Слово избрано от святых писании. еже на латыню.

и сказание о составлении осмаго собора латыньскаго.

и о извержении Сидора прелестнаго.

и о поставлении в рустеи земли митрополитов.

о сих же похвала благоверному князю Василью Васильевичю всея Руси .

благослови отче.

 

Яко богонасажденныи раи мысленаго востока праведнаго солнца Христа. или яко виноград богозделанныи цветы, и в поднебеснеи сияя благочестием, богопросвещанная земля руская веселится, о державе владеющаго ею благовернаго великаго князя Василья Васильевича царя всея Руси. хваляшеся о мудрости обличения его. еже богоразумне обличив. и изгна врага церковьнаго сеятеля плевелом злочестия. Исидора тмокровнаго. латыньския ереси исполнего. и другаго не прият Григория ученика его иже от Рима пришедшаго. таковаго же развратника веры православныя. споспешника его и советника. латыном поборника. святая же церкви Божия величается благыми пастыри и учители истинни проповедници. великими святители Василием Кесарейским и Григорием Богословом и Иоанном Златоустым с ними же и богосоставленных святых седми соборов святых отец, от нихже мы учение почерпающе яко от источника воду бесмертия доволне бо напоиша землю благоверия пивом спасения. по глаголу Господню, яко да не вжажется в векы. еяже напившеся обилне рекы взыграша. и езера всплескаша. горы же и холми веселяхуся. земля же с ними радующися вкупе. просвещьшися светолучною зарею божественнаго Духа. и мы убо братие духовне подвигшеся. тако же с сими вспомним иже в благости прежде восиявших. благоверных цареи православия. с ними же святых вселеньскых патриарх прежде бывших и добре правящих и соблюдающих святую церковь безмятежну. и препревших и посрамивших прелесть богоотметных зломысленик. Ария и Нестория. и Македония. и инех многых пособник их же прежде бывших злоначалных еретик. ихже прокляша святии отци богопроповедници. они же убо злии еретици. таковым их проклятием спону деюще. и научиша отца своего сатану. иже всех человек преизлише гордостию возвысится диавол. иже от небесных высот низвержен бысть в кромешная тмы. даже и до дна ада преисподняго. и тако не имея о бывших си прежде благых и надежда в бесконечныя векы. и того ради вся человекы прелщает и от Бога отлучает. и низводит в погыбель. и тако влагает мысль Еугению папе Римскому. составляти богоотметныи осмыи збор в лето его ради сопротивления. богосоставленных святых седми зборов святых отец, и в попрание запрещения их святаго. Еугении же папа Римьскии. от диавола таковую мысль злую в сердце си прими. сице же и сотвори помышляя о сих, еже бы съединити к собе восточную церковь православия. и уединити с римскою по уставу обычая своего. и единаче ввести в них опресночная приношеныя. и закон веры истиннаго православия хотя привести в латиньство. и егда же бысть по отшествии еже к Богу, благаго нашего пастыря и учителя. Фотия митрополита всея Руси, в лета же и в дни благочестиваго великаго князя Василья Васильевича всея Руси. И пришедшу некогда Сидору греку митрополиту на русскую землю. и тако добре почтену ему бывшу. он же сыи подстрекаем бысть сатаною. и по малем временем своего пришествия. начат дерзновенно тщатися к зборному путешествию. и поведаша яко быти ныне в римстеи земли собранью осмаго збора. мятежа ради и раскола еже гречестеи церкви с римскою. о растворении святаго тела и крови Божия на святем жертвенице. еже в кислом хлебе растворение даже и в пресноцех. и прочие о Святем Дусе. и тако нарицашеся прежнии сходатаи збору тому. Благоверныи же великии князь Василеи Васильевичь. Богом вразумлеваем. глаголаше ему, да не пойдет на составление осмаго збора латыньскаго. ниже сблазнится в ересех их. и взбраняше ему о сих. к сему же повеле и еще глаголати ему. яко да останется таковыя мысли свершати. и много глаголаша ему. и не послушаше сицевых. но яко неистов ся деяше. и по сих рекоша ему. веси ли отче заповедь святых правил святых отец, якоже о сих богоносныи отци седмы збор свершиша. и в святых правилех устав божественыи закон святых апостол весь положивше. и святую веру православия запечатлеша проповедя Отца и Сына и Святаго Духа. чтуще Святую Троицу едино божество неразделимо. о осмом же сборе составляющихся проклятию предаша. и анафема их нарекоша. и с еретики их отлучиша единословно Богу сопротивная делающих. он же сих никакоже послушати можаше по пророческому гласу. бысть бо рече якоже аспида глуха. затыкаяй уши свои еже не слышати гласа обовающих. Соломон же о таковых глаголет. нечестием своим погибает законопреступныи. еже и бысть. он же о сих еже рече. и умысли сице и сотвори его же пути желаше. и тако поиде нань же дерзаше. благочестия же ревнитель и споспешник истине. благоверныи князь великыи Василеи Васильевич. сицевая рече к нему. о Исидоре. дерзновенно дееши в латыньскую землю идеши. и составление осмаго збора поведаеши. егоже отрекоша святии отци, ныне же аще не останеши мысли своея. но буди ведая. егда возвратишася оттуду к нам. то принеси к нам изначальственейшее прежнее благое съединение. нынешнее въсиявшее в нас благочестие и устав божественаго закона. и правление святыя церкви. он же зело тяшкую о сих клятву на ся положи. рекущи яко ничто же странна и чюжа не принести от латынь в рускою землю с осмаго их збора. но ятся рече крепце стояти о православии. и по святым правилом побарати о благочестии. лжесловесне бо глаголаше сия скрывая мысль злу в сердци своем. хотя совратити люди Божия с истиннаго пути святыя веры. и съединити к латыном. мнев себе единаго мудрейша в всех. а не помянув к сему Господня словеси. еже рече своим учеником и апостолом, аще кто в вас хотяи быти преднии. да будет всем слуга. а иже мнит в вас болии да будет всем раб. еже сице и бысть Сидору к отвержению его. егда же прииде Исидор в немецкую землю до града Юрьева. живущии же в нем людие православия и вси священници и с честными кресты изыдоша срести его. латыни же и немци. крыжь лятьскии изнесоша противу ему почести его ради. он же преступив тяжкую свою клятву. ею же клятся о благочестии великодержавному си государю Василью Васильевичю всея Руси. по реченому пророком, яко забы Бога спасающаго и. преже бо возре и поклонися. и притече любезно целова и знаменася крыжем лятьцким. и по сих прииде к святым крестом правосалвия последоваше же и провожаше и чтяше крыжь латыньскии. иде с ними до костела сиречь до церкви их. а о святых крестех православия небрежаше ни провожаше. того бо ради и самого остави его помощь Божия. видев же сия Аврамии владыка Суздальскии. и вси на том пути бывшии с ним христиане православия. еже таковая нечестия от него святым крестом бываема. в том часе ужасом зело вси одержими беша. зане бо еще не дошед Рима, таковая богоотступная делаше. и по сих прииде Сидор в область римьскую в град нарицаемыи Ферару. идеже тогда богоотметныи суемысленныи осмыи збор папа Римьскии Еугение составляше. в четыредесят седмое лето месяца септевриа в седмои тысущи последнего ста. обрете же ту и царя Иоана Констянтинопольскаго. и с ним вселеньскаго патриарха Иосифа. с ним же и трапизоньскаго царя митрополит. и иных земель многых митрополиты беша ту. ихже числом яко двадесят. и хартофилакове мнози. и латыньских земель арцибискупи. и бискупы. и гречестии простии старци. и всех