ЖИТИЕ И ПОДВИЗИ

ПРЕМУДРАГО, ДРЕВНЯГО БЛАГОЧЕСТИЯ УЧИТЕЛЯ,

БЛАЖЕННАГО ОТЦА, АНДРЕЯ ДИОНИСИЕВИЧА.

ИЖЕ ТРУДОПОДВИЖНЕ НАПИСА ЗА ДРЕВНЕЕ СВЯТОЕ БЛАГОЧЕСТИЕ

ПРЕСЛАВНЫЯ КНИГИ ОТВЕТСТВЕННЫЯ.

ЕДИНУ ПРОТИВ НИЖЕГРАДСКАГО ЕПИСКОПА ПИТИРИМА:

ДРУГУЮ ЖЕ ПРОТИВ ВОПРОСОВ

ПРИСЛАННАГО ОТ СИНОДА ИЕРОМОНАХА НЕОФИТА.

 

Велие обдержит мя желание, о мужие любомудрии: еже бы толикаго и таковаго в любомудрых премудраго мужа, преславнейшаго древняго благочестия учителя, преблаженнаго отца нашего и настоятеля, Андрея Дионисиевича, по сущей моей возможности описати его бывшее на земли блаженное житие: и явити вам за святое благоверие богоугодныя его подвиги. Вина же есть сицеваго натрижнения яко преславных мужей воспоминание паче же добродетелей житие, воспоминающим не малую плодоносит пользу: вкупе же и всякаго благорачительствующаго воздвизает к таковому же добродетелному житию и благопохвалному подвигу. Сие бо и в древности зело любомудрии наблюдали: и по склонности своей к каковому жительству, таковых совершенных жителей, для незабвеннаго воспоминания по тонку их жития описали и последнему роду с немалою пользою преподали. Не токмо же сие творят таковии еже о единых святопоживших святых великих отцех: просиявших в житии, и по смерти велиими преестественными чудодействии. Но мнози многия описаша жития бывших прехрабрых царей и славных военачалников: яко прехрабраго царя Александра Македонскаго, или храбрствовавших по плоти древле: Ахиллеса и Ектора, и прочих в силе, богатстве и могуществе преславных мужей, славную их память не погребли безславно в безпамятнем забвеннем гробе: но достаточнее елико возмогли описали, и не скрытно оных тленное могущество свету показали. Кольми же паче надлежит нам таковаго в последнее сие многобедственное время бывшаго преславнаго учителя и премудраго словосказателя блаженнаго онаго отца описати его богоугодное житие и имети яко себе в полезное воспоминание, тако и преподати последне родным в полезное же о нем благое ведение но аще сей премудрый муж, от всех и забвен быти не может, по своим люботщателным трудам: ибо коль не возможно забвенным быти собранным свидетельствам о древнем святороссийском благочестии и сложенным из них люботрудне им справедливым ответам противу вопросов иеромонаха Неофита: толь не можно и блаженная его памяти от любителей оных угаснути. Обаче она имеется и пребудет точию краткая, а пространнейшей с совершенным описанием всего его благочестиваго жития еще ни от кого не видится. Токмо через части некия описанныя во истории Выговския пустыни писателя Иоанна Филиповича видится и через похвальныя и надгробныя сочиненныя ему от разных авторов слова познавается. Аще и от сих могут любители его жизни наслаждатися оными о нем похвалными повестьми. Но точию же не весма достаточно. И от сего аз грубый препобеждаем, паки вам глаголю, что несть такова преславнаго нашего [засвидетельстованнаго многими и внешними премудрыми мужи] учителя, пополнителнаго обычным порядком описания блаженнаго его целомудреннаго жития, весма приидох в жалость о оного небытности, и долго о сем соболезновах и рачительствовах, еже како бы возможно оное превести в бытность. Просих неких любомудрых от ученик его, дабы сия учинити, но токмо все оное учинилося праздным, и от их никакова охотнаго к сему тизания не получих. Что же убо аз и сотворити не вем; аще непременное мое о сем желание тушити возъимею ничтожеством, то оное на некое время аще мало горячность свою и сокрыет: но по малу паки наиболее возгорится и в величайшее страдание ми претворится. Егда же бы по возможности моей самому во оный труд вступити; то не попускает ми великое ко оному делу недостаточество, и без мала неприступное мне описуемаго достоинство. Како могу неученый про таковаго великоученаго учителя подробну житие описати. И тако отвсюду стесняем многое время в недоумении бых. Наконец же всего онаго размышления положихся на волю Божию, елико возмогу толико возусердствую, коснутися к написанию повести о блаженнем отце Андрее. Не для таковых кии присно упражняются наиболее в риторских красноглаголаниих: но иже наипаче не за красноречие но за сущее поведание блаженнаго отца, блаженных детелей сие восприятствуют, и не отменную к нему любовь имеют, а притом и для собственнаго своего воспоминания понудихся в вышесилное сие вступити дело. Ибо хотящее быти о нем повествование наиболее от слышания жительствовавших с ним и слышавших пресладкое его учение богобоязненных мужей происходит. Ничто же убо сами от сего видевше, но от списавших таковая яко цветы собравше. От их повествований про его душевныя и телесныя свойства и благий целомудренне нрав сие творится. Еще же и от истории Иоанна Филиповича, и от похвальных и надгробных ему слов заимствуется.

Вас же прошу честнейшии читателие, и слышателие возлюбленнии, не презренно сие приятствовать, не за учтивость и благоречие слога, но за добродетелное описуемаго отца, любопремудрое незлобивое и любителное и сладкое ко всем святое его житие. И яко же преже рекохом, сия вся добре изобретше разсудихом, не полезно быти на многи части и разно такова и толика многодобродетелна глаголатися, но собравше во един чин. яко злату пленицу исплести, ничтоже от себе приносяще ей. Аще и зело грубо есть нашего художества люботрудное снискание противу оного добродетели, и тяжкоценныя его безсмертныя заслуги к гонимой от седмиглаваго змия древлеправославной церкви и всему  христианскому соньму. Но обаче надеждою себе во оном ласкаю: яко аще кто к нему незабвенную любовь имеет, той и грубаго сего о нем повествования не отринет, но подобию сему: егда какому любо, аще и весма грубому поселянину прилучится, где быти в далнейших странах с каковым весма нам любезным родственником, ли благим приятелем или весма с какою велико преславною персоною: то аще и зело грубо оный нам имать о них повествовати, и о случившихся в чюжестранствии действиях сказовати: обаче мы за великую к повествуемым любовь, не презираем конечно и самаго того грубаго повествователя, и его невежливаго повествования: но охотно всесладостне послушаем про преславнаго и любимаго нам, невежливое и не витиеватое его сказание. Не о себе же ни на себе надежду полагаю аз, многотрудное по мне сие в написании пройти поприще: но наипаче надеждою вперяем, упование мое возлагаю на все вышнее вышняго Бога благоволение, и на блаженнаго отца святыя молитвы, и за премногую любовь мою к нему на невидимое его в руковождении сем отеческое наставление и всея моея грубости благое исправление.

 

О отечестве и родителех блаженнаго Андрея

 

Отечество премудраго сего учителя, из славнейшей части света Европы, преславнейшая Россия, елико изобилующая всякими плодами и древесами, толико и пребогатая разными металлы: преславна же суть и славными царями и прехрабрым крепким воинством. Наипаче же благоцветущая бе прежде благочестивым православием и истинною верою во единосущную триипостасную святую Троицу, и от Тоя воплощеннаго от святыя Девы Марии, Сына Божия и Бога истиннаго, Богочеловека Спасителя всему миру, Исуса Христа. Нас ради воплотившагося, и нашего ради спасения нашим естеством страдавша и погребена: и по тридневнем воскресении возшедшаго на небеса, и седяща одесную Бога Отца. И паки хотяща приити со славою судити живых и мертвых, и воздати вечное по делом коегождо воздаяние: праведным неизреченное веселие, грешным же безконечное мучение. И толико сия обоя преестественная таинства, российский благочестивый народ всеверне храняше: яко непременно оное по Христову святому преданию в сложении своем перстном, в крестном знамении всеговейно изобразоваше. Слагаху бо десныя своея руки три перста, во образ святыя триипостасныя неразделимыя Троицы, два же перста, указательный и великосредний, во образ дву естеств вочеловечшагося Сына Божия, и сына девича Исуса Христа. И сими всегда на себе крестное знамение воображаху, исповедающе сим страсти бывшия нас ради нашим естеством на кресте нашего Спасителя и Бога. И сие все согласно с грековосточными православными патриархами исповедоваху и правоверно вероваху. И многими преславными видами оными святое содержание засвидетельствовавше последнеродным оставиша. Многими глаголю засвидетельствовано бе оное древлеправославныя церкви святое содержание, святыми чюдотворными иконами, и предревними харатейными [писанными самыми святых отец руками] святыми книгами: и святыми их нетленными мощами. Колико же Россия верою оною святою сияше поднебесней, яко и прочим частям света всем ей удивлятися сотвори: многажды восточнии патриарси пишуще к российстем архипастырем зело за ненарушимое святыя веры содержание российское царьство похваляху, и Третиим Римом его нарицаху: коль же преукрашено российское государство и великими имеющимися в нем прекрасными градами: коль преудобрено многими честными монастырями: коль преспещрено и святыми Божиими церквами, и толико, яко небо пресветлыми звездами: колицы же и святии плоды, от святыя оныя православныя веры, в России израстоша: предобрейшии несравненно прекрасных плодов едемских: преблагоуханнейши по премногу благовонных мастик аравийских. Колико глаголю в Велицей и Малой России просияша святии угодницы, земнии ангели и небеснии человецы. И ими же коль обогатися российская земля; коль доброплодства и облагоухася российский виноград яко рай Божий, яко едем сладости показася: толико многоплодно, елико на безчислие изливающеся красно преизобильствоваше. Несть бо таковаго града, и даже святаго в нетленных мощах не является: суть же таковии гради суть, в них же по два, по три, по пяти и по десяти, и много премножае святии многоцелебно почивают. И несть таковыя обители, идеже преподобнаго почивающаго, или святых чюдодейственных мощей не обретается. Премного бо множество Россия имеется в себе чюдотворящих и по смерти праведных и преподобных отцев святых благоуханных мощей, яже российская златоплетенно украшающе пределы, земная совокупляху с небесными, человеки российския с самым Богом всепречудне соединяху: и светлобогоудное свое содержание и по смерти святии мнози нетленными своими мощьми являху. Святый Никита епископ новгородский; его же мощи сохранны пребывающа в земли, до обретения 1753 лета: безсмертно и по ныне возвещает предсказанное святое таиньство, преестественныя святыя Троицы, и воплощения Христова нетленною своею благословляющею десницею. Такожде оное же нетленныя святыя молебныя руки, преподобных отец печерьских Иосифа многоболезненнаго, и Илии Муромца.

Но да не продолжу в безчисленных и оном чюдесных доказательств многое время: довольно бо и от малаго сего написания показуется достоинство преславной России, а наипаче сияющее в ней от святаго благочестия. Надлежит же ныне и о родителех виновнаго сему повествованию предложити.

Прадеда бо его отец бяше рода князей Мышетских, российския части с новгородския области именуем Борис Александрович: муж благ и благочестив, и добродетелен. Якоже последованием родителей ведение даже до нас дойде. [Сие сам он блаженный Андрей Дионисиевич в надгробном слове сроднику своему Петру Прокопиевичу описует.] Той во время смущения русския земли егда от шведов и поляков волновашеся Россия: и мнози принуждаеми бываху крест целовати за чюжестранных кралей, сие же благородный князь не восхоте в том вчинити поползновения: но яко же крепок во благочестии, сице и своим природным государем вернейший явися: не поддадеся чюжестранным иноверным кралем, не восхоте креста за них целовати. А понеже велие налегание тогда от противных бяше и бедствоваше России, конечным бедством остави сей отечество свое и поместья и вотчины, и пресельник бывает в заонежской пятины: аки в пустыни некоей в лесожительном селце, Пудоская гора именуема. В нем же во иноческом чину Боголеп преименованый благочестно преставися. Сын же его, Иван Борисович, священства и иночества чином назнаменован, Иона во иночестве именуем упокоися. Того же дети Порфирий, священник, и Евстафий, преселники на место Повенец, именуемо быста: незнатно и убого тогда суще, яко бы последи от них и роды их  тое место населися, и из рубища нищеты и неволи очистися и знатно в сих странах учинися. Ныне же и в преславнейший уже град претворися. Сего бо Евстафия дети Иаков. [иже и Анексий бяше блаженнаго]. Муж в сих странах знаменит и разумен: в гражданстве же словый, и от великих государей самолично многажды милосердие гражданству же и поминаемому Повенцу получивый: а наипаче во время воеводства на Олонце князя Терентия Васильевича Мышетскаго от него же по любви и милосердию благородия сродственнаго велие милосердие тогда получи. Тако же и братия сего вси священному писанию научени, и церковными древними уставы просвещени: в гражданстве и странах сих знаменити бяху от них и отец бяше виновнаго сея повести премудраго Андрея, блаженный Дионисий, не токмо в мире правдою и добродетелию поживе: но и оставив мир пустынное житие лобызав добре Богу девятолетно потрудися, о чесом последи пространное речется.

