Челобитная Александра, епископа Вятскаго, к царю, Алексею Михайловичу.

[Из сборника инока Авраамия: Христианоопасный Щит веры (глава 20)].

 

Статия 1. Христолюбивый государь царь и великий князь Алексей Михайлович, всеа великия и малыя и белыя Росии самодержец, милостивно послушай и своего государева богомольца, не свою честь гоняща, но о святей соборной и апостольской церкви боляща, ко утвержению царствия твоего: в великий бо страх приведены. Преосвященный Паисия, митро­полит Газский, сице глаголет, яко вельми согрешают архиереи, что не извещают тебе великому государю о вдовстве матери твоея, святыя соборныя и апостольския церкви, чрез правила святых апостол и святых отец, боле бо трех месяц вдовствовати правила не повелевают [На поле: 4 Соб. прав. 25], нерадящих же о красоте ея запрещают и отлучают, отрекшагося убо архиерейскаго престола с клят­вою правдоглаголивый архиерей Паисия жива погребенна нарицает, нас же архиереов вправдо порицает сице глаголя: пастыри, для какой притчи небрежете престола патриаршескаго, которая есть общая паства? Оберегайтеся, чтобы та ваша неприлежность Бога не возбудила до отмщения и яро­сти. Серп бо вижу, рече Захария, летающь двадесять локоть длиною, а шириною десять [Захар., гл. 5].

Статия 2. Аще бо, рече, бы (вы) архиереи о обирании и поставлении патриаршеском, кто же иной порадеет чинити, что можете чинити? ваше то дело и ваше радение. Для чего вы друг другу тягости не носите по апостолу [к Гал. 213], ни обша воспомагаете себе, презревше заповедь Божию: возлюбиши ближняго своего яко самого себе, еже есть всех християн? И дивяся преосвященный Паисия рече: како единоя есте веры не милуете свой народ и сродники своя? и есть ли бы (вы) сами о своем добре и о своей чести нерадеете, кто иной странной будет радеть? Сего ради и мы молим тебе, христолюбиваго государя царя, да по заповеди благочестиваго Іустинияна царя [Нов. зап. гл. 28 и 29] избрание сотвориши в трех лицех, блюдый себе, да не нечто праведно постраждеши, по 38 главе того же благочестиваго Іустинияна царя. Вправду убо, благочестивый царю, преосвященнаго Паисия митрополита праведное запрещение, да не нечто от Бога постраждем, нерадяще о сих.

Статия 3. Сего ради священный он муж и тебе, великому государю, не стыдяся праведно рек, яко аще ты, великий государь, матерь твою святую со­борную и апостольскую церковь, для достойныя притчи и обычаем строителским и для причин, которыя нам неведомы, о пастве царствующаго града не промышляет(ш)ь, великим грехом, рече, не согрешает(ш)ь, от меншаго же греха неси свободен, потому-что многия соблажняются и почитают то дело в леность, что ты, великий, государь, нерадеешь и прилежности о том не имеешь, и моля тебе, великаго государя, твое, благочестивый царю, прилежное попечение о церкви, потому, яко не укрепляются дела царския, донележе не укрепятся дела матере твоея, святыя соборныя и апостольския церкви: мати бо твоя, рече, благочестивый царю, церкви Божия, и якоже должен еси почитати матерь свою, которая тебя родила, много паче должен еси лю­бити и почитати духовную твою матерь, святую со­борную и апостольскую церковь, которая тебя по­родила во святей купели святаго крещения и ко­торая тебя помазала на царство маслом и хризмою радости.

Статия 4. Но, о благочестивый царю, священнаго онаго мужа неухищренная беседа, паче же молба, и мы, твои государевы богомолцы, молим, да действенна будет. Воистинну убо никоторое твое цар­ское дело крепости имети не будет, донележе мати твоя, святая соборная и апостольская церковь, от смущения не свободится и благ пастырь той даруется могий праве промышляти о красоте ея и благ мир той даровати. Отнележебо он, Никон, начат вводити смущения догматы, не имамы чисты молитвы к Богу. Но по известном его отвержении и воистинну странном и нелепотном патриаршескаго престола с клятвою, преосвященному Паисию митрополиту Газскому дерзостно пишет сице: Никон Божиею милостию патриарх, в Духе Святем преосвященному митрополиту Паисию ми­лости благословения. Облак свидетелей имать он, Никон, отрицанию своему, о благочестивый царю. Почто озирается вспять? Али не ползова его Христос, рекий: никтоже возлож руку свою на рало и зря вспять, управлен есть во царствие Божие?

Статия 5. Жена убо Лотова, обратившися вспять, бысть столп слан. И не дивно: не сохранши бо заповедь, пострада в правду. Несущее бо Никон глаголет, патриарха себе нарицая, и прост чернец сущему архиерею благословения дая. Не совершив бо службы из церкви изшел есть, и без лепоты престол оставль гневом и яростию, презрев Божий страх. Прощения бо, пад, должен есть просити таковаго дерзновения и ругательства и многих соблазн. И где бо обрести имать в писании таков образ оставления престола? Дерзость бо онаго и безсоветия обычай правилно сугубо страдати его устроит. Іоанн бо мних и молчалник и сущия с ним черноризцы Святыя Горы яве показати имут, сице рекуща [Книга Кор. вопр. 12, лист 581]: своею волею оставльшу кому святительство, аще подобает глаголати: Благословен Бог наш, и: Боже ущедри ны и благослови ны, и: Христос истинный Бог наш, или кадити кадилницею, не сущу иному презвитеру, или входити, или причащатися внутрь святаго олтаря? И блажен­ный патриарх Николае со всеми святаго собора отцы сице рекоша: никако не достоит; на местех бо от простых людей поставлен будет.

Статия 6. Да аще Благословен Бог наш, и: Боже ущедри ны и благослови ны, и: Христос истинный Бог наш — глаголати не подобает оставльшему волею святительство, и кадити кадилницею, не сущу иному презвитеру: како убо он, Никон, паки архиерейская действует и рукопола­гает, противяся правилу 28 святых апостол? Изверженому по праведней вине о согрешении явленне, и паки дерзнувшу прикоснутися преже врученныя ему службы, яко гнил уд от церкви отсещи повелевают. Не явленно ли согрешение имать Никон, не совершив божественныя службы, безчинно из церкви изшед и безчестно святительский сан с себе сверже пред многими свидетели? И не клевещущии нань быша, но сам, свою совесть познав, с клятвою престола отвержеся, недостойна себе судив святительския власти и чести. Ныне дерзая пишет, аки и не осудим и ни правил святых апостол и святых отец на себя имея, будто для непрямыя ярости царевы престол оставил, послушав евангельскаго гласа: егда гонят вы из града, бегайте.

