Челобитная чернца Савватия.

 

Царю Государю и Великому князю Алексею Михайловичу  всея великия  и малыя и белыя России Самодержцу бьет челом нищей ваш государев богомолец Чюдова монастыря чернец Саватеище, что был в мире ваш государев дьячишко Сенька Васильев:

В прошлом Государь в 168 году, по вашему государеву указу, сослан я с Москвы на Белоозеро в Кирилов монастырь за то, что извещал вам Великому Государю печатнаго двора на справщиков о книжном неисправлении, а грамматическаго учения будто неумеючи. И я нищей бил челом вам Великому Государю на справщиков не о грамматичном деле, — извещал на них про то, яко книги портят и плевелы в них сеют.

В Прологе марта в 25 числе, в поучении на Благовещение Пресвятыя Богородицы, во 2 слове, Сыну Божию от Отца рождение напечатали на небесех, а небеса под леты: а Сын Божий без начатка и без лета купно со Отцем и Духом, и творец небесем и летом и всей твари, якоже и в Символе глаголет: им же вся быша. И како, Государь, удобно сему быти, яко сотворил небо, а потом на нем родися? По богословным, Государь, книгам: не бе николи Отец, егда не бе Сына — виновен Отец Сыну рождением, а не после Отца Сын, без Сына не может нарещися Отец, рекше Бог без Словеси.

Иоанн Дамаскин написал в книзе своей: Аще не дамы исперва Сыну со Отцем быти, то извратя ипостаси; вводим яко не сый Отец, после же бысть Отец небо: но тварь еже есть мир, иже всякия хулы злее суть.

А после, Государь, извету своего и в троих книгах такойже злой вред видел. В Октае 1-го гласа, в неделю на утренне по кафизмам после 1-го седальна в Богородичнем стисе, да Минеи месячной июля 24 числа, в службе святых страстотерпец Бориса и Глеба, на утренни же по кафизмах, в Богородичном же стисе, да в Триоде постной, в седальнах осмогласных, в четверток в Богородичном же стисе; на небесех Христу от  Отца рождение напечатано. И егда на небесех ему рождение, тогда он после твари —  ангелов и небес будет. Кто может рещи, яко то не ересь и не самое зло? Не токмо Сына обезчестили, и Отца и Духа вредили. Григорий Богослов написал в книзе своей: аще кто едино что уймет от Троичнаго Божества, все Божество разорит. Тако же и Афанасия Великаго в вопросех, еже в Чиновнике глаголет единыя ипостаси безчестие — всего Божества хула.

Да с таким злым плевелом многия книги: октаи, и менеи, и триоди и прологи по всему государству разсеяли. И неведомо до коих мест будет ими хула Богу? Непщую, яко враг такой злой плевел всеял, еже не быти исперва Сыну со Отцем. Прежде сего, Государь, не за такое злое дело, мнее того, на Москве и везде порченныя книги отставливаны, а ныне покинуты просто, только и зделано, что я оскорблен.

А другой плевел: Сына ж Божия со Отцем, по Савелиеву совокупу, смазывают во едино лицо, во многих местех печатают без союзнаго слова и без запятых слитно. В Триоди постной, тиснением 144(164?) году, в четверг 5 недели поста, в каноне Андрея Критскаго, в трипестньце 4 песни в Троичном стисе напечатали: Отче Слове и Душе Святый, союзнаго слова и запятыя не положили. Такоже и во Псалтыри с следованием, тиснения 160 году, в Святцах октября, 23 числа, в кондаке Иякову Апостолу напечатали: Отче единородное Слово. Начали Отцем, а совершили Сыном, и тем смесили Отца с Сыном. Удобно было напечатати: отчее Слово, а не отче. А в постной Триоди, тиснением 164 году, в каноне Андрея Критскаго 8 песни в запеве над ирмосом напечатали: благословим Отца Сына и Святаго Духа. Союзнаго слова и запятыя между отцем и словом не положили же. И в цветной Триоди, тиснения 168 года, в неделю 5 по пасце, 9 песни в Троичном стисе напечатали: Отец Сын и Дух, союзнаго слова и запятыя между отцем и сыном не положили же. А 7 недели по пасце же после канона в светильне отцем, напечатали: Господи и вся сподоби Отца Слова славити и всесвятаго Духа. Союзнаго слова и запятые между отцем и словом не положили же. И Господь четвертое лицо будет свене Троичнаго Божества. К кому удобно тако рещи: Господи, сподоби Отца Слова и Духа славити? А на сшествие Святаго Духа в каноне, 7 песни втораго творца, последняго стиха в конце противъобратно напечатали: Сын Отец, союзнаго слова и запятые между ими не положили же. Перечневато, Государь, глаголати без союза: отче слове, отца слова, отца сына, отцу сыну, отец сын, сын отец, да грубо самое слияние – Савелиева блядь.

В Дионисиеве, Государь, книге Ареопагита, во 2 главе, еже о соединенном и разделенном богословии пишет: яко при разделенных же именех Святыя Тройцы ни едино, рече, быти противообращение, или общение. А Дамаскин написал в книзе своей: все еже не совершенно сложно свершеными же составами немочно сложению быти. Несть, Государь, в сем тягости и хулы Богу, еже и везде лица раздели то печатати Троичное Божество в составе с запятою и союзным словом, яко же и в словаре печатают, весьма удобно освенятися безумнаго еретическаго Савелиева смешения, что бы ни малым ереси было прилично. Да не тем Государь единем, что союзнаго слова не полагают и иным такожде пакость творят.

