Спиридон Иванов

 

Которыя кроме благословения и венчания иерейскаго, и ангелословных молитв совокупляются.

 

Первое:

Понеже кроме венчания брачившихся, авторы богословския, и правописцы церковныя, браком християнским не исповедуют.

Матфей [в лето 6843], в составе, Г-м. в правиле Василия, 38-м, объявляет, про прежнее, и еже нам утверженое глаголет. Но тогда убо с пристатием единем браки стояше. В нас же не убо состоятися может, кроме священнословия. [На поле:] Без священнословия брак не состоится.

 

Второе:

Иоанн фракийскии, во изложении своем глаголет [Кормч. глав. 43, лист 344 на об.]. Повелеваем, никакоже обручение творити, никогдаже, или обручение имя истинное имети сотворяем, аще священническаго благословения совершаема не имать на себе. Ниже [346 на об.]: обручение священно совершаемо божественными глаголы, иже о браце совершаемых молитв, сочетанию приимших. Дозде Иоанн.

 

Третие:

Понеже ко обручению без священнодействуемых ангелословных молитв, Бог не присудствует. Яко Варда хранитель полаты, сице глаголет [в Кормч. глава 43]: Началныя браку молитвы, на обручение совершенныя. Ниже: Аще не Бог посреде совокупляющихся лицу лицу обручением внидет. Дозде Варда.

 

Четвертое:

Понеже в новой заповеди христолюбивыи царь Алексии Комнин, заповедает сице глаголя [Кормч. лист 336. в лето 6588]: Елико аще без священных молитв своя рабы на сочетания брака совокупляюще, не боголюбив брак составляют им, но блудническое смешение утверждают. Тойже [глава 43]: Ихже бо не совокупи Бог священными молитвами призыванием, тии вси сходят на грех. идеже слышано будет се.

 

Пятое:

Понеже преподобныи Матфей Властарь, в составе Г-м, во главе 1-й, сице глаголет: Брак есть мужа и жены совокупление, и наследие во всей жизни, божественныя и человеческия правины приобщение, любо благословением, любо венчанием, любо записанием, а яже чрез сия бываемая, яко не бывша вменяем. Дозде Матфей.

 

Шестое:

Святейшии Максим митрополит рускии, в послании своем сице заповедает [в лето 6813]: Да вси чада моя порождении в купели. новокрещенней. да держите жены от святыя соборныя и апостольския церкви, занеже на спасение. ради человеческаго бысть. Ащеже их держите в блуд, без благословения церковнаго, то что ти в помощь есть. В Кормчей писменной [глава 52].

 

Седмое:

Святейшии митрополит Фотии руский, в послании своем в Нов град, сице пишет [в лето 6918]: А которыи не по закону живет с женою без благословения поповска понялись, тем епитимия 3 лета, как блуднику, да паки совокупити их молитвами. А не з благословением аще восхотят жити, ино их разлучити. Дозде Фотии.

 

Осмое:

В новой же заповеди, предпомянутыи христолюбивыи царь Алексей Комнин. Сице [Кормч. лист 335]: И отселе не быти инако, не именоватися законному браку, и християнскому строению достойну. Аще не молитвы совокупляющихся, рекши жениха и невесты в любовь свяжют.

 

 Девятое:

Но и о таковых же и святейшии Иоанн митрополит рускии, нареченныи пророк, ко Иякову черноризцу, в послании своем, сице заповедает [в Кормч. писм.]: Иже просте и беззаконне, простьцем и невежам творят совокупление, кроме божественныя церкве, и кроме благословения творяще свадьбу тай, и ижеся тако поимают. [по роспусту] яко блудным епитимия. глава, 93.

