Вопросы и ответы о вере, о сектах, и староверах.
[Из рукописного сборника «Кадес»].
Вопрос 1. Что первее Господь заповеда святым апостолом?
Ответ 1. Господь рече, своим учеником, шедше научите вся языки крестяще их, и учаще их блюсти вся елика заповедах вам. [Матф. зач. 117].
Вопрос 2. Что есть знамение истинаго християнина?
Ответ 2. Вера правая, и дела
благочестивыя, христианин бо истовыи [господственыи] Христов, добрыми делы и
благочестивым учением состоится. [Альфа лист 557 (гл.
Вопрос 3. Что есть вера?
Ответ 3. Яко от двою мудростию научаеми, деяние реку и ведение: то есть, деяния подвиг, и видение вера. [Иоан. зач. 61].
Вопрос 4. Что нужнее вера, или дело?
Ответ 4. Нужно есть вера, в кратких глаголех имать спасение. [Бес. лис. 96. ст. 1].
Вопрос 5. В кии глаголет спасение?
Ответ 5. Сердцем веровать в правду, усты же исповедовати во спасение, в сердцы вера, то крило едино, а во устах свободное глаголание то крило другое. [Златоуст на Богояв.].
Вопрос 6. Кому сии крила даются?
Ответ 6. Мучеником и исповедником; учителем два крила, дело и слово, а иноком, чистота и кротость. А мучеником вера сердечная и устное глаголание, яко же разбойник, первее верова, та же исповеда, и влете в рай. [Четии минея генв. 6].
Вопрос 7. Кое нужнее?
Ответ 7. Вера всем обще[?нрзб.] едина преда, якоже монета царская, не требует прибавления ниже отъятия; а дела коегождо по силе, яко инок против поселянина.
Вопрос 8. Како блюсти веру?
Ответ 8. И мало что изменяяй, все погубил. якоже в царских златницах, аще и мало что от образа пресекл, всю непотребну содела; такожде и о вере. [Бес. лис. 1574 (1474?)].
Вопрос 9. Мощно ли на милость Божию уповати, аще что недоразумеем?
Ответ 9. Не рцы многа щедрот Божии, сиречь очистит множество грехов моих; [Бес. лис. 1612]. и ниже, лис. …[нрзб.] Две надежды на Бога, едина благая надежда. з делом закона, а 2-я, ничтоже соделавшы.
Вопрос 10. От чего ереси раждаются?
Ответ 10. Велико зло еже не видети писания, от сего лютый еретически возрасте недуг; [Никон, лис. 55 и 403] тоже лис. 13, и 14; Второе от зависти; Бес. лис. 106, или 2377. Третие ради свободнаго жития законы превращают, и ереси составляют; [Кирилл., лис. 12]. Четвертое, егда поболев страстию любоначалия, и от сего раждается ересь; Вне писания Господь распинается; [Бес. лис. 1549; Матф. лис. 167]. Превелие зло неведети писания, от сего впадают в руки диаволу. [Бес. лис. 1131].
Вопрос 11. Како исповедати веру пред нечестивым?
Ответ 11. Всяк убо исповесть Мене пред человеки, исповем его Аз пред Отцем Моим иже на небесех; Толк. На муки зде подвизает их, не токмо бо душею веровати, но и от уст исповедания ищет. [Матф. зач. 38; Марк. зач. 37].
Вопрос 12. Аще помолчат страха ради: не будет ли греха?
Ответ 12. О истине умолчание сам себе осудил. [евангел. в нед. 14]. глаголет авва Максим. Аще убо Бог и Божии пророцы и апостоли, повелевают исповедати нам словесы и гласы веры таинство иже приносит всему миру спасение, то несть полезно налагати исповеданию тому молчанию. [генв. 21]. О истине не молчать но обличать. [Никон, слов. 3].
Вопрос 13. Како есть еже веры отпасти?
Ответ 13. Аще кто озверившемуся антихристу повинется, и злочестивое жительство пройдет онаго вообразующе делом, или словом проповесть его Бога, се и сказуется на руце, и на челе данное начертание; [Апок. зач. 42]. еще зри июня, 19. Ученик преподобнаго Паисия. токмо рече к жидовину, может быть и тако яко же глаголашы. Увы Христа отвержеся, и христианскии образ взяся, и Дух Святый излете.
Вопрос 14. Аще кто отвержется страха ради, како церковь приимала таковых?
