Предисловие увещательное к раздирающим церковное единство

 

[Выговское сочинение начала 80-х годов XVIII в.]

 

Сетоваше древле Ревекка [Быт. 25], яко во утробе ея два несогласующая сына [Ияков и Исаав] брань о перворождении между собою творяху, и матернюю утробу, братоборным томлением удручаху.

Ныне же в нас мати наша святая церковь, о колико сетующи скорбит: несогласных ради сынов своих [иже нарицающихся федосеевыми и филиповыми] иже ревнующих в брани развращенному Исаву. братию свою сущую ненавидят и гаждают: и сими хулами и досадами, любимое носило матере общия святокафолическия церкве терзающе великому лжесловесию на ню приобщаются. Колико же рыдаше неутешне и сам оныи ветхозаветныи патриарх Ияков зря на раздранную ризу любимаго своего сына Иосифа, и тою теплейшия своя отирающ слезы, глаголаше: сия (рече) есть риза, юже лютии зверие растерзаша (совлекоша).

Равною же (не меньше) сетоваша иерарх он Александрийскии Петр, егда узре Спасову ризу раздирающую надвое, знаменующую тем надвое, или на многия части раздирающихся чад церковных.

Равною убо скорбию и ныне жених церковныи Христос, Спаситель наш, сболезнует своей невесте, в таковых всепагубных раздорах, сынов ея пребывающих. и друг на друга ненавистию злобою и лжеклеветанием воюющих. паче же на сие богоспасителное место и в нем пребывающих пустынножителей. На них же горе и доле обращают своя гласы, всякое плетут [подвизающе] неправдословное наношение.

Сами же и между собою имеюще многое несогласие. и в том великия производят споры. якоже федосееву прилежащии соньму, имеют различное о богомолии [за внешния монархи] умствование. овии бо из них сие богомолие ревностно разумеют с теми, кия за изверженнаго папу римскаго молят, овии же сему разумению противляются. но в сем погрешают: должно рекуще за царя молить, токмо не в церковном собрании. а инии кривотолкующе глаголют: можно и в церковном собрании не по службе же, но по лестовице молитися. И иная многая грубоумствующе противоглаголют.

Подобне же сим, или паче между собою противоречат, филиппову собранию последующии. и еще жестоце на ны умствующе стремятся. нецыи бо из них равняюще моление наше, как и за папу римскаго преправлять наши действа совершенно умствуют, друзии на четыредесятныи пост просто от нас к ним приходящих определяют. а инии не просто, но полагают во вторыи чин еретическии, и спасения не проповедают, но конечную погибель. и Духа Святаго совершающа в действах не исповедают. и иная ужасная глаголют и действуют. о которых …умствованиях[нрзб.] настоящая сия …[нрзб.] обоих частях достаточно укажем.

Зде же паки увещательное наше слово со обличением обращаем в лице творящих раздоры.

О хитоне Христовом возвещает нам Иоанн святыи евангелист: Яко воины Пилатовы не дерзнуша того разделити, бе бо [рече] хитон нешвен, свыше исткан весь.  реша же к себе [воини] не предерем его, но метнем жребии о нем. кому будет.

И сия убо сотвориша воини распинатели Христовы, воини неведущии Христа быти истиннаго Бога, но проста человека вменяющии, тии не дерзнуша хитона Христова раздирати.

Что же вам речем о раздоролюбителие церковнии: чию вы терзаете ризу; яве есть, яко Христову. кую Он вседражайшею своею кровию всесветло украсив удобри. и облече ею свою возлюбленную невесту святую глаголю церковь. сию вы своим любителным раздором, разсекосте, растерзасте, раздрасте, раздробисте на многия части, так и самим вам своего Федосея, …[нрзб.] Филиппа едва ведети путей …[нрзб.-инии?] из …[нрзб.-них?] крепкоутвержаемую вашим началопредводителем титлу совершенно отметают. овии же своего учителя предание и по сие время крепко держаще, на отметающих же тую ратуют, и разделяются. А овии, то есть филипповы в совершенное заблуждение вшедше конечно испадоша предводительства своих зачаловодцов. и раздельшеся на многия части, друг на друга несогласием различным дышут, и друг друга еретиками сами себе браняще порицают. Зрите опасно. если бы светом евангельския правды блистал ваш путь, не бы во многия разныя страны уклоньшеся друг от друга в совершенном неведении явилися есте. или во тьме египетскаго мрака стены распадшия осязали, якоже и онии древле созидающии халанскии столп. если бы безсоветием и несогласием не уловилися, не бы в разныя разсеялися языки, и свой богоглаголателныи оставили диалект.

Сице же и вы раздоролюбителие если бы держалися премудрых и богодухновенных советников и наблюдали бы общество, не бы в таковыя разсекалися части, и междоусобныя творили брани. идеже в ваших разделах не точию начала православныя церкви возможно кому обрести, но ниже предводителей ваших путей кому сыскать есть удобно.

Темже будет ли в вас сия церковь, которая согласием кафолическаго единьства светоблистанием. ни не буди: Понеже златословесныи учитель, церковь соединением имене украшает, а не разделением. о чем к ефесеом на послание в нравоучении 11, пишя о схизматиках тако глаголет: Ибо церкви имя не разделения, но соединения и согласия имя есть. Аще тако есть, еже от соединения церковь имя свое притяжет, убо следовательно по Златоусту в ваших разных толках, ниже церкви, ниже имени ея быти. ибо кииждыи ваш раздел мнится собственно своею церковию быти. но убо может ли тело разделившеся во многия части телом совершенным быти. Аще же и разделяется наименования частей, но не отделяется часть своего естества, но сродное присвоение имеет. Аще ли отделится, то совершенно уже мертво явится. Темже нужно есть святей церкви о вашем таковом от нея душевредном разделе болезнено скорбети, и плакати вкупе с древлеветхозаконною иеросалимскою церковию за отведение в плен вавилонскии чад своих сынов израилев: яже плакаше чрез пророка Иеремию горце глаголя: Сынове сиони честнии, и одеянии златом, како потемне злато; изменися сребро доброе, разсыпашася камыцы святыни в начало всех исходов.

Достойно бысть поистинне горкаго плача оное пленение сынов израилевых в преселение вавилонское; но горчайших слез достойно есть раздрание церковное, которое не телесное плен наводит, но гибель своим душам раздоротворствующии приобретают. Якоже и при Моисеи отступившии от него Кореов и Дафанов и Авиронов соньм пострада, в сей твари известно есть. коль страшно Бог их казни, яко и земли стерпети не повеле, но зинувши скрыти в своя внутренния скалы, паче же адожителей содела.

Еще же сам Владыка Христос, и святии апостоли, и велицыи учители, и словесы своими и писаньми, обличающе раздоры и разсечения с единоверными творити, глаголет бо вочеловечившиися Сын Божии, евангельскими громогласии [Матф. зач. 46]: Всяко царство, раздельшееся на ся; запустеет. и всяк град или дом, разделивыися на ся не станет.

Последуя же своему Творцу и Господу, и святыи избрания сосуд, лестовица церковная, великии учитель языком вопиет крепце [к рим. зач. 121]: Молю же вы братие блюдитеся от творящих распри и раздоры. И паки [к Тим. в зач. 294]: Буих же и ненаказанных стязании отрицайся, ведыи яко раждают свары. рабу же Господню не подобает сваритися но кротку быти ко всем.

Великии же вселенныя учитель златоточная уста, притужнейше глаголет вопия [к ефес. нравоуч. 11]: Ничтоже тако раздражает Бога яко еже церкви разделятися: аще и безчисленная, будем содеявше благая, от иже тело Его пресецающих не меньшую приимем казнь, ссецающе исполнение церковное. ниже: Ниже мученическая кровь может сего загладити греха.

Всероссийскии же святейшии Филарет патриарх, в своем изложении соборном таковая страшная глаголет [Потребник лист 563 на об.]: Идеже бо (рече) и мало раскольство счинится, и тамо воставает вражда гнева Божия, и мечь ярости, и пребывающим в том, конец мука вечная. Преподобныи же во иеромонасех Матфей тако глаголет [сост.]: раздрати церковь болши есть зло неже идолом поклонитися [сост.? глав.? (Σ, 12?)]. Толика убо есть раздоров прелютейшая вредность, толико величайшее всегубительство, толика тяжчайшая поражательнейшаго всех смертоносия язва, яко не токмо свое  ближних и единьствующих в вере горце острупляет, но и отдаленныя видящих очи, и слышащих ушеса, преболезненно теми вреждает. яже слышащи и видящи в таковых распрениих нас пребывающих, не ино что, но на хулу и гаждение языки своя на нас изостряют. и тем общее всех единьственное благочестие порокуется.

Темже о возлюбленная братия: молитвы общия всех нас родительница, святая церковь, да сию вредность душегубительнаго раздора познавше, и от того с великим вашим восторгом вспять возвратившися единоумственным с прочими християны быти. и благосоветием и соединением общекупным украсится, яже она чрез сосуда избраннаго вас любезно увещевает [евреом зач. 332]: Мир (рече) имейте и святыню со всеми. ихже кроме никтоже узрит Господа. Убо любезнии друзии, вся вражды сия и раздоры о недоумеетельных отринувше, всякое разсечение и распри поплевавше, всякое свое мнение и самосмышление за индианы и ефиопы прогнавшее, возлюбим благое и братолюбное душеполезное общесоветие, возжелаем вкупообщне и другосоветне испытовати и разсмотряти, божественая писания, зане во мнозе совете спасение есть.

Аще ли кое сомнение покрывает наше умное существо недоумением: то прибегнем к преглубочайшему разума источнику, притецем к любодарованному Владыце: просим со всяким смирением и долготерпительным пожданием, с Давыдом вопиюще: вразуми мя и испытаю закон Твой, и сохраню и всем сердцем моим. И паки: открыи очи мои разумею чюдеса от закона Твоего. Псалом 118.

Притецем к единосогласию общаго всех собора, прибегнем ко общесоветию церковному. и яже недоуметельная и сомнение раждающая всесмиренне предложим вкупосоветному собранию всего общества. пождем долготерьпетелно и вселюбезно разсмотрителнаго всесоборнаго уставления.

Ибо всеблагии Бог, прославляемыи во святых советех: всяко поспешит общему и боголюбезному собранию, всяко толиким ищущим волю Его открыет полезная от писания избрати: в пользу и приобретение, и во изрядное спасение святей Его церкви.

Тако убо в кротости любовне и мирне пребывающе, недоумительная же и сомнительная общесоветне разсуждающе: немогущая же разсудитися, общему собранию и совету оставляюще: не токмо зде дивнаго мира, и любезнаго спасительнаго покоя, и всесладчайшия тишины насладимся: но и будущаго премирнаго, и небеснаго пристанища, яко сынове благодатнаго мира, и чада церковнаго согласнаго соединения, радующеся достигнем. Еже благодатию своею Христос да сподобит вас сие получити, ныне и во вся веки, аминь.

 

Увещание к повелевшым в сей труд сочинения внити.

 

Любезныи читателю: да не позазрит твое любомудрие в невежестве моих словес, но благоприятствуй нас твоим исправлением. За что от всеобщесвойственныя благости, и пресовершенныя премудрости Бога нашего, мзды в приятии благонадежным буди. аз же ярем послушания нося выше моих мер в незаходимыя пределы входити дерзаю. Понуждаем же бых от вас написати о противоумствовании посте святым и богоносным отцем от неких чрез закон вместо миропомазания на монастырьских и прочих полагаемом. аз же благоразсудих и о прочих их раздоротворствах и о несогласных мнениях для общей пользы в сию аполлогию вместити. в котором моем подвиге молю всемогущаго Бога благосовершителем быти. и помощь от него изрядну получити.

 

Часть первая.

 

Показание 1-е.

О начале раздоротворств федосеевых и филипповых, с выгорецкими и прочих стран православными християны.

 

Ничтоже тако исконному врагу желательно есть, яко еже церковное соединение разрушати, и християнское совокупление раскалати. Понеже от любовнаго совокупления Христовы ученицы быти познаваются. якоже сам истинная и нелицемерная любовь Христос Спаситель глаголет [Ин. зач. 46]: О сем разумеют вси яко мои ученицы есте, аще любовь имате между собою. Того ради и вселукавыи оныи наветник на оную паче всего подвизается, и зелною яростию, на христоименитое достояние дышет: раздоры разсекая тело церковное, и иже бы друг друга спомощьствовати и зболезновати долженствовало. Сей же всековарныи друг на друга льщении своими сражает, и ратовати и угрызати наваждает прелукавыи. Ведыи преокаянныи, яко в раздоротворных бурях, многа волкоядина овцам произыти возможет, и в прогневание Божие таковыя низринути и мглу невидения истины навести, и в словесех и делех погрешительных содеяти. и в таково неведение вложити возмогает омраченныи, омраченных, яко не познавати своего им на истинну сопротивления. якоже на святаго Евфросина воставшии древле псковичи, за пресвятую аллилуию. возмневше они тогда о истине ревновати: на истину ратоваша и хулиша грубосмысленнии. Оле жалостнаго плача: сие раздоротворное плевелие не мину безстудныи диавол между православных християн посеяти. не проскочи древнии он Адамов завистник между соблюдающих древнее благочестие рати воздвигнути. но о сем убо дозде, прочее же о самом началораздоротворении слышателю благочестивыи на среду ради удобнейшаго познания историописательне предлагаю.

 

О федосеевых.

Сии убо влекутся именованием и последованием, от началопредводителя своего тако именовавшася Феодосием. и сии родом бе новоградских стран (якоже и история о нем являет) и дьячек бе в Крестецком яму, тамошныя церкви. крещен же и поставлен по новопечатным книгам. и потом прииде в познание благочестия. и просветися крещением от неких християн. таже за прилежание его к божественным книгам, и учителем прослыся. собра же многое множество народа в польских краях, и тамо общежительство согради. имеяше же исперва согласие с выгорецкими общежительством, токмо в неких содержаниях церковных со оными разньствоваше. и именно, о надписании животворящаго креста, внесенное внове новинами титле сей, I.Н.Ц.I; Понеже он со своими единомысленники крепце о оной устаиваше. и с учительми выгорецкаго общежительства многажды и прение учиневаше. такоже и в прочих неких разликоваше. Отцы же выгорецтии премудро и учительски обще их увещеваху, отстати сего словопрения, и хоша быти им [о своем мнении] в произволности за снисхождение попущаху, токмо мира церковнаго не разрушати их моляще. обаче сия искра несогласнаго разумения, не возможе кроме раздорнаго пожара быти. но самым делом произведеся.

Ибо сей учитель Феодосии с некоими единомысленными своими приехав в Поморье в лето 7214.

И с сущими тамо отцы много противоречно о титле разглагольствова. [в то бо время тамо неприлучившимся Андрею и Симеону Дионисиевичам] кия ему многодостаточныя доводиша доводы.

И увещевающе моляху, еже бы ему церковнаго единьства ризу не раздирати.

Обаче он с своими к сему неудобосклонен показася, кроме того аще бы выгорецтии отцы в нововыниклой титле согласными учинилися, и на всей были их воли. но онии в том за благо разсудили лучше остатися при святой старожитности.

