Из Выгорецкого Чиновника: Соборное определение о постах.

 

Списано с собственной руки Андрея Дионисовича.

 

Благоверным пустынноскитскаго пребывания, согласующим о Христе, отцем и братии, всякаго чина и возраста христоименитым людем.

Общесоборное яко богоявленскаго общежительства, тако разных скитов, книжных, и прочих собравшихся братии, со старостою и выборными: увещателное, в свитце сем написание, от божественных писание изобразися.

Понеже в прешедшия лета, в общесоборныя братския пустынноскитския советы, от божественных законов утвержено, и во вся скиты возвещено. еже Господни посты, по уставу святых отец поститися всем. и всяк кто, в среды и пятки, в посты же и в понеделники, кроме разрешенных, дабы весма не был двоядец. К сим же пустынножителем всякому везде мяса не ясти, и пиянственнаго пития не пити. и прочии пустынныя, от святых отец преданныя обычаи хранити. вы же тогда обещеваетеся соблюдати, и церковным Божиим законом послушны а не противны быти.

Ныне же услышахом, яко нецыи презирают устав святых отец, и свое обещание попирают. еще же и прекословием дерзают противо стояти постному среды и пятка единотрапезному уставу. Сего ради, в научение и обличение тем, а противоупрямствующим, во отлучение, благопокорнейшим же сыновом церкви матере во утвержение. первие о посте среды и пятка и прочих постных дней от Божиих церьковных законов предлагаем;

Устав еже есть око церковное избран святыми отцы от многих типик, иеросалимскаго, и святыя горы, и от студитова. и от многих святых отец, и от вселенских святых собор, и предан святей Божией церкви [на поле: начало устава].

В нем же от листа 72-го. о посте и разрешении всегодном завещавает. на листе же, 74-м, пишет сице:

От правил святых отец, и от предании апостольских сице лепо есть поститися, всякому православному християнину.

Тамо же пространно, о всегодном пощении и разрешении пишет. идеже в постныя [кроме разрешенных] днии, без рыбы и масла, пост до 9-го часа быти законополагает. понеделник же и среду и пяток, во вся посты единожды сухоядением, во многих же листех, до 9-го часа весма постити велит: что везде явствует еже единожды ясти.

Таже о сырной недели.

Во всю сырную неделю иноком и миряном сыр и яйца и рыбу. в среду же и в пяток единою днем.

На листе же, 73-м повелевает.

В предпраздньствиих и попраздньствиих, Владычних праздник. Аще случится в среду и в пяток, ямы единою днем;

Услышите о посте ропщущии и научитеся. Како от предании апостольских, от святых соборов, и от святых отец, праданныи устав, всякому православному християнину, еще и миряном на сырной недели, в среду и пяток, не попущает дважды ясти, тако же и в предпраздньственныя и попраздньственныя Владычних праздник дний, в среду и пяток на двоядение не разрешает; Како же вы пустынножители суще, не в сырныя, и не в попраздньственныя, но весма в неразрешенныя среду и пятки дерзаете на двоядение разрешати: чрез устав святых апостол, и святых отец.

Но услышите малодушнии от того же устава по законоположении постном, на непостящихся страшнаго запрещения: и устрашитеся и будите великодушнии.

На листе, 79-м.

О том же о взаконеных постех, иже саборныя церкве предаде православным християном.

Святых апостол, правило 69.

Аще которыи епископ, или архимарит. или игумен, или презвитер, или диакон, или чтец, или певец. во святую, 40-цу, не постится. да и во весь год, в среду или в пяток, разве аще немощию телесною забавляем есть. да извержется своего сану. Аще ли кто и простыи человек есть да отлучится.

И паки в конце устава. По 50-це лист 104.