Ответ 14. Зри, собора во Анкире, прав. 4. Елицы ведоми, внидоша с радостию в идольскии храм, и ядоша, 6 лет да припадают. Прав. 5. Аще прещения убоявся пожерл идолом, 5 лет, да припадают; тож, собор. Прав. 7. Иже 2 и 3 пожерл идолом, 7 лет, да припадают; Петра Александр. 1. Иже немогущих терпети, и Христа отвергшимся 3 лети покаяния, и другим, 40 дней. Прав. 2. Иже в темницы токмо ввержени, и отвергшися Христа, иже к три еще едино лето; Прав. 4[3?]. Иже нестрадавше ничтоже; 4 лета, покаянием даем им; Прав. 5. Иже лицемерием а не истинною пожерл идолом и преблазнивше мучителей, и тако избегшее пожрети; 6 месец запрещение да примет. [Прав. 4] Аще отвергшеся, и потом без покаяния пребывают. да будут яко варвари погании.
Вопрос 15. Единым ли идолопоклонением невернии прельщали православных или многим?
Ответ 15. Что заповедь или правило разумеет, то и отступление нарицается; зри апрел. 14. за брадобритие замучены. маия 26. Георгии святыи за татарскую тафию замучен. зри в Баронии, в лете 302. Филикс епископ и Упль диякон за книги замучены; августа 1-го за свиное мясо замучены. А овы за причащение еретическое, овым токмо речено бысть послушаи повеления царева, и свободен будешь.
Вопрос 16. Что поморцы глаголют, что мы де веры отступили. ныне нас и не спрашивают.
Ответ 16. Зри их ответ. Первое были вопрошены поморцы от ермонаха Неофита, вопросил их, какую государь веру имат, ибо и мы рече надеемся спастися. Ответ: Мы его благочестия не испытуем, но за его православие Господа Бога молим, а за еретиков щитать не хощем и ужасаемся.
Вопрос 17. Поморцы приводят слово сие, не нарицай еллина скверна, ниже буди ему досадитель.
Ответ 17. Аще вине не сущи не нарицай еллина скверна, аще о вере вопрошен будешы, рцы яко сквернава и нечестива вера ваша; [Никон слов. 2; Бес. лис. 2155] А на поли указ, нечестиа еллинская и еретическая обличати.
Вопрос 18. Когда поморцы и вси сектаторы записались в раскольники, и именем секты, и согласия?
Ответ 18. Зри указы Петра перваго, в лета, 1716, и в 1718, и 1724, и 1735, и 1745; И во всех сих указах записались в раскольники; а раскольники колящиися на разныя секты, и на разныя названия и согласия, именуются отщепенцы от правоверия; и нарицаются расколниками и сектарями; Секта поморскаго согласия, секта федосьева согласия; а иныя андреева согласия, а прочее, филиппова согласия; а которыя новожены, а иныя тропарники, а другия безтропарники; секта старой часовельной; секта новоблагословенной часовни, и вси брашники, и нечашишники; а другии чашишники; сиречь чашками врось, а молятся вси вкупе; секта под названием спасова согласу; секта под названием четырех евангелистов; или единоверческая; секта австрийская, беглопоповская, от Амбросия, еретика обливанца; секта израиль в пустыни; секта нетовщина; секта рябиновщина; секта керженскаго согласу; секта белоризцов; секта стариковщина; секта хлыстовщина; секта дияковщина; секта кадовщина, секта вретищников и воздержников; и одежду носят всю синю, или всю белу; а если нить синя, вмести с белой, та одежда, глаголют пестра, пестра, антихристова сестра; а самовар антихристова брюха; секта тайно брашников, и безпоповщиков; секта безденежников; секта морильщиков; и прочих разных безчисленых названиих, и сектов; И вси нарицаются и хвалятся старой верой, а что же это за старовер; и по какой это по старой вере; И много старых вер: во первых жиды староверы; во вторых еллины староверы, и прочии еретики остались в старой вере, кии не поверовали новому благодатному закону. А вернии христиани не нарицаются староверами, а по Христе Спасители, и по новой благодати, нарицаются христианами; а не по жидовски староверами; А о сектах зри достоверно, книгу Обличник, тамо и основание всех сектов узриши; есть изображен змий двуглавый из онаго гортани древо израсте; а на древе лиски, а на лисках подпись означенных, 37 различных сектов.
