Часть первая.

Предел третий.

От ересей ради покрещевании.

 

Древле убо святая православнокафолическая церковь, от еретик приходящих ко истинней христианьстей вере, не токмо единопогружателнаго ради крещения, или поливателнаго, но и мерзских ради ересей, предопределивши уставила, второе святым крещением от скверн ересских очищати. каковых ересей многи отрасли, в нынешней великороссийстей церкви, отнележе Никон святую древлеправославную веру изпревратив премени, прозябше обретающыяся и в сутствующыя зрим. кия пребирающе разсмотряем, каковых и киих суть еретик породы; и аще обращающихся от них их ради, ко благочестивей вере, по священным священных апостол, и богоносных отец правилом, лепо есть паки святым крещением, аще и погружательне крещени освящати.

 

Глава, 1.

О еже что есть ересь.

Во первых ведателно есть, что есть ересь? ересь по всем авктором яко древнейшим тако и новейшим, есть самомненное избрание, и еже не тожде со святыми отцы мудрствовати. Сице в книзе Реторице повествует [третие местоимение, толк.]: [ересь убо сказуется от греческаго языка, самомненное избрание, егда кто свое мнение любит]. подобне и святый Афанасий Великий глаголет [Скрижаль, лист 28]: [ересь глаголется, от еже избрати что свое, и сему последовати]. Паки, ересь нарицается мерзость запустения, о ней же в велицем Катихисисе, о последних летех пиша повествует: [Мерзость запустения станет на месте святе, сиречь, егда обладает нечестивая ересь церкви святыя]. Паки в книзе Реторице глаголет: [в коемждо роде содержится ересь во лже]. в книзе же Щите веры глаголет: [еже убо нетожде со святыми отцы мудрствовати беда велия и ересь]. И толь люта, толь ядовита есть ересь, яко якоже гагрена все, аще у коего обрящется человека, поядает тело, тщится все тело церкве растлити, и доконца благочестие истребити. [Реторица, третие местоимение, ниже]: [не тако бо зелным и свирепым гонением и идолослужением, якоже ересию умалися верных собрание]. О ней же и киевских училищ ректор Феофан глаголет [Феофан архиеп. Новгородский, в книзе Реторице]: [обрящеши ересь помрачающую день спасения, время благоприятно оскверняющую святая места, пособием диавола, и оружною силою свое учение проповедающую, знаменанную во Иоанновом Откровении, и Данииловом многовидными страшилами]. книга Реторика. И толико есть мерзска, толико ненавидима Богу, яко егда кто ересию окаляся, аще и мученическую смерть приимет, не имать спасен быти. Явственно о сем в той же книзе Реторице поведает. сице глаголя: [Яко ниже самыя мученици, аще и много страдали, а ересию повреждени, спастися не могут]. тем же и глаголет: [еже убо не тожде со святыми отцы мудрствовати, беда велия и ересь]. книга Щит веры. Каково самомненное избрание, и не тожде со святыми отцы мудрствование, еже глаголется ересь, в нынешней великороссийстей церкви, по премногу обретается, о нем же явлено абие имать быти.

Глава, 2.

О еже каковы ереси в великороссийстей церкви содержатся их же ради подобает обращающихся покрещевати.

Ересь первая нынешния великороссийския церкве есть, юже привнесе Никон, сопротивно святым отцем мудрствуя, подобно же арменом. армени убо, двою естеству во Христе не проповедуют, но едино. исповедающыя же два естества во Христе проклинают. и на кресте Божество страдати исповедуют. Якоже блаженный Иоанн Никейский в слове своем, и Иларион Мегленский обличают. и в Минеи четии, августа 30, в житии Иоанна патриарха. и Бароний лета 511, и 513. их же приходящих к соборней церкви, святый Иоанн митрополит Никейский, в слове своем, еже писа к Захарии соборному великия Армении, повелевает святым крещением совершенно крестити паки, сице глаголя [Кормчая, лист 636 и Никон Черныя горы, в слове 63 великия книги]: [Яко ни рукоположения имут, но чюжди суть всякаго рукоположения. тмами бо в ереси впадши, и от соборныя церкве отчюждившеся, и от кесарийския церкве поставления не приемлюще, како не суть всячески несвященнии, и безрукопоставлении; и иже от них крещаемии, отнюд язычницы некрещени]. еже утверждает и преподобный Никон Черныя горы, в слове 63, великия книги. имже согласно и ноконопоследствующии архиереи, и прочии вси российстии народи по новопечатным книгам, назнаменование себе слагают три первыя божественныя ипостаси, Отца, и Сына, и Святаго Духа. в коем своем триперстном сложении, двою естеств во Христе Бозе не изобразуют. совокуплением бо триех перстов, едино точию естество Святыя Троицы исповедается, двою же естеству Христову не изъявляется. исповедающыя двема перстома два естества во Христе Бозе анафеме предают [Скрижаль, лист 806]. и тако треми персты знаменающеся имиже три божественныя ипостаси исповедают, крест страдания на себе воображают, аки бы Божество на кресте страдало едино. чесо ради святая церковь не знаменающихся двема перстома, клятве предает, сице светлым гласом вопиющи: [Иже аще не знаменается двема персты, якоже и Христос, да будет проклят]. Стоглав, глава 31. И аще убо армен повелевают божественнии отцы паки святым крещением, приходящих к соборней церкви, очищати, яко нечестивво Божество Пресвятыя Троицы умствуют на кресте страдати. како не подобает и от новодействуемое имущих крещение, иже смудрствующе арменом, аще и не словесы, но самою вещию показуют божеством Троицу страдати на кресте, обращающихся ко благочестивей христианстей вере, паки совершенно святым крещением крестити? всяко подобает. слышим бо яко еретическое крещение несть крещение, но паче сквернение [Карф. прав. 73]. якоже в толковании 19 правила, перваго вселенскаго собора явствует [Потребник, лист 575]: [Первое бо крещение несть крещение, понеже еретическо бе]. сие же прияша святии отцы от самых самовидец Слову и премудрости божественных апостол, еже еретическое крещение не в крещение вменяти. ибо божественнии апостоли тако в своем правиле запечатлеша [прав. святых апостол, 46]: [Епископ или презвитер, или диакон, аще еретическое приимет крещение, или жертву, таковыи да извержется]. и аще тако есть, убо безпрекословне подобает паки святым крещением крестити.

2: Юже привведе Никон. несогласно святым отцем мудрствуя, согласно же Евтиху и Диоскору. ибо Евтих и Диоскор, по сказанию 4-го вселенскаго собора [Кормчая в предисловии 4-го собора, лист 93], Господа нашего Iсуса Христа, единосущна убо Отцу исповедаста, о вочеловечении же Его хулу глаголаста. и бежаста Несториева разделения, два сына глаголющаго, и во ино зло от разделения впадоста. ибо двема естествома, божеству же и человечеству, по совокуплению убо смеситися, и во едино сотворитися естество, нечестиво проповедаста. их же от ереси их обращающихся, ко святей соборней апостольстей церкви, Тимофей презвитер великия церкве во изложении о приходящих от ереси, к благочестивей вере, исчитая еретик имена, повелевает крестити, сице глаголя [Кормчая, лист … на обор.]: [и несторианы же, и евтихианисты, и севирианы, и иже от подобных им ересей, подобает им творити записания, и проклинати им свою ересь, и Нестория и Евтихия, и Диоскора, и Севира, и прочия началники таковым ересем, иже тех мудрствующыя, и вся яже прежде воспомянутыя ереси, и тако восприимати им святое крещение]. Подобне сим и Никону последствующии, в сложении перстов, обою таинству веры изъявление, и согласно святым богословцем правоверное исповедание древлеправославныя церкве [треми бо сложенными персты, таинство Святыя единосущныя Троицы исповедается, двема же совокупленнома перстома, таинство смотрения Христова, во двою естеству, во единой же ипостаси изображается, якоже святии, Феодорит, Максим Грек, и Петр Дамаскин, и прочии явственно научают]. По новопечатным книгам, несторианьским разделением порицающе, и ертичеством неправедно хульствующе проклинают. и онаго аки несторианскаго разделения бежаша. сами же в сложении трех перстов, коими равенство триех ипостасей, соединением тех же перстов, единосуществие Святыя Троицы исповедающе, теми же перстами, в том же соединении, и смотрение воплощения Слова Божия изъявляти мудрствуют, сливающе воедино естество. якоже во Псалтырех новопечатных в полдесть явствует [Псалтырь новопечатная в полдесть. Скрижаль, лист 806]: [Яко во оном триперстном сложении заключается вся тайна Святыя Троицы, вкупе и смотрение воплощения]. такожде и в Скрижали [лист 99 и 409]: [Да не отлагаем оба таиньства первыми великими персты исповедати Святыя Троицы, глаголю и смотрения Бога Слова]. и паки: [Умно услышим. да не прелщаемся сугуба быти Христа]. якоже Евтих и Диоскор. в каковом новопечатных книг новоучителстве, еже в трие перстов совокуплении, три божественныя испостаси изъявляюще, ту же и воплощение Сына Божия изобразующе слиятелно и нечестиво во едино естество божество и человечество смешающе, подобно Евтиху и Диоскору, проповедуют. Чесо ради и от новодействуемое имущих крещение, яко от евтихианистов и диоскоритов приходящих к истинней христианстей вере, подобает паки от ересей их совершенно святым крещением очищати. Негли речет кто, яко правило 95 шестаго вселенскаго собора, диоскорян и евтихиан, по проклятии своих им ересей, повелевают точию миром помазовати, сице бо глаголет [Кормчая, глава 17, лист 205]: [Обращающихся от еретик, сице приемлем, арианы, македонианы, и наватианы же, иже и чистии именуются: несторианы, и четыредесятники, иже суть средницы, и аполинарианы, и евтихианы, и северианы, и иже от подобных им ересей, проклинающыя вся ереси, и с ними и свою, помазуем святым миром, темена, очи, ноздри, уста, уши, и знаменающе я глаголем, печать дара Святаго Духа]. Кормчая, глава 17. Вемы убо известно вемы, яко сие правило от именованных в нем еретик, обращающихся к православней вере, повелевает точию миром помазовати. но не просто ниже туне. понеже бо по сказанию Матфея Иеросалимскаго [Матфей Властарь, в правиле 47 свв. апп. состав 2, глава 1]: [миропомазание часть крещения есть. явление бо и сие и оно погребения и воскресения]. имже бо мажущиися освящаются, якоже сказует Матфей Властарь в правиле 47, иже в Лаодикии собора, сице глаголя: [Лаодикийскаго же, 47, и святым помазовати миром просвещаемых повелевает, себо молитвами и призыванием Святаго Духа освящаемо помазующих освящает, и причастники Христова небеснаго царьствия устрояет]. состав 2. Аз же вопрошаю, рцы ми, что подобает, егда не обретается миро, со от еретик обращающимися творити? понеже святое миро от единаго точию архиерея освящается, якоже глаголет святый Симеон Солунский: [Ныне же вместо рук, то освященныи именуемыи мир, а освящающиися не от священников, но от патриархов и архиереов священными молитвами, и благословеньми. Ниже: миро же не елей просто, но освященными молитвами в жертвенике от архиереов Христовых]. глава 43. убо ли тако просто приимати, всяко обрящется приемляй таковых под запрещением правил святых апостол, 46, и 47. ибо оная повелевают от еретик приходящих без изъятия покрещевати. и святый Василий Великий светило церковное, в первом своем правиле глаголет [Кормчая, лист 224]: [от еретика крещение не приятно]. сии же не беша раскольницы, но еретицы, по сказанию 95 правила, 6-го вселенскаго собора.

Сего ради и блаженный Тмофей повелевает от ереси их обращающихся покрещевати. И аще убо тогда, егда архиереи благочестивии быша, егда святое миро от освященных архиереов, освящаемо в церквах содержашеся, Тимофей евтихиан и диоскоритян, обращающихся от ереси их, повелевает покрещевати. колми паче ныне, от новодействуемое имущих крещение евтихианом и диоскоритяном смудрствующим, в толикое нужды время, егда благочестивых архиереов не обретается, иже бы святое миро освятили, егда православных священников несть, иже бы оным помазующе я освящали, безотрочне подобает, святым крещением от ереси их очищати.

3: Нынешния великороссийския церкве ересь, юже привсади Никон, сопротивно святым отцем мудрствуя, подобно же единоволником. якоже убо единоволцы едину точию волю исповедаху быти в Господе нашем Iсусе Христе, и едино хотение [януария в 21 день, в житии преп. Максима Исповедника]. родижеся та ересь ис преждебывшия ереси Евтихиевы, яже едино токмо естество во Христе быти блядословяше, сопротивно православному исповеданию утверждающему два в Господе Бозе нашем воплощеннем быти естества, такожде и две воли, и два хотения, и действа два особно коегождо естества. обаче во едином лице Христове. не во двойце естестве несмесне познаваемыи. произыде же от ияковит, сицевым образом [Бароний лето Господне 629; Ираклия 20 лист 751; Феофан и Кедрин в летописи иаковитов патриарх]: царю Ираклию живущу во Иераполе, прииде к нему патриарх ияковитов Афанасии. и наченшейся о вере беседе, обещася ему кесарь дати епископство во Антиохии, аще Халкидонский собор приимет, и два естества во Христе Бозе нашем исповесть. он же абие обещася сие сотворити, но лестно, и до времени кесаря прелщая. ниже: Егда бо ложно прия собор Халкидонскии той Афанасии, вопроси кесаря: аз уже [рече] два естества во Христе исповедую, о воле же и действии, едина ли есть, или две? кесарь не умея на сие отвещати, вопроси Сергия Константинопольскаго патриарха, иже сущь и от родителей ияковитов отписа: яко едину волю, и действо едино, подобает исповедати в Господе нашем Iсусе Христе. Ниже: Такожде оныи ияковитов Афанасии, с радостию на сие преклонися, ибо по его ереси бяше сие. идеже бо едино есть естество, тамо и воля едина. Бароний, лето Господне 629.

Которых ияковитов, Тимофей презвитер великия церкви, во изложении о приходящих от ересей, к соборней церкви повелевает покрещевати, сице глаголя [Кормчая, лист 635]: [и несторианы же, и евтихианисты и северианы, и иже от подобных им ересей, подобает им творити записания и проклинати свою ересь, и Нестория, и Евтихия, и Диоскора, и Севира, и прочия началники тем ересем, иже тех мудрствующыя, и вся яже прежде помянутыя ереси: и тако воспринимати им святое крещение]. зде не видится воспоминати иаковит. но выше в том же изложении исчисляя еретиков именословне по Севире воспомяну иаковит. зде же по Севире рече и прочия, сокращенне. откуду явственно показуется, яко подобает и единоволников паки крестити. понеже ересь их есть прозябение иаковит, порождение же Евтихово. и преподобный Максим Исповедник глаголет: [Иже сами от себе прокляти суть, и от поместнаго собора бывшаго в Риме извержени, и от священства отчюждени. тии кая совершают таинства, и который дух приходит на тех]. Минея четия, генваря в 21 день, в житии. О таковых бо Иоанн Никейский митрополит, страшно вопиет глаголя: [Аще бо тмократицею прокляти бывше, и диаволу предани, како от анафем и от клятв благословение изыдет и како диавола духовное и святое дело совершается?]. в слове на армены. Согласно единоволником и никонопоследствующии, по новопечатным книгам, отринувше вседоброе исповедание древлеправославныя церкве еже двема перстома занменатися, в коем знаменовании два естества Христова исповедаются, божественное и человеческое, и две воли, и два хотения, и два действа, вместо оного новоуставиша, три первыя персты назнаменование крестное слагати, в коем триех перст сложении, едино точию естество божественное Святыя Троицы исповедается, двоих же естеств Христовых, божественнаго и человеческаго не изъявляюще же двою естеству, не исповедуют двою волю, и двою хотению, и действу двою. и тако едино естество во Христе Бозе исповедающе, аще и не словесы, но самеми вещьми показующе, в триперстном своем сложении божественное, едину волю, едино хотение, и едино действо исповедают божественное, человеческаго ни. но святая древлеправославная церковь не исповедующих дву существу, и дву волю, во Христе Бозе проклятию предает, сице вопиющи [Потребник, лист 323]: [Не исповедующеи дву естеству, и дву волю, един же состав при Господе нашем Iсусе Христе, ни исповедующе ни приемлюще, да будут прокляти]. елма же убо единоволников повелевает обращающихся ко святей церкви покрещевати: како от новодействуемое имущих крещение, смудрствующих единоволником, приходящих ко истинней христианстей вере не подобает паки совершенно святым крещением крестити? зело подобает.

4: Нынешния великороссийския церкве ересь, юже возрасти Никон, противомудрствуя святым отцем, согласно же еретиком [Потребник, лист 322], Евтиху, Диоскору, Симону, Монтану, Маненту, Маркиону, Арию, Евномию, Македонию, Аполинарию, Павлу Самосадскому, Савелию, Петру гугнивому, Киру, Макарию, Петру, Оригену, Дидиму, и прочим сим подобным, иже неправо мудрствоваша о Святей Троице, и о воплощении Сына Божия [Кормчая в толк. прав. 1 Василия Вел., лист 224; и Матфей правильник, в главе 2, перваго состава]. от них же ови убо о Божестве неправо мудрствующе преткнушася, яко монтанисты, манентиане, и савелиане, иже три составы единосущнаго Божества: во едино лице смешающе нечестиве сливаху. овии же о вочеловечении Христове, яко Арий, Евномий, Павел Самосатский, иже Сына Божия не единосущна Отцу, но тварь а не творца злочестивии исповедаху. ови едино естество во Христе Бозе умствующе проповедаху, яко Евтих и Диоскор. инии же едину волю, едино хотение, и действо едино в Господе нашем Iсусе Христе, исповедаху, яко Кир, Макарий, и Петр. их же всех нечестиве смыслящих и мудрствующих, о Святей Троице, и о воплощении Сына Божия, святая православнокафолическая церковь яко гнилыя суще уды, отсекши от сообщения своего, клятве предает, сице вопиющи [Потребник, лист 322, и 323]: [Иже не исповедует Святыя Троицы, Отца и Сына и Святаго Духа, да будет проклят. не исповедающии дву естеству, и дву волю, един же состав при Господе нашем Iсусе Христе, не исповедающе не приемлюще, да будут прокляти]. и крещенных от них повеле, егда обратятся ко истинней христианстей вере, не яко крещеных, но яко же явствуют священная правила, сице правило перваго вселенскаго собора, 19. Тимофей прзвитер во изложении о приходящих от ересей. Алексий архидиакон в толковании на правило 95, шестаго вселенскаго собора. и в толковании на первое правило Василия Великаго [Кормчая, лист 40, и 634, и 205, и 225]. и Никон Черныя горы, в слове 63: в толковании на правило перваго собора 19, и в трех чинех. Ибо и нынешнии никонопоследствующии архиереи, и иереи, осуетившеся в мудровании своем отринуша великотаинственное предание, еже сам Христос Бог наш, егда возношашеся на небо, благословив ученики своя предаде, двема перстома благословляти [Лк. зач. 114]. в коем благословении оба таинства православныя веры, вседобре и богатовидно исповедаются, совокуплением бо триех перстов, великаго и двоих последних, тайна Святыя Троицы изъявляется. сложением же двох, указателнаго и великосредняго, тайна самого Господа нашего Iсуса Христа, во двою истеству познаваемаго, разумеется. еже и святый апостол Лука на образе Богоматере вещию изобразив показует [Тихвинская икона Богоматере]: написа бо у Христа благословлящуя руку [якоже история [о Тихвинской иконе] свидетельствует], три убо персты совокуплены воедино, по образу неразделимыя Троицы, яко сыи от Троицы един воплощься от Девы, не разлучися от Отца и Духа. два же перста образуета божество Его и человечество.

Вместо же сего великотаинственнаго христопреданнаго православнаго благословения, благословляют вся таинства церковная и народы, пятию перстами, подобообразне римляном. римляне убо не двема персты, якоже Христос предаде благословляти, благословляют: но странно некако пятию персты. о них же явственно засвидетельствуется в древлепечатном Потребнице сице [лист 584]: [Пятию персты странно некако благословляют]. и понеже убо сопротивно Христову благословению благословляют: сего ради святая православнокафолическая церковь, благословение их клятве предает сице взывающи [Потребник, лист 597]: [Проклинаю иже в латинех творимое странно некако благословение пятмы персты]. Потребник в чине от ересей приходящих. В коем своем новопреданном пятиперстном подобообразном латином благословении отринуша оба таинства таинственнейшая, православныя веры. ибо не совокупляюще триех перст, великаго и двох последних, не исповедуют триех божественных испостасей. не слагающе же двух указателнаго и великосредняго, не исповедуют дву естеству во Христе сшедшуся, божества и человечества. но токмо литеры перстами изобразуют, ими же усилуются имя Iсус Христос изображати. и не токмо сами в благословении своем не изображают, таинств православныя веры, ни исповедуют: но и изображающыя я, и исповедающыя еретиками порицающе, проклинают и мучат сами проклятию подлежащии. святая бо древлеблагочестивая церковь, неблагословляющих двема персты проклятию отсылает, сице восклицающи [Потребник, лист 323 на обор.]: [Иже не крестит двема перстома, яко Христос, да будет проклят]. в чине от яковит.

Темже убо,  аще оных вышеименованных еретиков, священная правила повелевают, яко неправомудрствующих о Святей Троице, паки крестити, како сих от новодействуемое имущих крещение, неправославно о Святей Троице, и о воплощении Сына Божия мудрствующих, иже в благословении своем отринуша оба таинства, не исповедующих треми персты, трех божественных ипостасей, двема же, дву естеству во Христе Бозе сшедшуся, не подобает приходящих ко истинней христианстей вере, паки совершенно крестити? ей подобает.

5: Нынешния великороссийския церкве ересь, юже Никон насади, сопротивно святых отец преданием мудрствуя, согласно же римляном. ибо римляне треми персты, аще и несовокупленне, обаче треми крестное знамение на себе изображают сице: [Два убо перста указателныи и великосреднии, простерта имуще, полагают на главу и на живот. таже палцем внешнею страною полагают на левое рамо посем на правое. два же близсреднии и мизинец ко длани имут согбена]. Катихисис великий, глава.

Сие римлян знаменование, сопротивно святых апостол преданию, и древлеправославныя церкве содержанию, и святый Никифор Панагиот, обличая еретика латинщика кардинала Иоанна Азимита, засвидетельствует сице глаголя: [Почто не согбаеши три персты? но твориши крест обоими персты, и последи палцем внешнею страною, и не одеваешися оружием креста Господня, но совлачишися]. Минея четия Макария митрополита, месяца августа. Сего ради святая древлеправославная церковь крестное их знаменование, яко не по преданию святых апостол знаменающихся, осуждением проклятия облагает, сице вопиюще: [Проклинаю не истинно творящих крестное начертание, иже на своих лицах крест единем перстом начертают латини, яко монофелитяне, и тако причастницы ереси их обретаются, и тако творяще воображают крест вне себе, диаволим научением, идеже бы облещися в крест, они же совлекаются его]. Потребник, в чине от ересей приходящих [лист 597]. Сим последовательне и никонопоследствующии сопротивно древлеправославныя церкве содержанию, треми персты, указателным великосредним и палцем внешнею страною крест на себе изображают, два же перста близсредний и мизинец, ко длани приклонена имут. якоже свидетельствуют Псалтыри новопечатныя, и Скрижаль, на листе 739.

Святая же убо древлеблагочестивая церковь, не знаменующихся, двема перстома, клятве предает, тако гремящи: [Иже не крестится двема перстома, якоже и Христос, да будет проклят]. Потребник святейшаго Иова патриарха Московскаго.

6: Нынешния великороссийския церкве ересь, юже Никон привнесе, сопротивно святых отец преданию мудрствуя, согласно же латином. латини убо и шаровным строением пишут, и печатают, и соделовают крест от двою древу, на немже новодогматствующе, распятие Христово пишут странно и необычно, не по преданию святых отец, испревращенно сообешанием рук, и сжатыма дланьма. чесо ради святая древлеправославная церковь, в чине приятия латынь приходящих, еже Потребники при святейших патриарсех, Филарете, Иоасафе, и Иосифе изданий свидетельствуют, обличает и проклинает латины, яко за иныя ереси и новодогматствования, сице и за сие, яко пишут распятие Христово странно и необычно испревращено, висит не по подобию, и длани пригвождены, а персты не распростерты но сжаты [Потребник Иосифа патр., лист 600 на об.].

Сим подобне и последователие Никоновы, новомудрствующе о честнем и животворящем кресте, на нем же Христос Бог плотию распяся, иже бе тричастный, трисоставный, и четверочастный, вместо оного от двою древу соделанна научающе утверждают. на немже исповедуют распята быти Христа Бога нашего. якоже Димитрий митрополит Ростовский, в книге Розыске, в третией статии вторыя части, изъявляет глаголя: [Не на брынском осмоконечном Христос распяся, но на римском четвероконечном]. И Пращица во ответе, 115. Сие свое новомудрствование не согласно святым богословцем и всей древлеправославней церкви, не токмо словесы, но и самеми вещьми изъявляюще утверждают. распятие бо Христово пишут и печатают, на дводревнем кресте, подобно во всем латинским распятиям, яже у них нарицаются крыжи, сообешением рук, и сжатыма дланьма. якоже в новопечатных книгах, московскаго друку показуется. сице в Служебнице изданием при Адриане патриарсе, в лето, 7207, в новом завете в четверть листа, изданнем между патриаршеством, в лето 7210, пред Деяниями апостольскими, и в прочих. Святая убо древлеправославная церковь, дерзающих испревращати крестный образ проклятию предает. сице вопиют святии отцы, собравшиися в честней патриархии, святаго града Иеросалима, в тысящи четыреста пятьдесять и пять, глаголюще: [Иже убо дерзнет кто инако веровати, или развращати что от законоположенных, или крестнаго образа, или написания иконнаго образа шаровы, или ино что сущих во святей церкви держимых, по первым обычаем святых отец, и благочестивых царей. аще святители суть, да извержени будут и прокляти. аще ли же иноцы или простии людие, тоюжде клятвою осуждени будут, и святаго причащения да отлучатся]. Свиток многосложный.

7: Нынешния великороссийския церкве ересь, юже привнесе Никон, сопротивомудрствуя святым отцем, смудрствуя же еретиком римляном. римляне бо трижды глаголют аллилуия, в четвертое приглашают слава Тебе Боже. якоже о сем засвидетельствует преподобный и премудрый в богословцев Максим Грек, в книзе своей, в главе 88: [Еже бо трижды глаголати аллилуия, а в четвертое приглашати слава Тебе Боже, есть римскаго костела новопредание]. и священный священных всероссийских архиереов собор, бывый при царе Иоанне Васильевиче, в лето 7059. на нем же бяху дивный Макарий митрополит, елико святостию и житием словущий, толико в священном писании многотщателный, и от всея церкви препохвалный архиерей, и святоучении, Феодосий архиепископ Новгородский, и чюдотворный Акакий епископ Тверской, и прочии боголюбивии архиереи, и святии игумени и протопопы, и старцы пустыннии, в них же мнози в чюдесех и знамениих, богопрославлени быша, в соборней своей книзе Стоглаве, во главе 42, еже трижды глаголати на псалмопении аллилуия, а в четвертое приглашати слава Тебе Боже, поведает быти латинскую ересь. сего ради и запрещением запрети, дерзающим троити аллилуия, сице глаголя: [Известно же уведехом, от списателя жития преподобнаго отца нашего Ефросина чюдотворца Псковскаго, како его ради молитв святых извести и запрети пречистая Богородица, о трегубой аллилуии, и повеле православным христианом говорити сугубую аллилуия, а в третие слава Тебе Боже. и того ради отныне всем православным христианом, говорити двоегубое аллилуия, а в третие слава Тебе Боже, якоже святая соборная апостольская церковь имея предаде, а не трегубити аллилуия, якоже прежде сего во Пскове говаривали, и по многим местом, а в четвертое приговаривали слава Тебе Боже. сия несть православных предание, но латинская ересь, не славят бо Троицу, но четверят, и Святаго Духа глаголют от Отца и Сына исходяща, и тем раболепна Святаго творят. и того ради не подобает святыя аллилуия трегубити, но дважды глаголати аллилуия, а в третие слава Тебе Боже]. до зде Стоглав. споследствующе убо римляном и ревностнолюбителие новопреданий Никоновых, отвергше древлеправославныя церкве, ангелы преданное содержание, еже на псалмопении глаголати дважды аллилуия, а в третие приглашати слава Тебе Боже, глаголют Никоном уставленное трижды аллилуия, а в четвертое приглашают слава Тебе Боже. сицевое новопредательство и содержательство, чрез церковное предание, и учителство святых отец, новопреданное и содеянное, святая древлеблагочестивая церковь клятве предает, сице вопиюще: [вся, яже чрез церковнаго предания и учителства и воображения святых и приснопамятных отец, новосотворенная и содеянная, или по сем содеятися хотящая, анафема]. собор соединения [Кормчая, лист 641].

8: Нынешния великороссийския церкве ересь, юже насади Никон, противомудрствуя содержанию древлеправославныя церкве. ибо святая древлеблагочестивая церковь, обычай содержащи име, божественную литургию на седми просфирах совершати. первую полагаше за Господьский хлеб: вторую Пресвятыя Богородицы: третию за всех святых: четвертую за патриарха: пятую за царя: шестую за всех православных живых человек: седмую за усопших. о чесом явственно свидетелствуют святии, Симеон Фессалонитский [глава 92], и отцы афонстии [Номоканон, прав. 210]. Сии же новолюбителнии суще архиереи и иереи, отвергше предание и содержание, святыя кафолическия церкве, воспоследовавше Никонову новопредателству, совершают литургию на пяти просфирах. четвертую за патриарха, пятую за царя отложиша, якоже новоизданнии Служебницы явствуют, и Жезл новопечатный утверждает глаголя [часть 2, возобличение 19]: [Но лучше есть над пятию служити, во образ оныя трапезы, егда пятию хлебы, пять тысящь народа насыти. ибо болшее есть чюдо пятию хлебами четыре тысящи]. Но святая православнокафолическая церковь, смелостне дерзающих древния святых отец, и благочестивых царей обычаи превращати и изменяти, извергши из сана, клятвою облагает, сице гремящи: [А иже убо дерзнет кто инако веровати, или развращати что от законоположенных, (ниже) во святей церкви держимых, по первым обычаем святых отец, и благочестивых царей, аще ли святители суть да извержени будут и прокляти, аще ли иноцы, или простии людие, тоюже клятвою осуждени будут, и святаго причащения да отлучатся]. Свиток многосложный.

9: Нынешния великороссийския церкве ересь, юже привнесе Никон, несогласно мудрствуя святым отцем, согласно же римляном, римляне бо опресноки своя печатают двочастным крестом. сим последствующе и никонопоследствующии архиереи и иереи, печатают просфиры своя двочастным же крестом в четвероуголней сущим печати, без копия и трости. еже явственно видимо есть от новопечатных их книг, яже преводяще с греческих новых книг, кия печатаются в латынских странах в Риме, в Паризе, и Венеции, во всем им согласно преводят и печатают, да всевсячески им уподобятся. якоже сами о себе свидетелствуют глаголюще: [Яко праведне и нерастленне печатают их латыни, от них же вся наша книги преводим, ничтоже прилагающе или отъемлюще, да совершенне им уподобимся]. Жезл, лист 54. [Креста убо образу от двою древу совокупляюще поклоняемся]. Скрижаль, лист 87. И ему же двочастному кресту покланяются, подобящеся римляном, сим сопротивно же святей церкви. ибо святая древлеправославная церковь, яко просфиры тако панагиарный хлеб, сице и артус, трисоставным крестом, в кругловидней печати, с надписанием евангельским: Се Агнец Божии вземляи грехи мира, с копием и тростию печаташе. и не бо всуе ниже туне сице печаташе. понеже действо проскомидии есть воспоминание страстей Христовых. Сего ради якоже сам Христос распяся на трисоставнем кресте, сице и просфира грядущая образовати самого Христа годствует трисоставным же крестом печататися. ибо без сего трисоставнаго креста Господня, его же честною кровию освяти, не может на проскомидии предложенный хлеб пресуществитися в плоть Христову. сице о сем вопиющу Августину: [Что есть, еже вси ведают знамение Христово, разве крест Христов. которое знамение аще не употреблено будет, или на челах верующих, или в той воде, от нея же раждаемся, или в елеи, имже миропомазуемся, или в жертве еюже питаемся, ничтоже от сих право совершается]. глава 22. и кругловидство бо ея показует [Симеон Солунский, книга 1, глава 88]: [безначалнаго и безконечнаго Слова, воплощенна всем вкупе показующи, и Бога суща, и по нас явльшагося, и воплотившагося поистинне и страдавша]. Но виждь ми, како сих в толь велию ересь впадших, иже самосовершителя всех таинств креста отвергоша, не подобает паки крестити? слышим бо святаго Василия Великаго, в 47 правиле, и Тимофея презвитера, в первом чине, водопредстателей, иже вина в литургии не приносят, но над водою единою служат, повелевающа обращающихся к соборней церкви паки крестити. и аще убо сих водопредстателей, яко отложивших во святей литургии вино в потир вливати, но над единою водою служащих, повелеваюта крестити: како от новодействуемое крещение имущих, иже в божественней литургии, самосовершителя креста Господня, от печатания просфир отвергоша, еже не меньшая есть, но и вящшая онаго отставления вина в литургии ересь, зане сим трисоставным крестом Господним, хлеб и вино приносимое в литургии, пресуществляется в тело и кровь Христову, сице святому Симеону Солунскому вопиющу [глава 62]: [без креста Господня ничтоже совершается божественных таин. тем же и совершеннотворитель сам крест]. и Иосиф Фессалонитский взывает [слово в неделю 3-ю поста]: [Тобою тело и кровь Христову приемлем]. не подобает ко истинней христианстей вере приходящих совершенно паки святым крещением крестити? зело подобает.

10: Нынешния великороссийския церкве ересь, юже вкорени Никон сопротивомудрствуя святых отец содержанию, согласно же римляном. понеже убо римляне, егда возгласит на литургии священник, словеса Господня: Приидите и ядите, сие есть тело Мое, покланяются. зело утверждает сие и от новых Иоаким патриарх Московский, сице глаголя [Щит веры]: [Сие поклонение ново прииде в Россию, от латинских обычаев]. имже согласующеся, и усердно желателнии любители новопредателств Никоновых, к оным словесам Господним, егда возгласит я священник, покланяются, ибо споследствующе римляном, аще словесы и не изъявляют себе исповедати, якобы онеми словесы Господними единеми точию, предложенный хлеб в тело Христово и вино в кровь Его претворяются. обаче самою вещию, самем си делом показуют себе самех исповедати, яко сими единеми словесы, прелагается предложенныи хлеб в тело, и вино в кровь Господню. сего ради аще и таятся, смудрствующе оным, противомудрствующе же святей древлеправославней церкви, покланяются на возглашение словес оных Господних. ибо святая древлеправославная церковь, содержащи исповедует, предложенным даром, хлебу пресуществлятися в тело, и вину в кровь Господню, знамением креста, и пришествием Святаго Духа. сего ради покланяющиися на воспоминание оных словес Господних, не токмо от древлеблагочестивыя церкве, но и от нынешних некоторых, анафеме предаются. сице взывает Иоаким патриарх Московский [Щит веры, в слове поучителном, на соборе глаголанном, в лето 7198, о поклонех]: [Обычай той есть западнаго костела, отпадшаго благочестия. восточней же церкви, еяже предания чины и обычаи непретворно вси долженствуем хранити, не есть ниже бысть когда, еже в то время поклонятися. (ниже) им же в то время покланятися. (ниже) имже в то время по древнему отцев наших обычаю, отнюд не подобает быти, ниже сообщницы латином будем. да не с ними осуждени будем от Бога, отчюждающеся церкве православныя, матере нашея искренния. глаголют бо закони священнии: иже аще и малейшее что кафолическия церкве подвизая, есть еретик, и Златоуст святыи глаголет: веру превратиша, и мало нечто ново творят. и паки тойже: в вере и мало изменяющим анафема]. книга Щит веры.

11: Нынешния великороссийския церкве ересь, юже насади Никон, сопротивно святых отец преданием мудрствуя, смудрствуя же еретиком непоклонником. ибо якоже еретицы непоклонницы, о них же святый Иоанн Дамаскин, во изложениих своих, пиша о поклонех земных великаго поста в церкви бывающих, воспоминает, никогда же хотят колен своих в молитвах к Богу преклонити. сице и сии никонопоследствующии, во святый и великий пост, вместо, идеже святая древлеправославная церковь уставила полагати земныя поклоны, полагают поясныя. якоже творец Пращицы объявляя глаголет: [Во всех древних уставех и триодях, во святыи и великии пост, во всем церковном последовании, на трисвятое, на приидете поклонимся, и на всякую славу Псалтыри, на аллилуия, поклонов земных не положено]. ответ 147. Но святая древлеправославная церковь, не токмо повелевает во святый и великий пост, на трисвятое, на приидете поклонимся, и на всякую славу Псалтыри, на аллилуия, и на честнейшую, 17, поклонов, земныя полагати, еже древлепечатныя писменныя харатейныя уставы утверждают: но еще на не поклоняющыя колен в поклонении, во святый и великий пост, и тяжчайшая запрещения и клятвы полагает. яко же преподобный Никон Черныя горы, в слове 57, своея книги повествует. еже во Псалтырех древлепечатных в полдесть, изданных благословением святейшаго Иосифа патриарха Московскаго, со освященным собором, в лето 7154, напечатано сице: [Понеже убо по ненависти древняго нашего врага, и ратника диавола к роду человеческому, сии земнии поклоны, в нынешнее настоящее время, от некиих иереов, иже страха Божия в себе не имут, презираеми бяху. и мнози поклонов не творят в церкви в великии пост, якоже устав повелевает, ово убо лености ради и небрежения, ово же безстрашия ради, и нечаяния будущаго страшнаго суда и вечьных мук. и не хотяще разумети, яко сии земнии поклоны повсюду во обще всем православным, иноком и мирским предани от святых апостол, и святых отец. яко да никако же сии презираеми бывают во святыи сии великии пост, но да и паче подвигнемся. еже исправити сие святых отец предание, сиречь коленное преклонение, якоже устав повелевает, а не разрушати, и вместо света тму возлюбити. проклято бо есть сие, и с еретики отвержено таковое злочестие, еже не творити поклонов до земли, в молитвах наших к Богу, в церкви во уреченныя дни, якоже глаголет Дамаскин во изложении своем, и воистинну убо збысться на сицевых, иже не хотят колен своих преклоняти в молитвах во уреченныя дни, или якоже устав повелевает. [ниже, лист 30] зане во мнозех вкоренися таковое нечестие и ересь, еже коленное непреклоняние во святыи и великии пост. [лист 35] обаче в первых речем о отпадших от церковнаго предания, таковых коленопреклонении, и с еретики отверженных. во изложении Дамаскинове, еже о ересех, начинается сия неколенопреклонная ересь 91, непоклонницы. сии на всяко время молитв своих колен не хотят преклонити, но стояще присно молитвы своя творят. и сия убо ересь зде предлежит нашему утвержению, егда непроизволяюще, или инако некако от десных украдаемся, и не хощем преклоняти колена, рекше кланятися в молитвах во уставленных днех. ибо всяко уклонение от православных велении, отпадение есть от соборныя апостольския церкве, якоже божественнии отцы глаголют, паче же и в сицевых. ибо управленнии посты, и повеленная коленопреклонения во управленных днех, образи нецыи суть православныя веры и непорочныя. и якоже во управленных постех, несть надесно или налево укланятися, якоже прежде речено бысть, тако и в коленопреклонениих, сиречь в земных поклонех, сих убо неизменно и неотложно полагати, во святыи и великии пост, устав святых отец повелевает. [лист 45] и градстии закони сице глаголют: яко еретик есть, и еретическим подлежит законом, и мало что уклоняяся от православныя веры. и Евлогии папа Александрийский вопиет: аще от угодных богоносным отцем поколебает что, не ктому се смотрение нарицаем, но преступление велению, и к Богу нечестие].

12: Нынешния великороссийския церкве ересь, юже привнесе Никон, противомудрствуя святых отец преданием смудрствуя же римляном. римляне бо стояще на коленех молитвы своя совершают. очесом в соборном ответе Дионисия митрополита Московскаго, с прочими архиереи на латынь изъявляется, идеже пишет тако [Соборник]: Что бо в латынех доброе уведел еси, (ниже) се ли есть смирение, и благочиние во святей церкви, еже папа их клячит на колену своею? (ниже) и вси падающе на колену свою клячат, до скончания богомерскаго пения их. подобне в книзе Артемия старца Острожскаго, на Симона Буднаго о ересех латынских. Четвертая в них ересь глаголемых непоклонителей, котории не покланяхуся по преданию церковному, якоже Господь во время прилежныя молитвы показал учеником, покланяя колена, и падая на своем лицы. (ниже) в лицемерной же их молитве, яко да не познани будут варварским обычаем постоят мало на коленех, яко и татарове. Сим подобне и никоновых преданий тщателнии хранителие, на Троицтней вечери на молитвах, и на преждесвященней литургии [не якоже древлеправославная церковь повелевает, колена преклоншим на землю с главами молитися, якоже засвидетельствуют древлепечатныя харатейныя и писменныя книги, ихже долготы слова убегающе, оставляем именословне зде предлагати]. на коленах стояще молятся. откуду святая древлеправославная церковь на дерзающих изменяти святыми отцы преданная, страшно вопиет взывающи: [храняще же и соблюдающе древнее предание соборныя церкве, и последующе преданием первым пределом, и законом святых и богоносных отец, и учитель наших, и любяще и приемлюще седмое число святых и вселенских соборов, темже и бывшия особныя соборы, их по местом, Святым Духом составленныя, ихже бо они проклятию предаша, проклинаем и мы, и прочая]. евангелие учителное, в неделю 1-ю поста.

13: Нынешния великороссийския церкве ересь, юже привнесе Никон, сопротивно святым отцем мудрствуя, согласно же римляном. якоже бо римляне сопротивоборствующе древним святым учителем, пишут Иоанна лице орле, а Марка лице львово. еже засвидетелствуют святейший Филарет патриарх Московский со всем освященным собором, и Иов митрополит Киевский с собором, во обличении Кирила Транквилиона, сице глаголюще: [Пишет о четырех евангелистех: Матфея лице человече, Марка львово, Луку телче, Иоанна лице орле, и сим мудрствует по римляном. римляне бо пишут Иоанна лице орле, а Марка лице львово, а не орле]. Сим подобне и последствующии Никонову мудрованию, изменивше древлецерковное предание, пишут Иоанну лицем орлим а Марка львовым. еже самая воображения вида в евангелиях печатных, и на иконах писанная показуют, сия и в книгах, в Скрижали на листе, 463, и в предисловии евангелия, мудрствующе исповедают. святая же древлеправославная церковь повелевает писати святых евангелистов, Матфея лицем человечим, Марка лицем орлим, Луку телчим, Иоанна львовым, сице святый Андрей Кесарийский в толковании Апокалипсии, о четырех животных виденных Богословом, разрешая сказует: [льву убо являющу мужество, и евангелие по Иоанну, якоже глаголет Ириней, за знаменателное того превечнаго царства. в начале бо бысть слово, проповеда. телцу же аки своими си довлеющу труды, правду, и по Луце евангелие, яко законне и священнически Христа родословившу. орлу же целомудрие [свидетельствуетбося сему животному любити сие] и евангелие по Марку, яко скращенное и от пророческаго Духа начинающу. человеку же мудрость, и евангелие по Матфею, яко естеством а не законом проповедавшее Христово рожество]. не тако убо мудрствующих, аще епископи суть, из сана измещет, прочих же от причащения отлучает, сице вопиющии: [Смеющих же прочее инако мудрствовати, или учити, или по богомерзских еретик церковная презирати предания, нова же некая разумевати, или отложити от чина церковнаго евангелие или знамение креста, (ниже) аще епископи суть или клирицы, изметати повелеваем, аще ли же иноцы суть, или белцы, от причащения да отлучатся]. евангелие воскресно, в неделю 1-ю поста.

14: Нынешния великороссийския церкве ересь, юже привнесоша никонопоследствующии архиереи, сопротивно святых отец преданием мудрствующе, согласно же римляном. римляне убо в живописателстве святых икон, древний обычай изменивше, живописуют образы, не по преданию святых, но от своего умствования. их же святый Симеон Фессалонитский в книзе своей обличая глаголет: [Яко подобает живо писати и благоговейно божественная, и благочестиво, и по преданному обычаю. что же ино у них кроме церковнаго обновися предания? (ниже) и святыя иконы кроме предания иным образом многажды живописуют их и украшают, еже противно святых икон есть паче, яко же шестаго вселенскаго собора шестое правило предлагает. ибо не живописати речет оное (правило) яже простейшим не ползуют, и еже кроме чина, неблагочестно, и отцы сие не приемлют]. глава 22. Сообразне римляном и никонопоследствующии живописцы, изменивше живописателства древний обычай, от святых апостол преданный, изобразующии подобие первообразнаго, иже неизменно в древлероссийстей церкви, до лет Никона храним бяше, по древним церкве преданием, пишут иконы не от древних святых чюдотворных образов подобии, греческих и российских, но от своеразсудителнаго смышления, вид плоти Спаса Христа, и прочих одебелевают, и в прочиих начертаниих не подобно древним святым иконам имеюще: но подобно латинским, и прочим иже в библиях напечатаны, и на полотнах малиованы изображениям изображают. ибо Пресвятую Богородицу уже обрученную мужу Иосифу праведному, и Христа Iсуса рождьшую, пишут непокровену главу имущу, и власы украшену. веруем бо яко Пресвятая Дево Богородица, прежде рожества дева, и в рожестве дева,  и по рожестве паки дева. сицевых бо новых видов церковь святая не приемлет. ибо святии апостоли, и святии отцы изображающии на иконах, яко Спаса Христа, и Пречистыя Богоматере, тако и святых образы, благоговейно, во умеренной тонкости, умиленным подобием писаху, якоже сами образи чюдотворнии древлегречестии и российстии, и самого евангелиста Луки писания показуют. иже убо не по преданию святых апостол, и священных отец пишут святыя иконы, сих святии отцы клятве предают, сице вопиюще: [Иже убо дерзнет кто инако веровати, или развратити что от законоположенных, или крестнаго образа или написания иконнаго образа шаровы, по первым обычаем святых отец, и благочестивых царей, аще ли святители суть, да извержени будут и прокляти. аще ли иноцы, или простии людие, тоюже клятвою осужени будут и святаго причащения да отлучатся]. свиток многосложный.

15: Нынешния великороссийския церкве ересь, юже породи Никон с прочими архиереи, сопротивно святых преданием мудрствуя, имя пресвятое Христа Спаса, с единою иотою пишемое охуливше, яко бы не знаменует Спасителя, но равноухаго, отвергоша. вместо же его вымыслиша новое и неслыханное имя, чрез иоту и иту пишемое Iисус. якоже Димитрий Ростовский, в книзе Розыске, в статии перьвой, первыя части пишет глаголя: [В руском же языке расколщики в две токмо силлябы глаголюще Iсус, не исповедуют Спасителя и Исцелителя душ наших, и вправду в них ин Iсус: неистиннаго бо Iисуса Спасителя и Исцелителя исповедуют, но некоего равноухаго Iсуса]. Подобне сему и в Пращице новопечатней, во ответе 146, напечатано, яко с единою иотою пишемое имя Iсус, не знаменует Спасителя, но равноухаго. но оле дерзости! оле смелости непреподобныя! како не убояшася, како не устрашишася, толь пресвятое имя Iсуса охулити, еже не человеки наречеся, но ангелом. ибо той явивыйся Иосифу во сне, рече: не убойся прияти Мариам жену твою, родит сына, и наречеши имя ему Iсус, еже есть Спас, Той бо спасет люди своя от грех их. сего ради и святая древлеправославная церковь, последствующи ангелову преданию, всюду пиша протолкует имя Iсус Спас. якоже в книзе древлехаратейней Кормчей, в вопросех явствует, глаголя: Вопрос: Что есть Iсус? Ответ: Iсус наречется Спас, спасая род человечь. Подобне в Катихисисе велицем, во главе первой, пространнее о сем изъясняет сице [глава 2]: Вопрос: Еврейское же слово паки Iсус како толкуется? Ответ: Iсус толкуется Спас, или Спаситель, сиречь Избавитель. Что убо еда ли святии древлеблагочестивии архиереи, чюдодействоваху равноухаго именем? еда ли святии велиции чюдотворцы равноухаго именем силы многи творяху? еда ли преподобнии и богоноснии отцы равноухаго именем Iсуса Христа, сего бо в молитве призываху, сего во устех присно имяху, сим именем с бесы боряхуся. по реченному: Iсусовым именем бий ратники, и прочая. Лествичник, слово 21. И како же вероваху, тако и исповедаху Iсуса Спасителя, якоже древлепечатныя писменныя и харатейныя, тако святых мужей и известных преводников и премудрых, книги и преводы, и святых чюдотворцев саморучная писания показуют. их же продолжения ради слова, на среду привносити зде оставляем: но отчасти имать речено быти в третией части. темже убо аще отступивше Iсуса, Ему же покланяется и припадает всяко колено небесных и земных и преисподних. аще отвергшеся Iсуса, Его же аще кто призывает без сумнения Духом и истиною спасен будет. аще отдалившеся Iсуса, о Нем же аще кто что  просит, от Отца небеснаго, вся приемлет. аще отчюждившеся Iсуса, Его же подобает всем верным присно имети в сердцех и во устнех, во всех делех своих, по апостолу Павлу глаголющему: аще творите слово, или делом, все во имя Господа Iсуса Христа творите, благодаряще Бога и Отца о Нем. новаго и неслыханнаго Iисуса, якоже Димитрий Ростовский глаголет вправду в них ин Iсус, приемше проповедают, Его же святии апостоли не проповедаша, новаго неслыханнаго Iисуса приемше веруют вонь, его же священнии богословцы писателными гласы не изъявиша. верующе же во инаго Iисуса, всяко веруют во инаго Христа, веруют и нехотяще во инаго бога. ибо святый Кирил Иеросалимский, во оглашении 9, пиша глаголет: [един есть Iсус Христос, имя чюдно пророки провозглашаемо. глаголет бо Исаия пророк: се Спас тебе приидет, имыи с собою мзду свою]. книга Кирила Иеросалимскаго древлеписменная. и аще убо един есть Iсус Христос истинный Бог, якоже и есть. сии же во инаго Iса Христа верующе исповедуют его бога, в него же и крещаются. како убо будет крещение их приятно, во инаго Iисуса крещающихся? аще ли речет кто крещению их приятну быти, да будет новопроповедумый ими ин Iисус Христос несть приятый, како возможно крещение их прияти? аще бо крещение, в нем же изобразуеши крещаяся погребение и воскресение, новопроповедуемаго Iисуса, приемлеши, всяко долженствуеши и самого Iисуса, ему же спогребаешися, в крещении, свосприяти. аще сего не приемлеши, убо ниже крещение приято да будет. убо от новодействуемое имущих крещение, приходящих ко благочестивей вере, подобает паки совершенно святым крещением крестити.

16: Нынешния великороссийския церкве ересь, юже самосмышленне породи Никон, сопротивомудрствуя преданием святых отец, есть неисповедание в молитве Сына Божия. святии бо отцы, Василий Великий, в завещании своем: Иоанн Златоустый, в Беседах апостольских, на послание к римляном, в нравоучении 8: и в евангелии воскресном, в неделю 17. Преподобный Иоанн Лествичник, в слове 15. Святейший патриарх Филофей Константина града, в предании ко ученику своему: Преподобный Симеон новый Богослов, в книзе своей в слове о молитве: Преподобный Григорий Синаит, в книзе своей, во втором слове о молитве: Преподобный Нил Сорский пустынножитель росийский, в книзе своего собрания, во втором слове: Преподобный Иосиф Волоколамский, в книзе своей, в седмом слове: Преподобный авва Дорофей в завещании ко ученику совему Досифею: Святый Григорий Двоеслов папа Римский во второй епистолии ко Льву царю, о поклонении святых икон: Святый Герман патриарх царя града, в слове о поклонении святых икон: Святый Симеон Фессалонитский, во главах 294, 296, и 297, и прочии святии, вси единогласно повелевают, аще наедине, глаголати: Господи Iсусе Христе Сыне Божии помилуй мя грешнаго. аще ли во обще, то: Господи Iсусе Христе Сыне Божии, помилуй нас. Сию молитву аньгелом Пахомию Великому преданную, святыми богословцы, и священными отцы на молении глаголати повеленную, яже всех есть изряднее, по святому Симеону Фессалонитскому [глава 294], яже от Спасителя в евангелии предана, вся обдержащи вкратце, евангельскаго разума силу, и Господа нашего Iсуса Христа Сына Божия спасителное призывание. о ней же многим иным труды быша преподобных отец наших, и златоглаголивому отцу во триех беседах о божественней молитве сей научающу. (ниже) зане молитва сия Святым Духом глаголется, якоже и Павел глаголет: никтоже может рещи Господа Iсуса, токмо во Святем Дусе, и от Бога есть глаголяи сию. всякии бо дух, иже исповедует господа Iсуса Христа в плоть пришедша, от Бога есть [во главе 296]. яже исповедание веры, и Духа Святаго подателная, и дарований божественных подателница, и чистота сердцу, изгоняет демонов и селение Iсуса Христа, и духовных помышлений и мыслей божественных источник, и грехов избавление, и душам исцелителница, и просвещения божественнаго подателница, и Божии милости студенец, и откровении и поучении божественных со смирением дарователница, едино спасителное носит, зане и спасителное в себе Божие носит имя, еже убо единое имя есть названо на нас Iсуса Христа Сына Божия. и несть ни в чем ином спастися нам, якоже рече апостол. сию, глаголю, молитву Никон с прочими архиереи отставиша, и глаголати не повелеша. вместо же оныя предаша новую глаголати, яже есть: Господи Iисусе Христе Боже наш помилуй нас. не хотящих же послушати, рекше оныя отставити, сея же прияти, клятвенным запрещением обложиша, якоже свиток соборный явствует. в чине напечатанном в Москве, лета 1720-го, како приимати староверцов, обращающихся волею или от принуждения, к нынешней российстей церкви, идеже пишет тако: [не глаголющих молитву, Господи Iисусе Христе Боже наш, сиречь глаголющих, Господи Iсусе Христе Сыне Божии помилуй нас. аки сквернейших еретиков проклинаю]. и аще они проклинают не приемлющих новыя их молитвы, всяко сами тмами прокляти суть, зане сопротивно святых отец учению, паче же всецерковному преданию учаще проклинают. всяк бо всуе проклиная, себе проклинает, глаголет Соломон. ибо на дерзающих пременяти, или прилагати, или отъимати от церковных содержаний что любо, седьмый святый собор, с прочими светлым гласом вопиет, глаголя: [Мы законы церковныя соблюдаем, мы пределы отеческия храним, мы прилагающих нечто, или отъемлющих от церкве проклинаем. и паки: Аще кто все предание церковное написанное и неписаное отметает, да будет анафема]. книга Кирилова, лист 371.

