Сказание о перемазанском соборе 1779-1780 гг.

 

Господи Исусе Христе, Сыне Божий, помилуй нас.

В богоспасаемую обитель Пресвятыя Богородицы нашея и Приснодевы Марии, честнаго и славнаго Ея Покрова, и во окрестныя слободы и места, при имеющихся церквах пречестнейшим священноиноком, иноком же и инокиням, и всем честных персон обывателям, мирно о Господе здравствовати.

Во известие вам доносим. Мимошедшаго 1779 года, ноября 4 дня, Покровскаго монастыря строитель священноинок Михаил и при нем инок Никодим, инок Иоасаф прибыли к нам в богоспасаемый град Москву, в чем весма возрадовахомся, яко не лишил нас Господь Бог таковаго дара, егоже издавна всеусердно жадательне желахом, якоже и древле в ветсем завете принесл Господь Бог во мгновении ока от земли еврейския до земли ассирийския пророка своего Аввакума, яко да алчущаго Даниила в рове львов напитает.

Дивно убо бысть чудо то; дивнее же есть се. Оно убо бысть, да препитает единаго в рове, зде же многих; тамо тело, зде же дражайшия души; тамо пищею тленною, зде же негиблемою, учением слова Божия, которое чувствительно в себе ощутивше, яко суть праведно, егоже всеусердно восприемше, благодарим Господа Бога, иже удостои слышати разум церковных учителей о происходимых между нами распрениях в догматех церковных, яко то о не согласнем приеме отвне приемлемаго священства, о паки перепринимании от святыя церкви священных и помазании миром, о действии неких незаконнаго мира, о чем судихом, да истяжутся тая пред очесы общенароднаго собрания, не яко в преписаниих безконечных, но лицем к лицу, еже о крещении, или по миропомазании елико священных, без повторнаго по степенем от православнаго архипастыря церковнаго хиротонисания священная воздействуют ли, и следовательно ли от единыя матере нашея святыя соборныя и апостольския церкве, древле-греческаго и древле-российскаго чиносодержания блюстительницы, яко от неблагодатней, приятых тамо у вас при святей церкви и долговременно Господеви Богу безкровную жертву за весь мир во оставление грехов приносящих, зде же таковых паки неразсудне переприемляху и помазоваху миром. Еже не дарованное нецыи без совести общества нашего поступаху непохвально, пачеже во всецелом свете безчестно. Чего ради обще собравшеся всепокорнейше просихом обоих стран о призвании в помощь всемогущаго Господа Бога, да послет премудрость от престола славы своея, да научит воле святей своей, яко та угодна есть пред величеством Его, и да разсуждают между нами случившияся распрения и несогласие чиносодержания в церковных, по святых писанием, при общенароднем собрании, на котором бы предлагалася самосущая справедливость, свидетельствованная божественными велении, о чем мимошедшаго 1779 года, месяца ноября 1 дня и собрахомся в доме Григория Федоровича Ямщикова яко до трех сот человек, и бысть – с таким установлением:

 

Седение первое.

В крестовой его домовой собственной палате постановлено было на столе, подобием престола сделаннем, священное Евангелие, пред коим возжена была свеща; нижее – стол судейский; понижее – стол беседующих. У судейскаго же стола сидели избранныя от всего общества медиаторы, то есть судьи, яко да праведно разсуждают о имеющейся эсенцыи распрения нашего. Со стороны церковныя города Скопина купец Ефим Денисов, с московскаго же общества – московский купец Василий Иванов серебреник; про между же их поморскаго согласия Василий Емельянов. При том же столе разглагольствующих со стороы церковныя инок Никодим, со стороны же московскаго общества Димитрий Федоров, Иван Семенов, Георгий Федоров. Как оныя судьи, так и разглагольствующии были обязаны пред святым Евангелием присяжною должностию под клятвою в силе безстраснаго и нелицемернаго разсуждения, яко стоя на страшнем суде Христове. Священницы же от лица церкве с правыя страны образа Христова (седяху), яко то: священноинок Михаил, священноиерей Кир, диакон Сергий, иноцы же: схимник Никита, инок Иоасаф, инок Иоаким, инок Иоанн; с левыя же страны от московскаго общества: иерей Василий Стефанов, иерей Алексий, иноцы же: Аарон, Иосиф, Тарасий. Против же об ону страну елико от послушающих окруживше сидяху и стояху, благочинно внимающе обеих стран опасному разсуждению, слушающе и судейскаго положительнаго определения. На коем было первое предложение, чтоб разсуждать по священным правилам и деяниям церковным о имеющемся распрении и да не уничтожаемы будут и предки наших отец. Чего ради первее и приступиша к разсуждению о предках отеческих: аще где, в коих странах, что и действоваху, но по коему писанию? и суть сии законно и во всегдашнее, яко правильное и обдержное, приятие годе станет ли приятно быти соборною церковию? яко то во повторнем на Ветке Стефаном и Козмою приходящих от великороссийския церкви и крещенных по новопечатным книгам крещении и повторнем некоторых по местам перевенчевании, и при исправлении священных без миропомазания, простых же с помазанием, и купели с водою поставления, и свещ возжения, и около купели хождения, и синдонов накладания, кума и кумы предстояния, и младенческаго отрицания, Апостола и Евангелия чтения, и несогласных приемов един другому непоследующих? О чем разсуждающе, яко таковых действии вне и кроме божественнаго писания быти показуются. Чего ради от страны московскаго общества Димитрием Федоровым таков изнесся глас противу вопрошения отца Никодима, иже вопроси его: яко таковая предков наших действия законная ли? на что Димитрий отвеща: не законная. Чего ради в столе судейском и записаша судии, почему на таковых предках несогласных и правилам церковным противных основание и последование иметь опасно. Того ради и присудивше беседовать от Божественнаго писания, а не от предков и обычаев, един единому разгласных. Но отец Никодим прирече тако: а аще что и действовася и не согласно законом церковным, но по неведению от отец и ревности древлецерковнаго чиносодержания, буди им вечная память, аки верным Божиим рабом. Народи же, елико ту слышащии, весьма на Димитрия Федорова негодующе, яко таков на прежде бывших отец действия изнес глас: незаконная. На что Иван Симеонов Хорский, зазирая Димитрия, яко несмысленна, сам же седе противу отца Никодима, а Димитрию же судии повелеша из стула беседующих изступити, и изступи. О чем паки отец Никодим Ивана Симеонова вопроси таковем же вопросозаданием, якоже и Димитрия Федорова. На что в прочих же Иван Симеонов умолча, а о паки браков перевенчании сказа, яко без прегрешения таковая, аще и действоваша. На что Никодим и вопроси его, да покажет от законов церковных, или деяниев, еже во священных историях показующихся. О чем и доказуя Иван Симеонов от книги Саввы архиепископа Сербскаго, якобы точно таковех повеле перевенчевати, еже от латин венчавшихся. Никодим же таковое Ивана Симеонова доводствование весьма зазирая и ложно быти сказуя. Иван же Симеонов весьма крепляшеся, яко в книзе его точно сие обретается, а книги его ту не бяше, чего ради дадеся сроку до предбудущия недели, яко да покажет, о чем точно слышателие повелеша сие в столе судейском записати. И записаша, но моляху, да беседуют от божественнаго писания, чего ради от страны московскаго общества, елико от беседующих, и не хотяху приступити к опаснейшему разсмотрению божественных правил. Обаче приступиша един ко единому, пременяхуся, беседующе о еретицех, елико обращающихся ко святей соборней и апостольстей церкви, яко святая церковь приходящих, елико священнаго и мирскаго чина, на три чины единообразно располагая приемлет: перваго чина еретик крещает, втораго святым миром помазует, третьяго с проклятием ересей точию приемлет во общение церковное. О восточней же ныне и великороссийстей церкви разсуждающе, яко о не осужденных и обще изрицательнаго суда не приемших, и не яко уподобительно есть несторианом, евтихианом и северианом, еже о самой священней богословии согрешающих, без миропомазания, но точию с проклятием ересей приемляхуся в полности церковных архипастырей, по изъяснению церковных учителей, яко то Тимофея презвитера и сосудохранителя, бывшаго в царство Анастасия и Юстиниана, в лето 485, и толкователя священных правил Алексия архидиакона, от толкования девять десят пятаго правила шестаго вселенскаго собора, бывшаго в лето 891-е, Никона Черные горы от слова 63-го, бывшаго в лето 1085, Феодора Валсамона от ответа Марку, патриарху Александрийскому, бывшаго в лето 1200-е, преподобнаго иже во иеромонасех Матфея Правильника от состава 1-го, бывшаго в лето 1343-е. Чего ради изрекоша со страны церковныя таков глас: аще святии и от таковех еретик, сужденных общецерковным судом и сице проклятых, еже о самой полности священныя богословии погрешающих, с проклятием точию ереси, без миропомазания, приемляху и тем токмо удовлетворяхуся, и в самой полности богопреданнаго чина архиерейскаго общения церковнаго таковех сподобляху. Чего ради из московскаго общества Иван Симеонов изрече: пускай по вашему и с проклятием точию ереси принимать есть свойственно! Никодим рече: не хощем еже глаголеши: пускай по вашему! но пристигая да рекут: по святоцерковных учителей! На что и не хотя изрекоша, яко и третиим чином принимать есть спасительно и святых отец предание, на коем хотяху от страны церковныя и утвердитися. Обаче прошаху московстии, да с таковех доказательств сойдут на осмое правило перваго вселенскаго собора, на что и согласися отец Никодим, не яко да тое его прежнее и вышеобъявленное доказательство оставит, но по просьбе Ивана Симеонова, яко да со умолением дозволит о осмом правиле разсуждати: зане, рече, перваго вселенскаго собора повеление; о вышепоимянованных же свидетельствах потом иметь незабвенное разсмотрение. Чего ради и соидоша, и начаша разсуждати о приеме священных, елико обращающихся от еретик перваго, или втораго чина, яко по крещении, или по миропомазании, како нарицаются? и пребудут ли во своем чине? и како пребудут? и без паки повторнаго по степенем хиротонисания священная воздействуют ли? и может ли священник священника миром помазать и по помазании паки, без обычнаго по степенем возведения от соборныя церкве епископа, священная действовать дозволить? Чего ради Иваном Симеоновым и прочтено правило осмое перваго вселенскаго собора, в Кормчей напечатанное во главе на листу 35-м. По прочтении же начаша разсуждати самосущее правило 8-е 1-го вселенскаго собора, положенное в лето от Рождества Хрситова 325: в каковом смысле положися о еретицех наватианех, глаголемых чистых? и кия ереси бяху за таковеми? и под кая казнения церковная тии подпадаху? и к киим еретиком бяху подобни? и како до перваго вселенскаго собора во общение церковное святии приемляху? и по сем до толкователя священных правил, Алексия архидиакона, по каким правилам, елико священнии, от таковых обратившихся приемляху? Иван же Симеонов на отца Никодима совопрошения о том ответствия никаковаго не сказа, но точию да прочтено будет, глагола, и толкование того правила. Никодим же уступи ему, и повеле чести. Когда прочтоша и доидоша речи: «токмо святым миром помажутся, аще же нецыи от них суть епископи, паки в своем чину да пребывают», на что отец Никодим вопроси Ивана Симеонова: како по миропомазании паки в своем чине да пребывают? – с тою ли от еретик принятою хиротониею, или другия сподобятся от соборныя церкве епископа? Иван же Симеонов изрече: с тою, еже от еретик приятою; и указа на речь в толковании имеющуюся: «паки в своем чину да пребывают». Никодим же воспрепятствова, яко не с тою, но от соборныя церкве епископа таковии сподобляются, о чем хотяше доказовати от святаго писания. И егда разгнув Кормчую книгу, Иван же Симеонов моляше, да оставит о сем ныне; вину же полунощия представляя, и яко да в пути в домы своя разшествия в руце командующих не впадут, и домашними нуждами отрицаяся. Никодиму же нудящу, хотя поне на мал час да пробеседуют и да слышат на сие доказательство. Народи же моляху его, да отпустит до предбудущия недели, на что и согласишася вси обще, да в предбудущую неделю будет полное собрание. И тако на сем седении, не окончив о сицевой эсенцыи, разыдошася, но токмо с таковым изветом отходяще глаголаху нецыи: аще и самая справедливость выйдет по доказательству отца Михаила и Никодима от святых писаний, яко по миропомазании священства своего ниспадают и без повторнаго по степенем хиротонисания священная отнюдь да не воздействуют, но обаче мы, рекоша, без керженских, иргизских и сибирских к тому ни под каким видом не согласимся. Но при сицевом извете и сие изрекоша: сибирских за 6000 верст пождут, пождут, и так, не окончивши, разъедутся; а мы уже слободским не покоримся и без миропомазания не примем.

 

Седение второе.

