Том вторый

 

Часть вторая.

О покаянии.

Покайтеся, приближибося царствие небесное. Словеса суть самого Господа нашего Iсуса Христа, положенная во священнем евангелии, у священнаго Матфея евангелиста, в зачале 11.

 

Предел первый.

О еже что есть покаяние; и кто научивый покаянию; и кая сила его.

 

Глава, 1.

Что есть покаяние.

Покаяние есть, возвращение от дел, чрез закон и естество творимых, рекше, их же закон и естество не повелеваюта творити, ко совершению закона и естества, сиречь, ко исполнению заповедей божественных и естественных, и от диавола к Богу пришествие, постом и бдением. сице о сем божественный Дамаскин глаголет: покаяние есть, от еже чрез естество во яже по естеству. и от диавола, к Богу пришествием, постничеством, и труды. книга Небеса, слово 31. Или: покаяние есть волное обращение от злых деяний, на сопротивное им благое, якоже Давыд поучая вопиет: уклонися от зла, и сотвори благо [псалом 33]. еже и кир Гавриил Филадельфийский изъявляя глаголет: покаяние есть, обращение волное от прегрешении, на сопротивное благое. книга О седми тайнах. глава 8. Святый Иоанн списатель Лествицы глаголет [слово 5]: Покаяние есть возвращение от греха. возвращение от греха, есть зазрети себе, зазревшу себе, омерзити грех. омерзившу же грех, возненавидети его, возненавидевшу же его уклонитися от него. уклонившужеся от него, творити добрая дела: чесому научая нас сам Господь пророком Иеремиею вопиет глаголя [Иеремия, глава 40]: да отвратится убо кииждо от пути своего лукаваго, и лучшая сотворите начинания ваша. Или: покаяние есть, еже престати злая и беззаконная дела творити, и жалети яко толь премного Бога прогнева: якоже Лествичник вопиет глаголя [слово 5]: Покаяние есть, еже оставити первая: и печаловатися о них. Паки: покаяние есть, залог или обет к Богу, еже не ктому уже прочее согрешити, но прейти на новое житие, си есть добродетельное, якоже и Павел апостол глаголет [галат. зач. 213]: совлещися ветхаго человека, со страстьми и похотьми, сиречь греха, и облещися в новаго по Бозе живущаго, рекше в добродетельное житие. о чесом той же Иоанн Лествичник глаголет [слово 5]: Покаяние есть, ненавидение и омерзение, всех прежних сладострастии, любосластии, и грехов, яже прежде зело любезна быша. Якоже той же преподобный Иоанн списатель Лествицы научает глаголя: Покаяние есть ненависть и омерзение того, еже прежде любезно бе.

Но уже доволно, мнитмися, показахом, что есть покаяние. Ныне еще рцем: Что есть каятися? Святый Амвросий архиепископ Медиоламский научая глаголет [книга Мир с Богом, часть 1, глава 1]: Каятися есть, от прежних злых жалети, и жаления достойных паки не творити. Ведательно же и сие есть [Гавриил Филадельфийский, книга о седми тайнах, глава 8, лист 134]: колико убо есть покаяние? покаяние есть сугубо. внутреннее, и внешнее. внутреннее убо сокрушенным сердцем бывает, якоже Давыд глаголет: сердце сокрушено и смирено Бог не уничижит. и еже из глубины воздыханием, яко из глубины возвах к Тебе Господи, Господи услыши глас мой, и воздыхание убогих не погибнет доконца. Внешнее же слезами бывает, коленопреклонением, в перси биением, якоже древле мытарь сотвори. части же покаяния суть три. 1, сокрушение сердца. 2, исповедание уст. 3, довлетворение. Сокрушение убо сердца есть, скорбь сердечная, раскаяние прежних ради грехов, и преступления закона Божия. Сие любезно есть у Бога, и не уничижается от него. по реченному [псалом 50]: сердце сокрушено Бог не уничижит. исповедание же есть изглаголание волное без стыда устнами бываемое, прежних содеянных ради студодеянии, и оглаголательное волное явственнейшее сердечных таин пред имущими законную и правителную власть, рех исповедание. якоже пророк глаголет [псалом 31]: рех, исповем на мя беззаконие мое Господеви, и Ты отпустил, нечестие сердца моего. рех волное: яко нужное все несть добродетель. рех без стыда. яко студ есть наводяи грех, и есть студ слава и благодать по Соломону. И Сирах [Сирах 32]: несть добро всякому студу хранитися. рех устнама: зане глаголет пророк Исаия, во главе 43: глаголи ты прежди грехи твоя, да оправдишися, яко Аз есмь очищаяи грехи твоя. И Господь во евангелии [Мф., 12]: от словес бо твоих оправдишися, и от словес твоих осудишися. Рех бо оглаголателное: яко глаголет божественный Златоуст, в 51 от Матфея беседе: Аще хощеши оглаголати, оглаголи себе. рех сердечных таин, яко пророк глаголати [псалом 18]: от тайных моих очисти мя. Рех пред имущим законную и правилную власть. яко мнози лжепророцы внидоша в мир, и мнози прелщающе и прельщаемии, по божественному Павлу [Тим., зач. 296]. Темже нужно есть испытати нарицаемыя духовники, аще власть имут и разрешательную грамоту по обычаю святыя церкве. Третия часть покаяния есть довлетворение, еже есть делательное исполнение, и совершение правила, еже имеяй власть духовник даде согрешившему о гресех его, по преданию святыя церкве. и по отмщению духовному святых правил. сему не токмо соборныя церкве богопроповедницы и духопроповедницы научиша: но и божественное писание яве проповедает. ибо сестра Моисеова на него язык двигнувшая, аще седмь дний ополчения отлучению подлагашеся, не бы проказа изменилася [4. Моисей, глава 12]. И в Коринфе блудник, аще не сатане предашеся, не бы дух его спаслся [1 кор., глава 5]. Темже и святии собори, и богоноснии отцы по части. Афанасий же, глаголю, Петр Александрийский, и Дионисий, Григорий чюдотворец, Василий, и Златоуст, Григорий же, и Кирил, и Иоанн Постник, по количеству и качеству грехов, довлетворение грешником известно определяюще наводят. им же не покоршуся, нужда есть к тамошним мучением послатися, и слово дати о них же содела, непреподобнодействиих, яко законов церькве отвергся. Номоканон же от правил святаго Василия Великаго зело страшне на разоряющих заповедь отца своего духовнаго изрече, сице глаголя [Номоканон, правило 114]: иже разоряет устав духовнаго отца своего при животе и при смерти, буди анафема. Сия три части покаяния и творец книги Мир с Богом изъявляет быти глаголя: материя покаяния ближайшая, суть три деяния кающагося: сокрушение сердца: исповедание грехов: и довлетворение за грехи. о чесом Златоустыи святый: сокрушение, [рече] покаяние, понуждает грешника, вся любезно понести, да будет в сердцы его сокрушение, во устех исповедание, в деле всякое смирение. коими бо образы Бога прогневаем? прогневаем же сердцы и устнами, и делом, теми же и да примиримся с Богом. сердцем убо чрез сокрушение. устнами чрез исповедание. и делом чрез довлетворение. которое довлетворение бывает треми образы: усты, телом, и вещию. усты убо, егда кто молитвою умною, и песньми, и пеньми, умилостивит Бога. якоже великии он творяше Давыд [псалом 129]: из глубины возвах к Тебе Господи: глаголет: и паки [псалом 50]: помилуй мя Боже по велицей милости Твоей, и по множеству щедрот Твоих очисти беззаконие мое. и паки [псалом 140]: Господи возвах к Тебе услыши мя. Телом же, егда постом, и коленопреклонением, и бдением, и всенощным стоянием молит кто Бога. якоже творяше той же пророк. якоже сам о себе послушествует [псалом 101]: колена моя изнемогоста от поста, и плоть моя изменися елея ради. и пепел яко хлеб ядях, и питие мое с плачем растворях. Коленопреклонения же, и бдения, и всенощная стояния, и иная телесная озлобления, святых и праведных жития предпоставляют, и святаго Иоанна Лествичника книга явственно учит нас. Вещию, егда кто благотворением и милостынею, и щедротами ко убогим, Бога умилостивит, и очищает грехи своя. якоже пророк Даниил Навходоносора учаше творити [Даниил, 4]: грехи твоя милостынями избави, и беззакония твоя щедротами убогих. И Сирах: затвори милостыню в клети твоей, и сия измет тя от всякия нужды. И Товия: милостыня от смерти избавляет, и очищает грехи. И сие убо треми реченными видми довлетворение, к Богу, глаголю, и к самому себе, и ко искреннему. ощищати грехи может.

И еже к Богу, молитвою подобает творити, еюже беседует, яко воистину Богу, и со ангелы соединяемся и еже к безсловесным приобщения много убегающе являемся, по божественному Златоусту, в первом слове о молитве. А еже к самому себе, постом и иными ожесточеньми совершати. А еже ко искреннему, милостынею и благотворением тихо показовати.

Глава, 2.

О еже кто есть научивый покаянию.

Рехом, что есть покаяние, и киими образы бывает. прочее требе ведати, кто есть научивый покаянию. темже и вопрошая глаголю: кто есть научивый покаянию? покаянию научивый, сам есть щедрый и милостивый Господь, сам пророком Иоилем глаголет во главе 2: обратитеся ко Мне всем сердцем вашим. Паки пророком Малахием [Малахия, глава 8]: обратитеся ко Мне, и обращуся к вам, глаголет Господь Вседержитель. Но и Иеремиею вопиет глаголя [Иеремия, глава 18]: да отвратится убо кииждо от пути своего лукаваго, и лучшая сотворите начинания ваша. И богоотцем Давыдом [Псалом 7]: аще не обратитеся, лук свой очистит. Такожде и Иезекиилем вопиет глаголя [Иезекииль, глава 33]: живу Аз, глаголет Адонай Господь, не хощу смерти грешника, дондеже обратитися и живу быти ему. обращением обратитеся от пути вашего лукаваго, и вскую умираете доме израилев? Подобне пророком пророк, святый, глаголю, Иоанн Креститель, повнегда начиная проповедати. [якоже о нем божественный Матфей евангелист во главе третией споведует] глаголаше: покайтеся. приближибося царство небесное.

Но и сам Спаситель наш Сын Божий и Бог наш, повнегда, сшедшу Ему на землю нашего ради спасения, искуси Его диавол. научаше покаянию, якоже той же святый Матфей евангелист, о Его божественнем научении изъявляя глаголет [Мф. глава 4]: нача, рече, Iсус проповедати и глаголати, покайтеся, приближибося царство небесное. Паки сам Спас пречистыми своими усты вопите глаголя [Мф., глава 11]: приидите ко Мне вси труждающиися и обремененнии, и Аз упокою вы. Еже святый Иоанн Златоустый толкуя глаголет: [приидите не он сица, но вси сущии в попечениих, и в печалех, и во гресех, приидите, да не истяжу вины, но да разрешу грехи. приидите не понеже требуя вашея славы, но понеже требую вашего спасения. Аз бо упокою вы. не рече спасу токмо: [но еже много вящшее бе во упокоении всяком поставлю]. Темже и божественный Лука, в Деяниих глаголет: [яко Бог даде покаяние в живот].

Елма же сам Бог, устави покаяние в живот, сего ради зело нуждно потребно есть покаяние грешником, от хотящих рещися явленно. ибо аще не покается, не имать внити в царствие небесное [Мф., глава 11], по словеси самого Спаса нашего Iсуса Христа. якоже глаголет, и в тринадесятой главе, святаго евангелиста Луки, предсташа же нецыи Ему, в то время, глаголюще о галилеох, их же Пилат кровь смеси с жертвами их, и отвещав Iсус рече им: мните ли яко галилеане сии грешни паче всех галилеан быша, яко сицевая пострадаша? ни, глаголю вам, но аще не покаетеся, вси такожде погибнете.

Глава, 3.

О еже кая есть сила святаго покаяния.

Понеже сила покаяния их толика и такова, яко из грешнаго творит праведнаго, и вся грехи по святом крещении содеянная кающемуся отпустит, якоже и прежде падения нескверна соделовает. о чесом засвидетельствовася в Катихисисе велицем, идеже пишет тако: Вопрос: Что есть покаяния тайна. Ответ: Покаяние есть вторая дщица, по разбиении крестильнаго корабля. И нужднопотребная тайна согрешившим, в ней же оставление грехов о повинных испрошается. глава 64. Чесому и святый Иоанн Златоустый доволно яве научает нас сице глаголя [Соборник, лист 431]: сего ради подобает всегда слезити и плакати, яко да избавит нас Господь от злаго мудрования тела и смерьти сея, и вожделением поне некогда вожделенная она, в ня же и ангели желают приникнути. сия и мы вожделеем. покаемся, и покаяния ради паки нескверни будем, якоже и прежде падения. таков есть вид и сила честнаго стяжания покаяния, на первую честь, юже имеяше прежде согрешения, в ту устрояет паки покаявшагося. слово в неделю 4-ю поста. Зриши ли колика и какова есть сила святаго покаяния? яко чисте покаявшагося, на первую честь, юже прежде падения имеяше, возводит, и нескверна паки, якоже и прежде осквернения грехом бывша, содевает. Но смотри же ми, колицы и какови суть плоды покаяния. покаяние возбраняет согрешающему согрешити, отверзает рай. по реченнному: аминь глаголю тебе. днесь со Мною будеши в раи [Лк., 23]. Обращает душу в прежнее свое естественное строение и упокоение. По реченному: обратися душе моя в покой твой, яко Господь благо сотвори тебе. воздает честь, юже грехом погубихом, якоже на сыне блуднем бысть, глаголет бо Спас [Лк., 15]: изнесите одежду первую, и облецыте его. радости и веселия наполняет душю. яко глаголет пророк: возрадуется душа моя о Господе, облече бо мя в ризу спасения и одеянием веселия возложи на мя. оживотворяет умерщвенную душу от греха. по реченному: сей сын мой мертв бе и оживе. воздает благодать, юже погуби душа грехом. О колика блага: о колики духовныя плоды содела, и делает нам грешным, святое и божественное покаяние! кто есть ведыи разбойника в рай? не святое ли покаяние? кто Давыду оставление дарова? не святое ли покаяние? кто Манасии прощение испроси? не святое ли покаяние? кто от Неневии града Божий гнев отврати? не покаяние ли? кто Петру апостолу отпущение дарова? и первоверховнаго апостолом сотвори? не покаяние ли? о святое покаяние, еже исповеданием убо грехов, достойная твориши уста, очищающее сия от студодеяния, еже воспевати и пети Бога благодерзновенно. сокрушением сердца присвояеши Богу, святыя Его заповеди преступившаго. довлетворением же от геенны всячески человека изъимаеши. обаче не токмо Бог делом согрешавших делом и кающихся, сиречь довлетворением, приемлет; но убо делом согрешивших, словесы же кающихся не отревает, но равне приемлет, яко же и делом покаяние приносящих. и тако покаяние их очищает, яко снег белы сотворяет. и яко ярину убеляет. о чесом явственно засвидетельствует преподобный Нил черноризец, сице глаголя [Кормчая, лист 296]: [негли убо человече, яко делом согрешивших, словесы же токмо исповедающихся не приемлет Бог. таковая убо глаголя, недалече еси чистых убо словесы, нечистых же делесы, невеждных наватиан: понеже они премножеством безумия, и буести неполезныя, да не реку душетленныя, по крещении всяко покаяние отмещут. [ниже] и ты убо ныне презвитере не уничижай; но приемли сердце сокрушено, и согревай, и созидай, и спасай, не токмо плодов исправления тяжких от согрешающих изыскуя дела постническими: но и словесы приимая кающихся о своих гресех, и со многим смирением исповедающих тебе, яже зле содеяша. [ниже] велика убо есть покаяния сила, яже нас яко снег сотворяет, и яко ярину убеляет. Темже и Господь к таковым грешником рече: приклоните ми души ваши из глубины, и яко осуждени, и тыяжде венцы праведных приимете. Тако спасаются поникшии детелною добродетелию, неделанием Божиих повелении, но человеколюбием Божиим и исповеданием, иже со многим смирением и сокрушением сердца, своя грехи исповедав. он убо таковым образом спасается покаяния, и глубиною смирения, ты же спасися в чистоте руку своею, рекше во благих и добродетелных деяниих. [ниже, лист 298] И како убо веровати мя сотвориши? яко имаши разум божественных писании? просто Спасу вопиющу во евангелиих: несть воля Отца Моего, да погибнет един от менших сих. ты же многи и велики хощеши лишити спасения. понеже глаголеши, глагол единех не приемлет Бог. [выше, лист тойже] помышляти бо должен еси, не токмо суд, но и человеколюбие Христово, наказующаго на полезное человеческии род, исходяща и страждуща с нами, да не погибнем. се бо и Навуходоносор всяк образ злобы безчеловечия же и нечестия сотворив, и кровьми землю напоив, и николиже ничтоже возрастив подобнаго помысла, но противна себе Богу сотворив: обаче егда в зверя преложися, и скот бысть Божиим судом, словесы токмо исповедася, и глаголы малыми. и ниже бесчисленная беззаконновав делесы, абие и милости Божия, прежде таковая судившаго напоследок насладися, и восприят царскии престол и образ, и честь обилнейшую получи [лист 297], якоже глаголаше Господь: яко аще уканет ярость Моя на некоего судима, паки того исцелю. Аз прогневаюся, и Аз ущедрю. [выше лист тойже] негли убо невеждна, яко простых глагол Бог покаяния не приемлет, которыми болезньми и труды мытарь спасеся? не простыми ли глаголы смирения? киими же поты и труды разбойник со креста в рай вселися? не малыми глаголы, и исповеданием Христова царства: глава 41]. Что же, разбойник, иже бе при Маврикии царе, его же всяцем ухищрением мнози от воевод покушахуся яти, но не возмогоша, киими поты? киими болезньми спасение получи? не краткими ли и простыми глаголы, и слез источением? якоже о нем блаженный Анастасий Синайский повествует, глаголя [преп. Никон Черныя горы, в слове 22, и в Прологе]: при Маврикии царе бысть началник разбойником в странах фракийских суров и безчеловечен, и таков бяше, яко пути оны непроходны сотвори. Сего ради яти мнозем воином и воеводам. всяцем ухищрением наченшим, и не возмогшим. Слышав же блаженнейшии царь Маврикии о нем, с неким юным отроком своим крест посла к началнику разбойническому, слово дая ему тем, [не боятися но приити к нему] началоразбойник по действу Божию, устыдевся слова, и отложи обычай разбойническии, с ккротостию якоже овча пришед, со исповеданием к ногама царевыма припаде. таже малым некоим днем мимошедшым, в болезнь некую огньчну разбойник впад, в болнице глаголемей святаго Сампсона, и прием винное питие, во умное изступление впаде. потом же яко виде себе отягчаема, и от жития всяко исходяща, на молбу ко всещедрому Богу обратися, со слезами исповедаяся, и прощение своим грехом прося, и глаголя: не ищу что странно от тебе человеколюбче, но якоже древняго разбойника исповеданием спасл еси, сице и на мне удиви милость Твою своим благоустроением, и приими мой сей присмертный плачь на одре, якоже онех иже при единонадесятом часе ничтоже достойно соделавших: тако и моя малыя сия и горкия слезы, и очисти мя крещая в них, смертное прощение, яко крещение подаждь ми, не истязая мя множае что, не подает бо время, беззакониям моим приближившимся, но да не истяжеши, или спираешися, не обрящеши бо во мне что благо. предвариша бо мя беззакония моя, и к вечеру постигох зле, яко безчисленнии суть долгови мои; но якоже прият Петра апостола горкии плачь, тако приими и мой Человеколюбче. Возливаю сия слезы моя, на грехов моих рукописание. губою милосердия Твоего потребляя, неисцелная моя прегрешения. Сицевая на многи часы исповедаяся разбойник, и своим убрусом слезы от очию отирая, предаде дух. якоже близ его спящии поведаша. врачем же началник некто благоговеин, иже ону болницу посещая, и в своем дому спя, зрит во сне в той час, воньже разбойник скончася, некия ефиопы многи пришедше ко одру разбойничю, со мноземи хартиями, имущими грехи разбойническия. таже и два некая светлая мужа, принесоша убо мерило, и возложившим ефиопом вся рукописания разбойническая, претяже сия страна, другаяже на высоте бяше легка сущи. глаголаху убо два святая ангела: мы ничтоже имамы зде. глагола другии к нему: что хощем? не у десять дней имать пришед от разбойничества и от убийств своих, и что благо ищем от него? да яко се глаголаху, сотвориша осязати на одре его, еда како обрящут, и та нечто добро? и обрете един убрусец, им же слезы отирал бяше, и глагола к другу своему, воистинну ничтоже имамы зде, разве убрусец со слезами его. Но вложим его в другую страну, человеколюбие Божие с ним, и всяко нечто имать быти. и яко токмо вложиша его в страну возвышенную претяже внезапу. и разсыпашася вся рукописания на другой стране сущая. и возопиша единем гласом ангели, глаголюще: победи человеколюбие Божие, и вземше душу разбойничю отнесоша с собою. ефиопи же воскликнувше бежаша посрамленни. сия видев абие возбудися, и облечеся в ризы своя, и теком прииде в болницу. и пришед ко одру разбойника, обрете тело его еще тепло, душу же его отшедшу ко Господу, убрус же его на очию его лежащ исполнен слез, и уведав от близ его спящих исповедание, еже сотвори разбойник к Богу. и взем убрус, вниде к благочестивому царю, и показуя ему поведа, яже от ближних его слыша. глагола врачь к царю: благочестивыи владыко, слышахом разбойника спасена исповеданием на кресте при небеснем Царе, и видехом разбойника спасшася исповеданием при твоей державе земнаго царя. и сия убо слышаше веруем, истинна быти. [ниже] Велика убо еже по Бозе слезам крепость, велико тех действо, и свидетели, в ветсем убо ниневитяне, Иезекия, Навуходоносор, и Манасия, неисповедима и непостижима глубина спасеся, и кто прочее каяся всею душею не спасеся? что ми глаголеши, соблудих, прелюбодействовах, убийство сотворих, разбойничествовах, и в беззаконии состаревся, и спастися не могу? сия ли глаголеши? аще Манасию Бог покаянием прият, дерзаю рещи, яко и диявола кающася вседушно приял бы. пятьдесят два лета сотвори Манасия люди израильтейския служити. и покланятися идолом. колико тем, рцы ми умроша у летех онех, и идоша в погибель, их же грех царь Манасия взят, должен бяша? но не победи толикое множество человеколюбия Божия, глаголют бо древнии летописцы. яко веден бысть царь Манасия, в Вавилон персидскии, пленен от халдей, и затворен бысть в здании медяне от царя персскаго, и внутрь сыи, разседеся здание. изыде Манасия, и спасен бысть ангелом, прииде во Иеросалим, и ту скончася в покаянии и исповедании. зри пучину неисповедимую щедрот Божиих, единаго блага и человеколюбца спасающаго и милующаго туне, иже к Нему прибегающих воистинну. что бо принесе Манасия, рцы ми, Богови, достойно суда и погибели толиким тмам душ, еже в геене огня осужденным и погибшим? ничтоже. но понеже всяко покаяся, и прибеже, и приверже себе в щедроты Божия, сподоблен бысть от него оставления грехом. Никон, слово 52. Но что глаголю, яко Бог согрешающих делесы, кающихжеся простыми словесы со излиянием слезных источник, приемлет: но и при самом конце смерти покаяние приносящих не отревает. явственно о сем засвидетельствует преподобный Никон Черныя горы, в своего творения посланиях, сице глаголя [в послании 38-м]: Не несвидетельствовано же есть от божественнаго писания, но многа таковая обретаются, и паче страшнейшее о Феофиле оном царе, како иконоборец сыи спасеся и по смерти, якоже на святыя хуливыи, того язык огнем сгараше, и той безгласен обзираяся многою тяготою, и едва некогда видев промыслом Божии некоего от синклитик носяща енгорф божественныи образ, и той своима рукама удержав, безгласне приложи, ко устом же и очима, и челу, и сердцу, и тако отдаст душу. Блаженная же Феодора того жена втай верна бяше, да яко виде бывшее, абие отгна от церкве еретика патриарха, и великаго Мефодия вместо его введе, и советом его, ради царя Феофила, та убо внутрь палат милостынями и прочими благими делы, патриарх же тако и с прочими, упражняшеся на молитву, и бдение, всю первую неделю великия четыредесятницы. и по совершении недели, ответ прият патриарх от Бога, такожде и Феодора царица, яко спасеся царь Феофил. [ниже] но убо да видим, како спасеся царь Феофил, показа конец, яко в покаянии обретеся, внегда лобзати, и прочее сотворити к божественному образу енгорфе, и обаче безгласен на том смертном конце. послание 38. Видиши ли, яко Господь Бог, бе милости премногий, в щедротах неисчетный, при самой кончине смертной всеусердне кающихся приемлет. и не точию кающихся при кончине смертней приемлет: но и обращающихся от грех к покаянию, не отревает. якоже видимо есть в Пролозе, о некоей деве, освященней Богови, яже от диаволя действа запята бывши, впаде в блуд, и неколико времени пребывши в нем, паки умом возвратившися, мысляше о покаянии, о ней же повествуется сице [Пролог, июнь 2, лист 655]: поведаше некто от отец глаголя: яко в Селуне есть монастырь девическ, едина же от действа вражия, пущена бысть отъити от монастыря, изшедши впаде в блуд, тако бо прельсти враг, и в то впадши, неколико лет сотвори блудящи, и помянувся к Богу, паки умом мысляше на покаяние. и пришедше к монастырю, в нем же бяше хотяше каятися, и падше пред враты, и умре. и яви Бог единому епископу смерть ея, и виде святыя ангелы пришедша, и приимша душу ея, и бесы вслед их идуща, и прящася с ними. святым же ангелом глаголющим: нам работа толико лет, наша есть душа. долго же прящимся о том, и рекоша бесове, яко иде в монастырь в лености. да како глаголете покаялася есть: и отвещаша ангели глаголюще: понеже видев Бог разум ея, на то уже преклоншися прият ея покаяние, да покаянием она владеяше, еже на ум наложи сие. животом же Владыка Бог владеет, и тако посрамишася беси, и отбегоша. того ради блюдущеся живем и ходим, не вемы бо в кии час смерть нас возмет. июня, 2 день. Сего ради всякому православно жительствующему христианину несть лепо отчаяватися, повнегда и в некое прегрешение впадет. не бо погибает от Бога труд, его же в покаянии сотвори человек. аще бо тмами согрешил есть, тмами и да покается. в нем же Бог обрящет человека при смертней године, в том и судит. и слыши святаго Анастасия Синайскаго вопросоотвещателне сице о сем глаголюща [Кормчая глава 62, лист 628]: Вопрос: Нецыи многажды отсекающеся от греха и кающеся, есть яко паки поползающеся, и падающе отчаявают себе, яко се весь труд покаяния, иже суть сотворили, погубльше? Ответ: Не погибе от Бога труд, иже сотвори в покаянии человек, и сего ради не лепо ему есть отчаяти себе, но паки востати противу врага благими делы и покаянием. яко же и при воинех царских, любит царь воина стоящаго и борющагося со враги, овогда убо и уязвляющаго, паче бегающаго, и оружие пометающаго. тако и Бог паче спострадает души стоящей неослабевающей но борющейся с бесы, паче неборющейся, и себе отчаявша, и прочее безстудне грех творяща. не тожде бо осуждение имать, иже единою летом согрешая, его же иже часто согрешая. яко не туюжде мзду приимает, иже вся дни творит милостыню, его же иже по редку творит. аще убо и тмами согрешил есть, тмами и покайся, да пришедши смерть, обрящет тя в покаянии. до зде Анастасий. Сим согласно и божественный Златоуст поучая нас, повнегда случится кому, запяту бывшу от врага и человекоубийцы диавола, пасти, повелевает не отчаявати себе, но паки воставше обновляти себе покаянием, и слезами, и исповеданием, сице толкуя словеса блаженнаго апостола Павла, яже рече [к рим. зач. 108, ст. 5, от толков. Беседы апост. лист 363, лист 71, и 68, и 142]: [не сообразуйтеся веку сему, но преобразуйтеся обновлением ума вашего] глаголет: понеже человеком сущим последовательно есть на всяк день согрешати, утешает слышателя глаголя: яко всегда обновляя себе. еже о домох творим, обетшавшия тыя присно исправляюще, сие и о себе твори. Согрешил ли еси днесь? обетшил еси душу твою? не отчаяйся, ниже обленися, но обнови ю покаянием, и слезами, и исповеданием, и благих деланием, и никогда то престаеши творя. аще же не хотел бы нас великими венцы по трудех даровати, не бы прежде трудов толикая дал благая. Ныне же теплое своея любве показует отсюду, яко не тихо и помалу почте нас, но внезапу источник излия, и наипаче да еще прежде подвигов. темже аще и не вельми достоин еси не отчайся, имеяи велика споборника судящаго любовь. сего бо ради и сам той рек: упование не посрамит. не нашим исправлением, но любви Божией все возложи, рекше даянием. Беседы апостольския, лист 363.

