Алексий Самойлович

 

Книга глаголемая Меч Духовный,

от многих богодухновенных писании собрана, на приемлющыя от еретик совершаемое крещение, и глаголющыя, яко несть втораго крещения. и сочинена лета, еда под солнечными зарями исчиташеся ко седьмию десяти сотиям, и двадесяти десятицам девятое.

а от по плоти рожества Бога Слова, по сте седмидесяти седми девятицах, первое.

 

Предисловие к читателеви.

 

Благочестивому и доброразсудному читателеви о Господе радоватися.

 

Горе полагающим тму свет, и свет тму.

[Словеса суть святаго пророка Исаии, положенная во главе 5.]

 

Плакаше древле святыи пророк Иеремия, над запустением Иеросалима: како, рече потемне злато, и изменися сребро доброе, разсыпашася камыцы святыни: но кто и ныне не восплачет, кто не возрыдает, кто ли не излиет слез, над российскими мнящимися быти пастыри, видя их всякаго плача достойную в вере православней измену, како потемниша мраком ересей, паче, не глаголю злата, но солнца пресветлаго в поднебесней, в российском государстве сияющую древлеправославнокафолическую веру, самем Богом насажденную, святыми апостолы по вселенней проповеданную, седмию святых отец вселенскими соборы утверженную, святым равноапостольным великим князем Владимиром от грек в Россию принесенную. о ней же пресвятейший патриарх Константиня града Иеремия пиша в послании своем, к благочестивому великому государю царю, и великому князю, Феодору Иоанновичю, свидетельствует, глаголя [Кормч., лист 15]: [Понеже убо ветхии Рим падеся Аполинариевою ересию. вторыи же Рим, еже есть Константинополь агарянскими внуцы от безбожных турок обладаемь. твое же, о благочестивыи царю, великое русийское царствие, третии Рим, благочестием всех превзыде, и вся благочестивая в твое царствие, во едино собрашася]. Согласно сему и святейший патриарх, святаго града Иеросалима Феофан, о древлеправославней вере, в российском государстве древлесодержимей засвидетельствует, глаголя [Кормч., лист 25]: [Аз смиренныи Феофан святаго града Иеросалима, и всея Палестины, свидетельствую сим моим писанием истинно, егда бех во святем граде Иеросалиме с преждебывшим мене патриархом, святейшим кир Софронием, и со инеми боголюбивыми тамо сущими митрополиты и архиепископы и епископы, и видех на востоце и на полудне от поганых агарян святым Божиим церквам запустение, и православным христианом святаго греческаго закона великое насилие и погубление, и утешение ниоткуду несть, точию слух благочестиваго христианскаго русийскаго царя, яко той един на вселенней владыка, и блюститель непорочьныя веры Христовы, прочии же вси, аще и именем христиане нарицахуся но далече от истинны отпадоша]. Како измениша паче солнцесиятелнаго злата блещащаяся православием древлецерковныя догматы; како разсыпаша паче камении драгоценных, сияющая, святых апостол, и божественнных отец предания; о них же издалеча божественныи апостол Павел Духом Святым предвидев рече, глаголя [Деян. зач. 44]: от вас самех востанут мужие глаголющии развращенная еже отторгнути ученики, [простыи, глаголю, народ] вслед себе. От каковых сам Христос пресвятыи наш Владыка повелевает блюстися, глаголя [Мф. 7, ст. 15]: Внемлите от лживых пророк. Сиречь, блюдитеся от лживых учителей. Пророками бо учители в древних бяху нарицаеми. якоже Павел апостол в послании своем к Титу о критянех воспомяну глаголя [Тит, 1, ст. 12]: Рече некто от них свой им пророк: критяне присно лживи. пророк же той бе, по сказанию Златоустаго, Епименид критянин, иже бяше пиита, и философ, и жрец идольскии, и учитель еллинских законов критянам. вся бо догматы святыми апостолы уставленныя, святою древлеправославною церковию содержимыя, нечестиве охуливше отринуша. вся предания яже святии отцы друг другоприемне от святых апостол приемше предаша, ложная нарекше отвергоша, от них же един некто Феофилакт епископ Тверскии сице глаголет [в книге Возобличения на ответы заонежския, глава, 9. лист]: [Российския преводчики святых отец писания превели подложныя. ниже: аки нарочно труждалися на прелщение рускаго варварскаго грубаго народа. и воистину не имамы известия, есть ли каковое подлинное хотя едино слово святых отец на российском языце, под которым именем многая нарицаются]. ельма же отринуша святую православную веру, купно соотринуша с нею и святое душеспасителное крещение, зане вера и крещение неразделна еста с собою. о нею же святыи Никита Ираклийскии, в толковании словес святаго Григория Богослова, на святая Просвещения глаголет сице: вера убо совершается крещением и предходит исповеданием ко спасению, и вместо оныя внесоша новую ересьми наполненную, с неюже купно совнесоша и новое крещение. понеже убо заравно исповедуют и содержат, яко в три погружения совершаемое, тако и обливанием действуемое крещение, ложне глаголюще, яко бы и сам Христос поливанием от Иоанна во Иордане крестися, о чесом речено имать быти на своем месте [книга Оправдание обливанием творимаго крещения]. еже многими и различными странными и неслыханными доводами, неправо толкующе священная писания, усилуются утверждати. поистине, иже хотят состреляти во мраце правыя сердцем [Пс. 10]. во первых мрак ухищрения и льсти устрояют, имже помрачают святая писания, православней нашей вере поборствующая. таже стрелы своих злочестивых догматов со угльми пустынными неправо святых писании толкования испушают. тако неискусных и в православии неутвержденных уязвляют, и в ров погибелныи, вонь же сами впадоша, влекут неопасных. ибо не неприлично есть еретическому нраву умягчати словеса своя паче елея, и та суть стрелы, по псалмопевцу [Пс. 54]. сего ради не ощущают неискуснии, како под злаком прекрасных цветов татися змий ядовитый; како на воде покойне скрывается камень на разбиение кораблей пловущих; тии бо не явственне ров ископовают, и сети утаевают, утвердиша себе слово лукаво, поведаша скрыти сеть, реша кто узрит их [Пс. 63]. сего ради и новыя законы. паче же не суть законы, но прелести и закона древлецерковнаго развращения, уставиша, во еже бы всех вер еретических приходящих к их вере, яко римлян, лютеров, калвинов, и прочих сим подобных, кроме турков, и иных языков не имущих никакова крещения, второе не покрещевати, но токмо миром помазовати, сопротивно божественных апостол правилом. ибо священнии апостоли во 50 своем правиле не отлагателне повелевают треми погружении крестити, не крестящих же треми погружении, из сана измещут, сице глаголюще [Кормч. лист 15]: Аще которыи епископ, или презвитер не крещает в три погружения единем глашением, но во едино погружение, в смерть Господню даемо, да извержется таковыи. откуду проникоша распри, откуду прозябоша раздоры, откуду возрасте. едва едва не во всех россианех, такове противное святых отец учением мнение, яко несть втораго крещения. откуду мнози и от святую древлеправославную веру содержащих, и вся древлецерковныя догматы соблюдающих, и вся предания ея лобызающих, в таковом же неправом мнении погрязоша. еже утверждают словесы святаго апостола Павла, яже пиша, к ефесеом рече [зач. 224]: един Господь, едина вера, едино крещение. и поистинне яже глаголют, не разумеют. не бо блаженныи Павел от еретик совершаемом крещении рече: но от православных сущих христиан. еда ли убо он будет прочим святым апостолом своим учением не согласовати? да не будет. святая древлеправославнокафолическая церковь, яже яко крин посреде терния различных многообразных ересей процветаше и процветает; обращающихся ко святей вере, от еретических вер, без покрещевания отнюд не приемляше и не приемлет. аще ли же кии от священнаго чина епископ или презвитер от еретик крещенаго яко христианина приимет, таковаго из сана извергает [святых апостол прав. 46. Карфаг. прав. 73]. понеже еретическое крещение несть крещение, но паче сквернение, сего ради прекословителне глаголют, како убо леть есть не имущим рукоположения крещати, и исповедь совершати; к сим же баснословят, яко без святаго причащения всячески невозможно есть спасение получити. еже видев неразумное их мудрствование зело возболезновах утробою моею по псалмопевцу [Пс. 118]: Печаль прият мя от грешник оставляющих закон Твой. чесо ради, все упование мое возложив на всещедраго Бога, могущаго немудрыя упремудрити, якоже и безкнижными рыбари всю вселенную в веру улови, не неприлично вознепщевах таковыи их мрак противнаго древлеправославныя церкве учению мнения, светом божественнаго писания растворив, далече от душ их отринути. Понеже убо еретицы ничим же от прочих поган, иже истиннаго Бога не ведят, разньствуют. Якоже святыи Иоанн Златоустыи вопиет глаголя [Маргарит, лист 585]: [Врази бо неприязни церковнии еретицы, ничим же разни от прочих поган не знающих Бога]. слово о лжеучителех. Ельма же убо еретицы ничтоже разньствия имут от язык не ведящих Бога, того ради равно с ними, аще не очистятся святым крещением второе, и мучими имут быти. сице о сем в службе святым седми вселенским собором, святая церковь воспевает вопиющи [Минея служеб. Германа патр. в каноне песнь 3, ст. 1]: [Твари служитель, Арий безумныи, Македонии паки мерзок явлься, в геенне огненней, равно мучатся с еллины]. июня в 16 день. Аще бо и груб есмь, и невежествен словом, ниже добре веждествен в священном писании, вмале бо коснухся умопросветителных учении. не бо свет филосовствовати, ниже разумею богословствовати, сего ради и малое сие собранийце грубосочиненное, не витийственне, но просто беседою сооружено есть. зане и сам пресвятыи наш Владыка Бог Слово буйством проповедания благоволи спасти верующыя вонь [к коринф. зач. 125]. буее бо Божие премудрее человек есть. обаче многими богодухновенных отец доводами и яснейшими священных учителей церковных свидетельствы ограждено. в коей малой моей сей книжице имать предложено быти. яко аще кто первее прия крещение от еретик, таковаго аще обратится к православней вере, святых апостол правила, и богодухновенных отец писания всеконечне повелевают второе крестити.

Чесо ради и не неприлично возмнех нарещи ю мечь духовный. ибо якоже мечь обоюду изощренныи противо борющыяся на полы разсецает: сице и в сей книжице предложенныя доводы, глаголющих, яко несть втораго крещения, и приемлющих еретическое крещение, якоже и православных крещение, обезглавляют, рекше от главы Христа отсецают, и от всего христианскаго сочетания далече отлучают. и яко премнози от святых в первенствующей церкви, во время нужных случаев, не имущии рукоположения крещаху. к сему же мнози во время нужды и несвященнаго чина исповедь совершаху, и аще кто имать веру правую, и дела добрая, егоже неосквернила бе прежде рука еретическая крещением, может спасен быти, аще и не допустит ему каковыи любо случай, святаго комкания причаститися.

Которую малую книжицу удобнейшаго ради разумения, разделих на три части, части же расположих на пределы, пределы разчиних на главы. и в перьвой убо части имать глаголано быти о святом крещении. во второй же о исповедании. в третией о святом причащении. еже имут ниже следствующия главы явственно показати, их же по чину их предлагаем.

 

Сказание главам настоящыя книги сея.

 

Главы первыя части перваго предела.

 

1. О еже что есть крещение.

2. О силе святаго крещения.

3. О еже что есть еретическое крещение.

4. Яко приемлющии от еретик крещеных яко крещеных, из сана измещутся.

5. Яко первое приемшых крещение от православных, не подобает крестити, от еретик же всячески.

6. Яко от еретик приемлющии крещение, общницы суть их зломудствованию.

7. Яко не токмо от еретик крещенаго крестити паки повелевают, но и недоведящых, аще крещени быша.

8. Яко от еретик крещении не толико просвещаются, елико помрачаются.

9. О еже крещение есть корень святыя непорочныя веры.

10. О еже крещение утверждение есть християнския веры.

11. О еже едина есть истинная христианская вера.

Главы втораго предела.

1. О вине действителней. л.

2. О вине материалней.

3. О вине формалней.

4. О еже сам Христос предаде святым апостолом во святом крещении в три погружения крестити.

5. Крещение нарицается рождение, еже точию изображается в три погружательства крещении.

6. О еже треми погружении и священнии богословцы повелевают крестити.

7. О еже егда погружаемся тогда смерть изобразуем егда же возницаем, тогда воскресаем.

8. О еже како подобает погружати и возгружати.

9. Яко трипогружательства крещение Дух Святыи чюдодействием запечатле.

10. Познавается истина из прообразователных трипогружателнаго крещения, на разных местех ветхозаветнаго писания.

11. Показуется истина во крещении погружения, от прообразования крещения, и в новой благодати обретаемых.

12. От самаго речения, еже крещение, твердость погружения показуется.

13. О еже что знаменует баня паки бытия.

14. О еже како святии апостоли в день пятьдесятныи крестиша, три тысящы народа.

15. О еже како Филипп апостол крести каженика.

16. О крещении клиников, сиречь на одре лежащых.

17. Яко Христос Спаситель крестися от Иоанна, погружаемь а не обливаемь.

18. Крещение обливанием творимое, есть латинскаго западнаго костела, нововводныи, церкви святей противныи обычай.

19. Яко древле приходящих от латин лютеров и калвин ко святей христианстей вере непременно крещаху паки.

20. Яко изобразование в крещении погребения и воскресения Христова зело есть нуждно.

21. О приложении в приглашении над крещаемым четвертаго аминя.

22. Яко совершителная крещения с древлецерковными не единствуют догматы же и уставы.

Главы третияго предела.

1. О еже что есть ересь.

2. О еже каковы ереси в великороссийстей церкви содержатся ихже ради подобает обращающихся покрещевати.

3. Аще и в три погружения крещени но от еретик, святии отцы повелевают паки крестити.

4. О еже правила яко седми вселенских собор, тако и девяти поместных, сице и особь от святых отец сложенная святая церковь ненарушително повелевает соблюдати.

5. Яко святая церковь древле узаконоположи, некиих от еретик миром помазовати вин ради благословных.

6. Святии отцы от еретик приемших крещение всячески повелевают покрещевати.

7. О еже безчисленнии простолюдини не имущии хиротонии яко при апостолех сице и послежде крещаху их же крещение якоже и священников церковию приято.

8. Во время нужды попущаемо есть яко от святых отец подобне и от нынешних учителей простому иноку, диакону и мирянину сущу христианину крещати.

9. Яко не подобает избирати, еже  он сица или он сица крестит мя, но точию был бы христианин, равно бо Святыи Дух приходит и на от несвященнаго крещенаго.

10. Крещение и без елеопомазания и миропомазания совершается вся бо сия вода навершает.

11. Силою словес Господних, сиречь крещается раб Божии во имя Отца, и Сына и Святаго Духа с треми погруженьми, крещение совершенно бывает.

12. Лучше есть крещению от простолюдина христианина совершитися нежели от священника проклятаго.

13. Лучше есть от простолюдина крещению совершитися, нежели от священника отлученнаго.

14. Лучше есть крещению совершитися от простолюдина, нежели от священника еретичествующаго.

15. Якоже корень священства, сиречь архиерей не в три погружения крещен, несть крещен, тако и рукоположенныи от него священник тогожде требует.

16. Яко архиерей вся действует священником, и якоже еретическое крещение неприятно есть такожде и хиротония.

17. Аще и в три погружения крещенаго архиерея хиротонию имать священник, но в ересех состоящаго неприятна есть.

18. Святии отцы повелевают от еретик приходящих якоже покрещевати, тако и похиротонисати.

19. Единых есть епископов миро освящати.

20. От ересей обращающихся, епископов, священников, и прочих причетников, аще кии и в три погружения крестишася, по помазании миром, божественнии отцы повелевают паки хиротонисати.

21. Аще кии еретицы и точию с проклятием ересей своих им приемлеми бывают. но и от таковых обращающихся епископов, презвитеров и диаконов, святии отцы, по проклятии ересей их, повелевают паки хиротонисати.

22. О еже аще крещение от никонопоследствующаго священника приято, то и вера.

23. О еже священник священника не может рукоположити, ниже благословити, ни молитвы разрешителныя над ним, по отречении ересей прочести, но вся един архиерей действует.

24. Священник священника по испадении степени, не может паки на первыи его степень возвратити.

25. Меншии от болшаго благословляется.

26. Яко священнику невозможно есть без жертвенника таин совершати.

27. Унее есть крещению совершитися от простолюдина в храме, нежели от священника отвергшагося при проклятии ересей своего сана, и паки кроме архиерейскаго повеления на ся и похитившаго.

28. О еже в новосозидаемых церквах без антимиса невозможно есть служити иерею.

29. О еже аще Христос некиим обрядом и обеща до скончания века пребывати, обаче не пребыша преступления ради.

30. Аще кто отступит от своего епископа, не греховнаго ради извета, но ереси ради содержимыя им. таковыи от святых отец не казни, но чести достойныя сподобляется.

31. Яко и кроме видимых церквей, и священников спасение возможно есть получити.

32. Яко не имыи истиннаго крещения и хиротонии, не может инаго крестити.

33. От в ересех состоящаго иерея, и еретическую имущаго хиротонию, не может совершено быти крещение.

34. О иже крещаются в новопроповедуемаго Iисуса, не крещаются тии во Iсуса Христа Сына Божия.

35. Яко на от еретик крещаемых, аще и в три погружения крещаются. Дух Святыи не снисходит.

 

Главы вторыя части перваго предела.

 

1. Что есть покаяние.

2. О еже кто есть научивыи покаянию.

3. О еже кая есть сила святаго покаяния.

4. Яко исповедаяи должен быти православен, и исповедаяися такожде православныи.

5. Лучше есть несвященнику искус имущему исповедатися, нежели священнику неискусну, колми паче еретику.

6. Яко премнози святии в первенствующей церкви не имущии священства исповедоваху.

7. Яко помышления тожде суть, что и греси.

8. Святии отцы и простым повелевают на покаяние приимати, и епитимийствовати.

9. О еже святии отцы не токмо на лета определиша отлучати от причащения, но и трудами и подвиги плоть изнурити.

10. О еже отцу духовному с разсмотрением подобает чадом своим епитимии налагати, елико могут понести.

11. Яко и древле преподобнии отцы, и пустынножители, не имущии священства впадших в грехи и кающихся епитимийствоваху.

Главы втораго предела.

1. О еже не токмо иноком несвященным: но и миряном не имущим хиротонии, во время нужды попущается от отец исповедовати и епитимийствовати.

2. Яко область от Христа Спаса отпущати грехи не единым священником дадеся, но всем верующим вонь.

3. О еже, не токмо, ихже свяжут священницы на земли, будут связани и на небеси: но ихже и несвященнии свяжут на земли, будут связани и на небесех.

4. О еже друг другу исповедати согрешения повелено есть.

5. Яко исповедаяися преподобному мужу, приемлет от Бога оставление грехов.

6. Яко в первенствующей церкви от любве подвизаеми, неимущии рукоположения, исповедаху.

7. О еже мужу духовну могущему лечьбу подати, без стыдения святии отцы повелевают исповедати.

8. Святии отцы повелевают к другом велми любимым и праведным, аще и мирстии человецы суть, исповедати согрешения.

9. Яко и в первенствующей церкви мнози святии неимущии рукоположения, исповедоваху, отпущения грехов подаваху.

10. Яко древле во святей церкви не кийждому иерею власть вдавашеся от архиерея кающихся приимати.

11. О еже нелепо есть, аще и писания свесть, самому себе исповедати.

12. О еже аще кто не изречет грехов своих, на посрамление свое не имать оправдатися пред Богом.

13. О еже покаянием очищается человек от грех своих и невозбранно проходит воздушная мытарства.

14. О еже не всякому лепо есть исповедати согрешения, но имущим искусство, и могущим врачевати.

15. Яко отлагающии покаяние к смертному часу не получают исцеления.

16. О связании и разрешении кающихся человек.

 

Главы третия части перваго предела.

 

1. Аще и нужно есть причастие животворящих таин Христовых ко спасению. обаче не имущу где причаститися, может спасен быти.

2. Аще и седмь таин во святей церкви исповедаются, но две точию тайне нужнопотребне ко спасению, ихже кроме невозможно есть спасения получити.

3. Премнози древле жительствующии по пустыням, не причащахуся святых таин, овии чрез многая лета, овии же чрез всю свою жизнь, обаче спасошася.

4. Трегуби суть причащающиися божественных таин во святей церкви, ови усты и сердцем в чистой совести, друзии верою и усердием, третии едиными токмо устнами.

5. Кийждо от христиан имеяи веру праву и дела добрая, может по мере веры и добродетелей духовне наслаждатися Агньца Божия.

6. Во святей церкви вся службы, праздницы, причащения, и жертвы уставлены, не иного чего ради, точию дабы человек очистился от грехов своих.

7. Аще кто некия ради нужды, не имать где и от кого причаститися, обаче зелне желает, таковыи яст тело и кровь Христову, и кроме причащения, единым теплым желанием и верою.

Главы втораго предела.

1. О вине действителней.

2. О вине материалней.

3. О вине формалной.

4. О вине кончателной.

5. О печатании просфир трисоставным крестом, в кругловидной печати и таинстве кругловидства.

6. Яко в великороссийстей ныне церкви обретаются два креста, тако и два Христа.

Главы третияго предела.

1. О еже от священника проклятию преданнаго не подобает причащатися.

2. О еже отлучению подлежащаго священника не лепотствует причащатися.

3. Яко от священника еретичествующаго не подобает причащатися.

4. Яко не подобает с еретики причащатися, зане причащаяися с ними едино тело бывает.

5. От еретиков не подобает причащатися, аще и чрез всю свою жизнь кому случится, нужды ради некия пребыти непричастну.

6. Яко причащаяися с еретики, причастник будет и мучения ждущаго еретик.

7. В первенствующей церкви премнози святии пастырие образ себе своим стадом представляюще, не причащахуся с еретики.

8. Яко древле не точию иноцы, но и мирстии людие бегаху еретическаго причащения.

9. О еже в прежния времена безчисленно множество народа во всех четырех странах вселенныя, от еретик раны и узы, разграбления имении, темницы изгнания, и самую смерть подъимаху, во еже бы не быти причастником им.

10. Во время пришествия антихристова не имать явитися тело и кровь Христова, обаче святии будут.

 

 

Книга глаголемая Меч Духовныи, на схизматики.

 

 

Часть первая о святом крещении.

 

Аще кто не родится водою и Духом, не внидет в царствие небесное.

Словеса суть самого Господа нашего Спасителя Iсуса Христа,

положенная у Иоанна во священном евангелии.

 

Предел первыи.

В сем пределе взыскателно есть, что есть крещение; и кая его есть сила;

и подобает ли от еретик крещение приимати.

 

Глава первая.

Что есть крещение.

Крещение есть видимое омовение тела, чрез трищное погружение в воде, с призыванием имене Пресвятыя Троицы, знаменующее невидимо Духом души измытие, от первороднаго праотеческаго, и всех грехов. Сице глаголет Иоанн Дамаскин [свт. Иоанн Дамаскин книга 4. глава 10. О крещении]: заповеди же нам даде Христос водою возрожатися и Духом, молбою и призыванием, воде приходящаго Святаго Духа. Понеже бо сугуб человек, из души же и телесе, сугубо нам даде и чищение, водою же и Духом. Дух убо сущее по образу и по подобию в нас возобновляющу. воде же Духа благодатию чищащой тело греха, и тли свобождающей. или: крещение есть измовение и потопление всех грехов кающагося. якоже святыи апостол Павел научает ны глаголя [1 коринф. глава 6]: но омыстеся, но освятистеся, но оправдистеся именем Господа нашего Iсуса Христа, Духом Бога нашего. о чесом явственно засвидетельствует в Катихисисе велицем сице [Катих. вел. глава, 27, о крещении. лист 92]: Вопрос: откуду нарицается крещение; отсюду нарицается, еже погружаю и измываю грех. измывает бо и потопляет вся грехи крещающагося, по Григорию Богослову. Сим согласно и от новых учителей Стефан митрополит Рязанскии изъявляет, глаголя [книга Камень веры, часть 2, главы 9, лист 1040]: Крещение есть измытие, и отъятие праотеческаго греха чрез трищное погружение в воду. Камень веры. часть 2. Но и новотворец книги новосочиненныя глаголемыя Мир с Богом не неподобне глаголет сице [книга Мир с Богом, догмат 1 о тайне крещения, лист 108]: Крещение есть омовение водное тела человеку, с призыванием Пресвятыя Троицы, по преданию Господню, знаменающее омовение души от грехов. о чесом апостол [ефесеом, 2]: Христос возлюби церковь, и себе предал есть за ню, да освятит ю, очистив банею водною, глаголом. Паки в Катихисисе велицем глаголет [Катих. вел. лист 92. Титу зач. 302, ст. 5]: Крещение есть баня паки бытия, обновление Духа Святаго, Егоже излия за нас обилно, Iсусом Христом Спасителем нашим, святии бо богословцы святое крещение многоименне нарицают. Сице бо святыи Григории Богослов во втором слове на Крещение глаголет [Катих. вел. лист 5]: Крещение есть тезоименито просвещению. просвещение же светлость есть душам. житию приложение. поможение немощи нашей. плоти отложение. Духу последование, Слову общение. создания исправление. греха потопление, света приятелище, тме разрушение. к Богу возвожение, крепость вере. уму совершение, отверзение небеснаго царьствия. жизни изменение, работы отсечение, узам разрешение. что убо о сем много числити. всех убо божественных даров болшее, и великолепнейшее дарование. якоже бо святая святых зовутся некая, и песни песней, тако и сие всякаго иного, еже у нас просвещения сущи святейшии. до зде святыи Григории. Се убо явственно показахом, что есть святое крещение. прочее поведателно есть, кая есть его сила.

Глава, 2.

О силе святаго крещения.

Сила святаго крещения есть, еже омывше вся грехи наша, дает нам всецелу благодать Божию, и творит из врагов сыны Божия, и наследники царствия небеснаго, сице [Катих. вел. лист 249 об.]: егда человек грешен будет, не может покаянием своим грехов избавитися, благодатию же Христовою во крещении очистився будет христианин, и сын Божии, и дарованием и сыновлением образ Христов, и самого того Сына Божия в себе имеяи, якоже святыи апостол Павел глаголет [галат. гл. 3]: Елицы во Христа крестися, во Христа облекостеся. сие же бывает сице: елма убо вси раждаемся в первороднем гресе, егоже имамы от прародителей наших. Сей же грех с прочими грехопаденьми в крещении прощен бывает, и дается нам тогда всецела благодать Божия, оправдающая ны. и сице бываем чада Божия, и наследницы царствия небеснаго. внегда бо ко умовению водою, словеса сия Божия приложатся, сиречь: крещается раб Божии, имярек, во имя Отца, аминь. и Сына, аминь. и Святаго Духа, аминь. тогда с сими словесы, тайна святаго крещения совершается, и душею паки раждается крещаемыи силою Святаго Духа. Сей же Дух Святыи несказанно пременяет воду во умовении сем, якоже внегда огнь зимную воду в кипящии укроп претворяет, и дает ей сицевое совершителное, яко касающися тела и душю омывает, и паки раждает. и убо, не вода сие творит, но Духа благодать. сего ради святое крещение омывше крещающагося от всех грехов, облекает в криле орли, и устрояет возлетати в небесная селения. по премногу нас научает сему святыи Григории Нисскии, укаряя тех, иже по приятию святаго крещения, на первая злая дела возвращаются, сице бо глаголет [Григории Нисскии, в слове на Крещение]: Тако безстуднии, крещение приемше, не вем которыми подвигошася неистовствы, и спасение от крещения воде истекающее погубляют, егда Христовой плоти спогребены бывше, во орли облекошася криле, могуще ко оным небесным птицам, иже суть безсмертнии дуси, возлетати. До зде Григории. Явственно о сем показуется и от истории о святей Пелагии антиохийстей, в ней же повествуется тако [Минея чет. Слово на святое Крещение; и октября во 8 день, в житии преп. Пелагии]: Преподобный Нон епископ Илиополский, егда во Антиохии имяше приобрести Богови Пелагию явно грешницу, виде во сне нощию видение сицевое: Мняшеся стояти в церкви на литургии, и се некая голубица черна, скверна и смрадна паряше окрест его, юже он ем. егда воверже в крестилницу, и омыв ю, абие та голубица бысть чиста лепотна, и паче снега убелена, и от воды просто к небеси летяше. то видение знаменова. яко блаженныи отец он обратит грешницу к Богу, и святым крещением просветит ю. О коль суть силны святаго крещения воды! яко человека от сети диаволи исторгнувше, небесною птицею соделовати мощны, и к престолу Божию приводити. Чесому доволно научает святыи Григории Богослов, сице глаголя [Григорий Богослов во 2 слове на Крещение Господне]: вчера, рече, на одре повержен оставлен и разслаблен, и не имел еси человека, да егда возмутится вода, ввержет тя в купель. днесь обрел еси человека, Того же и Бога, паче же Бога и человека, взят его от одра, паче же взял еси одр, обрел еси благодать, исторгнул тя есть от власти темныя, и примири отчюждена, во еже быти ти святу и непорочну. глаголет бо апостол Павел, в послании еже к колосаем [колос. зач. 258]: Вас иногда мертвых сущих в прегрешении, и в необрезании плоти вашея, сооживил есть с ним. вчера убо долу, ныне же горе твою душю приемлет Бог, направляет, у престола царьска поставляет, дает сыном Божиим быти, иже не от крови, но от Бога, рече, родишася, еже есть сыноположенною материю святою купелию. Таже тогда и глаголати абие научает [Катихисис вел., лист 317. Богослов Г. в слове на Крешение], отрицаюся, речеши, сатаны, вместо еже бы рещи, не послушаю тя лукавниче. таже, да не иными тя имет, приложи, и всего студа его, и всея службы его, и всех аггел его. и не ктому стрещи рая вводит тя, но жительствовати на небеси устрояет. не древо сматряеши, но самого абие объемлеши Владыку. срастворяешися телу, смешиваешися горе Седящему. идеже приступити несть мощно диаволу, аще не снидеши ты к Нему, не возможет взыти, идеже еси, на небеси бо еси, небо же нешествено есть диаволу. сие приобретение имамы от святаго крещения. о нем же глаголет [Тим. зач. 302]: Егда благодать и человеколюбие явися Спаса нашего Бога, не от дел праведных, ихже сотворихом мы: но по своей Его милости, спасе нас банею паки бытия, и обновлением Духа Святаго, Егоже излия на нас обилно Icуc Христом Спасителем нашим, да оправдившеся благодатию Его, наследницы будем по упованию жизни вечныя. Видиши ли коль велия неизреченная сила святаго крещения, яко исторгает от сети диаволи омывает вся грехи, содевает из врага сына Божия, творит из сквернаго чистаго, убеляет очернелаго паче снега, облекает в криле орли, возводит горе, устрояет жителя на небеси наслаждатися лицезрения Божия, соделовает наследника же Христу. сего ради зело нужно потребно есть крещение на спасение наше, занеже спасает нас. якоже бо оныи ковчег Ноя от потопа сохранил есть [Катих. вел. лист 92]. сице глаголет святыи апостол Петр, и нас крещение спасает, глаголет бо: в нем же мало душ спасошася от воды, егоже воображение ныне и нас спасает крещение. якоже о сем и святыи Григории Богослов глаголет [Григорий Богослов, 2 слово на Крещение]: Спогребохомся убо Христови крещением, яко да воскреснем Ему. совнидем, яко да и вознесемся. совзыдем, яко да и спрославимся. да будет ти баня не точию телу, но и образу, рекше, не тело твое точию да омочится, но и душа. не измовение грехов токмо, но и нраву исправление [Катих. мал. лист 28]. ибо егда человек в крещении в воде погружается и измывается, тогда невидимо в души первородныи грех омывает и очищает. якоже святыи апостол Павел научает [1 посл. коринф. глава 6; Григорий Нисск. О крещении Христове, галат. 3; рим. глава 8]: Омыстеся, но освятистеся, но оправдистеся именем Господа нашего Iсуса Христа, и Духом Бога нашего. в то бо время бываем удами Христовыми, и в Него облекаемся. По того же Павла учению: Елицы бо во Христа крестихомся, во Христа облекохомся. и сице бываем наследницы Богу, снаследницы же Христу.

Но уже отчасти, или якоже мнитмися, и не недовольно предложихом, что есть истинное христианское крещение, и кая есть его сила. Прочее же не непотребно есть знати что есть и еретическое крещение, да познав оное, всяк хотяи быти сын церкве православныя, удобь может тщание имети блюстися его всеми силами, во еже не впасти в не. тем же и глаголем.

Глава, 3.

Что есть крещение еретическое.

