Увещание держаться православной веры.

 

[рук. И. П. Б. Q.I.1026, лл. 8-21, прилож. 1 в кн. П. С. Смирнова «Из истории раскола в первой четверти 18 в.», 1909 г.]

 

Господи Ісусе Христе, Сыне Божий, помилуй нас, аминь. Государем моим милостивым, и приятелем смиренным, и в кротости пребывающим, сединами и незлобием преукрашенным, милосердием и милостию одеявшимся, нас сущим питателем, сиротам и вдовицам помогателем, скорбящим утешителем, больным посетителем, немощным помогателем, странным покоище, плачущим возвеселителем, просящим подателем, и многими добродетели облекшимся, имя-рек, и всем вам любимцам моим, от мала и до велика, по великому челобитию и по низкому поклону до лица земли от мене грешнаго, имя-рек. Здравствуйте, любимицы мои!

А о мне изволите вопросить: аз еще жив, и терпит Господь моему убожеству, и пребываю с рабами Христовыми в православной вере Христове, и молюся, елико по силе моей, Господу Богу и Спасу нашему Ісусу Христу, Пречистой Его Богоматери, Пресвятой Богородице, и всем святым Его, чтобы мне, грешному, в православной вере Христове (быть) до смерти моея. Понеже писано есть во святом и божественном Писании, претерпевый до конца, той спасется. Пишу аз, грешный, о сем к вам, друзи мои советнии и братия любезная, попецытеся о спасении душ своих Господа ради, доколе в веце сем еще, поищите безценнаго бисера небеснаго, который бы вас избавил муки вечныя и подал бы царство небесное. Понеже аз, грешный, от болезни сердечныя и со слезами глаголю к вам, поминаючи вашу любовь прежнюю ко мне, и не могу забыти днем и нощию, аки стрелы остры избодают сердце мое. Того ради, господие мои и братия любезная, утолите моя слезы и плач и рыдание непрестанное, помилуйте свои души, Господа ради обратитеся в православную христианскую веру: попомните свой смертный час и помяните страшный суд Христов, внегда Ангели лютии и грознии приидут по вас и восхитят вас в час, в онь же не чаете, и во время, в не же не ведаете. И которая дела тамо пошлете пред собою по аеру, и како тамо вам отвещати праведному судии Богу, не токмо за дела скверная, но и за слова и помышление. И того ради, государи мои, приятели, помилуйте свои души и измите себе от вечныя муки, — тамо вам никто не поможет: ни отец, ни мати, ни сынови, ни дщери, ни друзи, ни сердоболи, ни злато, ни сребро, ни имения, ни богатства изобилие, ни могутства гордость, но токмо поможет добрая дела, да истинная вера христианская. А ныне аще которые человецы и многия добродетели совершают: пост, или поклоны, или милостыню творят, а не в правой вере християнской, и то труд их весь вотще погибает. Понеже о таковых пишет святый Иоанн Богослов, тако рече: блюдите, да не погубите яже соделасте, яко мнози прелестницы изыдоша в мир. Да и мнози святии о сем пишут, яко вера без дел мертва есть, тако же и дела без истинныя веры мертвы суть. Яко во святом Евангелии Благовестном в Матфее пишет в зачале 95, лист 182: паки же не токмо подобает миловати, но веровати Богу истинному; мнози бо и от елльнин милостыню даяху, но не веруют в Бога живаго, и не имеяху милостыни, не последующе вере, и сего ради бяше без пользы милостыня их. Да и Кирилла Иеросалимскаго в книзе писано, в прении премудраго Панагиота философа с кардиналом Азимитом. Панагиот рече: священницы ваши свиньи, в них же посла Господь легион бесов, а милостыня ваша рожцы свиные, яко же рече премудрый Соломон: жертва нечестивых — мерзость Господеви. А мы, православные християне, известно о сем ведаем, еже во святом Евангелии