множество греков и латынь. и аламан. и фрягов. и калатин. и френчюк. и беребеан. и катеян. и не зборовааше долго. ожидающе от великыя Руси митрополита Исидора по совету его. царь же тогда кир Иоан извествоваше слово Еугению папе Римьскому. и всем бывшим ту. яко восточнии земли суть рустии и болшее православие и вышьшее христианьство белые Руси. в нихже есть государь великии. брат мои Василеи Васильевичь. емуже восточнии царие прислухаю и велиции князи с землями служат ему. но смирения ради благочестия. и величеством разума благоверия. не зовется царем но князем великим руским своих земель православия. и того ради ожидающе не збороваше месяц шесть. егда же Исидор приспе к ним и тако сретоша его людей множество зело с великою честию. славы ради и имени великаго царя Василья Васильевича всея Руси. и по малех днех начаша зборовати тамо. первое снидошася на збор месяца септеврия. вниде папа Еугении в костел сиречь в церковь, с ним же арцибискупы. и бискупы латынстии и сташа на левои стране. царю же и патриарху бывшим на деснеи стране на престоле. и тогда внесши поставиша святаго Петра. и Павла. литы сребряны позлащены. а пред ними по три свещи возжены. и столы пред ними философьскии. а пред царем такоже устроен богословль стол. а на философьском столе посажени суть мудреци. Улиян римскии гардинал. а с ними грекове. Иван болоньскии. Андриян критьски. а на столе богословли пред царем Марко Ефески митрополит вместо патриарха Александриискаго. а Висарион Никейски вместо патриарха Еросалимскаго. начатью же збора того их сице бывшу. егда вшед папа. мало поклечит на колену свою по обычаю латыньскому. и шед сядет на месте своем. и тогда бискуп един начнет велегласне латыньскым языком. и жаком их поющим не мало. по сих же начат глаголати, и толмачи от них глаголют толкующи треми языкы. гречески. фрязски. и философьски. и книг много снесут пред ними. и глаголавше разыдошася. и тако по три дни делающе. не бысть между ими пря никоеяже. зане бо начаша прежде глаголати фрязове. греком же тогда веселящемся. егда же приспе праздник великаго Иоанна Богослова. и тогда начаша зборовати. четвертыи снем по прежде бывшему подобию устава своего и начаша глаголати фрязове. и множество книг принесоша ту и тогда в них распри велице бывши. и не согласишася блаженейши же Марко митрополит Ефески. начат к ним сице глаголати благоразумне и благоутишне. словесы благыми увещевая их смирене и благочинне рече к ним. добро бы вам латыно познати истинну Божию, и не лгати неправды. а на святых отец не лгати. ни ложных писании не класти. а Духа Святаго не разделяти. а опресночьных остатися. а в святых седмь зборов веровати, и заповеди святых отец творити. а не укаряти их ни отрекатися. а осмаго збора ни составляти ни нарекати. а блаженнеиших седми пап учение изыскати. и зрети в книгы святыя, и делати вселенскаго учителя наказание Иоанна Златоустаго. и ходити по правилом святых апостол, и богоносных отец всех святых седми зборов. и писания святых истинная избрав положити. а лестных и ложных не глаголати. и тако по божественому закону святых правил. и по уставу святаго пения церковнаго. прошение верно и молитвы принесем к всемилостивому Богу, и прославим память святых апостол и святых отец Василия Великаго. Григория Богослова и Иоанна Златоустаго. и всех богосоставленых седми зборов святых отец и святейших пап вселеньскых. от Селивестра Римьскаго даже и до Андрияна. и ти вси святыя о нас к Богу помолятся. и нас а разум истинныи приведут. и емуже Господь Бог открыет разум премудрости и явит всем глагол Божии свои истинен. и яко да умягчит Господь нивы душевныя сердец ваших еже слышати и разумевати всем истинну и поити путем правым. да ногы мысли нашея не ткнутся. тобе же честьные папо Еугение. достоит о сих истинне разсудити. и мысль благу имети зане бо призвал еси святаго царя, и святейшаго патриарха. и всех восточных митрополит. и повсюду православный вселеньски збор честьных ереев и калугер. зделайте же о Бозе правду и истинну. да не вотще будет труд вашего собрания. да не к нам о таковых пророк Давыд глаголет. вскую шаташася языци. людие поучишеся тщетных. князи людстии собрашася вкупе на Господа на Христа Его. блюдите же и сего да некогда услышат сия вернии языци православия. еже отмещете правду. а лестная и ложная любите. и тако посмеются вашему суемысленому собранию. аще же ли не хощете сделати истинны. ни пойдете путем Божия правды. то и сами весте како о таковых пиша пророк глаголет. аще ли не хощете ни послушаете Мене. оружие вы поясть. уста бо Господня глаголаша сия. тацеми бо Марко богоутешными словесы претяаше и смирено глагола им. и тогда встав римьскии гардинал Иулиан с места своего. и иде к папе злобяся велми о сих жестоко. не могы от него слышати таковых словес. и рече папе. слышиши ли честныи папо святыи учителю. что сицеву хулу Марко на тя глаголет; книгы твои лживы зовет. а збора твоего не хочет зборовати. а тобе папу вначале поминати не хочет. а осмаго збора назвати не хочет. но седмии збором воследует. о сих поучает. папа же услышав смутися велми. и тако начат глаголати царю же и патриарху. слышите ли царю сия и ты патриарше. како на мя хулу глаголет Марко и книгы моя хулит. царь же тогда отвещав глагола ему. мы убо ничто же хулна слышим Марка глаголюща, но вся справедливая Марко глаголаше пред нами. и тогда папа римскии многое множество повеле книг принести. досажающе Марку. блаженнеиши же Марко умилився сердцем в собе. и о прелести их латыньстии зело разжизася мыслию. видя мятущихся люди Божия, и приступающа к соблазну ереси их. и начат жестоко глаголати к ним сице рекущи. о латыно. о латыно. аще ли буиства своего не останете неправедная глаголюще на седмь богосоставленых зборов святых вселенскых учителеи. и на святых седмь блаженнейших пап. весто вы буди. яко от сего часа буих своих ложных речеи скоро престанете глаголати, и в тои час Марку не на кого злобно глаголющу. изыде отсюду рече да не пребудеши ту. и тогда некто мних избеже вон. вси же в том часе смятошася фрязове. и латыни. и папа встав с места своего избеже. и вси гардиналы. и арцибискупы. и бискупы. и фрязеве. и аламане. и вси латыни. не могуще терпети Марковых словес. а толко осташася ту едини грекове да русь. и тогда царь и патриарх вопросиша Марка глаголющи. что злое папе и гардиналом изрекл еси. и [еже] избегоша от мест своих. отвещав же Марко рече к ним. слыши царю и ты патриарше. аще кто неправду делает. то и не может слышати правды. о таковых бо пророк рече. заградиша уста глаголющих неправду. аз же толико сия рекох им. аще кто отступит заповеди святых апостол. и богосоставленых святых седми збор святых отец, и седми святых пап же вселеньскых учителей, да будет анафема. и того ради збегоша с мест своих. помните убо како в Цариграде и сами о сем рекли есте. яко латыне не суть христиане. како могут христиане быти. ныне же сице и бысть. не могут слышати правды. како могут пойти путем правды. и како может нам быти единачьство с ними. и едина церковь отметающихся истинны Божия, но весть держава твоя царю. аще бы рекл им слово о сих. како латыни зделали разстояние святей Божией церькви. или како отверьглися веры православия. то не могоша таковых обличеных на ся слышати. избегли бы из града