 

О рождении и воспитании благороднейшаго,

наипаче духом премудраго Андрея

 

Благоразумный той муж, Дионисий, с законною супружницею своею Мариею живяше на Повенце близ езера Онега, во всем по заповедех Божиих иже зачаста, и родиста преславнаго сего Андрея. От таковых бо честных родителей рожден и воспитан бе, коль прехвално: коль пречестно: коль преудивительно: сие узрим. Не толико бо млеком елико молитвами, не толико хлебом елико молебными прошении воспитываем бяше. Еже присно всежелателно блаженная мати его, содеваше миру Христа моего тезоименная присныя слезы непрестанная моления, всегдашняя о его здравии молебная прошения, преизобилно содеваше: яко да свещу сию пресветло светящу во юностном цвете соблюдет до совершения возраста. Яков же бяше сий блаженный отрок благолепием: ибо зело благообразен: Яков натурою; зело предивен: Яков природою нрава; зело и от младенчества бяше благонравен и преславен, по писанному: аще корень свят; то и ветвие свято. И егда убо первый возраст начен, отцу Игнатию соловецкому пребывающу во многих вышеестественных подвизех близ Повенца. Сей убо крести первие блаженнаго Андрея последи же и родителя его крести: не бо попусти Бог, таковаго светилника и церковнаго учителя, да и родителя его лишени будут древлеправославнаго благоверия. Растяше же велеумный Андрея телом и преспевая мудростию, имый нрав добр, и житие добродетелию украшено, воздержася присно от детских глумлений, но и во всяком благоразумии и в повиновении родитель любомудрствовавше. Возжеле же и книжному учению. И даша ему родителие в научение святых книг. Остр же и благоразумен отрок имея разум,  вмале времени многа извыче. Бяше бо зело любя учение, имея страх Божий в себе и смирение, велико ум свой управляя день и нощь на книжное учение. Иже в пятилетнем возрасте сый у родителей своих извыче до конца книги читати и писати, егда десятому лету наставшу, стрый его Ияков таможенное службы его дело поручи ему исправляти. Любит же человеческое естество в славе и богатьстве величатися и выситися. Но сей премудрый отрок сих всех не требовавше, но яко мимотекущая преобидяще ко учению присно прилежаше и никакоже преступая своего чина. По сих же яко лета ему превосхождаше и разумом на и более предуспеваше. Но убо аще афиньская люботочительства угасоша, еллиньская же любомудрии умолкоша. Но возуповав на Вышняго промысл, абие словесному наказанию и внешнему люботрудне и любопчелне прикасашеся: и о сем тщание присновелие имея, елико подобно прием граматикию еже есть начало и конец всякому любомудрию, от нея же всякое естество творится и естествословится. Яже добре навык, Божиею благодатиею наставляем. Таже потом и риторикию прошед. Бяше бо зело хитр в словесном любомудрии, и тщателен философской премудрости егда вдастся доблий отрок на учение тех книг яко вмале времени та навыкнути и сице ему в наказании и разуме велику бывшу единаче нравом смирен, и образом благолеп и кроток бяше помыслом на большая внимаше. Словесная убо наказания во вторых полагаше, все же тщание имяше о добродетелном поучении, и о сем всегда печашеся и болезноваше, како да исправится ему мудрость к сей же мужество, смысл, правда и целомудрие. И яже от сих и прочия добродетели к сим пригвожден имея смысл предивный Андрей в божественных писаниих трудолюбне поучашеся, и всем умом сих испытуя бяше. Яко да иже в глубине тех лежащая разум обрящет по писанному: возрадуюся аз о словесех Твоих, яко обретаяй корысть многу.

Должно убо нам возлюбленнии зде на среду привести благочестивых своих отец прсветлое благочестие, и изрядная дела воспоминати, и сих памятию к доброделным подвигом и трудом обощрятися, якови суть и наши собственнии отцы и предводители, и благочестия пресветлии светилницы. От них же сия Выговская пустыня светом древнецерковных святых преданий просветися. И егда на всю Россию мрак новых заблуждений нападе, тогда богоспасаемая страна сия зарею непорочнаго правоверия ясно озарися. Сии бо предивнии мужие бяху нашего просвещения светозарныя звезды. Сии нашего утвержения крепкая основания, сии нашего ограждения нерушимая забрала, сиии нашего стояния непреклоннии столпи, сии нашего украшения неувядаемии цвети. И что множае глаголати: мужие благодатнии веры исполненнии благочестием сияющии делы благими удобрившиися Богу любезнии: ангелом желаннии, человеком полезнии. Мне убо возлюбленнии желательно есть воспомянути вседоброе житие сих крепких мужей, и предложити вашей любви, слово нехитроречивое, но истиною окрашенною о дивном их мужестве, и преславном подвизе благочестия, паче же о теплой их к Богу любви. Ею же разжеся сердце присновоспоминаемаго нами премудраго Андрея [о нем же нам слово настоит] в любовь к Богу и в ревности по благочестии. Да отсюду увидим свою нищету, худость, слабость и ленивое произволение, и умилимся о суетии жития своего. Вам же любезно да будет слышати, добрыя повести о благочестивых мужех: не бо басни и кощуны глаголем, но самую известну истину ниже еллиньских поганых человек дела предлагаем: но мужей честных и добродетельных, умевших предпочести благочестие, паче сладкия жизни древния уставы церковныя паче любимаго России новшества и озлобление от властей и поношение от народа паче славы и чести. Убожество Христово, паче богатьства мира сего. И еже в пустыни плачевное житие и попечение о своем спасении, паче светлых радостей и покоев века сего. Не есть убо грех, о любимии мои слышателие: сицевыми повестьми время провождати но изрядное дело и согласное апостольскому премудрому поучению: помните наставники ваша, иже глаголаша вам слово Божие их же взирающе на скончание жительства, подражайте веру их.

Егда убо грех ради наших Никоном патриархом премена благочестивых святоотеческих уставов учинися, и светлое светлейших отец святых чиносодержание отлагашеся, своя же его уставоположения утверждахуся. И знаменающиися крестным знамением по святых отец Божиим уставом, тии проклинахуся. И по старопечатным и старописанным святым святоцерковным и царственным и архиереи содержателие благочестия знаменосцы же и чести достойнии отцы яко злодеи тогда прогоняхуся, вязахуся, и мучении тяжкими искушахуся, и тма тяжкая покры тогда Россию, мечь и огнь поядающь села и домы и пустынная места, за содержание древняго святоотеческаго благочестия. Бысть же сие смущение от лета осмыя тысящи сто шесть десят втораго, с Никонова патриаршества. От тогда противящияся Никонову новопреданию, и опасный хранитель святоотеческих древних содержаний, священный архиерей и Божий человек Павел епископ Коломенский, за имя Божие и за свидельство Исус Христово. за древлецерковное православие, муж свят и достойный чести,  с безчестием послан бяше в заточение, в поморскую нашу страну, в Олонецкой уезд, в Палеостровской монастырь паче же рещи яко некий Моисей и Аарон Божиим изволением на утвержение новаго Израиля, беззлобивых и богобоязнивых поморьских людей прислан бяше, иде же несколько время пребыв свободно поучаше народы утвержая жити в святоотеческом благочестии, новоизникшихся уставов никоновых  соблюдатися наказуя. Коего учения и благословения архиерейскаго страны сея жители, слышатели же и видители зело бяху. От них и сия Выговская пустыня населися.

По сих же явися ин муж свят и благочестив, игумен Досифей, с Тихвины Николы Беседнаго монастыря, благочестия ради крыяся. Старостию и добродетельми украшенный, иже часто прибегая к пустынной некоей Курженской обители,  в строении преподобнаго Евфросина. В ней же и святыя бяху, в них же собираяся со многими отцы великими постники и знаменоносцы, иже от многих стран, и от соловецкия обители изшедшии яко ангели нецыи земнии и небеснии человецы службу Богови за весь мир приношаху. И бяху мнози в них разумом Божественнаго писания обогащени, и безстрастия светом просвещени, священнаго же и иноческаго чина знаменоносцы откуду тогда в зиму гонения лютаго, на благочестие весна сияше пресветлая от оных знаменоносцев благоверия. Тогда мнози обонежских жителей во ону обитель прихождаху, просвещахуся исповедывахуся и святых безсмертных таин причащахуся, аще и послежде защитницы никоновы и ненавистницы древлесодержателнаго благочестия, архиерейстии посланнии с Нова града, оле плача и жалости: не токмо распудиша стадо Христово [по реченному апостолом: вси хотящии благочестно жити о Христе Исусе гоними будут], но и святыя церкви тыя в Курженской обители огнем пожгоша. Донележе бо бе в Нове граде Макарий митрополит муж кроткий и благоразумный, и древлецерковнаго благочестия добрый исповедник. Доколе в Новеградской епархии и в Олонецком уезде, вси древних церковных преданий хранители, никоновских новин не приимаху, и старопечатныя безбоязни содержаху книги, и по ним славословие Божие совершающе, в мире и тишине пребываху. Той бо митрополит аще и бе на никоновом соборище, и боязни ради неволею подписася на отвержение древних уставов, яже Никон отложи, обаче пришед во свою митрополию в Великий Нов град, новопечатныя книги и двочастный крест по совету иконома своего и ризничнаго, и прочих благосовестных священнаго чина мужей вложи во едину некую полату и заключи ю и запечата, да никоново новшество при животе его в Великом Нове граде и во окрестных монастырех, и в пределех его неразсеянно будет. Сам же древлепечатныя книги содержаще службу и всем священником своея области тыя содержати повеле, яко же честное наследие святых и богосносных отец. И не токмо сие сотвори благочестивая она душа, но и каяшеся и плакаше, и исповедаше всю свою немощь и боязнь, и неволное согрешение, яко подписася на не преподобном оном соборе, еже отложити церковныя святыя уставы, и тако в покаянии и исповедании от сего жития преставися в лето 7171. Бе же на архиерействе десять лет, яко же новоградский летописец сказует. По смерти же сего кроткаго архиерея и благочестию защитника бысть митрополит в Великом Нове граде не кроткий и не преподобный Питирим, иже вконец отложи древлецерковная святая предания и книги святыя, и вся Никоновы уставы с мучительством и кровопролитием в церковь введе. Тогда и вышереченная Курженская пустыня лютым оным от архиерея гонением истребися, и в ней святыя церкви огнем пожжены быша [яко же речеся]. Обаче одушевленныя церкви благодатныя, по апостолу: вы есте церкви Бога жива, старожитнии они отцы остальцы соловецкия и прочих обителей, крыяхуся по пустыням поморьским около Выга езера, в Шунге, в Толвуи, в Повенце, паче же в сей Выговской и Водлозерской пустынях, и тако древлеправославное благочестие храняшеся и проповедашеся, и в домех благочестивых богобоязнивых мужей светяшеся и пустынная места благочестивыми от гонения наполняхуся. Тако не токмо издревне сие наше православие евангельскими и апостольскими и соборными догматами украшено есть и священными книгами засвидетельствовано, но и в смущенныя сия дни, архиерейским и священных мужей благословением и проповедию насаждено, и страдальческою кровию утвержено есть.

Откуду же общежительство сие начало прият, и како устроися; ныне краткословием объявим, да неведующии ведением: ведущие же памятованием обновят своя слухи.

Егда бо древлесоловецкия отцы не приимаху новых уставов Никона патриарха, древлесодержания же и церковныя нимало уступити дерзаху, бяху же в них тогда мужи честнии и святии от многолетних подвигов постных просвещени и разумом божественнаго писания озарени. В них же три, прочих превосходящи в премудрости и разуме и во всем ведении священных писаний. Един Герасим Фирсов именовашеся, его же премудрость и разум каков бяше, является от писаний его; еже писа о знаменовании креста на лицах своих. Вторый же черный диакон Игнатий, муж святолепен и подвижник велий, и божественнаго писания вельми читатель, и внешняго наказания искусен. И третий диакон же черный именем Пимин, добродетелнаго богатьства, и разумом божественнаго писания обогащен: иже последи на Березове на Волоке, со множеством народа, от нашествия гонителей за благочестие огнем скончася. Бяху же тогда в соловецкой обители мнози отцы святоподвижнаго их ради жития прозорливым даром и знамении и чюдесы облагодатьствовани. В них же бе некий отец Гурий именуемый, аки благоуродствуя пребываше, многия прорицания тогда предвещаяше. Егда еще Никон митрополитом бывый, по мощи святаго Филиппа посылаем бяше, тогда той святый старец приезде его о яже о нем прежде прорече. И ина многа памяти достойна [яко глаголют] отец прорицаше. Молитвенник бо бе велий и постник многолетен, и чистоты ради умныя предвидяше далная, яко близ сущая. Той великий отец часто помяновенному Игнатию отцу повелеваше изыти из обители соловецкия: Бог тебе повелевает [глаголя] отсюду изыти. Чесо ради стужившу отцу Игнатию, и некогда молящу святаго старца: почто убо святче Божий аки мя непотребнаго уда от обещания своего от обители преподобных изгоняеши. Святый же той старец: иди, иди Игнатие [рече] не имея сомнения, хощет бо Бог состроити тобою велию обитель в славу Его: обители же соловецкой разорение предрече. Еже и бысте, ибо послежде зельным мучением древлесоловецкия отцы за древнее благочестие скончани быша. Помяновенный же Игнатий изыде из соловецкия обители, по глаголу святаго старца, и по благословению отец и Богом подвизаем прииде в сия поморския пустыни. [И еже прорече ему отец Гурий. Сие последи сам сказа настоятелем его общежительства, Даниилу и Андрею]. Пребываше же Игнатий во многих вышеестественных подвизех близ Повенца, и в Курженской обители с священноигуменом Досифеем и с прочими отцы схождашеся, и единоумно о благочестии усердствоваху. Бе бо добродетелнаго ради жития, и премудрости всеми знаем и именит, еще же живый в пустыни сей, чистоты ради его сердечныя, и безстрастнаго жития, прозорливый дар от Бога имеяше. Иже видяхуся добродетелны быти, их же провиде он последи отпасти благодатнаго жития; и предрече о них, наказанным быти за прегрешения объяви. Другия зело ревнители являющиися от очию своею отгна, преступники быти предсказа, вся же сия по проречению отца сего сбывахуся. Много же сей священный отец просвети учением, научи благоверию наказа добродетелем, и на подвиг спасителный возстави. Сей священный отец просвети учением своим премудрых само, братию Андрея и Симеона, и дом их сущим, и в страсе Божии живущим увиде чистоту ума их, правость смысла, целомудрие душевное, кротость нрава и желание к Богу. Иже потом мудростию и добродетелию, аки звезды возсияша в пустыни сей. Сей отец и Петра дивнаго, последи еклисиарха в киновии сей бывшаго, от юности наказа непорочному благочестию, и страхом Божиим воспита. Тем же бысть древо благоплодное и маслина плодовитая, дивныя сладости исполненная.

 

О разсуждении Андрея Дионисиевича плотьскаго миролюбнаго жития

и пустыннаго боголюбиваго пребывания,

и о отлучении мира, и шествовании в пустыню.