17: Нынешния великороссийския церкве ересь, юже насади Никон, сопротивомудрствуя святых отец учению, смудрствуя же Павлу Самосадскому. Павел бо Самосадский проста человека Христа нарицаше, сего ради прочитая во евангелии от Иоанна, во главе 5. разделяше стихи сице: И власть даст Ему и суд творити, яко Сын человечь есть. таже аки от инаго начала начиная глаголаше: не дивитеся сему яко грядет час, и прочая. святии же богословцы, Иоанн Златоустый, и Феофилакт, и Максим Грек, повелевают сице читати: И область даст Ему, и суд творити. зде стати. и паки начати: яко Сын человечь есть, не дивитеся сему. еже засвидетелствуется в беседах на евангелие от Иоанна, в беседе 39. и в Благовестнице, в толковании зачала 16, от Иоанна. и в книзе Максима Грека, во главе 72. Чесо ради от павликианския ереси обращающихся к соборней церкви, святая правила повелевают покрещевати. сице правило 19. перваго вселенскаго собора повелевает: [Павликиане покрещеваются, и глаголемии от них причетники, аще без порока обрящутся по крещении да поставлени будут, аще же порочни будут, да извергутся, и диаконисы крещеныя от них, понеже поставления не имут, с мирскими человеки да истязани будут]. Подобне Павлу Самосадскому и Никоновых новопреданий ревностнии хранителие сие стихоразделение от святых, Златоуста, Феофилакта, и Максима Грека зазренное прочитают, еже показуется в новопечатнем Требнице, изданнем в лето 7167, в чине погребения мирян, монахов, и священников, во евангелии от Иоанна, сице: И власть даст Ему, и суд творити, яко сын человечь есть. отсюду паки от инаго начала начинающе глаголют: не чюдитеся сему: яко грядет час и прочая. Сим своим стихоразделением явственно себе самех показуют, смудрствующих Павлу Самосадскому, исповедати Христа Бога нашего суща Бога и человека, проста быти человека. и аще убо павликиан исповедающих Христа Бога, проста человека, божественнии отцы перваго вселенскаго собора, прибегающих к соборней церкви, повелевают, святым крещением очищати. какоже и от никониан, смудрствующих Павлу, имущих новодействуемое крещение, приходящих ко истинней христианстей вере, по томужде святых отец правилу, не подобает паки святым крещением крестити? всячески подобает.

18: Нынешния великороссийския церкве ересь, юже углуби Димитрий митрополит Ростовский, противомудрствуя святых отец преданием, смудрствуя же римляном. римляне убо. якоже папы их, тако епископи, священницы и прочии вси народи, брады своя бриют. их же брадобрития их ради, святая древлеправославная церковь проклятию предает, сице взывающи: [Проклинаю богоненавидимую блудолюбнаго образа прелесть, душегубителныя помраченныя ереси, еже остругати браду, ейже бысть началник беззаконныи Петр гугнивыи Римскии папа. во царех же тоя ереси началник, гноеименитыи Константин Кавалин иконоборец. и в той ереси и прочии римстии папы погрязоша, и вси латинстии епископи и попове]. Потребник Филарета патриарха, в чине от еретик приходящих. Сообразне сим и последствующии лжеучению Димитриеву, иже в книзе Розыске, во второй части, в статии третией зело утверждает брадобритие, брады своя бриют. ихже брадобрития ради их святая древлеблагочестивая церковь, клятве отсылает вопиющи: Аще убо кто прекословит и непокорив, и паки яко пес своя блевотины начнет пожирати, сице кто возследовати начнет древним еретиком, царю Константину гноетезному, и римскому папе Петру гугнивому, и евхитской ереси, по великому Епифанию, и инем прочим таковым, паче же иже Бога не знающим, и сия святых апостол, и святых отец, иже на седми вселенских соборех бывших, тако же и поместных девяти преданныя божественныя законы и предания презрит, (ниже) на таковых по божественным правилом, буди общая церковная клятва прежде бывших святых собор, и благоверных царей, якоже в предисловии пишет седмаго вселенскаго собора, и в прочих божественнаго писания. егоже проклятию предаша, и мы проклинаем. Служебник святейшаго Иосифа патриарха [изданный в лето 7155, лист 632].

19: Нынешния великороссийския церкве ересь, юже породи Петр Могила митрополит Киевский, сопротивно святых апостол преданием мудрствуя, согласно же еретиком евномианом. евномиане убо вместо погружения, на главы своя возливают воду до пояса. сего ради приходящих евномиан ко святей церкви, повелевают священная правила, паки совершенно святым крещением крестити [Потребник, лист 572]. сице правило святаго вселенскаго собора осмое завещавает [Кормчая, лист 88]: иже единем погружением крещающиися, евномиане, и савелиане, и фриги, яко еллини прияти будут. Толкование: И тии еретицы суть, иже единем погружением крещаются, а не треми якоже православнии. сии аще приступят к соборней церкви, якоже погани прияти будут. и прежде крещения время доволно поучаются, и божественных писании да послушают, и потом совершенно крещаеми бывают, и помазуеми. до зде от правила. Им же последующе и римляне, в крещении своем такожде обливают, а трижды не погружают. Сим всем подобне и Никону последствующии пастыри, хотя аще и не у всей России, крещение обливателне действуемо есть, но в Киевстей и Смоленстей епархиях, и у некоторых высоких персон, совершается крещение обливанием, каковии и сами суть великороссийстии пастыри обливанцы, от них же по всей России священницы рукополагаеми суть, за равносилное и равночестное с трипогружателства крещением обливателное исповедуют и имеют. якоже сами о себе свидетелствуют [книжица истинное оправдание поливателнаго крещения, глава 12, лист 47]: [Мы бо, реша, приемлем крещение погружателное, не отмещем же и поливателнаго. но сие и оное за равносилное и едино неотменное исповедуем]. о чесом выше в пределе 2-м, доволно явлено есть. и аще убо евномиан божественнии отцы втораго вселенскаго собора, яко обливателне крещеных, прибегающих к соборней церкви, яко некрещеных повелевают паки крестити. кто бы от благомыслящих дерзнул отрещи, яко по сему правилу никониан, имущих новодействуемое крещение от священников, иже имут рукоположение от обливателне крещеных архиереов, иже не имут истиннаго крещения, приходящих к православней вере, не подобает паки святым крещением крестити? поистинне подобает. но да не вся российския церкве по единой исчисляя ереси, в безмерное долготы множества ради их слову простру, и тако доброжелателных слышателей слухом бриткость сотворю. прочее прочия самем вежественнейшым в писании разсмотряти оставляю.

20: Оставляю скверное их в подпупии женстем совершаемое обливанием крещение. ему же начальник бысть Петр Могила Киевский, иже прием от римлян, смудрствуя им, повеле, егда жене неудобное будет рождение, сиречь, егда младенец не скоро раждается, и близ смерти видится, показал бы главу, или ину началную тела часть, крестити и бабе, или кто любо прилучился; поливая ону часть, яжебыся из ложесн показал.

21: Оставляю заедино и равно приятелство их, согласно римляном, обоих глагол при крещении глаголемых [Скрижаль, в слове о седми тайнах], еже крещается раб Божии, страдателне. ово убо есть римскаго костела новопредание. оно же восточныя церкве содержание. из них же оное убо по святаго Симеона Солунскаго словесем, явствует волное и самохотное приемлющаго крещение [книга 1, глава 61]. сие же показует, аки насилием и нуждею крещает.

22: Оставляю новоуставленное их, еже устави Никон, миропомазание при крещении по всему телу бываемое, сопротивно святых отец преданием, согласно же римляном. римляне бо убо помазуют миром во время своего крещения, по всему телу, от главы даже и до ногу, по жидовски. якоже свидетелствует в Кормчей сице [лист 11]: [Егда Лев папа венча на царство в Риме князя Карула, греческим законом, примесив же законы жидовския. и не вем которым умыслом, от главы даже и до ногу миром его помаза]. Сим подобне и никоновых преданий ревностнии хранителие, жидовским обычаем, вместо еже на сердцы, и на плещу, и между рамома святым миром помазовати. еже показуется в Требницех новопечатных.

23: Молчю о нововведеннем звоне бываемем на литургии, возглашаемым от священника словесем Христовым, приимите и ядите латиноримскаго чюждаго благочестия костела породе [книга Щит веры, беседа 3]. егоже первее Никон в российскую церковь привнес устави, и предком своим по себе остави. сим бо своим звоном никонопоследствующии уподобляются римляном, соуподобляющеся в мудровании, понеже убо римляне исповедуют сими Христовыми словесы, пресуществлятися хлебу в тело, и вину в кровь господню. сего ради в то время в един колокол звон сотворяют. подобне и сии, якоже словесы исповедуют темиже Христовыми словесы предложенным даром прелагатися в плоть и кровь Господню [Пращица, ответ 193], еже показует Требник Петра Могилы: сице и самою вещию сим своим звоном изъявляют тожде смудрствовати [новопечатный устав, глава 29].

24: Молчанием прехожду нововведенный, сопротивный святей восточней церкви, егоже нововвед Никон в российскую церковь определи, смудрствуя папежаном и униятом, еже на литургии на возглашение словес Христовых, иереом и монахом открывати главы обычай [книга Врачевство, ответ 10]. коего древле яко в восточней, сице в великороссйистей церкви отнюд не бяше.

25: Претекаю симониатство в российской церкви ныне содержащееся, имже подобящеся римляном отступником святокупльствуют. якоже бо в Риме чрез злато и сребро церковно служителие получают себе церковныя степени, еже засвидетелствуется в книзе О вере: симониатству, рече, в Риме бывати не новина, и папежь папежа подкуповал [лист 139]. сице и в России хотящии взыти на священство, диаконство, и прочия степени, златом и сребром стяжавают себе саны. ибо кииждо от них хотящии рукоположитися купует себе рукоположение, ов за тридесять, ов за четыредесять ин же за пятьдесят рублев. и в диаки бо причестися, становится в десять, пятьнадесять, и двадесять рублев. сие убо симониатство клятве и анафеме святии отцы предают [Кормчая, глава 36]. яко поставляющии за мзду, по Исидору Пилусийскому, уподобляются Июде продавшему Христа, поставляющиижеся Симону волхву. Сице бо страшне взывает блаженный Геннадий, патриарх Царя града, со всем своим освященным собором: [Буди убо и суть отлучени, и всякаго священническаго достоинства чюжди, и проклятию и анафеме подлежат, и даяи, и приемляи, непродаемую благодать Пресвятаго Духа, иже стяжати священство за сребро мнит, и сие подати на сребре обещаваяй, аще причетник. аще людинин есть, любо обличается, любо не обличается сие сотворь]. Потребник, лист 719.

26: Прешествую евхитство в россианех ныне содержимое. ибо якоже евхиты еретицы, долгия власы растяще ношаху. о них же святому Епифанию архиепископу Кипрскому свидетельствующу [Никон Черныя горы, слово 36]. сице и россияне, пременивше естественную подобу в преестественную, мужие овии долгии власы растят, и инии же и накладныя парики, якоже латыни, лютори и калвини, на главах носят, жены же власы глав своих стригут. еже обое есть зло, и Богу противно. мужу бо нелепо есть власы растити, яко началство свое от Бога данное погубляет, и покровенною главою молитву деет, жена же стригущи главу свою, началство мужне восхищает. явственно о сем свидетельствующу святому Иоанну сице: [Муж аще власы растит безчестен, и начал свой погубляет, и покровенною главою молится Богу. жена же аще стрижет главу, началство мужеское восхищает]. к коринфям, беседа 26. Сице же убо покровенною главою молящихся, святая древлеправославная церковь, проклятию предает вопиющи сице: [Проклинаю еретическое приятие, еже агарянским обычаем последовавше, и неоткрытою главою молятся]. Потребник, лист 605.

27: Не воспоминаю оригенствования в россиянех нововведеннаго. иже смудрствующе Оригену еретику о зачатии человечестем, научают, яко не купно душа с телом в зачатии человечестем бывает. но мужеск пол чрез 40 дней, женск же чрез 80 дней во утробе матере воображается и растет, и тогда Богом одушевляется [Жезл соборный новопечатный, глава 27]. еже есть сопротивно святых отец преданием. ибо преподобный Иоанн Дамаскин сицевое мудрствование нарицает оригенскою блядию [книга 2, глава 14]. научает же купно души с телом в зачатии человечестем бывати, а не овому убо прежде, овей же послежде.

28: Не изъявляю о бракосочетании россиан с еретики, иже сопротивно божественных отец правилом творяще, браком сочетавают дщерей своих с еретики, латины, люторы и калвины, и сами от них поемлюще за себе и сынов своих сочетаваются. еже убо с еретики в святовство входити, священная правила зело возбраняют. сице правило собора иже в Лаодикии, 10: [С еретеки в сватовство не сходитися]. на поле: у еретиков не женитися, ни дщерей своих за них христианом не давати. и в Номокононе правило 52, глаголет : такожде и с латины аще православная жена сочтется, с распустом брака и запрещению подлежит, по 12 главу, 3 стиха. еже в Матфеи. аще ли кто преступит уставленная, да отлучится.

29: Не сказую о молении их с еретики, иже презревше святая святых отец правила, последующе еретиком латином, кии во время своея службы, различных вер еретиков в своя костелы пущают, всяких вер еретиков, латин, люторов, и калвин, в церковь, совершаемей службе, наипаче же егда бывают коронования царем, браки высоким персонам, и погребения, невозбранно приемлют. сего ради священными правилы и от церкве отлучаются. сице правилу святых апостол, 45, вопиющу: моляйся с еретики да отлучится.

30: Не глаголю о трапезствовании их с еретики, иже сопротивно святых отец преданием творяще, купно якоже духовнии, сице и мирстии, из единых сосудов, с латины, люторы, калвины, турки, и иными неверными языки, ядят и пиют купно. божественнии отцы зело возбраняют верным с еретики ясти. якоже блаженный Иоанн Златоустый взывает глаголя [Маргарит, лист 582]: Услышите вси вы, иже с еретики вкупе ядущии, болезненнаго сего ответа, яко вы Христовы врази бысте. иже врагом царевым друг есть, сей не может друг царев быти, и жити не достоин есть, но со враги погибнет, и горшая подъимет. слово о лжеучителех. Сему подобне и преподобный Иосиф Волоколамский вопиет: [Творяй бо сия, чюжда себе творит Христовы церкве, аще кто и безплотных житие поживет, еретиком же приобщаяся в службе, или в любви, таковыи есть чюждь Владыки Христа]. Сего ради святая церковь ядущих с еретики клятве предает, сице восклицающи: [всякаго ядущаго с еретики, или пиющаго, или дружбы деющаго, и любви, и соединение, таковаго анафема]. Зинарь, глава 76, и 112.

31: Не глаголю о манихействовании их, иже подобящеся манихеом, якоже латыни, лютори и кальвини, в астрономствовании, и звездном движении непрестанно упражняются. солнца, луны, и прочих планет движения разсуждают. и ни единаго дне и часа без смотрения не оставляют. на кииждо год новыя календары издающе составляют. Сицевое убо новомудрствование их святая древлеправославная церковь клятве предает, сице гласящи: [Проклинаю прелесть их, иже зрят в бег небесныи, оттуду сведшеся в ересь манихейскую]. Потребник, лист 602.

32: Не глаголю о разрушителстве их святых постов, иже святая церковь уставила на очищение душевное, и всякия среды и пятка, вселетнаго окружнаго обхождения. иже якоже в прочих смудрствуют латином, сице и всем. ибо латини буестию гордости надмевшеся, святыя посты разрушивше, не хранят я по уставу уставленному святыми апостолы, и святых отец правилом. еже нарицается, в Кормчей, в Кирилове, и в Потребнице, ересь 7-я их. ихже святая церковь разрушительства ради их проклинает вопиющи: [Проклинаю отвращающих христианский пост, святыя великия 40-цы, егоже латини сами не хранят, ни иноцы их, отвергше апостолское и отеческое предание]. Потребник, лист 256. Подобне лютори, калвини, и прочии еретицы, и армени, никогдаже во вся святыя всего лета посты постятся, но выну ядят мяса. их же всех якоже за иныя ереси, сице и за сие святая древлеправославная церковь клятве предает, тако гласящи: [Проклинаю и отрицаюся вселетнаго обхождения их, весь закон не имущии поститися никогдаже, ни воздержатися]. Потребник, лист 262. Сим всем подобственне и россиане разрушивше уничтожиша святыя посты. от них же овии убо, яко духовнии и простии народи, во вся святыя посты, и в самую 40-цу, и во вся среды и пятки, невозбранно ядят мяса, им же и духовенство разрешая споизволяет ясти. Божественнии убо отцы поведают [преп. Никон Черныя горы в Тактиконе, слово 4], яко [елицы не держат посты тако, якоже лепо есть, с еретики от божественных собор святых отец спричитаеми суть]. и клятве предаеми. Сице отцы собора, иже в Гангре, вопиют глаголюще: [Аще кто от воздержащихся, кроме телесныя нужды гордится, и преданныя посты во общину, и хранимыя церковию разрешает, целу сущу в нем и совершенну помыслу, да будет проклят]. правило 18. И вся купно церковь проклинающи взывает: [Иже аще яст млеко и яица в великий пост в суботу, и в неделю, да будет проклят]. Потребник, лист 659.

33: Едино токмо глаголю, яко мессалианствуют и василианствуют [Потребник, лист 574]. ибо мессалиане и василиане последующе Оригенову мудрованию, приходящих от различных грех, прощают без всякаго страха, чрез божественная правила, и не разсмотряя плодов покаяния, скоро очищати всяк грех повелевают, токмо аще кто прославленную их молитву от них научится и ученик от тех проказы будет. Подобне и римляне убо, и вси еретицы, и иныя от всех различных еретических вер, такоже по мессалинскому мудрованию и василианскому, человеком грехи отпущати без епитемей, и неразсмотряющи плодов покаяния, такожде скоро от грех мнятся очищати. Сим всем последствующе и никонопоследствующии, без епитемий кающимся, и не разсмотряюще плодов покаяния, абие отпущают грехи. якоже в новопечатней книзе глаголемей, духовнем уставе, изданнем, в лето 1723, в прибавлении Стефан митрополит Рязанский, с прочими архиереи, уставивше повелеша, без епитемей отпущати грехи, сице глаголюще [о епитемиях, лист 16]: иногдаже усмотря неудобство епитемии коей любо исполнения, никаковой не налагати епитемии. кую бо, например, наложити епитемии воину рядовому, нуждному путнику, кораблиному служителю, нищему, болному, и подобным прочим? поститися им невозможно, милостыня давати нет из чего. таковых убо доволно страхом суда Божия обуздав, да не воспять к злодеянию возвратятся, а за грехи исповеданныя, аще истинною каются, предложением Божия благоутробия утвердив их, может духовный отец прощения сподобити, и без епитемии удостоити причастия святых таин. (ниже) собственно же и имянно оную в древнем обычаи бывшую епитимию, еже на долгое время лишати причастия святых таин, отселе отставити, и оной ктому не употребляти. до зде от устава. Елма же убо мессалиане и василиане в различныя ереси впадше, без епитемей отпущают грехи. сего ради обращающихся от них к соборней церкви, священная правила повелевают паки совершенно крестити. Сице шестаго вселенскаго собора правило 95 [Кормчая, лист 205]: обращающихся от еретик, сице приемлем; арианы, македонианы, несторианы и четыредесятники, иже суть средницы, и аполинарианы, и евтихианы, и северианы, и иже от подобных им ересей, проклинающыя вся ереси, и с ними и свою, помазуем святым миром. темена очи, ноздри, уста, уши, и знаменающе я глаголем: печать дара Святаго Духа. Толкование: Неции от еретик крещаеми бывают: инии же святым миром помазуются: друзии же вся ереси с ними же и свою прокленше, на общение приемлеми бывают; котории же миром токмо помазуются; котории же свою ересь со всеми прокленше. и тем токмо довлеюще, на общение приемлеми бывают, в сем правиле сказуется. ариане убо и македониане, и наватиане глаголемии чистии, и левии, и четыренадесятницы рекше средницы, и аполинариане, прокленше свою ересь, и иныя вся, токмо миром помазуеми, темена, очи, ноздри, уста, уши, и помазующи я глаголем: печать дара Святаго Духа, и тако на общение приемлемы бывают. несториане же и евтихианы, и севериане, и от инех ересей, и подобнии им, свою ересь, и иныя прокленше, и тем токмо доволни бывше, и на общение прияти суть. аще же и многи ереси отставлени быша, обаче и павликиане, иже от Павла Самосатскаго суть, и евномианы, и монтанисты, глаголемыя фригианы, и савелианы, и манихеи, и уалентианы [сии суть, по сказанию Матфея Иеросалимскаго (глава 2, перваго собора), мессалиане], и маркиониты, и сущия от подобных им ересей, приходящыя к православней вере, яко еллины приемлем я. до зде от правила. Зде убо вонми ми. аще мессалиан и василиан отци шестаго собора, яко без епитемей отпущают грехи, повелевают паки крестити. како от новодействуемое имущих крещение, смудрствующе мессалианом и василианом, отпущающих грехи без епитемей же, приходящих к христианстей вере, по сему же святых отец правилу, не подобает паки совершенно святым крещением крестити? зело подобает.

Темже убо аще толикими и толь многоразличными различных еретик ересми, яже не многшая от множайших предпоказахом, новодействуемое крещение богато изобилует, ихже ради тмократне от святых отец, паче же от всея православнокафолическия церкве, имущии е проклятию и анафеме предани суть. како возможно е, яко истинное прияти? ей невозможно. Ибо святый Иоанн Никейский вопиет глаголя: [Аще бо тмократицею прокляти бывше, и диаволу предани, како от анафемы и от клятв благословение изыдет? или како от диавола духовное и святое дело совершится? от анафемы благословение не бывает, и от проклятия молитва не исходит, и от диавола Христово не совершается таинство, и от гноища благоухание не исходит, ни от гнилаго трупия ин исцелится, ниже от червивых удов здравие иному телеси подавается, ни паки от ереси, или неверия духовное действо исполняется]. в слове обличителном на армены. Аще таковыми и таковых еретик ересми, ихже священная правила неотложне повелевают приходящих к соборней церкви покрещевати, изобилно обогащается новотворное крещение, киих ради имущих е годствует паки крестити, како возможно е яко законное прияти? поистинне невозможно.

Аще в новотворнем крещении крещающиися таковаго Iисуса погребение и воскресение изображают, спогребаются ему, егоже апостоли не проповедаша, священнии богословцы не изъявиша, святии отцы седми вселенских и девяти поместных соборов не воспомянуша, святая кафолическая церковь не вероваше вонь како возможно е прияти? всячески невозможно.

Аще бо приемлеши новодействуемое крещение, яко истинное крещение всяко долженствуеши свосприяти и многоразличныя ереси на крещении оном стоящия, яко истинныя догматы, ихже ради святии отцы клятве и анафеме содержащыя я предают.

Аще приемлеши е яко законное, безпрекословне должен еси свосприяти и оных еретик ереси, яко на нем утверждающыяся, ихже ради священная правила повелевают я имущих покрещевати.

Аще приемлеши е яко сущее, неотрочне долженствуеши и новопроповедуемаго Iисуса, емуже крестящиися в крещении погребение и воскресение его спогребающеся, изображают свосприяти.

Аще ли же ересей оных, ихже ради святая церковь содержащих я клятве и анафеме предает: аще ересей оных, ихже ради божественнии отцы повелевают, погрязших в них покрещевати, не приемлеши, како крещение оными ересми обогатившееся приемлеши? корень убо приемлеши, древо же с ветвьми отреваеши, и что се? аще бо корень есть свят, всяко и древо с ветвьми есть свято. аще ли древо с ветвьми несть свято, убо ниже корень. зане от корене происходяще неразлучным споением есть совокуплено. корень бо есть крещение, древо же с ветвьми, вера с догматами. и аще крещение есть приятно, убо и вера с новыми догматами да будет приятна. аще ли вера с догматами несть приятна, како возможно прияти крещение? понеже вера с догматами на крестителном корени неразлучне водружена содержащися состоит. к сим же аще новопроповедуемаго Iисуса не приемлеши, како приемлеши новодействуемое крещение, в нем же крещающиися спогребающеся ему изображают погребение и воскресение его? всяко долженствуеши свосприяти и его. аще ли же его не приемлеши, убо ниже крещения, в нем же спогребаются ему крещающиися, должен еси прияти. убо от новодействуемое имущих крещение, приходящих к древлеправославней вере, подобает паки совершенно святым крещением крестити.

Глава, 3.

Аще и в три погружения крещени но от еретик, святии отцы повелевают паки крестити.

По негли речет кто от нехотящих истине повинутися, глаголя: яко несть леть второе, первое в три погружения крещеных, аще и от еретик крестишася, крестити. понеже Павел апостол изъявляя единость крещения, вопиет глаголя [к ефес. зач. 224]: един Господь, едина вера, едино и крещение. что убо глаголеши? Павел ли очерняющее со очищающим совокупляет? окаляющее со омывающим соравняти? оскверняющее паче со освящающим соединяет? да не будет. он ли еретическое крещение, аще и в три погружения, творимое, со от правоверных творимым соединствует? да не будет. како бо сам он вопиет глаголя: кое сообщение свету ко тме? или кая часть верному с неверными? или кое сочетание Христови к диаволу? и аще тако есть, яве яко Павел святый о едином крещении от правоверных совершаемом глаголет. к сим же едино и тожде определяет быти крещение творимое яко от правоверных тако от еретик, како будет его определение согласовати уставлению всех священных апостол, в нем же повелевают безпрекословно, от еретик приемших крещение, паки второе совершенно святым крещением правоверным покрещевати. сице бо вопиют в 46 своем правиле глаголюще [Кормчая, лист 12 на обор.]: крещение и жертву еретическую прием святитель не священ. коего толкование есть сицево: епископ, или презвитер, или диакон, аще не похуляет ни ругается еретическому крещению, но приемлет крещенаго от сих, или приносимая от них на жертву, сиречь на службу приемлет, таковыи да извержется от сана. откуду явственно видимо есть, яко Павел апостол глаголет о едином от православных совершаемом крещении.

Елма же убо святии апостоли в сем своем правиле, всякаго от еретик, аще в три погружения, аще ли не в три, ничтоже о сем упоминающе, крещенаго, повелевают без изъятия, паки второе святым крещением крестити, полагают вину сицеву, яко от еретик крещении, паче осквернени. Сице бо глаголют в 47 своем правиле: второе крещаяи крещеннаго истинным крещением, и не покрещеваяи оскверненнаго от зловерных, таковыи святитель не священ. от коих святых апостол словес светлее самых солнечных лучь показуется, яко всякаго от еретик крещенаго, аще в три погружения, аще ли не в три, приходящаго к православней вере, безпрекословно подобает второе совершенно святым крещением крестити.

Аще ли убо не подобает второе, первое приемшаго крещение от еретик, святым крещением паки крестити, како святии апостоли глаголют во своем правиле, яко от еретик крещении некрещени? Сице бо вопиют [Кормчая, лист 19; Никон Черныя горы, слово 63]: Аще которыи епископ или презвитер или диакон, второе поставление приемлет от кого, перваго возненавидев, да извержется сам и поставивыи его, аще токмо не прилучится, яко от еретик поставлен бе первее. ибо от тех крещении не крещени, и поставлени не причетницы. правило 68. И понеже по священных апостол гласовом, от еретик крещении не крещени. сего ради священным их правилом споследствующе божественнии отцы, всякаго от еретика и расколника крещенаго, и к соборней церкви приходящаго, повелевают паки второе святым крещением крестити. якоже свидетелствует Матфей Иеросалимский, в книзе своей от счисления по составех, сице глаголя: [Всех убо вселенских и поместных иже Кархидоне собор первейшии написуется, началника убо имуще великаго Киприана, в епископех же множашеся к четыре осмьдесят, иже убо едино токмо изнесоша, аки во образ правила отречения еже весма от всякаго еретика же и расколника крестившихся к соборней приходящих церкви паки крещати.

Сим согласно и прочии священнии отцы, последующе священным священных апостол гласовом, повелевают от еретик крещеных, аще и трипогружателне крещени, паки совершенно святым крещением крестити. якоже абие имать явлено быти, тем и глаголю:

1: Аще не подобает паки первее от еретик треми погруженьми крещеных, таже приходящих к соборней церкви, второе святым крещением крестити; како светилник церковный, святый Василий, глаголю, Великий, наватиан приходящих к православней вере, их же первее в первом своем правиле прия крещение по смотрению. в 47-м исправляя, еже тамо по смотрению прия, повелевает паки крестити, сице глаголя [Кормчая, лист 239]: воздержники и вретищники, и апотактисты, да крестиши, аще бо и глаголют, яко во Отца и Сына и Святаго Духа крестихомся, но понеже злу творца Бога нарицающе, хулят по Маркионову учению, не крещени же не приятни. Толкование: В первом убо правиле своем, по смотрению словесе воздержник и наватиан, глаголемых чистых великий сей светилник церковный, прият крещение, и повеле токмо святым миром помазовати их, егда приходят к соборней церкве вере, и ереси своя прокленут. Зде же исправляя, еже по смотрению онамо прият повелевает воздержники и прочия крестити понеже ересь их отрасль есть маркионския ереси, ненавидят бо сии, якоже они, брака, и отвращаются вина, и тварь Божию скверну быти глаголют. до зде правило. Сей убо Нават не бе еретик, но паче расколник, якоже о нем повествует Матфей Иеросалимский глаголя [глава 1, перваго состава]: [Нават же презвитер сыи стараго Рима глаголемых чистых ересь начат, расколник сыи истее, а не еретик, не бо в чесом от правых предании с верными разньствоваше, но иже в гонение подклонившимся и пожершим, отрицаше покаяние, двоеженцам же не приобщашеся: ихже ради, аще и не о вере погрешаше, но за немилосердие его и братоненавидение собору бывшу в Риме при Корнилии папе, Декию царствующу, извержен бысть и проклят]. От сих словес яве видимо есть, яко сей Нават не о вере погреши что, но ниже о крещении. явственно о сем свидетелствует преподобный Максим Грек сице глаголя [преп. Максим Грек, слово 68, бывый в лета 7029]: [Слыши внятно, и разумей прямо, еретицы, иже от Навата презвитера бывша Римскаго, наватиане нарицаеми, ниже о крещении, ниже о таинстве православныя веры, ниже о ином коем законе церковнем беззаконноваху, но зане точию дарованное от человеколюбия Спаса Христа, грешником покаяние отрицаху, и не приимаху на покаяние обращающыхся, иже в гонении Христа отвергошася]. глава 68. Обаче святый Василий Великий повелевает покрещевати. Сему согласно и Константин Арменополь, в толковании на 47 правило Василия Великаго повелевает глаголя [Кормчая, лист 40]: [Наватиане, аще многих епископ изволися суду, да покрещеваются]. книга 1, севаста Арменополя надписание 8, сечение 3, о людинех.

2: Аще не подобает паки, первее трипогружателне от еретик крещеных, приходящих к соборней церкви крестити; како божественнии отци перваго вселенскаго собора, павликиан повелевают покрещевати? Сице бо глаголют: [Павликиане покрещеваются, и глаголемии от них причетницы, аще без порока обрящутся, по крещении да поставлени будут, аще же порочни будут, да извергутся, и диакониссы прельщенныя от них, понеже поставления не имут, с мирскими человеки да истязани будут. Толкование: от павликианския ереси приходящии к соборней и апостольстей церкви, да покрещеваются второе. первое бо крещение, понеже еретическо бе. крестившежеся, и аще от них неции епископи, или презвитери, или диакони беша в павликианех, аще житие имут непорочно, от соборныя церкве епископа, в ней же крестишася, да поставлени будут кождо в свой чин. аще же недостойни обрящутся, да и от того, в немже беша, отвергутся. сущии же в них диакониссы, понеже никакова поставления не имут, аще к соборней церкви приступят и крестятся, с мирскими человеки да причтени будут]. правило 19. Павликиане же нарицаются, яко от Павла Самосатом бывшаго епископа прияша ересь, иже смиренная о Христе мудрствоваше, и проста Того человека быти проповедаше, и начало не от Отца прежде век но от Марии приемша. якоже поведает Матфей Иеросалимский в счислении по составех. сии убо павликиане по изъявлению осмаго правила, втораго вселенскаго собора. в нем же, кии не в три погружения крещаются, именословне исчисляются, в них же сии не именуются, явственно показуется, яко в три погружения крещаются, обаче не крещения ради, но ересей их ради святии отци повелевают приходящих к соборней церкви покрещевати.

3: Аще не подобает первее, от еретик в три погружения крещеных, покрещевати; како той же Василий Великий повелевает, саватиан еретиков, приходящих к соборней церкви, паки крестити? тако бо глаголет [Кормчая, лист 239]: воздержники, и вретищники, и апотактисты да крестиши, аще бо и глаголют, яко во Отца и Сына и Святаго Духа крестихомся, но понеже злу творца Богу нарицающе хулят по Маркионову учению, не крещени же не приятни. Толкование: В первем убо правиле своем по смотрению словесе воздержник и наватиан, глаголемых чистых, великий сей светилник церковный, прият крещение, и повеле токмо святым миром помазовати их, егда приходят к соборней церкви вере, и ереси своя прокленут. Зде же исправляя, еже по смотрению онамо прият повелевает воздержники и прочия крестити]. Зде возмнится некиим, яко святый Василий Великий не упоминает в сем своем правиле саватиан, сего ради не подобает их паки крестити. обаче аще и не воспоминает, но их же в первом своем правиле, под миро определяет, тех и святаго втораго вселенскаго собора отцы, в 7-м своем правиле, под миро же определяюще, с ними же и саватиан именословне исчисляют, сице: [Четыренадесятницы, иже и средницы глаголются, и ариане, и наватиане, и македониане, и саватиане, и аполинарите, писание вдавше, приятни, помазующе токмо вся чювства]. к сим же ересь сих саватиан есть отрасль ереси Наватовы. о них же повествует Матфей Иеросалимский глаголя: [Саватиане же, их же вождаше некто Саватии презвитер, ереси убо той сыи Наватовы, любочестием же еже на горшая, июдейски суботствовати велит, пост в сию проходя, и иная приискренно о нем, якоже и латини ныне]. глава 2, перваго состава. Темже убо аще наватиан святый Василий Великий повелевает в 47 правиле крестити, безпрекословно яко и саватиан, яко ересь сих прозябение есть ереси оных. не крещения же ради их повелевает сей светилник церковный покрещевати, яко бы они не трипогружателне крещаются, ни, но ересей ради их. ибо они, по свидетелству Матфея Властаря, подобне нам святым крещением просвещаются. сице бо глаголет: [Арианы убо и македонианы, и саватианы, и наватианы, ниже: точно нам божественным совершаются крещением]. Матфей, глава 2-я, перваго состава.

4: Аще не подобает от еретик первее в три погружения крещеных, паки крестити; како Тимофей презвитер, и сосудохранитель пречистыя Богородицы в Халкопратии, на три части разделяя обращающихся от еретик ко святей церкви, на требующих святаго крещения, на некрещаемых, но миром святым помазуемых, на ни крещаемых, ни помазуемых, но проклинающих точию свою и всяку ересь, определяет от маркионския ереси обращающихся покрещевати? глаголет бо [сей бысть до шестаго собора вселенскаго]: [Три чина обретаем приходящих к святей Божией соборней апостольстей церкви, боголюбезныи сослужебниче Иоанне, и от всех мне любезнейшии. и первыи убо чин есть требующих святаго крещения. вторыи же не крещаемых убо, но помазуемых святым миром. третии ни крещаемых, ни помазуемых, но точию проклинающих свою ересь и всяку. и крещаемии убо суть сии, таскудрути, маркионите, рекше артотирите, вретищники, и апотактите]. Кормчая [глава 70], лист 634.

Сих маркионитов, и святый Василий Великий повелевает, в первом своем правиле, обращающихся к православней вере покрещевати. еже явствуется от толкования перваго его правила. идеже пишет тако [Кормчая, лист 225]: [Маркионити же суть мессалиане, иже и молебницы сказуются, иже многоглаватую и многоименитую ересь имеют. сии убо от ереси своя обращающеся, и к непорочней вере приступльше крещаются, понеже отвержено есть нами крещение их]. сих убо маркионит повелевают отцы покрещевати, не того ради, яко бы не исчисляются между еретиками во едино погружение крещающимися, их же исчисляет правило осмое, втораго вселенскаго собора. но яко многоглаватую и многоименитую ересь имеют. якоже той же Тимофей презвитер сказует: [Маркионите, рекше хлебоблюстители, Маркион монтанскии, ученик быв Кедронов четвертыи, нерожденна существа всем сущим полагает, от них же ово убо нарече: ино разумно: ово же содетеля, и праведно и лукавно нарече, и Господа привидением человека быти глаголет, а не по истинне, и тело же зло глаголет, и весь мир лукаваго творения, и душю часть Божия существа мняше, и брань и вражду душю и тело полагает, и змию нарече содетеля блаженнейшую, яко овому убо завистию вкушение древа возбранившу, сия же независтно вкушати совещавши, юже сковавше медяну, друзии же глаголют, яко и живую обилно почитают]. Кормчая писменная от правила 2.

5: Аще не подобает первее от еретик трипогружателне крещеных покрещевати; како паки той же святый Василий Великий повелевает, еретиков воздержников ко святей приходящих вере святым крещением возотрождати? сице бо глаголет в 47 правиле своем: [Воздержники, и вретищники, и апотактисты да крестиши. аще бо глаголют, яко во имя Отца и Сына и Святаго Духа крестихомся, но понеже злу творца нарицающе, хулят по Маркионову учению. не крещени же не приятни]. их же сей святый великий светилник, повелевает покрещевати не крещения их ради, якобы не треми погруженьми крещаются, ни: но ересей их ради. якоже о них изъявляет преподобный Никон Черныя горы сице глаголя: [Сии глаголемии воздержници, брак отметают, сатанин глаголюще его быти, и всякия пищи одушевленных удаляются]. слово 62, великия книги. Сему подобне и Епифаний архиепископ Кипрский поведает глаголя: [Воздержницы, иже отлучени суще Татияна, брак отлагают, сатанин сей глаголюще быти, от всего же отрицающеся душевна ядения]. глава 47. Сей убо Татиан, по сказанию того же Епифания Кипрскаго, растяше со Иустином мучеником философом, по скончании же святаго Иустина, осквернися проповеданием Маркионовым, и равная тому повеле, приложив и другая от него. глава 46. Но Матфей Иеросалимский поведает, яко сих воздержников повелевает святый Василий Великий покрещевати, не крещения ради, но ересей, якоже глаголет: [а еже убо  воздержник не достояше,  маркионитския бо есть явственно яже в них ереси прозябение. якоже бо они, сице и сии брака гнушаются, сатанин той быти отрицающе, вина отвращающеся, одушевленных отричют снеди и тварь Божию скверну быти блядут. да не глаголют убо яко во Отца и Сына и Святаго Духа крещаются, иже злым творца Бога глаголют, точно Маркиону]. глава 2, перваго состава. Сего ради преподобный Никон Черныя горы, отмеща скверное их крещение, в толковании 47, правила Василия Великаго, вопиет глаголя: [Не приемлем их в церковь, аще не крестятся в наше крещение. да не глаголют убо яко во имя Отца и Сына и Святаго Духа крестихомся, зане злу творца творят Бога, подобне Маркиону]. слово 63, великия книги.

6: Аще не подобает первее от еретик в три погружения крещеных паки крестити; како Тимофей презвитер, великия церкве, определяет еретиков вретищников и апотактитов, приходящих к соборней церкви, покрещевати, сице глаголя [Кормчая, лист 634]: [Три чина обретаем приходящих ко святей Божией соборней и апостольстей церкви. (ниже) и первыи убо чин есть требующих святаго крещения. вторыи же не крещаемых убо, но помазуемых святым миром. и третии ни крещаемых ни помазуемых, но точию проклинающих свою ересь и всякую. и крещаемии суть сии, таскудрути, маркионите, рекше артотирите, вретищники, и апотактите]. их же и святый Василий Великий повелевает покрещевати вопия: [Воздержники вретищники, и апотактиты да крестиши, аще бо и глаголют, яко во Отца и Сына и Святаго Духа крестихомся. но понеже злу творца Бога нарицающе, хулят по Маркионову учению, не крещени же не приятни]. правило 47. Сих убо вретищников, и апотактитов, повелевают покрещевати отцы, не крещения их ради, во еже бы не трипогружателне крещахуся, ни: но ереси их ради. явственно о сем свидетелствующу преподобному Иосифу Волоколамскому сице: [Суть же и друзии еретицы, аще и зле мудрствуют, но не тако, якоже первии, иже суть наватиане, и донатиане и средницы, и четыренадесятницы, и воздержницы и инии таковии. сии убо исповедуют Святую Троицу, и Господа нашего Iсуса Христа истиннаго Бога нарицают, и плотскому Его смотрению веруют, имут же некоторыя иныя ереси в себе]. слово 15. Доволно яве и преподобному Никону Черныя горы научающу, яко вретищницы не крещения ради покрещеваеми бывают, но ересей. Сице светлым гласом в толковании на 47 правило, Василия Великаго, вопиет сице: [Воздержники и вретищники, и апотактите, томуже слову подлежат, емуже и наватиане, яко о онех убо правило изложено бысть. аще и различне, якоже о сих умолчана быша. мы же единем словом покрещеваем таковыя, аще ли от вас отречено бысть, еже покрещевати, но наше слово крепость да имать, яко понеже маркионитския отрасль тех ересь, гнушающихся брака, и отвергающихся вина, и создание Божие осквернено быти глаголющих. не приемлем их в церквь, аще не крестятся в наше крещение]. слово 63, великия книги.

7: Аще несть лепо первее от еретик, трипогружательне крещеных, покрещевати; чесо ради паки той же святый Василий Великий, повелевает еретиков водопредстателей обращающихся к соборней церкви святым крещением возрождати? якоже видимо есть от 47 его правила, в нем же глаголет тако: [Воздержники, и вретищники, и апотактиты, да крестиши. Аще бо и глаголют, яко во Отца и Сына и Святаго Духа крестихомся. но понеже злу творца Бога нарицающе, хулят по Маркионову учению, не крещени же не приятни]. Негли речет кто от зде сущих, како убо глаголеши, яко Василий Великий повелевает, в сем своем 47 правиле, покрещевати водопредстателей, их же в нем не воспоминает. ведый убо буди, аще бо в сем правиле и не воспоминает их сей великий светилник, обаче в толковании перваго его правила, с прочими еретиками, их же всем повелевает покрещевати, именословне воспоминаеми суть, в нем же пишет тако: [Наватиан же, рекше чистых, и воде предстоящих, и воздержащихся крещение, аще и не приятно есть, понеже оставляет сих Дух Святыи, но смотрения ради будет приятно]. зде же исправляя (сиречь в 47 правиле), еже по смотрению онамо прият, повелевает воздержники и прочия крестити. воднии же предстатели того ради нарицаются, яко во священнодействе святыя чаши воду едину токмо приносят, не смешающе с вином. о чесом явственно свидетелствует Матфей Иеросалимский сице: [воднии предстателие же суть, иже точию воду во священнодейство святыя приносяще чаши, с вином же сию сопримесити не приемлюще, и законному браку ничтоже разнствовати блуда непщующе]. глава 2, перваго состава. Сих убо водопредстателей святый сей светилник повелевает покрещевати, не крещения их ради, яко бы не трипогружателне крещаются, никако, но ересей. понеже ересь их есть маркионитския ереси отрасль. якоже о сем свидетелствует Тимофей презвитер великия церкви, рекий: [Вретищницы и отрочницы мира, и воздержницы, и иже суть воде предстатели, сии в вина место Богови воду приносят, сего ради и воде предстатели нарицаются, сии брак блудодеяния нарицают, и яже от Бога сотворена, яко лукава ненавидят]. Кормчая писменная.

8: Аще не подобает первее от еретик треми погруженьми крещеных паки крестити; како паки той же Тимофей презвитер великия церкве, повелевает еретиков уалентиан, приходящих к христианстей вере, покрещевати, не крещения ради, во еже бы не треми погруженьми крестишася, ни, но ересей их ради. еже явственно показуется от толкования на первое правило Василия Великаго, в нем же тако глаголет: [Уалентиане же телесем отрицают воскресение, и ветхий завет отмещут, пророки же почитающе, и на свою ересь тех пророчества толкующе, баснословия некая слагают, яко сквозе трубу прошедша святую Деву, и ина некая такова хулная блядут]. их же и святый Василий Великий, повелевает в первом своем правиле, ересей их ради покрещевати. якоже явствует Алексий Аристин, в толковании его правила, сице глаголя: [Сии убо от ереси своей обращающеся, и к непорочней вере приступльше крещаются, понеже отвержено есть нами крещение их]. Кормчая, лист 235.

9: Аще не подобает первее от еретик, в три погружения крещеных, покрещевати; како святии отцы собора поместнаго, иже в Лаодикии, повелевают фотиан еретиков, обращающихся к непорочней вере, святым крещением возотрождати. Сице бо в 7 своем правиле глаголют [Кормчая, лист 73]: [наватиане, и фотиане, и четыренадесятники, сии еретицы, аще и иных ереси не прокленут, (ниже) помазани миром да приобщатся]. Зде от сих словес священных отец не показуется, яко их подобает покрещевати: но миром токмо помазовати. обаче Алексий Аристин толкуя оное правило, явственно показует, яко фотиан лепотствует покрещевати, в нем же тако глаголет: [Сии преждереченнии еретицы с инеми ересми и свою прокленше, прияти да будут церковию, и токмо святым миром помазани бывше да причастятся, но токмо наватиане, и четыренадесятницы. фотиане же святаго и спасеннаго крещения требуют, рекше да крестятся]. Сих убо фотиан повелевают святии отцы покрещевати, не крещения их ради, якобы не трипогружателне крещаются, но ересей их ради. еже явственно видимо есть от толкования тогожде правила. первее бо рече [Кормчая печат. в толк. на прав. 7, лист 73]: [Фотиане же святаго и спасенаго крещения требуют, рекше да крестятся (таже вину навед, чесо ради рече:) началник бо их Фотин, многи ереси обнови, и Павла Самосатскаго ересь, и Савелия Ливийскаго, и Монтанову, ни безначална бо глаголаше Божия Слова, ни Творца веком всем, ни первейша всея твари суща, но млада и нова, и начало бытию приемша, от плотскаго рожества, еже от девы]. Кормчая печатная. Подобне и Тимофей презвитер великия церкве изявляет глаголя: [Фотин епископ Сремскии, бысть в царство Константия, Павла Самосатскаго, и Савелия Ливийскаго, и Монтанову ересь обнови, ни безначална, ни всех творца, ни прежде суща всея твари, Бога Слова проповеда, но млада и нова нарица и, и начало приимша от плотскаго, иже от девы рожества]. Кормчая писменная, написание ко Иоанну презвитеру. Сим всем согласно и Матфей Иеросалимский поведает глаголя: [Фотиниане же от Фотия влечаху звание, от Сирмия убо суща, и тамо епископа бывша, тождереченному Павлу мудрствовавша Самосатскому]. глава 2, перваго состава. Его же, Фотина, (по сказанию Тимофея презвитера великия церкве), [иже в Сирмии бывший собор, не токмо от сана обнажи, но и чюжда от греческаго жития осуди. тем и сущии от тоя ереси святаго и спасеннаго крещения требуют]. Кормчая писменная [в чине о ересех].

10: Аще не подобает первее от еретик, трипогружателне крещеных, паки крестити; како паки той же Тимофей презвитер и сосудохранитель великия церкве, еретиков келестиан, иже от Пелагия и Келестина, приходящих к соборней церкви, повелевает покрещевати? о них же пиша в различии о приходящих от ересей, к благочестивей вере, сице глаголет: [И крещаемии убо сии, таскудрути, маркионисте артотирите, вретищники, и апотактите, валентини, и ермеи зовомии, (ниже) и иже от Пелагия и Келестина]. Кормчая, лист 634. Сим последующих повелевает покрещевати, не того ради, якобы не треми погружении крещаются, но ересей их ради. якоже свидетельствует Матфей Властарь, глаголюще сице: [Келестий же ученик Пелагия, некоего мниха, беста же и оба Карфагена, якоже Константина града Фотий исповедует, новейшая привождаху предания, смертна бо создана быти в начале Адама прилежаста, а не преступления сего осудися, новорожденным младенцем не требовати крещения, не бо обносят прадедняго еже от Адама греха, место же быти посреде рая и муки, в нем же просветитися недоспевшим младенцем преставляемым блаженне жити, сия и иныя шесть приискренния сим главизнам сущии о Пелагии и Келестине вероваху, их же и сей вселенскии (третий) собор, анафеме предаде, но убо и в Карфагене собор]. глава 2, перваго состава.

11: Аще не годствует первее от еретик в три погружения крещеных покрещевати; како святый Василий Великий повелевает, еретиков четыренадесятников, обращающихся к православней вере, в 47 своем правиле святым крещением очищати от скверн их еретических. сице бо взывает глаголя: [Воздержники, и вретищники, и апотактиты да крестиши. Аще бо и глаголют, яко во Отца и Сына и Святаго Духа крестихомся, но понеже злу творца Бога нарицающе, хулят по Маркионову учению, не крещени же не приятни. еже истолковано сице: в первом убо правиле своем по смотрению словесе воздержник, и наватиан, глаголемых чистых, великий сей светилник прият крещение, и повеле святым миром помазовати их, егда приходят к соборней церкве вере, и ереси своя прокленут. зде же исправляя, еже по смотрению онамо прият, повелевает воздержники и прочая крестити]. Кормчая, лист 232. Но речет ли кто от зде присудствующих, како глаголеши, повелевает Василий в своем правиле, еретиков четыренадесятников покрещевати, их же ни мало не воспомяну именословне, обаче общим именем сокращенне рече: и прочия крестити. понеже сии еретицы четыренадесятницы, от иных святых отец купно с наватианами исчисляеми суть. якоже в правиле 7, втораго вселенскаго собора отцы, вкупе с наватианами исчисляют сице: [Четыренадесятницы, и средницы, и ариане, и наватиане]. тем же аще именословне не воспомяну, обаче сокращенне упомяну, сего ради тому же правилу подлежат. ихже святый Василий Великий повелевает якоже наватиан покрещевати, не крещения их ради, яко бы не трипогружателне крещаются, ни, но ересей их ради. ибо ересь их есть ереси наватовы еже явственно видимо есть от толкования правила 7, собора иже в Лаодикии, поместнаго, в нем же пишет тако: [Четыренадесятницы нарицаются, в четвертый бо надесять день луны, егда полна будет, и аще прилучится день той в понеделник, или во вторник, или в среду, тогда тии и Спаса нашего празднуют воскресение. не приемлют же якоже и наватиане, обращающихся и кающихся грех своих. да держат же и почитают отверженныя книги, и ина многа таковая мудрствуют]. Кормчая, лист 73.

12: Аще не подобает первее от еретик треми погружении крещеных, паки крестити; како паки той же Тимофей сосудохранитель великия церкве еретиков евтихиан и диоскорян, приходящих к благочестивей вере, повелевает покрещевати, сице глаголющь: [Несторианы же, и евтихианы, и северианы, и иже от подобных им ересей, подобает им творити записания, и проклинати свою ересь, и Нестория, и Евтиха, и Диоскора, и Севира, и прочия началники таковым ересем, иже тех мудрствующыя, и вся яже прежде воспомянутыя ереси, и тако восприимати им святое крещение]. Кормчая, лист 635. Сих убо евтихиан и диоскорян повелевает сей Тимофей покрещевати, не крещения их ради, якобы не трипогружателне крещаются но ересей их ради. но показуется сие от надписания, четвертаго вселенскаго собора, идеже пишет тако [Матфей Властарь]: [Диоскор убо сей словущаго града Александрии, священная на священне правяше кормила, Евтихий же сущих в царьствующем граде священных обителей архиманрит бяше [Кормчая в надписании четвертаго собора] та бо Господа нашего Iсуса Христа, единосущна убо Отцу исповедаста, о вочеловечении же Его глаголаста: и бежаста Несториева разделения, два сына глаголющаго, и во ино зло от разделения впадоста: иже двема естествома божеству же и человечеству, по совокуплени убо смеситися и во едино сотворитися естество, нечестиво проповедаста: имже и к Божеству страсти прилагаста: но и плоть не единосущну нам Господь прият глаголаста, ни от девических кровей совокупльшуся: но неизреченне некако и божественне воплотитися Ему глаголаста, и иная многа блядословяста]. Кормчая, лист 93.