сего неправд своих ради. ныне же слыши царю о сих что папа глаголет, седми святых вселеньскых збор не хочет поминати. тобя царя в молитвах не поминати ни патриархов братиею себе звати не хочет. но велит свое имя папу Еугения поминати в церквах по всеи земли. но аще будет в первых папу поминати. то уже нам велит опресночная служити. но царю аз таковаго збора никако же зборовати не хощу. ни папы вначале поминати не хочю. но всем повелеваю не отрекайтеся святых отец, зане бо в святых правилех написано есть. аще кто от заповеди святых отец вселеньских учителеи. приложит или уложит да будет проклят и сего аз трепещу зело. а осмаго збора не нарицаю а папы не поминаю. а заповеди его небрегу. а кто папу в православных церквах помянет. да будет анафема сиречь проклят. слышав же сия латыньстии капланове. и тии посрамившеся избегоша от словес его. и тогда рече к нему царь. отче святыи престани. и всташе изыдоша в домы своя. и потом гардиналове часто начаша приходити от папы к царю и к патриарху. даже и к Сидору митрополиту с многыми лестьными речми о сих да не преодолевает Марко ниже пререкует латыне. да сотворите рече волю нашу. беруще злато множество елико хощете. и по многыя дни прихождаху к ним тако далающи с ними. и прельстиша их. царь же и патриарх положиша мысль свою быти збору их в конци в Флорентии граде латыньстем. сице же и сотвориша. поимавши злата множество. и поидоша в град их Флорентию. царь же и патриарх. и Сидор с ними единаче. на совершение злыя своя прелести. чающи обольстив и утолити Марка. и глаголющу Марку к царю и к патриарху. не ходите в латыньскии град в Флорентию. не можете бо тамо учинити своего желания о них же вы мыслите. но якоже Бог восхощет тако и будет. они же не послушавше его и поидоша. и тако нужнаго ради путишествия. взимающе папе свою волю над ними. Марку же к ним глаголющу, не рекох ли вам о сих. яко латыни ложь есть. о их же глаголют а все лжут. и тогда самому царю с Сидором начнейшу к папе часто ездити. и в конец слово чинити. и поченше себе зборовати едини. чающи над Марком свою волю учинити. ему же к ним жесточаиша словеса глаголюща, латыною всех нарековая. царю же и патриарху к нему глаголющим. о Марко аще си тамо жестоко глаголал. зде же смирено глаголи. отвещав же Марко рече к ним. и ныне царю не послушаю вас. но яко же Бог восхощет тако сотворит. многажды им без него зборовавшим. и не успевшим ничтоже. и потом грекове с Сидором и книгыи своя подписаша нань чтобы чим одолети его. или что слово уловити от уст его. имже от правды отлучити его. ему же не дадущу им ничтоже хулу глаголати, и укаряше философов их. а папы не благословяше ни збора его. и изыде от них в полату свою. и тако не смевшим им сборовати без него. зане молва будет в людех велика. и многажды царь же и патриарх по совету Исидора претяху ему глаголюще послушаи папы. по сих же и сам папа Исидором научен муками претяше ему. он же сих ничтоже не убояшеся. но поминаше Давыда пророка глаголюща. живыи в помощи Вышняго. в крове Бога небеснаго водворится. и пакы взовет ко Мне и услышю. с ним в скорби изму и прославлю. и долготу дни исполню. и явлю ему спасение Мое. Марко же имея упование на Господа Бога своего спасающаго. сим о Бозе утешашеся. и потом зело молением просяше его папа. и злато ему доволно посылаше. дабы послушал его и сотворил с ними волю его. он же ни во что сия вменив и рече к ним. не злата ради ни сребра приидох аз семо. но правды ради Божия. и не возмогоша прельстити его. греческому же царю и патриарху с Сидором. зборующим собе от Алексеева дни человека Божия, и до Сисоя Великаго. месяца иуния в 6 день. обретая сицевых чтобы получити им свое желание. Марку же не всегда входящу к ним на избрание дел их. имже без него ничто же сотворшим и не возмогоша [пре]прети его. И тогда учиниша собе с папою болшеи збор. и кончавше между собе дела своя. и в записи крепци положиша и подписашеся им царь и с ним Сидор митрополит. а Иосифу патриарху приставльшуся тут. месяца иуния в 10 день. и положиша его в костеле сиречь в церкве. идеже стоял папа на зборе своем. блаженнейшему же Марку митрополиту Ефескому. не вписавшуся с ними в суемысленная и прелестная их положения. такоже и Иверскому митрополиту Григорию. и Нитрискому Исакию. Агаскому Софронию. и побегоша от них из града в путь свои. царю же с пути их к себе возвратившу. а Григорию Иверьскому к своему царю утекшу на море тако избежавшу. возвращении же назад к ним пришедше. ничтоже помогли царю и тако у них скончавшуся збору их. в граде Флорентеи: +: + ..

В лето 6.900,48.-е. месяца иуния. в 6 день. папе же тогда мшу свою служившу в ризах червлена оксамита. и воскладаше рукавици на ся. и перстни златы многи на рукавицах. и на главе шапку с корунами высока и с камением и с жемчюгы многоценно. а коли входит к мше. а пред ним несут святых в скринах златых и сребреных слиты аки человеци. в образ святаго Петра и Павла. и егда вшед в костел сиречь в церковь. и приклекнет мало с арцибискупы. и бискупы своими. и потом шед сядет на месте своем. высоко на зголовии червлена оксамита. и тогда мнози вострубят в трубы и в арганы. и в гусли. и с всеми играми по фряскому праву. папе же служившу мшу свою. а прежде молебен поюще по фряски. а Сидор с греки своими по гречески. и отпевше молебен. и пришедши все к папе челом удариша по фряскому праву. и благословишася у него. ему же благословившу их. и простишася. и по сих пребыша у них гостяще до 26 дне августа месяца, и разыдошася тмою неверия покрывшеся. увы прелести сия погубныя. увы съединения мерзости греческому православию. како убо вместо света животнаго мрак тмы вменяется. како ли вера благочестия к латыном приложися. царь же и патриарх православия в прелести латыньскых ереси впадоша. в сети злата увязнувше погыбоша Сидоровым оболганием. злато приимше от Бога отлучишася. и с латыною съединишася. о великодержавныи царь. что ради к ним пришел еси. что ли о сицевых благое мыслил еси. что ли си зделал еси. свет на тму приложил еси. вместо божественаго закона латынскую веру приял еси. вместо же правды и истинны. ложная и лестная возлюбил еси. како убо прежде быв делатель благочестия, и ныне вместо сия плевелом сеятель злочестия показася. како убо прежде быв светом божественаго Духа осеняем. ныне же в мрак неверия облечеся. и како убо прежде цветы в благочестии, яко многолиственыи кедр обвеселяя сердца верным вонею благоплодия. ныне же израстил еси горкаго семяни злы плод преслушания. и како зле огорчил еси душа верных человек. преслушание богосоставленых святых седми збор. заповеди святых отец, и вместо благословения их клятву приобрел еси. и съединил еси латыном истинное православие греческаго си царства. что ради сицевая створити дерзнул еси прежде бывших сродник своих. благоверных цареи православия великаго Констянтина и прочих цареи споспешник благочестия. како Богу послужиша. и путь истинныи обретоша. и царство небесное получиша. к сему же како не помянул еси и оного великаго Владимера. иже не у бывшим в вере родителем его. он же сам поискав обрете веру благочестия, сущую в Констянтинополи. и познав истиннаго Бога, и поиде путем правды. и тако от мрака тмы на свет пременися. очистив си душю святым крещением. и многыя душа спасе, и того ради от Бога