Виждь колику крепость, колику силу, колику мощь имать покаяние, яко и при самом смертном конце, истинно кающихся, очищает от грехов. сего ради толико нужно потребно есть покаяние, яко, якоже кроме святаго крещения, сице и покаяния, невозможно есть человеку отнюд наследником царьствия небеснаго быти. Понеже убо крещение все грехи прежде сотворенныя себе омывает, покаяние же, яже по крещении человеком содеяни суть, очищает. о чесом кир Гавриил Филаделфийский явственно засвидетельствует сице глаголя: ведати нужда есть всем, яко тайны церковныя, иныя суть по нужде посредния, каковы суть, миропомазание, евхаристия, и елеопомазание, их же аще и не сподобится нужды ради некия, спасен быти может. иныя по нужде заповеди. темже есте две, крещение и покаяние, ею же кроме несть леть спасение получити. о крещении сам Спаситель глаголет [Ин. глава 3]: аще кто не родится водою и Духом, не внидет в царствие Божие. О покаянии же в Матфеи: во главе 18: аще не обратитеся, не внидете в царствие небесное. книга О седми тайнах.

Глава, 4.

Яко исповедаяи должен быти православен, и исповедаяися такожде православный.

Обаче покаяние тогда силно и важно и очистително всех грехов кающагося бывает, егда исповедуяи будет православен, и исповедуяися такожде православный. Аще ли един кий либо от них, или исповедуяи, или исповедуяися будет православен, другий же еретичествуяи, тогда ничтоже пользы сотворити может кающемуся, рекше не может тогда каяющагося очистити от грехов. кольми паче егда оба обрящутся еретичествующе. Сице убо о сем святая древлеправославная церковь научающи вопиет глаголя: первее кающемуся подобает быти христианином православно верующим; понеже без благия веры, ни едино же покаяние быти может. Второе разрешити кающагося, никтоже может, точию православныи священник. понеже кроме церкви несть спасения и разрешения. Катихисис малый, лист 32. Зде воньми прилежно, ныне в великороссийстей церкви священник исповедуяи приходящих исповедатися, аще есть православен? всяко не обрящеши. понеже несогласно самей первоначалней вине Христу благословляет: несогласно святых апостол преданию, и божественных отец содержанию знаменается: несогласно пророческим проречением, Христа Спасителя, не на трисоставнем им же и на нем же животворная Его смерть содеяся кресте, но на двочастнем распята быти умствует: несогласно всяк чин, всякую службу, всякое действо святей древлероссийстей церкви и совершает и действует. о чесом предоволно в догмате о крещении, в пределе третием, во главе 11, изъявихом, зри тамо. И аще убо сопротивно научению самыя первоначалныя вины Христа Спасителя благословляет: аще сопротивно святых апостол преданию, и богодухновенных отец содержанию знаменается: аще сопротивно пророческим проречением, Христа Спасителя на двочастнем кресте, а не на трисоставнем распята умствует: аще сопротивно всяк чин, всякую службу, всякое действо, святей древлероссийстей и восточней церкви совершает и действует, како от таковаго могут исповедающагося грехи разрешени быти, егда сам привнесений, привложений, отложений, и изменений ради, клятве предан быв, лишися благодати Святаго Духа? всяко не могут. ибо кроме благодати Святаго Духа никтоже от священных может ни вязати, ни разрешати, ни оставляти грехов, ниже удержавати, но вся сия Духом Святым совершаема бывают. о чесом явственно засвидетельствует преподобный Иосиф Волоколамский, пиша к преосвященному владыце Нифонту Суждальскому, сице рекий: Зриши ли яко Святым Духом, вязати и разрешати, и оставляти грехи и держати, кроме благодати Святаго Духа ничтоже может кому сотворити от священных. еретицы же в себе нечистыи дух имеяху сатанин. како могут на небесех и на земли вязати и решити. слово 12. Виждь коль преизъяснителне глаголет преподобный Иосиф, яко никто от священных кроме благодати Святаго Духа, ни вязати, ни разрешати, ни оставляти, ни удерживати грехов исповедующагося не может. Сей же священник лишився благодати Святаго Духа, повнегда премногшими новинами, древняя святых апостол предания, священных отец содержания, духоносных богословец учения, и всея древлеправославнокафолическия церкве пределы и уставы дерзостне измени. како может кающагося  у него грехи отпустити, или удержати? всяко не мню. Не имый убо дара Духа Святаго, не имать власти отпущати или удерживати грехи исповедающагося. понеже убо и сам Спаситель всего мира Сын Божий и Бог, егда по воскресении своем из мертвых, посылаше священныя своя ученики и апостолы во вселенную, ко еже обращати языки от темнаго идолобесия, паче же от бесовскаго служения, даде им Дух Святый, во еже отпущати и удерживати грехи, чрез них же и их наместником. якоже священное евангелие от Иоанна свидетельствует сице: [приимите Дух Свят, имже отпустите грехи, отпустятся им, и имже держите держатся]. зач. 65. Никонопоследствующий же убо священник несогласно священных апостол преданию и благословляет, и на себе крестное знамение изображает, несогласно наместником их, священным богопроповедником архиереом на седми вселеньских соборех бывшим, священный символ предавшим, и непременно тако пребывати в вечныя веки священными своими гласы утвердившим, изглаголуют ниже от по преданию самого Владыки, и содержанию всея святокафолическия церкве, архиерея крещеннаго хиротонию имать, чесо ради и под клятвою от всея церкве обретаются, и ниже яко крещен, ниже хиротонисан видится и есть, якоже в прешедшей части, в третияго предела, главе 12. и прочих многодоводне предпоказахом, како может имети Дух Святый, Его же даде Господь апостолом и их наместником, во еже отпущати грехи? всяко не имать. аще не имать, како может отпущати, или удержевати исповедающегося грехи, кроме благодати Святаго Духа? поистинне не может. аще не может, якоже и есть, како исповедание его будет силно и очистително грехов? никако. аще несть очистительно грехов, убо унее есть, исповедати грехи своя, не имущу священьства, сущу же христианину имущу искус духовнаго врачевания, и в лепоту. понеже убо Спаситель наш Iсус Христос, подая Дух Святый священным своим учеником, ов еже отпущати и удержевати грехи согрешающим, чрез них, и всем верующим вонь подаде. чесому по премногу научает нас святый Григорий архиепископ Солуньский, сице глаголя: [се Аз с вами есмь до скончания века. и паки: Аз умолю Отца, и иного Утешителя даст вам, дабы пребывает с вами в веки, Дух истинныи. и паки: приимите Дух Свят, имже отпустите грехи, отпустятся, и прочая. Сие же и на всех приходит веровавших]. слово 1. От коих словес святаго Григория Солуньскаго явственно видимо есть всякому, яко Христос Спаситель даде Дух Святый божественным своим учеником, во еже отпущати или удерживати согрешающим согрешения, чрез них и всем верующим вонь. Сего ради имущии искус духовнаго врачевания, аще и не имать рукоположения, во время нужных случаев, всякаго кроме прекословия и сумнительства, может паче же и лепо есть, хотящаго струпы душевныя открыти, исповедати, и разрешити, или удержати, рекше епитемиею связати. зане и святая древлеправославная церковь, во время нужных случаев попущает, паче же и повелевает неимущему священьства нужнейшия некоторыя тайны, их же кроме человеку невозможно спасения получити, совершати. сице сие в Катихисисе малом утверждает глаголя: [тако убо потреба ведати, яко ни един на священьство не рукоположенныи, ни таин строителем быти может, разве некоторых нужных случаев]. лист 34. И аще убо, по словеси святаго Григория архиепископа Солуньскаго, Спаситель наш Iсус Христос Сын Божий и Бог, даде Дух Святый святым своим учеником чрез них же и всем верующим вонь, во еже согрешающим согрешения отпущати: аще святая древлеправославнокафолическая церковь попущает во время нужных случаев, не имущим священьства, таин, их же кроме несть леть спасение получити, строителем быти. убо унее есть хотящему каятися грехи своя исповедати, простолюдину имущему искус духовнаго врчевания, сущу христианину, яко имущу власть от самого Спаса, отпущати согрешения, нежели священнику врасками ересей окаляему, и от незаконне крещеннаго архиерея рукоположенному, их же ради лишися благодати Святаго Духа, чесо ради ниже разрешити кающемуся грехи может, ниже удержати.

Глава, 5.

Лучше есть несвященнику искус имущему исповедатися, нежели священнику неискусну, колми паче еретику.

Божественнии отцы святаго Афона не токмо священнику в кале ересей погрязшему, не попущают сущим христианом исповедати своя согрешения, но ниже священнику, иже аще и сущый сый христианин, не имать же искусства ко врачеванию душевных струпов, но паче аще кий и не сый священник, сущий же христианин, и может врачевати струпы душевныя, помышления приимати, и правилно исправляти повелевают. еже самая словеса их явственно показуют вопросоотвещателне сице: [Вопрос: Аще суть иноцы священницы неискусни слову, во еже приимати помышления, друзии же не суще священници, знают сей искус, достоит ли сицевым помышления приимати неких, или ни? Ответ: Иже помышления приемлют, врачев искусных чин содержат, знающих на недужныя подобная подобная наводити былия, аще убо кто есть священник, неискусен же. а другии несвященник, искус же имея духовнаго деяния, сему паче священника праведно есть, помышления приимати, и правилно исправляти]. Номоканон, лист 730. Сим согласно и блаженный Симеон архиепископ Фессалонитский, в своих вопросоответех, попущает иноком священьства не имущим, помышления приимати, сице глаголя: [Вопрос, 36: Архиереи волю дают иноком помышления прияти, иже без священьства благословляют и прощают, неразлично ли убо благо? Ответ: Слышано и от мене, яко иноком простым дается от архиереов помышления прияти. аз же прежде глаголах есмь, и ныне разум мой, и чаю отцев быти, яко священьства сие дело есть. и от архиереов и иереов подобает сие действоватися. никакоже сие от простых. разве нужда некая, не сущу иерею, понудит действовати инока, изволением архиерея, благоговейна суща, и законы сведуща Божия, священная реку, правила. обаче токмо еже прияти помышления, да известит епископу, или да разсудит душеполезным что взыскующу, а не во еже прощати и разрешати]. Подобне и во ответе 13 глаголет: [Аще негли кто по нужде во общении неких помышления удостоився прияти, возложит сия епископу, или имеющу чрез писание служения, сицевое бо видехом случающееся и на множайших благоговейных мнисех, иже да имеют внимание не от себе решити, ниже именовати себе духовным, яко и не имеют сие, но по нужде приемлюще, и сие исповедающе, яко не суть духовныя, но яко ко спасению пользующия да привносят. и аще близ есть служения служитель, тамо его да пошлют. аще же несть, тогда да приимут, да повелят же и отцу рещи духовному. И тии же, яже прияху, и слышаху, имеющим силу от Бога решити да известят, и тако твердо решение да будет. якоже и мнихом не имеющим священьства, от архиерея дадеся покаяние действовати, и прияти помышления. Слышано убо и нам, понеже нужно весма мнится, зане требе есть помышления приемлющему, и благословляти, и молитвы глаголати, и причастити тайнам требующих. и просто иерею быти, во еже приносити и ходатайствовати о кающихся и молитися. по нужде внегда множайшим не присудствуют, доволно некоего из священных, и сему волю датися, во еже прияти помышления, и мнихом благоговейным, обаче во еже не решити их от себе, но во еже доносити поместному архиерею, и от него повелению быти]. до зде Симеон. Видиши ли яко святии отцы афонстии, и блаженный Симеон Фессалонитский, повелевают не имущим священьства иноком, имущим же искусство духовнаго врачевания, паче священника неискуснаго в духовном действовании, человеческая помышления приимати, и правилно сие исправляти. По премногу нас сему научает и Великий Василий, учитель вселенныя, в постнических своих словесех, яко не всякому лепотствует исповедати согрешения, но могущим врачевати, в них же сице глаголет [лист 263]: [аще подобает деяния непостыдне исповедати всем, или неким? и киим сим. исповедание греховное сие имать слово, еже показание телесных страстей. якоже убо страсти телесныя не всем открывают человецы, ниже прилучившимся, но искусным сим прилежания и врачевания: сице и исповедание греховное бывает, должно есть и могущим врачевати, по писанному: вы силнии немощи немощных носите, сиречь взимайте ради врачевания]. глава 298. Но негли речет некто от любопрящихся, яко блаженный Симеон, аще и повелевает простым иноком помышления приходящих приимати, обаче не повелевает самем о себе разрешати [ответ 36]: но повелевает архиереом решения ради предлагати. есть тако ни аз сему прекословлю. обаче ведый буди, яко блаженный Симеон не повелевает иноком простым помышления приемлющим разрешати самем, но архиереом решительства ради предлагати, им же от архиереов дана власть приимати помышления. Аще же убо кии самовластне приемлют помышления человеческая, сицевым искусство дает власть примиряти и разрешати согрешения. И слыши, доволне яве научают нас сему блаженнии отцы афонстии, в своих вопросоответех, сице глаголюще [Номоканон, вопросоответ 72]: [Вопрос: Достоит ли несвященному иноку, или освященному исповедания приимати самоволне? или ни? Ответ: Елицы убо суть освященнии, по повелению епископа исповедания человеческая да приемлют. несвященному иноку наказание его и искусства дает власть примирения. аще убо себе самого безбедно соблюдает, и исповедающихся Богови да примиряет]. до зде отцы афонстии. Зри опасно разум блаженных отец, реша: елицы убо суть освященнии, тии по повелению епископа исповедания человеческая приемлют. несвященному же, рекше не имущему рукоположения священьства, наказание его и искусство дает власть примиряти. аще убо себе самаго безбедно соблюдает, и исповедающихся Богови да примиряет. Но и сам блаженный Симеон Фессалонитский, в 72-м ответе, попущает и простым на покаяние приимати, и епитимийствовати, а в 73-м ответе духовными отцами нарицает простых мнихов, и приимати от кающихся милостыню на раздаяние повелевает. темже убо, аще по божественных отец афонских, во время мирнаго состояния в церкве, несвященный инок, иже имать наказание и искусство духовнаго врачевания, и себе безбедно соблюдает, может Богови исповедающихся примиряти, и епитимиями облагати: аще святый Симеон Фессалонитский простым иноком попущает, во отишии пребывающей святей церкви, в ней же бывшим православно сияющим архиереом и иереом, на покаяние приимати и епитимийствовати, много паче в нынешнее всякаго плача достойное время, в ней же корабль православныя церкве бурями ересей отвсюду окружен, вне же нигде же видимо есть светом благочестия сияющаго архиерея, нигде же обретаемо лучею православия блистающагося иерея не имущему священьства, имущему же искусство духовнаго врачевания, и ведение прилагати пластыри к струпом душевным, и себе безбедно соблюдающему, всякаго кроме прекословия попустят, паче же должно есть, и может приимати хотящих исповедатися, и епитимийствовати.

Глава, 6.

Яко премнози святии в первеньствующей церкви не имущии священьства исповедоваху.

Что убо хощеши ли, дати всякаго вероятия достойнейших свидетелей на среду приведу, иже несвященнии суще исповедываху? всяко приведу, точию воззрим в древняя времена, посмотрим в первеньствующей церкви, и абие не неузрим, колици преподобнии мужие колици богоноснии отцы, сущим православным архиереом, аки светилом на священницех сияющим, сущим благочестивым иереом, нерукоположени суще, самем делом сие показующе, самою вещию сие творяще, еже души человеческия покаянием очищаху, о чесом в житиях их повествуется. От них же:

Святый Антоний Великий, не имый священьства, многия приходящия к нему поучаше, и помышления приимаше, и образ иноческий Павлу простому подаде [в житии его, генваря в 17].

Святый Пахомий Великий, не священник сый, монастыри многи собрав, помышления братии приимаше, и отвергшася Христа страха ради, в покаяние прияв, и епитимиею обложив его исправи, о чесом в житии его писано.

Святый Иоанн Златоустый, еще до поставления в презвитеры в монастыре живый, не точию иноков многих, но и мирян помышления приимаше и исповедываше, и ключимыя пластыря от себе им подаваше. о чесом в житии его, чюдо 3, являет [Маргарит, в житии Иоанна Злат., лист 25].

Святый Сава освященный, еще до священьства своего монастырь создав, и братию собрав, помышления их приимаше [декабря, 5 дня].

Святый Иоаникий Великий, не священник сый, помышления исповедающихся приимаше, еще же и от иконоборныя ереси некоего отступльша на покаяние прият, совершена христианина того устроив.

Святый мученик Христофор, две жене блуднице кающияся прият, и прощение им подаде.

И что много глаголю: исполнени сих образов патерики, исполнена жития преподобных отец, исполнени отеческия книги, иже не токмо великоподвижным отцем, но и братии своей помышления, и прилучшияся напасти от бесов исповедати поучают, всегда чисту и душу и совесть, от грехов и страстей имети моляще повелевают. Но мнитмися, яко суть нецыи, иже разсуждающе непщуют, яко с повелением епископским нерукоположеннии приимаху исповедания человеческая. якоже и Симеон глаголет. но не тако есть не тако. не бо всюду. ниже всегда сие можаше исполнитися за неудобность. от коего бо епископа, рцы ми, повеление бяше преподобному Антонию, иже един на уединении в далечайшей пустыни жительствоваше, не токмо от епископов, но и от вселенныя далече удаливыйся? к нему же колицы четы инок, колицы народи мирских приходяще, исповедающе помышления своя врачевахуся. от коего епископа преподобному Пахомию повеление бяше, иже от епископов крыяшеся, яко и от святаго Афанасия скрыся, бояся да не рукоположен будет епископом. кто ли повеле преподобному Иоаникию, иже по пустыням присно скитаяся хождаше, и место местом изменяше. Коих епископов повеление святым пустынным отцем бяше, иже в удалении не токмо от градов, и от весей пребываху, егда помышления и дела своя отцем своим, с ними же жительствоваху, присно исповедаху, очищенную совесть имуще? сии вси зрятся, яко кроме епископских повелений, человеческою верою, паче же Богом понуждени, спасения ради иных в сие вступаху. еже и предобъявленны и афонских отец Номоканон утверждает глаголя [лист 72, на обор.]: [елицы убо освященнии, по повелению епископа исповедания человеческая да приемлют, несвященному же иноку наказания его и искусство дает власть примирения. аще убо себе самаго безбедно соблюдает, и исповедающихся Богови да примиряет]. до зде Номоканон. Откуду яве видети есть, яко освященным иноком епископское повеление предлежит, неосвященному же наказание его и искусство, сиречь, аще наказан есть писания, аще искусен есть в добродетельном разсуждении, аще свесть священных апостол, и богоносных отец правила, аще тверд есть помыслом, могущь себе без беды соблюдати, таковому исповедающыяся правилно исправляти, и Богови примиряти повелевают. понеже убо, и телесныя недуги и согнития врачевати хотящии, ищут врача, не сего, иже врачевски одевается одеждами, иже имя врачевское носит: но иже искус врачевания знает, иже врачевская былия имать, иже вину врачевания в действии показует. тако и душевныя язвы и согнития, требуют врача, добродетельми блистающа, искус святаго писания знающа, ведяща борения и прелести бесовския, знающа коейждо язве подобное врачевание приносити, а не именем единем хвалящася, имже ничтоже ползовати может исповедающася. о чесом преподобный Максим Грек яве засвидетельствует, сице глаголя [книга Кирилова, в слове о Святем Дусе, во главе 5, лист 371]: [Ниже убо врача наричет, дондеже праве мудрствует, иже убо ризами врачевскими одеян есть вне уду, видения же врачевскаго не имать в себе согласна одеянием; но ведущаго свидением известным, яже художества суть, действовати, по преданию премудрейших врачев прежде его бывших, того наричем врача. и ко исцелению недугов призываем, аще убо о своем здравии попечение имеем]. в слове о Святем Дусе. Сице, духовники же, [глаголют отцы Номоканона] глаголем в правду, и поистинне законныя духовники, иже по Бозе о спасении человечестем промышляют, а не тщеславныя, и неискусныя невежи, и ложныя, иже купечеством сквернаго ради прибытка, во образе духовнем, врачевание наводят, тыя бо суть убийцы яко душы человеческия убивающыя, за нерадение и неискусство свое. до зде Номоканон [лист 694]. Чесо ради божественнии отцы искусному иноку, аще и не имать рукоположения паче неискуснаго священника повелеша хотящих исповедатися исповедания приимати? и правильне разрешати. елма же убо аще толицы преподобнии мужие, толици богоноснии отци, тогда, егда приемницы апостольских престолов, всюду по вселенней, аки светилницы на свещницех, всем благочестием сияющии апостольския престолы правяху, тогда, егда священницы, по всем странам вселенныя, православием блистающии, безкровныя жертвы Богу живому приношаху, не имуще рукоположения, не имуще повеления от епископ, человеческою верою, паче Богом понуждени, иных ради спасения, приходящих исповедатися приимаху исповедания. како ныне в толь прегоркое, всяких слез, всякаго рыдания преисполненное время. егда престолонаместников апостольских, отеческое благочестие ненарушимо содержащих нигдеже видимо есть, егда священников православие непозыблемо соблюдающих ниже где либо в поднебесней обрести возможно, не имущим рукоположения, не имущим от архиерея повеления, имущим же искусство и вежество духовнаго врачевания, не своего ради мшелоимскаго прибытка, но иных ради спасения, в сицевое дело понужденным, нелепо есть и не подобает, хотящих исповедатися исповедати, и правилне исправляти, и Богови примиряти? ей ей лепо есть и подобает.

Глава, 7.

Яко помышления тожде суть, что и греси.

Воглаголет ли некто вопреки от нехотящих истинне повинутися, яко зде помышления токмо, а не грехи, простым исповедати отцы Номоканона повелеша [лист 730]. На сие ответствуем сице: еже бо правилне исправляти несвященому, вещь не помышлении, но грехов есть. понеже правила святых апостол, и святых отец, на грехи а не на помышления кая написашася. Темже греси правилно врачюются, а не помышления. К сим же и на поле напечатася [лист 730]: Старча исповедь прията церковию. Кая исповедь старча прията церковию? яве яко грехов а не помышлений. Сие бо и в самом начале Номоканона, иже ко иереом сочинен, (якоже являет предисловие) яве видети есть, идеже сице глаголет: приемляи помышления человеческая, должен есть в писании наказан быти. ниже: Темже внимай себе о духовниче. до зде Номоканон. Что убо речем ли, яко Номоканон повелеваяй, иереом помышления человеческая приимати, простыя мысли повелевает приимати, а не грехи? всяко солжем. Темже убо Номоканон повелеваяй иереом помышления человеческая приимати не простыя мысли повелевает приимати, но исповедания грехов. Убо и простым повелеваяй помышления человеческая приимати, и правилне исправляти. не простая помышления человеческая приимати повелевает, но исповедания грехов. И сия правилне исправляти. Рцы убо ми; кая правила на исправление помышлений человеческих написашася? Не вся ли, яже написашася от святых апостол, и святых отец, на исправление согрешений человеческих написашася, а не помышлений? ей всяко. Сие яснейши, еже есть, несвященным помышления человеческая приимати, не простыя мысли приимати, но грехи, и в Кормчей, во главе 54, от вопроса Иоанна мниха 11, объявляется. идеже пишет тако: [Некто от сущих братии с нами, прежде седе в мире многих помыслы восприемля, сиречь дети духовныя приимаше в покаяние. ниже: Презвитеры же и мнихи падшияся с женами прием, и иныя грехи тяжкия]. до зде от вопроса. Видиши ли разум словес Иоанна мниха? Первее рече: некто от сущых братий с нами, прежде седе в мире, многих помыслы восприемля. сиречь дети духовныя приимаше в покаяние. Таже наведе; Презвитеры же и мнихи падшияся с женами прием, и иныя грехи тяжкия. От сих словес Иоанновых, всяк хотяй истинно истину познати, удобь может уразумети, яко помысл восприимание есть исповедание человеческих грехов. Убо отсюду ясно показуется, яко Номоканон повелеваяй неосвященному иноку, помышления человеческия приимати, не простыя мысли, но исповедания грехов повелевает приимати, и правилно исправляти.

Глава, 8.

Святии отцы и простым повелевают на покаяние приимати, и епитимийствовати.