По тех же иже в Гагре святии отцы божественным духом собрани. от всех вкупе иже от святых апостол, уставленых постех. ниже постом взаконеных со властию всякою. в 19-м, правиле страшно отвещает, глаголя сице. Аще кто от постящихся кроме телесныя нужды разгордится, и преданныя посты во общину, и хранимыя от церкве разрешает, целу сущу в нем и совершену помыслу, анафема да будет. и паки иже божественыя просвещшеся отцы, в различных книгах изложиша о сих постех. С теми же светилники церковными, и Аполлос Великии во отцех. всех согрешении страшнейше глаголет. яко соборныя посты невозможно разрешати, кроме всякия нужды. в среду бо Христос предан бысть. в пяток же распят бысть. иже убо сия разрешаяи, сей предает Спаса, и сей распинает.

Убо братие вразумистелися от священнаго устава, повелевшаго в соборныя посты до 9-го часа без рыб и масла поститися, и единою днем ясти. и потом страшная на презирающих запрещения положшаго. Но и еще вразумитеся, яснейше показуем вам.

Устав о святей, 50. лист, 54.

Завещания святых апостол.

По посте же сем, всяку среду, и пяток, повелевает нам поститися; ниже: Повинен бо есть греху иже в неделю постяися, воскресения дню сущу. тако же и в 50-цу;

О том же блаженнаго и Великаго Афанасия от сочтания. [лист тойже на об.] Не преступайте заповеди поста Господня, сиречь, среды и пятка, аще не недугом отягчен еси. кроме, 50-цы, единоя. и Богоявления. и святую седмицу Пасхи. 40-цы же святыя, опасно хранити пост. разрешай пост всегда братня ради прихода. пост же незаповеданныи среда и пяток, и 40-ца. но иже от своего произволения, сиречь, понеделник, и вторник, и четверток; ниже: среды же и пятка, часов, пост до 9-го, учинен есть.

О том же святаго Епифания от Панария, о среде, и о пятце, и о 50-цы [лист 55]. собрания же сотворяема, уряжена суть от святых апостол. в среду, и в пяток, в посте, до 9-го часа. Понеже свитающи среде. ят бысть. Господь и в пяток, распят бысть. и предаша апостоли. в сих постом сотворятися, исполняющуся реченному, егда возмется от них Жених, тогда постятся в ты дни. и не яко благодать сотворим, иже о нас пострадавшему, пост нам повелен бысть. но яко да исповемы в наше спасение Господню страсть яже нас ради восприят. и яко да о своих гресех посты нам благословны Богу будут. и во всем убо лете пост хранится, во святей соборней церкви, глаголю же в среду, и в пяток, до 9-го часа. кроме едину, 50-цу, всю 50, дней.

В них же ни коленопоклонение бывает, ниже пост повелен бысть.

В том же уставе прежде святец на листе 74-м.

В пятьдесятницу же всю, в понеделник, в среду, и в пяток, благословение подобает мерити, две онгии чисты паксимады. И точию снедати в притворе, 50-цы ради, яко да не наречется пост, и поеже отпети, 9-и час, вовремя его. тогда ясти совершене. Ниже [на об.]: Обаче убо даемое благословение и паче меры яже рехом. аще подобает и в малу часть, дается точию. яко да не наречется пост.

Вонмите братие, что устав Церковное око глаголет. аще и в малу часть второядение, в понеделники, среды, и в пятки. да не наречется пост. и тем, и 50-цу от прочих разделяет.

Тем же не творите противно уставоположению святых апостол и святых отец. и не дерзайте двоядением противо 50-цы, разрешати соборныя посты. да не выше реченным запрещением повинни будете. К сим же еще услышити от завещании божественных апостол, и от жительства святых отец предании. како подобает иноком и христианом жити.

Идеже по прочих постных повелениях сице завещавает. Воздержание же и устав святых отец, единою днем ясти. и ты и второе вкуси за немощь свою в разрешенныи день.

