Стостатейник

Московский

 

{Написан Алексием Яковлевым 1780 г.}

 

с приложением

Соборне разсужденного показания, московских отец и братии нашей,

о снизходительном понятии Алексия Яковлевича о федосеевых

 

Стостатейник, составленный московским отцом нашим Алексием Яковлевичем. а ельма же писатель сей имея некое время теплое сочювствие к еретиком феодосиевым, тем и вмести в оныя статии неколико угоднаго им снизходительнаго, православней же церкви чюждаго и вреднаго понятия своего разсуждения. Которое на своих местех покажется нами и объяснится.

Свидетельства и доводы от святаго писания, и от прежде бывших отец написанныя статии, православнаго исповедания, и содержания православныя Христовы церкви, в сохранение ныне от феодосиевых, и новомонастырскаго согласия.

 

СТАТИЯ, 1.

 

Еже веру и прочее все, имети по писанию, и союзно с прежними отцы.

Евангелие от Иоанна [Зач. 27]. Рече Господь: веруяй в мя якоже рече писание, реки от чрева его истекут воды живы. От толкования [Учит. Еванг.]. Понеже мнози вероваша чюдес ради, сего ради глаголет Христос, якоже рече писание. даже научимся, яко исправленная вера от писания есть, а не от знамен. и тако подобает веровати, яко от писания. Евангелие от Матф.[Зач. 99]. Тогда сущии во Июдеи, да бежат на горы. [Книга о вере, гл. 23, лист. 217, об.] На сие евагельское место, Златоустый, толкование творит сими словесы. Иже суть во христианстве, да прибегают к писанию. ибо от того времени, егда ереси церковь возмущати начаша. ни единаго истиннаго христианскаго прибежища, иже веры правость хотят познати, кроме божественнаго писания имети не могут. [ниже лист 216] Ведая Господь, яко будет в последняя дни смятение, повелевает яко иже суть християне, хотящии в правду во християнстей вере утвердитися, ни к чесому же иному да бежат, точию к писанию. аще бо на ино что взирати будут, соблазнятся и погибнут. Катехизис малый [лист 1]. Вопрос. Господь имам научитися вере, и доброму жительству християнскому. Ответ. Во святом писании и предании апостольском, такоже и во святей соборней церкви, еже на соборех святыми отцы совершенными истинными. Святаго Феодора Студита [Никон Черныя горы, слово 18]. Не преступай законы и правила святых отец, но вся елика аще твориши, или глаголеши, имей свидетельство от святых писаний, или от отеческаго ти обычая, кроме преступления Божиих заповедей. Вторый закон. [глав. 32] Вопроси отца твоего, и возвестит тебе, и старцы твои, и рекут тебе. Мелетиево послание [Кирилова, лист у36]. Аще бы Арий вопросил отец своих, то не бы разселся хулы ради, еже хуляше на Сыновнее Божество. аще вопросил Македоний старцов, то не бы о Дусе безумствовал. [ниже] Такоже и всех прочих еретиков сонм, аще бы отцем ведали воследовати, а не новая некая изобретати. [ниже] не убо были быша погибели вожди, покаряющимся им. не убо церковь смутили бы, и разделили верных, и прочая. Исус Сирахов [глав. 8]. Не отступай от заповедей старец, ибо тии навыкоша от отец своих. Притчи [глав. 12]. Не прелагай предел вечных, иже положиша отцы твои.

От отец благочестивых бывших в России по Никоне.

От слова Андрея Дионисовича надгробнаго, Петру Прокопьевичу. Егда грех ради наших, Никоном премена благочестивых уставов учинися; тогда противящийся Никонову новопреданию, опасный хранитель святоотеческих содержаний, священный архиерей Павел Коломенский, за святоцерковное православие, послан бяше в заточение в поморскую нашу страну, во Олонецкий уезд, в Палеостровский монастырь; идеже несколько время пребыв, свободно поучая народы. коего учения и благословления архиерейскаго, жители страны, и родителие сего Петра, слышатели и видетели зело бяху. посем же явися ин муж свят, игумен Досифей с Тихвины, и часто прибегая к пустынной некоей Куржетской обители. в ней же собираяся со многими отцы великими, постники и знаменоносцы. иже от многих стран, и от Соловецкия обители, крыяхуся по пустыням поморским, около Онега езера, и около отечества сего Петра, Повенца именуемаго. посем Соловецкия обители черный диякон Игнатий, муж святолепен, и подвижник велий, и божественнаго писания, и внешнаго наказания искусный, изыде из обители, изыде из обители. Богом подвизаем, прииде в сия поморския пустыни, и пребываше близ Повенца отечества сего Петра. и часто в дом родителей его прихождаше, якоже и прочии отцы соловецкия, благословения сподоблевающе. сему Игнатию ученик и сообщник бывает кроткий Даниил, благословением священнаго отца Игумена Досифея. бяше же тогда в пустынях сих, живяше священный отец предревний, великаго жития подвижник, авва Корнилий староскитский. знаемый еще древле бяше и любим, добродетельнаго ради жития, святейшему патриарху Филарету. и несколько время у него жил бяше: той аки ангел небесный, просвещаше пустынная сия недра. всем нам отец духовный, и сладостный наказатель бяше. Даниилу же, и поминаемому нами Петру. бяху же инии отцы: отец Генадий, древлесоловецкий, по роду Качалов именуемый. Иосиф Сухой соловецкий: и инии отцы пустыннии живуще. молитвами своими дебри сия освящающе. не токмо же древнейшии отцы, Корнилий, и Виталий, благословением и присещением, многажды нам присудствоваху. но и соловецкия обители, священник Пафнутий, и пустынножительный старец, поживе зде во общежительстве лет седмь. всерадостно благословляше устав церковныя службы. и возвещая всем благочестивыя уставы, и обычаи соловецкаго монастыря. к сим же и древний священник Феодосий прилучися зде быти, усердно похваляя и благословляя чины вся, и Бога благодарствуя. От инаго счинения. Тако же и около Волги, и в Нове граде страдальцы, священноинок Варлаам, и бывший во Пскове, в Троицком соборе протопоп, Иван Дементьев, и Пахомий инок, прочии. сии вси с поморскими пустынножителями отцы, едино согласие бяше, и разделения в них не было Феодосия, точию един некий учитель Феодосий, бывый исперва дьячек никониянския церкве, таже позде позна лучю благочестия. сей Феодосий учини от сих поморских благочестивых отец разделение.

 

СТАТИЯ, 2.

 

О разделении Феодосия Васильевича.

Из житейника писаннаго от согласников его. ниже. По сем и иный подвиг наста отцу Феодосию: бяху некотории християне, бегающе никоновых новопреданий. иже поселишася за езером Онегом. общее житие на реце Выге составиша. иже в первых величайших догматех, со отцем Феодосием согласны бяху, немалое ведение в писании, и изрядную ревность о чистом житии имяху: но во иных вещех несогласно отцу Феодосию мудрствоваху, еже суть сия. 1-е. Аще кии люди в незнании до крещения, браки от никониян прияша, и потом крестишася, тыя браки они хуляху, ни во что вменяюще, разводити веляху. 2-е. Пищу и питие от иноверных приимаху, и без молитвы ядяху. 3-е. А наипаче на кресте, Пилатом положенную титлу отметаху, воображати сие на кресте весма возбраняху. к кресты с титлою от поклонения отставляху. и хульствующе всячески латынскою ересию. и прочая различия в чинех церковных имеяху. [ниже] К ним же иногда отец Феодосий ездив, и тамо с ними беседоваше о титле немало. [еще ниже] Тии же не восхотеша вышепоказанных своих мудрований отложити. тогда учитель Феодосий, и прочии с ним, видяще их во своем разуме непреложно стоящих, и согласию не склоняющихся, и единаго креста с титлою у себе в часовне поставити не восхотевших. общим советом прочих учителей, сотвори с ними в молитвах и в ядении и в питии разделение. в лето от мироздания, 7214-го [1706]. Словесное же сказуют. Яко тогда оный Феодосий, с прочими своими выехавши из обители, и прах ног своих от оных отец отрясоша, отрицающеся, и вопиюще сице: несть нам с ними ни части ни жребия, и в сем веце и в будущем. Еже сие разделение за неправое и за сущей раздор вменяти. Святый Златоуст, послание к ефесеом, на схисматики отдирающих себе от церкве. [нравоучение 11]. Аще убо хощем Духа насладитися, иже от Главы, друг друга держимся. две бо суть разделении от тела церковнаго. едино убо егда изсякнем любовию. второе же, егда недостойная творити начнем, ко иному телу дерзнем. обоими бо отлучаем себе от исполнения. аще же иных во еже созидати учинены есмы, не созидающе, но и первее раздирающе что непостраждут; ничтоже может тако церковь разделити, якоже любоначалие. и ничтоже тако раздражает Бога, якоже церкви раздиратися, аще и безчисленная будем содеявше благая, от иже тело его пресецающих не меньшую приимем казнь, ссецающе исполнение церковное. [ниже] Муж же некий святый рече. ниже мученическая кровь может сего загладити греха рече. [ниже] Сего ради глаголю и засвидетельствую. яко от еже в ересь впасти, еже церковь раздрати, не меньшее есть зло. В толковании. 1-го правила Василия Великаго. [Кормч., лист 225] Раскольницы же суть, иже от церкви себе отставльше, яко же и наватиане глаголемии чистии. [Матфей Прав., лист 172 и 173] Раздорницы делят Христово тело. Раздорник церковный подобен еретиком. От послания поморских отец к феодосиевым, писаннаго в 10-е лето по раздоре сем. Ничто же тако исконному врагу наветовати потщательне, якоже церковное соединение раскаляти. [ниже] Оле жалостнаго плача, не мину сие губительство, бедне терпящих о благочестии християн. не мину о церковнем благоверии страждущих, а о церковных преданиих раздирающихся. еже ваше братство в прошедшее время жалостное раздрание, со иже в поморских странах пустынножители проведесте. И мнози от иже вашея лобызающих тяжкими хулами [за оная яже в нас непременна древлецерковная предания] надходяще, за что не без плача минуем о таковых душах от грубости в противление святым впадающих, и слезим гибели таковыя. [выше] якоже на святаго Евфросина, восташа древле псковичи, за пресвятую аллилуию, возмневши они тогда о истинне ревновати, на истинну ратоваша, и хулиша грубосмысленнии. [ниже] вопиюще не имети ни части ни жребия за сия. Грубостию своею отчасти святых тако вообразивших и предавших отлучатися дерзают.

 

СТАТИЯ, 3-я.

 

О первобытном Пилатове написании.

Еже зле и на хулу сие написание писано.

Благовестник, Евангелие от Матфея [зач. 113]. И возложиша верху главы его вину ему написану, се Исус царь июдейский. [от толкован.] А еже другий евангелист рече титлу, се Матфей нарицает вину. написаша бо хотяще оправдитися, чесо ради распят бысть, сиречь яко похищник царства июдейскаго, они бо облигающе написаша. Евангелие от Марка [зач. 68. Толк.]. Написа же и титлу Пилат, еже есть вина, ея же ради распят бысть царь июдейский, да того ради похулят его славу, яко противника суща, и царя себе нарекоша. и да имут вси мимоходящии не помиловати его, но паче надходити нань мучительне. Всякой убо злобе исполньшейся [Синоксарь. в великий пяток], Пилат и дщицу написа о нем, глаголя, Исус назарянин царь июдейский. Святаго Григория Богослова на Крещение. [Никиты Ираклийскаго, слово 2, в толк. Стих. 53] Он убо се зле написа Пилат титлу, яко вину убо, а не яко истинну написа.

Еже частию на славу Христову сие написание бысть.

Благовестник, евангелие от Матф., в толковании [лист 226, об.]. Они бо облыгающе, подписаша царь: обаче свидетельство се верно есть, яко враги приношаемо, царь бо есть воистинну, на се пришед спасти июдей, но понеже плотяне суще, не восхотеша его царствовати ими. царь бысть прочее, исповедающимся июдеом духовним. июдея бо исповедание глаголется. Евангелие от Иоанна [зач. 60, в толк. лист 288]. Пишет и титлу Пилат. [ниже] понося убо июдеом, яко ослушавшимся его, и являя злобу их, яко на своего царя восташа. абие же и ответ с разбойникома сотворяя о славе Христове. зане бо тии с разбойникома распяша, и осквернити хотяша имя Его. Пилат же являя, яко не разбойник бе, но царь их. [ниже], они же и на распятаго льстяху к Пилату, глаголюще, не пиши яко той рече. ныне убо общий совет является. [ниже], но Пилат не превратися, но на первей стоит воли, тем и рече, еже писах писах. Из бесед евангельских на Иоанна [беседа 85, лист 636]. Написа же и титлу Пилат, вкупе убо июдей отмщая, вкупе же отвещая о Христе, понеже бо худа издаша, и суд сей общением разбойников утвердити начинаху. [ниже], заграждая их уста, и всех оклеветати хотящих. показуя, яко на своего царя восташа. яко же на одолении некоем, сице писание положи, и светел испусти глас, победу являющь, и царствия проповедающь, аще и не всецел. [ниже], июдеи же реша, рцы нам сам рече; аще же приложится еже он рече, продерзания его и презорства, показалобыся согрешение суще, но Пилат не превратися, но о первом ста разуме. Соборник, в среду великую [слово Златоуста, о зависти жидовстей]. Егда Иезавель виноград науфеов отъяти, многа писания писа, и сладко послушасте. а егда Пилат на досце истинну показа, гневаетеся и оставляете писати, что глаголаху, не пиши царь жидовеск. сиречь, не кажи истинны, [ниже], како не стыдешася ныне гневаяся о Божиих учениих, яко пишеми суть на благодарение верующим. юродивыя беседы филистиновы не оставляете писати, а славления не писати Божия, ими же на небо правими есмы. аще бо кто ныне уча и грубыми словесы, обаче о Бозе глаголет, зело мудрость. [ниже], но аще и фарисеи глаголаху Пилату, ставляху его писати истинная писмена; он же к ним глаголаше, еже писах писах.

Еже не всецел глас в писании сем.

В беседах евангельских [выше]. Якоже на одолении некоем сице писания положи, и светел испусти глас, и победу являющь, и царствие проповедающь, аще и не всецел. Благовестник. Евангелие от Иоанна [зач. 2]. Отвеща Нафанаил, Ты еси Сын Божий,Ты еси царь израилев. отвеща Исус и рече ему. [ниже] веруеши ли, больши сих узриши. [От толкован.] Нафанаил аще и Сына Божия Христа исповеда, но не якоже Петр, но яко человека проста, благодать добродетелей усыновления. и се яве от глаголаний его, Ты еси рече царь израилев. видиши ли, яко не у достигл, совершенный разум, истиннаго Божества Единороднаго. Но яко человека боголюбива, и яко царя израилева быти Его верует. аще бы истинною Бога Его исповедал, не бы Его нарекл царя израилева, Царя всех. тем и не блажится якоже Петр. и того ради и Господь исправляя его, и возводя разумети, что есть достойная егову Божеству: узрите рече ангелы Божия, возходяща и низходяща над Сына человеческаго. не бо рече непщуяй мя проста человека, но Бога истинна. Из бесед евангельских, толкование на тоежде [беседа 28]. Петр убо исповеда Сына Божия, яко Бога истинна. Нафанаил же человека проста. и откуду ли явленно сие нам; от иже по сих реченных. рек бо, Ты еси Сын Божий. наведе, Ты еси царь израилев. Сын Божий, не израилев есть царь токмо, но и всей вселенней. тем Петру убо. яко совершенныя ему веры, церковь рече Христос на исповедании создати инаго: зде же ничтоже таково сотворил есть, но яко многия некия и лучшия части исповеданию оскудевающу, прочая приложил есть: отселе рече узрите небо отверсто, и ангелы Божия возходяща и низходяща. зриши ли, како его от земли возводит помалу, и творит не ктому мечтати человека просте, ему же бо ангели служат, како аще сей человек будет. сего ради рече больша сих узриши:

Еже смиренная о Христе сие написание исповедует.

Из бесед на деяние апостольская. Сущее. [словеса святаго апостола Петра] [зач. 5, беседа 6]. Мужие израильтяне, послушайте словес моих сих, Исуса назорея мужа указаннаго от Бога в вас. Златоуст на сие. Зри како ничтоже глаголет от высоких, но зело смиренных начинает. Исуса рече назорея, и абие отечество глаголет, еже видяшеся худо быти, и ничтоже велие еще глаголет о Нем, ниже яково же аще бы кто рекл о пророце. Из апостола толковаго, деяния [словеса апостола Павла]. Слышах глас глаголющь ми, Савле Савле что мя гониши: аз же отвещах, кто еси Господи; рече же ко мне. Аз есмь Исус назорей, его же ты гониши. Толкование Аммониево. О премудрости Владычни, почто не рече ему, аз есмь Сын Божий, аз есмь изначала Слово. [ниже]: почто не рече честна велика и высока: но аз есмь Исус назарянин. От дольнаго града, от дольней веси иместа: занеже неведяще гоняй Его. Евангелие от Луки [зач. 113]. О Луце и Клеопе. Они же реста ему, еже о Исусе назарянине, иже бысть муж пророк, и прочее. От толкования [Благовестник, лист 254]. Виждь какову малу о Господе мысль иместа, мужа бо пророка и непщеваста. Соборник [Слово святаго Иоанна Златоустаго в неделю о слепом, лист 794, об.]. Что же рече ему народ; Исус назарянин мимо ходит. Оле чюдо, о ином глаголет ему, он же ино проповедует, слышит Исуса назарянина. не наричет же его Исуса  назарянина, но Исуса Сына Давыдова. Зрящий убо мняху глаголюще, а слепец поистинне проповедаше, Исусе Сыне Давыдов помилуй мя. Из недельнаго евангелия. [в неделю 8-ю, от толкования]. Книжицы и фарисеи, злохотением отечество Христово глаголют Назарет, даже от Вифлеема не нарицаем бывая Христос. уверен будет пророчества ради. Благовестник от Иоанна [лист 127]. Сия же глаголаху злодействуемым разумом, а не по Нафанайлу. [ниже]: подобаше убо им разумети, яко от Вифлеема есть Христос, аще и в Галилеи бе воспитан. от зависти же не хотеша исповедати от Вифлеема рождение, но галилейна Его именуют. Апостол толковый [зач. 17]. Слышахом бо Его глаголюща, яко Исус назарянин, сей разорит место се. Толков. Исус рече назарянин, поношающе се глаголаху. Из недельнаго евангелия [на пятидесят.]. Рече же им Исус, Аз есмь свет миру. Толкование. Понеже бо выше и ниже обращаху Галилею июдеи и пророка нарицаху Христа, той всех избавляя, таковаго погрешеннаго мнения, и чюждия славы. показаше яве, яко не един от пророк есть, якоже сия мнят. но всего мира Владыка есть. аз есмь свет миру глаголаше, а не Галилеи токмо и Июдеи, но всему миру есть свет.

А еже токмо на первобытном Кресте Христове, сие Пилатово бысть написание, последи же во святей церкви на святых крестах сего написания не видится; о сем самый вид достоверствует.

 

СТАТИЯ, 4.

 

О надписании святых крестов боголепными надписании.

Из Пролога и из Минеи четии [сентябрь 19 день]. Царь Константин моляшеся Богу небесному даровати ему образ победы. и явися ему в полудне, и сущим с ним, образ креста Господня, воображен звездами, сияющь паче солнца. и написание на нем, сим побеждай враги. нощию же спящу ему, явися Христос, и паки показа ему явльшееся знамение честнаго креста; и рече ему, сотвори подобие его. востав же царь. [ниже], призва хитрыя златаря, повеле им сотворити честный крест, во образ явльшагося знамения, златом и бисером и камением драгим. [ниже]; повыи тии же в Византию, христолюбивый царь Константин сотвори три кресты велики, от чистыя меди, и нарече святыя их имена сице: IС ХС. ника, си есть побеждает. начертаемым златым писменем устроенным.

От жития преподобнаго Авраамия архимандрита Богоявленскаго Ростовскаго чюдотворца [Пролог окт. 29 день]. Во граде Ростове граждане чюдски живуще, и покланяющеся идолу каменну Велесу. и никто же смеяше ходити путем тем, мечты бо творяше. преподобный же Авраамий помолися Богу, и иде в царствующий град, взыскати дому Иоанна Богослова. и явися ему святый Иоанн Богослов на пути, и вдаде ему трость. и глаголав ему, возвратися в Ростов. и избоди тростию сею идола Велеса. и рцы ему, во имя Иоанна Богослова да сокрушишися. и абие сотвори тако святый. и бысть весь идол в прах. На той же трости самозрительно видимый крест с распятием, и на нем надписание сице, IС ХС, ника.

Крест Муромский святыми ангелы, от взятаго от жен сребра и злата чюдне сотворен, и на ней надписание тако же, IС ХС, ника.

Устав. Еже есть Око Церковное, избран от типиков, Иеросалимскаго, и Святыя Горы, и от Студитова, и от многих святых отец, и от вселенских соборов. В нем же в чине о панагии, во главе, 53, напечатан крест, надписание к нему, Царь Славы, IС ХС, ника.

В Потребниках, в чине освящения церквей, воображены кресты, како знаменовати на антиминсе и на воодружении, с надписанием, Царь Славы, IС ХС, ника.

На дорниках в древнее благочестие, ими же просфиры печаташа, в них же самое совершение тела и крови Христовы действовашеся.

Еще же и на персех, еже исконно обычай имеют християне носити кресты, на них же надпись, Царь Славы, IС ХС, и прочее.

На кресте греческом Корсунском, и на прочих крестах греческаго изображения надписание, IС ХС, ника, и прочее.

Преподобный Никон Черныя горы в книге Тактиконе, в слове 38-м пишет: блюдох всюду честныя кресты надписуемы. ов сице, ов же инако. а не в едино надписание, о сих убо аз недоумеюся, исках с трудом подобающее надписание и лучшее уведати. и сего ради написав послах в соборную церковь, патриархии Антиохийския. они же испытавше о сем опасно, вписаша ми сице, яко лучше есть надписовати святыя и честныя кресты, IС ХС, Сын Божий. В том же слове выше. Брат некий от наших, сотворив крест, написа IС ХС Сын Божий. и шед постави верху гроба еретика, и тако упразднися бесовское мечтание.

На распятиях Антония римлянина, иже в великом Нове граде, латынскими писмены надписание, IС ХС, и прочее.

На крестах многочисленных чюдотворных, российскаго изображения, елицы от самого Бога чюдесне свидетельствованы, от святых саморучно изображенныя, от благочестивых царей и князей и патриархов, и прочих архиереов, данныя и поставляемыя в соборных церквах, и различных обителех. паче же и по всей России, по церквам и по домам бывших благочестие, на них же на всех единственный обычай подписания, еже, Царь Славы, IС ХС, и прочее. коему обычаю подписания, и поморския прежния отцы всяко последоваша.

Из Псалтыри толковой, превода преподобнаго Максима Грека от песни 7-я триех отрок. Сущее. Благословен еси Господи Боже отец наших. [ниже]; и благословено имя славы Твоея, и прочее. Толкование Златоуста. Славы имя есть, Божие имя. Царь славы есть имя и победительный, и елика таковая. [ниже]; Господь бо и вседержитель, и человеколюбец и благ, и вся таковая имена, славы имена суть. Из беседы на деяния [зач. 17, Толк. Златоуст.] Сущее. Бог Славы явися отцу нашему Аврааму. [ниже], и почто начиная, Бог Славы Богом нарече. понеже безчестных славны сотвори. Беседы на послание к ефесеом [зач. 218, лист 1593]. Отец славы рече, иже велия нам дав благая. яко егда глаголет, Отец щедрот, и Бог всякия утехи. и паки пророк: Господь крепость моя и помощник мой. [ниже]; славу нарицает, еже у нас имя и наречение всякия есть светлости, се славы рече.

В книге Кирилове, назади книги толковано. IС ХС, Бог и человек есть, Сына же Божия Петр исповеда. ты еси Христос Сын Бога живаго; и на сем исповедании его, и церковь свою обеща Христос создати, еже и врата адова не одолеют ей. Ника. Во многих местах толкуется победитель, и победа. Во алфавитах древних. ника толкуется сице; ника сказуется победа, над диявола, а сам непобедим ни от кого же. В грамматице древней польской, толкование неведомым речем. [ниже] Пишется на кресте Царь Славы IС ХС ника: ино тому сила, воистинну царствию Его никакоже несть конца.

О четырелитерном I Н Ц I написании.

Еже с латынских новых преводов Никоном взятое. Обличитель на латыны восточнаго православия Евсевий Пимян. в книзе Лифос, или Камени, изданной в Киеве и Кракове. Лета, 1642, типом изданием пишет. Зри в костеле римском. во время литургии на Агньце, еда не узриши ли на единой стране распятаго Спасителя, сих слов под титлою, IНЦI. еда не узриши ли и иных в крузе писмен более неже у нас. [ниже]; на просфире же греческой граммата, IС ХС ника. но и самозрительно на многих латынских и немецких крестах сия IНЦI буквы видимы. таковыя же IНЦI буквы и в Малой России от латын яве во унеятское отступление на образах и в книгах их, вкупе со обливаемым крещением, и со именем Iисус явишася. Никон же патриарх в Ставрове монастыре крест постави, и на нем перво вообрази в России сия IНЦI буквы. откуду и на многих крестах по всей России сия буквы и до ныне изображаются. и отсюду и поповщина и феодосиевы, и прочия, сия буквы восприяша.

Еже таковое надписание нововводное, а не святоцерковное.

От писания священнодиякона Соловецкия обители Игнатия. Сию титлу воздвигоша новыя еретицы злыя, богохульныя еретическия уста, адския преисподния огорелыя главни, содомскаго пламене останки. и Творца всея твари и Владыкою не проповедуют единороднаго Сына Божия, но потаенно еретически лает, и прочее. От писания древняго мужа Феодора Калиныча. Прежния поморския отцы, со всяким известием показоваху. откуду в Россию начало прияша, и от коих лет тая титла, и тыя четыре литеры сицевым видом IНЦI. писатися начаша. понеже мнози от них обретошася памятуя, инии же и от старейших себе помняху, от богоугодных иноков и от простых, елицы гоними быша, и велия страдания от патриарха Никона претерпеша. инии же и по Никоне за древнее благочестие страждуще. вся подробну поведающе и сказующе. яко тыя литеры начашася писати от патриарха Никона. и яко бы первое начало новой вере и нововводству учиниша, еже на святых крестах тыя четыре литеры начаша писати. противна святой соборной апостольской церкви древняго благочестия. и противно святым богословцем. и показующе прежнии отцы глаголаху; яко таковая титла не от святых богословцев, святей церкви предание. но тую титлу на крестах пишут с преводов костела римскаго, и с преводов польских. понеже Никон тех стран веру возлюби, и тую веру прият. с тою же верою, и тую титлу усердно прият, с новою же верою.

Еже таковым писанием крестов не приимати и не покланятися.

Из евангелия недельнаго [в 1 неделю поста]. Мы убо древнему законоположению церковному последуем; мы заповедания святых отец соблюдаем, мы прилагающих что или отъемлющих от церкве проклинаем, мы вводимое новозаконие христианохульников еретик проклинаем. Смеющих [там же выше] новая некая от чина церковнаго, евангелие, или знамение честнаго креста, или восписание икон святых, и проч. Стоглав [глава 41]. Писати иконы с древних образцов, а от своего замышления ничтоже претворяти. И [Кормч. старописм., глава 124] не прибавливати сверх древняго ни единыя iоты. Захария Копыстенскаго [Книга Полинодия, глава 2]. О Мануиле цесаре мовлю: [ниже] в вере православной без всяких новотин папежских стоял, чесо знаменитый довод, во истории константинопольской оныи; иже у единаго плебана латынскаго, не хотел целовати образа Спасова, который неправо выгофованный был. а для того не целовал, дабыся не здал веры папежской поблажити, с которым в единстве веры не был, и святостей его не почитал. От писания паки Феодора Калиныча. Древнии отцы поморстии извещаху: сего ради мы во омышлении о таковой новой титле. понеже аще о иных нововводствах опасение имамы и сумнение; кольми паче о нововведенной и незнаемой той титле. аще о иных прочих нововведений боимся, и неприятно душам и сердцам. кольми паче о честнем и святем кресте, в нем же все наше спасение и оправдание. аще во иных церковных догматех опасение имамы, еже бы не приложити, ниже отложити, кольми паче к честному и животворящему кресту, ему же безпрестанне кланяемся. како можем кланятися чистым сердцем, на нем же, [сиречь на кресте] видим приложено немецкое и римскаго костела, еже Никон прият с новою верою.

От послания Даниила Матфеева поморскаго, к Михаилу Григорьеву ис писма миротворнаго. Сицево. А когда прилучится нам быти в странах християнских, и обретающимся у них животворящим крестам, с подписанием Царь Славы, IС ХС, ника. аще и титла на тех же крестах четырми буквами воображена, и тем крестам поклонение творим, и прочее. и сице ради примирения написася о четырех литерах, дондеже об них обыскание творитися будет, снисхождение убо, а не законное положение написася. [ниже] но и по толиких летех, ничтоже во обысканиих показуется, токмо Еррорес, еже есть ничьтоже. четыре же оны литеры, еже есть IНЦI от Никоновых времен в России явствуется, паче же от самаго Никона, нововнесены показуются. [ниже] потщися неведущия известити о сем, да познавше Никоново новопредание; якоже о прочих, тако и о четырех литерех крестных, опасное блюдение возъимеют, как и о прочих того новостех. Бог благий, превечный Царь славы, да утвердит ны в любви своей, и покрыет ны страхом своим аминь.

 

СТАТИЯ, 5.

 

О отце Игнатии.

От слова Андрея Дионисиевича надгробнаго, Петру Прокопьичю. Егда древлесоловецкия отцы не приимаху новых уставов Никона патриарха, бяху тогда в них, мужи честны и святы. в них же два прочих превосходяще в премудрости и разуме. Един Герасим Фирсов именовашеся, вторый черный диякон Игнатий, муж святолепен и подвижник велий, и божественнаго писания вельми читатель, и внешняго наказания искусен. бяше же тогда в Соловецкой обители, некий отец Гурий именуемый, яко благоюродствуя, иже многая тогда прорицания предвещаше, о приезде Никона, по мощи святаго Филиппа прорече, и прочее. той великий отец, отцу Игнатию идеже среташе, присно глаголаше; Игнатие изыди из монастыря сего, ибо свой монастырь равный сему собереши. [ниже] Помяновенный же Игнатий изыде из Соловецкия обители, по глаголу святаго старца, и по благословению отец. и Богом подвизаем, прииде в Поморския пустыни. [ниже] пребываше же сей отец Игнатий, во многих вышеестественных подвизех; и в Куржетской обители, с священноигуменом Досифеем, и с прочими отцы схождашеся, и единоумно о благочестии усердствоваху. бе бо добродетельнаго ради жития и премудрости всеми знаем и именит; еще же живый в пустыни, чистоты ради его сердечныя, и безпристрастнаго жития, прозорливый дар имеяше. [ниже] Многи же сей отец свщенный просвети учением, научи благоверию, наказа добродетелем, и на подвиги возстави. [ниже], сему отцу Игнатию, ученик и сообщник бяше кроткий Даниил, благословением священнаго отца игумена Досифея. ибо молящуся Даниилу, священнаго сего игумена, да благословит и научит, у какова искусна отца в наказании быти. священная же она глава, аки Богом воздвизаем, иди рече, и в ваших Поморских странах пребывающа Соловецкаго старца Игнатия послушай, сей может тя наставити на путь спасения. еже и сотвори Даниил. бысть сему отцу Игнатию, сын и сообщник общежительства его. и несколько время терпяше с ним и с братиею, многи скорби пустынныя, и гонительныя волнения. И по сих отец Игнатий, многи души во благочестии и добродетелех научив и направив, и о Христе скончася. Из истории о разорении соловецкаго монастыря, о том же отце Игнатии. Игнатий Соловецкий диякон иеклисиарх бывый киновии. иже ведением мудрости, и разума собранием, толико украшен и удобрен бяше, яко и от новолюбцев некто в сих упражняяся о нем изглагола: Игнатий Соловецкий сосуд полн мудрости и нагнетен есть. сей блаженный, по изшествии из Соловецкия обители, многия пустыни и страны и грады обходя, древлецерковнаго благочестия слово утвержая, и к добродетельному житию люборачительныя души возграждая. Сей Обонежския и Каргопольския пределы, во отеческих православия утверди законех, и непроходимыя Выгорецкия пустыни и дебри и блата, благочестивыми насади жительми, и чином и уставом общежительства преподобных отец Соловецких удобрив и украси оныя дебри. Бяше бо муж жития воздержнаго и безстрастнаго. еще же и прозорливаго дара исполнен, многим хотящая быти провидев предглагола, овым в беды и напасти впадания, овым в наказания за согрешения объяви, кая по временном вся збышася. сей един из Соловецкия обители изыде, и со многими ко Господу взыде. В Палеостровстем монастыре, со двема тысящами и седмию стами собравшихся за древнее отец благочестие, от присланных воинов сожжен, в мирная покоища прейде.

Апостол ко евреом [зач. 334]. Братие помните наставники ваша, иже глаголаша вам слово Божие, на их же взирающе скончание жительства, подражайте веру их. и паки той же [к рим., зач. 99]. Кто поемлет на избранныя Божия, Бог оправдаяй, кто осуждаяй.

Описание отца Игнатия о титлах.

Ис писма Поморских писаннаго к феодосиевым. Понеже преподобнейший оный Игнатий, бяше постриженник Соловецкия святыя обители. верою же благочестив, и житием свят. и понеже в писании его противу новостей везде ясно, о Святей Троице, и воплощении Христовом, и о пресвятей Богородице правомудренно исповедует, и святыя вселенския и поместныя соборы приемлет, и прочия вся церковная последования, согласно извествует. и о крестных надписаниях, согласно со святою церковью правомудрствует. извествуя на кресте подписовати боголепныя надписания, еже есть Царь Славы, IС ХС, и прочее: [ниже], егда же к прочим Никоновым новинам четыре литеры IНЦI на кресте пишемы ново узре, за что оныя не точию не прия, но и новиною порече. и о сем здраво разсудити. [ниже]; понеже и многоученый автор Евсевий Пимин известно показует. яко в римском костеле таковое написание находится, на Агньце написуемо, у святых же не видится тако пишемо. Темже святопросвещенный отец Игнатий, не видев нигде в древлеправославней церкви [сие написание] пишемо, от новиков же везде воображаемо узре. чесо ради ревностию Илииною подвигся. оныя писмены обличи, и неприятны показа. и тако из сих доводов, писание отца Игнатия, и ревность его о надписании животворящаго креста, якоже и о прочих правомудренна, и со святою церковию, и богословными мужи согласна и приятна суть.

 

СТАТИЯ, 6.

 

О браках поганских и еретических, бывших до крещения.

Еже по крещении таковыя браки [в неимении ныне священных лиц, и священнаго устроения] не приимати, и церковнозаконными не утверждати.

Евангелие от Матфея [зач. 22]. Рече Господь, не собирают бо от терния грозды, ни от репия смоквы. Святый апостол Ияков глаголет [зач. 55]. Еда может братия моя смоковница маслины творити, или виноградная лоза смоквы. такожде ни един источник слану и сладку творити воду. Святый апостол Павел глаголет [к Титу посл., зач. 301]. Вся бо чиста чистым, оскверненным же и неверным ничтоже чисто, но осквернися их ум и совесть. Бога бо исповедают ведети, делы же отмещутся Его, мерзцы суще и непокорливы, и на всякое дело благое неискусни. Златоуст в толковом апостоле пишет [зач. 150]. Тайны без единости церкви христианския ничесоже суть, ибо всем отлучившимся единения церковнаго, Бог пророком рече, послю на вы клятву, и проклену благословение ваше, им же тайна совершаема. ибо церковь Божия есть, якоже глаголет писание, вертоград заключен, и источник запечатлен. того ради невозможно нигдеже тайне совершатися, токмо во единости церкви Божия. ея же между сонмищы и еретиками несть, тогда и тайны в них ни единыя несть. Той же глаголет [Маргарит, лист 537]. Не можеши ли действовати, брачися с целомудрием, точию в церкви, точию на ризе, точию под Царицею. Святый Иоанн Никейский, в слове на армен пишет [Кормчая старопис.]. Якоже Господь глаголет, не собирают бо от терния грозды, ни от репия смокви. тем же проявленно, яко крещение их, и вся от них содеваемая, неприятна и непотребна суть. аще и тщатся несмысленнии и неразумнии и не утвержении и лживии християне, яко истинна и благоприятна творят деяния их: [выше], от диявола бо Христова таинства не совершаются. и от гноища благоухание не исходит, ни от гнилаго трупия ин целится, ниже от червивых удов, здравие иному телеси подается: ни паки от ереси, или от неверия, духовное действо исполняется. [ниже]; тем же проявленно, яко иже правовернии именуются, а приобщаются с еретики, и творимая от них аки благоприятна мнят: [ниже], общники обретаются проклятию и анафеме их яже на них написана. Сему подобно и святии апостоли в завещании глаголют [книга 6, глава 15]. Яко онии иже от нечестивых приемлюще осквернение, общницы разума их будут. И в Кирилове [лист 307]. Языцы бо, сиречь, турцы и скифове, и богоубийцы июдеи, и прочии им подобнии еретицы. [ниже]; и учения их, или обычаи, или законы и нравы многим неразсудным человеком, сладка и красна быти мнятся, но всяко неистинна, и горька вконец обретаются, и вечной муце ходатай бывают. Бароний, лето Господне, 258. Восточныя церкви о том, во Иконии во Фригии собор сотворше, уставиша ни едину тайну, у еретиков в тайну вменяти. Захария Копыстенскаго. Наияснейший Карл наш пан милостивый. [ниже]; понеже от костела латынскаго отдаляемся, веры его неприимуемо, и ничого от папежников римских, проткове наши не приняли, и мы не хочемо приимати. Святый апостол Павел о браце глаголет [к ефесеом, зач. 231]. Тайна сия велика есть, аз же глаголю, во Христа и во церковь. Бароний, лето Господне, 57. К ефесеом пишущь апостол, тайною брак нарицает, его же чести ради, и сей закон от апостолов произыде; дабы в церкви, и с ведением епископьским совершатися. Тако бо Игнатий пишет к Поликарпу [посл. 11]. Подобает сим, иже жены поемлют, или брак восприемлют, с ведением епископским сие творити, и прочее. О тайне супружества, си есть законнаго брака [Кормчая, печатн., глава 51]. Супружества или законнаго брака тайна, от Христа установлена, во умножение рода человеческаго. и в воспитание чад к славе Божии; [ниже], вещь сея тайны есть муж и жена, во приобщение брака, честно и кроме всякаго препятствия правильнаго совокупитися изволяющии. форма же, си есть образ, или совершение ея, суть словеса совокупляющихся, изволение их внутреннее пред иереом извещающая. да убо честно и кроме всякаго препятия правильнаго, тайна брака совершится. [ниже]; изряднее же да весть иерей; яко супружества восхищенная, такожде и потаенная и вся прочая супружества, еже не с благословением церковным и чинным [от епископа или от священника] совершаемая, по соборному уставлению, и святых отец учению, незаконна, паче же и беззаконна и ничтоже суть.

Из послания Поморских отец, к Феодосию Васильевичю. О сколь святолепно священный церковный закон быти заповедует браку, кроме всякаго препятия правильнаго. к сим да угаснут тии, иже в правой вере мнящиися быти. А яже от еретик браки похваляющие, зане не точию в брацех, но и вся вера их противна святым правилом. [ниже] и да не глаголет кто, яко до крещения сшедшимся леть есть, по крещении без венчания смешатися: зде бо церковным законом, яко ножем истинны, пререзует вся изветы. и единым словом заключает церковную тайну, глаголя вся прочая супружества, кроме венчания беззаконна. а ельма глаголет вся супружества; к тому ни единаго супружества оставляет быти в церкви, кроме чиннаго церковнаго венчания.

От жития великаго князя Владимира [Минея четия, киевопеч., июля, 15]. Великий Владимир, взя Херсон град греческий, и крестися в Херсоне. [ниже] по крещении же приведена бысть Владимиру царевна Анна, греческих царей сестра на обручение; и по немнозех днех венчан бысть с нею в законный брак. [ниже] и живяше с нею Владимир по закону христианскому. прочия же прежния своя жены, еже ему прежде крещения быша, богатествы удоволи отпусти, дав им на произволении, да каяждо аще хощет за иного посягнет. Кормчая старописменная, правило Максима митрополита рускаго к новокрещенных христианом [глава 52]. [ниже] Пишу же и се вам детем моим; да вси чада мои порождения в купели новокрещенней, да держите жены от святыя апостольския церкве. аще же держите их в блуд без благословения церковнаго, то что ти в помощь есть. но молися и нуди их, аще и стари суть, или млади, да венчаются в церкви. От жития стаописменнаго, Савы архиепископа Сербскаго, от исповедовавших ереси святому [глава 141]. [ниже] Посылает же и эксархов много взыскующе; их же яко погански без благословения и молитв, жены поемлющих, и сих венчати повелевает. аще в старости и дети таковы имуще будут, и сих под крыле матере приити, и с ними венчатися. И [Кормч. печатн., лист 335] отселе не быти инако, не именоватися законному браку, и христианскаго строения достойну, аще не молитвы совокупляющихся в любовь свяжут. Книга Матфея Правильника [Состав 3, глава 8]. Без священнословия брак не состоится. Там же [Состав ф, глава 7]. Брак аще священною требою, ветхое преступление не отмыет, сквернен быти мнится.

Еже в таковых поганских и еретических браках бывшим, безбрачно ныне жительствовать.

Ис потребника иноческаго, от слова преподобнаго Иосифа Волоцкаго [лист 332]. Яко егда прииде в Рим, великий апостол Павел. тогда  научи две жене, Нерона царя римскаго, веровати во Христа, иже крестишася, и отступиша от Неронова сквернаго смешения. Нерон же много претив апостолу, дабы повелел женам его, на скверное смешение приити к нему. апостолу же непослушавшу, и не повинувшимся женам Нерону; тех умучи, Павлу же главу отсече. Такожде и святый апостол Андрей, егда крести Максимилу, жену геефа Антипата. тогда  Антипат даяше много злата апостолу, яко да повелит жене его на скверное смешение сочтатися с ним. апостолу же никакоже нехотящу. тогда разгневася Антипат, повеле апостола стремглав распяти. Такоже и святый апостол Фома, егда крести царицу, Муздия царя. царица же отступи сообщения царева. царь же повеле апостола копии пробости; царицу же много мучив, и не увеща ея быти с ним. От страдания святых мучениц, Веры, Надежды, и Любови, и матере их Софии [пострадавших в царство Андреяна царя]. Антиох епарх градский, прииде к Андреяну царю, глагола; жена Етера купно с треми дщери пришедши, боги наши развратила есть, глаголющи единаго Бога чтити, Отца и Духа и Сына Его. лишает же нас, и жен наших. ни бо на ядение и питие приходят послушающии тех отроковиц. От страдания святых мученик, Хрисанфа и Дарии [Минея, четия, киевская, марта 19 день]. Свободное имущи житие святый Хрисанф. крести в дому своем блаженную сожительницу свою деву Дарию. [ниже], не точию о своем спасении но и о многих печастася Хрисанф и Дария. ибо ов множество мужей ко Христу обращаше. и юнош к девственному увещаваше житию. и обещати чистое житие Богови. а ова множество жен и дев Христови уневещаше. и раздельшеся во особныя на то аки монастыри, устроенныя домы. кождо ею свой лик девьствующих имеяше. [ниже]: поне колицех же летех, обоему лику Хрисанфову и Дариину умножившимся зело. в то время, воста нечаянно молва и мятеж. народ бо пришед, к Нехерину епарху, вадяше на святых рабов Христовых Хрисанфа и Дарию. и взываху, мужи глаголюще, погубихом жены нашя. юноши взываху, погубихом обрученыя девицы, Дарии ради. Такоже и жены кричаху, лишихомся мужей наших. девицы же зваху, лишихомся обручников наших, Хрисанфа ради. Народ же молвяще кричащи, како будут раждатися чада, супружеству отвергаему; оскудеют людие, отлучающемуся мужескому полу от женскаго, странным учением и волшебным прельщением хрисанфовым и дарииным. и абие епарх повеле яти обою, и различне мучити. От жития преподобномученицы Марии Голендухи [Минея четия, киевск., июля 12]. По приятии же святаго крещения, паки в дом свой возвратися. И уже необщашеся естественному супружества закону, не хотящи сквернима быти от нечестиваго мужа, сущи обручена Христови в невесту. и пребываше в посте и в молитвах; якоже от духовнаго отца крестившаго ю научена бысть. [ниже]; мужу же своему ниже прикоснутися попускаше. и удивляшеся муж таковому ея нечаянному пременению. [ниже]; и много нудяше ея на обычное совокупление, ово ласканием и молением, ово прещением и биением и насилованием, но ничтоже успе. Апостол [зач. 245]. Братие, в неже достигохом, тоже и мудрствовати, и тем же правилом жительствовати.

Еже преступающих таковых чистое житие, яко соблудивших епитимиями наказовати.