писано есть: яко милостыня и пост — два крыла возлетати на высоту небесную, но сия вся с правою верою. И паки: милостыня очищает грехи, а пост совокупляет человека со ангелы. И паки: даяй нищему, Христу взаим дает. И паки: елико сотворите нищим, то Мне сотворите. И сие речеся православным христианом, а не еретиком, или которые человецы в ересех пребывают и учению их последуют. Кто последует и приобщается с ними в службе их, и к тем святии отцы инако глаголют: еже обратитеся от прелести и покайтеся, а не глаголют им тако: еже творити милостыню, или смирение, или поститися, или любовь имети в ересех. Но токмо глаголют: обратитеся в православную християнскую веру, понеже без правыя веры не возможно спастися. И паки рече: праведник от веры жив будет, понеже и невернии мнози милостыню творят, и жидове и еллины, и постятся, и любовь имеют и смирение, но не в правой вере, и сего ради труд их весь вотще погибает. И вы, друзи мои советнии и братия моя любезная, прежде всего потщитеся и подвигнитеся изобрести путь священный — православную християнскую веру, не погубите времени, даннаго нам на покаяние, его же паки получити невозможно, якоже и Господь рече: любяй Мя, в законе моем поучатися имать день и нощь. И вы, любимицы мои, поскорбите о душах своих зде, дондеже в веце сем; яко же святый Иоанн Златоустый глаголет: иже аще кто скорбен зде о души своей, той о ней небесною славою возвеселится. А наипаче же сего блюдитеся, еже рече: горе полагающим свет во тьму и тьму в свет, еже есть у нынешних учителей: церкви Божии тьма, неведение, сиречь учение ложное, еретическое, проклятое, и от святых отец отверженное и уничиженное. И что много глаголю, и глагола не скончаю, несть бо того догмата в церкви Божии, котораго бы Никон патриарх не разрушил. А святии отцы и за едину черту проклятие положили, якоже пишет в книзе Кормчей, лист 641: яко еретик есть и еретическому же проклятию подлежит, аще имать что, уклоняяся от православной веры. Тако святии отцы написали, а вы, тако слышавше, святых отец проклятие ни во что полагаете, аки безсмертни, и не поминаете смертнаго часа и страшнаго втораго пришествия Христова, и возлюбили есте проклятие паче благословения,  и муку вечную паче царствия небеснаго, и тьму кромешную паче света безвечерняго, и алкание вечное паче наслаждения неизреченнаго. И вы, государи мои, любимицы, и друзи мои советнии, ради наслаждения суетнаго и маловременнаго лишитися вечнаго наслаждения; да аще вам зде и сладко будет, но не надолго, а огорчитися вам во веки веком. И вы, государи мои, изберите себе лучшее, чтобы вашим душам на пользу, обратитеся в православную християнскую веру, и потерпите в малое се время, да царствовати имамы в непроходимых вецех: алчем зде, да тамо насытимся; плачем зде, да тамо утешимся; будем зде скорбни, Бога ради, да тамо возвеселимся; обнищаем зде добровольне Христа ради, да тамо обогатимся . Или вы не слышите гласа глаголюща, яко невозможно богатому внити в царство небесное. И паки рече: о, горе вам насыщении, яко взалчете. Иже бо кто не хощет зде алчен и жажден быти Христа ради, той лишится вечнаго наслаждения и пищи райския; яко же святый Иоанн Златоуст в Маргарите глаголет и Правыя Веры списатель: иже бо в пиянстве пребывающий и в многоядении, под самым дияволом мучим будет, таковый; паки глаголет: о, горе вам, смеющимся ныне, яко плакати и рыдати имате безпрестанно; яко же святый Ефрем Сирин глаголет в своей книзе: иже бо не хощет зде страдати, той тамо имать плакатися в непроходимых вецех.