 

Десятое:

Паки предпомянутыи царь Алексии Комнин [Кормч. лист 336 об.]: И брацы по первому даже и до ныне держащемуся обычаю заматоревшуся, подобает и на тех священным молитвам быти [бысть 6590]. Ниже: Мы же Божиею благодатию, на краснейшее паче, и на священнейшее возвращение хощем произыти житейским вещем, и отселе не браку токмо, но и тому обручению священное благословение совершаемо имети на себе.

 

11:

О тайне супружестве, сиесть законнаго брака, сице поведает [Кормчая глава 51]: Изряднейшии да весть иерей, яко супружества между восхищающим и восхищенною, егда сама восхищенная во власти восхитившаго ю пребывает. такожде и потаенныя, и вся прочая супружества, яже не с благословением церковным и чинным от своего си пастыря, сиесть от епископа, или от тоя епархии священника, венчанием при двух или триех свидетелей совершаемая, по соборному уставлению и святых отец учению. незаконна, паче же и беззаконна, и ничтоже суть. Ниже [лист 523 об.]: Венчание же и брачное благословение, ни от кого прияти им достоит, точию от самого своего приходскаго священника, или от инаго священника повеление от него имущаго, аще оба суть единаго прихода. венчанию и благословению супружества, в церкви достоит совершатися пред людьми. Ниже [лист 524 об.]: Супружество же, или законныи брак, есть вещь святая. тем же и свято сию совершати достоит. Закона градскаго. грань, 4-я. [лист 411] Никтоже в тайне да венчается, но при множайших людех. ибо се дерзнувыи сотворити, да накажется запрещении мучим. сиречь иерей, яко вне подобная себе вложит, втайне венчав, достойным истязан будет по церковных правил заповедей.

 

12:

Паки во изложении, предпомянутаго, великаго стража Иоанна Фракисия, в той же главе, сице [лист 345 об.]: Брак убо по узаконенному времени, ветхими же и новыми законы, и от нас изложенною новою заповедию да соблюдется со обычными его вещьми. и не подобает никомуже от всех граждан, чрез сию изложеною от нашия державы заповедь ничтоже творити; Дозде ис Кормчей.

 

13:

Божественнии апостоли, в завещании своем, в книзе, 8. сице заповедают [глава 34]: Верныи и неверная спрягшися. или да разведутся, или да отринутся. И от сицеваго апостольскаго канона, приразумевается нам, яко аще верныи с неверною спрягшися, яве яко за неверие верныя части в православной церкви не возмог венчатися, и ангелословными молитвами освятитися, и таковаго ради спряжения, да разведутся, или да отринутся, по завещателному канону святых апостол.

 

14:

Матфей Властарь, сост. Г, сице глаголет: Небо совокупление, но молитвенное служение творит обручение, якоже браку вменятися.

 

15:

Ответ святаго патриарха Феодора Валсамона: Аще убо обручение, егоже состави заповедь светлейшаго царя Алексия Комнина, со обычными, сиесть святыми молитвами, и совершенными летами. Ниже: Сице бо совершенно обручение есть, во всем равно венчанию, и совершенному супружеству. Аще же сотворено есть инако, сиесть по обычаю иже ныне содержат по всем странам полунощным и восточным, яко слышим, сиесть кроме молитв. И таковое полагается низачто. во оном ответе;

 

16:

Но и блаженныя памяти достойныи Андрей Дионисиевичь, самобывше в Стародубщине, на Чернецкой слободе, своеустно заповеда нам, по святым апостольским и отеческим правилом, отлучати от сообщения братскаго, Иякова Островскаго, которой вновь пригласитися желал, а с невенчавшеюся женою разлучитися не восхотел. Темже видитися, яко и Андрей Дионисиевичь согласная согласным святым отцем, о сицевой вещи самем делом показа. Еже вышепомянутаго Иякова, кроме благословения священническаго со женою спрягшагося, не точию под брачное житие, но и под девственное, не разлучившихся прияти не соизволил.