Видя же учитель Феодосии к его разумению выгорецких отцев несклонных, с крайним изыде из общежительства несогласием. отцы же с честию по християнской должности онаго со своими провождаху, напутьствующе снедными брашны. он же хоша и прием тыя но отшед немного, и обрете братския трудники скоты пасущыя и тым данная поверже и своих обущей с прочими своими ученики ревностно совлекося, трясти оныя против общежительства повеле, приглашая оны евангельския глаголы: прах прилепшии к ногам нашым отрясаем во свидетельство и не буди нам с вами общение имети ни в сем веце ни в будущем. И тако учинивше во своя отъидоша. Сия содеявшаяся отцы уведевше зело о сем оскорбишася. паче же [егда прибы] богомудрыи Андрей, вельми о их разгласии болезнуя сокрушашеся. и много их увещеваше своими послании, и премудрыми словесы. Но при жизни учителя Феодосия никоего соединения у них с поморскими не бысть. тако же и по смерти его немало время в том раздоре пребыша. В 7227 годе; приезжал их страны Игнатии Трофимов, и соединение со отцем Андреем учини. точию сие соединение не во всех их последователей возможе простретися. по неких бо их странах. паче же по новоградской и великопольской всегда раздорныя бури веяху, и до ныне в том же упорном нраве стояти утверждаются. и с неприемлющими титлу раздоротворствуют.

Верности же ради о бывшем их первоначальном раздоре, со иже поморскими отцы, от истории учителя Феодосия. [сочиненныя сыном его Евстратом] засвидетельствуем. идеже сице пишет:

Посем инныи подвиг случися отцу Феодосию. Бяху некотории християне, бегающе никоновых новопреданиих иже поселишася за езером Онегом, в пустых лесах. общее житие на реце Выгу составиша, в них же начальнейшии сии быша, Даниил Викулин, Андрей и Симеон Дионисиевы, Петр Прокопиев, Леонтии Феодосиев; и прочии.

Иже в первых величайших догматех мудрованием со отцем Феодосием, и с прочими учители християнскими согласны бяху о нынешнем времени разумение. еже неприяти хиротонии, крещения, евхаристии, и прочих тайн новодействуемых от никониан: немалое ведение в писании изрядную ревность о чистом житии имяху. но во иных вещех несогласно мудрствоваху. яже суть сия: Аще кии люди незнающе древняго благочестия. браки от никониан прияша, последи же познавше крестишася от правоверных, тыя браки они хуляху, нивочто вменяюще разводити веляху. Пищу и питие от неверных еретик творимое и сосуды их приимаху, и без молитвы ядяху и во иных каковых осквернениях молитв на очищение с поклонами не творяху. А наипаче на кресте Христове Пилатом положенную титлу, Iсус Назарянин Царь Iудейскии по свидетельству святаго евангелиста Иоанна, зачало 60, отметаху. Писати же и воображати на кресте Христове сию весма возбраняху, написанную где на кресте или вылитую, инии от них дерзостне заглаждаху, и стираху, и кресты с титлою от поклонения оставляху и злохульствоваху всячески латынскою ересию. и злейшии сего оную нарицающе чесого и писанию предати зазорно и прочая различная в чинех церковных имяху. о сих всех учитель Феодосии с протчими со Андреем, и Симеоном, Леонтием и со иными их учительми многажды от святаго писания беседоваша, они же согласие о титле к нему в словесех показоваху, а в своей стране по первому своему обычаю творяху, и ни единаго креста с титлою у себе в часовни ради уверения словес их поставити не восхотеша и прочим своим таковым весма имети не веляше.

Иногда же к ним во общее житие отец Феодосии с прочими учители християнскими ездив, кии быша сии имены, Спиридон Максимов, Симеон Григорьев, Прохор Матфеев, Иван Кондратов, Иван Симеонов, подьячей [Леонтей Васильев брат его родной тамо в монастыре и остался, и во иноческии образ пострижеся, и именем наречеся Леонид] и тамо с ними беседоваше о титле немало. Андрею [Дионисову] убо небывшу тогда. ниже: Тии же не восхотеша вышепоказанных своих мудровании отложити и в согласии о сих любовно быти. но в своем упрямстве неизменно пребываху. Тогда учитель Феодосии и прочии [с ним] по многократном увещании видяще их в своем разуме непреложно стоящих и к согласию не скланяющихся, и единого креста с титлою у себе в часовни поставити не восхотевших. Общим согласием протчих учителей християнских сотвори с ними в молитвах, и в ядении, и питии, разделение, в лето от создания мира 7214. сице с теми сотворися. дозде от жития Феодосиева.

Яве видети есть и от их страны свидетельств, яко истинно есть слово наше и приятию достойно. что они и прежде раздоротворными бурями смущаеми, и еже несогласием к выгорецким отцем кипяху, мира с ними имети нелюбяще. но аще и Игнатии Трофимов некогда частно примиряшеся. но совершеннаго и повсемественнаго мира от тех времен николи с ними не бысть. Аще же егда и случахуся где мирствовати, но паки они на тоеже разгласие устремляхуся. и сам той Игнатии последи своего примирения хулное писмо о блаженнем страдалце Игнатии палеостровском в выгорецкое общежительство с немалым поношением писаше. Темже не сия есть наивящшая причина их с нами к несоединению недопущающая, что мы по завещанию апостольскому за внешния монархи Бога молим, но еще прежнее заматоревшее несогласие ко общему с нами соединению путь преграждает.

По богоносных отец гласу: немал есть подвиг еже своему обычаю одолети. Прочая же долготы ради словес писати оставляю.

 

О филипповых.

Сии филиппову согласию прилежащии началоводителя своего стяжаху старца Филиппа, которыи в белцах нарицашеся Фотии. еще до Самарина приезду в монастырь пришед из стрелецких служителей, немалое время в бельцах поживе. и пострижеся во иночество от боголюбиваго и подвижнаго инока Давыда: но по пострижении весма недолгое время в послушании у отца Давыда пребысть. и шести недель невозможе премедлити.

Егда же преставльшуся выгорецкому отценачальнику Даниилу взем духовную должность, и нача бывших у отца Даниила за неимением в духовеньстве к себе ко исповеди людей присваивати. глаголют же нецыи яко и Даниил отец ему соизволи. обаче в едином точию духовеньстве. он же по смерти его забра всю должность отца Даниила, и нача непокарятися богомудрому отцу и настоятелю Симеону Дионисовичю. предлагая всем, равномерное слушание и почитание себе быти как и отцу Даниилу. отец же Симеон и прочии много его наказоваху, и увещеваху, еже бы в таковыя должности не вступал, но доволну быти глаголаху, в правлении духовных дел, ко внешним же яко неприличным ему не прилагался, такоже и прочия наружныя дела без общаго совету не творил. он же вместо послушания непокорение являше, и ко иноческому увещанию никакоже преклоняшеся.

Некогда же ездив самоволно в скит Лунбоской, и тамо приобщив новопоженившихся, и в духовеньство их себе прия. Егда же уведавшим о сем отцем, зело всем обществом на Выгу. [ту прилучьшимся и скитожителем] потязовваху его и зазираху. он же на всех с непокорением вопияше. паче же на отца Симеона, велиею ревностию грубоумне дышаше. случися же некогда быти отцу Симеону на Лексе, и в столовую для непокорств и наношении филипповых собратися братьству повеле. и пред всеми его с кротостию увещеваше. он же ту свои точию тетратцы являше. яко бы на него написанныя, а в руце его дати не смеяше. боящися богомудрых его зазрении. обаче и потом весма на его всякия хулы с неправдою наношаше яве и втай, и всем своим духовным детем наглаголоваше на святую и богодухновенную отеческую особую: и паки отец Симеон собратися на Лексе повеле и притом бе присудствуя отец Феодосии выгорецкии. такоже с кротостию ему свое увещание предлагаше. он же не точию непокоряшеся, но и оглаголуя бе, его отеческое предводительство, якобы по самовольству кроме братскаго соизволения восприятое. отец же яко неведыи, вопрошаше братию, как он сию должность восприя. братия же имеяху на то от всего выгорецкаго как монастырьскаго так и скитскаго избрания рукоприкладованныи лист, которыи отец чести повеле. в нем же и сего непокорника рука приложена услышася, подписана тако: [еще ему бельцом бывшу] Фотии Васильев подписался. братия же ему начаша глаголати: отче чия сия рука приложена бысть. Он же глагола: аще и наша, обаче аз тому непоследую. и некия грубословия тогда тамо приглашая бе. виде же отец и прочии с ним, в таковом онаго непреклонном намерении, паче же грубоумствующа, оставиша его на изволении.

Обаче потом он весма недолгое время покосне, во общебратском на Лексе селении, и не могии более терпети в себе разгарающагося духа к раздорным бурям, изыде из братскаго святаго общежительства, и поселися вниз по реце Лексе, в ските Надеждине. еще года за два до приезду Самаринова. и тамо конечным несогласием, не точию ко отцу Симеону, но и ко всему обществу воскипе. всякия нача по своей грубости наносити зазоры, отлучая от общества легкомысленныя люди, и присвояя к своей секте. много же от отца Симеона, такоже и от прочих братии увещаем и молим бе, якоже словесы, тако и писанием. обаче к склонности мира никакоже бе подвижим. и отец его духовныи, инок Давыд, увещевая не благословляше таковаго начинания творити, но он ко всем сим глух показася. и тако тамо пребысть в разгласии до коммискаго приезда. Егда же почю оныи приезд, и всех старцов требуют в коммисию по оговору Круглаго, тогда и он преселися на реку Умбу. и тамо человек без мала до ста в свое сожитие набра. якоже от достоверной истории отца Ивана Филиповича показуется. И сперва весма жестоко на монастырь наношаше винности, и по скитам ходя людей от монастыря отлучаше. такоже и ученики его творяху.  некотории же его согласники Симеон Гаврилов, и Мартин медник и прочии мнози, усумневшеся о его разгласии, призвавше из монастыря многокнижнаго мужа Даниила Матфеевича. такоже и Филиппа старца призываху на разглагольство двократно, чтоб раздор сей погасити, и церковь безмятежну сотворити, и во едино согласие раздирающихся совокупити. но оной Филипп идти на беседу отречеся, никакоже восхоте. [сие же бысть уже последи преставления богословнаго мужа Симеона] обаче на последнем годе тамо своего жития не по прежнему поступаше с монастырьскими, но зело мягчайше сотворися, и на волю последователей своих оставляше. и глаголаше: если бы приехали из Сибири Трифон Петровичь и оба брата Гавриил и Никифор Семеновичи. всяко бы мы согласни были. И тако поживе тамо на Умбе более пяти лет. и в 251-м годе при наезде из коммисии огнем скончася.

Оставшии же по нем его согласницы, старцы Терентии и Матфей, велию ревность к раздору восприяша, и еще грубейше с сущими монастырьскими християны поступаху, равным образом. якоже с никонияны, и двоих человек пришедших к ним из монастыря наизнова преправиша, паче же искривиша своим крещением. [оле дерзости:] обаче осмотревшеся в своей грубой дерзости, и начаша от монастыря приимати, полагая на приходящих четыредесять дней поститися якоже и на оглашенных. которому их действу паче же и учению последуя питерский Федор Михайлов, заведе и тамо свое согласие, и с великим своим стремлением на монастырь ратоваше. от него же прияша обычаю своему вину и нарицаемыя балчюжныя московския.

И тако сей раздорныи пламень по всей России растечеся, и многия породи раздоры и своемненныя толковании.

Согласует же сему нашему известию, и престарелыи бывшии муж Михаил Григорьевичь московскии, которыи до каммисии, и после каммисии многажды посещал выгорецкия жилища. идеже к балчюжным увещание писав о отложении четыредесятнаго поста полагаемаго ими на монастырьских и федосеевых сице свидетельствует: А что (рече) четыредесятныи пост у питерских положен, не от первых отец поморских взят, но от старца Тереньтья, которыи был после Самарина, он изложил сей четыредесятныи пост. А сей Терентей и жил белцом в монастыре до Самарина. и с Филиппом старцем из монастыря вышли до Самарина. А еще и тропаря в монастыре не было. не богословных ради вин старец Филипп из монастыря вышел, но яко человек по пристрастию. и сей старец Терентии от Филиппа старца и пострижен. и были они с монастырем в раздоре до Самарина, и Филипп старец при коммисии згорел. а Терентей старец после Филиппа старца двух человек от монастыря с Матфеем старцем крестили. и потом одумалися они что неладно так крестили и уложили чрез четыредесятныи пост от монастыря приимати. а питерских Федор Михайлов (бывыи) Маркитант старцу Терентию последует. а первых отцев поморских не застал и не знал их. Дозде из свидетельства Михайла Григорьева, списаное из саморучнаго его писма.

Зде убо благочестивыи читателю внятно разсмотрити подобает, обоя сия, и от них родившиися разгласия, с каковым небогоугодным видится основаны началом, да и во многия раздельшеся части, сами с собою несогласни явишася. точию ратовати выгорецкое общежительство вси сии разгласницы зело согласни обретаются. якоже у онаго древняго афинскаго Сократа бывшии две жене между собою несогласни быша ратовати же своего супруга, зело соглашахуся. но и древнии бывшии раскольницы и еретицы. аще между собою и разглашахуся, обаче святокафолическую церковь единоумственне хуляху поношаху и зазираху. о котором их разгласии нижше вкратце известится.

 

Показание, 2-е.

Яко не леть есть единаго ради некоего [бываемаго] в раздорцех воздержания прельщатися, и впадати с ними в сети погибельныя. но подобает зрети на общество кафолическаго согласия.

 

Братьства нашего неции мужие, а наипаче престарелыя жены, на филиппова и федосеева согласиев [и подобных им] воздержности зряще удивляются. видяще их конечное освенение животных брашен, и виннаго пития, и от внешних обществ, сосудов, и брашен и снедей торжищных зряще их воздержание: соблажняются на оная, и похваляют тех крепость, и за тая их воздержания неразумно вменяюще за самых сынов святыя церкве, и непорочных блюстителей тоя предании, и в согласии оных надеются совершенному быти спасению. Но мы правилно о том соблазне разсмотривше, познахом братии нашея соблазн, детьскаго некоего неразумия преполн. ибо дети младенческими слабыми умы зряще блещаемыя им вещи, неразсудно к тем руце простирают, мняще утеху свою в тех исполнити, дондеже от прикосновения почювствующе вредное, на слезы обращаются: то наша братия страждут. о чем Павел и увещевает таковыя глаголя [1 кор. глав. 14, зач. 156]: Братие, не дети бывайте умы, но злобою младенствуйте, умы же совершенни бывайте. И на ином месте пишет [ко евреом глава 5. зач. 312]: Всяк бо [рече] причащаися млеку, неискусен слова правды: [младенец бо есть] совершенных же, твердая пища, имущи чювствия обучена долгим учением, в разсуждении добра и зла. И во ином месте [ко ефесеом глава 8, зач. 229]: Блюдите како опасно ходите, и не яко немудри, но якоже премудри: искупующе время, яко дние лукави суть. Сего ради не бывайте несмысленни, но разумевающе что есть воля Божия.

От сих Павловых словес аз вину прием, поносительно к своему братству глаголю: зазирая их леность и нерадение: како в толиких раздорах, в толиколожне умноженных церквах, в толиких соблазнах, неопасно небоязненно, непоучительно, неснискателно разума священных предании пребывают: како не готовят слово благодатно разумом [к колас. зач. 260], ведати коемуждо како любовию о своем уповании отвещати [1 Пет. зач. 60], и всем указати стадо сущее превышшаго Пастыря Христа [О вере глава 23, и предислов.], и отлученно явити от прочих оно словом, и подкрепити пасти хотящыя сердца: но вси просто зияют безпечально, аки уже в самое то небо достигше, не тщатся о взыскании истиннаго разума, в нем же вся благая и дивная церкве растет.