Разумейте мужие братия, силу словес святых, иже не попущают второе не в разрешенныя постныя дни ясти: но в разрешенныи день. а дерзающии разрешати чрез законоположение церковное, убойтеся страшнаго запрещения. Великии же Афанасии глаголет [Номоканон, прав. 215], разрешаяи среду и пяток, сей распинает Господа якоже июдее, ибо в среду предадеся, а в пяток распялся, разве точию в богоявленских, и в пентекостии, и в седмице от церкве разрешенныя.

Такожде в праздники разрешаяи, неповинен есть. [прав. 216] Иноцы же, и в понеделник, да хранят всего лета, якоже среду и пяток, тако бо от отец прияхом. Дозде с Номоканона.

А иже ищущии вины о гресех, и помогающии своему самолюбию в разорение святых постов, развращающе яже в Номоканоне сущим под каноном ослаба епитимий написана сице.

[о исповедании поучение] Аще ли постится среду, и в пяток, по божественым правилом, оставя ему еще другое лето.

И мнят посему аще кии не восхотят поститися,  аки бы им на волю попущено. Да слышат таковии о сем в том же Номоканоне мало пониже.

Среду же и пяток должни суть поститися вси, и не имущии канона яко же и имущии. ибо всем благочестивым сие прилично есть, паче же и правило ко всем глаголет, да постятся в тыя дни. обаче за благоутробие Божие, и за произволение покаяния, оставляем едино лето покаятися хотящим, яко благочестие ныне наченьшу.

А иже за немощь глаголющии не могуще поститися. да внимают от того же Номоканона написанное сице.

Но понеже нецыи немощи разум, зле приемлюще, и равносущую и несущею немощию, разсужающе вину, за уповаемую немощь, от самолюбия водими, не хощут покоритися апостольскому правилу, не помышляюще вины о гресех. приведем же мало что, и мы по вместному о сем. Немощь веждь сие божественное правило глаголати, яже тело преклонитися, устрояет, и всесовершенное недвижение, тому подобает, а не за уповаемую немощь ему заповеда, ложен сии извет есть и вина. стомах болит ми. слезень студенеет, нозе не стоят просто, руце недобре суть, уши звенят, глава горит с болезнию, и недуг мя лют сих ради ожидает, и о сих попечение противное.

И сия убо доволна суть к таковым. а иже еще нехотящии покоритися законоположению святых отец, и ищущии различныя изветы противства. шепчюще где кто кого слыша древле в соловецкой обители, или инуду, не единою в среды и пятки, ядущих. Да услышат сицевии, яко в типице преподобных отец Зосимы и Саватия, не велено в среды и пятки и прочия постныя дни ясти дважды кроме разрешеных но единою, и да престанут от невоздержания.

Еще же да научит таковыя, преподобныи Никон Черныя горы. прямо лицу их глаголяи. в Тактиконе в слове, 8-м, сице.

Яко николиже слышахом кого глаголюща к славе Божии, яко же рече он собор сице, или яко евангелие или апостол рече сице, или ино божественное писание. или бысть инде где се яко же оно правило, и апостольское и божественных отец предание глаголет, и да подвигнемся яко да сотворим то и утвердим. Но что слышим в суд, яко на оном месте бывает сие, во Антиохии и в Патриархии бывает сие, и во обители святаго Симеона, и инде паки такожде. и не слышим житии отеческих, или великаго господина нашего Симеона житие, или ина таковая яже уставил есть в святей его обители. или ино божественое писание. в прочих всего мира церквах. и паки слышим, яко он сица старец рече се, и они сица сотвори се, от еже ныне явльшихся.

И паки того же, от 28-го слова.

Яко да ради смотрения же и подражании един от другаго и человеческих предании, разрушишася вся и небрегома быша божественая писания от християн, и паче рещи и погублена быша вся, и сего ради предани быхом языком.