Вопрос 19. Которым еретикам подобни вси сектаторы во всей Россие живущии, ибо токмо сердцем веруют а устнами не исповедают?
Ответ 19. Гностики не токмо бегати, но и усты Бога отрицатися советоваху, глаголюще [Бароний, в лет. 205], довлеет яко Христос умре, не желает Он нашея смерти; и еклесаиты, и прискилиналисты, и павлиане, симониане, и Василид учаше леть есть в гонение Христа отрещися, сии еретики вси подобни нынешним сектаторам. токмо сердцем во Христа верующе а устами не исповедующе.
Вопрос 20. Которым еретикам подобни еже научаеми в гонение не бегати?
Ответ 20. Монтан еретик и Савелии. не веляше скрыватися, егда ищут на мучение. [Бароний в лето 172]. Тертулиян зело возбраняше бегати во время гонения, последуя монтанинтом. [Бароний в лето 205].
Вопрос 21. Что есть имя раскол, в какое название полагается от церкви в хвальное или хулное?
Ответ 21. Два по смыслу раскола есть: един добрый, а 2-й, злый а имя едино, а вещею великое растояние; Аще Феофилакт и глаголет что раскол добрая вещь, зри там Златоуст толк.; Яко не везде мир и единение добро есть сиречь законом естества совокуплении сын ко отцу, и матерь ко дщери, аще един не верит. то доброй части велит раскалатися, то есть отступить, сей доброй расколник; А в которыи поморцы и прочии сектаторы пишутся, той подобен еретиком раскольник.
Вопрос 22. Которое мнение поставляется в закон правельный, той ли который токмо сердцем, или кто и устами исповедает?
Ответ 22. Того должен быть верх которыи устнами себя исповедают, ибо поморцы и прочии сектанты, аще тмами мнение полагают, что они не таковы суть, якоже никониана. их везде пишут расколниками, а себя православными, и верх приписуется; ибо поморцы к тому прикладывают, что они расколники, а никонияне православныя.
Вопрос 23. Которое мнение в закон поставляется, мучеников, или мучителей?
Ответ 23. Зри месяца августа, в 1 день. Мучитель святым предложи им мяса свино ясти, которое законом возбранено, а сродники предложиша им мясо не свиное ясти чтобы мучителя обольстить, и мучеников от смерти избавить, святыи Елиазар рече гласно лучше мне рече во ад живу снити нежели что лукавновати пред Богом моим. И святыи Савва готфянин тоже сотвори, аще не идоложертвенное предложиша ему.
Вопрос 24. Что есть секта, ибо разныя согласники пишутся в секту, и отнюд ни полагают во грех, добре се творят?
Ответ 24. Секта латинским языком. а римским схизматик, а руски расколник, а гречески еретик в сех четырех названиях равно отступление заключается, зри о сектах свидетельство. Апостол зач. 52. ст. 19. Секты жидовския именуются: Алфа лис. 75. Един Господь едина вера. Аще одна вера то прочии не веры токмо секты: и Кирил. лис. 190: Месия лис. 16. Секты еретическия нарицает. Зерцало богословие, лис. 85. Вымышляюще себе секты по воли сердца своего, а не по воли Божии и закону Его.
Вопрос 25. Како святии прелести имя гнушахуся?
Ответ 25. Егда спросил Арахиа где есть прелестник иже прельстивыи сына царева, отвеща старец, несть его у нас, ниже будет, ибо имать посреде вас пребывание, вопроси Арахиа знаеши ты его, отвеща пустыник знаю прелестник иже глаголется диавол, той посреде вас живет, рече Арахия аз о Варлааме тя вопрошаю. Аще о Варлааме вопрошаешы, то должен тако рещи, где есть прелести отвративыи сына царева. [нояб. 19].
Вопрос 26. Како подобает отвещати на вопрос, аще нарекут еретиком, или сектатором?
Ответ 26. Глаголет плоть душы [Зерцало душезрительное]. Претерпи укоризну, досаду, и поношение, и хухнание, и покор, подражание, насмеяние душе моя вся претерпи вся приемля, еретика же тя назову суда не приимеши, речешы яко несть аз якоже ты глаголешы, аще же приимешы, отвергхся еси Христа своего; Патерик лис. 20: Еще Феодор Студит книг. 3-я. Обаче яко аще речет кто о мне зле истинствуй, кроме еже не еретик ми быти, и прочее радуяся о глаголемых.
