Выговский полемический сборник

(«стоглавник») нач. 19 в.

 

 

КАТОЛОГ

еже есть сказание глав.

 

Статия первая.

1. Яко без правыя христианския веры невозможно есть угодити Богу, аще кто и велии добродетели творит.

2. О том яко едина есть истинная христианская по вселенней православная к Богу приводящая вера. прочии же не суть веры, но прелести и раздоры.

3. О еже яко ниже отъяти что от православныя веры, или приложити, яже предаша нам святии апостоли, и святии отцы, Духом утверженныя догматы тверде держати, да не предани будем вечнеи клятве и анафеме.

4. О анафеме, что в ней заключается.

Вторая.

5. О Церкви Христовой, кую врата адова не одолеют.

Третия.

6. Яко святое крещение, корень христианския веры, яко твердое основание.

7. Яко не крещени не именуются вернии, ниже возмогут внити в царьство небесное по словеси Господню.

8. Яко христианскии род верныи не прейдет, ниже оскудеет даже до скончания века.

9. Яко истинныи и православныи христианин именуется от святаго крещения.

10. Яко Христова Церковь истинным крещением, своих чад во время антихристова гонения, и даже до скончания века, порождати будет.

11. О том, яко святое крещение весь кал греховныи отмывает, и во Христа облекает.

12. Яко святым крещением, не точию прежния грехи оставляются, но и впредь нашим согрешением дается помощь на возбранение онех.

13. О реченнем от апостола, еже во всяком языце бояися Бога и делаяи правду приятен есть.

14. Яко неподобает избирати достоинства в крестителех аще и житие имеет кто укорное, точию да не будет чюждь православныя веры.

Четвертая.

15. О приходящих от еретик к соборней апостольстей церкви. како достоит их приимати. и яко на три чины еретицы разделяются. на еретики на расколники и на подцерковники. яко от еретика крещение не приятно. от расколника же и подцерковника приятно.

16. Показание правилное. о трех погружении еретических. яко нецыи еретицы, и в три погружения крещаху, обаче крещение их от многих святых отец не приемлется. и крестити паки второе повелевается.

17. Яко аще древле святии и прияша от некоторых еретик крещение в три погружения, обаче вин ради благословных и нужных.

18. О том яко святии отцы не еже точию за неисправность крещения. но и за важность вины крестителевы въторое крестити повелевают.

19. О крещении еретическом, яко от еретик действуемое крещение по священным правилом не вменяется быти во истинное крещение, но паче во осквернение полагается.

20. Яко приемлющии от рук еретических крещение, или прочая таинодействия, и за истинно почитающии, неистиными правоверными, но лживыми христианами, и лживыми правоверными нарицаются, и святительствующии неосвященными приписуются.

21. О еже яко на крещение и на прочее действо еретическое Дух Святыи не сходит.

22. О сомнящихся младенец, и без залога веры крестившихся, аще и от православных крестишася сумнения же ради от святых писании и правил второе крестити повелевается.

23. Яко крещение и прочии тайны, без креста не совершаются.

Пятая.

24. О власти преосвященнаго чина.

25. О вечнующем пребывании священства, яко епископом до скончания века быти речено есть.

26. Яко воздательной благодати презвитери не имеют. но точию едини епископове.

27. Яко без воли епископли, презвитер ничто же может сотворити.

Шестая.

28. О мире, яко от архиерея токмо совершается, и яко не едино точию миро, но от различных вещей составляемо бывает.

29. О поставлении церквеи без воли и благословения епископскаго не бывают поставлени.

30. О антимисе от кого освящену быти подобает, и киим образом оныи составляется.

31. О падших во отступление причетницех. понеже по покаянии своего прегрешения не может священнодействовати но яко простолюдин вчиняется.

32. Яко без ставленаго писания чюждь и неприятен есть презвитер.

Седмая.

33. О еретической хиротонии, яко оная от святых не приемлется.

34. Яко на мзде хиротонисаемаго и хиротонисавшаго церковь православная из санов извергает, и не точию извергает, но и горее Македония духоборца быти сказует.

35. Яко хиротония и прочия тайны без креста не совершаются.

36. О Иоанне патриарсе Иеросалимском.

37. О Пирре Константинополском патриарсе.

38. О святем Тарасии патриархе Цареградском.

39. О Мелетии патриарсе Антиохииском.

40. О Нестории.

41. Свидетельство о правиле сотвореннем на имя Иоанна Китрскаго.

42. О пренесении мощей святителя Христова Николы.

Осмая.

43. Яко неподобает от еретик причащатися.

44. О еже яко святии отцы вовремя нужное чрез желание и усердие сказуют причащатися.

45. Ответ, 104-й. выгопустынных жителеи на вопрос иеромонаха Неофита о тайне евхаристии.

46. Свидетельство от божественнаго писания. во ответ вопрошающим нас о приносимои тайне под видом хлеба и вина тела и крове Христове. до скончания века реченной быти. и глаголющим сице: где оная тайна ныне священнодействуема обретается.

Девятая.

47. О еже не подобает в дому крещати, аще ли нужда приключится, то не запрещается.

48. Яко несвященным сущим крестити Господне бысть повеление, и святоотеческая правилная определения обретаются. иже и крещаху в нуждах бывающих мнози святии.

49. Ответ, 101-й, и 102-й. выгопустынных жителеи.

50. О несвященных, яко аще понужди крещают то Божия благодать совершает.

51. О еже понужди крещение без мира, и елеопомазания, и прочих молитвословии священнических может совершитися и облагодатьствоватися.

52. Яко на всякаго крещающагося человека Дух Святыи невидимо сходит. тако и во всех таинах церковных оныи действует.

53. Яко аще на которых рука еретическая бяше первее, таковых простолюдином крестити никоего препятьствия не обретается.

Десятая.

54. Яко подобает исповедати грехи своя отцем духовным, а не уповати на ся, аще и велми добродетельным сущим; еще и о покаянии.

55. О еже яко подобает исповедатися и простым иноком и простолюдином, иже добре божественое писание ведущим, и правилную силу знающим. и иже врачевати добре умеющим. и понужди праведно к таковым исповедание имети. лист, 224, на об.

56. Сказание от святаго писания, о еже реченнем в писании, исповедании помыслов, яко не о единех ту глаголет исповедании помыслов. но и о гресех. и яко обычно есть писанию грехи нарицати помыслами.

Первая надесять.

57. Свидетельство от святых правил. яко неподобает к еретиком в церковь ходити, или к себе во свою церковь приимати и молитися. и не точию в церкви, но и в дому с еретики молитву совершати запрещается.

58. О еже яко неподобает со иноверными, и с еретики общения имети в ядении и в питии или в дружбе, но всячески от них удалятися.

59. О неприемлющих учения Христова и апостольскаго, и святых отец, яко от них ни яже на потребу телесе подобает приимати еже есть пищу, или милостыню, но удалятися.

60. Яко неподобает у еретиков благословлятися, ни еретиков благословляти, ниже радоватися им глаголати, и ниже любовь к ним имети.

61. О еже яко неподобает с жиды и с еретики в бани мытися, ниже иное кое общение имети.

62. Яко неподобает православным христианом имения своего по смерти еретиком оставляти, никакоже о сем ущедрити. но отдавати та вся своим единоверным.

Вторая надесять.

63. О церкви и что есть церковь, и о нужных ея временех, и о чинех, колико их обретается. и о гонении на ню от противоверных.

64. О церковном собрании, и о еже како подобает молитися православным христианом, и о пении.

65. О кажении, яко без священника где случится простым кадити не запрещается.

Третия надесять.

66. О пострижении яко при смерти без епископа и игумена, или попа и причетнику пострищи позволяется.

67. Яко мнози и простии мниси священства не имущии приходящих к ним во иночество постригаху.

68. О облачающихся во иноческое одеяние, и паки совлачающих оное.

Четвертая надесять.

69. О еже яко подобает покарятися учителем и священиком, аще имут и житие укорное. аще ли о вере погрешат тогда бегати и судити их подобает.

70. Яко благочестия ради, и нарушения догмат святоотеческих разделение имети подобает.

71. О еже что есть ересь, и от чего еретик нарицается.

72. О безначалии.

Пятая надесять.

73. О еже яко и мирским человеком и священства неимущим учити и наставляти люди не отречеся.

Шестая надесять.

74. О реченнем от апостола еже святится муж неверен женою верною, и жена неверна мужем верным.

75. Яко святии апостоли, и святии отцы, от инославных тайну брака не приимаху: и сшедшихся в неверии, и обратившихся к православию, не попущаху просте тако жительствовати.

76. О еже яко кроме благословения и венчания иерейскаго и ангелословных молитв брак не состоится.

77. Яко тайны без креста не совершаются.

78. Яко нынешнии россиистии автори крыжем латынским тайны своя действовати исповедают.

79. О бракосовокупляющихся с противоверными.

Седмая надесять.

80. О убивающихся во время гонения веры ради.

Осмая надесять.

81. О ядущих и покупающих на торжищих.

Девятая надесять.

82. О написании титлы Пилатом, на кресте, и о четырех буквах: I Н Ц I вънове ныне полагаемых. яко на древних крестах оных букв не бяше.

83. Свидетельство от божественнаго писания, како достоит молитися о неверных лицех.

84. Яко о живых противоверных молити а о умерших сих не молити.

Двадесятая.

85. Свидетельство от божественнаго писания, каковым быти достоит изуграфом, пишущим святыя иконы. иже благоговейным сущим, святии отцы быти, и лепо иконы писати определяют.

86. Яко от рук иноверных написанных икон не приимати. и в руки иноверных святых икон не предавати.

Статия: 21-я.

87. О прочитании со испытанием божественнаго писания.

88. О еже не всегда тойжде везде приимати во указ писания, но во свое время.

89. О том яко не подобает с еретики о вере беседы творити. и о привсеянии еретическом в православная предания своя еретическия догматы.

Статия: 22-я.

90. Свидетельство от послании страдальцев, [пострадавших от Никона патриарха и ученик его] о новодействуемом крещении, и о прочих тайнах. яко от них отметахуся оныя такоже и бегствующия [котории древняго рукоположения бяху] иереи онаго крещения не приемляху.

Статия: 23-я.

91. О том, яко печать есть христианства святое крещение.

92. О печати антихристовой и о приемлющих ю. и о отрицании креста и Христа, и крещения Христова.

Статия: 24-я.

93. О том яко покаянием единем без крещения очиститися не может человек. и яко покаяние по крещении согрешающим бывает.

Статия: 25-я.

94. О клятве еретичестеи, и о отлучении их, яко аще и святитель паче воли Божии отлучит, не последует ему божественныи суд.

Статия: 26-я.

95. О еже яко неподобает неволею и нуждею к благочестию приводити.

Статия: 27-я.

96. О пустынницех неимеющих [за умалением] священства, ниже видимых церквеи.

Статия: 28-я.

97. О том, еже ясти, неподобает со оглашенными.

Статия: 29-я.

98. Яко неподобает с противоверными целование имети, ниже иной коей дружбы. лист, 403.

99. О еже яко неподобает скоро без уверения и прочих мерзостеи греховных отстатия во крещение приимати.

Статия: 30-я.

100. Яко сатана не печется нечестивых ратовати. [еже разделити веры и ереси, или раскол сотворити] но на верных Божиих вооружается.

 

 

Яко без правыя христианския веры невозможно есть угодити Богу, аще кто и велии добродетели творит. глава, 1.

 

Аввакум глава, 2.

Праведныи от веры жив будет.

 

Апостол зач., 326.

Без веры невозможно угодити Богу.

 

Апокалипсис, глава, 3. слово 3. в толк., зач. 9.

При правой вере дел несовершенство Бог приемлет: студесть же в вере всякая отметает.

 

Книга о вере, в предисловии, лист, 4.

Всякому достоит ведати, колико о сем тщание показовати подобает, еже познати истинную православную веру, яже по Златоусту всех благих мати и всех добродетелей красота верою правою кто сияет. воистину сей славен есть. и что коеждо кто на основании веры созидает, вечно от трудов своих утешатися будет. знати Бога, есть веровати в Бога. а от веры сыном Божиим быв, наследником царства небеснаго быти. несть бо мощно кроме правыя веры спастися.

 

Беседы апостольския. лист, 2871 [ко евреом, нравоуч. 10].

Всяк бо верныи свят есть, поелику верен есть. аще и мирянин будет кто свят есть.

лист, 2854. Якоже бо в писменах, все аз содержит, и основания все содержит здания. сице и жития чистоту о вере имать извещение. сея же кроме несть быти християнину.

 

Книга Пчела, слово, 2.

Яко о благочестии паче всего подобает пещися.

 

Тояже книги.

Яко око недугом отягчено, солнечнаго света видети здраво неможет. сице и душа, недугующа неверием неможет света истинаго видети.

 

Книга Постичество Василия Вел., глава, 2.

Никтоже да имать надежды. аще порок и мал имать в вере, но несть приятно его во псалмех моление к Богу.

 

Из книги Иосифа Волоц., слово, 15.

Ничтоже убо паче несумненныя и чистыя веры крепчайши. еже во Отца и Сына и Святаго Духа. тако ничтоже пагубнейшии есть неверия, и сумнения. от него же бывает, еже в ересь. и отступление впадати.

 

Беседы апостольския, лист, 2671.

Да здравии будете о вере, еже ничтоже прелюбодейческо ниже чюждее вводити.

лист, 1475. Иже от здравыя веры, и малейшее преложив, всю веру повреждает.

лист, 2855. Темже аще и тмы лет в вере имамы, а не утвержении будет в ней младенцы есмы;

 

Лествечник, лист, 14.

Законопреступник еже закон Божии своим злоумием держаяй с ересию сопротивно веровати Богу мняяся.

 

Никон Черн. гор., слово, 63. от градскаго закона.

Яко еретик есть, и еретическим подлежит законом и мало что уклоняяся от православныя веры.

 

Риторика, г. место именительное.

Яко ниже самыя мученицы аще и много страдали а ересию повреждены, спастися не могут.

 

Иосифа Волоц., слово, 13.

Яко тяжчайшии и страшнейшии всех грехов, грех еже в ересь впасти;

 

Цветник духовныи, глава, 26.

Глаголю же ти яко аще вся добродетели исправит человек а неправо верует не минет муки.

 

Благовестник от Иоанна, зач. 27. лист 124.

Ибо правая вера от писания есть. Ниже. Мнози бо мнеша веровати, но не яко же рече писание. а якоже тии своим изволением последоваша, тии вси еретицы.

 

Евангелие учителное в неделю, 50-ю. лист, 173.

Мнози бо мняху веровати, но неправо, ни якоже рече писание, и понеже они своим ересем последоваша того ради и погибоша.

 

Той же, в неделю святых праотец, слово, 62.

Вера еже Богу братие едина есть. обаче величится и умаляется разумением, или неразумеванием. Глаголет же Христос, маловере вскую сумняся, и инде, велия вера твоя, буди ти яко же веровал еси. и паки, ни во израили толики веры обретох. се убо возвеличавается веде, и умаляется вера изволением и тщанием нашим. и никтоже да не глаголет яко препрост есмь и како хощу разумевати. и ведети опасно веру. независтна убо есть благость, и всякому хотящему благое, малу же и велику, премудру же и препросту, старцу и юному, богату же и нищу, мужем же и женам, и всякому возрасту. благии бо Бог всем простирает луча своя благодати. Выше. Верою святии вси до смерти подвигошася. Ниже. Веры бо ради рече святии вси победиша царствия.

 

Книга Небеса. слово, 17.

Иже сопротивно живуще закону, и раздор деюще труды же носят телесни, пост молитвы, хотят подобитися сребру, яко медь злату. обаче чюжди раби наричются, якоже разум со злодеянием несть разум. тако и простота с неразумием несть простота, ибо в простоте безумия бегати подобает, а в разуме лукавства.

 

Катихисис болшей, глава, 4.

Вопрос. Чесо ради нарицаем християнскую веру.

Ответ. Православная христианская вера есть. понеже правыи истинныи закон от святых отец преданныи, в словеси Божии утверженныи. кровию мученическою, и исповеданием святых и богоносных отец свидетельствованныи.

 

От книги Палеи, лист, 1.

О еже испытати писание, со страхом Божиим, и имети веру истинну, и о законе Божии несомнятися. а сомняяся о законе и не послуша гласа Господа Бога своего погибе вера.

 

Ефрем Сирин, слово, 26.

Вера мати есть всякому делу благу. и тою стяжет кто себе обетование Спаса нашего Iсуса Христа. якоже пишет, без веры невозможно угодити Богу. многоплодовитое бо стяжание диаволу наричется безверие, еже есть мати всякому делу неприязнену. от того же раждается двоедушие, еже есть неверствие, муж бо двоедушен, неисправлен во всех путех его.

 

Лествица, лист, 253.

Вера крило молитве, себо неимущии, паки в недро свое возвратится.

 

Той же слово, 28, лист 266 [259 (на поле книги, и далее подобно все что на поле рукописи)].

Вера, молитву воскрили, без нея же возлетети на небо не может.

 

Благовестн., от Луки, зач. 88, лист. 193.

Понеже всякой молитве основание и степень вера.

 

Сущее, псалом, 130.

Господи невознесеся сердце мое. Толкование. Иже убо о кресте не хваляися всех есть безумнеишии и беззаконнейшии. ниже о вере не хваляися всех есть окаяннее. Ниже: Зриши ли еже глаголах яко в делех, а о вере и о догматех, и вине не сущи часто подобает хвалитися, а не хваляися погибает.

 

Книга О вере, глава. 23, лист, 216.

Яко иже суть христиане хотящии вправду во христианстей вере утвердитися, ничесому иному да бежат. точию к писанию, аще бо на ино что взирати будут соблазнятся и погибнут, неразумеюще кая бы была истиная Христова Церковь. Ниже. Что бы ты православныи читателю устерегся, все свое о временном покои и сладостех, советования на страну отложив, о сем всем самом попечение имей днем и нощию, яко да в познаннои и приятои на крещении правде живот свой богоугодно в православней соборней вере скончати могл;

 

О том яко едина есть истинная христианская по вселеннеи православная к Богу приводящая вера. прочии же не суть веры, но прелести и раздоры. глава, 2.

 

Книга О вере Острожск. печати, а напеч., в лето, 7097. глава, 1, лист, 1.

Апостол глаголет [к ефес. 224], един Господь, едина вера, едино крещение, един Бог и Отец всем иже над всеми и о всех, и всех нас, а если так есть иже един Господь, едина вера. то мусят быти иншие все веры облудные замышленые. которых не толико межи неверными. але и межи называемыми христианы разумевайте намножило. для того потреба спочатку взявши, а доконца доводне выправить, и едину истинную веру показать. а змысленные все отщепенства яко прелестные и облудные обнажить и обличить. Яко апостол учит нас, да избавимся рече от злых и лукавых человек, не всем бо есть вера. аще и верен есть Господь. мнятбося веровати жидове, и агаряне, и им подобнии еретикове. властне так яко и лукавии беси веруют. о них же блаженныи Ияков в послании своем воспоминает. Ниже. Все иншие веры облудны суть, суетны и прелестные, от сопротивнаго духа чрез растленных человек от ложных басней составлены, и намноженны, на пагубу сластолюбивым и веждам, возлюбившим сей прелестныи погибающии век.

 

Книга Кирил. лист 505.

Ведяще убо видите вы православнии. елицы еще верою прелести непоследуете, но держитеся благочестия, въкратце вам ко утвержению речем, да знаете яко все веры прочии иже верами зовутся, несуть веры, но прелести, наченше от латинския и до прочих всех. И почто несуть достойни называтися верами; того ради, яко ни едина от них не вмещает Духа Святаго даровании, ни пришествия его сподобляется.

 

Благовест., от Матф., зач. 55. в толк., лист, 109.

Мнози же мнятся бисери сиречь многих вера, мнящихся разумети, един же есть многоценныи, единая бо есть истинная вера Христос.

 

Катихисис болшей, глава, 4.

Вопрос. Иныя убо веры ихже велие множество по вселенней что они суть.

Ответ. Веры иные несуть православнии, понеже не в словеси Божии утвержаются. ниже по преданию святых апостол, и богоносных отец жительствуют. но по волях и по преданиях льстивых еретиков шествуют. сего ради ничтоже ино глаголется о них. точию яко несыи суетни бо и ложни, и бесовския нарицаются. яко свидетельствует божественныи апостол Ияков глаголя. беси веруют и трепещут.

 

[Книга О вере, лист 16, на об].

Един Господь, едина вера, по свидетельству апостолову. то уже иныя, все ереси а не веры;

 

О еже яко ниже отъяти что от православныя веры, или приложити, яже предаша нам святии апостоли, и святии отцы. Духом Святым утверженныя догматы тверде держати. да непредани будем вечнеи клятве и анафеме. глава, 3.

 

[Книга О вере, глава, 1].

Господи утверди нас во святых заповедех твоих стояти, и от востока тебе Христе, к западу не отступати.

 

В предисловии Кириловы книги, лист, 12.

Наша убо православная вера, аки солнце сияет во всю вселенную. широтою же божественнаго писания просвещает, всяку душю правоверную.

 

Седмаго вселенскаго собора правило, 1. [Кормч. лист, 208].

Святая правила облобызающе приемлем и держим, святых апостол, и шестих вселенских собор, к сим же и поместных, и еще и святых отец наших, яко единаго Святаго Духа вдухновенна, ихже прокляша, проклинаем, ихже извергоша, изметаем, ихже отлучиша, запрещаем.

 

От книги Даниила митр. Московскаго.

Непреступай закона и правила святых отец, прежде всех божественнаго Великаго Василия. но вся елико твориши, или глаголеши, имей свидетельство от святаго писания. отеческаго ти обычая, кроме преступления Божиих заповедей.

 

Апостол Павел к галатом, глава, 1. зач., 199.

Чюждуся, яко тако скоро прелагаетеся от звавшаго вы благодатию Христовою, во ино благовествование. еже несть ино, точию нецыи суть смущающии вас. и хотящии превратити благовествование Христово. но аще мы, или ангел с небесе благовестит вам, паче, еже благовестихом. анафема да будет.

 

[Беседы апостольския, к галатом, глава, 1. лист, 1477].

Но аще аз, или ангел с небесе благовестит вам паче еже приясте, анафема да будет. Ниже. Аще бо и от первых ангелов будет кто сущих с небесе растлевающих проповедь, анафема да будет. Ниже. И не рече, аще проповеданная возвестят, или превратят все но аще и мало нечто благовествуют, аще и худое что подвигнут, анафема да будут.

[лист, 1474]. Якоже бо в царских цатах, иже мало от образа пресек, всю цату непотребну содела: сице иже здравыя веры и малейшую часть превратив, все погубляет, на горшая происходя от начала.

 

[Книга Никона Черн. гор. слово 63].

Аще кто от угодных богоносным отцем поколебает что. не ктому се смотрение нарицает, но преступление предании и к Богу нечестие.

 

[Кормч. глава, 71. лист 641, на об].

Подобне и градстии закони сказуют, яко еретик есть, и еретическим подлежит законом, аще и мало что уклоняяися от православныя веры. Выше. Вся кроме церковнаго предания и учительства и воображения святых и приснопамятных отец, новосотвореная и соделанная, или посих паки содеятися хотящая, анафема.

 

[О вере, лист, 257, на об].

Вся кроме церковнаго предания и учения, и изображения святых и приснопамятных отец обновляемая, или посем содеяная, анафема, трижды.

 

Книга Кирилова, послан., 3. Мелетия, до белорусцов.

Обыкшая с новым обретением, бывати злая, сия вся молвы и разстояния, ереси наношение, и церковная смущения, новины любославных.

 

[Книга О вере, глава, 24].

Сего ради всеми силами всяк православныи тщатися повинен есть. яко да в приятии новин, под анафему не подпадет. при которой искушение казни злыя сретает небрегущих о сем.

 

Евангелие учител., в неделю 1-ю, поста, лист, 42.

Храняще же и соблюдающе, древнее предание соборныя церкви. и последующе преданием первым пределом, и законом святых и богоносных отец, и учитель наших, и любяще и приемлюще седмое число. святых и вселенских собор. к темже и бывшая особная соборы их по местом, Святым Духом составленныя; ихъже бо они проклятию предаша, проклинаем и мы. ихъже паки отлучиша, или извергоша, тако же и мы имамы их. такоже паки ихже прияша и почтоша, почитаем их и мы. проклинающе, и анафематисающе, и отревающе всех еретик и християнохулник, ихже и святохулники нарекоша. христианы же нарицает и глаголет, имамы православных покаряющихся, и последующих по преданию святыя и соборныя церкве. якоже и святыи великии вселенскии седмыи собор. Ниже. Содержите же предание, святаго сего вселенскаго собора. с прочими же иными, и сия тако глаголюще. со всяким убо опасением изыскавше и испытавше. и смотрению истинному последовавше, ничтоже отъемлюще, и ничтоже прилагаем, но вся преданная вселенския церкви невредна соблюдающе, и последующе шестим вселенским святым собором вся церковная предания писанная и неписанная, узаконенная предания нам непреложно сохраняюще. Ниже, лист 44. Смеющих же прочее, иноко мудрствовати, или учити, или по мерзских еретик, церковная предания презирати новая же некая разумевати, или отложити некое от чина церковнаго евангелие или знамение креста, или восписание икон святых, или мощи святых мученик. или разумевати строптиво и коварно, еже развратити что, от обычных предании вселенския церкве. Ктому же и еще аще яко общих имети священныя сосуды, или честныя монастыря. аще епископи суть, или клирицы, изметати повелевает. аще ли иноцы суть или бельцы, от причащения да отлучатся. святыи собор сия предал есть. Вси убо тако веруем, вси убо тако мудрствуем. вси тако похваливше записахом. Сия вера есть святых апостол. Сия вера есть святых отец. таковая вера есть православных всех. Сия вера вселенную укрепи. верующе во единаго Бога, в Троице певаемаго. и честныя иконы целуем. елицы же тако не мудрствуют, прокляти да будут. елицы тако не мудрствуют, далече церкве святыя да отженутся. Мы убо древнему законоположению церковному последуем. мы заповедания святых отец соблюдаем. мы прилагающих что, или отъемлющих от церкви проклинаем. мы вводимое новозаконеное, христианохулник еретик проклинаем.

 

Книга Кирила Иеросалим. лист, 30.

Аще кто в той седми вселенски соборы, утверженнои правде пребудет, спасен будет. якоже пишет. а кто отступит, или в чем порушит, погибнет вовеки. егдаже уставися последнее и совершеное всем исповедание веры. то уже несть потребы претворяти, или отъяти, или пременити аще бы что иноко вново пременити, то бы святии отцы седми вселенских соборов на похвалу и на память умели проповедати; но глаголаша и написаша сице. аще кто иноко дерзнет что вново уставляти и проповедати, а не тако якоже святии апостоли предаша, и святии отцы утвердиша, то уже к разрушению и разорению есть. а не начаток проповеди и вере. но всей твари скончание приидет, не глаголет паки будет, но приидет. [лист, 305]. Темже всякому подобает всею силою держатися церковнаго предания. от божественных апостол Духом Святым уставленнаго, и оттоль множества преподобных и богоносных отец седмищи на вселенских соборех собравшихся, утверженнаго и соблюдаемаго. Прикладающих же что, или отъемлющих, или иноко претворяющих, аще и сам будет крайнеишии учитель кто, никакоже слушати но удалятися таковаго, якоже божествении апостоли научают нас сице глаголюще, аще и мы, или ангел с небесе благовестит вам, паче еже благовестихом вам, анафема да будет. Ниже: От сего убо яко яве есть, яко дерзающии переправливати закон, еже Духом Святым утверженныи, то сами те плотьским мудрованием недугуют, якоже бо здравому лекарство не пользует но паче повреждает его. сице и правое поправляющии, паче кривят, нежели правят;

 

Книга О вере, глава, 24. лист, 195, на об.

В церковнои же вещи общей глаголет божественныи апостол Павел, аще мы, или ангел с небесе благовестит вам паче еже благовестихом вам, анафема да есть, еже и святыи Златоуст сказуя рече, сим бо убо еже благовестники, и ангелы прокляти всякое достоинство описа, равне и святыи Феофилакт. сия же апостольская словеса сказуя рече, ангелов проклятию подлагает, и вельми их охуждает, всякую власть и достоинство отметает, и мало ниже, недостоинство и на лице зрения ни единаго быти имать. Ниже: Не рекл рече Павел апостол, аще противная возвестят, или все превратят, но аще и мало нечто благовествуют, паче еже благовестихом, аще и последнее что подвигнут, прокляти да будут.

 

Книга Кирилова. Максим Грек о Святом Дусе, глава, 5, лист, 371.

Глаголет убо по прочтении священнаго исповедания веры, еже составиша первыи и вторыи собор, а третии утвердил, повеле святыи и вселенскии собор сей, иную веру никому списавати или составляти, или износити, тии аще епископи будут. или клирицы. да лишени будут епископства, клирицы же от клироса. аще же простии будут, да проклянутся тии: таже и теми же глаголы и прочии соборы повелевают, и пятыи и шестыи и седмыи, иже вопиет светлым гласом глаголя. Мы законы церковныя соблюдаем. мы пределы отеческия храним, мы прилагающих нечто, или отъемлющих от церкве, проклинаем; И паки, аще кто все предание церковное, написаное или неписаное отметает, да будет анафема. Ниже: [лист, 372] Иже бо мало что или велико от божественных отметает закон. и считается вкупе с преступающими его.

лист, 374. И с Июдою съчиняем, зане тоже что и той дерзнуша, непредавше в смерть. Господьское тело, новерных, иже суть уды телесе того отсекше, и разделивше друг от друга, и тако в вечную смерть пославше. [папа ок(?Иоанн) отступников веры со Июдою судит]. а наипаче себе, яко же неправе сотвори реченныи ученик. Се коль известно преблаженнейшии той отец краткими словесы сими, ненавидиму и отбегаему показа ересь. Яко с Июдою соучиняти начавших, и после тех укрепляющих ю.

лист, 407. Иже бо не убоястеся рещи, многих прельщеных бывших от сего евангельскаго речения, седмих соборов блаженных и знаменоносных онех отец безсрамне сице оклеветающе. тии бо предаша нам священное исповедание веры. яко же мы днесь еще храним то благодатию Христовою множае паче приложение во евангелии издавна сотворили бы есте. но не смеете сего сотворити, явственне ведуще. яко воистинну еретик есть иже и мало что от содержимых в божественном евангелии подвизая. Ниже: лист, 436. Добро воистинну и благочестивне рече Василии Великии, в первом еже на Евномия. яко аще бы на отеческих догматех и преданиях, умалчевали быхом, и просто неоплазивою верою апостольскою веровали, отнюд не требовали быхом словес. и сам реку, яко аще ничтоже от отеческаго удаляемся учительства, и стопам онех воследуем то ниже церковная смущалися бы, ниже спасения нашего вещи позыбалибыся, и была бы наша известнейша спасения нашего надежда, отцем воследующих древних догматом, и преданием учащихся, нежели испытубщих. якова же суть новых учителей новыя догматы и учительства, яже дабы токмо красовалися;

лист, 440, на об. Сия творя, даже наипаче отвещати буду за отеческая предания и по отцех, от детей своих обижаемых побарая. зело добре сие ведыи в предлежащеи наипаче вине, отцем отвсюду въследовати. аще и глаголемая правилца не всяко негде сходитися будут со опаством, много забавляющихся о сем астрологов. не бо астролози, но отцы суть, церковнии учителие. Выше. [лист, 436, на об.]. Вопроси отцы твоя и возвестят ти. старец твоих и рекут тебе. Аще бы Арии вопросил отец своих, то не бы разселъся хулы ради, еже хуляше на Сыновне божество. аще бы вопросил Македонии старцев, то не бы о Дусе безумствовал. Такоже и Несторию злочестивому откуду прииде низпасти, токмо еже от отец отступити. что же и Диоскор. не тоже ли пострада от правыя веры пренесъся, нехотящу ему со отцы туюже исповедати веру, совоспитавшуюся с нею истинную.

лист, 434. Еяже абие апостоли, и со апостолы отцы, и со отцами мы снаследствующе растем онем. Ниже: Егда станем вси страшному престолу предстояще, коих познают своих отцы, отеческую ли веру и богодухновеных святых отец предания отвергшихся, или нас православных, иже ничтоже ни в чем изменьших, не онех мню но нас. Выше. [лист, 401, на об.]. Подобаше убо, якоже предрекохом. отцем последующе. ничтоже разумевати паче уставленых ими, ниже собирати речения от писания, о ином и ином глаголаная, насиловати тех ко иному разуму, да волю нашю поставим. [лист, 442, на об.]. Кое слово рцы ми днесь отступити отец, и новым сим внимати, утро же и сих отпадати. леть сущее благо велми отеческое правило держати; [лист, 462, на об.]. Аще кто благовестит вам, паче еже приясте учение, анафема да будет, сие проклятие и от святаго вселенскаго втораго собора утверженное, на дерзающих приложение некое символу веры, или отложение творити, и по них же от всех святых соборов сохраненное. [лист, 493, на об.]. И Павел вопия ясне анафема быти аще и ангел бы был с небесе. еже есть немощно. аще ино паче еже предаша апостоли. дерзнет ново пресекати. [лист, 369]. И да услышат иных блаженных отец. что нам повелевают. о еже соблюдати цело и неподвижно священное исповедание веры. ни прилагающим что. ниже отъемлющим от того. Ниже. Кто убо когда недостоин анафемате осужден бысть, отъемля нечто, или прилагая в вере. И яже бо полне и явственне преданная нам от святых отец. ниже приложение ниже убавление приемлют. Чтохом бо в книгах наших, ниже приложити подобает, ниже убавити. великою бо и прилагающаго и убавляющаго мукою связуют. темже и огнь и железо приготоваем, понеже инако несуть исцеляемы язвы. [папа Келестин на пременители веры огнь и железо повелевает].

 

Соборник, лист, 389.

Проклят разоряи уставы отеческия, и непременнныя уставы церковныя. яже положиша отцы твои;

 

В предисловии книги О вере, лист, 50, на об.

Нам же и всем христианом до скончания мира хотящим быти исповедание православныя веры на святых вселенских соборех изобразиша еже есть сице; Верую во единаго Бога, весь доконца. Сия вера Христова. Сия вера апостольская. Сия вера проповедана бысть от конец, до конец земли по вселенней. Сия вера писанием святых богоносных отец и вселенских учителей утвержена, трудами исповедник, и кровми мученик украшена. Сице и мы веруем и исповедуем со отцы святыми. а иже тако неверуют проклинаем да будут прокляти трижды. А иже веровал, и других писанием и словом такожде научил. якоже ныне церковь православная кафолическая исповедует. вечная им память, 3-жды;

 

О анафеме, что в ней заключается. глава, 4.

 

[Ис книги Максима Грека, глава, 7].

Павел апостол глаголет. аще и с небесе будет ангел возвещаяи вам иная паче ихъже научистеся да отлучится Христова сообщения. и да осудится сатане в негасимыи огнь геенскии. сице убо толкуется еже анафема да будет.

 

Из книги Матфея Иеросалим. счинение по составех.

Но иже языком златыи в беседе о иже неподобает анафематисовати. не мнит подобно быти отнюд верна человека анафема глаголати. се бо и всеконечне отсекает от Христа рече, и диаволу возлагает. яко не ктому место имети таковому спасения. осуждается бо от Христа, и верных лика. иже анафема быв, и присудствующих сатану. и яко яже Богови возложена. общих человеческих вещей отлучаются. сице от сопротивнаго, иже лукавому отлучена, разделяется от божественных.

 

Святаго Иоанна Златоустаго. к рим., глава, 9. стих, 3.

Анафема есть да отлучится от всех. отлученнаго бо от церкве всех отрицая от того отлучитися и отступити аки отчюжденнаго, от Бога и отвергшагося от церькве.

 

Кормчая старописмена, слово, Иоанна митроп. Никейскии, на армены.

Сии проклинаемии, да предани будут дияволу. уже да не имут места спасению, но да будут от Христа чюжди. аще убо толикими от всех святых прокляти бывше, и от Христа отгнани, и дияволу предани, и до скончания века. от всех христиан проклинаемии; Ниже: Аще бо тмократицею прокляти бывше, и диаволу предани. како от анафемы, и от клятвы благословение изыдет. или како от диявола духовное и святое дело совершается; А от анафемы благословение не бывает, и от проклятия молитва не исходит. и от диявола Христово таинство не совершается. и от гноища благоухания не исходит. и от гнилаго трупия ин не исцелеется. ниже от червенных удов здравия иному телеси подается. ни паки от ереси. или от неверия духовное действо исполняется. ни от неверных ниже зловерных и нечестивых. совершенное и благоприятное крещение может быти.

 

О Церкви Христовой, кую врата адова не одолеют. глава, 5.

 

Пролог поучение святаго Иоанна Златоуст. на память святых апостол Петра и Павла. июнь, в 29, день.

Петра бо камень наричется, на нем же созда Христос церковь духовную. ейже врата смертная не могут одолети, идеже сам творец основание положи и стены возгради верою, кто возможет ей противитися к той бо верою всяк притек спасется. К той братие прибежим ту всех грех отпуст приимем, ту исцеление страстем получим, ту веселия и радости насладимся.

 

Никона Черногор. в послании, 22.

Соборная бо церкви, не стены суть, но правая учения, и предания божественых правил, и святых соборов, и святых апостол. Якоже рече Господь к верховному, апостолом, ты еси Петр, и на сем камени созижду церковь мою, и врата адова не одолеют ей. видели, кая есть соборная церкви. сам бо великии Петр. Первее Антиохииския многажды разрушены быша от язык. законы же и предания божественных отец, и божественая правила пребывают неразрушена вовеки от держащих тая;

 

Маргарит, в слове о предста Царица. лист, 519.

Зане ограда есть церковь, аще еси внутрь волк не входит рече, ащели же изыдеши вон, то зверем ят бываеши. но не от ограды, но от твоего малодушия; [лист, 518] Занеже имамы вручение твердо, ты еси Петр, и на сем камени созижду церковь мою, и врата адова не одолеют ей. церковь мою глаголю, не место точию но и нрав. не стены церковныя но законы церковныя, егда бегаеши рече в церковь, не к месту прибегай но к совету. церковь бо не стены и покров есть но вера и житие.

 

Благовестник, от Матф., глава, 7. зач. 67. в толк.

Воздает Господь Петрови мзду велию. еже на нем создати церковь свою. понеже бо исповеда его Сына Божия, Петр глаголет. яко сие исповедание еже исповеда, основание хощет быти верующим. темже всякому человеку подобает хотящему знати дом веры. сие исповедание полагати основание. аще и добродетели зиждем не имам же основания праваго исповедания разслабленно зиждем, рекше, уже церковь мою, являет себе владыку всяческим. Богу бо вся порабощена суть, и врата адова не одолеют ей, сиречь по временех бывающии гонители, иже прельщением во ад отпущаху христианы. еретицы же суть врата, во ад низводяща. многим бо гонителем, и многим одоле церковь; есть же и кождо нас церковь храм Божии бывая. и аще же на исповедании Божии утвердимся, врата адова, сиречь греси не одолеют нам.

 

[Книга О вере, глава, 7. лист 64].

Отвещают ли противнии на вышереченная словеса, яко Христос на Петре церковь созда, и яко ему поручи пасти своя овцы. Но сие вкратце помощию Божиею объявим; Первее же положим Христова словеса. Ты еси Петр, и на сем камени созижду церковь мою. Петровым именем, камень толкуется, или от камене камень, всяк верныи человек разуметися имать, и на всяком таковом яко на камени церковь свою Христос созидати обеща. стих. На камени мя веры утверди. святыи Амбросии. Второе толкование имене Петр святыи апостол, имать быти разумен. и не точию сам Петр, но и друзии апостоли таковыми же суть каменьми, мнози учителие от святых тако разумеют. Кирил патриарх Александриискии Августин, и инии некотории. Четвертое сказание, яко Петровым именем, сиречь каменем, вера или исповедание от Петра реченное разумеваемо имать быти. кая вера, от Христа Петром есть наречена. Сие Златоуст, Григории, Дамаскин, Феофилакт, еже выше явственее злата свидетельствуют. Ты еси Петр, и на сем камени созижду церковь мою, сиречь на вере исповедания, еже исповеда, ты еси Христос Сын Бога живаго. и на том исповедании созда Христос церковь свою, еже есть вернии людие во имя его крестившиися.

 

Катихисис болшеи, глава, 7.

Вопрос. Что есть церковь Божия. Ответ. Церковь Божия есть собрание всех верных Божиих, иже непоколебимую держат едину православную веру, и в любви пребывают. облобызают же учение евангельское непоколеблемое, и иже суть достойни приимати святыя и божественныя и совершеныя тайны. и иже суть под единою славою Господем нашим Iсус Христом.

 

Лествечник, лист, 24.

Церковь Божию нас нарицает, освящения ради и крещения.

 

Псалом, 67.

В церквах благословити Бога Господа, от источник, израилев. Исихиево. Церковь глаголется, и еже по домовех собрание благочестивых. сего ради и Павел глаголет, целуйте Прискилу, и яже в дому их. церковь от источник израилев от пророков и апостолов и Господа Бога словословитися хощет. да яко по коему чину тии уставиша. сице и мы о Бозе мудрствуем.

 

Благовестник от Луки, зач. 45, лист, 86. толк.

Церковь именует, идеже множество верных, яко пищу заповеди приемлюще спасаются.

 

Минея чет., ген., 21, день.

Христос Господь кафолическою церковию нарече быти правое и спасеное исповедание веры идеже бо нарицается Христос, ту и соборная церковь сходится.

 

Кирил Иерос., лист, 371.

Не бо от оград, и от престолов апостольское величество и область состоится, но от догмат правыя веры, и сожития божественаго апостольскими учительствы управляемо, и есть познавается.

 

Беседы апостольския, лист, 437.

Аще бо церковь раскопати, люто и непреподобно кольми паче храм духовныи ибо человек от церкве есть честнейшии, ибо не стен ради Христос умре, но храмов ради.

 

[Книга О вере, лист, 19].

Небесная бо есть церковь. и ничтоже ино есть разве небо. и инде. в церкви вся с небесе от Бога вещаются. въходим с подобающею честию в церковь, и со страхом послушанием в ней глаголемая. Ниже: Церковь не стены и покров, но вера и житие. Ниже: Златоустыи в слове на пятьдесятницу. Вельми бо церковь Богу возлюблена есть. не сия иже стенами огражена. но сия иже верою огражена. Ниже: лист, 24. Бысть рече в то время гонение велие на церковь Иеросалимскую, не на ту, иже Соломоном создана бысть, еюже тогда жидове владели, но на верующих во Христа, гонение разумей. тогда бо не у созидаеми верных церкви беша. Ниже: лист, 29. Церковь истинная сия есть яже гонения претерпевает, а не та, яже других изгоняет. Выше. И егда слышим в писании церковь гонения терпит, с церковию брань. не о стенах и мурах, но о верных Божиих разумети потреба.

 

Маргарит от жития Иоанна Злат., лист, 116.

Церковь глаголю, верных весь народ. Ниже. [лист, 117]. Нечистыи ты и скверныи диаволе. стенам не можеши одолети, или церкви надеешися соодолети. еда мниши стенами церковь сущу, но паче народом верных есть церкве. Видиши колицеми столпы есть утвержена. не железы связани, но верою утвержени.

 

Слово О предста царица.

Досаждаема светлейшии устрояется. приемлет язвы но не испадает от язв волнуется но не погружается. обуревается, но потопления не подъемлет. и чесо ради попусти на ню брань, яко да покажет светлеишую победу. Колицы рече ратовавшеи ю погибоша таяже выше небес взыде;

 

Яко святое крещение корень христианския веры, яко твердое основание. глава, 6.

 

Книга жития Иоасафова, глава, 8. святыи Иоанн Дамас.

Крещение есть корень святыя христианския веры, яко твердое основание.

 

Пролог, июня в 29, день. Златоуст.

Сам Творец стены возгради верою.

 

Книга о постничестве, Василия Великаго.

Креститися подобает якоже прияхом, а веровати якоже крестихомся.

 

Книга Григория Назианзина. Афанасия Великаго. слово, 3. на ариан, лист, 40.

Темже и Спас не просто заповедал есть крещати, но прежде рече научите и потом крестите во имя Отца и Сына, и Святаго Духа. да от учения вера права изъявится и с верою совершение крещения приложится.

 

Книга Григория. слово 2-е. на Крещение Господне.

Крещение есть утвержение вере и извещение.

 

От того же слова, на святое Просвещение, от толк.

Вера и крещение, два образа спасению, равна себе и неразделна, вера совершается крещенем, и предходит исповеданием ко спасению.

 

Беседы евангелския, лист, 274.

Вопрос. Что есть вера.

Ответ. Сице есть изъявиша, вера ничтоже ино токмо сие есть что глава всем добродетелем крещение. иже веру имет и крестится спасен будет. а потом чисто довлеет соблюсти, и добрая дела творити, честно есть, понеже крещение мать и отец всем добродетелем.

 

Катихисис болшей, глава, 4.

Не разделяем веры, в нюже крещени есмы и в той пребываем;

 

Яко не крещени не именуются вернии, ниже возмогут внити в царство небесное по словеси Господню. глава, 7.

 

Евангелие от Иоанна, глава, 3. зач. 8.

Сам Христос Спаситель наш глаголет. Аще кто не родится от воды и Духа не может в царство небесное внити, и паки рожденое бо от плоти плоть есть рожденое же от Духа дух есть.

 

От Марка, глава, 16. зач. 71.

Шедше в мир, проповедите евангелие царствия всей твари, иже веру имет и крестится спасен будет а иже не имет веры осужден будет.

Толкование Феофилакта. [Благовес. лист, 104]. Виждь Господни заповеди [евангелие] рече всей твари, иже веру имет и крестится спасен будет. а иже не имет осужден будет. не рече верным но всей твари, аще ли верен, аще ли же ни. верующему же не довлеет токмо проповедь прияти, но и креститися, ибо веровав, не крестивжеся, и еще оглашен сыи. не уже спасен.

 

Благовестник. от Иоанна, глава, 7. зач. 25. в толкован.

Не еже бо токмо веровати и приити от неверия. но подобает прежде креститися и достойну быти, и с крещенными в церкви стати.

 

Беседы евангелския, от Иоанна нравоуч., 25.

Яко некрещенныи, аще и бесчисленныя имея исправления умрет, в геену отходит. Толкование. Толиких убо таинств сподобльшеся, житие покажем достойно дара жительство нарочито. а иже не у сподобльшеся, вся да действует, якобы сподобитися, да будет тело едино, да будем братия. дондеже по всему разньствуем, аще и отец кто будет. аще и сын. аще и брат, аще иже кто ни буди, не у сродник есть присныи еже свыше рождению разтерзану. что бо польза обретеннаго рода совокуплятися, егда чюж бо есть вернаго оглашенныи, не имеет бо главу туюже. не имеет отца того же, не имеет града того же, ни пищу, ни одежду, ни трапезу, ни храмину. но вся пременена. ибо вся на земли, и вся на небесех оному. Царь сему Христос. оному же грех и диавол, и щит сему убо Христос. оному же греющая и растлеваемая. одеяние паки сему убо дела червеи. оному же ангельскиии Владыка, град сему небо. оному же земля. егда убо ничтоже имеем обще. почему приобщимся рцы ми, но та яже ли разрешихом рождения, и единыя проидохом утробы ничтоже сие ко опаснейшему сродству. Да потщимся убо горняго града быти граждане. доколе в чюжей стране пребываем; Потребно есть началнеишее отечество восприяти ниже бо от прилучшихся беда есть. но аще будет еже да не будет неначаянному скончанию нашедшу, некрещеным от здешних отъити, аще и безчисленная имеем благая, ничтоже нас ино приимет разве геена. и червь ядовитыи и огнь негасимыи. и узы нерешимыя.

 

Той же беседы, 25.

Услышите елицы есте просвещения кроме. устрашитеся, воздохните, страшно прещение, страшно изречение. несть рече нерожденному водою и Духом внити во царство небесное.

 

Апостол. 1 послание святаго апостола Петра, зач. 60.

Во дни Ноевы делаему ковчегу, в нем же мало, сиречь осмь душ спасошася от воды, егоже воображение ныне и нас спасает крещение;

 

Послание к галатом святаго апостола Павла, зач. 208.

Елицы во Христа креститеся во Христа облекостеся. Ниже. Аще ли вы Христовы, то убо Авраамле семя есте, и по обетованию наследницы.

 

Той же послание к римляном, зач. 91.

Елицы во Христа Iсуса крестихомся, в смерть его крестихоимся убо с ним крещением в смерть. да яко же воста Христос от мертвых славою Отчею, тако и мы во обновлении жизни ходити начнем.

 

В каноне пред празд. Богоявления, на павеч. ген., 4. песнь, 7. стих, 3.

Со мною аще кто снидет и спогребется крещением, со мною славы насладится, и воскресения Христос ныне возвещает.

 

Благовестник, в толк. Феофилакта, от Матф. зач. 48.

Ты же и се разумей. яко крещением изгоняется нечистыи дух, и обходит безводных и безверных душ, но во онех не обретает покоя, покой бо есть бесу, крещенных смущати лукавыми делы. некрещенных же своих имать изначала, возвращается на крещеннаго. с седмию духи. якоже бо. седмь, духовнии дарове, тако и лукавии, седмь злых духов. егда же возвратится на крещеннаго. и обрящет его празднующа, и от добрых дел спрятана, сиречь, лености ради не имуща в себе дело на супротивление супостатом, тогда вшед вонь горше первых пакостит ему. прежде бо крещением очищьшуся, потом же второму крещению несть надежды, разве покаянием зело трудно.

 

Из евангелия неделнаго, в неделю, 6-ю, в толк. лист, 221.

Тако и мы братие не прежде убо можем Отца нарицати Бога, дондеже аще в купели крещения и покаяния грехи отмыем. егда же отнуду взыдем, лукавое оно время отложше. тогда глаголем Отче наш иже еси нанебесех.

 

Евангелие в неделю о блудном, лист, 15.

Святым бо крещением сыновство приемлют человецы.

 

Евангелие на крещение Господне. лист, 519.

Еже крещением начертавшиися образ всыновления, нескверно сохранити должни есмы, и чист и не блазнен.

 

Евангелие в неделю разслабленнаго, лист, 130.

Ныне же креститися ни единаго повреждения имамы. ниже бо единому исцелевшу, прочии без исцеления остают. но аще бо и вся вселенная соберется, не оскудевает благодать, изобилна бо есть, и неоскудна пребывает. и изливаема изобилует. всегда истощаема, и николиже оскудеваема.

 

Из того же евангелия на Вознесение Господне. лист, 159.

Какоже крещение разумеваем, о имени Христове токмо быти. а се инде учи ми во имя Отца и Сына и Святаго Духа свершати, сие прежде рекохом сия убо, яко крещение егда глаголет о имени Христове быти не то глаголем, яко лепо о едином имени Христове съвершати се, но яко Христово крещение. Христос крестилъся еже есть духовно, а не июдейскии ни яко, Иоанново крещение в покаяние токмо, но Духа Святаго причастие и отпуст грехов подая. яко же и сам нас ради показа. крестився во Иордани, и Дух Святыи в видении голубя явль. о имени же Христове крещение, в смерть Христову разумеваи, якоже бо Христос умер, в третии день воскресе. тако и мы погружаемы в воде образно, таже возникаем нетленни душею, и Духа нетления залог приемлюще.

 

Благовестник, от Луки. зач. 38. в толк. лист, 75.

Увеждь, яко иже кто имать бесы в себе; сеже есть бесовския деяния, в ризу не облачитися. сеже есть крещения и добродетели не имать. и в дому не пребывает, сеже есть в церкви, недостоин бо есть входити в церковь. но во гробех, еже суть мертвых дел приималища, еже в блуде и мытарстве. се бо гробове злобы суть.

 

Никон Черногорскии. в 5, послании.

Исперва убо насаждается всяк христианин от святаго крещения;

 

[Беседы апостольския, лист, 2855].

Ниже убо покаяние довлеет на очищение, но потреба крещение восприяти.

 

Григория Богослова, от слова 2-го. на Крещение Господне, от толкования, стих, 16.

Предложи щит веры еже есть крещение. его же обнажает тя враг, не попусти его прияти. да тя яко безоружна победит.

 

Беседы апостольск., лист, 531.

Велие глаголю крещения, и кроме крещения невозможно царствия получити, но может тя и не зело доблии муж сотворити, а еже благовестити, многа труда требует.

 

Катихисис болшеи, глава, 60.

Вопрос. Кая нам потреба святаго крещения.

Ответ. Сия нам потреба, да егда человек грешен будет, не могии покаянием грехов своих избавитися. благодатию же Христовою во крещении очисти вся будет христианин, и сын Божии, дарованием и сыновлением образ Христов, и самого того Сына Божия в себе имея. якоже святыи апостол Павел глаголет. елицы во Христа крестистеся, во Христа облекостеся. И како сие бывает; Сице, ельма убо вси раждаемся в первороднем гресе, егоже имама от прародителеи наших. сей же грех с прочими грехами в крещении прощен бывает, и дается нам тогда всецелая благодать Божия. оправдающая ны и сице бываем чада Божия, и наследницы царствия небеснаго.

 

Ис книги Иосифа Волоцкаго: слово, 5.

Несть иного имене под небесем, о нем же подобает спастися нам. точию о Господе нашем Iсусе Христе якоже глаголет Господь во святем евангелии, аще кто не родится свыше водою и Духом. во имя Отца и Cына и Святаго Духа, не может спастися. аще и всех человек праведнейшии будет. се показа Петр апостол Корнилия суща праведна, и Богом свидетельствованна, крести;

 

Книга Алфавит. начало писму о оглашении.

Оглашении глаголю иже веровати во Христа научении, а еще некрещены то суть оглашении.

 

Беседы апостольския, лист 2881.

Плачися неверных, плачися иже ничтоже онех отстоящих, иже без просвещения отходят. иже без печати. Сии воистинну плачев достоини суть, и воплей вне церкви суть, со осуждеными с повинными казни. аминь бо глаголю вам, аще кто не родится от воды и Духа, не внидет в царство небесное. Ниже: А оглашении ниже сподобляются утехи, но лишаются всякия сицевыя помощи. разве единыя некия, кояже: Сия, мощно за них милостыню давати. творити им некую прохладну вещь.

 

Пролог месяца[?], 28.

Аще родится отроча, и небрежением поповым умрет некрещено то люте попу тому. ащели небрежением родителю умрет некрещено, то горе есть родителем тем. того ради вельми достоит пещися родителем о крещении чад, и хранити времене, наипаче к смерти, отроча неназнаменно, волчия часть есть. знаменано же Христово есть, и хранит и имущаго знамение.

 

Ис Катихисиса болшаго глава, 68.

Вопрос. Чесо ради пред враты ожидает хотяи креститися.

Ответ. Сего ради яко сицевыи в церкви не имать места прежде даже сатаны не отречется, и работы ига его не свободится.

 

Беседы апостольския, лист, 530.

И да не речеши бо, глаголет, кто крести, но в чие имя. не бо крестивыи, но призываемыи в крещение взыскуется. сей бо оставляет грехи.

 

[Книга Маргарит. лист, 385, на об.].

Аще ли вне винограда вас постигнет смертная нощь, не ктому прочее вас нареку други. мертвыи бо неверует. мертвыи не исповедует. мертвыи не делает. мертвому не открываются таинства. мертвыи не делает целомудрия. не может мертвыи мзду истязати, мертвыи не крещен и прежде суда осудися.

 

Апокалипсис. глава 62. в толк.

Мертвеца глаголет, иже не воскреснувша со Христом крещением.

 

Ис книги Григория Амиритскаго, от 3-го сопрения с Ерваном жидовином.

Архиепископ рече. Восток бо есть мысленныи крещающимся церковная купель. и темным, заходящим, со множеством мрачных согрешениих светлейшии паче снега от крещения происходят, тяготу беззакония тамо потребляюще. возведи окрест, всемирныя умныя очи твои и виждь о новыи Иеросалиме, от всех племен язык ради. иже во Христа веры. едину соборную и апостольскую церковь. честным крещением во спасение;

 

Из Катихисиса болшаго. от главы, 17.

Хотяи убо ити вослед Господа Iсуса Христа. родители же его неверны быша сего ради и мертвых рекл иже Господь. и повеле не пещися о житейских последующему ему. сице убо и до крещения всяка убо душа мертва бе. святым же крещением животворится.

 

Из бесед апостольских. нравоучение, 25. лист, 3022.

Что бо творящее братство. баня паки бытия, еже возмощи нарещи Отца Бога темже оглашенныи убо, аще и инок будет, несть брат. верныи же, аще и мирянин, брат есть.

 

[Из тех же, лист, 121].

Чие бо будет знамение; чия печать, несущу печатленному. якоже и влагалище показал бы еси нам печать имущее, ничесому же внутрь положеному, темже посмеятелно есть обрезание вере внутрь несущеи;

 

[И паки тая же, лист, 893].

Явление же Духа знамение нарицает, в лепоту, мне бо убо верному явлено есть иже Духа, имать от еже крещен бысть, неверному же ниоткуду сие будет явлено. точию от знамении.

 

Из тех же бесед, апостольских послан. к коринф., глава 15. зач. 161. [лист, 1063].

Крещеннаго же душю не ктому, но самых солнечьных лучь светлейшю. и якова же изначала рождена бе, наипаче же и оная много лучьшая. Духа бо наслаждается иже отсюду раздизающаго ю и святыню протязающаго, и аки железо или злато преливая, чисто и ново свыше твориши, такожде и Дух Святыи якоже в горниле в крещении приемляи ю, и снедаяи согрешения злата всякаго чиста чистейши уготовляет ю блистати, и телес воскресение достоверно быти и отсюду паки тебе показует.

 

Ис книги Иоасафа царевича, глава, 8.

Крещаемся убо по словеси Господни, во имя Отца и Сына и Святаго Духа. и тако вселяется духовная благодать. крестившаго душю просвещающи ту, и боговидну содевающи. и еже по образу ея по подобию обновляющи, и прочее вся ветхая и злобная дела отвергше, обет к Богу втораго жития, и начало чистейшия жизни сотворяем. яко да и наследницы будем на нетление порождьшися и вечное спасение приимем. кроме же крещения несть благую ону надежду получити. аще кто и благочестивых благочестиве будет. тако бо иже на спасение роду нашему вочеловечивыися Бог Слово рече: аминь глаголю вам, аще не родитеся водою и Духом не внидите в царство небесное. тем прежде всего молю тя, душею прияти веру. приступити же вскоре ко крещению, желанием теплым. и никакоже о сем не ожидати. бедно бо есть ожидание. понеже не явлено есть смертное нашествие.

 

Книга Григория Богослова, на Крещение Господне, в слове, 2. в толк., стих, 16.

Разумей врага, да не дерзнет бо ти рещи отнюд отступити от Бога, весть яко тяжко есть се слышати христианом. но козньми лестными ухищряет, и учит отлагати крещение. страха ради и говения не прияти его. Ниже. Не неради убо быти. некрещенныи бо, не у верен аще и во Христа верует.

 

Той же на Крещение слово, 2. толк. от стих., 22.

Ино паки противление предлагает, отметатися крещения, глаголет сице, яко Бог есть испытатель помыслом, и милостив человеколюбив, желание мое в крещения место приимет, безмернаго ради милосердия его; к нему же Богослов глаголет вещая тако. Сия человече сплетения некая глаголеши, и яже суть самосмышления. и прелагаеши сия во ответ не хотя прияти благодати, и мниши некрещенному вменитися с крещенными человеколюбия ради. Аз же ти сие непщевание разоряю, им же противишися. и якоже вем, дерзаю глаголати. мню же и прочим ум имущим способствовати ми о сем, яко различни степени. улучившим крещение, и не улучившим. крестившеибося, и тии различие имут в себе. ови доконца чюжди быша Богу. всяку злобу со тщанием проходяще, невстягновено грехи творяще, и яко незрящу Богу дел их пребываху. друзии же исполу некако злии. иже хотением не хотят зла творити, побеждаеми бывают или от немощи или от обычая предварившаго. и якоже паче огнем жегоми не хотят бо жегоми быти. но неволею жегоми суть, а иже прежде крещения быша похвалени, благаго ради нрава неподвижни суще на зло. или от произволения и потщания, и прежде божественная баня чистящеся да приимут е хранят. неприемлющии же благодати божественнаго крещения, ови отнюд яко скоти и зверие, похотем работающе. горцы суще и яри якоже плотоядни зверие. сии убо безумство и лукавство в себе имуще. к тому же ниже благодать крещения разумеюще воистину ниже силу благодати крещения, и почитающе мнятся отлагати. еще же то за несытство сластей нехотящеся от сих отторгнути. друзии же ведуще благодать. и от лености отлагают, нехотяще прияти дар крещения яко младенцы немогуще разумети. и того ради отщетеваются, не за ино что горши суть первии ниже по них во отлагающих крещение, яко доконца суть злии, ответ дадят о злобе. и о небрежении крещения. а иже от лености отложившеи, дадят поистине убо ответ но легчейшии первых, яко не за умножения злобы сластей. но буйством нрава и несмысльством отщетишася. ты же противляяся глаголеши, яко восхотевшему ми токмо креститися, и от желания сего единаго вменятися от Бога крещен. не прельщайся человече, некрещенныи бо несть крещен. рцы же ми вопрошаю тя о сем, восхотевыи убити не убив же яко со убицами осудится ли, но не имаши сего рещи какоже ты мниши яко довлеет ти вместо крещения се едино еже токмо восхотеем, и не крещався с крещенными вменитися, и того ищеши славы просвещенных получити. тем же по твоему суду, довлеет ти желание едино вместо получения славы понеже желание славы имаши, и се едино довлеет ти и неполучившу, и что еще ищеши славы, понеже любовь ея имаши.

 

Ис книги Завещания святых апостол. [книга, 6. глава, 15].

Но иже от презорства не хотят креститися, яко невернии осудятся, и поносими будут. яко неблагодарни и неразумнии. глаголет Господь аще кто не родится водою и Духом [не крестится], не внидет в царство небесное. и паки, иже веру имет и крестится спасен будет. а иже не имет веры осужден будет.

 

Апокалипсис трех толковой, глава, 26.

Иже глаголет не имет печати Божия, сиречь невернии, не крестившиися во имя Отца и Сына и Святаго Духа. и не знаменани знамением честнаго креста, над сими власть имеет диавол.

 

Соборник, в неделю мясопустную. слово, 1. святаго Иоанна Златоустаго. лист, 26, на об.

Плачи неверных, плачи же ничим же не остающих, иже без освящения отходят и без знамения сии поистинне плачю подобни суть и жалости иже вне царева двора суще, со осужденными и со окаянными. аминь бо рече глаголю вам. аще не родится кто от воды и Духа, не имать внити в царство небесное.

 

Ис того же Собор., Григория Богослова на святую 50-цу, лист [856].

Содетельствует же Дух, и духовное крещением обновление. и неложныи Бог устрашив рек, аще не родится кто свыше, не может видете царствие Божие. ни един бо приимет царство, иже не очистит первое плотьское рождение, еже в нощи и тме начало приемлющее еже семене в нощи бо множае паче смешение, и еже семене приятие бывает. очистити же того сквернаго и темнаго рождения, светлым и дневным назданием крещения.

 

Благовестник от Иоанна, зач. 2, лист, 12.

Аще же кто речет и се, яко мнози приемлют. и верующе токмо, иже суть глаголеми оглашеннии, и не убо от сего бывают чада Божия. власть же имут аще волят креститися и сего сподобитися дара, сыновства реку.

 

[Той же. зач. 21, лист, 98, на об.].

Некрещенныи бо жажду имать и сухоту многу, непрестанну сущу, устужающия святыя воды. крещенныи же имея Дух присно руководится им.

 

Книга Зерцало богословия. о Иеросалиме граде прекрасном, и о основании стенах и братех его. от главы, 1-й.

Но таковыи град пречюдныи не руками человеческими создан. но самем премудрым Богом, врата у того града от всех четырех частей. каяждо часть имать троя, от востока запада, юга севера. еже знаменает сего града отверзение, от всех четырех частей мира невозбранное в него вхождение всякому народу, но теми токмо троими враты. крестяися во имя Отца и Сына и Святаго Духа входят в сей прекрасныи град. Ниже: Покушаются тмою своего ложнаго учения, закрыти свет правды Божия. таковии вси никоим образом могут внити инде где, в той град святыи. аще не теми, троими враты. ибо ни единаго тока и диры в том граде обрящут.

 

От деянии апостольских, в ... , лист, 11.

Рече бо той же святыи, яко в един день, 3000 крестишася. и еще в другии день, 5000. такоже прияша святое крещение и друзии мнози им же не бе числа крестишася. не ожидаху бо Пасхи, ниже отлагаху время, но вскоре сподобльшеся благодати;

 

Яко христианскии род верныи не прейдет, ниже оскудеет даже до скончания века. глава, 8.

 

Евангелие от Матфея, зач. 101.

Аминь глаголю вам, не мимо идет род сей, дондеже вся сия будут. небо и земля мимо идет, словеса же моя не мимо идут.

В толк. Феофилакта, благовес. лист, 82.

Род зде глаголет, не тогда сущии но верных; сиречь, яко не имать род верных преити. яко сими злыми не погибнет, но пребывет, и ни едино зло удержит его. нецыи же сия вся будут, о разорении Иеросалима токмо разумеют, а не о вторем пришествии. отонуду же, и сице сказуют, не мимо идет род сей, сиречь, апостольскии род, видети имать разорение Иеросалима, и злая. уверяя же глаголемая рече, яко удобнейшии есть погибнути небу и земли, твердым и крепким составом нежели мною реченым погрешитися некоему.

 

[Евангелие от Марка, зач. 62].

Аминь глаголю вам, яко не имать преити род сей дондеже вся сия будут. небо и земля прейдет словеса же моя не прейдут.

В толковании Феофилакта. [Благовестник лист, 82].

Аминь глаголю вам. яко род сей христианскии не прейдет, даже сия вся о Иеросалиме и антихристове пришествии будут. не бо где род апостольскии глаголет понеже не до скончания мира живут апостоли. ниже до скончания Иеросалиму, мнози достигоша жити. род убо христианскии глаголет, утешая апостолы, да не мнят толиким злым бывающим вся оскудеет вера. рече дерзайте, не прейдет род христианскии, ниже оскудеет. прежде бо бездушныя сия стихии, небо и земля прейдет, ниже словеса моя отпадут. вся бо свершатся елико рекох.

 

[Евангелие от Луки, зач. 107].

Аминь глаголю вам, яко не имать прейти род сей, дондеже вся сия будут. небо и земля мимо идет, а словеса моя не имут преити.

В толк. Феофилакта.

Аминь глаголю вам, яко не прейдет род сей. дондеже вся сия будут. род рече не тогда сущии народ весь христианскии верныи, весть бо и род от единонравия именовати писание. яко сей род ищущих Господа. понеже бо мятежи и ради и изменению рече быти стихиям и вещем да непщуют нецыи, яко егда христианство разорится, ни рече, не прейдет бо сей христианскии род: небо и земля изменятся, словеса же моя и евангелие мое, не разорится. но пребывают; аще и вся двигнутся, но о мне вера не оскудеет, являет же зде. яко церковь честнейшу имать всех тварей. ибо аще и тварь изменится, верных церкви и словеса ея, и евангелие, никогдаже.

 

Ис книги Максима Грека от главы, 8. [а инде главы 12. на агарянскую прелесть].

А якоже евангельскии завет егоже положи священным учеником его. и ими всем верующим вонь. непреложен доконца соблюдется. а не преложится якоже ветхии. и яко семя его, сиречь христианскии язык пребудет вовеки;

 

Яко истинныи православныи, христианин именуется от святаго крещения. глава, 9.

 

Катихисис болшеи, глава, 1.

Вопрос. Что есть истинныи православныи христианин.

Ответ. Христианин есть иже от Бога святым крещением порожденныи. и по благодати его банею паки бытия сын Божии нарицается.

 

Ис предисловия Псалтыри со воследованием. острож. печати. в лето, 7107.

Первое рождение наше во гресех, за преступление первозданнаго родоначальника праотца нашего Адама смерти всех человек виновно бысть. от него бо яко прежде согрешшаго, естественне всяк во гресе понужди родится. от сего же и смертию осуждени быхом. сего ради свобождая нас от греха и смерти, един безгрешен и вторыи Адам, единородныи Сын Божии Господь с небесе. в подобии плоти греха пришедыи, и о гресе осуди грех плотию; И второе порождение очищение от греха, спасеное крещение постави, и узаконил глаголя. аще кто не родится водою и Духом, не может внити в царствие Божие. сие бо второе посреде порождение спасенное крещение, первому рождению еже во гресех есть отмытием и потреблением греха первороднаго, и присвоением приближения к Богу, зане сим обновляющеся чада Божия бываем. и паки крайнему совершенному истинному порождению. сиречь общему всех воскресению ходатаи и споручник бывает; Третие истинное и совершенное порождение, второе пришествие Христово в день судныи общее всех воскресение. отродившиися убо крещением, и Христу приобщившиися наследующе его востают в жизнь вечнаго царствия Божия. невернии же и не хотящии в чювство и в познание божественнаго хотения приити. воскреснувши соотводятся в вечныя муки уготованныя диаволу и ангелом его, восприемлюще кождо по делом своим, вечне и без конца тамо пребывают. темже и всяк хотяи, сохранити и соблюсти яко изначала иже по образу Божию создан бысть, и желающе на неже создан есть, еже в небесных со ангельскими лики пребывание, отнюдуже сатана испаде. сей паки отрожается и обновляется сим посредним порождением спасеным крещением. погружаяся потребляет грех первородныи. и паки возгружаяся из воды совостающе, образуем Христово тридневное востание. и сим сопричастник бывает третиему совершенному порождению общему всех воскресению, и царства небеснаго наследию; Ведати и се достоит правоверному. якоже три рожения суть о них же выше речено есть. тако и три имена точию свойствена суть христианину; Первое естественное общее всем верному же и неверному глаголется имя, человек еллинским же языком антропос. еже ся толкует, горе зря. мощно же всякому присно зрящи в небесное благолепие в чювство приити. и от сея видимыя твари, невидимаго Творца познавати, и на истинныи путь Божия хотения направитися; Второе имя, точию верному свойствено есть, отродившемуся святым и спасеным крещением. и сим Христу приобщившиися, христианином нарицатися; Третие же особное коемуждо человеку от действа, паче же христианину именоватися яко Петр от непоколебимыя веры твердыя. и якоже Григории от бодрости и трезвения умнаго. или яко Феодор от Божия дарования такоже Василии Иоанн и прочее;

 

Катихисис болшеи, глава, 60.

Вопрос. Кая нам потреба святаго крещения.

Ответ. Сия потреба, да егда человек грешен будет не могии покаянием грехов своих избавитися. благодатию же Христовою во крещении очистився будет христианин, и сын Божии. дарованием и сыновлением образ Христов, и самого того Сына Божия в себе имеяи. якоже святыи апостол Павел глаголет, елицы во Христа крестистеся, во Христа обекостеся.

 

Никон Черногор., в 5-м послании.

Исперва убо насаждается всяк христианин от святаго крещения;

 

Яко Христова Церковь истинным, крещением своих чад вовремя, антихристова гонения, и даже до скончания века, родити будет. глава, 10.

 

[Апокалипсис печат. глава, 7. Сущее].

И видех ин ангел восходящ от восхода солнцу, имыи печать Бога живаго. и возопи гласом велиим к четырем ангелом, имъже дано бысть вредити землю и море. глаголя не вредите ни землю ни море ни древа, дондеже запечатлеем рабы Бога нашего на челех их. и слышах число запечатленных, сто четыредесять четыре тысящи запечатленных от всякаго колена, сынов Израилев. И паки ниже: Посих видех и се народ мног, его же изчести никтоже может. от всякаго языка и колена и людей и племен. стояще пред престолом, и пред Агньцем, облечены в ризы белы. и финицы в руках их и возопиша гласом велиим глаголюще, спасение седящаго на престоле Бога нашего и Агньца. и вси ангели стояху окрест престола, и старец, и четыре животных. и падоша на лицы пред престолом и поклонишася Богу глаголюще, аминь благословение и слава и премудрость и хвала и честь и силы и крепость Богу нашему вовеки, веком аминь. и отвеща един от старец глагола ми. Сии облечении в ризы белыя кто суть и откуду приидоша. и рех ему, Господи ты веси, и рече ми. Сии суть иже приидоша от скорби великия, и испраша ризы своя и убелиша ризы своя в крови Агньчи;

 

Апокалипсис толковой. в толковании, святыи Андрей Кесариискии. печат.

И убелишася ризы их в крови Агньчи, сиречь крестишася во имя Отца и Сына и Святаго Духа. и очищени суть кровию Агньчею.

 

Апокалипсис трех толковой глава, 33.

Сущее. И змии стояше пред женою хотящею родити, да егда родит чадо ея снесть. Толк. Диавола менит противу церкви стояща обновляемыя крещением. хотяща снести, паче же церковь. яко главу ея сущу. и яже суща в верных своя творяща. темже и к Савлу глаголаше, что мя гониши;

Сущее. И роди мужеск пол иже имать упасти вся языки жезлом железным. Толк. Выну крещением церкви Христа раждает. иже имать упасти вся языки верою, мужеск пол церковныи сын, людие держащеся крепко от похоти.

 

[В печатном толковом, зач. 33].

Жена облечена в солнце есть церковь. Ниже: Луна же образне мню веру, очищаемых и свобождаемых тля банею. Ниже: Яко луною знаменует крещение.

 

[Той же, зач. 34].

От кого избеже разве от змия да родит умныи сион мужеска полу.

 

Зерцало богословие. глава, 26.

И таковых всех в болезни Христова церковь породи, но и ныне родит и родити будут даже до скончания века. ибо родити речеся се же знаменает непределное или некончаемое.

 

Ефрем слово, 105. о антихристе. [лист, 299].

Щит веры восприимем вси, и почерпем с любовию от Божия источника упование глаголю возлюбленнии, Троицу. единосущну сущу, источник источающу жизни. аще бо оградится тацем оружием наша душа, то попран будут змии посреде.

 

Книга Григория Богослова, от слова 2. на крещение Господне. стих, 16. [От толк.].

Предложи щит веры, еже есть крещение, его же обнажает тя враг не попусти его прияти, да тя яко безоружна победит;

 

Беседы апостольския, послан. к фесалон., глава, 3.

Слыши Христа глаголюща ко учеником. шедше научите вся языки крестяще их во имя Отца и Сына и Святаго Духа. и се аз с вами есмь во вся дни до скончания века. Не точию ко оным сия рекошася, но и к нам, яко не оным точию обещася, явлено есть от еже рещи до скончания, но и с шествующими по стопам оных;

 

Яко святое крещение весь кал греховныи отмывает, и во Христа облекает. глава, 11.

 

Кормчая правило, 12. иже во Анкире собор. [лист, 45].

Преже святаго крещения пожер идолом, неповинен по крещении. Толкование. Понеже святое крещение, весь кал греховныи отмывает. по достоянию, и аще кто прежде крщения пожер идолом, по крещении несть повинен, и в священническии чин да приидет. аще житие непорочено обрящется.

 

Катихисис болшеи, глава, 60.

Вопрос. Кая нам потреба святаго крещения. Ответ. Сия потреба, да егда человек грешен будет, не могии покаянием грехов своих избавитися. благодатию Христовою во крещении очистився будет христианин, и сын Божии, дарованием и сыновлением образ Христов, и самого того Сына Божия в себе имеяи. якоже святыи апостол Павел глаголет, елицы во Христа крестистеся во Христа облекостеся. И како сие бывает. Сице, елма убо вси раждаемся в первороднем гресе его же имамы от прародителей наших. сей же грех с прочими грехами в крещении прощен бывает, дается нам тогда всецелая благодать Божия, оправдающая ны и сице бываем чада Божия, и наследницы царства небеснаго.

 

Псалтырь тол., псалом, 28. Василии Великии.

Сущее. Господь потоп наведет. Толкован. Потоп воды есть потопления погубления все подлежащее: и очищая все прежде оскверненое. крещения убо благодать потопом именует, яко омывает от грехов душю очищает ветхаго человека готову быти в жилищи Божии Духом.

 

Беседы апостольския. послан. к кор., глава, 15. зач. 161. [лист, 1063].

Крещеннаго же душю не ктому, но самых солнечных лучь светлейшу. и якова же изначала рождена бе, наипаче же и оная много лучшая. Духа бо наслаждается иже отвсюду раждизающаго ю, и святыню протязающаго, и аки железо или злато твориши. такожде и Дух Святыи и якоже в горниле в крещении преливаяи ю, и снедаяи согрешения, злата всякого чиста чистейши уготовляет ю блистати, и телес воскресение достоверно быти, и отсюду паки тебе показует;

 

Апокалипсис, зач. 67. стих, 13.

Имъже умное море [святаго] крещения очищающее мир от грехов;

 

Катихисис болшеи, глава, 15.

