Увещание бегать и таиться.

 

Список с грамотки юзника и страдальца, раба Божия Дионисия, христолюбца и пустынножителя бывша прежде.

 

[Рукоп. Румянцевскаго музея №730, лл. 303 об.-310 обор. прилож. 3 в кн. П. С. Смирнова «Из истории раскола в первой четверти 18 в.», 1909 г.]

 

 

Господи, Ісусе Христе, Сыне Божий, помилуй нас. Аминь.

Государем моим милостивым, смиренным приятелем, о Христе братиям и сестрам, рабом Божиим соборныя церкви, пребывающим во евантельском учении, и во апостольском проповедании, и святых отец седми вселенских соборов утверждении и девяти поместных, изгнанным от сатанина полка и страждущим за слово Божие и за свидетельство Ісус Христово, якоже изначала миру, такожде и доднесь, их же имена Бог весть. И аз, братие и сестры, первый во гресех и последний в человецех, Дионисий многогрешник, поклоняюся вам до лица земнаго и облобыжу ваше всякое духовное дело, терпение и озлобление и поношение в человецех имени ради Сына Божия и Его, Спасителевых, заповедей. Писано бо есть: аще кто в той седмивселенской правде до конца пребудет, спасен будет; а кто отступит, или в чем нарушит, погибнет во веки. Воистину, кто правою верою сияет, сей славен есть. И аз, многогрешный, с горькими слезами припадаю к вам и молю вашу святыню: о, светы рабы Христовы! постоим за благочестивую христианскую веру, оградимся печатию живаго Бога — крестным знамением, имуще щит веры — терпение и молитву Ісусову, а шлем спасения — смирение и любовь к братии, и меч духовный, еже есть глагол Божий. Слово Христово да послушаем, и да веруем в онь, и да пребываем в нем. Сим убо оружием ополчимся на диавола, крестом бо Господним разрушим всю силу вражию, а словом Божиим споборим сердце диаволе, и всю силу его сокрушим, и с помощники его. Видите, яко грех ради наших ветр жгущ от пустыни пришел есть на ны, и хощет все попалити и изсушити жилы водам, еже есть — Божие слово погасити и плоды древеснии в лето его: сиречь, верующих во Отца, и Сына, и Святаго Духа хощет воврещи в ров погибельный. Уже бо злохитрых ересей, грех ради наших, пламень возгореся. О, Христовии рабы, вернии суще христиане! Возрим на предыдущая лета, вначале на пастыря своего Христа: Он пострадал по нас, а нам оставил образ, да последуем стопам Его. О, светы мои, братия духовная, рабы Христовы, внемлем словесем Христовым: аще кто хощет благоверно жити о Христе Ісусе, гонимы будут, а лукавии человецы на горшая преуспевают. На сие бо лежит христианин, еже страдати по Христе и гониму быти, на сие и званы есмы, сиречь на сие и родихомся, а мы покоя ищем. О, горе! и увы! на всю вселенную пришло бяше время, и на самой громаде злобы всея стоим вси, и отнюдь веры не емлем. Видите, братие, яко во всех градех страдальцы умножились, благодатию Божиею. Аще бы мы просили и в любви пребывали, милостив есть Владыка наш — подал бы нам щедроты, понеже хощет всем спастися и в разум истинный приити. Не убойтеся, Господа ради, возлюбленнии, постойте за веру Христову, и не предайте благочестие на нечестие, и не приимите лживаго вместо праведнаго. Помолимся Владыце Христу, чтобы не отступити от него. Аще ли не восхощет кто на муки дерзнути, то побегите Господа ради от змия, а не прельщайтеся суетою света сего. Понеже змий скор и напраслив роду человеческому, паче же святым горек бывает, могущим победити привидения его. Страх бо всех нас обдержати будет, аще не подвигнемся на мучение, или на бегство. И вы, государи мои, любимицы Христовы, потщитеся вооружитися на брань вражию, и на все козни его, и на вся его ухищрения. Он бо зело скор и напраслив хищник, беззаконник, везде иский, яко лев во ограде своей, восхищая и рыкая, хотя поглотити и погубити, и от любви Божии отлучити, и заповедей Господних лишити, и дабы царствию небесному недостойным быти. И вы, православнии, сущии истиннии христиане, рабы Божии, чисто благочестие содержаще и верующе во Отца и Сына и Святаго Духа, и не разделяюще пресвятую Троицу! Слышите глаголы Владыки нашего