Тем же и многим невежеством одержими пребывающе, едино точию созирают, аще кое согласие внешнее воздержание имать, то и сущая Христова церковь. младенческаго се неразумия, зане неведят, что и расколницы и еретицы древлебывшии мнози бяху высокаго жития: яковы быша воздержницы и вретищницы, мантанисты, тертулианисты, татианисты, донатисты, наватианы, духоборцы, евстафиянисты, богомили, и прочии безчисленнии еретицы: яко высокаго ради жития их, некия от них и по водам хождаху немокренно, и во огни бяху неопаляеми, болным от прикосновения здравие подаваху, мертвых воскрешаху молитвами, по судбам Божиим недоведомым: паче же еретики наватианы, и донатисты, велие о себе мечтающе, мняхуся быти святыми, и блюстительми заповедей Христовых, и предании апостольских, милостивы быша, страннолюбиви, обидимых заступатели, скудных награждатели, и смерти небоящиися: и в знак святыни, белая носяще одеяния, истинныя же церкви пастырей, и собрания християнскаго ненавидяще, и аки скверных и грешных гнушающеся, и бегающе правоверных собеседования, нечестивыми их нарицающе: и глаголюще, яко грехов ради християнских во всем мире паде Христова церковь, точию в них единых остася. Святыя же церкве пастырие и учители показоваху им, яко грехов ради человеческих не может церковь пасти: и от них вопрошаху, да покажут от писания, аще во всем мире грехов ради паде церковь.

О чем изволяяи да чтет во обоих книгах Никона Черныя горы, и дееписца Барония. яже от многих, едино свидетельство от Барония взем на среду представляю. Иже в лето Господне 365-е, тако пишет: Донату (рече) лжеепископу Карфагенскому умершу, на его место взыде Пармениан, которыи сущь словесен, писати и хулити православных нача, вся хартии лжами исполняя, а простых прельщая. епископи собрашеся, к себе его призываша, дабы оная его писания разсмотрили. он же ими гнушашеся, и аки свят и чист ко грешным и нечистым приити не восхоте. того ради писати на его лжи Оптат Милевитанскии епископ подвижеся в то время, и глаголет ему в начале: не восхотел еси к епископом на беседу приити, не даеши к себе приступити, беседы уклоняешися: принуждени есмы писанием отражати тя. аз твоим писанием, чтущь е, не гнушахуся, такожде моего послушай брате возлюбленне, аще братом нарещися не возбраниши. От сего познавается смирение и кротость духа православнаго, а надмение и кичение еретическое. хотяще сие доводити Пармениан, яко во всем мире християне суть расколники, а токмо в единой Африце у донатистов церковь кафолическая остася. Сие ему многими доводами возражает Оптат.

Обретеся между донатистами, ихже ереси человек Тиконии, которому странно и дивно возмнеся быти дабы церковь Божия у единых токмо донатистов была, и сопротивися в том Пармениану, и бе от него проклят. Но он противу ему писаше, и крепко его возражаше: показуя яко церковь кафолическая человеческими грехами не может пасти, и человеческая недоверьства Божиих обетовании о церковном во всем мире разширении, разоряти не могут, и яко той кафолик, иже сообщение имать с християны сущими по всему миру. Дозде Баронии.

В таковых убо хулениих на общее сословие християнское погрешают феодосиевы и филипповы, и прочии неразумеющии что ересь, и что грех: и о чем умолчевати, и о чем обличати годствует: и в чем долготерпети, и в чем ревностно поступати спасенно бывает. неразуждающии, но равно приемлющии грех и ересь: темже таковии вящшии испытатели грехов человеческих бывают, глаголюще: Сей то согрешает, а другии оно. и бредят как и онии вышереченнии противницы. яко тако согрешающих несть церковь Христова, и недостоит с ними ни ясти ни пити ни молитися. И приводят в свидетельство апостола Павла с таковыми, не ясти повелевающаго: но он сосуд избранныи се глаголет, пользы ради согрешающаго, а не ядущих ради осквернения, и хотя возтягнути онаго, или паче рещи устрашити, да воспрянет от злых своих падении. якоже и сам Господь Бог к Иеремии пророку заповедает не молитися о жидах неотступивших от злоб своих. но Златоуст оное тако протолкует [к рим. нрав. 14]: невозтягнути (рече) Бог хотя пророка от моления, но устрашити оныя. Ибо Христос человеколюбия ради своего до смерти дарова покаяние и обращение человеческому роду [Матф. зач. 76. Лк. зач. 84, Мк. зач. 20]. того ради Петру верховному ученику своему и глагола: аще кто и седмь десять седмерицею согрешит, покается, прощати подобает. А наипаче простому народу, и запрети Христос грехи братия судити. Павел бо апостол тако о сем к римляном пишет [глава 14, зач. 113]: Нектому убо друг друга осуждаем, но сие паче судите, еже не полагати претыкания брату, или соблазна. Не положи бо нам Бог очи отверзати на грехи братия, и судити тыя, или тех ради во своем спасении сомневатися, и отделятися грешных еретически, но врачевати болящия и разслабленныя грехми [к галат. зач. 213], и долготерпети брату во грехах, подражающе долготерпеливаго Владыку, ждущаго грешных разкаяния и обращения [Мк. зач. 8]. сего бо ради не прииде [Сын Божии] праведныя призвати, но грешныя к покаянию [Лк. зач. 20]. Ты же о человече: что болезнуеши; что снедаешися скорьбию; что ради сомневаешися; что тя от собрания отгоняет святче; брат рече согрешает, и боюся да и аз со грешными пребываючи не погибну. о слепоты твоея: о невежества крайняго. Давыд к Богу глаголет [Псалом 129]: Аще беззакония назриши Господи, Господи кто постоит; Не все ли пред Богом тмою талант грехов должни есмы [Мф. зач. 74]; братия же грехи пред нами аки сто пенязь долженствуют. обаче Бог безгрешен сыи, тму талант грехи прощает: ты же сто пенязь грехов немилостивно тако истязуешь; а грехи своя имаши. Аще бы ты и непреклонен был во грех, обаче и тогда Павла просяща и увещающа тя послушати подобает [к рим. глава 15, зач. 116]: Вы [рече] сильнии немощи немощных носите. И паки просит [к галат. глава 6, зач. 213]: братие, аще и впадет человек в некое прегрешение, вы духовнии исправляйте таковаго духом кротости: блюдыи себе да не и ты искушен будеши. друг другу тяготы носите, и тако исполните закон Христов [зач. 214]. О том же и Христос глаголет [Матф. зач. 20; Мр. зач. 17; Лк. зач. 27, и 78]: в ню же меру мериши, возмерится ти.

Или не было древле во святей церкви грешников; было много и блудников, и прелюбодеев, и татей, и разбойников, и пияниц, и чародеев, и убийцев, и прочих. Ибо церковь Христова аки дом Царев, имеяи сосуды златыя, сребренныя, и скуделныя, обаче вси дому Царева [2 Тим. глава 2, зач. 294]: силен же есть Бог и скудельнаго злат сосуд соделати, за очищение дел скверных.

Тем же дивитися поистинне слепоте нынешних фарисеев, како не могут видети и разумети онаго словесе Христова: еже глаголет [Матф. зач. 25, 86; Лк. 78]: яко мытари и грешницы варяют во царствии Божии, сынове же царствия изгнани будут во тму кромешнюю. Или како сам же Христос к таким фарисеем иногда повеле и рек [Матф. зач. 30 и 95; Лк. зач. 61; Мк. зач. 8]: идите и научитеся, что есть милости хощу а не жертвы. И кая се противность: что Бог хощет, то сии не хощут. Да постыдятся прочее испытающии испытания грехов человеческих, и да помнят притчю оную о мытари и фарисее [Лк. зач. 29]. а наипаче да чювствуют, кому сим грехов назиранием подражатели; фарисеом. кому подобни церковь грехов ради падшу вменяюще; донатистом и прочим. Кому противницы в сем немилосердии; самому милостивому Господу нашему Христу.

Сего ради жестосердия, древнии еретики донатисты, наватисты, мантанисты, и славнейшии в мудрости и в воздержании Тертулиан погибоша.

 

Показание, 3-е.

Яко святокафолическая церковь как в начале своего первеньства, так и послежде не за всякия несогласия, и противныя между последущими себе, обычаи и чины разделятися заповедаше, многажды же ради обождания ко исправлению и снисхождения, и сущим противным терпение показоваше.

 

В начале убо проповедания святых апостол, егда нача сеятися семя слова Божия, якоже во июдеех, тако и во языцех, и обращаеми уловляхуся людие мрежею апостольския проповеди к вере Христа Спасителя Бога, тогда убо и в самех апостолех разгласности некия появляхуся. обаче между собою не раздоротворствоваху.

Ибо и Петр и Павел, во Антиохии разпрешася вмале, но не раздраша мира церковнаго, но в едином согласии церковном пребываху. и Павел и Варнава распревше разделишася друг от друга: обаче христианскаго единьства не разсекоша на части, но в томжде единомыслии благочестия соглашахуся. И сущии в Коринфе распрешася друг со другом: но паки во едино союзство братолюбия и во общество единомыслия церковнаго снидошася.

Такоже и в чиноприятиих ради некиих снисхождении у апостолов между собою распрения прозябяху. якоже и Павел святыи егда преже обрезав. [неких ради сомнителных июдеов] и крести Тимофея. И паки егда прочии апостоли по обрезании крещаху еллинския народы. Павел же сопротивно сему нача разоряти жидовския  законы и обычаи, да не в препятие новой Христовой благодати будут, и кроме обрезания крещаше.

Чесо ради воздвигнушася ревностию на него галатяне, и многая хульная глаголаху: и апостольскую тем проповедь помрачающе бяху. о чем оныи сосуд избранныи к ним поносителне пиша глаголет [к галат. глава , зач. 204]: О несмысленнии (рече) галате, кто вы прельстил есть непокоритися истинне. И ниже: Тако ли несмысленни есте: неченьше духом, ныне плотию скончеваете. и прочая. Такоже бысть тогда в начале и у верующих в Христову проповедь между собою некое несогласие. Понеже обращеннии тогда быша из двоих народов июдейских и еллиньских. ибо июдеи, не весма своих обычаев испразнишася. такожде и еллини некия своя обычаи храняще содержаху. И сего ради между ними немалое распрение сеяшася: от июдеев бо еллины многажды обличаеми бываху, яко в пищах [по Моисейскому закону] себе ненаблюдяху. еллини же июдеи за то препирающе. яко покорьшеся евангельской проповеди, а совершенно не оставиша обычаи и чины жидовския. о чем учитель языков, во апостолех же верховнейшии, к римляном в послании пиша о ядении совокупляет их разумы, сице глаголя [глава 14, зач. 112]: Изнемогающаго (рече) в вере приемлите не в сомнение помышлении. ов бо верует ясти вся, а изнемогаяи зелия да яст. ядыи неядущаго не укоряет: и неядыи ядущаго да не осуждает: Бог бо его прия. ты кто еси судяи чюждему рабу, своему Господеви стоит или падает.

О сем же бысть в верных распрение и во Антиохии [деян. глава 15, зач. 36], о чем святии апостоли соборне из Иеросалима писавше до Антиохии, и тамо разпревающияся, яко не о богословных вещех согласиша, да о сем не любопрятся, или которствуют. ниже позорствуют друг друга глаголюще: ты убо еллин, а ты жидовин. или он сица есть, еллинская мудрствуяи, а он жидовским последуяи.

Бысть же паки во 198-м годе, по апостолех в первеньствующей церкви, между асийскими и восточными епископы немалое несогласие в праздновании святыя Пасхи. овии бо из них праздноваша Пасху по полноте перваго месяца, (сиесть марта) овии же четвертаго надесять дне, по зачатии сего месяца, в кии день июдеи праздноваша. глаголюще, яко древнии апостольскии обычай соблюдающе, во оно [в то] время празднуем, и проч.

Сего ради Виктор папа клятве их предаде, и от церкве общения отсече. Сей убо клятве мнози противу сташа, якоже Ириней святыи Лугдунскии епископ и зело поношаху Виктору о сем, яко толь многих епископов дерзнул от церкве отлучити. ихже прежде его бывшии папы не отлучаху ради онаго стерпимаго разньствия, мира и любве общия нераздорствоваху. О чем Баронии в лете Господнем 198-м, взем от историографа Евсевия греченина свидетельствует.

Быша же и между святыми некая разпрения. якоже у Епифания с Златоустом. такоже и у Кирила с ним же. Или у того же Кирила с Феодоритом и Ивою епископы. коликая брань между ими растяше. якоже Феодориту на Кирила нанести, что Духа Святаго и от Сына исходити мудрствует. обаче по смерти уже Кирилове примиришася, и прияты быша, аще же и в толиком разстоянии, в разумех быша, но разглашатися всему обществу не поучаху. аще бы учили, то коликое бы волнование народом произвели. темже добре о таковых, пророк глаголет: праведник аще и падет не разбиется.

Но и онии святии древлезападнии учители Амбросии Медиоламскии, Иероним, и Августин Иппонскии и прочии, Духа Святаго и от Сына исходяща, некако разумеваху. О чем святейшии и премудрейшии патриарх Константиноградскии Фотии пиша к прочим вселенским патриархом засвидетельствует тако: мужей (рече) святость облобызаем, учительство же о сем, кроме Господьскаго гласа не приемлем, и прочая.

Такоже и послежде западнии многая в содержаниих восточных. [до отступления их конечнаго от восточныя церкве] несогласия имеяху. еже о опреснцех, и о браках такоже и о прочем. и за сие восточная церковь, яко полномочная сущи в суждениих, западных от соединения не дерзаше вскоре отвести. Но толикая убо лета терпеливно их несогласие ношаше. яко еще, на шестом вселенском соборе оныя западных противности поминахуся правилне. конечное же отлучение и проклятие от восточных западным в 56-е по тысящном временочислии годе содеяся. но и тогда за явное мудрование западных о Святем Дусе, от Отца и Сына исхождении восточнии возревноваху конечно отлучити. Толикое кафолическая церковь имеяше и имеет к погрешающим снизхождение. по толиких убо летех, яко неволею понуждаема отсещи тех повинуся, матерски о них боляше.

Слышите вы о раздоролюбителие: жалость и любовь кафолическаго духа. не по вашему убо неразсмотрителному стремлению. она мать наша святая церковь поступает, якоже вами творится. яже за малейшия кия любо несогласии вашему умствованию, или греховныя случаи, еретическим судом тяжко осуждаете, кроме всякаго пождания и терпения, и без общаго всех православных християн собора, на таковыя всестрашныя степеней востещи дерзаете раздоры. В симже и кроме всякаго разсмотрения священных писании, в таковыя богопротивныя сети жалостно увязаетеся. О сем убо довлеет, паки к предлежащем возвратимся.

Случашеся же и в России древле, иже некия между чистаго и богосеменнаго жития возрастаху плевелы. якоже и во Пскове трегубившии аллилуию бяху. или по свидетельству Максима Грека, в книгах древлеписменных российских многая противных речей, согласующая неким ересем вмещахуся, иже и многая он исправи. за сие же исправление, ово по зависти, ово же по грубости тогда российских пастырей, многая оная многопремудрая глава претерпе, поношения, досаждения и изгнания. иже и еретиком его нарицаху. о чем книга его о сем доказует.

Но и Дионисии архимандрит Троицкия лавры, такожде за сие много озлобления и хуления пострада. быша же и в чинех многая разньствия. якоже в соборных церквах, такоже и во святых обителех, обаче о сем разгласия между собою никакова не имеяху. но усердно друг со другом соглашахуся. прозябаху же тогда в российском множестве и безчинныя некия обычаи. якоже Стоглав, и Степенная, и прочия древлероссийския истории о сем доказуют. Но и о сем такожде безсоветных раздоров между собою не сеяху, и святыя церкве единьства на части не раскалаху. но общесоборным судом вся сия истребляти подвизахуся.