Ноября седьмаго на десят дня собрашася тож в доме Григория Федоровича Ямщикова яко до двух сот человек таковым же порядком и в той же силе присяжныя должности, да недокончанная на прежде бывшем седении паки начнется, яко да правда и неправда на среду изнесется. Вина же сего седения бысть в такой силе, яко по крещении или по миропомазании елико обращающиися от еретик перваго, или втораго чина священнии како священствуют в соборней церкви, - с первейшею ли еже от еретик приятою хиротониею, или другия сподобятся от соборныя церкве епископа, аще таковии восхощут от достойных священнодействовать? Чего ради дожидахомся беседословцев, Ивана Симеонова и Георгия Федорова, яко до двою часов и более; но вси отзывающеся глаголаху, яко не хощем с Никодимом беседовати; овии глаголаху, яко человек сильный и никто не может с ним глаголати, понеже вси дни в том пребывает; овии же нарицаху его отступником; инии же укоряху различными укоризнами и непостоянна его нарицаху. Но точию един Дмитрий Федоров от беседословцев прииде. На коем собрании чтены были доказательствы церковныя, собранныя от святаго писания, яко по крещении, или по миропомазании елико священнии священства своего лишаются. И некоторыя противоречия были от Дмитрия Федорова весьма неосновательныя и с подобательным нравом христианства и показаниев законов церковных нимало не сличныя, яко то разсуждая в послании Константина града собора речение се, еже: «поставляются». Но он, представляя, якобы сие послание не о духовных, но о светских секретарях, канцеляристах и бургомистрах сказует, о чем напротив того и доказано ему, яко отцем Константинограда синоду не есть опекунство о светских, но о духовных, и не к сенатскому члену, мира сего владеющему и афицию генералитетства содержащему, и воинския саны определяющему, но великоодарованному и свыше от Бога саном архипастырства почтенному, и не яко светских в секретари и канцеляристы производит и в бургомистры определяет, но елико от достойных в диаконы и презвитеры посвящает и в епископы поставляет: оружия бо его суть не плотская, но духовная, к нему же сие послание есть, Мартирию епископу Антиохийскому. Но в чем Димитрию вси отрекоша, яко неведущему святых писаний, и вступати в доказательствы таковому есть несвойственно. Чего ради, видя себя в достойном презрении о своем упрямстве, яко с един точию час поседе и уйде в дом свой без обычнаго прощения, со изветом таковем, яко бы изгнанный Григорием Федоровичем. Но никаковаго ему изгнания не бысть; точию Григорий Федорович выговорил, да беседует кротко и доказывает от святых писаний, а не от своих и неприличных тому нимало мнениев. Посем вопрошаху судии и Филипп Симеонов отца Никодима, да явит о сем, еже как по крещении, так и по миропомазании елико обратившиися от еретик священнии яснейшее доказательство, яко без паки обычнаго по степенем возведения священная да не действуют и по таковех приятиях таинств священства своего лишашася. О чем явственно от божественнаго писания и показа, яко таковии священства своего лишаются и яко мирстии и простии людины от церковных учителей вменяются; а без повторнаго паки поставления отнюд да не священствуют. О чем весьма понятно слышаще, разсуждаху, яко тако под миропомазание принимать священных, без свойственнаго архипастыря церковнаго, отнюд не подобательно. Паки попросиша отца Никодима: аще под миропомазание принимать опасно, да по миропомазании не потеряем содержание правильнаго священства, то как принимать свойственнее, и по коему писанию, и где тое обретается? На что и ответствова отец Никодим, доказуя, яко свойственнее есть принимать елико священных без миропомазания, о чем и предложишася правилы собора, иже в Карфагене, 69 и 99-е, в книзе Кормчей, и Севаста Арменополя и Матфея Правильника о еретицех донатианех и о ересех их. Потом от деяний церковных чтено, яко святии Савва освященный и Феодосий с десятию тысящи отец приняли Иоанна патриарха Иеросалимскаго от ереси Севировы без миропомазания, но с проклятием точию ересей и исповеданием православныя веры, тем токмо удовлетвориша и во общение церковное прияша, о чем чтено в Минеи Четии декабря 6 числа со объявлением ересей Севировых. Или якоже на четвертом вселенском святом соборе, иже в Халкидоне, прияша от ереси Евтихиевы тоже без миропомазания, но с проклятием ересей и исповеданием православныя веры, со изъяснением ересей их: Барония лето Господне… Потом чтено было приятие Пирра и Феодосия и двух патрикиев от ереси единовольныя без миропомазания, но со отречением точию ересей и исповеданием православныя веры: Минея Чет. генваря 21. Потом чтено было приятие на седмом вселенском святых отец соборе от ереси иконоборныя, тоже со изъяснением ересей их, без миропомазания, но с проклятием точию ересей: Минеи Четии февраля 25-го. Потом чтено было о приятии Даниила Берестинскаго, от Исидора отступника православныя веры латинщика хиротонисаннаго, без миропомазания, но с проклятием точию ереси и исповеданием православныя веры: Минея Четия великая августа 31. И тако по выслушании сих от отца Никодима доводствований, яко святии и учителие церковныя и от таковех ересей елико обращающихся без миропомазания, но с проклятием точию ересей приемляху во общение церковное, почему же и наши отцы, иже в Польстей области жившия, на Ветке, и окрестных местах, таковем отцем последствующе без миропомазания приемляху, а особливо под миропомазание священных принимать весьма опасуяся, яко да по миропомазании не потеряем правильное священство, коим и ныне подражающе тако и приемлем, повинующеся словеси священнаго проповедника слова Божия, святаго Апостола Павла, иже рече: помните наставники ваша, иже глаголаша вам слово Божие, на ихже взирающе скончание жительства, подражайте вере их. Темже и покаряющееся о сем, тако отцепоследовательне и приемлем. Потом чтена была история о Ветковском бегствующем священстве, от времен блаженныя памяти священноинока Михаила, и им принятых ко святей церкви, - едино-другоприимательне приемляху без миропомазания, которым приятиям и доказательствам мнози от слушающих согласишася отнюд под миропомазание не принимать, да по миропомазании не потеряем правильнаго священства. Чего ради и приступиша к судии Василию Емельянову, яко да скажет по самосущей справедливости, яко стоя на страшном суде Христове, еже по миропомазании елико обращеннии от еретик втораго чина священнии лишаются ли своего сана, в немже у еретик беша, и праведно ли доказательство от страны церковныя. На что ответствова Василий Емельянов, яко от еретик втораго чина елико священнии обратившиися и тайны святаго миропомазания сподобишася, уже первейшаго своего от еретик приятаго священства лишишася, и яко мирстии и простии людины от церковных учителей вменяются, и елико от достойных потом хиротонисуются (во) оное, еже у самех беша первее, - или презвитеры, или диаконы, или ино что. Чего ради разсуждающе принимать свойственнее с проклятием точию ересей, обще соборне судивше; а не пришедших попа Василия Симеонова соглашася на сем собрании, хотя и неволею, да призвани будут и да очистят предложение осмаго правила перваго вселенскаго собора, еже и в мимошедшем собрании условишася, да в предбудущей недели о сем разсуждают, еже якобы по миропомазании с тою же от еретик глаголемых чистых приятою хиротониею да священнодействуют, и тако разыдошася.

 

Седение третие.

Ноября 24-го дня, тоже в доме Григория Федоровича Ямщикова, на коем было яко до трехсот человек, и бысть полное собрание, на коем было от страны церковныя прошение, яко то от отца Михаила и прочих отец, яко да будет таковое же установление, якоже на первом и на втором собрании: Евангелие и стол судейский, при коем бы то-ж были-б судии, как и прежде, для удобнейшаго разобрания и слышателей понятия. Но к тому нимало враждебницы церковнии, яко то Георгий Федоров, Иван Симеонов, Прокофий Иванов, Дмитрий Федоров и главный их предикатист Петр Матвеев резщик, не преклоняхуся, но вопияху, яко изумлении, с не малым азартом и криком глаголюще: не хощем, да будет первое установление – Евангелия и стола судейскаго с присяжной должностию! – воскричаша: мы люди свободные, можем и на своих местах остаться, и к сему приступить не хощем, и беседовать с таковым положением от нас никто не будет. И аще все сие отложится, беседовать, рекоша, будем. О чем на мног час между собою распрешася. Хотящии же ведать опасно правду церковную и разсмотреть справедливо от святых писаний, то тии глаголюще, яко достоит быти таковому прежде бывшему установлению; а разсуждающии же никако к тому не преклоняхуся, хотяще, да тем токмо и отъидут, воеже бы не беседовать от божественнаго писания, но во своем упорстве и остаться. Обаче вси упросиша отцев хотя по воле их сделать уступку, стола судейскаго и прочих перваго седения уставлениев во еже бы не быть, да не безплодно сотворят толико собрание многонародное. И уступиша; токмо отец Никодим такую речь выговорил к противящимся: Вам того ради судейскаго общества и присяжныя должности видеть и слышать не хочется, да свободнее будет многонароднаго клича и вопля, а наиболее страстнаго суждения и своей воли исполнения; аще мы по вашему прошению искомое вами и уступим, обаче намерением присяжныя должности как себя, так и вас таковым же образом обязуем, а стола общим собранием и из судей, яко богоугоднаго дела, не отмещем. И указа рукою на священное Евангелие, и рече: аще кто пристрастно будет разсуждать и не по разуму церковных правил тая будет толковать, то судит таковем в последний день оно слово Божие! И по сем рекоша противницы церковнии: аще беседовать и начнем, но токмо ставим условием, чтобы противу Никодима было беседословцев шесть человек, зане яко в писаниих человека сильнаго глаголюще его быти. Но аще и трудно ему вменися сие быти, но обаче, полагаяся на заступление Пресвятыя Владычицы нашея Богородицы и Приснодевы Марии, призывая Господа Бога в помощь, помолившеся вси общекупне, седоша с благословением. Имена же суть противящихся, яко то: инок Арон, Георгий Федоров, Иван Симеонов, Дмитрий Федоров, Петр Матвеев, Ефим Пименов. И начаша беседовати о недоконченном беседословии, еже на первом седении предложения осьмаго правила перваго вселенскаго собора, чего ради паки о том приупомянеся, на кое доказательства яснейшаго требоваху от отца Никодима, яко по миропомазании сказует толкователь сице: «аще же нецыи от них суть и епископи, паки в своем чину да пребывают». Такое речение отец Никодим доказывал свидетельствы церковных учителей, яко то: от послания Константина-града собора к Мартирию епископу Антиохийскому (Кормчая, глава 33, лист 292); Севаста Арменопола от книги 4-я; Феодора Валсамона патриарха Антиохийскаго ответ 30-й; пречестнаго иже во иеромонасех Захария Копистенскаго, яко по миропомазании во своем чине пребывание с тем, яко потщаливии мирстии, яко людини, посвящаются, поставляются, хиротонисуются, рукополагаются в сан, в нем же беша, почему и достоверно есть, еже елико обратившихся от еретик перваго чина, от павликиан, по крещении, да поставлены будут кождо в свой чин, о чем в правиле перваго вселенскаго собора и толковании того (Кормчая, лист 40), по миропомазании же поставляются в сан, в немже беша, или презвитеры, или диаконы, или ино что, о чем Кормчая во главе 33 лист 293. Почему мнози к разуму церковных учителей и согласишася, единиже осташася враждующии на единение церковное нецыи же и от беседословцев признаша самосущую правду, яко по крещении, или по миропомазании лишаются своего священства, яко то Ефрем Пименов и самый их главный предикатор Петр Матвеев резщик, но которой ныне их убеждением паки развратися; а принимать рекоша свойственнее и от всех поноса и унижения свободительнее без миропомазания, и писанию святых согласнее, якоже в священных правилах и деяниях церковных есть видети, о чем выше сего во втором седении представишася, коему больше и соглашахуся; а от церковнаго единства отстать ниже в мыслях наших обретается, а остаются более тии при своевольных своих мыслях, в которых душех мир Божий не водворяется, но таковии, яко розга, не творящая добраго плода, вон из винограда Божия измещутся и бывают всем в попрание. Чего ради со страны несогласных изыде на сем собрании от Георгия Федорова и Ивана Симеонова таков извет, яко без керженских, иргизских и сибирских едини согласитися не хощем, а прочих оставляем на власть коегождо, якоже кто хощет, понеже у нас и на первом седении было таковое условие; аще же и докажется от писания, яко по миропомазании священства лишаются, но оставить всякаго при своей власти, якоже кто хощет. Инии же изнесоша таковыя гласы, яко мы в том и умрети готовы, якоже у нас действоваху отцы на Керженце, в Сибири, Иргизе и в Дунилове; на что таковем было представлено, яко отцы тии, аще и действоваху по неведению, и сего ради им есть простительно, якоже и глаголющим трегубую аллилуию с приглашением: Слава Тебе, Боже, или якоже (служащим) по неисправным от недописей и переписей письменным книгам, еже и в самой богословии погрешительным, по свидетельству преподобнаго и великоученаго мужа Максима Грека; и того ради поносити таковых отнюдь несвойственно, но буди им вечная память, аки верным Божиим рабом. Посем даша Симеону Федорову присланное из слобод письмо к московскому обществу от елико согласных на отца Михаила и Никодима, да вдаст е при всенародном множестве, кое бы токмо прочести, а в руце Никодиму не давать, мняся якобы таковым заградитися. Никодим первее всех исхити; и сделася презельный крик; и у Никодима его из рук отъемляху. Одначе не возмогоша отъяти, кое и прочтено Никодимом, в коем написано с презельно ругательными поношении на отца Михаила и Никодима, но кое вси зазреша. И тако разыдошася.

 

Седение четвертое.

Ноября 25 дня, в доме Иоакима Васильевича Мальцова, в горнице Ивана Симеонова Хорскаго, на коем были избранныя люди со страны московскаго общества: Иван Симеонов, Стефан Евдокимов, Алексей Алексиев, Володимир Иванов сапожник, от страны же церковныя инок Михаил, инок схимник Никита, инок Иоасаф, инок Пафнутий, инок Никодим. На коем было представлено от многих церковных учителей доказательство, яко ни под каким видом по миропомазании без повторнаго паки по степенем хиротонисания священная действовать отнюдь невозможно, откуда слышателие весьма о том понявше, яко свойственнее есть принимать без миропомазания, но со отречением точию ересей и исповеданеим православныя веры, а ежели помиропомазании, яко мирстии людини от святых разсуждаются. Иван же Симеонов ничего не доказуя, но в своенравии и упорстве остася, откуда вси чувствительно уразумеша безответвие его, и тако разыдошася.

 

Седение пятое.

Декабря 2 дня, в доме Григория Федоровича Ямщикова, на коем были: Никита Павлов, Иларион Григорьевич, Стефан Алексеевич, Филипп Симеонович, Ермил Филипов, Никита Никифоров, Иван Михайлов Мусорин, Егор Исаев и прочих человек яко до пятьдесят. На коем было предложено винословие отеческаго приезда триех ради проявленных разнствий между здешним обществом и церковным единством, яко то: о разногласнем приеме отвне приемлемаго священства и мирских, и еже о повторнем перепринимании, и еже о варении на Кладбище вне соборныя церкве и законов церковных незаконнаго и неправильнаго мира. И разсуждающе вся сия действия кроме свидетельств священных канонов и омышлению подлежащия, и разсуждающе, яко свойственнее есть принимать без миропомазания, но точию с проклятием ересей и исповеданием православныя веры; обаче с прошением отец моляху, воеже бы до Рождества Христова пождали, яко да с прочих стран отцы съедутся, и тако соборне что положат. И тако разыдошася.

 

Седение шестое.