Правило Максима митрополита рускаго. Да вси чада моя порождени в купели новокрещенней, да держите жены от святыя соборныя и апостольския церкви. [ниже], аще же их держите в блуд, без благословения церковнаго, то что ти в помощь есть. Елико [Кормч. печатн., лист 336] же без священных молитв, на сочтание брака своя рабы совокупляюще, не боголюбив брак составляют, но блудническое смешение утверждают. их же бо не совокупи Бог священными молитвами призываем, тии вси сходятся на грех. В книге арменопуловой пишет [книга 6]. Смешение без священнословия блуд есть. Святейший Фотий митрополит русский, в послании в Нов град пишет. А которыи не по закону живет с женою без благословения поповска понялися, тем епитимия три лета, как блуднику, да паки совокупити их молитвами. [ниже] а без благословения аще восхотят жити, ино их разлучити. [ниже] да давали бы о себе поруки, чтобы им прочая лета жити целомудренно. Святаго Никифора патриарха [Кормч. печатн., прав. 19]. Иже неявленная согрешения исповедающих, от причащения отлучати подобает, в церковь же тем входити не возбраняти, ниже обличати, но кротко сих наказовати; от правила 20-го; ащели же явленна сих согрешения, тогда прочее по церковному уставу исполнять запрещение.

Еже без исправления таковых о сем пребывающих, от церкви конечно отлучати.

Святаго Василия Великаго, о не радящих о епитимиях, рекше о запрещениих [Кормч. лист 253, обор.]. Аще не уцеломудрят кого общая запрещения. нужда есть, от Господа реченными правилы повинути таковаго: обличи бо рече согрешающаго брата твоего. [ниже]; аще же не послушает, рцы в соборе. аще ни тако послушает, да будет ти яко язычник и мытарь. [ниже]; и да возвестится о нем везде, не прияту быти ему, на всяко общение житейския потребы, и прочая. Апостол [коринф., зач. 134]. Ащели кий брат именуем будет блудник, и прочее. с таковым ниже ясти. Прелюбодей [Номоканон, прав. 176], или явленный блудник не приемлется в церковь, и прочее. Из устава скитскаго, прежних поморских отец [статия, 22]. Которыя мужи живущии по скитам, и начнут безчинно жити с женами своими, не по пустынному обещанию. таковых аще достойне не исправятся, высылати вон из скитов.

 

СТАТИЯ, 7.

 

Еже яко бы крещением брак составляется, таковаго мудрования не иметь.

Из послания поморских отец, к Феодосию Васильевичю. От всех божественных писаний яве показуется, яко ина тайна святое крещение, и другая браковенчание. [ниже]; от браковенчания бо исходит, ов больши, другая же мние, ов глава жене, другая же покорения нося. крещение же супружных и не супружных равно освящает. и от крещения вся исходят, равно во Христа облечени, и ни ов больши, другая мние. О Христе бо Исусе несть мужеск пол ни женск. Крещение бо братство подает, а не телес совокупление, и прочее.

 

СТАТИЯ, 8.

 

Еже писем оправдательных о новой IНЦI титле, и о браках еретических, и на отца Игнатия хульных, за правыя не приимать.

Понеже в таковых писмах о новой IНЦI титле многия свидетельствы обретаются ложныя. Такоже и о браках еретических, и прочее, противно святоцерковному, и отец наших писанию и преданию. Вышепомяновеннаго же отца Игнатия, в таковых писмах феодосиевы сице хульствуют: Некий рече, Игнатий старец, зовомый богослов; иже в Палеострове скончася, пишет о титле от дерзости своея, подстрекаем от сатаны. [ниже]: дозде Игнатия старца, богомерское предложение, и толкование о титле. [ниже], всяк бо может ведати, яко злой курицы, злое и яйцо. [ниже]: злаго же сего корене, злая отрасль, старца того Игнатия, своего им учителя, ученицы поморския пустынножители, и прочия. Таковыя многия во оных писмах хулы: но понеже аще кто и простаго христианина похулит, и на таковых клятва написана, якоже во евангелии недельном, от седмаго собора пишет [В неделю 1, велик. поста]. Проклинающе и анафематисующе, всех еретик и христианохульник, их же и святохульники нарекоша. кольми же паче, егда сице дерзают хулити, таковаго знаменитаго отца; паче же и сущий корень благочестия. того ради таковыя писмы всячески отревати, и за правыя не вменяти подобает. Яко же 7-го вселенскаго собора, правило, 9-е запрещает сице. Аще [Книга о вере, в предисловии, лист 3, обор.] кто обрящется чтый, [сиречь за правыя приемля] еретическия книги, еже супротивляются истинне, священницы убо да извергнутся, мирстии же да отлучатся.

 

СТАТИЯ, 9.

 

Еже торжищное [во обстоянии иноверных] брашно, осквернено от руки иноверных не мудрствовати, и без молитвы очистительныя приимати и ясти.

Святый апостол Павел [коринф. зач. 146]. Все еже на торжищи продаемое ядите, ничто же сумняшеся. [ниже]; ащели кто речет вам, се идоложертвенное есть, не ядите за онаго поведавшаго. От толкования Златоустаго [Беседы, лист 829]. Многу отраду и свободу им уготовляя, ниже бо разсуждати отставляет, сиречь, истязовати и вопрошати, аще идоложертвенно есть, или не таково, но просто ясти все, еже ис торжища, ниже сие навыцати, что есть предлежащее. и себе подавати вины. Бароний [лето Господне 362]. Якоже в Константинополи сотвори Иулиан; [царь отступник], тако и во Антиохии вся снеди богом пожрети повеле, елико токмо во град вношахуся; да тако или осквернит, или уморит християн. но Антиохийстии вернии о том небрежаху, ниже испытоваху, что богом пожерто, или ни. по научению апостольскому, ядяху и пияху ничтоже сумнящеся: оба добри, онии [иже не ядоша сицевых] похвалы достойни. и сии хулы недостойни. Из книги Кринцы святаго Георгий Кедрина [Царство 44, Иулиана прес.]. Иулиан скверный. [ниже], источьники жертвами скверными оскверняше. [ниже], последи же на торгу продаемая оскверняше, обливаше бо и хлебы и мяса, и овощь и зелие и прочее. убо видящии сия християне, стоняху и плакаху обываемых, приимаху же ядь, апостольскому закону последствующе, глаголющему; всяко продаемое на торгу ядите, ничим же испытающе. Память святых седми отрок, иже во Ефесе [Пролог, август, 4 день]. Сии святии отроцы, бяху в царство Декиево, приимше же злато и сребро на пищу себе. изыдоша в пещеру, близ сущу града, глаголемую Охлинту, пребыша дни многи моляшеся Богу. Амблих же бе мний, и той вхождаше во град купити брашна. [ниже], и взем злато нача купити хлебы. От жития преподобнаго Антония Великаго [Никон Черныя Горы, слово 45]. [ниже]. Срацыни видевшее Антониево усердие, по случаю путем онем мимоходяще, и радующееся приношаху ему хлебы. От жития преподобнаго Саввы освященнаго [декабря, 5 день]. Сретеся преподобный с четырми срацыны. [ниже], потом приидоша к нему носяще хлебы и сыры и финики. От жития преподобнаго Макария Желтоводскаго [минея четия, кивск., июля, 25]. Вся на пользу строяй Бог, раба своего явленна сотвори, не точию во християнех; но и во агарянех. и тии бо приходящее ко святому, приношаху ему хлебы, и медовые соты, и пшеницу и иная потребная ко пропитанию, он же приемляше от них со благодарением. Апостол [к Тим., зач. 285]. Всяко создание Божие добро, и ничтоже отметно со благодарением приемлемо, освящает бо ся словом Божиим и молитвою. Святый Златоуст [Беседы, лист 1462]. Зане всяко создание Божие добро рече, о едомых всех назнаменова. [ниже]; две убо главизне полагает. Едину убо, яко никоеже создание Божие скверное. вторую же, яко аще и скверно было бы, но имамы целение, знаменай благодари, прослави Бога, и всяка ничистота отлете. Никон Черныя Горы [слово 17]. Добро убо есть, и мирянином пищу приемлющим благодарити Бога. памятию бо Божиею пища освящается. А еже не тожде со святыми отцы мудрствовати [Щит веры], беда велия и ересь есть.

 

СТАТИЯ, 10.

 

Еже иноческий чин и пострижение, от несвященных иноков приимати.

От жития преподобнаго Павла Простаго [Пролог, окт. 4 день]. [ниже]. Иде ко блаженному Антонию. [ниже], и глагола Павел, еже ми велиши творити, то творю; и искуси и Антонии, и обрет яко вся терпит. постриже и. Святцы летописныя [маия, 15 день]. Преподобнаго Пахомия Великаго: Пахомий Великий бе в царство Константина Великаго, родителю еллинску сын. чином бе преже воин, пострижен отшельником Паламоном. В книге 2-й, преподобнаго Никона [слово 36]. И сам убо Великий Пахомий, тяготы священства избеже. В минее четии Макарьевской [в житии его]. Начат убо приимати, иже от покаяния приходящих им Господеви, и со испытанием мнозем даяше тем иноческий образ. От жития прподобнаго Антония Печерскаго [патерик печерск. в житии его]. И начаша приходити к нему христолюбивии нецыи, пострищися хотяще, он же приимаше их и постригаше. Там же выше. Иларион муж благочестив. в божественном писании разумен. [ниже], но прежде того от преподобнаго Антония пострижен бысть во иноческий чин. [ниже], совокупленней же братии, рече преподобный Антоний, се Бог вас совокупи братие, и от благословения есте от святыя горы. имже игумен постриже мя, аз же вас постригох. От жития преподобнаго Зосимы Соловецкаго. Прииде Герман старец, и с ним муж именем Марко. [ниже], и не по мнозе времени постриже его преподобный. [ниже], раб же Божий Зосима, не хотяше сам хиротонисания прияти, за многу кротость и смирение, братия же належаще. В Кормчей старописменной, вопрос. Аще случится человеку в велицей болезни, а не будет игумена, льзе ли епископу пострищи его; ответ; не токмо епископу, но и попу и диякону, а при смерти да и причетник пострижет.

О самовозложенцех. От жития преподобная Аполинарии [минея четия, киев., генваря, 5 день]. Умедли неколико дней во Александрии, обрете же в дому в нем же виташе старицу, юже милостынею ущедривши. умоли да тайно ей купити мантию, параманд же и клобук чина мужеская одеяния. старица же купивши, и принесши блаженной. [ниже], приближися же и колесница, к некоему блату сущу при источнице. [ниже], откры же блаженная закров колесничный, виде обоих слуг дремлющих. совлачеся убо одежд мирских, и облачеся во иноческая одеяния, глаолющи к Богу, давый мне начаток сего образа; сподоби мя доконца понести его, по Твоей святой воли. таже знаменавшися крестным знамением; сниде тихо с колесницы, спящим слугам обоим, и в блато шедши скрыяся, даже колесница далече отъиде. вселижеся святая во оной пустыне при блате. [ниже], ангел же во сне явльшися, и в скит идти ей, и Дорофеем именоватися повеле. Номоканон [правило 80]. Аще кто предвари почернитися, или рясу облещи, внутрь искуса, аще и кроме страстнаго; да не дерзнет совлещи сего прочее, но и неволею понужден будет пострищися от местнаго епископа, с запрещением и отлучением. Матфей Правильник [состав м, глава 15]. Ащели же кто и тролетия внутрь, [то есть во искусе] иноческим кроме молитв одеянием облечеся, велико подъимет осуждение, аще совлещися его восхощет; яко ругаяся явственне ненаругаемым, и неволею бо в сию одеятися понужден будет.

 

СТАТИЯ, 11.

 

Еже во иноческом образе благочинно жити, безчинным же запрещати.

Ис книги 1-я, преподобнаго Никона Черныя горы [слово 36, халкидонскаго собора правило 4]. Иже воистину чисте иноческое проходяще житие, достойныя да сподобляются чести. ельма же нецыи иноческий приемлюще образ. церковныя же и градския смущают вещи, обходяще без удержания во градех. годе бысть да в коемждо граде и стране, иночествующим вчинятися под областию епископу, и безмолвие лобзати, и внимати точию посту и молитве в них же отрекошася местех терпяще. ниже церковным ни житейским забавляти вещем, или приобщатися, оставляющим своя обители, разве аще когда повелени будут, потребы ради нужныя, от градскаго епископа. ни единаго же приимати раба, еже иночествовати, без воли своего ему владыки. Преступающаго же сей наш устав, повелехом без причащения быти, яко да не имя Божие хулится; и святых апостол правило, 10, Аще кто с неприобщающимся поне в дому помолится, и той да отлучится. Дозде ис книги Никоновы.

 

СТАТИЯ, 12.

 

Еже отложивших иноческий образ, без исправления не приимати.

Ис книги преподобнаго Никона Черныя горы. От старчества [Слово 51]. Рече старец, якоже в крещении просвещении, тако и во иноческаго жительства образе, видех божественныя силы благодать. и сего ради, иже святый образ иночествующих отложивый, не имать части с верными, но во отвергнувшихся веры, причитается чин и муку; аще не покается достойно, и облечется паки в той. 4-го вселенскаго собора [Кормчая, прав. 7]. Причетник или мних, в воинство, или в который сан, от своего изступив, проклят. Толкование. Аще котории мниси, или причетницы. мниси оставльше монастырь, или причетницы причет, и ризы изменьше, в воинский чин внидут, или мирской сан приимут, и не покаются и не обратятся, ни восхотят взяти своего образа, его же прежде Бога ради изволиша, да буд прокляти. Матфей Правильник [состав от. с. Никифор. патриарх, прав. 34]. Аще инок, святый отложит образ. [ниже]; подобает необращающася таковаго, анафеме предати; и без воли во иноческая отвлещи, и в монастыри затворяти. [выше] правило, 24. отложившаго святый образ, и не исправляющася, не подобает под кров вводити, или радоватися глаголати ему. Там же [правило 14]. Отложившаго инока образ, и паки обращающася; подобает паки облачити его, во еже совлече иноческое одеяние, кроме вчиненных молитв. Зинарь [глав. 126]. Аще мних оставит свой образ. [ниже] таковый аще приидет когда на покаяние; да отлучится на покаяние, 6 лет, аще будет был в малом образе. аще же в великом будет был, да отлучится на покаяние, 10 лет.

 

СТАТИЯ, 13.

 

Еже обычай иноческий древний о откровении главы приимати.

В Потребнике иноческом, в чине пострижения пишет. Иноку мантии с себя не снимать, а к Евангелию клобук точию, [а не камилавку] снимать, [и то] аще сверстен человек есть. ащели же млад есть, рекше юн; не снимати клобука, ни к лоре ни к Евангелию, дондеже брадою обрастет. Никон Черныя горы [в предисловии]. Приемлю церковная предания, писанная и не писанная.

Еже внешних не хвалити.

В летописце российском, в лето, 6981 [1473] пишет. Аще кто возлюбит, и похвалит чюжую веру, то своей поругался есть вере. В Потребнике, в чине проклятия ересей люторских пишет. Проклинаю и всех единомудренных помощников их, и прилагающихся им, и похваляющих их.

 

СТАТИЯ, 14.

 

Еже иконнаго воображения от внешних и новоженов, [аще и по подобию писанных] не приимати.

Свидетельство из выписки Феодосия пустынника о иконном воображении. пишет. Божественная служба, иконное воображение от святых апостол начало прият. подобает священнику и иконописцу чистым быти. понеже священник служа божественными словесы составляет плоть, ей же мы причащаемся, во оставление грехов. и иконописец вместо словес, начертает и воображает плоть, имже покланяемся, первообразных ради любве державне а не служебне. и будет случится им впасти в явленныя скверны, обои неприятны. Кормчая старописменная [глава 124]. Подобает убо изуграфом, [рекше иконописцем] чистым быти, и житием духовным жити. [ниже], понеже на таковое святое дело, и древле рече Бог к Моисею, еже Веселеила наполни духа Божия; сей же Веселеил, делатель бысть скинии свидения, ветхаго закона. колми паче подобает нынешния благодати, пишущим образ Спаса Христа, и пречистыя Его Богоматере, и святых Его; тщатися к восприятию духа Святаго. Симеона Фесалоникийскаго [глава 23]. Яко подобает писати благоговейне божественная и благочестивно, и по преданному обычаю. Святый апостол Павел, в послании к Титу, о еретицех и неверных, пиша глаголет [зач. 302]. Еретика человека, по первем и втором наказании отрицайся. Той же там же [зач. 301]. Вся убо чиста, чистым; оскверненным же и неверним ничто же чисто. но осквернися их ум и совесть. Бога исповедают ведати, делы же отмещутся Его; и мерсцы суще и непокориве, и на всяко дело благое не искусни. Матфей Правильник [состав а, глава 2]. Понеже убо глава телесе церковнаго Христос, по божественному апостолу. от Него же уди вси живятся, и духовный возраст приемлют. сии же [то есть еретицы] от состава удов телесных отторгошася, не к тому пребывающа в них имут благодать Духа Святаго. еже убо не имут, сами, како иным предадут. Зиновия инока Отни пустыни [Соборник малой, лист 147]. Имать бо всяк еретик в себе дух дияволь, тем же и противится Духу Святому. Святый Иоанн Никейский, в слове на арменов [Кормчая старописменная]. От диявола, Христова таинства не совершаются, и от гноища благоухание не исходит, ни от гнилаго трупия ин исцелится, ниже от червивых удов, здравие иному телеси подастся. ни паки от ереси. или от неверия, духовное действо исполняется. якоже Господь глаголет, не собирают бо от терния грозды, ни от репия смоквы. тем же проявленно, яко крещение их, и вся от них содеваемая, неприятна и не потребна суть. аще и тщатся несмысленнии и неразумнии и неутверженнии и лживии християне, яко истинна и благоприятна творити деяния их. [ниже], но иже творимая от них, аки благоприятна мнят. общники обретаются проклятию, и анафеме, яже на них написана. От поучения Исидора Пустынника, ко Евсевию епископу Пилусийскому [там же, глава 126]. От неверных иностранных римлян и германов, иконнаго воображения православным христианом приимать не подобает. аще по некоему прилучаю, от древних лет где обрящется, в наших странах верных рекше, в греческих, или руских; а вообразуема будет после расколу церковнаго, еже греком с римляны. и тогда аще и зело иконное воображение есть по подобию и хитро; поклонения же сим не творити, понеже от рук неверных воображени суть, аще и по подобию суть, но совесть их нечистоте подлежит. о таковых бо Павел божественный апостол, к Титу пишет. еже оскверненным и неверным ничто. [ниже], мерски суще и непокориве, и на всякое дело благое неискусни. Захария Копыстинскаго [Полинодия, часть 3, раздел 1]. И ничого от папежников римских проткове наши не приняли, и мы не хочемо приимати. От послания Андрея Дионисиевича, к некоей пустыннице. Первое написано у тебе, много испытовали  божественнаго писания, и того не могли обрести, что испытовати иконописцов веры и жития. и по сему вашему разумению, аще иконописцы будут, или латынники, или люторы, или армены, или махаметовцы; и иных вер. и вы не хощете веры их испытовати. Оле вашего неразсуждения и самомнимаго толкования. [ниже], апостол убо пишет, еретика человека, по первом и втором наказании отрицайся; а вы святых икон писати их приемлете. [ниже], или не слышасте священнаго Симеона Фесалоницкаго заповедающа. яко подобает живописати благоговейно божественная, и благочестно, и по преданному обычаю. а вы дерзаете и кроме благоговейнаго жития, и кроме благочестнаго, попущаете святыя иконы писати, противно святых разумению. [ниже], како могут тии, кои веры святыя не знают, знати по существу, святыя иконы писати; иже не просвещаеми благоверием, иже Духом Святым неосвященни, иже и нечестием и безверием помраченни, иже духом противным потемненнии, и прочее. А еже от феодосиевых и прочих иконы на общее разсуждение оставляют. О сем Матфей Правильник пишет [состав е, глава 4]. О них же писание не лежит, сохранити подобает навычение и обычаи. аще же сему будет оскудение последовати подобает, множае приближающимся, и уподобление имущим ко искомому. аще же ни се будет, разумнейших купно и множайших совет да держится.

/Зде списатель сего стостатейника, по сочювствию и дружбе своей к феодосиевым и к прочим таковым. аще и готов бяше писанныя ими иконы приимати, обаче и своя ему совесть возбраняше повелительне написати сие, решился точию оставити на общее обсуждение. То какое же на приятие феодосиевских икон мощно употребити разсуждение; егда и православнаго изуграфа, священныя правилы обязуют во всем быти непорочну и беззазорну, и непричастну Божия благодати. единако якоже и священнику. о чем и сам списатель, пространно от божественнаго писания выше сего свидетельствует. у еретика же феодосианина, мощно ли надеятися быти благодати Божией; и мощно ли его у нас в православной церкви уполномачивати в духовныя правители; ни, но и помыслити страшно. того ради и разсуждение оное списателя, весма противозаконно и вконец непрятно есть. и якоже прочих еретиков, тако и феодосиевския иконы отвержены суть./

 

СТАТИЯ, 15.

 

О иконописцех верных.

Еже не зазорным в житии быти, из древних образцов святыя иконы воображати.

Книга Стоглав [глава 43]. Подобает быти живописцу не празднословцу, ни смехотворцу, не сварливу, не завистливу, не пияницы, ни грабежнику, ни убийцы; наипаче хранити чистоту душевную и телесную. [ниже], и приходити ко отцем духовным на часте, во всем извещатися. и по их наказанию и учению жити, кроме всякаго зазора и безчинства. и с превеликим тщанием писати образ, Господа нашего Исуса Христа, и пречистыя Его Матере, и всех святых. по образу и по подобию и по существу, смотря на образ древних живописцев, и знаменати с добрых образцов. [ниже]: писати с древних образцов, а от самосмышления догадками Божества не описовати. [выше]. Писати живописцем иконы [глава 48], с древних обрасцов, как греческия живописцы писали. и как писал Андрей Рублев, и прочия пресловущия живописцы. и подписовати. а от своего замышления ничтоже претворяти. Подобает узуграфом чистым быти, и благими нравы украшатися. а не сквернословцем ни кощунником, ни блудником ни клеветником, ни иным таковым, иже последуют обычаем скверным. [ниже]; и был бы иконописец хитр, о подобии древних переводов, и первых мастеров богомудрых мужей, имже от начала предано бысть, по объявлению коегождо где бывшаго чюдеси, или явления, и собою бы вново не прибавливал ни единыя иоты. аше убо и зело кто мнится смыслити, а кроме святых отец предания не дерзати.

Еже не таковых, от дела иконнаго отставляти.

Тут же в Кормчей старописменной. Аще кто и зело имать быти хитр святых икон воображению, а живый не благолепно, таковым писати не повелевати. и паки аще кто и духовно житие имать, а благолепно вообразити святыя иконы не может, таковым писати святых икон не повелевати же, но питатися им иным рукоделием. В выписке Феодосия пустынника. Будет случится священнику и иконописцу, впасти в явленныя скверны, обои неприятны. [ниже], или будет не художно иконописец воображает, то взяти по нем порука, чтобы впред не писати ему, а учитися иному рукоделию. Аще кому не даст Бог таковаго рукоделия [Стоглав, гл. 43], учнет писати худо. [ниже], и им вконец от таковаго дела престати; да не Божие имя таковаго ради писма похулится. [ниже], питатися же им иным рукоделием. а Божия образа во укор и в поношение не давати. Такоже [там же] мастеры, или их ученики, аще учнут жити не по правилом завещания, во пиянстве и в нечистоте и во всяком безчинстве. и святителем таковыя в запрещение полагати, от дела иконнаго отнюд отлучати, и касатися того не велети, боящеся словесе реченнаго, проклят всяк творяй дело Божие с небрежением.

 

СТАТИЯ, 16.

 

Еже по еретическому преданию икон не творити, и в руки неверных, святых икон не предавати.

Кормчая старописменная [глава 144]. Кроме святых икон, правоверному иконописцу и изуграфу ничтоже писати, ни еже есть на глумление человеком. ни зверева образа, ни змиева; ниже ино что от плежущих, или рода гмышевеска, кроме где-либо во прилучившихся деяниих, якоже есть удобно и подобно. Святаго апостола Павла [правило 7]. Идолом творец, да престанет идолы творя, ащели ни, да отвержется. Паки в Кормчей. А неверным и иностранным, паче же рещи нечестивым и поганым арменом, святых икон не писати, и на сребро и злато не меняти; понеже не в почесть, но в поругание святыня предавати грех есть. не дадите бо рече святая псом. Познанным же невинно даяти иконы. О сем июля 8, о святем великомученице Прокопии. И сентября 14. о царе Константине, в прологе и в минеи четии извествуется.

 

СТАТИЯ, 17.

 

О настоятелех.

Еже по общему совету, и достойных избирати.

Преподобный Феодор Студит, в книге Никонове глаголет [слово 18]. Вся елика аще твориши или глаголеши, имей свидетельство от святых писаний, или от отеческаго ти обычая, кроме преступления Божиих заповедей. Матфей правильник [состав е, глава 4]. Аще о чем писание не лежит, сохранити подобает навычение и обычай; и последовати подобает множае приближающимся, и уподобление имущим ко искомому. но понеже еже настоятелей избирати по общему совету, в прежних наших отцех бысть обычай; по уподоблению избираемых древле во обителех игуменов. очесом преподобный Иосиф Волоцкий, в книзе о монастырстем строении. от правил Григория Акраганскаго. пишет сице [слово 13]. Повелеваем игумена в монастыри поставляти, и не по степенем или по старейшинству, но его же вси мниси добрейши смыслом, сиречь старейши достоинством и разумом изберут, ничтоже ради, но яко права верою, и житием целомудренна, и правлению достойна. Матфей правильник [состав м, глава 15]. Игумен аще и священства не причастен, поставляется. и тако по сему и прежни наши отцы. несвященных правителей, по совету избираху. еще же и по благословению отеческому. якоже преподобный Антоний Печерский, и прочии отцы нерукоположении, свидетельствоваху и благословляху на игуменство.

Еже настоятелем все церковныя уставы хранити, прочим же, к ним повиновение имети.

Ис тоя же книги преподобнаго Иосифа Волоцкаго. о монастырском строении [слово 13]. Подобает настоятелю попечение имети о сем, яко да тако будут вси, якоже божественная писания повелевают; и паки. таковый избран быв, настоятельство и благочиние да уставляет братии. Несть бо ино что [Кормчая печатная, лист 572], имже величие Божие верным бывает, якоже правила церковная крепко хранити. Хранящии бо священныя каноны [лист 637], от Владыки и Бога помощи сподобляются. сия же преступающии, в конечное осуждение себе влагают. Подобает даже и до кончины века [там же], християном божественная хранити правила. В Никонове книге святаго Ефрема. Яко велико есть тамо потопление душам, идеже правила и окормления не жительствуют.

О повиновении.

Апостол [ко евреом, зач. 335]. Братие повинуйтесь наставником вашим и покаряйтеся, тии бо бдят о душах ваших. яко слово воздати хотяще; да с радостию сие творите, а не воздыхающе. Евангелие учительное [август, 29]. Особное же вам глаголю, почитайте начальники ваша, и игумены ваша, и повинуйтеся им и покаряйтеся о всем. Иже повинуется старейшине рекше игумену, сей ангелы подражает, противляйжеся ему, диявола вселяет в себе. Преподобный Никон [О неприемлющих яже от предстателя воображенаго]. Послушником же благочиние сохранявшим и послушание, свою меру ведящим. поминающим Господа глаголюща: овца Моя гласа Моего слышит. и Аз знаю Моя, и по Мне идут, и Аз живот вечный дам им; [ниже] А не приемлющу наставником повеленная, потреба есть и пред всеми и особь глаголати ему. аще слово некое крепко имать по воли святых писаний. или умолкнувшу повеленное творити. Аще ли сам стыдится, и некий ходатая на сие да приимет, и прочая.

Еже противно что деющих и настоятелй по чину исправляти и наказывати.

Паки в книге Иосифа Волоцкаго, о монастырстем строении [слово 13]. Аще когда познано будет настоятелево согрешение; воспоминати ему старейшим и соборным братиям, наедине и благочинно; яко убо да не разорится благочиние. и якоже убо он братию пользует; сице и сам от братии пользу да приимет. [ниже]. Сим последующе писанием, преподобнии и богоноснии отцы наши, и в предняя лета и в последняя. кротцы бяху и милостиви, егда потреба бяше. жестоцы же и не милостивы, егда подобаше. [ниже]: и не точию сами содержаще отеческая предания, но и инех наказующе, и не боящеся ниже срамляющеся никого же, ни самого того настоятеля, егда видяху что стропотно и развращенно, и не по обычаю отеческих преданий творимо. В Номоканоне отец афонских, на конце пишет. Да будет же разумно. яко несть леть, не точию иереом, но ниже архиепископом и епископом, противу канонам что дерзати, творити же и разрешати. Аще же [Кормчая лист 634] кто некая божественных правил, истощевати или возбраняти начнет, повинен есть по таковому правилу, и запрещение приимати. А еже за небрежение и неискуство, от настоятельства отрешати. О сем в последующей статье показуется.

 

СТАТИЯ, 18.

 

Еже не избранных и не искусных в правление не попущати и наказывати.

Паки из книги, преподобнаго Иосифа Волоцкаго, о монастырстем строении [слово 13]. Великий Василий глаголет, се есть истиннаго пастыря дело, еже не от себе приемлющу настоятельство, но избрану бывшу от инех старейших и преимущих, возрастом и разумом. Симеона Фесалоницкаго, о крещении [глава 62]. Подобает же елико вместимо крещение творити, светлостию и благоугодием. и крестителю бодрому и внимательному быти, Божие бо величайшее дело действует, человеков обновление. О исповеди, Номоканон. Несвященному иноку, наказание его искуство, дает власть примирения, аще себе самого безбедно соблюдает. и исповедающихся, Богови да примиряет. Там же выше. Обаче иже не суть священницы и иноцы, паче же неискусны, приемлющии же некиих помышления, и сказующии и решащии; да знают, яко не по правилом сие творят, и ни во чтоже есть. От вопросов Иоанна мниха [вопрос 11]. И некто от сущих братий с нами, прежде седе в мире, многих помыслы восприемля; сиречь, дети духовныя приимаше в покаяние. паче ничтоже сведый от правильных заповедей. презвитеры и мнихи, падшияся с женами прием; и иныя тяжкия грехи прощаше всем, ничтоже отнюд творя, ни запрещения налагая. [ниже от ответа], аще бо единой души, равен быти весь мир не может. и соблазнивый единаго от малых, в море ввержен бывает. множае паче, иже многия души, в погибели погрузив, своим невежеством. Преподобный Феодор Студит глаголет [книга Никона Черныя горы, слово 13]. Вся елика твориши, или глаголеши, имей свидетельство от святых писаний, или от отеческаго ти обычая. тем же таковых самочинных и неискусных, прежние наши отцы, и за самое самочиние наказоваху. понеже всякое дело, без совета и благословения, не наричется свято. и проклят всяк творяй дело Божие с небрежением.

Еже за неправилно содеянное, особно таковых наказовати.

Кормчая [святых апостол, прав. 49 и 50]. Аще который епископ не крестит во имя Отца и Сына и Святаго Духа, или не крестит в три погружения; [то есть крестит не по форме], да извержется. Арменопул [книга 5]. В них же бо священницы извергаются, в тех людини отлучаются. И во ответе оном, на вопрос Иоанна мниха, о неискусном старце пишет [Кормчая, лист 580, об.]. Обаче да не весма отчается, но да вся дни живота своего, о умерших чадех духовных, молитвы да приносит к Богу. и да простит ему Бог великое се и тяжкое согрешение.

Еже неправильно таковыми устроенных дел в церковь не приимати.

Матфей Правильник [состав в, глава 1]. Правила святых апостол [49 и 50]. Во святую Троицу, и в три погружения крещати научают. не сице же творяща епископа или презвитера, отъятием отщетевают священства; ищи во 2-й главе, а-го состава, 7-го правила II-го собора. от него* и разумееши яве, которых подобает покрещевати, и прочее. в том же составе, в 7-м правиле пишет сице. елицы крещьшеся не по уставех православных церкви назнаменашеся. тем же и яко не просвещены божественными отцы вменяются. Иоанна Дамаскина [книга 3, глава 9]. Елицы не в святую Троицу крестишася, тех паки подобает крестити. Пролог [август, 28]. Крещеннаго песком: паки совершенно крестиша. И в Потребнике, в соборном изложении, Филарета патриарха. Которыя белорусцы, аще и во християнскую веру крещены, а обливаны, тех паки крестити повелевает.

О умерших же таковых без исправы.

В книге Никонове пишет святаго Дионисия. Божественный иерарх, о непросвещенных не молитствует о усопших, точию по чину оглашенных; таковии в синодике патриарха Иова, поминаются сице: помяни Господи душа младенцев, которыя порождени от християнскаго семени, и не сподоблени быша проститися святым крещением. И в Потребнике в чине погребения младенцев. Аще младенец умрет некрещен, а оглашен молитвою, и именем наречен; и тех младенцев в церкви не отпевати, точию в дому святым маслом полити, творя крест на персех, и погребати его с своими родителями у церкви, и поминати его.

/Сие 3-е знамение сочинитель весма скратив, ограничился точию единем крещением. от сего многим возмнится, яко бы точию едино крещение развращенно, и не в три погружения, и не во святую Троицу действуемое, церковию не приемлется. ни, никакоже, но она и прочия вещи и действия противозаконно и не по обычаю християнскому устроенныя, отнюд не приемлет. сиречь; аще настоятель видимыя братния преступления, будет разрешать в келии тайно. или с неприобщенными некако смешиватися, и их приимати будет на исповедь. Или же кую либо от соборных статей начнет презирати, а по человекоугодию самосмышленно действовати. А кольми паче, аще вопреки закону церковному начнет пасху праздновати по июдейски несвоевременно, или безсвященнословныя приимати браки, или явных блудников допущати будет к молению. Вся сия и подобная сим, церковь православная не точию вконец не приемлет, но и анафемою претит, глаголя [Кормчая, лист 641]. вся яже чрез церковнаго предания и учительства и воображения святых, и приснопамятных отец, новосотворенная и соделанная, или по сем содетися хотящая; анафема. что и сам сочинитель в статиях сих начасте поминает./

 

СТАТИЯ, 19.

 

Еже пред крещением пост по уставу налагати.

Потребник; в соборном изложении. чин и устав, како достоит приимати от латын приходящих [глава 10]. Сего же чина и устава последование единообразно действуется над приходящими от иных вер, аще жидовин. аще срацынин. или кто прежде еретическое имея крещение. [ниже]: предварив убо подобает того сотворити оглашенника. [ниже], и даст ему иерей заповедь поститится 40 дней, и прочее. Язычником повелевает прежде крещения пребывати под началом, седмицу или две. аще же кто злоделатель, то и до 40 дней пребывати во учении, в посте и молитвах, якоже о мнозех еретицех указано. и в прочих святых писаниих везде пред крещением на таковых пост, аще и наименьшия дни, кроме токмо разве крайния нужды налагати повелевает. Иже в небрежение полагает священныя правила, божественных отец наших, иже церковь утверждают, и все христианское жительство украшают, и к божественному наставляют благобоязньству, анафема.

Еже ризок и прочаго от крещаемых. не брать.

В чине святаго крещения [Потребник]. Возлагает иерей на руки своя рукавы, сиречь, обязует платом, таже и синдона возлагает на выю кому. синдона именует плат бел нов. потом же оставляет в церкви. Святых апостол [Кормчая, прав. 73, от толков.]. Не подобает взяти от церкви ни завесы ни ризы ни платна, но вся бо та Богови возложена суть, и не достоит их на свою потребу взимати. Аще [выше прав.] кто обрящется таковое беззаконие творя, да запрещением будет отлучен. 6-го вселенскаго собора [прав. 23]. Пречестным тайнам причащаяй, аще вопросит медницы или иного чего, да извержется. И 7-го собора [прав. 19, в толков.]. Истязающии злато от приходящих, в священнический чин, или во мнишеское житие священния да извергнутся, аще же несвященнии игумени, в покорение да предани будут.

 

СТАТИЯ, 20.

 

Еже в светлую неделю креста по иерейски не воздвизати.

Святых апостол [правило, 1]. Кождо в данном ему чину да пребывает, и не преступайте заповедей, не суть бо наша, но Божия. [ниже]. Восхищающии не дарованная им [прав. 2], раздражают Бога, якоже сынове Корреови, и Иозия царь.

Еже рук не подъимати. Сицеваго обычая в православней церкви отнюд не было. и явственно сей обычай новый и странный.

В Кормчей от собора Соединения пишет [лист 641]. Вся яже чрез церковнаго предания и учительства и воображения святых отец новосотворенная и соделанная, или по сем соделатися хотящая, анафема. И святый Афанасий Великий, в толковании притчей глаголет. Ересь есть, еже избрати что свое и тому последовати. Паче же егда сказуют, яко сицев обычай видится у еретиков латынов. И на сие в Потребнике в проклятии ересей их пишет сице: Проклинаю вся латынския обычаи, иже творят кроме православных церковных преданий. И в книге Кирилове пишет [лист 307]. И учения их и обычаи, многим неразсудным человеком. красна и сладка быти мнятся. но всяко неистинна и горька вконец обретаются, и вечной муце ходатай бывают.

Еже крестным знамением тогда знаменатися.

Сей обычай присно во святей церкви, аще и без писания бяше. Святаго Василия Великаго [Кормчая, прав. 90]. Многа и велика церковь имать от неписаннаго предания. и первое есть еже верным крестообразно лице знаменовати. И преподобный Никон Черныя горы [в предисловии]. Приемлю церковная предания, писанная и неписанная. И паки в Кормчей пишет. Яко хранити подобает и не писанием преданный церковный обычай, яко и закон. Матфей Правильник [состав е, глава 4]. Аще писание не лежит, сохранити подобает навычение и обычай. И преподобный Феодор Студит [Никон Черныя горы, слово 18]. Вся елика твориши, или глаголеши, имей свидетельство от святых писаний, или от отеческаго ти обычая.

 

СТАТИЯ, 21.

 

Еже молитв священнических не читати.

Церковь святая явственно простолюдином от иереов различие полагает, и читати им иерейских особных служений не повелевает. якоже и в каноне за единоумершаго видимо. Аще рече священник, глаголет, Благословен Бог наш. аще же инок, глаголет, За молитв святых отец. и ниже на конце. Аще иерей, глаголет ектению, и молитва, Боже духовом, и прочее. аще же инок, то глаголет, Господи помилуй, 40, и молитва, Помяни Господи Боже, и прочее. тако и в прочих местех церковь указует, и правилами сице запрещает. Кождо [Кормчая, лист 30] в данном ему чину да пребывает. [ниже]. Восхищающии же недарованная им, раздражают Бога, якоже сынове Корреовы, и Иозия царь.

 

СТАТИЯ, 22.

 

О богомолии за иноверных властей.

Еже по псалтыри, и в прочих указанных местех, и о обращении их молити.

Святый апостол Павел в послании 1-м к Тимофею. Молю убо, прежде всех творити моления и молитвы ходатайства благодарения за вся человеки, за царей и за всех на власти сущих, да тихое и безмолвное житие поживем, во всяком благочестии и чистоте, се бо добро и приятно пред Спасителем нашим Богом, иже всем человеком хощет спастися, и в разум истинный приити. Святый Златоуст на сие [Беседа 6, лист 2613]. Якоже общий некий отец, вселенней всей священник есть. о всех убо достоит ему промышляти. якоже и Бог, Ему же освящается. [ниже], аще и биеми бываем от внешних, ничтоже должни есмы умаляти приязни сущия к ним. Что же есть прежде всех; сиречь, в служении повседневном; и сие таинницы ведят, како на всяк день бывает вечер и утро. како за весь мир и за царей, и за всех иже во власти сущих моление творим. но негли речет кто, яко не за всех рече, но за верных. что убо егда глаголет за царей. не быша бо воистинну тогда благочестивии царие, и прочая. От завещаний апостольских [книга 8, глава 10]. [Моление от святых апостол уставленное]; [ниже]; о врагох гонящих нас помолимся, яко да Господь укротит ярость их. [ниже] еще [глава 14] помолимся Господеви о цари, и о тех иже во власти, и всего воинства; да мирствует еже к нам. [ниже], о еже вне сущих и заблужденных, яко да обратятся во благое. Собора Лаодикийскаго [Кормчая, прав. 16, в толков.]. Тако ся мнит, яко не бе еще тогда строение церковное, якоже бысть потом. [ниже], егда не у предана быша стихеры и каноны церкви. От предисловия псалтыри учебныя, святаго Василия Великаго [лист 12]. Никакия же бо иныя книги тако Бога славят, якоже псалтырь душеполезна есть. [ниже], за царя и князи и за весь мир Бога молит. больше бо и выше есть всех книг. Златоуст на послание к Тимофею [лист 1418]. Весте убо вернии, о коих подобает молитися. како всяка обща есть молитва; но не речеся рече о неверных молитися тамо; понеже ниже весте молитвы силу, ниже глубину и сокровище тоя познаваете, аще бо кто разверзет ю, обрящет и то лежащее в ней. егда бо глаголет моляйся, да будет воля Твоя яко на небеси и на земли. ничтоже ино разве сие гадательствует зане на небеси ни един есть неверен, ни един приражаяйся. [ниже], но якоже на небеси рече никтоже есть лукав, тако ниже на земли да будет; но всех рече в страх Твой привлецы, вся ангелы сотвори человеки; аще и врази наши и супостати. Катихисис Большой о третием прошении [глава 41]. Да будет воля Твоя. [ниже], являет убо сие прошение, да искоренится на земли нечестие все и лесть, и потребится всяко беззаконие и страсть, насадится же правда и благочестие, и утвердится православная яже во Христа Бога вера. и светло яко солнце вселенную осиявает. И славима будет земля верными человеки, якоже славятся небеса святыми ангелы. Книга Златоуст [лист 14]. Сице нам божественная писания повелевает молитися, о ельлинех же и еретикох, паче о вразех, да и тии в разум истинный приидут, и в веру обратятся. Из псалтыри древлеписменной, в лето 7085. молитва святаго Иоанна Златоустаго. Обрати Господи иноверныя от прелести их, да с чистою совестию к познанию и крещению приидут, и послужат Ти во благоверии и чистоте. Во псалтири печатной, по 17 каф. молитва. Иже суть погании, обрати их во християнство. да и тии будут наша братия. От писания Афиногора философа ко кесарем поганским [Бароний, лето Господне 179]. Мы за державу вашу всегда Бога молим, дабы вам всегда благополучно успевало, то и нам полещно есть, да мирно житие сие имамы. Святый Севастиан глагола к царю Диоклетиану [минея четия, киевопечерская, декабрь, 18]; аз о здравии твоем, всегда Христа молих, о мире же царства римскаго просих, и покланяхся Цареви небесному. Захария Копестинскаго [Полинодия, часть 3, раздел 1, артикул 1]. Наияснейший кралю пан наш милостивейший. [ниже]: во всем королевству твоему земному над нами естемо подданными и богомольцами. Из ответов прежних поморских отец [ответ 52]. Мы за его императорское величество Бога молим. по реченному псалмопевцем; Господи спаси царя и услыши ны, воньже день аще призовем тя. [ниже]: и всякаго блага его боголюбивому величеству доброхотно желаем. и от Господа Бога просим. [ниже]: мы, и прочих градоправителей и военачальников персоны, должны не судити, но честно почитати, и Бога за них молити. [ниже]: и от Господа Бога просим, мир вселенней даровати, и душам нашим велию милость.

Еже в тропарях стихерах и канонех и прочих благочестивых местех, особным молением и с титулы, от таковых не молити.