На сие отвещают святии отцы собора иже в Карфагене с блаженным Киприаном сущии, сице глаголюще [прав. 73, иже в Карф. соб. помест.]: крещение еретическое несть крещение, но паче сквернение. еже убо аще несть кому внятно, да слышит пространьшаго изъяснения сицеваго: крещение еретическое, несть омовение тела водою знаменающее невидимо пришествием Святаго Духа омытие, первороднаго праотеческаго, и очищение всех грехов крещающагося, но паче осквернение, и грехов приложение. понеже бо от еретик крещении некрещени, по сказанию 68 правила святых апостол. Почто: Яко на от еретик совершаемыя тайны Дух Святыи не приходит. По словеси преподобнаго Максима Исповедника: или: крещение еретическое несть крещение, но осквернение. понеже от нечестивых приемлющии крещение, сообщницы мудрования их бывают. ниже бо суть тии священницы, от них же прияша крещение, ниже крестившиися от них очистишася, но осквернишася, ниже оставления грехов приемлют, но связание нечестия. Явственно о сем священии апостоли в Завещании своем, завещавающе, не приимати от еретик крещения, сице глаголют [книга Завещаний апост., преведена с греч. на славенорос. язык во граде Стриковском Досифеем митр., сочавским, книга 6, глава 16. яже в Москве в патриаршей ризнице]: еже от нечестивых крещение данно, несть крещение, но осквернение. [ниже] онии, иже от нечестивых приемлющии [крещение] осквернение обещницы разума их будут. ниже бо суть тии священницы. глаголет к ним Бог: Понеже и ты отринул еси разум, отрину тя и Аз священствовати Мне. ниже крестившиися у них очистишася, но осквернены суть, не оставление грехов приемлюще, но связание нечестия. до зде от Завещания. видиши ли, яко еретическое крещение несть крещение, но паче осквернение. тем же убо аще истинное христианское крещение есть очищение души, потопление всех грехов крещающагося. еретическое же крещение несть крещение, но паче осквернение, яко крещающиися от них не очищаются от прежних своих грехов, но паче оскверняются, то како не подобает от еретик крещение приемших, и ко святей православней христианстей вере прибегших, паки второе совершенно крещением крестити? всяко подобает. и слыши:

Глава, 4.

Приемлющии от еретик крещеных яко крещеных, из сана измещутся.

Божественнии апостоли, во священных своих правилех, обращающихся от ересей, ко истинней православней христианстей вере, и прибегающих от нечестия к православнокафоличестей соборней и апостольстей церкви, приемших первое крещение от нечестивых еретик, повелевают совершенно святым крещением крестити. Сице глаголет правило святых апостол, 46 [Кормчая, лист 12 обор.]. [Крещение и жертву еретическую прием святитель не священ. еже истолковано сице: епископ, или презвитер, или диакон. аще не похуляет, ни ругается еретическому крещению, но приемлет крещеннаго от сих, или приносимая от них на жертву, сиречь на службу приемлет, таковыи да извержется от сана. кое бо сочетание Христу к диаволу: или кая часть верному с неверным [2 кор. зач. 182];]. Что убо к сим возглаголеши? что ли воспрекословиши? святии апостоли епископа, презвитера, и диакона, иже не хулит, ни ругается еретическому крещению, но приемлет от них крещеннаго, яко истиннаго крещеннаго. из сана измещут. и ты ли глаголеши. яко не подобает второе крестити, первое от еретик приемших крещение приходящих к православней вере? аще не подобает, како будут истинна словеса святыми апостолы реченная, яко аще епископ, или презвитер, или диакон. не похуляет ни ругается еретическому крещению, но приемлет крещеннаго от сих. таковыи да извержется от сана? убо лгут? да не будет. тако бо Духу Святому изволися быти. сице и они уставиша. якоже сами о себе свидетельствуют, глаголюще [Деян. зач. 36]: [изволися Духу Святому и нам]. аще же истинна суть. якоже и суть, убо всуе лжеши, яко несть втораго крещения, ниже от еретик крещенных, и обращающихся к православней вере второе святым крещением подобает крестити. аще бы не подобало, не бы божественнии апостоли священнодействителей приемлющих от еретик крещенных из сана извергали, а понеже извергают. убо подобает;

Глава, 5.

Яко первое приемших крещение от православных не подобает крестити, от еретик же всячески.

Не подобает убо второе крестити, первое приемшаго крещение от православных, еже зело и священная правила возбраняют творити. сице о сем правило святых апостол 47-е вопиет: [второе крещаяй крещеннаго истинным крещением. и не покрещеваяй оскверненаго от зловерных, таковыи святитель не священ. его же толкование сицево: несть достойно дващи крестити человека, аще же которыи епископ, или презвитер, крестит кого второе совершенным крещением, да извержется от сана. суть же нецыи, иже по прилучаю прежде благоверно крещени бывше отвергшежеся Христа волею и неволею, о осквернени бывше, таковыя миром токмо помазуеми освящаются. ниже не крестит совершенно второе, перьвое крещение приемшаго от еретик, но приемлет его яко верна. да извержется от сана]. но виждь ми яко и в сем святых апостол правиле, двое якоже видимо есть повелевается. первое: возбраняет от православных крещенаго крестити второе совершенным крещением. второе: Повелевает паки совершенно святым крещением первее крещеннаго от еретик крестити. и не точию просто повелевает крестити первое крещение приемшаго от еретик: но аще кто от священнаго чина приимет его яко верна, таковаго и сана, в нем же есть, чюжда творит. темже убо аще священнии апостоли епископа или священника приемлющаго от еретик крещеннаго яко верна сана лишают. како от них крещеннаго приходящаго к православней вере не подобает паки второе крестити? всячески подобает. аще бы не подобало первее от крещеннаго, и приходящаго ко истинней православней вере. второе святым крещением крестити, не бы святии апостоли приемлющаго епископа или священника крещеннаго от них яко верна сана лишали. а понеже лишают, убо безпрекословно подобает.

Глава, 6.

От еретик приемлющии крещение общницы суть их зломудрствованию.

Паки священнии и божественнии проповедницы апостоли, в книзе своего завещания 6. во главе, 16. повелевают от еретик крещенных, и приходящих к православней вере яко некрещенных. второе святым крещением крестити, в нейже писателными своими гласы вопиют сице: [такожде яко ниже покрещевати подобает, ниже несть крещение, но осквернение. такожде и крещением единым довлевайтеся самим, еже в Господню смерть даемым. не оное, еже от злоименитых еретик даемое, но еже от непорочных священник даемое во имя Отца и Сына и Святаго Духа. ниже оное. еже от нечестивых приято буди вам. ниже от преподобных сущее укоризненно за второе. якоже бо един Бог, един Христос, един Параклит, едина же и Господня во плоти смерть: сице едино и еже в Нем даваемое крещение. а онии, иже от нечестивых приемлющии [крещение] осквернение, обещницы разума их будут. ниже бо суть тии священницы. глаголет к ним Бог: понеже и ты отринул еси разум, отрину тя и Аз священствовати Мне. ниже крестившиися у них очистишася, но осквернены суть, не оставление грехов приемлюще, но связание нечестия. не точию же, но и очистившихся, вторицею крещати покушающиися, второе распинают Господа, убивают Его вторицею, посмевают божественная, ругают святая, поношают Духа, кровь святую яко общую нечестивствуют на пославшаго, на пострадавшаго, на свидетельствовавшаго]. до зде от Завещания святых апостол [Зри убо и зде разум словес священных апостол]. двое бо запрещаемо есть. первое: возбраняют крестити второе. первое крещение от благочестивых приемшаго. второе: повелевают всячески, первее крещение приемших от еретик второе совершенно крестити. тамо убо в правилех не явиша, чесо ради от еретик крещеных подобает паки крестити. зде же и вину показаша: понеже от еретик приемлющии крещение не очищаются но оскверняются, ниже оставление грехов приемлют, но связание нечестия. елма же убо аще по божественным апостол гласовом, от еретик приемлющии крещение не очищаются, но паче оскверняются, ниже оставление грехов приемлют, но связание нечестия, то како рцы ми, не подобает от них крещеннаго, егда приходит ко христианстей вере, паки второе святым крещением очищати. ей подобает.

Глава, 7.

Яко не токмо от еретик крещеннаго крестити паки повелевают, но и недоведящих, аще крещени быша.

Не токмо же убо священнии апостоли, но и божественнии отцы сим последующе, не точию от еретик первее приемших крещение но и недоведящих младенческаго ради возраста, аще крещени быша. повелевают паки второе святым крещением крестити. сице отцы собора поместнаго, иже в Карфагене, в правиле, 73, вопиют глаголюще [Кормчая лист 149]: [неразумевающих, аще крещени быша, или ни, годе бысть крестити, да не како двоеразумием лишатся божественаго очищения. егоже толкование сицево. иже второе крестити кого, крещение первое приимша от правоверных, различная правила отрицают: токмо аще не будет от нечестивых еретик крещен: тех бо крещение сквернение есть паче а не крещение. аще ли кто от правоверных сумнится и недовесть аще крещен есть, или ни. ни сам того свесть младенческаго ради возраста, и иного не имать извествующа ему, и свидетельствующа воистинну, яко крещен есть, таковаго без сумнения крестити подобает, да не размышления ради лишится божественнаго очищения]. внемли убо и сих святых отец разуму. не явственно ли и они повелевают от еретик крещенных паки крестити. виждь, реша бо первее, еже второе крестити кого, крещение первое приимша от правоверных, различная правила отрицают. таже наведоша токмо аще не будет от нечестивых еретик крещен. сиречь, разве аще кто от нечестивых еретик будет крещен, таковаго подобает паки крестити. почто. вину предложиша: тех бо реша, крещение осквернение есть паче а не крещение: и аще убо по святых отец гласовом, еретическое крещение сквернение есть паче а не крещение, аще они согласно божественным апостолом повелевают от еретик крещенных паки крестити. то чесо ради не подобает первее от еретик крещенаго, паче оскверненаго, к православней вере приходящаго, паки второе святым крещением очищати, всячески подобает.

Глава, 8.

Яко от еретик крещении не толико просвещаются, елико помрачаются.

Да приидет же днесь в посреде, и зелный в богословии святый Григорий, и да заградит уста приемлющих от еретик крещенных, яко православно крещенных, иже согласно вышепредреченным отцем, повелевает всячески приемших первее от еретик крещение, и приходящих ко святей непорочней вере, второе святым крещением крестити. сице бо в своих словесех гремя на еретики трубы велегласнее вопиет, глаголя: [ныне же кая лесть благодати, паче же дающих благодать: яко в Бога уверити, и возъити безбожну. иному исповестися, и иному учитися никаковы словес татьбы. и льсти, иным вопрошением, и исповеданием во оно не сущыя, увы светлости, аще по бани очерневаются. аще светльшыя зрю, не у очищенныя. аще крестителя. злославием коварствуюся. аще ищу духа лучшаго, и не обретаю. даждь ми баню вторую, и о первой зле помысли]. слово 24, на еретики. видиши ли коль явственно повелевает святыи Григории, от еретик крещенных паки крестити. но вем яко нецыим от зде сущих, разум святаго Григория Богослова неразумен есть, и неудобовнятен: сего ради аз отчасти его, да удоборазумителнейший будет потщуся расположити. и зри ми, рече бо святыи: увы светлости, зде иронически рече, сиречь посмеятелне рекше. о каково просвещение от еретик крещающимся бывает: егда по бани очерняются, сиречь темнейшии душею бывают, ибо во святом крещении крещающагося душа очистившися от всех своих прежних грехов, бывает свтлейша солнечных лучь. зде же толико от еретик крещающагося душа светльша бывает, яко паче очерняется. тем и рече: увы светлости аще по бани очерняется. таже рече: аще светльшыя зрю не у очищенныя, сиречь светлейшая, рекше чистьшая душа бывает оного, иже донележе не крестится от еретик, имже крещением мне очистится, но паче очернеся. того ради и рече: аще светльшыя зрю, не у очищенныя, еже есть еще не крещенныя по сем рече аще крестителя злославием коварствуюся, то есть: аще крестителя нечестием оскверняюся. паки рече: аще лучшаго ищу, и не обретаю. понеже убо в сей бани всяк крестяйся от православнаго ищет себе лучшаго, и обретает. како же? слыши: ищет хотяй креститися очиститися от всех своих прежних грехов, и очищается. ищет сын Божии по благодати быти, и бывает. ищет наследником царствия небеснаго быти, снаследником же Христу, и бывает, от еретик же в совершаемой бани, сиречь крещении, не тако, но вся вопреки. ищет очиститися от всех прежде содеянных своих грехов, и не очищается. ищет сын Божии по благодати быти, и не бывает, ищет наследником царства небеснаго быти, снаследником же Христу, и не бывает. тем и рече: аще ищу лучшаго, и не обретаю. и наведе, даждь ми вторую баню, и о первой зле помысли. зриши ли, коль явственне повелевает святый Богослов первее от еретик приемших крещение. и прибегших ко святей христианстей вере паки второе святым крещением крестити. темже убо аще святый Григорий Богослов еретическое крещение нарицает очернение, рекше осквернение: аще божественнии отцы собора, иже в Карфагене, еретическое крещение именуют сквернение паче а не крещение: аще священнии апостоли изъявляют от еретик приемших крещение не очищатися, но паче сквернятися, не оставление грехов приимати, но связание нечестия. то како, рцы ми, не подобает от еретик первее приемших крещение, и приходящих к православней вере, паки второе святым крещением крестити безпрекословне подобает. и аще тако есть, якоже и есть, како убо и от наших росиан, первее приемших крещение от священников никонопоследствующих, в толиких и толь премногих ересех. о них же напреди имамы отчасти глаголати. состоящих, прибегающих ко святей древлеправославнокафоличестей вере, не подобает паки второе святым крещением очищати? не отрочне подобает. аще бы не подобало, первее от еретик крещение приемших ко святоправославней вере приходящих, святым крещением покрещевати: не бы святый Григорий Богослов глагола: даждь ми баню вторую, и о первой зле помысли: не бы божественнии отцы собора, иже в Карфагене повелевали от еретик крещенных покрещевати: не бы священнии апостоли приемлющаго епископа, или презвитера от еретик крещеннаго яко вернаго, из сана извергали. но понеже и святый Григорий Богослов, и священнии отцы, и духопросвещеннии апостоли, повелевают первее от еретик приемших крещение, приходящих ко святей соборней апостольстей церкви, святым крещением второе крестити, не крестящих же, но с первым крещением, яко верных приемлющих, из сана измещут. убо безпрекословно подобает второе крестити.

Глава, 9.

Крещение есть корень святыя непорочныя веры.

К сим же святии богословцы, святое крещение сказуют быти корень святыя веры и основание. сице святый Иоанн Дамаскин объявляет сими словесы глаголя: [крещение есть корень святыя христианския непорочныя веры, яко твердое основание]. книга жития Иоасафа, глава 8. зде внимаем: аще убо крещение есть корень святыя христианския веры. по святому Дамаскину: убо вера есть древо с ветвьми возрастающее и стоящее на корени святаго крещения. аще крещение есть основание веры. убо вера есть здание кафолическаго благочестия. стоящее на всеспасительном крещения фундаменте. но якоже корень древа всячески не отделяется, и древо корене никогдаже оттерзается, яко основание здания не разлучается отнюд, ниже здание основания разделяется когда. понеже неразделныя споения случением, твердость своего стояния вскрепко показует. аще ли разлучается древо от корени, здание от основания, оба разорятся, елико древо от корене разделившееся умерщвяется: толико здание от основания отлучившееся разрушается. тако крещение с верою неразделным совокуплением споено, и согласно долженствует быти и неразделятися, якоже святии велиции богословцы научают ны явственно. сице святый Великий Василий в послании о иночестве согласное веры и крещения показует глаголя: [крестити подобает, якоже прияхом веровати же, якоже крещаемся]. книга о постничестве. и святый Афанасий Великий неразделность крещения и веры изъявляя взывает: [темже и Спас не просто заповедал есть крещати, но прежде научите, и потом крестите во имя Отца и Сына и Святаго Духа. да от учения вера правая изъявится, и с верою совершение крещения приложится]. в слове 3, на ариан. ныне убо разсмотри молю, благоразсудителне, мысленныма ума твоего очима, аще есть корень, по сих святых отец пределом, новодействуемое в российстей церкви от никоновых ученик, древлероссийскаго благочестия крещение, всяко не обрящеши. почто? понеже не токмо не споевается со оным, но и разделяется от оного. понеже не токмо не срасльствует с древлецерковными догматы: но и разлучается от оных. понеже не токмо не зрится быти основание древлеотеческаго кафолическаго благочестия: но и далече отстоит от онаго. яко не токмо соединяется со отцы: но и поносит отеческая предания. кое несогласие и разделение новодействуемаго крещения, с древлероссийским благочестием, показует явьственно яко отложение древлепечатных святых книг: тако тяжкословесными хуленьми оных поречение [Скрижаль, лист 715]. яже бо в древлеправославней церкви православныя догматы, имиже вседоброе веры таинство словесы. или знаменователне иероглифически, православно изъявляет. сия в новопечатных тяжкословными порицанми, и ересми арианскою, македонскою несторианскою, арменскою, и прочих безбожных еретик, неправедне и вседерзостне порицаются [Пращицы ответ 30, 31, 32, 33, 34, 35, 36, 37, 41, 42, 52]. а яже в древлецерковных святых книгах, ересми и нечестием пореченная: сия в новопечатных книгах, и в новотворимых действах, всесмелостно имеются. показуют, яко толь тяжчайшая гонения, толь нестерпимая мучения, толь злодейственныя смерти, ими же за древлецерковное благочестие содержащии си всеяростно облагахуся, и облагаются, немилостивно. показуют новоизданныя клятвы и анафемы, яже в новосочиненных книгах, Скрижали [лист нечислен], Жезле [лист 62], Увете [лист 57], и в Соборнем свитце, и в новосочиненных присягах [лист 2], на древнее благочестие ужасно и предерзостно воспосылаемыя. показуют несогласия новосовершаемых действ, к древним тайнодействам. яже бо древле от святых отец, клятвам и анафемам предашася, сия в новопечатных книгах, и в новотворимых тайнодействах небоязнено и присно, и всюду совершаются. о чесом во ответех поданных Синоду, яко во ответех пятом и девятом, тако во ответе пятьдесятом и прочих явствено изъявлено, и в сей книжице нижше отчасти во втором и третием пределех изъявится. аще же убо новодействуемое крещение не соединяется с древлецерковным Руссии православием. аще не соглашается со святыми преданиями. аще святыя апостольския и отеческия уставы под клятву отсылает. аще анафемствованная святыми отцы в себе удобосодержанно замыкает. убо не есть корень древлецерковнаго благочестия: не есть соединение со святою древлеправославнокафолическою верою. аще бы было новодействуемое крещение корень древлероссийскаго благочестия: не бы от древлецерковнаго благочестия оттерзалося. аще бы основание древлеправославныя веры являлося: не бы древнее благочестие разрушало. а понеже древлероссийскаго благочестия оттерзается: понеже древлеотеческия догматы разрушает: понеже святых апостол предания клятве предает. убо не есть корень и основание. яко не со отцы собирает, ниже отцем согласует. аще не есть корень и основание древлероссийскаго православия. како может быти истинно? всяко несть. аще не есть истинно: убо не есть омывателно праотеческаго первороднаго греха. ниже есть очистително всех грехов крещающагося, но паче окалятелно. и аще тако есть, якоже и есть, то како от таковое новодействуемое крещение имущих, и приходящих ко святей древлеправославней христианстей вере не подобает второе совершенно святым крещением крестити. зело подобает.

Глава, 10.

Крещение утвержение есть христианския веры.

Паки святии богословцы поведают быти крещение утвержение веры и извещение. сице святыи Григорий Богослов изъявляет возглашая: [Крещение есть утвержение веры и извещение]. в слове 2-м на святая Просвещения. внемлем убо словесем святаго Григория Богослова. аще крещение есть, веры утвержение, убо вера есть вещь всекрепко подтвержаема святым крещением. но елико убо утвержаемое утвержающаго не разлучается, елико укрепляемое укрепляющаго не отделяется, понеже отделившееся непотребно и удобопадателно является; толико вера крещением неразделно подтвержаемая, всекрепка и неудобопадателна является. откуду веры и крещения соединенное и неразделимое показуя, святый Никита Ираклийский тако глаголет: [вера и крещение, два образа равна себе и неразделна. вера убо совершается крещением, и предходит исповеданием ко спасению]. в толковании словес святаго Богослова на святая Просвещения. виждь, аще убо по святаго Никиты словесем, вера и крещение два образа равна себе и неразделна. откуду явственно показуется, яко вера крещению должна есть согласовати. зане якоже кроме крещения неудобно есть в царствие небесное внити, по реченному самем Господем [Иоан. зач. 8]: [аще кто не родится водою и Духом, не внидет в царствие небесное]. тако и кроме правыя и истинныя веры невозможно есть спасение получити. сице святый Иоанн Златоустый вопиет глаголя [Беседы лист 2825 и лист 123]: [Велие убо есть, (благо) и спасителное вера, и сея кроме не мощно есть спастися когда]. и паки: [Сими показует не точию не излишнюю быти веру, но и нужную тако, яко несть мощно сея кроме спастися]. подобно и во евангелии учителном, в неделю 4-ю вопиет глаголя [еванг. учит. лист 198]: [Кроме бо веры невозможно есть благоугодити Богу]. откуду многое к Богу дерзновение верующаго право показуя святыи Иоанн Златоустый, глаголет сице [еванг. поучит. в нед. 4, слово 25]: [Ничтоже убо несть паче несумненныя и чистыя веры крепчайше. ниже упования еже к Богу и надежды еже к Нему крепчайше. веруяй бо право, много имать к Богу дерзновение, и со дерзновением приступая к нему обретает, елика на пользу просит]. в вере живут праведнии. якоже пророк глаголет [Аввакум, глава 2]: праведник убо верою жив будет. ниже: аще бо есть, рече, кто творяй суд, и ищай веры, милостив ему буду, глаголет Господь. святый Афанасий Великий в толковании псалма 7-го изъявляя многомощнейшее веры, и приятнейшее Богу паче агнец и юнец всесожегаемых, тако глаголет: [теми бо наслаждается Бог, Богу паче агнец и юнец вера действует. смирение бо и благочестие паче тех может и вменяется]. верою и обетование Святаго Духа приемлем. о чесом яве извествует святый Иоанн Златоустый, сице глаголя [Беседы, лист 424 (?)]: [но не просто от Духа. но аще и яже от нас внесем. сего ради рече, внегда веровати, тако бо возможете исполнитися радости. аще веруете, аще уповаете. но не рече, аще веруете. аще уповаете: но аще избыточествуете во уповании, тако яко не точию обрести утешения лютым, но и радость имети за премножество веры и упования, тако и Духа превлечете, тако и Оному пришедшу благая соблюдете вся]. якоже и святый апостол Павел пиша к галатом вопиет [зач. 207]: да обетование Духа приимут верою. еже святый Иоанн Златоустый толкуя сице изъявляет [Беседы апост. лист 1522; к рим. зач. лист 99]: [понеже бо не можаше Духа благодать вне благодарнаго и приразившагося приити. благословляются первее, клятве отъятой бывшей, таже верою оправдившиися, привлачают Духа благодать]. видиши ли коликое есть веры богатство; сего ради по святых богословец гласовом, вера и крещение два образа равна себе и неразделна. по коим святых отец пределом, новодействуемое крещение и древлеправославная вера не зрятся два образа равна себе быти, понеже крещение не согласует древлеправославней вере. не зрится быти утвержение древлецерковнаго благоверия. зане не токмо не утвержает древлероссийских святых законов: но и отмещет оныя. аще же отмещет, убо не утверждает древлероссийскаго святаго благоверия. аще не утверждает. убо далече отделися от веры. елма же убо отделися, всяко есть непотребно. аще же есть непотребно, убо не есть омывателно крещающагося, убо есть осквернително паче, по святых отец гласовом. и аще тако есть, якоже и есть, чесо ради не подобает, вы сами судите, от новодействуемое имущих крещение, обращающихся к древлеправославней христианстей вере, второе святым крещением совершенно крестити; ей подобает.

Глава 11.

Едина есть истинная христианская вера.

Блаженный убо Павел апостол, учитель вселенныя, единость веры и крещения, и равнообразное изъявляя сими словесы, глаголет: [един Господь, едина вера, едино крещение]. ефесеом зач. 224. зде вонми словесем блаженнаго Павла. аще един Господь, едина вера Господем преданная, святыми апостолы проповеданная, седмию вселенскими святых отец соборы утвержденная, убо прочия все. елико их ни есть в поднебесней веру не суть, яже верами нарицаются, [не] веры, но прелести. явственно о сем засвидетелствуют отцы Афона, сице глаголюще [книга Кирилова лист 505 послание 10]: [вкратце вам ко утвержению речем, да знаете, яко все веры прочие, иже верами зовутся, не суть веры, но прелести, наченши от латынския и до прочих всех. и почто не суть достойни называтися верами; того ради, яко ни едина от них не вмещает Духа Святаго даровании, ни пришествия Его сподобляется]. послание 10. почто ни едина от вер кроме истинныя не вмещает Духа Святаго даровании? [Катих. вел. лист 21] понеже не по словеси Божии утверждаются, ниже по преданию святых апостол, и богоносных отец жительствуют: но по волях, и по преданиях лстивых еретиков шествуют. сего ради ничтоже ино глаголется о них, точию яко не сый. суетни бо и ложни, и бесовския нарицаются, яко свидетельствует божественный апостол Ияков глаголя [зач. 53]: [и беси веруют и трепещут]. и аще по блаженных отец гласовом, все прочие веры, не суть веры, но прелести, како убо кто от ум имущих, от Никона новомышленную веру, дерзнул бы нарещи правою верою? кая, яже в древлеправославней церкви православныя догматы содержимыя, ими же вседоброе веры таинство изъявляется, тяжкословными порицаньми и ересьми, неправедно и продерзостно порекши отмещет. кая, яже древлеправославная церковь ереси и нечестие нарекши отрину, сия в новодействуемых действах всесмелостне в себе замыкающи содержит. кая, яже святии отцы клятве и анафеме предаша, сия небоязненно и присно в новотворимых тайнодействах содержащи имеет. аще бо убо в нововымышленной от Никона вере, вседоброе древлеправославныя веры исповедание и таинство отмещется: аще в новоустановленной древлеблагочестивою церковию ереси и нечестия нареченная содержатся. аще святыми отцы клятве и анафеме преданная замыкаются: како может быти истинная православно христианская их вера? в вере бо аще и мало что изменено обрящется, не ктому уже есть вера истинная, но прелесть и вымысл. о чесом яве засвидетелствует святый Иоанн Златоустый сице глаголя [Беседы апостол. лист 1474; к галат. зач. 199]: [якоже убо в цатах царьских, иже и мало образа пресек, всю непотребну содела: сице иже здравыя веры и малейшую часть превратив, все погубляет. на горшая происходя от начала]. како же будет вера их права и благоприятна; егда вседоброе древлеправославныя веры таинство отмещет, егда древлеблагочестивою церковию ереси и нечестия нареченная в себе содержит, егда святыми отцы клятве и анафеме преданная в себе замыкает; аще бы была вера их права и апостольская: не бы вседоброе древлеправославныя веры таинство отметала. аще бо истинная и не имущая была прилог еретических: не бы древлеблагочестивою церковию ереси и нечестия нареченная в себе содержала. аще бы была чистая и святоотеческая: не бы святыми отцы клятве и анафеме преданная в себе заключала. но понеже вседоброе древлеправославныя веры таинство отмещет. понеже древлеблагочестивою церковию ереси и нечестия нареченная в себе содержит: понеже святыми отцы клятве и анафеме преданная в себе замыкает. убо не есть святоотеческая истинная и права, яко не со отцы собирает, ниже святым отцем согласует. аще же не есть святоотеческая истинная и права, како убо может быти благоприятна? поистинне не может, паче же несть. аще же вера несть благоприятна, то кто бы от благоразсудителных имел прияти крещение их, поистинне никтоже. почто? понеже вера и крещение по словеси Никиты Ираклийскаго, два образа равна в себе и неразделна. и аще вера и крещение равна себе и неразделна. како убо ты сопротив святых отец мудрствуя, разделив я, крещение приемлеши, безпрекословно должен еси и веру их прияти. зане яже бо крещение их новодействуемое отмещет святыя древлеправославныя догматы, сия и вера. якоже выше рехом. аще ли же вера их несть ти приятна, всяко ниже крещение их да будет ти приятно. и слыши о сем блаженнаго Иоанна митрополита Никейскаго трубы велегласнее сице вопиюща [Кормчая писм. свт. Иоанн митр. Никейский в слове обличения на армен]: [темже проявлено, яко крещение их, и вся, яже от них содеваемая, неприятна и непотребна суть, аще и тщатся несмысленнии и неутверженнии, и лживии христиане, яко истинна и благоприятна творят деяния их. аще бо вера их права и благоприятна есть, да будет и крещение их приятно. аще же вера их неприятна есть, како крещение их приятно?]. до зде Иоанн. зриши ли коль явственно вопиет блаженный Иоанн: аще бо, рече, вера их права и благоприятна есть, да будет и крещение их приятно; равнообразно и зде: аще вера их несть приятна, всякому проявлено есть, яко и крещение их несть приятно, якоже и есть. убо новодействуемое имущих крещение, и приходящих ко святей древлеправославней христианстей вере всячески подобает второе совершенно святым крещением крестити.

Но уже не недоволно, как мнитмися, вашей любви показахом, и от самого корене веры, от основания, и утвержения веры, и от равнообразия веры, и крещения, и от единости веры и крещения, яко имущих новодействуемое крещение, и прибегающих ко истинней христианстей вере, подобает второе святым крещением порождати. прочее да покажется и от самых вин в новодействуемом крещении действуемых, яко не неподобает их покрещевати. темже приступая глаголем;

 

Предел вторый.

О винах новодействуемаго крещения, яже с древлецерковным православием не сходятся.

 

Аще убо и во всех вещех зданных и действуемых. вины обретаются, и суть, обаче во святых церковных тайнах, яко во святем крещении, тако и в прочих, от всех авторов, и древних и нынешних, согласно и свойственно, полагаются четыре действителная, имже что бывает, яко в крещении повелением Божиим действует креститель. материалная: в ней же что бывает. яко крещение в воде. формалная, чрез еже что видотворится. яко чрез троичное приглашения, с трищным погружением. кончателная, яко крещение искупления, сынотворения и освящения ради. о коих винах древнии, в Катихисисе велицем малем изъявляют [лист 315]. блаженный кир Гавриил Филаделфийскии о седми тайнах. нынешнии, в книзе Ормолоксогион. во яко се, и в книзе О седми сакраментах, и прочих. сия вины к совершению каждаго таинства, толико нуждны и благопотребны суть, елико без них ниже едино таинство совершитися может. которыя вины и в новодействуемом крещении пребирающе опасно разсмотрим.

Глава, 1.

О вине действителней.

Вина, 1 [Катих. вел., Ин. зач. 11, Мк. зач. 71]: В тайне убо святаго крещения, действующая вина, аще первоначалная и сущая, сам есть Христос Бог уставивый тайну святаго крещения. егда крестився во Иордане прикосновением пречистаго тела своего воды освяти, во еже имети им силу чистителную, и крести ученики своя, ихже по воскресении своем в весь мир посла крестити, яко да спасется мир. обаче всяк креститель есть действующая или органная вина по святым отцем. ему же должно быти всячески православну, первоначальней вине Христу согласну. согласну кафоличестей церкви, законоположену еже святии богословцы явственно утверждают. сице святый Григорий Богослов глаголет: [тако да будет тебе всяк креститель, аще и житием претягнет, но крещения сила равна. и совершаяй тя всяк единак. иже тоюжде верою воображен]. слово, на святая Просвещения. и святый Никита Ираклийский последовательно глаголет: [тако крещение иереево есть токмо да не есть церкви чюждь, но тоюжде воображен]. в толковании на Богоявление. в новодействуемем же убо крещении, действителя, или органныя вины. си есть священника, вера не зрится нам быти православна. святоотеческаго православия чюждь, согласие к древлеправославней России святей церкви разньственно. принеси убо того согласие на среду. испытаем благоразсудителне, аще имать согласие неразньственно к первоначальней вине Христу; всяко не обрящем. Христос бо Бог наш, егда возношашеся на небо [Лк. зач. 114], воздвиг руце свои, благослови ученики своя двема перстома. яко древлегреческая церковь воображении праздников, и самовидитель святый Лука евангелист на образе Пресвятыя Богоматере, иже на Тихфине самовидно иероглифически написав утверждая засвидетельствует. священник же оный не двема перстома, но пятию персты всюду и всегда странно осеняя благословляет яко новопечатныя книги, и самое видение показующе свидетельствуют. сего ради священник несть первоначалней сущей вине Христу согласен. испытаем ли того согласие к древлеправославней российстей церкви. обретаем оного ко всякой службе, во всяком действе, несогласна оной, несогласна знаменающася, несогласно крещающа, несогласно литургисающа, и всякий чин, и всякую службу, несогласно древлероссийстей благочестивей церкви, и совершающа и действующа. испытаем ли того православие; обретаем оного древлецерковное святосодержание, еже в сложении крестнаго знамения. православно уставленное, [еже вседоброе веры таинство в себе содержит и замыкает]. анафеме и проклятию (предерзостно) предающа [Пращица, ответ 1], и ересию арианскою, несторианскою, и арменскою, и хуляща и порицающа. которое святое предание двоеперстнаго сложения, тако святии отцы всепрекрасно похваливше, всепредивным таинством предивно уясниша: яко святии апостоли святонаучивше предаша. и сам Христос Бог своя апостолы своим благословением научи богодействительно [Лк. зач. 114]. о чесом нижше во главе 22, и в третией части, во главе 3, втораго предела, имамы словодоводително засвидетелствовати.