Статия 7. Но и гонитель слышишися, о христо­любивый царю, от буяго сего. Никто весть, яко тобою, великим государем, изгнан Никон; и откуду явленно имать быти гонение твое государево к Никону? Пишет бо, яко святительский суд ты, великий государь, у него похитил, и судят священной чин мирския твои государевы царевы люди, а тот де суд приняла святая мати церковь, владении де о суде церковнем против предания святых апостол и святых отец седми вселенских соборов, и иных милостивнейших царей; и то де владение приняло твое царское величество, ево самово судишь и преосвященныя митрополиты, и архиепископы и епископы, архимариты и игумены, и монастыри, освященныя старцы, и весь церков­ный чин. Но о сих, христолюбивый царю, от него, Никона, при отречении престола с клятвою во церкви несть глаголано. Или откуду явленно, яко того ради он, Никон, оставил престол? И ныне дерзая пишет к странному архиерею, гонителя и хишника тя нарицая, презрев апостольское пра­вило 84, сице глаголющее: аще кто досадит царю или князю без правды, аще епископ или причетник, извержется. Царя бо верховный апостол Петр чтити повелевает; сице рече: князю людей своих да не речеши зла [Посл. Петр. зач. 58 и 43, и 282]. И молитися повелевает за царя и за вся сущая в величестве; досаждати убо царю или князю всем возбранено есть.

Статия 8. И паки Никон пишет, яко ты, великий государь, учинил пир болшой для некотораго царя Грузинскаго, на котораго пришествия к твоему царскому величеству един некто из велможных, твой государев, ударил ево патриаршева стряпчева, а как де сказался патриаршим стряпчим и что де бить ево не годитца, и тот де твой государев человек болшой и болши придал ударов, и слова де безчестныя говорил: чего велми почитаешь патриарха? Не велика досада, благо­честивый царю, и немного безчестных слов болезненно Никону, и нищу сущу и ни благорородием от детства цветущу, но и зело от худейших быв, обаче власть и честь приим от тебе, великого государя, и в самовластии быв, не терпит и от болярина к стряпчему своему безчестия и сего, что болярин рек стряпчему ево: для чего вельми почитаешь? И сих ради он, Никон, к твоему царскому величеству своею рукою писал, чтоб суд и управу об том деле ты, великий го­сударь, учинил, и ты де, великий государь рек ся с ним повидать, и того не сделал, и болшим гневом разсердився, июля в 8 день Богородице Казанской и праздновать не пришел, також и в 10 день на праздник ризы Господни обычно приити не изволил, и в келью де прислал из своих князя одного со многими непрямыми словесы, и он де ту похвалу и слышав, здумал место дать гневу.

Статия 9. Многим мнится, благочестивый царю, яко сего ради кручинен был Никон, что на пир не зван. Не сего ли ради и дерзостно послал стряпчево своево безобразно в твою цар­скую полату чрез волю твою государеву, где ему и быть не годится? Вправду твоим государевым болярином отослал(н) со гневом не имый одеяния брачна и прекословив много. А что волю твою государеву болярин твой государев совершил, неимущаго одежды брачны из полаты твоея государевы выслал, аще и соскорбно, бояся от тебе, великаго государя, гневу: не в лепоту тут суд. Аще к смирению приводя его, Никона, на оба торжества ты, великий государь, празновать не пришел: в лепоту сих ради смиритися Никону, и болярину мир и благословение подати, а не престол оставити с клятвою, еще же и безлепотно. А что он пишет о князе, которой прислан от тебя, великаго государя, к нему в келью, будто со многими непрямыми словесы и безчестием: и в сих совесть его весть, аще не лжа. Во многих бо бывый неверен, в малых кто веру имет ему? Яве бо показа свою лжю, паче же хулу, рек при отвержении бо престола с клятвою, будто ты, великий государь, в соборную церковь к нему, Никону, прислал некотораго велможнаго с теми же позорными словесы, как и прежде.

Статия 10. Оле дерзости, благочестивый царю, на твое царское величество Никона! И лжа сия известнейша всему священному собору и всему причту и множеству сущим в церкви народи(а), яко в соборную и апостольскую церковь прислан от тебя, великаго государя, твой государев болярин князь Алексей Никитич Трубецкой, а не без имени некто, и не с позорными словами, но с молением от тебя, великаго государя, и с любочестными словами, якоже лепо есть священни­ческому чину. И аще сих ради Никон, поючи святаго Давыд песнь: отдален и учинен есть бегая, розжился в пустынях, ожидаючи Бога Спа­сителя? Оле буесть! Нареченный от него Новый Іеросалим воистинну реку Никаполим, рекше смятение градовом. Ныне и сам пишет, что бегая розжился в пустынях. Пустыня ли? И вправду: яко пусть от благих, исполненый злоб. Вправду рек Никон, что отдален нелепотнаго ради отхождения святительскаго престола с клятвою, и правильне учинен чужд святительския власти и чести, и бегая от благих нравов; но не в пустынях розжился вещми века сего, властне взят патриаршескаго дому казну и других епископий, и всего царствующего града Москвы и  других градов выморных домов животы: едва и твоей государеве цареве казне не коснулся ли. И в сих тому трудившуся, мзду трудов своих восприял есть, и не диво рек, яко розжился в пустынях: великим бо обозом от царствующаго града изыде в свой Новой Іеросалим и урядством дивным, и ни неволею гоним, разоряя бо и грабя пустынныя места, казну тех к себе присовокупил. И в правду рек, яко розжился в пустынях.

Статия 11. О сих воистинну дивимся, благочестивый царю, яко будучи он, Никон, во своем Іеросалиме год и два месяца, недостаток харчев терпел, и от скудости в другий свой монастырь и в третий отшед, которой на море. Но и в ску­дости до трех сот подвод запасы имел, и есть ли бы свидетелствовать истинными свидетелствы путь оного, имже идяше, подобно рещи, яко огнь хождение того, убогих домы пожигая граблением. И егда тому жившу в пристанищи год, пишет, что ты, великий государь, в то время собрал разныя власти, зде живущия, и ничего свыше написан­ных от его отходов им не сказал, но то учинил, чтобы лживыя свидетелства написаны были на него, Никона, от некоторых людей, в твоих царских полатах живущих; а иных де ты, великий государь, мучителствы стражаючи, приказал говорить, что он, Никон, доброволно оставил престол; архиереом и прочим властем будто ты, великий государь, дары дал, что руки свои подпи­сали, чтобы впредь ему патриархом не быть, и будто мы, твои государевы богомолцы, даров ради учинилися тебе, великому государю, послушны: не изыскав противной притчи и не роспрося ответу, для чего он отъехал, суд чинили не прямой, по твоему государеву указу, и все руки свои против ево подписали, не по преданно святых апостол и святых отец, приводя правило одно 16 второперваго собора.