В ирмосе 3 гласа: Еже законно — прежде сего печатали: от Отца безначальна Сына, [А ныне печатают: Отца безначальна Сына ] ω и твердо у отца из прилогу отставили, и тем смесили же Отца с Сыном. Что в сих мелкая их грамматика, начало детскаго учения, поможет, яко печатают Отца с Сыном слитно. А святии Отцы на соборех ту злую ересь отсекли, и еретиков Савелия и безглавных проклятию предали.

Непщую, яко и во иных книгах не мало той ереси насеяли и впредь будут сеяти, понеже некому им в том зазрети. Аще кто и смыслит, а смотря на наше неповинное разорение, говорити о том не смеет. Была и та Савелиева ересь, еже овогда Отцу, овогда Сыну а овогда Духу быти: но обаче не слияние, а слияние то, еже смазывати Отца с Сыном. Ясно о сем Иоанн Дамаскин написал в книзе своей: яко весьма Отец и Сын неслагаеми, и несмажеми по Савелиеву совокупу, но без всякаго смаза и измута, и наричут то Савелиево смешение богословцы скверным и безмерным злом. И то забыли же яко Божество просто и несложно. И начто боле тое вины их, яко такую злую ересь, которая святыми Отцы отсечена, паки вводят. Аще ли же кто речет, яко то не слияние — еже Отца с Сыном печатают без союзнаго слова и без запятыя, и како инако можно в составех слиянию быти, аще не союзное слово иже между отставити и запятые между ими не полагати? а прилагают безумием своим Троичное Божество к твари, к человеческим слитным имяном, где в пролозех два святых без союза, а третий с союзом; и Творца к твари прилагати неудобно: Божество ни к чему неприкладно. Дионисий Ареопагит написал в книзе своей в послании к Тимофею Апостолу: образ Божий не яко свет и живот, ниже ум, ниже существо, истейшее глаголется Бог, и никто разумети и рещи возможет, что есть Бог. Вся сущая от несущих сотворил, а сам паче всякаго существа и бытия, и бытия при нем не глаголется, якоже при тварех: но предбытие. Понеже всякаго существа и бытия прежде Бог. И како удобно его прилагати к твари, к тименному теловеческому естеству? Такожде и Апостол глаголет: яко Бог паче всякаго имени именуемаго. А инде и сам Господь рече: кому мя уподобите? Зри Государь Самодержец и по сему разуму справщиков, яко два состава слитно печатают, а един состав разцепляют, якоже в единороднем стисе и инде печатают: Сыне и Слове Божий. Между сыном и словом запятую и союзное слово полагают, и тем во едином составе два лица вчинили. И прежде, Государь, сего до Никона везде печатали: Сыне Слово Божие. Запятые и союзнаго слова в нем не полагали, понеже един состав и едино лице, то и Сын, что Слово. И правда ли, Государь, то, яко един состав разцепляют, а два слитно печатают? Дионисий же Ареопагит написал в книге своей о соединенном и разделенном богословии: яко весьма неудобно соединенная разделяти и иже разделенная — сливати, но есть коемуждо составу своя пения благочестивне храняще. Такожде и Афанасий Великий писал: яко кафолическая вера то есть, еже единаго Бога в Тройце и Тройцу во единице почитати, не сливаючи ипостасей. Аще ли же кто сего не соблюдет — без сумнения во веки погибнет. И в Октае, Государь, 7. гласа, в воскресном каноне 2. песни Троичен напечатан: яко не божествы Тройца, но составми, ни единица лиц но 6ожеством, сечем ту разделяющих, разсеваемое же паки смешение дерзающих на ню. И в Прологе, августа в 6, на Преображение Господне, в 1 слове по кафизмах, напечатано к лицу Христову, яко единороден из Отца и из Марии единочаден и разделяяй его — разделен будет от царства его, и смущая его в естестве — погибнет от живота его. И то ли, Государь, не разделение Сыну от Отца и не смут в естестве, яко не исперва ему со Отцем быти, на небесах ему рождение от Отца напечатали? По Василию, Государь, Великому и ангели пред небесем давняя тварь, а сотворены Словом Божиим, рекше Сыном. А инде новую ересь положили: в Триоди цветной, 3 недели по пасце, во вторник на утренни на стиховне другой стих напечатали: яко взя на рамо Иосиф в деснице Отчей Сына седящаго. А десница — рука, и то зело же грубо малство Сыну пред Отцем и Духом будет. В Символе и везде его глаголет писание — в недрех отчих или одесную Отца седяща, а не седящаго. А в Шестодневе, тиснения  169 году, в воскресном каноне 1 гласа первыя песни, начало 2 стиха напечатали от лица человеческа к лицу Христову: яко умерщвление прия мене ради и душу смерти преда! Что сего злее? не токмо Христова, и человеческая душа не умирает: тело смертно, а душа безсмертна. Такожде и в Октаех в том стисе печатают смерть на Христову душу.

По сем, Государь, и о грамматике глаголю: яко нас уничижают, а и сами справщики совершенно грамматики не умеют, и обычай имеют тою своею мелкою грамматикою Бога определяти мимошедшими времены, и страшному и неописанному Божеству его, где не довлеет, лица налагают. В воскресном, Государь, тропаре на пасху — Еже в гробе с плотию — прежде сего печатали: и на престоле беяше Христе со Отцом и Духом, вся исполняя неописанный. А ныне в новой Триоде напечатали мимошедшим временем, якоже и в руце седящаго, — и на престоле был еси Христе со Отцем и Духом. Яко же бы иногда был, а иногда несть. А сего не разумеют, яко по богословным книгам, при Бозе бытие не глаголется, якоже при тварех, но предбытие, понеже всякаго существа и бытия прежде Бог. И лепо Богу присно быти. Зданию бывати, телеса человеческая преходят от месте в место, сего ради и временем множицею к лицу человеческому глаголется: яко зде или инде бе. А Бог не яко телеса пред место не преходит, ни пределу, ни месту подпадаем, сам определяет вся. И како удобно глаголати к лицу Христову времянем, яко к лицу человеческому: был еси на престоле. Тою глупостию своею разлучают его от Отца и Духа и от престола, не всегда глаголют его со Отцем и Духом  на престоле быти. А того не ведают, аще и посылаеми Сын и Дух от Отца глаголются, но промысла ради твари посылаеми глаголются, а николи неразлучно от него, яко же свет луча от солнца, неразлучимо Божеством отрыгну Отец Сына. В толковом, Государь, Евангелии, в неделю пред Воздвижением честнаго Креста, глаголет о Христе: яко на земли беяше не отступи небес, и на небеси сый не отставляшеся земли: но везде бяше, понеже неописанно суть Божество.