И сия убо святых слышавше наказания возлюбленнии, престаните творити стязания, противо яве положеннаго святых законоположения. и ради невоздержания нрава, не дерзайте примышляти вины, в разорение соборных постов, и не будите дерзи, в посты на рыбу, масло и двоядение. Кроме яве положеннаго во уставе, во дни празднуемыя, на что разрешения.

Вонмите же еще преподобнаго Никона в 4-м послании, на недержащих пост яко же лепо страшнейшаго запрещения.

Писал ми еси яко да напишу тебе ведение о праздникох, и обаче опаство праздником, вящьше ради Владычних праздник пост испытах рекше среды и пятка, и прочих законных пост, яко да не просто разрешаются изветом праздник. ибо яко же веси и ты, и вси елицы в разуме божественая правила и прочая святая писания получающе прочитают, яко посты сия, и в божественных писаниих правилех святых апостол и в святых соборех,  и инде в различных писаниих повелеваемых суть. в христианех исповедоватися, и со опаством хранитися им. и елицы не содержат сия тако яко же лепо есть, с еретики от божественых собор и святых отец спричитаеми суть;

В Старчестве же святии о посте научают.

Пост есть единою днем ясти.

К сим еще во утвержение постное, предлагаем. из книги о правой вере. о посте среды и пятка.

[лист 126 на об.] В среду поститися, святая восточная церковь сего ради узакони; яко тварь на Творца своего, в той день совет сотвори, како бы Его лживе смерти предати могли. и тогда же Июда куплю с ними сотворяше, Христа Бога на 30 сребреницех продаде. Пяток же паки того деля постим; яко Господь наш Iсус Христос на кресте в той день пригвоздися, за спасение наше вся в страсти претерпев, и пречистою своею кровию нас обновив. в 9-и час плотию смерти вкуси. сих ради страшных таин велми праве тех дней пост хранится. Святии апостоли о посте среды и пятка, тако предаша [правило 64]. Аще кто в среду и пяток не постится, отлучен да будет; Игнатии святыи ученик и наместник апостольскии, в послании 4-м, к филипписиом пишет. среду и пяток постити всеконечно повелевает; Святыи Афанасии Великии, сице глаголет [правило 215]. Разрешаяи среду и пяток, сей распинает Господа, яко же июдеи. ибо в среду совет бысть на Него, а в пяток распяша и. разве точию в разрешенныя дни от церкве и праздники, неповинен.

От устава. Святии отцы иже в Гангре, Духом Святым собрани, сице глаголют. [правило 19]

Аще кто от постящихся кроме телесныя нужды разгордится, и преданныя посты во общину хранимых от церкве разрешает, целу сущу в нем и совершену помыслу, анафема да будет. Помощию Божиею знаменитая ветхаго и новаго закона свидетелства, и святых Божиих предивныя посты описавше, и от правил апостольских, и святых богоносных отцев, о святых постех запрещения приведши, удивитися и устрашитися в сия последняя слезам достойная времена, до какова своевольства и презорства ослепше чревобожницы вдашася; широким путем в погибель, ведущим, един другаго предваряюще, и от часу дале и глубочайше бежат. всяк может познати, яко сие своеволное поветрие из двора римскаго возниче, и поражени им быша вси человецы.

И сия убо от божественных писании свидетельства, наказания же и запрещения, написавше зде во утвержение постов Господних. во обличение же и наказание, на непостящихся якоже лепо.

Прилагаем еще, яко же пренебрегающим постныя дни, тако и кроме постов, меж двою трапезу невоздержно ядущим, общее исцеление. от воспоминания страшнаго яже на мытарствах о том по смерти истязания.

Катихизис Большей, глава, 13. Мытарство 14. О объядении, и тайноядении, и рано ядении, и в неподобныя времена, и в праздники и во дни постныя. и о всяком неподобном ядении.