Темже убо сия разгласницы: мною в восточней и западней и древлероссийстей церкви приведошася по прилучаю деющияся неблагосклонныя истине вины, не ради овых или иных киих противностей защищения. не буди того: но ради ваших смущении, и многочастных раздоров. киими вы зело помрачаете всецерковную светлость, и велию хулу, на тоя православие наводите, творяще неблагословныя, ниже благословныя схизмы. Но за малейшии кии любо братнии недостаток, или за общее снизсхождение, на части раздираете ризу Христовы церкве, юже наш Спаситель искупи своею вседражайшею кровию.

Сице убо подобне с плачем писаше всепремудрыи наш всецерковныи пастырь Господень Андрей Дионисовичь, к новогородским христианом, отлучающимся церковнаго исполнения, изъяв от богоглаголиваго Златоуста словеса, тако глаголет: Ничтоже (рече) тако раздражает Бога, яко еже церкви разделятися. и такова убо, и толь тяжка расколов церковных беда. оле жалостнаго плача; не мину сие губительство, бедне терпящих християн. не мину о церковном благоверии страждущих, а о церковных преданиих раздирающихся. И нижше моля их увещевает: Помилуйте помилуйте возлюбленнии; тако свои души, яко прочия грубоумныя, в дерзостех своих увязающия в тяжкия хулы, умилитеся братия, и мира християнскаго не терзайте. разсмотрите, и разсудите потщитеся возлюбленнии о согласии церковном, и миротворцы христоименитым людем будем. да сынове Божии быти получим, по священному гласу: блажени миротворцы яко тии сынове Божии нарекутся.

 

Показание, 4-е.

Яко святая Христова церковь имен человеческих нарицания на себе не приемляше, но единем именем Христовым. в ней пребывающыя именовахуся. [еже есть християны] А имены человеческими еретицы любяще нарицатися. якоже арияны и македонияне и прочии, от Ария и Македония. убо и федосеевым и филипповым тако нарицающимся, от имен своих началоводителей, святей церкви зело будет противно. согласно же оным ея противником.

 

Понеже по спасителном Христовом вознесении, в начале самыя проповеди християнския веры, вси верующии в Господа нашего Iсуса Христа, не християне, но учениками точию именовахуся [Прение святаго Афанасия со Арием]. и за еже мнози творцы учении новых обретошася. быша учению против стояще апостольскому. и всех последующих своих нарицаху учениками. и от того не мощно бысть раззнати между правых и ложных учеников, аще кии Христу, или Досифею, или Февде, или Июде некоему [деян. зач. 15], или убо Иоанну последующии, иже аки бы себе Христу веровати исповедаху, единем они ученическим именем звахуся. тогад апостоли сходящеся во Антиохию, (якоже о том Лука в Деяниих засвидетельствует:) всех учеников новым именем рекше християны наричют. разделяюще их от общаго ложных учеников наречения. да и Божии Исаием проречения глагол исполнится. (иже рече) работающим ему прозовется ново имя. Темже познавается отсюду, яко общее есть последующим святей церкви именование, еже нарицатися християнами. (а не федосеевыми или филипповыми, якоже тым разгласием последующии любят тако нарицатися.) вящшаго же ради разньствия, со инославными (кия такоже нарицаются) изначала первеньствующия церкве, присвоено и сие прилагательное имя: кафолическии. якоже о том Баронии в лете Господнем 43-м. (взем от Пацианова послания) засвидетельствует тако: Имя имамы христианин, прозвание же кафолик: оно именует имя, а сие показует: толкующь же сие имя кафолик с греческаго на римскии язык: кафолик есть везде едино. или [по мнению мудрейших] кафолик нарицается послушлив, а кто послушлив, той есть и христианин, и тако кафолик есть христианин. то древнии сей учитель. да познаем како имамы быти верными християнами и кафоликами: ибо единением и послушанием к святей церкве, и к началником нашим того имени сподобляемся. Дозде Баронии.

От сих доказательств ясно уверяется, яко святей церкви последователем зело чюждо и бедовместно, и многим раздором вводительно, еже кроме сего християнскаго именования, такожде и прозвания кафолическаго, вмещати человеческих имен названия.

Егда убо и Павел апостол токмо услыша о том в коринфех велие любопрение вводящееся, и на различныя мнении разделяемыя. такожде и расколы уже в тех сеющыяся уведев. овии бо из них Павловы нарицахуся. а овии Аполосовы. инии же Кифины. а друзии Христовы именовахуся. Сего ради люботщательне с молением к тем пишет, разумы их совокупляя [1 кор. глава 1, зач. 124]: Молю вы (рече) братие, именем Господа нашего Iсуса Христа, да тожде глаголете вси, и да не будут в вас распри, да будете же утверждени в том же разумении, и в той же мысли. возвестися бо ми о вас братие моя, посланым от Хлоиса, яко рвения в вас суть: глаголю же се, яко кииждо вас глаголет: аз убо есть Павлов, аз же Аполлосов, аз же Кифин, аз же Христов. еда разделися Христос; еда Павел распятся по вас, или во имя Павлово крестистеся. И паки к ним нижше о их неутвержении глаголет [глава 3, зач. 127]: и аз братие, не могох вам глаголати яко духовным, но яко плотяным, яко младенцем о Христе. Млеком вы напоих, а не брашном: ибо неу можаста, но ниже еще можете ныне: еще бо плотстии есте. идеже бо в вас зависти и рвения и распри, не плотьстии ли есте, и по человеку ходите; егда бо глаголет кто, аз убо есмь Павлов: другии же, аз Аполлосов; не плотьстии ли есте. кто убо есть Павел; кто же ли Аполлос, но точию служителие, ими же веровасте, и комуждо, якоже Господь даде, аз насадих, Аполос напои, Бог же возрасти. Темже ни насаждаяи есть что, ни напаяяй, но возращаяи Бог.

Подобне же сим коринфом погрешаху в таковых именованиих онии любомудрецы прящиися о высоте величества [учительства], триех иерархов вселенских, Василия Великаго, Григория Богослова, и Иоанна Златоустаго. Кииждо из оных любопрителей, к нему же любовь его влечаше, того и возвышающь бяше. Овии бо из них вышше полагаху Великаго Василия, высокоглаголива того нарицающе, яко всех превозшедша словом и делы, малем чим ангелом не равна, нравом тверда, и неудобь прощающа согрешения, и ничтоже земное имуща. нижша же творяху Иоанна Златоустаго, яко противная оному в себе имевша, понеже удобен бяше к помилованию, и скоро к покаянию привлачающии. Друзии же паки сего божественнаго Златоуста возвышаху, яко человеколюбнейша суща, и разумевающа на естества слабость, и яко в поучениях гладкоречива, всех на покаяние множеством медоточных словес своих наставляюща, и предлагаху того паче Василия Великаго, и Григория Богослова. Инии же Григория Богослова держахуся, сказующе, яко той добровещанием, искусным же изъяснением словес, и речении сладостию, всех в еллинском наказании бывших пресловутых, и в настоящем времени сущих превзыде. Тако убо святаго Григория возвышаху, инии же того снижаху. И от сего бысть разделение многим, и нарицахуся овии иоанианя, друзии же василияня, а инии григорияня. и препирахуся о сих именах мужие в словесех и любомудрии искуснии. Сему тако бывающу, по некоем времени, явишася велиции сии святии. первее по единому кождо особь, таже вси трие купно, яве а не во сне, Иоанну епископу евхитскаго града, зело словеснейшому мужу, и наказанию еллинскому доволно изученну, [якоже исписанная от него показуют] на верх же добродетелей достигшему; и единеми усты рекоша к нему: мы едино есмы, якоже видиши, у Бога, и ничтоже в нас есть сопротивно, или распрю имущее, но во времена своя, особь кождо нас, божественным подвизаеми Духом, яже на спасение человеком учительства списахом,  и им же тайно научихомся, та наяво предахом, и первыи убо в нас несть, ниже вторыи, но аще единаго речеши, другая оба последуют; темже востав повели распрю имущим о нас не разделятися. ибо якоже живым нам бе, и по преставлении есть тщание, еже в мире и единомыслие приводити концы вселенныя: ктому уже в един день совокупи нас, и якоже тебе лепо есть, праздничная нам состави, и прочим предаждь, яко мы едино есмы у Бога. и прочая рекше возхождаху к небеси.

Зрите убо якоже святии апостоли, тако и богоноснии учители церковнии, весма не любят в их имена прозыватися правоверным. Но якоже сами единою мыслию, и теплейшею любовию вси обще ко Христу Спасителю горяху, тако и нарицатися и самем, сице и последующим их учению, желаху и повелеваху християнами кафолическими. И по преставлении своем являющеся, запрещаху разньствующим нарицатися их именами. и разделяющимся повелеваху единокупным быти. и от сих вышеприведенных свидетельств доказуется, яко во святей кафолической церкве таковых имен человеческих обще верующим несть обычая налагати. разве в противных тоя православию, еретических сект содержателех. от которых безчисленнии именовании от имен своих зачаловодителей насеявшися расплодишася. якоже от Ария арияне. и от Македония македониане. или от Махомета махометяне. также от Лютора и Калвина, лютеране, и калвинистове обыкоша нарицатися. Котораго наречения богословеснейшии вселенскии учитель, златоточная уста опасая верныя, и зазирая таковых сице глаголет [бес. на деян. нравоуч. 33]: Еда бо от человек наречение прияхом; еда бо вождь нам кто есть, якоже овому убо Маркияну, овому же Павел Самосатскии. овому же Манихеи, овому же Арии. другому же ин кто ереси начальник.

И паки той же златыи языком, в слове о вочеловечении Господни глаголет [Маргарит, глава 7. о вочеловечении Господни, лист 485 на обор.]:  Вем (рече) яко уже глаголах вам, но и ныне глаголю всякия ереси явленны суть начальницы. от Ария, арияне, от Македония, македонияне, от Евномия, евномиане. от Маркиона, маркионяне, от Савелия, савелияне, от Манента, манихеи, от Монтана, монтанияне и прочии ереси такоже поряду. аще же вера церковная есть ересь. и да рекут еретицы кто есть ея начальник. да рекут яко он сица человека начатся ересь вашя, да рекут со дерзновением. Зри бо Божию благодать, не попусти Бог славе апостольской нарещися во имя человече. не наречем бо ся македонияне, или инаго таковаго, но аще и рекут единосущны отцы, не имя реша, но веры согласие показаша. Аще же вопросиши тех, кто первие рече единосущныи, не имут рещи яко он сице, и он сица. но триста и осмь надесять отец, согласен глас испустивше, исповедания в благочестие. Внемли, како и самое то добродетели и истинны сияет исповедание, не начяша согласнее веры нашея, ни два, ни три. но весь собор, от востока до запада, полунощия, и полудния. идеже бо истинна является, вся соглашаются.

Вопроси же еретика, еже хощеши глаголати, аще согласно со инеми отвещает. Аще же вопросиши православна, аще и биен будет, аще и неискусен, сия глаголет согласно. аз во Отца и Сына и Святаго Духа, едино царство, и едину силу исповедаю. вопроси же еретиков, дву или трех, како веруете. и не сойдутся на един глас, и неединомысленно рекут. но ов убо глаголет созданна. ов же нерожденна, ов же смертна, ов же неприсущна. и аще ли возникнет, глаголет аз вем яко Отец сотвори Сына, Сыном же вся бысть. паки ин исправляя сего глаголет, не тако. но убо Отец сотвори Сына, Сын же вся состави. идеже бо несть истинны, тамо ни твердости. но яко гнилая риза раздирается, и яко же старая, и ветхая, аможе аще торгнеши ю, дерется. и аще ли мало кого от еретик привлечеши в беседу, обличается гнилость и от прилучающих вин раздирается.

И прочая тамо пространнее зри. мы же краткость сего нашего сочинения лобызая, в далегкость шествовати о еретических разгласии и раздоротворных путей не пустихомся. Понеже святый Епифании описуя еретиков количество и разность, исчисляет их до осмидесяти. всех же сих во именовании и во умствовании не согласных изъявляет. Никон же черногорскии, и Иоанн Дамаскин вящше ста и пятидесяти их быти описуют.

Не точию кииждаго тех секта последователи несогласни в мудровании бяху. но и сами с собою, неединоумственнии обретахуся. яко же и выше от Златоуста показася. Такоже и дееписец Баронии в лете Господнем 394-м о донатистах свидетельствуя сице доказует: Во Африце донатисты сошедшеся на собор в Багаи, разделишася на многия части, сварящеся между собою о епископствах. едини последоваху Примиану, и нарицахуся примианисты. друзии Максимиану, и нарицахуся максимианисты. инии Клаудию, и нарицахуся клавдианисты. инии Рогату, и нарицахуся рогатисты. всяк за свою ересь великим упорством противляшеся друзей. бяху же толь мнози, яко до трех сот епископов собиратися на соборища своя от единыя страны можаше. И в лете 368-м о тех же пишет: Обретеся между донатистами, ихже ереси человек Тиконии, которому странно и дивно возмнеся быти, дабы церковь Божия у единех токмо донатистов была, и сопротивися в том Пармениану, [донатскому учителю] и бе от него проклят. Но он противу ему писаше, и крепко его возражаше, показуя яко церковь кафолическая человеческими грехами не может пасти, и человеческая недоверства, Божиих обетовании о церковном во всем мире разширении, разоряти не могут, и яко той есть кафолик, иже сообщение имать с христианы сущими по всему миру. Тойже паки в лето 358-м, о несогласии ариан пишет: Яко между еретиками гордыми и слепыми, раздорам и несогласиям бывати обычно есть: едини арияне прияша слово существа или естества, яко общее есть Сыну со Отцем, якоже исповедаша во Антиохии на освящении, и в Сардикии и в Смирне, собора Никейскаго, ниже словесе, единосущен, приемлюще, и сим от православных разньствоваху, которых совершенное бысть с сим словом исповедание. друзии ниже существо, ниже подобие Сыну со Отцем общее даяху. и сицевии бяху множайшии и первейшии. таков бе Акакии Кесарийскии. Евдоксии Антиохийскии, Уалент и Урсакии из Паннонии. Дозде Баронии о несогласии еретическом.

Но  и мы довлеем о них свидетельствовати. прочее же время есть внити в показание о пререкании раздоротворствующих нам в молении за внешния власти. о чем которая есть наиважнейшая причина их сомнения. На что с доводами ответствие полагаем.

 

Показание, 5-е.

О раздорницех в молении за внешния власти [еванг. от Луки зач. 70; и в толк. Феофилакта; и Баронии лета Господня 73, лист 71].

 

Во дни пришествия Христова в мир. бяху нарицаемии галилеяне, ихже вожди быша Июда и Садох, раздорники жидовския, и многия народы к себе обратиша, смятение на властей творяще, даней не хотяху давати, ниже в приношении жертв о римских царех мольбы творити. уведано же то бысть кесарю римскому, посла на них Пилата с воиньством, и изби их во время жертв. О их же избиении возвещено бысть Христу [Лк. зач. 70]: И отвеща им рече: мните ли яко галилеяне сии грешнейшии паче всех галилеян бяху. яко таковая пострадаша; ни. глаголю вам: аще не покаетеся, вси такожде погибнете. Зде Христом не вменени быша сии избиеннии за мучеников Божиих, но за погибших: такожде [рече Христос] и вы погибните. но ересь сия галилейская и раздор и по смерти Иудины пребысть. о чем доволно от историков засвидетельствуется.