венцем святым увязеся. и равен апостолом вчтен бысть, ты же о царю не тако створил еси. но колико душь народа православия смутил еси. прельсти ради Сидорова развращения. что благо в латыньстем ложнем их законе возлюбил еси. но аще бы благоукрашен был закон их. или устав их церковнаго пения. то не бы оставил он великии изыскатель верномудрыи Владимер. а приял бы закон их. и возлюбил бы веру их. но преже вся та испытав. и увиде свет истинныи. и познав божественыи закон святыя веры благочестия. и тако возлюби верова. и принесе к Богу трудов своих благии плод добродетели. просветив всю землю рускую святым крещением. тогда же тма неверьствия всеконечне прогнася. ныне же от Исидора горкородныи корень злохитрия прозябоше. ты же прелесть от него взимаше. что убо царю в латынех доброе видел еси. не сия ли есть почесть в них Божией церкви. еже возвысят в ней гласы своя яко безумнии. и многокличи и плищь. и зело велик вопль пения их. или се есть красота их церковная еже ударяют в бубны. в трубы же и в арганы. руками пляшуще. и ногами топчюще и многыя игры деюще. ими же бесом радость бывает. се ли есть смирение и благочиние. в святеи церкви еже папа их клечит на колену свою. и опресночная приносит. и в рукавицах служит. и перстни на рукавицах носит. такоже и арцибискупы. и бискупы учители их творят. и капланове их клячят. такоже и вси ляхове и весь латынскии род. мужеска полу и женьска. малии же и велици и вси падающе на колену свою. и клячят до скончания богомерьскаго пения их. тако бо и жидове створиша. ругающеся Христу Спасу нашему. еже на святых Его страстех претерпе от них досаду и поношение. си же к тому еще яко наругахуся образу Господню, учители их церьковнии: служители постризают брады и усы своя. ревнующе женьскому зрению. рекущи же сице блядословия. тако добро есть к святыни приступати. а идеже служат и приобщаются. ту и пси их с ними ходят. им же советуя похваляше таковая Исидор злочестивыи. и того ради от папы Исидору приимшу почесть велику. и тако идущу ему от Рима в путь свои на руску митрополью. и приспе в град нарицаемыи Будин месяца марта в 5 день. и оттуду пославшу ему своя писания в ляскую. и литовскую. и в немецкую землю и на всю Русь православного христианьства. сице пиша. Исидор милостию Божиею перщиныи архиепископ Киевскии всея Руси легатос. и от ребра апостольскаго седалища. ляскаго. и литовьскаго. и немецкаго. всем. и всякому христоверным. с прибавлением веры своея вечное спасение в Господа. возрадуитеся и возвеселитеся вси ныне. яко и церковь восточная коликое бо время разделени быша. и единак един и вражебныя ныне истинны съединением съединишася. в единачество древние безо всякаго разделения. вси иже христоименитии люди как латыни так грекове. и тии вси иже подлежат святеи зборной церкви Констянтинопольстеи. еже суть русь. и серби. и влахи. и инии христианьстии роди. приимете тое же святое и пресвятое единачьство. с великою духовною радостию и с честию. и напред молю вас в Господа нашего Исус Христа, иже с нами милость сотворившаго. чтобы никакова разделения с латыною в вас не было. за иже вси есте раби Господа Исуса Христа, и во имя Его крещени. вы же латыньстии роды тех всех иже в вере гречестеи суть, истинно веруите безо всякаго размышления суть бо вси крещени. и крещение их свято есть и испытно. от римьския церкви. еже истинно и равно есть якоже и тое церкви крещение. и дале бы межи вас никакова злое размышление не было о тыя делех. но как латыни так и прежереченыи грекове. к единои церкви смотрение имели. еже бо единым едина есть. и когда греки в земли суть латыньстеи. или где есть в их земли латыньская церкви. чтобы есте вси к божественои службе с дерзновением прибегали. и тела Исус Христова смотрели. и сокрушением сердца честь вознавали. яко же и в своих церквах чиниях. а на покаяние приходят к латыньскым попом. и тело Божие от них приемлют. а латыни такоже должни суть в их церковь ити. и божественыя службы слушати. и с теплою верою покланяти тому же Исус Христову телу. понеже истинно Исус Христово тело, также священно в пресном хлебе. и того ради достойно есть обое держать пресное и кислое. а латыни также приходят на покаяние к греческым попом. и причастие Божие от них взимают понеже обое то едино есть, тако бо вселеньскии збор кончал в явленом поседении. в честнеи и в болше церкви служивше в граде Флорентии под леты воплощения Господня 1.400.39.-го лета. месяца иуния в 6. по сих же прииде Исидор на рускую землю в богоспасаемыи град Москву. к благочестивому и благоверному великому князю Василию Васильевичю. скрывая в собе прелесть латынския ереси. еже изнесе на истинное православие. и тако почесть свою латыньскаго обычая бесование гордости вскоре являет. имже хотя величатися еже странно и чюже е от православныя веры. еже недостоит творити верным. прежде убо в послании грамот своих звашеся легатос. и от ребра апостольскаго седалища. лятцаго же и литовскаго и немецкаго. а пред собою повелеваше носити крыжь латыньскии. да три палици сребряны про честь фрязскаго права. егда же в молитвеных речении святыя службы и вместо святых патриарх вселеньскых поминает впервых. и блажит Еугения папу Римскаго. емуже бо на злате отдаде святую веру греческаго православия. по скончанию же святыя службы. повелевает Сидор вшед на амбон чести велегласно грамоту осмаго суемысленаго си збора. отреченнаго. в ней же написано есть богомерзьско и богоотступно еже суть латыньстии прелести. разделяюще Святую Троицу. глаголющи яко Дух Святыи от Отца исходит. Дух же и от Сына. и опресночная мудрьствующи съединиша рекуще яко в безквасие и в кваснем хлебе телу Христову сотворитися достоит. а о усопших сице писано. иже в истиннеи вере исповедании Божии, с смирением конец прияша. и покаяния плод не доспеша принести о согрешении своих. о них же им духовнии отци заповедаша. и таковии очищением мук очистятся по смерти. но вся убо сицева собою мудрствующе зделаше. прелести ради истинныя веры православия. еже бы прельстив отлучити христианьство от божественаго закона. и тако всих о сия.

От папы. Писание к благоверному князю Василью Васильевичю. грамоту сице пиша. Еугении епископ раб рабом Божиим превысокому царю. спасение и апостольское благословение. благодарим Господа Бога, якоже ныне по мнозех трудех Духа Святаго благодати помощию. восточная церковь с нами едина есть, еже к спасению идет душь многых людей. и к твоей славе. и хвале пишется. и к сему единачьству. многое поможение и поспешение честнейшаго брата нашего. Исидора митрополита твоего и всея Руси. и от апостольскаго престола посла. иже за свое благое много потрудился о соединении крепчайшее имел, и того ради потребно есть помогати каждому во всех делех. а и паче в сих делех еже пристаяние имеет. и достоиньству и чину церковьному врученнеи ему. а твое превысочайше в Господа, излишим желанием просих сего митрополита о оправдании. и о добре церковьнем прежде реченнем. да приимеши его богорадно и нас для. занеже то с желанием. и с еже имаши видети от него о церковней пошлине престояние. да будеши помощник ему усердно с всею своею мощью. еже да будет хвала и слава от людей. а от нас благословение, а от Бога вечное дарование да имаши. а дано в Флорентии священьства нашего в 9 лето [5 лето].