 

Вторая вина:

Понеже кто и до познания православныя веры, в каковом любо нечестии пребывающе, от живой жены, оженится на второй, или жена от живаго мужа посягши за втораго. таковых браков древлеправославнии учители евангельскому благовестию не свойственных, и Богом запрещенных браков, в браки не вменяли, и не разлучив друг от друга во крещение не принимали. О которых божественныи апостол Павел, глаголет, во главе, 7 [к рим.]: Убо живу сущу мужу прелюбодеица бывает, аще будет иному. И паки [к галат.]: Яко таковии царствия Божия не наследят. Паки: Яко здравому учению противятся, по благовествованию славы блаженнаго Бога. еже и мне уверено бысть. Паче сам истинна Христос, у Матфея во главе, 5-й, сице глаголет [зач. 13]: Иже пущеницу поймет прелюбы деет. И во главе, 16 [зач. 82]. Всяк пущаяй жену свою, и приводя ину, прелюбы деет. И женяйся пущеною от мужа, прелюбы творит. И у Марка святаго, во главе, 10, глаголет [зач. 44]: Иже аще пустит жену свою, и оженится иною, прелюбы творит на ню. и аще жена пустит мужа, и посягнет за иного, прелюбы творит. Божественныи Феофилакт, в благовестнице, в Матфеи, на главу, 19, толкуя сице глаголет [зач. 78]: Яко создавшаго искони дело есть закон, единобрачие. изначала бо Бог, единаго единой припряже. темже не подобает единому мужу, многим женам совокуплятися, ниже единой жене, многим мужем. Но и священномученик Иустин, Философ, во апологии своей. которая в толковом апостоле, в толк, на зач. 195, в надписании, на 2-й, нравоучение, сице пишет: О тех о иже всех людей без возбранения во крещение приимати хотяху. О како си[?нрзб.] зло есть. Прежде крестити, последи же о изменении в лучшая нравы наказывати. Понеже созидаше на основании, еже есть Христос, не злато, ни сребро, ни камение драго. Но дрова, и сено, стеблие: сиречь, неправду, нечистоту, нечестиве и нечестиве не срамляющеся. И сицевыи от нас не бывают прияты во крещение. И яже оставиша жены своя, пояша иныя, или тии жены, они же оставивши мужи своя, посягоша ины. Ибо Христос глаголет [Матф. глав. 7], яко сицевое посягание, есть прелюбодеяние. и противится сему не могут, еже сама истинна Христос Господь прелюбодейство наричет. Ниже: Таковии они же сицевым помогают, дабы во крещение прияты некоим человеческим милосердием, понуждени, да сия их вещь, и противление приимется. Сим являющи, да с ними и прочии вси лукавии и нечестивии, некою казнию наказанием и покаянием не исправльшеся, во крещение пряты будут. [неприятни].

Той же [нравоуч. 2]: О еже како, и чего ради от крещения отгонены бывают. Егда же сицевых во крещение не приемлем, тогда не прежде времени плевелы исторгати хощем. но более не хощем плевел сеяти. Якоже диявол творит. Ниже хотящему ко Господу Iсусу приити возбраним. Но аще ко Христу Iсусу приити не хощут, мы, ихже исповеданием одолеваем, и не возбраняем Господу Христу веровати, но свидетельствуем, яко тии не хощут в Господа Iсуса веровати; Они же глаголют, яко несть грех прелюбодеяние, еже Христос нарече прелюбодеянием. или не веруют, яко прелюбодеи удами Его не возмогут быти, о них же апостолом Павлом глагола. яко царствия Божия не наследят. и яко здравому учению противятся сущии, по евангелию блаженнаго Бога. Сего ради да не почитаются между сими пришедшии на брак, но между нехотящими приити. Понеже противятся учению Христову. и дерзают явственне глаголати сопротив евангелию.