Декабря 22 дня, в доме Никиты Павлова, на коем было народа яко до ста человек. И что рещи тое своевольное соборище? Разве изумленных сонмище! Вси вопияху, вси горце кричаху, вси яко гуси гоготаху, вси яко журавли скрипяху. На котором были со страны церковныя: священноинок Михаил, инок схимник Никита, инок Никодим, инок Пафнутий, инок Иоасаф; со страны же московскаго общества: поп черной Матфей, иерей Василий Стефанов, инок Иона курносой и Иаков Галицкой с Керженца, Сергий Иргизский. На коем были чтены письма из Керженца, Данилова, из Городца с молением к отцу Михайле, да последует прежде бывшему отеческому обыкновению, еже бы приходящих от великороссийския церкви миром помазывать, в коих прописано, чтобы Никодима старца не слушать и яко противника церковнаго отлучить. Потом чтено бысть писание, присланное из слобод Климовой и Митьковки к московскому обществу, в коем прописано, якобы иеромонах Михаил и чернец Никодим отрыгнули злодыхательный и зловредный еретический яд, ежебы миром не помазывать приходящих от великороссийския церкви, и иная злохуления восписанная из того свитка чтено дуниловским жителем Федором Михайловым. Потом чтены некоторыя поносительства на отца Никодима в его некоторых наносительных недостатках. Потом чтена была история о бегствующем на Керженце священстве, веденная от времен Никона патриарха, писанная саморучно Ионою курносым, - в начале о Павле, епископе Коломенском, якобы изволил он приказывать, чтобы священников принимать от великороссийской церкви средним чином, под миропомазание, а и по миропомазании священство не снемлется, ибо-де и святый Григорий повелевает под миропомазание принимать и по миропомазании священство не снемлется. На которое веденное историчество вопроси Никодим читателя Федора Михайлова: сия история киим написана? На что ответствова Феодор: писал де сию историю саморучне отец Иона, на котораго ту преседящаго и указа рукою, к коему и прииде отец Никодим, и вопроси отца Иону и рече: ваше благословение, вы ли изволили сию историю писать? Он же рече: аз грешный. Никодим же нача вопрошати о Павле епископе Коломенском: сами ли изволили есте его священнострадальца Христова видеть и из его уст оное приказание слышать, или от кого вам случися уведать тое, или в письма некоего списавша? О чем отцу Никодиму дуниловские жители: Яков Васильев, Василий Афанасьев Софонеев, Григорий Демьянов отнюдь не даяху подробну испытовати и разными гласы вопияху, укоряюще Никодима; секретарем его нарицаху, инии же повытчиков именословляху, овии же различно ругаху, кому что вздумается, ихже укоризн не леть есть и писати. Он же неотступно Иону вопрошаше, да яве будет, откуда оная история выйде. На что Феодор Михайлов: я за отца нашего Иону возответствую. На что ему отец Никодим сказал: вам несвойственно за самописателя, ту суща присутствующаго, отвещавать, не к вам бо наше совопрошание настоит, но к самописателю истории сея. Чего ради паки дозволися вопросити близ его седшу Никодиму, и вопроси его паки: убо ли самовидец и самослышатель бысть приказания священно-страдальческаго? или от кого где слыша? или с готово веденней истории списа? Он же рече: самовидец и самослышатель таковех повелений о приятии священных под миропомазание не бывал и повелений таковых не слыхал, но списал сию историю с готовыя; а кто тую историю писал, того не ведаю; а списал ее не в давних летах. Паки вопроси его отец Никодим: в оной веденней истории упоминается святый Григорий, от коего якобы священнострадалец Христов Павел епископ Коломенский при приеме (приял) повеление и своему приказанию крепкое заключение, у коего обретается, еже обращающихся от еретик втораго чина, елико от священных, принимать во общение церковное под миропомазание и по миропомазании священство с таковех не снемлется, - и кто таков Григорий? святый Богослов, или Двоеслов? или ин некий? и от лица ли церковных учителей, или ученик чей бысть? и где таковое его повеление обретается, - в коей книзе, и на коем языке, - на греческом ли, или на латинском, или на грузинском, или на молдовлахийском, или на ином некотором? в печатней, или в писменней, в харатейной, или в бумажной? Чего ради Никодим, и кланяяся до земли, прирековаша: и аще таковое повеление ясное в писаниях обретается, молим, да покажите нам имени ради Божия и вся наша мысленнаго мрака о сем недоумении разрешите. Видев же Иона, яко Никодим неотступно о сем вопрошает, чего ради и умолча и яко безгласный седяше, зря ниц, не смеяше ни очесы возвести на Никодима. Никодим же паки его притужая, да ответствует о Григории: суть ли от лица церковных учителей и где был? в коей стране, какая лета поживе, и кто о нем от святых засвидетельствова? Видеша же елико ищущии сущия правды и благоразсудительнаго доказательства от законов церковных, разсуждающе глаголаху, яко сие во истории, с Керженца привезенней, писанней Ионою, ложно суть и фальшивую именословляху. Елицыи же не истинныя правды ищущии, но победы и одоления смотряюще, то тии Никодима канцелярским ябедником, уничижающе, нарицаху. Видеша же даниловския жители, яко Иона о лживей его истории изобличается от Никодима, вси воскричаша, укоряюще Никодима различными злохулении и досажденьми. Никодим же неотступно его вопрошаше, да пред всенародным множеством изобличится лжа их и яко да неприятную во всем обществе нашего единения покажет. Чего ради вышепоименованный Феодор Михайлов сказа, яко сие Григория святаго повеление описка суть. На что отец Никодим сказа: вам откуду известно, что во оной истории упоминаемый святый опискою в ню внесеся, еже не вам ю писавшим, но отцем Ионою? и аще сия описка, то что бы следовало вместо того написать? На что сделался Феодор безответен. Никодим же (нача) оную историю, яко фальшивую, обличати, а отца Иону, яку лжу пишущаго, препираше, глаголя, яко всяка лжа от диавола есть, любяй лгати друг бесом. Убо ли сицевыми ложными доказательствы изволите нас уврачевать, яко таковем никогда последствовати обещавшимся, и яко не свойственными христианом догматизании уверити нас приехасте? А особливо ангельский образ имеющим и сединами преукрашенным есть лгати непристойно. На что ни мало не ответствоваху, как оный Иона, так и Феодор Михайлов, но точию на Никодима бедне гневахуся и хотяще, да изведен будет от ту собраннаго народа; а особливо Яков Васильев Игумнов моляше с лестию, да в друзей полате един на един с ним точию да беседует. Никодим же отзывашеся, глаголя: кая польза будет нам наедине глаголати, яко слышателие останутся без пользы? А намерение их бысть такое, чтобы или его запереть единаго, или согнати с двора, или пястие возложити на хребет и на ланиты. Некто же от боящихся Бога вездесущаго и на всех милостивно презирающаго возвести иноку Евфимию, Евфимий же иноку Иоасафу, да не отходит никуды отец Никодим, хощут бо его на то уготовленные бити нещадно. Обаче весть Господь благочестивыя от напасти избавляти. Посем отец Никодим воззре на Никиту Павлова и прирече: вы, Никита Павлович, изволили в мимошедшее время, по приезде оных с Керженца отец, плескать руками, яко Никодима сими выписки победим, понеже обрели и есть готово, яко и по миропомазании священство не снемлется: о сем ли изволили радоватися, плещуще руками и глаголюще: победим, победим? Как видно, вы не правды и разсмотрения ищете, но победы и одоления. Сие ли ваших столетних стариков твердое доказательство? Аки паутинная ткания прикосновением крыла бездушныя мухи разоряется! И о сем ли радоватися изволил еси, яко сицевыми лживыми списками Никодима, плещуще руками и глаголюще: победим, победим? И на сицевых лжах, от сего сединами цветущаго написанных в его издавна им самем похвальной книге, всюду лжами, яко Питиримом Нижегородским сысканной им книгою, нарицаемое Деяние, плесния паче сребра блещащеюся, выдумкою утверждатися, яко не следовательно, а паче омыслительно. За что отцу Никодиму от Никиты Павлова и жалование дубин посулися, чего ради и изведоша его оттуду в дом Стефана Алексеевича, да не сотворится некоторый с обеих стран бунт и убийство. И потом сделася ужасно презельный крик и неполезный с криком шум и друг на друга поношение с произносительными укоризнами, ихже не леть есть и писати. Посем час утишашася, - раскаевахуся, яко таковое собрание не есть полезное, пачеже безчестное, и излишно обидехом беднаго Никодима. Зазирающеся и едва пришедше в себе, видеша, яко Никодима ту не обретается, послаша Никиту Никифорова и Филиппа Семеонова, да умолят Никодима ко еже паки прити на то собрание, и да беседуют от божественнаго писания, и да не памятует, молящеся, досад их. Пришедше же послании в дом Стефана Алексеевича и просиша его с умолением, не поминая злохулениев и досад, на что и согласися отец Никодим, и пойде по прошению их, и прииде паки в дом Никиты Павлова, и на долг час прошаху, да поне мало побеседуют от святых писаний и да разсуждают праведно с обеих стран. Но никако умоляеми бяху: паки начася крик и презельный шум. Овии глаголаху, да беседуют от святых писаний, овии же ниже слышати сие хотяху, а особливо боящеся отца Никодима, яко человека в писаниих ведущаго, да не побеждени будут ищущии победы и одоления, а не правды. Прииде же инок Пафнутий к Феодору Михайлову и рече: чего ради вы от божественных писаний беседовать не хощете? Он же, не ведая яко Пафнутий есть сын святыя соборныя и апостольския церкве [т. е. держится стороны Михаила и Никодима], и рече ему: аще от писания беседовати, то многих соблазнишь. Пафнутий же сие возвести велегласно, яко того ради от писания беседовати не хощут, да не обличится лживое их смышление. Народи же, елицы от страны противных, весьма на беднаго Пафнутия возшумеша, укоряюще его. Обаче едва убедишася, на мал час да беседуют от писания, о чем и согласишася. Иван же Симеонов Хорский изрече: Никодим хотя и не вас обманет! Нецыи же, со усердием желающе слышати слово Божие и зрети правду церковную, воспрепятствоваша ему и рекоша, яко Никодим не свое глаголет, но от святаго писания, а аще и ангел с небесе сшедший и вещаяй свое, а не от писания, анафеме предается. На что Иван Симеонов паки сказа: Что нам говорить с ним? Ибо он человек сильный и всякия увертки в беседах ведает; никто его не знает, а мы весьма его издавна ведаем. Однако назначиша пять человек, яко да беседуют с Никодимом, а именно: старца Сергия, Ивана Симеонова, Петра Матвеева рещика, Феодора Михайлова, Георгия Феодорова. Но Георгий Феодоров никогда в лице ответчика не стоит; аще и назначивается к сведению, но никогда в самосущем ответствии лицем выстаивая, но созади, из-за людей, бояся Никодима, да не обличен будет в действии на Кладбище беззаконнаго мироварения, чего ради на третьем седении в доме Григория Феодоровича, ноября 24 числа, по просьбе его Иван Симеонов Хорский в крестовой палате за иконостасом, отведши отца Никодима, кланяяся до земли, молящеся, ежебы о мироварении не было при общенародном собрании упоминаемо, да не молва и соблазн будет в людех. Однако до того в то время случая не доиде глаголати; зде же о сем оставляем, но на предлежащее возвратимся. Помольшеся вси общекупно и седоша с благословением, призвав Господа Бога в помощь и пречистую Его Матерь, начаша разглагольствовати. Но приезжих с Керженца отцев: Матфея, Ионы и Иакова не бяше ту, - аще и умоляеми отцем Михаилом, да послушают беседы от святаго писания, но не идяху, зане от писания доказательств ниже слышати хотяху, отзывахуся, глаголюще: что нам писание? у нас так отцы действоваху! ужели не ведали писания! И прирече Матфей отцу Михаилу: я разбойника слушать не хощу и к седению не иду! Отец же Михаил, увы, горько из глубины сердца о сем слезно болезноваше, молящеся, кланяяся, да приидут из другия полаты и да слышат о предлагаемых, между нами имеющихся распрях, и разсуждают праведно по законом церковных архипастырей. Однако никто не послуша его, и не приидоша; точию единии мирстии, слушающе, внимаху. И бысть помощию Божиею тишина. Беседующе разсуждаху о новшествах великороссийския церкви, яко суть омышлению подлежащих(ия), о нихже и сомневаемся. Сергию же вопрошающу, Никодиму же его наставляющу и ответствующу, воеже бы како принимать елико хотящих содержать древлецерковное благочестие, как священных, так и мирских равнообразне, и доказуя, яко в первенствующей церкви архипастырие церковнии приемляху и приимати заповедаша от еретик, иже в самой полности священныя богословии согрешающих, яко то от несториан, евтихиан и севириан, иконоборцев же и униат, о чем и нача свидетельствовати из книги Кормчей от шестаго вселенскаго собора правила 95 и толкования. И егда доиде до несториан, евтихиан и севириан, яко таковех елико обращающихся ко святей соборней и апостольстей церкви с проклятием точию ересей во общение церковное приимати от святых заповедашеся, почему тако и приемляхуся, иже весьма не сходственны таковем ныне новшествы имеющиися во великороссийстей церкви, - о чем паки сделася преужасный крик и зельный шум, - мнети, яко едва и здания каменная, по пословице, не разнесут; не хотяху, да слышать таковех доказательств, ежебы без миропомазания принимать. На что доказуя отец Никодим, яко и от белорусцев миропомазания тайну святейший Филарет Московский соборне повелевает приимати, о чем сделася паки неумиримая брань, и едва утишишася. Егда же отец Никодим нача Ивана Симеонова вопрошати о сицевых белорусцех: суть ли сии ходиша светом Евангелия, еже крещени крещением обливательным, по римскаго костела чиносодержанию, или тьмою еретичества являются во всяком ветре учения и противная истинней вере творят? И тако недокончив сие, и возшумеша. Никодим же, препирая их, еже да скажут: оное белорусцев крещение обливательное православное ли, или еретическое? И со всецелый час не даяху ответа. Одначе Иван Симеонов, аще и не хотя, обаче изрече, яко еретическое, крещатель же како наречется? Иван же Симеонов сказа: ты суди! – бояся, да наречет крещающаго еретиком, того ради да не разгласится с посланием во обитель Покрова Пресвятыя Богородицы, от общества их посланнем, понеже тамо нарицаются того действителие сущими христианы. Сергий же сказа: христиане! На что отец Никодим вопроси Сергия: убо ли сицевии, от вас именуемии христиане, светом Евангелия ходиша? – молю, да явите нам; понеже святейший Филарет, иже в Польстей области живущих, и в два пути ходящих сказует. Сергий же о сем умолча и нимало противу того не возответствова. Никодиму же притужившу, да ответствует, и сделася паки презельный шум. Вси, елико враждующии на правду церковную, быша яко вином наполнени: кто что вопиет и кто кого ругает, кто кому досаждает! вси неключими и непотребни быша, несть до единаго, во ежебы благая и полезная слышати! всюду свары, всюду раздоры, всюду укорения слышашася! погибе в таковех боговлиянный и всех частей превосходнейший разум и разсуждение души; ослепишабося душевныя таковех разумная очеса. По сем Яков Васильев и Никита Павлов, вземше отца Михайлу и отведоша от стола к окну, и поклонишася до земли в нозе, с лукавством глаголюще: покажи нам третьяго чина еретик особенныя молитвы. На что отец Михаил не разуме их лукавства и обещася им на утрие прислати сделанный прием, по немуже прежнии отцы на Ветке приемляху, в особенной тетради написанный, возмнев, яко бы его требуют. Егда же отец Никодим услыша, приде и рече: чего вы (у) отца Михаила изволите требовать? Они же Никодима с безчестием отреваху, не давше ему никаковых слов во ответствие за отца Михаила глаголати. Обаче услыша, яко третьяго чиноприятия ищут от отца Михайлы, о чем доказоваше людем от книги Кормчия, от собора 6-го вселенскаго правила 95-го, от толкования, яко несториане, евтихиане и севириане, и от инех ересей подобных им, свою ересь прокленше и тем токмо довольни бывше, и на общение прияти суть. Зазираху же отцев ветковских, яко молитвы чтут над елико приходящими, вземлют из разных чинов молитвословия, елико приличествуемыя; на что отец Никодим доказывая, яко суть сие безпогрешительно, понеже на чине постригания малаго образа, елика ненапечатанная, то, поелику приличную, на окончании пострижения вземлют из великаго образа молитву: Иже огненей главе, и прочая; и посему несть никаковаго согрешения, во еже прочтенным молитвословиям таковым, зане с греческаго языка российстии пастырие от таковех еретик несториан, евтихиан и севириан чина молитв не преведоша; а понеже в России таковех ересей не обреташеся, чего ради молитвословия третьяго чина еретиком не положися; но по свидетельству Алексия архидиакона, свою ересь и иныя вся прокленше и тем довольни бывше, прияти суть во общение церковное. И аще оно вас, рече отец Никодим, соблажняет, якобы блюстителей устава церковнаго, и того ради общесоборным судом и всех повелением оныя молитвы, чтомыя во время приятия, оставить мы не прекословим. По сем Григорий Демьянов Дуниловский хотяше, да побеседуют о осмом правиле перваго вселенскаго собора. Егда прочте его с толкованием и хотяше отец Никодим, да покажет его и протчим, в каковом разуме церковнии учителие о приятии новатиан по миропомазании в своем чине пребывание таковых сказуют, и егда хотяше развергнути книгу Кормчую, но Георгий Федоров приступи к столу, не даяше книги развергнути. Никодим же усилуяся, да явит искомое; Григорий же Федоров отпихну его в грудь, и тако весьма воскричаша. Приидеже поп Василий Стефанов и нача Никодима ругать и еретиком его нарицая. Никодим же вопрошаше его: кую ересь во мне обрести изволил еси, и коего еретика и на коем соборе тая проклятию предана? О чем и умолча. Никодим же пристигая его, да явит; и рече Василию Стефанову: аще бы нарек мя блудника, пияницу, татя и скверноглагольника, претерпех бы; а еже за церковь Христа моего и умрети готов есмь, но христианин есмь, а не еретик, а ереси и отступства православныя веры всех анафематизаю и общения таковех всеусердно соблюдаюся и блюстися усердствую. И сделася паки презельный крик и неумиримая брань. И тако весьма возкричаша со гневом и разыдошася, един другаго безчестно гаждаху.