13: Аще не лепотствует первее от еретик трипогружателне крещеных воспокрещевати, како святый Григорий Богослов тезоименитый, еретиков ариан, обращающихся к соборней церкви, повевает покрещевати? сице светлым гласом вопиет глаголя: [Ныне же кая лесть благодати, паче же дающих благодать, яко в Бога уверити, и возъити безбожну, иному исповестися, и иному учитися, никаковы словес татьбы, и льсти, иным вопрошением, и исповеданием во оно не сущыя, увы светлости, аще по бани очерневаются, аще светльшыя зрю, не у очищенныя, аще крестителя злославием коварствуюся, аще ищу лучшаго духа и не обретаю, даждь ми баню вторую, и о первой зле помысли]. слово 24. на еретики. Сих убо ариан повелевает святый Григорий покрещевати, не крещения ради, понеже убо они, по сказанию Матфея Иеросалимскаго [глава 2, перваго состава], точно нам божественным совершаются крещением, но ереси их. ибо ересеначалник их Арий, сый презвитер иже во Александрии церкве, Сына Божия и Святаго Духа единосущна Отцу, создание всескверный предаваше. Но и сам Григорий явственно сказует. яко ариане погружающеся крещаются, сице глаголя: [Что глаголете погружающии, или возгружающии, есть ли быти духовным без Духа, причащается ли Духу, нечествуя Духа? чювствует ли, воздание и единоравное крещаяся? несть.] слово 25, ко арианом.

14: Аще несть лепо первее от еретик треми погруженьми крещенных покрещевати: како паки Тимофей презвитер, в различии о приходящих от ересей, еретиков несториан, приходящих к православнокафоличестей вере, повелевает покрещевати. идеже тако глаголет: [И несторианы же, и евтихианы, и северианы, и иже от подобных им ересей, подобает им творити записания, и проклинати свою ересь, и Нестория, и Евтиха, и Диоскора, и Севира, и прочия началники таковым ересем, иже тех мудрствующыя, и вся яже прежде воспомянутыя ереси, и тако восприимати им святое крещение]. Кормчая, лист 635. их же несториан еретиков повелевает Тимофей презвитер покрещевати, не крещения их ради, яко бы не трипогружателне крещаются: но ересей их ради. о них же поведает Матфей Властарь, глаголя: [Несторий убо патриарх Константина града, проста человека глаголаше Христа, соединитися Ему по любовному одержанию Сыну Божию, Егоже ради, ниже Богородицу святую Деву именоваше]. глава 2, перваго состава.

15: Аще не подобает первее от еретик, в три погружения крещеных покрещевати. како святыи Василий Великий, еретиков средников, обращающихся к соборней церкви повелевает паки крестити? о них же в 47-м своем правиле сице глаголет: [Воздержники, и вретищники, и апотактиты, да крестиши. аще бо и глаголют, яко во Отца и Сына и Святаго Духа крестихомся, но понеже злу творца Бога нарицающе хулят, по Маркионову учению, не крещени же не приятни. Толкование: В первем убо правиле своем, воздержник, и наватиан, глаголемых чистых, великии сей светилник церковныи прият крещение, и повеле святым миром токмо помазовати их, егда приходят к соборней церкве вере, и ереси своя проклинают. зде же исправляя, еже по смотрению онамо прият, повелевает воздержники, и прочия крестити]. Кормчая, лист 232. Зде мнитмися, яко возглаголет некто от ссутствующих, како ты глаголеши на сего светилника великаго, яко он повелевает еретиков средников покрещевати, о них же нимало не воспомяну. обаче аще и не воспомянул есть зде в правиле, но в толковании краткословия ради, по изречении еретиков, общим именем рече, и прочия крестити. понеже сии средницы подобни суть своими ересми, еретиком четыренадесятником, и наватианом. их же и прочии святии отцы купно с сими, и прочими сим подобными, их же повелевает святый Василий Великий покрещевати, именословне исчисляюще полагают. Сице преподобный Иосиф Волоколамский: [Суть же и друзии еретицы, аще и зле мудрствуют, но не тако якоже первии, иже суть наватиане, и донатиане и средницы, и четыренадесятницы, и воздержницы, и инии таковии. сии убо Святую Троицу, и Господа нашего Iсуса Христа истиннаго Бога нарицают, и плотскому смотрению Его веруют, имут же некоторыя ереси в себе]. слово 15. Повелевает же их святый Василий покрещевати, не крещения ради. понеже бо сии точно нам погружателне крещаются. явственно о сем свидетелствующу Матфею Иеросалимскому сице: [Арианы убо и македонианы, и саватианы, и наватианы, глаголющих себе чистых, и левыя, и четыренадесятники, и средники, и аполинарианы, (ниже) точно нам божественным совершаются крещением]. глава 2, перваго состава. Якоже той же Матфей изъявляет глаголя: [Тии же средницы, яко пасху празднующе, не разрешати но постити велят, якоже в среду, июдеом и в сем подобящеся, иже по пасце опресноки и горчицы ядущим]. глава 2, перваго состава. Откуду: [и средницы нарицаются, понеже (по сказанию святых отец втораго вселенскаго собора) в среду мяса ядят, а в суботу постятся]. правило 7 [втораго вселенскаго собора].

16: Аще не лепотствует первее от еретик трипогружателне крещеных покрещевати. како Тимофей презвитер, еретиков севериан прибегающих ко благочестивей вере, повелевает святым крещением возотрождати, сице глаголя: [и несторианы же, и евтихианы, и северианы, и иже от подобных им ересей подобает им творити записания, и проклинати свою ересь, и Нестория, и Евтихия, и Диоскора, и Севира, и прочия началники таковым ересем, иже тех мудрствующыя, и вся яже прежде воспомянутыя ереси, и тако восприимати им святое крещение]. Кормчая, лист 635. Их же повелевает Тимофей покрещевати, не того ради, якобы не трипогружателне крещаются, ни, но ересей их ради. понеже ересь их есть отрасль ереси Евтиховы и Диоскоровы. о чесом свидетельствует Матфей Властарь, сице глаголя: [Севир же Антиохийский епископ бе, не по чесому же менший в нечестии Диоскора и Евтиха. сего ради и от православных от престола вкупе и из града изгнан бысть, Александрии же достиже, идеже и книгу списа, всякаго исполнену нечестия, в ней же отметаше убо иже в Халкиндоне четвертый собор, укрепити же покушашеся предающую ересь, едино естество на Господне совокупление]. глава 2, перваго состава.

17: Аще несть лепо первее от еретик в три погружения крещеных покрещевати; чесо ради Иоанн митрополит Никейский, еретиков армен, приходящих к соборней церкви, повелевает паки крестити? иже глаголет тако: [Темже проявлено, яко крещение их, и вся яже от них содеваемая не приятна и не потребна суть, аще и тщатся несмысленнии и неразумнии, и не утверженнии, и лживии христиане, яко истинна и благоприятна творят деяния их. аще бо вера их права и благоприятна есть, да будет и крещение их приятно, аще же вера их не прятна есть, како крещение их приятно?]. в слове обличителном на армены. Обаче повелевает их блаженныи Иоанн покрещевати, не крещения их ради, яко бы не трипогружателне крещаются, но ересей их ради. понеже ересь их есть порождение ереси Евтиховы и Диоскоровы. якоже пишет в книзе Кирилове: [Исперва убо армени бяху с нами в соединении и в праволсавней вере, до святаго четвертаго собора вселенскаго, иже в Халкидоне святых собравшихся, 630, потом же отвергошася от святыя соборныя церкве, и от православныя веры, впадше в ересь Евтихиеву и Диоскорову]. О арменской ереси, глава 30. И во иныя тмищныя. о чесом засвидетелствует Тимофей презвитер великия церкве сице глаголя: [Тии же тмами в ереси впадше, и от соборныя церкве отчюждившеся, и от кесарийския церкве поставления не приемлюще, како не суть всячески не священнии и без рукопоставления? и иже от них крещаемии отнюд язычницы некрещении]. Кормчая, лист 636.

Зриши ли, коликих и каковых еретиков, от ересей своих обращающихся, ко истинней христианстей вере, треми погружении крещеных, священнии отцы священными своими правилы, и поучителными словесы, повелевают второе святым крещением от скверн еретических очищати. и не токмо сих: но и агарянских детей, иже от православных священников, святогреческаго закона трипогружателне крещени быша, яко не благ залог имущих, прибегающих от агарянскаго своего их нечестия. ко святей соборней апостольстей церкви, повелевают паки совершенно святым крещением крестити. явственно о сем свидетелствует севаст Константин Арменополь номофилакт и судия Фессалонитский, сице.

18: Знамение синодалное, в царство Комнина господина Мануила, патриарху сущу Луце. (ниже) во дни же святейшаго патриарха господина Луки, предсташа агаряне синодално, и спрошаеми креститися, яко предваривша в страх их креститися, и вопрошаеми, како? отвещаша: обычай есть всем младенцем агарянским крещатися от православных иерей, но не прияшася. услыша бо, яко от неверных искомое от христиан крещение, не залог благ и произволение православное ищется, но лечбу телесную. возмнися убо у агарян чадом их бесноватися, и потом смердствовати, аще не крещение получат христианское. и оттуду не яко чистителя всякия скверны дешевныя, и света божественнаго, и святьбы подателя воспрошают но токмо бальство, или напевание. неции же из них матери реша имети православныя, и от тщания сих креститися им от православных. но ниже сии услышашася, яко не предсташа свидетели, сие самое свидетелствующии. паче убо и осудишася, яко не благое предприятие дающе на себе, во еже приходити к вере православней, темже и попустися всячески сим креститися. книга 1, надпись 8.

Согласно сему и Матфей Иеросалимский, о агарянских детех поведает, глаголя: видети есть и во глубоцей тме агарянскаго злочестия свет насилуем благодатный, и от тоя не объемлем или убежаем. понеже знамение ниже верным возбранено бысть, возводяще сих к божественому помазанию. обычай бо есть от агарян многим не первее обрезовати своя младенцы, прежде даже убо под властию их христианстии священницы и неволею понуждени будут сия крестити. взыскание убо бысть о сем на соборе, иже в царствующем граде Луце божественному патриаршеский правяще престол, аще подобает таковая истинней христианстей вере приступающих покрещевати? или токмо миром помазовати? и суждено бысть сих непрекословно паки крещати. имже бо измышася крещением, не мыслию благочестивою, но яко чарование или обаяние некое сия прияша. глава 3, втораго состава. Сим споследствующе и святии отцы афонстии, повелевают агарянских детей, первее приемших крещение, от христианских священников, не с благою мыслию, всячески покрещевати, сице взывающе: аще же агарянския дети крещени бывше по времени от кого, паки крещаются и тии послежде, аще от произволения обратятся ко истинне. Номоканон, правило 202.

19: Не токмо же божественнии отцы, агарянских детей, прежде крещенных от благочестивых священников: но и от неосвященных ложне сотворившихся священниками крещеных, повелевают отнюд покрещевати, сице глаголет Матфей Иеросалимский в книзе своей: [взыскано бысть и се Ираклийскому вопрошающу Мануилу, аще подобает приимати яко верна, его же не священ крестил есть, священник ложно сотворився? се бо в пределе его тогда приключися. и суди собор и сим покрещеватися. понеже бо, рече, по священных апостольских правилех, 46, и 47. единем епископом дается и священником, еже святаго крещения совершение. показуется же и от 26, и 47, иже в Лаодикии собора, овому убо не оглашевати, сиречь поучевати оглашенныя, не поставлену от епископа, овому же просвещаемым веру возвещати. не точию: но и реченнаго шестаго собора, и Карфагенскаго, иже сомнение имущих, аще и крестишася, неразложне крещати повелевают. ни убо несть преподобно, ниже непогрешно, ни без соблазна крестившемуся, от не приемшаго власть крещати. и прощением оставление даровати согрешением. чистително бо сим крещение, божественному сопримешати лику, не мала убо беда, да не когда от такова сомнения, тии убо еже святаго крещения очищения лишатся, и мы со некрещеным предваримся причащающеся. аще ли же кто судит глаголя, бывших ради от людин молитв, и помазание мира святаго истинно подобает быти, еже от несвященнаго даемое вменяти крещение. сице убо рещи имать и хиротонисанных от некоего не священна, епископом лицемерящеся, подобает быти причетником. и повнегда уведано будет, еже есть безместно, и сопротивно четвертому правилу втораго собора, еже о Максиме кинице повелевающее, ниже тому быти епископу, и иже от него хиротонисанным ничтоже множае от него ползоватися. в сем убо нетвердым бывшим, яже чрез устав он содея; еще и 20-му, иже в Средце, иже от Моисея и Евтихиана, не священным сущим хиротонисанных от причта совершенне изгнавше, и в людских сведшуся место. яко же бо они не хиротонисаны, сице и сии не крещени вменяются. и яко же агарянская крещаемая отрочата, еже не злосмрадием воняти, христиане не вменяется: сице и иже миром помазуемии от несвященных, яко не дано бысть сицевым от крещения коего отнюд подавати]. глава 3, втораго состава. Согласно сему и кир Симеон Солунский от неосвященных лицемерящыхжеся священниками быти, крещеных повелевает покрещевати, сице вопия: [аще ли неции попущением Божиим, в толикое приидоша дерзнутие яко еже неверне и злочестивне, [неверие бо вещь таковая, еже кроме священства прияти хиротонию] священная действовати, несть слово рещи о осуждении сицевых: сие бо дело горше есть и самех тех нечестивых бесов, во аггела светла претворяющихся, но не сущих, и Божие убо лицемерствующих, безбожных сущих и противных Богу. таковии не токмо велие и неисчетное томление подъимут, на божественная сице зле похуливше, ниже бо гласи божественнии от них, ниже божественная дела, понеже благодати рукоположения не имут, но и месть приимут иную за прелстившихся от них, или негде крещеных, или рукоположеных. сии бо не хиротонисаны, ни крещени суть, ничто бо дает не имеяй, и никтоже приемлет что от неимущаго, аще и мнится. темже и прелщен бысть, веруяй быти священник, или крещен, несть. и погибели сих крестивыи повинен. не может бо человек имети не прием от Бога. кроме бо Мене, рече, не можете творити ничтоже [Ин. 15, зач. 8]. Номоканон, лист [ответ кир Симеона Солунскаго].

Сего ради и святии отцы афонстии, от неосвященных, сотворившихжеся ложне священными, крещеных повелевают покрещевати, сице вопиюще: [Второкрещаются паки, иже ложне творящеся, поистинне же не суще священницы, крестиша]. правило 203.

20: Но что много глаголю; что много исчисляю; не токмо бо священнии священными своими правилы отцы, от еретик первее крещеных трипогружателне приходящих к соборней церкви повелевают паки крестити: не токмо агарянских детей в начале от православных священников крещеных, таже живших в своем махометском законе, и паки обращающихся ко истинней вере, определяют покрещевати: не токмо от ложне лице приемших на ся священства, крещеных законополагают воскрещевати: но и тех самех, иже во младенчестве от православных священников крещени быша, младенческаго же ради возраста недоведят, аще крещени быша, или ни, ниже имут извествующаго им яко крещени быша, повелевают всячески второе крестити, да не како недоведения ради нази будут божественнаго просвещения. сице божественнии отцы собора иже в Карфагене, священным своим правилом вопиюще, повелевают: [Неразумевающих, аще крещени быша, или ни, ни сам того свесть, младенческаго ради возраста, и инаго не имать извествующа ему, и свидетелствующа воистину, яко крещен есть, таковаго без сомнения крестити подобает, да не размышления ради лишится божественнаго очищения]. правило 73. Подобне и шестаго вселенскаго собора отцы повелевают глаголюще: [иже не ведят, ни послух же не имут, аще крещени быша, да крестятся. Толкование: Елицы не ведят, аще во младенчестем возрасте, крещени быша, не обретаютсяжеся ни послухи неции достовернии, безизвеста тех извествующе, аще крещени суть, без всякаго претыкания да крестятся]. правило 85. Но и Матфей Иеросалимский, приводя правило шестаго вселенскаго собора 85, и Карфагенскаго 73, повелевает сомнение имущих, аще крещени быша, или ни, паки крестити, сице глаголя: [осмьдесят и пятое правило шестаго собора, еще же и 73, Карфагенскаго, сомнящыяся младенцы, аще божественнаго получиша крещения, ниже сим ведущим возраста нечювствием, ниже иных известне свидетелствующих, без сомнения повелевают крестити. аще бо едино исповедати крещение, от божественаго изображения научили быхом. Но понеже Господь рече: Аще кто не родится водою и Духом, не может внити в царство небесное, убоимся, да не лишимся божественнаго крещения, прикладным к духовному браку не облечен одеянием, чертога вкупе и брака извержен будет. лепо есть во имущих сомнение, побеждати человеколюбне несомненное]. глава 1, втораго состава. Сим всем согласно и святии отцы афонстии повелевают сомнение имущих, аще крещени быша, или ни, покрещевати, вопиюще сице: [Елицы не знают, аще крестишася от пленении негли, или от инаго недоумения, и никтоже да известит их опасно, да крещаются паки, по 73-му правилу, иже в Карфагене святаго собора]. Номоканон, правило 201.

Видиши ли убо колицы и каковы светила церковная, забрала православия, божественнии, глаголю, отцы живописателными своими гласы вопиюще, в священных своих правилех, первее от еретик трипогружателне крещеных, приходящих ко истинней христианстей вере, и не токмо от еретик: но и от православных священник агарянских детей не с благочестивою мыслию крестившихся; к сим и несвященных, ложне священниками сотворившихся крещенных; еще же и от благочестивых иерей крещеных, не сведящих же совершенно, аще крещени быша, или ни, ниже имущих свидетелствующих, яко крещени суть, повелевают безпрекословно второе яко некрещенных суще крестити; како убо глаголеши, яко не подобает второе, первее треми погруженьми крещеных, аще и от еретик крестишася, крестити.

Аще бы не подобало второе, первее трипогружателне от еретик крещеных, приходящих ко святей соборней церкви, крестити: не бы божественнии апостоли во своих священных правилех, 46 и 47, всякаго от еретика крещенаго покрещевати повелевали, приемлющаго же от еретик крещенаго яко крещенаго епископа или презвитера не бы из сана извергали.

Аще бы не подобало второе первее треми погруженьми от еретик крещеных, приходящих ко благочестивей вере, крестити: не бы святии отцы поместнаго собора иже в Харкидоне, повелевали от всякаго еретика и расколника крестившихся, святым крещением очищати.

Аще бы не подобало второе, первее в три погружения от еретик крещеных, обращающихся ко истинней вере, крестити: не бы святый Василий Великий повелевал, еретиков воздержников, вретищников, апотактитов, наватиан, саватиан, водопредстателей, четыренадесятников, средников, и прочих сим подобных покрещевати.

Аще бы не подобало второе, первее трипогружательне от еретик крещеных, прибегающих к православней вере, крестити: не бы святии отцы перваго вселенскаго собора, повелевали павликиан еретиков паки крестити.

Аще бы не подобало второе, первее в три погружения от еретик крещеных, прилагающихся к части православных, крестити: не бы священнии отцы, собора иже в Лаодикии, повелевали фотиан еретиков святым крещением просвещати.

Аще бы не подобало второе, первее трипогружательне от еретик крещеных, прибегающих к православию, крестити: не бы богословию верх святый Григорий повелевал еретиков ариан совершенно святым крещением крестити.

Аще бы не подобало второе, первее треми погружении от еретик крещеных, обращающихся ко благочестию, крестити: не бы Никон Черныя горы, еретиков вретищников и апотактитов повелевал паки крестити.

Аще бы не подобало второе, первее в три погружения от еретик крещеных, приходящих ко святей кафоличестей вере, крестити: не бы Тимофей презвитер, еретиков манихеян, уалентиан, маркионитян, пелагиан, несториан, евтихиан, севериан, и прочих сим подобных повелевал святым крещением просвещати.

Аще бы не подобало второе, первее трипогружателне от еретик крещеных, обращающихся к соборней церкви, крестити: не бы Иоанн митрополит Никейский, повелевал еретиков армен покрещевати. но понеже божественнии апостоли повелевают всякаго от еретик крещенаго, аще трипогружателне, аще ни, ничтоже упоминающе, без изъятия, приходящаго к соборней церкви, покрещевати; како от никонопоследствующих священников, толь многобогатящихся различием ересей, их же выше изъявихом, крещеных обращающихся к православней вере, не подобает паки крестити? ей подобает.

Понеже святии отцы собора, иже в Халкидоне, всякаго от еретика и расколника, крещенаго, повелевают воскрещевати: како не подобает от новодействуемое имущих крещение, не от в расколе, но от в ересех состоящаго священника, крещеных, приходящих к части православных, паки крестити? воистинну подобает. Понеже священнии отцы перваго вселенскаго собора, повелевают от павликиан крещеных, неотложне крестити: како не подобает от новодействуемое имущих крещение, иже павликианом смудрствуют, паки крестити? зело подобает.

Понеже отцы собора, иже в Карфагене, от донатския ереси, иже во время причащения, кость некую целуют, обращающихся повелевают покрещевати: како не подобает от новодействуемое имущих крещение, в толь множайших ересех погрязших, паки крестити? поистинне подобает.

Понеже святый Василий Великий повелевает еретиков воздержников, вретищников, апотактитов, водопредстателей, четыренадесятников, средников, саватиан, и наватиан, иже аще и право мудрствоваху о Святей Троице, и о воплощении Сына Божия, и трипогружателне крещахуся, но иныя ереси в себе содержаху, воскрещевати: како не подобает от новодействуемое имущих крещение, иже в пятиперстном своем благословении, неправо мудрствующе о Святей Троице, не изображают треми персты триех божественных ипостасей, и в воплощении Сына Божия не изъявляют двема персты дву естеству во Христе Бозе, паки крестити? всячески подобает.

Понеже Тимофей презвитер великия церкве повелевает еретиков, мессалиан, несториан, евтихиан, севериан, яковитов, единоволников, и прочих сим подобных, покрещевати: како не подобает от новодействуемое имущих крещение, иже и мессалианствуют, и евтихианствуют, и яковитианствуют, и единоволствуют о чесом во вторей главе явлено, паки крестити? неотрочне подобает.

Понеже блаженный Иоанн митрополит Никейский, повелевает еретиков армен, яко во тмищныя ереси впадоша, святым крещением очищати: како не подобает от новодействуемое имущих крещение, в толь премного безчисленныя ереси впадших, их же от многих малая во вторей главе предложихом, паки крестити? ей ей подобает. Темже убо аще божественнии апостоли повелевают от еретиков крещеных, аще и в три погружения крещени, крестити: аще святии отцы перваго вселенскаго собора, и поместных, иже в Кархидоне, иже в Карфагене, и иже в Лаодикии, и святый Василий Великий, и Тимофей презвитер, и Никон Черныя горы, и Иоанн Никейский, повелевают еретиков, их же выше именословне изъявихом, иже аще и трипогружателне крещени быша, обращающихся к соборней церкви, покрещевати. убо безпрекословне подобает, и от новодействуемое имущих крещение, приходящих к православней вере, аще и трипогружателне крещаются, но ересей их ради, паки крестити.

Глава, 4.

О еже правила яко седми вселенских собор, тако и девяти поместных, сице и особь от святых отец сложенная святая церковь ненарушително повелевает соблюдати.

Но вем воистинну вем, яко речет кто от сведущих правила, глаголя: священная правила повелевают еретиков, наватиан, саватиан, ариан, несториан, четыренадесятник, средник, и прочих сим подобных, токмо святым миром помазовати, и тако на общение приимати. сице правило перваго вселенскаго собора глаголет [Кормчая, лист 3]: еретицы глаголемии чистии, приходяще к соборней церкви, первое да исповедят, яко повинуются церковным законом, и приобщаются с двоеженцы, и простят согрешающих. и аще убо будет же и от сих, глаголемых чистии, другий епископ поставлен или презвитер да имать честь, или, аще хощет града того епископ, да даст ему негде в селе епископию. Толкование: от приходящих еретик, ко святей Божией соборней апостольстей церкви, ови убо крещаемии бывают совершенно, друзии же, иже токмо миром помазуются, инии же токмо проклинают своя и иныя ереси вся. сии же глаголемии чистии прелщени бывше в таковую ересь, от Навата презвитера Римския церкве, от него же и чисти наречени быша, того ради: понеже не приемлют покаяния обращающихся от грех. и второе женитися возбраняют, двеженца же отнюд не приемлюще на общение, и таковии аще убо приступят к святей соборней апостольстей церкви, и исповедят двоеженца приимати на общение, и не хулити втораго брака, и согрешающим и кающимся прощати грехи: и просто рещи, всем церковным последующе повелением, свою ересь прокленше и иныя вся, прияти да будут, и токмо святым миром помажются. согласно сему и правило 7, собора поместнаго иже в Лаодикии повелевает сице [Кормчая, лист 73]: наватиане, аще инех ереси не прокленут,, и с теми и свою, не приятни, аще прокленут, помазани миром да приобщаются. сим подобне и правило 7, втораго вселенскаго собора, заповедает глаголюще [лист 88]: четыренадесятницы иже и средницы глаголются, и ариане, и наватиане, и македониане, и саватиане, и аполинарите писание вдавше, приятни, помазующе токмо вся чювства. но и девятьдесят пятое правило, шестаго вселенскаго собора, согласно повелевает, сице глаголюще [лист 205]: обращающихся от еретик, сице приемлем, арианы, македонианы, и наватианы же, иже и чистии именуются, иже суть средницы, и аполинарианы, и евтихианы, и северианы, и иже от подобных им ересей, проклинающыя вся ереси, и с ним и свою, помазуем святым миром, темена, очи, ноздри, уста, уши, и знаменающе я глаголем, печать дара Святаго Духа. сего ради от новодействуемое имущих крещение, не лепотствует покрещевати, но токмо святым миром помазовати, и тако приимати я. но вонми убо внятно, и разсуждай прямо. святый Василий Великий приходящих к соборней церкви, на три чины распределяет, на еретики, расколники, и подцерковники, сице бо глаголет в первом своем правиле [лист 224]: [еретик есть, иже верою чюждь. а иже по некоему незнаему вопрошению, той есть расколник. собирающии же сих, или от инех непокориви, сии суть подцерковники. иже отлучившеся сами от соборныя церкве, и иную создавше, особно собираются. а еже от еретика крещение не приятно; от расколника, и подцерковника приятно. Толкование: Еретицы убо глаголемии пепузини. иже началника их Монтана утешителем именуют: темже иже в того крещающиися не крещени суть. наватиан же рекше чистых и воде предстоящих, и воздержащихся крещение, аще и не приятно есть, понеже оставляет сих Дух Святый, но смотрения ради да будет приятно]. зде убо сей святый великий церковный светилник, наватиан, водопредстоящих, и воздержащихся, крещению отрече быти приятну, Духу Святому оставляющу я; но смотрения ради попусти е быти приятно. сие самое в 47 своем правиле исправляя, повеле оных всячески крестити. ариан же повелевает святый Григорий Богослов покрещевати, сице вопия: [Увы светлости, аще по бани очерневаются, аще светлшыя зрю, не у очищенныя, аще ищу лучшаго духа, и не обретаю, даждь ми баню вторую, и о первой зле помысли]. слово 24. на еретики. Еже убо в первенствующей церкви и творяху святии отцы, рекше покрещеваху ариан. о чесом повествуется в житии святаго Порфирия епископа Газскаго, сице: егда отпущени быша святии отцы, Иоанн и Порфирий от царя Аркадия списанием, и приближишася к острову родийскаго, молиша Навклира, да пристанет к брегу, яко да шедше целуют преподобнаго Прокопия отшелника. Навклир же не хотяше сказуя ветр быти неудобен, и весма не послуша святителей Христовых, бе бо в тайне арианин, и ненавидяше правоверных епископов. и егда мину той остров, абие в мори бысть буря и волнение, и бяху вси в страсе велицем, боящеся потопления. бысть же то весь день, и всю нощь. восходящей же заре утренней святый Порфирий воздремася мало, и виде преподобнаго Прокопия глаголюща к ему: Навклира увещайте отврещися ереси арианския, и прокляти ю, и огласите его к крещению, и абие волнение то страшное престанет. воспрянув же святыи Порфирий, сказа блаженному Иоанну митрополиту, и прочим с ним бывшим. и призвавше Навклира реша ему: аще хощеши спасену быти от потопления кораблю твоему, и всем нам, а наипаче души твоей избавитися от вечныя погибели, то отвержися зловерия твоего ереси арианския, и приобщися кафоличестей вере. Навклир же удивися, яко святии епископи уведаша тайну, ея же никтоже ведяше, и рече к ним: понеже откры вам Бог тайная сердца моего, убо отвергаюся Ариева мудрования, и верую, якоже вы веруете. утвердите же вы мя лучше ко святей вере. тако Навклиру глаголавшу, абие преста буря, и бысть тишина в море. а святая поучивше Навклира от божественнаго писания, и утвердивше в православии, огласиша его и крестиша. минея четия, февраля 26. И виждь ми, оная правила вышеименованных еретиков, повелевают токмо святым миром помазовати. святый же Василий Великий, и прочии святии, их же в третией главе именословне предъявихом, тех же еретиков повелевают покрещевати их же и покрещеваху, якоже предпоказахом. отсюду яве видимо есть, яко оная правила, яже выше в третией главе предложихом, не меншую силу их имут, но равную. сего ради и равне я долженствуют соблюдати. понеже священная священных отец правила, яко вселенских соборов, тако и поместных, сице и особь сущих святых отец, изложенная равно должна суть всячески исполняема быти. явственно о сем преподобному Никону Черныя горы возглашающу сице [Кормчая, глава 71, лист 637]: изглашение от божественных правил, от богоносных соборов, и особь святых отец бывших, яко един Дух Святый действова, в поместных же и вселенских соборех, и подобает даже и до кончины века, христианом божественная тех хранити правила, а непщевати вины о гресех. глаголет бо божественный о сих апостол [к галатом, зач. 299]: аще кто вам благовестит, паче еже прияли есте, анафема да будет. паки той же: яко аще и мы, или ангел с небесе благовестит вам, паче еже приясте, анафема да будет. Зриши ли, яко не токмо апостолом, но и тому самому ангелу с небесе возбраняет, к вящшему мню опасству и утвержению. и зде убо тако. и паки той же Святый и поклоняемый Дух вдуну и научи святым шестым собором, из уст святых, в предисловии божественных правил сочетав всех собор, в коемждо колико правил изложил есть. изволижеся и се святому сему собору, добре еже и споспешнейше, яко пребывати от ныне тверду и известну к душевному врачеванию, и исцелению страстей, от иже прежде нас святых и блаженных отец приятое и утверженное. и еще же и преданная нам именем святых и славных апостол правила, 85. и понеже в сих правилех вчинено бысть приимати нам, в тех же святых  апостол, Климентом завещанная, в них же древле от иноверных на пагубу церкви лестна некая и странна благочестию приложена быша, благолепную доброту божественных велений нам погубляюща. таковых завещаний по подобию отложение христианскаго стада, к созиданию и утвержению, никакоже вмещающе еретическаго лжесловесия рождения, и присному апостолскому и совершенному учению прилагающе. назнаменаем же и прочая вся священная правила яже святыми и блаженными отцы нашими изложенная, сиречь, иже в Никеи собравшихся, 318 святых и богоносных отец: и иже во Анкире: и еще же в новей Кесарии: и в Гангре: такожде и во Антиохии сирстей: но и иже в Лаодикии фригийстей: еще же, 350-ти, в богохранимом граде царьстем сшедшимся: и двою сту, иже во Ефесстей митрополиии собравшихся первее: иже в Халкидоне 630, святых и блаженных отец: такожде и в Сардикии: и сущих в Карфагене и еще же паки в богохранимом Царе граде сшедшихся, при Нектарии сего града наместнице: и Феофиле бывшем во Александрии архиепископе: но и Дионисия бывшаго архиепископа Александрийскаго великаго града: Петра епископа и мученика: Григория епископа бывшаго новыя Кесарии и чюдотворца: Афанасия Великаго архиепископа Александрийскаго: Василия архиепископа Кесарии каппадокийския: Григория епископа Нисскаго: Григория Богослова: Амфилохия Иконийскаго: Тимофея архиепископа Александрийскаго: и еще же от Киприана бывшаго архиепископа африкийския страны и мученика, и иже с ним собора изложенное правило, еже в предреченных наместник местех точию по преданному обычаю удержа: и ни единому же мощно быти проявленная развращати правила, или отметати, или иначе паче лежащих приимати правила, ложными надписаньми от неких сложенная, иже истину корчемствовати начинающих. (ниже) сим сице засвидетелствованным, нам радующимся о них, якоже обрящет кто корысть многу любезне божественная правила в персех объемлем, и совершенно тех завещание, и непоколебимо утвержаем, и изложенных от святых духовных труб всехвалных апостол, и иже от святых вселенских собор, и поместных собравшихся, о изложении таковых заповеданий и изложений, и инех святых отец наших, от единаго бо вси и тогожде Святаго Духа озарени бывше, повелеша яже на ползу. и их же убо сии святии проклятию предаша, и мы проклинаем: и их же извержению, и мы изметаем: и их же отлучению, и мы отлучаем: и их же запрещению предаша, и мы такожде предаем, имуще не сребролюбен нрав, но доволни сущими, и иже возшедыи до третияго небесе, и слышав неизреченныя глаголы, Павел божественный апостол яве вопиет. сей святый седмой собор зри како и по предписаннем шестем святем соборе, той и паче подтверждает убо, сиречь, запечатлевает, вся святыя вселенския соборы, и предания вселенския церкве. по нем же паки в последних временех, егда соборная церковь восприят, исправление веры, и всяка ересь отступи, и свободися от соблазн, тогда собор сей бысть соединения глаголемый, во еже бо совершити вся завещания, приносит проклинания и глаголет: вся яже чрез церковнаго предания и учителствы и воображения святых и приснопамятных отец, новосотворенная и содеянная, или по сем содеятися хотящая, анафема. и паки по сем глаголет. ко иже в небережение полагающим, священная и божественная правила, божественных отец наших, яже церковь утверждают, и все христианское жителство украшают и к божественному наставляют благобоязству, анафема. Кормчая, глава 71. Подобне и священноинок Матфей, о правилех церковных, колико подобает их держати, приводя священных отец правила, глаголет : Первое четвертаго собора правило, иже от святых отец рече, коегождо собора вселенскаго же яве яко и поместнаго, даже и ныне изложенная правила в предании воспевающих опасение, и церковное утверждение держати оправдуем. Первое же шестаго собора, и подробну счинившыя священная и божественная правила, общне же и особне божественныя отцы исчитает, и тверде пребывати повелевает, и яже они с дохновением Святаго провозвестиша Духа, и иже прежде нас святии отцы прияша, и нам предаша, к душевней же цельбе, и врачевству страстем, 85, святых апостол правил, глаголя: освень Климентом завещанных, сия бо многое присеяние от злославных образом плевел, прияша, утвержены имети повелевает. и яже в Никеи, 318. богоноснии отцы. изгласиша. и убо и яже в царствующем граде, вторыи вселенский собор, 150, отец уставиша. третий же во Ефесе, 200, отец. четвертый же в Халкидоне, 630. и яже во Анкире счини. к сему же иже в Неокесарии, и иже в Гангре. и иже во Антиохии сирской. и в Лаодикии: и иже в Сардикии: и иже в Карфагении приятни убо: и иже о Нектарии: и Генадии патриарсе Константиня града написанная. к сему же Дионисия и Петра священномученика, Афанасия Великакго и Кирила, Тимофея и Феофила, иже Александрийскаго великаго града бывша первоседалницы. не точию же: но и Григория Кесарийскаго чюдотворца. Василия Кесарийскаго Великаго. Григория Нисскаго. Григория Богослова и Амфилохия Иконийскаго. а иже убо от архиепископа Африкийския страны, священномученика Киприана, и иже с ним собора, издавшееся правило в тех местех токмо удержася. от сих убо всех правил, иже некая пречерпати, или возражати, или отметати дерзнет, или развращати, или другая ложне от некиих сложенная приимати от начинающих истину корчемствовати, сицевый, да будет, рече, анафема, и христианскаго сословия чюждь. глава 5, К-го состава.

Зриши ли яко священнии отцы, священная правила, яко святых апостол, тако вселенских собор, сице и поместных, подобне и особь сущих святых отец, крепце и ненарушителне соблюдати повелевают, возражати, или отметати, или развращати дерзающих анафеме предают. темже благоявлено, яко якоже оная правила, яже повелевают вышеименованных еретиков наватиан и прочих точию святым миром помазовати: сице и сия правила, святаго Василия, и прочих, их же в третией главе предложихом, повелевающая тех же еретиков покрещевати, равносилна суть, и равно должна исполняема быти. Сего ради не погрешит, аще кто сих еретиков наватиан, и прочих, по правилом Василия Великаго, и прочих, обращающихся к соборней церкви, паки крестити. понеже святии отцы якоже оная, сице и сия правила, равне и неотложне повелевают соблюдати, преступающих я анафеме предают. Елма же убо по правилом святаго Василия Великаго наватиан еретиков, иже не о вере погрешиша, лепотствует покрещевати. како не подобает от новодействуемое имущих крещение, иже не токмо в вере погрешают: но и таковых еретик ереси в себе содержат, их же не миром точию помазовати, но паче совершенно крестити священная правила повелевают, якоже выше во главе второй показахом, покрещевати? ей ей подобает.

Глава, 5.

Яко святая церковь древле узаконоположи, некиих от еретик миром помазовати вин ради благословных.

Обаче аще божественнии отцы, священными своими правилы, многих от еретик обращающихся от ересей, ко святей соборней церкви, святым миром помазовати предопределиша: но не просто ниже туне, но вин ради благословных. явственно о сем свидетельствующу Тимофею презвитеру Великия церкве сице: [Зрим же ныне в Великих и соборных церквах, рекше митрополиях и прочих, яко армены, и яковиты, и несторианы, и прочия безглавныя, и подобныя им обращающыяся в православную веру, божественным миром помазуют, а не крещают, творят же их проклинати началники их, и се вообразися ныне вин ради благословных и нужных]. Кормчая, глава 70, лист 636. Киих убо ради вин благословных? яве извествует священноинок Матфей, сице глаголя: [Но да не опасения держащеся ленивейших сотворим сих, ко еже соборней приступити церкви. да приимемся, рече, обычая, и иже о нас устроившим отцем да последуем, и яко онем мнится, помазаеми святым миром, сице священнии да причащаются]. глава 2, перваго состава. Сия есть первая вина. вторую же вину полагает, во еже святым миром помазовати, сказуя, яко миро есть часть святаго крещения, сице рекий: [И се бо быти веруется часть святаго крещения]. глава 1, втораго состава. Освящает бо и миро помазующихся, и причастники небеснаго царствия творит. якоже священноинок Матфей, приводя от 47 правила иже в Лаодикии, изъявляет глаголя: [Лаодикийскаго же 47, и святым помазовати миром просвещаемых повелевает, се бо молитвами и призыванием Святаго Духа освящаемо помазующихся освящает, и причастники Христова небеснаго царствия устрояет]. глава 1, втораго состава. Сия же убо вся во время благочестия законоуставне совершати определена быша. ныне же что сотворително есть в толикое нужды время? егда архиереов благочестием посюду сияющих не имамы, иже бы миро освятили. священников православие ненарушимо хранящых не обретаем, иже бы возмогли освященным миром помазующе обретающихся освящати. понеже убо миро кроме архиереов не может быти освящено. о чесом засвидетелствуемо есть в велицем Катихисисе сице: [Вопрос: Что есть миро? Ответ: Миро святое есть масть, или елей, от различных вещей устроимое, сиречь, елеа балсаму, и нарды, и прочих благовонных ароматов, по Дионисию, освящено в великий четверток от архиерея, на божественнем престоле, идеже тело и кровь Господню освящают]. глава 62. Согласно сему и святый Симеон Фессалонитский глаголет сице: [Ныне же вместо рук, то то освященныи именуемыи велии мир, а освящающиися не от священников, но от патриархов, и архиереов, священными молитвами, и благословениями. (ниже) Миро же не елей просто, но священныи молитвами в жертвеннике от архиереов Христовых. (ниже) и ниже мир от мощей святых, яковый же от тела божественнаго и мироточиваго Димитрия, или некоего инаго из святых, яко же прославляется в Кипрском великомученице Маманте, или от святыя иконы, якоже глаголет Аттик, (ниже) и сия бо честная благодать имеюща божественную, исцеление подавающи. понеже мощь божественнаго онаго мира, особлива бо сия, и чрез архиерейства, архиерейския молитвы подается, и не просто действуется: но в жертвеннице во время священнодействия полагаемое, и во святый великий четверток, в конце священнодействия (литургии) молитвами священноглаголемое, и печатию божественнаго креста совершаемое и освящаемое]. глава 43. От сих всякаго вероятия достойнейших свидетельств всякому яве видимо есть, яко священное миро, от единых токмо архиереов освящается. темже убо аще хощеши, да от новодействуемое имущих крещение, обращающиися помазуются токмо святым миром, даждь благочестивосиятелных архиереов, да миро священными молитвами освятят. даждь православие не позыблемо содержащих священников, да освященным миром освященных архиереов освящают я. но сицевых архиереов, таковых священников, аще и всеусердне потщишися обрести, всяко не обрящеши. убо безпрекословно от новодействуемое имущих крещение, приходящих к древлеправославней вере, по всем вышепредложенным винам, и правилом, их же в вышних главизнах предъявихом, и живописателным гласовом священных отец, и богодухновенных богословец, их же и ныне еще на среду имамы привести, святым крещением очищати подобает.

Глава, 6.

Святии отцы от еретик приемших крещение всячески повелевают покрещевати.

Многих убо от святых, в вышних главизнах, иже от еретик крещеных паки крестити повелевают, и священных апостол, тожде повелевающых представихом: но и еще некиих от отец, иже споследствующе оным в тождемудровании повелевают первее от еретик приемших крещение покрещевати, представим. кто же суть сии? слышим. Преподобный Максим Грек в толковании своего толкования Псалтыри, на псалом 96. приводя Дидимово толкование глаголет: сущее. [Господь воцарися, да радуется земля, да веселятся острови мнози. толкование Дидимово: добре же многим островом веселитися, а не всем написа, показуя яко суть острови и еретическия церкви, славящеся и тии водою крещения, но не пристоит им веселитися, зане нечестием еже к Божеству благодать крещения отметают]. псалом 96. И поелику убо еретицы нечестием еже к Божеству благодать крещение отмещут: потолику ни едина от них вера не вмещает Духа Святаго даровании. явственно о сем свидетельствующу Мелетию патриарху Александрийскому сице [Кирилова, лист 501]: [Видяще убо видите вы православнии, елицы еще верою прелести не последуете, и держитеся благочестия, вкратце вам ко утвержению речем, да знаете яко все веры прочии, иже верами зовутся, не суть веры, но прелести, наченше от латинския и до прочих всех. и почто не суть достойны называтися верами? того ради, яко ни едина от них не вмещает Духа Святаго даровании]. послание 10. Сего ради блаженный Иоанн митрополит Никейский, сказуя аще вера еретическая не приятна, всяко и крещение их есть не приятно, вопиет глаголя [Кормчая писменная]: [Темже проявлено, яко крещение их, и вся, яже от них содеваемая, не приятна и непотребна суть, аще и тщатся несмысленнии и неразумнии и неутверженнии, и лживии христиане, яко истинна и благоприятна творят деяния их. аще бо вера их права и благоприятна есть, да будет и крещение их приятно]. в слове обличителном на армены. Виждь рече, аще вера их, (рекше еретическая) не приятна, како крещение их приятно? како убо кто от добре смыслящих попустит новодействуемому крещению быти приятну, егда толикими и толь премногими новинами и ересми, их же от многих малейшая, в вышших главах предпоказахом, богато изобилует? аще бо сие крещение есть приятно, да будут и вся оныя новины и ереси приятны, аще бо оныя не суть приятны, како крещению содержащему я мощно быти приятну. святым отцем иже в Карфагене глаголющым, яко крещение еретическое сквернение паче а не крещение [правило 73, Кормчая лист 140 (149?)]. и непобедимый воин Святыя Троицы, Афанасий глаголю Великий, громогласно о сем вопиет глаголя: [сии же бедствуют прочее о самой полности тайны, глаголю же крещении. (ниже) истинную же ни едину имуще к благочестию помощь. (ниже) аще бо и имя Сына законописанное именовати притворяются. не бо глаголяй просто Господи, сей дает, но со именем и веру имеяй праву. (ниже) и с верою ко крещению совершение приложится. многия убо и иныя ереси глаголющия имена точию, не мудрствующия же право, якоже речеся, ниже веру здравствующую имущыя, неполезну имут от них даемую воду, скудствующую благочестием. якоже и кропящемуся от них паче сквернитися в нечестии]. слово 3, на арианы [лист 40]. Елма же убо еретическое крещение сквернение паче а не крещение. елма еретицы имена глаголющии точию, не мудрствующия же право, ниже веру здравствующу имущия, не полезную имут от них воду даемую, скудствующую благочестием. како от новодействуемое имущих крещение, егда, аще и имя Святыя Троицы глаголю, неправо же мудрствующыя, прилагают к Божеству по арменьски страсть, ниже веру здревствующую имут, не подобает паки крестити? ей подобает. ибо святому Афанасию вопиющу: не бо глаголяй просто Господи, сей дает, но со именем и веру имеяй праву, и с верою ко крещению совершение приложится. Святый Григорий Богослов взывает глаголя: [не терплю вернаго гласом научену быти, и научитися неверну исповедати истину, и быти со лжею, яко совершаем внити, и возъити несовершеннейшии, яко поживущ крестися водою, якоже болезньми вмирающим породом истечну приемшим рождения смерть. что твориши блаженны в сем и окаянна новопросвещенна и непросвещенна, божественна и безбожна]. слово 25, на арианы. и паки: [Не терплю непросвещен быти по просвещении, приначертая что трех, во яже крестихся, и сущно в спогребстися воде, не в возрождение но во умерщвение совершаем]. слово 24, на еретики. И аще убо по Григорию Богослову, крещаяйся от еретик, совершенш входит в воду, восходит же несовершеннейший, аще сотворяется новопросвещен и не просвещен, аще непросвещен по просвещении бывает, аще в спогребайся воде, не в возрождение, но во умерщвение совершается, како не лепотствует от еретик крещеных воскрещевати? всяко. како же и от новодействуемое имущих крещение, иже толь премногими ересми веру окаляша, о них же выше рехом, от них же не просвещается по просвещении, и в спогребаяся воде не возрождается, но умерщвляется, не подобает паки совершенно крестити? ей подобает.

И что много исчитая различие ересей, глаголю, яко таковых и толиких ради, повелевают святии отцы приходящих от еретик ко святей церкви покрещевати. древнейшии бо святии отцы собора, иже в Кархидоне, ему же первоседатель бе священномученик Киприан, всякаго еретика и расколника обращающася к православней вере, повелевают покрещевати. о чесом явственно засвидетелствует Матфей Властарь, сице глаголя: [в Кархидоне бо, ему же епископ бе великии Киприан, собор отец древнейшии всех собрася, им же угодно бысть общим судом, всем еретиком же и расколником покрещеватися. смотряху бо сице, рекше глаголаху, аще и не о вере расколницы погрешают, но понеже убо глава телесе церковнаго Христос, по божественному апостолу, от Него же уди вси живятся, и духовный возраст приемлют. сии же от состава удов телесных отторгошася, не ктому пребывающую в них имут благодать Святаго Духа. еже убо не имут сами, како иным преподадут]. глава 2, перваго состава. Еже утвержает и преподобный Никон Черныя горы, глаголя: [Иже с Киприаном собор повелевает всякаго еретика крещати, и хотящим от ереси обратитися, 10 дней, или 15, поститися, и упражнятися на молитву утро и вечер, и учити псалмы повелевает. и сия убо сии вси тако завещавают]. слово 63. Согласно сему и Тимофей презвитер Великия церкве изъявляет: [А иже с Киприаном собор повелевает всякаго еретика крещати]. Кормчая, лист 636.

Зриши ли яко отцы собора, иже в Кархидоне всякаго еретика и расколника, от еретика и расколника крещенаго, повелевают без изъятия покрещевати. вину же наводят сицеву, яко от состава удов телесных отторгшихся, не ктому пребывающую в себе имут благодать Святаго Духа. еже убо не имут сами, како иным преподадут? сие и Никон преподобный Черныя горы, толкуя правило святаго Василия Великаго первое, утверждает глаголя: [Обаче позволися древним, иже о Киприане глаголю, и Фирмилиане нашем, единем судом облагати чистыя, и воздержники. и воде предстатели, зане же начало раздором бысть. а иже от церкве отступльшии, не ктому имеша благодать Святаго Духа в себе, оскуде бо подаяние, внегда присещися последованию. первии убо отступльшии от отец имеша рукоположение и возложением рук их имяху дарование духовное. отделившиижеся простии людие бывше, ниже крещати, ни рукополагати имеша область ктому, не могуще благодать Святаго Духа инем подати, от нея же тии отпадоша. тем яко от простых людий иже от них крещаемых, повелеша приходящым к церкви истинным крещением церковным очищатися]. слово 63. И аще убо отцы собора, иже в Кархидоне, повелевают всякаго, не токмо от еретика крещенаго, но и от расколника паки крестити. понеже отторгшеся от церковнаго телесе, не имут в себе пребывающыя благодати Святаго Духа, ея же сами не имуще, ниже другим могут преподати. како же убо и от новодействуемое имущих крещение не долженствует, иже сами самохотне, отсупльше от древлеправославныя церкве отдалившеся от древлецерковных догмат, отлучившеся от древлеправославнаго благочестия, впадоша в многоразличныя ереси, их же ради их, якоже выше предъявихом, подобает всячески покрещевати, совершенно святым крещением паки крестити? зело подобает.

Глава 7.

О еже безчисленнии простолюдини не имущии хиротонии яко при апостолех сице и послежде крещаху их же крещение якоже и священников церковию приято.

Суть же нецыи суть от нехотящих истине повинути, иже воспрекословят глаголюще: како вы простолюдини суще, не имуще рукоположения, дерзаете священническая творити, рекше крестити творящеся ложне священниками. от таковых бо крещени не крещени суть, ничтоже бо дает не имеяй, и ничтоже приемлет просяи от неимущаго. Противу коих усретающе ответствуем, ведателно убо да есть ти, яко ино есть ложный священник, ино же простый по нужде нуждныя случаи таин совершающий. Ложный епископ есть, иже хиротонии не приим и не рукоположився, епископом нарицается, в ризы и омофор епископский одевается, церкви свящает, священники и диаконы поставляет. священник же ложный есть, иже не поставлен в священники сый, поставлен называется, в ризы священническия одевается, литургию служит, молитвы, возгласы, и вся священническая обряды действует. таков бяше Исхиран Мареотский, о нем же в житии Великаго Афанасия повествуется; яко священство ложно состроив, имя презвитерско на себе возложи, без обычнаго освящения. таков бяше лжесвященник, во время Мануила патриарха бывый, о нем же в книзе Матфея правилника, в составе В, является. Таков бяше лжесвященник во Пскове, при Фотии митрополите всероссийстем. о нем же в послании святаго Фотия митрополита повествуется. таковии ложнии священници негли и ныне случаются самопоставленнии, кроме рукоположения священнодействующии в церквах, от сицевых ложных епископов и священников, ниже рукоположение, ниже крещение, ниже ина действа приемлются. еже засвидетелствуют святии отцы Афона в правиле 203. сице глаголюще: [Второе крещаются, иже ложне творящеся, по истинне же не суще священницы, крестиша]. по третией главе, втораго стиха, иже в Матфеи.

Простый же есть, иже нуждныя случаи таин действуя, не сущу священнику, якоже древлеправославная церковь научает глаголющи: [Тако убо потреба ведати, яко ни един на священство не рукоположенный, и ни таин строителем быти может, разве некоторых нуждных случаев таин]. Катихисис малый, лист 36. Не священницы бо быша при апостолех, обаче нуждныя случаи таин действоваху. якоже Номоканон глаголет: [ибо Господь наш Iсус Христос, многим апостолом священства не имущим повеле крестити]. лист 65. Не священницы быша при мученицех, обаче учаще крещаху, по реченному блаженным апостолом Павлом: [Учитель аще и мирскии человек будет, искусен же слову учения, и нравом чист, таковый да учит. будут бо вси научени Богом]. правило [ап. Павла] 15. Не священницы быша во пророцех, яко четыре дщери, святаго апостола Филиппа, бяху прорицающе. о них же в Деяниих изъявляется [Деяния, зач. 45]. и сии вси не священнии действующе крещаху, обаче единыя церкве, единыя веры бяху, сия убо вкратце предложивше пространнее самая словеса святых писаний, самыя вещи действования, на среду привносяще объявляем.

Священный священных деяний апостольских списатель Лука евангелист, повествует о гонении на церковь Иеросалимскую, во главе 8, сице [зач. 17]: бысть же (рече) в той день гонение велие на церковь Иеросалимскую, вси же разсеяшася по странах июдейских и самарийских кроме апостол. (ниже) Филипп же сошед во град самарийский проповедаша им Христа. (ниже) [зач. 18] егда же вероваша Филиппови благовествующу яже о царьствии Божии, и о имени Iсус Христове, крещахуся мужие же и жены. Сей убо Филипп не священник бяше, но диакон, не олтарю же, но трапезам. якоже 16 зачало Деяний утверждает, и святии учители церковнии изъявляют. сице Аммоний в толковании на зачало 18, Деяний глаголет: [Презвитерства, или епископства достойнства, (Филип) не имеяше, якоже ученицы Господни. и како, рече, диакон сыи крестил есть? понеже оскудение бе презвитер в Самарии, и един Филипп точию бе гонения ради бывшаго, и разсеяном бывшим. подобает же в нужди и диакону крестити, не сущу презвитеру, якоже его Дух Святыи научи]. что убо святый Филипп не священник сый, крестив Самарию, еще же и евнуха на пути, повреди ли церковь, или священство? никакоже никако. ибо едина церковь, едина вера бяше, яже во Иеросалиме во апостолех, сия и в Филиппе крестившем и в самарянех и каженице крестившихся. святии бо апостоли крещение его, якоже и от священника бывшее, за равносилное вменивше прияша. Паки святый апостол Анания, еще диакон сый, крести апостола Павла, оскудения ради презвитер [зач. 21]. еже изъявляет святый Иоанн Златоустый, сице глаголя [Апостолу писмен. переводу Максима Грека]: [Яко не хотяше человеки возвестися, но самем Христом, понеже ни Анания поучи его ничесоже, точию крестил есть. (ниже) и виде во сне мужа возложьша нань руце. и Анания диакон бе, якоже сам Павел свидетельствует в правилех. се же бысть, понеже оскудение бе презвитер в Самарии, гонения ради бывшаго]. в толковании на зачало 21. Но святый апостол Анания, не священник сый, крестив Павла, повредил ли веру? или апостольство? ни, никако. и Павел апостол от неосвященнаго крестився, умалил благодать крещения? не умали, но паче умножи от многаго усердия. и святии апостоли потязаху за сие Ананию? или Павла апостола паки второе крестиша? ни, никако. якоже бо онаго за сие не потязаша, сице и сего паки не крестиша: но за самое истинное крещение, якоже и есть вмениша.