Вопрос 27. Сектаторы подписались ни учить ни крестить в 1728 года.
Ответ 27. Зри первой вопрос. Господь апостолом своим заповедал шедше научите вся языки крестяще их и учаще блюсти вся елика заповедах вам; сие противно всему писанию, яко Господь рече [Лук. лис. 224]. Не прейдет род сей, дондеже вся сия будут. Толков. Род же не тогда сущии, народ християнскии верныи. А по их записанию конец прият новыя благодати.
Вопрос 28. Что есть закон новый благодати?
Ответ 28. Лука зач. 3. Что рече архангел к деве, яко родишы сына, и той воцарится в дому Ияковли, и царствию его не будет конца. Толк. царству сиречь благоразумию християнскому конца не будет. По онаму яко семя его християнский род, пребудет вовеки, и положу в век века семя его [из Алфы].
Вопрос 29. Сектанты глаголют, что не мы подписались, но отцы нашы, а мы неповины. право ли они глаголют или ни?
Ответ 29. Посему и никонияне и ариане и прочии неповини. ибо ни они ереси учинили но учители их: сие противно писанию, ибо отцы вашы записались, а вы на их основались. Помысли убо колико время в смерти род наш пребывает [Бесед. лис 619], единаго ради греха, и множайше преидоша а смерть не разрешенна. Аще бы у них кто записался отставили его, а вместо того инаго поставили. А то у них нет ни единаго целаго, а вси прокажени.
Вопрос 30. За что поморцы, и вси прочии сектаторы ссылаются на Кавказ, и в Сибирь?
Ответ 30. Зри на указ тогда расколники сице писались ни учить не крестить, не токмо постороним, но и в своем дому отнюд прелести своей ни учить, с подтверждением имения лишения, и ссылкою на галеры. Вот они и судятся за вороство то есть подписались не учить и ни крестить а тихообразна крестят.
Вопрос 31. Како апостоли святии любомудрствоваху?
Ответ 31. Деяние 11. И да не прострется в людех слово, и прещением запретим има, отнюд не глаголати ни учити о имени Iсусове. Петр же Иоанн отвещаша, аще праведно есть пред Богом вас послушати паче нежели Бога. И во всех деяниях тако написано что тмами запрещаху апостолов не учити но они не слушаху зане незаконно.
Вопрос 32. Что проповедь сокращает?
Ответ 32. Боязнь и неверие, ибо вси сектаторы подписались в расколники, и не учить и не крестить и книги у себя не держать, и потаенных християн то есть соловецких суду предавать нечего инаго что страха ради и животолюбия ради.
Вопрос 33. Законно ли поморцы, и вси сектаторы подписались святыя книги писменныя и печатныя суду предавать?
Ответ 33. Зри Баронии в лето 302, Филикс епископ и Упль диякон за книги замучены.
Вопрос 34. Сектаторы подписались потаеных и незаписных християн предавать.
Ответ 34. Правило есть в Кормчей предающих пути и домы и братию в руки нечестивых. до смерти не причастить; И святую мученицу Варвару егда гоня…[нрзб.] ся. и спроси единаго пастыря где такая то бежащая. он токмо перстом на место то показа, где же святая скрыся, и абие окамене сам пастырь и вси овцы его.
Вопрос 35. Всяко ли властелину покарятися, и всегда ли?
Ответ 35. Господь рече воздадите кесареви кесарева. емуже страх страх, емуже дань дань: емуже честь честь: емуже урок урок; кроме проповеди. Аще что таково будет, еже проповеди повреждающее, не ктому кесарева дань сицевая но дияволя [Никон слов. 17, в конце]; Аще ли царь над человеки царствует. а над собою же имат царствующии грехи, и страсти, сребролюбие, и грех и лукавство, и неправду, гордость и ярость. злейше же всего неверие, таковый бо царь несть Божии слуга, но дияволь, ни царь но мучитель, убо таковаго царя или князя не послушаеши, аще мучит, аще смертию претит, сему свидетельствуют пророцы апостоли, и мученицы, иже от нечестивых царей убиени быша, и повелению их не покоришася, сице подобает служите царем. [Иосиф, слово 7].
Вопрос 36. Аще отец и мать невернии, подобает ли покарятися им, аще противятся проповеди?