 

Седение седмое.

Декабря 29 дня в доме у Никиты Павлова бысть, на коем было человек яко до ста, и вси сами с собою разгласны: ов мнение такое предлагает, ин иное разсуждает, и един другому ратует. Со страны же церковныя из отцев никого не бысть, кроме отца Пафнутия. Пафнутий же от страны церковныя защищая ея праводогматствование, доказывая им, яко жестоко есть вам противу истины ратовати и лишившихся по миропомазании священства священными почитати, и действовати им есть противно правилом церковным: темже по восприятии тайны святаго миропомазания яко мирстии, яко людины от церковных учителей вменяются, чего ради, рече, отцы наши чиноприем принимать опасаются, да не вовсе лишатся содержания правильнаго священства, а приемлют точию с проклятием ересей, православно, по правилам святых отец. Ту прииде иргизский старец Сергий с Иваном Алексиевым Голым. И сделася великий шум и преужасный крик; ругающе изгоняху вон онаго Пафнутия и слепым его нарицаху; притом же яко обличительне Сергий, призвав Якова Васильева Игумнова, и на Пафнутия сказоваше, еже слыша от отца Михаила пересказованныя речи Пафнутием, якобы Яков Васильев в доме Прасковьи Даниловны Журавлевой увещавал Пафнутия, да согласятся со Матфеем; Пафнутий же рече: аще с законами церковными Матфей будет согласен, то и я с ним соглашуся. И Яков же рече: оставь ныне законы, последуй обычаю. О чем вопроси Сергий Пафнутия: бяше ли таковыя речи? На что и ответствова: быша, рече. Сергей же, спрашивая Иакова Васильева: бысть ли таковыя речения? О чем Яков не возможе запретися, зане око на око сведени суть. Чего ради и рече: говорил таковыя речи, чем Сергий и Яков посрамишася, а на Пафнутия весьма оскорбишася, досаждающе изгоняху его вон, да не противоречит им. Но Никита Никифоров вступися за Пафнутия, моляше, да беседуют от святых книг. Но коим обоим, как Пафнутию,так и Никите Никифорову, Никита Павлов посули дубины, и обеих изгнаша. По сем сташа Петр Матфеев, Стефан Алексеевич, Василий Иванов серебреник за разум церковный о елико приходящих от еретик втораго чина священных, яко по миропомазании священства своего лишаются, и доводствоваху от послания Константина-града собора к Мартирию епископу Антиохийскому о приятии еретик, в коем еже по миропомазании елико священнии, яко мирстии человецы от церковных архипастырей вменяются, и яко (иже) от тщаливых поставляются в сан, в немже беша. Сергий же рече: идите и вопросите своего учителя Никодима, в кая лета послание сие бысть, и буде толкователь священных правил послее бысть сего. Никодим же в то время бысть в соседстве Никиты Павлова у московскаго жителя Филипа Симеонова, к коему прииде изгнанный Пафнутий, беседующе от святых писаний о пользе душевней, у него же народу бысть человек яко до тридесять. Таже пришедше Петр Матфеев рещик, Стефан Алексиевич, Василий Иванов серебреник в дом Филипа Симеонова, и вопросиша отца Никодима о послании Константина-града собора: в кая лета бысть? есть ли где о сем известное ведение? На что отец Никодим и ответствова, яко совершеннаго ведения о летописании о послании сем видеть нигде не случися, гадательствуетбося, яко от втораго святых отец вселенскаго собора бысть сие послание, а вторый собор бысть в лето 374-е. На что Петр Матфеев, пересказывая старца Сергия, яко сие послание бысть до толкователя священных правил Алексия архидиакона, а толкователь бысть после послания. Но о сем отец Никодим нимало в том не препятствуя, и рече: аще прежде, аще после, но разум церковный есть един, как соборнаго послания, так и толкователя священных правил, осмаго перваго вселенскаго собора толкования; убо в толковании онаго правила сказует о еретицех глаголемых чистых, елико обращающихся ко святей церкви, и таковии только святым миром помажутся, аще же нецыи от них суть и епископы, паки в своем чине да пребывают; в послании же Константина града собора сказует: по миропомазании потщаливии мирстии человецы поставляются в сан, в нем же беша, или презвитери, или диакони, или ино что; в толковании же того отдает приходящих в волю православныя веры епископу, емуже и сказуется о таковех, елико священных: паки в своем чине пребывание таковем, емуже то поручися от Христа Спасителя в последовании церковным архипастырем, елико приходящих в свой чин поставляет с обычными всяко степеней произведении. Потом доказывая отец Никодим, яко от времен втораго вселенскаго собора до толкователя священных правил проиде лет 517, ибо толкователь бысть в лето 891-е; а аще по мнению Сергия старца, якобы толкователь по миропомазании, елико обратившихся от ереси глаголемых чистых, священных с первейшею от еретик приятою хиротониею во своем чине пребывание сказует, то в таковех летех како хиротонисаннии в чистых, елико священнии, по миропомазании по посланию Константина-града собора приемляхуся? И посему явствуется, яко таковии и в таковая времена, по приятии оныя тайны святаго миропомазания, яко мирстии, яко простолюдины вменяхуся, потщаливых же паки хиротонисаху в сан, в немже беша; а без повторнаго паки по степенем поставления священная действовати, яко неосвященным, не приемшим сана, не дозволялося. Чего ради и прирече Никодим, яко у них простии и не освященнии священная во одеждах священных действуют неправильно, и подобни во ангела светла образующимся, но не сущим, и Божие лицемерующим, ниже бо гласы божественныя от них, ниже дела святая, понеже поставления не имут, но и месть приимут негде прельстившихся от них, или крещенных, и прочая. И аще собора послание бысть после толкователя, то всеконечно криворазсудительное Сергия старца мнение, еже по миропомазании без паки повторнаго по степенем возведения священная действовати разоряется. Откуду и еще придаде им ведение, яко Феодор Вальсамон бысть после толкователя 309 лет, и той по крещении, или по миропомазании священства лишатися сказует и яко не бывшее вменяет, а елико от достойных по степенем возводитися сказует; тож и Севаст Арменопол, бывый в лето 1343-е, после толкователя спустя 452 лета, засвидетельствова онаго собора послание, в коем по миропомазании, яко тщаливии людини, хиротонисуются во оное, еже у самех беша первее; потом Захарий Копыстинский, бывый в лето 1620-е, после толкователя спустя 729 лет, тожь: по миропомазании посвящаются в сан, в немже были, любо презвитеры, любо диакони, или подъдиакони, или псалмочетцы. От которых доказательств вси ту слышащии приидоша в страх и удивление, како неразумия ради и простоты своея правильнаго священства лишившиися паки священная действуют, о чем и Петр рещик сказал: я – де правду церковную и сам знаю, да для народа умалчиваю! Чего ради даде им Никодим и выписку из Вальсамонова ответа. Но уже не засташе их, вси разыдошася: бояхуся, да не обличени будут. И о сем не умолчим: егда сии, послании из дому Никиты Павлова, пришедшия о вопрошении лет соборнаго послания, моляше отец Никодим елико пришедших да возвестят отцам и всему обществу, собранному у Никиты Павлова, да дозволят ему внити побеседовати от писания и самоличне противу елико совопрошающих отвещати, или Сергия да умолят приити в дом Филиппа Симеоновича. Чего ради и поидоша нецыи из ту слушающих с таковем прошением, и возвестиша тое пред все общество. На что посланным нецыи отрекоша сему быти: к себе его, рекоша, не зовем, и к нему не идем. И ту сделася ужасный крик и зельный шум; инии глаголют, яко да приидет, овии же кричаху: да не приходит, да не соблазн и молва будет в людях, елико слышащих! И тако оставиша.

 

Седение осмое.

Декабря 31 дня в доме Иоакима Васильевича Мальцова, в крестовой светелке Ивана Семенова Хораскаго, на коем бысть со страны церковныя священноинок Михаил, инок схимник Никита, инок Никодим, инок Иоасаф, инок Пафнутий, инок Савватий, инок Евфимий, инок Иоанн, и бысть празднующим ту Пресвятей Богородице, к тому же умоляеми Иоакимом Васильевичем, да побеседуют от Божественнаго Писания со Иваном Семеновым Хорским о между ними имеющихся распрях, яко да правда и неправда обеих стран пред очесы предложится; по коему и согласишася отцы, на что и Иван Симеонов преклонися. Но обаче с обеих стран моляху Иоакима Васильевича, да не разсуждает предложения опасно, безстрастне, ни на куюжде страну, но самосущую правду. И бысть беседующим им, вопроси Иоаким Васильевичь обеих стран и рече: в чем у вас разгласие церковное состоит промежду вами молю, да явити ми. На что отвеща ему отец Никодим, и рече, яко три суть проявленная разнствия между нами и здешними: первое, еже о несогласнем приеме елико отвне приходящаго священства и мирских; второе о паки повторнем приеме от нашея святыя церкве и помазании миром; третье – о варении на Кладбище незаконнаго мира. Посем паки у вас при церкви елико обращавшихся от Велико-российския церкве и приходящих к древле-церковному чиносодержанию, - помазуют ли святым миром, или ни? На что отвеща Никодим, и рече: не помазуют. Вопроси же и Ивана Симеонова: како у вас приемлют? На что отвеща и рече: помазуют. И вопроси его: по каким правилом? и дозволи ему доказывать. Иван же Симеонов вопроси Никодима: единообразно ли святая церковь елико приходящих от еретик принимала и приемлет, как священных, так и мирских? На что и отвеща: единообразно; аще перваго, или втораго, или третияго чина еретик, как священнии, так и мирстии, равно сподобляются крещения, или миропомазания, или с проклятием точию ересей во общение церковное приемлются. Потом Иван Симеонов и прииска священныя правилы о елико обращающихся от еретик втораго чина ко святей соборней и апостольстей церкви, которых повелевается святым миром помазовать, и прочте от тех некоторую часть. На что отец Никодим и выговорил такую речь: аще от таковех елико изъясненных втораго чина еретик приходящих святая церковь повелевает святым миром помазовать, убо и от Великороссийския церкви тожь хощете таковем же чином принимати, почему и приемлете, как священных и мирских, о чем хотя по мнению вашему ныне и попустим сие, и не токмо чела наша готови суть к помазанию святаго мира, но и главы ко крещению; точию да будет согласно с законы церковными и воеже бы елико приходящих и священства саном почтенных и помазавшихся миром не лишитися правильнаго священства: ибо елико обратившихся от еретик перваго или втораго чина по крещении или по миропомазании по законам церковным священства своего лишаются, и без паки повторнаго от соборныя церкве епископа священнаго рукоположения действовать ни под каким видом не дозволяется. О чем и вопроси Никодим Ивана Симеонова, да явит ему поне единое правило или страну, еже бы по крещении или по миропомазании, елико от священных, обратившихся паки с тою же от еретик приятою хиротониею священная воздействуют православно. На что Иван Симеонов и ответствова, яко от еретик глаголемых чистых, иже во осьмом правиле перваго вселенскаго собора и толкования, из коего взем от речи: «и таковии токмо миром помажутся, аще же нецыи от них суть и епископи, паки в своем чину да пребывают». На что отец Никодим и вопроси его: с первейшею ли от еретик приятою хиротониею, или другия от православныя церкве епископа паки сподобятся, и во своем чине да пребывают? На что и отвеща Иван Симеонов и рече: с тою еретическою хиротониею, и без паки повторнаго хиротонисания священствуют безпрепонно. На кое его мнение доводствуя Никодим, яко еже от еретик перваго или втораго чина обратившихся ко святей соборней и апостольстей церкви и крестившихся, или святым миром освятившихся, священства саном почтенных никогла архипастырие церковнии с тою же, от еретик приятою хиротониею, священных не приемляху и принимати отнюдь не повелеваху; как в законах, так и в историях церковных уставления сего нигде же не обретается, и по приятии онех равнообразных таинств священства их лишают, и яко не бывша священства их сказуют, и яко скверна непщуема быти уставляют, и по сих яко мирстии и простолюдини вменяхуся. Чего ради и представи о еретицех глаголемых чистых от книги Кормчия от главы 33-я от листа 272-го правило 19 Феофила архиепископа Александрийскаго, сказующее сице: «иже от ереси глаголемых чистых обратившеся восхотят приступити к соборней церкви, да поставляеши от них презвитеры и диаконы и епископы по повелению Никейскаго собора, аще житие их право будет и не имый ничто же противно». И подаде книгу Кормчую в руце Ивана Симеонова, моляше, да явит, о ком сие Феофил архиепископ Александрийский глаголет. Иван же Симеонов сказа, яко сие правило о простых, а не о священных гласит. Никодим же рече: не глаголет: да поставляеши от них в диаконы, в пресвитеры, в епископы; но: презвитеры и диаконы и епископы по повелению Никейскаго собора. Чего ради Иоаким Васильевич повеле Ивану Симеонову отыскать в Никейском соборе о простых, да окончена будет речь о чистых. Иван же Симеонов, сыскав в Никейском соборе правило второе и предложи, но в коем не о еретицех глаголемых чистых объявляет, но о язычницех и поганых сказует; но кое его доказательство, яко не тое искомо суть, и не приемляшеся во оправдание Иоакимом Васильевичем; но моляше Ивана Симеонова, да покажет тое, о немже Феофил архиепископ сказует. Он же трикратно книгу Кормчую с преужасным азартом и неумирительным гневом мещаше на ту стоящий аналой и изрищаше тако: Никодим хотя и не тебя обманет! Иоаким же Васильевич сказа: тут не обман, но само ясное правило и точное доказательство еже от чистых, на чем вы наиболее и стоите и таковем и защищаетеся, напечатано: «поставляются презвитеры и диаконы и епископы по повелению Никейскаго собора», в коем о чистых кроме осьмаго правила не обретается. И тако не окончив беседы со гневом из крестовой светелочки и поиде. Пафнутию же старцу для некоторой потребности вниз в горницу сшедшу, виде Георгия Феодорова и рече: просим, Господа ради, да внидеши в крестовую ко отцем побеседовати от Божественнаго Писания, яко тии напаяют души вином умиления и да отгнани будут мраки раздоровидныя. На что Георгий Пафнутию сказа: видно, что оставаться всякому при своих мыслях, кто как хощет! И поидоша во град со Иваном Симеоновым. Потом паки еще вопроси Иоаким Васильевич отца Никодима: есть ли где еще яснейшее доказательство, еже по крещении или по миропомазнии священнии священства своего лишаются, и елико от достойных паки поставляти от святых повелевается? На что отец Никодим и доказоваше его честности от той же книги Кормчия, главы 37, от послания Константина-града собора к Мартирию епископу Антиохийскому, и от книги 9-я Марка патриарха Александрискаго, и ответ Феодора Вальсамона патриарха Антиохийскаго и всечестнаго иже во иеромонасех Матфея правильника от состава перваго, тожь и Захария Копыстинскаго архимандрита Киево-Печерскаго от книги его нарицаемыя Обороны, яко по миропомазании елико священнии священства своего лишаются и от достойных паки в свой чин пребывания хиротонисуются, а без паки обычнаго по степенем возведения священствовать не повелевается отнюдь. Иоаким Васильевич весьма понятно уразуме правду церковную, чего ради и разсудивше, яко свойственнее есть принимать без миропомазания, а доводствования и разсуждения Ивана Симеонова, а паче о нескромнем и пристрастном его нраве зазре, и тако разыдошася.

