Алексей и Григорий Яковлевы

(60-е годы 18 в.)

 

Ответы древлеправославныя церкви последователей. на вопросы, федосеевых согласника Ильи Алексеева.

 

Вопрос, 1.

До познания веры браком совокупившихся, како к себе приемлете?

 

Ответ, 1.

Понеже мы нижайшии последованием произыдохом от святыя древлеправославныя Христовы церкве, чрез преждебывших наших соловецких и поморских отец. темже мы якоже в прочих чиносодержаниих основание имамы на святаго писания святоотеческом предании: тако и еже до познания веры в глубочайшей неведения истинны тме родившихся, и браком совокупившихся, не инако обычай имамы приимати, и ко избранному Христову стаду сочетовати: но тако, якоже предание имать святая церковь; сиречь, еже просвещати таковых светом истинныя во Христа веры, и научати их спасительному благочестию, и по заповедем Господним христианскому жительству: и еже отвращатися им богомерскаго своего закона и веры, в ней же кто бяше; сиречь, или жидовин или срацынин, или еретическое прежде имеяй крещение. таковых всех, якоже супружных тако и несупружных равно под крещение приемлем: якоже в древлепечатных Потребниках в чине от ересей приходящих извествуется.

 

Вопрос, 2.

И егда их поучаете христианству, что им предлагаете?

 

Ответ, 2.

То и предлагаем им, что святая церковь предлагати таковым уставляет: сиречь научати истинныя во Христа веры, и предлагати им порядок христианскаго закона, и отвращатися и прежняго своего закона и веры. и прочая.

 

Вопрос, 3.

О браках их како разсуждаете?

 

Ответ, 3.

О браках их в глубочайшей неведения истинны тме, сиречь в поганском неверии, или еретическом зловерии, кроме православныя Христовы церкви устроенных: не инако о таковых их браках разсуждаем, но токмо за неприятныя и за нетайны таковыя супружества вменяем. Понеже вне православныя церкви и веры соделанныя тайны, истинными тайнами и приятными от святых церковных учителей не извествуется. очесом вселенскии учитель святыи Иоанн Златоуст сице разсуждает: Тайны (рече) без единости церкви христианския ничесоже суть. Ибо всем отлучившимся от единения церковнаго Бог пророком рече, послю на вы клятву, и проклену благословение ваше, и оклену е, и разорю благословение ваше, и не будет в вас: сиречь положю клятву на благословение ваше, им же тайна совершаема бывает. ибо церковь Божия есть яко же глаголет писание вертоград заключен, и источник запечатлен. и того ради невозможно нигдеже тайне совершитися, точию во единости церкви Божия, еяже между сонмищи и еретиками несть, тогда и тайны в них ни единыя несть, разве крещения святаго. Дозде Златоуст. Подобне и святыи Максим Исповедник о еретиках единоволниках извествует: Иже рече единоволники сами от себе прокляты, и от поместнаго собора бывшаго в Риме извержены, и от священства отчюждены, тии кая совершают таинства, и проч. И в Катихисисе велицем древлеправославная церковь о еретиках и о тайнах их объявляет. Вопрос: Истинныя ли и правыя пресвятыя тайны суть у еретиков? Ответ: Понеже они истинныя и правыя веры Христовы не имеют: то како пречистыя и святыя тайны Христовы у них быти могут. И святыи Иоанн Никейскии о еретиках арменах и о тайнах их пиша глаголет: Аще (рече) тмократицею прокляти бывше, и дияволу предани: Како от анафем и от клятв, благословение изыдет, или како от диавола духовное и святое дело совершается. от анафемы бо благословения не бывает, и от проклятия молитва не исходит, и от диавола Христова таинства не совершаются. И паки тойже: Тем же проявленно, яко крещение их, и вся от них содеваемая неприятна и непотребна суть: аще и тщатся несмысленнии и неразумнии и неутвержени и лживи христиане, яко истинна и благоприятна творят делания их. Дозде Иоанн Никейскии. Темже тако и мы с сими церковными учители согласующеся, такоже подобне о браках в неверии или в еретичестве приятых разсуждаем: сиречь за нетайны и за неприятныя, и за ничтоже сущия таковыя супружествы вменяем. а не тако, якоже вы федосеевы: иже за православныя и церквозаконныя и приятныя таковыя сих в нечестии полученныя браки (по крещении таковех) мудрствуете, и крепкими и твердыми исповедуете. еже таковое ваше мудрование яве противно есть всему святому писанию, и всем богомудрым церковным учителем.

