Из филипповского апологетического сочинения Михаила Васильевича Крупкина († около 1902 г.) «Показание истины», в защиту правильного чиноприема, написанного 25 мая 7398 лета (1890 г.), от главы 30. Ст. 4, 5, 6. О четырелитерной титле IНЦI.

…

ЧАСТЬ ТРЕТИЯ.

ГЛАВА 30-я.

…

СТАТИЯ 4.

О четвертой их латинской ереси, приятии четырелитерной титлы на животворящем кресте писанной.

Егда древний противник Божии по тысящном лете от вознесения Господня получи развязание себе, тогда перве устремися в Рим, и тамо прельсти християнскии народ и отведе от Бога и себе подчини. и оттуду быстро нача разсевати по вселенней всякия тяжкия богохульныя ереси, и всякия душеубийственныя своя богопротивности. якоже хулу на Святыи Дух, опресноки, поливательное крещение, инаго Иисуса, и триперстное сложение и прочая безъчисленная таковая. Последи же и крыж двучастный с написанною Пилатом титлою изнесе. Егоже потом патриарх Никон, взем в Россию принесе и в своем ставрове монастыре постави, яко же очевидцы поморстии наши отцы свидетельствуют о том. оттудуже абие по всей Росcии разнесеся той с титлою четыреконечный крест.

Бывший же причетник тоя новороссийския церкве Феодосий Васильевичь, аще в нечесом и зазре оной церкве и отста от нея, но ельма законно к винограду Христову православней церкви не присажден, того ради некоторыя ея святости почитая за действительныя у себе остави. Еже шестую ея брачную тайну, да негли и хиротонию почитая, яко в поповския одевашеся ризы и молитвы их читаше. Такожде креста двучастнаго аще и не прия, обаче титлу на хулу Сыну Божию написанную прием, и наравне с богословным надъписанием почиташе. за нее же выстаивая с благочестивыми предками нашими поморскими жители пряся и раздор учини.

Сия же титла: Аще негде и на славу Христову написана [якоже феодосиевым учеником мнится] сиречь: В благовестнике от Матфея лист 126. От Иоанна же лист 288. И в беседах евангельских на Иоанна, беседа 85 лист 636. и в Соборнике в среду великую в слове Златоуста о зависти жидовской. обаче не утвердительне и не обдержне, но якобы рещи мимотекателне святыми речеся о том. они бо более противу хулы и злобы жидовския вооружахуся, аще некако и титлу в помощь приимаху. в других же временех и местех от брани жидовской свободных, идеже писаху законоположительне и утвердительне, тамо везде являемое титлою имя назарянин и царь июдейскии зазираху и отвергаху. о чем хотя мало нечто для достовернаго свидетельства представити вам должни есмы.

«Отвеща Нафанаил ты еси Сын Божии ты еси царь израилев, отвеща Исус и рече ему. [ниже] веруеши, больши сих узриши» [Благовест. от Иоанна. Зач. 5];

«Нафанаил аще и Сына Божия Христа исповеда но не якоже Петр, но яко человека проста, благодать добродетелей усыновления. и се яве от глаголании его, ты еси рече царь израилев. видиши, яко не у достиг совершенный разум истиннаго Божества единороднаго, но яко человека боголюбива и яко царя израйлева быти его верует. Аще бы истинною Бога его исповедал, небы его нарекл царя израйлева, но царя всех. тем и не блажится якоже Петр. того ради и Господь исправляя его и возводя разумети что есть достойная егову Божеству: Узрите рече ангелы Божия возходяща и низходяща над Сына человеческаго. Не бо рече непщуй мя проста человека, но Бога истинна» [От толкования].

Зрите како божественный Феофилакт ясно поведает. Яко проста человека исповеда Христа, а не Сына Божия и Бога. Из бесед евангельских толкование на тожде [беседа 28].

«Петр убо Сына Божия яко Бога истинна. Нафанаил же человека проста. И откуду ли явлено сие нам; от иже по сих реченных, рекл, ты еси Сын Божии не израилев есть царь токмо, но и всей вселенней. тем Петру убо яко совершенныя ему веры, церковь рече Христос на исповедании создати оного: зде же ничтоже таково сотворил есть, но яко многия некия и лучшия части исповеданию оскудевающу, прочая приложил есть: отселе рече узрите небо отверсто и ангели Божии возходяща и низходя. Зришили, како его от земли возводит помалу, и творит не ктому мечтати человека просте, емуже бо ангели служат, како аще сей человек будет, сего ради рече болша сих узриши»

И паки проста человека Христа исповедати Нафанаилу, Златоуст глаголет. Из бесед на деяния апостольския [зач. 5. Беседа 6]. Сущее:

«Мужие израильтяне послушайте словес моих сих, Исуса назорея мужа указаннаго от Бога в вас». Толкование: «Зри како ничтоже глаголет от высоких, но зело смиренных начинает, Исуса рече назорея, и абие отечество глаголет, еже видяшеся худо быти, и ничтоже велие еще глаголет о нем, ниже яковоже аще кто рекл о пророце».

Видите ли: ничто же высокаго и достойнаго Христу вещает апостол, но зело смиренное и от отечества его мало. творит же тако отнюд не поистине, но по потребе времене за немощь слышащых и начала ради сходя им. яко же и от прочаго познати есть.

Из Апостола толковаго. Деяния. «Слышах глас глаголющь ми, Савле Савле что мя гониши: Аз же отвещах, кто еси Господи: речеже ко мне. Аз есмь Исус назорей егоже ты гониши». [Аммониево] «О премудрости Владычни, почто не рече ему Аз есмь Сын Божии, Аз есмь изъначала Слово. [ниже] по что не рече честна велика и высока; но Аз есмь Исус назарянин, от дольняго града. От дальней веси и места: зане неведяше гоняи его».

И зде за неведение Савлово Христос умалял себе.

О Луце же и Клеопе [от Луки зач. 13]. «Они же реста ему, еже о Исусе назарянине, иже бысть муж пророк» и прочее. От толкования. «Виждь какову малу о Господе мысль имеша, мужа бо пророка и непщеваста».

Из недельнаго Евангелия [в неделю 8, от толкования]. «Книжницы же и фарисеи злохотением отечество Христово глаголют, даже от Вифлеема не нарицаемь бывая Христос, уверен будет пророчества ради».

Благовестник от Иоанна [лист 127]. «Сия же глаголаху злодейственным разумом, а не по Нафанаилу. [ниже] подобаше убо им разумети, яко от Вифлеема есть Христос, аще и в Галилеи бе воспитан, от зависти же нехотеша исповедати от Вифлеема рождение но галилеина его именуют».

Нафанаил аще и Сына Божия нарече Христа, аще и всю веру имяше к нему, и все благоговеинство и благопочитание тщашеся показати ему, обаче за приложение царь израилев, тем и оказася не совершен, и потребовашеся от Христа ему за неведение исправление якоже мы видехом. Како не досаду Сыну Божию глаголют иже по уведении о нем еже есть истинныи Бог, и по толицем от писания обличении именуют его яко и жидове назарянином; како за таковую хулу не вочтутся с теми еретики иже смиренная о нем смышляху; но и еще о сем послушаем;

Евангелие [в нед. 50, зач. 29]: «Рече же им Исус, Аз есмь свет миру». Толкование. «Понеже бо выше и ниже обращаху Галилею июдеи, и пророка нарицаху Христа, той всех избавляя таковаго погрешения мнения и чуждия славы, показаше яве яко не един от пророк есть яко же сия мнят. Но всего мира Владыка есть, Аз есмь свет миру глаголаше, а не Галилеи токмо и Июдеи, но всему миру свет».

Аще негде и именует себе Господь, назарянином, но случайно познания ради. господьственне же, и обдержне везде отводит от сего погрешеннаго и чуждаго ему наименования показует же себе всего мира света, и Владыку, Царя, и Бога истинна. дольняго же именования, яко же и лепо бе не приемляше, понеже досадительно ему бе яко же и есть.

И паки из Толковаго Апостола [зач. 17]:

«Слышахом бо его глаголюща, яко Исус назарянин сей разорит место сие». Толкование. «Исус рече назарянин, поношающе се глаголаху».

Видите ли наименование назарянином, каково бесчестие наносит Христу; ово простым человеком творит его ово же в поношение ему бысть. и в лепоту, кое бо может быти более и безчестнее Сыну Божию поношение, еже истиннаго Бога и творца всея твари простым именовати человеком: ужасно и помыслити есть, еже въместо Бога признавати человека. яко же и Златоустыи глаголет:

«Что же рече ему народ; Исус назарянин мимо ходит. Оле чюдо, о ином глаголют ему, он же ино проповедует, слышит Исуса назарянина, не наричет же его Исуса назарянина, но Исуса Сына Давыдова. зрящии убо мняху глаголюще слепец же поистинне проповедаше, Исусе Сыне Давыдов помилуй мя».

Сие яве показует, яко именование назарянином инаго проповедует зданна земна же и подобострастна нам человека, а не Бога небеснаго.

От толкования на Евангелие от Марка.

«И титлу [Пилат] еже есть вина, ея же ради распят бысть царь июдейскии, да того ради похулят его славу, яко противника суща и царя себе нарекша, и да идут вси мимоходящии не помиловати его, но паче надъходити нань мучительне».

Зде же не точию божественную славу его от него отъемлют, но и человеческия честности и соболезнования и спострадания о нем лишают его. творят же и преступника быти и противника царска суща, занюже вину якобы и распят бысть. Сию же нестерпимую хулу носят и кажут титлы ихъже написа Пилат, якоже и богослов Григории свидетельствует о сем глаголет [Слово 11, стих 53]:

«Зле написав Пилат титлу, яко вину. А не яко истину написа».

Аще ли такова зла=хула и клевета на Спасителя нашего титлою оною написана, то может ли она служити на честь ему и на славу; и како мощно таковое преужасное досаждение, прилагая ставити на кресте его; не будет ли сие согласно и смудренно с жидовы, яко прост человек и за таковое пострадавшим преступление; О ужасти нестерпимыя, о дерзости пребеззаконыя. И в Синоксаре в пяток великии глаголется:

«Всяко убо досаде исполнишася, Пилат и дщицу написа онем, глаголя, Исус. назарянин царь июдейскии».

На основании же всего написаннаго и богомудрыи и многоученый муж, диакон и иеклисиарх соловецкии Игнатии, обличая произведших противность сию, и употребляти на крестах начавших сице за сие им поношает:

«О проклятая еретическая и богоборная уста, како на святыи и пречистыи верх отверзаетеся. О изощреныи еретичеством хульныи языче. како от устен своих яд аспиден пролиясте; доколе противу рожна лаянием злое бреханием своим отрыгаете: Титлу бо положисте Пилатову в другии ряд, на животворящем кресте Христове, аки бы незнаючи яко царствует всеми Исус назарянин: царь июдейский, а не ваш. а он живет ныне не в Назарете, но седит одесную Божия славы в небесных и тою титлою нам верным християном подписовати не пристойно; понеже ведаем яко прославися царь великия славы, божественною славою своею. и купно кланяются ему всяческая, небесная колена и земная и присподняя, иже и седит одесную велелепныя божественныя отеческия славы, а не в Назарете с человеки пребывает. и тою титлою своею называют богоборцы, Спасителя Света простым человеком, сия титла бысть от Пилата написана не о божественной и боголепной славе Христове, но познания ради креста Христова, яко с ним въместе ина два злодея распята быста, пачеже и укор приносяще, яко противника кесарева на распятие предали, и они купно кесарю радеют. и тако жидове Христа Света пресветлаго, немерцающаго Солнца к Пилату оклеветаша сим злодейством, яко противник кесарев есть и августу римскому непокорством. [ниже] обаче же его всей твари Бога не славят, но называют Его назарянином простым человеком. понеже Пилат бысть иноязычник, и Христу Свету истинному Спасителю нашему правою верою не прилепися, и пророческим писанным книгам не научен бысть, и сея тайны от всех родов прообразованныя не искатель. Сие же наречение Христу Свету истинному во устех человеческих, и всех живущих во Иеросалиме, и около Иеросалима бысть обносимо, и небесною славою славитися еще не начатся. тем же Пилат тако просто пишет, называя Его назарянином простым человеком, якоже и прочих: и что прилучися, то тако и повеле просто и написати. Сию же титлу ныне новыя злыя еретицы воздвигоша. зане яже в то время и Нафанаил законник, егда не хотящи воспроповеда Христу идущи, равви ты еси царь израилев, обаче аще и тако возгласи рек, но самем Спасителем не ублажися, но паче и поношен бысть, яко боговиднаго ради слова Христова, аще сыном Божиим и проповеда, но то аки бы добродетели ради нарече его сыном Божиим, а не по существу Сына Божия исповеда, но по причастию добродетели ради и благодати: плотскаго же ради смотрения, человеком равна Христа Света помышляет, а не Творца всех и Бога прославляет, и царем израилевым нарицает, а не всех Царя славит. того ради и Спаситель свет наш Христос истинныи, по существу Сын Божий, и Сын девичь быв, милостию своею сия глаголы ему претерпевает, яко еще боголепныя славы своея и силы начаток, правоверию и чюдесы приемлет, а Нафанаилу тем и боголепным гласом превечнаго Божества своего силу и славу объявляет: Аще ты мене и проста человека и царем израилевым помышляеши.сыном же божиим прославляеши не по существу, но добродетели ради, и по причастию благодати. Аз же аминь аминь глаголю вам, яко отселе узрите небо отверсто, и ангелы Божии восходяща и низходяща над Сына человеческаго. Мне и ангели Божии и небеса и вся тварь послужит, яко Творцу всех во очию вашею. и от того времене начат свою боголепную славу объявляти и проповедати чюдесы и ученьми, последнее же крестом и распятием, и во гроб положением, и славным воскресением, и по воскресении на земли 40 дней со ученики своими хождением. последи же всех на небеса вознесением, и одесную Отца седением. И такою славою прославися в небесных и земных и преисподних. и егда славою своею великою прославися, и седит одесную Отеческия славы Божества в небесных, а не в Назарете соводворяяся яко же и прежде.