Вопрос. Что есть духовное воскресение; Ответ. Духовное воскресение есть, еже порождение души крещением, и востанием от грехов.

 

Кормчая, Карфагенскаго собора. правило, 111. лист, 161 на об.

Иже глаголет, яко младенцы крещаемии, не имут ничтоже от адамскаго греха, и не глаголет крещением быти оставлению грехов да будет проклят. единаго бо ради человека грех в весь мир вниде, и греха ради смерть;

 

Книга аввы Дорофея. слово, 1. лист, 16 на об.

Всякии грех прощает святое крещение, и истребляет;

 

Яко святым крещением, не точию прежния грехи оставляются, но и впредь нашим согрешением дается помощь на возбранение онех. глава, 12.

 

Кормчая Карфагенскаго собора. правило, 112. [лист, 161 на об.].

Иже глаголет, яко благодать Божия, юже приемлем в крещении, токмо прежним грехом дает прощение потом же не дает нам помощи на возбранение греха, да будет проклят.

Правило, 113. Иже глаголет, яко благодать Божия на се токмо помогает нам, еже ведети, что подобает творити нам, и от чесого уклонятися. не дает же силы, яко любити нам, еже познахом доброе и творити е, да будет проклят.

Правило, 114. Иже проповедает яко кроме благодати Божия, можем творити заповеди его но с трудом, да будет проклят. без мене бо рече Господь, не можете творити ничтоже.

Выше в толк. Или паки мудрствует некто, яко крещение первым убо грехом дает отпущение, помощи же не дает к тому несогрешати, но токмо от нашего потщания се исправляется. аще ли убо кто се приемлет, и благодать Божию не славит, укрепляющую нас на творение заповедей; учит же кроме благодати Божии, исправити заповеди его можем, обаче с трудом, да будет проклят. рече бо Господь, яко без мене не можете творити ничтоже.

 

Псалтырь толк., Василия Вел. в тол. на псалом, 28.

Не приближаются греси приемшему крещение, и отпущение грехов воды ради и Духа, сродное же сему и во пророчестве Михиине обретается, глаголет бо яко хощет милости и обрящет и помилует нас, и погрузит грехи наша и ввержены будут во глубины морския.

Псалом, 24. Сущее. Потопи Господи раздели языки их. Толк. Потопи бо бесы в крещении, языки им уреза, да к тому не лают на человека и церковь.

 

Минея чет., в житии преподобномуч. Евдокии, мар., 1 день.

Да прежде всего, приимеши знамение веры, крещение святое, еже тя соблюдет невреждена во вся дни твоя.

 

Благовестн. от Иоанна. зач., 54. в толк., лист, 252.

Ибо вера грехи решит крещения ради.

 

Беседы апостольския, лист, 166.

Не точию бо сие крещение может еже прежняя погубити прегрешения, но и к будущим утвержает;

 

О реченнем от апостола, еже во всяком языце бояися Бога и делаяи правду приятен есть. глава, 13.

 

[Книга Иосифа Волоцкаго. от слова, 5-го].

Тако бо блаженнии апостоли пишут. верховныи убо апостол Петр глаголет. поистинне разумею яко несть лицемер Бог. Но во всяком языце бояися его и творяи правду приятен есть. Ниже. И аще тако есть. Како бо божественныи Петр глаголет, несть убо о ином ни о едином же спасения, и несть иного имене под небесем о немже подобает спастися нам о Господе нашем Iсус Христе, яко о сем вси пророцы свидетельствуют оставление грехом прияти именем его. всякому верующему в него. И паки глаголет. яко во всяком языце бояися Бога и творяи правду приятен ему есть, како сия убо глаголы умирятся, и согласны будут. преже убо рече несть иного имени под небесем, о немже подобает нам спастися; Ныне же глаголет. яко во всяком языце бояися Бога и творяи правду приятен ему есть, аще во всяком языце бояися Бога приятен ему есть. то и почто Корнилия не остави ни сущих с ним пребывати во своей вере, иже бяше бояися Бога и творяи правду паче всех, повеле им креститися во имя Iсус Христово. Аще и бояися Бога и творяи правду приятен ему был бы. То почто рече Господь наш Iсус Христос ко священым своим учеником. шедше в весь мир проповедите евангелие во всей твари, крестяще их во имя Отца и Сына и Святаго Духа, и учаще блюсти вся елика заповедах вам. иже веру имет и крестится спасен будет, а иже не имет веру осужден будет. Виждь что глаголет, иже имет веру и крестится, спасен будет. и не точию крестите, но и учите их блюсти вся елика заповедах вам. И паки глаголет. аще кто не родится от воды и Духа не может внити в царство небесное. То како во всяком языце бояися Бога приятен ему есть. во инех бо языцех несть порождения от воды и Духа. во июдеох обрезание, во еллинех же идолом обретение. То како во всяком языце бояися Бога приятен Богови есть. А еже глаголет великии апостол Петр, яко во всяком языце бояися Бога и делаяи правду приятен ему есть. и се апостол рече о сущих прежде воплощения Христова и распятия его и воскресения боящихся Бога и делающих правду. или во июдеох, или во языцех непокланяющихся идолом. но истинному Богу. якоже и Корнилии и подобни ему. по воплощении же Христове, и по распятии его, и по воскресении. несть иного имене под небесем, о нем подобает спастися нам, точию о Господе нашем Iсус Христе. якоже глаголет Господь во святем евангелии, аще кто не родится. от воды и Духа не может спастися, аще и всех праведнейшии будет. се показа и Петр апостол праведна суща Корнилия и Богом свидетельствованна крести, якоже преже речеся. о сущих преже воплощения и распятия и воскресения Христова рекл есть и понеже июдеи возбраняху апостолом крестити необрезаных. Петр же увидев от явления яже на небесе плащаницы оныя. глаголаше яко всяк бояися Бога и творяи правду, приятен ему есть. преже воплощения Христова страха ради Божия и правды ради. ныне же всяк бояися Бога и творяи правду приятен ему есть, на крещение;

 

Златоуст, в толковании, на деяние святых апостол. на зач. 27-е.

Темже яве есть яко язычник аще и всяк праведник будет, никако же не приимет дар Духа божественнаго, аще не причастник будет истинныя веры. сего ради в начале проповедания приемлюще, и крещение дар Святаго Духа. в познание дарованию благодати. языки глаголаху и пророчествоваху, егда же вера простреся, несть потреба знамениям но в познание убо, якоже суть Божия бывают. но ко спасению и благодаянию человеком.

 

Минея писмен. в десть. октяб. месяца. А в ней отечник монастыря Соловец.

Душевное убо составление есть еже знати Творца. еже бо не знати Бога смерть есть души. тем же убо крестися, некрестивыися не освятится, без света бо око не может своя сущая зрети. тако и душа непросвещенна не может Божия видения прияти.

 

Афанасия Вел., ко Антиоху князю, 104.

Вопрос. О некрещеных о июдеох и еллинох. И что убо должни есмы глаголати, о некрещенных июдеох и еллинех многажды добродетели делающих апостолу бо глаголющу, яко слава и честь и мир всякому делающему благое, июдеови же преже и еллину. Господу же глаголющу, аминь глаголю вам, аще кто не родится водою и Духом не внидет в царство небесное.

Ответ. А во всяком языце воистинне бояися Бога послушает закона, и писания Божия верует словеси Божия, се есть Сыну Божию. слава и честь и мир, рече апостол, имети делающему благое, июдеови же преже и еллину, не в будущем веце но в нынешнем. в будущем веце некрещении истязани будут, како той же рече апостол, не льститеся, ни блудники, ни прелюбодеицы, ни пияницы ни хищницы царствия Божия не наследят. аще хулницы человеки царствия Божия не наследят, колми паче иже веру Христову, и Бога хулящии, о них же паки глаголет. яко врази креста Христова, ихже конец пагуба. но убо елико их делают некая дела блага не крестящиися зде восприимут мзду свою еже есть богатьство и благоденство, и славу и радость, и прочая житейская благиня и красота. сего и богатому сице глагола Господь, помяни яко восприял еси благая твоя в животе твоем. не рече яко приял еси, но восприял еси благая твоя рекше мзду свою.

 

Иосиф Волок., слово, 5.

Подобно же тому глаголет великии апостол Павел, слава же и честь и мир всякому делающему благое июдеови же и еллину. и сия тако глаголет апостол о сущих прежде воплощения Христова, и делающих благая дела, ныне же по воплощении Христове не тако. но слава и честь и мир. июдеови же и еллину и всякому человеку делающему благое и верующему Христови, и печать крещения его приемшему. якоже глаголет тойже блаженныи Павел, елицы рече во Христа креститеся во Христа облекостеся.

 

Кормчая, глава, 69. Анастасия Синаитскаго.

Вопрос о июдеох, и еллинех. Апостолу глаголющу [рим., 81], яко слава и честь, и мир всякому делающему благое, июдеови же первое и еллину. Господу же паки глаголющу [Иоан. 50], аминь глаголю вам, аще кто не родится водою и Духом, не внидет в царство небесное что убо должни есмы глаголати о некрещенных, иудеох и еллинех, многажды добродетели делающих.

Ответ. И во всяком языце поистинне бояися Бога, послушает закона и писания Божия. послушая иже писания Божия, верует словеси Божию; сеже есть Сыну Божию, слава же и мир, рече апостол имети делающему благое иудеови же и еллину не в будущем веце. аще ли не в будущем веце славимом им, и мир имущим то убо в нынешнем веце. аще едини в будущем веце, невернии и некрещеннии истязани будут, како той же апостол рече [1 кор., 134], не льститеся, ни блудницы, ни прелюбодеи, ни в себе согрешающии, ни хулницы, ни пияницы, ни хищницы, царствия Божия не наследят: да аще хулницы, иже человек хулят, отвержени суть царствия Божия, колми паче, иже веру Христову и Бога хуляще. слово бо крестное погибающим убо уродство есть. о них же паки глаголет, яко враги креста Христова, их же конец пагуба, не елико ли убо их не делают некака дела блага, Христа, иже крест хулят. сынове пагубы суть, в царство не входят. мзду же свою восприемлют в сем веце. сеже есть богатьство благожизненное, многочадство, благоденство, славу, радость, и прочая житейская благая, и красоты судятъбося от праведных мерил Божиих, и возмеряются нам деемая от него благая, и приносимая ему паки от нас. и сего ради глаголет Бог к богатому оному. иже в Лазареве притчи, помяни яко восприял еси благая твоя в животе своем. такоже и Лазарь злая, что же есть восприял еси. сие есть, исполнил еси благая дела своя. яже еси соделал, и восприял еси мзду их богатьства ради и багряницы и червленицы ради, и повседневнаго веселия ради; такожде и Лазарь имяше некая зла дела, и недуга ради и нищеты и страсти восприя зде мучение их. яко богатыи отъиде тамо доконца осужден, Лазарь же доконца праведен. того бо ради не глаголет приял еси, но восприял еси благая своя, сеже есть исполнил еси, яже тех ради и мзда. якоже вера без дел мертва есть, тако и дела без веры мертва суть.

 

Беседы апостольския, лист, 844.

Всякому мужу глава Христос есть. убо ли и еллину, никакоже;

 

Яко не подобает избирати достоинства в крестителех, аще и житие имеет кто укорное. точию да не будет чюждь православныя веры. глава, 14.

 

[Книга Григория Богослова, в слове на святое Просвещение].

Тако тебе да будет всяк креститель, аще и житие претягнет, но крещения сила равна, и совершаяи тя всяк единак, иже тоюжде верою воображен.

 

Того же, слово, 11. о святом крещении, стих, 25.

Толк. И яко паче мурин он каженик, в деяниях апостол пишет, научен от Филиппа, прият сердцем веру, не отлагаше печати Духа, от радости веща се вода что возбраняет ми креститися, тако и ты сотвори; не рцы епископ да мя крестит, или иеросалимлянин, или благороден и неженат, да не благородство мое укорено будет крестителем, и осквернюся в крещении от недостойнаго. не пытай о житии крестителеве от Саула в первом царствии речено, человек зрит в лице Бог же в сердце. не искушай достоинства крестителев.

 

Беседы апостольския [лист, 531].

Велие паки глаголю крещение, и кроме крещения невозможно царствия получити; но может тя и не зело доблии муж совершити, а еже благовестити много труда требует.

 

Ис книги Григория Богослова, слово, 11. стих, 25.

Ты же не сомнися отнюд, к хотящему тя духовне породити крещением. точию да будет от сочетаных церкве, и присвоенных. а не явлено обличеных и отгнаных, и от церкве отчюжденых.

 

О приходящих от еретик к соборней апостольстей церкви, како достоит их приимати. и яко на три чины еретицы разделяются. на еретики на раскольники и на подцерковники. яко от еретика крещение не приятно. от расколника же и подцерковника приято. зри. глава, 15.

 

Кормчая, глава, 21. лист, 224. Правило, 1-е. Вас. Вел.

Еретик есть, иже верою чюждь. а иже по некоему незнаему вопрошению, той есть раскольник. собирающии же сих, или о инех непокориви. сии суть подцерковницы, иже отлучившеся сами от соборныя церкве. и иную создавше, особно собираются. а еже от еретика крещение, неприятно. от раскольника, и от подцерковника. приятно.

Толкование. Еретицы убо глаголелемии пепузини, иже началника их Монтана утешителем именуют. тем же иже в того крещающиися, не крещени суть. наватиан, рекше чистых, и воде предстоящих. и воздержащихся крещение, аще и неприятно есть, понеже оставляет сих Дух Святыи но смотрения ради да будет приятно. Неприобщающиися же к соборнеи церкви, на три части разделяются. на еретики, на раскольники, и на подцерковники. еретицы убо суть, иже Божии веры отнюд учюждившеся, якоже се пепузини, и манихеи, и уалентиане, и маркионити. и инии мнози. пепузини убо Монтана Утешителя нарицают, и совокупльшияся ему блудом, две жене Прискилу, и Максимилу, якоже пророчицы имеют. браки же без разсуждения разрушают, пасху развращают, три состава единосущнаго Божества, в едино смещают лице, и другая некая нечестивая таковая мудрствуют. манихеи же два начала вводят, противна и равномощна, и глаголют яко едино начало свет сотвори, другое же тму: и солнце и луну боги творят, и диавола именуют всем вещественым властеля. брачное законоположение бесовско нарицают. и требующим подавание, беззаконие глаголют; и Господа нашего Iсуса Христа, ничтоже человеческаго приимша, егда воплотися, рекше не прият плоти нашея от святыя Девы глаголют. и крест, и смерть, и воскресение, яко не истинною бывше глаголют, и тмами ина нечестива повелевают, уалентиане же телесем отрицают воскресение, и ветхии завет отмещут. пророки же почитающе, и на свою ересь тех пророчество толкующе, баснословия некая слагают. и Христа с небес снесша плоть глаголют, яко сквозе трубу прошедша святую Девицу; и ина некая такова хульная блядут. маркионити же суть. месалиане, иже и молебницы сказуются, иже многоглаватую и многоименитую ересь имеют. Сии убо вси от ереси своея обращающеся, и к непорочней вере приступльше крещаются: понеже отвержено есть нами крещение их; раскольницы же суть, иже от церкве себе оставльше. яко же и наватиане глаголемии чистии, и водопредстатели, воздержницы: тии бо аще обратятся к соборней церкви, и ереси их прокленут, яко крещени приятни бывают, токмо святым миром помазуются. подцерковницы же суть иже осуждени бывше о некоих гресех, епископи, или презвитери, и отставлени бывше от службы. и не повинувшеся правилом, но себе господьски отмстивше. и епископи нарицаются и служат и церковь создавше другую, и в своей воли быти другия указаша, и соборную оставити церковь. тии убо преложше себе, и покаянием достойно, и обращением удобрившеся, совокупляются паки. яко едино тело к соборней церкви;

 

Никона Черной горы. слово, 63. от перваго правила, Василия Великаго.

Оно бо судиша древнии приимати крещение еже никакоже от веры исходящее, темже ова убо ереси именоваша, ова же раздоры, ова же сборца. ереси убо, иже всячески отверженыя и по вере очюжденыя. раздоры же, иже вин ради неких церковных и възыскании ненарочитых друг на друга негодовавше. сборца же, собрания от непокорных презвитер или епископ. и ненаказанных люди бывающая якова. Аще кто в согрешении истязан быв, и удержан бысть от службы. и не подклонися правилом, но себе оправди наместническо, и службу, и отъидоша с ним нецыи, оставльше соборную церковь. съборец таково есть. раздор же, еже о покаянии несогласне имети к сущим от церкви, ереси же, якова же есть манихейская, иуалендииская, и маркионитян, и тех самех пепузиан. абие бо о самой еже к Богу вере есть разлитие. изволися убо древним еретическое убо отнюд отметати, раздорных яко и еще от церкве сущих приимати. сущих же в сборцах покаянием достойным и обращением удобрившеся, совокупляти паки к церкви. яко и множицею сущих в степени соотшедших, с непокорными внегда раскаются, в той же приимати чин.

 

От того же правила.

Чистии и тии от раздорных суть, обаче но изволися древним иже о Киприане глаголю и Фирмиане нашем, единем судом облагати чистыя и воздержники, и воде предстателя. занеже убо начало раздорам бысть, а иже от церкви отступльшии, не ктому имеша благодать Святаго Духа в себе. оскуде бо подание внегда пресещися последованию. первии убо отступльшеи от отец имеша рукоположение, и возложением рук их имяху дарование духовное, отделившежеся простии людие бывше. ниже крещати ни рукополагати имеша область, ктому немогуще благодать Святаго Духа инем подати от нея же тии отпадоша. тем яко от простых людии иже от них крещаемых повелеша приходящим к церкви, истинным крещением церковным очищатися, елма же изволися неким всяко иже во Асии, смотрения ради многих прияти им крещение да будет приятно. воздержных же злодеяние разумети нам достоит. яко да неприятныи бо тех сотворят церкви. начаша прочее своим предваряти крещением. тем же и обычай свой развратиша. мню убо понеже несть о них яве сказано нам, лепо быти отметати тех крещение. аще и кто есть от них прием, приходяща паки к церкви крещати. аще убо хощет отнюд смотрению забавление быти сие, паки обычаем прииму, и устроившим яже о нас отцем последуя, боюжеся да не како яко хотяща тех ленивеиша о еже крещати сотворити. возбраним спасающимся, ради истязания лютости, аще ли они хранят наше крещение, се нас да умолит. небо воздаяти тем благодать повинни есмы, но работати опаству правилному. со всяцем же словом, да вообразится иже о крещении онех приходящим, помазуемо быти яве яко с верными и тако приступити к тайнам. вем же яко братия, иже о Изе и Саторнине от онаго сущих чина, прияхом в седалище епископское, яко иже чину онех совокупленных, не ктому можем рассуждати от церкве: рекше правило некое, еже к тебе изложивше епископскаго ради приятия;

 

Матфей Иеросалим. состав, А. глава, 2. Василия Великаго, правило, 1-е.

Но убо како иже от ереси обращающихся и соборней приступающих церкви, божественнии отцы приимати повелеша. уже досмотримо будет на не у о сем яко во образе же разделения отделяющися праваго мудрования роднейшая первое да рекутся именования яже прелестное и многообразное чюждих предании коемуждо убо в достои, овех бо убо ереси именоваша. в первом правиле рече Великии Василии. овех же расколники, овех же чрезсоборники. ереси убо всячески отверженных, и по самой очюжденых вере. рекше манихеи уалентиане. маркионите пепузяне иже онем приискренних; расколения же, рекше расцепления, иже вин ради неких церковных и искании целебных иже между собою распревшеся. и паче еже разньствовати о образе покаяния к соборней церкви. чрезсобория же чрезсобирания рекше, аще кии епископ или презвитер во гресех ят быв удержан будет служения. и правилом повинутися не хотя. себе предании ущедрив и служение. и с сим отступиша иже не покаявся, недугующеи от людей соборную оставльше церковь.

 

Того же состав, А. глава, 2.

Чистым же убо от расколник, и всем сущим, и воздержником, и водным предстателем, годе бысть сущим о Киприане, и Фирмилиане нашем, воляся покрещеватися. в Халкидоне бо ему же епископ бе великии Киприан. собор отец древнейшии всех собрася. имъже угодно бысть общим судом еретиком и расколником покрещеватися. сматряху бо сице, рекше слагаху, аще и не о вере погрешают, но понеже убо глава телеси церковнаго Христос по божественному апостолу, от него же уди вси живятся, и духовныи возраст приемлют. сии от составов удов телесных отторгшася, не ктому пребывающую в них имут благодать, Святаго Духа. еже убо не имут сами. како инем преподадут; Но обаче рече великии сей отец. понеже неким сущим во Асии, годе бысть строя ради чистых крещение приимати да будет приятно.

 

Севаст Арменопуль сеч. 5, о людинех, надпис., 1. 1-е правило Василия Великаго.

Неприятно еретик крещение, приятно же расколник и присонмищник.

 

Потребник болшей, лист. 567. Правило Великаго Василия, 1-е. да 47-е. правило, 1-е.

Взыскание убо от чистых, и речено есть первее, и добре воспомянул еси, яко подобает обычаю возследовати всякия страны, зане вознести различно от крещенных приимших от тех тогда. Ниже. Изволиша древле приемлюще крещение еже ничим же веры преступающее тем убо ереси нарекоша отверженыя отнюд. и по той вере отчюждены еже манихеяны и уалентианы и маркианы.

Ниже: лист, 574. по правилу 1-му. Вел. Вас.

И римляне убо и вси еретики, иныя от всех различных еретических вер. такоже по месалианскому мудрованию, и василианскому, человеком грехи отпущают без опитемей, и не разсмотряя плодов покаяния, и такоже скоро от грех мнятся очищати, и равну ересь в себе с месалианы и василианы содержат. того ради убо подобает и римлян, и всех от различных еретических вер, приходящих, к нашей православнеи вере греческаго закона, совершено крестити, понеже убо еретическое крещение, несть крещение, но паче осквернение.

 

Тойже лист, 581, на об. Указание от правил, обличително на ереси латынския, Иоанна митрополита рускаго, ко архиепископу римскому, о опресноцех.

Да о тех же убо ересех, во изъявлении своем свидетельствует и Тимофей великия церкве Констянтина града. яко приходящих от ереси маркиан, и маркионитян, и от воздержник, рекше вод предстателей, валентиан, и василидиан, николатиан, мантанян, и пепузан, манихеян, и евномиан, павликиан, и фотиян, савелиан, и маркилиан, и внонян, соторниян, и аппелиян, и слесаит, симонян, и менандреан, и мелхиседекиан, иже и непрекосницы нарицаются. сицех всех еретических вер приходящих, к православней вере нашеи христианстей греческаго закона, указует их по правилом же святых отец совершено крестити. А которых убо еретиков ереси имена он зде выписал, и тех всех еретиков ереси в латынникох есть суть. и за то их латыников, и всех различных еретических вер, приходящих к православнеи вере нашеи христианскои, подобает совершено крестити святым крещением;

 

Показание правилное о трех погружении еретических. яко нецыи еретицы, и в три погружения крещаху, обаче крещение их от многих святых отец не приемлется. и крестити паки второе повелевается. глава, 16.

 

Книга Иосифа Волоцкаго, слово, 15. о наватианех и прочих свидетелствует.

Суть же и друзии еретицы, аще и зле мудрствуют, но не тако якоже первии суть наватиане, и донатиане, и четыре надесятницы, и средницы, и воздержницы, и инии таковии. сии убо исповедают Святую Троицу. и Господа нашего Iсуса Христа истинным Богом нарицают, и плотьскому смотрению веруют.

 

Матфеи канонист в составе 1-м, во глав. 28, о наватианех.

Нават презвитер сыи стараго Рима, глаголемых чистых ересь начат, раскольник сыи истее, а не еретик. не бо в чесом от правил предании с верными разньствоваше. но иже в гонении подклонившимся, и пожершим отрицаше покаяние, двоеженцем же не приобщашеся. ихже ради, аще и не о вере погрешаше но за немилосердие его и братоненавидение. собору бывшу в Риме при Корнилии папе, Декию царствующу, извержен бысть и проклят, якоже Памфилийскии Евсевии, исповедует.

 

Того же состав тойже, глава, 2.

Арианы бо и македонианы, и саватианы, глаголющих себе чистых, и левыя и четыренадесятники, иже и средники, и аполинарианы. понеже точию нам божественым совершаются крещением.

 

Ис книги Кормчеи, писмен. Тимофея презвитера.

Нават презвитер в Римския церкве, понеже убо во время гонения, ключися неким верным нетерпящим муки прегрешати. посем гонению минувшу, и согрешившим со слезами молящимся пастырем церковным, подати им время покаяния. и брань получити повеле. разгневася на ты неприят. но против глаголаше без студа. Ниже. Того же Навата пребывша в гордости и святии возвышение отлучиша от церкве.

 

Книга Максима Грека, глава, 68.

Слыши внятно, и разумеи прямо. еретики иже от Навата презвитера бывша Римскаго, наватиане нарицаемии. ниже о крещении, ниже о таинстве православныя веры. ниже о ином коем законе церковном беззаконноваху. но зане точию дарованное от человеколюбца Спаса Христа грешником покаяние отрицаху, и не приимаху на покаяние обращающихся иже в гонении Христа отвергошася. за то едино отриновени быша от всякаго собора православных, и прокляти быша. Зри еретиков ихже выше явихом. яко мнози святии крещение от них не приемлют, и второе крестити повелевают. ихже зде на среду представляем.

 

Кормчая, лист, 239. правило, 47. Василия Великаго.

Воздержники и вретищники и апотактиты да крестиши, аще бо и глаголют, яко во Отца и Сына и Святаго Духа крестихомся, но понеже злу творца Бога нарицающе, хулят по Маркионову учению, некрещени же неприятни. Толкование. В первом убо своем правиле по смотрению словесе воздержник и наватиан глаголемых чистых, великии сей светильник церковныи прият крещение, и повеле токмо святым миром помазовати их, егда приходят к соборнеи церкве вере, и ереси своя прокленут. Зде же исправляя еже по смотрению, онамо прият, повелевает воздержники, и прочия крестити. понеже ересь их, отрасль есть маркионитския ереси. ненавидят бо сии, якоже они брака, и отвращаются вина, и тварь Божию скверну быти глаголют.

 

Преподобныи Никон Черног., на правило, 47, Василия Вел., слово, 63.

Воздержницы и вретищницы, ипатактите, тому же слову подлежат, ему же и наватиане. яко о оных убо правило изложено бысть. аще и различне а яже о сих умолчана быша. мы же единем словом покрещеваем таковыя ащели от вас отречено бысть еже покрещевати, якоже и от римлян смотрения ради некоего отметается крещение их, но наше слово крепость да имать. яко понеже маркионитская отрасль тех ересь. гнушающихся брака. и отвращающихся вина, и создание Божие осквернено быти глаголют, не приемлем их в церковь, аще не крестятся в наше крещение. да не глаголют убо яко во имя Отца и Сына и Святаго Духа крестихомся, зане злу творца творят Бога подобне Маркиону и прочим ересем. темже аще угодно будет се, подобает множаишим епископом вкупе быти. и тако правило изложити. яко да и сотворшему безбедно будет, и отвещаю и достойно верное имать еже от таковых отвещати.

 

Севаст Арменополь, на правило, 47. Василия Великаго. [сеч. 5 о людинех надпис., 1].

Наватиане, аще многих епископов изволится суду да воскрещеваются.

 

В книзе Григория Назианзина, на лист. 40-м. страница, 1. Афанасия архиепископа Александриискаго, на арианы, слово, 3-е.

Сии же бедствуют прочее, и о самой полности тайны, глаголю же крещении. аще бо во имя Отца и Сына и Святаго Духа дается совершение, не глаголют же Отца истинаго, заеже отметатися из него подобнаго существа отметаютжеся истиннаго Сына. и иного себе от несущих зданнаго возтворяюще именуют. како не всеконечно тщее и неполезное от них даемое есть; притворение бо имущее. истину же ни едину имущее к благочестию помощь. небо во Отца и Сына дают ариане, но в зиждителя, в тварь и творца. яко ино есть здание кроме Сына. тако ино будет от истинны, мнимое ими даятися, аще и имя Отца и Сына, за написанное, именовати притворяются. не бо глаголя просто Господи, сей дает, но со именем и веру имеяи праву, сего убо ради и Спас, не просто заповеда крещати, но первее рече научите: таже крестите во имя Отца и Сына, и Святаго Духа. да от учения вера права будет, и с верою крещения совершение приложится. многия убо и иныя ереси, глаголющия точию имена не мудрствующиясяже право, якоже речеся. ниже веру здравствующую имущыя. неполезну имут и от них даемую воду, скудствующую благочестием. якоже и кропящемуся от них паче сквернитися в нечестии, неже избавлятися. тако еллини убо Бога устами глаголюще, безбожия имут порок. яко сущно сущнаго и истиннаго Бога. не знают Отца Господа нашего Iсуса Христа. тако манихеи и фруги и Самосатовы ученицы имена глаголюще ничтоже мнее еретицы. тако поряду прочее, и Ариево мудрствующе. аще и чтут написаная, и глаголют имена. тии ругаются приемлющим от них. вящьше иных еретик нечестивейшии суще.

 

Книга Григория Богослова, слова, 25. ко арианом.

Не терплю гласом научену быти, и научитися неверну, исповедати истину, быти со лжею яко совершаем снити, и возъити несовершеннейшии, яко поживущь креститися водою, якоже болезньми въмирающим породом истечну приемлющим рождения смерть, что твориши блаженна всем и страсна, новопросвещна, и непросвещна, и божественна.

 

Той же на арианов, 25 слово.

Что глаголет погружающии или возгружающии, есть ли быти духовному без Духа, причащаютлися нечестивии Духу, чествует ли воздаяние, и единорабное крещаюся несть. но токмо многа речеши, не солгу ти Отче безначалне, не солгу ти, единородныи Слове, не солгу ти Святыи Душе, вем кому исповедахся. кому отрекохся и кому счинихся, не приемлю вернаго гласом научину быти, и научитися неверну исповедати истину, и быти со лжею.

 

Гранограф болшеи, глава, 162. [а во иных. глава, 122].

Первыи вселенскии собор в Никии на Ария еретика. Ниже. Констянтин великии видев церковь смущаему Ариевым учением, и о сем болезнуя душею, и посла повсюду носилы, и коньми, и колесницами людскими собра. святыя отцы в Никию град. леты от создания мира. 5827, в 12, лето царства своего. Ниже. Спиридон епископ Тримифиискии иже и чюдотворив в соборе, прящагося по Арии философа ко благочестию обрати. изрек ему православныя догматы, и повеле последовати по себе, и крести его. и рече философ другом своим, иже хощет да последовати со мною старцу сему в нем же глагола Бог.

 

Минея четия. февраля в 26 день от жития святаго Порфирия епископа Газскаго.

Егда же приближишася ко острову Родийскому святии отцы Иоанн и Порфирии, молиша Навклира да пристанет к брегу, яко да шедше целуют преподобнаго Прокопия отшелника. Навклир же не хотяше сказуя ветр быти неудобен. и весма непослуша святителей Христовых, бе бо вътайне арианин, и ненавидяше правоверных тех епископов. и егда мину той остров, абие в море бысть буря и волнение, и бяху вси в страсе велицем боящеся потопления, бысть же то весь день и всю нощь. восходящей же заре утренней, святыи Порфирии воздремася мало, и виде преподобнаго Прокопия глаголюща к нему. Навклира увещевайте отврещися ереси арианския, и прокляти ю, и огласите его ко крещению, абие волнение то страшное престанет. воспрянув же святыи Порфирии сказа блаженному Иоанну митрополиту, и прочим с ним бывшим. и призвавше Навклира реша ему, аще хощеши спасену быти от потопления кораблю твоему, и всем нам, а наипаче души твоей избавитися от вечныя погибели, то отвержися зловерия твоего ереси арианския, и приобщися кафоличестеи вере. Навклир же удивися, яко святии епископи уведаша тайну еяже никтоже ведяше, и рече к ним. понеже откры вам Бог тайная сердца моего, убо отвергаюся Ариева мудрования, и верую якоже вы веруете. утвердите же вы лучше во святеи вере, тако Навклиру глаголавшу, абие преста буря, и бысть тишина в море. а святии поучивше Навклира от божественнаго писания, и утвердивше в правоверии, огласиша его крестиша.

 

Святаго Григория Богословца толк. на символ веры. [по концы толк. псалтырь старописм. Афан. толк.].

Сущее. Исповедаю едино крещение во оставление грехов. Толкование. Едино убо крещение зовется, еже веровати несовратне в Троицу единосущну. яже дастъся нам от юности нашея, ина суть крещения но различна, яже суть нам на вред души. техже нам яко нечто нечисто гнушатися. яже суть арианская, аполинарианская, и та нам отметна имети, да не внидет гнилость в тело наше. яже губит душю с телом.

 

Кормчая, глава, 77. лист 635, на об. Тимофея презвит. о несторианех и евтихианех и о прочих.

И несторианы же и евтихианы и севирианы. и иже от подобных им ересей, подобает творити записания, и проклинати свою ересь, и Нестория и Евтихия, и Диоскора, и прочия началники таковым ересем иже тех мудрствующия. и вся яже воспомянутыя ереси; и тако восприимати им святое крещение. Ниже, лист, 636. А иже с Киприаном собор повелевает, всякаго еретика крестити. и хотящим от ереси обратитися, десять дней или пятьнадесять поститися, и упражнятися на молитву, вечер и утро, и учити псалмы повелевает.

 

Ис книги Матфея Иеросалимскаго, во объятии всех вин, о иже в Кархидоне соборе;

Всех убо вселенских же и поместных соборов первейшии написуется, иже в Кархидоне собор. началника убо имуще великаго Киприана в епископех множашеся к четырем осмьдесять. иже убо едино токмо изнесоша, яко во образ правила отречение. иже весма от всякаго еретика и расколника крестившихся, и к соборнеи приходящих церкви, паки крещати.

 

Ис книги преподобнаго Никона Черныя горы. от слова, 63, толк. другаго.

И иже с Киприаном собор повелевает, всякаго еретика крещати. и хотящии от ереси обратитися. десять дней, или пятнадесять поститися, и упражнятися на молитву утро и вечер, и учити псалмы повелевает. и сия убо вси тако завещавают.

 

Потребник болшеи, лист 561. во изложении патриарха Филарета.

Аз же по малей силе моей, елико благодать Святаго Духа настави мя, вседушно попекохся о сем. и правила смотрях со вниманием, и истязовах со испытанием. того ради да уведят вси людие всея российския земли, яко вси еретики различных еретических вер, не имут праваго святаго крещения, еже водою и Духом Святым. того ради от всех еретических вер различных приходящих к православию христианскаго закона, подобает совершенно крестити святым крещением.

Ниже: лист, 564. И от лет убо присно памятнаго, и святаго великаго князя Владимира, иже просвети всю великую Руссию святым крещением от грек прием. и даже и до днесь по лет, 7128. никтоже в нас не дерзнул творити таков соблазн еретичества, кроме Игнатия.

Ниже: лист, 565. Как и Московское государьство учинилося и от того времени и по се время того не бывало в Московском государстве, что бы еретиков латынь, и иных различных вер еретиков не крестили, кроме изверженаго из святительства Игнатия патриарха.

 

Кормчая старописм. в толк., 47-го правила Василия Вел., инаго толк.

Воздержники и вретищницы, томуже подлягут слову, емуже и наватиане, яко о тех убо аще возглашенно бысть различно, у Василия умолчано бысть. мы же убо единем словом второе крещаем таковыя;

 

Яко древле святии и прияша от некоторых еретик крещение в три погружения, обаче вин ради благословных и нужных; глава, 17.

 

[Кормчая, глава, 70, лист, 636. Тимофея презвит.].

Зрим же ныне в великих и соборных церквах, рекше патриархиах и в митрополиях и прочих, яко армены, и яковитяны, и несторианы, и прочия безглавныя и подобныя им обращающыяся в православную веру, божественным миром помазуют, а не крещают. творят же их проклинати началники их. и се вообразися ныне вин ради благословных и нужных.

 

Ответы правилныя Тимофея святейшаго архиепископа Александриискаго. [Кормчая, глава, 61. лист, 606].

Вопрос. Почто обращающыяся еретики к соборнеи церкви непокрещеваем. Ответ. Аще бы се было, небыся человек скоро обращал от ереси покрещения стыдяся, обаче и возложением руку презвитерску и молитвою. весть приходити Дух Святыи якоже свидетельствуют деяния святых апостол.

 

Правило, 1-е, Василия Вел., в толк.

Наватиан же рекше чистых и воде предстоящих и воздержащихся крещение, аще и неприятно есть, понеже оставляет сих Дух Святыи но смотрения ради да будет приятно.

 

Матфеи Иеросалим. состав, В-й. на правило 47-е. Василия Великаго.

Василии знаменает о воздержницех, еже недостояше, по Маркионову мудрствуют и создание Божие скверно быти глаголют. да не глаголют яко во имя Отца и Сына и Святаго Духа крещаются зане злым творца Бога нарицают. Ниже: Но да не опасения держащеся, ленивейших сотворим их коеже соборнеи приступити церкви. да приимемся обычая. и устроившим о них отцем последуем якоже онем мнится помазуемом быти святым миром, сице священи да причащаются.

 

От толков., 47-го. правило, Вас. Вел.

В первом убо своем правиле по смотрению словесе воздержник, и наватиан, глаголемых чистых, великии светилник церковныи прият крещение. и повеле токмо святым миром помазовати их. егда приходят к соборныя церкве вере, и ереси своя проклинают. зде же исправляя еже по смотрению, онамо прият, повелевает воздержники и прочия крестити.

 

Феодор Валсамон патриарх Антиохиискии, на 95-е правило шестаго собора.

Блазнятъбося глаголющии крещение в три погружения от еретик приятно, скверно бо паче. аще бо и приятно множицею от отец смотрения ради. си есть примирения ради, боящеся раздрания церковных, да не разлиется злоба еретическая.

 

[Полуустав, глава, 40. лист, 67].

Главизны же законны и обдержны, а не смотрителны. или отчасти. яже бо отчасти и смотрителне, некоего ради слова содеяная или глаголанная, недостоит восприимати во обдержная и законная свидетельства. сего ради яже отчасти и смотрительная, в сих несочетахом.

 

Преподобныи Никон Черногор. в слове, 2-м.

Аще не разсуждаем время, и вину и различие вещи. но яко по смотрению глаголанная или бывшая, обьятно на всяко время приемлем главою снити имам, и горняя долу будем.

 

Той же, слово, 28.

О других же отчасти смотрителне бывших, яково ко иконе исповедавшагося и Давыдово. и ина Ветхаго закона, и великаго канона. и другая, яже честное твое имяше послание да испытует владыко мой честь твоя смотрителных. развращенная сердца человеческая, не прочитающе тех толкования, но от плотьскаго мудрования, совращаются в различныя ереси, и прелести и доконца погибают.

 

Пролог декабря. в 8. в страдании святых мученик, иже во Африкии, скончавшихся от ариан.

Яко Африкиискую страну правящу в содержании Онориху по скончании отца своего Зериха арианин бы сыи верою, Ариевы ереси. а с ним тояж ереси иерей Кирил и Валиндис совещавающеся. Ниже: Сии Онориху подражающе повелеша, иже некрещающихся во арианское крещение внезапу убивати. Ниже: В старом же Риме, в таковое время, Сулинда, жена Риги содержащаго Рим, яже и та недугующа подобне во единой вере едину от градских житель, некоего от велможь жену, нудящи еже креститися оной во арианское крещение. ей же бяше имя Анфиса. И яко увещавати ю невозможе, слышащи, яко от епископа Медиоламскаго водою и Духом крещена бысть. Ниже: Разгневившижеся Сулинда и святую Анфису огнем сожже.

 

Баронии в лете Господнем, 486.

Феликс папа падших во Африце епископов, и иереов, и дияконов, иже тяжких ради мук соизволиша на новое крещение от ванъдалов ариан, паки с покаянием обращающихся приемляше. обаче епископом и иным духовным, сицевую епистолию, или добле творение, чрез послание определи. дабы никогда сана своего касалися, но отлучени от молитв верных на ином месте молитися. и при смерти аки простолюдине причащалися.

 

Минея чет., месяца июня в 9 день. от жития святаго Кирила Александриискаго.

Крещенных бо (еертицы наватиане) кафолически паки крещаху, (тожде и прочии еретицы творяху, в то время. прельщенных с собою прекрещивающе веру).

 

Из Боронии року, 258.

Крестили православных изнова еретики монтанисты и наватиане тожде чинили;

 

Яко святии отцы не еже точию, за неисправность крещения, но и за важность вины крестителевы второе крестити повелевают. глава, 18.

 

Потребник болшеи, глава, 1. лист, 565. во изложении Филарета патриарха; Ереси римския, иже прияша от мелхиседекиян и жидов и армен; [и Кирилова, лист 241, об.].

Сии изверженнии и проклятии мелхиседекиане убо и жидове и армени равну ересь в себе содержат, еже в суботу постятся. от них же кто восхощет быти в православии нашего христианскаго закона, и сих святая правила повелевают совершено крестити святым крещением; Ниже; в толковании. А римляне с мелхиседекияны, и жиды, и со армены равно такоже в суботу постятся. и сея ради вины подобает убо и от римския веры, и от всех от различных еретических вер приходящих, к нашеи православней вере греческаго закона, совершено крестити. понеже убо еретическое крещение, несть крещение, но паче осквернение;

Ниже: глава, 5. лист, 575. Месалиане убо и василиане последуют Оригенову мудрованию. и приходящих, от различных грех прощают безовсякаго страха, чрез божественая правила, и неразъсмотряя плодов покаяния скоро очищати всяк грех повелевают. токмо аще кто прославленную их молитву от них научится, и ученик от тех проказы будет. и месалиан убо и василиан, приходящих быти к благочестивой нашей христианстей вере повелевают святая правила совершено крестити. по правилу 1-му, Вел. Вас. И римляне убо и вси еретики, и иныя от всех различных еретических вер, такоже по месалианскому мудрованию, и василианскому, человеком грехи отпущают без опитемей, и неразсмотряя плодов покаяния, и такоже скоро от грех мнятся очищати, и равну ересь в себе с месалианы и василианы содержат. того ради убо подобает и римлян, и всех от различных еретических вер приходящих, к нашей православнеи истинней христианстеи вере греческаго закона, совершено крестити, понеже убо еретическое крещение несть крещение, но паче осквернение;

Ниже: [лист, 575] Да и многих ради вин довлеет от латинских и от инех различных еретических приходящих ко благоверию, крестити совершено.

Ниже: [лист, 576] И что убо горьши сея злобы и вражды к Богу, еже латини и иных, многих различных вер еретики, Духа Святаго в два начала разделяют. не самого ли единороднаго Сына Божия и Господа нашего Iсуса Христа, слово во святем евангелии глаголет. всяк иже аще речет кто слово на Сына человеческаго, оставится ему, а на Святаго Духа хулившему, не оставится ему ни в сем веце ни в будущем. и убо да весть всяк, яко сие злое размышление, всем ересем глава, от него же вся и иныя ереси прозябают. и за толикия презелныя ереси всех еретик, довлеет совершено крестити, понеже всему божественному писанию супротивно мудрствуют, и инех учат.

 

Изложение патриарха Филарета о белорусцех. [лист, 588].

А которыи белорусец скажет о себе, яко крещен он в христианскую веру. а которыи поп его крестил, и тот поп в божественнои литургии в приношении и во ектениях, в первых поминает римскаго папу. да и во всяком пении во ектениях и в литиях молит Бога за папу, и таковаго подобает совершено крестити в три погружения, и миром и маслом помазовати да и латынскую ему ересь и папежев римских еретиков проклинати.

И паки тоиже, Ниже [лист, 589]: А которыи белорусец скажется, что был он выной вере и пришел изыной веры в совершенных летех, и крестился в христианскую веру в Литве от русскаго попа. а тот поп которой его крестил, молит Бога за папу, и таковаго совершено крестити. и латынское еретическое отрицание ему говорити, и молитвы все говорити, и младенческое такоже что и еретику для того, что крещен от отступника которой молит Бога за папежа.

 

Кормч., лист, 239. правило 47. Василия Вел.

Воздержники и вретищники и апотактиты да крестиши, аще бо и глаголют, яко во Отца и Сына и Святаго Духа крестихомся, но понеже злу творца Бога нарицающе, хулят по Маркионову учению, некрещени же неприятни.

Толкование. В первем убо своем правиле по смотрению словесе воздержник, и наватиан, глаголемых чистых, великии сей святилник церковныи прият крещение. и повеле токмо святым миром помазовати их, егда приходят к соборныя церкве вере, и ереси своя проклинают зде же исправляя еже по смотрению, онамо прият, и повелевает воздержники, и прочия крестити; понеже ересь их, отрасль есть маркионитския ереси ненавидят бо сии, якоже они брака, и отвращаются вина, и тварь Божию скверну быти глаголют.

 

Поместнаго собора Лаодикиис., правило, 7.

Наватиане и фотиниане и четыре надесятницы, сии еретицы, аще инех ереси не прокленут, и с теми и свою, неприятни. аще же прокленут, помазани миром, да приобщаются.

В толковании. Фотиниане же, святаго и спасеннаго крещения требуют, рекше. да крестятся. началник бо их Фотин, многи ереси обнови, и Павла Самосатскаго ересь: и Савелия Ливиискаго, и Монтанову. небезначална бо глаголаше Божия Слова, ни творца веком всем, ни первеиша всея твари суща, но млада и нова, и начало бытию приемша, от плотьскаго рожества еже от Девы;

 

О крещении еретическом, яко от еретик действуемое крещение по священным правилом не вменяется быти во истинное крещение, но паче во осквернение полагается. глава, 19.

 

Кормчая. Правило святых апостол, лист, 12.

Второе крещаяи крещенаго истинным крещением, и не покрещеваяи оскверненнаго от зловерных таковыи святитель неосвящен;

Толкование. Несть достойно дващи крестити человека. аще же которыи епископ, или презвитер, крестит кого второе, совершенным крещением, да извержется от сана. суть же нецыи, иже по прилучаю прежде благоверно крещени бывше, отвергошажеся Христа волею и неволею, и осквернени бывше, и таковыя миром токмо помазуеми освящаются. и иже не крестит совершено второе, первое крещение приемшаго от еретик, но приемлет его яко верна, да извержется от сана.

 

Ис книги Завещания святых апостол. книга, 6. глава, 15.

Яко ниже прекрещати подобает, ниже паки приимати, еже от нечестивых крещение, данно, еже несть крещение, но осквернение. Такоже и крещением единым довлевайтеся, самим иже в Господню смерть даемым. не оное еже от злоименитых еретик даемое, но еже от непорочных священник даваемое, во имя Отца и Сына и Святаго Духа. ниже оное еже от нечестивых приято буди вам ниже от преподобных сущее укоризнено за второе.

 

Кормчая, в толковании, 68-го правила апостольскаго.

Ибо от тех крещени некрещени и поставлени не причетницы.

 

Никон, Черн. горы, в слове, 63-м.

От таковех бо поставленом, или крещеном ниже верном, ни причетником мощно есть быти.

 

Матфея Иерос., состав, Х. глава, 14.

Аще от еретик хиротонию приял бе, отметаем таковех, яко крещение, сице и хиротонию, небо освящение се. но скверну, веруем исходатайствовати;

 

Потребник большеи, глава 5. лист, 575.

Правило перваго вселенскаго собора, 19. и тако вси созгласиша купно, еже еретическое крещение, несть крещение но паче осквернение. и повелевают таковых крестити святым крещением паки совершено.

 

Той же Потребник, лист, 649.

А иже второе крестити кого крещеннаго преже от правоверных, вся правила отрицают. разве аще некто от нечестивых еретик крещен бысть преже. тех бо крещение, сквернение есть паче а не крещение.

 

Поместнаго собора в Карфагене, правило, 73. в толк.

Аще будет от нечестивых еретик крещен, тех бо крещение сквернение есть паче а не крещение.

 

Баронии в лете Господнем, 258-м.

Яко сотвори собор, Киприян, собрав из Африкии и Нумидии епископов, 71. на котором вси уставиша яко еретическое крещение, не есть истинное крещение. и не может в крещение въменитися.

 

Той же, лето. 217. стих, 2.

Еретики не имут общения со учением православным, само их проклятие о том свидетельствует. Ниже: Ибо ни того бога имеют, егоже мы, ниже того христа егоже мы имамы. убо и тайны не едины.

 

Книга Григория Богослова, слово 24. лист 128. на еретики.

Не терплю непросвещен быти по просвещении проначертая, что трех во яже крестихся и сущно въпогребстися воде, не в возрождение но во умерщьвение совершаем. Ниже: Ныне же кая лесть благодати; паче же дающих благодать. яко в Бога уверитися, и возъити безбожному; исповестися, и иному учитися, каковы словес татьбы и лести; и иным вопрошением и исповеданием во ино несущия. увы светлости, аще по бани очерневаюся, аще светлейшия зрю не у очищенныя аще крестителя злословием коварствуются аще ищу Духа лучшаго обретаю. даждь ми баню вторую, и о первей зле помыслих.

 

Того же, Григория Богослова, слово, 40. лист, 196.

Свидетельствую пред Богом, и избранными ангелы. с сею крестишися верою аще убо инако написался еси, неже яко мое истязует слово. гряди препишися, аз сих безъестествен доброписец, пиша яже написахся, и уча имъже и научихся. Ниже: Аще же тако имаши, и добрыми знаменался писмены. храними написанная, во времена превратна непревратен пребывая.

 

Григория Богослова. на еретики.

Ниже: Подобает удобь предвижным убо быти, к лучшему от горшего, недвижным же к горшему от лучшаго. Аще тако крещаешися, и посему учению ускорим спасения, востанем на крещение.

 

[Катихисис болшеи, глава, 4].

Поистине ничтоже у них [еретиков] несть истино. но все убо еже еретицы творят, от смышления своего. како могут совершити действа Божия на игралищах своих. аще и Христа проповедают, и веру свою похваляют, но вся сия льстиво, и лживо творят, аще и церкви своя, и клирики церковныя, и писания божественная почитают, и мнятся еже темже крещением крещатися. такоже и тайны божественныя, еже есть пречистое тело, и честную кровь Христову имети. но вся сия не тако имеют, но иноко и нечестиво. Ниже: Сего ради разумети имамы, яко еретическая писания, и празднества, и службы, и тайны, и проповеди несуть права.

 

Сущее. псалом, 96.

Господь воцарися да радуется земля да веселятся острови мнози.

Толкование Дидимово. Добре многим островом веселитися, а не всем написа. показуя, яко суть иныя островы еретическия церкви. славящеся и тии водою крещения, но не пристоит им веселитися: зане нечестием еже к Божеству благодать крещения отметают.

 

Кирила Александриискаго, от слова, 112.

Люте некрещеным душам, и ко идолослужителем, и бесом связани, тамо веригами различными. а по мытарствам уже не несут, некрещеныи души, понеже и жива беса имела, и то суть друзи и братия бесом, от еретик крещении осквернении бяху.

 

Ис книги Гранограф. о сербском Саве, глава, 165.

Святыи Сава неких ради потреб монастырских, иде в Царь град прият бысть с радостию царем и патриархом. Ниже. Сущих же в ереси елицы обретахуся некрещенных повелеваше крестити. а елицы крещени в латынскую ересь впадоша. сим молитву миру изглаголав помазоваше их и верных причитает.

 

Перваго вселен. собора, правило, 19. в толк.

От павликианския ереси приходящии к соборней апостольстеи церкви, да покрещеваются второе: первое бо крещение, некрещение, понеже еретическо бе.

 

В Каталоге. [Кормчая лист, 662, на об.].

Крещеннаго от еретик, паки крестити;

 

Яко приемлющии от рук еретических крещение, или прочая таинодействия, и за истинно почитающии, неистиными неправоверными, но лживыми христианами, и неправоверными нарицаются. и святительствующии неосвященными именуются. глава, 20.

 

Кормчая, правило святых апостол, 46. лист, 12. [на об.].

Крещение и жертву еретическую прием святитель неосвящен.

Толкование. Епископ, или священник, или диякон, аще не похулит, ни поругается еретическому крещению, но приемлет крещеннаго от сих, или приносимая от них на жертву, сиречь на службу приимет. таковыи да извержется от сана кое бо сочетание Христови к дияволу, или кая часть верному с неверными;

 

Ис книги Завещания святых апостол, 6. глава, 15.

А иже от нечестивых приемлюще осквернение, обещницы разума их будут. ниже бо суть тии священницы, глаголет к ним Бог. Понеже ты отринул еси разум, отрину тя и аз священствовати мне, ниже крестившыися у них очистишася. но осквернени суть, не оставление грехов приемлюще, но связания нечестия;

 

Из соборника Досифея, ученика преподобнаго Зосимы. от правил Иоанна митрополита Никейскаго, и Афанасия Александриискаго.

Аще кая душа приимет от еретик крещение, или покаяние, или молитвы, или ино что духовное или телесное брашно, или благословение. и таковых убо бесове яко своих имут. и сего ради верным несть общения с неверными. но и мест их отбегаем вернии, где молятся зловернии. занеже тамо бесовская живут. А егда поют они, и тогда заткнув уши бежати, дабы гласа их неслышати. сего ради да бегаем и отвращаемся соборищ, и тех мест. где же еретицы молятся, или поют, или молебствуют, и в церкви, или в часовне, или у креста, или на пути, или в дому еретическая служба, и те иконы водою омывати, и фимияном кадити и потом верным молитися. А еретиков в домы не пускати християном да не осквернятся вернии от зловерных. занеже благодать Божия отбегает от мест тех, и от мощей святых, и гдеже еретицы приходят, и ту Господь не пребывает, но бесове.

 

Кормчая старописменная, от заднеи дски. слово Иоанна митрополита, Никиискаго.

Сии проклинаемии, да предани будут диаволу, уже да не имут места спасению, но да будут от Христа чюждии. аще убо толикими от всех святых прокляти бывше и от Христа отгнани, и диаволу предани, и до скончания века, от всех христиан проклинаеми. како паки яко истиннии христиане от правоверных прияти будут, какоже и лживии христиане от правоверных прияти будут; какоже и лживии христиане, и лживии правовернии, скверное их крещение, и жертвы их, яко истинныя и крепкия творят, аще бо тмократицею прокляти бывше, и диаволу предани; како от анафемы и от клятвы благословение изыдет, или како от диавола духовное и святое дело совершается; А от анафемы благословение не бывает, и от проклятия молитва не исходит. и от диавола Христово таинство не совершается, и от гноища благоухания не исходит. и от гнилаго трупия иныи не исцеляется, ниже от червавых удов здравие иному телеси подается. ни паки от ереси, или от неверия духовное действо исполняется. ни от неверных, ниже зловерных и нечестивых, совершенное и благоприятное крещение может быти. Темже проявлено, яко крещение их, и вся яже от них неприятна и непотребна суть. Аще тщатся несмыслении и неразумнии, и неутвержении, и лживии христиане, яко истинная и благоприятная творити деяния их но да услышат ненаучении, и ненаказани, Иоанна Богослова глаголюща тако в своем послании, аще кто приходит к вам, а сего учения не приносит с собою, радоватися ему не глаголите, в храмину не приемлите. иже бо глаголет ему радоватися, общник будет делом его лукавым. Темже проявленно есть, яко иже правовернии именуются, а приобщаются с сими еретики в ядении и в питии, и в дружбе, и в любви, и творимая от них яко благоприятна мнят, и нечестиво и неразумно истиныя христианы их именуют, общьники обретаются проклятию и анафеме, яже на них написана от всея вселенныя. от востока и до запада, от соборныя и апостольския церкве. яко же божественныи Иоанн Златоуст глаголет. иже творится друг быти еретиком, враг Божии есть.

 

Из той же писм. чин, аще кто в ереси быв крещен сыи, к Богу обратится. [глава, 49].

Севир безглавныи, и крещение его да будет проклят. Ияков Цанзал да будет проклят.

 

Кормч. в каталоге, лист, 655. [на об.].

От еретика крещение неприятно;

 

Баронии в лете Господне, 258.

В первенствующей церкви. о том во Иконии, во Фригии, собор сотворше, уставиша ни единому тайну у еретиков в тайну вменяти;

 

Матфей, Иеросалим., состав, Г. глава, 12.

И аще убо от еретик прилучишася крещьшеся, ихъже крещение здраве мудрствующими отвержено;

 

О еже яко на крещение и на прочее действо еретическое, Дух Святыи не сходит; глава, 21.

 

Кормчая, в толк., на правило, 1-е. Василия Вел.

Наватиан же рекше чистых, и воде предстоящих, и воздержащихся крещения. аще и неприятно есть, понеже оставляет сих Дух Святыи;

 

Никон Черногор., на тоже правило, слово, 63.

Иже от церкве отступльшеи не ктому имеша благодать Святаго Духа в себе оскуде бо подаяние, внегда пресещися последованию. Ниже: Ктому немогуще благодать Святаго Духа инем подать, от неяже тии отпадоша.

 

[Потребник болшеи. лист 561].

Яко вси еретики, различных еретических вер, не имут праваго святаго крещения, еже водою и Духом Святым.

 

Зиновии мних Отни пустыни, лист, 93.

Яко не сходит на еретическое действо Дух Святыи.

 

Книга Кирилова, 10-е послание Мелетиево. лист, 505.

Яко все веры прочии иже верами зовутся, не суть веры, но прелести, наченши от латынския и до прочих всех. и почто несуть достойни называтися верами. Того ради, яко ни едина от них не вмещает Духа Святаго даровании, ни пришествия его сподобляется;

 

[Соборник мал. Зиновия мниха, глава, 11.].

Имать бо всяк еретик в себе дух диаволь, темже и противится Святому Духу.

 

Из книги преподобнаго Иосифа Волоц., слово, 12.

Кроме же благодати Святаго Духа, ничтоже может кому сотворити от священных. еретицы же в себе нечистыи дух имееху сатанин.

 

Ис книги преподобнаго Максима Грека, глава, 66.

Оноже буди ведыи яко всяка ересь началника и учителя имать диявола.

 

Никон Черногорскии, слово, 63.

Чистыя и воздержники и водопредстателя [ниже] от церкве отступльшей нектому имеша благодать Святаго Духа в себе.

 

Матфей Иеросалим., состав А, глава 2.

Аще и не о вере раскольницы погрешают, [ниже] сии от состава удов телесных отторгошася, нектому пребывающую в них имут благодать Святаго Духа, еже убо не имут сами, како иным преподадут.

 

Ис книги Собор. старопис., преподобнаго Иова и Феодосия первоначалников скит вел.

Еще и узриши два духи, о едином теле разни. и себе противни. зде в православии Христов, онаможе во иноверном антихристов. Выше; Тамо бо [во иноверном] дух лукавыи, здеже Божии;

 

О сомнящихся младенцех, и без залога веры крестившихся аще и от православных крестишася, сумнения же ради от святых писании и правил второе крестити не запрещается. глава, 22.

 

Кормчая, 6-го вселенскаго собора, правило, 85.

Иже не ведят ни послух же не имеют, аще крещени бывше, да крестятся. Толк. Елицы не ведят, аще во младенчестем возрасте крещени быша, не обретаютжеся ни послухи неции достовернии. без извета тем извествующе, аще крещени суть, без всякаго претыкания да крестятся.

 

Книга Матфея Иеросалим. состав, В. глава, 3.

Не точию, но и реченная 6-го собора, и Карфагенскаго, иже сомнение имущих аще и крестишася. не разложне крестити повелевает;

 

Того же состава, глава, 2. о сомнящихся аще и крестишася. собора 6-го, и Карфагене, 73 прав.

Сомнящиися младенцы, аще божественнаго получиша крещения, ниже сим ведущим возраста нечювствием, ниже иных известне свидетельствующих. без сомнения повелевает крестити. аще бо едино исповедати крещение от божественнаго изображения научени быхом. Но понеже Господь рече, аще кто не родится водою и Духом, не может внити в царство небесное. убоимся, да не лишимся божественнаго крещения, прикладным к духовному браку, не облечен одеянием чертога, вкупе и царства извержен будет, лепо есть во имущих сомнение, побеждати человеколюбне несомненное.

 

Никон Черног., слово 63. Карфаген. собора, прав. 73.

Такожде угодно бысть и о младенцех, елижды не обретаются известни свидетелие иже сия без сумнения крещени быти глаголющеи, и ниже сии младенства ради о преданем тем таиньстве отвещати свершене могущим, без никоегоже претыкания, должно есть сия крещати. да некако таковое сумнение улишим их таковаго освящения и очищения;

 

[Потребник большеи, лист, 649].

Аще же некотории в пленении бывше, и не весть никтоже аще крещен есть, или ни: ни сам весть младенческаго ради возраста, ни иного имать извествующа, и свидетельствующа ему, яко крещен есть. таковаго без сумнения крестити подобает, да не размышления ради лишится божественнаго очищения;

 

Той же Номоканон, лист. 708. правило, 230.

Елицы не знают яко крестишася, от пленения негли, или от инаго некоего недоумения. и несть никтоже, да известит о них опасно, да крещаются паки. по седмьдесять третиему правилу, иже в Карфагене святаго собора.

 

Книга Матфея Иеросалим. состав, В. глава, 3. о крещаемых младенцев агарянских.

Видети есть и во глубоцеи тме агарянскаго злочестия, свет насилуем благодатныи и от тоя необьемлем или убежаем. понеже знамение ниже верным возбранено бысть возводяще сих к божественому помазанию, обычаи бо есть от агарян многим не первее своя обрезовати младенцы прежде даже убо под властию их христианстии священницы и неволею понуждении будут сия крестити. взыскание убо бысть о сем на соборе, в царствующем граде, Луце божественному патриаршескии правящу престол. аще подобает истинней христианстеи вере приступающих покрещевати или токмо помазати миром. и суждено бысть сих непрекословне паки крещати, имъже бо измывшеся крещением, не мыслию благочестивою, но яко чарование или обавание.

 

От книги 1 надпись 8-я из книги севаста Арменопол. знамение синодалное в царство Комнина господина Мануила, патриарху сущу Луце. ниже. 481.

Во дни святейшаго патриарха господина Луки, предсташа агаряне синодално испрошаеми креститися. и спросими како; отвещаша, и обычай есть всем младенцем агарянским крещатися от православных иерей, но не прияшася. услышаша бо яко от неверных искомое от христиан крещение, не залог благ и произволение православное ищется. но лечьбу телесную, возомнится убо у агарян чада их бесноватися, и потом смердствовати, аще не крещение получат христианское, и оттуду не яко чистителя всякие скверны душевныя, и света божественнаго и святьбы подателя воспрошуют. но яко бальство, или напевание, нецыи иже из них, матери реша имети православныя и обещания сих креститися им от православных, но ниже сии услышатся яко не предсташа свидетели. сие самое свидетельствующии, паче убо и осудишася, яко неблагое предприятие дающе на себе, во еже приходити к правой вере. темже и попустися сим креститись;

 

Надпись 1. того же.

Агарян дети крещаемии от православных иерей невольствующих, не благочестивым разумом приводящих я. но аки волшебства или напевания употребляющих. аще приидут к вере воскрещеваются, сия бо синодально провещаша, яко Валсамон глаголет;

 

Яко крещение и прочия тайны, без креста не совершаются. глава, 23.

 

Беседы евангельския на Матф. нравоуч., 54.

Яко венец, сице да обносим крест Христов ибо вся тем совершаются, яже по нас, аще и породитися треба будет, крест да приходит; аще и напитатися таинственною оною трапезою, аще и рукоположитися, аще и яково ни буди ино что сотворити, везде одоления нашего предстоит образование;

 

Из бесед апостольских, в зач. 247. бесед. 13. лист, 1995.

Навыкни коликая есть крестная крепость, коликая исправи, коликая исправляет, како есть утверждение жития, сим вся совершаются. крещение крестом подобает восприяти, печать рукоположения крестом. аще и на пути будем, аще и в дому, или идеже аще когда любо будем, велие благо крест, стенное оружие, щит непреборим, диаволу супостат противныи;

 

Пролог марта, 13. лист, 64.

Ныне же чрез повеление Божие крестом кленетеся, егоже даде нам Бог на честь велику оружие на противнаго врага; без того бо, ни крещение, ни литоргия не бывает, ни ина кая духовная вещь: им же мы знаменующеся бесовския силы побеждаем;

 

Соборник, в слове Иосифа Фесалонитскаго в неделю 3-ю святаго великаго поста.

Крестом крещения обновления дано бысть, крестом сыновом Божиим, и наследником царства небеснаго быти сподобихомся.

 

Той же лист, святаго Феодора Студита, в слове в 3-ю неделю великаго поста.

Крестом умертвися смерть, и Адам оживлен бысть, крестом похвалися всяк апостол, и мученик венчася, и преподобен бысть преподобныи, крестом во Христа облекохомся, крестом назнаменовахомся Христовы овцы, и вышней ограде причитахомся. крестом бодем враги наша и рог спасения вземлем;

 

Книга Симеона Фесалонитскаго, слово 62.

Темже и совершено творитель сам крест, и без креста ничесо совершается божественных таин.

 

Кирила Иерос., лист, 275. Прение святаго Илариона со армены.

Рукою воображаемыи крест, освящает вся, на них же полагается, и воду глаголю крещения, и масло и миро и лица человеча верующих, и тайны хлеб, и священную чашю и ина вся;

 

Псалтырь толковая, псалом, 4.

Сущее. Знаменася на нас свет лица твоего Господи дал еси веселие в сердцы моем.

Толкование Кассиодорово. Занеже яко же пенязь царскии имать образ, тако и верныим знамение небеснаго царя напечатлеются в крещении и иных таинствах, еже есть знамение святаго креста, имъже диавол прогоняется, свет есть лица Божия напечатление креста. зане тех просвещает всегда, иже себе не оставляют никоим лукавством, веселие глаголет правыя веры, тогда бо веселимся истинно егда право веруем.

 

Псалом 1-й.

Сущее. И будет яко древо саждено происходящих вод.

Толкование. Древо глаголет крест Господень. и водами купельными одержима веселяща, просвещаемыя им святым крещением в купели Святаго Духа.

Сущее. И лист его не отпадет.

Толк. Листвие креста вернии людие суть. яко от него раждаемии, и онем пребывающии не отпадут.

 

Псалом 103.

Сущее. От запрещения твоего побегнут.

Толк. Бесове от воды крещения прогоними бо суть знамением крестным;

 

Той же псалом.

Сущее. Ту корабли преплавают.

Ниже. толк. Исихиево. Церкви в лепоту корабли глаголются. зане составляются убо от древа креста, куплю же и потребу в водах имети крещения;

 

О власти преосвященнаго чина. глава, 24.

 

Деяния апостольския, зач. 44, лист, 54 об.

Внимайте убо себе и всему стаду, в нем же вас Дух Святыи постави епископы, пасти церковь Господа и Бога, ея же снабде кровию своею.

 

Кормчая, лист 15. правило святых апостол, 55-е.

Аще которыи причетник досадит епископу, да извержется. писано бо есть князю людей своих да не речеши зла.

Толк. Епископи убо по образу суще Господа нашего Iсуса Христа, и глава церковнаго телесе именуемии, и большия чести достойни суть. темже аще кто досадит им, да измещется. презвитери же и диакони по образу суще рук, яко теми церковное правление содевает епископ, чести убо и тии достойни суть, но не тако якоже епископи, глава бо рук честнейшии есть, тем же аще кто сим досадит. меньши мучится, токмо бо отлучится.

 

Книга Симеона Фесалонитскаго.

Вопрос, 37. Кое различие епископа, или иерея, и чесо ради не хиротонисает иерей. понеже литоргисает крещает.

Ответ. Различна суть Духа даровании, и овому убо дается сие, овому же оное дарование;

Ниже: Иереи сию благодать на имеют, но токмо священодействовати могут, и крестити. и сия убо кроме архиерейския не творят силы, и миром и хиротониями.

 

Той же, глава 75.

Единыи действует епископ, свидетель свещателен сыи, яко подражает Бога Отца, светов, и его же обилует благодатию, си есть даровании даром, и всяк чин, и вся тайны, и все совершенство чрез него;

 

Той же во главе, 76.

Якоже бо от источника света, вся церковная чрез него совершаются, тем же свещателен именуется епископ;

 

И паки той же.

Яко от епископа токмо, и чрез него во всех действиях епископская предваряют благодатию.

 

Той же глава, 77.

Слыши, ничтоже действовати священик может в Дуси, или иное что действовати. аще хиротонию не имеет. Сия же от архиерея есть, ибо архиерейство чрез ню действует.

Паки. Иерей не действует тайны без жертвенника. сей же чрез миро освящается, миро же чрез архиерея, ниже жертва, ниже священник, ниже жертвеник, весма убо, вся сия чрез архиерея суть.

Глава, 77.

Яко 7, действии имеет в себе епископ, тем же и действии седмь носят епископи, по числу божественных действии Духа: сия же суть крещение: миропомазание: четьца печать, рукоположение, и подъдиякона: хиротония: диякона презвитера, и епископа. в сих убо совершен суть. воздательную един имеет благодать. тем же и единыи и рукоположения, и мир действует.

 

О первой печати, глава, 201.

И хартофилаксу вопиющу держащу знаменующаго от выи, востают епископы. и на рундуке архиепископ архиепископ. и свыше руку простираяи знаменаяи его глаголет благодать Всесвятаго Духа чрез нашю мерность поставляет во епископы, или в митрополиты. имярек, и прочая. творяи крест на конце, являя яко не он, но чрез него Христос хиротонисает. яко трижды в хиротонии тригубным знамением иерарх совершает хиротонисуемаго.

 

Глава, 171.

И зри отвсюду Троицу проповедует, и действующу в нас и совершающу божественныя дары, в первых убо абие приведена знаменает трижды: еже есть начаток освящения и хиротонии, потом паки знаменает трижды, по призывании божественныя благодати, и действуяи на нем чрез крест, посреде действа в Троице дарования, всем глаголющим, Господи помилуй с пением, и третие по молитве паки трижды знаменует: якоже совершивше божественною силою всеконечно, или служителя, или иерея, или епископа;

 

Како чтец от архиерея совершается. глава, 158.

Потом приводится совершаемый к нему, и благословляется рукою крестообразно от него трижды. потом знаменается и стрижет бо его власы главы крестообразно архиерей. божественое и страшное имя глаголяи троическое, из него же всякое священное и совершеное таиньство. в первых убо: по верху стрижа власы глаголет, во имя Отца, потом по челу: глаголяи и Святаго Духа. потом из боку паки ошую, крест совершая, и паки глаголет всегда и ныне и присно. вся же на всяком возвании, аминь глаголет, исповедающе вкупе и утвержающе яже от архиерея. и отъятие убо власом, освящение знаменует, яко власы во его теле извещение и начаток Богу принестися от человека знаменует крестообразно же Iсуса ради, яко той воплотивыися и распят бывыи освящает, во имя Троицы же яко сия содетель всем, совершено творяи единыи Бог;

 

О вечнующем пребывании священства, яко епископом до скончания века быти речено есть. глава, 25.

 

Благовестник Лука. зач. 95. лист, 205.

Человек некии добра роду иде на страну далече, прияти себе царство, и возвратитися. Призвав же десять раб своих, даст им десять мнас, и рече к ним, куплю дейте, дондеже прииду.

В толков. Ниже: 58, лист, 206. Рабом же своим десять мнас вда. раби же, имъже церкви поручи. десять глаголем быти, совершеннаго ради церковнаго состояния. ибо в церкви чин совершение имать предстоящими украшение и ни большим лепо быти. ни мнее; еже слова благодатию трие сии образи в церкви очищение, просвещение, и совершение, три сия действа, наследуема чинов. диякони очищают оглашением учения; презвитери просвещающе крещением; архиереи же, священныя чины поставляют и совершают, видиши ли чины к действом, ни вящьше, ни мнее реку предстоящих;

 

Кирил. лист, 77.

Престало тогда архиерейство Аароново, яко временое. востало же Христово вечное иже из мертвых востав, апостолов своих на се освяти хиротонии еже есть руковозложением. и воздвиг руце свои и благослови их, и вознесеся на небо. Апостоли паки епископов освятиша, якоже пишет. тогда постившеся и помолившеся, и возложьше руки на ня, и отпустиша их проповедати слово Божие; А епископи паки попов, якоже пишет, освящьше же им попы на вся церкви, помолившеся, с постом предаша их Господеви.

 

Книга о вере, лист, 59.

Не восхоте достояние свое оставити на земли неустроено отходя на небеса, но изем два сребреника, даде гостиником. се есть старыи и новыи завет, кому же дал; кто гостиницы; апостоли. и по них восприемницы их пастырие и учителие, архиепископи и епископи, иже служителие суть величеству смотрения его. имъже и спребывати даже до скончания века обетование сотвори, и по своему неложному обетованию благодатне избирает себе людей достойных и поставляет и освящает рукоположением чина духовнаго чрез патриархи архиепископы и епископы.

 

Из Библии от втораго закона Моисеова. глава, 12.

Снабди же слово се, закон себе сыновом вашим до века;

 

В Паралипомене во главе 7. о церкви Соломони рече Господь.

Ныне избрах, и освятих дом сей. да будет имя Мое ту вовеки.

 

В Паралипомене, 1, в главе, 15. Духом Святым царственыи пророк Давыд рече о левитех.

Ихъже глаголаше избра Господь к ношению киота его, и к служению себе даже до века.

 

В службе святаго апостола Петра, в стихере июня, 30.

Бысть Риму первыи епископ, православному граду основание и столп церкви, божественное утвержение, и врата адовы не одолеют. воистину ей Христос заповеда;

 

Кормчая, лист, 1.

Иже во царех перваго христианина бывша, святаго и блаженнаго и равна апостолом: великаго царя Констянтина. повеление его царское содеянно и дано святей соборней и апостольстей церкви.

Ниже: Святейшему, и блаженнейшему отцу отцев; поднебесныя: православному Силивестру епископу и папе превысочайшему: великаго града Рима: и всем сущим по нем приемником, святителем православным иже на седалище блаженнаго Петра, даже до скончания века седящим.

Ниже: лист, 6. И тамо до скончания века и всегда прищут учителя идеже святое почивает учителево тело;

 

Яко воздательной благодати презвитери не имеют. но точию едини епископове. глава, 26.

 

Ис книги Симеона архиепископа Фесалониц. от ответа, 13.

Ниже бо человек что может не взяв от Бога, разве бо Мене, глаголет, не можете творити ничтоже;

Ниже: Тем же презвитери, якоже седмьдесят чина имеюще, и не имеющъ волю Духа подати, сиречь благодать: или хиротонисати или мир творити, или разрешение дати в Дусе;

 

Того же, глава, 31.

Презвитери же глаголемую совершителную якоже благодать имеющу, токмо совершателную в действиях, а не воздавателную крещает бо, и священно действует. не может же хиротонисати, ниже инаго действовати иерея, или из еликих. имеют чина освященнаго.

 

Кормчая, лист, 30. Правило всех святых апостол, 1-е.

Кождо в данном ему чину да пребывает, и не преступайте заповедей, не суть бо наша, но Божия. якоже рече Господь, слушаяи вас Мене слушает. слушаяи Мене, слушает пославшаго Мя. и вас отметаяся, Мене отметается. и Мене отметаяи, отмещет пославшаго Мя.

 

Ис книги Дионисия Ареопагита о церковном священноначалии. от толков., глава, 5.

Знаменай яко освятити и свершити миро несть презвитера, но ниже жертвенник совершити да принесет на нем, ниже хиротонисати. Сия бо един священноначалник сотворити имать; ихъже кроме священник, ниже крестит, ниже принесет. но в предсвященных от епископа священнодействуется.

 

Катихисис, болшеи. глава, 63.

Вопрос. Что есть хиротония или чин духовных лиц;

Ответ. Рукоположения есть тайна еюже вручается власть яко святителем священником, и прочим строителем, и служителем церковным, дабы строение и служение в церкви Божией благочинне и благолепне и законне содевали и совершали.

Вопрос. Кое есть вещество сея тайны;

Ответ. Возложением рук деяния, зач. 16. и Тимоф. зач. 287. Сия же свидетельства имаши о священстве и о видотворении.

Вопрос. Кое есть видотворение сея тайны [. Ответ.?] суть оныя глаголы, ихъже Спаситель над рукополагаемым в молитве глаголет;

Вопрос. Кая суть совершательная сея тайны;

Ответ. Сила и власть от Бога даная, печать дара Духа Святаго, на души священничестеи и оная благодати Божия. о нейже святыи апостол Павел к Тимофею не неради сущей в тебе даннеи ти пророчеством, со возложением руку священничества. сия благодать Божия устрояет. рукоположеннаго, да будет во своем чине и сане благоприятен и благоугоден своим служением Богу и церкви.

 

Катихисис малыи, лист, 36 на об.

Вопрос. Кая есть вещь, или образ тайны священства.

Ответ. Вещь есть возложением рук епископских на главе приемлющаго священства. совершение же учиненая тому молитва, юже епископ единою с возложением рук. над главою освящающагося глаголет; еже есть божественная благодать.