 

Вопрос, 4.

Пришедшим же в состояние ваше, во едином ли храме жити повелеваете?

 

Ответ, 4.

Якоже браки таковых в нечестии полученныя мы нижайшии (по святому писанию) истинными браками, и тайною церковною и приятными (по предложенному в прешедшем ответе) не мудрствуем: Темже и пришедшим таковым из нечестия брачным, в християнскую веру (за неприсудствие ныне священных чинов) безбрачне жити завещеваем. Понеже хотящим таковем по крещении брачне жительствовати, долженствует всяко, по неприятию таковых их браков, от священных лиц разборство, и в брак священнословное по закону християнскому благословение восприяти (очесом ниже в 17 и 18 ответех изъявится). Но у нас ныне священных лиц не обретается, и сего ради безбрачне таковии жити определяются. Местом же жительствуют сицевии у нас, не единако, но ови убо в разных храмех: ови же (по обстоянию нынешняго нужнаго времени, ради многих нужных вин) аще и во едином храме жити попущаются, обаче безбрачным чистым житием сожительствуют. и сему подобныя и в прежния времена бываху случаи: якоже о единодомовнем таковых чистом сожитии, в страдании святаго апостола Фомы, и в страдании мученицы Марии Галендухи, и в прочих засвидетельствуется.

 

Вопрос, 5.

И брак прежде крещения состоявшиися, по крещении како браком нарицаете?

 

Ответ, 5.

Оныи таковых преже крещения состоявшиися, брак; якоже до керщения их, тако и по крещении, равно неприятным, и нетайною церковною, и ничтоже сущим браком (по святому писанию) мудрствуем и нарицаем: якоже в 3-м ответе известихом. И от крещения никоего преимущества податися сему браку исповедуем. Понеже православная Христова церковь о таинстве святаго крещения такова мудрования не имеет, еже бы тайна брачная в нем составлялася: но по всем церковным учителем сила святаго крещения извествуется, ветхаго человека, сиречь, греха совлечение, и во Христа облечение, и сыновство Божие, а не брачное же сопряжение: брачное же сопряжение ина тайна, и особным действом в церкви святей от священных токмо лиц отправляется, а не от крещения подавается. темже аще святое крещение православныя тайны брака не составляет, (а аще тому и не препятствует:) кольми же паче поганъскому или еретическому браку преимущества никоего не подает, и приятным онаго не устрояет. и не токмо приятным не устрояет, но и приятию его зелне противствует: яко ветхаго человека, и всех богомерских деяний его, (последователно же и брака поганскаго и еретическаго) святое крещение очищает и обнажает. И того ради по таковому, крещением сицева брака неприятию, равне сей брак и по крещении мудрствуем и нарицаем, якоже рехом, и прочими званиями его (по святому писанию) имянуем, якоже в следующих ответех показуем.

 

Вопрос, 6.

И аще браком: то каковым браком имянуете, законным, или беззаконным, еретическим или православным?

 

Ответ, 6.