Иеросалимская же церковь, за кесарей неверных в жертвоприношении мольбы творяше; свидетельствует сие дело послание Иеремии пророка в Вавилон к плененным июдеом, в нем же писа, да молят Бога за Навходоносора царя [Минея чет. маия 1; Иерем. глава 29].

Писа же и Варух пророк с сущими братии, и сребро собравше послаша во Иеросалим, да купят на не потребная в жертву, и да молят Бога за царя Вавилонскаго, и за сына его, да будут дние их, яко дние неба [Варух глава 1].

Повнегда же израильтяном из Вавилона во Иеросалим свободитися, уставлено бысть перским царем от даней киликийских и финикийских даяти июдеом на жертву Господню, во всяко лето, елико потребуют, да приносят Богу вышнему за царя, и рабы его, и молят Бога за живот их. Зри в первой и второй книгах Ездры пророка, главы 6-я.

Такожде и послежде о римлянех и их самодержцех израильтяне во своих жертвах в церкви Господу Богу моления приношаху. О чем в 1-й книге маккавейской, во главе 12 повествует.

Но онии июдейския раздорники, ереси галилейския, вопреки сташа пророком оным, и церкви иеросалимской, не моляху Бога за царей, и рабов их, темже и погибоша.

В новой благодати во истинной церкви, тожде обыкновение древнее о богомолии властей творяшеся. о чем Павел апостол, не просто, но аки о великой вещи, всех верных на то принуждая просит глаголя [1 Тим. глава 2, зач. 282]: молю убо вы прежде всех творити молитвы, моления, приношения, благодарения, за вся человеки, за царя и за всех во власти сущих: да тихое и безмолвное житие поживем. во всяком благочестии и чистоте. се бо добро и приятно пред Спасителем нашим Богом: и проч.

На сия Павлова словеса святыи Златоуст глаголет: В самое то безкровныя жертвы приношения, за неверных Бога молити [книга Завещания апостольския 8, глава 10?]. Зри о сем в беседе 2, на послание к Тимофею. и в Толковом Апостоле. и у Никона Черногорскаго, в книзе Заповедей, во главе 26.

Последовательне же апостольскому повелению сему, неотложно восточная церковь молитвы за неверныя цари и рабы их творяше.

Свидетельствует же се Афиногор философ християнскии, тако пишущь ко Аврелию кесарю римскому и сыну его: мы [рече] за державу вашу всегда Бога молим, дабы и сын отеческое царство восприял, оное всегда умножал: дабы вам все благополучно успевало, то и нам полезно есть, да мирно житие имамы, и вам доброхотно по повелению служим.

Засвидетельствует же восточныя церкви обычай сей, и святыи мученик Севастиан, иже к царю Диоклитиану и прочим ту предстоящим тако рекии: Ведайте яко християне много вы пользуют. ибо тех молитвами град сей на лучшее успевает. не престают бо молящеся о царствии вашем, и о здравии всего римскаго воинства.

Такоже и древлероссийская церковь последуя восточней егда бе под областию ордынских царей, в жертвах своих посылаемыи дар ими, приношаше за них. О чем засвидетельствуется в страдании преосвященнаго Феогноста митрополита всероссийскаго, идеже сице пишет: Видяху бо погании, яко и первии царие их нечестиви бяху и немилостиви и кровоядни. но обаче с клятвами завет полагаху. и ярлыки своя даваху митрополиту и епископом еже не имати дани никоеяже ни на едином от причту церковнаго и на всех живущих во областех чину церковнаго. и всех сих имеяху яко Божия слуги. и в дар даяху их небесному Богу. есть же и доныне таковая писания тех нечестивых царей.

Но и правильное повеление еже молити за таковыя обретается. о чем 84-го правила святых апостол. в толковании сице утверждает: Моисеов закон рече. Князю людей своих не речеши зла. и верховныи апостол Петр царя чтити повелевает, и за вся сущыя в величестве, рекше во власти, паче и еще тогда и неверни бяху. Досаждати убо цареви, или князю всем возбранено есть. Дозде из правила.

Тако засвидетельствовахом, яко сему общему обычаю, еже молити за внешния власти, еще при Спасителевом пришествии в мир раздоротворствоваху нецыи с июдеи, и от Него в погибших вменени быша. тако пророки подкрепихом, яко иеросалимская тогдашняя церковь, непременно за оная в своих мольбах жертву приношаше. Сице и в новой благодати учитель языков, тойже закон излагает.

Сице историописатели повествуют, яко восточная церковь молитвы своя за неверныя кесари творяше. Сице последуя восточней и древлероссийская о таковых дар в жертву своих возношаше, тако и правилное о том повеление обретается.

Едини сии наши раздорницы согласующии оным, молитв си не творят, противницы суще апостольскому повелению, и обычаю восточному и древлероссийския церкве, и правильному заповеданию.

 

Пререкание, 1-е.

Рекут ли нам противствующии, яко восточныи учитель Симеон Фессалоникийскии за неверныя власти молитися запрещает.

Отвещаю, 1-е.

Еда убо о чюднии! сей учитель восточныи противен бе святому Павлу учителю языков, и того словес толкователю богоглаголивому Златоусту. или паче самому Началопастырю пастырем Христу Спасителю, ко июдеом тако глаголавшу: Воздадите [рече] кесарева кесареви, а Божия Богови. Сия же учителем протолкующим. не токмо царю дань давайте (реша) но и Бога молите за него. Будет ли всем сим Симеон вопреки полагати? ни; не буди. Ибо егда сам Христос, и апостол глаголаста, тогда быша едини токмо невернии царие. Симеон же бе во времена царей благочестивых, утверждающих святое благоверие, и охраняющих верныя от варварскаго нашествия, и под тех державою пребывающии. Сице и не летьствует о неверных тогда прилучшихся во иных державах властей молитвы творити, или законы излагати, и повелевати. наше же ныне время не Симеонову, но апостольскому точно согласует. убо и в туне вами приводится на срам себе. Понеже по богоносных отцу гласу: повелевается разсуждати время и вину и различие вещей. аще же не сице, то главою снити имамы, и горняя долу будем. якоже Никон черногорец во 2-й главе своея книги пишет.

Отвещаю, 2-е.

Но и Симеон Фессалонитскии тамо о святей литоргии толкуя, не повелевает не жертвы приносити, но на имя от неверных приношаемыя и просфиры, и части из просфир вынимати, и к ним посылати. якоже и самая святыя литургии словеса запрещают к таковым посылати: Святая (рече) святым. И паки тойже Симеон в книзе своей, в вопросоответствии 47-м, о приношаемых частицах на имя глаголет: яко вместо лиц, частицы суть приносящим, и умное бывает со Христом причастие. Темже ниже согрешающих явно, и не отступающых, подобает прият просфиры.

Зри яко не точию от неверных приносимыя просфиры приимати, или им части посылати Симеон повелевает. но и от явно согрешающих запрещает. неверным же и Христос, не повелевает святая даяти. не дадите (рече) святая псом.

Отвещаю, 3-е.

Внидем и в самая оная словеса, яже от противствующих нам предлагаются, и опытаем самою истинною, всеконечно ли запрещает Симеон за неверныя цари молити? На что самая его словеса в книзе во главе 335-м тако глаголющая предлагаем: Молится убо церковь Павлов закон хранящи, о царех и иже в превосходительстве, паче же ныне сущих верных о иже поборати им к Богу, и покорити им супостатов, да мы тихое житие имеем. благочестие в чести храняще.

Зрите ясно, яко и Симеон не отрицает молитися за неверных царей. аще бы отрицал, не бы Павла апостола во свидетельство приводил. не бы церковь Павлов закон хранящую засвидетельствовал. Павел же всем учителем утверждающим. за неверныя еще тогда бывшия цари молитися законополагаше. Но и Симеон сею последующею речию яве изъясняет, еже рече, паче ныне сущих верных. якобы рещи, больши и лучше любити или молитися о верных, яко поборающих о истинне, паче же в то время царьствующих правоверно прекословити сим и о неверных молитися. И сие речение паче, по грамматическому разумению, есть наречие, знаменования, разсудительнаго. якоже и апостол о любви разсуждая кому прикладнее имети, глаголет: ко всем (рече) любовь имейте паче к единоверным. Сим не отрицает, и к неверным по случаю любовь являти. Тако убо по вышепредложенным, и святыи Симеон, Павлову закону ниже противится, ниже вопреки святей церкви за внешния власти молитися в подобно время запрещает.

Отвещаю, 4-е.

Святии и богоноснии отцы, к тысящи и четырестам пятдесять и пять, писавшии к Феофилу иконоборцу, исповедоваху своими словесы, яко онии в жертвах своих, такоже и в соборных молитвах о его державе своя моления выну Богу приносиша. О чем во многосложном своем свитце тако глаголют: Темже убо и мы [реша] от чистыя веры молитвою к Богу, день и нощь в молитвах и мольбах, в литиях же и соборех святительскими и божественными приношеньми и нашими потребную и лепотную память, о благочестивой вашей державе, и о царстей вашей победе исповедаем в святых тайнах. Еда убо речете о чюднии! и сим тысящечисленным богодухновенным отцем Симеону Фессалонитскому вопреки стати, или оным несогласно святей восточней церкви писати. не буди того; ниже сим. ниже Симеону учителю восточному разглашатися. Но ведяху вси обычай святыя церкви непременно утверженныи чрез апостола Павла, и прочих того словес толкователей. Како можаху разглашатися. никакоже никако.

Отвещаю, 5-е.

Не неведяше учителя восточнаго Симеона, и прочих учителей церковных, и древлероссийская святая церковь. но не разгласуяся тем творяше. егда бе под ордынскими царьми обладаема. за киих посылаемыи от них дар непречашеся небесному Богу возносити. Но и в предисловии Кириловы книги. тех же сего обычая началоутвердителей. [сиесть] Христа Спасителя, и апостола Павла, и Златоустаго в свидетельство приводя, во утвержение моления за внешния самодержцы полагает. Еда по вам и древлероссийская святая церковь не узна, и вопреки Симеону, сии свидетельства положи. Престаните о слепцы! во тме вашего неосязания бредить, и противлятися святей церкви. Но лучше последуйте, ясно положенному святыми апостолы, и святыми отцы обычаю, паче же утверженному самем Христом Спасителем. по реченному: Не прелагай предел вечных яже положиша отцы твои.

Отвещаю, 6-е.

Еда ли неведяше, и белороссийская церковь, последующая восточней. якобы по вам инако полагающаго святаго Симеона. Иже моляшеся во святей литургии о польских кралех латинския веры. якоже о сем виленския печати Служебники засвидетельствуют. По вам не знаяше сего, и Иона митрополит всероссийский. иже моление о польском крале Казимире латинския веры приносивыи. яко же от его послания видети есть.

Но о сем прекословствующим довлеет.

 

Пререкание, 2-е.

Не молчат противствующии вопреки предлагати нам, глаголюще, яко прежнии отци, до каммискаго приезду, о властех соборне не моляхуся.

Отвещаю, 1-е.

Прежнии отци, в начале соловецтии, аще и не моляхуся якоже рекосте, обаче благословную вину имеюще. Понеже кая им тогда польза молитися за оныя. когда они совершенно хотяху святую обитель разорити. когда желаху древняго благочестия отец отлучити. тогда прилично тем видимо о победе, или о обращении тех сердец к милости и оставлению содержить свое благочестие молитися. Ибо онии приступающе к стенам нудяхуся внутрь вскочити святыя ограды, преподобным же отцем нужда бе тогда обороняти стены градныя вкупе же защищати и святое благочестие. Темже не леть есть в подобие привлачати нынешняго времени случаи оному. Понеже от ныне Богом определенных нам властей дается всецелая свобода соблюдати древнее благоверие убо не на них по общему святыя церкви, обычаю молитися летьствует. Несть же известия, аще всеконечно отцы не моляхуся. а понеже в приношении жертвы, просфира за царьское величество ими не отлагашеся, темже и отцы соловецстии неконечно немоляхуся.

Отвещаю, 2-е.

В Выгорецком же общежительстве аще и не моляхуся соборне, но богомудрии учители выгорецтии Андрей и Симеон Дионисовичи и прочии, разум о том [еже молитися] весь святыя церкве имеюще. и всем сие предлагаху, еще до каммискаго приезду, яко законно есть за власти Бога молити. но имуще такожде некия благословныя вины.

Понеже егда еще до конечнаго основания обители, бяху тогдашнии отцы от гонителей в великом утеснении. и тогда они не о видимых церемонии учреждении пекущеся, но едино то тщание в них вящшее бе, еже бы како благочестие невредно соблюсти. такоже и друг от друга разсеяни быша, не имеяху полных собрании. но овии в малейших хижах от гонения соблюдахуся, овии же у огненных нудей летом на дожде, зимою же на снезе, свое благочестие нудяхуся сохранити. негли же сих ради вин и озлобления зелнейшаго от еретик молитвы за них творити не вообычишася.

Отвещаю, 3-е.

Аще же убо от тех богодухновенных учителей, и тогда законней то назнаменовашеся быти, еже за власти молити Бога. темже смотрителное некое от отец тогда снисхождение к народу бяше, паче же ради безвременнаго колебания. смотрительное во обдержное и законное везде и всюду от учителей запрещается полагати. якоже у Никона черногорца в книзе Заповедей, в слове, 2-м и 28-м, такоже и во Уставе велицем во главе 40-й, засвидетельствуется.

Отвещаю, 4-е.

Общее и всецерковное повеление всюду обретается, еже бы здравому и всему утверженному обычаю более слагатися. но овыи еже молити за внешния власти общии и всецерковныи бе, якоже и выше известися. убо и леть есть общему обычаю без сумнения последовати.

Отвещаю, 5-е.

Быша убо и древле нецыи восточнии и западнии учители, благочестивым учительством зело прослывшии, но в некоем своем учении, или неведения ради, или неких ради упорных снисхождения, вопреки полагающе общесоборному умстованию. якоже от западных - Иероним, Амбросии великии, Августин Иппонийскии, и Ириней Лугдонскии, от восточных же - Дионисии архиепископ Александрийскии, и Мефодии Патрскии, и прочии мнози. Обаче восточная церковь святость приемлет без посредства, словеса же их кая быша несогласующая общей истинне не приемлет. О чем блаженнейшии и пресвятейшии Фотии патриарх Константиноградскии в послании своем к восточным патриархом о римлянех пишет.

Но от наших отец аще в действии за снисхождение и несовершаемо бе, в разумении же, согласно общему святыя церкве обычаю, полагашеся.

Отвещаю, 6-е.

Но и древнии онии раздорницы галилеяне, во время Христова вочеловечения бывшии, тако же указоваху на прежния жертвы Моисеом уставленна, яко во оных не велено жертву за внешния власти приносити.

Уставленныя же послежде от старец людских жертвы за римскии язык браняще, и раздоры о том деяху. О чем изволяяй да чтет Апостол толковыи преводу Максима Грека, Деянии глава 5, зач. 12, толкование Златоустово. такоже и древлевосточнаго историописателя Георгия Кедрина царство Тивериево, главу 4.

Убо и нынешнии раздорницы точно тем творяше, не на общии закон взирающе, но снисходительному случаю последующе: раздор неблагословныи со святою церковию не по разуму деют. И тако зело противни являются.

 

Пререкание, 3-е.

Вземлют противствующии во свидетельство оно Господне слово к пророку Иеремию о жиде глаголанное. (еже есть) не молитися о людех сих и не проси еже помилованным быти им, и не моли, ниже приступай ко мне о них, яко не услышу тя.