 

Егда же прииде блаженный сей велеумный отрок в возраст осминадесятый, угодный уже и к брачному сочетанию, о чем родители его неусыпное рачение имеяху, еже бы ему изобрести благоразумную супружницу. Премудрый же сей паче же рещи муж, а не юноша, ибо мужески в старческое вступаше безстрастное разсуждение, а не юношески свождашеся в пристрастное размышление. Видит себе и слышит отвсюду о себе, что всеми его богодарованными имствы зело угоден есть сему миру. Но сей разсуждаше чтобы ему из двух сих возможно едино за превысочайшее избрать, и служить сему со смиренным покорением раболепно мир ли сей или Бога. Егда убо помыслит разныя утешения и плотьския наслаждения прелестнаго сего мира; богатьство же честь и славу и прочия мирьския увеселения, и к сему весма принадлежащия младыя свои лета, и прекрасное юношество и яко бы ко оному сие некое свойственное, по младости неотторженое присвоение имеяше жестоту неудобь мягкости его стерпимыя, постническаго святовоздержнаго девственнаго пребывания, а наипаче же разсуждаше: Како жизнь свою от младости беспорочно и до старости препровождаше в диких и неплодных пустынях. И тако по немощем человеческаго естества, аще бы во младости и миру послужить мало некако когда и сослагаем бываше обаче несовершенно, ибо премудрый сей от природы любомудрец любомудренно не толико о настоящем времени, елико о предбудущем разсуждаше: вопреки убо предлагаше смертный час, а по смерти за настоящия жизни пристрастное любление вечное мучение. И тако сим разрушает вси вышеписанныя миролюбивыя предложения премудрости рачитель бывает и всех сущих еже к Богу, разсудив сожительницу поучение смертное, и все плотьское мудрование повинув духу. Тем же плоть и мир возненавидев и миродержца, к воспалению огня в любовь Божию изгоняет себе вдати. и волю свою и тако села Повенецкаго прозябение отрочь сый леты, мудростию же многолетную постигнувый старость. Божий страх возъиме в своем сердцы и надеждою вперися яко орел по писанному: на того упова сердце мое и поможе ми. И абие распалися в Божию любовь, пустыннаго желая жительства, оставляет отца и братию, и единоутробную сестру; презирает дом и вся настоящая, яко не сущая уничтожает оплевает и отвращается, понеже ведяше Выговскую пустыню, от бегающих и крыющихся, населяющему християн. Вземлет спутника себе, Иоанна некоего Белоутова нарицаема, и с ним желаемое ему достизает место, лыжи убо вместо коней, кережу же вместо воза приим, сам себе бывает подвода и извощик, и слуга и господин, и вождь и водимый. И тако Богом наставляем, приходит самозван, паче же рещи богозван, к подвигу постному, по писанному у псалмопевца Давыда: Се удалихся бегая и водворихся в пустыню, и прочее. Лету настоящу от сотворения мира седмотысящному и двусотому, в последних декабря месяца днях. Таже с предреченным подругом своим Иоанном в чащех леса скитающеся. Богорадное оно и самоозлобленное начинают житие, ни стены, ни покрова от зимныя студени имуще, огненой точию приседяще нудии, и от принесенныя с собою потребных мало внуждающе. Зимному же прешедшу времени, и весненным солнце озаряемым днем начинающимся, келию же малу себе соградиша между двема езерома, ею же едино Тагоозеро именуется. На таковом пустом вселившеся месте, гору точию сожительницу и ручей соседа себе избраша: да к горе убо часто взирают и давыдское всегда имеют слово: надеющиися на Господа, яко гора Сион не подвижится во веки. К ручью же ожажди воду почерпати прихождаху, и другое того же пророка  приснопоминающе слово: им же образом желает елень на источники водныя, сице желают души наши к Тебе Боже. Прихождаху же часто ко отцу Даниилу Викуличу, на Рязани тому тогда обитающу, с прочими пустыннолюбными отцы, о них же напреди подробну скажем. И с ним овогда убо пения и молитвы Богу приношаху, овогда же Божественная прочитающе словеса, и о душевней присно беседующе пользе, к пустынному злостраданию обостряхуся, и паки к своему возвращающеся жилищу. День от дне ревностию Божественною разжизающеся, и крепяще же друг друга утешением подражати жития святых, паче же пророка Илии, и в последняя лета восиявших Александра Свирскаго, и Александра Ошевенскаго, и прочих именованных зде, яже многаго ради нестяжания получиста царьство небесное, бывша земленая ангела, небрегуще трапез имущих различная снеди, ни многих риз, но точию яже довлеет телеси на потребу. Подаяху и нищим от своих трудов, чающе воздаяния в того место от богатно дающаго Бога. Их же око не виде, яко же глаголет Павел: и ухо не слыша, и на сердце человеку не взыде, яже уготова Бог любящим Его.

 

О отце Данииле,

како прииде в Выговскую пустыню от моря,

и о зачале малаго общежительства, преходя с места на место,

для гонения и искания от гонителей,

малыми людьми крыяся по пустыни самым нужным житием,

и в каких местех, о сем ниже сего объявляется.

И о проречении дивнаго страдальца Пимина отцу Даниилу,

како прорече кормником и правителем быти християнскому

последнему народу в Выговской пустыни, еже и бысть.

 

А оставшии еже отцев Игнатия и Германа, и Емельяна, Исакий Евфимов и Харитон Шунской Мартынов с прочими. И оной Харитон посла к морю попомянутаго Даниила, сродника его Исакия Евфимова, и шед Исакий к морю зимою, и тако несколько пожиша, и привезе Даниила в Повенец. Тогда к нему приидоша на Повенец вышеписанный Харитон; да с ним Трифон Пиминов; да Прохор, а после постригся Павел отец; да Никифор Астраханец, а после инок Никола; да Лука Филатов, да Иван Димитриев, старицы Нимфодоры сын. И собрашеся, и шедше в Выговскую пустыню, крыяхуся от гонителей на Сароозере, в поставленной келии вышеписаннаго соловецкаго отца Игнатия, на островку. И начаша ту жити пустынным нужным житием, не смеюще никакоже исходити гонения ради. И приидоша к ним в есень с Повенца Иван Белутов, да Петр Прокопиев, еще млад сый, да Ияков Повенецкой, и начаша к ним проситися жити, они же не смеяху их к себе взяти гонения ради, и для сыску оных с Повенца. А Петра Прокопиева взяша к себе, лета от мироздания 7200 году, октября, в первых числех. А оных, Ивана и Иякова, отпустиша ходити скитатися по пустыни. Они же шедше скитахуся по Суземку, и несколько у отца Корнилия и у Сергия поживше, идеже ныне Сергиевской скит, и близ его отец вышеписанный Корнилий живяше. И в то же время старец Питирим вышед ис пустыни, в волости зимою для потреб своих нужных, и в Космозерском селе поп с прочими онаго старца Питирима поймавше и связавша, и свезоша в село, в Великую губу, и тамо оковаше и послаша скована, за крепким караулом, в Олонец с проводники, и написаша отписку, а в отписке писаша, что из Выговской пустыни соловецкие старцы, для учения народа ходят по волостям и из оных старцов одного именем Питирима поймали, и послали за караулом в Олонец.  И весть дойде до Даниила Викулова с прочими. Ибо в то время прилучися он в Шуньском погосте, крыяся втай у христолюбцев, и услышавше же скоро собра из своих смелых и скорых ногами пять человек, и пославше вслед за старцем на конях, для свобождения старца. Они же посланнии, скоро гнавше вслед и приехавше в Шуйской погост, в село рекомое Виданскую волость, и своих лошадей в том месте кормити оставиша своему человеку, и от ту живущих наяша лошадей, и гнаша легко вслед и постигоша близ села Пряжи на Волоку. И старца онаго от проводников отъюша и к себе в сани положиша, и проводников оставиша на пути, и сами со старцем приехавше в село Виданскую волость, и своих лошадей взяша и поехаша наскоро в Заонежье, к Шуньги. А онии проводницы пришедше в Шуйской погост и взяша с собою людей у старосты и гнаша за ними многолюдством чрез Кижской погост по пути, а далее гнатися не смеяше, и оных не засташа. И шедше во Олонец подаша доезд, и отписку посланную со старцем от попов, и скаскою показаша како на Пряжинском волоку староверцы наехаша созади многолюдством, и онаго старца отъюша у проводников, и их связанных к древу оставиша. И с Олонца власти послаша для искания посыльщиков с солдаты и множеством людей, котории и по пути много зла сотвориша, и у которых стояли, на постоях посланнии старца ради, и лошадей нанимали, и оных в Олонец отослаша скованных. И тамо во Олонце многия беды подъюша. И посланнии из Олонца приехавше в Шунской и Толвойской погосты, старцы искаху и много пакости жителем сотвориша.

И бысть в то время всем староверцем страх велий. И в то же время Даниил Викулич с Устрецкаго заводу сестру свою с мужем Леонтием Боталовым и з детьми вывезе с заводу. И бысть из заводу вслед их погоня и сыск. И они Даниил с сестрою и з зятем несмеявше в Суземок ехати, ни в волостях жити, для погони, и заехавше в онежскую Кумсогубу и тамо по островам в пустых келиях ловецких, и на лесу у нудей огненных весь пост скитахуся.

А в Суземки бысть страх всем боящимся гонителей, и всякому жителю пустынному бежащу от своея келии. А еже от помянутаго Даниила близ Сарозера был в келии оставлен Харитон вышепомянутый. И он от того страха ужасеся, келию свою сам сожег, того ради дабы слух прошел, яко бы людия гонимии сгореша. А сам Харитон на лыжах отшед прочь скиташеся, и келии сгоревшей со всеми запасы, великому тогда настоящу посту, и оной Харитон, шед ко отцу Даниилу, и сказа ему яже о себе и о келии, и начаша оба тужити от скорби, таже возложиша печаль свою на Господа.

По сих и весне наставша и Даниил шед в пустыню Выговскую в чащах лесных у огненных нудей, на реце Оле. И тамо поживше, и нужди гонящей их прейдоша на Рязань в Емельянова строения келии, и ту жити начаша. В та же убо времена пришедый из Великаго Нова града, пречестный диакон, и благоговейный инок отец воистину святый Пимин, бегом отлучився Никона новоградскаго митрополита, и во святую Соловецкую обитель пришед, пребысть ту некое время у преподобных отец Зосимы и Саватия и Германа соловецких чюдотворцев. Потом изшед из монастыря, живяше при мори в пустыни великим постническим жестоким житием, с Григорием учеником своим. Имяше же отец Пимин и прозорливый дар Святаго Духа. Бывшу у него некогда в корельских пустынях, из помория Даниилу Викулову, и беседовавшу с ним доволно о пользе душевней, а егда Даниил начат в путь свой отходити, тогда отец Пимин изыде проводити его, и понеже путь бе река, в лодку собрашеся, и Даниил убо седе к веслам, хотя грести, ученику же отца Пимина остася место на корме, Пимин же седе посреде лодке, пророчества духом глаголаше Даниилу: ты Данииле сяди на корму, зане ты будеши кормник и правитель добрый, християнскому последнему народу в Выговской пустыни. О словесе предивнаго: дивную пророчества являющаго благодать. Откуду отец знати можаше будущая; аще не от Святаго Духа живущаго в нем, и являющаго ему безвестная и тайная премудрости своея: тако бе сбысться последи, яко же тогда отец прорече, о чем на преди явлено будет.

 

О звании Даниилове премудраго Андрея во общее житие,

и благословении святых отец в население святыя Выговския обители,

и о уставленных в ней святоотеческих чиноположениих.

 

Прежде убо всех, на сие судбами Божиими избранное место, идеже ныне богоспасаемое Выгорецкое общежительство стоит, в лето 7199-е [1691], пресельник бывает из Зосимина отечества от села великаго зовомаго Толвуй новый, некто Герман не соловецкаго отока, но места к населению Выгорецкия обители взыскатель великий о древлеотеческом благочестии ревнитель, и опасный постническаго пустыннаго жития хранитель, именем Захария, зовомый Дровнин, муж тако в духовных подвизех прилежный, яко и в естественном мужестве крепкий. Сей со отцем своим Стефаном, последи преименованном Саватием, и с сестрами своими девицами сущими, презревшими плотьский брак, и мира сего красоту, прелесть, и дом всяким изобилием кипящий, крыяхуся от новолюбительных гонителей, и пришедше поселишася на сие богоизбранное место, идеже к упокоению своему, и келии поставиша.

О первом же киновиарсе святыя тоя Выговския обители преподобном отце Данииле, муже желания, и кротости истовом правиле. Како он ревнуя по древлеотеческом благочестии, по многим странам бегая от гонителей и скитаяся по пустыням, каковы подвиги и желание о общем спасении душ человеческих показа, и каков сострадалец Иеремию Кемскому бысть и собеседник преподобным отцем показася, Досифею игумену Куржетския пустыни, и Игнатию Соловецкому, и Обонежскому просветителю и предревнейшему авве Корнилию Выговскому.

К сему блаженному отцу мнози от благочестивых прицепившеся, моляху его с ними пребывати и предводительством его спасенным быти еже и сотвори боголюбивая она душа, памятуя проречение и повеление святаго старца соловецкаго Гурия. И нача в сей пустыни общее житие, не токмо по благословению отец соловецких, но и благословением помяновеннаго игумена Досифея. Бяше бо отец, иже повеле ему женеск особь в пустыни от братии зданием жилищ отделити, и велиим опасством целомудренное наблюдати житие. Иже и велиим опасством по священным писанием общежителныя же и целомудренныя уставы соблюдаше. Сему отцу ученик и сообещник бывает кроткий, аще ин кто таков Даниил благословением священнаго отца игумена Досифея, бяше бо ему сын духовный и стаинник благочестия.

Молящу же Даниилу священнаго сего игумена да благословит и научит у какова искусна отца в наказании быти.

Священная же она глава аки, Богом воздвизаем, иди рече, и в ваших поморских, пребывающа соловецкаго старца Игнатия послушай, сей бо мощен тя наставити на путь спасения, и научити правилу общаго жития, еже и сотвори Даниил.

Бысть ему сын и сообещник общежительства его всей Выговской пустыни, и несколько время терпяше с ним и с братиею многи скорби пустынныя и гонительная волнения. Сей отец прилежно наказоваше Даниила общему житию, и како хранити целомудрие и чистоту велиим тщанием.

Чесо ради и совеща ему особная жилища мужескому полу сотворити, и особная женьскому аще и во единой келии за нужду жити будут: но преграды да будут посреде еже и бысть. По сих же отцу Игнатию, многи души во благочестии и добродетелех научившу и направившу. Даниилу же потребы ради некия в поморския страны отшедшу. Егда убо блаженный отец Игнатий последнее общежительное обитание, близ езера Онега на речке зовомой Возрица согради. тогда наипаче суровейшее гонение от новолюбителных на стадо его просыпася. И убо преподобный отец стесняем гонителными страхами, возжигает же ко Господу Богу усердием, к своему же собранному стаду отеческою любовию. изволи сам яко же Исус мой, по братии своей душу свою положити.

И того ради собрався в Палеостровский монастырь, иже отстоит от реченнаго села Толвухи за четыре поприща, во храм пресвятыя Богородицы честнаго Ея рожества. И тут при наезде началных, и ратных и понятых людей тысящи и пяти сот: со двема тысящама седмию стали за древнецерковное православие. во уповании на милость Божию ревностно с прочими отцы. огнем скончася. в лето 7195-е (1687).

Его же скончавшимися ревнительми, некто добродетелный муж села великаго Шунги, веси Паиницкой, на небо идуща со крестом виде.