Блаженный Симеон архиепископ Фессалонитский, во ответе 72-м, попущает и простым на покаяние приимати, и епитимийствовати, зде вопрошаем, рцыте нам о любезнейшии: за что блаженный Симеон повелевает епитимийствовати, рекше связовати согрешающих? за помышления ли кая? или за согрешения? всяко речете яко за согрешения. понеже и священная правила от божественных апостол, и богоносных отец, не на помышления, но на согрешения человеческая сочинишася. Ибо исполнение епитимии есть делательное исполнение и совершение правила, еже имеяй власть духовник, даде согрешившему о гресех его, по преданию святыя церкви [кир Гавриил Филадельфийский в книзе О седми тайнах, глава 8]. и по отмщению духовному святых правил, каковым грехом согрешил кто любо будет, таковою епитимиею таковаго по определению учиненнаго правила облагает духовник. ибо святии и богоноснии отцы на вселенских, и поместных соборех, и между соборов, и последи бывшии, Святым Параклитом учими, изложивше правила, падающыя в различныя грехи, и в покаяние приходящих, по качеству и количеству грехов, заповедаше отлучати на лета от причащения тела и крови Господни, сице [Кормчая, глава 5]: Правило перваго вселенскаго собора 11: без нужды веры отвергся 12 лет да не причастится. правило 12: понужден быв приступи 10 лет да не причастится. правило 13: аще болен к смерти да причастится, аще ли оздравеет, да исполнит уреченное время непричастен. [глава 6] собора Анкирскаго о пожерших идолом различными образы, правило 4: аще кто внидет с радостию во идольский храм, и яст 6 лет да не причастится. правило 5: Аще ли в плачевней одежди вшед, яст со слезами 3 лета да не причастится, аще ли не яст, два лета. правило 6: Аще прещения обоявся, пожрет идолом 5 лет да не причастится. правило 7: Аще кто в праздники поганския, бывающия на неких местех, мимо идыи прилучится и свой хлеб имея, яст с ними, два лета да не причастится. правило 8: аще кто второе и третие пожрет идолом 7 лет да не причастится. правило 9: аще ли кто не токмо сам своею волею пожер, но иныя на то понудил, 10 лет да не причастится. правило 16: со скотом соблудив, до 20-ти лет возраста, 20 лет не причастится. по 20-ти летех и жену имея, соблудив, 30 лет не причастится. аще по пятидесяти летех, до смерти не причастится. правило 20: любодей 7 лет не причастится. Подобнейше святаго вселенскаго собора правило 87, тожде повелевает. правило 91, и Василия Великаго 2-е. жена смертным былием уморивша во утробе своей 10 лет не причастится. правило 23: неволею убив, 5 лет не причастится. правило 24: волхвы приводяи в дом свой, 5 лет не причастится. шестаго вселенскаго собора 61, и Василия Великаго 83 правило, 6 лет не причастится. [глава 10] Лаодикийскаго собора правило 1: двоеженец едино лето. Василий Великий 4 правило, едино лето или два не причастится. [глава 16] Шестаго вселенскаго собора, правило 44, и Василия Великаго 59: мних женився, или блуд дея, 7 лет да не причастится. [глава 21] Василия Великаго правило 4: троеженец 3 лета, или 4, или 5 лет не причастится. Правило 7, 62, и 63. С мужеским полом, и со скотом, и со инем животным блуд сотворивыи, 15 лет не причастится. правило 13: воин аще на брани за благоверие убиет, 3 лета не причастится. правило 18, и 60: девицы обещавшиися действовати, или черноризцы соблудившия, или посягшыя, по разрешении сожития, 15 лет не причастится. правило 22, 25, и 26: Прежде брака растлив, блудника запрещение да приимет, сиречь, 4 лета не причастится. правило 31: Жена, отшедшу мужу ея и безвести бывшу, ни испытавши ни уведавши добре, яко умре, за иного мужа пойдет, 15 лет не причастится. правило 34: жена втай прелюбодеяние сотворши, 15 лет не причастится. правило 35: жена без вины оставивши мужа своего, аще за иного пойдет, 15 лет не причастится. Правило 38: без воли отца своего посягшая, 3 лета не причастится. правило 39: живущая с прелюбодеем, по престатии от греха, 15 лет не причастится. правило 56: волею убив, 20 лет не причастится. правило 57: неволею убив, 10 лет не причастится. правило 58: прелюбы сотворив, 15 лет не причастится. правило 59: блудник 7 лет не причастится. Правило 64: кленыися во лжю, или преступив истинную клятву, 10 лет не причастится. Правило 65: чародей и идолослужитель, 20 лет не причастится. правило 67: брат с родною сестрою соблудив, 20 лет не причастится. аще ли от единаго отца, иныя матере, или от единыя матери, инаго же отца, 12 лет не причастится. правило 68: в сродстве брак сотворивыи, распустятся, 7 лет не причастится. Правило 71: Сведыи иного грехи, и покрывая, равно запрещается. Правило 72: Волхвом и чародеем вдав себе в научение, яко убийца запрещается. Правило 73: Христов отметник при смерти да причастится. правило 75: С сестрою по отце, или по матери соблудив, 12 лет не причастится. подобне запрещается и поимающии снохи своя по 76 правилу. правило 77: свою жену оставль, и иную поим, 7 лет не причастится. правило 79: с мачехою соблудив, 20 лет не причастится. правило 81: Преступив веру мук ради, 8 лет; своею волею, 12 лет не причастится. Правило 82: Понужден преступив клятву, 6 лет; своею волею преступив, 12 лет не причастится. Тожде запрещение и в кратких правилех.

Се колика и какова, и сих суть, еще множайшая правила от святых и богоносных отец сочиненная. не за помышления кая, но за согрещения приходящих каятися, по качеству и количеству грехов, определяют налагати отлучения на различная лета. Кая лета запрещение имущему, на четыре части времени, или мала или велика разделяются. на плакание, послушание, припадание, и внутрь церкве стояние. Сия лета святый Василий Великий на четыре части располагая сказует [глава 23]: Что есть плакание? плакание: вне церкве и притвора стоя молити о себе со слезами входящих в церковь. Послушание: при дверех церковных в притворе стоя, слушати святых писании. Припадание: внутрь церкве позади омвона стояти, и по евангелии вне церкве исходити, со оглашенными до скончания службы. Стояние с верными: внутрь церкве до конца службы стояти, не причащатижеся. [лист 222] Сими убо четырми месты всяко покаяние совершается. Темже должен есть епископ, или духовный отец, всяко запрещения времене, или велико, или мало, сия четыре места разделяти, и тако очищати от грехи кающагося. Видиши ли разум словес Василия Великаго, должен есть, рече, епископ или духовный отец, всяко запрещения времене, или велико, или мало, на четыре места разделяти, и тако очищати от греха кающагося. Не рече от помышления, но от греха. убо блаженный Симеон попущаяй простым на покаяние приимати, и епитимийствовати, не за простыя кия мысли повелевает епитимийствовати, но за грехи.

Глава, 9.

О еже святии отцы не токмо на лета определиша отлучати от причащения, но и трудами и подвиги плоть изнуряти.

Не токмо же убо божественнии отцы, кающихся противу качества и количества согрешений, на различная времена отлучати каноны своими от святаго причащения уставиша, но и труды и подвиги облагати узаконоположиша. еже Матфей Властарь засвидетельствуя глаголет сице [от книги Матфеевы, Поребник лист 673]: А еже сице скращати нам, рече, покаяния лето, не убо вознепщуется не быти слово спасаемых. се же да будет разумно, яко святыи Василии, и прочии отцы древнии, не точию грешников кающихся, от святаго причащения отлучаху, но и труды и подвиги предаяху. паче же соборныя обдержныя посты, бдения, и молитвы церковныя, на всяк день и нощь повелеша хранити и исполняти. К сему и каноны покаяния налагаху, якоже есть в канонех Василиевых, 56-м, и 58-м, и 59-м, и 75-м, и 77-м. Собора Анкирскаго канон 16. Григория Чюдотворца 10. Григория Нискаго 11. В них же паче же в 56-м, узаконяется, яко да кающиися грешник, 4 лета плачется, сиречь вне церкве стоя, и входящих прося, да помолятся о нем, грех свой исповеда, лет 5. в послушающих пребывая, сиречь в притворе церковном послушая божественных писании, лет 7. в припадающих, сиречь стоя в церкви за амвоном и со оглашенными исходя, лета 4. с верными, сиречь, стоя и моляся, обаче кроме причащения пребывая. Такоже совершивше лета сия покаяния, таин святых причастится. Внемли зде. ни ли се есть покаяние и трудови плотьстии? и зело убо есть, вместо поместных, наедине довлеют сия кающемуся, пребывати во вся дни в церкви. чрез все правило, начен от полунощницы даже и до вечерни; к сему среду и пяток поститися, рыб и пития упивающагося не касатися: такожде и вся великия посты целы хранити, и трезвенно выну, не праздну же пребывати, и милостыню даяти, нищих призывати, в домех же молитвою и чтением упражнятися, и грехом же вспять никакоже возвращатися. От отец же святых, святый патриарх глаголемый Постник, сухоядения и метания с молитвою предает грешником. Подобает возмнехом истинно кающимся, и плоть жестоким пребыванием изнуряти хотящим и житие благоразумное проходити, первыя злобы сопротивносилное, и по мере воздержания возмеряти им, и по времени покаяния умиления. Сии убо образ запрещения всем кроме раб и рабынь мною даемыи во всех запрещения устав [Потребник бол. лист 135]. в понеделник убо и среду и пяток, ясти масло миряном, рыбы же, или сыра, или яица, или мясо, ни. во вторник же и четверток вся ясти кроме мяса невозбранно. в суботу же, и в неделю не запрещати ни в чем же, или в снеди, или в питии, в каковем любо, но быти невозбраняему на вся, якоже и неимущии запрещения, сиречь, и на мясо, и на вино, и на вся. Такожде и на вся праздники Господьския, ина праздники пречистыя Богородицы, и родителей ея, и 12 апостол, якову же прилучится память, и яков же есть день, быти не возбранену в снеди и питии запрещаемому, яко ни среды ни пятка или понеделника хранити в таковыя праздники. такожде и Предтечевы, и 12 дней, и неделя Пасхи. ниже по пяттьдесятнице, сице быти и в тех всячески разрешену на вся, разве среды и пятка, держати единообразно, мирским убо от мяса, иноком же в понеделник и в среду и в пяток от сыра и яиц. быти же и во двою неделю, пред глашенней же и мясной невозбранно на вся, иноком убо сыр и яица, мирским же мясо, кроме двоих среды и пятка. Сия бо вся чистоты тогда подобает держати, иже во великия впадшим согрешения, аще мощно, даже и до вечера поститися, повелено бо есть и се божествеными правилы, якоже многажды речеся, кроме предреченных праздник. [лист 674] Аще кто вина пити во уреченныя дни не изволяет, годище и мы судихом отъяти едино, уставленому егову падению, от отец запрещения. [лист 669] Аще же в понеделник восхощет воздержатися от мяса, другое, паки отпусти ему лето, а на сыр и яица другое. Аще ли постится среду и пяток по божественным правилам, остави ему еще другое лето. Аще сыра и яиц, рыбы и масла воздержатися обещает, тогда на всякое воздержание единаго сицевых вида, едино лето отъяти. Внемли и сему. егда обрящется человек благоговейныи, и произволит творити неколико метании на нощеденство по силе своей, отпусти ему едино лето, от меры канона причастия. Аще произволит творити милостыню по силе своей. остави ему и другое лето. Аще ли человек той, ниже тридесяти лет, другое лето паки отпусти ему. Аще же есть и двадесяти нижае, мнее запрещается. Аще же не изволит написанных, да исполнит цело нарекованная лета. Иоанна Постника сие есть разсуждение. Паче же оно, 15 лет, глаголю же прелюбодейства, мужеложства, нисходит даже до трех лет, поистинне да постится вся целы три лета, сухоядение, в 9 час, и поклоны многи, кроме субот и недель. Но камо днесь обрящеши таковаго человека, да исполнит сицевый канон? ельма же не может за злую похоть нашу и нерадение, поне от божественнаго причастия да удержимся, якоже божественнии отцы уставиша. они бо о воздержании и о трудех, или ином чесом, о сицевых не радеша, разве точию о божественном причащении. Аще ли обрящется подвижник, да держит оное правило, аще восхощет, сиречь Иоанна Постника по Матфею. Ведомо же буди, яко во многих летех, сиречь, 15-х, да сходиши, якоже рехом, в малейших же менше паки, изыдеши отнюд вне. согрешением же блуда, до четырех лет, да отпустиши ему с каноны менше. Среду же и пяток должни суть поститися вси и неимущии канона, якоже имущии. Ибо всем благочестивым сие прилично есть, паче же и правило ко всем глаголет [прав. апост. 69]: Да постятся в тыя дни. Обаче за благоутробие Божие, и за произволение покаяния, оставляет лето едино покаятися хотящим, яко благочестие ныне наченшу. Внемли и сему: Яко аще кто по согрешении восхощет быти инок, две части да держит. а третию часть лет оставит ему. Аще же восхощет отъити во общее житие, остави ему пол. Аще ли по приятии образа падется, уставленная да исполнит цело. Пристижение [Потребник бол., лист 674]: до зде о исправлении кающихся, в нем же о духовниче да не погрешиши, при глубоком разсуждении сия три памятствуй. Первое: Количество. Много кто согреши, да множайшая постраждет. Второе: Качество. Да противная противными врачуются, чревонеистовство воздержанием, и прочая. Третие: Время. Долго кто согрешаше, долго и казнится, паче же всех желание и произволение в кающихся зрително есть. Великий же Василий в третием своем правиле, весма, глаголет, истиннейшее целение, греха ошельствие, и еже воздержанием и злостраданием плоть поработити, и покорити духови, тако бо совершенное нам каяся подаст исцеление своего указания. Достоит же строителем душ обое ведети, и яже испытания, яже обычай, и иже убо приемлют испытания испытающихся, потому строити их, аще ли ожесточевается, последовати обычаю схождения. До зде о скращении епитимии. Отсюду ясно показуется, яко святии отцы умножати и умаляти, продолжати и сокращати, кающимся епитимии, зряще их труды и подвиги, воздержание и произволение, не за мысли кия простыя повелевают отцем духовным, но за грехи, убо и отцы Номоканона, и Симеон Фессалонитский повелевающе простым исповедовати помышления человеческая, и епитимийствовати, не мысли кия простыя повелевают исповедовати и епититмийствовати, но за грехи.

Глава, 10.

О еже отцу духовному с разсмотрением подобает чадом своим епитимии налагати, елико может понести.

К сим же божественнии отци, повелевают отцу духовному, чад своих согрешения, не яко чуждая согрешения, но яко своя приимати, и смотрети, аще смиряет ся, аще сокрушено сердце имать, аще постится, аще поклоны творит, и тако или облегчевати, или умножати епитимию. Кую епитимию налагати повелевают, не за мысли кия простыя, но за грехи. сему по премногу научает нас Иоанн Зонарь в правиле своем 48, сице глаголя: [Такожде подобает отцу духовному, не яко чюждая согрешения своего чада духовнаго приимати грехи, но яко своя имети, и его же аще видит смиряющася, и сокрушена сердцем, и приложьша себе, и верна, и милостива, и сему исповедавшуся благоразумно и покаявшуся, сему с разсуждением, и искушением облегчевати заповеди. И паки егда слышит ему исповедающа грехи своя многи, и беззакония, не подобает ему дивитися о сем, ниже зрети на множество прегрешении, аще и чрез естества будут, но взирати на Бога, и на благость милосердия Его упование возлагати, и всяко утешение и кротость и любовь имети ко исповедавшемуся. от правила 49: таже подобает сести с ним, и вопрошати его, что может хранити заповеди; не бо, еже хощет исповедаяися, но даст ему отец, ниже паки елико ему есть лепо: но с расмотрением подобает ему заповедати, елико может сохранити, яко да не по равенству грехов его достоит ему заповедь дати, ниже паки разсуждати о гресех, и о возрасте его, но количестве, но якоже рехом, по силе дати заповедь. А егда како о малых гресех возможет, и множае заповеди сотворити, да не точию грехов прощение получит от Владыки Христа, но и венцем венчается по усердию своему, или паки немощен сыи и усердия не имыи, приим заповеди достойныя ему, абие разслабився, ни едино сотворит, во уныние от жалости впад, и вся оставит. Не оставихом бо ся еже тяжкая облегчевати, ниже паки тяготы налагати на таковых. Иго бо Господне благо есть, и бремя его легко. Приидете бо ко Мне, рече, обремененнии и Аз покою вы. Ниже: Сия убо вся согрешения единому прилучаются единою, или дващи сотворити, а другому многащи, а другии даже и до самыя старости се делал есть, а иныи еще юну ему сущу пострада, и се ведением, или неведением. Темже опасно подобает сия вся разумно разсуждати, и со испытанием. И аще единою бысть в юности, или дващи точию, буди ему покаяния пол лета, или исполнено лето. Аще от малых кровосмешении бысть. Аще от великих, лепо есть вящьше сотворити заповеди. Правило 57: Подобает же отцу духовному разумну быти зело, и разсудительну, да разумеет и смотрит како дати заповеди; Како пост; како ли молитвы; понеже овии суть убозии и от работы не отстают. овии же воини, или раби под властию, а друзии по куплям ходяще в путех, а друзии стари и немощни, а друзии силни, друзии богатии во всяком покои живуще и поживающе. темже о сих всех лепо искати, како коемуждо мощно есть дати заповеди; А друзии суть ленивии, и таковыи приимет заповедь по делом и по грехом своим, еда како обленився нимало не сотворит от повеленнаго ему, и на вящшее зло паче будет ему. Ниже: И паки многогрешныи и ленивыи, леностию своею, поне мало совершит заповеди, еда како и той поне сице спасется, помалу, аще и помалу, да не доконца погубит себе. зряще убо неции отцы духовнии на множество грехов, на блуды или на убийства, или на чрез естественная согрешения, и хотяще противу которомуждо греху, без разсуждения полагати заповеди. Сии прежде убо Бога не ведят, якоже лепо есть, иже хощет всем спастися. Второе же и свою душу погубляет их ради, хотяи бо душю о Бозе очистити, самое оно человеколюбие Божие и милосердие подобает призывати, и нань уповати, иже нас ради грешных человек бысть Бог сыи благ и благоутробен. Божественныи же Златоуст, во втором еже о священстве слове, не просто рече, прямо согрешении мере, подобает запрещение нанести [ис книги Матфея Властаря]: но и согрешающих сматряти произволения, да не сшити хотя раздранное, и горши диру сотвориши, и возставити падшияся тщася, вящшее соделаеши падение, немощнии бо и разлияннии, и множае мирским привязаннии наслаждением, еще же о роде и силе великомудрствовати имуще, тихо убо и помалу, о них же согрешают, обращающеся могут, аще и не совершенне, но поне отчасти от одержащих свободитися зол. Аще ли же кто напрасно нанесет наказания, и меншаго тех улишит наказания и исправления. Душа бо внегда обезсрамится, понудится бо во отчаяние впасти, и ни кроткими словесы покаряется прочее, ниже прещенми преклоняется, ниже благодеянми убеждаема есть: но бывает много горше града онаго, ему же пророк гневаяся глаголаше: Лице блудниче бысть тебе, обезсрами бо ся ко всем. Сего ради много потреба разума пастырю, и тмами очию, ко еже обзирати всюду душевныи нрав, якоже бо в нездравии быти мнозе, и во отчаяние своего спасения впадают от еже не возмощи горкое терпети напоение. Так суть нецыи, за еже не возмощи прияти томление, согрешением противомерно, в малодушие совращаются, и много горше и во еже вящше согрешати происходят. Подобает убо ни едино от сих без истязания оставити: но вся испытавшу известне, прямо нраву коемуждо и произволению от приходящих, и яже приносити от себе бальство. до зде Златоустыи. От коих словес святаго Иоанна Златоустаго явственно показуется, яко епитимии отцем духовным повелевающеи божественнии отцы полагати, не за мысли кия простыя, повелеша, но за согрешения. Якоже и сам божественный Иоанн Златоустый, прежде приятия священства, живый в монастыре, многих не точию иноков, но и мирян, помышления и исповеди приемляше, и ключимыя пластыри им от себе подаваше [Маргарит, чюдо 3-е]. Кия пластыри, рекше епитимии налагаше, не за кия простыя мысли, но за согрешения. Тем и блаженный Симеон Фесалонитский попущая простым на покаяние приимати и епитимийствовати, не за простыя кия мысли повелевает епитимийствовати, но за согрешения.

Глава, 11.

Яко и древле преподобнии отцы, и пустынножители, не имущии священства впадших в грехи и кающихся епитимийствоваху.

Сему нас по премногу научают и самая деяния, самыя исповеди преподобных отец, и блаженных пустынножителей, не имущих священства, иже егда благочестие аки крин во удолии в мире процветаше, егда православие аки шипок в вертограде в поднебесней сияше, егда вера христианская аки светозарное солнце вселенную лучами благочестивых догмат просвещаше, приемлюще приходящих исповедатися, иже в тяжкия грехи впадаху, по мере качества грехов епитимийствоваху. Чесо ради самыя истории в достовернейшее уверение на среду предлагаем, в них же пишет яве:

Месяца ноября в 3 день, в слове о епископе, иже не стерпев мучения пожре идолом, повествуется тако: Поведаше епископ града Сухейска о сем епископе, его же обрете в пустыни. егда, рече, бех в пустыни, мних сыи, и тогда восхотемися ити в далнюю пустыню, аще обрящу тамо кого служаща Владыце Христу. И взем на четыре дни хлеба и воды, и идох в путь. и якоже прейдох дни четыре, и не доста ми мищи, и дерзнух другия четыре дни и дале ити, и изнемогся от жажды и труда, и уже наконец падся лежах на земли. и се некто пришед коснуся во устне мои перстом. тако же и осяза мя и абие укрепихся, яко мнетися и на пути деявшу, ни алкавшу ни жадавшу, и востах прехождах пустыню: И яко друзии четыре дние минуша, паки утрудихся, и воздев на небо руце, и се той же муж укрепляи мя первие, паки помазав перстом устне мои, и утверди мя, и идох седмь надесять днии, и потом обретох хижу, и финик и воду, и мужа стояща, ему же власи главнии бяху одеяние, и бяху седы, сам же страшен лицем. И яко увидев мя, и ста на молитве, и рек аминь. и разуме яко человек есмь, и приим за руку, вопрошая мя, како семо прииде, и како стоит ли мир во вселенней? и еще ли гонят мучители христиан? аз же рех: молитвою вашею пустыню сию прохожю, а мучения престаша силою Христовою. Рцы же ми: откуду еси ты, и како прииде семо. он же востав плачася нача глаголати: аз епископ бех, и бывшу мучению, и многи муки приях, и не могии терпети мук, последи пожрох. и посем разумех беззаконие свое, и вдах себе умрети в пустыни сей. и есть ми зде лет 30 и 9, исповедаяся и моляся Богу, дабы ми оставил грех. И даст ми пищу от сего финика, а утешения отдания не приях, и се глаголя: востав и тече вон, и ста на молитве на мног час, и яко сконча молитву, прииде ко мне. видев же лице его, и ужасохся. И рече ми: не бойся, Господь бо посла тя погребсти тело мое. ибо ныне уже отпусти грех. И се рек простер нозе, кончину прият живота.

Паки месяца сентября в 25 день, повествуется о презвитере, иже впаде в любодеяние, и прощен бысть покаяния ради, иже исповеда иноку свое согрешение, о нем же пишет тако: Презвитер некии бе в Констянтине граде, и от действа диаволя впаде в блуд, и по неколицех днех помысли свое согрешение, и рыдаше в себе глаголя: увы мне оскверненному душею и телом: что сотворю, да получю прощение моим согрешением? И востав пойде на гору Олимпскую, помыслив убо тамо покаятися, к некоему духовному отцу. И обрете тамо старца, и исповеда ему вся своя согрешения, посем рече и блудныи грех. И рече старец, по лютом том согрешении, не дерзнул ли еси служити? И рече, ей отче святыи служих. и рече старец: ведыи буди чадо, аще впадет иерей в таковыи грех, несть ему исцеления, но да не служит прочее, аще и с великим покаянием приступит к человеколюбцу Богу, несть бо прощения. Он же рече: несть ли ми отче покаяния? Старец же усомнився рече: прости мя чадо Господа ради, кто есмь аз таковая дерзнух судити, точию аще бы могл и своих покаятися грехов. он же слышав сия, поклонися старцу, и отъиде скорбен. И якоже бо идяше, срете и авва Петр, и видев его печална, и глагола, что ти есть чадо? он же рече, честныи отче, приидох ко оному старцу, и исповедав ему вся моя грехи, и той во отчаяние мя введе. И глагола ему Петр: мню чадо яко несть греха побеждающа человеколюбие Божие, пойди в мою келию, и яви ми своя дела, да якоже хощет Бог, устроити имать. И пришед с ним в келию, и абие исповеда блудное дело. Петр же рече: Поистинне глаголал ти святыи старец. иерею бо сей грех тяжек есть, и не имать прощения. Но понеже ти злое дело сотворилося, то отселе нелзе служити, точию да ся пострижеши во мнишескии чин, и покаявшися истинно, надеемся на благодать Господа Iсус Христа, яко и сотворит милость с тобою, якоже и со всеми покаявшимися. Он же слышав, припаде к ногама его глаголя: понеже Бог привел мя в святеи твои руце, не отлучаюся от тебе. [ниже] и бяше с ним в посте, и в покаянии со слезами моли Бога.

К сим месяца июля, в 25 день, в слове о диаконе, иже впаде в любодеяние, кии исповеда мниху некоему согрешение свое, о нем же повествуется сице: Диакон етер нарочит, и всем славен бе в монастыре во Египте. и некто прост людин гоним от князя, прииде со всем домом своим в монастырь крыяся, и от неприязненныя силы падеся с женою его диакон. и обличен же быв о гресе, его же сотвори, и бысть всем в студ, и отъиде к етеру старцу возлюбленному от него, и исповеда ему свой грех. имяше же старец темницу вне келии своея, и моляше глаголя: Погреби мя зде жива, и не возвести о мне никомуже. И влезше в темницу ту каяшеся. И по лете едином не бысть дождя отнюд, и всем Богу молящимся, и со кресты ходящим, яви Бог етеру от святых, яко аще не приидет сокровенныи диакон мнихом, не будет вам дождя на земли. и слышав дивишася, и прославиша Бога. И пришедше изведоша его из места, идеже седяше. И тогда вземши он сан свой помолися Богу, и сниде дождь. и тако мнози соблазнившиися, и отчаявшеся грех, ползу прияша о покаянии его, и прославиша Бога.

Подобне и в книзе Зерцале велицем, о некоем во отчаяние впадшем грешнице, его же пустынник направи к покаянию, повествуется сице: Некии человек бе плотолюбец преизлишнии, и премного грехи умножи, и той прииде ко вратом смертным. друзи же и сродники умолиша отца некоего пустынника живуща, да наглаголет его покаятися и направит, и той сам да послушает изречение его. и отшелник послушая моления их, и прииде. болныи же токмо, егда узре его, и рече: отъиде от мене, и иди в свое место, убо излише грехов моих, неже милосердия Божия. и святыи мних рече: не глаголи человече, и возлюбленное чадо велика сила покаяния. Аще убо добре попечешися о всех гресех твоих, аз ти споручник, яко Господь отпустит ти. Аз, рече, обнажу себе от всех добрых дел, и дам тебе сия. Ты же тако же совлецыся от всех злых дел твоих, и дай ми я. аз убо прииму на ся вся грехи твоя, отверзи всякое мнение и страсть отчаяния. грешныи же уверися со старцем, и изволи исповедати грехи своя. И егда нача исповедатися, неисчетныя и страшныя грехи сказа, и ничтоже остави, ниже утаи, и по исповедании рече мних, обещаешилися имети печаль о сих, епитимиею вся сия исправити? яко да будет покаяние твое таинствено. И грешныи рече: зело хощу; И пустынник рече: Аз ти разрешаю, во имя Отца и Сына и Святаго Духа. И тако за сим человек оныи умре, и по 40-тих днех явися оному пустыннику извествуя, яко есть на пути спасения. Пустынник же вопроси: что же бысть о добродетелех моих, их же тебе совлекохся? И рече явивыися: стократно приплоди тебе Господь, за еже отчаяния мя избави, и к покаянию привлек мя еси. до зде из Зерцала.

Но и преподобный Пахомий Великий, иже не имяше рукоположения священства, по свидетельству преподобнаго Никона Черныя горы, имяше начальство на 7 иноков, исповеда брата некоего, иже впад в руце варваром, убоявся смерти, и пожре идолом, и епитимию обложи. о чесом в житии его пишется тако [маия 15, Никон слово 37]: Брат некии взем осла носящаго снеди, ко братии идяше, бывшу же ему близ пустыни, сошедше от горы вравары ловити сретоша и, и сваливше от осла, связаша руце ему. [ниже] он же видев мечи наги, и взор их неукротим и свиреп, абие прием вино пожрети идолом, и яде с ними от мяс идоложертвенных. И убоявся телесною умрети смертию, безсмертною посече душю, Владыки всех Бога отвержеся. [ниже] и повеле ему отлучитися великии в молчалную келию и затворитися, и ни единому же беседовати даже до смерти его, и во вторыи день ясти хлеб и соль токмо, и воде причащатися во все время живота своего, две же рогозине творити на кииждо день, бдение елико может, и молитижеся елика крепость, отнюд же от плача не престати. он же отлучився, якоже повеле ему блаженныи, усугуби вся, елика рече ему творити. [ниже] успе добре Божиею благодатию, свидетелствовавшу о покои его великому.