Отвещаю.

Противу котораго их привождения не сам ответствую, но умолю прити к разрешению Павловых словес толковника, всепремудраго Златоуста, еже на послание к римляном толкующа сице: Глаголет Бог пророку Иеремии. Не молися о людех сих, яко не услышу тя, не востягнути его хотя молящася. [вельми бо желает спасения нашего] но оныя устрашити: еже убо и пророк сведыи, не престаяше моляся. Дозде Златоуст.

 

Показание, 6-е.

О неправом умстовании (Симеона Шаготьскаго и иных) во изложении Филарета патриарха о белорусцех молящихся западу. которым они уподобляют монастырьских богомолие содержащих за внешния власти.

 

Пререкание, 1-е.

Глаголют противницы: яко Филарет патриарх за богомолие едино о папе римском белорусцев онех повелевает крестить.

На что отвещаю.

Святейшии Филарет патриарх в предисловии своего изложения описуя оных белорусцев вины подробне сия повествует: Мнозе же в них белорусцах и за папу извержанаго Бога молят, во святей литургии в приношении, и во ектениях и в литиях. а в которой у них церкве, аще она и християнская есть, а молят Бога за папу, и таковая церковь у них нарицается унея, и по их же разсуждению толкуется, яко таковыя церкви, еже нарицаемии от них унеи, сиречь соединение, еже мирующиися и соединяющиися с папежники, и в тех их церквах, в нарицаемых в унеях, еже есть в соединяющихся с папежники, и под паствою папы римскаго пребывающии митрополиты, и архиепископы, и епископы, и архимариты, и игумены, и протопопы, и попы, и дияконы, и инии причетницы мнози есть суть. Дозде от изложения Филарета патриарха.

Зде убо разсмотряяи внятельным умом может зело ясно видеть яко блаженныи Филарет патриарх не за едино точию богомолие о папе римском оных белорусцев действа не приемлет. Наивящше сих ради:

Первое: По вышеобъявленному из изложения Филарета патриарха, сии белорусцы творящии соединение с папежники, могут нарещися унияты. по польскому же наречию унея - соединение толкуется. яве есть, яко сии белорусцы сущыя быша к римскому костелу отступники, о киих униятах, или юнитах, творец книги О вере, во главе 23, засвидетельствует.

Второе: Но и в самом изложении, сиих белорусцев сущими отступники нарицает яко еже глаголет: Для того от отступника крещен, второе онаго крестити. Яве яко не за богомолие, вящше оных блаженныи Филарет тяжкословствует, но за отступление к костелу римскому.

Третие: Филарет патриарх засвидетельствует, яко сии белорусцы в самех своих церквах соединяющеся с папежники мирствовали. убо не едино богомолие за папу римскаго имеюще содержаху, но и всякое уже соединение со оными удобно стяжаху.

Четвертое: По объявлению же Филарета патриарха онии белорусцы под паствою уже не восточною но папы римскаго содержахуся. яве яко и за рукоположением к нему прибегаху. такоже и во первых его в ектениях и литиях поминаху.

Пятое: Но и поминати имя папежеское в сицевом молитвословии не летьствует: понеже папа не мирскии человек но духовныи. паче же за богопротивныя сия титулы кия он беззаконно к себе привлачает, трепетно есть: о чем в книзе Хрисмологионе повествует сице: Пишет бо католик Белярмин кардинал, яко [папа] 15, титулов имеет по достоинству своему, ими же нарече себе: 1, папа. 2, отец отцев. 3, християнскии патриарх. 4, верховнейшии священник. 5, князь священников. 6, наместник Христов. 7, глава тела Христова. 8, основание созидании церкви. 9, пастырь стада Христова. 10, отец и учитель всех верных. 11, правитель дома Божия. 12, хранитель лозы Божия. 13, жених церковныи. 14, апостольскаго престола начальник. 15, епископ вселенныя. и прочия. Сих ради убо вин и титулу негли и блаженныи Филарет патриарх опасает верныя поминати в церковных службах римскаго папы имя. И оных белорусцев тяжкословит, самою же вещию за отступление их от восточныя церкви к костелу римскому крещение от них не приемлет.

Шестое: А еже во оном изложении свидетельствует, моливыися поп за римскаго папу, крещаше в християнскую веру греческаго закона, то убо показует, яко онии униятове обои законы, восточьныи и западныи содержаху сих ради:

1: По объявлению Захарии Копестинскаго архимарита киевопечерския лавры. Сии белорусцы оставлены быша от папы римскаго во всех церемониях [сиесть действах] восточных пребывати, прелести ради правоверных християн. О чем в книзе его, во второй, во главе, 37. засвидетельствует.

2: В той же книзе выпечатано слово Кирила епископа Любортовскаго на оных униятов в нем же зело явственно доказуется. яко онии [белорусци] ко обоим церквам, к восточней и западней храмляху. в нем же сия пишет: Тая унея не может зватися ни латынская ни християнская вера: бо от церкви отступает, а до костела не прилучается во всем во единость. тая унея матку восточную лобжет, а мачеху западныи костел лижет. тая унея пред очима папежника хвалит его за веру, а заочне ганит, удаючися всюду лицемерно. и прочая.

3: Доказует же ясно, и О вере списатель книги, яко онии белорусци униятове, подобное имеяху крещение и подобныя святости. о чем во главе 23 достаточно пишет.

4: Но и в самом том изложении обоюдность онех белорусцев Филарет патриарх показует. яко онии в первых поминаху папу римскаго. последователно зрится. и патриарха восточнаго поминаху.

Темже сих ради доводов, видится, яко сии белорусци аще и отступники быша от восточныя церкви, к римскому костелу, но восточных действ, ради прелести простых не отлагаху. того ради и блаженныи Филарет патриарх их в християнскую веру греческаго закона крещающих показует. самою же вещию отступницы суть. за что и крестити от них паки повелевает. Где убо ныне Шаготьскии и прочии подобнии ему. да приидут семо, и отрут свои очи раздорным прахом засыпанныя. и сию справедливость представленную в сих наших доводах ясно да узрят. и потом да останутся от своих любопрении. и со святою церковию согласными явятся.

 

Пререкание, 2-е.

Но раздорницы не молчат глаголюще, яко молитися за внешния самодержцы равно Филарет патриарх полагает как и за папу римскаго.

На сие отвещаю.

Понеже блаженныи Филарет патриарх богомолие за папу римскаго яко духовнаго властеля а не мирскаго о чем и выше доводихом. За внешних же властей богомолие не винословствует сам Спаситель Христос Бог. Не винословствует его сосуд избранныи апостол Павел, но паче законополагая утверждает. Не винословствует златословесныи Павлов толкователь. С ними же и вся древлеправославная церковь ветхаго закона и новыя благодати, соглашаяся по всему, сие творити повелевает. Убо ясно зрится, яко папежская власть от внешней, во оном [богомолии] далече отстоит.

Отвещаю, 2-е.

Папу римскаго или всякую духовную еретическую власть в тайнах поминать святое писание не определяет. За внешния же власти, священныи Златоуст и Никон Черногорец, и Максим Грек, и прочии многочисленнии многосложнаго свитка отци, безсомнительно поминаху, и поминати в самех жертвах повелевают. О чем выше засвидетельствовахом.

Отвещаю, 3-е.

За папу римскаго блаженныи Филарет, во ектениях и в литиях богомолие винословствует. За внешния же власти, за Феофила иконоборца, многосложнаго свитка отцы, и за польскаго краля латинския веры в служебниках виленских, без сумнения в службе в литиях и ектениях молиша.

Отвещаю, 4-е.

Святыи Иона митрополит всероссийскии в послании в Царь град о богомолии папежском сице пишет: Чтоже [рече] может быти благо, идеже в церквах латынскаго папы имя поминается. Он же святыи пишет в послании Казимиру королю польскому. [кии бе такоже костела латинскаго последователь] в нем же показует себе богомолцем быти оному: идеже сице глаголет: Превысокому благородному славному великому королю Казимиру польскому, и великому князю литовскому и рускому и мутьянскому и иных многих, богомолец великаго вашего господьства общии. Иона митрополит Киевскии и всея Русии. благословляем и челом бием. Ниже: И аз ваш общии богомолец по своему святительскому долу и Бога молити рад, и колико мощно, и попечение имети, и проч.

От сих убо вышепредложенных доводов показуется, колико сии грубословцы погрешают, равняюще в молении внешнюю власть с духовною, или папежскою. яко они вопреки, святому Павлу апостолу, паче же в нем Христу Спасителю глаголавшу востают, и всей святей церкви противу вооружаются. яко же о сем выше доводствовахом. верно убо от сего познавается, яко не с нами единеми они борются, но со утвердившими непреложныи сей закон.

 

Пререкание, 3-е.

Глаголю еще противницы грубоумствующе, яко власть внешних самодержцев, таже есть что и антихристова. убо и страшно есть за таковыя молити.

На что отвещаю.

Антихрист имя не есть российскаго диалекта. того ради не дивно сим мудрецем заблуждати. и водитися по различным стремнинам разных толковании. но есть сие имя греческое, по гречески бо хрисма, по нашему языку помазание толкуется. по еврейски же месса. и тако будет по еврейски Мессия, по гречески Христос, по нашему же Помазанник. предречие же сие анти, по нашему языку протолкуется противник. иже и во апостоле на словенском языце в преводе сему согласно от сосуда избраннаго глаголанное полагается: противник (рече) превозносяися паче всякаго глаголемаго Бога, или чтилища, яко сести ему в церкви. Блаженныи Ипполит зело явственно о антихристе глаголет: По всему (рече) хощет льстец уподобитися Сыну Божию. Преподобныи же Ефрем Сирин согласно сему являет: Образ [глаголет] приимет истиннаго пастыря, да тем возможет прельстити овец стада. Подобне же и Стефан Зизании Кирила Иеросалимскаго словеса толкуя глаголет: К своему духовному и святительскому уставу приводит восхищающи. Яснейшии же той же Стефан Зизании о пришествии антихриста глаголет: Егда [рече] изгубится римская власть. тогда антихристово начнется властельство. Согласно сему сирскии глас в 8-м слове вопиет: По конец бо [рече] римскаго царьства подобает всему совершитися [сиесть антихристу приити].

Темже от вышепредложенных свидетельств показуется, яко сия неудобства еже царьскою должностию антихриста приходяща мнети не допущают: 1: По свидетельству Ипполита папы римскаго, и Ефрема Сирина антихрист приидет по образу самого Христа, и таковое возмечтается себе царство. царство же Христово по Его словеси, внутрь нас есть. По толкованию же блаженнаго Каллиста еже в слове на суботу Лазареву: Духовне в наших душах Христос царствует. Яво есть, яко и антихрист, аще по образу Христову приидет, то духовное же некое свое царство на прелесть человеком явити имать, и духовне внутрь сердцах ему повинующихся имать царьствовати. 2: По свидетельству Стефана Зизании к своему святительскому престолу будет восхищающи приводити, а не ко внешнему царьскому трону. 3: По сказанию же того же Зизания и преподобнаго Ефрема Сирина, егда Римом цари не имут владети, тогда и антихристово монаршество начнется. Посему познавается яве, яко по окончании уже царьской державы духовное антихристово царство на прелесть человеком произыдет. 4: Апостол Павел сосуд избранныи в послании своем к римляном о внешней власти глаголет: Несть (рече) власть аще не от Бога, сущи власти от Бога учинены суть. Темже противляяся власти, Божию повелению противляется. По сему сосуда избраннаго достоверному свидетельству, явственно есть, яко Богом определенную власть менити богопротивной антихристовой власти зело бедовместно будет, яко самому Божию определению сопротивно и несогласно обрящется. Согласно же Июде галилеянину, о котором в деянии святых апостол, и в прочем толковании повествует, яко учаше римскому кесарю не покарятися, и жертвы за него не приносити. Чего ради блаженныи Феофилакт архиепископ Болгарскии, протолкуя евангельская словеса, менит онаго Июду, самого быти подобна антихристу.

Зри в Благовестнице во евангелии от Иоанна в зач. 35-м, на листу, 165-м.

Суть убо и иныя наносимыя от противствующих нам пререкательства. рекуще, яко аще и молитися за внешния власти, но кроме церковных соборании. Но обличает их сосуд избранныи. обличает же и того толкователь священныи Златоуст, кия повелевают не точию при собрании, но и при самей божественней жертве, за таковыя моления совершати. Обличает же их, яко ветхозаконная, так и новыя благодати древлевосточная святая церковь повелевающая при божественней службе молитву приносити. яже за множество свидетельств и краткость лобызающе сочинения оставляем.

Такоже пререкуют зело и о прилагательных именах. но о том хотяи уведати да чтет книгу покойнаго отца Даниила Матфеевича. мы же не разсудихом зде вместити. Понеже подвиг наш вящше предлежит, на оставляющих конечно сей всецерковныи обычаи, и со святою церковию рать творящих, и раздоры с нею неповинно деющих. За что и мученическою кровию [по богоносных отец гласу] невозможно загладити.

Прочее Богу ми помогшу, кончаю первую часть сея моея аполлогии. прошу от Его всемощныя власти помощи, да и з благим успехом вторую начавши совершену читателю благочестивому показати.

 

Часть 2-я.

 

Показания.

На издание противоположеннаго святым четыредесятнаго поста вместо миропомазания от неких (филиппова мнения) разумеваемаго. которыи на федосеевых и монастырских (полагаемых ими во вторыи чин еретическии) от них определяется. Да и о пятинадесятном вкратце на третии чин. [по их мнению] на бывшаго Михаила Григорьева полагаемом.

 

Понеже благочестивыи читателю! одолжен бых аз вашею прозбою. наиболее о сем, еже изъяснити вашему боголюбию, неправое разумение о четыредесятном посте. кии нецыи грубоумнии нудятся заместо миропомазания вместити, и на сущих християн монастырьских, или федосеевых от них полагаемыи. которых они и еретиками нарещи неусомнешася, и во вторыи чин неразумне положиша. в том прошу вас меня извинить, что аз одолжих себе первую частию. и в ней некое время укоснех. но разсудися мне оную к ползе слышателей присовокупити. И посем на вами желаемое во…ю[нрзб.].

Но прежде неже вступити ми в полату сего разглагольствия, о раздоротворных их действиях, мало в предверии сея постоя, ради извещения. что есть пост? и которыи есть спасителныи? которыи же погибельныи души. или и прочия добродетели, аще и именем соглашаются, но в деяниих по произволу творящих зело разньствие имеют. Ибо дешеспасительныи пост есть, самем Христом Богом преданныи, от апостол и пророк утверженныи, и от святых отец на вселенских соборех засвидетельствованныи и повеленныи. Таковыи пост не о себе токмо состоящии, но и с прочими добродетелей имствами есть спряженныи. Естьли кроме покаяния, и кроме смирения, не может сей пост постом нарещися. Естьли кроме милости и любви и братолюбия пост, сей ниже именоватися постом может. разве убийцею души вкупе же и тела. истинныи есть пост сей, иже со освенением брашен, освенение имети гнева, вражды и братоненавидения. таковыи бо пост есть оружие на диявола преострое. того и он яко огражденнаго прочими добродетелей богатьствы трепещет. Аще же не таковым, ниже пользуемся, ниже пользовати им кого можем. Якоже преподобныи Иосиф Волоколамскии навыкнув от златословеснаго учителя вселенныя глаголет: аще и оружие есть, но не вемы како составити его, ничтоже пользуемся от него. аще бо кто приимет оружие, и бронями убо обьвиет нозе, шлем на лицы положит. щит же к ногам привесит. луком же сещи начнет. мечем же стреляти, убо может ли что оружием сим пользоватися. Дозде Иосиф Волоцкии.