Они же богохульныя еретическия уста, и адския присподния огорелыя главни, содомскаго пламени останки, разоренаго вавилонскаго столпотворения семя, египетскаго лакомства ласкорство. боголепную присносущную к безначальному Отцу, и присносущную и единосущную превечную славу отмещут, и Творца всей твари, и Владыкою, не проповедают. и во двою естеству, божественном и человечеством, во едином лице, не исповедают, единороднаго Сына Божия по существу, и Бога истинна, и Владыку и Содетеля. и Тварца всей твари не славят. но тако еретически лают, из ада погибели изшедши, простым человеком укорно называют. полагаючи титлу Пилатову; еже евангелисты Матфей и Марко и Лука, именуют вину, яко жидове вину написаша за неяже распяли, еже есть Исус назарянин царь июдейскии. нынешнии же еретицы тое вину объявляют, и тако веруют, яко же и древнии жидове. пишут Исус назарянин царь июдейскии, а не всей твари Царь.

И аще назвать по существу Сына Божия ныне нам верным християном познавшим истину святую назарянином, простым человеком, по прославлении его по воскресении его, и на небеса по вознесении, и одесную безначальнаго Отца по седении. Еще же от крещенных истинным крещением, и познавшим его Бога всех: то станет сие их дело еретическое, яко от мужеска семени зачатие его баснословят проклятии, и от Христовы веры отступили, еже како крещени были, и всю проповедь святую евангельскую и апостольскую опорочили. наипаче же благовестие святаго Иоанна Богослова, еже пишет: в начале бе Слово. [ниже] О богоборная лающая еретическая уста, геенскому огню пища, вечныя тмы наследницы послушайте внятно и разумно; аще бо святии апостоли, ученицы Спаса Христа проповедь сотворяюще по вселенней, неверных идолопоклонников в веру приводяще, чюдотвореньми различными многими уверяюще, на время уверения ради, и познавания к неверным идолопоклонником сие слово на время, яко же верховныи апостолом Петр сотвори, к разслабленному рек, исцеляет тя Исус назарянин мною, или во имя Исуса назарея востани и ходи; и абие разслабленныи воста въскоре. но и Петр сие к разслабленному изрече, не догмы ради не устава ради, но временно к неверному и некрещенному. понеже они идолопоклонницы, идолом прилежаще, и пророческих и законных святых книг не имуще. и таинства сего ни слухом слыхали, что есть Бог всея твари Творец, и по существу Сын его на землю сниде, и плоть прият сущую нашу, от преблагословенныя Девы Марии, осенением Святаго истиннаго Духа, пренепорочныя и пресвятыя Богородицы, и зачатие плотьское архангеловым гласом бысть ей возвещенно, и плотию воистину без мужеска семени родися Сын Божии присносущный. и прочее ниже.

Того ради святии апостоли сие слово к некрещенным и неверным изрицаху, назорею поминаху уверения ради, ко крещению приводяще некрещенных, и ненаученных святым книгам, яко да познают в кого им креститися будет веровати; и кто есть Сын Божии, и котораго Сына Божия единым призыванием имени, силы и чюдеса великая действуются и сотворяются; И таковая чюдеса видевше сотворяема святыми, да не приимут идолопоклонники в своя мысли от своего безумия, яко их бога идола, или иного котораго Сын таковая чюдеса сотворяет. и апостоли в того им веровати велят: к тому же и сего да не помыслят, яко Бог Отец безначальныи единороднаго Сына жену имел. того ради святии апостоли назорею поминаху, некрещенных идолопоклонников в веру приводяще: яко сей есть во истинну Спас миру Христос. и прочее. [ниже]

И по рожестве и по пришествии из Египта, в Назарете точию воспитася плотию. пророческое слово исполняя, от Египта возвах Сына Моего, и паки другое пророчество, яко назорей наречется. назорея же толкуется, святыня: себо святыи и пресвятыи и преблагословенныи Сын Божии, со отцем мнимым Иосифом от Египта пришедши, и с нескверною материю вселися в Назарет. и в нем плотию вскормися. и бе родителем мнимому отцу Иосифу, и матери присносущей Деве довремене повинуяся, и тако назорей наречеся, еже есть свят и пресвят, благословен и преблагословен сыи во веки аминь. А неземныи Назарет вознося назарянином именовася, ниже жителем его нарицался.

И аще назарянином простым человеком Сына Божия нарицати ныне, то уже и лютое богоборство стало. А нетленное рожество его и не хотяще, или будет и вправу знающе лаете, от блуда сказываете было; егоже ни вси небесныя безплотныя силы нечуша когда воплотися, ни самыи благовестивыи Гавриил архангел возможе уразумети, ниже сама приимшая присносущая Дева в свою пресвятую и пренепорочную утробу возможе почути, како зачатся.

И аще по вашему лукавому сему размыслу, о гнилая еретическая и богоборная уста, новая суетная жидовская сонмица, пречистую и пренепорочную присносущую чистую Богородицу и Деву нетленную и нескверную блудницею именовати, и Христа Света непорочнаго Агньца пречистаго праведнаго немерцающаго Солнца от блуда рождена нарицати. Яко же и титлу пишет Исус назарянин царь июдейскии, аки бы от назарянина от кого зачатся, и сам назвался царем июдейским, того ради и распясте яко противника римскому кесарю. вы же ему радеете и пишете, Исус назарянин царь июдейскии. а не ваш: за него же верных истинных християн, томительными муками смерти предаете.»

От сего предписаннаго показания еже о титле положенной на кресте Христове, по всему видится, яко сей святопросвещенный муж оное обличение, на отступника веры християнския Никона писаше, по его положенному: согласному святоотеческому писанию объяснению, яко же рещи Исус назарянин царь июдейскии, оная четверобуквенная IНЦI. титла прообразует. Якоже и Пилатом на первобытном кресте Христове положися. разсмотри праворазсудныи зрителю, и поразумей, о оном Пилатовом на кресте Христове надъписании, христолюбче. еже Господа нашего Исуса Христа Царя Славы и Вседержителя, по святем его страдании и из мертвых по воскресении и по вознесении на небеса и поседение одесную Отца, ныне мы аще его будем Исусом назарянином, простым человеком именовати; за что и Нафанаил от него не ублажися якоже Петр, за приглашение еже ты еси царь израилев. Коль оное именование будет со святыми не согласное, и не единомудренное: Аще будем таковое на животворящем кресте Христове именование воображати, и Господа Царя Славы простым человеком назарянином нарицати душегубительно, якоже и богоподвижныи он муж изъглагола.

Но и кроме сих: Многострадальнаго святаго мужа Игнатия глаголем соловецкаго, обличения, и сего предков наших согласнаго с ним надписания, много имеем мы от отец своих на оную титлу винословия, но продолжения ради и невмещения писати оставляем. Едино или два еще воспомянувше, к предлежимому нам о феодосиевых обратимся.

Богомудрыи и ревностныи о православии учитель наш Андрей Дионисьевич, пламенным горяше усердием о сохранении правыя веры и благочестия, и будучи движим нелицемерно любовию и к ближнему, и желая всем утвердитися в православии и непорочно и цело сохранити е. того ради в десятое лето по раздоре Феодосиевом а в пятое по смерти его, посылает ко учеником его всякия премудрости братолюбия и от святаго писания свидетельства исполненное увещательное моление. еже бы отставити им нововымышленую богопротивную титлу, на крестах ими пишемую. Причем предложи им весма благопотребныя и непреодолеемыя осмь вопросов, еже бы оправдати им чужемудренную латинскую новизну тую.

Но яко же невозможно мертваго воодушевити, невозможнеише есть и им сию латиноримскую ересь свою оправдати. въместо же ответов, прислаша они тогда некии лист, имущии на себе изображен крест с титлою. около же его яко бы рещи оправдательныя помещены свидетельства. 1, един крест в Киеве глаголют, обрели Марка гробокопателя с четырми буквами, иже воображен у них без копия и трости и без главы Адамли: и на нем надъписание не воображено в кои лета он сотворен, ниже от посторонняго писания, ниже от какова достовернаго свидетелства освидетельствован. 2, их свидетельство: Лексикон киевской печати, на негоже съсылаются: и неведуще или и ведуще сицевыми засвидетельствуется. яко тех времен у печатников онех белоруских, не токмо сия четыре буквы пред московскими печатными излишествуют: но во инех книгах и крест без вышния дски, и обливание, и на пяти просфирах литоргисание, в некоих Исусово имя Иисусом у них печатано обретается. 3, их свидетельство написано: в Старой Русы крест поставлен за 60 лет, в кое время Никон уже патриаршествова, и новины свои всесоборне предаде. Разсудите зде о братолюбивии, каковыми малыми и недостоверными свидетельствы себе подкрепляюще, тако дерзают на истину ратовати, и противу столь великих всецерковне содержимых святейших свидетельств вооружаются.

К сим приложиша сослатися на первообразныии крест Христов: глаголюще иже есть во Иеросалиме. А откуду они достоверны яко он есть во Иеросалиме, сего не объявиша. Но на первообразном Христове кресте, не было тако четырмя буквами титлы писано. И сие им не токомо не свидетельство, но явственно обличение. Святым же богоносным отцем с первообразнаго креста Христова вообразившим животворящия кресты, и предавшим Божии церкви, с надписанием богословным воображати. Аще же не будет кто достоверствовати и последовати, начнет же еще сам о себе свыше их умудрятися, и воображати с прилогом пред святейшим их преданием, и прочим предавати, еще же с хулою и раздиранием, како не явственный продерзатель над святыми обрящется таковый;

А якови они тогда Андрею Дионисьевичу писменныя прислаша оправдания, таково в последствии и словесное исповедание отцем нашим давше. сице предки наши поведают о том.

[Сборник лист 167] В 7271 лета генваря 30-го на беседе в Преображенском, между прочим отцы наши спросили перваго их отца Илью Ивановича. како мудрствует о четырех литерном IНЦI. надписании; и он пред всем собором сказал, что старыя церковныя образцы сие написание, а не новое. Я де сие написание, новым или виною не назову. наши же паки вопросиша его: ты не будеши ли поклонятися оным крестам с четырелитерною надписью; он же говорил: А для чего непоклонятися, я крестам с сею подписью поклоняюся. и вопрошал наших оный Илья Иванов: покажите мне с чего мудровати новым написанием сие IНЦI. написание; они же ему говорили: како не новое сие написание, аще в древлеправославней церкви такова надписания не обретается, а явилося оно вънове во время Никоново въкупе с новинами. так стало новое. и оныи Илья Ивановичь им напротив сего изърек: да ведь и Никон с древняго же образца сие написание снял. и стал представлять Никоново свидетельство себе во укрепление: вот де он [Никон] крест вывез из Палестины мерою и подобием во всем равен первобытному кресту Христову, на коем кресте и четырелитерное написание имеется, для чесо сему неверить. отцы же наши слышавше таковое его вин своих защищение, с удивлением рекли ему: отселе мы Илия Ивановичь, будем о тебе знати и тако о сем прекратили речь.

Зрите истиннии сынове церкве православныя, и елико вас на изменническую еретикам защиту еще не приклонившияся. како оннии суемудреннии, по толиком святых богоносных святаго писания толкователей свидетельстве, еже Пилатовы титлы не честь и богословие Христу приносят, но хулу и последнее безчестие и простым его именуют. и по толиком обличении от восточнаго православия, учителя Евсевия Пимена, и богоблаженнаго страдальца Игнатия, не их феодосиевых но принесшаго от латин новизну сию патриарха Никона. и паки по таковом богомудром и братолюбном увещании Андрея Дионисьевича, и по прочтении присланных от него столь сильных и назидательных вопросов, кои прочетше ни на едино слово ответа дати не возмогоша. Едали после сего разсудивше и титлу тую оставиша; Едали зазревше себе и уньши сотворишася; никакоже. но исполнися пророческое слово на них глаголющее: «Яко аспида глуха затыкающа уши свои, не слышит гласа обавающых ю» [Пс. 57]; «Нечестивыи во глубину зол дошед, к тому нерадит» [Притчи 18]. Не токмо еже отвергнути бы от себе таковую богохульную ересь, не токмо покаятися им за сие и пред православною церковию исправитися, но еще и на горшая прострошася, радея латыном и Никону воздвигнувшим титлу оную, и по них поборающе каковою преужасною на святопомазанную главу ону, разразишася бранию; даже верным християном таковая злодейственная злохуления их болезненно есть. но аще и тако обаче ради показания зверства их и ко оной латинской ереси прилежания нужно есть нам объявити о них сие.

[Сборник лист 589] На собрании своем в 1756 году августа 26. в дому у Тихона Филипьева, бысть у них между собою разговор о крестах. идеже Илья Иванов от отца Игнатия соловецкаго нестерпимыми хулами гаждал по них непишущых на крестах четыре литеры. «Сия де блевотина изыде от Игнатия старца палеостровскаго, и разсеяся во вся поморцы». Тогоже году декабря в 29 день. еще было собрание в дому Кирила Андреева. и при том собрании был Илия Иванов, Федор Федоров, Семен Савельев, и всех было до 15 человек, и тогда Семен Савельев, тогоже отца Игнатия гаждал, за онуюже титлу, «сия де блевотина Игнатия старца разсеяся во вся поморцы».