А я ныне вижу, что несть у вас разсуждения ни деснице, ни шуйце, сиречь ни добру, ни злу, ни ересем, ни истинной вере. Видите ли , како учителие нынешние со ста шестидесят шестаго году повелевают креститися щепотию, тремя персты, а благословляют людей разстопыря персты Малаксою. И то их предание — новое, еретическое, а святии отцы то называют печать антихристову, понеже все едино: кто щепотию крестится, или под руку к ним ходит, все то одна печать антихристова и мудрование Никона патриарха. О сем святый Ипполит, папа римский, глаголет, книга Соборник, лист 101: и даст им знамение на руце десней и на челе, да никто же честный и животворящий крест сотворит десною рукою своею на челе, но связана рука его будет. Лист той же: печати же его, иже на руце десней и на челе есть, число 666. Ниже: суть сия — злый вождь, агнец неправедный, древлезавистник, потрясет вельми, титин, еже есть преисподний бес. Ниже, лист 133: восплачутся горы, и холмы, и древа польская, человеческаго рода    ради, яко вси уклонишася от Бога и лесцу вероваша, приемше начертание сквернаго богоборца вместо животворящаго креста Спасова. Восплачутся и церкви Божии плачем велиим, зане ни приношения, ниже кадило совершается, ниже служба богоугодная; священныя бо церкви яко овощное хранилище будут, и честное тело и кровь Христовы во днех онех не имать явитися; служба угаснет, чтение Писания не услышится, но тьма будет на человецех, и плач на плач, и горе на горе. И егда пришел 666 год, в Никона патриарха дух лукавый, и начат Никон казити благочестивыя книги, и начат свои новыя печатати книги, и по них учить, а старыя святыя книги отринул, и святых московских чудотворцев уничижил, и благоверных князей и благочестивых царей опорочил: будто они не знали святых отец учение и соборное уложение, и проклятие их ни во что вменил, и заповеди их святыя разрушил. И то бы мощно и вам разсудити, что их мудрование неправо: понеже велят креститися тако, а благословляют инако; так, по их мудрованию, стало два креста, а не так, как у святых отец положено. А святой Феодорит глаголет: како рукою креститися, тако и благословити, понеже един Бог, и едина вера, и едино крещение, един и крест Христов. А нынешние учителие иную веру нашли, потом иное крещение, да иный крест. Да они же уложили: служат обедню на 5-ти просвирах, а печатают крыжами двоечастными. А святый Кирилл Иеросалимский тако пишет о том двоечастном крыже: и тот, кто его истецал, проклят. И о том бы мощно и вам разсудити, что то богопротивно, понеже Христос не на дву древах распят бысть, а тут токмо два древа; а Христос распят бысть на трех древах: на кипарисе, и певге, и кедре. А служили святии отцы обедню на 7-ми просфирах, а кресты были истннные, в триех древах, а не в дву.

И глаголют нецыи от вас: несть-де в нынешнем причастии ни святости, ни осквернения, и греха в том не сказывают. И сию они речь глаголют от своего разстленнаго и помраченнаго ума, а не от святаго Писания. Мы зрим во святом Писании, книга Потребник Иноческий, лист 236: егда Рим паде Аполинариевою ересию, вместо кислаго хлеба на опресноках начаша святую литоргию совершати, и которые человецы приступили к таковому причащению, и святии отцы к ним глаголют, яко пси мертву плоть [едят], а не живу.

Зрите ли, о, любимицы мои, силу сего словеси: мука и вода нескверна, яже опресноки сотворяют и действуют на них службы, но ради того скверны, яже от своего умышления действуют, а не от святого Писания. Тако же и о нынешнем причастии и о крыже латинском разумети достоит, скверно быти, а не свято, для того, что не по святых отец уложению действуют литоргию, но по своему умышлению  служат, якоже латыни. Тако у нас ныне в Московском государстве Никоново предание восприяли и служат на 5-ти крыжах латинских: поистине яко пси мертву плоть ядят, а не живу, якоже римляне. О сем и во святом Евангелии Господь рече: егда узрите мерзость запустения, стоящу на месте святе, реченную Даниилом пророком, тогда сущии во Иудее да бежат на горы, сиречь ко святому  божественному Писанию. И которые человецы смеют рещи тако, яко несть мерзости ныне, и како уста их отверзаются противу Господних глагол? Господь пророком глаголет, что мерзость станет на месте святе, а они мерзость святостию называют. И о сем, аще кто усомнится и не вразумится о нынешнем причастии, сиречь о мерзости, и он приникни во святое Писание со здравым разумом и ума трезвением, понеже тако святый Иоанн Златоустый пишет в Соборнике , лист 448: что же ради не разумеем почитаемых? аз убо мню, яко имать сердце непокориво, и гневливо, и самовольно, и того ради не разумеем Писания, яко же Соломон рече: в злохитру душу не внидет мудрость, ниже может укоренитися в сердце лукавей и оскверненней пиянством. А на церквах ставят ныне кресты разными переводы: тут так, а инде инако, — так уже, по их мудрованию, не един разве и Христос был, понеже неодинаково крест Христов ставят. И то бы мощно и вам разсудить: понеже един Христос, един и крест Христов, а не многие. А где хотя у них и истинные кресты стоят на церквах, ино в алтаре, на престоле, крыж же латинский. А святый Иоанн Дамаскин глаголет: и где будет истинный крест Христов, тамо и Христос, а где начертание будет зверино, щепоть или крыж, тамо и сатана. Понеже во едином теле не могут две главы быти, тако и крест Христов не может быти разными переводы.