Статия 12. Да аще, благочестивый царю, от тебе (о тебе) равноапостолном помазаннике Божии и о всем освященном соборе таковыя хулы дерзает Никон произносити, явно имы(й) отречение пре­стола с клятвою и безлепотно, не суд убо чинити благоволившу ти, великому государю, о нем и ни вин искати, чтобы ему патриархом не быть, но без зависти и рвения и кроме тщетныя лсти распрашивали властей, которыя прилучилися с ним, Никоном, в службе в то время, и свидетельствовали о нем Никоне праведно, бояся праведнаго Божия суда, и ни по страсти и гневу, ни даров ради: святители убо известили по архиерейству, сице и архимариты и игумены, протопопы и попы и диаконы сказали по священству, и весь причет по Христове евангелской непорочной заповеди ска­зали, что он, Никон, самоволне отречеся пре­стола и власти с клятвою, и не пастырь, но па­сомая овца звашеся, и не совершив божественныя службы безчинно из церкви изыде. Свидетелствует бо о сих писмо их за руками, и всего священнаго собора соборное деяние за архиерейскими руками и еромонашескими, в немже не одно 16 правило второперваго собора, и 9 правило третияго вселенскаго собора, 18 правило Сардикийскаго собора, и святых (апостол?) правило 62, облак же свидетельств и правил преподобнаго Никона, инока Черныя горы, ис правил Матфеевых, из других божественных писаний их. Како лжущи пишет Никон, яко суд о нем чинили не прямой по одному правилу второперваго собора, и даров ради от тебе, великаго государя, учинились послушны и руки свои подписали?

Статия 13. Но и 16 правило второперваго собора  нерадившаго епископа о своем стаде, ни болезни ради, ни царевым повелением, ни патриарховым одержима, вяшще 6 месяц от своея церкви отшедша, епископскаго сана и чести чюждь пра­ведно сотворити повелевает. И зри зде правилнаго суда: неотрекшагося своея паствы сице осу­ди, но нерадившаго о своем стаде. Никон же отрекся с клятвою, и безчинно пишет, что его отъезд не таков видится ему быти по евангельским писмам, так как и сам Христос от ярости Иродовы и жидовския многажды охраняючися отходил. Но и подражатель Христов наречеся суесловесный сей! И кого убо Ирода нарек, или жидов буявый! И от того (от кого) с Москвы побежал, подражая Христа? Како не заградятся она хулная уста и не вместная глаголющая! Не великим бо обозом Спаситель наш Владыка Христос бегал от Ирода во Египет, да не убиен будет; но смотрения таинство совершая, пречистою Девою носим, единому бывшу хранителю Іосифу обручнику, и тому нищу. И нашего ради спасения нищ на земли был, не имея где главы подклонити, и ни о собрании богатства пеклся, ни многими вещми, но и уча ученики своя, глаголя: блажени нищии духом, яко тех есть царство небесное [Мф. зач. 10]. И свидетельствуя о себе, рече: лисы язвини имут и птицы небесныя гнезда, Сын же человеческий не имать где главы подклонити.

Статия 14. Но и от зависти жидовския Хри­стос в пустыню отходил един со ученики своими, немного с собою запасов имел, пять бо точию хлебов и две рыбы но и сия народом предложити повеле: и ядоша вси и насытишася, взяша из­бытки укрух 12 коша исполнь; ядущих же бе мужей яко пять тысящ, разве жен и детей [Мк. зач. 32]. И паки седмию хлебы и малыми рыбицами четыре тысящи насыти и избытки укрух седмь кош взяша. Но глаголяй, яко подражая Христа, со многим богатством из царствующаго града изыде. Апостол же Павел от июдей, убити его ходящих, нощию в кошнице свешен по стене, немного с собою взят запасов и вещей [зач. 28 и 19]. Сице и Петр ангелом изведен из темницы, а не ушел, и уже железныя на руку имый [зач. 14]. Архиереи же и сущая с ними ересь саддукейская исполнишася зависти и возложиша руки своя на апостолы, и послаша их в со­блюдение общее, рекше в темницу; но ангел Го­сподень нощию отверзе двери темницы и изведе их. И зри, како апостоли из темницы изводими бяху от святых ангел, а не уходили. Но и в сих солгал Никон: да ни в темнице не сидел и оков железных на руку и на ногах не имел, и в кошнице по стене не свешен, но ум погубя оставил престол и никим гоним, гордости ради и гнева, остави власть, многа богатства взем, отъиде, всуе воистинну рек: подобяся апостолом.

Статия 15. Но и Григорий Богослов самоволно оставль престол смирения ради, а никим гоним; в негоже место Нектарий скоро поставлен бысть. Афанасий же Великий от ариан 6 лет по Божию извещению у девицы крыяшеся еретик ради; но не отвержеся престола с клятвою, остави точию престол, повинуся  воли Божии, и скрыся, да не буести ради еретик убиен будет. Власти ж собранныя от тебе, великаго государя, свидетелствующия ево Никоново отвержение патриаршескаго престола с клятвою, аще и болши 6 месяц про­жили на Москве, не суть достойны правилнаго осуждения [Карфаг. соб. прав. 94]: зане рождьшиися во благочестии и в вере воспитани бывше цари руку помощи даяти церквам должни суть, благочестивых бо царей пособия и помощи церкви всегда требует. Благочестивии же цари должни суть таковая подавати им, яко вере суще поборницы, да не от еретик или от безчинных человек преобидимы бывают: все бо седмь вселенстии собори благочестивыми цари собрани быша, святии же и богоноснии отцы христолюбивым царем благопослушны быша, и волю тех Божию волю непщеваша. Всуе бо рек Ни­кон, что не надобно было слушать архиереом тебе, великаго государя царя, и не приходити без его повеления.

Статия 16. Но все рек Никон, возвысився паче меры. В поставлении бо святителства во святой соборной и апостольской церкви якова исповедь чтена пред тобою, великим государем, и пред всем освященным собором и пред всем миром от него, Никона, самого, сицева и от нас архиереов в поставлении святительства. И аще бы ты, великий государь, противно что церкви сотворил: влепоту бы не слушати и тебе, великаго го­сударя царя, аще бы и смерию претил. На (но) твое, великаго христолюбиваго государя царя, о святой со­борной и апостольской церкви, матери твоей, праведно и правилно попечение: сего ради и всем нам нужно, да не вдовствует мати наша святая церкви; боле бо триех месяцех вдовствовати той правила не повелевают. И како убо преслушны явимся, о благо­честивый царю, о нихже и молитися должни есмы, зане в зазоре есмы правилно от странных архиереов. Не мы бо воистинну от него отступихом, но он нас оставил, и молим со слезами безчинно отвержеся престола и власти с клятвою. Всуе бо поминает правило второперваго собора 13, 14, 15: праведно бо того же святаго собора 19 пра­вило епископскаго сана и чести чюжа его устраяет.