Не точию святии апостоли, не сущии священницы, но мнози и мирстии человецы, от еллин обращающе ко святей православнокафоличестей церкви, крещаху. их же крещение древлеправославная церковь, за истинное приемши вменила. о чесом по премногу повествуется в житиях святых. сице убо.

Месяца сентября в 6 день, святый Архипп живый при церкви святаго архистратига Михаила, иже в Хонех, понамарское творя служение, многих неверных обращая ко Христу крещаше [Минея новопечатная].

Того же месяца в 7 день святый мученик Созонт, иже бе от страны ликийския, сый пастырь овчий, и Божиею благодатию учаше еллины, и крещаше я во имя Отца и Сына и Святаго Духа [Пролог]. Того же месяца, в 9 день: преподобный Феофан Исповедник, иже бе от еллинских родитель, измлада возраста ко Христови пришед, по различным местом ходя, проповедуя веру Христову, не имея священства множество народа крести [Пролог]. Тогожде месяца в 11 день: святая мученика, Феодор и Дидим, христиана суща, участа люди святей вере, и многия от неверных обращающа к Богу, крещаста [Пролог]. Тогожде месяца в 15 день: святый мученик Порфирий, сам ся крести, во имя Отца и Сына и Святаго Духа, сицевым образом: и Иулияню рождению совершаему, повелено бысть Порфирию укорити и поругати игранием христианы, и внегда ему внити в воду хотящу, и погрузитися, тогда возопити: крещается Порфирий во имя Отца и Сына и Святаго Духа. и изшед из воды, наложи ризы белы, и христианина себе исповеда [Пролог]. Тогожде месяца в 21 день: Святый мученик Приск христианин сый многия от еллин обращая крещаше [Пролог]. Тогожде месяца в 27 день: Святый мученик Каллистрат, четыредесят и девять воинов крести, сицевым образом: Егда по различных муках, 40, и 9, воинов иже видяще Каллистрата в море не погрязнувша, увериша в Господа Iсуса Христа единаго истиннаго Бога, повеле воевода Персентин купно со святым Каллистратом воврещи в близ бывшее езеро. и егда имяху ввержени быти, моляшеся святый к Богу, глаголя: Господи в вышних живый, и на смиренныя призираяй, на сие Твое малое стадо, милостивныя Твоя очи обрати, и благослови е в тех водах омыти купелию отрождения и усыновления, нашествием Святаго Твоего Духа, да всякия ветхаго человека омывше скверны, будут причастницы наследия, от века Тебе благоугодивших. связаным же им бывшим, и в воду верженным, абие разрешишася их узы, и стояху в воде лицем светлым радующеся о крещении своем [Минея новопечатная].

Месяца октября в 4 день: святая мученика Евсевий и Хиримон диакон, многия от еллин участа, и крестиша я, овогда тай, овогда же яве. Тогожде месяца, в 14 день: святый мученик Назарий, бывш во граде нарицаемем Мелия, тамо от некия благородныя и верныя жены, прият отроча в триех летех сущо, именем Келсия, крести е. потом Назария и Келсий ученик его приидоша во град Тимир, и тамо во обычной упражняющеся проповеди евангельской множество душ Христови приобретоша. чесого не терпяще зрети идолопоклонницы, яша их и к нечестивому царю Нерону отслаша. их же царь по различных муках, повеле воврещи в море. они же по водам аки по злачном поле поидоша, еже видевше слуги царевы вероваша во Христа, и крещение от святаго Назария прияша [Минея новопечатная, св. Амвросий слово 14. о святых мучениках]. Тогожде месяца, в 17 день: святый мученик Хрисанф крести Клавдия, и жену, и чад, и всех домашних его [Пролог]. Тогожде месяца, в 27 день: святый мученки Марк, и иже с ним, Христа всем проповедающе, и многия неверныя ко Господу обращающе, крещаху во имя Отца и Сына и Святаго Духа [Пролог].

Месяца ноемврия, в 5 день: Святый мученик Галактион, иже бе от еллинских родителей, его же некий мних именем Онуфрий, благочестию научив, купно со отцем и материю его крести, потом сам жену свою Епистимию крести. таже обрати Галактион единаго от раб тестя своего, ему же имя Евтолмий, к вере Христове, и крести его яко и супружницу свою, иже бысть последи черноризец, и списатель жития его [Минея новопечатная, четия]. Тогожде месяца в 24 день: мних некий крести девицу, жидовину сущу, во святом, Авварике, о нем же Иоанн Милостивый откровение получи [Пролог].

Месяца декабря, в 10 день: Святый мученик Мина Ермогена епарха к вере Христове привед крести. Тогожде месяца в 14 день: Святый мученик Филимон сам ся крести.

Месяца генваря в 4 день: Святый мученик Зосима, Афанасия коментарисия, от еллинства к вере Христове обратив крести.

Месяца февраля в 3 день: Святый мученик Власий, иже и Вукул именовася дващи посылаемых от игемона воинов, вере Христове научив, всех крести. Тогожде месяца в 23 день: преподобный Александр мних, иже бе от асийския страны, научивжеся книгам в Константине граде, и пришед в страны асийския, отъиде в пустыню. слышав же о некоем граде, яко кумирослужителев есть, и препоясав ся иде вон, и запали кумирницу их, и пришедше претяху ему смертию. он же препрев всех о имене Христове, крести старейшину града. и посем много множество того народа.

Месяца марта в 5 день: Святый мученик Конон крещен бысть со женою своею архистратигом Михаилом, последи же сам научив родителя своя вере Христове крести. Тогожде месяца в 13 день: Святый мученик Александр, в Панде граде многия от еллин обратив к вере Христове крести. Тогожде месяца в 19 день: Святый мученик Хрисанф, иже бе сын некоего Полемона синклита александрийскаго, научен бе вере Христове некиим христианином благочестивым, и крещен им.

Месяца апреля в 15 день: Святый мученик Сава, иже бе от страны готфския, издетска христианин сый, многих обращая от идолопоклонения к вере Христове крещаше.

Месяца маия во 2 день: Святый Афанасий Великий, еще отрок сый, многия отроки крести, его же крещение иже во святых Александр папа Александрийский за истинное вмени. Тогожде месяца в 10 день: Святии мученицы Алфий, и Филаделф, и Кирил, и иже с ними, крещени быша некиим Онисимом христианином, их же он научи вере Христове. Тогожде месяца в 14 день: Святый мученик Максим, многия от еллин от идолослужения обратив крести. Тогожде месяца в 22 день: Святый мученик Василиск, 13 воинов емшых его на мучение крести, купно с женою, ея же бяше дом, и со всею ея челядию, потом многия недужныя и бесныя уврачевав крести.

Месяца июня в 7 день: Святый Сисиний диакон сый римския церкве, егда ят бысть от идолослужителей, и представлен Апрониану коментарию, нань же возрев Апрониан, узре его светом пречюдным с небесе облистаема, еще же и глас услыша глаголющь: приидите благословеннии Отца Моего, приимите уготованное вам царство от сложения мира. исполнися убо Апрониан ужаса, и трепета, паде на ногу святому Сисинию, глаголя: заклинаю тя Христом, Его же исповедуеши, да немедля крестиши мя, и сотвориши обещника венца твоего. и того часа принесена бысть вода, святый же Сисиний огласив Апрониана, благослови воду, и крести его [Минея четия новопечатная]. В той же день: Святый Кириак диакон сый римския церкве, крести Артемию девицу, дщерь Диоклитиана царя, потом крести дщерь персскаго царя Иовию, и прочих царева двора, до четырех сот крести. Тогожде месяца в 10 день: преподобный Феофил, иже бе от Антиохии, сый от неверну родителю, пришед в совершенный возраст, сам себе крести, посем блудницу некую нарицаемую честная умоли отступити от блуда, крести ю [Пролог].

Месяца июля в 1 день: Святый мученик Потит, отрок сый тринадесяти лет, пришед во град Валерия именуемый, в нем же некую жену именем Кириакию, супругу сенатора Агафония, прокаженную велми, юже никтоже от врачев исцелити можаше, научив вере, яже во Христа Бога крести, яже абие очистися от проказы своея, и изыде здрава, имущи плоть яко младаго отрочате. то виде муж ея Агафон, и вси домашнии, вероваша во Христа, и крестишася от него. посем дщерь Антонина царя римскаго Агнию, (среди позорища) пред всеми крести. понеже невозможно бяше в то время обрести иерея, всем крыющимся гонения ради [Минея четия новопечатная].

Месяца августа в 10 день: Святый мученик архидиакон Лаврений, егда ввержен бысть в темницу, в ней же бе некий еллин именем Кукиллос, его же святый научив вере в Господа нашего Iсуса Христа, крести. потом стража темнична, именем Ипполита научив вере Христове крести. таже по умолению Ипполитову весь дом его крести, в нем же бе обоего пола душ 19 [Минея четия новопечатная].

И сия убо о мужех, иже не имуще рукоположения, многих от еллин в веру Христову обративше крестиша: прочее да видим яко и жены учаще крещаху. иже на среду предлагаем.

Святая великомученица прехвалная и равноапостолная Фекла, ученица святаго апостола Павла, по нужде сама себе крестила. потом же послана святым апостолом Павлом учити люди, и многия научивши вере Христове, крести. таже вшедши в гору, и обретши пещеру, живяше в ней лета многа. жены же етеры добра рода уведевше святую деву, хождаху к ней, и учахуся словеси Божию от нея. (ниже) прииде же и жена некая со дщерию, и отрекшися диавола, и обещастеся Господу нашему Iсусу Христу, она же молитву сотвори има, и научи я евангелию Божию, и помазавши елеом веселия, и крести я во имя Отца и Сына и Святаго Духа. о чесом в житии ея повествуется. сентября в 24 день [Пролог, Минея четия писменная].

Святая Мариамия, сестра благовестника Филиппа, ходящи со апостолом Филиппом и Варфоломеем, посем в Ликаонию шедши, проповедаше слово Божие, многия крестила, о ней же в житии ея февраля, в 17 день явствует.

Святая мученица Дросида, дщи Трояна царя римскаго, самя ся крестила, якоже в житии ея марта в 22 день повествуется.

Святая мученица Фотиния самаряныня, в темнице сущи сто человек крестила, и дщерь царя Нерона. еже в житии ея показуется.

Сии убо вси и множайшии мужие и жены, не священнии суще, якоже при апостолех, такожде и по них, в прилучающихся гонениях в неприсудствии священников, учаще крещаху понеже безчисленная места, безчисленнии гради, без священников обретахуся. и толико оскудение священников бе, яко святому Галактиону крестившему святую Епистимию рещи: священство погибе от рода христианска. Минея четия, ноября в 5 день, в житии его. И святый мученик Потий цареву дщерь крести, понеже невозможно бяше в то время обрести иерея. Минея четия новопечатная, июля в 1 день, в страдании его. Еда убо сим действием, еже крещаху, несвященнии суще, святую веру повредиша? еда благочестие умалиша? еда православную церковь поколебаша? никакоже никако. ибо святая церковь крещение их, якоже и священиков крещение, за равносилно и равночестно приемши почте.

Темже убо аще святый Филипп не священник сый, крестивый Самарию, и евнуха, не повреди церкве, не повреди священства; но едина бе церковь, едина и тажде вера, и во апостолех во Иеросалиме, и в Филиппе крестившем, и в самарянех и каженице крестившихся. Аще святый Анания не священник сый крестивый Павла не повреди веры, не повреди апостольства, ниже Павел крестивыйся от несвященнаго умали благодать крещения? но паче умножи.

Аще якоже в самая времена святых апостол, тако и по отшествии их сего света, якоже священницы несвященнии сущи мужие и жены, в неприсудствии священников, крещающе, не повредиша святыя веры, не умалиша благочестия, не поколебаша православныя церкве: но паче умноживше утвердиша. Аще святии апостоли Филиппа крестившаго Самарию и евнуха, и Анании крестившаго Павла, не потязаша за сие, ниже самарян и евнуха, ниже Павла апостола, яко от несвященных крещеных паки воскрестиша: но яко от сущих священников крещеных прияша. Аще православнокафолическая церковь, не священных сущих мужей и жен крестивших, не присудствующым священником, безчисленных от неверных, не поносила за сие, ниже судом отлучения или клятвы облагала, ниже от них крестившихся, яко некрещеных паки крестила: но яко от самых сущих священников крещеных, крещение их приемши имела. Чесо ради убо ныне в толь оскудителнейшее время, в толь нужнейшия случаи, егда благочестивосиятелных архиереов не видим, егда православнии священницы не ссудствуют, сущым христианом, не имущим рукоположения, не подобает хотящых креститися крестити. Что убо, еда крестящии сущии христиане, не имущии рукоположения, сим своим действием, вере святей повреждение творят? и аще сии творят, убо и они не имущии рукоположения крестившии сотвориша. ащели они не сотвориша: убо ниже сии, еда благочестие умаляют? и аще сии умаляют: убо и древле не священнии крестившии умаляху. аще ли они не умалиша, но паче умножиша: убо ниже сии. еда православную церковь разрушают? и аще сии разрушают: убо и в первенствующей церкви нерукоположеннии крестившии разрушаху. аще ли они не разрушаху, но паче утвержаху: убо и сии. ибо святая древлеправославная церковь якоже оных, в нужныя случаи крестивших, не священных сущых, крещение прияла: сице и ныне крещающих не имущих рукоположения, сущых же христиан, крещение, якоже и от священников совершаемое, за равночестно и равносилно приемлет. темже убо, аще отреваеши ныне, не присудствующым священником, крещение совершаемое не священными сущими. всяко долженствуеши соотринути и древлее, якоже при апостолех, сице и по них действуемое крещение не имущими же священства. и тако обрящешися и нехотящь, возносящься над всех святых апостол, и богоносных отец, приемшых их крещение, противоборствуя всей православнокафоличестей церкви. аще ли же оных приемлеши, якоже и годе есть, убо и ныне крещающих, не имущих рукоположения, сущих же христиан, крещение неотрочне должен еси восприяти. убо годствует во время нужднаго случая, не сущу священнику, и не могущему рукоположения, сущему христианину крещати.

Глава, 8.

Во время нужды попущаемо есть яко от святых отец подобне и от нынешних учителей простому иноку, диякону и мирянину сущу христианину крестити.

Довольственно убо яве научают нас, и писателными своими гласы, елико древлеправославныя церкве, толико и нынешния учители, яко может во время нужды простый инок, и диакон, и мирянин сый крестити. сице святый Никифор патриарх Царя града глаголет: [Яко простый инок и диакон в нужде может крестити]. Жезл новопечатный. часть 1 [возобличение, 17 лист 49]. Святый убо Иероним в двоесловии на светоносцы глаголет сице: [Вемы же леть быти и миряном (крестити). ибо якоже кто приемлет тако и дати может]. Согласно сему и блаженный Августин в епистолии своей к Фортунату пиша глаголет: [егда прилучится быти велицей нужде, обычай есть, да и простии людие крестят, иже хощут креститися]. и паки глаголет: [Яко подобает некрещенным младенцем креститися, аще кто обрящется на месте, не сущу священнику]. до зде Августин. Но и севаст Константин Арменополь, номофилакт и судия Фессалонитский, приводя правило Никифора патриарха, сице глаголет: [подобает некрещенныя младенцы, аще обрящется некто на месте, не сущу иерею, крестити. крестит и свой отец, и каков любо человек христианин несть грех. Толкование: Недугующь детищь вдадеся абие крещатися, здравствующий же по 40, днех рождения]. Блаженный Иоанн тако глаголет: [Недугом удержан приближився уже к смерти детищь, аще тройческим погружением иерей, страхом еже не предвосхитися совершит, не потреба сему по сих и молитвы яже оставишася, и определения возъисполнити]. книга 1, сечение 5. Сим всем согласно и кир Гавриил архиепископ Филаделфийский, научая глаголет [в книзе о седми тайнах, глава 7]: [Ведати подобает и о сем христиане православнии, яко аще бы прилучилося не быти священнику, и прилучилася бы нужда новорожденному детищу, может, аще есть диакон, или прост человек, или жена, точию христиане, окрестити, якоже в каноне святаго Никифора писано есть: иже во время нужды и прост мних, такожде и диакон, новорожденное да крестит]. такожде и Августин в епистолии своей, к Фортунату пиша глаголет: [Егда прилучится быти велицей нужде, обычай есть, да и простии людие крестят, иже хощут креститися]. и паки: [иже достоит некрещеныя дети крестити, аще бы обретаеми были на местех таковых, идеже священника не бысть, и дети изнемогали бы к смерти, таковое аще бы и свой ему отец окрестил, или ктоже, точию правоверен, несть грех]. книга о седми тайнах, глава 7. Сим всем древлеправославныя церкве учителем споследствующе и от новейших повелевают, нужде належащей, якоже священнику, иноку, диакону, и простолюдину, крестити. Сице творец книги глаголемыя Мир с Богом, вопиет глаголя [печатана в киевопечерстей лавре, лета 1669, лист 109 и 110]: [Служителе же сея тайны, аще и обычне есть священник, но во время зелныя нужды может окрестити и всякий человек несвященный, мужеский пол и женский, не точию баба служащая рождению, но в не бытии баб, и самы родителие без всякия препоны в супружестве]. и паки: [Приемлющим сию тайну святую может быти всяк человек, мужеский пол и женский. всякаго сана и возраста. ибо о всех Христос ко апостолом рече [Мф. зач. 116]: шедше научите вся языки, крестяще их во имя Отца и Сына и Святаго Духа]. догмат 1. о тайне крещения. Видиши ли колицы и каковии, яко древлеправославныя, тако и нынешния церкве учители, единогласно повелевают, нужде понуждающей, безпрепятственно, простому, иноку, диакону, и мирянину сущу христианину, хотящых креститися крести; что убо несть ли ныне нужда? несть ли нестерпимый глад, егда православнаго священства ниже следа возможно есть обрести? ей есть. и аще толицей нужде убеждающей, толикому гладу належащу, чесо ради по сих всех вышепредреченных, елико древлеправославныя, толико и нынешния церкве учителей гласовом, несть лепо, паче же не подобает, во время гонителных случаев, мирянину сущу не имущу рукоположения, якоже рукоположенному сущу христианину крестити? ей подобает. Не подобает убо миряном, присудствующим священником, отнюд дерзати крещати, не сущым же православным священником, всяко подобает. ибо и древле в ветсем завете, не лепо бе июдеом несвященным хлебом предложения ясти, обаче гладу належащу снедоша. якоже явствует о сем в книзе Жезле, идеже пишет тако: июдеом не подобаше хлебов ясти предложения разве священников. обаче глаголет Христос Спаситель к фарисеом: несте ли чли, что сотвори Давыд, егда взалка сам и сущии с ним? како вниде во храм Божии? и хлебы предложения снеде, ихже не достойно ему бе ясти, не сущим с ним? подобне и зде, аще и несть достойно кроме нужды, диаконом и чернцем, и белцем, и женам крещати: но смертней нужде, или гладу нудящу, может Давыду уподобяся диакон, или белец крещение сотворити, якоже и твориша неции в первоначалней церкви, крестил Филипп диакон евнуха, крестил Анания Павла, крещаху и ученицы Христовы, еще Ему странствующу в мире. не у бывше священницы. якоже воспоминает Иоанн святый евангелист, во главе 4: Iсус же сам не крещаше, но ученицы Его. Крестил Галактион святый Епистимию супружницу свою. часть 1, возобличение 17 [лист 49, на обор.]. Зриши ли коль явственно и нынешния церкве учители доводствующе повелевают, во время нужды, иноком миряном, и женам крестити? И како убо ныне в толикое несудствие православнаго священства, не подобает миряном сущим христианом крестити? всячески подобает. Темже убо аще ученицы Господни, во время странствования Его по земли, не суще священницы, крещаху. аще при апостолех Филипп каженика, и Самарию, Анания Павла, не имуще рукоположения, крестиша: аще жены в нужныя случаи множество народа крестиша: аще мученицы и прочии несвященницы, суще, в гонителныя случаи, оскудения ради священства, многих от неверных обращающе крещаху. их же всех крещение, яко священническое, и самем Господем приято, и святыми апостолы почтено, и древлеправославною церковию вменено: аще якоже древлецерковнии учители: сице и нынешнии, согласно во время нужных случаев, повелевают, иноком, диаконом, и белцем крестити, их же крещение, якоже и священников за равносилно и равночестно приемлюще определяют.

Чесо ради ныне в толикая всякаго плача достойная времена, егда вера православная пременися, благочестие истребися: ныне в толикия нужныя случаи, егда пастырей благочестием сияющых несть где слышно: священников православие содержащых ниже с возженными свещами в самую полдень обрести можно, миряном сущым христианом не подобает крестити? или того ради, яко не имут хиротонии? сего ради и не вменится крещение их за истинное, якоже и от священник совершаемое? и аще не вменится; како же святии отцы Афона не повелевают второкрестити от мирянина суща христианина крещеных? сице бо в своем правиле глаголю: [Не второкрещаются, иже от причетник, или от простца инока, или диакона, или от самого отца, или от христианина некоего православнаго, по нужде не сущу священнику крещени суть, точию аще не рука еретическая бяше первее]. правило 203 [лист 707]. Ибо от тех, (рекше еретик) крещении некрещени, и поставлении не причетницы, по 60-му правилу святых апостол [Кормчая, лист 19]. от таковых бо поставленым, или крещеным, ниже верным, ни причетником мощно есть быти. по словеси Никона Черногорца [Никон слово 63]. Ибо (глаголет Матфей правилник [в слове 24 Матфеевы книги]) аще от еретик хиротонию приял бе, отметаем бо таковых якоже крещение, сице и хиротонию, не бо освящение сие. но скверну веруем исходатайствовати. И аще убо святии отцы афонстии не повелевают от мирянина суща христианина, по нужде не сущу священнику, крещеных второкрещати: но приемлют яко от самаго священника крещенных: благоявлено яко вменяется и есть и от ныне сущых христиан совершаемое истинное и очистителное грехов, якоже и священническое, крещение. ибо еже второе крестити кого крещенаго прежде от правоверных, вся правила отрицают, разве аще некто от нечестивых еретик крещен бысть прежде [Потребник, лист 312, глава 17]. тех бо крещение сквернение есть паче а не крещение [Кормчия, лист 636]. сего ради иже с Киприаном собор повелевает всякаго еретика крестити. темже и блаженный Иоанн Златоустый глаголет [Беседы евангельския на Иоанна, нравоучение 25]: яко некрещеный аще и безчисленныя имея исправления умрет, в геену отходит. И аще убо вменяется и есть и отныне сущих христиан совершаемое, истинное и очистительное грехов, якоже и священническое, крещение: проявлено яко подобает, паче же и должни суть, якоже древнии, иже при апостолех и по них несвященницы суще, обращающе от еллин крещаху, ничтоже сумнящеся, от еретик крещеных обращающихся паки крестити.

Но что много глаголю; воззри в древняя времена, посмотри в прошедшая лета, како в гонителныя случаи, православнии христиане, церквей видимых не имяху, якоже свидетельствует Бароний, в лете Господнем 211: яко христиане церквей во оно время не имеяху. И святый Василий Великий, о гонении арианстем, к западным епископом пиша глаголет: [Людие церквей не имеют, и в полях пустых собираются, увидели бысте великую нужду, жены и дети, старии и младии, на дожде и снеге, на ветрах зимою, и летом на знои солнечном, под единым небом пребывают. и сия тягости терпят, ради единаго, дабы кваса аринскаго приимати не были принуждены]. епистолия 1. В сих убо гонениих, толицы народи и крестившиися и крестившии не имуще священников, не имуще видимых церквей, еда не в православней, еда не во святей кафоличестей церкве бяху? ей в кафоличестей. еда несовершеннии христиане бяху? ей совершении. еда крещение от них совершаемое не за равно яко и священников творимое вменяемо? воистинну за равно. и не токмо кафолическия церкве сынове бяху: но и от новодействующия церкве кликующей на небо, яко во свое отечество святопреселишася. Подобне и нынешняго века христане, иже древлецерковное благочестие лобызают, иже святую древлеправославную кафолическую веру соблюдают, иже гонения ради, или иных вин благословных, не имут рукотворенных церквей, не имут священников, нуждныя случаи таинств действуют, еже есть крещают, [не гордости ради и кичение, но спасения ради душ своих] еда не суть в православней вере? ей суть. еда не суть во святей кафоличестей церкви? ей в кафоличестей. еда не суть истиннии христиане? ей суть истиннии. еда крещение их якоже и от священников совершаемое за равно церковию святою не вменяется? ей воистинну вменяется и есть. ибо аще бы не имущих рукоположения крещение, не за равно якоже и священническое вменялося, и не равну благодать Святаго Духа имело; не бы сам Господь своим учеником, не имущим рукоположения, во время странствования своего по земли, попустил крестити: не бы первенствующая церковь жен прияла крещение: не бы в гонительныя случаи не имущих священства, крещающих крещение святыми отцы приято было: не бы якоже древлецерковнии учители, тако и нынешнии, во время нуждных случаев, иноком, диаконом, и белцем, не имущым хиротонии повелели крестити. а понеже сам Господь учеником своим соблагоизволи: апостоли святии Филиппово и Ананиино крещение прияша: вся древлеправославная церковь, яко жен, сице и мужей не имущих рукоположения крещение прияла: понеже учители елико древлецерковнии, толико и нынешнии, во время нуждных случаев неимущим священства, повелевают крестити: убо благоявлено и нынешних сущих христиан, крещающих, не имущих рукоположения, крещение равночестно и равносилно и равну благодать Святаго Духа имать, и за равно яко священническое вменяется и есть. и аще тако есть, якоже и есть: убо может и мирянин сый христианин не имый священства, во время нуждных случаев, от еретик приходящих совершенно крестити, его же крещение якоже и священническое, за равно церковию святою вменяется и есть.

Глава, 9.

Яко не подобает избирати, еже он сица или он сица крестит мя, но точию был бы христианин, равно бо Святый Дух приходит и на от не священнаго крещенаго.

Но что убо, или того ради не равносилно мниттися быти, яко не имый рукоположения крещаяй есть? суетно сицево мнение есть и непотребно. ибо во время нужды не испытуй рукоположительства: но испытуй правоверства. вемы бо яко велие есть крещение, но велие сие не крестяй творит, но крещаемый. и слыши убо о сем златоглаголива отца Иоанна позлащенными усты вопиюща сице: [Велие убо есть крещение, но велие то не крестяи творит: но призываемыи в крещение. (ниже) велие убо есть, паки глаголю, крещение, и кроме крещения невозможно царствия получити: но может то и не зело доблий муж сотворити]. Беседа 3, на послание 1 к коринфом [зач. 124, лист 532]. Се коль явственно вопиет глаголя: может то и не зело доблий муж сотворити. воззри убо, каженик он, научивыися от Филиппа, искаше ли яко он сица или он сица апостол крестит его? никако: но что? прият сердцем веру, не отлагаше крещения: но от радости вопияше: се вода, что ми возбраняет креститися. сице и ты не изыскуй яко он сица епископ, или он сица священник крестит мя. ни: но того смотри прилежне, во еже бы был истинныи христианин, аще и мирянин. и сия убо не своя си глаголю: но слыши богословию тезоименитаго Григория сице вещающа: [И яко паче мурин он каженик, в Деянии апостол пишет, научен от Филиппа, прият сердцем веру, не отлагаше печати Духа, от радости веща: се вода, что ми возбраняет креститися. тако и ты сотвори, не рцы епископ да мя крестит, да не благородство мое укорено будет крестителем, и осквернися в крещении от недостойнаго. не пытай о житии крестителеве, от Саула в первом царствии речено [в толку, на стих 25]: человек зрит в лице, Бог же в сердце. не искушай достоинства крестителева]. слово 11, о святом крещении. Темже крещаемый болши есть, нежели крещаяй. явственно о сем свидетельствующу святому Феофилакту сице [Благовестник Мф. зач. 6]: [Да увеси, яко егда и ты крещаешися отворяеши небеса. сниде Дух Святый да засвидетельствует, яко болши есть крещаяися, нежели крещаяи]. Благовестник лист. Сего ради и святый Иоанн Златоустый глаголет: яко, [не бо крестивыи, но призываемыи в крещение взыскуется: сие бо оставляет грехи]. беседы апостольския [лист 530]. И виждь ми, святый Анания не имый рукоположения, ничесоже поучи Павла: но токмо крести. и егда убо крестися Павел, коль многу прият благодать Святаго Духа. о чесом свидетельствует святый Иоанн Златоустый сице глаголя: [понеже ни Анания поучи его ничесоже, точию крестил есть. егда убо крестися, абие многу прият благодать Святаго Духа]. Апостол писменный, переводу Максима Грека. Подобне и святый Филипп крестивый Самарию, не сый рукоположен, обаче крестившиися самаряне Дух прияша оставления грехов по премногу сему научает ны, святый Епифаний архиепископ Кипрский, сице глаголющь: [Понеже апостол Филипп слуга сыи, не имяше рукоположения власти, еже даяти Дух Святыи, знамениом великим бываемым, како Дух Святыи не прияша? Дух убо прияша грехов оставление]. в толковании на Деяния [Апостол писменный в переводу Максима Грека]: равнообразне и зде. яко аще крестяй и не имать рукоположения сущий сый христианин. обаче, якоже на от Филиппа крещеных, на крещенаго от него сходит Дух Святый. свидетель сему неложен святый Феофилакт сице глаголющ: [отверзаетжеся небо, да явит нам яко крещения ради отверзается всем небо, еже Адам затвори. сниде же и Дух на Iсуса, да от сего увемы, яко и нам крещаемым сходит Дух Святый]. Благовестник, лист 35. Подобне и во евангелии учителном, в слове на крещение Господне, глаголет: [Даже увемы, яко на всякаго человека крещающагося отверзаются небеса, и призывает его в вышнее жилище. сходит же нань и Дух Святыи. аще ли же чювственныма очима не видим сей. несть достойно неверовати. знамения бо неверующим дана быша. но неверных ради, нам же доволно есть вместо знамения вера]. лист 520. И аще убо и на от неимущих рукоположения, якоже и на от священников, [Но о священницех глаголю христианских, от еретических бо креститися паче есть сквернитися] крещеных, во время погружения сходит Дух Святый, и очищает вся прежняя согрешения, како не равносилно есть? ей равносилно. аще же равносилно есть, и равну благодать Святаго Духа подает крещающимся, убо безпрекословно во время нужных случаев, лепо есть и от неимущих рукоположения, сущих христиан, паче священник еретичествующих, крещению совершаему быти.

Глава, 10.

Крещение и без елеопомазания и миропомазания совершается, вся бо сия вода навершает.

Суть убо нецыи суть, иже глаголют, како может быти совершенно крещение, от неимущаго хиротонии совершаемое, егда ни елеопомазания, ни миропомазания при крещении не бывает. сицевое мнение есть неимущих ведения доволственна во святом писании, паче же невеждь. ибо во святей церкви аще и седмь таин исповедуется, яже посредства вечнаго блаженства суть, обаче не идинообразны, ниже всякому приличествуют. овы бо суть во спасение нуждные, яко крещение и прочыя, овы же ко спасению, яко миропомазание, яко священником крещающим прилично есть на крещение, яко печатьствуеще крещение. кроме же священника, или и при священнице по скудости, тайна может и без мира совершитися, и спасение человеческое по нужде может твердо и известно быти. еже утверждают святии отцы, писателными своими гласы изъявляюще. две бо есте, глаголют, тайне нужнейшие, крещение и покаяние, без нею же невозможно человеку всячески спастися, прочия же суть посредния, их же аще кто и не сподобится нужды ради некия, спасен быти может. Сице глаголет кир Гавриил архиепископ Филаделфийский: [Ведати нужда есть всем, яко тайны церковныя иныя суть по нужде посредния, каковыя суть: миропомазание, евхаристия, и елеопомазание, их же аще кто и не сподобится нужды некия ради, спасен быти может. иныя по нужди заповеди, те же есте две, крещение и покаяние, еюже кроме несть спасение получити]. в книзе о седми тайнах [и Жезл, лист 49]. Видиши ли крещение без елеопомазания и миропомазания совершенно может быти. понеже, рече аще кто и не сподобится елеопомазания и миропомазания, нужды ради некия, спасен быти может: без крещения же не может спасения получити. Подобне и в Катихисисе в велицем глаголет: [Святое же миро, и последнее елеоосвященно помазание, сице ко спасению суть потребни, дабы имети спасение наше дерзновенне известно же и твердо. сего ради пренебрегии я, немощен есть и неизвестен, ниже утвержен, разве аще бы я вожделел и не возмогл бы их употребляти]. глава 60. зри: глаголет: Святое же миро, и последнее елеоосвященнопомазание, сице ко спасению суть потребни, дабы имели спасение наше дерзновенне известно же и твердо, а не глаголет яко без них невозможно есть человеку спасение получити. темже аще кто и не сподобится сих, нужды ради некия, божественная благодать совершает и. сице бо в Потребнице велицем: [Вопрос: Елика аще крещают несвященнии, мужие и жены, или иноцы, что достоит творити? Ответ: Аще умрет крестивыися, прежде нежели постигнути священнику божественая благодать совершает и. аще ли же жив будет, да паки поставит священник в купель, и молитвы и миро по обычаю творит]. Номоканон, лист 626.

Блаженный же Иоанн, приближившуся детищу к смерти, и троическим погружением от иерея, страха ради смертнаго совершену бывшу, не повелевает по сем молитвы и определения оставльшаяся возисполняти. сице бо глаголет: [Недугом удержан приближився уже к смерти детищь, аще тройческим погружением точию иерей страхом еже не предвосхититися, свершив, не потреба сему по сих и молитвы, яже оставишася и определения возисполнити]. севаст Арменополь, сечение 5.

Рцы убо ми; кое миро бяше, егда крещаху простии мужие и жены? кое миро при мученицех бяше, егда в темницах, егда на самех мучениях, крещахуся, егда сами себе крещаху, нерукоположеннии суще? кое миро при оных апостолех бяше, иже не имуще священства крещаху? о чесом выше доволно изъявися. яве яко не бе. и аще не бе, како совершено крещение их бысть? благоявлено яко и без миропомазания крещение по нужде совершаемое, совершено есть. темже убо аще простии мужие и жены крещающе, без миропомазания крещаемых освящаху: аще святии мученицы без мира крещение подающе освящаху: аще святии апостоли не имуще священства, и без миропомазания крещающе освящаху, верующия во Христа. зело явственно есть, яко тайна святаго крещения по нужде, может и без мира совершитися, и совершается, может освятити и облагодатствовати приступающыя к нему, паче же освящает и облагодатьствует. понеже сия тайны, еже есть елеопомазание и миропомазание возъисполняет вода. ибо аще ниже елей будет, ниже миро, довольствует вода к помазанию и к печати. явственно о сем в завещании святии апостоли о крещении, к епископом и презвитером, о еже како подобает крещати, и в чию смерть, засвидетельствуют глаголюще: [о крещении же, о епископе, или презвитере, уже бо и первее завещахом, и ныне глаголем, яко да сице крещаеши, якоже Господь нам завеща, глаголя: шедше научите вся языки, крестяще их во имя Отца, и Сына, и Святаго Духа, учаще их хранити вся, елика заповедах вам, пославшаго Отца, пришедшаго Христа, свидетельствующаго Параклита. да помажеши первее елеом святым, таже крестиши водою, и конечное печатуеши миром. да помазание убо причастие будет Святаго Духа, вода же совет смерти, миро же печать сложении. аще же ниже елей будет, ниже миро, доволствует вода и к помазанию и к печати, и ко исповеди умирающаго, сиречь соумирающаго]. книга 7, завещания святых апостол. И аще убо по завещанию святых апостол, доволствует, егда не будет ниже елей, ниже миро при крещении, и к помазанию и к печати, како не может быти совершенно крещение, аще и от неимущаго рукоположения совершается? ей совершенно.

Глава, 11.

Силою словес Господних, сиречь крещается раб Божий во имя Отца , и Сына, и Святаго Духа с треми погруженьми, крещение совершенно бывает.

К сим же вся святая древлеправославная церковь по премногу поучает, яко святое крещение силою сих божественных словес, ими же Господь повеле крестити, сиречь во имя Отца и Сына и Святаго Духа вкупе с треми погруженьми, кончается и совершенно бывает. сице о сем в Катихисисе велицем глаголет: [Вопрос: Кий есть вид или видотворение сея тайны (крещения)? Ответ: Оная словеса, ими же Господь повеле крестити, сиречь во имя Отца и Сына и Святаго Духа, вкупе со тремя погруженьми. сими бо глаголы божествеными, и силою их крещение кончается, и совершено бывает. аще и прочии глаголы при крещении глаголемии от священника, в благолепное украшение и наказание бывают, сия же три в видотворение, и содеяние крещения суть, да сими всездравственно и совершенно крещение бывает]. глава 61. И якоже сими словесы крещение совершенно бывает: тако ими же и всяко нечистота крещаемаго отмывается. научает ны сему святый Иоанн Златоустый сице взывающ: [Банею омывает чистоту, глаголом, рече, каковым? во имя Отца, и Сына, и Святаго Духа]. Беседы апостольския, лист 1688. Согласно сему и вся древлеправославная церковь научает глаголющи: [Внегда ко умовению водою, словеса сия Божия приложатся, сиречь крещается раб Божий, имярек. во имя Отца, аминь, и Сына, аминь, и Святаго Духа, аминь: Тогда с сими словесы тайна святаго крещения совершается, и душею паки раждается крещаемыи, силою Святаго Духа]. глава 61. Но и новопечатная книга Жезл изданная от собора в Москве, лета 7174. на листе 49, на обороте, миропомазания тайну в посредственных тайнах полагающи, ея же кто и не сподобится нужды ради некия, спасен быти может, изъявляет. темже убо аще святии апостоли научают, яко аще ниже елей, ниже миро будет при крещении, доволствует вода и к помазанию и к печати, како несть совершенно крещение, от неимущаго хиротонии совершаемое без миропомазания? ей совершенно. аще вся древлеправославная церковь изъявляет, яко сими божественными словесы, во имя Отца и Сына и Святаго Духа. купно с треми погруженми совершается крещение, како несть совершенно без мира совершаемое крещение? ей совершенно. аще сим единым глаголом, сиречь во имя Отца и Сына и Святаго Духа, омывается нечистота крещаемаго, како несть совершенно по нужде кроме мира совершаемое крещение? поистинне совершенно. и аще тако есть, якоже и есть, убо и от неимущаго рукоположения, во время нуждных случаев, и без миропомазания творимое крещение есть совершенно. аще же есть совершенно: убо есть равночестно и равносилно, и равну благодать Духа Святаго имущо, якоже и от сущаго священника совершаемое, и изнурително грехов. понеже святии отцы собора иже в Карфагене глаголют [Кормчая, лист 161]: [Иже не глаголет крещением оставлению быти грехов. да будет проклят]. и аще тако есть, убо во время нуждных случаев, лучше есть совершаему быти крещению от простолюдина суща христианина, нежели от священника еретика.

Глава, 12.

Лучше есть крещению от простолюдина христианина совершитися нежели от священника проклятаго.

Многу крепость, много утверждение во еже лучше во время нуждных случаев, крещению совершитися от простолюдина христианина, нежели от священника еретика, подает и от новых пастырей, Петр Могила, митрополит Киевский сице глаголя: [Яко лучше есть, да простым людином совершится божественное крещение, нежели священником проклятым, или отлученным, или еретичествующим]. Потребник киевопечерский, року 1646. Зде возмем три сия точию речение, проклятым, отлученным, и еретичествующим, и разсмотрим со всяцем прилежанием, внутреннима ума нашего очима, аще обретаются при нынешняго века священство имущих? ей всяко. и виждь ми.

1: Святая древлеправославная церковь, не крестящихся двема перстома, клятве предает, сице светлым гласом вопиющи: [Иже не крестится двема перстома, якоже и Христос, да будет проклят]. Потребник старописменный Иова патриарха, глава 48. Но священник нынешняго века, не изображает на себе крестнаго знамения, по содержанию древлеправославныя церкве, двема перстома, но треми, убо есть проклятый.

2: Святии отцы поместнаго собора бывшаго в Москве при царе Иоанне Васильевиче в лето 7059, неблагословляющих двема перстома клятве полагают, сице взывающе: [Аще кто двема персты не благословляет, якоже и Христос, да будет проклят]. Стоглав, глава 31. Священник же нынешняго века, не благословляет двема персты по чину древлеблагочестивыя церкве: но пятию странно, убо есть проклятый.

3: Святии отцы поместнаго собора, иже бе в честней патриархии святейшаго града Иеросалима, изменяющих образ честнаго и животворящаго трисоставнаго креста Господня, клятве отдают, сице громогласне восклицающе: [иже убо дерзнет кто инако веровати, или развращати что от законоположенных, или крестнаго образа, ниже: аще святители суть, да извержени будут и прокляти]. Свиток многосложный. Священник убо настоящаго века, сопротивно древлеправославней церкви умствуя, исповедует Христа распята на двочастнем кресте, им же крещение совершает, просфиры печатает, тем венчает, тем вся тайны совершает. убо есть проклятый.

4: Святая древлевосточная церковь, определи таинственное ангельския песни славословие, в сугубом аллилуия возглашати, прилагающих же или отъемлющих, клятве предает вопиющи: [мы убо древнему законоположению церковному последуем мы заповедание святых апостол соблюдаем, мы прилагающих что или отъемлющих от церкве проклинаем]. евангелие учителное в неделю 1 поста. Священник же нынешняго века сопротивомудрствуя древлеправославней церкви, приложив третие аллилуия воспевает, убо есть проклятый.

5: Святая древлеправославная церковь законоположивши предаде всем верным во обще и наедине, молитву глаголати: Господи Iсусе Христе Сые Божии помилуй мя, или нас. ея же законы святии отцы седмаго вселенскаго собора соблюдающе прилагающих нечто, или отъемлющих от церкве, проклинают, сице взывающе: [мы, законы церковныя, мы пределы отеческия храним, мы прилагающих нечто, или отъемлющих от церкве, проклинаем]. книга Кирилова, лист 371. Священник же никонопоследствующий отринув, оную, древлеблагочестивою церковию узаконенную сопротивно ей новопреданную глаголет, сего ради есть проклятый.

6: Святая соборная и апостольская церковь,  всеми седмию вселенскими и девятию поместными соборы, символ веры, еже есть верую во единаго Бога, утвердила всем неподвижно блюсти, ни отъемля ни прилагая что, но цело сохраняти, темже и клятвами запечатле страшными, да не како кто дерзнет что пременити, или словом, или вещию, якоже о том в самех правилех соборных видимо есть. сице правило втораго вселенскаго собора гремя вопиет: [яже в Никеи святых отец вера, твердо да держится и пребывает, реченная же и писанная на ню от еретик, и еретики да будут прокляти]. правило 1. Священник же нынешняго века сопротивомудрствуя древлеправославней церкви, и отъемлет, и прилагает, и пременяет, якоже в самем их символе показуется, еже предложихом во второй главе втораго предела, сего ради есть проклятый.

И что много предлагаю, доволно бо и в вышних главах явлено, не токмо бо от древлеправославныя церкве, за пременения, приложения, и отъятия, никонопоследствующий священник есть проклят: но и от своея си нынешния. точию кто не глаголет имя Спасителево Iисус, чрез иоту, и иту пишемо, но Iсус, клятве предает, сице глаголющи: [аще кто не глаголет имя Спасителево пишемо чрез иоту, и иту, Iисус, но чрез иоту токмо Iсус, да будет проклят]. чин приятия староверцов [печатан, лето 1720]. Сей же благословляет пятию персты. в коем сложении перстов изображает литерами имя Iс Христос: указателным перстом, I, великосредним, С. где же зде возможно обрести иту, зане более перстов не обретается, им же бы возможно иту изобразити. темже аще совокупиши, I, и, с, будет. Iс, а не Iисъ. Понеже иты несть. сего ради, аще и не мнится изглаголати Iсъ, но Iисъ, обаче самою вещию показует в благословении своем, яко изглаголует Iс, убо и от своея си церкве есть проклят.

Сие показует ти, яко нынешнии никонопоследствующий священик, не токмо от древлеправославныя: но и от своея си новыя проклят. Зде убо во первых ведателно есть, что есть проклятый или проклят? проклятый или проклят тожде знаменует, еже и анафема, сице бо о сем свидетельствует святый Иоанн Златоустый глаголя: [весть бо в злобе живущых и беззакониях, не токмо не любити, но и проклинати. яко егда глаголет: Аще кто не любит Господа Iсуса Христа, да будет анафема: И аще кто благовестит вам, паче еже приясте, да будет проклят]. к римляном, беседа 31 [лист 1150, зач. 191; к коринф. бес. 41]. Что же есть анафема? анафема есть отлучение от всех, отторжение от церкве, и отчюждение от Бога. яко же той же святый Иоанн Златоустый толкуя глаголет: [что бо есть анафема? слыши его глаголюща: Аще кто не любит Господа нашего Iсуса Христа, да будет анафема, сиречь да отлучится от всех, да будет всех чюждь. якоже бо анафема, сиречь дару возложенному Богови никтоже дерзнет просто рукама прикоснутися, ниже близ быти: тако и отлученнаго от церкве, всех отсецая, и аки наидалечае отводя, сим именем от сопротивнаго нарицает, со многою боязнию всех отрицая от того отлучатися и отскакати. анафеме бо. (сиречь дару) чести ради, никтоже дерзну приближитися. отсекшагося (от церкве) от сопротивнаго разума отлучахуся вси, тако яко разлучение убо едино и подобне и сие и оно от многих отчюждаше, образ же разлучения не един, но и сопротивен сей оному. от онаго бо удаляхуся аки возложеннаго Богови, от сего же аки отчюжденнаго от Бога, и оттерзшагося от церкве]. к рим., беседа 16, лист 280.

И тако по сказанию Иоанна Златоустаго, проклятый знаменует еже и анафема, сиречь отлученный от церкве, отчюжденный от Бога. аще бо толико кратне и вящше от всея святыя восточныя и великороссийския древлеправославныя церкве, и от своея си новыя, нынешний священник проклят, како может проклятый, сиречь отлученный от церкве, отчюжденный от Бога, благодать святаго крещения иным преподати, ея же сам своим отлучением лишися? святый Иоанн Златоустый глаголет: [никтоже бо от проклятых иному преподает благословение, его же сам лишися]. Беседы апостольския, лист 1522. Како бо может преподати, егда клятва лишает подаяния проклятаго таин церковных? глаголет бо творец книги Мира с Богом: [Клятва лишает проклятаго общения таин церковных, сице в приимании их, яко в подаянии. ибо проклятыи не может таин приимати и сущии священныи подати]. догмат 4. о клятвах. И аще проклятый сущий священный не может таин подаяти, како может он тайну святаго крещения совершити? и како может крещение от него творимое быти совершенно, и подаятельно отпущения грехов, повнегда клятва его лишает всего строения чина и сана священническаго. якоже той же творец книги Мира глаголет: [(клятва) лишает всего строения чина и сана священническаго: такожде приимания и строения добр]. догмат 4, о клятвах. Аще убо клятва лишает всего строения чина и сана священническаго священника, благоявленно яко, аще и действует священническая, лишен сый священьства, не ктому уже есть священник, и како возможно от него прияти крещение, егда проклятый не может подаяти таин церковных? о чесом же той же творец книги Мира засвидетельствует глаголя: [запрещается общее с проклятым моление и участие во всех духовных делех, сице яко ни от проклятаго, ниже при нем или с ним, ни единаго моления церковнаго соборнаго, ниже тайны церковныя употребляти, или ему подавати не достоит]. догмат 4. И аще убо проклятому не достоит тайны церковныя подаяти: кольми паче от него приимати. како же возможно от никонопоследствующаго священника, иже многократно от всея древлеправославныя церкве. и от своея си проклятию предан, его же клятва лишила всего строения чина и сана священническаго, и подаяния таин церковных, тайну святаго крещения прияти? и како может от него совершаемое крещение в сущее крещение вменитися, егда тмократне клятве предан, яже его обнаживше священства от церкве и Бога отлучиша? ей не может. глаголет бо святый Иоанн митрополит Никейский: [от анафемы благословение не бывает. и от проклятия молитва не исходит, и от диавола Христово не совершается таинство]. в слове на армены. Како же будет от него совершаемое крещение очистително грехов, егда клятв ради наложенных на него лишися подаяния благодати Святаго Духа в крещении? всяко несть. глаголет бо преподобный Никон Черныя горы: [иже от церкве отступльшии, не ктому имеша благодать Святаго Духа в себе, ниже ктому могуще благодать Святаго Духа инем подати, от нея же тии отпадоша]. слово 63. Аще бо попустим крещению от него совершаемому прияту быти, всяко и нехотяще и вся оная их же ради проклятию предается, и множайшая содержимая им будут прията, с ними же купно и клятвы наложенныя на него свосприяты. аще ли же оная не прията суть, всяко ниже крещение совершаемое от него возможно есть прияти. убо безпрекословне имущих новодействуемое крещение, действуемое от многократне проклятию преданнаго священника, приходящих к древлеправославней вере, подобает паки совершенно святым крещением, аще и простолюдину, но сущу христианину, крестити. понеже, по словеси Петра Могилы, лучше есть да простым людином совершится божественное крещение, нежели священником проклятым.

Глава, 13.

Лучше есть от простолюдина крещению совершитися, нежели от священника отлученнаго.

Доволно убо познахом, якоже мнитмися от священных правил, яко никонопоследствующий священник, приложений, отложений, и пременений ради не токмо от древлеправославныя, но и от своея си нынешния церкве есть проклят. взыскано есть прочее. аще есть отлученный. не требе бы много искати яко есть отлученный. самое бо сие являет, яко аще есть проклят, яко и отлучен. ибо проклятый тожде знаменует, что и анафема. анафема же по изъяснению Златоустаго, знаменует отлучение от церкве. и отчюждение от Бога. сего ради аще убо есть проклят, яве яко и отлучен. зане по сказанию и седмаго вселенскаго собора: [анафема есть вечное проклятие, и от Бога и от церкве отлучение]. Бароний, лето Господне 787 [лист 820]. Тем проклятый есть от Бога и от церкве отлучен. обаче ведателно есть сие, каковых ради вин есть отлучен. суть бо премногия вины, их же ради есть отлучен: но долготы слова убегающе, от множайших малейшыя ведения ради предложим. Темже и глаголю.

1: Святии апостоли получившаго епископа, или священника, или диакона за сребреники сан, извергают из сана, и от церкве отлучают, сице в своем правиле вопиют глаголюще [правило свв. апостол 29, Номоканон лист 60, Кормчая лист 7]: [аще кии епископ за сребреники сего достоинства приятель бысть, или презвитер, или диакон, да извержется и той, и рукоположивыи, и да отсечется общения всячески, якоже и Симон волхв от мене Петра. Толкование: зде вкупе два запрещения дает. поставленному по мзде, и поставльшему его, обою бо измещет от сана. ктомуже еще и всегда непричастнома быти повелевает. и от церкве отлученнома, за таковое великое прегрешение]. правило 29. Сим споследствуя и святый Генадий патриарх Царя града, во окружном своем послании с митрополиты и епископы, 81. взывает глаголя: [буди убо и суть отлучени, и всякаго достоинства священническаго чюжди и проклятию анафеме да подлежат, и даяи и приемляи, не продаемую благодать Всесвятаго Духа, и иже стяжати священство за сребро мнит, и сие подаяти на сребре обещеваяи, аще причетник, аще людин есть]. Номоканон, лист 61. Священницы же нынешняго века едва едва не вси священство за сребро себе получают. ибо егда кто хощет священником рукоположитися, становится ему оное, в консисториах, вдаяние подъячим, секретарю, ризничему, духовнику, певчим, во еже бы производство сотворили, и удостоили священства, рублев, в 30, в 40, и в 50. аще ли не хощет дати, или не имать что дати, то аще и чрез долгое время ходя просит о произведении, не имать получити. темже аще и не самому архиерею дает, обаче чрез иных купует себе священство, сего ради отлучен есть от церкве. ибо святый Тарасий патриарх Константина града, равне повелевает изметати из священства, аще купует е себе даянием злата епископу, или иным ходатайствущым ему, сице глаголя: [Аще кто даянием злата, епископ, или причетник будет. или странноприимец, или болничарник, или правитель светлому некоему дому или иному церковному некоему промыслитель служению, и давыи и приемыи и ходатайствовавый священства, или причта, и ввереннаго правления да обнажится]. Номоканон, лист 62. Убо никонопоследствующий священник аще и не самому архиерею, но инем, обаче дает, да получит священство, по сим святых апостол, и богоносных отец гласовом, есть отлучен от соборныя апостольския церкве.