Христа, Сам бо Господь наш Ісус Христос, научая нас, глагола сице: "молитеся, да не внидете в напасть", и паки рече: "молитеся, да не будет бегство ваше зиме, ни паки в субботу", сиречь пространство желая: зимняя зело прииде зноба, сиречь злоба времени сего. И аз молю вашу благостыню, раби Божии, любимицы Христовы, потщитеся стяжати меж собою истинную и нелицемерную любовь. Сею бо заповедию Христовою, еже есть любовию, зело многие полки бесовские побеждаются, и самого диавола посрамляются. И сам Господь наш Ісус Христос любве ради с небесе сниде, и родися от Пречистыя Девы, и вся пострада нас ради, совокупляя нас во едино стадо. И святое Писание рече: "пребываяй в любви, в Бозе пребывает, и Бог в нем". И что се? Любы Бог есть. Аще с Богом пребывает человек и Бог в нем, то никогда же не боится диавола, ни зла супостата. Якоже Господь наш, Творец небу и земли, вземляй грех всего мира: тако и нам заповедал друг от друга тяготу понести. Зело благо есть, аще друг за друга страждет, и душу свою полагает, или мучение приемлет, или утеснение терпит. О, рабы Христовы! молю вы всякаго хотящаго спастися: поживите вси в любви Христове, да будете от нынешней злохитрости препокровени святым Богом, и сохранит вас своим милосердием. Но токмо вы станите твердо, яко на камени веры, и вся находящая злая терпите с похвалою. Сам бо Господь наш Ісус Христос рече святым Евангелием своим: "аще слушаяй слово мое, и творяй е, уподоблю его мужу мудру, иже созда храмину свою на камени; и приидут ветры, и снидет дождь, и подступит вода, и не сламляют ея, понеже основана бе на камени. Аще слушаяй слово мое и не творяй е, уподобится мужу бую, иже созда храмину свою на песце, и приидоша ветры, и сниде дождь, и подступи вода, и падеся храмина его, понеже бе на песце". Толк: камень — Христос, а храмина — душа, а ветры — всякия беды и напасти находящия, а дождь — злые бесы, иже спадше с небеси, и нападают всякими бедами и напастьми, ово собою зло творяше, а ово человеки злыми. И сего ради слушаяй слово Божие, и не творя, и приидет какая ему аще и малая напасть, и тогда ослабевает, и унывает, и тоскует о находящей ему напасти, а таковый падает, еже есть на песце, сиречь на безумии своем, погибает. Аще слушаяй слово Божие и творяй е, подобен есть мужу мудру, иже зиждет храмину свою на камени, сиречь душу свою, на заповедех Божиих, таковаго не могут никакия беды, ни напасти поколебати, понеже крепко утвержден, верою огражден. О, государи мои, смиренницы Божии! поживите ради имени Господня, рабы Христовы, во страсе Божии, и со всяким терпением, и житием добродетельным, и всяким утеснением, и прилежным молением, и всяким тщательством подвигнитеся жити Богу угодно и веру Христову соблюсти, яко зеницу ока. И аз, братие, пишу вашей любви сие писанейце, ино слезы мои текут, и от рыдания сердечнаго не могу слово изрещи о сем, что помолитеся ради имени Господня, подайте помощи, чтобы мне, многогрешному, во веки бы не погибнути, но, да хотя и многогрешным, но обаче дабы в последних был спасаем. И ныне аз познах неможение и слабость свою, понеже зело слаб есмь. И ныне тако помышляю, аще бы да Бог вынес, то не токмо бы уединитися должно бы, и под землею скрытися. И вы, любимицы Христовы, поживите в тишине, и вскрыте, и невыходимо: зело бо зло время есть и люто, не токмо верующим, но и всем человеком, паче же верным. Аще и гладом умрети, а нежели ползновенно ходити; зело благо есть истаети гладом, а нежели выходити, или знаему быти. Побегайте и скрывайтеся за имя Ісус Христово. Зело бо есть нужда прииде, и самое прискорбное житие; нуждно бо есть царствие небесное, и нуждницы восхищают е. И ныне спасаяй, спасет душу свою, велик будет в царствии небесном. И от всех вас, приятелей моих, знаемых и незнаемых, где кто ни живет вскрыте, или невскрыте, истинных сущих православных христиан, от всех молитв ваших желаю и благословения требую. О, други Божии! помолитеся о мне, многогрешном, чтобы мне не погибнути. Аминь.