[Сборник лист 590] Оных же феодосиевых из писма оправдательнаго о той же титле, на того же священнаго отца Игнатия, отрыгают богомерская еретическая своя уста сице глаголют [на поле: речь еретическая]: «Пишет некии от них [сиречь от поморских] Игнатии старец, зовомыи от них богослов, иже в Палеострове скончася, от дерзости своея, пострекаем от сатаны, глаголя сице титлу бо положисте Пилатову в другии ряд на кресте животворящем Христове Исус назарянин царь июдейский, и тою титлою своею называют богоборцы Спасителя Света простым человеком. и прочее. [ниже] до зде Игнатия старца богомерское предложение, и толкование о титле, еже есть, Исус назарянин царь иудейскии. А прочая его злейшая хульная словеса, невмещения ради здешняго оставляем но на предлежащее да возвратимся. всякое древо от плода своего познавается. всяк бо может ведати; яко злой курицы, злое и яицо. не всяк же познавает его от скорлупы, но иже под скорлупою. злаго же сего корене, злая и отрасль. старца того Игнатия своего им учителя ученицы, вопияху зверообразно отрицающеся якоже иконоборцы пред всею церковию сиречь пред собранием верных, нам глаголюще: Исус назарянин ваш не надобно». до зде из писма еретических скверных уст. адскаго наследия феодосиевых.

[На поле: наше речь] По сем благочестивая наша о Христе братия, и вси любомудрии читателие. Аще и зело протяженна но назидательнаго отец наших, похвальнаго остальцем благочестия, о вере православней изъяснительнаго и утвердительнаго, еретиком же феодосиевым обличительнаго и возразительнаго, от усердия невозмогохом минуя не написати слова. вас же любовию Божиею молим, не точию мимотекательне оставляти сие, но люботрудне прочитовати оное, и внимати: како своими щедротами всемилостивыи Господь, благоволи нам веру православную отцами нашими кровию и страдательными подвиги сохраненную наследовати; и таковым богопросвещенным и твердым по благочестии поборником сподоби нас быти учеником и последователем; наконец какова зверообразная злоба на святопочивших предков наших, онех еретиков феодосиевых; и их присвоение и поборание по латиноримской и никоновской четыребуквенной титле. есть же сице слово сие.

[На поле: Слово от отец наших] «Оле всесмелыя таковыя хульныя дерзости. оле таковаго ужаснаго и злохульнаго беснования. и толь тяжкаго и гнуснаго онаго бряхания, и како нами православными, на святоотеческую персть оное языкобесие приятно быти может. како онаго преокаяннаго развращенная умная мысль, оная злейшия глаголы в разум свой въместити возможе, и произнести неустрашися. како же язык он, на толь просвещенных муж, и всеясных проповедник слова Божия, изрещи не смутись, и не оцепене во устах их яко затыка. какоже и не усше оная пребеззаконная десница толь страшная и страха преисполненная словеса писати. Ибо о сих последняго времене подвижницех и страдальцех благочестивых, кои побиются со антихристом, и победу приимут на диявола, и одоление покажут неуклонно. Ипполит святый сим велию похвалу сказует от Господа Бога прияти, и почесть равну со ангелы и со всеми святыми получити оным вещает, и глаголет сице [Соборник в неделю мясопустную]: Яко первие мученицы того слуг сиречь антихристовых победиша. сии же последнии того самого сына погибельнаго поперут, и победители будут. которым похвалам и венцем несподобятся от Спаса нашего Исуса Христа. и сказует святое писание сим равным быти Иоанну Предотечи, за твердостное и крепкое стояние в православной вере. тако и о их крепких подвижницех благочестивей и непорочней вере разсуждается быти, яко поморских благочестивых отец подвиги бывшая о благочестии. Тако и соловецких всепреподобнейших и пресветлых страдалец за благоверие неуклонное. подвиги бо их и труды, прият человеколюбец Господь, паче всякаго приношения. Такожде и прочих благочестия ради от Никона и его ученик замученных, и разнообразно пострадавших. Киих похвал и почестей от Спаса нашего Бога сподоблени будут; Ей воистину сподобятся радость получити со ангелы и со всеми святыми на небесех, Владыки нашего Бога лице видети выну. И кто от правомыслящых может таковая злохульная изрещи словеса, яко же еретическая адская феодосиевых уста. ибо сей святопросвещенныи благочестия подвижник преподобнейшии отец Игнатии, соловецкии бывши диякон и екклисиарх, бяше корене благочестиваго, а не злаго, яко же блядословят феодосиева еретичеством растворенная уста. И насаждение имяше всепреподобнейших отец Зосимы и Саватия соловецких, и по благочестии велии поборник и о праволавней вере всеусердныи огнепальныи ревнитель. Писа же оныи отец обличительное слово на новую положенную на кресте латинскую титлу, еже есть IНЦI. не на Феодосия Васильевича писал бяше, но на всемирнаго пагубника, отступника и потребителя православныя веры, Никона еретика, бывшаго патриарха. Яко егда узре от него оныя четыре буквы IНЦI. выраженныя на кресте Спасове, с пременением християнския веры во всей России, еще до разорения оныя соловецкия киновии, и будучи во оной обители, в самое время, егда оным отцем натрижнения о благочестии подвиг наста. задолгое время до Феодосиева появления. писал же оныи святоподвижныи страдалец обличительное на оную титлу слово, повсему зрится, что уже в велицей скорби и сокрушении сердечнем. жалостию снедаемь о благоверии. и от самыя всеусердныя горящия по благочестии ревности, Богом подвижим тако писаше. и не точию оныя буквы положенныя Никоном на кресте не похвали, но и новиною порече. и оное его обличительное на помянутыя буквы слово, всем во оно время бывшим в соловецкой обители отцем не неведомо бяше. и не видится того и ниже слышится когда, кто бы онаго о православии ревнителя, и о благочестии подвижника от правоверующих за оное его обличительное слово, яко же соловецтии в то время бывшия отцы, тако и по них и от них произшедшыя поморския отцы, и прочии во всей России оставльшаяся благочестиваго корене чада: кроме феодосиева согласия, порекл бяше. или како укори или обличи, сего нам не извествуется. Токмо убо сии, иже ревность имеющее по раздорнице своем Феодосии, за оная новшества латиноримскаго костела титлу, не стерпимыми хулами гаждают. яко же выше речеся, и таковая произливающе от устен своих злейшая словеса, еже ушесем православнослышательным весма мерзостно и гнусно оная на святоотеческую персть изходящая слышати. глаголющая якобы пострекааемь от сатаны, и прочая яже въпреди реченная неистовая словеса. нам же православным видится, яко оныи благочестия подвижник пострекаемь бяше не от сатаны якоже еретическая блядословят на таковыи святопросвещенныи верх, уста: но благодатию Духа Святаго понуждаем таковая писаше. и аще не бы сего святопросвещеннаго мужа Господь Бог на сие воздвигнул, на обличение оных от латиноримскаго костела произшедших букв. то малии бы нецыи точию убежаша оноя феодосиевы прелести, согласныя с Никоном отметником православия. но тако Господу Богу божественными судбами своими изволившу, сего мужа на сие подвигнути, во осторожность последнему роду сему, на утвержение истиннаго благочестия, о оном незнаемом имени IНЦI. положенном на кресте Христове, изъяснити. оныя же феодосиевы ученицы, за онаго еретика Никона, отметника веры православныя ставшее. и бывшее оному врагу и губителю душ человеческих Никону, аки некая таибничащая чада, себе же глаголюще последовательми древняго благочестия бытии. А на отцепреданная благочестивая их воображения произносящее прелукавыми своими ядом змииным растворенными усты пребеззаконное гаждение и злохуление. и на блаженную онех отеческую персть, протягосте языки своя аки псы бесноватыя, на злобесное бряхание. и убийственное душ человеческих, сим последующих брехателем смертное пожрение. и соединяющихся прелукавому соньму оному, на вечное погубление. но оле таковаго преокаяннаго развращеннаго соборища, глаголющаго себе быти благочестивых велении последователи, а благочестивая отцепреданная веления порекоша бесолаятельными языки своими нечестивством, и хулою неправедною обложисте. и окаянному оному отступнику Никонову правоверию, устроившеся нравы и делы своими, аки сынове. таковымиже дияволобесными надмени дыхании своими, на благочестивую персть отеческую, якоже оный преокаянный Никон изрещи и порещи неусомнися, такоже и сия сонмица Феодосиева последования ученицы порещи не устрашишася. якоже выше изъявися, но о роде лукавыи и развращенныи, род по псалмопевцу строптив и преогорчевая, род иже неисправи сердца своего, ни увери с Богом духа своего. сия ли благодеяния Господеви воздаете, еже благочестивую персть ругательными и гаждательными словесы надходяще оглаголуете несмысленно, но подобало бы вам о мужие братие, оным православным подвижником всеусердне последовати, и простою и невысокою мыслию, и горящею ко оным любовию прилежати, и во всем их слушати и велением их покарятися, яко правоверным истиным и усердным по благочестии рачителем. Понеже во оных блаженным памяти отцех, по пременении Никоном православныя веры християнския, и искра благочестия остася, оставшаяже оная благочестивая и искра, от божественнаго угля воспалена произыде от преподобных отец Зосимы и Саватия соловецких. и толь возжеся оными поморскими благочестивыми отцы якоже солнце, и яко свет в темне месте просия. и тако всех благочестивых словом истины, и благодатию Святаго Духа озариша, иже тмою неведения помраченных, и к свету богоразумия возведоша. и во отцепреданных законех непоколебимо пребывати утвердиша, и тая отцепреданная благочестивая веления непременно хранити заповедаша. оныя же Феодосиевы ученицы, враждебне ко оным отцем прилежаще, вместо еже бы благохваление оным приносити, они же злохуление от уст своих отрыгают, и еже въместо бы тех веления всеусердно почитати, и всесмиренне лобызати, оны яже к жидом распеншим Господа, и к еретиком уподобляти неустрашишася. по их развращенному разуму непишущих четырех сих IНЦI. букв, на кресте Христове, тако и прочими богомерскими гаждательными словесы на неповинныя оныя прелукавии надходяще оглаголуют, якоже выше показася. еже срамно православным онех отец чадом ушесы своими слышати, или мыслию своею вняти, и во ум таковыя бесноватыя хулы прияти. глаголющия сице: Еже пострекаемь от сатаны, и богомерское предложение, и злым коренем оглаголанная от уст еретических, на толико подвижника о благочестии. оле оное нестерпимыя хулы, оле таковыя дерзости. како не убояшася Создателя всех Бога изрещи таковая; како неустрашишася будущаго гнева Божия и страшнаго суда; и вечнаго мучения во огни негасимом, хотящем постигнути грешники. и како не зжалиша си сердцы своими в толь гонительное нужное и горькоплачевное последнее время, богорадне пустынная озлобления благочестия ради терпящих, таковыми непреподобными глаголы обложити. и неповине оныя осудити, и кто не восплачет видя таковая дерзостная речения. и како не заградися оная гортань, таковая злохульная словеса изглаголати; како же оный всезлобный велеречивый еретичеством напоенныи язык возсмелися таковая изърицати; какоже и рука оная беззаконная прият перо, и неоцепене таковая богоборная словеса писанию предавати; Глаголющая на праведныя беззаконие гордынею и уничижением. но о наостренныи еретичеством злохульныи языче, на кого тако наострися; и за кого став вооружаешися; яко на благочестия столпа нерушимаго, и православия поборника непоколебимаго, и истинныя веры християнския всеяснаго проповедателя. и всем благочестивым хотящим во отцепреданных законех неизменне пребывати укрепителя, оберегателя же и заступника от всякаго навета вражия. и кто от боголюбезных чад церковных, на благочестивую отеческую ону персть, износимая гаждательная словеса, без слез и без жалости сердечныя быти возможет. и не поскорбит душею и сердцем о таковом всесмелом буйстве, на оныя боголюбезныя наши пастыри и учители, от таковаго лукаваго и развращеннаго пагубнаго рода феодосиевых. колико душ человеческих павших в свой род привлекосте, и в нем конечне погрязнути сотвористе. и едва кто возможе исторгнутися прелести оноя лукаваго рода, и познати лучу благочестия, и к свету приити древлеотеческаго православия, и в нем возможе безбедне живот свой скончати. но аки лев ядовитыи всех пожирает зубы своими, хотящая оного еретическаго, приятаго ими брачнаго совокупления насытитися. от неяже прелести да избавит нас человеколюбец Господь. Сей же соньм лукаваго отрода, како неустрашися на боголюбезных наших отец, яко злой курицы, злое яицо сказати, от киих озарися Россия благочестия светом. о сем ли пречестнем и всеблаженнем отце Игнатии. О гнилая еретическая безкоренная сонмица таковая изрекосте; но сей вселюбезныи отец наш о Господе, и Божии подвижник, произыде не от злыя курицы, якоже бесноватая уста брехают: но от всеблаженных и преподобных отец соловецких. такоже и отрасль оная бяше, не от злаго корене израсте, яко оныя змиевы защитницы мнят быти, но от корене оная благочестивая леторасль произыде богонасажденнаго всепресветлых и преподобных подвижник отец наших Зосимы и Саватия. о сих бо и церковныи глас воспевает сице глаголя: о всеблаженнии и преподобнии отцы Зосимо и Саватие, вы бо исполнители заповедем Христовым бысте. блажени же и ученицы ваши иже таковых отец чада нарекошася. Сии же вселенней светилницы израстоша от корене апостолов насажденнаго, и от богоносных отец, и вселенских учителей напоеннаго. и бяше насаждено оно древо при водах Божиих законов, и ограждено бысть всекрепким благочестия оплотом. и толь благодатию вседержащия десницы Вышняго твердо укоренися, яко и во время великобурнаго еретическаго Никонова искушения ниже мало поколебася или потрясеся, или лист его отпаде, но и принесе Господеви плод сторичествующии. и такова бяше онная гобзованная земля на ней же оное богорасленное насадися древо, яко и посмерти оных божественных отец телеса издаде нетлены. от таковаго корене святонасажденнаго. преподобных отец Зосимы и Саватия соловецких, оная богорасленная ветвь израсте сей святопросвещенныи отец Игнатии произыде. тем же святых апостол и богоносных отец учением воспитан насадися, и от тояжде гобзованныя и доброплодны земли, преподобных отец соловецких по проречению святаго мужа Гурия именем изыде. и в поморскую страну со оным доброплодным благочестия словом прииде, тамо и нача в нем множитися семя слова Божия и плоды приношати приятны на вкушение Владыце своему. Многия бо страны и грады, и пустынная места обходя, древлецерковнаго благочестия слово утверждая и к добродетельному житию люборачительныя души возграждая, во отцепреданных законех пребывати утвержая. и таковым своим отцепоследованным учением оныя выгорецкия непроходимыя пустыни, дебри и блата, благочестивыми насади жительми. и оным отцепреданным чином и уставом общежительства преподобных отец соловецких удобрив украси оныя страны, и от сего пресветлаго благочестия подвижника, таковыя же добромасличныя благоуханныя произрастоша ветви, благочестия храбрыя воины, Даниил Викуловичь, Петр Прокопьевичь, Андрей Дионисьевичь, Симеон Дионисьевичь, и прочии отцы. последующе онаго преподобнаго отца учению. помянутыи же Даниил, у онаго священнаго отца Игнатия, бяше неколико время в послушании повинуяся ему, по благословению отца игумена Досифея. и с ним во оно время пустынная озлобления богорадне терпяще, благочестия ради. Послежде по составлении обоих общежительств на Выгу мужескаго, а на Лексе женьскаго, сей помяновенныи Даниил обоим сим общежительством, бысть наставник и отец о Господе. и тако от сих вышепомянутых отец оное общежительство благодатию Божиею распространися, и корень древняго благочестия во оных отцех остася, и православная Христова церковь от них в сие последнее горькоплачевное время светом благочестия озарися. Зрите внушите и разумейте, о федосеевыи роде прелукавыи и развращенныи, внемлите слухи вашими, и не будите яко аспид глухии, затыкаяи уши свои еже неслышати гласа обавающих. кии корень сей бе, и сие насаждение произрасте; и каковыя сия ветви быша. коего нарекоша злым коренем, и киих именоваша злою отраслию; о прелукавая гнилая сонмица, о пребеззаконныя хулы, о бесноватаго строптиваго языка. за кого стасте, и противу кого вооружаетеся; своею пребеззаконною ратию ополчение творите, и несытною гортанию вашею при пути седяще хапаете. осмотритеся безумия вашего, приимете чуствие, на кого ваша хула восходит; не на оных мню благочестивых отец, глаголющих о вашей прелести, но на глаголющаго в них о вашем помрачении Бога. что же вы безумнии помышляете, о сем вашем за Никона ересиарха и отступника православныя веры старании. кую от него почесть чаете себе от онаго отступника, за свое еже о нем старание прияти; или кую похвалу и славу мните приобрести, или кое мздовоздаяние получити; Но не мню аз более вам сего от него оноя почести получити якоже Июда Христов предатель за ваше еже к нему ближайшее друголюбие. таковоюже и вас одарит онаго отец Никона учитель и наставник почестию, якоже онаго Никона послушника своего. Помыслите о своем таковом дерзком и неосмотрительном, на толь богопросвещенных муж гаждательном изрицании, за неприятие онаго никониянскаго паче же латиноримскаго костела четыребуквеннаго IНЦI. еже на кресте Христове надписания. въкупе же и за брачную прияту вами оную еретическую тайну за содомское ваше смешение, таковое бряхание на оныя благочестивыя мужи неустрашистеся произнести. Ибо кто не почудится и не посмеется вашему дерзкому безумию, за что; и за кого стасте, надходяще тако ругаете несмысленно. но подобало бы вам неточию онеми ругательными словесы на оныя богопросвещенныя мужи надходити, но всячески вселюбезне почитати бы и прославляти оныя, яко благочестивых велении последователей. еже бо святии апостоли православную веру от самого Господа научени прияша, и сию вовся вселенныя концы поспешествующу им Святому Духу, проповедаша. и оную богопросвещеннии святии богоноснии отцы, на седми вселенских соборех утвердиша, и словом Божиим тую запечатлеша. яко невозможно никомуже в ню что приложити, или отъяти, или что от нея пременити, сия творяи прокляти да будут святии отцы рекоша. и оную православную веру, по онех святых апостолех и богоносных отцех, святии преподобнии отцы и святителие, друг другоприемне непорочно соблюдаху. Егдаже благодать Спасителя нашего Бога, преизобильно на нас излияся, еже коснуся духовная благодать сердцу русскаго великаго князя Владимира, позна оную апостолопроповеданную, и богоносными отцы запечатленную православную веру християнскую. и святое крещение прият в Корсуне граде, в лето от рожества Христова 990. и потом просвети русскую землю святым крещением, и прият теже православныя чины и уставы, от престолонаместников апостольских в Царе граде. и тако зде в велицей Руссии оную православную веру, святии богоноснии и преподобнии отцы и святителие Божии, аки некое драгоценное сокровище. друг друго последованне непременно, даже до лет Никона патриарха соблюдающе бяху. егдаже попущением Божиим ради беззаконии наших, прииде уготованный сосуд сатанин сын дияволов, и враг Божии оныи Никон пременение оныя отцепреданныя благочестивыя веры християнския начат чинити. тогда помяновеннии воини преподобнии отцы соловецтии, яко тверди адаманти верою вооружившееся, доблественне ставше, онаго врага и отступника веры християнския Никона мужески победиша. и кровми своими оное отцепреданное благочестие запечатлеша, якоже и история о разорении соловецкия обители повествует. во оно время и сей помяновенныи богоносныи муж, блаженныя памяти отец Игнатии соловецкую оную обитель остави, и прииде в Поморие, якоже речеся. имыи с собою тую же отцепреданную апостольскую православную веру, и многия души в той пребывати утвердив ко спасению настави. Такожде и мы последнии, в сие горкоплачевное последнее время, от того же благочестиваго отцепреданнаго корене произшедше, тех же отец учения яшася. и оно их благочестивое учение и наказание яко же в сей книзе о всем том выше вообразися, кроме всякаго недоумения. и кроме преложения и отъятия сохранити усердствуем, и от Господа Бога помощи просим, дабы дал нам Господь во оном отцепреданном благочестии, неизменне живот свой скончати и аще Божия заповеди и отеческая повеления, во оном благочестии будем соблюдати, то без всякаго сумнения можем себе спасение получити. и тако дозде корень православныя апостольския и отцепреданныя благочестивыя веры дойде». До зде отец наших, к феодосиевым обличительное слово.