Таковыи преже крещения состоявшиися, (по крещении же неприятыи) брак; браком нарицаем. а еже законным или беззаконным его имянуем, о сем ответствуем: Понеже во святем писании различныя слышим законы, овыя благия церковныя, с небесе по свидетельству святаго Златоуста от Бога снесенныя [Беседы, лист 1062]. овы же поганския и еретическия. И о божественных убо и церковных законех Псаломник к Богу вещает [Пс. 118]: Благ мне закон уст Твоих, паче тысящь злата и сребра. О других же законах поганских и еретических в книге Кирилове сице пишет [лист 307]: И учения их или обычаи, или законы и нравы, многим неразсудным человеком красна и сладка быти мнятся. но всяко неистинна и горка вконец обретаются, и вечной муце ходатаи бывают. И в книге О вере от пророчества Даниилова пишет: Беззаконнующии (рече) завет наведут с прелестию, и осквернят священия, и прочая. и тако посему якоже законы суть различны, тако и вещи законныя от законов проистекающия бывают неединочестныя, якоже и супружествы: но убо по церковному закону во христианстве сотворенныя, церквозаконныя и христианския и суть и нарицаются: по закону же поганскому или еретическому соделанныя всяко поганския или еретическия имянуются: а аще и обоя законныя. Темже мы не отметаемся состоявшии до крещения брак нарицати по поганскому или еретическому (или естественному) закону законным: якоже и в толковании 72-го правила 6-го собора Алексии Аристин, до познания законно в неверствии совокупившихся, законным браком нарицает: Аще (рече) нецыи невернии суще законным браком совокупишася. тако и мы нарицаем. но токмо сицевыи законныи брак за равно с церковным вменити, и в церковь прияти не можем. Понеже поганския и еретическия брачныя законы весма противны суть закону христианскому. И в первых, священнословнаго благодатнаго (новыя благодати)  брачнаго освящения, вси невернии и еретицы на брацех своих не имут. 2-е: В сродстве многажды законно брачатся, а персяне и матерей своих и сестр родных законно себе в супружество поемлют. 3-е: Невернии язычницы и двух и трех жен и более у себе законно имеют. 4-е: И без благословения родителска с восхищением и уводом женятся. 5-е: Аще и десятую и более себе жену свободно законом своим поемлют невернии, и еретики люторы и латини. 6-е: В капищах идольских язычницы, с жертвами, еретицы же в скверных церквах своих с мерзостною службою браки кииждо по своему закону составляют. Сия и прочая множайшая противства и нелепотства поганских и еретических брачных законов: чесо ради за сия церквозаконным в поганстве или в еретичестве соделанныи брак нарещи и похвалити, и за правыи закон прияти зело святому писанию противно есть. Темже и в преждебывшая времена правовернии поганских брачьных законов не похваляху, и правыми их не исповедаху: О чесом в страдании святыя мученицы Евгении пишет: еже Помпей пред царями римскими сице свидетельствова: Издавна рече вредни суть народу тии, иже глаголются христиане, ругаются законом нашим, и самаго естества превращают законы, неправедну вещь глаголюще, да обручница своего обручьника поймет, и прочая. Откуду является яко правовернии поганским законам ругахуся, и неправедну вещь глаголаху, еже по поганскому закону обручник обручницу свою поймет. Сему подобно и в Кормчей, обручение в неверных не твердо вменяет. Зри Кормчую лист. И от жития святаго Владимира и прочих показуется еже неверных законныя браки, по изволению токмо человеческому во христианстве свободно расторгахуся. Темже сих ради всех и мы нижайшии в нечестии состоявшиися до крещения брак, аще и законным нарицаем: обаче церквозаконным и правым и твердым нарещи его, и в церковь прияти отнюд не можем. А еже вопрошаеши: еретическим или православным его нарицаем, о сем в следующем ответе извествуем.

 

Вопрос, 7.

Аще еретическим, то где о том писано, в котором соборе, или особь святых есть сицевое нарицание?

 

Ответ, 7.

Вся у еретиков содеваемыя тайны, а особно с действием их еретическим бываемыя, святое писание обычая не имеет православными таковыми таковыя нарицати, яко православия весма чюждыя и проклятыя суть. очесом приведенныи в 3-м ответе святыи Златоуст извествует: Всем (рече) отлучившимся единения церковнаго Бог пророком рече, послю на вы клятву, и проклену благословение ваше, и оклену е, и разорю благословение ваше и не будет в вас; сиречь положю клятву на благословение ваше, имже тайна совершаема бывает. Дозде Златоуст. Но вся таковая у еретик содеваемая таинства обычай имеет святая церковь еретическими нарицати. сице убо крещение еретическое во многих местех еретическим нарицается. сице и жертва их еретическою называется. тако подобне сим и браки у еретик содеваемыя еретическими браки во святом писании имянуются. очесом в Потребнике иноческом в слове преподобнаго Иосифа Волоцкаго сице написано: И ина многа обрящем в божественном его писании (о словесех Павла апостола глаголет) о них же сказует божественныи учитель святыи Иоанн Златоустыи: Сие и на еретическия браки велие обличение, иже женятся и посягают люторове и калвини и папежники. Дозде ис Потребника иноческаго.