2: Святая древлекафолическая церковь содержащи, определи священнодействие священныя литургии службу совершати на седми просфирах, на них же воображати крест трисоставный, в кругловидной печати, с копием и тростию, и с сим надписанием: Се Агнец Божии вземляи грехи всего мира, ей же последуя древлероссийская церковь, имущи содержаше той же чин и определение. служаше на седми просфирах, даже до лет Никона патриарха. еже и сам Питирим утверждает глаголя: [в прешедших летех, до правления старопечатных книг, аще и служили на седми просфирах, ибо тако тогда повеление было великороссийския церкве, не по противлению восточней церкви]. Пращица, ответ 212. Нынешнии же священницы совершают службу литургии, сопротивно древлевосточныя церкве преданию, содержанию же великороссийския, на пяти просфирах, на них же полагают крест четвероконечный, без подножия копия трости и надписания, се Агнец, в четвероуголной печати. чесо ради святая древлевосточная церковь, смеющих предания ея отметати, новая же сопротив вводити, из сана измещущи отлучает сице восклицая: [Смеющих прочее инако мудрствовати, или учити, или по богомерских еретик церковная презирати предания, нова же некая разумевати, или отложити от чина церковнаго евангелие, или знамение креста, (ниже) или разумевати стропотно и коварно, еже развратити что от обычных предании вселенския церкве (ниже) аще епископи суть, или клирицы, изметати повелеваем, аще ли же иноцы суть, или белцы, от причащения да отлучатся]. евангелие воскресно в неделю 1-ю поста. Тем нынешния великороссйиския церкве священник служаи по новопреданному Никоном, сопротивному древлевосточныя церкве преданию, на пяти просфирах, имущих на себе крест четвероконечный, есть отлучен от святыя соборныя апостолския церкве.

3: Священнии апостоли священными своими правилы, всякаго епископа, презвитера, и диакона, непостящагося во святую 40-цу, и во вся среды и пятки всего лета извержения суду подлагают, сице вопиюще: [аще которыи епископ, или презвитер, или диакон, или поддиакон, или чтец, или певец, в 40 дней, сиречь в великий пост не постится, и во все лето во всякия среды и пятки, да извержен будет, токмо аще не пакостит ему болезнь телесная, немощному бо прощено есть по силе вкушати масла и вина, аще ли мирский человек не постится, да отлучится]. правило 69. Никонопоследствующии же убо епископи, презвитеры диакони и прочии причетницы, во святую 40-цу, и в прочия посты, и во вся среды и пятки, ядят, егда хотят, рыбы невозбранно. Сего ради всяк нынешния церкве презвитер, не постящься во святую 40-цу, и в прочия святыя посты, и вся среды и пятки всего лета, есть извержен из сана, и отлучен от соборныя апостольския церкве.

4: Святая древлеправославная восточная церковь, содержащи определила, еже во освящении церквей около ходити со кресты, и в венчании, и в крещении, около купели ходити, на посолонь. ей же последствующи и святая древлероссийская церковь, неизменно содержаше, еже ходити во время освящения церквей, в венчании, и в крещении на посолонь. якоже свидетельствуют древлепечатныя книги, сице изъявляюще: [исходят вси из церкве, и идут со свещами вкруг, на север, последует же причет, и люди, темже образом, якоже со кресты. первее убо кропит церковь, второе кадит, третие крестом знаменует церковь. и повыше мало напечатано: крестом осеняет в церкви: первее к восточней стране, таже к южней, и к западной, к северной]. Потребницы изданнии в Москве, при патриарсех, Филарете, лист 61, Иоасафе, лист 39, и Иосифе, в чине церквосвящения. Нынешния же российския церкве священницы, яко в церквосвящении, тако в венчании, и в крещении, около купели, сопротивно преданию древлеправославныя церкве творяще, противу солнца обходят. чесо ради святая древлеправославная церковь. таковых протерзателей смеющих пременяти предания ея, из сана извергши клятве предает, сице вопиющи: [иже убо дерзнет кто инако веровати, или развращати что от законоположенных, (ниже) во святей церкви держимых, по первым обычаем святых отец, и благочестивых царей, аще святители суть, да извержени будут и прокляти]. свиток многосложный. Сего ради нынешния церкве не ходяи по преданию древлевосточныя церкве, елико в церквосвящении толико в венчании, и крещении около купели по солнцу, напротиву солнца, священник есть отлучен от древлевосточныя церкве.

5: Святии апостоли, и священнии отцы, священными своими правилы всячески возбраняют, с еретики или со отлученными от церкве в дому или в церкви молитися. сице вопиют святии апостоли глаголюще: [Моляися с еретики, да отлучится, аще же яко причетники приимет я, да извержется. Толкование: Епископ или презвитер, или диакон, аще помолится токмо с еретики, или в дому, или в церькви, да отлучится]. правило 45. Подобне и отцы собора, иже в Лаодикии возбраняют глаголюще: [с еретики и с отвергшимися от соборныя церкве да не помолится никто. Толкование: Аще помолится кто с еретики, или со отлучившимися от соборныя церкве своею волею, сам отлучен будет]. правило 33. Священницы же нынешния российския церкве молятся в церквах купно с еретики латины, люторы и калвины. ибо совершающым им службы. входяще сии еретицы стоят даже до отпуста, их же они не изгоняют. тем нынешния церкве священник, по сих святых апостол и святых отец, правилом есть отлучен, от древлеправославныя церкве.

Суть и иныя множайшия вины, их же ради никонопоследствующий священник отлучается от древлеблагочестивыя церкве. обаче долготы слова ради убегая, прочия оставляю. довлеют бо и сия и выше во второй главе предложенная, яко обретается и есть отлучен от соединения древлецерковнаго телесе. Вемы бо яко аще кто каково правило святых апостол, или святых отец преступает, по таковому всячески и запрещению подлежит. и сия не своя си глаголю, но слыши преподобнаго Никона Черныя горы сице вопиюща: [никому же не леть быти проявленная развращати правила, или отметати, или иная паче лежащих приимати правила лже надписана, от некиих сложенная, иже истину корчемствовати начинающих. аще ли кто обрящется правило некое от реченных упражняя, или возбраняти начиная, повинен да есть по таковому правилу яко же тое сказует, запрещением прияемля]. Тактикон, послание 4.

Что убо, речеши ли? како убо есть отлучен, егда вся церковная таинства действует? ведый убо буди, аще бо и действует: но есть отлучен. действует бо сия вся вне чина своего чрез правила. ибо аще зрителне и действует, обаче духовне есть отлучен. тем аще и действует, действо его несть действо, ниже действително и благоприятно: но токмо церемонии отправление. явственно сие утверждающу Иоанну Никейскому сице: [вся яже от них содеваемая, не прият наипотребна суть, аще и тщатся несмысленнии и неразумнии и неутверженнии, и лживии христиане, яко истинна и благоприятна творят деяния их]. слово обличителное на армены. Сего ради аще и мнится действовати, но есть духовне отлучен. и в лепоту. Слыши убо о сем, како блаженный Иоанн Златоустый, некиих христиан ходящих на позорища сатанинския, таже приходящих в церковь измещет из церкве, аще и мнятся быти в ней, иже глаголет тако: [елма иже с растливым жительством священному сему причащаяися собранию, аще и зде стоит, изриновен есть и от затворенных вне, и не у могущих священней причаститися трапезе, паче изгнан есть]. слово о Давыде, и о Сауле. Маргарит, лист 329, на обороте.

Творец убо книги Мира с Богом сказует, яко [всяк христианин, иже от церкве отлучен бывает, сатане бывает предан. ибо вне церкве диавол, якоже в церкви Христос]. И аще убо отлученный от церкве, сатане бывает предан, како от преданнаго сатане может таинство церковное совершено быти? благоявлено яко не может. аще не может. како от священника отлученнаго от церкве, и сатане преданнаго, святое крещение совершено будет? яве яко несть, аще же несть, како будет совершаемое от него крещение очистително грехов кающагося? поистинне несть. аще же несть, како возможно крещение от него совершаемое прияти? зело зело невозможно. почто? понеже отлеченным от церкве, и диаволу преданным, не ктому уже что Бог действует, ниже благодать Святаго Духа на призывание его приходит. сего ради и крещаяися от него, ниже крещение имать, ни христианин есть. и сия не своя си глаголю, но слыши златокованную трубу Иоанна, о священнице, им же ничтоже Бог действует, сице глаголюща: [аще бо тем, (сиречь священником) ничтоже действует, ни крещение имаши, ниже таинств причащаешися, ниже благословение приемлеши, убо ни христианин еси]. к Тимофею нравоучение 2, послание 1. И аще убо отлученным от церкве, и сатане преданным, ничтоже Бог действует. сего ради и крещенный от него, ниже крещение имать, ниже христианин есть. како и от новодействуемое имущих крещение, от отлученнаго от церкве священника совершаемое святым крещением крестити: ей ей подобает. ибо лучше есть, по гласу Петра Могилы, да простым людином (христианином) совершится божественное крещение, нежели священником проклятым или отлученным.

Глава, 14.

Лучше есть крещению совершитися от простолюдина, нежели от священника еретичествующаго.

Се уже, Богу поспешествующу, двое при нынешнем священнице содержащееся, еже есть проклятие и отлучение, усмотривше от священных писаний показахом. прочее показателно есть, якоже обещахомся, аще есть еретичествуяи. понеже сказует Петр Могила: лучше есть, да простым людином совершится божественное крещение, нежели священником еретичествующим. но прежде даже приступим во испытателство о священнице, ведателно есть что есть еретик? еретик есть имя греческаго языка, славенски же сказуется иномнитель, избиратель. якоже егда кто не тожде, еже сам Христос Спаситель священным своим евангелием предаде: еже пророки предвозвестити: еже божественнии апостоли предаша: святии отцы на седми вселенских, и девяти поместных собравшеся соборех, определиша: святая православнокафолическая церковь узаконоположивши содержит: мудрствуя содержит: но ино возмнев, и оному ложному своему мнению прилепився, противяся истине упорне стоит, есть еретик. сице бо преподобный Максим Грек изъявляет глаголя: [еретик бо он, кто мнению своему ложному крепце прилепляется, известно совестию истине верно и противу глаголет, жестоце, без надежди исправления]. глава 78. Творец же Пращицы, по чесому глаголется еретик, вопрошая глаголет тако: [почесому еретик, сиречь иномнитель? посему, понеже аще кто очесом мнит иное, а не тое, еже Христос Спаситель научи, и предаде священным евангелием, еже устави вселенскими седмию, и девятию поместными соборы, и еже святою восточною апостольскою церковию узаконоположи]. Пращица, ответ 235. И тако: еретик есть той, сиречь иномнитель, иже о чесом иное мнит, а не тое еже Христос Спаситель научи и предаде священным своим евангелием: еже пророки предвозвести: еже апостолы благовести: еже вселенскими седмию, и девятию поместными соборы устави: и еже святою восточною и апостольскою церковию узаконоположи.

Ныне убо разсмотрим внутреннима ума нашего очима прилежне, аще никонопоследствующий священник тоежде, еже Христос Спаситель научи и предаде священным евангелием: еже вселенскими седмию, и девятию поместными соборы устави: и еже святою восточною церковию узаконоположи, а не иное мня содержит. аще бо от сих пяти предреченных поне во едином обрящется не тожде мудрствуя, всяко есть еретичествуяи. и виждь ми: в начале убо разсмотрим, како Христос Спаситель благослови: како же нынешний священник благословляет.

1: Христос убо Спаситель, егда возношашеся на небо, благослови священныя своя ученики, с ними же купно и вся верующыя вонь, совокупль три персты, палец со двема последнима, во образ Святыя неразделимыя единосущныя Троицы: два же указателный и великосредний, во исповедание сшедшуся двою естеству своею божества глаголю и человечества. еже богогласный Лука евангелист, в священнем евангелии засвидетельствует, глаголя: [извед же их (апостолов) вон до Вифании, и воздвиг руце свои и благослови их. и бысть егда благословляше их, отступи от них, и возношашеся на небо]. зач. 114. Зде убо во евангелии аще и не объяви святый Лука евангелист, како Спас персты сложив благослови: обаче благословящую Спасову десницу, священным образованием, по вышепоказанному изобрази. написа бо образ Пресвятыя Богородицы, с превечным младенцем, на нем же у Христа Спасителя благословящую руку, три персты, палец со двема последнима совокуплены по образу неразделимыя Троицы, два же, указателный и великосредний, простерта на благословение, во исповедание сшедшуся во двою естеству во Христе, божества и человечества. еже солнца светлейши на чюдотворнем Тихфинском Богородицыне образе Спасово благословение показуется [в лето 6891 явися]. о нем же древлеписанная история повествует, сице: [Руку же его божественую десную имущу простерту, яко благословящу, призывая благословенныя, яко область преимея владычествия на небеси и на земли. божественнии же его персты, три убо согбени, и друг ко другу совкуплени, по образу неразделимыя единосущныя Троицы, яко сый от Троицы един воплощься от Девы, не разлучися от Отца и Духа. два же великая перста образуют божество Его и человечество, яко совершен Бог во двою существу, сиречь в божестве и человечестве, во единой же ипостаси, якоже и персты во единой длани]. до зде от истории. Никонопоследствующий же священник не тако, якоже Христос Спаситель возносяся на небо, священныя своя ученики, совокупив три персты вообразив Святыя Троицы, два же простер во исповедание двою существу своею благословив, предаде им и прочия верующыя вонь благословити: но иное мудрствование имея, сопротивное преданию Христову, согласное же некоему протопопу Павлийскому, по реклу Малаксе, иже ниже в числе церковных учителей обретается, ниже в лице святых отец воспоминается, ниже, в кая лета, и при коем царе, и патриарсе греческом, или при коем княжении российском бе известно есть, благословляет странно некако пятию персты, изобразуя перстами литеры, сице указателным перстом, I, великосредним, С, палцем и четвертым, Х, пятым перстом, С, ими же изобразует имя IC ХC. и аще не тожде, еже ХС Спаситель в благословении своем, сам первее совокупив персты, изобрази треми три ипостаси божественныя, двема же два естества божество и человечество, благословив предаде учеником своим, и преемником их такожде изобразующе, тожде исповедати, мнит, но сопротивно Его божественому преданию. убо есть еретичествуяй.

2: Паки Христос Спаситель наш, егда восхождаше на небеса, благословив божественныя своя ученики предаде им священным своим евангелием, якоже благословляти, такоже и знаменатися. совокупи бо три божественнии свои персты. во образ триех божественных ипостасей, Отца и Сына и Святаго Духа, два же во исповедание двою естеству, божества и человечества. еже явственно показуется от образа Пресвятыя Богородицы чюдотворнаго, иже на Тихфине, его же святый Лука евангелист написа. о коем знаменовании, самем Христом Спасителем, святым своим учеником и апостолом преданном, царьственный пророком Давыд Духом Святым предрече глаголя: [Дал еси боящымся Тебе знамение, еже убежати от лица лука]. псалом 59. Кая словеса священнаго пророка, святии богословцы, Феодорит, Афанасий, Кирил, Златоустый, и инии отцы толкующе изъявляют: яко даде Господь знамение честнаго креста верным христианом, им же знаменают лица своя. сие пророческое слово и преподобный Максим Грек толкуя, засвидетельствует о знаменовании согласно Христову преданию, еже благословя ученики своя предаде, слагати три персты, палец со двема последнима, во исповедание таинства Святыя Троицы, два же, указателный и великосредний во исповедание сшедшуся двою естеству во Христе. якоже в книзе его, в слове 40, явствует. сие предание, еже якоже благословляти, сице и знаменатися, три убо персты совокупив, палец со двема последнима во образ Святыя единосущныя и неразделимыя Троицы, два же, указателный и великосредний, во исповедание двою естеству сшедшуся во Христе, божества глаголю и человечества, священнии и божественнии апостоли приемше от Христа Спаса, егда изыдоша во вселенную сеяти семя веры Христовы, купно с нею верующим во Христа Бога предаша. якоже преподобный Максим Грек свидетельствует, глаголя: [О нем же предварив вопросил мя еси, раскрыти тебе силу тайнаго апостольскаго предания, сиречь образа крестнаго, имже знаменуем себе вернии, на всяком начале молитв наших, яже к Богу]. слово 40. Нынешний же никонопоследствующий священник во знаменовании себе, не тоежде, еже Христос Спаситель предаде учеником своим, во еже в знаменовании себе, совокуплением триех перст, палца и двою последнею исповедати три божественныя ипостаси, Отца и Сына и Святаго Духа, двою же, указателнаго и великосредняго, два естества сшедшеся во Христе, божество и человечество, еже и священнии апостоли приемше, всем верным предаша, мудрствуя мнит. не бо он последуя Христу Спасителю, и священным Его учеником совокупляет на знамение себе, три персты, палец со двема последнима, во образ триех божественных ипостасей, два же указателный и великосредний, во исповедание двою естеству Христову, божества и человечества: но некоему Дамаскину иподиакону студиту, иже ниже в лице святых Божиих воспоминается: ниже в числе святых церковных учителей обретается, ниже от единаго когда яко древлегреческих, сице древлероссийских благочестивых архиереов мало воспомянуся, три первыя персты совокупив знаменуется, ими же три божественныя ипостаси мнится изображати, двою же естеству Христову, божества и человечества, не являет исповедати. и ельма же убо не тоежде, еже Христос Спаситель предаде совокуплением триех перст, палца и двою последнею, исповедати три божественныя ипостаси, двою же указателнаго и великосредняго, два естества, божество и человечество, мудрствуя мнит: но совокуплением триех первых перстов, три божественныя ипостаси исповедует, двою же естеству Христову не изобразует: убо есть еретичествуяи.

3: Паки Христос Спаситель священными своими пророки предвозвести, яко имать пречистую свою страсть совершити, на трисоставнем кресте. Сице усты святаго пророка Исаии предрече, глаголя: [и слава ливанова к тебе приидет, кипарисом и певгом и кедром]. глава 60. Сия словеса божественнаго пророка Исаии, святый Григорий Амиритский толкуя глаголет: [крест Христов от кипариса и певга и кедра сложение имать. ибо простое его от кипариса бяше, прекое же же от певга, подножие же от кедра]. беседа 3, в прении с Ерваном.

Согласно сему и святый Иоанн Златоустый, в слове в неделю 3 глаголет: [А Исаия откуду бы было? и яковыя креста древеса были, именует ты ми словесы на кипарисе и певге и кедре вкупе месце святое прославите]. Маргарит новый. Сим подобне и Хрус уединенный в слове на Воздвижение честнаго креста глаголет: [что бо яснее рещи, кипарисом и певгом и кедром вкупе прославити место святое мое. понеже бо святая омоусия Троица, единою от своих ипостасей, смотри сотворити человеческое спасение крестом: воистинну спасенное оружие, от трех древ сложено бысть]. минея четия, сентября в 14 день. Никонопоследствующий же священник не тако, якоже Христос Бог Исаиею пророком предрече, еже есть на трисоставнем кресте, Христа распята быти умствует: но на римском двочастнем. якоже Димитрий митрополит Ростовский, в книзе Розыске изъявляет глаголя: [Христос распяся не на брынском осмоконечном кресте, но на римском четвероконечном]. часть 2, статия 3. Брынским убо осмоконечным нарицает трисоставный крест, римским же четвероконечным двочастный. и понеже не согласно Христову предвозвещению пророком предвозвещенному умствует, си есть не на трисоставнем кресте Христа распята, но на двочастнем. убо есть еретичествуяй.

4: Паки: Христос Бог наш предвозвести божественными пророки своими, о печатании на проскомидии просфир, самем тем, на нем же распяся, иже бе трисоставен, крестом. Сице усты святаго пророка Иеремии предрече: [приидите вложим древо в хлеб его]. глава 11. Кая словеса святаго пророка святый Иоаннн Златоустый толкуя глаголет: [древо, крест, хлеб, плоть Христова, иже взем Господь хлеб рече: Се есть плоть Моя за вы ломимая во оставление грехов]. Соборник, лист 494. Подобне и в новопечатней Скрижале изъявляя глаголет: [хлеб Христов, тело Его глаголется, зане в нощь, в ню же хотяше Христос предатися, прият хлеб, и рече апостолом: Сие есть тело Мое. древо убо еже вложиша еврее хлеб Христов, сам крест есть, на нем же распяша Христа]. лист 780. Который крест Христов бе трисоставен. якоже святый Григорий Синаит воспевает, глаголя: [крест трисоставныи честное древо, Троицы бо носит трисоставныя образ]. в каноне кресту, песнь 8. И вся церковь возглашает воспевающи: [Трисоставныи крест, яко троичный образ воспеваем]. Триодь во вторник, 4-я недели поста в трипеснце. К нему же животворящему кресту Христову, и святый Иосиф Фессалонитский воспевает глаголя: [Тобою тело и кровь Христову приемлем]. в слове в неделю 3 поста [Соборник лист 399]. Никоновых же новопреданий усерднохранитель священник, не согласно Христову предречению, усты святаго пророка Иеремии предреченному мудрствует. не трисоставным бо крестом, на нем же распяся Христос, на проскомидии просфиры печатает: но двочастным, на нем же и исповедует быти Его распята. еже и Питирим Нижеградский епископ, солгав на святаго Константина митрополита Киевскаго, утверждает глаголя: [Мы вам повелеваем служити по преданию святых апостол, и святых отец, над квасным хлебом, и печатайте на просфорах двочастныи крест, а не распятие]. Пращица, ответ 128. И аще убо сопротивно предречению Христову пророком предреченному умствует, то есть, не трисоставным крестом, но двочастным просфиры печатает. убо есть еретичествуяй.

5: Паки: пресвятое имя Владыки Христа, Iсус, еже нарече ангел Господень, ко Иосифу рекий, якоже свидетельствует Матфей евангелист: [Иосифе сыну Давыдов, не убойся прияти Мариам жены твоея, рождьшеебося в ней, от Духа Свята есть. родит же сына, и наречеши имя Ему Iсус. Той бо спасет люди своя от грех их]. Матфей, зач. 2. Священнии и божественнии апостоли, егда изыдоша во вселенныя концы, благовестити языком про нареченнаго Спаса Христа, яко прииде в мир искупити род человечь от диавола мучительства. предаша верным в молитвах, и всяком призывании произносити с единою иотою пишемо и глаголемо, Iсус, еже знаменует, Спас. якоже самая словеса благовещанная ими засвидетельствуют. Сице верховный апостолом Петр вопиет глаголя: [Симон Петр, раб и посланник Iсус Христов, в равночестную нам получившим веру. правдою Бога нашего и Спаса Iсуса Христа, благодать вам и мир да умножится, в познание Божие и Христа Iсуса Господа нашего]. 1 послан., Петра, зач. 64. Подобне и сын громов, наперстник и возлюбленник Христов, святый Иоанн Богослов взывает глаголя: [Еже видехом и слышахом, поведаем вам, да и вы общение имате с нами, и приобщение наше, со Отцем и с Сыном Его Iсусом Христом]. 1 послан., зач. 68. Сим согласно и блаженный Павел восклицает глаголя: [благодать вам и мир от Бога Отца нашего, и Господа Iсуса Христа]. рим. зач. 79. И паки: [Аще что творите словом, или делом, вся во имя Господа Iсуса Христа творите, благодаряще Бога Отца о Нем]. Никонопоследствующий убо священник, не согласно благовещению благовещенному, священными апостолы, и пишет и произносит. не бо глаголет Iс, якоже апостоли научиша, еже знаменует Спас. о чесом свидетельствует в благовестнице, в беседе Златоустове на Матфея, идеже пишет тако [лист 14]: [Сего ради и сим именем наречеся Iс. Iс бо несть имя еллинско, но еврейско, еже есть еллинским гласом сказуемо Спас, Спас же яко спасая люди своя]. Но порекши е равноухим, пишет с иотою, и итою, и произносит Iисус. откуду показуется инаго некоего Iисуса исповедати, святый убо Иоанн Богослов на таковых вопиет, глаголя: [Кто есть лживыи? точию отметаяися, яко Iс несть Христос, сей антихрист]. 1 послан., зач. 71.

Темже убо аще не согласно благовествовании благовествованному святыми апостолы, пресвятое имя Владыки Христа Iс, не Ic, но инаго некоего исповедуя Iисуса, пишет и произносит со иотою и итою Iисус. убо есть еретичествуяй.

6: Паки: Священнии и божественнии апостоли, егда по вознесении Господни на небеса, изыдоша во вселенную на проповедь, благовествующе пришедша Христа Сына Божия в мир искупити род человечь честною си кровию, и свободити от идольскаго паче же диаволскаго служения, научивше предаша верным, в призывании Господа нашего Iсуса Христа Сына Божия, священную поистине благотворивую, якоже глаголет Симеон Фессалонитский, глаголати молитву сию: Господи Iсусе Христ Сыне Божии помилуй мя грешнаго. аще вообще, нас. и поистинне есть апостолы преданная. ибо егда Христос вопроси ученик своя [Мф. зач. 67]: вы же кого Мя глаголете быти, отвещав Симон Петр рече: Ты еси Христос Сын Бога живаго. на что отвеща ему Христос: блажен еси Симоне вар Иона, яко плоть и кровь не яви тебе, но Отец Мой, иже на небесех, си есть [от Божией благодати приемша разум] [Феофилакт, в толков.]. за сие исповедание Господь, яко исповеда Сына Божия, воздаде Петрови мзду велию глаголя: [Аз же тебе глаголю, яко ты еси Петр, и на сем камени созижду церковь Мою, и врата адова не одолеют ей]. Тем же и глаголет Симеон Фессалонитский: [Зане и молитва сия Святым Духом глаголется, яко и Павел глаголет: никтоже может рещи Господа Iсуса, токмо во Святем Дусе, и от Бога есть глаголяи сию. всякии бо дух иже исповедует Господа Iсуса Христа, в плоть пришедша, от Бога есть]. глава 294. И понеже сия молитва есть основание веры. сего ради святый Феофилакт, всякому хотящему здати дом веры, повелевает сие исповедание, основание полагати, сице глаголя: [Всякому человеку подобает хотящему здати дом веры, сие исповедание полагати основание, аще бо и добродетели зиждем, не имамы же основания право исповедание, разслабленно зиждем]. Благовестник, лист 128. Почто? Глаголет Симеон Фессалонитский: [зане спасительное Божие в себе носит имя: еже убо едино имя есть названо на нас Iсуса Христа Сына Божия. и несть ни в чесом ином спастися нам, якоже рече апостол]. глава 296. И паки: [в сем божественом имени, дивная сотвориша апостоли, и научиша. и божественныи глаголет евангелист: Сия пишаи да веруете, яко Iсус есть Христос Сын Божии. Се вера, да верующе живот имете во имени Его. се спасение и живот]. глава 296. Что же сия есть предание священных апостол, той же блаженный Симеон утверждает глаголя: [Подобает в коемждо еже о сем, и всем изображение имети, сию молитву действовати по силе священным мнихом же и миряном. (ниже) священнии же яко апостольскому сему делу да тщатся: и якоже божественнаго проповедания: якоже божественная действия действующу: якоже любовь Христову поставляющу. иже в мире, якоже печать сию свою и знамение веры, и освящение, и сохранение, искушения всякаго изгонителницу, по силе да действуют]. глава 297. Никоновых же новопредаданий усерднохранителный священник, не туюжде молитву, юже апостоли предаша, яже есть: Господи Iсусе Христе Сыне Божии помилуй мя, или нас: в ней же исповедание и основание християнския веры зависит: но новопреданную, си есть: Господи Iсусе Христе Боже наш помилуй нас. юже святии апостоли не предаша, в ней же нечто ино сопротивно апостольскому разуму мудрствуя в молении своем глаголет: убо есть еретичествуяй.

7: Паки: Христос Спаситель святыми и духопросвещенными отцы, на седми вселенских, и девяти поместных соборех, собравшимися, их же святым своим Параклитом научи, изложив правила, падающих в различная грехопадения, и приходящих в покаяние, по качеству и количеству грехов, заповеда отлучити на лета, от причащения божественнаго своего тела и крове. якоже самая их священная правила явствуют. перваго вселенскаго собора правило 11, глаголет [Кормчая, глава 3]: без нужды веры отвергся, 12 лет да не причастится. Тогожде, 12: Понужденым приступльшим, 10 лет не причаститися. Правило 13: аще болен к смерти, да причастится. аще ли оздравеет, да исполнит уреченная лета непричастен. собора поместнаго иже во Анкире [глава 6]. Правило 20: Любодей седмь лет не причастится. И шестаго вселенскаго собора, правило 87: Такожде повелевает. Правило Анкирскаго собора 21, и Василия Великаго 2: смертным былием жена уморившая во утробе своей, 10 лет не причастится. Правило 23: Волею убив, до смерти не причастится. Правило 24: Волхвы приводяи в дом свой, 5 лет не причастится. Шестаго собора, 61 правило, и Василия Великаго 83, 6 лет не причастится [глава 10]. Собора поместнаго иже в Лаодикии, правило 1 [глава 7]: Двоеженец едино лето не причастится. Шестаго вселенскаго собора, правило 44: Мних женився, или блуд дея, 7 лет не причастится. Суть и ина множайшая священная правила, яже по качеству и количеству грехов, на различная лета повелевают согрешающих от причащения отлучати, сия убо святии отцы того ради уставиша, да накажются прочее согрешающии не ктому согрешати, и от глубины греховныя, и гнева Божия душы их извлечены да будут. научает нас сему святый Иоанн Златоустый сице глаголя: [Таковыи возлюбленнии другом нашим дарует дары, яко да душы их извлечем от глубины греховныя, и от гнева Божия. свяжи убо его зде, дондеже милостива Бога сотворит. не остави и разрешена, да не множае свяжется гневом Божиим. аще бо ты свяжеши, Бог ктому не свяжет. аще ли ты не свяжеши, вечная и нерешимыя того ждут узы]. в послании к ефесеом. Никонопоследствующий убо священник, сопротивно священным святых седми вселенских, и девяти поместных соборов, правилом отлучающым согрешающих по мере качества и количества грехопадений от причащения, в различныя грехи впадающих, и приходящых каятися, никаковою епитимиею не связует. но предложив Божие милосердие, абие разрешает от грехов, и сподобляет причащения, подобне еретиком евхитом. о них же повествует преподобный Никон Черныя горы сице: с праваго пути совращейся, не сим шествоваша путем, но аще кождо от своего сердца умысли, тако и содела и научи. и отвну бо в десных украдени бывше, безсловесно и безвременно человеколюбие введоша. и исподоша в мессалианскую рекше евхитскую, и глаголемых енфусиасте, хоревте, и лампетиане, и аделфиане, и евстафиане, и маркионисте, и евтихиане, и сим подобных ересь. иже от сатанинския тех гордости, не покоряющеся божественным правилом и законом, славы ради своея, кроме преданных нам заповедей в божественных писаниих прощают грехи]. слово 52. И понеже убо сопротивно священным святых седми вселенских, и девяти поместных соборов, правилом, повелевающим согрешающих, епитимиею связав, причащения лишати до уреченнаго времене, согласно же еретиком мессалианом, и прочим согрешившых и кающыхся, предложив милосердие Божие, разрешает от грехов, никаковою епитимиею не связав, абие причащает. убо есть еретичествуяй.

8: Паки: Христос Спаситель, святою древлевосточною апостольскою церковию святым своим Параклитом наученною, божественную литургию, совершати на седми просфирах узаконоположи. якоже о сем засвидетельствует святый Симеон Фессалонитский, в главах 92, 93, и 94. и святии отцы афонстии, в Номоканоне в правиле 210, о седмопросфирной службе глаголют сице: [На святой проскомидии божественныя литургии седмь просфир да имаши: первую за Господьский хлеб. вторую: пресвятыя Богородицы. третию: за святых. четвертую: за патриарха. пятую: за царя, и за царицу, и за чад их. (ниже) шестую: за всех православных, за живых человек. а седмую: за усопших]. ей же последующи и святая древлеправославная великороссийская церковь, неизменно даже до лет Никона патриарха в божественной литургии, на святой проскомидии седмь просфир содержащи имела. доволно о сем и сам Питирим засвидетельствуя глаголя: [В прешедших летех, до правления старопечатных книг, аще и служили на седми просфирах, ибо тако тогда повеление было великороссйиския церкве, не по противлению восточней церкви]. Пращица, ответ 212. Сие седмопросфирное служение уставлено бе во образ оныя трапезы, на ней же Христос Господь изволи седмию хлебами, четыре тысящи народа насытити. еже утверждает и книга Жезл, изданный от собора, нарицая седмопросфорное служение церковный обычай, сице глаголя [возобличение 19]: [не невемы некиих церквей обычай, яко над седмию служат просфирами, во образ оныя трапезы, егда Христос Господь седмию хлебов изволи четыре тысящи народа насытити]. часть 2. Нынешния же церкве священник, не согласно святыя восточныя древлеблагочестивыя церкве, законоположению мудрствует, не бо на седми просфирах службу, яже во образ оныя таинственныя Христовы трапезы, на ней же седмию хлебы четыре тысящи народа препита, уставися: но на пяти, во образ сея трапезы Христовы, на ней же пятию хлебами пять тысящь народа насыти, совершает. еже бо на пяти просфирах, во образ сея трапезы Господни, на ней же пятию хлебами пять тысящь народа насыти, служити, ни един от апостол предаде: ниже кто от церковных учителей определи: ниже кто от святых богословец устави: ниже самою святою древлеправославною церковию законоположися. но понеже сопротивомудрствуя никонопоследствующий священник, законоположению древлеправославныя восточныя апостольския церкве, на пяти просфирах совершает литургию, убо есть еретичествуяй.

Суть и ина множайшая, о них же в прешедших главах речеся, нынешния великороссийския церкве новопредания, яко содержа священник, не тоежде, еже Христос Спаситель священным своим евангелием научив предаде: еже пророки предвозвести: еже апостолы благовести: еже седмию вселенскими, и девятию поместными соборы устави: еже святою древлевосточною православною и апостольскою церковию законоположи: мудрствуя разумеет: но ина сопротивная. чесо ради обретается и есть еретичествуяй. но долготы слова уклоняяся оставляю я.

Темже убо аще никонопоследствующий священник, не двема персты, якоже Христос благословив ученики своя, предаде верныя благословляти, но пятию персты, благословляя, есть еретичествуяй. аще не тако, якоже Христос благословив ученики своя, предаде верныя благословляти, но пятию персты, благословляя, есть еретичествуяй. аще не тако, якоже Христос священным евангелием учеником своим, чрез них же и всем верным, предаде двема персты крестное на себе изображати знамение, но треми первыми персты знаменуяся, есть еретичествуяй. аще сопротивно святаго пророка Исаии предречению, паче же чрез него самем Богом предреченному, и святых богословец разумению, на двочастнем, а не на трисоставнем кресте Христа распята мудрствуя, есть еретичествуяй. аще не согласно предпроречению святым пророком Иеремиею предпрореченному, и святых отец, и церковных разуму учителей, не трисоставным, но двочастным крестом просфиры печатая, есть еретичествуяй. аще не якоже апостоли предаша, пресвятое имя Христа Спаса, в молитвах и всюду всем верным глаголати, Iсус, глаголяй, но пременив с иотою и итою Iисус, есть еретичествуяй, аще не тую боготворимую молитву, юже предаша святии верующим выну глаголати: Господи Iсусе Христе Сыне Божии помилуй мя, или нас: Но новосотворенную, в ней же Сына Божия извергоша, Господи Iисусе Христе Боже наш помилуй нас, глаголяй, есть еретичествуяй. аще сопротивно святых и богодухновенных на седми вселенских, и девяти поместных соборех собравшихся отец, священным правилом, впадающих в различная согрешения, и кающихся, не наказав епитимиею, причащаяй, есть еретичествуяй, аще не согласно святыя древлевосточныя церкве законоположению, повелевающему на седми просфирах литургию служити, на пяти служай, есть еретичествуяй. како убо от толико и тако еретичествующаго священника, совершаемое крещение совершено может быти, и грехов очистително? всяко не может. понеже, глаголет преподобный Максим Грек: [всяка ересь началника и учителя имать диавола]. глава 66. И аще убо всяка ересь, сиречь всяк еретик началника и учителя имать диавола. како, на, от еретичествующаго и имущаго началника и учителя диавола, крещаемаго прииде Дух Святый, во еже очистити его от грехов, и совершенно сотворити крещение? никакоже никако не приходит. зане несть согласия Христу с велиаром. и слыши Павла апостола вопиюща тако: [кое согласие Христу и велиару]. зачало 182. Аще же несть согласия, благоявленно яко не приходит. зане, идеже бо водворяется диавол; ту не приходит Дух Святый, всяк же еретик имать в себе дух диаволь. якоже о сем яве сказует, преподобный Зиновий инок Отни пустыни, сице глаголя [Свиток многосложный]: [имать бо всяк еретик дух диаволь, темже и противится Святому Духу]. глава 11. И аще всяк еретик имея в себе дух диаволь, противится Святому Духу. Что убо никонопоследствующий священник еретичествуяй, не имать ли в себе тогожде духа? благоявленно яко имать. аще же имать, убо и противится Святому Духу. и аще противится Святому Духу, убо не приходит Дух Святый над от него крещаемаго. аще же не приходит, тем ниже крещеный от него крещен есть. зане не присудствующу Духу Святому, не очищается от грехов. аще же не очищается: убо действуемое от него крещение совершено быти не может и в лепоту глаголет бо Иоанн митрополит Никейский о сем тако: [како от диавола духовное и святое дело совершается? от анафемы благословение не бывает и от проклятаго молитва не исходит, и от диавола Христово не совершается таинство]. слово на армены. И аще убо от него творимое крещение, не может совершенно и очистително грехов быти: како козможно е прияти? отнюд невозможно. аще же невозможно, паче же не подобает: то како от новодействуемое крещение, от таковаго священника, иже и анафеме новшеств ради содержимых им предается, и отлучению подлежит, и еретичествуяй обретается, имущих приходящих ко святей древлеправославней вере, не подобает паки совершенно святым крещением крестити? зело подобает. зане лучше есть по реченному Петром Могилою, да простым людином (христианом) совершится божественное крещение, нежели священником проклятым, или отлученным, или еретичествующим.

Глава, 15.

Якоже корень священства, сиречь архиерей не в три погружения крещен, несть крещен, тако и рукоположенный от него священник тогожде требует.

Но уже не недоволно как мнитмися, от всякаго вероятельства достойнейших, яже в вышших главах предложихом, свидетельств познахом, яко никонопоследствующий священник, елико от древлеправославныя восточныя, толико и великороссийския церкве, новшеств ради содержимых им, есть проклят, есть отлучен, и есть еретичествуяй.

Ныне ведателно есть еще, от какова архиерея имать свое рукоположение. вемы бо яко каков есть корень, таково и древо, тацы суть и ветви. понеже от корене напояемо проникнувше возрастает. корень убо есть архиерейство, древо же священство, яко от корене архиерейства, священство происходит, ветви же суть древа христианство, еже от священства проникает, обаче на корени архиерейства содержимо есть. но взыщем, какови суть нынешния великороссийския церкве архиереи? вемы бо по премногу вемы, и всякому не неизвестно есть, яко нынешния великороссийския церкве архиерей малороссиане суть, иже в киевстей митрополии родишася и воспиташася. кии не трипогружателне, но поливательне крещени суть. понеже в киевстей и смоленстей митрополиях, обычай есть новорожденных младенцев поливанием крестити. еже самыя книги их киевопечатныя, повелевающе утверждают. Сице в книзе Потребнице велицем сочинения Петра Могилы, изданнем року 1646: [Имать же воды быти толико, елико мощно быти в ней погружению трикратному, или поне омовению, любо возлиянию трикратному, аще и малому на крещающагося по обычаю коея страны]. Подобне и в книжице о седми сакраментах, изданней в Чернигове, в лето 1716.

Но вонми ми корень убо священнодейства, той есть архиерей, от него же священник рукоположение имать, есть не в три погружения крещением крещен, но поливанием, священная правила повелевают всячески, яко еллинов не имущих крещения, совершенно паки в три погружения святым крещением крестити. Сице правило 50, святых апостол вопиет глаголяще: [Аще которыи епископ, или презвитер, не крещает в три погружения, единем глашением, но во едино погружение в смерть Господню даемо, да извержется таковыи. Не рече бо Господь в смерть Мою крестите: Но шедше научите вся языки, крестяще их во имя Отца и Сына и Святаго Духа]. Подобне и втораго всленскаго собора священнии отцы, седмым правилом взывают сице [Кормчая, лист 88]: [Иже единем погружением крещаются, евномиане, и савелиане, и фриги, яко еллини прияти будут. Толкование: И тии еретицы суть, единем погружением крещаются, а не треми, якоже православнии, сии аще приступят к соборней церкви, якоже погани прияти будут]. и прочии святии и богодухновеннии отцы и богословцы. О чесом во втором пределе пространно доводствовахом. И понеже убо божественнии апостоли, и священнии отцы, и богодухновеннии богословцы, священными правилы, и писательными гласы, повелевают не в три погружения крещеных, яко еллинов, сиречь не имущих святаго крещения, совершенно треми погружении крестити. остается, яко поливаемых крещением крещенный, есть не крещен. архиерей же нынешния великороосийския церкве, поливаемым крещением крещенный, еда есть крещен? всяко несть. аще бо сему соизволим крещену быти. будут еже да не будут, святых апостол, и священных отец правила, и богодухновенных богословец повеления, повелевающая не в трипогружателне крещеных, яко не крещеных, паки трипогружателне крестити суетна и ложна. аще ли суть достоверна и истинна, якоже и суть, убо несть крещен. аще же несть крещен. что убо, не крещеный еда может кого посвятити, егда сам не имать корене святыя веры, святаго крещения? никакоже никако не может. ибо аще не крещен, яве яко и не священ. аще же не священ сый, не священный убо, еда может инаго посвятити? и кто бы от благоразсудителных дерзнул рещи мощи? его же бо сам не имать, како иному может преподати? отнюд не может. Ибо глаголет Матфей Иеросалимский: [Иже бо от составов удов телесных отторгошася, не ктому пребывающую в них имут благодать Святаго Духа. еже убо не имут сами, како иным преподадут]. глава 2, перваго состава. Видиши ли, яко не имый благодати Святаго Духа, не может иному преподати. и аще корень священства, сиречь архиерей, не имать святаго крещения, яко не трипогружателне крещен сый, тем ниже посвящен. благоявлено яко и древо происходящее от корене архиерея, си есть священник, не имать крещения, ниже посвящения, понеже бо каков есть корень, таково и древо. зане древо корене не разлучается, неразлучным бо совокуплением споено есть. кроме бо архиерея ни диакон ни священник быти может. Явственно о сем блаженнейшему Симеону Фессалонитскому поведающу сице [глава 72]: [Един действует епископ, свидетель же свещателен есть, яко подражатель Бога Отца светов, и Его же обилует благодатию, си есть даровании даром, и всяк чин, и вся тайны, и все совершенство чрез него]. И паки: [Якоже бо от источника света вся церковная чрез него совершаются]. И паки: [Ничтоже действовати священник может в Дусе, или иное что действовати, аще хиротонию не имеет, сия от архиерея есть, ибо архиерейство чрез ню действует]. Се коль научает блаженный Симеон, яко вся церковная чрез епископа бывают. Подражает, рече, Бога Отца светов, и Его обилует благодатию, и всяк чин, и вся тайны, и все совершенство чрез него. Но сия глаголет о истинно православно христианстем епископе. Сей же святаго крещения не имый, како может обиловати благодатию Божиею? сиречь, како может имети благодать Святаго Духа в себе? отнюд не может, паче же не имать. аще же не имать, без благодати убо Святаго Духа, кий чин? кая тайна? кое совершенство чрез него может совершитися? яве яко ничтоже. и понеже ничтоже, сего ради божественнии апостоли, от еретик хиротонию первее приемших, паки повелевают хиротонисати. Сице им в своем правиле взывающим [Кормчая, лист 19]: [Аще которыи епископ, или презвитер, или диакон, второе поставление приимет от кого перьваго возненавидев, да извержется сам и поставивыи его, аще токмо не прилучится, яко от еретик поставлен бе первее. ибо от тех крещеннии не крещени, и поставленнии не причетницы]. правило 68. И аще по священных апостол гласовом, от еретик крещеннии не крещени, и поставленнии не причетницы; рцы ми како никонопоследствующий священник имея хиротонию от ересию поврежденнаго, рекше от обливаемых крещением крещенаго архиерея, каковых священная правила всячески повелевают совершенно трипогружателне, яко отнюд некрещенных крестити, может быти правилный и законный священник? не может поистине не может. и слыши, тако бо о иных преподобный Никон Черныя горы вопиет глаголя [Слово 63]: [от таковых поставленым, или крещеным, ниже верным, ни причетником мощно есть быти]. Почто? на сие ответствует Матфей Иеросалимский глаголя [глава 24]: [аще от еретик хиротонию приял бе, отметаем бо таковых, якоже крещение, сице и хиротонию, не бо освящение се, но скверну веруем исходатайствовати].

Глава, 16.

Яко архиерей вся действует священником, и якоже еретическое крещение не приятно есть, такожде и хиротония.

Зде ми дадите мало побеседовати к нашим, аще лепо есть нарещи нашими. от нас бо [с сыном громовым реку] изыдоша, но не беша от нас. аще бо быша от нас были, пребыли убо с нами, ныне же не суть. их же толико помрачися разумное око, тмою неведения божественных писаний, яко приемлюще от обливаемым крещением крещеных архиереов, хиротонию приемших священников, вся тайны церковныя от них творимыя приемлют. Темже и вопрошая глаголю: Рцыте убо о любезнии! Како священика, иже от никонопоследствующаго архиерея, иже обливателным крещением крещен есть, хиротонию прия приемлете? покрещеваете? или миром помазуете? или с проклятием токмо ересей? и аще убо покрещевающе приемлете, то кто вам по крещении паки рукополагает? епископ ли кий? но епископа не имате. без епископа же священник отнюд не может быти. якоже о сем свидетельствует блаженный Симеон Фессалонитский сице глаголя: [един действует епископ, свидетель же свещателен есть, яко подражает Бога Отца светов, и Его же обилует благодатию, си есть даровании даром, и всяк чин, и вся тайны, и все совершенство чрез него]. глава 75. Видиши ли коль явственно глаголет святый Симеон, яко един епископ действует, и всяк чин чрез него. Сие и божественнии апостоли во своем правиле утверждающе глаголют [Кормчая, правило 2]: [един епископ поставляет презвитеры, и диаконы, и прочия причетники]. Понеже един епископ имать воздавателную благодать. Якоже той же святый Симеон Фессалонитский изъявляет глаголя [глава 76, первыя книги]: [Тем же и действии седмь носят епископи, по числу божественных действий Духа. сия же суть: Крещение: Миропомазание: Чтеца печать: Рукоположение, подиакона: Хиротония диакона, презвитера, и епископа. В сих убо совершен сущь, воздавателную един имеет благоадть. Тем же и единыи рукоположения и мир действует]. от сих словес божественных апостол, и святаго Симеона, явственно видимо есть, яко едини епископи рукополагают презвитера, диакона, и прочия причетники. Вам же не сущу епископу, кто паки рукополагает священника? Аще же покрещевающе его, хиротонию же от никонопоследствующаго архиерея иже обливателне крещен, священника приемшаго приемлете. како убо, рцыте, крещение отмещете, еже прия от священника, иже имать рукоположение от архиерея, обливателным крещением крещенаго, хиротонию же от тогожде архиерея приемшаго приемлете? аще бо крещение от еретик не приятно, безпрекословно и хиротония, понеже от единаго источника, сиречь архиерея, крещение и хиротония происходита. Свидетель сему достовернейший блаженный Симеон Солунский, иже тако глаголет: [яко бо от источника света, вся церковная чрез него совершаются]. глава 76. Темже аще крещение не приятно, всяко и хиротония. и в лепоту. Ибо священнии апостоли священным своим правилом, иже отмещуще еретическое крещение, купно соотмещут и хиротонию от них происходящую, сице взывают: [дващи поставленныи и с поставльшим его да извержется, аще не будет еретическая рука первая. От толкования: аще токмо не прилучится, яко от еретик поставлен бе первее. ибо от тех крещеннии не крещени, и поставленнии не причетницы]. правило 68. И аще святии апостоли отмещут еретическое крещение и хиротонию, глаголюще, яко от тех крещеннии не крещени, и поставленнии не причетницы. како же вы противящеся священным апостолом, дерзаете приимати священника приемшаго хиротонию от таковаго архиерея, иже сам требует крещения, от него же невозможно крещеному верну быти, и поставленному причетнику? И слыши о сем преподобнаго Никона Черныя горы сице взывающа: [аще объявлено есть, яко от еретик имать рукоположение, от таковых бо поставленным или крещеным, ниже верным, ни причетником мощно быти]. слово 63. И понеже от еретик поставленным или крещеным, ниже верным ни причетником мощно быти. како, возможно от обливателне крещенаго архиерея, хиротонию приемшаго священника прияти, их же освящение не освящает освящаемых, но паче оскверняет. Не свое бо се аз глаголю. Но слыши Матфея Иеросалимскаго тако вещающа: [Аще от еретик хиротонию приял бе, отметаем бо таковых якоже крещение сице и хиротонию, не бо освящение сия, но скверну веруем исходатайствовати]. глава 24. Елма же убо якоже крещение крещеных от еретик, сице и хиротония хиротонисанных не освящает, но оскверняет. сего ради и великий в богословии Григорий, пиша Клидонию презвитеру, повелевает не приимати еретическаго поставления. О чесом в житии его явственно показуется, идеже пишет тако [генваря 25]: [посылаше вписав Клидонию презвитеру, (ниже) яко не приимати пагубы еретическия и поставления, и отметати Аполинария, яко странны соборныя церкве]. минея четия. К сим же божественнии отцы поведают, яко от проклятых никто иному не преподает благословение, егоже сам лишися. сице о сем свяидетельствует святый Иоанн Златоустый глаголя: [никтоже от проклятых иному преподает благословение, егоже сам лишися]. беседы апостольския. Архиереи же иже обливаемым крещением крещени, сами о себе послушествуют глаголюще [книжица истинное оправдание]: [Вемы что на многих соборех, анафема сказано тем, котории не в три погружения крестилися]. глава 13. И аще по сказанию самех архиерей, иже обливаемым крещением крещени, от многих святых собор анафеме предани суть. благоявлено яко и сами они той анафеме, от тех же святых собор, яко обливателне крещени, предани суть. Сего ради и благословения, его же клятвы ради сами лишилися, иным преподати они не могут. но ниже хиротонисати кого могут. яко на проклятию преданных Дух Святый не приходит. Явственно о сем преподобный Максим Исповедник свидетельствует сице [житие Максима Исповедника, генваря 21 день, из минеи]: [Убо иже (единоволницы) сами от себе прокляти суть, и от поместнаго собора бывшаго в Риме извержени, и от священства отчюждени, тии кая совершают таинства? и которыи дух приходит на тех, иже от таковых хиротонисаются]. Сего ради и блаженный Иоанн митрополит Никейский, яко от анафематисанных ни едино действо духовное совершается, глаголет тако: [от анафем бо благословение не бывает, и от проклятия молитва не исходит, и [от] диавола Христово таинство не совершается, и от гноища благоухание не исходит, ни от гнилаго трупия ин исцелится, ниже от вервивых удов здравие иному телеси подается, ни паки от ереси, или от неверия духовно действо исполняется]. в слове на армены. Темже убо аще святии апостоли от еретик действуемое крещение и хиротонию отмещут: Аще преподобный Никон отревает еретическое крещение и поставление, яко от них поставленным, или крещеным, ниже верным, ни причетником мощно быти: Аще Матфей Иеросалимский отвергает якоже еретическое крещение, сице и хирототонию, яко не освящение сия, но скверну исходатайствуют: Аще святый Григорий Богослов не повелевает от еретик рукоположения приимати: Аще на проклятию преданных Дух Святый не приходит, во еже освятити от них хиротонисуемаго: убо и от обливателне крещеных, яко некрещеных, яко не треми погружении крещеных, чесо ради и проклятию предани архиереов, яко во многих ересех состоящих, хиротонисанных священников, на них же хиротонисание совершеннотворитель хиротонисателства Дух Святый не приходит, хиротонии отнюд невозможно прияти.

Глава, 17.

Аще и в три погружения крещенаго архиерея хиротонию имать священник, но в ересех состоящаго не прията есть.

Что убо речете негли, яко мы священника, не от обливанием крещенаго архиерея, хиротонию имамы, но от треми погружении. добре: Аз же вопрошаю, рцыте ми: Треми погружении крещенный архиерей не единогласно ли со обливателне крещеным, вся таиньства церковная содержит, не такожде ли благословляет? не темже ли знамением крестным знаменается? не за равно ли исповедует трипогружателства крещение, якоже и обливанием творимое? еже утверждает книжица оправдающая обливание, синодом сочиненная. Не подобне ли от святыя древлеправославныя соборныя апостольския церкве отступиша? И аще убо вся таинства церковная такожде, якоже и обливателне крещеный содержит. вся новопредания без ущербления хранит. Вся новоуставления крепце соблюдает. и обливанием действуемое крещение, с трипогружателства за равносилно исповедует и верует. како от таковаго хиротонию приемшаго священника, и прибегшаго ко святей древлеблагочестивей соборней церкви, не подобает паки хиротонисати? зело подобает. Понеже убо отторгшеся от церкве, лишишася благодати Святаго Духа, не могут преподати ю иным. Явственно о сем преподобному Никону Черныя горы свидетельствующу сице: [А иже от церкве отступльшии, не ктому имеша благодать Святаго Духа в себе, оскуде бо подаяние, внегда пресещися последованию, (ниже) ктому не могуще благодать Святаго Духа инем подати, от нея же тии отпадоша]. слово 63. Согласно сему и священноинок Матфей, паче же вся им древлеправославная церковь взывает глаголя: [понеже бо глава телесе церковнаго Христос, по божественному апостолу, от Него же уди вси живятся, и духовныи возраст приемлют. Сии же от состава удов телесных, отторгошася, не ктому пребывающую в них имут благодать Святаго Духа. еже убо не имут сами, како иным преподадут?]. состав 1. Отсюду светлее полуденнаго солнца показуется, яко от отступльшаго от древлеправославныя церкве архиерея, хиротонию приемшаго священника, и пришедшаго ко истинней христианстей церкви, безпрекословно подобает возхиротонисати. Не токмо же божественнии отцы от еретик отступивших от соборныя церкве епископ; но и от незаконно и неправильне рукоположенных епископ, приемших хиротонию священников, и прибегших ко святей апостольстей церкви, яко не имущих хиротонии, всячески повелевают паки хиротонисати. Сице святии и богодухновеннии отцы, втораго вселенскаго собора, от Максима глаголемаго Киника, рукоположения приемших священников, яко не священных сущих всячески отмещут, вопиюще [Кормчая, лист 87]: [Максим глаголемыи Киник, не бе еретик. Ибо его святым крещением просвети святыи Григорий Богослов. но позавидев святому Григорию, восхоте епископства Константинопольскаго, ная златом епископов, во еже бы его рукоположили в епископы на престол царскаго града. Имже собравшимся и пришедшим в соборную церковь, да его освятят, уведевше константинопольстии, абие стекошася отвсюду, и изгнаша их вонь. Сии же потом вшедше в дом некоего свирца, рукоположиша его]. якоже и Матфей Властарь, в толковании четвертаго правила, втораго вселенскаго собора, споведует о нем глаголя: [Но и четвертое правило втораго собора, Максима некоего отметает, ниже епископу быти, или будущу отрицает, за еже извне правилнаго устава поставлену быти, ниже иже от него поставляемым клириком. Сего ради и Григорий Богослов, от иже в церквах не чтомых его поминает словесех. Сей же Максим египятнин бе фмлософ, ниже: В желании же архиерейскаго престола царствующаго града быв, имения во Александрию посылает, и оттуду епископы приводит сего хиротонисати, имеяи некоего споспешника от своих Богослову, и уже внутрь церкве бывше, уведани бяху, но ни сице безмолствоваху, во храмину же влезше свирца некоего, тамо хиротонисуют Максима, аще и ничесоже еже о сем злобы ползовася]. состава 1. И аще убо от незаконно хиротонисаннаго епископа, хиротонию приемшаго священника, святии отцы, аки не имущаго отмещут: како возможно от епископа отступльшаго от святыя соборныя церкве, и в толь премногия ереси впадшаго и обливанием творимое крещение с трипогружателным за равносилно исповедающаго, священника приемшаго хиротонию не воспохиротонисав прияти? Не вем кто бы от благоразсудителных прирекл тако прияти. аще подобает его паки прияти с первейшею хиротониею. Будет, еже да не будет, святых отец повелевающая, священника хиротонию имущаго, от епископа еретичествующаго, воспохиротонисовати ложна. Аще ли же она суть истинна якоже и суть: убо подобает неотрочне воспохиротонисати. Понеже отступив от церкве, купно лишися и благодати Святаго Духа, ея же сам не имать, всячески и инем преподати не может, тем ниже рукополагаемый от него есть рукоположен, яко кроме благодати Святаго Духа не может совершитися хиротония. И аще от него хиротонисуемый несть хиротонисан: убо якоже от обливателне крещенаго, сице и от сего, аще и трипогружателне, яко равне отторгшагося от церкве, и в тех же ересех состоящаго архиерея, хиротонию имущаго священника, и прибегшагося к соборней апостольстей церкви, подобает паки воспохиротонисати.