Ответ 36. Господу глаголющу аще кто любит отца или матерь паче Мене несть Мене достоин. Яко аще еллин будет, или еретик, и тому повиноватися не подобает, несть бо повиновение о Господе. [в неделю 1-ю всех святых].
Вопрос 37. Что, вси сектаторы крепко в том выстаивают, что нынешная власть, подобна той что была при Августе кесари, глаголюще Господь записался и мы пишемся?
Ответ 37. В те дни изыде повеление кесарево во всю вселенную, се первое написание бысть [Лук. зач. 5]. Толк. Того ради написание да всем сошедшимся во свое отечество, взыде и девице в Вифлеем, во свое отечество, и тако родит Господа, да збудется пророчество. Лепопо же есть единому Христу хотящему преставити многобожие, и единому кесарю царствовати, написуется же и Христос со всеми. Достоит же и Господа со всеми написати. Да освятит написанныя; да разрешит работу, якоже обрезася разрешы обрезание, сице и написася яко раб, разрешы работу естества нашего.
Вопрос 38. Чем еще неподобна ныне ревизия …[нрзб.] оной?
Ответ 38. Служба рожеству Христову. на возвах слава. Августу единоначальствующю на земли многоначалие идолом упразднися, и под едино владычество Божества языцы вероваша. описашася людие повелением кесаревым написахомся вернии именем Божества. Видите ли сектаторы, а не именем секты. якоже ныне вы пишитесь.
Вопрос 39. Чего ради Христос записался, и кая тайна о сем?
Ответ 39. В 24 день. Канон на утрени, песнь 1, тропарь 1. Написася кесаревым повелением, хотя написати в книзе животней всех царю человека, странно во своя пришел еси, люте устранившагося человека от рая на небо возводя. И во всей службе тако писано, что есть[?нрзб.] таинство сие написание.
Вопрос 40. Все ли подобает нам творити что Христос творил, или ни?
Ответ 40. Аще будем во всем на Христа слагатися, то всем ересем двери отверзем. Потребник иноческии. лис. 349. Мы же убо к сим речем, яко многа такова суть, еже Христос сотвори а нам не подобает сице творити, Христос обрезася и суботствова, а нам не подобает сице творити, Христос 30 лет дождався крестися, а нам не подобает сице творити, и подобная сим.
Вопрос 41. Како прежнии християне любомудрствоваху о ревизии?
Ответ 41. Зри историю о сибирских страдалцах егда прииде указ во град Тару, тогда благочестия ревнители храбро стали за веру, и тогда всех лютыми томлением мучили, и ишымскии людии мнози домы свои оставиша и бежаша в разныя страны. в 1719 году кажнаго записывали к месту и сословию.
Вопрос 42. Сектаторы детей своих на военную службу отдают в преступления закона.
Ответ 42. Смотри Кормч. лис. 261. прав. во Ангкире. Не токмо сам собою пожерл, но иныя понудил, 3 лет да покается. Толк. Аще кто своею волею пожерл идолом, сам себя погубил, и другия понудил вринул в погибель. аще обратятся три лета прибудут с послушающими другии 6 лет да сотворит с припадающими, лето же едино да сотворит с верными приобщаяся с ними молитв.
Вопрос 43. Сектаторы глаголют, мы не идолом служим, но[?нрзб.] токмо браду бреем, а царю служим.
Ответ 43. Антихрист не бо во идолослужение приведет люди но самому себе повелит кланитися, и вместо бога почитати, при антихристе идолов не будет.
Вопрос 44. Сектаторы съединение имут с еретики, и различия никакова нет. пишутся вместе, и умир..[нрзб.] и власти объявляют.
Ответ 44. Григории Богослов рече [Бол. Соб. лис. 759]. Временем таяся, и противу времени вероваша зане имеше держаща тя еретики, и мняся еретиком равняся и ты еретик.
Вопрос 45. Чесо ради, сектаторы пишутся в раскол себя не отлучают от еретик?
Ответ 45. Зри Баронии, в лето 253. Мнози страха ради Христа отвергошася, и во первых сии падоша, иже житие пространно во гресех, и благая мира сего лобызаша, яко же глаголет Киприян святыи. любовь слепая имение многих отнюд прельсти, и не можаху на оставление мира быти готовы, ихже любовь благих мира связа. Святыи Ипполит рече. Ибо тогда связаннии вещьми житейскими и желанием века сего тии удобь приступят к дияволу.