 

Вопрос, 8.

Аще не браком имянуете, то уже будет яко блудническии?

 

Ответ, 8.

Каков сей вопрос, аще не браком нарицаете, то уже яко блудническии? что сие странное и неприличное разуму речение? понеже аще не браком нарицати, то уже будет сущии блуд, а не блудническии, якоже глаголеши: Зане звание сие блудническии прилагателное есть браку, а не безбрачию. темже мы состоявшиися до крещения брак браком нарицаем (якоже в вышших ответех явихом) о блудническом же именовании в следующем ответе ответствуем.

 

Вопрос, 9.

Аще яко блудническии его имянуете: то покажите имянно, которыи апостол сице научи, или которыи собор сице нарицати повеле, или которыи святыи тако его именовати повеле.

 

Ответ, 9.

Оныи в нечестии до крещения состоявшиися брак блудническим не видится где во святом писании нарицатися. (зане не именование сие блудническии, по крещении како любо незаконно соделанну браку свойствует: а не сему до крещения по своему тамо закону состоявшуся). Обаче же свободно сей до крещения состоявшиися брак нечистым и скверным может нарицатися. Понеже святыи апостол Павел преясно вопиет глаголя: Оскверненным рече и неверным ничтоже чисто: но осквернися их ум и совесть: Бога исповедают ведати, делы же отмещутся Его, мерзцы суще и непокориве, и на всяко дело неискусни. Преподобныи же Иосиф Волоцкии явственно поганския браки скверными нарицает, глаголющи сице: Яко егда прииде в Рим великии апостол Павел, тогда научи две жене Нерона царя римскаго, иже и крестишася, и отступиша от Неронова сквернаго смешения. (ниже) Такоже и святыи апостол Андрей егда крести Максимиллу жену геефа Анфипата: тогда Анфипат даяше много злата апостолу, яко да повелит жене его на скверное смешение сочтатися с ним. апостолу же никакоже не хотящу, и проч. Подобне и в житии святаго апостола Фомы пишется, еже скверными же поганъския браки нарече апостол, глаголя: Не подобает да рабыни Христовы сообщаются с беззаконными мужи: ниже праведно есть, да верныя от злочестивых и неверных оскверняются. и проч. И тако по сим свидетельством явственно в нечестии пребывание нечисто и скверно разумевается: сице и браки состоявшиися нечисты и скверны яве извествуются: яко во тме и сени смертней кроме истиннаго благочестия содеянныя. Темже и последнии поганскии и еретическии (до крещения состоявшиися) брак, аще и законным по естественному (или по их) закону тако нарицаем: обаче чисто законным его утвердити (за лишение благодатнаго священнословия, и за прочее объявленное в 6-м ответе) и в церковь прияти его отнюд не можем.

 

Вопрос, 10.

Аще ли блудническии его разумеваете, то почто сожитию не расторгаете, и во едином храме жити им попущаете? где же такое повеление лежит, чтобы блуднику со блудницею обещавшимся хранити себя от смешения, во едином храме жити попущалося?

 

Ответ, 10.

Оныи в нечестии состоявшиися брак тако разумеваем, якоже в сих ответех от святаго писания предложихом. А еже пришедшии таковии во едином храме нецыи у нас по крещении жити попущаются (вин ради нужных) о сем в 4-м ответе от святаго писания засвидетельствовахом. И сице мы в таковое сожитие не блудника со блудницею попущаем, сиречь не безбрачне беззаконно живших: но иже бяху исперва аще и в нечестии, честно же по своему закону в брак аще и скверныи, но законом естествем совокупленни: таже потом ко святеи церкви присвоившеся: и чрез церковное присвоение, паче же и чрез крещение святое, быша (по словеси святаго апостола Петра) род избран, царское священие, язык свят, людие обновления. а не блудник со блудницею по твоему неправому (в вопросе сем) извещению.