Оставшийся же того ревности и любви наследник. вышеименованный Даниил, исполняя дарованное ему от отцев Досифея и Игнатия, и собрании общежительства повелителное благословение. Бяше же тогда в пустыни сей живя священный отец. предревний великаго жития подвижник, Авва Корнилий староскитский Ниловы пустыни. древле бяше и любим добродетелнаго ради жития святейшему патриарху Филарету, и несколько время у него жил бяше. Той аки ангел некий в вышеестественных подвизех. просвещаше пустынная сия недра. и всем общежителем отец духовный, и сладостный наказатель, Даниилу и Петру, такоже Андрею и Симеону. оставльшим уже мир и всельшимся в пустыню.

Бяху же и ини отцы, древлесоловецкий отец Генадий Качалов по роду именуемый. Иосиф нарицаемый Соловецкий же. Сергий началник Сергиева скита. Кирил дивный постник, иже прежде на Суне реце с Епифанием соловецким отцем и последи бывшем страдальцем постнически подвизася, и гонения ради оттуду семо преселися. и зде жестоким житием Богу угоди, преставися благочестне с миром, иже и погребен бысть идеже живяше. Того ради и пристань Кирилова именуется. зане покров его душевный ту под часовнею почивает. И Виталий корнилиев спостник, из московских боляр, бывый мних и пустынный житель, иже толико премудраго Андрея любляше: яко и при преставлении мантию на благословение остави. и Питирим мниходиакон, и добрый подвижник. Серапион Московский. и Варлаам Быков Каргополец. И инии отцы и пустынножители, с малою дружиною живяще, молитвами своими дебри сия освящающе. Даниил же в малом общежительстве живя, древнесоловецких отец благословение, аки искру во угле, или аки благовонное миро во алавастре нося и соблюдая. Усердствуя же он и в обжежительстве, возусердствоваша же и прочая братия возревноваша же и отцы, благословляюще и повелевающе о нем пещися. разсуждающе бо тое тогда, да обдержанием общежительства в пустыни сей благочинное житие утверждается, всякое же безчиние изничтожается, и да не попустится своевольным злым людем место пустынное жительство быти, яко же и бысть. Ибо тогда воровских людей терние в лесах сих вкоренитися наченьшееся благодатию Христовою обдержанием общежительства сего изничтожися, и тщанием присновоспоминаемаго нами премудраго Андрея. Мирно и благопокорно, и ведомо житие се тако царьскому величеству, яко властем градодержателным общежительством сим исходатайствовася. Яве бо по Христовым и апостольским преданием, повелевающим Бога боятися и царя почитати: и Божия Богови, и кесарю кесарева отдаяти. Сия вся Богу помогающу, благое от Божиих писаний, и благопокорное разсуждение, и общежительство сие источает.

И тако сие общежительство яко же рехом от Соловецкия обители проистекшее есть. Ибо малая сия речка общежительство сие глаголю, истече от источника великаго, Соловецкия глаголю преподобных отец и мирьских молитвенников Зосимы и Саватия обители, яко благословением, тако чином и уставом вкорененное, и священноигумена Досифея благословением насажденное к сим же и староскитскаго отца Корнилия, и прочих отец пустынных молитвами и благословением утверженное.

И тако кроткий Даниил, муж желаний духовных аки от Божиих устен прием благословение. шед в пустыню Выговскую, со своими последователи, исполняя дарованное ему от отцев, о собрании общежительства повелительное благословение. собра несколько братии и водрузи себе хижу с преградою в пустыни, в лето 7199-е (1691). близ Боровскаго скитонаселения, в разстоянии от того за пять поприщ. при езерке малом иже последи Старозаводское прозвася.

Поселивжеся ту преславный Божий угодник дивный отец, целостию умною толико сияющь, елико не токмо себе, но и сущим с ним и по нем бывшим явитися ему благосочетанному и всекрасному священия образу. И тако добродетелей светлостию блистати, яко не во дне яснаго благочестия светити токмо. но и в нощи от новолюбителей на сионских чад просеянна злочестия пребывающься озаряти, и сильнейше магнита железо к себе привлачающа оныя к Богу привлачити.

Таже призывает к себе с великим прошением присновоспоминаемаго нами премудраго Андрея моленьми отеческими благословеньми. и советов принужденьми, принудиша. не жития точию но и попечения и тяготы его вкусити. яко возопити о сем псаломнику. Бог вселяет единомысленныя в дом той же яко рачитель сый чистоты, тако и братолюбия.

Оставляет молчалную свою хижу: яже бяше при потоце отдающем устие свое в езеро именуемое Сароезеро. В нем же тогда живяше с возлюбленным его ревнителем Иоанном Белутовым. Тогда убо тако Богу извольшу, и сердце Андреево к воли Даниилове преклоншу. И абие во единотрапезное, и единокелейное, и единоименное сходятся житие. Тем же и с пророком неложными усты по вся дни глаголаху: се что добро, и коль красно, но еже жити братии вкупе.

Их же бе сердце и душа едина, и ревность о святей вере едина, и желание к Богу едино, и все стяжание едино. и ни един же что от имения своего глаголаше свое быти, но бяху им вся обща. И абие бывает спожитель усердный отцу Даниилу, а братии настоятель дивный. Их же число обоего пола даже до 40  умножися.

И тако премудрый пастырь прослави себе первее любовию к Богу егда от юности своея отвержеся мира, богатьства и славы, и всех яже мир обеща, и постническим пустынным житием служити Богу предложи себе глаголя: Тебе рече сердце мое Господа взыщу, взыска Тебе лице мое, лица Твоего Господи взыщу.

Ведяще бо добре, яко пустынное житие есть подвижно. мирьское же житие суетрудно. Еще же влагает ему Бог, в сердце помысл благ, и достоин того разума и мудрости еже паки в дом отца своего возвратитися, и сестру свою по плоти девицу Соломонию, из бури и треволнения мирьского, во спасителное пристанище богоугоднаго своего жития, и безмолвнаго пребывания привести: псаломски взывая, повем имя Твое братии моей посреде церкве воспою Тя. Также постизает дом своего по плоти отца, и того убо еще обрет не внутрь дома, но во иных преходяща жилищах. украдает из дому отца своего. вещь честну же и тяжкоценну, целомудренную сестру свою Соломонию, уже ей тогда бывши двадесяти лет. Той самой мню изволившей         во след Бога, нежели во след своего ей шествовати брата. Поемлет же с собою от Повенца Анексея своего Петра, и сестру его Февронию.

Посем отец прииде и дому быв, а дщере не виде, и случшееся позна на сына гнев разжизает, и прещения яко стрелы пущает. Богу же того укращающу сердце, вмале потом гнев угасе, и прещения острота притупися. Премудрый же Андрей на дело укрепляшеся, и во след Христа итти готовляшеся, и не точию сам един в подвиг злострадания течаше, но и любезную сестру за собою с предреченными ведяше. Желаше же убо и отца привлещи, и братию свою Симеона и Иоанна, во единоименное пустынное пребывание, о чем непрестанно Бога моляше, яко да исполнит Господь желание сердца его, еже бысть по реченному псалмопевцем: волю боящихся Его сотворит, и молитву их услышит. Премудрый же Андрей во всем Богу угождая на прочая подвизашеся, в покорении же и послушании преуспевая, бысть образ кротости, и воздержанию учитель, брася с миром, телом и диаволом, с миром чрез отвержение, с телом чрез умерщвление, с диаволом же чрез пощение и молитвы. Убо не ино что к сицевым привлече подвигом, слава вечная Христос: да Богови жив будет. Показася всяко подражатель быти израильского законодавца, ибо якоже той с законом ко Израилю пришед, солнечныя на себе показа и учи: и того ради возложи на лице свое покров. Сице и сей премудрый наш пастырь, российский законодавец. по истинне просветися добрыми делы яко светозарное солнце, яко же и нарицает древлеправославно, кафолическая церковь. тем же и вселися в Выговскую пустыню, аки такожде возлагая на лице свое покров. и обаче якоже облак, покрывающь солнечное лице, не может утаити его лучи, да не творит дне: сице. ниже Выговская пустыня, между дебрями, холмами и горами, и никем проходными до облак досяжущими лесами, утаи пренесеннаго премудрым отцем нашим Андреем, закона, о нем же той аки о луче своей с пророком к Господу глаголаше; светилник ногама моима закон Твой, и свет стезям моим. Просвети бо яко солнце, премудрый сей законодавец Выговскую пустыню, законов лепотою, и уставов общежительных дивною красотою. не зыблемаго благочиния добротою устамени. аки светом и во тме светящим: и сотвори ей благоприятный спасения день. в нем же благообразно начаша ходити выгопустыннии чада, приемлющии благочинный постнический образ, апостольски глаголюще: Се ныне время благоприятно, се ныне день спасения.  В велицей же скудости пребываху, труждающеся в поте лица своего по писанному снедаху хлеб свой. аще и в скудости но богатыми молитвами и целомудрием изобильни бяху. И тако живуще, препроводиша на том месте с три лета, и мало более. Во святую же пятьдесятницу на утрии день Вознесения Христова в пяток, изыдоша вси на земледелныя труды, древия в груды собирати. Неведомо каким неусмотрением остася огнь во храмине и по горе келия и сени. и припасы и одежды бывшия в том обитании, вся убо тая полиза огнь всеядец. Вся же сия быша промыслом всех Бога, да на избранное того судбами место приведет избранныя своя люди.

Влекомии же волею Божиею на то место, блаженнии отцы, доблии Даниил, и премудрый Андрей. к поселившемуся прежде их на Выгу реце Захарии пришедше. поведаша ему вся бывшая. Готовый же общежительства любитель, просит и зовет тоя с радостию приити им в его селение, со всею их братиею. За которое его радостное приятие, налияннии братолюбною любовию отцы, доволно его возблагодариша. И яко премудрии винограда Христова строителие, не на своем разсуждении основание жительства положити дерзающии: но шедше к преподобному отцу Корнилию, живущему уже тогда на Выгу реце. поведаша ему вся содеявшаяся над ними, и о желаемом ими поселении еже у Захарии сказаша.

Той же радостною душею и богопросвещенною мыслию благослови их, и повеле им строити общее житие, поселитися у Выга где ныне монастырь стоит, и с Захарием сложитися в место и пещися о них добре, и правити чин и устав держати по святых отец правилам, по образу древних монастырей. и о хотящих им быти радостных и скорбных приключениях, вся пророчески им предрече, яже по времени збышася.

Отпуская же святый старец глагола к Даниилу: ты да будеши собранному тобою стаду, щедрый отец и настоятель, Андрею же рече: ты же буди им судия и учитель. И тако благословив их отпусти с миром.

Тии же приснопамятнии отцы, Даниил и Андрей приемше от отца благословение, приидоша к Захарии и к прочим, и возвестиша вся яже глагола им отец Корнилий. Они же слышавше сия возрадовашася вси, и прославиша Бога.

Абие же прииде к ним, отец Корнилий, и беседовав доволно со отцы и братиею от божественнаго писания, и о изменении в России православныя християнския веры, и како пременися; и от кого имянно; и о прочих церковных догматех.

Посем по повелителному благословению отца Корнилия, воставше отцы и братия и с ним помолившеся Богу, положиша начало, и сложишася во общее житие с Захарием, в лето от мироздания 7203 году (1695), в есень после Покрова Богородицы.

И тако начаша отцы с братиею здати обитель,  и поставиша келии, и сооружиша молитвенный храм, во имя Богоявления Господа нашего Исуса Христа, и по образу монастырскому оградиша оградою, и от стены до стены между мужескими и женскими келиями преграду учиниша, да будет незазорно соблюдаемо и целомудренное девственное житие. И в мужескую убо ограду никогдаже не вхождаше девы и старицы, в женскую же едини настоятели и благоговейнии старии мужи, для потребных благословных вин вхождаху, и то со всяким благоговением и кротостию.

В молитвенном же храме, от предния часовни имеющаяся трапеза, преграждена бяше стеною крепкою, и от десныя страны мужеск, а от левыя женск пол приходяще молитву совершаху. по чину и уставу общаго жития. Вся убо им бяху обща, тако пища и житие, яко одежды и обуща, и вся телесныя потребы не имяше бо никто особь ничесоже, ни нарицаше сие мое, а сие иного. И яко братия и сестры живяху в непрерываемом любве союзе.

К прочим же обычаем общежительным, положиша отцы вси обще крепкую под тяжким запрещением заповедь: да никто же дерзнет тайно, и особь ясти, не точию получаемое общими трудами, но и приносимое кому сродниками откуду, всячески особь ясти запретиша, и вся тая на общу трапезу приносити заповедаша.

Елицы же сего завещания не сохраниша, в великое искушение, и мучительство бесовское впадоша.

И бысть в то время глад и хлебный недород, и частыя зябели. и годы зеленыя, хлеб не соспеваша, и бысть у них велия хлебная скудость и глад, и поставиша на Выгу мелницу от монастыря за шесть поприщ, в верху реки мелею и толчею. и начаша солому ржаную сещи, и толочь на муку и начаша хлебы соломенныя ясти точию раствор ржаной а замес весь соломяной муки, хлебы в кучи не держалися, помялом ис пещи пахали, властяжныя бураки и коробки, и начаша такой хлеб ясти, и такова скудость бысть тогда, что днем обедают, а ужинать и не ведают что, многажды и без ужина жили. И бысть велия скудость и нужда. егда вси солому толкуще равны со скоты ядяху, егда в толико велицей печали вси являхуся. елико что, творити, что ли содеяти недоумовахуся. Тогда отец наш, по своему званию имени, тако мужествует, тако великодушствует, яко все стадо, вся христособранныя люди воздвизает на ревность. возставляет на мужество терпения, поостряет с псалмопевцем Давидом на ожидание посещения Божия, увещевая глаголет. яко насаждеи ухо не слышит ли; или создавый око не смотряет ли; и паки с Давидом же утешая глаголаше. яко не отринет Господь людей своих, и достояния своего не оставит.

И посем послаша отцы премудраго Андрея, и с ним своих людей, для промыслу хлебнаго в Нижнее по Волге, понеже в то время тамо вельми хлеб дешев был, четверть с две гривны. И тамо промышляше хлеб чрез добрых людей. Ово покупаше, а ово у добрых людей в милостыню прошаше. И водою привезоша в Бадоги, из Бадок перевезоша на Вытегру, и с Вытегры в Пигматку летом на судне, а ис Пигматки начаша оной хлеб в крошнях на себе в монастырь носити. и носящи рожь пареную носаки и ядяху.