На основании всего вышеизложеннаго, кто же из правоверующих обрящется таков не боголюбив; еже небрещи о сем по писанному [На поле: Иосиф Волоцкий. слово 13]: Якоже несытно должни любити Бога, тако ненавидети еретиков. И ктоже будет таков жестосерд; и стерпит не изыти на словесное отмщение таковым не укротимым хульником вере Христовой, и тоя истинных содержателей, по глаголющему: благочестия ради точию да будет ти брань. Или кто же есть таков еретиком рачитель, православию же изменник и сопостат; еже бы сих зломудренных феодосиевцев оправдовати и таковая тяжкая их преступления умаляя нивочто полагати, и презирати писанное: чужую веру похвалив, своей поругался есть. Мнится нам, никтоже от истинно желающых избежати на втором пришествии шуяго стояния, решится в ущерб благоверия во угождение же онем еретиком феодосиевым, безсловесную творити им защиту и присвоение, но весма продвигнутся, по достоинству и по качеству их заблуждений в первое положити их еретическое определение якоже и безпристрастныи всецерковныи поповский суди о них собор.

Воистину по правилом за возобновление сея латиноримския ереси, онии феодосиевы повсему подлежат первому еретическому чину. за еже по вышепоказанному, титла тая Пилатова творит Сына Божия простым человеком, то како не перваго чина есть ересь сия; А за таковыя важныя ереси, священныя правила крестити повелевают неточию тех еретиков иже таковыя ереси заченших, но иже и последних возобновивших оныя. Якоже и в правиле Василия Великаго 47 читаем; Воздержники, наватияны, вретищники и прочия. не еретики паче но раскольники, за возобновление же маркионитской ереси в чин крещаемых сведени быша. И Фотиновы ученицы Алексеем Аристиным в тойже сведены чин, за тоже что учитель их Фотин многи ереси обнови. [Лаодикийскго собора пр. 7]. И Павла Самосатскаго ересь, и Савелия Ливийскаго, и Монтанову. Такожде и Тимофей презвитер: за приложение к вящшим еретиком крестити повсему подобает рече [Кормч. лист 630].

Посим показаниям, и сии феодосиевы смудреники за приятие латиноримской титлы, повсему подобни суть павликияном. Ибо якоже Павел Самосатскии отъимаше от Христа божественное существо и вечность, и признаваше его проста человека, не вечна ни Творца всея твари, но млада и нова и прочее блядословие его. Тако и титла тая, по извещению святых толкователей евангельских, исповедует Сына Божия простым человеком. Они же оную титлу приняли и вчинили в закон свой, тем и показуются нимало же уньши Павла Самосатскаго. и якоже паки Самосатский смиренная о Христе мудрствовал, тако и наимянование Сына Божия Исусом назарянином, по Иоанну Златоусту [На деяния. зач. 5. беседа 6]: смиренная же онем изъявляет. за возобновление же таковыя латинския ереси, святыми отцы зазренныя, и восточным учителем засвидетельствованныя, и благочестивыми предками нашими обличенныя, по вышеписанным правильным указаниям весма и они [феодосиевы] подлежат первому чину под крещение, верно слово и всякому приятию достойно. понеже не точию законообдержне имеют у себе тую титлу, но и неприемлющих оную православных християн жидом и еретиком уподобляюще называют. А что со страны отступивших от истины лжебратии наших, рекше Григорьева и его смудренников, много обретается на сие возражения, феодосиевых же защиты и оправдания, то Богу помогающу следующею статиею обличая изпровергати будем.

СТАТИЯ 5.

О богопротивном и изменническом Григорьева четырелитерной латинской титле оправдании, глаголющем небыти ей ереси. Зде же показано имать быти свидетельство от божественнаго писания, и от отец наших разумения что сущая есть ересь титла оная.

Ни пристрастия имамы ни ненависти к Григорьеву, ниже паки вражды коея дело есть еже на часте порицати мудрование его поповщинским. Но егда коснемся разсматривати счинения его и проповеди, нуждею со обычных поповщине неприязненных же православию словес его, привлекаеми показуем его таковым. Понеже тако ясно и толико пространно святыми учительми церковными изтолковано, что титла положенная Пилатом на кресте Христове, не богословие и не честь Христу приносит но последнее безчестие и досаду, и проста человека, и весма смиренная о нем проповедует. и яко в православней церкви от времен апостольских до самого римскаго отступления, не было полагаемо тоя титлы на крестах. но за малое время пред патриаршеством Никона, явися титла сия в латиноримском костеле. о чем восточный учитель Евсевий пимян обличая латин свидетельствует. и от лика остальцев благочестия, многоученый муж мужеством в православии и страданием за оное украшенныи диакон соловецкии Игнатии, крепкое написа принесшему из Рима титлу оную патриарху Никону обличение, в нем же и всеизрядное и назидательное предложи разъяснение. И после сих всех истиннейших учителей церковных о той титле понятий, Григорьев во угождение еретиком в хулу же Сыну Божию пренеистовно оправдуя ю и богопротивности ея нивочто полагая.

Хотехом убо мы сокращеннее изложити окончательныя главизны сия, понеже и сами по худосилию нашему утрудихомся уже, вемы же что и прочитающым книгу сию утомительно будет. Но что сотворим видя толикое множество, и таковое преужасное просыпано Григорьевым на церковь Божию лжи, и святым угодником Божиим противление, ума нашего не станет малыми словесы обличити и испрвергнути таковое зломудрие его. Того ради и молим любомудрие ваше не стужати си, но с великодушным терпением проходити убогое сие православней церкви оправдание.

Мы уже видехом, что якоже святии богоноснии учители церковнии, и премудрии толкователи евангельстии, тако и предки наши соловецкия и первобытныя поморския отцы и учители наши согласно и единоумно признавали, Пилатом положенную на кресте Господнем титлу на конечную хулу Сыну Божию, и простым человеком еще же и противником кесаревым его исповедующею, потом и латинскою ересию порекли ее. [которая от времен апостольских до латиноримскаго написания оныя, в церкви православней на животворящих крестах не воображалася] всему же оному святоотеческому богодухновенному и отец наших истинному преданию, Григорьев безстудно противоборствуя тако пишет:

[На поле: Речь Григорьева. тетрадь 1, лист 24 обор.] «Еще не праведно натягает поповская бумага, на вологодских. пишущих на животворящем кресте четыре буквы, таковое уже у них написание из давных лет оставлено, на крестах воображати».

[На поле: Наша речь] Почему он зде приплете вологодских; и безумися ли он уже; или другаго ради коего замысла восхоте их смесити с феодосиевыми; мы не вемы. Точию должни есмы объяснити что, во оной бумаге вологодстии за титлу не винословятся ни единым словом, даже и помину о том тамо несть. понеже вологодстии якоже не феодосиевскаго толку, то и титлы при дознании их родословной у них не оказалося, того ради и писать в той бумаге о сем не для чего. Писажеся собственно о феодосиевых, оную титлу имущых за нее и судими быша они тогда, хотяй удостоверитися да прочтет бумагу тую. А что якобы титла сия у них оставлена, о том ниже в статии 7. покажется. ныне же другое богопротивное его понятие разсмотрити и обличити подобательно есть нам. пишет он:

[Речь Григорьева] «Ибо на первобытном кресте от Пилата положенное: в древнем отеческом писании, нигде не видится что ересь богохульная, и Спаситель простыи человек есть».