 

Седение девятое.

1780-го году января в первый день, в праздник Обрезания Господа Бога и Спаса нашего Исуса Христа на память иже во святых отца нашего Василия Великаго, в доме Григория Феодоровича Ямщикова, на коем народу было яко до ста человек. От страны церковной из елико духовных бяше священноинок Михаил, инок схимник Никита, инок Никодим, инок Иоасаф, инок Савватий, инок Иоанн, а керженских отцев двократно зваху, яко то попа чернаго Матфея, Иону курносаго и Якова галицкаго, и Сергия иргизскаго, аще и обещавшеся приити и смиренномудренно побеседовать от Божественнаго Писания о примирении церковном, но не приидоша на собрание. Сергия же иргизскаго тайно в слободы, во обитель Пресвятыя Владычицы нашея Богородицы и Приснодевы Марии, честнаго и славнаго Ея Покрова, с некаковыми письмами, при которых акибы от московскаго общества составленное писание, послаша, но кое нашему обществу никогда представлено не было, и никто его от нас не ведает, а слышно, якобы за все московское общество подписал, во имени старосты, но который от нас старостой никогда не был определен, а приставлен только для смотрения на малое время общаго Кладбища, но коему их писанию мы нимало неизвестны, и еже что в нем написано, всего того никто не ведает, точию тии, в коих душах мир Божий не водворяется. И бысть седение честное, и со смирением разсуждаху опасно от Божественнаго Писания, церковных правил и деяниев о священстве, яко законнее и свойственнее принимать без миропомазания, а еже помазовать миром и по помазании без паки повторнаго поставления священная во освященных одеждах действовать, есть богопротивно и греху смертному причастно, о чем и вси доказательствы прочтошася, еже по миропомазнии, елико священнии, от еретик хиротонисаннии, яко мирстии, яко простолюдини нарицахуся и яко не бывшее и скверне непщуемо от церковных архипастырей вменяхуся, и о сем еже по чесому без миропомазания принимати свойственно повелешеся, но со отречением точию ересей и исповеданием православныя веры, объявляшеся, яко то собора иже в Карфагене правило 69-е и 99-е о приятии от ереси донатския, и еже от ереси Севировы Иоанна патриарха Иеросалимскаго Саввою и Феодосием с десятию тысящи отец, еже на четвертом вселенском соборе, иже в Халкидоне, от Евтихиан, еже на седьмом святых отец вселенском соборе от иконоборцев, еже Пирра патриарха и Феодосия епископы от ереси единовольных, еже и Даниила Берестийскаго и Володимерскаго, от Исидора отступника хиротонисаннаго, униата и сущаго еретика Ионою митрополитом Московским и всея России чудотворцем, от всех сих суще проклятых еретик, еже о самой богословии согрешающих, без миропомазания приемляхуся, но с проклятием точию ересей и исповеданием православныя веры. И о сем разсуждаху, еже о паки повторнем от нашея церкве елико священных приятии и помазании миром, разсуждающе сицевыя быти начатки происходимыя от безразсудных начальников любоначалия, любоначалие же есть, по Златоусту, мати ересем; еже о новотворнем и без совета общецерковнаго и вне законов церковных на Кладбище сваренном мире, о чем разсуждающе, яко тое миро в число таинств церковных не точию принять, но ниже словом нарещи святое боязненно, и есть таковех правы и действия и непокорения знамением раздора церковнаго, коего ниже мученическая кровь сего греха загладити может. И тако разсуждающе внимать себе, а от таковых весьма блюстися, да не вотще будет странствование наше, и разыдошася.

 

Седение десятое.

Генваря седьмаго дня, в домех Александра Андреева лесника и Григория Федоровича Ямщикова генваря осьмого дня. Народу было в доме александрове человек до ста, на коем были от страны церковныя священноинок Михаил, инок схимник Никита, инок Иоасаф, инок Пафнутий, инок Иоаким, со страны же московских и керженских поп черной Матфей, инок Иона курносый, инок Иаков, Яков Васильев Игумнов, Василий Афанасьев Сафонеев, Георгий Федоров; а отца Никодима не бысть ту, зане прошаху тако, да без него будет собрание, понеже нарицаху его канцысторским судиею и секретарем магистратским, и яко человеком в доказательствах сильным и в беседах увертливым. Того ради и не бяше ту. И бысть беседующим им разсуждаху о феме приятия священства, яко по миропомазании будут ли священнии с тою же от еретик приятою хиротониею без паки обычнаго от соборныя церкве епископа возведения, и да священствуют ли. Овии глаголаху: будут и воздействуют; овии же, прекословствующе, глаголаху, яко по миропомазании священства своего лишаются и действовати без повторнаго поставления священная во одеждах священных ни под каким видом отнюдь невозможно. Чего ради от страны церковныя Пафнутий вопрос таков к помазующим миром издаде: аще еретик иерей, или диакон сподобится божественнаго и святаго крещения, или святым миром освятится, будет ли священнодействуя с первейшею его хиротониею, или другия сподобится хиротонии? На что и ответствоваху Георгий Федоров и дуниловский житель Иаков Васильев Игумнов, яко и по крещении, или по миропомазании священства своего не лишаются; довода же от Писания никаковаго не показоваху, но точию извет таков глаголаху: когда де святыня святыню снимает и лишит ея! О чем услышав Пафнутий и рече: молю вас, да явите нам поне малейшее о сем свидетельство от божественных правил, еже о елико обратившихся от еретик перваго или втораго чина священных ко святей соборней и апостольстей церкви и по приятии таинств крещения, или святаго миропомазания без паки обычнаго по степенем поставления священная воздействуют. Но о сем никаковаго доказательства от Писания не получи, но вместо того укоризны и изгнание от таковех слышаше. Обаче моляше их глаголюще: аще вы нам о искомом от Писания не показуете, но и не докажете, молим, да послушаете нас. И начаша Иоасаф с Пафнутием доказовати от божественных правил, яко по крещении, или по миропомазании священства своего, еже от еретик приятаго, лишаются. Еже по крещении, доводствоваху от правила 19 перваго вселенскаго собора, иже в Никеи (Кормчая глава 5 лист 40 о еретицех павликианех). В самосущем правиле сказует тако: «павликиане покрещеваются и глаголемии от них причетницы, аще без порока обрящутся, по крещении да поставлени будут». В толковании же того правила сказуется: «Крестивше же ся, аще нецыи от них епископи, или презвитеры, или диакони беша в павликианех, аще житие имут непорочно, от соборныя церкве епископа, в нейже крестишася, да поставлени будут кождо в свой чин». До зде. Тож и в книге преподобнаго Матфея Иеросалимскаго, в составе первом, во главе второй, сказуется сице: «и аще убо обрящутся по крещении житием непорочны, да хиротонисуются от епископа церкве, ейже приступиша». Тож и в книге всечестнаго Севаста Арменополя и судии Фесалоницкаго, в сечении пятом, в надписи первой, в правиле 19 перваго собора: «да воскрещаются, и аще непорочни, и паки да хиротонисуются, аще и предхиротонисашася». До зде. По сем доказоваху, еже по миропомазании тож священства лишаются, от послания Константина-града собора Мартирию епископу Антиохийскому в Кормчей, во главе 33-й, на листу 293-м: «по миропомазании потщаливии мирстии человецы поставляются в сан, в немже беша, или презвитеры, или диаконы, или ино что». В книзе Севаста Арменопола, в четвертой: «по миропомазании яко тщаливии людины хиротонисуются во оное, еже быша у самех первее, аще же презвитеры, аще диакони, аще подъдиакони, аще псалмочетцы». Потом доказуя из тоя же книги 5-я Севаста Арменополя, вопрос 30 Марка патриарха Александрийскаго: «аще еретик иерей, или диакон сподобится божественнаго и святаго крещения, или святым миром освятится, будет ли священнодействуя с первейшаю хиротониею его, или другия сподобится хиротонии, аще восхощет священнодействовати?» Ответ Феодора Валсамона патриарха Антиохийскаго: «святых Апостол 80 правило из языческаго жития пришедшия к православной вере и крестившияся епископскаго достоинства сподоблятися преопределяет, убо первейшему иерейству скверне непщуемой и яко не бывшу вменяему, аще с правильным опаством возсуждаемый тако православив, и сый некогда скверныя иереи в последнейшем своем житии, неосужден возмнится сподобитися не точию иерейскаго достоинства, но и епископскаго, обычными всяко степеньми на учительскую высоту возводим». По сем доказоваху от книги пречестнаго иже во иеромонасех Захарии Копыстинскаго, архимандрита Киевопечерскаго, тож свидетельствуется, яко по исповеди и по миропомазании и подании писма способом предреченным, посвятити их, если годны будут, на той степень, на котором в ересех пребывающии были. «Синод Никейский в правиле осмом повелевает посвятивши их чрез рук вкладание, суд патриархов о том во Арменополе в книге 4-й; а ставят они тако, а по сих яко гречнии ласкове рукоположиться имеют на он степень, на котором первее у своих были, либо презвитеры, либо диакони, или ипподиаконы, или псалмочетцы. Есть ли миром святым мировати велит собор, а яко наискоре и яко снову потреба их хиротонисати». И о сем Иоасафу и Пафнутию доказующим, яко таковии, елико от священных обратившиися и помазавшиися миром, как и крещеннии равномерно, по приятии сих таинств лишишася своих собственно от еретик приятых санов и яко простолюдини от архипастырей церковных вменяхуся, сего ради без паки повторнаго от соборныя церкве епископа поставления священнодействовать никак не возможно. Чего ради Георгий Федоров и Яков Васильев, Василий Сафонеев, отмещуще книгу Захария Копыстинскаго и порицающе его еретиком и обливательнаго крещения защитником, показоваху из превода его от Деяний апостольских о крещении евнухов царицы Кандакии Муркския Филиппом Апостолом во изображении лицевом, на листе 181-м, яко бы Филипп его обливал, чего ради и мняху его защитника крещения обливательному, о чем доказывашеся и из ту сущаго воображения, яко неявствующаго ни мало облияния, зане во струях показующа стояща каженника, Филипп же держа прямо дланию над крещаемым, каплям же водным с руки стекающа не являет, еже прямо, а не горстию, и по сему облиянием нарицати никако свойственно показующе. О чем таковое ж порицание на сего мужа благочестнаго и на третьем седении, ноября 24 числа, в доме Григория Феодоровича Ямщикова тожь навлекаху, но которым доказоваху, яко сей муж благаго разума и премудрости исполненный и ревнитель благочестия приснопамятный Захария Копистинский, о немже и в Книзе о вере московской печати печатней, в предисловии тоя, на листе пятом, свидетельствуется, от коего и о вере Книги творец десять главизн исписа, чего ради похваляя его ревность по восточней церкви и благочестия защитника его нарицая; но и из самого его сочиненной книги, нарицаемой Обороны, доказоваху о действии тайны святаго крещения повелевающаго богопреданным чином крещати в три погружения, с приглашением триипостаснаго Божества, а не обливати. Потом навлекаху на его святыню, яко бы пятипросфорное приношение утверждает быти во святей церкви, а доказоваху из Номоканона Афонския горы отец, в бытность его в Киево-Печерской Лавре пречестным иеромонахом переведеннем[наго] с греческаго языка на словенороссийский диалект, коего ради поношения от таковех навлекателей законно свобождается, понеже не его то догматизание явствует, но в востоце прежде его уставленное быти показуется, ибо с греческаго языка готовословно преведеся, якоже и в книге 6-й господина Константина Севаста Арменополя и судии Фессалонитскаго объявляется от честнейшаго разрешителя господина хартохранителя Петра и диакона Божия и великия церкве, сице: «Вопрос: есть ли достойно с единою просфорою литургисати? Ответ: аще несть святаго память и мертваго, возбраняющее ничтоже». Написася же сие в лето 6600-е. О чем и доводствоваху, глаголюще от страны церковныя: аще тое, иже в Номоканоне, готово преведенное с греческаго языка в бытность его в Киевопечерстей Лавре на наш славенороссийский диалект, и сего ради еретиком и отступником от некоторых невежд нарицается, убо сей господин хартохранитель каковым нарицатися достоин? Аще Захария в преводе пяти просфорнаго приношения яко еретик соборныя церкве гаждается, сей же Петр диакон великия Божия церкве не точию на пяти, но и на единей точию просфоре служити сказует возбраняющее ничтоже. О Боже! от всероссийскаго святейшаго православнаго патриарха, орла небопарнаго и великаго господина Иосифа сей приснопамятный Захария Копистинский, архимандрит Киевопечерский, яко зельный ревнитель православныя веры и благочестия защитник засвидетельствовася; от низу плежных же нощных вранов, си есть от раздорников святыя церкве, яко еретик уничижися, чего ради книгою его, яко некою мерзостию, гнушахуся и еретическою ю глаголюще не приемляху! О чем было таковем и представлено из предисловия Апокалипсиса Иоанна Богослова, сказующаго тако: «понеже бо противницы церкве, видяще что противно своему зловерию в книзе каковой, и хотяще ю отвержену и помрачену имети, не могуще же никако истине ни единым образом противу стати, оглаголуют ю быти коего еретика творение». И егда вся сия доводствования прочтошася, о чем начаша разсуждати, яко весьма бедственно есть и законом церковным противно, еже по миропомазании без поставления, яко нерукоположеннии, священная действуют не правильно; также елико сопротивлящиися разуму церковному о сем ни мало слышати хотяще; чего ради и отъидоша в другую храмину. Пафнутия уничижаху; той же не отступне ревностне их, яко неразумеющих писания и силы его, убеждаше, да благоразсудительне, а не обычаем страсти осуждают его. О чем и вступися Василий Афанасьев Сафонеев, не от Писания глаголя, но точию пересказуя, яко тако отцы на Керженце приимаху. Вопрошаем же бысть: кто таковии отцы быша? Он же имен их не знаяше, сказа, но нетлением телес хваляшеся. И о сем вопрошаху, да явит место и имя и в кая лета свидетельствовани суть, и кто, и есть ли о том достовернейши свидетелие, и самовидцы ли, или от кого слышащии; но на что ответа никаковаго не даяше, точию вопрошающих, по пословице, молокососами нарицаше. И так и сей уйде тожь в другия храмины безответен. Посем нача старец Иоасаф пересказовати: аще и быша таковии разнообразнии приемы негде по местом от неразсмотрения от отец и действуемыя, а церковь того есть николиже не причастна, понеже ни единаго священника во святей церкви, как в Польстей области на Ветке состоявшейся, так и по вывезении оттуду в Великороссийское государство, и имеющияся в малоросском стародубском полку, между слободами Митьковской и Климовою, под миропомазание не приемляху, опасающеся, да по миропомазании не потеряют содержание священства. Откуду из ту приседящаго собрания коснуся милосердие Божие сердца великаго ревнителя по миропомазании их священства и церковных послушник презельнаго уничижителя, Василья Родионова Набатова, который и выговорил: се отныне я конечно признал правду церковную, яко по миропомазании наши священницы священства своего лишаются, и священная действовать без паки повторнаго хиротонисания по законом церковным никак не возможно. О чем весьма народи возшумеша; гневахуся на Иоасафа и Пафнутия, развратниками их нарицаху. Посем начаша Пафнутий и Иоасаф доказовати, яко и от белорусцев, крещенных обливательным крещением, тайна святаго миропомазания святейшим Филаретом Никитичем, патриархом Московским и всея Русии, приемляшеся и приимати заповедася, о чем сказуется в Соборнем его изложении в великом Требника, на листу 587-м. Народи же елико слышащии обеих стран весьма о сем понятно слышаху. Видеша же Георгий Федоров и Яков Васильев Игумнов и Василий Афанасьев Сафонеев, яко народи весьма прилежно слушати устремишася доказательств церковных, чего ради и возшумеша, да удобь непонятну беседу сотворят, да в пересецании слов справедливая показания не удобь яснейшая явят. Сего ради и книги священныя закрываху, Пафнутия же уничижаху и слепым его нарицаху, а наипаче тщахуся, да изгнан будет вон. Он же неотступно противу их доблественно стояше и от писания беседовать противников принуждаше, чего ради и прирече: аще мене вон из собрания изгнати хощете, убо и отец наш священноинок Михаил да изгнан будет, а аз от него не отлучуся. О чем и устыдешася. Поп же их Матфей в крестовой храмине со отцем Михаилом седяще слушаху, внимающе обеих стран прению. Матфей же рече отцу Михайле: не отменно смиритися подобает. Отец Михаил на то ему возответствова: очень изрядно, да толко в силу законов и велений церковных будет мир наш; и аще не тако, то бывает мир и на повреждение, коего не прииде Христос вложити, но разделения. Чего ради и упросиша отца Михаила, да на утрие будет при малонародном собрании от писания беседословие. И тако отложивше и разидошася в домы своя.