Нравоучение 17. Той же: О еже злых не приимати во крещение, несть вещь нова. воистинну чюдно, аще бы они же инако разумеют. от того или новаго, или стараго, обаче тщетнаго мнения отступити подобает. вещающи сами, яко учение ново, яже лукавии человецы явственно исповедающе, и обещающися по беззаконии своих пребывати. Не будут прияты во крещение, аки не слышащи, аки блудницы, и шутове, и прочии явственне исповедающия ся скверны. дондеже не расторгнут сих оков, ко тайнам Христовым недостойни приступити. Они же вси по их непщеванию приступили бы, аще не бы стараго и крепкаго чину и обыкновения церковь святая сохранила. Сиречь, с явственнейшия правды приходящаго неусомнително имать. Яко творящия сия, царствия Божия не наследят. И аще от сих мертвых дел не покаются; во крещение не будут прияты.

[Нравоучение, 18] Но истинная учения воздержность умерение хранящии, смотрим коих во крещение приимати достоит, да святая псом не дадутся.

[Нравоуч. 8] В тех же вещах апостоли святии чин, он же бы во церкви был хранен узаконити имяху. да не приемлются прелюбодеи во крещение дондеже исправити.

[Нравоуч. 22] Аще ли же Господь нерадением и неприлежанием есть обыкновением, приимати во крещение блудники, и прелюбодеи, ихже Бог осуждает, сиречь, они же чюжия жены аки своя имеют, и жены чюжия мужи. Таковым подобает прилежати да истинными вещьми, неправая исправят, сиречь, да тии к тайнам приступают. Сими же вещьми неправыми, правая да не вреждаются. Сиречь, да не мнят яко о исправлении злых нравов, не имеют быти наказованы, вкупе с прочими святаго крещения желающими. И паки: Да не мнят прияты быти во крещение предреченныя скверны и беззакония исполняющия, и в сих пребывати обещающияся. Ибо вся она беззакония от апостола сочетанная, яко творящии таковая царства Божия не наследят;

 

Третия вина:

Ибо усумневаемся о пременении устава отеческаго, еже брачившихся до познания православия, жити со своими женами без разводу, но в воздержании от жен своих заповедали. Понеже на освящение вышеписанных браков, иерея православнаго несть. Темже внегда и Господу Богу соблаговолившу, от возсмущения преславнаго моря, праведнаго Ноя, и сущих с ним спасти. убо и законным супружницам, в плотстем смешении, и сам Господь Бог заповеда воздержатися. очесом святыи Иисдор Пилусийскии, в книзе своей к Мартину в послании [69], сице пишет: Не пост ли паки и смешение отвержения Ноя, и сущих с ним от возмущения преславнаго моря спасе; семена убо ядущих, неприкасающихся же супружница в плотьстем смешении. Послушай писания к Ною заповедающаго. Вниди в ковчег ты, и сынове твои и жена твоя, и жены сынов твоих. Да разлучитися рече, мужие от себе, блуд уцеломудряется, и нечистота от наносимых вод. вы убо ниже несквернаго неприкоснетеся ложа. Яко не точию до познания православныя веры, от противоверных брачившихся, но и в присудьствии православных епископов брачившиися вин ради благословных, друг от друга, аще и без разводу, но от плотскаго смешения в воздеражании руководствовани суть. очесом древнейшии учитель святыи Августин епископ Иппонскии, Вонифантия военачалника увещал, сими словесы [Барон. лис. 475] Аще бы жены не имел еси, чистое житие советовал бы тебе. можеши ли жену к себе приклонити. сотвори. Епистолия, 79.