Понеже егда Россия бе, под властию ордынских татарских царей, и тогда обычное о благочестивых службою о них Бога не моляху. но за своих благоверных князей, на местах царских моляху. Из старописменнаго часослова [на утрени, тропарь]. Спаси Господи люди своя. [ниже]: победы князем православным на неверныя во Христа языки даруй, и прочее. И в житии святаго Алексия митрополита московскаго пишет. Иже над болящею ордынскою царицею, сице моляшеся. Исцели Господи недуг болящия сея неверныя царицы, и прочее. Такожде егда малороссияне бяху под областию королей польских латынския веры, и тогда обычное о благочестивых службою о них не моляху. но за своих князей и панов на оных местех моляхуся. Из псалтыри острожской печати. 1598-го [на утрени, тропарь]. Спаси Господи люди своя. [ниже], победы князем нашим на супротивныя даруй, и прочее. Сице же и егда турки взяша Царь град. и тогда православныя греки, за турскаго султана, обычное о благочестивых службою не моляху. Но в гранографе пишет, егда патриарх прият книги от султана. тогда став на молитву, сице токмо моляшеся, обрати Господи неверных, ко святей своей вере, и прочее. Обычное же о благочестивых службою за московских благоверных царей [а не за турских] моляху. О чесом в соборном деянии, гречестии патриарси пишут [Скрижаль, лист 33]. Уставляем да благочестивый царь московский, имать память во святых предложениях, и во священных памянниках, такожде и в начале ексапсалмов, и прочее. Симеона Фесалоницкаго [глава 94]. О приношаемых частицах, о архиереи и о верных царех поборающих о благочестии, и о всякой души християн православных. [ниже]: и несть места неверным, ниже иномудрствующим, кое бо причастие свету ко тме, зане и возмут рече нечестивых, посреде праведных ангели. [ниже]: Зриши ли, како синапти глаголется. всех собирает воедино, якоже Спаситель молися, с людьми убо и царей совокупи и князи и воинство. но понеже о обществе подвизающиися суть сии, и особно сих поминает, благочестивых токмо сущих. [ниже]: тем же и царие воспроповедаются благочестивыя; а не яко невернии, ниже иномудрствующии. [ниже]: о милости всех и верных царей, иерей обычныя молитвы о людех, и Божии наследии творя, во еже спастися ему, и християнскому нашему возвыситися рогу. Спаси Господи вопия люди Твоя, и прочия общия молитвы, Господи помилуй воспевается, и о царех молится, яко предстоящих и благочестивых, и о вере подвизающихся. Яко [книга О вере, лист 198] папежеве ис помяновенных книг, в сообщении благочестия заглажени суть, и никогда же поминаются в восточных церквах. Катихисис Большой [глава 57]. Святии отцы много трудишася о сем, еже обличаху римлян, но не могуще обратити их: и сего ради конечно отсекоша поминовение папино; и всех неправомудрствующих, от свитка православия извергоша, и конечным проклятием прокляша их. Из истории печатной во Иверском монастыре. Егда во Афонской горе, в Ксиропотамском монастыре, по ухищрению дияволю, купно соединение с латыны сотвориша; и по оглашении их, о архиепископе нашем иже в Риме, и о благочестивом царе. О страшному чюдеси, Бог с небесе презирает с яростию своею на преступники. [ниже] абие стены монастырския, с прочими иже в них распадошася, и прочее. В книзе Захария Копестинскаго, о том же пишет [глава 28]. Егда диякон стал поминати имя папежево, и царя отступнаго. на том часе, земля тряслася. и палися снагла все стены церковныя и монастырския, и прочее. Понеже в таковых о благочестивых царех молениях, возглашаются высочайшия титулы, благоверия и благочестия. и похвала за благочестие их приписуется; и купное с ними моление, молящихся извествуется; якоже в тропаре блаженному Максиму. Днесь мы ныне чтем [август, 13] честных мощей обретение. вкупе с благочестивым царем, и прочее. В книзе Захария Копестинскаго пишет [глава 5]. Яко еретики не могут привращати себе благочестивых, правды титулов. И в житии прподобнаго Феодосия Печерскаго пишет. Глагола преподобный Феодосий. аще кто будет еретическую веру хвалити, таковый обретается свою хуля, или начнет непрестанно хвалити чюжия веры, отрекся есть от православнаго християнства. И в Потребнике, в чине проклятия ересей люторских. Проклинаем и всех прилагающихся им, и хвалящих их. Кормчая [святых апостол, прав. 10 и 45]. Аще кто молится с еретики, да отлучится. И сих ради и прежде бывшия наши отцы, за иноверных властей, таковаго богомолия не употребляху. но на благочестивыя лица оно склоняху. Тем же в Соборнике, во многосложном свитке пишет. Проклят всяк разоряяй уставы отеческия, и непременныя уставы церковныя. И в Кормчей пишет [от собора Соединения, лист 641]. Вся яже чрез церковнаго предания и учительства и воображения, святых и приснопамятных отец, новосотворенная и соделанная, или по сем содеятися хотящая, анафема. И святый Афанасий Великий глаголет [в толковании притчей]. Ересь есть, еже избрати что свое, и тому последовати. и еже не тожде со святыми отцы мудрствовати, беда велия, и ересь есть.

 

СТАТИЯ, 23.

 

Еже умерших без крестов не погребати.

Преподобный Феодор Студит глаголет [в Никонове слове 18]. Вся елика твориши или глаголеши, имей свидетельство от святых писаний, или отеческаго ти обычая, [кроме преступления Божиих заповедей]. И в Кормчей [грань 1, глава 3]. Подобает и не писанием преданный церковный обычай хранити яко закон. Тем же по обычаю церковному християнин, якоже на святом крещении, приемлет на себе спасительное знамение крестное; и во всей жизни своей, на себе оно носит, сице же и погребается с тем. не сице же творити противно зрится християнскому обычаю. аще же кто мнит, того ради с крестом не погребати, да не учинится кресту каковаго безчестия. то о сем в Кормчей старописменной пишет, в вопросех Кириковых, еже Нифонт епископ Новгородский, погребшим забытием икону со умершим, не повеле возгребати, глаголя, християнин рече есть. И в житии преподобнаго Венедикта пишет. Еже умершему повеле на персех часть пречистых таин положити, и тако погребсти.

 

СТАТИЯ, 24.

 

Еже аллилуйныя поклоны в посты отправляти.

Устав Большой печатной [лист 1096]. Начало святаго поста святых апостол. В понедельник по памяти всех святых, начинаем пост, святых и всехвальных апостол. Да аше несть празднуемый святый. Поем аллилуия, на глас октая, и троичны гласу. Творяще поклоны, по чину святыя четыредесятницы. Тамо же [ноябрь 14, лист 259]. Подобает ведати, яко заутра начинаем постом к Рожеству Христову. [ниже], Аще ли кроме суботы и недели, поем аллилуия, вхождения ради постнаго. Егда же в святыя дни прилучится аллилуия. Поем все воследование с поклоны, якоже и в великую святую четыредесятницу. [ниже]. Сей же чин и правило бывает, якоже в посте Рожества Христова, тако и в пост святых апостол, и всего лета в среду и в пяток известно, яко егда случится аллилуия. Тамо же [август 1, лист 758]. Известно буди, от сего дни чистимся постящеся, якоже и в прочех постех, еже пред Рожеством Христовым, и святых апостол. Устав Кириловы обители [август 3 или 4-й день]. Совершаем едины поклоны в сей пост. Из псалтыри в полдесть, Иосифовской печати [лист 56, об., в предисловии]. Яко сии земныя поклоны, повсюду вообще всем православным, иноком и мирским предани от святых отец, яко да никакоже презираеми бывают. [ниже]; Проклято бо есть сие, и с еретики отвержено таковое злочестие. Еже не творити поклонов до земли в молитвах наших, к Богу, во уреченныя дни. [ниже], ибо всяко уклонение от православных велений, отпадение есть от соборныя апостольския церкве. якоже божественнии отцы глаголют. паче же в сицевых, ибо управленнии пости, и повеленная коленопреклонения, во управленных днех, образы нецыи суть православныя веры и непорочныя. и якоже во управленных постех, несть надесно, или налево уклонятися. тако и в коленопреклонениих, сиречь, в земных поклонех.

 

СТАТИЯ, 25.

 

Еже земными поклоны в праздники не епитимствовати.

Сию заповедь даде нам [Зинарь, глава 57], святый Василий Великий, аще каковый убо, приимает работ Господеви о гресех своих. то в суботу и неделю и в праздник Господьский не творити поклоны; но паче от великих трудов, и великаго поста заповеданнаго нам, тогда имети ослабу и покой в тыя дни. И в Потребнике, пред чином исповедания, во уставе запрещаемых [ниже]. Во вся же суботы и недели и праздники, и 12 дний. и прочее. не покланяти колену в молитве, но точию поклонения творити по всему. 1-го вселенскаго собора, правило 20 и 6-го вселенскаго собора, правило 10. и Василия Великаго, правило 90. Не поклоняти колена в праздники всем законно повелевает. [ниже], святый Афанасий глаголет. Никтоже тебе да прельстит отнюд, в неделю колена прекланяти, или в пятьдесятницу.

 

СТАТИЯ, 26.

 

Еже приходных поклонов осмь, а не седмь полагати.

Устав Большой. В понедельник 1-я недели святаго великаго поста, при часе 3-м дни, собираемся в церковь, и творяще прежде начала пение кийждо нас, на месте своем. прямо святым дверем, начало глаголюще сице. Боже милостив буди мне грешному. Поклон. Создавый мя Господи и помилуй мя. Поклон. Без числа согреших Господи помилуй мя. Поклон. Достойно есть, И поклон. Слава и ныне, Господи помилуй, 2, Господи благослови. И поклоны три. Сице творим по вся дни. В суботу и в неделю, творим поклоны обычныя, кроме достойна. целующе на местех наших святыя иконы, и паки на оба лика, по единому малу поклону. Таже. Благословившу иерею, Начинаем, Царю небесный, и прочее. Из грамотки, или послания Петра Прокопьича. прежняго отца и еклисиарха, поморския обители Даниловския. [ниже], А еже осмый поклон в начале творим; о сем во Уставе Большем [лист 943]. Иже с целованием святых икон, на конце начала писано полагати. Во обителех же, древлесоловецкой и прочих, и без целования святых икон, в начале осмой поклон, отцы древнии полагаху. и сему достоверных свидетелей, не 100, или 200, но вся елицы тамо живяху, или к ним приежжаху, видяще тако творимо. И сей обычай древний, и мы от отец навыкше содержим, и вся християне наших стран, и преждебывшия нас, тако творяху; и вси избегшии отцы от разорения святыя обители тоя, такожде творяху. и сему вси мы свидетели, с ними жительствовахом и сопребывахом вкупе. и еще некоих от тех отец имамы живых сущих; их же видим такожде творящих. и не точию в наших странах, но и в нижегородских пустынях, идеже древнии отцы, тако содержаху. сице и мы творим, отеческим путем шествующе. [ниже], а что седмь поклонов в начале видим, во Иосифовских псалтырех положено, и тамо описуя отпуст начала; и потом ничто больше не вспоминает, како на конце творити, поклон ли, или без поклона. ликом ли покланятися, людем ли сущим в церкви, ничто же тамо описует. а мнится нам, что и тамо тако же творимо быти, оставляет, обычаю последовати, понеже ничтоже описует на конце како творити. Дозде из грамотки.

Еже и в прочих чинех службы, благочестивых отец чину последовати.

Исус Сирахов [глава 50]. Не отступай от заповедей старец, ибо тии навыкоша от отец своих. И преподобный Феодор Студит [в Никонове слове 18]. Вся елика твориши, или глаголеши, имей свидетельство от святых писаний, или от отеческаго обычая, кроме преступления Божиих заповедей.

 

СТАТИЯ, 27.

 

Еже еретиков при службе стояти не попущати.

Кормчая [грань 3, глава 19]. Яко не подобает службе быти, еретику сущу в церкви. Правило Тимофея Александрийскаго, 9 [лист 270]. Службе бывающи в церкви, не подобает приходити еретиком, аще не обещаются покаятися, и бежати от ереси своея. Иосиф Волоцкий. Аще еретик внидет в церковь, Божественная служба не поется, дондеже изыдет. И в книге Кирилове. Аще арменин приидет в церковь нашу, не пети при нем. Из разговоров Дмитрия Франзбекова, и соборнаго ключаря Ивана Наседки, с лютеранами в Москве. [ниже] Да немчин Юрий Лот говорил нам: для чево нас не пущают в церковь вашу соборную, и чтобы де только пущали, и мы бы де видя благочестие, и чин церковный, и мольбу и службу вашу, ко Господу Богу. то бы и от нас многия, к вере вашей приступили. И ключарь говорил ему. написал вам Мартин, что всякая красота чина церковнаго вымыслы человеческими сталася, и велел вам церкви християнския разоряти. [ниже], а про благочестие наше про все, у вас в катихисисе о всем написано. да сверх того, все очима своима видити, что творим пред очима вашими, с молебны и со кресты ходим, и воду святим. и вам Мартин на все то велел плевать. и нам для чево вас в церковь пускать, на обругание себе.

Еже обещавшихся обратитися, допущати до смотрения службы.

Князь Владимир [книга О вере, глава 3, лист 34]. [ниже], посла послы своя в разныя страны, чтобы веры чинов и закон дозрели. [ниже], потом же приидоша до Константинополя, и поведано бысть царю и патриарху. яко послове от князя Владимира рускаго пришли суть, веры нашея дозирати. сия же услышав царь, возрадовася вельми. и повеле патриарху церковь украсити, и благочестне и знамените преславно действовати. при сем же оны послове будучи, видели в то время церковь, и вся люди, якобы светом с небесе освященных, и недоумеваху о видении оном. Егда же приидоша ко Владимиру, и поведаша ему, егда приидохом во греки, введоша нас идеже служат Богу своему. и не вемы на небесех или на земли в то время были есмы, несьмы бо видели таковаго на земли видения и красоты, и не можем исповедати того, от светлости явльшейся тамо тем послом, вера предложена бе, и чины благочестия явлены.

Еже приносов от внешних за службу не приимати.

Кормчая. И не принеси приноса в Божий жертвенник от неверных, ни от еретиков, ни от блудник, и прочее. [ниже], и кто будет от таковых, не емли у них приноса.

Еже на особных местех при службе поставляти молитися, совершенно от ересей отставших, и первому чину оглашения подлежащих, не таковых же не попущати.

Кормчая [1-го Всел. собора прав. 14, от толков.]. Два чина еста оглашенных. первый убо, иже внове приходят к соборней церкви. вторий же, иже совершеннейший быша. совершенный убо оглашенный, аще впадет в грех. с послушающими да причтется. Собора Кесарийскаго [правило 5]. Совершении же оглашении, по евангелии колена покланяют. [то есть припадают]. Святаго Василия Великаго [ниже, лист 251, обор.]. Четыре места суть запрещением. плачющаго. послушающаго. припадающаго. и стоящаго с верными. [ниже], Плакание есть, еже вне церкви, и вне притвора церковнаго стояти. [ниже], Послушание же, стоящу при дверех церковных. внутрь же церкве внити не прощен есть. [ниже], Припадание же есть, еже внутрь церкве стояти от задния страны амвона, до святаго евангелия, и прочее. Матфей правильник [состав а, глава 2]. Тимофея Александрийскаго правило, 9. Божественному совершаемому священнодейству, на молитву приходити еретиком не повелевает. [ниже], но обращающихся, вместе еже уставлено есть оглашенным да стоят. не хотящии же покаятися, и от сего да изгнани будут. Никон Черныя горы, от того же правила [слово 63]. Не должни убо приходити [еретицы], Аще не обещаваются покаятися и избегнут от ереси.

 

СТАТИЯ, 28.

 

Еже во внешних домех, развращенным образам не покланятися, и покланяющихся наказывати.

Симеона Фесалоницкаго [глава 23]. И святыя иконы кроме предания иным образом многажды живописуют. [ниже]; и кроме благословения же живописуют их и украшают, еже противно святых икон есть паче. В Потребнике, в чине проклятия ересей латынских. Христово распятие [пишут латыни] странно и необычно и испревращенно,  висит не по подобию, и длани пригвождены, и персты не распростерты, но сжаты. а подножие пишут у креста впрямь. и во обе Христове ноги, един гвоздь вонзен. Ис Полинодии Захария Копестинскаго [часть 2]. О Мануйле цесарю мовлю. [ниже]; в вере православней без всяких новотин папежских стоял, чого знаменитый зовод во истории константинопольской оный, иже у единаго плебана латынскаго, не хотел целовати образа Спасова, который неправо выгофованный был; и для того не целовал, да бы ся не здал веры папежской поблажити, за которым в единости веры не был, и святостей его не почитал. Из летописца рускаго [лето 6981 (1473)]. Великий князь Иоанн Васильевичь, женился вдругие, и привели к нему из Риму царевну Софию. [ниже], а с нею пришел из Риму посол Антоний от папы, несый пред собою крыжь. великий князь, и преосвященный Филипп митрополит, и весь освященный собор, и вси московстии народи, его Антония с тем крыжем, и близ царствующаго града Москвы приити не допустили; но повелеша ему крыжь той скрыти; сего ради, яко да не будет нами православными латынская вера почитаема. понеже писано есть, яко возлюбив и похвалив чюжую веру, той своей поругался есть.

О наказании таковых, развращенныя образы почитающих.

Матфей правильник [состав е, глава 4]. О них же писание не лежит. [ниже], последовати подобает множае приближающимся, и уподобление имущим ко искомому. Собора Лаодикийскаго [Кормчая, прав. 9]. Аще кто помолится в гробницах, идеже лежат мнимии от еретик мученицы, или в церквах еретических, или исцелитися хотя от недуга, приидет тамо; да будет отлучен, дондеже покается и исповесть яко согреши, и тако прият будет. Того же собора [прав. 34, от толков.]. Аще кто яко истинныя мученики, ложныя еретическия мученики почитают, иже не за правоверную веру скончашася, и чюжди суть от Бога. таковый чюждь от Бога есть и сам, и да будет проклят.

 

СТАТИЯ, 29.

 

Еже ко внешним службы служить, и Христа славить не ходить, и молебнов за них не петь; а противное творящих наказывати.

Понеже таковии обычаи християнския суть. внешним же сими приобщатися, нигде в писании не видится, и не свойствует. ибо еже у них службы служити, и Христа славити, и от их стяжания при том свещи брати, и за них сия службы отправляти, зело не свойственно, паче же приношения и жертвы их восприятие, и сообщение явное с ними видится. о чесом писание сице запрещает. Не принеси приноса [Кормчая, лист 604] в Божий жертвенник от неверных от еретик, и блудник, и прочих. Номоканон [правило 151]. Священник аще примет жертву еретическую. [ниже], да извержется, по 46-му правилу святых апостол. кая бо часть верному с неверными, или кое общение свету ко тме, по божественному апостолу. [ниже]. Иже в Лаодикии собора [прав. 33]. Возбраняет с ними молитися, или ясти, или приимати что от благословения их, сиречь милостыню. [и аще милостыню возбраняет принимати, кольми паче приношения] якоже паки в Кормчей пишет [правила святых апостол 46, в толков.]. Епископ аще приносимая от еретик на жертву, сиречь на службу приемлет, да извержется. Арменопул, книга, 5. В них же священнии извергаются, людини ж отлучаются.

 

СТАТИЯ, 30.

 

Еже приносов и поможения еретичестей церкви не творити, [аще бы и святыни у них были], и молитися туда, и слушати учения или пения их не ходити.

Кормчая [святых апостол прав. 71]. Аще который християнин, принесет масло в соборище жидовское, или в церковь еретическую, или поганскую, в праздник их, или кадило, или свещу вожжет, да отлучится. Матфей правильник [состав I, глава 4]. Под сим правилом пишет; Почитати бо от сего яже онех требища вменен будет. Святых апостол Петра и Павла, о епископе [Кормчая правило 9, лист 58]. Да не внидет благочестивый, в церковь нечестивых, не место бо освящает человека, но человек место. Аще же нечестивии держат место [правило 10], да бегаеши от него; понеже осквернено бысть от них. якоже преподобнии и святители освящают, тако нечестивии оскверняют. Златоуст на июдеи [Маргарит, слово 1, лист 68]. Позорища бо и сонмища ничтоже посреде. [ниже]; рех, яко позорища и сонмище, ничим же лучше есть. и от пророка привожу свидетельство; оставих рече дом мой, и отринух достояние мое. егда же Бог оставит, бесом жилище бывает оно место. [ниже], ельма же суть нецыи, иже сонмище жыдовское, честно быти место непщуют. [ниже] закон рече лежит в нем, и книги пророческия. [ниже], аз же сего ради паче ненавижу сонмище их и отвращаюся, яко пророки имуще, не веруют пророком. [ниже]: рцы ми, аще бы некотораго видел человека честна и светла и проявлена, в корчемницу введена, или во обиталище разбойническое, безчестима тамо и биема; удивилися бы корчемницы или вертепу. сие и о сонмищи помышляй. пророки бо и Моисея введоша тамо, не яко да почтут, но да обесчестят. [ниже]: бегай убо соборищь и мест их; и никто же да стыдится, сонмищь ради книг. [ниже]: во святилищи серапидове, даже до ныне тамо пророческия истолкованныя книги пребывают. что убо свят ли будет серапидов храм, книг ради; да не будет. но они убо имут свою святость, месту же тому не подают, ради сходящихся скверности. тоже убо и о сонмищи вменяем. аще бо и кумир не стоит тамо, но бесове живут в месте том. [ниже]. Сим ли убо последуеши [слово 4, лист 134] рцы ми; и к сонмищем тех течеши. и не боишися, да не огнь свыше сошед, попалит твою главу. не веси ли яко аще кто и не разбойничествует, в разбойнических вертепех явится, ту же со онеми приимет казнь. [ниже], ты же тщишися тещи и не боишися, ниже трепещиши, в нечистая и скверная места она себе сводя. и кий ответ имети имаши, кую ли милость; да не убо ли се речеши, яко закон тамо лежит, и пророческия книги; не довлеет сие сотворити место свято. Преподобный Никон глаголет [слово 22]. Священная бывша под властию ратных, престают быти священна; якоже свободный порабощен быв, отпущен же быв от беды, восприемлет первое устроение. Потребник. Чин и Устав во освящении церкви от язык, или от еретик оскверньшейся молитвы, и водоосвящение, и прочее. Матфей правильник [состав а, глава 2 и святых апостол прав. 64]. Входящаго клирика или людина в сонмище июдейское или еретическое молитвы деля, оваго убо изметает, оваго же отлучает. кое бо согласие рече, Христове к велиару, и прочее. В книге Кирилове, о армянех. Аще християнин мимо идет их церковь, а у них поют, то заткнувши уши бежати, чтоб глас не нашел. Потребник, в соборном изложении [чин 3-й] [ниже]. Иже по действу дияволю, аще неразумием или небрежением, или волею водворится с жиды или с срацыны, или со армены, или с латыны, или со иными еретики, яст и пиет с ними; и закона их и пения слушает, а не хулит. а еще не приобщился закону их, и веры православныя не отвергся, и таковым проклинающим, свою и иную ересь, еже не внимал и не хулил. и омывшеся от таковых ересей чистым покаянием, и молитвою презвитерскою, и тако приобщатися святых таин.

Еже на праздники и пирушки ко внешним не ходити, и снеднаго от них не приимати.

Кормчая [собор Лаодикийский, прав. 37].Со июдеи и с еретики никтоже да не празднуют. и да не приемлет еже от них глаголется праздничное. Толкование. Несть никоегоже общения свету ко тме, сего ради убо христианом не праздновати с еретики, или со июдеи, не приимати яже в праздники их творят, якоже се, опреснок или что таковое. Несть достойно с погаными праздновати [прав. 38, от толков.], и приобщатися безбожию. Златоуст на июдей [Маргарит, слово 77]. Коли праздники их, честно что имут и велие. И тыя самыя убо нечистоты с колицем тех отвращается преумножением, слыши Бога, возненавидех рече, и отринух праздники ваша. Бог ненавидит, и ты приобщаешися. [ниже] Колика убо безумия есть [лист 78, об.], иже Владыку раздражившия, сия общники творити, в праздник, и в скверная их места приходити, и на нечистая вступати преддверия, и приобщатися трапезе бесовстей. Кормчая [лист 140, об.]. От древних обычаев приемше человецы, еже собиратися в нарочитых местех, или при церквах в памяти святых; мужи и жены сходящеся, пирования творят, и упившеся пляшут срамно, и ина некая безобразная творят, иже суть обычай еллинския прелести. Катихисис Большой о еретицех. Праздники убо и святыя дни празднуют, но вся во отвержение веры Христовы. Номоканон [правило 133]. Аще кто пойдет на праздник, или еретический, или варварский, и снесть в той день с ними жремая за душю их, или спразднует им; лета два да не причастится, по 7-му правилу иже во Анкире святаго собора. В Кормчей собора Анкирскаго [правило 7]. Аще кто и свое брашно имый, яст с погаными в праздник их, два лета да припадает.

 

СТАТИЯ, 31.

 

Еже со внешними и несогласными, вкупе из единых сосудов не ясти.

От жития священномученика Климента папы римскаго, ученика святаго апостола Петра [ноябрь]. Глагола святый Петр, к матери святаго Климента: поведати ти хощу жено, нашея веры житие. мы единаго Бога чтем, сотворшаго мира, и Того храним закон. [ниже]; к сему разноличь живуще, трапезы поганых не приемлем, еже се ясти с ними не могуще, за неже нечисто живут; обаче егда я покорим, истинная мыслити и творити: крестивше я в преблаженное некое именование, тогда с теми водворяемся. Святаго Василия Великаго, вопрос [книга 2-я, глава 279]. Аще достоит с еретики, или с еллины, или с жыды по случаю обретшуся, или ясти с ними, или целовати их. Ответ. Целование сие, [сиречь поздравление] яко общее, ни о едином же отрече Господь. а еже ясти с ними, запрещение апостолу глаголющу. [ниже] с таковыми ниже ясти. Златоуст о лжеучителях [Маргарит, лист 582]. Услышите вси вы, иже с еретики вкупе ядущии и пиющии, болезненнаго сего ответа; яко Вы Христовы врази бысте. иже врагом царевым друг есть, сей не может друг царев быти, и жити недостоин есть, но со враги погибнет, и горшая подъимет. [ниже] Послушайте паки [лист 583], иже с ними сквернящеся в ядениях и в питиих; како смеете приступити к божественным тайнам Христовым, или не слышите Павла божественнаго вопиюща, яко не можете чашу Господню пити, и чашу бесовску. Преподобный Иосиф Волоцкий [слово 13]. Возлюбленнии, многажды глаголах вам, о безбожных еретицех, и ныне молю; не совокупляйтися с ними, ни в ядениих, ни в питии, ни в любви ни в дружбе: творяй бо сия, чюжда себе творит Христовы церкви. [ниже]; аще бо кто и безплотных житие поживет, еретиком же приобщается, в дружбе или в любви: таковый чюжд есть Владыки Христа. Зинарь [глава 76]. Иже со арменином кто яст, или пиет, с павликианином, или со инем еретиком каковым любо. [ниже]; и аще неведением се сотворил есть, да освятит его иерей. [ниже], дав ему заповедь малу от запрещения, ащели не послушает наказания, но хощет с ними ясти и пити, таковый с християны да не яст, и в церковь да не приемлется. но да отвращается от него всяк християнин, яко от идолослужителя. ащели паки приидет когда ко исповеданию, да отлучится на покаяние лета три. [ниже]. Всяко ядущаго с еретики [глава 112], или пиющаго, или дружбы деющаго, или в любви и единении, сиречь со арменином, или яковитом, или с мосулманином, или с павликианином, или иже суть прочии таковии, иже суть патерфи, и богомоли, таковаго анафема. От толкования Златоустаго. Да некако и ко еретиком любовь имети будете. и сим вредитеся и сокрушитеся, и ложныя догматы, под образом любви приимете. [ниже]: многим бо множицею бысть тщетою любовь со еретики. ибо аще тебе в чесом не вредит, обаче ин в то время соблажняется; соблазнивый же под мучением есть. [ниже] Иже мнози еретицы [зач. 237] претвориша писание. имеют бо еретицы, и сердца лукава, и учения развращенна. От жития преподобнаго Феодосия Печерскаго. Глагола преподобный о латынех: християном же недостоит ни брачитися с ними, ни кумитися, ни целования с ними имети, ни ясти с ними, ни пити из единаго сосуда. тем же, просящим им, дайте им Бога ради, но в их сосуде. ащели не будет у них сосуда; в своем дати; и потом измывше сосуд, дати молитва. От Кириковых вопросов [Кормчая старописменная]. Аще в сосуде латыне яли, или пили: то измыти, и молитва дать. В Епитимейниках старописменных. В латынскую церковь не подобает входити, ни пити с ними из единаго сосуда ни ясти. В Потребниках во исповеди вопрос. Или едал еси с волхвом, или с еретиком, или с некрещенными, или пивал с ними из их сосуда. В Кирилове [лист 269]. И аще будет арменин, и християнин вместе, а чаша будет едина; и аще испиет арменин прежде воды из нея, то християнину из нея не пити. и сосуду молитвы не дати, но разбити. В Потребниках, в соборном изложении [чин 3-й]. Иже по действу дияволю, аще неразумием, или небрежением, или неволею водворяется с жиды, или с срацыны, или со армены, или с латыною, или с иными еретики, и яст и пиет с ними, и прочее. и аще не приобщился закону их. и веры православныя не отвергся. и таковым проклинающим свою и иную ересь. и отмывшеся от таковых ересей, чистым покаянием, и молитвою презвитерскою, и тако приобщатися святых таин.

Еже вкупе и без преграды в домех со внешними не молитися.

Моляйся со отлученными [святых апостол, правило 10], сам такожде да отлучен будет. Толкование. Аще кто молится с еретики в церкви или в дому, со отлученными от церкви, сам такожде да отлучен будет. [ниже] Моляйся с еретики в дому или в церкви [правило 45], да отлучится, и прочее. о сем многия свидетельствы.

 

СТАТИЯ, 32.

 

Еже в банях со внешними не мытися.

Кормчая старописменная, от послания Тимофея презвитера, о Коринфе. Реша же, яко святый Поликарп епископ и мученик рече. Яко некогда мыющуся в бани святому Иоанну апостолу, и уведевшу, яко Коринф еретик мыется; отскочи от места, и бежати повеле ту сущим с ним, бежым глаголя, да некако баня падется, и вредит нас всех, внутрь сущу Коринфу истине врагу. От жития священномученика Евсевия епископа Самосатскаго [июня 22]. Во град же Самосатский на место Евсевия святаго, послан бысть от ариан некий епископ, именем Евномий, арианская мудрствующий. тому во град входящу, никтоже изыде в сретение ему; весь бо град сущий правоверен. [ниже]: вниде же некогда Евномий, по обычаю страны тоя во общую баню мытися, и затвориша онем слуги двери, да не инии от людей внидут тамо, идеже мыется епископ. разумев же он, яко мнози пред дверми стоят, мытися хотяще. повеле служащим да отверзут дверь; и да велят всем изволяющим внити невозбранно, и мытися с ними купно. внидоша убо мнози, и стояху пред ним по чести ради он же зваше я, да в туюжде купель аще кто хощет внидет. тыя же не дерзаху. и разумев Евномий, яко почести ради предстоят ему, и мытися не дерзают, опечалися. и восстав от купели, изыди скоро из бани, яко не хотяй почитаемый быти. оставшии же в бани человецы, абие ту от купели воду, аки оскверненную еретиковым омовением, вон источиша, и сосуд добре омыша. гнушающеся еретикова в нем мытия. и согреяша иную воду, купель себе паки устроиша. 6-го вселенскаго собора [Кормчая, правило 11]. Опресноцы июдейстии отвержени, призываяй же врачи их, или мыяйся с ними, отвержен. Толкование. Ни единаго же несть християном приобщения к жидом. сего ради убо аще обрящется кто тех опресноки ядый, или врача их призываяй на цельбу себе, или мыяйся с ними в бани, или инако како присвояяся к ним; аще убо есть причетник, да извержется. ащели мирский человек, да отлучится.

 

СТАТИЯ, 33.

 

Еже некрещенных во исповедь не приимати.

О сем самый чин исповедания научает, в нем же в поновлении сице извествует. исповедуюся аз многогрешный, имярек, Господу Богу Вседержителю. [ниже], и тебе отче, вся согрешения моя. [ниже] еже исперва сотворих, отнележе крещен есмь. даже и до сего дня, и прочее. не крещенному же нигде несть во святей церкви исповедати. такоже без крещения несть покаяния. Якоже в Благовестнике глаголет [от Луки, зач. 114]. О крещении же где рече, о сем бо покаяние бывает. В Катихисисе Большом [глава 64, в толкован.]. Покаяние есть вторая дщица, по разбиении крестильнаго корабля. И в беседе Златоустаго, на послание. на брезе напечатано [лист 2832]. По крещении покаяние. И в книзе Гавриила Филадельфийскаго. Первы чин имать, святое крещение. [ниже]: и яко сему не сущу, прочая совершити християнина не могут. И в беседе [лист 2855]. Ниже убо покаяние довлеет на очищение, но потреба прежде крещение восприяти.

 

СТАТИЯ, 34.

 

Еже внешних в веру и в крещение, со искусом и со исповеданием приимати.

Рече Господь [Евангелие от Мф., зач. 116], шедше научите вся языки, крестяще их во имя Отца и Сына и Святаго Духа; учаще их блюсти, вся елика заповедах вам. Святаго Афанасия Великаго [слово 2, на ариан]. Тем же и Спас не просто заповедал есть крещати, но прежде научите, и потом крестити. да от учения вера права изъявится; и с верою совершение крещения приложится. Златоуст на послание [беседы, лист 2855]. Тем хотяй на добродетель приити, первее злобу осудити должен есть, и тогда добродетель проходити. Святаго апостола Павла [Кормчая, правило 1, лист 25]. Первое приходящий к таинству благоверия, дияконом да приведутся к епископу, и да испытаны будут вины, ея же ради приидоша. испытавше же оних, приведшии их да свидетельствуют. да испытаетжеся житие и нрав их, аще суть раби или свободнии. аще убо будет кто раб, и свидетельствует о нем господин его, да будет прият. ащели же ни, да будет отвержен, дондеже достоин явится господину своему; и аще свидетельствует о нем господин его, да будет прият. [ниже] Блудница приходящи первое к соборней церкви [правило 5], аще не престанет от блуда, да отринется. На колесницах уристание творя [правило 6], или самоборец, или пешь уристание творя на позорищех, или игрецем старейшина, или борец, или свирец, или гудец, или смычник, или плясец, или корчемник, да престанут от таковых, и ащели же ни, да отвергнутся. Идолом творец приходя к благоверию [правило 7], да престанет идолы творя, ащели ни, да отвержется. Воин приходя к благоверию [правило 8], да научится ни обидити ни клеветати, но токмо доволен быти даруемыми ему от царя оброки; повинуяся убо да будет прият, противу же глаголя, да извержется. Скаредие творя блудник [правило 9], скотоложник, мятежник, чародей, скоморох, узольник, и проч. [ниже]: Таковии за лето да испытани будут. невозможно бо от злобы возникнути скоро. преставшии убо от таковых, да будут приняты. не повинующиижеся, да отвергутся. [ниже] Оглашенный три лета да поучается [правило 14]. аще же будет потщалив, скорее да будет приятен. не времене бо смотрим, но обычая. Из Апостола Толковаго, апология святаго Иустина, о вере и о делах добрых, и како достоит приимати во крещение [при зач. 194, глава 2]. [ниже] О тех иже всех людей без возбранения во крещение приимати хотяху. Некоим убо мнится, да вси без возбранения приходят во крещение, аще бы и житие их зло скверно и лукаво явственне было, и пременитися от злаго на лучшее не хотели. [ниже]: токмо да будет рече удом Христовым. аще бы и удом блудницы утвердился быти, и отстати не хотел, последи же глаголют о нравах и делах благих, да будет наказан. О, како си зло есть, прежде крестити, и потом о изменении в лучшия нравы наказывати. [ниже]: таковии иже сим помогают, дабы во крещение прияты были, некоим человеческим милосердием понужени. сим являюще, да с ними и прочии вси лукавии и нечестивии, некоею казнию наказанием и покаянием не исправишася, во крещение прияты будут. мняще аще крещени не будут, тогда вовеки погибнут. а егда крестятся, тогда тако в нечестии живущим, мнят онем спастися. [ниже]: Но истинная учения [глава 7], воздержность и умерение хранящи, смотрим коих во крещение приимати достоит, да святая псом не дадут. [ниже]: Хотящая во святое крещение приити [глава 9], да послушают не токмо како веровати подобает; но и того, како от рода строптиваго спастися имеют, и како верным жительствовати достоит. [ниже] Тии иже хощут прияти святое крещение [глава 19]; да веруют в Бога, якоже исповедание веры поучает, и от мертвых дел да покается. И отрицающиися мира словесы [глава 17], приходящии. во истинну бывают между пшеницею сеяни, и в гумно собрани, и овцам прилучени. [ниже]: Лукавии же человецы [глава 18], явственно исповедающии, и обещавшиися в беззакониих своих пребывати, не будут приняты во крещение. [ниже]: дондеже не расторгнут сих оков, ко тайнам Христовым недостойни приступити. [ниже] аще от сих мертвых дел не покаяются, во крещение не будут прияты. Егда же сицевых во крещение не приемлем [глава 17], тогда не прежде времени плевелы исторгнути хощем, но более не хощем плевел сеяти, якоже диявол творит. ниже хотящим ко Господу Исусу Христу приити возбраняем, но не возбраняем им Господу Исусу верити: но свидетельствуем, яко тии не хощут веровати, иже здравому учению противятся. сего ради да не почитаются сии между пришедшими на брак, но между нехотящими приити. понеже мы приходящих их не изгоняем, но сами приити не хощут. Собора Лаодикийскаго [Кормчая правило 45, от толков.]. Подобает хотящаго прияти крещение, поучати вере прилежно, и аще навыкнет, да исповедует пред епископом. И в болезни сый аще кто воспросит крещения [правило 46, от толков.], да крестится, и потом аще от болезни исцелеет, да научится вере, и образу веры, и исповесть пред епископом. Во апологии паки святаго Иустина [глава 7]. Егда при концы живота, желает кто крещения тогда малыми глаголы, но обаче сицевыми, в них же вся вещи заключаются уверен сущи крестится. аще же здравый желает крещения, требует времени себе и наказанию вещей, их же навыкнути подобает.

 

СТАТИЯ, 35.

 

Еже от внешних младенцев в церковь без веры родителей не приимати.

Святый Афанасий Великий, в слове 2-м, на ариан. Тем же и Спас не просто заповедал есть крещати, его прежде научите, и потом крестити; да от учения вера права изъявится, и с верою совершение крещения приложится. О крещении, Катихисис Большой [глава 61]. Еже слышанием словеса Божия имети веру, се в возрасте сущим последовательно есть. младенцы же имут во крещении веру родительскую, пособствующую им ко спасению. [выше] аще и не имут разумом разумети, яко подобно глуси и неми, но имут по природе нрава родителей своих, веру си стяжати. [ниже]: и в лепоту сие им бысть. да якоже прародительным грехопадением; сиречь, первородным грехом повредишася. тако и родителей своих верою помощь приемлют. и яко неведущим им, подпадоша осуждению, самым тем зачатием и рождением. сице и в неведении своем, цельбу и спасение приимут. Евангелие недельное [в неделю 6-ю]. Бывает убо и се, яко другий от других веры исцеление приемлет; якоже на крещении, еже дается младенцем; ибо приношающих родитель вера действует. Паки а Катихисисе Большом, в предисловии. От верных родителей, верни суть младенцы. а от неверных родителей, не суть вернии. [ниже]: от верных родителей, родивыйся младенец, и до крещения верен есть. а от неверных родителей, неверен есть. Номоканон [правило 151]. Священник аще приимет жертву еретическую, или крещает турчину [в Номоканоне киевском, или схимастику и еретику] детищь. или приимет жертву его; или яко приемника детищу возмет и. или друга жениха на брак. кая бо часть верному с неверными; или кое общение свету ко тме, по божественному апостолу. [и прочия подобны свидетельствы, чти на статию, 38-ю положенныя]. Преподобный Феодор Студит [в Никонове слове 18]. Вся елика твориши, или глаголеши, имей свидетельство от святых писаний, или от отеческаго обычая. Понеже и прежде бывшия наши отцы, тако по изображенному в статии сей, о таковых младенцех поступаху.

Еже за несохранение младенцев, родителей их и блюстителей наказывати.

Зинарь [глава 180]. Аще дитя осквернится по причащении, в великий пяток, или в великую суботу. да отлучатся родителие их от причащения.

Еже оскверненых и неисправленых младенцов не поминати.

Матфей Правильник [состав е, глава 4]. О них же писание не лежит, сохранити подобает навычение и обычай, и последовати множае приближающимся, и уподобление имущим ко искусному. тем же нигде во святом писании не видится; чтобы таковых оскверненных младенцев умерших, в поминовение приимати. Обычай же у нас отеческий, еже таковых в поминовение не приимати. По подобию в Номоканоне, 225-го правила. Аще родители не хранят постов святых; то за сие не приимати в церковь ни их, ни чад их живых, проявлено яко умерших. кольми паче от таковых, иже во осквернении своя чада предающих. И сицевых оскверненных их младенцев. якоже некрещеннии младенцы, в помяновение не приемлются. Якоже выше на 18-ю статию явленно. Тако и сии оскверненнии.

 

СТАТИЯ, 36.

 

Еже за умерших внешних некрещенных моления не творити, кроме токмо за оглашенных.

Святых апостол Петра и Павла [правило 14]. Творити усопшим третины и девятины и 40 дней, и на всяко лето память им творити, и от имения их раздавайте нищим, на воспоминание их; сеже от благоверных глаголем. за нечестиваго же аще и всего мира раздаси богатство нищим, никоея же ползы сотвориши ему. ему же бо живу сущу, враг бе Богу, яве есть яко и по смерти; ибо несть неправды у Бога, и прочее. Книга о вере. Третины же того ради творим, яко той человек иже преставися, крещен бяше, во имя Отца и Сына и Святаго Духа. [ниже]: и во единой святей соборней и апостольстей церкви, до конца живота своего благообразне и терпелив пребывал. Святаго Дионисия Ареопагита [в Никонове слове 32]. Яже священником по уставу священному испрошаемая всяко будет, иже по божественней жизни скончавшимся. [ниже]: тем же божественный иерарх, несвященным не молитвует сия усопшим. яко не точию возвестительнаго всего совратися чина, и с презорством священническим дерзнет; но яко и благочестивыя молитвы не получит; по праведному слову, и сам не неподобне услышит; просите и не приемлите, зане зле просити. Из Зерцала душезрительнаго, Григория Нискаго [слово 5, глава 8]. Ведомо же буди, яко тайныя службы и жертвы бываемыя о согрешивших грех их к смерти, всуе бывают. [ниже]: яко к смерти грех есть неверие. [ниже]: и еже отвергнутися Христа; и еже еретику умрети в ереси некоторой. Никона Черныя горы, от надписания [слово 26, лист 15]. Яко еретиком скончавшимся, не подобает молитися о них. но еще живым сущим им, молитися о них потребно. Той же в Кирилове книге, напреди. О еретикох живых сущих токмо молити, о умерших же сих не молити; тако бо от святых отец указася. Катихисис Большой [глава 12]. За нечестивых же не пользует ни моление, ни приношение, по апостольским завещанием.

О Трояне, и Феофиле, чесо ради то было, яко не предания ради законоположеннаго, но чюдеси ради и славы Божия.

Из Соборника в суботу мясопустную, о усопших [слово преподобнаго Иоанна Дамаскина]. Григорий Беседовник убо, старейшаго Рима епископ. [ниже]: сей некогда по каменному пути шествие творя; и став со усердием, молитву крепку к душелюбцу Богу, о прощении грехов Трояна царя сотвори. иже абие гласу от Бога принесшуся ему, услыша сице рекшу; молитву твою рече услышах. и прощение Трояну даю; ты же не к тому приложи молитвы о нечестивых просити мя. Тамо же в ту же суботу мясопустную о усопших [слово Иоанна Златоустаго]. Не плачемся о умерших просто, но о сущих во гресех, тии бо суть плачю достойни; [ниже] плачи не верных, плачи же ничим же не отстающих, иже без освящения отходит и без знамения. [выше], плачися сице отходящих, и воздохни в клети неведущу никому же; се бо пожаление есть истое. сие бо и тебе на пользу есть. плачай бо иного, и сам подвигнутися имать на покаяние, и николиже в сия не впадет, страшен бо ти к тому грех.

О оглашенных.

Из Потребника Иосафскаго, из чина погребения младенцем [лист 306, обор.]. Аще младенец умрет некрещен, а оглашен молитвою, и именем наречен; и тех младенцев в церкви не отпевати, но точию в дому святым маслом полити, творя крест на персех. и погребсти его с своими родителями у церкви, и поминати его. Из Помянника патриарха Иова. Помяни Господи душа младенцев, которыя суть порожени от християнскаго семени, и не сподоблени быша просветитися святым крещением. Златоуст [беседа на послание к филипис., нравоучение 3, лист 1882]. Помяни [си есть литургия] бывати о отшедших, ведят им многое приобретение быаемое. [ниже]: на сие убо о иже в вере отшедших. а оглашеннии ниже сия сподобляются утехи, но лишаются всякия сицевыя помощи, разве единыя некия, коея же сея; мощьно есть нищим за них даяти, творити им некую прохладну вещь. [ниже]: яко убо о живых молимся ничим же разньствующих мертвых, сице мощьно есть и о онех молитися. Книга Златая чепь [слово святаго Алимпия]. Яко святый отец наш Златоустый рече. не точию в вере усопшим пользу творит. за них бывающая милостыня, но еще и за оглашенных некрещенных отходящих жития. [ниже]: отрекбося некто мира, жену имый и дщерь некрещенну, обаче християнина бе. раздели же имение свое на три части. умерши же дщери его некрещенне; за душу ея, отец ея, вда нищим часть ея. и еще женню часть, и свою, и непреста же моля Бога за ню. и прииде глас к нему, молящуся ему, яко крестися дщи твоя, не тужи. Святый же Кирил Александрийский, от матери ея вопрошен, аще достоит за ню приносити просфиру, и милостыню творити. и повелено бысть матери ея творити вся за ню.

 

СТАТИЯ, 37.

 

О браках поганских и еретических свидетельствы выше, на 6-ю статию написашася.