И бысть в то время в монастыре великая скудость, и нужда хлебная, и всяких потреб. А братьство убо умножашеся уже числом до полуторых сот, и болши было мужеска полу и женьска, и малых робят со отцами и с матерьми из миру приведенных, и начаша матери бесовским научением детей своих тайно кормити без благословения, и хлеб красти. И того ради бысть на них попущение Божие, приим диавол область, нача тех мучити. Но егда убо в дом свой прииде премудрый отец Андрей, преславным подвигом, и крепким мужеством всехрабрственную на бесы показа храбрость, и дивную победу в случай бесовскаго всеяростнаго движения сотвори. Ими же толико множество от братьства мучено бываше елико страх вся и трепет одержаше, им же предобрый подвижник толь всехрабро подвижеся. толь премужественно сопротив ста, яко о молитвами общими, вкупе с блаженныя памяти прекротким Даниилом, и еклисиархом Петром, вкупе со всем братством ополчися. И сим одоле благодатию щедрот Божиих, заступлением пресвятыя Владычицы: яже и гласом от своего образа, своего подвижника утверждая дерзати устрояше и тако одоле. яко и волка от стада всехрабро отгна, и стадо в тишине благодатнаго покоя пребывати паки утверди.

Слышите возлюбленнии каков бяше отец наш премудрый Андрей, и именем и вещию прямаго мужества преисполненная душа, еще и в самом юностном цвете, мужеумный смысл показа. и когда уже наполнися, и наполняшеся пустыня жительми, богоревнители аки водами покрыся некими: и толикия великия тягости и неудобоносная попечения, вся опрошася храмине Андреева великосилия. той же яко многомощный атлант вся со удобством подъемляше. Егда позываху случаи искушенней веледушно поступати ему: тако ступая творяше, аки от давна тое деяше. гладныя нужды, аки лютая стрелы, бедство творяху ему, иже толь благодарственно оное глада искушение, толь всерадостно понесе, яко худую оныя сламы пищу, аки пресладкия пшеницы брашно всерадостно ядяху, и не время краткое сею или единолетное питахуся: но больше десятолетнаго обхождения, всежелательно благопретерпеваху. великодушным и предобрым пастырем, веледушно подтверждаеми. и чесом послежде пространнее сказано будет. и тако день от дне умножахуся братия и сестры богоизбранное стадо, и живяху по отеческому завещанию без преступления.

Яко исполнитися и о нем пророческому речению: дах его в завет вечный странам еже устроити землю, и наследовати наследие пустыня. бысть зерцалом же непорочным божественнаго делания. ибо якоже смотрящии в зерцало украшают лица, и все одеяние. такожде и прочия отцы и братия, взирающее на житие первоначальника своего предивнаго Андрея украшаху житие и нравы своя. той бо их изперва обучаше боятися Бога, и воздержатися от всякаго греха. бысть и образом, зане к чесому оных обучаше сие первее самем собою изобразити тщашеся, и всем сам себе подавая образ добрых дел.

Посем услыша Бог моление угодника своего премудраго Андрея, вложи мысль благу в сердце Дионисиево, абие благоревностно потщася приити, во пристанище спасительное пустыннаго пребывания, с Повенца з детьми своими Симеоном и Иоанном, лета от мироздания 7205 году [1697]. и начаша с ними житии, с великою ревностию и усердием, богоугодно жестоким житием. всем благий совет подавающе ко спасению. и аще, кого видяще Дионисий на пении своих или приходящих лениво и небрежливо стоящих. или не по подобию крестное знамение на себе воображающих всем без боязни глаголаше и поучаше и воспрещаше. и поживе девять лет во общем житии добре и богоугодно, и преставися с покаянием в вечный покой, в лето 7213 году [1705], месяца июня, а при животе его как сын его Андрей походил к морю мест искати, где житие зачати и оной Дионисий запрещаше сыну мест искати, и глагола им простою речию: живите тут где отцы благословили и кончалися. хотя и много ходишь да ищешь, да тут сорока кашу варила, таковское сие место, по времени, и бысть тако по его проречению. и начаша к ним людие наипаче приходити с разных мест и градов. а оные же отцы Даниил и Андрей, принимающее их с любовию, и учаще и наказующе. и начаша чины и уставы церковныя и монастырския хранити, молодых детей обоего полу учаху грамоте. и древнейшии отцы Корнилий и Виталий, благословением и присещением многажды общежительствующим присутствоваху. прииде же к ним Соловецкия обители, общежительный старец, священноинок Пафнотий, муж вельми духовен, много лет живый в Соловецкой обители, и весь чин церковный и монастырский добре ведый. они же его с великою любовию прияша к себе. И той же отец всерадостно благословляше устав общежительства и церковныя службы и возвещая вся благочестивыя уставы же и обычаи Соловецкаго монастыря, и сладостно прилагашеся сего общежительства уставу.

К сим же и древний старый священник Феодосий, страдавый многолетно за благоверие. той прилучився быти в общежительстве сем, усердно похваляя и благословляя чины вся, и Бога благодарствуя о уставе общежительства сего и сам желаше сообщежитель и служитель быти, и начаша церковную службу уставляти по чину и уставу. и поставиша Петра Прокопиева в чин еклисиаршеский, и к нему пособников певцов и псаломщиков; и конархистов избраша.

В тоже время еще вельми скудно живущее, нужным и скудным житием, с лучиною в часовне службу отправляющее, и икон и книг в часовни скудно и мало вельми. а колоколов тогда не было в доску звониша. и потом приидоста с Москвы два мужа ведущая писания. един именем Прокопий Макариев, другий Василий, иже последи во иноческом чину Варлаам наречеся. и из других мест иныя многия, и с того времяни. начаша по праздникам всенощныя пети, по чину церковному. такожде и по воскресным днем. и после заутрени книгу читати до молебна и часов, и после у́денья такожде книгу читающее, часа с полтора, и в вечеру после вечерни и ужины такожде книгу читающее. и по вся дни службу церковную отправляющее на то учиненныя, а в простыя дни труждающияся братия отстояв полунощницу. и на заутрени после ексапсалмов взяв прощение, отхождаху в столовую часов пети. и после часов полагаху поклоны брацкия данные лестовки, и по обычных дву началах отхождаху по своим келиям, со всяким благоговением кождо на свои труды.

И уставиша все по чину монастырскому, во вся службы монастырския, келарей и подкеларников. и нарядников старост и надсмотрщиков, во вся брацкия службы. а в хлебни хлебы печаху, и в поварнях шти варяху и квасы делаху сестры труждающеся с великим усердием и тщанием. а от них хлеб и шти и кашу, и всякую пищу, келарь с подкеларником взимаше. и в келарьскую приношаше. и поставляше братии и кормляше. и во время обедов и ужинов на обоих сторонах у братии и у сестр четцы жертвенники читаху. а братия, или сестры обедающии со всяким молчанием седяще и чтению внимающее, и никто с кем в то время не глаголаше ни о чем. Бысть в то время велие молчание и после обеда расходящееся вси в свои келии, кождо на свои труды.

И потом начаша к ним приходити и умножатися и пашни пахати по крежам, и по лесам суки сещи и палы прятати, и хлебы не одны по кряжам имающе и кормящееся, с великою скудостию и нуждею, пашнею своею. и начаша скот держати, и дворы скотския поставиша. а посреде монастыря стену поставиша. и около всего монастыря ограду построиша. мужеский пол живяше на своей стране, а женский на своей. а между ими стена. а в стене построиша келеицу малую, то есть привратню. и окно малое на братскую сторону, для прихода братии к своим сродницам для свидания. и иных ради братских нужд, и к тому делу во оную келейцу избраша из сестр человека добраго духовнаго старицу сему другу; чтоб всегда приходящих з благословения ко окну оному для свидания сродниц, и прочих братских нужд, при себе пущати. что глаголати, или спросити. а в их сестр келии, на оных сторону, никто не хождаше, кроме духовнаго их отца, и настоятелей и келаря, а в труды с ними посылаху на работу, особь старших добрых духовных людей, а братия особь труждахуся. Тако же и над женьским полом поставиша начальниц, и надсмотрителниц добрых духовных людей, между ими надсматривати.

Сице убо сие общежительство от пустынных и освященных отец первозачатием проистече. толиких же и таковых священных мужей благословением, строительствовано бяше. беже тогда стадо Христово, в сих Поморьских пустынях, аки в нощи бурней и темней, в гонительных волнениих, и от безчинных людей во обуреваниих по пустым местом. страдальчески без чина и паствы скитающыя, и рещи по Григорию Богослову, яко смокву в пустыни обретохом  израиля, и яко зерно едино или второе в безгодне грозде благословением Господним убо соблюдено, и начаток освящен, обаче мало и скудно и не наполняя уста ядущему, и яко стяг на холме, и яко древо ядреное на горе, или аще ино от единаких же и не множайших видом.

Егда же благодатию Божиею, и благословением отец, совокупишася четверостолпное выгопустынное утвержение, в сие общежительство богоизбраннии мужие, Даниил златое правило Христовы кротости. Петр устава церковнаго бодрое око. Андрей мудрости многоценное сокровище, и Симеон сладковещательная богословия уста. предивнии мужие, светилницы истиннаго благочестия, и честная добродетели хранилища, на западе лет возсиявшия благодатныя звезды, мужи богати добродетельми, и нищи духом, велицыи во смирении, и смирении в славе, земнии ангели, и небеснии человецы друзи Божии честнии. Якоже рече Давыд. мне же зело честнии быша друзи Твои Боже [псалом 138]. Тогда в таковых пустых и хлебонеродных местех, в толиких бурях и волнах неисчисленных, в толиких ратех и напастех, непрестанных. о коликих трудов и потов в строительстве сего общежительства потреба бяше:  о коликих подвигов бедовметных, и попечении многопечалных потребова киновия сия богопрославленная: телесное житие состроити, и душевное спасение устроити, вне плодных прекормление примыслити, и душевную трапезу [да не гладом помрут] всегда уготовити. Нивы летораслыя с трудами пахати, и терновидныя травы со многими поты истерзати, одеждами в нищих местех одеяти, и общежительными святых отец обычаи не навыкших людей украсити, горы своеволная поравняти, чащи миролюбных обычаев искореняти. сено со огнем разделити, воды страстныя застановити. возгорения похотная и яростная загасити. Волны многочисленныя утишити. противу ратей премножайших ополчатися. колики же и каковы противности и злодыхателныя рати, на церковь же и братьство сие быша и суть от диавольскаго злорыкания, от бесовския зависти, от гонителей рютия, от раздорников лукавствия, от июдоподражателных злодыхательства, от безчинных свирепства, от своевольных шатания, от злообычных роптания, от гладных случаев. от нужды потребных, от вне и от внутрь от невежества и предприятия. Мнится сие, от самыя преисподния геены волны сия на корабль благоверия гремеша и гремят и от самых челюстей чермнаго змия бурливыя воды сия, на церковное благочестие возклокташа. О коликую ужастию прешедшия рати тыя помыслити: о с коликим, жалостным плачем, о оных пророчески возопити: яко аще не бы Господь в нас [помогая нам] внегда востати человеческому и бесом на ны убо живы пожерли быша нас, внегда прогневатися ярости их на ны убо вода потопила бы нас. Во всех же сих нужных братских строениих, и ратех от диавола наносимых бесчисленных. велии бяху ревнители, и усерднии подвижницы, и тепли молитвенницы, и духовнии ратоборцы, и премудрии советницы и помощницы правительствовати братьство и боголюбивии учители, и украсители церковнии, сии достохвалнии мужие, Даниил, Петр, Андрей, и Симеон. Четверица богосочетанная, и четырем евангелистом равночислении, благочестия учители, и церковных преданий столпи непреклоннии. но пишу сие поминая отец ревность о благочестии, и усердие о всяком благочинии, и о всяком спасителном поучении, и о трудех и подвизех, и о чиноустановлении, для прикладу сия писах, и не сравняя сим великим апостолом и евангелистом, но сие оставляю правосудию Божию. их же многолетныя всебратственныя и всецерковныя подвиги и труды не краткаго некоего времени, и не нашего грубаго ума есть, подробну представити пред ваша боголюбивая очеса, аще и потребно нам сицевая слышати, да воздвизаемся на таковое усердие.

Аще и должно трудами их память нам поновляти, да незабвенно имеющее толикия их всебратьственныя и всецерковныя подвиги, долг любве помяновением душ их любовно отдати возусердствуем, но краткости ради сия вся молчанием минуем.

Обаче не премолкнут нивы и горы, древния труды их возвещати. идеже они братьства ради и сирот. ово в сечении и пожигании древния усердно потрудишася: не помолчат дебри и блата, крошен и кереж, хлебов ношения их в нужная времена, да братьство препитается: не потаят горы и холми в трудех их древних, молитвеннаго славословия, и праздников торжествия, по местам путем и лесом возсылаемым. жалостне возглаголют древлетрудники брацкия и сироты, насладившияся в нуждах и трудах словес духовных, и праздньственных торжествий утешения духовнаго: не потаят и древлемолитвенных храмов и всебратственное строение, идеже не советом токмо и усердием, но и сечением древия и на себе вожением в нуждныя случаи потрудишася, явит трапеза братская нужных сламосмесных хлебов, благодарное их соутешением прочих ядение.

Возглаголют мимошедшая времена, усердное их в таковой нужды и труды к написанию словословию и молитвам тщание, и сохранению благочиния прилежание. воспроповедят в сих местех празники празднователей, торжества торжественников, молитвенныя храмы украсителей, книги читателей, цветники собирателей, и устава и обиходники, недреманных усердных церковных ревнителей. отсловия к противным своих премудрых сочинителей. соборное деяние своих разрушителей, Пращицы и Розыски своих разсмотрителей, иеромонаха Неофита вопросныя пункты, богомудрых и хитрословесных отвещателей. символ троический и Христов в перстосложении своего начала изыскателей, и истины показателей. трисоставный крест Христов, о себе богословских свидетельств всетщательных собирателей и предложителей, и вся древлецерковная предания своих твердых хранителей, хульницы обличителей, ругатели посрамителей.

Возъявят во обою общежительству и скитах, церковныя службы чин тщательных чиноправителей: не потаят церковницы обучителей, псалмопевцы и четцы наставителей, читатели книжнии собеседников, настоятели сподвижников, братия обучителей, сироты утешителей, и общежителства благочиния заступников, благовернии благочестию проповедников, и вси сих стран благовернии в напастех и бедах, теплых на молитвы возбудителей, и неленостных Спасу и пречистей Богородицы и всем святым, всецерковных и келейных молитвенников.

Мы же груби и несмыслении, аще сию краткословную повесть о зачале общежительства сего написахом, и добродетелную жизнь отцев наших воспомянухом, но несмы творцы повести сея, токмо преписатели, или иначе рещи преложители. невозможно бо бе нам и умом помыслити, таковыя и толикия крепости и терпения, и трудов, и злострадания боголюбивых мужей, населивших юогоизбранное место сие. аще бы не получили быхом премудраго словесе, славнаго в премудрости мужа и настоятеля сея честныя обители Андрея, приснопамятнаго вселюбезнаго отца, и всесладчайшаго учителя нашего. еже он сочини в надгробную похвалу, сожителю и клеврету своему духовному Петру еклисиарху. но мы грубии после приидохом за несколько лет, токмо застахом оное их боголюбивое житие, а овое слышахом от прочих с ними жителей от Захариа Стефанова, и от прочих про их терпение и крепость, и мы грубии предлагаем сию повесть, не яко чюжее похищающее злато, яко лежащий у нас праздным талант в сем предсловии краткою речию вашей любви, аки добрым вдающе. торжником, да куплю сотворите и прикуп добрый обрящете пользу душевную.