Вторыи приклад, о котором кроникарь Баронии, в лето Господне, 408. сице пишет: По смерти Феодосиеве изволением Пулхерии, сигклит с воинством избра на кесарство Маркиана, мужа не млада, советом и мудростию, и воздержанием, и в воинском делании славима, желаючь супружницею его быти Пулхерия. но понеже она в летех бе заматоревшая. имеяша бо лет, 51. Ктому, девство свое Господу Богу обручи, обретоша сицевыи совет дабы без повреждения своея чистоты девическия, имела мужа. А толикому и толь мудрому, и благочестивому и храброму воину, под покрывалом супружества, на царстве к миру помоществовала. Ниже [лист 523]: Истинныи и усердныи святыя веры православныя защитник, [Маркиан кесарь] премудр в делех кесарских, праведен и крепок во истинне и правилех. к тому же телом и душею чист, Пулхерии жены своея чистоту доконца соблюде.

Темже колми паче в нынешнее в неприсудствие православных архипастырей [иереов] весма нам благополучно, и всеверно отческое водруженное руководство. желащим во известном и безсумнителном православии, от правоверных церемонии, чрез правоверие, и чрез чистоту жития свободным быти, и всеверно веруем и приемлем, незазорна, и несумненна сия. Понеже божественныи апостол Павел утверждает, глаголя [зач. 245]: В неже достигохом, темже правилом жительствовати. К филипписиом, глава, 3.

А за преступление своего произволнаго обещания, сиесть, за смешение с своими женами и признанных к чадородию присудили от братскаго общения отлучати. И потом паки изволяющих на преждебывшее обещание покаятися, на прощение присудили приводити пред братию. Темже[?нрзб.] слышим что к пастырю глаголет Бог [глава, 13], у Иеремии пророка. Где стадо данное тебе, скот нарочитыи твой; что речеши егда посетити тя. еда ли не восприиму болезни, яко жену родящую. Но и Гедеон святейшии, епископ Лвовскии, в поучении своем, на Рожество Христово, сице глаголет. Ибо двоякии грех есть, един наш сластныи которыи мы сами чиним. другии есть грех чюжии, которыи иншии человек чинит. Единако и мы того чюжаго греха остаемся участниками. Когда бы кто грех учинил, а мы ему благословили тое чинить, или поизволили, или научили ему, чтобы то учинить. Ниже: или приразумили его до того. Ниже: или не возбранили его от того, могуще возбранити [отец чада]. или похвалили есмы ему той учинок; не хулили и не карали его за тое. тогда любо кто иншии учинил той грех. единако и мы того чюжаго греха остаемся участниками. тако глаголет псалмопевец [псалом, 18], о чюждих пощади раба Твоего. Еще же блаженныи Златоуст, на послание к Тимофею, 1, на главу, 6-ю, сице глаголет [лист 2511]: О согрешенных бо онем и ты казнь подъимеши, начало подавыи и мимошедшим грехом и хотящим быти. оставль бо первыя неказненно, повинен будеши и будущим. Той же на послание к римл. в беседе, на зач. 81. Не точию бо сия творят рече, но и соизволяют деющим. лютейшее убо первое положив, и непростителное да победит. Ибо грех похваляй, паче согрешившаго много лютейшии есть. Еще же в Катихизисе болшем, во главе, 23, во ответе. В судныи день судими будем, первее в презрении благих, потом же [в сотворении] злодеяниях. Ниже: Понеже грехи еже непризрением нашим они творят. Аще бо и возмогли быхом соблюдением нашим помощи им, но презрехом их. Сего ради вся сия наша и их причтена будут. Ниже: Напоследок и в том истязани будем, еже аще соблазнихом кого, и сами сему начало быхом греху, коею же любо виною, повелением, и проч.;

 

Статия, 4:

Еже кроме благословения церковнаго, и венчания иерейскаго, по крещении, или до крещения брачишася, и прелюбодеи суть. о таковых благоискуснейшим советом отцы наши сего нам не предали, еже бы чада их крестити, и приносы от таковых приимати. И не точию настоящаго сего времени, наши настоятелие не повелеша сему быти в нас. но и древнейшии святии учителие церковнии согласно сему заповедают. Очесом святейшии Иоанн митрополит рускии, нареченныи пророк, в послании своем ко Иякову черноризцу, сице пишет. глава 93: Ижеся поимают без благословения в сочетание, и много поимают жены, и отметают, и своя жены пущают, и прилепляются инем. Ниже: Тем всем чюжим быти нашей непорочней веры, и отвержены от соборныя церкве, и всею слою потщишися возбранити таковым. Ниже: Иже свое подружие оставляюще, а инех поемлюще, таже и жены, в которой епитимии сих влагати, прелюбодейство, по девятому правилу святаго Василия. Иже к концу рече: Иже муж пустит жену, и она ко иному приидет, и сам любодей, занеже сотворил ю любодейцу, понеже иного мужа введе к себе. От них же не приимати чад ко крещению, дондеже пребывает в сем недостойнем совокуплении, по 18, правилу, и проч. В правиле, 18, Василия Великаго сице заповедает [Кормч. 231 об.]: Сластем блудным себе издавши, неприятна будет инако в церковь, аще не останется греха, и разрушит беззаконное сожитие. себо разсторгнувши, и покаявшися время прелюбодейнаго греха исполнит. якоже, 15, лет быти ей без общения святым даров. И не точию чад крестити от прелюбодеев, святии учителие не повелевают, дондеже не расторгнут их от беззаконнаго сожития. но самех прелюбодеев которыя православнаго крещения не имеют на себе, дондеже не разлучатся друг друга, и не престанут от греха. таковых святыи священномученик Иустин Философ не повелевает крестити. очесом выше писано во второй статии.

О чадех же не точию от прелюбодеев, иже суть отвержены от святыя церкви: но аще кто и во христианстве живет, а по правилом святых апостол. аще кто среды и пятка не постится. убо того ради святых тайн причаститися не достоин. В Номоканоне же в правиле, 225-м [лист 712], сице глаголет: Ащели кто не хранит святых апостол, и Рожества Христова пост, да не приемлеши, ниже чад его, аще не воздержатся от мерзскаго.

Тем же убо яве показалося от сего правила, яко не младенческаго ради греха, но за несохранение постов родителема святая церковь, не приемлет. и безгрешных и незлобивых сущих младенец, родителнаго ради согрешения. И аще за нехранение постов святых, родителей отлучают, и чада их не приемлются, колми паче грешнейшии суть прелюбодеи. Понеже таковых богоноснии отцы, не разлучающихся друг от друга, и на покаяние не принимали, но проклятию предавали, и от святых таин, и от церкве отлучали. Очесом богомудрыи Захария архимандрит, в книзе своей Полинодии, сице пишет: Царь Константин, сын четвертаго Леона, и Ирины. возгордевши Мариею женою, взял другую Феодоту, и короновал ея чрез Иосифа архимандрита монастыря Конкарата. Платон славныи оныи монах студийскии, яве церкве грех, яко Иоанн Креститель выметал. Феодор Студит проклинал, и всюду разглашал, а быся его вси стереглися. В части, 2-й, раздел, 7. артикул, 2. Тойже: О святем Игнатии Константинополском патриархе, сице пишет [раздел 5]: Яко Игнатия Варда кесарь неправедливо с престола согнал, иже за телесность[?нрзб.] в церковь пустити его не повелех. Тойже паки о том пишет: Блаженныи Игнатии, Варде кесареви, которыи без причины жену отпустил, а невестою своею общевати голошен был, в церковь заборвнил ходити. а он с той причины архиерея от церкве отгнал, и многими вверженнаго во гроб затворил. Часть, 2-я. раздел, 9. артикул, 4. Тойже Варда, Иосифа песнописца изгнал. апреля, …[нрзб.] Иже изгнанию Вардою осужден бысть, занеже того добре обличившу. Такожде и о святем Тарасии патриарсе Константинопольском. [ноябрь, 11] Святыи Тарасии, убо из церкви отсылается. от Констянтина и Ирины царех. занеже законную свою жену отложив, и иную приведе, и сим обличен бысть. Еще же о Феодоре Студите, сице [Пролог, генв. 26]: Феодор же возбраняше ему глаголя: обличашеже и о прелюбодеянии царя, и того ради заточен бысть в Селунь.