В наутрие же, то есть генваря перваго на десять, во втором часу дни, поиде отец Михаил со отцем Никодимом и Пафнутием в дом Александра Андреева лесника, и приидоша; а обещавшихся беседовати никого не обретоша: вси неизвестно камо и уехаша. А Никиту схимника отец Михаил посла, да собраны будут московстии житилие к собранию, свойственныя для слышания и разобрания имеющияся распри, яко да правда и неправда на среду общаго собрания изнесется. Чего ради тии, елицым о сем возвестишася, вскоре собрашася, яко то: I. В. М. Стефан Алексеевич Шапошников, Тимофей Потапович, Василий Иванов и прочих человек до двадесяти, дожидающеся собрания даже до полудня; к коим прииде от страны противных защитник их Дмитрий Федоров. О чем и предложися собранию ту сущему Стефаном Алексеевичем, яко да беседуют в доме Григория Феодоровича Ямщикова Дмитрий Федоров с отцем Никодимом от святых Писаний; чего ради согласишася и приидоша в крестовую палату. Седше и мало помолчавше, возсташа, помольшеся Господу Богу, призывая Его величество в помощь, да просветит коегождо очи сердечнии к познанию истины, на коем бысть слушающих отцев: священноинок Михаил, инок Лаврентий, инок Иоаким. И начаша беседовати. Бысть же предложение от отца Никодима к ту сущу народно-собранному обществу о трех свойствах, яко то: первое о отвергшихся Христа волею или неволею, елико священных, и потом раскаявшихся, также прибегших в покаяние, чего ради по законом церковным за отвержение Христа святители святым миром помазанных, - убо ли потом паки священная воздействуют безпрепонно? второе, - аще обратятся ко святей церкве, елико священник, от еретик перваго чина и крестятся, - будут ли паки без повторнаго паки по степенем хиротонисания, с первейшею от еретик приятою хиротониею священнодействовать в соборней и апостольстей церкви? третие, аще обратятся от еретик втораго чина, тажь елико от священных, ко святей церкви и по божественным правилом сподобишася тайны святаго миропомазания, и по приятии оныя святыни, аще восхощут священнодействовати, убо ли с тою, от еретик приятою хиротониею, без повторнаго от соборныя церкве епископа поставления, священная воздействуют безпрепонно по повелению церковных архипастырей? О чем и упросиша Дмитрия Феодорова, да разсуждают тая трегубая предложения праведно; почему и вступися. Никодим же вопроси Димитрия о первом предложении, се есть о отвергшихся Христа. На что Димитрий отвеща, яко сугубое есть отвержение Христа, первое  - волею, второе – неволею. О чем отец Никодим и не препятствуя, яко тако суть. Димитрий же рече: аще волею кто отвержется Христа, и покаявшеся святым миром помазуются, да не священнодействует таковии; аще же неволею, то таковии, аще покаявшеся и миром святым помазани будут, безпрепонно да священнодействуют во вся дни живота своего. На что отец Никодим вопроси Димитрия и рече: где таковое различное о отвергшихся Христа святителей обретается определение? – приятие едино точию, эпитимийствование не единообразное; а определение таковем различное: волею отвергшиися Христа по помазании миром да не священнодействуют? На что Димитрий, взем от книги Кормчия, из поместнаго собора, иже во Анкире, правило 3-е, во главе 6-й, на листу 42-м, явственно показующее яко о страдальцех Христовых, а по мнению Димитрия Федорова якобы о сущих отступниках православныя веры* [* «Мученики бывше, и понуждени воистину, и по мучении брашно приемше идольское, таковии от общения да не возбранятся. Аще же будут и мирстии человецы таково что пострадавше, яко ничтоже согрешиша, аще хотят и рукоположение прияти, да получат, в ином непорочни суще»]. На что ему и отвеща отец Никодим, яко сие правило о сицевых, елико нуждею и не хотяще идоложертвенная ясти, ниже жертву идолом принести, и не токмо делом или словом отрещися Христа, но ниже мыслию хотяху, и исповедающе, яко христиане есмы. О чем и немалое бысть препирательство: отец бо Никодим не нарицаше таковех отвергшимися Христа, но страдальцами исповедоваше; Дмитрий же отступниками именоваша, чего ради и разсуждаше таковех святым миром помазовати, елико священных, и потом священная действовати безпрепонно дозволяется. И о сем сделася преужасная распря: вси бо елико послушающии, яко то: Тимофей Потапович, Стефан Алексеевич, Василий Иванов со Арбату, глаголаху, яко сии суть страдальцы Христовы и не требуют никаковаго исправления; Дмитрий же аки изумленный кричаше, упорствуя. На что отец Никодим, взем книгу Матфея Иеросалискаго, показа от состава перваго главы первыя, от надписи и сущаго, о иже принужденных отврещися и неповинующихся. Увидев же Тимофей Потапович, яко сии страстотерпцы Христовы неповинно поношением от кривосказателя Димитрия страждут, о чем вси зазреша его, яко непокорника церковным правилом. Отец Никодим со Стефаном Алексиевичем весьма ревностно за таковех стояху и сущими христианы исповедоваху. Но видя Димитрий, яко никто к разсуждению его не преклоняшеся, зазрев себе, яко не в силу лежащаго в правиле разума разсуждаше, аще и не хотяше преклонитися, обаче преклонися, и извинение пред елико слышательми принесе, яко не поня лежащаго в нем разума, но не рече таковех сущими страдальцами Христовыми. Никодим же Димитрия препираше и искаше от него исповедания, яко да отвергшиися Христа волею или неволею, елико священнии, потом раскаявшеся и миром святым помазани, прияшася во общение церковное и потом да священствуют, или ни. На что и неволею Димитрий Федоров пред ту всех слышащих возвести, яко таковии, елико отвергшиися Христа волею или неволею, ни под каким видом да не священствуют во вся дни живота своего, точию честь седалища своего да имеют. Посем приступиша беседовати и о вторем предложении, еже елико обращающихся ко святей церкви священных от перваго чина еретик и крестившихся от соборныя церкве епископа, и по крещении, без паки обычнаго поставления, во своем сане священнодействуют ли. На что Димитрий отвеща и рече: да разсмотрено будет о таковех в правилех церковных. Чего ради и предложися от правила святых Апостол 68-го и перваго вселенскаго собора правило 19 о павликианех еретицех, ибо от тех крещени не крещеннии и поставлени не причетницы, елико по крещении елико от достойных да поставлени будут кождо в свой чин. О чем отец Никодим и вопроси Димитрия, и испроси книгу Матфея Правильника и предложи из нея от состава перваго главы вторыя, от надписи о павликианех, того ж 19 правила, еже по крещении, вместо того речения, еже «да поставлени будут», написано: «хиротонисуются в сан, в немже беша». Чего ради Димитрий Федоров и прирече, яко по крещении, без паки повторнаго по степенем от православныя церкве епископа хиротонисания, священная действовати ни под каким видом никак невозможно, о чем друг другу и не препятствоваша, зане в том единогласне разумеваху. Потом приступиша к разсмотрению третияго предложения, еже елико о обращающихся священных втораго чина еретик ко святей соборней и апостольстей церкви и святым миром помазанных, и по приятии оныя тайны могут ли священнодействовать с тою, еже от еретик приятою, хиротониею, или другия от соборныя церкве епископа сподобятся, аще таковии восхощут священнодействовати. На что Димитрий Федоров и возответствова, яко по правила осьмаго перваго вселенскаго собора толкованию могут священнодействовать с тою же, от еретик приятою, хиротониею и по миропомазании, чего ради взем из толкования того правила от речи: «таковии токмо святым миром помажутся, аще же нецыи от них суть и епископы, паки в своем чину да пребывают». На что отец Никодим и вопроси Димитрия Феодорова о речи сей: како в своем чине да пребывают, - убо ли с тою, от еретик приятою, хиротониею, или другия хиротонии во святей церкви сподобятся? На что Димитрий и отвеща, - рече: с тою, еже от еретик глаголемых чистых приятою. На что отец Никодим воспрепятствова разсуждению Димитриеву, доказывая, яко святая соборная и апостольская церковь никогда и ни в кая времена еже от еретик как перваго, так и втораго чина обратившихся, елико священных, и крестившихся или святым миром освятившихся, с тою же хиротониею не принимала (исключая некоторых нашего общества мнений, по крайнему недоумению) и не приемлет, и дозволения о том никаковаго от божественных правил не явствуется; и таковем, по приятии оных таинств, коемуждо приличествуемых, крещения или святаго миропомазания, без паки повторнаго по степенем возведения от соборныя церкве епископа (священнодействовати) не дозволяется; но по приятии таковех, елико от достойных поставляются в сан, в немже беша, или презвитера, или диакона, или ино что; почему во своем чину и да пребывают, а не еже, по мнению некоторых, якобы по миропомазании с тою же от еретик бывшею хиротониею во своем чине пребывают. Чего ради Никодим и отыска в книге Кормчей главу 33-ю, лист 293, на коем напечатано от послания Константина-града собора к Мартирию епископу Антихийскому, како подобает приимати еретики, приходящия к соборней и апостольстей церкве, - хотяше, да при народнем собрании тое прочтено будет, моляше Димитрия, да выслушает. Но он же слышати того (не) хотяше, весьма упорствуя, не даяше чести, бояся да не безответен явится. Чего ради трикратно реяся, да уйдет из крестовой без конечнаго слышания доказательств от отца Никодима. Обаче удерживаем силою слышателей да выслушает того соборнаго послания и прочих доводствований, яко по миропомазании, равне как и по крещении,  священства от еретик действуемаго лишаются и без паки повторнаго хиротонисания в соборней церкви от епископа священная да не действуют. И едва убедиша выслушати тое. И бысть прочтено послание, в котором явственно по миропомазании,  елико священнии, мирскими и простолюдинами нарицаются, и от тщаливых поставляются в сан, в немже беша, или презвитеры, или диаконы, или ино что. Отчего признаша вси, елико послушающии, яко по миропомазании священства лишаются. На что Димитрий вопроси отца Никодима: есть ли где о сем послании известное ведение, в кая лето оно бысть? На что отец Никодим сказоваше, глаголя: достовернаго свидетельства и точнаго летописания чести и видети о том нигде не случися; но о сем известно вемы, яко оное послание есть действительно от собора Константина-града святых отец писанное к Мартирию епископу Антиохийскому. Димитрий же рече, яко оное бысть прежде толкователя. На что отец Никодим вопроси: откуду вам сие известно есть? На что Димитрий умолча. Никодим же, сказуя, глагола: аще прежде толкователя священных правил Алексия архидиакона, или после, но разум един есть, яко по миропомазании, елико тщаливии, поставляются в сан, в немже беша. Гадательствуетбося, яко от втораго вселенскаго собора святых отец, бывшаго в Константине-граде, оное послание бысть писанное к Мартирию епископу Антиохийскому. На что Димитрий рече: аще тако суть, то онаго собора послание бысть прежде толкователя священных правил, ибо вторый вселенский собор бысть в лето 381-е; следовательно верить последнему. Никодим же отвеща и рече, яко толкователь священных правил есть не разгласен сего собора посланию, но и последователь, чего ради в толковании перваго вселенскаго собора правила осьмаго о еретицех, глаголемых чистых, елико приходящих от священных ко святей церкви отдает в волю православнаго епископа, и прирече: «паки в своем чину да пребывают»; а еже како таковем в своем чине пребывати, о сем ведают православнии архипастырие церковнии, имеющии дарование воздательныя благодати и слушащии собора Константина-града послания, писаннаго к Мартирию епископу Антиохийскому, о еже како подобает приимати еретики, приходящия к соборней церкви, в коем между прочими и Наватиане, глаголемии Чистии, о нихже и толкователь в толковании осьмаго правила перваго вселенскаго собора упоминает, поручая таковех в волю соборныя церкве епископа, и сказует: «аще же нецыи от них суть и епископи, паки в своем чине да пребывают»; по коему соборнаго суда посланию таковии, елико от достойных, последовательне и поставляются в сан, в немже беша, - или презвитеры, или диаконы, или ино что. Дмитрий же паки, реяся, уйти хотяше, да не слушает таковаго разсуждения; обаче неволею удерживаем бысть. Чего ради Иван Михайлов Мусорин, гневася на него от ревности последования церковнаго опаства, рече: по заугодьям нас, людей неведущих писания, вы учите, зде же противу ведущих не хощете и слышати, не точию беседовати! Димитрий же рече: мы сего собора посланию не последуем, понеже оное бысть прежде толкователя священных правил. На что отец Никодим выговорил: святая церковь равно приемлет – аще до толкователя, аще по толкователе, понеже есть православно, не еретиком помогая, но от ереси свобождая, и по миропомазании елико достойным благодати дар священства подавая, и без паки подобительнаго таковех обычнаго поставления яко мирскими и простолюдинами нарицая, о чем и прежде сего было представлено. По сем Димитрий Феодоров о летех онаго собора умолча, но от речи «поставления» доказоваше, яко сие речение: «поставляются», знаменует: определяются, и взем разум из поместнаго собора, иже во Антиохии Сирстей, правила 16-го. На что отец Никодим и возрази ему сие его разсуждение, и рече: яко во всяком ли месте речение сие «поставление» разумееши определение, или в елико тамо приличествуемых? Димитрий же молчаше, ничтоже глаголя. Чего ради Никодим, отыскав в книге Кормчей правило 19-е перваго вселенскаго собора о еретицех, глаголемых павликианех, еже по крещении да поставлени будут кождо в свой чин: убо и зде по вашему разсуждению следовательно разуметь да определени будут кождо в свой чин? и аще тако, то будет сие обновление ереси кривосказательныя! О чем народи весьма поняша, яко Димитрий разсуждает страстно и богопротивно, а паче несмысленно упорствует, побежденный матию ересем, любоначалия[ем]. Обаче Димитрий виде, яко есть доводствование его к совести своей противно, чего ради и рече, яко сие речение: «определяются», вместо речи: «поставляются», принимать во всяком месте не свойственно, но в елико точию приличествуемых; но зде, сказуя, еже в послании в книзе Кормчей напечатано «поставляются», темно быти показуется. Никодим же рече: аще сие темно и мрачно видится, то по приказанию преподобнаго иже во иеромонасех Матфея Правильника, прейдем к светлому и ясному. И взем книгу Севаста Арменополя, хотяше, да предложится онаго же собора послание, в таковем ли разуме разсуждается речение сие, еже в Кормчей напечатано: «поставляются», но вместо того речения «поставляются» написано: «хиротонисуются». Потом представлено было, яко поставление знаменует не определение в таковех, но посвящение, рукоположение, хиротонисание; и доводствоваху от книги Кормчия главы 7 на листе 44, и в грани 9 во главе 38-й, на листе 46, и в книзе Севаста Арменополя в книге 1-й сечении 1-м. Но Димитрий паки от таковех ясных доказательств, яко аспид, затыкая ушеса свои, еже не слышати таковаго гласа церковных архипастырей, но о сем точию помышляше, да убежит из крестовой палаты. Видеша же Стефан Алексиевич и Тимофей Потапович, яко Димитрий хотяше уити, чесо ради отъяша у него шапку, да против Никодима ответствует. Он же быстро зря Никодима, яко до триех минут, и обратився к Стефану Алексиевичу, и рече: сие речение, еже у Севаста Арменополя в книге написано, «хиротонисуются» в таковом разуме, когда-де священныя елико не отлучившияся общения великороссийския церкве, тогда к ним под благословение не ходим и действуемых ими таинств не приемлем, а егда прийдут в наше согласие и общения великоросийския церкви отрекутся и миром помажутся, тогда под благословение пойдем и таинства церковныя ими действуемыя с верою приемлем, то тогда так тем и хиротонисуются. На что отец Никодим и вопроси Димитрия: оное ваше, рече, доказательство коим писанием святых отец подтверждается? и аще чрез миропомазание поставление и хиротонисание разумееши быти, убо всяк, и мирский, по мнению таковому хиротонисуется, и того ради в священстве у вас никая скудость постигнути не может: зане вси хиротонисанни, не точию мужие, но и жены, юноши и девы, и всяк возраст! На что Димитрий никакова писания не доказа, а паче всем себя кривосказателя показа, чего ради вси, его елико ту приседящии, яко невежду и зазреша. Потом паки отец Никодим, притужая его, вопрошаше и рече: от кого у вас таковии хиротонисаются? Хиротония чрез православнаго епископа подается, коего во обществе вашем не имеется. А священницы, яко не имеющии воздательныя благодати, чего ради таковем ея и не подают, но токмо приходящих елико в ваше состояние миром помазуют; убо миро, по свидетельству церковных учителей, хиротонии не подает, но елико не совершенно крещенным печать дарования Святаго Духа подает, и по миропомазании елико обратившиися священнии священным священствовать с тою же, от еретик приятою, хиротониею дозволяют неправильно. И посему не токмо чрез миропомазание (не) хиротонисуются, но яко и бывшаго на таковех рукоположения лишаются; и посему, яко неосвященнии, священная во одеждах священных действуют, - (сие) есть не без омышления. Димитрий же Федоров рече: аще и огнь с небесе сведете и писания от всея вселенныя соберете, не поверю и к разумению вашему не преклонюся. И взем от Стефана Алексиевича свою шапку, и уиде из крестовой палаты без обычнаго прощения. От коея беседы весьма поняша слышателие, яко по отвержении Христа Спасителя и помазании миром, по крещении или миропомазании, священнии священства своего лишаются, и есть едино упорствующих непокорство святей церкви, чего ради и прочтеся нравоучение 11-е Златоуста святаго на схизматики церковныя. И тако разыдошася.