С вышереченными же отцы и добродетельными мужи. бяху и инии мнози боголюбцы и добрии подвижницы, во общежительстве же и в скитех, вкупе подвизающееся противу мысленных врагов ополчения, вкупе целомудрие и чистоту, аки сады прекрасныя садящее, и бе тогда в пустыни, молитва непрестанная, славословие к Богу немолчное, чтение святых книг всегдашнее, воздержание крепкое целомудрие изрядное, смирение высокое, братолюбие нелицемерное, во всяком ските бе едино вседоброе тщание, еже молитвенныя храмы устроити, и служителей учинити, и книги собрати, и службу церковную тщательно совершати.

Во всякой келии бе чистоты многоценное сокровище. благочиния всекрасное благолепие: всюду надзиратели благочинных обычаев: всюду песнословцы Божия величества, всюду церковнии славии, их же усты славословяшеся всех Творец; всюду добровещателныя ластовицы, всекрасную покаяния весну, и всежеланное пролетие богоугоднаго жития всесладостно возвещающия: всюду обучение к духовным подвигом, желание неувядаемых венцев и неугасимое рачение, ко всесладчайшему Спасителю Христу, прихождаше вечер, и абие вечерняя молитвы яко кадило благовонно Богу приношахуся. наставше нощь и келейное правило, и частная коленопреклонения с воздыханием и умилением, и со источники слезными, аки главное дело у всякаго пустынножителя совершашеся. являшеся утро, и абие полунощныя молитвы, и утреннее славословие с теплою любовию, всех Содетелю возсылашеся. приближашеся время обеда, и бе у коегождо попечение воздати Господеви молитвы своя, яже святая церковь установила есть совершати, в час третий и шестый и девятый, да прежде воздастся славословие, и благодарение Владыце. и потом пищи вкушение предложится. прихождаху воскресныя дни, и бяше везде хваление и песнословие пострадавшему за нас Христу, и умершему и воскресшему, и свет воскресения всем языком показавшему. и по таковом славословии, бываше чтение словес Божиих, и поучение в Законе Вышняго. и всесладчайшия беседы о спасении душевнем и о получении нетленных оных благ, яже уготова Бог любящим Его, прихождаху Владычния праздники, и бе в пустыни, аки на небеси глас празднующих и шум торжествующих бяше, во всякой души светлая радость и красное веселие, о неизреченней благодати Божией, ею же обновится человеческий род, и от тли в нетление преведеся Господом нашим Исус Христом, являхуся летняя торжества пресвятыя Богоматере, и честныя памяти великих угодников Божиих. и паки славословие Божие, паки хвала Богоматере, и память праведных с похвалами, и веселие людем и обновление душам. храмов ли молитвенных летнии прихождаху праздницы, с велим желанием и теплою любовию призываху скитяне, и общежителных настоятелей и неких от клириков во своя скиты к светлому торжеству, и бываше сладкая радость и красное ликование, и ангельския воспевахуся песни, и слово Божие аки многоценная трапеза премудрыми предлагашеся проповедники и питахуся души всебогатно небесною пищею, не гиблющею но пребывающею в живот вечный. И тако пустыня другое небо показовашеся, вместо солнца вещественнаго, разумное солнце Христа имущи, вместо же звезд таковыми добродетельными и благодатными мужи всекрасно сияющи но и жены бяху боголюбивыя, и елико верою просвещахуся светозарно, толико и делы благими украшахуся изрядно, и бе украшение сих не плетения златая, не камений многоценных сияние, ни бисер драгих имство, не ризы шелковыя, но всекрасная добродетель ею же удобряется душа, ею же внутренний украшается человек, и представляется всекрасен, и боголепен небесному Царю Христу, между таковыми же благочинными, обоего пола человеки.

Аще и безчиние каковое случашеся, скоро исчезаше, зане бяху о сем надсмотрители и надсмотрителницы по правилом древних святых отец уставлени, от боголюбивых наших настоятелей, аще и грех каковый противный закону Божию, яко душевный недуг являшеся, скоро от хитрых врачев усмотряшеся, и подобающим врачевством исцеляшеся, зане врачеве тии умеяху составляти целительныя пластыри, и прилагати душевным струпом, и болящии таковыми недуги ведяху повиноватися врачюющим, и приимаху врачевание со благодарением.

Тем же и скоро ко сладкому возвращашеся здравию. аще ли же кии от жесточайших безстудием и противословием противляхуся. настоящим и надзирающим и благочиние строящим. но стоящи имеяху с собою честный собор добродетелных мужей, имеяху власть и силу строити житие свое по преданиям отеческим, имеяху вси едину ревность жити благочинно, по правилом Василия Великаго, и прочих святых отец. тем же аще кто за безчестие и прегрешение свое, и наказанию подлежаше, толикому собору един не можаше противитися, и бяше наказуем подобающими наказаньми, и злыя своея воли исполняти не можаше. понеже не имяше заступников, не обреташе помощников, и един или два, или трие, безчиннии. многим благочинным не можаху противостояти. и тако всякая злоба всякий грех, всякое самочиние и безчиние, аки злое древо от винограда искореняшеся и изметашеся, не точию от общежительства и скитов, но и от всея пустыни.

В таковом благом и богоугодном труде, яко в делании винограда Владычня. предреченным настоятелем пособствоваху в общежительстве благоревностнии мужие. Исакий Евфимиев, Захарий Стефанов, Леонтий Феодосиев, Трифон Петров, Гавриил и Никифор Семеновы, Лука Федорович, Яков Повенецкой, Иван Германов, Марк Феофилов, Михаил Павлов, да иноцы. Пафнутий Кольской, Прокопий Нижегородской, Серапион Русской, Феодосий Устюжский, Иаков Ковачь Кижской, Никола Русской. Антоний, Симеон и Гавриил, сии три старцы, с самых первых лет пришедши. двое с Толвуйскаго села, а третий с Фоймогубы. и Давыд и Иосиф поморьские пустынножители, и прочие рабы Христови, их же житие честно, и успение блаженно, имена их в книгах животных.

И в скитех же духовному сему правлению сильнии бяху помощницы, иноцы, Сергий помяновенный, и Серапион Московский. и Варлаам, и Павел Торомской, и Питирим помяновенный, и бельцы. Петр Ануфриев, Иосиф, и Иван Давыдов тихвинцы, Леонид Шелтопорожской инок, дворянин Евстафей Яковлев, и ладоженик Моисей Иванов Толвуйской, Даниил Иванов, Семен Еремиев олончанин, Захарий Мефодиев, с сыном Титом, Иван Акиндинов, Симан Иовлев, Иван Белоутов, Гавриил Ефремов, с братиями, Михаил Шелехов, Иван Димитриев сумлянин, в ладожском ските инок Феодосий и прочии добрии подвижницы, их же души да упокоит Господь со святыми во царьствии своем.

 

О ревности боголюбиваго отца Андрея Дионисиевича к присной молитве

и о укреплении во оной братии, чрез свойственныя истинныя утвержения:

и от многих прочих чюдесно оное самовидевших засвидетельствованныя.

 

Елико боголюбивейший той отец ни касался премножайшим упражнениям, ово братским попечениям. ово неусыпному священных книг прочитанию, ово же и во внешнем любомудрых учений коснению: еще же и во множайших телесных трудах преимению, яко в грубейших крестьянских, тако и в написательстве многих панегерических и нравоучительных слов. и целых догматических книг. Но никогда же убо преклоняшеся в леность к молитве. аще бы и много предписанными трудами когда бы и отягощен. всегда бо по уставной службе преданной от церкви всякому боголюбивейшему иноку и христианину творити. еще же и на всяк день в келии своей каноны глаголаше: Исусу сладчайшему, акафисту пресвятей Богородицы. и ангелу хранителю. к сему же и нощное келейное правило поклонами неотложно повсегда исполняше. и сие бе отцу по многом в чесом ни буди утруждении. самое свойственное мняшеся бытии упокоение, еже умныма и телесныма очима присно зрети на превысочайшее всетворителное Божие существо: и всегда поминати сладчайшее Божие имя, яко же и святый Златоуст глаголаше: помянух Бога и возвеселихся. и что же сам творяше, тое и в прочих непременно желаше видети. но тако упражняшеся не леностно о почитании, и о поучении божественнаго писания. бдению и молитве, всеусердно прилежа. и изуст ведый ветхий и новый завет, уча и сказуя многим яже на пользу. ничим же бо умалися в трудех ревности святых всех глаголю же, верою. делы. и упованием к Богу. Нецыи же от братии видящее таковое благоревностное его житие, тщахуся ревнителие ему бытии. сему же болезнь велия беяше от них. и хотяше всем да быша свое житие исправили, яко же он. Поминаше же рекшаго в сто на осмьнадесятом псалме, заповеди Твоя взысках, и глаголах о свидениих Твоих пред цари, и не стыдяхся, и поучахся в заповедех Твоих, их же возлюбих зело. Единою бо келейно разглагольствоваше с пришедшею братиею с трудов из далних мест. о множайших братских нуждах и потребах: между же тем, привниде речь и о присно усердно желаемой святой молитве. вопрошая их, да исполняется ли у них во отдаленных службах, и в хождении по дорогам правило церковное и келейное. они же извинящеся справедливо. что ово от трудов, и за немощь телесную, ово же и от лености, презирается ими таковое неоцененное душеспасительное небесоподобное дело, и в сем пред отцем прощахуся. он же тяжце воздохнув, и весма поболев о неисполнении святыя молитвы, возглаголаше им таковая златая о молитве словеса: о братие: воистину вы сущее остависте дело, учинисте же и возлюбисте точию, едино поделие. сего же ради, яко праведно отец древний глаголаше, остависте и святую молитву, ельма оную постависте вы своим малоумием в поделие. а не в самое первое высочайшее жизни нашея дело, для чего есмы живем и движемся. и много поучаше тогда прилучившихся всех о творении святыя молитвы во дни и в нощи [кои словеса послежде, и писменно изобрази и молитве] напоследок же, аки бы с велием нехотением, но от ревности понуждаем всесмиренно сам объяви о себе сице. аз братие грешный человек: многажды бывах в далних путешествиях, и в других таковых мнящихся к молитве весма неудобных случаях. но никогдаже презрех церковнаго и келейнаго правила. ибо предпочитах тое всегда за первое дело. по исполнении же того упражняхуся и в прочих разумлениях. да еще и самим прошед искусом, что никакия ни в чем пользы никогда не обретох. аще бы когда оставя молитвы, за иное поторопясь для лучшаго иметельства коснухся. несть, ни во уме, и в прочих девяти наших чувствах, таковаго всеприятнаго преиметельства, яко же бывает прозрачность. и благоустроение по исполнении святыя молитвы. сам Господь Бог тогда спомоществует во всех наших умных и телесных действиях по глаголющему пророку: Волю боящихся Его сотворит, и молитву их услышит, и спасет их.

 

О видении отеческаго келейнаго служителя,

како видев в нощи премудраго отца своего Андрея,

пред Господем Богом на молитве стояща.

 

Понеже убо блаженный любя безмолвие, да без препятия исполняет своя теплейшия ко Господу Богу молитвы, и во чтении священных писаний, да не отбегнет ум его от подобающаго тех внимания: и того ради по совещанию его поставиша ему братия келейцу малу, юже на три обитания преградиша. и в первом убо еже от сеней служащему ему брату житии. второе же для приятия приходящих к нему братии. третие же внутреннее для малаго упокоения плоти, на сон влекущияся, исполняше во вся дни нощныя молитвы, и келейное правило приношаше Господеви Богу присно. и тако ему в келии той благочестно живущу.

В нощь некую глубоку, живый в преднем келии тоя обитании. служай ему брат, некоторыя ради потребы, отверзе двери, в среднее обитание, не ведый отверзеных сущих дверей. во отческую внутреннюю обитель. в ней же зрит ужасное видение, полна бо бяше та небеснаго света. в нем же стояше блаженный, яко древний Моисей в синайском пламени, весь лицем красно светяся, а не опаляем стояше. приемля свыше, не скрижали камены, но благодать премудрости разума Божия, еже видев брат он, велим ужасом устрашив себе, тако забывся стояше, не ведый что сотворити. и яко убо тому страхом и удивлением томиму сущу, абие преславное то видение от очию его скрыся. По времени же некоем, служитель той со дружебным ему братиям о преславном том видении поведа. тии же друг другу поведающе бяху о сем. тако и до нашего слуха повесть сия дойде. юже и пред будущим родом слышати предложихом.

 

О видении Матфея Е-ча,

како виде отца Андрея, по обеде на молитве стояща.

 

Толик обо блаженный сей отец, о молитве радяще, елико дыхаше, ибо и по утру, и пред обедом, и по обеде, многажды присно моляшеся. и кому время телеснаго тогда упокоения. оному же навершающу сие сладчайшею тогда молитвою. свидетель сему неложный живший при нем тогда в ските именуемом Березовка, у боголюбивейшаго странноприятеля Михаила Ивановича Вишатина, странствующий Бога ради муж Матфей Епифанович, иже послежде живяше в царствующем граде Петербурге: и всегда велие благодеяние, ко обители Выгорецкой [блаженнаго отца] творяше: и при оном сие сам многим умильно сказоваше.

Случися быти в предреченном ските у праздника, премудрый отец Андрей Дионисьевич, в доме у рекомаго Вишатина, и праздноваше по чину церковному. во обеденное время приобщишася, и представленней трапезе: которой весма воздержным видом блаженный причащашеся, излишнее же елико можаше преминоваше. и после оныя еще духовное разглагольствие о древнем благочестии пространно произвождаше: то бо блаженному отцу и присное бяше попечение днем и нощию, еже в древнем святом законе поучатися. егда же братия утруждьшеся телеснаго требоваху покою. тогда  и он изыде вкупе. во уготованное ему место: оное же бе вверху и мшиц холстины и полог предуготован бе. по тесноте же пустынных жилищ. и предреченный муж Матфей Епифанович: таможде по близости онаго, от старейшины дому определен бе, упокоение имети, и сий нарочно несколько времени, после отшествия блаженнаго, ис покою в верх ожидаше: дабы отец непомешательно сном упокоение себе возъимел, и по доволном времени взыде онамо. идеже блаженный во уготованном пологу пребываше. нарочно же учини зело тихим вхождением себе не яви, како бы не разбудити многоутружденнаго бдением отца. и се зрит блаженнаго в пологу стояща: в преди же его висяща малыя створы. с изображением Божественных лиц. он же пред ними зело обливаясь слезами усердно молящееся, настояше бо тогда солнечный день: и лучею света озарен вельми умилен являшеся. яко оному нечаянно от сего и ужаснутися сотворися. и ни когда же по смерти видящаго сие блаженнаго молитвенное деяние в забыть прейде. но присновоспоминаше, и отца прославляше, яко и по обеде не телесно упокоевашеся, но духовно паче молитвою прохлаждашеся, и тако умиляшеся сим бывшим самовидением благочестивый он муж Матфей: на самый конец своея жизни, аки бы нарочно с высоты бысть позван, от ложи всестрастия к миру, прибыв в Выгорецкое наше общежительство. и с миром душю свою предаде в руце Божии. не малое учини всем пустынножителем милостивое благодеяние. тело же его бысть погребено в близости всегда любезнаго ему отца Андрея Дионисьевича. толико бо добродетель святая возмогает привлачить, и зело из дальных к себе мест.