Кия и к новоженьским бракам по всему свойствуют. еже в тех свидетельствах, блудническими таковыя браки показуются. по крещении же сия приемлюще, новожены от еретик, веры отвергшиися по сему являются. Тем же святый апостол Павел глаголет [коринф., зач. 134]: аще кий брат именуемый будет блудник, или лихоимец, или идолослужитель, и проч. И паки той же [зач. 332]. Измете злаго от вас самех, и очистите ветхий квас. И паки ко евреом. Да не кий корень горести выспрь прозябая, пакость сотворит и тем осквернятся мнози. На сие святый Златоуст сказует [беседы, лист 3077]. Сиречь, да не сие рече будет, невоздержных и блудников отсецайте. Той же [в Никонове слове 6]. Аще таковии пребывают неисправлени, отсецатися и отметатися требе есть. Матфей правильник [состав м, глава 9]. Отсецати телесе христианска, еретики научени быхом, и иже безместными повинных согрешеньми. Номоканон [состав м, глава 9]. Прелюбодей, или явленный блудник, не приемлется в церковь. Там же [правило 76]. Инок, или инокиня, аще приидут во общение брака; сиречь, аще оженятся, не судится то брак, но блуд. сего ради донележе не распустятся, в церковь да не входят. [ниже]: ибо чюжди суть християн. Святаго Петра Александрийскаго [правило 4]. Аще и отвергшеся, и потом без покаяния пребывают, да будут яко варвари погани. Из устава скитскаго прежних поморских отец [статия 25]. Новоженившихся из пустынных скитов высылять. а отцу и матери таковых не держать, и не присваивать. и в работу никому их не нанимать.

Еже обращающихся новоженов с правильным наказанием, и с расторжением сожития их приимати.

Кормчая, Василия Великаго [правило 59]. Блудник 7 лет запрещение да приимет. [ниже] Преступивших веру мук ради [правило 71], 8 лет запрещение да приимут. своею же волею преступивше, 12 лет. Послание святейшаго Фотия митрополита в Нов град. А который не по закону живет с женою, без благословения поповска понялись, тем епитимия 3 лета, как блуднику, да паки совокупити их молитвами. да давали бы о себе поруки, чтобы им прочая лета жити целомудренно. [ниже]; а не с благословением аще восхотят жити, ино их разлучити. Кормчая, Василия Великаго [правило 18, толков.]. Сластем блудным себе издавше, не прияты будут инако в церковь, аще не оставит греха , и разрушит беззаконное сожитие. Матфей правильник [состав г, глава 3]. От иже незаконне бывающих браков, овии глаголются нелепотни, яко иже со сродники, или с еретики; их же божественная правила разлучити токмо повелевают. Тем же по разрешении неприкладнаго брака [того ж состава, глава 12], и отлучатися преступающим сподобляет. Номоканон [правило 52]. Такоже и с латыном аще православная жена сочетается, с распуством брака и запрещению подлежит. Инок, или инокиня оженившись [там же, правило 76], по распущении, 15 лет да не причастися. Кормчая [лист 560]. Повелевает в беззаконном браке обретшася, не приимати в покаяние, дондеже не расторгнут брака, аще будет и дети сотворил. От старчества. Рече старец, аще впадеши в любодеяние, и будеши близ места, идеже лице живет, с ним же впал будеши, отъиде от места того, не можеши бо покаятися. Из устава скитскаго, прежних поморских отец [статия 26]. Обращающихся новоженных приимати, ежели приговорят выборныя и скитския жители, со обязанием писменным, чтобы им жить сшедшимся с женами, порось друг от друга в разных скитах. испребывания  и бесед им друг ко другу весма не чинить. и которыя хозяива, их приимут к себе жить, для охранения вдовственнаго их чистаго жития. и оным хозяивам, или свойственником, такожде потписоватися к тем писмам, чтобы им хранить и надсматривать их друг ко другу не сожительны.

Еже новоженов и прочих явно испадших, явно наказывати.

Святаго Никифора патриарха [Кормчая, правило 19]. Иже неявленная согрешения исповедающих, от причащения отлучати подобает, в церковь же тем входити не возбранити, ниже обличати, но кротко сих наказывати. Аще ли же явлена сих согрешения [правило 20], тогда прочее по церковному уставу исполнять запрещение. Там же [лист 590]. Великий Василий, в три чины отлучения повелевает творити. [ниже]: и не срамлятися яве и обличати, во облегчение студным делом. и на отгнание будущаго срама. якоже рече Богослов Григорий; да сущаго тамо студа, зде убегнеши. [ниже]: и иже во святых Иоанн Златоуст глаголет. Аще кто причащения несть достоин, то убо ниже молитвы, ни стояния с достойными, несть достоин. [ниже]: ныне же не веде како утвердися безумное, еже не исходити непричащенным, да не уведени будут яко не причащаются; и ради человеческаго зде срама, хранятся в будущий. но якоже есть отеческий устав, и в божественных писаниих, ни грехов таковых увы мне убогому оставление бывает. В Каталоге [лист 660, обор.]. В запрещении суще, и не изходяще из церкве, никогда оставление грехов своих получат.

 

СТАТИЯ, 38.

 

Еже от новоженов, и прочих испадших без обращения их, младенцев и всяких приносов от них в церковь не приимати.

Матфей правильник [7-го вселенскаго собора, состав в, глава 4, правило 50]. Аще нецыи от них крестишася, и покрываются убо християнская творити, сокровенне же июдейских обычай и назирания ведени будут имуще; и сии ниже в церковь входят рече, ниже какова любо да сподобляются приобщения, ниже дети их божественным крещением да знаменаются. Номоканон [правило 225]. Аще кто не хранит пост, святых апостол, и рожества Христова и Богородицы, в церковь сего да не приемлеши, ниже дар его, аще не воздержится от мерскаго. Кормчая старописменная, в послании Иоанна митрополита русскаго, ко Иякову черноризцу. Иже си поемлют без благословения, и свои жены пущают, и прилепляются инем. [ниже]: тем всем чюжим быти нашея непорочныя веры, и отвержены от соборныя церкви. [ниже]; от них же не приимати чад ко крещению, дондеже пребывают в таковом недостойном совокуплении. От собрания о браках, Спиридона Иваныча, сожителя прежних отец [статия 4]. Еже кроме благословения церковнаго, и венчания иерейскаго, по крещении, или до крещения брачишася. от таковых благоискуснейшим своим советом отцы наши сего нам не предали, еже бы чада их крестити, и приносы от таковых приимати. [ниже]: дондеже не престанут от скверносмешения и в покаяние не приидут, приношения от них приимати боимся, и чад их крестити ужасаемся. Номоканон [правило 176]. Прелюбодей, или явленный блудник не приемлется в церковь, ниже приносы его, аще не оставит грехи, по 39-му правилу Великаго Василия. Арменопул, книга 6-я. Вопрос. Рабом и рабыням супружствуемым без благословения, подамы ли божественное общение, или приимем жертву их. Ответ. Понеже смешение без священнословия блуд есть; аще раб есть не благословен, аще же свободь; ниже в дароношение приятен, ниже в молитву в дому Господнем. понеже и божественный апостол, ниже с ясти величествует, ниже звозмешатися с ним. Кормчая [лист 604]. И не принеси приносы в Божий жертвенник от неверных, ни от еретик, ни от блудник ни от прелюбодей, ни от татей, и прочее. [ниже]: и кто будет от таковых, а не покается. не емли у них приноса.

 

СТАТИЯ, 39.

 

Еже новоженскаго разума не имети, и с мудрствующими тако не общатися.

О браках поганских и еретических, выше на 6-ю статию написася. И сколь вредно за правыя таковыя браки мудрствовати тамо показася. Апостол [Тим., зач. 287]. А еже с таковыми мудрствователи, не общатися о сем святый апостол Павел глаголет. аще кто инако учит. и не приступает к здравым словесем Господа нашего Исуса Христа; и учению еже по благоверию. [ниже]: отступай от таковых. Яко же в мори трождающийся [Кормчая, лист 274], измещут некая бремена в море, яко да прочая спасут; тако и мы отмещем соблазны нам творящия, да не с ними погибнем. Из Соборника Даниила митрополита рускаго [слово 1]. Аще кто от Святаго Духа положенныя законы развращает, и древния отеческия благия обычаи отмещет, и света благаго учения не приемлет; нововводя узаконение, яко и древнии еретицы, от десна подукрадающе, и погубляюще род человеческий. к таковым лучше есть мира отлучающаго от Бога, похвальна брань. Апостол [к Титу, зач. 302]. Еретика человека по первом и втором наказании отрицайся.

 

СТАТИЯ, 40.

 

Еже на новоженство благословляющих, и различно присвояющихся наказывати.

Книга Ключь Разумения, слово Гедеона, епископа Львовскаго, на Рожество Христово. Ибо двоякий грех есть, един наш властный. еже мы сами творим. а другии чюжии, его же иный человек творит. Единако и мы того чюжаго греха бываем участниками. Егда бы кто грех творил, а мы бы ему благословили тое творити, или позволили, или научили, или принаразумили до того. [ниже]: или не возбранили его от того могуще возбранити. или похвалили ему то, и не хулили, и не карали его за тое. тогда аще и ины кто, учинит той грех; единако и мы того чюжаго греха бываем участниками. Подобне и святый Златоуст, к Тимофею на 1-е послание, на 6-ю главу глаголет. О согрешенных бо онем, и ты казнь подъимеши, начало подавый и мимошедшим грехом, и хотящим быти. оставль бо первый не казнено, повинен будеши и будущим. Вопрос [Катихисис Малый, лист 56]. Может ли человек быти причастник чюжим грехом. Ответ. Может: егда кто могий кого от греха отвести, и не отведет. такожде кто не накажет, имея силу к наказанию, глаголю же, господень раба и подданаго. отец сына, муж жену, и всякий начальствующий подначальствуемаго. такоже кто дает кому возбужение ко греху, яковым любо образом, причастником греха того бывает. Номоканон, на преди. Аще исходатаила жена кому блуд, и та яко блудница запрещается. Татем приятель [тамже. ниже], яко тать запрещается. Разбойник [правило 46 и 47], и разбойником приятель, яко убийца запрещается.

 

СТАТИЯ, 41.

 

Еже мужеску полу, с женским вкупе без нужды жити не попущати

Апостол. Без преткновени бывайте, июдеом и еллином и церкви Божии. 1-го вселенскаго собора [правило 3]. Отрече великий собор, отнюд ни епископу, ни презвитеру, ни диякону, ни всякому сущему причетнику, недостойныя жены в дому своем держати, но токмо матерь, или сестру, или тетку, сия бо три лица всякаго зазора кроме суть. [ниже] От толкования. Не токмо священным, но и прочим причетником, се отречено есть. [ниже] И 5-е правило, 6-го вселенскаго собора. Такоже заповедует, приложив и се; сеже и скопцы да сохраняют, непорочне себе житие промышляюще. преступающии же правило, аще суть причетницы, да извергутся. ащели мирстии человецы, да отлучатся. [ниже] И собора иже во Анкире [правило 19, на концы]. Сходящимся девам с некиими мужи, яко з братиею, того возбранихом. [ниже] От толкования. Возбраняет правило се девицам, еже обещавшеся Господеви девствовати, кроме всякаго извета отнюд с мужи пребывати изветом братства. Шестаго собора [правило 5, толков.]. На скопца же болми се правило наводит. яко аще бо и мирстии человецы суть, и живут в дому своем с чюжими женами, иже не суть от незазорных лиц, ни сродницы им, да отлучени будут. Матфей правильник, от того же правила [состав г, глава 19]. Прилагает же правило се и скопцем всяку быти нужду от сего сохраняти, еже отсюду укоризны бояся. Той же, собора Карфагенскаго [правило 38, состав м, глава 15]. Иноком, или причетником, не попущати ходити ко девам, без повеления епископова, но и тогда не единым со единым беседовати; но ту сущим или причетником другим, или христианом почтенным и благоговейным, якоже всякому зазору отъятися. без преткновения бо рече апостол бывайте июдеом и еллином, и церкви Божии: понеже и бежати лукавых омышлений, повеление прияхом, аще суть ложни. И прочия подобны сим свидетельствы, чти ниже, на статию 93-ю положеннныя.

О нужди же. Подобно же есть святых апостол правило, 54-е глаголет. Аще кто яст и пиет в корчемнице, да отлучится. В 40-м же правиле Карфагенскаго собора. Аще причетник на стране земли пребывая, и не имея нигдеже чиста места обитати, и в корчемницу внидет, не имать запрещения. В книге Матфея правильника, на 18 правило, 7-го собора глаголет [состав г, глава 19]. Епископ аще повелевает женам которую любо службу во епископии сотворити, запрещение да приимет, аще прилежит к тому, да извержется. [ниже]: аще же епископи в чюждей странноприимницы витают, и неудобно быти мню правила сего соблюстися.

 

СТАТИЯ, 42.

 

Еже за неподобныя одежды, и за обычаи еретическия наказывати.

Ис книги Зерцала мирозрительнаго [часть 1, глава 16]. Никто же да вводит новых изобретений во одеяниих; но да убоится страшнаго Божия суда. Глаголет Софония: посещу на вся одеявшеяся ризою странною. Ис книги преподобнаго Иосифа Волоцкаго [беседы и видения преподобных Сергия и Германа Волокаламскаго монастыря начальников. ниже]. Любимая братия беда и скорбь и погибель роду християнскому, оставившим веры православныя, и позавидевшим неверных ризам, от главы и до ногу, и их обычаем. [ниже]: понеже Бог не повеле неверных риз, и их обычай, верным человеком внимати. Богу мерско и беззаконно их житие, и обычай их неприятен. [ниже]: сего ради любимая братия, от всех их неверных прелестей крепко брежемся, и их ничтоже имеем, и не внимаем, да за таковое неверствие, зле не постраждем от Господа. [ниже]: горе роду християнскому, прельстившимся в неверных порты, и шлыки имущем на себе, держащим их неверных прелестей. 6-го вселенскаго собора [Кормчая правило 71]. Отлучен бывает, закону учайся градскому, и обычаем еллинским придержася, и на позорище ходя и играя, или паче общих риз, во ины облачаяся. Толкование. Обычаем еллинским, аще приимет кто, и учаяся градским законом, по прилучаюся на позорище взыдет, и содеваема ту игры сотворит. или во одежду некую, еже есть кроме общаго обычая отвлечется, да отлучится. Святаго апостола Павла [правило 12, лист 26]. Еллинским баснем последуяй, или жидовским обычаем; аще не отступит от того, да извержется. Не подобает православным поганских обычаев вводити [Стоглав, глава 39]. От священных правил. В коейждо убо стране законы и отчина, а не преходят друг ко другу, но своего обычая кийждо закон держит. мы же православнии, закон истинный от Бога приемше; разных стран беззакония осквернихомся, обычаи злыя от них приемше. тем же и от тех стран томими есмы и растачаеми, виною нашея похоти обычая. и сего ради казнит нас Бог, за таковая преступления. И прочия сим подобная свидетельствы, чти ниже, на статии 91-ю, и 97-ю положенныя.

 

СТАТИЯ, 43.

 

Еже в домех где бывает рождение, в те храмы до 40 дней не входити, и входящих наказывати.

Матфей правильник [состав е, глава 4]. О них же писание не лежит закон, сохранити подобает навычение и обычай, и последоватти множае приближающимся, и уподобление имущим ко искомому. понеже таковыя храмы, и рождьшия жены, и прочия ту прилучающиися; и во время священных чинов, повелевает в книге Зинарь, во главе 91-й. рождьшую до 40 дней, в причащение не приимати. прочия же жены бывшия ту, овых до 12, а других и до 15 дней не приимати в церковь повелевает. и в храм оный до триех дней не входити повелевает, и потом с молитвою иерейскою входити, и прочее. И того ради, и у преждебывших наших отец, положися тако по разсуждению, наказывати и исправляти таковых входящих во оскверненная она места, или живущих ту, якоже в сей статии написася. Тем же и преподобный Феодор Студит глаголет [в Никонове слове 18]: вся елика твориши, или глаголеши, имей свидетельство от святых писаний, или от отеческаго ти обычая, кроме преступления Божиих заповедей.

 

СТАТИЯ, 44.

 

Еже за всякия греховныя явныя вины, настоятелем по писанию наказывати, а в неисправлениих же пребывающих, по первом и втором наказании от церкви конечно отлучати.

Евангелие от Луки [зач. 84]. Рече Господь, аще согрешит к тебе брат твой, запрети ему. и аще покается, остави ему. От Матфея [зач. 75]. Аще согрешит к тебе брат твой, иди и обличи его. [ниже]: аще же не послушает, повеждь церкви и прочее. Святый апостол Павел [к солуняном, зач. 273, зач. 277]. Молих вы братие, наказуйте безумныя, утешайте малодушныя. [ниже]: И аще кто не послушает словесе нашего, посланием сего сказуйте. и не примешайтеся ему да посрамится. Той же к Тимофею глаголет [в послан. 1]. Согрешающих предо всеми обличай, да и прочии страх имут. На сие святый Златоуст глаголет [беседы, лист 2503]. Согрешающих рече пред всеми обличай; сиречь егда увеси яве, зело казни, да инии уцеломудрятся. якоже бо еже просто осуждати, вредно есть, сице же не казнити явленныя грехи, путь есть еже подаяти иным еже таяжде творити и дерзати. Из апологии святаго Иустина Философа [в толковом апостоле, зач. 195]. Яко достоит казнити лукаваго, а не благочестно жительствующих християн. [ниже]: сия бо казнь в церкви святей тако бдети имать. да не абие упрямство и невоздержание приидет ко безумию; сего ради сия подобия даны суть, в совет благим старейшинам; и да возбраняют, его же возбранити должни суть. Святый Златоуст паки на послание к коринфом глаголет [нравоучение 14]. Свяжи согрешившаго, донележе милостива сотворит Бога; не оставляяй его разрешена, да не паче связан будет Божиим гневом. аще бо аз свяжу, Бог не к тому связует. ащели же не свяжу, нерешимыя его ждут узы. аще бо быхом себе осуждали, не быхом осуждени были. Ис книги преподобнаго Иосифа Волоцкаго о монастырстем строении [слово 13]. Подобает соборным братиям приемшим правление монастырское, с настоятелем, или не сущу настоятелю, попечение имети о сем. [ниже] да аще видят кого стропотна и развращенна, да обличат и запретят. [ниже]: тако бо повелевает святый апостол Павел, глаголя: молю вы братие, наказуйте безчинныя, и прочее. аще бо и к мирским человеком сице речено бысть, еже наказати безчинныя, и непокаряющимся запрещати, и не примешатися к ним. кольми паче подобает старейшим братиям, иже в монастыри суть; им же повелено есть, безчинствующим запрещати. [ниже]: ащели же кто речет; яко священником подобает давати запрещение согрешающим, и кающимся прощение; простым же человеком не подобает тако творити. к ним же сице речем; аще будут неведома и тайная согрешения, малая или великая, исповедаваема бывают к священнику, такоже в тайне от него и прощение приемлют; по свидетельству священных правил. Зде же не о тайных гресех, но о явленных запрещают с настоятелем братия, приемши правление монастырское. кающимся прощение с настоятелем или не сущу настоятелю подают. кто убо невесть, аще кто начнет безчинствовати в церкви, или в трапезе, или на монастыре, или за монастырем, не по обычаю благословения; и братии бы не наказывати и не воспрещати сим; ибо и мирстии человецы, и господари рабом, и отцы чадом, и старцы учеником, не священницы суще возбраняют и запрещают безчинствующим, и раны полагают о таковых согрешениих, кающихжеся  прощают, не священницы суще, ниже игумени. [ниже]: ащели же кто от настоятеля, и от преимущих братии, не приемлет наказания и обличения; подобает таковаго пред всею братиею обличати. ащели же пребывает в непокорстве, да изгнан будет из обители. тако бо повелевает божественный апостол Павел, и прочая божественная писания. измете рече лукаваго от вас самех; занеже мал квас все смешение квасит. [ниже]: и великий Василий глаголет, изжени рече губителя из сонмища, и соизыдет с ним и молва, да не и прочим своя красты подаст. Святаго Василия Великаго о не радящих о епитимиях, рекше о запрещениих [Кормчая лист 253, обор.]. Аще не сотворят кого целомудренна общая запрещения. нужда есть от Господа реченными правилы повинути таковаго: обличи бо рече согрешающаго брата твоего, между тобою, и тем единем. аще же не послушает, приими с собою и другаго единаго. аще же ни тако, рцы в церкви, рекше в соборе. аще же ни тако послушает; да будет ти яко язычник и мытарь. и он сица убо единою позван быв, пред двема же обличен быв, и пред церковию свидетельствован, и понеже не восхоте послушати, да будет от тебе отвержен, и да возвестится о нем везде, не прияту ему быти на всяко общение житейския потребы. яко да того ради, понеже не смешатися ему с нами, будет дияволу в снедь.

 

СТАТИЯ, 45.

 

Еже за молитвы на по рождении и в разговеньи и за яблоки и прочее, простолюдином ныне не молитися, кроме что за молитвы за баню и над сосудом и кладезем оскверненными.

Понеже по рождении женам, очистительныя молитвы положены, на иже от православных браков раждающия; на раждающих же от блуда, или от еретических браков, молитв положенных не видится; но покаянием токмо сицевии очищаются. На разговеньи же. И над яблоками положены молитвы иерейския благодарственныя, а не очистительныя. и того ради вместо сих молитв, неудобно, и не зрится в писании на сие никоего вида. На сосуды же и кладези оскверненныя, положены в потребниках очистительныя молитвы. тако же и за баню велено в древлеписменных епитимейниках, приимати очистительную молитву от иерея. аще же несть иерея, то чести псалом, 50-й. и сотвори поклонов 50, и тако очищатися.

 

СТАТИЯ, 46.

 

Еже о истинном причастии неверия не имети.

Святый апостол Павел глаголет [к коринф., зач. 149]. Елижды бо аще ясте хлеб сей, и чашу сию пиете, смерть Господню возвещаете, дондеже убо приидет. Святый Златоуст на сие в беседах [лист 871]. Показуяй яко даже до скончания та пребывает, рече, дондеже аще приидет. Из ответов прежних поморских отец [ответ 99]. Обаче мы веруем святому вапостолу Павлу; веруем святым учителем церковным, возвещающим жертве тайней приноситися, даже до скончания века. яко будет до скончания, идеже будет приноситися; по согласию святых апостол и святых отец. И паки [во ответе 65-м]. Во святей литургии действуемое таинство, под видом хлеба и вина; по преданию святых апостол и святых отец, веруем и исповедуем всегда самое быти пречистое тело Христово, и самую животворящую кровь его, аще ныне, аще впред действоватися будет, на всяком месте идеже будет. [ниже]: Ибо дотоле сие таинство цело есть [ответ 104], доколе вид хлеба и вина цел пребывает.

Еже причастия неведомаго без свидетельства не приимати.

Святый Златоуст глаголет [в толковом апостоле, зач. 150]. Церковь Божия есть, вертоград заключен, и источник запечатлен, и того ради невозможно нигдеже тайне совершитися, токмо во единости церкви Божии. а яже между сонмищи и еретиками несть. тогда и тайны ни единыя в них несть. [ниже]: и без знамения креста святаго, и совершения слова Господня, тайне статися невозможно. Той же в беседах [беседы апостол., лист 585]. Не будет же тайна божественная и цела, егда и от себе что приложиши. Барония [лето Господне, 592]. Во Испании бысть собор, на котором мощи в церквах арианских обретенныя, огнем искушати велено, и которыя во огне не згорят; за истинныя прияти. сицевое тщание потребно, да ничтоже притворно и ложно в церкве почитается.

 

СТАТИЯ, 47.

 

Еже пред иноверными веры и крещения не отрицатися, преступающих же сие наказывати.

Евангелие от Матфея [зач. 38]. Рече Господь своим учеником, всяк иже исповесть мя пред человеки. исповем его Аз пред Отцем Моим иже на небесех. а иже отвержется мене пред человеки; отвергуся его и Аз, пред Отцем Моим иже на небесех. Евангелие от Марка [зач. 37]. Иже бо аще постыдится Мене и Моих словес в роде сем прелюбодейнем и грешнем, и Сын человеческий постыдится его, егда приидет в славе Отца своего со ангелы святыми. От толкования в недельном евангелии [в неделю всех святых]. Отрекшиися и презревшии Бога, отречени будут от Него, и услышати имут; якоже убо сотвористе, тако и будет вам. И постыжуся и срамляюся в распятаго Христа веровати [в неделю 3-ю поста], и исповедати Его Бога срамляюжеся и словесе евангельскаго; сего и Господь усрамится. Святаго Анастасия Синайскаго [Кормчая лист 631]. Подобает ведати, яко не всяко вся злая, яже людем Божиим творят ариане, по Божию повелению творят. не повелевает бо Бог тем нудити, или мучити человека верна, да отвержется еже исповедати Христа, или крещения, или приятия святых Его таин. Тамо же святых апостол правило [62. выше, лист 18]. Аще который причетник, страха ради человеча, жидовска, или еллинска, или еретическа, отвержется имене Христова; весьма от церкве да изринется. аще же не Христова, но имене причетническаго отвержется, причетник сый; сиречь, убоявся епископ речет; несмь был, ни хощу быти епископ. такоже и презвитер и диякон, и прочии причетник, аще отвержется своего имене, да извержется своего имене, да извержется от сана своего. Пролог [генваря, 16]. Слово о некоем мнисе, отвергшемся Христа, и святаго крещения, и обетования мнишескаго, и паки спасе его Бог. [ниже]: повеле ему старец поститися 3 недели, чрез день ядый, и прочее. Святаго Петра Александрийскаго [правило 2, лист 260]. Иже в темницу токмо ввержени бывше, и отвергшеся Христа, 4 лета да покаются. [ниже]: Аще отвергшеся [правило 4], и потом без покаяния пребывают, да будут яко варвари погании. Апокалипсис толковой [зач. 42, от толков.]. Аще кто изверившемуся антихристу повинется, [ниже]: и словом и делом сего проповесть Бога, и той причастится с ним испити чашу мучения не растворенна милостию Божиею.

 

СТАТИЯ, 48.

 

Еже християн, в руки иноверным на нечестие не предавати. и деющих сие наказывати.

Евангелие от Иоанна, словеса Господня к Пилату [зач. 60]. Сего ради предавый Мя тебе, болий грех имать. От толкования [Благовестник, лист 283]. Являет же зде и Пилата грех повинна, аще и меньша. предавый же Мя тебе, болий рече грех имать. Святаго Григория епископа Кесарийскаго [Кормчая, правило 10, лист 263]. Мудрствующий варварская пленницы, убивающии же единоверныя своя, и пути и домы варваром показующе, и послушания божественных писаний да упразднятся; дондеже ино нечто промыслят сшедшеся святии отцы. Тое же правило в Матфеове, состав, п, глава 21. о предателех; святаго Григория [правило 10]. Елицы рече пленении, толико того причастившеся, яко и забыто приемше яко быти им християном. некия от единоплеменных древом, или замком убиша, и путеве или домове неведущим варваром показаша; и послушания да изгнани будут. [ниже]: Закони. Поощряя ратники, или предаяй ратником православна, главне да томится.

 

СТАТИЯ, 49.

 

Еже самим себе извольно смерти не предавати, и гладом не моритися; аще и Бога ради.

Евангелие от Матфея [зач. 69]. Рече Господь, иже хощет душу свою спасти, погубит ю. От толкования [Благовестник, лист 153]. Якоже бо и душу и тело презирати повелевает [Господь], не убивати же себе рече, но веры ради не щадети времени призывающу. [ниже]: От толкования на евангелие от Луки [лист 156]. Уча Господь, яко лепо возненавидети, не токмо всех сущих, но и самыя своея души. смотри же да не восхитишися реченным просте и без разума; ниже безчеловечеству учит Бог человеколюбец, ниже самому ся погубляти, не буди то. Паки от толкования на Матфея [лист 121]. Еже бо себе зазрети, добро есть, а еже удавити, бесовско дело есть. [ниже]: На Иоанна [лист 135]. Никогда же в таковое неистовство мошно приити ми, яко себе убивати. се бо бесовско есть; а не Божие. Из бесед святаго Златоуста [на послание к галатом, лист 1552]. Во плоти сущии угодити Богу не могут: что убо убити ли подобает плоть. сам же иже сия глаголет, не плотию ли обложен есть; не плотьская, но диявольская сия суть учения; он бо человекоубийца бяше искони. На послание к римляном [лист 225]. Что убо ссечем ли тело, да угодим Богови, и изыдем от плоти, и мужеубийцам нам повелеваеши быти, но добродетель ведый: зриши ли коликая безместная раждаются, аще просто глаголемая приимем. На послание к филиписеом [лист 1995]. Распни тебе самого глаголю, да не убиеши сам себе, не буди, сие бо есть нечестиво. но якоже Павел глаголаше, мне мир распятся, и аз миру. Паки на послание к галатом [лист 1469]. Не молю да возмеши их от мира, [рече Господь] но да соблюдеши их от неприязни, сиречь от злобы. аще же не приемлеши сего наказания; но еще лукаво быти настоящее житие глаголеши. не порицай самех себе убивающих. [ниже]: и иже насилованною смертию, или удавою, и иными некими разрушая еже жити не был бы порицатися достоин по вашему разуму. ныне же и Бог таковыя мучит паче, нежели мужеубийца, и вси омражаемся, и в лепоту: аще бо инех убивати не добро, много паче себе. В толковании на Иоанна [Благовестник, зач. 67]. Сего ради неволею разлучается от тела душа, се Богу на пользу устроившу, да не сами себе изрезываем. Ис книги Симеона новаго Богослова [от слова о различных. внимании]. Нецыи же прельстившеся, и ни единаго наказания от человек приемше, но своима рукама сами себе убийцы быша; се от прельстившаго их научени быша. друзии вниз стремная места себе ввергоша. а инии во ужи себе удавиша. и кто убо различия изречет диявольския прелести. Бароний [лето Господне, 331]. В сицевое неистовство приидоша донатисты, яко себе новое мученичество, имже бы у народа прославились обретоша; си есть убиение самых себе. повергахуся с гор, падаху во огнь, потопляхуся в воде, аки бы за веру и за Христа; и единомысленнии их, вместо мучеников освещаху. о сем на многих местех глаголет Августин, в толикое юродство ересь приводит, еже и между погаными не бе.

О иже гладом морящихся.

Благовестник от толкования, евангелие от Марка [лист 43]. Помысли же и сие, яко Христос никого же хощет погубити алчна. Лествица, [о великих подвижницех пишет] [слово 5, лист 95]: Нецыи же мало воды вкушающе, престаяху, елико токмо от жажды не умрети. Книга Никона Черныя горы [слово 44. от постных. Василия Великаго]. Подобает поститися в меру, и нужнейшую помощь телу приносити. [выше]: да не безмерием воздержания силу телесную разрушивше, праздно то, и бездельно потщание деянии сотворим. Того же. Пост и еже ясти с словом благочестия восприимати потребно есть, яко да егда убо заповедь Божия постом исправити лепо есть, постимся. егда же паки заповедь Божия брашна ищет укрепляюще тело, да ямы: не яко чревообьядницы, но яко делатели Божии. Тимофея Александрийскаго [правило 14]. Аще убо кто сам себе убиет, приношение не принесется за него; токмо аще не будет ум погубил. Зинарь старописменной [слово 198]. Аще каков любо человек, волею своею свержет себе низ брег и умертвится, или в воду или низ камени, или ножем заколется, или каковою любо смертию, или ужем обесится, таковый не погребается яко християнин, ни да поют его; но да повергут его, яко же единаго от поганых: аще будет се и Бога ради сотворил, да не пощадится; таковыя бо добродетели и смерти не заповедал Бог никомуже.

Еже по нужде гонения самоубившихся, приимати и поминати.

Память святых мученик седми братии Маккавей, и учителя их Елеазара, и матери их Соломонии [август, 1]. [ниже]: Мати же их Соломония, понеже скончавшихся сынов своих виде, и не стерпевши рук человеческих нападания, помолившеся, и в розжегшуся сковраду себе вверже, и тако Богу дух свой предаде. От святаго Григория Богослова, о Макковеох [стих 17]. Сия глаголаше, и прилагаше себе к ним, образом яко на торг, на огненное жжение текши, и не пождавши ведущих ту людей; на сковраду злых мук к детем себе приложи. О страдании святаго священномученика Анфима Никомидийскаго [минея четия, киевск., октября, 3]. Тогда ярость царска распалися зело, и паче зверя люта возрыча пожырая християны, их же великия громады, мечем посекаемы бяху, инии огнем сожигаеми; но и сами от верных множайшии мужи и жены, божественною любовию разжегшеся, яко в некую прохладу во огнь себе вметаху. От жития святыя мученицы Дросиды [Пролог, март 22]. Царь повеле две пещи запалити вне града, и жещи я на всяк день. написа же на пещех подпись сице; мужие галилейстии, иже распятому покланяющиися, [ниже]: пожрите богом, ащели ни, то кождо вы сам себе да вревается в пещь. таковому же повелению изшедшу. и слышавши сия раба Божия Дросида, яко кождо от християн, веры ради и любви Христовы вревают сами себе в пещь. Бароний [лето Господне 252]. Во Александрии погании, Аполонию девицу уже состаревшую емше, зубы ей сокрушиша, и огнем претяху, аще Христа хулити не восхощет, она же испросивши малое время на разсуждение, сама во огнь вскочи и сгоре. [ниже]: Жена бе в Риме християныня [лето, 309], Софрония именем; еже муж ея страха ради, соизволи Максимину на нечистоту отдати. и спроси себе Софрония поити в камару, аки хотящи украситися, и рабынею девицею возвести глаголя, да будут таковыя християныни приятны мучителю; и тамо заключишися, и Богу вручившися. от надхнения Духа Святаго, острым железом прободе сердце свое, и мертвый труп мучителю остави. Такова же бе во Антиохии Пелагия, девица млада, яже изволи низврещися с горы и разбитися, неже осквернитися от неверных, иже ю на нечистоту похитити хотяху. о сей пишет Амбросий, похваляя велие мужество ея. еже и Златоустый яко единостранец ея творит. Тоя же Пелагии мати, пишет тамо же святый Амбросий, ведома к судии; изволи паче утопитися в некое реце, неже впасти со дщерми, в поганския нечистыя руки, на погубление чистоты. еже и Евсевий воспоминает: несть сомнения, яко на сие имаху особое надхнение Духа Святаго, якоже и Августин показует. Память святых мучениц, Домнины, и дщери ея Виринеи, и Проскудии [октября, 4]. Сия жены, воини яша я. [ниже]: река же течаше путем, им же идяху, они же утаишася от воин, ядущим им хлеб. и молитвы сотворше наскоре внидоша в реку, тако и оставиша себе, вдашася струям водным, и тако скончашася. разсудивше, яко любве ради Христовы, боле есть водою утопитися, нежели беззаконным в руки вдатися. Никона Черныя горы [слово 52]. Яко не подобает по нужди бывающая, или по смотрению некоему временну, всегда та во свидетельство приносити; но егда паки таковое найдет время. Кормчая старописменная. Вопрос. Аще кто ума цела не имый, удавится, или избодется, или утопится, достоит ли зань приношению быти: [ниже, от ответа] Аще от безумия се сотворил, а не бесен, ни от беды, недостойно зань приношению быти. Вопрос. Аще раб, или рабыня, не терпящи злых господей погубится, достоит ли за тех приношению быти. Ответ. Достоит, а господарю епитимьи. Ис книги Измарагда писменной. Аще кто от беды и нужды великия, или от господарей злых, удавится, или уколется, или утопится, или инако погубится, достоит за него приношению быти, а господарю епитимьи три лета, поклонов по 300 на день.

 

СТАТИЯ, 50.

 

Еже в записки и в покорении царем пребывающих, не винословити.

Святый апостол Петр, в соборном послании глаголет [зач. 58]. Повинуйтеся убо всякому человечу созданию Господа ради, аще царю, яко преобладающу, аще князем, яко от него посланным. Святый апостол Павел глаголет [к рим., зач. 111]. Всяка душа властем предержащим да повинуется. Книга о Вере [лист 290]. Не предлагали ли прикладу онии прежде нас жившии чрез 300 лет и более, даже до крещения Константина Великаго, погани цари и воеводы были, и на християны неудобь носимыя мучительства творили, единаче же, ни Исус Христос, ниже апостоли и по них последствующии святии. не сметали с себя ярма царскаго. Евангелие от Матфея [зач. 90]. Рече Господь, воздадите убо кесарева, кесареви. а Божие Богови. В недельном евангелии [зач. 36, в неделю всех святых]. Будите мудри яко змия, и цели яко голубие. От толкования. Аще имения и злата хотят, дадите им елика имать. Апостол Павел глаголет [к рим., зач. 101]. Воздадите убо всем должное, емуже урок, урок; емуже дань, дань; емуже страх, страх, и прочее. И паки той же [к колосаем, зач. 260]. В премудрости ходите ко внешним, время искупующе. В страдании святаго мученика Евтихия пишет [минея четия, киевская, апреля 9]. Иулиан царь Отступник, на кесарийских жителей християн верных, дань велику наложи; святый же Василий Великий, архиепископ тогда в том городе бывый. честь оному царю воздаваше, и на сретение его изыде с хлебами. Подобне и в житии святаго Феодора Едескаго пишет [июля, 9]. В та времена християне, под рукою агарянскою быша; християне же им дающе многия дани, живот свой и веру искуповаху. Книга о Вере [глава 2, лист 28]. Яко стадо Божиих овец, в Грецыи живущих, аще телесную чувственную, от телеснаго чювственного врага неволю терпят: но веру истинную, и совесть чистую и нескверну, Царю над всеми цари и Богу сохраняют, ничесоже бо турцы, от веры и от церковных чинов отъимают, точию дань грошовую от греков приемлют. [ниже]. Но рекут римляне [лист 185, обор.], яко патриарси со всем духовенством турскому дани дают: и то правда, нечему тому дивитися, аще и дают. да волю имут свое благочестие содержати. зане и Христос Бог, святому Петру, за себе и за его, повеле дань воздати, несть раб болий господина своего. Книга Апокрисис [часть 4, раздел 3]. Греки у турок купуют себе покой, купуют вольность церковную, купуют вольность благочестия, для души своея. Из жития преподобнаго Корнилия Выгорецкаго, [о прежних поморских отцех повествует]. Прорече блаженный Корнилий, яко на всех выгорецких и окрестных жителех, востребует царское величество дани. и вси выгорецкопустыннии жители, подвержет под иго мирских судищь. и сие блаженнаго Корнилия пророчество не солгася. [ниже]: ибо вси выгорецкопустыннии жители, под иго данничества, и мирских судищь подвержены. и от лета 7214 [а по гражданству 1710 года], во всяком даннословии, не точию мирских сравнительне, но и сугубо, содержания ради благочестия древняго определяются. От слова надгробнаго, Андрея Дионисиевича, Петру Прокопьичу. Бысть же сие общежительство ведомо царскому величеству, и властем градодержательным. и милость общежительству сему, исходатайствовася, по Христовым и апостольским преданием, повелевающим Бога боятися, и царя почитати. и Божия Богови, и кесарева кесарю отдати. сия вся Богу помогающу, благое от Божиих писаний, и благопокорное разсуждение общежительство сие источает. Святаго Петра Александрийскаго [Кормчая, правило 11]. Аще нецыи даша злато да убежат мук, несть им греха. изволиша бо злато погубити, нежели душу свою. глаголет бо и писание, избавление мужеви свое ему богатьство. Тое же правило и в Никонове. Сребренники убо давшим, за еже без забавления им быти от всякия злобы, несть греха привести. тщету убо имению подъяша; да не душа своя отщетят или погубят. [ниже]: исполниша бо писанное; яко избавление мужеви души своей богатство.

Еже при том подписок вредных остерегатися, и за сия наказывати.

Книга Никона Черныя горы. Златоуст [слово 17]. Отдадите рече кесарева кесарю; она глаголати разумей точию, иже ничто же благочестия повреждающа: яко аще что таково будет, не к тому кесарево, но дияволия дани суть сицевая. Тамо же выше. Суть предели рабом от Бога уставлени; и даже до чесого хранити их законоположено есть. егда бо господие повелевают угодно Богу, последовати лепо есть и послушати. инакоже не к тому. [ниже]: се бо назнаменовает глаголя, не бывайте раби человеком, сиречь, не повинуйтесь человеком, безместная повелевающим. Тамо же от старчества. Рече некто от святых, яко князи и владыки, над телом токмо имеют власть. [ниже]: аще на губительство, и на некая безместная и душевредная дела повелевают нам, не подобает повиноватися им. В той же книге в надписании [слово 63]. Аще кто некая от божественных правил истощевати начнет, повинен есть по таковому правилу и запрещение приимати.

 

СТАТИЯ, 51.

 

Еже со всеми правоверными християны мирно пребывати, и раздора без сущия вины и безчинно и без терпения не вчиняти.

Евангелие от Иоанна [зач. 48]. Рече своим учеником, мир Мой оставляю вам, мир Мой даю вам. И о сем познают вас вси, яко Мои ученицы есте, аще любовь между собою имате. Апостол Павел ко евреом [зач. 332]. Мир гоните со всеми и святыню, без нея же никто узрит Господа. Той же к солуняном [зач. 73]. Молим же вы братие, вразумляйте безчинныя, наказуйте малодушныя, долготерпите ко всем. и паки блюдитеся раскола. Ис книги Завещаний апостольских [книга 6-я, глава 1]. Прежде всех сохранитеся о епископи, лютых и вредливых ересей, бегающе их, яко огня паляща приближающимся им: бегайте же и раздирания: ниже бо к неподобным ересем достоит накланяти ума, ниже единоразумным отлучатися достоит за любоначалие. Кормчая [святых апостол правило 31]. Без вины отторгнувся епископа, и иную поставит церковь, и с приемшими его да извержется. Толкование. Аще который презвитер, без вины епископа своего оставит; не познав того согрешивша что в правоверии, или что в которой правде; и отшед, и собор людей о себе собрав, и церковь другую сотворит; да извержется яко властолюбец, сам же, и последовавшии ему причетницы, простии же людие да отлучатся. Матфей правильник [состав с, глава 12]. Явственно убо от сего правила представляется, никаковым должным быти обинованием, иже от своих епископ отдирающихся; но токмо зазирающих, яко нечествующим и обидящим. иного же ради образа, аще и ина горшая глаголются о епископе, или презвитере, несть праведно онаго приобщения отступати, прежде даже известным истязанием суд того низложит. [ниже]: сие и 1-го, и 2-го собора, 13-е правило. якоже еретических плевел прозябение рече, ножем духа искоренения самого изрезашася. сице и раздорник неистовство, Христово тело делити начинающих, мы спрятающе повелеваем: яко аще кий презвитер, или диякон, о некиих согрешениих, своему зазрев епископу. [ниже]: отступати того приобщения дерзнет, прежде соборнаго разсуждения, и сего имя в божественней службе не возносит; сему подлежати извержению повелеваем. Тактикон, Никона Черныя горы [от послания 23-го]. Иже в Константине граде собор изметает священники, не поминающих своя епископы, ради греховнаго извета, прежде соборнаго осуждения. [ниже]: изри Феофила онаго Александрийскаго, в колику обратися злобу на иноки, яко 7000 постник православных подвижник, и клети их с законными тем книгами пожже, и божественнии отцы наши не отступиша от того, чести же и повинования: и не исполу якоже ныне зрим, яко ничтоже ради сущих извет, и за самая ядомая и пиваемая, и елика таковая. Из апологии святаго Иустина Философа [апостол толковый, зач. 195]. Ибо есть и чин терпения злых в церкви святей. есть же паки чин казни и обличения и отлучения от церкви. [ниже] соблажняются не хранящии меры, иже нецыи зрят на повеление, еже принуждает казнити согрешающих, и не давати святая псом. и преслушающаго церковь, имети яко язычника и мытаря. и тако волнение творя, и мир в церкви святей возмущают, хотящии прежде времени исторгнути плевелы. сим же соблазном ослеплени суще, сами вскоре от единения Христова отлучаются. [ниже]: ибо и в тайне входящих злых в церкви обретаемо; их же церковною казнию наказати и смирити не мощно: обаче же и в сердце наше не внидет сие дерзновение; имже быхом восхотели от них разлучтится, да грехами их не осквернимся. [ниже]: яко злым в церкви смешение с добрыми, даже до кончины мира, и до дня суднаго будет. и яко добрых во единости с ними сущих, и дел их не творящих, ничесоже вредят. но понеже тии иже церковь хранят, власть имеют и не смущающи покоя церковнаго казнити злых. Преподобнаго Никона; от главизн преподобнаго Иоанна Дамаскина [книга 1, слово 2]. Самопретыкатели, ересь 101-я. Сии убо по всему правоверни бывают; безстрашно же соборныя церкве и причащения, виною неких худых вещей, себе отсецающих. [ниже]: понеже церковнии питомницы священныя убо почитают законы. [ниже]: Раздорницы и славоискатели, ересь 102-я. Иже славу свою ищуще, правде же Божией не повинуются. [ниже]: невежди же не какови суще, разделяются соборныя церкве. Отлучившиися соборныя церкве, сии именуются авдиане, иже веру имут, якоже соборная церковь: множайшии же от них в монастырех пребывают, и со всеми на месте не молятся, и хулят епископов наших богатьства ради, другия же ради инех вин. Святый Златоуст [к римляном, беседа 32]. Сие бо есть наипаче развращение церкви, еже разделитися. сие оружие дияволе; сие вся горе и долу творит. донележе бо есть соединено тело, не может входа имети сатана, но о распри и раздора соблазна. Там же. Ничтоже тако раздражает Бога, яко еже церкви разделятися. паче всего Бог раздражается о раздоре церковнем. аще и безчисленная будем содеявше благая, от иже тело Его пресецающе исполнение церковное. Той же к ефесеом [нравоучение 11]. Сего ради предглаголю и засвидетельствую, яко от еже в ересь впасти, еже церковь раздрати, не меньшее есть зло. Там же. Муж же некий святый рече, яко ниже кровь мученическая может сего загладити греха.