А крестят ныне младенцев такоже по новому: противу солнца около купели ходят, не по преданию святых отец, живых во ад сводят, сатане на жертву отдают. А в молитве на крещении молятся духу лукавому. И сего их проклятаго умышления не даждь нам, Боже, и помыслити, не точию тако творити.

И что много глаголю? А иное и сами видите, что все книги перепечатаны по своему плотскому мудрованию и суемудрому разсуждению, и весь чин церковный и устав нарушили, и святых отец предание исказили. А святии отцы и за едину точку проклятие положили, и на 7-м соборе еще написали: аще кто убавит или прибавит вновь, да будет проклят. И кто их послушает, таково же осуждение приимет в будущем веце и муку вечную с ними. Аще не покается и не обратится от прелести их, будет тамо мучитися не год, не два, или 1000 лет, но во веки веком, и утешающаго не будет в них. А святый Иоанн Златоустый глаголет в Маргарите в слове о лжеучителех, иже с неверными и с еретики и со отступники общающиеся: услышите вси вы, иже с еретики вкупе ядуще, или пьюще, или молитву деюще, болезненнаго сего ответа, яко вы Христови врази бысте; иже врагом царевым друг есть, сей не может друг царев быть и жити недостоин есть, но со враги погибнет и горши подымет. О, горе, братие, больше мука сказана христианину за то едино, кто с еретики общение имеет: яст, или пиет, или молится. Яко же той же Златоуст глаголет: послушайте, православные, с еретики не смешайтеся, да не сведены будете в вечныя муки с ними. И паки: послушайте иже с ними любящиеся, како имате убежати гнева, приходящаго на них? иже с ними сквернящиеся в ядении и питиях, како смеете приступити к божественным тайнам Христовым? или вы не слышите плача блаженнаго, вопиюща: яко не может чашу Господню пити и чашу бесовскую, изыдите от среды их и нечистому не прикасайтеся. Да и Кирилла Иеросалимскаго в книге писано есть лист 333, на обороте: имя бо Божие вами во языцех хулимо бывает, воистину бо хулимо есть неточию жидами, но и некоторыми християны, сообщающиися с ними. Ниже, лист 334: что же, таковые пострадати имут, иже с сопротивниками не человеки, но со враги самого Бога обществуют, таковые бо купно с ними Единороднаго Сына Божия распинают.

Видите ли, о, братие моя любезная: аще который христианин с еретики общение имеет, колико Богу досаждает, яко же жидове проклятии. А вы то себе в грех не вменяете. А святый Златоуст называет нынешних учителей псами, волками и проклятыми еретиками, диаволовыми детьми. А вы чаете от них освящение прияти, от таковых диаволовых детей, понеже от клятвы благословения не бывает, и от смрада благоухания не исходит, и от гнилаго трупа не может кто исцелитися. Или вы не слышите, како апостолы и святии отцы глаголют во святом Божественном Писании, яко еретическое крещение несть крещение, но паче осквернение. Так лучше, по святому Писанию, не крещеные младенцы нынешних крещенных младенцев, потому что еретик их не осквернил. А вы ныне то и в грех не вменяете и младенцы умирают          без святаго крещения. А сам Господь во святом Евангелии глаголет: аще кто не родится от воды и Духа, не может внити в царство небесное. О горе, отвещати вам будет, государи мои любимицы, за всякую душу младенческую на Страшнем суде Христове.

А браку такоже истиннаго несть. Понеже в правилех святых отец тако пишет: иже от еретик венчани, по вере еретической, то не браки, но прелюбодеичища, тому подобно, как с чужою женою блуд творити. И таковым блудникам аще покаются, то 15 лет эпитимии. По том(у же) и всякое действо скверно и Богу противно.