 

Вопрос, 11.

Единообразно ли их с новобрачившимися разумеваете? Аще единообразно, яко тех, сице и онех: то почто новобрачившагося исповедания даемаго вам под изветом честнаго жития не приемлете? но сожитие их расторгаете: и всячески во едином храме жити возбраняете?

 

Ответ, 11.

Новобрачившиися разумеваются, иже христиане крещенныя быша: таже христианства отступльше, и чрез церковныи закон прияша себе брачное сожитие христианъскаго священнословия весма лишенное. Нецыи же из них горшее развратившеся, иже и от еретик брачное благословение получити дерзнуша. и о таковых святыи апостол Павел жалостно повествует [зач. 286]: Уже бо рече нецыи развратишася во след сатаны. И в толковании 18 правила Великаго Василия о приятии таковых пишется: Сластем (рече) блудным себе издавши неприята будет инако в церковь, аще не останется греха, и разрушит беззаконное сожитие. И в Потребнике в Номоканоне пишет: Аще с латины православная жена сочтется, с распустом брака и запрещению подлежит. И в прочих писаниях довольно о сицевых извествуется. темже и мы тако по сим правилом возвращающихся новобрачьных приемлем. Пришедшии же сии из нечестия брачнии, понеже восприяша тамо браки по своему тогда закону, в христианскии же закон еще не въступивши: Но по пришествии в христианство церковнаго закона они не отступиша, и веры православныя приобщением чюжия части не окаляша. тем в писании обретаются виды, еже и единодомовне таковии (кроме брачнаго общения) по крещении сожительствоваху: якоже в 4-м ответе явихом. И сего ради таковых не равно с новобрачными разумеваем по различию таковаго их устроения, а не по различию брака.

 

Вопрос, 12.

И аще кии брат пришед в состояние ваше брачившиися прежде, и потом не возможет одолети, и падется со женою своею тайно: то какую ему епитимию налагаете блудническую, или легчайшую: и аще яве, то единообразно ли, или вящьше?

 

Ответ, 12.

Таковии брачившиися прежде, безбрачне ныне у нас (за неприятие их браков, и за неимение священнословнаго от священных лиц брачнаго благословения) жительствуют: якоже в 4-м и прочих ответех явихом. тем и в случившемся грехопадении явно соблудившии сицевии епитимиею наказоватися достойни суть: по оному: их же бо не совокупи Бог священными молитвами призываем, тии вси сходятся на грех. И святейшии Фотии митрополит в послании в Нов град пишет: А которыи не по закону живет с женою, без благословения поповска понялися, тем епитимия 3 лета как блуднику, и проч. И в книге Арменопуловой пишет: Яко смешение без священнословия блуд есть. и проч. А еже вопрошаеши: И аще яве, то единообразно ли, или вящьше. И о сем святыи Никифор патриарх в правиле 19 извествует: Иже не явленная согрешения исповедающим от причащения отлучити подобает, в церковь же тем въходити не возбраняти, ниже обличати, но кротко сих наказывати. от правила 20-го: Аще ли явленна сих согрешения, тогда прочее по церковному уставу исполнять запрещение. Дозде патриарха Никифора. Тако и у нас по сим правилом неизменно исполняется.

 

Вопрос, 13.

И аще с чюжею от зависти диаволи падется, то блудника ли его вменяете, или прелюбодея? и единообразно ли запрещается, якоже падшиися с своею женою, с нею же прежде познания сочетася, или вящьши? аще же вящьши, то чесого ради, покажи от святаго писания, а не своесмышленным разсуждением?

 

Ответ, 13.