 

Приложения

 

Копия с посланнаго письма от отца Михайлы на требование отцев Матфея, Ионы и Иакова исповедания, в каком разумении остаются церковнии послушницы.

Господи Исусе Христе, Сыне Божий, помилуй нас.

Пречестнейшим отцем Матфею, Ионе и Иакову мирно о Господе здравствовать.

Известно мы уведомилися чрез сего подателя, яко ваше преподобие требует от нас мнения, в каком мы разсуждении остаемся о промежду вами и нами разнствиях, еже о несогласнем приеме от великороссийския церкве, еже о повторнем он нашея святыя церкве священных приеме, еже о варении у вас в обществе вашего единения мира. Но мы, елико уведехом от ьожественнаго Писания, яко еже не тожде со святыми мудрствовати беда велия и ересь есть, чего ради вне церковных повелений и священнаго Писания быть согласными опасаемся, и на иное что взирати не соблажняемся, ащебы и ангел сшедый и паче писания вещаяй, не приемлем, и аще вся вселенная начнет с вами не по Писанию веровати, но нас никая же нужда принудити может, Богу помогающу нам по воли Его святей, и тако остаемся.

Священноинок Михаил кланяюсь.

1780-го году генваря 7 дня послано с Стефаном Алексиевичем Шапошниковым, но на какое ответствия никаковаго не получихом.

При сем и сие воспомянути подобательно.

Сего 1780-го году февраля 7 дня иноку схимнику Никите, бывшему в доме московскаго купца Никиты Павлова, для прощения пришедшу, при коем проси Никита Павлов отца Никиту, кланяяся, да упросит отца Михайлу о примирении их ко святой церкви, но не сказоваше, в каковом разсуждении быть миру церковному, но точию прирековаше, яко да неотменно приидут того дня в вечер, вземши с собою триех человек, яко то: Александру Андреева лесника, Ивана Сидорова медовщика, Ивана Симеонова Хорскаго, воеже бы просити мирнаго соединения. А вид разума их таков показовашеся, да по воли их будет примирение. Чего ради и приидоша в той вечер в дом Григория Федоровича Ямщикова: старец Сергий, старец Арон, Никита Павлов, Александр Андреев, Георгий Федоров, Иван Симеонов Хорский, и прочих человек яко до пяти; внидоша в крестовую палату, положше обычно приходныя седмь поклонов, под благословение же ни един не подойде, понеже в сенех крестовыя Георгием Федоровым научени быша, да не ходят под благословение ко отцу Михайле. Потом внидоша со страны церковныя Иларион Григорьевич Заплатин, Стефан Алексиевич Шапошников. И седшим им и (мало) помолчавшим, потом отец Михаил нача вопрашивати пришедших, Что ваш приход до нашего убожества? – рече. Они же вину слышания о отъезде отца Михаила в обитель объявляху и примирения церковнаго от отец искаху. Отца же Никодима не бяше ту, но за иконостасом стояще слушаше беседы их. На что отец Михаил за таковая благодарение приношаше, и прирече: да будет мир наш в согласии божественных правил, а кроме божественнаго Писания миритися опасаемся, да не осудимся, яко разорителие догматом церковным. Видеша же елико не последующии матери своей святой церкви, яко отец Михаил с братиею своею мыслем их не преклоняшеся, чего ради Никита Павлов отзва Григория Федоровича в другую палату, за коими поиде Иларион Григорьевич и Стефан Алексиевич, и бысть седящим, Никита Павлов увещевая Григория Федоровича, да преклонится к их уразумению, чего ради и представляя ему стариков, что так старики прежняя действовали. На что ему Григорий Федорович ответствуя, яко не всякаго старика дело бысть с волею Божиею согласно, но много и противностей, и на стариках, не по Писанию о чем мудрствующих, основание иметь есть не без опасения, а паче последовать божественному Писанию и притекать к здравому учению святыя церкве, а не баснем внимать, следовательно. Никодиму же в то время в дверех тоя палаты стоящу и тако назирающу, слушающу беседы их. Увидев же его Григорий Федорович и призва к себе в палату близ их разсуждая слышанное и увеличивая последование церковным учителем, а не стариков(ам) неповинующихся(мся) им, о чем и доказоваше о приеме, яко свойственно есть принимать без миропомазания в последовании архипастырем церковным. Никите же Павлову доказующу, якобы елико приемлющия под миропомазание нетлением телес Бог прослави. На что отец Никодим вопроси его о именах таковех: кто суть и где таковии обретаются, и в кая лета обретошася, и кто их свидетельствова, и кая о том писания, еже во особо сочиненных историях явствуется? Но о сем Никита Павлов яко не знаяше, и ответа никаковаго не даяше, но безответен являшеся. Потом отец Никодим остави ту в палате седящих и поиде в крестовую. Пришед, поклонися обычным поклонением к ту седящим; но не благословяхуся един от единаго по научению Георгия Федорова, о чем пересказывая Иларион Григорьевич. И слышашеся беседа громогласная, пересказоваху старцы Сергий и Арон, яко в монастыре Покровском никто не согласен принимать елико приходящих без миропомазания, о чем и зазрени быша от отца Михаила, Иоасафа, Иоакима, глаголющим им, яко и зде нашея обители есть согласных отец до десяти человек. Отец же Михаил рече: аще и вси не будут согласны законом церковным, аз един остануся при правде церковней, в чем усердствую и душу свою положить. Посем отец Никодим моляше их, да разрешат омышление наше, рече, в триех собственных свойствах: о несогласнем приеме елико приходящих, паки о повторнем приеме от святыя церкве священных, о варении на кладбищи мира, аще суть правильно? О чем Георгий Федоров сваряшеся, а ответа никаковаго не даяше. Видя же отец Никодим, яко не ответствуют, но вместо того весьма гневаются, чего ради и отъиде оттуду из крестовой в малую прихожую, идеже Никита Павлов с Григорием Федоровичем и прочими беседующе. И слышашеся разсуждение Никиты Павлова о нетленных мощех на Керженце и Иргизе. На что отец Никодим доказоваше от книги преподобнаго Никона игумена Черныя горы, от слова 43-го, яко таковая телес нетления оставльше в правосудие Божие, понеже не освидетельствовани суть и не прославлени соборною церковию: аще бо и быша, но несть о сем известно. Чего ради Никодим и указоваше на елико святых и прославленных чудотворцев, Савву освященнаго и Феодосия, Максима исповедника, Тарасия патриарха Цареградскаго, Иону митрополита Московскаго и всея России чудотворца, яко суть святии, ихже благолепне святая церковь и почитает, иже елико обращающихся таковии святии без миропомазания приемляху от таковех еретик, еже о самой полности священныя богословии согрешающих, но точию с проклятием ересей и исповеданием православной веры. Чего ради и вопроси его отец Никодим: поклоняешися ли таковем и почитаеши ли их? Отвеща Никита: я всех почитаю. Никодим же рече: аще почитаеши, то почто не последуеши им? они бо без миропомазания приемляху во общение церковное елико обращающихся ко святей церкви. На что Никита Павлов приводил стариков керженских, по сту лет имущих, яко тии тако пересказывают, еже бысть при их очесех, яко отцы под миропомазание приемляху. На что Никодим сказа ему: се ныне от вас, Никита Павлович, отцем керженским по сту лет назначивается, а в С.-Петербург изволили писать о таковех, якобы по сту по двадцати лет имеющих, о чем милости вашей излишнее лгать не следовало, и тою неправдою уверять души простейших не подобательно, откуду и зазрение вам о сем восписашеся, яко, оставившим святых писания, последовать старикам не свойственно. Никита же Павлов незапно вскочи, бежаше в крестовую, ругая Никодима, из крестовой же за ним со двора вси уйдоша без прощения и ни единожды на лицы не вообразиша и крестнаго знамения, не точию святым иконам поклонения.

 

 

Сказание о бегствующем священстве

[Ионы курносого]

 

История сия заключает в себе кратким объявлением сказует о бегствующих отцех древле хиротонисанных Филаретом, патриархом московским, Иоасафом и Иосифом, и прочими митрополиты, архиепископы, и епископы.

В начале предлагаем о епископе Павле Коломенском и о заточении его и протчем страдании. И о священноиноцех и священницех, кои во благочестии крестишася и хиротонисашася от древле поставленных архиереов и видеша церковное предание повреждаемо и новое предание предано Никоном патриархом, и велие принуждение от него Никона к новопреданному узаконению, сего ради вышеписанныя священноиноцы и священницы, бегуся яша в разныя места и пределы в Керженския, Чернораменския леса и в Польскую страну и в прочия различныя места и где кто можаше благочестие сохранити, и сохраняху древле-церковное предание, и нам предаша хранити. И како от новых учителей крестившихся и хиротонисавшихся священноиноков и священников, и мирских человек и всякаго чина, обращающихся ко святей соборней и апостольстей церкви приимати: Новопредания же писанием отрицатися, и потом миром помазовати ниже пространне узрише. И похвала неприемлющим новопредания Никонова.

Разума зане нищетою одержим от убогаго дому ума моего ничесо же имый. Яко подобну вашего достоинства предложити трапезу, полну сущу ангельския пищи вас присныя рабы богатаго Владыки и Бога. О отцы и братья милости подвизаю. Слово разумное текущее, и язык уяснения, от неоскудных Его сокровищ, подати ми. Прежде же всех света зарю, ею же мрак души и ума очистив си всеблаженных отец наших, иже ныне ново в наша роды просиявшая добродетельми жития бодрено сказати возможе; не яко оных ищуще похвалити, похвала бо праведнику от Господа, но паче полезно нам от них что снискати, не токмо бо древних, и изрядных муж жития, потребна бяху писатися, и пользы ради от них бываемыя человеком, но и нынешняго нашего последняго и лениваго рода, воньже век кончина достиже, в нем же мало спасаемых, не точию потребно но и желанно, еже сих писати и частнее почитати, и яко в высоту стоящия одушевленныя столпы, на жития их зрети. И елико от них остающе, себе зазрети, и совестию осудитися. Овыя же за сущыя в нас лености, яко се поучаемы ими, и яко остном стречеми к добродетели, поне мало подвигнемся. Едва бо аще многи и велики повести, возбудят сердца наша к житию исправлению. Сих ради и аз вашему повелению повинуяся, ныне хвалимых и всеблаженных отец наших житие, елико они от новых никоновых учеников в бегстве за древле православную веру труды, томления, гонения и беды подъяша в повесть предлагаю слышащим. Не от слышания токмо сия приемлем, но от честных ученик их и странничествия спутник, и хождения с трудники. Обаче Бога в помощь их призываем, юже по силе начинаем повесть. Начинаем же взыскующе отнудуже подобно.

Подробно же взыскати от начала кто и откуду бяше, и где жительство имяше, и в которых местех преставися.

Егда убо прореченное от святых время приближашеся, еже чрез Никона патриарха Московскаго и чрез новопечатныя книги православной вере не малое падение учинилось, - тогда преосвященный епископ Павел Коломенский крепце став за благочестие, не принимая от него Никона новин, в церковь внесенных. Егда же приведоша его в собор и начаша его увещати многими ласкательствы, яко да приимет новоисправленныя книги, он же никакоже преклоняшеся. Потом же единому от епископ некоему повеле Никон истязати его. Он же абие предста, ко глаголанию готов сый, добре умея речения представляти, правду же на неправду превращати и истину вредити паче всех ведущий. Околь тогда ему Павлу многая пресечения в речениях творяше: ни мало бо ему попущаху о правде глаголати и проповедати правость благочестия. Павел же, видя сия и не терпя творимыя неправды, абие возгласи сия, глаголя: угасе правда, попрана есть истинна, погибе правосудие, бежа от пастырей законное испытание и опасное вещей разсмотрение.