[Наша речь] Паки пророче слово исполнися на нем, глаголющее: «Ушима услышите и неразумеете. и видяще увидите, и не имате видети. одебеле бо сердце людей сих, и ушима своима тяжко слышаша и очи свои смежиша» [Исаия. глава 6].

Что дале то более дивитися приходит, на определившаго себе в защиту еретиком Григорьева. доколика ослепи его, изменничество православней церкви; толикое множество свидетельства в богодухновенном писании о той титле обретается, [кое в вышшей статии отчасти показася] еже на хулу Сыну Божию написана и простым человеком его исповедующая. и он от всего онаго отвратися невидит и неслышит того, но подобно ум погубльшему глаголет: в древнем отеческом писании нигде не видится что ересь богохульная и Спаситель простый человек есть. Непщуем что едва ли кто из его последователей и из общества брачников беляковских не чуждых добросовестности, решится на то чтобы для защиты еретиков оправдовати оную Пилатову титлу, явно Спасителю Христу досадительную, и Божественныя его славы лишающую но простым человеком, но не простым точию: но преступником и похищником и противником кесарю исповедующую. что весма пространно святыми церковными учители истолковано и засвидетельствовано, соловецкими же и поморскими отцами обличенную у Григорьева же и на то достает смелости. Ясно что он ищет не истины, открытой в слове Божием, и святых отец писанием утвержденной, а токмо защиты своего любезнаго феодосиевства, ради котораго готов пожертвовати и истинною.

Како убо не нахулу сия титла написана бысть; А в благовестнице от Марка сице пишется [Зач. 68. от толкования]:

«Написа же и титлу Пилат, еже есть вина, еяже ради и распят бысть царь июдейскии да того ради похулят его славу, яко противника суща, и царя себе нарекша, и да имут вси мимоходящии непомиловати его но паче надходити нань мучительне».

И в Синоксаре в великий пяток:

«Всякой убо досаде исполнившейся, Пилат и дщицу написа о нем, глаголя, Исус назарянин царь июдейскии».

И Григории Богослов в слове на крещение, Ираклийскии же Никита толкуя сия сице глаголет:

«Зле написав Пилат титлу, яко вину, а не яко истину написа».

Зри убо сия дщица всяку досаду исполнила есть, и всякую лжу и злость противу Христа изъявляет.

Како ли убо не простым человеком признаваше Христа титла оная; яко Нафанаил, аще и сыном Божиим назва его [Благовестник от Иоанна. зач. 2. и беседы евангельск. на того же], но за прирекшее: ты еси царь израилев, святии толкователи евангелия, простым человеком, того Нафанаила веровавша Христа быти, изъявляют. Аще ли Нафанаил за слово ты еси царь израилев признавал Христа простым человеком; то что рещи о титле которая с таковым варварством, и с такою на Христа злобою, и с таковыми хулою и безверием написана бысть. в сем он [Григорьев] показуется не токмо заступник феодосиевым, но участник жидом и Пилату покрывая их злодейственныя на Христа ругательства и винословия. но о сем довлеет посмотрим что далее пишет он о том:

[Речь Григорьева] «Ибо и все поругание жидовское, не на хвалу умыслиша, но на хулу восхотеша жидове, проклятою и поносною смертию осудити, ибо и во исчислении латынских ересей невидится. Латины сие первобытное написание Пилатом треми языки писано прописью полным слогом, измениша, но пишут четырьми буквами се есть IНЦI. ибо четыри буквы не ино что являют, токмо счет церковныи: I, десять и прочее. ибо по единой букве слога не являет. якобы рещи I, Iсъ, Н, назарянин, Ц, царь, I, июдейскии».

[Наша речь] Смотите внимательне вси ищущии спасения, и не хотящии с еретики осудитися. како зде тонко и прикровенно душеубийственное излагает учение Григорьев; глаголя: и все поругание не на хвалу жидове умыслиша Христу но на хулу, и прочее. Сим он, и преднее свое всему православию противное выражение поправляет, еже в древнем писании нигде не видится что ересь богохульная титла оная, въместе с тем, сочетовает и съравнивает ее со всеми вещьми яже при страдании Христу жидами сотворенными. якоже: по судам вождение, по ланитом биение, оплевание, вязание, венец, трость, копие, гвоздие и самыи животворящии крест. зрите же: како коварно и злохитростно, тойже мастер злобы иже жидов наусти Христа вменити со беззаконными, наусти и его вещи святыя богопрославленныя, пророчествами прознаменованныя и неизчетными чудотворениями от Бога одаренныя, съравнити и сочетати с вещию богопротивною, и богохульною церковию отверженною.

Конечно что вся на хулу богоубиицы жидове Христу содеваху, но аще божественному промыслу благоизволися тыя вещи разделити, и таковое несравненное дати им различие, сиречь: овыя отринути и безвести их оставити, овыяже освятити и неизглаголанною почтити их славою, то ктоже таков будет неистов продерзатель, еже бы непостижимым Божиим судбам противитися и по своему хотению разсуждати оное; и ктоже посмеет чистое смешивати с поганым, и святое с проклятым соединяти; нам мнится что из числа правоверующих каков бы ни был злодей и растленнаго жития человек, неможет такого дерзскаго воли Божией оказати сопротивления.

Ибо божественное неизреченное человеколюбие и милость нестерпе зрети погибающу роду человеческому, но восхоте снити на землю и искупити человека страстию плоти своея, а ельма смотрение Божие сие, до того велико страшно же и премудро: еже Богу снити на землю воплотитися и пострадати, что не точию человеческому уму но и ангельскому есть непостижимо. того ради да не внезапу явится таковое преудивительное и благохотенное его всемотрение, тем и повеле духопрозрительным пророком своим напредь провозвестити о том, да не неверуемо будет. они же по его Божию вразумлению подробно во своих пророчествиях обо всем писаху, о них же хотя мало нечто воспомянути нужно есть нам. о страсти Спасове пишется между прочим и сие: «Бых яко агнец безъгласен пред стригущим его. и вдах плещи мои на раны, и лице мое на ударение. и не отвратих лица моего от заплевания. и, ископаша руце мои и нозе мои, исчотоша вся кости моя. и возъзрят нань егоже прободоша». и о гвоздиях тако глаголет: «в день той узде коню свято Господеви наречется». и о кресте: «возносите Господа Бога нашего и кланяитеся подножию ногу его яко свято есть» и прочаго о всем том в пророчествиях до безчислия обретается, но более нас ведущым сказовати не прилично есть.

И сия события и вещи, овыя пророки предсказана точию, оваяже и предсказана и церковию православною принята, и воображаема, якоже копие и трость. Иная же, яже гвоздие и крест, сверх того и чудесными дары и святостию от Бога почтена еста. А кольми паче крест животворящии, весь облечен в Божию силу. о Пилатовой же титле всего сего ни чесо несть и не видится: ни пророческаго предсказания, ни церковию приятия ни воображения на крестах, а ельма не сочетована с богоугодными и святыми вещьми рекше со крестом с гвоздием копием и тростию, то яве и чести той не получи. Но еще от всея церкви православныя возненавидена и охулена бысть, понеже крайнее на себе носит Христу безчестие.

Григорьев же, не ведая различити святое от сквернаго, и чистое от нечистаго. того ради таковую богопротивную и богохульную вещь, уподобил и съравнял, с вещьми боголюбезными и святыми. и сим он своим изречением еже: «И вся не на хвалу содевали жидове Христу» весма съровнял он единочестием оную титлу, с копием, с тростию, с гвоздиями и с самим даже животворящим крестом. тем и признает ее достойною на крестах воображения и поклонения, яко же и феодосиевы, поповщина же и великороссийстии. или же: Аще де титла сия за богохульство свое, воображению и поклонению недостойна, то и прочия вещи, на хулу же от еврей сотворенныя: подобает де отринути.

И таковое мудрование он имеет непросто, но будучи единем диаволим духом водим и наставляем якоже и новии учители, кои за приложение четвертаго в чине крещения аминя, от православных обличаеми немогуще свидетельством святых сие утвердити, нехотяху и православной церкви повинутися, и сие еретичество отложити. Но якоже на древнее, такое и на своя скверная предания восташа глаголющее:

[Обличение глава 9, лист 28] «Амини не токмо четыре, но и три непотребни ко святому крещению»* [*Разговор с Вальдемаром] Подобно богомерским лютором.

Тако и Григорьев, не могии титлу свою писанием оправдати, не могии и с православною церковию согласитися, понеже в того же ловца увязе сетех яже и новии учители, того ради купно с богохульною титлою полагает и святыя вещи сиречь копие, губу, трость, гвоздие и честныи крест. и равному же подчиняет достойнству, или прияти или отринути.

Того то ради и подобает, нам, с особым прилежанием вникнути в его учение. и внимати како он смешивает православие с еретичеством, и богоугодныя и святыя вещи и животворящия, за едино полагает с богохульною и отверженною, и Сына Божия простым человеком признающею, титлою; и таковое развращенное и богохульное внушает понятие, еже бы и титлу Пилатову въместе с прочими святыми вещьми прияти, аще ли сия недостоина приятия то и прочия должны быть недостойными. зрите, сего что может быть окаяннейши и нечестивеиши понятия; Ибо преподобныи Максим Исповедник, о сем тако разсуждает [Минея четия. киевск. генваря, 21]:

«Следовательно [рече] кто въместе с нечестивыми еретиками отвергает святых, тот въместе с дияволом отвергает и Бога».

Тем же убо и он, аще на крестах и не пишет титлы сея и ей не кланяется, и сего ради неподобает нам сумневатися о том, и ему снизходити, понеже верою своею он и писменным исповеданием уже оправдал и за равночестную с крестом и с протчими вещьми сочетал ю есть. Аще для обману невнимающых и глаголет негде: что мы де титлу неприемлем, но лучшее от хуждьшаго почитаем. таковое бо душеубийственное коварство, для всех чужемудренных необходимо есть, еже прикрывати вреды своя да не абие познани будут. Тако некогда и иконоборцы, прельщающе правоверных поступаху, молитвенницу свою украсиша святыми иконами и патриарх их: аще кто непочитает святыя иконы, анафема, изрече. но ельма вера у них бяше иконохульная, то якови быша еретицы такови и пребыша. Тако и Григорьев: Аще и всеобразно прикрывает свое чужеверное мудрование, но дела его и рукописи ясно его обличают в том. Ибо пишет приимати от феодосиевых правильно с шестинедельным постом а за вящшия вины наказывати особо, и самобрачников де крестити подобает. понятием же своим и писанием. и того самого бракотворца Шеина крещение принял и делом исполнил. Како ли же и титлу не принял он; кою непрестает и еще оправдуя сице пишет:

[Речь Григорьева в письме Ефрему Ивановичу] «Ибо и во изчислении латинских ересей невидится ее» [и инде] «Аще отцы наши и много о титле той понимали, но святии отцы ересию не называли ее».

[Наша речь] Сия его оба изречения, весма подтверждают наше показание о нем, и ясно свидетельствуют что обычай и понятие у него совершенно поповщинское. ибо он будучи еще в сонме беглопоповцев, имея частыя прения с великороссийскими, и прочими разноверцы, от коих поповщина часто бывает о безкоренном своем священстве безответна. и в таком трудном своем положении они всегда прибегают: или к различным криворазвращенным усильствам, или же приискивают в божественном писании некая краткая и неясная речения, к сим привязующеся и на свое мнение обращают. или глаголющая о ином, они же оправдуя другое и предлагают: что тамо де сего не писано. А иная отвергающе вовсе неприемлют, о сем [глаголюще] нигде не писано. и таковыми безчестными школьническими козньми точию и правят кривизну своего состояния.

Яко же егда оправдающе великороссийскую церьковь, изложиша знаменитое свое окружное послание, в нем же и имя Иисус заравночестно с именем Исус, полагают: в подтверждение же сему, не обретающе что предъставити, тем и обращаются к обычным лукавым кознодействам своим глаголюще: Яко егда патриарх Иосиф, перепечатывая малый катихизис Петра Могилы, в нем же находящееся имя Иисус из него изключи, но суда хульна, еже бы Иисуса нарещи иным богом, или иным Иисусом, отнюд не изнесе. [А ниже глаголют] Такожде и всеосвященныи всероссийскии собор, собравшийся в церьствующем граде Москве, съсылаяся о исправлении церковнаго пения, на беседы апостольския, изданныя в Киеве Захарием Копестенским, в них во многих местех Христово имя напечатано Иисус, видеша, и в церковное употребление того не прияша: обаче и суда хульна, еже бы Иисуса нарещи иным богом, неточию не изнесоша, но даже о сем и не глаголаша. [и прочее] до зде из окружнаго послания. В том же окружном послании, и двучастный крест наравне с истинным тричастным крестом Христовым приемлется.

И сия таковая вся недобросовестная и коварныя настроения, Григорьев всецело оттуду с собою принесе. имиже ныне во оправдание еретиком, а на досаждение и хулу православней церкви вовсюду и руководствует. Нам же убогим неуклонный предлежит долг, обличити и изпровергнути таковое его безъчестное натягательство.

Григорьев глаголет: «Во изчислении латынских ересей титлы Пилатовы не видится, и святии отцы не пишут что она ересь латынская».

[Наша речь] Сия его речь вовсем подобна и единонравна есть окружному посланию, обои убо защиту свою еретиком, полагают на умолчанном и не писанном свидетельстве. Но тамо убо при патриарсе Иосифе, аще уже и быша тогда противности тыя: сиречь; Иисус, триперстное сложение поливательное крещение, и двучастный крест и прочее. о них же патриарх Иосиф умолча, но не о сем ему тщание бе тогда еже тыя ереси изчисляти и о них судити, а точию оныи образ веры рекше катихисис исправити и церкве Христовой предати.