Подобообразне и генваря в 16 день, в слове о некоем мнисе, хотящем дщерь пояти иерея идолскаго, и отвергшемся Христа, и святаго его крещения, егоже спасе Бог паки, иже исповеда согрешение свое старцу велику, иже его исправи, моляся Богу с ним, повествуется сице: Брату брань бысть в любодеянии, и видев дщерь иерея идольскаго, и возлюби ю. И рече отцу ея, даждь ми ю в жену. Он же отвещав рече: не могу дати ея, аще не вопрошу бога моего. И рече к демону: Се етер мних просит дщерь мою, дам ли ю? и отвещав демон рече: Аще отвержется Бога своего и крещения, и обетования мнишескаго, даждь. Мних же обещася. И абие виде яко голубь изшед из уст его, и летящь на небо. шед же иерей к демону, и рече, се уже обещася. тогда отвещав диавол рече: не даждь ему дщере своея в жену, не отступи бо от него Бог его, но и еще ему помогает. И пришед иерей к брату, и рече: не могу дати ея, и еще бо Бог твой помогает ти, и не отступил от тебе. Си слышав брат, рече в себе: Аще толику благодать яви мне Бог, аз же окаянныи отвергся Его, и крещения, и обетования мнишескаго, и благии Бог еще помогает ми, и тако в себе пришед восклонися, изыде в пустыню, и старцу велику исповеда вещь. и отвеща старец, рече ему: сяди со мною в вертепе, и постися три недели, и чрез день ядыи, и аз молю Бога за тя. И поболе старец по брате, помолися Богу глаголя: молю Тя Господи, благодарствуй ми душю сию, и приими ея покаяние. и послуша его Бог. И скончавшися первой недели, прииде старец к брату, вопроси его глаголя: видел что? отвещав брат и рече: ей видех голубь летящ выспрь на высоте небесней, прямо главе моей стоящь. И отвещав старец рече ему: веруй внимай себе, и моли Бога всегда. Во вторую же неделю прииде старец к брату, и вопроси его глаголя: виде ли что? он же рече: видев голубь прилетевш ко главе своей. И запрети ему старец глаголя, бди умом и молися. Прииде же паки скончавшися третии недели, и вопроси его глаголя: что вещь виде? он же отвещав, видех голубь яко прилете, и ста верху главы своея, и прострох руку яти и. он же воста вниде во уста моя. И похвали старец Бога, и рече старцу: се прият Бог покаяние твое, прочее внимай себе.

Но и преподобный Никон Черныя горы, доволно яве поведает о некоем мирянине, иже пред многими исповеда грехи своя старцу, сице глаголя [слово 52]: Старец некии и свят и богоносив бяше в горе Олимпе, и к нему приведшим множайшим братиям услышати от него слово спасения, и седящим им, и святому старцу яже ко спасению душевному подобающая поведающа, прииде некии мирянин и поклонися ему ста. Старцу же воззревшу нань, и вопросившу коея ради потребы пришел  есть к нему? отвеща, исповедати святыни твоей грехи моя приидох честныи отче. Старец же к нему: особь ли убо моей худости хощеши рещи та чадо, или пред пришедшими братиями. он же рече: Аще велиши честныи отче пред сими всеми глаголати. Старец же, и глаголи, рече, чадо, не стыдящеся. Начат же глаголати и таковая, якоже несть подобно и в слух человеком прияти, или писанию предати. И изрекшу убо ему вся со слезами, ста поник долу зря сокрушенным сердцем. Молча убо святыи старец быв на час доволен, к нему рече: хощеши ли убо чадо одеятися во святыи образ? Той же рече: ей отче желаю та, и имам такова одеяния в мешце. Огласив убо его святыи старец, и постриг, и одея во святыи образ, и отпусти рек, иди чадо с миром, и к тому не согрешай. он сотвори метание отъиде славя Бога. Иноком же чюдящимся, и глаголющим, како честныи отче тому такова исповедавшу пред всеми нами, не дал ему малу заповедь или запрещение? той отвеща: о любезна чада, не зресте ли страшнаго и славнаго мужа стоящаго зде; ему же лице бяше яко молния, и одежды его бела яко свет, и в руку своею имяше хартию написану исповедающагося грехи, имяше чернило и трость, яко убо человек той к моей худости пред вами своя глаголаше прегрешения, он тростию потрываше, елма убо человеколюбец и милостивыи Бог та простил есть, кто есмь аз грешныи дати ему заповеди запрещения? Сия слышавше иноцы страхом объяти бывше, преклонишася честному старцу, благодаряще Господа нашего Iсуса Христа благодать и человеколюбие, отъидоша чюдящеся, и удивляеми велми в преславных делех милостиваго Бога.

Равнообразне повествуется в Патерице азбучном, о авве Лоте, ему же некто от братии, иже впаде в грех любодеяния, исповеда согрешение свое, его же он связа епитимиею, в нем же пишет тако: Поведа некто о брате некоем, впадшем в грех, яко шедшу ко авве Лоту смущашеся исходя и входя, и не могии сести. И глагола ему авва Лот: Что имаши брате? он же рече: Грех велик сотворих и не могу исповедати отцем. и рече ему старец: исповеждь мне, и аз понесу и. тогда рече ему: яко впадох в блуд, и пожрох яко получити ми вещь сию. И глагола ему старец: дерзай яко есть покаяние, иди и седи в пещере, и постися два дни, и аз возму пол греха твоего на ся. по скончании же третием неделям, извещено бысть старцу, яко приято есть покаяние брата, и пребысть в послушании старцу до смерти своея.

Паки преподобный Никон Черногорский, поведает о некоей жене, иже исповеда грехи своя старцу прокаженному, о ней же пишет тако [слово 52]: Жена некая шедши к некоему старцу исповеди ради, не возможе рещи своя прегрешения премнога суща и люта, и возвращьшися мимоходяще сквозе некую улицу, виде старца некоего инока на земли лежаща прокажена, и отнюд без прилежания. И рече к нему: хощеши ли возму тя в дом мой, и упокою тя всячески, яко да о моем недостоинстве умолиши Бога, он же рече: ей госпоже моя, аще бы сотворила милость на мне окаяннем и грешнем. Шедши убо в дом свой и растребивше клеть, и постелю уготовавши, посла рабы своя купити ризы иноческия, повелевши же взяти прокаженнаго инока и нести в баню и омыти, и одеяти его в ризы, и принести его и положити на уготованнем одре. Тому же бывшу, сама собою служаше, и язвы его помазаньми помазующи, и всячески тому угожающи. Святому и великому четверку приспевшу спасеныя страсти, рече к старцу, вещь хощу сотворити к тебе отче, но претерпи и не рцы никомуже. он же, еже велиши госпоже моя сотворити сотворю. Часу убо доспевшу божественныя службы, священнику ту творящу в молитвенном храме ея, яко начат глаголати святое евангелие: Iсусу бывшу в Вифании, в дому Симона прокаженнаго, приступи к Нему жена имущи алавастр мира многоценнаго, и прочая: И та вземши сосуд мира приступи к иноку, и возлия на нозе его облобызающи и власы главы своея отирающи, и исповедающи грехи своя. Се убо творящи ей, бысть трус страшен, не во всем граде, но в дому ея точию, и по трусе прииде глас глаголющ: оставляются тебе греси. Сему убо божественному гласу пришедшу, воста инок весь здрав скача, и не имея на теле своем струпа, славя и хваля Господа нашего Iсуса Христа непрестанно творящаго страшная и великая чюдеса. блаженная же она жена прощения приемшая своим прегрешением, от Божия неизследованнаго и неизреченнаго человеколюбия, прочее лето своея жизни в покаянии совершивши, преставися к Богу.

Се колик ти облак всякаго вероятия достойнейших свидетелей представих, иже не имуще рукоположения священства, приходящих исповедатися, кии в различная грехопадения впадоша, приемляху исповеди, их же по мере каковства грехов, связоваху епитимиями, не за мысли кия простыя епитимийствоваху, но за согрешения. И да вкратце реку: Аще блаженнии отци Афона, неимущему хиротонии, сущу христианину, имущему ведение, и искусство во врачевании духовном, паче неискуснаго ко врачевству струпов душевных священника, повелевают помышления приимати, и правилно исправляти: аще древнии благочестивии архиереи иноком не имущим священства, во время нужды помышления попущаху приимати: аще святый Симеон Фессалонитский дает власть простым на покаяние приимати и епитимийствовати, их же и отцами духовными нарицает: аще множайшии преподобнии отци, и блаженнии пустынницы, не имущии священства всякия кроме нужды, всякаго кроме архиерейскаго повеления, приемлюще приходящих исповеди, противу качества и количества грехов епитимийствоваху, да еще когда вся сия творяхуся; когда содевахуся; егда благочестия лучи вселенную просвещаху, егда православие в поднебесней блисташе, егда вера христианская во подсолнечной процветаше, егда апостольстии престолоприемници аки светилницы на свещнице благочестием сияху, егда иереи веру христианскую ненарушимо содержаху. Како убо ныне в толь лютое время, в неже благочестию аки искре в пепеле ересей засыпану, нечестие по вселенней обладает; в толь прискорбное время, в неже истинному православию отриновену сущу, неправославие в подсолнечней господствует; в толь плача преполное время в неже вере святоотечестей, юже коль премногое множество святых мученик кровми своими запечатле, в ней же коль пребесчисленное число полцы преподобных отец и пустынножителей спасошася, в ней же коль неисчетное число святых пастырей в знамениих и чюдесех просия, презренней и отриновенней, мерзость ересей всюду в поднебесней тако реку царствует, егда архиерея благочестие соблюдающа отнюд никако, откуду с псалмопевцем леть рещи, вси уклонишася, вкупе неключими быша, не имущим хиротонии обаче веру христианскую, юже святии апостоли предаша, святии же отци седмию вселенскими и девятию поместными соборы запечатлеша, цело и неущерблемо содержащим древлецерковное благочестие, еже православнии христиане друг другопреемне благочестно содержаху, непозыблемо соблюдающим, не имущим хиротонии, имущим же искусство и вежество в духовном врачевании, толицей нужде належащей, не подобает хотящих своя души очистити от греховных скверн, приимати на исповедь и епитимийствовати? ей подобает и лепо есть.

 

Предел вторый.

Аще законно и церковноуставително есть, архиереом токмо и иереом, яко строителем таин церковных, хотящих исповедатися исповедовати. Обаче от отец и не имущим священства, имущим же вежество, дается свобода исповедати, паче священника неискуснаго. зане неискусный священник есть убийца душ человеческих.

 

Глава, 1.

О еже не токмо иноком несвященным: но и миряном не имущим хиротонии, во время нужды попущается от отец исповедати и епитимийствовати.

Мнози убо множицею пререкующе глаголют, яко отцы афонстии, и блаженный Симеон Фессалонитский, аще и соизволяют иноком не имущим хиротонии помышления приимати, и епитимийствовати, но не простым, рекше не белцем. кто же сущим миряном, не имущим хиротонии, есть даяй поизволение, еже приимати на исповедь, и епитимийствовати? Противу коего усретающе вопрошаем: Рцыте ми о возлюбленнии; Кое разньствие есть между иноком и мирянином? и чим отстоит инок от мирянина? Аще ли вы не весте, аз вам повем. Инок единем точию разньствует от мирянина, яко чин четца имать, и сим отстоит от мирянина, яко не имать власти во еже женитися, и мяса ясти, прочая же вся предания и заповеди, якоже иноку, сице и мирянину лепо есть содержати. К сим же мирянину возбраняется вход во олтарь, равнообразне и иноку. О чесом засвидетельствует в Кормчей, идеже пишат тако: [Яко не подобает мнихом входити во святыи олтарь, им же возбранено есть священие, ибо мних четца чин имать]. глава 54. И аще инок единем разньствуует от мирянина, яко имать чин четца, тем яве есть, яко якоже иноку несвященному дается область приимати на покаяние и епитимийствовати, и мирянину не имущу хиротонии, имущу же искус и вежество во врачевании духовном, во время нужды, дает ему искуство его область приимати на исповедь, и епитимийствовати [Номоканон, лист 707].

И чесо убо ради не лепо есть ему исповедовати якоже иноку? Зри ми: Аще бо во время нужды святии отцы попущают якоже иноку несвященному, тако и мирянину сущу христианину крестити [Жезл, лист 49]. Еда ли не имут попустити мирянину не имущу хиротонии, якоже иноку во время толь презельныя нужды, хотящаго исповедатися исповедати? всяко попустят и попущают. И слыши, сице бо о сем святая церковь светлым гласом вопиет глаголюща [Катихисис малый, лист 35]: Яко ни един на священьство нерукоположенныи, и ни таин строителем быти может, разве некоторых нужных случаев таин. Виждь разум святыя церкве. Рече: Ни един на священство не рукоположенныи, и ни таин строителем быти может, разве некоторых нужных случаев таин. Инок убо на священство не рукоположенный, кроме всякия нужды попущаем бывает от отец тайны строителем быти, рекше исповедати и епитимийствовати. Како убо не имать попуститися, в толь пренужное случая, в толь презелное нужды, егда нигде несть возможно православием осияваемаго священника обрести, мирянину сущу христианину хотящаго исповедатися исповедати и епитимийствовати? Всяко попустится и попущается. Не бо рече: ни един инок: но ни един, рекше, ни инок ни мирянин, на священство нерукоположенный не может таин строителем быти, и наведе: разве некоторых нужных случаев таин. Си есть, во время некоторых нужных случаев, может и нерукоположенный на священьство, некоторых таин строителем быти, но не всех. Кроме бо крещения и покаяния иных таин строителем не имый рукоположения, не может быти. Ибо во время нужды якоже иноком сице и мирянином, не имущим хиротонии, [якоже многажды рехом] еже многократно и твориша, от отец сия две тайны попускаются совершати. Темже убо аще во время некоторых нужных случаев, может и нерукоположенный на священство, строителем быти некоторых таин, си есть крещения и покаяния. Како ныне в толь самое нужды, в толь самое потребе належащей, егда ниже инока благочестиваго, ниже презвитера православнаго, не глаголю обрести, но не слышати возможно есть, мирянину якоже иноку неимущему рукоположения, невозможно тайны исповедания строителем быти, рекше хотящих исповедатися исповедати и епитимийствовати? ей возможно. Аще бы невозможно, не бы речено: разве некоторых нужных случаев таин. А понеже речено: убо и ныне может и мирянин якоже инок, в таковое нужды время, исповедати и епитимийствовати. Зане искус имущему ведения духовнаго деяния дает власть исповедати и епитимийствовати, и правилно исправляти [Номоканон, лист 730].

Глава, 2.

Яко область от Христа Спаса отпущати грехи не единым священником дадеся, но всем верующим вонь.

И что глаголю искус дает власть; но сам Пресвятый наш Владыка Христос Спас душ человеческих, хотяй всем спастися, егда по воскресении своем, еже из мертвых, посылаше священных своих учеников во вселенную на проповедь, даде им Дух Святый, во еже отпущати и удерживати грехи согрешающим. О чесом священный Иоанн евангелист свидетельствует глаголя: [приимите Дух Свят, имже отпустите грехи, отпустятся им, и имже держите держатся]. зач. 65. Чрез них же и всем верующим вонь подаде. Сему нас по премногу научает святый Григорий архиепископ Солунский, толкуя священная словеса Господня, сице глаголя: [Се Аз с вами есмь до скончания века. И паки: Аз умолю Отца, и иного Утешителя даст вам, да пребывает с вами Дух истинныи в веки. И паки: Приимите Дух Свят, имже отпустите грехи, отпустятся, и прочая. Сие же и на всех преходит веровавших. рече бо инде: веруяи в Мя, якоже рече писание, реки из чрева его потекут воды живы. Се же глаголаше [рече евангелист] о Дусе, иже хотяху приимати, не он сица, или он сица, сиречь апостоли, или пророки, или учителие, но верующии вонь праве словесы и делы, якоже сам предаде в писании: аще иудеанин, аще ельлин будет. Творяй бо рече, заповеди Моя, он есть любяй Мя, а любяй Мя возлюблен будет Отцем Моим, Аз и Отец приидема и обитель у него сотворима. [ниже] се бо равновернии вси, премудрии же и грубии и по равенству наставляются вдуновением Святаго Духа, на всяку истинну]. слово 1. Зде убо внемли словесем сим: Даде Господь священным своим учеником Дух Свят, во еже отпущати и удержевати грехи согрешающим, чрез них же и всем праве верующим вонь. И якоже убо божественнии ученицы, имже отпущаху грехи, отпущахуся им, и имже удерживаху, удержевахуся. Сице и всяк праве веруяй в Господа нашего Iсуса Христа, иже имать искус и вежество в духовном врачевании, не глаголю всегда, но во время нужды, [Аще зде и не упоминает нужды] по словеси святаго Григория Солуньскаго, может исповедати, аще и не инок, хотящаго исповедатися, и епитимийствовати, и ему же аще отпустит грехи, отпустятся, и ему же удержит, удержатся. Понеже святый Григорий, сим речением, и на всех, общество показует. Не бо раздели на части, сиречь, не рече, аще апостоли, аще приемницы их пастыри, аще священницы, аще иноцы, но обще на всех преходит веровавших сие, рекше область, еже рече, имже отпустите грехи, отпустятся, и имже держите, держатся. Якоже и ниже наведе словеса Господня рече: Веруяй в Мя, якоже рече писание, реки из чрева его потекут воды живы. Сие бо глаголаше [рече евангелист] о Дусе, иже хотяху прияти, не он сица, сиречь, апостоли, или пророки, или учителие, но верующии вонь праве словесы и делы, якоже сам предаде в писании. И аще убо по словеси святаго Григория Солунскаго, сие на всех преходит веровавших, сиречь повеление Господне, область вданная Господем, святым Его учеником, еже рече, приимите Дух Свят, имже отпустите грехи, отпустятся, и имже держите держатся. Како не имут власти ныне праве верующии, аще и не имут рукоположения, сущии миряне, имущии же искус и вежество во врачевании духовнем, исповедовати хотящих души своя уврачевати от язв греховных, и епитимийствовати, рекше, или отпущати, или удерживати грехи согрешающим. Аще не имут: убо ложна суть словеса святаго Григория, еже да не будет. Аще же суть истинна, якоже и суть, убо имут. Аще же имут область от Господа чрез святых Его учеников праве верующии вонь вданную, во еже отпущати или удержевати грехи, убо безпрекословно и ныне в толикое нужды, егда все священство врасками ересей окаляся, всяк праве веруяй в Господа, аще и мирянин сый не имый рукоположения, может хотящих исповедатися исповедати, и епитимийствовати властию Господем данною, по сему словеси святаго Григория Солунскаго: сие и на всех преходит веровавших, еже рече: приимите Дух Свят, имже отпустите грехи, отпустятся, и имже держите держатся.

Глава, 3.

О еже не токмо, их же свяжут священницы на земли, будут связани и на небеси: но их же и несвященнии свяжут на земли, будут связани и на небесех.

Вемы бо вемы, и известно доволно научаемся от священнаго писания, яко не точию, еликих связуют священницы на земли, бывают связани и на небеси, и еликих разрешают на земли, бывают разрешени и на небеси. Но и мы, егда обидимы бываем, аще обидящаго свяжем на земли, будет связан и на небеси. Аще ли разрешим на земли, сиречь простим, будет разрешен и на небеси. Сие же не свое аз глаголю, но слыши святаго Феофилакта архиепископа Болгарскаго, иже толкуя священная словеса самаго Господа Iсуса Христа, яже рече ко учеником своим: Аминь бо глаголю вам, елика аще свящете на земли, будут связани и на небеси, и елика аще разрешите на земли будут разрешена и на небесех, глаголет сице [толк. на ев. Мф., гл. 18, Благовестник зач. 77, лист 143]: Аще бо ты рече: обидимыи яко мытаря и язычника имаши обидящаго тя, будет и на небесех таков. Аще ли разрешиши его, сиречь простиши, будет и на небеси прощен. Не токмо бо елика священницы разрешают, суть разрешена: но и мы обидимии, или связуем, или разрешаем, и тамо суть связана или разрешена. до зде Феофилакт. Зде речет ли кто, яко святый Феофилакт глаголет о связании и разрешении обидящаго от обидимаго, а не связании простолюдинов приразившагося Богу. Ведый убо буди, аще бо и глаголет святый Феофилакт о обидимом и обидящем, обаче, аще по словеси тогожде Феофилакта, не токмо, елика аще священницы разрешают, суть разрешена, но и аще обидимый обидящаго, или связует на земли, или разрешен, и на небеси. Много паче православный христианин, аще и не сый рукоположен, якоже и священник, данною властию от Христа Бога нашего, юже даде святым своим апостолом, чрез них же и всякому праве верующему вонь, якоже сам Спас инде рече ко учеником своим глаголя: А еже вам глаголю, всем глаголю, может грешника исповедающагося исповедав, или отпустити, или удержати согрешения. Понеже бо сия власть всем дается праве верующим. И аще тако есть, якоже и есть. Убо наипаче ныне в толикое нужды время, егда священника несть обрести благочестиваго, может безпрекословно, православный христианин, аще и мирянин, не имый рукоположения, данною властию самаго Христа Бога, чрез священных своих учеников, всем праве верующим, якоже и священник, имея искусство и вежество во врачевании духовном, паче еретичествующаго иерея, хотящаго исповедатися исповедати, и ему же аще отпустит согрешения, отпустятся, и ему же аще удержит, удержатся.

Глава, 4.

О еже друг другу исповедати согрешения повелено есть.

Слышим бо и божественнаго апостола святаго Иакова, в соборном совем послании, повелевающа исповедати согрешения друг другу, идеже сице пиша глаголет: [исповедайте убо друг другу согрешения, и молитеся друг за друга да исцелеете]. зачало 57. Зде вопрошаем: Рцыте ми о возлюбленнии! Святый апостол Иаков повелевает друг другу согрешения исповедати, кому повелевает? Иноком ли? или ни? Речеши ли яко иноком; Всяко имаши солгати; Понеже бо не у быша тогда иноцы. Ибо в самом начале первенствующия церкве, в самом разсеянии веры христианския, не токмо иноци не быша, но и священников велия бе скудость. Чесо ради не точию мужие, неимущии рукоположения, но и жены многия крестиша. О чесом в первом догмате доводственно предпоказахом. И аще не у быша тогда иноцы, явственно отсюду видети есть, яко святый Иаков повелевает согрешения исповедати, не иноком, но миряном сущим христианом, аще и не имут рукоположения, могущим носити помышления. Понеже и божественнии апостоли повелевают мирским человеком иже имут искусство в слове учения, и нрав чист учити прочих. Сице бо глаголют в правиле своем: [Учитель аще и мирскии человек будет, искусен слову учения, и нравом чист, таковыи да учит. Будут бо, рече, вси научени Богом]. правило 15. Елма же убо божественный апостол Иаков повелевает друг другу согрешения исповедати, не упоминает, яко иноком, или рукоположенным, но просто рече друг другу, зане не у тогда быша иноци. То чесо ради ныне невозможно друг другу исповедати согрешение? Или мниттися яко мирян не имущых хиротонии, не важно есть исповедание, и не отпустително грехов? То како святый апостол Иаков повелевает друг другу согрешения исповедати, наведе, и молитеся друг за друга, да исцелеете, сиречь да очиститеся от грехов. Аще бо по словеси святаго апостола Иакова исповедаяй друг другу согрешения исцелевает от струпов греховных, рекше очищается от грехов, яве яко есть важно и очистително грехов. Аще же очистително есть грехов друг другу исповедание. То чесо ради ныне в толикое оскудение иночества, егда несть где ли бо обрести инока, иже бы благочестие без ущербления содержал, не подобает мирянину сущу православну христианину, не имущу хиротонии, имущу же искус и ведение во врачевании духовном действа, исповедати согрешении? ей подобает. Ибо и в каноннице о житии христианстем, егда приключится нужда, яко несть кому исповедати согрешения, повелевает другом велми любимом и праведным исповедати. в нем же пишет тако: [Аще приключится некогда нужда, еже не имети кому исповедати помышления своя, и прияти помощь, в них же требуем, глаголя яже твоя к другом вельми любимым и праведным, и ими же уповаеши, да помолятся о гресех твоих]. до зде от канонника. Зде вопрошаю, рцы ми: еда несть нужда ныне, еда благочестиваго архиерея нигдеже видети есть? еда ныне несть нужда, еда иерея древлеправославныя церкви догматы ненарушимо содержащаго, святоотеческую веру непревратно соблюдающаго, несть где слышати? еда ныне несть нужда, егда православнаго инока, несть где обрести, им же бы подобало исповедатися? И кия сего вящшая может быти нужда? не вем. Темже убо аще толика и таковая нужда обыде ны, и како несть возможно, аще и мирянину, сущу христианину, имущу искусство и ведство во врачествовании душевных струпов, исповедывати хотящих исповедатися, и епитимийствовати? ей возможно. Зане исповедание его якоже священника и инока есть важно и отпустително грехов. Понеже сам Спас даде дар Духа Святаго всем праве верующим вонь отпущати согрешения. Аще бы не было важно и отпустително грехов исповедание мирянина, суща христианина: не бы святый апостол Иаков повелел друг другу исповедати согрешения, да исцелеет, сиречь да очистится от грехов. Аще бы не было важно и отпустително грехов исповедание мирянина, православна христианина. Не бы вся древлеправославная церковь повелела приключьшейся нужде, егда не имети кому исповедати согрешения своя, глаголати к другом, да помолятся о гресех согрешившаго. А понеже святый Иаков повелевает друг другу исповедати согрешения: Понеже вся древлеправославная церковь во время нужды заповедает другом своим исповедати согрешения: Убо и ныне лепо есть, паче же и подобает, в толикое нужды время аще и мирянину, сущу христианину, имущу искус и вежество во врачевании духовнаго действа, исповедывати хотящих, исповедати своя согрешения, и правилно их исправляти, яко есть его исповедание, яко же и суща священника, важно и отпустително грехов.

Глава, 5.

Яко исповедаяйся преподобному мужу, приемлет от Бога оставление грехов.