Виде же Никон и прочие с ним, яко нимало возмогоша его увещати, дабы приял новинства его, внесенныя в церковь, но что уже потом Никон умысли: увы! На заточение его осуждает в Новгородския пределы. Егда же повезоша его на заточение, тогда умоли посланников, яко да попустят ему видетися с Иларионом дьяконом (который последи был митрополитом граду Суздалю). Егда же получи по прошению своему и узре Илариона, и абие нача ему поведати с плачем: како его на соборе истязаху и коликия наглости и гаждения ему творяху. Он же, жалостно сия слыша, абие сокрушися сердцем и нача с плачем просити его, глаголя: владыко святый! Приими мя с собою в заточение, яко да и аз буду общник исповеданию твоему. Он же послуша моления его, но токмо повеле ему некоторыя вещи духовныя устроити и к себе с ними быти; сам же пойде на заточение. Последи же его Иларион ощути в себе бурю пренемогания, начен смущатися и бояшеся на таковыя скорби наступати, яко человек сый, аще убо духом бодрствуя, но плоть изнемогаше. Потом же Иларион отсла к нему оныя вещи с некоторыми людьми, сам же уклонися во ино место. Павел же епископ прият оныя вещи, что в нужду приличествуют роду христианскому в просвещение душам и телесем и во оставление грехов, что при(ли)чествует ко святому крещению: миро и прочия святыя вещи, - и о сем радуяся, благодарив Бога, да и еще похвали Творца своего, яко сподобися за древнее благочестие в заточении во узилищи пребывати.

Пребывающу же ему тамо, начаша к нему приходити ревнующии по древлеблагочестию. Он же многих наказуя, уча и моля, яко да пребудут во благочестии и да не приемлют новых догмат, Никоном внесенных в церковь, и всегда приходящим глаголаша: почитайте священника, без него не пребывайте, на покаяние приходите, посты сохраняйте, пьянственнаго пития удаляйтеся, Тела Христова не лишайтеся. Сам бо рече Господь: ядый Мою плоть и пияй Мою кровь во Мне пребывает и Аз в нем, и воскрешу его в последний день. Аще не яст тела Моего и не пиет крови Моея, не внидет в царство небесное и не воскрешу его в последний день. Еще же рече Господь Своим учеником на Тайней вечери: приимите, ядите и пийте, се есть тело и кровь Моя; сие творите в Мое воспоминание, дондеже прииду. Сего ради глаголах вам: не лишайтеся тела и крови Христовы и всякой святыни. Стойте и держите предание, им же научистеся словом или посланием нашим. В научении же странна и различна не прилагайтеся.

Егда же Никон патриарх уведе, яко мнози наставляеми от Павла епископа, запрети и начаша ему не приобщатися страха ради и гонения, убоявшеся Никонова запрещения. Что же потом умышляет Никон? Злохитростию лукаваго змия нечто зло содеяти истинному страстотерпцу и страдальцу воину Христа, царя Вышняго. Увы безчеловечия и прелести лукаваго змия! Абие посылает иных посланников, яко не дадут к нему ни единому приити, не точию священником, ниже простолюдином. Тогда уже прочее без милости начаша не точию его, но и приходящих к нему озлобляти; и тогда не точию священнии, но ниже простии смеюще яве приходити.

Видев же Павел тако себе озлобляема, начат глаголати к приходящим к нему сице: чадца моя возлюбленная! Уже время приходит, яко не могу более видетися с вами, и вы не стужите си о разлучении моем с вами, и не вметайте себе в напасти; и аще гонят, вы бегите и дадите место гневу. О сем бо и самая истина наша Христос рече: аще гонят вы из града, то бегите в другий: не имут бо скончатися грады Израилевы. – Они же, сия слышаще, слез исполнишася и вси аки единеми усты возопиша, глаголюще: благослови ны, владыка святый, последним своим благословением. – Он же, обращься к ним, рече: буди благословение Господне не точию на вас и на чадех ваших, даже и на всей церкви; идеже аще в коем либо месте благоволит ей Бог быти, да почиет Дух Святый в ней.

Они же вопросиша его: владыко святый! Аще по твоем от нас разлучении сии с нами священноиереи или иереи остаются с нами за вашим благословением, и мы последствуем им и должны есмы всякую святыню приимати: крещение, и браки, и покаяние, и тело и кровь Христову и прочия церковныя обряды, - аще ли сим, тобою благословение имущим, оскудение будет и прочим древлехиротонисанным, что тогда и в те времена имамы творити? – Отвеща бо купно всем предстоящим ту иереом и мирским: чадца моя! Аще ли приидет время ко оскудению священства древлехиротонисанных, и взирайте на писание: по глаголу Господню, грады Израилевы не имут скончатися. Тако же писано, что Господь не умирает; тако и священство Его пребывает, тако и тело и кровь Христова до скончания века пребудет. Аще ли будет пресекатися древлесвященнохиротония, зрите в божественное писание, како положиша святии апостоли и святии отцы правила на седми вселенских соборех и девяти поместных – како подобает от ересей приимати, положиша три чина. Первый чин – совершенно крестити в три погружения; второй чин – токмо с писанием проклинати всякую ересь и потом миром помазуеми; третий чин – ни крещаеми, ни миром помазуеми, токмо проклинают свою ересь и прочия. Тако подобает разсмотряти в новых учителех великороссийских: аще отложат в крещении три погружения – во имя Отца, и Сына и Святаго Духа и будут крестить во едино погружение, или обливать, или окроплять или инако некое странное, - то и вы их принимайте первым чином, совершенно крестити, яко еллины. Аще ли не отложат в крещении три погружения – во имя Отца, и Сына, и Святаго Духа, то за сие двух сих ради главизн подобает и вам средним чином приимати – с писанием нововводных догматов отрицатися и прочия ереси проклинати, тако же и чин наблюдати. Аще кто от вас верный христианин и отступит христианския веры, и оставит ю, и приидет в некую ересь, и пребудит в той ереси неколико время, и потом познает свое заблуждение, и приидет в раскаяние и начнет молити со слезами, яко мытарь, - и сих подобает приимати третьим чином за сие, что они в чину подцерковнин, что у них в крещении мудрствуют, и чины церковныя невреждены и согласны православной вере, токмо в некоторых упрямствах пребывают, не покоряются своим учителем, и за то собор их клятвою обложих и ересию нарече. И сим подобает с писанием самомненную или умоборную ересь проклинати и прочия ереси проклинати же, а миром не помазовати. Аще кто во благочестии крещен и неким случаем отвержется православныя веры, начнет похваляти и защищати нечестивую еретическую веру, и пребудет в ней неколико время, и признает себе, что погрешил пред Богом, и обратится и приидет в раскаяние и покается, - и сих подобает приимати средним чином, с писанием и с проклятием ереси, в ней же был есть, потом миром помазуется. – И сего ради я ваше мнение и печаль утоляю, како по нас пребывати и священнаго чина не лишенным быти; и выше сего объявихом вам, что приимати от новых учителей вторым чином, под миропомазание. И святый Григорий попущает не в присутствии епископа иереом иереов помазовати миром. Уже аз разреших ваше сомнение, исполнив желание ваше на путь спасения, аминь.

Они же, много плачуще и о Христе целование давше, отъидоша.

Потом же наипаче они немилостивии начаша озлобляти; каковыя же тогда ему напасти творяху, которых уже не могу подробно исчислити, но оставляю сие самим слушателям спослушествовати совести их. По таковых же озлоблениях и скорбех, не по мнозем времени, без вести его сотвориша. – Видевше же сие мнози от священнаго чина и мирстии, не к тому уже смеяху, что рещи, бежаша в разныя места, идеже можаху благочестие сохранити невредимо; колико же их быша древлехиротонисанных и по них последующих и хиротонию приявших от новых учителей, зде отчасти объявляется.

Зри любезный читателю о бегствующих священницех, кои древле в благочестии крестишася и хиротонию прияша от древних учителей и благоверие храняху бегуся яша. Таже и от новых учителей хиротонисанных и познаша свое нечестие, и бежаша и приступиша к благочестию. Зде объявляем отчасти.

1) Священноинок Иов, бывый келейник Филарета патриарха. Сей игумен монастыря Агова, и виде что сотвориша Павлу епископу, нектому уже смеяше что рещи, но отъиде и поселися на Дону; и тамо пребывая в подвизех выну день и нощь в молитвах упражняяся и ту конец прият ко Господу отъиде.

2) По кончине Иова прииде священноинок именем Досифей, саном игумен сый Тихвинскаго монастыря, и ту поживе неколико лет в подвизе и в посте и молитве, и благий конец прият ко Господу отъиде.

3) Некто поп именем Козма гонения ради скитаяся и прииде на Ветку.

4) В то же время прииде и Стефан поп населник бысть ту, идеже последи монастырь и церковь бе, и пожиша вкупе с Козмою добре в постех и молитвах и в вечный покой отъидоста.

5) В то же время прииде черный поп Иоасаф, и поселися ту, и поживе добре, и конец благий прият и в вечно жилище отъиде.

6) По сих прииде священноинок Феодосий крещения и постановления бяше древняго, рукоположен бо бысть Иосифом патриархом Московским, и добре пожи в жизни сей в посте и молитве и в коленопоклонении жизнь свою провожаше Богу единому служа неколико лет, и отъиде в вечное жилище.

7) Еще же прииде белый поп Иоанн и пожив добре ко Господу отъиде в вечное жилище, каковыя же они тогда в пощении бдения и молитвы к Богу возсылаху.

8) Последи же прииде к ним священноиерей Антоний и тамо пребываше не малое время.

9) От Рыльска прииде поп белый Александр.

10) И другие белой же Григорий от Москвы. Крещение на обою на Александре и на Григории древнее, а хиротония от новоставленных.

11) Еще же от Калуги привезоша Бориса белаго попа тако же крещение имуща старое, а рукоположение новое. И сих иереов Феодосий приял вторым чином, с писанием отрицания нововводных и мирпомазанием, и священников сих с первою хиротониею приял. Сице и мирских не покрещеваху, взирающе на благословение прежде бывшаго Павла епископа, и тако пребывающе безраздорно.

12) Священноинок Дионисий Шуйский пребываше в керженских лесах несколько лет в великом подвизе и посте и прейде в вечный покой.

13) Священноиерей Трефилий, из Вологды, временем пребываше на Керженце, и паки возвращащеся на Вологду и тамо скончася.

14) Священноинок Софоний Соловецкаго монастыря прият быв собором отцами в начале священноиноком Дионисием и с прочими христианы, после Никона патриарха: а собор бысть на Керженце, труды же его и подвиги же к Богу кто изрещи может.

15) Священноинок Сергий Ярославский, пребываше на Керженце, тамо и конец прият.

16) Священноиерей Исидор, Козмодемьянский, тоже время, иное смущение и буря на церковь Божию воста, имже яко некиим трясением земли, зело поколебася, многия бо, а наипаче и до священных лиц коснуся сие искушение. Возмутиша бо тогда сего священноиерея Исидора, возмнеша убо сии возмутители, яко крещение от великороссийския церкви несть крещение и обращающихся от российской церкви начаша паки крестити, невзирающе же на древний обычай, ниже на правила церковныя.

Тогда убо вышеобъявленнии отцы сошедшися соборне, древний обычай и правила соборныя ведяще, сему противу стала, и показоваху, яко не бе то исправление благочестия, но повреждение истинны, и обычая от правил преданнаго. Писаша же тогда и на Ветку ко отцам (о них-же варивше рехом) просяще, яко да пошлют к ним поне единаго от отец на укрепление обычая церковнаго. По прошению же их прииде к ним священноинок Феодосий, который прежде был на Белмоше, и ныне тойже прииде. Тогда же много увещающе оных возмутителей приводяще во свидетельство соборныя правила. А наипаче указующе на Павла епископа Коломенскаго, прежде их бывшаго, како повелеваше в жизни своей обращающихся приимати, аще суть священницы то с первою хиротониею, и во вторы не хиротонисатися. И потом запретиша крестити паки: повелеша же приимати обращающихся и кающихся с писанием и миропомазанием по правилам святых отец: 1-го вселенскаго собора, и 2-го и 6-го вселенскаго собора и прочих святых соборов, и отец, их же для краткости оставляю. Тогда-же сей священник Исидор зазрев себе и покаяся, и тако в покаянии поживе лета довольно в воздержании и ко Господу отъиде. Сей-же священоинок Феодосий, о нем же выше рехом, обращающихся приимал по соборному тому уложению, чрез миро и потом паки возвратися на Ветку, к церкви и тамо пребывая, труды ко трудам прилагая, подвиги же его яже к Богу, и труды телеснии кто исповесть. И в таковых подвизех соверши течение свое и тако ко Господу отъиде.

По преставлении-же его обретошася мощи его целы и ничимже вредимы, и погребоша его в церкви. Во время же первой выгонки ис Полши христиан взяты оныя мощи присланными полководцы и без вести учинились

17) Священноинок Варлаам, временем живяше на Керженце, прият же быв отцем Софонием, вторым чином со отрицанием новодогматствования, и миропомазанием. Сей же Варлаам переселися в пустыню за Соли Галицкия и тамо пребывше в молитвах к Богу упражняшеся. Егда же приидоша посланнии от града Соли, подвизаеми злобою врага нашего диавола, и тако обыдоша келию его и зажгоша, и ту предаде дух в руце Божии.

18) Священоиерей Симеон пребываше временем на заводах и на Яике, в Тобольском, и в слободах, потом же некое время взят бысть Тобольским архиереем и многия напасти и оскорбления претерпе, последи же в заточении скончася, глаголют же о нем.

19) Священноинок Яков в Сибири же скончася, в жизни же своей елико мощно подвизаяся к Богу, молитвами и бдением всенощным, в таковых же подвизех предаде дух свой в руце Божии.

20) Священноинок Иов в Сибири же, при Нижнем Тагиле пребывая, и жизнь свою добре провождая, в посте и молитве, и всенощном стоянии и милостыню творяше убогим и всем благотворяше, и добрый конец получи, и дух свой в руце Богу предаде.

21) Священноинок Феофил игумен Далматова монастыря поживе в Сибири в великом воздержании, соверши подвиг течения своего, и тако отъиде к Богу в вечный покой.

22) Священноинок Тихон скитаяся от места на место прехождаше овогда на Ветке овогда на Яике, и бысть гонение, и тогда ят бысть Тихон поп, и сослан на Воронеж в духовное правление и мучен бысть, и не повиновася, и посажен бысть в ледник епископским повелением, и ту уморен бысть; и благий конец прият, предаде дух свой в руце Божии.

23) Священноинок Никодим в Сибири скитаяся, в пустыне пребывая велию нужду приимаше, и терпяше от бесовскаго навета и человеческаго озлобления, и вся сия претерпеваше, токмо утешение имея пост и молитву и всенощное стояние. И не терпяше диавол добродетели его навади некиих злодеев, приидоша в келию его, и начаша мучити, и потом огнем сожгоша и смерти предаша, и от сего благую кончину прият, и в руце Бога живаго душу предаде.

24) Священноинок Никифор скитаяся в керженских лесах, потом прииде в Сибирь, таже на Яик, и поживе тамо неколико время, и добре поживе и благий конец прият ко Господу отъиде.

25) Священноиерей Василий в Сибири жительство имяше, труды же и подвиги его кто исповесть, воздержание и пост его всегдашнии, бдение и молитвы непрестанныя, в сицевых подвигах преселися в вечныя обители к богу Его же возлюби.

26) Священноинок Досифей в нове прият бысть отцами ветковскими. Сей же отец поживе упражняяся в молитвах и трудех телесных выну пребываше и тако преселися в вечный покой его же возжеле.

27) Священноиерей Иоанн скитаяся в сибирской стране тих и кроток, смирение стяжа нелицемерно, в посте и молитве пребываше день и нощь, и поживе богоугодно неколико время, и в вечный покой отъиде и с праведными водворися, а дух вручи в руце Божии.