Из минеи мартовския, в 26 день, от болшаго жития Василия Новаго; Мытарство 14. Достигохом, 14 мытарства, иже нарицашеся чревообъядение, и от того мытарства изыдоша нецыи толстии и тучни дивии, и злии суще, большии бо суще, нежели прежнии. И си обличахут мя. Како ядях от юности моея от утра им же образом и свиния. не ведающи о горцем сем мытарстве. како ядях в говение от перваго часа, не сотворши молитвы. яко же ядят всегда вси, в велице пространстве завтракающе, и обедающе, сиречь полуднующе и вечеряюще, объядающеся чревообъядением. Сия вся обличаху, и понашахут ми, искушаху тыя пожрети мя рекуще, в крещении своем рекла еси, и обещалася еси, отметающеся сатаны и всех дел его. И како ныне по страшных обещаниих онех. и потом творила еси сия прегрешения.

Вонмите мужие братие, тако страшная, в церкви на непостящихся запрещения. и на мытарствах по смерти за невоздержное ядение грозная испытания. И истребите молим злыи обычай невоздержания, от среды церковнаго пустынножителей совокупления. и противно священному церковному законоположению, вместо постнаго по уставу единоядения, двоядение. и во иныя дни межтрапезныя ядения, во всех вас благоверных пустынножителех. весма да не будет.

Еще же и мясоядения во всех скитех пустынных, ни у кого и нигде да не будет: Понеже вси уставы святых пустынножителем мяса ясти не повелевают.

К сим же и пиянственнаго пития, всяк кто от пустынно живущих да не пиет. Понеже преподобнии отцы наши российстии чюдотворцы, крепкое о сем во обителех запрещение положиша. яже вкратце предлагаем.

Явися преподобныи Макарии желтоводскиии и унжескии на Тихвине некоему мужу Никите Христа ради уродивому повелевая ему глаголати, игумену Александру и братии, чтоб во обители Пресвятыя Богородицы, отнюд бы пиянственнаго пития не имели, и от виннаго пития конечно бы престали.

Преподобныи же Кирил белозерскиии во обители у себе запрещение положи о всяком пиянственном питии. И тако блаженныи сим уставом змиеву главу пиянство отреза. и корень его прочее исторже. Подобне сему преподобныи Зосима соловецкии. Александр свирскии, и прочии мнози росийстии чюдотворцы законоположиша;

Преподобныи же Иосиф волоколамскии, пространное о сем запрещение написа.

Еще же на соборе при царе Иване Васильевичи. святии российстии соборне: всем общежителем и скитяном о пиянственном питии запретиша.

И аще святии о том запрещение положиша. и тем уставом змиеву главу пиянства отрезаша: Кто есть тако дерзыи вмещаяйся посреде пустынно живущих, а святым не покаряяся, и отрезанную святыми от пустынноживущих, змиеву главу пиянства, дерзнет вносити; и пыстынножитель сыи, а кабатския пияи пияная пития. аще бо священная правила вшедшаго в корчемницу без нужды отлагают. а иже пиянственно пиющаго, нарещи лжепустынника. Колми паче от пустынно живущих благовернаго сочетания, подобает отлучити.

Вы же убо о скитстии соборнии выборнии, братие, потщитеся кождо в своих скитах всем всякаго чина пустынно живущим в благовернем согласии, собрав их сие наше общесоборное написание прочитати. и аще в коих скитех обрящутся, преступники священнаго постнаго устава, такоже и мясоядцы, и пиянственно пийцы. и вы их истяжите, что ради тыя живут в пустынных скитех, а преступают общесоборное по божественным писанием пустынно скитское совещание. И аще котории, истиннаго о том покаяния, и пред всеми смиреннаго прощения не принесут, и обещания в том нелестнаго, еже тако им не преступати законов Божиих о посте Господни, и двоядством не разрешати. И о прочих вышепоказанных: аще не дадут вам, но в противстве и непокорстве быти возъупорствуют. и вы таковых, имейте отлученных по вышереченным священным правилом, и по апостольскому велению глаголющему. Повелеваем же вам братие, о имене Господа нашего Iсуса Христа отлучатися вам от всякаго брата бесчинно ходяща а не по преданию, еже прияша от нас.