И ныне уже тому времени 43-е лето, как истинной веры христианской в церквах Божиих не стало. А вы в нынешния еретическия церкви ходите, и с ними молитеся, и в домы свои пущаете, и благословение от них приемлете. А святый Златоуст в Маргарите глаголет: аще кто и не разбойничествуя, а в разбойнических вертепех явится, ту же со онеми казнь приимет. Тако и вы к ним не ходите в разбойнические вертепы, сиречь в нынешния еретическия церкви, идеже крест отгоним есть, идеже Бог хулим есть, идеже Отец неведом есть, идеже Сын безчестим есть, идеже христоубийцы сходятся, сиречь босорманы: армени, греки, поляки, полуверцы латыши, немцы брадобритцы, и всех разных вер еретических люди. Поистине: стоит капищеи идол у них невидимо, ему же они жертву приносят, — ни овцы, ни тельца, якоже бо прежде во Второзаконии бысть, но души человеческия пожирают, сиречь теми ересьми своими проклятыми погубляют.

Но убо время и прочая сказати вам: яко и бесове тамо живут, не в том же самом месте точию, но и в самых душах еретических. И паки еще глаголет святый Златоуст в Маргарите, слово о лжеучителех: но не почудитеся сему, аще и волцы будут пастуси, к епископом бо и презвитером глаголя: яко от вас самех возстати имут мужие, глаголюще развращенная; тем же да никто же прельстит вас, иже извне имея образ ангельский, а внутрь диавольск; от плодов их самем Господем познавати учими есмы. И паки Господь рече: блюдитеся, да не прельщени будете, мнози бо приидут, именем Моим глаголюще: аз есмь Христос, и многих прельстят. И паки: блюдите себе от лживых пророков, иже приходят к вам во одеждах овчих, внутрь же суть волцы и грабители, но от плодов их познати я имате, неимущим бо плодов добрых. Всяко бо древо от плода своего познается: тако и вы от плодов их познавайте, не приемлите их в домы и радоватися им не глаголите, и не повинуйтеся им, ни подобитеся словесем их, и не сыплите бисер ваших пред свиньями, да не попрут ногами, но блюдитеся от кваса их, рекше от зловерства. Яко же в книге глаголемой Кормчей пишут святии апостоли, правило 65, лист 18: христианом с еретики не молитися; толь вшедый в соборище иудейское, или в церковь еретическую, или поганскую, и помолився с ними: аще убо мирский [да отлучится, аще же причетник] да извержется, яко иудейская мудрствуя; аще ли же в дому токмо помолится с еретики епископ, или презвитер, или диакон да отлучится, яко же повелевает 45-е правило сих апостольских заповедей и собора, иже в Карфагене, правило 9-е так же: аще кто с еретиком приобщается и молится с ним, с верными не приобщится, но от церкви да изринется. Обою святых верховных апостол Петра и Павла правило 9, лист 28: аще несть мощно собиратися неверных ради еретиков в церковь, в дому собиратися на пение; да не внидет благочестивый в церковь нечестивых: не место бо освящает человека, но человек место. Правило 10: аще же нечестивии держат место, да бегаеши от него, понеже бо осквернено бысть от них: яко же бо преподобнии святители освящают, тако и нечестивии оскверняют. Правило 11: аще же ни в дому, купно ни в церкви собиратися несть мощно, кождо себе да поет, и да почитает, и да молится, или купно два или трие. Идеже бо аще, рече Господь, два или трие о имени Моем, ту есмь посреди их. И паки инде писано есть: лучши един творя волю Божию паче тьмы беззаконных. Правило 12: верный со оглашенными и в дому да не помолится: кое бо общение свету ко тьме, или: кая  часть верному с неверными, или: кое сочетание Христови со дияволом. И не токмо в церковь еретическую ходити, но и ясти и пити с ними вкупе не подобает, яко же правило святых апостол глаголет 71, лист 20: аще который христианин принесет масло в соборище жидовское, или в церковь еретическую, или поганскую в праздник их, или кадило, или свещу возжет, да отлучится христианства. О, чудо велие, и страшно и трепетно! Како вы, любимицы мои, не разсуждаете сего, — правил святых апостол! Слышите и разумейте, яко не точию освящают вас моление и жертвы ваши, но паче и оскверняют и погубляют вас, и вечную муку ходатайствуют вам. Таково моление, иже с еретики молится кто. А которому человеку аще и смерть случится в нечестивой вере и в ересех, и за то поминать не указано, а пишут святии апостоли в правиле 14, лист 28: за нечестиваго, аще и всего мира богатство раздаси нищим, никоея же пользы ему сотворити: ему же бо живу сущу, враг бе Богу, яве есть, яко и по смерти. Слышите ли, государи мои любимицы и друзи советнии, и милостыня уже не поможет нам, не в правой вере умрет кто. И того ради християне еретиков не поминаают, да и мы вас поминать не будем, аще не обратитеся в православную християнскую веру.