Статия 17. Явлена бо вина Никонова всем, безчинное его отвержение его престола с клятвою, и всему росийскому государству, паче же и самой той соборной и апостольской церкви крайне безчестие, яко и не совершив божественныя службы, не проводив обычно ризы Господни, безчинно из церкви изшед. Где бо в писании таково ругателство от православных архиереов обрести воз­можно? В правду своя ему сеть, в нейже и увязе, и ров, егоже сам себе ископа. И туне молвил он, Никон, яко без его воли мы архиереи тебя, великого государя, слушая, в царствующий град собралися. Не послушанию(е) точию мы, твои госуда­ревы богомолцы, тебе, великому государю, должны творити; но и молим тя, равноапостольнаго госу­даря, и со слезами просим, да упразднится буесть таковая и безчинна детель; томимый гневом туне, исполненный воистинну неправды  и лсти, да предан будет под крепкия началы в пречестную которую любо лавру; трем же монастырем строи­тель отнюдь да не будет на пагубу самому тому и другим многим, но в молчании по своему обещанию да спасет свою душу, в твоей же, вели­каго государя, державе пакости да не дает и обид многим да не творит: меч бо обоюду остр своя ему воля. Аще обрящем благодать пред тобою, великим государем, не презри молбы твоих государевых богомолцов, да возмется нечестивый сей от среды нашея, да Божий праведный гнев не поститнет нас и вправду постраждем, не пекущеся о благих. Благопослушливу же ти бывшу, государю, и делом сотворшу, о нихже тя молим, державу царствия твоего исполниши благих, и Бога милостива ко всем нам сотвориши, и самого себе радостна узриши.

Статия 18. Слезно, христолюбивый царю, изгнан насильством и чрез ум пишется Никон и будто для исповедания соборной церкви и для самой его неправды, неправду поносити понужден, делатель воистинну неправды и преисполнен всякия лжи и лсти. Приводил правило 19 Сардийскаго собору, будто для обид в московских своих паствах живет; и паки пишет, яко ныне в великое говение слышав от тебе, великаго государя, жестокую грозу чрез околничего твоего государева Иродиона Матвеевича Стрешнева, что ты, великий государь, буести его не хощешь болши терпети. Праведно воистинну то твое государево слово, и матери твоей, святой соборной и апостольской церкви, зело благопотребно и ко утвержению царствия твоего, аще делом показати имаши. Но зри, христолюбивый государю, ругателство оного: пишет, будто слово твое государево показалося ему великая гроза; обаче убо яве говорит, что пред тобою, великим государем, никакой вины не знает, опроче того, что пишет и говорит постерегаючи неправды твоея, и что де ты, великий государь, святыя Божия мона­стыри до болшаго убожества привел и церкви Божия силною своею рукою разорил, разсердився на него, и без его благословения от святых церк­вей и монастырей животы святыя отнимаешь, и без суда и повеления архиерейскаго под власть свою понуждаешь. Правда ли в сих, христолюбивый царю, глаголемая тем? Аще ли ни, воистинну руга­телство.

Статия 19. И паки пишет Никон, что епи­скопы и архимариты и игумены, без архиерейскаго обрания, по твоему государеву повелению и по расмотрению поставляются и посылаются, и ево-де самого и весь пресвященный соборъ некия люди судят, а называется-де тот суд монастырской приказ и который-де он, Никон, вяжет, ты, великий государь, тех увольняешь и ни во что связку и проклятие его почитаешь и сам с ними соеди­нен на молитву приходишь, будто преступаючи апостольскую 10 и 11 заповедь. Десятое же пра­вило святых апостол молящагося со отлученными от истинных архиереов вправду отлучает; но он, отвергийся и безчинно престола с клятвою, несть архиерей. Сице и 11-е правило святых апо­стол молящагося со изверженными по правилом соборне, а не страсти ради и гнева, сего от церкви и от сану извергает. Но зри, христолюбивый царю [Карф. прав. 12 и 20], правилнаго суда: епископьска (епископа) убо  всея области собором по нужде 12 епископы судити повелевает, презвитера ж шестма епископы да судят, и седмый свой да разсмотряют о нем; диакона же три епископы, четвертый свой. Но и тако по правилом судимым извергати от сана, или прокляти всея области собором подобает, Свидетелствует бо о сих вся седмь вселенстии собори и девять поместных, по различным временам собравшимся еретик ради.

Статия 20. На первом бо вселенском соборе 318 богоносных отец, Ария ради попа собравшиися, известнаго ради врага Божия и еретика, хуливша того на сына Божия, тварь глаголюща, а не Бога, и необратно того блядуща соборне клятве того предаша [в граногр. в царство Констян.]; единомудрствующа же со Арием нечестивого Македония, патриарха Царяграда, ху­ливша Святый Дух, тварь, а не Бога того нарицающа, 150 святии богоноснии отцы втораго вселенскаго соборне прокляша. Нестория же злочестиваго патриарха Царяграда и сущих с ним еретик, о вочеловечении Сына Божия блядущих, два бо сына глаголюща: единаго Бога от Отца рождена, иного от Марии Девы и по любви соеди­нившихся(шася) Богу Слову, сего ради и Богородицу Христородицу нарицающе, но сих врагов третияго вселенскаго собора [в царство Маркияна] двесте святии богоноснии отцы соборне клятве предаша необращаю­щихся от злобы. Но и 4-го вселенскаго собора 630 святии богоноснии отцы вепря дивияго, Диоскора патриарха Александрийскаго, и архимарита Евтиха и прочих с ними соборне прокляша, блядущих сице, яко по привидению плоть прия Гос­подь наш Ісус Христос. Пятаго же вселенскаго собора [в царство Иустиниана] святии богоноснии отцы 165 Оригена безбожнаго, Дидима и Евагрия, прия(трия) зле хулящих, соборне клятве предаша, 6-го же вселенскаго собора [в царство Констянт. брадатаго и сына его Устинияна] святии богоноснии отцы 170, на единоволников собравшеся, Сергия, и Пира, и Пав­ла, и Петра патриархов Константина града и Кирила патриарха Александрийскаго, и сущих с ними еретик и иконоборцев соборне прокляша, Гос­пода же нашего Ісуса Христа во едином составе исповедаше, во двою же естеству, божества ж и человечества. Седмаго же вселенскаго собора [в царство и матере его Ирины] святии богоноснии отцы 367 иконоборцев и християнохульников Льва Исаврянина, и единомысленников его Анастасия и Копронима, и по них бывших патриархов Констянтинаграда и сущих с ними еретик соборне клятве предаша.