Понеже брак таковых (в нечестии бывших) в церковь святую не приемлется, якоже рехом. тем и падающии от такова бывшаго брака с другим свободным лицем: соблудивших всяко наказанию достоин судятся, а не прелюбодействующих. (якоже и в житии святаго Василия Новаго пишет: еже на мытарствах шествующии с Феодорою аггели, грех ея от несвященнословна брака с чюжим лицем бывшии, за блуд, а не за прелюбодейство вмениша). А еже единообразно ли запрещается, якоже падшиися с своею женою: но яко же грех единообразныи, сице единообразно и запрещается, а не вящьше: кроме разве особных разностей, по некоему разсуждению.

 

Вопрос, 14.

Аще кто приидет в ваше состояние, имея у себе жену и отца: отцу же его еще в неверии сущу, поемшу себе жену вторую, и тако будет сыну его мачеха, и вси приидут в ваше состояние. Аще ли же по зависти дияволи падется с мачехою своею: то како таковаго судити будете, равно ли якоже блудника, или вящьше? о сем скажите якоже стояще пред нелицемерным Судиею, по правилом святых отец.

 

Ответ, 14.

Уже о сем доволно известно есть: яко брак в нечестии состоявшиися в церковь святую не приемлется: якоже в прешедших ответех явихом. о сродствах же таковых браков в нечестии бывших, како оных разбирати и судити, о сем во святем писании явственнаго определения и установления не видится. Обаче же священныи правилописец Матфей Иеросалимскии в составе П-м книги своея повелевает главнейшее сродство и от блуда соблуда соблюдати: очесом пишет сице: Закони (рече) о брацех и правила повелевают и от блуда сродство соблюдати: и совокупляющихся от блуда сродник яко и от законных браков в кровосмешество впадших муча. Дрзде Матфей правилник. И в книзе Кормчей в заповедех благочестивых царей [лист 462, чис. 2], смешаяйся плотски сын с женою или и с подложницею отца своего, наследия отца за сие лишается. Темже сего ради и у нас ныне аще бы где случилося таковое (в вопросе сем извествуемое) грехопадение: и сие (кроме протчаго) яко досаду и безчестие отеческой персоне приносящее: убо всяко вящьшее прочих блудодеянии судится имать.

 

Вопрос, 15.

Еще помяновенная в 14 вопросе мачеха егда будет имущи дети от перваго мужа женеск пол: егда же паки завистию миродержца, окрадующаго разными образы житие наше падется брак с сведенною ему сестрою: како его въменяете, якоже ли блудника, или яко кровосмешенца?

 

Ответ, 15.

Вышеписанным ответом и сей вопрос разрешается: еже не видится во святем писании о сицевых бывших в нечестии сродствах явственнаго извещения, но разве по прочему в прешедшем ответе винословию вящьше прочих сицевая падения судитися имут.

 

Вопрос, 16.

Аще свекр с снохою падется, то како о сем разумеете, и по которым правилом судити будете?

 

Ответ, 16

Подобне предложенными ответы и сей вопрос довольствуется: еже и в заповедех благочестивых царей, аще со снохою или и с подложницею сыновнею смесится отец: и за то наследия сыновня лишается. И сего ради и у нас по таковому разсуждению вящьше прочих сицевое падение судитися имать. (Брак же в нечестии состоявшиися чрез сия отнюд не приемлется).

 

Вопрос, 17.

В книге Кормчей на три чины разделяются приходящих к православию: первыи чин под крещение, въторыи чин под миропомазание, третии под проклятие. и убо о сих святии обращающихся венчанных до познания веры, их же повторяху крещением, паки повторяху ли венчанием?

 

Ответ, 17.