Обретаем оного, святое древлеправославныя церкве содержание, и всетаинственное аггельския песни славословие еже в сугубем аллилуия возглашаемое, ересию. многодерзостно порицающе, и клятвам пресмелостно предлагающа [Жезл лист 86. Служебник лист 6], которое святаго сугубаго аллилуия пение, яко древлевосточная церковь содержащи имеяше, еже старогреческия рукописаныя книги свидетелствуют: тако древлероссийская святая церковь неизменно содержаше еже святых архиереов, и мужей чюдоносных саморучныя книги свидетельствующе утвержают. еже святии премудрии учители своими писаньми похваляюще позлащают. о чесом нижше во главе 22, имать явлено быти.

Обретаем оного, пресвятый и животворящий трисоставный крест Христов, [имже и на немже животворная Спасова содеяся смерть]. дерзновенно от просфир отлагающа, и от таинства святыя евхаристии отмещуща, и брынским хулителне порицающа [Розыск, часть 2]. который всепресвятый трисоставный крест, яко в таинстве животворныя смерти Спасовы послужив преестественно облагодатствовася: тако таинство освящая облагодатствует. о чесом во главе 22. и во главе 3, втораго предела, третия части, доводственно имать засвидетелствоватися.

Обретаем оного, прочих премногих святых отец предании, содержании, и действ безчисленных нарушителя, и смелостно отменителя, яко свободным языком, и дерзостныма устнами, святая древлецерковная предания. не токмо отметающа, но хулами и поношеньми облагающа, яко новопечатныя книги самопоказующе изъявляют. О чесом отчасти. во главе 2. втораго предела.

Аще же священник крещаяй не согласен есть Христу во благословении: аще не согласен древлеправославней церкви в действиях показуется: аще не согласен древлероссийскому благочестию обретается: аще сопротивная древлеправославней церькви совершает: аще хулит и поносит древлецерковныя догматы и уставы, како будет согласно новодействуемое крещение древлеправославному крещению, всяко несть. аще же несогласно есть, якоже и есть, како может истинное быти? ей не может, паче же и несть. аще же несть истинное, како будет очистително грехов крещающагося? зело несть. аще бо от толико и толь пребезчисленно несогласующаго священника, яко и самому Христу во благословении, и древлеправославней церкви в действиях, и древлеблагочестивыя церкве священнику в содержании чинов и уставов, попустим новодействуемому крещению быти очистителну грехов крещающагося, обрящется и не хотяще, яко от православнаго древлеправославныя церькве священника еже да не будет совершаемое, не бе очистително грехов крещающагося, яко во всем сему сопротивомудрствуя и вероваше и исповедоваше, и тако будет, еже да не будет, суетна бе вера древле от онаго священника крещающихся. тщи трудове, безнадежни подвизи. аще ли же от онаго совершаемое крещение очистително грехов крещающагося бяше, якоже и бяше, понеже пребезчисленнии оным породившиися святии в знамениих и чюдесех и нетлении мощей просияша, убо от сего священника новодействуемое крещение сопротивно оному и мудрствующа и исповедующа, несть очистително грехов крещающагося, како возможно ему быти приятну аще бо новодействуемое крещение приятно есть, да будет и вся новоизданныя догматы, предания, чины и уставы, их же священник содержит приятна. зане неразделна суть с крещением. якоже святый Афанасий изъявляя вопиет [во 2 слове на ариан]: [темже и Спас не просто заповедал есть крещати, но прежде научите, и потом крестити во имя Отца и Сына и Святаго Духа, да от учения вера их изъявится, и верою совершение крещения приложится]. аще ли же новоизданныя догматы, предания, чины и уставы не суть приятны, всякому благоявлено, яко и новодействуемое крещение несть приятно. аще же несть приятно, якоже и есть, убо новодействуемое имущих крещение, и приходящих ко истинней древлеправославней христианстей вере, подобает второе совершенно святым крещение крестити.

Глава, 2.

О вине материалней.

Материалная вина сущая вторая, и вещество крещения, аще по всем а в котором, яко по древним, тако по нынешним свойственно и согласно показуется [Катихисис малый лист 29; книга Мир с Богом лист 108]. вода естественная, чистая, нерастворенная, ниже со иными влагами смешенная. обаче по иным а в котором, и вещи и действы при крещении бывающая, к материи приписуются. какова суть: отрицание сатаны; исповедание веры; сообщение Христу; окрест купели хождение; и прочая последования, описуемая в Потребниках; тако в Катихисисе малом, вещь воду естественную глаголет: в ней же при последовании иных потреб, положенных в Потребниках, от священника крещение бывает. о чесом в книзе новопечатней нарицаемей Исповедание православныя веры яве изъявляется: [Первое: крещаяйся нужду имать отрицатися диавола, потом исповедати символ веры, и обещатися Христу]. часть 4, лист 136. в новодействуемем же убо крещении, материя воды, аще и подобно полагается, но прочия вещи и глаголы при крещении бывающыя несогласны яко древлероссийстей православней церкви, тако и древлевосточной разньственны обретаются. их же егда во испытание действ, и вещей глаголов, доброразсудителне внидем, иже при крещении, яже в крещении церковнопредателно положися. многа несогласия, многа разнствия, многия противности в новодействуемем крещении и с древлепечатными книгами несослагателная обрящем. кая несогласия, разньства, и противности вся, трудно и многопотително изследовати. обаче отчасти некая удобная ко исчислению предлагаем.

1: Егда на крещении младенец приносится, и пред дверми церковными от пелен разрешается; тогда сотворяет священник на нем крестное знамение. кое благословение по древлецерковному преданию, двема перстома совершается, о чесом засвидетелствуют святии отцы. по новопечатным же книгам, пятию перстами священник онаго благословляет. но древлепечатныя книги не крестящыя двема перстома клятве предают, сице вопиющи [Кормч. древлеписм. в чине приходящих еретик, патриархов Филарета, Иоасафа, и Иосифа]: [иже не крестит двема перстома, яко и Христос, да будет проклят]. Кормчая древлеписменная, в чине от еретик приходящим.

2: Приложен чин воцерковления, в котором принесеннаго младенца приим священник пред враты храма, крест младенцем начертавает пред дверми, глаголя [Потребник новопечатный]: воцерковляется раб Божии, и прочая. сего же, еже младенцем крест начертавати, и приглашати воцерковляется раб Божии, яко в древлепечатных, тако в харатейных не обретается: но и некрещенным младенцем крест начертавати, аще приличествует, недоумеваем. святии отцы прилагающих или отъемлющих что паче узаконеннаго, в церковном чине, клятве полагают. сице блаженный Келестин папа Римский, предстатель третьяго собора, в девятой главизне вопиет: [кто убо когда осужден и проклятию будет достоин, токмо той, еже отъемлет и прилагает к вере, ибо исполнь яве предана нам от святых отец. ниже приложение, ниже уимование приемлет]. Кирилова лист 426.

3: Во оном же чине, в новопечатных младенца некрещеннаго, повелено вносити в церковь и во олтарь, и к самому жертвеннику, глаголя [Потребник новопечат.]: воцерковляется раб Божии. сего же вождения и приглашения, во всех древлецерковных книгах не обретается. но и некрещеннаго лепо ли есть вносити в церковь и во олтарь? и несть ли противно апостольским и отеческим уставом? древле бо в православней церкви хотящии креститися не имяху места. дондеже сатаны отрекутся. о чесом яве засвидетелствует в Катихисисе велицем, сице пиша: [чесо ради пред враты церковными ожидает хотяй креститися? сего ради, яко сицевый во церкви не имать места, прежде даже сатаны не отречется, и работы и ига его не свободится]. глава 61, лист 353.

4: В запрещении первом, в древлепечатных: запрещает ти диаволе, Господь наш Iсус Христос, пришедыи в мир. в новопечатных же: запрещает тебе Господь диаволе пришедыи в мир. а Iсус Христос оставлено. в том же запрещении к диаволу в древлепечатных: запрещен буди, а отъиде отставлено. в том же запрещении, в древлепечатных: онем бо ти запрещаю, ходящим на крылу ветренюю, творящим аггелы своя духи, и слуги своя огнь палящь. в новопечатных же: онем тебе запрещаю, ходящим на крылу ветренюю, творящим аггелы своя огнь палящь, а духи и слуги своя отставлено.

5: В молитве 4, в древлепечатных: и дунет иерей на крещаемаго 3-жды, и знаменает чело его, и уста его, и груди его, и глаголет: изжени от него, и прочая. в новопечатных: и дунет священник на уста его, на чело и на перси глаголя: изжени и прочая. а еже знаменати его, сие отставлено.

6: Во отрицании сатаны: в древлепечатных: вопрошает иерей крещаемаго. имярек, отрицаешилися сатаны; и прочая. в новопечатных же: обращает его священник и глаголет: отрицаешилися сатаны; а имярек, отставлено.

7: В том же отрицании, в древлепечатных: отрицаюся сатаны, и всех дел его, и всея службы его, и всех аггел его и всего студа его. в новопечатных же: вместо студа его, напечатано, и всея славы его. но древлецерковныя книги, яко печатныя, тако рукописныя и харатейныя, согласно во отрицании диавола написано имеют, и всего студа его, а не славы его. еже и святии церковнии учители утверждают. святый Златоустый во Андриатисе, глава 21. и в похвале святому Иоанну Богослову, сентября, в 26 день. святый Кирилл Иеросалимский во оглашении первом. Преподобный Никон в Тактиконе, слово 5. Даниил митрополит Московский, в Соборнице, слово 11. согласно древлецерковным книгам свидетельствующе, и всего студа его отрицатися являют, а не всея славы его. откуду в новопечатных сие изменение, яко несогласно древлецерковным книгам, тако несогласно святым учителем церковным. святии учители церковнии зело возбраняют, ниже речение пременити, или иное вместо иного положити. сице святый Афанасий Великий в послании к Маркелину завещавает: [обаче хранити подобает, да не кто сих мирскими красноглаголания словесы упещряет, ниже покусится речения пременяти, или всячески иное вместо иного поставляти: но спроста яко писаны суть, да чтет и поет, якоже речеся. и дабы святая сия словеса предавшии, своя искренняя быти разумеюще, купно с намися молили: или изрядне, дабы Дух Святыи сице глаголивыи во святых, сматряя словеса своя тамо возвещатися, нашему деянию споспешествовал. елико бо житие святых лучшее: толико их и словеса наших лучша, и действеннейша в ресноту наречеши, понеже в них подобашеся Богу. ниже: отнюд же всякия казни достойных быти мнети сих, котории сия речения оставльше, и отинуду словеса красовита ловят, и в сих себе заклинателей нарицают].

8: Во оном же отрицании, в древлепечатных: вопрошает младенца, имярек, отрицаешилися сатаны? отвещают вместо младенца восприемници: отрицаюся сатаны. в новопечатных к вопросу: отрицаешилися сатаны: отвещают отрицаюся, а сатаны отставлено. но древлецерковныя печатныя, и рукописныя и харатейныя книги, во отрицании диавола, явственно отвещевати повелевают: отрицаюся сатаны. еже и святый восточный учитель, Симеон Фессалонитский, явственно утвержая во своей книзе, глаголет: [и глаголати повелевается от архиерея, отрицаюся сатаны, и всех дел его. и последствующих. и крещающиися отрицание лукаваго творит, яже суть его совершенное отрицание, и прочая]. глава 62. откуду явственно познавается, яко новопечатныя, отмены, не токмо древлецерковным книгам не согласно, но и святым учителем восточным не сходны суть.

9: В том же отрицании, в старопечатных: паки вопрошает крещаемаго, и сие трижды: отречелися сатаны. отвещает: отрекохся сатаны. В новопечатных к вопросу: отреклся ли еси сатаны? отвещает: отрекохся. а сатаны отставлено. но в древних святых книгах всех неизменно обретается сие отвещание, еже отрекохся сатаны. еже утверждает укрепително вышепомяновенный святый Симеон, глаголя [глава 62]: [явно бо и известно подобает быти лукаваго отрицание]. в новопечатных же не явно ниже известно творится, чесо ради яко древлецерковным книгам, тако святым учителем не согласно есть.

10: Во обещании Христу, в древлепечатных: вопрошает священник подобне трижды и сие: обещеваешилися Христу, имярек, и отвещевает: обещаваюся Христу. в новопечатных: глаголет священник: сочетаваешилися Христу? отвещает оглашенный: сочетаваюся, а имярек, и Христу, отставлено. но яко в древлецерковных книгах везде слежит, обещаваюся Христу: тако и святый Симеон Фессалонитский явственно возглашает [глава 62]: [рцы, и сочетаваюся со Христом, и верую во единаго Бога]. в новопечатных же сие оставление, ниже древним книгам, ниже греческим учителем согласно. и виждь коль нужднопотребная речения, яко во отрицании сатаны, тако во обещании Христу. имянно глаголати отставлено. о сицевых преподобный Исидор Пилусиотский вопиет глаголя [Кириллова, лист 372]: [отъемлющии или приложити что смеющии к богодухновенным словесем. единым от двоих недугуют, или убо невероваша Духом Святым реченных бывших святых писании, или суть неверни, или себе непщуют мудрейших Святаго Духа].

11: В символе святыя веры, иже глаголется на святом крещении, от крещаемаго трижды, в новопечатных с древлепечатными церковными книгами несогласие в речении обретается:

В древлепечатных:

И во единаго Господа Iсуса.

Рождена а не сотворена.

И Марии Девы вочеловечьшася.

Страдавша и погребена.

Егоже царствию несть конца.

И в Духа Святаго Господа истиннаго, и животворящаго.

И во едину святую соборную.

В новопечатных:

И во единаго Господа Iисуса.

Рожденна несотворенна.

И Марии Девы и вочеловечьшася.

И страдавша и погребена.

Егоже царствию не будет конца.

И в Духа Святаго Господа животворящаго.

Во едину святую соборную.

Святии же отци запрещают, еже во святем символе, ниже склада ниже речения пременити. сице святый Кирил Александрийский вопиет глаголя: [ни по коему чину, глаголет, подвигнутися подъемлет преданную от отец наших веру, сиречь веры нашея исповедание, ниже попущаем себе или иным, ниже глаголание пременити, от них же лежат ту, или един преступити склад, поминающе глаголящаго: да не прелагаеши предел вечных, яже положиша отцы твои, не беша бо тии глаголющии, но Дух иже от Бога и Отца]. книга Кириллова, лист 370.

12: В старопечатных, по символе, вопрошает крещаемаго трижды: обещался ли еси Христу; и отвещает: обещахся Христу. в новопечатных: и глаголет паки к нему: сочетался ли еси Христу; и отвещает: сочетахся. а Христу, отставлено. кое отставление всем древлероссийским и древлевосточным несогласно книгам.

13: В древлепечатных: вопрошает: веруеши ли во Христа? и отвещает: верую во Христа. в новопечатных: веруешили ли ему? и глаголет: верую Ему, яко царю и Богу. а во Христа отставлено, разгласно ко древним. а яко царю и Богу приложено, не согласно древлеросийским книгам.

14: В молитве: благоутробныи: в древлепечатных: и вообрази Христа твоего в хотящем родитися, святым крещением от мене недостойнаго. в новопечатных: и вообрази Христа твоего, в хотящем паки породится моим окаянством, а святым крещением отставлено.

15: В молитве: велии еси Господи: в древлепечатных: Тебе поет солнце, Тебе славит луна, Тебе молятся звезды. еже рабское служение от твари ко творцу приносимое, говейне, [метафорически] являет. в новопечатных же: вместо. Тебе молятся звезды, напечатано, Тебе собеседуют звезды. советническое и приближное звезд к Богу сим глаголание показуется. несогласно яко к древним рукописным и харатейным книгам: тако и к самому словес разумению. кая убо тварь к непостижимому Творцу в собеседство может приити? недоумеет.

16: И дунет на воду трижды, и знаменает ея рукою трижды. погружая персты крестообразно. и глаголет: да сокрушатся под знамением воображения креста Твоего вся сопротивныя силы. которое знамение, по древлецерковным книгам, двема перстома священници совершающе благословляху. по новопечатным же пятию перстами иереи знаменающе воду благословляют. Не двема убо перстома благословляющыя древлеправославная церковь клятве предает. якоже выше изобразися [Потребники Филарета, Иосифа и Иоасафа].

17: В тойже молитве: в древлепечатных: да отступят от нас вся воздушная. и невидимая привидения, и да не утаится в воде сей бес темен, ниже да снидет со крещающимся дух лукав, помрачение помыслом. и мятеж мыслем на разум наводя: но молимтися Владыко, Ты Господи всех покажи воду сию, воду покоя, воду избавления, воду освящения, и прочая. В новопечатных: да отступят от нас вся воздушная. и неявленная привидения, и да не утаится в воде сей демон темный, ниже да снидет во крещающимся, молимся тебе. (Господи) дух лукавый, помрачение помыслов, и мятеж мысли наводяй. но ты Владыко всех покажи воду сию, воду избавления. сие новопечатных новоисправление или изменение, самем благоразумным читателем оставляем доброразсудително разсмотряти, кая светлейшая и яснейшая речения суть, кая темнейшая и сумнителнейшая обретаются, древлепечатных, или новопечатных испытателно да изволят мерити.

18: В действе масло помазания: и дунет священник в сосуд елея трижды, и знаменует рукою 3-жды, крестообразно. которое знамение в древлецерковнем, двема перстома священницы знаменающе совершаху, и освящаху масло. по новопечатным же: пятию перстами священницы оное знаменование совершают, сопротивно древлеправославней церкви. чесо ради не знаменающии двема перстома древлеправославною церковию клятве подлагаются [Кормчая древлеписмен. в чине приходящ. от еретик].

19: В маслопомазании в древлепечатных: священник приим святое масло, помазует крестящагося, на челе, на очию, и на прочих частех тела на коемждо помазании глаголя: помазуется раб Божии, имярек, маслом возрадования, во имя Отца и Сына и Святаго Духа, аминь. в новопечатных: помазуется раб Божии елеом радования, во имя Отца и Сына и Святаго Духа, ныне и присно и вовеки веком аминь. а имярек, отставлено. ныне и присно, и прочая прибавлено. еще приложено в новопечатных, в масло помазании приглашения: на персех: во исцеление души и тела. на ушесех: в слышание веры: на руках: руце Твои сотвористе мя и создасте мя. на ногах: во еже ходити ему по стопом заповедей Твоих. сих приглашений во всех древлецерковных книгах, яко в печатных, тако в рукописных весма не обретается.

20: В самом действе святаго крещения, в древлепечатных: посем иерей приемлет крестящагося. и крещает глаголя: крещается раб Божии, имярек, во имя Отца, и погружает его к востоку лицем, и возводит глаголя: аминь. таже паки второе погружает его, и глаголет: и Сына, аминь. И паки третие погружает его глаголя: и Святаго Духа, аминь. И на коемждо речении в купели низводя того погружением в воду, и возводя держа к себе лицем. в ноовопечатных: крещает его священик, просто его держа, и зряща на восток глаголя: крещается раб Божии, имярек, во имя Отца, аминь, и Сына, аминь, и Святаго Духа, аминь, ныне и присно и вовеки веков аминь. на коемждо приглашении низводя его и возводя. а еже погружати его. и еже первое и второе и третие погружати, сего в новопечатных требниках не обретается. откуду и сомнетися подавает, яко самая форма крещения в новопечатных явственно не указуется. а наипаче, понеже во иных книгах и обливати повелевает, яко напреди речется.

21: Еще во оном же приглашении над крещаемым в древлепечатных три аминя положены, за триипостасное Божества. в коейждо ипостаси Святыя Троицы, аминь, или запечатление положися. О чесом свидетельствуют древлецерковныя книги. Катихисис болшей, во главе 60. Стоглав во главе 17. и Служебники древлеписменнии, и харатейнии, три аминя во указе крещения имуще объявляют. еще же и Номоканон святых отец афонских, в правиле 199. такожде три аминя в крещении изъявляет. И Иосиф патриарх в послании к датскому королевичу Валдемару, три аминя свидетелствует в крещении, в коейждо ипостаси аминь приглашати. но и нынешнии учители гречестии Иоаникий и Софроний Лихудиевы, в сочиненной ими книзе Врачестве, во 2-м ответе, вид святаго крещения сказуют, во имя Отца и Сына и Святаго Духа, чрез трищное низведение в воде и возведение. По коим многшим свидетелством, всякаго вероятия достойным, древнее приглашение в крещении право и достоверно является. в новопечатных же, четыре аминя в возглашении, к коемуждо званию ипостаси аминь, таже после ныне и присно и вовеки веков, аминь, напечатася. и тако четыре аминя в приглашении. и в самой форме прилог полагается. несогласно древлецерковным учителем и книгам, и настоящаго века  авктором предъявленным.

22: В старопечатных: таже помазует священник крестившагося святым миром, и творя крестообразно, на челе, на очию, на ноздрию, на устех, и на обе уши, и на грудех, и на руках, и на сердцы, и на плечию, и междурамома, глаголя на коемждо помазании: печать дара Святаго Духа, аминь. В новопечатных: помазует крестившагося святым миром, творя креста образ, на челе и на ноздрех, и на устех, и на обоих ушесех, и на персех, и руках, и ногах глаголя: печать дара Святаго Духа, аминь. а еже на очию, на сердцы, на плещах, и междурамома, помазовати отложено, вместо же сих на ногах помазовати положено. но еже очи помазовати, и правила святых соборов вселенских, втораго, 7. шестаго, 95. свидетелствуют, глаголюще: [помазуем чело, очи, ноздри, уста, и уши]. а еже на сердцы, на плещах, и междурамома помазовати, утверждают древлецерковныя книги, Катихисис болший, во главе 62: и Служебники харатейныя и рукописныя, в чине крещения согласно старопечатным положено. ноги же помазовати, не токмо в древлецерковных свидетелствованных книгах сего не обретается, ниже в действотворении святых апостол, ниже в правилех, втораго и шестаго вселенских соборов, ниже во оглашении святаго Кирила Иеросалимскаго, ниже во евангелии учителном святаго Каллиста. но во всех оных указует чювства токмо святым миром помазовати. и в первых Потребниках святейшаго Филарета патриарха, иже по описанию от старых книг добрых преводов исправленных. такоже помазовати миром, согласно старопечатным книгам повелевает, а на ногах миропомазания не воспоминает. аще же и случилося где в России древле сему смотрителне быти, еже все тело миром помазовати: обаче на таковыя запрещение соборное святаго Кирила митрополита рускаго с прочими архиереи является сице глаголющее: [Понеже уведехом о божественном крещении смутне некако и неразумне смешающе миро божественное с маслом, и тако мажют по всему телу крещаемаго, еже всего злее есть неразумие. ниже: миро бо особь а масло особь, по оглашении бо мажут и маслом древяным. ниже: и мажет на всех составех, и потом да крещает. ниже: таже мажут и миром по чювством, глаголюще: печать и дар Святаго Духа. по инем же местом нигде не мажут, разве на челе на очию, на ушию на ноздрию, на устну. якоже во святых отца нашего Кирила, во оглашенных его словесех писано есть]. до зде святаго собора. откуду показуется, яко древлероссийская церковь, не токмо не указует святым миром все тело помазовати, но и помазующим запрещает, и в книзе Кирилове, егда Карула цесаря, Леон папа миром в миропомазании помаза, наречено июдейским обычаем. книга Кирилова, лист 226, и книга Кормчая, на листе 11. а наипаче, понеже до осмаго дне миро не омывается, како от мокрот сохранится нуждно от естества исходящих, вящше же от младенца, темже нынешних архиереов в новопечатных книгах установление в действе миропомазания, миром ноги помазовати, яко святым собром, тако древлероссийстей церкви, и святым учителем зело сопротивно.

23: В древлецерковных: в миропомазании приглашения положена. на челе: да избудет студа, его же первее преставил человек, всюду ношаше. на лице: да откровенным лицем славу Господню зрит. на очию: да зрит очима свет Святыя Троицы, первыя доброты образ. на ушию: да приимет ушима слышание таинства духовнаго. евагелия Христова яко же рече Христос: имеяй уши слышати, да слышит, да не приложится ему злое слышание. по ноздрям: да обонявает божественных таин, яко да и той будет в миро Христова благоухания, и в добровонство спасаемых, да не обоневает прочее смрадныя льсти. по устом: да перваго вкуса вторым заградит, сиречь телом и кровию Христовою. на персех: да оболкся в броня правды противу художеству вражию станет, яко победитель непобедим. на руках: да будут готови на простертие во благотворение, и на отгребание всякаго зла. которая приглашения обретаются и у святаго Кирила Иеросалимскаго, во оглашении: и Никифора Каллиста, во Учителном евангелии. на Крещение Господне, и в Катихисисе велицем, во главе 62. яже и святыя древлецерковныя, Служебники рукописныя показуют. Сия же вся приглашения в новопечатных в чине миропомазания отложена и не совершаются.

24: В древлепечатных: и возлагает на крестившагося крест с гойтаном, якоже истиннии христиане имут обычай, еже носити на себе знамение спасителных страстей Христовых, иже есть честнаго креста образ на прогнание всякия неприязненныя детели, себе же на сохранение души и телу. сего же в новопечатных крестовозлагания не указано.

25: В древлепечатных: и обходит священник святую купель среди церкве стоящую трижды, последующе и восприемники с новокрещенным, поющим всем: елицы во Христа крестистеся. которое обхождение в древлероссийстей церкви совершается по солнцу. в новопечатных: таже творит священник с восприемником и младенцем круга образ, и поем: елицы во Христа крестистеся. еже содевается в новодействуемом обхождении единожды, и противу солнца. святыя же древлецерковныя книги, и рукописныя и харатейныя, яко трижды, тако и на посолонь обходити повелевают. и святый Симеон Фессалонитский трижды купель обходити в своей книзе показует.

Прочия отмены и изменения [в новодействуемом крещении] продолжения ради оставляем. оставляем прилоги, отложения, и измены, елики в словесех, елики в речениих, елики в молитвах, в возгласех, в тропарех, песнех, и прочих действа речениих, имиже толико новопечатныя Требники изобилно обогатишася. яко не обрящется молитвы, периода, да не реку и колона, и самыя коммы, кия отменами и приложенми не преправлены. оставляем властострижения, пременения куколио, возлагания отъятия, которое и в греческих обретается. вся сия множества ради претекаем, оставляюще самем честнейшим и благоразумным читателем желателно труждатися во оных. И аще убо в новодействуемом крещении, толикия и суть и обретаются отмены, толь многая приложения и отложения, и в словесех и действах, толь множайшая несогласия к древлецерковному святороссийскому тайнодействию, толь многочисленная и таковая несходства, яже от святых отец клятве предаются, к святым древлегреческим учителем, якоже выше предпоказахом, како может быти новодействуемое крещение душеспасително? всячески несть. аще бо речет сему быти душеспасителному, обрящется и нехотяще древлецерковныя церкве крещение не душеспасително, еже далече буди мысли православных. аще ли оно душеспасително есть. якоже и есть, безпрекословно новодействуемое несть душеспасително, яко толикими и толь премногими отменами, приложениями, и отложениями, яко же предпоказахом, между собою разньствуют. и аще тако есть, якоже и есть, како возможно е прияти? аще бо новодействуемое крещение приятно есть, благоявлено яко и вся толикия и таковыя отмены, приложения и отложения содержащиися в нем, яко крещение навершающая суть, да будут приятна. ащели же не суть приятна, убо ниже новодействуемое крещение да будет приятно. тем благоявленно яко подобает приходящих, от новодействуемое крещение имущих, к древлеправославней христианстей вере, паки второе совершенно святым крещением крестити.

Глава, 3.

О вине формалней.

Форма или вид крещения, по написанию, и древних, и настоящаго века авктором трепетное троичное приглашение над крещаемым. си есть крещается раб Божии, и прочая, вкупе со трищными погруженьми и возгруженьми, тайну крещения, всесвято и богатоблагодатно совершающее, яко свидетелствуют, кир Гавриил архиепископ Филаделфийский. книга Катихисис великий [глава 64], Катихисис малый [лист 29]: тако исповедание православныя веры: Акос, и прочия от новоизданных. и толико сия форма богатовидна и многотаинствена: елико вседоброе веры таинство, в себе содержащи замыкает, яко приглашением богоначалнаго Пресвятыя Троицы имене, трисоставное и единосущное, богоначалнаго пресущественнаго Божия величества, исповедателно богословит: еже святии велиции богословцы, Григорий Богослов; Афанасий Великий, Иоанн Дамаскин; к сим и Симеон Фессалонитский, тако чрез три погружения и возгружения, тридневное единаго от Троицы Христа Iсуса погребение и воскресение великотаинственне изобразуется. явственно сосуду избранному вопиющу: [елицы во Христа Iсуса крестихомся; в смерть Его крестихомся, спогребохомся Ему крещением в смерть]. к рим. зач. 91. еже святии богословцы, Дионисий Ареопагит, и прочии, тридненощное Спасовы смерти и погребения, и тридневнаго светотворнаго воскресения, всепрекрасно изобразовати свидетелствующе утверждают. толико же сия форма, постоятелно и неизменно в кафоличестей соблюдается церкви, от начала проповеди евангельския яко святым апостолом правилными запрещеньми на отметающыя ю, трепетный извержения суд наносящим. пятьдесятому убо апостолскому правилу яве возглашающу: [аще которыи епископ, или презвитер, или диакон, не крестит в три погружения, единем глашением. но во едино погружение, в смерть Господню даемо, да извержется от сана]. книга Кормчая, глава 1. тако твердо и непрелагаема, яко святым собором святых отец, всеявственно гремящим: [иже не крестит в три погружения, во имя Отца и Сына и Святаго Духа, да будет проклят]. откуду и святых учителей восточных, на изменивших форму трипогружателства в крещении на латины, благоревностно вопиют писателныя гласы, оных непреподобную обличаюше дерзость. яко святый Михаил Константинополский, в послании к патриарху Антиохийскому, взывая на оныя глаголет [преп. Никон Черногорский]: [слышах же яко и арианствуют, во едино погружение крещающе]. книга Тактикон, глава 40. но и святый Симеон Фессалонитский обличая новшества латинов изъявляет: [паки же и крещение ниже бо в трех погружениях, но обливанием действуют]. книга 1, глава 20. сию форму трипогружателства во крещении, ей же сам Господь начало и основание бысть, нынешнии российстии пастыри, иже древле предуставлени на сие [Июдино послан. зач. 77 и 78], благодать [святаго крещения] прелагающе в скверну [обливания], и единаго Владыки Бога, и Господа нашего Iсуса Христа отметающеся. облацы безводни, от ветр преносими, древа есенна безплодна, дважды умерша искоренена, волны свирепыя моря, воспеняюще свои струи, звезды прелестныя, ни во что непщующа, в новотворимем крещении пременяют на обливание. сию форму трипогружателства во крещении, в нейже тридненощное Спасовы смерти и погребения великотаинственне и тридневнаго светотворнаго воскресения всепредивно изобразуется, ненужную ниже важну, но вещь среднюю имеюще свободне подлагают [книжица Оправдание обливания]. сию форму трипогружателства в крещении, юже святии апостоли непременителну отнюд быти утвердиша, святии отци соборными запрещеньми непретворителну быти запечатлеша, не есть сказуют, непременныи догмат. не бо погружением токмо но и обливанием водою действовати всячески повелевающе утверждают. еже показуется от книг киевопечатных, ихже на среду предлагаем. в книзе Требнице велицем, творения Петра Могилы, издание року, 1646. сице повелевает: [имать же воды быти толико: елико мощно быти в ней погружению трикратному, или поне омовению любо возлиянию трикратному, аще и малому на крещающагося, по обычаю коея страны, паче же в скудость воды]. подобне во всем сему и в книзе глаголемей Мир с Богом, изданней, в лето 1669, напечатано, на листе, 108. и паки на листе 109, сице: [паки ведати подобает второе, яко егда неподобное будет рождение отроча же во утробе матерней близ смерти сущее показало бы главу точию, или ину началнейшую часть, являющу отроча быти живо, тогда убегающи беды смертныя, на отроча, имать е крестити баба, или кто либо поливая ону часть, яже бы ся показала]. до зде из Мира с Богом. согласно и в Катихисисах изданных при Петре Могилы. в лето 1645, и при Арсении же любортсем, в лето 1646. и в книжице Катихисисе кратком, о седми тайнах, изданнем при Селивестре Косове, и в книжице О седми сакраментах, изданней в Чернигове, в лето 1716. сия вся книги тайне крещения совершатися тройственным погружением или поливанием за равно свидетелствующе изъявляют. наипаче же новоизданная о поливателном крещении книжица. которая от духовнаго Синода. в лето 1724, издадеся, и напечатася первое в Питербурхе, того же лета. второе в Москве в тоже лето, благословением правителствующаго всероссийскаго Синода, не токмо поливателное определяет крещение: но и за важное и законное вменяет. и не сие токмо. но и единопогружателное крещение за крещение поставляет, аще с приглашением Святыя Троицы совершатися будет. еще же и трищное погружение во крещении не нужно, ниже важно, но вещь среднюю имеет. свободе подлежащую. тако и таинство смерти Христовы, погребения и воскресения, не нужно и не преступно быти глаголет, якоже в книжице видимо есть. в ней же в начале сице напечатано: [истинное оправдание правоверных христиан, крещением поливателным во Христа крещаемых, неправедно же и злобно аки бы таковое их крещение не важное было невежами порицаемых]. тамо же в предисловии на листе 7, напечатано сице: [таинство крещения, яко погружением, тако и возлиянием действуемое, равночестное и равносилное есть]. во главе же 3, на листе 14, на обороте глаголет: [понеже апостол крещение банею нарицает, а баня омовение есть, и как погружением, так и поливанием добре совершается]. подобне и во главе 4, на листе 17, на обороте. и во главе 5, на листе 19. и во главе 7, на листе 22, 23, 24. и во главе 9, на листе 31, на обороте, и 38. и во главе 10, на листе 41, на обороте. и во главе 13, на листе 50, и 51. паче же всея книги словесы поливанием крещение творимое, свято, и благодати Святаго Духа единако, яко и треми погружении совершаемое, подателно быти, самовидно свидетелствующе утверждают. не тако же разумеющих, атеистами и безбожниками нарицают. откуду в великороссийстей ныне церкви, яко в митрополиях Киевстей, Смоленстей, и Белоградстей, законно обливание действуется, тако во всей великороссийстей державе, обливание с погружением откровенною главою равно совершается, и за важное крещение законно быти вменяется, по оным вышепредреченным книгам.