И я вам сию грамотку, ей-ей, не от своего разума возвещаю, но от святого Евангелия, и от святых пророк, и от святых апостол, и от святых седми вселенских соборов, и 9-ти поместных, яко же в Книге, глаголемой "о вере", пишет в тридесятой главе: яко по тысящи лет от воплощения Божия Слова от Рождества Христова Рим отпаде от православныя христианския веры со всеми западными странами; а от 1000 лет егда прошло 595 лет, тогда юниты отступили от истинныя веры. А егда исполнилось от воплощения Божия Слова 1666 лет, тогда и здесь уже, у нас, в Московском государстве, отступили от истинныя, православныя, христианския веры. И ныне тому времени 43-е лето, как у нас, в Московском государстве, в церквах Божиих благочестия не стало и истиннаго пения и чтения. Антихриста уже впредь не ожидайте в чувство, но по сему разумейте: егда Христос на земли явися и с человеки поживе, не царствовал он чувственно на земли, тако и антихрист не имать в чувство быти. Понеже святый Ипполит тако пишет: во всем хощет льстец уподобиться Сыну Божию; лев Христос, лев антихрист, явися агнец Христос, явится и антихрист агнец, внутрь же сый сокровенный волк, в коже овчи. И ныне уже он давно есть, яко же в Беседах Апостольских Больших пишет, лист 2333, в толковании: о антихристе зде беседует и велия открывает тайны. Что есть отступление? Того самаго антихриста нарицает быти отступление. А ныне уже видите и сами, что отступили от истинныя православныя христианския веры, так иного нечего ожидать, токмо страшнаго второго пришествия Христова. Не лжет божественное Писание: небо и земля мимо идет, словеса же Господня не прейдут. Яко же во святом Евангелии сам Господь рече, Лука, зачало 17, лист 189: и яко же бысть во дни Ноевы, тако будет и во дни Сына Человеческаго: ядяху и пияху, женяхуся и посягаху, до него же дне вниде Ной в ковчег, и прииде вода, и погуби вся; тако, яко же бысть в дни Лотовы: ядяху и пияху, куповаху, продаяху, саждаху и здаху, вонь же день изыде Лот от Содома, и одожди камык горящий, и огнь с небеси, и погуби вся. По тому же будет и в день, вонь же приидет Сын Человеческий. Явися кованье толь сего ради: внезапу прииде потоп и погуби вся тако будет и пришествие Его. Являет же, указа ради, и сео потопом на человеки и еже на содомляны: яко антихристу пришедшу, безместными сластьми обложени будут, человецы блудницы будут, и в безмерныя сласти отдадутся. Еже и апостолом реченная: яко в последняя дни будут человецы сластолюбцы паче, нежели боголюбцы, и достойно бо в царство лестьца процветут злая лукавства, и всякаго греха жилище нечисто сотворити имать окаянный тогда человеческий род. От нечистаго бо кто очистится? Будут бо тогда человецы во всякой пищи, яко же и при Ное, ничто же зла не чающе, но не веруют, еже им кто, чем случится, глаголет.

Яко же при Ное и Лоте: слышасте ли, братие, во антихристово время будут человецы во всякой пищи; а инии безумнии глад чувственной ожидают. Того ради, государи моя любимицы и друзья советнии, и братия, и сестры, и вси сродницы мои от млада    и до велика: умилитеся душою и сердцем, и восплачитеся слезами, и приклоните колена сердец ваших к покаянию, и пролейте слезы умильно; и обратитеся в православную християнскую веру, и сотворите радость на небеси Отцу своему небесному и ангелом Его, и душам своим радость вечную, во веки веком не отымется от вас; покиньте прелесть тленную и богатство суетное и маловременное ради вечнаго жития и будущих благ вечных, ради царства небеснаго обратитеся сынове отступившии, обратитеся и покайтеся, глаголет бо Господь, Исаием пророком призывает вас. Лучше бо вам есть обратитися, государи мои приятели, в православную християнскую веру.