Богошествены святаго пути богоуставному закону. и мудры изыскатель святых правил. богоцветущи исходатаи. и споспешник истинне. благоверныи великии князь Василеи Васильевич всея Руси. Богом вразумлеваем и осияем благодатию Духа Святаго, новыи Владимер иже быв подражатель святых апостол. и споспешник блазеи вере истиннаго православия. или в царех новыи Констянтин иже быв ревнитель Божия страсти, и добрыи изыскатель честнаго креста Христова, и сеи такожеже великыи державныи боговенчанныи рускыи царь Василеи. имея страх Божии в сердци своем. и духовне попечение о святеи Божии церькви. и яко узре и услышав по изречении словес его. впервых папино поминовенье имени. и познав Сидора волкохищнаго ересь. и тако не прият благословения от рукы его. и латыньскым ересным прелестником нарече его. и скоро обличив посрами его. и вместо пастыря и учителя. волком назва его. и скоро повеле с митропольскаго стола соврещи его. яко безумна прелестника и отступника веры. и повелевает пребыти ему в монастыри. донеле же обыщете о нем по божественым священным правилом святых апостол, богосоставленых седми зборов святых отец. и тако истинным судом правды. пред архиепископы и пред епископы земель своих. и пред всеми зборы священных обличит сущее в злых ересех бывшее дело его яко да устрамится таковых. отложит таковая дела своя. и повинется и покается. и милость получит. Исидор же злаго яду насытився. никако же отринути моги. но тако пребывает в мерзости запустения. по пророческому яко же пишет. окамене бо сердце людеи сих. ушима услышаша очи свои смежиша. и другое к сему. рече, законопрестыпныи в сердци своем несть Бога, и согрешаяй в собе ни есть страха Божия пред очима его, такоже Исидор бесуяся в окаянном сердци своем и ни мала времени пожает не стерпе срама ради и обличения своего о злых си ересех латыньскых еже делаше. и тмою своего безверия оболкся. нощию безверием исшед. татьство бегуется. и с учеником своим с черньцем с Григорием. и тако бежаху к Риму отнюду же приидоша. злыя латынския ереси изнесоша. богоразумныи же благочестия делатель. благоверныи князь великии Василеи Васильевичь. никакоже не посла по нем возвратити его. ни восхоте удержати его. яко несмыслена суща богомерьзка. да не приступятся греси. зане бо святая правила божественаго закона святых апостол, повелевают таковаго церкви развратника огнем сжещи. или жываго в землю засыпати его. Исидор же о таковых своих ересях латыньских еже зделаше. ничто же не приим зла отъиде. и по сих отдалеча тая же Сидор творит. якоже злыи пагубныи змии диавол. жестоко гоня святую церковь иже в Руси цветущаго благочестия, и превращает христианьство на латыньство. от таковаго же злохитриваго врага. соблюде Господь Бог и Пресвятая Богородица святую церковь, безнаветну и безмятежну. обличением Богом вразумлеваемаго великодержавнаго Василья Васильевичя. в благочестии цветущаго царя всея Руси. ему же о сем откры Господь Бог, велеумне разумевати. и вся мудрствовати. якоже и оному Соломону премудрому царю Еросалимскому уподобися. иже сицевая рекшему. чаша моя чаша моя. прорицати то. дондеже звезда в пиво будет Господеви, первенцу бдящу нощию. о сих же истолкова Исая пророк. чашю бо нарече мудрость Соломоню. звезду же Христово рождество. а первенец Христос, бде бо в тую нощь. в нюже вечеряше с ученики и пии. и предан бысть, или уподобися в мудростех Иоасу царю сыну Ахазову. царьствовавшему в Израили, еже видения сына о святом грезну и о двою честных жен посланых кедрови ливаньскому. и реченнаго с ним о горах же и о холмех. и о велицем граде. не восхоте поведати никомуже. о нихже мудрыи Амесия царь июдин раздрешив сице истолкова. грезн есть Христос, а кедр правая вера новых людеи. а две жене ветхии и новыи закон. горы же суть пророци. а холми апостоли, иже поведаша нам держати новыи закон. а ветхаго ся остати. великыи же град весь мир а малыи церкви святая, и прииде царь великии. и обьступи град с твердостию хотяи взяти. то есть диавол ему же подобен Исидор. хотя люди соблазнити. и ввести в латыньство. великодержаваныи же благочестия ревнитель Василеи Васильевичь уподоблься Иосифу премудрому царю земли египетскыя. еже мудростию си проразуме хотящая преди быти. и тако хитрым приготовлением жит многих спасе град и люди всея земли царства египетскаго от велия ярости нужне пришедшаго глада на всю подсолнечную. такоже и сей великии боговенчанныи царь Василеи боговразумлеваемая действует. мудростию разума прогоняет тму неразумия. и море размещет лютаго безбожия. и тако многи от язык агарянскаго племени. и от жидовьского роду. и от иноверных благочестием си удобри. и великодержавием учреди. и благоразумием от тмы на свет изведе. безверных сущи в блазеи вере укрепи. и святым крещением просвети. и тако избавляет всего народа православия от тмы ереси и находящих и прогнал есть врага церковнаго Исидора тмокровнаго к латыном приступившаго. имже хотяше быти многа развращенье святей Божии церкви, и божественому закону истиннаго православия, и всему народу христианьския веры. и тако благочестия делатель благовенчаньныи царь Василеи, Духом божественым распаляем, возревновав по Бозе и по святом законе благоверия. и не моги зрети святыя церкви без учителя. еже истиньнаго правителя святым Божиим церквам ниже таковыя прелести и мятежа от Рима святей церкви бываема. но вскоре о сих богомудра действует великодержавныи. исполнися о Бозе благоадати Духа Святаго, и утверждая святую си церковь непоколебиму от мысленных владык. губящих веру истиннаго в рустеи земли восиявшего благочестия. и вскоре о сих благодеянии поспешьствуя. сбирает к себе збор и сзывает архиепископы и епископы земель своих. и честьнейшая архимандриты и игумены и священноиноци и вси священници. держащих Божия престолы святыя церкви. и мудрых философов и иноков множество. хытрых ритор. добре ведущих святая писания. и тако повелеваше от святых писании изыскивати им божественаго закона положение святых апостол. и заповеди предание святых седми збор святых отец. и запрещения их о бытью осмаго збора. и святых правил устав еже о святей церкви. и о поставлении митрополита. иже в своей земли просиявшаго благочестия. и тако Божией волею. и Пречистыя Его Матере. вскоре о сем изысканию бывшу. и святая писания о сих пред ним положиша. рекущи. яко достоит епископом земель собравшеся поставити в рустеи земли митрополита. о осмом же зборе прелесть бывшую зле изрекоша. а опресночная латыньское дело мертво сие поведаша. тако бо по святым правилом святии отци с проклятием отрекоша. и чюже от православия. слышав же сия боговенчанныи Василеи царь всея Руси. зело возрадовася. Духом божественым распалаем. и возвеселися сердцем. и рече. Господи Владыко Святыи Царю. воля Твоя да будет. яко угодна Тобе Богу. и нам разумна суть. и тако споспешение Божия воля. и Пречистыя Богородици. и по изысканию святых правил божественаго закона. и по извещению Святаго Духа. се избра и возлюби, Иону епископа суща Муромскаго и Рязаньскаго. и повелевает сшедшимся тогда архиепископом и епископом. и всему священническому збору. помолити Бога и Пречистую Богородицю о сих. да днесь будет свершен епископ Иона в рустеи земли митрополитом. еже сице бысть Богу о нем благоволившу. и вскоре сущу створяем святому збору православия. и приношение божественыя службы стваряется. и возлагается на Иону епископа великии сан святительства. и вскладается честныи омофор на плещу его. и руковлагается посох великии митропольи в руце его. и т[от] с благобоязньством свершает святую службу. и благословляет народы. словесы научает верных людии истиннаго православия. и тако бысть добродетельми украшен. яко цвет прекрасныи в удолии цветы. и зрением обвеселяя сердца верных. или яко многолиственыи кипарис. благовонием наслажая и душа православных учением святых словес. или яко источник сладок напаяя пресохшая сердца верных человек вином умиления. и благым плодом покаяния. и черпала