Но еже в крещении крещаемаго обливати, не есть древлеправославныя церкве обычай, не есть святых апостол предание, но еретический, паче же рещи диаволский, противный святей церкви вымысл. не бо сам Господь Бог Спаситель рода человеческаго, еже обливати во крещении предаде, ниже святии апостоли узаконоположиша, ниже кто от святых церковных учителей научи, ниже един от вселенских или поместных соборов утверди, но паче запрещают. о чесом явлено имать быти.

Глава, 4.

О еже сам Христос предаде святым апостолом во святом крещении в три погружения крестити.

Пречистый наш и пребожественный Владыка, основатель непорочныя нашея веры християнския. и всея истинны и правды началник, Господь наш Iсус Христос, егда шествие творя по земли, избра себе божественыя своя ученики, их же сам первее научи, еже во священнем и спасителнем крещении треми погружении крестити, а не обливати. сам бо первее, не яко требуя очищения, но наше содетелствуя очищение, крестися от Иоанна во Иордане, якоже свидетелствует кир Гавриил архиепископ Филаделфийский, сице глаголя: [таинства уставивыи и узаконоположивыи, сам есть Господь наш Iсус Христос. Той бо первее от Иоанна крестися во Иордане, не яко требуя очищения, не бо бысть под грехом протчим, ниже греха сотвори, ниже обретеся лесть во устех Его: но да омыет ны, и очистит вся, и освятит водное естество, якоже и прочая освятил есть своим пришествием]. книга О седми тайнах [во главе 8]. таже егда убо священныя своя ученики, по воскресении своем из мертвых. посылаше во вселенную на проповедь заповедав им рече [Мф. зач. 116]: [шедше научите вся языки, крестяше их во имя Отца и Сына и Святаго Духа, учаще их блюсти вся, елика заповедах вам]. в коех пребожественнех Его словесех, не видится явственно форма святаго крещения, како повеле крестити, треми ли погружении, или обливании? обаче прежде волныя своея страсти, по внегда избрав прия их себе, самем делом научи я самою вещию образ действа предаде им. сам бо прежде верховнаго апостолом Петра своима пречистыма руками крести. еже засвидетелствует блаженный Епифаний архиепископ Кипрский [Синоксарь на Вознесение Господне]. Петр же крести Андрея, Андрей Иакова и Иоанна, Ияков же и Иоанн прочия апостолы. и тако друг друга крестяще, преподаваху образ крещения трипогружателства. и якоже пресвятый наш Владыка крестив апостола, самем делом научи его треми погружении крестити: тако же и посылая яко агнцы посреде волков, в неверныя языки повеле им учаще я крестити треми погружении. коих словес Его божественнейших, яже рече учеником своим: шедше научите вся языки, крестяще их во имя Отца и Сына и Святаго Духа, ясность показуется, яко треми погружении заповеда им крестити, от изъяснения святых учителей церковных. сице святый Иоанн Дамаскин пиша о святом крещении, глаголет: [исповедуем едино крещение во оставление грехов, и в жизнь вечную. крещение бо Господне смерть являет. спогребохомся убо Господеви крещением. якоже глаголет божественный апостол. якоже убо единощи совершися Господня смерть. тако и единощи подобает крещатися. крещатися же по Господню слову, во имя Отца и Сына и Святаго Духа. учащим во Отца и Сына и Святаго Духа исповеданию. но яко образ смерти Христовы есть крещение, треми бо погружении, три дни Госпродня погребения знаменует крещение, ниже: призыванию свойственныя ученики Господь научая, глаголаше: крещающе я во имя Отца и Сына и Святаго Духа]. книга [Небеса] 4, во главе 10, о крещении.

По премногу научает ны и златоглаголивый отец Иоанн златоглаголивым языком вещая о святом крещении, яко Господь завеща священным своим учеником треми погружении крестити, сице глаголя [евангелие поучительное, в слове на Крещение Господне]: [устраяй живота нашего Господь, завет крещения положил есть, смерти и живота образ имея. смертнаго бо образа водою являя, животу же обручение Духом подая]. и виждь ми, рекл бо святый: завет крещения положил [Господь], смерти и живота образ имея. сиречь такии завет или заповедь крещения положи, иже имеет образ смерти и живота, си есть который изобразует в себе смерть и живот. но образ смерти и живота изобразуется, точию в погружателне совершаемом крещении, по сказанию богословцев [к рим. беседа 11]. егда бо в воду погружаемся, тогда яко во гробе погребаемся: егда же возницаем, яко оживаем, или воскресаем. от коих словес священных богословцев, светлее солнца полуденнаго показуется. яко Христос Спаситель наш священным своим учеником, посылая их на проповедь, заповеда приемлющих святую Его веру, крестити треми погружении, и с призыванием божественных триех ипостасей, Отца и Сына и Святаго Духа.

И якоже священнии и божественнии ученики и апостолы и самем делом научишася, и заповедь прияша от Учителя своего Христа Бога нашего, еже во спасителном крещении треми погружении крестити: тако по вознесении Господнем на небеса, егда разыдошася в концы вселенныя, проповедати евангелие царствия, обращающе люди от идолобесия, паче же от темнаго диаволскаго поклонения в веру Христову, трипогружателне же крещаху. явственно сие засвидетелствуется во Епистолии на римляны, в ней же тако пишет: [егда Петр апостол, в Риме множество народа крести, в три погружения крести, на оное святое крещение гром с небесе возгреме]. Кормчая писменная. откуду явственно показуется, яко Христос Бог наш повеле священным своим учеником, трипогружателне крестити. сего ради они, якоже сами заповедь приемше от Владыки своего Христа Бога нашего. неподвижне соблюдающе, крещаху трипогружателне: тако и прочим приемником действ, и престолонаместником своим, освященным архиереом, и прочим таинств строителем, непременителне отнюд содержаще, треми погружении, с призыванием триех божественных ипостасей, заповедаша крестити. дерзающих же толикую и толь нужнопотребную, трипогружателства догму преступити и пременити судом извержения сана обложиша. сице во священном своем правиле пятьдесятом гремяще возглашают: [аще которыи епископ, или презвитер не крещает в три погружения единым глашением. но во едино погружение в смерть Господню даемое, да извержется таковыи]. Кормчая, глава 1. какоже сии толь высокую догму, от Христа убо учеником живым гласом преданную, последи по вознесении Его на небеса самем делом священными апостолы проповеданную, божественными правилы утверженную Святым Духом запечатленну не устрашаются пременяюще, привношением чюждаго действа, обливанием крестити уставляти, сказующе [книга о прав. обливания глава 8, лист 31]: [что крестить погружением, не есть непременный догмат]; како убо не есть непременный егоже сам Господь устави. святии апостоли проповедающе научиша, священными правилы непременителна всячески быти утвердиша, Святый Дух чюдодействием запечатле; аще бы не был непременный догмат: не бы святии апостоли дерзающих пременяти, сана лишали. Ельма же убо лишают, благоявленно есть всякому, яко есть непременный. сии же пременяюще, како похвалятся яко со Христом собирают, учителства Его не соблюдающе? како не вменятся тати и разбойницы, не евангельскою дверию во двор овчий входяще? или како истинне евангельстей не повинующеся, Святому Духу сопротивляющеся, священным апостолом сопротивоборствующе, утверждают обливанием, егоже Господь не предаде, святии апостоли не проповедаша, божественнии отцы писателными своими гласы не утвердиша крестити? темже убо аще сам Господь заповеда треми погружении крестити: аще святии апостоли приемше действителне научиша, и не претворителне узаконоположиша: аще Дух Святый чюдодействием запечатле: убо всячески подобает треми погружении крестити, а не обливати. убо обливанием действуемое крещение, не по преданию Господню, не есть крещение, но осквернение.

Глава, 5.

Крещение нарицается рождение еже точию изображается в три погружателства крещении.

Слышим же яко крещение в божественном писании нарицается рождение. сице сам Господь во священном своем евангелии глаголет : [аще кто не родится водою и Духом, не внидет в царствие небесное]. Ин. зач. 8. два бо рождения нам писание поведает, плотское и духовное. плотское еже от плоти бывает. духовное же от воды и Духа. якоже убо тамо происходяй младенец от чрева матерня во свет раждается или воотрождается. но сие возотрождение никакоже может изобразитися во обливаемом крещении, но токмо в трипогружателном. и какоже? слыши о сем божественнаго Иоанна Златоустаго сице вещающа: [еже бо есть чрево (утроба) младенцу, сие верному вода. водою бо назидается и воображается]. беседа, 26. на Иоанна, лист 195. и виждь ми якоже бо во чреве матерне сокрывается младенец, сице крещаемый в воде погружается, таже, якоже он раждается, тако сей возницает от воды. которое рождение токмо в трищном погружении, зело удобно может изобразитися, и изобразуется, во обливании никако, ни. како бо, рцы ми, может крещаемый поливателным крещением сокрытися в воде, егда поливаем бывает, да еще пястицею, или лжицею, идеже толикое множество воды, яко ниже единыя главы возможет смочити? како же может, яко родитися, возникнути, весь вне воды стоя? яве яко невозможно. сего ради в обливанием творимом крещении, не может рождение духовное быти, паче же несть. аще же несть в обливанием творимом крещении порождения духовнаго, тем богоявленно, яко не имый порождения от воды и Духа, не имать внити в царствие небесное, по реченному Господем: аще кто не родится от воды и Духа. еже святый Феофилакт толкуя глаголет [в толк. глава 3, Ин.; на зач. 8]: [сугуб бо сый человек, от души и тела. сугубо имать и таковаго порождения образ. вода бо видимо приемлема, видимому телу очищение разумеется. Дух же невидимо приходя, невидимей души в порождение. аще же вопрошаеши, како может вода родити; вопрошу и аз, како семя водно суще, и то может человеку на создание; обаче якоже о телеснем семени, всяко Божия благодать, такоже и о крещении, вода убо предлежит, а Дух все действует. ниже: гробу бо и воскресению образ в воде совершается, три погружения, тридневнаго гроба образ, таже возникнет человек]. Благовестник, лист 42. видиши ли яко и святый Феофилакт в погружателне крещении совершаемом разумеет крещаемаго порождения образ. и не токмо в погружателне совершаемом крещении явствует крещаемаго порождения образ: но и гробу и воскресению Господню, образ в воде совершается. три бо погружения всепрекрасно изображают тридненощное во гробе Господне погребение, таже возницание, спасителное воскресение Его. обливанием же действуемом крещении не изобразуется тридненощное во гробе Господне погребение, зане не сокрывается крещаяйся в воде, не изобразуется воскресение Господне, яко не возницает, ниже изобразуется образ рождения духовнаго, тем ниже раждается, крещаяйся, в нем водою и Духом. аще же не раждается водою и Духом убо по Господни словеси: аще кто не родится водою и Духом, не внидет в царствие небесное. сего ради обливаемым крещенных, подобает в три погружения по Господню завещанию крестити.

Глава, 6.

О еже треми погружении и священнии богословцы повелевают крестити.

Время же уже и богоносных мужей, священных богословцев, писанныя гласы на среду привнести, и услышати, како и тии о священнем и божественнем крещении научают; и во первых премудрейшаго Дионисия, нареченнаго Ареопагита, что о том же нам завещавает; како повелевает в божественнем крещении крестити; глаголет бо [О священоначалии глава 1]: [да держим яже божественне нам от божественных писании показаны суть]. но слышим, кая нам от божественных писаний показана суть; абие глаголет [глава 2]: [священноначалник же крещаемаго трижды погружает в воде, треми низвожденми и погруженьми троичныя божественнаго Блаженства призвав составы, во имя Отца и Сына и Святаго Духа]. что убо светлейше, что ли достовернейше может быти сего свидетелства? священный бо Дионисий, иже бе научен от Павла таинств, той последуя священным апостолом, глаголет явственно трижды погружати в воде. сии же како единою отвергше трипогружателства догмат во крещении непременныи, пременяем сей показующе, не срамляются тако явьственно на истинну борюще, еже за равносилное имети обливанием действуемое крещение с трипогружаемым? [лист 47. На обливан.]. откуду бо прияли быша? или от коего иного Павла научишася, еже во святем крещении обливателне крестити, той глаголет искренний сый ученик Павлов, да дрежим, сиречь, удерживаем крепце, яже божественне нам, от божественных писаний показана суть. и сии како не устрашаются сей неподвижимый догмат подвизати и иных к томужде привлекати? не мнее сего и непобедимый Христов воин Афанасий глаголю Великий, великаго града Александрии архиепископ, научает ны еже в божественнем крещении погружати сице глаголя  [в толк. притч. Афанасия В. ответ 99. Скрижаль лист 99]: [аще бо сраслени быхом смерти Его, но и воскресению будем; ответ: сраслени быхом, сиречь причастницы, якоже тело Владычнее погребенное в земли, породи спасение миру, тако и наше тело погребенное во крещении, породи правду нам самем. подобие же сице имать, якоже Христос умре и в третий день воскресе: тако и мы во крещении умирающе востаем. еже бо погружати отроча в купели трищи и возводити, сие являет смерть, и тридневное воскресение Христово]. ответ 94. зриши ли, не явственно ли и сей святый богословец научает во священнем крещении погружати; глаголет бо: еже бо погружати отроча в купели трищи и возводити, сие являет смерть и тридневное воскресение Христово. и сии како глаголют, яко равно есть еже погружати и обливати; аще равно есть. чесо ради, рцыте ми, божественнии отцы, втораго вселенскаго собора, иже не в три погружения крестишася еретицы, повелевают приходити ко святей соборней церкви, яко еллинов приимати? сице бо в 5 своем правиле гремяще вопиют: [иже единем погружением крещаются, евномиане, и савелиане, и фриги, яко еллини прияти будут. Толкование: и тии еретицы суть, единем погружением крещаются, а не треми, якоже православнии. сии же аще приступят к соборней церкви якоже погани прияти будут. и прежде крещения время доволно поучаются, и божественных писании да послушают. и потом совершенно крещаеми бывают, и помазуеми. сице же приемлем яко еллины. в первый убо день сотворяем я христианы: во вторый же сотворяем я оглашены, да поучаются вере: в третий же день заклинание творим, и дуновение трищи на лицы и уши, и тако поучаем их, и повелеваем время доволно сотворити в церкви, и послушати божественных писаний, и тогда я крещаем. но прежде сего всего да прокленут свою ересь писанием, и иныя вся. яко же прежде именованнии еретицы]. до зде от правила. и виждь ми. аще бы было равносилно и очистително грехов обливанием действуемое крещение с трипогружателства крещением: кая бы была нужда священным отцем, втораго вселенскаго собора, обливателне крещеных повелевати яко еллинов приимати, и паки совершенно крестити? яве яко несть. аще же несть, якоже и есть, равносилно, како убо сии, толиким и таковым божественным отцем сопротивоборствующе, не срамляются усиловатися утверждати обливанием творимое крещение за равносилное с трипогружателства? и како будет их обливателне содеваемое крещение, омывателно грехов крещающагося, егда отцы таковое имущих повелевают яко еллинов крестити? благоявленно яко несть. аще же несть омывателно, якоже и есть. убо безпрекословно, обливателно крещенных, по священных отец гласовом, приходящих ко святей соборней церкви, подобает паки в три погружения крестити.

Глава, 7.

О еже егда погружаемся, тогда смерть изобразуем. егда же возницаем, тогда воскресение.

Грядим прочее и до прочих богословцев, и учителей вселенныя, и услышим священных их гласов. како и тии во спасителном крещении крещати научающе повелевают. повелевают бо всячески треми погружении крестити; сице бо явственно столп церковный, святый, глаголю, Василий Великий вопиет глаголя [Минея четия Макария, мес. августа в слове о крещении]: [спогребемся убо Христови, иже нас ради умершему, яко да и совоскреснем с Ним]. слово о крещении. и в слове о Святем Дусе. зде внемлем словесем святаго Василия, како рече: спогребемся убо Христови; и в лепоту. спогребаемся убо Христови, егда в воде погружаемся совоскресаем же. егда от воды возницаем. понеже егда погружаемы бывают главы наши в воде, яко погребаемся в земли, егда же восходим от воды, яко совоскресаем. еже явственно видимо есть от евангелия поучителнаго на Вознесение Господне. в нем же глаголет тако [евангелие поучит. на Вознесение Господне лист 159]: [якоже бо Христос умер, в третии день воскресе, тако и мы погружаемы в воде образно, таже возницаем нетленни душею, и Духа нетления залог приемлюще]. но сие спогребение Христови и совоскресение, в единем токмо трипогружателне совершаемом крещении изобразуется и бывает. во обливателне же творимом никакоже неудобно есть изобразити. како бо изобразиши? егда обливаемым крещением крестяйся не погружается в воде, но весь вне воды стоя обливается, тем и не соумирает Христови. не погружаяижеся в воде, ниже возницает, убо ниже совоскресает. и аще во обливателне творимом крещении, не изобразуется смерть и воскресение Христово, како возможно е нарещи с равносилно трипогружателному? и кто бы от благоразсудительнейших тако сему соизволил быти, не вем. яве бо яко несть равносилно. аще же несть, како возможно таковым крещеному крещением спасение получити; святый Василий Великий вопиет [Минея четия Макария, август]: [аще не сообщник будеши смерти Господни, како общник будеши воскресению?]. и аще по славеси святаго Василия, не быв сообщник смерти Господни, не будет сообщник и воскресению Его. обливателным же крещением крещайся, не бывает сообщник смерти Господни, яко не спогребается в воде, како будет сообщник воскресению Его? яве яко ни. тем проявлено яко не крестивыйся треми погружении не имать внити в царствие небесное.

По премногому же нам спомощестьвует, и великое светило всея вселенныя, зелноревностный учитель покаяния, святый, глаголю, Иоанн Златоустый научая ны трипогружательства во крещении и споборствует противу обливанием деемое крещение укрепляющих, сице глаголя [в беседе 25 на Иоанна евангелие лист 191]: [божественныя совершаются вси образы, гроб и умерщвение, воскресение и живот. и сия вкупе бывают вся. якоже бо в некоем гробе, в воде погружаемым нашим главам, ветхии человек погребается долу и истопляется вконец весь: таже возницающим нам, новыи восходим паки. якоже удобно нам креститися и возницати: сице удобно Богу погребсти ветхаго человека, и показати новаго. трижды же сие бывает, да навыкнеши, яко сила Отца и Сына и Святаго Духа, вся сия совершает. [ниже:] якоже бо мы удобне погружаемся и возницаем: сице и Той удобне умер, егда восхоте, воскресе]. беседа 25. на Иоанна. что сих сего светилника словес светлейше: что ли явственнейше: он бо сказует в трипогружателства крещении божественным совершатися всем образом, гробу и умерщвению, воскресению и животу. како же бы убо кто рекл от ум имущих, обливателне творимое крещение равносилно быти трипогружательному, в нем же ни един божественный совершается образ, ни гроб, ни умерщвение, ни воскресение, ни живот? понеже ни погружается крещаяйся в воде. аще бо ни един божественный образ, во обливателне творимом крещении совершается. проявлено яко несть равносилно, понеже, не погружающуся в воде, не погребается ветхий человек, и не восходит новый паки. по свидетельству Златоустаго, глаголющаго сице: якоже бо в некоем гробе в воде погружаемым нашим главам, ветхий человек погребается долу, и истопляется вконец весь: таже возницающим нам, новый восходит паки. Подобообразне сем и святый Григорий Богослов в книзе своей, в слове 2, на Крещение, в стисех 9, 36, 50, и 52, в толкованиих. якоже и во учителном евангелии, в слове на Крещение Господне, глаголет: [а еже третицею в воду погруженном бывати, и возгружаемым тридневное Христово погребение являет. якоже бо Христос три дни и три нощи в земном сердцы сотвори: тако и крещаемыи погруженьми, и возгруженьми, еже во гробе три дни и три нощи Господния образует. якоже бо иже в нощи, не ктому зрит, сущии во дни во свете ходит: тако и в погружении, яко в нощи ничто зрят погружаемии, в возгружении же паки яко во дни бывают. и в том же купно и умирают и раждаются. и спасенная она вода, и гроб им бывает и мати]. в толковании. но и святый Григорий Нисский, трипогружательства во крещении научая, возглашает: [ко сродной со землею стихии воде пришедше, в ней же якоже Спаситель в земле, сокрываемся: и трижды сие творяще, тридневную воскресения благодать образуем]. в слове о крещении Христове. сим всем согласно и святый Кирил патриарх Иеросалимский, трипогружательства во крещении научая, восклицает сими словесы: [и погружаетеся три краты в воде, и паки возницаете, и зде прикладом, тридневное Христово образующе погребение]. в книзе Оглашении, глава 2.

Не мнее и Дамасково солнце, преподобный Иоанн, трипогружательство во святом крещении утверждает писателными своими гласы вопия, сице глаголет: [но яко образ смерти Христовы есть крещение. треми бо погружении, три дни Господня погребения знаменует крещение]. книга, 4-я, глава 4. слово 10, о крещении.

Зело убо и блаженный Феофилакт, архиепископ Болгарский тверду и непременну трипогружателства во святом крещении форму творя, вопиет сице: [Понеже просвещение глаголется, крещение, еже в трех погружениих совершается, в трех суть просвещени крещением]. Благовестник на Марка. в толковании на зач. 32, лист 42.

Доволно же и преподобный Максим Грек, показуя трипогружательство во святом крещении, непременително быти, сице глаголет: [в божественном крещении треми в воду погруженьми, тридневное Спаса Христа погребение и воскресение гадает церковное предание]. слово 40, о крещении.

Сих убо святых богословцев, священных гласовом последующе и святии богоноснии отцы, и пастырие церковнии, зело возбраняют еже во святом крещении обливати. яко святии чюдоноснии митрополити Московстии, греци бывшии, Киприан и Фотий, в посланиях своих во Псков, не обливати заповедают, но и преосвященный Кирил митрополит всероссийский, со всем своим освященным священных архиереов собором, обливати запрещает. им же согласно и святый Макарий митрополит Московский, с сущими с ним архиереи соборне, с прочими духоносными отцы, обливати запрещает сице глаголя: [А детей бы крестили в церквах по уставу, и по преданию святых апостол, и святых отец, а не обливати бы водою: но погружали в три погружения]. Стоглав, глава 17. но и святейший Филарет патриарх Московский, со всем собором освященным преосвященных архиереов, в них же бе и Арсений архиепископ Суждальский муж святаго жития, и грек родом, во изложении соборном всячески возбраняет крестящихся обливати. к сим и прочии святейшии патриарси Московстии, Ермоген, Иоасаф, и Иосиф, посланьми и книгами своими, обливание далече от церкве отгоняют. и аще убо толиции и таковии, священнейшии богословци, и Василий Великий, и Григорий Богослов, и Иоанн Златоустый, и прочии, ихже выше именословивше приведохом на среду, преблаженнейшии отцы, столпи и забрала церкве, трипогружательства во святом крещении, священнейшими своими гласы, единогласно всепресветле научающе, непременительно е быти утверждают. како сии толикому множеству, священных богословцев, паче же всей святокафоличестей церкви, противоборствующе, не срамляются соравняти несоравняемое обливанием творимое крещение трипогружателному; како же возможно обливанием деемому крещению вменитися в крещение, о нем же ни един от апостол, ниже кто от святых богословцев, ниже от богоносных отец мало когда воспомяну? и како кто от благоразумнейших наречет е быти равночестно и равносилно и равну благодать Святаго Духа имети? како убо есть благочестно рещи или помыслити, равночестно и равносилно и равну благодать Святаго Духа имети, обливанием творимому крещению, егоже божественнии апостоли не проповедаша: но паче запретиша, священнии богословцы, и богоноснии отцы учении своими не утвердиша: но яко скверное далече отринуша, и паки повелеша, трипогружателне крестити таковых; к сим же како станет священных богословец богодухновенное учение, еже о трипогружателстве, достоверно, не благочестивне совокупляющим во едино, и трипогружателне, и обливателне творимое крещение; како не латинствующе обретаются, противу толь множайших священных богословцев гласов, соравняюще обливание с трипогружателством, и за истинно приемлюще; не тако подобаше мудрствовати, о священнейшем крещении, не тако. подобало было весма срамлятися древних богословцев и отец достоинства, и от них научитися право и незаблуждьшею стезею шествовати, и не соравняти несоравняемаго с несоравнителным, имже не время токмо и премудрость крайняя свидетельствует достоверное, но и жителство равноангельное и над всеми сими всельшаяся в них благодать божественная, яже и безчисленными даровании тех просветила.

Глава, 8.

О еже како подобает погружати и возгружати.

К сим же не токмо священнии богословци, и богодухновеннии отцы, научающе повелевают еже во святом крещении непременне трипогружателне крестити: но и писателными своими гласы изъявляют, како подобает погружати. сице святии богодухновеннии отцы Афона, в кратких своих правилех научают [Потребник лист 706 на обор.]: [отроча идеже крещаеши, да имаши тамо купель покровенну и чисту, или ин сосуд отлучен. и егда влиеши елей в купель, якоже повелевает последование, и возми масла стопкою треми персты, и помажи отроча по всех удех, якоже сказует устав, и тогда вземлеши и наго, и став просто, крещаеши в три погружения, сице глаголя: крещается раб Божии, имярек. во имя Отца, аминь, и погружаеши и в купель. и паки станеши просто, возводя отроча, и погружая вторицею в воде, и омочая подобне, и глаголя, и Сына, аминь, и паки станеши просто, и погружаеши третицею, такожде глаголя, и Святаго Духа, аминь]. Номоканон, правило 199.

Сим согласно и святый Фотий митрополит Московский, пиша во Псков, повелевает, сице глаголя: [на первое погружение глаголет поп, погружая младенца, сице: крещается раб Божии, имярек. во имя Отца, аминь, и на второе погружение глаголет: и Сына, аминь, и на третие погружение глаголет: и Святаго Духа, аминь]. послание во Псков. Подобне и святый Макарий митрополит Московский, со всем освященным собором, како подобает в крещении погружати, яве научает, глаголя тако: [крещается от священника глаголюща сице: крещается раб Божии, имярек, во имя Отца, и погружает его единощи, глаголя аминь. таже, и Сына аминь, и погружает паки. и Святаго Духа, и паки погружает третие, и глаголет, и ныне и присно и вовеки веком, аминь. и паки: прием священник рукама крещаемаго, и глаголет: крещается раб Божии, имярек, во имя Отца, аминь, и низводит его, и возводит, и Сына, аминь, и Святаго Духа, ныне и присно и вовеки веком аминь, и паки погружает его. и тако бо крестит в три лица божественная, в тридневное воскресение Христово, треми погруженьми]. Стоглав, глава 17. видиши ли богодухновенных отец к священным богословцем согласие; онии убо научающе трипогружателне повелевают, во святом крещении крестити: сии же, и како подобает, аки перстом показующе изъявляют, обаче вси единомудрственно и согласно, единопогружательства крещение утверждают: о обливаемем же ниже мало кто от них воспоминает, но наипаче на не трипогружателне крестящих, и святии апостоли, и богодухновеннии отцы, ужасно запретителне гремяще вопиют. овии убо страшней клятве предают: овии же извержением сана лишают. сице бо глаголют богоноснии отци Афона: [Глаголет пятьдесятое правило святых апостол, яко священник не крещаяи в три погружения, едино Отчее, другое Сыновнее, третие Святаго Духа, и сице не творяи в единой тайне, да извержется]. Номоканон правило 200. святии же отцы вопиют сице: [иже не крестит в три погружения, во имя Отца, и Сына, и Святаго Духа, да будет проклят]. Потребник, лист 659.

Темже убо аще священнии богословцы научают во святом крещении трипогружателства: аще богоноснии отци всепреясно, аки пред очесы представляюще, трикратно погружати во святом крещении повелевают: аще святии апостоли не крестящих в три погружения суду извержения сана подлагают: аще духоноснии отцы писателными своими гласы не крещающих и некрещающихся в три погружения клятве предают: убо едино есть крещение. убо обливателне творимое крещение не есть крещение, и не может быти равночестно, паче же несть, и равносилно с трипогружателным, ниже имать равную благодать Святаго Духа. аще бы было равночестно и равносилно с трипогружателным, и равную благодать, Духа имело: не бы святии апостоли не крестящих в три погружения из сана извергали: не бы богоноснии отцы не крестящих трипогружателне клятве предавали. но понеже святии апостоли из сана измещут: понеже священнии отцы и не крестящих и не крестящихся трипогружателне, клятве предают: убо не есть равночестно и равносилно с трипогружателным, и не имать равныя благодати Духа Святаго. Аще не есть равночестно и равносилно, и не имать равныя благодати с трипогружателным; убо не есть очистително грехов крещающагося: убо обливаемым крещением крещаемых, приходящих ко святей соборней церкви, безпрекословно подобает совершенно паки трипогружателне крестити.

Глава, 9.

Яко трипогружателства крещение Дух Святый чюдодействием запечатле.

Принеси прочее, и да предложатся на среду и самая действа крещающих, яко божественных апостол, тако и их престолонаместников и действий приемников, священных пастырей, яже купно начашася с проповедью евангельскаго света, и непременительне содержахуся, и совершахуся всюду по вселенней, имиже древность и твердость трипогружательства во крещении всеявственне совершаемаго показуется. кая Дух Святый чюдодействием аки некою печатию утвердив запечатле. И во первых: [Святыи апостол Петр, егда в Риме множество народа крести, в три погружения крести. на оное святое крещение гром с небесе возгреме]. Кормчая древлеписменная. епистолия на римляны.