Статия 21. Он убо, Никон, безчинно отвергийся престола с клятвою, откуду имать власть связати или решити? Не имый же власти вязати или решити, како имать несудимих правилне и необличенных собором проклинати? Кого бо от архиерей и святых отец единомудрствующих с собою не(?) имея Никон? Ей никого; но злобы ради самого себе убив, а ихже прокля без ума, сих вправду венча и от Бога благодати сподоби. Оружие бо извлече Никон, по пророку [Пс. 36], состреляти убогих от злобы и нищих от всякия не­правды, заклати хотя правыя сердцем; но оружие его внидет в сердце и лук его в правду сокрушися. Хулная же вещая на тебе, великаго го­сударя, неопасива уста имея и ясно показуя и всем свою злобу разорителя святых Божиих монасты­рей и церквей, и тебе, великаго государя, нарицая светло, являя кротость и беззлобие твое госу­дарево. Вправду он, Никон, святыя Божия мона­стыри до болшаго убожества привел, строя свой Новый Іеросалим и другие  два монастыря, многим скорбь и безчисленную пакость содея; наре­ченный же его Новый Іеросалим противен древ­нему, о немже древле пророки проповедаша, и Сын Слово Божие, пресвятыма своима ногама ходя, освяти и безчисленными знамении и чюдесы онаго прослави, и в Нем волею благоволи о нашем спасении пострадати и пречистую свою кровь излияти, перваго же епископа Іякова брата Господня во Іеросалиме своима рукама освяти, и по воскресении своем божественным своим учеником и апостолом от Іеросалима отлучатися не повеле, дондеже облекутся силою свыше, и по вознесении своем на небеса к Богу и Отцу в день пятьдесятный низпослав Святаго и животворяшаго Духа во огненных языцех во Іеросалиме же, и на все­ленную проповедь от святых апостол от Іеросалима изыде: свидетелствует бо ясно пророк Исаия: яко от Сиона, рече, изыде закон и слово Господне от Иеросалима.

Статия 22. Аще бо во Іеросалиме возрастет от Духа Святаго вера и тамо первее распространися, везде в правоверных возрасте, а не приде; от Іеросалима изшедше учаху языки, но и паки возвращахуся от востоку и до полудне и от запада во Іеросалим апостоли, и тамо прибежище им бе; во Іеросалиме бо и гроб Господень и Пречистая Богородицы Девы Марии, житие и успение и гроб ея чудотворный на месте, нарицаемем Гепсинании, пребывает; но и в день воскресения на всяко лето преславно огнь с небеси сходя, на гробе Господни во Іеросалиме свещи вжигая православному патриарху с причтом поющим: Воскресение Твое, Христе Спасе, ангели поют на небесех. Воистинну благословен Господь от Сиона живый во Іеросалиме [Пс. 49]. И святый убо Захарий рече: обращуся и вселюся посреде Іеросалима. На Сион сниде Іоанн Дамаскин воспеть: радуйся Сионе святый, мати церквам, Божие жилище. В том бо Господь Бог тайну вечерю апостолом подаде, разумей же церковь, и нарече ю в жилище себе до века. Аще бо и чрез триста лет истинныя церкви во Іеросалиме не бе, одержания ради мучителей царей, до великаго царя Констянтина; но сих ради святыя места не погибоша. Пуста бо бысть церкви Іеросалимская за неистовство жидов; но благодати Божия не лишишася: от всея бо земли и моря преходят вси и благословение кипящее от Іеросалима взимают, о немже пишет Феодорит на псалом 101: трилюбезен бо есть нам Сион, аще и зело пуст бысть, любима же и камения разореная и персть раскопанная ратными: память бо сих любезна есть нас ради содеянных в нем великих таин и благодатей. Но скращу за умножение свидетельств: в Книге бо о вере, в первом слове, ясне узрит кто.

Статия 23. Откуду убо, благочестивый царю, таково дерзновение Никону, яко свое жилище новый Іеросалим нарече? Всяко бо возненавиде и не верова в Сионе бывшим тайнам постыдятся от Господа и яко трава от огня будет изсохши, по пророку: бо Аммос претит сице: люте хулящих(м) Сиона, и Давыд утвержает: да постыдятся и возвратятся во ад вси ненавидящии Сиона. Смеху же достойно, паче же и плачю: и Истру реку зваше Iордан. И сих ради не хотящих звати: Іеросалим, Іордан, многим скорбь сотвори; строящии же его обитель несказанны беды подъяша от приставник его. И вправду священный Паисия митрополит Газской его Никонов новый Іеросалим Никаполим нарече, сиречь: градовом смятение, убо по гречески ианикитас никос толкуется смятение, для ради греха и смуты, которая прилучилась в первом основании его. Никто же от отец ни от благочестивых царей смея которое жилище или град Іеросалим нарещи, точию окаянный Мамант еретик, иже и параклита себе именова и две жене, с нимаже блуд творяще с нимаже, Прискиллу и Максимиллу, пророчицы именоваше, градец же некий во Афригийстей области, емуже имя Пепузан, Іеросалимом нарицаше. Сему подобно сотвори Никон, о немже свидетельствует тойже священ­ный Паисия, глаголя сице: О, недостоинство! О, неизвыченная новость! Новый Іеросалимник, любитель новых речей муж! Не было пророчества о твоем непрямом Іеросалиме, о Никоне, ново писмо нарицаешь, з жиды единомудрствуя: жидове бо жалают и дожидаются тебе, что изыдет воплотитися и родитися новый месия в новом Іеросалиме. На удачю, не в твоем ли, о Никоне, антихристова будет родителница? Покинь, человече; не шути святыми делы, не играй речми бого­данными: един есть Іеросалим на земли, в немже и судити будет Христос вселенней вправду и воздаст комуждо по делом его, о немже Песнопевец вопия глаголет: в дому Давыдове страх велик, ту бо престолом поставленым судятся всяка племена земная и языцы. А вторый Іеросалим на небеси. Никто не вздумал, токмо Мантан и Никон; но не по достоинству. Блаженный Максим Грек глаголет в книзе своей: ни который град, рече, называй Іеросалимом, аще и всею вселенною обладает; един есть Іеросалим на земли и едина земля июдейская в нейже родися Христос, и во Іордани крестися, и на горе Фаворстей преобра­зился, и на Голгофе распят бысть и погребеся негде близ, и по воскресении со ученики своими 40 дней поживе и от горы Елеонския на небеса вознесеся.