Тако же и акафистова канона в 8 икосе глаголет, от лица Христова: яко весь бе в нижних и в вышних, никако же отступль неописанное Слово; исхождение божественно неместно бысть прехождение. А инде пишет, яко и во чреве матере был, и Предтечею крестим, и Пилатом судим, а не истощил отеческих недр, и престола не отступил выну, со Отцем и Духом на престоле седяй. И тамо в тропаре — Еже в гробе с плотию, за беяше — был еси положили не делом, а и инде за бысть — был еси печатают негораздо. Яко же в Псалтыри в молитве Моисеове, ею же и псалом наречет, прежде сего печатали: Господи прибежище бысть нам, ныне печатают: Господи прибежище был еси нам. А в Октае 4 гласа в суботу вечер, на стиховне в 4 стисе о женах Мироносицах глаголет: яко, со слезами дошедше гроба Господня, вопияху глаголюще; увы нам, Спасе наш Царю всех, како украдет бысть. А ныне в Триоди напечатали: како украден был еси, яко же бы самому ему в лицо глагола. А во Евангелии от Луки, в зачале 113 глаголет: яко самаго Господа тогда Мироносицы не видеша, от ангел слышаху, яко жив есть; или в Триоди же, Государь, в неделю 4 по пасце, в Синоксаре было напечатано: егда обрящет Ісус по исцелении разслабленного во святилищи и глагола ему: се здрав бысть, к тому не согрешай. А ныне в Синоксаре напечатали: се здрав был еси, к тому не согрешай, яко бы паки по исцелении не здрав бысть разслабленный. А инде и глупее того учинили: 3 недели в суботу на  вечерни на стиховне в славнике: егда первое обрете Ісус разслабленнаго при  купели на одре лежаща и сотвори его здрава, — тако же соврали, напечатали: яко глагола ему Ісус: возьми одр свой и ходи, се здрав был еси, к тому не согрешай. А он до Христа здрав не бывал, а по исцелении болен не бе. Не явная ли, Государь, в сем глупость их, где ту грамматике потреба, и какому лицу тамо удобно быти? Или в ирмосе 8 гласа, еже устав преиде естества — прежде сего печатали от лица Богородицы: и дверь спасения мирови бысть. А ныне в ирмосех, тиснения 165 году, тоеже речи к лицу ее напечатали: была еси мирови спасение, яко же бы древле спасала, а ныне несть; а дверь и бысть, блуден ради своих, отставили. Так же, Государь, истинно много в тропарех и кондаках печатают: был еси помощник, был еси заступник. Ей Государь, смутилися и книги портят, и впредь будут портить, аще не уймут их от такова безумия. А учали так плутати недавно, прежде сего и они так печатали, а свела их с ума несовершенная их грамматика, да приезжие нехаи. В богословных, Государь, книгах пишет: яко беяше, непределная речь, при Бозе глаголется искони и присносущное, а бысть при человеце и при иных тварех, от нележе наста что; обаче от начатка и то присносущное, а был еси, всегда глаголется мимошедшее, яко зде или инде был; и в 98 псалме глагола Давыд от лица Моисеова и Ааронова и Самуилова к лицу же Божию множественною речью: яко бываше им милостив и мщая на вся начинания их. А ныне напечатали единственною речью: бывал еси им милостив. Непщуют себе, яко по грамматике, втораго ради лица, за беяше и за бысть удобно глаголати — был еси, и бывал еси, и грамматика в сих не потреба. Аще и помяну псалмопевец лице Божие или Богородицы или иного етера: но помощи и прибежища и спасения ради помяну. А егда нарече его помощь и прибежище и спасение себе, тогда лице оставит, а приложит к молебному своему глаголу помощь и прибежище и спасение, яко же и в 31 Давыдове псалме к лицу Божию глаголет: Ты еси прибежище мое. Или егда Давыду же к Голияфу идущу на брань, такожде глаголющу к лицу Божию: милость моя и прибежище мое. Или в ирмосе, еже веселится о тебе церкви твоя Христе зовуще, такоже глаголет к лицу Божию: Ты ми Господи крепость и прибежище и утверждение. Ей государь, смутилися и книги портят, яко же и прутся своею глупою грамматикою. Христа напечатали древним Адамом не делом. В Триоде цветной в неделю 4 по пасце, в каноне 4 песни, прежде сего печатали к лицу Богородицы: како родила еси младенца Адама древнейша, рекше, старейша. А ныне к новой Триоде к той речи прибавили две буквы го и напечатали: како родила еси младенца Адама древнейшаго. А Христа где и наречет Адамом, и тамо глаголет его: новым, или вторым, или последним Адамом, а не древним. Григорий Богослов написал в книге своей во втором слове, еже на пасху, яко Христос новый Адам на земли, и ветхости человеческия ничтоже имея. А инде на мучительную тварь честь положили, где глаголется в молебной речи к лицу Божию: избави душу мою от ада преисподняго. А ныне к той речи ша прибавили, якоже к честному лицу по граматике ша чести ради прилагают, напечатали: от ада преисподнейшаго. А где глаголется ров преисподний, такоже печатают: ров преисподнейший. А то забыли, яко инде врагом, и окаянным, и диаволу содружебником ада наречет, а ров погибельным. Напрасно Государь, нас безпомощных за грамматику их разорять: мелка грамматика их, добро грамматика кто умеет ея совершенно. А с их грамматики точию книгам пагуба, а людем соблазна.