В книге Кормчей в различных местех в соборных и отеческих правилех обретается сие, еже приходящии к православию на три чины разделяются: но сицевое деление во святых правилех полагается видится для разбору крещения: сиречь кого от еретик крестити, и кого не крестити: а не ради разбору о брачней еретической тайне. (чесо ради о брацех тамо и о прочих тайнах, сиречь о евхаристии и прочих не воспоминается) но о всех обще еретических тайнах и действах явъственно святыи Иоанн Никейскии извествует: еже вся рече таковая не приятна и не потребна суть: якоже выше в 7-м ответе предложихом. А святыи Иоанн Златоустыи не токмо от 1-го чина еретическаго, но и от втораго вси тайны кроме крещения, за не тайны и за неприятныя извествует. от коего сих святых разсудительнаго о еретических тайнах извещения явственно показуется, яко брачных от еретик святии приемляху не кроме разборства, священнословнаго (по чину церковныя тайны) венчания, инако быти не мощно: зане аще не священнословити брачьных сих, то брак их в нечестии бывшии всяко за тайну и за приятныи въменити: но аще же святии за тайны и за приятныя их действа не вменяху: то необходимо показуется, еже приходящих брачных их (по приличном по закону христианьскому разобрании) священнословяху. Показует сие и церковныи закон: якоже в Кормчей книге о брацех особная целая 51 глава положися: в которой явственно всякому священнику твердыи и непревратныи законныи устав написуется и дается, каковыя ему супружествы в приходе своем содержати, и при том извествуется сице [Кормчая, лист 522]: Изряднее же да весть иерей, яко супружества между восхищающим и восхищенною, егда сама восхищенная во власти восхитившаго ю пребывает, такожде и потаенныя, и вся прочая супружества, яже не с благословением церковным и чинным от своего си пастыря, си есть епископа, или от тоя парохии священника, венчанием при двух или триех поне свидетелей совершаемая, по соборному уставлению и святых отец учению незаконна паче же беззаконна и ничтоже суть. Дозде ис книги Кормчей. Сему подобно и свяшенныи Матфей правилописец извествует: яко брак в нас кроме священнословия состоятися не может. Сему подобно и прочии вси церковнии правилописцы утверждают. От коих всех твердо и ясно является, яко святая церковь никаковых супружеств кроме чиннаго своего венчания и священнословия не имеяше и не содержаше: почему и приходящих из нечестия брачных по примирении церковнем брачне хотящих сожительствовати, имеяше всяко обычай (по неприятию всех еретических таин) якоже правилно онех разбирати, сице и священнословно в брак совокупляти церковным венчанием: якоже сей обдержныи ея закон показует.

 

Вопрос, 18.

Аще повторяху, то покажите правилне о том именно: где такое лежит повеление, и где таковыи чин написася, и кем кому предадеся?

 

Ответ, 18.

Аще убо православная Христова церковь вси тайны вне тоя содеваемыя за нетайны и за ничто вменяет. И аще церковнии учители, яко крещение еретическое, тако и вся от них содевамая не приятна и не потребна извествуют. якоже в 3-м ответе предъявихом. И аще в книге Кормчей святая церковь во особно положенной 51-й главе о супружестве всякому священнику твердо узаконяет не имети в приходе своем никаковаго супружества кроме венчания: и вси браки кроме венчания за беззаконныя и ничтоже сущия въменяет: якоже в прешедшем ответе засвидетельствовахом: то убо от сих явственно показуется, яко святая церковь, якоже за тайны в нечестии полученныя браки не вменяше и не приемляше: тако последователно и пришедших из нечестия брачных (по всеобдержному своему о брацех узаконению) имеяше обычай священнословити церковным венчанием: верно о сем слово показуется, и всякаго приятия достойно. Подтверждает сие еще явственнейше святейшии Максим митрополит рускии, которыи в благословенной своей грамоте новокрещенным людем по приятию святаго крещения хотящим брачносожительствовати, аще и старым сущим или младым всем явственно венчатися в церкови уставляет. очесом пишет сице [Кормчая старописм. глава 52]: Пишю же (рече) и се вам детем моим, и да вси чада моя порожени в купели новокрещенней, да держите жены от святыя соборныя и апостольския церкви: занеже жена спасения ради человеческаго бысть. аще же их держите в блуд без благословения церковнаго, то что ти в помощь есть. Но молися и нуди их аще и стари суть и млади, да венчаются в церкви. Дозде Максим митрополит рускии. Подтверждает сие и нынешняя великороссийская церковь, которая от издревле сей чин содержания непрерывно имеет, еже татар и мордву брачьных по крещении в брак священнословно совокупляет. Подтверждает сие и самого тебе вопросителя извещение, еже явственно извествуеши: яко сицевии из нечестия приходящии брачнии с благословением священных лиц на сожитие попущахуся. Аще же с благословением священных лиц сии на сожитие попущахуся, якоже сам извествуеши: убо явственно чрез сие и сам (аще и не хотя) показуеши, еже таковии браки церковию не приятни, и с венчанием тако брачнии бывшии на сожитие (в православней церкви) попущахуся: ибо благословение священных лиц ничто ино, токмо венчание: или аще не венчание полное (по тебе) то всяко священнословныя брачныя молитвы: но и сия вместо венчания же полнаго во святей церкви употребляхуся, якоже свидетельствует священномученик Игнатии [Баронии, лето Господне 52]. Кроме же сего (сиречь без молитвы) благословение священных лиц отнюд не бывает. И тако убо от всех сих свидетельств, и подтверждении: (сиречь и от святоотеческаго о еретических тайнах разсуждения, и от закона церковнаго, и согласия правилнаго, и от явственных свидетельств древних российских святителей. и от непрерывнаго от издревле содержания нынешния российския церкве, и от подобнаго сему извещения самого тебе вопросителя:) явственно показуется: яко православная Христова церковь якоже браков в нечестии устроенных не приимаше и за истинныя тайны не вменяше: сице и приходящих сих из нечестия брачных непременно обдержныи обычай имеяше, не инако в брак попущати, но токмо по чину церковному священнословити обычным венчанием. Верно таковое показание по нам является, и всякия твердости преисполнено.