Приложижеся ему к даром словесным, и к Богу угодней ревности, яже на страстех власть. и от них же воспомянем от многих малая премудраго отца сего преславное житие, имущее сице.

 

О нашедшем гладе

в зяблыя годы от недороду хлебнаго на общежительство,

и на всю Выговскую пустыню.

И в тоже время о великом диавольском томительстве,

в начале Выговския обители,

на тайноядущия малодушныя девы и малыя отрочата.

И о избавлении от сего искушения помощию пресвятыя Богородицы.

И о бывшем гласе от святаго образа Ея,

егда молящуся пред ним боголюбивому отцу Андрею.

И о проречении его братьскому эконому Луке Ч-ю в гладное то время,

яко вскоре имать Бог послати всякое братьству изобилие.

 

В та же времена и лета, случися бытии хлебный великий недород, понеже насеянныя нивы жестокими морозами до конца побило.

И того ради солому и траву, и сосновую и березовую кору сушащее толчаху, и месящее на самом житком ржаном растворе, печаху. И по Давыду, таковый хлеб, яко пепел ядяху, и питие их с плачем растворяющее пияху. в сем времени и случае, [яковый более десяти лет бяше] терпеливодушный Андрей, аки предобрый мужественнейший воевода, ополчаяся сам и прочих пустынножителей, вооружая на мужество терпения против глада. мнози бо тогда немужественнии изыдоша в другия веси: но не бысть им то во спасение, зане не послушаша спасителнаго Андреева гласа, присно увещавающаго терпети, и ждати милости Божия на едином месте. инии же от оных выходцов, не точию стяжания своя малая растеряша, но и души свои в пременении святаго благочестия погубиша. кои же з детьми и сродницами выехаша, то всех из целомудреннаго хранилища растеряша. егда же время от времени и час от часу, наиболее глад хлебный во общежительстве умножашеся, тогда уже и самыя мужественныя сердца начаша колебатися: и что творити не знаяху; в конечное бо поступиша мысльми своими отчаяние. еже от великия нужды не разрушену бытии общежительству, и сия помышляющее каждый имея потщание о выходе из общебратьства. и из самыя пустыни в другия хлебородныя страны. еже и учиниша весма благочестивыя мужи. яко Михаил Иванович рекомый Вышатин, и прочии подобныя ему. на что творит тезоименитый мужеству, премужественный отец Андрей: зря таковое в братьстве колебание, и изнеможение от належащаго долговременнаго глада. не преклоняшеся сей ниже ослабеваше к слабым мыслям, еже бы оставити место общебратское за скудость, и прейти в другое изобильное всякими потребностями. но в начале денно и нощно моляше премилостиваго Владыку Господа Бога, дабы Он ему и прочей братии подал свыше терпение, претерпети жезл наказания Его, в позяблениях хлеба. братию же непрестанно поучаше от Божественнаго писания, еже не малодушествовати в превеликом оном общепустынном искушении. но мужественно ждати изменения того. но братия не вси суть таковы мужественни быша, яко поучающий отец, аще и слышащее увещание его но мнози изнемогающе от глада, прошаху благословения на исхождение из общежительства, в другия хлебородныя места. но терпеливодушному отцу зело то учинися печально, еже распустити по своевольным холмам богособранное свое стадо. паки прилагая молитву к молитве, паки неусыпно тщашеся всех напитати словом Божиим, мужественно укрепляя не ослабевати во искусителном оном времени. чего уже мнози не могущее терпети. конечно прошаху благословения о изытии из общежительства. особливо же к сему приложишася мнению не малии, от видения померзших на поле с недорослым хлебом нив глаголющее, яко в зимнее время, не имут конечно ничего видети представленнаго ястия на трапезе, толикое премножество народа. и собрание людей разсыплется. что слыша честнейший муж братский эконом Лука, всюду от всех в братстве оно разглашаемое, и за неблагословителное распущение, от иных уже и роптание велие на отца увещевающаго их происходящее аки бывшее древле на пророка Моисея, от сынов израилевых. иже в хождении по пустыне, восхотеша ясти египетская брашна, и чесновитаго луку. прииде помяновенный Лука ко отцу Андрею в келию, пишущу тогда богодухновенная в пользу всем христианом писания. и нача устремително поведати братьское негодование, и на распущении вольном из общежительства предлагая ему и свое разсуждение с ними согласное. зане хлеб на полях весь прозябе: а имеющагося и до зимняго пути недостанет. в зимнее же время толикому народу будет от нужды гладом помирати. и сими глаголы толико возмяте мужественнаго отца, яко содрогнувся некако, и зелне восплака: и абие воста от седалища своего, и возвед очи свои горе. нань же всех очи уповают. о доблественныя души, премудраго отца: о всевернаго упования, и веры яже к Богу: о мужества крепкаго полководца. обращься и вельми мужественным гласом возглагола сице: о боголюбивейший брате Лука: престани ми глаголати малодушныя глаголы сия. еда и ты неверием одержим сый яко и прочии, и не имаши надежды подающаго пищу всякой плоти. или не помниши напитавшаго в пусте месте, пятию хлебы и двема рыбома. пять тысящь мужей разве жен и детей; и тебе глаголю яко сам тако шед и прочих укрепи в братстве, да возъимеют ми грешному веру, яко вскоре хлебная у нас в братстве нужда престанет. и будет братьство наше всеми потребными изобилно: и во свидетельство верное даю ти в поручительство сий святый Божия Матере образ, на него же указуя рукою зелне плакаше. что виде и благоревностный Лука, тако же восплака и поклонясь ему просяше в притруждении прощения. Шед же к прочей своей братии, ревностно увещевая их премудрыми всякими глаголы, и сказуя отеческое обещание с поручительством пред образом святыя Богоматере, яко чрез полгода или менее будут ясти хлеб добрый, и всякое довольство имать в братстве изобиловати. и по сем братия вси крепкодушно утвердившееся пребываху в молитве и трудах надеющееся на отеческия молитвы и Божий промысл, зане не имут долго бытии во искушении том. премудрый же отец Андрей, видя превеликую братственную во всем скудость и таковыя ради великия хлебныя скудости, нужда бысть премудрому отцу Андрею, отъити в царьствующий град Москву: да у любящих древнее благочестие христолюбцев, испросит щедрое подаяние, на прекормление странствующих. Бога ради, в Выговской пустыни обитателем. и тому убо тамо яко пчеле трудолюбней, облетающу московския вертограды. И елико пекущуся о при добытии богособранному братству пищи, толико наипаче желаше, яко елень напитатися животворных вод священнаго писания, и оттуду извлещи источник премудрости, да готов будет присно ко ответу. всякому вопрошающему его слово о нашем уповании, с кротостию и страхом совесть имеяй благу. Сих ради великих благословных вин. доблий сей христианскаго полка воевода, промедли тамо немалое время. сущии же во обители братия его и сестры, претерпеваху великую нужду, скудостию потребных ежечасно томими. видя же враг диавол непоколебимое от гладу Андреево сердце ину кознь в братстве злострадательну устраяет. быша бо во оном общежительстве, мнози жительствующии з детьми своими пришедшими из мира. Тогда матери яко есть естественно чадолюбивии, начаша детей своих кормити тайно, не благословенною братьскою пищею.

И из них же нецыи женьска пола постницы, яко немощнейшая некая подобообразна скуделнику часть, малодушием прабабы Евы поболевшее, приносимая им от сродников их, аще и малыя и убогия пирого́щи обаче чрез отеческое завещание, не дающе на общую братскую трапезу, начаша тайно ясти.

Злохитрый же ради человеческаго враг диавол, изгнавый древле сею сластолюбия кознию, из едемския породы прадеда Адама, наскочи лютее и на сию немощнейшую малодушием деющую часть, и обыкнувый преобразоватися во ангела светла. той и зде преобразовашеся в разных сродников их виды овым братия показовахуся. инако которую како прельстити могуще. приношаху им желаемую пищу яже что хотяше, иным убо хлеб чист. другим же пироги мягкостию утучненныя, овеем же мяса добре испеченная, иным же рыбы изрядно унеготованныя. приносяще же им устроенныя ими многокозненныя брашна, запрещаху им никомуже о том поведати: глаголющее: аще поведаете с вами братии или сестрам, то больше мы к вам ничтоже от ядомых приносити будем. Ибо приносимая нами вам, тии отъимут на общую трапезу, и не достанется ни вам ни онем, и нам убо невозможно будет всех вас удоблевати, толь утученными лакомством пищами.

Рыдателна убо сия есть повесть о слышателие боголюбивии: яко убо разсуждаеми от доилиц тельцы, по снятии кожи пометаеми бываху псом на снедение. тии же рода человеческаго неусыпнии губители, собирающе тыя, устроеваху привидением в мягкия туки, и приношаху малодушным тем девам ясти. они же насытившееся диаволами приношаемыя им в привидении пищи, не хождаху с прочими на общую трапезу. еже узревше старейшия братия и сестры вопрошаху тыя глаголюще: чесо ради не приобщаетеся с нами общия братския пищи; тии же отвещеваху, яко аще и умрети нам будет, не можем толь жестокой и человеком неядомой причаститися пищи. к тому же доколе сердоболии наши, возмогут нам приносити обычную пищу. дотоле мы не будем с вами ясти, скоту данныя травы. еже слышавше тии, разумевше быти над ними диаволу прелесть, не видяху бо никого же к ним входяща ни исходяща. и тако потщашеся. по апостолу тех страхом от огня прелести исхищати. и начаша их с прещением, о приносимых им сердоболящими их брашнах вопрошати.

Тии же духом прелести укрепляеми, не глаголаху им ничтоже. принуждени убо бывше, связаннии союзом любве Христове отцы и братия, связати их узами железными, яко да не могут скрывшеся приносимаго им прелестниками брашна, ясти тайно. связанным же бывшим им, диавол чрез оное наипаче возъиме силу, еже мучити их аще бы где ни прилучилися, или в келиях. или в часовни на молитве: тогда прихождаше к ним очевидно, и пометаше их на помост мучаше зело, яко и пенам из уст тещи. окрест же предстоящим смятение велие и страх от сего прихождаше. наиболее егда слушашеся сие на пении церковном в часовне. отрочата  же и вси тайноядущия девы егда еще издалече видяху к себе грядущих синцо́в: тогда зелне вопияху, кричаще грядут грядут грядут мучащии ны. сами же метахуся семо и овамо. ищуще помощи от мучителей, но до времени ни от когоже получаху: ибо пришедше к ним бесове восхищаху их отвсюду, где бы ни крылись, и по обычаю мучительскому мучиша их. тии же нелепыми гласы вопияху глаголюще: о люте нам яко лестию нас сии прелестницы [парицающе отца Даниила и Андрея с прочими] созвавше убити нас начинают. лучше бы нам не родитися, а родившимися почто бы в такую неплодную пустыню изыти, и кричаху велиим гласом вопиюще: дадите нам нож, да себе заколем. подайте нам вервь, да себе удавим, спустите нас, да себе ввержем во огнь или в воду, да тако угонзнем сих лютых прелагатаев и прелестников лютыя смерти. Тако и множае сих великим верещанием, днем и нощию кричаще, и власы своя рвуще, и лице деруще плакаху. и сим убо бедным сиротам, тако нечистыми духи бедне мучимым что не хотяше творити чадолюбивая отеческая щедрая утроба. прекроткий Даниил с ревнителем того и со всеусердным молитвенником Петром глаголю, новосозидаемыя Выговския обители всеразсудным еклисиархом, и с теплым верою Захариею, и с целомудренным ревнителем Исакием, и с прочими отцы братиею и сестрами, по вся убо дни молебная пения к Спасу и пречистей Богородицы, и всем святым совершаху, приводяще страждущих к святому евангелию, аще и не хотящих, обаче за преслушание положенныя отеческия и общежителныя заповеди попустися им тако страдати на долгое время.

Доблий же отец Андрей духом святым подвизаем, точию положи намерение свое, во свою новосозидаемую ограду возвратитися: сие почювше лукавии дуси, сущии в страждущих девах, вопияху друг ко другу глаголюще: о люте нашея беды: яко приспе время от упокоевающих нас обитаний изыти: ибо злодейственный наш враг Андрей с Москвы уже в дом поеха. и аще постигнет нас зде, то вельми нас мучити имать. и тако спешно друг друга от страждущих зовуще. день от дне исчезаху, дондеже вси без вести быша. и яко убо всего братства ликователная радость, премудрый отец Андрей, во свою киновию возвратися. нося множество потребных. мир и благословение всем братии и сестрам даруя, и тако всем о прибытии отца радостно ликующим. простреся от отца повесть, о бытии его в Москве и в прочих градех, и о именах христолюбивых добротворцев, кии что дарова на сограждение обители, и на исполнение потребы телесныя. тако в насыщение пищи, яко в довольство одежды, между которыми разглагольствиями, сказа отец время и день, воньже из Москвы в путь к дому ити подвижеся.

Слышав же сия прекроткий Даниил и прочая братия, назнаменанный ими день лукавых духов отшествия, со оным днем пошествия отеческаго с Москвы сточнивше, обретоша лукавых духов бывшии друг ко другу, отшествии их от обители вопль быти неложен. и яко о пришествии отца, тако освобождении его ради, от лукавых духов возрадовавшеся вси, прославиша Господа Бога, чрез усты Давыдовы рекшаго: аще оправдания Моя осквернят, и заповеди Моя не сохранят посещу жезлом беззакония их. и ранами неправды их, милость же Мою не разорю от них.