их исполнь веселия же и радости. еже благым своим наказанием и запрещением. пленица им разрешая многых грехов. и обращаяй к Богу на покаяние. и бых бо рече яко маслина плодовита в дому Божия. и упова на милость Божию. или яко божественыи Утешителя арган воспевающе нам спасеную песнь. и словом безсловесие язык разрешая. и о безсловесных деянии люте омраченая сердца изъимая. и скверну греховную Утешителя благодатию просвещая. тако бо видехом его сияюще сединами разума богочестия. яко же зорничную звезду. и попечение велие имеюща о благоустроении святых Божиих церквеи. и украшая их святыми иконами. и златом же и сребром. и честным камением драгим. и устроением честных амбонов. и паникадил драгих. и зборы святаго пения и чтения. и многы святыя церкви камены созиданы. и врата входу корсунскую утворены. хитростию на злате прикладаша к ним. и многы труды своя и молитвы принесоша к всемилостивому Богу и Пречистеи Богородици. и о державе и о пребывании. и о многолетном здравии великодержавнаго. богодуховне сына своего Василья Васильвича царя всея руси. и сынов его яко да умножит Господь Бог великодержавное его царство рускых земель православия в благом устроении, и тишине и обилии всякаго добра. и покорит под нози их вся видимыя и невидимыя врагы. и тако благодушьствуя в молитвах всегда пребываше. добре управляя святую си церковь безмятежне. и по сих многу времени минувшу. тойже злохитривыи Сидор льстец. второе пришед в Рим. облыгает папу другаго в Риме ложьными словесы. и поведаша ему яко сам прииде  к нему. для уряду прежняго и расправ его римския церкви. к тому рече не хощу к ним назад вернутися на русску митрополью. но прошу твое папежьство. да послеши к ним другаго в мое место митрополита ученика своего, нарек именем Григория достойна суща правления тое церкви русские митропольи. и мудра зело в речех асириискых. он же послушав моления и просбы его. и постави Григория митрополитом. и отпусти в Сидора место на русскую митрополью. и грамоты свои х королю и к всем князем и паном. подаваша ему яко да приимут его. на блаженейшаго же нашего Иону святителя и правителя Божии церкви, в тойже грамоте написаше папа свое неблагословение. и окрутную свою тяжкую клятву. а не помянув зломысленыи о сих пророка Давыда глаголюща, еже ров изры и ископа. впадеся в яму юже сотвори. и обратися болезнь его на главу его. и наверх его неправда снидет. ты же о папо римьски забыв сего латыньски учителю. что ради неистов еси. что ради злая сия дееши. народы прелщаеши и в погибель вводиши. веси ли папо яко прежде сам не благословен еси и богоотметная дееши. божественаго закона предание святых апостол отвергл еси. и богосоставленых святых седми зборов святых отец заповедь отрекл еси, и проклятие их на ся возложил еси. а преждних еретик учению вследовал еси. и тех богоотметных ересь приял еси. в нейже пребывая суемысленыи осмыи збор створили есте. и тако о сих нимала в очью си срама, не имея. еже сам прелестная и богомерьская делая. како неблагословение свое на русскую землю посылаеши, веси ли о сих, како евангелист пиша усты Господни глаголет. не требуют рече здравии врача. но взыщут си иже недугом зле стражут. ты убо сам не истиньствуя. и путем неправды ходиши. како в истиннеи вере живущих не благословляеши. веси ли о латинскии учителю. яко не требуют зде твоего благословения, ни прощения твоего приимают. ниже боятся неблагословения. но вси в благочестии живуще и уповают на милость Божию, и по божественым правилом ходят. и на богоизбраннаго святителя русскаго на церковнаго правителя смотрят. и душевне и телесне к нему прибегают. державою владеющаго в русстеи земли. богошественаго споспешника истинне. высочайшаго исходатая благоверия. мудраго изыскателя святых правил божественнаго закона. благовернаго великаго князя Василья Васильевича. истинныя веры православия боговенчаннаго царя всея Руси. ты же о Исидоре прелестниче и богоотступниче доколе враждуеши воставляя гонения на святую церковь. иже в рустеи земли восиявшаго благочестия. доколе о си спону дееши благодати Духа Святаго, вводя опресночная латиньское приношение в святую церковь рускаго православия. богоненавидимая богомерьзская зделал еси. злато возлюбил еси. веру свою погубил еси. царя обольстил еси. патриарха смутил еси. и царствующии град их погибели исполнил еси. и колико душ народа православных погубил еси от Бога отлучил еси. ныне же видеши ли окаяне Исидоре како прелести твоея ради и преступления божественаго закона. еже наведе греческому народу истинныя веры благочестия. и погуби царствующии град смятением латыньския ереси. и твоею ради от Бога попущенною казни о поганых нахождением. множество зело безбожных агарян людеи православья сотрошася и погибоша. увы прелести твоея царю правоверия да иже святеишему патриарху. увы от тебе оболгания веры, и пагубы царствующаго града благочестию, како не разседеся утроба твоя Исидоре неистовы. яко же богоотметнаго Ария еретика. или како не испадоша чресла твоя на землю Исидоре пагубниче. яко же богомерьскаго епископа оного Селуньскаго. да не бы толико душ народа православия смутив погубил. вы же о латыно суемудрении. что ради учителеи губящих латыньскии род ваш. душевне же и телесне прелестью бо злых своих ересеи. друг друга преспевающе ересьми тщетне поучают вы и в ад низводят. и к вечнеи мукы готовят. ихже ради анафеме предани быша. весте ли пав сия зломыслении како прежде бывшии ваши учители латыньсти еретици суще. како от святыя церкве православья отвергшеся. и от греков отлучишася. изобретше собе ереси и навыкоша опресночная служити. и Дух Святыи разделяти хулу глаголюще на Святыи Дух, возрете же слепии душею. и прелщении сердцем и помрачении умом. како о ересех ваших написано есть. внемлете о сих. известне увидите. егда бысть по шести богособранных зборех святых отец. в лето же благочестивых цареи. Констянтина. и Ирины матери его. преставшу тогда злочестивому иконоборьству зловерных цареи. повелено бысть благочестивою царицею Ириною. и сыном ея Констянтином. быти збору на иконоборци. еже бысть вселеньскии седмыи збор в Констянтине граде. и беяше на том зборе блаженнеиши Андриан папа Римскии. и прочих вселеньских четыре патриархи. Констянтинопольскии. Александренскии. Иеросалимскии и Антиохейски. и весь богособранныи вселеньски збор святых отец, и тако сошедшеся святии богопроповедници. обыскаша по преданью божественых верховных святых и богоносных отец перваго святаго збора заповеди и преданье. и втораго збора святаго да иже и прочих святых зборов утвержение. о Святом Дусе исповедающих Сына и Святаго Духа от Отца исходяща. Троицу единосущну. и неразделиму. и кончаша тои святыи вселенскии збор в Никеи граде. и утвердивше таковая в святых правилех положиша. и по сих в Констянтинополии инии царие зломыслении. иконоборци всташа. от них же после Феофил царь бысть иконоборец. при нем же бяше в Риме папа Лев. и пострада много от проклятых цареи иконоборных, Лев же папа умысли сице, и совеща с римскими князи. и с стареишинами и с священники. избрав некоего собе царем створят благочестива. да царьство рече от Рима начнется. якожде и прежде. да не преодолевает Феофил иконоборец. и вскоре совету их бывшу. избраша Карула князя латыньскаго. мнящи православна его суща в благочестии божественаго закона. и послаша по него и прииде к ним. и приимше поставиша его царя, и приидоша с ним от западных латынь и капланове их ереснии учители. и пришедши прежде сокровено в собе держаху веру богоотметных Ария и Полинария. и Македония. и начаша истонка учити люди Божия, еже опресночная служити. и хулу онех проклятых глаголаше, яко не точию от Отца исходит Дух Святыи. но от Сына Дух, и тако блядословьствующе вгнетишася. Карул же в Риме царь бысть. и восхоте царьствовати над всеми латыньскими родовы. и над всеми греки. и воевати Констянтинополь. латыньстии же роди и князи их никто же восхоте поклонитися ему. и оста Карул в