По премногу научают нас и божественнии отцы, яко подобает согрешения своя исповедати несвященным сущим якоже и священным. И во первых убо пресловутый в философии, священный Дионисий Ареопагит, ученик божественнаго Павла, сице научает глаголя [Никон Черныя горы, слово 51]: [Аз глаголю последующи божественным словесем, яко на ползу суть зело святых молитвы, аще кто притечет к преподобному мужу, и изречет ему своя согрешения, с тем яко от Бога приемлет оставление грехов]. Что сих словес святаго Дионисия светлейши? что ли явственнейши может быти? Рече бо яко на ползу суть зело святых молитвы. Аще что? Аще кто, наведе, притечет к преподобну мужу, и изречет ему согрешения своя. Зри, не рече, к священнику, или иноку притечет: Но к преподобну мужу, и изречет ему своя согрешения. Како? с тем, сиречь, с таковым упованием, яко от Бога приемлет оставление грехов. Ведательно же есть, кто нарицается преподобный? Нарицаются преподобнии свойственне иноцы. обаче не токмо иноцы суть преподобнии, но и вси, иже вся красная мира сего во уметы вменивше, и крест на раму вземше носят, си есть, находящия скорби, напасти, и гонения Христа ради, и благочестия претерпевают. О чесом явственно засвидетельствует преподобный Никон Черныя горы сице глаголя: [Преподобныи же есть, иже выше праведнаго рекше благии, сиречь еже обидену быти, и елика свершение евангельское глаголет, Всем бо иноци, ниже по тех вси преподобнии нарицаются, яко небрегше вся, и крест на раму носяще, еже есть находящих скорбей терпение]. слово 8. От сих словес преподобнаго Никона яве есть, яко не едини иноцы нарицаются преподобнии:  но вси, иже иночески жительство свое препровождают, сиречь, иже пренебрегше вся сладкая и красная мира сего, и вземше крест на раму свою, рекше, обиды, скорби, напасти, уничижения, и гонения Христа ради претерпевают. Якоже нарицается Онуфрий Великий преподобным, иже не бе инок. Алексий человек Божий, зовется преподобным, иже не бе пострижен во иночество. Суть и инии множайшии таковии, иже нарицаются преподобными, кии аще и не быша иноци, но иночески живяху, сего ради и преподобными нарицаются. Понеже не вси иноцы могут нарицатися преподобными: Но тии точию, иже евангельски, и якоже лепо есть совершенным иноком жительствовати жительствуют. Аще ли кии мирски живут, аще и иноцы видом суть, рекше в сластех, в богатьствах, в роскошах, не сами обиды претерпевают, но паче обиждают, не смиряют себе пред Богом и людми, но аки фарисей гордостию надмени возносятся. Таковии аще и показуют себе от одеяния быти иноков, но не от дел. Сего ради не суть преподобнии вещию. Ниже вси, иже в мире сем многосуетном жительство свое провождают, могут не нарицатися преподобными. Но аще кии в мире жительствуют, обаче мнишески жительствуют, якоже Алексий человек Божий, сии яко чадо послушливая, делающая волю Отца небеснаго, могут нарицатися, аще и не суть иноцы, преподобными, паче же и суть. Сему нас доволно научает святый Феофилакт архиепископ Болгарский, сице глаголя [в толков. на Мф. лист 166]: [Мнози же и доныне обещаются Богу и Отцу мниси, или священницы быти, по обещании же разленяются, и мирски живут. Друзии же мнишескому или священническому житию не обещашася, мнишески и иерейски живут. Яве убо яко сии суть чада послушания делающая волю Отца, аще и не обещашася]. До зде Феофилакт. И понеже по словесем преподобнаго Никона Черногорца, преподобный есть, иже смиренномудренне жительствуя презрев красная мира сего, обиды претерпевает, находящия скорби доблествене сносит, изгнания и поругания Бога ради и благочестия благодарственне терпит, словом рещи, иже тако, якоже священное евангелие повелевает, аще и несть инок, жительствует. По блаженнаго же Феофилакта, преподобный есть той, иже и не имать на себе иноческаго одеяния, но иночески живет. Тем явственно показуется, яко не точию иноци нарицаются преподобными, но и миряне, иночески жительствующии. Что убо зде священный Дионисий Ареопагит повелеваяй притещи к преподобному мужу, и согрешения ему своя изрещи, ко иноку ли повелевает притещи? никакоже никако. Аще бо речеши ко иноку, всяко имаши соглати. Понеже блаженный Дионисий бяше во времена апостолская, егоже божественный апостол Павел на ариевом паге мрежею учения своего уловив, извлече из тмы неведения, на свет благочестия. В тая бо времена при апостолех, в начале первенствующия церкве не у быша иноцы: но потом, егда уже свет евангелския проповеди вселенную всю просвети. И понеже тогда не у быша иноци, тем священный Дионисий повелеваяй к преподобному мужу притещи, и согрешения ему изрещи, не к иноку повелевает притещи, но аще кто иночески, паче рещи, евангельски живет, аще и мирянин есть, и не рукоположен сый на священство, и изрещи ему согрешения своя. Но да не возмнится паки кому, яко божественный Дионисий повелевает к преподобну притещи повелевает ко архиерею, или иерею притещи, ни, но просто к преподобну мужу. еже явственно ведети есть от того же Дионисия Ареопагита: словес, идеже глаголет тако [О священноначалии]: [Аще кто священноначалие, или ин некоторыи чин оставив благоговеинства ради, притечет к преподобну мужу, и зазрев себе с ним молящеся, приимет всяко прощения своя. есть бо и се богоначалным велением взаконено]. до зде Дионисий. Виждь, рече Дионисий, аще кто священноначалие. Зде вопрошаю: Что есть священноначалие? Священноначалие не ино что есть, но начало священства. Что же есть начало священства? Архиерейство. И кий ин некоторый чин оставити глаголет; разве священство. уставне бо определно есть архиереом и иереом, исповеди приимати. Зде яко бы рекл Дионисий, аще кто архиерея, или ин некоторый чин, си есть иерейство оставив благоговеинства ради притечет к преподобну мужу, и зазрев себе с ним молящеся, приимет всяко прощения своя. от коих Дионисия Арепагита словес всяк всякаго кроме труда может уразумети, яко повелеваяй он к преподобну мужу притещи, и изрещи ему своя согрешения, не к архиерею или иерею, ниже ко иноку, зане не у тогда быша иноцы, но к преподобному мужу, иже и мирянин не сый рукоположен, но иночески, паче рещи, евангелски живет, притещи повелевает. Да аще убо священный Дионисий тогда повелеваше егда престолонаместницы апостолстии, аки светилницы на свещницех благочестием сияюще, люди Божия врученными себе управляху. егда священницы аки порфирою царскою, верою христианскою одеяни, стада словесных овец пасяху, притещи к преподобному мужу, не к архиерею или иерею, или иноку, яко не быша в то время иноци, якоже множицею рех, но просто к преподобну мужу, аще бы он был и мирянин, и изрещи ему своя согрешения. Чесо ради ныне в толикое крайнее нужды время, егда благочестиваго архиерея нигдеже слышится, православнаго священника отнюд не видится, правовернаго инока всяко не обретается не подобает притещи к мужу мирянину, сущу христианину, иже благочестия ради, и веры ради христианския, обиды, скорби, напасти, уничижения, и изгнания претерпевает, и изрещи ему своя согрешения? или мнится вам, яко несть важно исповедание его, и отпустително грехов? То почто божественный Дионисий преминув священноначалие, оставив священство, повелевает притещи к преподобному мужу, и изрещи ему своя согрешения? Аще бы не было важно и отпустително грехов исповедание несвященнаго; не бы повелел, преминув архиерейство, оставив и священство, притещи к преподобному мужу, не имущу священства, ниже иночества, и изрещи ему своя согрешения. Убо есть важно и очистително грехов исповедание несвященнаго. И аще есть важно и очистително грехов исповедание несвященнаго, якоже и есть; убо аще кто и ныне притечет, не сущу священноначалию благочестивому, ниже священству православному, ни иночеству правоверному, к мужу аще и несвященну сущу, но православну христианину, и изречет ему своя согрешения, с тем яко от Бога приимет оставление грехов, всяко приимет; Темже убо аще в начале первенствующия церкве, по блаженнаго Дионисия словесем, сущу архиерейству благочестивому, и иерейству православному, не возбраняшеся мужу несвященну сущу исповедывати, кольми паче ныне в толикое нужды время может, паче же и долженствует, простолюдин сый, сущий же христианин, иже аще и не имать рукоположения, имать же искусство и ведение во врачевании духовном, хотящих исповедатися исповедати, и правилно исправляти, яко исповедаяися ему приимет всяко оставление грехов.

Глава, 6.

Яко и в первенствующей церкви от любве подвизаеми, не имущии рукоположения, исповедоваху.

Зрим же, яко и в самое полудение благочестия, в самое сияние православия по вселенней, нецыи не священнаго чина, но от мирскаго, не имущии рукоположения, от любве духовныя подвизаеми, инех бремена, рекше грехи восприимаху. Якоже о сем свидетельствует преподобный Иоанн списатель Лествицы, сице глаголя [лист 279]: [Суть нецыи, выше силы своея, от любве духовныя подвизаемии, бремена инех восприемше, рекшаго помянувше: Больши сея любве никтоже имать, и прочая: И суть друзии, иже и силу иных восприятия равно от Бога приемше, и не сладце ради братняго спасения себе влагающе в тяготы]. слово 30. Но смотри ми, зде преподобный Иоанн два чина быти показует, несвященных, и священных [Патерик скитский, слово 11]. Первее бо рече: Суть нецыи выше силы своея от любве духовныя подвизаеми, бремена инех восприемше. В которых своих словесех явственно дает ведати, яко сии не священнаго чина быша. Понеже не рече, иже силу иных восприятия от Бога прияша. Но что? но от любве духовныя подвизаеми, рекшаго помянувше, сиречь Господа рекшаго: Болше сея любви никтоже имать, аще кто душю свою за друга положит, бремена иных восприяша, сиречь грехи: Бременем бо божественный Давыд грехи нарицает, сице глаголя [псалом 37]: Беззакония бо моя превзыдоша главу мою, и яко бремя тяжко отяготеша на мне. Егда же о священном чине слово простираше, тогда рече: Суть друзии, иже и силу иных восприятия равно от Бога приемше, и не сладце ради братняго спасения себе влагающе в тяготы. Рцы убо ми: Кому восприимати бремена иных власть дадеся? Не яве ли яко священником? Что убо? еда ли похули преподобный Иоанн? еда ли порече? еда ли окая онех, иже не имут рукоположения, от любви подвизаеми, дерзнуша других бремена совприимати? никакоже никако; но паче и похвали. Сих бо наипаче окая, иже власть от Бога прияша восприимати других бремена, но ни восприемляху. О чесом яве сице вопиет глаголя [Лествица, лист 279]: [И аз убо тех, яко не стяжавших любовь окаях. о первых же речено негде обретох: Изводяй честное от недостойнаго, яко уста моя будут. Имже образом сотворил еси, буди ти]. глава 30. Видиши ли яко преподобный Иоанн списатель Лествицы, не имущих рукоположения, не имущих власти от архиерея, но от Бога, восприятия иных бремен, обаче от любве духовныя подвизаемых, восприемлющих тогда, егда пастырие благочестивии быша, егда священницы православнии всюду служиша, иных бремена, рекше исповедающих, не похули, не порече, не окая, но паче похвалами ублажи. Понеже тем своим исповеданием других веры не повредиша, церкви не поколебаша, священства не уничтожиша. Како убо ныне в толикое нужды время, в толикое оскудения священства, егда ниже стопы православнаго священства видети есть, невозможно, паче не подобает неимущему рукоположения, сущу христианину, имущу искусство и ведство во врачевствовании духовном, не своего коего ради прибытка, но других ради спасения хотящих исповедатися, и правилно исправляти? ей возможно и подобает. Аще не подобает неимущим хиротонии, сущим миряном, требующих душевнаго врачевствования врачевствовати, и како великий во отцех Иоанн Златоустый повелевает миряном душевнаго врачевания требующих врачевати. Уврачевавшаго же другаго, велиими похвалами ублажает, яко таковаго ниже пост, ни легание, ни всенощная бдения, толико спасением, яко онаго его же уврачева, спасение обогащает. Отрицающихжеся и глаголющих, яко мирский человек есмь, сия иерейская суть, сия иноческая, зело поносит. еже самая его словеса являют [Маргарит, лист 152]: [Да не речеши к себе, мирскии человек есмь, жену имам, и дети, сия иерейская суть, сия иноческая. Ни бо самарянин он сицевая рече: Где ныне суть священницы? где ныне фарисеи? Где июдейстии учителие? Но якоже некии лов обрет, тако восхити прибыток. И ты убо егда видиши кого требующа врачевания, или телесное, или душевное, не глаголи к себе, чесо ради он сица и он сица того не уврачева? Но премени его от болезни, и не истязуй онех вины небрежения. Аще обрящеши злато лежаще, еда глаголеши к себе; Чесо ради он сица, и он сица то не взяша? но спешиши прежде инех сам взяти. Тако и падших от братии помышляй, и вменяй сокровище обрести прилежание о них. Аще бо излиеши нань яко елей словеса учительства, аще обяжеши тихостию, пожданием, аще уврачуеши, сокровища всякаго богатейша тя той соделает. Изводяй бо честное от недостойнаго, яко уста моя будет. Что убо будет сему равно? Еже ни пост, ни низу легание, ни всенощная бдения, ни ино что могут соделати, се брата твоего спасение творит]. до зде Златоустый. Видиши ли коль явственно святый Златоуст повелевает миряном сущим требующим душевнаго врачевания врачевати? Да не речеши в себе, мирский человек есмь, сия иерейская суть, сия иноческая. Ни, но премени его от болезни, и не истязуй онех вины небрежения. Что убо, он повелевает врачевати, и ты ли прекословиши, яко не подобает мирянину исповедывати, яко сия суть иерейская, сия иноческая? Но аще бы не подобало сущу мирянину, не имущу хиротонии, восприимати иных бремена: Не бы во времена благочестивых архиереов, и священников, не имущии хиротонии от любве духовныя подвизаеми восприимали иных бремена. Аще бы не подобало мирскому человеку нерукоположену сущу, требующих душевнаго врачевания, рекше исповедания, врачевати; не бы божественный Златоуст повелел не имущим рукоположения, иных хотящих исцелети от душевных струпов врачевствовати. А понеже во времена православных архиереов и иереов, нецыи от любве духовныя подвизаеми, иных восприимаху бремена, рекше исповедоваху: понеже Златоустый не сущим рукоположенным, повелевает требующих душевнаго врачевания врачевати, си есть исповедывати. Убо ныне в толикое неимущество православнаго архиерейства, в толикое лишенство благочестиваго священства, в толикое оскудение правовернаго иночества, возможно есть, паче же подобает, мирскому человеку, сущу христианину не имущу хиротонии хотящих исповедатися исповедывати, и правильно исправляти.

Глава, 7.

О еже мужу духовну, могущему лечбу подати, без стыдения святии отци повелевают исповедати.

Доволно убо сему и сам божественный апостол Павел научает нас, повелевая друг другу тяготы носити да тако исполнится закон Христов. Якоже о сем в послании своем к галатом глаголет: [друг другу тяготы носите, и тако исполните закон Христов]. зачало 214. Зде вопрошаю: Рцы ми: Кому повелевает блаженный Павел, друг другу тяготы носити? иноком? или мирским? Речеши ли иноком; И кии тогда иноцы быша? Тогда бо ниже следа иноческаго бяше. Но вся, яже заповедаше, миряном заповедаше. Явственно о сем засвидетельствует святый Иоанн Златоустый, сице глаголя: [Ниже бо стопа тогда иноча бяше, но вся к миряном беседоваше блаженныи Павел]. Беседы апостол., лист 3022. Видиши ли яко блаженный Павел повелеваяй друг другу тяготы носити миряном повелевает, а не иноком; И кия повелевает тяготы носити? Грехи взимати. Тяжек бо есть грех, яко низвлачит душу во дно адово. егда же друг другу исповеданием взимаем согрешения, отъемлем я, во обращение приводяще согрешающих. И кий, рече, закон Христов исполните? Той закон, о нем же сам Христос рече: Не приидох призвати праведники, но грешники в покаяние. Сия же глаголю не от себе, но от божественных отец писаний. Сице бо о сем светилник церковный, святый Василий Великий глаголет [вторыя книги, глава 212, лист 215]: [Что есть друг другу тяготы носити? И которыи закон наполним, сие творяше? Тожде есть предреченному. Тяжек бо есть грех, низвлача душю во дно адово, яже взимаем друг другу, и отъемлем, во обращение приводяще согрешающая. А еже понести, вместо еже взяти. Обычай бо есть и поселяном глаголати, якоже множицею от многих сам слышах. Закон же Христов наполним рекшаго: Не приидох бо призвати праведники, но грешники в покаяние]. до зде Василий. Елма же убо божественный Павел повелевает друг другу тяготы носити, рекше грехи взимати, сиречь исповедати, не иноком но мирским повелевает. То чесо ради ныне в толикое неимущество православнаго священства, не подобает мирянину, сущу христианину, не имущу рукоположения, имущу же искусство и вежество, во врачевании духовнаго действа исповедати хотящаго исповедатися? Что убо, мниши ли, яко не имать власть от архиерея, сего ради исповедание его несть отпустительно грехов? Аще несть отпустительно грехов, и како божественный Павел повелел друг другу тяготы носити, рекше друг другу исповедати, еже и нарече исполнение закона Христова? Аще бы не было отпустително грехов исповедание нерукоположеннаго: Не бы Павел друг другу повелел грехи взимати. А понеже повеле. убо есть отпустително. Но и блаженныи Анастасий игумен Синайския горы, сему последуя, повелевает мужу духовному и наученному, могущему лечьбу подати, без стыдения исповедатися. Иже пиша тако глаголет [в книзе Кирилове, лист 204]: [Аще обрящеши мужа духовна и научена, могущаго тебе лечьбу подати, без стыдения и с верою исповедайся ему тако, яко пред самем Господем]. слово 6. Виждь разум словес Анастасия. Не рече, аще обрящеши инока, но и аще обрящеши мужа духовна. И что есть муж духовный? духовный муж есть, учитель добродетели, враг же злобе. Понеже бо не вси могут истинне быти, аще и нарицаются духовными, духовнии, иже плотски жительствуют, рекше не по заповедем Господним. Аще бо видом и показуют себе духовных, яко архиереи, и иереи, быти, но далече суть Духа, иже плотская мудрствуют, си есть к житейским вещем, и злым делом пригвождающеся, не покаряются закону Божию [Беседы апостол., к рим. 13, лист 222]. Духовный же есть истинно, иже не видом показуется быти духовный, но самою вещию, иже представляет себе учителя добродетели, и злобы супостата, и еже всяческих согрешений отводит [выше, лист 208]. Таковому повеле блаженный Анастасий, исповедатися, рекий: Аще обрящеши мужа духовна и научена, аще бы он и мирянин был, иже бы тебе могл лечбу подати, без стыдения и с верою исповедайся ему тако, яко пред самем Господем. Сего ради и Никон Черныя горы убеждает мирян, не сущих рукоположенных ко врачеванию, иже отрицающеся предлагают вину, яко мирянин есмь, сия священников, сия иноков суть, требующих душевнаго врачевания, сице глаголя: [Аще бо видиши кого душевнаго или телеснаго требующа исцеления, да не речеши в себе, почто он сица и он сица не исцели его, или яко аз мирянин есмь, жену и чада имыи, сия священником суть и иноком. Рцы убо ми, аще обрящеши злато лежаще, еда речеши в себе? Почто он сица и он сица се не взят? Никакоже: Но тщишися прежде иных похитити. Сице и о падших братии помышляй, и непщуй сокровище, еже о онех попечение]. слово 8. Темже убо, аще блаженный Павел повелеваяй друг другу тяготы носити, рекше грехи взимати, и не иноком, зане не у тогда быша иноцы, но миряном повелевает; аще Анастасий Синайский повелеваяй мужу духовному, не упоминая священнику или иноку, но просто духовному, аще бы он и мирянин был, и наученному, могущему лечбу подати без стыдения и с верою исповедатися повелевает, яко пред самем Господем; аще преподобный Никон Черныя горы убеждает мирянина суща неимуща рукоположения, егда видит кого душевнаго требующа врачевания, аще сия и священническая суть, аще и иноческая, врачевати. Убо и ныне возможно есть, паче же и подобает, в толикую несущность православнаго священства, мирянину сущу христианину, аще и не имать хиротонии, требующих душевнаго врачевания, рекше хотящих исповедатися, исповедывати, и правильно исправляти.

Глава, 8.

Святии отцы повелевают к другом велми любимым и праведным, аще и мирстии человецы суть, исповедати согрешения.

Аще не подобает несвященному исповедатися, како святый Иоанн Златоустый, во едином от своих нравоучений, повелевает исповедатися к другом зело любимым и праведным. на них же уповаем, яко помолятся о гресех наших, в нем же глаголет тако: [Глаголи яже твоя уповаеши, яко да помолится о гресех твоих]. ко евреом, нравоучение 21. Что убо, зде святый Иоанн Златоустый повелеваяй глаголати согрешения, сиречь исповедати, другом, кому велит? Иноком ли точию? или и миряном? Речеши ли иноком единым? всяко имаши солгати. Понеже святый Златоустый повелевая глаголати согрешения к другом, велми любимым, не у помяну яко к другом иноком, но просто к другом, кто бы он како ни был, аще инок, аще ли мирянин точию любим бы был и праведен, нань же уповаеши, яко да помолятся о гресех твоих. Хощеши ли, да сие ти, твоего познания и вероятия, яснейши покажу? откуду убо? от повеления святыя древлеправославныя церкве, яже повелевает сице глаголющи: [Аще прилучится некогда нужда, еже не имети кому исповедати помышления своя, и прияти помощь, в них же требуем, глаголи яже твоя другом велми любимым и праведным, и имже уповаеши, да помолятся о гресех твоих]. Канонник о житии христианстем. От коих словес святыя древлеправославныя церкве, явственно видети есть, яко святый Иоанн Златоустый, и сама повелевающе исповедатися к другом велми любимым и праведным, не к иноком повелевают, но к мирским исповедати. Понеже первее рече: Аще прилучится некогда нужда, еже не имети кому исповедати помышления своя. обычай бо есть святыя церкве и законоположение еже епископом и презвитером исповедати. Сего ради и рече, аще прилучится некогда нужда, сиречь, аще найдет таковое нужды время. еже не имети священника, во еже бы исповедати своя согрешения. Таже наведе: Глаголи иже твоя к другом вельми любимым и праведным, аще суть и мирстии. Преподобный же Иоанн списатель Лествицы, не токмо пред други: но и пред учители повелевает исповедати согрешения. сице бо глаголет [в книзе Кирилове, лист 204]: [Не прелщайся тем сыну и послушниче Господень, еже не исповедати грехов своих, но исповедуй пред учителем своим грехи своя. Невозможно убо есть стыдящуся человеку исцелитися, но открывающу раны своя. Открывай же и ты раны грехов своих, и яко врачю показуй их не стыдяся]. до зде Лествичник.

Но мнитмися яко нецыи непщуют, яко преподобный Иоанн повелевая исповедати пред учителем своим грехи своя, новоначальным мнихом повелевает пред учители своими, у них же суть в подначалстве, грехи своя. Обаче буди и тако, яко преподобный Иоанн повелевает новоначалным мнихом исповедати пред учители своими грехи своя. Но инок кое разньствие имать от мирянина? не сие ли, яко чин, якоже выше рехом, четца содержит. прочее ничтоже. Тем яве есть, яко повелеваяй пред учители своими исповедати грехи своя, не единым новоначальным мнихом повелевает, но и миряном. Понеже бо лепо есть и мирским человеком учителем быти. зане и правило святых апостол повелевает сице глаголюще [Кормчая, лист 26]: [Учитель аще и мирскии человек будет, искусен же слову учения, и нравом чист, таковыи да учит. Будут бе, рече, вси научени Богом]. правило святых апостол 15. Зде убо вонми, аще святый Иоанн Златоустый повелеваяй исповедати согрешения к другом любимым и праведным, не к единым мнихом повелевает, но и к мирским исповедати; аще вся древлеправославная церковь, нашедшей нужде, преопределяющи исповедати согрешения к другом, повелевает к миряном исповедати; аще преподобный Иоанн Лествичник повелеваяй исповедати пред учителем грехи своя, не предопределяет пред иноки, но аще инок, аще ли мирянин, кто бы он каков ни был, просто пред учителем. То чесо ради ныне, толикой нужде належащей, егда архиерейства благочестием сияющаго несть, иерейства православием блистающаго не обретается, иночества правоверием украшеннаго не зрится, мирянину сущу христианину, имущу искусство во врачевстве духовном, не подобает исповедывати? Что убо негли того ради, яко человек есть мирянин, не имый рукоположения, сего ради не имать власти во еже отпущати согрешения? Далече да будет сицевое неполезное, и разуму божественных отец противное мнение. Ибо божественнии отцы писательными своими гласы научают глаголюще, яко аще человек обратится ко Господу покаянием, возвестит и человеку грехи своя, спасен будет. Сице бо глаголет преподобный Никон Черныя горы: [Аще помыслит человек сердцем обратитися к Богу, возвестит человеку укоризну свою, беззаконие же свое покажет, приятен Ему будет, и внидет чистым сердцем со исповеданием. И паки: Аще добре покается человек, и обратится к Господу покаянием, возвестити же и человеку своя грехи, и с ним помолится Богу, спасен будет]. слово 51. Видиши ли коль явственно преподобный Никон глаголет, яко аще человек обратится ко Господу покаянием, возвестит же и человеку грехи своя, спасен будет. Каково нечто не неподобно сему и в ветхом завете сотворшееся видим. Два человека убийство равное сотвориста Каин и Ламех: но не равно казнистася. Ов убо ею милость получи, ов же казнен бысть жестоце. Зане Каин обличаем не покаяся, Ламех же необличаем исповеда грех свой пред человеки. О них же в книзе Бытия пишет сице [глава 4]: [И рече Ламех своима женама, Адда и Села, услышите глас мой жены Ламеховы, внушите моя словеса, яко мужа убих в язву себе, и юношу в струпе мне, яко седмицею мстится от Каина, от Ламеха же седмдесят седмицею]. Преподобный Никон Черныя горы повествует, яко Ламех не Каина но иных праведных уби, сего ради убегну мучения, яко исповеда грех свой. Сице бо глаголет: [Не Каина уби Ламех, но инех праведных, убегну же мучения за исповедание греха, и на ся суд изнес, Божию возбрани суду]. слово 51. Подобне и преподобный Исидор Пилусийский о Каине и Ламехе изъявляет глаголя: [Чего ради Каин и Ламех убийство сотвориша, не такоже мучена быста? но ов убо казнь прият, ов же милость получи. Понеже ов обличаем отвержеся, сей же не обличаем исповедася. Аще и греховная равна, но яже по гресе не равна. Темже рече: глаголи ты первее грехи своя, да оправдишися. сего ради убо потщимся не согрешати, аще и согрешим, да не отвержения ради и скрытия страсти, лютейшую муку себе приуготоваем]. до зде Исидор. Что убо исповедайся пред иереем, не самому ли Богу исповедается? и в лепоту. Сице о сем в книзе Кирила Иеросалимскаго: [Не мните же яже иереем исповедается. Аще же и пред иереями, но весте яко самому Богу. Помяните убо кождо вас, ко исповеданию приступивыи, не первее ли речеши; Исповедаютися Господи Боже небесе и земли; потом же речеши: и тебе отче]. лист 230. Откуду явственно видимо есть, яко исповедаяйся иерею, самому Богу исповедается. равнообразне, и неимущему рукоположения мирянину, сущу христианину, исповедаяйся, самому Богу исповедается. убо аще покается, спасен будет. Зане данною властию, юже Христос Спаситель вдаде учеником своим отпущати грехи, глаголя: Приимите Дух Свят, имже отпустите грехи, отпустятся, еже, по сказанию Григория Солунскаго, на всех веровавших преходит, вся согрешения его разрешает и отпущает.

Глава, 9.

Яко и в первенствующей церкви мнози святии не имущии рукоположения, исповедоваху, отпущения грехов подаваху.

И не дивно яко ныне толицей нужде убеждающей. Но воззри точию в прежния веки, посмотри в древняя времена, абие не неимаши узрети, яко не токмо в самое первобытие первенствующия церкве, но и в самое цветение всюду по вселенней благочестия, мужие не имущии хиротонии, не имущии от архиерея власти во еже исповедывати, обаче кающихся приемлюще исповедываху, и прощение им подаваху. О чесом самыя их истории явственно показуют, их же ушесем слышателей на среду предлагаем, в них же пишет тако:

Святыи мученик Конон, иже бе в лета святых апостол, от села глаголемаго Видалия, отстояща 18 поприщ от Исаврийскаго града. его же нечестивии мучиша в Ликаонии и Исаврии. Понеже убо о всем цветяху святом чюдеса, и мног народ от Исаврийския страны обращахуся к Iсусу Христу, исповедахуся, и крещахуся святым и преподобным Кононом [марта, в 5 день, Пролог, лист 22; минея четия Макария митрополита]. Зде да не возмнится кому, яко святый мученик Конон бе инок, зане нарицает его преподобным. ни: но прост бе мирянин. Не бо тогда по свидетельству блаженнаго Иоанна Златоустаго, стопа иноча бяше [беседы апост., лист 3022].