Еже и кроме известныя вины и безчинно никого не отлучати.

От свитка новых заповедей, Иустиниана царя [Кормчая, глава 39, лист 321]. Всем же епископом и презвитером отрицаем отлучати кого от святаго общения, прежде даже вина не явится, ея же ради церковная правила тому быти повелевают. аще же кто чрез повеления сия, некоего отлучит от святаго общения; той убо яко без правды, от общения отлучен быв, разрешается от отлучения от большаго святителя, и святаго сподобляется общения. отлучивый же его без правды, от святителя под ним же есть сам отлучен быв, на елико ж оно время свесть. Матфей правильник [состав а, глава 19]. Яко не подобает кроме известныя вины отлучати кого. отлучивый же неразсудне и по гневу, сам повинен мучению. В Номоканоне к концу, святаго Никона от послания к Енклистию. Виждь убо отче мой, яко божественная писания с божественными канонами определяют, яко неправедно налагаемая запрещения у Бога не связуют, аще я и архиерей положит, кольми паче аще меньший. глаголет святый Дионисий: иже убо неразсудным изречением, и невоздержным сердцем, от верных кого отлучи, сего не токмо не коснуся; но и на главу его возвращается, якоже и святии собори провещавают: но сия запрещения еже по божественным правилом наложишася, а не по своей воли. безсловесне бо казнь налагаяй, сам отлучается, и сам сию казнь должен есть соблюдати, якоже божественнии и святии правила усмотряют. [ниже]: Аще убо архиерей чрез волю Божию кому запретит, Бог ему не последует. [ниже]: Отлучая иже кого от церкве, прежде нежели вина явится по правилом, разрешается от большаго архиерея, сам же отлучится. да еже неправедно сотвори, праведно претерпит. Тамо же в Номоканоне о отлучении безсловеснем [правило 120]. Отречено есть епископом отлучати когождо от святаго причастия, кроме благословныя вины; отлучаяй же безсловесне, лето едино от святаго причастия возбраняется.

 

СТАТИЯ, 52.

 

Еже с согласием монастырским и феодосиевым общения не имети.

Понеже в сих обоих согласиях, обретаются многия церковныя вины; еже противно святому писанию, и прежних наших отец содержанию. и противно сим написанным статиям, много обоя сия согласия, мудрствуют и действуют, и в том от прежних наших отец, довольно в прежняя лета обличаеми и наказуеми бяху. но не послушаша: и до ныне в тех своих несвойственных чинех и обычаех пребывают, и к православному сему исповеданию и содержанию с нами усердия и усвоения не показуют. тем же таковых святое писание, неприобщенными ко святей церкви извествует. и в раздоре и в ересях быти счисляет. Святый Златоуст глаголет [на послание к ефесеом, нравоучение 11]. Две бо суть разделении от тела церковнаго: едино убо, егда изсякнем любовию, второе же, егда недостойная творити ко оному телу дерзнем: обоими бо отлучаем себе от исполнения. Кормчая в Каталоге [лист 674]. Три чины неприобщающихся соборней церкви, еретики, раздорницы, и подцерковники. Раскольницы же суть [лист 225], иже от церкве себе отставльше, якоже и наватиане [лист 35 обор.], глаголемии чистии, не приемлют покаяния обращающагося от грех, и прочее. Четыредесятницы [лист 88], иже и в 14 день луны празднуют пасху, и средницы, иже в среду мяса ядят, и прочее.

[сие вне сих статей писано]:

В Никонове же, Тимофея презвитера великия церкви и сосудохранителя пречистыя Богородицы в халкопратиях, о различии приходящих к благочестивей нашей вере [слово 63]. Три чины обретаем приходящих, к святей Божией соборней и апостольстей церкви. [ниже]: и первый чин есть, требующих святаго крещения. Вторый же, некрещаемых убо, помазуемых святым миром. И третий, ни крещаемых ни помазуемых, точию проклинающих свою, и всяку ересь. Тоя же книги. [ниже]: от 1-го правила Великаго Василия. Тем же ова убо ереси именоваше. ова же раздоры. ова же зборца. ереси убо еже всячески отверженныя, и по вере отчюжденныя. раздоры же, иже вин ради некиих церковных, и о взыскании не нарочитых, друг на друга негодоваше. сборца же, собрания от непокоривых презвитер, или епископ, и ненаказанных людей бывающая. яково аще кто в согрешении истязан быв, удержан бысть от службы, и не подклонися правилом, но себе оправди наместничество и службу. и отъидоша с ним нецыи, оставльше соборную церковь. сборец таково есть. раздор же, еже о покаянии несогласне имети к сущим от церкве. ереси же якова есть, манихейская, и маркионитян, и прочих таковых. [ниже]: изволися убо древним еретическое крещение убо отнюд отметати. раздорных же, яко и еще от церкве сущих приимати. сущих же сборцах покаянием достоим и обращением удобрившимся. [ниже]: внегда раскаются, в той же приимати чин. [ниже]: а иже от церкве отступльшии, не к тому имеша благодать Святаго Духа в себе. оскуде бо подаяние, внегда пресещися последованию.

Того же преподобнаго Никона [слово 57]. Ибо всяко уклонение от православных велений, отпадение есть святыя собрныя и апостольския церкве. В той же книге, от главизн преподобнаго Иоанна Дамаскина [слово 2]. И разумоборцы, ересь 88. Иже всяцем разумом християнству противящеся. [ниже]: Обычаепретыкатели, ересь 96. Иже во обычаех, сиречь, деланиих претыкающеся; некия убо обычаи похвальныя преобидяще, некия же укорны яко благи проходяще. [ниже]. Кривосказатели, ересь 97. Иже божественное писание накриво сказующе. [ниже]: Лампетиане, ересь 250. Иже глаголют, не подобает по нужди что творити християнину. [ниже]: сии вси не веры ради в ересех счеташеся, не злаго ради делания. раздраша бо и сии церковь, якоже и иже о вере погрешающии, учаще от своих помысл, а не иже от божественных писаний нам преданная. И того ради с таковыми заповедует святое писание, общения не имети. Евангелие в неделю всех святых [от Луки, зач. 69]. Христос Бог во святом евангелии глаголет; Мните ли яко мира приидох дати на землю, ни, глаголю вам, но разделения. От толкования. Не везде бо есть добро соединение, но бывает иногда и разделение добро. ниже всякое умирение похвально, но бывает множицею и мир на повреждение, и далече божественныя любве отгоняющь. егда убо миримся о разрушении истины, прегрешно есть и неподобно зело. таковый бо мир не прииде Христос вложити; но сопротивное паче хощет нас друг от друга добраго ради отлучатися. не всякое бо мирование и совокупление добро; но бывает егда и распря и разлучение, велие и божественно дело: никтоже убо сим образом любовию, да прилежит к лукавым, ниже мира имеет с ними. Святый апостол Павел глаголет [к Тимофею, зач. 287]. Аще кто инако учит, и не приступает к здравым словесем Господа нашего Исуса Христа, и учение еже по благоверию. [ниже]: отступай от таковых. Той же [к римл., зач. 110]. Аще возможно еже от вас, со всеми человеки мир имейте. На сие святый Златоуст [беседы, лист 387]. Добре же еже по сих яви рек. аще возможно. есть бо негде невозможно. яко егда о благочестии слово бывает. [ниже]: аще негде благочестие вреждаемо увидиши, не предпочитай соединение паче истинны, но стани добре даже до смерти. Святый Григорий Богослов, о пришествии епископ [слово 14, стих 14]. Ниже миримся на слово истинне, оставляюще что за славу кротости, ни бо зле доброе ловим: но миримся законы опрущеся, и внутрь наших устав и правил духа. Толкование. Не хощу же миритися на слово истинне, сиречь, с хулящими слово истинное, ниже умолчю еже обличати их, за еже именоватися кротку. не хощу бо злом доброе уловляти. да не будет нам по законех Божиих, и внутрь наших християнских устав и правил духовных пребывати. Даниила митрополита русскаго [Соборник, слово 1]. Аще кто от Святаго Духа положенныя законы развращает, и древния отеческия благия обычаи отмещет, и света благаго учения не приемлет. нововводя узаконения, яко и древнии еретицы. [ниже]: к таковым лучьше есть мира, отлучающаго нас от Бога похвальная брань. Тамо же. Аще не приемлют наказания по мнозем врачевании, почто с ними совокупляешися, что ради им друг бываеши: почто от них не отлучаешися и не хранишися.

О сообщающихся с таковыми.

В книге о Вере пишет [лист 230]. И кто им последует, тоже на души своей подъяти имать зане кто приобщаяся ко отлученным, и той отлучен да будет. Собора Карфагенскаго [Кормчая, правило 9]. Приобщаяся неприобщенному, сам неприобщен.

Еже и спасение и тайны получити у них не обнадеживати.

Книга Пчела [слово 2]. Никтоже да не имать надежду спасения, аще порок и мал имать в вере. Златоуст о схизматиках церковных [на послание к ефесеом, нравоучение 11]. Что глаголеши, таяжде вера есть, православни суть и они: чесо ради не суть с нами; един Господь; едина вера. едино крещение. аще еже тех добре суть, то наша зле. Той же. Тайны без единости церкви християнския ничесожы суть. [ниже]: ибо церковь Божия есть, якоже глаголет писание, вертоград заключен, и источник запечатлен. и того ради невозможно нигде же тайне совершитися, токмо во единости церкви Божия. ея же между сонмищи и еретиками несть, тогда и тайны в них ни единыя несть. разве крещения святаго; еже тако достойно есть, яко крещаемаго от них, егда приходит к соединению церковному, паки крестити не требе. Аще же не приидет ко церкви, ничесоже ему несть полезно.

Еже и в судбы Божии их оставляти, [то есть излишно не судити.].

От жития преподобнаго Максима Исповедника [минея четия, генваря 21]. Глагола преподобный, иже единовольники, сами от себе прокляты. и от поместнаго собора бывшаго в Риме извержены. и священства отчюждены. тии кая совершают таинства, и прочее. глаголаша ему пришедшии: что убо ты сам спасаешися, а вси погибают. глагола им святый; егда вси людие в Вавилоне, телу златому поклоняхуся, святии трие отроцы, никого же осудиша в погибель. не смотреша бо инех деяния, но точию себе самех. [ниже]: да не даст убо и мне Бог кого судити, ниже глаголати, яко аз точию спасуся. елико же могу изволяю умрети, неже смути мою совесть, согрешивши чим любо противу православной вере. Из ответов прежних отец поморских. Вопрос Неофитов, 71. Отнележе начася правление книжное, от тех времен даже и до ныне, всякаго чина и рода. [ниже]: есть ли им от Бога оставление грехов, или помышляете отходити на муки вечныя. Ответ. Излишнаго и неповеленнаго во святом писании, Господь Исус Христос, Судия есть живым и мертвым. [ниже]: мы же древлецерковныя святыя уставы, непреложно соблюдати усердствуем, во спасение душ своих, а не другия судити дерзаем. Из ответов святаго Афанасия Великаго, ко Антиоху. Вопрос, 115. Еда вси еретицы в погибель отходят. Ответ; Есть ересь и ересь, и есть суд и суд. [ниже]: ин бо грех епископа, прельщающаго люди. и ин клирика могущаго навыкнути православныя веры, и ин не могущаго; и ин проклинающаго истину, и противу борющася нам, и ин ведением блазнящагося, и ин в неведении; и ин паки всех легший; яже весть известно, имеяй судити вселенней вправду.

И сие еже в судьбы Божии сих оставляти, он написа неправильно, но по человекоугодию, понеже в судьбы Божии оставляются вещи неизвестныя, и церковью еще не осужденныя, еретицы же новомонастырцы и феодосиевцы уже осуждены быша. А за таковое его к ним снизходительство, московския отцы его зазреша, и в показании своем обличиша. зри на листах.

 

СТАТИЯ, 53.

 

Еже приходящих от сих согласиев крещенных под покаяние с постом приимати.

Тимофея презвитера великия церкве, о различении приходящих от ересей ко благочестивей нашей вере [зри выше. сие ж. из Никон. писан. Кормчая, лист 634]. Три чина обретаем приходящих, к святей Божией соборней и апостольстей церкве. [ниже]: и первый убо чин есть, требующих святаго крещения. Вторый же не крещаемых убо, но помазуемых святым миром. третий же ни крещаемых ни помазуемых, но точию проклинающих свою и всяку ересь. Матфей правильник [от 7-го правила 2-го всел. собора, состав а, глава 2]. Арияны убо и македонианы и наватианы и левыя и четверодесятники, иже и средники, и аполинарианы, понеже точно нам, божественным совершаются крещением, не мнится быти подобно покрещевати. 6-го вселенскаго собора [Кормчая, правило 95]. Арианы и македонианы и наватианы несторианы и четверонадесятники. [ниже]: и евтихианы, и иже от подобных им ересей. [ниже]: помазуем святым миром. [ниже]: От толкования. Несториане же и евтихиане и севериане, и от инех ересей, и подобнии им свою ересь и иныя вся прокленше, и тем токмо довольни бывше, на общение приятни суть. Матфей правильник [состав а, глава 2]. Возмнеся убо изначала еретическое крещение отметати, приимати же раскол сотворших, чрез собория же творящих, достославным покаянием обращение показавших, соединяти паки церкви. Кормчая старописменная [глава 92]. Арианы и македонианы и наватианы и четверонадесятницы, рекше средницы, и аполинариане приемлем, вдающе писание. и проклинающе с своею ересию, вся еретики. [ниже]: первое убо подобает, егда хотят приведени быти ко правой вере, поститися дней 10, или 15. и упражнятися им на молитву вечер и заутра и полудне, и учаше псалмы, яко и оглашенныи. и тогда сподобитися правоверныя веры. [ниже]: и помажет его святитель миром, и по сих паки молится; и потом приобщится, и приимет заповедь 7 дней мяса не ясти, не умывати лица, и прочее. Матфей правильник [состав е, глава 4]. О них же писание не лежит закон, сохранити подобает навычение и обычай, и последовати подобает множае приближающимся, и уподобление имущим ко искомому. Понеже и в 7-м правиле святых апостол, отвергшихся и обращающихся, подобне повелевает с миропомазанием приимати. В Потребнике же, в соборном изложении. Постом и проклятием ересей, и миропомазанием таковых исправляти. Преподобнии же отцы нерукоположении, постом единем и покаянием токмо таковых исправляху. Якоже преподобный Пахомий Великий, отвергшагося покаянием токмо исправи. И преподобный Иоаникий Великий, от иконоборныя ереси некоего отступльша, епитимиею обложив исправи. И старец оный [Пролог, генваря, 16 день], иже отвергшемуся Христа и крещения, и обетования мнишескаго, повеле поститися 3 недели, и прочее. И по сим подобным свидетельством; тако и у наших отец положися, покаянием единем и постом исправляти приходящих таковых, от средняго и меньшаго чина ересей. [то есть от монастырских и феодосиевых] вместо полнаго чина, бывшаго во время священных чинов; еже и тогда с достославным покаянием и с постом, таковии приемлеми бяху. [якоже зде показуется] точию при том и проклятие ересей и молитвы священническия, и прочее действовашеся. но понеже преподобнии отцы нерукоположении, и без сих совершенств человеческия души очищаху. Подобне и прежния поморския отцы, в писании к феодосиевым показуют; еже вместо священнических сих молитв, и заклинаний и миропомазания, плачем и воздыханием ныне милость испрошается. Тем же и преподобный Феодор Студит глаголет; вся елика твориши, или глаголеши, имей свидетельство от святых писаний, или от отеческаго ти обычая, кроме преступления Божиих заповедей. но еще же и от общаго согласия и совета, таковый чин утверждается. Понеже и в Помории прежде, и в прочих странах мнози согласишася уже, тако сих приимати, якоже писмы свидетельствуют. Тем же и о сем паки, той же Матфей правильник, тамо же извествует: еже и разумнейших купно и множайших совет да держится; тогда держимся обычая града, или епархии, егда междусобно стязание то утвердит. Дозде Матфей правильник.

Еже прочих кия в больших винах у них обрящутся, сих с вящьшим наказанием приимати.

От изглашения преподобнаго Никона Черныя горы. от 6-го вселенскаго собора [Кормчая, лист 639]. Аще кто обрящется кое правило истощавая, или возбранити начиная; повинен будет по таковому правилу якоже то сказует, и запрещение приимати.

Такоже и зде, он в силу своего к феодосиевым присвоения, определенный на них пост отметал, и якоже сам приимал их иногда с недельным постом; иногда же и без онаго, тако и в писании статии сея, положил пост неопределенный. А в подтверждение сего он и представи неколико от божественнаго писания свидетельства, вовсе к сему неприличнаго. первое: святии отцы аще и действоваху тогда. [в отношении поста] над приходящими различно, но они разсуждали время и вины и различие лиц, на коих тогда определьнаго устава негли еще не бяше. он же сего святоотеческаго разсуждения отнюд не соблюдаше, но вопреки церковному о феодосиевых уставу самочинно действовавше. ибо они аще в начале некогда и приимались предками нашими различно, обаче впоследствии отцы наши дважды соборне положили на них пост четыредесятный, он же сие отвергнул, за что и был от современным ему московских отец зазрен и обличен. чти в показании их на листах. Аще убо ныне и под крещение определены онии феодосиевы, обаче не непотребно и тогдашнему о них положению, развращенное его действие показати, да не неведением и самочинием паки нецыи к другим в тоже увлекутся.

 

СТАТИЯ, 54.

 

Еже за соединение и общение с сими согласии по разсуждению наказывати.

В Потребнике в соборном изложении в чине от различных отвержений приходящим. Повелеваем прежде поститися, и потом пред церковию проклинати ереси, таже миром таковых помазывати. [ниже]: третий чин ни крещаемым, но миром помазуемым, иже быша благоверни. и аще неразумием или небрежением водворятся с жиды, или с срацыны, или с латыною, или со иными еретики; и яст и пиет с ними, и прочее. [ниже]: и таковым проклинающим свою, и иную ересь. [ниже]: и омывшеся от таковых ересей, чистым покаянием, и молитвою презвитерскою. [ниже]: став пред церковию. и глаголет во услышание всем проклинанием закона и обычая тоя земли и веры и ересей идеже быв. и потом молитвы. [ниже]: и разсуждением духовнаго си отца приимет заповедь со епитимиею, и проч. вместо же таковых полных чинов, еже с проклятием ересей, и с молитвами священными действовати, преподобнии отцы нерукоположении, епитимиями токмо таковых по разсуждению исправляху, якоже на прешедшую статию показася. и потому и у нас в сей статии, по разсуждению и по обычаю отец наших, и по свойству ересей, тако исправляти таковых положися: якоже в книзе Зинаре, во главе 76, за сообщение и с великими еретики, малую и большую епитимию по разсуждению повелевает налагати. то по сему тако и у нас содержится, якоже в сей статии написася.

 

СТАТИЯ, 55.

 

Еже умерших в сих согласиях, в помяновение не приимати.

Святых апостол Петра и Павла [Кормчая, правило 14]. Творити усопшим третины и девятины, и 40 дней, и прочее. [ниже]: сеже о благоверных глаголем. Третины же того ради творим [книга О вере, глава 13, лист 110], яко той человек иже преставися крещен бяше во имя Отца и Сына и Святаго Духа. [ниже]: и во единой святой соборней и апостольстей церкви, до конца живота своего, благообразне и терпеливе пребывал. В книзе Зерцале душезрительном [слово 5, глава 8]. Ведомо же буди, яко тайныя службы и жертвы бываемыя о согрешивших, грех иже к смерти всуе бывают. [ниже]: якоже к смерти грех есть неверие; и еже не каятися. [ниже]: и еже еретику умрети в ереси некоторой. В книге прподобнаго Никона, в надписании слова 26, и в Кирилове книге напреди [лист 15]. О еретикох живых сущих токмо молити, о умерших же сих не молити. тако бо от святых отец указася. Бароний [лето Господне 1110]. Король Германии просил папу Пасхалиса втораго, дабы повелел ему тело отца его, [короля Генрика третияго. который в раздоре с папою умре] погребсти не соизволи, на сие пишущь. яко писание святое, и чюдеса Божия не попущают: и яко с теми умершими не имамы сообщения; иже с нами живи суще, не хотяху имети его.

А еже о неких просто во общении с сими согласии умерших, впредь обще посоветовати.

О сем паки помяновенный Матфей правильник глаголет. О них же писание не лежит, сохранити подобает навычение и обычай, и последовати множае приближающимся, и уподобление имущим ко искомому. аще же ни се будет, разумнейших купно и множайших совет да держится.

 

СТАТИЯ, 56.

 

Еже и с прочими неправо раздирающимися и неправомудрствующими и действующими. по первом и втором наказании общения не имети.

Святый Иоанн Златоуст на послание к ефесеом [нравоучение 11]. Две бо суть разделении от тела церковнаго. едино убо егда изсякнем любовию. второе же, егда недостойная творити ко оному телу дерзнем; обоими бо отлучаем себя от исполнения. Матфей правильник [состав с, глава 12]. Первое убо поученьми нудитися подобает, еже раздоры творящих возвращати ко единомыслию, непокаряющихся же изметати, или отлучати. ащели же и сице пребудет высокопарствующе, и крамолы творяще, подлагати сих анафеме. и яко уды гнилы, от здравствующаго телесе церковнаго отсецати. Сему же подобно и в Кормчей [святых апостол правило 31]. Без вины отторгнувся епископа, и ину поставит церковь, и с приемшими его да извержется. [ниже] От толкования. Таковый же союз должен есть прияти дващи и трищи, помолшу его епископу его. Тоже и 5-е правило собора Антиохийскаго пишет. И Сам Христос Бог во святом евангелии глаголет [от Мф., зач. 75]. Аще согрешит к тебе брат твой, иди и обличи его между собою и тем единем. [ниже]: и поими с собою паки единаго или два. [ниже]: аще же не послушает их, повеждь церкви. аще же и церковь преслушает, да будет ти яко язычник и мытарь. Матфей правильник [лист 173]. Раздорник церковный подобен еретиком. Апостол, к Титу [зач. 320]. Еретика же человека, по первом и втором наказании отрицайся. Златоуст [на послание к ефесеом, нравоучение 11]. Сего ради предглаголю и засвидетельствую, яко от еже в ересь впасти, еже церковь раздрати, не меньше есть зло. Той же. Сия же мною реченна, ко иже неразньственне вдающих себе церковь раздирающим. аще убо и догматы имут противныя. и сего ради неподобаше со онеми смешатися. аще же таяжде мудрствуют, много паче. почто; зане любоначальства есть недуг. не весте ли что пострада Корей и Дафан и Авирон; убо ли тии сами, ни ли и сущии с ними. Соборник. И аще кто от Святаго Духа положенныя законы развращает, и древния отеческия благия обычаи отмещет, и света благаго учения не приемлет, нововводя узаконение, яко древнии еретицы, от десна подукрадающе, и погубляюще род человеческий. к таковым лучьше есть мира отлучающаго от Бога, похвальная брань, и прочее. Собора Лаодикийскаго [правило 33]. С еретики и со отвергшимися своею волею от соборныя церкве, сам отлучен да будет. Матфей правильник, правило 33, собора Лаодикийскаго. С еретиком или раздорником, отнюд не повелевает нам молитися.

 

СТАТИЯ, 57.

 

Еже приимати от таковых раздирающихся и отлученных, с прощением, или с наложением поста по разсуждению.

Святаго Василия Великаго [Кормчая, правило 1, от толков.]. Раскольницы же. [ниже]: аще обратятся к соборней церкви, яко крещени приятни бывают, токмо святым миром помазуются. подцерковницы же. [ниже]: преложьше себе и покаянием достойно и обращением удобрившеся, совокупляются паки яко едино тело к соборней церкви. В книге Никонове от того же правила [слово 63]. Раздорных яко и еще от церкви сущих приимати крещение. сущих же в зборцех, покаянием достойно и обращением удобрившимся, совокупляти паки церкви. В Матфеове от того же правила [состав а, глава 2]. Приимати раскол сотворивших крещение. чрез собория же творящих, достославным покаянием, обращение показавших, соединяти паки церкви, и прочее, еже выше, на 53-ю статию написася. прочих же в важнейших отлученных, како приимати, о сем по качеству вин, во святых правилах именно извествуется. И преподобный Никон пишет [слово 63]. Аще кто некая от божественных правил истощевати или возбраняти начнет, повинен есть по таковому правилу и запрещение приимати. И с тем в нем же согрешает [Кормчая, лист 639], да уврачюется.

 

СТАТИЯ, 58.

 

Еже умерших в раздоре и во отлучении во всяких винах, по писанию же и по разсуждению поступати.

И святый Златоуст на послание к ефесеом [нравоучение 11]. Две бо суть разделении от тела церковнаго. едино убо, егда изсякнет любовию. второе же, егда недостойная творити ко оному телу дерзнем; обоими бо отлучаем себе от исполнения. Той же на послание к Тимофею [зач. 278]. Творит бо раздоры и житие нечистое. Матфей правильник [состав с, глава 12. Первое поученьми нудитися, иже раздоры творящих возвращати ко единомыслию, не покаряющихся же, изметати, или отлучати; по сих же подлагати анафеме. От жития преподобнаго Венедикта [минея четия, март 14]. Две некия девы, рода велика; живяста в дому своем постнически, житие убо имяста чисто. язык же неудержан, иныя бо осуждаста, оглаваста и укоряста. очесом уведав преподобный Венедикт. посла к ним глаголя; исправите язык ваш, ащели ни, то от божественнаго причащения отлучю ваю. они же от своего безумия не отступиста, и ниже ответа сотвориста наказанию отеческому. и по малех днех умроста обе, в девьстве чистом, и в церкве вкупе погребене. и егда совершашеся божественная служба. и диакон возглашая повелеваше оглашенным исходити. видене бысть нецыими, обе девы тыя исходящия из гроба своего, и из церкве. се же бываше по вся божественныя службы. егда же о том возвещенно бысть Венедикту святому. [в книзе Никонове, в 56-м слове пишет. Яко питательница дев онех прииде и припаде к ногама его, прося помощи девам онем]. сожалися онею, и взем просфиру посла в церковь ту; повелев принести святую жертву, о душах дев онех: и по принесении жертвы, нектому видены бысте исходящия вон. и веруемо бе, яко прощение от Бога прияста, святою жертвою и молитвами преподобнаго. Ис книги Никоновой, святаго Анастасия Синайскаго [слово 52]. Вопрос. Которая согрешения прощаются по смерти, службами и молитвами и милостынями бывающими о усопших. Ответ. И о сем паки Великий Дионисий глаголет; яко аще мала некая, и худа суть согрешения умершаго, приемлет некую пользу, от иже о нем сотворяемых. ащели тяжка и люта суть, затвори Бог о нем. Из Зерцала душезрителнаго, Григория Нискаго [слово 5, глава 8]. Ведомо же буди, яко тайныя службы и жертвы бываемыя о согрешивших, грех иже к смерти всуе бывают. [ниже]: грех к смерти есть, егда нецыи согрешающе, и не исправлени пребывают, якоже к смерти грех есть, неверие и отчаяние. и еже не каятися, и хула еже на Святый Дух, и еже отвергнутися Христа, и еже еретику умрети в ереси некоторой. Ис Потребника чин исповедания. Аще убо християнин без покаяния умрет, то не достоит иерею над ним пети, ни приношения зань принести, яко не исполнил закона Божия, и веры християнския. Номоканон [правило 76]. Инок или инокиня, аще приидут во общение брака, сиречь, аще оженятся. [ниже]: донележе не распустятся, в церковь да не входят. [ниже]: ащели случится им умрети без покаяния, да не погребают их, ни да творят им помин, ибо чюжди суть християн. Зинарь [глава 81]. А иже аще идет на прелюбодейство, или на блуд, или на крадьбу, или на разбойничество. аще от сих какова любо убиют, и умрет; да не поют его, и ни каковы же памяти творити ему. И прочее к сим свидетельствы чти выше на статию 55-ю написанную.

 

СТАТИЯ, 59.

 

Еже от неизвестных и от прочих стран, без разсмотрения в соединение не приимати.

Ис книги разговоров Валдемаровых. от разговора Дмитрия Франзбекова, да соборнаго ключаря Ивана Наседки с лютеранами. [ниже]: Да немчин Юрий Лот говорил нам, для чево нас не пущают в церковь вашу соборную. [ниже]: и ключарь ему говорил. и благочестивыя которыя християнскую веру держат без еретичества; и как приезжают от многих стран разныя языки, в царствующий град Москву; и привозят от своих от начальствующих ими грамоты, какой веры они люди; християнских ли законов, или еретических вер. и буде только в грамотах тех писано, что християнскую веру прямо держат без еретичества. и с такими людьми в приездех их не бывает без церковных начальников, а бывают с ними сановники большия и средния и малыя. и о тех людех по чином их бывают свои грамоты, поставления их в каковой чин ни есть; и грамотам их зде, царственная держава разсмотря, в церковь Божию соборную молитися и служити их пущают. а кои будут люди, с примесом еретическим, и таковых людей не токмо в церковь Божию не пущают, но ни в дом святительской, и с нами православными християны, никакова ни с кем соприобщения не имеют. токмо по царской державе, как в государстве о том строй ведется, и потому им честь бывает. Ис Потребника соборнаго изложения святейшаго Филарета патриарха, указ о белорусцех. Божией милостию аз смиренный Филарет патриарх: [ниже]: со всем освященным собором советовал есми, и приговорили вкупе на соборе; како изыскивати о самех белорусцех, иже приходят от польскаго и литовскаго государства, в православную веру нашу, в державу нашу московскаго государства, и в сея великия Росии; хотящих быти с нами вкупе християне. [ниже]: како действовати о них еже к нам просвещенным сочетовати их. понеже аз смиренный Филарет Патриарх, егда бых в польском и литовском государстве, и многая в них видех несогласия церковная, в самех тех християнех, еже суть белорусцы в них нарицаются: и нарицаются убо християне, а правила святых апостол, и святых отец, седми вселенских, и девяти поместных соборов, и инех святых отец предания, мнози в них не соблюдают. и во едином убо дому у них, у отца с детьми, и мужа с женою, и у господина с рабы, веры три или четыре: и ов держит веру християнскую, ин же папежскую, и ин люторскую, [и прочия]. и вкупе убо на единой трапезе ядят и пиют, и браком совокупляются; а инии вкупе и молитву творят: мнози же в них и за папу извержанного Бога молят, во святей литургии в приношении, и во ектениях и в литиях. [ниже]: мнози есть суть, иже древняя предания святых апостол и святых отец не все держат. и от вселенских убо святейших патриарх, уже немало лет о сем неисправляеми и не пасоми суть: понеже бед и напастей и гонения ради от папежа римскаго. и того ради инии подкланяются под папино благословение, и в два пути ходят. ови суть светом евангелия, ови же наипаче мнози, тмою еретичества, и влаются во всяком ветре учения, противна истинней вере християнстей, инии же терпят беды и напасти, правды ради нашея веры християнския, и непреклонны пребывают в папино учение. тем же убо аз смиренный Филарет патриарх. [ниже], с сыновы моими положих и утвердих завет и устав, грядущим по нас, [ниже]: се не новое предание введше, но древнее укрепляюще поновихом. и последующе заповедем святых апостол, и святых отец; якоже они заповедаша, о еретицех и раскольницех, и о тех иже отчасти приобщаются еретическому папежскому учению, и инех еретик учению. [ниже]: и егда приидет кто от польскаго и литовскаго государства к нам, и скажет о себе, яко белорусец есть, и истинный християнин греческаго закона веры: его же повелеваем всем вам нашего смирения благословения требующим. прежде его искусите с добрым вопрошением по божественным писанием, и по сему нашему утверждению. вопросите его како верует, и что вера его. истинно ли крещен в три погружения; и не обливан ли; и которыя. [ниже]: в роспросе про себя скажут, яко они крещены в хритиянскую веру, греческаго закона, а в крещении у них обливают. [ниже]: и таковых подобает совершенно крестити в три погружения. ащели котории миром и маслом помазован, и того не помазывати; ащели будет единым маслом помазыван, а миром не помазыван; и того миром помазывати. [ниже]: ащели будет и свидетелей несть, а сам про себя сказывает, яко крещен в три погружения, и миром и маслом помазыван; и тех крестити не подобает; и миром и маслом не помазывати; но токмо велети им поститися неделю, такоже и в московском государстве говеют православнии християне ко исповеданию. и велети его исповедати; и о том его допрашивати зело накрепко, вправду ли он сказал про себя, что крещен в три погружения. [ниже]: и аще будет скажет во исповедании тоже, еже и в роспросе сказал, и о том разсудити отцу духовному; и доложити о том святейшему патриарху. [ниже]: которыя он святыни достоин будет, того и сподобити: и имети его християнина, так же как и прочих в московском государьстве крещенных. [ниже]: и к сему соборнаго совета свитку и указу, аз смиренный Филарет, с сыновы моими с преосвященными митрополиты, и со архиепископы и епископы руками своими приписали.

 

СТАТИЯ, 60.

 

Еже всякое церковное дело, по общему совету творити.

Притча, глава, 21. Спасение есть во мнозе совете. Псалом, 110. В совете правых и в сонме, велия дела Господня, изыскана во всех волях Его. Святый Златоуст, на послание к римляном [беседа 22]. Тем же и в потребу друг друга постави нас Бог. аще бо и мудр будеши. инаго требуеши. [ниже]: есть бо многажды и мудрому несведати, безумнейшим же обрести нечто от подобающих. якоже о Моисеи, и о его тести бысть. якоже о Сауле и отроце его. Той же на послание к коринфом, 2 [нравоучение 18]. Якоже бо во едином дому, тако нам подобает в церкви жити. якоже в едином теле, тако пребывати в сем. [ниже]: таково бо и от меньшаго больши приобрести возможет. аще бо и Моисей от тестя нечто полезное навыче, еже той не сведяше. кольми паче в церкви сие бы было. [ниже]: тако и ныне* [*аще не глаголет полезных он сице. ин встав да речет] аще и меньший будет, глаголет же нечто полезное, утверди советование, аще и от зело худейших будет, да не безчинствуюши. [ниже]: да не презираем убо потребная советующих, аще и от начинаемых кто будет, аще и от худых: ниже аще еже мы привнесем сие всячески, держати достойная быти да судим, но яже аще полезная являет. сия от всех да утверждаются. [ниже]: и сице домове и градове. и сице церковь строема, множайшим приимет прилог.

Еже приходящих друг от друга без известия не приимати.

Собора Антиохийскаго [правило 7]. Странен не имый мирскаго послания, рекше грамоты, неприятен. Четвертаго вселенскаго собора [правило 11]. И требующии помощи нищии, с послании мирными да отходят.

 

СТАТИЯ, 61.

 

Еже иноверным присягу, то есть клятву деющих по вере их, или вместо себе посылающих, за виноватых почитати, и наказывати.

Вторый закон [глава 10]. Господа Бога твоего да убоишися, и тому единому послужиши. и к Нему прилепишися, и именем Его кленешися, и прочее. Матфей првильник [состав е, глава 32]. Клятва есть слово, уверяющее собою истинну. тем же убо и царей, иже благочестия багряницею одеянай. сей убо происходити, рекше совершатися повелеша. законопреступную же и ненаказанную клятву всячески возбраниша. [ниже]: Там же. Во имущих сомнение, обыче судия приносити клятву, и тако судити. и всяка таковая клятва сохраняется. ею же кто кленется во свою веру, в неискусную же веру, бывшая клятва не сохранится. Там же [выше]. Всяко записание ему же подписано есть, честнаго и животворящаго креста образ имети должно есть твердостное и непреложное. Из летописца Троицы Сергиева монастыря, о литве. о крестном целовании, у москвичей с поляки. в лето, 7118 [1610] [глава 62]. Герман Желковской целовал крыш королевскою душею. что королю сына своего Владислава дати на Московское государство. [ниже]: такоже и всею землею российскою, целовали крест Господень; что Владиславу Жигимонтовичю служити право во всем. Ис книги Уложения печатнаго, о крестном целовании [глава 14, статия 3]. Буде же на руских людех, будут искати литва и немцы, или татарове, или иныя всякия иноземцы, и в том доведется руским людем крест целовати: и руских людей во иноземцовых искех, ко кресту приводити в приказех. а крест для того держати в приказе, написан на иконе. такоже будет и руской человек, учнет искати на иноземце. [ниже]: и иноземцев к вере приводити по их вере в приказе же. Святый Златоуст, на июдея [Маргарит, слово 1, лист 69]. Жену некую красну же и верну, видех принуждаему, от некоего скверна и нечювственна, мнящася быти християнина, в еврейская внити, и тамо подати тому клятву, о сомнительных тому вещех. якоже приступльши жена она, к пособию призываше мя, и беззаконную нужду возбранити беждаше. ни бо быти праведно той, божественным причастившейся тайнам, ко оному месту приити. разгоревся от ревности и разжегся и востав; ту убо не оставих прочее на законопреступление оно привлечену быти, но исхитих от неправеднаго сего отвожения. влекущаго же ю вопрошах. [ниже]: зельне нечювствие потязая ему, и последнее безумие, и скотов ничим же мнее разньствовати глаголах, аще к вертепом жидовским привлачит кого. Святаго Василия Великаго [правило 81, от толков.]. Елицы в варварстем нахождении, велику нужду от мук претерпеша, и болезни не терпяще, Божию веру преступиша, клятвы поганския сотворше. и неподобных неких во идольских храмех вкусивше; сии убо покаявшеся, осмь лет запрещение да приимут; елицы же без всякия нужды, предатели быша Божия веры, трапезу демонскую ядше, и клятвами поганскими кленшеся, тии убо во 12-е лето благаго общения да причастятся. Тамо же 6-го вселенскаго собора [правило 93]. Елинскими клятвами кленыйся, запрещение да приимет отлучение. Матфей правильник, 6-го собора правило, 93-е [состав е, глава 32]. Кленущихся рече клятвою еллинскою, сиречь, тако ми солнца, и сицевых Великаго Василия, 81-е, правило запрещеньми низлагает, и мы сим отлучение повелеваем.

О иже вместо себе посылающих.

От слова святаго Феодора Студита [Пролог. и в лест. слово]. Не точию с яростию досаждают, но и бити начинают. [ниже]: потом же поношениями о продерзании отвещавают, не под правилом святом; понеже рече не собою, но инеми бихом, [ниже]: аще же не собою, но инеми бити, оставляет от согрешения; да отставлени будут от убийственнаго греха и вси мучители; яко не собою, но слугами своими убиша, пророки же и мученики. и да никто же глаголет, яко он имярек, мучи сего и сего. но да ищет по имени глаголати слугующия, еже есть несогласно несодружно. [ниже]: какоже и апостольское правило презрено будет, глаголющее: епископа, или презвитера, или диякона биюща, или неверныя неправдоваша, изврещи повелеваем. убо егда како утаися Духу Святому воспомянути еже инеми бити; но да не будет лжа сия, да причаствуетжеся слово. и о иже на злате поставленных. убо яко не собою, но иною рукою, или прияша, или даша, вне суть правильнаго извержения. ни убо никакоже. Такоже разумей и о присяге, иже вместо себя посылающи в поганския храмы, по их закону клятву исполнити, тожде убо и зде да мним. Святаго Петра Александрийскаго [Кормчая правило 6]. Понеже нецыи понудиша пожрети своя рабы в них место. понужденнии убо едино лето, покаяния дело да покажут; понудившии же их три лета да покаются.

Еже аще вместо дела извествующих о себе что у таковой присяги, или к попа был, и тайны приимал, и таковых винити же и наказывати.

Соборник, слово святаго Григория Богослова. Вчера веру имел еси времене, дне Божии познай. даже дочесого на обою храмлеши бедру, даже дочесого устроиши се, и соградиши когда потщишися бедре строшене. От толкования. Вчера временем таяся, и противу времене вероваше; зане имеяше держащия тя еретики, и бояся их, мняшеся еретиком равняяся, и ты еретик. [ниже]: есть, се яко кому глаголати боязни ради еретик, еретик есмь и аз, я[?] християнин сый по всему. Того ради глаголет святый к таковому. доколе строительне неподобная твориши, явися яко истинный християнин еси. Святаго Петра Александрийскаго [правило 5]. Иже лицемерием а не истинною обещавшеся пожрети, и преблазнивше мучителей, и тако избегше пожрети идолом. 6 месяц запрещение да приимут в покаянии обращения.

Еже просто деньгами откупующихся не винословити.

Того же святаго Петра Александрийскаго [правило 11]. Аще нецыи даша злато, да убежат мук, несть им греха; изволиша бо злато погубити нежели душу свою. глаголет бо писание: избавление мужеви свое ему богатьство.

 

СТАТИЯ, 62.

 

Еже внешним подарков на праздники их без нужды не носити, и от них не приимати, и поможения и поздравления в том не творити, противно же творящих наказывати.

О сем выше на статию 30-ю написася, еже на праздники их, и на пирушки не ходити, и снеднаго от праздников их не приимати. Зде же и о подарках, и о прочем служении им, и о поможении им, и поздравлении. Книга О вере [глава 29, лист 266, обор.]. Но о нынешних неблагополучных и слезам достойных временех потребно воспомянути; яко християне частое совмешение с жиды имеют; приветствуют просят кланяются, подарения дают. ядят и пиют с шинков. [ниже]: и от прочих их компании: инии же безумнии и служат им. се же все противно святому писанию, и правилом и запрещением святых и богоносных отец. Святый Иоанн Богослов, в соборном послании 2-м глаголет. Аще кто сего учения не приносит, не приемлите его в дом, и радоватися ему не глаголите. глаголяй бо ему радоватися, сообщается делом его злым. И святый Златоуст о лжеучителех [Маргарит, слово о лжеучителях]. Иже врагом царевым друг есть, сей не может друг царев быти, но со враги погибнет и горшая подъимет.

О иже в нужди.

В житии святаго Феодора Едескаго пишет [глава 9]. В та времена страны християнския, под рукою агарянскою быша. християне же им дающе многия дани, живот свой и веру искуповаху.

 

СТАТИЯ, 63.

 

Еже книг еретических читать, и службы иноверных смотреть не попущать и наказывать.

В книге О вере, в предисловии [лист 3, обор.]. Мнози ныне свой хлеб, и сокровища духовная, во чтении и поучении изобильных книг словенских оставльше. за чюжей, иже смертоносным ядом устроенный хлеб хапаются; а запрещения 7-го собора не поминают, сице запрещающаго; аще епископ, или презвитер, или диякон, и всяк от церковнаго чина обрящется, чтый еретическия книги, иже супротивляются истинне. священницы да извергнутся, мирстии же да отлучатся. [ниже]: тем же аще бы православнии сие воспоминали, не требовали бы еретических книг. лакомятбося на упестренную прелесть, чесого деля мнози и погибоша. [ниже]: О римлянех [лист 28, обор]. Двадесятое уложение, последование поганским обычаем; в научениих и изданиих поганских книг; [ниже]: 7-го же собора, правило 62, тако запрещает. иже последуют поганским обычаем. [ниже]: аще причетник есть, да извержется, простый же да отлучится. Святый Златоуст на июдей [Маргарит, слово 4, лист 81]. Засвидетельствую вам небом и землею, яко аще кто зде, сущим нам, или не сущим, к видению пойдет трубам, или в сонмищи усрящет, или в матронина взыдет. [ниже]: или ин некий мал или велик июдейский обычай совершит; чист аз от крове всех вас; сия словеса предстанут, в день Господа нашего Исуса Христа. [ниже]: Что убо которагождо от иже се недугующих вопрошу [от слова 2, лист 86]. християнин ли еси, чесого же ради жидовская ревнуеши. [ниже]: Аще и  раба имаши [лист 94], аще и жену; удержи со многою зельностию в дому. аще на позорище не повелеваеши поити, множае паче о сонмищи сие подобает творити. больши бо есть онаго сие законопреступление. тамо грех есть бываемое, зде же нечестие. [ниже]: что течеши видети рцы ми, человеки трубяще; подобаше в дому седящу стенати о них и слезити, яко повелению Божию сопротивляются, яко диявола имут с собою ликовствующа. [ниже]: Сим ли убо последуеши рцы ми [слово 4, лист 134]. и к сонмищем тех течеши. [ниже]: не веси ли яко аще и не разбойничествует кто, в разбойнических вертепех явится, ту же со онеми приемлет казнь. [ниже]: Храм ли желаеши видети [лист 136], не потещи в сонмище, но будеши и ты храм; вы бо храм Бога живаго есте, и прочее.