Риме. тии же учители его тайнии еретицы начаша с Карулом развращати люди ересьми. овех таи учаще а инех явлено. и елико бяху рода латыньскаго в Риме. и тии вси внимателно послушаху еретик онех. и учения их требоваху. зане бо и сам царь помогаше им Карул. увидев же сия Лев папа Римскии. и запрещаше своим мужем верным и философом. учителем православья, да не глаголют с ними. ни учения их не внимают. и вся люди возбраняют от послушания словес их, да не причастни будут ересем их. сам же мысляше и недоумевашеся. како бы послати ему к патриарху в Констянтинополь. зане бо еще царь Феофил иконоборец тамо. и посла к Фоме патриарху в Иеросалим, яко да послет к нему философ мужь словесных. книжники на обличение онех губителеи. Фома же избрав Михаила протосиггела с ученики его Феодором и с Феофаном. и посла их в Рим к нему. они же сами изволиша собе прити прежде к Феофилу царю. на обличение злых дел его. и хотяще и возвести на первое благочестие. суровыи же зверовидныи Феофил повеле их мучити. Михаил же по многых муках предасть душю Господеви, а Феофану и Феодору учеником его. по многых муках пожгоша им образы железною пилою. и ввергоша их в темницу. в неи же святыи Феодор преставися к Богу в вечныи живот. а святыи Феофан пострада в заточении. по смерти же Феофила царя. жена его благочестивая царица Феодора. изведе его ис темница. Феофан же добре пожив и книги исписав преставися к Богу. Карул же царь с еретикы своими погубиша в Риме люди Божия ересьми си развращении. Лев же папа Римьскии недоумевашеся о сих что сотворити им и тако духовне подвизася написа на скрижалех святыя веры исповедания. верую в единаго Бога, и прочее о Святем Дусе до конца исписав. и положиша на стене в римстеи церкви. да вси зряще глаголют исповедающе Сына и Святаго Духа от Отца исходяща. сие бо сотвори на утвержение и на укрепление христоименитых людем. и на прогнание срамоты злочестивых еретик еже глаголющих развращенная о Святом Дусе. по смерти же Лва поставлен бысть Венедикт папа в Риме латыньскаго роду. и тои богоразумием си не повеле никомуже глаголати латыньским языком. верую в единаго Бога, но всем истолковав. и исписа греческими словесы. на извещение истиннаго исповедания. по преданию святых отец, и повеле сице всем гречески глаголати, ради ереси Карулевех учителеи. и такоже посла в Констянтин град и в Антиохию. и в Иеросалим, и в Александреи. сице рече. отныне убо никто же вас в молитвеных да не поминает имени папы Римскаго. донеле же

 да истяжется како верует. и како исповедует о православнеи вере понеже рече вкоренися в Риме злая си ересь от латын. мнози имут губитися. и глаголют злую хулу на Духа Святаго, не от Отца токмо глаголют исходити Духу Святому. но и от Сына. яко раболепно чести Святаго и животворящаго Духа повелевают. а не якоже святии богособран седмь зборов святых отец повелеваше, равна Отцю Сына и Пресвятаго Духа от Отца исходящаго токмо. и тако по повелению блаженеишаго папы Венедикта. иже хотяше быти папа в Риме. но прежде посылаше свое писание к четырем патриархом вселеньскым. исповедаша известно како верует истинным исповеданием. и по Венедикте папы беша в Риме. Павел. Стефан. Николае. Фотие. Андриян. Иван. Марин. Стефан. и тии вси блази единомудрени беша четырем патриархом всленьскым. такови бо преже папы в Риме. изначала в православии живуще. и благочестная делающа. егда же бысть в лета царя Лва Премудраго. и Фотия патриарха Констянтина града. нача быти в Риме папа Формос имуще в себе ересь онех еретик Каруловех скровену в серци своем. егоже народи православие неведуще. избраша на папежство римьскаго стола. и по обычаю прежде бывших написа исповедание свое. к четырем патриархом вселеньским льстивно и потаено в окаяном сердци его исповедающи Пресвятаго Духа и с Сыном токмо исходяща от Отца, и чтущи и славящи по преданию святых отец. егда приимшу поставиша его папу. и тогда в Риме начат учити всех людеи. яко не от Отца токмо исходит Дух Святыи но и от Сына, и опресночная служити лепо есть глаголаша. а неведыи окаянныи яко то есть сень закона ветхаго. опреснок. мертво бо есть отвержено. его же июдеи створят ходяще под сению закона в тме и сети смертьнеи. и тако вси латыни иже бехом любезно по нем идоша. и от святыя церкви отступиша. от царьства отлучишася. 200. 80. шестое лето в седмои тысущи. по смерти же Формосове. папы беша в Риме Вифинатии. Роман. Феодор. Иван. и инии мнози даже и доднесь воследующи ересем их. егда же бывшу Геронтию патриарху в Констянтинополи. и восхоте обличив потязати папу Римьскаго. да уцеломудрився придет в первое благочестие святыя церкви. он же слепотою ума помрачен сыи и тако не восхоте писания слышати от всех патриарх вселенских. помрачи бо я злоба их несытством душа латыньския прелести. и тогда Сергие патриарх. и прочии вселеньстии патриарси Римьскаго папы имени. ктому уже и в патриархиях рекоша. не вменити. ниже написати когда. но извергнути и анафему сиречь проклятью предати. и по сих же в лета благочестиваго царя Констянтина Мономаха. в седмои тысущи. 500.50. 6.-го лета, бысть при нем патриарх в Констянтинополи Кируларие. и тои проклят богоотметных латын створшихся еретик яве. и тако отлучени беша латыни от четырех патриарх вселеньских. и на ся Рим прияша. и врази быша христианом православным паче всех иноверных. и прельсти многых от скифьскаго языка. овех льстяще. а инех насилующе. и тако в многи ереси различны впадоша. сие же мало нечто воспомянем ересных дел их. еже списа Никита презвитер студииския обители. прежде убо сие. суботу хранят и постят в ню яко жидове. а велик пост начинают в среду поститися на феодорове недели. а в великии четверток яица и сыр ядят. и млеко. а пост держат неровнои 9 недель. и 8 недель. а инии боле. а инии менши. а римляне постят 6 недель. а в костели своеи сиречь в церкви клячевшу на колену свою. да крест на земли своею рукою знаменавшу целуют. а водою по вся дни кропятся. якоже июдеи. а мшу свою служат в единой костели трижды днем. а и в четвертыи не возбраняют. а презвитеры их червлены ризы служебныя носят. а егда крещают. и в уста соль крещаемому мечют. и размятше на руце слину помазуют его. а к жертвенику их жены входят и садятся невозбранно. лице же свое мирсти люди палцем собе прекрещают. а умершему воском закладают уста и ноздри и уши его. а мниси их ядят бобровы плеск. и свиныи тук. а приболит тогда и от мяса ему не возбраняют. а мирстии людие зверя и птици и всякии [гад] ядят и нечистыи. невозбранно по обычаю ереснаго устава их. пса же и волка отвращаются. а егда на брань исходят и епископи их сами прежде вооружаются и бьются. а мирстии людие человеки заклающе мажутся ими. и оружья своя кропят кровми их. инии мнози в них ереси суть ихже ради анафему сиречь проклятью предани быша. и вси прилагающися к ним и похваляющеи их. латыньсти же держателне римстии многое попечение и подвиг велик имеющи. о сих како бы им утвердити собе царство в Риме. уже бо до конца отлучишася от грек. и от царства их и от церкве. и совещавше с папою поставиша собе царя от латын. и не успеша ничтоже. не повинуютбося ему латыньстии роди. зане суть жестоци и непокоривыи. в немже обычаи пребывающа и доднесь. и тако послаша в Вританию к аламаньскому князю. да поставят им царя в Вританию. тогда бо тии бяхом врази римляном. они же сим ласкающе к собе да примирят их. беша бо еще тогда и сии православнии христиани от Великого Констянтина. по своему же языку мудрости книг не умеюще. а знают книгу латыньскаго языка. и того ради вскоре папа Римьскии прельсти их своими ересьми. и царьскаго си ради имени присташа к ним на всяку волю. и призваша в Рим к собе аламаньскаго князя. папа же клятвами си тяжкыми заклят его и с всею землею его. да никогда же им отлучитися от латыни от церкве римские. и тако утвердивших их великими си запрещении. и постави им царя папа Римьскии. и написав сие твердо положиша. яко да от латынь поставляется папа в Риме. а в