Инока Максима Грека

Сказание о еже како подобает блюсти исповедание православныя веры.

 

[По синодальному изданию. Сочинения Максима Грека в 3-х частях. Казань, 1859 г.]

 

Другу возлюблену Максим инок радоватися о Господе. О нем же спросился еси со мною, сицева отвещаю ти и тобою всякому православному. Священный символ, еже есть исповедание православныя веры християнския, изложен бысть первым собором 300 и 18 святых отец в Никейском граде, при великом царе Константине, изложен бысть ими до сего точию: веруем и во Святый Дух. И вторый вселенский собор 150 святых отец, собравшихся на духоборца Македония, хуляща на Святый Дух и глаголюща и создана, а не создателя, приложили святии отцы богословие, еже о Святом Дусе. Третий же вселенский собор святых отец 200, собравшихся во Ефесе, на христоборца Нестория, хуляща и глаголюща иного быти Сына и Слова Божия, и иного, егоже родила приснодева Мария, егоже ради и не хотяше глаголати Богородицу приснодеву Марию, но Христородительницу, разделяя окаянный во двою лицу единого богочеловека Ісуса Христа, сего ради святый третий собор сей заключили и крепце заповедали страшными клятвами святый символ изложенный прежними двоими соборы, дабы никтоже прочее дерзнул по малоумней своей дерзости ни приложити что отнюд к нему, ни уложити из него ни едину черту ни иоту, ни пременити ни едино речение ни письмени от яже в нем, иже и рекоша тако: аще кто последи дерзнет таково что во святом символе православныя веры, да будет проклят и чюж всякого благословения и собства християнскаго. Страшна заповедь и запрещение сие и великаго соблюдения достойно все нам, аще убо истинною желаем получити спасение и сообщение со изложившими святыми отцы священный символ православ­ныя веры нашея. Не глаголи убо, яко мала разнь есть дерзаемое ныне новое бытто мудрословие страшная заповедь их равне подлагает анафеме и прилагающего и отъемлющаго и пременяющаго наименьше писмя, не добра убо такова наша похвала, да не глаголю дер­зость, под той же бо анафеме и вас подлагает претваряющих богодухновенная словеса и глаголющих из Марии, а не от Марии, и чаем, а не чаю, и жизнь будущая в веки аминь, а не будущаго века. Довольна вам ратная дела умети строити, а яже Святаго Духа, уставят, им же дано есть; не можете Богу и мамоне работати, глаголет Божие сло­во [Лк. 17, 13]. Колико бил челом святому пятому собору великий царь Юстиниян, да быша по­волили ему приложити во священном символе едину малу пословицу сию, еже есть присно, да где глаголем и Марии девы, да гла­голем и Марии приснодевы, и они треблаженнии отцы, соблюдающе заповедь первых четырех собор, не поволили ему приложити пословицу ту во святом символе, аще и ничтоже вредит, паче же прирастает славу и похвалу пресвятей Богородицы, а во иных похвалах ея велели и глаголати и писати, егоже ради и царь, не получив от собора прошения своего, и любовию, яже ко пречистей Богородицы, нудим, сам сложил стих сей: единородный Сын и Слово Божие безсмертен сый и изволив нашего ради спасения воплотитися от святыя Богородицы и приснодевы Марии. Мария имя ея, а не з Мария без лепа туто приписати и глаголати писмя сие (з) землю, сие бо и соуз есть совокупителен, а не предлог; совокупителен же глаголется, зане речь связует с речию, якоже егда глаголет: Петр, Іяков, и Іоанн; сице и в том: воплощшася от Духа Свята и Марии Девы, а не из Марии, якоже глаголет: от Захарии и Елисавети, а не из Елисавети родитися Предтеча; сие писмя и промеж положено Святаго Духа и Марию Деву, показа нам, яко Святая Дева осенением Святаго Духа зачат и родила Ісуса Христа, а не едина