 

СТАТИЯ, 64.

 

Еже рукохудожником, еретических и поганских святынь и церквей не строить и за сие наказывати.

Святаго апостола Павла [Кормчая, правило 7]. Идолом творец, да престанет идолы творя, ащели ни, да отвержется.

 

СТАТИЯ, 65.

 

Еже без веры родителей, младенцев крестящих наказывати.

Номоканон [правило 151]. Священник аще приимет жертву еретическую, или крещает турчину. [в Номоканоне киевском, схимастику или еретику] детища, да извержеся. Арменопул, книга, 5. В них же бо священницы извергаются, людини же отлучаются.

Еже младенцев же таковых без веры крещенных, [аще родители и прочии верою не предварят]. в церковь не приимати, и не поминати.

О сем чти выше свидетельствы, на статию 35-ю, и 38-ю положенныя, в коих ясно показуется, еже без веры родителей, таковии младенцы в церковь не приемлются.

Еже потом аще родители в веру приидут, или младенцы таковыя без веры крещены бывшия в возрасте будут, и собою веровати будут, таковых за крещенных приимати.

О сем подобно сему в Лимонаре, во главе 198. от словес святаго Афанасия Александрийскаго пишет. Аще кто иныя ради вины приимет святое крещение, а не веруяй, несть ему пользы. аще же по крещении размыслит, и начнет веровати истинно, и благодарити от сердца, вменится ему в крещение.

Следующия же 66-я и 67-я статии, заключавшия в себе беззаконное и божественным писанием не подтвержденное падшим лицам снисхождение. от чего в православней церкви множицею и случашеся быти соблазном, смущением, и разделением. за что и быша они отеческими собраниями: в селе Козе в 7328 [1820] году, и в Москве* в 7375 [1867] году бывшими [от руки карандашем -  *богородским], зазрены и поречены; московским же паки в 7369 [1861] году бывшим, конечно уничтожены. о чем чти в статиях тех собраний, и иже сего на листах написанных.

На основании же сего и мы ныне малейшии, сии две статии, яко плевел некий вредящий церковней пшенице, из благоговейнаго сего места изнесохом.

 

СТАТИЯ, 68.

 

Еже за грехи до крещения и до оглашения бывшия не епитимствовати.

О сем самый чин исповедания научает, еже грехи вопрошаются, и исповедаются по крещении бывшия. и везде во святех правилех, на таковыя грехи епитимии написаны зрится. о бывших же до крещения гресех, якоже исповеди несть, сице и епитимей нигде не видится. Святый Афанасий глаголет. Ересь есть, иже избрати что, свое , и тому последовати.

Еже во оглашении согрешающих, в полы противу верных наказывати.

Собора Анкирскаго [Кормчая, правило 6]. Муж прещения убоявся, и пожер идолом, 5 лет да припадает, 6-е же причастится. 1-го вселенскаго собора [правило 14]. Аще же некто от оглашенных падется, таковый три лет токмо в послушающих да пребывает, и потом со оглашенными да помолится. [ниже]: совершенный бо оглашенный, аще впадет в грех, несть оставлен без запрещения, аще и святое крещение довольно есть всяку скверну душевную омыти.

Еже согрешивших оглашенных при смерти, аще и епитимии недонесли крестити, и потом аще оздравеет по крещении наказывати по разсуждению.

Кирила Александрийскаго [Кормчая, правило 5, лист 275]. Аще отлучени будут нецыи, запрещение приемше о гресех, и потом разболевшеся восхотят умрети, оглашенни суще, да крещени будут, да не скончаются без общения, и божественныя благодати не причастни. 1-го вселенскаго собора [правило 14]. Аще же кто от таковых устрабится, и жив будет, да будет токмо с приобщающимися молитвы. Толкование. Божественныя святыни да не причастится. но исполнив в божественнем стоянии время, оттоле таковыя благодати да сподобится.

Еже от федосеевых и прочих пришедших за грехи до примирения их бывшия, правильно наказывати.

Матфей правильник [состав а, глава 2]. Ариане и македониане и наватиане и четыренадесятники, и прочии. [ниже] Понеже точно нам, божественным совершаются крещением, и того ради, и за грехи их после таковаго крещения бывшия, достоит правильно наказывати. якоже в чине исповеди, исповедаяйся глаголет. исповедаю вся согрешения моя. [ниже]: еже исперва сотворил отнележе крещен есмь.

Еже и аще за кия грехи тамо они исправление творили, сие и в дело приимати и зачитати.

В Номоканоне, напреди пишет. Аще паки по ошаянии греха удержа время от причастия, или сам о себе, или от иного духовника запрещаются, и тая лета в канон.

Паки и в сем пятом знамении, таковое феодосиевым снисхождение он в вместил, по безсловесной своей к ним любви и дружбе, православней же церкви и святоотеческим завещаниям в противность и досаждение. Понеже преподобный Матфей правилописец [зри выше, в 4 знамении], приходящих втораго чина еретиков за грехи до присоединения бывшия повелевает наказывати. а еже бы тамошнюю их исправу зачитати в дело, сего отнюд не являет. Такожде и Филарет патриарх московский в соборном своем изложении, приходящих белорусцев повелевает накрепко испытовати, потому и исповедовати, и докладовати о том патриарху или митрополиту или епископу [Потребник, лист 506], которыя он святыни достоин будет, того и сподобити, и прочее. и паки [ниже]: И разсуждением духовнаго си отца [лист 510], приимет заповедь со епитимиею. До зде Филарет. А что якобы прежнюю их исправу зачитати в дело, сего и сей архипастырь нимало не поминает. А что он [1-я] в подтверждении таковому своему мнению предложил из Номоканона текст, в том он весьма не осмотреся, понеже текст той, изложен на кающихся и на приемлющих исповеди духовников, православных сущих. Феодосиевы же тогда беша втораго чина еретицы, тем же аще употребляти оный текст к ним в руководство, тогда нужно будет признати их православными. то что сего может быти безумнейши; и Богу досадительнейши;

Обаче подобает ведати, что возражение сие написася нами вовсе не феодосиевых ради, понеже они убо церковию определены уже в первый чин под крещение, а святое крещение всякия прежния грехи весма потребляет и очищает.

Написажеся сие в предостережение на будущее время, для приходящих от втораго чина сущих, якоже и от внешних раздорников Беляковых и Григорьвых. от сих убо приходящих, непременно подобает за вящьшия вины наказывати особо, ащели же будем тамошнюю их исправу, им зачитати, тогда нужно будет и прочия действия их признавати заправо, сиречь: староженов падших и новоженов приимати без расторжения, такожде и некрещенных у них, приимати за крещенных. То что может быти язвы сея для церкви Христовой губительнейше.

 

СТАТИЯ, 69.

 

Еже иноческий образ не от залога и не во искусе возложившим наказание токмо, донележе вящше что от таковых взыщется.

Номоканон [правило 84] [в Кормчей, лист 591, на 40 дней запрещается]. Иже во иноческий облечеся образ за страх брани, или за ино некое коварство, яко негли посмеваяся, и сие после нужды и лицемерия поверг, в 40-цах три дни запрещавается, и тако приступает ко святому причастию, по 21-му правилу святаго Никифора Цареградскаго. Матфей правильник, от заповедей царя Льва [состав м, глава 15]. Людский и паче глумец или блудник, на ся возлагая или подражая иноческий святый образ. телесною казнию да томим есть. и да затакается от епископ и князь, такоже и иже наиграти восхотевый, которое любо церковное устроение. и в сих писаниих наказывати токмо таковых повелевается, [безчинно иноческий образ возлагающих] потом же быти ли им во иноческом образе, или не быти, о сем ничтоже писано. и того ради и мы наказывати таковых присоветовахом, донележе вящьшее что изыщется.

Еже без наказания таковым быти, и при смерти самим на ся иноческий образ возлагати, сице не мудрствовати.

Таковаго мудрования, отнюд нигде во святом писании не видится; паче же еже без наказания таковым пребывати: противно зрится святому писанию. Занеже явственно таковых наказывати повелевает, якоже зде показася. Тем же в Кормчей [лист 641]. От собора Соединения пишет, иже в небрежение полагающим священная правила. [ниже]: анафема. А еже при смерти таковым иноческий образ неотменно возлагати, до смерти же тако просто жити. сицевое учение яве противно есть. ибо аще неотменно надлежит сим во иноческом образе быти, то не до смерти повелевает святое писание отлагати, но тогда же в том быти, не хотящим же в том быти, сицевых за отвергшихся веры, святое писание почитает, и под кров храмины приимати не повелевает, якоже выше на 12-ю статию показася. при смерти же самим на ся иноческий образ возлагати, таковаго учения несть во святом писании. не токмо сицевым, но ни всякому християнину. и того ради по всему противно сие мудрование. Святый же Афанасий Великий пишет. Ересь есть еже что свое избрати, и тому последовати.

 

СТАТИЯ, 70.

 

Еже храмы не священныя, за освященныя не мудрствовати.

Понеже освященныя храмы или церкви именуются освященныя, яко созидаемы бывают с благословением епископским. Якоже в книге Зинаре, во главе 67-й показуется [Кормчая, лист 603 и 200 и 206. Катихисис Малый, лист 35. Матфей правильник, состав д, глава 7], потом и освящение им чинное бывает; якоже в Потребниках видится. таже и охраняются таковыя храмы велелепно и превосходно. яко в таковых храмех не повелено нерукоположенным ни чести ни пети ни учения творити. учащему же нерукоположенному в таковой церкви, на 40 дней отлучение налагается. В таковых же храмех ни спати ни трапезы поставляти не повелевается. Аще же пес вскочит, или кто от неверных внидет в таковой храм, то молитвы и водоосвящение в Потребниках положена. и прочее о освященном храме, иместь велелепное охранение. Неосвященныя же храмы, [иже на молитву просто определенныя], освященными не именуются, но просто домами. якоже в правиле 9-м святых апостол Петра и Павла пишет. Аще несть мощно собиратися в церкви, неверных ради еретик, то в дому собиратися на пение. И в книге Симеона Фесалоницкаго, во главе 100-й пишет. Чрез жертвенника святый храм есть, без жертвеника не храм, но моления ради дом. и сего ради и охраняти таковыя домы и неосвященныя храмы, противу освященных церквей, нигде во святом писании не узаконяется, ниже от прежних отец нам предадеся. Тем же в книге 2-й Арменопуловой, от собора Соединения пишет: вся еже чрез церковнаго предания и учения обновляемая, анафема.

 

СТАТИЯ, 71.

 

Еже в настоятельство избирати по свидетельству, и по отеческому благословению.

О сем выше на 17-ю статию показуется, тамо чти свидетельства.

Еже не по всеполной мере епископских правил избирати, и полнаго достоинства противу священных чинов не взыскивати.

Понеже таковаго уставления, еже несвященных в настоятельство. и в строение нужных таин, по всеполной мере епископских правил избирати. и полнаго достоинства, противу священных чинов взыскивати, нигде во святом писании не видится. от многих же свидетельств святаго писания показуется; еже мнози не священни правители, не по силе священнаго достоинства были; и от самаго повеления нерукоположенным, о нужных тайнах является, еже приемлет церковь святая крещеннаго, аще и отца самаго, или от християнина некоего православна, [не взыскующи достоинства противу священнаго чина]; но по нужди не сущу священнику крещени суть глаголет, токмо бы православен а не еретик крестил. Тожде и в повелении о тайне покаяния: наказание его рече и искуство, дает власть примирения: и аще себе самого безбедно соблюдает. прочаго же священническаго достоинства не налагают. В книге 2-1 преподобнаго Никона Черногорскаго, в послании 14. явственно показует, еже недостойным в священный чин  в духовное правительство вступати древле попущается. якоже священнику изверженному, исповеди повелеваху приимати. тако и прочим. Но ниже от отец наших, нам предадеся сие, еже бы полнаго достоинства священническаго в таковых закон взыскивати: паче же видим неких, у прежних наших отец бывших, иже в священнический чин недостойных, в правление же таковое, и во отправление нужных таин, [по покаянии и исправлении] всяко допускаемых. Тем же преподобный Феодор Студит пишет [в Никонове слове 18]. Вся елика твориши или глаголеши, имей свидетельство от святых писаний, или от отеческаго ти обычая. Аще де полнаго достоинства, противу священных чинов, от нерукоположенных законне взыскивати, и тако по всеполной мере епископских правил, сицевых непременно избирати и судити, и аки хиротонисанных на престолы, и места им и епархии уставляти и узаконяти, и прочее. опасно есть не данного чина восхищение, еже по правилу святых апостол, сицевии раздражают Бога, якоже сынове Кореовы, и Иозия царь, и иже кроме святаго писания сице своесмышленне уставляти и узаконяти, суд ереси на ся привлекати. святому Афанасию Великому глаголющу: ересь есть еже избрати что свое, и тому последовати.

А еже рачительных избирати, и могущих елико по силе таковое дело правити.

О сем выше на статию 18-ю написася.

 

СТАТИЯ, 72.

 

Еже за погрешения наказывати таковых настоятелей яко прочих, и правительствовати им по исправлении дозволяти.

И о сем на прешедшую статию написася свидетельства довлеет.

Аще убо противу священных чинов судити, сиречь не извергати. [яко извергати сих не ис чего, яко священнаго чина, и никакова малаго причетническаго степени не имущих]: того ради должно таковым, яко и прочим обычную простым человеком епитимию воприимати. и по исправлении епитимии и правительствовати, аще потребно будет дозволяти. якоже на прешедшую статию февраля в 4 день показуется в Прологе. Еже старец нерукоположенный впадши в грех, по покаянии паки правительствова, и прочая.

А еже за небрежение и прочая неключимости, от настоятельства отрешать.

О сем выше на 18-ю статию показася.

 

СТАТИЯ, 73.

 

Еже пребывати настоятелем между собою мирно, и любовно. котор же друг на друга не творити, и которающих наказывати.

Евангелие от Иоанна [зач. 48]. Рече Господь своим учеником, мир Мой оставляю вам, мир Мой даю вам: и паки: Заповедь нову даю вам [зач. 46], да любите друг друга, якоже и аз возлюбих вы, да и вы любите себе, и о сем разумеют вси, яко Мои ученицы есте, аще любовь имате между собою. Апостол [зач. 25 (55?)]. Аще же зависть горьку имате, и рвение в сердцах ваших, не хвалитеся ни лжите на истинну. несть сия премудрость свыше сходящая, но земна душевна и бесовска. идеже зависть и рвение. ту нестроение, и всяка злая вещь. Святый Златоуст на послание к колосаем [беседы, лист 2160]. Понеже бо благоискуству братнему, сплетеся и церковная польза. нужда сему разрушающуся, и оной разоритися; тем же посему, дело сатанинско твориши завидя наветуя на тело Христово; ратуешися с церковию, на Бога ополчаешися. егда бо видиши благодать имущаго и болезнуеши, и хощеши низложити. не с онем ратуешися но с Богом. Егда бо видит церковь Божию пользуему [к римл., лист 103], или словом, или другим неким образом, его же что будет горшее. ниже бо с братом прочее. но с волею Божиею таковый борется. Яко благодать духовную приял есть брат [коринф. 1, лист 926]. и от кого прият рцы ми; ни ли от Бога. тем же ко Оному восприемлеши вражду, давшему дарование. видел ли еси где злое плежет, и каков согрешений наводит верх; и колику ископовает пропасть мучения. Егда бо злоречиши любимаго [коринф. 2, лист 1422], егда слыша инаго зле глаголющаго, не отмщаеши. егда благохваляему сущу завидиши, кая се есть любовь. ибо не еже не враждовати и не опочатися, но и заступати и растити подобает ближняго. егда же вся творит и глаголет яко низложити искренняго, что сея окаяннее души. [ниже]: сие бо недугование и церкве коснуся, и вся доле и горе сотвори, и тела раздра последование; егда друг на друга востаем, зависти вооружающей ны. сего ради многое развращение. аще бо всем назидающим, любезно есть стояти учимым. егда же вси разоряем, кий будет прибыток. что твориши о человече, не зриши ли село насадителей, земледелателей. како вси наедино текут, ов убо ископа, ов же насади, а ов прикры корень, ин напаяет насажденное, ин ограждает и остеняет, ин отгоняет скоты; и вси наедино блюдут сада снабдение. зде же насаждаю убо аз. колеблет ин и потрясает. остави поне водрузитися добре. [ниже]: аз насадих, тебе же подобаше напоити. аще убо поколеблеши, корень исторгнул еси, и не имаши где да покажеши напоение. но ниже убо насаждаяй, ниже напаяяй есть что. единаго дело есть Бога; тем же со Онем борешися, насажденная исторгаяй. истрезвимся прочее некогда и побдим. не бо вси внешния брани, якоже внутренния рати. зане и корень егда будет всажден в землю, ничтоже постраждет от ветров. ащели же той колеблется червию от внутрь снедающу его, и ни единому подвижущу падет. даже доколе снедаем церкви корень, якоже червие: [на поли] церкви не снедати. К колосаем паки [лист 2160]. На сего бо болезнуеши, иже ничтоже обидевшаго, много же паче на Христа. чим тя обидел есть, яко не оставляеши тело Его украшатися добротою. яко не оставляеши невесту утварию облагатися, и враги твоя веселиши. Той же святый [Пролог, июня 11]. Яко Божие есть избрание да не негодуеши, на Онаго бо негодуеши, и противу Оному гневаешися. Он убо избрал есть, ты же смееши на Сего негодовати. тожде твориши, яково же Каин, зане предпочтенна бысть жертва братня, оскорбися негодова, подобаше бо восприяти, подобаше умилитися. И паки в беседах к римляном [лист 103]. Сего ради аще и знамения сотворит кто, аще и девьство и пост [и прочее] всех будет сквернейши, сие имея согрешение, и да не зазрит кто премножеству слова. аще бы кто огнь и мотыку взем. сей низлагал бы и палил храм, ни ли бы того кождо зде камением побил, яко нечистаго и законопреступнаго. что же егда огня поядательнейшу приносит, зависть глаголю. ни камении здания низлагающую, ниже златый жертвенник раскоповающую. [?] много и стен и жертвенника честнейшее, учителей здание превращающую и губящую; сей коего прощения будет достоин. Потребник в Номоканоне о иноцех. Аще кто оглаголует и клевещет старейшаго, несть далече гнева Божия. сицевый да отлучится месяц 6, творити поклонов 2000. В Никоновой [слово 17]. Аще нецыи будут отай клеветы [на настоятели] творяще. и вину по истинне не исповедающе. [ниже]: и непокорства и преслушания будут учители, да изженутся из монастыря, зане мал квас все смешение квасит.

 

СТАТИЯ, 74.

 

Еже и недостатках настоятелем друг друга исправляти любовию, и наедине или пред собором братии. тайно же не клеветати, и явно пред людьми безчинно не обличати.

Ис книги преподобнаго Иосифа Волокаламскаго, о монастырстем строении. Аще познано будет когда настоящаго согрешение. воспоминати ему старейшим соборным братиям наедине и благочинно, яко да не разорится благочиние. и якоже убо он братию пользует, сице и сам от братии пользу да приимет. Святый Златоуст в беседах [на послание коринф, лист 1114]. Аще тако устрояем обличение, возможем удобь согрешающих исправити. зане иже ныне творим, зверей паче суть и безсловесных. аще убо ощущают ныне согрешающаго, оному убо ничтоже беседуют. а сами яко же бабы упившеся шепчют между собою [ниже]: кая бо польза от поста или бдения, егда язык упивается. и песиих нечистейшею трапезою питается. [ниже]: псалом, 49. седяй на брата своего клеветаше. Потребник в Номоканоне [Номоканон]. Аще кто оглаголует и клевещет старейшаго, несть далече гнева, сицевый да отлучится месяц, 6, творя поклонов, две тысящи. Псалом 188. Оклеветающаго тай искренняго своего, сего изгонях. Паки в Потребнике. Аще кто от инок обличает и потязует игумена своего пред миряны, аще и истинна суть глаголемя от него. и той, и верующий ему, с ним погибель наследят, а покаявжеся, да запретится лето едино, и поклонов1900 творит. пред собором либо братии, аще нань что имать должен есть глаголати.

 

СТАТИЯ, 75.

 

Еже всякому настоятелю свою паству более смотрити, другия же паствы не судити, кроме нужнаго случая.

Патерик словес скитских отец [глава 37]. Рече авва Иероним, аще живут с тобою братия пецыся о них всем сердцем, кия аще тебе слушают, ведый яко отвещати пред Богом о них. В Никонове [слово 39]. Глагола отец Макарий. покажи и суди праведно, сущих под тобою. не сущих же под тобою да не судиши никого. писано бо есть, не внутреним ли вы судите, и прочее. Тамо же святаго Варсонофия [слово 50]. Воспомяни, потребе бывши, в своем монастыре точию, а не инде. ибо сущии во единой киновии, яко едино тело суть. [выше]. Преподобнаго Марка. Настояй повинующемуся, подобающая глаголати должен есть. не сущаго же ти в повиновении согрешения да не глаголеши, се бо власть паче, а не совет есть.

 

СТАТИЯ, 76.

 

Еже во исповедь настоятелем друг от друга без отпущения и разрешения, кроме нужды смертныя не приимати.

Потребник пред чином исповедания святаго Григория Нискаго наказание. Ведати достоит, како приимати пришедшаго ко исповеданию, и вопросити всего прежде кающагося, не бывал ли он у отца духовнаго; а будет бывал, то распросити, не дал ли ему отец духовный епитимии. и будет скажет, что дал, и распросити, за каковый грех дал. и будет не разрешил его отец. и ты смотри совести греха, и исправился ли он хотя мало в запрещении, или не исправился. и будет возможно, и он бы от прежняго отца духовнаго разрешение получил, аще жив будет отец, давый запрещение, то от того же просити разрешения. а ко иному отцу духовному, без разрешения и отпущения не ходити. ащели кто случится в запрещении, а изволит отец его духовный отпустити удаления ради. или иныя ради некия потребы. то новый духовник, по исповедании подаст исповеднику разрешение, по разсуждению. ащели же гордостию и непослушание от прежняго отца духовнаго идет прочь, то ты не принимай его, разве смертнаго часа.

 

СТАТИЯ, 77.

 

Еже благословляти настоятелем вместо себя на нужды, по совету всего братства, или всякому во своей пастве [В Никонове, слово 18].

Понеже таков о сем обычай у прежних наших отец бяше; якоже преподобный Феодор Студит глаголет: вся елико твориши, или глаголеши, имей свидетельство от святых писаний или отеческаго обычая, кроме преступления Божия заповедей.

 

СТАТИЯ, 78.

 

Еже наказывати и отлучати настоятелем послушных своих в силу писания, или по отеческому обычаю, а не собою.

Потребник, в Номоканоне к концу, Великий Феодор Студит глаголет. Власть предстателем ни в чем же дается, по преступлению правила, разве токмо да прилежит тем еже узаконена суть, и последуют еже предъидоша. и да связуют и разрешают не неразмысленно, но яко же мнится истинне; и канону и правилу высочайшаго закона. Там же на концы. Вязати убо елико узам достойна суть; разрешати же, елика разрешению суть достойна. Той же. Вся елика твориши или глаголеши, имей свидетельство от святых писаний, или от отеческаго ти обычая, и прочее.

Еже недоумительная некая, на суд Богу оставляти.

В книге преподобнаго Никона Черногорскаго [слово 56, к концу]. О прощении же недоведомых неких, и неудобь разсудных некими винами, имамы по наказанию Великаго Инокентия, глаголюща ко оболгателем божественнаго Златоуста. яко Бог аще благоугодно ему есть, да простит вам чада согрешения ваша. первее тех почасти обличив, яко тии прияша суд извержения на своя главы, и возложив той на Бога, отпусти их без забавления.

 

СТАТИЯ, 79.

 

Еже настоятелем о отлученных друг другу возвещати, и другим таковых, без известия и разсмотрения не разрешати.

Того же Никона Черныя горы, правило святых апостол, 12 [слово 63]. Аще который причетник, или прост человек отлучен, рекше неприятен, шед во ин град прият будет без писания, да отлучится и приятый и приемый его. И в Кормчей правила святых апостол 16, собора Антиохийскаго 6, и Карфагенскаго 9 и 29, и Сардикийскаго 15. Не повелевает без разсмотрения разрешати. разрешающаго тако повелевает наказывати. Собора Сардикийскаго, правило 16. Аще же от гневлива епископа кто по гневу отлучен будет, и приступит к митрополиту, моляся испытати вину, и аще обрящется прав, да будет приятен на общение. Сему подобно и святый Златоуст, по гневу от Феофила отлученных, разсмотрив в церковь допусти, зри в житии его. И в Номоканоне, и в 609 заповеди, Иустиниана царя. Повелевает неправедно отлученных старейшему епископу, и до соборнаго суда разрешати.

Еже кия разрешат чие отлучение, или сообщение с кем учинит. и сих соборне разбирати, или наказывати. разделения же церьковнаго с таковыми вскоре не творити.

Собора Антиохийскаго правило 3. Епископ аще приимет изверженнаго. и яко причетника начнет имети, запрещение ему дати от общаго собора, егда сходятся купно всея области епископи, стязания ради церковных правильных взысканий; тогда запрещение да приимет, яко преступник церковных законов. Второперваго собора правило, 3. Аще который презвитер, или диякон, якоже се мня сведый епископа согрешша. прежде суда и уведения всех епископ собора, отступит от общения, и не поминает имени его в службе, да извержется; последующии же ему аще священницы, своея чести да отпадут, мниси же и мирстии человецы да отлучатся дондеже обратятся. И прочии свидетельствы, еже вскоре не разделятися чти выше на статию 51 написанныя.

 

СТАТИЯ, 80.

 

Еже ради всяких таковых церковных исправлений, вкупе на соборе собиратися.

1-го вселенскаго собора, правило 5, от толкования. Убо да неотлучаемии кроме подобныя вины отлучаются, ни отлучающий их, преобидими будут другим епископом, приемлющим без испытания таковыя. сего ради в коейждо области собору быти. святый собор повеле. да общею волею всех, всяко совопрошение и истязание церковное, и всяко прекословие разрешится; якоже и 37-е правило святых апостол повелевает; и 55 правило 6-го собора, и 6-е правило 7-го собора. И в Зинаре глава 123. Повелено бысть на святем вселенском соборе 4-м; дважды в лето, в которойждо епархии собирати собор; и на соборех о всех вещех церковных и человеческих стязовати, и исправляти всяко; да не како закосневшу собору, и испытанию таковому о сих, начнет всяк о законе Божии нерадити, и о предании святых апостол, и преподобных отец, [наполи] собору не сущу вся Божия в небрежение приходят.

 

СТАТИЯ, 81.

 

Еже с женским полом, настоятелем и прочим братиям, советов о церковных делех не имети.

Апостол к Тимофею. 1 [зач. 282]. Жене учити не повелеваю, ни владети мужем, но быти в безмолвии. Потребник в Номоканоне о иноцех. Игумен аще имать советы с женами, да престанет от начальства. Арменопул книга 5-я. В них же священницы извергаются, людини отлучаются.

 

СТАТИЯ, 82.

 

Еже неизбранным самовольно в правление не вступати, без совета же вступающих наказывати, кроме токмо нужнаго случая.

Апостол ко евреом [зач. 311]. И никтоже собою приемлет честь, но званный, от Господа, якоже Аарон, тако и Христос. Святых апостол правило, 2 [Кормчая, лист 30]. Аще бо Филипп скопца крестил, и Анание мене Павла; но не не сама себе восхитиста, святительскаго чина, но от Бога прияста власть, от несочетаннаго Архиерея. Патерик словес скитских отец [глава 37]. Рече авва Иероним, аще живут с тобою братия, пецыся о них всем сердцем, аще тебе слушают. В книзе преподобнаго Иосифа Волоцкаго, о монастырстем строении [слово 13]. Игумена поставляти, его же мниси вси разумнейшии и преимущии изберут. [ниже]: а еже игумену быти не по совету братии, нигдеже в божественных писаниих являет. Преподобный Феодор Студит [в Никонове, слово 18]. Вся елика твориши, или глаголеши, имей свидетельство, от святых писаний, или отеческаго ти обычая, кроме преступления Божиих заповедей. [понеже и прежния наши отцы тако о таковых самовольно вступающих разсуждаху и наказываху.]. О иже по нужде без совета вступающих [святаго Златоуста, от бесед на Деяния апостол.].

 

СТАТИЯ, 83.

 

Еже всякому християнину под правительством быти, и без того не быти. и в самоволии без покорения пребывающим воспрещати.

Ис книги преподобнаго аввы Дорофея [поучение 5]. В притчах глаголет, имже несть окормления падают яко листвие. спасение же есть во мнозе совете; видите силу слова братие, видите что учит нас святое писание. утверждает нас, да не последуем сами себе, да не имамы сами себе можем устроити; требуем помощи братие, требуем по Бозе окормляющих нас. ничтоже есть окаяннейше, ничтоже губительнейше, неимущих кого наставляюща их в путь Божий. что бо глаголет; имже несть окормления, падают якоже листвие, лист изначала присно есть зелень, благоцветущь красен; таже помалу изсыхает и падает, и прочее небрегом бывает и попирается. тако есть и человек неокормляем от кого. [ниже]: бывает прочее подручник врагом, и творят в нем еже хотят. о изволяющих же еже о себе. и с советом вся творящих, глаголет. спасение есть во мнозе совете. [ниже]: виждь чесо ради ненавидит враг, глас утверждения, понеже всегда хощет погибель нашу. виждь, чесо ради любят составляющих себе, понеже дияволу помогают, сами себе наветы творяще. Аз ино падение не вем, но от еже веровати своему сердцу. нецыи глаголют, сим падает человек или сим. Аз же якоже рех, ино падение бываемое кому не свем, разве от сего. Видел ли еси кого падша, увеждь яко себе последова: ничтоже сего губительнейше. Святый Златоуст на послание к римляном [беседа 22]. Тем же и в потребу друг друга, поставил есть нас Бог. аще бо и мудр будеши, инаго требуеши. ащели же мнишися не требовати, безумнейши бываеши. Таковый бо и пуста себе составит помощи, и в них же аще согрешит, никоегоже восприимет ниже исправления, ниже прощения, и Бога прогневает гордынею, и многая согрешит. Той же на послание ко евреом [беседа 34]. Зло есть убо безначали, и многих бед вина, и начало безчиния и слияния; наипаче же в церкви толико нетвердо есть, якоже бо аще лика верховнаго отъимеши, не будет лик по песни и по чину. и аще от полка воинства, воеводу отставиши, не к тому правлением и чином яже ополчения будут. и от корабля кормчию аще отъимеши, погрузиши корабль. тако и от стада пастыря аще отставиши, вся развратил еси и погубил. зло убо есть безначалие, и возмущению вина. зло же не мнее и неповинование начинаемых: тожде бо бывает паки, людие бо князю неповинующияся, мучими бывают. Ис книги Симеона Фесалоницкаго [глава 264]. И никтоже о себе да дерзает исправлятися, далеко бо сие от християнскаго жития: занеже еже жити самовольно, несть Христово. ибо Христос послушлив быв Богу и Отцу. и друг от друга нам повеле исправлятися. и сего ради како Христов, иже не по Христе живый. В книзе 1 преподобнаго Никона Черногорскаго. святаго Анастасия [слово 51]. Без совета трудяйся, всяко обнищавает. иже бо на ся надеяся, падет; и горе единому. [ниже]: яко бо не требуя в себе помышляя, и в себе высокомудруя и гордяся. Господь же гордым противится смиренным же дает благодать. Тамо же в Тактиконе Великий Мефодий глаголет [послание 23]. Яко учение великия церкве раздельно не бысть когда, ниже будет. безначально же нигдеже слышася. Преподобный Ефрем Сирин глаголет [слово 83]. Иже повинуется старейшине, рекше игумену, сей ангелы подражает, противляяйжеся ему, сей диявола вселяет в себе. Потребник в Номоканоне. Аще кий инок, в коем любо словеси, ко спасению его изглаголаннем прекословит игумену, и противится ему; яко соперник Божий обретается, и да уцеломудрится от общаго совета запрещеньми. Тамо же. Аще кий инок, без вины благословныя, прекословит игумену; да отлучится от обители, аще и вельми есть разумен, отгоним есть отнюд, якоже красту имущая во скотех, едина от сих отгонима есть, да не окрастовеет все стадо. аще бо старейшии суть прекословцы и и преслушателие. како послушанию и смирению и терпению научат новоначальных.

 

СТАТИЯ, 84.

 

Еже простым людем кому неприлично и не нужно о чем знати, много не толковати, паче же женскому полу.

Апостол к коринфяном, 1 [зач. 152]. Якоже бо тело едино есть, и уды имать многи, вси же уди единаго тела мнози суще, едино суть тело, тако Христос. Выше [зач. 151]. Комуждо дается явление Духа на пользу. овому бо Духом дается, слово разума, другому же вера. [ниже]: другому же разсуждения духовом. [ниже]: и аще все тело око, где слух; аще же все слух, где ухание. ныне же положи Бог уды, единаго когождо их в телеси, якоже изволи; ащели бы были вси един уд, где тело. ныне же мнози убо удове, едино же тело. [ниже]. Еда вси апостоли; еда вси пророцы; еда вси учители. [ниже]: еда вси сказуют. Святый Златоуст на сие в беседах [лист 931]. Яко невозможно всем быти вся; сего ради тако рече, аще быша вси един уд, где тело. Паки апостол [зач. 137]. Братие, в неже кто зван бысть, в том да пребывает.

О женах.

Апостол к Тимофею [зач. 182]. Жене же учити не повелеваю, ни владети мужем, но быти в безмолвии. К коринфом [зач. 157]. Жены ваша в церкви да молчат, не повелебося им глаголати но повиноватися, якоже и законом глаголет. ащели чесому научитися хотят, в домех своих мужей да вопрошают. срамно бо есть жене в церкви глаголати.

И еже без совета и вопрошения никому собою ни о чем не произносити и не толковати.

О чем выше на статию 60-ю, и на прешедшую зде статию 83-ю свидетельствы показуются.

Еже без совета собою ничего не творити.

И паки, преподобный авва Дорофей глаголет [слово 5]. Егда бех во общем житии, вся возлагах старцу авве Иоанну, николиже смеях сотворити что без совета его. и есть егда глаголаше ми помысл, не тожде ли имать рещи старец, что хощеши стужати ему; и глаголах помыслу, анафема ти, и разсуждению твоему, и мудрованию твоему, и ведению твоему: яко иже веси, от бесов веси. отходях убо и вопрошах старца, и прилучашеся яко некогда отвещаваше ми слово оно, еже имех во уме; и прочее глаголаше ми помысл, что есть се, тожде есть еже рех, не безвременно ли стужил еси старцу; и глаголах помыслу, но ныне добре есть, ныне от Духа свята есть, [выше]: спасение бо есть во мнозе совете.

 

СТАТИЯ, 85.

 

Еже всем християном кому случится за кем что видети, то настоятелю, или старейшему от братии возвещати, или друг другу воспоминати. не клеветати же в том друг на друга, и не крамолитися, противно же деющих отлучати.

В Номоканоне, Потребник, Пристижение [правило 165]. Сеже разумно да будет, яко иже людини, или духовнии, иже от сожительства и пребывания вкупе, сведят, или слышат, прочих грехи и беззакония, вреды и тщету творящих. тогда любовию исправления и спасения ради ближняго, должни суть предстателем и старейшинам извещати, да препнутся от греха, и зла онаго, да убо утаенныя грехи души не погубят. [ниже]: знаменай, не оклеветание се будет, ниже осуждение, но любовь и поболение, еже брата от греха избави, и на путь спасения исправити, точию не пред коим любо, но пред старейшим, ему же власть и начало есть вручено да извещает, извещаяй же да будет покровен. должное же есть и друг другу воспоминати. [ниже]: Глаголет святый Златоуст. Аще увидиши друга блудяща, рцы к нему, зла есть вещь еже дееши; не срамляешилися ниже чермнееши. [ниже]: аще гневлива увидиши, аще лихоимца, удержи, свяжи наказанием. се есть дружество. тако брат от брата помогаем, яко град тверд будет. Ис книги преподобнаго Иосифа Волоцкаго, о монастырстем строении [слово 13]. Глаголет Великий Варсонофий. аще видиши вещь недобре бываему рцы со смирением во своем монастыре. [ниже]: сеже не укорити хотя брата, ниже пронести, но пользовати. ащели же не послушает, глаголи могущим исправити его, или настоятелю. не сущу же настоятелю, соборной братии возвести, и тако да почиеши. [ниже]: юнии же и новоначальнии да не обличают ни запрещают никогоже. но аще видят кого что неподобно сотворша, наедине и безмолвно да возвещают старцем у кого кто живет; или старцу единому от больших, коим приказано правление монастырское. Святый Златоуст, на послание коринфом [лист 1114]. Аще тако устрояем, возможем удобь согрешающих исправити: зане еже ныне творим, зверей паче суть и безсловесных. аще убо ощущают нецыи ныне согрешающа, оному убо ничтоже беседуют. а сами якоже бабы упившеся, шепчют между собою. [ниже]: кая бо польза от поста есть, или бдения; егда язык упивается; от песиих мяс нечистейшею питается трапезою. [ниже]: псалом 49, седяй на брата своего клеветаше. Ис книги Никоновой, от старчества [слово 10]. Рече старец, яко всяк глагол, его же не может рещи кто пред братом своим, клевета есть. Тамо же [от послания Василия Великаго]. Глаголяй о согрещении братнем, еже оболгати его и пронести, клеветник есть, аще и истино есть глаголемое. Преподобнаго Иосифа Волокаламскаго [слово 13]. Якоже и имже не повелено есть, и обличающе, или запрещающе, се осуждение и клевета есть. псалом, 100. оклеветающаго тай искренняго своего, сего изгонях. Потребник в Номоканоне, о иноцех. Аще кий инок, поджизает инаго инока в коей любо главизне, или клевете нань изречет и посмеяние; имать запрещение 50 дней, и поклонов 100 на день. Святаго Василия Великаго запрещение, 7 [Кормчая, лист 609]. Аще кто познает братне согрешение, и по еже преминути, поношает, яко обличаяй, той яко безмилостив [выше запрещение 3], и о злобе радуется, да отлучится седмицу едину. И аще кто познает чие согрешение и не исправит его, или обличая не во смирении о Христе, но согневом яко поношая, да отлучится и со обличаемым о согрешении седмицы две; понеже яко враг, а не яко брат обличил есть.

 

СТАТИЯ, 86.

 

Еже советовати о церковных делех с настоятели, старейшим братиям.

Книга преподобнаго Иосифа Волокаламскаго, о монастырсем строении [глава 13]. Подобает соборным братиям, приемшим правление монастырское, пещися о церковном благочинии, с настоятелем, или не сущу настоятелю, и егда будет настоятель во обители, тогда братия приходят к настоятелю и советуют. [ниже]: аще будет дело требующее совета: настоятель призывает келаря, и назначая и соборную братию, и о всем советуют.

Еже аще случится в советех кое несоглашение, то в простой народ и женску полу не произносити, но соборне о всем разбиратися, и внешним в суд не вдаватися.

Потребник в Номоканоне, о иноцех. Аще кто от инок обличает и потязает игумена своего пред миряны, аще и истинна суть глаголемая от него, и той и верующии ему, с ним погибель наследят; покаявжеся да запретится лето едино, и прочее. [ниже]: пред собором бо братии, аще что имать должен есть глаголати. Той же. Игумен аще советы имать с женами; да престанет начальства.

О внешних.

Святый апостол Павел в послании коринфом [зач. 134]. Смеет ли кто от вас, вещь имея к брату своему судитися, у неправедных, а не у святых. [ниже]: житейская убо судилища, аще имате уничиженных, в церкви сих посаждаете; се же к сраму вам глаголю. тако ли несть мудр в вас ни един, иже может разсудити между братом своим, но брат с братом судится, и сие пред неверными. Святый Златоуст на сие [беседы, лист 706]. Како бо небезместно к другу малодушствующему, врага примирителя приимати рече. како же не срамляешися ниже чермнееши, егда еллин сядет християнина судя. ащели же о особных не подобает у еллин судитися, како им оставим, о других вящьших. [ниже]: подобаше же и немудрым оставляти паче слышание [лист 709], нежели внешним судити. како бо несть безместно, в дому убо бывшему раздору, ни единаго от внешних призывати, но посрамляти аще предадутся ко внешним, еже внутрь бываемая. а идеже церковь недоведомых таин сокровище; вся ли износиши вне. [ниже]: грех есть и еже с братом судитися; а еже и пред внешними, кое есть прощение.

 

СТАТИЯ, 87.

 

Еже всем християном крестное знамение на себе полагати истово, и благочинно стояти в службе Божии.

Из устава прежних поморских отец [статия 2]. Крестное знамение на себе благочинно и истово воображати, и покланятися ниско, якоже святый Иоанн Златоуст, в слове о страсе Божии, и о еже како во святей Божией церкви, стояти со страхом и благочинием, и лице свое крестити крестообразно глаголет. мнози убо невегласи, махающе по лицу своему рукою, творяще креститися, всуе труждаются; занеже не исправляют истово креста на лицы своем, тому бо маханию беси радуются. а еже кто истово крестится, покладая руку свою на челе, и на правом раме, и потом на левом. то ангели зряще веселятся истиннаго креста воображаема на лицах их. и ангел Господень тогда написует входящия в церковь Господню со страхом и с верою. да аще кто пришед в церковь, стоит со страхом и со умилением покланяние творит ко образу Божию. ащели без страха, то таковый больший грех получив отходит. И в книзе о Вере, во главе 9 пишет. Еще же и сие ведати потреба, яко да честно и благочинно креста знамение с сокрушенным сердцем изобразуемо да бывает всегда. а  безчестне и не по состоянию, никоея помощи не приимем. [ниже]: отгоняем же его от невнимания и нерадения унынием и леностию, словесы непотребными, и делы лукавыми; их же ради враг крепость на ны прием, сводит в пропасть погибели. И в книзе Стоглаве, о крестящихся не по чину написано. Ащели кто леностию не исправит креста на лице своем, отмещется креста Христова, и предается дияволу.

Еже в чтении и пении, искуство и внятность сохраняти. за небрежение же и безчиние наказывати.

Из Октая иосифской печати, глас, 6 [лист 50]. Поучение святых апостол и богоносных отец, како хранити со всяким тщанием службы церковныя. [ниже]: по первем убо пении утрения службы да поет еклисиарх екса псалмы, или утренный на то мних, якоже есть обычно и косно. и елико мощно с сокрушением и со вниманием. [ниже]: подобает же ему кротким и тихим гласом пети, во услышание всем, покашлити же и плюнути, или всяко от места своего преступити, из внешняго притвора в церкве, егда поются ексапсалмы, не имать никтоже области. безстрашия бо и безчиния знамение се велие. яко сим образом и на евангелиях чтомых иерей. и глаголему исповеданию православныя веры, сиречь, верую во единаго Бога, такоже со страхом, и великим опасением стояти. [ниже]: ащели Бог Господь поется, или аллилуия, излегка да поется, паче же троическия песни, от всех со вниманием и по косну петы да бывают. тако же и псалтырная стихология, да бывают кротко и тихим и тонким гласом. [ниже]: тако же и прочия вся службы с кротостию да будут. такоже и поклоны творим кротко, и равно вси единокупно, зряще на настоятеля, или еклисиарха. [ниже]: а еже высоко пети, и провлачая. неискусных бо и ненаказанных есть. такоже и поклоны творити не вкупе. но кождо себе пометая на землю, и воставая озираяся, ов вспять, ов же надымается юряся, напрасно воскланяяся; сие есть велие самочиние и безчиние. В Номоканоне пишет. Уставиша отцы, да не поются священная пения, псалмовещаньми безчинными и пиянственными, и естеству нужду приносящими; ниже некими доброгласии не приличными церковному составлению и последованию; якоже суть мусикийская пения, и излишняя раличия гласовом. но со многим умилением, и нравы благочинными, и святыми, приносити Богу молитвы, ведущему тайнам сердец наших. [ниже]: поющии висканьми безчинными и подобная презревше. то со многим вниманием и умилением да поют. ащели ни, да запретится. [ниже]: поющии же глас, или отончевают, или велий вопль испущают, сеже да лучший инех явятся, и человекоугодие и тщеславие исполняют. сицевая пения от церкви суть далече, и сице поющии, правильно да запретятся. Ис книги чиновной преподобнаго Иосифа Волоцкаго, запрещение 12. Аще кто от крылошан, небрежливо начнет на крылосе стояти, да поклонится 50, или сухояст день един. и прочее.

 

СТАТИЯ, 88.

 

Еже грамотным службы служити вседневно, по уставу или по псалтыри кроме нужды.