Сему последствуя и преблаженнейший Селивестр папа Римский, егда великаго царя Константина крести, о нем же повествует святый Симеон Метафраст, в житии его, генваря, во 2 день. идеже пишет тако [Минея четия, генв. 2 день]: [По явлении святых апостол Петра и Павла царю Константину, и по оглашении его от Селивестра папы Римскаго, приспевшу седмому дню, прииде святый к царю, и поучив его много о тайнах святыя в Пресвятую Троицу веры, уготова ему купель крещения святаго, в нюже егда вниде царь, и погрузи его святый Селивестр, призывая над ним имя Пресвятыя Троицы, внезапу облиста свет велии с небесе паче солнечных лучь, и исполнися храмина неизреченнаго сияния. очистися же царь абие от проказы, яже вся в воде оста, отпадши от тела его яко луска от рыбы, и изыде от купели здрав, яко ни следу бывшух язв на теле его являтися. облекжеся в белыя по святом крещении одежды, исповеда сам, яко егда погрузися, рече, в воде, чюх руку свыше простершуюся, и коснувшуюся мене]. Минея четья новопечатная.

Подобне и в житии равноапостолнаго великаго князя, российскаго монарха, и просветителя Владимира, маия, в 15 день о чюдеснем его в погружении прозрении изъявляется, в нем же есть сице [книга О вере, глава 3, лист 35 на обор.]: [егда царевна Анна во град Корсунь пришла, и вниде в полату, а в то время на Владимира нападе слепота, такова, яко нимало чесо видети можаше. и абие мыслити начат и разумевати, яко бози его наказуют за то, что веру их поверг, а христианскую хощет прияти. и велми смутися о сем, и совету себе дати не мог, о здравии своем, и о вере христианстей в сомнение приходити начат. в том размышлении бывшу ему, посла к нему царевна глаголя, аще не крестишися, слепоты не избудеши. Владимир же слышав сия, изволи креститися. и абие призва епископа, просяше святаго крещения. епископ же перьвее огласи его и о святей вере добре научи, таже в церкви Святыя Софии, посреде града бывшей крести. и егда во имя Отца и Сына и Святаго Духа бысть погружен, тогда от очию его спаде на землю яко чешуя, и начат видети ясно]. книга О вере [лист 372?].

Паки в томжде житии святаго великаго князя Владимира, преподобный Нестор Печерский, и инии летописцы, и в Минеи четии, извествуют, о крещении киевлян, яко трипогружателне крещени быша сице [Минея четия, июня в 15 день]: [егда собрася весь град крепце, всякаго чина и возраста, от обоего пола безчисленное множество. и повелено бысть им одежд совлекшеся внити в воду, особь мужескому полу, особь женскому. старейшим в глубочайшая места, малым же близ брега. и стояху в воде овыи до выи, овыи же до пояса, разделшеся на полки. священницы же во иерейских облачениях, стояше при брезе на дсках, нарочно того ради устроенных, чтяху над народом молитвы крещению подобающии, и имена им нарицаху, коемуждо полку особь имя едино. и трижды погрузитися им в воде веляху, сами же взываху над ними, имя Пресвятыя Троицы, по чину крещения призывающе]. Минея четия.

От коих выше предпоказанных всякаго вероятия достойнейших свидетелств, светлее полуденнаго солнца показуется, яко святии апостоли, якоже от Христа Бога приемше, научах восприемников своих трипогружателне крестити, тако и сами крещаху. сице и священнии пастырие, якоже священными своими гласы поучаху: тако и самеми делы, [паче же вся кафолическая церковь, от самого вознесения Господня на небеса], сотворяху, рекше треми погружении святое крещение совершаху.

Который трипогружателства вид во святом крещении, содержащийся от начала проповеди, всюду по всей вселенней, во всей православней церкви, неизменителне, засвидетельствует и преблаженнейший Феофилакт архиепископ Болгарский, в толковании, на зачало 114, от Луки, сице глаголя: [Якоже бо Христос умре, в третии день воскресе: тако и мы погружаемы в воде образне, таже возницаем нетленнии душею, и Духа нетления залог приемлюще]. Благовестник от Луки. и виждьми разум сего церковнаго учителя словес. Первое: Показует древность трипогружателства, яко от самаго Христова вознесения на небеса, непременно содержится в церкви. понеже отнележе начатся евангелие проповедатися, оттоле и крещение. Второе: тако, рече. и мы погружаемы в воде, от лица всея церкве, рече. ибо во множественном числе рече. Третие: Яко сей непретворимый есть вид всюду по всей вселенней, зане идеже бо евангелие проповедася, тамо и сей вид погружателства.

К сим же и како не от начала проповеди сей вид трипогружателства содержашеся? Егда Петр апостол по вознесении Господнем пришед в Рим, множество народа трипогружателне крести; се убо яве яко от начала проповеди. какоже не по всей вселенней, и не во всей церкви? Егда на западе Селивестр папа Римский царя Константина крести, трипогружателне крести. на востоце великий князь Владимир в Корсуне крестися, треми погружении крестися. На севере: в Киеве множество народа крестися, в три погружения крестися. в Болгарии, засвидетельствует Феофилакт трипогружателне крещению совершаемому быти. убо яве яко по всей вселенней и во всей церкви.

К тому же погружателне совершаемое крещение, Дух Святый аки некою печатию истинно и неприлогствуемо отнюд быти всепредивно чюдесами утвердив запечатле. ибо егда святый апостол Петр в Риме множество народа крести в три погружения, тогда на оно его крещение гром с небесе возгреме. паки, егда царь Константин вшед в купель погрузися в воде, абие очистися от проказы, и весь здрав бысть. но и великий князь Владимир, егда погрузися в купели, абие отпаде от очию его слепота аки чешуя, и прозре. в обливанием творимом крещении, где таковая, и когда [поне едино да покажут] чюдеса содеяшася? всяко, аще буди и вся латинскаго диалекта книги. елико их обрящут, потщатся прочести, разве ложне смыслят.

И аще убо трипогружателне совершаемое крещение, святии апостоли проповедавше научиша, аще божественнии пастырие содержаще совершаху, аще сам Бог Дух Святый чюдодействиями, аки рукописанием утверди. како сии толикое и таковое трипогружателством совершаемое крещение, смелодерзостне уничтоживше, дерзают, сопротивящеся всей древлеправославней церкви, паче же самому Богу, поливанием творимое равночестно и равносилно, егоже апостоли не проповедаша, престолонаместницы апостольстии не содержаша, сам Бог чюдесами не утверди, нововводяще глаголати быти; аще бо оно трипогружателне совершаемое Бог Дух Святый, чюдодействы укрепив запечатле, сие же ни, благоявленно всякому, яко оно едино есть истинно, и очистително грехов якоже и есть, убо сие несть истинно и очистително грехов. аще же несть истинно и очистително грехов: убо несть равночестно и равносилно, и равныя благодати Духа Святаго не имать. аще же тако есть, якоже и есть: убо подобает обливателне крещеных, паки в три погружения крестити.

Глава, 10.

Познавается истина из прообразователных трипогружателнаго крещения, на разных местех ветхозаветнаго писания.

Многа быша в древнем завете прообразования крещения, яже нам нынешнее от грехов очищение, под образом воды, чрез погружение предъявляющая, и аки бы перстом на купель крестителную показующая. в коих имянно крещения нигдеже обрящеши. ни бо нарицахуся именем крещения оная прообразования, ниже от народа тогдашняго познавахуся быти крещения прописания, разве от некиих, имже от Бога открыся, пророков, познашажеся та уже в новой благодати от святых отец, разсмотряющих ветхозаконная, и из следствующих, яко та бяху крещения прообразования. сугубая бо в ветхом завете бяху прообразования тайны святаго крещения. овая в веществах чювственных, знатных. овая же в видениих и откровениих бывших святым пророком. от коих знатнейшая некая зде воспомянем вкратце. первая прообразования, в веществах чювственных знатных же.

В начале: Оное ношение Святаго Духа верху вод, прообразоваше наше крещение. якоже пишет [Бытия1; св. Вас. Вел. в беседе 2 на шестоднев; Катихисис вел. глава 6, лист 312; Феофилакт в толк. на Иоанна]: [Ношашеся Дух над водою, животворяяи ю и согреваяи, да вода восприимет силу в рождение рыб и птиц]. беседа 2, на шестодневец. кое прообразование явственно показует погружение в крещении. якоже бо тогда в воде раждаху птицы, животворящу я Духу Святому, и возлетаху: сице и крещающиися в воде погружающеся, раждаются возницающе оттуду, приходящу Духу Святому в порождении невидимей души. якоже Василий Великий глаголет: [Имже подобни суть христиане во благословении и в быстроте и в скорости, и в высокопарении даже до небес, во крещении от воды и Святаго Духа раждаеми].

Паки [Бытия, глава 7]: Ковчег Ноев от древес негниющих соделанный, в нем же останки рода человеческаго, от всемиранго потопа спасошася, бе прообразование крещения. о нем же воспоминает святый Петр апостол, в послании своем, глаголя [1 Петра, глава 3]: [Егда ожидаше Божие долготерпение во дни Ноевы делаемому ковчегу, в немже мало, сиречь, осмь душ спасошася от воды, его же воображение ныне и нас спасает крещение]. глава 3. И виждь ми коль явственно образ прообразова ковчегом во крещении погружения. яко же бо Ное и свои ему с ним внутрь ковчега сохраняхуся во время потопа: тако и погружаемый на крещении человек внутрь в воде содержится.

Паки [Исход, глава 13]: Чермное море и облак, чрез него же израильтяне проидоша, египтяне же погрязоша, прообразованием бе крещения. о нем же блаженный Павел апостол, в первом послании к коринфом, глаголет: [Отцы наши вси под облаком быша, и вси сквозе море проидоша, и вси в Моисея крестишася во облаце и в мори]. глава 9. Зде яве моря прошествие, и облака осенение образом крещения нарицает, море изъявляет купель, облак благодать Духа. Якоже бо израильтяне сквозе море, имже вода чюдесне разступившися бысть стена одесную и стена ошуюю, прошедше спасошася, врази же египтяне погрязше погибоша [Исход, глава 14]: сице и крещаемыи сквозе воды крестителныя прошед спасается. врази же его греси погрязше погибают. Который образ крещения и блаженный Феодорит во облаце купно и в мори полагает, едино токмо море за вещество крещения держит, чрез облак же разумеет, образование Духа, в крещении невидимо действующаго. тако бо глаголет в толковании разсуждаемаго сего словесе апостольскаго: [Оная, рече, образ бяху наших; море изобрази купель, облак благодать Духа, Моисей иерей, жезл крест, израиль знаменова крещаемых, гонящии же египтяне демонов, сам фараон бе образ диавола]. до зде Феодорит.

Такожде погружение Неемана ассирианина, во Иордане бяше прообразованием святаго крещения. о чесом повествуется в книгах, 4 царств сице: [И сниде Нееман, и погрузися во Иордане седмерицею, по глаголу Иелисея, и обратися плоть его, яко плоть отрочате млада, и очистися]. глава 5.

Зри коль явственно прообразовася погружением Неемановым во Иордане, погружение крещаемаго в купели. ибо якоже тамо Нееман погрузився во Иордане, очистися от проказы, и обратися плоть его, яко плоть отрочате млада: равнообразне и зде погружаяися крещаемый в купели, очищается от проказы грехов, и обновляется яко орлу юность его. о нем же обновлении святый песнопевец Давыд, предведев Духом Святым, прорече глаголя [Пс. 102]: [обновляется яко орлу юность моя]. кая священных писании толковник, святый Афанасий Великий, толкуя словеса, глаголет сице: [Орел на пятьсотно лето обновляется жгом солнцем. и поныряя во источнике водне, паки юн бывает. тако и человек разжизается огнем Духа Святаго, языки святитель учим, и погружением крещения обновляемь в жизнь]. Псалтырь толковая.

Се толико предпоказася в ветхом завете прообразовании святаго крещения, в веществах чювственных, и ни едино же от них обретается прообразуемо поливанием творимое крещение, но вся погружением. Да предложатся прочее и другая прообразования святаго крещения, в видениих и откровениих святым пророком бывшая. Во первых да будет нам царственныи пророком пророк Давыд, иже издалеча о погружении в крещении предзрев Духом Святым, предрече глаголя [Пс. 67]: [Рече Господь, от Васана обращу, обращу во глубинах морских]. На которая словеса святый Афанасий Великий, полагает толкование сицево: [от лицы Христова се возглашает бо, от Васана обрати. Васан толкуется студу, обрати же нас от идолскаго студа, блуда же и прочих, возвав бо обрати же во глубинах морских, в водах крещения, ту бо яко во глубине погрязают греси и погибают]. Псалтырь толковая.

Паки: Сам Господь Бог обеща милость свою, оставляющую грехи, у Исаии пророка, сими словесы: [Аз дам воду в жажду ходящим в безводней, наложу Дух Мой на племя твое, и благословения на чада твоя: и прозябнут яко трава посреде воды, и аки верба подолг реки текущия]. глава. Зде Господь Бог явственно о крещения воде предрече. понеже убо, егда узре человека, по образу своему созданнаго, уклонившагося от Него, и изсохша жаждею идолобесия, ходяща по безводным путем рекше идолом служаща, и всяк путь беззакония проходяща, сожалев о нем, посла Сына своего возлюбленнаго, Христа Бога нашего да обратит его от идолопоклонения, даде же и балство, воду убо на очищение телу, Дух же души. сугуб бо есть человек, сугубо и очищение дарова, воду телу, Дух же души. темже егда обращается человек к Богу, очищается водою и Духом, погружаяся в воде, прозябает аки трава посреде воды, возницая.

Подобно Михея пророк, о Христе пророчествуя, и о обращении язык к вере, и о погружении в крещении, сице глаголет: [Той обратит и помилует нас, и погрузит неправды наша, и ввержет во глубины морския вся грехи наша]. глава 7.

Зриши ли коль явственно предрече пророк Михея, о погружении в крещении. рече бо, и погрузит неправды наша, и вовержет во глубины морския вся грехи наша. ибо егда крещаяися погружается в купели, вся грехи и неправды погружаются и потопляются.

От коих вышепредпоказанных ветхозаконных прообразовании, крещения, яко в веществах чювственных, тако и в пророчениях святых пророк бывших, явственно видимо есть, яко во святом крещении погружати подобает, а не обливати.

Глава, 11.

Показуется истина погружения во крещении, от прообразования крещения, и в новой благодати обретаемых.

Не токмо же убо в ветхом завете быша прообразования погружения во святом крещении: но и в новой благодати обретаются некоторая прообразующая погружение в крещении, какова суть. Первое: Купель оная овчая во Иеросалиме, в ней же болнии погружающеся исцеляхуся. не туне бо действовашеся оное чюдесное в воде той исцеление, во времена Христова. понеже показоваша Бог тако образ возлюбленнаго Сына своего Христа Бога нашего, иже имать очистити мир водою, иже в ветхом завете бе прообразована, от грех их. якоже глаголет Иезекииль пророк: [Внидох в завет с тобою глаголет Адонай Господь, и омых водою, и оплаках кровь твою от тебе, и помазах тя маслом]. глава 16. И тако чюдесным тем во времена его исцелением в воде, возбуждаше Бог мысли человеческия, во еже бы помышляли, яко уже приспе время обещанныя благодати, водами преждеобразованныя. Такожде, понеже в купели оной овец на жертву закалаемых, внутренняя измываема бяху. чесо ради и овчая нарицашеся, которыя жертвы прообразоваху Христа, яко Агньца за грехи мира имущаго заклатися. возбуждаше Бог умы боящихся Его, и грядущаго спасения ожидающих, ко помышлению еда уже не прииде ли Агнец, Егоже овцы жромыя прообразоваху, водою своею души их хотящии исцелити, якоже видеша болная телеса в купели овчей исцеляема, и веровали быша проповеди Иоанновой [Иоанн, глава 1; бл. Феофилакт в толк. на зач. 14, Иоанна. Блгавестник лист 73]: [Се Агнец Божии] Еже засвидетельствует и святый Феофилакт, глаголя: [в лепоту убо Божия мудрость далече путь творящи от июдей ко Христу в веру, купели тоя чюдо предустрой. понеже хотяше крещение дати многу и могущу силу, и дар вящшии, очищающь от греха, и оживляющь душы, проначерта Бог крещение во июдеох, и дает убо им воду очищающу скверны]. Сие прообразование купели оныя, явственно показует нынешняго нашего крещения погружение. понеже якоже тогда болнии вовергаеми в воду погружающеся, здравие себе телесное получаху. Подобне и ныне болящии душами, вовергаеми в крестилныя воды погружаются, и здравие себе оттуду душевное приобретают. Паки: Низпущение оное плащаницы с небесе, [о ней же воспоминает в Деяниих апостольских, глава 19, зач. 24]. Петру апостолу, во Иоппии, в нейже бяху вся четвероногая земли, и зверие, и гади, и птицы небесныя, прознаменование бе, по сказанию учителей церковных, погружения во святом крещении. Сице бо глаголет святый Иоанн Златоустый: [Плащаница убо, сие есть земля: а яже в ней зверие, иже от язык люди: а яже заколи и яждь, яко и онем подобает приити: а еже трижды сему быти, крещение знаменует]. Беседа 22, на Деяния апостол. лист 212.

Святый же Симеон Метафраст, в житии святаго священномученика Корнилия сотника, явствует [Минея четия, сенятбря в 13 день]: [Трикратное сосуда с небесе схождение, знаменова трикратное в крещении погружение]. от коего сказания, толковников священнаго писания, яве видимо есть, яко токмо погружати в крещении, святым апостолом, и их наместником, от Христа Спаса предано есть. ибо плащаница земля: а яже на ней зверие, люди, иже от язык: схождение с небесе, трикратное в крещении погружение. которым трикратным в крещении погружением, в сем, иже от язык, по всей земли сущим, обращающимся к вере Христовой, подобает от прежних своих грехов очиститися.

К сим же море оное, еже виде во откровении своем [Апок. гл. 4], святый Иоанн Богослов, пред престолом Божиим сткляно, подобно кристаллу, прообразованием есть, по изъявлению святых учителей церковных, святаго крещения. Сице глаголет святый Мефодий [Апок. гл. 12, слово 11, лист 52]: [Луною знаменует крещение, море образне именуемое]. Чесо ради именовася крещение морем? понеже яко во глубине морстей, сице в водах святаго крещения, погружающагося, погрязают вси греси. ибо между Божиим престолом, и человеком к престолу Божию приступити хотящим, посредствует вода крещения, и не может кто иначе приближитися к Богу на престоле в вышних седящему, аще не первее море крещения прейдет глаголющу писанию [Иоанн, глава 4, зач. 8]: Аще кто не родится водою и Духом, не внидет в царствие небесное. Почтоже море то, тайну крещения, образующее, есть сткляно и кристално; сткляно есть, чистоты ради, очищающия душю крещающагося, кристално же крепости ради утверждающия сердца.

И аще убо сам Бог, прежде век предопределив, погружателство во святом крещении, различными прообразовании, в различная времена предобъяви: аще святыми пророки таинственне прописав предвозвести: аще в новой благодати и купелию овчею, и плащаницею, и морем сткляным изъяви: како сии сопротивляющеся Божиею предопределению и предустановлению, дерзают обливанием творимое крещение, егоже Бог не предустави, святии пророцы не предвозвестиша, и в новой благодати ни единою о нем когда, в священном писании воспомянуся, соравняти с трипогружателным.

Аще бо несть, еже обливати в крещении, Божие предопределение и уставление, что убо? не яве ли, яко человеческий, противный Божию определению и уставлению вымысл? и како возможно е соравнити трипогружателству; что убо: аще Бог законополагаяй, и кто разоряяй? и како не вменятся таковии в богоборцех? не вем вы судите. аще бы было равночестно, всяко бы имел Бог, или образовании предпоказати, или пророки предвозвестити. но понеже ни прообразова, ни предвозвести, ниже когда повеле: убо не есть равночестно и равносилно с трипогружателным, и не имать равныя благодати Святаго Духа. И аще тако есть, якоже и есть, како не подобает обливаемым крещением крещенных, паки совершенно в три погружения крестити? ей подобает.

Глава, 12.

От самаго речения, еже крещение твердость погружения показует.

Оставим прочее иная, возмем самое речение, самое имя, еже крещение, и разсмотрим доброразсудителне сокровенное в нем, что знаменует. и абие не имать нам доволно силы подати, ко утвержению трипогружателнаго крещения, ко отражению же поливателнаго. И виждь ми: Крещение производится от греческаго глагола, апоту вапто, та птаисма, сиречь, от погружаю, погружение. якоже о сем в книзе своей кир Гавриил архиепископ Филадельфийский в книзе своей о седми тайнах, засвидетелствует, сице глаголя: Крещение глаголется, [а по ту вапто, то птесма, птаисма, сиречь, погружаю прегрешение. ибо, якоже некто, аще гнусное [кальное, грязное] тело нося, погрузит е в воду, скверну убо весма отлагает тела, тело же очищает от нечистоты: тако и крестивыйся в святой и православной христианской вере, отлагает убо аки некую скверну душевную, и телесное прегрешение, сиречь праотчий грех, погружением воды, и очищен быв, и убелен, ризою боготканною одевается, благодатию, глаголю, божественною, и жизнию. Аз приидох, глаголет Господь, да живот имут, егоже погуби преступлением]. глава 8.

Сему подобно и в великом Катихисисе, нарицает крещение погружением, идеже пишет тако [лист 133]: [Откуду нарицается крещение? Ответ: Отсюду нарицается еже погружаю, и измываю грех, измывает бо и потопляет вся грехи крещающагося, по Григорию Богослову]. глава 22. Что убо не явственно ли есть, яко крещение есть погружение греха; аще бо и глаголов вместо имен существителных употреби. аще бы сея частицы не приложил, отсюду: тогда бы рекл, крещение нарицается погружение и измытие греха, яко, измывает и потопляет вся грехи крещающагося.

Святый же Иоанн Златоустый, крещение нарицает крестом, сице глаголя [Беседа апостольск., глава 6]: [Крещение есть крест]. беседа 9, ко евреом. како же нарицает Златоустый крещение крестом? видится неудоборазумително быти. обаче сам той же блаженный Иоанн явственно вразумляет ны, в той же беседе ниже, сице глаголя: [Якоже бо Христос умре на кресте, сице и мы в крещении, не плотию, но грехом. зри смерть, и смерть. Он умре плотию, мы же грехови. крещением наш ветхии человек погребеся и воста новыи, сообразен быв подобию смерти Его]. от коих словес Златоустаго зело удобовразумително показуется, яко крещение нарицает погружением. Како же рече бо, крещением наш ветхий человек погребеся, сиречь погружением, и воста новый. зри: Якоже в некоем гробе в воде, погружением погребается наш ветхий человек, и возницанием востает новый. Чесому по премногому научает ны той же Златоустый, сице глаголя [Беседы евангельск. на Иоанна, лист 191]: [Якоже бо в некоем гробе в воде погружаемым главам нашим, ветхии человек погребается долу, и истопляется весь вконец: таже возницающим нам новыи восходит паки]. беседе 25, на Иоанна. И паки инде уподобителне нарицает крещение крестом. глаголет бо [к римл. беседа 10, зач. 91. ст. 3, лист 159]: [Крест бо есть крещение]. и наведе [еже убо крест Христов и гроб, сие нам бысть крещение, аще и не в тех же: Той бо плотию умре и погребеся, мы же грехом обоя]. сиречь, умрохом и погребохомся. И виждь ми разум словес сего святаго. рече: еже убо крест Христов и гроб, сие бысть нам крещение. Како же возможно изобразити крест Христов и гроб в крещении? и зело возможно, паче же и изобразуется. ибо якоже Христос распяся на кресте, и погребеся во гробе: сице наш ветхий человек распяся и погребеся в крещении. понеже убо егда погружается, умирает не плотию, но грехом, и погребает его аки в некоем гробе в воде. Тем же и глаголет Златоустый: Еже убо крест Христов и гроб, сие бысть нам крещение. Той бо, рече, плотию умре, мы же грехом обоя.

От коих всех вышепредложенных достовернейших свидетельств, явственно показуется, яко крещение есть погружение. сего ради и от самаго имени крещение, всеконечне подобает во святом крещении погружателне крестити, а не обливателне. Како сии крещающиися обливателне, сопротивляющеся толицей истинне, возмогут в обливанием своем творимом крещении, изобразити смерть и гроб Господень? всяко не возмогут, аще и всеми образы покусятся. Ибо егда крестяися обливанием, не сокрывается в воде. не сокрываяижеся в воде, не умирает грехом. не умерый же грехом, ниже потребляет его. [на 2 коринф. гл. 3, беседа 6, лист 1200]. [В крещении бо, (по словеси Златостаго) погребаются греси, омываются прежняя, оживляется человек, якоже на скрижали, на его сердцы написуется всяка благодать]. Зде же како, и каковым образом могут погребстися греси его егда не сокрывается в воде? Како омытися прежния, егда не погружается, како оживитися, егда не возницает? И аще убо крещаяися обливателне не сокрывается в воде. не сокрываяижеся в воде, не умирает грехом. не умерый же грехом, ниже погребает его в воде аки в некоем гробе. не погребый же его, не омывается от прежних. не омывжеся от прежних, ниже оживляются. Како может равночестно и равносилно быти, и равну благодать Святаго Духа имети, с трипогружателне совершаемым крещением? и кто бы сице от благочестно мудрствующих дерзнул рещи? крещение бо без трех погружений, и без сих глаголов, крещается раб Божии, и прочая, никакоже может совершитися. сице о сем вопиет глаголющи святая церковь: [Сие лепотное благочиние трех погружении и возвождении в воде, по подобию тридневнаго погребения и воскресения Господня, и сими глаголы, крещается раб Божии, и прочая, знаменует смерть нашу ветхим Адамом, и паки рождение новым Адамом, сиречь, Христом, совершает крещение]. Катихисис великий, глава 61, лист 319. И аще без трех погружении, и без сих глаголов, не может крещение совершатися, то како не подобает обливательне крещающихся паки в три погружения крестити, зело подобает.

Глава, 13.

О еже что знаменует баня паки бытия.

Но дивлюся убо зело, како сии православных самех себе во всем непщующе и нарицающе, не устрашаются священное трипогружателства крещение уничтожати, еже самем Богом предано, святыми апостолы проповедано священными богословцы утвержденно, Святым Духом запечатлено: Новое же поливанием творимое, еже есть евномианския и арианския ереси отрасль, с нем соравняюще, нововводити в церковь; не обретающе писателных гласов явственне, ко утверждению обливаемаго их крещения, и реченная инако писанием о бане паки бытия, и коварственне и развратителне толкуют, на прелщение простшых. глаголют бо [книга оправдания обливания, лист 14 на обор.]: [Понеже крещение апостол банею нарицает, а баня омовение есть, и как погружением, так и поливанием, добре совершается]. Противу коих усретающе вопрошаем: Рцыте нам о честнии! Едино ли есть хлеб, хлеб квасный, и хлеб пресный? зане якоже квасный, сице и опреснок, нарицается хлеб. И аще едино есть? чесо ради святая древлеправославная церковь не совершаше таинств на пресном хлебе, но на квасном, всяко бо можаше яко в квасном хлебе, тако и в пресном, по вашему мудрованию, тело Христово действоватися, зане он хлеб, и сей хлеб. обаче не прия, но отрину. аще не едино, рцыте ми; Почто? Не явственно ли есть, яко он убо нарицается хлеб, и сей же хлеб; ктому же из единой таковой же пшеницы сотворяется. Но смотри же ми, аще бо убо он хлеб, и сей же хлеб нарицается, и из единой пшеницы составляется, но не может едино быти. понеже он убо глаголется хлеб, сей же опреснок. сей же убо есть тело мертвое, он же живое. сего ради аще именем и приобщается опреснок хлебу: но вещию зело разнствует. Подобне многая имена обрящеши, во священном писании соименна себе, яже убо именем едино другому приобщаются, вещию же далече между собою различествуют. Якоже и в самом крещении, рождение и рождение, смерть и смерть, погребение и погребение [беседа на солун., 25]. Яково что глаголю, рождение нарицается плотское, рождение и духовное. Аще кто, рече Господь, не родится водою и Духом. Смерть глаголется Господня, яко Он умре на кресте плотию, смерть и погружение крещающагося в воде, яко грехом умирает погружаяися [Ин. зач. 8. ко евреом, беседа 9, лист 2857]. погребение именуется Господне во гробе, погребение и крещающагося, егда погружается в воде. Он убо погребеся плотию: сей же погребает ветхаго человека, сиречь всецелую злобу [к рим. беседа 11, лист 168]. Кая имена именем едино другому приобщаются, вещию же разнствуют. сице и зде баня и баня. яково что глаголю: баня нарицается она, в ней же телеса, от скверн омываем. баня и сия, но духовная. в ней же не телеса точию омываются, но самыя душы от всех грехов. Яко же о сем блаженный Иоанн Златоустый глаголет [беседа 40, на 1 коринф. гл. 15, зач. 161, лист 1063]: [Бог бо сам творит сие, еже в бани паки бытия соделовает. самыя бо души касается благодать, и оттуду ис корене истерзает грех. Сего же ради убо иже от царя оставленнаго скверну душю есть видети, крещеннаго же душю не ктому, но самых солнечных лучь светлейшую: и якова же изначала рождена бе, наипаче и оная много лучшая. Духа бо наслаждается еже от всюду раждизающаго ю и святыню протязающаго: и аки железо или злато преливая, чисто и ново свыше твориши: такоже и Дух Святыи, якоже в горниле в крещении преливая ю, и снедаяи согрешения, злата всякаго чиста чистейша уготовляет ю блистати]. Обаче толико от оныя елико небо от земли, аще и именем приобщается, сия отстоит. Темже убо блаженный Павел, аще и нарече крещение уподобителне банею, якоже пиша к ефесеом, во главе 5, воспоминая о таинстве крещения глаголет [зач. 231]: [Христос возлюби церковь, и себе предаде за ню, да освятит ю, очистив банею водною в глаголе]. но не просто рече банею, но приложи, банею паки бытия. Понеже омовение есть имя родное, види же сего имене разнственни. Яково что глаголю: есть вид омовения погружателства, есть вид облиятелства. во оной убо бани, сиречь телесней, омывается человек полиятелне. в сей же не тако, но погружателне. Сего ради, да не возмнит кто едино и тожде быти, еже погружением, и еже полиянием, творимое, омовение, наведе, паки бытия. Якоже самая его словеса, яже пиша к Титу в послании рече, во главе 3, явствует [зач. 302]: [егда же благодать и человеколюбие явися Спаса нашего Бога: не от дел праведных, яже сотворихом мы, но по своей его милости, спасе нас банею паки бытия, и обновлением Духа Святаго]. зде же разумително есть, что есть баня паки бытия? Святый Иоанн Златоустый сказует [к Титу, беседа 5, лист 2693]: Паки бытие, есть отрождение, сиречь паки рождение, или возрождение. и виждь разум словес божественнаго апостола. рече бо: спасе нас банею. И приложи паки бытия, си есть банею отрождения, или рождения, и обновлением Духа Святаго. Разсмотрим убо зде, в котором крещении, сиречь в погружателне или в поливателне творимом. сия баня отрождения может изобразуется; Вемы бо, и вся кому, мню, не неизвестно, яко раждаемый младенец прежде во чреве сокровен бывает, сице и крещающемуся подобает, яко младенцу во чреве, в воде сокровену быти. Сице бо о сем глаголет Златоустый  [беседа 26, на Иоанна, лист 195]: [Еже бо есть чрево младенцу, сие верному вода]. Таже якоже родитися возникнути. Кая баня паки бытия, сиречь отрождения, всепреизрядно может изобразитися и изобразуется, в трипогружательства крещении. И виждь ми: Егда крещаемый погружается в воде, сокрывается яко во чреве матерни, таже егда возницает, яко раждается. Се коль богатовидно изображается баня паки бытия, в три погружателства крещении. в поливателне же творимом, колико возможно изобразити сию баню паки бытия, рекше отрождения? Како бо рцы ми, может поливанием крещаемый, аки во чреве в воде покрытися, егда поливаемь бывает, весь вне воды содержится, яве яко не сокрывается. А еже не сокрывается, како может родитися, егда не возницает? Поистинне ни. Аще не сокрывается в воде, яко во чреве, ниже возницает, яко раждается, сего ради не изобразуется сия баня паки бытия, в поливателне творимом крещении. Но понеже сия словеса блаженнаго Павла, баня паки бытия [отрождения], в поливателне творимом крещении не изображаются. сего ради не может быти совершенно крещение, паче же несть. И аще несть совершенно крещение, тем ниже крещающиися в нем, раждается водою и Духом. Аще же не раждаются водою и Духом, якоже Господь рече [Ин. гл. 3]: [Аще кто не родится водою и Духом, не внидет в царствие небесное]. убо обливаемым крещением крещеных всячески подобает совершенно паки в три погружения крестити.

Глава, 14.

О еже како святии апостоли в день пятьдесятный крестиша три тысящи народа.