Вопрос. Которая есть четвертая тайна

Ответ. Священство уставленое от Христа во апостолех, ихъже возложением рук на епископах, от епископов же на священниках, яже освящени бывают чином церковным.

 

Ис книги Симеона Фесалонитскаго о презвитере или священнице, глава, 177.

Презвитер же иже и совершителен именуется от божественнаго Дионисия, якоже многажды рекохом. ради того что совершено действия, якоже причастие крещение, и молитвы, обаче невоздавателну имеют благодать ниже инаго иерея совершити может. сице свыше действуется и истязается сей от архиерея. и о житии и о времени;

 

Той же, глава, 32.

Подобне же и даровании Святаго Духа, и о хиротонисаемых сие явно, запечатается прочитати поставлен, и приимати благодать, и четца имеет благодать. но он не возмогает яже суть иподдиаконова действовати. диакон же подобно не возмогает презвитерова. ниже презвитер якоже прежде рекохом, яже суть архиерейския благодати;

 

Того же от вопросов.

Вопрос, 37. Кое различие епископа или иерея, и чесо ради не хиротонисает иерей, понеже литоргисает крещает.

Ответ. Различна суть Духа даровании и овому убо дается сие: овому же оное дарование; Ниже. Иереи же сию благодать не имеют, но токмо священнодействовати могут, и крестити. сия убо кроме архиерейския не творят силы, и миром и хиротониями.

 

От главы, 1.

Убо просветителному глаголющемуся. сиречь архиерею; и воздавателную божественных светов, вси бо приемлют чрез него хиротонии же и печати. иерей же и клирос и освящении храмы.

 

Того же, от главы, 77.

Яко епископа токмо мир и хиротонии. и чрез него во всех действах, епископская подается благодать.

 

И паки тойже.

Иерей не действует тайны без жертвенника; сие же мир освящает мир же чрез него архиерея токмо совершается. и убо кроме архиерея, ниже священник, ниже жертвенник. весма вся сия чрез архиерея суть.

 

Катихисис малыи, лист, 34.

Рукоположения силы никтоже имать, точию епископове.

 

Кормчая, глава, 1. лист, 1. святых апостол, правило, 2.

Един епископ поставляет презвитера, и диакона, и прочия причетники.

 

Ис книги Симеона Фесалонитскаго, от главы, 77.

Яко 7 действии имеет в себе епископ темже и действии седмь, носят епископи по числу божественных действии, Духа: сия же суть крещение: миропомазание; четца печать, рукоположение, иподиакона: хиротония: диакона, презвитера, и епископа. в сих убо совершен сущ. воздавателную един имеет благодать. темже и единыи и рукоположения, и мир действует;

 

Благовестник Лука, в толк., зач. 95. лист, 206.

Еже слова благодатию трие сии образи в церкви, очищение, просвещение, и совершение. три сия действа наследуема чинов. диакони очищают, оглашением учения, презвитери, просвещают крещением. архиереи же. священныя чины поставляют и совершают еже есть рукоположение;

 

Ис предисловия Номоканона афонских отец [лист, 4 на об.].

Иереов же и протодиаконов грехи, яже извержения томление наводят, епископом суду подлежат. да не дерзает духовник разрешати их. якоже бо невозможно ему хиротонисати, сице же ни на священства степень изпадшаго паки возвращати. еже бо во гресех извержения сущему священнодействовати простити и попустити есть аки паки паче подобающаго возводити на священство;

 

Ис Кормчей Карфаген. собор., правило 117. [в толк. лист, 162].

Понеже многи распри бываху между епископ о донатианех, обращающихся к соборнеи церкви, к которому престолу тем подобно причитаемым быти. прежде бо царскаго закона, иже повелеша о соединении церквеи. тому епископу повиновахуся, имже от льсти обращение прияша. и к соборней церкви, приобщишася;

 

Яко без воли епископли, презвитер ничто же может сотворити. глава, 27.

 

Кормчая, правило святых апостол, 39. [лист, 10 на об.].

Без воли епископа своего, презвитери или диакони, да не творят ничтоже, тому бо суть поручени людие Господни.

Толк. Несть достойно презвитеру, или диакону без повеления епископа своего, ни людей связовати, еже есть отлучати, или умножити, или умалити епитемию, сиречь запрещение или ино что таковое творити, аще не будет дано им от епископа о том писание, сиречь приимати в покаяние, и вязати и разрешати, кроме того не могут ничтоже творити. яко епископу суть поручени Господни людие, и той хощет воздавати слово о душах их.

 

Ис книги Симеона Фесалонитскаго, от главы, 49.

Еже убо иереом действовати сицевое понужди бывает, и с повелением епископским. и не присудствующу ему, но священствующу. И большия грехи. се есть, отрицание веры, и убииства греха, и священников падения, к епископом просити подобает. и ина, елика отбегают исповедникова разума. И вся творити с епископским советом. яко епископа дело сие свойственно есть.

 

Той же во ответе, на вопрос, 13.

Тем же презвитери не имут хиротонии, во еже решити и вязати, но токмо епископи.

Ниже: Ниже убо воля есть презвитеров во вся разсуждати, наипаче же отрицании не могут разрешити, токмо епископи. ниже убийства.

 

В толков. правил, 5-го, иже во Анкире собора. [Кормч. лист, 43 об.].

Епископу есть власть якоже видит их или потщаливы, или в небрежении сущя. тако и заповедь даст им, или человеколюбствовав скратит время покаяния, или паче приложит к тому.

 

Номоканон предисловие. лист, 4. на концы.

Подобает же духовным отцем и се ведати. еже от духовнаго и каноннаго разсуждения, яко да грехи тяжкия и недоумителныя исправлению кающагося, к епископом и к совершеннейшим, и благоразумнейшим препосылати. в неких же со искуснеишими советовати не срамлятися, иереов же и протодиаконов грехи. яже извержения томление наводят. епископом суду подлежат, да не дерзает духовник разрешати их. яко бо невозможно ему хиротонисати. сице же ни на священства степень изпадшаго паки возвращати. еже бо во гресех извержения сущему священнодействовати простити и попустити есть аки паки паче подобающаго возводити на священство;

 

Баронии в лете Господнем, 254, и 358-м.

Яко мнози от сих, страха ради, или мук ради отрекошася Христа. и во многом множестве народа, бегаху за епископы своими, дабы на покаяние в церковь прияты были.

Ниже: Тако и инии восточнии епископы с сими падшими творяху, яко же и Киприян во Африце, тако и в Риме Корнилии папа, правило сие с падшими храня;

 

О мире, яко от архиерея токмо, совершается, и яко не едино точию миро, но от различных вещей составляемо бывает. глава, 28.

 

Книга Катихисис бол., глава, 62.

Вопрос. Что есть святое миро;

Ответ. Миро есть масть или елей, от различных вещей устроеное, сиречь от оливнаго елея и валсаму и нарди. и прочих благовонных ароматов, по Дионисию освященно в великии четверток, от архиерея на божественном престоле. идеже тело и кровь Господню освящают. уготовано же во употребление крестящимся. сие же есть первейшее, святое вещество, сея вторыя тайны. Чти о сем святых писания Кирила Иеросалимскаго, во оглашении таинственном, глава, 1. и 2, и 3, Климента Римскаго, в завещаниях апостольских, книга, 7. глава, 42, и 44. и Дамаса послание, 88. и Киприана книга, 1, послание последнее. и прочих собора чти.

 

Ис книги Дионисия Ареопагита о церковном священноначалии. от толкования, глава, 5.

Знаменай яко освятити и свершити миро несть презвитера, но ниже жертвенник совершити да принесет на нем. ниже хиротонисати. Сия бо един священноначалник сотворити имать.

 

Ис книги Симеона архиепископа Фесалонитскаго, глава, 43.

Ныне же вместо рук то есть освященныи именуемыи мир, а освящающиися не от священиков. но от патриархов, и архиереев, священными молитвами и благословениями.

Ниже: Мир же не елей просто, но освященныи молитвами в жертвенике от архиереев Христовых.

Ниже: И ниже мир от мощей святых яковыи еже от тела божественнаго и мироточиваго Димитрия, или некоего инаго из святых, яко еже прославляется и в Кипрском великомученике Маманте, или святыя иконы, якоже глаголется аттив.

Ниже: И сия бо честная благодать имеюща божественную исцеление подавающи. Понеже мощь онаго божественнаго мира особлива бо сия, и чрез архиерейства, и архиерейския молитвы подается и не просто действуется: но в жертвенике во время священнодействия полагаемое. и в святыи великии четверток в конце священнодействия [литоргии] молитвами священноглаголемое, и печатию божественною креста совершаемое и освящаемое.

 

Из Катихисиса малаго о второй тайне, лист, 31.

Вопрос. Что подобает разумети в тайне миропомазание;

Ответ. Первое вещь освященная уготованная, иже сами большии архиереи освящают. от них же священницы приемлют себе к сей тайне. по писанному обычаю: в нем должни сицевая словеса употребляти; печать дара Духа Святаго. яко от епископа токмо мир и хиротонии и чрез него во всех действиях епископския [подобает] благодать.

 

Ис книги Симеона, архиепископа Фесалонитскаго, от ответа, 13.

Тем же презвитери, яко седмьдесят чина имеюще, и не имеют волю Духа подати, сиречь благодать. или хиротонисати, или мир творити, или разрешение дати в Дусе.

 

Того же, глава, 77.

Яко епископа токмо мир и хиротонии. и чрез него во всех действиях, епископская подается благодать;

Ниже: Иерей не действует тайны без жертвенника; сие же мир освящает. мир же чрез архиерея токмо совершается. И убо кроме архиерея, ниже священник, ниже жертвенник. весма вся сия чрез архиерея суть.

 

Того же от ответа, 37.

Иереи же сию благодать не имеют. но токмо священнодействовати могут, и крестити. и сия убо кроме архиерейския не творят силы, и миром и хиротониями.

 

Кормчая, лист, 120. поместнаго собора иже в Карфагене, прав. 6.

И помазанию творение, рекше миру совершение, девицы священие. и смирение в народе службы, от презвитера да не будет.

В толковании. Святое миро творити и совершати, или освящати девицу, или совершенное прощение сущим в покаянии творити. якоже стояти несумненно с верными, и божественных причащатися даров, презвитеру не оставляти того творити, но от епископ таковым подобает быти.

 

Кормчая старописм. глава, 51.

Понеже уведахом о божественном крещении, смутне некако, и неразумне. смешающе миро божественное с маслом, и тако мажут по всему телу крещаемаго, еже всего злее неразумие;

 

Поместнаго собора Лаодикиискаго. правило, 47.

Подобает просвещающимся святым крещением, в крещении миром мазатися, мастию небесною, и причастником быти царствия Христова;

 

О поставлении церквеи яко без воли и благословения епископскаго не бывают поставлени. глава, 29.

 

 

Поместнаго собора в Карфагене от толк. на прав. 84. [Кормчая, лист, 152].

Елико же молитвенных домов, рекше церквеи, без воли и без молитвы епископли, создано бысть, в них же ни мощи святых мученик положени быша. таковии церкви не священи суть. сего ради убо яже на полях и в нивох, или в виноградех созидаемыя церкви, без воли и без молитвы епископли, и без положения мощей мученик, аще есть мощно, да раскопаются;

 

Ис книги Зонаря, правило, 67.

Что есть праведнейше обьявляют, и воставляти обещания, и падшися церковь или создати ново другия, сего ради повелеваем. да еже будет церковь ветха разорена и восхощет кто обновити ю и создати, да не полагает иного ставропикию. но еже от перваго основания то достоит непоколебляем. аще ли обрящется по свидетельству. яко без благословения великия церкве наместныя тая церковь основалася бе, тогда приидет хотяи созидати церковь тую, и да имут благословение от епископа наместнаго, якоже и о новей церкви. тогда положит ставропигнов, созидает. [церковь создана да бывает со благословением епископа]. Аще ли кто хощет от основания создати церковь, да приидет ко архиепископу наместному, подобную службу да сотворит ему, да вопрошает епископ колико может на всяк день освящати церковь тую свещами. яко довольно будет к славословию Божию, или три свещи, или 6. или, 8. или, 9. или, 10. елико по силе ему будет и ясно видев сей по ответу кътиторову, востанет заутра епископ, и мерит место окрест оградит с платном, или с покровы некаковеми и возжет свещу окрест внутрь, да разумеет колько место хотят осветити свещами, елико может вжизает кътитор на всяк день. и по освещении свещам только места да назнаменает, и тако крест да вонзет еже есть ставропиг. и покадив епископ сотворит молитву и начнет здати хотяи создати ю. буди же ему на благословение и на очищение во здравие и во спасение души и телу его. Кроме же сицеваго правила, никто же инако да не творит, понеже несть достойное самовластная убо изволения многим быша на пагубу. яко безчинная, и прекословная и недостойная. Ащели же сам епископ не идет на сицевое благословение, а он власть имеет послати свое иереи некими благословение. аще хощет точию без повеления, епископова, и без благословения его храм никаков да не начинается.

 

Седмаго всел. собора, прав. 7.

Да полагаются мученик святыя мощи в церквах. иже без них священы быша, по обычнеи молитве. аще же святит без мощей, да извержется яко преступник церковных предании.

Толк. Елицы убо церкви, преже сего собора без обычныя молитвы творимыя от епископа, и без положения мощей святых мученик созданы быша, повеле собор полагати в них мощи святых, и обычную молитву епископом творити. елицы же от епископ по соборе сем обрящутся без святых мощей свящающе церкви, собором сим на извержение осуждени суть, яко преступницы церковным преданием;

 

О антимисе, от кого освящену быти подобает; и киим образом оныи составляется. глава, 30.

 

Потребник бол., в чине освящения церкви. лист, 19. указ о антимисе.

Антимисе есть плат на четыре углы, а в нем вшиты мощи святых мученик. а свящает их святитель со всем собором, и проч.

 

Никона Черногорца послание, 29-е.

Тогожде ко мниху кир Стефану презвитеру о антимисех и божественеи службе и священничестве, и яко не просто всячески и всюду бывати достоит божественым службам, и о опастве священичества. слово, 29.

Духовныи мой отче, брат авва Козма глагола тебе службы ради и молитвенных домов. обаче без разума множае и неведоме. и убо егда не весть что отвещавати, ниже от Бога благодать на се имать, лучши есть не глаголати, и еже не весть учитися потребно, яже бо от слушания единого не имут благодать от Бога твердости в них несть. обаче убо сам паки нарековал ми еси яко, како глаголет тамо яко о дискосех, и ниже се изъобретеся, да речет ми якоже лепо есть. аз от речи и обычая иже ныне крепко удержавшаго, познах, яко о антимисех глаголет. и ради сего вящьше что не знаю, разве якоже написуют антимиси, и тамо обрящеши како пишют, и ова убо сице, яко одикон, рекше пятно и пишет точию еже где освятися, каможе дан бысть не пишет. и внимати со опаством речь одикона сего. обаче ту во святем в книгах кир Феодора патриарха, есть книга велика камбакерна, имущи главизны различны. тамо убо и се пишет являяи глаголя, яко службы бывающыя просто в местех и горах и всюду без молитвенных домов арианско есть предание, и тии се вообразиша. и зде убо о сем, могии с Богом да сочетает неблазнено в славу Божию. опаче обдержителне друзии антимиси пишут. яко олтарь во имя сего святаго, его же яве яко есть имя. и прочти паки ин антимис, и тамо да обряши како написует, и еже в кою церковь дан бысть и повелен и освящен, и не пишет всюду, но на имя в церковь идеже возложен бысть. Се согласует божественным правилом во искомое. обаче убо и се паки якоже благоугодно есть Богу, другии да разумеет, аз бо невежда сыи, вящше от себе не смея разумети, разве якоже божественная правила повелевают, и первее убо святыи шестыи собор, в 30-м правиле не повелевает просто или инако [в молитвеных домовох бывати службам, глаголет бо сице, якоже] в молитвенных домовох вънутрь храмин сущих служащыя причетники, по совету се творити местнаго епископа повелеваем темже аще которыи причетник се сице не сохранит, да извержется. и зде убо тако. паки же иже в Константине граде собор во святых апостолех, во 12 правиле, како не от себе правило положи, да не имать кто сопротив глаголати, на святыи шестыи собор приводит, и с ним утверждает паче а не возражает, но глаголет по тонку вину, и отсецает еже не бывати ныне;

 

Кормчая, глава, 59. лист, 598 на об. Иоанна Китрошскаго. о антимисех, 1.

Антимиси освятительныя причастившеся силы. юже тем дарует освящение воздвиженых вънове церквей, и еже над сими молитв треба. еще же и седмодневное в тамошнем жертвенице лежащим, священнодейство невозбранителне преподавается, идеже аще потреба будет таковых, и не описуются в нейже освятишася енорси, якоже и божественное миро, и ина святая: приводит же сих именование, о еже по тайнех антимиса, на трапезах полагаются, ихъже освящение церковное освяти. а на антимисе пиши сице; жертвенник святаго, имярек, священнодеиствовавшься, от он сице патриарха, имярек, месяца коего, и в лето кое;

 

Потребник бол., глава, 3. лист, 42, на об. Чин бываемыи о поколебавшеися святей трапезе.

Прежде зачала божественныя литургии, послан бывает каменосечец, или златолиятель иже на се въходити уставленныи достойныи во олтарь въходити и подвизавшыяся столпы, ими же держима есть святая трапеза, утвержает, и уставляет на своя места. и по сем, заливает составы поколебавшыяся, воскомастихою, или снастию некоторою, еюже годно, иже мешая тую рукама якоже воск, или инако некако якоже мощно, и тако облагает бумажнною, и связует тая вервьми новыми, на крепость и соблюдение воскомастихи. Ащели невозможно починити столбцов не снимая сорочки со антимисом. то вервь и сорочка со антимисом со престола сняти. и починов столбцы, и дска, и прочая обетшавшая. и уготовив вся, святити церковь священием всем. якоже и новая церковь. сорочка же и вервь, и индитня, аще тверда, прежде бывшая на престол возложити. А антимис прежде бывшии, в столбец положити под престолную дску, а на сорочку возложити новыи антимис;

 

О падших во отступление презвитерех. понеже по покаянии своего прегрешения не может священнодействовати но яко простолюдин въчиневается. глава, 31.

 

Кормчая лист, 18. Святых апостол правило, 62.

Отметник Христов отверженныи, причетническаго имене отвергиися, и обратився паки, яко простыи человек приимется;

Толкование. Аще которыи причетник страха ради человеча жидовска, или еллинска, или еретическа, отвержется имене Христова, весма от церкви да изринется. аще же не Христова, но имене причетническаго отвержется причетник сыи, сиречь убоявся епископ речет, несмь был, ни хощу быти епископ. такоже и презвитер и диякон и прочии пречетник аще отвержется, своего имене, да извержется от сана своего. обративжеся паки и каяся яко мирскии человек да будет приятен.

 

Перваго вселен. собора. правило, 10-е. [лист, 36].

Отпадшии, или неведящим, или ведящим поставльшим их поставлени бывше, да извергутся;

Толкование. Господа нашего Iсуса Христа, отвергшихся и покаявшихся, в священичество прияти не подобает. како бо может святитель быти таковыи, иже святых таин во все время живота своего недостоин причаститися, аще токмо смерть не приспеет. аще же неведущу поставляющему, или ведящему, священничества сподобится. сие правило изврещи повелевает таковаго, аще и по поставлении уведен будет еже бо беззаконно бывшее, правила не вреждает.

 

Поместнаго собора Анкирскаго, правила, 1-е, и 2-е. лист, 42.

Презвитери и диакони, пожерше идолом и потом истинным сердцем обратившеся, токмо места и чести да приобщатся, никакоже к святым прикасающеся.

Толк. Елицы убо от презвитер и диакон, во время гонения понуждени бывше пожрети идолом и потом истинно приступиша паки в соборней церкви, кающеся о них же согрешиша, токмо седания и чести сподоблени быти должни суть; священическое же что соделовати, недостойни суть; якоже се, хлеб, или чашю принести, или слово учения к людем сотворити: и отнюд ничтоже от святыя службы сотворити.

 

Ис книги Матфея Иерос. состав А, глава, 1.

Первое убо и второе, иже во Анкире собора правило, иже страха ради мук, пожерших презвитер или диакон, таже въспять обратившихся рекше покаявшихся, и пред мучители Христа исповедавших чести убо причастником быти, и седалища не оставляет;

 

Того же состава, А. глава, 1.

Великии Афанасии, во еже ко Руфиану епистолии, приобщившихся иже Ариева мудрствующим. священником рече. иже убо нуждею низложени бывшеи, правилне убо исправляются, места же его же, получиша чина не изгоняются, и паче аще помысл никако имяху онем сослагающия яко же реша, строения же ради приобщатися покрышася страхом еже не растлитися церквам, злочестивых въведением в тех место: онем заточеннем со благочестием бывшем. а иже ко приобщению и о нечестии подвизающеся, и спомогающе елика сила не теми же запрещеньми покаявшеся низлагаются, но обнажени бывше священьства в людских въчиняются стране.

 

[Никон Черногорец, слово 28].

И малых падениих и великих, и покаянии испадших священник, в первом твоем послании, вся изложена быша о Господе, яко покаяние грехи очищает, а не священство подает;

 

Ис книги Зонаря в главе, 125-й.

Аще кто от христиан сыи во время гонения отступят от православныя веры страха ради. потом паки приидет к православней вере, таковыи да не будет иерей отметнувыи есть, уже ктому да не будет иерей, но да приидет на покаяние;

 

Ис книги, Кормч. лист 261, прав. 9. Петра Александриискаго.

Иже от причетник своею волею на подвиг пришедше, и многих ради мук бежавше, от службы да останутся како бо может служити оставивыи стадо егоже ни един от апостол не сотвори;

 

Никон Черныя горы от послан. слово, 27.

Яко в достойно извержению согрешение въпад священник, или ин причетник, не ктому покаянием причет возприемлет покаяние бо грехи очищает а не священство подает.

Ниже: Аще и единою падение будет, и подвигнется каятися, яко и мертвыя воскресити, но невозможно есть священнодействовати. причащения же божественных таин не лишают;

 

Яко без ставилнаго писания чюждь и неприятен есть презвитер. глава, 32.

 

Кормчая лист, 8. на об. святых апостол прав. 33-е.

Чюждь презвитер без ставилнаго писания неприятен. аще же и имать, да испытается, аще правоверен есть ащели ни, потребная на путь взем да отпустится;

Толкование. Без ставилнаго писания не подабает чюждаго презвитера приимати. ставилное же писание сицевое есть, котораго града епископ, и како имя ему, и како имя презвитеру, и по святым ли правилом поставил его. и с миром ли отпустил аще же и таковое писание носит, то и тако подобает вопрашати и испытати его, и аще без всякаго извета правоверен обрящется, прияти его достойно. ащели некая противная правоверию глаголет и творит, подобает таковому потребная на путь въдати, и отпустити его;

 

Поместнаго собора Лаодикиискаго. правило, 40.

Причетник бес правилных послании, и бес повеления, пути да не шествует;

Правило, 41.

Неподобает священнику, или клирику, бес повеления епископля путь шествовати;

Толкование. Священная правила не пращают во ином пределе поставленнаго презвитера или диакона, в друзем приимати, аще ставленных грамот не имеют. сего ради нужда есть ходити тем с правилными грамотами, на нихже поставление их написано есть. такоже и причетником коеяждо соборныя церкве, по воли и повелением епископа своего, в другии град или во область отходити.

 

Вселенскаго собора, 4-го правило, 13.

Причетник без ставилныя грамоты, во ин град пришед, непричастен.

Толк. Се во многих правилех речено есть. аще от иного епископа поставлен презвитер, или диакон во ин град приидет, не имыи ставленыя грамоты от епископа своего, несть прощен служити;

 

Того же собора, правило, 11. в толков.

Ставилная же послания причетником даются: да егда хотят приити во ин град презвитери, или диакони, вънити в причет того града церкве, да имеют от своего епископа ставильная послания, рекше грамоты, в них же есть написано поставление их и свидетельство, яко непорочни суть житием и правоверием, и показавше града того епископу, и тако прияти бывают.

 

Вселенскаго собора, 6-го. правило, 17.

Приемляи чюждаго причетника, и поставляяи, с поставленым зде, и сам да извержется;

Толкование. Никтоже от причетник без воли своего епископа, во иную церковь причтен быти мощен есть. еще которыи епископ чюждаго причетника приимет, без отпустныя грамоты своего епископа, и в свою церковь причтет: аще в том сану, в нем же бе имать его. аще в болшии степень поставит его, рекше презвитера, или диакона, да извержутася оба.

 

Седмаго вселен. собора, правило, 10.

Причетник оставив свою землю, и на иную страну отшед, без повеления своего епископа, и Констянтина града, да не будет прият ни в дом, ни в церковь, сеже творя и пребывая, да извержется, аще же сведением еже рекохом се сотворше, мирских попечении на ся да не приимут. ащели прияша, да останутся. не оставшиижеся, да извергутся.

От толковании. Чюждаго причетника пришедша в Царь град без повеления епископа его, и Константиня града патриарха, не подобает в кии любо дом, или в церковь приимати. аще же от некоего прият будет, без ведения сею, и пребывает нехотя обратитися в свою страну да извержется;

 

О еретической хиротонии, яко оная от святых не приемлется. глава, 33.

 

Кормчая, лист, 19. святых апостол, правило, 68-е.

Дващи поставленыи, и с поставльшим его да извержется, аще не будет токмо еретическая рука первая.

Толк. Аще которыи епископ или презвитер, или диакон, второе поставление приимет от кого, перваго возненавидев, да извержется сам, и поставивыи его, аще токмо не прилучится, яко от еретик поставлен бе первие. ибо от тех крещении, некрещени: и поставленни, не причетницы;

 

Ис книги Никона Черногор., слово, 63. на святых апостол, правило, 68-е.

Аще которыи епископ или презвитер, и диакон. второе поставление приимет от некоего, да извержется и той и поставивыи его. разве аще обьявлено есть яко от еретик имать рукоположение. от таковех бо поставленом, или крещенном, ниже верном, ни причетником мощно есть быти.

 

Ис книги Матфея Иеросалим. состав, глава, 14. на апостольское правило, 68-е. [состав Х, глава 24(?)].

Шездесят осмое святых апостол правило, иже второе от кого хиротонию приемшаго, епископа или причетника изметати повелеваем и того хиротонисавшаго. аще сведяше с ним; Разве аще от еретик хиротонию приял бе первее, отметаем бо таковых, якоже крещение, сице и хиротонию, небо освящение се но скверну веруем исходатайствовати. Вторую же покушающеся прияти хиротонию, или яко в первому хиротонисавему зазирая се творит, или яко уповая множайшая восприяти от втораго благодать. или яко отступль негли священства и истинно похиротонисатися смышляя, еже есть беззаконно.

 

Ис книги севаста Арменополя книга, 5-я. вопрос, 30.

Аще еретик иерей, или диякон, сподобитися божественнаго и святаго крещения, или святым миром освятится. будет ли священнодействуя с первейшою хиротониею его или другия сподобится хиротонии, аще восхощет священнодействовати.

Ответ. ниже. Первейшому иерейству скверне непщуемои, и яко небывшу вменяему. Ниже. И сыи некогда скверныи иерей, в последнейшом своем житии, неосужден возъявится, сподобится не точию иерейскаго достойнства, но и епископскаго. обычными всяко степеньми, на учительскую высоту возводим;

 

Кормчая лист, 293. От послания Константина града собора. к Мартирию епископу Антиохиискому, о том, како приимати еретики приходящыя к соборнеи церкви;

Арианы, македонианы, и наватианы глаголющыя себе чистыя и чистеишыя, и четыредесятники, рекше средники, аполинарианы, приемлюще написующих свою ересь. и проклинающе ю и ину всяку ересь, немудрствующую, якоже и соборная церковь, помазуем их первое святым миром, чело, ноздри, уши, перси, и вся чювъства помазующе им, глаголем, печать дара Святаго Духа. и потом потщаливии мирстии человецы поставляются в сан, в нем же беша, или презвитери или диакони, или ино что;

 

Ис книги севаста Арменополя, 4. неявленых патриарха, 1-е, послание, писаное от Константинополя. Мартирию епископу Антиохиискому о еже како подобает приимати еретики приходящия святеи кафолическои церкви.

Некая разглаголаше ми боголюбезнеишии презвитер Антонии о прилагающихся к православию, и части спасаемых от еретиц. како приемлем сия, и по лицу убо ему разглаголах все зде последование, и обычаи. и вашей же святыни нуждное непщевах во знаменити отцу отец, отродну святаго Иоанна Богослова, бывшаго архиепископа нашего. яко убо арианы, и македонианы, и наватианы глаголющия себе чистыя, и чистишая, и дитекарекедекатицыты или тетрадиты, и аполинарианы. приемлющем дающыя книжцы и анафематьствующыя всю ересь. немудрствующих якоже мудрствует святая наша кафолическая церковь. еяже председатель, и глава еси блаженнейше печатьствуемыя, или помазуемыя, первейше святым миром, чело и ноздри и ушеса и перси и вся чювства. и печатьствующе я глаголем. печать дара Духа Святаго. и посих, яко тщаливии людини хиротонисаются оное еже быша у самых первее. аще же презвитери, аще диякони. аще же иподдиакони; аще же псалмочетцы.

 

Той же, 19. перваго. от книги, 1.

Павликиане да воскрещеваются, и аще непорочни и паки да хиротонисаются, аще и предхиротонисашася.

 

Правило, 4-е. 2-го. вселенскаго собора.

Максим глаголемыи киник. от епископов чюждь, и всяко несвящен, иже от него в причет прият бысть.

Толкование. Сей Максим киник сказается безстудныи. церковь Божию раздра, и многаго мятежа и молвы сию исполни. волк въместо пастыря явлься, и вся грехи прощати готов согрешающим. единаго ради еже нечествовати в повелениих, рекше преступати заповеди. якоже глаголет великии богословец Григории, чюждь убо сии Максим от епископства да будет, и вси от него поставлении презвитери, и диакони, и прочии причетницы чюжди священия.

 

Кормчая гран., 12. лист, 50. на об.

О Нестории, и о Моисеи, и Евтихиане, и о Максиме, и о Порфирии, и о поставленых от них еретик, и о правоверных изверженых от них: правило собора 2-го вселенскаго, 4, лист, 86. собора 3-го, всел. 1, 2, 3, 4-е, лист 89, и 90. собора в Сиредце 20, лист, 114.

 

Ис книги Матф., Иерос., состав, А. глава, 2.

Но и четвертое правило, 2-го собора, Максима некоего отметает, ниже епископу тому быти, или будущу тому отрицает. за еже не в закон правилнаго устава поставлену быти ниже еже от него поставленом клириком быти;

 

Поместнаго собора Сардикиискаго, правило, 20.

Неприятен причетник, не пребываяи в своей церкви, в нюже въчтен бысть. Евтихиан же и Моисей епископскаго имене не приимет, общения же с мирскими человеки равно сподобится.

Толкование. Многими правилы се речено есть, и просто рещи всеми соборы. яко не приимати чюждаго причетника, и в свою церковь степень въводити того. тому убо учит и се правило Евтихиана же и Моисея епископа расколника бывша и извержена, аще покается, и епископскаго взыщета сана, или имене в том да не послушана будета. аще же хощута приобщитися яко мирьстии человецы, да будута прията.

 

Вселенскаго 3-го собора, правило, 7.

Иже к никейстеи вере иную, прилагает. епископ убо чюждь епископии: мирскии же человек отвержен.

Толкование. Иже паче веры, яже святии отцы никейстии съшедшеся изложиша, еже есть верую во единаго Бога. к сему аще ино сложение зловерно приложит кто, на развращение и на погибель, иже от еллин, или от жидов, или от иныя ереси обращающихся в разум истиныи, аще же есть епископ, или причетник от епископии да будет изгнан и от сана извержен.

 

Ис книги Дионисия Ареопагита, часть, 3.

Разумевше же яко безчинне и кроме уставов священных во святая въскочи. Ниже. От тех, ниже вид, ниже слышати, ниже имети веруется. аще и руками тех касается, аще и подобная творят, вне своего чина и достояния.

 

Ис книги Максима Грека, глава, 37.

Римскаго убо папы, яко отпадшаго лика православных архиереов рукоположения отвращатися и отметатися достойно и праведно есть, и нужно зело.

 

Никон Черногор. слово, 63. на прав., 1-е Василия Вел.

Иже от церкве отступльшеи не ктому имеша благодать Святаго Духа в себе оскуде бо подаяние, внегда пресещися последованию; Ниже: Ктому не могуще благодать Святаго Духа инем подати от неяже тии отпадоша.

 

[Максим Грек, глава, 60].

Оно же буди ведыи яко всяка началника и учителя имать диавола.

 

[Соборник малыи глава, 14. Зиновии мних].

Имать бо всяк еретик в себе дух диаволь, тем и противитися Святому Духу.

 

[Ис книги преподобнаго Иосифа Волоцкаго, слово, 12].

Кроме благодати Святаго Духа, ничтоже может кому сотворити от священных. еретицы же в себе нечистыи дух имеяху сатанин.

 

[Из минеи четии генваря в 21 день, от жития преп. Максима Исповедника].

Убо иже сами от себе прокляти суть. и от поместнаго собора бывшаго в Риме извержени, и священства отчюждени; тии кая совершают таиньства. и которыи дух приходит на тех иже от таковых хиротонисаются;

 

[Минея чет. Макар. мит., генваря, в 25 день. от жития Григория Богослова].

Посылаше въписав к Лидонию презвитеру мужу благочестиву и угоднику присному Божию, и другим неким. яко не приимати пагубы еретическия и поставления. и отметати Аполинария яко страны соборныя церкви.

 

Минея чет. старопис. декабря, 5. от жития святаго Савы освященнаго.

Да верует твое державство, еже глаголем пред Богом, и пред избранными ангелы, яко никоим же словом, ни образом пристанем к злым онем расколником. не отступим же законнаго правилнаго чина. ни приложения сотворим святей апостольстей вере ни по коемуже образу. на лице еретик хиротонисаемо когда приемлем. еще се будет нуждею на нас грех ради наших. то крови наша усердно пролием о сей святей вере.

 

От жития преп. Феодосия Великаго. [генваря, в 11 день].

Не приемлем бо новых догмат, но предварших отец законом воследствуем. а иже кроме сих иная защищати прияша, тех благочестивне отметаем, и проклятию предаем. и хиротонисаемаго от безглавных, ни единаго понужде приимем не буди нам то о Христе Царю.

 

[Пролог марта. 8 день. в житии Феофилакта].

По божественному жребию, Тарасии възыде на престол Констянтина града, и божественыи архиерей показася. Павлу же Кипрскому волею исшедшу с престола. занеже от иконоборец архиерейство приемшу, и недостойна себе нарекшу;

 

[От жития Аникия Вел. нояб. 4. мин. чет. Макар. мит. Моск.].

Яко по проклятии иконоборныя ереси и по утвержении благочестия, воставше нецыи от нечестивых восхотеша въвести в церковь рукоположенных от иконоборец, и того ради быша людие в великом смущении и разделишася в две части, и того ради и сам Мефодии патриарх был в велицеи скорби, к ним послание писал великии Иоаникии и совокупи всех воедино;

 

Яко на мзде хиротонисаемаго, и хиротонисавшаго церковь православная из санов извергает, и не точию извергает, но и горее Македония духоборца быти сказует. глава, 34.

 

[Кормчая, лист 7 на об. святых апостол правило, 29].

Иже епископ или поп, или диакон, имением приял будет сан, да извержется сам и святивыи его.

Толкование. Зде вкупе два запрещения дает, поставленому по мзде, и поставльшему его обою измещет от сана. кътому же и еще всегда непричастнома быти повелевает, и от церкви отлученома за таковое великое прегрешение. по мзде поставльшему и поставленному горе.

 

Вселенскаго 4-го собора, правило, 2.

Купяи и продаяи поставление, даже и до церковнаго ключаря. своих степене да отпадут: ходатайствующии же, причетницы убо сана да отпадут, мирстии же человецы, и черноризцы да будут прокляти.

Толкование. По Великому убо Василию, горее есть Македония духоборца, иже непродаемую Божию благодать продает. того ради убо, аще которыи епископ поставит кого по мзде, или епископа, или презвитера, или диакона, или иного некоего вочтенаго в причет чюжди да будут своего сана. и еще же и ходатаиствующии о таковых поставлениих; аще убо суть причетницы, да отпадут своего сана, аще же мирстии человецы, или мниси, да будут прокляти.

 

Вселенскаго 6-го собора, правило, 22.

Епископ и презвитер и диакон и всяк причетник поставлен быв на мзде, да извержется и с поставльшим его.

 

Тоя же книги, глава, 36. правило, 29. святых апостол. [лист, 284].

Аще кто епископ или поп, или диакон. имением приял будет сан, да извержется той сам, и поставивыи его и да отсечена будета всячески от общения, и от церкве отлучена, яко Симон волхв от Петра; [лист, 279] Продаяи и купуяи на сребре священство, оба проклятию анафемы подлежат. [лист, 282] Злее Македония духоборца, поставляяи на мзде во священство согрешает; [лист, 278] Аще кто исходатайствующии явится в срамных сих и неправедных взятиях, и той [аще убо есть клирик] степене своего да отпадет, аще же людин, или мних, проклят да будет; [лист, 286] Жидовскии обычаи продаяти и куповати священство; [лист, 277] Не творите дому Отца Моего дом купли, иже голуби продающим Господь рече; святителей назнаменуя, дары Духа Святаго продающих: понеже в видении голубя божественыи явися Дух, богокорчемников изгоняющ; [лист той же, на об.] Приял еси священство образом несвященным, священства недостойне, пенязьми украв вещ небесную, вторыи Кайафа, сребром неизреченныя тайны купив; [лист, 288] Всяк убо иже священство купуяи, Кайафа христоубийца обретается; [лист, 289] Поставляемых на пенязех, аще епископов или коих любо клириков и не по испытанию и избранию жития, изврещи повелеваем; [лист, 291] Симонова же ересь, сугубое ятому грехом сим, наводит осуждение. Епископом Симоновою ересию, неподобает ухапленым быти сиречь мздоиманием;

 

[Номоканон, правило, 2. лист, 15].

За сребренники рукополагаяи, на кии любо степень с рукополагаемым да извержется, и отлучится по двадесят девятому правилу святых апостол.

 

Той же лист, 60, на об. прав. 29. святых апостол.

Аще кии епископ достоиньства сего приятель бысть, или презвитер, или диакон, да извержется и той и рукоположивыи, и да отсечется общения всячески, якоже Симон волхв, от мене Петра. правило, 35. аще кии епископ, мирскии князя поем, тех ради держатель будет церкви, да извержется и отлучится, и сообщающиися ему вси. Ниже: Легчайшии паче есть Македонии, и от него духоборец злочестивая ересь, нежели продати дерзающии. благодать Всесвятаго Духа. тии бо убо тварь и раба, Богу и Отцу Святаго Духа буесловят. сии же своего якоже мнят. раба того творят си. иже бо кто нечто продает. и купуяи владыка быти хотяи и купующаго сребром сего стяжав ценою. прилагает. яко сих согрешение равно есть Июде предателю. тако смышляющих. аще бо единосущен Сыну Духа есть. и единочастен, осуждается Июда Сына продаяй на сребре. нужно есть негли. и Дух Всесвятыи продающим, не менши оного казнити подъяти;

 

От жития святаго Иоанна Златоустаго.

Обрет же Иоанн патриарх и другия шесть епископ во Асии, купивших епископство, и тыя же вся божественным уставом изверже, якоже и достояше. Выше. тако обычаи жидовеск будет, куповати и продавати священничество;

 

О сем за множество писания, в Кормчеи, главу, 36-ю. Никон 35. В Матфеи, состав, Х. И Номоканон, лист, 60 на об. [зри];

 

Яко хиротония и прочия тайны без креста не совершаются. глава, 35.

 

Ис предисловия Грамматики, Киевския печати року, 7103.

Замыкает в себе крест Христов всю таебницу благоверия нашего.

 

Ис книги бесед евангельских на Матфея нравочение, 54.

Яко венец сице да обносим крест Христов, ибо вся тем совершаются, яже понас аще породитися треба будет крест приходит; аще и напитатися тайньственою оною трапезою, аще и рукоположитися, аще и яково ни буди ино что сотворити, везде одоления нашего предстоит образование;

 

Из бесед апостольских к филипис. беседа, 13.

Сим вся совершаются крещение крестом подобает восприяти, печать рукоположения крестом. аще и на пути будет, аще и в дому, или идеже аще когда любо будем, велие благо крест.

 

Ис книги Симеона Фесалонитскаго слово, 62.

Тем же и совершенно творитель сам крест, и без креста ничесо совершается божественных тайн.

 

Того же, глава, 171. о хиротонии.

В первых убо абие приведена, знаменует трижды: еже есть, начаток освящения и хиротонии. потом паки знаменает трижды, по призвании божественныя благодати действуяи на нем чрез крест;

 

Маргарит рукописанныи превода Андрея Курпскаго. в неделю 3-ю, поста.

Но яко венец да обносим крест Христов, ибо вся яже по нам чрез него совершаются. аще и возродитися возтребствует крест приписует. аще напитатися тайньственою оною пищею, аще хиротонисатися, аще что либо иное сотворити всюду нам знамение крестное предстоит;

 

О Иоанне патриархе Иеросалимском. глава, 36.

 

От жития святаго Савы освященнаго;

Царь Анастасии нудяше Илию архиепископа, Иеросалимскаго, [Севира] прияти. он же никакоже обещася се сотворити. воскипе же гневом царь [Анастасии] посла некоего Алимпия именем, власть имуща в Палистине. со принесеньми от Сидонскаго собора уставными писаньми исповедающими не приимати Халкидонскаго собора, да всячески Илию архиепископа Иеросалимскаго из епископии изжденут. той же Алимпии, силою царевою пришед, и многоразличием и лукавством реченная грамоты явив повелевающа изгнати епископа, и многою областию Илию архиепископа изгна из Иеросалима, и ко але отпусти, Иванна же Маркионова сына обещавшася Севира прияти, и собор Халкидонскии прокляти. епископа во Иеросалима постави. в 1 день септеврия. Слышав же се святыи Сава, и прочии пустыннии отцы, тако обещавшася Ивана. собравшеся советоваху ему Севира во общество не приимати. но о Халкидонском соборе твердо стояти. имущии их всех помощники себе. и тако Иван еликося обещал хулу творити, преступити обещание свое. отцев постыдеся. царь же Анастасии слышав Иванна свое слово преступивша. зело разгневася. посла Анастасия Дукса, власть имуща Палестинскую со многою яростию, да сотворит Иванну Севира во общество прияти, а собор Халкидонскии прокляти. или от епископия изгнати. он же пришед во Иеросалим внезапу, и ем Иванна вверже в темницу, яко обругавша царя гражданя же порадовашася того ради. понеже бысть предатель архиепископу Илии. Захарии же некто, старейшина граду Кесарийску, яко ущедрив Иванна. вниде отай к нему в темницу. и советова ему глаголя. аще хощеши добре сотворити, и Севира во общество неприяти, и епископства не лишитися. сотвори сие еже обещатися Дуксу, яко велимая ти им сотворити, и да не понужи ведет тя отселе, рцы, испустите мя отсюду. и по двою дню недели сущи сотворю со тщанием яже вами повеленная, и тако Ивану сотворшу, верова Дукс словесем его, и обрати его паки во церковь. он же пущен быв, во едину нощ вся черноризца собра во святыи град, и бысть число чернеческаго чина, яко 10000, и яко в церковь немещати их. и угодно бысть всем собратися во церковь святаго первомученика Стефана велицей сущи и доволне въместити множество народа. еще же и срести хотящим Ипатия царева братана, тогда от пленения пущена, и во Иеросалим поклонения ради пришедша. и совокупишася в реченней святей церкви, иноцы и мирстии. Прииде же и Анастасии Дукс и Захария Иватик. такоже Ипатию пришедшу. и архиепископу со множеством народа вшедшу в церковь. Надеющуся Дуксу, яко по повелению цареву быти. архиепископ же взыде на амвон. поим с собою святых Феодосия и Саву, верховники старейшины всему чернеческому чину. весь же народ на мног час вопияху глаголюще, еретики проклени, а соборы прослави, и оправди, тогда скоро вси трие согласне прокляша Нестория, и Евтихия, и Севира, и Сотирика Кападокиискаго и всех неприемлющих Халкидонскаго собора. сим же трием се изрекшим, паки Феодосии и Сава, испустиста глас сице, глаголюще, иже не приемлет четырех собор, яко четыре евангелисты, проклят да будет. Сим же тако бывшим, Дукс убоявся множества чернеческаго отбеже в Кесарию. Царь же Анастасии слышав бывшая во Иеросалиме, уготовися с силою архиепископа Иванна, и Феодосия и Саву, возшедшая с ним на амбон, игнати из своих мест. И сей вести во Иеросалиме услышанней бывши, и абие чернечестии старейшины, Феодосии и Сава, собраша вся черноризца пустынныя, и единем умом здумавше, писание с молением послаша ко царю; имуще сице:

Боголюбивому, и благочестивому, августу самодержцу, царю Анастасию христолюбцу. Моления от Феодосия и Савы архимандрит, и от прочих всех черноризцев, живущих во граде Божии Иеросалиме самом, и около града Божия, оба полы святаго Иордана, и во всех пустынях. И проч. И паки. [Минея четия старопис.].

Никтоже нас повинути может, аще и многи смерти предложит нам. Богом на сих утверждающимся. уверения же ради державы твоея, и се приложим к глаголаным. аще кто мнит о нас яко Несториева учения ереси, и Евтихова причащаемся; и сим подобных еретик; проклят буди Нестории, со всею своею ересию, и послушающии его. иже единаго Господа Iсуса Христа Сына Божия единороднаго истиннаго Бога нашего, два сына помышляющи, иного от Отца Бога Слова. иного же иже от святыя присноДевы Богородицы Марии. прокляти же буди и по Евтихию и иже вочеловечение не по истинне но по мечту, и привидению быти глаголющии, и прочим подобным сим еретиком всем. сего писания известие приемши, твоя держава. от всех нас смиреных да повелит твое благочестие утолити злобная сия безчиния на святыи сей град, и на архиепископа нашего Иоанна, востающая от врагов истинны: Да верует же твое державство, еже глаголем пред Богом, и пред избранными ангелы. яко никоим же словом, ни образом пристанем к злым онем расколником. не отступим же законнаго правилнаго чина. ни приложения сотворим святеи апостольстеи вере, ни по коему же образу. ни лице еретик хиротонисаемо когда приемлем. аще се будет нуждею на нас грех ради наших. то крови наша усердно пролием, о сей святей вере;

 

От жития преподобнаго Феодосия Великаго минея чет., генваря, в 11 день. [Писан. преподобнаго Феодосия к царю Анастас.].

Не приемлем бо новых догмат, но предварших отец законом последствуем, а иже кроме сих иная защищати прияша. тех благочестивне отметаем и проклятию предаем. и хиротонисаемаго от безглавных, ни единаго понужде приемлем, не буди нам то о Христе царю. прибуди;

 

О Пирре Константинополском. патриархе. глава, 37.

 

Баронии в лете Господнем, 645-м. лист, 766.

Сего лета во Африце, егда Пирр оныи Констянтинопольскии патриарх, сущь во изгнании, хотяще ересию своею церковь повредити. и от истины отводити. Сопротивися ему Максим святыи авва, а потом мученик, с которым явно пред всеми епископы и игемоном Григорием патрикием и господами честными, в месеце июлии, во граде Карфагене прение сотвори. Которое целое вернописанное, и в книгохранилнице витиканской греческо хранимо есть, даже до сих наших времен. И преложи е на латинскии язык Францсктуриан Езунт; все целое на обоих языках. Сим прением Пирр побежден покорися и на отречение своих ересей, в Рим к папе Феодору пойде. Идеже егда вся ереси прокля, почте его папа. и на патриаршество Констянтинопольское возвращен бысть. и при олтаре папа престол его, при своем постави, почитая его яко патриарха Констянтинопольскаго.

 

Минея чет. апреля в 14, день. От страдания святаго Мартина папы Рим.

И вопрашаху святаго о Пирру прежде бывшем патриарху, свободною ли волею своею бе в Риме, и сотворил отрицание своея монотелитския веры, и како Феодор преже бывыи папа прият его. святыи же Мартин сказоваше им вся яже о Пирру подробну. яко свободною волею в Рим пришедши подаде на хартии свое неправыя веры отрицание, и аще паки потом на свое первое зловерие возвратися. и яко от папы Феодора честне прият бысть яко епископ, и всеми потребными удовлен.

 

Генваря в 21, день. от жития препод. Максима Исповедника.

Убо иже [единоволники] сами от себе прокляти суть, и от поместнаго соборе бывшаго в Риме изверьжени, и священства отчюждени; тии кая совершают тайньства, и которыи Дух приходит на тех иже от таковых хиротонисаются;

 

О святем Тарасии патриархе Цареградском. глава, 38.

 

От жития Тарасия патриарха Царя града. [февр. 25, день].

И со всеми святыми отцы, иже бе, 360 и 7 святейшии Тарасии. в Никеи сошедшеся, собор вселенскии седмыи состави, в пространнеишей того града соборней церкве. Бысть же первое святых отец седение, месяца септеврия в 24 день в память святыя первомученицы Феклы. Идеже святейшии Тарасии сотворив предисловие, коея ради вины суть собрани. увещаваше епископов, да судят праведно, искореняюще неправославная учения, в церковь ново внесеная. таже чтомо бе царское к собору писание. в нем же воспоминашеся патриарх Павел како при кончине своей советова, да соборным судом иконоборная ересь отвержена будет. благословиша же святии отцы царя и матерь его, яко таковое о православии сотвориша попечение. Посем епископов в ересь впадших, послушаемо беспокаяни обращение, и православия исповедание. и приято их бысть покаяние. И место им в соборе между епископы православными дадеся. Инемже не весма ереси отмещущимся суд на иное время отложися. глаголаше бо святыи Тарасии, состаревшиися болезни, и обыкновенныя злыя нравы, неудобно исцелеваеми бывают. обаче и тех потом истинно покаявшихся. святыи собор прият и не отстави их от санов их.

 

Баронии в лете Господнем, 780-м.

Яко умершу царю Лву злому на иконы святыи гонителю наста сын его Констянтин десятолетен с материю Ириною. И в сие время державы приятия царства их всякому невозбранно было Господу Богу служити, и православное учение проповедати, глаголати же с еретики и препиратися о чести икон: о чем при Лве и уст отверсти было не мощно. откуду и признатися возможно есть яко и в самой царице немалая бяше о благочестии склонность, негли се наипаче по предъувещанию онаго Иоанна Готфскаго – в ней явися читаем июня 26. негли же и Павлово в 5 лето державы тоя бывшее увещание поможе ей ко истинному взысканию благочестия. Откуду и мысляше Ирина со иными своими, кого бы сыскати на умирения бедств оных и на устроение собора вселенскаго онаго: но никогоже обретоша токмо сего Тарасия секретария кесарскаго но мирскаго. котораго егда на сие преклоняху, отнюд соизволити не хотяше и тогда нужда бысть ей весь народ духовнаго чина и мирскаго собрати в полату Магиавру: и егдаже собратися им, рече: весте что сотвори Павел, поищем церкве добраго учителя. и возопиша вси, никтоже ин может быти токмо Тарасии. Тарасии же изыде к ним и сице глаголаше о себе; вижду раздрану церковь Божию, а восточнии и западнии проклинают нас. Тяжка вещь есть клятва и отлучение от царствия Божия, едино крещение, едина вера, едина церковь православная. Ничтоже тако Господу Богу приятно, якоже сие егда вси едино есмы. аще собор вселенскии устроен будет, да вси соединени пребываем: аз соизволяю, аще же сие не будет: аз проклят, и на суде Божиим от него же мя ни един кесарь свободити может, осужден быти не хощу. То слышав вси, на собор соизволиша. Посем Тарасии на патриаршество посвящен бе егда уже от всех чинов имяше обещание.

 

От жития святаго Тарасия: о Павле патриархе. февраля, 25 день.

Патриарх же бе Павел кипрянин муж добродетелен и благочестив, но боязнив. Ниже: И разболевся отъиде от дому патриаршаго тай, в монастырь святаго Флора, и прият на ся святую схиму. Сотворижеся о том вестно всюду вскоре, и вси бяху в велицем удивлении. опечалися же царица Ирина, яко патриарх то сотвори никомуже возвестивше. и прииде к нему с сыном – царем Константином, и вопрошаше его: что сотворил еси отче: и коея ради вины; отвеща: болезнь моя, и чаяние – скорыя смерти, в сей святыи схимническии образ приведе мя. а наипаче церковное смущение и безобразие, принуди мя оставити престол патриаршии, понеже болезнует церковь ересию образоборною, и от долговременнаго злаго мудрования. прият язву неисцелну, и аз окаянныи трижды уже рукою моею и чернилом соизволих на то еретичество, ниже бо возможно ми бысть избежати сетей зловерия, но случися – и языком и рукою увязнути в ня, чесого ныне зело каюся. а еже множайшею и безмерною печалию уязвляет мою душю, сие есть: вижду вся страны всея земли, правило неподвижимое соблюдающе и в православном учении пребывающе и веселящеся, чюждаются церкве нашея, и от себе яко от Христова стада, нас яко чюждых овец отгонят, и того ради отрицаюся пастырь быти еретическому сонму.

 

[Ис Пролога марта в 8 день. от жития святаго Феофилакта].

По божественному же жребию, Тарасии взыде на престол Констянтина града. и божественныи архиерей показася. Павлу же кипрскому волею изшедшу с престола, зане от иконоборец архиерейство приемшу недостойна себе нарекшу.

 

[Во Псалтыри со воследован. октября, в 11 день].

Подобает ведати, яко в приидущую неделю, память святаго апостола Филиппа, поется служба, святаго вселенскаго собора 7-го, иже в Никеи собравшагося второе, святых отец 367. на потребление, и на посрамление бузбожных предании, христоненавидец и християноукоритель, иконоборец Копронима же нечестиваго, и окаянных его епископов и неосвященных его архиерей, и того безбожнаго и окаяннаго собора;

 

О Мелетии патриарсе Антиохииском. глава, 39.

 

Мелетии сей Севастиискии епископ житием и словом славен зело: безчинии же ради сущих под рукою его, отрекся епископии и бысть в безмолвии. Тогда еретицы мневше, яко мудръствует с ними Мелетии: Испросиша его у царя, да будет им епископ, еже и бысть.

 

В житии святаго Мелетии, февраля, в 12 день.

Мняше ариане Мелетия единомудренная им быти, и надеяхуся, яко к томужде их мудрованию, и евстафиан приведет, [тако бо християн нарицаху], и всю Антиохию научит догматом арианским. Составльше нань общии избрания суд утвердиша писанием своих рук и увериша святому Евсевию Самосадскому, мужу правоверну, на соборе том бывшему, и пославше моление ко святому Мелетию, моление с царьским соизволением, приведоша его во Антиохию с великою честию. Ниже: И посажден бысть Мелетии святыи на Антиохиискаго архиепископстве престоле.

 

[Баронии в лете Господнем 360: на листе 287-м, пишет, от истории Феодоритовы].

Яко Евсевии Самосатьскии епископ православныи, отай на оныи престол Антиохийскии Мелетия [ведая каков бе внутрь] устрои, и писание избрания его у себе держаше. егда же епископи во Антиохию на извержение Мелетиево собрашася: Посла кесарь ко Евсевию, дабы оное писание возвратил. Аще же не восхощет отсещи ему руку. [обаче не веляше ему руки отсещи, токмо тако его устрашаше]: он же обе руце простре, глаголя: не единыя, но обоих да лишуся, а писание на совершение злобы арианския не дам. Прия сие в сладость Константии [кесарь] и сию его добродетель похвали;

 

О Нестории. глава, 40.

 

В толковании пяти правил, 3-го. вселен. собора.

Егда собрашася святии отцы на Ефестем соборе, и нецыи от митрополит отлучишася от правоверных, и мудроваху повеления еретическая, злочестиваго Нестория епископа Констянтина града, в человека верующаго, и жидовская смышляющаго и Келестина епископа Римскаго. Нецыи же от епископ осташа и не приидаша на собор, и не восхотеша осудити, ни прокляти, не освященную сию и злочестивою епископу но паче побараху и помогаху им. Сего ради убо повеле святыи собор, помогающих Несторию, и Келестину, и тою ересь держащих, и тако смыслящих, изврещи от сана и от церкве изринути. епископом же и презвитером, ихже бе Нестории и Келестин, от священничества извергл, занеже право мысляху и вероваху тем паки прияти свой чин. такоже паки и иже от своих епископов извержени быша, зане кая злая дела, и от Нестория и от Келестина, прияти и оправдани быша, паки несвящени: и абие да извержени будут.

 

Баронии в лете, [428-м].

Нестории сей прежде неже взыти ему на престол Константинопольския церкве, иерей бяше Антиохии града, муж сущь великаго жития и премудрости. И тоя его ради славы, по смерти Сисиниевы царь Феодосии возведе его на престол Констянтинопольския церкве. И в начале сего приятия престола, велие рачительство показа на искоренение еретиков: обаче в тоже лето, и сам тяжкую ересь сицевым образом нача. употреби той Нестории некоего епископа Дорофея аки толкователя своего, на разглашения онаго хуления, а сам еще стыдяшеся. и в церкви при нем седя, дерзне ко всему народу той Дорофей возгласи: иже Марию наричет Богородицею, да будет анафема. Сему весь народ удивися, и общения с ним имети нехотяще. Феодорит епископ Кипрскии имея велие с Несторием дружество в начале ересь его защищаше. но пришед в чювство, описа его како изначала людем являшеся смерен, и о мире небрегущь. во второе же лето своего пастырьства Нестории, ересь свою во вся страны разширяти начен: Но Кирил Александриискии велие тамо посланиями утверждение подая. Феодосии же кесарь почиташе Нестория, понеже сам его на оное епископство устрои. Не похваляше же его учения, обаче не возбраняше его прежде соборнаго осуждения. егда бо монаси поношаху ему, а друзии дерзновеннейшии на него яве в церкви вопияху: яко еретик есть. он же темнице их предаваше, и бити их повелеваше, и во изгнание посылаше. Предлагаху сие кесарю монаси, и даша ему просителное писание, просяще дабы за их обиды не творил отмщение Несторию, но дабы веру святую от его злаго учения защищал, и немедля собор устроил бы. Писаше же и увещаваше святыи Кирил Нестория, дабы веру святую целу сохранил, и единогласия церковнаго не терзал бы. удержеваше же и клириков цареградския, иже у него совета просяху, дабы еще о нем кесарю не доносили, и ереси на него не возлагали, ожидая его исправления. Того ради и собора египетскаго еще нехотяше составити Кирил, на немже можаше такожде предати анафеме тех, иже Марию не исповедает Богородицу. Сия вся кафолическая кротость и терпение и любовь, отлагаше. дойдеже сей о Нестории слух и в Рим, и писа папа к Кирилу. аще тако есть, и Кирил отписа к папе, яко тако есть. В лето же третие своего архиерейства, написа Нестории, и к папе своего исповедания словеса, в них же Христа простым человеком именуя, а рождьшую Его, христородицею: и сие его писание папа соборне в Риме прокля а Кирилу написа, наместником его своим поставляя, яко да возвестит Несторию, аще в десять дней не исправится Нестории проклят да будет. Но приим сие Кирил нескоро о том к Несторию яви. Писа же от собора Александриискаго ко клиру Цареградскому, возвещая им о проклятии на Нестория от папы, и о разрешении тех ихже Нестории прокля. В четвертое убо лето патриаршества Несториева, третии вселенскии собор на Нестория во Ефесе собрася, и сице на нем непокоривыи в ереси, из священства низложен святыми и проклят [заочно, ибо не единою зван бысть не прииде ко отцем: тем и глаголаше]. Понеже Нестории звание наше презре, и послов наших не припусти. Понуждени есмы, то ему безбожно учаше разсуждати: И егда уразумехом от его писания, еже зде явно прочтеся. И отвещания сего, еже из уст в том граде слышано яко зле научает и нечестиво мудрствует: По законом, и правилом и по писанию святейшаго Римскаго епископа Келестина, с плачем и нехотяще сие плачевное изречение творим. Господь наш Iсус Христос, егоже он похули, сим собором тогоже Нестория от сана епископскаго низлагает и от чина и общения священническа осуждет. Сие изречение вси епископи подписаша, ихже бяше множае двух сот и писаша о том к Несторию. По соборе же сем Нестории, на покаяние в монастырь святаго Евпропия заключен. и егда на каяшеся о том, на горшее во Асен пустыню изгнан. И тамо пребывая, лютою смертию погибе: язык бо его червие расточиша: и зде еще геену себе исповеда;

 

Свидетельство о правиле сотвореннем на имя Иоанна Китроскаго аще согласно с прочим писанием. глава, 41.

 

[Ис книги Матфея Иеросалимскаго, от состава, ОТ. Иоанна Китроскаго. от главы, 12].

Иже убо иноколеных латинских предании облюдатися и бегати, якоже гагряны елика сила подобает. сих бо ради и тех освеняемся приобретения. обаче и еже не толико мерзцы да воменяются. но и священнодействуемии от них опресноцы. но причастни убо нами да суть, но ниже паки просты да воменяются. Господнее бо призвание назнаменует. сих и божественнаго Иякова брата Божия священная припевания службу сим якоже навыцаем священнодействуют ниже подъемлющая сия и служащая сих священнодейству сосуды, ниже священных одежда, ниже что в сих ино проста от нас да возмнятся. но и сих хиротония к нам прилагаемом иже от них хиротонисанным не отлагаются. понеже и сущим от нас божественными отцы, еретическая хиротония неотметны многажды быша. православным сущым, или бывшим. на них же они руки возложиша. и они же перстень носити тех архиереом, толику тех укоризну приносити. иже по Духу хотящим духовне приемлются. понеже бо жених церковныи, и честных и девъственных душ Христос наречется. и иже оного носяще образ кояждо церкве предстателие жениси нарицаются. сего ради и перстень яко же обручницы, образ духовныя печати приемлют.

 

Того же. ОТ состава, от главы, 17.

Составлена бысть книга сия, в лето, 6840.

 

Из епистолии на римляны, от седмаго соб. о опресноцех. глава, 81. Потребник бол. лист, 579 на об.

Да уведят, таковии еретическая и опресноки ядуще, яко пси мертву плоть ядуще, а не живу. и в ересь впадают, проклятаго Аполинария. иже бездушныи опреснок в тела место Господня приемлют, подобни суть Аполинарию, он бо безумныи бездушно опреснок, прият, не имеет бо ни души ни ума, ни кваса бо ни соли не имеет, яже суть в хлебе, яко душа и ум. и прокляти суть с древними еретики, со Уалентом. и Манентом, и Аполинарием Лаодикииским.

 

Ис книги святаго Максима Грека, глава, 68.

Ихъже и перво и величайше прегрешение есть. еже опресноки приносити во святую службу согласно мудрствующе проклятому Аполинарию отгнавшу просфиры и квас и соль. аки овому убо образующе душю. овем же сказующе ум. ихъже лишаше треклятыи Господа нашего Iсуса Христа. глаголя его оболкшеся в плоть едину бездушну и безумне. сея же хулы что может быти хулнее еяже и вы причастники есте, приносяще и вы подобие оному проклятому опресноки. И той же оному анафеме подлежите и вы, аки тоже ему и нехотяще и вы проповедаете опресночным приношением вашим.

 

Потребник. в чине от ересей приходящих лист, 593.

Проклинаю же и всякое их злочестие, и тайное развращенное их учение. и яже держаху многия ереси, и жидовския обычая, иже вместо хлеба опресноки служат, и суботствуют жидовствующе. оклеветавающе же святаго апостола Петра, и святыя отцы от них имуще таковое предание.

Ниже: лист, 595 об.

Проклинаю латыньских попов глаголющих, яко жену обручену възимати церковь, и носящих женьскую утварь, и литургисающих в рукавицах, и серги во уши вкладающих, и на шею ожерелие, и венец на главу, и на руце перстьни.

 

Ис книги о вере белорускои печати, часть 4. о опресноку. роздел 9. лист, 277. пересторога.

Лечь к престорозе правоверным потреба ведати, иж суть некоторыи меновите Димитрии Хоматен Булкгарьскии, и Иоанн Китриискии епископов, которыи латинником в своих писмах нечто недорожают, лечь и то в поверховных речах: теды то разумети, або яко суседе будучи угожали оным, або тыж и не доконца верити всему, к гдыже грецких писм рукою писных незасяглих мы еще, любо тыже неверное выданое здруков немецких. до чого чинить нам мнемание то же в тых же писмах в многих пунктах остро натирают на латинников, а вне которых ослабеле, и обоятое мешание: амели быти статечными в своих предсявзятях. але ты православныи къгрунтуйся и полегай беспечней на вышше предречных отцех грецких, яко вышших степенем, и патриаршею учтеных достойностью. а до того тыж при болшой личбе, изгажаючимися за церковью и з съборами преставати побожнейшая. суть тыж еще писма грецкии юж открите противныи церкви въсходнеи баине что подзорных словенских, примешаи до благочестивых книг, теды и о тых разумети, же такии ж были, которыи за посягнением Констянтинополя през Балъдувина и французы, для дочасного меня отщепилися быти ли от церкве въсходней, и нешно противного Богу и вере православней писали азгола за исидорянов, и за теперешних оным подобных апостатов разумены быти мают и з писмы своими;

 

О пренесении мощей святителя Христова Николы. глава, 42.

 

Ис книги Палинодия от части 2-й. в разделе, 11. во артикуле, 2-м.

Николае святыи изволил быти пренесеным мощем своим на запад в град Бар, не до церкви Римскои. но до церкви имеющея тогда восточное благочестие. Калаврия бо или Апулия, в ней той Бар град, аще и на западе есть едина от стран италииских, обаче жителеи своих име веры исповедания церкве восточныя. и бе тогда вся та страна Калаврия или Апулиа, под царем восточным и под патриархом Констянтинопольским.

 

Ис книги туркогреческои осмои. от листа Михайла Килурллария патриарха Констянтинопольскаго, ко Антиохиискому патриарху Петру.

В той Апулии или Калаврии, к граду Бару святыи великии чюдотворец Николае, мощам своим попусти быти пренесенным. из малой Грецыи к велицей, от греков к греком, а не к римляном, от православных исповедания восточнаго, ко православным тояже веры исповедания, из епархии патриарха Констянтинопольскаго, ко епархии томужде патриарху подчиненои, а не ко власти Римскои. ибо восточнаго исповедания в повиновении патриарху Цареградскому, епископы во всей Апулии издревле бяху дотоль, донележе тою страною нортманове обладаша си есть до лета воплощении Бога Слова 1196. В коем месте римляне нортманов победиша, и от стран тех отгнавше свою тамо область и веру распространиша, по пренесении тела святаго Николы яко в сто лет и более;

 

Яко не подобает от еретик причащатися. глава, 43.

 

От жития святаго Иоанна Милостиваго. глава, 47. яко недостоит еретицех причащатися.

К сему же блаженныи учаше и засвидетельствоваше, яко никакоже никогдаже отнюд еретичестве общения, и паче сквернении причаститися аще и весь ваш живот рече блаженныи, и от какия нужды, или напасти безпричастни пребудите не обретающе соборныя церкви. аще бо естество жены плотяны законне притяжавше, аще по стране некой, кроме ея ину пояти, Богом и законы возбраняеми есмы. ащели сие сотворим кажнени будем. тако убо в Бозе правою верою. соборною церковию припрягшеся, якоже рече апостол. обручивыи единому мужеви девицу чисту представити Богови. аще православную святую веру оскверним, приобщением еретическим, не будем ли причастницы мучению в будущии век, ждущему еретик. общение бо глаголаше. сего ради наречеся. за приобщение и причастие общающаго имъже общимся не мозите убо о чада, тацех молитвицих прикасатися комкания ради;

 

Ис книги Григория Богослова. от слова 14. в толку 9-го стиха.

Ты же рече арианскии собор. к тебе бо ми слово ныне церкви содержиши, правоверныя изгнав. имате же токмо церкви, и стены и скрижали, мы же небеси и земли Владыце покланяемся. аще и и[з] стен изгнани быхом, но в крове Бога небеснаго водворихомся. вы злато и сребро яко воду изливаете, от силных спомогаемии вашей воли, и яко Петр собираете от церковных данеи. мы же слово чисто. вы же сотвористе храмы двокровны и трикровны, но никакоже нашее веры вышша и небес к ним же и несемся. лучше бо и наясне и бездому благочестие во многоценном дому нечестие. идеже бо еста два или трие собрани о имени моем, ту есмь посреде их. лучше бо пред Богом многих ариан, отметающихся Сыновня Божества.

 

От вопросов Афанасия Великаго.

Вопрос. Аще вовремя праздника останет человек во стране некои, в нейже причащение соборныя церкве не обретается, что должно есть праздника ради творити. приобщатилися еретиком или пребыти без причащения;

Ответ. Ащели многа и люта беда есть мужеви, еже свою жену оставити и со иною прелюбы деяти, аще и во отхождении далече есть. то кольми паче правую веру предательствовати за еже еретиком съприобщатися; якоже бо свою куплю продати хотящии, еликоже время в таинстве укоснят, нехотят прияти в место царскаго воображения, внешнее начертание;

 

Из Пролога, месяца июля в 12, день.

Святая Мария Голендуха шедши во Иеросалим и поклоньшеся святым местом. прииде в монастырь некии, идеже злочестиваго Севириана ересь живяше. и испросивши от Бога еже открытися ей аще подобно есть приити к причащению их. и виде ангела держаща два потира, един полн тмы, другии же света. являя ей, яко света полныи. соборныя святыя церкве есть;

 

От страдания святаго мученика Ерминигильда царевича Готфскаго. минея чет. ноября в 1.

Наставшу же великому празднику святыя пасхи, Ливигилд царь призвав некоего епископа от своего зловерия, посла его нощию к сыну своему в темницу, яко да от руку епископа того, Ерминигилд приимет арианское их сквернодейственное причастие. Ниже: святыи же страстотерпец арианскаго епископа всячески возгнушася, и зловерие его добре обличив, отгна и от себе, не прием сквернаго их причащения. Ниже: арианскии же епископ посрамлен к царю возвратився. сказа ему вся яже от сына его слыша. тогда царь исполнився неизреченныя ярости, и зубы поскрежетав абие нарочитыя от бояр своих мужи посла, повелевая им Ерминигилда сына своего убити в темнице. тии же шедше. секирою отсекоша ему честную главу;

 

Того же месяца, в 6 день от жития святаго Павла Исповедника.

Македонии еретик на патриаршии в Цари граде престол възыде, и неизреченно озлобляяше Божию церковь, гоня и убивая правоверныя: Ниже: Инем уста железы отверзше нуждею причастие арианское влагаше.

 

Катихисис болшеи, глава, 4.

Вопрос. Истинныя ли и правыя пресвятыя тайны Христовы суть у еретиков.

Ответ. Понеже они истинныя и правыя веры Христовы не имеют. то како пречистыя и святыя тайны Христовы у них быти могут.

Вопрос. У еретиков убо такожде якоже и у православных христиан служба Божия совершается, такоже святое писание и книги прочитаеми бывают такоже церковное строение, и духовныя чины и уставы и образы имеют, такоже поучаются заповедем Господним, пост держат и милостыню творят, такоже и девство соблюдают, и крещение у них бывает, и причастие тела и крове Христовы приемлют, и паче мнятся православных во благочестиии проходити како убо у них невозможно быти истинным пречистым и животворящим тайнам Христовым.

Ответ. Поистинне ничто у них несть истинно но все убо еже еретики творят от смышления своего, како могут совершати действа Божия, на игралищах своих, аще и Христа проповедуют и веру свою похваляют но вся сия льстиво, лживо творят, аще и церкви своя, и клирики церковныя и писания божественная почитают, и мнятся еже темже крещением крещатися, такоже и тайны божественыя еже есть пречистое тело и честную кровь Христову имети, вся же сия не тако имеют. но инако и нечестиво. Ниже: о них же святыи Иоанн Златоустыи глаголет: праздники убо и святыя дни празднуют, и святых апостол и мученик, но вся во отвержении веры истинныя от своего умышления творят, и лживыя пророки имеют, и вся творят ко прельщению верных. Ниже: Сего ради разумети имамы, яко еретическая писания и празднество и службы, и тайны и проповеди не суть правы.

 

Прав. 32.

Еретическое благословение, не благословение.

Толк. Благословение убо зде просфира нарицается, темже неподобает прияти яко благословения от еретик проскомисанных просфир. не благословение бо есть паче тех благословение;

 

О еже яко святии отцы вовремя нуждное и чрез желание и усердие сказуют причащатися. глава, 44.

 

Из Баронии в лете Господнем, 260. лист, 160 на об.

Но изгнану сущу Киприану, Понтии Папернус и иных многих епископов и иереев, и диаконов и клириков, по Африце ищущь. многое их число поима и крепких во исповедании Христове видя дрекольми их бити повеле, и на работу их руды медныя изгна, в сигу и в горы Халкорихиов. К сим Киприан святыи утешая их писа послание сладости христианския исполнено. Ниже: Не имате [рече] возлюбленая братия ни единыя тщеты во в благоговении и вере, яко тамо в сие время священницы Божии приношения и жертвы [или литургии совершати не можете. пожрите в жертву дух сокрушен. сердце сокрушено и смирено Бог не уничижит. Сию жертву Богу непрестано воздаете в день и нощь, и сами есте жертва жива и свята. [якоже глаголет апостол] в телесех ваших. Ниже: и дарова им Господь Бог, яко вси в онои долгои тяжкои работе изомроша.

 

Ис книги Гавриила архиепископа Филадельфийскаго, о 7 тайнах церковных.

Ведати нужда есть всем. яко тайны церковныя иныя суть понужди посредия, яковыя суть. миропомазание, евхаристие, и елеопомазание, ихъже аще кто и несподобится, нужды некоея ради, спасен быти может. иныя понужди заповеди, темже есте две. крещение и покаяние, еюже кроме несть леть спасение получити.

 

Из Благовестника от Иоанна зач. 24. лист, 105.

Ядыи Мою плоть, и пияи Мою кровь, во Мне пребывает и Аз в нем.

Ниже, толк. И ты можеши не токмо по тайному причащению ясти и пити плоть и кровь Владычню, но и по иному образу. ибо плоть яст кто егда по детели проходит действеное. нуждно бо делателна плоть якоже и детель есть трудна. кровь же пиет яко вино веселящее сердце, виденне глаголю, яко безтрудно виденное, паче же труду покой. зане питие без труда паче, нежели брашно.

 

Соборник, лист 687.

Сице кождо нас в дому некоем особочинием, еже по добродетели прикладствующе ему устроения закалает агнец, и причащается тоговы плоти, и насыщается Iсусом.

 

Книга Анастасия Синайскаго глава, 1. И патерик Иеросалим. слово.

Вопрос. Кто суть истинни поклонницы, иже ниже в горе, ниже во Иеросалиме поклоняются Богу и Отцу. идеже во Иеросалимех не поклоняются благоразумно. яко ни во ином месте на земли, ничтоже бо Иеросалима зде честнейши.

Ответ. Страшно убо воистинну, и дивна слышания вопрошение. и сего ради ответа и разрешения, явленнейша неведыи. божественнеиших таин слышания. обаче от показания некоего священна, муж священных. ихъже ныне в плоти сущих. яко явлено реченное сотворим.

Шед некии от здешних, мужу отшелнику молчальствующу и рече ему. Дивлюся отче, како сице терпиши отлучен быти от святыя церкви, и от тоя причащения, и святых собрании; К сему же отвеща человек Божии. и рече, вся собрания и службы, и праздницы, и причащения, и жертвы, о человече. сего ради быша яко да очистится человек от грех своих, и вселится Бог вонь. По иже от Христа реченному. Яко приидем Аз и Отец Мой и обитель в нем сотворим, и вселюся в них и похожду. Егда убо человек храм одушевлен и богоздан будет Божии и Отец и Сын, и Святыи Дух живет и ходит и отстоит душа богоносная, от всякия любве церквей зданных, и жертв видимых, и собор множества, и праздник человеческих. И ниже сей ни во Иеросалимех желает поклонитися Богу. вънутрь бо имать в себе Отца. вънутрь Сына Архиерея, вънутрь Дух истинныи огнь, вънутрь жертвеник чистую совесть, вънутрь очистилище грехом, духовную слезу. вънутрь вышнии Иеросалим, радостную душю. Прочее яко духовен духовныма очима, духовныя жертвы приносит. Дух бо есть Бог, и поклоняющимся ему в Дусе и истинною достоит покланятися.

 

Из Псалтыри толковой, псалом, 4.

Сущее. Пожрите жертву правде и уповаите на Господа.

Вопрос. Что есть пожрите жертву правде и уповайте на Господа.