Или, Государь, в каноне Одигитрию во 8 песни во 2 стисе, да в Октае 5 гласа воскреснаго канона в 1 стисе Богородицу напечатали: бывшею материю Божиею. А она Госпожа и Царица великая и ныне мати Божия, и не разрешно имать матерьчество от Сына своего Христа Бога нашего, и за превосходящую честь величествия ея всегда славима мати Божия. И не грубо ли ей Госпоже, яко наричут ея бывшею материю Божиею? Забыли то, яко древле за два Несториева слова отвращалася Богородица Кириака попа, и не вниде в клеть к нему. А инде у Давыда Пророка единою прибавочною буквою книжное законное разумение отняли. Во Псалтыри в 70 псалме глагола Давыд от лица своего ко иному лицу, яко не познав книжна, рекше, человека ведяща законная писания, понеже книжен или книжник человек глаголется. А они в той речи прибавили букву наричиму — я и напечатали: яко не познах книжная законная писания, а Давыд глагола о себе во ином псалме: яко паче всех учащих мя и паче старец разумех. Где, Государь, ни прибавят букву или две, то все не делом, точию книги портят. А всех боле портит дерзостию своею уставщик Ефим, а богословия весьма мало разумеет. Яко же на литоргии в конце заамвонныя молитвы прежде сего печатали: Всяко даяние благо и всяк дар совершен, сходяй от тебя Отца светом. А ныне печатают, светов; а сего неведят, яко по богословным книгам, на всю тварь нисходит благодать Божия осиянием света. Или во 150 псалме глаголет к лицу Божию: Хвалите его на силах его, хвалите его во утверждении сил его; а ныне печатают, во утверждении силы его. А сего не разумеют же, яко глаголет о чинех небесных на силах яко седяй на херувимех, а утверждение сил глаголет, яко соблюдает Бог Ангелов от превращения, яко же и в каноне их 5 песни в 7-м стисе глаголет, яко тех непреклонны на горшая приближением к тебе Христе слузи своя сохранил еси. Нетокмо, Государь, разные чины, ни особо чин, сил небесных множества ради, единою силою не наричется, но силы. А ныне в нефимоне в молитве Манасии царя Июдейска, единою силой напечатали: яко сила небесная, как простаки говорят. В Дионисиеве, Государь, книге Ареопагита пишет: яко вси 9 чинов небесных обще силы глаголются. И како можно в них сочленению быти, рекше, слиянию и нарещи их единою силою? Блудят, Государь, так, без естественнаго разума и не читаючи богословных книг. А в каноне, Государь, на пасху в икосе жен Мироносец девами напечатали, а в них известныя жены были: мати сынов Заведеовых, а другая мати Иосии, Мария Магдалина и Мария Ияковля. А в Прологе маия в 7 числе в слове Святаго Петра Александрийскаго напечатали, яко Стефана первомученика жидове убивали во имя Христово. А во имя Христово творят благое, а не злое, а жидове благу не причастни: враги суть Божии.

А иным Государь много портят, еже за отнуду и за отъонуду, отнюд полагают. Яко же в вознесенском каноне и в стихирех пред каноном печатают от лица Христова: Вознесеся на небеса отнюдъже изшед, и в песни степенной печатают: возведох очи мои в горы отнюд же помощь моя прииде; и то не гораздо же, удобно было тамо печатати: вознесеся на небеса отнуду или отъонуду же исшед, и возведох очи мои в горы отнуду же помощь моя приидет. Понеже отнуду или отонуду вместо сего глаголется, еже от куду: а отнюд отрицание всякаго дела, еже рещи; отнюд не знаю, и не вем, или отнюд не хощу и не творю. Яко же и в каноне Благовещения 8 песни, в 3 стисе, от лица Богородицы глаголет: отнюд не знаю ложа сверстника, или в песни трех святых отроков, глаголет: отнюд не прикоснуся их огнь. А еже по Акафистове каноне на  хвалитех, в самогласном стисе, от лица же Богородицы печатают; отнюдъже от ангеловых глагол верно приемши целование. И то зело гру6о,отречение будет вернаго целования. И во многих, Государь, местех, за отнуду и за отъонуду — отнюд полагают не делом, точию книги тем портят, не философии, а обаче и тое грамматики не разумеют. Или прежде сего во псалмех Давыдовых печатали к лицу Божию: Господи обрати и спаси, и виждь: и обращ живиши ны. А ныне Богу обращение полагают, во многих местах печатают; Господи обратися и спаси ны, и обращся живиши ны, и обращся утешил мя еси. А то забыли, яко инде глаголет от лица Божия: не хощу смерти грешному, но еже обратитися ему и живу быти. Зело худо! Человеку глаголется обращение от грехов к покаянию, а Бог безгрешен. Или во псалме, еже — Господи прибежище бысть нам — прежде сего печатали о кратком житии человека: лета наша, яко паучина паучахуся, а ныне печатают: поучахуся. Да о том со мною на очной ставке спор учинили, так же удобно быти: лета наша яко паучина паучахуся. Только, Государь, у них и ответу было, что  грамматикою путали, говорили, неумеючи в богословии и в ином ответу дати. А по нашему, Государь, извету ни чем до грамматики коснулся, да не грамматичным делом вам Великому Государю на них извещал; но приказной есми человек бывал и ваше государево дело по своей мере знаем, что к делу пристоит то и говорим, а что к делу не пристоит о том умолчал. А власти мне то поставили  в неведение, а справщиков в разум и во оправдание, яко грамматикою путали, говорили. И Троичное Божество прилагают к человеческим слитным имяном. А богословцы наричут отъятие всех сущих Богом и к ни единому сущих судити его; паче бо сущих, иже виновен сущим.