Но и божественныи Златоуст, в беседах евангельских, во Иоанне [нравоуч. 63]. Невнимающих бо себе, удобне, в злобу поползаются. Аще и веру имеют праву, но мы сих да бежим. несть бо праваго жития кроме уведати Христа, мир гонити и святыню, еяже кроме никтоже узрит Господа. святыню же глаголет целомудрие, якоже комуждо довлетися своею женою, и не внимати иной. не довлеющему, невозможно спастися, но нужа всячески погибнути. Аще и безчисленная имать исправления, со блудом бо немощно внити в царство небесное. Ниже: Темже молю свобождатися н…[нрзб.] сего. Аще же не хощете в незаходимая [?нрзб.] не входите священная. Ибо красты исполненыя овца, и недуга полныя, не подобает со здравствующими изводитися и пастися, но отгоняти от паствы. дондеже недуг отложит. уды бо Христовы есмы, да не уды блудницы бываем, несть место блудно. но церковь. уды же блудницы аще имееши да не станеши в церкви, да не досадиши месту.

Темже от сих свидетельств, страшно и трепетно слышим, яко прелюбодеи, и прочии явно грешницы, чюжди нашей православней непорочней вере, и отвержены от соборныя церкве. Убо сего ради прелюбодеев неразлучившихся друг от друга, и дондеже не престанут от скверносмешения, и в покаяние приимати боимся, и чад их крестити ужасаемся и трепещем.

 

Статия, 5:

Еже по крещении православном, которыя в различных противоверств браком совокуплялися. убо того ради сумняемся. понеже разсуждения вашего учительства не ведаем. убо таковых во единой ли силе с теми, иже которыя до познания веры по неведению от противоверных браков совокуплялися, полагаете. Сиречь, всех ли заравно неосвященными браками исповедуете, или всех освященными; Но мы надсвыше, и паче отеческаго учительства обоих священными не смеем исповедати. Сих ради: Понеже чрез которую евхаристию, и бегствующия иереи хиротонисании. Ибо о той евхаристии отцы наши во ответе 65, сице исповедуют: По новопечатным же книгам о действуемых тайнах омышление имеем. Понеже не под печатию креста Господня трисоставнаго, по обычаю (действуемаго) древлеправославныя церкви действуемаго. Но под печатию двочастнаго креста действуются. И понеже не двема перстома священницы в самом совершении действующе благословляют, яко древлецерковнаго православия содержание повелевает. но пятьми перстами, чрез литеры азбучныя благословляют. несогласно священным старопечатным книгам, и всей древлеправославной церкви. И паки, в 102-м, ответе, сице глаголют: Яко опасаемся новин, и священства с новинами, и в новинах сущаго опасаемся, и прочая.

Еще же и в грамоте своеручно, ко Иякову Зубову Андрей Дионисиевичь, сице пишет: Иже бо православным просвещением порождении, иже православно священством церкви сочетанныи, иже благоверне ангелолепным одеянием украшенныи, не прилично оному с чюжеверными тайнодействы сочетоватися, неприлично с хиротониею таковым сгаждатися, неприлично спорождение непросвещенным совокупляему быти. Паче же таковому богопросвещенному отцу, якова и есть, и познавается ваша отеческая святыня, во иноческих подвизех боголюбезно пребывающая, ей[?нрзб.] добрейшо, и благодатнаго разсуждения сие исполнено, еже ваше преподобие ныне ревнует, еже церковная тайнодейства благоверно исповедуете. еже православия с противоверных тайнодействы не смешаете, еже неосвященное за освященное не приемлете, и прочая.