Вопрос 46. Сектаторы помогают церквам еретическим дровами и плинфами, и прочем, и денежным сбором.
Ответ 46. Аще которыи христианин принесет масло, или свещу, в соборище еретическое, или жидовское, да отлучится [Кормч. лис. 11, лис. 25. прав. 7]. Зри святии мученицы отнюд не прилежаху о идольских храмех, но разоряху и сожигаху, и со землею соравняху. Аще епископ наследие пишет еретиком да будет проклят. зри прав. 82 собора в Карфагене.
Вопрос 47. Что аще еретику внити в церковь во время моления, подобает ли, или ни, ибо у сектаторах всегда власти стоят?
Ответ 47. Несть достойно еретиком в церковь входити, аще Василий Великии Уалента царя еретика суща прият, не бе еще сего собора, и сие правило не бе изложено [Кормч. глав. 10 прав. 6; Минея сен. 4], Якоже святыи Вавила не пусти в церковь отступника Иулияна.
Вопрос 48. Вси сектаторы во граде живущии, огнь в плошках зажигают, в честь царя, законно ли се творят?
Ответ 48. Обычаем еллинским внимати запаление огней пред домом своим творити. аще ли епископ или презвитер, се творит да извержется, а мирскии да отлучится [Кормч. 2 соб. прав. 7]. Еще Номоканон прав. 25 о том же. Еще в Бароние в лето 200. Плавтиян тех всех избиваше, не за то что они христиане, но за то что не принесоша чести огнем кесарю.
Вопрос 49. Сектаторы глаголют, мы де аще в чем и преступаем а каемся.
Ответ 49. Вопросим вас в чем[?нрзб] вы каитесь, о том ли что веру не исповедали страха ради, или за то что под секту, или в раскол подписывайтеся, или подписались ни учить ни крестить, сего нет нигдеже что вы каитесь. Понеже в том неизбывно[?нрзб.] пребывайте, аще и на святаго апостола Петра ссылайтеся. он аще и отвержеся в дворе каиафином, а покаяся во дворе[?нрзб.] галилейском, а вы всегда в дворе каиафином пребывайте и Христа распинайте.
Вопрос 50. Сектаторы нарицаются названиями, в местность или тленнаго человека, поморцы, федосеовыми, филипповыми, австрийскими, староверами, и единоверцами, нетовщиной, и рябиновщиной, стариковщиной, и прочими разными названиями. …[нрзб.] под записью в раскол; законно ли се творят?
Ответ 50. Апостол зач. 166. Аще кто не любит Господа нашего Iсуса Христа да будет проклят. Толк. Единым словом сим всех устрашы, иже тая творящих блудничи уды, и братию соблазняющих идоложертвенным, и иже от человек именующихся, иже воскресению неверующе. Таже. Кто не любит Господа Iсуса анафема. анафема глаголется да осудится сатане, и предастся во огнь геенскии. Святыи Афонасии рече [слово 2]. От человек именовася знамение нечестия, вместо христиан ариянами нарицатися.
Вопрос 51. Како поморцы антихриста на Iисуса разумеют?
Ответ 51. Сие противно всему писанию чтобы бездушная вещи антихриста разуметь. аще и рече Иоанн Богослов: аще ин приидет того приимите. Ибо той вам мира славу возвестит еяже вы ищите. а Iисус како возвестит аще устов и гласа не имать. о том единой строки нет в писание чтобы был из чернил написан.
Вопрос 52. Что заставило поморян на Iисуса антихриста толковать?
Ответ 52. Животолюбие и сласти. ибо егда сего зверя назвали богом венчанным, и богом помазанным, и сказали молимся за твое православие, вот заставила и нужда антихриста на Iисуса толковать, потому что зверя обоготворили.
Вопрос 53. Кто антихрист?
Ответ 53. Златоуст на зач. 275. Убо ли сатана никакоже, но человек некии всякии образ сатанин получивыи. А той антихрист человек будет [О вере глав. 30] и подымет все действо сатанино.
Вопрос 54. Что за человек и что действо сатанино?
Ответ 54. Человек разуметися может ветхии, по Иполиту мечтательная[?нрзб.] плоть, а что рече Ипполит своему существу восприимет сосуд. То есть сосуд все человеки отступившии от Бога. А существо его ереси и грех царствует в человецех.