И всем в своем ските возвестите о тех непокорниках, да вси в ядении и молении от них отлучаются.

Якоже и преподобныи Иосиф волоколамскии о непокоривых апостольское повеление предлагает сице.

О непокоривых же сице глаголет, аще ли же кто словеси нашего непослушает, с посланием сего знаменуйте: и не примешайтеся к нему да посрамится. аще бо и к мирским человеком речено бысть сице, еже наказати бесчинныя, непокаряющимжеся запрещати, и непримешатися к ним да посрамятся. Кольми паче подобает старейшим и соборным братиям, и всем служебником иже в монастыре суть, имже повелено есть бесчинствующих запрещати.

И аще от сего наказания в чювство и покаяние не приидут. во иныя скиты выборным, и во общежительство богоявленское о них возвестите, да будет, везде учинены неприобщенны. А елицы с непокорными будут общатися, с ними сами тожде да учинены будут. закон бо сей есть церковныи, аще кто неприобщенному приобщается, да будет и сам неприобщен.

Еще же в воскресныя дни и праздники Господьския завещавати неделати но упражнятися на молитву и на слышание божественных писаний. якоже в Номоканоне в правиле, 159-м, глаголет. В неделях, и в праздники завещавай неделати, но приходити в церковь, яко же подобает християном. аще ли кто делает в тыя дни, да отлучится.

В повсявоскресном же евангелии в неделю 27-ю поучает сице.

Обыче же вскую и священныи день сии недельныи, освященныи Богу похищаем, и о житейских печалех сии изнуряем, а не на всяку неделю о житейских мятеж и молв кроме бываем: но бузчислеными попеченьми и смущенми и молвами связуем себе: или мним яко приложение имению, таковыми подвиги творим. Бог убо презираем, и собранная имения множицею разсыпа. и претя иногда иудеом презирающим церковное устроение, глаголаше пророком, внесосте сия в домы ваши, и разсеях я, глаголет Господь Вседержитель. убоимся братие приказании сих.

К сим же да будет ваше и во иная полезное прилежное попечение и безчинию возбранение. еже да не будет у кого з зазорным лицем сожития, по другим келиям блазненаго бесчиннаго хождения: возбраняти же в мир безнужная хождения, клеветная блядословия. за трапезами и по павечерницы немолчания. отсекати же лжи и неправды, и прочая зло творения: кощуны же, и игры и иная безчиния, татьство же, и сквернения, весма да не будет. да некогда нерадения ради умножится безчиние и гнев Божии найдет на ны. яко же пишет преподобыи Иосиф волокаламскии.

Сих же всех вина старейших, и соборных братии, приемшим правления монастырская. и всех служебников. Ниже. яко да сего ради возмогут единодушно вкупе вси попещися о церковном и о монастырском и о трапезном благочинии, и о благоговеинстве. аще ли же в небрежении, и в бесчинстве пребудем. того ради в запустение предадимся, в нынешнем веце в будущии же век того ради осуждени будем яко нерадиви и лениви. глаголет убо Великии Василии. Ниже: Внемлем себе братие небрежения бо ради и бесчинства гради разоришася, и монастыри запустеша, и божественныя церкви огнем пожжени быша, глаголет же и святыи Исак братиям. яко аще сохраните заповеди Божия, и отеческая предания. послати имать Бог благодать свою, и сохранити имать Бог место сие. Ащели же не сохраните, запустети имать место, и вы не пребудете в месте сем. глаголет же святыи Никон, внимаем себе братие опасно, яко да не в небрежении, и в бечинстве бывше, в запустение предадимся.