Глава, 18.

Святии отцы повелевают от еретик приходящих якоже покрещевати, тако и похиротонисати.

К сим же вопрошаю вы аз, рцыте ми; Аще убо священника, иже имать хиротонию от обливателне крещенаго архиерея, крещенаго от священника от таковагожде архиерея хиротонисаннаго, иже по священным правилом, якоже выше предъявихом, ниже крещен есть ниже рукоположен, яко истинно крещенаго, и истинно хиротонисаннаго, не покрещевающе приемлете? По коему убо правилу сице приемлете? Апостоли ли сице повелеша? или от святых седми вселенских, и девяти поместных собор кто опредали? или кто от святых богословец устави? или кто от святых церковных учителей тако научи? явите нам? Мы бо вемы и известно вемы, яко священная священных отец правила, якоже от еретик крещеных, яко некрещеных сице и хиротонисанных, яко не хиротонисанных приходящых ко святей соборней апостольстей церкви, всячески повелевают тако мирских, яко и мнимых их духовных, паки совершенно святым крещением покрещевати, равнообразне и воспохиротонисати. Сице правило перваго вселенскаго собора взывает глаголя [Кормчая, лист 40]: [Павликиане покрещеваются, и глаголемии от них причетницы, аще безпорочни обрящутся, по крещении да поставлени будут. аще же порочни будут, да извергутся. Толкование: От павликианския ереси приходящии к соборней апостольстей церкви, да покрещеваются второе: первое бо крещение, не крещение, понеже еретическо бе. Крестившежеся, и аще нецыи от них епископи, или презвитери, и диакони беша в павликианех, аще житие имут непорочно, от соборныя церкве епископа, в ней же крестишася, да поставлени будут, кождо в свой чин. аще же недостойни обрящутся, да и от того, в нем же быша, отвергутся]. правило 19. Сим споследуя и севаст Константин Арменополь, толкуя 19 правило перваго вселенскаго собора, вопиет глаголя: [Павликиане да воскрещеваются, и аще непорочни, и паки хиротонисуются, аще и предхиротонисашася]. книга 1. Видиши ли коль явственно святии и богоноснии отцы, повелевают от ересей приходящых ко святей соборней апостольстей церкви, яко простолюдинов, сице и священных, елико покрещевати, толико и воспохиротонисати, аще и предхиротонисашася. Вы же како крещение и хиротонию, обливателне крещенаго архиерея, приемшаго иерея приемлете, веру же и догматы тем же архиереом содержимую отмещете? Корень убо веры крещение приемлете? древо же, си есть веру с ветвьми, рекше новопрониклыми догматы отреваете. И кто сицевому вашему неразсуждению не подивится. кто ли не почюдится? Аще бо крещение, еже есть по святому Дамаскину корень веры [в житии Иоасафа царевича], приемлете, всяко должни и древо, си есть веру с новопрониклыми ветвьми, сиречь нововымышленными догматы прияти. Зане корень с древом, си есть крещение с верою, неразлучным споением есть совокуплено. Аще же веры их и догмат не приемлете, убо ниже крещения от них содеваемаго, ниже хиротонии их прияти должни есте. Понеже [от таковых поставленым, или крещеным, ниже верным, ни причетником мощно быти] по словеси Никона Черногорца [слово 63].

Суть же нецыи суть от зде присудствующих, иже имут вопреки рещи, яко сие правило святых отец, приходящих от павликианския ереси, повелевает покрещевати, и хиротонисанных паки хиротонисати: понеже Павел Самосатский, Христа Бога нашего не суща Бога проповедаша, но проста человека. Зде в никонопоследствующем иереи таковыя ереси не обретается. того ради не подобает покрещевати, ниже паки хиротонисати. Но что ми предлагаеши, яко в никонопоследствующем иереи, подобная павликианом ереси не обретается? тамо убо единыя ради ереси, определиша святии отцы покрещевати, и паки хиротонисати. Зде же коль премногия и коль великия ереси, в никонопоследствующем иереи, и таковым еретиком сослагающияся их же ради святии отцы повелевают покрещевати, обретаются. О них же выше во главе второй предпоказахом. Сего ради неотрочне подобает покрещевати, и паки хиротонисати. К сим же архиерей, о него же иерей имать хиротонию, не треми погружении, якоже православнии, но обливанием крещен есть. Божественная же правила, не треми погружении крещеных, яко архиереов, сице от них рукоположенных иереов, и прочих причетников, повелевают покрещевати. Сице святии отцы поместнаго собора, иже в Лаодикии, взывающе глаголют: [Фриги от ереси покаявшеся, паки да крестиши, аще нецыи от них и причетницы суть. Толкование: И сии еретицы суть, нарицаемыя фриги, и аще убо покаются, и от ереси их обратятся, и непорочней приступивше вере, вся ереси, и с теми и свою прокленше, да будут прияти, и со всяким прилежанием научени бывше, да крестятся, аще нецыи от них причетницы их суть, рекше попове, или диакони, вси да крестятся]. правило 8. Сии фриги, по сказанию осмаго правила, отец втораго вселенскаго собора, не треми погружении крещаются. И аще убо не треми погружении крещеных, яко простолюдинов, сице и причетников святии отцы повелевают покрещевати: како от таковаго архиерея, иже непогружателне но обливателне крещен, его же божественная правила повелевают неотложно паки крестити, имуща священника хиротонию, иже от тогожде архиерея рукоположеннаго священника крещен, аще и в три погружения, но понеже еретическа рука бе, не подобает паки крестити, и паки хиротонисати? всячески подобает. По премногу сие и Матфей Властарь утверждая вопиет: [Аще от еретик хиротонию приял бе, отметаем бо таковых якоже крещение, сице хиротонию, не бо освящение сия, но скверну веруем исходатайствовати]. глава 24 [состава X].

Что убо, возглаголеши ли? яко Матфей Властарь, латинских преданий повелевает блюстися и бегати, хиротонии же их не повелевает отметати, котории латини не треми погружении, но обливателне крестятся. Сего ради и от никонопоследствующих архиереов, аще кии и обливаемым крещением крещени суть. преданий содержимых ими блюстися и бегати подобает: хиротонии же от них творимыя не подобает отметати. Но оле слепоты! оле неведения! оле крайняго неразумия! поистинне не ведят, иже утверждают ниже разумеют, яже предлагают во свидетельство. обаче сами от своих словес, аки Галиаф от своего меча обезглавися, абие не неимут зауститися. Блаженный убо Матфей не просто рече, яко сих, сиречь латин, хиротония к нам прилагаемым, иже от них хиротонисанным не отлагается. Сие утверждая глаголет: яко сущими божественными отцы многажды еретическая хиротония не отметна бе. таже прирече: православныя сущым или бывшим, на них же они руки возложиша. но лучшаго ради ведения, самая словеса его на среду предлагаем, яжеся имут сице: [иже убо иноколенных латинских предании облюдатися и бегати якоже гангрены, елика сила, подобает. (ниже) но и сих хиротония к нам прилагаемым иже от них хиротонисанным не отметается. Понеже и сущими от нас божествеными отцы, еретическая хиротония не отметны многащи быша, православным сущим, или бывшим, на них же они руки возложиша]. глава 12, ОТ (800) состава. Видиши ли разум словес Матфеевых? Рече бо первее, латинских преданий блюстися и бегати, яко гангрены, подобает. Таже: Сих хиротония к нам прилагаемым, иже от них хиротонисанным не отлагается. и утверждая рече: Понеже и сущими от нас божественными отцы, еретическая хиротония не отметна многащи бе, и наведе: Православным сущим, или бывшим, на них же они руки возложиша. Сиречь иже православни суть или быша, тии, на них же они, рекше еретицы руки возложиша. Сей же священник, иже от никонопоследствующаго архиерея, иже обливателне, или аше и трипогружателне, крещен есть, хиротонию имать, когла бе православен? Родися в новодогматствованиях. крестися от священника имущаго хиротонию от архиерея зелноревностнаго содержателя новшеств. хиротонисася в новопреданиях, от тогожде архиерея, аще трипогружателне, аще обливателне крещенаго, смелодерзостнаго отметателя древлецерковных догмат. И како не подобает его, по вышепредложенным святых апостол и богоносных отец пределом и повелением, паки крестити, и паки хиротонисати? ей подобает. Но смотри же ми, аще не подобает, како преподобный Максим Грек, повелевает отвращатися хиротнии римскаго папы, отпадшаго лика православных архиереов, сице глаголя [глава 56]: [Римскаго убо папы аки отпадшаго лика православных архиереов, рукоположения отвращатися и отметатися достойно и праведно есть]. Почто? Понеже вера их не имать дарований Святаго Духа, тем ниже хиротонисаемый дара Его сподобляется. Якоже о сем засвидетелствует блаженный Мелетий патриарх Александрийский глаголя: [Ведяще убо ведите вы православнии, елицы еще верою прелести не последуете, и держитеся благочестия, вкратце вам ко утвержению речем, да знаете яко все веры прочия, иже верами зовутся, не суть веры, но прелести, наченше от латинския и до прочих всех. И почто не суть достойни называтися верами? Того ради, яко ни едина от них не вмещает Духа Святаго даровании]. послание 10 [В Кирилове, лист 501].

И понеже святии отцы, от еретик крещеных, мнимых их духовных, обращающихся к соборней церкви, повелевают покрещевати. Понеже преподобный Максим заповедает латинския хиротонии не приимати. Понеже блаженный Матфей от еретик действуемое крещение и хиротонию заповелевает отметати, яко не освящают сия, но оскверняют. Како убо от никонопоследствующаго архиерея, аще трипогружателне, аще обливателне, крещенаго, иерея хиротонию имущаго, приходящаго ко святей соборней церкви, не подобает воспокрещевати и воспохиротонисати? всячески подобает.

Глава, 19.

Единых есть епископов миро освящати.

Паки вопрошаю вы, рцыте ми: Аще убо от никонопоследствующаго архиерея, хиротонию имущаго иерея, не покрещевающе приемлете, с первейшею его хиротониею или не помазующе просто? И аще миром помазуете, откуду миро получаете? и кто вам освящает е? архиерей ли кий? но архиерея у себе не имате. или кто от священник ваших? Но коею властию сия творят, аще творят, священницы ваши? И кто им повеле сице творити? от апостол ли кто? не обрящеши. от отец ли кий, иже на седми вселенских соборех бывших попусти? всяко не покажеши. от учителей ли церковных кто устави таковы уставы? отнюд не укажеши. Ибо блаженный Симеон архиепископ Фессалонитский, от единых точию архиереов сказует освящаему быти миру, сице глаголя: [Ныне же вместо рук, то освященныи именуемыи великии мир, а освящающиися не от священников, но от патриархов и архиереов, священными молитвами и благословеньми. (ниже) Миро же не елей просто, но освященныи молитвами в жертвеннике от архиереов Христовых. (ниже) И ниже мир от мощей святых, яковыи от тела божественнаго и мироточиваго Димитрия, или некоего инаго из святых, якоже прославляется. в кипрском великомученице Маманте, или от святыя иконы, якоже глаголется аттив. (ниже) И сия бо честная благодать имеюща божественую, исцеление подавающи. Понеже мощь онаго божественаго мира, особлива бо сия, и чрез архиерейства, и архиерейския молитвы подается, и не просто действуется, но в жертвеннице, во время священнодействия полагаемое, и во святый великий четверток, в конце священнодействия, (в литургии) молитвами священноглаголемое, и печатию божественою креста совершаемое и освящаемое]. глава 43. Зриши ли яко единым токмо архиереом лепотствует, по священному Симеону, освящати миро, а не священником? Но и божественный премудрейший Дионисий Ареопагит, поведает, яко несть священника миро освятити и совершити, но архиерея единаго. Сице в книзе о церковнем священноначалии глаголет: [Знаменай яко освятити и совершити миро, несть презвитера, но ниже жертвенник совершити, да принесет на нем, ниже хиротонисати. вся бо един священноначалник сотворити имать: ихже кроме священник, ниже крестит, ниже принесет, но в предсвященных от епископа священнодействует]. глава 5. от толкования [в книзе о церковном священноначалии]. От коих словес святаго Дионисия Ареопагита, и Симеона Фессалоникийскаго, явственно показуется, яко несть священника миро освятити и совершити, но точию единаго архиерея. И аще убо единым архиереом лепо есть миро освящати и совершати, убо священник не может, аще и дерзнет освящати, миро освятити. Убо и от ваших священников аще и дерзают противоборствующе божественных отец пределом, освящати миро, несть освященно и совершенно.

Глава, 20.

От ересей обращающихся, епископов, священников, и прочих причетников, аще кии и в три погружения крестишася, по помазании миром, божественнии отцы повелевают паки хиротонисати.

И аще убо приходящаго в по вам согласие, иерея, от никонопоследствующаго архиерея имущаго хиротонию, помазуете миром. то како с первшею хиротониею его приемлете? и кто вас сице научи? от апостол ли кий? или кто от отец седми вселенских собор? или древлеправославная церковь определила? Но нигдеже сицеваго повеления в божественных писаниих обрящете нигдеже. Доволно бо известно научаемся, от божественных отец, и толковников священных правил, писательных гласов, яко еретиков священников, иже не токмо не треми погружении, но и иже аще и треми погружении крещаются, егда приступают ко святей соборей и апостольстей церкви, их же лепотствует по проклятии их ересей, миром точию помазовати, всячески паки хиротонисати подобает, первейшей хиротонии, юже прияша от еретик, скверне непщуемей быти. Сице отцы собора Константина града, в послании к Мартирию епископу Антиохийскому, пишуще како подобает приимати еретики приходящыя к соборней церкви, повелевают глаголюще [Кормчая, лист 293]: [Арианы, македонианы, и наватианы, глаголющыя себе чистыя и чистейшыя, и четыренадесятники рекше средники, и аполинарианы, приемлюще написующе свою ересь, и проклинающе ю, и ину всяку ересь не мудрствующую, якоже и соборна церковь, помазуем их первее святым миром, чело, ноздри, уши, перси, и вся чювства помазующе им глаголем: Печать дара Святаго Духа. И потом потщаливии мирстии человецы поставляются в сан, в нем же беша, или презвитери, или диакони, или ино что]. глава 37. Сим согласно и севаст Константин Арменополь, от ариан, македониан, наватиан, и прочих сим подобных еретиков, презвитеров, и диаконов, и прочих причетников, прилагающыхся к соборней церкви, по помазании святаго мира, повелевает паки хиротонисати, первшей хиротонии скверне вменяемей, сице глаголя: [Арианы, и македонианы, и наватианы глаголющыя себе чистыя и чистейшыя, и тессаресии декадиты, или тетрадиты, и аполинарианы, приемлем дающыя книжицы, и анафематствующыя всю ересь, не мудрствующих, яко мудрствует наша кафолическая церковь, ея же председатель и глава еси блаженнейше печатствуемыя, или помазуемыя первое святым миром, чело очи, и ушеса, и перси, и вся чювства, и печатствующе глаголем: печать дара Святаго Духа. и по сих, яко тщаливии людини хиротонисаются, оное, еже быша у самых первее, аще презвитери, аще же диакони, аще же иподиаконы, аще и псалмочетцы]. книга 4. Видиши ли убо, отцы собора Константина града, и севаст Арменополь, презвитеров диаконов, и прочих причетников, от ариан, македониан, наватиан, и сим подобных еретиков, иже первее хиротонию прияша от своих арианских, македонских наватианских, и прочих им подобных еретических си епископов, приходящих ко святей соборней апостольстей церкви повелевают паки, аки простолюдинов, никогда же имущих хиротонии, помазании миром, хиротонисати, кии в три погружения крещаются. Якоже свидетельствует Матфей Иеросалимский, глаголя: [арианы убо и македонианы, и саватианы, и наватианы глаголющих себе чистых, и левыя, и четыренадесятники, иже и средники, и аполинарианы, точно нам божественым совершаются крещением]. глава 2, перваго состава. Како же вы, сопротивоборствуще толиких и таковых отец повелением, дерзаете иерея, от никонопоследствующаго архиерея, иже не треми, якоже православнии, погружении, но обливателне крещен есть, его же множицею рехом, священная правила повелевают яко не крещена суща, повнегда приступит ко святей христианстей вере, паки крестити, или аще и от трипогружателне крещенаго, но в толиких и толь премногих ересех, их же ради сего, не токмо миром помазовати, но паче по священным правилом якоже выше показахом внегда обратится к древлеправославней вере, годствует крестити, имущаго хиротонию, по помазании мира, аще помазуете, с первшею хиротониею приимати? Что убо, еда, иже от трипогружателне крещенаго архиерея, аще и в ересех состоит, имущаго хиротонию иерея, егда приступит к соборней церкви, по помазании мира, не подобает воспохиротонисати. И аще не подобает? како святейший патриарх Феодор Валсамон Антиохийский, во ответе своем, к господину Марку святейшему патриарху Александрийскому вопрошающему, аще кий еретик иерей, или диакон, сподобится святаго крещения, или святым миром освятится, с первшею хиротониею будет ли свщеннодействовати? ответствуя, повелевает таковаго священника, или диакона, повнегда сподобится святаго крещения, или миром освятится, первшему иерейству скверне непщуемей, и яко не бывшу, паки хиротонисати; якоже самая его словеса явственно свидетелствуют, яже ся имут сице [севаста Арменополя от книги 5 Феодора Валсамона. вопросы правилнии святейшаго патриарха Антиохийскаго Феодора Валсамона. и инии ответы его печатаны в Кормчей, на листе 545, и в Номоканоне, в правиле 209]: [вопрос 1: Аще еретик иерей, или диакон, сподобится божественнаго и святаго крещения, или святым миром освятится, будет ли священнодействуяи с первшею хиротониею? или другия сподобится хиротонии, аще восхощет священнодействовати? Ответ: Святых апостол 80 правило, из языческаго жития пришедша к православней вере, и крестившася, епископскаго достоинства сподоблятися предопределяет. убо первшому иерейству скверне непщуемей, и яко не бывшу вменяему, аще с правилным опасством возсуждаемыи, тако прославив, и сыи некогда скверныи иерей, в последньшом своем житии, не осужден возъявися, сподобляется не точию иерейскаго достоинства, но и епископскаго, обычными всяко степеньми, на учителскую высоту возводим]. севаста Арменополя, книга 5. Что, еда сопротивно правилом святых апостол повелевает, от еретик имущаго хиротонию иерея воспохиротонисати? И аще сопротивно; како сам свое повеление утверждает правилом святых апостол? Како же и святая церковь прияла определение его? Аще бо святая церковь прияла, богоявлено яко несть сопротивно святых апостол правилом. Аще же несть, якоже и есть: Убо вы приемлюще от архиерея состоящаго в ересех, имущаго хиротонию иерея, сопротивно святых апостол правилом, и всех святых отец, иже в вышших главах представихом, пределом, повелеваете с первшею хиротониею, ей же от святых отец скверне непщуемей. и яко отнюд не бывшей, священнодействовати. Убо неотрочно подобает, священника имущаго хиротонию от еретик, аще и в три погружения крещени, по помазании мира, воспохиротонисовати.

Глава, 21.

Аще кии еретицы и точию с проклятием ересей своих им приемлеми бывают, но и от таковых обращающыхся епископов, презвитеров и диаконов, святии отцы, по проклятии ересей их, повелевают паки хиротонисати.

Аще же убо иерея, от никонопоследствующаго архиерея, имущаго хиротонию, ниже покрещевающе, ниже миром помазующе, приемлете; то како тако приемлете с проклятием ли ересей, или кроме проклятия? И аще убо с проклятием ересей; то како по проклятии ересей, с первшею хиротониею паки приемлете его? И кто тако повеле? апостол ли кий? но ни един. от святых ли богословец кто? не слышу. от церковных ли учителей кто? не обретаю. И не будет ли сие приятие ваше сопротивно определению святыя древлевосточныя церкве? Аще несть, по вашему мнению. Како святая древлеправославная кафолическая, церковь, не точию, таковых еретиков, их же определила, егда обращаются ко святей православнохристианстей вере, с проклятием ересей их и иных, священников, и прочих причетников, аще кии имут от еретик рукоположение, с первшею хиротониею просто приимати, но паки, аще достойни суть повелевает хиротонисати? Явственно о сем свидетелствует севаст Константин Арменополь номофилак и судия Фессалонитский, поведая о монотелитских, сиречь единоволнитских священницех. их же по проклятии ересей их благочестивии архиереи паки хиротонисаху, сице глаголя: [Вопрос 25. Монотелита иерейскии имея обет, покаянием обратися в по нам православную веру, и приятся и посвятися. Помале же обращься на свою блевотину ереси. яко первее быв, но паки, яко глаголет, по себе самому быв, и грех сразумев, в православную веру прибеже, и приятся подобне обращься блудному, понеже хощет иерейства сподобитися, ищем творителная научитеся; От ответа: Довлеет бо сице зле поползнувшуся, и семо и онамо приметающуся, приятися по правила объятию, иерейства же не сподобится]. книга 5.

Видиши ли коль яве дает ведати севаст Константин, яко древлеправославная церковь име определение, монотелистких священников, обращающихся в православную веру не просто с первшею хиротониею приимати, но паки рукополагати. И аще убо монотелитских иереов, единыя ради ереси единоволныя, святая церковь обращающихся определила по проклятии ересей, миром помазав, паки рукополагати. И аще убо монотелитских иереов, единыя ради ереси единоволныя, святая церковь обращающихся определила по проклятии ересей, миром помазав, паки рукополагати. Како не подобает от никонопоследствующих архиереов имущих хиротонию иереов, иже не едину в себе ересь, но множайшыя содержит, их же ради их обращающыхся ко святей древлеправославней церкви, не точию миром подобает помазовати, якоже выше показахом, но паче покрещевати, паки хиротонисати? неотрочне подобает. Ктому же не токмо сами они в ересех состоят: но и прочих содержащих древлецерковное благочестие, принуждающе к своему нечестию, гонят, биют, мучат, и смерти предают, да их содержания сообщницы будут. Святии же отцы подвизающихся о нечестии и спомогающих еретиком, всячески обнажают священства. Сице святый Афанасий Великий, во еже к Руфину епистолии пиша глаголет: [Приобщившихся иже Ариева мудрствующим священником, рече, иже убо нуждею низложени бывше, правилне убо исправляются. И паки: аще помысл никако имяху онем слагающеся, якоже реша, смотрения же ради приобщитися спокрышася страхом, еже не растлитися церквам, злочестивых введением в тех место, онем заточением со благочестием бывшем. А иже по приобщении и о нечестии подвизающеся и спомогающе елика сила, не теми же запрещеньми покаявшеся низлагаются, но обнажени бывше священства, в людских вчиняются стране. Прелщеным бывшим, или нужду пострадавшым людином, прощение дается, первие запрещение приемши, и явственне прокленших еретическая, и иже в Никеи православную веру почитати обещавшимся. Сего не аз, рече, един судя: но иже поместныя соборы божественнии отцы изложиша]. Матфей Властарь, во главе 1, перваго состава.

Что убо, аще по божественному Афанасию, священник, иже впад во арианство, подвизающься о нечестии, спомогает им, егда паки к непорочней вере обратится, в людских стране. сиречь в простолюдинех вчиняется, ничто же имый священническаго. еда нынешний священник, иже не токмо в ереси впаде, но и родися в них, и возрасте, и крещение прият от иерея, в тех же ересех состоящаго и хиротонию восприят от архиерея тыяжде содержащего, и не точию сам в них пребывает: но и прочих лобзающих древлеотеческое благочестие, к тем же принуждая, гонит, мучит, в преторы предает, повнегда обратится ко святей древлеправославней церкви, не имать вчинитися в людских стране, рекше в простолюдинех? не вем, вам оставляю, вы судите. аз бо с Великим Афанасием не обинуяся глаголю, яко неотрочне и вчинится и вчиняется в простолюдинех. И аще тако есть, якоже и есть. то како ему не восприемшу, по обращении, от православного архиерея хиротонию, возможно с первшею хиротониею служити? отнюд невозможно. убо подобает воспохиротонисати.

И что много глаголю, яко не токмо от еретика архиерея имущаго хиротонию иерея, святии отцы повелевают воспохиротонисати: но и в раскол впадшаго, и извержена бывшаго, аще покается, и перваго взыщет сана, не ктому повелевают послушати, но яко мирских человек приимати предопределяют. Сице отцы поместнаго собора, иже в Сардикии, рекше в Средце, повелевают глаголюще [Кормчая, лист 114]: [Евтихиана же и Мусея расколника бывша, и извержена, аще покается, и епископскаго взыщет сана, или имене, в том да послушана будета, аще же хощута приобщитися, яко мирстии человецы да будета прията]. в толковании на правило 20.

И аще убо святии отцы в раскол впадших, и изверженых бывших, аще покаются, не ктому попущают вчиняти в первый сан: но яко простолюдинов повелевают приимати. Како священника, иже не в раскол некии впаде, но в ересех родися, в ересех воспитася, от ереси содержащаго иерея крестися, от в ересех состоящаго архиерея рукоположися, повнегда обратится ко святей соборней церкви, не яко простолюдина подобает приимати? зело яко простолюдина. И аще яко простолюдин приемлется, в простолюдинех вчиняется. како таковаго не подобает воспохиротонисати? поистине подобает. Глаголет бо святый Павел апостол: Аще корень свят, то и ветви. Зде корень каков, сиречь архиерей, от него же происходит древо священство? Не требует ли святаго крещения? всяко. Зане ов обливателне крещен, ов же, аще и трипогружателне, но обливателство с трипогружателством за равно исповедует и содержит. Каковых священная правила повелевают, якоже в прешедших главизнах доволно предпоказахом совершенно крестити. И аще корень, сиречь архиерей требует святаго крещения, всяко и рукоположения. Аще бо кто не крещен, той ниже рукоположен. И кто воспрекословит от ум имущых, не востребовати происходящему от него древу сиречь священству, якоже крещения, сице и рукоположения? Понеже бо, по словеси святаго апостола Павла, аще корень свят, то и ветви. Проявлено, яко аще кий корень сквернен, то и ветви. Ибо от тех, сиречь еретик, по реченному святыми апостолы, крещении не крещени, и поставлени не причетницы. Убо от никонопоследствующаго архиерея, имущаго хиротонию иерея, поелику воспокрещевати, потолику и воспохиротонисовати подобает.

Глава, 22.

О еже аще крещение от никонопоследствующаго священника приято, то и вера.

К сим же вопрошающу ми вы паки рцыте: аще крещение от никонопоследствующих архиереов совершаемое, еже истинно и душеспасително непщуете быти, приемлете: Аще хиротонию, юже освятителну священника мнити быти, от тогожде архиерея новодействуемую приемлете: Почто нововведенных и новосодержимых темже архиереом не приемлете? яково что глаголю: Почто новопреданнаго херосложнаго благословения не приемлете? Почто треми, якоже и они, персты знаменатися не приемлете? Почто трегубое аллилуия по новопреданному на псалмоглаголаниих глаголати не приемлете? Почто на пяти просфирах, якоже Никон предаде, литургии служити не приемлете? Почто двочастным крестом, в четвероуголней печати печатати просфир не приемлете? И что много исчисляю? Почто всех новин, яже содержит никонопоследствующий архиерей, не приемлете? аще бо корень веры, сиречь крещение, и хиротонию, яже есть совершение священства, приемлете, всяко должни есте свосприяти и древо с ветвьми, рекше веру с новопреданными догматами. понеже неразлучным споением совокуплено есть. Аще ли же древо, си есть новопреданную веру с новопрониклыми догматы не приемлете: убо ниже корень оныя веры, то есть крещение, еже никогда древа не отлучается и не отделяется, долженствуете прияти? Аще бо крещение их и хиротония права и благоприятна еста, безпрекословно и вера их, и новоустановленныя догматы правы и благоприятны суть. Аще ли же вера их, и новопреданныя догматы не суть правы и благоприятны: како может быти крещение их и хиротония права и благоприятна? ей не может и несть. И слыши о сем достоверна свидетеля блаженнаго Иоанна митрополита Никейскаго, сице вопиюща: [Аще бо вера их права и благоприятна есть, да будет и крещение их приятно. Аще ли же вера их не приятна есть: како крещение их приятно]. от слова обличителнаго на армены. Темже убо аще вера их и новопреданныя догматы не суть правы и благоприятны: убо ниже крещение их есть право и благоприятно. И аще тако есть, якоже и есть. убо всячески от никонопоследствующаго архиерея хиротонию имущаго иерея, яко паки совершенно святым крещением крестити, сице и хиротонисати подобает. Зане от таковых поставленым, по словеси преподобнаго Никона [слово 63], или крещеным, ниже верным, ниже причетником мощно быти.

Глава, 23.

О еже священник священника не может рукоположити, ни молитвы разрешителныя над ним, по отречении ересей прочести, но вся един архиерей действует.

Рцыте ми, молю вы, паки; егда убо к по вам соединению, от никонопоследствующих архиереов, имущии хиротонию священницы приходят, их же ниже покрещеваете, ниже миром помазуете, что убо с проклятием ересей приемлете? И аще с проклятием ересей. По проклятии ересей, кто их благословляя, попущает им с первшею хиротониею, не сущым у вас епископом, священническая действовати? Или кто молитвы, по отрицании ересей их, прочитая над ними, благословляет их священнодействовати? Священницы ли ваши? но коею властию сия они творят? еда может священник священника, обратившася от заблуждения, и пришедша к православней вере, очистив от ересей, благословити? или разрешителную над ним молитву прочитав, власть преподати ему паки священнодействовати? И кто им тако повеле творити? Святии ли апостоли? но святии апостоли паче возбраняют, нежели попущают священнику священника поставляти, и развращати чин священнический. Сице бо в своем правиле возбраняюще вопиют [Кормчая, лист 30]: [Восхищающии недарованная им, раздражают Бога, якоже сынове Корреовы и Иозия царь. ни диакону убо приносити жертвы, несть достойно, ни крестити кого, ни благословения мала или велика творити. такожде ни презвитеру, несть достойно поставления творити, и развращати чин священнический. Якоже дерзнувыи таковая, не с нами борется, но с великим архиереом Христом]. правило 2. Видиши ли коль страшне вопиюще, святии апостоли возбраняют восхищающым недарованная им творити, и развращати чин священнический. Реша бо, таковая дерзнувый творити, рекше поставляти, не с нами борется: но с самем великим Архиереом Христом. Что убо священницы вашы, повелевающе священником обращающимся от ересей, паки священнодействовати, не восхищают ли на себе сана епископскаго и не развращают ли священническаго чина? и не с самем ли творяще таковая, великим Архиереом Христом борются? ей поистинне тако. Речеши ли святии отцы попущают? Но где святии отцы попущают таковая творити? покажи ми? но отнюд сего не можеши показати. Понеже святии отцы не попущают, но паче запрещают. Мы бо вемы, и известно научаемся, от писателных гласов, священных отец, яко священник точию имать благодать совершителную в действиях, еже крещати и священнодействовати, но не воздавателную, сиречь не может хиротонисати, ниже инаго действовати иерея. Явственно о сем свидетельствует, блаженный Симеон архиепископ Фессалонитский, сице глаголя: [Презвитери же глаголемую совершителную, якоже благодать имеюще токмо совершителную в действиях, а не воздавателную. крещает бо и священнодействует, не может же хиротонисати, ниже инаго действовати иерея, или из еликих имеют чина священнаго]. глава 31. Почто не может священник священника совершити? понеже, ничтоже человек может не прияв от Бога, иному преподати. Якоже той же паки блаженный Симеон глаголет: [Ниже бо человек что может не взяв от Бога, разве бо Мене, глаголет, не можете творити ничесоже]. от ответа 13. Сего ради, аще презвитер и совершителен именуется, яко действует совершена действия, сиречь, крещения, и молитвы, обаче воздавателныя не имеет благодати, ниже инаго иерея совершити может. Якоже той же блаженный Симеон Фессалонитский утверждая глаголет: [Презвитер же, иже и совершителен именуется, от божественнаго Дионисия, якоже многажды рекохом, ради того, что совершенна действия действует, яко причастие, крещение, и молитвы, обаче не воздавателную имеет благодать, ниже инаго иерея совершити может, сице свыше действуется, и истязается сей от архиерея о житии и о времени]. глава 177. И аще убо священник, хотя и совершителен нарицается, по блаженному Симеону, обаче не имать воздавателныя благодати, сиречь, не может рукоположити инаго священника. Како же ваши священницы не дарованная им восхищающе, дерзают. приходящым в соединение ваше, священником имущым от никонопоследствующаго архиерея хиротонию, с первшею хиротониею, по отречении ересей, аки бы рукополающе их, повелевати паки священнодействовати? Откуду сице прияша? Божественнии отцы глаголют, яко имеяй благодать четца, не может действовати, иже суть иподдиаконова, ниже диакон, яже суть презвитерова, ниже презвитер, яже суть епископова. Сице о сем блаженный Симеон Солунский глаголет: [Подобне же и даровании Святаго Духа, и о хиротонисаемых же сие явно запечатается, прочитати поставлен, и приимая благодать, и четца имея благодать, но он не возмогает, яже суть иподдиаконова, действовати, и диакон же подобно не возмогает презвитерова, ниже презвитер, якоже прежде рекохом, яже суть архиерейския благодати]. глава 32. Се коль явственно глаголет святый Симеон, яко не может презвитер, яже суть архиерейския благодати, действовати? Сии же противу толикия явныя истины борствующе, дерзают, яже суть архиерейския благодати, действовати. Ни ли слышат, яко единых есть епископов, якоже священников хиротонисати, сице и обращшыхся от ересей, имущых священства сан, на первое священническое достоинство возводити. Сице в Катихисисе малом глаголет: [Рукоположения силы никтоже имать, точию епископове]. лист 34. Якоже и блаженный Павел апостол повелевает единым епископом рукополагати, сице пиша к Тимофею глаголет: [Воспоминаю тебе возгревати дар Божии, иже есть в тебе возложением руку моею]. еже святый Иоанн Златоустый толкуя глаголет сице [беседы апостол. на послан. Тимофеево, лист 2540]: [Воспоминаю тебе возгревати дар Божии, иже есть в тебе руку моею, сиречь благодать Духа, юже приял еси в предстательство церкве]. беседы апостольские. Сего ради и просветитель нарицается архиерей, яко вси приемлют чрез него хиротонию же и печать, иереи же и клирос, еже утверждает блаженный Симеон Фессалонитский глаголя: [Убо просветителному глаголющюся, сиречь архиерею, и воздавателную божественных светов. Вси бо приемлют чрез него, хиротонии же и печати, иереи же и клирос, и освящении храмы]. глава 1.

Темже един архиерей имать воздавателную благодать, сиречь хиротонисати иереов и клириков. Презвитер бо аще и имать совершителную благодать в действиях, воздавателныя же не имать, сиречь не может хиротонисати не токмо презвитера, но ниже четца. вся бо сия един архиерей совершает, возложением руку своею. Якоже той же блаженный Симеон Фессалонитский изъявляя глаголет: [Потом приводится совершаемый к нему, и благословляется рукою крестообразно от него трижды, потом знаменается, и стрижет бо его власы главы крестообразно архиерей, божественное и страшное имя наглаголяи троическое, и за него же всякое священное и совершенное таинство. В первых убо по верху стрижа власы глаголет: во имя Отца, потом по челу, и Сына. потом и збоку главы одесную, глаголя: и Святаго Духа. потом и збоку паки ошшую, крест совершаяи глаголет: всегда ныне и присно. Вся же на всяком названии, аминь глаголет, исповедающе вкупе и утверждающе, яже от архиерея. и отъятие убо власов, освящение знаменует, яко власы во его теле извещение и начаток Богу принестися от человека знаменует. Крестообразно же Iсуса ради, яко Той воплотивыися и распят бысть освящает. Во имя Троицы же, яко сия содетель всем, совершенно творяй единый Бог]. глава 158. И яко же четца, сице и служителя, и презвитера хиротонисает един архиерей. Еже утверждает святый Симеон Солунский глаголя: [Три в хиротонии трегубым знамением иерарх совершает хиротонисуемаго. И зри отсуду Троицу исповедуему, и действующу в нас, и совершающу божественыя дары: В первых убо абие приведена знаменует трижды, еже есть начаток освящения и хиротонии. Потом паки знаменает трижды, по призвании божественныя благодати действуяи на нем чрез крест, посреде действа в Троице дарования всем глаголющым, Господи помилуй с пением. И третие по молитве паки трижды знаменает, якоже совершивше божественою силою всеконечно, или служителя, или иерея, или епископа]. глава 171. Вся же сия совершает един епископ благодатию и властию данною ему от Бога, с возложением руку своею. Сице засвидетельствуется о сем в Катихисисе велицем: [Вопрос: Кая суть совершителная сея тайны? Ответ: Сила и власть от Бога данная, печать дара Духа Святаго, на души священничестей, и оная благодать Божия, о ней же святыи апостол Павел к Тимофею пишет: Не неради о благодати сущей в тебе, данней ти пророчеством, с возложением руку моею. Сия благодать Божия устрояет рукоположеннаго, да будет во своем чине и сане благоприятен и благоугоден своим служением Богу и церкви]. глава 63. И понеже един епископ имать воздавателную благодать. священник же, аще и совершителен глаголется, но не имать воздавателныя благодати. Сего ради святии отцы между епископом и священником, разньствие полагают. еже овому литургисати и крещати, оному же рукополагати. Сице блаженный Симеон Фессалоникийский во своих вопросоответех глаголет: [Вопрос: Кое различие епископа или иерея? и чесо ради не хиротонисает иерей? понеже литургисает и крещает? Ответ: Различныя суть Духа дарования, и овому убо дается сие, и овому же оно дарование. ниже: Иереи же сию благодать не имеют, но токмо священнодействовати могут, и крестити. И сия убо кроме архиерейския не творят силы, и миром и хиротониями]. вопрос 37. И не токмо священник священника не может рукоположити: но ниже разрешение преподати ему каково любо в Дусе. яко седмидесяти апостол чин имут презвитери. Явственно о сем свидетелствующу томужде блаженному Симеону Фессалоникийскому сице: [Темже презвитери, яко седмьдесят чина имеюще, и не имеют волю Духа подати, сиречь благодать, или хиротонисати, или мир творити, или разрешение дати в Дусе]. ответ 13. Зриши ли яко не может священник священнику разрешение дати в Дусе. Ваши же священницы дерзновенно противящеся священных апостол, и святых отец пределом, повелевают, аки епископи, священником обращьшимся, паки священнодействовати. И кто се от века слышаше.

Темже убо, аще по священных апостол гласовом, несть достойно презвитеру поставления, творити: аще презвитер и имать совершителную благодать, но токмо в действиях, а не воздавателную аще презвитер презвитера не имать власти от Бога данныя рукоположити: Аще презвитер не имать таковыя благодати, еже презвитеру разрешение в Дусе дати: убо презвитери ваши, приходящии к по вам согласию, не суть истиннии священницы. Понеже отрицающеся новин, и новотворных действий, купно соотрицаются и новодействуемыя хиротонии, иже прияша от никонопоследствующаго архиерея. Ибо повнегда глаголют, отрицаюся всех новин и новодействий, абие соотрицается и хиротонии. яко есть новодействуемая. отрекшежеся хиротонии прочее не суть хиротонисани, яко не имут православнаго архиерея, от него же бы восприяли в себе законно хиротонию. не суще же хиротонисани, не суть священницы, аще и дерзают священнодействовати, но вне сана своего, и кроме уставов дерзают. Не суще же священницы, сего ради не могут ничтоже в Дусе действовати. И свидетель сему достовернейший святый Симеон Солунский сице глаголющь: [Слыши, ничтоже может действовати в Дусе, или иное что, аще хиротонии не имеет]. глава 77.

И аще убо ничтоже может в Дусе действовати, не имый хиротонии: тем ниже таин может действовати. Якоже явствует о сем в Катихисисе [малом] сице: [действовати убо таин не может, разве возложением епископских рук, по реченному: еяже ради вины воспоминаю тебе возгревати дар Божии живущии в тебе возложением руку моею]. лист 34. Аще же не могут действовати таин: убо ниже крещеннии от таковых крещени суть. И слыши о сем кир Симеона Фессалонитскаго сице вопиюща: [Аще ли же нецыи попущением Божиим, в толикое приидоша дерзнутие. яко еже неверне и злочестивне. (неверие бо вещь таковая, еже кроме священства прияти хиротонию) священная действовати: несть слово рещи о осуждении сицевых, сице бо дело горше есть и самех тех нечестивых бесов, во ангела светла, точию преобразующися, но не сущих, и Божие убо лицемерствующих, безбожных же сущых и противных Богу. Таковии неисчетное томление поимут, на божественная зле похуливше, ниже бо гласы божественныя от них, ниже божественная дела, понеже благодать рукоположения не имут. но и месть приимут иную, за прельстившихся от них, или негде крещеных, или рукоположеных. сии бо ни хиротонисани, ни крещени суть]. Номоканон, лист 100 [от ответа 1 кир Симеона Солунскаго]. убо подобает воспохиротонисовати.

Глава, 24.

Священник священника по испадении степени, не может паки на первый его степень возвратити.

Но что много глаголю, яко презвитер презвитера, по обращении от ересей, не может кроме епископа отнюд, или воспохиротонисати, или молитву над ним разрешителную прочести, или благословити паки священная действовати, ниже бо леть есть, но ниже испадшаго от степени священства может паки на предний его степень возвратити. якоже о сем в Предисловии Номоканона явственно сказует, идеже пишет тако: [иереов же и протодиаконов грехи, яже извержения томление наводят, епископом суду подлежат. да не дерзнет духовник разрешити их. якоже бо невозможно ему хиротонисати: сице ни на священства степень паки возвращати испадшаго]. Потребник лист 766. Видиши ли, яко аще презвитер презвитера, аще кий и от православнаго архиерея прежде име хиротонию, но некоего ради греха, иже наводит извержение сана, испаде степени своего, не может паки возвратити на предний степень. Кольми паче не может прежде приемшаго хиротонию презвитера, от архиерея в ересех состоящаго, паки возвести на священство. Сице бо о сем блаженный Симеон Фессалонитский свидетельствует глаголя: [Темже презвитери, яко седмьдесять чина имеюще, и не имеют волю Духа подати, сиречь благодать, или хиротонисати, или мир творити, или разрешение дати в Дусе. (ниже) ниже бо волися презвитером на вся разсудити, изряднее яже отрицания, не могут сии разрешити, токмо епископи, ниже яже убийства, иереов согрешения, клятвопреступления, и прочая, аще же убо и взявшии повелителная писания, долженствуют вопросити, кую власть имети будут весма решити иже связавшии]. ответ 13. Аще бо и попущается презвитероу приемшему помыслы кающихся вязати и решити согрешения от архиерея: но и сие не всегда, но во время наипаче разлучения души от тела. Якоже о сем сказует Матфей Властарь, толкуя 60 правило Карфагенскаго собора, сице глаголя [глава 9]: [но и седмое примирение кающихся, аще о животе бедствуют, не менит быти подобно презвитером творити повеления кроме епископа]. якоже и паки толкуя 43 тогожде собора,  глаголет сице: [Сия четыредесять и третие повелевает, аще ли ту епископ, и иже в покаянии сыи на концы самом беды будет, да примирит того и презвитер]. глава 9. И аще убо презвитер презвитера по испадении от сана. не может паки, кроме архиерея на преждний степень возвести. Благоявленно яко отнюд невозможно презвитеру презвитера, имущаго хиротонию, от архиерея в ересех состоящаго, ея же при обращении отвержеся, паки возвести на священства степень. и не токмо презвитер презвитера не может, на священства степень по обращении его, паки возвести: но ниже девице священие сотворити. Сице бо отцы собора, иже в Карфагене повелевающе глаголют: [И помазанию творение, рекше миру совершение, девицы священие, и смирение в народе службы, от презвитера да не будет]. правило 6. Сего ради священнии и божественнии апостоли, комуждо в своем данном ему чину пребывати, и не преступати заповедей божественых, всячески повелевают, сице бо писателными гласы гремяще вопиют: [Кождо в данном ему чину да пребывает, и не преступает заповедей, не суть бо наша, но Божия, якоже рече Господь: Слушаяи вас, Мене слушает, и слушаяи Мене, слушает пославшаго Мя, и вас отметаяися, Мене отметается, и Мене отметаяися, отмещется пославшаго Мя]. правило 1, всех апостол. Тем ваши священницы, их же по обращении от ересей прочии священницы, иже противоборствующе каноном, святых апостол и божественых отец, восхищают на себе не дарованный им епископский сан, возводяще на священства степень, егоже они отрицаются новин отпадоша, нань же отнюд не могут возвести повелевают священнодействовати, не могут всячески быти сущии священницы.

Глава, 25.

Менший от болшаго благословляется.

И не сие токмо дивно, яко презвитер презвитеру, по обращении от ересей повелевает, аки бы благословляя его, без всякаго священнодейства с первшею хиротониею, от отпадших приемшею, паки священнодействовати. Но много паче дивнее, и есть чему удивлятися, яко простолюдины мужие и жены, собравшеся купно, приходящему в по них согласие презвитеру, никаковаго священнодействия совершающе, никаковыя молитвы очистителныя от ереси прочитающе, ни миром помазующе, но просто тако с первшею хиротониею, юже прият первее от архиерея отпадшаго православия, аки бы от православнаго хиротонисанному, о слепоты! о неведения! о крайняго неразумия! да не глаголю безумия! повелевают священная действовати. но кто от века слыша? кто ли виде? еже бы простолюдины мужие и жены, епископский на ся сан восхитивше, священником обращающымся от ересей, аки бы их воспохиротонисающе, или благословляюще, с первшею их хиротониею, юже прияша от еретик, повелевали, аки от благочестивых имущым архиереов хиротонию, священная действовати? никтоже никто. Пройди вся священная правила. обозри вся жития святых отец. осмотри вся истории церковных действ. нигдеже обрящеши таковаго неподобнаго дела нигде. Сие бо есть единых токмо архиереов дело, еже священников обращающихся от ересей, и приходящых к православней вере, еже воспохиротонисати, аще достойни суть таковаго сана, и возводити на предний степень. И свидетель сему есть достовернейший, блаженный Феодор Валсамон, иже, толкуя правило святых апостол осмьдесятое, во ответе своем к господину Марку патриарху Александрийскому, глаголет тако: [Из языческаго жития пришедша к православней вере, и крестиашагося, епископскаго достоинства предопределяет сподоблятися, убо первшему иерейству скверне непщуемей, и яко не бывшу вменяему. аще с правилным опасством возсуждаемыи, тако прославив, и сыи некогда скверныи иерей, в последньшом своем житии не осужден возъявися, сподобляется не точию иерейскаго достоинства, но и епископскаго обычными всяко степеньми на учителную высоту возводим]. ответ 1 [севаст Арменополь, от книги 5].

Божественнии бо отцы, не токмо презвитеру не сущу схимнику, не попущают пострищи инаго, и сотворити великаго схимника, но ниже малый образ наложити на кого оставляют. И слыши о сем блаженнаго Никиту Ираклийскаго, его же вопроси Константин Памфилийский, о еже аще может презвитер не схимник, пострищи другаго, и сотворити великаго схимника, сице вещающа [Кормчая]: [Святыи мой Владыко, подобает ли не схимнику презвитеру пострищи другаго, и сотворити великаго схимника? или ни? На сие ему отвеща тако: Его же не имать кто, не может никомуже дати ни малаго образа презвитер, какоже даст кому великии образ]. ответ 4. Зри, аще презвитер не схимник не может сотворити великаго схимника. Како убо простолюдини суще, не имуще рукоположения никакова, могут по обращении презвитера от ересей, с первшею его хиротониею, юже прият от архиерея, иже не сый православен, якоже многажды рехом, благословити, еже паки священнодействовати? никакоже не могут никако. Ничтоже бо может человек, аще сам неимат, иному преподати. Якоже бо Симеон Фессалоникийский глаголет: [Ниже бо человек что может, не взя от Бога]. ответ 13. Понеже меншее от болшаго благословляется, а не болшее от меншаго. Явственно сему научает ны святый апостол Павел глаголя [ко евреом, зач. 316]: [без всякаго прекословия меншее от болшаго благословляется]. И аше убо по апостолу меньшее от болшаго благословляется, благоявлено яко болшее от меншаго не благословляется. убо простолюдини, суще меншии, не могут обратившеся от заблуждения, по отречении его от ересей, вящша себе священника благословити, паки священнодействовати. аще же не могут, якоже и есть, проявлено яко священницы сии, или с первшею хиротониею юже прияша от архиерея, благочестия отпадшаго каковых божественнии отцы хиротонию всячески отмещут: от таковых бо, глаголет Никон Черныя горы [слово 63], [поставленым, или крещенным ниже верным ниже причетником мощно быти]. или, аще не с первшею, то безчинне самопоставлен, кроме хиротонии архиерейския, и благословения, дерзают священная действовати. действовати же таин не могут, кроме возложения рук, епископских, аще и дерзают действовати [Катихисис малый, лист 34]. Ибо, иже кроме возложения рук епископских, и безчинне во святая вскочиша, теми никакая тайна, аще и касаются их руками совершена может быти. Доволно сему научает ны святый Дионисий Ареопагит, сице глаголя: [Разумей же яко безчинне, и кроме уставов священных во святая вскочи, ниже видети, ниже слышати, ниже имети веруется, аще и руками тех касается, яко аще и подобная творит, вне своего чина и достояния]. часть 3. И понеже убо аще ни едина тайна от сицевых совершаемая совершена может быти, благоявлено яко ниже крещение действуемое от них совершено есть. И аще крещение от них совершаемое несть совершенно: убо безпрекословно яко крещеных от них, и приходящых ко святей древлехристианстей вере, паки подобает совершенно крестити. и в лепоту. Слыши священноинока Матфея о сем вещающа сице [глава 3, втораго состава]: [Взыскано бысть и сие, и Ираклийскому вопрошающу Мануилу, аще подобает яко верна, его же не священ крестил есть священник, ложно совторися. се бо в пределе его тогда приключися. и суди собор и сим покрещеватися. понеже бо, рече, по священных апостольских правилех, 46, и 47, единем епископом дается и священником, еже святаго крещения совершение. (ниже) Ни убо несть преподобно, ниже не безгрешно, ни без соблазна, крестившемуся от не приемшаго власть крещати, и крещением оставление даровати согрешением. Чистително бо сим крещение, божественому лику сопримешати немалая беда, да некогда от таковаго сомнения, той убо еже от святаго крещения очищения лишится, и мы со некрещеным предваримся причащающеся]. К сим же рцы ми; о любезнейший! может ли хиротония совершитися без трисоставнаго животворящаго креста Господня? Речеши ли не может? Како же ты сию хиротонию, от нынешних никонопоследствующих архиереов действуемую юже действующе, не трисоставным крестом, но двочастным совершают, яко суще совершену приемлеши? понеже бо егда архиерей священника рукополагает, осеняя ограждает его на главе трижды пятию перстным знамением, им же изображает крест двочастный. Якоже сами они свидетелствующе утверждают: [Ибо сицевым воображением креста Господня, вся тайны церковныя действуют воду ко крещению святому сицевым креста образом благословляюще освящаем, елей такожде: но и отроча мажюще елеом, и миром святым, не ин крест, точию четвероконечныи изображаем. сицевым крестом просфира на заколение агнца уготованная благословляется, и в самых тайн тела и крове Христовы совершение, сей же образ креста употребляется. сим супружество составляется и священство благословляется]. Жезл, часть 1, возобличение 23. Что убо, еда двочастный крест есть истинный Христов крест, на нем же распяся? Речеши ли, несть истинный Христов крест. како же ты выше рекл еси, яко без креста хиротония не может свершитися? Яже совершается двочастным крестом, юже ты приемлеши яко истинно совершенную? Аще бо ты приемлеши ю, яко истинно совершеную, яже совершается двочастным крестом: убо двочастный крест есть истинный крест Христов, совершеннотворитель сея хиротонии. Аще ли же глаголеши яко двочастный крест несть истинный крест Христов: убо сия хиротония без креста совершается. И аще без креста совершается: убо может и без креста совершитися. понеже приемши ю, яко совершенную. аще же, по твоим словесем, может без креста совершитися. како Иоанн Златоустый глаголет, яко без креста ничтоже таинств совершается. сице бо вопиет: [Яко венец, сице да обносим крест Христов. ибо вся тем совершаются, яже по нас: аще и породится треба будет, крест приходит: аще и напитатися таинственною оною трапезою, аще и рукоположитися, аще и яково ни буди ино что сотворити, везде одеяния нашего предстоит образование]. беседы на Матфея. нравоучение 54. И паки инде: [сим вся совершаются, крещение крестом, рукоположение крестом]. к филипис. на послан. беседа 14. Но и святый Симеон Фессалонитский глаголет: [темже и совершеннотворитель сам крест, и без креста ничтоже совершается божественных таин]. глава 62. И аще по святых богословец гласовом, ни едина божественных таин совершается без креста, и совершенотворитель сам крест есть. како же ты сию хиротонию яко истинно совершенную, яже не трисоставным крестом Господним, без него же совершенотворителя таинств отнюд не может быти совершена, но двочастным, иже несть истинный крест Христов, совершается, приемлеши? Рцы бо ми, молю тя? Аще кий изуграф, верою сый латинянин, напишет вапами по древнему преданию образ на дсце коего любо святаго, и принесет ти, приимеши ли и яко самаго сущаго христианина написание? и будеши ему покланятися, яко и прочим святым образом? Речеши ли не прииму. Чесо ради? Понеже не сый христианин пиша его. Добре. Аще нынешний архиерей, на кий любо праздник освятит воду, юже егда освящает, рукою воображая на ней крест двочастный освящает, приимеши ли ю яко освященную? Речеши ли не прииму. Рцы почто? Понеже, речеши, двочастным крестом освящаема, сего ради несть освящена. Изрядно. Смотри же ми, образа, егоже написа латинянин, яко освяти архиерей, яко двочастным крестом освящаема, не приемлеши. како же приемлеши хиротонию от нынешняго архиерея, двочастным же крестом совершаемую? Аще бо приемлеши хиротонию двочастным крестом совершаемую, всяко должен еси и воду двочастным же крестом освящаемую прияти, и образ латинянином написанный. Понеже всех сих совершенотворители равни суть. Аще ли оных не приемлеши, яко не суть церковию прияти совершенотворители их. Убо ниже сея должен еси прияти, яко совершенотворитель ея есть церковию отвержен. К сим же аще хиротонию приемлеши совершаемую вещь, яко истинно совершенную, всяко должен еси свосприяти и совершенотворителя ея двочастный крест, понеже отнюд не может хиротония без креста совершитися. Аще ли же совершенотворителя ея, двочастнаго креста, яко несть истинный крест Христов, не приемлеши: Убо ниже хиротонии совершаемыя им, яко несть истино совершена без креста, долженствуеши прияти. едино бо зде от двоих неотрочне подлежит, или совершаемую вещь прияв, и совершенотворителя ея свосприяти, или совершенотворителя отринув, и совершаемую им вещь соотринути. Аще ли едино приемлеши, еже по твоему нраву. аще и святыми не приято, всяко и нехотящ сприемлеши и другое. Темже подобало быти, о любезнейший! от древних святых отец и богословец научитися, и не приимати от неправославных совершаемыя хиротонии. Сице бо им вопиющым: Отметаем бо таковых якоже крещение, сице и хиротонию [Матфей Иеросалимский].