Катихисис малый [лист 55, обор.]. Вопрос. Многоли есть церковных заповедей. Ответ. Главнейших есть 9: Первое на всякий день по обычаю християнскому, подобающее благочестие, еже любо слушати пения в церкви, или самому отправити усердне. якоже се, утреню, часы, вечерню, павечерню, и прочее. От старчества, по учению отца Макария. Да будут убо благоволением Божиим твоя пречисты и не смутны, 1-й, 3-й, 6-й. 9-й, часове, и вечерня, павечерница же, и полунощница; их же должен еси, укрепльшей тя божественней благодати всегда совершати. Книга древлеписменная, Домострой [глава 12]. По вся дни муж с женою, и с детьми и домочадцы, кто умеет грамоте, отпети вечерню и павечерню, и прочее. Ис книги Златоуста, в понеделник 3-й недели поста [слово 85]. Аще человек умея грамоте, а не поет себе ни заутрени, ни часов, ни вечерни, ни нефимона, то сам ся Божия света лишает. Из устава прежних поморских отец [статия 1]. Полунощницу, часы, и павечерню, говорим исполняти всякому человеку. [ниже] статия 3. вечерня же и утреня грамотным пети по уставу службу, или по псалтыри отправити. [ниже]: статия 4: а не умеющим грамоте, молитвами исправляти. [ниже]: статия, 5: а по нужди в пути, или в тяжких трудех, и собрания лишившимся, поклонами отправляти.

Еже в праздники всем приходити в собрание: не приходящих же наказывати.

Патерик печерский, послание преподобнаго Симеона епископа Владимирскаго [лист 267]. Собора церковнаго не отлучайся, ибо якоже дождь растит семя, тако и церковь, влечет душу на добродетель, елика бо твориши в келии, все то ни единому Господи помилуй уподобится соборному. Катихисис малый [лист 25, обор.]. Тем же во дни праздничныя, и неделю, аще християнин святыя литургии не слушает, здрав сый и не в пути, наипаче же егда церковь поблизу есть, смертно согрешает. 6-го вселенскаго собора [правило 80, от толков.]. Аще кто за три недели, кроме церкви пребудет, без всякия нужды и великия напасти, аще есть причетник, да извержется, аще же мирский человек, да отлучится. На поли. Иже 3 недели кроме церкви быв, да запретится. Зинарь [глава 102]. Иже есть от мирских человек отбегая от церкви, и на ся молится, глаголя, яко более на ся молитися, а не в церкви, и се творит без повеления епископова, или отца духовнаго, и тако ходящаго, анафема.

Еже и чтение писаний в праздники усердно слушати.

6-го вселенскаго собора [Кормчая, правило 19]. В неделю и в праздники людие молитися должни, и слова Божия послушати, глаголет бо в притчах; уклонивый ухо свое непослушати закона, сей молитву свою омерзил есть. Златоуст. Несть бо кому спастися, нечасто прочитания духовнаго наслаждающуся.

 

СТАТИЯ, 89.

 

Еже в праздники не торговати и не работати. не хранях же сего наказывати.

Ис книги Уложения царя Алексия Михайлыча вся Русии, и святейшаго патриарха Иосифа [глава 10, статия 26]. Против воскресных дней, по вся суботы православным християном, от всякия работы и от торговли престати и ряды затворити за 3 часа до вечера. а в воскресной день рядов не отпирати, и ничем не торговати, опричь съястных товаров и коннаго корму. а съястныя товары, и конной корм, овес и сено, продавати по вся дни и часы невозбранно. а работы никакия в воскресной день никому не работати. да и в господьския праздники быти томуже как и в воскресныя дни. В Номоканоне [правило 159]. В неделях и в праздники завещавай не делати, но приходити в церковь, якоже подобает християном. ащели кто делает в тыя дни да отлучится. Катихисис малый [лист 61]. В новой благодати день недельный, не во едином ином имать быти изнурен, точию во единой славе Божии, и в воспоминании благодеяний Его; тожде разумети и о прочих праздницех господьских, в них же особная благодеяния Божия воспоминаются, и заповеданием церковным празднуем.

 

СТАТИЯ, 90.

 

Еже позорищь не содевати и не смотрити, и за сие наказывати.

В недельныя дни [Кормчая, лист 14], и в праздники господьския, християном позорищь и конскаго уристания не творити, но токмо молитися во святых церквах. Тамо же, святаго апостола Павла [правило 6, лист 194]. На колесницах уристание творя, или самоборец, или пеш уристание творя на позорищах. [ниже]: да престанут от таковых, ащели же ни, да отвергнутся. [ниже]: И аще кто прилежит к бывающему на позорищах неистовству [правило 13], или на лов упражняется, или на конное уристание бывающее на позорищах. аще не останется да будет извержен.

 

СТАТИЯ, 91.

 

Еже обычаи християнския соблюдати, в стрижении власов. и украшение излишное ризами, и прочее не по обычаю деемое возбраняти, и за сия наказывати.

Муж убо аще власы растит [Апостол, коринфом 1, зач. 147], безчестие ему есть. жена же аще власы растит, слава ей есть. От толкования на сие святаго Златоуста [беседы, лист 842]. Согрешение бяше у коринфян: жены откровенными и нагими главами моляхуся. [ниже]: и мужие власы растяху, аки в любомудрии пребывающе. [ниже]: еже обое, еллинскаго бе закона. [ниже]: Там же, растити власы мужу присно возбраняет; яко аще власы растит безчестие ему есть. В Никоновой [слово 37]. Великий Епифаний, о евхитстей ереси глаголет. [ниже]: власы женскими радующеся, и вретищем проявленнем одевающеся. [ниже]: чюждо бо есть соборныя церкве, вретище носити проявленно и власы не отрежеми, по проповеди апостольстей. муж бо рече не должен есть растити власы, и прочее. 6-го вселенскаго собора [Кормчая, правило 95]. Иже власы плетуще, или мудростию некоею шаряще на вред зрящим, да отлучатся. Стоглав []. И в ризах и во обущах, комуждо свой чин соблюдати, а излишними не украшатися. [ниже]: ино бо одеяние тысящнику, и ино пятьдесятнику. и ино одеяние купцу, и ино златарю, и ино железному ковачю, и ино орачю, и ино просителю. и ино женам, и прочее. Паки в книзе Никоновой. Яко такова одеяния лепо есть имети християнину, яковы суть в месте, идеже пришельствуют общий народ, и убозии вси, по коегождо обету. [ниже]: Ослабленная же суть и ухищренная во одежди хождения не приемлем. Тамо же в том же слове святаго Василия Великаго [на конце слова]. Яко одежду нам подобает имети на потребу токмо, не к тому же и различение, еже от нея удобрение. во отрешенное красование отпадающих. Соборник от слова святаго Кирила Александрийскаго [лист 116]. Горе украшающимся коеже ловити душа в блужения и студодеянию невоздержания, во истинну удица есть дияволя, различное украшение ризное. Святый Златоуст [на послание 1 к Тимофею]. Несть мал грех, но зело велик, доволен прогневати Бога, доволен весь труд девьства погубити. На поли. Украшеньми прельщати велик грех. Из устава прежних поморских отец [статия, 16]. Одеждами и шапками и поясами не украшатися. [ниже]: вышеявленная же не хранящих [статия, 33], по любовном обличении не послушающаго, смиряти наказанием и отлучение. Стоглав. 6-го вселенскаго собора [глава 5, правило 27]. В сем правиле изъявляет не токмо о причетницех, но и о мирских. начен от синклита и до просителя, и до самых жен, глаголя: никтоже от причитаемых к клирос, в неподобну ризу облачится, ниже во граде живяй, ниже на пути шествуяй. но одеяния да носит усвоенная. аще же кто таковое сотворит, на едину неделю ла отлучится. 6-го вселенскаго собора [Кормчая, правило 100]. И иже на срамная дела подвизают видения образы, да не пишутся на стенах и дсках. преступаяй же се да отлучится. Барония [лето Господне 506]. Анастасий кесарь, приведе некоего живописца, иже в его полатах, скверныя и неприличныя образы писаше; за сие народ константинопольский возмутися, возбраняя ему о сем, пишет Кедрин. аще же благоговейнии не попустиша сего в дому кольми паче о церкви.

 

СТАТИЯ, 92.

 

Еже не глумитися и не играти, не отступающих же от сих обычаев наказывати.

Аще который епископ [святых апостол. правило 42. от толкования], или презвитер, или диякон, играет и глумится, и люди глумит, и упивается, и аще не отстанет от того, да извержется. Иподиякон или певец [правило 43], или чтец, или мирский человек, таковая же творя, аще не останется того, да отлучится. 6-го вселенскаго собора [правило 50]. И мирским человеком играти неподобно, правило, 55. ни шпилманом быти, ни позорищь глядати, ни лова деяти, отлучаютбося. От толкования. И мирстии человецы християне суще, чисто житие имети истязаеми суть. того ради правило се. Аще кто играет, или плясание творя или шпиманит, рекше глумы деет, и на видение человеки собирает, или ловитвам прилежит, таковыя отлучает. В Никоновой тое же правило. [в слове 63]. Никому же от всех, или причетник, или простых людей, игры деяти. ащели кто назрен будет се творя, аще причетник есть да извержется, ащели от простых людей, да отлучится.

 

СТАТИЯ, 93.

 

Еже мужеску полу от женскаго хранение целомудренное имети, не хранящих же сего наказывати.

1-го вселенскаго собора [Кормчая, правило 3]. Отрече великий собор, отнюд ни епископу ни презвитеру, ни диякону, ни всякому сущему причетнику, не достоит иныя жены в дому своем держати, но токмо матерь или сестру, и тетку, сия бо три лица, всякаго зазора кроме суть. 7-го вселенскаго собора [правило 22]. Мирским убо мужем с женами ясти, не оклеветанно есть. Тое же правило, в Матфеовой [состав м, глава 15]. Священником, и имже иноческое есть житие, нрав запрещает, наедине с женами ядущим, аще суть и по крови тем ужики. Тое же правило в Никоновой [слово 12]. Имже житие есть, брака и чад мирскаго устроения, купно ясти мужем с женами от незазорных лиц есть. [ниже]: обещававшимся же Господу Богу, иго иноческое взяти, но убо и священническое избравшим житие. никакоже подобает с женами ясти. Тамо же. Брат вопроси Великаго Варсонофия: хощет ли убо кто от любовных призываем, ясти с женами. ответ; никакоже с ними ясти подобает. Тамо же выше Златоуст. Отнюд неприлично есть человеку хотящему иночествовати, с женою ясти, или промышляти о женах, или всяко с ними разум имети. Из устава скитскаго прежних отец поморских [статия. 18]. Мужем с женами безпреградно вкупе не молитися, и не ясти с ними, и не путьшествовати единому с женою. В Номоканоне о иноцех, Потребник. Аще кий инок спутьшествует жене, поприще едино, да отлучится едину седмицу, на всяк день творя поклонов 100. Паки в книге Никонове. от постных святаго Василия [слово 12]. Лепо же есть и женския присвоения и беседы паче бегати, аще не некая нужда беседу понудит. [ниже]: аще убо мощно всяческих; ащели ни, поне частых и долгих бесед и приобщения да удаляемся. Тамо же от завета, святаго Феодора Студита. Да не имаши содружество со инокинею, ниже приходи в женскую обитель, ниже наедине беседуй иночествующей, или мирской, аще не некая нужда привлачит, и тогда двема лицема от обоих стран сущима. 7-го вселенскаго собора [Кормчая, правило от толкования]. Всяко утвержение положиша отцы, и повелеша черноризцем и черноризицам, не жити во едином монастыре, ни вкупе ясти, ни особно беседовати. В Никонове. 6-го вселенскаго собора [слово 12, правило 47]. Ниже в мужеском монастыре жена, ниже в женском муж да спит; ащели кто се сотворит, или причетник, или мирянин да отлучится. Из устава прежних отец поморских [статия, 19]. Юным мужем во обитание женска полу [зазорных лиц] не ходити, и не беседовати с ними николиже. Летом на пашнях [статия, 20], во едином стану безпреградно, отнюд мужем с женами не спати. [ниже]: Вышеявленная же не хранящих [статия, 33], по любовном обличении непослушающаго, смиряти наказанием и отлучением.

 

СТАТИЯ, 94.

 

Еже мясоядения, и пиянственнаго пития без нужды не употребляти.

Устав церковный, прежних свободных времен, и противу прежних еретиков [святых апостол, правило 51]. Всяк причетник, и мирский человек, вина или мяс, или брака гнушаяся, аще токмо не воздержания ради, аще не исправится, отвержен. От толкования. Аще хуля оклеветает тварь Божию, да исправится, ащели ни, да извержен будет, и до конца отриновен от церкве. Анкирскаго собора [правило 14]. Священник мяс удаляяся, вкусив токмо, и тако да останется. аще же ни зелия варенаго с мясы не хощет вкусити, да престанет от службы. Толкование. Яко Божию тварь отмеща, и клевеща на ню, аки гнусну творя. Собора иже в Гангре [правило 2]. Аще кто ядущаго мясо осуждает глаголя; яко ядения ради мяс, не имать надежду спасения, да будет проклят. Книга преподобнаго Максима Грека. Яко разсуждением святых апостол, и преподобных отец, прощено бысть свиных и иноком мясоядение; послух верен божественный Василий. в постнических завещавая отходником преподобным, егда сходятся праздновати, ясти ветчину. [ниже] такоже и Великий во святых и во иночестве Пахомий, тучнейшая убо свиных мяс, предлагаше приходящим к нему миряном, худейшим же и постливыми удесы, питаше сущия онем преподобныя иноки.

О вине.

Кормчая, святых апостол Петра и Павла [правило 16]. Глаголет бо писание, властели яри суще, вина да не пиют. [ниже]: се же рехом, не яко да не пиют. еже бо не пити досаждение есть бывшей от Бога твари на веселие, но да не упиваются. не рече бо писание, не пити вина, но не пити вина в пиянство. Устав Большой [глава 32]. В праздники Христовы и Богородичны и святых, разрешати иноком на рыбу и вино; в иныя же на масло и вино. Тамо же [лист 1012]. Святыя горы Типик повелевает, в Великий Четверток, ясти с маслом, и пити вина по 3 чаши вина. На 40 мученик [лист 922], и на обретение главы Предтечевы, по 2 чаши вина [ниже]: В великую Суботу [лист 1026], по единой мерней чаши вина, и прочее.

Ин устав иноческий, ради сохранения от многих душевредных страстей. о вине и мясоядении.

Апостол коринфом [зачало 146]. Вся ми леть есть, но не вся на ползу, вся ми леть суть, но не вся назидают, и прочее. Ис книги Никоновой, от старчества [слово. 60]. Бысть иногда праздник в ските, и даша старцу некоему чашу вина, и отвращь ю рече, возми от мене смерть сию. видевше же прочии с ним ядущии, и тии неприяша. принесен бысть в келиях корчаг вина, яко да дадут братиям по чаши. и вшедшу некоему на помост бежати, падеся помост. и изшедше грохота ради, обретоша его повержена лежаща, и начаша ему досаждати, глаголюще; тщеславне, добре ти бысть; и прият его отец его, глаголя; оставите сына моего, добро дело сотворил есть. и жив Господь, яко не имать создан быти помост сей в лета моя. яко да увесть вселенная; яко за чашу вина, падеся помост в келиях. От старчества [слово 59]. Рече некий от отец, аще юн еси, бегай вина, якоже от змия. яко вино и жены, отлучают человека от Бога. Аще пойдеши к кому когда, не восхощи показати жительство свое. или яко не ям масла или варения, или рыбу; точию о вине да не разрешаеши, аще боишися брани. аще и укорят тя нецыи. Поведаша отцу Пимену о некоем иноце [слово 60], яко не пиет вина, глаголя им; вино отнюд несть подобно иноком. Ис книги преподобнаго Иосифа Волокаламскаго, о монастырстем строении. Яко не подобает во обители быти питию, от него же пиянство бывает. подобает убо примущим и соборным братиям, о сем попечение имети с настоятелем, [или не сущу настоятелю]. яко да не будет во обители пития, от него же пиянство бывает. аще бо и правилы святых отец; и типицы великих монастырей повелевают, иноком пити вино, в подобно время, а не всегда. овогда по три чаши, овогда по 2, овогда по единой: имеяху бо вино во всех монастырех, и в первых, и в нынешних; но до пиянства его не пияху. якоже свидетельствуют мнози человецы благородни. такоже и иноцы бывшия в Константине граде, и святей горе Афонстей, и во иных тамошних местех, яко не токмо иноцы, но и вси православныя християне, ненавидят и гнушаются пиянства. и вино убо вси имеют. от пиянства же яко от тлетворнаго духа отбегают. таков убо обычай земли тоя. и се есть закон земский и обычай. Ин закон. Аще имеем питие пиянственное, не можем воздержатися, но пием до пиянства. а еже повелевают святии отцы пити по чаше, или по две, или по три, сего мы ниже слышати хощем, ниже ведаем меру чаш онех. но сицева мера наша есть егда пияни будем, якоже себе не познавати, ниже помнити множицею. даже и до блевани, и тогда престанем пити, и таковаго ради обычая, и погибельнаго нрава навыкновения, не подобает имети во обители пития, от него же пиянство бывает; яко да не в конечную погибель, и в блудный ров впадем, еже от пиянства случается бывати, подобает убо соборным братиям; [ниже]: яко егда увидят брата пияна, или уведают у кого где питие, или увидят на трапезе питие от него же пиянство бывает они же никако же да умолчат, но да возбранят и запретят. [ниже]: и аще кто привезет во дворец пиво или мед, или вино, то возвестити настоятелю, или келарю, они же да не умолчат о сем. и аще будет князь или болярин привез, и они ему челом биют, чтобы в монастырь не велел носити, и на дворе не велел никого поити. аще будет игумен, или инок; ино ему говорити любовно о том; чтобы велел, или мед или пиво, или вино, положити в клети да замкнути, и как поеди прочь, ино ему отдати; ащели же не восхощет любовнаго завещания послушати, ино ему возбранити, занеже похвалная брань, лучши миру разлучающаго нас от Бога. [ниже]: ащели же к кому принесут в келию таковое питие, да возвестит настоятелю, или келарю, сам же никакоже да вкусит. [ниже, от слова 14]: аще же вымут у кого в келии питие; или аще вон из монастыря ходил пити, да отлучится от церкви и от трапезы на 40 дней, еще же и келии своея лишен будет впредь. От жития преподобнаго Кирила Белоезерскаго [июня, 9]. Мед же или иное питие, елико пиянство имут, никакоже в монастыре обретатися повеле. и тако блаженный сим уставом, главу змиеву пиянство отреза. и корень его прочее исторже. не токмо же в животе, но и по своем преставлении таковым не обретатися заповеда. И в житии преподобнаго Зосимы Соловецкаго пишет. Еже пиянственнаго пития в киновии имети, и при себе и по преставлении своем никакоже повеле. Книга Стоглав святых отец собравшихся [глава 52]. По совету благочестиваго государя царя Ивана Васильича; и по благословению преосвященнаго митрополита Макария, соборне изволиша вся Бога ради, и своего ради спасения душевнаго вкупе и телеснаго, и брегучи церковных чинов; [ниже]: от ныне в митрополиях и во архиепископиях и епископиях, и по всем честным монастырем, общим и соборным, и особь сущим, пиянственнаго пития сиречь хмельнаго, и вина горячего не держати и не пити; а держати святителем, и по всем монастырем, иноком и игуменом и старцем, житныя квасы, и медвенныя всякия квасы, по своим обиходом. а фряжския вина где обрящутся, да испивают якоже устав повелевает в славу Божию, а не в пиянство. [выше]: святому Великому Василию Кесарийскому, явися Пресвятая Богородица во сне, и глаголя; аще хощеши друг мой быти, и во всем помощницу мя имети, то отрецыся вина, и пиянственнаго пития. он же возбнув, дивяся заповеди Пресвятыя Богородицы, и до кончины живота своего, заповедь Пресвятыя Богородицы соблюде, не пияше вина.

О мясоядении.

В книзе преподобнаго Никона Черныя горы [Тактикон, слово 40]. В начале убо бяше мясо во иноцех, ныне же всячески отсечено и не творится; но отсечено бысть совершенно во иноцех мясо. А миряне же и латыни мудрствуют древнее страстно. В книзе о Вере [глава 15]. Последуй Христу Господу, о Нем же писание свидетельствует, пищи насладитися потребоваше, ячменный хлеб приемляше, и инде пишет, яко рыбы и мед вкушаше. святии же апостоли класы стирающе в суботу ядоша; а не тако якоже ныне прелестнии мнихи мясо жрут, а в посты рыбы и пития хмельныя, и в грех то не щитают. а от наших мнози в той же сети увязают; и еще дерзают глаголати, яко греха в ядении и в писании не заказано мясо. ведай же яко в правилех истинных, два лета епитимия мниху от мясоядения. Книга Зинарь [глава 197]. Инок аще яст мясо, да постится два лета, причащаяся трижды в год, поклонов 50 на день. В Никонове от старчества. Рече некий от отец, яко не полезно якову любо мясоядению творитися в монастыри, ни сущим во образе, ни простым людем, ни странным приходящим. В том же слове апостолово. Тем же аще брашно соблажняет брата моего, не имам ясти мяса во веки. Толкование. И не глаголю рече идоложертвенное, еже и иныя ради вины возбранено бысть, но аще и от сущих во власти нашей и прощенных соблажняет, и онаго удержася; и ни един или вторый день, но и во все время живота. От жития преподобнаго Досифея. Приидоша в Гефсиманию, бе же ту написание муце: яко убо стояше, юноша внимая и дивяся. виде жену честну, носящу багряны ризы. [ниже]: глагола убо ей; госпоже что сотворит кто, да избавится от мук сих; она же отвещав, глагола ему; исполни три заповеди законныя, постися, и не яждь мяса, и молися часто, и избавишися от мук. [ниже]: бе же Мария Богородица. оттоле убо пребысть детищь умилен, и храняше три заповеди, яже даде ему Богородица. Устав поморских отец. По сим различным святаго писания свидетельством; паче же по разсуждению нынешняго последнаго времени. в лишении евхаристии и брака, и прочих пространных таин. о мясоядении и пиянственном питии, на кончину века дошедшим во уставе своем; в статии 15-й пишут законоположительне сице. Виннаго пития и мясоядения не сотворити. [ниже]: в статии 43: Вышеявленная же не хранящих, по любовном обличении непослушающаго, смиряти наказанием и отлучением. Ис тетради собрания Спиридона Иваныча. Тем же и Господу Богу егда благоволившу от возмущения преславнаго мира, Ноя и сущих с ним спасти, тогда и от законных супружниц им воздержатися повеле. о чесом пишет святый Исидор Пилусийский. не пост ли и отвержение смешения, Ноя и сущих с ним, от возмущения преславнаго моря спасе, семена убо ядущих, не прикасающихся же супружницам в плотьстем смешении, святый же апостол Павел глаголет: в не же [время] достигохом, тем же правилом и жительствовати, тоже и мудрствовати. тем же аще и не по заповеди Божией бывают таковая. но и в писаниих у Иеремии пророка, во главе 35 читаем о рахавитах, иже не Божия, но человеческия заповеди [отца своего] послушавше, во всем житии своем, со всем сродством своим, воздержахуся от пития вина, и от насаждения виноградов, и от создания себе домов, еже и самому Богу быти угодно. и сего ради глаголет чрез пророка во главе той, ельма рече послушаша сынове Ионадавли заповеди отца своего творити. не оскудеет муж от сынов Ионадавль, стоя пред лицем Моим во вся дни земли. В книге Гранограф пишет о рахманех [глава 101]. Суть рахмани нарицаемии блаженни родом от земли июдейския, от Иеросалима, имуще отца и учителя Рахава. егда же Иеросалим хотяше пленен быти, в царство Седекии. сии за 3 дни отлучишася от жен своих, послушавше отца своего Рахава, и совлекшеся моляхуся Богу, и не преда их Бог в руце халдеом: и воставшу царю иному, вверже я в темницу. ангел же Господень разруши верх темницы, ем я за власы, и постави за Июдею на место, идеже ныне живут; река же тамо, имя ей Умели, глубина же ея до бездны, верху же ея облак до небес; яко невозможно прейти ни птицы, ни злому духу ко оным от мира сего. Апокалипсис [глава ]. Яко соблюл еси Мое слово, и Аз тя соблюду от часа искушения, хотящаго приити на всю вселенную.

О иже в нужди на вино и мясоядение разрешении.

В книге Никоновой, Златоуст [слово 62]. Хощеши ли уведати, когда добро есть вино, слыши писание глаголющее, дадите вино сущим в печали, и пиянство сущим в болезни, в правду жестокое бо и сетованное весть умягчити, и дряхлое отгонити. [ниже]: вино ни за что же ино дано бысть нам, разве здравия ради. слыши блаженнаго Павла о сем пишуща и глаголюща к Тимофею, вина мало приемли стомаха ради, и частых недуг твоих. Во второй книге [слово 1]. Вино же аще прилучится, не достоит даятися во ин день, но в неделю или в Господьския праздники, или в другая нужная утешения. [ниже]: якоже и Великий Симеон чюдотворец глаголет, яко похвала мниху еже не пити вина, ащели и пиет немощи ради тела своего мало да испивает. сего ради немощи ради нужныя некия по словеси святаго Симеона, мало нечто подобает пити, врачевания ради. В первой книге [слово 68]. Но аще и варение се малое сухое мясо, еже от святых отречено ныне, вместо инаго коего строения в брашно вложити смешено к прочей снеди. [ниже]: подобает убо и таковая не презирати; ни бо жидовствующе удаляемся таковых, но наслаждения и сытости бегающе. Святый Златоуст к коринфом. 2 [нравоучение. 19. лист 1343]. Иже убо семены могий довлетися и здравствовати, ничтоже к сему да ищет. а немощнейший, и яже зелий требуяй цельбы, да не возбраняется; ащели же и сего кто немощнейший есть, и мерноя от мяс помощи требует, ниже того возбраняем ему; ниже бо да убием человеки, и да растлим сия. но совещаваем да излишная отсечем. лишнее же есть, еже потреб вящьше есть. егда же бо и кроме сего можем пребывати здраво и благообразное. лишше всячески оно есть приложенное.

 

СТАТИЯ, 95.

 

Еже всем безвременно не ясти, противно же деющих наказывати.

Преподобнаго Никона Черногорскаго 2-я книга [слово 1]. Кроме трапезы ясти отнюд неподобает. [ниже]: а отнележе от трапезы востанут братия, от воды точию не возбраняются, якоже может кождо творити должен есть, на иное же что не подобает. От поучения отца Макария [от патерика]. По ядении же твоем не прикасайся пищи, разве аще вжадася испиеши воду. От старчества от наказания старца послушнику. А кроме обеда и ужины пити ти по благословению. Там же. И вода опричь обеда и ужины не пити кроме нужды. Ис книги новопреведенной Раймундуса Люлиуса [часть 7, глава 2]. Вопрос. Что есть ядение без времене. Ответ. Есть егда кто яст прежде времене подобающаго, ради самаго невоздержания, а не ради потребы. очесом Сирах поносит, горе тебе земле, ея же князи рано ядят. сим образом согреши и Анафан, противу заповеди отца своего Саула, не дождавши времене яде обретенный мед. но за то повинен бысть смерти. к сему же прилагается, аще кто обык многажды на день ясти. В 1-й Никоновой книзе. от главизн святаго Епифания о ереси месалианстей и лампетианстей, и прочих [слово 59]. Пост же никакоже ведят помняще, на молитву упразднившеся, и от часа втораго, или третияго, или нощию, аще достигнут взалкати, вся без страха содевают. ядуще и пиюще. Номоканон о иноцех [Потребник]. Аще кто от инок тайно яст, кроме братства, да отлучится две седмицы, творя поклонов тысящу и пять сот.

 

СТАТИЯ, 96.

 

Еже в 40-цу и в среду и в пяток, единою днем ясти, кроме нужды, и в понеделники скоромнаго не ясти, и прочее.

Из устава прежних поморских отец [глава 4]. Четыре посты поститися по обычаю християнскому, и во все лето, во всякую среду и пяток, в посты же и в понеделник по уставу. кроме праздников, и разрешенных седмиц, по единожды днем ясти, без рыбы и масла, якоже божественнии апостоли узакониша, и в правиле 69-м сице глаголюще; аще который епископ, или презвитер, или диякон. [ниже]: в 40 дней великаго поста не постится, и во все лето, во все среды и пятки, да извержен будет. [токмо аще не пакостит ему телесная болезнь, немощному бо и в посту прощено вкушати по силе масла и овощнаго вина]: ащели мирский человек не постится, да отлучится. В Номоканоне святаго Афанасия [Потребник]. Среды и пятки пост учинен, даже до девятаго часа. Тамо же. Ведомо же буди, яко в равном чину полагают правило, святую 40-цу, и всяку среду и пяток. Никон Черногорский [слово 57]. В пост великий, ковачи и древодельцы, егда делают ядят в 6-й час хлебы токмо, пиют и вино по 3 чаши, разве понеделника и среды и пятка: в сих бо днех, точию больнии и старцы пиют, инии же не пиют. в других же служениих, иже есть немощен, и не может единою днем ясти, яст 2-жды, рекше в час 6-й хлеб и воду точию, вечер же с братиями. в 40-цы же тяжцыи служебницы, испивают по единой чаше прежде обеда, и хлебы ядят работы ради, яко тяжки суть.

О понеделнике в мясоястии.

В конониках печатных о житии християнском. Кроме уставленных постов, аще кто имать произволение, и понеделник хранит от мяс, добре творит, ащели ни, поне среду и пяток. В Номоканоне о понеделнике [Потребник]. В понеделник же миряне от мяса, иноцы же от сыра и яиц и рыбы да воздержатся. Тамо же. Иноцы же и понеделник да хранят всего лета, якоже среду и пяток. Зинарь [глава 193]. В понеделник святии отцы уставиша пост мнихом покаяния ради. В Никонове [слово 57]. Сии убо соборнии пости християнстии, от божественных писаний, понеделник среда и пяток всего лета, предание имамы постити их. В книзе преподобнаго Максима Грека [слово ]. Послание инока Максима грека, к некоему князю. С чего пошло не ясти скоромно в понеделник. [ниже]: от Господа реченно, аще не преизлишествует правда ваша, паче книжник и фарисей, не внидите в царство небесное. [ниже]: фарисее к прочим добродетелем, дважды в неделю постяхуся. святии же Христови угодницы, якоже в прочих добрых делех, предолели им зело, такоже и в постном делании, превзыти их уставиша себе пост в понеделник, то есть, 3 дни в неделю поститися.

И еже после полуночи не ужинати.

В книзе Матфея правилника [состав п, лист 164]. Начаток дне, нощный, 7-й час.

 

СТАТИЯ, 97.

 

Еже запрещенных снедей не ясти, и пиров по обычаю поганскому не творити.

Кормчая, 6-го вселенскаго собора [правило 67]. Божественное писание нам заповедало есть, удалитися от крове и удавленины и блуда. нецыи убо угождения ради чревнаго, кровь коего любо животнаго, хитростию некоею сотворяют снедну, еже глаголются колбасы, и ина таковая, и тако крови ядят. подобно убо запрещением таковым. Аще убо кто есть ныне кровь животнаго киим любо образом ясти начнет, аще есть причетник, да извержется, мирский же человек, да отлучится. Карфагенскаго собора [правило 68]. Иже от поганских обычаев сотворяемии пирове, да будут отвержени. От толкования. Иже от поганских обычаев сотворяемии пирове, верным творити непрощени.

 

СТАТИЯ, 98.

 

Еже друг друга почитати, безчествущих же наказывати.

Апостол к римляном [зачало 110]. Бывайте друг другу любезни, честию друг друга болше творяще. Отверзите от себе хуление и срамословие [зач. 257], и не лжите друг другу, и прочее. В Номоканоне о иноцех [Потребник]. Аще кий брат буесловит, и безчествует братию и миряны ругает. поклонов 100. еще же должен есть, пред ними же оболга и оклевета, славу и честь благую воздати; глагола, яко он сице оклеветах, и ложь рекох, но он честен и праведен и свят есть, по святому Златоустому и отечьнику. Зинарь [глава 134]. Аще два брата духовная окрамолятся, да отлучатся дней 60, поклонов на день 12. В Номоканоне [правило 97]. Инок аще солжет вольным хотением, имать запрещение 100 поклонов великих. Ащели да спасет душу, или свою или ближняго, греха не имать. Тамо же [правило 125]. Укоряя и проклиная искренняго; прежде да смирится пред ним. таже да отлучится три дни, сухо ядый с водою. писано бо есть; глаголя брату своему ракка, или юрод, повинен есть геенне огненней. Аще кто укорит священника [правило 126], да запретится лето едино. [ниже]: аще и священник простит ему согрешение. В Номоканоне о иноцех. Аще кий инок вземляся на игумена своего, и досадит ему, да запретится лето едино, и поклонов 1000. на всяк день. Зинарь [глава 135]. Ругатель да покается лето едино поклонов, 12.

 

СТАТИЯ, 99.

 

Еже лихоимствующих в чесом, воспрещати и наказывати.

Святаго Григория Кесарийскаго [Кормчая, правило 3, лист 262]. Не токмо разбивати скаредно есть и странно, но и лихоимствовати чюжих, срамнаго ради прибытка прикасатися, всяк убо таковый, Божия церкве отриновен. Ни на пути что обретый брата своего [правило 6], не подобает свое имети. Аще и сами что погубивше [правило 8], и в того место чюжая восхитивше держат, сами ся прельщают. Святых апостол, правило. 44. Лихву вземля от должника святитель, аще не останется того, да извержется. Арменопул книга, 5-я. В них же бо священницы извергаются, людини отлучаются. В Матфеове [состав т, глава 7]. Лихвы притяжание недостойно християнскаго жительства и мерско судится. Тамо же [состав от(?)]. Никифора патриарха правило. 31. Лихву приемлющих не подобает причащати, или ясти с ними, пребывающих в законопреступлении. В Номоканоне на конце. Имущих меры сугубыя, отврещи от християн и прокляти, по рекшему, скупо ценяй пшеницу, от народа проклят. аще же престанут и покаются, да запретятся лета 4, сухоядением с поклоны, такожде и на лихву дающии сребро свое. В книге Никонове Златоустаго [слово 46]. Егда бо в советех внегда купити, или отдати любопримся, и нудимся менша достоинства вдати. и вся о сем творим. не разбойничество ли вещь та, не татьба ли и и лихоимство. Катихисис малый [лист 61]. Осмая заповедь Божия, [еже не укради] научает ни единыя вещи чюжия привлачити си, яковым любо образом, аще втай, или яве, или убо прелестию яковою ближняго в чинех и службах. Понеже то все заповедано есть от Господа Бога в сей заповеди. Древлеписменной Соборник [слово 1]. Видех иконописца ценяща иконы дорого. и рех, не много ли емли, да не вторый Июда будеши иже прода Христа. В Никонове святаго Исаия [слово 47]. Аще продаеши что, или купуеши что, возлюби яко да мало что отщетиши себе, яко да не побеждаем сый о опастве цены и впаднеши в грех. Святый Василий Великий [Кормчая, правило 61]. Тать покаявся лето едино отлучится, обличен же быв и другое. Там же [лист 269]. Лихоимство вторый идолослужения образ. [ниже]: втайне крадый и покаявся, да раздает и яже украде, и своя нищим. Исправление лихву вземлющему [лист 230], еже раздати нищим собранное от лихвы неправедное богатьство, и обещатися к тому в таковый сребролюбия недуг не впасти.

 

СТАТИЯ, 100.

 

Еже во вражде пребывающих наказывати. по первом же и по втором наказании не послушающихся конечно отлучати, тако и в прочих винах.

Номоканон о иноцех. Аще кий брат укоризну приим от брата, и молен быв от дружины, и не простит согрешившему, да отлучится седмицу едину. Там же, выше. Имея ненависть на кого, в дом молитвы да не входит. донележе примирение сотворит. да сотворят же оба поклонов, 50. Там же [правило 125]. Аще кто во время причастия печаль имея на брата, не даст ему мира, да есть отлучен: ащели священник со враждою литургисает, да будет празден 60 дний. Выше правило, 123, апостола Павла. Аще кто имать вражду на кого, в церковь да не входит, ниже приносы его приемлются, дондеже примирится; ибо молитва его в клятву и в грех вменяется, да творит же на всяк день поклонов 50. Зинарь [глава 134]. Аще брата духовная окрамолятся, да аще паки держатся и любятся, то добре; ащели ни, то да отлучатся от церкви. [ниже]: ащели предварит един и простится с покаянием, мзду приимет от Бога сугубо. а иже не хощет простити, враг души своей, таковый да отлучится от церкви. [ниже]: памятозлобник да покается лето едино, поклонов 12. Святаго Василия Великаго, о нерадящих о епитимиях рекше о запрещениих. Аще не сотворят кого целомудренна общая запрещения. нужда есть, от Господа реченными правилы повинути таковаго; обличи бо рече согрешающаго брата твоего, между собою и тем единем. аще же не послушает, приими с собою и другаго единаго. аще же ни тако, рцы церкви, рекше в соборе. аще же ни тако послушает, да будет ти, яко язычник и мытарь. и он сица убо единою позван быв, пред вама же обличен быв, и пред церковию свидетельствован, и понеже не восхоте послушати, да будет от тебе отвержен, и да возвестися о нем везде, не прияту быти на всяко общение житейския потребы, яко того ради, понеже не смешатися ему с нами, будет дияволу в снедь.

Еже и прочее все творити по писанию и содержанию прежних отец.

В Никоновой преподобный Феодор Студит глаголет [слово 18]. Не преступай законы и правила святых отец, прежде же всех божественнаго и великаго Василия: но вся елика аще твориши, или глаголеши, имей свидетельство от святых писаний, или от отеческаго ти обычая, кроме преступления Божиих заповедей.

Еже вся таковая творити, в славу Божию, и во утвержение церкви до скончания века.

Апостол к ефесеом [зач. 223]. Слава Богу в церкви, о Христе Исусе во вся роды века. От толкования Златоустаго в беседах апостольских [лист 1634]. Слава Его в церкви, добре тако рече, сия бо весть пребывати выну. сего ради хощет Бог в ней от нас прославлятися до скончания века: сие бо есть во вся роды века. В книге 2-й, преподобнаго Никона Черногорскаго. Соборная же церкви, не стены суть, но правая учения, и предания божественных правил. [ниже]: виде ли, кая есть соборная церкви. сам бо великий Петр Антиохийский, многажды разрушены быша от язык. Закони же и предания святых отец, и божественная правила пребывают неразрушенна от державных та в веки. Евангелие от Матфея [зач. 116]. Рече Господь своим учеником, шедше научите вся языки, крестяще их во имя Отца и Сына и Святаго Духа, учаще их блюсти вся елика заповедах вам, и се Аз с вами есмь во вся дни до скончания века, Аминь

 

Дозде стостатейник

 

 

 

 

Соборне разсужденное показание, московских отец и братии нашей,

о снизходительном понятии Алексия Яковлевича о федосеевых.