Вопрос 55. Како яснея разуметь?
Ответ 55. По 1000 лет, Рим отпаде, а по 1595-му лет и юнияты отпали. а по 1666-му лету и Россия отпали, в ереси и в ревизию и в разныя секты вси записались под раскол. Вот о сем и глаголет Богослов. Паде паде Вавилон и бысть жилище бесом, и хранитель духу нечистому.
Вопрос 56. Что паде паде, стены градския или ино что?
Ответ 56. Духовная власть и гражданская. якоже глаголет Златоуст, егда возмется власть римская от среды, тогда антихристово зачнется властительство, и похитит, не точию что человеческую но и Божию.
Вопрос 57. Что есть римская власть, и когда взялася от среды?
Ответ 57. Римская власть видимыи престол и царство благочестивое. А когда взялася от среды. смотри среду глаголет весь мир. А егда не стало царя и патриарха, тогда, и римския власти не стало, тогда и антихристово властительство стало, то есть безначалие. Смотри разумно вси ереси разрешены, и всяк грех. аще царьския законы и правятся. но в том зри несть и епитимии или коего наказания. но всякая ересь возобладала, и грех царствует, и вязать стало некому. Почему и нарицает святыи Андрей Кесарийскии, блудница вавилонская седящая на звери со златою чашею. разумеется весь мир яко во едином телеси.
Вопрос 58. В какой персоне антихрист?
Ответ 58. Кирил. знам. 1. Яко и простейшии человецы видяще и слышаще разумети могут яко антихристу предотечами его место самодержавное царское мира сего уготованно будет. Святыи Иполит. Яко убо воистину от колена Данова хощет родитися, и противитися, мучитель сыи царь, и судия лютыи диявол.
Вопрос 59. Аще человек антихрист и в царским …[нрзб.] во едином ли человеке, или во многих?
Ответ 59. [Анастасии Синаит] Антихрист ни во едином есть человеке, или царе, но во многих едином по единому последующе, и друг другу передающе. антихрист многих лиц собрание, яко во едином телеси суще. антихристу преходити и образы пременяти.
Вопрос 60. Како при антихристе спастись?
Ответ 60. Два пути ко спасению. Кирил. знам. 11. Силныи да борется с сатаною, а немощныи да бежат. Матф. Претерпевыи до конца той спасется. Ниже. Подобает бегати ниобратно ни о чем же радяще сущих в храмех[?нрзб.] ни о ризах ни о иных сосудех.
Вопрос 61. Сектаторы у зверя место просят для моленны, законно ли сие творят или ни?
Ответ 61. Евангелие. Неции мерзость запустения антихриста глаголют, яко на запустение мира и разорение церквам Божиим грядуща. Видите ли разорить пришел, а не созидать. Аще не в дому купно ни в церкви собиратися несть мощно, кождо сам да поет да почитает, да молится [Кормч. прав. 11]. А етова нет позволения кто бы тя гнал и мучил и веру отъимал, к тому же и припадать моленны просить. Антихрист созиждет церковь и воставит ю июдеом, то есть всем староверам, сиречь жидам сектарям отступникам расколникам. А правоверных прелюте изгоняти будет.
Вопрос 62. Что Ипполит глаголет, антихрист даст малыя снеди печати ради своея скверныя?
Ответ 62. Печать отсечение десных дел, то есть сперва отсечет дела и веру, тогда то и снедь малую даст, то есть мало[?нрзб.] закона ради записание в раскол, и за исправление богопротивных указов, и моленну дал и крестить позволил, и вси с покоем остались, токмо без главы.
Вопрос 63. Могут ли сии моленны существовать, которыя выстроены по звериным указом?
Ответ 63. Священная под властию ратных предстает быть священная [Никон лис. 171], яко же свободныи порабощен бысть, отпущенну же бывшу от беды восприимет первую свободу. Таже. Народное место по повелению цареву не бывает освященно. Аще хощет создати монастырь или церковь. то следует епископу место освятить потом и строить. А вы просите у самых злейшых мучителей.
Вопрос 64. Сектаторы глаголют, не сами мы тако раскольниками нарицаемся но они нас называют, и пишут в свои книги.