Глава, 26.

Яко священнику невозможно есть без жертвенника таин совершити.

К сим же священнии и божественнии отцы, священником таин не повелевают, без жертвенника действовати. Сице вопиет священный Симеон архиепископ Фессалоникийский, глаголя: [Иереи не действуют тайны без жертвенника]. глава 77. Сии же ваши священницы где свои жертвенницы имут, на них же таинства совершают? в коих храмех? И аще имут храмы, по коего архиерея благословению и повелению создаша? Понеже церковнии учители, без благословения архиерейскаго, всячески не повелевают созидати церкве. Якоже о сем Иоанн Зинарь в книге своей вопия глаголет: [Ащели кто хощет от основания создати церковь, да приидет ко архиепископу наместному, подобную службу да сотворит ему. Кроме же сицеваго правила, никтоже инако да не творит. аще же хощет, точию без благословения епископова, и без повеления его храм никаков да не начинается]. правило 67. И аще убо без повеления епископова, святии отцы не точию создати церкве не повелевают, но ниже начати. Сии же священницы по коего епископа благословению, егоже не имут, созидати храмы, в них же тайны совершают? Что убо, не яве ли яко самоличне, и без повеления епископскаго, церковь созданная не может совершена быти, и достойна к священнодействию таинств: но яко простый и несвященный храм вменяется, по гласовом священных отец. Явственно бо священному Дионисию Ареопагиту вопиющу о сем сице: [Знаменай, яко освятити и совершити миро, несть презвитера, но ниже жертвенник совершити, да принесет на нем, ниже хиротонисати. Вся бо един священноначалник сотворити имать, их же кроме священник, ниже крестит, ниже принесет, но в предсвященных от епископа священнодействуется]. глава 5. о церковном священноначалии. Ельма же блаженный Дионисий глаголет, яко освятити и совершити жертвенник несть презвитера, во еже бы на нем принести божественыя дары, но един архиерей вся сия совершает. Како же сии священницы дерзают, противно повелением божественных отец, без воли и благословения совершати храмы. Иже бо без воли и благословения епископля созидаеми и освящаеми храми, яко простии и не священнии от святых отец непщуеми суть. Сице бо божественнии отцы собора, иже в Карфагене, сказуют глаголюще [Кормчая, лист 152]: [елико молитвеных домов, рекше церквей, без воли и без молитвы епископли, создано бысть, в них же ни мощи святых мученик положени быша, таковии церкви несвященни суть]. в толковании на правило 54. Святии же отцы седмаго вселенскаго собора, иже без мощей святых мученик дерзают святии церкви, судом извержения облагают, сице вопиюще [Кормчая, лист 112]: [да полагаются мученик святыя мощи в церквах, иже без них священы быша, по обычней молитве. Аще же святит без мощей, да извержется яко преступник церковных предании]. правило 7. И аще убо без повеления епископля созидающии, и без мощей освящающии церкви, по божественных отец гласовом, Карфагенскаго и вселенскаго соборов, от овых суду извержения подпадают, от оных же таковыя церкви не освященныя определяются. В каковых божественный Ареопагит, ниже крестити, ниже таинства священнику совершати попущает: но и в предсвященных от епископа [Дионисий Арепагит в толковании главы 5]. И аще по божественнаго Дионисия в предсвященных от епископа церквах священнику лепотствует и крестити, и священнодействовати. убо без воли и благословения епископля, в созидаемых храмех, и без мощей святых мученик освящаемых, служащии священницы, чрез правила святых и приснопамятных отец дерзают служити. от таковых, яко неимущии суще православныя хиротонии, и иже крещение. ниже иная кая тайна церковна совершенна быти веруется, яко самочинне, и вне повеления святых отец творят. И слыши о сем божественнаго Дионисия тако вещающи: [Яко безчинне и кроме уставов священных, во святая вскочи, ниже видети, ниже слышати, ниже имети веруется. аще и руками тех касается. яко аще и подобная творит, вне же своего чина и достояния]. часть 3.

Глава, 27.

Унее есть крещению совершитися от простолюдина в храме, нежели от священника отвергшагося при проклятии ересей, своего сана и паки кроме архиерейскаго повеления на ся и похитившаго.

Возглаголет кто от неу утвердившихся во истине рекий: како убо ты от священников в церквах без повеления епископля созданных, совершаемое крещение, и вся тайны церковныя не совершенны быти глаголеши. От простолюдина же в простых храмех, творимое крещение совершено быти поведаеши? Тако есть воистину тако. Ибо от священника в церкви, без повеления епископля созданней, творимое крещение, и прочия тайны церковныя, не могут быти совершены, вин ради богословных.

Первое: Яко крещение, имать, от священника хиротонию имущаго, от епископа в ересех состоящаго, и поливание за равно с трипогружателством содержащаго. Каковых божественнии отцы, повнегда обращаются ко святей непорочней вере, повелевают паки совершенно крестити. аще и клирицы суть, якоже выше предпоказахом [1 всел. собора правило 19; Лаодикийскаго 8; Никона Черн.; Матф. Властарь].

Второе: Яко хиротонию, юже имать, прият от архиерея православия отступльшаго, от таковых убо хиротонию имущих, божественнии апостоли, и святии отцы, приходящих к соборней и апостолстей церкви, определяют паки совершенно православным епископом хиротонисати. о чем доволно назади предъявихом [свв. апостол прав. 68; Никон Черн.; Матфей Иеросалим.]

Третие: Яко не имея от православнаго архиерея хиротонии, но кроме хиротонии и благословения архиерейскаго, и молитв вовремя обращая его, на очищение от ересей глаголемых, самочинне, сам на ся похитив чин священнический, облачаяся в священныя одежды, по повелению простолюдинов, вся церковныя тайны дерзают действовати. От сицевых, по священных учителей церковных гласовом, и крещении не суть крещени. сих ради вин богословных, и множайших, совершаемыя от него яко крещение, сице и прочия действуемыя им тайны, в церкве кроме повеления епископля созданней, не могут совершенны быти, ниже суть [Симеон Солун.; Матфей правилник].

От простолюдина же суща христианина, совершаемое крещение, аще и в простом храме совершается, есть и будет совершено.

Первое: Понеже еще во время священных апостол, нецыи от апостол, яко Филипп и Анания, не имущии священства крестиша, ов убо Павла, ов же каженика и самарийский язык, их же крещение святыми апостолы яко самое истинное прияся.

Второе: Понеже мнози простолюдины суще во времена гонителная, мужие и жены, многих от еллин обращающе крещаху. их же крещение святая церковь не отринула, но яко истинное и спасителное, якоже и есть прияла.

Третие: Понеже во время нуждных случаев, церковнии учители, яко Августин в епистолии к Фортунату; Никифор патриарх Царя града; Константин номофилакт [севаст Арменополь]; кир Гавриил Филаделфийский [о седми тайнах]; Петр Могила [Потребник киевопечерский]; и инии простолюдином сущым христианом повелевают хотящых креститися крестити. о чесом доволно доводственне в вышшых главах предъявихом.

К сим же крестящии в простых храмех не без повеления крестят. но всяко по повелению. Понеже церковнии учители, належащей нужде, повелевают и в дому крестити. Сице кир Гавриил архиепископ Филаделфийский, о еже на коем месте достоит крестити, взывает глаголя [глава 8]: [Началне убо и первее в святых церквах, якоже 59 канон, иже в Трулле глаголет. Належайшей нужды, в молитвенном дому сущем в храме. Еще и в дому простом может кто крестити. Обретается в святых апостол деяниях, яко Филипп апостол на пути крести евнуха. мнитже ми согласоватися реченным, 44 канон, глаголет бо: аще кто в недуг впад, и последней будет беде, да сподобится крещения, прежде даже оглашен будет к благочестию. свободивжеся недуга, да навыкнет тайну веры. убо недугуяи в дому недугует, а не в церкви. Тем же и в дому лепо есть крестити без сомнения належащей потребе, якоже речеся]. Согласно сему и в Потребнице повелевает сице: [Разве долгаго ради разстояния церкве, и аще зело будет болно отроча, сие бо в дому нужды ради крестити]. Потребник, лист 115.

Темже убо, от священника, без воли епископли в созданней церкви, совершаемыя тайны, крещение, и прочия, яко от священника, иже хиротонию имать от архиерея в ересех состоящаго крещенаго, егоже годствует воспокрестити: яко имущаго хиротонию от епископа православия отступльша, его же лепотствует воспохиротонисати: яко кроме хиротонии православнаго епископа, и благословения, безчинне самем на ся похитившаго чин священнический, священная действовати дерзающаго, не суть совершены ниже душеспасителны. от простолюдина же аще и в простом дому совершаемо суща христианина, яко от сущих не священных во времена апостольская совершаемое приято бе: яко во времена гонителная от простолюдинов, мужей и жен, действуемое за истинное и равносилное, яко, и от священных церковию вменено бе: яко учители церковнии, елико древнии, толико и новии, во время нуждных случаев, простолюдином повелевают крестити, крещение есть совершенно и спасително.

Глава, 28.

О еже в новосозидаемых церквах без антимиса невозможно есть служити иерею.

К томуже, како священницы ваши в новосозидаемых своих, без воли и благословения архиерейскаго церквах, кроме антимиса дерзают служити? святая бо древлеправославная церковь, аще и за нужду, отнюд без антимиса не попущает священнодействовати. Сице в Потребнице велицем пишет: [Без антимиса за скудость мощно ли священнодействовати? Ответ: Отнюд не священнодействовати ниже с тримофором. Ибо вина сатанинска есть, еже ни взимати икону в пусто место]. Номоканон, лист 726. Зриши ли, яко без антимиса, аще и за скудость, не повелевает священнодействовати. Сии же откуду получают антимисы? Сами ли освящают я, несущым им епископом? Но ли священником леть есть освящати антимисы? никакоже никако. едини бо точию архиереи освящают я. Якоже о сем в Потребнице велицем явственно показуется [лист 1]: [чин священию церкве малаго священия, понеже антимис освящен великим освящением и совершен от святителя]. Якоже и паки во указе о антимисе: [антимис есть плат, а в нем вшиты мощи святых мученик, а свящает их святитель со всем собором, а пишется на нем сие надписание]. Виждь, рече, свящает их святитель, сиречь антимисы, со всем собором. Сии же священницы не имут архиерея, иже бы им освятил антимис. Не сущу же архиерею, невозможно быти и антимису. Без антимиса же служити, есть последовати преданию арианскому. о чесом преподобный Никон Черныя горы пиша в книзе своей поведает сице: [В книгах Феодора патриарха, есть книга великая балбакерна, имуща главизны различны, тамо убо и сие пиша являет глаголя: яко службы бываемыя просто в местех, и в горах, и всюду без молитвенных домов арианское есть предание, тии се вообразиша]. глава 29 [послание 29. о антимисех]. Без антимиса бо дерзающих, в простых домех священнодействовати, святая древлеправославная церковь клятве предает. сице вопиющи [Потребник Иосифа патриарха Московскаго, иже печатан в лето 7160]: [Проклинаю всех еретиков, иже учат, кроме святых Божиих церквей, в простых домех службу жертвы приношения возносити]. лист 605. Суть же антимиси сугуби, ови путнии инии же местнии. Яко же той же преподобный Никон, в том же слове, пиша о антимисех, яко даются. и камо, и како на них надписание пишется, и являет сице: [Прочти антимиса, и тамо обрящеши, како пишут. Нови убо сице: одикон, рекше путное, пишет точию, еже где освятися, како дан бысть. Мало ниже: обаче обдержателне друзии антимиси пишут, яко олтарь во имя коего святаго, егоже яве яко есть имя. И прочти паки антимис, тамо обрящеши, како надписует: И еже в кую церковь дан бысть, и повелен, и освящен. И не пишет всюду, но на имя в церковь, идеже возложен бысть]. слово 29. И аще по сказанию преподобнаго Никона, антимиси даются не просто, и ни единем образом, но сугубым: Ибо едини даются от патриарха, или архиерея, кому прилучися в далечейший отъити путь, на сих написует: одикон, сиречь путное. точие где освятися. и како дан бысть. С сицевым антимисом, где любо аще прилучится, может непогрешителне священнодействовати. По премногу сему научает священноинок Матфей глаголя: [Иже со антимисом во особнем месте хижи, или корабли, божественым иноком отлученней, священнодействовав, или крестив, не осуждается, понеже и иже царем последующии причетницы на равнинах пустых священнодействуют, во единой убо отлученней в сие бумажней хижице]. глава 12, ОТ (800) состава. Сии же священницы сицеваго антимиса, сиречь путнаго, где даннаго, от коего патриарха или архиерея, с ним же бы на всяком месте свободно им было служити, всячески не имеют, яко не сущу им архиерею. не имуще же таковаго антимиса, како от места на место преходяще, дерзают священнодействовати, в простых домех? дерзающе же тако просто священнодействовати, не обрящутся ли, преступающе пределы божественых отец, арианствующе, и под клятвою от древлеправославныя церкве: друзии же антимиси даются во освящение церквей, и на тех надписуется, по сказанию Никона, сице: В кую церковь дан бысть, в той точию и власть имать к священнослужению, в прочих же местех ни. Сего ради, аще кто таковыя сняв с престола тоя церкве, в ню же вдан, возмет с собою, и дерзнет на нем без повеления архиерейскаго, в простом доме служити. сицевый обрящется под запрещением правила святых апостол 39. еже повелевает иереом ничтоже творити без воли епископа своего. якоже тое правило сказует сице: [без воли епископа своего, презвитери, или диакони да не творят ничтоже, тому бо суть поручени людие Господни]. Что же служити на нынешнем антимисе, зело нечестиво есть. Ибо шестый вселенский собор и в молитвенных домех, без воли епископа служити не повелевает, дерзающаго же презвитера из сана извергает, правилом своим 31, сице глаголя [Кормчая, лист 187]: [аще не своею епископа в церквице, яже есть внутрь дому, не принести жертвы. Толкование: Пятьдесять и осмое правило Лаодикийскаго собора, возбраняет в церквице сущей внутрь дому епископу, или презвитеру божественую службу творити: се же правило то отвращает, и с повелением того епископа, презвитером служити в церквицах сущих внутрь домов, без повеления епископа, творящаго презвитера измещет]. Ельма же убо без воли епископа, служащаго презвитера, 31 правило шестаго вселенскаго вселенскаго собора, из сана измещет. Како убо от изверженнаго из сана священника, могут быти совершенны тайны, сиречь крещение, и прочия? Блаженный Симеон глаголет: яко кроме архиерея, ниже священник, ниже жертвенник может быти отнюд, сице рекий: [иереи же не действуют без жертвенника. сие же чрез мир освящается. мир же чрез архиерея токмо совершается. и убо кроме архиерея, ниже священник, ниже жертвенник весма]. глава 77. И аще по Симеону, кроме архиерея ниже священник ниже жертвенник весма, уже ниже тайны, сиречь ниже крещение совершенно, ниже приношение, ниже иныя, яко не имать хиротонии от православнаго архиерея. и в лепоту, тако бо глаголет тойже Симеон: [Ничто же действовати священник может в Дусе, или иное что действовати, аще хиротонии не имеет: сия же от архиерея есть, ибо архиерейство чрез ню действует. (ниже) убо божественыя тайны, во всех священных, архиерейство действующее есть, и кроме его ниже жертвенник будет, ниже хиротония, ниже миро святое, ниже крещение, ниже убо христиане, темже чрез него истинное христианство, и вся тайны Христовы чрез него]. глава 77. И аще архиерейство вся тайны чрез хиротонию, от никонопоследствующаго архиерея, тем благоявлено яко никонопоследствующее архиерейство, чрез свою хиротонию, в священнице вашем, яко с первшею хиротониею священнодействует, вся тайны, крещение и приношение, совершает. Но понеже святии отцы сицевых якоже крещение, сице и хиротонию, якоже предпоказахом, всячески отмещут: убо унее есть святое крещение от простолюдина христианина прияти, нежели от священника не имущаго хиротонии, от православнаго архиерея, но самочинне дерзающаго священнодействовати, и без воли епископа, кроме антимиса, в простых храмех служившаго.

Глава, 29.

О еже аще Христос некиим обрядом и обеща до скончания века пребывати, обаче не пребыша преступления ради.

Суть же неции суть, от хотящих священство вечне пребывати утвердити, кроме архиерейства, иже глаголют: Како убо без священников возможно пребывати, и спасение получити, им же вся тайны церковныя поручены, и крещение, и евхаристия, и брак, и прочия: им же спребывати, даже до скончания века, сам Господь обеща. О чесом пишет в книзе О правой вере сице: [Не восхоте достояние свое неустроено оставити, на земли отходя на небеса но взем два сребреника, даде гостиннником, се есть старыи и новыи завет кому же дал. Кто гостинницы? Апостоли, и по них восприемницы их, пастырие и учителие, архиепископи и епископи, иже служителие суть величеству смотрения Его, им же спребывати даже до скончания века обетование сотвори]. глава 7 [лист 59]. Вемы и доволно известно вемы, яко обещася Господь пребывати всем верующым вонь до скончания века. Сам бо пречистыми своими усты рече: И се Аз с вами есмь во вся дни до скончания века. Мф. зач. 116. Но Господь спребывает нам тогда, егда мы хощем. Не бо всячески пребывает с нами, егда мы себе самих беззаконии своими и законопреступлении удаляемся от Него. Свидетель сему достоверен святый Иоанн Златоустый сице глаголющь [Беседы апостол., лист 2358]: [Сие и Господь завеща глаголя учеником: Се с вами есмь во вся дни до скончания века. Но сие бывает, егда мы хощем. Не бо всячески будет с нами, егда себе далече творим]. беседы апостольския. Возведи токмо зеницы очес твоих умных, и разсмотри прилежне священная писания, и абие не неимаши узрети, многажды обещающася нам спребывати Господа, во вся дни до скончания века, обаче не спребывает. Что убо солга ли? да не будет. Всяк бо человек ложь, един же Господь есть истина. Якоже сам о себе пречистыми своими усты глаголя послушествует: понеже недостойных себе сотвориша преступлением заповедей Божиих, обета Его. Сего ради отврати лице свое яко от недостойных, премени обет свой. И виждь ми, в начале, обеща Бог, землю обетованнную дати Аврааму, и семени Его во веки. Якоже явствует священное писание, сице глаголющее: [Рече Бог ко Авраму, яко всю землю, юже ты видиши, тебе дам ю, и семени твоему вовеки]. Бытия, глава 13. И паки: [И рече Бог ко Аврааму, ты же завет Мой снабди, и семя с тобою в род их, се есть, (ниже) во 8 день обрежете весь мужеский пол. (ниже) и будет завет Мой на плоти вашей в завете вечен]. глава 17. О чесом и царственный пророком Давыд вопия глаголет: [О чесом в век завет свой, слово еже заповеда в тысящу родов, еже завеща Аврааму и клятву свою Исааку, и постави я Иякову в повеление израилю в завет вечен, глаголя: тебе дам землю Ханааню, юже достояния вашего]. псалом 104. Разумей ми, рече: завеща Аврааму, и клятву свою Исааку, и постави ю Иякову, израилю в завет вечен, глаголя: тебе дам землю Ханааню, юже достояния вашего. Но понеже семя Авраамле недостойна себе сотвори наследствования земли обетованныя. Сего ради Бог пременив обет свой, разсея их во вся страны и языки вселенныя.

Паки: Повеле Господь Моисею и Аарону и всему израилю, вечно празднующе 7 дней ясти опресноки. еже засвидетелствует священное писание сице: [рече Господь к Моисею и Аарону, (ниже) чтите праздник сей Господу в родех ваших законно и вечно празднуйте 7 днии опресноки да ясте]. глава 11 [Исход]. Паки: Моисею Господь повеле, во еже бы Аарон и сынове его вжизали елей в храме свидения вечно, сице глаголя: [да вжизает Аарон и сынове его елей в храме свидения, всегда с вечера до заутрия пред Господем в закон вечный. в роды вашя, у сынов израилевых]. Исход, глава 27. Что убо пребысть ли сей завет Господень вовеки, и не пребывает ли? никакоже. Но что? Понеже сынове израилевы недостойных себе сотвориша ядения опреснок, и сынове Аарони вжизания елея в храме свидения. Сего ради Господь преложи обещания свое, избра себе новый израиль от язык, им же вместо опреснок, предаде пресвятую свою плоть ясти, и пречистую свою кровь пити.

Паки: повеле Господь Бог шесть дний делати, в день же седмыи, иже сть субота, препочити сыновом израилевым, сице рекии: [шесть днии да сотворите делеса, в день же седмыи субота, покой свят Господу. Всяк иже сотворит дело в день седмыи, смертию умрет. и да снабдят сынове израилевы суботы держати в роды их, в завет вечен, во Мне, и в сынох израилевых знамение есть вечное]. Исход, глава 31. Якоже и в книзе Левит, о том же дни заповеда Господь к Моисею: [Всяка бо душа, яже не покорится, в той день да потребится от людей своих. и всяка душа, яже творит дело в сей день, погибнет душа та от людей своих. всякаго дела да не творите, завет вечный в рождения ваша]. Левит, глава 23. Сей завет Господень, еже в суботу не делати, аще ли кто делает, смертию да умрет, пребысть ли вовеки? и пребывает ли? никакоже. ибо сыновы израилевы, преступлением заповедей божественых, недостойных себе сотвориша обетования Его. Тем и Господь Бог, отвратив лице свое от них, премени обет свой, преложи день суботный, пришедшу возлюбленному Его Сыну на землю нашего ради спасения, и воплотившуся от Духа Свята, и Марии Девы вочеловечьшуся и страсть свою благою волею претерпевшу, и воскресшу в третий день, на день недельный, еже есть воскресный.

Паки: обеща Господь жречеству Аароню пребывати вовеки, якоже священное писание о сем явствует: [Рече Господь к Моисею: и да облечеши Аарона в ризы святыя, и да помажеши и, и освятиши и, и да жрет Мне, и сыны его. (ниже) якоже быти им в помазание жречеству в веки в род их]. Исход. И паки: [И рече Господь ко Аарону: Се дах вам снабдение принос Моих, и от всех священных мне, от сынов израилевых, тебе дах я в старейшинство, и сыном твоим по тебе, закон вечныи]. книга Числ, глава 18. Сие обещание Господне, еже сыном Аароним до скончания века жречествовати, пребысть ли не пременно? или ни? ни, но пременися. Почто? Яко удалиша себе от Бога, но снабдение заповедей Его. Сего ради преложив обет свой, премени сынов Аароних священство на иное. устави бо священство новое не по чину Аароню, но по чину Мелхиседекову.

К сим же обеща Господь Бог к Соломону, освятити храм, его же он созда, и пребыти ту во вся дни, еже показуется от книг вторых царств: идеже пишет тако: [явися Господь Соломону и рече ему: услышах глас молитвы твоея, (ниже) и освятих храм сей, его же создал еси, еже положити имя Мое ту вовеки, и будут очи Мои ту, и сердце Мое во вся дни]. глава 9. Пребысть ли обещание сие Господне непревратно вовеки? никако. Но что? Егда бо весь израиль, презрев заповеди Божия, уклонися в развращенныя пути: егда царие израильтестии сведошася во идолопоклонство: егда священницы вознебрегоша о преданиих божественых, абие воздвигну Господь Навуходоносора царя Вавилонскаго, иже пришед с силою тяжкою, плени Иеросалим, и храм святая святых Соломоном созданный разруши, его же, многу времени мимошедшу, возобнови паки Зоровавель. обаче по четыредесятих летех, вознесения Господня на небеса, Тит Веспасиан царь римский пришед, по проречению Господню, со множеством сил военных, взяв плен Иеросалим, разори храм Соломоном созданный тако, яко ниже камень на камени остася. Се коль многократне, в ветхом завете, Господь израильтяном обеща, обаче обещание свое премени, не яко солга, да не будет, но яко не достоин удалением исполнения заповедей божественых обещавшагося Бога обета, сотворися, израиль. Но сия убо в ветхом завете. Посмотрим же и в новой благодати, како обещася Господь, святым своим учеником, чрез них же и всем верующим вонь. спребывати во вся дни до скончания века. якоже самая его пребожественая словеса, во священнем евангелии, у Матфея евангелиста положенная явствуют, сице: [Се Аз с вами есмь во вся дни до скончания века]. Мф. зач. 116. Обаче всем ли ответ свой сей ненарушимо соблюдает? всем ли обещание свое твердо и неизменно сохраняет? всем ли во всей вселенней, яже мнятся веровати вонь, нарицающимся именем токмо христиане, спребывает? никакоже никако. Что убо солга ли? да не будет. Но что? Яко себе далече совториша обещания Его. окалянием нечестивых ересей. Но кто суть таковии, взыщем? оставим восток, претецем юг, преминем север, коснемся запада, и не не абие уразумеем, кто суть таковии? Слышим бо от матере градовом, и царствующем на грады, преславнем и многословутем во градех, ветхом Риме, ему же бе первый епископ, православию основание и столп, и церкви божественное утвержение, верховный апостолом Петр. Якоже о сем пишет в службе святаго апостола Петра, сице: [бысть Риму первыи епископ православному граду основание и столп, и церкви божественное утвержение, и врата адова не удалеют воистину ей. Христос заповеда]. июля 30, 1 стихера. В коем граде Риме, толико вера процвете, толико прославися, яко солнце в поднебесней сияя, яко во всем мире, всем сведома бяше. Сего ради и блаженный апостол Павел, в начале всего благодарит Бога, о всех римлянех, яко вера их возвещается во всем мире. Сице бо пиша в послании своем к римляном, взывая глаголя: [Первое убо благодарю Бога моего Iсус Христом о всех вас, яко вера ваша возвещается во всем мире]. к рим. зач. 79. Елма же убо тогда и потом, блаженнейший папа ветхаго Рима, тако православием сияюще, вселенную просвещаху, тако благочестием блистающе, поднебесную яко солнце освещаху, тогда и Господь обещание свое исполняя и неотступно спребываше им. якоже сам глаголет: [Идеже еста два или трие собрани о имени Моем, ту есмь посреде их] Мф. Чесо ради мнев святый великий и равноапостольный царь Константин, яко приемницы святаго Селивестра, папы Римскаго, имуть седети на престоле, верховнаго апостола Петра, даже до скончания века православнии, устави повыну оттуду всем учителя себе приобретати. о чесом в повелении его царьском, данном святей соборней и апостольстей церкви, пишет тако: [святейшему и блаженнейшему отцу отцем поднебесныя, православному Селивестру епископу, и папе превысочайшему, великаго Рима, и всем сущим по нем преемником, святителем православным, иже на седалищи божественаго Петра до скончания века седящим. (ниже) [лист 6] И тамо до скончания века, и всегда поищут учителя, идеже святое почивает учителево тело]. Кормчая, лист 1 [по втором счете]. Что убо пребывают ли ныне в Риме православнии папы? никако. Требуют ли все страны восточныя, южныя, и северныя оттуду себе пастыря и учителя? ни, не требуют. Ибо, егда Лев папа, царствущу царю Константину в Царе граде, и матере его Ирине, отступи от подданства греческих царей, и помаза на царство в Риме Карула князя фряжскаго, иже приведе с собою священники и учители имущыя в себе ересь тайно Аполинариеву, и Македониеву, и Севирову, и Диоскорову, и Оригенову, и Евтихову, иже начаша развращати люди Господня, учити своим ересем [книга Кирилова, глава 25, о Римском падении, лист 227]. По преставлении убо Льва папы Римскаго. многим мимошедшим благочестивым папам Римским, друг другопреемне престол Римския церкве украшающим. восташа папы еретицы, их же многажды восточнии патриарси братолюбезне увещаваху, послании своими, от божественых писаний соборнными, во еже бы обратилися в первое благочестие, и с ними в соединение веры пребывали: но ничтоже успеша. егда же убо не восхотеша обратитися, и во единстве веры с ними пребыти, утвердиша бо ся во своей прелести невозвратно [Кирилова, лист 231]: Тогда Сергий патриарх Царя града, царствующу в Константинополе царю Василию болгарогубителю, в лето 6552, и прочии вселенстии патриарси, не точию в церкви в первых отложиша их поминати, но и извергоша и проклятию предаша. Что убо, егда папы Римстии, от восточных четырех первопрестолных вселенских благочестивых патриархов, сана, яко не достойни таковаго сана, извергошася, и проклятию предашася, пребывает с ними Христос? никакоже никако. Извергошабося из сана, отсекошася от соединения церькве, отделишася от тела церковнаго, отдалишася от главы Христа. К сим же како спребывает, таковому, иже толико над прочих святителей вознесеся, яко един, начало и господьство Сына Божия похитив себе, началом и главою церкве дерзает нарицатися? О нем же Мелетий патриарх Александрийский, в послании своем пиша изъявляет сице [Кирилова, послание патр. Александрийскаго Мелетия]: [Припояса бо себе Римский архиерей начало или власть некую мучителскую. и имя мучителства поддаде, еже всем блаженнейшым архиереом, и учителем вселенским посполито, сиречь, обще есть, Римскии же все единому себе привлачити насилует, папою хотяи называтися един, и един быти церкви началом и главою. ниже [лист 459, Даниил 7]: Ими же Сына Божия начало и господьство низлагает. Но сие велеречие зверю некоему свойственно быти проувиде Даниил муж желании. Которому зверю уста бяху велия глаголющая. нижше [лист 462, Даниил 7]: Или занеже уста велика глаголющая, иже проувиде Даниил пророк, яко и времена и закон пременити размысли]. послание 4. Сему согласно и творец книги О правой вере пиша глаголет [лист 186]: [При конце воспомяну Григория Великаго папежа, иже нынешнюю гордость папежскую презревши рек: Аз со дерзновением глаголю, иже кто кийждо вселенским нарицается епископом, или назван быти жадает, гордостию своею антихриста предваряет. Понеже кичением надувся, на иных возносится. И се уже исполнися Григориево проречение в нынешних папежах, иже из предел им описанных изступивше, и сие во Христове церкви, что имели между братиею, погубили, и тацы быша, яковым был первыи ангел, иже между братиею монархом быти восхоте]. Тем убо, по всем вышепредложенным свидетельством, егда толико папа, якоже оный ангел глаголемый Люцифер, сиречь светоносец, иже гордости ради наречеся Лицепер, еже есть светопагубник, вознесеся, яко начало и господьство Сына Божия похитив себе, началом и главою един дерзает нарицатися церкве, не спребывает ему Христос. И аще убо папе, и ему единомысленным, и последствующим, яко веры христианския нарушителю, яко преданий отеческих презирателю, яко новшеств насадителю, яко ересей насеятелю, яко от восточных патриархов благочестивых изверженному, яко проклятию преданному, Христос не спребывает: Проявлено яко и всякому пастырю, архиепископу глаголю и епископу, мнящим ся быти преемником апостольским, иже заповеди Божия преступиша, иже апостольския учения пренебрегоша, иже святоотеческая предания презреша, иже новины возлюбиша, иже ереси насеяша, иже седми вселенских и девяти поместных святых соборов, канонами священнаго сана обнажени клятве предашася, не спребывает Христос. Какоже спребудет Христос архиереом, иже аще и мнятся быти преемницы святых апостол, обливаемым крещением крещеным, или аще и трипогружателне, но обливаемое крещение с трипогружателным, за равно содержащим, и прочия вся новины купно с ними имущым, и им последствующым, и таяжде предания, и тыяжде догматы, тоежде учение содержащым, иже вседоброе таинство веры, еже сам Христос возносяся на небеса предаде, яко в благословении, тако и в знаменовании себе креста иже несогласно предвозвещению пророческому предвозвещенному, на трисоставнем кресте Христа распята, но на двочестнам возмудрствоваша, иже пресвятое имя Владыки Христа, ангелом нареченное, Iсус, отложивше, новаго некоего Iисуса восприяша, иже молитву Iсусову, Господи Iсусе Христе Сыне Божии, измениша, иже правила святых вселенских, и девяти поместных соборов отвергше, епитемий отложиша, иже святою древлевосточною церковию предание преданное, еже на седми просфирах проскомидии святыя литургии совершати, презревше, измениша? И что много глаголю, аще по единому вся исчисляти, яже привнесоша, отвергоша премениша не достанет ми времене ко исчислению. Коих ради преложений, отложений, и пременений божественными апостолы, и седмию святыми вселенскими, и девятию поместными соборы, анафеме предаются, рекше, отлучаются от всех, отторгаются от церкве, отчюждаются от Бога. От каковых сам Господь Владыка наш оберегая нас, повеле блюстися, глаголя: [Блюдите, да не прелщени будете, мнози бо приидут во имя Мое глаголюще, яко Аз есмь, и время приближися, не изыдите вслед их]. Лука, зачало 105.

И блаженный Павел апостол, сосуд избранный Духа Святаго, опасая нас от новшеств дерзающих новоблаговествовати, анафеме предая взывает: [Но аще мы, или ангел с небесе благовестит вам паче, еже благовестихом вам, анафема да будет]. галат. зач. 199. Святый же Григорий богословию тезоименитый, от ложне учащых удалятися, тако вопия [Соборник, лист 629]: [Не токмо же, но и пастыря добре ведуще, да не прельщаемся от ложных учитель, ниже послушайте яко пастырей, татей сущых и разбойников]. в слове на святую пасху. Сим споследуяй святый Василий Великий, аще кто кроме заповеди, или заповедь преступая, аще и ангел с небесе, или кто от апостол, аще и живот обещавая, аще и смертию страша, велит что ново творити, никакоже повелевает послушати, сице взывая глаголет [и Никон слово 17]: [Аще ли что чрез заповеди есть, или заповедь повреждает, аще и ангел с небесе, или кто от апостол заповедует, аще и живота обетование имать, аще и смертию претит, никакоже послушати подобает. Апостолу рекшу: Аще и мы сами, или ангел с небесе благовестит вам паче, еже благовестихом вам, анафема да будет]. глава 334. Святый же Иоанн Златоустый, толкуя словеса апостола Павла, не токмо тех, иже аще противная возвестят, или все превратят, но аще что и худое подвигнут, анафеме предает глаголя: [И не рече, аще противная возвестят, или превратят все, но аще и мало нечто благовествуют паче, еже благовестихом, аще и худое подвигнут, анафема да будут]. в толковании на послание к галатом. Сего ради преподобный Никон Черныя горы, повелевает слышателем божественых писаний наказанным, сиречь ученым быти, и согласующая писанием приимати, несогласная же отревати, сице глаголя: [Яко подобает наказанным слышателем божественых писаний искушати яже от учителей глаголемая, и согласующая убо писанием приимати, чюждая же не приимати. и таковых зелне отвращатися]. слово 17. Почто? [Ибо, глаголет тойже преподобный Никон, всяко уклонение от православных велений отпадение есть соборныя и апостольския церкве, якоже божественнии отцы глаголют]. глава 57. Темже блаженный Феодор Валсамон патриарх Антиохийский, в толковании на правило 32, Карфагенскаго собора, пиша глаголет: [Пишет, рече, святый Игнатий, иже глаголет паче, яже узаконена суть, аще бы был и верныи, аще бы и постился, аще бы и девьственник был, аще бы и знамения творил, аще бы и пророчествовал, волк тебе да мнится быти в кожи овчей, убийство овцам соделоваяи]. Потребник, лист 743. Сего ради в книзе Кирила Иеросалимскаго, прилагающых, или отъемлющих, или пременяющых что, никакоже повелевает слушати, аще и сам будет крайнейший учитель кто, но далече отбегати, сице глаголя: [Прикладающых что, или отъемлющих, или инако претворяющых, аще и сам будет крайнейшии учитель кто, никакоже слушати, но удалятися таковаго]. глава 34 [в слове о опресноцех, лист 305]. И святый вселенский собор всячески не попущает иную веру износити, или составляти. Якоже поведает преподобный Максим Грек, глаголя: [Повеле святый и вселенский собор сей иную веру никомуже попущену быти износити, или списовати, или составляти, или учити, или показовати. А иже смеют иную веру списовати, или составляти, или износити, тии, аще епископи будут или клирицы, да лишени будут, епископи убо от епископства, клирицы же от клироса, аще же простии будут, да прокленутся тии]. глава 5. Вселенский же учитель, святый Иоанн Златоустый, раздирающых соединение церковное, греха, глаголет, ниже кровь мученическая может загладити. Якоже пишет о сем в книзе О вере сице [лист 257]: [И о сем да слышит великаго всего мира учителя, святаго Иоанна Златоустаго, к ефесеом о раздирающих первое соединение церковное глаголюща: Муж некии святыи рече: ниже кровь мученическая сего греха загладити может. Святии паки отцы на соборе, разсуждение имеюще о таковой велицей погибели душ человеческих, оттуду исходящей, таково учения указание издаша: вся кроме церковнаго предания и учения, и изображения святых и приснопамятных отец объявляемая, или по сем содеянная, анафема трижды. Мы же правовернии сего трикратнаго проклятия убоявшеся не дерзаем ни в чем предания церковнаго повреждати. А иже сего небрежет сей делом искушение приимет вовеки]. глава 28.

Глава, 30.

Аще кто отступит от своего епископа, не греховнаго ради извета, но ереси ради содержимыя им. таковый от святых отец не казни, но чести достойныя сподобляется.

Аще бо святии отцы и повелевают папе во всем повиноватися, и достойную почесть воздавати: но егда во отеческих преданиих непреклонне пребывает. егда же не пребывает во отеческих преданиих, яко волка и душегубителя бежати повелевают. Сице в книзе О православней вере, печатаной во Острозе пишет [печатана в лета 6106]: [Яко пребывающа убо папу во отеческих велениих, достоит воздавати ему почесть, елику отцы повелеша, праведно бо. не пребывающа же, бежати того подобает, якоже волка и тлителя, сиречь сказицы церковнаго]. лист 146. Благоявлено отсюду, яко и всякому пастырю, архиепископу глаголю и епископу, иже во истинней христианстей вере непозыблемо пребывает, иже во отеческих преданиих тверде стоит, достодолжную почесть воздавати. Аще ли же вере христианстей ереси привсевают, и святоотеческая предания преступают, и церковное соединение разсекают, таковым не токмо не подобает последствовати, но и далече, яко врагов Божиих, и душегубцев отступати. И слыши о сем святаго Иоанна Златоустаго, златопозлащенным языком сице вещающа: [Яко подобает повиноватися учителем и священиком, и не судити их, аще и житие имут укорно, аще же о вере погрешат, тогда не подобает покарятися им, но и отбегати и судити их]. Беседы апостольския, лист 2508. Святии же отцы собора первовтораго, в 13 своем правиле, повелевают сице [Кормчая, лист 221]: [Аще которыи презвитер, или диакон, якоже се мня, сведыи своего епископа согрешша, прежде суда и уведения всех епископ собора, отступит общения его, и не поминает имене его в службе, да извержется, и всея священническия чести да будет лишен: последующии же ему, аще суть священницы, своея чести да отпадут, мниси же и мирстии да отлучатся, дондеже обратятся]. В четвертом же надесять правиле глаголют: [Аще которыи епископ тожде сице дерзнет сотворити на своего митрополита, да извержется, подобает бо комуждо своея меры ведати]. В пятом же надесять правиле сице вопиют: [Такожде аще которыи епископ, или митрополит, на своего патриарха таковая же дерзнет, всего святительства да будет лишен. Аще же нецыи отступят от некоего епископа, не греховнаго ради извета, но за ересь его, от собора, или от святых отец несведому сущу, таковии чести и приятия достойни суть, яко правовернии]. Сим согласно и преподобный Никон Черныя горы, взывает глаголя: [Аще которыи епископ, или презвитер, или митрополит, дерзнет отступити еже к своему патриарху приобщения, и не поминает имя по уставленному и учиненному в божественней службе: но прежде объявления соборнаго, и совершеннаго ему осуждения раздор сотворит, сему повеле святыи собор всего священства всячески чюжду быти, аще токмо обличен будет се законопреступив. И сия убо уставлена быша и запечатлена, о еже виною неких согрешении отступающих своих первопрестолник, и раздор творящих, и соединение церковное раздирающих. Иже убо ереси некия святыми соборы и отцы отреченныя, еже к первопрестолнику приобщения себе отлучивше, оному ересь яве яко в народе проповедающу, и не покровенною главою в церкви учащу. Таковии не точию правилному запрещению не подлежат, прежде соборнаго разсуждения себе к зовомому епископу приобщения отделяюще: но и подобающия чести православным сподоблени будут. Не бо епископом, но лжеепископом и лжеучителем зазреша, и не раздором церковное соединение ссекоша, но раздирания и разделения церковь потщашася избавити]. слово 40. Подобне и преподобный Иосиф Волоколамский научает, глаголя: [Иже убо ереси ради некия, приобщения себе отлучивше епископа, таковии правилному запрещению не подлежат: но и подобающия чести православным сподоблени будут. Не епископом бо, но лжепископом и ложным учителем  зазреша, и церковное соединение не раздраша, но раздрания церковь и разделения потщашася избавити]. слово 12. Зриши ли колицы и каковии божественнии отцы, отступающих от своих епископ сообщения, не греховныя ради вины, но ереси ради проповедуемыя им в народе, не токмо правилному запрещению не подвергают: но и подобающия чести православным сподобляют.

Глава, 31.

Яко и кроме видимых церквей, и священников спасение возможно есть получити.

Что убо, еда ли не имуще священников, невозможно во благочестии пребывати, ей возможно? Еда не имуще священников, невозможно понужде, таин церковных нуждно потребных ко спасению, их же кроме неудобно есть наследником царствия небеснаго быти, совершити? Ей возможно. Еда не имуще священников, невозможно спасения получити? Ей возможно. И слыши богодухновенных отец, иже научают ны сему явственно. Сице бо святый Великий Афанасий, архиепископ Александрийский, возглашая глаголет: [Шествующии же непрелестный и живоносный путь, око убо да извержем не чювственное, но умное, сиречь аще епископ, или презвитер, сущии очи церковнии, неподобне живут, и соблажняют люди, подобает изврещи их. Уне есть вам без них собиратися в храм молитвенныи нежели с ними воврещися, якоже со Анною и Кайафою, в геенну огненную. Подобне же и рука, еже есть диакон, аще недостойно что творит, да отлучится жертвенника. Нога же, еже есть слуга, аще зле течет во лжю, и ко приятию имении, по Гиезии, подобает и сего от служения чюжа творити, яко люта и несмысленна человека, да церковь собираема без соблазна хранится]. Никон Черныя горы, слово 7. Видиши ли яко святый Афанасий Великий повелевает глаголя: уне есть без них, (сиречь без епископов и священников) собиратися в храм молитвенный, неже с ними воврещися, якоже со Анною и Кайафою, в геенну огненную. Он вопиет, уне есть без них, и ты глаголеши, невозможно без них быти. Но гряди прочее дале, и слыши, како не неподобне сему, и святии отцы афонстии, в послании своем до белорусцев пишут, повелевают отступати от отступивших благочестия сице глаголюще [книга Кирилова 10 послание, лист 505]: [Многа бо имех писати вам, о прелести антихристова хитрости, злобы, лукавства, ухищрения, како се упестрил различне, и вооружил на церковь Христову, хотя погасити семя веры в верных: Но ныне несть время. Сего ради толико вам мало обнажим, отступников благочестия. да ся ими не прелщаете, яко пастыри отступиша или заблудиша, яко и нам не мощно без них сохранити? но несть тако несть. Мощно бо быти без них, занеже Бог их из Церкве изгнал и обезчестил. Понеже недостойне тыя престолы содержат, и то имя на себе носят. И не мни яко слава им се, но безчестие, и вечное отпадение Христа и свытых Его]. послание 10. Сим согласно и святейший Мелетий патриарх Александрийский, пиша к народом малыя и белыя Руссии похваляет ревность и крепость их в вере, яко не соотступиша с пастыри, и сказует яко возможно без них спастися, сице глаголя [книга Кирилова, лист 467]: [Мужие российстии, благочестия воспитание православия заступницы, иже произволением уже и мученицы, в державе царства сопротивистеся о благочестии подвизаеми, не убо на иже от Бога данныя власти высящеся, но Божию любовь всех иных предпочитающе, иже истинныя веры усердие являюще. ниже: Ибо учинени бывше владычествовати вами пастырие волцы суще, и отступивше добраго стада Христова, не токмо расточити вас, или убити, или погубити возмогоша, но в болшую ревность совоздвигоша. Вы бо восприясте пастырскую ревность, и злых пастырей отлучистеся, иже истины отступивших, и благочестия ради человеческия славы позыбляти убо начавших, невозмогшых же Божиею благодатию. о овчата христоименитая, и воистину Христовы, и от Христа научившиися, чюжих не послушати гласа. ниже последовати чюжим! о ангели земнии подражающе небесных, и сопострадавше небесным. еже не ниспасти с денницею! чюдо велие, како отврати, вас Божия благодать от епископов ваших. ох прелести нынешнии возлюбивших век. и отвратившихся вспят, и благочестия и православия отступльших. вы пребысте столпи незыблеми, недвижими, во иже отцы преданном учении Спасове, апостольском, святительском, с ними же и венцы венчатеся, вем, добре венцы онеми правды, иже, якоже глаголет Павел, течение совершившым, и веру соблюдшым во обетовании лежащими, праведныи воздает Судия во он день]. послание 5. Се коликими и каковыми похвалами ублажает святейший Мелетий, не последующых пастырем своим, архиепископом, епископом, и священником волком сущим, святоотеческаго благочестия отступившим, святоправославныя веры отвергшимся, святоцерковных преданий отпадших. Нарицает благочестия воспитанием: нарицает православия заступниками: нарицает овчатами Христовыми: нарицает произволением мучениками: нарицает овчатами Христовыми: нарицает ангелами земными подражающими небесных. Наконец приложи: яко понеже во отци преданном учении, Спасове, апостольском, святительском, пребыша, с ними и венцы правды во обетовании лежащими, венчаются во он день. И како невозможно без священников спастися? ей возможно. Аще бы невозможно: не бы святый Афанасий глаголал: уне есть без них, рекше епископов и священников, отступивших православия, в храм молитвенный, неже с ними собирающеся, воврещися, якоже со Анною и Кайафою в геенну огненную. Аще бы невозможно: не бы отцы афонстии глаголали. яко возможно и без них быти. Аще бы невозможно: не бы Мелетий толикими и таковыми похвалами ублажал не последствующих им. А понеже святый Афанасий глаголет: уне есть без них собиратися: понеже отцы афонстии сказуют, яко возможно и без них быти: понеже Мелетий толикими и таковыми похвалами, непоследствующих им ублажает: убо есть возможно спастися. Но возведи токмо зеницы очес твоих умных, воззри в древняя времена, колици православнии христиане, в первенствующей церкви, в гонительныя случаи, церквей видимых не имяху, ниже священников, обаче православнии христиане быша и спасошася. яково что глаголю: Во дни святых апостол, святый апостол Филипп, не имый священства, егда бысть гонение велие на церковь Иеросалимскую, пришед во град самарийский, проповедая Христа, множество от граждан мужей и жен, научив вере Христове, крести [Деяния зач. 17 и 18]. кии не имяху тогда церквей видимых, не имяху священников, еда не быша истиннии христиане? ей быша. еда не возмогоша спасение получити? ей возмогоша. Во времена царствования царей нечестивых царствовавших в Риме, в гонителныя случаи, колицы мужие и жены, их же мирстии человецы от еллинства обративше крестиша, быша, еже не имяху видимых церквей, не имяху священников, еда не быша они правовернии христиане? ей быша. еда не быша сынове кафолическия церкви? воистину быша. Но и во времена царей мнящихся быти христиан, ересми же поврежденных в гонителныя случаи, гонение воздвигшим еретиком, христиане церквей видимых не имяху. якоже свдетельствует Бароний, в лете Господнем 211, глаголя: [яко христиане церквей во оно время не имяху]. И Василий Великий, о гонении арианстем, к западным епископом пиша глаголет: [Людие церквей не имеют, и в полях пустых собираются]. [епистолия 1]. В сих убо гонениих, толицы народи не имуще священников, не имуще видимых церквей, еда не в православней вере живяху? ей в православней. еда не во святей кафоличестей церкве бяху? ей в кафоличестей. еда не благочестивии христиане бяху? воистину благочестивии. И не токмо кафолическия церкве сынове бяху: но и от воинствующия церкве, к ликующей на небо, яко во свое отечество свято преселишася.

По гонителных же случаех во время церковнаго мира, преподобнии отцы, в пустынях поселившиися, елицы отшелницы, елицы безмолвницы, елицы скитницы бяху, не имущии архиереов, не имущии священников, обаче сущая быша чада церкве, и сущии уди церковнии. Не бо закон разоряху, не приемлюще священство держати. Якоже о них преподобный Ефрем Сирин глаголет: [совершени суть, и исполнени правды, зане суть уди церковнии. Не разлучают себе от стада, зане чада суть святаго просвещения. Не закон разоряют, не приемлюще священство держати, но заповеди хранят, не противятся закону, тепли суще верою. ниже: церкви имут языки своя, ими же совершают молитвы своя прилежныя. ниже: Сами суть священницы себе, и исцеляют наша недуги, молитвами своими]. слово 111 [о отцех скончавшихся].