С сорок лет есьми убогой аз был у ваших государевых дел, а такова суда не видал, каким меня осудили на изгнание. Мало не целой день очной ставки было, а не единой строки не записали. И так, Государь, не судят по вашему государеву указу: и не в таких великих делах записывают очные ставки при исцах и при ответчиках, а исцы и ответчики к речам руки прикладывают, не сходя с суда и очной ставки. Буду на такой неправедной суд до кончины живота своего плакати праведному и нелицемерному Судии, херувимскому Владыце Христу Богу нашему, за него же и стражду. Непщую грешной, яко и вам Великому Государю сказано на краткую речь, как мне не к милости; а справщиков и больших вин несказано, бурегучи их. Обвинили меня тем до чего и дело недостало. Аще бы я и следа не умел грамматики, да зла никакаго не сотворил, а справщики будто и умеют грамматику, да пакости ею многие творят.

А что и с природнаго и пространнаго своего славенскаго языка на греческой тесной язык воспящаются во многих речах вместо (с) слова — земли (з), и в земли (з) место — слово (с), а за еры (ы) — и полагают, и то не добре же. Двоими, Государь, книгами сего не похваляет: в книге Иоанна Дамаскина, рекомой Небеса, яко еллинской, рекше греческой язык в своем диалекте красен и честен, а во ином языце некрасен и бесчестен. А в другой, Государь, книге, еже о Вере, их же тиснения Московских справщиков 156 году, напечатано: яко мнози от наших, гордостию объяти, славенским языком, в нем же крестишася и сподобишася Божия благодати, гнушаются, иже широк есть, и великословен, и умилен и имеет в себе велию похвалу. А ныне, забыв то своих рук дело, да на греческой тесной язык воспящаются, а свой охуждают. Негли, Государь туне грамота з греческаго языка на словенской преложена и счинена своя, и буквы прибавлены в ней потребы ради перед греческою азбукою многие лишние? Или прежде сего в Москве у книжной справки людей не бывало, еже того знати, и сами нынешние справщики дураки были, яко доселе того не разумели? Сего же найлучшей известной филосов Максим Грек не испортил. Ей Государь, смутилися и книги тем портят: где глаголется: з Богом, з душею, з девою, з бодаем, израиль, тамо в земли (з) место — слово (с)полагают. Печатают: с Богом, с душею с девою, с бодаем. Трудно сего и глаголати, а исраиль в нашем славенском языце зело непригоже. А где глаголются — зраки, тамо весьма нелепо изменяти земли (з) словом (с), и за ы — и полагати, и Сына нарицати Сином, а Давыда Давидом, а за высящася — висящагося, а за всылаем — всилаем, а за быв — бив. Аще и худо тако та глупость вселилася, хотя по старым печатным книгам говорят, а мнози, угожаючи нынешному нелепому новому и бояся тогоже, что и над нами учинено, сим худым воспятословием говорят. И пошел тот недуг во все государство: не много тех мест, где тое глупости не любят. А прежде, Государь, сего Давыда и иных пророков и апостолов и праведных царей и князей всех печатали под прикрытием, а складом писали и печатали лживых пророков и нечестивых царей и князей. Или в старых, Государь, рукописных и печатных служебниках на сшествие Святаго Духа, на вечерне, отпуск был от лица Христова: иже от отчих и божественных недр излияв себе и сошед с небесе на землю. А ныне в новой Триоди, тиснения 168 году, напечатали: иже от отчих и божественных недр истощив себе и сошед с небесе на землю. И то, Государь, зело грубо — еже истощание ему от недр отчих, яко же бы разлучение от Отца. Не истощив себе от недр отчих сошел на землю, полон горе Божеством и присно в недрах отчих. Яко же от чювственнаго солнца исходит свет и луча, не отступая кола: тако и Христос от разумнаго солнца Отца изыде в мир и предбысть с ним неразлучно, плотию страдал, а божество безстрастно и непоколеблемо. Множицею пишет, яко неразлучным его Божеством отрыгну Отец. В толковом, Государь, Евангелии, в неделю пред Воздвижением честнаго Креста, глаголет о нем: яко на земли быв не отступи небес, и на небеси сый не оставляшеся земли, но везде бяше, понеже неописано суть Божество. И во вседневном Евангелии, во Иоане в 3 главе, пишет, яко сам глагола Господь: егда кто слышав о мне, яко с небесе сниде, не мни не быти ми тамо, аще и зде есть плотию и тамо со Отцем сежу божески. Такожде и Акафистова канона, в 8 икосе, глаголет, яко весь бе в нижних и в вышних, никако же неотступль неописанное Слово. А инде пишет: яко и во чреве матерне был, и Предтечею крестным, и Пилатом судим, а неистощим отеческих недр и престола не отступил: выну со Отцем и Духом на престоле седяй. Такожде и Григорий Богослов написал в книзе своей во 2 слове, еже на пасху, от послания Павла Апостола, еже к Филиписиим: яко излия себе Христос от недр отчих, образ раба прият, сиречь, бысть человек, и глаголет излияние смотрительное, окутание божественныя славы и высоты смирение. Да и сами, Государь, справщики свидетельствуют на свою глупость. В тойже Триоди, типографа 168 году, в неделю 3 по пасце, святых жен Мироносиц на утренни