Аще убо и во внешних бранех таковаго требуется благоискусьства, и благочиннаго во оружиих бранных наряжения. кольми паче в духовной на диявола брани, зело благоключимственно есть согласными и чинными добродетельми вооружатися. такоже прикладно рещи и о посте. Аще не есть согласен правилом святых апостол, аще не сослагателен богоносным отцем, како приятен будет. И по Златоусту: еже бо не по воли Божией творимое, аще и добро нами мнится быти, в грех обращается. якоже и о самом посте в поучительном евангелии сице глаголет: Таково же дело есть и пост, по подобию держащим его и творящим велию пользу ходатаит, лицемерием же и лжею творящим и, ничтоже пользует. Паки вышше: Недобро есть доброе егда недобре бывает. Евангелие в неделю сыропустную. И паки: Цельбо бо есть, и молитва. обаче же аще не вемы како подобает приложити цельбу, ниже пользу приемлем от нея николиже. Евангелие учит. в неделю 17.

Полезно же, и весма спасительно безмолвие, но по разсуждению небошественнаго Лествичьника, есть убо безмолвие приятно, есть же и неприятно, и неспасително. о чем в 27-м слове засвидетельствует. Сице убо и о прочих добродетелех разумети потреба есть. естьли убо, по Иосифову Волоцкому, добре вооружимся порядочным чином, пользуемся от них. А если недобре, то от чего пользу уповающе имети, паче от того вред себе получити имам. что пользова воздержание онаго высокоумнаго фарисея, иже во евангельской притчи поминаемаго. Что же пользовашася. и онии израилтяне, постившиися ради убийства Науфеова. которыи их пост отвержен, и зело мерзок Богу бысть. егоже зазирая и поношая церковныи духосоставленныи орган, златыи языком тако глаголет: Оле пост повелен. полн беззакония. проповедаша пост да убийство сотворяют. Соборник, в неделю 2-ю поста, лист 396. Прочее уже отложим предисловное плетение, благонадежным упованием приведемся на самая показания: от которых чаю вас говетельных слышати. и воньмем опасно, да некогда многоразвратными и многораздорными различных мнениев толковании пленимся во отведение истинны. Но непоколебими во единомыслии святыя церкви пребудем, да сынове и наследницы ея явимся в день Господа нашего Iсуса Христа.

И так выговоря, входы отверзаем в сицевом намерении и приготовлении вступаем в словоотдание просящим, требующе от Господа, да подаст в возответьствиях не отпасти разума святыя церкве, ниже что различно изглаголати.

 

Показание, 1-е.

О начале заводителей сего четыредесятнаго поста полагаемаго на християн монастырьских и прочих, и последованием до киих дошедшаго.

 

Понеже убо первыя части, в первом показании повествовахом, от кого и от каких причин четыредесятныи пост на выгорецких общежителей произыде. и ныне [зде] паки хоша кратко удобнаго ради понятия таяжде повторим.

По скончании убо старца Филиппа, оставшии по нем его ученицы, иноцы Терентей и Матфей, ревнующе горшею ревностию паче своего учителя на выгорецкое общежительство за моление внешних властей, начаша оных полагати в равномерныи чин с никонияны, и двоих человек пришедших из монастыря в их разумение, (оле смелости) наизнова крестиша. и потом осмотревшеся в продерзательной своей грубости, инако начаша от них приимати, полагая на приходящих четыредесять дней поститися как и на оглашенных. которому их сему чиноустановлению послежде разгласися Симеон Иванов нарицаемыи Шаготьскии. согласуяся же прежнему еже изнова крестити. а на сие, несогласное самим с собою чинозаведении, многая винословия полагая, и наводя на свое умствование укрепление, оных белорусцев за папу римскаго молящихся. кии и доныне в том своем упорстве вопреки тем грубоумствуя устаивает. о чем в первой части на его умствование возответствовася.

Оному же четыредесятному поста чиноприятию Терентиеву и Матфееву. паче же тех учению последуя питерскии Феодор Михайлов. кии и до смерти своея в том устаивал. на монастырь же с великим стремлением ратоваше. такоже и с Семеном Шаготьским несогласоваше, но в великом раздоротворном духе оба друг на друга вооружастася. От него же (сиесть Феодора Михайлова) прияша обычаю своему вину и нарицаемыя балчюжныя московския. кия и с Феодором Михайловом раздоротворствоваху. а не соглашахуся. Понеже Феодор хоша и четыредесятныи пост уставляше. но просто тако кроме неких умствовании, и на единых токмо монастырских. балчюжныя же, более на федосеевых вооружаются. с ними же причитают и монастырских. киих они обще полагают, во вторыи чин еретическии. (якоже от писма их писаннаго в Питербурх к Феодору Михайлову извествуется) и сущими их схизматиками, или еретиками нарицают. и спасения им не проповедают. и на действа их Духа Святаго приходити не исповедовают. И спроста рещи, якоже о древних арианех и прочих, так и они о онех разумеют. Началоводители же сего раздора самобратия Григории и Алексей Яковлевы быша. к ним же инии присовокупишася. балчюжныя же именовашася по месту. Понеже в Москве на Балчюге сии жительствоваша. и начало своего раздора заведоша. И ездиша нецыи из них в поморския суземки, в лето 7271-е. И с Ионою еще тогда тамо бывшим старцем и с прочими раздор свой устамениша. положивше что с единым началом приимати. последи же вопреки своему собору сташа. и положиша с треми лестовки приимати. таже с пятию надесять днями. И потом восходя горе, на лествицу своего раздора, положиша и четыредесятныи пост. и по окончании поста повелевают сняти с пришедшаго крест, и свой заместо крещения полагати. инна и инна бредят на свою погибель. Тако и сами в сем своем начальном раздоре разгласни быша. ибо ездившии тогда в начале в суземок. Феоктист старец, и Михаил Григорьев и прочии един из них (сиесть Феоктист) на собор той писаше оглаголуя сице: Которыи у нас был собор в Помории о церковных вещах. и тот собор является с святой церковию несогласен. Дозде ис писма Феоктистова. И аще несогласен их той собор [на котором они свой раздор утвердиша] бяше со святою церковию, яве яко и начало их раздора от сего собора влекущееся, по их же гласу будет святей церкве несогласно но противно, якоже и суть. убо яве на них збывается евангельскии глас, от Спасителя реченныи. от уст твоих сужу тя рабе лукавыи. и паки по премудрому крепка сеть мужу свои ему устне. Но и Михаил Григорьев от сего раздорнаго шума не без колебания пребысть. и сперва егда согласися со оными еже разделятися с выгорецкими, Филиппу старцу последовати во всем соглашашеся. якоже от общеписаннаго их уставления с заручным укреплением показуется. а последи писав к оным балчюжным по раздоре со оными несогласна с Филиппом - яко за неблагословной еще до приезду каммискаго раздор, с балчюжными же - за противоумственныи как святым отцем, так и прежним поморским учителем четыредесятныи вместо миропомазания пост. О чем для наивящьшаго уведомления благочестивыи читателю судих список со онаго его писма зде вместити.

Первое его о балчюжным сомнение сие:

Мудрствуете (рече) и хульствуете християнское крещение монастырских и федосеевых сущими еретиками облагаете, и еретическое крещение несть крещение но паче осквернение. и Духа Святаго не исповедуете на крещении. и вси де во ад идут. таковаго мудрования у поморских отцев которые были и жили до Самарина не бывало, ни у нижегородских ни у волошеских стариков отнюд таковаго мудрования не бывало.

Второе его сомнение:

Монастырьских и федосеевых во вторыи чин положили под миропомазание и у вас от своего разума вместо миропомазания новоузаконися четыредесятныи пост и тако умствуете чрез четыредесятныи пост Дух Святый приходити с миропомазанием в равной силе как чрез миропомазание Дух Святыи приходит так и у вас чрез четыредесятныи пост Дух Святыи приходит и будет сей пост вторая тайна церковная. Понеже кии отцы жили в Поморье до Самарина у тех отцев таковаго мудрования и обычая отнюд не бывало. сего ради мы немалое омышление имеем о вашем умствовании. аще ли вы сие мудрование все отложите и начало положите и проститеся и впредь тако мудрствовати не будете и я вам обещаюся без вашего совета ничево не творити.

А что четыредесятныи пост у питерьских положен не от первых отец поморьских взят, но от старца Тереньтья которыи был после Самарина, он изложил сей четыредесятныи пост. а сей Терентей и жил белцом в монастыре до Самарина и с Филиппом старцем из монастыря вышли до Самарина а еще тропаря в монастыре не было не богословных ради вин старец Филипп из монастыря вышел но яко человек по пристрастию. И сей старец Терентей от  Филиппа старца и пострижен и были они с монастырем в раздоре до Самарина и Филипп старец при Самарине згорел. а Терентей старец после Филиппа старца двух человек от монастыря с Матфеем старцом крестили и потом одумалися они что неладно так крестили и уложили чрез четыредесятныи пост от монастыря приимати. а питерских Феодор Михайлов (бывыи) Маркитант старцу Терентию последует. а первых отцев поморьских не застал и не знал их. Дозде из писма Михайла Григорьева списанное из саморучнаго его писания.

Но балчюжное убо согласие ныне всюду и везде по России разсеяся, и при брегах окиянских имеется. Суть же тамо оным последующии старец Андреян и прочии. тако и сей со своим прежним предводителем Ионою несогласным весма обретается. И толико во оных под именем филипповым крыющихся разгласиев умножися. якоже рещи летьствует: елико глав их есть. толико и согласиев обрящется. вси же елико во мнениях. толико и в чиноположениях сами с собою разгласни имеются.

Но в настоящем сем моем сочинении, подвиг мой о балчюжных мнении и чиноположении якоже обещахуся восприемлю.

 

Показание, 2-е.

Яко четыредесятнаго поста положение на вторыи чин еретическии, [по уставлению балчюжных] несогласно есть святых отец с соборными уставы.

 

В священней старописанной книзе Кормчей во главе 92. о приятии …[нрзб.] еретик к сообщению святыя церкве законополагает сице: Первое убо подобает егда хотят приведени быти ко правой вере поститися 10 дней, или 15. и упражнятися им на молитву, вечер и заутра и полудне, и учаще псалмы, якоже и оглашенныи. и тогда сподобитися правыя веры. [ниже: По чину отрицания ереси] таже помажет его миром, якоже и новокрещенныя, тоже приговаривание и на том рекше. печать и дар Святаго Духа. Посем паки молится святитель, Господи Iсусе Христе Боже наш, и прочая. ниже. И потом приобщится и приимет заповедь, 7 днии мяса не ясти, ни умывати лица. но яко же крещаемии, тако пребывати, и во осмыи день омытися. Дозде из устава святыя церкве в Кормчей писанного.

На сей полагающеся балчюжнии своего четыредесятнаго поста уставоположение укрепляют противу коих возответствующи превирают …[нрзб.] …[нрзб.] святыми отцы положенныи, и сих противоумствующих оному обретаю.

Первое: Во оном уставе положено 10 и 15 дней поститися. у них же положено четыредесят дней. аще и прилагают ко оным еще 7 дней. кия по миропомазании пришедшему от мясоядения воздержатися повелевает. обаче тамо не ради приуготовления. но для соблюдения оныя небесныя печати святаго мира, и неоглашенное правило имети потом указует. но токмо блюсти тем [немясоядением] оную тайну. якоже и крещенным повелевается. Темже балчюжнии якоже зрится не от святыя церкви устава сей свой обычай восприяша, но от своего умышления. убо и втуне на оныи устав указуют.

Второе: Во оном святыя церкве уставе, в количестве дней пощения, не обдержно законополагает, но аще 15, или 10 дней. таковыи по положению от церкве постится, не противляется уставу. от балчюжных же непременныи закон положен. аще таковых приходящих, или приемлющих таковыя, не исполнит их сего закона, всяко неприятен таковыи в их обществе бывает. яве яко за непременяемую от них полагается тайну.

Третие: В завещании святых апостол, в книзе 7-й. во главе 23-й. такоже и в Потребницех 40 дней поста полагаются на первыи чин, а не на вторыи. Темже зрится от сего указания, яко онии в том уставу святыя церкви зело вопреки сие свое чиноприятие на вторыи чин еретическии уложиша. убо и соглашатися в том кому под опасением вящьшим обретается. По писанному: не прелагай предел вечных яже положиша отци твои.

Четвертое: Но и в прочем тому уставу старописменныя Кормчия онии противляются, понеже тамо повелевает учити псалмы оных еретик, яко неверных и отчюжденных сущых. Они же и сами яко неведящии православия уставом. и прочим церковным чиноотправлениям от монастыря тщатся навыкнути.

И паки тамо заповедает чести приходящему символ православныя веры, они же онаго лишают, и прочая.

И от сих наших предложении ясно доказуется, яко онии балчюжнии не точно будут последователи онаго церковнаго устава. но ниже какова следа в их чиноприятии ко оному согласующа обрести возможно. Верно есть слово, и всякаго приятия достойно. якоже учит апостол.

 

Показание, 3-е.

Яко неимущим священства, три чины приходящим от еретик на приятие ко общению святыя церкве употребляти неудобно есть сих ради.

 

Первое: Понеже святая православно кафолическая церковь: о оных трех чинах засвидетельствуя законополагает, яко первыи чин есть требующ святаго крещения. вторыи миропомазания. третии же с проклятием ересей руковозложения. Но сии последнии два чина ко употреблению не точию простолюдину возможныя, но ниже иерею за неимением мира вторыи чин употребляти есть возможныи. Понеже мир совершают епископи. Простолюдину же по нужде точию две тайны действовати позволено. еже есть крещение и покаяние. Убо нам лишенным священных санов, зело будет бедовместно, и писанию противно вреватися в неданная, и в таковыя чины. единым токмо освященным, паче же епископом входити. естьли оными по чину попустимся действовати. убо кто нам миропомазание совершит. кто миропомазанием воздействует. кто руковозложение сотворит. кто подавающыя тому видотворения (то есть молитвы) и прочыи священныя гласы исполнит. Правою вагою добросовестнаго ума весити читателя.

Второе: Аще простолюдину за невозможное есть в действе вторыи, и третии чина от еретик приходящим, за неимение на то власти, и материалов (сиесть миропомазания) такожде и руковозложения. убо ключимейше есть еретиков оных под един чин крещения принимати. Понеже вси они лишени суть в своих действах Духа Святаго. Но и святая церковь не обдержно от оных еретик крещение приемлет. но смотрительно. якоже 1-го, и 47-го правил Василия Великаго в толкованиих изъясняет. И в Матфеевой книзе, состав А, на оное же правило Василиево 47-е показует. Согласует же сему и завещание святых апостол. аще где не случится ниже мира, ниже елея, едину воду довлеющу на совершение быти утверждает. о чем в книзе 7, во главе 23, явствует.

