Диакон Феодор с соузниками Пустозерскими

 

ОТВЕТ ПРАВОСЛАВНЫХ

 

[И Правила, и книга Ответ наш о православних догматех – за руками – послано все с Поликарпом. И ты, братец Иван, порадей о пользе церкви Христовы опасно и сотвори так, как отец приказывал вам: в Соловки пошли и Москве верным. И тут (на Мезени) давай списывать верным человеком, иже довольны будут, и иных научити, а списывали бы добрым письмом (диакон Феодор, из письма к сыну Аввакума Ивану)];

[Еще же от меня и от братии дьяконово снискание послано в Москву, правоверным гостинца, - книга «Ответ православных» и обличение на отступническую блудню, писано в ней правда о догматех церковных. (из «Жития Аввакума»)]

 

Книга сия, глаголемая Ответ православных

Во имя Бога-Отца, и Сына Его Исуса Христа, и Пресвятаго Духа, единаго во Святей Троице, истиннаго Бога.

Ответ православных, благочестия поборников, о Сим­воле православныя веры [еже есть Верую во единаго Бога] и о прочих церковных догматех правых к хулящим старыя святыя и непорочныя книги,

и своя, догматы нововводяще растленныя, и теми ныне христоименитыя люди всеа Руския земли возмутивше.

 

И ты, всяк православный читателю, внимай зде крепце и разсуждай лжу со истинною трезвым умом, понеже инаго такова верна свидетелства не обрящеши нигде же в нынешнее последнее время великаго и многаго ради гонения на церковь, Богу попустившу грех ради наших.

«И се ныне прииде час искушения на всю вселенную [по От­кровению Богословлю], и искусити живущих на земли» {на поле: Апок. глава 3}, в том же искушении и мы плаваем, борющеся со многим обуреванием про­тивных духов, но кормщика и правителя корабля своего имамы Хри­ста истиннаго, рекшаго, яко «Церкви Моея врата адова не одолеют» {Мф. зач. 67}; и о сем до зде.

Зри же свидетельства о Символе православныя нашея християнския веры и в коих местех ныне разодран новой.

[Первое]. Против древних — литера приложена, [«иже»]: «и во единаго Господа Иисуса Христа» глаголют, и тою прилагатель­ною литерою отделяют человечество Сына Божия во ин состав от Божества. И того прилагательнаго слова ижа ко Исусу отнюдь ни во единой древних книг несть — ни в рукописных, ни в печатных, что есть книг в Рустей земли, но везде «и во единаго Господа Исуса Христа». И в прочих словесех писано: «Исус, Исуса, Исусе, Ису­су». И аще бы годно то было матери нашей святей росийской церк­ви, еже глаголати и писати Спасово имя Исус Иисусом, тогда бы еще древния преводницы святии Кирил Философ и брат его Мефодий, епископ Моравский, и прочии по них превели бы со греческаго языка на наш словенский язык в книгах «И [и]суса». Но несть, несть!

[Второе]. В Символе погрешение учинили, отняли литеру аз. Где стоит в старых книгах в Символе: «Бога истинна от Бога истинна рожденна, а не сотворенна», а ныне пишут и глаголют: рожденна, несотворена. А та литера аз стоит в нашем непорочном Символе против сквернаго еретика Ария, яко острое копие. Той бо Арий, враг, хуляше Сына Божия, тварь нарицая его, а не Творца твари; того ради святии отцы, 300 и 18, на Первом Вселенском соборе обличивше проклятаго Ария, разделяющаго триипостасное Боже­ство Святыя Троицы, и то слово аз в Символ противу нечестивыя хулы его, яко меч, поставиша на отсечение ереси его, и тою лите­рою, азом, скверное сердце его прободоша, глаголюще в Символе веры [рожденна Сына Божия от Отца прежде всех век] рожден­на, а не сотворенна, единосущна Отцу, им же вся быша. И тако стоит и стоял доднесь во всех древних святых книгах, рукописных и печатных, в киевских и московских, в сербских и болгарских, и острожских — везде в Символе «рожденна, а не сотворенна».

[Третии]. Раскол положиша ныне в Символе: вместо несть кон­ца — не будет конца, будущим глаголом, а не настоящим време­нем. И сего речения отнюдь же несть во всех вышереченых книгах, в Символе, но во всякой книге: Его же царствию несть конца, яко уже Господь наш Исус Христос и воцарился в дому Ияковли во веки, сиречь в церкви верных. И тако предан бысть Символ от свя­тых отец 1-го собора, и тако по них держаша вси святии и держат доныне, кроме отпадших единства веры. Тии бо едини преложиша в Символе не будет конца вместо несть конца и потпирают себя глаголом архангеловым токмо, егда той послан бысть благовес­тити зачатие превечнаго Сына Божия ко Пресвятей Деве Марии и глагола ей: «Зачнеши во чреве, и родиши Сына, и наречеши имя Исус, и воцарится в дому Ияковли во веки, и царствию Его не будет конца». И сие глагола архангел Богородице будущим глаголом, хо­тящая ся збыти на Пречистей, «еже зачнеши, — рече, — и родиши, и наречеши Ему имя, и сей будет велий, и воцарится, и царствию Его не будет конца». И се истинна от архангела к Богородице Деве реченна быша. И по сему их толкованию аще будут рассуждати себе о Христе в Символе веры, то далече отпадут от истинны Христовы и в жидовство уклонятся. Тако по их заблужению и ныне еще Христос не воплотился, ни воцарился, но будет еще родитися и царствовати.

О Господи Исусе Христе, пощади нас от таковаго неправославнаго мудрования! О порождения ехидна, доколе грызете чре­во матери своея, доколе терзаете то! Лучше бо вам не прелагати предел вечных, яже положиша отцы наши. Почто остависте сосцы матери своея и за чюжия хватаетеся, лестное млеко? О мятежни­цы церковнии, лучше бы было вам тот же свиток православия, в ру­ках держаще, прочитати, его же вы во святом крещении обещавшеся цела и непорочна хранити до смерти своея! И отвсюду вы обличаеми во своей неправде, и негде уклонитися от солнца правды. Закрываетеся архангеловыми глаголы, что неприлично к тому Сим­вола мудрованию полагати не будет конца Христос, Спас наш, как воцарился по благовещению архангела Гавриила, тому 1675 лет [по синодальному 1667], и царствует ныне всеми языки, и царствовати будет во веки, и царствию Его горнему и долнему ныне несть конца, яко и ныне и присно царствует, верными — по присвоению словеси, неверными же — по словеси создания. И глаголем вам, кривящим веру, а не правящим глаголете Символ исправляти в новых книгах з древ­них харатейных книг и сербских, а в харатейных и прочих книгах несть конца, якоже и прежде рекохом, и вы та, готовая оставльше и за иная хватаетеся льстивно. На что сами сосластеся, от того же обличаетеся, яко лжу глаголете, и сами от своих словес осуждаетеся, яко преступницы закона Христос глаголет «Горе человеку тому, им же соблазн приходит».

Четвертое погрешение в Символе — о истинном Святем Дусе, еже, истинства его отметающеся, глаголют «Истинный — прилог есть». А кто приложил, того они показати не могут ни лица, кто приложил, ни времени его, ни места, где и когда то бысть тако, и когда на свету не бысть верных християн, что о таком деле вси умолчаша? Скажите, ненавидящии, в Символе Господа истиннаго, но вем, яко и уст отверсти не можете о сем!

Мы же истиннаго благодатию просвещаеми и наставляеми тем же слуха ради верных, зде предложим многия облацы сви­детелей, яко истинный в Символе всегда бысть. И от святых отец 150-ти, тако веруем, предан бысть на 2-м Вселенском соборе всему исполнению церковному. И о сем слово зде начинается от кон­ца веры и до начала доходит, сиречь от московских книг святых до Втораго Вселенского собора и до самого началника веры и со­вершителя Исуса, всяко бе по ряду слово впред идый объявит.

Вонми, всяк православный, нелюбоприятелне, но благопослушателне, и всяко изволение злое от ума изгнав. Не бо своя ищем поставити, но готовая вся на среду предлагаем, яже от многих — лености ради — утаися. Нами же многотрудно поискася истинна, как распря наста, и многим потом и слезами снискася многаго ради книжнаго разгласия о истинном, но истинный сам себе прославля­ет ясно и устами святых своих глаголет велегласно, лучи своя в вер­ных сердца простирает и призывающих его на истинну наставляет. А кто воставая на истиннаго — погибает и в непрощенное нечес­тие себя вметает.

 

Свидетельства о исповедании Святаго Духа

 

Во всех московских православных книгах, печатных при бла­гочестивых царех Иоанне Васильевиче, Феодоре Иоанновиче, Ми­хаиле Феодоровиче, и при нынешном государе царе Алексее Ми­хайловиче, и при пятих святейших московских патриарсех до Ни­кона-отступника, возмутившаго святую церковь, и в тех книгах не­порочных, в Часословах, во Псалтырях с воследованием, и Треб­никах , и Минеях общих и месячных, декабря и генваря, в Цар­ских Часех, во всех и в Духа Святаго, Господа, истиннаго и животворящаго. И теми святыми книгами наполнися вся Росия, свидетельствованными пятию святейшими патриарси, и митрополиты, и архиепископы, и епископы, при них бывшими, и всем освященным собором. И никто от них, святых пастырей наших, не зазре отнюдь в Символе веры и ни в малом чесом от догмат святых, но вси друг по друзе идуще, и якоже приимше что, тако то и держаще и преподавающе друг другу без притыкания и порока, тщащеся соблюсти цер­ковь Христову, и православныя догматы невредны сохранити, и люди христоименитыя бдяще во православии упасти, и души своя за них полагающе, яко истиннии пастырие Христова винограда.

От пятих же святейших патриарх два исповедника Гермоген и Филарет. Святейший Гермоген пострада за церковь Христову от злочестивых поляк, заморен бысть гладом в Чюдове монастыре, владущим им тогда Москвою после ростриги. Святейший же Фила­рет в Полше от нечестивых же ляхов пострада много лет за церковь же святую, но благочестия не предал и с победою возвратися во свое отечество, и о сих писано во своих местех. Нам же о настоящем деле глаголати истинну подобает на утвержение верным.

И в Книге «о правой веры», в четвертой главе, о Святем Дусе «... и в Духа Святаго, Господа, истиннаго и животворящаго».

И в Книге, иже глаголется Кирила Иеросалимскаго: «... и в Духа Святаго, Господа, истиннаго и животворящаго», чти лист 89, 127, 258, 380, и 383, 405, 416, и лист 507 совершенно.

И и киевских Часословцах, печатаных в Печерском монасты­ре в лето от Рожества Христова 1660 году, и в тех; «...и в Духа Святаго, Господа, истиннаго и животворящаго», — и прочая вся Символа добре.

И Иверского монастыря на Валдае Никоновы печати Ча­сословы в четверть изданы по его велению, и в тех: «И в Духа Святаго, Господа, истиннаго и животворящаго», — и прочая вся со старыми сходна в них. И зри всяк Никоново заблужение ума: и так и сяк верует!

И и книге Болшом Катихисисе: «... и в Духа Святаго, Господа, истиннаго и животворящаго». Сия святая книга и богомудрая написана бысть на еретическия многия речи латинника Лаврентия Зизания, хоте он зазрети в нечесом нашея церкви догматом, и от своих словес осудился от наших богомудрых мужей, прящихся с ним о вере, и святейшаго патриарха Филарета великою похвалою ублажил, что ко истинне его привел.

И во Успенском соборе на Москве была икона, древнее писмо, еже о нас совершившаго все свое смотрение Господа нашего Исуса Христа, и на той иконе весь Символ написан над праздни­ки Владычни: «... и в Духа Святаго, Господа, истиннаго» и про­чее. И егда уведавше нынешнии заблуждшии пастыри, что бла­гочестия ревнители на ту чюдесную Спасову икону зряще, и Сим­вол прочитающе, и о истинном себе подтвержающе, тогда они, не­навидящии истиннаго в Символе и срама ради своего, скрыша ту Христову икону не вем где с того места, а в тое место, написав, поставиша Успение Богородицы. И то какая правда слепых вожей, скрывающих истинну Христову, кто их безумия не кает?

А еже в руских же многих рукописных книгах писан Символ разгласно: о Святем Дусе исповедь: «И в Духа Святаго, истинна­го» (Господа — несть тут), а во иных: «И в Духа Святаго, Господа, и животворящаго» (иже токмо между Господем и жи­вотворящим), а инде в книгах: «И в Духа Святаго, Господа, жи­вотворящаго» (тамо несть истиннаго, где Господа есть, а иде же — истиннаго, тут Господа несть), а во иных книгах рас­тленных ни Господа, ни истиннаго, токмо: «И в Духа Святаго, животвррящаго». И то все от преписующих невеж, безумных лю­дей, как кто хотя, сице и писа, паче же наветом коварным сатаны, истребляющаго истинну из книг, но истина Христова Евангелия крыется во истинных Христовых рабех и до скончания века, аще и в малых останется, а будет.

Пред вторым бо пришествием праведнаго Судии, укло­нятся вси людие в нечестие розных ересей, паче же в прелесть Ан­тихристову. О сем сам Спас наш, истинна и живот, рече: «Егда приидет Сын человеческий, обрящет ли веру си на земли?». И на сие Христово слово толкуют богословцы: «Не обрящет, кроме малых избранных, забегших в горы и пустыни» {Лк. зач. 88}. И лучши бы было Нико­ну и дрожжами прокислыми его мудрецем собрати себе богомуд­рых мужей и преподобных и крепко с ними вкупе испытати Бо­жественное Писание о последних днех, и блюстися отступления, хотящаго быти прежде пришествия сына погибелнаго, по Апосто­лу, а веры бы правыя не превращати, но паче стоящих во благоче­стии подтвердити; подобает и на святых отец наших хулы не наносити, предавших нам священныя предания, и сами тако веровавше право и прямо, и угодивше Богу.

А еже глаголют прелагающии старыя предания, и истин­наго из Символа истребляющии, прилогом нарицающе («В печат­ных книгах приложиша», — глаголют лжуще), а кто приложил ис­тинного или кто повеле приложити, кой царь или патриарх, или ин кто, того они не ведают, утаи бо ся от них премудрость Божия, но токмо сатана лстивый научил их лгати и клеветати на правоверие отец своих, от них же и сами всякое освящение прияша прежде, и сами заблудивше от веры, а святых пастырей церковных прежних порочат, яко бы поблудивше в вере и в догматех церковных погрешивше, глаголют лжюще безстыднии, како бо не бысть тогда в церкви Христове правыя веры. Христу глаголющю, яко «Церкви Моея врата адова не одолеют», и паки: «Се Аз есмь с вами во вся дни до скончания века» {Мф. зач. 67 и 116}. И аще Христос в церкви своей во вся дни («И Церкви Моея, — рече, — врата адова не одолеют»), то како по их лжи одолеша церковь врата адова, сиречь святых пасты­рей, в церковной вере пребывающих, и всех верных христиан? Оле суемудрия немудрых, о помрачения от неверия! Истинный бо в Символе и до печатных московских бысть и есть, и в писмяных добрых книгах и свидетельствованых до царей еще руских, при ве­ликих князех киевских, и владимерских, и московских.

Видехом книгу харатейную древню, преписану на Москве с ыныя книги, и тое старее, в Киево-Печерской монастырь, архимариту Иосифу, тогда тамо бывшу, на латинския ереси писано в ней — тому, триста лет без мала по летописи в ней — и о Сим­воле сице там: «Символу веры от евангельских речей сложену сущу и яве глаголющу: И в Духа Святаго, истиннаго и животворящаго» и прочее. В ней же и о сложении перстов сице: «Аще кто не исповедает во Христе дву естеств и не крестится двума персты, яко Христос, [таковый] да будет проклят». Сию книгу у нас вла­сти темнии отняли, чтобы не ссылалися на ню.