 

Показание известное, о новопроизшедшем мудровании, преждебывшаго нашего благорачителя, Алексия Яковлевича. Ибо он, по 7288 [1780], лет; Благорачительно состоял по согласию со святым писанием, и с содержанием древних отец. И по общему совету поступаше; А от 7288 года, По выезду из Помория, начат вскоре открывати новыя сия мудрования и поступки. А: не требуя по обычаю общаго совету, но токмо собою заключил чрез некия, 13, статий: с феодосиевым согласием мирный союз сицев. Воизвестие боголюбивейшей братии о мирном устроении, на чем полагаем примирение; о том в сих статиях написуем: На кои они согласились, и рукоприложением утвердили; И с тем чтобы всех у них прежде умерших поминати, К коему поминанию он и сложился, и в заключение всего Илья Алексиевич и начало пред ним положил. И по сем уже стал оказывати и нам о безсоветном своем мудровании. При том же и о новом мудровании: При сих же являя яко бы поморския отцы феодосиевых в лета 7235 [1728]: от раздору примирили и правильно исправили. А почему и поминати о том во осми статиях предложил к нам, в коих он яве новое мудрование объявил. Яко бы и древле святии не токмо в каковых винах не равно умерших поминали. И к сему его мудрованию и поминанию исперва не последовали, Как живущие с ним, Стефан, а: также Иван, а: подобне и Кимрской Андрей Ивановичь. И того ради он изобрел по своем заведение на то удобнаго, и прежде семо и овамо влающагося Ивана Панкратовича. И прият его по новому своему заведению без всякаго исправления, И поручил ему духовное правление, чрез правила святых, и чрез соборно положенныя статии, по коим мы грубии следующе: и прежде елико Господь помог ему предлагали; Но он отнюд не приимаше. Того ради и зде хотящих ради придержатися древних отец содержания по святых отец писанию. А от его вновь произшедших мудрований удаления: О коих и показуем зде сими. 1-е. Еже он исперва в презрение положи братьское советование. А чрез то и самое о том Христово, и апостольское законоположение. Евангелие от Матф., зач. 76. Рече Господь своими усты; Аще два от вас совещаета на земли о всякой вещи, будет има от Отца Моего иже на небесех. И правило апостольское 34. Епископом коегождо языка деяти убо особь подлежащим тем церковная строения. Множайшу же взысканию возрастшу, яве яко во общую церковь устроению зрящу. Любо о преданых потреба будет стязатися. негли. Любо общее исправити погрешение; Любо ино что сицевое. Ведати подобает епископом митрополита, и с ним совокупльшеся, о привпадающих вещех вкупе смотряти. И еже всем добрейше возмнится судити. И ниже митрополиту в насилие сию полагати, и кроме воли своих сослужебников, некая от вышереченных деяти: Но единомыслием и любовию связаным, общих вещей смотрети. [Кольми паче неосвященный без совету ничего не может творити.] Сему согласует и 9-е правило, иже во Антиохии собор. Книга Кирилова, послание Фотиево. Всякое рече добра, да предваряет совет; А имже сия потаишася, истины отпадают. Святый Златоуст, к римляном беседа 22. Тем же и в потребу друг друга постави нас Бог, Аще и мудр будеши, иного требуй. Ащели мнишися не требовати, всех безумнейши будеши. Тем же якоже хощет он, Алексий Яковличь: да поступает, а сия правила яве преступает. А еже он Алексий Яковличь: от 7288 [1780] года вново проповедует, якобы поморския отцы, феодосиевых примирили и исправили. И сие проповедание не есть истинно, но и ложно: По сим показаниям. Первое; Яко сей раздор феодосиевых, Андрей Дионисьевич в послании яве уподобил, к бывшему раздору чрез Феодорита с прочими помогающими еретику Несторию, и отлучишася от святыя церкви; Подобне и Феодосий с прочими, от части верных отлучитися дерзнуша, по свидетельству Андрея Дионисьевича с прочими. Второе. А примирения и правильнаго исправления подобнаго Феодориту отнюд не показуется: Кроме ложных изветов, якоже и поныне видимо есть всякому благочестивому. Третие. А еже обносится на писме выданном поморскими отцы: в лете 7235 [1727], По желанию Игнатия Трофимова на время и для обыскания: И се есть отеческое снисходительство едино, а не правильное их бяше исправление; Занеже на то время и сами оныя отцы крестам с титлою поклонятися извещали. Откуду и собор бывший в помории, в лето 7268 [1760] год, Яве исповедают сице. Аще и отцы наши на время уступаху. Но не законно, но для обыскания и ради надежды обращения; Но той же Игнатий лет через 10: и отписал в Помория сице: А что вами представлено нам о крестах с надписанием Царь славы, и прочая. И сие приемлем и лобызаем. А где с Пилатовой титлою четырьми буквами, и то за равно честно приемлем, и поклонятися будем; Противу сему поморския отвечали сице: Еда по вам и латыни и люторы равночестно и богословно пишут; Нам сие страшно есть и слышати, а не токмо принимать. А еже вы потщание имели для обыскания на древних крестах, Но видится нам ваше тщание, Где бы по вам титла была, А иного не смотрите, Но блюдите писаннаго. Всяк творяй дело Божие с небрежением, проклят есть. По сему же Естрат Федосеичь, в житии отца своего, и на вопрошение Михаила Григорьевича, о 15 статиях отписывал сице: Како отцы наши нас научили, тако и содержим; А переучиватися нам, и людей переучивати несть хотения. Четвертое. Почему и Михаило Григорьевичь ведаючи сие на время, бывшее отеческое токмо снизходительство. а их неисправление. И потому описуя о раздоре их сице. И тому рече раздору минуло по нынешний настоящий год, 7266 [1758]: 52, год уже течет, И в том раздоре греха и от сего света неисправлены отходят. Подобне и Данило Матвеичь отписуя к Михаилу Григорьичу сице: Яко было сие снизхождение на время и для обыскания. а понеже во обыскании их ничтоже обретеся разве ересь и ты потщися неведущих уведомить, чтобы как прочих новизн, тако бы и от сея блюлися. И сих показаний сия, о мире и о исправлении правильном, проповедь, новое и ложное есть. Пятое. А еже выше упоминашеся, во еже умерших в раздоре, яко и православных поминати. О коем поминании доводствуя он прежде бывшия во святей церкви внутренния случаи. Якоже бысть смущение о изгнании Иоанна Златоустаго: И прочия таковыя кои исправляемы бяху святою церковию. якоже писание показует. При коих доводах яве дерзнул доказывать и такую новизну. Яко бы царица Феодора, по смерти царя Феофила, согласися с православными епископами положила, чтобы всех разрешать и в церковь приимать иже ересиею иконоборною повреждени бяху, и мертвым отпущать. Иконоборцы же тогда от прежде бывшаго 7-го собора осуждены бяху и прокляты. Обаче отцы умирения ради церковнаго соизволиша на сие. И сего ради и Феофила того поминаху. До зде довод. Почему же сие есть новое. Показуем сими. Первое, Яко мы сего в писании не обретаем, еже бы еретиков поминать: Но паче запрещение сицево. Никон Черныя горы, слово 26. Подобно и в Кирилове лист 15. о еретикох же о живых токмо молити: О умерших же сих не молити, тако бо от святых отец указася. Соборник Большой лист 42. Да будет ти разум о них же поминание бывает умерших. Яко же кто имать чадо мало и неразумно, таже и недугующо, и того взем свещи и масло, и принесет в божественный храм, и сие сожжет отрока ради. Но не яко той отрока ради, но яко сам отрок ту стоя и жьжа. Согласно же сим и Бароний в лето 1110. Король Германии, просил папу Пасхалия 2-го. дабы повелел ему отца его Генгрика, которой в раздоре с папою умре, погребсти не соизволи, на сие пишут, Яко писание святое и чюдеса Божия не попущают: И яко с теми умершими не имамы сообщения, Иже с нами живи суще не хотяху имети его. Святый Иоанн Златоуст, беседы лист 2066. Суть бо мнози радующиися о злых, и тело Христово растерзающии паче нежели воини копием: оное бо сего есть и меньшее зло. Они бо паки совокупишася. Сии же отторгшеся. Аще зде не совокупятся: то не к тому уже совокупятся, но пребывают исполнения вне. И по сим показаниям яве есть, яко новое сие мудрование, еже еретиков поминати, и приобщение с ними имети. Второе. А еже о Феофиле царе бывшем во иконоборной ереси, при смерти же бедной раскаявшуся, и бедное то над ним Божие наказание в милость претворися; И исповедал добро почитати святыя иконы: И за сим токмо и умершу ему. Царица же Феодора умолила епископа, не яко уже поминати, но мольбу о нем творити: яко покаяние его в Божиих судьбах оставашеся. По многим же мольбам бысть царице видение, яко ведоша его связана, яко повиннаго казнить, и поставиша пред судиею, царица же последуя: ей и рек судия, О жено велика ти вера. Разумея убо яко слез твоих ради, и моления рабов моих: Прощаю его; Разрешите его и дадите жене его. Но святейший Мефодий патриарх еще совершенно не уверился, но взем книгу и написав всех еретиков иконоборцов имена, с ними же и сего Феофила, и положив под святую трапезу: И по литургии узрев Феофилово имя заглажено; И сице сего Феофила, сам Господь Бог, от четы еретическия изъят. Очесом преподобный Никон, слово 38, пишет; Яко поможе ему покаяние умерших, не есть писанного повеления еже поминати, но паче запрещение, якоже выше показася. Откуду яве, яко сие мудрование есть новое, и писанию противное, и с неприобщенными приобщительно. Третие. По коему мудрованию, от 7288 [1780] году: откровено уже чрез многолетный обычай, у феодосиевых в раздоре нераскаяно же умерших и поминают. Коего действия древле отнюд не показуется, еже бы с живыми не приобщатися, умерших же поминати. И живым феодосиевым за здравие или за упокой молити завещевати, Якоже ныне Иван Панкратович, всем ведомо учинил, и сей есть учинок нововводный. Понеже как в Помории монастырских, так в Питере и в Москве прежде не поминали, такоже и несогласным молити не завещали, но паче и запрещали. О чем у Федора Михайловича питерскаго, в 21: статиях именно написано. Четвертое. Его же новое мудрование сицево; Ибо исперва он сих единьственно феодосиевых оправдуя, якобы они поморскими отцами, законно примирены суть, и правильно исправлены: А отцы наши якобы того не знали. А о монастырских молчаше. По некоем же  времени потщався сочинити слово показательное. В нем же: оправдуя феодосиевых, вкупе и монастырских неисправленных николиже; Хуля же и злословя древних отец оних бывшая суждения: И приятие нарицая сие чрезмерным мудрованием, и прочими злохульствы. И якобы произыде мудрование: Еже нецыи усмотривше во християнех глаголемых феодосиевых и монастырских некия недостатки. И вместо подобающаго о тех попечения, и тем исправления; от самыя гордости и вышения, начаша в чины неприобщенных полагати, и прочая тамо ниже; Но понеже и от дней апостольския проповеди, даже до Никона патриарха, многия бываху во християнех недостатки и заблуждения, и вящьшия сих феодосиевых и монастырских. Обаче же не за всякия недостатки, в ереси определяху, но исправляху точию: Кое слово на 13: статей исписано. о случаех еще внутренних сущих; о них же отец Андрей Дионисьевичь на вопрос 10. ответ полагая сицев. Объявив во осмих статиях, о бывших в России раздорах. о прочих же внутренних яве исповедав. кроме же поменовеных раздоротворений, аще какия недостатки случахуся в Росийстей церкви от киих. и сия вся исправляхуся церковию. И все благодатное согласие всеросийскаго благочестия вельми безраздорно соблюдашеся. А еже уподобляти церковныя исправляемыя недостатки, кие исправно пребывающим в явных раздорах. да еще же якобы сии и меньше сих древле бывших недостатков непщующе, приобщения же сих обоих уклоняющеся; Убо и сие мудрование есть новое, и нигде не бывало. Пятое. Да его же мудрование о сих же обоих согласиях сицево есть. А понеже сии согласии чрез приятие веры и святаго крещения, и в ту веру и церковь приемлют и святое крещение, и потому они и в части древлеправославныя Христовы церкви бывают. аще и недостатки имеют; Но сих ради никаковым древле бывшим подобни быть не могут, сих ради вин; 1: Яко вси тии еретики судимы быша в полность церковную: Без той же судитися и прииматися не могут. 2: Якобы на последнее время Святым Духом предвидено о трех токмо падениях: о римском, о унитском, о руском. 3: А о втором, и о третием чину умолчено и быть. Того ради и святейший патриарх Филарет, римлян, и уният, в первый чин положи. прочих же преступления имущих ни в который чин не положи. но яко и своих по обычаю православных целити завеща. 4: А по Филаретову изложению, якобы и поморския отцы подобне о новоженах, и о федосеевых поступали, и яко своих исправляли: Сице, якобы и он ныне о сих согласиях поступаше. И о сих его четырех его мудрованиях. Мы грубии зело сумневаемся, сих ради. 1: Яко сии обои согласии яве состоят под зазреными от святых и древних отец, новизнами; яко же о еретической, I Н Ц I, титле, от восточных чрез Евсевия Пимина, в книзе Лифос лета 1642: А от лика российских страдалец, чрез Игнатия соловецкаго старца, и Андрея Дионисьевича. Но феодосиевы сию новизну равночестно почитают с богословным писанием. 2: О браках еретических до веры брачившихся, еже они ко второму браковенчанию неподлежащих мудрствуют. На чадородьствующих, правильно яко соблудивших не наказуют: О коих они обличены и зазрены, чрез соборное послание от поморских отец. Противу коего и от феодосиевых противомудренное послание яве о них показует: И много своиньствует древле бывшему николаицкому зломудрию. 3: Мудрование о торжищном брашне, зазренное от многих святых, и от Выгорецкия обители. Прочая же за краткость оставляем. Подобне и у монастырских. 1: Зазреное же святыми и древними отцы нововводное богомолие. 2: О браках новоженских чрез правила, и чрез готовая отеческая содержания, кая много своиньствуют вышереченным николаитом. 3: Еже они монастырския, киновийскую общину яве разрушили. И всякому свое имение яве содержати попустиша, чрез правила святых отец. Альфа, глава, 70. прочая же за краткость оставляем. Тем же известно ведаючи он сия вся, а дерзает яве, якобы они в части еще древлеправославныя Христовы церкви суть. Кое есть мудрование писанию святых противное по сим показаниям. 1: Святый апостол Павел, зач., 51, на коринф., церкви Божией иже в Коринфе. Златоуст беседы лист 1021: Паки их церковь нарицает, Собирая всех воедино и связуя. Нибо будет церковь едина, раздравшимся иже в ней, и друг на друга воставших. 2: Преподобный Максим Грек, глава, 92. Противу Николая немчина: пишет бо. Добро убо о Николае зело добро и спасительно есть, еже промежу вам и нам единомыслие и соединение. Сего бо кроме не можем имети Спаса Христа посреди нас. Сам бо глаголет: Идеже бо аще будут два или три собрани во имя мое тамо есмь посреде их. 3: По коим писанием и поморския отцы, к феодосиевым о раздоре их пишут, Яве отторгшимся от согласия церковнаго, и от части святых, отлучившимися, и от диявола сей раскол всеянный яве исповедают. 4: Согласно же сим преже бывший в Помории Андрей Борисов, в 21, статии. Церковь бо святая по писанию, соединение есть, а не разделение. И тако пребывающии в правоверном соединении, во святей церкви пребывают. Раздирающиижеся вне церковнаго сочленения бывают. хотя же сии и свое собрание церковию наричют. Однако ненадежно главою оныя быти примирившему нас ко Отцу небесному Своею кровию Христу Богу. [соглашающий бо] си есть диявол в раздорных началом не бывает. Следовательно и Христос Бог, в несогласных главою быти не имать. К сим же и в Москве бывшия отцы, старец Варлаам, Феоктист, Михайло Григорьевичь с прочими соборне в лето 7274 [1766]. таков приговор обще положиша, Чтобы общения с феодосиевыми не имети: Уповающе сим нечто полезно учинити. Аще почувствуют они наше отделение, и упрямство свое повергнут. Ащели же и не повергнут: То и тако да будет церкви Христове утешение; егда таковыя упрямцы уже не во святей церкви, но вне ея пребудут. Сие же после корнилиева миру. на подлинном писано. К сему письму старец Феоктист подписуюсь. к сему письму Иван Алексиев, вместо старца Варлаама подписуюсь. к сему письму Михайло Григорьичь подписуюсь. 1: И от сих писаний яве есть, яко новое сие мудрование, зане без единомыслия, и без согласия, и без соединительнаго собрания в части Христовой церкви быти утверждающее. 2: Его же мудрование о суде, токмо священным лицам, а не простым; И сие мудрование супротивно есть писанию святых, и древних отец содержанию. И о сем пишет преподобный Иосиф Волокаламский, Слово, 13, ниже: Прочие же речем и о сих: Еретицы глаголют: Яко аще и подобает судити и осуждати еретики, или отступники, но царем и князем, и святителем. а не иноком. И к таковому сице речется: Аще не подобаше иноком осуждати; То како Великий Антоний осуждаше их. И ученики своя наказуя, да никоегоже приобщения не имут с мелетианы, и с прочими еретики. Святый же Пафнутий, на 1-м соборе, Ария со святыми отцы осуди. Святый же Авксентий на волах привезен Нестория осуждати. Подобне и Даниил Столпник повеле понести себе на собор еретики осуждати и проклинати. Такоже и на шестом соборе, вместо патриарха, Петр мних прииде, и со святыми отцы еретики осуди. Но и на всех 7-х соборех приходяще иноки, и со святители вкупе еретики осуждающе и проклинающе. И от Святаго Духа научени быша, и написаша правила, еже еретики осуждати и проклинати. Правило, 15: второперваго собора [Кормчая, лист 221]; ниже: Ащели патриарх, или митрополит, или епископ, которую убо ерсь от божественных зазреною прежде отец, народне проповедует. иже от того приобщения ограждающе себе, не точию недостойным быти муце, но и прикладныя почести да сподобляются. и не в раздоры соединение церковное разсекоша, но от раскол церковь потщашася разрешити елико по тех силе. Ответ, 29: Тимофея Андреевича на вопрос поповщине еже судити и определяти противомудрствующих, в кий любо чин, и всяк правоверный християнин может. О чесом в 10-м ответе, и в 21-м, и в 30-м, явихом. Никон Черныя горы, слово 63. Да церковная правила употребляем в полезная, и яко да кождо от хотящих в потребная и в ключимем чине, и своим временем приплодит пользу. Темже и мы аще правильно судим, разсмотряюще второперваго собора, 15 правило. Иосифа Волокаламскаго, слово 12. Убо можеши ли рещи, якобы единым освященным суд вручен есть; неосвященным же отнюд якоже священнодейства не касатися; Якоже в вопросе у вас предложися; но несогласно есть святых, якоже показахом. 3: Третие мудрование, якобы на последнее время, проречено Святым Духом Первому чину быть, а второму, и третьему не проречено и быть. Кое и есть, противно же писанию святых: беседы лист 2012: ереси [а не ересь] во вся времена быша и будут. О вере списатель после римскаго, и униатскаго отступления бывый: Пишет против разных ересей целую книжицу написав. и ныне помянути о плевелах еретических потребно: ниже. А тое потреба ведати, иже святый Иоанн Златоуст, двояку способу ересей описует. Един яже догмат: А другий яже распр: В первом еретицы заблудили. Во втором же и верныя поувязли, единак распр легчае. але ереси пагубны. Подобно сему святый Симеон Фессалонитский после же римскаго и униятскаго отступления бывый, Вопрошения Кирикова. Елма же множество есть ересей, и християня все зовутся, мнениями же разлучаются многообразными; ниже: И кая убо ересей горшая архиерей. Все брате иже в ров погибели вреяет, лукавыя есть части: и все еже спасение вредит, погибающаго есть чина. Но обаче же якоже разньства во благих, и подаянием воздаяние; Тако мню и в противных: Аще и безчиние всякое есть в них, и ничтоже бо у лукавых в чине есть. Но обаче горшая ересь о Бозе многшая имущая вредословие. Порядно же средния же и последния меньшество, мнящеся имети вредословие злаго, до зде Симеон. От жития Выгорецкаго отца Корнилия, глава, 8. О проречении его о Выгорецкой обители сицево; Яко послет Бог велию скудость на обитель, обаче мнози укрепятся, и скудость претерьпят. И не к тому от скудости что постраждут, но от самочиния и от самоволия и от непристойных обычаев, якоже и прочии монастыри разорится. В житии глаголет списатель, о сем проречении Корнилиевом. Должни есмы молити Бога, дабы сие яко Ионино упразднил. А чрез что того не вообразил: Егдаже исполнися, тогда яве забыл, и книгою оправдил. Отца же Филиппа расколом осудил. До зде от жития. Святый Афанасий, ответ, 73. Есть ересь. И по сим показаниям от писаний яве, яко и сие мудрование есть новое. 4: Четвертое: Егоже мудрование якобы и Филарет в первый чин положив, прочих же яко и своих целить завеща. А по Филаретову изложению, и поморския отцы о новоженах, и о феодосиевых поступаху, и якоже своих поцеляху. Убо и сие о изложении мудрование яве супротивно есть писанию святых и разуму древних святых отец: еже самое изложение показует сице. Тем же аз убо смиренный Филарет патриарх, с сыновы моими положих завет, грядущим по нас братиям нашим. ниже: И сие не новое введше, но древнее укрепляюще поновихом, последующе заповеданию святых апостол, и святых отец. якоже они заповедаша, о еретицех и раскольницех, и о тех иже отчасти приобщаются еретическому учению, или общению. И на сие поморский отец, в 13; статиях, явственое разсуждение, сицево. Филарет патриарх по изображению своего писания, всех еретиков повелевает крестити. Вторый чин миропомазание положи на тех, которыя Христа отвергутся, или в ересь впадут и обратятся. Третий чин изложи, о ядущих со еретики, и обычаем внимающих, а еще веры християнския не отвергшихся. И о сих убо дву чиновех поморския же отцы противу феодосиевых зело яве показуют. Ащели кому возмнится невозможно спастися, еже отложити вышереченныя священническия действы, си есть молитвы раждающим женам; и оскверньшимся сосудом и брашном, и прочая, и прочая; То помыслити подобает: Како и нужнейши бы сего во отвержение Христа; или в ересь впадшему, миропомазание и молитвы очистительныя. Такоже кто яст со еретики, сим по проклятии ересей молитвы очистительныя. И за сия вся у нас не плачем ли и воздыханием, от Бога милость испрошается, до зде поморския. И чрез сия яве они показуют, котории положены Филаретом патриархом, во 2-й, и в 3-й, чин. Якоже древле обретахуся и обращахуся: Такоже и в сия времена обретаются, и в неприсутствии священнодейств обращаются, и чрез правильное видимое и духовное покаяние исправляются, и сие отеческое изъявление утверждают мнетия[?] образы. Первый верховный апостолом Петр. Вторый брат некий отвергшийся Христа генваря 16. Третий; преподобный Пахомий, отвергшагося Христа покаянием исправи. Четвертое: Великий Иоаникий, от иконоборныя ереси некоего отступиша, на покаяние прият, и совершена християнина быти устрои; Ответ 72, Поморских отец; К сим же еще показуют поморския отцы к феодосиевым; сице и о нынешних раздорах. Сия убо кратко предложися любопрящимся и раздирающимся о готовых речениях, в готовых книгах. Ниже: [его же] Аще бы кто и ныне в каковых распрениях, или раздорах и прегрешил, и потом покаявся, и от него своесмышленаго будет разума, и согласия с кафолическою церковию: Долженствует оного приимати к церковному согласию, по древним образцем. Ибо и Феодорит блаженный Едеский, на 3-м соборе со святым Кирилом от церкве отлучишася; но паки покаяшася, 4-м собором не точию к церкви прияшася, но и в епископы паки учинишася. Сице и мы благочестивым и мирным согласием, готовое отеческое православие держаще; и тако единостию согласия благочестиваго, во единьство кафолическия церкве вместимся. И от сих яве показася, якоже древле приимаху святии нерукоположении, и чрез покаяние исправляху. Такоже и сии отцы, от нынешних раздоров, по древле бывшим образцем кающихся, с вышеписанным устроением приимати от раздоров устав полагают. И от сих показаний яве, яко и о Филаретове изложении мудрование, писанию святых и древних отец разумению супротивно якоже показася. А еже при том же и о поморских отцех доказует, якобы и они по Филаретову уставу о новоженах, и о прочих, якоже о белорусцех поступаху яко со своими. Убо и сие мудрование святым и древним отцем противное; еже показуем сими, Первое: Еже Андрей пишет Дионисьевичь: А еже поимати жены по крещении без браковеньчания святоцерковнаго, мерзско есть и нечестиво, и апостольскаго законоположения чюждо. Ниже: А еже отсечены у вас от цекве по крещении брачившиися, сице потщитеся кои до крещения сошедшиися со женами; да плевел браконевенчаннаго смешения истребятся. Но не токмо не истребися, но и посланием утвердися, и толь твердо яко и по ныне пестуют крепко. Кормчая писан., Иоанна митрополита русскаго ко Иякову черноризцу; Иже ся поимают без благословения: си есть браковенчания. ниже: Тем всем чюжым быти нашея непорочныя веры, и отверженым от соборныя церкве. От статей Спиридона Ивановича; Статия, 4: Еже кроме святоцерковнаго браковенчания по крещении или до крещения брачишася прелюбодеи суть, чюжди нашея непорочныя веры, и отвержены от соборныя церкви. И по сим показаниям от писания святых, и древних отец за едино преступление благоверия тайны отчюждаются. Кольми паче с вышереченными зазреными от святых новизнами. Откуду яве яко сие показание на поморских отец, якобы подобно белорусцем за своих вменяли. не есть достоверно по вышереченным показаниям. а наипаче яко во 100: статиях писано, в лето 7285 [1777]. В тех уподоблены белорусцем, кои словяху филипова согласия, якоже в Суземках, и в прочих местах обретающиися. А от 7288 [1780]: по замирению яве уподобляет, новоженов и феодосиевых и монастырских. Откуду яве не древних отец сие новое мудрование, но его собьственное. О нем же вкратце показуем сими. 1: Ибо самое изложение показует о белорусцех тех. яко в два пути ходят, ови светом евангелия, друзии же тмою еретичества. Их же на три раздели чины. А ходящих евангелия светом, повеле приимати тем же по обычаю православным следом; Аще бы у них каковыя недостатки были, но правити их восточьным не удобно бысть гонения ради папежскаго. А что у них и в книгах привниде несогласное. И о том поморския отцы вину полагают сицеву; Яко тии печатники не под рускими благочестивыми цари и патриархи, но под польскими крали и митрополиты латиньския пребываху. И сих ради и прочих, как с восточными, тако и с ними поступаху в разсуждении яко со своими. Что у них неисправно, тая исправляху, а что исправно то за свято приимаху: и общение как с восточными, так и с ними не пресецаху. Сии же обои согласии кроме всякия нужды в таковых вышеписанных зазреных святыми новизнах, волею пребывают. А готовому святоцерковному содержанию не последуют. И сих ради новопроисходящее сие уподобление противно есть писанию святых, и содержанию древних отец. Еже выше упоминашеся, якобы обоя сия согласия потому еще в части древлеправославныя Христовы церкви, яко они держат веру неизменно, и в ту веру и крестятся; и потому они и бывают в части святыя Христовы церкви. Убо и сие мудрование есть новое; по сим свидетельствам. Первое. Яко святая Выгорецкая обитель соборно засвидетельствова: Яко сии от согласия святоцерковнаго отторгшася, и от части святых отлучишася: и не нагими словесы, но писание приведше святаго Златоуста сицево: ко ефесеом, нравоучение, 11. Ничтоже тако раздражает Бога, яко еже от церкве разделятися, аще и безчисленная будем содеявше благая: от иже тело Его пресецающих, не меньшую приимет казнь ссецающе исполнение церковное; ниже: Тем же глаголю от еже в ересь впасти, и еже церковь раздрати не меньшее зло. Ниже: Тем же аще не приобщаешися к церкви, ниже приемлеши Духа. И что глаголеши, яко таяжде вера [убо и крещение] православни суть и они, почто же не суть с нами. Един Господь едина вера едино крещение. Аще их добре, то наше зле. До зде нравоучение. И паки той же Апостол Толковый, зач. 150. ниже: Ибо церковь Божия есть, вертоград заключен, и источник запечатлен. ниже: Ея же между соньмищами и еретиками [среди ими] несть, тогда и таин в них несть, разве крещения святаго: егда бо обратятся к церкви, паки крестити не требе. И от сих писаний яве, ту же веру в них, и по вере крещение на них показует: И приходящих к церкви паки крестити не требе, судит, и за неприобщение же к церкви, дарования неприятных судит, и в части святыя церкви до обращения не счисляет. Подобне от главизн Иоанна Дамаскина, ересь, 96, обычаи претыкатели: Некия же укорныя яко благия приходяще. Ересь кривосказатели, 97; Иже божественая писания накриво сказующе: ниже; И сии вси не веры ради в ересех счеташася, но злых ради дел. Тем же сие мудрование яве противно святых писанию якоже показася, и обычаю общему. Яко по вере и по крещению, в части Христовой церкви судит, а общение яве не имеет. Коего мудрования у древних отец поискав не обрящет. Но как древле святии: тако и преже бывшия отцы, свет со светом не разделяли: но разве тму по всему, или по части; якоже святейший Филарет патриарх, и прочая. О чесом яве восточный учитель Симеон Фессалонитский в книзе своей, глава, 28. о церковном образовании: Вопрос; Кая убо образует верный люд; Ответ. Верный же люд правоверный, с предложением души. песнопевцем случаются небесным. сущую от Бога призывая милость. Являет же сей чин, последний чин. С ними же не леть состояти, или злоделателю, или инославну; не бо есть общение свету ко тме. Аще бо обратится ко свету, тогда прият будет сущими света. до зде Симеон. Откуду яве, яко древния отцы правильно полагали с раздирающимися разделение; и необращающимся подобающее определение, о коих выше отчасти показася. и ниже поне вкратце объявляти будем. Ибо поморския отцы о новоженстве правильной суд яве изнесоша. И обращающимся предел вечьной положиша. 6. Подобне по Самарине по приятии нововводнаго богомолия устоявшии во благочестии отцы, Терентий, и Матфей, с прочими правильной суд изнесоша; И ради обращающихся предел положиша. И после того бывшу собору, в лето 7268 [1760]; на коем утвердиша еже бы последовати писанию святых, и содержанию древних отец соловецких и поморских. Андрею Дионисьевичу с прочими, и страдальцем по благочестии, отцу Филиппу, Терентию и Матфею, и прочим по них. На подлинном писано: к сему писму старец Александр руку приложил. Старец Леонтий руку приложил. Старец Варлаам руку приложил. Феодор Калиничь руку приложил. Михайло Григорьевичь руку приложил. И сии по Самарине бывшие отцы, положиша предел обращающимся от монастырских исперва; Последи же и от страны феодосиевых, по тому же пределу приимаху. Коему приятию свидетели самыя вещи, и вероятию достойныя люди; Первый: Михайло Григорьевичь, в лето 7279 [1771]: писав к собору отец наших, Яко сие приятие с постом начато Терентием и Матфеем. Вторый свидетель, Федор Михайловичь питерской. Писано в лето 7273 [1765]: К Семену Ильичу Волосову. А у отец наших и у страдальцов положено, и нам по себе приказано приимать не меньше поста, 40, дней, и 1000-м правилом. Третий свидетель Фаддей Семеновичь Норкин кемской писавый в лето 7305 [1799], по нашей прозбе. А о посте о монастырских объявляю аз чистою совестию, яко исперва начат отцем Терентием, по отце Филиппе: А по Терентии осталися Матфей и Павел, и они нас благословили: И от феодосиевской стороны тем же пределом приимати. А сей зимы был у нас Яков Григорьев, и привлекал нас к своему разуму, чтобы приимать с началом: но мы ему не согласны, а последуем отцем вышереченных. Книга Матфея правильника, состав т, глава 7. Уставленая от отец не судити но последовати. еже и премудрый Сирах глаголет: Не отступай от заповедей старец; ибо тии навыкоша от отец своих. Но ныне же тии сожители бяху, соловецким и поморским отцем. еже и вышереченный собор отец, яве утверди сим отцем последовати: И того ради мы и последуем. Наш же прежний рачитель, Алексий Яковличь: якоже о выше показанных новомудрствуя; а наипаче о сем отеческом пределе, развращено толкует и отвергает; якобы нововведших сей пост, и от лика древних отец отделяет: и всех последующих им различно злохульствует и облыгает; яко сей пост положен Феодором Михайловичем питерским; и якобы вскоре после положения, отец Варлаам в Помории был; и ему Федор много предлагал о посте; но он не принял, и они его не понудили. но и волосовскую страну прият без поста прияти благословили; Да якобы и мы с покойным Иваном Алексеичем сей пост по его мудрованию с поречением отложили. Сия вся на живых нас, кольми паче на умерших, явленая лжа. По сих кратких показаниях. 1: Яко вышепоказании, трие свидетели писанием увериша, что по Самарине оставшими отцы, сей пост положися, а не Федором Михайловичем. 2: Его же Варлаам не приял но отринул, яко вново положенаго, и они ему позволили без поста приимать от монастырских: а Варлаам суземских не истязал с постом примлющих; И были два чинодейства, токмо друг друга не хулили, якоже он ныне Алексий Яковличь: Но сие странно есть и слышать, а не токмо заверятися. 3: К сим еще сие; Мимошедшаго июня, получено нами егоже доводьствие о сем; Якобы и в прежде бывшей Христовой церкви, и во святых правилех таковаго чина; еже бы от таковых иносогласных приимати. Или от сообщения со еретики, приходящии: Но вси таковии тайною покаяния исправляхуся. И при том речено, яко разсуждением отца духовнаго, приемлет заповедь со епитимиею, а не единственно с таковым постом. Дозде довод. Тем же и сие его доводьствие о сообщающихся со еретики, и о прочих иносогласных, сопротивно писанию святых, и содержанию древних отец. по сим свидетельствам. Первое; Яко Филарет патриарх, приобщающихся к еретическому отчасти учению, или общению, в 3-й чин, ни крещаемых ни миром помазуемых по древнему святых преданию положи. Второе: Подобне и поморския отцы, егда Феодосий с прочими открыша иносогласное учение: и того ради отторгшася от согласия святоцерковнаго, и от части святых отлучишася. По коему и не уподобляли по вам белорусцем; яко в полону у еретиков латыньския веры живущих. Но яве уподобили иносогласным, и раздирающимся древле от святыя церкви, по писанию святаго Златоуста. о чем выше показася. Третие: Согласно сему. древний отец Спиридон Ивановичь показуя о староженстве. ниже: Тем же не токмо ко еретиком кто приступит; но аще кто и к подцерьковником приобщится. Ибо таковых Алексий Аристин, донележе не преложаться и покаянием достойно, и обращением не удобрятся, и паки не совокупятся заедино, тех к соборней церкви не присвояет; но в 3-й части с неприобщенными к соборней церкви описует. Тем же и мы с таковыми преступившими благоверия тайну общатися не смеем. дабы и нам тогожде преступления на душах своих не подъяти. Книга о Вере глава, 25: Глаголет списатель: И кто им последует сиречь сообщается, тожде на души своей подъяти имать. Зане кто приобщается ко отлученным, отлучен есть, и к неприобщенным не приобщен есть. Четвертое: Согласно же сим бывый с нами Тимофей Андреевичь, в показании о разньстве между православныя церкве, и поповщинския: Православная церковь ядущих со еретики, в 3-й чин неприобщенных полагает. И обращающихся на 3 лета: под запрещения и покаяния подлагает. Поповщина же ови молитву приемлют, ови же и просто. Подобне и у монастырских, и феодосиевы, ови начало кладут, ови же и просто, по свидетельству казанских, в лето 7312 [1804]. Пятое: К сим же они монастырския, чрез нововводное богомолие подобно есть ядущим со еретики; феодосиевы же с ними никаковаго правильнаго разделу не имеют, а наипаче и просто сообщаются. А наиболее яко обои частию и еретическому учению приобщаются, по Филаретову соборному изложению, и по древних святых заповеданию. Тем же посему и приходящих приимати праведно, и исправляти правильно. Якоже святейший Филарет собором завеща. Первое: Тыя ереси проклинати, и очистительныя молитвы совершати повеле. Второе: И по сих чрез духовнаго отца заповедь и епитимию полагати определи. Третие: Сия же заповедь полагается не по изволу отца, но по канонам святых отец, а не по своему разсуждению [якоже ныне преумножися]. Потребник Большой, лист 743. Яко не леть есть не точию иереом но ниже епископом что дерзати противу каноном; творити же и разрешати. Во уверение же сего святый Игнатий глаголет; Иже глаголет паче яже узаконеннаго, волк тебе да мнится быти в кожи овчей. Книга Симеона Фессалонитскаго, глава, 254. Яко покаяния тайна, вместо проповеди евангелия, за ню же вину и слово учительства в церкви действовати Духа Святаго. Ниже: Да ниже над каноны да разсуждают, да не на себе самого действуя над каноны грехи, инаго привлача будет духа; кто бо оных к таковым чистейший, да паки и паки прельщаяся, ослаблен сый снизпадая безсловесно падающим. Да извествуется убо кождо ничтоже действовати над пределы отеческия; но вси да разсуждают по канонам, и не внимати иным неким. Ибо на апостолы Христовы прииде; а от апостолов, на отцы; а от отцов наших на ны. Аще убо яже отцев блюдомо, и приемство благодати в нас будет. Аще же инако вздействуеши, паче определенных, сомнено будет и неприятно изречение. Псалом, 118; Сущее. Законопреступныя возненавидех. Ниже: Толк. Феодоритов: Всяк грешник, в законопреступницех учинится, аще и мало нечто преступает от закона. Сущее: Избави мя от клеветы человеческия. Толков. Евсевия: Клевету глаголет еретическое учение; от коих единаго Бога есть избавляти. Сущее: Явление словес Твоих просвещает и вразумляет младенца. уста моя отверзох и привлекох Дух. Толков. Афанасия. Ниже: Достойне убо приятелище души моея отверз: и аки уста их отверз Божественный Дух: и сия творях, привлача в себе Дух, иже от Тебе. Диласион: Мзда убо дарованием Духа явление есть, и заповедей Божиих совершение. О устах же сокровеннаго человека глаголет. И могут быти душевная уста, разумевательная ея сила, еже помысливше износит слово, яже в разуме. И ничтоже разньствует от слова еже в разуме, и привлещение Духа глаголати. той же бо есть Дух Святый Божественному Слову. Тем же и Спас, в нем же глаголаше слове: Словеса яже Аз глаголю вам, Дух суть и живот. Максима Грека, глава 30. Четвертое: Книга Зинарь, глава 76. Иже со арменином кто яст, или со иными еретиками, таковый со християны да не яст: Но отвращатися от него всякому християнину, яко от идолослужителя; Егда обратится к покаянию, да отлучится на покаяние, 3, лета. Пятое:  А понеже отцы наши, и мы, в неприсутствии священнодейств обретаемся, и отлучати на лета от тайны причастия и разделения мест: нам неключимо есть. и того ради по сокращению Иоанна Постника, иногда же и по обычаю отеческому, по сему нужному времени, вместо тех лет, [сверх округи и правила] постом и молитвами исправляются, по вышепоказанным свидетельствам. Тем же ядущии со еретики, на 3 лета отлучаются. Подобне и явную татьбу творящии; еще и невольное убийство творящии, на три же лета отлучаются. Зинарь, глава, 35, Василия Великаго, правило 61, и 13. Но мы убо глаголет Постник, кающагося вместо трех лет, до 40-х дней удерживаем, по 9-м часе сухоядуще, и метания на кийждо день 100 творяще. Шестое: Вышеписанный же Тимофей Андреевичь, по прозьбе иногда ярославских християн о ядущих со еретики подаде совет, на 40, дней, без рыбы и без масла, кроме же сухоядения, а поклонов сверх церковных и келейных, 200, и 100, Богородице. Седмое: У отец же наших и у нас обычай следует от лет многих, о ядущих со еретики, и распутно живущих, сей пост и правило полагати. Осмое: К сим же в явном блуде долго живущих на 7 лет отлучение налагается. Постник же на 2 лета, с постом и поклоны многими. У отец же наших почему будучи обычай утвердися, на 40, дней пост, и правило 1000 полагати: И сие противу седмолетия счисляти, вторую же половину до году, по разсуждению пост и молитвы выполняют: Коего пределу в правилах ясно не обретается. Но мы сему отеческому обычаю, всеверно последуем, По учению святыя церкви; Книга Кирилова, Мелетиево 2 послание; Стойте и держите отеческая предания непревратна. Ни в чем же богоносных отец потязающе, но ниже Божиих людей православных потязати изволяюще. Девятое: От послания Федора Михайлыча: ниже; Да еще прошу вас Семен Ильичь; како вы приемлете от монастырских, до Самарина, и по Самарине. А у прежних наших отец положено с вышеписанным постом, и правилом, 1000-м. И после их отцы тоже подтверждали в силу святых правил. Книга Матфея правильника, состав е. тем же и долгим обычаем искушена, и на многа лета сохраненая, не меньши от писаннаго закона держати обыкоша. Книга Никонова, слово, 18, Феодора Студита. Вся елика твориши, или глаголеши, имей свидетельство от святых писаний, или от отеческаго обычая. Тем же по сим свидетельствам, сие чиноположение по чину святых древних, и по Филаретову соборному положению, и по бывшим прежде случайным образцем, и по обычаю древних отец есть, якоже зде показася. А еже сих уподобляти вышереченным белорусцем, и за своих еще счисляти, а видимая общения пресекати: И сию новую проповедь, не погрешит кто наречет хромою, по псалмопевцу, Охромоша рече, от стезь Твоих. Десятое: А понеже он Алексий Яковлевичь, вину возлагает сию; якобы отцы наши по неведению судили и принимали: А он якобы в Помории уведал. Однако же исперва переписуя, в 100, статиях, 52-ю, и 53-ю, сия оба согласия надвое раздели. Овых, второму, и третьему чину еретическому уподобил, и теми же правилы прииматися устави: И других по Филаретову изложению, белорусцем уподобил, и по обычаю православных, чрез неделю приимати положив. По сему же яко, 1: по ведению противомудрствуют: 2-же, по неведению; А писана сия, в 9 лет, по выезде ис Помория; Последи же передумал, и положил всех за подобных белорусцем; Еже и поныне в том укрепляются. Книга Максима Грека, глава, 10: Подобает рече ведати, яко всяко списание треми свойствы достоверно бывает. Первое, аще от благочестиваго сложено будет. Второе, аще по всему согласует преданием святых. Третие, аще само в себе согласует, а нигде же разликует. Аще же не согласует, или в себе разликует, таковыя отринути, аки Бога нас отлучающих. Еще же и кроме сих мудрований, многия и у себе видимыя поступки, противныя святых правил происходят; и древних отец содержанию. Первое, Новоженов без разводу приятие. Второе, По сем негли мудрованием, нецыи его согласия множество икон святых новоженьския работы по християнех распустили, а повороту и по ныне[?] не слышится. Три преступления присяжная прощены чрез правила святых, и чрез суд поморских отец, и здешних. Третие: Доказ о разводе новожен, Правило Василия Великаго, 18. Поморских отец статия, 25, и 26, о иконах, состав глава 43. Симеон Фессалонитский, глава, 23. Послание Андрея Дионисьевича к пустыннице, о присяжных правил, 81, Василия Великаго, и прочих. Четвертое. Беседы евангельския, лист, 295: О еже с честию в церкви стояти. ниже: Подобаше стену имать от жен, или поне преграду мужем с женами. Подобне поморския отцы. Статия 18. Мужем с женами безпреградно вкупе не молитися, и не ясти с ними. Симеона Фессалонитскаго, глава, 153, О сущих в покаянии, Тии убо да стоят в катигуменах, рекше, оглашеных, и кающихся месте. И сия убо вся заведомо в презрение полагаема суть. Пятое: К сим же случися нам быть в Кимре по выезду его ис Помория. И показаша нам они руки, 1. я. написаны, 20 статей; противу правил святых отец, что сия вещи исправити. Подобне и к старцу Феодосию, 10 статей, в лето, 7311 [1803]. А исправления правильнаго и по ныне не видно и не слышно: Прочая же молчанием проминуем. Тем же аще писаная святыми, и содержаная древними отцы добре суть: То сия вещи его, Алексия Яковлича, с прочими недобры суть. Разве и сии отцы поморския, якоже по Самарине бывшия по неведению содержали: Но не буди нам грешным ни во ум сего прияти, а не токмо приимати. Шестое. Якоже аз грешный, от его уст слышах, 1, я. Егда бывшу ему в Помории, и слышах тамо вещь сицеву, при отцех древних бывшую. Брат некий живя наедине с девицею. Сего приказали отцы отлучить. Сего же брата отец духовный упросил отцев, дабы не отлучали. Последи же того позван сей брат писатися в скитския жители; он же отрекся; Я де не хощу писатися в книги антихристовы: И по сем згорел вскоре. Андрей же Дионисьевичь, сему згоревшему, похвальное слово написав. Сия же речь у них была потому, что у нас написано во 8 статиях, чтобы последовати поморским отцем. Он же противу сего сказал, и рек сице: От таковаго де последования и попятисеся. И от сего сказания его, зело яве есть: Каковыми мутными повестми его ползовали и нынешния поморския опекуньщики новоженьския. И от сих негли и прочих подобных воздвигся он на вышереченныя толки и хулы и укоризны, на бывших отец по Самарине, и на их чиноположение, и на тех которыя им последуют. Противу коего хуления, Сам Господь Своими усты глаголет. Матф. глав. 7. Не судите, да не судими будете; Имже бо судом судите, судится вам. Святый апостол Павел, к римл., глава 2. Тем же безответен еси о человече всяк судяй. Имже бо судом судиши другу, себе осуждаеши. 9. К сим же вышеписаным мудрованием происходящим, от 7288 [1780]: И сие происходит более о сих согласиях, и о их действах. Лучше де о сих, в Божия судьбы оставляти. И от сего обношения вкоренися в мыслях человеческих, яко во всех согласиях есть спасение, кроме тех, кои живут неисправно. И сие происходимое самомнительное разумение: противное же есть святых писанию, еже показуется сими: Первое; Ибо в Божия судьбы оставляются таковыя вещи, которыя законом яве неотречены: Или и отречены, но неведомы правителем церковным. Или и ведомы, но на время смотрительно в терпении оставляются, якоже от святых писаний учимы есмы. Второе: Еще бо по ветхому закону, законоучители израилевы старцы соблазнистася на богомудрую Сусану, Тогда сей грех их в судьбах Божиих оставляшеся. Егда же зло ко злу приложиша, да убиена будет; Тогда Бог воздвиже Даниила самех судити; То не к тому в Божия судьбы оставишася; Но по закону камением побиена быша. Третие: Егда царь Иозия чрез закон яве покадити дерзнул, Бог же за то проказою осудил. Архиерейство же тогдашнее, даров благодатных улишил: яко чрез закон прокаженному во граде седящу. Егда же на прокаженнаго смерть от Бога послася, и законопреступление чрез сию отъяся. От тогда и дары от Бога низпосылахуся якоже и прежде. а не просто оставляшеся, аще и по неволе сие найде. Четвертое: Егда же благоволи на землю приити Творец небу и земли Господь наш Исус Христос, и видев закон несоблюдающих: И то несоблюдение до прихода Его, в Божиих судьбах оставашеся. Тем же и глаголаше, Аще не бы пришел и глаголал, греха не быша имели; Ныне же не имут о гресе своем вины. Егда же по многом обличении не покаряхуся, тогда рек им; Се оставляется дом ваш пуст. Пятое: Егда во Пскове и в прочих местех, аллилуию четверили по неведению, тогда в Божиих судьбах оставахуся; По уведению же осуждахуся ересию латиньскою. Шестое: Егда усмотрев преподобный Максим Грек в росийских книгах, чрез переводчиков мало ведущих многия неисправности, кои и предлагаша да исправлены будут: нецыи же сопротивляхуся, он же привождаше вышереченное Христово глаголание. Седмое: Егда святейший патриарх Филарет с собором судил Иону митрополита, за приятие двух ляхов обливанцев, он же Иона в том покаявся, что прежде собору с патриархом спорил, а о ляхах якобы не помнил велел прияти, или ни; Сия в Божия судьбы оставиша, и его простиша: Якоже древле Феодорита с прочими, а ляхов крестиша. Осмое: Сице егда появися новое учение о браках, чрез Феодосия Васильевича с прочими; Отцы же поморския, чрез послание обличаху, яко заблудившихся исперва: Заблудивших тогда они в судьбах Божиих оставахуся. Егда же к сим присовокупиша вышереченную титлу и прочая; И чрез раскол от части святых отлучитися дерзнуша. Тогда яко раздоротворцы яве осудишася, якоже выше показася. Девятое: Монастырски же яве чрез готовое отеческое содержание, нововводное богомолие приявших, вскоре отец Филипп с ними разделися: И по ныне последующии ему, законно разделяются, по вышепоказанным от писания свидетельствам. Десятое: А еже сице разделяющимся, вспять сице толковати, в Божиих судьбах еще состоящих. то следовательно по 13-му правилу, второперваго собора, Без видимаго суда не разделятися; Ащели яков любо по сему времени суд вменяти; то странно и чюждо сие толковати: не точию по божественному закону: но и по градскому. Не осужденнаго, с ворами не счисляют; а осужденнаго в Божиих судьбах не оставляют, но по наказанию коегождо по делу в сылки отсылают древле и ныне. Тем же сие толкование по всему, чюждо и вредно. А наипаче простому народу. Апокалипсис, глава, 1, ниже. Таиньство о 7 х звезд. Еже видел еси на деснице Моей. И 7 х светилник златых. Толков., 7-мь звезд суть, ангели 7 х церквей суть. 7-мь же светильник златых, яже виде, 7-мь церквей суть. Глава, 2. Ангелу ефесския церкве, напиши, Тако глаголет держай 7 звезд в деснице Своей, и ходя посреде 7 х светилник златых: Вем твоя дела, и труд твой, и терпение твое: И искусил еси глаголющаяся быти апостолы, не суть, и обрете я лжа. Ниже: Но имам на тя яко любовь твою первую остави: Помяни убо откуду спаде, и покайся, и первая дела сотвори; Ащели ни, гряду ти скоро, и двигну светильник твой от места своего, аще не покаешися. Но се имаши, яко ненавидиши дел николаитеск: Их же и Аз ненавижу. [николаити были еретицы, от Николая автора тое герезы, который же всем посполиты учил имети] Яве безбрачныя тайны. Имеяй ухо да слышит, что Дух глаголет церквам, Побеждающему дам ясти от древа животнаго, еже есть посреди рая, рай живот вечный, аль бо церковь знаменует.

Тем же единовернии отцы и братия, молим вашу любовь благоразумно разсуждати, что есть златозарное святоцерковное правое учение. И что есть николаицкое темное от диявола всеяное развращение; его же Сам Господь ненавидит и отвращается; Тако же и верным рабом своим хощет разделятися. Якоже во евангелии толковом, в неделю, 19; Еже бо тако просто хвалити [смешати] и добра суща и не добра: Не есть се любящаго, но прелестника. А еже хвалити елика подобна бывают: Уничижати же, елика погрешаема суть; Вселюбящего дело есть.

При сем же просим, сие грубое наше показание, за благо приимати: А кому вразумится лучше, то просим, и нас тоя пользы не лишати.

Писано 7313 [1805], лета; Евангелие в неделю всех святых.

Hosted by uCoz