Святый мученик Кондрат никомидийский, отступльшых христианския веры, поучив обратив к покаянию, и кающихся их прием, помолися Богу прилежно, да приято будет обращение их [маия в 9 день, в житии его киевопечерскаго друку].

Святая мученица Дорофея премудрая дева, двух жен, Христину и Каллисту, отвергшихся Христа поучивши, паки к правей вере обрати, и даде има покаяние, помолися Богу о них, да простит согрешения ею, яже и пострадаста с нею за Христа.

К сим же повествуется в Патерице скитстем, о некою двою брату, яже иместа между собою вражду, от нею же един не простився умре, другий же пришед в себе зазре, начат каятися о согрешении свое, его же некий велможа царьский имый житие свое в царствующем граде Константине, прият на покаяние, смири з братом его умершим. яже ся имать история сице [Патерик скитский, глава 73]: И се поведаша нам, беста, рече, два брата по плоти, в богохранимом граде Константине, от действа же диаволя, сице возненавидеста себе, яко не мощи им друг друга видети. и сице вражде в них сущи, прилучися единому умрети от них. Видев же брата своего смерть другии брат, страхом одержим, начат рыдати, и бити лице свое, слезами себе умывая, глаголаше: Горе мне окаянному, не сохранившу заповеди Божия, но в злых делех житие свое скончах. Како вниду в церковь Божию, и смею руце мои воздети на молитву? Како получю прощение безчисленных ми грех от Бога человеколюбца, иже ни своему брату отпустих ко мне согрешившу? Сия и сим подобна глаголющу ему во многи дни, и недоумеяся что сотворити. Человеколюбивыи же Бог, иже всем человеком хотяи спастися, и в разум истинныи приити, вложи в сердце его ити в гору Олимбу глаголемую, и некоему от старец исповедати согрешение, иже о злопомнении. Шедшу же ему, обретшу старца свята, и припад к ногама его, и сердцем сокрушенным исповеда грехи своя, вкупе же и злопомнения недуг изрече. Старец же слышав, рече, о чадо, не слыша ли дивная словеса святаго Ефрема; иже о злопомнении написа, в них же глаголет: Яко имеющии вражду между собою, и разлучившися от жития своего, безконечно мучени будут, и яко мерзци кромешней тме предадятся, яко возненавидеша Христа рекшаго: Любите друг друга, прощайте даже и до седмдесять седмерицею. он же отвеща: И что сотворю честныи отче? Старец же рече: веру ми ими чадо, недоумеюся, что сотворити? Обаче, аще хощеши получити прощение, иди в подкрилие горы сея, и обрящеши дуб велик, глаголемыи костян, и пребуди ту два или три дни. Близ бо ту водворяется старец некии свят, наг же всякия одежа, приходит же единою в неделю нощию к древу оному, и собирает от плода его пищу себе. Пожди убо тамо бдя и моляся, и егда приидет тамо старец, припади к ногама его святыма, и рцы ему грех свой, и еже аще речет ти, сотвори, и обрящеши милость. Сия слышав, и поклонися старцу, и отъиде. Шед же на место, идеже показа ему, и пребысть ту два дни. В третию же нощь воззрев, и се прииде человек наг, якоже родися. Он же внезапу скочив, и яся по ногу его, глаголя: Помилуй мя отче святыи. он же остави мя зовяше. Сему же удивившуся, и трепетом содержиму отпусти и. Он же абие отскочи от него, и рече: Бог да помилует тя брате, понеже толико лет сущу ми зде, и сицево не пострадах николиже, обаче аще хощеши беседовати к моему смирению, верзи ми едину от риз своих, яко да облекуся, жена бо есмь нага, якоже видиши, непокровен имущи естества женскаго студ. Он же сия слышав скоро совлекся, и поверже едину от риз своих. Она же сия вземши, и оболкшися приступи к нему, и рече: Что хощеши о человече! Он же рече: мати моя святая, между мною и братом моим вражда велика бысть, яко не мощи нама видети друг друга. Сице убо сущим нам, умре брат мой, аз же по смерти его согрешение свое разумех, и приидох во святую гору сию, и идох ко святому старцу, и исповедах грехи моя. он же паки посла мя к твоей святыни. Моля же тя убо припадаю к святым твоим стопам, яко да ущедриши мое окаянство, и даси разрешение моему согрешению. Она же слышавши, отвеща: Аз брате что сотворити тебе не имам. Но возвратися к царствующему граду, и взыщи дом, некоего велможи, имя ему рекла, вниди к нему, и скажи ему согрешение свое, и еже речет ти, сотвори, и обрящеши прощение. Он же отвеща: Горе мне мати моя святая ты мое окаянство, но к мирскому человеку посылаеши мя. Она же, поиди, рече, не стой, другое бо слово ли ответ не услышиши от мене, и сия рекше отъиде в пустыню. Он же сниде с горы со слезами, и прииде в царствующии град, и обрете дом реченнаго велможи, вниде к нему, и виде его работающа, и попечение имуща о некоеих потребах царских, рече к нему: хотех господи мой поведати тебе некое слово. Он же рече: не видиши ли брате колик спех имам? и глаголеши ми сия. Паки он рече: Слово точию мало хотех рещи господи мой. Он же глагола: потерпи до вечера, и аще упразднюся, тогда речеши ми, яже хощеши. оному же ожидающу, и вечеру приспевшу, виде его упразднившася, и исповеда ему вся, и злопомнение оно, иже к брату своему, восход иже на гору Олимбу, и беседу к святому старцу, и како посла его святая жена к нему. Он же сия слышав, и рече: прелстился еси брате мой, не виде ли даже до ныне каков подвиг и неупражнение имех? и сия глаголеши ко мне человеку мирскому служащему работы царския. Он же сия слышав, паде на лици своем, емся по ногу его глаголя: не востану дондеже помилуеши мя, вопияше и глаголаше, помилуй мя Бога ради, рекшаго: помилуй помилован будет. он же рече к нему: Веру ми ими брате, яко недостоин небеси и земли, и сея временныя жизни. Но понеже от святыя жены послан еси, и с верою пришел еси, в четвертыи час нощи прииди в притвор великия церкве, обрящеши мя тамо, и якоже хощет Господь, и сотворит яже о тебе. Шед же он в реченное ему место, и обрете его вне церкве в притворе стояща, и молитву творяща. Видев же его поклонися, и яко приидоша до внешних врат, и сотворшим три метания, сами о себе врата отверзошася. Внидохом же и до внутренних, бяху бо затворена. Паки поклон колена трищи, и сия о себе отверзошася. И якоже внутрь святыя церкве быхом, никомуже от стрегущих ведущу, глагола к нему велможа: Преклоним колена на молитву. Преклониша оба колена молитву творяще на мног час, и свету велику возсиявшу в церкви от светелник сущих тамо. воставшим убо им от молитвы, обретеся с ними и другии человек, глагола велможа сущему с ним, познаеши ли человека сего? он же: ей господи, брат мой есть. Рече же к нему: прииди и приими прощение от него. Он же паде на ногу, и рече: согреших брате прости мя Господа ради. он же отвеща: Бог да простит тя брате мой. Воставшим же и объемшимся, и целовавшимся и плакавшим на мног час, рече к ним велможа: всяко ныне известистася друг другу, понеже Господь Бог сотвори по смотению своему, отступим прочее от церкве сея. Да якоже приближашася изыти из дверей святыя церкви, третии убо, иже прежде умерл бе, абие невидим бысть. изшедшим же внутренним и внешних врат, паки сами о себе затворишася. Рече к нему велможа: иди с миром в дом свой, и сохрани, яже видел еси, не поведая никомуже даже до кончины живота моего. По отшествии же моем от тела, якоже хощеши сотвори. Зрите братие любимая безмерно человеколюбие и благодать Божию, яко не точию в пустынях и монастырях угождают Богови: но и посреде плищев, и мятежей мирских пребывающе. до зде от Патерика.

Видиши ли кации простии мужие, не имущии рукоположения, не имущии повеления от архиерея, во еже исповедывати, исповедываху. Суть и инии множайшии кроме всякия хиротонии, кроме всякаго повелительства епископскаго, приемлющии исповеди, и правилно исправляющии: их же исповедания святая древлеправославнокафолическая церковь, не зазре, не опорочи, не отрину, но паче прият, и исповедающихся простолюдином, якоже и священником за равно поминает, сице вопиющи: [Помяни Господи душа православных христиан, иже скорби имеша по вся дни о своих гресех, и слезы излияша, и исповедаша простым человеком со слезами и без слез, прости им вся согрешения их, и упокой с праведными Твоими]. Синодик святейшаго патриарха Московскаго [патр. Иова, и в прочих старописанных]. Елма же убо, аще в начале первенствующия церкве не имущии хиротонии: Аще в самое цветение православия по вселенней, нерукоположеннии суще, егда благочестивии архиереи, всюду быша, православнии иереи во всех странах вселенныя пребываху, правовернии иноцы везде во обителех и пустынных местех жительствоваху приемлюще хотящих исповедатися, и очиститися от грех своих, исповедываху, и правилно исправляху. Како ныне в толикое оскудение благочестиваго архиерейства, в толикое неимущество православнаго иерейства, в толикое лишение правовернаго иночества, не подобает неимущему хиротонии, сущу христианину, имущу искусство и ведение во врачевании духовном, хотящих святым покаянием очиститися от прежних своих грехов, на покаяние приимати и правилно исправляти? ей подобает. Что убо, непщуеши ли, яко несть простолюдинов исповедание отпустительно грехов и благоприятно. То чесо ради вышепредреченнии простолюдини суще, не имущии хиротонии, не имущии власти от архиерея вданныя ко еже исповедывати, дерзаху исповедывати? Како же и святая древлеблагочестивая церковь прият простолюдинов исповедь, с прочими исповедающимися священником поминает? Аще бо бы не было покаяние простолюдинов неотпустительно грехов; не бы дерзнули вышеименованнии святии приимати на покаяние, и епитимиями облагати. Аще бы не было благоприятно исповедание не имущии хиротонии: не бы святая древлеправославная церковь имела узаконоположити простолюдином исповедающихся, с прочими исповедующимися священником купно поминати. А понеже исповедание простолюдинов есть важно и отпустително грехов кающихся. Сего ради и простолюдини хотящих очиститися святым покаянием от грех исповедываху. Понеже есть Богу приятна не имущих хиротонии исповедь, тем и святая церковь не сущим рукоположенным исповедающихся, якоже и рукоположенным, поминая просит Бога о отпущении грехов. убо есть покаяние не имущих хиротонии, якоже и имущих, отпустително грехов кающихся, и богоприятно. Убо во время нужды может всякаго кроме прекословия, не сый рукоположен, сущий христианин, имущий ведство во врачевании, исповедавати и правилно исправляти.

К сим, аще отреваеши сих ныне, иже не имут хиротонии, сущих христиан исповедание, еже творят крайняя ради нужди, яко несть, [по мнению твоему] отпустително грехов и богоприятно, безпрекословне долженствуеши и оных, иже кроме нужды, в бытность благочестивых архиереов иереов и иноков, дерзаху исповедати, исповедание соотреяти, яко и онех не имать исповедание отпустительно грехов и богоприятно, яко не имаша рукоположения, простолюдини твориша, не понуждающей их нужде творити. Аще ли же оных приемлеши, якоже и лепо есть, яко святою церковию приято есть исповедание. Убо и сих крайней нужде убеждающей творити е, исповедание должен еси, якоже и подобает неотрочне прияти. Зане якоже они быша простолюдини, не имущии хиротонии, сущии христиане, равнообразне и сии тации же. Их же бо вера едина, догматы благочестия едины, житие и мудрование едино, сих всяко и действо едино. Убо и ныне не сущих рукоположенных, сущих же христиан исповедание, и правилно исправление, есть отпустително грехов и богоприятно.

Глава, 10.

Яко древле во святей церкви не кийждому иерею власть вдавашеся от архиерея кающихся приимати.

Вемы бо известно, вемы, яко в первобытней церкви обычай бяше благочестивым архиереом, не коемуждо иерею власть вдаяти приимати кающихся; но могущим себе, безбедно содержати, и прочих правилно исправляти. О чесом явственно видимо есть в Номоканоне, идеже пишет тако [Потребник, лист 730, Номоканон лист 72, и 126]: [Ибо святии отцы ниже священником изволяют бес повеления архиерейскаго примиряти кающихся, якоже 6, и 43-е правило, иже в Карфагене собора изъясняет]. Обаче належащей нужде, егда умирая человек призовет иерея, во еже исповедатися ему, аще и несть ему вдана власть ко еже исповедывати, должен всячески ити исповедати, на одре болезни лежащаго. Ибо святая древлеправославнокафолическая церковь во время нужды повелевает иерею, егда его убеждают ко исповеданию болящаго, да не како кроме исповеди отъидет сего света, аще и не имать от архиерея вданныя власти, ко еже исповедати, ити исповедати. Аще ли же предлагая вину, яко не имать власти от архиерея ко еже исповедывати, нейдет к позвавшему его болящему исповедати его, ему же умершу кроме исповеди, грехи умершаго взыщутся на иереи том. еже утверждает Иоанн Зонарь, сице глаголя: [Иерея аще кто от человек умирая призовет его исповедатися ему, а иерей нейдет, но речет, яко не имать повеления от архиерея, еже приимати чада, и не смею се сотворити. И аще умрет он человек не исповедався, то грех той на иереи том есть, понеже не внят писанию глаголющему: яко да не возвратиши приходящаго к тебе тща, и оскорбиши дух его. Безумный иерею, добре глаголеши, яко не имаши повеления на се, но нужди ради иди, и притекающаго приими Бога ради. Тем да покается иерей той лета 3, поклонов 100 на день]. правило 90. Сим подобне и Матфей Властарь, во главе 9, священнику, аще и не имать власти от архиерея приимати исповеди, обаче при смерти человека кающагося прияти повелевает, а не отринути. Зде убо смотри ми. Божествении отцы во время нужды, сиречь умирающу некоему, и желанием желающу исповедатися, иерею аще и не имать власти вданныя от архиерея ко еже исповедывати, повелевают его исповедати, не исповедающаго же иерея, ему же вину предлагающу, не вдание власти исповедывати, епитимиею трилетнаго времене облагают, на кийждо день поклонов сто. Ныне же в толикое нужды время, в толикое неимущество, якоже множицею рех, благочестиваго архиерейства, православнаго иерейства, правовернаго иночества, како не долженствует сущу мирянину, православну христианину, аще и не имать рукоположения, не имать власти от архиерея, но имать власть от самаго первосвященника Христа Спаса, во еже исповедати, имать дар Духа Святаго от пастырей Началника, во еже вязати и решити согрешения кающихся, внегда рече: приимити Дух Свят, имже отпустите грехи, отпустятся, и имже держите держатся [Ин. зач. 65], еже, по словеси Григория Солунскаго [слово 1], на всех преходит праве верующих, словесы и делы, хотящих исповедати, и правилно исправляти? ей долженствует.

Что убо рцы ми; кому унее есть наипаче исповедатися, священнику ли мнящуся священнику, священства правилне лишену, яко во множестве различных ересей погрязшу, яко ниже от православнаго архиерея хиротонию имущу? или мирянину сущу христианину? Речеши ли священнику, аще и в различии ересей состоит, зане священником вдается власть от архиерея исповедывати, и вязати и решити кающихся, и им свойственно есть? оле неведения! оле неразумия! оле крайняго неистовства, да не глаголю безумия! Вдается власть, якоже и вдадеся от Христа Спаса чрез архиереов иереом, но православным, а не еретичествущим. Рцы ми, еда может священник еретичествуяй имети в себе Дух Святый, в нем же обитающу духу нечистому сатанину, якоже глаголет преподобный Иосиф Волоколамский? всяко не может. глаголет бо и апостол, несть сочетания Христови к диаволу. 2 коринф. зач. 182. И аще не имать в себе Духа Святаго, но дух нечистый сатанин. Не сущу же в нем Духу Святому, еда может кроме Его на небеси и на земли вязати и решити? поистинне не может. якоже той же Иосиф Волоколамский глаголет [слово 2]: [Кроме благодати Святаго Духа ничтоже может кому сотворити от священных]. И понеже священник еретичествуяй, яко имать в себе дух сатанин, не может ни на небеси ни на земли вязати и решити. Убо унее есть исповедатися мирянину сущу христианину, аще и не имать рукоположения, не имать власть от архиерея, (яко не сущу) но имать дар Святаго Духа, имать власть от архиереом Началника Спаса Христа, чрез священных Его учеников вданную, во еже кающихся согрешения вязати и решити. Темже убо имже аще свяжет согрешения на земли, будут связани и на небеси, и имже аще разрешит на земли, будут разрешена и на небеси.

К сим же, аще унее есть, [по твоему мнению] покаятися священнику аще и еретичествующу, нежели мирянину, аще и сущу христианину, то како Петр Могила, сый от новых учителей митрополит Киевский, глаголет [Потребник киевопечерскаго друку]: Яко лучше есть святому крещению совершитися от простолюдина, нежели от священника проклятаго, или отлученнаго, или еретичествующаго. Чесо ради тако рече? Явственно нас сему научает святый Иоанн митрополит Никейский, сице глаголя [Кормчая писмен., в слове на армены]: [Яко от анафем благословение не бывает, и от проклятия молитва не исходит; и от диавола Христово таинство не совершается]. Но понеже, по сказанию Петра Могилы, лучше есть святому крещению от простолюдина совершитися, нежели от священника еретичествующаго, или отлученнаго, или проклятаго, яко по словеси Иоанна Никейскаго, от анафем благословение не бывает, и от проклятия молитва не исходит, и от диавола Христово таинство не совершается. То како не лучше и святому покаянию от простолюдина совершитися, нежели от священника еретичествующаго, или проклятаго, или отлученнаго? Кая вся сия три при нынешнем священнице обретаются, о чесом в первыя части пределе третием доволно предпоказахом. Почто? понеже, по сказанию тогожде Иоанна Никейскаго, [от гнилаго трупия ин не исцелится, ниже от червивых удов здравие иному телеси подается, ни паки от неверия или от ереси духовное действо исполняется]. И аще тако есть: Убо унее есть простолюдину сущу христианину покаятися, нежели священнику еретичествующу, или проклятому, или отлученному. Понеже и святая древлеправославная церковь, сущих христиан, покаявшихся простым человеком, поминая молит Бога о отпущении их, покаявшихся же еретическим священником, ниже мало где воспоминает.

Глава, 11.

О еже не лепо есть, аще и писания свесть, самому себе исповедати.

Суть убо неции от нехотящих истинне повинутися, иже глаголют, яко книжный может и сам себе исповедати пред Богом, и якоже святии отцы заповедаша, тако сотворити. Далече сицевое неполезное непщевание да будет далече. Диаволе бо се есть умышление, [глаголет святый Златоуст] [Пролог, сентября в 30 день]. Он бо мысль влагает человеку рекии, сам себе ты своя мысли свеси, и еже писание глаголет, якоже святии отцы суть заповедали, тако сотвориши сам. Не послушай мысли тоя, и не медли исповедати грехи своя, да прощен будеши в сии век и в будущии. Преподобный Иоанн списатель Лествицы глаголет [лист 15]: суще. Прельстившеся убо, иже сам на ся надеявшеся, и ни единаго же предводящаго требовати умысливше. Иже убо из Египта изшедшии, Моисея, а иже от Содома избегшии, аггела наставляющаго имеша. И ови убо иже душевныя страсти исцеляющии, попечением врачевским уподобишася, иже суть из Египта исходящии. овии же окаяннаго сего тела нечистоты желают совлещися. Тем же и аггела, сиречь равноаггелна, да сице реку, спомогающа требуют. Противу бо согнитию язвенному хитреца зело и врача требуем. Толкование. Душевныя страсти суть, тщеславие, гнев, печаль, гордость, уныние, и яже от сих бываемая. Телесныя же, чревообъядение, блуд, сребролюбие, и яже от сих. Глаголет убо, яко иже душевными страстьми болящии, человека требуют, престателя и наставника, попущающа мало плоти, да не яко воздержницы и спешнии множае возносятся. И суть сии подобни из Египта исходящим, и Моисеом наставленным, человеку сущу, египтяне бо от гордости поемлются, а не о блуде. Телесными же страстьми боримии, требуют мужа наставника, вмале рещи, аггельское и бесплотное житие имуще, воздержника, якоже рещи, не милостива, яко да пощением плотская движения умертвят. И подобятся таковии от Содома изшедшим, и аггелом наставленном. Видиши ли коль яве глаголет преподобный Иоанн, яко таковии прельстишася, иже на ся надеявшеся не требуют предводящаго. Понеже бо сугуб есть человек, состоит убо от души и тела, сугубы имать и страсти, душевныя и телесныя. Боляй душевными страстьми, требует врача мало попущающа плоти, да не возносится яко воздержник. Боляй же телесными страстьми, требуют врача зело воздержна, да постом умертвит плотския страсти. Сего ради и богословию тезоименитый святый Григорий повелевает, не стыдяся грехи своя исповедати пред человеком, а не самому пред собою, сице глаголя [в книзе Никона Черныя горы, в слове 51]: [Да не устыдишися исповедати грех свой, ведыи како Иоанн крещаше, яко да онаго срама сим убегнеши. Занеже часть и се оныя муки, и покажеши яко воистинну грех возненавидел еси, изъявив той, и обличив яко достоин безчестия]. Сим согласно и преподобный Иоанн списатель Лествицы научает нас исповедати грехи наше пред человеки, сице вопия [лист 68]: [Не бо есть без срама срама угонзнути, обнажая обнажи своя струпы врачю, рцы и не усрамися]. Подобне и блаженный Анастасий Синайский вопиет глаголя [Никон, в слове 51]: [О души своей не срамляйся. есть бо срам наводяй грех, и есть срам слава и благодать. и не приими лица на душу свою: И не срамляйся впадение свое, и не стыдися исповедатися о гресех своих]. И Иоанн: [Аще исповедуем грехи своя, верен есть Бог и праведен, да оставит нам грехи, и очистит нас от всякия неправды]. Се колиции и каковии богоноснии мужие, без стыдения повелевают исповедати грехи человеку, а не кроме человека. Почто? понеже ничто тако бесовом и помыслом крепость на ны подает, яко еже грехи без исповедания внутрь сердца содержати. Чесому по премногу научает нас преподобный Иоанн списатель Лествицы, сице глаголя: Прежде бо всех исповедаемся доброму нашему Судии единому, аще ли же велит, и всем. Язвы бо обличаемы не успеют на горшее, но исцелевают. Ничтоже тако бесовом и помыслом крепость на ны подает, яко еже сих без исповедания в сердцы хранити. душа бо исповедь помышляющи, яко уздою держима есть не согрешати. Неисповедаема бо яко во тме без боязни прочее творит. Не прелщайся о сыне послушниче духом мнения, и якоже от инаго лица своя согрешения учителю поведуя. Несть бо кроме срама, срама пременитися. Обнажая обнажи свой струп врачеви. Рцы и неусрамися, иой струп отче, моя язва, от моея лености, а не от инаго лица. Никтоже сему виновен, ни человек, ни дух, ни плоть, ни ино что, но мое нерадение и леность. Буди обычаем и видом и помыслом яко осуженик о исповедании, на землю поник, аще возможно, и врачеве нозе, яко Христовы слезами омакая. до зде Лествичник. Иже бо зде срамляется грехи своя открыти человеку, на спасение души своея, во второе и страшное Христово пришествие, не единому, или двема но всей вселенней откровена будут, и аггелом и человеком. Явственно о сем божественный Иоанн Златоуст вопиет глаголя: [Подражаем жену самаряныню и мы, и о своих гресех человеков не срамляемся. Срамляйбося о спасении человеком открыти своя грехи, в день он, не пред единым, или двема, но вселенней всей зрящей обличаем бывает. Ибо Бог помогает, не хощет бо смерти грешнику, якоже есть, обратитися и живу быти ему. [ниже] Вся же, рече. обличаема от света являются. Якоже бо рана, дондеже вогнеждается доле, прикровена есть сверху глубиною текущи, ни едино же приемлющи прилежание. Сице и грех, дондеже крыем есть, якоже во тме с бестрашием мнозем творим есть. Внегда же объявится, бывает свет соделавыи его. Егда бо наказан будет, егда покается, егда оставление получит, не исчистил ли еси ему тму? Не бесплодие ли призвал еси к плоду? Таковы другом нашим даруем дары, яко да душа их исторгнет от гнева Божия]. Зриши ли колиции и кации богодухновеннии мужие, вси единоустне повелевают человеку исповедати согрешения человеку, от невевежественных человек привнеде, иже не точию сами дела тмы делающе, но и других тех же беззаконных дел творению учители бывающе, к свету не приходят, но ниже инем оставляют приходити, якоже о сем споведует блаженный Анастасий Синайский, сице взывая [Никон Черныя горы, слово 51]: [Но мнози от невежественных человек, студа и тмы дела делающе, не точию тии творят, и во тме ходят, но и волю творят делающим, и лукавей вине учители бывают, и ни сами приходят к свету, ниже онех оставляют приходити. Вправду убо Господь глаголаше о таковых: Горе вам книжницы и форисеи лицемери, яко затворяете царство небесное пред человеки, вы бо не входите, ни хотящим оставляете внити. Ничтоже бо тако в муку ведет неотреченную, яко еже возбраняти и забавляти хотящих спастися спасению, и многи ревнители творити своих зол. Бывает бо послушавших и подражавших погибель, приложение мучению научившему. А яко с своими грехи последующа имут по смерти, и греха вредящих душ и погибающих от лукаваго учительства их таковии. Слыши что глаголет апостол: Неких человек грехи проявлени суть предводяще на суд, некиих же и последуют. Темже неисповедаемая неисцельна от своея лености, и непоболения, и безстрашия Божия недугуют. И сего ради не приходят к свету, исповедания, да не обличаются дела их. якоже паки рече Господь: Всяк иже злая делает, ненавидит света, и не приходит к свету, да не явятся дела его, яко не о Бозе дела суть. Такожде и божественный апостол: Не приобщайтеся, рече, к делом подобным тме, паче же и обличайте. Бывающая же тай от них срамно есть и глаголати. вся яже обличаема, от света являются, все бо являемое свет есть. Неразумне же и нечестиве глаголющии, ничтоже ползоватися от еже к человеком исповедания, заповедь бо страстное. един бо Бог может отъимати грехи. Буди яко сия глаголя, первое убо яко прикровение своея мерзости и безсловесия предлагают. Потом развращают, еже сам Бог глагола к своим слугам: елика аще свяжете на земли, будут связана на небеси, и елика аще разрешите на земли, будут разрешена на небесех. И паки: Имже оставите согрешения, оставятся, и имже держите держатся. И, яко вы есте свет миру, и соль земли. еще же и по плоти брату его глаголющу: Исповедайте друг другу согрешения, и молитеся друг за друга, яко да исцелеете. и друг другу тяготы носити, и тако исполните закон Христов. К сим же отверьгут всяко и крещение, и все божественное священнодейство, за еже от человек убо служимо быти, от Бога же освящатися. Обыче бо Бог спасение человеческое, не точию аггелы действовати, но и человеки святыми. и древле убо пророки, последи же собою, и святыми апостолы. И прочее даже до скончания века своим в роды слугам глаголет: Приемляй вас, Мене приемлет, и отметаяйся вас, Мене отметается, и слушаяй вас, Мене слушает. Темже аще и человек есть, иже исповедание слышай, но Бог его ради обращает и наказует, и прощает, якоже и Давыда Нафаном. Темже глаголаше: Рех исповем на мя беззаконие мое Господеви, и прочая. Бяше исповедание его, и ради Нафана обращение. Ниже. человек убо человеку споспешествует в покаяние, якоже рех, и служит и строительствует, и наказует, и обличает, яже ко спасению, по апостолу и пророку. Бог же обещавает грехи исповедающагося потребити, глаголя: Аз есмь потребляяй грехи исповедающемуся, и не воспомяну, ты же помяни, и да истяжемся. И, глаголи ты первее грехи своя, да оправдишися]. до зде Анастасий. От коих словес блаженнаго Анастасия, явственно показуется, яко аще и человек слышай есть исповедание, но Бог его ради обращает, наказует и прощает грехи кающагося. Обаче же не просто отци повелевают грехи кающемуся разрешати, но и епитимиями связовати на время. Якоже святый Иоанн Златоустый научая завещевает, рекий [в толкован. на послан. еже ко ефесеом]: Свяжи убо зде дондеже милостива Бога сотворит. Не остави и разрешена, да не множае свяжется гневом Божиим. Аще бо ты свяжеши, Бог ктому не свяжет. Аще ли не свяжеши вечныя и нерешимыя ждут узы. до зде Златоуст. Темже убо аще святый Иоанн Златоуст не повелевает мысли своея послушати: но немедленно исповедати грехи своя человеку, да прощен будеши в сий век и в будущий. Аще божественный Григорий Богослов повелевает непостыдне исповедати грехи своя да сим срамом, онаго срама убегнем. Аще преподобный Иоанн списатель Лествицы завещавает, обнажая обнажи своя струпы врачю, и изрещи грехи несрамляяся. Аще блаженный Анастасий не стыдяся велит исповедати грехи своя. Аще блаженный сын громов святый Иоанн Богослов заповелевает исповедати грехи друг другу, да оставит я нам Бог, и очистит от всякия неправды. Убо всячески кииждо от человек человеку должен есть непостыдне исповедати согрешения своя, и всякаго кроме срама, да онаго будущаго, убегнет срама.