Ей, ей, скорбит и болезнует душа моя о вас! Посмотрите вы на добрых людей, како покидают домы и палаты каменныя, да бежат и скрываются в пустыни, в горы, и в вертепы, и в пропасти земныя, и не пекутся ни о чем же о здешнем, суетном и прелестном, житии. Диво, поистине, смиреннии мои друзи, что ся вам не смилится вечное житие будущее! А у нас благодатию Христовою много и младые люди младость свою презирают, и о здешнем житии не пекутся. А вы, толикими сединами обложени суть, а не печетеся о душах своих. А либо столько и не жить, сколько жили. Или вам не умереть будет? Или вам вечно зде жить будет? Или вы на тленное богатство надеетеся? По истине, любимицы мои, все ваше тленное богатство останется, аще смерть приидет. А я, грешный, того ради скитаюся за имя Ісус Христово, чтобы мне во веки душею и телом не погибнути, и от Бога и святых Его не отлучитися, и царства небеснаго не лишитися, и пищи райския не удалитися, и избавитися бы мне муки вечныя, и плача неутешимаго, и скрежета зубнаго. Да аще мне и скорбь приходит: ино Господь мене утешает своими пречистыми усты, тако глаголет: аще кто мене ради оставит отца или матерь, жену и чада, рабы и рабыни, и Аз вам буду и отец, и мати, и жена; и чада, и рабы, и рабыни, и послужу вам яко братиям и другам, и всегда имать слышати ухо Мое прошение ваше, и не преслушаю николи же вас: зане возлгобисте Мене от всего сердца вашего и Аз возлюблю вас, яко отец. О, любимицы мои, помните вечно разлучение праведных от грешных. Ох, увы, увы! тогда будет грешником плач неутешимой во веки веком. Егда приидет Господь судити живым и мертвым, сиречь праведным и грешным: и тогда воздаст Господь комуждо по делом его, и праведным и грешным. Якоже пастырь разлучает овцы от козлищ, праведных поставит одесную Себе, а грешных ошую. Праведнии, имущие плоды добры, иже тесным и скорбным путем ходившие и узкими дверьми прошедшие, похитиша царство небесное, не точию мужи, но и жены иже немощнейшая часть тогда просияют яко солнце во славе Отца своего небеснаго. А грешных поставит ошую Себе, яже нарицаются козлища, иже прогневали Господа на всяк день своими лукавыми делами, и послются в муку вечную, конца не имущую. Тамо будет плач и скрежет зубом, и нарицается гроза, ея же и сам сатана трепещет, и тогда восплачут и возрыдают горько: о, люте нам, люте! о, увы нам, увы! о, горе нам, горе! лучше нам, да быхом не родилися! И помогающаго им несть. И вы, о любимицы мои, советнии други, обратитеся от прелести антихристовой и отбегите учеников его, да чтобы и вам с ними не осудитися во огнь вечный, яко же святый Кирилл Иеросалимский пишет о них в своей книзе в предисловии, лист 6: понеже они неверующих прельщают, и нам тому их еретическому учению не подобает внимати, но токмо достоит нечестивая уста их сим Божественным Писанием заграждати; понеже не от Бога, ни от святых Его ученик и апостол, ни от святых отец, те их проклятые изветы преданы, но от еретик и богоотступник учинены; и вси они, окаянные, теми своими проклятыми верами хвалятся; ведомо убо да есть, яко от вечныя муки не избавятся, аще и хвалятся всех мудрейше быти, и за таковое им злое деяние вечных мук не избыти; и ныне учители их во дне адове пребывают, со отцем своим сатаною воздыхают, да и они вси туды же грядут и вечных мук себе ждут.