Статия 24. Никон же пишет, что Крутицкого митрополита проклял для того, что он митрополит в неделю цветоносия, по обычаю в великой Росии, всел на жребя пред всем миром, и бедно себе вменив, рек: Крутицкой митрополит что Евза проклят, отческое ложе осквернил и отече­ской престол опозорил, безо всякаго сомневания всел на отеческом престоле со обижением отчим. А во святом Евангелии пишет, что один Хри­стос сидел и того апостолом деяти никогдаже не приказал. Но всуе рек суемудренный; забы пресвятый Спасов глагол: веруяй в Мя, дела, яже Аз творю, и той сотворит и болше сих сотворит. Да аще в преестественных божественным своим учеником и апостолом власть даде, еже бо болящая исцеляти, прокаженныя очищати, мертвыя воскрешати, бесы изгоняти, смиренное вхождение во Іеросалим на жребяти осли Господа нашего Ісуса Христа кто возбрани от святых апостол и святых отец, да не обновится таинство сие на славу пресвятому имени Его? Но аще Христос един на жребяти седел и того апостолом делать никогдаже не приказал: нелепо бяше, по его мудрованию, и ему самому действовати вайя, еще и не отрекшемуся безчинно архиерейскаго престола с клятвою, зане апостольский и он был наместник, аще и первый бысть епископ всего государства росийскаго: первый бо епископ не началник епископом ни крайний святитель, но епископ перваго седалища наречется, рекшаго (рекше) царствующаго многонароднаго града; святительский бо сан един есть и тажде (тойжде) на всех. Не наре­чется сей убо совершен, ин же не совершен святитель, но вси равни святители и вси епископи, якоже и благодать Святаго Духа равно приемше [прав. Карф. соб. 39]. В правду своя ему хула на свою ему главу да обратится. И второе сам себя прокля, отрицаяся престола, и действа ради вайя гневом томим. Не имый власти ничтоже, ради известнаго отречения проста чернец, хапает яко зверь вне ума быв. Еще бо истиннаго архиерея, власть архи­ерейскую имущаго и священства благодать, проклинает, играя, досадити хотя. Но несть се игра по мнению суемудреннаго. Воистинну свой ему меч его самого, гневом напыщенное, сердце пройдет. И не туне вправду проклят первее самем собою, отрицался престола, не хотя пастырь быти, но окрастованную овцу себе нарицаше; второе своим ему судом, имже без вины тщих осудил: зане и сам был митрополит в Нове-граде, вайя действовал. Аще бо, по того мудрованию, ихже той (прокля), прокляти быша: и в других градех действующая вайя архиереи клятвы не отбегоша, и вси сообщающиися им.

Статия 25. Но несть тако, благочестивый царю, якоже он, Никон суемудреный, смысли, учим воистинну древним человекоубийцею дияволом и с ним советуя всегда реях, ко отчаянию привести тщася и всех погубити хотя. Забы пресвятый Спасов глагол: мир Мой оставляю вам и мир Мой даю вам. Но несть сей сын мира, но древняго злодея сын, ищущаго всех поглотити; гнилая воистинну глава, но не церковнаго телесе, своим ему последующа, мудрованию его, прокаженны вся имея уды и чюж быв благодати священства, нелепотнаго ради отвержения престола с клятвою. Вне бо ума быв, сущей главе церковнаго телесе досаждает, истинныя архиереи сыны себе нарицает, недостоин воистинну и прага церковнаго, зане чрез правила святых постол и святых отец еще в мирских священство прият, не к церкве бо и престолу поставлен, но на дворянской двор в крестовыя попы, оболгав архиерея, мира же отвергийся не любве ради Христовы, ниже смирения ради, но внешнюю честь и славу гоня, некоему рекшу к нему, яко велик имать быть, аще пострижется, не с волею же подружии своея, но и кленущии его, оставляю (оставль ю) любоначалия ради, и отлучися от нея чрез правило святых апостол и святых отец. В правиле пишет сице [Гангрскаго прав. 9]: аще кто девствует или воздержится, мерзок творя брак и яко гнусно отшед, а не доброты ради и святаго девственнаго пребывания, да будет проклят [Кор. 146]. Да аще убо проклинает благоверия ради отшедших, еже есть и почествовати (иночествовати), то колми паче богатства ради и чести. И святых апостол правило 15-е сице глаголет: аще презвитер или диякон помощницу свою изженет, да отлучится; аще же не введет ю паки, да извержется. Богат­ства же ради и чести болшия жены своя пущающа не точию отъяти сан божественное писание велит от них, но и отнюд прокляти и от святаго общения отлучити. Но веждь, христолюбивый царю, яко Никон не в сих точию увязе, но и сугубо обруга себе сам. Еще бо (бе) в царствующем граде Москве белцем, а в священноиноческую благословенную грамоту взял, оболгав преосвященнаго митрополита Антония (Афония) Новгородскаго, и Никона себе нарек преже пострижения своею во­лею; и едучи во Анзерскую пустыню, на  Вологде в паперте церковней Илинским игуменом Павлом пострижен, а не в церкви, приедучи в пу­стыню, абие священноиноческая действовал и под началом не бывал. Аще всю жизнь ево кто известно ведал и преже прия чести и власти, вправду бы рек, яко на праг церковный несть достоин взыти.

Статия 26. Преосвященный же Питирим митрополит Сарский и Подонский, аще и тремя епископиями владеет, но не похити других престолы: свое ему звание Крутицкий митрополит, а не дру­гих епископий. По отречении бо его, Никоновы(е), престола с клятвою и по презрении молбы тебе, христолюбиваго государя цари, и триех архиереев и всего освященнаго собору и всего причта, последующу тому своей ему воли и юзою анафема(ы) себе связавшу, яко ни мыслити ему патриарху быти, и сице рекшу: да не уподоблюся псу, возвратившуся на своя  блевотины, и сице тому обругавшу царствующаго града престол и святителскую власть, яко ни божественныя службы совершив безчинно из церкви изшед, а никим гоним, обаче ты, христолюбивый государь царь, и в другий день паки молити того послал болярина своего государева,  князя Алексея Микитича  Трубецкова, якоже и в соборную церковь, к нему на подворье, сице и третицею того же болярина в Воскресенский монастырь посылал, но ярости и гнева исполненный трижды от тебе, христолюбиваго госу­даря царя, молбы не прием и третицею отвер­жения(жеся) ни мыслити хотя прияти престол: тогда, христолюбивый царю, волею твоего государевою и советом архиерей царствующаго града, святыя соборныя и апостольския церкви правление вверено бысть преосвященному Питириму митрополиту. Не властне же взять и Суздальския архиепископии правление, но твоею же волею государевою, окле­ветану бо сущу архиепископу и не приемлему грацкими жители. Не против же правилом содея. Во Антиохии Сирстей правило 18-е аще и чести епископския не отъемлет от таковых и служити не запрещает, но ожидати велит всея области епископ, да соборне управят о нем; стужающаго же другим епископиям, таковаго отлучити повелевает, хотя же, да причтен будет (к) презвитеры, равну честь прияти ему велит; аще же и противу ту сущим епископом молбу творити начнет, и от презвитерския чести да изринется и от церкви отлучен. Сих ради нужно, благочестивый царю, другаго архиепископа, или, донеже о нем собором управится, епископии той не без правления быти.