Ответ. Правду рече творите, правду приношайте, си есть велии дар Богу, таковая жертва есть приятна таковое приношение много угодно есть Богу. ни овча заклати ни тельца, но праведныя дела творити. видиши ли церковныи чин, како изначала древле провозвещен есть, и вместо чювственныя жертвы оное умное искати. правду же зде глаголет, якоже рех, не отчасти добродетелеи рече на всяку правду, якоже и праведнаго человека глаголем, имеющаго всяку правду, а не иногда неправду. таковая бо жертва ни цену требует ни заклания, ни жертовник, ни огнь ни дым разходится ни сквара. но лежит изволение приносящаго и, сей бо жертве ни нищета не возбраняет. ни убожество отгоняет. ни место, ни человек. ни ино ничтоже, но идеже аще обрящешися, можеши жертву сию приношати присно, сам быти священник, и жертовник, и олтарь, и ножь, и овча, и огнь. тако умная и духовная жертва, удобно приношение имать, ни единаго от внешних не требует орудия.

 

Из бесед апостольских, лист 2959.

К кому приходим кии приступим; аще кто свят верою, духовною службою, со истинным сердцем по извещению веры: сиречь, понеже ничтоже есть видимое, ниже священник, ниже жертва, ниже олтарь зрится;

 

Псалтырь толковая, 7-я песнь триех отрок.

Сущее: Но душею сокрушенною.

Толк. Златоуста. Еже и Варух глаголет, дух в теснотах, и душею дряхлою возопити к тебе самое величество бед, въместо моления предлагаем, сице да прияти будем, сице да услышимся. И паки: Но в место глаголют благочиния, еже в храме, приими наше во смирении моление, равно могущее приношение, еже безсловесными, положи в наших телес всесожжение.

 

Псалтырь толку Афанасиева в песнех.

Богу паче агнец и юнец, вера действует. смирение бо и благочестие паче тех может и въменяется.

 

Нила Черногорца.

Которыми болезньми и труды мытарь спасеся; не простыми ли глаголы смирения; Но якоже в ветхом законе, душею сокрушенною, смирение и благочестие паче агнец и юнец въменяется.

 

Из книги Захария Копистенскаго. лист 271.

Утверждает не скорбети вовремя гонения, аще и недостаток кии будет в церковных пространствах, и в добродетелех умаление. но утешатися о вере правои. и яко удостоилися в тех часех жити.

 

От патерика скитскаго.

Два етера велика старца ходяща в пустыни скитстей, и слышавше етера ячаща от зимы. искаше та въходу вертепу и влезша обретоста етеру старицу. девою святу лежащу. и реста ей когда прииде старице. и кто есть служаи ти. ничтоже бо не обретоста в вертепе, разве едину лежащу. она же рече, 38, лет, имам в вертепе, семь былие ядуща, и служаще Христу не видех человека. но точию вас днесь. посла бо вы Бог да погребета тело мое. и се рекше успе. старци же прослависта Бога. и погребоста тело ея и отъидоста;

 

Ответ 104-й, выгопустынных жителей, на вопрос иеромонаха Неофита о тайне евхаристии. глава, 45.

 

Вопрос, 104.

Святую евхаристию где емлете и бываете ли причастники тайне сей и от кого посвященнаго ли причащаетеся или так без причащения тела: и крове Христовы и помираете зане церквей, и попов у вас нет. и аще есть скажите где церковь и кто поп.

Ответ: 104.

Христос Спаситель наш, пречистыми усты своими глаголе: ядыи Мою плоть, и пияи Мою кровь, во Мне пребывает и Аз в нем. Иоанн глава 6, зач. 24. Сия словеса Христа Бога нашего, елико всякаго достойнства, благоговейнаго почитания достойна суть: толико и прележнаго во тщании исполнения требователна: во еже всякому всегда причастнику быти животворящия плоти и крове Господни во освящение души и тела, в наследие живота вечнаго. очесом вси верущии Христу, а наипаче всем сердцем спастися ревнующии огнепалное желание присно являти усердствуют. обаче во святей кафоличестеи церкви, якоже прилучающихся устроение трегубо разделно обретается. тако и словеса святых отец о сем разсуждающая являются. Еще же и новопечатная книги, явствено сия определяют. Первии суть иже усты и сердцем в чистеи совести приемлют животворящее тело и святую кровь Христову, по преданию святых апостол и святых отец: и се сугубно. ови во святеи церкви. на святеи литургии причащаются: овии же от священника православнаго, въземъше часть животворящих тайн у себе держат, и егда восхотят причащаются: ибо доколе сие тайньство цело есть, доколе вид хлеба и вина цел пребывает. таковии быша в скитех и пустынях отцы, во Александрии же и Египте простии людии, намнозе имуще причащение в дому своем кождо, и егда хотяху причащахуся собою: яко Василии Великии свидетельствует. И Симеон Фесалоницкии в книзе своей утверждает тожде: Втории, иже благословных ради вин не имеющии где причаститися, еже устами въкусити животворящих и пречистых таин. обаче веру теплую и усердное желание о сем показуют, добродетельми свое житие украшающе. таковии чрез веру и усердие духовне причащаются плоти и крови Христовы. такова бяше преподобная Мария Египетская, 47 лет в пустыни живущи. и святых таин усты не причащающиися чрез добрая дела присно благодати Божия причащашеся и Христа вънутрь себе имяше. Сице преподобныи Марко Фряческии, и Петр Афонскии ов 95 лет, ов 53 лета в пустыни бывша, человека не видевше, и евхаристии не имуща, обаче чрез высокое житие, Святаго Духа сосуди вожделеннии Богу, честнеишии паче всего мира явишася. Сице мнози святии пустынницы далече от вселенныя живуще. церквеи и священников не имуще. устами святых таин причаститися не имяху. обаче верою и желанием и житием добродетельным присно оных благодать в себе имяху. о них же святыи Ефрем: в слове 111, глаголет. Славу юже поют в горах же и в вертепах, жертва благоприятна приносится Богови. сами суть священницы себе, исцеляют наши недуги молитвами своими. Сице святыи Феофан иже во Антиохии, иже сам себе крести. и блудницу крести, и оба благочестно живша преставистася к Богу. И святая мученица Дросида, сама себе крестивши во осмыи день ко Господу отъиде. сии святии, никогда же усты сподобишася въкусити пречистых таин, понеже священника не имяху, яко от писания о них познавается, обаче сердцем чрез веру и добродетели присно благодати Божия причащахуся на земли отчасти, на небесех лицем к лицу божественнаго светолития наслаждаются. Сице в книзе новопечатней Барония кесаря повествует, в лето Господне 260: На изгнании сущу Киприяну, Понтии Патернус, иных многих епископов иереов и диаконов и клириков, по Африце ищущь, многое их число поима: и крепких во исповедании Христове видя, дрекольми их бити повеле, и на работу их руды медныя изгна в сигу и в горы Халкорихов. К сим Киприан святыи, утешая их писа послание сладости христианския исполнено. Ниже: Не имате [рече] возлюбленная братия, ни единыя тщеты во благоговении и вере, яко тамо в сие время священницы Божии приношения и жертвы [или литургии] совершати не можете: пожрите в жертву дух сокрушен, сердце сокрушено и смирено Бог не уничижит. сию жертву Богу непрестанно воздаете в день и в нощь, и сами есте жертва жива и свята [якоже глаголет апостол] в телесах ваших. Ниже: И дарова им сию благодать Господь Бог, яко вси в оной долгой и тяжкой работе изомроша. И святии учители, чрез добродетелное житие усердствующим причащатися плоти и крове Христовы глаголют: Святыи Феофилакт в Благовестнице на Христова словеса, не токмо по тайному причащению ясти и пити кровь являет: но и чрез деяние, и видение причащатися сказует. И святыи Никита Ираклиискии, на слова святаго Григория Богослова на святую Пасху сказует чрез добродетелное устроение кождо причащается святаго Агньца плоти, и насыщается Iсусом по мере своих добродетелеи. И в книзе святаго Анастасия Синайскаго, и в книзе Патерице Иеросалимстем, обретается о сем отвещание сицевое; Вопрос. Кто суть истиннии поклонницы: иже ниже в горе, ниже в Иеросалимех поклонятся Богу и Отцу: идеже во Иеросалимех не поклонятся, благоразумно яко ни во ином месте на земли, ничтоже бо Иеросалима зде честнейши; Ответ; Страшно убо воистинну, и дивна слышания вопрошение, и сего ради ответа и разрешения явленнеиша неведыи, зане не всем вмещати божественнейших тайн слышания. обаче от показания некоего священна муж священных ихъже ныне в плоти сущих, яко явленно реченное сотворим. Шед некии от здешних, мужу отшельнику молчаствующу. и рече ему: Дивлюся отче. како сице терпиши отлучен быти от святыя церкви, и от тоя причащения. и святых собрании: К сему же отвеща человек Божии и рече. Вся собрания, и службы, и праздницы, и причащения и жертвы. о человече, сего ради быша. яко да очистится человек от грех своих и вселится Бог вонь по иже от Христа реченному, приидем Аз и Отец Мой, и обитель в нем сотворим, и вселюся в них и похожду. Егда убо человек храм одушевлен и богоздан будет Божии. и Отец и Сын и Дух Святыи живет и ходит, отстоит душа богоносивая от всякия любве церквеи зданных, и жертв видимых, и собор множества, и праздник человеческих, и ниже в горе сей, ни в Иеросалимех желает поклонитися Богу. внутрь бо имать в себе Отца, внутрь же Сына, Архиерея, внутрь Дух истинныи огнь, вънутрь жертвеник, чисту совесть, внутрь очистилище грехов духовную слезу, вънутрь вышнии Иеросалим, радостную душю. прочее яко духовен, духовныма очима, духовныя жертвы приносит, Дух бо есть Бог, и поклоняющимся Ему в Дусе истинною достоит поклонятися; Дозде патерик. И не токмо древнии святии, но и новопечатная книга, Жезл изданная от собора в лето 7174, на листе 49, на об. сице научает. Ведати нужда есть всем, яко тайны церковныя иныя суть понужди попосредия, яковы суть миропомазание евхаристия и елеопомазание. ихъже аще кто и несподобится, нужды некоея ради, спасен быти может. Иныя понужди заповеди, темже есте две крещение, и покаяние, еюже кроме несть леть спасение получити; Дозде Жезл. И занеже преподобнии отцы и святии не имевше где причащатися святых таин, ови многовременно без него пребыша, ови же и при смерти устнами не вкусивше. духовнаго и благодатнаго просвещения не лишишася: занеже святии учители научают, чрез добродетельное содержание, плоти и крове Христовы причащатися: занеже святии мужи чрез добродетели, внутрь сердца Бога въходяща поведают внутренняя вся очищающа: занеже новопечатныя книги спасение понужде и кроме евхаристии поведают: убо иже понужди причащения святых тайн несподобится, может чрез веру и усердие невидимыя благодати сподобитися, яко прежднии святии. Третии суть, едиными токмо устнами причащающиися: иже недостойне ко святому комканию приходят, иже скверными грехи окаляни, иже в смертных грехах погрязшии, и не очистившиися: Котории не токмо не получат благодати Божия, но паче большее осуждение приимут. по блаженному Павлу глаголющему: ядыи бо и пия недостойне, суд себе яст и пиет. неразсуждая тела Господня. Кор. зач. 149. И святыи Исидор Пилусиискии глаголет; Согрешающии, и пресвятыми тайнами дерзающе прикасатися, тмами мук суть достойни и повинни себе сотворяют, по неложному Павлову гласу, телу и крови Господня. в Старчестве же страшнейше приводит глаголя: Аще недостойне приимеши святых тайн, повинен бываеши телу и крови Христовы. и обретаешися самого Христа убивая, и оного заклинания повинен еси. Ниже: Иже тогда тело Его прободшии и оскверняющии Того ныне сии нечистою душею недостойне причащающеся Ему. един суд с распеншими Его прияти имут, по глаголу апостола Павла. Дозде словеса святых. Сие трегубое причащающихся устроение, и новопечатныя книги явственно изъявляют. Книжица о седми сакраментах типографии Черниговския, року 1716, на листе 7-м. Вопрос: Много кратное есть употребление [поживание] евхаристии; Ответ. Трикратное: едино есть устами токмо, якоже обыче бывати. егда кто с нечистым сердцем, приемлет тело и кровь Спасителя нашего, яко Июда беззаконныи на тайной вечери: но таковыи на погубление души своей приемлет; Другое потребление [поживение] есть духовное: то есть, егда кто истинною верою, и волею хощет тела и крове Христовой причаститися, но не может его прияти, яко то обыче бывати, несущу тогда тамо священнику: Ниже: Третие есть, егда кто и чистым сердцем, и чистыми устами бывает причастником евхаристии святой. Сие трегубное устроение причащающихся; И Диалогисм книжица изданная в Киевопечерстеи лавре року 1714, на листе, 154-м, располагает глаголюще: яко велие есть разньствие между ядущими трапезу царскую, едини ядят действително, инии тайну святую приемлют, купно же и действие ея. прочии же ни тайну святую приемлют, ниже действие или корысти от тайны святыя приходящыя. Ниже: Приемлющии тайну святую без действия, еже есть без благодати Божия. сии суть иже в гресе смертном причащаются. и сице причащающиися далече отстоят от благодати Божия; новыи же паче грех соделовают, и суд себе ядят и пиют. Не любве же Христвы, но гнева, и негодования приумножение себе творят. Приемлющии же действие тайны святыя си есть приумножение благодати Божия без причащения сии суть, иже имеют огнепальное сердца желание причаститися но не могут, или некоея ради тяжкия болезни, или иных киих благословных вин. или не имеют на сие помощника себе. приемлют же точию действие тайны святыя за свое благоусердное желание, и духовне сицевии причащатися глаголюся. Выше, от беседы, 50-я. лист 136 на об. Не усумневайтеся не изнемогайте умом вашим благоговейнии, и Бога любящии души, воистину веруйте; яко равную мзду и благодать и милость у Бога обретаете за сицевую ревность, и намерение духовное. аки бы воистину уже причастилися; и намерение бо сицевое неизреченне благоугодно есть Господеви. свидетельствующу о сем учителю церкве Иппонийския сими словесы; веруй и вкусил еси, и причастился еси. Пребудете в чистоте, бегайте греха, чтоже вам предложи церковь Христова верите; веруйте повинуйтеся, и заповеди Божия соблюдайте, Господа Iсуса от всего сердца любите. и вседушно причаститися тела Его желайте. Аще же когда доити сего не возможете толико будете имети мздовоздаяние елико в самом причащении святом прияли бысте; Дозде из Диалогисма. И от сих выше предложенных доводов является, яко трегубо есть знаменование причащающихся. Понеже во святей церкви, яко на литургиях причащахуся. тако древнии христиане и пустынницы, приемлющии от священников тайнство у себе держаще, сами собою причащахуся: Понеже мнози святии мученицы, и отшельствующии пустынницы не имеюще причащения, благодати Божия не лишишася; Понеже не имещии где причащатися за неимением священника, чрез веру и добродетелное житие духовно причащаются, и тояжде благодати сподобляются; Понеже недостойне и во гресех смертных причащающиися, суд христоубииства себе сънискают. темже по сим свидетельством, и ныне иже за древле церковное благочестие терпящии; всякое усердие всякии подвиг, и тщание показуют, да причасницы будут животворящия плоти и крове Христовы; и аще кто обрящет древле православнаго благочестия церковь. и священство, от священника с чистою совестию причащается. аще кто от древлеправославнаго священника приим животворящия тайны у себе держит. яко от самого онаго собою причащается; Аще кто сих не имеет, веру всеусердну желание огнепално, и житие добродетелно распростирает со слезами Господеви моляся. тоя святыни не лишишися; чрез сия средства изрядная, тояжде благодати тояжде сладости духовныя получает, без всякаго сомнения. Аще бо во время толикаго множества священников, святии произволително от мира в пустыню отходяще, и кроме видимаго причащения живше; невидимыя и неизреченныя благодати Божия и пришествия Его в своя сердца сподобляхуся. колми паче в неприсудствии и неимении священников, в неимении церквей видимых, по древлецерковному благочестию, видимаго причащения святых тайн несподобляются. могут чрез веру и желание и добродетели. невидимыя благодати Божия сподобляются. могут всеблагодатнаго Божия посещения во своя сердца нелишатися, по реченному: Аще кто любит Мя слово Мое соблюдет, и Отец Мой возлюбит его. и к нему приидема, и обитель у него сотворима. Иоанн, зач. 48;

 

Свидетельство от божественнаго писания. во ответ вопрошающим нас о приносимой тайне под видом хлеба и вина, тела и крове Христовы, доскончания века реченной быти, и глаголющим сице где оная тайна ныне обретается. глава, 46.

 

[Из минеи четии, от жития и страдания святаго пророка Иеремии. маия, 1 день].

Испроси то себе [Иеремии] у разоряющаго Иеросалим воеводы, да не возбранит ему възяти святыню Бога Израилева прежде разорения церкве, яже неубе разграблена и зажжена. обрет некия избывшыя от меча священники и левиты, поят я к себе, и ходя с ними небоязненно, посреде халдеов, иде со тщанием в церковь, и взя первее огня олтарнаго, иже иногда во дни Моисея и Аарона с небесе на жертвы сниде, и оттогда неугасимо на олтари хранимыи бяше, повелено бо бе от Бога да жерцы выну прилагают дрова огню тому на олтаре, еже бы ему никогда же угаснути. от того огня вземши Иеремия, сокры в кладязе безводном, велию имея веру, и пророчески провидя, яко огнь той тамо аще на время и угаснет. [претворившися чюдесно в иную стихию, в воду тучну] обаче во время свое паки в свою истую стихию возвратившися, воспламенится: еже бе по возвращении от Вавилона людей Израилевых, при обновлении храма во дни Неемии, по многих летех скончания святаго Иеремии пророка. Ниже: По сокровении же таковом кивота Божия не имеша кътому иудеи тоя славы, аще и обновиша по седми десяти летех Соломонову церковь, но у кивота Господня бяху лишени: Ниже: точию имеша огнь небесныи от святаго Иеремии пророка и от священников иже с ним быша, в кладязе безводном сокровены бывшии, и потом иными священниками обретенныи. о немже выше рехом: но та вся бяху уже по кончине Иеремии святаго многим летом прешедшим;

 

[Ис Пролога, марта, 21 дня. слово от старчества].

Аще восхощем глаголати, и сказовати и являти, яже о сем велицем старце, в долготу многу написуемая протяжутся, яко многа другая и страшна того даровании и различных подвиг повести суть. о них же поведа се. яко идущу ми некогда путем, съшествова ми некии мних. и шедшима нама по внутреннее зело сокровенно место, и гору часту, и обретохома обитель ограждену и внутрь иноки, и яко убо внидохома и иноки обретохома свершенне молчаща и ниже мне яко странну проглаголавша каково любо слово. источник же бяше посреде обители. и зрящу ми единаго от них тамо суща, и показующа своею рукою, и глаголющами, яко сии раби Божии суть. вящше же ино неслышав тамо ни мало ни велико слово изыдох же, и соблазнився и яко убо отъидох от того места разстояние доволно, и обретох пастыри пасуща овцы. и глаголющу ми к ним, и яко укоряющу иноки. и глаголаша ми они пастырие, многими леты рождение же и воспитание и жилище на сем месте имамы не видихом зде монастыря, ниже иноки якоже ты глаголеши, сия слышав великии старец, разуме яко сокровен бе. и Бог имиже судбами свесть. яви того реченному старцу сему. подобно еже в патерице монавасиистем оного монастыря, идеже овощие по повелению Божию, во свое коегождо время, птицы приношаху, в препитание сущих тамо инок, и убо всем познаваем, якоже и выше рехом о дарованиих, яко и ныне в подвизающихся даются и даже доконца в хотящих. тако и во множайших. тайнии же и сокровении обретаются, и имъже хощет Бог сих и ныне являет. Вопроси отец Памва отца Антония, что сотворю. Глагола ему старец, не буди уповая на правду свою, не раскайся о мимошедшей вещи. и воздержник буди языку и чреву, Богу нашему слава ныне и присно и вовеки веком;

 

[Беседы апостольския к рим. святаго апостола Павла: в беседе, 18. лист, 329].

Ибо при Илии в седмих тысящах оста яже спасения. и ныне леть есть многим быти веровавшим, аще же не весте вы чюдесно ничтоже, понеже и пророк он. толик и таков муж, неведяше. Ниже: Еже убо и зде глаголет, яко и олтари раскопаша, и пророки убиша. но что глаголет ему божественныи ответ, оставих себе седмь тысящь мужии, иже не преклониша колена пред Ваалом;

 

Из Библии, глава, 18. лист, 7.

Рече же Господь, не потаю Аз от Авраама раба Моего, еже Аз творю, Авраам же будыи будет в язык велик, и мног. И благословятся о нем вси языцы земнии, вем убо яко скажет сыном своим, и дому своему по себе да снабдят заповеди Господа Бога творити правду и суд;

 

[Пророк Иеремия. глава, 35, лист 100].

Слово бывшее к Еремии от Господа, во дни Иоакима сына Иосиина царя Иудина глаголя, иди в дом Рахавин и воззови я, и веде я в дом Господень во един от дворов, и напоиши я вином. и приведох Езонию сына Иеремиина, сына Хавасиина и братию его, и сыны его, и весь дом Рахавин. и въведох я в дом Господень, в храм имения сынов Ананиин, сына Годолиина человека Божия. иже есть близ дому княжа, выше дому Маасеова, сына Селомля стрегущаго двор. и поставих пред ними корчаг вина и чаша, и рекох пиити. И рекоша не пием вина, яко Ионадав сын Рахавль отец наш заповеда нам рекии. не пиити вина вы, сынове ваши довека. и храмин не соградите и семене не сейте, и виноград да не будет вам. но вкушах жа живете вся дни живота вашего. да живете дни многи на земли, на ней ходите вы. и послушахом словесе Ионадавля отца нашего. якоже не пити вина вся дни живота нашего, мы и жены наша, и сынове наши, и дщери наша. якоже не сограждати храмин жити тамо. винограда же и нивы и семене не бысть нам, и жихом въкушах. и послушахом и сотворим по всему елико заповеда нам Ионадав отец наш. И бысть егда прииде Навъходоносор царь Вавилонскии на землю нашю, и рекохом, вшедше да внидем во Иеросалим от лица халдейска, и от лица силы сирьски, и вселихомся ту. И бысть слово Господне к Иеремии глаголя. тако глаголет Господь, иди и рцы человеку иудину, и живущим во Иеросалиме. еда не восприимете ли наказания послушати словес моих. уставиша слово сынове Ионадавли сына Рахавля, еже заповеда сыном своим, якоже не пити вина и не пиша. аз же глаголах к вам заутра и вечер, и не послушаста мене. И посылах к вам рабы своя пророки глаголя. обратитеся кождо от пути своего злаго, и унша сотворите дела своя, и не ходите во след богов инех яко служити им. и вселю вас на землю юже дах вам и отцем вашим, и не приклонисте ушию своею и не послушасте. И уставиша сынове Ионадавли сына Рахавля заповедь отца своего, еже заповеда им, а людие мои не послушаша мене. Сего ради сице рече Господь. се Аз наведу на иуду, и на вся живущая во Иеросалиме все зло еже съглаголах на тя. того ради иже глаголах к ним. и не послушаша, възывах я. и не отвещаша ми. но дому Рахавлю рече Иеремия, тако рече Господь Бог Вседержитель. елма же послушаша сынове Ионадавли заповеди отца своего, творити елико заповеда им отец их. не оскудеет муж от сынов Ионадавль сына Рахавля. стоя пред лицем вся дни земля;

 

Из книги Гранограф, царство Александра Македонскаго о рахманех.

Вопроси же их Александр, имеете ли старейшину, они же реша имеем Дандамия игумена, наставника и учителя. Ниже: Александр слышав же рад быв, и прииде с 15 воины и рече радуйся учителю рахманом. и сохранителю премудрости и приидох к тебе слышав имя твое а ты не прииде к нам Дандамии же нимало воста противу его. ни почти его яко царя но лежа рече радуйся и ты егоже ради мнози грады мятутся. и страны крамолятся. Александр же сед у ногу его, виде землю чисту от крове, рече ему Дандамии что к нам Александр прииде, или что хощеши взяти в нашеи пустыни егоже ищеши мы не имамы. А еже имамы ты не требуеши: мы Бога чтим и Владыку любим. Ниже: Александр же рече к нему аз приидох премудрости навыкнути от тебе глаголют бо яко к Богу беседуеши. Ниже: И аз како могу Божия премудрости словеса к тебе глаголати. аще хощеши со мною жити, воньми словесем моим. аз бо от злых человек отвращаюся. несть бо страха, небо мне покров земля же ложе; дрязги трапеза плоды древеса пища реки. живу яко исперва сотворен есмь, вы же во вся дни. волхвующе неразумеюще находящая на вы Божия дела. аз ведыи Божия дела глад и пагубу, ведро и дожди и плодом не угобзование, како и откуду и что ради бывают мне дает ведати проразумение Божие, и мене зело веселит. Ниже: Александр же целовав Дандамии ползовался зело, и отъиде скорбя, и чюдися о глаголех его преславных и пришед оттуду, поем воя своя и прейде реку окиян чюдяся плодоносной земли той, и житию рахманскому. Рахманы бо родом суть, индияне живут яко черноризцы по своей воли отходяще. инии бо суть рахмани нарицаемии блаженнии родом от земли июдейския от Иеросалима имуща отца и учителя Рахава, егдаже Иеросалим хотяще пленен быти. во царство Седекия, сии за три дни отлучишася от жен своих послушавше отца своего Рахава, и совлекшеся моляху Бога о градех Бог же не преда их в руце халдеом они же пребываху тако, и воставшу царю иному вверже я в темницу ангел же Господень разруши верх темницы. ем я за власы и постави на своем месте изнес вон идеже живут. река же тамо имя ей Имелии. глубина же ея до бездны верху же ея облак воден до небес яко невозможно преити ни птицы ни злому духу ко онем от мира сего. Индиистии же рахмани живут, близ великия реки рамския Гангрия иже течет из рая в окиан великии. еюже идут вся древа красная и благовонная.

 

От жития и страдания святаго апостола Фомы ок., в 6.

По вознесении же Христовом, и по приятии Духа Святаго, святым апостолом метнувшим жребия, где кто имать проповедати слово Божие: паде Фоме святому жребии ити во Индию, да тамо просветит помраченная страны. научит различныя народы: парфы, имиды, перси же, и гирканы, бактри и брахманы, даже до последних стран Индии. Ниже: Приспе честное преставление Божия Матере, и вси апостоли от различных стран облаком быша восхищени и в Гефсимании одру Преблагословенныя Девы представлении. тогда и святыи апостол Фома от Индии восхищен бысть: но в самыи час погребения богоприятнаго тела Пречистыя Богородицы не приспе. Богу тако изволившу, достовернейшаго ради известия, яко Мати Божия с плотию есть к небеси взята;

 

Гранограф в царство Нерона кесаря. [глава, 116].

В лето, 5556. по Клавдии кесари царствова в Риме сын его Нерон лет 13. и 2 месяца сей воздвиже гонение на християн при сем Нероне, в 1. лето царства его. преставися святая Богородица, жила всех лет 24, тогда вси апостоли, из всех градов и стран носими по воздуху святыми ангелы елицы живы в мегновении ока снидошася на погребение Ея, и елицы котории преставилися и тем Христос востати повеле, Андрей, Филипп, Ияков Зеведеев, Симон Какит. и приидоша такожде на погребение Ея, и видеша славу Божию самого Iсуса Христа пришедша, и въземлюща святую Ея душу. и погребоша Ю с пением и кандилы во гробе во дому Ея в Гефсимании един Фома апостол от Индей по смотрению Божию не бысть на преставлении, и по трех днех прииде Фома имыи пояс Пречистыя Богородицы, апостоли же его вопросиша о сем, он же рече, егда восхищен бысть от Индии на облацех, и видев Святую Богородицу с плотию во врата небесная со множеством ангел и даст мне пояс свой, апостоли же целовавше и шедши отверзоша гроб Ея еже поклонитися Фоме телу Богородицыну, и не обретоша Ея токмо погребальная;

 

О еже не подобает в дому крещати, аще ли нужда приключится, то не запрещается. глава, 47.

 

[Потребник болшеи, лист, 115].

 Правило, 59-е. 6-го собора, иже в Труллне полатнем, яко неподобает отрочат в дому крестити, никакоже не в соборней церкви ниже внутрь дому сущу крещение совершати, но хотящии сподобитися пречистаго просвещения к соборным церквам да приходят и тамо дара да насладятся. ащели кто объят будет, преступая от нас повеленная ащели клирик есть да извержется, аще ли мирскии человек, да отлучится; Иже у церкви сущии вънутрь дому, и служити с повелением страны тоя епископа. 31-е, правило сего собора повелевает, аще и 57 правило, иже в Лаодикии собора возбрани бывати сему. Аще еже крещение детем творити в церквицах сущих в домех, или кроме церквиц дому, таковое дело правило се отрицает. и повелевает хотящим сподобитися божественнаго причащения к соборным церквам приходити, и в них таков дар приимати. аще же преступит кто повеленное, причетник убо да извержется, мирскии же человек да отлучится, разве аще далнаго ради разстояния церкве. и аще зело будет болно отроча, сие бо и в дому нужды ради крестити.

 

Ис книги Гавриила Филаделф., глава, [6].

Началне убо и первее в святых церквах, [крестити] якоже 59 канон иже в Трулле глаголет. належащои нужди, и в молитвенном дому сущем в храмине, еще в дому простом может, кто крестити обретается святых апостол в деяниих, яко Филипп апостол на пути крести евнуха.

 

Потребник болшеи. лист, 629. в чине от ересей приходящих.

Ащели же случится на глубоце реце, то крещаемыи въместо синдона полотном белым обьемлется подпазусе по персем, крепко держаще нецыи за оба концы полотна того. святитель же по преже указанному погружает его рукою своею трижды, якоже выше писано;

 

О несвященных сущих яко крестити им бысть Господне повеление и святоотеческая правилная определения обретаются иже и крещаху в нуждах бывающих мнози святии. глава, 48.

 

[Евангелие, от Матфея зач. 116].

Едини надесяте ученицы, идоша в Галилею в гору, аможе повеле им Iсусю и видевше Его поклонишася Ему, овии же усумнешася. и приступль Iсус рече им глаголя, дастъмися всяка власть на небеси и на земли шедше научите вся языки крестяще их во имя Отца и Сына, и Святаго Духа, учаще их блюсти вся елика заповедах вам. и се Аз с вами есмь во вся дни до скончания века аминь;

Феофилакт святыи в толковании: Едини надесяте ученицы верховнии с прочими всеми последующими Христу, поклонишася овии же усомнешася; сиречь мняху о Христе, или той есть, или несть, и паки еже глаголет, усумнешася нецыи от них; являет се [зри]: сиречь нецыи яко от прочих седмидесятих усумнешася о Христе. напоследок же и тии уверишася. Ниже: Яве бо яко по всем языком посла их, заповедав крещати их, во имя Отца и Сына и Святаго Духа. Ниже: Разумейте же Господне глаголание, како оба верха христианскаго благочестия содержит богословие, и действенную добродетель рекше бо, яко подобает крещати во имя Троицы, богословие нам предаде. рекшу же нам учити, и заповеди соблюдати, действительную нам добродетель показа. творя же их не боятися, и в напасти и закалания, рече им не бойтеся, Аз буду с вами, до скончания века. Ниже: Не токмо же убо апостолом обещася с ними быти, но и всем верующим вонь, и заповеди Его хранящим, не бо жити апостоли до конца века имяху, и нам учеником своим обещается сей;

 

[Из бесед апостольских. послание 29-е, глава 3. лист 2360].

Слыши же Христа глаголюща ко учеником. шедше научите вся языки крестяще их во имя Отца и Сына и Святаго Духа. учаще их блюсти вся елика заповедах вам. и се Аз с вами есмь во вся дни до скончания века. Не точию сия ко оным рекошася, но и к нам яко бо не оным точию обещася, явлено от еже рещи до скончания но и с шествующими по стопам их.

 

[Ис Кормчеи, глава, 1. в толк. на прав. 49, святых апостол].

Господь наш Iсус Христос посылая ученики своя на проповедь, рече: научите вся страны крестяще их во имя Отца и Сына и Святаго Духа. всякому убо правоверному по сему повелению достоит крестити, в три составы единаго безначалнаго Бога;

 

[Номоканон афоньских отец, лист 65].

Ибо Господь наш Iсус Христос многим от апостол священства не имущим повеле крестити.

 

[Из книги Зонаря от правила 168-го].

И Бог наш Iсус Христос многим от апостол не имущим иерейства, повеле крещати.

 

[Номоканон афоньских отец. лист 49, правило, 204].

А сии нужды ради: обаче не второ крещаются иже от причетник, или от простьца инока, или диакона, или отца самого, или христианина некоего православнаго, и понужде несущу священнику то крещени суть. но точию аще не рука еретическая бяше первее. Чти правило, Никифора патриарха Констянтинопольскаго, Арменополь в канонех кратких, сечение, 4-е. титла 2. сечение, 5-е. глава, 1. и в книзе, 3. собор 1. Книга севаста Арменополя.

 

В канонех кратких, сечение 4: титла 2. [надписание, 2]. Правило 14. патриарха Никифора.

Подобает монашествующим входити в святыи жертвенник и въжигати свещу, и кандила, и красити храм, по обьстоянию и монах прост крещает. такожде и диакон и людин же. аще обрящется на месте несущу священнику.

Сечение 5. глава, 1. Патриарха Никифора.

Подобает некрещенныя младенцы, аще обрящется некто на месте, несущу иерею крестити. крестит же и свой отец, или каков любо человек христианин несть грех. Толкование. Недугующь детищь въдася абие крещатися. здравствующь же по 40 днех его рождения. Блаженныи Иоанн тако глаголет: Недугом одержим приближився уже к смерти детищь аще троическим точию погружением, иерей страхом еже не предвосхититися совершит не треба сему по сих и молитв, яже оставишася и определения возъисполнити.

В книзе 3, собор 1 сечение 4. надпись 2. Никифора Исповедника, правила некая.

По обьстоянию монах прост крещает, такожде и диакон по обьстоянию крещает. И людин же крещает, аще несущу иерею креститися. аще крестит же и свой отец или кии любо человек: точию да будет христианин несть грех.

 

Ис книги кир Гавриила архиепископа Филаделфиискаго: о седми тайнах, глава, 7.

Ведати подобает и о сем христиане православнии. яко аще бы прилучилося небыти священнику, и прилучилобыся нужда новорожденному детищу. может аще есть диакон, или прост человек, или жена точию христиане окрестити: якоже в каноне святаго Никифора, писано есть иже во время нужды и прост мних такожде и диакон новорожденное да крестит. такожде и Августин в епистолии своей к Фортунату пиша глаголет, егда прилучится быти велицей нужде. обычай есть да и простии людие крестят иже хощут креститися, и паки иже достоит некрещенныя дети крестити; аще бы обретаемы были на местех таковых идеже священника небысть, и дети изнемогали бы к смерти. таковое аще бы и свой ему отец окрестил. или ктоже точию правоверен несть грех.

 

Ис книги Номоканона выпечатанаго: к Киевопечерстеи лавре, от создания мира, 7132. Каталог страница, 169, строка 22.

Инок и людин [крестити] может, ис книги Апостола толковаго, зач. 18. Вопрос. И како рече [Филипп] диакон сыи крестил есть. Ответ. Понеже во оскудение бе презвитерство в Самарии, и един Филипп точию бе гонения ради бывшаго, и разсеяном всем бывшим, подобает же в нужди и диакону крестити. несущу презвитеру, якоже его Дух Святыи научи, повелевшу ему еже приближитися евнуху, и аще не бы воля Божия еже сотворити се, небы покрещении Святым Духом восхищен был.

 

Номоканон лист 67.

Вопрос. Елико аще крещают несвящении мужие же и жены или иноцы, что достоит творити;

Ответ. Аще умрет крестивыися, прежде нежели постигнути священнику. благодать божественная совершает и. ащели же жив будет, да паки поставит и священник в купель, и молитвы и миро по обычаю творит. тоже и Никифор патриарх глаголет.

 

Катихисис малой, лист, 35.

Тако убо потреба ведати, яко ни един на священство нерукоположенныи, и ни тайн строителем быти не может, разве некоторых нужных случаев тайн.

 

Гавриил архиепископ Филадельфиискии.

Иныя понужди заповеди, темже есте две, крещение и покаяние еюже кроме несть леть спасение получити.

 

Ис Пролога августа 28-го дня.

Где убо суть глаголющии, простъцем уже нам при напасти немощно крестити не сущу ту иерею.

 

Деяние апостольское зачало 17.

Бысть же в той день гонение велие на Церковь Иеросалимскую, вси же разсеяшася по странах июдейских и самарянских кроме апостол. Ниже: Филипп же съшед во град Самариискии проповедаше им Христа. Ниже: Егда же вероваша Филиппу благовествующу яже о царствии Божии и о имени Iсус Христове крещахуся мужие и жены.

 

Святыи апостол Анания еще в дияконех сыи крести Павла апостола, оскудения ради презвитер.

Святая равноапостольная Фекла, ученица святаго апостола Павла, понужди сама крестися; потом послана святым апостолом Павлом учити люди, иныя крести.

Святая Мариамия сестра благовестника Филиппа, ходящи со апостолом Филиппом и Варфоломеем. посем в Ликаонию шедше, проповеда слово, и многия крести.

 

[Месяца марта в 20 день].

Святая мученица Фотиния, многия учаше и крещаше, и цареву дщерь со стом рабыням ея научи вере Христове, и крести их;

 

[Месяца сентября в 6 день].

Преподобныи Архипп многих приходящих к нему еллинов учаше и крещаше.

 

[Месяца сентября в 7 день].

Святыи мученик Созонт, иже бе пастырь овчии, и Божиею благодатию учаше еллины и крещаше я. во имя Отца и Сына и Святаго Духа;

 

[Месяца того же, в 9 день].

Святыи мученик Феофан, иже бяше от ельлинских родителеи како и той крещаше немало народа.

 

[Месяца того же в 11 день].

Святая мученика Диодор и Дидим, християне суще, участа люди, многих от неверных крестиша.

 

[Месяца того же в 21 день].

Святыи мученик Приск християнин сыи, многи от еллин учаше и крещаша.

 

[Месяца октября в 4 день].

Святии мученицы Евсевии и Хиримон диакон, многи от еллин учаше я и крещаше. овогда тай овогда же и яве;

 

[Месяца того же, в 27 день].

Святыи Марко и иже с ним Христа всем проповедающе, и многи неверныя к Господу обращающе и крещающе;

 

[Месяца ноября в 5 день].

Святыи Галактион со отцем и с материю крестися от Онуфрия мниха, а сам потом и обручницу свою святую Епистимию крести.

 

[Месяца того же в 24 день].

Мних некии, крести девицу жидовину сущу о немже Иоан Милостивыи откровение получив;

 

[Месяца декабря в 10 день].

Святыи мученик Зосима мних приведе к вере Афанасия коментарисия огласив его и крести.

 

[Месяца февраля в 3 день].

Святыи мученик Власии дващи посылаех от игемона воин к нему крести всех;

 

[Месяца того же в 23 день].

Святыи мученик Александр мних множество града людей крести;

 

[Месяца марта в 5 день].

Святыи мученик, Конон родителя своея крести;

 

От жития святаго Конона иже в Ликаонии и Саврии муч. бысть. Понеже убо о всем цветяху святом чюдеса и мног народ от Саврииския страны обращахуся Iсусу Христу исповедающеся и крещахуся святым и преподобным Кононом;

 

[Месяца того же в 13 день].

Святыи мученик, Александр многих еллин крести;

 

[Месяца того же в 19 день].

Святыи мученик Хрисанф, невесту свою святую Дарию крести. таже и Клавдия триуна и всех домашних его крести;

 

[Месяца апреля в 15 день].

Святыи мученик Сава многи крещаше;

 

[Месяца маия в 2 день].

Святыи Афанасии Великии еще млад сыи, многи отроки крести;

 

[Месяца того же, в 10 день].

Святии мученицы Аафии и Филадельф и Кирил, иже с ними крещени Анисимом неким научившим их;

 

[Месяца того же, в 22 день].

Святыи мученик Максим многих крести;

 

[Месяца того же, в 22 день].

Святыи мученик Василиск, 13 воинов крести, въкупе же с женою, и со всею ея чадию потом недужныя уврачева и крести.

 

[Месяца июня, в 7 день].

Святая мученика диакона Сисинии и Кириак участа люди, и крещающа;

 

[Месяца июля, в 1 день].

Святыи мученик Потит дщерь цареву крести.

 

В Патерице скитском во главе 54, повествуется, нецыи христианстии, отроцы на поли пасуще овцы своя, и прилучьшагося с ними пасуща въкупе овцы своя евреина детища именем Феодула крестиша, во имя Отца и Сына и Святаго Духа;

 

[Месяца сентября, в 24 день].

Святая равноапостольная Фекла ученица святаго апостола Павла, понужде сама крестися, потом же послана святым апостолом Павлом учити люди иныя крести;

 

[Месяца того же в 15 день].

Святыи мученик Порфирии сам ся крести во имя Отца и Сына и Святаго Духа;

 

[Месяца того же в 29 день].

Святыи мученик Дада сын Савория царя перскаго сам ся крести;

 

[Месяца декабря в 11 день].

Святыи мученик Филимон, сам ся крести;

 

[Месяца марта, в 22 день].

Святая мученица Дросида, дщи Трояна царя, сама ся крести.

 

[Месяца июня в 10 день].

Преподобныи Феофан, сам ся крести. и потом умоли блудницу от блуда и крести ю.

 

[Месяца июля. в 17 день].

Святая великомученица Марина сама ся крести;

 

Из книги старохаратейнои в полдесть Глушицкаго монастыря, глаголемыя Кормчии, рекше правила закону, от сказания Номоканона.

Седящим святым патриархом в месте своем в святой Софии Антиохиискому, Констянтина града патриарху Иоанну, [ниже] а всея Русии митрополит Максим. и предстоящим ту многим избранным попом и диаконом и положиша посреде собора вопросы некия, и ответы всякому. [ниже] Вопрос. Аще кто от татар приидет хотяи креститися. толк.: Аще не будет велика сосуда в чем погрузити его. в воде в реце, и погружай его трижды глаголя: во имя Отца и Сына и Святаго Духа. Вопрос: Ащели будет при смерти, а не будет святителя ни попа, ни дьякона, а будет дьяк, льзе ли ему крестити. толк.: Аще не будет ни попа ни дьякона, а будет причетник церковныи, то и тому подобно крестити. во имя Отца и Сына и Святаго Духа;

 

Ответ 101-й, выгопустынных жителей, на вопрос иеромонаха Неофита. глава, 49.

 

О несвященных, яко аще понужди крещают то Божия благодать совершает. глава. 50.

 

[Номоканон лист 66].

Вопрос. Елико аще крещают несвящении мужие же и жены или иноцы, что достоит творити. Ответ: Аще умрет крестивыися, прежде нежели постигнути священнику, божественная благодать совершает и. ащели же жив будет да паки поставит и священник в купель, и молитвы и миро по обычаю творит. тоже и Никифор патриарх глаголет.

 

Ис книги Апостола толковаго, зач. 18. О Филиппе.

Вопрос. Знамениям великим бываемым како Духа не прияша. Ответ Златоустов. Оставления Духа прияша. а дар чюдесем неприяша, Ниже: Епифания Кипрскаго в толковании. Знамением же великим бываемом како Духа неприяша; Дух убо прияша грехом оставления знамениям же неприяша.

 

Беседы апостольския на деяния зач. 18.

Како убо рече, Духа не прияша тии; Дух прияша оставления, Духа же знамении, не у бяху прияша.

 

Минея служ. октября 11. службе святому апостолу Филиппу единому от 7 диякон. стихира 1. на Господи возвах.

Иже седмих диякон причтен, яко исполнь премудрости, и божественныя благодати, служити блаженне Филиппе святым купно с Стефаном потребам избрался еси. тем и убиваема сего видев, в Самарии востече. повелением божественным, Божие слово проповедая славне, и просвещая сущих во тме прежде. их же соверши Духом Святым, дневи сыны премудре.

 

[Апостол в деян. зач. 20].

И слезоста оба на воду Филипп же и каженик, и крести его. егдаже взыдоста от воды, Дух Святыи нападе на каженика.

 

[В службе святому апостолу Филиппу. в каноне песнь 4].

Священныи кандакии видев тя, вразумляюща того твоею рукою Филиппе крещается. и исполнь Духа Святаго явлься, проповедник божественныи бысть.

 

[Из апостола толк. зач. 18. Исидорово толк.].

Не апостол Филипп иже во двонадесяти счетан. но един от седмих иже с доблим мученикм Стефаном счетан быв на устроение въдовиц. сей есть, иже евнуха крестивыи, и Симона на веру наставив вси бо рече рассеяни быша по странах июдейских и самарийских кроме апостол.

 

[Той же глава 9, зач. 21].

Сущее. Бе же некто ученик в Дамасце, именем Анания, рече к нему Господь, во сне: Анания, он же рече: се аз Господи. Господь же к нему рече востав иди востогну, нарицаемую праву, и възыщи в дому, иудове Савла именем тарсянина родом. себо молится, и виде во сне мужа именем Ананию, вшедша и возложьша нань руку да прозрит. Толкован. Златоустово. Почтоже ни едино достоверных и великих, ниже приведе, ниже представи на крещение Павлово; яко нехотяше человеки возвеститися, но самем Христом. понеже ни Анания поучи его, ничесоже, точию крестил есть. егда же убо крестися, абие многу прият благодать Святаго Духа. от ревности и усердия многаго, не рече беседуй к нему, и поучи его, но яко молится, и виде во сне мужа, возложьша нань руце, и Анания диякон бе якоже сам Павел свидетельствует в правилех. сеже бысть понеже оскудение бе презвитер в Самарии, гонения ради бывшаго.

 

[Месяца сентяб. в 7 день].

Святыи мученик Созонт бе пастырь овчии, иже Божиею благодатию учаше еллины и крещаше я, во имя Отца и Сына и Святаго Духа.

 

Патерик скитскии слово, 54.

В церковных повестех слышах нечто сицево яко в Аравии, в граде некоем, в немъже беша стада, овча многа, прилучися пасти отрочищем христианским, с ними же вкупе пасяше отрочищь некоего евреина. внегда пасти им на поли, во един от днии в полудни собравшимся им по обычаю въкупе, седоша отрочищи играти и ясти от них же имяху потреб. въкупе же и отрочищь еврейскии с ними. по снедении же начаша играти друг с другом, и начаша досаждати еврейскому отрочищу, христианстии отроцы глаголюще, почто окаянне не будеши христианин якоже и мы. желаю бо христианин быти глаголаше отрок слезя со умилением но боюся родителей моих, реша же ему христианстии ороцы, и хощеши ли зде сотворим тя христианина. он же с радостию отвеща, хощу рече, отрочищи же абие начаша глаголати некия глаголы от церковнаго устава яже беша слышали в церкви, начаша омывати водою и крещати его глаголюще. крещается раб Божии Феодор, во имя Отца и Сына и Святаго Духа и вземше от хлеб ихже ношаху в снедение себе, и реша, Христе благослови, и даша ему глаголюще, прииде причастися святаго причащения якоже и мы въземше отрок еврейскии и снесть и прочее бысть християнин. сия убо на поли сотвориша отроцы яко незлобиви. Бог же всем человеком хощет спастися, и в разум истинныи приити. рекии. аще не обратитеся и не будите яко дети, не внидите в царство небесное. дело же отрочищь пришествие Святаго Духа показа. Приспевшу же вечеру, кииждо отрочищь отъиде в дом свой со овцами. такожде и отрочищь еврейскии, паче же истиннейше рещи, новопросвещенныи отъиде во свой дом к родителем. и внегда седоша и начаша ясти на вечери, начаша родителие его обьюхати благовоние мира многа яко мнети им исполнитися всему дому их, и недоумевахуся что се есть. мневше же яко от ближних християн исходит сицево благоухание. воставше затвориша двери и оконца дому своего, тогда же паче множае благоухание исполнися дом, начаша же и друг друга обьюхавати, и ни на едином же сих обретеся таковая воня, непричастни бо бяху, просвещению святаго крещения. якоже приидоша ко отроку обьюхати его, обретоша его от главы даже доногу, миром благовония исполнена. начаша же, възирати нань со гневом, вкупе же и бити его. убоявъжеся отрочищь, и сказа им вся бывшая. тогда убо диаволнею завистию исполнени, начаша бити отрока немилостивно, совещаша же между собою убити рекше, аще убием его яве то уведано будет от христиан, яко убиица и мы от них убиени будем и умрем зле, совещаша же диаволи советницы отцы и начальницы убииству внуцы Каиновы сице: Бе же во граде том некии банарь евреин, иже баню града того держаше. и бе любим родителем отрочища, ради единыя веры быти им. сего призвавше отай, и даша ему злата много, сказавше ему яже о отрочищи. и рекоша ему, егда разжжеши пещь баню, и восхощеши заградити дверь, въверзи отроча се яко да разгорев будет прах. понеже отступник веры нашея. И никтоже вас любимицы да мнит или помышляет ложна быти глаголемая, слыши убо псалмопевца о детех их вопиюща, и пожроша сыны своя и дщери своя бесовом. И паки в царских книгах пишет. и принесоша чада своя огневи: Вземше же злато евреин. и приведено бысть ему отроча от родителеи его в час вонь же повелено бысть им. взем же въверже его, егда хотяше заградити двери пещныя, и заградив отъиде. По смотрению же Божию, заутра прииде епископ града измытися в бани. и вшед обретеся баня студена, яко мнети низапалене быти во дни многи. ибо сшед ангел в пещь Вавилонскую ко святым онем трием отроком той и ко отрочищу сему въшед угаси пламень пещныи, въкупе же и осени на его благодать Святаго Духа от крещения начат же епископ стязатися со строителем бани яко небрегуща о запалении бани, он же свидетели приведе верных въчера измывшихся в бани, тогда епископ призвав банаря, и начат истязовати его прилежне глаголя, почто не зажегл еси пешь по обычаю якожде и прежде, или вражду некую сотворил еси. он же отвещаваше яко выше меры паче ныне запалих баню, дивляшеся же епископ, и неверую глаголаше идем к пещи яко да своима узрю очима. како запалена бысть. шед убо и обрете двери пещныи заграждены с твердостию. и повелевшу ему отградити. и сему бывшу, и абие изыде отрочищь неврежено. имея лице свое яко лице ангела, удивижеся о преславном чюдеси епископ. и повеле и привести строителя бани, и приведени быша к нему. истязаемом же им отвещи отрочища. и реша, яко в вечер сей евреину повелехом заградити пещь истязаем же бысть и евреин. и начат поведати истину о отрочищи, ибо ни скрыти можаше. ибо преславное то чюдо, и нехотя обличаше его, отрок же стояше, егоже мняху прах быти, тем обретеся обличитель. и бе видети воистинну преславное чюдо, яко светлеише видеся образ отрочищу, паче онех триех отрок, нибо якоже и онех власы отрочищу не опалишася. ниже что знамение огня явися на нем. глагола же отрочищь пред всеми, яко егда въвержен быв в пещь огненую, зрех жену некую багры носящу ризы. и пламень погашающу, и огнь в росу претворяющу, иже слышавше разумеша, яко то бяше святая Богородица, еюже молитвами вси да сподобимся сохранени быти в православней вере, и огня вечнаго избавленном быти. епископ же поем с собою отрочища, и воста и научи его божественным книгам и облек его во иноческии образ, и сотвори диакона своей ему церкви во обличение богоборным иудеом.

 

Той же Патерик.

Поведа нам отец Василии старец и отшельник иже от вышния лавры бывыи мних. яко слышах некия христолюбивы мужи поведающа таково чюдо, в стране Палестинстеи в некой много человечьной в ней же живяху христиане и иудеи, имуще скоты многи, имеяху же сицев обычай от родителей преданныи, по вся дни по обычаю собирахуся со скоты подверем града. и кождо посылая со своими скоты, ов убо сына своего. ов же отрока, и въземлюще скоты отроцы и хлеб свой и отхожаху. и посяху скоты своя даже до вечера. по захожении же солнца паки привожаху скоты в домы своя. во един убо от днии, идоша по обычаю пасти скоты оныи, во время убо снедения совокупльшеся, реша друг ко другу христианстии отроцы. приидете и мы да сотворим службу зде яко же творят попове в церквах. и сотвориша епископа старейшаго их отрока. той же прочия сотвори отроки, оваго презвитера, другая же диаконы иныя же иподиаконы, прочия же отрочища сотвори четца. и поставиша плуя едину в чин жертвеника. принесоша же и приношение сиречь просфиры. кождо от своего хлеба иже ношаше, бе же с ними и отрочищь еврейскии, сын сущь архиереов. и моляше отроки глаголя приимите мя с собою, да и аз принесу просфиры якоже и вы, они же отреваху его глаголюще не можеши ты приношение с нами сотворити евреин сыи. он же рече, да буду и аз христианин, и реша к нему отроцы, аще будеши христианин приимем тя с нами. обещавшужеся ему и прияша. Сотворенныи же от них епископ крести его в воде, сотворив вся по обычаю. потом же реченную жертву принесоша, и егда наченшим им глаголати, един свят един Господь. сниде огнь с небесе, и пояст вся предлежащая. отроцы же от страха падоша, и быша яко мертвии. вечеру же бывшу, идоша скоти по обычаю во град отроци же не приидоша. Заутра же шедше, родителие их на взыскание им, обретоша отроки еле живы, и поем кождо свое отроча, въведе в дом свой. и по триех днех едва приидоша в себе отроцы, вопрошаеми же быша от родителей своих что бысть прилучьшееся вам. они же поведаша вся бывшая. Сын же евреина молим бе от отца въкусите хлеб, и не послушаше его глаголя, яко аз христианин есть, и нехощу июдейская ясти кътому. сия же слышав скверныи он и совеща лютей смерти предати его Бог же иже тайная сведя, и испытая сердца и утробы. лукавое умышление сквернаго иерея сведя, уготови князя того града истязати о бани банаря еже банную пещь добре разжжещи и рече к нему сие, колико лет имаши преобидя всех. ибо и аз егда прихожду измытися, студену обретаю баню, но кленуся великим Богом, яко аще недобре ужжеши, и обрящется днесь неупалена но студена, главу твою отсеку, он же обещася сотворити по угожению князя. Сия же уведев еврейскаго отец мнев диавольским коварством утаити вещь. послав к банарю и призвав его рек ему сице: веси ли о друже, яко должен ми сеи 10, златниц, он же ей тако есть. и глагола ему, аще сохраниши заповедь яже дам ти весь долг той отпущу ти. он же отвеща ему, иже аще заповедаеши ми, сотворю, точию да свобожуся тяжести долга моего. беззаконныи и нечестивыи глагола ему, уведев яко заповедано ти есть от князя, разжещи пещь банную, и понеже имам некоего отрока прогневающа мя. хощу егда угорит пещь, и хощеши заградити ю послав ко мне повеждь ми, и его же послю воспросити тя аще доспе пещь удержав его въверзи в ню, и загради крепко, яко да поне сице избавлюся злаго нрава его. Сия слышав банарь. и хотя свободитися долга. обещася сотворити заповедь его. и шедше боязнию князя одержим разжже пещь паче меры, евреин же егда разуме яко ужжена бысть пещь посла сына своего рек шед виждь аще угоре пещь, банарь же по обещанию похитив отрочища, непорочнаго и верже его в пещь, и заградив двери отъиде. князь же убо заутра пришед измытися, и обрете баню студенейши паче первых дней. и призвав банаря и глагола ему со гневом, злонравне, не заповедах ли тебе добре запалити баню, и почто презрел еси, и студенейши сотворил еси. он же начат проклинати себе. яко три части дров множае згоре. бояся хотя угодити тебе. откуду же сице студена обретеся, неведя, аще ли моим словесем неверуеши, прииди и виждь пещь, и от углия разумееши яко не лжу. он же исполнь гнева быв, иде с ним к пещи, и открыв двери обрете отрочища в ней седяща, и рече к банарю, откуду отрочищь сей обретеся зде, банарь же сказа ему вся яко воистину отрок без правды вовержен бысть, егоже толико пламене сожещи невозможе и огнь. Князь же ложно мнев глаголемое, а не истинно. глагола к банарю, принеси ми дрова, и стоящу ми зде запали пещь. и сему бывшу. князь же вопрошаше отрочища, котораго от евреи сын еси; коея ради вины в пещь сию въвержен еси. и уведев яко зане быти ему христианину, и не хотевшу ему ясти иудейская снедения, отец мой посла мя зде, яко ненавидя христианства. мерзость бо злочестивому благочестие. князь же взем отрока разгоревшися пещи, и вверже и в пещь глаголя, аще в первое обаял еси пещь не згорети, в ней ныне же не убежиши руку моею. Бог же, иже всегда творя велия и чюдная. и иже близ всех призывающих его истинною. подобно, яко же и первее пламень пещныи угаси и отрока сохрани невредима. пришед же князь измытися. обрете паки студенейшу пещь паче первыя, яко мнетися за неделю быти не паленой. о сем бо князь во удивлении быв, и пришед отверзе баню, и обрете отрочища онаго седяща с веселием и лице ему светяся яко ангелу. тогда князь удивися преславному чюдеси, и скоро тек поведа сие епарху. он же сие слышав въскоре, к бане прииде, и повеле паки третицею запалити пещь. и седящу ему ту, дондеже ужжет множае первых и абие въвергоша паки отрока в ню, и заградив двери, положи печать и стражники. потом же въниде умытися, и вместо теплоты, студени много и зимы исполнися. и абие изшед, и отгради двери пещныи. и обрете отрока седяща весело зело. вопроси же и той чии есть сын, и уведев яко иерея беззаконнаго июдея сын есть. и яже на селе бывшая, якоже выше написахом. зане быти ему христианину, и не восхотевшу причаститися ему июдейских снедей нечистых. сицевому огню предан бысть от своего отца смертоносному умучению. и бе видети якоже древле вавилонская пещь три отроки сохраньшая, сице и сего зде сохрани. Тогда повеле епарх привести отца отрочищу. и глагола к нему, кии ответ хощеши дати, о нем же сотворил еси диавольское и неправедное дело. ты убо мнел еси утаити от Бога и человек, но Бог сведыи лукавая твоя, совещания. не остави тебе совершити. но остави тебе совершити. но обличи суровство душа твоея, ты же толико немилосердие показа. яко твоея утробы плод таковей смерти предаст но понеже злое се дело сотворил еси. и причастники и нас нечистому ти начинанию быти соделал еси. того ради и ты лютою смертию погибнеши. яко да не и друзии тебе подобно такоже сотворят. и тако повеле главу его отсещи вне града, на пусте месте на снедение зверем и птицам. повеле же призвати вся отроки, и подробно от них яже на селе прилучьшаяся им испытав от них, и вдаст вся в монастырь воспитати сия тамо. и нарицати именем якоже преже кождо наречен бысть. нареченому епископу пребывати, такоже и нареченному презвитеру и диакону, такоже и подиаконом и четцем. и просто рещи комуждо по чину и по степени заповеда почитати их, и пищу подавати им;

 

О еже понужди крещение без мира и елеопомазания и прочих молитвословии священнических может совершитися и облагодатьствоватися. глава, 51.

 

Книга о седми тайнах архиепископа Филадельфийскаго.

Ведати подобает яко тайны церковныя, иныя понужди суть посредния. евхаристие и елеопомазание их же аще кто и несподобится нужды некоея ради спасен быти может. Иныя понужди заповеди, темже есте две крещение и покаяние, ею же кроме несть леть спасение получити;

 

Книга древлегреческая Завещание святых апостол. книга, 7-я, глава, 23, в завещании к епископу или презвитеру.

О крещении. Да помажеши первее елеом, таже крестиши водою, конечне же печатаеши миром. да помазание убо будет причастие Святаго Духа. вода же совет смерти. миро же печать сложении. Аще же ниже елей будет ниже миро довольствует, вода к помазанию, и к печати, и ко исповеди умирающаго, сиречь соумирающаго.

 

Катихисис болшеи, глава, 60. О седми тайнах.

Вопрос. Скажи ми о сем явъственее. Ответ. Ниже: Вся убо седмь тайны потребны суть. но не всякому человеку, ниже единообразни. Ниже: Крещение бо и причастие и покаяние сице нужно потребни суть всякому во спасение да спасется. Ниже: Без них же ни един спастися может. разве аще невозможет их употребляти вожделев их, святое же миро и последнее елеосвященое помазание, сице ко спасению суть потребна. дабы имели есмы спасение наше дерзновенне, известно же и твердо. Ниже: разве аще бы я возжделел и невозмогл бы их употребляти.

 

Из Катихисиса малаго, лист, 35.

Тако убо потреба ведати, яко ни един на священство нерукоположеныи, и ни тайн строителем быти не может. разве некоторых нужных случаев тайн.

 

Ис книги Гавриила архиепископа Филадел., о 7 тайнах.

Иныя понужди заповеди, темже есте две, крещение и покаяние еюже кроме несть леть спасение получити.

 

Ис книги Григория Богослова от слова, 2. на Крещение Господне, стих. 13. от толк.

Вера совершается крещением. и предходит исповеданием ко спасению.

 

Беседы апостольския лист 2555.

Ниже убо покаяние довлеет на очищение, но потреба крещение восприяти.

 

Ис книги Захария Копистенскаго, лист 71.

Утверждает не скорбети вовремя гонения, аще и недостаток кии будет в церковных пространствах, и в добродетелех умаление, но утешатися о вере правои. и яко удостоилися в тех часех жити.

 

Из минеи чет., Макария мит. сентяб., в 24 день. от жития вел. страстотерпицы Христовы и равноапостольной Феклы.

Вшедши же в гору обретши пощеру, и живяше в ней лета многа, жены же етеры добра рода: уведевши святую деву хожаху к ней учахуся словеси Божию и крещахуся от нея. Ниже: Изнесши жена дщерь свою, и верзе ю на нозе ея и сама ся с нею. и возопи глаголющи помилуй сию, якоже и многи помиловала еси. и вопроси ю крещена ли еста. они же реста поганска жития есве: Ниже: мати же девицы, ово на страсть, ово на желание, вънемлющи дщери своей. изволи прияти знамение Христово, припадше ко святей и рекоста. аще достойне есве воля Божия буди, и отрекошася диявола: и обещастася Господу нашему Iсусу Христу. и молитву сотвори има, и научи я евангелию Божию, и помазавши елеом веселия. и крести я во имя Отца и Сына и Святаго Духа.

 

Из минеи чет. печат., нояб. в 5 день, от жития и страдания святых муч., Галактиона и Епистимии.

Епистимия же рече [Галактиону] еже велиши господине мой то и сотворю, верую Господеви твоему, и хощу креститися, он же рече добре девице мудрая. ныне тя истинно любити начинаю, но понеже несть да кто крестит тебе. ибо лютаго ради на христианы гонения, погибе благочестие, презвитеры и клирицы и ины избиены суть, инии же в пустыни бежаша. того ради нужда есть да аз сам крещу тя, возми убо белая одеяния, изыди к реце Кифос аки мытися, изыду же и аз из дому моего аки бы в поле играя, и тамо обретши тя крещу, и бысть тако. изыде же Галактион и в Кифосе крести обручницу свою, во имя Отца и Сына и Святаго Духа, и научив ю молитися Богови разыдошася никомуже ведущу тайны сея. тем временем Галактион блаженныи к святеи вере обрати единаго от рабов тестя своего, и крести его якоже и обручницу свою;

 

Месяца июля, в 1 день. от страдания святаго муч. Потита.

И абие призвана бысть дщи царева, яже припаде к ногам мучениковыма. и глаголаше, молю тя рабе Божии крести мя во имя Отца и Сына и Святаго Духа, всесильнаго Бога твоего. его же проповедаеши. и повеле святыи абие уготовати купель, и крести ю сам пред всеми, понеже невозможно бяше в то время обрести иерея всем бо священником крыющимся гонения ради.

 

Минея чет. Макария мит. от жития святаго Конона. иже в Ликаонии Исаврии муч. бысть.

Понеже убо о всем цветяху святом чюдеса и мног народ от Саврииския страны обращахуся Iсусу Христу исповедающеся и крещахуся святым и преподобным Кононом.

 

Ис Пролога, июня в 10 день, житие преподобнаго отца нашего Феофана, иже во Антиохии.

Феофан во святых отец наш, бе убо от Антиохиискаго града родися от неверну родителю. и пришед в совершеныи возраст, сочтася с женою. той же умерши, сам ся убо крести, и затворися в хижине близ града. и прилежаше добродетели, уча вся приходящыя к нему, еже вся Господни заповеди хранити изрядне еже целомудрствовати. уведав же о блуднице нарицаемей честная. яже многи погуби, излезе ис хижи своея, и облечеся в ризы светлыя, и испроси у отца десять литр злата. яко хотяше пояти жену си. и шед к ней дав ей злато и умоли ю отступити от блуда и крести ю. и сотвори ей ину хлевину близ своея хижи. и въведе ю ту, и устрой Духа Святаго обителище. и тако Божиею благодатию оба в един день преставистася, и восприяста нестареющееся присносущное блаженьство.

 

Катихисис болшеи глава, 60. о 7 тайнах.

Внегда бо ко умовению водою словеса сия Божия приложатся, сиречь, крещается раб Божии, имярек, во имя Отца аминь. и Сына аминь, и Святаго Духа, аминь. тогда с сими словесы тайна святаго крещения совершается и душею паки раждается крещаемыи силою Святаго Духа. сеже Дух Святыи несказанно пременяет воду во умовении сем, якоже внегда огнь зимную воду в кипящии укроп претворяет. и дает ей сицевое совершительное, яко касающися тела и душю омывает, и паки раждает. и убо не вода сие творит но Духа благодать.

 

Той же, глава, 61.

Вопрос. Кий есть вид, или видотворение сея тайны. Ответ. Оная словеса, имиже Господь повеле крестити, сиречь во имя Отца и Сына и Святаго Духа. въкупе со трема погружениями, сими бо глаголы божествеными и силою их крещение кончается и свершено бывает. аще и прочия глаголы при крещении глаголемии от священника, в благолепотное украшение и в наказание бывают. сия же три в видотворении и содеяние крещение суть, да сими всездравъственно и благосовершенно крещение бывает.

 

Из бесед евангельских, беседа 25. нравоуч. 24, лист 191.

Якоже бо удобно нам креститися и возницатися: сице удобно Богу погрести ветхаго человека, и показати новаго. Трижды же сие бывает, да навыкнеши, яко сила, Отца и Сына и Святаго Духа вся сия совершает.

 

Беседы апостольския, лист 1778.

Банею омывается нечистоту глаголом рече каковым, во имя Отца и Сына и Святаго Духа.

 

Из Благовестника, от Марка. зач. 32. лист 43. В толк.

Понеже просвещение глаголется крещение. еже в трех погружениих совершается, в трех суть просвещении крещением.

 

Книга севаста Арменополя, в канонех кратких, сечение 5, глава 1. надпись 1. патриарха Никифора.

Подобает некрещеныя младенцы, аще обрящется некто на месте, несущу иерею крестити. крестит и свой отец, или каков любо человек христианин, несть грех. Толкование. Недугующь детищь. въдадеся абие крещатися. здравствующь же во 40 днех его рождения. Блаженныи же Иоанн тако глаголет: недугом одержим, приближився уже к смерти детищь. аще тройческим точию погружением, иерей со страхом еже не предвосхититися совершит не треба сему посих и молитв яже оставишася, и определение возисполнити.

 

Того же книга, 5. Илии митрополита Критскаго ответи к некоему монаху Дионисию о детищь. 6, вопрос.

Детищь рекл есть неудугом удержан и приближився убо к смерти, принесеся некоему иерею священным богорождением возраждущся. тонкое же сего видев въдышюща, и убоявся, да некако обычным молитвам и заклинанием припеваемым предвосхитится неполучив крещением возрождения отъем молитвы, прежде совершения припеемыя, и заклинания. совершает его троим погружением, и равночисленным призыванием, Отца и Сына и Святаго Духа. что посих крепится детищь, недугу отбегшу. присудствует паки иерей, заклинания, иже остави и молитвы яже возъисполняющь. Прочее искал еси научитися, аще годствует сие творити или ни. и мнится ми, яко неподобает по совершении яже преже совершенному троим погружением и призыванием трех лиц, в нихже и совершение. негде бо от коего освященных правил сицево что обретаем преоделенное; В Лаодикии, правил. 47. обьстоятелно в недузе крещаемых происходящее, ничтоже сих помяне, ни благословити и ни заклинати по крещении, точию подобает вере изучатися, глаголет бо, яко подобает в недузе крестившимся, или воставшия, изучитися вере. и знати яко Божияго дара удостоишася;

 

Яко на всякаго крещающагося человека. Дух Святыи невидимо сходит, тако и во всех тайнах церковных оныи действует. глава, 52.

 

Евангелие учителное, поучение на Крещение Господне. слово, 68. лист, 522.

Даже увемы яко на всякаго человека, крещающагося отверзаются небеса. и призывает его в вышнее жилище, сходит же нань и Дух Святыи. ащели же чювственыма очима невидим сии несть достойно неверовати. знамения бо не о верующих дана быша, но неверных ради, нам же доволна есть вера, вместо знамения;

 

Евангелие в неделю по Крещении Господнем, лист, 526 на об.

Телу бо видимая вода чювственная, души же невидимей Дух невидимыи.

 

[Благовест. от Матф., зач. 6, лист 30].

Небеса же Адам заключи, Христа ради отверзаются. яко да увеси, яко егда и ты крещаешися, отворяеши небеса.

 

[Той же, от Иоан. зач. 8, лист 42].

Вода бо видимо приемлема, видимому телу очищение разумеется. Дух же невидимо приходя, невидимей души в порождение. аще же вопрошаеши, како может вода родити водно суще, и то может человеку на создание. обаче якоже о телеснем семени, всяко Божия благодать, такоже и о крещении вода убо подлежит, а Дух вся действует.

 

Беседы апостольския от Иоанна. беседа 26. нравоуч. 25.

Рожденное бо, рече, от плоти плоть есть; рожденное же от Духа, дух есть. отводит его чювственных всех. и не попущает очесом сим испытовати тайноучение. не о плотьском бо беседует естестве, но о дусе, о Никодиме. [прежде его словом сим к горнему посла] яко бы ничтоже чювственых възысковати. Дух бо не убо вознепщуеши яко плоть раждает духа.

 

Из апостола толковаго, зач. 2. От толков.

Како же креститися глаголет воде несущи в горницы. яко истиннейшии Дух есть имъже воду содетельствует. якоже и сам Христос елеом помазан быти глаголется никакоже помазану бывшу, но Дух Святыи прият.

 

Ис Катихисиса болшаго, глава 24.

Вопрос. Како нам дадеся Дух Святыи, и дарование и в чем действие его совершается.

Ответ. Первее гласом евангельским, и поучением святых писании. якоже святыи апостол Петр к Корнилию глагола. нападе Дух Святыи на вся слышащыя слово. [ниже:] И зде Дух веры слышанием, и поучением слова Божия нам дадеся. [ниже:] Потом паки во всех тайнах церковных действует Дух Святыи. и нам дадеся. якоже на крещение Дух освящения, и истинныи Дух обручения, и дарования приятие Духа сыноположение. Такоже и возложением рук, и миропомазания, и в хиротонисании. сие же и вовремя освящения церкви. Такоже святыи апостол Павел глаголет, яко Дух Святыи действует вся во всех вся едина суть потребно к спасению нашему. [ниже] Сия вся Дух Святыи во всяком изволяющем действует. И тако убо, яко без него никтоже может рещи Господь Iсус, точию Духом Святым. Дух Святыи благодатию и силою своею, во вся совершенства спасения нашего еже нам истекает, и исправлением Христовым в нас все совершает. устрояя нас в снабдение и содержание того спасения темже тойже апостол глаголет, ащели кто Духа Христова не имать, той несть егов.

Вопрос. В коих убо таковая действует Дух Святыи.

Ответ. Яве яко во изволяющих благое, и крестящихся. и в послушающих слово Божие, и хранящих е. и в кающихся, и верующих обетованием и в тех они же противу совести ничтоже дерзают творити, или предложением имут блюстися грехопадении и до издыхания своего Богу повиноватися. в сицевых токмо человецех дародатель Дух Святыи действует.

 

Благовестник от Марка, зач. 2. лист, 7.

Но да увеси и ты. яко егда крестишися и на тя Дух Святыи найдет. Ниже: разверзаются и нам.

 

Благовестник от Луки, зач. 10 [лист 35].

Сниде Дух на Iсуса, да от сего увемы, яко и нам крещаемым сходит Дух Святыи. Выше. Отверзаетъжеся небо, да явит нам, яко крещения ради отверзается, всем небо, еже Адам затвори.

 

Катихисис болшеи во главе, 60-й.

Яко вся седм тайн имут слово, и видимое знамение. и вся имут обетование благодати и благословение Божие. Вопрос. Что есть святая тайна. Ответ. Тайна есть невидимыя благодати Божия видимое знамение. Молитва. По крещении человеком пред миропомазанием. Благословен еси Господи Боже Вседержителю, источниче благих солнце правды, просиявыи сущим во тме свет спасения, ради явления единороднаго ти Сына Бога нашего, и даровав нам недостойным, блаженное очищение во святей воде, и божественое очищение в животворном ти помазании еже и ныне благоволил еси породити раба своего новопросвещеннаго имярек. водою и Духом и волных и невольных согрешении оставление даровав. и проч.;

 

Сказание от святых писании, о еже аще на которых рука еретическая бяше первее, таковых простолюдином крестити никоего препятствия не обретается. глава, 53.

 

[Потребник иночес., лист, 247].

Чин и устав како достоит приимати. иже от лытынь приходящих, ко святей Божии соборнеи и апостольстеи церкви к нашей непорочней христианской вере православней хотящих истинным святым крещением креститися. Дающих на себе свиток писания православныя веры, и проклинающих вся своя ереси, и иную всякую ересь. Сего же чина и устава последование, единообразно действуется над приходящими. и от иных вер. аще же жидовин, аще срацынин, или кто преже еретическое имея крещение, о них же все совершается неизменно. якоже зде написано.

 

Из Шестодневца Василия Великаго.

Жидовин бо еретик едино еста. Крестили в древле православней церкви жидов, простолюдини суще, их же зде на среду представляющи объявляем. Месяца ноября в 24 день. Мних некии крести девицу жидовину сущу, о нем же Иоанн Милостивыи откровение получив. В Патерике скитском во главе 54. повествует. Нецыи христианстии отроцы на поли пасуще овцы своя, и прилучившагося с ними пасуща вкупе овцы своя евреина детища именем Феодула крестиша, во имя Отца и Сына и Святаго Духа.

 

Ис книги предоб. Иосифа Волок. от слова, 15.

Но и еретицы убо не единомудрствуют. но овы убо тако, овы же инако, павликиане, и фотиниане, фриги, ивномиане, и монтаниты, и савелиане, и маркиониты. и измальтяне, и инии таковыи. [ниже] о сих убо глаголют божественая писания, яко егда приходят к православней вере. подобает им поститися время доволно и вне церкви стояти, потом же сих крестити и яко же ельлины.

 

Потребник бол., лист, 564, об.

Яко павликианы иже от Павла Самосатскаго суть, и евномианы, и монтаниты, иже есть и мантане, и савелианы, и манихеи, и уалентианы, теже и валентини, и маркионити, теже и маркиане, и сущыя от подобных им ересей, приходящыя к правоверней вере, яко еллины приемлем сия. еллины же убо, якоже и жидовы и агаряны повелено есть. крестити совершенным крещением в три погружения.

 

Кормчая глава, 70. лист, 635.

Манихеяны же, и уалентианы, и маркиониты, и от подобных им ересей приходящих, яко еллины приемлюще покрещеваем.

 

Номоканон лист, 49. прав., 203. аки нужды ради.

Обаче не второкрещаются, иже от причетник, или от простца инока, или диакона, или отца самого. или христианина некоего православнаго, и понужди не сущу священнику то крещени суть. но точию аще не рука еретическая бяше первее. Чти правило, Никифора Констянтинопольскаго, и Арменополь в канонех кратких, сечение, 4-е. титла 2. и сечение 5-е. глава 1. и в книзе 3. собор. 1.

 

Сему правилу, в Номоканоне писанному. приводим во свидетелство прав. святых апостол 68. глаголющее сице.

Дващи поставленныи, и с поставльшим его да извержется, аще не будет токмо еретическая рука первая. Толкование. Аще которыи епископ, или презвитер, или диакон, второе поставление приимет от кого перваго возненавидев, да извержется сам. и поставивыи его. аще токмо не прилучится, яко от еретик поставлен бе первие. ибо от тех крещени некрещени: и поставлени непричетницы.

 

Никон Черногор. слово, 63. на прав. святых апостол. [68-е].