Вретании царь от аламан вместо Констянтина града. и тако латыни врази беша греческаго царя. Видесте ли сия окаяннии латыни. како прелщени бысте ложными си учители. и како тмою неверьствия помрачени есте. и от святыя зборныя апостольския великыя Божия церкви отступили есте. последовавше злому учению богомерьскых прежних онех губителеи. мы же убо вернии в истинном законе православья живуще. и веруем и исповедуем единаго Бога несозданна. трисоставна. и безначална Отца и Сына и Святаго Духа, Троицу единоестествену, и преестествену. непреложну. неразмесну. единославну и единопрестольну. в Них же имя крещение прияхом и совершение истинно имам. в сию Пресвятую единосущну живоначалную Троицу верующи поклоняемся. с Отцем Сыну и Пресвятому Духу, в едином божестве. Троици единосущнеи. единаго Бога трисоставна благодаряще песньно славим. и прославляя почитаем яко Бога своего в веки веком. и ныне же егда бысть в лета и во дни боговенчаннаго Василья царя всея Руси. и сына его благовернаго великаго князя Ивана Васильевича всея Руси. пришедшу от Рима латынскаго Исидорову ученику черньцу Григорию митрополитом в литовскую землю. Андрею же королю с прошением посылающи о нем к своему брату. к великодержавному Василью Васильевичю всея Руси. дабы к себе приял его на Рускую митрополью. зане бо Иона митрополит престарился убо. богоутверженыи же и богоразумныи благоверия держатель рускых земель. боговенчанныи Василеи царь всея Руси. зело отрицаше таковаго Исидорова ученика. и советника его злыя ереси латыньския прелести. но отвеща, никако же от Рима пришедша латыньскаго митрополита к себе не приимати. с сими же глаголы х королю отпусти послов его. тогда же великому нашему пастырю. и чеснейшему учителю Ионе митрополиту. и грамоты своя написаша к епископом своего рукоположения. и своего поставления святыя зборныя церкве правителем Руси. иже литовьской земли живущих. да не приимут благословения от руки Григорьевы богомерьскаго и богоотступника. ниже в послушание приимут ложных его словес. но сице рече пребудте в Бозе, соблюдающи богопорученное си Христово стадо словесных овец. от мысленаго волка Григорья и от всех враг злаго навета непреклонно. и по сих Богу о нем благоволившу Иона же святитель в глубоцей си старости немало поболев. и тако богодуховне благословяше в свое место держати. настолование и правление святыя великыя церкве рускых земель великие митропольи. еже о Святем Дусе, брату си сослужебнику смирения моего. Феодосию архиепископу бывшу Ростовьскому и Ярославскому. еже по нем блюсти и пещися святыми церквами. и добре управляти и пасти богоизбранное Христово стадо словесных овец. о сих же моля и прося благословяше богодуховне сынов своих. боговенчаннаго Василья царя всея Руси. и боговозлюбленных сынов его. и прказывая им сице повелеваша. да в место мое рече будет вам сынове благословен Феодосии архиепископ, и совершен митрополитом на рускую землю. еже и бысть Божиею благодатию по благословению его. и тако в велицем си святительстве благодушьствуя пребысть яко дванадесят лет и три месяци и две недели. добре держав и управляя святую великую зборную церковь в Русстеи земли восиявшего благочестия, и упас благопорученное си Христово стадо словесных овец. и преставися к Богу в вечныи живот. месяца. марта. в 31 день. 60. девятаго лета в седмои тысущи. егда же бысть по отшествии его еже к Богу, и обретоша грамоту его написану о благословении Феодосия архиепископа на место его великаго стола руских земель митропольи. благоразумныи же и богошественик боговенчанныи Василеи царь всея Руси. и сын его благоверныи великии князь Иван Васильевичь всея Руси. отцем своим Ионою митрополитом. благословленная вскоре поминают. и написанная его словеса богопоспешне делают. к сему же имеша свое душевное попечение еже о святеи Божии церкви. и остерегая истинную веру своего благочестия. и соблюдая всего народа православья от сети и козни диавола ловления и от зломысленаго волка Григория. иже от Рима пришедшаго митрополита к собе да не приимут. и того ради вскоре созывают к собе близ сущих епископ своих рускых земель православья. Суждальскаго Филипа. Рязаньскаго Ефросима. Коломеньскаго Геронтия. Сарьскаго Васияна. и весь священническии збор. и тако по обычаю прежде бывшаго их избрания изыскания еже от святых правил. о поставлении митрополита. благоверныи же велиции о Бозе поспешници истинне. и с обосланием. и с воспрещением пречестнейшаго. и боголюбиваго своего богомолца Ионы архиепископа Великаго Новагорода и Пскова. и Генадия владыки Тверьскаго. и с их повольными грамотами. и повелевают начятью благаго дела своего вскоре и совершену быти. и тако делающи споспешением Божия воли. и по уставу святыя си церкви собравшися збор святительскии. и помоливше о сих Господа Бога и Пречистую Богородицю, еже о поставлении его. и тако совершен бысть Феодосии архиепископ митрополитом на рускою землю в утвержение. и в управление святых Божиих церквеи. и в соблюдение заповеди Божия, и в попрание злокозненых враг и тмокровных еретик злых прелестник вере истиннаго православия. и тако Божиею помощию и благодатию бысть в рустеи земли изряден святитель Феодосии митрополит всея Руси. великии правитель Божиеи церкви. благочестив же и милостив. и благопорученному си Христову стаду словесных овец. и всему богоименитому народу истиннаго православья бысть чюден пастырь и учитель. и по милосердию Господа Бога Вседержителя. и Пречистыя Его Богоматере Святыя Богородици, и предстоянием великаго воеводы небесных сил архистратига Господня, и святых божественых верховных апостол Петра и Павла. и вселеньских святителеи предстоящих престолу Божию, Василия Кесарейскаго и Григория Богослова. Иоанна Златоустаго. с ними же и великаго помощника Николы чюдотворца. и святых митрополит руския земля чюдотворцев Петра и Алексия. Леонтия епископа Ростовскаго чюдотворца. и молитвами богосоставленых седми зборов святых отец. и преподобных святых чюдотворец рускых Сергия. и Варлама. и Кирила. ныне убо в временах богопросвещанная земля руская. святым правлением Божия церкви подобает в вселенне и под солнечьным сиянием. с народом истиннаго в вере православья радоватися. одеявся светом благочестия. имея покров Божии на собе многосветлую благодать Господню, исполньшися цветов богозрачне цветущих. Божиих храмов. якоже небесных звезд сияющих святых церквеи, якоже солнечьных лучь блещащихся. благолепием украшаемы. и збор святаго пения величаемы. державою владеющаго на тобе богоизбраннаго и боговозлюбленнаго богопочтеннаго. и богопросвещаннаго и богославимаго богошественика. правому пути богоуставнаго закона. и богомудраго изыскателя святых правил. благаго ревнителя о Бозе, и споспешника благочестию истиннаго православия. высочайшаго исходатая благоверию. богоукрашеннаго и великодержавнаго. благовернаго и благочестиваго великаго князя Василия Васильевичя. боговенчаннаго православнаго царя всея Руси. и сына его благовернаго и благочестиваго великаго князя. Ивана Васильевичя всея Руси. и благовернаго князя Георгия и благовернаго князя Аньдрея. ими же утвердит Господь Бог и укрепит святую веру истиннаго и в рустеи земли восиявшаго благочестия, и подаст им свыше венца победы на вся видимыя и невидимыя врагы. и покорит под нозе их вся борителя и супостаты и умножит Бог лет живота их. в благоденьстве и тишине великодержавнаго их царства. в велицеи славе благочестия в вселеннеи же радости на многа лета. предстоянием к Богу, молитвами богоизбраннаго и боговозлюбленнаго благаго пастыря истиннаго учителя. святым Божиим церквам. богопоспешне мудра правителя. великаго святителя Феодосия митрополита всея Руси. ему же Бог поручи и правление святыя си церкви. и паству избраннаго си стада словесных овец. яко да приимет всемилостивыи Бог прошение сердца его. да молитвами его помилует и спасет ны от всех видимых и невидимых враг. ныне и присно и в бесконечныя векы. аминь.

Hosted by uCoz