К сим же усилующеся обливанолюбцы, обливанием свое творимое крещение, тщатся в законное и вечное всеми силами поставити, лжюще на святых апостолов, сказуют, яко бы они в день пятьдесятный, по сошествии на них Святаго Духа, вонь же день обратишася и крестишася три тысящи душ, якоже пишет Лука святый в Деяниих апостольских, во главе 2, крестили оныя три тысящи обливанием. утвержают же сие своеразсудителне, глаголюще: как и где толикому числу мощно было погружатися? во Иеросалиме и реки нет, толко ключи, или источники, с которых, також и с дождей, собирали воду для нужды житейской в цыстерны, то есть некия на то уготованныя в земле водныя вместилища [книга оправдания обливания, глава 5, лист 25]. Ктому же глаголют: Лука святый и обращение и крещение трех тысящь людей, во един день полагает, да и так о том пишет, что подает мнение, аки бы без росхода бо народнаго, и с ними апостолов не воспоминает: А сказуют, что веровавшии бяху терпяще во учении апостол, и во общении и в преломлении хлеба и в молитвах: и вси бяху вкупе, то есть в некиих сумежных домах. Но сия их ложь ничим же от паучиннаго постава, пауком сотканнаго, мухи убо уловляюща, шершни же, не глаголю иною тяжестию, раздираема, твердейша есть. Како бо не бе во Иеросалиме воде? Аще не бе, откуду жителие града Иеросалима, и себе самем на всяку потребу, и скотом своим воду на питомство получаху? Яве яко быша. ибо и един источник, иже именуется Силоам, многия и сладкия воды из себе испущает. яко же повествуется во истории о разорении Иеросалима. сие известно показуется и от географов, яко и прочия купели Иеросалимския, из онаго источника силоамскаго наполняхуся. Ктому же Иезекия царь Иеросалимский, прежде неже осади Сеннахерим ассирийский, приведе трубами во град довольственшыя воды. еже воспоминается в книгах четвертых царств, в главе, 20. И у Iсуса Сирахова, во главе 48, идеже сице: [Иезекия утверди град свой, и введе посреди его воду, ископа жезлом острым, и созда сусеки водам]. откуду яве есть, яко многия быша воды во Иеросалиме. Аще бо Иезекия царь доволственно вод во град трубами введе, благоявленно есть всякому, яко вне града доволственшыя быша воды. где же крестиша толикое множество народа святии апостоли, аще и не поведает списатель Деянии апостольских, святый Лука евангелист. обаче не в том доме, в немже быша собрани апостоли, како бо толикому множеству возможно есть, во едином доме вместитися, аще без росхода народнаго совершилося их крещение? Всяко не возможно. Аще же, якоже глаголют не в едином доме быша, но в некиих сумежных домах. И аще тако, то како можаху слышати словеса святаго Петра, яже рече [Деян. гл. 2, зач. 6]: [Покайтеся, и да крестится кождо вас во имя Iсуса Христа. Ниже: Они же убо любезне приемше слово его крестишася]. Проявлено яко не в разных [зач. 2]: [Понеже и святии апостоли во едином доме бяху седяще]. Но инде негде крестишася. и в лепоту. Показуется сие явственно от толкования Деянии апостольских, блаженнаго Иоанна Златоустаго, сице глаголющаго [беседа 7, на Деяния апост. лист 68]: [Они же убо приемше слово, похвалиша глаголанная, аще и страху исполнени бяху, и по сложении тогда на крещение грядут]. Зри, яко приемше убо слово, и по сложении, тогда на крещение грядут. Аще же грядут, яве яко не камо инамо, а не в том доме крестишася: но ниже в сумежных домех, тем не не без росхода народнаго совершилося крещение их. Аще и глаголет святый Лука [глава 2, зач. 6], яко веровавшии бяху терпяще во учении апостольстем, и во обращении и преломлении хлеба, и в молитвах, и вси бяху вкупе. Но от ниже наведенных его словес, явственно показуется, яко бе росход. Понеже глаголет: [Истяжания, рече, и имения продаваху, и разделяху сия всем, поелику аще кто потребу имяше]. видиши ли, како без росходу сущим возможно стяжания и имения продавати,  разделяти сия всем? всяко невозможно. Аще невозможно, яве яко бе, еже засвидетелствует и святый Иоанн Златоустый, сице рекии [беседа 7, лист 68]: [Беша терпяще во учении]. от сего яве, яко не един день, ниже два и три, но многи учахуся. Убо не ту крестишася: но инде негде, аще внутрь, аще вне града, на реце, аще и не объяви святый Лука. Обаче буди аще и ту в доме крестишася. Но что убо? еда ли святии апостоли облиятелне их крестиша? И како будет действие их согласновати словесем их? Яково что глаголю: Зде убо облиянием веровавших крестиша, по вашему мнению, потом же сами, яко священными своими правилы [прав. 50], повелеша погружателне крестити, не крестящих же тако судом лишения сана облагают: тако уже по смерти своей, явишася царю Константину во сне, глаголаста: аще погрузишися в купели три краты, здрав будеши. сице о сем повествующу Баронию, лета Господня, 324: [Нощию во сне явишася Константину Петр и Павел святии апостоли, глаголюще: Понеже престал еси от грехов, и кровию неповинною возгнушался еси, посла Господь наш Iсус Христос о исцелении здравия твоего подати тебе совет, Селивестра, иже в горе Соракте пред тобою с клириками своими крыется, призови к себе, иже тебе покажет воду, в нейже егда три краты погрузишися, оставит тя проказа]. [Евсевий книга 56, глава 1]. Видиши ли кое зде согласие дела их словесем их. И лепотствует ли сице учителем творити? да еще каковым? Первоначалнейшим, и во всю вселенную на проповедь имущим послатися. Учителю бо подобает, еже словесы лубомудрствует, сие и самем делом да изъявляет [нравоучен. 12, к филиппис. лист 1990]: [се есть учение (глаголет Златоустый), изящное: тако ученика привести учаи возможет: аще ли же сам убо глаголет, и любомудрствует, делесы же противная творит, не у есть учитель: сие бо есть и ученику удобное в словесех любомудрствовати: но потреба делы наказания и приведения. сие бо и учителя говейна творит, и ученика повиноватися уготовляет]. Не тако творяху святии апостоли не тако. они бо, еже словесы проповедаху, сие самем делом творяху. и яже писания глаголаху, сия вещьми, сиречь делесы изъявляху, зане образ всем быша. якоже глаголет Златоустый [лист той же]: [образ быша апостоли, первообразную некую икону сохраняюще (ниже:), яко им лежати и первообразному, и указанию, и законом одушевленным: яже бо писания глаголаху, сия вещьми всем являху сии]. внемли убо ми зде. рече, яже писания глаголаху, сия вещьми всем являху сии. Где убо писания глаголаху о святом крещении? слыши. сам Господь рече [Ин. зач. 8]: Аще кто не родится водою и Духом, не внидет в царствие небесное. Родитижеся водою и Духом невозможно иначе, аще не чрез трищное погружение в воде. якоже выше доволно предпоказахом. Аще же чрез трищное погружение в воде, раждается водою и Духом. яве яко и святии апостоли, чрез трищное погружение крещаху. зане яже бо писания глаголаху, сия вещьми всем являху сии. и яже словесы любомудрствоваху, и правилы законополагаху, сия самыми делесы совершающе предпоказоваху. убо и оныя три тысящи трипогружателне крестиша.

Глава, 15.

О еже како Филипп крести каженика.

Паки кривотолкующе, паки лжесвидетельствующе, утверждают сие обливанием творимое крещение, крещением Филиппа апостола, иже крести каженика, сице глаголюще [книга оправдания обливания гл. 10, лист 38]: Святый апостол Филипп не могл крестить каженика, разве поливанием: ибо на пути от Иеросалима в Газу ведущем, несть ни одного потока, в котором погрузитися человеку возможно было (ниже:), знаемый есть оный поточец, в котором Филипп святый крестил каженика. (ниже:) и так есть малый, что и ноги в нем человек не мог омочить. Принеси убо зде словеса, и нынешних новых учителей, утверждающих обливание, и онаго каженика, реченная. разсмотрим правосовестне, како оный каженик крестися. сии глаголют о оном потоце, в нем же крестися каженик, так есть малый, что и ноги в нем человек не много омочит. Аще же ноги в нем немного омочит, яве яко неудобно погрузитися. Каженик же глаголет, егда шедша путем купно с Филиппом, приидоста на некую воду, се вода, что возбраняет ми креститися? виждь, аще, рече, се вода, являет некую обилнейшу воду, и доволственнейшу ко погружению. ибо рече [Деян. апостол. гл. 8, зач. 8]: Се вода. И абие наведе: Что возбраняет ми креститися? самое бо сие речение креститися в еллинском языце, по первоначальной своей силе грамматической знаменует погрузитися. понеже по их наречию, вапто, еже по нашему крещаю, по сущей же своей его силе, погружаю, от коего сочиняется баптисмос, крещение, по самой же и святой его силе, погружение. О чесом и выше доволственно показах, во главе 12. И тако, яко бы рекл, се вода, что возбраняет ми погрузитися? Якоже и от ниже наведенных словес святаго Луки явно показуется: Повеле же стати колесницы, и снидоша оба на воду, Филипп же и каженик, и крести и. И виждь ми, аще бо снидоша оба на воду, яве яко доволно бе воды ко погружению. его же святый Филипп в ней крести, чрез трищное погружение. понеже каженик не токмо не знаяше обливателнаго крещения, но ниже слыхаше. яко не у тогда бе обычай обливаемаго крещения. Ибо святый Иоанн Предотеча, первый креститель, крещаше во Июдеи июдей, погружателне крещаше [Мф. зач. 5, Лк. зач. 9]. которое крещение кажеников, яко чрез погружение бе совершенно от Филиппа, всяк не трудно может познати, от крещения самого Владыки Христа. Ибо якоже тогда Христос сниде на воду, тако и взыде от воды. подобне и зде каженик, сниде на воду и взыде от воды. обоих бо их вход в воду, и восхождение от воды, Лука святый именует. Но елма же убо Христос тогда от Иоанна во Иордане крестися погружателне, никтоже от благочестно мудрствующих отречет. явственно показуется от словес святаго Матфея евангелиста: [И крестися, рече, Iсус, взыде абие от воды]. Безпрекословно и сей каженик от Филиппа погружателне же крестися. зане якоже Христос вниде в воду, подобне и каженик, и якоже Он взыде от воды, сице и сей. Аще ли же каженик облиятелне крестися: убо и Христос, еже да не будет. Аще ли Христос погружателне, якоже и есть, убо и каженик. равно бо их действие входа в воду, и восхода от воды. К сим же аще святии апостоли, три тысящи оныя, и пять тысящь, о них же воспоминается в Деяниих апостольских, облиятелне крестиша: аще святый Филипп каженика облиянием крести: како потом сами же святии апостоли правило издаша, на не крестящихся в три погружения под извержением сана, сице вопиюще [прав. 50]: [Аще который епископ, или презвитер, не крещает в три погружения единем глашением, но во едино погружение в смерть Господню даемо. да извержется таковыи]; Аще бо иным повелеша трипогружателне крестити, всяко самих себе первее должни образ прочим предложити, рекше трипогружателне крестити. како убо учай иного, не себе самого первее должен научити? и в лепоту. Ибо Павлу на учащых иных, но не творящих, сице вопиющу [к рим. зач. 82]: [Учай убо инаго, себе ли не научиши]; откуду благоявлено, яко себе самех первее должни показати образ. какоже аще иных не крестящих погружателне сана судом извержения облагают, сами, аще крестиша облиятелне, тогожде изреченнаго ими суда свободни будут? Писанию бо глаголющу [зач. 81]: [Имже бо судом судиши другаго, сам же таяжде твориши, себе осуждаеши]. И аще тако, всяко обрящутся по сему своему правилу, яко и на себе суд изнесоша. И тако остается едино от двоих, или правило сие под именем их ложне сочиненное, аще они облиятелне крестиша, или они, аще сие правило самое их есть истое, трипогружателне крестиша. но никтоже дерзнет от ум имущих, сие правило ложно под их именем сочиненное рещи. понеже правила святых апостол, между ими же и сие правило обретается, числителне во многих правилех, вселенских соборов воспоминаются ихже ненарушителне повелевают соблюдати. Аще же сие правило самое истое их есть, якоже и есть: убо яко же святии апостоли, три тысящи, и пять тысящ. трипогружателне крестиша, такоже и Филипп каженика трипогружателне крести, убо не есть содержание и предание апостольское, еже облиятелне крестити.

Глава, 16.

О крещении клиников, сиречь на одре лежащих.

Еще утверждают обливанолюбцы обливанием творимое крещение, крещением клиников, сиречь в болезни лежащих крещенных. клини, имя греческое, еже нам знаменует ложе или одр, и от того имене, онии, иже в болезни своей крестишася, нарицаху клиники, аки бы одриники. глаголют бо, крещение на одре лежащих, как могло погружением совершатися? и с одра снимать, и погружать тех, которыя близ смерти были, как было возможно? но и ведаем, что не снимая их с одров крестили, того бо ради и клиники, или одриники нарицалися, что ко одром аки бы привязани лежали. вопрошаем, почто не могло на одре лежащих крещение совершатися погружением? того ли ради яко не могут от одра встати, и внити в купели? но несть утверждение обливания. Аще бо сами собою и не могут от одра востати, и внити в купель, могут же в то время присудствующии, иже на то дело приидоша, подъявше со одра опасителне, удобно вложити в купель, и тако погрузити. И виждь ми, кто оного разслабленнаго, о нем же воспоминается у Иоанна во священном евангелии [Ин. зач. 14], егоже Господь словом здрава сотвори, может быти немощнейший? кто ли болнейший? яко ни единым удом можаше двигнути; еже явствуется от обещания его ко Господу; Господи, человека не имам, да, егда вода возмутится, ввержет мя. обаче ожидаше, аще бы кто ввергл в купель, всяко бы имел погрузитися.

Паки [Минея четия, генваря во 2 день]: святый великий и равноапостольный царь Константин, колико немощен бе, коль оструплен, яко от главы и доногу, по всему телу аки чешуя проказа бе, да и толь великолепнейшее и высочайшее лице, яко царственнейшее, за него же и принятися с великим опасством и страхом. обаче, егда крестися, в купели святый Селивестр папа Римский погружаше его. и аще толь зелне немощию одержимии, ов во время крещения в купели погружаемь бе он же ожидаше, да егда возмутится вода, ввержен быв, погрузится. безпрекословно яко и прочии на одрех лежащии, болезнию одержими, во время крещения, могут в купели погружаеми быти, якоже и бываху.

Что же приводят себе в подтверждение некоторых от святых, яко бы и они утверждают обливанием творимое крещение. обаче не на утверждение, но паче на разорение. в начале ис послания Корнилия епископа Римскаго, к Флавию Антиохийскому епископу, яко бы он произвел в чин презвитера Наватиана ересиарха, поливанием крещенаго, в немже пишет тако: [Оставил церковь Божию, в которой по приятии веры, удостоен был презвитерства, милостию епископа возложшаго на него руки в причет презвитерства. которому епископу и возбранял того весь клир, и от мирян многии: понеже на одре, болезни ради, крещенаго, как и ему случилося, не подобало принимать в причет: но епископ просил, дабы сего единаго хиротонисать ему попущено]. сие Корнилиево послание, обретается у Евсевия Памфилова, в книзе 6, Церковной истории, в главе 43. Зде разсмотрително есть, чесо ради клир не попускаше, епископу Навата хиротонисати в чин презвитерства? того ли ради, яко в болезни крещен? или того ради, яко в болезни крещен? или того ради яко, якоже они мнят, поливанием крещен? вемы бо, и доволно от святых отец писаний, их же в вышших главах предложихом научихомся, яко в первенствующей церкви, аще и в болезни сущих, не бе обычая поливанием крестити. ибо и сей Нават, аще и в болезни крещен, не поливанием крещен, но погружением. свидетельствует о сем Матфей Властарь, сице глаголя [состав а]: [Арианы убо и македонианы, и саватианы. (ниже:) точно нам совершаются божественным крещением]. Внемлем, аще рече точно нам, всяко в три погружения. темже и Нават, аще и в болезни крещен, обаче погружателне крещен. сего ради и клир возбраняше Навата епископу, в чин презвитерства производити, не того ради, яко, якоже им мнится, поливателне, якоже выше показахом, крещен: но того ради, понеже в болезни. таковых бо правило 12. Неокесарийскаго собора, в чин презвитерства производити зело возбраняет.

Паки приводят словеса Иоанна Златоустаго, яже рече в беседе 59. к приходящим к просвещению в болезни сущим, идеже глаголет тако: [Что тако крещаемыи на одре лежит, иногда мало. уже и чювствен: неизвестно, видит ли, что с ним деется; и слышит ли, что над ним глаголется]. Но неизвестно, мню, всякому, что из единаго устия источника, никогда не истекает купно и сладкая и горкая вода, сице ниже когда может из толь великаго богословца устен и правда и ложь происходити, но выну правда. како убо может толикий богословец сам с собою в словесех ратовати? всюду бо, идеже глаголет о святом крещении, всюду о погружателстве глаголет. Зде же како и где о поливании глаголати видится? Принеси убо, да мало поразсмотрим словеса его. глаголет бо: что тако крещаемый на одре лежит, иногда мало уже и чювствен. Зде святый Златоустый не о поливании глаголет: но о крещающихся при самом конце смерти. в начале бо в первенствующей церкви, у древних христиан обычай бе отлагати крещение, до совершеннаго возраста. инии же отлагаху и до смерти, дабы им свободно, или паче своеволно жити и грешити, помышляюще, яко тогда крещением очистятся, когда исход души приспеет, и тако безгрешнии к Богу отъидут. Чесо ради святии церковнии учителие, таковое долгое крещение отлагательство, зело возбраняху, якоже святый Григорий Богослов в слове 40. Василий Великий в слове о крещении. и Златоустый в первой, и в 23 беседах, на Деяния апостолская, якоже и зде. темже и глаголет: что тако крещаемый на одре лежит, иногда мало уже и чювствен. в коих словесех Златоустаго ничтоже является о поливании. но зазирает крещающиися при самом конце живота своего, и едва мало уже чювства в себе имущим. и недоумевается глаголет: видит ли, что с ним деется? и слышит ли, что над ним глаголется? и увещевает, во еже бы прочии к таковому неизвестному времени не отлагали крещения, а не о поливании глаголет, лгут убо на святаго Златоустаго.

Приводят паки обливанцы священномученика Киприана епископа Карфагенскаго во свидетельство, яко бы он обливанием творимое крещение оправдаше, в некоторой епистолии ответной, к некоему вопрошающему его о крещении поливателном, в ней же пишет тако [священномученика Киприана, книга 4, глава 7]: [Вопросил еси мене любезнейшии брате, кое мнение наше о тех, которые в недузе и болезни благодать Божию получают, имети ли в числе законных христиан, понеже спасителною водою не погружаеми суть, но поливаеми (ниже) ниже бо в спасителном тайнодействии, так греховныя скверны, якоже телесныи кал в мирской и плотской купели, омываются, дабы и мыло было, и нитр, и прочия пособия, и сосуд великии, и купель, ко умовению доволному тела. инако омываются перси вернаго, инако дух человеческии верою очищается. (ниже) известно яко и кропление воды содержит образ спасителнаго омовения. и когда сие в церкви деется, где и дающаго и приемлющаго непорочная вера, и вся законная суть, и крещаемии совершаются спасителною водою, и прямою верою во Христа]. книга 4. послание 7.

Вемы бо известно вемы, яко от самаго начала евангельския проповеди, таковыя лживыя подлоги, и к святому писанию еретическия прилоги, и растления быша. ибо манихеи, евангелие некое пятое, от Фомы апостола писанное привносят, егоже церковь святая кафолическая, яко нечестиваго в лепоту отрицается. Стефан Рязанский в слове о святых иконах. часть 2. глава 7.

И Павла именем сыскашася желатели посылати послания, сими своя учения утверждающе. Якоже сам свидетелствует к солуняном, во главе 2. Зрим и латины богатящыяся в таковых тщаниях, иже свое неправое мудрование, о исхождении Духа Святаго от Отца и Сына утверждающе, святых вселенских учителей книги во свидетелство привводят. но сия их утверждения и доводы, от святых восточных учителей, недостоверная некая присевания вменяются. Якоже Нил Солунский, во главе 13, 14, и 21. книги своея сказует. Подобне и сие послание, несть святаго Киприана, но некоего от обливанолюбцев, сложение на утвержение обливания, и именем его отитлованное. како бы той зелный ревнитель в православии, имел попустити обливанием творимому крещению, егоже апостоли не предаша, святая кафолическая церковь не содержаше, иже от еретик действуемое крещение, скверну вменив быти, судом собора отверже [собора Карфагенск. правило 73]; или не ведяше он правила святых апостол [прав. 50], не в три погружения крещающих из сана измещущаго? всяко ведяше, яко не многим времене разстоянием от апостол бяше. аще же ведяше, како дерзну противоборствующе правилу всех священных апостол, с лишением сана положенному, не токмо обливанием творимое крещение в крещение вменяти, но и кроплением; что убо не обрящется он по правилу апостол под лишением сана? всяко. Како же паки толь высокоученый муж, противу всех святых богословцев, во святом крещении погружательство утверждающих, укрепляя обливанием творимое крещение писаше? убо явственно показуется, яко сие послание несть его, но подметное.

Бе убо древле, яко в Служебницех Иова патриарха, по нужде болнаго младенца облити указано. которое указание смотрителне аще и положися во онех Служебницех, или ис писменных книг по неведению внесеся, обаче послежде исправися, и в Служебницех ктому не напечатася. Сие смотрителне положенное указание, Питирим в новосочиненное своей Пращице, нарицает римскаго костела обычаем, а не восточныя церкве. И виждь ми, аще смотрителне положенное, во время нужды болнаго младенца обливание, по Пращице есть римскаго костела обычай. что убо речем о всегда и законно деющемся обливании? несть ли римскаго костела обычай? ей всяко. и аще убо римскаго, яко же и есть, како может совершенно и очистително грехов крещающагося, обливанием творимое крещение быти, святая древлеправославная цреоквь един вид сея тайны содержащи изъявляет, без коего совершенно крещение не может быти, сице бо глаголет: [Вопрос: Кии есть вид, или видотворение сея тайны. Ответ: Оная словеса, имиже повеле Господь крестити, сиречь во имя Отца и Сына и Святаго Духа, вкупе со треми погружениями. сими бо глаголы божественными, и силою их крещение кончается, и совершенно бывает]. Катихисис великий [глава 61]. Елма убо без сих божественных словес, и трех погружений, крещение совершенно не бывает. благоявленно яко обливателно творимое крещение несть совершенно. Аще же несть совершенно, убо несть очистително грехов крещающагося. аще несть очистително: убо несть равночестно и равносилно с трипогружателным крещением, и не имать равныя благодати Святаго Духа. и аще тако есть, якоже и есть. убо подобает всячески обливателне крещеных, паки в три погружения совершенно крестити.

Глава, 17.

Яко Христос Спаситель крестися от Иоанна, погружемь, а не обливаемь.

Недоволно же, как мнитмися, еже на богоносных мужей солгаша: но еще и на самаго Владыку Спасителя нашего, о дерзностнаго языка! о непреподобных устен! дерзают лгати, яко бы и Он от Иоанна Крестителя обливателне крестися. все же сие того ради творят, да ложь свою правдою соделают, да обливанием творимое крещение законно вечно быти покажют. якоже самыя их книги явствуют. в начале: В книзе новопечатней нарицаемей Трубе, издания Лазаря Барановича, архиепископа Черниговскаго, в слове на зачатие Иоанна Крестителя: и в слове на Богоявление первом, пишет: яко Предотеча Иоанн, на главу Христову в крещении воду рукою возливал, а не погружал Его. Подобне Досифей патриарх Иеросалимский в грамоте к великим царем, Иоанну Алексиевичю, и Петру Алексиевичу всея России самодержцем, пиша глаголет: [Христос во Иордане крестися, и вниде во струи Предотеча рукама своима, приемля от струй воду, и крести прочия части того святаго тела, которые не были в воде]. до зде от грамоты. противу коих усретающе вопрошаем: рцыте убо нам о честнейшии! откуду сии, сей глас обретоша? кто от евангелистов сице провеща? или от коего апостола услышаша? или кии от богословец сей глас противныи исповеданию кафолическому произнесе? всяко не обрящете. святии бо евангелисти, Матфей и Марк согласно во священных своих евангелиях научают, яко приходящии ко Иоанну креститися, во Иордане реце погружахуся, а не обливахуся. сице глаголют [Мф. гл. 3, зач. 5; Мк. гл. 1, зач. 1]: [И крещахуся вси во Иордане реце от него, исповедающе грехи своя]. Но разсмотри точию силу словес сих евангелистов, и абие не трудно можеши разумети яко погружахуся. ибо реша: и крещахуся вси во Иордане реце от него. виждь, како возможно в реце сущему креститися, аще не токмо погрузитися; и кая нужда стоящему в реце по выю, толь богато изобилующей воде, облиятися? и сам бо святый Иоанн Предотеча, увещавая приходящих к нему креститися, ко приятию Iсуса, глаголет [Мк. зач. 1]: [Аз убо крестих вы в воде]. Что убо: не явственно ли показует, яко погружаше; рече бо аз убо крестих вы в воде. не рече, аз убо керстих вы водою. аще бо бы рекл водою, всяко бы имели рещи соперници наши: видите ли, яко рече, крестих водою, сиречь облиях водою. но зело преявственне рече, в воде, то есть погрузих в воде. Подобне и Спаситель наш Христос Господь, не яко требуя очищения, но наше содетелствуя очищение, во Иордане погружением от Иоанна крестися. якоже тойже Марк святый евангелист, в той же главе свидетельствует глаголя [зач. 1]: [И крестися от Иоанна во Иордане, и абие восходя от воды]. Внемлим сим словесем святаго евангелиста. рече, крестися от Иоанна во Иордане. Зде показуется вход Iсуса в воду. и аще убо вшед в воду крестися. что убо не яве ли есть яко погрузися? и кая убо нужда вшедшему в воду, ей же доволне сущей возливати ю на главу? сие и от ниженаведенных ясно показуется: и абие взыде от воды. Видиши ли яко Христос вшед в воду погрузися, и не укосне, но абие взыде. [Понеже Иоанн приходящих к нему креститися в покаяние, коегождо погружая до выи, и донележе вся своя грехи исповесть, содержаще его в воде, и тако погружаше. Христос же ни единаго греха не сотвори, и сего ради рекл евангелист, яко абие взыде от воды] [книга О вере, лист 285; евангелие поучит. на Крещение Господне, лист 525]. откуду всякому явственно видимо есть, яко Иоанн Креститель погрузи Христа во Иордане, а не облия. По премногу убо научаемся, и от сладкопеснивых церковных славиев, святых песнописцев. паче же от повсемественнаго всея православнокафолическия церкве содержания, яко Иоанн Предотеча Христа крестивый во Иордане, погрузителне крести, а не облиятелне. якоже самыя песни их явствуют. Сице, во вторник на утрени, в каноне Предотечи: капля спасения одожди мне Предотече, и ставшему разжизанием похотей, погрузивыи во струях иорданских, пищи потока, Iсуса жизнодавца. Октай, глас 4, песнь 4. Паки: Яко бездну во струях речных погрузив, бездну изсуши моих страстей, подая ми слезам источник, Предотече проповедниче Христов. песнь 6. Что убо не явственно ли зде показуют святии песнописцы, яко Предотеча погрузи Христа во струях Иорданских. Якоже и паки: Во главу усечен без правды блаженне, погрузивыи главу Христову в водах. песнь 8. И святый Иосиф песнописец, во вторник на утрени, в каноне Предотечи вопиет: в реце бездну иногда всемудре погрузив, потоп содевающую благодатию всего преступления. глас 2. песнь 1. в блаженнах: Погрузивыи бездну милосердия в водах Предотече, зол моих бездну молитвами си изсуши. И паки: во вторник на утрени: Водами потока пищи, преклоншагося под руку твою крестил еси. глас 3, песнь 6. Паки, глас 4. во вторник на утрени: Стояща крещая в быстринах Владыку, иже грехи всем человеком вземлющаго. песнь 6. И паки, глас 5. во вторник на утрени: Бездну погрузивыи милосердия Христа в речных струях. песнь 1. И паки, глас 6. во вторник на утрени: погружей иорданскими водами милости бездну пророче. песнь 6. Се колико предложих свидетельств всякаго вероятия достойнейших, святых песнотворцев, иже всюду единогласно громогласне вопиют: погрузивый во струях иорданьских пищи потока, Iсуса жизнодавца. погрузивыи главу Христову в водах, они убо глаголют, погрузивыи главу Христову в водах. и сии баснословят, яко Предотеча рукама своима приемля от струй воды, крести прочия части того святаго тела, которыя не были в воде. Но откуду тако прияша? и от коего святаго научишася? како убо не стыдятся, не срамляются и не устрашаются, противу толь явственнейшей истинне борющеся, лгати на святаго Предотечю. и возмущати люди Божия, и напаяти пития мутнаго. что убо не явственно ли показуется, привсеяние быти противников святыя церкве.

Да предстанет же ныне нам и еще не недостовернейший свидетель, святый Иоанн Дамаскин, и да заградит уста, уста глаголющая ложная обливанолюбцев. заградит бо всячески, зане яко пред очесы представляет, яко Христос от Иоанна погружателне крестися. сице глаголя: [Пятое, Господне крещение, имже сам крестися, крещается же, не яко сам требуя чищения, но мое свойствуя чищение, да сотрет змиев главы в воде, да потопит грех, и всего ветхаго Адама впогребет воде, да освятит крестителя, да исполнит закон да Троицы открыет тайну, да образ и подпись нам коеже крещатися будет. крещаемся же и мы совершенным Господним крещением, водою и Духом]. книга 4. глава 10. о крещении. Что сего свидетельства достовернейши? рече бо: крещается же (Христос), не яко сам требуя чищения, но да образ нам ко еже крещатися будет, сиречь, да образ нам будет яко тако, якоже и Он крестися, и мы должни всячески креститися, како же? наведе: крещаемся же и мы, совершенным Господним крещением водою и Духом. како совершенным Господним крещением крещаемся? в той же главе выше, той же святый глаголет: треми погружении. зриши ли, яко Господь от Иоанна во Иордане погружателне крестися, нам образ оставль. и аще убо мы, по словеси святаго Иоанна Дамаскина, по Господню образу треми погружении крещающеся. совершенным крещением крещаемся. обливателне крещающиися по чиему образу крещаются? яко не по образу Господню. разве по образу оных, о них же святый мученик Иустин философ, беседуя о крещении, воспомянув оныя Исаии пророка словеса [Измыйтеся, и чисти будете], сказуя глаголет: Что беси уведавше оное Исаино пророчество, уставили и сами прелщенным от себе человеком воды чистителныя, которыми входящии в капища кропят себе, иногдаже все тело омывают, таковая кропления и омовения языческая (глаголет Иустин), от бесов узаконена суть подражанием будущаго нашего крещения. и в лепоту. понеже сия словеса святаго Иустина, во утверждение своего обливаемаго крещения приводят, и за равносилное и равночестное, обливанием и кроплением творимое крещение в книзе своей, истинном оправдании [книжица Истинное оправдания поливаемаго крещения], исповедующе утверждают. каковое крещение не по образу Господню творимое святая православнокафолическая российская церковь проклятию, в проклятии люторских ересей, предает, сице вопия [Потребник лист 262]: [Проклинаю скверное их крещение обливаемое, а не погружаемое по Господню образу иже во Иордане]. лист 262. Елма же убо пречистый наш Владыка от Иоанна во Иордане крестивыйся, погружателне крестися, нам оставль образ. сего ради, по блаженнаго Дамаскина словесем, тии токмо, иже по Господню образу треми погружении крещаются, совершенным крещением Господним крещаются. благоявлено яко обливателне крещающиися, несовершенным крещением, яко не по образу Господню крещаются. Чесо ради крещение их и клятве от церкве предается. предаемое же клятве есть от Бога и от церкве отлученное. и аще тако есть, якоже и есть, кии дух на обливателне крещающыяся приходит, и како может быти таковое крещение, нань же не пришествующу Духу Святому, очистително грехов крещающагося? всяко не может. паче же несть. аще же несть, како не подобает обливателне крещеных, паки трипогружателне совершенно святым крещением крестити? поистинне подобает.

Глава, 18.

Крещение обливанием творимое есть, латинскаго западнаго костела, нововводный церкви святей, противный обычай.