Разве аще обьявлено есть яко от еретик имать рукоположение, от таковех бо поставленом или крещеном ниже верном ни причетником мощно есть быти.

 

Матфей Иерос. состав, Х. глава, 14. на апостольское прав. [68-е].

Аще от еретик хиротонию приял бе первее, отметаем бо таковых, якоже крещение сице и хиротонию, небо освящение се но скверну веруем исходатайствовати.

 

Потребник болшеи, глава 5. лист, 649.

А иже второе крестити кого крещеннаго преже от правоверных, вся правила отрицают. разве аще некто от нечестивых еретик крещен бысть преже. тех бо крещение, сквернение есть паче, а не крещение.

Еще приводим во свидетельство сему 203, му Номоканона правилу, на которыя оныи Номоканон севаста Арменополя правила съсылаются. идеже явственне сице показует. Книга севаста Арменополя, в канонех кратких, сечение 4: титла, 2. Правило 14. патриарха Никифора. Подобает монашествующим въходити в святыи жертвенник, и въжигати свещу и кандила, и красить храм, по обьстоянию и монах прост крещает. такоже и диакон, и людин же. аще обрящется на месте не сущу священнику.

 

Сечение 5. глава, 1. надпись 1.

Патриарха Никифора. Подобает некрещенныя младенцы, аще обрящется некто на месте. несущу иерею крестити. крестит и свой отец, или каков любо человек христианин. несть грех. Толкование. Недугующь детищь, въдадеся абие крещатися, здравствующь же по 40 днех его рождения. блаженныи же Иоанн тако глаголет. Недугом одержим, приближився уже к смерти детищь, аще тройческим точию погружением, иерей страхом еже непредвосхититися совершит, не треба сему по сих и молитв, яже оставишася, и определение возъисполнити.

 

В книзе, 3. собор 1: сечение 4: надпись 2. Никифора Исповедника правила некая.

По обстоянию монах прост крещает. такожде и диакон по обьстоянию крещает, и людин же крещает аще несущу священнику. подобает некрещенным детем, аще обрящется на месте несущу иерею креститися. аще крестит же и свой отец, или кии любо человек точию да будет християнин несть грех.

 

Ис книги кир Гавриила архиепископа Филадельфиискаго: о седми тайнах, глава 7.

Ведати подобает и о сем христиане православнии, яко аще бы приключилося не быти священнику, и прилучилобыся нужда новорожденному детищу, может аще есть диакон, или прост человек, или жена точию христиане окрестити; якоже в каноне святаго Никифора писано есть. иже вовремя нужды и прост мних такожде и диакон новорожденное да крестит, такожде и Августин в епистолии своей к Фуртунату пиша глаголет, егда прилучится быти велицей нужде. обычай есть да и простии людие крестят иже хощут креститися, и паки иже достоит некрещенныя дети крестити: ащебы обретаемы были на местех таковых идеже священника не бысть, и дети изнемогали к смерти. таковое аще бы и свой ему отец окрестил. или кто же точию правоверен несть грех.

 

Ис Пролога 28-го дня.

Где убо суть глаголющии, простцем уже нам при напасти не мощно крестити несущу ту иерею. Вся твори, кроме еже повредитися благочестию. Златоуст на послание к коласаем беседа, 11.

 

Яко подобает исповедати грехи своя отцем духовным, а не уповати на ся, аще и вельми добродетелен зрится быти. глава, 54.

 

[Катихисис малыи, лист 27.].

Четвертая заповедь церковная четырежде летом повелевает исповедатися аще и частей благоговеинейшии могут. но никтоже паки да не имеет того которыи не имел ни единою летом исповедатися, таковы бо под клятвою и отлучением от церкви;

 

Ис книги, сына церковнаго, глава.

Иже кто в мире живет, а отца духовнаго не имеет у себя, той несть человек христианин. И паки, горе тому человеку в мире живущему иже умрет, а отца духовнаго не имеет. лучше бы ему не родитися.

 

Ис книги Кирил. [Иеросалим. лист, 204].

Иоанн Лествичник глаголет, не прельщаися тем сыну послушниче Господень. еже неисповедати грехов своих, но исповедуй пред учителем своим грехи своя. невозможно убо есть стыдящемуся человеку исцелети, но открывающу раны своя. открывай же и ты раны грехов своих, и яко врачю показуй их нестыдяся.

 

Ис книги Постничества, Василия Вел. ль главы, 263.

Аще подобает отреченная деяния нестыдне исповедати всем, или неким, и к ним сим исповедание греховное имать слово, еже имать слово, еже имать показание телесных страстей. якоже убо страсти телесныя не всем открывают человецы, ниже прилучшимъся но искусным сим прилежания и врачевания сице исповедание греховное быти должно есть к могущим врачевати по писанию. вы силнии немощных немощи носити, сиречь възимати ради врачевания.

 

Из бесед апостольских, лист, 3059.

Зане грехи неисповеданныи откровенны будут вселенней, и пред други и враги и ангелы.

 

На деяние, лист 207.

Покаяния кроме отходящим лучше бе не родитися.

 

Ис книги Никона Черн. гор. слово, 52.

Аще прегрешением прегрешит человек в грех въпад, изнурит же плоть тела своего, и истает кости мозгов своих, в посте и в плаче ничтоже успеет. аще изречет человеку грехи своя на срам себе сего ради оправдится.

 

Из книги душезрителнаго зерцала, в катологе, слова 2-го, ст. 10.

Яко аще не исповесть кто своя грехи зде, спастися не может.

 

Ис книги Григорьева видения.

Вопрошение Феодорино ко ангелом. И посих вопросих аз [глаголет Феодора] водящих мя святых ангел, господие мои, всякаго ли греха иже сотворит человек жив сыи, безо всякаго ли извета истязаема бывает душа его; минущим зде не может ли очистити их понеже написана суть в коемждо мытарстве, якоже испытовают мя ныне. вижю бо яко подробну истязуют мя, и трепещущи ужасаюся. и реша ангели не всех тако, но токмо подобных себе, неисповедавшихся и в сицевых умерших. аще бы ты исповедала духовному отцу без срама и прияла бых заповедь и успела бы исправити. и прияла прощение от него. прешла бы и ты невозбранно вся злая сия. Ниже: Аще кто упразднится на покаяние и престанет от зол яже творяше. не исповедает же отцу духовному грехи яже сотворил прежде. надеявся яко доволно есть ему на спасение, токмо отступление от них. то аще постыдится их ради на долга время, несть ему ползы аще исповедание не будет якоже подобает. и сицевыи же добре испытан будет. якоже видиши.

 

Из Благовестника. от Луки, зач. 46 и в толк. лист 95 об.

Мертвыи же есть грешныи, иже погребает своя мертвецы; сеже есть лукавыя помыслы неисповедая их. тому Iсус бранит последовати себе, не погребати ни крыти лукавых помысл, но велит являти я покаянием.

 

Ис Пролога, маия, в 29 день.

Не пребуди в месте в нем же Богу согрешил еси, не презри службу свою да не впадеши в руки враг твоих, понуди себе на поучение псалом, понеже се соблюдает тя от пленения вражия, возлюби всяко злострадание, и смирятся тебе страсти твоя, попецыися еже не вменяти себе ни в чем же, и устави плакати грех своих. соблюдаи себе от лжи та бо отгоняет страх Божии от тебе, открыи помышления своя отцем своим, даже помощь Божия покрыет тя.

 

Ис книги Старчества.

Старец некии наказоваше ученика своего. и глагола ему, чадо егда видиши себе во мнозе смущении и бури от лукавых помышлении. скажи мне отцу своему, или братиям иже суть с тобою. и уповающе на Бога яко помощи ти хотя, яко не толико боятся разбойницы единаго якоже мнозех.

 

Из Благовестника, от Марка. зач. 60. лист, 80.

И иже на высоких стояи, да не блазнит. егда бо пристрастное что разума, станет в нас, подобает исповеданием восходити на высокая, и не слазити с высоты добродетелей. И делаяи же доброе, да не возвратится, якоже взяти древнюю совесть, еже есть риза, еяже совлечеся; о горе же зиме бегающему; подобает бо ныне бегати от греха с теплотою; сиречь с покаянием, а не измершу и неподвижне; себо есть, еже зиме бегати.

 

Ис книги Григориева видения.

Яко аще исповесть духовному отцу своя помышления облегчение от них приимет, ащели в себе крыет Христов несть, но антихристов.

 

Ис Пролога, июля, в 17 день.

Мнози от согрешающих присно глаголют смрада исполнен есмь, како могу приближитися к Богу, и како могу умолити и, диавольским одержим согрешением. о брате, без дерзновения ли еси, сего деля прииди, да обрящеши дерзновение велико еда бо человек есть хотяй истязатися с тобою, дася его постыдиши; Бог есть паче человека хотя избавити тя от грехов. не тако ты спасения своего желаеши, якоже он хощет твоему спасению. да не глаголи, погибох, что сотвори; врача имаши выше врачьбы, хотяща исцелити тя греховнаго недуга, аще ты сам обавиши, рекше преди исповеси своя согрешения греховное покаяние чиста творит кающагося умом. добро убо еже не согрешати. благо же есть. еже согрешаемым каятися. якоже от болезни болящему пременитися и здравейшему быти по язве, не еже бо пасти люто, но еже падши не востати, но лежати. аще глаголеши чрезъестество согреших; то кто есть без греха на земли; довлеет ти се на память; глаголи ты преже беззакония своя, да оправдишися. плачи преже времене покаяния, да не услышим егда несть времене покаяния. соделаем благое, дондеже можем. не тольми бо отец любит сына, якоже Бог кающагося душю. тако бо есть Владычне человеколюбие, ни единаго от пририщущих к нему отвращается. несть потребна времени на поискание спасения хотящему, разбойник убо не вовремя спасеся, но точию уверовав, и себе осуди по делом приимша, но истощимое сокровище царства небеснаго обрете. начало бо спасению, себе осудити кающуся, покрывая своя согрешения неоправдится. каяижеся от злых яже содея, аще грехом достойна не сотворит покаяния во епитемиях исправлением то отвещати ему на суде, Богу нашему слава, ныне и присно и вовеки веком.

 

Катихисис болшеи. глава, 64.

Вопрос. Что есть покаяния тайна. Ответ. Покаяние есть вторая дщица по разбиении крестилнаго корабля и нуждно потребная тайна согршившим в нейже оставление грехов о повинных испрашается.

 

Кормчая: Нила черноризца, глава, 41. [лист 299].

Не токмо плодов исправления тяжких от согрешающих изыскуя делы постническими, но и словеса приимая кающихся о своих гресех, и со многим смирением исповедающих тебе, яже зле содеяша. велика убо есть покаяния сила, яже нас яко снег сотворяет, и яко ярину убеляет. Ниже: Темже и Господь к таковым грешником рече, приклоните ми души ваши из глубины яко осуждени, и тыя же венцы праведных приимите;

 

Пролог, маия, 6.

И слышах о авве Зиноне, яко многия исцели, и восхотех ити возвестити ему, и удержаваше мя диавол глаголя, яко егда знаеши что сотворити хощеши, сотворити, якоже чтеши, и не иди соблазнити старца, и егда устремлевахся поити, мало облегчеваше от мене брань даже не иду. и егда сотворяше мя не ити к старцу, паки потопляше мя страсть. и паки нуждахся ити, и паки тако же льстяше мя враг, неоставляше мя исповедати старцу. и множицею идох к старцу исповедати, и неоставляше мя враг. студ приношая сердцу моему и глаголя, яко егда веси како исцелитися, кая потреба есть возвестити кому. и сия рече приношаше ми супостат, даже не явлю страсть свою, и прииму целбу.

 

Той же сентября, в 30 день.

Ащели книжник есть кто, то мысль ему влагает диавол рекии, сам себе, ты своя мысли свеси, и еже написание глаголет. якоже отцы святии суть заповедали тако сотвориши сам. непослушай мысли тоя, да прощен будеши в сии век, и в будущии.

 

Потребник, в чине исповедания, лист, 148.

Аще бо христианин без покаяния умрет то не достоит над ним иерею пети ни приношения зань принести, яко не исполнил закона Божия и веры христианския.

 

Лествичник, слово, 4. лист, 64. Сущее.

Богу мне яже ко своему отцу веру и любовь чисте показуй, и той неведоме прочее тому известит, по твоей к нему любви приложитися, и присвоитися тебе. иже всякого змия обличаяи, веру явленну показа, сокрываяи же, безпутием заблуди. Толкование. Змию питаяй на лоне, и помысл лукав в сердцы, умерщвлена будет. ова бо тело уязвит жалом ядовитым. овоже, в души вложит яд смертоносныи, но исчадия змиина скоро убиваем. и помыслы лукавыя в сердцы необличаеми горце болети имамы. Ниже: Непрельщайся о сыне и послушниче Господень духом мнения, и якоже се от иного лица своя прегрешения учителю возвещати; ни бо есть безъсрама срама гонзнути. обнажая обнажи свой струп врачю, рци и не усрамися мой струп отче, моя язва. от моея лености а не от иного прибывши никтоже сей виновен, ни человек, ни дух, ни тело, ни ино что, но моя леность. буди и обычаем и видом и помыслом яко осужденик о исповедании на землю поник. и аще мощно судиине и врачеве нозе яко Христове слезами моча. обычаи бо многажды бесом, или неисповедатися нам влагают. или яко от лица иного се творити, или неких о своих гресех укаряти яко повинны.

 

Книга Кирилова, лист 204.

Анастасии же святыи великии пишет, аще обрящеши мужа духовна и научена, могущаго тебе лечьбу подати, без стыдения и с верою исповедаися ему тако, яко пред самем Господем.

 

Пролог, декабря, в 7 день.

Уподобимся и мы жене самаряныне, и о своих гресех человек да не устыдимся. егда бо стыдимся о спасении человеком открыти своя грехи то в день он не пред единем или двема, но всей вселенней, зрящим людем испытаемся. ибо Бог помогает ныне. не хощет бо смерти грешнику, но еже обратитися и живу быти ему. воспомянем прочее, како прииде к Давыду Нафан, пророк к пророку прииде. аще бо и пророк бе Давыд, но яко же и врачеве егда болят, то иного требуют врача, ибо болезнь хитрость погубляет. такоже и зде вся обличаема рече, светом яве бывают и исцелеваются и якоже убо и струп храним есть и покрываем, не исцелевается. но егда горе восходит, тогда исцелен бывает. яко ни единаго приемля потружения. такоже убо и грех, дондеже храним есть, не прощается. темже убо да не восхощи связан быти от человека, зане и разрешение приимеши от человека же. ащели убо от человека невосхощеши связан быти то узами неразрешимыми в вечнеи муце свяжешися, идеже несть льзе покаятися. темже возлюблении молю вы, вси друг друга, бедите к покаянию, да варим лице его ко исповеданию нашему.

 

Маргарит, слово 13. о лжеучителех. [лист 597].

Покаяние же имейте богоотца Давыда, ибо той бысть нам образ покаяния, научая нас глаголет, приидете чада послушайте мене, и аз покажю вам образ покаяния, понеже и аз некогда запенся падох, но покаянием востах.

 

Анастасии Синайскии, глава, 16.

Темже аще и человек есть духовник, но Бог тем наказует и прощает, якоже Давыда Нафаном. Темже и приводит глаголя [псалом 31 толк.], беззакония моя показах, и грех мой не сокрых. сиречь без стыда обьявил есмь пред тобою отцу духовному, сиречь Нафану пророку, пред ним же пад рече, согреших Господу Богу моему и ты Господи отпустил еси беззаконие сердца моего.

 

Ис книги Никона Черн. гор., от слова, 51. Анастасии Синайс.

Вопрос. Добро ли убо есть еже исповедати грехи духовным мужем. Ответ. Добро и зело полезно но не еже без искуса, и невеждествен о сих сущих, да не ради безсловеснаго милования и смотрения, или безвременаго ради и нехудожнаго продолжения запрещения, нерадива и не болезнива, или ленива и ослаблена тя соделает. аще обрящеши мужа духовнаго могущаго тя уврачевати, без стыдения и с верою исповеждься ему, яко Господеви а не человеку. [ниже] Обыче бо Бог спасение человеческое строити, не точию ангелы действовати. но и человеки святыми. и древле убо пророки, и последи собою, и святыми апостолы. и прочее даже до скончания, к своим в роды слугам глаголем. приемляи вас, мене приемлет, и слушаяй вас мене слушает. отметайся вас мене отметается. Тем же аще и человек есть иже исповедания слышай но Бог его ради обращает и наказует и прощает. якоже Давыда Нафаном.

Ниже: Святаго Григория Богослова.

Да не устыдишися исповедати свой грех. ведыи како Иоан крещаше, яко да онаго срама, сим убегнеши, занеже и часть оныя муки. и покажеши яко грех воистинну возненавидел еси. изъявил то и обличив, яко достоин безчестия.

 

Той же: от слова, 28.

О других же отчасти смотрителне бывших, яково ко иконе исповедавшагося, и Давыдово, и инна, ветхаго завета, и великаго канона, и другая елика честное твое имяше послание, да испытует владыко мой честь твоя смотрителная сила, отнюд не приводити сих ниже в беседу. яко от таковых смотрителных, развращенная сердца человеческая, непрочитающе тех толкования ни вмещающе в духовныи ум, но от плотскаго мудрования совращаются в различныя ереси, и прелести, и доконца погибают;

 

О еже яко подобает исповедатися и простым иноком и простолюдином, иже добре божественое писание ведущим и правилную силу знающим, и иже врачевати добре умеющим, и понужди праведно к таковым исповедание имети. глава, 55.

 

[От послания святаго апостола Иякова, зач. 54].

Исповедаите друг другу согрешения и молитеся друг за друга яко да и оцелеете.

 

Беседы апостольския. лист, 2983.

Глаголи твоя яже к другом вельми любимым и праведным, и имже уповаеши яко да помолятся о гресех твоих.

 

Иоанна мниха епитимейник, глава, 11.

Яко подобает кающемуся вътайне исповедати, своя согрешения, человек человеку исповедайся. А не яко человеку, но яко самому Богу, исповедайся брату.

 

[Беседы апостольския, лист 3052].

Брата зде глаголяй всякаго правовернаго, а не инаго. что бо творящее братство, баня паки бытия еже возмощи нарещи Отца Бога.

 

[Хрисмологион, глава, 5].

Второе исповедание прегрешением егда прегрешения наша, или пред Богом, или пред священником, или ближнему исповедаем.

 

Захария Копестинскаго, глава, 36.

И коли час имееш учащай до исповеди и не обленися. а однако в той мере и разсуждение есть у отец святых. а особливо под час пригоды, и в недостатку презвитер православных. и под час преследования нынешняго на нас россов. от папежников, и от тех которыя с ними заодно мудръствуют. такоже и в странах далных в которых православных иереов недостало будущим тогда до латынских князей, и до попов с папежи римскими верующими, аще же сих призывания несть всем избавления. Ниже: Первая наука: пред разумными и умелыми, любо иеродиаконом, или мнихом. или такожде и пред простым человеком. яко же Ияков апостол во главе, 5-й глаголет. и учит исповедати друг другу, согрешения, и молитеся друг за друга. яко да исцелеете. И паки: Друг другу тяготы носите, и тако исполните закон Христов. И иже: По свидетелству даже и простым искусным, и мудрым и разумным, исповедания грехов имеют приимати.

 

Библия Бытия, 4.

И рече Ламех своима женама, Адда, и Селла, услышите глас мой жены Ламеховы, внушите моя словеса. яко мужа убих в язву себе, и юношю в струпе мне. яко седмицею мстится от Каина, от Ламеха же 70 седьмицею.

 

Никона Черногор. слово, 51.

Не Каина уби Ламех, но иныя праведники убегну мучения, за исповедание греха. и на ся суд изнес, Божию возбрани суду.

 

В том же слово, 51. Исидор Пилусийс.

Чесо ради Каин и Ламех убийство сотвориша, но не такожде мучена быста. ов убо казнь прият ов же милость получи, понеже ов обличаем отвержеся, сей же необличаем исповедася; аще и греховная равна, но яже по гресе неравна. Темже рече, глаголи ты первее грехи своя, да оправдишися, сего ради убо паче потщимся несогрешати. аще же и согрешим, да не отвержемся исповедати. и скрытия ради лютейшую муку себе уготовим;

 

Номоканон, лист, 72.

Аще убо кто есть священник, неискусен же, а другии несвященник, искус же имея духовнаго деяния, сему паче священника, праведно есть помышления приимати, и правилно исправляти. [на поли: старча исповедь прията] Ниже: Елицы убо суть освященнии, по повелению епископа исповедания человеческая да приемлют. несвященному же иноку, наказание его искуство дает власть примирения, аще убо себе самого безбедно соблюдает, и исповедающихся Богови да примиряет;

 

Синодик старописменыи.

Помяни Господи душа, иже скорбь имеша по вся дни о своих согрешениих, и слезы пролияша. и простым человеком исповедаша со слезами или без слез, прости им согрешения их, и упокой их с праведными твоими;

 

В том же Синодице, описание сицево.

Яко сицевая исправления святых апостол, бысть разсылаемое по градом, и ведяшеся сие честное апостольское законоположение, до седмаго собора. и на той же собор прииде Евсевии, и сие писание в руку своею держаше. Понеже добре любляше, и то исправляше, и инех поучаше тако творити. Святии же отцы на седмом, соборе апостольским преданием много избравше от писании, положиша того ради, как достоит на сем свете пребывати всем православным христианом. и сего ради сей Синодик составися, и помяновение о всех православных христиан устроися.

 

Ис Кормчеи, лист, 608. святаго Варсонофия.

Вопрос. Добро ли убо есть исповедати кому от братии о мечтании, и сотворити ему метание, и рещи да помолится о мне. Ответ. Добро убо есть глаголати, но могущим слышати, а не юным, сотворив же кто метание, должен есть просити молитися о нем. писание бо глаголет, исповедайте друг другу грехи ваша, и молитеся друг за друга.

 

Ис книги Зинаря. правило, 46.

Женам повелеваем исповедатися в паперте церковном отверстыи двери имети внешнюю соблазна ради. заповедаем совершенным мнихом и девствующим яко не приимати жены к себе на исповедь, точию еже есть доспел в старость целомудрену благочестну, сии да речется к таковым, да помышлением не соблажняется ибо з женами диавол творит брань мнихом честным. егда хощет которыи любо прияти исповедь женьскую. прежде да утвердит себе, молитвами и молением, поя псалмы сия помилуй мя Боже. доконца, и воспойте Господеви вся земля. посем да приимет во исповедь которую любо жену.

 

Полуустав, глава, 43. [лист, 66, на об.].

Аще кто от братии умирает, и всем достоит споспешествовати ему ко спасению души аще произволяет убо аще смысл имущу болящему, настоятелю должно есть извопрошати брата тонко частне. такоже и болящему вся лепо есть подробну исповедати, понеже то есть конечное упование спасения, занеже отходит к праведному суду Божию, и несть иная помощь души, разве совершеное истинное покаяние. и аще преставится брат, и аще есть священник во обители, да бывает служба на третины, на девятины, на четыредесятины, и годищныя о усопших, якоже есть предание в православных христианех. Ащели несть священника во обители, отпущати подобает просфиры идеже аще есть священник, и о усопших приносимом быти. вънутрь же во святей обители да бывают подобающая, якоже предрекохом.

 

Книга Катихисис малыи, лист, 35.

Тако убо потреба ведати яко ни един на священство нерукоположенныи, и ни тайн строителем быти не может. разве некоторых нужных случаев тайн;

 

Гавриил архиепископ Филаделф. [Книга о 7–ми тайнах].

Иныя понужди заповеди, темже есте две, крещение и покаяние, еюже кроме несть леть спасение получити;

 

Минея чет. Макария мит. [мар. в 5 день] от жития святаго Конона иже в Лакаонии Исаврии мучен бысть.

Понеже убо о всем цветяху святом чюдеса, и мног народ от Саврииския страны обращахуся Iсусу Христу исповедающеся и крещахуся святым и преподобным Кононом;

 

Ис книги Никона Черной горы в слове, 52-м.

Старец некии и свят и богоносив бяше в горе Олимбе, и к нему пришедшим множайшим братиям услышати от него слово спасения. [Ниже:] И прииде некии мирянин и поклонься ему ста. старцу же возревшу и вопросившу коея ради потребы пришел еси к нам, и отвеща, исповедати святыни твоей грехи моя приидох, честныи отче, старец же рече к нему, особ ли моей худости хощеши рещи та чадо. или пред пришедшими братиями; он же рече, аще велиши честныи отче пред сими всеми глаголю та, старец же рече, глаголи чадо нестыдящися. начат же глаголати таковая, яко несть подобно вслух человеком приити: или писанию предати. и изрекшу убо ему вся со слезами, и ста поник, и долу зря сокрушенным сердцем, молча убо святыи старец быв начас доволен, [ниже] и отпусти его рек, иди чадо с миром: и ктому не согрешай. он же поклонися до земли, отъиде славя Бога, мнихом же дивящимся и глаголющим, яко тако честныи отче толико тому возвестившу пред всеми нами, не вда ему ни малы заповеди ни епитимии, он же отвеща. О любимая чада, не видесте ли онаго страшнаго и славнаго обону страну мужа стояща, егоже лице бяше яко молния, ризы его белы яко свет, и в руку своею хартию имяше написану исповедавшаго грехи, имяше и чернило в сосуде, и той убо яко человек моей худости пред всеми вами вся глаголаше согрешения, он же тростию пречерташе; да понеже человеколюбец милостивыи Бог сия прости ему. кто есмь аз грешныи дати заповедь тому и епетимию, и сия слышавше мниси трепетни бывше, и поклонишася честному старцу благодаряще Господа нашего Iсуса Христа, и благости его человеколюбие величающе; и отъидоша чюдящеся велми, о преславных деянии Бога нашего.

 

Пролог, сентяб. в 25 день. слово о презвитере впадшем в прелюбодеян., и прощену бывшу покаянием.

Презвитер некии бе в Констянтине граде, и от действа диявола впаде в блуд. и по неколицех днех, помысли свое согрешение, и рыдаше в себе глаголя, увы мне оскверненому душею и телом, что сотворю, да получю прощение моим согрешением. И востав пойде на гору Олимбъскую, помыслив убо тамо покаятися к некоему духовному отцу. и обрете тамо старца, и исповеда ему вся своя согрешения. посем рече и блудныи грех, и рече старец по лютом том согрешении, не дерзнули ли еси служити, и рече, ей отче святыи служих. И рече старец, ведыи буди чадо, аще въпадет иерей в таковыи грех, несть ему исцеления, да не служит прочее, аще и с великим покаянием приступит к человоколюбцу Богу, но иерейству же паки не приидет, несть бо прощения. он же рече, несть ли ми отче покаяния, старец же усумневся рече, прости мя чадо Господа ради, кто есмь аз таковая дерзнух судити, точию аще бы могл и своих покаятися грехов. он же слышав сия, поклонися старцу и отъиде скорбен. И якоже бо идяше, стрете и авва Петр. и видев его печална, и глагола, что ти есть чадо. Он же рече, честныи отче, приидох ко оному старцу, и исповедах ему вся своя грехи, и той во отчаяние мя введе. и глагола ему Петр мню чадо, яко несть греха побеждающаго человеколюбие Божие, поиди в мою келию, и яви ми своя дела, да якоже хощет Бог, устроити имать. и пришед с ним в келию, и абие исповеда блудное дело. Петр же рече, поистине глаголал ти святыи старец. иерею бо сей грех тяжек есть, и не имать прощения. но понеже ти злое сие дело сотворилося, то отселе нелзе служити. точию да ся пострижеши во мнишескии чин, и покаешися истинно, и аз надеюся на благодать Господа Iсуса Христа, яко сотворит милость с тобою, якоже и со всеми покаявшимися. Он же слышав, припаде к ногам его глаголя, аще Бог привел мя, в святеи твои руце, не отлучюся тебе. Старец же видев слезы его, и рече, аще ти угодно, не отгоню тебе. рече бо Господь, яко приходящаго ко мне не изжену вон. и по малех днех постриже его во святыи мнишескии образ, и бяше с ним в посте, и в покаянии со слезами моля Бога. Имяше же старец под храминою погребец, и по лете едином нача молити старца, да повелит ему в погребе том жити. он же по прошению его, даде ему. и шед скова уже железное, и очепие о шии своей. другии же конец ужа, въдрузи в стену. и яко убо трие дни минуша, не вниде к старцу. и сниде к нему старец сам, и видев его ужем привязана, и рече, что се чадо сотвори, како изыдеши на проход, сице привязан. где ли и потребу телу своему возмеши, он же отвеща, святыи отче, аз преже благовонна фимиана, и благаго мира им скуса насытихся, ныне же злосмрадия исходящаго от мене насыщуся. Бог же да наставит твою святыню, по двою днию или по трех, да приносиши ми мало хлеба и воды нужды ради телесныя. и приим старец мольбу его, приношаше ему хлеб и воду по двою днию. он же омочая слезами ядяше. и терпевшу ему в таковой скверне три лета. извещение же о нем Петр от Бога приим, яко Бог приял есть покаяние его. возвести бо ему ангел, яко хощет преставитися уже, иди рече, и разреши его. шед убо старец, и приближися разрешити его, рече уже ти есть скончатися. он же моляше небрещи его, да тако умру, старец же рече, ни чадо. уже не подобает сему тако быти, поп бо еси. и повеле ему молитву сотворити, и еще же сущи молитве во устех его, и тако предаде душю очистився грехов;

 

Ис Пролога октября, в 18. слово о жене пришедшеи преподобному Неофиту исповедатися.

Честныи Неофит добродетелныи мних, и Божии иерей, иже и постническое проходя житие, сам поведаше глаголя. яко некая жена славна, по смерти мужа своего собравши в своя помыслы своя грехи, и помянувши си смертныи час, и страшное судище во ум приимши, и иде к черноризцу Неофиту, и поклонися ему и рече, верою приидох к твоей святыни честныи отче, исповедати вся грехи моя. Тому же нехотящу и глаголющу яко несть ми возможно чадо женьских внимати деянии; Она же рече, святыи отче, Господь Iсус Христос, истинныи Бог наш, в наш оболкиися образ, не отрину пришедшия к нему блудницы, со слезами облобызающия честнеи нозе его, исповедающия ему своя грехи. а ты отгоняеши мя. покаятися хотящу и спастися. Тоже слышав старец отвеща к ней, и рече, аще сице ми глаголеши чадо, и верою пришла еси к моему недостоинъству, пойдема в церковь, и глаголи сокрушенным сердцем к человеколюбцу и милостивому Богу деяния своя, слышащу и мне худому старцу таковая. и пришедши въкупе в церковь со старцем, и поклоньшися помолися старцу, и ста молчащи, старцу же нудящу ю и глаголющу, что се бысть чадо; с заутрия нудяше мое смирение прияти тя, и ныне не глаголеши. таже отвеща, не дерзну изрещи честныи отче, одержит бо мя неподобная мысль. старец же рече, напиши ю волею, да прочту хартию ту пред Господем Богом, прощающим по мнозеи его милости наша согрешения. и рече жена, ни сего могу сотворити за многая моя студодеяния. и рече старец, да аще ни сего можеши сотворити, да сице аз сотворю, елико в житии человечесте содевается воспоминаю ти грехи, глаголя по единому, сице сотворила ли еси, или ино другое. она же отвеща, Божия ради благодати, и святых твоих молитв. ничтоже еже глаголеши сотворила. но ина суть моя согрешения, он же рече, аще суть ина, то аз несмь сердцеведец, ни таин человеческих веде. она же рече, молися о мне, Бог сотворит. и то рекши, поклонися старцу, и отъиде. идущи же ей по улице, виде некоего черньца стара раслаблена на земли лежаща, и отнюд небрегома, и рече ему, хощеши ли да тя поиму в дом мой и препокою тя добре, яко да о моем недостоинстве умолиши Бога. он же рече ей, хощу госпоже, дабы ты сотворила милость на мне окаяннем. она же въшедши в дом свой уготова постелю. и пославши искупи ризы чернеческия. и повеле рабом вземше разслабленнаго мниха, и несше в баню измыти и. и облещи и в новыя ризы, и принесше положити его на уготованнеи ему постели. сему же бывшу и тамо служаше ему струпы мажущи и врачюющи. По времени же великому четвертку приспевшу спасеныя страсти. и рече жена к старцу, вещь хощу сотворити на тебе отче, но потерпи и не рцы ничтоже. он же рече якоже велиши госпоже моя, да сотворю тако. и приспевшу часу божественныя службы, иерею творящу в церкви в дому божественую литоргию. и яко нача глаголати евангелие Iсусу бывшу в Вифании, в дому Симона прокаженнаго. приступи к нему жена блудница, имущи сткляницу мира драгаго. и се рекшу иерею. приимши жена та сосуд мира, приступи к черноризцу, и возлия на нози его, и облобызающи слезами омочи, и власы своими отирющи, и исповеда грехи своя. И той убо сотворши тако, бысть трус страшен не во всем граде, но токмо в едином дому ея. и по трусе глас глаголющь оставляются грехи твои, тому же божественному гласу пришедшу, и воста черноризец весь здрав, никоегоже имея струпа ни язвы на теле своем славящи Господа нашего Iсуса Христа, творящаго страшная и великая чюдеса.

 

От Патерика азбучнаго, о авве Лоте, знамение: 30:

Поведа некто о брате некоем въпадшем в грех, яко шедшу ко авве Лоту, смущашеся исходя и въходя, и не могии сести. и глагола ему авва Лот, что имаши брате; он же рече грех велии сотворих и не могу поведати отцем. и рече ему старец, исповеждь мне и аз понесу. и тогда рече ему, яко в блуд въпадох и пожрох, яко получити ми вещь сию. и глагола ему старец, дерзай яко есть покаяние, иди и сиди в пещере и постися два дни, и аз возму пол твоего на ся, по скончании же трем неделям извещенно бысть старцу, яко приято есть покаяние брата, и пребысть в послушании старцу до смерти своея.

 

Ис Пролога, генв. 16 дня. слово о некоем мнисе хотящем дщерь пояти иерея идолскаго, и отвергшася Христа. и святаго его крещения. и паки спасе его Бог.

Брату брань бысть в любодеянии, приключижеся ему мимо ити в весь Египетскую. и видев дщерь иерея идольскаго, и возлюби ю. и рече отцу ея, даждь ми ю в жену. Он же отвещав рече, не могу дати ея, аще не вопрошу бога моего. И рече к демону, се етер мних прося дщере моея, дам ли ему. И отвещав демон рече, аще отвержется Бога своего и крещения, и обетования мнишескаго, даждь. Мних же обещася, и абие виде, яко голубь изшед из уст его, и летящь на небо. шед же иерей к демону и рече, се убо обещася. Тогда отвещав диавол рече, не даждь ему дщери своея в жену, не отступи бо от него Бог его, но и еще ему помогает. И пришед иерей к брату, и рече, не могу дати ея, и еще бо Бог твой помогает ти, и не отступил от тебе. Си же слышав брат рече в себе, аще толику благодать яви мне Бог; аз же окаянныи отвергся его. и крещения и обетования мнишескаго, и благии Бог еще помогает ми. и тако в себе пришед восклонься, изыде в пустыню, и старцу велику исповеда вещь. И отвещав старец рече ему, сяди со мною в вертепе, и постися три недели, чрез день ядыи, и аз молю Бога за тя. и поболе старец по брате, помолися Богу глаголя. молю тя Господи, благодарствуй ми душю сию, и приими ея покаяние. И послушав его Бог. И скончавшися первой недели прииде старец к брату, вопроси его глаголя, виде ли что. отвещав брат и рече, ей, видех голубь летящь выспрь на высоте небеснеи, прямо главе моей стоящь. И отвещав старец рече ему, веруй, внимай себе, и моли Бога всегда. Во вторую же неделю прииде старец к брату, вопроси его глаголя. виде ли что. Он же рече, видех голубь прилетевш к главе моей. и запрети ему старец глаголя, бди умом и молися. Прииде паки, скончавшися третией недели и вопроси его глаголя, что вещь виде. он же отвещав, видех голубь яко прилете, и ста верху главы моея. и прострох руку яти и. Он же воста вниде во уста моя. И похвали старец Бога, и рече, се прият Бог покаяние твое, прочее внимай себе. И отвещав брат и рече, се отселе с тобою сяду отче. дондеже умру;

 

Из Зерцала великаго, отчаявся грешник, и некиим пустыником к покаянию направися.

Некии человек бе плотолюбец преизлишнии, и премнога грехи умножи. и той прииде ко вратом смертном, други и сродницы, умолиша отца некоего пустынника живуща да наглаголет его покаятися и направит. и той сам да послушает изречения его, и отшелник послуша моления их, и прииде, болныи же токмо егда узре его рече, отъиде от мене, и иди в свое место, убо излишше грехов моих. неже милосердия Божия. и святыи мних рече, не глаголи человече. и возлюбленное чадо, велика сила покаяние, аще добре попечешися о всех гресех твоих, аз ти споручник яко Господь отпустит ти. аз рече, обнажу себе от всех добрых дел и дам тебе сия, ты же такожде совлецыися от всех злых дел твоих, и дай ми я аз убо прииму на ся вся грехи твоя, отверзи всякое мнение, и страсть отчаяния. грешныи же уверися со старцем, и изволи исповедати грехи своя. и егда нача исповедатися и неисчетныя и страшныя грехи сказа, и ничтоже остави, ниже утаи, по исповедании рече мних, обещаешилися имети печаль о сих, епитимиею вся сия исправити, и яко да будет покаяние твое таинствено. и грешныи рече, зело хощу. и пустыник рече, аз тя разрешаю во имя Отца и Сына и Святаго Духа. и тако за сим человек оныи умре. и по 40-х днех показася оному пустыннику, извествуя яко есть на пути спасения, пустынник же вопроси, чтоже бысть о добродетелех моих, их же тебе совлекохся, и рече явивыися, стократно приплоди Господь. за еже отчаяния мя избави, и к покаянию привлекл мя еси;

 

Слово о диаконе впадшем в любодеяние. и паки в свой сан пришедшем покаянием. [Пролог июля в 25 день].

Диакон етер нарочит, и всем славен бе в монастыри во Египте. и некто прост людин гоним от князя, прииде со всем домом своим в монастырь крыяся. и от неприязненыя силы падеся с женою его диакон, и обличен же быв о гресе егоже сотвори, и бысть всем в студ, и иде к етеру старцу возлюбленному от него, и исповеда ему свой грех. имяше же старец темницу вне келии своея, и моляше глаголя, погреби мя зде жива, и невозвести о мне никомуже. и влезши в темницу ту каяшеся, и по лете едином не бысть дождя отнюд. и всем Богу молящимся и со кресты ходящим, яви Бог етеру от святых, яко аще не приидет сокровенныи диакон мнихом, не будет вам дождя на землю. и слышавше дивишася и прославиша Бога. и пришедше изведоша его из места идеже седяше. и тогда вземше он сан свой помолися Богу, и сниде дождь. и тако мнози соблазнившиися, и отчаявшиися грех ради, ползу прияша о покаянии его, и прославиша Бога;

 

Сказание от святаго писания, о еже реченнем в писании исповедании помыслов, яко не о единех ту глаголет исповедании помыслов, но и о грехах. и яко обычно есть писанию грехи нарицати помыслами. глава, 56.

 

[Номоканон афон. отец, впреди, которыи ко иереом сочинен].

Приемляи помышления человеческая должен есть в писании наказан быти, и проч. Ниже: Темже внимай себе о духовниче;

 

[Кормчая, глава 54. вопрос Иоан. мниха, 11].

И некто от сущих братии с нами прежде седе в мире многих помыслы восприемля, сиречь дети духовныя приимаше в покаяние: Ниже: Презвитери же и мнихи, падшияся с женами прием, и иныя тяжкия грехи;

 

Благовестник, от Луки. зач. 49. в толк. лист, 95 на об.

Мертвыи же есть грешныи, иже погребает своя мертвецы, еже есть лукавыя помыслы неисповедая их. тому Iсус бранит последовати себе, не погребати ни крыти лукавых помысл, но велит являти я покаянием;

 

Свидетельство от священных правил яко не подобает к еретиком в церковь ходити, или к себе во свою церковь приимати и молитися, и не точию в церкви, но и в дому с еретиками молитву совершати запрещается. глава, 57.

 

Правило святых апостол, Петра и Павла, 9. [Кормчая, глава 3, лист 28].

Аще несть мощно собиратися в церкви неверных ради еретик, в дому собиратися на пение: о епископе да не внидет благочестивыи в церковь нечестивых; не место бо освящает человека, но человек место.

Правило, 10-е.

Аще нечестивии держат место, да бегаеши от него, понеже осквернено бысть от них: якоже бо преподобнии святии освящают, тако нечестивии оскверняют.

Правило, 11.

Аще же ни в дому купно ни в церкви собратися несть мощно, кождо себе да поет. и да почитает и да молится, или купно два, или трие, идеже бо аще рече Господь два или трие собрани о имени моем, ту есмь посреде их;

 

Номоканон, правило, 152. [Потребник, лист 698].

Правило, шестьдесят пятое святых апостол глаголет, иже кто дерзнет внити в сонмище жидовское. или в еретическое капище еже помолитися, аще убо священник есть, да извержется. ащели же людянин да отлучится;

Правило, 153.

Святыи же Тимофей Александриискии, в девятой главе своих правил содержит, яко еже не приимати еретика в церковь. благочестивых помолитися, аще не обещается покаятися. якоже бо преподобнии освящают, тако мерзцыи оскверняют. Правило же тридесят третие, иже в Лаодикии собора, возбраняет с ними молитися, или ясти, или приимати что от благословения их, сиречь милостыню.

Правило, 154.

Правило же десятое святых апостол повелевает яко моляися со отлученными, аще и не в церкви, но в дому, да будет отлучен, и той такожде.

 

Кормчая, глава, 10. Правило, 40. Лаодик. соб. [лист 79].

Со еретики и со отвергшимися от соборныя церкве, да не помолится никто. От толков. Аще помолится кто с еретики, или со отлучившимися своею волею, от соборныя церкве сам да отлучен да будет.

 

Правило, 10. святых апостол.

Моляися со отлученными, сам такожде да отлучен будет. Толкование. Аще кто молится с еретики, или в дому со отлученными от церкви, сам такожде да отлучен будет.

Правило, 45.

Моляися с еретики, да отлучится, аще же яко причетники приимет я, да извержется. Толков. Епископ или презвитер или диакон, аще помолится токмо с еретики, или в дому, или в церкви, да отлучится. аще же повелит им служити в церкви яко презвитером, или ино что от священных содевати, яко причетником, таковыи да извержется.

Правило, 65.

Моляйся с жиды да отлучится. Толк. Вшедыи в соборище июдейско, или в церковь еретическу. или поганску, и помолився с нимим, аще убо есть мирскии человек, да отлучится. ащели причетник да извержется, аще июдейская мудрствуя. аще же в дому токмо помолится с еретики, епископ или презвитер или диакон, да отлучится, якоже повелевает, 45. правило, сих апостольских заповедей; [християном с еретики не молитися].

 

Поместнаго собора Карфаген., правило, 9. в толк.

Аще кто еретиком приобщается, и молится с ними, с верными не приобщится, но от церкве да изринется.

 

Поместнаго собора Антиохиискаго. правило, 2. в толк.

Аще от церкве изриновеннаго, ни молящагося с верными прием, и в дому с таковыми помолився или в друзей церкви. той правилом повинен есть. яко же и с лишеными общения приобщается, и сам неприобщен есть.

 

Никон Черн. гор., от слова, 63. Лаодикиискаго собора, правило, 37.

Яко неподобает с еретики и раздорники молитися.

 

Ис книги Матф. Иерос., состав К. глава, 24. правило 2-е. иже во Антиохии собора.

Приобщения неприобщеных отступати всяческии, сам заповедает, ниже в дому молитву творити, ниже в церкви, аще бо и местом разстоимся, но убо верою друг друга не разстоимся, иже по всей земли христианы, и единыя вси соборныя церкве, глаголемжеся есмы. да иже убо священнаго сословия неприобщенных явится приобщаяся. и сего неприобщена быти яко правила церковная смущающа.

 

Правило святых апостол, 71. [Кормчая, лист, 19].

Аще которыи христианин принесет масло в соборище жидовское, или в церковь еретическу, или поганску в праздник их, или кадило, или свещу, вожжет, да отлучится.

 

Правило, 9-е. Тимофея архиепископа Александриискаго. [лист, 270].

Службе бывающи в церкви, неподобает приходити еретиком. аще не обещаются покаятися и бежати от ереси своея.

 

Поместнаго собора Лаодикиискаго. правило, 6.

Еретиком святилище невходно. Толк. Несть достойно еретиком в церковь Божию входити. аще и Великии Василии Уалента царя еретика суща, к исполнению верных прият, не бе бо еще сего собора, и се правило не бе изложено.

 

[Ис книги Кирилла Иерос., о арменех. лист, 269].

И аще поидет христианин мимо их церковь а у них поют, то заткнувши уши бежати, чтобы глас не нашел. Аще арменин приидет в церковь нашю, не пети при нем. а добра утра, ни добра нощь ему не молвити;

 

О Флорен. соборе, Исидоровом шествии на той собор. [Ис книги Истории Острожск. печ.].

Славнаго монастыря Ксиропотам реченнаго: Ниже: Приняли их [римлян] на унею. Ниже: Явныи чюд Бог з высокости оказал, остался шум, и трясенье земли страшное, изнагла упали все стены церковныя, и муры монастырския, яко стены Ерихонские, и погинули весь пол так иноцы, яко миряне которыя там зместити могли великое мнозство душ. и осталися офера мертвая Богу мерзская;

 

О еже яко не подобает со иноверными, и с еретики общения имети в ядении и в питии или в дружбе, но всячески от них удалятися. глава, 58.

 

Ис книги Иоанна Зинаря, правило, 76. о арменех.

Иже со арменином кто яст, или с павликианом, или со иным еретиком. любо аще и любовь имеет кто ли с таковым, сему глаголет да оставится того ради приходит к церкви чисте, аще неведением се сотворил есть, да освятит его иерей, дав ему заповедь малую от запрещения; Ащели не послушает наказания. но хощет с ними ясти и пити, таковыи да не яст, и в церкви да не приемлется; Но отвращатися всякому христианину яко от идолослужителя. да аще паки когда приидет ко исповеди да отлучится на покаяние три лета, и во двоих летех да не приятно от дому ни просфиры никаково же приношение, а в третие лето приемлется просфира его в церковь, да совершится три лета в покаянии.

 

[Ис книги Маргарит. слово, 13].

Услышите вси вы с еретики ядущии, болезненаго сего ответа, яко вы Христови врази бысте. иже врагом царевым друг есть, сей не может друг царев быти. и жити недостоин есть, но со враги погибнет и горшая подъимет;

 

[Ис книги Иосифа Волоцкаго, от слова, 12].

Глаголет божественныи Златоуст возлюблении многажды глаголах вам, о безбожных еретицех, и ныне молю не совокуплятися с ними, ни в ядении ни в питии, ни в дружбе ни в любви. творяи бо сия чюжда себе творит Христовы церкви.

От слова, 13.

Аще кто из безплотных житие поживет, еретиком же приобщаяся, в дружбе и любви, таковыи чюжь есть Владыки Христа;

 

[Ис книги Маргарита, от слова, 13].

Послушайте паки иже с ними любящиися, како можете убежати гнева, приходящаго на них, иже с ними сквернящиися в ядениях и в питиях, како смеете приступити к божественным тайнам Христовым, или не слышасте Павла блаженнаго вопиющаго, яко не можете чашю Господню пити, и чашю бесовскую.

 

Ис книги Даниила митрополита Рускаго, глава, 8. наказание.

Слышите прежде егда к вашей любви побеседовати сподобихся. Ниже: буди ревнитель по Господе Бозе. не попусти еретиком хулити имени Христа Бога. помяни Владыки твоего Христа человеколюбие, толико тебе ради сотвори, солнце, луну, и звезды землею, и море, источники, и реки, и вся движимая в них. и яже на земли живущая, и по воздуху летающая, ся тебе ради даде, и над всеми, царя постави, и еще что над сими Бог человек бысть тебе ради. и будущая благая тебе обеща, и царство небесное и со ангелы житие. а ты нехощеши злодейственных еретиков хулящих Его, и пречистую Его Матерь, воспретити, взустити устрашити; Но и совокупляешися с ними, яси и пиеши, и покрываеши, и заступаеши, и како христианин наречешися, но паче лукавыи бес, и самыи сатана. Ащели же глаголеши яко обращяю, и в покаяние привожу, ей добраго убо сия, аще тако есть обращай и в покаяние приводи. множество бо рече ангел возрадуются на небесех о едином грешнице кающемся. добро убо сие и блаженно есть, но блюди от волков, блюди от псов, блюди от свиней, блюди от злых делателеи, блюди от татей, не входяй дверми во двор овчии, но прелазя инуде, той тать есть и разбойник, блюди да не разбиют стада Христова, о немже имаши немал ответ дати на страшнем суде Христове. блюди да человеком угождая погубиши себе и иных. блюди от змии, да не внидет в стадо Господне, и прельстит и снесть якоже перваго человека. аще не приемлют наказание по мнозем врачевании; аще не обращаются и в познание истины Iсус Христу Богу не приходя. Почто с ними совокупляешися что ради им друг бываеши, почто от них не отступаеши, и не хранишися.

 

Правило, 118 [Номоканон. лист, 39].

Тридесят третие, иже в Лаодикии собора, возбраняет с ними молитися, или ясти, или что приимати от благословения их, сиречь милостыню.

 

Евангелие учител., в неделю, 29-ю. [лист, 388].

Никако же примешатися праведным лукавому, и чистым скверному. ниже бо купно быти со освященными, неудобь имея отмовенну греха скверну. Кое бо приношение свету ко тме, или кая часть верному с неверным.

 

Книга о вере, глава, 28. о разньствии. [лист, 255].

Сие же наигоршая беда яко с ними смесихомся, и приобщаемся делом и нравом их. и приимаем их, или невозбраняем им вхождения в церковь, и ядим и молимся с ними, и милостыню приимаем мимо правила святых апостол. 10-го, и 33-го, Лаодикиискаго собора того возбраняющих о сем же пространнее и в Номоканоне, 133, 153, и 154.

Ниже, глава: 29. лист, 266.

Но и о нынешних неблагополучных и слезам достойных временех, потребно воспомянути, яко христиане частое совмещение с жиды имеют, приветствуют, просят, кланяются, подарения дают, ядят пиют, з шинков [от корчемных домов, от торжищных кущ], з крам, с поборов, с померчих, и от прочих их комкании, инии же безумнии и служат им. се же все противно святому писанию, и правилом и запрещением святых богоносных отец, о них же чти правило святых апостол, 64. о жидех и еретицех. правило, 11, 6-го вселенскаго собора, и правило 33, иже в Лаодикии собора. возбраняют с ними молитися, или ясти, или пити, или что приимати от общения их, или милостыню.

 

Ис книги Кирил. Иерос., от главы, 35. лист, 333.

Имя Божие вами во языцех хулимо бывает, воистину бо хулимо есть, не точию жидами, но и некоторыми христианы сообщающимися с ними.

Ниже: лист, 334.

Чтоже таковии пострадати имут; иже с противниками не человекиими, но со враги самого Бога обществуют, таковии бо купно с ними, единороднаго Сына Божия распинают.

 

Потребник болшеи, изложение Филарета патриарха. [лист, 586].

Понеже аз смиренныи Филарет патриарх Московскии и всея Росии, егда убо бых в Польском и Литовском государстве, и многая в них виде несогласия церковная, в самех тех христианех, яже суть белорусцы в них нарицаются. и нарицаются убо христиане, а правила святых апостол, и святых отец седьми вселенских, и девяти поместных соборов, и инех святых отец предания, мнози в них не соблюдают. и во едином убо дому у них у отца с детьми, и у мужа с женою, и у господина с рабы, веры три, или четыре. и ов держит в них веру христианскую ин же папежскую, и ин люторскую. ин же калвинскую, и ин новокрещенскую. ин сасскую, и ин арианскую. и въкупе убо на единой трапезе ядят и пиют, и браком совокупляются, а инии въкупе и молитву творят.

 

Кормчая писм. слово Иоанна митр. Никиис. [на армен.].

Яко иже правовернии именуются, а приобщаются с сими еретики в ядении и в питии, и в дружбе, и в любви, и творимая от них яко благоприятна мнят. и нечестивно и неразумно истинныя христианы их именуют, общники обретаются проклятию и анафеме, яже на них написана от всея вселенныя. от востока и до запада, от соборныя и апостольския церкви. якоже божественныи Иван Златоуст глаголет. Иже творится друг быти еретиком, враг Божии есть;

 

О неприемлющих учения Христова, и апостольскаго и святых отец, яко от них ни яже на потребу телесе подобает приимати, еже есть пищу, или милостыню но удалятися. глава, 59.

 

Ис книги Василия Великаго, от обычных, от главы, 70. [лист, 142].

Яко подобает иже неприемлющаго проповедь евангельскую удалятися. и ниже яже и нужным телесе потребам от него благодеяния восприимати;

 

Беседы, апостольския, к Тимофею, пос., зач. 286. [лист, 2500].

Добре приложил есть, аще кто верен; от неверных бо неподобаше верным питатися, да не возмнятся требовати их;

 

Степенная, степень 7. страдание блаженнаго князя Василия Ростовскаго от Батыя.

Блаженныи князь Василии, не токмо неповинуся богомерзскому их обычаю, и непокорися беззаконному их повелению ни брашна ни пития тогда никакоже не прият; вся бо сквернит, но паче обличая, безбожную их прелесть.

 

Ноября, 28 день. от жития преподобнаго Стефана новаго.

Яко многия мучения и изгнания от иконоборец претерпе, и многая исцеления творяше людем. егда же кто приидет к нему прежде испытает его, аще покланяется святым и честным иконам. и еретики прокленет. тогда исцелеваше приходящих к нему молитвою своею во всяких недузех. Седящу же ему в темницы исповедания ради поклонения честных и святых икон. принесе ему некая жена потребная к телесному упокоению и питанию, и моляше его дабы он приимал от нея. он же глаголаше к ней. яко никогдаже от иконоборец что аз приимах возбраняем бо от заповедавшаго еретиком не приобщатися, не вем бо иконоборцем приобщився когда, или что прием от руку их. Сеже она слышавши повергши себе на землю, и глаголаше себе непримесну еретиком, и святыя иконы почитающи. и показа ему в тайне у себе сокровенныя три иконы. и пред очима его верне поклонься заповеда ему не поведати мужю ея. ни иному кому тогда он повеле ей приносити к себе вся елика хотяше.

 

Книга, Степен., гран., 17. святых мученик князя Михайла, и болярина его Феодора, мучени от Батыя.

Поведаша иерею ити во Орду к нечестивому цареви Батыю, и обличити прелесть его. Сии же иерей Иоанн отец слышав сия удивися и тяжко си внят дерзновение их, глагола им. О чадо церковная аще ити блюдите да не прелщени будите. якоже нецыи идоша и прельстишася со славою света сего сотвориша волю поганых, идоша сквозе огнь и поклонишася кусту и солнцу и повредиша душа своя. вы же аще хощете идите с миром токмо сего не сотворите еже они сотвориша. егда же достигнете землю поганых брашно и питие их не приемлите во уста ваша, яко осквернено есть.

 

Из Барония о Евсевии Верколенском.

Яко во Скифополи завезен, и от Патрофиля епископа арианскаго в крепкую темницу въвержен бысть. идеже от приходящих ариан многа поругания прият. иже его к своей ереси много развращаху, гладом и смертию претяху ему. он же молчаше, и ничтоже им отвещаваше. умыслиша они наконец и сим посмеятися, дабы хлеб их ядущь возмнелся, с ними некое сообщение имети. того ради ни единаго от правоверных допущаху к нему. на подаяние пищи, он же сие познав, написа епистолию к Патрофилю, стражем своим его именуя. веждь о сем, яко хлеба твоего ясти не буду, аще моим пищу мне приносити не попустиши аще и гладом умру, от тебе убиен буду.

 

Ис книги Афанасия Вел. вопрос [86].

Егда кто от неверных приемлет даяние всякое и милостыню, люте повреждается, аще не раздаст паки нищим, и на свою потребу истощит: таковыи с ними горце осуждается от Бога, и сластолюбец и тать именуется. и вечнеи муце достоин.

 

Номоканон, правило, 153.

Правило 33, иже в Лаодикии собора, возбраняет с ними молитися, или ясти, или приимати что от благословения их, сиречь милостыню;

 

Яко неподобает у еретиков; благословлятися, ни еретиков благословляти, ниже радование им давати ниже любовь к ним имети. глава, 60.

 

[Ис Катихисиса большаго, глава, 45].

Такоже и в Лаодикии святаго собора, правило, 33. глаголет, яко неподобает еретиков благословляти, ни от еретик благословения приимати. еже есть безсловесие паче а не благословение.

 

[Из бесед апостольских, к гал., лист, 1522].

Никтоже бо от проклятых иному преподаст благословение егоже сам лишися;

 

[Пролог декаб. в 3. преподобнаго Иоанна молчал.].

Муж же некии православен, поим с собою инославника, и приидоста к святому. еже от него благословения просяще, оному же к нему рекшу, тебе яко верному и благочестиву благословение подам, сему же никако, аще не отвратится Севировы ереси. Сия же верныи он муж слышав, удивися о прозрении святаго, инославныи же ужасен быв, яко ин от иного быв. некогда же ему в чювство пришедшу, и к ногам преподобнаго прикоснувся, и пыташе уведати бывшаго. Он же того воздвигнув, и поучив полезными, и всяку ересь прокляти его управив, и ону Севирову юже имяше. и оттуду к соборней приити церкви, и дерзновенно отрещися и прокляти Севировы ереси, и тогда подати ему благословение и молитву. сему же тако бывшу, абие купно оба благословив, и молитву подав и лобзав, и отпусти я в своя им с радостию.

 

Ис книги Апостола толк. от собор. послан. Иоанна 2-го, глава, 1, зач. 75.

Сие послание пишет, единой от приемлющих проповедание жен. двое же се наказует я. едино бо еже в любви пребывати: второе же с еретики неприкосноватися. и толико удалятися их, яко ниже именование радования подаяти.

 

Книга Изморагд, глава, 55.

Мир держите, не токмо с любовными, но и со враги своими, и что есть врази. аще кто убиет сына, или брата заклал бы пред ним. отдати ему, и простити его. то есть врази наши. а врази Божии суть жидове и еретицы, даржаще кривую веру. и совращающеся на иноверие, и прящеся по чюжей вере, и хваляще чюжую веру, и двоеверие любяще. с теми бо николиже держати мира и любви, дондеже отступят от того, и тогда умиритися с ними о Христе;

 

О еже яко неподобает с жиды и с еллины и с еретики в бани мытися. ниже иное кое общение имети. глава, 61.

 

[Потребник бол. лист, 578, на об.].

Шестаго, вселенскаго собора правило, 11. Ни единаго же несть христианом приобщения к жидом. сего ради убо аще обрящется кто тех опресноки ядыи, или врача их призывая на цельбу себе, или мыяся с ними в бани, или инако како присвояяся к ним, аще есть причетник да извержется, ащели мирскии человек да отлучится.

 

Ис Кормчеи писм., от посл. Тимофея през. о Коринфе.

Реша же, яко святыи Поликарп епископ и мученик рече. Яко некогда мыющуся в бани, святому Иоанну апостолу. уведевшу же яко Коринф мыется, отскочи от места, и бежати повеле ту сущим с ним. бежим глаголя. да некако баня падется, и вредит всех нас вънутрь сущу Коринфу, истинне врагу.

 

Месяца июня в 22 день. от жития и страдания святаго священномуч. Евсевия епископа Самосацкаго.

Во град же Самосацкии, на место Евсевия святаго, послан бысть от ариан некий епископ именем Евномии арианская мудръствующии. Тому во град приходящу, никтоже воздаде подобающеи епископу чести, не изыде бо в стретение ему поне един которыи человек, ни богат, ни нищь, ни художник, ни земледелец, ни муж, ни жена, ни стар, ни юн, ниже кии отрок; весь бо град сущи правоверен. нехотяше зловернаго епископа почтити, ни благословитися от него, ниже видети его. Вниде убо Евномии в епископию, прият соборную церковь властию царскою, людие убо неначаша к церкви тои ходити, нелюбяще еретика в ней архиерействующа и никтоже отнюд к нему прииде, ни в церковь ни в дом архиерейскии, и седяше Евномии в епископии сам токмо со своими иже с ним пришли бяху. Сказуетжеся о нем яко аще злочестив бе верою, обаче нравом добр, кроток, тих и смирен, и к всем любезен, и глаголется о добронравии его сие. Вниде некогда по обычаю страны во общую баню мытися, и затвориша онем слуги двери, да не инии от людии внидут тамо идеже мыется епископ. разумев же он яко мнози пред дверми стоят, мытися хотяще, повеле служащим да отверзут дверь, и да велят всем изволяющим внити невозбранно и мытися с ним купно. Внидоша убо мнози, и видевше епископа в тепле купеле седяща, стояху пред ним почести ради, он же зваше я да в туюжде купель аще кто хощет внидет. тыи же не дерзаху. и разумев Евномии яко почести ради предстоят ему и мытися не дерзают, опечалися, и востав от купели изыде скоро из бане. яко нехотяи почитаемыи быти. оставшии же в бане человецы, абие ту от купели воду аки оскверненную еретиковым омовением, вон источиша, и сосуд добре омыша, гнушающеся еретикова в нем мытия, и согреявше иную воду, купель себе паки устроиша. уведав же то Евномии, и видев яко никакоже может к себе привлещи людии самосадских, остави епископию и отъиде от града во своя си. По изшествии же Евномиевом, паки ариане от своего зловерия прислаша в Самосаты епископа именем Лукия, явнаго волка и врага овцам Христовым, граждане же и тому якоже и первому еретику несотвориша почести, и живяше и той со своими токмо в епископии, никому же от людии онех приходящу к нему. овца бо Христовы аще и без пастыря своего бяху, обаче учение оного добре памятствующе, непорочно соблюдаху святую веру, какоже того еретическаго епископа правоверныи гнушахуся, видети есть отсюду некоего времени, множеству отроков на улицы по обычаю детскому играющим, и мячик едини к другим метающим, прилучися ту де быти шествию епископа Лукия, и по случаю паде мячик под коне и колесницу епископову: и абие начаша дети велегласно звати: мячик еретичеством осквернися: мячик еретичеством осквернися: слышав же то епископ, остави единаго от слуг своих, видети что дети творят, и чесо ради велегласно вопят, они же возгнетше огнь, метаху мячик той чрез пламень семо и овамо, дабы очистился огнем от еретичества. тако не токмо совершеннаго возраста людие, но и малыи отроцы мерзяхуся тем еретическим епископом, иже яко мерзость запустения бяше на месте святе, то уведав Лукии, не подража кротости Евномиевы, но исполнився гнева, многия от священнаго сана, иже догматы православныя защищаху, в далечайшия заточения разсла;

 

Яко неподобает православным христианом имения своего по смерти еретиком оставляти. аще и сродницы будут никакоже о сем ущедрити, но отдавати та вся своим единоверным. глава, 62.

 

Степенная, грань, 2-я. Глава, 6. От наказания святыя княгини Олги к сыну ея великому князю Светославу.

А яже о мне по преставлении моем, да ничтоже сотвориши по вашему поганскому обычаю, но презвитер мой, той да погребет грешное мое тело, якоже есть обычай христианом, погребати равно з землею, могилы же надо мною да не дерзнет никтоже сыпати ни тризны творити. Но посли злато в царствующии град к патриарху, и той молитву и совершение сотворит к Богу о души моей. и нищих милостынею ущедрит. Не буди же инако сотворити, но исполни завет мой, уже бо приближися время скончания моего, да к желаемому Христу отъиду емуже веровах. Светослав же слышав матерни глаголы, слез исполнистася очеса его, аще же и не обратися веровати во Христа, но матере любезно обещася по повелению ея сотворити о ней;

 

Поместнаго собора Карфаг., правило, 22.

Епископи и причетницы, еретиком аще и сродницы им суть, да не даруют от своего ничтоже: ни прибытка им сотворят. Толк. Достойно есть епископом и причетником, свое имение даровати имже хотят, но правоверным христианом. еретиком же аще и сродницы их суть. ничтоже от своего не давати, ни в животе, ни по смерти, ни оставити, ни инако никакоже тем от своего богатьства прибытка не сотворити;

 

Правило, 82. лист, 151.

Епископ, еретиком, или еллином наследие пиша, да будет проклят; Толкование. Еретиком, от градскаго закона возбранено есть, от христиан ничтоже взимати, ни по завету наследия поганым давати. Ащеже будут оставлени наследницы имению от некоего епископа, иже умирая оставя их наследники богатьству своему, и аще ему суть сродницы, тии убо еже прияша, ничтоже от того приобрящут; но людскии поборца, иже берет на людех царьския дани, вся оставленая им да возмет, епископ же, или ин причетник, написавыи тех наследники своему имению, наследник есть, еже слышати, да будет проклят.

 

Ис книги Матфея Иеросалимскаго. состав, А. глава, 2. [Карф. соб. прав. 22].

Епископом и всем причетником, церковным посмерти сродником своим еретиком сущем свое имение оставляти неповелевает, такоже и простым людем. Ащели же кто сего правила непослушает таковии по смерти, анафема;

 

О церкви, и что есть церковь, и о нужных ея временех, и о чинех, колико их обретается. и о гонении на ню от противоверных. глава, 63.

 

Поучение, на память святых апостол Петра и Павла. [Ис Пролога, июня, в 29 день].

Петр бо камень наричется, на нем же созда Христос церковь духовную. ейже врата смертная не могут одолети. Идеже сам Творец основание положи, и стены возгради верою, кто возможет противитися; к той бо верою всяк притек спасется. К той братие прибежим, ту всех грех отпуст приимем. ту исцеление страстем получим, ту веселия и радости насладимся.

 

Никон Черногор., в послан. 22-м.

Соборная бо церкви, не стены суть, но правая учения, и предания божественных правил, и святых соборов, и святых апостол. Якоже рече Господь к верховному апостолом, ты еси Петр и на сем камени созижду церковь мою, и врата адова не одолеют ей. видели, кая есть соборная церкви; сам бо великии Петр. Первие Антиохииския многажды разрушены быша от язык, законы же и предания божественных отец, и божественная правила пребывают неразрушена вовеки от держащих тая.

 

Маргарит слово, 10. о предста Царица. [лист, 519].

Зане ограда есть церковь, аще еси внутрь волк не входит рече, ащели изыдеши вон, то зверем ят бываеши, но не от грады, но от твоего малодушия.

[лист, 518].

Занеже имамы вручение твердо, ты еси Петр, и на сем камени созижду церковь мою, и врата адова не одолеют ей, церковь мою глаголю, не место точию но и нрав, не стены церковныя, но законы церковныя. егда бегаеши рече в церковь, не к месту прибегай но к совету. церковь бо не стены и покров есть но вера и житие.

 

Из Благовестника от Матф., глава, 17, зач. 67. в толк.

Воздает Господь Петрови мзду велию, еже на нем создати церковь свою. понеже бо исповеда его Сына Божия Петр: глаголет, яко сие исповедание еже исповеда, основание хощет быти верующим; Темже всякому человеку подобает хотящему знати дом веры, сие исповедание полагати основание. аще и добродетели зиждем, не имам же основание право исповедание раслабленно зиждем, рекше, уже церковь мою, являет себе владыку всяческим. Богу бо вся порабощена суть, и врата адова не одолеют ей, сиречь по временех бывающии гонители, иже прельщением во ад отпущаху христианы. еретицы же суть врата, во ад низводяща: многим бо гонителем, и многим еретиком одоле церковь, есть же и кождо нас церковь, храм Божии бывая. и аще же на исповедании Божии утвердимся, врата адова, сиречь греси не одолеют нам.

 

Ис книги о вере, глава, 7. [лист, 64].

Отвещают ли противнии на выше реченая словеса, яко Христос на Петре церковь созда, и яко ему поручи пасти своя овцы. Но сие помощию Божиею обьявим; Первее же положим Христова словеса [Матф. 67]. Ты еси Петр, и на сем камени созижду церковь мою, Петровым именем, камень толкуется; или от камене камень, всяк верныи человек разуметися имать, и на всяком таковом яко на камени церковь свою Христос создати обеща. Стих, на камени мя веры утверди. святыи. Второе толкование имене, Петр святыи апостол, имать быти разумен; и не точию сам Петр, но и друзии апостоли таковыми же суть каменьми, мнози учителие от святых тако разумеют. Третие сказание каменем имя, иже по гречески петра, а не петрос, сам Христос разуметися имать. Кирил патриарх Александриискии. [книга, 3. глава, 33] Августин, и ини некотории. Четвертое сказание, яко Петровым именем, вера, или исповедание от Петра реченое разумеваемо имать быти. кая вера; от Христа Петра [каменя] петром [каменем] есть наречена. Сие Златоуст, Григории, Дамаскин, Феофилакт, еже выше явственее злата свидетельствуют. Ты еси Петр; и на сем камени созижду церковь мою; сиречь на вере исповедания еже исповеда, ты еси Христос Сын Бога живаго. и на том исповедании созда Христос церковь свою, еже есть вернии людие во имя его крестившиися.

 

Катихисис великии, глава, 7.

Вопрос. Что есть церковь Божия. Ответ. Церковь Божия есть, собрание всех верных Божиих, иже непоколебимую держат едину православную веру, и в любви пребывают. облобызают же учение евангельское непоколеблемое. и иже суть достойни приимати святыи и божественыя и совершеныя тайны;

 

Псалтырь толк. псалом, 67.

В церквах благословите Бога Господа от источник Израилев.

Толков., Исихиево. Церковь глаголется, и еже по домох собрание благочестивых. сего ради и Павел глаголет: целуйте Прискилу и Акилу. и яже в дому их собрание церковь. от источник же Израилев, от пророков и апостолов, Господа Бога славословитися хощет. да яко по коему чину тии уставиша, сице и мы о Бозе мудрствуем;

 

[Из Благовестника от Луки. зач. 45. лист 86]. в толк.

Церковь именует, идеже множество верных, яко пищу заповеди приемлюще спасаются.

 

[Минея чет. генваря, 21 день].

Христос Господь кафолическою церковию нарече быти правое и спасеное исповедание веры, идеже бо нарицается Христос, ту и соборная церковь сходится;

 

[Ис книги Кирила Иерос. лист, 371 на об.].

Не бо от оград и от престолов апостольское величество и область состоится, но от догмат правыя веры, и сожития божественнаго апостольскими учительствы управляемо, и есть познавается.

 

Беседы апостольския [лист, 437].

Аще бо церковь раскопати, люто и непреподобно, кольми паче храм духовныи, ибо человек от церкве есть честнейшии, ибо не стен ради Христос умре, но храмов ради. [человек церковь духовная]

 

[Ис книги о вере, от главы, 2-й. лист, 19].

Небесная бо есть церковь, ничтоже ино есть, разве небо. И инде, в церкви вся с небесе от Бога вещаются. въходим с подобающею честию в церковь, и со страхом послушаем в ней глаголемая. Той же святыи в слове Предста Царица, глаголет. Церковь не стены и покров, но вера и житие. Ниже: Тойже Златоустыи, в слове на пятьдесятницу. Вельми бо церковь Богу возлюблена есть. не сия иже стенами ограждена, но сия иже верою ограждена. Ниже [лист, 24]: Бысть рече в то время гонение велие на церковь Иеросалимскую, не на ту, иже Соломоном создана бысть. еюже тогда жидове владели, но на верующих во Христа, гонение разумей. тогда бо не у созидаеми верных церкви беша. Ниже [лист, 29]: Церковь истинная сия есть, яже гонения претерпевает, а не та, яже других изгоняет. Выше: И егда слышим в писании, церковь гонения терпит, с церковию брань, не о стенах и мурах, но о верных Божиих разумети потреба.

[Глава, 20. лист 146 на об.].

А подобно начаток Христовы церкве, с концем согласуется, ибо первее триста лет в неволе, тако и останок в том же скончается.

 

Маргарит, слово, 10. О предста Царица. [лист, 519 на об.].

Стены летом обетшавают, церкви же никогдаже стареет, стены варвары разоряют церкви же ни бесове преодолевают, и яко неложни глаголы, свидетельствуют вещи. Колицы ратоваша церковь, и ратовавшей погибоша, таяже выше небес взыде. таково имать величество церкви, ратуема побеждает, наветуема, одолевает, досаждаема, светлейшии устрояется, приемлет язвы но не испадает от язв, волнуется, но не погружается. обуревается но потопления не поемлет. борима есть но не побеждается, пореваема, но не соодолеваема. и чесо ради попусти брань, яко да покажет светлейшу победу.

 

[От жития святаго Иоанна Златоуст., лист, 117].

Нечистыи ты и скверныи диаволе. стенам не можаше одолети, или церкви надеешися соодолети. еда мниши стенами церковь сущу, но паче народом верных есть церкве. Вилиши ли колицеми связани, но верою утвержени.

 

Из Зерцала богословия, беседа, 6-я. о церкви Божии. глава, 6.

Церковь именую не здания каменная и согниваемая стены, яже лета многа тлению предают: или огнь, в пепел и нивочто обращает, но люди Божии избранныя, посреде языко нечестивых и еретиков и грешник, и отлученных от тех нечестия и скверны: сих всех церковь Христову именую, правоверующих в Господа нашего Iсуса Христа, исповедающих пресвятую неразделную и единосущную Троицу Отца и Сына и Святаго Духа, в трисоставном Божестве, и хранящих заповеди Господа Бога своего. и творящих волю его. и ничтоже нарушающих постановления его. и закона вечнаго, егоже Дух Святыи устави чрез апостолы, и их наместники. отцы святыя на вселенских соборех: таковии истинно суть церковь Христова. прекрасныи град, и жилище трисияннаго Божества. якоже рече Господь, чрез пророка [Иерем. 35], вселюся в них и похожду, и буду им Бог, и тии будут мне людие. и буду вам во Отца, и вы будете мне в сыны и дщери, глаголет Господь Вседержитель, в том пресветлом Сионе ныне Христос Бог наш живет и царьствует вечно в душах верных своих в премирном царствии своем. в патриарсех, пророцех, апостолех, мученицех, богословцех, и всех верующих вонь.

 

Апостол. зач. 153. о чинех церкве.

Положи Бог в церкви, первее апостолы, второе пророки, третие учители, и проч.

 

Номоканон афонских отец о священницех. лист, 49. [о 1-м, чине].

Ибо Господь наш Iсус Христос многим от апостол неимущим иерейства, повеле крещати; [понужди не священницы быша во апостолех нужныя тайны совершаху].

 

Ис книги Зинаря, от правила, 168-го.

И Бог наш Iсус Христос многим от апостол неимущим иерейства, повеле крещати;

 

[Деян. зач., 17].

Святыи апостол Филипп не священник сыи, крести Самарию, еще же и каженика на пути.

 

[Златоуст на деян. святых апостол. зач. 21].

Святыи апостол Анания, еще в диаконех сыи крести Павла апостола, оскудения ради презвитер;

 

[Минея чет. старописм. сен. 24].

Святая же равноапостольная Фекла, ученица святаго апостола Павла понужде сама крестися. Потомже послана святым апостолом Павлом учити люди, иныя крести.

 

[Пролог февраля, 17].

Святая Мариамия сестра благовестника Филиппа, ходящи со апостолома Филиппом и Варфоломеем, посем в Ликаонию шедши, проповеда слово, и многия крести.

 

Кормч., прав. 15. святаго апостола Павла. [о 2-м чине].

Учитель аще и мирскии человек будет искусен же слову учения и нравом чист, таковыи да учит, будут бо рече вси научени Богом. [несвященници быша во учителех].

 

Книга о священстве. лист, 140.

Всегда неотступне божественых писаниях поучатися подобает. не иереом токмо, но и простым всяко повелено бысть божественная писания ведети и умети о своем уповании отвещавати.

 

Деяния святых апостол, зачало, 45. [о 3-м, чине].

Вшедше [Павел апостол и проч.] в дом Филиппа благовестника, суща от седмих диакон, пребыхом у него, сегоже бяху дщери девицы четыри прорицающе. [не священници быша во пророцех].

 

Барон. в лете Господнем, 211-м.

Яко христиане церквей во оно время не имеяху.

 

И святыи Василии Вел. о гонении арианстем, к западным епископом пиша глаголет. [епистолия 1].

Людие церквей не имеют, и в полях пустых собираются. увидели бысте великую нужду. жены и дети, старии и младии, на дожде и снезе, на ветрах, зимою, а летом на знои солнечнем, под единым небом пребывают. и сия тягости терпят, ради того единаго дабы кваса арианскаго приимати не были принуждены.

 

Ис книги, Григория Богослова, от слова, 14: в толку 9-го стиха.