И аще безчисленнии народи, иже во время гонительная, ови от идолопоклонников бегающе крыяхуся, друзии же от еретиков удаляющеся особь собирахуся, иже не имуще священников, не имуще видимых церквей, непоколебимо в вере православней живяху, ненарушимо святоотеческая предания содержаху, непозыблемо святоцерковныя законы соблюдаху, истиннии сынове апостольския церкве быша, и от воинственныя церкве, к ликовствующей на небо, яко во свое отечество свято преселишася: Аще во времена мирнаго состояния церкве, преподобнии отцы, удалившеся мира, в пустынях поселившиися, коль премнози отшелници, коль премнози безмолвницы, коль премнози скитницы, не имеша архиереов в пустынях но веру православную в себе имеша: не имеша священников, но святоотеческия догматы крепце содержаша: не имеша рукотворенных церквей но чада соборныя церкве и быша и глаголашася. И не токмо зде, но и в весельствующей церкви, на небесных водворившеся, общии заступницы предлежат человеческому роду. Како убо и нынешняго последняго века, всякаго плача достойнаго, христиане, иже древлецерковное благочестие лобызающии, гонения ради, или иных вин благословных, не имут священников: но имуще священную христианскую веру ненарушимо содержат: не имут архиереов: но имуще непременно святоотеческая предания соблюдают: не имут рукотворных церквей: но имуще непозыблемо святоцерковныя законы, по нужде нуждныя случаи действуют, еже есть крещают. [не гордости ради и кичения, но спасения ради душ своих] еда не в православней вере суть? ей в православней. еда не суть православнии христиане? ей православнии. еда не суть святокафолическия церькви чада? ей святокафолическия. И аще тако есть, якоже и есть: убо безпрекословно, аще веру христианскую ненарушимо до скончания своего соблюдут, и дела добрая имети будут, и от воинствующыя церкве, пресилившеся на небесная, в торжествующей, могут от Бога жителство себе получити. Вемы бо яко Христос Спаситель наш, не токмо со ученики своими обещася, и с их преемниками, священными архиереи, но и со инеми веруюшими вонь, и последствующими стопам Его, пребывати. Явственно о сем свидетельствует святый Иоанн Златоустый, сице глаголющ: [Слыши Христа глаголюща ко учеником: шедше научите вся языки, крестяще их во имя Отца и Сына и Святаго Духа, учаще их блюсти вся, елика заповедах вам, и се Аз с вами есмь до скончания века. Не точию сия ко оным рекошася: но и к нам, яко бо не оным точию обещася, явлено от еже рещи, до скончания века, но и с шествующими по стопам оным]. к солуняном, глава 3. [беседа 45]. Понеже якоже начаток в первенствующей церкви христианства в гонении бяше, подобне и в скончании века христиане имут в гонении же пребывати. Якоже о сем явственно показуется от книги О веры, в ней же пишет тако: [Подобно начаток Христове церкве, с концем согласуется. ибо первее триста лет в неволе бысть, тако и останок в том же скончается]. глава 20 [лист 186].

Глава, 32.

Яко не имый истиннаго крещения и хиротнии, не может инаго крестити.

Аще ли же, по вашему мнению, кроме священника христианину невозможно быти, и спасения получити. Священника же таковаго, иже бы от православнаго архиерея рукоположение имел, имети невозможно есть. Что тогда творити должно есть? Убо ли последовати должни священнику, иже хиротонию имать от в ересех состоявшаго архиерея? Но како таковому священнику имамы последовати, иже, якоже сам источник священства, архиерей, глаголю, вся новопредания, вся новодогматствования, вся новозаконоположения содержит, и прочим содержати повелевает, не хотящих же прияти и содержати, тяжкими клятвами и анафемами облагает? Како же и Спасово повеление, якоже выше рехом, повелевающее не последовати привносителем новшеств, истинно будет? Како и святаго апостола на дерзающих новоблаговествовати анафеме предание, правилне будет? Какоже и божественых отец, из них же, ов ложне учащих не повелевает послушати, ов же чрез заповеди учащых никакоже повиноватися повелевает, ин и мало нечто благовествующых, паче благовещеннаго, анафеме предает, иншии прикладающих что, или отъемлющых, или инако претворяющих, никакоже слушати, но удалятися заповедает, повеление праведно будет.

Глаголеши ли, яко священник, егда приходит к по вам соединению, отрицается всех ересей и новин. Отрицаяжеся всех ересей и новин, не соотрицается ли и своего архиерея хиротонисавшаго его? всяко речеши отрицатися. аще отрицается архиерея. не соотрицается ли и хиротонии его? Благоявлено яко соотрицается. Ибо отрицаяся рукополагающаго и, соотрицается и нехотяще и происходящаго от него рукоположения. И аще соотречеся хиротонии, остается прочее не ктому уже имать хиротонию. Не имый же хиротонии, яко не сущу вам православному епископу, иже бы воспохиротонисал его, то како тако без хиротонии дерзает священнодействовати? Не слышал ли еси блаженнаго Симеона Солунскаго, глаголюща [глава 77]: яко ничтоже может действовати в Дусе, или иное что аще хиротонии не имеет; от таковых бо и крещени не крещени, суть, по того же Симеона.

Глаголеши, яко с первшею хиротониею действует. И аще с первшею: еда возможно от таковаго архиерея, иже в толиких и таковых ересех состоит, его же их ради священная правила, якоже в прешедших главах предпоказахом, не токмо воспохиротонисати, но и покрещевати повелевают, хиротонию прияти? И аще возможно, како будут истинствовати словеса святых апостол, повелевающая от еретик приемшаго хиротонию воспохиротонисовати? иже глаголют тако [Кормчая, глава 19]: [дващи поставленныи и с поставльшим его да извержется, аще не будет еретическая рука первая. От толкования: Аще не прилучится, яко от еретик поставлен бе первее. ибо от тех крещеннии некрещени, и поставленнии не причетницы]. правило 68. Како же будет и Никон Черныя горы повелеваяй, не приимати от еретик хиротонии, правдоглаголати? иже глаголет тако: [аще объявлено есть, яко от еретик имать рукоположения, от таковых поставленым или крещеным, ниже верным, ниже причетником, мощно быти]. слово 63. Аще же словеса святых апостол, повелевающая, имущаго от еретик хиротонию воспохиротонисати истинна суть, якоже и суть: И аще Никон праведно глаголет, якоже и есть, яко от еретик поставленым или крещеным, ниже верным, ниже причетником мощно быти: убо всевсячески от архиерея в ересех состоящаго хиротонии невозможно есть прияти. Почто: Понеже творимое таковыми освящение не освящает освящаемых, но паче оскверняет. Якоже Матфей Иеросалимский свидетелствует глаголя: [Аще от еретик хиротонию приял бе, отметаем бо таковых, якоже крещение, сице хиротонию, не бо освящение сия, но скверну веруем исходатайствовати]. глава 24 [состав X (600)]. Ащели же приемлеши священника с первшею хиротониею священнодействующа, всяко и нехотяща сприемлеши никонопоследствующаго хиротонисавшаго его архиерея. Понеже архиерей чрез хиротонию вся тайны священником действует. Явственно о сем свидетелствует блаженный Симеон Фессалоникийский сице глаголя: [Ничто же действовати священник может в Дусе, или иное что действовати, аще хиротонию не имеет, сия от архиерея есть. ибо архиерейство чрез ню действует]. глава 77. И аще архиерей чрез хиротонию священником действует: благоявлено яко приемлеши хиротонисавшаго и архиерея. Аще ли же не приемлеши хиротонисавшаго и архиерея, всяко ниже должен еси свосприяти и хиротонисаннаго от него иерея. Понеже аще корень свят, то и древо, аще ли корень ни, убо ниже древо.

Темже убо аще святии апостоли, от еретик приемшаго хиротонию яко неимущаго отмещут: аще преподобный Никон Черныя горы сказует, яко от таковых поставленым или крещеным, ниже верным, ни причетником мощно быти: аще блаженный Феодор Валсамон, и прочии святии отцы, их же в вышших главах, во свидетельство представихом, повелевают воспохиротонисати первшему иерейству скверне непщуемей, и яко не бывшу вменяему: Аще священноинок Матфей поведает, яко таковых хиротония не освящает приемлющих ю, но паче оскверняет: Убо от никонопоследствующих архиереов, приемших хиротонию иереов, всячески подобает воспохиротонисати. аще бы не подобало от еретик первее хиротонисанных воспохиротонисати: не бы святии апостоли отметали таковых хиротонию: не бы преподобный Никон глаголал, яко от таковых поставленным или крещеным, ниже верным, ни причетником мощно есть быти: Не бы блаженный Феодор Валсамон, и прочии святии отцы повелевали таковых воспохиротонисати: не бы священноинок Матфей рекл, яко таковых хиротония не освящает приемших ю, но паче оскверняет. Но понеже и святии апостоли от еретик действуемую хиротонию отмещут: Понеже и преподобный Никон глаголет, от таковых поставленым или крещеным, ниже верным ни причетником мощно есть быти: Понеже блаженный Феодор Валсамон, и прочии святии отцы от таковых хиротонисанных повелевают воспохиротонисовати первшому иерейству скверне непщуемей. и яко не бывшу вменяему. Понеже священноинок Матфей глаголет, яко таковых хиротония не освящает приемшых ю. но паче оскверняет: убо подобает и от никонопоследствующих архиереов, в толиких и толь премногих ересех состоящых, приемшых хиротонию иереов неотрочне воспохиротонисовати. Но понеже несть православнаго архиерея, иже бы повнегда обращаются, воспохиротонисах я. Тем благоявлено яко уне есть, по словеси блаженнаго Афанасия Великаго, без них пребывати, содержаше веру православную, пещися о спасении душевном: нежели приявше их, со отверженною святыми апостолы и божественными отцы хиротониею, лишитися купно с ними и православныя церкве и царства небеснаго.

Глава, 33.

От в ересех состоящаго иерея и еретическую имущаго хиротонию, не может совершенно быти крещение.

Рекохом убо прежде, и ныне паки глаголем, яко всяк священник, иже в ересех пребывает, и рукоположение свое от еретичествующаго архиерея имать, не имать в себе Духа Святаго. яко имать в себе дух диаволь, им же противится Святому Духу. о чесом достоверно свидетельствует кир Зиновий Отни пустыни инок, сице глаголя [свиток многосложный, глава 12]: [имать бо всяк еретик в себе дух диаволь, темже и противится Святому Духу]. Сей же никонопоследствующий священник, иже толико премногобогатообильствует различными ересьми, их же ради страшными клятвами облагается, и анафемам предается, о чесом в прешедших главах третияго предела, явственно предпоказахом, иже хиротонию имать, от архиерея не трипогружателне крещенаго, аще ли и трипогружателне, но обливание за равне ему с трипогружателством соисповедующаго, и тыяжде новины, тыяжде ереси содержащаго, каковых божественнии отцы хиротонию всячески отмещут, и ниже священника вменяют быти, кии дух имать, и на от него совершаемая таинства которыи дух приходит. Святый ли, но како приидет, идеже соперник Его пребывает. яве яко не приходит. аще же не приходит Дух Святый на действуемая Им таинства, то како Бог действует тем. аще бо не действует Бог тем, то кая полза от него приимати тайны, крестивыйбося от таковаго несть крещен, причащаяися не совершенным тайнам причащается, благословляяися не приемлет благословения, сего ради ниже христианин есть. велегласно о сем златоглаголивый отец наш Иоанн златым языком вещает глаголя [к Тимоф. посл. нравоуч. 2]: [аще бо тем (рекше священником) ничтоже Бог действует, ниже благословения приемлеши, убо ни христианин еси]. И аще от таковаго священника, им же Бог ничтоже действует, крестивыйся несть крещен, причащаяися не сущым тайнам причащается, благословляяися не приемлет благословения, тем ниже христианин есть, то како от таковаго священника крестившагося, егда приходит ко истинней христианстей вере, не подобает паки второе совершенно святым крещением крестити, зело подобает. Аще бо крещение от никонопоследствующаго священника действуемое приемлеши, почто не свосприемлеши тех же догмат, их же он лобызает, почто не свосприемлеши тех же преданий их же он крепце соблюдает, яково что глаголю: почто не знаменаешися треми персты, якоже он? почто не содержиши символа, якоже он? почто не исповедуеши Христа распята на двочастнем кресте, якоже он? почто не причащаешися тем же тайнам, им же он? и что много исчисляю: почто всех новопреданий, Никоном патриархом преданных не содержиши, их же он? Аще бо крещение действуемое им приемлеши, всяко должен еси им содержимую свосприяти веру. понеже вера и крещение два образа равна себе еста и неразделна. яко же глаголет блаженный Никита Ираклийский. аще вера и крещение два образа равна себе и неразделна, ты же како, сопротивяся толикаго богословца учению, дерзаеши неразделимая разделяти крещение яко истинное от него действуемое приемлеши веры же содержимыя им яко не истинныя не приемлеши. аще бо крещение от него приемлеши, безпрекословно долженствуеши в веру им содержимую свосприяти. аще ли же веры им содержимыя не приемлеши, то како приемлеши от него крещение, корень убо приемлеши, яко здрав, древа же не приемлеши, яко гнило? и кто бы сему разсуждению не почюдился/ Аще бо корень здрав всяко и древо, аще ли древо гнило неотрочне и корень. Понеже древо корене никогда не разлучается, неразлучным бо совокуплением совокуплено есть. аще ли же древо корене разлучится, всяко умерщвяется. сице бо о сем глаголющу блаженному Дамаскину [книга жития Иоасафа царевича]: [крещение есть корень святыя непорочныя христианския веры яко твердое основание]. И аще по Дамаскину, крещение есть корень веры, вера же есть древо, на крестителном корени всегда стоящая, и никогдаже его разлучающаяся. ты же аще крещение действуемое им приемлеши, непщуя яко право и истинно долженствуеши и веру им содержимую на крестителном его корени стоящую, яко праву и истинну неотрочне свосприяти, аще ли же веры им содержимыя, яко несть права и спасителна, не приемлеши. убо ниже крещения действуемаго им, яко несть право и очистително грехов должен еси прияти. не свое се тебе предлагаю: но слыши блаженнаго Иоанна Никейскаго трубы велегласнее о сем сице вопиюща [Кормчая писменная в слове на армены]: [темже проявлено, аще крещение их и вся яже от них содеваемая, не приятна и не потребна суть, аще и тщатся несмысленнии и неразумнии и неутвержении, и лживии христиане, яко истинна и благоприятна творят деяния их. аще бо вера их права и благоприятна есть да будет и крещение их приятно. аще же вера их не приятна есть како крещение их приятно]. Видиши ли яко и блаженный Иоанн не разделяет веры от крещения, ты же како сопротивоборствуя толиким богословцем дерзаеши неразделимая разделяти. крещение убо яко право приемлеши, веру же яко неправу отреваеши. аще бо вера содержимая им несть права и спасителна. како крещение действуемое им право и спасително? благоявлено яко несть. аще несть душеспасително: како будет очистително и изнурително грехов крещающагося? поистинне несть. сице бо святым отцем вопиющим: крещение еретическое несть крещение, но паче осквернение. и аще несть очистително и изнурително грехов крещающагося то како возможно прияти е? отнюд невозможно. аще же невозможно яко же и есть. убо всякаго кроме прекословия от новодействуемое имущих крещение приходящих ко святей древлеправославней христианстей вере, неотрочне подобает паки второе совершенно святым крещением крестити.

Глава, 34.

О иже крещаются в новопроповедуемаго Iисуса не крещаются тии во Iсуса Сына Божия.

Хотел бых уже слову моему конец положити, но вем сопротивоборствующих неукротимость разума возскачющагося и высоце возносящагося, сего ради да не возносит злоба брови над истину. вознамерих еще вопросити тя. ты же ми отвещай любезне. темже и глаголю: рцы ми о любезнейший великороссийския ныне церкве архиереи и ереи, и прочии им последствующии народи в того ли Iсуса Христа Его же архангел Гавриил пресвятей пречистей и преблагословенней приснодеве Марии во время благовещения благовести глаголя [Лк. зач. 3]: [се зачнеши во чреве и родиши Сына, и наречеши имя Ему Iсус] веруют или во инаго? речеши ли в Того? всяко имаши солгати на свою главу. еда не слышиши самех нынешния церкве пастырей и учителей исповедающих, яко они во инаго Iисуса веруют. сице о сем явственно засвидетельствует Димитрий митрополит Ростовский, глаголя [Розыск, часть 1, статия 1]: [в руском же языце расколщики в две токмо силлябы глаголюще Iсоусъ не исповедуют Спасителя и Исцелителя душ наших, и вправду в них ин Iсъ]. Виждь ми разум словес Димитриевых, аще бо рече у нас ин Iсъ, неотрочне у них иный, его же архангел Гавриил не благовести, его же святии апостоли не проповедаша, вонь же никтоже от святыя древлеправославныя церкве сынов не вероваша, егоже божественный Павел апостол, утверждая нас не бо от человек, но ангелом нареченнаго Iса веровати [Мф. зач. 2], не повелевает отнюд приимати но отскакати, сице пиша к коринфом вопиет [зач. 191], глаголя: аще бо грядыи инаго Iсуса проповедает, Егоже не проповедахом, добре бысте прияли. еже святый Иоанн Златоустый толкуя, добре бысте прияли, глаголет тако [беседы лист 1374 и 1376]: [и убо сего ради не достояше приимати, но отскакати]. Почто? ниже наведе: [зане лицемерие творяще ины вводяи догматы]. Сего ради и страшне, блаженный Павел вопиет глаголя [к коринф. зач. 166]: [аще кто не любит Господа нашего Iсуса Христа, да будет анафема]. Что убо верующе во инаго Iисоуса, не веруют ли во инаго бога. ей всяко. понеже Iсус Христос есть Сын Божий и Бог. яко же глаголет святый апостол Петр [Мф. зач. 66]: Ты еси Христос Сын Бога живаго. Еже и святый Афанасий Александрийский утверждая глаголет [символ о вере]: яко Господь наш Iсус Христос Сын Божий Бог и человек есть. Подобне они и сами утверждают, яко Iисус есть Бог сице бо глаголют [Жезл новопечатн. лист 86]: [аще кто не исповедует Iисуса Христа быти Сына Божия, да будет анафема]. Зде убо рцы, верующе во инаго Iисуса, коего Iса смерть крещающеся прообразуют погружающеся в купели? Того ли: Его же пророцы провозвестиша? Глаголет бо Исаия пророк [книга Кирила Иеросалимскго, оглашение 9]: се Спас тебе приидет, имыи с собою мзду свою Ему же ангел имя предрече? его же святии апостоли проповедаша. в него же святии божественнии архиереи престолонаместницы апостольстии и преподобнии, и вси православнии христиане верующе безчисленная знамения и чюдеса сотвориша? или новопроповедуемаго ими? коего пророци не провозвестиша, святый архангел не благовести, святии апостоли не проповедаша, божественнии отцы и вся древлеблагочестивая церковь не прияла и не веровала. речеши ли в того. его же пророци провозвестиша, ангел нарече, святии апостоли проповедаша, вонь же вся древлеправославная церковь веровала? всяко имаши солгати. не сами ли они яве свидетелствующе о себе глаголют. яко новопроповедуемаго ими Iисуса, вонь же веруют, ими же исповедуют и спасение себе получити, смерть крещающеся в купели изображают: и слыши, сице бо они чтуще послание святаго апостола Павла глаголют [к рим. зач. 91]: елицы во Христа Iисуса крестихомся, в смерть его крестихомся. Видиши ли яко в новопроповедуемаго Iисуса крещающеся, смерть его изображают.

Зде убо ми вонми раума сих словес. аще бо сии крещающеся в новопроповедуемаго ими Iисуса, в смерть его крещаются. крещающежеся в смерть его не крещаются во истиннаго Iсуса Христа, вонь же вси древлеблагочестивии, елико духовнаго толико и мирскаго чина, людие, крещающеся. смерть его изображаху. и изображающе же смерть Его, быша сообщницы смерти Его. бывше же сообщници смерти Его, будут общницы и воскресения Его. сии же иже веруют в новопроповедуемаго ими Iисуса его же и смерть крещающеся изображают, будут ли общници воскресению Христа Бога нашего, речеши ли будут то како святый Василий Великий, труба церковная вопиет глаголя [минея четия Макария, август]: [аще не сообщник будеши смерти Его, како общник будеши всокресению Его]. Зриши ли, яко не бывшу сообщником смерти Iсуса Христа невозможно есть быти общником и воскресению Его. о чесом и позлащенный усты Иоанн восклицает глаголя [к рим. беседа 10, лист 159]: [аще бо смерти приобщился еси и погребению, колми паче воскресению и жизни]. Но и вся древлеблагочестивая церковь от лица Христова взывает вопиющи [канон предпраз. на павечернице, генваря 4, песнь  7, ст. 3]: [со Мною аще кто снидет и погребется крещением, со Мною славы насладится и воскресения Христос ныне возвещает]. От коих божественных отец словес явственно показуется, яко аще кто снидет со Христом Iсусом, и спогребется Ему крещением, той точию и славы с Ним насладится и воскресения. благоявленно яко ниже не снидет со Христом Iсусом и не спогребется Ему крещением, не насладится той всячески славы с ним и воскресения. елма же убо аще сии, иже веруют в новопроповедуемаго ими Iисуса не бывают сообщницы смерти Его, будут ли общницы воскресению Его? ей не будут. Аще не приобщаются и не спогребаются Iсусу Христу крещением, приобщатся ли воскресению и жизни вечныя, всяко не приобщатся. аще не снисходят и не спогребаются крещением со Iсусом Христом насладятся ли славы будущия и воскресения с Ним? отнюд не насладятся, разве со Iисусом. и в лепоту. понеже бо крещающиися в новопроповедуемаго Iисуса, не бывают сообщницы смерти Iсуса Христа Бога нашего. не бывше же сообщницы, по словеси Василия Великаго смерти Его, не будут общницы и воскресению Его тем ниже славы Его будущия насладятся. и аще тако есть, якоже и есть то како таковое возможно есть прияти крещение, в нем же крестяися в новопроповедуемаго Iисуса не изображает погружаяся в купели, смерти Iсуса Христа Бога нашего, не изобразив же смерти Его, ниже может быти общник и воскресению Его? зело невозможно. како возможно таковое прияти крещение, в нем же крестяися в неслыханнаго Iисуса, не приобщается тридненощней смерти и воскресению Iсуса, не приобщивжеся смерти Его, не может приобщитися всячески воскресению и жизни вечныя? отнюд невозможно. како возможно таковое прияти крещение, в нем же крестяися в непроповеданнаго святыми апостолы Iисуса, не снисходит и не спогребается Iсусу Христу крещением, но Iисусу, не спогребыйжеся Ему крещением, не может насладитися с Ним воскресения и славы будущия святых, всячески невозможно.

Аще бо приемлеши новодействуемое в новопроповедуемаго Iисуса крещение, яко истинное с восприемлеши всячески и самого того Iисуса его же пророцы не прорекоша, апостоли не проповедаша святая древлеправославная церковь не прияла яко истиннаго Сына Божия, и веруеши в него яко в Бога. зане погружаяся в купели, изобразил еси смерть его, изобразив же смерть его, спогреблся еси ему крещением, спогребыйжеся ему крещением, исповедал еси с ним и славы насладитися. аще ли сего Iисуса не приемлеши, яко несть истинный Iсус Сын Божий и Бог, тем ниже крещение, в нем же спогребыйся ему соумирл еси с ним, соумерый же ему совостал еси с ним совостав же с ним, исповедал еси наслаждатися с ним и жизни вечныя, должен еси свосприяти, яко истинное и очистителное грехов. и ако убо глаголеши не приимати его. аще бо приемлеши вещь, в ней же действо действуемаго лица изображается неотрочно свосприемлеши и самое то лице, его же действо действуемо в ней бывает. яко не распоряженным союзом, сопряжена еста между собою. аще ли же не приемлеши лица сего его же действо действуемо бывает в вещи, убо неси должен свосприимати и самую ту вещь, в ней же действо действуемаго лица изобразуется.

Что убо речеши ли, яко мы погружаещеся в купели в три божественныя ипостаси, Отца и Сына и Святаго Духа крещаемся, а не во Iисуса? вем воистинну вем, яко вы погружающеся мнитеся крещатися в три божественныя ипостаси. но чию смерть изобразуете погружающеся в купели, рцы ми? не новопроповедуемаго ли Iисуса? ей его. понеже убо вси, елицы во Христа Iсуса крещаются, тридненощное Его изъявляют погребение. якоже явствует о сем в евангелии поучителном в слове на крещение Господне, идеже пишет тако: [яко же бо Христос три дни и три нощи в земном сердцы сотвори: тако и крещаемыи погруженьми и возгруженьми, еже во гробе три дни и три нощи Господния образует. якоже бо иже в нощи ктому не зрит. сущии же во дни во свете ходит: тако и в погружении, яко в нощи ничто зрят погружаемии, в возгружении же паки яко во дни бывают, и в том же купно умирают и ражаются]. Видиши ли убо, яко елицы во Христа Iсуса крещаются, смерть Его в крещении изображают. сице и сии, иже в новопроповедуемаго Iисуса крещаются, смерть его изобразуют. и слыши, сами они во время действования их крещения, чтуще апостольския словеса глаголют: елицы во Христа Iисуса крестихомся, в смерть его крестихомся. Что убо не в новопроповедуемаго ли Iисуса крещаются, и не в смерть ли крещаются, и кто бы от благоразсудителных дерзнул отрещи, яко не в смерть его. темже, аще и непщуете крещатися в три божественныя ипостаси, Отца и Сына и Святаго Духа. но не крещаетеся. зане, егда погружаетеся в купели, не крещаетеся во истиннаго Iсуса Христа Сына Божия, но в новопроповедуемаго Iисуса. не крещающежеся во истиннаго Iсуса Христа Сына Божия, не веруют вонь, но в новопроповедуемаго. глаголеши ли паки яко мы во истиннаго Iсуса Христа веруем, а не в новопроповедуемаго и когда уверил еси, яви ми? во время действования вашего крещения, како символ глаголасте, рцы ми, не тако ли: верую во единаго Бога Отца, таже, и во единаго Господа Iисуса Христа. Видиши ли яко чтый исповедание вашея веры, исповедал еси тя веровати во Iисуса, а не во Iсуса Христа Сына Божия. исповедуя же тя веровати в новопроповедуемаго Iисуса, не веруеши во истиннаго Iсуса Христа Сына Божия, не веруеши и в самого. аще и мнишися веровати, Бога Отца Его. не свое се аз глаголю, но сам Господь наш Iсус Христос Сын Божий и Бог пречистыми своими усты во священном евангелии тако глаголет [Ин. зач. 43]: [веруяи в Мя не верует в Мя но в пославшаго Мя]. Видиши ли, яко веруяй в Сына купно верует и в пославшаго Его Отца; вы же крещающеся не у веровасте в Сына Божия Iсуса Христа, но в неслыханнаго Iисуса, не верующе же вонь ниже веруете и в самого пославшаго Его Отца, сего ради, аще и мните крещатися во имя Отца и Сына и Святаго Духа, не веруете же в Господа нашего Iсуса Христа Сына Божия. яко не изображаете смерти Его. но в новопроповедуемаго Iисуса яко в него веровати показастеся, чтуще символ, ниже крещаетеся во имя Сына Божия Iсуса Христа. не крещающежеся вонь, ниже крещаетеся и во имя Отца, сего ради, аще и имена изглаголете. но не крещаетеся в Сына Божия Iсуса Христа, ниже крещаетеся и во Отца Его, не крещающежеся во Отца и Сына тем ниже Дух Святый сходит над крещаемаго. зане Троица есть нераздельна. не пришествующу же Духу, ниже крещаемый очищается от кала греховнаго. сей бо пришед якоже в горниле в крещении преливаяй душу, и снедаяй согрешения, злата всякаго чиста чистейше уготовляет ю блещати [1 послан коринф. беседа 40, лист 1063]. не очистивжеся от кала греховнаго скудствующей сущей воде благодати Духа, не может быти наследник царствия небеснаго. и слыши о сем непобедимаго Святыя Троицы воина, Афанасия глаголю Великаго громогласно вопиюща тако [слово 3, на арианы, лист 40]: [сии же бедствуют прочее о самой полности тайны, глаголю же, крещении. (ниже) истинную же ни едину имуще  к благочестию помощь. (ниже) аще бо и имя Сына за написанное именовати притворяются. не бо глаголяи просто Господи, сей дает. но со именем и веру имеяи праву. (ниже) и с верою ко крещению совершение приложится. многия убо и иныя ереси глаголющия имена точию, не мудрствующия же право. якоже речеся ниже веру здравствующую имущия, не полезну имут от них даемую воду скудствующую благочестием. якоже и кропящемуся от них паче сквернитися в нечестии]. Видиши коль явственно глаголет святый Афанасий Великий яко ни едину рече имут ко крещению помощь, аще и имя Сына за написанное именовати притворяются. зане не имеют веры правыя. не бо глаголяй просто Господи сей дает, но со именем и веру имеяй праву, тогда с верою ко крещению и совершение приложится. что убо не равнообразне ли и вы о самой полности тайны крещения бедствуете. разсмотри токмо внутреннима ума твоего очима. ей всяко. понеже бо егда крещаетеся аще и имя Сына при погружении именовати мнитеся, не веруете вонь, яко не изображаете смерти Его, но в новопроповедуемаго Iисуса, вонь же и крещаетеся. не верующе в Сына Божия, ниже веруете и в самого якоже многажды рех, Бога Отца Его, тем ниже, аще что и приначертаете триех божественных ипостасей, в них же непщуете крещатися, крещаетеся, не в возотрождение бо, но во умерщвение совершаетеся, яко скудствующую воду благодати Духа имате, явственно о сем и Григорию Богослову сице гремящу [слово 25 на еретики]: [не терплю не просвещен быти по просвещении приначертая что трех во яже крестихся, и сущно в спогребстися воде не в возотрождение, но во умерщвение совершаем]. Елма же аще не просвещается по просвещении, рекше не очищается от прежних грехов, аще и надглаголется что триех над ним, в них же мнится креститися ипостасей яко не истиннаго Iсуса Христа Сына Божия смерть погружаяся изобразет, но Iисуса чюждаго сыновства Бога Отца. в спогребаяся воде, яко не возотрождается, но умерщвляется крещаяися. сего ради той же богословию верх святый Григорий всячески таковую баню отметати повелевает, сице взывая: [увы светлости, аще по бани очерневаются. аще светльшыя зрю, не у очищенныя аще крестителя злославием коварствуюся, аще ищу духа лучшаго и не обретаю, даждьми баню вторую. и о первой зле помысли]. слово 44, на еретики.

Темже убо о возлюбленне, разсуди, зде, молю благою совестию, како возможно таковое прияти, и за истинное вменити крещение, в нем же аще и трипогружателне, с приглашением триех ипостасей, во имя Отца и Сына и Святаго Духа мнитеся крещатися, но не изобразуете тридненощныя смерти и погребения Господа нашего Iсуса Христа Сына Божия, не изобразующе же смерти и погребения Его, не спогребаетеся Ему, не спогребающежеся Ему, не крещаетеся во имя Его, не крещающежеся во имя Его, ниже крещаетеся и во имя Отца, но в неслыханнаго, яко смерть его изобразуете Iисуса; не крещающежеся во имя Отца и Сына, еда отмываетеся от кала греховнаго, но не паче ли окаляетеся? ей всяко.

Како возможно таковое прияти крещение, яко очистителное грехов, в нем же аще и надглаголете что триех божественных ипостасей, но не право мудрствующе. ниже здравствующую имеюще веру, верующе в новопроповедуемаго Iисуса, крещаетеся в смерть его, крещающежеся в смерть его, не крещаетеся в Сына Божия Iсуса Христа, не крестившежеся вонь, не крещаетеся и в пославшаго Его Отца по реченному самем Господем [Лк. зач. 51]: отметаяися Мене, отмещется пославшаго Мя. и Аз во Отцы, и Он во Мне [Ин. зач. 47]. И аще отметаяйся Сына отмещется и Отца. благоявлено яко и не крестяися в Сына, не крестится и во Отца, не крестившежеся во Отца, ниже крещаетеся и в Духа Святаго. понеже бо отвержену сущу Сыну, ино привводится лице еже есть чюже Отча существа, Троица бо есть проста и неразделна существом и естеством божества. разделна же точию составы [Митрофан патриарх Царя града]. и слыши, сам Господь глаголет: Аз и Отец едино есва. О Дусе же глаголет: Его же Аз послю вам от Отца, Дух истинный, иже от Отца исходит [Ин. зач. 52]. Не крестившежеся в три божественныя испостаси, еда возотрождаетеся в таковой бани? но не пачели умерщвляетеся. поистинне паче.

Глава, 35.

Яко на от еретик крещаемых, аще и трипогружателне крещаются, Дух Святый не снисходит.

Но уже доволно возможно бы было и от вышепредложенных всякому хотящему познати истинну. зане не точию прикрывати будет темностию облаков невежествия светлость разума своего, священных богопроповедников, и богодухновенных отец и учителей свидетелств, яко отнюд не лепотствует новодействуемое, яко истинное, зане несть, и очистителное грехов, яко не может быти, крещение приимати. обаче единою еще сопротивоборствующих вопрошу, и тако конец беседе дав, до инших, о их же в начале предложения моего обещах, приступив разглагольствовати имамы. тем и вопрошая глаголю: рцы ми о любезнейший, на от еретик, кии не обливателне крещаются  и крещают, но трипогружателне, яко наватиане, донатиане, воздержници, вретищницы, и сим подобнии, крещаемых Дух Святый снизходит ли? или ни? что убо? речеши ли снизходит. и аше снизходит, како светилник церковный святый Василий Великий, в первом своих правил глаголет о чистых, яко не имут они в тайнах своих, аще и подобне нам веру в Бога и крещение содержат, Духа Святаго; святый же Иоанн Златоустый не точию в еретицех, но и в самех схизматицех Духа Святаго отрицает быти [к ефес. на послан. нравоуч. 11]; убо лгут ли, да не будет, аще истинну глаголют: якоже и есть. убо всуе, прелщая простыи народ, глаголеши Духу Святому снизходити на от еретик крещаемых, аще и трипогружателне крещаются, ни едино от святых во утверждение твоего баснословия свидетелство отец привед. аще же не снизходит на от еретик, аще и трипогружателне, крещаемых, Дух Святый то кто крещаемаго в купели грехи изнуряет, и очищает его от всего кала греховнаго? глаголеши ли вода? то како сам пребожественный наш Владыка Iсус Христос глаголет [Ин. зач. 8]: аще кто не родится водою и Духом. не внидет в царствие небесное. Видиши ли, не единою рече, аще кто не родится водою, но водою и Духом, той не внидет в царствие небесное. не вода бо очищает крещаемаго грехи, но Дух. аще бы вода очищала, была бы всех тварей превышша. по премногу нас сему научает божественный Златоустый, в слове в неделю по крещении, сице глаголя: [ибо крещение братие обновлению и порождению вина есть. порождение же глаголется вина зрима [Мф. зач. 69], очима же не видима, ниже бо стараго изменити имамы во отроча, или человека возвратим во чрево матере его. но уязвеннаго грехми, и злыми начинаньми обетшавша, благодатию небеснаго Царя возводим на младенческое безгрешие. сие бо благое деяние, не вода дарует была бы убо всея твари превышша, но Божие повеление, и Духа Святаго схождение. вода же служит на показание очищения. (ниже) глаголет бо Господь: аще кто не родится от воды и Духа, не может внити в царствие Божие. (ниже) отнудуже не призираем божественныя бани, ниже яко общую сию похуждаем приятия ради воды. якоже бо хлеб, хлеб есть общь прежде благословения, такожде и вино, по освящении же Духа, хлеб убо тело Христово, вино же кровь поистинне бывает и глаголется. тако и вода, ничтоже ино есть разве вода, обновляет же человека на мысленное порождение свыше благодать благословляющая]. Видиши ли коль явственно глаголет, яко не вода очищает крещающагося грехи, но Божие повеление, и Духа Святаго схождение. вода бо ничтоже ино есть, разве вода. обновляет же человека на мысленное порождение свыше благодать благословляющая.

Но негли речеши, яко аще кто крещается во имя Отца и Сына и Святаго Духа, в три погружения, тогда с сими словесы тайна святаго крещения совершается, и аще с сими словесы в три погружения творимая тайна святаго крещения совершается, убо совершенна есть. аще же совершенна есть, убо и очищает грехи. Поистинне не веси яже глаголеши, ниже разумееши, яже утверждаеши. зде убо рцы ми? тайна крещения от еретик ли, аще кии крещаются во имя Отца и Сына и Святаго Духа в три погружения с сими словесы действуемая совершается? никакоже никако. не от еретик бо зде святая церковь действуемом крещении, но благочестивым совершаемом глаголет. ничтоже бо святая церковь о от еретик действуемых тайнах яко отверженных упоминает. но вся яже глаголет, о от благочестивых совершаемых глаголет. понеже бо глаголет, еретицы аще и имут тайны у себе имут бо крещение, имут и евхаристию имут и рукоположение, архиереов и ереов, и прочия клирики, и браки, и прочыя тайны. но не истинны имут, но аки на игралищи вся содевают [Катихисис вел.]. аще бо аще кто и от еретик крещается во имя Отца и Сына и Святаго Духа, в три погружения, тогда с сими (по неправому вашего разума мнению) словесы тайна их крещения совершается, будут, еже да не будет, святых Василия Великаго, и Иоанна Златоустаго словеса из них же ов убо глаголет, яко ниже чистии, иже аще точно нам веру в Бога имут, и крещаются трипогружателне, имеют в тайнах своих Святаго Духа, ов же ниже на самых схизматик тайны Дух Святый сходит, ложна. аще ли истинна и всякаго приятия достойна суть, якоже и суть, убо не от еретик действуемых зде святая церковь, но от благочестивых совершаемых беседует. но ли вода едина очищает крещающагося, аще и во имя Отца и Сына и Святаго духа крещается. но  от еретик, грехи? никакоже никако. не вода бо очищает, но Духа Святаго благодать. и слыши о сем всю древлеправославную церковь вопиющу тако [Катихисис великий, лист 249]: внегда бо ко умовению водою, словеса сия Божия приложатся, сиречь: крещается раб Божии, имярек. во имя Отца, аминь, и Сына, аминь, и Святаго Духа, аминь, тогда с сими словесы тайна святаго крещения совершается, и душею паки раждается крещаемыи силою Святаго Духа, сей же Дух Святый несказанно пременяет воду в кипящии укроп претворяет, и дает ей сицевое совершителное, якоже касающися тела и душу омывает, и паки раждает. и убо не вода сие творит, но Духа благодать [лист 324]. Зриши ли яко не вода очищает грехи крещающагося, но Духа благодать. благодать же Духа на от еретик, аще кии и трипогружателне во имя Отца и Сына и Святаго Духа крещаются, крещаемаго не снизходит. то како может таковое крещение быти совершенно и очистително грехов крещающагося без пришествия Святаго Духа. всячески не может. елма же убо аще на от еретик, иже точно нам веру в Бога имут, и крещение содержат, крещаемых, аще и трипогружателне, по святых Василия Великаго, и Иоанна Златоустаго гласовом, Дух Святый не снизходит, снизходит ли на от таковых, рцы ми, иже и трипогружателне, мнятся в три божественныя ипостаси, Отца и Сына и Святаго Духа крещати, крещаемых, но не во имя Iсуса Христа Сына Божия, Его же пророцы прорекоша, архангел благовести, апостоли проповедаша, вонь же верущи вся древлеблагочестивая церковь, безчисленная знамения и чюдеса сотворила. но не в неслыханнаго Iисуса, крещаются, Дух Святый. Речеши ли снизходит. И како убо снизходит, рцы ми, идеже Сын Божий и Бог наш Iсус Христос, Ему же поклоняется и припадает всяко колено небесных и земных и преисподних, безчествуется. Не исповедуют бо Его Спасителя н Исцелителя, но равноухим нарицают [Розыск часть 2, статия 1]. Безчествуяй бо Сына, безчествует и Отца. Не свое се аз глаголю, но сам Владыка наш Iсус Христос о сем явственно глаголет тако [Ин. зач. 15]: иже не чтет Сына, не чтет Отца пославшаго Его. И аще безчествующе Сына, безчествуют и Отца, всячески не снизходит на от таковых крещаемых Дух Святый. И како убо снизходит, идеже Сын Божий и Бог Iсус Христос, в Него же имя повелени елмы от самого Спасителя нашего Iсуса Христа креститеся якоже глаголет [Мф. зач. 17]: Шедше научите вся языки крестяще их во имя Отца и Сына и Святаго Духа, отмещется: В Него же место ин Iисус, о нем же ни един пророк не прорече, архангел не благовести, апостоли не проповедаша, святая древлеблагочестивая церковь не уверила, привводится: Не вем, вы судите благою совестию. Како убо снизходит, идеже Сын Божий и Бог единосущен Отцу с съестественен Святому Духу отмещется? отмещетбося Сын, соотмещется и Отец. И слыши о сем самого Господа Iсуса Христа Сына Божия пречистыми своими усты в пресвятем своем евангелии тако глаголюща [Лк. зач. 51]: отметаяися Мене, отмещется пославшаго Мене. Зриши ли яко отметаяися Сына, соотмещется и пославшаго Его Отца; [святейший Филофии патриарх Константина града] и аще убо отметаяися Сына соотмещется и Отца. благоявлено яко не снизходит на от таковых крещаемых Дух Святый, иже неизреченно от Отца происходит, и на Сыне почивает неразделно есть съединосуществен и съединоестествен Отцу и Сыну. Не снизшедшу же Духу, ничтоже ползы имут, аще и мнятся во имя Отца и Сына и Святаго Духа крещатися, от таковаго крещения доволно яве нас сему святый Афанасий Великий сице глаголя [в слове 3, на арианы]: Сии же беду приемлют о самом исполнении тайны, рекше, крещении. аще бо во имя Отца и Сына дается совершение, не глаголют же Отца истинна, занеже отмещутся подобнаго естества еже от Него, отметаютжеся и истиннаго Сына, и иного себе от несущих зданна творца именуют. како не всеконечно тщее и неполезное от них даемое, притворение же имея, поистинне же ничесоже имуще на помощь благочестия. не во Отца бо ни в Сына дают. И понеже убо не снисходит Дух Святый на отмещущихся Сына, соотмещущихжеся и Отца, аще непшуют крещатися во Отца и Сына и Святаго Духа, крещаемых, то кто от таковых крещающаго в купели грехи истребляет? вода ли едина? никакоже никако. Вода бо едина не истребляет крещающагося грехов, якоже выше рех, и ныне паки глаголю, но Дух Святый. Слыши о сем явственно святаго Кирилла Иеросалимскаго сице глаголюща [от оглашении жидов, слово 3. яже просвещаемых во Иеросалиме]: понеже бо сугуб есть человек, от души и тела сложен, сугубо очищение. безплотное безплотному, а плотное плоти. И вода же очищает тело, и Дух знаменует душю: А окроплении сердцем, и омовени телом водою чистою, приступим ко Господу. темже хотя в воду влести, и не простыни водныя смотрыи но духовным действом спасения чай, без обоего бо тебе не мощно совершитися. Не аз есмь глаголяй сего, но Господь Iсус Христос имеяй вещем власть рече: аще кто не родится свыше, и приносит глаголя, водою и Духом не может внити в царство Божие. Подобне и преподобный Варлаам учитель Иоасафа царевича о сем глаголет, его же вопросив Иоасаф рече [книга жития Иоасафа царевича]: Но и крещение что есть, еже веровавшим прияти, нужду быти рекл еси, поряду возвести ми: он же к нему отвеща: Святыя сея и непорочныя христианския веры корень, яко твердое основание божественнаго крещения есть благодать, всех иже от рождения грехов очищение дающая. и совершеннейшее отмовение, нашедших злобы осквернении. Тако бо Спас заповеда порождатися водою и Духом, и на древнее восходити достоинство. Молитвою убо и спасеным призыванием находящу на воду Духу Святому. Сим сообразне и златокованная труба позлащенными своими усты златовещанне возглашает глаголя: [Той вы крестит Духом Святым и огнем. Дух огнь нарече. И почто Его огнь нарече? да навыкнеши Того силу от познаваемых того речей, превосходяща твоя разумения и смысл представити хощу. занеже: яко огнь изнуряет терние, тако и Дух нашед потребляет согрешения. и яко огнь рудную землю злато соделовает, сице и Дух Святый впадая в крещение, и в купель водную, прелюбодея праведника сотворяет, разбойника сына Божия устрояет. И не рцы ми како? понеже и аз вопрошу тя: како огнь землю приемля злато творит: и не веси рещи хитрости. вкупоработному попущаеши, и человеколюбию ли Владычнему не попущаеши? огнь и от земли творит, и паки истуканно оборжавша разливает и отирает. Так и Дух Святый, и от оглашеннаго верна соделовает, и от грешник праведника сотворяет]. Маргарит, слово 3, о крещении.

Видиши ли согласие сих святых, иже аки единоустне глаголют, яко не вода но Дух Святый сходяй на воду в купель, крещающагося грехи потребляет, и от грешника праведника соделовает. Сему же убо тако сущу, како от новодействуемое имущих крещение, в нем же отмещему Сыну соотмещется и Отец, крещающагося грехи, не снизшествующу Духу Святому на воду в купель, очистятся? всяко не очистятся. и аще не очистятся, сего ради и аз с преподобным Иосифом Волоколамским тако глаголю [от слова 5]: Несть инаго именем под небесем, о нем же подобает спастися нам, точию о Господе нашем Iсусе Христе, якоже глаголет Господь во евангелии: аще кто не родится свыше водою и Духом. во имя Отца и Сына и Святаго Духа, не может спастися. аще и всех человек праведнейшии будет.

Ельма же убо не вода но Дух Святый крещающагося потребляет грехи, то како будет таковое крещение, в нем же в купель на воду Дух Святый не снисходит, изнурително и очистително грехов крещающагося, благоявлено яко несть. Аще несть, како таковый, иже аще и трипогружателне мнится во имя Отца и Сына и Святаго Духа крещатися, не родився Духом Святым, имать внити в царствие небесное. всячески ни. аще же не внидет, како таковое крещение прияти возможно есть? отнюд невозможно.

Возоглавление реку: еда убо возможно есть новодействуемое прияти крещение, в нем же в крестознаменовании двоестественное и единоипостасное воплощшагося Христа Бога нашего таинство изображатися не видится? еда возможно новотворное прияти крещение, его же действо пятиперстным ограждается благословением. еже под клятвою древлеправославныя обретается церкве? ей невозможно. еда возможно таковое прияти крещение, еже двочастным, по исповеданию новопечатных книг, крестом, иже не подобится самому животворящему кресту Господню, чесо ради ниже крест Господень может нарещися, паче же несть, совершается? ей невозможно. еда возможно таковое прияти крещение, в нем же крест, его же Христос кровию своею освяти, самосовершитель крещения, изобразоватися не исповедуется, без него же ни крещение, ни ино что совершается? зело невозможно. еда возможно новодействуемое прияти крещение, в нем же крещаяйся крещается не во Iсуса Христа Сына Божия смерть, но неслыханнаго Iисуса? зело невозможно. еда возможно таковое прияти крещение, в нем же не сообщник смерти Iсуса Христа Сына Божия, но Iисуса, ниже общник будет воскресению Его? зело невозможно. еда возможно таковое прияти крещение, в нем же не снизходит со Христос Iсусом, и не спогребается Ему крещением но Iисусу, ниже воскресения и славы насладится вечныя? всячески невозможно. еда возможно таковое прияти крещение, в нем же аще и мнится в три божественныя ипостаси крещатися, но отмещется Сына Божия Iсуса Христа. не крестяияся в Него, но во Iисуса, отметаяжеся Сына соотмещется купно и Отца пославшаго Его, тем ниже крещается во имя Отца и Сына и Святаго Духа, не возотрождается, но паче умерщвяется? всячески невозможно. еда возможно новодействуемое прияти крещение, в нем же на крещающагося, аще и трипогружателне и во имя Отца и Сына и Святаго Духа непщует крещатися крещаяися, безчествуя же Сына Божия Iсуса Христа, безчествует и самого Его Отца, не снизходит Дух Святый в купель, и не очищает согрешений его? всячески невозможно. еда возможно новотворимое прияти крещение, в нем же крещаяися, аще и в три божественныя ипостаси кажется купно со треми погружении крещатися, не веруя в Сына Божия Iсуса Христа, но в неслыханнаго Iисуса, в него же и крещается, не веруя же в Сына Божия, не верует и во Отца, не раждается водою и Духом, отмещему сущу Сыну Божию, приводится иное лице, чюждее существа Отча, отмещему Сыну Божию, соотмещется и Отец, яко единосущна еста, чесо ради не снизходит нань Дух Святый, не родивжеся водою и Духом не внидет в царствие небесное? зело невозможно.

Аще бо приемлеши новодействуемое крещение, яко истинное, свосприемлеши всячески и пятиперстное им же крестилныя воды осеняются, благословение. Свосприемы же е, и двочастный крест, яко совершенотворителя новодействуемаго, им же действие его умствуется совершитися, крещения. аще приемлеши новодействуемое крещение, яко истинное, в нем же крещаяся изобразил еси смерть новопроповедуемаго Iисуса, свосприемлеши неотрочно и самого его, в него же смерть крестился еси. свосприемый же его, веруеши в него, веруя же вонь, не веруеши во Iсуса Христа Сына Божия, не веруя же в Сына Божия, не веруеши и в самого Его Отца, по словеси Господню, веруяи в Мя, не верует в мя но в пославшаго Мя [Ин. зач. 43]. Не веруя же во Отца, не раждаешися, аше и трипогружателне мнишися во имя Отца и Сына и Святаго Духа крещатися, водою и Духом. Не родившужеся водою и Духом, невозможно есть, по реченному Господем, внити в царствие небесное. И аще тако есть, яко и есть. убо не полезна есть сицева баня, суетна вера, тща надежда, никчемнии трудове. То кто бы от благосмыслящых дерзнул таковое, в нем же крещается не очищается, но очерняется, не просвещается, но омрачается, не оживотворяется, но умерщвяется, прияти крещение? Аще бо отреваеши пятиперстное, им же крестилныя воды осеняются, благословение, соотреваеши и самого совершеннотворителя крещения двочастный крест, убо всякаго кроме прекословия воздолженствуеши соотринути и самое, им же совершается, новодействуемое крещение, яко совершеннотворимую вещь. Ибо невозможно есть всячески совершеннотворителя отринув, совершенно творимое содержати. аще не приемлеши новопроповедуемаго Iисуса, яко истиннаго Iсуса, всячески не долженствуеши свосприимати и самое тое его крещение, яко истинно, в нем же крещаяся изобразил еси смерть его. Невозможно бо есть в него же крестился еси прияти. Приемляи бо образ, свосприемлет и самого того, иже на нем изображен есть. аще отмещешися веровати в неслыханнаго Iисуса, всяко долженствуеши отметатися, и крещения, в нем же крещаяся в смерть его, обещался еси веровати вонь, яко очистителнаго грехов, не веровати вонь. Приемля бо крещение его яко душеспасително, безпрекословно веруеши вонь. Веруяи же вонь, не веруеши во Iсуса Христа Сына Божия. не веруя в Сына Божия, не веруеши и во Отца. не веруяй же во Отца, не раждаешися, аще и мнишися, водою и Духом, но токмо водою, яже не пришествующу Духу, не очищает крещающагося грехов. Не родижеся водою и Духом, не внидеши, аще и уповаеши, в царство небесное. аще бо Бог не действует иереом в крещении. [Дух бо Бог есть {Ин. зач. 12}] сего ради ниже крещение имаши, ниже христианин еси. И слыши о сем позлащеннаго усты златовещателне сице глаголюще: Аще бо тем, (рекше иереем) ничтоже Бог действует, то ниже крещение имаши, ниже тайнам причащаешися, ниже благословения имаши, то ниже христианин еси. к Тимофею, нравоучение 2.

Прочее о возлюбленне, отрини покрывало невежествия твоего помрачающее свет разума твоего. отверзи зеницы сердечныя. отрини нелепое твое мудрование. научися от священных и богодухновенных отец и учителей древлеблагочестивыя церкве. Восприими святое и богопросвещенное крещение. несть бо возможно несть не родившуся водою и Духом внити в царствие небесное. Явственно о сем взывает святый Иоанн Златоустый сице глаголя [в беседы 25, на Иоанна евангелиста]: [Что бо рече, аще кто не родится водою и Духом, не может внити в царствие Божие. ты убо невозможно глаголеши сие быти, аз же сице сие зело мощно быти глаголю, яко и нужно быти, и ниже мощно инако спастися. зело бо нужная и удобная сотворил есть Бог. земное бо рождение еже по плоти от персти есть, темже и заградися, яже на небесех сему].

Что убо обще земли к небеси? оно убо от Духа сущно, удобне нам круги отверзает горния. Услышите, елицы есте просвещения кроме, ужаснитеся, воздохните страшно прещение, страшно изречение. Несть, рече, нерожденному водою и Духом внити в царство небесное. Аще бо кто и во Христа верует не имать же на себе святаго и богопросвещеннаго крещения, несть верен. Громогласно о сем вопиющу Григорию богословию тезоименитому сице [от слова 2-го на Просвещение, стих 15]: [Ты же человече Божии разумей востание супостата ко имущему от великих рать, и не приими соперника врага, и не преобиди быти славитися верен. дондеже еси оглашен, в преддверии еси благочестия. внутрь подобает тебе быти, двор проити, святая видети. во святая святых восклонитися, с Троицею быти. От толкования: Ты же разумей совет его, что бо боле в крещении чистоты, елма убо велие сокровище, тольма тебе и страшилище твердо, да приим не погубиши его. и не неради бо быти верен, некрещенныи бо не у верен, любо и во Христа верует]. слово 2. Некрещеный аще и милостыню творит, вне царствия небеснаго извержен будет. Некрещенный, аще и пост и воздержание содержит вне райских селений изгнан будет. Некрещенный, аще и ко всем нелицемерную имать любовь, во тму кромешную отходит. Некрещеный, аще и во Христа верует, в муку вечную отходит. словом рещи. Некрещеный, аще и безчисленная соделает благая, в геену отходит. Тако бо златокованная труба о сем воглашает вопиющи: [Потщимся убо горняго града быти граждане. Доколе в чюжей стране пребываем? Потребно есть началное отечество восприяти. Ниже бо от прилучьшихся беда есть. Но аще будет, еже не будет, неначаянному скончанию нашедшу некрещенным от здешних отъити, аще и безчисленная имеем благая ничтоже нас ино приимет, разве геена, и червь ядовитыи, и огнь негасимыи, и юзы нерешимыя]. нравоучение 25 [в беседах апостольских].

Сия убо и сицевая толико страшная и ужаса преполная слышав, яже могут и окаменное сердце удобь умягчити, обратися, молю, ко истинней христианстей вере, буди сын истинныя древлеблагочестивыя церкве. восприими святое и душепросвещенное крещение. возотродися водою купно и Духом, да возможеши внити в царствие небесное, и будеши наследник Богу, снаследник же Христу [рим. глава 8].

Но да не в безмерную долготу слово мое простер, нанесу доброчестивых слушателей ушесам бриткость. прочее слову моему конец дав, время уже и о инших, о них же обещахомся, поне мало побеседовати, и сомнительство от сердец сомнящихся отъяти, противомудрствующих обличити, неверствующих научити колеблющихся утвердити, темже и начиная глаголю.

Hosted by uCoz