И вы, государи мои любимицы, зрите, да чтобы и вам с ними не осудитися. Покайтеся и обратитеся, дондеже время имате; покайтеся, дондеже смерть не пришла: покайтеся, дондеже в веце сем еще; покайтеся и сотворите радость на небеси Богу и ангелом Его, да аз бы, грешный, возрадовался с рабами Христовыми о вашем обращении, яко же рече Господь: радость бывает на небеси о едином грешнице кающемся; и паки рече: не приидох бо призвати праведных, но грешных на покаяние. Слышасте ли, государи мои и приятели, сам Господь призывает вас на покаяние, а вы не покаетеся и не престанете от злоб своих! И паки апостол рече: изыдите, братия, от мира изыдите, и нечистот его не прикасайтеся, возлюбите безмолвие, да познаете Бога и откровенным умом славу Его; узрите, что всуе мятемся в жизни сей. Егда бо и до небес славою и величеством вознесешися, егда и весь мир приобрящеши, не гроб ли покрыет, и угасит все твое суетство, и отыдеши наг во страну инаго века, и истязан будеши не токмо деяний злых и отвержения веры Христовы, но и глагол и помышлений суетных, в них же время свое изнурил еси. Или вам скорбно видится оставити прелесть мира? Ино слышите апостола Павла, глаголюща: многими скорбьми подобает нам внити в царство небесное, и паки: нуждно есть царство небесное и нуждницы ей восхищают. Да и сам Господь глаголет: блажени изгнани правды ради, яко тех есть царство небесное. Слышите ли, государи мои любимицы: сам Господь сказует тем царство небесное, кои ныне Его ради гонение терпят. Якоже и паки рече: вы Мене ради остависте богатство тленное, и Аз вам дам сторицею богатство нетленное во веки. Внемлите, братия моя любимая: Сам Господь вам воздати (хощет), что вы Его ради оставите. А хотя вы ныне и не разлучитеся с тленным своим имением, ино в будущем веце разлучитеся и неволею. Да аще вы не обратитеся ныне от прелести антихристовы, и ученик его не отвергнете, то не спроси, Господь, на мне душ ваших, понеже аз вам путь возвещаю в царство небесное. Яко же о том во святом Евангелии писано, в Матфее, зачало 36 лист 72, в толковании: отраднее будет земли Содомской и Гоморской, сиречь неверным мука в день судный, нежели преслушающим слово Божие.

А о сем молю и прошу ваше смирение: не погнушайтеся и не позазрите моему малоумию и скудости ума моего, понеже не учился граматике и философии и риторике, но приимите сие писанийце с любовию и прочитайте со вниманием. Поистине от болезни сердечной, и от ревности душевной, и от святаго Писания глаголю вам. Понеже Писание повелевает в закон: не скрывати таланта, но раздавати торжником, дабы купили себе царство небесное. И аще паки помянух аз притчу евангельскую и лениваго раба, скрывшаго талант в землю господина своего, и прикупа не сотворил, и мучен бысть за то: и аз сего убояхся, и того ради вам возвещаю. А егда б Господь Бог изволил нам с вами побеседовати, аще по истине хощете известитися о нынешнем многомятежном времени и о антихристе: может Господь Бог известити и скотом безсловесным. Аз, окаянный, грешен паче всех человек, но токмо уповаю на Творца и Содетеля Бога: понкже бо может Бог и немудраго умудрити, и безумнаго вразумити: множицею бо и мудрый мимо течет, и разумный муж оскуде — се отроча обретеся, и еже учителем утаися, а учеником найдеся. Поиеже бо мудрость мира сего вражда на Бога, еже кто плотская мудрствует, а не духовная. А по сему, любимицы мои и друзи советнии, аще услышите какия клеветныя речи на нас, не имите веры, дондеже сами известитеся у нас, понеже диавол ложь есть и в правде не стоит; или паки увидите некиих отступивших от нас и отпадших от православныя християнския веры, о сем не смущайтеся и не сумнитеся, понеже и во апостолех христопродавец обретеся. Еще и сего чуднее: понеже бо иногда и сам диавол Денница бе, ныне же помрачен бысть возношения ради и гордости; и первый человек Адам сластолюбием отпаде славы Божия; а Иуда сребролюбием погибе. Понеже во святом Евангелии писано есть: велия сия три падения человеком бывают: славолюбие, сластолюбие, сребролюбие.

А по сем молитва Ісусова: Господи Ісусе Христе, Сыне Божий, помилуй нас. Аминь.

Hosted by uCoz