Ты же рече арианскии собор, к тебе бо ми слово ныне, церкви содержиши, правоверныя изгнав. имате же токмо церкви, и стены и скрижали, мы же небеси и земли Владыце покланяемся. аще и истен изгнани быхом. но в крове Бога небеснаго водворихомся. вы злато и сребро яко воду изливаете, от силных спомогаеми вашей воли, и яко персть собираете от церковных даней, мы же имамы слово чисто, вы сотвористе храмы двокровны и трикровны, и никакоже нашия веры вышьша и небес к ним же и несемся: лучше бо и наясне и бездому благочестие. идеже бо еста два или трие собрани о имени моем, ту есмь посреде их, лучше бо есть пред Богом многих ариан, отметающихся Сыновня Божества.

 

Месяца ген. 1, день. чюдо святаго Василия иже сотвори в Никии.

Уалент царь беззаконныи, брат царя Уалентиана великаго, в Риме царствовавшаго, изгнав епископы христианския, и затвори церкви Христовы, и предаде власть арианом. епископи же рекоша к царю, аще приидет зде Василии, и препрен будет арианы, то вси мы покоримтися. Послав же царь приведе Василия в Никию, и претяше ему смертию, аще не причастится арианом. Василии же рече, даждь мне царю суд аще не разсужу в правду, кому прияти власть церковную, или арианом с бесы, или нам христианом, да убиен буду. И повеле царь быти тому тако. И собра Василии единоверныя своя христианы, и пришед к церкви, изгна арианы из церкви, и рече, недобре прияли есте Божию церковь. аще есть Бог с вами, ходите вслед его, и се рек, повеле затворити вся двери церковныя. и заваляти извнутрь колодием. и рече к царю, се суд мой егоже просих у тебе. се затворих врата церковная, да имже отверзутся молитвою, тех веру вси имем. годе бысть всем суд Василиев. И реша ариане, страха ради царева, право судил еси, и сотвориша ариане молитву от утра и довечера, и небысть гласа ни послушания. Во утрей же день пришед Василии отгна арианы. и взем кресты, иде со крылосом своим к церкви, поклоньже колена, молитву деяше, и внезапу бысть гром велик, и отверзошася двери церковныя. И удивлься царь, отверзе церкви Христовы, и многи дары Василиеви, и отпусти и с миром, но токмо сам неверова. небо от стада Христовых овец, но доконца прельстився от еретик, и шед на Фракию, тамо жив огнем сожжен бысть, по пророчеству святителя нашего Василия;

 

О церковном собрании, и о еже како подобает молитися православным христианом, и о пении. глава, 64.

 

[Ис книги Иосифа Волоколамскаго, слово, 7].

Аще кто глаголет, яко в дому помолитися могу. прельщаеши себе человече, помолитися убо в дому возможно, сице же помолитися якоже в церкве невозможно. идеже отцем множество, идеже пение единодушно к Богу посылается, и единомыслие и согласие и любве соуз. И вовремя оно любимиче, не человецы точию вопиют страшнейшии он вопль, но и ангели припадают Владыце, и архангели молятся: Ниже: Но егда клепание возгласит, тогда вся дела своя отмещем и со мнозем усердием с подобающим тщанием семо приходим.

 

[От книги Евфросина Псковскаго месяца маия 15].

А о церковном прехождении егда услышиши клепание, и в той час воспрянути аки от огня, или от змия, или на молитве стоя кто будет, или на поклонех, или на рукоделии. все оставль, и тамо обрестися в начале пения. занеже аще и всю нощь стояти в келии своей на молитве, не сравняется ни единому Господи помилуй общему. стояти с братиею до отпуста не отходя, разве нужда, и стояще глаголати молитва, Господи Iсусе Христе Сыне Божии помилуй нас.

 

Патерик Печер. Послан. святаго Симеона, к блаженному Поликарпу. [лист, 267].

Собора церковнаго не отлучайся, ибо яко дождь растит семя, тако и церковь влечет душю на добродетели: елико бо твориши в келии, аще псалтырь чтеши или обанадесяте псалмы поеши, все то ни единому Господи помилуй, уподобится соборному.

 

Ис книги о священстве. лист, 223.

Идеже бо аще будут два или три собрани во имя мое, ту есмь посреде их, то аще идеже два, или три суть собрани посреде есть; много паче в вас, иже бо кто о себе моляся прияти не может. сие же со множеством моляся приимет. почто, яко аще и не своя добродетель, но согласие многое имать сию крепость. идеже бо аще будут рече два или три собрани. чесо ради рече два; аще бо един был бы во имя твое, то почто неси ту; яко всем вкупе хощу быти, и не растерзатися. темже да соградим друг друга, да свяжемся любовию, и никтоже нас да не разлучает, и тако держащеся, вся да творим и руки себе подадим, да похвала наша вы будете. и мы ваша в день Господа нашего Iсуса Христа;

 

Ис книги Нила Сорския пустыни. [и устав древлеписм.].

Ащели подалеку есмы, идеже невозможно есть на пение в церковь приходити. и где убо да есть кроме соборнаго пения, иже в церкви бывает. Тогда сице имам уставление. вовремя устав, 9 час в навечерие праздника собираемся ближния братия вся вкупе, идеже есть соборная церковь, рекше келия, или есть соборная церковь, рекше келия, или церковь аще есть, и потом начинаем пети, 9 час, или вечерню противу дни прилучившемуся. и тако по отпетии вечерни празднику собираемся по обычаю, на концы тропаря празднику или обычной будет, и от проч. Аще несть поста поставивше трапезу причащаемся пищи мало. и проч.

 

Апостол к римлян., зач. 120.

Целуйте Прискилу и Акилу, споспешники моя о Христе Iсусе. яко о души моей своя выя положиша, имже не сам аз благодарю, но и все церкви языческия, и домашнюю их церковь.

 

[Беседы, лист 477].

Тако бо быша благоискусни, яко и дом церковь сотворити, заеже вся сотворити верных, и заеже странным сию всем отверсти, ниже бо просто обыче домы церкви нарицати, аще бы немногое благоговение, и многии Божии страх укоренен в них был. сего ради и коринфяном глаголаше: целуйте Акилу и Прискилу, с домашнею их церковию. и о Онисиме жь пиша глаголет; Павел Филимону и Апфий возлюбленнеи, и домашней церкви.

 

Псалом, 67.

В церквах благословите Бога Господа от источник Израилев.

[Исихиево]. Церковь глаголется, и еже по домох собрание благочестивых, сего ради и Павел глаголет: целуйте Прискилу и Акилу, и яже в дому их церковь; от источник же Израилев, от пророков и апостолов, Господа и Бога славословитися хощет, да яко по коему чину тии уставиша сице и мы о Бозе мудрствуем.

 

[Ис предисловия Октая, лист, 3].

Бысть рече в царство Уалента царя арианина грядущу ему некогда в Едесе граде, виде мног народ православных изгнаны ис церкви, на поли собравшихся и творящих службу, разъярився зело и своима рукама бив епарха, зане не изби и не изгна народ христианскии. Епарх же досажден быв, но обаче человеколюбъствовав возвести сие народу, да не ктому собираются на утренюю службу. Нощи же глубокой сущи, епарх бе стрежай град свой. и видев некую жену, с детищем на руках младым, скоро бежащу, и врата дому не затворшую, ни облекшуюся благообразно, но яко рыщущу, повеле ю привести, и рече к ней. о убогая жено. камо сице рано тщишися; она же рече, на поли к народом соборныя церкве. и рече ей не слышала ли, яко епарх грядет тамо избивати вся. она же отвеща, слышах, и сего ради тщуся да обрящуся тамо с ними. И вопроси ея отроча же се камо влечеши. она же рече, да и той мучению сподобится. слышав же сия епарх, устрашися, и возвращься скоро во град свой, шед в полату к царю, и рече, аще повелиши ми о царю, и умрети готов есмь. повеленное же ми дело не могу сотворити, и поведа ему вся, и яже о жене, и утоли гнев его. тако бо побеждаше ревность любочестия хвалы Господни женскую немощь. К сим же ина тому подобная. В лето по рожестве Христове, 176-е, обретается свидетельство достоверно царя Уалериана. в послании его в сиклиту римскому, егда бяше на рати свои, числом, 77. противу супостат, иже много одолеваху нань. призываше же отеческия боги, и ни единыя отрады обрести ему. Но уже и во отчаянии бывшу, зря на скудость вои своих, между велиими горами, в гладе и жажди затворен. Призва же християн от среды вой, и моли их, да от Господа Бога своего помощи просят. христиане же на землю скоро себе повергше, во псалмех и пениих чрез всю нощь призываху Господа. и той послушаше их. внезапу бо от небесе сниде велии дождь на все то воиньство, зело прохладен. на супостаты же паде град велик, и молнии огнены, и громы убивающия тех, яко онем убо спасеным быти, молитв ради верных, еже Бог дарова победу, и одоление им, овем же пагубу смертную обрести. тако бо много может молитва праведнаго поспешествуема, и от чиста сердца возсылаема к Богу, верою утвержена. Бог же всюду прославляем есть во святых своих.

 

Ис книги сына церковнаго, о молитве всякаго человека живущаго в мире.

Нам же в мире живущим человеком, того труда понести невозможно есть. и сего ради они же святии отцы уставиша нам на всяк день правила церковная. тако же и в дому поелико кому сила возмогает, уставили и повелели молитися, а без правила церковнаго и без домовнаго моления православному христианину отнюд никако быти не повелено;

О церковном правиле.

Слыши и о сем что суть правила церковная. вечеря с павечернею, полунощница с заутренею, часы с литоргиею.

 

Ис Катихисиса мал. [лист, 25 об.].

Вопрос. Много ли есть церковных заповедей. Ответ. Аще их и немало, но главнеиших девять. первое на всякии день по обычаю христианскому, подобающее благочестию, еже любо слушати пения в церкви, или самому отправити усердне, якоже се, утреню часы вечерню и павечерню.

 

От старчества, преподобнаго отца Филимона отшелника.

Дух же всегда сокровенное поучение, и воображенныя от святых отец дневныя молитвы. глаголю же третии, шестыи, девятыи час, и вечерня, и нощныя службы потщимся совершити. всею же силою блюсти, ничтоже творити по человекоугождению, не имети николиже вражду на брата своего, да не отлучишися от Бога.

 

Препод. отца нашего Макария Вел.

Да будут же убо благоволением Божиим молитвы твоя пречисты и несмустны. 1, 3, 6, 9. часове. и вечерня. павечерница же и полунощница. их же должен еси укрепльши тя божественней благодати, всегда совершати. и аще убо прилучится в сих уставных часех скончати, добро и благо; ащели же кая будет спона во весь день, аще прилучится, точию скончай их и непреступаи.

Инаго святаго.

Аще не можеши на молитве стояти или гласом пети. ты же творцу своему плод от уст твоих любо седя, или лежа приноси из болезнены душа, и от сокрушена сердца. ибо великия почести от Бога, той достоин кто в велицей болезни сущи, молитвенаго пения не лишится.

 

Из Псалтыри со воследованием друку острожьскаго выпечатаныя в лето, 7107. о правиле церковном.

Правило молебно, мниху наедине, по вся дни стихеры, и на стиховне. седална, канон и светилна на хвалите, и на стиховне, стихеры. блаженна, апостол, и евангелие, и проч.

 

Послание святаго Фотия митрополита во Псков град, в лето, 6927.

Я мирским людем правоверно живущим, подобно и сим правило церковное держати, пред святыми иконами в своих домех, понеже и должни суть сия творити, аще произволяют, павечерницу убо великую вечер или малую и паки отложа воставши полунощница и заутреня со псалтырию и с прочим последованием должни суть творити, аще произволят. а сии же суть священническаго ничтоже не творят начала благословен Бог наш. вместо начала, убо да глаголи сице молитвами святых отец наших, Господи Iсусе Христе Сыне Божии, помилуй нас аминь. А вместо отпуска глаголи сие молитвами пречистыя ти Матере, и всех святых твоих, Господи Iсусе Христе Сыне Божии помилуй нас аминь.

 

Из минеи чет. нояб., 11, дня: от жития преподобнаго Феодора Студита. [вовремя гонения иконоборства].

Во острове Сардиистем бе некии муж благочестив, иже имея у себе писанная словеса, учения преподобнаго Феодора почиташе я прилежно. и любляше и песни, от святаго того отца составленныя певаемыя в пост великии иже триоди или трипесницы нарицаются. к тому убо мужу неции зловернии иноцы, мимо ходяще путем, приидоша и обиташа у него вовремя великаго поста, видевше же творенная преподобным Феодором пения и словеса, хулити я начаша, глаголюще. яко не по разуму суть составленая, и буйства исполнена. муж же той гостивыи их развратися от беседы их, уже ктому не почиташе полезных словес преподобнаго, ниже трипесницов его на утреннем пении пояше, якоже прежде име обычай пети. тако ему развратившуся. единыя нощи преподобныи Феодор явися ему, мал возрастом якоже бе жив блед лицем, плешив главою. вслед же его и ины иноцы идяху, жезлы в руках держаще, ими же бити повеле прельщенаго онаго. [биет развращеннаго святыи] биену же ему, глаголаше отец. почто неверием отверже моя творения яже преже любяше и почиташе, почто сего не разсудил еси, яко аще бы не видела в них пользы церкви Божия, не бы их прияла. не ухищренным бо льжесловием ни витийством речи составлены суть, но по всему здравая и смиренная имут словеса, могущая сокрушити сердце, умилити душю. сладка бо суть и полезна, истинно хотящим спастися; тако наказав развращеннаго отъиде, бывшу же дню муж же той лежаше на одре от биения тело исполнено синости, яже показоваше всем поведая бывшее ему наказание. и абие иноков оных прельстивших его. отгна с бесчестием от дому своего. яко виновных, его прегрешения, и таковыя казни; к преподобному же Феодору оттоле множае перваго веру стяжа, и любезне почиташе писания и пения от него составленая, моля его да простит ему прежде согрешение;

 

[Ис книги Златоуста, слово, 25: в понед., 3 недели, вел. поста].

Ащели человек умея грамоту, а не поет себе ни заутрени, ни часов, ни вечерни, ни нефимона, то самся Божия света лишает.

 

[От старчества. от слова, 1].

Аще кто упразднится или со мноземи, или с малеми на пение, и заградит уста своя не вопити к Богу. таковыи бесовское дело делает, ибо и бесове не могуще слышати хвалу Христову. и поющих упражняют.

 

[Из бесед апостольских, лист, 1764].

Поющии бо Духа исполняются святаго, якоже воспевающии сатанинския песни духа нечистаго.

 

[Ис книги жития преподобнаго Сергия Радонеж. глава, 7, лист 42 на об.].

Сице живыи с братиями, аще и не поставлен бысть в презвитеры, но вельми с ними пристояше церкви Божии. и по вся дни пояше с братиями в церкви и полунощницу и утреннюю, и часове, 3, и 6, и 9. и вечерню и нефимон. по реченному, седмижды днем хвалих тя о судбах правды твоея, и промежу сих частыя молебны, на то бо и упразднишася еже безпрестани молити Бога, и в церкови и в келиях, по Павлу глаголющу, непрестанно молитеся Богу. на литургию же призваше некоего чюжаго попа суща саном, или игумена старца, и того приимаше и повелевааше ему творити святую литургию. сам же Сергии исперва нехотяше поставления презвитерска, или игуменства прияти, многаго ради и конечнаго смирения.

 

[Из старописменнаго устава соловецкаго].

И о сем да есть ведомо, яко сию заповедь имамы всем предании, да всяк еже хощет сие правило держати. млад и стар не умея книг еже пети, или прочитати, да учитися елико есть мощно и аще множае не может научити, поне трисвятое и 50, псалом, помилуи мя Боже, и верую во единаго Бога.

 

Ис книги Симеона Селун., яко подобает общеуставленная сохраняти, глава, 344.

Неким усердствующим, и иная некая воспеваются. обаче во общении, но особно яко понужде, яко общеуставленая хранитися подобает чина ради, безмятежное еще и неблазности ради особно же правило неким отеческим усердствующе пети, имети волю келейно. или со учеником своим, некоего, особна, или со братиею усердствующим неким, и сие со искуством отцев же и советом, яко спасение есть во многом совете. якоже навыкохом, яко убо умиления ради, и каноны в повечерии поются весте, якоже и великии канон. и повечерям же нецыи поют, во обители святыя Богородицы, каноны, и последование акафиста множайшия, в кииждо в пяток вечера, и всяк усердствующии же и труждающися, и вящшую мзду имать, но труды его, и оная убо произволения некоего и усердствием лежат. сия же яже наяве уставленая не подобает преступати некоему кроме великия нужды и немощи.

 

И старчества.

Вопрос. Егда молюся, или пою, не ощущаю силу глаголемых словес жестокости ради сердца моего что пользуюся; Ответ. Аще ты не ощущаеши, но беси ведят что глаголеши, и трепещут, непрестанно убо пой и молися, и имей смирение в сердцы, и помалу Бог умяхчит ти сердце;

 

[Ис полуустава, от главы 43, лист, 67].

И аще преставится брат. и аще есть священник во обители, да бывает служба на третины, на девятины, на четыридесятины, и годищныя о усопших. якоже есть предание в православных христианех, ащели несть священника во обители, отпущати подобает просфиры идеже есть священник, и о усопших приносимом быти. внутрь же во святей обители да бывают подобающая, якоже предрекохом.

 

Ис книги старохаратеинои в полдес. Глушицкаго монастыря, глаголемыя Кормчия, рекше правила закону. от сказан. Номок.

Седящим святым патриархом в месте своем в святой Софии, Антиохиискому, Констянтина града патриарху Иоанну, [Ниже:] а всея Русии митрополии Максим, и предстоящим ту многим избранным попом и диаконом, и положиша посреде собора вопросы некия, и ответы всякому: [Ниже:] Вопрос. Аще не будет ни попа ни дьякона при смерти лзе ли дати причастие, или пети над ним, или кутию свящати, [Ниже:] Толк. Льзе дати причастие и кутья свящати.

 

[Ис Патерика египетскаго глава, 10. о черноризце Патермуфии, ниже.].

Аще кто где от христиан умираше, пребывая у него бдениом чисте погребаше.

 

[Ис устава бол. печатнаго, лист, 943].

При часе же 3-м дни ударяет параклисиарх в било, такожь ударяет в канбан, 3-жды: и собравшимся в церковь и творяще прежде начало пению кииждо нас на месте своем, прямо святым дверем начало глаголюще сице. Боже милостив буди мне грешному. и поклон. Создавыи мя Господи помилуй мя. и поклон. Без числа согреших Господи помилуй мя. и поклон. таже. Достойно есть. и поклон. Посем, слава и ныне. Господи помилуй, 2-жды. Господи благослови. и поклоны 3: Сице творим по вся дни, в суботу, и в неделю. творим поклоны обычныя кроме достоине. Целуем на местех наших святыя иконы, и паки поклон един. и паки на оба лика по единому малу поклону;

 

[Ис книги преподобнаго Никона, Черн. гор. от слова, 29].

И аще творимое есть собрание в церкви или бдение, поиди. Ащели не творится, ты псалмы, апостол, и евангелие, прочти. сия не токмо иноком и мирским, но и женам верным и говейным подобна суть, и никтоже возбраняяи.

 

[Ис книги Катихисис малои, Генадия патриарха].

Востани яко мытарь, прибегни аки блудник, умилися аки Ахав. прослезися аки блудница. зови аки ханаоныни. предстой аки вдовица, молися аки Езекия, смирися аки Манасия. аще тако молишися приимет Господь Бог молитву твою, аки мати младенца наруку.

 

[Из еванг. вос. от поучения в неделю, 17. лист 289].

Молюжеся всем верным хотящим спастися, правило молитвы непрезирати николиже. но аще ясте, или пиете, или делаете, или в путь шествуете, ли стоите, или седите, или что ино творите непрестанно вопиите кождо вас. Господи Iсусе Христе Сыне Божии помилуй мя;

 

[Ис Катихисиса болшаго, глава, 51. о четверописменнем имени Божии].

Сие имя всех спасает, сие имя всех укрепляет, в вере утвержает. от болезней же и недуг во здравие всех пременяет; Ниже: Сие имя и бесом страшно, и страстей и недуг отъятельно, сим хвалимся и украшаемся. сим ограждаем себе; и четверописменно именуем якоже и глаголем всегда. Первое Господи, Второе, Iсусе, Третие, Христе, Четвертое, Сыне Божии. се есть четверописменно, его же совершаем яко всесилному Богу моление возносим помилуй нас;

 

Ис книги Обиходника Серьгиева монастыря, и Кирилова, о поклоне по Достойне.

По Достойне завсегда поклон в землю, точию после стола в трапезе в пояс;

 

О кажении, яко без священника где случится простым кадити не запрещается. глава, 65.

 

[От послания Фотия митрополита Московскаго, в лето, 6927].

А мирским людем в своих домех православне живуще по закону, неприсовокупився к жене своей: достоит им кадити самим святыя иконы, аще не будет ту священника. и не токмо самим мужем но и женам благочестивым, и чистым от мужа кадити, и детей своих сему учити, аще и вельми малы, понеже православных сия обычай суть.

 

[Ис книги Нила Сорския пустыни; по концы книги.].

Подобает же и всякому брату имети иконостас. ащели невозможно есть кому святых икон стяжати, а он крест и тако при нем пети уставленныя каноны в келии своей. и кадити иконостас по обычаю вовремя пении соборных. Ащели кому невозможно есть кадити по уставленных, а он по единою днем. не подобает оставляти непокадив, кроме великия нужа. или по прилучая изгожается некогда;

 

[Из Псалтыри со воследованием московсия печ. в начале правил.].

Правило иноку на всяк день. Ниже: кажение святым, 2-жды. или единою.

 

Из старописмен. устава Соловец.

Подобает же всякому брату имети в келии своей иконостас. ащели невозможно есть кому святых икон стяжати, и он поне крест. и тако при сем пети уставленныи канон в келии своей. и кадити иконы святыя по обычаю вовремя пении соборных;

 

Из минеи чет., от жития преподобнаго отца нашего Саватия Соловец.

Преподобному же Саватию, поющу заутреню воскресную. изшедшу ему ис келии своея, в подобное время на покажение честнаго креста, иже близ келии его поставлен. и услышася ему глас и вопль того ради и возвратися в келию свою, и сказа подругу своему Герману.

 

В страдании святых мученик. Дады и Гаведдая и сестры Гаведдаевы Каздой. [Ис Пролога сентября, 29].

Видевше же царица мати их царево злонравие и безчеловечие, и приимши сама ароматы многоценными, и покади святое тело дщерино, и царскою багряницею повивше, положи с сыном своим Гаведдаем;

 

[Месяца октября, в 19, день].

Блаженъная Клеопатра взя тело святаго мученика Уара, и принесе в свое село, положи в дедне гробе, и по вся дни кадяше окрест гроба;

 

[Декаб. в 2 день. от жития святыя муч. Миропии].

Святая же Миропия, ревностию божественною подвигшися, нощию с своими служебницами пришедши, прият святое тело, [Исидора мученика] и честне покадивши, в нарочитом месте положи.

 

[Из минеи чет., июля в 3 день].

В страдании святаго мученика Иакинфа пишет яко некая вдовица приемши от некотораго презвитера мучениковы мощи, и кадяше по вся дни, идеже сице пишет: Прежив же презвитер той, [иже мучениковы мощи имеяше] неколико лет, егда приближися к скончанию своему, вручи святаго мученика мощи некоей вдове честной, житием святой, и старой леты, яже безценное то сокровище с радостию приемши соблюдаше у себе честно, такожде по вся дни кадило вжигающи, и кадящи, исхождаше же и от мощей святых благоухание велие, и наполняше храмину ту;

 

[Того же, июля, 11. о чюдеси святыя великомуч. Евфимии всехвалныя].

Откры убо царь Лев Саврянин злочестивыи изъят оттуду с древяным ковчегом святыя Евфимии мощи чюдотворныя нетленныя, а в тех место в каменной гроб вложи некия кости согнившия, смрадныя, якоже нарочне на то приуготовав бяше. и паки дскою наложив отъиде, татьскии отнес с собою честныя оныя мощи, и положи я в некоей храмине внутрь полат царских; Сестры же его такожде и дщери, отай его прихождаху к святым мощем, и кадяху миры, и свещами просвещаху. честно почитающе, и любезно поклоняющеся. но вскоре уведав то злочестивыи царь, абие ковчег с мощьми взем, нощию въверже в море;

 

[От жития преподоб. Саватия Соловец. чюдотворца].

И ко исходу блаженныя си души сам кажение сотвори.

 

Из сына церковнаго о фимияне.

И егда с фимияном кадило приносится от иерея, или от диакона, тогда рапростерши руце свои яко дух жизни приим его. и рцы молитву Iсусову: сие бо знаменует курение благих дел. и сим образом молитва наша к Богу восходит, и о том Давыд во псалме написав, дася исправит молитва моя, яко фимиян;

 

И старчества. глава, 12.

Подобает же ведати и се, яко внегда прилучится искушение, в той день креста своего не целовати ни во святыи олтарь дерзнути внити, ни святых икон целовати. ниже доры имати, ни хлеба Богородична: даже до настоящия нощи;

 

О пострижении, яко понужде без епископа и игумена, или попа. и причетнику пострищи позволяется. глава, 66.

 

Книга устав писменнои. в ней же устав Кириловской, и Сергиевскои, и Генадия архиепископа Новгор. от главы, 352, от собрания правил.

Вопрос, 33. Аще случится человеку в велицей болезни, а не будет игумена, льзе ли епископу пострищи его. Ответ. Не токмо епископу и попу и диякону, а не будет попа и диякона, а присмерти да причетник пострижет.

 

Сему подобно, в Кормчей писменнои.

Вопрос. Аще случится в велицей болезни, а не будет игумена лзе ли епископу пострищи его. Ответ. Не токмо епископу, но и попу и диакону, а будет несть попа и диакона, а присмерти да и причетник пострижет;

 

Яко мнози и простии мниси священства не имущии приходящих к ним постригаху. глава, 67.

 

Патерик Печерскии; отпослания преподобнаго отца нашего Симона епископа Владимирскаго и Суждалскаго, к блаженному Поликарпу. [лист 269].

Иларион, митрополит Киевскии иже от преподобнаго Антония в иноческии образ пострижен бысть; и тако святительства, сподоблен [бысть] якоже воспоминается о том в житии преподобнаго Антония.

 

[От жития преподобнаго Антония, лист, 5].

Бе ту презвитер именем Иларион муж благочестив, в божественом писании разумен, и постник, иже от благовернаго сего князя Ярослава. собравша епископы, и произволением Божиим по летех многих, поставлен бысть в святой Софии митрополитом: но прежде того, от преподобнаго Антония пострижен бысть. Ниже: И оттоле уведан бысть преподобныи Антонии всеми, и почитаем всеми. и начаша приходити к нему христолюбивии нецыи, пострищися хотяще: он же приимаше их, и постризаше;

 

[От жития преподобнаго Зосимы Солов.].

Яко он до поставления своего, постриже некоего именем Марка, идеже сице пишет.

 

Минея чет., апреля, 17.

И посем прииде старец Герман. и с ним муж именем Марко. и привезе с собою много запасов. еже на ловитву рыбную. и иныя запасы, бе бо муж на то строен, и не по мнозе времени постриже его преподобныи;

 

[Ис Пролога, октября 4, день]. В житии преподобнаго Павла простаго о преподобнем Антонии.

И глагола Павел, преподобному Антонию, еже ми велиши творити, то творю, и искуси, и Антонии обрет яко все терпит, и постриже и, создав един келию пребываше ту.

 

Того же месяца, в 21, день Илариона Великаго;

Ревнитель Великому Антонию показася, и пребысть у него лет немало;

 

[От минеи чет. того же дня].

Пища бе [преподобнаго Илариона] пять надесять смоквей на день по захождении солнца, одежда власяна, и кожаная мантиица от преподобнаго Антония данная;

 

[Маия в 13 день в святцах Пахомия Великаго].

Пахомии Великии бе в царство Констянтина Великаго, в лета, 5823, родителю еллинску сын, родом египтянин, чином бе прежде воин, пострижен отшелником Паламоном;

 

[От минеи чет. маия, 15].

Тогда преподобныи Паламон видя Пахомиево к Богу усердие, и звание в нем Божие разумев, отверзе ему двери. и внутрь прият его, и во иноческии образ одея, и пребыста вкупе оба в пощении и молитвах и трудистася в деле ручном: Ниже: И тако истинныи постник и воздержник скончася на руках возлюбленаго ученика и духовнаго сына своего Пахомия блаженнаго. Ниже: Преподобныи же Пахомии честное тело духовнаго отца своего подобающему предаст погребению. Ниже: Пахомии же [Великии] Бога благодарив. Ниже: начат приимати приходящия к нему. и произволяющия работати Богови, и по мнозем испытании даяше им иноческии чин. поучая их презирати мир, и вся яже в мире. Ниже: По мнозех же летех слышавши о нем сестра по плоти, Ниже: Блаженныи же Пахомии, о таковом ея усердии прослави Бога, и повеле благоговейным братиям повеле монастыря обон пол реки создати ей келию, и возградити мал монастырь, и облече ю во иноческии образ, Ниже: Посем прииде из мира ко преподобному во иночество един от скомрахов, егоже приемши преподобныи, и доволно о покаянии поучивши, облече в чин иноческии, имя ему бе Силван;

 

[Святцы с летописию в 15 маия о преподобном Пахомии].

И потом созда во Египте монастырь в месте нарицаемом Тавенисия, и бе началствуя над 7000 иноков.

 

Никон Черногор., слово, 36. в послан.

И сам убо Великии Пахомии тяготы священства избеже.

 

[От жития преподобнаго Пахомия мин. чет.].

И в малом времени умножися число братии, яко быти им вящьши ста, егда же в кии день праздничныи подобаше всем купно причаститися пречистых безсмертных и животворящих божественных Христовых тайн, преподобныи Пахомии призываше презвитера единаго от ближних, яже в весех церквей, и совершаше призванныи презвитер в монастыре их божественную службу, и бываху вси причастницы тела и крове Христовы. Не хотяше бо смиренномудрыи наставник, дабы от учеников его кто сподоблен был презвитерскаго сана.

 

Никон Черн. гор. слово 36: от послания ко отцу Герасиму о цатах.

Свидетельствует се самое житие Великаго отца нашего Савы. и такожде Великаго отца нашего, и началника общим житием Пахомия. яко и во обою сею монастырех, в лавре же и во общем житии колицы иноцы быша. и своего си пастыря инок в презвитерское рукоположение не имяху. но времени зовущу, от ближних презвитер призываху сотворити им священную службу.

 

[Лествичник, слово, 30. лист, 296].

И се старец иже первие отцу моему беседовавыи, и от болезни избавивыи мя. прииде в дом наш, видев же его отец мой побеже. старец же поим мене, и приведе в келию свою, и пребысть всю нощь в молитве упражняяся, и колена преклоняя, отгнав беса от мене. и остриг власы главы моея, и одея мя во мнишескии образ, и предаст мя отцу Исаии;

 

[Ис книги Никона Черн. гор., от слова 52].

Старец некии и свят и богоносив бяше в горе Олимбе, и к нему пришедшим множайшим братиям услышати от него слово спасения и седящим им, [Ниже:] прииде некии мирянин и поклонься ему ста. старцу же воззревшу нань и вопросившу коея ради потребы пришел есть к нему. отвещав исповедати святыни твоей грехи моя прииде честныи отче. Ниже: старец же, и глаголи рече чадо не стыдящися. Ниже: изрекшу же убо ему вся со слезами, ста поник доле зря сокрушенным сердцем. молча убо, старец быв начас доволен к нему рече, хощеши ли убо чадо одеятися во святыи образ; той же рече, ей отче желаю та, и имам такова одеяния в мешце огласив убо его святыи старец, и постриг и одея в святыи образ отпусти рек. иди чадо с миром и ктому не согрешай. он же сотвори метание отъиде славя Бога.

 

[Ис Пролога, маия в 7, от жития преподобнаго Антония Печерскаго].

Совокупленне же братии рече блаженныи Антонии, се Бог вас совокупи братие, от благословения есте святыя горы, игумен имже постриже мя. аз же вас постригох, да благословение на вас будет первее от Бога, и потом от святыя горы.

 

[Пролог месяца апреля, в 24: чюдо святаго Георгия отрочати, егоже змия уязви].

И поят мя старец в келию свою. и яко пребысть у него четыредесять дней, дивяся и чюдяся крепкому его житию. и прииде из града презвитер именем Сава, и сотвори святую службу, и облек мя во святыи сей образ. и се третие лето седящима нама со старцем и плетущема кошницы, то бо бяше дело его кошницы плести: Ниже: и во един день седящима нама и плетущима кошницы, рече ми старец, востани и сотвори нама обед, грядут к нам гости от твоея земли. и се глаголющу старцу, внидоста пять мужь, и благословишася. старец рече к ним добре есте пришли. Ниже: И повеле дати им ясти, бе же привечерии, и облекошася ту. и наутрие отсла их в домы своя. тии же шедше исправиша вся повеленная им и паки прият я, и даде им ангельскии образ;

 

[Ис Патерика египетскаго, слово 10. о чернорисцы Патермуфии].

Некия к своему житию поущая, прииде же к нему некто юноша учитися хотя. он же абие облече его в срачицу, и куколь ему на главу возложив;

 

[Ис Пролога, февраля, 4. и Лимонарь, глава, 166].

Бе некто разбойник ко отцу Зосиме, и моляше старца рекии, Бога деля сотвори на мне грешнем милость. понеже многа зла и безчисленныя грехи соделал есмь, не глаголи бых своего остался зла. Старец же наказав и, и сотвори его чернца, дав ему святыи образ; Посем рече ему старец, ими ми веру чадо, яко зде пребывати не можеши, зане аще услышит князь и поймет тя. но послушай мене. да тя поведу в монастырь подале отсюду. и веде и в Дорофеев монастырь в край Газы. и сотворив ту, девять лет, и навыче псалтырь и весь устрой чернеческии; И паки взыде к старцу в Фирмин место, идеже бе постриглъся преже. И рече ему, что деля чадо сице сотворити хощеши. отвеща ему брат рекии, се яко оболк мя еси во святыи сей образ отче Господи, и вда мя во ин монастырь. и се лет девять имам елико могии алках и воздержахся, и всем страхом Божиим в молчании бых повинуяся. и виде яко благостыня его прости мя многих моих зол;

 

О облачающихся во иноческое одеяние и паки совлачающихся. глава, 68.

 

[Из минеи чет., от жития препод. Аполинарии, девицы, генв. в 5, день].

Блаженная Аполинария, умедли во Александрии неколико днии, церкви и монастыри обходящи, обрете же в дому в нем же виташе, старицу некую юже милостынею ущедривши. умоли да тайно купит ей мантию, параман же и клобук, и пояс усмен, и вся иноческаго чина мужеская одеяния. старица же купивши и принесши блаженнои рече: Бог ти да поможет мати моя. Аполинария же вземши та одежды, сокры у себе, да не уведят сущии с нею. таже отпусти и прочия рабы и рабыни, двоих точию себе оставивши, единаго раба стара, а другаго евнуха, и седши в корабль, отплы в Лимн, оттуду наемши четыре животны, иде к гробу святаго мученика Мины: емуже поклонишися, и исполнивши своя молитвы, стяжа колесницу закровну, и тою пойде в скит. Ниже: Откры же блаженная Аполинария закров колесничныи, и узре обоих слуг дремлющих, евнуха и возатая, совлечеся убо одежд мирских и облечеся в иноческая мужеская одеяния, глаголющи к Богу: давыи мне начаток сего образа, сподоби мя доконца понести его, по твоей святой воли Господи, таже знаменавшися крестным знамением сниде тихо с колесницы, спящим слугам обоим, и в блато вшедши сокрыся, даже, колесница далее отъиде. вселися же святая во оной пустыни при блате, и живяше едина единому, егоже возлюби Богови. Ниже: Ангел бо во сне явльшися, в скит ити ей, и Дорофеем именоватися повеле;

 

О иже кроме молитв иноческим одеянием облачающихся. [Ис книги Матфея Иеросалим., М, состав].

Ащели же кто и тролетия внутрь иноческим кроме молитв одеянием облечеся: велико подъимет осуждение. аще же совлещися его восхощет, яко ругаяся явственне ненаругаемых, неволею бо в сию одеятися понужден будет;

 

Номоканон, правило, 80. [лист, 51].

Ащели кто предвари почернитися, или рясу облещи внутрь искуса, аще и кроме страстнаго, да не дерзнет совлещи сего прочее. но и неволею понужден будет пострищися от местнаго епископа с запрещением и отлучением, по третией главе, единонадесятаго титла, царских правил.

 

Никифора патриарха правило, 14. [От Матф. Иеросалим. состав ОТ].

Отложившаго инока образ обращьшася подобает паки облачити его во еже совлече иноческое одеяние кроме вочиненных молитв;

 

О еже яко, подобает покарятися учителем и священиком, аще и житие имут укорное, аще же о вере погрешат, тогда бегати и судити их подобает. глава, 69.

 

Из Кормчей. собора, 1, 2- го. правило, 15. [лист 221].

Аще же нецыи отступят от некоего епископа, не греховнаго ради извета, но за ересь его, от собора, или от святых отец неведому сущу, таковии чести и приятия достойни суть, яко правовернии;

 

[Ис книги Матф. Иеросалим., состав С. глава, 12].

Ащели же патриарх негли рече, или митрополит, или епископ которую убо ересь от божественых отец зазренную народне и нагою проповедует, главою, иже от того приобщения освеняющи, или ограждающе себе, не точию не достойным муце быти, но и прикладныя православным почести да сподобляются. не бо епископом, но лжеепископом и лжеучителем зазреша, и не в раздоры соединение церковное разсекоша, но от расколов и раздоров церковь потщашася разрешити, елико по тех силе. сего ради и мы добре творяще ветхаго Рима отрекохомся приобщения, и прежде соборнаго разбрания и суда;

 

[От жития преподобнаго Максима Исповедника, минея чет., генв. в 21. лист, 516].

Пришедшии от патриарха, начаша святаго [Максима] вопрошати, коея глаголюще еси церкви, Византийския ли, или Римския, Антиохийския ли, или Александрииския, или Иеросалимския. се вси тыя церкви с подлежащи им странами, с нами согласуют, аще убо и ты кафолическия еси церкви, убо едино буди с нами, да не и странническое житие во изгнаниях начен, чесого нечаеши постраждеши. к ним же блаженныи мужь премудре отвеща, глаголя; Христос Господь кафолическою церковию нарече быти правое и спасенное веры исповедание, того ради и Петра добре исповедавшаго нарече блаженна, на егоже исповедании таковую созда церковь всех Господь обеща. Ниже [лист, 518]: Глагола Феодосии [епископ] хощет царь и патриарх чрез нас уведати от тебе, чесо ради не общаешися с престолом Константинополским. глагола Максим: весте сотворшияся новшества от шестаго индикта мимошедшаго круга, яже начашася от Александрии чрез написание Киром бывши тамо патриархом, девяти главизн приятых и утверженных от престола Константинополскаго, и иная пременения, и приложения, синодов же святых ущербления, сотворенная от первоседателей Византииския церкве, Сергия, и Пирра, и Павла. которыя новшества, всем церквам суть сведома тоея ради вины, не общаюся раб ваш Константинопольстей церкве; да возмутся от церкве соблазны положенныя предреченными мужи, да возмутся же с положившими я, и претыкание от стезе да отметнется, и вы гладким путем евангелия, от всякия ереси очищенным шествуйте, и егда обрящу церковь Константинопольскую тако якоже прежде бе: тогда и аз обрящуся в ней якоже бех прежде, и поиду ко общению тоя без всякаго увещания человеческаго: а донележе в ней еретическия соблазны и соблазнители архиерей будут. дотоль никаковое же мя увещает слово, или дело, да бых когда им како приобщился. Ниже [лист, 520], Епифании патрикии глагола ко преподобному: сие царь нами тебе возвещает и глаголет: понеже весь восток и сущии на западе, развращьшися в сопротивление нам и умножившиися расколники, взирают на тя, и тебе ради ков воздвижут, нехотяше с нами соединитися в вере, да сокрушит убо умилением сердце твое Господи, яко да приобщишися нам, приемши составленныи нами тип, мы же приемлюще тя любезне, с великою честию и славою в великую тя въведем церковь, и поставим вкупе с нами, идеже по обычаю ставают царие, и причастимся вкупе с тобою пречистых и животворящих тайнств тела и крове Христовых. наречем же тя и проповемы быти отца нашего. Ниже: Глагола авва Максим: [Ниже:] воистинну вся небесныя силы не увещают мя то сотворити еже царь требует: которыи бо извет принесу, не глаголю Богу, но самой совести моей, аще славы ради и почитания человеческаго, ничтоже вправду сущаго, отрекуся правыя веры, яже любящих ю спасает. Ниже [лист, 524]: Глаголаша ему пришедшии: что сотвориши, егда римляне соединятся византияном, ибо вчера приидоша и зрима два апокрисарии, и утро в день неделныи будут причащатися с патриархом пречистых тайн. отвеща преподобныи: аще и вся вселенная начнет с патриархом причащатися, аз не имам причаститися с ним, вем бо Духа Святаго чрез апостола Павла, и ангелов, анафеме предающаго, аще бы инако благовестили, новое что вносяще.

 

Ис книги Никона, Черн. гор. от слова, 7. святаго Афанасия Алек.

Шествующе же непрелестныи и живоносныи путь, око убо да извержем не чювственное, но умное, сиречь, аще епископ или презвитер суще очи церковныя неподобне живут, и соблажняют люди, подобает изверщи их. уне есть им без них собиратися в храм молитвенныи, неже с ними воврещися якоже со Анною и Каиафою в геену огненную.

 

Послание к Тимоф., 2. [Из бесед апостольских, лист 2508].

Яко подобает повиноватися учителем и священником и не судити их, аще и житие имут укорное: аще же о вере погрешат, тогда неподобает покарятися им, но и отбегати и судити их.

 

[Из тех же бесед, лист, 2553].

Аще убо веры учение имать развращенны. аще и ангел будет, неповинуися, ащели же право учит, не житию внимай но глаголом.

 

Ко евреом, глава 13. [лист, 3114].

Аще убо веры ради бегай его и отрицаися, неточию аще человек бы был и аще и ангел с небеси сшедыи.

 

Из книги 2-й. завещания святых апостол, от главы, 19.

Сужду и мирянина ко мирянину, и князя ко князю, словесныи бо суть овцы и овнии сии, и не безсловеснии. да не речет мирянин, яко аз овча есмь и не пастырь, и никоего словесе о себе сотворю, но да пастырь узрит, и той сам истязан будет о мне суда. якоже бо доброму пастырю непоследующее явленную имать смерть, яко пояст е. тем же бегайте от губителных пастыреи.

 

Никона Чернои гор., от слова, 18. Великии Афанасии глаголет.

Всяк рече приемыи от Бога разсуждение последуя пастырю неискусну мучен будет.

 

[Ис книги о вере, глава, 25. лист 230].

И кто им последует, тоже на души своей подъяти имать. зане кто приобщаяся ко отлученным, и той отлучен да будет;

 

[Ис книги преп. Никона Черн. гор. слово, 40].

Яко лепо есть послушати учителя и священники всегда учити им от божественных писании, яве яко по Божии воле, а не по своих похотех, якоже пишется и не судити их аще и житие имут зло. ащели же о вере погрешают, тогда неподобает покарятися, но и отбегати и судити их.

 

[Из многослож. свитка от главы, 11. соборник малой].

Кто бо еретиков положи во учительство. понеже и в новом и ветхом завете не обретается, кто когда сам себе поставляет учителем. и сам себе повелевая учительство, но от Святаго Духа повелеваеми и избираеми учители Богом послани.

 

[Из того же, лист, 164].

Якова бо ересь в кое время востает тогда таковых и словес на возбрание потреба есть, егда бо убо писанием недугующаго уврачевати возможно, тогда от писания врачюется недугуя и кривоверием, тогда не от писания и глаголы ему представляются, вем всячески быти по апостолу, да всяко некли возмощи ко здравию возвати;

 

[Из того же, лист, 124].

Множайшая же и без писания апостоли предаша церквам, яже и непоколебима соблюдати заповедаша. аще же истее рещи, и вся нравы и предания, первие без писания предаша церквам апостоли, егда же проникоша делателие беззакония лжи апостоли, развращающе правыи путь Господень, тогда апостоли писаша обаче же не о всех оправданиих тогда писаша апостоли, но точию о онех единех писаша, в них же поколебати что лжии апостоли, покушахуся: а яже написанная апостольская предания, непоколебима пребываху, о тех ничтоже писаша посему же и апостольстии настолницы непоколебимая не писаху. егда же еретицы когда что развратити апостольских предании покушахуся, тогда апостольстии настолницы прокленьше еретики произыдоша писати;

 

Ис книги Иосифа Волоцкаго, слово, 13.

Прочее же речем и о сих, еже еретицы глаголют, яко аще и подобает судити, или осужати еретики, или отступники, но царем князем, и святителем и судиям земским. а не иноком иже отрекшася мира и всех яже в мире. подобает же им точию себе внимати, и никогоже осужати, ниже еретика, ниже отступника, к таковым убо сице речется: яко аще неподобает иноком осужати, ниже еретика, ниже отступника. то како Великии Антонии осуждаше их, глаголаше о еретицех, яко словеса их лютейша яда змиина. ученики же своя, всегда наказуя, яко да никоего же приобщения имут с мелетияны, и со арианы и с прочими еретики. святыи же Пахомии, всегда осужаше еретики глаголаше, яко приобщаяся еретиком и прочитая Оригеново, и Мелетиево, и Ариево, и прочих еретиков во дно адово сходит.

 

Тои же, слово, 12.

Ты же веси таковая творящих и тщишися утаити и не обличаеши сам ниже исповеси иным, могущим сия упразднити не явно ли есть, яко и ты сия любиши. тем же и со онеми иже сия творящими огню вечному предан будеши. святыи Василии Амасиискии глаголет, нехотящим прияти яже суть от божественнаго писания им показана анафема.

 

Ис книги Кирилла Иеросалим. [лист, 305, об.].

Прикладающих же, что, или отъемлющих или инако претворяющих, аще и сам будет крайнейшии учитель кто: никакоже слушати но удалятися таковаго, якоже божественнии апостоли научают нас сице глаголюще. аще и мы или ангел с небесе, благовестит вам, анафема да будет.

 

Ис Пролога, август. в 3, день от жития преподобнаго Антония Рим.

Преподобныи отец наш Антонии родися во граде Риме, от християну родителю. егоже егоже родителя держаста в тайне, крыюще в домех своих, понеже Рим отпаде веры християнския. и навыче книжному учению и облечеся во иноческии образ. Ниже: отъиде в пустыню, и обрете мнихов крыющихся от еретик в пустыни, в нихже бе един презвитер. и едва их преподобныи умоли еже пострищи его. бояхубося искушения от еретик, занеже видяху и ина суща, бе бо тогда осми надесяти лет, и облекоша его во иноческии образ. и поживе ту двадесять лет во всяком послушании. бывшу же гонению конечному от латынь. тояже пустыни иноцы от гонения разыдошася, и не познаша друг друг.

 

Ис книги Кирилла Иеросалим. послание, 5. Мелетиево. [лист, 467].

Мужие, росийстии, благочестия воспитание, православия заступницы, иже произволением уже и мученицы, и в державе царства сопротивистеся о благочестии подвизаеми. не убо на иже от Бога данныя власти высящеся, но Божию любовь всех иных предпочитающе, и еже истинныя веры усердие являюще, вторая подати терпяще всех весма никомуже. вас странне иже в нас дние и посему точию нелукави, зрятся не вседомовни мученицы, но всенародни, в вас преславне свет бываем тма, свет тма обличи. ибо учинени бывше владычествовати вами пастырие волцы суще. и отступивше добраго стада Христова, не токмо расточити вас, или убити, или погубити возмогоша, но и в болшую ревность совоздвигоша. вы бо восприясте пастырскую ревность, и злых пастырей отлучистеся иже истины отступивших, и благочестия ради человеческия славы позыбляти убо начавших, не возмогших же Божиею благодатию. о овчата христоименитая и воистину Христовы и от Христа научившеся, чюжих неслушати гласа, ниже последовати чюждим. о ангели земнии подражающе небесных, и се подражавше небесным. еже не испасти с денницею чюдо велие, како отврати вас Божия благодать от епископов ваших, ох прелести нынешнии возлюбивших век, и обратившихся въспять, и благочестия и православия отступльших. вы пребысте столпи незыблеми, недвижими, во иже отцы преданном учении, Спасове, апостольском, святителском, с ними же и венцы венчаетеся вем добре венцы онеми правды, иже якоже глаголет Павел, течение совершившим и веру соблюдшим, во обетованиих лежащими, праведныи воздаст судия во он день.

 

Послание, 10-е. лист, 501.

Скорбети и болезновати душею и телом приходит, еже у вас ныне слышится събысться. яко от сих от нихже бы церковь озаритися светом евангельскаго жития их имела, от сих тма, мрак прелесть, и соблазн возниче, якоже от адовых сокровищь мраковидныи дух разум их омрачив, и на церковь чистую их усты дунув. Но ничтоже вас сие ни да удивляет, ниже смущает, ниже в сумнение приводит. но паче вы благочестивии мужайтеся, тверди крепцы и непоколебими в вере своей пребудите. и ниже страха человеческаго ужасайтеся, ниже баснословия многоплетенных и лживых словес слушайте. Ниже [лист 502]: Сего ради толико вам мало обнажим отступников благочестия, дася ими непрелщаете, яко пастыри отступиша или заблудиша, яко и нам не мощно ся без них сохранити. но несть тако несть, мощно бо быти без них, зане Бог их из церкве изгнал, и обечестил, понеже недостойне тыя престолы содержат, и то имя на себе носят. и не мни яко слава им се, но бесчестие и вечное отпадение Христа и святых его. Ниже [лист 504]: Но сии отбегли на покой латинскии, на славу и на честь папину, да зде мирно свое житие и безнаветно поживут. изобразующе яко несуть, и небыша пастыри, но разбойницы, и не дверми, но дирою влезли. вовремя бо наветов и обороны овец от волков, отбегше, и сами в естество волчее претворившеся, на своя же овцы хотяще и погубити обратишася.

 

Номоканон. [лист, 86].

Пишет святыи Игнатии. иже глаголет паче еже узаконена суть аще бы был и верныи. аще бы и постился, аще бы и девьственик был. аще бы и знамения творил. аще бы и пророчествовал, волк тебе да мнится быти в кожи овчей, убийство овчам содеваяй.

 

Из бесед апостольских. [лист, 3113].

Лучше бо есть ни от единаго же обладану быти, нежели от злаго водиму быти. той бо многажды убо спасеся, многажды же и беду подъят: сей же всячески беду приимет в яму ведом сыи.

 

Книга о вере Острож. печати. [лист, 146. печана в лето 7097].

Яко пребывающа убо папу во отеческих велениих достоит воздавати ему почесть, елику отцы повелеша; праведно бо, непребывающа же бежати того подобает якоже волка и тлителя, сиречь, сказньцы церковнаго;

 

Яко благочестия ради, и нарушения догмат святоотеческих разделение имети подобает. глава, 70.

 

Из евангелия учительн., в неделю всех святых. [лист, 182].

Не везде бо есть добро соединение, но бывает иногда и разделение добро. ниже всякое умирение похвално. но бывает множицею, и мир на повреждение, и далече божественыя любви отгоняющь. егда убо миримся о разрушении истины, прегрешно есть, и неподобно зело. Таковыи бо мир не прииде Христос вложити, но супротивное паче. хощет нас друг друга добраго ради отлучатися. не всякое бо мирование и совокупление добро, но бывает егда и распря и разлучение велие и божествено дело. никто же убо сим образом любовию да прилежит к лукавым, ниже мира имети с ними. но аще и отец, аще и мати, аще чада, аще братия, супротивни обретаются закону Христову, съпротивимся им яко врагом истине.

 

[Ис того же, в неделю 2-ю. лист, 188].

Егда убо врежают на добродетель и благочестие или отец или мати, или чада, или братия, или друзи, тогда оставити их подобает. и не токмо же оставляти но и ненавидети яко враги истине, и яко супротивники закону Христову;

 

[Ис книги Соборник Данила митроп. рускаго, слово, 1].

Лепо есть тихо и кротко избирати истинная разумения и разсуждения по свидетелству божественных писании, и отеческих предании аще в лучьшая преходят. ащели же кто от Святаго Духа положенныя законы развращает, и древния отеческия благия обычаи отмещет, и света благаго и учения не приемлет. Ново вводя узаконения, яко древнии еретицы, от десно предукрадающе, и погубляюще род человеческии. К таковым лучше есть мира отлучающаго нас от Бога, похвалная брань, даже и инии злии устрашаются, темже блюдем и внимаем со опаством, еже не прияти еретических злых коварств. Якоже лисица некая животная, лукавством прельщати и снедати обыкла, такоже и лицемерницы, и еретицы овоже сице лукавством прелщают, и в ереси погибелныя отводят живущих в простоте, сего ради не ленитися, ниже забвен ум от таковых имети нам подобает;

 

[Беседы апостольския. к рим., глава 12. беседа 22. лист 388].

Ащели же негде благочестие врежаемо увидиши, не предпочитай соединения паче истины, но стани добле даже досмерти;

 

[Послание к Титу, зач. 302].

Еретика человека по первом и по втором наказании отрицайся.

 

[Беседы апостольския, лист 512].

Никая же бо нам полза, аще и со всеми мирны есмы, к Богу же ополчаеми яко ниже вредно нам. аще от всех ополчаемся, с Богом же мир водим. и паки, никая же полза, аще от всех похваляемы есмы, Господу же приражаемся. яко ниже беда кая: аще вси нас отвращаются и ненавидят, Бог же приемлет и любит ибо истинная благодать, или истинныи мир. иже от Бога, и убо от Бога благодать имеяй, никоегоже боится, аще и лютая безчисленая страждет, не глаголю человека, понеже самого диавола.

 

[К колосаем беседа, 11, лист].

Проповеди ради, благочестия, точию да будет ти брань.

 

[Ко евреом глава, 3, нравоуч. 5. лист, 2811].

Но аще же убо проповедь призывает, не отрицаемся. Ниже: Аще же благочестия труба призовет. абие изыди, и пренебрези душю, и вниди со многим усердием на подвиги.

 

[Ис книги аввы Дорофея, лист, 164. препод. Нила].

Несть убо добро еже всем человеки хотети угоден быти: писано бо есть. горе егда добре вам рекут вси человецы. пророцы убо о истине умираху, а ложнии пророцы, яже на сласть глаголаху человеком, и любими бяху. еже хощеши убо избери, или о истине пещися, и умрети ея ради, да жив будеши вовеки: или яже суть на сласть человеком творити, и любим быти, Богом же ненавидим быти;

 

О еже что есть ересь, и от чего еретик нарицается. глава, 71.

 

Ис книги Никона Черногор., слово 63. из градских закон. [и Кормч. лист, 641].

Яко еретик есть, и еретическим подлежит законом, и мало что уклоняйся от православныя веры;

 

Святаго Афанасия Вел., от вопросов и ответов. [Скрижаль лист, 20, и 28].

Ересь глаголется, от еже избрать что свое и сему последовати.

 

Ис книги Иосифа, Волоколам. слово, 13. Святыи же Афанасии Великии глаголет.

Яко тяжчайши и страшнеишии всех грехов, грех, еже в ересь впасти;

 

Ис книги преподобнаго Максима Грека от слова, 78.

Еретик бо он есть кто мнению своему лживому крепце прилепляется. и известно совестию истине верно и противу жестоце без надежди исправления. аще бо от неведения сие сотвори, тогда наречется, заблудник, а не еретик.

 

Риторика. 3. местоименителное.

Ересь убо сказуется от греческаго языка, самомненое избрание, егда кто свое мнение любит, яко ниже самыя мученицы, аще и много страдали а ересию побеждены спастися не могут.

 

Кормч. в каталоге буква 5. [лист 655, на об.].

Еретик есть аще и мало что уклоняяйся от веры.

 

Из Благовестника от Иоанна, зач. 27. [лист, 125].

Мнози бо мнеша веровати, но не якоже рече писание. а якоже тии своим изволением последоваша, тии вси еретицы. На поле. Не по писанию верующии вси еретики;

 

Евангелие учител., в неделю 50-ю. [лист 173].

Мнози мняху веровати, но неправо, ни якоже рече писание и понеже они своим ересем последоваша, того ради и погибоша.

 

[Матф. Иеросалим. состав, А. глава, 2].

Еретик есть и сущим на еретики подлежит законом, иже и мало убо уклоняяся православныя веры;

 

О безначалии. глава, 72.

 

Из бесед апостольских, зач. 335. беседа, 34 [лист, 3113].

Зло убо есть везде безначалие, и многих бед вина, и начало безчиния и слияния; наипаче же в церкви толико не твердо есть, елико и начала вящьшее и высочайшее. якоже бо аще лика верховнаго отъимеши, не будет лик по песни и по чину, и аще от полка воинству воеводу отставиши, нектому правлением и чином яже ополчения будут, и от корабля кормьчию аще отъимеши, погрузиши корабль: тако и от стада пастыря аще отставиши, вся развратил еси и погубил. зло убо есть безначалие, и возмущению вина; злое же не мнее, и неповиновение начинаемых. тожде бо бывает паки. людие бо князю неповинующеся, подобни суть неимущему: негли же и горшии тамо убо и прощение имут о бесчинии, зде же нектому; но и мучими бывают. но негли речет кто нам, яко есть и третие зло. егда началник будет зол, вем и аз, яко немало зло, но и безначалия [много] много злейше; лучше бо есть ни от единаго водиму быти, нежели от злаго водиму быти. той бо многажды убо спасеся, многажды же и беду подъят. сей же всячески беду приимет, в яму ведом сый;

 

Ис книги аввы Дорофея поучение, 5. лист, 18.

В притчах глаголет, имже несть окормления, падают якоже листвие: спасение же есть во мнозе совете. Видите силу слова братие, видите что учит нас святое писание; утверждает нас да не последуем сами себе: да не имамы сами себе разумных, да не веруем яко можем сами себе устроити: требуем по Бозе окормляющих нас; ничтоже есть окаяннейше, ничтоже губительнейше, неимущих кого наставляюща их в путь Божии. что бо глаголет имже несть окормления, падают якоже листвие; лист изначала присно есть зелен, благоцветущь, красен: таже помалу изсыхает, и падает, и прочее небрегом бывает, и попирается. тако есть и человек неокормляем от кого, изначала убо присно имать теплоту на пощение, на бдение, на безмолвие, на послушание. и во ина некая блага: таже помалу теплоте оной угаснет и неимущу ему окормляющаго теплоту ону изсышет сице нечювственне, и падает, и бывает прочее подручник врагом, и творят в нем еже хотят.

 

О еже яко и мирским человеком священства не имущим учити люди не отречеся. глава, 73.

 

Ис Кормчей, святаго апостола Павла, правило. 15.

Учитель аще и мирский человек будет искусен же слову учения, и нравом чист, таковыи да учит, будут бо рече вси научени Богом.

 

Ис книги Иоанна Златоустаго о священстве от слова 5.

Внегда неотступне божественных писаниях поучатися подобает, не иереом токмо, но и простым всяко повелено бысть божественая писания ведети и умети о своем уповании отвещевати.

 

Ис книги бесед апостольских, нравоучение, 30 [лист, 3078].

Не убо вся на учителей возметайте, не вся на наставники: можете и вы, рече, друг друга созидати. еже и к солуняном пиша глаголаше, един единаго созидайте, якоже и творите. Ниже: Темже молю не нерадите о даровании сем. кождо жену имать, раба имать суседа имать; сему да запрещает, сего да наказует.

 

Маргарит слово 6. на июдей, лист 158, на об.

Да не речеши к себе, мирский человек есмь, жену имам, и дети. сия иерейская суть, сия суть иноческая. ни бо самарянин он сицевая рече, где ныне фарисее, где июдейстии учителие; но якоже некии лов велик обрет, тако восхити прибыток. И ты убо егда видиши кого требующа врачевание, или телесное, или душевное. не глаголи к себе, чесо ради он сица и он сица, того не уврачева. но премени его от болезни, и не истязуй онех вины небрежения. Аще обрящеши злато лежаще, еда глаголеши к себе, чесо ради он сица и он сица то не взяша, но спешиши преже инех сам взяти. тако и падших от братии помышляи, и вменяи сокровище обрести прилежание о них. аще бо излиеши нань якоже елей словеса учительства, аще обяжеши тихостию пожданием, аще уврачюеши, сокровища всякаго богатейша тя той соделает. изводяй бо честное от недостойна, яко уста моя будут. Что убо сему будет равно, еже ни пост, ни низу лежание, ни всенощная бдения, ни ино что могут соделати. се брата твоего спасение творит. Помысли своя уста, колико многажды согрешиша, колика провещаша скверная глаголания, колики хулы, колики укоризны изнесоша и всяко аще восприимеши падшаго промышление, ради единаго сего исправления, все возможеши очистити, яко уста Божия сотвориши, своя уста, что сей убо будет равно чести. еда бо аз сия обетоваю, сам Бог сие рекл есть. яко аще и единого кого изведеши рече, яко уста моя будут твоя уста, чиста, свята.

 

Никон черногор., слово, 8.

Аще убо видиши кого требующа душевнаго и телеснаго исцеления, да не речеши в себе, он сица, и он сица, не исцели его. или яко аз мирянин есмь, жену и чада имый, сия священником и иноком. рцы ми убо, да обрящеши злато лежащо, еда речеши в себе, по что он сица, и он сица се не взят: никакоже. потщишися прежде инех похитити, сице и о падших братии помышляи, и непщуй сокровище быти, еже о онех попечение.

 

Маргарит слово, 1. о непостижимем [лист, 1].

Что се пастырь не предстоит, и овца со мнозем благочинием стоят. и се исправление пастырево есть, еже не точию ту сущу, но и не сущу ему, всяко показовати тщание пасомым. о безсловесных убо егда иже на паству изгоняяи, несть ту пребывати нужда внутрь ограды овцам. или кроме пастыря от ограды изшедшим, много подъимати заблуждение. зде же ничтоже от сих но и не сущу паствующему, ко обычным паствам со мнозем приидосте благочинием паче же и пастырь предстоит, аще и не плотию, но предложением. аще не пришествием телесным но благочинием стада. и сего ради паче тому удивляюся и блажу, яко толико тщание вложити нам возможе. ибо воеводе тогда наипаче чюдимся, егда и не сущу ему, воинства благочиннуют. сие и Павел о ученицех искаше глаголя [филип. 241]. тем же возлюбленнии мои, якоже всегда послушасте не яко в пришествии моем точию, но и множае паче ныне во отшествии моем. яко ту сущу убо пастырю, аще и приидет волк к стаду, удобь отгоняем есть его от овец. ну сущу же ту, в болшем подвизе овцам устроятися нужда, никомуже сущу загражающу их.

 

Беседы апостольския. на деян. нравоучение, 46 [лист, 409].

Понеже тогда епископу случися небыти ту во оно время, от презвитеров же, ниже един печашеся, но просте сотвориша просвещеным внезаапу, в едину от нощь тмами многим, и просте крещахуся вси ничтоже ведуще, сих оныи поем на особь, купно по сту и по двесте, беседоваше к ним, ино убо ничтоже, разве яже о тайнах, яже ниже прощати смешатися сие причастными тайнам. [на стране, и еда отъидут некрещении] сие ему творящу мняху мнози началства желающу, сие творити: но он ничтоже печашеся о мнящих: Ниже: Что убо он ли соблазны сия виновен; никакоже, якоже аз мню. аще бо, не сущей вине, сие творил бы, в лепоту оному вину написовали бы, и аще паки и простерл бы егда бо от угодных Богови возбранялобыся, за соблазну другаго, пренебрегати подобает; [о дияконе. учащем люди небрегущим, стареишим].

 

 

О речении от апостола, еже святится муж неверен женою верною, и жена неверна мужем верным. глава, 74.

 

Ис книги Кормч., прав., 72: 6-го вселенскаго соб. [лист, 200].

Нетверд с еретики брак. совокупльшиижеся прежде сего правила, аще хотят да пребывают; Толкование. Неподобает правоверну мужу, еретицу поимати в жену: или правоверней жене, за еретика ити мужа. аще же нецыи невернии суще законным браком совокупишася и потом муж убо неверныи, прступит к вере, жена же и еще лестию одержима есть, и аще волит верен муж жити с неверною женою, или верная жена с мужем неверным, да не разлучаетася по божественному апостолу: святитбося рече, мужь неверен женою верною, и жена неверна мужем верным;

 

Из миней чет., декаб. 12. от жития святаго Спиридона епископа Тримифиискаго. в лет., 1. собора.

Жена некая именем Софрония, благонравна и благочестива, име мужа неверна, языческаго нечестия держащагося. Ниже: Увещеваше мужа своего многими словесы, да отвержется языческаго нечестия, и познает единаго истиннаго Бога, и верует в Него: и бысть благодатию Христовою, обращен той неверныи к святей вере, и просвещен святым крещением, и спасеся муж неверен о жене верне якоже божественое глаголет писание [Кормч., 7];

 

Ис книги Никона Черногор., от послания, слово, 26 [лист, 501 об. (147 об.)].

Ащели нецыи и еще в неверствии суще, не у православных примешении бывши стаду, друг другу. брака законом обручишася: таже ов убо доброе избрав к свету истинному притече. ов же от прелестныя удержан бысть узы нехотя к божественым зрети лучам, благоволит же с верным неверная жити, или паки неверныи с верною, да не разлучаются по апостолу. святитбося муж неверен о жене, и неверна паки жена о мужи. Показа убо и сие божественое правило различие, и изначала убо правилу вещи бедное, на концы же апостолово, неповинно и безбедно; понеже мнози от подобных мне от своея похоти прельщаются, и в безсловесную вину приносят божественнаго апостола слово, глаголющее, яко да не разлучается неверная часть от верныя. сию безсловесную вину святыи сей шестыи собор, от среды изъят. и истину от прелести, хотящим показа, и протолкова. еже в киих и когда подобает апостолово слово ключаемо быти;

 

Ис книги Матф. Иеросалим. состав Г. глава, 12. собор. 6-го, прав. 72.

Седмьдесять второе шестаго собора, сице по речи уставляет. не леть буди да православен мужь, еретицы жене совокупится: ниже убо еретику мужу жена православная да сопряжется, но аще и явится что сицево от котораго бываемо, не тверд менит брак, и беззаконное разрешати сожительство. неподобает бо несмесная смешати, ниже со овчатем волка соплетати, и Христове части грешных жребию. аще же преступит кто от нас уставленная, да отлучится. Аще бо по градскому закону брак уставляется общение и наследие божественныя правины, како убо сложатся друг другу, иже большим разньствуют душевным усвоением, сопротивна мудрствующе о вере. темже и по разрешении неприкладнаго брака, отлучатися приступающим сподобляет. Но сия убо о иже брачне ныне быти совокупляющихся. И еже убо единей стране еретическим прилежати преданием, другой же православной держащеися вере. ащели же и обе части, рече, егда брачне снидошася исперва ова убо позна истину, другое же еще тме нечестия работает, не сего ради сожительство да разрешится. Якоже к коринфом великии уставляет Павел [зач. 137]. Аще бо волит, с неверным жити верная, или сопротив паки, неверныи с верною да не разлучается. освятитбося мужь неверен о жене верне. и сопротив паки. обаче зри, како и божественный апостол снисхождение творя, аще волит, без сумнения брак да разрешится. уповающе, яко начала ради бяху сия и начаток проповедания. А еже днесь имящее, како есть мощно июдейну или агарянину крещьшуся, или крестившейся с неверовавшим. Якоже при патриарсе бысть Феодосии, присковичар бо царскии всяко патриаршеским писменем распустися со женою, непокоряющуюся мужеви, много молящуся благочестия прияти. На поле. Феодосии патриарх, и роспуст при нем бысть;

 

Ис книги севаста Константина Арменопула судии Фесалоницкаго: книга, 1. сечен, 5. надпись, 2. Трульскаго, 72, и 18. Лаодикийскаго.

Верныи иноверной жене совокуплен, да разлучается пребываяи же да отлучается. неверных бо супружник аще другии их уверит, и соблаговолит верному сжити неверныи, да не разлучаются по Павлову гласу. Толкование. При патриарсе Феодотии трубачь царскии крестився, патриаршескою грамотою распружествовася жене, непокаряющойся мужу, много примолящу благочестие прияти, еже есть противное правилу сему.

 

Того же книга, 5, я. от ответов Феодора Валсамона:

Вопрос. Аще пришедшаго к вере православных еретика жена, и чада, или инии сему съучрежденицы и здомовницы, не воспрославят, но удержатся первейшия ереси, не возбранится ли совершивыися. яко речеся, крещением на иерейскии степень, или епископъскии возъити: или за онех злобу, и той сицеваго блага лишится; Ответ. Тредесят шестое убо правило в Карфагене синода глаголет. епископу и презвитеру, и диякону не хиротонисатися прежде неже в дому их православныя християны не сотворит. 72, правило в Трулле святаго вселенскаго синода, запределяет в часте сия речисто. ащеже нецы еще в неверствии суще, и не у православных пречествовавшеся, пастве, друг другу браком законным сочтавшеся. таже ов убо доброе избрав к свету истинному притече, ов же от лести удержася узы, ни к божественным возрети лучам изволися. благоволит же верному неверная, или паки неверныи сожительствовати верной. да не разлучается, по божественному апостолу, освятися бо неверный мужь в жене, или освятися неверная жена в муже. возъевляемое убо противенство двох сих правил, правилно решаще, глаголем яко из рождения убо сый православныи, с женою еретическою совокупився, несподобится клирства. аще не и в дому своем сотворит православныя християны. яко и церковнаго отлучен есть собрания, яко Христовой части соплетшии, жребие грешное. праведно, аще от некоего инаго слова незапинается, хиротонии сподобится иерейския что бо глаголет, веси великии апостол яко верный приведет неверную супружницу свою к вере, добре убо в православную веру пришед, от службы еретик по правилом удостоится сана иерейскаго, аще и не вославят жена и чада его;

 

Номоканон: правило, 52.

Правило, 72-е. шестаго собора повелевает, яко неподобает православну мужу, еретичестей сочетатися жене. аще же и будет неключиму вменяет женитву, и законопреступен брак. Ащели обещается покаятися лице еретическое, да не пребудет брак, донележе обетование известится, по четыредесятому правилу, собора четвертаго;

 

Изложение бывшаго церковнаго соединения, Кормч. [лист 568].

В начало убо евангельския проповеди, не требоваху твердаго законоположения, или запрещения, но точию еже приводити на крещение: по крещении же и исполнении веры дерзновение восприемше, вся совершаху елика подобаше, яко со властию Владычния заповеди совершиша. Тогда убо основанием твердым, святую церковь оградиша, запрещения же и отлучения соборныя церкве, безчинным и непокоривым по божественному закону положишу;

 

Потребник иноческии от слова, преп. Иосифа Волоцк. [лист 351 на об.].

Яко божествении апостоли в начале не налагаху тяжек ярем верующим, но много сходяще к немощем человеческим; Ниже: Понеже вера христианская не укрепися, тогда еще по всей земли, и церковная предания и правила еще не исполнишася. Ниже: И тако бысть до шестаго собора, иже з женами живуще епископи, и мирстии образ имуще, и худи быша и не нарочити. и ничтоже преславно сотвориша в житии их, ни чюдеса ни знамения. Видевше же сия божественнии отцы шестаго вселенскаго собора, яко в претыкание людем и соблазн, и на вред церкви сия бываху. сего повелеша оттоле никакоже сему быти. В неже время достигохом темже правилом жительствовати, тожде мудрствовати [к филип. посл. апостола Павла глав. 3, зач. 245];

 

Яко святии апостоли, и святии отцы, от инославных тайну брака не приемляху. глава, 75.

 

Потребник иноческ., от слова Иосифа Волоцкаго. [лист 332].

Аз же [Павел апостол] вы милуя глаголю, братие, время прекращено есть прочее, да имущей жены, яко неимуще будут. и много такова обрящем в божественном его писании. о нем же пишет великии Златоустыи, сие и на еретическия браки велие обличение иже женятся и посягают, и папежи и люторове. яко егда прииде в Рим великии апостол Павел, тогда научи две жене Нерона царя римскаго веровати во Христа, иже крестишася. и отступиша от Неронова сквернаго смешения. Нерон же много претив апостолу, дабы повелел женам его на скверное смешение приити к нему. апостолу же не послушавшу, и не повинувшимся женам Нерону, тех умучи. Павлу же главу усече. такоже и святыи апостол Андрей, егда крести Максимилу, жену гееафа Анфипата. тогда Анфипат даяше много злата апостолу, яко да повелит жене его на скверное смешение сочтатися с ним. апостолу же никакоже нехотящу. тогда разгневася же Антипат, повеле апостола стрем глав распяти; такоже и святыи апостол Фома, егда крести царицу Мигдонию, жену индейскаго царя Миздия. царица же отступи сообщения царева, царь же повеле апостола копии пробости. царицу же много мучив, и не увеща ея быти с ним. Видите, охулницы девству, како святии девьству, как святии апостоли девство и чистоту любляху и до смерти о сем пострадаша. и аще царем и князем и вельможам, и не токмо мужем но и женам, повелеваху чисто и целомудренно жити. и мужем совещаваху от своих жен отлучахуся, и женам от своих мужей отступати, чистаго ради и целомудреннаго жития;

 

Из миней чет. Макария митрополита сентября в 17 день. от жития святых мучениц Веры и Надежды и Любови.

Идущим же во святыи Божии храм в день неделныи, и иже исперва глядая диавол на противляяйся. и вниде в сердце Антиоху Катеру епарху градному, прииде ко Андреяну глаголя. жена етера купно с треми девами пришедши, боги наша развратила есть глаголющи, единаго Бога чтити, Отца и Духа и Сына Его; лишают нас и жен наших, не бо ни на ядение и на питие приходят. послушающи тех отроковиц, отъемлют же и богом славу;

 

Ис книги иже во святых отца нашего Савы, 1-го архиепископа Сербскаго, статия, 141 о исповедавших ереси святому.

Исповедавших же ересь, с собою в церкви удержав, и особь сих испытнее испытав. и сущих некрещенных прежде с проклинанием ереси юже имаху. оглашенныя дни в соблюдении чистоте заповедав им хранити, и тако креститися им повелеваше. сущих же благоверно крещенных, в латынстеи ереси бывших, такожде с прежде проклинанием злым я их ереси. и образ веры исповедавшим, и святому миру молитву прочести. и тако тем святым миром сих по всех чювствех помазати, и верных с нами имети, сице святыи епископом своим заповедав о таковых к ним приходящих творити: Посылает же и екзархов много взыскающе их же поганскии кроме благословения и молитвы жены поемлющих, и сих венчати повелевает. аще же в старости и дети таковы имуще будут, и сих под окрил матери прияти, и с ними венчатися.

 

Кормчая [лист 9].

Великии князь Владимир, веру от Константинополя прият, и крестися во имя Отца и Сына, и Святаго Духа, в лета, 6496. Ниже. По крещении же венчан бысть законным браком, с царевною Анною.

 

Ис Кормчей писм. от послания Максима мит. рускаго, глава, 52.

Да вси чада моя порождении в купе новокрещенней. да держите жены от святыя соборныя и апостольския церкви, занеже жена спасения ради человеческаго бысть. аще же их держите в блуд без благословения церковнаго, то что ти в помощь есть;

 

Ис книги Полинодии Захария Копестинскаго, часть, 4, раздел, 1. артикул, 1.

Данил князь великии росскии, ходил с ляхами и чехами воевати, там все, небеспеченства полки росски поносили, так же все звытяжьство Данилови приписано услышавши то папежь римскии, послы свои, и корону с титулом королевства послал Даниила веншуючи. а за так великую делность и мужество онаго уважаючи годным его быти, королевскаго титулу узнавал. которую то корону заповодом и порадою своих епископов принял, лечь от рук папежьских, аки его посла, аки от бискупов его короновал бы был, аки ся за костелом римским в веры единочил. а чрез приятие той короны, Даниил неотступовал веры, токмо за почесть к болшей своей славы принял оную.

 

Ис той же Полинодии, часть, 3. раздел 2. и артикул, 1.

Иже Елена жена королевская с Литвы до Кракова приехала, всякоя жь ради обычая королевен, короноватися ей не хотело. понеже она греческой веры. обязана, веры с костелом римским не прииимала. уважаяй статечность православнои христианки королевой полскои, что волила некоронованою заставатися короною золотою от земле. нежели православной веры отступити, и короны в небе лишитися.

 

Ис той же Полинодии, часть 2, раздел, 8. артикул, 10.