по 1 кафизме, во 2 седальне и во вторник тоя же недели на утрени в 1 седальне напечатали: яко пречистых недр в вышних неистощив, погребение и воскресение прият. А что и просодии в новых книгах превратили, по чужим пословицам (какими пословицы в Московском государстве николи не говаривали, и ныне не говорят, и книг по той речи не печатывали) и то недобре же. Многая речь учала быти опако изълежащаго на другое мнительно, и учал быти раскол: в книгах речь, а в людех другая. И тем все старые книги опорочили и укоризну навели; не токмо простых людей, и Святых многих, которые по тем книгам служили и Богу угодили, и сих дураками зделали, яко глупы были, еже до селе того не разумели. А многое испортили одною просодиею оксиею, как отняли ея от предлогу и учали полагати среди речи: где глаголется: по чину, рекше по уставу, тамо предлог покой (п) с оном (о) и просодию оксию, прежде сего полагали над пред предлогом над покоем и над оноем, а ныне ея полагают среди тое речи над червями и над и. И будет, якоже бы починути от трудов, или сна мало прияти. А где глаголется на род сиречь на колено, или на племя, яко же и во Евангелии глаголет: вся сия приидут на род сей. Предлог у тое речи на и просодию оксию прежде сего полагали тамо над предлогом же над на, а ныне ея полагают среди тоя речи над, рцами и над оном, и тако будет народ, рекше, множество людей и прочая такоже. А что говорят справщики, яко тое просодии оксии  нигде  неудобно полагати над предлогом: и где, помяну, Псалмопевец в молебных своих глаголет к Богу единаго дня и единой нощи звание, яко во дни возвах и в нощи пред тобою; и тамо предлог у дня веди с оном, а где глаголется о множных днях: во дни Ирода царя, или иного етера, тот же предлог веди с оном. И аще тамо где во дни многи просодии оксии над предлогом неполагати, не будет различия множным дням с единым днем. Или где глаголется о некоторым, яко поимали, рекше, взяли или побрали, то тамо предлог, покой с оном. И аще тамо, где глаголется поимали, рекше, взяли или побрали, просодии оксии над предлогом неполагати, и будет, яко поимали бежащаго. Ей Государь, и в том смутилися, еже просодии превращают по чужим пословицам. Аще мне и то поставлено в вину, яко обличаю их тем, а они и сами после моего извету в том винилися, яко истинну печатали наоборот, а описали тою свою вину в конце новые Триоди, тиснения 168 году. А всех своих вин и омылок с трех книг — во Псалтыри, да в Триоди, да в Святцах малых — более двух сот написали. Да не то, Государь, единое, и иное многое изменяют: прилагают и отлагают дерзостию своею, не делом, забыв изложение вселенских седми Соборов клятвами затверженное. Мнитмися грешному, яко и Духу Святому в чести повреждение учинили. Прежде, Государь, сего в старых рукописях и печатных цветных Триодех на сшествие его, на вечерне была ему особая молитва — Царю небесный — в ней же глаголет к лицу его: Ты убо Владыко единый от Троицы Бог, истинный Бог от истиннаго Бога. Яко же и Сына в Символе глаголет: Бога истинна от Бога истинна. А ныне тое молитву с такими великими богословными речьми отставили: в новых триодех, тиснения 168 году, ея не напечатали. Отцу и Сыну с присовокупляемым седьмь молитв, а ему и единой несть, и не многими речьми в очтчих и сыновних молитвах присовокупляют его — и то глаголет о нем, а не ему в лицо. Зело, Государь, дерзостно учинено, еже с таким великим богословием молитва отставлена. Страшно, Государь, не хранити чести Духа Святаго! Забыли сие, яко и сам Сын Слово Божие о чести и величествии его с грозным прещением изрече, яко на Сына человеческаго хулившему оставится, а на Святый Дух хулившему не оставится, ни в сий век, ни в будущий. Такоже и Григории Богослов написал в книге своей: яко неможно и Сына предпочести паче Духа, и зело грозно самого того Духа отпасти, еже не чести его со Отцем и Сыном единосущна, и яко многа брань еретиком ищущым ясна гласа о Дусе, еже аще кто речет Духа Бога истинна, оне же не честне его мняху, едину оставльше искру истины. И не удобно ли, Государь, сему злу противитися и глаголати в нужных Духа Святаго Богом или Господем истинным, и на сшествие его молитвы — Царю Небесный — с самым великим богословием полагати, то ли разум яко такое великое богословие отлагают, а чему неудобно быти, то прилагают? Во Псалтыри прежде Давыдовых псалмов напечатали Августиново Оглашение, а в книге Оглашения (которую привез из Литвы к Москве для исправления корецкой протопоп Лаврентий Зизантий, еже блаженныя памяти дед ваш Великий Государь святейший Филарет Никитич Патриарх Московский и всея России имя нарек —Беседословие) написано, яко Августин и друзии с ним, Касиодор и Ероним, сперва учили, а последи отпали, и едва поправились Амвросием епископом Медиоланским, а учение их святыми Отцы отречено. Паки глаголю, яко молитва на сшествие Святаго Духа — Царю Небесный — с самым великим богословием оставлена не делом: умаление в чести Духу Святому пред Отцем и Сыном учинено.