Сего ради братие потщитися всеусердно. во еже благочинное богоугодное житие по преданием отеческим утвержати. бесчиние же и злодеяние от среды пустынножития, истребляти. а о противниках, и непокорниках отеческому преданию и наказанию. тойже преподобныи Иосиф изложи сице:

Ащели же кто от настоятеля, и от преимущих братии. не приемлет наказания и обличения, подобает таковаго пред всею братиею обличити, ащели же пребывает в непокорстве. да изгнан будет из обители. Тако бо повелевает божественныи апостол Павел, и прочая божественная писания, измете рече лукаваго от вас самех, занеже мал квас, все вмешение квасит. И паки глаголет, обличи рече, и запрети согрешающая пред всеми. да и прочии страх имут. И в законе глаголет, обличением обличиши искренняго своего, и не приимеши о том греха. И святыи апостол Иуда глаголет, овех убо страхом спасайте от огня восхищающе, и великии апостол Петр глаголет, се убо есть воля Божия, еже благочестивым человеком, нечестивыя обуздовати. И Господь наш Iсус Христос глаголет, аще согрешит тебе брат твой, обличи его межу собою и тем единем, аще ли тебе непослушает и пойми с собою единаго или два. Аще ли и тех преслушает, повеждь церкви. аще ли и церковь преслушает, буди ти яко язычник и мытарь. И Великии Василии глаголет, изжени рече губителя из сонмища, и изыдет с ним молва, да не и прочим своя красты подаст. Сим последующе писанием божественным, преподобнии и богоноснии отцы наши, и в предняя лета и в последняя, кротцы бяху и милостиви, егда потреба беяше, жестоцы же и немилостиви, егда подобаше. Ниже: Не точию пастыри и наставницы, но и ученицы сих. иже суть старейшая и соборная братия, и вси служебницы иже суть в монастыре, иже прияша от них правления монастырская, такоже кротцы бяху и милостиви, егда лепо бяше, жестоцы же и немилостиви, егда подобаше, и не точию сами содержаще отеческая предания. но и инех понуждающе и наказающе, не боящеся ниже срамляющеся никогоже, ни самаго того настоятеля, егда что видяху стропотно же и развращено, и не по обычаю отеческих предании творимо.

Сим божественным писанием, долженствуете вси вы старейшинствующии в скитех последовати, и прочии церковныя чистоты ревнители, тако ревновати, тако усердствовати. И яко присная церковная чада, матерни болезни сболезновати. и за священныя ея законы мужественне стояти, и всякому бесчинству и злодеянию возбраняти.

Вы же убо о христоименитое пустынное совокупление. будите церкве матере законом послушны, а не противны. старейшим выборным братии, покорники, а не спорщики. церковники а не мятежники. писанию читатели, а не своеволству учители. законом Божиим сказатели, а не на слабость кривосказательныя блазнители. церкви помощники, а не бесовских прелестей заступники. за священныи постныи устав стоятели, а не чревобожному невоздержанию лже учители. общесоборнаго церковнаго совета творцы, а не заочныя на церковную истину клеветницы. яко славнии краснопесниво согласия церковнаго глас вопийти, а не яко мерская болотная жаба заочныи на истину рокот вярчите. яко прекроткия агньцы пекущихся о добре вам умиленным блекотанием познавайте. а не яко ехидна матери своей родившей и добротворящей утробу злохуленьми прогрызайте. вси боголюбцы, а не сластолюбцы, чистоты рвнители, а не страстныя сквернители. к писанию прилежни, в молитвах неленостиви, постники воздержники, смиренни же кротцы и целомудрени, братолюбцы и страннолюбцы, милостиви к нищим, раздорников чюжди мятежетворцов отвратни, злотворцов обличители бесчинников наказатели. церковныя ревнители, благочестия творители, райския доброты желатели, царствию небесному наследователи. о Христе Iсусе Господе нашем Ему же слава со Отцем и со Святым Духом. ныне и во вся веки аминь;