И преподобный Иосиф Волотской в богословной книге своей Просветителе [от собора нареченной] пишет в седмом слове на новоявльшияся тогда новгородцкия и московския жиды, от християнства отступлшия и Христа и Духа Святаго хулившия. И по­срамляя их святый Иосиф многими богословцы, о Святем Дусе бе­седуя, глаголет сице: «На святых 7-ми Вселенских соборех 2000 бысть святых отец, а вси свидетельствуют: "И в Духа Свя­таго, истиннаго и животворящаго"». В том же слове и сам свя­тый глаголет на конце слова: «Всяк веруяй в Духа Святаго, ис­тиннаго и животворящаго, иже от Отца исходящаго, сей истин­ный израильтянин есть, в нем же лсти несть», и яснее там, в книзе его святей.

И в Правилних писмяных книгах в Сергиеве монастыре и инде много видехом, и в Толковых Символах: «И в Духа Святаго, ис­тиннаго и животворящаго», и до печатных книг, и кто нам ис­тиннаго приложил во всех книгах вышереченных? Отраднее бы им и лучше Господа не положити в Символе, нежели истиннаго изметати, но не буди то от нас! Зде внимати всякому православ­ному, яко и до печатных книг в Символе бысть есть истинный.

 

О начале печатных московских книг

 

Егда убо продолжением времени от начала Святоруския земли многи разтлешася рукописныя книги в речении многих сло­вес от неискуства преписующих их, овии же греческия книги многия не преведены еще быша на словенский язык, тогда благоверный великий князь Василий Иоаннович посла в Царьград ко святей­шему патриарху, чтобы прислал премудраго мужа и святаго, всеко­нечно ведущаго греческий язык и словенский, паче же книжный разум и богословию всю. И патриарх той поиска у себя в Греческой земли такова мужа и не обрете. Посем же посла во Афонскую гору, и там в 24-х монастырех едва обретоша двух таких мужей, и единаго от двух — Максима Грека — посла к великому князю, и писа о нем сице: «Посылаю ти втораго Златоуста». Князь же Василий при­ят его честне и предаде ему преводити книги греческия на свой сло­венский язык. И егда преведе едину книгу, Псалтырь толковую, и великий князь не просто прият, но на соборе предложил ю, и архиереи Христовы свидетелствоваше, с похвалою прияша ту. Посем и прочия повеле преводити и преведеныя исправляти добре руко­писныя. И в сем святем деле преподобный Максим Грек 9 лет тружаяся преводя и исправляя книги добре. И с того Максимова исправления после великаго князя Василия сын его и первый царь московский Иоан Васильевич повеле печатным тиснением произ­води книги на болшую славу Богу многочисленному рускому на­роду, и да не паки книги повредятся преписующими, но якоже еди­на, тако и вси в себе согласие стяжут, еже и бысть. И теми непо­рочными книгами печатными тогда и по сих наполнися все наше государство Московское, и окрестныя его грады, и страны, и села, и великия святыя лавры, и морския островы, и, просто рещи, всяка церковь наполнися ими преизобилно, а распри не бысть в них ни единыя до нынешнаго Никонова развращения и раскола. Аще и не при едином царе и патриарсе печатаны, но вси едино согласие имут в себе, а не яко ныне при едином Никоне исхождаху новыя книги, а во многих местех сами собою не согласуются, и не у зде время о сем.

И оный Максим Грек о Символе веры в писмяных книгах, их же расмотряше, исправляя, не зазре отнюдь ни о истинном, ни о несть конца и о прочих, о них же отвещаем, но и сам во своем Исповедании, в книзе своей, Духа Святаго, Бога истиннаго испо­ведает ко оклеветающим его тогда небратолюбцем, токмо зазре в том, и обличая, не стыдяся, глаголющих неких тогда в Символе из Марии Девы вочеловечъшася вместо и Марии Девы. О том и в кни­зе своей написа. А еже глаголют новыя буесловы, яко едино есть в греческом языце зовется Господь и истинный, и сего для в Сим­воле овии Господа писаша, а инии истиннаго, кто что любя. Мы же глаголем: не едино есть звание Господу и истинному, но велие разньство между сими имены в греческом языце и словенском. По- гречески — Кирион, а по-руски — Господа, по-гречески — алифинон, а по-руски — истиннаго. Чти Алфавит, и буди по их лож­ному баснословию зде, яко истиннаго в руских книгах приложиша, аще и не указуют кто, но мы зде им заградим духоборная уста ста­рее наших руских книг сербскими печатными книгами, не единою и двема, но безчислеными.

Во святых тех книгах сербских Символ сам аз прочтох: «И в Духа Святаго, Господа, истиннаго и животворящаго, иже от Отца исходящаго» и прочее. И о сем Бога свидетеля поставляю на мою душу, яко не лгу. И во всем сербския книги с нашими согласны, слово в слово. И как печатана та книга, сербская Псалтырь со воследованием [чин по Уставу святаго Савы Освященнаго положен написано], тому без мала двести лет по числу. Тако же и в болгарских книгах: «И в Духа Святаго, Господа, истиннаго и животворящаго». И кто в сих книгах приложил истиннаго? Мощно ли и на них вам солгати, но заградишася уста хулныя глаголю­щих неправду!

А тии сербы и болгары прежде нас, Руси, крещение прияша и книги от Констянтиноградския церкви. И болгарскому князю Михаи­лу вскоре по крещении его святейший патриарх Фотий, крестивый его, писа о святых 7-ми Вселенских соборех изящно и какову быти князю достоит, утвержая его в вере, и Символ тут весь написан в послании его: «И в Духа Святаго, Господа, истиннаго и животворящаго» и прочее. Сие Фотиево послание напечатано в Ки­риловой книге Иеросалимскаго московская печать, лист 507.

Тако же и во острожских книгах святых благовернаго кня­зя Василия Констянтиновича, печатаных во время униатскаго отступления, и в тех: «И в Духа Святаго, Господа, истиннаго и животворящаго». И те его Часословы со старопечатными нашими сходны зело. А той благочестивый князь Василий Острожской ве­лик поборник бысть по благочестии тогда и отступлших своих па­стырей нечестивых обличал, а верных удивителными своими посла­нии укреплял. К нему же тогда и святейшия вселенския патриарси писаша изрядная послания, Афонския горы скитницы, похваляючи его ревность по благочестии. И сия вся послания в Кириловой же книге напечатаны, хотяй прочитает. И во время уни­атскаго того отступления истиннаго из Символа вынял у них Мелетий, епископ Смотрицкой. А истинный Господь его, врага свое­го, выкинул ис церкви своея, и во униатском отступлении зле скончася. О сем ведомо есть всем малоруским древним людем.

И сия вся слышавше и видевше униатскаго отступления поги­бель, священнии пастырие наши тогда наипаче убоявшеся, близ себе падших зря, и верных подтвердиша во православии крепко стояти, да не таяжде постраждут, яко и униаты, оставлше благочестие своея церкви и приступивше к богомерскому римскому костелу, приимше их развращенныя догматы. А на верных тогда великое го­нение воздвигоша, якоже поведает в Книге о вере на их отступле­ние, изданой в царствующем граде Москве. И тамо в их Символе положено не будет конца [яко же и Никон сотвори на Москве]. А кроме того — отнюдь ни в коих книгах не обрящешь разве того униатскаго Символа, якоже и прежде рекохом.

Да и древле, тогда, егда не бысть еще патриархов на Москве, токмо митрополиты, егда начаша печатныя книги заводити,  тогда, свидетелствоваше послание святейшаго патриарха Цареградскаго к болгарскому князю Михаилу, о нем же писано выше сего о Символе, и сербския книги разсмотряше и иныя многия, и везде Символ со истинным обретающе, и святым Евангелием со­гласующееся положиша. Аще и в книгах о сем промолчаша святии прежнии отцы и пастырие, не ведевше бо напасти сея тогда, хотящия изыти ныне из врат адовых на церковь Христову велико­российскую.

Еще же глаголем, яко и до патриархов московских и при патриарсех уже прихождаху в рускую нашу землю святейшия вселенския патриарси: при царе Феодоре бысть Иеремия, пат­риарх Цареградский, иже перваго патриарха поставил на Москве Иова, и при царе Михаиле бысть Феофан, патриарх Иеросалимской, чюдный муж [есть о нем писано], тот поставил Филарета, страдалца, патриархом. А о вере они у нас отнюдь ни в чесом не зазираху, но еще и похваляху и удивляхуся, глаголюще сице: «Яко солнце на небеси сияет и лучами вселенную озаряет, тако и в Московском государстве православная вера сияет и вся концы зем­ли благочестием своим просвещает». Тако бо и в грамотах их в Кор­мчей книге напечатано: «И нам от вас лепо ныне исправлятися, — глаголюще сии, — понеже мы обладаны насилием турецким и мно­гими зловерными обстоимы есмы еретицы».

И по сих немало лет преиде, и егда прият скипетры царствия тогда благочестивый царь Алексий Михайлович при Иосифе патриарсе, и посылаше во оно время в Греческую землю дозирати бла­гочестия Троицы Живоначалныя Сергиева монастыря келаря, старца Арсения Суханова, искусна мужа Писанию Божественному, во 158-м году. И егда Арсеней-келарь доиде в Греки, и слыша и видя у греческих властей благочестие пред старым много изменися и превратися: в крещении обливаются, и в еретических церквах служат, и с еретики причащаются, и трема персты, щепоткою, кре­стятся по-арменски, и брады бриют, и иная многая противная во­сточной церкви творят, и табак пиют пестрыи их власти. И Арсеней Суханов во всем их обличал нещадно Божественным Писа­нием, а наипаче же о крещении обливалном еретическом и о сло­жении трех перст по их, и зело посрамил их всех, что много преда­ния церковнаго измениша, а называются православнии. И о всем писано пространно, в Хождении его, время, и место, и лице, чтый да разумеет, мы же на предлежащее возвратимся.

О Символе веры пишет {Соборник московской печати} святый Иоан Дамаскин в Слове своем в 1-ю неделю поста на вся еретики и иконоборцы сице: «И в Духа Пресвятаго, Господа, истиннаго и животворящаго» и прочее. И в харатейной книге видехом Дамаскина слово истин­ный есть.

И преподобный отец Варлам учил царевича Иоасафа индийскаго вере: «И в Духа Святаго, истиннаго и животворящаго {Пролог, апрель, 11 день}.

И святый Иоан Златоуст учил приходящих к вере, в Марга­рите, 1-е Слово о оглашении: «Верую, — рече, — и в Дух Святый, истинный и животворящий, на того уповаю мое освяще­ние» и прирече: «Поучайтеся душою и языком всегда» и прочее.

И святый благоверный царь Констянтин пишет в грамоте сво­ей по крещении своем, как приял християнскую веру и крещен от святаго Силивестра, папы Римскаго, глаголет: «Веруем и в Духа Святаго, истиннаго и животворящаго, якоже научихомся от священнотворнаго и крайняго святителя Селивестра-папы». Тут же выше сего в Слове: «Его же царствию несть конца» и прирече: «Сия есть наша православная вера»; тамо зело пространно писано. И тако стоит в рукописных книгах и в печатной Кормчей книге, и се по сему знатно, яко и до 2-го Вселенскаго собора глаголали святии истиннаго и учили верных тако. Паче же на 2-м соборе святии исполниша веру, егда собрашася на Македония-духоборца, бывша патриарха Царяграда. Тот Македоний, враг Святыя Троицы, впад в непрощенное нечестие, похулив Святаго Духа, единосущнаго Отцу и Сыну, нарицая его тварию, Творца суща и совершителя всех тва­рей, им же всяческая живут и движутся. Тогда бо повелением благочестиваго царя Феодосия собрашася святых отец 150 на Македо­ния-духоборца и осудивше его, прокляша, а Святаго Духа единосущ­на проповедавше Отцу и Сыну, Бога истинна и Господа животво­ряща. Сице в Кормчей печатной книге, а в древних рукописных сице: «Святии отцы, 150, Святаго Духа, Бога и Господа, истинного и животворящаго, уясниша бытие, якоже Символ предержит, еже тии яснее благодатию Святаго Духа изгласиша», чти о 7-ми Вселенских соборех о сем.

И зде явственно показася о 2-м Вселенском соборе, яко святии отцы на нем Святаго Духа, Господа, истиннаго не отмета­ли, но всем верным тако предаша в Символ, последующе 1-му Вселенскому собору, 300 и 18 святым отцем, яко тамо святии отцы два лица — Отца и Сына — истинных проповедавше, сице положиша в вернем образе: Бога истинна [Сына] от Бога истинна [Отца]. Тако и зде, Духа Святаго, Господа, истиннаго 2 собор исповеда: якоже истинен Отец, тако же истинен и Сын, истинен же и Святый Дух, вкупе — Святая Троица; единосущен Бог един, а еже Бог глаголется и Господь зовется, то едино есть имя и равно: ни Бог больше Господа, ни Господь менши Бога {чти Маргарит}. О сем отвещает в Слове о непостижимом [Маргарит, слов 5-е, л. 44 об.]. А яко непрощенное есть нечестие, еже хула на Святый Дух, сам Спас наш, Христос, глаголет во святом Евангелии: «Аще кто речет слово на Сына человеческаго, оставится ему, а на Святого Духа хулившему — не оставится ни в сем веце, ни в будущем» {Мф. зач. 47}. Кто сие Христово слово пременити может? Сего ради и святый Герман-патриарх в творении канона своего собором святых отец глаголет сице (стих, чаю, в 7 песни): «Непрощенным нечес­тием недуговав, волк Македоний прирази бо ся Духу, обожающему человеки» и прочее.

И зде вострепетати подобает востающим на Святаго Духа, Гос­пода, истиннаго, и из Символа того изметающим, и святых отец облыгающим, яко истиннаго в Символ не прияша, а святии за ис­тиннаго умираша, и еретика Македония словом Христовым препреша, яко Христос рече: «Дух истинный, иже от Отца исходит» {Ин. зач. 52}.

Не лжыте, слепии, на святых райских жителей, не станет бо вас с тех бесчестие! Зрите облак свидетелеи о истинном, яко бысть, и есть, и будет! А еже глаголют, яко не хулим Святаго Духа, но истиннаго не прилагаем, и се явная есть хула, яко не токмо ис­тиннаго едино изметают, но и стоящих за истиннаго прокли­нают, и мучат, и уморяют различно. В том их судит сам Истинный и имат судити.

И ахайстии презвитеры поведают о апостоле Христове Анд­рее, яко учил их веровати сице: «Веруйте в Бога-Отца истинна­го, и в Сына Его Исуса Христа истиннаго, и в Духа Святаго, ис­тиннаго Бога», — и прочее тамо.

Сему же подобно и в 1-м соборном послании Иоана Бого­слова, и той апостол и друг Христов вся три лица Святыя Троицы истинных благословит на конце Послания.

Паче же сам Истинна и Живот наш пречистыми своими усты трикраты благословя, рек учеником о равночестнем своем и единосущнем Дусе во святом Евангелии Иоанна Богослова, зачало 47: «Аще любите Мя, и заповеди Моя соблюдите, и Аз умолю Отца, и инаго утешителя даст вам, да будет с вами во веки Дух истинный, Его же мир не может прияти, яко не видит Его, ниже знает Его. Вы же знаете Его, яко в вас пребывает и в вас будет». И паки: «Егда приидет он, Дух истинный, наставит вы на всяку истинну» {Ин. зач. 53}. И паки: «Егда же приидет Утешитель, его же Аз послю вам от Отца, Дух истинный, иже от Отца исходит, той свидетелствует о Мне» {Ин. зач. 52}.