Что же рещи о восточном патриарсе Михаиле изчислявшем латинския ереси, о титле же оной, о ней же ныне нам таковое належит стязание не мало не воспомянувшем. но повсему вероятию непщуемо что тогда еще у латин титлы оныя на крестах не обреташеся, аще бы тая тогда у них была, то убо сей ревностный по благочестию защитник и о малых латинских заблуждениях не умолча, но и перстней ношение объяви. Како бы сию титлу кая Христа Спасителя не Богом но простым признаваше человеком, не обличил бы;

Позднеише же сего греческаго святителя бывыи всероссийскии патриарх Филарет, которыи заблуждения латин и белорусцев отчасти извествует, о четыребуквенной же титле невоспоминает а негли уже тая тогда у них и обреташеся. Но сей архипастырь, новшества латинская и униятская не вся почасти ради невмещения писаше, и не вся паки новости их объявив описа но многия неудобства ради остави, еже бо вся потонку описати грезни латинския и прочих, от невозможных есть. скращенне же объявляя о заблуждениях их тако пишет: Что многая [рече] видех в них несогласия церковная, [ниже] и влаются во всяком ветре учения противна истинней вере християнстей. [ниже] и отчасти приобщаются еретическому папежскому учению, и инех различных ересей учению.

Зрите же како скращенне римская заблуждения поведает, подробно бо и поимянно изчислити весма невозможно есть. Ащели на листу 582. и показует некоторыя ереси их поимянно, обаче и тамо не все совершенно но отчасти, ибо выше того глаголет: «От них же горшии и множайшии суть сия». Сим ясно показа: что не вся заблуждения их изъяви. но нетокмо же сия, но и самыя важныя описывая вины, за них же всех еретиков крестити подобает, якоже се: за суботныи пост, за превращеие праздника пасха, за манихейское планетам верование, за не трепогружательное крещение, за прощение грехов без епитимии, и за разделение Духа Святаго в два начала еже 28 главы в пятой статии показася. Святейшии же Филарет показав вины тыя, не ста до сего но еще сице прирек: «Да и многих ради вин довлеет от латинских, и от иных различных еретических вер крестити совершенно. понеже прияша в закон свой многочастных ересей предания».

Видите ли како поповщинское Григорьева лукавство обличися зде, ибо и наивящшия латинския ереси за них же крестити достоит, ни вси описа Филарет патриарх но точию некия. яко же и видим: не написа он и о двочастном кресте, не воспомянул и о треперстном сложении, не рече и об Иисусе, с сими же въместе не написа и о четырелитерной латинской титле, заню же без сумнения патриарх крестити повелел бы. Сему же не подобает дивитися еже не написа, таковаго бо ради множества римских ересей неподобно есть и невместимо. от истинных же сынов православныя церкви, прекословити или сопротивлятися сему или привязоватися ни кто не решится, но якоже въконец ненавидяще еретических зломудрии всеговейно и всепокорно повинующеся древлеправославныя церкве преданиям, и за ненаписанныя ереси крестили еретиков и крестити должни суть. А иже суть фальшивыя християне и лживыя и отступившия от нея сынове неприязненнии, тии убо притворным лицемерием своим церковь православную лобжут, а еретическия церкви заступничеством и похвалами своими лижут. и о сем до зде возвратимся на предлежащее.

Такожде и прочии учители церковнии и поимянно описывали проказы еретическия, но вообще единем словом вся отринувше уничтожиша, глаголюще [Кормч. глава 71]: «Помняще седмаго вселенскаго собора всеобщее запрещение, еже есть чрез церковная предания анафема» и прочая: Якоже и в книге Кирила Иеросалимскаго соборное Фотия патриарха запрещение [глава 34, лист 305]. И в книзе О вере [глава 24, лист 224] и в прочих писанное видети есть. Но не вси же: напротив рещи, описании четырех литер в западной церкви именно умолчаша. не вси без обличения и разсуждения оставиша. но вышеписанныи учитель восточнаго православия Евсевии пимен, зело ясно о сих объясни, и между писмены восточныя церкви на просфире имеющимися сицево разньство положи: «Зри [рече] в костеле римском во время литоргии на Агньце еда не узреши на единой стране воображения распятаго Спасителя, сих слов под титлою IHRI. от Пилата на кресте написану» и прочее. Но Григорьев на сие не указует и сего не глаголет, но изтязует именно той титле обличения. и показует те в священном писании места где о том не поминается, якоже и окружное послание тем и внушает он всем якобы оная титла и не ересь. Сим он не токмо феодосиевых защищает, но уже и латин и великороссийских оправдовает.

Зрите же каково зде обретается кознодействие его, где писание пространно и ясно показует: что титла оная не точию простым человеком Христа исповедует, но и похищником царства, и противником кесарю, сие все он умалчивая преходит. А кое писание или ее не видело, или не о том материя излагашеся непорицает ее ересию, сие он утвердительно показует. Но душевредная сия его лесть сим изобличается: Почто бо тем евангельским изъяснителем ересию порицати оную титлу; понеже она с самаго распятия Господня на животворящих крестах никем и нигде не воображалася, но весма довольно и того что сущии смысл тоя титлы преясне нам ибъявиша. А кто бы сию титлу с таковым ея мудрованием восприял бы и на крестных воображениях почтил бы, тот без всякаго сумнения еретик и был бы, и еретик не третияго или втораго чина но весма перваго якоже и Павел Самосатский.

Понеже егда оная четырелитераня титла явися, тогда абие от восточнаго учителя Евсевия пимяна зазрена бысть и обличися. от древлероссийския же церкве остальцем благочестия Игнатием соловецким, а потом и всеми первобытными поморскими отцами. Но о сих свидетельства и обличения, Григорьев не приемлет, глаголя: святии отцы ересию оную титлу не порицали. Но мы уже хотя и кратко но показахом, что во время древних учителей церковных титлы оныя на крестах еще не бяше, тем и писать им было не о чем. Остальцев же благочестия соловецких страдальцев, и их преемников поморских отец, он за святых не почитает. Зде внимайте Господа ради, какова у него вера; каково и умственное понятие; таковых воинов Христовых якови соловетстии страдальцы, иже не со слугами брань сотвориша, но с самим дияволом, и победиша его сиречь за веру православную души своя всеусердно положиша. юже [веру] оставиша нам целу и невреждену, их же православная церковь в молитвах своих новыми возглашает страдальцами. он же [Григорьев] и за угодников Божиих не признает, они же суть и кроме мученических подвигов, за едино соблюдение веры наследницы суть царства небеснаго. по апостолу глаголющему [Тимоф. зач. 298]: «Течение скончах, веру соблюдох, прочее убо соблюдаетъмися венец правды» или паки их преемники, первобытныя поморския отцы, оставиша отечествия своя род и домы, и вдаша сами себе на изгнание, убегаху в дикия пустыни, в ненаселенныя и непроходимыя блата и леса, терпяще всякое оземствование, неизглаголанную тесноту глад мраз и последнюю во всем скудость. притом безпрестанному подвергахуся от новолюбцев преужасному гонению, мучению и самой смерти. чесо ради; точию еже бы како сохранити древнее святоотеческое благочестие и веру. Како сии не святи суть; А их же той же апостол выше всего мира воспрославляет глаголя [евр. зач. 330]: «Проидоша в милотех, и в козиях кожах. лишени скорбяще, озлоблени, их же не бе достоин весь мир».

Почему же Григорьев, сих новых страдальцев не признает в лике угодников Божиих быти им; почему же он и согласному православней церкви еже о титле преданию их неверит; Но мы вемы всяко речет он нам на сие: что де от Бога чудесми не у бе прославлени. Но таковое его непщевание, весма показует его еще нехристиянином, понеже он невзирает на веру и житие и скончание предков наших, но смотрит точию еже знамений не бяше от них. знамения же и чудеса не верных ради, но ради неверных и незнающых Бога. Аще ли он зато неприемлет от них свидетельства о титле, что они не прославлени еще от Бога. но православная церковь много имеет у себе подобных преданий, еже от непрославленных учителей церковных писанная, сиречь книги: Потребник, Кирила Иеросалимскаго, О правой вере, два Катихизиса, Захарии Кипистенскаго и другия. то уже подобает ему и сия вся отринути. Но пусть его аще ему годе есть отревает и сия, пусть его несочетовает и отцев наших со угодившими Богу, и пусть его не верит преданиям их и священному противится писанию.

Мы же благодатию Божиею чада церкви православныя, предков наших остальцев благочестия соловецких отцев, и их преемников первобытных поморских отец, и по них бывших неуклонных последователей вере и учению их, без всякаго сумнения почитаем их наравне с древлеправославными угодниками Божиими, и предания их согласная священному писанию якоже и сие еже о четырелитерной титле, кроме всякаго недоумения признаем законными и церкви православней согласными, и к приятию весма достойными и исполняти оная всеговейно желаем и должни есмы. Понеже и великии апостол Павел всеобдержно завещавает нам о том сице глаголя [Там же, зач. 339]: «Поминайте наставники ваша, иже глаголаша вам слово Божие. их же взирающе на скочание жительства, подражайте веру их».

[Речь Григорьева] Потом пишет он: «Что титлы тыя написаны быша прописью полъным слогом, латины же измениша сие пишут точию четыре буквы, си есть IНЦI. которыя [глаголет] не ино что являют, токмо счет церковныи. I, десять, H, пятьдесят, и прочее. ибо по единой букве [пишет] слога не являет во священном писании яко бы рещи Iсъ назарянин царь iюдейскии»

[Наша речь] Но в священном писании не являет чтобы тыя буквы означали Исус назарянин царь июдейскии потому, что тогда букв онех и в слуху не бяше отнюд, не о чем писанию являти было. хитросплетенным же сим показанием он слугует и оправдание сплетает неточию феодосиевым и суродичам своим поповцам, но и никоновым учеником, и самым тем римским католикам. но въсуе он бедный себе в том утруждает, ибо ни едины от вышереченных не нуждаются и не примут от него онаго слугования. По тому что каждыи из них свободно исповесть: что оною четырелитерною титлою они не счисление некое изъявляют, но Христа Сына Божия Исусом назореем и царем июдейским проповедуют. Тем и напрасно он тщится навязати такое им мнение котораго они и на уме никогда не имели, да и имети не восхотят. того ради аще буквы тыя и могут означати кое либо церковное счисление, но что нам до того, не о числах убо нам подвиг належит, но о еретическом богопротивном Сына Божия простым человеком исповедании. Ибо латыны егда от православныя веры отступиша, и всех богомерских еретиков ереси в свой закон внесоша, с ними же и Павла Самосатскаго ересь прияша сиречь Христа Сына Божия Богом исповедати отвергошася. и в прилучающихся писаниях, Богом Христа именовати избегают но яково либо иначе, якоже: на рожестве Христове не пишут якоже в православней церкви обычай есть, но просто: рожество младенца Исуса и прочее. и матерь Божию Богородицею неславят: но просто дева Мария. Того ради для совершеннаго исполнения воли древняго отступника диявола, да бы въконец отвергнуть от себе Христово Божество, они и титлу оную с хулою простым человеком Христа исповедующую на крестах воображати начаша. Потом и Никон патриарх московский, многия обычаи и вещи римския церкве в свою церковь вънесе, с ними же и титлу сию. от него же потом и бывшии его причетник Феодосий Васильевичь прият ю. Таже и беглое священство имущии восприяша ее.

И тако хотя въкратце, но помогающу Богу показахом, что святии учители церковнии объясниша нам: яко титла тая Божество Христово отвергает совершенно. показахом же, и отцев наших о титле оной разумение таковое же, и ересию латынскою признающее. объявихом же и Григорьева якоже святоотеческому писанию несогласное, тако и остальцем благочестия предкам нашим о титле оной мудрование супротивное, еретиком же единоумное и весма согласное. А что он свидетельствует будто бы четырелитерная титла оная на крестах воображащеся в церкви Христовой еще до Никона черногорскаго. о сем елико Бог поможет, абие к разсмотрению обратимся.

СТАТИЯ 6.

О ложном свидетельстве Григорьева, якобы Пилатова титла в православней церкви на животворящих крестах писася еще до Никона черногорскаго. Зде же показано имать быти, таковому его самосмышленному понятию испровержение.

Ныне убо оправдывая феодосиевския зломудрия, в таково прииде безстудие поправый истину и совесть свою Григорьев. недовольно бе ему что бывши всецерковныи християнскии поповскии собор всяким злословием нестерпимыми хулами и ложными обнес клеветами, с ним же и все християнство томуже подверже. Но и всю уже древлеправославную церковь Христову опорочити простреся, яко такову богохульную и богопротивную вещь, сиречь Пилатова титла: которая не токмо человеческаго достоинства и чести, Христа Спасителя лишает, но и божественное существо и власть его отвергает. Сию то всякому правоверующему, гнусную и ненавидимую четыребуквенную титлу, Григорьев оправдал, и глаголет: что церковь православная имела оную и на кресте Христове воображала до Никона черногорскаго. [яве по его от вознесения Господня] то воньмите зде прилежно, не порок ли будет всей древлеправославней церкви сие, еже таковую богопротивность она у себе имела; Он же возводя на нее такову грубую ложь, не убоялся суда Божия, привлещи к себе в сообщники и преподобнаго Никона. Сице пишет он о том: [ниже]

[Речь Григорьева] «Ибо и Никон в слове 38-м, сице являет, каковому надписанию подобает быти: "паки блюдох всюду честныя кресты начертаемы, ов сице, ов же инако, а не во едино надписание. о сих убо аз недоумея исках с трудом подобающее написание лучшее уведати; и сего ради написах и послах в соборную церковь патриархии Антиохийския; они же испытавше о сем опасно, восписаша ми сице: яко лучше есть надписывати святыя и честныя кресты, Исус Христос Сын Божии". зри друже [продолжает Григорьев] аки советуя а не проклиная прочая писания. онеже и явитися хощет честныи крест пред вторым Христовым пришествием на обличение жидом с первобытным надписанием. мы нижайшия неоправдываем с титлами поклонныя кресты, но признаем что они в церкви до Никона черногорскаго были; [ниже] На конце сия малыя книжицы; поясняю о титлах. [ниже] сие надписание Пилатово на крестах, до Никона игумена черныя горы было воображено; по свидетельству книги его Тактикона. от слова 38. где ясно восписует, разновидное надписание на крестах, ов сице, а ов инако: а не в едино надписание, [ниже]. Из сего и видно что Пилатово написание на масличной дщице Исус назарянин царь июдейскии: полным слогом, Никон черныя горы игумен, непорицаше богохульною ересию: и чрез сие Пилатово воображение, будет де Исус Христос простыи человек без Божества. о сем преподобныи Никон умолча такожде и патриархи Антиохийския Никону черногорскому восписаша; оставить прочая надписания без порицания хульнаго но сице пишут лучше есть надписывати святыя и честныя кресты, Исус Христос Сын Божии». до зде Григорьев.