Глава, 12.

О еже аще кто не изречет грехов своих, на посрамление свое не имать оправдитися пред Богом.

Божественнии убо отци поучевающе исповедати друг другу согрешения, глаголют, яко аще кий человек согрешит впад в грех, и изнурит плоть свою, и изсушит кости своя, в посте и в плачи, ничтоже успеет, аще не изречет человеку грехов своих на посрамление свое, яко да сего ради оправдится. Сице бо о сем громогласне вещает златословесный отец Иоанн глаголя [Никон Черныя горы, в слове 51]: [Аще прегрешением прегрешит человек впад в грех, изнурит же плоть тела своего, и истает кости мозгов своих, в посте и в плаче, ничтоже успеет аще не изречет грехи своя на срам себе. сего ради оправдится. Ибо весть враг, яко велми оставляет Бог согрешения, иже с теплою верою к Нему приходящему и прощает, иже со слезами Ему исповедающемуся. Той бо есть враг поспешай человеку на все злое, и сего ради возбраняет им исповедати]. Подобне и святии аггели беседующе к Феодоре, ея же душю повнегда несяху представити престолу Владычню, на мытарствех, глаголют яко аще и престанет от зол кто, во еже не ктому творити я, упразднився на покаяние, не исповесть же грехов своих отцу духовному, их же прежде сотвори, мня яко довлеет ему на спасение, во еже отступити от еже согрешати, таковый аще и постом себе чрез многое время изнурит, не имать получити отрады себе, всяко испытается зде на мытарствах. Якоже самая повесть их явствует сице повествующи [от жития преп. Василия новаго, мытарство 13]: [глаголаше святая аггела к Феодоре: Аще кто упразднится на покаяние, и престанет от зол яже творяше, и не исповедает духовному отцу грехи, яже сотворил есть прежде, и надеется, яко доволно ему есть спасение токмо отступление от них, то аще и постится, еже на долго время, несть ему на ползу, аще не исповедает, якоже подобает таковыи добре испытан будет зде, якоже видиши]. до зде от беседы аггел. От коих словес блаженнаго Иоанна Златоустаго, и беседы святых аггел всякому яве есть видети, яко аще кто впад в грех, и отступит во еже не ктому творити я, и постом и бдением тело свое удручит, не исповедает же человеку согрешения своего на срам себе, не имать от Бога прощения получити, но всяко на мытарстве истязан будет. Сего ради святая древлеправославнокафолическая церковь повелевает, аще кому приключится от немощи человеческия впасти в грех не отлагати, но абие исповедати. Сице бо вопиющи вопросоотвещателне глаголет: [Вопрос: Чим аггела хранителя от себе отгоняем? Ответ: Грехами, наипаче же смертными. Темже, аще и случится кому от немощи человеческия впасти в грех, наипаче же смертныи, не отлагати то, но вскоре исповеданием и покаянием очистити себе потреба, дабы аггел хранитель паки ся к нам обратил, и не попущал невидимому врагу в болшия грехи нас вводити]. Катихисис малый, лист 5. Ведателно есть, что есть грех смертный. в книзе Катихисисе сказует быти грех смертный, преступление к Богу, или к ближнему. Идеже пишет тако [лист 55]: [Вопрос: Что есть грех смертныи? Ответ: Грех смертныи есть, преступление к Богу, или к ближнему своему, егоже ради отщетеваемся благодати Божия, и егда его не исповедаем и не каемся, и умираем в нем, вечно умираем, и того ради смертным он грехом называется]. Сего ради божественный Иоанн Златоустый немедленно повелевает исповедати грехи своя, да прощен будет в сий век и в будущий сице бо взывает глаголя [Пролог, сентября, 30 день]: [Исповедайте грехи своя, исповеданием бо струпи душевнии исцеляются. И вред плотныи объявляем врачю исцелевает, а таимныи велику страсть творит, и потом смерть. Такоже и греси, таимии тело и душю уморяют, и творят радость диаволу. Велико добро исповедание грехов, а таение радость сатане. Не бо он прелщаяся глаголет, днесь угодие си сотворю, таже утре покаюся. не весть бо, дойдет утренняго дня, или несть, но точию хощет в глубину болшю свестися зол, даже нечаянно смерть похвативше погубит и. аще ли книжник есть кто, то мысль ему влагает диавол рекии, сам себе, ты своя мысли свеси, и еже написание глаголет, якоже отцы святии суть заповедали, тако сотвори сам. Не послушай мысли тоя, и не медли исповедати своя согрешения, да прощен будеши в сии век и в будущии]. Откуду по сим всем вышепредложенным святых отец, всякаго вероятия достойнейшим свидетельством, всякому удобь разумеемо есть, яко аще кто от немощи человеческия запят быв диаволом, впадет в грех, таже отступит от него, во еже не ктому паки творити и, чесо ради аще и тело свое постом и бдением измождит, не изречет же его отцу духовному на посрамление свое, не имать прощения получити ни в сий век ни в будущий, ниже наследником быти царствия небеснаго, но на место мучения сведется.

Глава, 13.

О еже покаянием очищается человек от грех своих и невозбранно проходит воздушная мытарства.

Ничим бо тако, яко покаянием человек очищается от прежних своих грехов, и безпакостно и невозбранно проходит мытарства воздушная, приближается к престолу Владычню. еже показуется от беседы святых аггел [от жития преп. Василия новаго, мытарство 13]: [Вопрошание Феодорино у святых аггел: Всякаго ли греха, яже сотворит человек еще жив сыи, без всякаго извета истязаема бывает душа его минующаго зде? еда не может очистити их? понеже написана суть на коемждо мытарстве, и испытывают мя ныне, и подробну истязовают, трепещу  ужасаюся? Отвещаша аггели: не всех тако, но токмо подобных тебе не исповедающихся, в сицевых и умерших. Аще бы и ты исповедала отцу духовному грехи своя без срама, и прияла бы еси заповедь, и успела бы сию отправити, и прияла бы от него прощение, прешла бы еси невозбранно вся злая не могущу ни единому мытарству истязати ни о едином же гресе: Но понеже не восхотела еси, исповедати духовному отцу, сего ради и испытаешися сих всех. Еще же и се ти помогает много, яко престала еси от грехов своих. еже не творити их. Паки аще кто прилежит со усердием к покаянию, оставляет ему грехи Господь, и оставляется свободь от всех прием невидимо прощение. Лукавии же дуси иже в мытарствах написанныя грехи имуще, вскоре хартии свои разгнувше ничтоже обретают, яже написаша, Святыи бо Дух невидимо покрывает. Видяще сия беси, яко исповедания ради загладишася вся скорбят по согрешившем. Аще ли же человек жив сыи, его же грехи исповеданием потребишася, спешатся лукавии беси вместо тех грехов, иныя написати по исповедании, болшими ему стужают страстьми. Велико убо благо ко спасению исповедание, иже от толиких зол избавляет человека. Ибо без пакости и невозбранно преминует сия мытарства, и приходит к Богу приносящи добродетельная]. до зде от беседы аггел. Обаче аще и вся грехи исповесть человек отцу духовному, един же стыдения ради утаит всяко отходит на место мучения. Еже сам диавол исповеда некоему иерею о некоей жене, яже вся грехи своя исповедала един же утаила, егоже, закля иерей именем Господа Бога нашего Iсуса Христа. о ней же повествуется сице: Жена некая, егда грехи своя исповеда, един же грех утаи, егоже ради злаго стыда исповедати не хотящи. и того ради совестию бысть обличаема идеже в церковь, и вся облиявшися слезами, пред единым образом падши на землю моляшеся Господеви. да той грех, его же исповедати никомуже хотящи, оставит ей без исповедания, егда же тако моляшеся, иерей же в то время бысть в церкви, и виде демона над нею семо и онамо летающаго, и от велия радости поругающагося ей. И того ради презвитер именем Господа нашего Iсуса Христа закляв рече: Чесо ради сице о лукаве и прокляте радуешися и веселишися? Скажи ми сию вину твоея радости. отвеща диавол: Како не имам радоватися и веселитися: Понеже вижю сию жену плачющу, и рыдающу, во ад нисходящу. и мнит безумная, яко скверну греховную без исповедания хощет очистити, и неудобное стяжати. И тако сия поругания, а не оставления достойна. Сия же иерей услышав, иде ко оной жене, и еже виде и слыша, сказа ей вся ужасающися, и елико можаше ко исповеданию наставляющи и поучающи. Жена же стыд победивши, грех свой, его же таяше на мнозе, смиренно со слезами исповеда, еже видящи диавол, скверным смрадом церковь исполнив, невидим бысть, и к тому не показася. книга Зерцало великое, глава 292.

Сему подобно нечто слышим о некоей жене, яже бе зело благочестива, и всякая добрая дела прохождаше, в мирском житии иноческое провождая. обаче единаго ради греха егоже срама ради не исповедала отцу духовному. низведеся на место мучения. о ней же повествуется в Патерице Иеросалимстем сице [глава 39; иже обретается и в Зерцале велицем, на листе 1140]: В земли Ликинопецкой, бе некая жена зело благочестива и верна, и велию любовь и желание име, и прилежно нощию всегда молитву имущи ко пресвятей Богородице. Ибо аще и в супружестве бяше, но в постех, и в благотворениих и во всех добрых делех и в мирском пребывании иноческии закон совершая, но убо некогда во младости еще, грех некии великии содела и во весь живот свой стыдяшеся его исповедати. Но егда исповедаяся иереови, грехи своя прикрытно вещая, прости мя, глаголя, в явных и неизрицаемых, и во всех, в них же аз виновата пред Господем, и пред тобою честныи отче. И сия се вещающи несказанно плакаше, иерей же отец ея, всеобразно приводя ю, да подробну исповесть, еже имать, и ничтоже успе. зело убо пекиися о спасении ея, учаше ю дабы и кроме его к некоему духовному и святому старцу сомнение свое предложила, она же обещася. егда же той прииде, и сему такоже веща. И той зело премудр, всякими образы, приклады и повестьми духовными хотя яд греха изъяти: но невозможе никако. И по некоем времени поболевши жена умре, тело же ея лежа тако непогребено, ожидаху бо дщери ея, занеже в далном разстоянии живуще от нея. И егда дщери приидоша, начат матерь оплакивати свою горко и зело жалостно, яко всех предстоящих в жалость и мног плачь приведоша. И егда тако горко всем плачющим, сила Божия вся содержащая над умершею показася. Вступи паки душа во умершее тело, яко от тяжкаго сна возбудися. Воста бо и горко плачющи рече по дщерем своим, и всем предстоящим: Не плачите дщери мои, и вы любезнии приятелие, и не ужасайтеся. Ибо великим милосердием Господа нашего Iсуса Христа, неотступным молением яже о мне, и предстателством славныя всех Матере, и помощницы Пресвятыя Богородицы к животу паки возвращена есмь да покаюся. Развяжите мне связание, и разрешите свивание. они же с великою скоростию развязавше, воста же и седе, и рече: Молю вас призовите ко мне немедленно отца моего и учителя. И со всякою скоростию прииде. она же вечно убивающии таимыи грех плачющи вельми, пред всеми отцу своему исповеданием из сердца своего изверже, и здравие души и благоденство вечное восприя. Сие же чюдо егда во многонародное множество пронесеся, и на премного сие удивителное дело многим стекшимся, таяжде жена сама о себе, и о неизреченней милости Божией, и о предстателстве Пресвятыя Богородицы, нача сказовати пред всеми подробну, рече сице: господие мои и матери честнейшия господие друзи и братия, такова милость Матери и Госпожи Богородицы есть. Аз окаянная грешница, благоверия моего ради, и добрых дел, вменихся человеком добра быти: но пред очима всевидящаго Бога, в падении смертнаго греха обретохся, и явихся заповедем Его преступница, иже устави во святей церкви своей, яко никтоже истинно не покаявся, и вся грехи на среду не предложив отцу своему духовному, не может избавлен быти. аз же окаянная грехом моим исповедание часто творила, един же некии тяжкии и смертныи грех, его же еще во младости сотворих, и великаго ради стыда отцу своему духовному не исповедах и того ради неисповедания вся моя добрая дела, яже сотворих, нивочтоже обратишася: обаче обретох помощь сему, понеже обычай имех сие мое злое согрешение на всякии день исповедати Пресвятей Богородице Госпоже нашей и великой Помощнице, на особном месте пред образом Ея пресвятым всегда тамо приходящи, или где на ином месте, каяхся и плача и рыдая дабы за оное преступление мое вечных мук осуждения избавила егда постиже мя смертныи долг, тогда многое воинство бесов окружи мя и начаша торгати и мучити, и тяжкии он грех, егоже таях, пред очима ми полагаху и тако на вечныя муки в геенну огненну отвлекоша мя. И тамо седя плача и рыдая, ожидая последняго на мя отречения, за толикое мое нечистое согрешение. Помянух же и се яко пред образом ея по вся дни предъявлях его Пресвятей Богородце моей, с плачем и рыданием исповедаяся, и мало сим обнадежихся. яже к Заступнице моей, и единой Помощнице отчаянных спасению и молебною мыслию к Матере Божией прибегох, дабы мя бедную в потребе моего призвания, в последней и трепетней сей беде не оставила. точию жадательством и воздыханми непрестанными и еже словесы просила. И се яко заутра восходящее солнце, и яко в полудни свет, всех Царя Мати, Заступница Пресвятая Богородица показася, и страшныя темныя силы разгна иже играху мною яко птенцем голубиным, сице рекущи им: Како злии и окаяннии смели есте зде рабу мою привлещи, оставите ю дондеже изыдет на ню суд Сына моего и Бога. демони же вострепеташа и разбегошася вси. Милосердия же сущи источник Пресвятая Помощница, приступивши к Сыну своему, Царю же всех и Богу нашему, нача вещанми прилежными молити о мне окаянней, сице глаголя: Чадо мое превозжеленное и пресладкое, Царю мой и Боже, аз мати Твоя, молю неизреченное к человеческому роду милосердие Твое воспомяни грешных ради на землю сшел еси, не предаждь зверем душю, яже пред образом моим ко мне плакавшую, и грех свой всегда извествующую, якоже в животе тако и по смерти помощи от Тебе требующую, даждь избавление бедней сей рабе моей. Избавитель же Бог наш ко преблагословенной Матери своей рече: Веси превозлюбленная и пренепорочная Моя мати якоже никтоже может избавлен быти кроме совершеннаго и чистаго покаяния и исповедания. Милосердая же Богородица рече к Сыну своему; вся Тебе возможна, Твоя суть и от Тебе изыдоша, не посрами моление мое, и бедствующую рабу сию Твою всегда к Тебе прибегавшую и имени Твоего ради святаго многа добра сотворшую. И аще недоуменно и несовершенно, обаче усердно, и от души лицу Твоему добродетели приносила. Покажи Сыне мой и Боже милосердие свое мене ради. И Царь славы преблагии Бог наш матери своей а моей Помощнице рече: Веси мати Моя благая, аще и неудобно Мне и невозможно о сем послушати, но за прошение твое сия душа кроме тела не имать места покаянию и избавлению. Но да возвратится в тело свое, и еже зле учинила, паче же горши того, яко таила свой грех, и за сие паки усердное покаяние и исповедание пред иереом Моим, да принесет и милосердие тако восприимет. И по повелению Господа моего милостивным и дивным предстательством матере Его, умолившей о мне, послан бысть аггел, иже прият благодатно, и в тело мое якоже видите, возврати. И се уже исправих по воли Божией покаяние мое, и час ми приспе паки к Богу, и Помощнице моей поити, и к вам паки возвратитися не имам, но на веки славити неизреченное милосердие о мне Творца моего, иже мя избави от нестерпимаго и страшнаго осуждения, и показа мя благодати своея причастницу. Сия изрекши и преклонившися возлеже. и знаменавшися знамением честнаго креста и успе. до зде от истории.

Разумееши ли отсюду, яко аще и вся грехи исповесть человек пред человеком, един же утаит, всяко отходит на место мучения. Какоже не имать отъити в геену огненную, иже не хощет ни единаго греха пред человеком исповедати? всяко отъидет. Сего ради всяк хотяй наследником царствия небеснаго быти, должен есть непостыдне грехи своя исповедати пред человеком.

Глава, 14.

О еже не всякому лепо есть исповедати согрешения, но имущему искусство, и могущим врачевати.

Обаче святии богодухновении отци, и церковнии учителие, не всякому просто и без разсмотрения повелевают согрешения исповедати но мужем духовным имущим искусство, и могущим уврачевати показующаго струпы душевныя, якоже сему доволно научает, господин Констянтин севаст Арменополь, и судия Фессалонитский, в книзе своей в вопросех. яже разреши честнейший, хартохранитель, господин Петр диакон Божия великия церкви, в лето 6600. в них же вопросоотвещательне глаголет тако: [Вопрос: Добро ли есть исповедати грехи наша мужем духовным? Ответ: Добро убо и велми полезно: но неискусно и грубо о сих залежащим, да не безсловесным состраданием и строением, или безвремянным и невежественным наляцанием, запрещении, небрежника или леностна, или разслаблена тя соделает. аще убо обрящеши мужа духовна и искусна, могуща тя уврачевати, непостыдне и с верою исповеждься ему яко Господеви а не человеку]. книга шестая. Аще ли же нужде належащей, невозможно обрести такова человека, к немуже бы годствовало исповедати согрешения, тогда должен исповедатися самому Господеви, по подобию мытаря. Чесому тойже севаст Арменополь в своих вопросоответех научает сице глаголя [книга шестая]: [Вопрос: Аще не обрящу человека к немуже имам исполнь ношения исповедати, что долженствует сотворити? Ответ: Исповеждься Богу о себе осуждая себе глаголя, по подобию мытаря, Боже наш, Ты веси яко грешен есмь, и недостоин всякаго прощения, но спаси мя ради милости Твоея]. Обаче исповедайся Богу, не всяк грех, егоже сотвори, долженствует изглаголати. О чесом той же паки Констянтин Арменополь глаголет: [Вопрос: Исповедаяйся же Богу, помяну ли и исчислю всяк грех, его же содеях? Ответ: Никако, наипаче аще телом и блудом согрешиши, елико бо аще хощеши помянути он сицу и он сицу, сквернится твоя душа. Прочее добро по подобию мытаря глаголати: Боже умилостивися о мне грешнем]. до зде севаст. Хотя же убо исповедающаго своя согрешения единому Богу на уединении, кроме посредствующаго человека, и приемлет Бог покаяние: но не приемлет каяйся един сам о себе извещения, аще совершенно получи от Бога прощение. К сим же надеяйся на ся удобь падет, егдаже падется, несть его воздвижай. Темже, иже бо зде не хощет пред единем посрамитися, во второе Христово пришествие, не пред единем, но пред тмами тем, и тысящами тысящь аггел и человек, имать посрамлен быти, и муце предатися. Глаголет бо святый Иоанн Златоустый [Беседы, лист 3089]: Яко грехи неисповеданныи откровены будут вселенней, и пред други и враги и аггелы. Обаче не свое си глаголю аз, но слыши блаженнаго Анастасия Синайскаго в вопросех и ответех своих, сице о сем вещающа [книга преп. Никона Черныя горы, слово 51]: Вопрос: Аще кто срамляяся рещи человеку своя грехи и студодеяния, внидет же в церковь, и о себе исповесться Богови, убо прият ли есть или ни? Ответ: Воньже день умилится человек, и обещается Богу ктому не согрешати, но прилежене покается, приемлет его Бог: но не приемлет извещение един о себе о совершеннем своем прощении. Иже бо надеяся на ся падет. И горе единому, егда падется, несть бо воздвижай его. И муж безсоветен, себе ратник, яко не требующа себе помышляя, и в себе высокомудрствуя. Господь же гордым противится, смиренным же дает благодать. Иже зде не хотяй пред единем посрамится, тамо пред мноземи посрамлен будет, и муце предан будет. Многажды бо нецыи яко Бога ради постничествовавше о себе, и много страдавше, за безсоветия и требования еже от искренняго ползу, далече от Бога быша. Без совета бо трудяйся, всячески обнищает. самосовершен бо и не требуя един Бог есть. Всяк же человек скуден, и требуяй есть, аще и мнит премудр быти. Веровав убо Господню учению, и святых Его ученик, спасется. Темже блаженнии апостоли, богодухновенная своя учения яко в написанне законе предаша церкви, яко да теми друг от друга наставляемся ко спасению. до зде Анастасий. От коих словес его, разумно ти да будет, яко аще и приемлет Бог покаяние на уединении единому Богу исповедающагося, кроме посредствующаго человека, обаче не имать он исповедайся совершеннаго известия, аще совершенне ему Бог прости согрешения. Но сия убо во время крайния нужды, егда не обрящет человека, к нему же бы исповедался. Аще ли же имать таковаго человека, ему же возможно есть и лепотствует исповедатися, но не хощет или за срам, или за мнение, яко мирянин есть, таковый, по словеси святаго Иоанна Златоустаго, аще изнурит плоть тела своего, и истает кости мозгов своих, в посте и в плачи, ничтоже успеет. Аще ли изречет грехи своя на срам себе, сего ради оправдится.

Глава, 15.

Яко отлагающии покаяние к смертному часу не получают исцеления.

Суть же неции, иже в сластех мира сего многосуетнаго пребывающе. отлагают покаяние до времене часа смертнаго. Но оле небрежения! оле нерадения о спасении душевнем! оле подкрадения дияволя! Он бо яко демон лукавый, аки лев рыкая тщится всех с собою в пропасть адову низвести. Что убо, рцы ми, отлагаеши покаяние свое до смертнаго часа? како веси? где имаши умрети? на сусе ли? или на воде? на одре ли? или внезапу нечаянною смертию? Аще на сусе, от разбойник ли? То како, и кому тогда имаши покаятися, егда тя абие смерти предадут? Аще на воде, кому ту имаши покаятися? и кия изрещи имаши грехи твоя, удавляющей тя в кратком времени воде? Идеже ни послуха, емуже бы покаялся, ни времене, в неже бы возмогл изрещи согрешения своя. На одре ли? но и тогда главе болящей, плоти ослабевшей, всем удом разслабленным от огня болезни, како ли слезити? жене, чадом, сродником, и другом предстоящим окрест одра понуждающим о завете имении твоих. Святый Феофилакт архиепископ Болгарский глаголет [Благовестник от Иоанна, лист 77]: [На последняя лета отлагая покаяние, и не тщайся зде очиститися покаянием, и улучити здравие душевное, напоследок не улучает исцеления]. Но ли внезапною смертию. Но в толь краткое время, в неже ниже мало что грехов излагати или сотворити, в толь внезапное похищение смерти, како возможеши покаятися, егда мнози множицею и спяще похищаеми бывают смертию? Блаженный убо Иоанн Златоустый страшне вопиет на без покаяния отходящих сице [Беседы на Деяния, лист 207]: [Покаяния кроме отходящим, лучше бе не родитися]. Понеже бо праведный Судия Владыка наш Господь Iсус Христос, в чем кого застанет, в том того и судит. Святая бо православнокафолическая церковь определила, на очищение согрешений человеком, четверократно в летнем обхождении исповедатися, сице вопиющи [Катихисис малый, лист 27]: Вопрос: Которая есть четвертая заповедь церковная? Ответ: Четырищи летом исповедатися, аще и частее благоговейнейшии могут: но никтоже паки да не имет того. которыи бы не имел ни единою летом исповедатися, таковыи под клятвою и отлучением от церкве. Зриши ли яко святая церковь таковаго, иже ни единощи летом не исповедается, клятве и отлучению предает. Что убо, не много ли паче сицеваго, аще кий чрез век свой не исповедуется, имать предати? ей всяко. Слышим бо яко аще кто в мире живый не имать у себе отца духовнаго, таковый ниже христианин есть. Сице о сем в книзе именуемей Сын церковный, засвидетельствует глаголя: [Пишет бо ся у нас в христианском законе, иже кто в мире живет, а отца духовнаго не имеет, той несть христианин]. О каковых и преосвященный Фотий митрополит Московский, иже не имеют у себе отца духовнаго, аще и к церкви приходят, не повелевает никакова приноса приносимаго ими у церкви приимати, ниже прочим имущим у себе духовных отцев с ними ясти или пити, ни к себе в домы их призывати, ниже к ним ходити. Сице бо пиша в послании своем во Псков завещавает глаголя: [А которыя люди живут без покаяния, и отца духовнаго не держат, аще и к церкви приходят, не приимати приношения от них к церкви. А своим детем духовным возбраняйте с таковыми ни ясти ни пити, ни в своя домы призывати, ниже к ним ходити. Понеже сии сами отлучишася стада Христова словесных овец, и елика сила таковых приводити к покаянию от злых, и приимати с радостию, а не гордяся, да не погибнут в своем нечестии]. Елма же убо аще не токмо, иже чрез всю жизнь свою не исповедуется отцу духовному, но аще кий ни единощи летом не исповесться, от святыя церкве клятве и отлучению предан бывает; Аще живый в мире не имать отца духовнаго несть христианин; Аще кий не имеет у себе отца духовнаго аще и в церковь ходит, от таковаго приношения в церковь не приимати, и не токмо не приимати, но ниже с ним ясти или пити, ниже в дом к нему ходити. То почто о возлюбленне отлагаеши покаяние к смертному часу? почто не абие покаешися? не веси ли яко смерть яко тать в нощи неначаянно приходит, и многащи неготовых от сего света восхищает? Почто косниши обратитися ко Господу? Премудрый Сирах вопиет глаголя [Сирах, 5. книга Зерцало мирозрителное, глава 38]: [ Не закосни обратися ко Господу, и не отлагай день за день; Ибо внезапу приидет гнев Его, и вовремя отмщения разрушит тя. Се глаголаше мудрец. Абие должен еси творити покаяние: Занеже не имаши известнаго часа житию. Почто отлагаеши покаяние на время, еже не веси, аще узриши? Ниже: Не имаши ни единаго дня известна, и пожидаеши целаго лета, во еже творити покаяние. Ниже: Не отлагай покаяние на много лета, егда Бог хощет в малом часе, дабы еси обратился]. [Почто убо отлагаеши покаяние, тако полезное во твое спасение? яже неудобь умолиши вовремя смертное, в нем же аще кто и много слезит, обаче лепо веровати о нем, яко страха ради адова сие творит, еже не оправдует человека]. [глава 39]. Якоже божественный Феофилакт глаголет [Благовестник в толк. на Иоанна, лист 77 ]: [На последняя лета отлагая покаяние, и не тщайся зде очиститися покаянием, и улучити здравие душевное, напоследок не улучает исцеления]. И поистинне отлагающии покаяние к смерному часу, не вси улучают: но мнози многащи не бо готови кроме покаяния внезапу восхищаеми отходят. Каково нечто слышим о некоем пустыннице, чрез многолетное время в пустыни пребывающем, и во всяцей добродетели сияющей, иже по случаю слышав некоего разбойника, всяк грех, и всяку злобу прошедшаго в житии своем, покаяние, коего ради покаяния святии аггели с песньми вознесоша душю его в небесная, рече: како сей злодеятель всех благ и сластей прием земных, на небо взыде? аз же доколе буду тако злострадати? при конце и аз покаюся, и наследником такожде царствия небеснаго буду, ныне же наслаждуся сладких мира сего. И абие оставив душеспасителное пустынное пребывание, и отъиде в мир сластей наслаждатися: но на конец не улучи во еже покаятися, но погибе кроме покаяния. О нем же повествуется в книзе Зерцале велицем сице: [Разбойник некии от гнавших по нем бежа, и виде яко уже не утещи, пристигоша бо гонящии, к земли низложи себе, глаголя: Праведно смерть приемлю, понеже Господа моего много различно, и многократне оскорбих, и Дух Его раздражих, и плача зело, изрицая грехи своя и вопия согреших, и моляше их усердно, да мстят ему, за еже Бога омрази, и кииждо член тела своего издая на муки. Некии пустынник пребывая много лет во оном месте, воистинну добродетелен бысть, сие покаяние разбойниче слыша, и от аггела объявлено ему бысть, яко за сие аггели душю онаго с песньми и пеньми вознесоша на небо. Пустынник же оныи не точию возда о сем славу Богу: но и разгневася глаголя: егда сей злодеятель всех благ и сластей приим земных, на небо взыде, аз же доколе зде тако буду злострадати? При конце покаюся и аз, и такожде дано ми будет царствие небесное, якоже и сему разбойнику. И тако ему доброе пустынное и молчаливое житие оставльшу, пойде в мире служити сатане, и случися ему ити чрез некую реку, спаде с мосту, и утопе, и восхитивше демони душю его, вергоша во ад]. до зде о пустыннице. Видиши ли яко отлагающии покаяние к смертному часу внезапу восхищаеми кроме покаяния окаянне отходят? Добро убо есть и еже в последнем издыхании покаяние, но со слезами, и болезненным воздыханием, и сокрушением сердца. Но таковым добро сицевое покаяние, иже в неведении заповедей Господних и будущаго суда, и вечных мук, жительствоваху законопреступно. А иже в ведении сих всех, и в разумительстве известном божественных писаний, презирают заповеди Господня, мняще в последнее издыхание умолити нелицемернаго Судию покаянием, таковии едва едва когда таковое благо получают. Якоже доволственно нас сему преподобный Максим Грек научает глаголя: [Добро о душе, и еже в последнем дыхании покаяние, со слезами и сокрушением сердечным, и болезненными стенанми, и отдаянием восхищаемым бываемое. Но тем добро таково покаяние, иже в неразумении заповедей Владычних, и будущаго суда, и соблюдаемых мук жиша беззаконно. А тем, иже в ведении всех сих, и в разуме известном божественных писаний попирают заповеди Господня, таже последним покаянием умолити мнят страшнаго Судию, не вем отнюд, аще даровано будет им таковое благо. Множайши бо сих внезапу восхищаются от жития сего, безгласием и безчювствием объяти бывше, и лежат окаянно зрение видящим их, невидимо истязаеми на дни доволни безгласни и неподвижни пребывающе. Нецыи же внезапу восхитишася, ниже малейшей части времени им дане бывши на покаяние. И сие известне ведый богодухновенный песнопевец, завещевает нам глаголя: Разумейте убо сия забывающии Бога, да некогда похитит, и не будет избавляя и. И котории суть о душе забывающии Бога, а не точию иже спасителныя заповеди Его, со многим и безумным презорством попирают]. глава 19.