и собою. Такоже и предлоги сочиниваются со имены и речми многими, един предлог многажды содержит имена и три и четыре, якоже сие: человек сложен есть от земли и огня и воздуха и воды, единаче речеся сие от, а имена четыре: земля, огнь, воздух и вода. А о том, что не хощете глаголати, со всеми святыми соборы и с вашими святыми чюдотворцы: чаю воскресение, а глаголете: чаем, и то у вас мудрствуется по нехвальному преслушанию заповеди отеческия, непущающия никомуже ни пременити речь ни каковую во святом символе. Блюдитеся, да не от малых сих ваших преступлений бывших и больших паднете; пределы и уставы отеческия преставляти несть на пользу, глаголет Божия премудрость: Божия словеса претворяете и премудруете. Аще бо неложен есть глаголяй учеником своим: не вы бо будете глаголюще, но Дух Отца вашего небеснаго [Мф. 10, 20], и аще убо по любопрению человеческому хоще­те глаголати: чаем, множественным числом, а не единственным: чаю; то убо: веруем во единого Бога, глаголите, а не верую, и исповедуем едино крещение, а не исповедую. Уже­ли (не) разумеете ваше несмысленно мудрование? Не мудрствуйте паче, еже подобает мудрствовати, глаголет премудрый Павел, Христов апостол [Римл. 12, 3]. Держите же и проповедуйте исповедание веры християнския непретворно, якоже предали православным вси святии соборы и четыре патриархи, и ваши отцы, и святии чюдотворцы держаша; да бу­дете во всех подобни им и сопричастники царствию небесному и жизни вечныя будущего века, рекше грядущаго, и хотящаго явитися во втором пришествии страшнаго Судии, не глаголите убо: и жизнь будущая в веки, но: жизнь будущаго века, рекше самого Спаса Христа; той бо есть нам и живот и воскресение наше, по святому апостолу Павлу, глаголющу в послании, еже к Колассаем: аще убо востасте Христу, вышняя ищите, идеже Христос есть одесную Отца седя, вышняя мудрствуйте, а не земная, умросте бо, и живот ваш сокровен есть со Христом в Бозе; егда же Христос явится живот ваш, тогда и вы с ним явлени будете во славе [Колос. 3, 2. 3. 4]. Сию жизнь безконечную Ісуса Христа жду по гречестей пословице, а не чаю, жду, рекше твердою и несумненною верою уповаю получити, а не будущая веки, по ва­шему младенческому мудрованию, Христос бо нам есть живот и воскресение, а не век, ни веки. Яко несть лет, ни спасительно приложити что к святому символу, ни уложити из него, или пременити речение каково, слы­шите внятно, что глаголет премудрый Іоанн Златоуст: якоже бо о царских златых деньгах, иже аще и малейше что от образа изсечет, всю  цату непотребну содела, такоже и иже что от здравыя веры, аще и малейше что претворит, преиспортил. Согласно же сему учит и блаженный  Исидор Пилусиитский,  глаголя сице: отъемлющеи или приложити что смеющеи от богодохновенных словес единым от двою недугуют, или бо не веруют, яко Духом Святым писана быша святая писания, и сего ради праведне нарекутся и суть безверники, или себе самех мнят мудрейших Святаго Духа и что ино разве неистовствуют? Подобне тем свя­тым, и аз грешен богомолец ваш молю вы Ісусом Христом, престаните от таковаго новоявленнаго мудрования, брань бо и соблазн двизаете точию православным, а не пользу; се аз, послушая царя и пророка глаголющаго [Псал. 118, 46]: и глаголах о свидениих твоих пред цари, не стыдяхся, сказах вам всю истинну апостольску и отцы преданую, и аще убо послушаете краткое сие воспоминание мое и престанете прочее смущати люди Божия, слава Богу, давшему грешному мне сицеву силу словесную! аще ли не послушаете, блюдитеся глаголющаго Господа: горе тому человеку, им же соблазн приходит и про­чая. Мир Христов с вами!