Статия 27. Всуе молвит Никон, что преосвя­щенный Питирим митрополит Сарский и Подонский отеческое ложе осквернил и отеческий пре­стол опозорил, без всякаго сомневания всел на отеческом престоле пред всем миром со обижением отчим. И преосвященный Питирим митрополит не опозорил патриаршескаго престо­ла, но он, Никон, патриаршеский престол обругал безлепотным отречением и к блевотине песье того приложи: да не возвращуся, рече, яко пес на своя блевотины. Обаче без всякаго сомневания паки алчет, престола и при(е)обидев правила святых апостол и святых отец, архиерейская властне действует, отчаявся. Преосвященный же Питирим митрополит не безлепотно что содея и ни своею волею честь прием, ниже чрез правила святых апостол и святых отец [прав. свв. апостол 18, в новой Кесар. прав. 14]: вси бо епископи суще по образу Господа нашего Ісуса Христа, глава(ы) церковнаго телеси, градстии бо епископи по образу суще 12 апостол вси, на нихже дуну Господь: приимите, рече, Дух Святый, и на нихже низпослав Пресвятый и Животворящий Дух во огненых языцех и глаголаше странными языки, имже и благодать Святаго Духа даяти вверено бысть, сельстии же бо епископи по образу суще седмидесяти апостол, имже есть дарованно благо­дати Духа Святаго раздаяние. Зри же, христолю­бивый царю, и равенства градских епископ: по образу бо суще двоюнадесяте апостол вси. Зри же и любомудрия апостол: яко егда Филипп, иже от седмидесяти диякон сый, шед в Самарию крести многи, и слышавше апостоли во Іеросалиме, послаша верховнейшаго Петра и Іоанна, и ти безпрекословно послушавше, вседше, полагаху руце на крестившихся, и приимаху Дух Святый. По ко­торому образу Никон, будучи на престоле, поработил свою братию архиереов, обругавше патриаршеский престол, и сыны себе нарицает и обычно архиерейская действующих проклинает, отъемля царствующаго града красоту и честь? И паки молвит, яко преосвященный Питирим митрополит Костянтинопольскаго патриарха паствы, рекше Киевская(ия). Изволившу ти государю и советом всех архиереов всеа Великия Росии Мефодия во Мстиславль и Оршу постави во епископы, не един же, но со другима трема архиереома; и во время поставления на первом месте седел по чину, сущим с ним архиереом степенми нижайшим: и се не чрез правила святых апостол и святых отец. По правилом бо два, или три епи­скопы поставляют епископа: и инде же пишет, яко епископ от всех епископ сущих во об­ласть(и) поставляется, аще ли ни, обаче от триех поставляется, прочим же писанием сложившимся, власть же митрополит. Аше бо и 6-е правило четвертаго вселенскаго собора коемуждо патриарху своими пределы обладати и никомуже их иныя области не возхищати, не бывшия прежде под ру­кою их изначала, се бо есть гордость мирския власти, и кроме бо воли старейшаго сущаго в митрополии епископа, рекше патриарха или митрополита, избрании 15 поставление не  бывает, не епископ бо, аще и поставлен будет вправду [2 всел. соб. прав.]; но мняйся старейшина быти с клятвою безчинно отвержеся престола, и на место от простых человек сам себе сведе, и без ответа должен есть и своих грех плакати [прав. 3 во Антиохии]. Аще бо по сим правилом и не убе(го)хом вины, но должни есмы прощения просити у Констянтинопольскаго патриарха, зане области его прежде сего та страна была; ныне же волею Божиею под рукою тебе, христолюбиваго государя нашего царя, и не чрез бо волю твою госуда­реву от нас содеянно что: с тобою, великим государем, к Константинопольскому патриарху и прощения просити должни есмы.

Статия 28. Во время бо великаго князя Василия Васильевича всеа Русии, по Фотии митрополите в царствующем граде Москве истиннаго пасты­ря не  бысть 18 лет. В та бо времена прииде Исидор митрополит к Москве, родом латынин, иже поставлен во Цареграде от патриарха Іосифа при царе Иване Калуяне. И быв Исидор на Москве четыре месяцы, и пойде на Флоренский собор и прелстившеся с патриархом Іосифом и со другими епископы златом, с ними ж и царь Иван Калуян сложися, точию блаженный Марко митрополит Ефесский и Григорий митрополит Иверский, Исакий митрополит Нитрийский, Софроний митрополит Гаский и сущии с ними, иже латинское злочестие обличаху и собор той проклятым называху, блаженный же Марко и чюдеса показа. Цареградский же патриарх Іосиф на том проклятом соборе умре, и погребен бысть в латинском костеле. Царь же Иван Калуян, идый от богомерзкаго собора, абие умре, егоже и земля трижды погребена изверже, и тело его от пес снедено бысть. Суемудреный же Исидор прииде к Москве, и начат поминати впервых папино имя. Великий же князь Василий Васильевич аще тогда и млад сый, но старых премудрых бяше разумен, Исидора в прелести суща, обличи его безумие и от митрополии изверже, посла в Чюдов монастырь: он же нощию избеже бездверием и со ученики своими, со Григорием и Афанасием. Евгений же папа постави в Царьград на патриаршество от латын именем Григория, пострижену браду и ус имуща. Сего ради великий князь Василей Василиевич, советовав со архиереи всеа Великия Росии, в митрополиты Резанскаго епископа Иону чудотворца своими русскими архиепископы и епи­скопы и всем священным собором в лето 695б-м году. В то убо время Исидоров ученик поставлен митрополитом в Киев от латынника, от Цареградскаго патриарха Григория, пострижену браду и ус имуща, отступника православныя веры. И егда прииде в Киев Григорий митрополит, раздиратель церковный, Исидоров ученик, нарицая себе митрополитом Киевским и всеа Русии: бла­женный же Іона митрополит Московский и всеа Русии писаше ко кралю не приимати Григория раздирателя церковнаго, и не послушан бысть в лета 6961 г. И оттоле раздрася Киевская митрополия с Московскою всеа Русии, еретик ради; а до того времени одна паства была. По Іоне же митрополите поставлен бысть в царствующем граде Москве в митрополиты Феодосий архиепископ Ростовский рукоположением своих русских архиепископов и еписпопов. По лете же едином Феодосий митрополит Московский и всеа Русии постави на Москве в митрополиты Іосафа в Кесарию Филиппову, в Іеросалим оттуду пришедша. И посему не нов обычай каковы любо ради вины поставляти епископы и в другия паствы.