[Наша речь] Видите любомудрии читателие, како он безъстудный на церковь Христову и на преподобнаго Никона открыто лжет; яко бы титла Пилатова на крестах писася до сего учителя церковнаго, и яко бы книга его Тактикон о том свидетельствует. А якоже во всем священном писании отнюд не обретается еже бы титла оная когда либо на крестах воображашеся, тако и в слове 38-м книги Тактикона, ни самой тени свидетельствующия о том не видится. А что не бяше никогда оныя титлы на животворящих крестах, о том достоверныя свидетельства имеются, кои на среду вашей любви и представляем.

1. Восточныи учитель Евсевии пимен свидетельствуя пишет [книга Лифос. издана в лета 1652. тип. Киевс. и Краковс.]: «Зри и в костели римском во время литоргии на Агньце, еда не узриши на едини стране воображения распятаго Спасителя сих слов под титлою: IНЦI. от Пилата на кресте. [ниже] на просфире греческой грамата, Исус Христос ника». Се ясно показуется, что и при сем писатели еще вънове тая титла в Риме явися, нанюже он указует яко на небывшую доселе. Аще бы [по Григорьеву] она на крестах бяше изъдавна, то почто бы о ней въпустош сему учителю и писати.

2. Егда же оную титлу Никон патриарх из Рима в Россию принесе, тогда ревностныи защитник древлецерковнаго благочестия диакон соловецкаго монастыря Игнатии, абие оную зазре и Никона зельнеише за ню обличи. Аще бы паки титла тая прежде патриарха Никона в церкви на крестах полагашеся, то како бы духопросвещенный муж сей дерзнул и посмел бы, приятую церковию вещь зазрев укорити; никакоже. ибо он не просто и без свидетельства таковым обнесе ее порицанием, но согласно премудрым евангельским толкователем и святым богословцем тако о ней исповеда. в подтверждение же поне едино речем и довлеет. Святыи Никита Ираклийскии толкуя словеса Григория Богослова сице глаголет [Слово 2 на крещение, стих 53]: «Зле написа Пилат титлу яко вину убо, а не яко истину написа».

Что сих слов яснейшее, что крепчайши быти может; сими писании видится приснопоминаемыи он старец уверися, Пилатово написание с новшествами в российскую церковь прибывшее обличи. Григорьев же, сего святаго старца Игнатия святым не признает, и писание его о сей титле не приемлет. тем он и оказася всей нашей православней церкви противник, и несравненно более присвоение имущий к еретиком поповщине и феодосиевым нежели к благочестивым отцем нашим. понеже соловецких отец за благочестие страдальцев, и по них бывших предков наших поморских отец, он богоугодившими не признает и православным их преданиям не следует. хотяи же более уверитися в богоугождении тех отец наших, да прочитает Андрея Дионисьевича Петру Прокопьевичу надгробное слово, и слово возразительное московских отец, противу феодосиевских отцу Игнатию ругательств выше сего в 4 статии положенное. и ответное послание поморских жителей феодосиевскому наставнику Игнатию Трофимовичу. Аще уже и по приятии ими тропаря писанное, но истинное свидетельство приемлется и от враг за достоверное.

3. Аще бы сие Пилатово надписание на крестах в древлеправославней церкви обреташеся, то бы патриарх Никон нуждаяся во оправдание сей своей новизны, легко бы мог множество представити древних крестов не токмо российских но и греческих, сию титлу на себе имущих. но ельмаже не обреташеся ни единого древняго ко удостоверению пристоящаго с сим надписанием креста, то и возможе противу остальцев благочестия приносимых ему обличений, представити в подтверждение един точию вывезенный им из Палестины якобы подобен первобытному кресту Христову крест.

4. А потом и единомудренники Никоновы ученицы Феодосиевы, такожде немогуще ни единаго показати древняго креста тыя латиноримския титлы имущаго, темиже точию Никоновы свидетельствы защищающе новизну сию.

Сими доводами достоверно и показуется что в православней церкви до латинскаго отступления сея четырелитерныя титлы на крестах воображаемы отнюд не бяше. Аще бы оная изъдревле на крестах писашеся, якоже Григорьев тако опрометчиво уверяет, то убо начасте везде таковыя кресты являлися бы. А яко же в православней церкви никогда не бяше тоя титлы, от сего же и крестов с нею не видится, но есть самосмышленно составленная Григорьевым, или заимствованная им из поповщинских счинений очевидная лож. Такожде и сие его показание яко бы в Тактиконе, в слове 38, о той титле писано, такая же точию есть едина нечестивая его на преподобнаго Никона клевета. Пусть всякий сам тое слово прочтет, и самой тени тому подобия тамо не обрящет. Но негли возмнеся ему [Григорьеву] в том слове яко бы о титлах писано, идеже глаголет: «Ов сице ов же инако, а не воедино начертание», но таковое о сем речении понятие Григорьева, самым невеждам неизвинительно есть, кольми паче ему тако начитану и таковую у своих последователей славу имущу, [аще он неведает] ащели ведает и тако малосведущых блазнит, то и часть его будет с преднаписанными в писании, изъшедшими в мир блазнительми и ложными пророки.

Понеже тамо, ов сице ов же инако, речено не о Пилатовой и не о четырелитерной титле, но о различных надписаниях. различная же надписания, и кроме титлы [ея же небяше тогда, обреталися] и обретаются на животворящих крестах сицевая суть:

1. Царь славы Исус Христос ника.

2. Исус Христос ника.

3. Исус Христос.

4. Исус Христос распятие Гоподне.

5. Распятие Господа нашего Исуса Христа.

6. Распятие Христово.

7. Царь славы.

8. Исус Христос Сын Божии. [по Антиохийской патриархии].

Сия же надписания аще и различна суть, обаче вся на славу а не на хулу Сыну Божию состоятся, и божественнаго существа его не отметают но весма православна суть. тем и проклинати или к ереси причитати их, антиохийстей церкви немощно и незачто есть весма. Григорьев же к сим богословным надписаниям, яко же некий смердящий труп к царским венцем любимую себе титлу безъстудно приторже, да и гаждает; что де патриархи антиохийския и Никон черногорскии советуют точию а не проклинают и богохульною ересию непорицают. А того уразумети нехощет, еже между вышепоказанными надписаниями, оныя титлы небяше, то и проклинати и ересию порицати незачто отнюд. он же неистов ся творя, усилием тщится к прочим надписаниям и четырелитерную приложити титлу. и о чем во всем священном писании необретается, то он от своего буяго ума измыслив писати нестыдится, о немже и богогласныи пророк Иеремия сице от лица Господня глаголет [глава 6]. «Мене оставиша источника воды живы». на что божественныи Иоанн Златоустыи таковое разсуждение полагает [Маргар. слово о вочеловеч. Господни, лист 468]; «Аще бо оставльше спасение, работаем человеческим мыслем. она разумеюще, яже помысл подлагает. обретаются нашя воды, учения пустыни воды, а не живыя воды. якоже глаголаше блаженныи Иеремия ко Иеросалиму. разширил еси пути своя на водах пустыни. и да явит яко глаголет, наведе, в похоти души своея, дух ношаше, сиречь, она глаголаше яже хотяше душа его, а не яже хотяше Бог. тако и ныне [Григорьев] похоти своих помысл исполняя, а не Божия ища. на водах пустыни заблуждается». [и] [Тойже, лист 119] «Ничто же чюдно. таков бо [его] язык изъперва безстуден и любопрепирателен есть, и явленная ратовати поучаяся вещи».

Наконец пишет он [Речь Григорьева]: «Яко явитися хощет честныи крест пред вторым Христовым пришествием на обличение нечестивым жидом с первобытным надписанием».

[Наша речь] Но и сие его свидетельство повсему подобно предним, ни коея достоверности неимущее, и доконца нам сумнительно есть. ибо аще бы и титла на нем была тогда крест честныи явитися хощет жидовом не на приятие и почитание, но на обличение и на осуждение. Нам же православным христианом ныне честныи крест Богом дан, не на осуждение, но на поклонение и на спасение, тем и обретается между нами и жидами неизмеримое различие. обаче и сие недостоверно есть, еже бы быти тогда тому надписанию на кресте. Аще он и сослася о том на книгу Кирила Иеросалимскаго, но тамо таковаго понятия невидится. Пишет же Кирил Иеросалимскии во главе 6. сице о том: «Тогда явится знамение Сына человеческаго, но един крест честныи, его же на рамех своих Христос на смерть грядыи с места снес на гору Голгофу, на нем же и титла его от Пилата была написана». Зрите, тамо глаголет: на нем же и титла его от Пилата была написана, а еже бы и тогда сиречь на втором пришествии титле оной быти на кресте, сего у Кирила Иеросалимскаго не является. Но сие в Кириловой книзе наказание, Григорьев скорчемствова, и якоже в прочее вино священнаго писания, тако и в сие налия воды своего развращеннаго разумения.

И тако Божиим поможением показахом, что с самых апостольских времен и до самаго латинскаго отступления и до патриарха Никона, в церкве православней той четырелитерной и Пилатовой титлы на животворящих крестах пишемой не бяше, что подтвердят и вся прежних отец наших писания и предания. тем и изобличихом ложное Григорьева на Кирила Иеросалимскаго и на Никона черногорскаго наношение. яко бы титла тая всегда на крестах писася, и якобы на втором пришествии на кресте будет.

СТАТИЯ 7.

О фальшивом Григорьева свидетельстве, якобы феодосиевы Пилатову титлу от сравнительнаго богословия надписанием почитания оставиша. Зде же показано имать быти, аще некогда феодосиевым отрицахуся и на крестах воображати престаша оную, но точию ложно лицемерствующе, истиною же и своим законом обдержне почитают ю.

Вседушно весь себе дав на защиту еретиком и их мудрованиям на оправдание Григорьев, уже и присвоение и вероятие к ним возъиме более нежели к благочестивым предкам нашим. во множестве обретающееся писменное предание отец наших о том, еже феодосиевы латинскую титлу от сравненнаго с богословным надписанием не оставиша, он неприемлет и никоего не дает оному вероятия. феодосиевское же в десяти статиях написанное коварное и ложное уверение: якобы они титлы у себе уничтожили, он приемлет и неразложне оному верит. которое в 7399 лето на беседе в Кимре в подтверждение своея им защиты пред всем собранием вычитати оное не устыдеся. а по том на основании онаго в 1-й вологодской тетраде на листе 24. сице пишет:

[Речь Григорьева] «Еще не праведно натягает поповская бумага, на вологодских християн. пишущих на животворящем кресте четыре буквы, IНЦI. таковое уже у них написание из давних лет оставлено, на крестах воображати».

Сего же свидетельства ничем не подтверди да и подтвердити не возможет.

[Наша речь] Мы же основываясь на истинном свидетельстве прежде бывших отец наших, и их самих о том подтверждениях, должни есмы показати якоже превратное и изменническое ко угождению еретиком, смышление Григорьева. Тако изобличити и самих феодосиевых в лицемерном их оныя титлы уничтожении.

1. В 7235, лето. феодосиевский предводитель Игнатий Трофимов, бывыи со своими клевреты в Даниловой обители, аще и согласися со отцами нашими к правым догматам, о титле же: аще и обещася произвести тщательное обысканье, но все сие въпоследствии оказалось тщетно и лицемерно, понеже въскоре потом от всего отказашася и осташася в прежнем своем мудровании, о титлах же в 7253-е лето Игнатий Трофимов с прочими писал оправдательное письмо в Поморие в нем же и хулу на соловецкаго отца Игнатия написа.

2. В 7256-м году дважды на своих собраниях московский же их отец Илья Иванов с прочими, онаго же соловецкаго отца Игнатия за оную четырелитераную титлу люте гаждал, глаголя: Сия де блевотина изыде от Игнатия старца палеостровскаго. и прочее, в статии 4-й писаное.

3. В 7271-го лета, тойже Илия Иванов на собрании в преображенском дому у Феодоровны, тую же титлу всеобразно защищал о чем в той же 4 статии подобно обносится.