И сия Христова животная словеса — корень и источник в богословии о Святем Дусе, ими же защищахуся вси святии от еретиков, паче же от латинников, преступающих Христово слово и глаголющих исхождение Святому Духу и от Сына и многих во свою погибель уловляющих, и уловиша мало не весь свет. И се еди­на беда и хула на Святый Дух, еже прилагати и от Сына исхожде­ние Святому Духу, преступающих Христово слово, и еже изметати истиннаго, не веруя словесем Христовым, яко той рече: «Дух истинный, иже от Отца исходит», а не приложи: «и от Сына». И кая отступления веры ни быша в древних родех, первие всех Символ повреждаху.

Первое, егда по 1000 лет по развязании сатаны от бездны паде Рим от веры и Символ повредиша приложением «и от Сына», по­том и иныя ереси составиша многия {Апок., гл. 20}.

Второе, униаты егда отступиша веры по 1000 лет, по числу зверя 600 исполнися, тогда такожде у них Символ повредиша, с латыни соединишася и истиннаго истребиша {Апок. гл 13}, якоже выше сего сказахом о Мелетии, епископе Смотрицком.

Посем же, егда преиде и исполнися по числу зверину по 600 летех 66, — о горе и увы! — в великой Росии развращение веры наста, лукавее и мудрее первых, и Символ такожде повредил Ни­кон, отступник и враг креста Христова: истиннаго истребил, и прочая превратил, и святых оболгал, яко святии истиннаго не прияша и прочия догматы не тако держаша, глагола льстивый, его же ис­тинный Господь тако же выкинул ис церкви своея, якоже и онаго отступника Мелетия Смотрицкаго, неизреченнаго своими судбами. И не сме никто же дерзнути от начала веры в предидущих родех истиннаго из Символа изметати в Руской земли, токмо един враг церкви Христовы и противник Евангелию Сына Божия Никон воста на истиннаго с прельстившимися от него, из книг изверже, и сам извержен бысть от ласкающих его прежде и дары приемлющих. Егда убо оныя лисы приимаху от Никона злато, и сребро, и соболи, тогда и догматы его похваляху и Господем его нарицаху. Егда же онаго слава увяде, тогда и руце свои нань возложиша и сана лишиша. Но — о горе живущим на земли! — аще и пес изгнан бысть, но блевотина его и доднесь сладце полизоваема пребывает от любящих ту и невидящих. Той бо окаянный Никон вселенную возмути и церковныя догматы и уставы отеческия вся преврати собранием пес­троты от различных книг, а иная мудрствуя и от чрева своего. И слу­жебники исказил многою пестротою, и шесть выходов новых слу­жебников при себе издал, а вси меж себе развратны во многих местех. А старых непорочных служебников службу до конца из цер­кви испроверже, ни обвиня ни словом. И крестное знамение в сло­жении перстов изменил, и трисвятую аллилуйю отверг, и вместо того небывалая своя в церкви положил, блазненная и развращенная от пре­жних врагов церковных, о них же зде скажем отчасти.

При великих князех и при животе преподобнаго Ефросина Псковскаго, чудотворца, бысть во Пскове некто Иов, «мотылной столп» именован, роспопа и троеженец бысть окаянный. Тот на­чал тогда четверити аллилуйю, и много о том писа от своего растленнаго ума, и повсюду разсылая, укрепляше аллилуйю 3-жды глаголати и четвертое — «Слава тебе, Боже!» приглашати. Пре­подобный же Ефросин возбраняше ему, о сем обличая и мудрова­ния его гнушашеся. И той Иов святаго Ефросина поношая на торжищих и вечерях и еретиком называя. Преподобный же стужив си, видя разврат в церкви, и сея ради вины иде в Царьград к патри­арху вопрошати, како восточная церковь держит аллилуйю. И пат­риарх его, Иосиф тогда, видя мужа свята, и прият честне, и вину от него уведе, ея же ради трудися, повеле итти в церковь и слышати аллилуйю. И слыша святый поющих ту аллилуйю 2-жды в 3-е — «Слава тебе, Боже!» [По гречески «Слава тебе, Боже!» «Докса си, Феос» глаголется.] И о сем святый возрадовася, яко не вотще трудися. И святейший патриарх, наказав его крепко: «Не мози, чадо, церковнаго предания изменити, держи, яже слыша, тако вселенская церковь держит аллилуйю!», и грамоту ему даде о сем, и иконою благослови; о всем писано в житии его ясно. И святый во своя возвратися с радостию, и без сумнения глаголаше во своей обители аллилуйю 2-жды, 3-е — «Слава тебе, Боже!». А той враг Иов, столп, два лета червми ядом и зле умре, яко ратова церковь Христову. И после сего в Рустей земли глагола­ли аллилуйю как кто хоте. И при благоверном царе Иоанне Васи­льевиче собор бысть, и то мудрование Иова-столпа отвержено пра­вым судом святителей тогда, и едино апостолское и отеческое пре­дание повсюду утвержено бысть. О сем с того собора святыи пастырие и в книге Стоглаве написаша.

В та же времена бысть и премудрый Максим Грек на Москве, и на смеющих дерзати аллилуйю трижды, а четвертое — «Слава тебе, Боже!» приглашающих, во своей книге о том Слово написа обличително, и называет то мудрование четвертое костела римскаго, а церковное предание [еже есть сице: «Аллилуйа, аллилуйа, слава тебе, Боже!»] утвержает четырми патриархи вселенскими и много там пишет о сем. И тако посем крепко утвердися во свя­тых книгах печатных до Никона, тако и в греческих книгах сто­ит «Аллилуйа, аллилуйа, докса си феос!», тако же и в вышереченных книгах сербских, и киевских, и острожских, и в Книге о стар­честве, сия вся сами видехом и прочтохом, и как сему врази церковнии противятся. А в греческих книгах тако видевши: нецыи от­ступницы аллилуйю и то заклеивают бумагою срама ради своего.

 

Свидетелства о крестном знамении

 

А о крестном знамении в сложении перстов по нас многая кни­ги свидетелствуют московския: Псалтыри с воследованием, Потребники болшия, Книги о вере, в книгах Кирила Иеросалимскаго и в Стоглаве то же. А на том соборе вышереченом, на нем же написана книга Стоглав, бысть и святый Гурей, архи­епископ Казанской, чюдотворец и мироточец, его же тело святое по 30 летех преставления обретеся в земли нетленно и мироточа.

Тако же и в Книге прежереченнаго Максима Святогорца о крестном знамении в сложении перстов.

Тако и в Книге святаго Петра Дамаскина на сопротив глаголание к неверным еретикам сице писано.

Тако и блаженный Феодорит мудрствова добре по Христе, а Никон его напрасно оклевета.

Тако и святый Мелетий мудрствова, патриарх Антиохийский, как в Стоглаве истолковано и в прочих книгах. А той святый Меле­тий бысть во время 2-го Вселенскаго собора, и того Никон оболгал, бутто святый Мелетий тремя персты благословлял.

А нынешния греческия патриархи и прочия власти их на сих своих древних святых о сложении перстов и не ссылаются — на сего Мелетия, и Феодорита, и Петра Дамаскина, и Максима Грека, и не знают их мудрования, как прелся с ними тамо оный Арсеней Суханов, келарь троицкой, о нем же выше писано, егда был посы­лан. Токмо горазды они верных проклинать по накуплению Никонову и прочих с ним, их же Бог судит.

Тако же и на святых иконах благославляющая рука Христова: три перста вкупе, а два — простерты — сложены, один от двух — великосредней — мало пригнут, в греческих и руских древних писмах и изрядных [изящных, и есть икона на Москве, письмо Луки-евангелиста, а у ней благословящая рука у превечнаго младенца тако же по вышеписанному, а стоит она у царя в Верху на Сенех во церкви у Евдокеи, и письмо икона Петра-митрополита Богородична, а у превечнаго младенца благословящая рука тако же по вышепи­санному, а стоит она на Москве во Успенском соборе, тако же руки благословящия у московских святых, у плоти их, у Ионы-митрополита и у Алексея-митрополита, еще же и в Кашине у плоти тако же, у великия княжны Анны. У всех сих святых мощей в руках крестное знамение по вышеписанным святым, по евангелисту Луке, и Феодориту блаженному, и Петру Дамаскину, и Максиму Греку, и Мелетию, и против Стоглаву]. И в Катехисисах, Болшом и Малом, о кресте, и в Гронографах есть. И святаго Петра, митрополита Московскаго, чюдотворца, его руки письмо есть икона Богородична в соборе — тако же рука Христова написана. И аще вся буду зде приводити свидетелства о крестном знамении и о прочих цер­ковных догматех, о них же выше глаголахом, то паче песка умно­жится и паче звезд. Верному бо и сия довлеют.

А греки нынешныя и наши заблуждшия пастуси слепии, сле­пым же водители, ссылаются о сложении перстов на некоего ипо­диакона дамаскина и студита, а прямаго имени ему и сами не знают. Тот их [глаголют] научил книгою своею тремя персты — щепоткою — креститися, а болше того не ссылаются ни на единаго святаго, все уже у них, видим, иссяче правое. А как был у них тот дамаскин иподиакон, студит, о том сами греки сказали Арсению Суханову, — всего лет с седмдесят, и каково его житие было — и того не ведают же греки, тако там писано.

А еже глаголют ныне, яко исправляют новыя книги с гречес­ких и с харатейных руских [и о сих руских рукописных сказано выше, что лгут на них и противно им все творят и прелагают, якоже хотят], а нынешния греческия книги печатают им римляне-отступницы и прочии еретицы в трех градех своих: в Риме, в Пари­же и в Винецыи, но не по древнему благочестию, с коих наши старыя книги преведены древле в добрыя времена. И книги старыя греческия римляне отнявши у прибегших грек в Рим от турскаго царя, как взял Царьград Салтан-царь, и преложивше на свой ла­тинской язык. А те святыя греческия книги все огню предаша еретицы они, и с того времени греки старыми книгами оскудели и у себя печати книжныя не имеют, но покупают у тех еретиков печатаныя книги греческим языком. А они, латинцы, печатая книги те, и сеют в них своя римския ереси, что хотят, а о сожжении книг сво­их сказа Максим Грек великому князю, как к Москве прислан. И то­го ради книжнаго оскудения, паче же от латинския печати разстления в тех книгах новогреческих, и от турецкаго насилия изсяче ныне благочестие у грек, по Сказанию в явлении своем царя Констянтина и Селивестра-папы, егда велели послать в Русь белый клабук святителской; яснее о сем напреди скажем. И той же у них Арсеней Суханов, егда бысть тамо повелением самодержца, и застал у них четыре патриарха цареградских живых, посему, что у них кой чернец даст болши червонных турскому царю, того царь и велит поставить патриархом, а прежняго скинут. Да все тако: и патриархи у них друг друга давят и уморяют всяко зависти ради. И сие писано в Хождении Арсениеви. И кто православный о сем не возрыдает, когда бысть такая мерзость запустения у прежних бла­гочестивых греческих святителей, якоже ныне, и что дале, то злее! О горе и увы [свет во тму преложился]! Иная же о них зде умолчю и слезами затру.

И нынешния бегуны и ласкатели, Паисия и Макарий, иже новыя законы укрепиша Никоновы, а самого его извергоша, их же сам лстец Никон прежде ублажал, егда старыя догматы истреблял, и они его похваляху, как тысящи сребра и соболи от него приимаху, а ныне он же их пред царем обличал и алтынниками нарицал. И се познася их не о Бозе совет, но кождо своих си ища, а не яже Христа Исуса, по Апостолу. И как они к Москве приходили, а тамо, на их места во Александрии и Антиохии, иныя патриархи и вскочили, а они в лишных стали и негдеже годны обрелися.

Прежнее же наше благочестие старых книг Московскаго го­сударства великаго не едини древния вселенския патриарси, быв­шии при прежних благочестивых царех, похваляху и удивляхуся, но и преже тех похваляет в Козмографии веру нашу паче всех царств и земель сице: «Нигде несть такия правыя веры, якоже в Москов­ском государстве. Аще и быша и еще есть в ыных землях вера хрис­тианская, но много с ересми смесишася, а такия уже под солнцем веры чистыя несть, какова в Рустей земли». И сия книга Козмография (греческим языком глаголется, а по-руски — «Всего мира опи­сание»: о всех тут землях писано, о нравех и о обычаех, и что в коей земли родится, и чем богата, и какова в коем царстве вера.

Еще же писано во Истории о оном белом клабуце, его же сотвори первый христианский царь Констянтин святому Селивестру, папе Римскому, в почесть. Много о сем писано, но токмо сие помяну, как принесли его, чюдеснаго клабука, по отдании римлян в Царьград, и тут явилися святейшему патриарху Филофию святии — царь Констянтин и Селивестр-папа — и глаголали: «Пер­вый Рим паде ересию Аполинариевою, а и зде, во втором Риме, Цареграде, вера изсякнет насилием агарянским, в третием Риме, Москве, тамо благочестие возсия паче первых царств, и то наречеся от Бога светлая Русия, тамо пошли белый клабук, да похва­лятся сынове рустии». И посем невидими быша. Патриарх же хотя у себе такую благодать утвержати и сам носити на главе своей. И по мале времени паки повелением Божиим прииде к нему ангел Господень и то же глагола: «Не помышляй, Филофие, ты носити белый клабук, не вам дана бысть благодать сия, но Рустей земли, отошли скоро в Новград архиепископу Василию, предаст бо Гос­подь Бог град наш неверным за беззаконие». И патриарх плакав много и, облобызал белый святый клабук, отпусти в Русь чесно. И последи сего предал Господь Бог Царьград турком [а по престатии царства Греческаго настатию быти скоро десяти рогом Антихристовым, о сем пишет Ияков, бывшей жидовин, в книге своей богословной]. А сего святаго белаго клабука носиша архиепископи новогородстии, посем и пять патриарх московских и че­тыре митрополита до Никона. А Никон и то превратил по-своему и на подклейке своей носил, яко жонка кая на кичке своей соро­ку, гордости образ показа, а смирения образ возненавиде пре­жних святых святителей Рустей земли. А посем и до конца отверже белый святый клабук и черной наде на себе, омерзе бо ему та благодать, яко древним отступником и еретиком римс­ким. Много бо тамо и они прежде наругалися белому святому клабуку, да Бог над ними и сам наругался; страшно писано там, зде же кратости ради оставих о том.

И за сия вся вышереченныя уставы церковныя и догматы отеческия, их же прият древле и держа святая наша российская цер­ковь непременно, и сего ради ныне чада ея есмы — гонимы и озлобляеми, укаряеми и проклинаеми от раздирающих церковное един­ство, и мучимы и уморяеми, и в давних странах заточаеми, и в тем­ницах затворяеми и заключаеми, и языков богословных лишаеми, многообразным томлением и гладом умерщвляеми, и в пустынях и в горах скитающеся, и жен и чад отлучаеми, не хотяще прияти пестрообразныя прелести разстленных новых догмат, и не предаем древняго своего благочестия, здравых и непорочных догмат, ими же духовне породихомся святым крещением и освятихомся, и теми законы отеческими от юности воспитахомся, и от свя­щенных своих пастырей наказахомся крепко держати правую веру Христову и за едино прилагаемое слово и отьемлемое в вере страдати до крове, паче же за превращение всецелых догмат умирати и за православие души своя полагати.

И сия есть вера наша по предиреченным всем свидетелством вера Христова единая, сия есть вера апостолская, сия есть вера мученическая, сия есть вера исповедническая, сия преподобническая, сия вера отеческая, сия Вселенскими 7-ми соборы утвержена. И сию ризу мы неразодранную носяще и сотканну от вышняго бо­гословия, юже исправляет и славит благочестия великое таинство христианское. И с сею верою и умираем и воскресаем, и с тою хощем стати на Страшном Суде Христове непосрамлени.