 

Вопрос, 19.

Аще где весте, то како оныи написан?

 

Ответ, 19.

Зри вышеписанныя ответы.

 

Вопрос, 20.

Святейшии многострадалныи Филарет патриарх Московскии в соборном своем изложении латынян повелевает крестити: убо повелевает ли их венчати?

 

Ответ, 20.

Святейшии многострадалныи Филарет патриарх Московскии сочини соборное изложение не о брацех латынских: но вся нужда и вина сего сочинения последова о крещении латынском: очесом с начала того соборнаго изложения явственно о сей вине свидетельствуется: ибо пишется тамо сице: От создания мира в лето 7128-го, возвестиша ми (ниже) на Иону митрополита Сарскаго и Подонскаго сицеву вещь: яко той Иона (ниже) от латынския веры двою человек ляхов, Яна слободцкаго, да Матфея светицкаго не повеле крестити. (ниже) аз же смиренныи Филарет патриарх не презрех таковаго раскола, да не погибнут овца стада Христова (ниже) вседушно попекохся о сем, и прочая. И тако от самаго начала соборнаго изложения видимо: яко вина счинения сего бяше не о брацех, но о крещении паче. И того ради о брацех латынских во оном соборном изложении подробнаго определения и не обретается. Но аще же и о хиротонии латынской пространнаго установления во оном изложении тако же не обретается: сиречь како от латын приходящих архиереов иереов по крещении хиротонисати ли, или не хиротонисати: всего того не извествуется. Но обаче же аще и не извествует святейшии Филарет пространно о брацех и хиротонии латынской, но в прочих церковных писаниих о сем является. якоже о хиротонии латынской в книге Захария Копестинскаго пространнейше извествуется: тако и о брацех еретических в прочих писаниих пространнейши свидетельствуется: очесом отчасти в вышеписанных ответех нами показася.

 

Вопрос, 21.

И аще повелевает, то где о том писано? и како чины полагает, и каковыми правилы утвержает?

 

Ответ, 21.

Како повелевает святое писание о брацех еретических и поганских мудрствовати и поступати, и где о том писано, и каковыми правилы сие утверждается: о том в предложенных зде ответех, по худосилию нашему извествуется. Святейшии же Филарет, понеже о крещении латынском, а не о брацех сочини соборное изложение: и того ради благоволите не вся в соборном изложении святейшаго Филарета, коварно, паче же и неразумно възыскивати: но и прочими предложенными святоцерковными свидетельствы удовлитися.

 

И тако на вся таковыя предложенныя твоя вопросы честныи вопросителю, краткия сия ответы (со свидетельствы от святаго писания) сочинивше ти предлагаем: и сим ответное сие писание заключаем ныне, аминь.

Hosted by uCoz