О Мануйле цесаре: мовлю. Ниже. Вере православной без жадных новотин папежских стоял: Ниже: А чтобы в вере римской, благоволити имел. а ни в мысли его то не было, чего знаменитый довод во истории Константинополскои политицкой [чти о том в книге Туркогреция названной на листу, 1-м]. оныи иже у единаго плевана латынскаго, не хотел целовати образа Спасова, которыи неправо выгафованный был. а для того не целовал, дабыся не здал веры папежьской поблажати. за которым же во единости веры не был, и святости его не почитал. Ниже. Послал до царя Московскаго Василия Димитриевича о дщере Анне в жену себе, что и одержал. а на заходе неоженься неизиношой причины, толко же в вере розрозненной жены имети не хотел;

 

[Матф. Иеросалим. сост. Г. глав. 12].

Аще не у крещения, печатию прежде не знаменашася, не ктому от еретик крестись. но ниже брачне совокупляти сих еретиком;

 

[Ис книги 6. Матф. Стриковскаго. раздел, 8].

Ибо русь не хотела римских церемонии короля имети, боящеся чтобы римскии король, и папежьския молитвы святорускои веры их згрунту не выкоренили. для того Мстиславича храбраго русина взяли на панство руское; Ниже: И там короной златой, от которой Коломан отбегл, от епископов руских был коронованныи. Ниже: А римския церемонии отринули, имеюще их за ересь;

 

[Баронии в лето Господне, 258].

В первенствующей церкви, о том во Иконии, во Фригии, собор сотворше, уставиша ни едину тайну и у еретиков, в тайну вменяти;

 

[Той же, в лето 217, стих, 2].

Еретики не имут общения со учением православным, само их проклятие о том свидетельствует. Ниже: Ибо ни того бога имеют, егоже мы. ниже того Христа егоже мы имамы. убо и тайны не едины;

 

[Правила 32 в Лаодикии].

Еретическое благословение, не благословение;

 

Зиновии мних Отни пустыни. лист 93.

Яко не сходит на еретическое действо Дух Святыи;

 

Кормчая писм. слово, Иоанна митрополита Никейскаго на армены.

Сии проклинаемии да предани будут диаволу, уже да не имут места спасению, но да будут от Христа чюжди. аще убо толикими от всех святых прокляти бывше, и от Христа отгнани, и диаволу предани, и до скончания века от всех христиан проклинаеми. Ниже: Аще бо тмократицею прокляти бывше, и диаволу предани; како от анафемы и от клятвы благословение изыдет; или како от диавола духовное и святое дело совершается; А от анафемы благословение не бывает. и от проклятия молитва не исходит. и от диавола тайнство не совершается. Ниже: Ни паки от ереси, или от неверия духовное действо исполняется. Ниже: Тем же проявлено есть яко иже правовернии именуются, а приобщаются с сими еретики в ядении и в питии, и в дружбе, и в любви и творимая от них. яко благоприятна мнят. Ниже: Общники обретаются проклятию и анафеме, яже на них написана от всея вселенныя. от востока и до запада, от соборныя и апостольския церкви.

 

Катихисис бол., глава, 4. во ответе.

Поистине ничто у них несть истинно, но все убо еже еретики творят, от смышления своего, како могут совершати действа Божия, на игралищах своих, аще и Христа проповедуют, и веру свою похваляют, но вся сия лстиво и лживо творят. Ниже: Сего ради разумети имамы, яко еретическая писания и празднество и службы, и тайны, и проповеди не суть правы.

 

Ис соборника Досифея, ученика преп. Зосимы, от прав., Иоанна митр. Никейск., и Афан. Алексан.

Аще кая душа, приимет от еретик крещение, или покаяние, или молитвы, или ино что духовное, или телесное брашно, или благословение и таковых убо бесове яко своих имут;

 

От жития святых мученик, Хрисанфа и Дарии. мин. чет., марта в 19, день.

Не точию же о своем спасении, но и о многих печахуся, Хрисанф и Дария; ибо ов множество мужей ко Христу обращаше, и юношь к девьственному увещеваше житию, а ова множество жен и дев Христу уневестиваше. Ниже: По неколиких же летех, обоему лику Хрисанфову и Дариину умножившимся в Риме зело, воста нечаянно мятежь и молва во граде: народ бо пришед к Келерину епарху клеветаше на святых рабов Христовых Хрисанфа и Дарию, и вопияху мужи глаголющи: погубихом жены наша. юноши же взыскахом; погубихом обрученныя девицы Дарии ради, такоже и жены кричаху, лишихомся мужей наших: девицы же зваху: лишихомся обручников наших Хрисанфа ради. Народ же молвяше вопиюще: како будут раждатися чада супружеству отвергаему, оскудеют людие отлучающуся мужескому полу от женскаго странным учением и волшебною прелестию Хрисанфовою и Дарииною. и абие епарх повеле яти обоих, и различно их мучити.

 

От жития преподобномуч. Евгении, о святеи мученице Василле. Мин. чет., дек. в 24, день.

Василла же уведавши [Помпея ея обручника] к ней пришествии, не попусти его к себе; Ниже: Отшед убо Помпей студом, и неких от сенаторов умоливши, и с собою поемши, иде и припаде к ногам царьским, жалеющеся на обручницу свою, и на Евгению: помозите рече римляном своим. о светлейшии царие. и Бога новаго егоже Евгения от Египта приведе, отжените от сего града: издавна бо вредни суть народу тыи, иже глаголются быти христиане, ругаются законом нашим. богов же аки суетныя идолы презирают, и самаго естества превращают законы, неправедну быти вещь глаголюще, да обручница своего обручника поимет. аще убо не будет женитвы, то откуду имут родитися человецы. аще же тыи родитися не будут, то над ким будет ваше царствование. откуду будет воинство, и римская сила. кто побеждает враги. и како состоятися имут отечество и житие человеческое. та и тем подобная со слезами Помпею глаголющу. сожалиси о нем царь Галлиен, и весь сигклит. и абие заповедь царска дадеся, да Василла дева, или обручника своего прияти изволит, или мечем убиена будет.

 

Апостол толковой. [зач. 284].

Христиане убо не бранят женитися, честен брак и ложе нескверно, и хотящим девьствовати попущают. нечистаго же брака возбраняют.

 

Ис книги 1-й, Исидора Пилусиотскаго, посл. 29, к Мартирию [? 67 Марону].

Не пост ли паки и смешение отвержения Ноя и сущих с ним от возмущения преславнаго моря спасе, семена убо ядущим, не прикасающихся же супружницам в плотьстем смешении. Послушай убо писания к Ною заповедавшаго. вниди в ковчег ты, и сынове твои и жена твоя, и жены сынов твоих. да разлучитеся рече, мужие от себе, блуд уцеломудряется, и нечистота от наносимых вод. вы убо ниже несквернаго не прикоснитеся ложа; [о законных супружницах имеющих но в нуждах обретающихся].

 

О еже яко кроме благословение и венчания иерейскаго, и ангелословных молитв брак не состоится; глава, 76.

 

Ис книги Матф. Иерос., сост. Г. прав. Васил. Вел. 38. глав., 8.

Но тогда убо с пристатием единем брак стояше. в нас же не убо стоятися может. кроме священнословия [быв 6843]; На поле. Без священнословия брак не состоится.

 

Ис Кормч. глава 43. Иоанн Фракиискии [лист 344 на об.].

Повелеваем никакоже обручение творити никогдаже, или обручение имя истинное имети сотворяем. аще священническаго благословения совершаема не имать на себе. Ниже [лист, 346]: Обручение же священно совершаемо божественными глаголы, иже о браце совершаемых молитв, сочетанию приимших.

 

[Кормчая, глава. Варда хранитель палаты].

Началныя браку молитвы на обручение совершенныя. Ниже: Аще не Бог посреде совокупляющихся лицу обручение внидет.

 

Кормчая, глава, 43. Благочестиваго царя Алексия Комнина заповедь новая. лист, 335 [быв в лето, 6588].

Прилагают бо и священное согласие, рекше молитвы обручения и венчания, не токмо свободным, но и рабом, держати: и отселе не быти инако но именоватися законному браку, и христианскаго строения достойну, аще не молитвы совокупляющихся, рекше жениха и невесту в любовь свяжут. Ниже: Елико же аще без священных молитв, своя рабы на сочтание брака совокупляюще, не боголюбив брак составляют им, но блудническое смешение утверждают. ихже не совокупи Бог священными молитвами призываем, тии вси сходятся на грех. и идеже слышано будет се аще оттоле от кого любо сотворится, да уведят господие, яко не токмо божественному возвещению явятся повини, и раб своих чюжди будут. на свободу восхищаемом им бывающим. подобаше бо им по закону Божию приводити на совокупление брака рабы своя, и власть на них имети без пакости. аще же сего не сотворят, вправду себе наведут отнюд господьства отпадение. сию бо заповедь не токмо должно есть во всех церквах возвестити но и в градских судищах распространити. да будет же предана во всех областех владящим князем, да имеют вси видение повеленных добре от царства нашего. понеже и брацы уже приспеша быти, по нашему велению рабскою имеющим честь, и брацы по первому неподобному даже и доныне держащемуся обычаю заматоревшуся подобает и на тех священным молитвам быти. Ниже [лист 337 об.]: Мы же Божиею благодатию на краснейшее возвращение хотящим произыти житейским вещем и отселе не браку токмо, но и тому обручению священное благословение совершаемо имети на себе.

 

Ис книги Матф. Иерос., сост. Г, глава 1.

Брак есть мужа и жены совокупление, и наследие во всей жизни, божественныя и человеческия правины приобщение, любо благословением, любо венчанием, любо записанием, а яже чрез сие бывамая, яко небывша вменяем;

 

Кормч. писмен., послан. Максима митр. рускаго, глава, 52 [Максим быв в лето 6813].

Да вси чада моя порождении в купели новокрещенней. да держите жены от святыя соборныя и апостольския церкви, занеже жена спасения ради человеческаго бысть. аще же их держите в блуд, без благословения церковнаго то что ти в помощь есть. но молися и нуди их, аще и стари суть и млади, да венчают в церкви;

 

От послания святаго Фотия митроп. рускаго в Нов град [быв в лето 6908].

А которыи не по закону живет с женою без благословения поповска понялись, тем епитимия 3 лета, как блуднику, да паки совокупити их молитвами, а не з благословением аще восхотят жити, ино их разлучити.

 

Ис Кормчей писмен., от посл. Иоанна митр. рускаго наречен. пророка ко Иакову черноризцу, глава, 93.

Иже просте и беззаконне простецем и невежам, творят совокупление кроме благословения творяще свадьбу тай, ижеся тако поимеют, яко блуднику епитимия.

 

Ис Кормчей печат. глава 51, лист 522.

Изряднее же да весть иерей, явно супружества между восхищающим и восхищенною егда сама восхищенная во власти восхитившаго ю пребывает, такожде и потаенныя, и вся прочая супружества, яже не с благословением церковным и чинным от своего си пастыря, си есть, от епископа, или от тоя парохии священника, венчанием при двух или триех поне свидетелей свершаемая, по соборному уставлению, и святых отец учению, незаконна паче же беззаконна и ничтоже суть. Ниже [лист 523 об.]: Венчание же и брачное благословение, ни от кого прияти им достоит, точию от самого своего приходскаго священника, и повеление от него имущаго, аще оба единаго суть прихода венчанию и благословению супружества, в церкви достоит свершатися пред людми. Ниже [лист 524 на об.]: Супружество, или законныи брак, есть вещь святая. темже и свято сию свершати достоит. Выше [лист 418 на об.]: Никтоже в тайне да венчается, но при множайших людех. ибо се дерзнувыи сотворити, да истяжется запрещении мучим; сиречь иерей, яко в неподобная себе вложити, в тайне венчав. достойных истязан будет по церковных правил заповедей.

 

[лист 345 на об. глава 43, Иоанна Фракис.].

Брак убо по узаконенному времени, ветхими же и новыми законы, и от нас изложенною новою заповедию да соблюдется со обычными его вещьми. и не подобает никому же от всех граждан, чрез сию изложеною от нашия державы заповедь ничтоже творити.

 

Ис книги Матф. Иеросал. сост. Г [глава, 15].

Не бо совокупление, но молитвенное служение творит обручение, яко же браку вменятися.

 

Ис книги Кормч. глава, 51. лист 551 об.

Вопрос. Некии человек утверди обручением супружество, еже имеяше заводити с некоею женою: умре же прежде даже венчан бысть, и прежде даже не снитися има, достоит ли брату его оную жену пояти.

Ответ святаго патриарха Антиохийскаго господина, Феодора Валсамона. Доброе несть добро, аще недобре составлено будет, аще убо обручение составися по чину, егоже состави заповедь светлейшаго царя господина Алексия Комнина, со обычными си есть святыми молитвами: имеющей жене, 12 лет, мужу же 14 исполнь, не может пояти ю в супружницу брат его: сице бо совершенно обручение есть, во всем равно венчанию, и совершеному супружеству. аще же сотворено есть инако, си есть, по обычаю иже ныне содержат по всем странам полунощным и восточным, яко слышим, си есть, кроме молитв, не сущу мужу, может убо тогда с прящися законно брат его с нею;

 

Ис книги святаго Савы Сербьскаго. статия, 141.

Посылает же и екзархов много взыскающе ихже поганскии кроме благословения и молитвы жены поемлющих, и сих венчати повелевает, аще же и в старости и дети таковыи имуще будут, и сих под окрил матери прияти, и с ними венчатися;

 

Ис книги Катихисиса малаго лист 37 на об.

Вопрос. Которая есть шестая тайна.

Ответ. Устроение брака, от тех иже входят в то достояние без всякия пакости, и благословением священническим, егда себе обручают взаемно, веруют и честь, и любовь брачную соблюсти, молитвою и благословением утвержено есть, и тайною именуется по реченному, тайна сия велика есть. таковое устроение брака и писание святое похваляет. честен брак, и ложе нескверно;

 

[Маргарит слово 10. о предста царица, лист 537].

Не можеши ли быти камень, буди злато. не можеши ли быти злато, буди сребро, точию во основании. Ниже: Не можеши ли быти солнце, буди луна, не можеши ли быти луна, буди звезда, не можеши ли быти звезда, буди малая, точию на небеси. не можеши ли быти девъственник, брачися с целомудрием. точию в церкви, точию на ризе, точию пред царицею;

 

Книга Соборник старописм., преподобных, Иова, и Феодосия первоначалников скита великаго.

Тайну бо навершают мужь со женою, и жених с женою Христовою.

 

Из книги севаста Арменопула, книга, 6. во ответе хартохранителя господина Петра.

Яко смешение, без священнословия блуд есть;

 

Яко тайны без креста не совершаются. глава, 77.

 

Апостол толковой, зач. 150. в толк. Златоуста.

Яко без знамения святаго креста и освящение слова Господня тайне статися невозможно.

 

Пролог марта, 13. лист 64.

Без того бо [креста] ни крещение ни литоргия не бывает, ни ина кая духовная вещь.

 

Книга Симеона Фесалоницкаго, слово, 62.

Темже и совершенно творитель сам крест, и без креста ничесоже совершается божественных тайн.

 

Псалтырь, толковая, на псалом 4. толкование Касенодорево.

Занеже якоже пенязь царскии имать образ, тако и верным знамение небеснаго царя напетлеются в крещении и иных таинствех, еже есть знамение святаго креста, имже диавол прогоняется;

 

Яко нынешнии российстии автории крыжем латынским тайны своя действуют. глава, 78.

 

Ис книги Жезла, часть, 1. лист, 65.

Ибо сицевым «+» IИС ХС/НИКА воображением креста Господня вся тайны церковныя действуем. Ниже: Сим супружество составляется, и священство благословляется, и священство благословляется. Ниже: Словом рекше, вся священная действуем, четвероконечнаго креста образ творяще;

 

Книга Камень веры, о кресте Стефана Рязан., часть 2. глава 3 [лист 253].

Не четвероконечным ли знамением крестным вся таинства церковная благословляются и освящаются, и совершаются.

 

Из книги Розыска пятой части, Димитрия Ростов.

Якоже Христа Сына Божия любим и исповедуем, и веруем в него. сице и святыи четвероконечныи крест, яко его истинным почитаем и облобызаем. Ниже: Тем и вся тайны навершаем;

 

О бракосовокупляющихся с противоверными. глава, 79.

 

Ис книги, 8. Завещания святых апостол, глава, 34.

Верный и неверная спрягшися, или да разведутся, или да отринутся.

 

Ис книги Матфея Иеросал., сост. Г. глава, 12.

Аще ли же убо еретик, или неверныи соприложится православной вере, обещавается, еже убо знамение да творится, рече совокупление, да отлучается, дондеже по обещанию делесы известится. не леть буди, да православен мужь еретице жене совокупится: ниже убо еретику мужу жена православная да сопряжется, но аще и явится что сицево от котораго бываемо, не тверд менит брак, и беззаконное разрешати сожительство. не подобает несмесная смешати, ниже со овчатем волка соплетати, и Христове части грешных жребию;

 

Из книги Никона Черныя горы, глава, 13.

Аще же приступит кто от нас уставленная, да отлучится, аще бо по градскому закону, брак уставляется, общение и наследие, божественныя же и человеческия правины, како убо сложатся друг ко другу, иже болшем разньствуют о вере, темже и по разрешении неприкладнаго брака, и отлучитися преступающим сподобляет. но сия убо о иже брачне ныне быти совокупляющихся. и иже единою убо стране еретических прилежати преданием. другой же православною, держащейся вере.

 

Зонарь, от правила, 77.

Иже женящиися на иноверныя дщери, или сыны, таковый да отлучится 5 лет. такоже и попове, иже венчают таковых. и тии отлучатся три лета вне церкве.

 

Номоканон, правило, 52. Потребник бол. лист. 685.

Правило 72-е шестаго собора повелевает, яко не подобает православну мужу еретичестей сочетатися жене. аще же и будет, неключиму вменяет женитву, и законопреступен брак. аще ли обещается покаятися лице еретическое, да не пребудет брак, донележе обетование известится, по четыредесятому правилу, собора четвертаго. Такожде и с латини аще православна жена сочтется, с распустом брака, и запрещению подлежит, по дванадесятой главе, 3-го, стиха, еже в Матфеи. [латини неприяти в сочетание]. аще ли кто преступит уставленная, да отлучится.

 

Ис Кормч. писмен., от послан. Иоанна митр. наречен. пророка ко Иякову черноризцу, глава, 93.

Иже дщерь благовернаго князя даяти замужь во ину страну, идеже служат опресноки, и не отметаются скверноядения, недостойно, и зело неподобно православным творити своим детем сочетание.

 

Ис книги Соборник старописмен. преп. Иова и Феодосия первоначалных скитских. вел. [Потребник в кит вел обрет.].

Не бракосовокуплятися души отчюжденной православныя веры, необреченныя суть Христови, блудницы убо суть, мертви суть: Ниже. Тайну бо навершают мужь со женою, и жених с женою, Христовою церковию. Ниже. Ты убо христианин совокупляяся, со иноверным Христов храм с вертепом диавольским соединяти дерзаеши. тамо бо дух лукавыи зде же Божии. зде же благословение гласом презвитерским дается, онаможе проклятство, гласом всея церкве, на иноверство того лица изливается. елико бо Бог благословляет, толико и злых проклинает. ты веруеши церкви, он же своим последователем. Ниже: Еще же узриши два духи о едином теле разни, и себе противни. зде в православии Христов, онамо же во иноверном антихристов. кое убо причитание, Христу, с велиаром будет когда; или кто трупа мертваго привязует к телу своему живо напревание; не можете бо писано, пити чашю Господню, и чашю бесовскую. нужда ти быти от Христа отриновенну со иноверники и всех убо привременных. иновернии суть веры антихристовы, да престанут быти.

 

Из минеи чет. Макария митр. Московскаго, глава 36. от жит. преп. отца нашего Феодосия Печерскаго. от ответов на вопрос, благовернаго князя Изяслава о латынянех.

Христианом же недостоит своих дщерей за них давати, ни поимати в них за себя. ни брачитися с ними, ни кумитися;

 

О убивающихся во время гонения веры ради Христовы. глава, 80.

 

Из Баронии, лето 252: стих 2.

Аполонию девицу, уже состарелую, емше зубы ей сокрушиша. и огнем претяху, аще Христа хулити не восхощет она же испросивше малое время на разсуждение, сама во огнь вскочи и згоре.

лето, 309. стих 1. Максимин, великия обиды своим творя, и жен честных сенаторов своих насилствуя повеле игемону своему римскому. дабы ему жену свою прислал, о еяже красоте ведаше. сия убо христианыня именем Софрония. мужь ея страха ради соизволи на оное повеление. Испросила себе Софрония поити в камору, аки хотящу украситися и тамо заключився, и Богу вручившуся, от надхнения Святаго Духа, острым железием прободе сердце свое. и мертвыи труп мучителю остави.

Ниже: Такова бе во Антиохии Пелагия девица, ученица Лукиянова, на мучение искана, боящеся да не насильствовано будет девьство ея. скочи от высокаго окна, и разбися умре, юже вернии с мученики почтоша; о сей пишет святыи Амвросии похваляя велие мужество ея. еже и Златоуст святыи яко единостранец ея творит.

Стих, 2. Тоя же Пелагии мати [пишет тамо же святыи Амвросии] ведома к судии. изволи паче утопитися в некоей реце, неже впасти со дщерми [двема] в поганския нечистыя руки, на погубление чистоты. еже и Евсевии воспоминает: несть сомнения, яко на сия имяху особное надхнение Духа Святаго.

В стихе, 3-м, и 4-м. Тому же подобно.

Стих, 5. Никифор такожде о никомидийской девице, именем Ефрасии повествует сице. Вовремя Диоклитиана, Евфрасия в дом нечистыи осуждена, вшедшу к ней младу блуднику. тако прельсти его, имам рече, масть некую. еюже аще кто помажется, ни единым железом вредим быти может, дам ю тебе, аще чистоту мою соблюдеши, и на мне перво познай силу тоя масти. Се аз выю мою помажу, удари в ню мечем, колико можеши, узриши, яко раны не будет. И тако сотвори оный юноша. извлек мечь, в протяженную выю, девицу удари. и абие главу ей отсече. избра девица сицевую смерть, неже обещанныя Христу чистоты тела своего лишения;

 

Из минеи чет., сент. 3 день. священомуч. Анфима.

Многия от верных сами мужи и жены, божественною любовию разжегшеся. яко в некую прохладу во огнь себе вметаху;

 

От жития святаго мученика Арефы, декабря, 24.

Некии младенец исторжеся от рук ведущаго и, и текши скоро вскочи сам во огнь и в нем горящую матерь свою объемше, и сам с нею сгоре, [списатель же похваляя глаголет] и бысть мати с сыном жертва и всесожжение благовоно Богови, слава Богу умудрившему тако малаго младенца.

 

От жития преп. Иоаникия Вел., нояб., 4.

Егда уведа [Иоаникии] некую девицу от диавольскаго искушения ратуему плотьскою похотию. Ниже: Помолися святыи со слезами к Богу, да избавится девица та от страсти тоя искушения диявольскаго, еже и бысть. Ниже: А Иоаникии путем своим в Контурию пойде, грядущу же ему, ощути в себе пламень похоти плотския, и нападоша нань яко буря зелная скверныя мысли. и восташа в нем волны нечистых страстей, и вря в нем кровь аки в конобе, и вся напасть на онеи девицы бывшая, нападе на блаженнаго Иоаникия; он же терпяше крепко, трудя плоть свою великими подвигами. обрет же негде змия страшна в разселине земной, возгнездящася, умысли вдати ему себе в снедь, изволяя умрети паче неже нечистым соизволяти мыслем, и осквернити чистое свое тело, и ввержеся к змию да снеден будет от него.

 

От жития преподобнаго Мартиниана, февраля, 13 день.

Сие рекши, святыи, знамена море знамением крестным глаголя: Господи Iсусе Христе, запретивыи морю ветром послушающим тебе, с трепетом, призри на мя и помилуй мя, и не остави мене погибнути, себо во имя твое ввергуся в море, лучше бо ми есть, в воде умрети, нежели страстию телесною жене прилепитися; и обращься к девице рече: спасися девице, Бог же да сохранит душу твою от всех вражиих наветов, и соблюдет тя доконца, то рек, ввержеся в море, и начат плыти;

 

От жития Михаила князя Черниговскаго, и болярина его Феодора. Бысть чюдо преславно во граде Рязани.

Явися Николае чюдотворец, благоверному князю Феодору Рязанскому рек, гряди князе в стретение чюдотворнаго моего образа, хощу бо зде быти, и чюдеса творити и место прославити. да молю о тебе всемилостиваго Бога и человеколюбца, да подарует ти венец царства небеснаго, и жене твоей и сынови. Благоверныи же князь Феодор возбнув от видения и размышляше в себе страхом объят быв, не поведав никому же видения сего. и возопий гласом велиим и рече. о святыи великии чюдотворец Николае. како будет се, и како умолиши человеколюбиваго Бога, да сподобиши мя венца царства небеснаго, и жене моей, и сынови моему. аз бо еще брака не сочтався ни плода чрева имех, и вскоре пойде во сретение чюдотворнаго образа Николина, и паде пред чюдотворным образом со слезами и с сокрушенным сердцем, и принесе во область свою, и принесен бо бысть ис Корсуня града, и посла весть ко отцу своему князю Иорию Интаревичю, и вскоре прииде отец его и со архиепископом Евфросином. и создаша храм во имя чюдотворца Николы, и освятиша торжествоваша честне, и отъидоша в домы своя, и помале времени князь Феодор сочтася браку, и поя супругу от царска рода царевну именем Евпраксия. и помале родиста сына именем Иоанна. в лета 6645: убиен бысть благоверныи князь Феодор Рязанскии от безбожнаго царя Батыя, на реце Воронежи. И услыша благоверная княгиня Евпраксия, и сыном своим князем Иоанном, сама себе зарази за любовь господина своего.

 

Из истории, о образе чюдотворне святителя Николы именуемаго Зараскаго.

Княгиня Евпраксия и с сыном своим Иоанном, возшедши на высоту церкви святаго Николы, и ринувшеся на землю. и заразися до смерти. и того ради прозвася, Николае Заразскии.

 

Пролог август, 1.

Мати Соломия помолившися, и в разжегшуюся сковраду себе вверже, и тако Богу дух предаде.

 

Месяца октября в 14 день, святыя мученицы Домнины, и дщерей ея, Виринеи, и Проскудии.

Сия жены, божественною ревностию подвигшеся, и оставльше домы и сродствия, и в землю чюжду преидоша. и тако бежаще достигоша в Едес. и тамо ходящим тем, внезапу ста мужь и отец. воини же имуще, к зачалу вратом доспевшу, и яша я, и доидоша в Ераполь. река же течаше путем, им же идяху. они же утаишася от воин, ядущим им хлеб, и молитвы сотворше наскоре, внидоша в реку. тамо и оставиша себе, вдашася струям водным, и тако скончашася. разсудивше же яко любве ради Христовы, лучше есть водою утопитися, нежели беззаконным в руце вдатися.

 

Из минеи четьи октября 15, от жития Лукиана презвитера.

Глаголют же, яко некая девица именем Пелагия ученица Лукианова, егда веры ради Христовы на мучение бысть искана: бояся да не насиловано будет девьство ея, скочи от высокаго окна и падши разбися, и умре, еже вернии с мученики почтоша.

 

Из минеи Макария митр. Московскаго в 30-м числе.

Филинид священноепископ бе вовремя Диоклитиана царя, и Максимиана игемона, ят же бысть со инеми затворен в темницу, в мучении скончася. иже бяху с ним, Аристоклей, и Дмитриан, и Афанасии. игемон же повеление скверно заповедавшу, яко христианы всякими муками казнити. и то повеление злочестивыи устави, яко да христианы паче естества нудити покланятися идолом. не терпе же Филинид ни слышати беззаконнаго повеления, ни пострадати же, но обязав главу и лице покрыв, с высока места свержеся, и прежде приближения к земли дух предаст. бе же сей отец Оригенов последи в ересь злу впадшаго.

 

[Ис Пролога марта 22, святыя мученицы Просиды].

Яко кождо от христиан веры ради, и любве Христовы вревают сами себя в пещь горящую.

 

[В Соборнике, в неделю 1 поста].

Святому мученику Феодору Тирону, явися Христос в темнице, и не повеле приимати пищи и пития, от рук неверных.

 

[о вере].

Святыи Лукиян, изволи паче гладом умрети, нежели от рук неверных питатися;

Святыи Николае, егда бе в темнице, не приимаше пищи от человек;

 

О ядущих и покупающих на торжищих. глава, 81.

 

[Евангелие Иоанна, зач. 12].

Прииде жена от Самарии почерпати воду, глагола Iсус. даждь ми пити. ученицы бо его отшли бяху во град, да брашна купят;

 

Апостол, посл. 1 к коринфом, святаго апостола Павла, зач. 146.

Все еже на торжище продаемое ядите ничтоже сумнящеся за совесть. Господня бо земля, и исполнение ея.

 

Беседы апостольския, лист 831 [и 832. зри тамо пространнее написано].

Ниже бо разсуждати оставляет, сиречь, истязовати и вопрошати, аще идоложертвенное есть, или не таково: но просто ясти все еже ис торжища, ниже то навыцати, еже ис торжища, ниже то навыцати, еже что есть предложенное. тако яко есть мощно и ядущу неведущему свободитися. такова бо суть яже не естеством злая, но от помысла творящая нечистое, сего ради рече. ничтоже сумнящеися, Господня бо земля и исполнение ея, а не бесовска, аще ли же земля, и плодове, и безсловесная суть егова вся, несть ничтоже нечисто, но инако нечисто бывает, от помысла, от преслушания.

 

Карфагенскаго соб. правило, 40.

Причетник на пути сыи, в корчемницу внидет; инакоже никакоже. От толк. Аще причетник настранне земли пребывая, и не имый нигдеже чиста места обитати, и потребная животу своему обрести, и в корчемницу внидет ясти и пити, не имать запрещения;

 

Святых апостол, правило, 54.

Иже кроме всякия нужди причетник обрящется в корчемнице ядый да отлучится. Толк. Не подобает причетником кроме некия нужды в кочемнице ясти и пити, или обитовати, аще же по прилучаю долг путь шествующе, и не могше града достигнути, и понужди обитают в гостинице, таковии помиловани будут. аще же кто кроме некия нужди яст и пиет в корчьме, да отлучится.

 

Никон Черныя Горы, от слова, 12. святаго Афанасия.

И рече Великий Афанасии, яко в корчемницу никакоже да внидеши. но аще будеши в странных и нужда будет еже требовати неких снедей, послав купи еже требуеши, и пришед в церковь во особно место яждь и пии. аще ли же не будет церкве в том месте ни храмина правоверных, и нужда будет внити в странноприемницу вниди идеже не суть жены ниже корчемница, и сие с скорбию.

 

[В Кормчей, лист 180].

Корчемница бо винопродавныи храм именуется.

 

Память 7, отрок иже во Ефесе. [Ис Пролога, август, в 4; лист 748].

Сии же святии отроцы приимше злато и сребро на пищу себе, изыдоша в пещеру, близ сущу града, глаголемую Охли, и ту пребыша дни многи молящеся Богу. Амвлих же бе мний, и той вхождаше во град купити им брашна. Ниже: И изем злато нача купити хлебы;

 

[Аввы Дорофея, послан. 9; лист 159 на об.. и поуч. 7, лист 72].

А о потребе телесней аще кто есть достоин почивати, и срацынску сердцу известит Бог, сотворити с ним милость по потребе его;

 

[Из минеи чет. от жития преп. Антония Вел., генв., 17 день].

Три же дни и нощи с сарацыны Антонии блаженныи в путь шествии сотворши. Ниже: И взем отступников хлеб, един исперва в горе той вселися. никому иному с ним сожительствующу. сарацыны же тыи видяще таковое его житие, иногда же от финик мало заучреждение вкушаше;

 

[От жития Савы освященнаго, дек. в 5].

Ходя же [сиречь преп. Сава] по пустыни, устрете четырех срацынов зело алчных и изнемогающих, тем повелев сести, изсыпа пред ними из одежды своея корения имже сам питашеся, глаголемое мелагрия, и сердца тростная, они же ядши укрепишася. и знаменавше место пребывания его, отъидоша по неколицех же днех, приидоша к нему носяще хлебы и сыры, и дактилы, воздающе благотворение, яко в день глада напита их;

 

[От жития преп. Макария Желтоводскаго, июля в 25].

И прослави того [сиречь преп. Макария] Бог, не точию в христианех; но и в агарянех в стране той под державою российских князей обитавших, и преклони сердца их на милость к угоднику своему: и тии бо приходяще к святому и нестяжателное его в пустыни пребывание зряще, удивляхуся того терпению, и умиляхуся и приношаху к нему хлеб, медовыя соты, и пшеницу иныя к препитанию, он же приемляше от них с благодарением.

 

Степенная, царство Василия Ивановича Шуйскаго, степень, 7.

Апостолом речено есть, аще кто от иноверных призывает вас ясти, и имеяй разум да идет на славу Божию. не имеяй же не идет, да не и прочих соблазнит;

 

О написании титлы Пилатом и о четырех буквах. I. Н. Ц. И. внове ныне полагаемых, яко на древних крестах оных букв не бяше. глава, 82.

 

Из Благовестника, лист, 226. Евангелие от Матф. зач. 113.

И возложиша верху главы его вину ему написану, се есть Iсус царь июдейскии. Ниже, в толк. А еже другии евангелист рече титлу, се Матфей нарицает вину, написаша бо хотяще оправдитися чесо ради распят бысть, сиречь яко похищник царства июдейскаго, они бо облыгающе подписаша, царь.

 

[От Марка евангелие, зач. 68. В толк. лист 97].

Написа же и титлу, еже есть вина, ея же ради распят бысть царь июдейск, да того ради похулят его славу, яко противника суща, и царя себе нарекша. и да имут вси мимо ходящии непомиловати его но паче находити нань мучителне.

 

От Иоанна, зач. 60. В толк. лист 288.

Пишет и титлу Пилат, и полагает на кресте сеже есть вину написание и явление. се бо толкуется титла, являет же титлою, сие есть крест. Выше [лист 286]: Се царь нашь, что приобретение, аще сего убиете человека, ни худому кому могуща сопротив стати; Сия же Пилат слабе и прикровенне глагола, а не еже крепце и тверде ста, яко за истину подвизаяся. Ниже [лист 288]: Они же [сиречь жидове] и на распятаху льстяху к Пилату, глаголюще, напиши, яко той рече, ныне убо общии совет является.

Выше [зач. 5, лист 31. евангелие]: Отвеща Нафанаил глагола ему, равви, ты еси Сын Божии, ты еси царь израилев. отвеща Iсус, и рече ему, зане рех ти, яко видех тя под смоковницею, веруеши, болша сих узриши. и глагола ему, аминь аминь глаголю вам. отселе узрите небо отверсто, и ангелы Божия восходяща и нисходяща над Сына человеческаго. Толк. Слышав убо сия Нафанаил в чювстве бысть Господня величества. ельма же исповедает его Сына Божия. обаче аще и Сына Божия исповеда, но не якоже Петр исповеда Сына Божия и Бога истинна. темже и блажит и Господь и церковь ему поручает. Нафанаил же яко человека проста исповеда, благодатию добродетелей, ради усыновления Богу, и се яве от глаголания его. ты еси рече царь израилев, видиши ли яко не у достигл в совершенныи разум истиннаго божества единороднаго, но яко человека боголюбива. и яко царя израилева быти его верует, аще же бы истинною Бога его исповедал, не бы его нарекл царь израилев, но Царя всех.

 

Евангелие от Матфея, зач. 111.

Iсус же ста пред игемоном, и вопроси его игемон глаголя, ты ли еси царь июдейскии. Iсус же рече ему, ты глаголеши, егда нань глаголаху, архиерей и старцы, ничесоже отвещеваше;

 

Книга Григория Богослова, слово на Крещение Господне.

Подобися Пилатову непреложению, и рцы яко он еже писах; обаче он убо рече зле написал титлу, яко вину бо, а не яко истину.

 

[Златоуст на деян. беседы, лист].

Пилат написа титлу, не по благодати.

 

Евсевии Пимен в книзе Лифос. издана в лета 7642. типом в Киеве и Кракове.

Зри и в костели римской вовремя литоргии на Агньце еда не узриши ли наедине стране воображения распятаго Спасителя сих слов под титлою; IНЦИ; от Пилата на кресте написану; Ниже: На просфире греческой граммата, IС ХС, НИКА;

 

Синоксарь, в пяток великии.

Всяко убо досаде исполнишася, Пилат и дщица написа онем Iсус назарянин царь июдейскии.

 

Летописец, в царство Тивериево, глава, 61.

Повеле же Пилат по осуждению его, над главою надписати вину греческими словесы, яко глаголаху июдеи яко царь есмь июдейскии.

 

[Пролог, июля, 8].

Великомученику Прокопию, явися крест во образе хрусталне, и глас бысть ему от креста глаголющь, аз есмь распятыи Iсус Сын Божии.

 

Из книги Тактикона, Никона Черныя горы, слово, 38.

Паки блюдох всюду честныя кресты начертаемы, ов сице, ов же инако, а не в едино надписание. о сих убо едино недоумею, исках с трудом подобающее надписание, лучше уведети. и сего ради написав послав в соборную церковь патриархии Антиохииския. они же испытавше о сем списаша ми, сице. яко лучше есть написовати святыя и честныя кресты, IС ХС СЫН БОЖИИ.

 

Свидетельство от древних крестов.

Во уставе болшем, во главе, 53. на лист. 97-м, напечатан крест како на хлебе Пречистыя воображати, надписание к нему ЦАРЬ СЛАВЫ IС ХС НИКА.

 

В книзе Потребнице болшем на листу, 20-м. в чине освящения церкви напечатан крест. како его знаменовати на антимисех. подписание к нему ЦАРЬ СЛАВЫ IС ХС, НИКА.

 

Тамо же на другом водружалном кресте, тоже надписание ЦАРЬ СЛАВЫ IС ХС, НИКА.

 

В тетро евангелиях Московския печати во Иоанове Благовестии в зач., 46-м в начале перваго страстнаго евангелия, на поле напечатан крест, надписание его ЦАРЬ СЛАВЫ IС ХС, НИКА.

 

На дорниках в древнее благочестие, имже просфиры печаташа, на кресте надписание, ЦАРЬ СЛАВЫ, IС ХС, НИКА.

 

Древле в благочестие, и доныне христиане вси от святаго крещения на рамех у себе носят крест Христов с благословным надписанием, по обычаю церковному, без четырех букв;

 

Равноапостольныи царь Константин устрои, три кресты от чистыя меди, по образу показанному на небесех от самого Христа, яже в Пролозе сентября в 14 день писано, и нарече святыя имена сице. IС ХС побеждает; [яже един от них крест в Москве во Успенском соборе обретается].

 

Апостол Христов евангелист Иоанн Богослов иже даде жезл с распятием преподобному Авраамию Ростовскому чюдотворцу. имже повеле сокрушити Велеса идола творяща многи напасти, мимоходящим людем, еже и бысть. на нем же воображено IС ХС, НИКА. сие же распятие в монастыре преподобнаго Авраамия имеется, о дании же жезла и о сокрушении идола в житии Авраамиеме написано;

 

В Переславле Залеском в соборной церкви в ризниче крест с распятием сотворен, по его подписанию в лето 6660 год, благоверным великим князем Георгием Владимировичем Долгоруким, а на нем на самой досце надписание, IС ХС.

 

На Москве в соборной Успенской церкви, на запрестолном кресте ис Корсуня принесенном на среднем крузе, распятие мусиею писано, надписание на досце, IС ХС.

 

Ту же на евангелии во олтаре старописанном в часовничей лист. распятие, на нем, надписание на досце распятие Господне, выше IС ХС.

 

Ту же лежит крест с распятием благословящии с мощьми святых сотворен сребром и позлащен в лета 7155, и дан по ризе Господни, надписание на досце IС ХС, выше распятия Господня;

 

Ту же златосияющии благословящии крест с распятием и с мощми святых сотворен при царе Феодоре Ивановиче и патриарсе Иове повелением царицы лета, 7103-го, год, надписание на досце, IС ХС.

 

Тамо же в крестохранителнице драгоценныи крест с распятием благословящии вынизан жемчюгом, и в нем часть животворящаго древа и мощи Петра митрополита, и инех святых, совторен при том же царе Феодоре, и патриарсе Иове, лета 7102-го, надписание на нем, IС ХС.

 

В той же церкви на ковчежце в нем же риза Господня, крест с распятием, на нем же надписание ЦАРЬ СЛАВЫ, IС ХС, НИКА;

 

Вторыи кочежец вящьший в нем же глаголют. риза Господня из Грузии принесена, на нем кресте надписание, ЦАРЬ СЛАВЫ, IС ХС, НИКА.

 

На Москве же в соборной церкви Благовещенской, над деисусом дванадесят праздников, межь ими распятие Господне, надписание на нем ЦАРЬ СЛАВЫ, IС ХС, НИКА.

 

В притворе тоя церкви у западных врат в верху стенным писмом писан образ распятия, на нем надписание распятие Господа нашего, Iсуса Христа.

 

В приказе болшия казны стоит крест меднолитыи при царе Михаиле Феодоровиче, надписание на нем ЦАРЬ СЛАВЫ, IС ХС, НИКА.

 

В Ладоге в Васильевском монастыре, из монастыре валаамских чюдотворцев, вывезенный благословящии крест с распятием резныи, надписание имеющь, вырезано на досце, ЦАРЬ СЛАВЫ и на прочих древах, IС ХС, НИКА.

 

В Соловецком монастыре в часовне идеже преподобнаго Германа мощи крест каменныи на нем распятие писаное, надписание изваяно ЦАРЬ СЛАВЫ, IС ХС, НИКА, а пред распятием написан преподобныи Саватии молебным образом; так и глаголют яко она преподобная отца Саватии и Зосима пред оным распятием молястася.

 

Тамо же в казне церковной крест благословящии с распятием весь златыи, обложен жемчюгом с мощьми святых. дание царя Ивана Васильевича Филиппу игумену Соловецкому. надписание на нем ЦАРЬ СЛАВЫ, IС ХС, НИКА.

 

Тамо же в соборной церкви юже устрои Филипп митрополит бывыи игуменом, тогда в дванадесяти праздницех крест с распятием, без четырех букв.

 

В той же церкви и другии крест с распятием, якоже и на прочих древних несть на досце, четырех слов за Пилатово надписание;

 

Тамо же над трапезою вверху служба Димитрия великомученика образ его местной в деснице персты сложены на знамение крестное по древнему, держит в них крест трисоставныи, написание имеющь ЦАРЬ СЛАВЫ, IС ХС, НИКА.

 

Еще же и близ пристанища на месте идеже при преподобном Зосиме купец просфиру оброни. крест с распятием дивно вырезаным надписание имеющь, ЦАРЬ СЛАВЫ, IС ХС, НИКА.

 

Над кладезем преподобнаго Зосимы, в часовне, поставлен крест с распятием резным, лета 7163-го год. надписание имеющь ЦАРЬ СЛАВЫ, IС ХС, НИКА.

 

Ту же стоит крест в часовне поставление Иринарха игумена Соловецкаго, надписание на нем ЦАРЬ СЛАВЫ, IС ХС, НИКА.

 

Над Филиповым кладезем поставлен крест с распятием резным в часовне, лета 7163-го, надписание на нем, ЦАРЬ СЛАВЫ, IС ХС, НИКА, без четырех букв;

 

А котории кресты по назнаменаному летоименованию их, последи древних соловецких отцев от нынешних духовнаго или мирскаго новолюбцев чина ставлены на тех и тыя четыри буквы на досце выреза.

 

В Великом Нове граде на Волховском мосту чюдныи крест сотворен с распятием при благочестивом царе Иване Васильевиче, и при святейшем Макарии митрополите Московском, на оном кресте надписание ЦАРЬ СЛАВЫ, IС ХС, НИКА.

 

Ту же другое распятие сотворено при царе Феодоре Ивановиче на нем надписание тоже ЦАРЬ СЛАВЫ, IС ХС, НИКА.

 

В минеи августовой Макария митрополита, в книзе Козмы Индикополова крест воображен, на нем же четырех букв не имеется;

 

В той же минеи на антимисе воображен крест надписание имеющь ЦАРЬ СЛАВЫ, IС ХС, НИКА.

 

В книзе Алфавите крест в лицах воображен, на нем же надписание, ЦАРЬ СЛАВЫ, IС ХС, НИКА. под ним НИКА толкована, сице. НИКА сказуется победа на диавола. и победитель врагом, а сам непобедим ни от когоже. и иныя речи, яже окрест его, толкованы а четырех букв или титлы Пилатом написанныя, на том кресте не написано.

 

Свидетельство от божественнаго писания, како подобает молитися о неверных лицех, глава, 83.

 

Из Гранографа, болшаго, от предисловия.

Царство со иерейством снемшися ясно процвете. понеже царь царствующим подал есть благовернами царствовати царю, аще убо и мнози земстии царие быша и бе и будут но не мнози со святительством и со иерейством управляюще власть, и таковым несть царство но мучительство. несть се им царь, но злобы их месть. Ниже. На прочих же именах рекше царевых, точию время текущаго колеси належит. Якоже Нила, и Кира, Трояна же и Диоклитиана. аще же и привоспоминаются понужде мимотекущаго времени хотящим прочитатися временныя бытия. Но память их темною славою шумит, и укоризною неверства их клокочет.

 

Соборник слово, 2. Григория Двоеслова [лист 310].

Мы же смирении хощем умилитися за преступление твое, яко не могох тебе обратити на правую веру, якоже и пред нами святители в своя лета царьствующыя приносят Богу, в посрамление нам смиренным. мы бо в своя лета не приносим царя благочестива, и славна и православна, но безчинна, и недостойна и зловерна. и се ныне молимтися, покайся и возвратися, и вниде во истину. якоже еси обрел и приял, тако и храни.

 

Евангелие учително, в неделю, 17, слово, 38.

Посих же и другое некое есть, еже творит непослуша бывати, егда во гресех пребывающе молимся. еже бо и о жидовех глаголаше Бог Еремиови, не молися о людех сих; не зриши ли что творят, не отступиша рече от нечестия, ты же о них молитвы приношаеши, но не услышу тебе. Паки же егда о вразех просим, не токмо непослушаеми бываем, но и прогневаем Бога. целба бо есть молитва, обаче же аще не вемы, како подобает приложити целбу, ниже ползу приемлем от нея когда.

 

Минея чет., марта 6. в страдан. святых муч., 40; иже во Амории.

Глагола воевода [срацын к мученикам] како то быти может, дабы кто ненавидяй кого, молился о нем; воистиу лжете глаголюще, яко молистеся о князе, егоже ненавидите. Реша святии, истину глаголем, яко молихомся о нем Богу, дабы просветил потемненныя неверием душевныя того очи, еже бы познати ему путь правды, и почитати Бога благочестно, приемши истиную христианскую веру вместо тоя, юже ныне имать ложную, и мнит ю быти праву.

 

Из книги Симеона Солун., глава 94.

О приношаемых частицех о святых и всех благочестивых. Ниже: Потом и прочии частицы о архиереи, и о верных царех побарающих о благочестии, и о всякой души христиан православных. Ниже: И несть место неверных, ниже убо иномудрствующих. кое бо причастие свету ко тме: зане и возъимут, рече лукавых посреде праведных ангели. тем же и весма иерею никоему о иномудрствующих приносити, или память ему творити. ниже и о явно согрешающих и без покаяния сущих, зане во осуждение им приношение: якоже и без покаяния причащающихся страшных таин, якоже божественный Павел глаголет, ядыи и пияи недостойне, суд себе яст и пиет.

Вопрос, 47: глава, 100.

Егда абие песньствуя лик, царей многолетствует с пением и самаго архиерея, не человека проста многолетствует, но верное царство, и православное архиерейство пребывати молящуся.

Глава, 155.

Молитвами Богоматере и всех ангелов, и всех святых. буди всем спастися благочестивым. нечестивых же ко благочестию возврати, и иномудрствующих множества ко православию приити. нужно бо и любве дело Божие, еже о всех молитися.

Того же, Симеона, главы, 332.

О благостоянии святых Божиих церквей и сие ради иже в вере мира и церковное житие, и последствующе подобное и о всех соединении правою верою и любовию и боголюбезным жителством, и всего причта. якоже служителя песней жертвенника и прочаго чина, и людей яко же верных и соединенных священных верою и житием, и чрез них освящаются; Зриши ли како синаита глаголется, всех собирает воедино, якоже Спаситель молися. с людми убо и царей совокупи, и князи и воинство. Но понеже о освященстве подвизающии суть сии, и особно сих поминает, благочестивых токмо сущих молитися убо церковь, Павлов закон храняще. о царех и иже по превосходителстве, и паче ныне сих сущих верных, и о еже поборати им Богу и покорити супостатов, да и мы тихое и кроткое житие имеем, благочестие в чести храняще. Понеже убо и хранилище требе нам есть, якоже хранящих князей, и сохранити молится граду, и любве ради и прочая вся грады и верою глаголем живущих в них. Яко не леть есть о нечестивых молитися, и молитися о друг друзе повелети по апостольстей заповеди, к могущему подавати вся обратитися и простиратися Господу. Милости всех и верных царей иерей обычныя молитвы людех и Божии наследии, во еже спастися ему, и християнскому нашему возвыситися рогу; спаси Господи вопия люди твоя, и прочая, и общия молитвы Господи помилуй воспевается, и о царех молится яко предстоящим благочестивым и о вере подвизающимся.

 

Ис книги Служебника в четверть лист., печати в Вилне в лета, 1641.

В литургии Иоанна Златоустаго, на листе, 8. в проскомидии. О державном государи нашем о великом короли, имярек. на лис., 15. в ектении. О великом короли нашем имярек: и благочестивых князех и панов наших, и всей полате и воев их Господу помолимся. [лист 16] О пособите и покорити под нозе их всякаго врага и супостата, Господу помолимся. Еще молимся о великом короли нашем, имярек. и о благочестивых и богохранимых князех и панех наших о державе победе, пребывании мирном. и проч

 

Из Псалтыри со возследованием печати Острожския. [в лето 7107, от Христа, 1597, лист 115].

Небесныи царю верныя князя наша укрепи.

[лист 144] Троп. Спаси Господи люди своя. и проч. такоже.

 

Из Служебника, вселенскаго на великом входе. [лист 31].

Святейшаго вселенскаго патриарха нашего имярек. И отца нашего архимандрита, или игумена, имярек. и весь чин священническии и иноческии, и всех благоверных и христолюбивых князей и панов наших, и ктиторы святыя обители сея да помянет Господь Бог во царствии своем. Лист 42. Еще приносим тебе словесное се служение, о вселенстей святей кафоличестей церкве. Ниже: О спасении великаго короля нашего, имярек. и богохранимых князей наших и за вся.

 

Из Псалтыри древняго писма, а писана, в лето, 7085. Молитва Иоанна Златоуста по всяком правиле.

Обрати Господи иноверныя от прелести их да с чистою совестию к познанию и ко крещению приидут, и послужат ти в благоверии и чистоте.

 

Молитва, по 17 каф.; за вся христианы. во Псалтыри печатной.

Господи иже суть вернии утверди их да будут вернейшии того, иже неразумливыи ты Владыко вразуми я, иже суть погани, обрати их Господи в християнство, да и тии будут наша братия, и проч.

 

Апостол толк. на зач., 282. Златоуст.

Еже молитися за вся человеки и за еллины да обратятся, аще же той хощет спастися. еже есть спася Господь.

 

Из Гранографа, о взятии Царя града.

Наутрия же послав царь Магмет салтан, ты ли еси Анастасии на мене жаловался Богу своему, будилмися во сне зело страшен, повеле ми тебе отдати книги ваша. и сего ради ужас велик и трепет мя обдержит, и ты возми книги ваша, да исправляй свое дело что вам Христос Бог приказал. да помолися и о мне чтобы мене от страха избавил. Ниже. Патриарх же прият книги, и возвратися в дом свой, радуяся и славя Бога, и пришед в дом свой паки ста на молитву, и моляшеся со слезами глаголюще. Благодарю тя Господи Боже мой яко услышал мя еси раба твоего, услыши мя и ныне молящагося тебе, и горко от сердца вопиюща и рыдающа, обрати неверных ко святей своей вере, да будут вернии и познают тебе истиннаго Бога.

 

От жития святаго Алексия митрополита. молитва. Степень гран., 12.

О Владыко Царю, сам бо рекл еси не требовати здравым врача но болящим. Днесь убо молютися раб твой, возвеличи имя свое во языцех не знающих тебе Господи, ниже поклоняющимся трисоставному твоему Божеству, и посли благодать и силу пресвятаго и животворящаго своего Духа. исцели всяк недуг и язю болящия сея неверныя царицы, да не рекут нечестивии где есть Бог их.

 

Книга Степен., послан. Филиппа митр. Московскаго в Нов град. степень и гран., 15.

О сих сынове сами весте, како в прежде бывшия времена коликая царства великих земель многия грады и места преступления ради закона, и преступления ради святых пророк, и апостол, и святых отец учения не послушавше, в пагубу многу впадоша, и в запустения быша а не покорившияся грады и земли Богом порученному их государю сотрошася и разорени быша. Царствующии же великии Константинополь, иже и прежде благочестием просиявыи паче инех царств. не тоя же ли ради латынския прелести погибе, и от благочестия истребишася.

 

От тоя же Степенныя книги гран., и степень, 14. глава 19: в житии Ионы митрополита Москов. [Послание в Литву].

Пишет же и о Цари граде, яко егда благочестие содержаху. тогда Царь град от перс, и от болгар воюющь нань ничтоже пострада. егда же своего благочестия отступившу, и приобщишася богомерскому соборищу, иже во Флорентии и папино имя в первых поминати начаша, и какова пострадаша пленения и смерти, о душах же их Бог весть един. Что же может быти благо идеже в церквах латынскаго папы имя поминается. в нашей же православной вере толико просияша богоносных мужей, ихже Бог знаменьми и чудесы прослави, и никтоже от тех мужей не приложися их службе. аще и пострадати прилучится о вере, якоже святии мученицы, и се невелико противо тамошня воздаяния, здешняя бо мимо ходят, тамошняя же пребывают вовеки, ихже получиша соблюдшеи веру.

 

Ис книги Истории острожской печати о Флоренском соборе и о Исидоровом шествии на той собор.

Ведаючи иже в горе Афонстей было сто тритцеть монастырей великих мурми оточенных и велико множество инок або мнихов греческих которыя на тую унею и словка мовити не дали. а не позволяли. а иже напобожное право ангельское постническое житие их, восток и заход оглядолся. выправили военного люду, с чадью крыжаков, зьарматою дватцеть шесть тысящь. которыя ркомо на оборону краев сербьских, и болгарских тягнучи до горы Афонской. Ниже. Пришли потом до великаго и славнаго монастыря. Ксиропотам реченнаго: мниси або иноцы, слышачи штося за изшими монастырями стало болестью сердечною и страхом зняты будучи, вышли против им со кресты, приняли их на унею позволили и згодилися з ними. по той згоде отправовали литоргию, диякон в октении кгды припомянул имя папы римскаго. явныи чюд Бог з высокости отказал, стался шум, и трясенье земли страшное, изнагла упали все стены церковныя, и муры монастырския, яко стены ерихонския, и погинули все весь пол, так иноцы, яко и римляне которыя ся там зместити могли великое множество душ и осталося одна стена часть башни мурованной, надзвычай нигде не бывалти, ко земли ниско схилившися а не упали на память вечную и того часа. видячи то римляне и крижацы перестрашившися велием страхом, мало што целых монастырей оставивши, отягнули от горы Афонския.

 

Из истории печат. в Руси в Ыверском монастыре, в лета, 7000.

По сих паки беззаконии латины устремишася зело с радостию, и розсеяшася полкове повсюду святыя горы; и нигде не скрыся от них обитель, ни пирг, ни келия, ни ино некое жилище иноческое. но все со всеми и вне пребывающими разрушиша и огню предаша, рукоделная орудия со прочими в плен взяша. Ниже; лист, 88. Абие же беззаконнии: привитают на он пол к югу, тамо бо ожидают их, инок множество от Ксиропотамския обители, с ваием и ветвиями, и сице рекоста к ним, добре приидосте, и мир Христов с вами, они же реша, есть и будет. и абие купно во обитель внидоста и монастырь, от пленованнаго богатства. и ктитор себе тоя обители нарекоша; оле прельщению и ухищрению диаволю, купно соединение с ними сотворяют. и по оглашении их о архиепископе нашем иже в Риме, и о благочестивом цари. о страшному чудеси Бог с небес призирает с яростию своею на преступники, и потрясает землю и место. идеже недостойнии стояху, абие стены градския с прочими, иже в них распадошася, якоже древле Иерихон. при Исусе Наввине.

 

От истории Симеона иерея Суздалскаго, от словес святаго Марка митроп. Ефескаго, на Флоренском соборе.

Но аз царю таковаго собора никакоже соборовати не хощу, ни папы вначале поминати. но всем повелеваю не отрицатися святых седми соборов, и заповеди святых отец. Ниже: А кто папу в православных церквах помянет, да будет анафема.

 

Ис книги Степенной глава 19. степень и грань, 14. Ис книги Летописца. 6981.

Фрязи и грецы пришли из Риму со царевною Софиею в немецкии град Мовин и оттуду приплыли в Колывань. в тоже время, пришла царевна София в Колывань, а носило их морем 11 дней. А с Колываня пойде в Юрьев, и во Псков, потом в Нов град. И пойде к Москве, и сказаша великому князю Ивану, что посол Антонии легатов идет со царевною, и пред ним крыж несут. Ниже: Слышав же пришествие их князь великии Иван Васильевич, нача о сем мыслити с материю своею и з братиею и з боляры. достоит ли сему быти. инии глаголаху не бранити ему, друзии же глаголаху несть се бывало в земли нашей, что почести быти латинской вере. учинил было то един Исидор митрополит, и той погибе. Князь же великии Иван Васильевичь, возвести сия отцу своему Филиппу митрополиту. митрополит же отвеща ему, что не мощно тому быти, еже во град внити, но ни приближитися. ащели тако учиниши, почтити его хотя. но он во врата граду а аз богомолец твой из граду другими враты. недостоит бо нам то слышати, не токмо видети. Понеже бо кто возлюбив и похвалив чюжую веру, той своей поругался есть вере. слышав же сия князь от святителя посла к легатову, болярина своего Феодора Давыдовича, и повеле ему глаголати, дабы не шел пред ним крыжь;

 

Беседы апостольския, лист, 256.

Иеремия глаголаше: оставите мя да горце восплачуся. и прежде сего же, понеже явьственне о прошении всеконечном злых молити несмеяше, но рока просил есть глаголя доколе Господи.

 

Никон Черногор., глава, 36.

Яко Бог с судом даст ответ о нечестивых глаголя. аще даст ответ о нечестивых глаголя. аще станет Моисей и Самуил пред лицем моим о них, не услышу их, и ты не молися о людех сих. и не беди помилованом быти им, и да не приступиши ко мне о них, яко не услышу тебе;

                                               

Яко о живых противоверных молити, а о усопших не молити. глава, 84.

 

Из книги Кормч., глав. 3. прав., 14. святых апостол Петра и Павла [лист 28].

Творити усопшим третины во псалмех и в молитвах, воскресшаго ради тридневно и девятины на воспоминание сущих зде усопших: и четыредесят дней, по ветхому закону, якоже и жидовстии людие, плакашася Моисея ради. и на всяко лето память им творите, и от имени их раздавайте нищим, на воспоминание их; Сеже о благоверных глаголем. за нечестиваго же, аще и всего мира богатство раздаси нищим, никоеяже ползы сотвориши ему, ему же бо живу сущу, враг бе Богу; яве есть яко и по смерти; ибо несть неправда у Бога. праведен бо Господь, и правду возлюби. и се человек, и дела его, и ты воздаси комуждо по делом его.

 

[Ис книги Кириловой, от предисловия, лист, 15].

И спросто о всех человецех по повеленному нам от апостола глаголющаго молбы и молитвы творити. о еретикох же живых сущих токмо молити, о умерших же сих не молити; тако бо от святых отец указася;

 

[Соборник, лист 42. слово 2. Иоанна Дамаскина].

Григории убо Беседовник, старейшаго Рима епископ, муж якоже и ведят вси в святости, и разуме именит, емуже глаголют служащу небесным, с ним служаще и божественныи ангел. сей некогда по каменному пути шествие творя, и став со усердием молитву крепку к душелюбцу Богу о прощении грехов Траиана царя сотвори. иже абие гласу от Бога принесшуся ему услыша, сице рекшу, молитву твою рече услышах, и прощение Траияну даю. ты же не ктому приложи молитвы о нечестивых приносити ми. Выше [лист, 32]: Темже о несвященных, рекше о непросвещенных, не молитвует о усопших.

 

[Катихисис бол., глава, 12].

Вопрос. О всяцем усопшем церковь Божия умолит Бога.

Ответ. Веждь убо се, яко написаша нам божественныи апостол, туже идеже по усопших творити третины, и девятины, и сорочины, и летния памяти, и прочая их поминания, и рекоша тако. сеже о благоверных глаголем; злочестиваго же, аще и всего мира богатство раздаси нищим, никоеяже ползы сотвориши ему, ему же живу сущу, враг бе Богу, яве есть, яко и по смерти убо есть неправда от Бога, праведен Господь, и правду возлюби и се человек и дело его.

Вопрос. О инех убо кесарех, о Трояне, и о Феофиле, такоже и о оной сухой главе, юже Макарий египетскии, во благочестии своем вопроси, пособиша ли им молитвы церковныя, и как разумееши, слышат ли они и видят о том по смерти.

Ответ. Без сомнения получиша милость и из ада избавлени быша, о сем убо и летописцы церковныя пишут, и богоноснии отцы являют, обаче ктому и разумети достоит нам, как милость получиша, и коего ради дела получиша, и за которое моление получиша по всемирному ли законоположению, или божественными некоими действы по своей ему благости, зри да не смутит тя главизна сия, понеже не по всемирному законоположению быша сия, но прошения ради святых и праведных боящихся Бога, якоже глаголет во псалмех 144-м, волю боящихся его сотворит, и молитву их услышит, и спасет их, буди же и ты Нисийскии Григории, он бо Трояна за долгии мост из ада изведе, ты такоже по подобию ко славе Божии, по подобию вещь изведи, сице же и о избавлении Феофила, благочестивая царица Феодора, о нейже великая похвала бысть в соборней и апостольстей церкви, понеже сию святыми иконами украси, и православие утверди, и прочее о ней внемли, како потрудилася, и како к Богу с собою на моление подвигнула всех святых церковных иереов, таже и постников великих и пустыников великих, и пустынников всех, ктому же и милостыню нищим, даже до истощения царскаго сокровища раздая, к сему же и сама непрестанно пред Богом стоя рыдая и стоня, и слезы лия, и вопия, и в перси бияся, своего супруга избавити от ада, и от вечнаго мучения прося. ино то великое и страшное Божие чюдо оно всемирному законоположению, не имать предлагаема быти во свидетелство, паче бо Бог идеже хощет преходит чин, своя ему во своих есть, кто возбранит. а Макария преподобнаго отца преславное же и страшное чюдо, еже о воскресении мертвых еретическаго ради неверия содеяся, ино то не всемирное же законоположение, но дело Божие. о нем же сам Господь во евангелии глагола своим божественным учеником и апостолом, веруяй рече в мя дела яже аз творю, и той сотворит, и больша сих сотворит. Ниже: Такоже и вси друг за друга молимся, и о грешных яко и преже рех ти молюся, за нечестивыя же не ползует, ни моление, ни приношение, по апостольским завещанием, а о Траиане и Феофиле, отчасти явих чесо ради то было, яко ни предания ради законоположеннаго, но чюдеси ради и славы Божия.

 

Ис Триоди постн., синоксарь, в неделю 1-ю, велик. поста.

Сей убо Феофил, многи от святых отец, томлением и мукам. различным издав, икон ради яве честных. Ниже: И дванадесяте лет самовластвовав. и чревным недугом обьят быв, расторгнутися хотяше от живота, уста его паче зело отверзошася, яко внутрь утробы его являтися. Царица же Феодора болезнена о приключившемся бывши. едва ко сну обрящься. и во сне виде Пречистую Богородицу, младя держащу Превечнаго, святыми обьстоима ангелы. Феофила же тоя подруга от тех немилостивно биема и поругаема. яко убо отъиде от нея сон. и Феофил мало возведся возопи, горе мне страстному, святых ради икон биен есмь. и абие полагает на него царица Богородичныи образ, молящися со слезами. Феофил убо сице имея, виде некоего от стоящих ему икону носяща, похитив ю у него облобызаше, и абие, яже на иконы шатавшаяся уста, и бестудно зинувый гортань, в первое существо претворяшеся. и одержащия беды и нужи, пременися и усну, исповедав добро быти святыя иконы почитати и чести. Изнесши убо царица, от своих ковчежец святыя и честныя образы, лобызати и всею душею почитати Феофила устрой. Помале убо изчезает от жития сего Феофил.

 

Ис книги О вере, глава 13, лист 110.

Третины того ради творим. Первое, яко той человек иже преставится, крещен беяше во имя Отца и Сына и Святаго Духа, в Троице единаго Бога. и ныне того иереи и ближнии, за преставльшагося умоляют; Второе, являем сим, яко отшедый, света сего, храняше три богословския добродетели, в нихже спасение висит. веру, егда во единой святей соборней апостольстеи церкви, доконца живота своего, благообразне и терпеливе пребывал. надежю, егда в животе своем, и в молитвах, в Бозе все упование свое полагал. Любовь, егда Бога ради единаго и ближняго своего любил, яко себе самаго. Сим намерением и мы умоляем Бога, яко да по вере преставльшемуся воздаст мзду. яко да тоя надежди удостоит его. яко да возлюблена будет Богом душа та;

 

[Ис бесед апостольских, на послан. к филиписиом, беседа, 3, лист, 1883].

Не туне сия узаконоположена быша от апостол еже при страшных тайнах памяти бывати о отшедших. ведят им многое приобретение бываемое, многую ползу. егда бо стоят людие вси руце воздеюще, исполнение священническое, и предлежит страшная жертва, како не умолим о сих Бога просяще, но сие убо о иже в вере отшедших. А оглашеннии ниже сея сподобляются утехи, но лишаются всякия сицевыя помощи, разве единыя некия. коеяже сея; мощно есть нищим за них даяти: творит им некую прохладну вещь; [за оглашенных даяти милостыню]

 

Свидетельство от божественнаго писания каковым быти подобает изуграфом пишущим святыя иконы, иже благоговейным сущим, святии отцы быти, и лепо иконы писати определяют. глава, 85.

 

[Из Стоглава соборный ответ о живописцех, и о честных иконах, глава, 43].

А в царствующем же граде Москве, и по всем градом, по царскому совету, и митрополита, и архиепископом, и епископом брещи. о многоразличных церковных чинех, паче же о святых иконах, и о живописцех и о прочих чинех церковных, по священным правилом, и каким подобает живописцем быти, и тщание имети, о начертании плотскаго воображения, Господа Бога и Спаса нашего Iсуса Христа. и пречистыя Его Богоматере, и небесных сил, и всех святых, иже от века Богови угодивших. Подобает быти живописцу не празднословцу не смехотворцу, не сварливу, не завистливу, ни пияницы, ни грабежнику, ни убиицы, наипаче же хранить чистоту душевную и телесную. со всяцем опасением. не могущим же доконца, тако пребыти, по закону женитися и браком сочетатися, и приходити ко отцем духовным начасте, и во всем извещатися, и по их наказанию и учению жити в посте и молитвах, и в воздержании со смиренномудрием кроме всякаго зазора и безчинства. и с превеликим тщанием писати образ Господа нашего Iсуса Христа, и пречистыя Его Богоматере, пророк и апостол, и священномученик, и святых мученик, и преподобных жен, и святителей и преподобных отец по образу и по подобию, и по существу, смотря на образ древних живописцев, и знаменати з добрых обрасцов, и аще которыя нынешния мастеры живописцы тако обещавшеся учнут жити и всякия заповеди хранити, и тщание о деле Божии имети. и царю таковых живописцев жаловати. а святителем их брещи и почитати паче простых человек. такоже тем живописцем приимати учеников и их разсматривати во всем, и учити о всяком благочестии и чистоте, и приводити ко отцем духовным. отец же их наказует по преданию и уставу, от святителей како подобает жити християном кроме всякаго зазора и безчинства, и тако от своих мастеров со вниманием да научатся. и аще которому открыет Бог таковое рукоделие, и приводит того мастер ко святителю. Святитель же разсмотрив, аще будет написание от ученика по образу и по подобию, и увесть известно о житии его, еже в чистоте и во всяком благочестии. по заповедем живет кроме всякаго безчинства. абие благословит наказует, да и впредь благочестно жити, и святаго онаго дела держатися со усердием всяцем. и приемлет от него ученик той честь якоже и учитель его, паче простых человек, посем же святитель наказует мастера, еже ему не поборати ни по брате ни по сыне, ни по ближних. аще кому не даст Бог таковаго рукоделия учнет писати худо, или не по правилом завещанию жити, а он скажет его горазда и во всем достойна суща, и показует писание иного а не того, и святитель обыскав полагает таковаго мастера под запрещением правилным, яко да и прочии страх приимут, и не дерзают таковая творити, а ученику оному иконнаго дела отнюд не касатися. и аще которому ученику открыет Бог учение иконнаго писма, и жити учнет, по правилному запрещению, а мастер учнет похуляти его по зависти дабы не приял чести, юже он приял; Святитель же обыскав полагает таковаго мастера под запрещением правилным, а ученик же приемлет, вящьшую честь. Аще кто от тех живописцев учнет талант скрывати, еже ему Бог дал, и учеником того по существу не отдаст таковый осужден будет от Бога сокрывшими талант с муку вечную, аще будет от самех тех мастер живописцев, или от их учеников, учнет жити не по правилом завещанию, во пиянстве и в нечистоте и во всяком безчинстве, и святителем таковыя в запрещения полагати, от дела иконнаго отнюд отлучати. и касатися не велети, боящеся словесе реченнаго, проклят всяк творяй дело Божие с небрежением, а которые по се время писали иконы не учася, самовольством и самочинием не по образу, и те иконы променяли дешево простым людем, и поселяном и невеждам, ино тем запрещение положити: чтобы училися у добрых мастеров, и которому Бог даст, учнет писати по образу и по подобию, и тот бы писал. а которому Бог не даст и им вконец от таковаго дела престати, да не Божие имя таковаго ради писма похулится. И аще которыя не престанут от таковаго дела, таковии царскою грозою накажутся и да судят, и аще они учнут глаголати, мы тем живем и питаемся, и таковому их речению не внимати, понеже незнающе таковая вещают и греха в том не ставят; не всем человеком, иконописцем быти, многа бо и различна рукодельствия подарованна быша от Бога, ими же человеком препитатися, и живым быти, и кроме иконнаго писма. а Божия образа во укор и в поношение на давати. такоже архиепископом и епископом по всем градом и по монастырем и весем своих предел, испытовати мастеров иконных, и их писем самим смотрети, и избрати каждому их во своем пределе живописцев нарочитых мастеров. да им приказывати надо всеми иконописцами смотрети. чтобы в них худых и безчинных не было, а сами архиепископи и епископи смотреть над теми живописцы которым приказаны, и брегут таковаго дела крепко. А живописцев онех брегут, и почитают паче простых человек, а велможам и простым человеком тех живописцев во всем почитати, и честны их имети за то честное иконное писмо воображения. да и о том святителем великое попечение и брежение имети чтобы гораздыя иконники и их ученики писали з древних образцов и от самосмышления бы догатками Божества не описывали, Христос бо Бог наш описан плотию, а божеством неописан якоже рече святыи Иоанн Дамаскин, не описуйте божества не лжите слепии, просто бо невидимо и незрително, плоти же образу вообразуя покланяюся и верую и славлю Рождьшую Господа Девою. а иже от хитрых и гораздых мастеров живописцов укрыет который талант что ему Бог дал иных не научит и не укажет, да будет от Христа осужден и сокрывшими талант в муку вечную, и того ради живописцы учите учеников безо всякаго коварства, да не осуждени будете в муку вечную.

 

Ис книги Кормч. писм., глава, 124. Сказание о иконописцех, каковым быти подобает.

Подобает убо изуграфом, рекше иконописцем чистым быти житием духовным жити и благими нравы, смирением же и кротостию украшатися и во всем благое творити. а не сквернословцем, ни кощунником, ни блудником, ни пияницем, ни клеветником, ни иным иже последуют обычаем скверным. понеже на таковое дело святое таковым не повелено есть. якоже и древле рече Господь к Моисею, еже Весеила наполних Духа Божия, сей же Веселеил делатель бысть скинии свидений ветхаго закона, колми же паче подобает нынешния благодати писавшим образ Спаса Христа Бога нашего, и пречистыя Его Богоматере, и святых Его тщатися к восприятию Духа Божия. был бы иконописец хитр от подобии древних переводов и первых мастеров богомудрых мужей, имже от начала предано бысть. по объявлению коегождо где бывшаго чюдеси, или явления, а собою бы вново, не прибавливал ни единыя оты, аще убо и зело кто мнится смыслити, а кроме святых отец предания не дерзати. Аще же кто и зело имать быти хитр святых икон воображению, а живыи неблаголепно, таковым писати не повелевати. И паки, аще кто и духовное житие имать жити, а благолепно вообразити святыя иконы не может. таковым писати святых икон не повелевати же. но питатися им иным рукоделием имже хотят.

 

О том еже кроме святых икон правоверному иконописцу изуграфу ничтоже писати.

Аще убо кто на таковое святое дело, еже есть иконное воображение всяко сподобится искусен быти. тогда не подобает ему кроме святых икон воображати ничтоже начертавати рекше воображати еже есть на глумление человеком, ни зверия образа ни змиева, ниже ино что от плежущих, или рода гмышевска, кроме где любо во прилучившихся деяниих, яко же есть удобно и подобно;

 

О иконах иже над вратами поставляеми, глава, 125.

Над вратами домов у православных християн воображаемых зверей и змиев и никаких неверных храбрых мужей, поставляти не подобает, ставили бы убо над враты у своих домов православныя християня святыя иконы, или честныя кресты имже в дом входя и исходя, покланяемся и почитаем первообразное существо, якоже отцы наши предаша, себо есть правоверных знамение. Всего же сего подобает назирати и учити святителем, и иереом духовным настоятелем, якоже рече апостол, покаряйтеся наставником вашим, не послушающих, и непокаряющихся, со опитимиями запрещение налагати, якоже божественая правила повелевают.

 

Паки о иконописцах.

Достойных же иконописцев и сподобльшихся таковаго святаго делательства истоваго воображения и изряднаго жительства, таковых подобает честно почитати, и посаждати их на седалищах и на вечерях близ святителей с честными людми, якоже и прочих причетников;

 

Глава, 127, о том на коих вещех писати и воображати святыя иконы, и на коих не писати.

Писати святыя иконы и воображати, якоже и на седмом соборе святии и богоноснии отцы повелеша на всяком древе и камени, и на столпех и на стенах, и на сосудех церковных иже суть крепцы существом сиречь вещию. на стекле святых икон не писати, и не воображати, понеже сия сокрушителна есть вещь.

 

О том еже святых икон не отягчити ценою сребра.

Подобает же се ведати, честным изуграфом рекше иконописцем, иже аще благоверно жительство имать. ктому же истоваго подобия воображению от древних богомудрых изуграфов подражати сподобилися еси. ктому же и меною сребра да не отягчит святыя иконы, но доволен будет от имущаго прияти на пищу и одежду и на рукоделие шаровнаго запасу.

 

О том [что] еже не оскудити изуграфа.

Такожде и всякому православному християнину, имущему веру написати, коего любо святыи образ, подобает ему неоскудно удоволити честнаго изуграфа. якоже должно и удобно, да не стужает о неких нужных потребах нань.

 

Из выписки Феодосия пустыника.

Божественная служба иконное воображение, от святых апостол начало прият, подобает священнику и иконописцу чистым быти, или женитися и по закону жити. понеже священник служа божественными словесы составляет плоть, ейже мы причащаемся во оставление грехов, и иконописец вместо словес начертает и воображает плоть и оживляет: имже покланяемся первообразных ради любве державне, а не служебне. и будет случится им впасти в явленныя скверны, обои неприятны. и яко же сказует седмое правило, и достоит быти священнику и иконописцу свободным а не работным, и повнегда изучитися и начертати от ветхих знамении и налепок. приходит со иконою на свидетелство к патриарху, или к митрополиту, или епископу, и будет икона воображена добро свидетельствуют житие его и благословляет его иконы писати, и то благословение вместо поставления ему бывает, и жити добродетелно. А будет нехудожно воображает, и взяти понем порука, что впредь не писати ему, и учитися иному рукоделию;

 

Ис книги Матф. Иеросалимскаго состав глава, 2. о изографии сласти ради душа врежающей.