Третие: Согласует же сему нашему доказанию, и многоученныи муж Трифон Петровичь, которыи в боголюбезнем своем списании в следовании всецерковных правил, во обыскании 9-м, глаголя свидетельствует сице: Аще и правилы некоторыя еретики по смотрению указуются приимати, судиша Василии Великии и прочии крестити, и тако чрез крещение приимати: убо по смотрению обращающыяся еретики приимати предел есть не непреложныи. сего ради что возбраняет такожде, егда обратится кии либо от еретик объявленных, чрез крещение приимати, и церкви сообщати. Паче же егда не имущим священство - имже миром помазовати и руку возлагати ни по нужди не дано. В неприсудствии священника будут от предъявленных еретик обращающиися приобщения просити, и ктому страх смертныи отлагати до священника терпети не попущает. Подобает весма и ни едино же омышление препятьствует, по глаголющему: где убо суть глаголющии, простьцем уже нам при напасти, не мощно крестити не сущу иерею добро и известно. И паки в надсловии тоже подтверждает. темже еже в предварших засвидетельствовася, лучшее, тожде и в настоящем показася изряднейшее, и тыя еретики ихже правилами помазовати миром и руковозложением рук священнических приимати повелеваются, обращающыяся в неприсудствии священника, не имущим священства – крещати, и тако церкви сообщати изряднейше и без омышления всякаго есть. Дозде изследования правил Трифона Петровича.

Темже уставление балчюжных четыредесятнаго поста вместо миропомазания и расположение в действо простолюдину трех чинов, якоже правилному разуму, тако и великоученным мужем, зело сопротивляется. Убо и последовати православным таковым самосмышленным пределом зело будет противно и спасению препятьственно.

 

Показание, 4-е.

О умствовании чрез слезы, или пост, или покаяние, благодати дара Святаго Духа приходити, на еретическое крещение.

 

На которое отвещаю, 1-е.

Понеже по свидетельству сосуда избраннаго различнии дарове Святаго Духа верным на освящение и очищение и душам и телесем действуются. якоже к кориньфом в послании 1-м. в зач. 151-м извествует. На которая апостольская словеса златословесныи толкует сице: Аще бо и дарования различна, но указание едино. И паки ниже: Вся же сия действует един и тойжде Дух, разделяя особно комуждо, якоже хощет. Согласно сему (сиесть о различии дарованиях Святаго Духа) и Симеон Фесалонитскии глаголет: Различна (рече) суть Духа даровании, и овому дается сие: овому же оное дарование. и проч. Сице же пишет и в Катихисисе большем, о самех тайнах, во главе 60-й, глаголя: Яко вся седмь таин имут слово и видимое знамение. и вся имут обетование благодати, и благословение Божие. И паки во главе 24 пишет: Во всех тайнах церьковных действует Дух Святыи. и нам дадеся, якоже на крещение, Дух освящения, и истинныи Дух обручения, и дарования приятие, Дух сыноположения. такоже и возложением рук, и миропомазания, и в хиротонии. Дозде из Катихисиса.

Зде воньми любезныи читателю о различии даровании Духа Святаго. да навыкнеши за единоименное указание в совершении Святаго Духа даров приятия не сливати воедино. Аще бо и един Дух Святыи вся во всех потребствах действует, но дарование Его различно. овых бо претворяет в высокия чины. овыя же в средния. а овыя в меньшия. да не речеши единаго дарования быти епископа и дьячка. такоже и той получи дарование. нонанеже[?нрзб.] Дух Святыи его совершил. да не вомниши паки единому дарованию действоватися в словесных, в чювственных и нечювственных тварех. Понеже по апостолу во всех движениих и содержаниих Дух Святыи действует. якоже о нем рещи апостолу: вся и во всех действуяи есть.

Темже зело грубоумствуют онии балчюжнии, идеже обрящут в писаниих или чрез пост, или чрез покаяние приходити Духу Святому. И сия нудятся на совершение еретическаго крещения приводити. якоже и прочии сектове нетовщины и ладожан погрешают. о чем нижше представится.

Отвещаю, 2-е.

Слезное поуверзение не на очищение еретическаго сквернаго крещения святая церковь нам имети определяет, но на очищение боготканныя одежды святаго крещения очерненной сажею [от верных] богомерзскими грехами, и на усветление печати Христовы, осмраженной грязию беззаконных действ. якоже о том в Лествичнике в слове 7-м и в Соборнике в слове Анастасия Синайскаго, на листе 210-м, пишет: И священныи Златоуст о отвержении Петра апостола сице свидетельствует: Ибо (рече) и блаженныи Петр, по крещении уже отвержеся Христа, и плачася горко, второе крещение слезами сотворив, источники испустив от очию слезныя. но плакався тако горце заглади грехи своя. В Соборнике в слове о десяти девах. Такоже и преподобныи Никон черногорскии свидетельствует глаголя: В крещении Бог туне прощает согрешения, и не ищет ничтоже разве веру. В покаянии же грехов яже по крещении не туне прощает, но ищет труды и скорби, и печали, и умиления, и слезы и плачь время много, и тако прощает. Слово, 5.

Сице убо по крещении святою церковию очищатися согрешающым предано суть. Сице первыя благодати святаго крещения по уронении человек паки сподобляется. Тако не крещение еретическое слезами очищается, но православное крещение, окалянное грехов наших грязию, слезным поуверзением омывается. Где убо балчюжнии умствующии слезами, заместо миропомазания, очищати еретическое (по их мнению федосеевых и монастырьских) крещение? да приидут семо и отрут своя глаза перстию невидения засыпанныя, и узрят с ким они рать деют. яко со святою церковию. и с тоя учители православными. да устрашаться онаго гласа на растлевающих святыя церкве предания гремящаго: Аще кто церковь растлит, растлит его Бог. Да последуют оному увещанию глаголющему: вящше предания не ищи.

 

Пререкание, 1-е.

Доказуют балчюжнии, из книги О вере, яко пост есть ходатай старому закону, и благодати данней нам от Духа Свята. и прочая. И того ради умствуют на крещение еретическое чрез оныи приходити Духу Святому.

На что отвещаю, 1-е.

Понеже выше рех, яко различни суть дарове Святаго Духа в действах потребных совершаются. убо сливати оныя во едино зело будет якоже божественному писанию, тако и правому разсуждению, сопротивно. Ибо святая кафолическая церковь, аще и доказует, яко пост ходатай или приуготовитель на приятие благодати Святаго Духа, но не без таинств над приходящими от неверия, или еретическаго заблуждения, его употребляет. Понеже не пост миропомазание совершает, но миропомазание его совершает. Ибо не есть тайна, но приуготовление на приятие тайны. Темже пост не о сем состоящии еретическое крещение совершает, но пред действием церковных таин приемлющаго предуготовляет. Яко же некую полату очищает и украшает на пришествие господина, тако и пост пришествию Святаго Духа при употреблении оныя миропомазания тайны [или других тайн] ходатайствует. Есть же паки и кроме тайнодейств пост бывает виною пришествия Святаго Духа, но - верным християном, а не еретическое крещение имущим. якоже бо обетшавшаго человека киими любо прегрешении творит его нова суща и очищенна от осквернения, и благодати Святаго Духа, от нея же испаде, сподобляема. Якоже [зане] многия о сем образы и показания в божественнем писании обретаются.

Отвещаю, 2-е.

Аще ли умствовати чрез пост или покаяние, и прочия труды еретическому крещению совершатися и благодати Божии приходити, кроме от церкви изображенных таин, то яве противу священных правил сицевое разумение будет, и под клятвою обрящется. Понеже Карфагенскаго собора, правило 114, на таковое умствование со ужасною клятвою тако гремит: Иже (рече кто) проповедает, яко кроме благодати Божии может творити заповеди Его, но с трудом, да будет проклят. без мене бо, рече Господь, не можете творити ничтоже. Сему подобне и в книзе Матфея канониста на сие правило толкование зрится. изволяяи да чтет тамо.

Отвещаю, 3-е.

Естьли тако по балчюжным умствовать, еже чрез пост и покаяние заместо тайны миропомазания еретическому крещению совершатися, то уже леть есть и о прочих еретических тайнах непщевати, яко и они чрез пост и покаяние могут совершение себе получить. якоже рещи, приявше во свое общество еретическое рукоположение имущих епископов, или иереов, и прочих причетник, и повелеть им выпоститися четыредесять дней. и тако по оных умствованию будут совершеннии служители тайнам церковным. Сице же и прочим еретическим тайнам двери отверзутся. и что сего будет беззаконнее. правою мыслию разсудити.

Отвещаю, 4-е.

Но и нетовщина, глаголемии и старцовщина, еже есть ладожане, чрез пост и покаяние, такоже и слезы, еретическому крещению [по их мнению нынешния российския церкви во вторыи чин полагаемому] совершатися разумеют. Темже сие балчюжных, и прочих им подобных разумение, о совершении (втораго чина) еретическаго крещения зело согласно будет оным нетовщине и прочим противным святей церкви толком. или паче рещи: со всякою точностию от тех восприятое. Темже по притчи оной, хотяху (по их мнению) бежати дыма, вправду во огнь впадоша.

 

Пререкание, 2-е.

Балчюжныя же отвсюду собирающе свидетельства, тщатся сие свое установление простейшим благоприятно сотворити, улучили видеть чин о приятии отвергших Христа, или в ересь впадших. и той во уподобление еретическое крещение имущим усилуют привлачати.

На что с возражением отвещаю.

Есть убо злато есть и медь, аще …нием[нрзб.–одним сиянием?] в блещании и обольщевают зраки, но естеством доброты зело различествуют, есть же паки сребро, есть олово. аще аще и единою белостию белоблистают, но вещей естество между собою кииждое разньствует. едино убо дражайшею ценою, другое же малым нечим ценится. Сице леть есть разсуждати православное крещение, от еретическаго, или еретиков со отвергшимися от православия.

Зде о слышателю: зри разумне внятельным умом твоего разсуждения оныя металлы. злато и медь, сребро и олово валяющыяся в грязи, еда обрящеши единовидственны паче же единокачественны. ниже: но всяко узриши аще и в кале злато своего видения, паче же естества не отступающа. медь же аще где любо ни положиши, всяко медь есть. Ибо по изъятии из грязи злату, и омовению причастившуся, паки в первую доброту своего светоблещания обращается. медь же как ни мой всяко медь есть, естества бо своего из предел не может выступити. Подобне сей еретическое крещение содержаи (кроме тайнодейств крещения, или миропомазания. понеже по Матфею канонисту миропомазание - часть есть крещения) не может своей природности уступити, еже есть неверия ссложити. Православное же крещение имыи, аще и грязию неверия тое осмрадит, аще и сажею грехов очернит, но цел и неотмытен характир святаго крещения на своей имеет даже и вовеки. якоже душезрительное Зерцало показует. Ибо якоже злато из грязи, тако от неверия к благоверию обративыися, может паки прежнюю красоту себе всецело восприять или с постом чрез миропомазание, или кроме миропомазания во время нужное. такоже и во время церковных архипастырей мнози таковии, иже без мира, чрез едино покаяние сподобишася паки получити благодать Святаго Духа. якоже от жития Пахомиева и от прочих истории церковных, и от отечников достаточне о сем засвидетельствуется.

Еретическое же крещение имеяй, како оныя благодати или дара Святаго Духа без тайнодействия сподобится? Иже в начале приятия не действовал Дух Святыи его крещение, пописанному: Имать бо всяк еретик в себе дух дияволь. тем противится Святому Духу, како во един чин с крещенным кафолически, еретическое крещение имущаго помыслим положити. Иже друг с другом вины действительныя и совершительныя в крещениях обоих содержаще замыкают. Ов от православных восприя крещение, сей же - от еретик. Той на крещении своем восприя Дух Святыи. сей же - духа нечистаго. И паки: той по качеству и количеству своего согрешения судится, сей же единомерно по уставлению всесоборному. Ов убо на двогодищное или вящше под запрещение полагается, сей же из единственной меры не выступает. Тому и до смерти негде каятися повелевает, сего же, по Лествичнику, церковь скоро приемлет. Оному истории и кроме миропомазания единем покаянием ко святей церкви примирение показуют, сему же нигде в писании надежды кроме получения таин спасения не определяет. Верно есть слово, и всякаго приятия достойно.

 

Пререкание, 3-е.

Умствуют паки противнии чрез покаяние совершитися еретическому крещению. на кое они вземлют свидетельство из толкования 1-го правила, Великаго Василия, в котором третияго чина еретиков за краткость речения, яко бы с единым токмо достославным покаянием приимати повелевается.

На что отвещаю.

Вскую о противницы! разглашаете разум святыя церкве. понеже нигде она своими учители, четвертаго чина от еретик приходящих не приписует, но всюду три токмо чины на еретиков полагает. Воззрите и в самое правило 1-е Василия Великаго, и тамо точию три чины от него излагаются, четвертаго же отнюд не назнаменуется. Согласите убо с прочими правилы сие толкование - всяко согласно обрящете. понеже третияго чина еретики с покаянием и проклятием ересей, вкупе же и с возложением рук презвитерских приемлются. засвидетельствует непременныи сей обычай святыя церкве на таковыя творимыи Тимофей архиепископ Александрийскии. Зри Кормчую старопеч. лист 606. К сему же присовокупи толковании 8-го правила, 1-го и 95-го 6-го вселенских соборов и изъявление Тимофея презвитера, и тако ясное согласие возблистает. Покаяние по Катихисису большому пятая тайна числится, но сущим верным на очищение от святыя церкве предана суть, якоже вопросоответственно сице тамо пишет: Покаяние есть вторая дщица по разбиении крестильнаго корабля. нуждно потребна тайна согрешившим.

 

Надсловие.

Тако убо показах ти любезныи читателю в вышепредложенных ответствиях, яко различны суть дары Святаго Духа. Тако убо явих слезы полезны суть верным согрешившым. Сице тебе засвидетельствовах, яко пост един не доволен есть, кроме тайнодейств, на очищение еретическаго крещения. Сице указах ти, яко покаяние верным по крещении согрешившым устроено есть. Тако не согласно есть сие разумение святей церкви, еже еретиком единем точию достославным покаянием без церковная действия очищатися. И сице кроме церковнаго положения иначе и иначе разумети по различию нынешних толков не без трепета и страха обретаюся. Тако и вам благочестивыи читателю разсуждати совещеваю.

А еже о пятидесятном посте, полагаемом ими на третии еретическии чин [то есть на Михайла Григорьева и прочих], я писати не разсудих, понеже таковых чиноположении на третии чин в правилах нигде не зрится, того ради втуне оставих.

А еже частному собранию негде во угле, без присудствия прочих православных христиан, такоже и кроме повинных ими лиц, веровати, и основание своего спасения на том полагати отнюд ненадежно есть, по гласу вселенскаго учителя: Муж безсоветен, сам себе ратник. И паки: спасение бывает во мнозе совете.

Темже читателю благочестивыи, кая есть спасению надежда, в раздорниках церковнаго единьства? егда и самим им в …ях[нрзб.–раздраниях?] многих сияющим, коей убо из них раздора секте последовати без опасения есть? Питерския глаголют, у нас филиппова согласия правое разумение. Вопреки же тем, московския балчюгу последующии вопиют: нет у нас, а не у них правое состояние филиппова сословия. Симеон же Шаготьскии на обои сии вооружаяся глаголет: нет сии заблудиша от филипповых путей, я достоверной осталец прежняго филиппова мнения. И подобно как свеща во мраце блистающая, тако он о себе быти мечтается, осуждает же всех топозерян и иных многих различных филипповых толков, и федосеевых. Сице и прочии друг друга позорствующе винословят. Сим ли слышателю многоразличным мнениям вверити свое спасение надежно есть? никакоже никако.

Ты же буди последуя непревратному разуму святыя церкве, восходя на горы священных писании. В них же во время таковых смущении можеши себе покой обрести. Якоже и Лот гору Сигор от содомскаго горения …[нрзб.-спасшуся?].

Прочее благодарение Господу Богу с поклонением отдаю, яко благоволи словеса нашя во благом ответе окончати. Ему же буди от нас, честь и слава, ныне и во вся веки, аминь.

 

Время же окончания сего труда четверток сырныя недели запечатлеет.