Ответ 64. Аще бы руки связали и насильно писати заставили рукою то не бы виновны были. Ибо связати языка не мощно. Аще тмами мучеников принуждали, то они противилися и не соизволяли. А сектаторы сами себя своеручно расколниками пишут, а их еретиков православными оставляют, а раскольническое звания то на себя приемлют. увы неразумия, и помрачения смысла. Что может быть сего безумия горше.
Вопрос 65. Что у сектаторов, овы брачныя овы небрачныя нарицаются законно ли они сице творят?
Ответ 65. Обои противно писанию разумеют. зри евангелие Лук. зач. 87. Не сходити с высоты добродетелей житейских ради, ниже ослабети извета ради житейских поклонитися мучителю животолюбия ради. Высота добродетели разумеется крест, а не мирское житие. и паки святыи Ефрем рече. Святии сего ради могут избежати яко вси печали мира сего отвергоша. И паки церковь побеже в пустыню. Толк. Избраннии жития сего избегнут, небрегуще ни о чем же поплевавшы вси гражданския плища и смятения мирския сласти.
Вопрос 66. Поморцы и вси сектари хвалютца и глаголют наш корень от соловецкаго, и мы на корени основаны.
Ответ 66. Посмееваяся святыи Афонасии [Баронии в лето 349], арияном, глаголя сим[?нрзб.] познавается нововымышленая их вера, яже в той день и лето родися. Наша вера не имать времени, едина всегда изначала пребывает. Вера едина от начала света [Мелет. посл. 9], во всех избранных действуема. яко во едином праотца нашего Адама от сынов действуема, и во всех избранных.
Вопрос 67. Что сектаторы глаголют, мы по писанию крестом разделени от никониян, то есть крестным знамением верныя от неверных.
Ответ 67. Апокал. гл..[нрзб.] Но убо якоже речеся, Во время пришествия антихристово, наипаче будут печати животворящаго креста разделяющеся от неверных верныя, непосрамленно и дерзновенно знамение Христово пред нечестивыми носяще. От сего мощно разуметь, что сие не о перстном сложение глаголет, но о страдание. якоже глаголет Златоуст. Крест есть душы ополчаемыя смерти желающии и ничтоже отрадно ищуще. Крест не просто знаменаяся им но крестная страждай. Видители чем разделени, сиречь страданием а не перстами.
Вопрос 68. Что сектаторы глаголют, аще бы Господь не сократил дни своим милосердием избранных ради не бы спаслася всяка плоть.
Ответ 68. Избранных ради сократятся иже в горах и в вертепах да не всех святых онех полк оскудеет, и паки избраннии жития сего избегнут, небрегуще ни о чем же поплевавше вси гражданския плища и смятения мирския сласти. А не тии кои в градех и в мятежах и во всякой роскоши пребывают.
Вопрос 69. Что сектаторы глаголют, печать антихристова щепоть, и глаголют мы не молимся, тако и печати на нас нет.
Ответ 69. Первое печать на челе, да научит во тме и льсти прельщенныя дерзати, а на руце печать да отсечет десных и благих дел действо. Аще кто озверившемуся антихристу повинется и нечестиваго житие содержит, или словом или делом проповесть его бога быти, се и сказуется на руце и на челе данное начертание. Видите ли вси сектаторы, что печать его, кто повинется зверю, а вы двести лет и болие покаряитеся зверю.
Вопрос 70. Что святыи Кирил пишет. Антихрист заповеди святых разрушит. а яже у него обратит и умыслит заповеди своим повелением держати.
Ответ 70. Ныне во всей вселенней заповеди святых уже сокрушены, антихристовы и богопротивныя заповеди введены, и вси безъизменно совершаются, и антихристово царство исправляется, и второе пришествие, в мгновение око приближается.
[Книг. гречес. Сечивца, глав. 18] Во время бо антихристово не будет покоя живущим на земли, но вси во градех и в селех живущи описани[?нрзб.] и знаеми явятся, и обременятся даньми великими, истинныя же благочестивыя веры не явится[?нрзб.], пастырие и священницы в зверие претворятся и не имать в них пребывати Дух Свят, но бесове водворятся, и к погибели душ человеческих вод..[нрзб.] имут быти; всех же человек сердца ожесточит диавол, на вся богоненавистная, похотения и слабость. И толико умножит в них ереси и злобу, аще им кто и возглаголет о истинней вере, не восхотят слышати, и вси в безверие преложишеся дияволю волю имут творити, сего ради якоже во дни Ноевы внезапу явится пришествие Христово.