А новых книг развращенных много з догматами их не прием­лем, боящеся прелести последних сих дней, и слушаем апостола Христова Павла, рекшаго: «Блюдитеся от творящих распри и раз­дор чрез учение, ему же вы научистеся и уклонитеся от них» {К римляном, зач. 121} и прочая. И паки той же Павел, Христово жилище, рече: «В последняя времена отступят нецыи от веры, внемлюще духовом лестчим и учением бесовским» {К Тимоф., зач. 284}. И паки той же Павел, Хри­стова уста, рече: «Будет бо время, егда здраваго учения не послуша­ют, но по своих похотех изберут себе учителей, чешеми слухом, от истины слух отвратят и к басням уклонятся» {К Тимоф., зач. 297}. И сам истинный Учитель наш Христос рече о скончании мира учеником своим: «Якоже бысть во дни Ноевы, тако будет и в пришествии Сына человеческаго» {Мф., зач. 102}. И мы о том вемы, яко во дни Ноевы не осталось единаго благочестиваго человека пред потопом, кроме праведнаго Ноя самого, но вси человецы, живущии на земли, отступиша от Бога и во всяческое нечестие и неправду уклонишася. Тако и ныне деет­ся, видим, везде: во многих местех и землях отступиша от веры и отступают лестию сатаны, тому бо Господь попусти прелщати на­роды на четырех концах вселенныя по развязании его из бездны за неправду людей {Лк. зач. 87}. И пред вторым пришествием Сына Божия не обрящется правыя веры на земли, кроме малых избранных, по словеси Христову: «Егда [рече] приидет Сын человеческий, обрящет ли веру свою на земли?» {Лк., зач. 88}; и того ради днем Ноевым пришествие свое Христос, Сын Божий, уподобил. И вся Священная Писания проидохом, ветхая и новая, а не обретохом нигде, что в последняя времена исправят веру добре и обрящут истинну, несть, несть! Но вси пророцы и апостоли и вси святии отцы вопиют согласно Христу, ис­тинному своему Учителю, яко в последняя времена востанут лжехристи, и лжепророцы, и лжеучители и Святая Писания исказят, превратят, отступят веры, и внесут ереси погибелныя, и Христа-Бога отметатися будут, и отеческая предания загладят, и по своей похоти начнут писати. Тако есть во святых книгах писано: «И прелести по­клонятся вси, живущия на земли, — по Откровению Богословлю, — их же имена не написана суть в книгах животных» {Апок., глава 13}.

Чтый да разумеет и блюдый ризы своя да не наг ходит.

Написах сие краткое писанейцо от болезни и туги сердечныя многими слезами, видя многих зрящих и невидящих и уши иму­щих и неслышащих. И зде имеяй уши слышати да слышит всяк православный. И сей есть ответ к востязающим нас и веру нашу искушающим в нынешняя времена.

Мы же, вернии, вси едиными усты и единым сердцем славим и воспеваем пречестное имя Бога-Отца Вседержителя, и Сына Его единороднаго Исуса Христа — Бога не нага и человека не проста, и Пресвятаго Духа, единосущнаго Отцу и Сыну, Господа истиннаго, единаго во Святей Троице истиннаго Бога, ныне, и присно, и в безконечныя веки! Аминь, аминь, аминь!

 

О молитве Исусове, еже есть:

«Господи Исусе Христе, Сыне Божий, помилуй нас»

 

Сию святую молитву ныне нецыи каникулы, глаголюще не­истовым языком, называют ю еретической молитвой, а нас, всех пра­вославных христиан, тако научили мнозии церковнии учители, а не еретицы. Святый Иоанн Златоуст учит на всяком месте молитву сию творити: «Господи Исусе Христе, Сыне Божий, помилуй нас!»; чти Пролог, апреля во 18 день. И в Беседах апостольских тако же молитва та, и в Толковом евангелии, в неделю 17, молитва та же Исусова, и в Книге Иоанна Лествечника, лист 155, молитва: «Гос­поди Исусе Христе, Сыне Божий, помилуй нас!» Чти и в Патерике Киево-Печерского монастыря святых отец, в Житии святаго Нико­лы, Святоши рекомаго, и прочих отец, молитва тако же творима ими. И преподобный Иосиф Волоколамский в своей книге Просве­тителе, что писал на новыя жиды руския, ту же молитву учит творити: «Господи Исусе Христе, Сыне Божий, помилуй нас!» Еще же и в книгах святых отец Григория Синаита и аввы Дорофея тако же молитва: «Господи Исусе Христе, Сыне Божий, помилуй мя!» И во всех святых книгах молитва писана: «Господи Исусе Христе, Сыне Божий, помилуй нас!» И сия молитва есть в книгах, ретце еже есть: «Господи Исусе Христе, Боже наш, помилуй нас!», и никто же хулит. Он, Спас наш, свет един, Сын Божий и Бог, да во своих та пределех стоит на возгласех иерейских. А они, безумнии люди, сея святыя молитвы [еже есть: «Господи Исусе Христе, Сыне Божий, помилуй нас!»] и слышати не хотят, и аминя не отвещают сей молитве, кто Сына Божия речет! Тако бо сатана их омрачил дураков! А Христос, Сын Божий, сам глаголет во святом Евангелии: «Иже не чтет Сына, не чтет и Отца, пославшаго Его», Иоанн, зачало15. И Богослов, друг Христов, глаголет: «Всяк отметаяйся Сына, ни Отца имат, а исповедаяй Сына, и Отца имат», 1-е соборное послание, зачало 71-е. Есть писано в житии святаго Селивестра, папы Римскаго, и в Книге Иякова, иже от жидов бысть, христиа­нин чюден. Тамо во прении с ними жиды глаголюще: «Какой Сын у Бога? Несть! Еда Бог жену имат?»; ругающеся пси: «Жены у Бога несть, откуду Сын ему есть?» Нас же пощади, Господе Исусе Хрис­те, Сыне Божий, от таковаго проклятаго жидовскаго мнения, вемы бо извесно и веруем, яко ты еси Сын Божий, рожденный от Бога-Отца безлетно и безстрасно прежде век, нас же ради в лето, от Пресвятыя Девицы. Сугуб еси, Христе мой, сугубо и рождение твое ис­поведуем, горнее же и дольнее, аминь.

О всем зде вкратце писано, а о всей беде новых книг аще пи­сать все, то книга с Устав будет.

 

Сказание отчасти, ведомости ради православным,

о превращении новых книг и богомерзких ересех в них и плевелах,

их же враг человек насеял на погибель душам христианским,

паче же на истребление православныя веры сотвори сие льстивый сатана

 

По тысящи лет от волния страсти Господа нашего Исуса Хри­ста развязан бысть змий древний, сатана, на мало время да льстит народы, якоже глаголет во Откровении Богословле, глава 20. И егда, выскочив из безны, прииде на первое свое место, на Запад, идеже свержен бысть с небеси, и тут хоботом своим, папою Римским, отторже третию часть звезд небесных, сиречь православных, от веры — церковнаго неба — и поверже их на землю {Апок., глава 12}, сиречь на плотское мудрование, еже «вражда на Бога» глаголется, по Апос­толу. И той сатана Римское царство на Западе, идеже престол его есть, ученил матерь и приятилище всех ересей и источник всякаго нечестия. Той же Рим глаголется и «любодеица» [по Апокалепсису] {глава 17}. С нею же любодействуют царие земстии и упишася живущии на земли от вина любодеяния ея, сиречь от ересей римских. И ту любодеицу-жену, римскую блядь, виде Иоанн Богослов сидящу на звери чермном, исполнь имен хулных, и прочее, и имущу чашу злату в руце своей, полну мерзости и скверн любодеяния ея, и прочее тамо. И чаша златая полна мерзости, то есть римскаго их костела мудрость, украшена философскою коварною лестию, а полна богомерзских ере­сей безчисленных, ими же уловиша весь свет; ныне видим койждо язык во свое время по совету лукаваго сатаны, возгнездившагося на Западе. Ведый бо себе сатана, яко время мало имат по Писанию, того ради тщится всеми силами своими поклонитися прелести рим­ской всем живущим на земли {Апок., глава 12}. И в наше пресветлое Руское царство до сих времен многажды вселукавый враг заглядывал, мысля от веры правыя отторгнута нас, но не попустившу Богу тогда, яко нет у еще исполнися Писание и число зверино по 1000 — 666.

Первое — наустил сатана папу Римскаго послати в Русь кар­диналов своих ко благоверному князю Александру Невскому претися о вере, хотя уловити его во свою прелесть. Но тогда святый князь Александр латинских тех мудрецов малыми словесы посра­мил, а их учения слышати не восхотел, и тако возвратишася безделни к папе.

Второе — сатана инако умысли. Латинник Исидор-митропо­лит подкраде лестию патриарха цареградскаго Иосифа, и той бла­гослови его в Русь митрополитом быти. И егда прииде к Москве, прияша его. И бысть тогда собор во Флоренске, вси епископи снидошася: папа Римский со своими, и из Царяграда царь Иоанн, и патриарх Иосиф быша ту. И великий князь Московский Василей посла Исидора-митрополита на собор тот, не ведый лукавства в нем, и не веле ему новаго учения оттуду привозити. И на беззакон­ном том Флоренском соборе папа Римской всех прелсти: и царя и патриарха греческих. Исидор той приклякнул папе, и римскую веру проклятую похвалиша вси. Токмо един святый Марко, епископ Ефеский, ревность показал по благочестии и отступников обличал. А Исидор егда прииде к Москве с гордостию папиной и нача в со­борной церкви по новому обычаю служити, и власти ему вси умолчаша, безумнии, стыдящеся глаголати о истине. Егда же сам услы­ша благочестивый князь латинския обычаи в церкви, скоро повеле Исидора-отступника, яко пса, изгнати ис церкви святыя и в Чюдове монастыре стрещи его. Он же, враг, убеже в Рим, и — то коварство сатанино — исчезе.

И паки диявол третицею наскочи на Рускую землю, и всеце­лое жидовство насади, от единаго жида Исхарии в Новеграде разплодися. Соборных тамо попов прелстил той проклятой жид, а попы племя свое и людей многих научиша жидовству там, и к Москве приидоша, и тут многих прелстиша верховных людей и всяких чи­нов, и митрополит сам Московской Зосима потаенной жид был. О го­ре и увы святой церкви и тогда бысть, и власти тогда худо брегоша. Но святый Иосиф Волоколамский обличал тех врагов, книгу напи­сав на ереси их, и помощник ему бысть архиепископ Новаграда Генадий. И теми сатанина прелесть тогда обнажися и до конца искоренися.

И посем еще зависный змий инако покусися: чернца Гришку Отрепьева на царский престол возведе, Богу попустившу грех ради наших. И тем хоте сосудом своим превратити святую нашу церковь и с латинством смесити. Но и тут Христос до конца произыти злодейству вражию не попусти, но сам лсти мудрец, сатана, и с во­инством своим попран бысть и посрамлен, а церковь наша свя­тая российская православною своею верою по таковых искушениих светлейши солнца показася, и мир глубок, и тишина бысть велия до наскочения Никонова на патриаршеский престол.

И егда убо исполнися Писание, и настоящее время откры тайну во Откровении Богословле. По числу зверя 600, исполнися по римском отступлении {Апок., глава 13}, тогда Малая Русь отступила веры, иже глаголются униаты. И посем, егда преиде 60 лет, тогда Богу попустившу сатане свое дело совершити и великое Российское наше цар­ство, увы, отторже сатана хоботом своим, Никоном. Тои бо волк подкраде Христово стадо, во овчей коже пришед, исперва и показася ревнуя по истинне, и тем пронырством своим добре возделан­ную ниву сердца Алексия Михайловича злым тернием насея, пле­велами и окраде святопомазанную душу его. Не дверию бо вниде лстивый во двор овчий, но прелез ограду священных правил: поп бяше в мире и пострижеся, не вем где и от кого, и таковых священ­ная правила отсекают и священнику быти возбраняют, не токмо ар­хиерею, еще же и не по жребию Святаго Духа избран, но царем понужен незаконне. И тако неверный строитель приставлен бысть к дому Владычню, нача церковь Христову разоряти, и церковныя дог­маты превращати, и святыя непорочныя книги, и уставы, и чины вся церковныя святых отец опрометати, и все по своему прелагати, и начинающих ему о сих возбраняти, тех церковных чад бия, и умучая, и в далних странах заточая, а иных и без вести сотворяя, якоже преосвященнаго епископа Павла Коломенскаго, добраго пас­тыря, полагающаго душу свою за Христово стадо, разбойничес­ки ободра, и никто же весть, како его оконча, и прочих.

И первие всех Христово знамение в сложении перстов отнял у христиан. Коих могий прелстити — прельстил, а иных, малоумных и слабых, беззаконною клятвою своею устраши и тремя персты знаменатися научил, Троицею крест творити, хулно и нечестиво ко Свя­тей Троице страдание приложил по-арменски, а армены ту ересь от Севира прияша. И Фармос, папа Римской, еретик, тако мудрствова, о сем в Книге о вере писано, московская печать. В том же сложении трех перст и Диоскорова ересь со Евтихием состоится, отметающих вочеловечение Господа нашего Исуса Христа, на них же Четвертый собор бысть Вселенский, 630 святых отец. И сей святый собор последи Анастасий, царь греческой, еретик, прелщен бысть от Севира, собра свой нечестивый собор, и святых отец 630 проклинали безумнии, мневши себе: Четвертой собор двух сынов исповедати предал недобре — глаголюще омрачении, а того не хотяще прияти, что святии отцы не два сына, но два естества во Хри­сте исповедати научи нас. Тою же слепотою и ныне болит Никон, и прелстившиися от него вси глаголют хулы на святых, предавших нам и научивших в сложении перст крестному знамению по Мелетию, и Феодориту, и Петру Дамаскину, и Максиму Греку,  и по Стоглаву, и прочим святым книгам, бутто мы, слагающе персты тако, двух же сынов исповедуем; облыгающи христиан, глаголют заблуждьшии. Мы теми двема персты своими два естества во Христе и две воли исповедуем по святых отец Четвертому и Ше­стому соборов, а не два сына, далече да будет от нас таковая хула! И якоже тогда враждующий на Четвертой Вселенской собор святых отец царь Анастасий с нечестивыми архиереи своими и неправедне проклинающе их сами прокляти быша и погибоша за беззаконие свое, сице и нас тако же проклинающии погибнут.

Последи же сего Никон и Символ превратил, во многих местех преступил пределы отеческия, и истиннаго истребил и на­звал того прилогом а истинный не во единых московских кни­гах, но и в сербских, и болгарских, и моравских, и острожских кни­гах есть, кроме иных многих свидетелств.

И Трисвятую песнь, аллилуйю, изгнал, еже есть: «Аллилуйа, аллилуйа, слава Тебе, Боже!». А вместо тоя четвертую латинскую мудрость приял и Святую Троицу восчетверил, и псковский Иов-роспопа сице мудрствовал и за ту ересь погиб. И ныне то же мудр­ствующии погибнут.

В новых же книгах объявилась мудрость Савелиева, слияние лиц Святыя Троицы, поют и глаголют богохульно сице: «Благословим Отца, Сына поем Отца, Сына и Святаго Духа», иже вынимают измежду Отца и Сына. И тут сливают два лица — Отца и Сына — во едино лице, Сыно-Отчество славят по-савелиански, а Святаго Духа раболепно отставляют. И в том их судит Святая Троица! Тмы тех святых книг проидохом, рукописных и печатных, многих земель, а сея богомерския мудрости не обретохом, но везде славиму, зрим, Свя­тую Троицу сице: «Благословим Отца, и Сына, и Святаго Духа, Гос­пода» [равно], и паки: «Поем Отца, и Сына, и Святаго Духа».