Статия 29. А еже пишет Никон, что преосвя­щенный Питирим митрополит Сарский и Подонский во своей области как и поставлен не бывал; но преосвященный Питирим митрополит во своей области живет, как и прочия митрополиты, преже его бывшия. В лепоту Никон сказал: проходил ли он своея паствы грады, быв в митрополитах в Нове-граде, тако же и в патриархах своея области градов, уча ко благочестию? всяко не проходил, точию благочестивыя священноархимариты и игумены, и протопопы и попы гонил, а последующих воли его, мира сего мудрование имущих, любил, но и те(м) пакости многи творил. Прежде его бывшия патриархи в цар­ствующем граде Москве и преосвященныя митро­политы, архиепископы и епископы всеа великия Росии, аще и градов своея паствы по правилом не проходили, далняго ради разстояния или тяго­сти ради людей, но учители церковныя благочестивыя, архимариты и игумены, и протопопы и по­пы, во грады поставили, могущия ползовати верныя люди, от нихже мнози обретшеся от невеглас, и страдалцы, по писанному: хотящии благочестно жити о Христе Ісусе гоними будут [к Тимоф. 296]. Сих ради, благочестивый царю, и ныне тебе молим и припадая на коленн милости просим — даждь мир матери твоей, святей соборней и апостольстей церкви. Мир же устроити никако имаши, аще истинных архиереов искати не будеши, проходяших добродетель и в чернечестве свидетелствованных: егоже бо избрати волиши во архиереи, чтобы отнюдь не менши 15 лет в чернечестве был и в послушании у старца искусна быв и в чернечестве в добром свидетелствован. Царствующаго же града перваго седалища епископа, рекше патриарха, избрати благоволи свя­щенное писание протолковати могуща, и разумеюща все божестиенное писание со испытанием, и свя­щенная правила святых апостол и святых отец известно ведуща, в летех же совершенна суща и добродетелми и крайним смиренномудрием цветуща, своея же воли исправити догматы неимуща, но советом, а не дерзостию исправляюща, ревни­теля же о благочестии и не стыдящеся лиц, многолетна в чернечестве суща и в послушании, во еже обрезати своя ему воля крепко обучиша вся (обучившася). Красота бо старец со смиреномудрием вы­сокое житие и не своя воля. Архиерею бо советливу быти подобает и ничтож дерзостию творити, да не многим соблазн и претыкание будет: во мнозе бо совете спасение бывает, яко же богоотец и пророк царь Давыд вопия глаголет: в советех правых и сонме велия дела Господня, изыскана во всех волях его. И инде пишет: Коли велик еси, толико смиряй себе. И сицев христолюбец не менши 60 лет да будет, яко присно смерть пред очима имети будет, единомудрствуя, да благолепие церкви сохранит, и не бы  зданий каменных, ни о строении градов и сел, но о спасении душ человеческих промышляет. Но и о сих, христолюбивый царю, без гнева послушати благо­воли: в мор постригши(х)ся и под началом не бывших, ни своея воли до конца отринувших, во епископы поставити блюди себе. И их бо ради не мала беда бывает в церкви, еще и мудрствующих и свое хотение творящих. Но и о сих, христолюбивый царю, да (не) сумнишися, яко ску­дость архиерей имаши в державе царствия твоего. Всеа бо области собором без сомнения судится епископ, но не отвергийся престола с клятвою, якоже и Никон, власть архиерейскую имущаго обличена бывша о гресех или в ереси суща, се же без ответа сама о себе (самаго себе) связав, безсоветием держим, и дерзостныя ради и не соборны клятвы и действа сам себе убив. Како о том собор? Великий князь Василий Васильевич митро­полита Исидора от митрополии властне изверже и в Чюдов монастырь посла. Но и Зосима митро­полита, новгороцкия ереси суща, 6 архиереов руских со архимариты и игумены от сана извергоша и в него место поставиша Симона, игумена Троицкаго монастыря, в митрополиты. Сие же сотворше, не правилом противящеся, но да не вдовствует святая соборная и апостольская церковь. Аще бо и пространно царство благочестивыя дер­жавы, но не во мнозех градех епископи. Аще бы воля твоя, мошно бы быти, яко же и в прочих паствах, епископом. При благочестивых греческих царех точию уравнение было в церквах и в вотчинах: 300 церквей, 500 крестьян: без нужи епископия; а где малыя сборы от церквей, мощно дать и 400 церквей епископу. И по сей (?) в Ростовской и в Резанской епископиях мощно быти от них многим епископиям, такожде и в других паствах, где 1000 церквей и крестьян.

Статия 30. Пишет Никон, о благочестивый царю, что оных трех иноков проклял, будто они наругаются исповедания православныя веры, присланнаго ему от святейшаго Паисия Цареградскаго патриарха, и во святей де литургии в божественных таинствах недоверуют, и недружбы чинят против того, что он исправил думою и благословением святейших вселенских патриарх, а во благости де своей никогда же хотел ни прибавить, ни убавить от церкве, опроче правил святых апостол и святых отец, еже есть Кормчую книгу в тиснении печатном перебил и со старыми писмяными книгами отнюдь несходны устроил. Един выход был, а самый несогласный; и с которыя будто и печатаны, и с тою несходны. Такоже и прочия книги, при патриаршестве его тиснением печатным изданныя, мятежа и смущения исполнены, и 6 бо выходов Служебников мудрования его сами в себе согласия не имут. Но и Скрижаль духовная сама в себе несогласна: су­щества перебиты, а толкованием с нашими древни­ми печатными Служебниками во многих несходно. Да аще он Никон от Цареградцкаго патриарха Паисея вере научился и исправити потщася: царствующаго града Москвы благочестивии и христолюбивии цари и великия князи, и князи и боляря, и преже его бывшия 5 патриархов, и преосвященныя митрополиты и архиепископы и епископы, священноархимариты и игумены, протопопы, иереи и дияконы, и святых великих обителей и прочих монастырей мнихи, паче же и старцы и христолюбивый православный росийский народ ушто до него, Никона, не право веровали и безкровную жертву Господеви всегда приносили туне? Оле дерзости и безстудия! Не насытився, убивая верных душа, гла­голет, яко исправляя, и нехотящих последовати прелестному его мудрованию проклинает. Не ново убо начинающе святии они старцы, но древнее святых отец предание утвержающе, верных души от смущения свободити тшащеся. Глаголяй же, яко не хотел прибавить ни убавить, опроче правил святых апостол и святых вселенских соборов, приказывал: как ни есть, толко не по старому! О книгах убо, благочестивый царю, что извещал преосвященный Паисия тебе, благочестивый царю,  которыя от многих стран собраны заперты лежат безпожиточно, пишет Никон, что в его далния монастыри отвезены и не в царствующем граде Москве. Почто, христолюбивый царю, попусти сице, не реку, человеку, но зверю, и нимало добра смыслившу святей церкви и державе царствия твоего? Сих ради молим тя, христолюбивый царю, даждь пастыря церкви и благо­честивую державу царствия твоего от крайняго безчестия свободи и верныя люди от смущения избави, даждь мир церкви, да не предварит нас от Бога праведный гнев, но да и чисту молитву возславше Вседержителю Богу, предварим лице Его исповеданием и получим милость, славяще святую Троицу, Отца и Сына, и Святого Духа, ныне и присно и вовеки веком, аминь.