Оный же Илия Иванов с прочими, аще в примирительных писмах в 7276. лето. к нашему старцу Феоктисту и изъявляше двусмысленное и неосновательное от тоя титлы отрицание, и после сего другим нашим християном, подобное же первым уклончивое писмо ими дано бысть. По сем и ктитор их преображенскаго кладбища Илия Алексеичь Ковылин, с таковымъже лицемерием миротворныя писмы и грамоты писа, ово в Петербург ово в Москве на балчуг нашим християном и к своим в Старую Русу посылаше, кои вси в вышереченных десяти статиях или уверениях их видятся. Имъже основательное приятие, или кое либо вероятие сотворити и от тоя титлы оправдати весма невозможно есть. по нижеследующим достоверным показаниям:

4. Илия Иванов аще и писаше ко отцем нашим лестныя якобы отставити оную титлу обещавающияся писмы, но будучи изкони пламенныи ревнитель учителю своему Феодосию Васильевичу, и всем его новизнам усерднейшии и неуклонный хранитель, преподобному же и духопросвещенному отцу Игнатию соловецкому за неприятие титлы горький и преужасный ругатель, якоже напреди писано есть о том. То како мощно тако скоро преложитися ему от таковаго огнепальнаго на благочестие враждования; и како бы он тако самохотно отрекся того, что вовосю жизнь для него, и для всего их сообщества было свято; вещь есть весма неудобна, того ради и невероятна. Ащели же он и писа притворныя на обман нашим предкам тыя обещания, но повсему видится нам: склоняемь бываше он к тому, хитрым и изобильным в коварстве владыкою своим Илиею Алексеичем Ковылиным. Посему и остаются оныя писмы ко оставлению ими титлы написанныя, яко недостоверны без всякаго внимания. А кольми паче и послания самого того Ковылина, еже бы ими уничтожити ему четыребуквенную титлу свою, въконец недостойны всякаго вероятия. Понеже благочестивыя предки наши сице пишут о сем:

5. «При сих же настоятелех бысть, [зри статию] и поних остася, онаго феодосиева согласия дефенсор Илия Алексеев. тем же противным феодосиевым духом, и его пламенем пылая явися. и многия души коварным своим злохитрством обманув прельсти. и в свою погибель привлече, якоже Ивана старца и Игнатия. даниловских, Тимофея Андреева и Ивана Петрова со множайшими християны. Сии конечне во оной прелести погрязоша, еще питерских, сии понескольку познаша онаго прелесть. Такожде и Иону старца топозерскаго соединив к себе привлече, сим всем оныи Илия Алексеев, начало полагаше прощение чини, сказоваше им своя ереси оставляя. А прочим кто его спросит, чего де ради вы Илия Алексеевич до сего времене в неправости пребывали; тем [он] оное похваляя, яко свято и праведно, сказоваше: и ныне не оставляем, а началы оным полагая глаголаше: ради примирительнаго соединения, а не ради оных вин оставления» [Сборник, лист 607]. до зде отец наших повествования.

На основании сего, и оказываются тыя их феодосиевых уверения в десяти статиях или показаниях находящияся, яко бы они титлу оную оставиша, ложными, притворными и никоего же вероятия недостойными. Понеже подобныя коварныя ухищрения еретиков над правоверными, и в древлеправославней церкви быша, от них же поне едино показати зде необленимся.

Пишется в житии преподобнаго Никиты Исповедника во время еретиков иконоборных бывшаго, сице [Минея четь, апрель, 3]: «Еретики [рече] злочестивии видевше отцев, яко изволяют умрети паче неже отступити своего правоверия, изобретоша на них прелесть сицеву: глаголюще: ничесоже инаго от вас требуем, точию с Феодотом патриархом в церкви приобщитися святыни. [ниже] и тако поидете свободно кождо в свой монастырь. [ниже] таковым еретическим лукавством прельщаеми бывше отцы, соизволяху некако во оно время, но послежде прелесть познавше вельми покаявшеся. [ниже] испущени же тогда бывше, изыде и Никита преподобныи, не ослушася в то время честныя дружины, и их же и веру правую и добротельное житие знаяше. и идоша убо вси купно, ко лжепатриарху оному. тойже да удобне уловит их к своему общению, веде их в некую молитвенницу иконами украшенную, того ради да отцы тии видяще иконы святыя мнят быти патриарху правоверна. Тамо Феодоту литоргисавшу, прияша причащение от руки его. Слышаху бо от уст его словеса таковая: Аще кто нечтит иконы святыя анафема да будет. Сие же той глаголя, не яко сам икону Спасителеву почитающи, но лицемерствующе пред ними, да не усомнятся общницы ему быти. Посем комуждо в свой монастырь отшедшу, преподобныи Никита сердечною уязвися жалостию о том, яко Феодоту лжепатриарху лицемерному лестьцу приобщися». до зде от жития преподобнаго Никиты.

А яко же тии иконоборцы, изъобретоша лукавую прелесть для приобщения к себе отцев тех, тако и сии феодосиевы питомницы, туюже прелесть употребиша привлекаху отец наших к соединению. И якоже паки зломудренный иконохульник Феодот лжепатриарх, отнюд неимяй мысли у себе еже бы ему покланятися иконам святым, украсил церквище свое иконами и таковая изърече словеса, но еже како бы точию прельстити преподобных подвижников онех в сообщение к себе. Тако тогда и феодосиевския наставники, аще и писаша ко отцем нашим писмы, и аще подписываху миротворныя бумаги, сообщением оставити четырелитерную титлу от почитания и прочая своя зломудрия, но лицемерно, лестно, и коварно точию како бы обманути отцев наших. понеже они тогда обещевахуся и вся своя ереси оставити, но точию словесы лицемерствующе, делом же и истинною ничтоже не оставиша. Якоже мы ныне видим: Старыя браки имеют у себе в полной законности, и торжищное брашно по прежнему, очистительными молитвами и вервицами хульствуют, тако и любимую свою титлу почитающе, законом своим наравне с богословным надъписанием содержит. Сим, оныя их десять статей об оставлении ими титлы написанныя, яко лицемерны и ложны въконец испровергаются. Такожде и Григорьева недобросовестное и изменническое о том свидетельство, всеясне изобличается.

6. Кроме вышеписаннаго, еще и в книге отеческих их завещаний в 30-й главе, ясно показуется что Пилатову титлу никогда они от почитания не оставляли. идеже тако пишут они: «Послание в Сибирь, 7312 года. Пункт 1. На крестах четверолитерная надписания оставляется примирения ради церковнаго». Зрите, примирения ради а не закона ради, а ельма тогда не смиришася то онна титла в своей силе и остася у них.

7. А потом уже вся своя ереси и зломудрия, всеобдержно утвердили и рукоприкладством скрепили. в той же книге отеческих завещании на конце 43 главы, приписано следующее: «В лето 7313. маия в 9 день. Сие писание у прежних отцов было, и мы сему последуем. не хотящих же последовати суду Божию оставляем». за тем следуют подписи. Сими показаниями яснея солнца всем зримо есть, что они феодосиевы никогда и не думали якоже прочия богопротивности своя тако и титлу Пилатову оставити и уничтожити. но точию яко же и вышереченнии иконоборцы, прельщающе от отец наших к сообщению своему привлекали а сами паки пребывали таковыми же. что подтвердят и дальнейшая понятия их.

8. К вящшему уверению, еще и сия свидетельства предъставити должни есмы, есть книга на вопросы поповцев, составленная ими [феодосиевцами] ответы, кая по видимости содержания ея относится ко времени 7320-м летам. в ней же обретается показание вин, препятствующих соединению их с новомонастырцами. во втором винословии сего показания, они всеобдержно и не обинуяся со свободною совестию, якоже им предал учитель их Феодосий, о той титле исповедуют. идеже сице пишут о том: «Неправое имеют [новопоморцы] мудрование о надписании, Пилатом положенном на первобытном кресте Господа нашего Исуса Христа. якобы оное надписание, не на славление Господа, но на хулу. и не Сына Божия, ниже Царя Славы исповедало, но проста человека».

9. И во втором показании, первым винословием, тожде о титле той умствующе тако пишут: «Что они [монастырцы] неправое мудрование имеют. и по писму Игнатия старца, о надписании положенном по повелению Пилатову на первобытном кресте Господа нашего Исуса Христа». до зде.

10. Подобно сему, и в вопросах к нашим предкам ими написанных, таковое же любочестие к латиноримской титле той изъявляют они. глаголюще сицевая: «Вопрос 6. Когда спросили мы вас о четырелитерном на кресте надписании, обретающемся за многия еще лета в латынстей церкви. и святии обличающе латынския ереси потонку, почто не обличили онное на крестах надписание: Вопрос 9. Андрей Дионисьевичь в четырелитерное надписание, Царь Славы Исус Христос оный нарек животворящии крест Христов, [ниже] и вы оное изречение за каковое признаете, за православное или еретическое». до зде.

Внимайте, аще бы тогда Илия Иванов и Илия Алексеевич и прочии, истинно и нелицемерно уничтожили бы титлы тыя, кому бы смеемо было после их с таковою настойчивостию паки за них выстаивати; Но понеже они въконец ведали что обещания оная теми предводителями, их писалися точию примирения ради, сиречь обмана ради ложно.

А что видимостию, кресты с надписанием титлы от поклонения они аще и оставиша, якоже Григорьев восхищается оным, но и сие нимало к истинному вероятию термина не имеет но таковая же обретается лесть, якоже и в вышереченных десятих их показаниях. ибо якоже паки лжепатриарх Феодот, без верования святым иконам, ставляше их невменися ему в правду. Тако и сии спряташа титлы не зазаревше им и от закона своего не изгладиша, и мудрования своего о них не измениша ничтоже им от спрятания онаго унее быти не может. По премудрому преподобнаго Максима Исповедника извещания [Минея четия, генваря, 21]: «Мы ручаемся за царя, что он уничтожит типос, есть ли только ты приимешь общение. Мы далеко еще отстоим друг от друга, отвечал преподобныи Максим. ибо кроме типоса есть еще определение о единой воле, соборно утверженное Сергием и Пирром. оно правда снята со стен церковных, но не изъято из сердец. пусть приимут [прибавил он] определения римскаго собора, осудившаго на основании правил церкви, все оныя нововведения, и тогда средостение ограды будет разрушено».

Посему тако и феодосиевы, аще кресты с титлами из своих молитвенниц и изнесоша, но понеже законная соборная православныя церкве определения неприяша, и предельно за свое заблуждение, по закону неисправишася, то и пользы себе от того ни мало не получиша и от церкви православныя никоегоже помилования или снизхождения за сие не суть достойни.

Но потребно есть нам рещи и о сем, ертицы монотелины аще еретическое свое о единой воле определение и истинно со стен церковных сняша, и тогда оправдания себе за сие неполучиша не подписавше православныя догматы. Феодосиевы же поборницы, и сего еще не сотвориша, не отставиша убо истинно вся с титлами оныя кресты от поклонения. но почитая предания первоначальнаго своего учителя Феодосия Васильевича, оставиша у себе для поклонения неколико тех с титлами крестов. в подтверждение же сего представляем следующее:

Живущии в Москве некто Крупкин, прослыша яко на Преображенском кладбище у феодосиевых, находится един крест с титлою в моленной. и возъиме о том желание уверитись лично, истинно ли тако есть; на второй недели великаго поста прошлаго 7397 лета. пойде туда к знаемому своему жившему тогда у попечителя их Кочегарова прежде бывшему нашему християнину, Лаврентию Васильевичу владимирскому. [ныне уже умершему] спрашивая у него где находятся у них с титлою крест; той же сказа ему о том, Крупкин же просит показати ему его. той же с любовию поем его ведяше и в ильиньскую полату именуемую детскую, и ту показа ему той крест в иконостасе против леваго крылоса стоящий. он же тщательно якоже подобает осмотрив его, совершенно удостоверися, и неколико постояху ту разсуждающе с оным Лаврентием Васильевичем, что не много у них таковых с титлами крестов, и тако разыдошася. Потом после уже пасхи, для удостоверения противников истине а онех феодосиевых заступников, той же Крупкин взяв с собою с братьскаго двора уставщика Никиту Васильева, паки поеха на Преображенское, и показа ему той крест и он видя на нем титлы и уверися.

А что вы истинны сея наши изменщики не скорчемствовали, и нерекли бы что де феодосиевцы и неведаша яко есть титла на кресте том, но случаино и по недосмотрению некако внесеся таковый. ни, не по недосмотрению, но всем им въконец известно о кресте том, ибо оныи Крупкин и раньше у многих спрашивая, и вси ведят что есть у них с титлами крест. И егда с Никитою Васильевым идяху из моленной, въстретясь с ними знаемый Никите их феодосиевский книжный, тому сказующе ходили де мы смотрети у вас крест с титлою, он же подтвердив рече: да у нас есть он, и тут то стоит. По сем паки той же Крупкин, некогда в разговоре со знаемым ему феодосивцем М. П. Сергиевым, сказа Аз де видел у вас в моленной крест с титлою. Той же рече ему: у нас еще и другой есть не с титлою, но с полным Пилатовым надписанием где же стоит таковый того не сказа. То что сих доводов яснейше; и что сих свидетельств истиннейше может быти; еже неуничтожиша видимостию, и не премениша мудрования своего латиноримския титлы, но обманывающе православных християн лицемерно на показание точию притворно спряташа оныя с титлами кресты.

Каковое же паки безчестное намерение и совесть наших отщепенцев феодосиевых же учеником рачители; таковыя явныя их заблуждения и коварныя поступки, скрывают защищают и оправдывают, глаголюще они де [феодосиевы] титлы своя оставиша. «Но да не безстудствуют прочее, ниже любоприпираются ко иже солнца явленнейшим вещем». Мы же показавше титлы тоя сущность, за исповедание ею Сына Божия простым человеком, имеющею ересь горши Павла Самосатскаго, той бо точию по существу непризнаваше Христа Сыном Божиим, но отнюд не хуляше его но признаваше и великаго святостию и богоугодным житием человека, и за такое богоугодное житие сподобльшася Сыном Божиим быти блядословящ. Титла же оная кроме еже простым человеком якоже и Самосатский Христа показует, но еще и похищником царства и кесарю противником хулою облагает. явихом же и сие, что феодосиевы в законе своем и вещию, обдержно титлу тую содержат. Того ради кроме всякаго прекословия, верно слово и всякаго приятия достойно, и оказашася они причастники и возобновители ереси Павла Самосатскаго. за что по священным и обдержным правилам, совершенно и не изъято подлежат перваго чина определению, якоже и всецерковныи поповскии собор правильно судил о них. сим и заключаем статию ону.