Нрав по грехом таков у нынешних Московских грамматиков, что новое ни объявится — за тем и пошли, а старое свое доброе покинув. И Богу обращение — еже Господи обратися и спаси ны, и обрящся оживил мя еси, и обрящся утешил мя еси, и вместо подражание — подражнение печатают, от литовския печати взяв. А прежде сего на Москве литовския печати непотребныя речи правили, а ныне опять за то же принялися; забыли то, яко иные литовския печати книги на Москве и огню предавали. А иное их пременение наруганию достойно, рекше, смеху. В каноне Ангела Хранителя, 8 песни в 7 стисе, прежде сего печатали: Христов храм бывшее сердце мое страстьми свиней не разумных житие соверших; а ныне в новой Псалтыри, тиснения 168 году, напечатали: яко умных свиней житие соверших. Не токмо на мучительную тварь — на ад и на свиней — честь, а на бесов — ум положили. Бесове прежде отпадения разумное существо было, а егда превратилися от благаго во злое, тогда явишася не разумны. Что сего глупее, еже на мучительную тварь — на ада честь, а на бесов ум положили? И многое справщики переправливают в книгах своими худыми догадками, а не от писания взяв. До старости есми дожил, а нигде в писании не видал и в пословицах не слыхал умных свиней. А что справщики говорят, яко умные свинии — помыслы страстные, и то не делом говорят, помогаючи глупости своей весьма. Были прежде сего напечатаны неразумными свинии бесове, а храм им человек, имея скверное житие, яко же и в толковом Евангелии на усекновение честныя главы Иоанна Предтечи глаголет от лица человеческа: яко храм Божий себе растлих и бесовско обиталище сотворих.

Аще и во изгнании и иное новое оглаголуем. Прежде сего в дву государствах на Москве и в Литве печатали в книгах Господа нашего Ісуса Христа с единою iотою — Ісус, а ныне его и иных ісусов везде печатают Іисус. И о сем глаголю: аще Господу нашему Ісусу Христу то прибавлено чести ради, чего было ради иным ісусам такая же честь творити и иту прилагати? Паки глаголю, яко всем ісусом кроме союза, рекше совокупления з другим лицем, единому иту прибавили не делом: тамо довлеет с одною iотою. А с итою и iотою печатали прежде, где им будет союз, рекше совокупление з другим лицем, Господа нашего Ісуса Христа с отчим лицем, где пишет во Евангелии, яко глагола во страдании своем Стефан первомученик: вижу небеса отверста и Iсуса стояща одесную Бога; или искаше Іуда миру продану быти и Ісуса лестию яти, или удивляется Петр о ловле рыбной и Iсуса благоговейнне молит изыти от него. А Навина Ісуса с Моисеом, где глаголются купно: Моисей и Ісус Навин, и в прочих таковых, понеже Ісус существительное имя: іота ему полагается в начале, существительнаго ради имяни, а ита прилагается союза ради з другим лицем, а кроме союза единаго Ісуса имени не довлеет печатати с  іотою да с итою. А инде Ісус с іотою да с итою — и два лица возмнится: где глаголется к лицу Богородицы — Господа Іисуса, или Христа Іисуса родшая, весьма два лица будет, прибылая ита союзом вменится. Ей Государь, смутилися тем не токмо на Москве, и там — откуду взято; а права старая Московская печать. Или, Государь, прежде сего печатали и певали на литургии в подъемлющем Христа —  дароносима, последствуя священническим молитвам и диаконским, яко молятся о предложенных и честных дарех. А ныне напечатали и поют: дориносима; такожде и в ирмосе, — яко виде Исаия — напечатали Господа дориносима, и от ангел славы дары приемлюща, от служебных духов и от многих лиц; а дори греческим языком — копия. И како удобно рещи Отца или Сына с копии носима? При Бозе оружия и ничесого вещнаго несть. И видех Исаия самаго Господа Саваофа на престоле седяща, а не Сына и не носима, и дары приемлюща от единаго лица — от Сына, а не от служебных духов и не от многих лиц. В торжественнике на Богоявление Господне пишет: яко человеческое естество свободил от адова мучительства и принес Сын ко Отцу в дар. Такожде и в Минеи месячной, в каноне на Христово Рожество, 5 песни в последнем стисе глаголет; языков Богови наследие Ісус приносит; и везде глаголет о Сыне, яко Царь и Господь славы и великаго совета Ангел, а не о служебных дусех тако глаголет. Подобно, Государь, дело их сему, яко же в Шестодневе Великаго Василия пишет, яко глагола Отец к Сыну и Духу общим советом: сотворим человека по образу нашему и по подобию, а жидове в том глаголе мневше много лиц, и яко ко ангелом глагола Бог предстоящим ему, не хотящи прияти Сына Божия, рабом советники сих дают, и клевретов Владыки творяще. Или,  Государь, в ирмосе 6 гласа — еже из пламени святым росу источи — прежде сего печатали: праведнаго жертву и воды попали. А ныне печатают: жертв водою попали. А вода не палит, точию угашает огнь. И в богословной, Государь, книге Дионисия Ареопагита, во главе 8, еже о силе и о правде пишет: яко николи вода огнь бывает, ниже огнь вода, о6оя древле чюдодействова Бог единым огнем в вавилоньской пещи: его отроком устуди и росу из него источи. А во Израили на кармильской горе Илиину жертву и воду им попали. Аще где и пишет, яко водою жертву попали, и то приклад и возводная речь, а не сущее; понеже и в совещании о жертве глагола Илия с Вааловыми жрецы: яко той есть Бог, иже послушает огнем, и по молитве Илиине спаде огнь от небесе, а не вода превратилася во огнь, иже в рове была. То, Государь, и дивно, яко ратник вода огню и всегда погубляет его, а тамо чрез естество огнь пояде воду. И другое Государь, свидетельство сему есть, яко иногда при камени Гедеонову жертву огнь же пояде. И третие свидетельство  в Печерском Патирике, в 3 слове, еже о сограждении церкви в конце глаголет: яко молитвою Святаго Антония на место, идеже во имя Пречистыя Богородицы церковь основана, от небесе же огнь спаде и пожже древа и терние, и долину сотвори подобну рву. Такожде и в Библии вторых книг Паралипоменон в главе 7, по молитве царя Соломона с небеси огнь сниде и пожре всесожжение и жертву, такожде и на Синайстей горе при Моисеи небесному же огню бывшу.