Новыя же книги Пресвятаго Духа и инде истинства обнажа­ют, Часословы и прочая глаголют: «Душе истинны», «Дух истин­ны», «Царю небесный, Утешителю, Душе истинны», а не «Душе истинный», ни «Дух истинный», «иже» с краткой отсекают, сие «й», и тем неподобным разумом своим само истинство Святаго Духа лишают, и Македониеву погашенную издавна непрощеннаго нече­стия ересь раздувают гнилыми своими усты, и хулу пущают на Свя­таго Духа, Господа истиннаго. Глаголют: «Дух истинны» — то по их безумию от истинны Дух, сиречь от Отца, истиннаго Бога, а сам не истенен, но слуга истинны, якобы подобно рещи: не самое солн­це, но луча солнца и не сам огнь, но дым огня или теплота огня. И луча солнцу, и теплота огню несть бо равны, но луча солнца и тепло­та огня, аще и единаго естества кождо себе, но служителне исходят, тако же глаголати: «Душе истинны», а не «Душе истинный». Велие безчестие ту и хула самому по своему естеству «истинному Духу», Царю небесному и всей твари Совершителю. Той бо ни от кого же величества истинны не приемлет, но сам по своему естеству велик и истенен есть, и сам подает истинну от себе рабом своим, комуждо по достоянию, и наставляет на истинну призывающих его воистинну. И тако пресвятая уста Христова рекоша апостолом его: «Егда [рече] приидет Утешитель, его же Аз послю вам от Отца, Дух истинный» [а не рече: «Дух истинны» — по новым книгам], но истинный, иже от Отца исходит. И сице стоит во святом Евангелии и в древних преводех харатейных изрядных писм доднесь. И апос­тол Христов Иоан Богослов в 1-м своем Соборном послании глаголет, яко «Дух есть истинна», а не рече «Дух истинны», яко сам «истинный Дух» истинна есть. А сие Христово слово святии апостоли положиша в молитве своей и предаша церкви глаголати в начале всякой службы и призывати «истиннаго Духа» сице: «Царю небесный, Утешителю, Душе истинный» и прочее. И кой бого­противной враг смеет дерзати, отменяя и превращая Христова еван­гельская словеса? Горе и увы их ожидает! Лучше бо небу упасти и земли превратитися, нежели слову Христову пременену быти и отметаему! Тамо, в Символе, лстец он, Никон, лестию своею истин­наго изверг, на книги разгласныя и пометныя писмяныя, кои валяхуся вне церкви и не свидетельствованыя, и на те указуя, и тако­вым коварством благовернаго царя душу окраде.

По сему же образу и в ыных догматех, яко змия Евву, прелсти лукавством своим, утаявая от него истинну всю, яко враг всякой истинне, и сказуя ему, помазаннику Божию: «Ни в коих книгах не об­ретается истиннаго, государь, токмо в печатных московских кни­гах приложено истиннаго». А послание Фотиево, святейшаго пат­риарха Цареградскаго, к болгарскому князю Михаилу, писал древле о 7 соборех, и сербския и острожския книги печатныя по бла­гословению вселенских прямых пастырей [а не наемников] во вре­мя униатскаго отступления — и сия вся утаил от царя, или сам не ведал, отступник, что в тех иных земель книгах православных Сим­вол согласен со святым Евангелием — И в Духа Святаго, Господа, истиннаго и животворящаго — и прочия вся догматы сходны старопечатным московским непорочным книгам во всем. А кто прило­жил в старых книгах истиннаго и в кое время, того невозможно было солгать Никону и казать не на что. И деяние святаго 2-го Вселенского собора, на нем же написаша святии отцы, 150, исповеда­ние о Святом Дусе, борющеся с духоборцем Македонием за честь «истиннаго Духа» и препреша его Христовым Евангелием, якоже Златоуст глаголет, еже рече Христос: «Дух истинный, иже от Отца исходит». И сим еретика Македония препревше и исповедавше Духа Святаго, Бога истиннаго и животворящаго. О сем в самом том деянии 2-го собора свидетельствует и яснее сего.

И сия вся от царя закрыл и загладил ложными словесы, да свое хотение совершит, а святых оболгал, 2-го собора отец, рек, бутто они истиннаго в Символ не прияша, и сказуя ему о греческих книгах, яко с тех и с харатейных руских вся исправил. И сие солгал: новой Символ с харатейными отнюдь не согласен во мнозе. А греческия книги посылал покупать тамо, научен от иноземца, чернца Арсения Грека, бывша там в чюжих странах жидовином, и Хрис­та Бога трикраты отрекшагося, и в Рускую землю от сатаны присла­на на помощь Никону. И уведавши о нем царь и патриарх Иосиф по отписке греческаго патриарха Паисии Иеросалимскаго, яко той Ар­сен еретик лют есть, и звездочтец, и богоотметник бысть, блюстися его велел, и сего ради заточену ему бывшу в Соловецком монасты­ре. И егда бысть там Никон, мощей ради святаго Филиппа-митро­полита, взя того врага с собою паки к Москве и охвали его царю. И как возкрадеся сам на патриаршество, и того невернаго раба и вра­га Божия приставил переправляти книги и новыя преводить, их же накупи во Греческой земле. А от самодержца о тех книгах утаил, новогреческих, и многолетным числом подкрал, и якобы в Рустей земли таких книг и несть. И тако прелсти всех. А те книги, их же накупи Никон во Греках, проходят сквозе еретическия руки латинския, и прошедшия давно печатают их латинники в трех градех у себя: в Риме, в Париже и в Винецыи, и греком продают тех, а греки у себя печати не имеют великаго ради утеснения от турок и за скудость книжную и нехотя покупают у еретиков тех книги со многими ересми и плевелами латинскими. И таковою виною помалу-малу у грек выкрали веру теми книгами и к своей прелести всех влекут тако. И греки то по нужи творят, злое приемля и веру свою первую тако повредиша от турскаго насилия и от еретическаго лукавства. Уже в крещении обливаются по-римски, и брады бриют, и с еретики слу­жат в одной церкви, и тремя персты по-арменски крестят лице свое странно, и табаку пиют, а священство себе мздою купят у турскаго царя и под живых патриархов иныя чернцы подкупаются, кто хотя быти патриарх, а того скинут, и крестов на выи не носят, но так хо­дят, как у нас в Руси мордва и черемиса. И никто же да дивится о сем, яко иссяче у грек благочестие от насилия иноверных, по про­рочеству святаго царя Констянтина и Селивестра-папы [о сих пи­шет во Истории о белом клабуце, как в Русь прислан]. Но о сем дол­жно есть возрыдати, якоже волею своею Никон и прелщеннии от него оставиша пресветлый свой свет, книзи, глаголю, непорочныя и догматы правыя, а тму прелести себе купиша, книги, глаголю, превращенныя и догматы богомерския, да и нас к своей прелести вле­кут. Мы же со апостолом Павлом и со Златоустом глаголем: «Един Господь, едина вера, едино крещение» {Беседы к ефесеем нравоучительные, 11}. И аще онех добре, то наша зле, аще же наша вся добре, то онех зле, якоже и есть тако, зле чюждее. И о всем том царю не поведа, что греки от тех книг много по­вредиша у себе благочестия и вредят, а старых книг у себя мало име­ют, и то писмяныя, а печати у них и древле не бывало, и до турскаго царя.

И ныне, аще покажут нам тот Символ греки, его же написаша в Цареграде святии отцы, 150, на 2-м Вселенском соборе, и руки своя к тому приложиша, и печатию благочестиваго царя Феодо­сия закрепиша, и аще согласен тот явится нынешному по всему: Iисуса и рожденна, несотворенна, и не будет конца, и без истин­наго, и в прочих складех, тогда мы новой сей приимем о Господе. Но вем, аще того у себе и поищут, но не обрящут, токмо завистию подстрекаеми, сами заблудившеся по нужи, во тме неправды живуще посреде тмочисленых волков, да и нас к своей погибели призы­вают. Да и не призывали бы, но сами наши владущии во тме шататися восхотели, и, оставя правый путь свой, заблудивше, последую­ще невидущим пастырем, и блудят в вере и любодействуют со все­народною блудницею римскою, по Писанию, приемлюще тех скверных еретиков крещение и священство, сиречь приходящих оттуду не перекрещивают, глаголюще: крещени суть! А писано есть: «Кто приемляй крещение от еретик, тот чюжд есть веры Христо­вы», по Правилом. Игнатий-патриарх Маринку латинския веры, не крестивши, с Ростригою венчал, и за то его последи священнии пастырие извергоша, и яко втораго Июду-предателя осудиша, и имя его ис помяновения книг истребиша. И тако крепко стояще за пра­вославие. А нынешнии отступницы, уклоншиися от истинны во лжу, вся латинская оправдающе и похваляюще: и книги, и догматы тех развращенныя, истиннаго из Символа лестию истребиша, глаго­люще: «Прилог есть!» А уже и кроме Символа объявися их вражда на истиннаго Духа в новых книгах. Где бысть Душе истинный, тут ста Душе истинны и, где бысть Дух истинный, тут явися Дух ис­тинны, якоже выше сего рекохом ясно.

А в крещении новых книг в молитве напечаташа: «Молимся тебе, дух лукавый». Истиннаго изгнавше, и лукаваго призывают и молятся! И того ради слова начаша християне гнушатися новых книг тех. И они иныя Потребники малыя напечаташа, и того соблазна не истребиша за стыд свой, токмо Господи приложиша сице: «Молим­ся тебе, Господи, дух лукавый». Обаче и хуже: господьство прило­жиша ему и правятся точками и скобками! Аще в первых книгах добре так сотворили, почто же во вторых Господи приложили? Где правда? Уже совесть их своя осудила прежде Страшнаго Суда Хри­стова, яко зле творят. И аще «лукавому духу» и не молятся там, яко­же оправдуяся глаголют, но Богу, да почто правыя книги отвергоша и превращенныя в церкви предложиша на соблазн християном? Христос глаголет: «Горе тому человеку, им же соблазнь приходит». Да тут же, в крещении, и ноги миром велят мазати — чрез прави­ла! — и иная противная.

И священие церковное искажено много: престол вместо мира святаго мылом мазати указано по углам доски, а обходят 3-жды церковь со кресты — не указано же, как предано от святых отец, обходя, крестом огражать, и кадить, и святой водой кропить. А егда святиша небеси подобную церковь в Киево-Печерском монастыре Пресвятыя Богородицы, юже сама Небесная Царица строяше, и на освящение тоя церкви собрала святых святителей руских, яко и на погребение свое апостол на облацех, и там писано, что трижды обходяще церковь ту и, певцов забыша оставити в церкви на ответ, тогда святии ангели отвещаху тут, кто есть Царь Славы. И сему уже 6 сот лет преиде, а в новых все сие истреблено и по-своему положено.

В новых же книгах, малых Святцах, что с летописию перваго выхода, напечатано в них в летописи о Богородицыне рожестве, глаголют блазнено зело и еретическо: седмь лет Богородица была во чреве матери своея Анны по их числу! И о сем тогда обличал Арсения Грека, еретика, Иродион, поп ризположенской, с подъяком Феодором, и о иных поблудах новых книг. И царю со архиереи о сем весно бысть, они же и о сем вознерадиша, и страшное то дело о Богородице яко игру вмениша, Иродиона-попа Сеней царицыных церкви Ризположения Пресвятыя Богородицы отторгоша, и в желе­зах томиша немало дней, и, не осудя его, отпустиша. Последи же сего за нужду и той поп не хотя о Христе скорби терпети, отступил. А подъяк Феодор в Сибирь бысть заточен того ради. Еретику же Арсену ничто же сотвориша тогда. А в Святцах тех, не исправя того соблазна и ереси обличеныя, тако и пустиша те книги во весь мир, да растет то зло до своего времени, и то правда ли есть судей на­ших?

Да в новых же книгах объявилось во всех Исусово имя с прилагателной литерой, ижем. Везде: Iисус, Iисусе, Iисусу, Iисуса. А тол­куют зазирающим их сей новоявленной мудрости, и на писме предаша, от чрева своего глаголюще: «I» образует Божество, а «с» — человечество. А «иже» — сие душу во Христе и ум образует, и того ради пишем и глаголем: «Iисус, Iисусе». И сице протолковал Арсе­ний, он, еретик, и указа на Толковое евангелие, на обрезание Хрис­тово, не вем, где. Многи тмы тем святых книг рукописных и печат­ных в Руской земли, а нигде несть тоя новопрозябшия мудрости, разве римских богомерских книг или иных еретик. И никто же от святых богословец в складных литерах не протолкова, что кое сло­во в Божественых именех образует, в Боге, и во Троице, и во Iсусе, и Христе. Неподобно то есть и отнюдь невозможно. Зде же подоба­ет их нечестия злую мудрость обличити и сокрываемую ересь в их разуме на Исуса Христа, Бога нашего, открыти, еже мрача глаголют Iисус да Iисусе, а последи того своего толкования в Прологах новых и в Библиях московской печати Iсуса Наввина Iисусом назваша и Сирахова Iсуса Iисусом же написаша. И по тому их богомерзскому разуму Сына Божия Iсуса Христа сровняли с простыми человеки — Исусами — Наввином и Сираховым и Оседековым Исусом, и те по их коварной мудрости под грехом бывшия человецы богочеловеки стали, им же почесть свою приложиша по лишному «ижу», сице: Iисус Наввин, Iисус Сирахов, Iисус Оседеков. И се явно зде обличися безумная их мудрость. И зри всяк, како солга, неправда се бе. От своих книг и от своего толкования обличишася, яко не на хвалу лишное слово «иже» Исусу, Сыну Божию, приложиша, но на болшую хулу, и себе на погибель, и на соблазн всему христианству. Тою бо прилагателною литерою отделяют человечество Сына Божия во иной состав от Божества, Бога-Слова, по Несторию-еретику, и про­ста человека Христа Бога исповедуют кроме Божества, глаголюще: «Господи и Исусе Христе!». И паки: «Един свет, един Господь, и Исус Христос» и прочая таковая. Еще же и чрез лице тако хулно секуще гласом глаголют на инаго «и Исуса» сице, в Евангелии и в прочих книгах: «i Исусу рождшуся», «Iисус явися», «приведоша i Исуса», «ста i Исус», «вниде i Исус» и сему подобная в новых.

И сицеваго новаго вымысла богопротивнаго ниже слышахом когда, не токмо видети в древних книгах, отнелиже и православие просия христианское на земли. Кои святыя иконы есть Луки-еван­гелиста писмо, и греческия, и с Корсуня от Владимирова крещения, и ис Царяграда, и на тех всех потпись: «Iсус Христос» сице. И пер­вых святых преводников книжных со греческаго языка на словенс­кий есть доднесь книги, Констянтина Философа и брата его Мефодия, епископа Моравскаго в Моравской земли. В них же сказуют сер­бы и Символ со истинным, и Спасово имя во всяком глаголе Icус, Iсусе, Iсуса и прочее, а не и Исус. И в харатейных руских сице же: Исус, «ижица» писана, вместо «йоты», а инде «йота», сиречь «I» да «с». И те святыя преводники многая страны людей научиша вере Христове, и иноверных приведоша в богоразумие, козар и жи­дов препреша. И инии по них быша в Руской земли, и Максим Грек богомудрой, и никто же от них не прописа и не преврати с небеси снесеное имя архангелом к Богородице Сыну Божию — Исус. «И наречещи имя Ему Исус», — рече Гавриил Пречистей. Еврейски бо Исус глаголется, а по-словенски — Спас. А нынешнии прелагатаи и отступницы и архангела Гавриила оболгали в богомерзском лука­вом Жезле, бутто Гавриил Иисусом Христу имя нарек, а не Исус. Где правда? Чему верить? Старым ли святым богословцем и богомудрым мужем или нынешным пияным философом, иже трясу­щимися руками пишут и ползающе по земли, яко гадове, что таковии могут доброе сотворити и чреву своему служат день и нощь! Не буди нам новому баснословию внимати и, оставя истинну, лжи последовати, не бо на едину книгу и на две указуем о всякой истинне, якоже они, но тмы тмами свидетельствуем о всякой правде и словеси.