Аще бо и тмищне усильствуются, обливанолюбцы обливанием свое творимое крещение, равносилно и равночестно с трипогружателным сотворити: но никакоже возмогут. никогда бо тма не может быти свет: сице ниже сие их обливательное крещение истинное крещение. яко не есть завещание Господне: не есть апостольское предание: не есть древний восточныя церкви обычай и содержание: но западнаго отпадшаго костела предание и содержание. чесо ради не может быти равносилно и равночестно, и равныя благодати Святаго Духа с трипогружательственным имети. како бо будет имети, егда святии восточнии учители, на изменившыя форму трипогружательства в крещении латины, благоревностно вопиют писателными гласы. оных непреподобную обличающе дерзость; сице святый Михаил патриарх Константинопольский, в послании в патриарху Антиохийскому, взывая на оныя глаголет: [Мерския латин веления, душям непщую сквернения, и от истинны отчюждение, и вышния помощи устранение: с ними же и ину всяку ересь, иже прежде соборов, или по них иже на церковь воставших, и люди отсецати и оттерзати начинающих, лестными учителствы простейших помыслы совосхищаху, и царьское слово право повеление всяко превращающих, отрясаю же и отвращаюся, слышах же яко и аринствуют, во едино погружение крещающе]. Тактикон, глава 40.

Подобне и святый Симеон Фессалонитский, обличая новшества латинов вопиет: [Паки же и крещение ниже бо в трех погружениях, но обливанием действуют]. книга 1. глава 20.

Но и преосвященный Дионисий митрополит Московский, со всем освященным собором, во ответе к папину посланнику, Антонию Пасевину, не единоравно обливаемое крещение, с трипогружательством показуя глаголет: [О крещении же глаголют римляне, яко едино есть еже погружати в воде, и еже обливати водою крещаемаго. мы же глаголем от божественных писаний, яко не едино еже погружати, и еже обливати]. глава 5.

Сим всем согласно и преподобный Никон Черныя горы обличая дерзость их, о роде фряжстем, и тех падениих, якоже неции нам известиша, и божественное крещение сотворяюще, крещаемыя во едино погружение крещают]. слово 40.

И не токмо древнии учители: но и нынешнии самобратнии Лихудиевы грекоучители, Иоаникий и Софроний, в разглагольстве к латинскому езуиту, обличающе латины, глаголют: [Вы же латини схизматицы есте, понеже и отдрастеся от нас, и не креститеся, якоже первее крестистеся треми погруженьми]. книга Мечец, разглагольство 2.

Се колицы таковии божественнии отци и пастырие црековнии, единогласно изъявляют обливанием творимое крещение, обычай и предание, отпадшаго от восточныя церкве западнаго костела римскаго. еже нынешнии пастыри ересию порицают. ясно Иоакиму патриарху Московскому, о Требнице Петра Могилы научающу: [В нем же Требнице положены латинския чины, в крещении вместо погружения обливание]. в слове поучителном, в книзе Щите веры, и в грамоте его к Лазарю архиепископу Черниговскому. и Питириму епископу Нижеградскому глаголющу: [Обливание не восточныя церкве обычай, но римскаго костела]. в книзе Пращице, ответе 14.

Елма же убо обливателне творимое крещение, несть апостольское предание, несть восточныя церкве содержание: но новопрониклая ересь римскаго костела. сего ради святая древлеправославная церковь, яко противное апостольскому законоположению, клятве е предает, сице вопиюще: [Проклинаю творящих развратно святое крещение, аще и во имя Отца и Сына и Святаго Духа глаголют, но обаче крещают во едино погружение, а трижды не погружают, инии же токмо обливают водою]. Потребник во отрицании латинских ересей [лист 256].

Како же убо сии таковое еретическое крещение, еже от соборныя апостольския церкве клятве предаемо есть, не постыдятся смелодерзостне, сопротивоборствующе ей, сравночеснствовати и сравносилньствовати трипогружателне творимому крещению; аще бо восточнии святии учители и пастыри, обливаемое крещение, не восточныя церкве предание и содержание изъявляют: аще нынешнии учители, отступающаго от восточныя церкве западнаго костела обычай и содержание повествуют е: аще настоящаго времене пастыри великороссийстии, римскою ересию нарицают е: аще святая древлеправославная церковь проклятию предает: како может быти равночестно, и равносилно с трипогружателственным? и кто бы от благосмыслящих дерзнул е сравночестнствовати и сравносилньствовати? аще бы было равночестно трипогружателному: не бы от восточных святых отец, и нынешних российских учителей, латинским обычаем нарицалося. аще бы было равносилно: не бы от настоящаго века пастырей, ересию порицалося. аще бы равну благодать Святаго Духа с трипогружателственным имело: не бы от древлеправославныя церкве клятве предавалося. но понеже обычаем латинским нарицается: убо не есть равночестно. понеже римскою ересию порицается: убо не есть равносилно. понеже от церкве клятве предается: убо не имать равныя благодати Духа Святаго: с трипогружателным. аще же не имать равныя благодати Духа Святаго убо не есть омывателно грехов крещающагося; аще же не есть омывателно грехов крещающагося: убо обливателне крещеных подобает паки совершенно святым крещением трипогружателне крестити.

Глава, 19.

Яко древле приходящих от латин лютеров и калвин ко святей христианстей вере непременно крещаху паки.

Не токмо же нынешнии великороссийстии архиереи, книгами своими утверждающе, обливанием творимое крещение, за равносилное непщуют с трипогружателственным: но и самою вещию, самем делом, от иностранных вер приходящих, ныне в великороссийскую церковь, яко от латин, яко от лютеран, яко от калвин, и прочих сим подобных, иже не в три погружения крещают, крещение их за истинное крещение вменяюще приемлют. еже новопечатныя их книги показуют. Требник великий Петра Могилы, на листе 199. Пращица во ответе, 66, и 67. книжица утверждающая поливанием творимое крещение правилно быти, в ней пишет тако: [Есть книга греческая, устав восточныи нарицаемая, в которой многие законы гражданские, и церковная правила содержатся: там положено правило, как приходящих от латин ко исповеданию церкви восточной принимать. и определено токмо миром святым помазывать, а крестить их не указано]. глава 11. Но и греки приходящих от латин и лютеров к восточной церкве не крестят второе: но миром токмо помазуют, еже засвидетельствует книжица о поливании сице глаголя: [И в наша времена, рече, недавно, святейшии Константинополскии патриарх, к благочестивейшему государю нашему, его императорскому величеству, Петру великому прислал свое, и священнаго при себе собора послание, в котором пишет, что от латин папежских, також и от лютеран восточной церкви соединятися хотящих, крестить не подобает: но токмо святым миром помазывать]. глава 11. Но кая тому вина, еже не повелевают их греки крестити, яко сами они обливателне крещаются. еже извествуется от беседы старца Арсения Суханова, с Паисием патриархом Иеросалимским, о крестном знамении, потом и крещении бывшия, в ней же пишет тако: [в лето 7157, июня в 6 день. черной поп Иоасаф, и прочии греки [с патриархом сущии] старцу Арсению говорили сице: не добре делают на Москве, в другой ряд христиан римлян и ляхов крестят. Арсении отвеща: римлян и ляхов того ради у нас крестят, зане они не погружаются, но обливаются и покропляются, и миром не помазуются. (ниже) Иоасаф глагола: не уже и нас греков паки крестити, зане и мы обливаемся, понеже изначала тако прияхом. у нас то и погружение именуется, егда трижды воду возлиют на крещаемаго]. и в книзе Проскинитарии, того же Арсения Суханова: [В лето 7160. сентября в 10 день, старец Арсений Суханов, во Египте вопрашивал Иоаникия патриарха Александрийскаго, егда где купели не случится в церкви или в дому, возможно ли крестити обливанием, или покроплением, есть ли будет иноземец болен, или младенец, а подняти и к погружению нелзе? патриарх отвеща: мочно и в дому крестити, и без купели, аще в церковь не мочно вынести. Арсении глагола: но аще оздравеет, то крещение будет за правое крещение? зане не погружен, или изнова крестити? патриарх отвеща: аще и оздравеет, то есть крещение право, а изнова крестити не подобает].

Но святая древлеправославная кафолическая церковь, яко греческая, тако российская, последующе правилом священных апостол, и списателным гласовом святых богословец и святых отец, приходящия от латин, и прочих иностранцев к православней вере, обливателне крещенных, паки святым крещением в три погружения крещаху. еже ниже предложенная свидетелства доводственне изъявят.

Бароний кардинал, в книзе своей, в лето Господне 1054, изъявляет, яко Гумберт кардинал издаде клятвы, на Цареградскаго патриарха Михаила, в них же глаголет: яко ариане, вторицею крестят, уже крещеных во имя Святыя Троицы, наипаче латын. Еже и в печатной в Москве Баронии, в лето 1719, согласно обретается. Еще же и на поле напечатано: грецы древле латин вторицею крестиша.

Преподобный Варлаам Хутынский чудотворец блаженнаго Прокопия Устюжскаго, от латинския веры пришедша научив, второе святым крещением просвети. житие святаго Прокопия Устюжскаго.

Но и Матфей Стриковский, историк полской повествует, лета 1263, Воскел Мендоговичь, королевичь польский, разсудя суетие мира сего, и невечную славу его, крестился паки из римской в рускую веру, и посем прия закон мнишескии. книга 8. глава 4.

Святаго князя Доманта псковскаго, прежде бывшаго литовскаго, иже бе во дни великаго князя Ярослава Ярославича тверскаго, в лета 1224, егда уразумел от книг святаго писания, яко отвержеся Рим греческаго стараго православия, пришедша во Псков с домом своим и с боляры своими, от латинския веры, священныи священных Псковский собор, вторицею крестиша. потом псковича посадиша на княжение у себе, а дотоле не прият, донележе не прия крещения. книга Летописец, лета 6724. и послание Иосифа патриарха Московскаго, к Валдемару королевичю.

Паки егда псковичи отлучишася от новгородцев, при великом Симеоне Иоанновиче Московском, и при Феогносте митрополите, в княжение Олгерда литовскаго, от нужды немецкия, просили псковичи Олгерда князя литовскаго, дабы у них во Пскове княжествовал, и крестился бы у них по уставу греческаго православия. но Олгерд сам тако сотворити не восхоте, вместо же себе даде им на княжение сына своего Андреа, и повеле ему чрез крещение римское паки креститися во Пскове его же пришедша от литовския в православную веру, псковскии священников собор вторицею крестиша. Летописец, лето 6850. и послание Иосифа патриарха.

Но и сам великий князь Симеон Иоанновичь, женат бе на литовке, юже пришедшу от литовския в православную веру крестиша, о ней же писано в Летописце, в лето 6853, как преставилась она, было ей литовское имя Августа, а во святом крещении Анастасия.

При том же великом князе Симеоне Иоанновиче на Москве, в лето 6853. великих князей литовских, Олгерда Данариманта Гедимановичев, брат же их третий Евнутий бегая от братии своих родных, прииде во Псков, потом в Нов град, и оттуду прииде к Москве, и отвергся римских ересей, крестися в греческое православие нашея веры, ему же наречено бысть имя вместо Евнутиа Иоанн.

Подобне великую княгиню, князя Иоанна Михайловича тверскаго, великих же князей литовских, дщерь Кестутьеву, от Литвы изъятую, владыка Евфимий крести. Летописец, лето 6883.

Что убо не явственно ли есть от сих всякаго вероятия достойнейших свидетельств, яко древле, якоже гречестии, тако российстии пастыри, обливателне крещенных, обращающихся в православнокафолическую веру, паки трипогружателне крестиша.

Сим последователне и прочии древлеправославнии великороссийстии митрополити и патриарси, не приемляху обливателнаго крещения, но паки трипогружателне покрещеваху, приемлющих же е яко истинное, из сана изметаху. якоже пресвященный преосвященнаго Дионисия митрополита Московскаго собор, противу папину послу Антонию, римлян и прочих крещения яко обливателнаго весма не приемлет. во ответе к послу, глава 5.

Но и святейший патриарх Ермоген всея России в послании своем к королевичю Владиславу польскому, молит его и научает в христианскую греческую веру паки креститися.

К сим преосвященый преосвященных российских архиереов собор, Игнатия патриарха Московскаго [иже бяше грек и архиепископ Кипрский], понеже Марину, дщерь сендамирскаго Юрья, жену Григория ростриги, латинския веры сущу, не крестив, но миром помазав, в церковь введе, и со оным ростригою венча. ему же митрополиту Казанскому Ермогену, много о сквернобрачии запрещение творящу, и глаголющу: яко недостойно есть царю совокупитися со иноверною отроковицею, и како ти есть возможно ввести в соборную и апостольскую церковь, не омыв ю банею паки бытия. он же окаянный никако сего восхоте слушати, из сана патриаршескаго извергоша. Хронограф в царство ростриги, глава 298.

Согласно сему и святейший патриарх Филарет, в соборном своем изложении повествует, сице глаголя: [Егда в лето 7114, грех ради наших Господу Богу попустившу, и царствующий град лестию и мечем прият рострига Гришка Отрепьев чернец, патриарх же Игнатий угожая еретиком латинския веры, и в соборную церковь Пресвятыя Владычицы нашея Богородицы и присно Девы Марии, честнаго и славнаго Ея Успения, введе еретическия папежския веры Маринку, святым же крещением совершенным христианскаго закона не крестил ю, но токмо единем святым миром помаза, и потом венча ю с тем ростригою. и якоже Июда предатель и сей поругася Христу. и обоим убо сим врагом Божиим ростриге и Маринке, подаде тело Христово ясти пречистое, и святую и честную кровь Христову пити. его же Игнатия за таковую вину, священноначалницы великия церкве Российския, яко презревшаго правила святых апостол, и святых отец, от престола и от святительства по правилом святым изринуша, в лета 7114.

И святейший патриарх Московский Ермоген, со всем освященным собором священных архиерей от святых правил написав, латины приходящия ко святей церкви, трипогружателно паки крестити утверди. Не мнейше подвиг о сем имея, и святейший Филарет патриарх, в соборном своем изложении, со всеми освященными архиереи российскими, в них же бе Арсений архиепископ Суждалский, грек сущий, бывый епископ Галасунский во грецех, иже со святейшим патриархом Иеремиею, в Россию приеха, муж свят, ему же во осаде в Москве преподобный Сергий Радонежский явися, в болезни сущу, здравие дарова, и освобождение града Москвы от поляк прорече, еже и збысться вскоре, и прочии святители соборне утвердивше написаша, многия предложивше латинския ереси, над всеми же ими крещение их обливанием творимое изъявивше, по правилом святых апостол, и богоносных отец, по преданию же и содержанию святых вселенских восточных патриарахов, от римлян, латин, и униятов крещеных, паки непременно повелеша крестити, и елико латины и прочия приходящия определиша второкрещати: толико и обливателне крещеныя белорусцы приходящия паки крестити в три погружения утвердиша, якоже изложение явствует сице [лист 587]: [Божиею милостию аз смиренныи Филарет патриарх Московскии и всея Русии с сыновы моими, с преосвященными митрополиты, и со архиепископы, и епископы, (ниже), положих, и утвердих завет и устав, грядущим по нас сыновом и братиям нашим, иже аще будут Божиим благоволением, и всем церковником сущим под нами, се не новое предание введше, но древнее укрепляюще поновихом. и последующе заповедем святых апостол, и святых отец, якоже они заповедаша. о еретицех и о расколницех, и о тех иже аще отчасти приобщаются еретическому папежному учению, и како приимати и испытовати их. и егда приидет кто от польскаго и литовскаго государьства, к нам в русийскую державу московскаго государьства, и скажет о себе, яко белорусец есть, истинный христианин греческаго закона веры, егоже повелеваем всем вам, нашего смирения благословения требующим. прежде его искусите с добрым вопрошением по божественным писанием, и по сему нашему утвержению вопросите его, как верует, и что вера его; и истинно ли крещен в три погружения; и не обливан ли; и которыя иноземцы, (ниже) в роспросе про себя сами что скажют яко они прежде сего в своей земле крещены в христианскую веру греческаго закона, и в крещении у них обливают, а не в три погружения крестят, а миром и маслом помазуют, (ниже) и таковых подобает совершенно крестити в три погружения. (ниже) А который белорусец скажет о себе, яко крещен он в христианскую веру, а которой поп его крестил, и тот поп в божественной литургии в приношении и во ектениях в первых поминает римскаго папу, да и во всяком пении во ектениях и в литиях молит Бога за папу, и таковаго подобает совершенно крестити в три погружения, и миром и маслом помазовати, да и латынскую ему ересь и папежев римских еретиков проклинати. (ниже) А которой скажет, или свидетели скажют, яко не поистинне крещен, но обливан, а про миро и про масло не ведает, или он не помнит, и таковаго подобает крестити в три погружения, и миром и маслом помазывати. а которыя белорусцы обливаны, и в костелех причащалися, или будет которые и не причащалися, а обливаны, и тех совершенно крестити в три погружения, а имян им не перекладовати, и латынскую ересь им проклинати, а младенческаго отрицания им не говорити. а которой белорусец скажется, что был он в иной вере, и пришел из иной веры в совершенных летех, и крестился в христианскую веру в Литве от рускаго попа, а тот поп, которой его крестил, молит Бога за папу, и таковаго совершенно крестити, и латынское и еретическое отрицание ему говорити, и молитвы все говорити, и младенческое отрицание такоже что и еретику, для того, что крещен от отступника, которой молит Бога за папежа]. до зде уложение.

Сим последствующе и прочии святейшии патриарси Иоасаф и Иосиф Московстии, со освященными своими соборы, священнодействоваху неотложне, и соборное оно изложение, в своих Потребницех, с чином проклятия ересей оных еретик, и како приимати их, напечаташа.

Итак, как московское государьство учинилося (глаголет Филарет патриарх), от того времене, и по се время того не бывало в московском государьстве, чтобы еретиков латин, и иных различных вер еретиков не крестили, кроме изверженнаго из святительства Игнатия патриарха [Потребник, лист 219].

Согласно греческим и российским пастырем, и сербстии древлеблагочестивии святители творяше приходящих от латин к православней вере трипогружателне крещаху. якоже повествуется о Саве архиепископе Сербстем, иже бе в царство Алексия Дуки, и Феодора Ласкаря, при патриарсе Мануиле, в лета 6722, идеже пишет тако [генваря в 14 день. от жития]: [исповедавшу же ересь святому в церкви удержав, и особь сих испытнее испытав, и сущих некрещеных прежде проклинанием ереси, яже имяху, оглашенныя дни в соблюдении и чистоте заповедав им хранитися, и тако креститися им повелеваше. сущих же (благоверно) крещеных, и в латинстей ереси (бывших) таже проклятием злыя их ереси, и образ веры исповедавших, и святому миру молитвы прочести, и таковым миром по всех чювствах помазовати, и верных с нами вменяти. сице святый всем епископом своим заповедав о таковых к ним приходящих творити]. глава 97.

Подобне и в книзе Гранографе о нем поведает, сице пиша: [Святыи Сава некоих ради потреб монастырских иде в Царь град, и прият быв с радостию царем и патриархом. (ниже) сущих же в ереси елици обретахуся, некрещенных повелеша крестити, а елици крещени в латинскую веру впадоша, сим молитву миру изглаголав, помазоваше их, и верным причитает]. глава 165.

Зриши ли яко древле святыя православнокафолическия греческия и российския церкве святоблагочестивейшии пастыри, от латин обливателне крещенных, приходящих к апостольстей церкве, паки трипогружателне и крестиша, и крестити повелеша. чесо убо ради ныне не подобает их паки крестити? ей подобает. Что убо глаголеши ли яко есть равносилно с трипогружателным: не бы всяко восточнии пастыри обливателне крещеных дерзнули паки трипогружателне крестити. аще бы равную благодать Святаго Духа имело с трипогружателственным: не бы древлеблагочестивейшии всероссийстии архиереи обливанцев, паки треми погруженьми и крестили и крестити повелевали, не крестящих же из сана извергали. но понеже не равносилствует обливателне творимое крещение трипогружателному, сего ради святовосточнии пастыри крестиша паки обливателно крещеных. понеже не имать равныя благодати Святаго Духа с трипогружателственным: того ради и святоблагочестивии российстии и сербстии архиереи погружателне покрещеваху. аще же крещение их обливателне творимое не имать равныя благодати Святаго Духа, и не токмо равныя, но ниже каковыя любо, убо несть очистително и грехов крещающагося. аще же не очищается грехов обливателне крещаяися, то кая надежда спасения? и како не подобает обливателне крещенных паки трипогружателне крестити? зело подобает.

Глава, 20.

Яко изобразование в крещении погребения и воскресения Христова зело есть нуждно.

К сим же да рекут убо паки обливанозащитницы како не подобает обливателне крещеных, паки трипогружателне крестити, егда во обливателнем крещении, ни смерть, ни погребение, ни воскресение Христово не изобразуются, якоже в погружателнем? ибо святая православнокафолическая церковь, приемши от самаго Христа Спаса, чрез священных апостолов, во спасителном крещении, чрез три погружения и возгружения, тридневное единаго от Троицы Христа Iсуса, погребение и воскресение великотаинственне изобразовати научает. Еже святии велиции богословци, Григорий Богослов, Афанасий Великий, Иоанн Дамаскин, Симеон Фессалонитский, к сим и Максим Грек явственно засвидетельствуют, сице глаголюще [Максим Грек, в слове 40]: [в божественном крещении треми в воду погруженьми, тридневное Спаса Христа погребение и воскресение, гадает церковное предание]. сие всепрекрасное и нуждноспасителное изображение, тридневнаго Спаса Христа погребения и воскресения, в поливателнем своем крещении, яко ненужное, отнюд отринуша и не изобразуют. глаголет бо поливание утверждающая книжица [глава 12]: [Яко в крещении образование смерти Христовы, погребения, и воскресения, не есть нуждно и не преступно, крещению могущу и без онаго совершитися]. и что убо? глаголют ли яко не есть нуждно? но откуду сице прияша мудрствовати? от коего иного Павла научишася, еже не нуждно и не преступно в крещении образование смерти Христовы погребения и воскресения? Павел вопиет [к рим. гл. 6 зач. 91]: [елицы во Христа крестихомся, в смерть Его крестихомся, спогребохомся Ему крещением]. и сии глаголют: не нуждно. той глаголет [к колос. гл. 2 зач. 255]: [спогребшеся Ему крещением, о Нем же и совостасте верою действом Бога, воскресившаго Его из мертвых].

Да како убо не есть нуждно? святый Василий Великий, труба церковная вопиет [Четия Мин. Макария мит. август]: [Аще не сообщник будеши смерти Его, како обещник будеши воскресению?]. и аще убо не бывшу сообщнику смерти Господни, невозможно есть быти общником и воскресению Его, и како не есть нуждно.

Како убо не есть нуждно образование погребения Господня, о нем же и ангели и человецы и ангельский Владыка радуется? сице о сем Златоустому златоглаголивым языком вещающу [к колос. нрав. 7. лист 2106]: [Погребеся наш первыи человек: погребеся не в земли, но в воде, не смерти разрушивши его, но разрушившему смерть, погребшу его, не естественным законом, но паче естества крепчайшим повелением Владычества. ниже: ничтоже есть блаженнее погребения сего, о нем же вси радуются, и ангели, и человеци, и ангельскии Владыка]. той вопиет: ничтоже есть блаженнее погребения сего. и сии баснословят не нуждно.

Како не есть нуждно образование погребения в нем же погребыйся приносит плод, правду, святыню, сыноположение? якоже той же златоглаголивый восклицает [к рим. бес. 11, лист 166]: [Якоже бо тело Его [Господне] погребенное в земли, плод вселенныя спасение принесе, тако и наше погребшееся в крещении, плод принесе правду, святыню, сыноположение, безчисленная благая, принесет же и воскресения послежде дар]. римляном. беседа 11.

Како не есть нуждно образование погребения Господня, в нем же греха свободився бывает праведен, о чесом той же Златоустый вещает [коринф. бес. 6, лист 1199]: [Грех имеяи, приступив крещается, праведен же быв живет, смерти греха свободився]. и аще имыи грех приступив крещается праведен бывает. праведен же быв живет, смерти греха свободився, и како не нуждно.

Како не есть нуждно образование воскресения Христова, в нем же исповедуется воскресение мертвых? сице о сем Златоустому вопиющу [коринф. 1. бес. 40. лист 1063]: [Дух Святыи якоже в горниле в крещении преливаяи ю (душю), и снедаяй согрешения, злата всякаго чиста чистейше уготовляют ю блещати, и телес воскресение достоверно быти отсюду паки тебе показует ниже: сего ради первее рек грехом оставление, тогда исповедуеши и мертвых воскресение]. коринф. беседа 40.

Како убо не есть нуждно образование погребения и воскресения Христова, в нем же приобщаяся смерти и погребению Господню, приобщится воскресению и жизни вечней? явственне о сем восклицающу позлащенному усты Иоанну [рим. бес. 10, лист 159]: [Аще бо смерти приобщился еси и погребению, кольми паче воскресению и жизни]. что убо несть ли явлено, яко не погружаяися, не приобщается смерти и погребению Господню, ниже имать приобщитися воскресению и жизни будущей в царствии небеснем, и како не нуждно.

Но кое таинство есть спасителнейшее Спасовы смерти, еюже весь мир искупися? кое действо преславнейше Владычня погребения, имже адская держава потопися? кое видотворение светлейше всепресветлаго и живоноснаго воскресения Христова, имже вся тварь просветившися красно оживотворися? како убо не есть нуждно в крещении образование таковых и толиких таинств, имже все нашего спасения, всепребогатое видотворение и бысть и содеяся; якоже убо всемирное спасение, кроме смерти и погребения и востания Владычня, содеятися и видотворитися не можаше: тако и в крещении всеспасителном видотворение кроме образования тридневнаго погребения, еже изображается погружением, исправится всеблагодатно не может. зане по словеси Иоанна Златоустаго [ко евр. бес. 9, лист 2857]: [Крещение ничто ино есть, разве убиение крещаемаго, и востание онаго]. И како сии блядут, крещению могущу и без онаго образования совершитися? откуду сице научишася? от коего апостола? или богословца? Павел вопиет: [Стойте и держите предания, имже научистеся, или словом, или посланием нашим]. 2 солуняном. и тии глаголют не есть нуждно и не преступно. Како убо не есть нуждно в крещении образование погребения Владычня, еже святии апостоли предаша, еже святии богословцы исповедаша, еже вся кафолическая церковь имущи содержаше, чрез еже погребающиися Христу в крещении будущия славы надежду получения, несумнително имут? явственно святей церкви от лица Христова взывающей тако: [Со Мною аще снидет и спогребется крещением, со Мною славы насладится и воскресения, Христос ныне возвещает]. канон предпразднеству, на павечернице, генваря 4. песнь 7, стих 3.

Что убо, рекут ли сии, таковое же духовное умертвие, и оживление духовно обнимать верою, а внешним видом, то есть погружением изображать, есть приличие изрядное, но нужды нет. но оле слепоты! оле заблуждения! да не реку, крайняго изумления! откуду сии тако научишася мудрствовати? како несть нуждно погружением изображати духовное умертвие и оживление? ей есть нуждно. слышим бо Павла апостола вопиюща: [Веруется убо сердцем в правду, усты же исповедуется во спасение]. не токмо бо Бог от сердца веры требует, но и устнаго исповедания. яковоже и зде. еже убо веруем, яко умре Господь, и погребеся, и воскресе в третий день: сице и мы самеми вещьми, погружающеся соумираем, и спогребаемся аки в некоем гробе в воде, и исповедуем мертвых воскресение. чесому научает ны святый Иоанн Златоустый сице глаголя [коринф. 1, бес. 40, лист 1061]: [Ибо сего ради крещаешися, мертваго тела воскресение веруя, яко ктому не пребывает мертво. и ты убо словесы глаголеши мертвых воскресение, а священник, якоже в некоем образе, яже веровал еси, и словесы исповедал еси, показует тебе и самыми вещьми. егда кроме знамения веруеши, тогда тебе и знамение подает. егда яже сотвориши (крещение) тогда и Бог тя извещевает. како же. и коим образом? чрез воду. еже креститися и погружатися, таже возницати, еже во ад снития есть знамение, и еже оттуду восхождения. тем и гроб Павел нарицает, глаголяй [рим. 6, лист 409]: [Спогребохомся убо Ему крещением в смерть. от сего и будущее достоверно творит, телес, глаголю, воскресение]. 1 коринф., беседа 40.

Темже убо, аще спогребыйся погружением в крещении Христу, изображаяй смерть и живоподательное воскресение Его, славы будущаго несумнително насладитися воскресения, несть ли благоявлено яко не изобразивый погружением Спасова погребения в крещении, будущия всекрасныя не имать сподобитися славы воскресения. и аще тако есть, како убо возможно поливанием творимое крещение, сравночестнствовати и сравносилнствовати трипогружателному? никакоже, никако. то чесо убо ради не подобает обливателне крещеных, паки трипогружателне крестити? всячески подобает.

На конец убо вся вышепредреченная во оглавлении реку: Како не подобает обливателным крещением крещеных, паки в три погружения крестити, егда сам Бог Отец прежде век предзрев, душеспасителное крещение, многообразне различными прообразовании прописа е, и священными пророки предвозвести о нем, егда сам Бог Сын Слово Божие, сшедыи с небес, первее крестився во Иордане трипогружателне, предавыи священным своим учеником образ крестительства, послав во вселенную, повеле верующыя вонь, трипогружателне крестити: егда сам Бог Дух Святый трипогружателства крещение, различными аки рукоподписав чудодействии запечатле? ей подобает.

Како не подобает обливателне крещеных, паки треми погружении крестити, егда божественнии апостоли, иже прияша от Христа Спаса трипогружателства во крещении образ предавше преемником действ своих, священным пастырем, повелеша трипогружателне крестити, не крестящих же тако, судом извержения сана обложиша? зело подобает.

Како не подобает обливателне крещеных, трипогружателне паки крестити, егда священнии богословцы, и божественнии отцы писателными своими гласы научающе, во святом крещении повелевают трипогружателне крестити? воистинну подобает.

Како не подобает обливателным крещением крещенных паки трипогружателне крестити, егда божественнии отцы вселенских соборов, не погружателне крещеных, яко еллинов повелевают паки крестити [прав. 8, 2 вс. соб.]? поистинне подобает.

Како не подобает обливателне крещенных трипогружателне паки крестити, егда святии восточнии пастыри, обливателное крещение новшеством нарицают, нынешнии же великороссийстии архиереи, обычаем и ересию римскою порицают? всячески подобает.

Како не подобает обливаемым крещением крещенных, в три погружения паки крестити, егда древле святии благочестивии пастыри, яко гречестии, тако великороссийстии, от обливателне крещенных, приходящих ко благочестивей вере совершенно трипогружателне паки крестиша? неотрочне подобает.

Како не подобает обливателным крещением крещенных, трипогружателне паки крестити, егда священнии священных соборов отцы, священными своими гласы, яко не крестящихся анафеме предают. сице бо всеявственне гремят [Потребник, лист 659]: Иже не крестит в три погружения, во имя Отца и Сына и Святаго Духа, да будет проклят. еже и поливателная новоизданная от Синода книжица, свидетельствующи утверждает: [ведаем что на многих соборех, анафема сказано тем, котории не в три погружения крестилися]. глава 13. ей ей подобает.

Како не подобает обливателне крещенных, паки трипогружателственным крещением крестити, егда святая вся древлеправославная церковь, обливателне творимое крещение, проклятию предает, сице вопиющи [Потребник, лист 255]: [Проклинаю творящих развратно святое крещение, аще и во имя Отца и Сына и Святаго Духа глаголют, но обаче крещают водою во едино погружение, а трижды не погружают, инии же токмо обливают водою]. и паки [лист 262]: [Проклинаю скверное их крещение обливаемое, а не погружаемое, по Господню образу, иже во Иордане, и святыми апостолы нам преданное в три погружения, во имя Отца и Сына и Святаго Духа]. подобает во истинну подобает.