Во всем пред Богом грешен; а пред вами Великим Государем Самодержцем Христом Господним виноват, но кроме сего дела; а в сем деле за что оскорблен, не могу вины своей разуметь, яко нигде не опорочил праваго древняго божественнаго писания, ни хулы на Бога принес, ни новаго что. По вашему государеву праведному разсмотрению учиненных единогласия и наречнаго пения не хулю, точию ревнуя по Бозе и вам Великому Государю служа и добра хотячи, плевелы показах, и иные блудни хотех пресечь. Если бы вы Великий Государь и Самодержец сам возрил в такое великое дело, или бы ваши Царскаго Величества боляре у того дела были, которые грамоте умеют и полатной суд знают, не был бы я нищей осужден на изгнание. А властем судьям нашим Чюдовскому и Богоявленскому архимандритом неколи уметь довольно грамоте и вашего государева дела знать.

По сем поведаю вашему Царскому Величеству от всего убогаго сердца своего, яко не Москвы домогаюся, милости вашей государевы и оправдания хощу: уже мне грешному несколько жити; и в Кирилове монастыре живу и за вас Великаго Государя Бога молю. Господня бо есть земля и концы ея, и на всяком месте благословит душа моя Господа. То мне грешному скорбно яко служил блаженныя памяти отцу твоему государеву и вам Великому Гооударю много лет безо всякаго дурна; а как был на вашей государеве службе в Сибири в Тобольску з боляры и воеводы дьячишком две перемены 6 лет, и тамо будучи, не мало вам Великому Государю добра делал. В первой перемене прибыли вам Великому Государю учинили в деньгах с десять тысячь рубл., хлеба 10 тысячь и 500 четвертей, ясачных людей вновь приискали с 500 человек, и твой государев ясак с них и с старых ясачных людей сбирали сполна; а до нас и после нас николи с тобольских ясачных людей ясаку сполна не сбирывали: славен был сибирскою службою боярин князь Юрья Янкеевич Сулешев, а притом ясаку сполна не збирывали. А работишка в том к вам Великому Государю не малая была моя, потому что сибирское дело мне было за обычай, до тех мест в Сибири и на Москве у него был многое время и знал в чем вам Великому Государю поработать, а за своим ни зачем не ходил, для чего послан — то и делал, убивался о вашем государеве, яко горлица. А как к Москве приехал, ничем твоим государевым жалованьем не поискан и не накормлен, ровен с прежними дьяки учинен, которые потеряли вашей государевы казны денег одних 200000 рублей, а после того разорен доконца: за кем что ни было моих убогих крох, то все пропало, никто ничего в опалумою не отдал и от обещания из Чюдова монастыря, где вкладышку дано было сто рублев, изогнан. В другоряд я нищей стражду при вас Великом Государе по не правому оглаголанию, напрасно. Первое в мире: в Сибирском Приказе, княж Осипове деле Щербатаго, как был дьячишком за Илью Бунакова мало неразорен, то кабы не заступила Богородица горьких ради моих слез, да не палачи оправдали: а ныне за справщиков разорен; аще и пожалован вашею государевою милостию, да не как иныя исподначала свобожен, а жить указано в Кирилове монастыре, твоя государева воля, а с целым я умишком вам Великому Государю на справщиков извещал, а как книги портят и плевелы в них сеют, — и ныне глаголю: яко удобно такой злой плевел, еже во многих книгах: в октаях, и в триодех, и в минеях, и в прологах Сына Божия под леты учинили, на небесех ему от Отца рождение напечатали — отъвсюду изторгнути, чтоб тое хулы впред не было. Также и Савелиеву ересь пресечь, слитно Отца с Сыном печатати и Богородицу бывшею Материю Божиею нарицати — не велеть; понеже зело грубо, и земнородных человек матери бывшими матерьми не глаголются. Не мало есми грешной писал о неразумии справщиков, последнее окончеваю глупость их, яко не токмо от богословия в богоимени неразумеют, инде и вашу Царскаго Величества честь глупостию своею вредили. В книжнице, еже счинили о умирении Церкви, по молебном каноне в молитве к лицу Христову напечатали: еже бо вознести рог Христианский и вас Великаго Государя помянуть и помиловать и вся благочестивыя Государи князи наши. То ли, Государь, не безумие, яко всех князей вряд с вами Великим Государем Самодержцем государями же напечатали, а не кяязи именно. Также Государь и в Минеи месячной февраля месяца, тиснения 154 лета, в конце, блаженныя памяти прадеда вашего Государя Монарха Царя и Великаго Князя Иоанна Васильевича всея России Самодержца дедом вам Великому Государю напечатали. Чюже есть и невеждем родословити вас Великих Государей. Непомалу грешной дивлюсь о сем, яко паче всех огорчал вам Великому Государю, и службишки мои не помогли мне. Иных нашу братию чернцов в больших винах жалуеш, прощаеш и на обещанье отпущаеш, а меня и простил, а на обещанные не отпустил. Ни какое я зло учиних, еже по Бозе поборах.

Милосердый и Благочестивый праведный Великий Государь Царь и Великий Князь Алексей Михайлович, всея великия и малыя и белыя России Самодержец, вели меня на время из Кирилова монастыря отпустить к Москве для моих бедных убогих крох и с родительскими гробами простится, а о грамоте, коли моя грамота мало надобна, не буду ни с кем спору чинити. Вся возлагаю на Бога. Царь Государь смилуйся, помилуй!