Да еще в новых Ирмолоях 2-го гласа ирмос 4 песни превра­тили на Антихристову руку, поют сице: «Пою Тя слухом бо, Госпо­ди; услышах и убояхся, до мене бо идеши, мене ища, заблудшаго» и прочее. И тако поющии Антихриста ждут, а истиннаго Христа, Бога нашего, отметаются. Церковь бо Христа, Бога нашего, поет, глаголя: «Пою Тя, слухом бо, Господи, услышах и убояхся, до мене бо прииде, мене ища, заблуждьшаго» и прочая. Яко Христос наш пришел давно, и заблуждшее естество наше взыскал, и ко Отцу принес, тому уже смотрения Христова таинству, еже о нас соверши, вто­рая тысяща лет сокращается. И то в лукавом Жезле правят. И иных много диких неподобных речей тамо. Аще о всех писать, то в велику долготу слово отъидет.

В том же Ирмолое в воскресном Богородичне 4 гласа: «Иже Тебе ради, такоже и заблуждшее горохищьное овча обрете», а не «волкохищьное». Бутто Адама и всех людей от него гора глотала, а не волк-диавол похищал до Христа, пришедшаго спасти нас. Мы же им глаголем: «Всяка лжа от диавола есть».

А в Шестодневах новых в 3-м светилне справили: «Яко Хрис­тос воскресе, никтр же да не верует», на жидовскую страну обрати­ли. А в старых добре: «Никто же не неверуяй» и прочее. В той же книге у них в Богородичном каноне 3-го гласа стих превращен на хулу Пресвятей Богородице, сице: «Растленна умом, растленна душею и совестию, и злобою осквернена, и всяческих благ явлен­на, Дево» и прочая там.

А в старых тот стих добре, да и не в том каноне, но на павечернице в четверг, а у них в среду на утре; все развращено и переблужено в новых книгах, и в Степенных много неподобства есть.

А в Триодях посных новых в трипеснице во вторник на сырной неделе в троичном стихе на Пресвятую Троицу Бога нашего нечестивая ересь положена Саввелиева, сице: «Троица, неразделная составом». Не составми еще, но составом единым. И тако то, неведуще лукавства в том и ереси и скоро спешаще, глаголют, хуля животворящую Святую Троицу, разделну суще треми составы и треми лицы, неразделну же сущу существом и естеством в триипостасном Божестве. И тако тот стих глаголющии по новым Триодям — вси во ад, в Савелиеву пропасть, себя вметают и за неведение мнози гибнут. Како бо Троица, неразделная с составом? И се рещи нечестиво: неразделная составми, то слияние станет лиц в трисоставном Божестве, тако Савелий, он блядословяше, а то еще и злейши сего, что Троица, неразделная составом. И по сему они по-жидовски единолична Бога славят, сиречь единосоставна и единоипостасна, и те богомерзския новыя книги хвалят. Мы же славим Пресвятую Троицу со всеми богословцы неразделну существом Бо­жества, разделену же лицы: ниже сливающе трех лиц, ниже разде­ляюще Божества Отца, и Сына, и Святаго Духа. Аминь.

В тех же Триодях посных полунощницы несть во весь пост, и на утрени два псалма: «Услышит тя Господь» и «Господи, силою Твоею», и тропари: «Спаси, Господи, люди», и прочая. Все то от­вержено, токмо по начале Трисвятое: «Господи, помилуй!», 12, да иексапсалмы. И Октая во весь пост не поют, и поклоны изменили в пояс, все кивают токмо по три поклоны в землю, по «Честнейшу»; одебеляша бо, не могуще колен преклоняти Владыце всех! Хо­дят, яко кравы непразныя, едва чрево влекуще, Никоновы поборни­цы, от толстых пищей и араматных питей! И того ради не могут трудитися в церкви сами, да и людем запрети враг церкви Христо­вы Никон и помощницы его и царство небесное затворяют пред человеки: сами не входят и хотящим внити возбраняют, по словеси Христову: «Вожди бо слепии слепцем суть».

В тех же книгах, в Великом каноне Андрея Критскаго в четверг, 5 неделя поста, в 9 песне, Пресвятую Царицу Богороди­цу безчестят, назвали детородицею, сице: «Тя, детородителнице» и прочая. И се есть ересь Несториева и иных еретиков, глаголю­щих: «Пречистей Деве многих детей родити по безсеменном роже­стве Сына Божия, Христа».

Тако же и в Цветных триодях новых много испревращено и изменено: в стихерах и тропарех, и в Троицком каноне в 9 песне ирмос «Радуйся, Царице, [поют зле] матере-девам слава», а не матерем и девам слава, как в древних непорочных рукописных и печатных. А «матере-девы» те глаголются, кои безчесныя девы, прокудятся в девстве и родят дети блуднически, иже по-руски зовутся «самокрутки». И тем Пресвятую Богородицу славу наричют «ма­тере-девам», иже до венца матере-девы ся творят. И то не хула ли на пречистую Матерь Христову? А еже по нас: «Радуйся, Царице, матерем и девам слава!» Се истинна суть. Два лика в церкви: лик матерей, посягших о Господе и родящих чада, и от крещения те наричутся сынове Божии по благодати, и возрастъши славят Христа Бога и Пречистую Матерь его; второй лик — чистых девиц, иже девство свое чесно хранят, подобящеся Пречистей Деве Богороди­цы, и тако до кончины своея свято живуще. И тем суть двум ликом, матерем и девам, слава — Пречистая Царица, Мати Божия, по богословцем, тако же и в молитве, творение Димитрия Кантакузина, доб­ре написано: «матерем и девам слава», в новых Цветословцах, лист 456.

На Троицкой же празник в коленопреклонных молитвах мо­литва Святому Духу отнята, и молящеся не от востока Духа Пресвятаго призывают, но от запада инаго, и канон Святому Духу отнят на павечернице.

И в Скрыжалех, новой книге, Никонова же заводу, много пле­вел и ересей насыпано, и сама в себе та книга разгласна во многих статиях. В толковой литоргии указано и диаконом просфиры мисать, и о небесных силах части вынимать. А в ней же о небесных силах и не указано частей приносить и антифоны петь, указано «Бла­го есть исповедь Господеви» и прочее по-старому. А инде тут же вместо антифонов «Благослови, душе моя, Господа» и «Вся внутреняя», а «Благо есть исповедатися Господеви» — тех антифо­нов отнюдь не поют ни в кой день, но «Благослови, душе моя, Господа» всегда глаголют.

Тут же в Скрыжали вторым знамением учат благословлять архиереом и попом людей, складши в перстах своих, «Исуса Христа» бутто. А написал то сложение тут Малакса некто: два перста — указателной и великосредней — толкуют «Исус», а палец да что подле мезиннаго, те два слагают палец на палец и называют «хером», а пятой — мизиной перст глаголют «с» быть, и то глаголют «Хрис­тос», и тако туман во очи пущая, морочат людей. Литеры бо две «I» и «с» по два конца имеют, а у перстов живых рук по единому концу. А и «хер» несть «хер», но «у», у «хера» бо четыре конца, а титлов, без чего несть мощно прописати ни «Исуса», ни «Христа», — и не спрашивай у них! И «иже» того, приложенаго ко «Исусу» [о нем же напреди сего глаголахом] нет же у них в благословящей руке пер­стов! Там везде пишут «Iисус», а тут глаголют «Исус»! И се их несог­ласно учение. Подобает им едино от двух сотворити дело у себя: или к перстам руки приковати иныя персты, и «иже» зделать, коим «ижем» во Христе исповедуют душу и ум по предиреченному словеси, или там во «Иисусе» лишное выскресть «ижо» и поставити то между Отца и Сына, где глаголют зле: «Поем Отца, Сына» и прочее. Аще же сего не сотворят, ратуются сами на ся: там во Иисусах исповедуют душу и ум, зде же — в благословящей руке, по их мудрости, души и ума во Христе Исусе не исповедуют, якоже и Аполинарий-еретик, токмо Божество едино. Оле безумия омраченных, кто их безделной мудрости не посмеется, кто их прелести не оплачет! Несть слыхано от века, еже бы в перстах литеры слагати, и людей благословляют тако, а сами щепоткою крестят лице свое и прочих учат нужею, а нехотящих примати двух знаний, боящихся прелести, таковых му­чат. А Христос неволею не учит никого же, но волею призывает к своему спасению, неволею же и мучением всегда христиан принужают отступницы и еретицы к своей прелести, чтобы им не зазирали. А щепоткою, тремя персты, патриархов и всяких властей учит крестить лица их иподиакон дамаскин и студит, а прямаго имени ему вси ученицы его, греки и руския владыки, не знают. Аще и не­давно был, и ста лет несть, по Арсениеву писму Суханова, как был посылан от царя в Греки. И знатно есть, что тот иподиакон их ере­тик был худой и никто его имя знает, токмо книга его осталась, и от тоя греки научилися щепотке и прияли. И о книге его Арсению сказовали греки. И по сему разумеем о иподъяконе том: или арменин был, или диоскорянин, или единоволник, понеже в трех перстах всех тех еретиков ереси сокровенны есть, в нем же учит тремя персты Троице крест творити, себе страсть, сиречь смерть, Троице при­лепляет, по Севиру-еретику, и гнило толкует все тут о сложении перст. Тут же глаголет, и се мрачно сице, якоже и он, иже имать распятися за некое прегрешение, носит крест на раме своем, ходит, бояся и трепеща, ожидая смерти. И буде се по их, якоже, оправдуя его, глаголют: «Человеком смерть памятовати велит и не о Христе глаголет безгрешном», буди тако. Аще же и не самого Христа хулит, но крест его безчестит и спасеную страсть Христову попирает лжи­выми своими словесы. Не бысть того нигде у благочестивых царей, еже бы злодеев на кресте распинати за некое согрешение, и крест им на рамех носити до смерти задолго, и, ожидая смерти, трепетати. Вси бо христианстии цари и князи крест Христов почитали велми везде от самыя страсти Христовы. А коих воров, убийц и татей всякими казньми инако казнят и на кресте не распинают, и Хрис­ту тем не ругаются делом. А нечестивии цари и мучители, аще и распинаша на кресте и после Христовы смерти апостолов и мучеников, и распинают еще, и то не за согрешение некое, но за Христа и за истинну Христову. И се иподиакон их блядословит в слове своем и отвсюду обличается в неправде своей, и то слово его — претыкание и соблазн верным от Никона положено. Лживых учителей враг собра себе словеса новыя, а святых предания вся разврати и их самих оклеветуя лесно, в том судит Бог и святии Его, ему, Никону.

В Скрыжали же во Афонасьевых ответех ко Антиоху вкинута ересь единоволников, еретиков, сице: «Умно услышим и не прелщаемся сугуба быти Христа», а в письмяных Афонасьевых ответех нет сего плевела диаволя в древних святых книгах, их же много видех.

Скрыжаль же учит простым иноком, и миряном, и бабам крестити младенцов без попа [о 7-ми тайнах тут писано о том], а свя­тии апостоли Христовы — Петр, и Павел, и прочии — и диакону крестити возбраняют, не токмо простолюдину и бабе, такоже и Вселенския соборы не повелеша негде простым крестити. Кто бо смеет несвященный святити? Что аще и бысть, то где до Вселенских святых соборов бысть во время гонения на христиан, и то не про­сто, а после 7-го Вселенского собора воструби седмый ангел и со ангелом вся вселенная: «Проклят приложивый, проклят отъемляи что от церковных преданий, яко совершися тайна Божия и вре­мя уже не будет», по Писанию.

Новыя же книги облыгают Третие Послание Иоанна Бого­слова: два, глаголют, быти, его соборные послании, а то, что ста­рец господыни и чадом ея писал, глаголют, то ин некто писа ста­рец Иоан, его же и гроб близ Ефеса показуется. Иероним у них некто о Сем написа в Евангелии новых, а священная Правила свидетелствуют три соборных послания Иоанна Богослова, а не два. И сего ради они то апостолово послание отлыгают, что страшно глаголет в нем, безбожными нарицая преступающих Христова словеса: «Всяк [рече] преступаяй и не пребываяй во учении Христове, Бога не имат». И сему словеси апостола Христова и верят и не верят, глаголюще: «Ин некто писал старец Иоан, веруем новым книгам». А вся тако­вая злая истекоша и ложная от блуднаго костела римскаго, от оныя чаши златыя, исполненыя мерзости в руках блудницы, седящия на красном звери, якоже о ней вначале рекохом. Они, проклятии рим­ляне, сатанины ученики, преступивше Христово слово, еже рече Христос: «Дух истинный, иже от Отца исходит»; а они приложиша «и от Сына» и тем Пресвятаго Духа похулиша, и сами утонуша во всяком нечестии, да и всех тянут прелести ужем к себе в пропасть, подпущают бо книги своя, полныя ересей, под всех верных на зем­ли, иже и зде, в Руси, без искуса прияша, от них же всякия гнилости плод родися и вселенная возмутися.

 

О служебниках

 

И егда отвергоша от святаго олтаря старыя непорочныя слу­жебники, купно же с ними и святыню от жертвенника, и издаде Ни­кон, лжываго сатаны сын, шесть выходов новых служебников, и ска­зал: «С греческих исправил и с харатейных руских: со Алексеива служебника митрополита, и Киприанова, и Сергиева Радонежскаго, и сии вси служебники согласны, — рек, — со гречески­ми». А новыя его служебники, шесть выходов, не токмо с теми все­ми, но и сами меж себе несогласны во многих местех. А со стары­ми печатными и не спрашивай! И те бо наши старыя святыя служебники не с мордовских и черемиских преложины и печатаны древле и не с латинских, но с греческих древних писмяных преведены в добрыя времена, до взятия Царяграда и истребления греческих книг от римлян за много лет, по них же служиша и жертву Богу приносиша непорочну преосвященнии митрополиты и прочии архиереи Божии рустии вси, до патриархов. А и пять патриархов московских: Иев, Гермоген, Филарет, Иоасаф и Иосиф, и прочии с ними архиереи Христовы и иереи всея Руския земли по тех же служиша, а ничем их не опорочиша, но право правяще по них слово святыя истинны.

А в новых служебниках вход — против Стоглава — отвер­жен и малой положен, и крест Христов с просфир снят тричастной, на нем же распятся Христос, Царь и Господь, и кровь и воду исто­чи, и пять просфир в новых, а две отняты А в Киприанове служебнике митрополита и в Сергиеве чюдотворца [на них же указал Ни­кон], в тех по 6 просфир, а не пять и не седмь. Чесо же ради тако бысть тогда? Понеже не бысть еще тогда царей и патриархов в Рустей земли, царский престол и патриаршеский устроити и тем паче прославити и вознести Руское царство, понеже у грек царство отня­то бысть тогда. И того ради Господь всю благодать прежних царств, Рима и Царяграда, пресели в Русь: мизиных бо людей своих афеторосийскаго рода Христос Бог паче прочих возлюби. И тогда 7-ю просфиру дополниша святии рустии архиереи с благословением все­ленских патриархов, по устроении царя и патриарха в Московском государстве по чюдеси Христову, егда от 7-ми хлеб насытил 4000 [а еже о пяти хлебах Христово чюдо, то на всенощьных прият церковь творити], еще же почитающе седмочисленое число седми Вселенских соборов. А до сего руския чюдотворцы над шестию служи­ли: Киприян, Алексий, и Иона, и Сергий с Никоном, и прочии по них

И в проскомидии — в новых — много изблужено: не против Киприанова служебника, и Сергиева, и Алексиева положено действо, и крыжа, сиречь образа креснаго, несть там, но самый крест бысть Христов на просфирах, и в киевских служебниках на про­сфирах в лицах написан самый крест Христов, треблаженнаго дре­ва вид. Кто бо почтет сень паче самыя истинны, и Моисея со Хрис­том не ровняем!