Сего ради святая православнокафолическая церковь таковаго, иже кроме покаяния умрет, аще и христианин есть, не повелевает священнику отпевати, не приношения зань приносити, яко несть исполнил закона божественнаго, сице вопия глаголет: [Аще убо христианин без покаяния умрет, то не достоит над ним иерею пети, ни приношения зань приносити, яко не исполнил закона Божия, и веры христианския]. Потребник [и в Служебницех].

Святый же Иоанн Златоустый, о коль страшно вопиет на без покаяния отшедших [Беседы на Деяния, лист 207]: [покаяния рече кроме отходящим лучше бе не родитися]. И понеже горе умершим без покаяния. Сего ради божественный Златоустый покаянию проповедник всеусердне молит и убеждает, отлагающих покаяние к последнему издыханию, во еже бы не отлагали но абие покаялися, сице взывая [Беседы на Ин., нравоучение 34]: Да подражаем убо жену и мы, и о своих гресех да не постыдимся человеков. Но убоимся, якоже подобает, Бога, иже и ныне зрящаго бываемое, и тогда мучавших не покаявшихся ныне. Якоже убо ныне сопротивное творим: хотящего убо судити не боимся; А иже ничим же нас вреждающих, сих ужасаемся, и иже от них студа трепещем. Сего ради боимся, всем страждем мучение. Иже бо студа человеческаго бояся ныне токмо, Бога зряща не срамляяся содеяти что безместно, ниже не хотя покаятися и преложитися, во он день не пред единым и другим, но вселенней всей зрящи обличается. Якоже бо и благих действ, и таковых велие позорище тамо седит, яже овец и козлищ притча да накажет тя. И блаженныи Павел глаголя: Подобает бо нам, рече, предстати пред судищем Христовым, да приимет кождо, яже с телом елико содея, или благо или зло. И паки: Яко явит сокровенная тмы. Содеял ли еси что лукаво; или помыслил еси, и крыеши человека, но Бога не укрыеши. Но ничтоже сих тебе радение бысть, очеса же человеческие сие тебе. Темже убо помысли, яко ниже человек можеши утаитися в день он, вся бо яко во образе тогда станут пред очима нашима, яко самоосуждену коемуждо быти. Ниже: Молю убо, аще и ни един же увидит наша дела, кождо нас во свою совесть внити, и посадити Судию помысла, и на среду привести согрешения. И аще не хощет обличити во он страшныи день, да исцеляет уже язвы, да налагает врачевания покаяния. Лет бо безчисленных исполненному язв отъити здравствующу. Аще бо оставите, рече, оставятся вам грехи. Якоже бо в крещении грехи погружаемыя, не ктому являются: сице и сия исчезнут, аще восхощет покаятися. есть же еже не ктому тожде творити. Иже бо теми же начиная, уподобися псу к своей блевотины возвращающуся. Подобает убо отступати и деянием и разумом дерзнутых: и отступившим и врачевания налагати язвам сопротивная грехом. Яково же что глаголю: похитил ли еси; или лихоимствовал; отступи хищения, и наложи милостыню язве. Соблудил ли еси; отступи от блуда, и наложи чистоту в среду. зле ли рекл еси брату; и вредил еси; престани оболгуя и оглаголуя, и наложи любомудрие. И на коеждо согрешенных нами сице да творим, и да престаем просте согрешения, наста бо прочее, наста испытания время, но к концу прочее приближается. Ниже: Темже и Павел глаголаше: Господь близ, не пецытеся. Ниже бо много остает скончанию время, но к концу прочее мир тщится. Сие рати являет, сие скорби, сие труси, сие любовь иссякшая. Якоже бо тело от души разделяющося, и близ сущо скончания, безчисленная привлачает озлобления, и дому хотящу пасти, много обыче припадати и от крова и от стен. сице и вселенныя близ, и при дверех скончания стоит, и сего ради безчисленная разсеяшася всюду злая. Аще бо тогда Господь близ, много паче ныне близ. Аще прежде триех сот лет, егда сия глаголаше, исполнение лет время оно нарицаше Павел, много паче настоящее. Но негли за сие самое неверуют нецыи, и убо сего ради веровати подобает паче. Откуду убо ведаеши, о человече, яко не близ есть кончина, и помале времени срящут реченная. Якоже бо лету конец не последнии день глаголем быти, но и последнии месяц, аще и тридесять днии имеет: сице и толиких лет аще и четыреста лет конец реку, не погрешу, якоже оттоле провозглашаше конец. дозде Златоустый.

Темже убо слышав сия, яко на конец отлагающии покаяние, множицею отходят без покаяния же аще кто умрет, лучше бы ему не родится, яко над таковым не повелевает церковь святая погребения пети, ни приношения зань приносити. чесо ради, о возлюбленне отлагаеши покаяние к смертному часу? Чесо ради не абие обратився покаешися? да не како не готова тя суща нашед час смертный аки тать похитит, и тако отъидеши на место мучения. Негли того ради отлагаеши покаяние к последнему издыханию, яко не хощеши простолюдину сущу христианину покаятися? Почто? Того ли ради, яко не имать рукоположения, не имать власти от архиерея, во еже исповедывати? Аз же тя вопрошаю, рцы убо ми? Аще бы кто от сущих христиан прилучился в римстей стране быти, в ней же всякому не неизвестно есть, яко архиереи, и иереи, и иноцы суть еретицы, ему же бы нужда воспоследовала, [смерти находящей] во еже исповедатися, идеже несть возможно отнюд обрести, ни единаго архиерея, или иерея, или инока, православносиятелнаго, кроме некоторых мирян, иже в тайне веру христианскую содержат, иже святоотеческое православие ненарушительне соблюдают, что убо кому паче должен есть исповедатися? священнику ли священнический точию на себе образ носящу, священства всячески чюжду, сущу еретику? или мирянину сущу христианину? Речеши ли священнику, аще и еретик есть? Како же священник еретик сый может кающагося согрешения связати или разрешити, егда сам от святыя церкве отлучен и клятве предан, в нем же дух нечистый сатанин живет? Кроме бо благодати Святаго Духа ничтоже кому сотворити может от священных [Иосиф Волоколамский, слово 12]. яве яко не может. аще не может разрешити согрешения кающагося, яко от святыя церкве отлучен и клятве предан есть, то вскую таковому и исповедатися. Остается прочее яко лучше есть мирянину сущу христианину, аще и не имать дара рукоположения; но имать дар Духа Святаго, от самаго Спаса Христа чрез апостолов, по сказанию Григория Солуньскаго, дарованный, не имать власть от архиерея ко исповеданию; но имать власть от превышшаго архиереов Архиерея Христа Бога вданную, во еже кающихся согрешения вязати и решити. убо лучши есть исповедатися мирянину сущу христианину, нежели священнику еретику.

Глава, 16.

О связании и разрешении кающихся человек.

К сим же божественнии отцы повелевают духовным мужем исповедати согрешения, и сказуют быти добро, но не без искуса и не разсмотрительне о сих залежащим, да не како безсловеснаго ради милования, или безвременнаго ради и нехудожественнаго продолжителства запрещении, нерадяща и не соболезнующа, или ленива и разслабленна соделает кающагося. Сице о сем блаженный Анастасий Синайский вопросоотвещателне завещевает глаголя [преп. Никон Черныя горы, слово 51]: [Вопрос: Добро ли убо есть еже исповедовати грехи духовным мужем? Ответ: Добро и зело полезно, но не еже без искуса и невежественне о сих сущим, да не ради безсловеснаго милования и смотрения. или безвременнаго ради и нехудожнаго продолжения запрещения нерадива и неболезнива, или ленива и ослабленна тя соделает. Аще обрящеши мужа духовна могуща тя уврачевати, без стыдения и с верою исповеждься ему яко Господеви, а не человеку]. Но ныне в нынешних мнимых духовных мужех, в священницех глаголю, кое обрящеши искуство в духовном действе, кое вежество в духовном врачевании? Милуют безсловесне кающихся, разрешают неразсмотряюще плодов покаяния согрешения исповедающихся. Чесо ради содевают я нерадивых о своем спасении, сотворяют презирателей заповедей Божиих, соделовают страха Божия неимущих в сердцы своем, отверзают путь ко всякому беззаконию, приуготовляют на жжение огню вечному. Святый Иоанн Златоустый вопиет [на послание к ефесеом]: [свяжи убо его зде, дондеже умолит Бога. не остави разрешена, да не вящше свяжется гневом Божиим. Аще бо ты не свяжеши, нерешимыя того ждут узы. да никтоже возлюбленнии суровства непщует быти таковое и безчеловечества, но конечнаго человеколюбия и тихости, и изряднаго врачевания, и многаго благодетельства]. Блаженный Иоанн Зинарь повелевает, в своих правилех отцу духовному с кающимися сести, и вопросити его, что может понести заповеди; сице бо глаголет: [Таже подобает с ним сести и вопрошати его, что может хранити заповеди: Не бо, еже хощет исповедаяйся, то даст ему отец, ниже паки елико ему лепо есть: но с разсмотрением подобает ему заповедати, елико может сохранити яко не по равенству грехов его достоин ему заповедь дати, ниже паки разсуждати о гресех, и о возрасте его и о количестве, но якоже рехом, по силе дати заповедь. А егда како о малых гресех возможет и множае заповеди сотворити, да не точию грехов прощение получит от Владыки Христа: но и венцем венчается по усердию своему. Или паки немощен сый и усердия не имыи, прием заповеди достойныя ему, абие разслабився, ни едино сотворит, во уныние от жалости впад, и вся остави. Не оставихом бо ся еже тяжкая облегчевати, ниже паки тяготы налагати на таковых. Иго бо Господне благо есть, и бремя его легко. Приидите бо ко Мне, рече, обремененнии, и Аз покою вас. (ниже:) Сия убо вся согрешения единому прилучаются единою, или дващи сотворити, а другому многащи, а другии даже и до самыя старости се делал есть, а иныи еще юну ему сущу пострада, и се ведением или неведением. Темже опасно подобает сия вся разумно разсуждати, и со испытанием. И аще единою бысть в юности, или дващи точию, буди ему покаяние пол лета, или исполненно лето. аще от малых кровосмешении бысть. Аще от великих, лепо есть вящьше сотворити заповеди]. правило 49. Святый же Иоанн зовомый Постник, патриарх Царя града, в своем Номоканоне глаголет: Подобает приемлющему сматряти и юность, и силы старости, и места различие, и нрава, имже лукавое содеяся, и аще с советом и предумышлением, или случаем бысть, и аще от вина, или от сытности, или инако, но или страхом, или нуждею, или нищетою, и прочая сим подобная. Послушаяй исповедания должен есть испытовати и час, и место, и житие, и мудрость, такожде и сокрушение, и срам, и печаль, и страх, и веры благопостояние, или непостояние, и милосердие, такожде наказанна, и невежду, богатаго, и нищаго, раба, и свободнаго, благороднаго, и безроднаго, и воина, и иже священное восприят одеяние, и иже в сих объумирает. Такожде и презирателя, и безстуднаго, и могущаго смиритися. Сия вся истязовати должен есть послушаяй исповедания, и сице казнити, сиречь епитимии налагати]. Обаче приемлющему исповедания должно быти разумну зело и разсудителну, да разумеет и смотрит како дати заповедь. Якоже о сем глаголет Иоанн Зинарь сице: [Подобает же отцу духовному разумну быти зело, и разсудителну, да разумеет и смотрит, како дати заповеди; како пост; како ли поклоны; како ли молитвы. Понеже овии суть убозии, и от работы непрестают. Овии же воини, или раби под властию. а друзии по куплям ходяще в путех. а друзии старии и немощни. а друзии силни, друзии богатии, во всяком покои живуще и почивающе. Темже о всех сих лепо испытати, како коемуждо мощно есть дати заповеди. а друзии суть лениви, и таковии приемлют заповедь по делом и по грехом своим, еда како обленився, ни мало не сотворят от повеленнаго ему, и на вящшее зло паче будет ему. [Ниже:] И паки многогрешныи и ленивыи, леностию своею, поне мало совершит заповеди, еда како и той поне сице спасется, помалу, аще и помалу, а не доконца погубит себе]. правило 57.

Откуду святый Иоанн Постник, осмь приемлющему исповедания, принадлежащих до исповедающагося испытовати повелевает, сице глаголя [лист 52]: Веждь всякии духовниче, яко егда послушаеши исповедающагося, осмь облежащих грехов, истязовати должен еси. 1: Кто есть согрешивыи? сие есть, коего жительства; коликих лет; коея мудрости; коего чина и достоинства; елико бо степень высочайшии, толико есть падежь страшнейшии и неблагодарство вящшее. такоже лета зрительна суть, абие егда человек отрок начнет разумети, совесть его исправляти подобает. 2: Что согреши? аще злое заповеданное; или злое от рода своего; аще грех смертныи; аще повседневныи; о смертных бо гресех наипаче исповедатися подобает. 3: Где согреши? аще на месте святом, или простом; и прочая. 4: Колми согреши? си есть аще исповедайся, иных привлече словом, или образом злаго жития ко греху; или мздою приведе; сие бо есть дело диавольское. Иже бо соблазнит единаго от малейших, уне бо ему было жернов камень, и прочее, якоже Христос рече. Мф., 18. 5: Коль краты согреши? Аще обыкл есть к коему греху; или ни; обычай бо лукавыи не обладает греха, но паче обтяжает. И сего ради кождо число грехов своих должен есть исповести. 6: Почто согреши? си есть аще от немощи; аще от страсти; аще от неведения; или паки от избрания и совершеннаго произволения грех содеяся; Тяжчайши бо грех, иже от произволения нежели инако содеяся. 7: Како согреши? Аще по естеству; или противу; уби кого кто древом; аще мечем; нрав, коим грех содеяся, исповести должен. 8: Когда согреши? си есть, аще в пост; аще иногда; аще в день делателныи; аще в празднественныи; аще во дни или в нощи; аще в той час, егда друзии в церкви беху; и прочее. Сие бо облегчает и отягчает грех. сия вся со испытанием испытай, да ни сам преткнешися ни исповедающагося соблазниши, или погубиши. К сим же святый Иоанн Постник повелевает приемлющему исповедание веселым и тихим лицем приимати приходящих исповедатися, сице бо глаголет [Номоканон, лист 159]: Должен еси убо веселым и тихим лицем приимати, к тебе приходящих исповедатися, и ни един сетованныи, или тяжестныи показовати образ, или удивлятися, аще и тяжкая будут им согрешения: но наипаче сладким лицем призирати на ня, и глаголы привлачительными, якоже годе есть, к ним беседовати, яко да и сущия во глубине сердца их открыет ти грехи правилно исправляти же достоит их, и законно испытовати, якоже божественная и священная правила вещают, коемуждо даяти противу целения, по мере лиц и силе. Понеже и божественнии отци древнии, не токмо грешников кающихся отлучаху от причащения; но и труды и подвиги облагаху. Якоже о сем засвидетельствует Матфей Иеросалимский, сице глаголя [от книги Матфеовы, Потребник, лист 673]: Се же да будет разумно, яко святыи Василии, и прочии отци древнии, не точию грешников кающихся от святаго причащения отлучаху, но и труды и подвиги предаяху, паче же соборныя и обдержныя посты, бдения и молитвы церковныя на всяк день и нощь повелеша хранити и исполняти; К сему же и каноны покаяния налагаху, якоже есть в канонех Василиевых, 56, и 58, и 59, и 76, и 77; собора Ангкирскаго канона, 16., Григория Чюдотворца 10, Григория Нисскаго 11. В них же паче в 56-м узаконяется, яко да кающиися грешник, 4 лета плачется: сиречь вне церкви стоя, и входящих прося, да молятся о нем, грех свой исповедая. лет 5, в послушающих пребывая, сиречь в притворе церковном послушая божественных писании. лет 7, в припадающих, сиречь стоя в церкви за амвоном, и со оглашенными исходя. лета 4, с верными, сиречь стоя и моляся, обаче кроме причащения пребывая. Таже совершивше лета сия покаяния, таин святых причастится. Внемли зде, ни ли се есть покаяние и трудове плотстии: И зело убо есть, вместо поместных, наедине довлеют сия кающемуся, пребывати во вся дни в церкви чрез все правило, начен от полунощницы даже и до вечерни. К сему среду и пяток поститися, рыб и пития упивающагося не касатися. Такожде и вся великия посты целы хранити и трезвенно выну, не праздно же пребывати, и милостыню дати, нищих призывати, в домех же молитвою и чтением упражнятися, и грехом же вспять никакоже возвращатися. От отец же святых святыи патриарх глаголемый Постник, сухоядения придает грешником. Подобати возмнехом истинно кающимся, и житие благоразумное проходити, первыя злобы противосилное, и по мере воздержания возмеряти им, и времене покаяния умаление. До зде Матфей. Сего ради святый Иоанн Постник три определяет разсуждая памятствовати приемлющему исповедания, количество, и качество, и время. О них же глаголет тако [Потребник болшой, лист 674]: О духовниче, да не погрешиши, при глубоком разсуждении, сия три памятствуй: Первое: Количество: Много кто согреши, да множайшая постраждет. Второе: Качество: Да противное противными врачюются, чревонеистовство воздержанием, гордость смирением, немилосердие и скупость щедрым подаянием, и прочее. Третие: Время: Долго кто согрешаше, долго и казнится, паче же всех желание и произволение в кающемся зрително есть. Суть бо неции неискуснии от духовных отец, в действии духовнаго врачевания, иже смотряще на множество грехопадении, на блуды, и убийства, и иныя преестественныя грехи, тщатся противу коемуждо греху, неразсудительне налагати епитимию. Тации вначале не разумеют, яко Бог хощет всем спастися, таже и своей души пагубу наносят. еже явственно показует Иоанн Зинарь, сице глаголя [правило 57]: Зряще убо неции отци духовнии на множество грехов, на блуды, или на убийства, или на чрезъестественныя грехи, и хотяще противу коемуждо греху, без разсуждения полагати заповеди. Сии прежде убо Бога не ведят, якоже лепо есть, иже хощет всем спастися. Второе, и свою душю погубляют их ради. хотяй бо душю о Бозе очистити, самое оно человеколюбие Божие и милосердие подобает призывати, и нань уповати, иже нас ради грешных человек бысть Бог сыи, благ и благоутробен. Ибо и божественный Иоанн Златоустый, не количества лет епитимии налагаемыя на согрешающих повелевает истязовати, но исправления души кающихся смотрети. сице глаголет [на послан. к ефесеом]: Доволно сотвориши время наказания? колико, рцы ми? лето ли? или два? или три? Но не се ищу лет множество, но души исправление. Се убо покажи, аще умилишися, о нихже согрешиша; аще преложишася , и все бысть; дондеже бо се не будет, несть ползы от лет. ни бо аще многажды привязана бысть рана, ищем; но аще успе что привязание; Аще убо успе, и вмале времени, да не ктому належит привязание. Ащели же ничтоже успе, по десятих летех да належит. И устави сии разрешения будет связанному прибыток, аще сице о нас самех, и прочих братиях прилежит. Не к человечестей блюдем славе, или студу; но тамошнюю муку помышляюще, и прежде всех Бога раздражающе зело, покаяния приложим лечьбы, и к чистому приидем здравию вскоре.

Святый же Иоанн Постник, сицев устав запрещения всем, кроме раб и рабынь в запрещениях сущим полагает, сице глаголя [Потребник болшей, лист 136]: В понеделник убо и среду и пяток ясти масло миряном, рыбы же, или сыр, или яйца, или мясо, ни. во вторник же и в четверток вся ясти, кроме мяса, невозбранно. в суботу же и неделю ни запрещати ни в чем, или в снеди или в питии, в какове любо, но быти невозбраняему на вся, якоже и неимущу запрещения, сиречь и на мясо, и на вино, и на вся. Такоже и на вся праздники Господьския, и праздники пречистыя Богородицы, и родители ея, и 12 апостол, якову же прилучится память, и яков же есть день, быти невозбранну в снеди и питии запрещаемому, яко ни среды, ни пятка, или понеделника хранити, в таковыя праздники, такоже и Предтечевы, и 12 дней, и неделя пасхи, и иже по пятьдесятницы, сице быти и в тех всячески разрешену на вся, разве среды и пятка. Держати единообразно мирским убо от мяса, иноком же, в понеделник, и в среду, и в пяток, от сыра и яиц. Быти же и во двою неделю, предглашеннеи же и мясной невозбранно на вся, иноком убо сыр и яица, мирским же мясо, кроме двоих среды и пятка. Сия бо вся чисты тогда подобает держати, иже в великия впадшим согрешения, аще мощно, даже и до вечера поститися. Повелено бо есть и се божественными правилы, якоже многажды речеся, кроме предреченных праздник. [лист 674, 669] Аще кто вина пити во уреченныя дни не изволяет, годище и мы судихом отъяти едино, уставлению егову падению, от отец запрещения. аще же и в понеделник восхощет воздержатися от мяса, другое паки отпусти ему лето. а на сыр и яица, другое лето. Аще ли постится среду и пяток по божественным правилом, остави ему еще другое лето. Аще сыра и яиц, рыбы и масла воздержатися обещает, тогда на всякое воздержание единаго сицевых вида, едино лето отъяти. Внемли же и сему. егда обрящется человек благовейныи, и произволит творити неколико метании на нощеденства по силе своей отпусти ему едино лето от меры канона причасти. Аще произволит створити милостыню по силе своей, остави ему и другое лето. Такожде и ину добродетель аще сотворит, другое паки отпусти ему лето. Аще ли человек той нижае 30-ти лет есть, другое паки лето отпусти ему. Аще же есть и от двадесяти нижае, мнее запрещается. Аще же не изволит написанных, да исполнит цело нарекованная лета. Иоанна Постника сие есть разсуждение. Паче же оно 15 лет, глаголю же прелюбодейства, мужеложство нисходит даже до триех лет. Поистинне да постится вся целы три лета, сухоядение в 9 час, и поклоны многи, кроме субот и недель. Но како днесь обрящеши такова человека, да исполнит сицевой канон. елма же не может за злую похоть нашю и нерадение, поне от божественнаго причастия да удержимся, якоже божественнии отци уставиша. они бо о воздержании и о трудех, или ином чесом, о сицевых не радеша, разве точию о божественнем причастии. Аще ли обрящется подвижник, да держит оное правило, аще восхощет, сиречь Иоанна Постника по Матфею. Ведомо же буди, яко во многих летех, сиречь 15-х и 20-х, да сходиши, якоже рехом, в малейших же менше паки, изыдеши отнюд вне. Согрешение же блуда до 4-х лет, да отпустиши ему с каноны менше. среду же и пяток должни суть поститися вси и неимущии канонов, якоже имущих. Ибо всем благочестивым сие прилично есть, паче же и правило ко всем глаголет: да постятся в ты дни [прав. апостол. 69]. обаче за благоутробие Божие, и за произволение покаяния, оставляем едино лето покаятися хотящим, яко благочестие ныне наченшу.

Василий бо Великий в третием своем правиле, весма глаголет, истиннейшее целение, греха отшельствие, и еже воздержанием, и злостраданием плоть поработити, и покорити духови, тако бо совершенное нам каятися подаст целение своего указания.

Сего ради божественнии отци глаголют: Достоит же строителем душ обое ведети, и яже испытания, и яже обычай. И иже убо приемлют испытание испытающих, потому строити их, аще ли ожесточаются, последовати обычаю схождения [Номоканон, лист 2], Обаче годе есть не точию словесы от устен, но и писмены грехи и без закона обличати, и запрещати, да и грешницы покаяние восприимут, а бес посрамится.