Темже бегствующия попы, аще и обращаются от вышепомянутых новин, обаче той материи в своей вере не имеют, сиречь: епископа своего православнаго, которой бы могл всякою полномощною своею Святаго Духа присудствующею властию, обращающихся, о житии и о времени разсудити, и паки от православной церкви всякою святынею того наздати. И неосвященнаго чрез воздавателную свою благодать, освященнаго и совершеннаго устроити. А понеже оной материи непрерванной не имеют. Сиречь, епископа своего православнаго. убо тогда едино им остается, еже несвященными священниками тайнодействовати. А понеже отцы наши самую совершителную вину, сиречь, священство, в новинах сущих неосвященным исповедают [ответ 102]. Темже по отеческому свидетельству, аще совершительная вина, сиречь священство само собою есть несвященно. Како может и прочия тайны, сиречь брак, от себе освятити, недоумеем. Василия Великаго. правило, 31 [Кормч.], сице глаголет: Жена, аще отъидет муж ея. и безвести будет, и не испытавши и неуведевши, яко умре, за ин муж идет, прелюбы творит. Никита Ираклийскии глаголет: Свободна бо есть жена якоже рече апостол, егда умершу мужу ея, живу же сущу никакоже. Паки, Василия Великаго, правило 39: Живущая с прелюбодеем, во всем житии своем прелюбы творит. Толкование: Того ради убо и неприятна есть таковая [жена] в церковь. Егда бо престанет от греха, тогда будет в запрещении, и исправится грех ея. Аще же пребывает в прелюбодеянии, неисправлена есть, и неприятна. Правило, 18: Обещавыися девствовати, или пострищися в черноризцы. аще обеты своя преступят, прелюбодейнаго греха лета исполнят. [толк.] Сластем блудным себе издавше, неприятна будет инако в церковь, аще не останется греха, и разрушит беззаконное сожитие: себо расторгнувши, и покаявшися, время прелюбодейнаго греха исполнит;

 

Статия, 6-я:

Ибо сомневаемся и о том, иже которыя православныя веры, чрез запрещение святых отец, приступают на бракосовокупление к различным противоверцем. И нецыи таковых веруют быти отступниками, а прочии сих не исповедают быти отступниками. Того ради глаголют, понеже не сердцем возлюбили противоверство оное, но бракосовокупления ради не отступили православныя веры.

Темже сея ради вины, потребно есть между собой разглагольство произвести. Понеже Григории Богослов, к Нектарию патриарху в послании, сице глаголет [Бароний, лето Господне 384, лист 365]: Ибо естество сему, дабы два учения о вещи единой себе противная истинствовали. токмо едино истинное и другое ложное. Ниже: Темже преступающих аще и не всем сердцем возлюбили неправославную веру. обаче, неотступниками и безпорочными християны исповедати их боимся, сих ради: Понеже в первенствующей церкви, которыя от числа православных, стояй против неправославных, и устоявши в православии, блажими суть. А которыя и несластолюбивых похотей ищущии, и не бракосовокупителныя ради тайны, и не сердечным сложением, и не церемонии от правоверных приимали. но заедино подписание уставов неправославных, отвержение Христа пострадали; Первое: Чесого ради и Евсевии епископ Виркилеискии, на Афанасиево извержение, из свитка медиоламскаго соборища арианских епископов, сына своего Дионисия епископа Медиоламскаго, притвором подписания от вышняго места, устроил подписание, руки искрябати. А о других епископех, сице изъявляет. А иже по благочестию бяху крепцы, тии онаго соборища уклонишася. Сии извержения Афонасиева не подписаша, помышляюще того извержение быти правыя веры истинны отвержение. Второе [мин. чет.]: А которыя пастыри ересь Евтихиеву подписанием своим похвалиша. тии Христа отрекошася. очесом историк Либерат диакон. в книзе 14, сице пишет: Иже [Диоскору] не изволяху, а Флавиана… [отсутствие конечных листов источника].