По новым же служебникам по Апостоле аллилуйю на еди­ном крилосе поют, и в «Херувимской песни» вместо «приносяще» «припевающе» поют, по-римски, там ко арганом припевают, игра­юще с бесы, латинники! А мы Животворящей Троице Трисвятую песнь приносим со ангелы, а не припеваем. И не во едином месте «Херувимская песнь» изменена и аллилуйа по ней 3-жды. И везде по 3-жды тут. А где в старых 3-жды, тут в новых 1-жды, где в ста­рых 1-жды, а в новых 3-жды! Все, ругаяся церкви, творил враг и творит, лише «Слава тебе, Боже!», четвертое, не приглашают там и Троицы не соединяют тем, по их мудрованию о трисвятой алли­луйи. И ту обличаются, да не у зде время много глаголати о том.

И по «Верую во единаго Бога» — в возглашении священника «Благодарим Господа!» поем: «Достойно и праведно», толко по Зла­тоусту, а Никон приложил тут «есть поклонятися Отцу, Сыну» и прочее ина — «со страхом Божиим».

Стих «Благословен грядый во имя Господне» весь отнят, в то время закуся язык стоят! А в ыных выходах новых служебников, последних, паки тот стих положили со оглаголанием на себя: в пер­вых [глаголюще] выходах новых служебников не положен стих «Благословен грядый» — несть-де того в греческих! — с коего преводили служебника на руский язык ново, и последи обретохом в Златоустовых словесех! Есть той стих «Благословен грядый» и все­конечно тому тут достоит быти!

И внимати зде подобает, яко с преблуженых греческих служебников новыя превели служебники, того ради они со старыми нашими и несогласны во всем: от враг свидетелство верно.

И «Видехом свет» поют: «Привсегда, и ныне, и присно», и прочее; и то Никон же приложил, еретик новой.

А в древних вышереченных служебниках святых отец наших, Алексия-митрополита и Киприана-митрополита, и Сергия и Ни­кона преподобных, и во иных многих харатейных и киевских, и в толковых литоргиях, и что есть книг в руских странах, во всех — «Херувимская песнь», стоит в ней приносяще, и прочая вся, как в старых печатных служебниках, их же отверже враг церкви. И пос­ле «Благодарим Господа!» — «Достойно и праведно», а «есть покланятися» — несть, как и в наших несть. И «Поем Тя, благодарим Тя» и в «Достойне» без сравнения несть, а «Благословен грядый во имя Господне» — есть, как и в старых везде, без превращения есть. А «Видехом свет» отнюдь же несть во всех святых служебниках сих и прочих книгах, на них же указахом, и по сему явно есть, каковы служебники прежних святых греческих и руских, таковы же суть и старопечатныя московския прежних святейших патриархов, не сме бо от них никто же церковнаго и единаго слова пременити или приложити что, или отъяти, но как что прияша, тако и держашя, тако и нам предаша. Но токмо в старых печатных служебниках молит­вы прибавлены, иже глаголются архиерейския, что положены пред службою Златоустаго Иоанна, и то на великую ползу вместо испо­веди иереом сотворено. Егда хощет страшную службу совершити, тогда их чтет за ся пред престолом Божиим. А без исповеди свя­щеннику недостоит литоргисати. Аще бо простолюдин не причас­тится без исповеди, колми же священник тако дерзнет! О том запре­щает в Номоканонех киевских и московских и святый Симеон, ар­хиепископ Селунский. А еже глаголют безумнии: «Грехи тяжки в тех молитвах архиерейских писаны, их же аще поп до священства творил, недостоит ему попом быти», то правда есть, да аще тем де­лом молитвы вынять те, то и причастныя молитвы [Иоанна Дамаскина — «Яко на страшнем», и прочих святых] отврещи по их, там и болши изъявляет грехов и тяжчайши, а Дамаскин Иоанн сам священник был и таковую молитву сложил.

О несмыслении и косныя сердцем! Аще и чтем таковыя мо­литвы, а сердце наше не зазрит нам, дерзновение имамы к Богу, а иже без исповеди служити дерзают, то клятвою святых отец сами себе связают, вся бо к созиданию добывают, по Апостолу, и на пользу церкви устрояемо, и то охуляют. А сами отступницы, како­вых ныне ставят, по священным ли правилом, паче же каковы и сами. Сметия бо и сора исполниша церковь! Кто им повеле от свя­тых попом, бывшим в мире и постригшимся, паки священствовати, еще же и на архиерейство дерзати беззаконно? Кто им повеле среб­ро от поставленных попов и диаконов имати и священством торговати? Кто им повеле седми лет отрочат в причет церковной поставляти и мало болши? Увы, плача, глаголю: блуда исполниша церковь и за таковая вся преступления своя от святых апостол и седми Вселенских соборов и 9-ти помесных извержени суть и прокляти, а не видят.

Да в новом же толковании литоргии на великом преношении святых даров в «Херувимскую песнь» не велят поклонятися свя­тым даром, глаголют: «Прост хлеб». А святый Иосиф Волоколамс­кий, чюдотворец, пишет в книге своей Просветителе на новых жи­дов, новогородцких и московских еретиков, хулящих тогда святыя тайны и книги святых, не токмо святым даром поклонятися велит, но и чаши, и блюдцем, и пеленам Христовым поклонятися учит, все бо то свято суть и многа о том свидетелства приводит. А святыя тай­ны — како тут «прост хлеб»?! Чесо же ради и поем в то время, яко «Царя всех, подъемлюще ангелскими невидимо дароносима чинми»? И простаго хлеба священнодиакони на главах не носят, и с рипидами около его не ходят, и кадилами не кадят. Аще и не у еще совершися таинство, но от начала свято есть, понеже принесено Богу, и заклано бысть на жертвенице, и Духом Святым осененно — и како «прост хлеб»?!

Да в новых Часословцах «Свете тихий» — творение названо «с римских переводов Софрония-патриарха», а не Афиногена-священномученика и конец отсечен: «Сыне Божий, живот даяй всему миру, его же ради весь мир славит Тя» — толко тут «Сыне Божий, живот даяй» [не вем кому], тем же «мир Тя славит». И всякой пса­лом, всякая молитва, всякий стих — все превращено и искажено!

В болшом Нефимоне «Пресвятая Владичице Богородице, моли о нас, грешных!», «Святый Иоанне-пророче, и прочее, моли о нас!» И тако всем апостолом и преподобным без Бога молятся, не вем кому! И «Господи, помилуй» глаголют трижды сице: «Господи помилуй, Господи помилуй, Господи помилуй, благослови!» — ни поп, ни Бог!

И молитва «Нескверная, неблазная» — творение Павла-мо­наха, написано, его же ни слышахом когда, а не Василия Великаго, как в старых.

И святаго Иоаникия Великаго молитва «Упование нам Бог» превращена тут.

И в Воскресном тропаре 1-го гласа: «Воскресл еси, тридневный Спасе» — сего не вемы, к чесому тако хулно глаголют: «Тридневный Спас», а в православных книгах старых писано: «Воскресе в третий день, Спасе» и прочая, и тако истинно. Того же гласа ипакои «Разбойниче покаяние рай окраде», а не «отверзе» по старым книгам.

И аллилуйя тут четверичная писана.

А о исправлении в нем глаголют с греческих, а наипаче ссы­лаются на Часослов Киприана-митрополита, по его велению, глаго­лют, писан. А не сам Киприан писал его, но неведомо кто и с каковых книг преписован, там объявлено. И сего ради на тот Часослов указуют, что в нем аллилуйа 3-жды, в четвертыя — «Слава Тебе, Боже!», и в Символе несть истиннаго. Се есть проявленная лжа на святаго Киприана, той бо Киприан-митрополит сербянин был, чти, кто хощет, житие его в Степенной книге и в новопечатных проло­гах, положено в сентябре. А в сербских святых книгах в Символе: и в Духа Святаго, Господа, истиннаго, и прочее, вся Символа сло­во в слово со старыми московскими и печатными книгами сходна, и «Аллилуйа, аллилуйа, слава Тебе, Боже!» наряду, да не во единой книге, но во многих тысящах печатных свидетелствованных кни­гах. И како Киприан смел бы зде новыя догматы благословлять писати, им же от юности не учися, ниже слыша когда аллилуйи четверичныя! Прислан бо тогда от цареградскаго патриарха к Москве на митрополию, а у вселенских тогда святейших пастырей, у всех четырех патриарх, глаголали аллилуйю 2-жды, а третие — «Сла­ва Тебе, Боже!», по их языку «Докса си, Феос!». Тому свидетели святый Ефросин, руский чюдотворец, бывый там сам у патриар­ха в Цареграде, и сам Грек Максим премудрый. Еще же и враг свидетелствует истинну, который начал в Руси четверити аллилуйю — Иов, роспопа, троеженец, псковский еретик. Писал он в сло­ве своем о аллилуйи и хулил тогда греков, во православии еще сто­ящих и владящих еще Царемградом до турок, и книги у них не отняты еще были от римлян и не пожжены. Одне [глаголюще Иов] греки говорят аллилуйю 2-жды, 3-е — «Слава Тебе, Боже!», а инде везде четверят аллилуйю. И чему верить, святым ли греческим и руским древним или Иову, псковскому еретику, кой жив червми снеден, с нынешными его ученики?! А Киприан како бы дерзнуть велел чрез вселенскую церковь мудрствовати аллилуйю, свят бо муж бысть: ни, ни! Подметной тот Часослов от Иова или от ученик его, а на Киприяна солгали, бутто он велел написати тако аллилуйю и прочая вся. Не токмо бо на святых лгут еретики и отступники, но и на самого Христа лгут! Есть писано в печатных книгах Корм­чих Никоновы справы, бутто Христос бил жидов в церкви бичом. И инде то есть писано? Да и нынешния мучители, а не учители, указуют на те лжи сатанины и биют священников, и иноков, и ми­рян шелепами за некая малая прегрешения и, оправдующеся, глаго­лют: «И Христос бил!» Оле диаволския лжи на Христа моего! Он, Творец, кротости учитель и смирения, сам бит был от жидов и об­руган, а их не бил, токмо изгна из церкви овцы и волы, а продаю­щим голуби рече словом, а не бил их, не лжи, еретик! О том уче­ник его Иоан Богослов свидетель. Да и в том их Часослове [что, называют, по Киприанову приказу писан] в Символе токмо истин­наго несть, а прочая Символа вся согласна старым книгам: Исуса, а не Иисуса, и рожденна, а не сотворенна, и Его же царствию несть конца, яко разуму его несть числа и величию его несть числа [по пророку], тако же и царствию Его несть конца. А не будет кон­ца — того речения в Символе не обрящеши нигде же, аще и тмы тысящей харатейных книг и сербских проидеши [на них же ныне отступницы ссылаются ложно и простых прелщают], кроме униатскаго Символа, там не будет конца положили они прежде, как от­ступили веры своея и поддалися римскому костелу, и истиннаго уни­аты тогда отняли из Символа у себя; епископ их, униат, Мелетий Смотрицкой вынял. Да, на них стыдяся указать о не будет конца, указу­ют на архангела Гавриила, егда Богородице глагола прежде Рожества и Зачатия Превечнаго Сына Божия о плотстем Его воцарении в дому Ияковли. К тому рече архангел Пречистей: «Зачнеши, и родиши Сына, и наречеши имя Ему Исус. Сей будет велий, и Сын Вышняго наре­чется, и воцарится в дому Ияковли во веки, и царствию Его не будет конца». А по Божественному своему естеству и преже вочеловече­ния своего царствовал и ныне царствует со всеми присно — со Отцем и Духом. И зде они прибегают к Евангелию и поемлют себе, что неприлично Символу [Христу уже царствующу сугубо] сбывшияся Гаврииловы глаголы на Богородице, а что сам Христос, небесный Царь архангелской и Творец всей твари, глаголет трикраты о истинном Дусе. И страшно велми: от тех словес Христовых они отмета­ются, и, яко аспиды глухия, затыкают уши своя, и слышати не хотяще о истинном! А Христос глаголет: «Отметаяйся Мене, и не приемляй глагол Моих, имать судящаго ему; слово, еже глаголах, то су­дит ему в последний день» и прочее.

Поистинне в лепоту рещи, подобно их мудрование человеку утопающему, ему же бы аще кто и бритву подал, и за ту хватается! Отвсюду себе пестроту собирающе и, тако разодравше церковь, сами погибают да и всех к своей погибели нуждею призывают. Таков есть обычай у всех отступников: самим прелстившимся и прочих прелщати, непокаряющим же ся им умучати всяко. Святый Златоуст гла­голет в Беседе на Послание к галатам и проклинает хотя мало что изменяющих в вере: «Аще и малое что подвигнут, анафема да будет!» И за один «аз» [в нем же целый склад отсекают ныне от Символа] прокляти суть от всех святых! У святаго Златоуста в Мар­гарите в 1-м Слове о оглашении рожденна, а не сотворенна есть, и истиннаго есть, и несть конца везде есть.

О сынове человечестии, доколе любите суетная и ищете лож­ная? Погубит бо Господь глаголющия лжю, и мужа крове и лстива гнушается Господь. Исполнися время, приближися царствие: покайтеся и веруйте во Евангелие. На всяко лето себе исправляете, и чем дале, тем глубже во дно адово себе низводите, и мнимому вашему исправлению конца не будет, дондеже не останется в вас ни едина жилица христианская. И всегда учащеся, а в разум истинный приитти не можете, плоть бо и кровь царствия Божия наследите не мо­жете {К Тимоф., зач. 295; к рим., 97}. А елицы Духом Божиим водятся, сии суть сынове Божии.

Что ваша пребеззаконная клятва успеет в день судный? Про­клинаете бо православных христиан, а сами отвсюду прокляти, и вяжете их неправедне, сами же от святых связани суще праведне, и богомерским еретиком — Арию, и Македонию, и Несторию, и Са­велию, и прочим — уподобляете благочестивых, а сами полны всех ересей оных еретиков, да, мню, и не видете их, ослепи бо Бог разу­мы неверных. Почто учителя своего, пса адова, Никона изгнасте, а пестроты его за ним не извергше? Почто крещение латинское приемше и с ним вся ереси принявше, поменовеныя отчасти в кратком писании сем? Почто своих святых отец благочестия не возлюбивше, и по смерти сияющих, яко светилники?

О честнии отцы и братия наша бывше, кто вас смути, кто вас прелсти противитися истинне всякой, кто вас научи укрепляти всяку лжу? Вем бо кто: сатана, опщий враг наш! И се вем, яко мнози от вас за неведение и за страх человеческий погибают. А корень всему злу — сребролюбие, и сего желающии веры отпадоша, по апостолу Христову Павлу (к Тимофею, 287 зачало).

И аще бы наша вера прежняя, единая в чем не права была или ереси в ней, то бы святым руским чюдотворцам откровенно было прежде, с ними же сам Бог беседовал и посещал явно, и Пречистая Богородица, и апостоли Христовы, и велели бы то ис­править.

Преподобнаго отца Александра Свирскаго посещала Троица, яко и Аврааму явися в трех лицех, а не во едином составе — по новым книгам, Триодям посным.