Сторичное шестаго собора правило [собор 6, прав. 100], зографию рекше живописанию безчестна, яже зрящих к безместным поощряют сластем. на стенах начертавати отричет всячески, понеже чювства удобне не внемлют яже теми зримая, яко и слышамая, в душу пущают и вревают. Сего убо ради, и очи твои праве да зрят, премудрость рече, и всяким хранением соблюдай свое сердце;

 

Яко от рук иноверных написанных икон не приимати. и в руки иноверных святых икон не предавати. глава, 86.

 

Ис Кормчей писменнои от послания Исидора пустынника, ко Евсевию епископу Полисиискому, глава, 126.

От неверных иностранных римлян, и германов немец. иконнаго воображения православным християном приимати не подобает, аще ли по некоему прилучаю от древних лет обрящутся в наших странах верных греческих рекше, или руских, а вообразуема будет после расколу церковнаго, еже греком с римляны. и тогда аще и зело иконное воображение есть по подобию, и хитро. поклонения же им не творити. понеже от рук неверных воображени суть. аще и по подобию но совесть их нечистоте подлежит. о таковых бо Павел глаголет, божественныи апостол. ко Титу посылая сице: вся бо чиста чистым. оскверненным же и неверным ничтоже чисто, понеже осквернися их ум и совесть. Бога исповедуют ведати, а делы отмещут Его, мерзскии суще и непокоривии. и всякому делу благу неискуснии. а неверным иностранным, паче же рещи нечистым и поганым арменом, святых икон не писати. и на сребро и на злато не меняти, понеже не в почесть но в поругание святыня предавати грех есть. писано бо есть не дадите святыя псом;

 

Из книги Симеона Фесалонитскаго, от главы 23. о латынех.

Святыя иконы кроме предания иным образом многажды живописуют. Ниже: И не во образ первообразнаго и изображение, и кроме благоговения же живописуют их и украшают, еже противно святых икон есть паче. Ниже: И еже чина не благочестно, и отцы сие не приемлют.

 

Из Кормчей писм., от слова Иоанна митроп., Ник. на армен.

Аще бо тмократицею: [армени еретики] прокляти бывше, и диаволу предани: како от анафемы, от клятвы благословение изыдет: или како от диавола духовное и святое дело совершается; а от анафемы благословение не бывает, и от проклятия молитва не исходит. и от диавола Христово таинство не совершается. Ниже: Ни паки от ереси, или от неверия духовное действо исполняется. Ниже: Аще и тщатся несмысленнии и неразумнии и неутвержени, и лживии християне, яко истинная и благоприятная творити деяния их.

 

От послания Фотия митрополита во Псков, в лето, 6927.

А еже на кресте имени не будет, тому не кланятися. а не поругатися ему ниже разоряти таковых;

 

О прочитании со испытанием, божественнаго писания. глава, 87.

 

[Евангелие от Иоанна, глава 5. зач. 17].

Испытайте писания, яко вы мните в них имети живот вечныи.

 

Глава, 14. зач. 48.

Аще кто любит Мя, слово Мое соблюдет, а не любяй Мя словес Моих не соблюдает.

 

[От Луки зач. 58].

Блажени слышащии слово Божие и храняще е.

 

[От Иоанна зач. 45].

Слово еже глаголах, то судит ему в последнии день.

 

Послание 1, к Тимофею святаго апостола Павла, зач. 285.

Внемли чтению, утешению учению и пребывай в них.

 

Ниже: Притчи, глава, 16.

Сотове бо медовнии словеса добрая, сладость же их исцеление души.

 

[Беседы апостол. в деян. нравоуч. 19].

Велия воистинну вещь есть писаний прочитание. несть исчести когда ума писаний, источник некии есть неимущии конца.

 

К коласаем, нравоучение, 19.

Стяжите книги, целбы душевныя, аще печаль случится, приими утеху злобе.

 

[Книга Иоанна Дамаскина, 4, глава 18].

Да исчерпаем от того раю источники вечныя, и пречистейшия струя, источающия живот вечный, понеже благодать бесконечную имеют.

 

Псалом, 140. в толку.

И не изобретай себе вины к небрежению душеспасителных Божиих заповедей, сия бо есть губителница всех добродетелей, и всепагубная души погибель.

 

[Патерик Иеросалимский].

Иже добрая дела присно делает, той радуется слыша словеса закона Божия, яко пользу и хвалу беседуют ему книги, а иже нечистую жизнь живет, той не хощет слышати, и не любит почитаемаго от них, хулу бо ему беседуют, но хотяй спастися, со усердием прочитовает послушает и делает.

 

[Книга Алфа].

Обаче от еже не испытовати нам со смирением и правым помыслом день и нощь воли Божией от святых писании, уклоняемся от пути праваго к мирскому всяко и плотскому хотению и мудрованию, и далече бываем от Бога.

 

Беседы на деян. [лист 389].

Сон налагает диавол послушающим учении божественных.

 

Никон Черногор., от слова 63.

Вопрос. Часто слышаще слово Божие, и не творяще е убо под осуждением ли есмы; Ответ. Аще и не творим, и невозможно есть не укаряти себе, егда слышаще преслушаем, часть же спасения есть еже себе укаряти.

 

Каф., 17.

Разжено слово твое зело.

 

Афанасии.

По Божий законе живущий яко огнь слово Божие разгарается.

 

От предисловия Алфы книги.

Сия вся разсудив возлюбленне восприими ползу от святых писании, бежи от всепагубныя лености, да не гладом душа твоя умрет, и да нераскаяватися имаши вотще вовеки, потщися стати противу врагов борися и побеждай мечем духовным, живо бо слово Божие и действо и острейше паче всякаго меча обоюда остра, точию со страхом и смиренною мудростию, испытай и почитай со вниманием, а не нерадиво, обрящеши велию ползу, и путь правый своему спасению, и победу на враги видимыя и невидимыя, удовлеешися сим, и образ благ покажеши себе всем зрящим к ползе, и от погибели греховныя в покаяние, и от смерти в живот от истления в нетление от многообразных и различных непрестанных мук, в неизглаголанныя и присно пребывая водворения радости небесныя ихже да сподобит нас Господь Бог милосердием своим получити.

 

[Никон Черн. гор. слово, 8].

Велико зло еже неведати писания, и якоже скот безсловесен обноситися, ибо от сего безчисленная злая раждаются от неведения писания, от сего небрегома, и неисправлена жития, и прочая.

 

[В толку, псалом, 118].

Егда что о вещах духовных глаголеши, человеку душевному, словес не разумеет, и сладости в них не почювает, есть ему вещь неудобна в горести мыслей злых, получити сладость словес Христовых, якоже бо кто в велий сосуд отцу мало меду положит, мед погубит, оцту же не осладит, тако и человеку плотну что благо глаголати словеса погубиши, похотения же его к вещем временным не измениши, понеже в себе не имать ничтоже блага от естества бо своего, человек хощет еже известити сам себе и еже мнит благо быти, покажи бо волку траву или цветы, ничтоже о сем нерадит. от естества бо своего не имать ясти травы, покажи же волу мясо, тажде нерадит, понеже не естество его ясти мясо, такожде егда человеку плотну о небесных вещех глаголеши, не имать хотения до сего, но аки камень наньже дождь падает звне мокр, внутрь же сух, блага бо прияти его невозможет, такоже и человеку сице егда слово Божие глаголеши, толико глас словеси биет звне плотныя уши его, не приходит же в сердце его и того ради диаволу удобь сие семя позобати возможно при сицеве пути.

 

[Деянии, нравоуч., 29].

Сия вся написана быша к наказанию нашему, да внимаем якоже подобает внимати, что всуе себе прельщаем, боюся да не о нас речеся, яко изчезоша в суете дние наши, и лета наша со тщанием.

 

[Ефесеом бесед. 21].

Да не речеши сие, иноков есть, наипаче бо мирским нужно есть, яже отсюду ведати учения, наипаче же детем.

Ниже:

Воспитаем их в наказании и научении Господни, дадим им образ от перваго возраста во чтении писании творяще их упражнятися, увы яко часто сия глаголя, буесловити непщуюся, но обаче непрестану еже мое творя.

 

[Святаго Исака Сирина, слово 2].

Упраздни себе всегда в поучении чтении божественных писаниих, во известне смотрении, да не виною праздности ума осквернится зрение твое, в туждых помыслех блудных.

 

Псалом, 18.

Вся словеса Господня истинна и оправданна.

В толку.

Ничтоже бо злато или камение драгое ползует человека, якоже словеса Божия и заповеди и сих кождо верныи желает и тщится сподобитися, и слаждьша паче меда и сота, медовная сладость временная, а словеса Божия вечна паче всех вещей и богатств, имамы хранити словеса и повеления Господня.

 

[Псалом, 118].

Открывает Бог тайны своя и просвещает человек, не токмо единым писанием, но писанием и истинным сказанием его, того ради отмещущии сказания святых отец и учителей согрешают Богу.

 

Святыи Петр Дамаскин.

Всяко сказание писания непорочно есть, и несть должен кто писания укаряти, но всею силою соблюдати сия якоже лежат, а не якоже той хощет, якоже еллини июдеи и еретицы творяху, негодующе рещи что есть невем, от мнения и самоугодия писания и естество вещем укаряху, и по мнению своему разумеваху, а не по совету Божию, сего ради прельстишася, и на всяко зло уклонишася, иже разум писания укаряет да поставит разум свой, несть безумнейша, от сего на земли.

 

Беседы еванг. на Матфея, нравоуч. 47.

Услышим елицы прочитании нерадим, колик претерпеваем вред колику тщету когда бо жительство еже делы восприимем иже ниже самех законов ведяще, по нихже жительствовати подобает.

 

Святыи Григорий Синаит, глава 137.

Суть убо списующих словеса по великому Максиму. образы различны, 1. памяти ради своя. 2. еже ползы ради иных, 3. еже, послушания ради списующий, имже множайшая от писания сложена быша, ихже смиренне взыскавшим слово, а еже ко благоугодию и славе, и за еже видетися добродетелем его словеса списуяй, отстоит рече мзды своея, ни едину же ползу имея зде, или мзду в будущем, но яко человекоугодник и лстец корчемствуя слово Божие осужден будет.

 

Псалом.

Не уведеша ниже разумеша во тме ходят.

 

Златоуст.

Свет дневый слово есть книжное, а егоже лишися безумныи, аки во тме ходит, и погибнет вовеки. Вонми яко пчела жадает на многоразличныя цветы, и собирает сладость медвенную, и славима цари и князи, и силнии величаются, а прочии ко здравию прилагают, тако и ты человече, почитай святыя книги, и собереши себе словеса Божия яко в мех воды морския, и будеши Богу любим, и от всех человек славим. Птицам даны крыле, да бежат сетей человеческих. а человеком даны божественыя книги, да бежат козней диавольских, зло же отнюд и погибель души, еже не почитати книг. слыши како ти хулит нечтущая книг. проклятий уклоняющийся от заповедей твоих, и зле осудятся, учение свет, а неучение тма.

 

В предислов. к римляном беседы апостольския.

Якоже бо света лишеныи сего, непросто шествуют, тако невзирающе к лучи божественных писании, много понуждаются и часто согрешати, аки во тме вселетнейшей шествующии. еже да не будет, отверзаем очеса к сиянию святых писании, ибо паче солнца просиявают с любовию чтущих и хранящих заповеди Господня.

 

Из благовестника, от Иоанна, зач. 27, в толк. [лист 125].

Мнози убо мнеша веровати но не якоже рече писание. а якоже тии своим изволением последоваша тии вси еретицы.

 

Из евангелия неделнаго, в 4 неделю поста. [лист 81].

Тако бо и всяк человек братие, иже не глаголет, ниже слушает божественная словеса, бесом лукавым содержим есть. и вметает его бес, иногда убо во огнь ярости и вожделения. иногда же в воду смущения, и обуревания и прочих страстей.

 

Ис того же, в неделю, 23. [лист 337].

Якоже бо телеса наша временная, земленая плодоприношения и частая и различная питания, укрепляют и умащают. тако и душ наших духовная словеса напитовают, и веселием и благодатию исполняют. обаче же телесная питания скончеваются, и во тление отходят. пища же духовная, сиречь святых писания поучения и наказания нескончаемо веселие имут и нетление даруют нам, и вечныи живот и наслаждение.

 

Из книги о вере, лист 2. от предисловия.

Посла глад на землю, не глад хлеба, ни жажда воды но глад неслышания слова Божия, иже далечайше тяжчайшии телеснаго, имже от истиннаго познания удаляемся.

лист, 3.

И по Златоусту, и святому Никону, от еже не ведети нам божественная писания, впадаем в сети дияволи, и погибели предани бываем; поне еже уведети токмо подобает, но и соблюсти и сотворити слышанное. от празднаго бо слышания никая же полза. еретицы бо, и беси слышат, но развращенно.

лист, 4.

Яко в настоящая сия времена последняя, по грехом нерадения нашего, велик пламень злохитреных и многоглавных ересей разгореся, от сего же мнози от правоверия в зловерие уклоняются, видяще толикую бурю облежащую на нас, ругателей различных, многохулных супостатов. и сие им дерзновение от неискуства нашего и неутвержения, яко неготов имамы мечь духовныи [по апостолу] еже есть глагол Божии, и не поучаемся ни тщимся по верховному [ефес. 233; 1 Пет. 60], готовы быти присно к ответу вопрошающему нас, и не токмо ко ответу, но и нецыи не сведят в чем православнии от отпадших разньствуем.

Лист, 7.

Тем аще хощеши правую веру познати, советую ти божественному писанию внимати.

 

Маргарит, слово, 3. [лист 266].

Велие утвержение ко еже не согрешати, писании прочитание. велия стремнина и пропасть глубока, писанием неведение. велие предателство спасения, еже ничто же ведети от божественных закон. сие и ереси породило есть, сие и житие разстленное введе. сие и горняя доле сотвори, невозможно без плода кому отъити часто чтения наслаждающуся с пристоянием.

 

Ефрем. [лист 255].

Сие убо веждь брате, яко внегда же аще беседуеши, в божественных книг писании, освящаешися. потщися часто беседовати в них.

 

Соборник, лист 448 на об.

И капля убо каплющая одолевает камень. тако и почитающии часто святыя книги разрешает духовныи соуз.

 

Кормчая, лист 568.

Тать и разбойник, не от писания глаголяй.

 

Петр Дамаскин.

Велие безумие есть, еже оставити глаголы готовы и глаголати моя.

 

Из книги преподоб. Никона Черн. гор. от слова, 27, в послан.

Се бо есть злых злейших ходатайствено погибели, глад же крепок по пророку не хлеба и воды, но еже слышати слово Божие, или паки сущу слову Божию, несть отверзаяй, уши во еже слышати, якоже аспида обычай имать творити затыкающии уши свои, яже не услышат гласа обавающих, си, якоже рече Великии Василии в постных его, яко горше судится паче ведущих и не творящи, и паче аще есть истинно. увы мне окаянному, слышу но от неких нынешних непщуемых мудрых несущих же и глаголющих, яко ниже слышати прочее невоздвизаема погребеная совесть, во отчаяние совершено приводит неслышащих, се есть страшное еже да не будет Господи в нас ни во искренних, но аще и не сотворим, понеже послушание божественных писании, и не нерадим. за еже яже от бесов прелести и вражебных человек убежати предания злаго, и се начало спасения есть, и наставление спасаемых во спасение, и не приемлем советники иже во внешнее учение наказанныя, и от плотскаго мудрования, и от воздушных духов лукавьствия, паче в таковое поспешьство имущии, яко да во вред ведут душу.

 

Ис Пролога, апреля, в 1 день. от слова Иоанна Златоустаго.

Мнози непочитанием божественных писании, с праваго пути совратишася, и заблудивше погибоша, инии же и книги почитающе, несовершен имеяху разум, такоже и тии с праваго пути совратишася. Богу попустившу величания ради их, зане разум приимше, а правды не творят по самохотению

Ниже.

Птицам бо того ради криле даны, да сетей человеческих избежат. а человеком книги, яже всю неприязнену лесть обнажают.

 

Маргарит, слово, 13.

Дерзайте убо яко не уморит Господь гладом душа праведных, откуду бо в них глад губяи душа; не от книжнаго ли неиспытания; испытайте рече писания, яковы мните имети живот вечный.

 

Той же слово, 4. лист 284.

Но яко да и отонуду навыкнеши, яко достовернейши есть пророческое учительство, от воскресающих возвещения. оно смотри, яко мертвец убо всяк раб есть. А яже писания вещают, сия Владыка провещал есть. темже аще и мертвец воскреснет, аще и ангел, с небесе снидет, всех да суть писания достовернеиша.

 

Книга о священстве, глава 2. слово, 4. лист 126.

Сего ради многое подобает творити тщание, даже слову Христову в нас вселитися богатно, не противо единому бо виду нам брани приуготовление, но упещрена есть сия рать. и от различных збираема врагов. ниже бо оружиими вси действуют теми же, ниже единем сражатися с нами поучишася художества образом. И подобает яже противу всем восприяти брань, всех видети художества. И потомужде стрелцу быти, и пращнику, и чиноначалнику, и десятоначалнику и воеводе, и пещцу, и коннику, и кораблеборцу. в воинских убо бранех, яково любо кождо их на ся дело приимет сим противу находящим ратует, здеже сие несть, но аще не вся поряду умеяй будет художества виды, хотящии побеждати, веде бо диявол единою страною аще кая небрегома есть, разбойники своя внутрь введет расхитити овца.

 

[Из книги о вере, лист 215].

Тогда сущии во июдей да бежат на горы. на сие евангелское место, Златоуст святыи толкование творит сими словесы. иже суть во християнстве, да прибегают к писанию. ибо от того времене, ереси церковь возмущати начаша, ни единаго иного истиннаго прибежища, иже правость веры хотят познати; кроме божественнаго писания имети не могут. прежде бо многи образи быша, к познанию истинныя Христовы церкве, и поганских синагог, сиречь соборищь. а ныне никаковым иным образом познати можем, кая бяше истинная церковь, разве точию от писания. сие чесо деля; понеже вся вещи иже суть свойствене, и истинно Христовы, и еретицы имут в раздрании, подобныя имут церкви. такожде святаго писания, подобныя епископы, и иныя в духовном чину клирики, подобное крещение, подобныя святости [бескровныя жертвы], и ины вещи вси наипаче же самого Христа. хотя же познати кто кая бы бяше истинная Христова церковь, откуду познати ю имать в таковем подобенстве мешаний, разве точию от писании, к сему же от обычаев и поступков. прежде бо Христова церковь познаваема бяше, егда сообщение всех, или многих християн бяше святое, иже у нечестивых не обреталося а ныне таковыми же еретицы и нечестивии, или горшими быша христиане, зане у них большее обретается воздержание, аще и в разорваний, нежели у християн. кто же хощет познати кая бяше Христова церковь, откуду ю познати имамы; не ежели от святаго писания. Ведая вся сия Господь, яко таковое будет в последняя дни смятение повелевает, яко иже суть християне хотящии вправду во христианстей вере утвердитися, ни к чесомуже иному да бежат, точию к писанию; аще бо на ино что взирати будут, соблазнятся и погибнут, неразумеюще какая бы была истинная Христова церковь. Дозде словеса святаго Златоустаго, имиже образ нынешних времен правее и истее изобразив яве о том ведати да есть, яко в них избраннии, Божии по благодати Его святей, болшаго утешения и подтвержения паче сего еже от святаго писания, и прилежнаго в нем испытания. Что же полза от прочитания божественнаго писания; яко да познает и уведает добре яко всякому человеку подобно есть знати истинную, а не смышлену церковь, но единую небеснаго Жениха чистую и нескверную Невесту. ибо кто не познает ея, како в ней и при ней в таковем велицем обуревании пребудет. а кто при ней не пребудет, и в ней не обрящется, той и вечнаго онаго и блаженнаго по временнем сем житии живота наследити не может. кто паки онаго грядущаго блаженства, и уготованных избранным Божиим радостей и веселия сопричастен будет; каковое паче сего горчайшее неблагополучение; и кую болшую паче повреждающую тщету подъимет таковыи: аще бо глаголет Сын Божии, приобрящет человек мир весь, а душу свою отщетит, кую ползу приимет; от таковыя неисповедимыя тщеты от всех мер несовершеннаго не благополучия, чтобы ты православныи читателю устерегся, все свои о временном покои и сладостех, советования на сторону отложив, о сем всем самом попечение имей днем и нощию, яко да в познаной и приятой на крещении правде, живот свой богоугодно в православней вере скончати могл, имея всегда в памяти апостольская словеса, аще мы или ангел с небесе благовестит вам, анафема да есть. и оную Духом Святым в церкви устроеную песнь воспоминая себе. Ненавидящии Сиона, тии посрамятся от Господа, яко трава бо огню вечному будут иссохшая. К сему же соборныя клятвы на прилагающих что во исповедании веры, или отъемлющих, отбегая, от душепагубных преступников церковных, униятов, от ихже прелести сохрани нас Господи, и даруй в православии угодившим Тебе спастися, аминь.

 

О еже не всегда тойжде везде, приимати во указ писания но во свое время. глава, 88.

 

Апостол, к коринф. 2 зач. 173.

Писмя бо убивает, а дух живит.

 

[Афанасия Александрийскаго].

Нужно есть божественная писания разумети хотящим истязовати со многим опаством плоды и лица и ум глаголющаго. многа убо от божественаго писания аще по писмени разумеют, в неключимая впадают. еже бо плоды Духа истязует с прилежным опаством сокровенных в божественнем писании, сего Дух живит. неразсуждая сего, но по писмени разумеваяй сего писмо умерщвляет. и того ради многия во ереси различны падают. Наипаче же сие приемлется о законе ветхом, он же убиваше, благодатныи же закон животворит, и спасает.

 

Из Библии от предисловия. [лист, 1].

Сего чистая, и пречистая уста рекоша, и повелеша возлюбленныи читателю. испытовати писания, и обретати в нем живот вечныи. и апостолом бо верховныи, воспоминая веру, и спасение рече [1 Пет. зач. 58], и испыташа пророцы. о сем же и скипетродержавный пророк Духа Святаго исполнь. се предваряя глаголя [псалом 118]. вразуми мя рече испытаю закон Твой. непросто же, но и сохраню и всем сердцем моим. Знаменай сия словеса со вниманием, и искусно разумей и отверзи умныя зеница сердца твоего, и остави тщеславие, и самомнителное мудрование. земно, душевно, и бесовско, не свыше сходящее. [Ияков 3, зач. 55] но горняя мудрствующе, разумей словесем Господним, яко не просто читати повелевает но и испытовати, испытавши же и сохранити. могущая же вместити, невместимая церкви с верою предлагати. она же не обыче заблуждати. читание бо писменое умерщьвляет, испытание же духовное оживляет. [2 кор. 3, зач. 173] инако же мудрствующе прельстишася мнози, и на пути погибели сташа, сие же молю да никтоже от чтущих, и слышащих ожестит. не ко всем бо речеся, но токмо к ненаказанным, и неутверженным, приникшим закону Господню утро, в вечер же учителми зватися изволяющим. искусных же и благоразумных в писаниих в божественых, и в добродетелех, прилежно молю, да и аз недостойныи от них наказан и исправлен буду. якоже бо здравии не требуют врача [Матф. 9, зач. 30], тако и искуснии сицеваго возвещения. но понеже не вси искуснии, ниже вси читают со испытанием и вниманием, от нихже и заблудиша мнози.

Ниже. Тебе же вторицею молю не прогневатися мои сверстнику, ненаказанныи добре, и неутверженыи. рече бо божественыи пророк [псалом 118]. коль сладка гортани моему словеса Твоя и паче меда устом моим.

Ниже. [лист 2 на об.]. Ты же читающе сладость божественых писании блюди удицы снести самозаконныя прелести. многи бо суть бесовския козни, и прелестнича соблазны, умягчают бо словеса своя паче елея, и та суть стрелы.

Ниже. [лист 3].

Паче же, и наипаче блюдися буих, и ненаказанных стязании, ведыи яко рождают свары. [псалом 54; 1 Тим. 2, зач. 294; Тим. 3] рабу же Господню неподобает сваритися, но тиху быти ко всем учителну, и незлобиву, с кротостию наказующу противныя. скверных же тщеславии отметайся, наипаче же преспеют в нечестие. Блюстижеся достоит от творящих распря и раздоры. [к рим. 11, зач. 121] таковии бо Господеви нашему Iсусу Христу не работают но своему чреву.

 

Ис книги преп. Никона Черн. гор., в послании.

Такоже и божественным писанием последовати. и обаче божественным, яко многа суть писания, и божественна не суть. И тако аще со опаством, от Бога вемы разумети та правде инакуюждо вещь приемлем подобающая. ащели ни, паче неведущих писания, горши же и паче подобающаго сия приемлющей обретаются. всяка бо прелесть и ересь, сице введена бысть житию, от еже комуждо неведети праве. но якоже восхоте и умысли, прият божественная писания.

 

От слова, 8-го.

Глаголют же и се отцы, яко всяка новаго и ветхаго завета богодухновенная книга о себе разрешение не имать. аще не отцы святии божественным исполняеми Духом яко же лепо есть Спасу скажют. тако якоже пишет. Сего ради споспешествующу нам Господу, и пречистей его матери, молитвами же святых отец елика и возмогохом божественных писании сказания в сей книзе трудолюбно составихом, яко да сия к вашему уведению имамы, да некако наречие просто блюдуще божественых писании. самыи же иже в них сокровенный ум яже неведяше в различныя ереси и прелести ползнемся.

 

От слова, 18.

Но якоже глаголют отцы яко невозможно есть праве мудрствующему, и благочестне живущему оставлену быти когда впасти в срамная согрешения, или прелесть бесовскую. елицы бо растленным разумом, или недугом человекоугодия и презорнем помыслом проходить мнят добродетель, сии в согрешения впадают. и сей есть отеческии устав о сих, якоже предрекохом. Глаголет божественное писание [Ияков 51], яко кождо привлачится, и прелщается от своея похоти и по своей воли желает кто быти воля его и от сего обращается еже разумети вся по своей похоти и по своей воли, или божественное писание, или отеческая словеса, се от возношения бывает помрачаему бо сердцу от возношения, непщуя видети ничтоже свесть.

 

От слова, 20.

Яко сице падение бывает, начинает бо злое от мала, и предидет в среднее. и тако восходит в совершенное. пощади нас Господи. и обаче таковая, якоже и Великии Василии в первом своем правиле, в три чины положи. в раздоры же, и сонмища и ереси, и сице рещи, якоже и инде является образ раздор, сонмища, и тогда ересь. и первое убо образ еже творит кто от образа яко же се добро. Таже отделяется от прешествовавших списании, и последующих им, и по своему умышлению, и своей воли последует, и потом свое учение не свидетельствовано книжным свидетельством, и тех сказанием, иже Духом Святым от богоносных отец сказанным, кроме сих сонмище составляет о себе, и тако ересь свершенне составляется, или о вере, или о деянии. Ересь бо якоже мню готовословится, о еже волити, и еже изволи и волею восхоте, и не приемлет, и не последует преданным божественным и законным писанием, от святых отец изложенным Святым Духом.

 

От слова, 28-го.

Ниже мощно есть смотрителная, во обдержная свидетелства приводити. яко да ради смотрения и подражании, и един от другаго и человеческих преданий, рушишася, вся небрегома быша божественая писания от христиан. и паче рещи погублена быша вся, и сего ради предани быхом языком.

 

От слова 38.

И яко юродство и прочия подобныя образы яже содеяша нецыи от отец. ныне возбранена бысть от тех же отец. яко смотрителна. яко да не бывают ктому.

 

От 1-го слова в заповедех.

Яже бо отчасти смотрителне некоего ради слова содеянная, или глаголанная, недостоит восприимати, во обдержная и законная свидетельства.

 

От слова, 2.

Но яже по смотрению глаголанная или бывшая объятно на всяко время приемлем главою имамы снити, и горняя долу будем. якоже и нецыи недобре испытавше ни праве разумевше сокровенный ум божественных писаний, в различная грехопадения устремишася.

Ниже. той же.

Прежде убо Бог в ветсем завете, сам жертвы повеле творити и законоположи сыновом израилевым. такожде и гусли и свирели и тимпаны и ина таковых многа. Не бяше воля Его всегда тако бывати. но смотрение бе временно, якоже от божественых писании навыкохом.

 

[Ис книги Многосложнаго свитка, лист 164].

Якова бо ересь в кое время востает, тогда таковых и словес на возбранение потреба есть. егда убо писанием недугующаго уврачевати возможно, тогда от писания и глаголы представляются. егда же не от писания врачюется недугуя и кривоверием, тогда не от писания и глаголы ему представляются, вем всячески быти по апостолу, да всяко негли возмощи ко здравию возвати.

 

[Бесед. апостол. лист 298].

Яко указания не вся повсюду достоит приимати, но потребное их избравшим и на неже приемлется, прочее все оставляти.

 

[Никон Черногор. слово 2].

Преподобныи Иоанн Лествичник глаголет, есть убо егда иного лечьба, иному же смертоносие бывает, и есть и тожде томужде во свое время приносимо лечьба спасителная бывает, не вовремя же паки смертоносие бывает.

 

Еклисиаст, глава 3.

Год и время всякой вещи под солнечною;

                                          

О том яко неподобает с еретики о вере беседование творити. и о привсеянии еретическом в православная предания своя еретическия догматы. глава, 89.

 

[Из бесед апостольских, беседа 30, от зачала 278, лист 2371].

Да запретиши некоим, рече, не инако учити, ниже внимати баснем и родословиам бесконечным. что есть бесконечным. Сиречь конца никоего имущим, или ничтоже полезное, или неудобь нам постижимое. Видел ли еси како укоряет стязании; идеже бо вера, не требе есть стязания; идеже ничтоже подобает испытовати кая потреба стязания; стязание вере есть разорителное.

 

Ниже: нравоучение, 1. [лист 2373].

Да не внимаем убо стязаниям, вернии бо сего ради нарекохомся, да несомнителне глаголемым веруем, да ничто сомнимся. аще убо человеческая быша глаголемая подобаше та истязовати: Аще ли же Божия почитати точию тая подобает и веровати им. Аще ли неверуем, ниже яко Бог есть уверуем.

 

На послание Павла апостола к Титу, беседа, 6. зач. 302.

Еретика человека по первом наказании и втором отрицайся, ведыи яко развратися таковыи, и согрешает сыи самоосужден.

Ниже. Егда бо кто будет развращен, и аще на что любо буди, произволив приложити разум, чесо ради туне труждаешися на каменех сеяи, подобает труждатися добрым сим трудом на твоих, юже, от милостыни беседуя им, и ино добродетели; Како убо другойцы глаголет, егда когда, даст им Бог покаяние. а зде еретика человека по первом наказании, и втором отрицайся, ведыи яко развратися таковыи и согрешает, сый самоосужден; тако убо о имущих надежду исправления, глаголет и о нападающих просто. егда же ведом будет всем и явлен, чесо ради труждаешися туне, почто воздух биеши; Что есть сыи самоосужден, не имать бо рещи, яко никтоже рече, никтоже наказоваше. егда убо послежде наказания, сам останет самоосужден бывает.

Ниже. [лист 2702].

Неисправляемаго глаголет еретика, якоже бо еже надежду имущих пременением презирати. лености есть. сице и еже неисцелная нудугующих исцеляти, безумия есть и последняго изумления. безстуднеиши бо содеваем их.

 

Послание к рим., от зач. 121. [лист 497].

И что сотворим таковая злойдействующим. Не рече дерзостию ходите, и бийте но уклонитеся от них. Аще бо убо от неведения или прелести сие творили быша. достояше исправляти. елмаже волею ведуще согрешают, отскочете. и инде же сие глаголет, отлучайтебося рече от всякаго брата бесчинно ходяща.

 

Ис книги преп. Никона Черн. гор., от слова 25. к магистрату послан. 3.

Понеже от иноплеменник держимы есмы, хранися небеседовати с некоим неимущим правую веру. аще кто от таковых вопрошает тя, еже беседовати. се точию во ответ да есть тебе. яко аз чином от простых людей сыи, в таковых мудрствовати нелепо ми есть, но несвойственно есть устроение моему и неподобно. соборней церкви паче сия подобна суть.

 

[Беседы апостольския, лист 571].

Егда убо в премудрости словес, бывает указание, множицею злейшии обладают кратчайшими, силнейшии глаголати суще и лжа изгоняет истину.

 

Ис книги Зиновия мниха Отни пустыни, глава, 48.

Неподобает правоверным о благочестии со еретики беседы творити.

 

Беседы апостольския. [лист 1464].

Неподобает же любопрящимся онеми от истины отступати, но аще и безчисленно неистовствуют меры благочестия нам блюсти нужно есть. На поле: Не любопретися с еретики.

 

Канонник о християнском житии.

Яко некто от святых написа глаголя: кривое правило и праваго искривит, сиречь самочиник и своеволник, иже и правая аще обрящет по развращенному его устроению приемлет сия.

 

Патерик.

Рече авва Маркел сохрани себе от еретик, и не беседуй с ними, еже обратити их на веру, да некогда яд словес их вредит тебе.

 

Степен., грань, 8. глава, 6. князя Александра Невскаго.

Некогдаже приидоша послы к великому князю Александру, из Великаго града Рима, от папы глаголюще сице. тако глаголет папа наш. слышахом тя князя честна и дивна, и земля твоя славна и велика. сего ради послахом к тебе люди избранны от двунадесять гординалу, два хитрейша, Галда и Гемонта, да послушаеши учения их. великии же князь Александр совещав с мудрецы своими, и исписав к нему от Адама и до потопа, от потопа, и до разделения язык, от разделения же язык, и до начала Аврамля, и до пришествия сынов израилевых сквозе чермное море. а от исхода сынов израилевых, до умертвия Давыда царя, и от начала царьства Соломоня, и до Августа кесаря. а от Августа кесаря, до рожества Христова, и до страсти и до воскресения его. и до вознесения его на небеса. и до царства Константина Великаго царя. и до перваго вселенскаго собора святых отец. а от перваго собора. до седмаго. сия вся добре сведаем, сия суть в нас учения, сице мудрствуем. иже во всю землю изыде вещания их и в концы вселенныя глаголы их. якоже проповедашася от святых апостол Христово евангелие, во всем мире. по сих же и предания святых отец седми соборов вселенских. и сия вся известно храним, от вас учения неприемлем, и словес ваших неслушаем, они же возвратишася во своя си ничтоже успевше.

 

Из той же степенныя, и гран. 11. глава, 8.

Во дни христолюбиваго великаго князя Иоанна Иоанновича, державствующу великому князю Симеону, при митрополите Феогносте. тогда бысть в Великом Нове граде архиепископ Василии, муж подвижен, и прилежание имея неуклонно, еже бы всюду исправити слово Божие, и истинное, к нему же посла в Нов град, свейскии крал Магнуш, чернцов своих глаголя. изберите у себе философов и пришлите их на уреченное место, и мы такоже своих философов пришлем яко да прятся о вере, и уразумеем лучшее. и аще ваша вера лучше будет, то и аз с вами буду единоверен. ащели же наша лучше вера будет. сице вы с нами будете единовернии. ащели же сего не сотворите, и с нами во едином начальстве не будете и того ради хощу вас ратовати. архиепископ же Василии, ведыи лукавственное того коварство, яко от начала отлучения их, многажды со многими верными, многа прения бываху им; и множицею препрени быша, и истине непокаряхуся. и того ради ответ сотвори им сице. аще хощете претися о вере, то идите в Царь град к патриарху, и тамо сопрение обрящете. мы от грек прияли православную веру юже соблюдаем, и святыя законы ея якоже прадеды наши, и деды, и отцы, и мы такоже держимся, а не премся нискемся. вемы бо яко сия наша вера права есть, и истина. ащели же кая обида будет межи нас, о том пришлем и управление сотворим, а о вере не премся. понеже всегда препираеми есте, и непокаряетеся истине.

 

Ис книги Максима Грека, от слова, 10. о спорносеянии еретиков.

Да навыкают сице вси, яко обычай есть обще вкупе, зломудренным еретиком. привсеяти во своих писании, некия догматы благочестивыя. да сим образом достоверна являются, и благоприятна бывают. от православных списуема ими хулная. сего ради, и всех Бог и Владыка составная премудрость Отчая, Господь наш Iсус Христос ведыи таковых злохитрие. преутвержает своя ученики, и ими всех нас верующих вонь. и завещавает крепце глаголя внимайте от лживых пророк, иже приходят к вам во одеждах овчих внутрь же суть волцы и хищницы убо от плодов их познавайте.

 

Ис книги Кириловы, лист 307.

И учения их или обычаи или законы и нравы многим неразсудным человеком красна и сладка быти мнятся; но всяко неистинна, и горка вконец обретаются, и вечной муце ходатаи бывают. истина бо упестрения не требует, обаче же сластолюбивым неблагодарна являются.

Ниже. [лист 346]. Разум же глаголет, истинныи разум по божественному писанию. а не по премудрости мира сего, велеречием и краснословием льстивне преобижающе ближним; и вместо Божии правды. свою правду ищуще поставити. Таковый бо разум суетный, и неразумие есть паче, нежели разум. о немже апостол пишет глагола. Аще кто в веце сем мнится мудр быти, буй да бывает. яко да премудр будет.

 

Максим Грек. [лист 364 об.].

Но добро убо и воистину достолюбно словес внешних ведение, но елико к навычению еже праве глаголати, и к нарушению разума и очищению, а не во обретение божественных догмат, и в разсуждение.

 

Преподобнаго Иоанна Дамаскина, книга, 4. глава, 18.

Аще что и от внешних приплодствовати возможем, неотреченно есть. будем искусни торжницы, и трапезницы, искринее убо чистое злато грамаждающе. растленная же отмещуще. примем словеса добрейшая. боги же смешныя, и басни чюждыя псом повержем. множайшую бо от тех на тыя крепость стяжати возможем.

 

Свидетельство от послания страдальцев пострадавших от Никона патриарха и его учеников, о новодействуемом крещении, и о прочих тайнах. яко от них отметахуся оныя. такоже и бегствующии. котории древняго рукоположения бяху иереи не приемляху. глава, 90.

 

От епистолии священнаго страдалца Феодора диякона.

А которыя попы от Никона отступника поставлены, и от никониан после мору, паче же от 174-го году. егда совершено православие все отринуша древняго предания святых и богоносных отец оболгаша их, и льстивно охулиша. нечестие же всякое прияша и оправдиша и укрепиша. и новоразвращенныя богомерзкия книги со многими нечестивыми ересьми в них и всех еретиков похвалиша. крещение римское, и священство их гнусное прияша. ихже вси святии отцы наши прокляша, и от святыя церкве отметаша понеже Рим всех ересей приятилище. и источник всякаго нечестия латынское мудрование богомерское. тем отступлением своим и с латыни сообщением, чюжди себе сотвориша архиерейства, по священным правилом святых апостол, и богоносных отец седми вселенских соборов и девяти поместных, и поставлении от них попы и диакони неосвященни суть по правилом. вси они отступницы глупи, и поставлении от них каиному суду подлежат и анафеме. и православным христианом ныне неподобает их благословения приимати ни службы, ни крещения, ни молитвы. и в церкви с ними не молитися. ниже в дому, то есть часть антихристова полка. от исполнения церковнаго самоволне отсекшеся. и все их действа и вера в прелести содержима суть и укрепляема не любовию Святаго Духа и не советом но гордостию сатаниною и мучением различным.

 

Из послания священоинока и страдалца Феоктиста.

Аще бо от еретик рукополагаемыи, и от слуг антихристовых; кое от таковых освящение, или очищение или крещение, или всякия потребы благоприятны бывают. рцы ми содействует ли Дух Святыи еретическому рукоположению еже на них; никакоже, но паче осквернение, а не очищение. и о том в Кирилове книге пишет, во многих местех, сице. еретическое крещение, несть крещение, но паче осквернение. и посему свидетельству святых отец, и всяко действо еретическое, несть освящение но паче осквернение, аще бо и в покаяние приидет познания ради истины, то неосвящена его мню, понеже бо Дух Святыи на нем не действовал. но за простьца его и мирянина в братство причитаем.

 

Из втораго послания к патриарху Иоасафу страдалца Лазаря священника.

А крещение в новых книгах не истинно есть, и то есть тайное отрицание, яко в молитве глаголют, молимся тебе дух лукавыи, помрачении помыслом и мыслей наводяи. но ты владыко всех. а печать на миропомазании таиньства христианскаго вся оставлена. а круг купели ходят, и отвращаются на шуюю страну. и се образуют яко отводят людей от десныя еже есть от Бога, на шуюю же страну уклоняются, еже есть ко диаволу приводят. Василии же Великии глаголет, креститися подобает нам якоже прияхом, а веровати тако яко креститися. яко от крещения запечатлеется в нас истинна. аще кто крещен будет неистинно, и како таковыи по крещении может веровати во истину.

 

Из большия епистолии отца Аврамия страдалца.

Нынешнии отступницы ученицы окаяннаго Никона повелевают нам отврещися печати Творца небу и земли. еже есть истиннаго крестнаго знамения, и святыя прежния службы, и святаго крещения. понеже бо не во истиннаго крещают, не во истиннаго и веруют, но в ложнаго антихриста.

 

Из малаго послания Авраамия страдалца.

А о крещении [сиречь новом] реку вам, первое символ православныя веры от лица крещаемаго, 3-жды. глаголется превращено, во имени Iсусове литера прибавлена, и в Духа Святаго крещаемыи истиннаго непроповедает, емуже и по крещении во истиннаго Бога веровати невозможно.

 

Ис послания паки страдалца Феодора диякона.

А от новых ставленников, аще и по старому служат, отнюд неподобает благословения приимати по правилом ни мала ни велика. понеже от еретик поставлени и неосвящении, но осквернени суть от рук их.

Ниже. А богомудраго старца Спиридония преподобнаго слова писанныя на еретики приемлите как и прочих богословцов святых Григория и Василия, и Дамаскина Иоанна, и иных. тот же истиныи Параклит глаголя в нем отце Спиридоне и пророк бысть, что он говорил про собор отступничей, так и збысться все. и на мне его пророчество збысться не едино что преставляяся глаголал мне. чюден муж бысть делом и словом и в премудрости, инаго таковаго ныне несть.

 

Ис книги богомудраго старца Спиридона Потемкина, иже богоугодно [в заточении] пожив в Покровском монастыре на убогом дому, и преставися ту, во 173, году, месяца ноября в 2. день, Слово 2.

Всяк имеяи в себе ересь и хуление чюжь Бога является, и всуе Христа именует, по реченому. не всяк глаголяй Ми, Господи Господи внидет в царство небесное. но мнози услышат не вем вас. Евномиева бо ересь меньши всех зрится, зане во едино погружение точию крещают, со еллины осуждаются по святым правилом, а хулники на Святыи Дух како явятся, непрощенным бо нечестием недугуют. и несть им ни части ни жребия во кресте Христове, ни во смерти Его, ни в воскресении Его, отрицающибося перваго воскресения, како во второе возрадуются. блажен бо рече и свят, иже имать часть в первом воскресении на сих бо смерть вторая не имать области. и прочая. но глаголют канакулы, мы веры еретическия ни единыя не приемлем; но крещения их не отвращаемся. потому что крещают во имя Отца и Сына, и Святаго Духа. такожде и священства характир не изглажен имут. Оле безумия омраченных, како глаголете веры не приемлем, а крещения не отвращаемся у него же вера зла, како крещение добро может быти. такоже и священство, аще бо рече будет в дому сын мира. то почиет на нем мир ваш. ащели же ни то к вам возвратится, глаголет Господь. и правила святых апостол, и собор под Киприаном ефес. и всяк епископ, или презвитер, приемыи еретическое крещение, или жертву, абие несвящен. и чюж христианства. правило святых апостол глаголет: един бо есть Господь едина вера, едино крещение. темже яко несть мощно обрести другаго бога. разве единаго. аще и мнози суть глаголемии бози, по апостолу; но един есть истинныи, а глаголемии ложни суть вси. такоже и вера едина есть истинная, а глаголемии веры, ложни суть вси. такожде крещение едино есть истинное, аще и мнози суть крещения глаголемая, но едино есть истинное. а глаголемии якоже от еретик все крещения ложни суть, и чюжи христианства. тако сатана вас прелстил незнати, ниже взыскати истины; Кто Бог есть разве единаго живущаго в Сионе; Кая есть вера, разве единыя положенныя в Сионе. и кое иное крещение, разве единаго истиннаго положеннаго в Сионе. И коим разумом богословия велит им знати едино истинное крещение, а не разньством разума. Всяк бо иже не знает единаго истиннаго Бога во Святой Троице единаго, еллин есть по своему злочестию, и всяк не знаяй единыя истинныя веры яже во Святую Троицу единаго Бога, еллин есть по своему злочестию. И всяк не знаяй единаго истиннаго крещения, еже есть во имя Отца и Сына и Святаго Духа, во едино божество. а не в ересь не во Ариево злочестие, ниже в Македониево злохуление. Имеяи бо злочестие в вере, чюж христианства. Кто может благочествовати в крещении, како просветитель, како послужит вода рукам вражиим. всяк бо зловерныи, враг есть стихиям. аще и повинул есть Господь суете тварь неволею, но вся тварь воздыхает и болезнует, чающее свобождения, да не работает врагом Божиим по писанию. истинным точию другом Божиим. истинно во Святую Троицу крещающихся, с радостию работает тварь, ащели же кто любо от еретик крещается глаголя: во имя Отца, и Сына, и Святаго Духа. неверует яко Святая Троица есть, Отец и Сын и Святыи Дух. Бог един есть и равночестен и единосущен и сопрестолен, а не два ниже три бози. яко бо блядословят еретицы ариане и македоняне, и прочии: или яко новыя македонияне непрощенным нечестием недугующии, хулницы Духа Святаго истиннаго к таковых действу не снидет благодать. Но добре глаголют святых отец правил, яко еретическое крещение, несть крещение. но осквернение. и помываися с еретики чюж будет христианства. Помоливыбося с еретики, свою молитву глаголя, а не еретическую, но понеже тех молитвам приобщился есть свою молитву, и того ради отвращается Бог, не точию молитвы, но и христианства его. множае паче гневит Бога крещение от еретик, яко еретицы суть крещающии, в злую свою веру крестят. хулящее Бога во Святыи Троицы единаго. Какова их есть вера мерзска Бог, таково и крещение, на неже никогдаже не призрит Бог ниже действует, но якоже еллинов, и июдеов отвращается. такожде и священство еретическое, несть, священство, но мерзость запустения. Видя ибо враг разнозлобную погибель человечскую, яко равно есть еже от церкви отпасти, и в ересь уклонитися. сице и от еретик что приимшу чюжду быти христианства. не моги кого привести к себе на ересь какову любо буди, то сам глаголет прими мя с моею ересию, и злоковарным советом ухищряет слово. Яко крещенныи от еретик, крещен есть, и освященныи, освящен есть. и теми двема злобами, злоковарно настоит истребити ис церкви, истинное крещение, и истинное священство, да лестию введет в злочестие, и ухитри свою мерзость запустения по писанию. Но горе приемлющим сия от злоковарных крещение, или священство, и лучьше бы им не родитится, сиречь умрети во утробе матерни.

 

От ответов дияконовых о бегствующих древняго рукоположения иереов.

Вопрос, 58.

Попы ваши в прежняя лета, по соборному приговору старцов и мучеников ваших, от нашея церкви приходящих к вам крестили совершенно в три погружения, и теми попы, старцы и мужики кои приговаривали им тако крестити непокаявшеся о таковом законопреступлении и умроша. Православнии ли суть они, или нечестивии по правилом святых отец;

Ответ, 58.

Аще кии оставшии древле православныя церкве попы, в прежняя лета, крещенных по новопечатным книгам, сумнишася приимати за оным крещением, ради пременения чина, и ради прочих, новодогматствовании и премен объявленных в 1-м, и 4-м ответех, а наипаче негли от оных попов, кии велми дерзаша гнати, мучити хулити за древлецерковное старопечатных книг содержании мы тыя древлепрапвославныя священники нечестивыми осудити за она не смеем. Понеже по сказанию священноинока Матфея Иеросалимскаго сказателя священных правил. Священномученик Киприан со священным собором, крещенных от всякаго в раздоре сущих повелеша крестити; А Василии Великии, воспоминает сие речение, в похваление убо положив строения же ради праздность на ня изрек, а нечестивством за сие не оглагола. сих ради и мы за новодейства усумневшаяся о тайнодействиях, православныя священники недоумеем нечестивством осуждати.

 

Книга Пращица новопечатная, Питирима нижегородцкаго.

А еже воспомянути прешедшая лета, отселе назад лет, 25. то по оному изложению, вы вси противни, мало не вси, всех к вам приходящих крещенных, совершено крестили. Исидор поп козмодемьянскии, по нем совершено крестил. и дворянин Феодор Кокмачев. такоже крестил. Посем Феодосии поп крещенных паки крестил, совершенно. посему же и прочии прельстившияся такожде много крещенных паки крестиша, в лето;

 

О том яко печать есть християнства святое крещение. глава, 91.

 

Благовестник от Луки, зач. 79. лист 165.

Елико крестихомся, во Христа, во Христа облачимся. и перстень даруют на руку, печать христианства.

 

В житии Варлаама и Иоасафа, мин. чет. ноября в 19 день.

В день той вонь же крестити его хотяше, сотвори к нему поучение таково; се хощеши прияти печать, и светом знаменатися лица Божия, и сын быти Божии, храм же Святому и животворящему Духу.

 

В Потребнице в чине о святем крещении, пред крещением глаголется в молитве.

Яко да по заповедем Твоим пожив, и сохранив печать нерушиму. и проч.

 

В житии святаго священномуч. Феодора епископа Киринейскаго.

И елицы прияша от святаго Феодора печать крещения.

 

Благовестник, от Иоанна, зач. 36, лист 170.

О Христе бо Iсусе несть еллин ни жидовин, ниже различия коего; един бо образ всем, и едина печать крещения.

 

Лествичник, лист 84.

Есть же печать убо святое крещение.

 

Генваря во 2 день, в предпразнество Крещения, в трипесньце, на павечернице. песнь, 8. стих 1.

Вас оглашает, избрание тогда разумею, аще моего дарования печать вообразится в вас, трисиянныи облистающии свет. ко крещению Христос слово рече.

 

О печати антихристовой, и о приемлющих ю, и о отрицании креста, и Христа, и крещения Христова. глава, 92.

 

От новопечатныя книги Жезла. часть, 1. [лист 65].

Ибо сицевым «+» воображением креста Господня вся тайны церковныя действуем. воду ко крещению святому сицевым креста видом благословляющее освящаем, елей такоже, и отрочата мажюще елеом и миром святым. не иныи крест точию четвероконечныи изображаем. сицевым крестом просфира на заклание агнца уготованная благословляется, и в самых таин тела и крове Христовы совершение сей же образ креста употребляется. сим супружество составляется, и священство благословляется не иным образом самися знаменаем, и иныя благословляем. тако елеем больныя мажем. церкви посвящаем, ястие и питие благословляем словом рекше, вся священная действуем четвероконечнаго креста образ творящее.

 

Книга камень веры, о кресте, часть 2. глава 3. [лист 253].

И что более [Стефан Рязанскии глаголет] имам возглаголати, не крестом ли, вси христиане знаменуются, не осмоконечие но четвероконечие крестное на себе воображающе. не четвероконечным ли знамением крестным вся таинства церковная благословляются и освящаются, и навершаются; не крестом ли четвероконечным яко знамением Христовым и печатию Духа Святаго, при крещении нашим – в миропомазании знаменани есмы.

 

Книга Розыск, о кресте.

Якоже Христа Сына Божия любим и исповедуем, и веруем в Него; сице и святыи четвероконечныи крест, яко Его истинныи почитаем и лобызаем, и тем знаменаемся и печатлеемся в миропомазании, яко истинною печатию Христа Бога нашего. тем вся таинства навершаем, и людей православных и трапезу благословляем и всюду себе четвероконечным крестом ограждаем.

 

Книга Увет, лист 128.

Посему разумейте, о противнии, [тако древняго благочестия любителей нарицают окаянии] яко святая восточная кафолическая церковь мати наша, изначала от обычая держит предание апостольское неписменное, еже треми первыми персты десныя руки, воображати на лице и на персех знамение честнаго креста сице: Понеже порождает нас водою крещения во имя трех ипостасей, а во едино божество, Отца и Сына, и Святаго Духа. Дозде новомудрствующих учителей словеса.

 

Апокалипсис печатной. лист, 82.

Креста или Христа отвержение чрез антихриста соделати тщится.

 

Соборник, лист 127.

Повсему убо хощет уподобитися льстец Сыну Божию. Лев Христос. лев и антихрист. Явися Христос агнец, явится и антихрист агнец, внутрь сый волк.

Ниже. Даде Господь знамение иже в него верующим честныи крест и той подобне даст свое знамение.

 

Той же, лист 131.

Таково нечто и придобру ненавистнице будет, отрицаюся глаголюще печати Творца небу и земли, отрицаюся крещения, отрицаюся службы моея, и тебе прилагаюся и верую.

Ниже. Вси бо во еже бежати и скрытися тщатся, и нигдеже возмогут убежати с пути сопротивнаго, но знамение его обносящеся, удобь ведоми и знаеми тому явятся.

 

Апокалипсис, зач. 26, стих 5.

А еже умни прузи уязвляют человеки по подобию скорпиов, являет яко наконцы лукавых деянии, сокровенна есть душевредная смерть. ейже подлежат незнаменаннии на челех божественою печатию, и просвещением животворящаго креста. чрез Духа Святаго необлистаеми.

 

Книга о седми тайнах церковных. [лист 780].

Якоже Адам древом паде, древом же крестным и оживе, в кончину же века сего, крестнаго же древа вкушением падение будет занеже поруган будет тричастныи крест; и отъято будет царское подписание. еже есть Царь славы.

 

Апокалипсис глава 17, зач. 54, стих 8. сказание. [лист 81].

Зверь егоже видел еси бе. и несть зверь, сатана есть. иже убиен бысть крестом Христовым, паки при кончине ожити глаголется, действуяи, знаменми и диве сами прелестными чрез антихриста, отвержение и запрение креста.

 

Стоглав, глава 32.

Аще кто леностию, или невежеством, неисправляет креста на лицы своем, то отмещется и креста Христова, и предается дияволу.

 

Апокалипсис трех толк., глава, 26.

Иже глаголет, неимут печати Божия, сиречь. невернии, не крестившиися во имя Отца и Сына, и Святаго Духа. и не знаменаннии знамением честнаго креста. над сими власть имеет диавол.

 

Псалтырь толков., псалом 34.

Да облекутся в студ и срам велеречющии на мя. Толков. Елицы во Христа крещаются, иже в правду и премудрость. А иже в сотону погружаются, облачаются в студ и срамоту.

 

Апокалипсис, глава 42[зач. 42?], стих 173[10?]. в толк.

Аще речет кто озверившемуся тому антихристу повинется, и нечестиваго житие содержит, или словом или делом Бога нарицает, себо сказует на руце и на челе даемое начертание, и той причастится с ним испити чашю мучения нерастворена милостию Божиею. чван же еже от различных мук вина ярости Божия. нарицаются хождение во след нечестиваго вина, иже упоявает пиющая. имже бо кто согрешает тем и мучен будет.

 

Кирила Иеросалим. от главы. 5, лист 60.

Но Христов противник яко во всем, тако и в том противится Христу, и востающе с шуия, против десныя, сиречь дающе силу свою надесную, тоже Христово, а шуее бо антихристово, обратився по своему на десную, совершити знамение свое. или на челе дает. Якоже о нем пишет глаголя, даст им знамение на правую руку их и на чела их.

 

Из минеи Макария митр. Москов. августа 1 день. о аллилуи.

Несть бо ино что печать антихристова разве неполагати десницею на челе. незнаменовати честнаго и животворящаго креста Христова, то есть печать антихристова.

 

Ефрем, слово 105. [лист 298].

Вонмите братие великую злобу зверину, ков и лукавство яко от чрева начинает да егда кто оскудеет брашна лишен, то понудится печать его прияти, и даст ему свою печать скверныи. не просто же на всех удех тела, да не негодуют, но дает на руце десней человеку, такоже и на челе мерзскии образ, да области не имать человек знаменатися десною рукою знамением Христа Спасителя нашего.

Той же. [лист 303]. Яко вси приемшии печать антихристову, и поклоньшеся ему яко богови святому. не имут части во Христово пришествие, но со змием вложени будут в геену.

Лист, 305. И ведом будет мучитель связан от ангел. со всеми демоны пред судище, и ведоми будут вкупе с ним, приемшии печать его и вси грешницы, и нечестивии связани. и даст царь на них осуждение, вечныя муки во огни негасимом.

 

Ипполит, папа римскии, в слове своем глаголет, лист 131.

И вси тесноты ради пищныя к нему приидут, и поклонятся ему. и даст им знамение на руце десней и на челе, да никтоже честныи и животворящии крест сотворит десною своею рукою на челе, но связана рука его будет. и оттоле власти не имать знаменати своя уды, но прелестнику приложится и тому единому послужит, понеже таковому покаяния несть, всяко убо яве погибе от Бога и от человек. и дарует тем льстец малы снеди, печати ради своея скверныя. печати же его иже на челе и на десней руце есть число шесть сот и шесть десят и шесть.

 

О том, яко покаянием единем без крещения очиститися не может человек. и яко покаяние по крещении согрешающим бывает. глава, 93.

 

Беседы апостольския, лист 2855.

Ниже бо покаяние довлеет на очищение, но потреба крещение восприяти.

 

Благовестник, от Матфея, зач. 48, лист 99.

Прежде бо крещением очищшуся: потом же второму крещению несть надежды разве покаянием зело трудно.

 

Катихисис болшей, глава 64.

Вопрос. Что есть покаяния тайна; Ответ. Покаяние есть вторая дщица по разбиении крестилнаго корабля, и нуждно потребная тайна согрешившим в нейже оставление грехов о повиных испрошается.

Глава, 60.

Вопрос. Кая нам потреба святаго крещения; Ответ. Сия потреба, да егда человек грешен будет, немогии покаянием грехов своих избавитися. благодатию же Христовою во крещении очистився будет христианин.

 

Ис книги Альфы и омеги, глава 53, буква П. О покаянии.

Душеспасенное покаяние, еже есть второе крещение.

Ниже. Что убо несть ли покаяния рече, есть покаяние, но крещения несть. Второе крещение покаяние есть.

Выше. И аще не было бы оставлено, покаяние не бы спаслася всяка плоть.

 

Собор. [лист, 15].

Ибо благодать и оставление. еже в крещении младенцы мы приемлюще, во гресех возрастающе, осквернихомся то, и угасихом. ради же слез, и даже до старости, и до последняго дыхания, на всяк час крещатися, и очищатися может.

Лист, 512.

Обаче убо и Петр [во отречении] тогда чюя плакатися нача. и непросто плакася, но горце, второе крещение слезами сотворив, источники испустив от очию слезныя. но плакався тако горце заглади грехи своя.

 

Ис книги Григория Богослов., слово 2. На Крещение Господне, ст. 3.

Вера совершается крещением и предходит исповеданием ко спасению.

 

Ис книги Никона Черн. гор. слово 51.

В крещении Бог туне прощает согрешения, и не ищет ничтоже разве веру. в покаянии же грехов яже покрещении не туже прощает, но ищет труды и скорби, и печали и умиления и слезы и плачь время много и тако прощает.

 

О клятве еретичестей. и о отлучении их. яко аще и святитель паче воли Божии отлучает, непоследует ему божественныи суд. глава, 94.

 

Библия бысть, глава, 12.

Рече Господь Авраму, благословлю благословящая тя, и кленущая тя проклену.

 

Никон Черныя горы, слово 7.

Егда входите в дом глаголете мир дому, и аще ту будет сын мира, мир ваш да почиет на вас. ащели же не будет достоин, мир ваш к вам возвратится; занеже не обрести достойна себе, множае паче неблагословение клятва возвращается на главу неправедно ту посылающаго, и яко неповинну сущу оному приятию. к нему послана бысть. всяк убо всуе проклинаяи себе проклинает.

 

Ис книги преподобнаго Иосифа Волоцкаго. от послания преосвященному владыце суждальскому, и старорускому.

Аще еси господине ко мне писал. аще прокленет еретик христианина, последует ли ему божественныи суд. То еретическое проклятие в проклятие ли или нивочтоже, ино сам ты господине ведаеши. что мнози еретицы христиан прокляша непоследова им божественныи суд, но клятва их на них возвратися. аще и патриарх или митрополит или епископ еретик прокленет, непоследует ему божественныи суд. и многа обрящеши свидетелства о сем в божественном писании, Диоскор еретик патриарх Царя града с Евтихом собраша собор с единомудреными себе епископы, и прокляша блаженнаго Флавиана патриарха Царя града, и непоследова им божественныи суд. но сами прокляти быша от Бога и от человек. А блаженныи Флавиан со всеми святыми причитан бысть. Потом же Копроним с патриархом своим с единомудренными себе, епископы прокляша, великаго Германа и всех поклоняющихся святым иконам, и сами прокляти быша. а блаженныи Герман со апостолы и патриархи и исповедники причтен бысть; Виждь, яко непоследует еретическому проклятию божественныи суд. но сами еретицы проклинающе христиан, себе проклинают.

Ниже. Проклинаяй христианина сам проклят, и мнози еретицы прокляша христиан, непоследова им божественныи суд, но сами прокляти быша.

 

Из книги святаго Дионисия Ареопагита.

Сущее. Сице отлучителныя имут святители силы. Толкование. Силы глаголет яже от Бога данныя тем искусы и суды, имиже отлучают и избирают грешныя от праведных, или супротивное.

Сущее. Яко возвестителным божественным оправданием не яко тем безсловесным устремлением, прямо богоначалию похвалне рещи служителне последующему. но яко тех учителне подвижну службоначалнику Духу. сужденных Богом. по достоинству отлучающим. Толк. Яко аще паче воли Божии отлучит святитель, непоследует ему божественныи суд.

 

От постничества, Великаго Василия.

Аще творит кто кого без благословения быти безвременно, сам да будет без благословения.

 

О еже яко неподобает неволею и нуждею к благочестию приводити. глава, 95.

 

Из евангелия в неделю 3-ю поста, евангелие от Марка, зач. 37. [лист 66].

Рече Господь своим учеником, иже хощет по Мне ити, да отвержется себе и возмет крест свой, и вслед Мене да идет.

От толкования. Не рече бо Христос, яко или хощете или нехощете но сотворите се и пострадати, глаголю вам и понуждаю воследовати Мне. но иже хощет и изволением грядет, той да идет вослед Мене. Не томлю рече, ниже понуждаю, но всякаго оставляю властеля изволения своему. на благая бо призываю человеки приити на царство небесное и бесконечное. на присныи покой иже убо хощет, или муж, или жена, или нищ или богат или началник или последнии, сим добрым путем да грядет, и последует Мне. аще же кто нехощет, ниже достоин есть последовати Ми.

 

Из благовестника на тоже евангелие.

Виждь же яко аще не рече аще и нехощет, кто да умрет но иже кто хощет, никогоже бо рече нужду, но на благая зову, а не на злая. темже иже кто нехощет, ниже достоин есть сих.

 

Из благовестника от Матф. зач. 69, лист 69.

Тогда Iсус рече учеником своим, иже хощет по Мне ити да отвержется себе, и да возмет крест свой и последует Мне. От толков. Рече же иже хощет, да покажет ему, яко самовластна есть добродетель, а не по нужди. Вслед же Iсуса ити, не токмо исповедати его Сына Божия, но и вся лютая страдати и терпети по Нем.

 

Генваря во 2 день; от жития Селивестра папы Римскаго. о крещении св. и великаго царя Константина.

И бысть радость велика верным, ихже толикое уже множество бе в Риме, яко хотящу изгнати от града всех нехотящих быти христианы, но царь запрети народу глаголя: нехощет Бог наш да кто неволею и нуждею убежден к нему приходит, но еще кто волею, и благим намерением приступает к нему, о том он благоволит и милостивно приемлет. убо якоже кто хощет, тако да верует свободно. и да не гонит един другаго. тем царским ответом, множае возвеселишася людие. яко свободно всех жити оставляет, коегождо при своей вере и волней воле.

 

Из бесед апостольских, на посл. к ефесеом, от главы, 4. нравоуч. 11. [лист 1694].

Не обладаем вашею верою о возлюблении, ниже властельскии сия повелеваем. во учение слова изведени есмы, а не начальство, ниже на область: советников чин содержим поучающих. свещеваяи глаголет, яже от себе, не понуждая послушателя, но оставляет и, глаголанным изволению властелина.

 

Февраля в 4 день. от жития преподобнаго Исидора Пилусиискаго.

Подобне и ко Аполонию епископу пишет суть созданны. да имут волную волю, неизволяющих и сопротивляющихся, ко благочестию нуждею привлекати несть прилично и неподобает; того ради пецыися, благим советом, и твоим добрым житием, и добрыми нравы, сущих во тме просветити.

 

Ис книги о вере, от главы, 2. [лист 59].

Святыи Иоанн Златоустыи в беседе, 23. пишет, церковь истинная сия есть яже гонения претерпевает. А не та яже других изгоняет;

 

О пустыницех, неимущих за удалением священства, ниже видимых церквей. глава, 96.

 

Ис книги преподобнаго Ефрема. слово, 111. [лист 343].

Славу юже поют в горах же и в вертепах, жертва благоприятна приносится Богови. сами суть священницы себе, и исцеляют наша недуги молитвами своими.

Выше. [лист 340]. Совершени суть и исполнены правды, зане суть уди церковнии. не разлучают себе от стада, зане чада суть святаго просвещения. не закон разоряют, неприемлюще священничество держати, заповеди хранят, не противятся закону, тепли суще верою. егда же предстанут честнии священницы святей трапезе, службу принести тии первее простирают руки своя, приемлюще с верою тело тогоже Владыки. и воистинну иже присно с ними сущаго.

 

Афанасия Великаго в толк. притчей.

Вопрос. 24. Котории суть истиннии поклоницы, иже ниже в горе оной. ниже во Иеросалиме, но духом и истинною кланяются Богу. Ответ. Сии суть, иже в пустынях и в горах, и в вертепех, и в разселинах земли живуще, иже кроме собрания церковнаго, делы благими бежественным Духом просвещаеми, духом и истинною поклоняются Богу и Отцу нашему, иже есть на небесех. непорочно живуще, и Богу благочестно мудренно служаще, во всяком благочестии и чистоте добродетелей сияюще, и не требуют церкви, или места, но сами себе храмы творяще благими деланьми, на всяком месте, и везде. благоугождают Богу. непрестанно и чисте Ему служаще, вся дни живота своего.

 

О том, еже ясти неподобает со оглашенными. глава, 97.

 

Ноябрь в 25 день. От жития святаго священномуч. Климента епископа Римскаго ученика святаго апостола Петра.

Темже прииде к воде себо едино огня устремление угасити может. и не ожидаи яко ожидание беду приносит, занеже не явимо есть смертное прихождение;

Ниже. И се рек, и брашнам вкусив, мне же оприснь вкусити повелев. благословив же при брашне, и благодарив наведе глаголя. да и ти Бог повсему подобитися мне. и крестившутися, сея со мною вкусити трапезы, си рек молчати повеле.

Ниже. Сего ради и тебе мати молим, да ихже благ сподобиховеся сих и ты приимеши, да вкупе брашен и трапезу вкусити возможем.

Ниже. Петр начат прежде навед глаголати. поведати ти хощу жено, нашея веры житие, мы единаго Бога чтем сотворшаго мира егоже се видиши. и Того храним закон, предержащии в мертвых Того чтити единаго, и того свящати имя чтити же родителя и целомудрити. жити же правостию. к сему же разноличь живуще, трапезы поганых неприемлем, еже се. ясти с ними немогущи, занеже нечисте живут. обаче егдаже я покорим истинныя смыслити же и творити же крестивше я в треблаженное некое имянование тогда с теми водворяемся. Понеже аще и отец или мати или жена, или чада, или брат, или ин кто от естества любовь имея с тем ясти смети не можем верою бо полезне се творим, не руготы убо мни, еже не ясти тебе с сыном, дондеже аще яже его творити наченше и смыслити. она же слышавше рече, что убо возбраняет ми днесь креститися. яже преже тебе видения, глаголемых Бог отвратит помыслом сицевым.

Ниже. Не рече ни един кии день непричастна будет, отнележе восприях своя чада не ясти с ними. си убо и нам с материю помолившимся. Петр рече, что рече, что мните, аз ли един есмь не имея усердия, яко нехощу вам, да ясте с материю крестив ю днесь. но поне един день пред крещением поститися ей подобает.

 

Яко неподобает с противоверными целование имети, ниже иной коей дружбы. глава, 98.

 

Из мин. август 11, день, от страдания мученицы Сусаны девицы.

И видев Клавдии девицу прослезися от любве и радости, и хотев ю объемши любезне лобзати. она же возбраняше и отвращашеся от него глаголя, нескверни уст моих.

Ниже. И глагола Клавдии, аз тя от сродныя любве лобзати хотех, яко внука еси мне, девица отвеща: не иныя ради, яко уста твоя, идольскими жертвы осквернена суть.

 

Из мин. чет. Макария митр. Москов. глава 36; от жития преп. отца нашего Феодосия игумена Печер. От ответов на вопрос благовернаго князя Изяслава о латынянех.

Христианом же недостоит своих дщерей за них давати, и поимати в них за себе. ни брачитися с ними, ни кумитися ни целования с ними имети ни ясти с ними, ни пити из единаго сосуда. темже просящим у вас давайте им Бога ради ясти, но в их сосудех. ащели не будет у них сосуда во своем дати, и потом измывше сосуд молитва дати.

 

Из мин. чет. от жития Галактиона и Епистимии, ноября, в 5 день.

Блаженныи Галактион, посещения ради хождаше ко обручнице своей но не даяше ей обычнаго целования, понеже некрещена бе.

Ниже. Галактион же рече ей наедине: госпоже Епистимие; веси ли чесо ради не даю ти целования, она же рече: не вем господине мой. и печалую о сем зело. Галактион же рече: понеже неси христианыня, и скверна еси нечестивою верою, того ради нехощу приобщитися нечестию твоему, да не опечалю Духа Божия. но аще хощеши имети любовь мою, отвержися идолов, и веруй Богови емуже аз верую, и приими святое крещение, тогда дам ти целование.

 

О еже како неподобает скоро без всякаго уверения и прочих мерзостей греховных отстатия во крещение приимати. глава, 99.

 

Из апологии святаго мученика Иустина Философа. вторая в толк. апостоле, на зач. 195. в надписан. на 2. нравоуч.

О тех и о иже всех людей без возбранения на крещение приимати хотящу. О како си зло есть. Прежде крестити, последи же о изменении в лучшая нравы наказовати. Понеже созидаше на основании, еже есть Христос, не злато, ни сребро, ни камение драго. но дрова, и сено, стеблие, сиречь, неправду, нечистоту, нечестиве и несрамляющеся. И сицевыи от нас не бывают приятны во крещение. И яже оставиша жены своя, и пояша иныя, или тии жены, они же оставивши мужи своя. посягоша ины. Ибо Христос глаголет, яко сицевое посягание, есть прелюбодеяние. и противитися сему немогут, еже сама истинна Христос Господь прелюбодейство наричет.

Ниже. Таковии они же сицевым помогают, дабы во крещении прияты некоим человеческим милосердием, понуждени, да сия их вещь, и противление приимется. сим являюще, да с ними и прочии вси лукавии и нечестивии, некою казнию наказанием и покаяние не исправльшеся, во крещение прияты будут.

 

Той же.

О еже како, и чего ради от крещения отгоняемы бывают егда сицевых во крещение неприемлем, тогда не прежде времени плевелы исторгати хощем. но более не хощем плевел сеяти. Якоже диявол творит, ниже хотящему ко Господу Iсусу Христу приити возбраним. Но аще ко Христу Iсусу не хощут, мы. ихже исповеданием одолеваем, и невозбраняем Господу Христу веровати, но свидетельствуем, яко тии не хощут в Господа Iсуса веровати; они же глаголют, яко несть грех прелюбодеяние, еже Христос нарече прелюбодеянием. или неверуют, яко прелюбодеи удами Его возмогут быти, о нихже апостолом Павлом глагола. Яко царствия Божия ненаследят, и яко здравому учению противятся сущии, по евангелию блаженнаго Бога. сего ради да непочитаются между сими пришедшии на брак; но между нехотящими приити. Понеже противятся учению Христову, и дерзают явственне глаголати сопротив евангелию.

 

Нравоучение, 17.

О еже злых неприимати во крещение, несть вещь нова, воистинну чюдно, ащебы они же инако разумеют. от того или новаго, или стараго, обаче тщетнаго мнения отступити подобает вещающи сами, яко учение ново, яже лукавии человецы явственно исповедающи, и обещающиися по беззаконии своих пребывати. Не будут прияты во крещение, аки неслышащи, аки блудницы и шутове. и прочии явственне исповедающии скверны, дондеже не расторгнут сих оков, ко тайнам Христовы недостойни приступити. они же вси по их непщеванию приступили бы, аще не бы стараго и крепкаго чину и обыкновения церковь святая сохраняла. Сиречь, за явственнейшия правды приходящия сия, царствия Божия ненаследят. и аще от сих мертвых дел не покаются, во крещение не будут прияты.

 

Нравоучение, 18.

Но истинная учения воздержность умерение хранящии, смотрим коих во крещение приимати достоит, да святыя псом не дадутся.

 

Нравоучение, 8.

В тех же вещех апостоли святии чин он же бы во церкви был хранен узаконити имяху, да не приемлются прелюбодеи во крещение дондеже исправити.

 

Нравоучение, 22.

Ащели же где нерадением и неприлежанием есть обыкновение, приимати во крещение блудники, и прелюбодеи, ихже Бог осуждает, сиречь, они же чюжия жены аки своя имеют, и жены чюжия мужи. Таковым подобает прилежати да истинными вещьми неправая исправят, сиречь, да тии к тайнам приступают. Сими же вещьми неправыми, правая да невреждаются, сиречь, да не мнят яко о исправлении злых нравов, не имут быти наказованы, вкупе с прочими святаго крещения желающими;

 

И паки.

Да не мнят прияты быти во крещение предреченныя скверны и беззакония исполняющия, и в сих пребывати обещающияся. Ибо вся она беззакония от апостола сочетайная, яко творящии таковая царствия Божия ненаследят;

 

Яко сатана не печется нечестивых ратовати. [еже разделити веры, и ереси или расколы сотворити] но на верных Божиих вооружается. глава, 100.

 

[Ис книги Кирил. Иерос. лист 522].

Зри убо елика ополчения лукавыи, на благочестную и едино истиную христианскую службу умысли, ереси различныя и распри и рати и брани умышляя.

Ниже. Яко идеже лукавыи зелнейше борим бывает, тамо и той спешнейши злобы своея стрелы посылает, и ухищрения поставляет. в прочих бо языцех, понеже ни едина есть ему зелна брань. сего ради ниже той на инех вооружается. христоименитии же убо Божии людие, язык свят, царское священие, и понеже на всяк день утвержаеми верою, на лукавая его действа, и начинания мужаются сего ради и он безчисленными наветы, и всякими козньми, неких от них запинати ухищряет и противу опечалити церковь Христову подвизается. аще и в студ ему подвиги и лукавствования обращаются, и инакоже, иныя убо языцы неразсудна и слианна яже в догматех имеют мудрования, и ничтоже чисто, ниже известием искушено. сего ради во онех, ниже православное, ниже развращенное является; в чистейшей же и святейшеи и много опасение имущей вере христианской, занеже зело ея и светло и право и изрядно и неувядаемо. егда убо некто и мало нечто развратное или ново ученное привнести начнет, абие развращенное и ложное приложением истинны и праваго слова, объявляется и обличается, и ниже на мало любодеищное рождение, ниже под самем именованием быти благочестивых догмат никакоже терпит благородие.

 

Афанасия Вел. [ко Антиоху князю].

Вопрос 43. Како сатана не раздели ину веру на толикия ереси. точию веру християнскую. Ответ. Яко противу ему. яве яко и упраздняющую его, кое бо рцы ми попечение, или печаль сатане, июдей или самарянтян. или еллины возратовати, или разделити, к ереси и веры различны. вся бо сия его суть. и никакоже сатана своя ратует, но Божия. темже хотяще и отсюду навыкнути. яко несть другая вера благочестивая на земли ина точию во Христа.

 

Ис книги о вере Острожск. друку. выдрукован. в лето, 7097. глава, 1. лист, 22 на об.

Присмотрися кождыи и известно увеждь, яко межи своими законопреступники, окаянныими жидами, и безбожными агаряны волю вражию действующими, жадных розрухов в прелестной вере их не чинит, но яко своим пособствует им. кождыи бо с них прелестную веру свою неотметно всегда содержат. окроме на правоверных всеми силами своими супостат и враг наш диавол въоружаючися ополчается, и безпрестани устремляется творяще розрухи незгоды, и розорванье веры. отвсюду беды напасти и гонения воздвизающе. Богу попущающу, акы боголюбцы обьявлени были, а сластолюбцы обличилися. Подобает бо рече апостол и ересем в вас быти, абы досветчоные явни были;