И вонми ми: Аще бы было обливателное их крещение истинное и душеспасителное: всяко бы имело, якоже и трипогружателное, прообразовано быти, или в ветсем, или в новем заветех. аще бы было христопреданное: не бы святии апостоли некрестящих трипогружателне из сана извергали. аще бы было правое: не бы священнии богословцы о нем умолчали. аще бы было важное: не бы божественнии отцы вселенских соборов, не трипогружателне крещенных, яко еллинов, паки совершенно треми погружении повелели крестити. аще бы было законное: не бы от восточных учителей новшеством порицалося: не бы от новых пастырей латинским обычаем и ересию именовалося. аще бы было равночестное и равносилное с трипогружателственным: не бы древле, яко гречестии, тако великороссийстии пастыри, обливателне крещенных, паки трипогружателне крестили. аще бы имело равную благодать, якоже и трипогружателное, Святаго Духа: не бы от святых, святых соборов, отец и крестивший и крестившийся обливателне, клятве и анафеме предавалися. аще бы было очистително грехов крещающагося: не бы вся купно святая древлеправославная церковь, обливаемое крещение, проклятию отсылала. но понеже священнии апостоли обливателне крестящих из сана изметают: яко несть христопреданное. понеже святии богословцы нигдеже о нем воспоминают: яко несть правое. понеже божественнии отци вселенских соборов, обливателне крещеных, яко некрещеных, повелевают трипогружателне паки крестити: яко несть важное. понеже восточнии учители новшеством порицают, нынешнии же пастыри обычаем и ересию латинскою нарицают: яко несть законное. понеже древле якоже гречестии сице и великороссийстии пастыри, обливателне крещеных, паки трипогружателне и покрещеваху и покрещевати повелеваху: яко несть равночестное и равносилное. понеже святии святых собор отци, обливателне  и крестивших и крестившихся, клятве и анафеме предают: яко не имать равныя благодати Святаго Духа с трипогружателным. понеже вся обще святая древлеправославная церковь, обливателное крещение, проклятию отдает: яко несть очистително грехов крещающагося. убо всякаго кроме прекословия, подобает обливателне крещеных, паки совершенно трипогружателне святым крещением крестити. что убо, аще бо дадим, но не соизволим, обливанием творимому крещению, важному, законному, равночестному и равносилному быти, и равную благодать Святаго Духа с трипогружательством имети, и равноочищающему грехи крещающагося: будет, еже да не будет, неистинно повеление, святых отец вселенских собор, повелевающее не в три погружения крещеных яко некрещеных паки покрещевати. будет, еже да не будет, ложно восточных учителей новшеством поречение, нынешних же пастырей обычаем и ересию латинскою наречение. будет, еже да не будет, суетно яко древлегреческих тако великороссийских пастырей, обливателне крещеных, паки трипогружателне покрещевание. будет, еже да не будет, напрасное святых отец, обливателне и крестивших и крестившихся, клятве и анафеме предание. будет, еже да не будет, тщетное всея древлеправославныя церкве, обливателнаго крещения проклятию отдание. аще ли же святых апостол истинное есть, якоже и есть правило, и правилно измещут не трипогружателно крестящих из сана: убо не есть христопреданное. аще ли священных соборов, отец истинное есть, якоже и есть, повеление, повелевающее не трипогружателне крещенных, яко некрещенных паки крестити: убо не есть важное. аще ли праведно есть, якоже и есть, восточных учителей новшеством поречение, нынешних же пастырей обычаем и ересию латинскою наречение: убо не есть законное. зане все бо новое, не есть древнее, ниже отеческое, аще же не отеческое, убо еретическое, аще еретическое: убо не есть законное. аще ли несть суетное, якоже и есть, древлевосточных и российских пастырей, обливателне крещенных, трипогружателне покрещевание: убо не есть равночестное и равносилное с трипогружателным. аще ли правилно и праведно есть, якоже и есть, святых отец, и крестивших и крестившихся обливателне, клятве и анафеме предание: убо не имать равныя благодати Святаго Духа с трипогружателственным. аще ли достодолжно есть, яко же и есть, всея святыя древлеправославныя церкве обливателнаго крещения проклятию отдание: убо не есть очистително грехов крещающагося. и аще тако есть, якоже и есть, и како не подобает, вы судите, обливателне крещенных, в нем же ниже форма есть видотворящая вкупе с приглашением крещения, яко не изобразует животворныя Спасовы смерти, погребения, и воскресения, в своем поливателном действии, паки трипогружателне крестити; како же не подобает и от новодействуемое крещение, в нем же, и ему же сравняяся, содержится, таковое и толикое обливателное крещение, еже ересию и новшеством именуется, и клятве предается, якоже выше рехом, и самей крестителней форме помешательственно есть, имущих, прибегающих ко святей древлеправославней вере, паки совершенно святым крещением крестити? зело подобает.

Глава, 21.

О приложении в приглашении над крещаемым четвертаго аминя.

Не токмо убо в новодействуемем крещении вмещаяся, обливателное крещение сравнителствует ему: но и в самом приглашении над крещаемым, в новопечатных Требницех, несогласно содержанию древлеправославныя церкве, привожение сотворено имеется. в древлепечатных убо в приглашении над крещаемым, три аминя возглашается, по коемждо речении, коейждо богоначалней ипостаси Святыя Троицы, аминь приглашается. в новопечатных же к трем оным четвертыи приложися [Ныне и присно и вовеки веком аминь]. и тако четыре аминя над крещаемым приглашается.

Древлецерковныя же святии книги, яко рукописныя тако харатейныя, в приглашении над крещаемым. три аминя изъявляюще указуют, а четвертаго не показуют. яко Катихисис великий во главе 60. и Служебники древлеписменнии и харатейнии, три аминя в приглашении над крещаемым имуще воспоминают, а четвертаго не упоминают. сице святии отцы Афона в Номоканоне в правиле 199. подобне и священный преосвященных архиереов российских собор в Стоглаве, такожде три аминя в приглашении крещения являют, а четвертаго не изъявляют. но и святейший Иосиф патриарх Московский, в послании к Валдемару королевичю написует: [у всех трех ипостасей приглашающе аминь, а не обливаемся якоже римляне, и инии обливают неразнственне, по ипостасем, во имя Отца и Сына и Святаго Духа, со единем аминем. но мы в коеиждо ипостаси аминь приглашаем]. до зде послание извещает, а четвертаго аминя не возвещает.

И не токмо древнии, но и от нынешних авкторов, самобратнии грекоучители Лихудиевы, в книзе Аккосе, во 2 ответе, вид святаго крещения описующе, во имя Отца и Сына и Святаго Духа, чрез трищное низведение в воду и возведение, в приглашении над крещаемым, такожде три аминя уставляют, а четвертаго не составляют. и тако убо сим своим приложением, по сим всем вышепредложенным, всякаго вероятия достойнейшим свидетельством, в новопечатных книгах, четвертаго аминя, новодействуемое крещение, в приглашении над крещаемым всей древлекафоличестей церкви, яко святороссийстей, тако святогречестей сопротивоборствует. ибо святая древлеправославная церковь в приглашении над крещаемым, три аминя возглашая к коейждо божественнейшей ипостаси живоначалныя Троицы, аминь приглашающи, аки запечатление полагаше. в новодействуемем же крещении, четвертый аминь приглашается, аки некоей четвертой ипостаси. чесо ради зело сумнително и опасно есть нам новодействуемое крещение. да некако приемше е, свосприимим и нехотяще новоприложение четвертаго аминя. темже убо воньми ми, како будет нам приятно новотворное крещение идеже Спасово предание отмещется? како будет приятно крещение, идеже многотаинственная трипогружателная форма нарушается и отъемлется? како будет приятно крещение, идеже обливание за важное и законное принято почитается и действуется? како будет приятно крещение, идеже великотаинственное изображение, спасителныя смерти, погребения и воскресения Христова отъемлется? како будет приятно крещение, идеже латинов, лютеров, и калвинов [сопротивная церкви крещения], вмещающеся удобно соединяются? како убо будет приятно новотворное крещение, еже всей древлероссийстей церкви, несогласно, всей древлевосточней церкви, несослагается всем святым учителем противоборително, всем богословцем противостоятелно, еже самем святым апостолом несогласно и сопротивно? аще же новотворимаго крещения форма толико не согласна, толико несослагателна, всей древлекафоличестей церкви показуется и есть, яко и самую форму уставленную от святых апостол, и святых отец, дерзновенно нарушает, якоже выше показася. убо новодействуемое крещение не есть приятно. аще ли сие приятно ти есть, да будут и оная вся вышепредложенная именословне безпрекословне приятна. аще ли она не суть ти приятна, якоже и суть, убо ниже крещение новодействуемое приятно да будет. убо подобает приходящих, от новодействуемое крещение имущих, к древлеправославней христианстей вере, второе совершенно всячески святым крещением крестити.

Глава, 22.

Яко совершителная крещения с древлецерковными не единствуют догматы же и уставы.

Четвертая: совершителная святаго крещения вина, по всем авктором, и древним и нынешним описуется, суть всеблагодатныя и пребогатыя Божия дары, крещаемым совершенно в души бываемыя: си есть, обновление, возотрождение, просвещение, и освящение, всыновление, и в самого Христа одеяние. тако книга малаго Катихисиса научает глаголющи: [Егда человек в крещении в воде первородный грех, в души омывает и очищает. якоже святый апостол Павел научает: но омыстеся, но освятистеся, но оправдистеся, именем Господа нашего Iсуса Христа, и Духом Бога нашего. в то бо время бываем удами Христовыми, и в Него облекаемся. по тогожде Павла учению: елицы во Христа крестистеся, во Христа облекостеся. и сице бываем наследницы Богу, снаследницы же Христу]. часть 1.

Подобне в книзе новопечатней, исповедание православныя веры, свидетелствует. согласно и в книжице о седми сакраментах явствует. которое в тайне крещения возотрождение (и освящение), и во Христа облечение, святии богословцы, святым и животворящим крестом совершается, сказуют. сице святый Иоанн Златоустый всеявственно взывает: [Яко венец, сице да обносим крест Христов. ибо вся тем совершаются, яже по нас: аще и породитися треба будет, крест приходит: аще и напитатися таинственною оною трапезою: аще и рукоположитися, аще и яково ни буди ино что сотворити, везде одоления нашего предстоит образование]. беседа на Матфея, нравоучение 54. и паки: [Сим вся совершаются, крещение крестом (подобает бо прияти печать), рукоположение крестом, аще и на пути будем, аще и в дому, идеже аще когда любо будем, велие благо крест]. на послание к филипписиом, беседа 13. Паки той же Златоустый златовещанне златоглаголивыми усты взывает: [ныне же чрез повеление Божие крестом кленетеся, егоже даде нам Бог на честь велику, оружие на сопротивнаго врага. без того бо ни крещение, ни лутургия не бывает, ни ина кая духовная вещь, имже мы знаменающеся бесовския силы побеждаем]. Пролог, март 13.

Но и святый Иосиф Фессалонитский, согласно научает ны глаголя: [Крестом крещению обновление дано бысть. крестом сынове Божии и наследницы царствия небеснаго быти сподобихомся]. в слове, в неделю 3-ю святаго и великаго поста. Подобне святый Феодор Студит восклицает: [Крестом во Христа облекохомся, крестом назнаменахомся Христовы овцы, и вышней ограде почитаемся]. в ту же неделю, 3-ю поста. Такожде и святый Симеон Фессалонитский взывает: [Темже и совершеннотворитель сам крест. и без креста ничтоже совершается божественных таин]. книга, глава 62. Сим всем согласно и святый Иларион епископ Мегленский учит ны вопия: [Рукою воображаемый крест освящает вся, на ня же полагается, и воду, глаголю крещения, и масло и миро, и лица человек верующих, и тайный хлеб, и священную чашу, и ина вся]. книга Кирилова московския печати, прение святаго Илариона со армены. И не токмо древнии святии богословцы, о кресте таковая утверждают: но и нынешнии учители, Дамаскин иподиакон студит подобне изъявляет, сице глаголя: [Крест есть сила и утверждение всех благих. тем совершаются вся таинства нашея веры, тем венчаемся, тем освящаемся. и аще хотят священницы служити, и аще хотят архиереи рукоположити, тем честным крестом исполняют вся]. книга Скрижаль, лист 771. И аще убо по святых отец гласовом, обновление крещения крестом, аще возотрождение, всыновление крестом, аще во Христа облечение крестом, аще всех таинств совершение, крестом, и о кресте совершается. убо святый крест есть всепребогатое благодати орудие, и всеспасителный и предивный освящения инструмент совершителныя вины.

Сие слово верно, и всякаго приятия, по апостолу, достойно показуется. еже в древлеправославней церкви законно и уставоположенно совершается: Яко священник воду, двема перстома осеняя возглашаше [Потребник в чине крещения]: Да скорушатся под знамением воображения креста Твоего, вся невидимая приведения. и прочая. Яко же о сем и святый Симеон Фессалонитский явственно взывает: [И знаменает трижды рукою крестообразно воду, крест изобразуя, и глаголет: со сокрушатся под знамением образа креста Твоего, вся сопротивныя силы]. книга, глава 62. Тако крещаемый в воду сходя, двема перстома на себе крест святый изображая, совершеннотворителя креста, по святому Симеону, всюду присно изъявляет. тако и во изображении благословения, и знамения себе, крест самый животворящий Христов, таинственно изобразовати, по святым отцем, умствоваху. паче же самаго распятаго Христа Бога высокотворно изображати вероваху. Якоже глаголет святый Кирил Иеросалимский [Псалтырь толк., пс. 59]: [И не стыдимся исповедающе Распятаго на челе со дерзновением, персты назнаменовати креста печать]. И паки: [Не стыдимся распятием Христовым, но аще ин таит, ты же на челе си знаменайся им]. Оглашение 4.

И не токмо святии отцы сие: но и новопечатных книг творцы, в крестном знамении изображати, толкуют: [На главу перстосложением, главу Христа Бога нашего, на кресте терновым венцем обложенную, на пуп перстосложением, ног Божиих ко древу пригвождение. на правое и на левое плече положением, рук Христовых ко древу крестному пригвождение]. Пращица, и Скрижаль.

Како же распятый Христос, в крестном воображении таинственне изображается, святый и дивный Петр, иже от Дамаска, явственно (и предивно), о сем научает ны глаголя: [Яко два убо перста, и едина рука, являют распятаго Господа нашего Iсуса Христа, во двою естеству, и едином составе познаваема]. книга О постничестве. к концу.

Откуду и благословлявший и знаменавшийся, в древлероссийстей святей церкви, елико страсть Христову, двема перстома, паче же самого распеншагося на кресте Христа Бога, во двою естеству, и единой ипостаси, православно верующе, православно изображаху: толико и крест самый животворящий Христов, на нем же Христос Бог пригвоздися, оный на себе, и во благословении изображати, по святым богословным отцем, и вероваху и умствоваху. о чесом в книзе старопечатней Кирилове свидетелствует глаголя: [А мы православнии христиане, то честное знамение крест Христов восприимаем, на нем же пригвождены быша нозе Его, и покланяемся Ему, не древо, но знамение Христово почитаем. полагаем на себе, исповедающе, еже Христос творяше, и что еще имать творити]. и прочая крестовоображения перстами наказание, глава 6.

Но крест Христов бяше тричастный, и четверочастный, со дщицею, и трисоставный, якоже древнии учители, и святии богословцы явственно свидетелствуют. Сице святый Григорий Амиритский, толкуя словеса Исаии пророка, во главе 60, положенная: И слава ливанова к Тебе приидет, кипарисом, и певгом и кедром, глаголет: [Крест Христов от кипариса и певга и кедра сложение имать. ибо простое его от кипариса бяше, прекое же от певга, подножие от кедра]. в прении с Ерваном, в беседе третией. Сице святый Феодорит в толковании главы 60-я, того же Исаии пророка глаголет: [(к сему же) проповедаем в сем словеси и о кресте Христове, яко сими треми древесы составлен есть]. Подобне святый Иоанн Златоустый, в слове в неделю 3-ю поста: [а Исаия откуду бы было, и яковыя креста древеса были, именует тыми словесы: на кипарисе и певге и кедре, вкупе месце святое прославите]. Такожде святый Герман патриарх в слове в неделю 1-ю поста: [Ибо якоже аз мню, крест аще и божественныя силы оружие есть, победоносно на диавола, и на вся того противныя силы есть, похвалам же похвала вышши всех, но убо от бездушных есть древес, кипариса убо глаголю, и певга и кедра]. Соборник великий.

Согласно Хрус уединенный в слове на Воздвижение честнаго креста изъявляя глаголет [Минея Четия, сентября в 14 день]: [Что бо яснее рещи, кипарисом и певгом и кедром вкупе прославити место святое Мое, понеже святая омусия Троица, единою от своих ипостасей, смотри сотворити человеческое спасение крестом. воистинну спасенное оружие, от трех древ сложено бысть]. и святии древнейшии отцы, и мученицы, Иустин и Ириней, доволне яве сказуют, яко обе нозе Христове на подножии креста стоясте. Минея четия декабрская новопечатная, в предисловии. и инии мнози святии отцы, и церковнии учители, креста Христова составление, от трех древ кипариса и певга и кедра, быти исповедуют, с титлою же и от четырех. имже согласно святии богословеснейшии песнотворцы, церковнии славии, животворящий крест Христов, в церковных своего творения имнах, различны описании количества, трисложный, тричастный, четверочастный, и трисоставный именовавше воспеша. сице в службе царя Константина, по 6-й песни, икос: [Константина вернии с материю почтем, иже пророка и тии словеса послушающе, на кедре и певге и кипарисе, трисложный крест уведеша]. Минея служебная, маия 21.

Сице сентября в 14 день, на всемирное Воздвижение того животворящаго креста: [Ты ми покров державен еси тричастныи кресте Христов]. на литии стихера. Такожде и августа в 1 день, на целовании креста: [сей крест тричастныи великии, мал видением сыи и небес ширши есть силою своею]. минея служебная.

Подобне святый Феодор Студит, в неделю 3-ю поста: [Днесь тричастныи крест поклоняем есть, и четвероконечная празднуют радостно]. триодь постная.

Но и сентября в 14 день, на Воздвижение креста: [Четвероконечныи мир днесь освящается, четверочастному воздвизаемому Твоему кресту Христе Боже наш]. купно же и вся церковь воспевает, во вторник 4-я недели поста, сице: [Трисоставныи крест, яко троичный образ воспеваем]. триодь постная, в трипеснце. Согласно и святый Григорий Синаит: [Крест трисоставныи честное древо, Троицы бо носит трисоставныя образ]. в каноне кресту, песнь 8.

От коих святых отец богоносных, и церковных песнотворцев гласов, явственно есть, яко крест Христов бе трисложный, яко от трех древ сложися. тричастный, яко три части, си есть древа в себе имать. четверочастный, яко четыре древа со дщицею от Пилата положенною содержит. трисоставный, яко три составы в себе содержашыя крест показует.

И не токмо древнии святии учители, и богосовцы, трисоставный крест Христов и дщицу титлу имущь изъявляюще научают: но и новии пастыри самый крест Христов, от четырех древес исповедуют. Сице Лазарь Барановичь архиепископ Черниговский, в слове в неделю 3-ю поста, глаголет: [Двор сей Господень есть крестныи, на крест созданныи от древес четырех, по описанию учителей, иже глаголют, широту быти крестную, на ней же руце Господни пригвождены, от древа, финика: долготу, на ней же висяше все тело, от кипариса: глубину, на ней же титле бе написан, от маслины. ниже: Вознесен бе сей двор Господень, крест Его, на горе Голгофе]. книга Мечь духовный, лист 400, на об.

И сам Никон бывший патриарх Московский, принесе от Палестины крест, мерою и подобием равен самому животворящему кресту Христову, яко во описании о кресте сем, и от мощей сущих в нем, написано сице: [Той крест в длину четыре аршина с четвертию: руки длина два аршина десять вершков: титла и подножие длина. пятьнадесять вершков]. в слове печатном о строении крестнаго монастыря, лист 7.

И елико убо святая древлеправославная церковь, единаго Христа Господа, и распеншася, и страдавша и воскресшаго, православно исповедает, сице и крест Его святый и животворящий, на нем же Христос пострада, един крест и трисоставен бысть и верует и исповедует. един той на поклонение поставляет. един в таинственном знаменовании изображает. и яко двою персту сложение во едино, двоестественное и единоипостасное, единаго распятаго Христа таиньство, тако крестообразным знаменованием, самый той животворящий крест Христов, и благоверно умствуется, и таинственно изображается. сим животворящим крестом священнии таинства совершаху. сим крестилныя воды освящаху, сим тайну крещения, всеблагодатным совершением обогатьствоваху. яко глаголют божественнии отцы: без креста ничтоже совершится божественных таин. Сице святый Симеон Фессалонитский: [Совершеннотворитель сам крестит, и кроме креста ничесого совершается божественных]. глава 62. В новодействуемем же ныне крещении, совершителство крещения, крестными способы, несогласно древлеправославней церкви, и действуется и мудрствуется. якоже бо священницы воду благословляюще, пятию перстами, а не двема осеняют. яко в воду сходящии креститися, треми персты, а не двема себе знаменают, сопротивно древлеправославней церкви, и святым отцем. кое их благословение и знамение, под клятвою обретается древлеправославныя церкве, сице вопиющия: [Иже не крестит двема перстома, яко и Христос, да будет проклят]. Кормчая древлеписменная, в чине проклятия еретик. И Потребник Иосифа патриарха. И паки: [Аще кто не знаменается двема персты, якоже Христос, да будет проклят]. И паки: [Аще кто двема персты не благословляет, якоже и Христос, или не воображает двема персты крестнаго знамения, да будет проклят]. Стоглав, глава 31. Ибо во оном новоблагословлятелном, и ново знаменовательном перстосложении [и воплотившагося, распятаго, и воставшаго Христа Бога нашего, двоестественное и единоипостасное не изображается таинство, еже двоеперстным сложением изображается], по святому Кириллу, и Петру Дамаскину. Тако и во образовании креста, двочастный крест изображати, и веруют и умствуют. еже показуют новопечатныя книги. Розыск во второй части, в статии третией, и Пращица во ответе 115. и яко распятие Христово, на двочастнем кресте великороссийская ныне церковь, исповедает быти, несогласно святым богословцем, несогласно святым песнописцем, несогласно и всей древлеправославней церкви: тако и в благословении и в знаменовании крестнаго образа, не самый крест трисоставный, но двочастный изображати извещают. тем двочастным крестом крещение освящати, тем вся таинства совершати, и веруют и утверждают. яко книга новопечатная Жезл явственно свидетелствует глаголюще: [Ибо сицевым воображением креста Господня, вся тайны церковныя действуем: воду ко крещению святому сицевым креста образом благословляюще освящаем, елей такожде: но и отроча мажуще елеом, и миром святым, не иныи крест, точию четвероконечныи изображаем. сицевым крестом просфира на заклание агньца уготованная благословляется, и в самых тайн тела и крове Христовы совершении, сей же образ креста употребляется. сим супружество составляется, и священство благословляется. не иным образом сами ся знаменаем, и иныя благословляем. тако елеом болныя мажем, церкви посвящаем, ястие и питие благословляем. словом рекше, вся священная действуем, четвероконечнаго креста образ творяще]. часть 1, возобличение 23, лист 112.

Святии же отцы глаголют, яко едина часть убудет креста, уже своего образа не являет, сице святый Кирил философ: [Четыре бо части имать крест, аще и едина его часть убудет, то уже своего образа не являет]. в прении со Аннием еретиком.

Подобне сему и Иоанн екзарх в книге своей глаголет: [Иже обретается образ не сыи по первому того подобию, в пустош есть зовом образ. от еже бо не подобится первообразному, того ради образ не есть]. Но и святый Афанасий Великий вопиет глаголя: [Яко образ от того, чии есть, разньствовати не может]. в прении со Арием Фотином и Савелием.

Зде же двочастный крест, в нем же не токмо единыя части не обретается: но и двух частей не исповедуют, титлы и подножия, како может быти крест Господень, не подобяся трисоставному кресту Христову, на нем же распяся? ибо по святому Афанасию Великому, образ от того чий есть, разньствовати не может. убо двочастный крест, разньствие от трисоставнаго креста Господня неимением титлы и подножия имея, не есть образ трисоставнаго креста Господня, убо не есть крест Господень. Како бы образ был первообразнаго, не спасаяй по образное. Скрижали вопиющей [Скрижаль лист 803].

И якоже двочастный крест не может крест Господень быти, паче же несть: сице вся таинства и вещи двочастным крестом совершаемыя, не могут совершитися, тако и крещения таинство, двочастным крестом совершаемое, не может всячески совершено быти, паче же несть. ибо без креста Господня по словеси святаго Симеона Солунскаго, ничтоже совершится божественных тайн [глава 62].

Но негли речет кто: тако ныне священницы и людины четвеространно знаменаются, яко и древнероссийстии, подобне вид показующе креста, различия в сем ниже единаго изъявляют. противу коим сретающе, умоляем блаженнаго Иоанна Златоустаго во отвещаение вместо нас самых, иже представ тако явственно вопиет глаголя: [Крест есть видом двоякии, ов убо из вещества, или злата, или маргаритов, или каменей честных, ов же [креста вид] невещественныи, ибо не из вещества ипостась его; но от веры существо, от залога творящаго и вещество]. Маргарит новый, в слове в неделю 3-ю поста о кресте, лист 206. и Камень веры новопечатный, часть 1, глава 4, о кресте, в слове новопреведеннем, с еллиноримскаго на словенский, в лето 1713. И аще убо двоякий есть вид креста, веществен и невеществен, ов из вещества, ов из веры осуществляется. но древлеправославная церковь елико вещественный вид креста тричастный, четверочастный, и трисоставный равнообразно самому кресту Христову всеусердно творяше: толико и невещественный вид, из веры усердный, и от залога теплаго желания, ипостасствующи осуществляше, той же а не ин вид креста изображаше. Якоже святый Иоанн Златоустый глаголет: [Сего ради и на храмех, и на стенах, и на дверех, и на челе и в мысли, со многим написуем его тщанием]. беседа на Матфея 54.

Темже по святому Златоусту, не ин вид креста на стенах и дверех написовати, ин же на челе и в мысли изображати, но един и тойже вид. Аще двоякий, за двоякое материи, но не двоякое вида. той бо вещественный вид, той невещественный вид, единаго креста, и из вещества и из веры составляемый, едино изображение креста, едино равнообразие самого животворящаго древа: паче же самого распеншагося Христа, и явственно, и таинственно, по церковным уставом всеверно изобразуемое.

Возглаголет ли паки кто: яко крестообразие равнознаменающихся есть, по новопечатным и старопечатным книгам, едино крестоначертание видение, и неразнственно являет, токмо и в мысли учащих различие, вреда же знаменающимся не показующее; отвещаем: аще и едино крестоначертание видение показуется: но не едино является веры существо, не един знаменающихся залог, не едина крестящихся мысль, якоже выше изъявихом, ими же сие есть, верою, залогом [люблением], и мыслию, многая и вящшая несогласия и разделения, и бывают и содеваются. сему мнози приклади, в церковных учениях обретаются.

Первый: в литургии Христовы глаголы: Приидите и ядите, се есть тело Мое. и прочая, равно и восточная и западная церковь глаголет: но не равно умствует. восточная убо токмо в воспоминание глагол Христовых, и во основание пресуществителныя благодати, и умствует и приемлет. западная же самое пресуществление, и совершенство сими верует быти.

Вторый: хлеба вещество во евхаристии, яко восточная церковь, тако и калвинистове, равне имеют [аще и опреснок калвини имеют], но мудрствование не равно, и залог веры несогласие имут. ибо восточная церковь, самое тело Христово, и истое по пресуществлении верует быти. калвини же не истое тело Христово исповедуют в тайне сей, но образ токмо тела и крове Христовы быти и веруют и приемлют.

Третий: святая кафолическая церковь, и лютеране, образы яко Христовы и Богоматере, тако святых апостол, равно и подобно написуют, и во храмех поставляют: но несогласно и неподобно, веры залогом разлучают. зане христиане поклонением сия всеговейно почитающе, на первообразная приносят честь. лютеране же зрения ради токмо и воспоминания поставляюще, святость же и поклонения честь от сих отъемлют. и инии безчисленнии приклади сему, и вещех и действах обретаются, аще и вещь подобну, и действо точно показуют, но мысль намерения, и залог веры, далече и несогласно относящих яже множества ради оставляем.

Темже убо егда в таинствах вещей, подобенство, залог творящых разлучает: егда тайнодействия видимую точность, невидимыя веры намерение относит: егда в знаменовании креста святаго, вера самая, вид креста, залог самый, образ онаго, таинственне и ипостасствует, и всеверно осуществляет. сего ради древлеправославная церковь, во изображении знамения крестнаго самем существом веры, самем залогом вернаго усердия, самый животворящий [иже бяше четверочастен и трисоставен], и составляет и изображает. сим святое крещение, и прочая таинства, всеблагодатно освящающи совершает.

Новопечатныя же книги, яко залогом мысли, тако веры существом, во изображении крестнаго знамения, двочастный вид креста осуществляюще ипостасствуют, оным и крещение, оным и таинства, оным и действа вся освящают, и совершати догматствуют, несогласная и различная древлевосточней церкви, и учаще и предлагающе, древняго благочестия ненавидяще отмещут.

Кое убо таинство святаго крещения всесовершенно освящаются? токмо единым двоестественным Христом освящаемое. кое действо всесвято облагодатьствуется? токмо единым животворящым крестом совершаемое. кая тайна всебогатыя благодати Божия сподобляется? токмо благословением Христовым осеняемая.

В новодействуемем же крещении, яко благословение несогласно Христу показуется и есть, пятию бо перстами, а не двема содевается. яко двоестественное и единоипостасное пострадавшаго Христа, во изображении креста отъемлется. ибо не двема перстома, но треми, или пятию персты знамение креста сотворяется. тако и самый животворящий крест, изображатися не умствуется, но токмо двочастный. чесо ради новодействуемое крещение не может быти совершенно, лишившеся совершенотворителя креста.

И како убо может быти новодействуемое крещение совершено, идеже сопротивно самому Христу благословляют? ей не может. како может быти совершено крещение, идеже в крестознаменовании двоестественное и единоипостасное изображати таинство воплощшагося Христа Бога нашего отъемлется? ей не может. како может быти совершено крещение, идеже крест кровию Христовою освященный, самосовершитель крещения, изображатися не исповедуется? ей не может. како возможно прияти новодействуемое крещение, егоже действо таковым благословением ограждается, еже под клятвою древлеправославныя церкве обретается? воистинну невозможно. како возможно прияти новотворное крещение, еже двочастным крестом, по исповеданию новопечатных книг, совершается, иже не подобится самому животворящему кресту Господню, чесо ради ниже крест Господень может нарещися, паче же несть; святым бо отцем явственно вопиющим: без креста ни крещение, ни литургия не бывает [Пролог, марта 13]. воистинну невозможно. аще же новодействуемое крещение, таковым крестом ограждается, еже под клятвою от древлеправославныя церкве содержится. аще таковым крестом совершается, иже не может нарещися крестом Господним. убо не может быти новодействуемое крещение всевсячески совершено, паче же несть. аще же несть совершено, како будет очистително грехов крещающагося, зело несть. аще несть очистительно, како возможно прияти е, отнюд невозможно. Аще бо приемлеши новодействуемое крещение, яко истинное крещение, всяко воздолженствуеши восприяти, и пятиперстное благословение, имже новодействуемое крещение осеняется. свосприемый же е, свосприимеши и двочастный крест, яко совершеннотворителя новодействуемаго крещения, имже действие его умствуется совершатися. и како убо возотречеши не восприяти, прием новодействуемое крещение, пятиперстнаго благословения, и двочатнаго креста? ибо без креста крещение не совершается. нынешнии же пастыри исповедуют и умствуют, двочастным крестом крещению совершатися, яко выше рехом. сего ради осеняюще воды крестителныя пятию персты, умствуют и утверждают двочастный крест изображати, имже крещение свое веруют совершенотворитися. ты же приемый новодействуемое крещение, исповедуя приемлеши яко истинное крещение, еже совершается двочастным крестом. приемый же е, сприимеши всяко и нехотящ, и совершеннотворителя его, пятиперстное благословение, имже изображается двочастный крест. и тако будет, еже да не будет, якоже пятиперстное благословение, яко истинное благословение: такоже и двочастный крест истинный Христов крест, совершенотворитель новодействуемаго крещения. аще ли же не приемлеши новодействуемаго крещения, совершеннотворителя пятиперстнаго благословения, и двочастнаго креста, чесо ради приемлеши совершенотворимое им новодействуемое крещение и кто твоему неразсуждению не подивится? кто ли не посмеется? совершенотворителя пятиперстное сложение, и двочастный крест отмещеши, совершенотворимое же новодействуемое крещение приемлеши. аще бо совершеннотворимое приемлеши, всяко должен еси свосприяти и совершеннотворителя. Аще ли совершеннотворителя отреваеши, всячески долженствуеши соотринути и совершеннотворимое. Темже убо аще новодействуемаго крещения совершеннотворителя, пятиперстнаго благословения, и двочастнаго креста, не подобает прияти, како убо подобает прияти совершеннотворимое им новодействуемое крещение, зело зело не подобает. и аще тако есть, якоже и есть. како не подобает от новодействуемое крещение имущих, приходящих к православней христианстей вере, паки совершенно святым крещением крестити? ей ей воистинну подобает.

Доселе убо глаголахом о винах святаго крещения, от них же явственно изъявихом, яко всевсячески подобает новодействуемое имущих крещение покрещевати.

Прочее да изъявится, яко и ересей ради, яже ныне в российстей церкви содержатся, не неподабоает святым крещением порождати. тем же и глаголю.