Ко преподобному отцу Сергию приходила Пресвятая Богоро­дица [а не «детородица» — по новым книгам] со апостолы, а у него тут в сенях были две чюдотворныя иконы: Пречистыя Богородица едина, с превечным младенцем, вторая — Николы-чюдотворца [ныне у гроба стоят]. А на тех иконах у Спаса Христа и у раба его Николы сложение перст едино написано, как нас святии учат в книгах сво­их. И аще бы то ересь была Несториева — два Сына, по Никонову блядословию, то бы святому Сергию не умолчала Владычица всех, ко оному Кириаку не вошла двух ради словес Несториевых в кни­ге, а тут, на святей иконе, ея како бы презрела? Ей же святый при­сно моляшеся и гласы слыша от нея, но немы да будут устны лстивыя, глаголющия на правду и на праведных беззаконие, а истинна Господня во веки пребывает в церкви Христове!

И преподобному Ефросину Псковскому, чюдотворцу, явишася в животе яве три вселенские учители: Василий Великий, Григорий Богослов и Иоанн Златоуст, и аще бы святый о аллилуйи неправо мудрствовал, тогда бы возбраниша ему о том, но несть, несть, паче же и ублажиша его и похвалиша!

И Авраамию Ростовскому, чюдотворцу, явися Иоанн Бого­слов, а веры не хулил его.

И в Киево-Печерском монастыре коликое множество святых, а у них та же вера бысть, книги их сходны с нашими, в малом нечесом разве несличны, и в тех аллилуйа 2-жды, 3-е — «Слава Тебе, Боже!» — до Могилиных Требников: тот немало повредил бла­гочестия тамо.

И в Еросалимской церкви восточной тако же глаголема бысть трисвятая аллилуйя сице: «Аллилуйя, аллилуйя, слава Тебе, Боже!» — до 158-го году, как был посылан тамо троицкой келарь Арсеней Суханов и прочии с ним, тамо слышаша у гроба Господня; и святейший патриарх тот благословляет добре, по преданию. А ны­не не вемы, ужасатися приходит о сем, како неправеден Бог, яко у рабов своих утаи истину всяку, а врагом откры, «чюдо» проявися ново! Да не будет! «Праведен Господь Бог наш, и несть неправды в Нем, и на святых почивает присно, и верным рабом Своим и дру­гом вся вверяет Своя и открывает. Тайна Моя Мне и Моим», — гла­голет Господь, утаи бо сия от мнящихся быти премудрых и разум­ных, а открыта младенцем, сиречь кротким и незлобивым учеником своим — всем и доселе.

Егда же попустившу Богу наскочити врагу и губителю душ хри­стианских и всякия злобы и лукавства исполненому Никону сести на патриаршеском престоле, той враг тогда чистую пшеницу здравыя догматы от церковныя нивы потреби, плевелы же, сеянныя от древних враг, собра, от разных стран неправыя и лукавыя догматы в церкви насади, к тем же еще и своя многия примеси. А самодержец ему о всем том не возбрани, видя матерь свою, святую церковь, от разбойника разоряему, и не поможе, понеже лстец, он улови его в начале патриаршества и рукописание взя на него, государя царя, да ни в чем ему не возбраняет, что начнет творити, еще же и от бояр его заступает, да не зазирают и не препинают ему хотения своя тво­рити.

О последняго неразумия, его же не слыхано от века, еже на благочестивых царей кабалы патриархом имати и царем в том поступати! Дивлюся помрачению разума царева, како от змия окраден бысть исперва, или рещи оно, яко забвение на всех валится и нера­зумие, человек бо есть; неведый бо помазаник Божий и не узна вол­ка, во овчей кожи пришедша, и сего ради тако бысть за согреше­ния наша. Аще бы и не тому, ино иному такову сосуду злобы явитися бо ся, да не мимо идет Писание последних времен и последних прелестей!

Тогда же вскоре Господь Бог гнев свой излия на всю Рускую землю, посла смертоносную язву на человеки, уцеломудрити хотя нас, да кроме святыя воли его ничтоже творим, но к нему прибега­ем, и от него милости просим и разрешения о всякой вещи. А наимник, иже несть пастырь, оставя овцы Христовы, и начат бегати от Божия суда по лесам и по блатом, и по монастырям крытися, и царицу благоверную с чады с собою водя [царю же в то время на рати бывшу в Смоленске], лестию им приступая, якобы хотя сохра­ните от суда Божия; человек тленный сам и смертный, а на Бога не уповая. Аще не Он, Создатель, сохранит, то кто от всевидящего ока Его укрытися где может? И, волхвуя, отступник тогда, древеса собирая, глаголемая муждевел, и по странам пути полагати веле и огнем зажигати, и сквозе той огнь сам, богоотступной, проходя, и благоверную царицу и с чады проводя, и всех людей окуряя. Тако прежде нечестивии цари и мучители творяху, святых мученик во идо­лопоклонство хотяще ввести, но святии того не слушаша и повеле­ние их оплеваша безумное. А Никон прелсти всех с богоотметником же оным, Арсеном Греком, а по градом грамоты розсылаше, богопротивник, и к болящим не повеле священником ходити и свя­тых таин Христовых не сподобляти их, и сам многих в весех людей Божиих немощных в храминах заваливая, а иных, завалявши, ог­нем сожигая живых. И тако тогда мнози христиане по градом и се­лом без покаяния и причастия умираху, а кои благоискуснии попы, помня страх Божий, тайно исповедовали и причащали, боящеся свирепаго мучителя великих запрещений. И кто тако от века во святых творяще, волхвуя, и христиан уморяя, и сожигая, и Христова тела и крови при смерти лишая, как сей богоотступник, враг Никон, ему же праведный судия Христос Бог наш в том? Егда бо быша моры в прежняя времяна во многих странах, тогда святии пастыри не бегаху, но со слезами Богу молящеся о себе и о всех людех, и болящих посещаху, и утешаху, и святою водою покропляху, и молитвами сво­ими Бога милостива сотворяху, и праведный Его гнев утоляху. А сей богомерзский Никон все противно творя самому Богу и всем свя­тым Его, на тварь надеяся — на огнь и муждевел, а не на Творца твари всей.

И како от такова злаго древа добрыя плоды прорастоша, реку же, вера им взыскася! Христос глаголет: «Всяко злое древо не мо­жет плода добра творити, но зол плод творит». Христос же велит всякаго человека от плодов познавати, а не от словес красноглаголивых, то есть листвие шумящее философския словеса. Христос же глаголет: «Не входяй дверми во двор овчий, но пролазяи инуде, той тать есть и разбойник» {Ин. зач. 35}. Тать есть и разбойник Никон, не дверию вошел на архиерейство, но дирою влез, сиречь не по правилом церковным стал: попа, бывшаго в мире и постригшася, отсекают священства святии отцы, втораго бо поставления попу несть; и во святителех таковаго святаго отнюдь несть, бывшаго попа в мире. А та беззаконная блудница Никон, каков сам бысть поп мирской и растленноживый, таковых же и чад себе наплоди, всех бо мирских попов бывших в епископы настави, кроме Коломенскаго епископа Павла, и таковыми, яко куплеными рабы, еже хотя, то и творя, не сме бо от них ни един глаголати с ним о всякой правде, но вси ему такаху и руки своя к новым догматом за страх прилагаху, блюдущеся маловременныя чести отстати, кроме онаго исповедника Павла, епископа Коломенскаго, о нем же в начале рекохом. Той един не предал благочестия, но мужески ста о правоверии своем и скончася от мучителя не вемы где. А инии вси — ласкатели и предатели, и сего ради от таковых злых делателей, не по Божию суду приимших епископство себе, вся злая сотворися церкви Христове, и теми сата­на сотвори хотения своя.

И каков Никон мерзок Богу и святым Его, таковы мерзски Богу книги и догматы его и укрепляющии их ученицы его, ненавидими суть от Христа Бога и святых Его, прежних отец наших и учителей греческих и руских всех. Христос глаголет: «Иже несть со Мною — на Мя есть и иже не собирает со Мною — расточает» {Мф. 47}. И паки Христос глаголет: «Аще кто Мне служит, Мне да последует, и идеже есмь Аз, ту и слуга Мой будет» {Ин., зач. 42}. Верен Господь во всех словесех Своих! Нынешнии же лжеучителие, гречестии и рустии, не со Христом собирают прежних святых отец Христову веру и своими растленными догматы Антихристу путь уготовляют, ему же сести в церкви, яко Богу, и показати себе, аки Бога {К солуняном, зач. 275}, по Апостолу. Во Афон­ской горе греки в 158 году сожгли наши православныя книги печатныя: Псалтырь с следованием, и Кирилову книгу Иеросалимскаго, и Многосложный свиток, кой писаша древле святейшия вселенские патриархи и вси епископи Феофилу, царю греческому, впадшу во иконоборную ересь, обращающи его в первое благочестие отец своих. А у того свитка 1000 четыреста пятдесят рук приложено было. И то какая правда нынешних грек? И своих древних святых сожигают книги и наших, а не единыя вины обретше в них, токмо зависти ради сотвориша то, что Кирилова книга всех еретиков ереси обличает и от прелести Антихристовы защи­щает всех верных, а у них таких книг несть. О той их неправде и обличал их Арсеней Суханов, как был у них в Греческой земли, и патриарху цареградскому на них жаловался: «За что [рече] благочестиваго царя нашего Афонския горы старцы пожгли книги?» И патриарх отвеща: «Напрасно государь-царь таким врагом и ми­лостыню дает». О том писано пространно в Ходнике Арсениеве. А Псалтырь наша с следованием и не згорела на огни, что пи­сано в ней о сложении перстов. О том чюдеси писано тогда царю Алексию Михайловичю при Стефане-духовнике, и во всю Серб­скую землю о том же чюдеси писаны грамоты. А нынешния никонианы тех врагов оправдуют и тати татей покрывают, глаголя: «За неисправление пожгли старыя книги московской печати». А каковаго ради неисправления или ереси, того стыдятся сказати людем. Потребит бо Господь вся устны лстивыя и язык веле­речив, и заградятся уста глаголющих неправду на первую свою веру православную, в ней же породишася, и освящение всякое прияша. И внезапу бо прелождшеся враждебная ей устрояют, своих святых отец благочестие похуляют, а Бахметову проклятую веру похваляют и кованаго Бахметова бога заступают, глаголюще [Павел безумной, митрополит Сарской, и единомудреннии его]: «Неделом писано в старых Потребниках Филарета-патриарха и прочих о проклятии срацынския веры: проклинают бога кованаго Бахметова — страшно то». Оле безумных глагол Павла! О глупос­ти! Аще Бахметов кованой проклятой бог прав и вера его добра, то и вси идолы и многобожие еллинское свято по их! Почто святии мученицы Христовы и отрекалися их, чесо ради и плеваша и проклинаша их, туне и страдание их по Христе Исусе! Поистинне реку, отступник Павел объюроде, воистинну ума лишен и развра­щен, токмо мучити и гонити христиан и лстити горазд простых душ и славных. Аще в таковой вещи малой и явной право разсудити не смыслят, то како в великих богословних догматех церковных уразумети могут, что право, что лесно? Якоже бо свиньи кал жуют, а бисер ногами топчют, прелесть укрепляют, а истинну попирают и стоящих за ню сокрушают, и разоряют, и всяко утомляют, дабы ни един христианин был на земли, держаяйся старых книг и догмат церковных. Когда православныя христианы гонили и мучили христиан же? Когда пустыни преподобных мужей разоряли? Когда в темницах затворяли? Но вся сия творят верным рабом Христовым еретицы и отступницы, да привлекут их муками к своей нечистоте.

— О Владыко, святый, истинный, доколе не судиши и не мстиши крови и гонения нашего от живущих на земли? {Апок. 6 глава} Уже ра­бом Твоим, нам негде и главы подклонити, везде гонимы и изгоняеми, ни мала покоя себе и утешения обретающе! {Мученицы глаголют}

— О раби Мои, страстотерпцы, в терпении вашем стяжите душа ваша, потерпите мало еще время, дондеже скончаются клев­рета и братия ваша, хотящии избиени быти, якоже и вы {Христос им отвещает}.

— Господи Исусе Христе, мало есть нас, раб Твоих, на земли в нынешнее время последняго часа, нечестивых же много, уклоня­ющихся в развращение {Мученицы глаголют}.

— Не рех ли Аз, Спас ваш: «Не бойся малое Мое стадо, яко благоизволи Отец ваш дати вам царство. И се Аз с вами есмь во вся дни до скончания века. Не бойтеся от убивающих тело. Аще Мене, Христа вашего, изгнаша и распяша, и вас, рабов Моих, изженут и рекут всяк зол глагол на вы, лжуще Мене ради, и всяк, иже убиет
вы, мнится службу приносити Богу, да не смущается сердце ваше. Претерпевый же до конца, тои спасется, и проповестся сие Еванге­лие царствия по всей вселенней во свидетелство всем языком, и тогда приидет кончина» {Христос утешает их - Ин. зач. 52; Мф. зач. 99}.

— Господи, Царю славы, несть бо уже под небесем того мес­та, идеже бы не проповестся пресвятое Твое Евангелие, но во всю землю изыде вещание посланников Твоих и в концы вселенныя гла­голы их, и время мертвым Суд прияти и дати мзду рабом Твоим, пророком и святым, и боящимся имени Твоего, малым и великим {Мученики - Апок. глава 11}.

— Не глаголах ли Аз к наперснику Моему Иоанну Феологу, «яко время близь есть: обидяй да обидят еще, и скверный да сквер­нится еще, и праведный правду да творит еще, и святый да святится еще. Се гряду скоро, и мзда Моя со Мною — воздати комуждо по делом его» {Христос глаголет сие мучеником - Апок. глава 22}.

Глаголет, свидетельствуя, и сия: «Ей, прииду скоро». Аминь. Ей, гряди, Господи Исусе! Благодать Господа нашего Исуса Христа со всеми православными да будет во веки. Аминь.

 

Писавый сие имени своего не поведа неправды ради гонителей и мучителей, что истинны церковных догмат ненавидят и всякую прав­ду святых отец лжею закрывают, а новых исповедников и мучеников Христовых неправедно осуждают, великим могутством и силою своею все творят. Токмо чтый да разумеет звание трудившагося в чисменстых — двести пятдесят ко осмим, в чине же священнослужения в численных же — сто пятдесят к пятим, в словенском диалекте. Ал­лилуйя, аллилуйя, докса си, Феос о всем! Аминь.

Молю зде всякаго православна, хотящаго сию малую книжи­цу преписати себе, да внимаеши, возлюбленне, опасно глаголем силу в речении всякаго словеси, и како есть писано зде кое слово или где запятыя и точки, и вместителныя сице, тако же и ты твори, и речь с речью не сливай в писме, и вместо «естя» не пиши «ятя», и вместо «ятя» не пиши «естя». А где еще опись узриши, и ты, разсудя со­бою, исправь, понеже писано в великих бедах сие и в горком гоне­нии, скорым обычаем, ползы ради верных христиан, убоях бо ся Страшнаго Суда Христова, како осуди скрывшаго талант онаго лениваго раба. Аз же, грешный раб Исуса Христа моего, не потаих истинны Христовы в сердцы моем, но еже где что прочтох и видех во святых книгах, тако и зде написах, а собою ничего не солгах, вся тако суть стоит истинна Христова в церковных правых догматех. А хотяй к сему приложити и более нас, во Священных Писаниих потрудится и снискати что на ползу гонимой церкви Христове, буди Бог с таковым! Приложит тому Христос, Сын Божий, мзды во цар­ствии Своем, Ему же слава со Отцем и Святым Духом во веки. Аминь.