И в то время содеяся сие чюдное видение, во время Пасхи, в нощь ону пресветлаго Христова Воскресения. отцы и братия вси в часовни пояху такожде матери и сестры вси во своей половине, в той же часовни у заутрени стояху. некая же из них богобоязнивая жена в болезни лежаше, не можаше на пении стояти, и в келии своей пребываше. и вышедши на переходы посмотре на часовню, и виде страшное чюдо и ужаса исполнено: виде бо бесов к стене часовенней, и на стене идущих по окнам и к дверем, разным всяким видом, многое безчисленное множество, с яростию в часовню идущих. и приближашася в двери и во окна: и внезапу бысть с часовни со всех окон и из дверей пламень огненный, с яростию свирепо исходящ, и бесов всех поядающь и поревающь, от дверей и от оконец, и вси бежаша прочь от часовни. а пламень паки вхождаше назад в часовню, теми же дверьми и окнами и бысть тихо. беси же в то время всем воиньством, вооружившеся своим свирепством паки ко оной часовни к дверем и окнам, и по всей стене яко мшицы устрашишася, и хотяще в часовню внити. пламень же ис часовни оконцами и дверьми, паки свирепее перваго исхождаше, и всех их поядаше, и отгоняше прочь. они же бежаху с шумом, и бысть того долго. многажды покушахуся внити и не возмогоша. она же смотряше и дивяшеся и по многом убо стремлении, паки вооружися бесов, аки силняго дождя бесчисленное множество, и с великою яростию и стремлением, пришедше к часовне ко дверем, и ко всем окнам, и на стену часовенную, и всю стену покрыша: и в то время ис часовни з дверей и со всех окон изшед пламень велий, наипаче перваго с великою яростию аки гром возгреме, и всех бесов пояде и розмета, и безвести вси исчезоша.

Пламень же объят всю часовню, и аки столп огненной стояше. оная же жена убоявшися чаяше запаление всей часовне, и нача гласом велиим кричати, и на оной крик, пришедше с часовни к ней прочия сестры: и видяще ю кричащу велиим гласом, и всю страхом объяту, и ведоша ю в келию, и начаша распрашивати. она же нача им сказывати свое видение все подробну, како выше сего писано. и возвестиша сие настоятелем, они же слышавше сие возрадовашася, и воздаша хвалу и благодарение Господу Богу и пресвятей Богородице, и всем святым, и теплыя радостныя слезы испустиша с молением к Богу, и сотвориша молебное пение, ко Господу Богу и ко пречистей Богородицы, с великим умилением. и в то время присно воспоминаемый отец премудрый Андрей, на молении стоящь. но о превеликия милости. Премилостивыя Владычицы, до раба своего верно тогда молящагося Ей. внезапу слыша глас от образа пресвятыя Богородицы к нему глаголющь, ныне Господь Бог моление и слезы ваши, отселе избави Господь Бог предстательством и заступлением Матери своея, от сего гладнаго великаго томительства, и от того времене вси беснующиися исцелеша, и гладная в братстве нужда преста. и бысть по пророчеству отца, братьство всеми потребными изобильно. и тако премудрый отец стадо в тишине благодатнаго покоя пребывати паки утверди. и начаша прочее жительствовати по положенному ими общежительному уставу, без преслушания.

 

О Лексиньской обители:

 

И видеша отцы настоятели, яко людие умножаются: положиша совет, како устроити житие. и положи им Бог в разум, чтоб построити особь девический монастырь подале. и избраша место на реце Лексе, от монастыря разстояние за двадесят поприщь. понеже тамо и прежде пашня была: и начаша келии здати, и часовню поставиша и столовую. такожде все по чину устроиша и скотской двор, и около келей ограду, и переведоша их, в лето от создания мира, 7214 [1706] году. И поставиша им такожде по чину: старицу вместо игумении, а Соломанию девицу Дионисиеву дочь, надсмотрителницею, и в часовню уставщика, а певцов и псаломщиков, и прочих служителей, по вся дни службу совершати, по церковному уставу непременно. и сами настоятели, Даниил, и Андрей, и Петр Прокопиев, часто их надсматриваху, и уставляху им чин. поставиша им келаря и столниц: чтоб всем ходити в часовню к службе к церковному пению, такожде и на обеды и на ужины всем собиратися за едину трапезу, и во время обеда и ужины, всегда быти молчанию, и читати четцу жертвенник, и поучиша их пению, и ко всему церковному служению, и в грамоте многих научиша, такожде определиша им пети по праздником, и по воскресным днем, всенощное и заутрени и молебны и часы, и после заутрени быти книжному чтению до часов. и после обеда и ужины, такожде собиратися к книжному чтению всем. и поставиша им надсмотрщицу, и казначея и хлебниц и поваров, и над всеми трудами над трудницами десяцких людей стариц и белиц, и весь устав против своего братскаго Выговского монастыря всенепременно. и даша им из братии служителей для пашни, и всяких трудов монастырских. и поставиша над ними надсмотрщика мужа блага, и житием вельми искусна, перваго жителя, сродника Даниилова. именем Исакия Евфимова, о нем же и прежде сего поминается. вельми житием добродетелна, иже от младости все житие свое препроводи со отцем Даниилом скитаяся. и пришед от моря в Выговскую пустыню, живяше во общебратствии, и труждашеся во всяких братских попечениих, и о чинах монастырских вельми чистоту телесную храняше, и добре живущих любляше. а слабо живущих и чины монастырския преступающих воспрещаше и не попущаше, и обличаше, и наказываше, и от писания поучаше. бе бо муж вельми словесен, все житие свое препроводи бес порока, до старости жестоким житием живяше, и всегда хождаше сам по трудам надсматриваше. а братия трудники при Лексе живяху на горе, во своих келиях, и посылаху с ними на труды старших добрых духовных людей, такожде и к ним в монастырь, для всяких братских нужд, уставленныя люди на то, а для свидания сродников поставиша при вратах келию, и двух или трех привратниц для надсмотру, такожде и от братии старика кому их приводить и отводить. и поставиша им мельницу на той же реке пониже где ныне стоит толчею, и мелею, и келию у мельницы, и поставиша им больницу, и в больницы надсмотрщиков, и келаря и служителей, которые не могоша в часовню ходити тем ту в больницы служба служити. а на Выгу близ монастыря к полудни за горкою где мертвыя погребаются. поставиша коровей двор, и келии жировые, и челядню и портомойную келию, и молошницу, и около келей ограду, и у ворот приворотную келию, для приходу и свидания сродственников, и для всяких братских нужд приходящих, и приворотниц и надсмотрщиц и караульщиков по чину. и бысть у них во обоих монастырех скудость книг и икон, и начаша посылати по градом из своих. овогда Андрея Дионисиева з братом Симеоном. Овогда и Петр Прокопиев ездяше. в Нов город и в Псков з Гавриилом Семеновым. овогда Леонтий Попов Толвуйской. и начаша им добрые люди милостивцы подаяние давати, ов деньгами, ов книгами и иконами, ов хлебом. такожде даваху на псалтырь по умерших и на помяновение. и начаша для хлебнаго промысла, на низ посылати, хлеба промышляти.

В то время бысть в Суземке зяблые и зеленые многие годы, и хлеб позябаше и не поспеваше. и толь великой был хлебной недород, что в иные годы ни на квас не приходило, и многие нивы для зябели, не жаты покидаху, точию для соломы, кое жали, кое косили косами, а иное не жато оставляху: понеже все начисто позябаше. и бысть тогда в монастырех и в Суземке толь велия нужда и глад, яко начаша солому ржаную по мелницам сещи и толчи на муку. и с той соломяной муки хлеб себе печаху. токмо раствор ржаной полагаху. но хлеб в кучи не держашеся, но и того скудно. братия и сестры вельми о сем печаловахуся и скорбяху. хотяще овые для той нужды расходитися, не могуще такой нужды понести, отцы же Даниил, Андрей и Петр во обоих монастырех учаше их от божественнаго писания, терпети и носити сию приключающуся нужду з благодарением. и никуда не исходить. хотя и гладную смерть прияти. просити у Бога милости. сказующе им како в прежние лета в монастырех такожде хлебные и всякие нужды случалися, но терпели з благодарением хотящии спастися. после и милость Божию получили. такожде и нас Господь Бог хочет искусити, каковы будем к терпению: и овы сладце, их учение слушающе, и з благодарением труждающеся. и тако ревнующе что и гладом были готовы умрети. малое же из них исхождаху из монастыря со своими семьями, Алексей Корельской, и прочии. такожде и из Суземка многия съехаша в нижегородския пустыни, не могоша нужды гладной такой потерпети и понести. и тамо житие свое, и детей своих потеряша, довольственным своим и пространным житием. а в монастыре совет сотвориша, избраша из своих людей кому куда ехати, и разославше во вся страны. Андрей Дионисьев з братом, ехав в Нижнее и в Москву: дву Гаврилов Семенова, и Новгородца, послаша в Нов город, и во Псков, а иных во иныя и в низовыя городы. для промыслу хлебнаго, и покупки где подешевле. обраша  у себе вси запасы, ово покупаша, а ово в долги имаша. а ово просяху у христолюбцев. а иных к городу Архангельскому. а Захария на Мезень. а иных на Мурманское, на рыбной промысл, и в Выгозерьском погосте, взяша воды соловецкия в Выгозере на Кортому. такожде и на Водлозери, и по иным езерам. начаша рыбы ловити везде и по пашням. и уловиша рыбы, и с рыбою, и с рыбными штями соломяной хлеб ядуще, питающеся и труждающеся, со всем усердием всякую нужду Христа ради терпяще: поминающе пророческое слово. терпя потерпех Господеви. и всякую службу братскую управляюще, друг друга воздвизающе, и возставляюще, и укрепляюще.

Потом послаша пашенной земли искати, где бы можно поселитися житии, или пахати. и ходиша по Мезени и прочим тамошним рекам, и в поморских краях. и тамо не найдоша таких пашенных мест. искаша и в поднизовых и в сибирских краях. но токмо хотя и есть, точию удалено от сих мест, в далном разстоянии. и искаша в Каргапольском уезде пашенных пустынных мест. и найдоша землю пустую, близ задней дубровы. на речки Чаженги, в прошлых годах у старца Копылова была на малый оброк. хотеша было монастырь ставити. и оного при Никоне патриархе сослаша в Царьград и во Иеросалим, и тамо оный умре, а земля пуста остася. и послаша оную землю досматривать Исакия, Луку, и Тимофея Кузнеца, и сам настоятель Андрей, и осмотриша с тамошними жительми, и вси похвалиша, что оная земля, к пашни вельми пристойна. и сколько оной во вси страны, и написаша челобитную, послаша в Нов град к губернатору господину, Иакову Корсакову, и взяша указ в Каргополь, к воеводе в котором велено окольными волостями торговати, кто выше даст оброк, и взять скаски, и принесоша указ в Каргополь и послаша подъячего во окольнии волости. и во окольных волостях вси подписашася что оным оная земля не надобна, и торговати никто ею не будет, а лежала оная земля всегда в пусте, во владении ни у кого не бывала. такожде и ближнею волостию задне дубровския пописаша между собою полюбовно записи, и отведоша землю ис приказу. и даша указ, на оброк во вси стороны на шестнадцать верст. и начаша на Чаженьги к речьки строити келии и построиша, и начаша пашню пахати. и скот держати. и к лету для пашни начаша братию посылати с лошадми. а зимою к дому отъезжающе, и тамо малые люди остающеся, для молоченья. и начаша лишней хлеб к дому посылати: ово пашуще сами а ово покупающе по волостям.

Бысть же сие строение и пашни завод, в лето от сотворения мира, 7218 [1710] года. а пашня заводилась и платежь оброчной стали платить в Каргопольскую канцелярию.

 

О люблении безмолвия на Лексе.

 

Зело же любляше приснопамятный отец Андрей, Лексинское пустынножительство, ово за безмолвие, ово же и за попечение о нем, и часто бо и ответы писаша, против Неофита, тамо и от диавола пострада скорбь в сожжении написанной части оных: написа бо он много о святом трисоставном кресте, и свидетельством из священнаго писания оное позлати. таже моляшеся Господу Богу, и пречистей Богородице: особливо же обычай имеяше соборно пропевати тем святым ежедневно молебны, от киих писаний свидетельства потребныя вземляше, и помоляся некако тонце воздрема над пишемым, идеже и светильник горяще, бе бо нощь. помале же воспрянув, ощути в келии дым, и горелую воню. Возрев же виде пред собою написанное все уже истлевше, и точию едина черность перегорелая от бумаги остася. светилник же не погасе, но добре стояше: како же учинися сие недоведомо, но конечно и самому ему, и прочиим признаваемо, что по зависти бесовской, оскорбление сицевое ему случися, и точию разве от нагорения свещнаго угль ветхий паде на писма, и от него сотлевшася, близ бо они быша свещи. но самоестественно по разсуждению всех обстоятельств никако не можно оному учинитися, кроме пособствия злаго духа, но отец аще и зело опечалися о истлении многих трудов своих. ибо непрестанно от Неофита з заводов Петровских, понуждения зело оскорбительныя прихождаху в пустыню, дабы вскоре со ответами своими пустынножители были к нему ово творяше скучности ради своея: ово же наипаче дабы в торопях неосмотрителны тыя учиниша. и сим над собою ему торжествовати не мало бы сотвориша. но премудрый оных сочинитель паки в подвиг дненощный вхождаше, еже истлевшее от огня во обновление привести. паки молитвою ко Христу Богу непрестанно вопияше, да подаст ему помощь за святый его трисоставный крест. добре отвещати. паки и в собор послаше вестников, дабы всюду святым [их же бе свидетелства привношаше] пропевали молебны. сам же восприя трость, паки нача писати: и не по мнозе времени, за молитв святых отец утвержающих быти крест Христов трисоставным, вскоре паки златое слово свое, и непреоборимое ответословие написа, еже имеется в книзе его, под исчислением 65-м.

 

О тщании Андрея Дионисьевича.

 

Оный же Андрей, в те вышеписанныя нужныя годы ездяше ово з братом Симеоном, а ово и с иными по всем градом, и в Москве по всем монастырем, и в Нижегородской пустыни промышляше книги, и осматриваше, овые покупаше, а овые списываше. испытуя како в древлеотеческом благочестии утверждатися и стояти. такоже досматриваше по церквам и по монастырем кресты и чюдотворныя образы. како благославящая рука у Спасителя. для подлиннаго свидетельства, великое усердие и тщание показоваше. день и нощь о том тщася, до Киева доездяше: и тамо многое свидетельство взяв от чюдотворных нетленных мощей. како знаменашася святии. и ездячи тамо и на Москве грамматическому и риторическому разуму учашеся, и зело извыче. и что добываше у христолюбцев к дому посылаше. и нача у добрых людей, на торг ис половины денег просити. добрые же люди денег ему в торг даяху. он же своих людей избрав, и начат посылати в низовые городы, хлеба покупати, и в Санкт Петербурх ставити. и видеша людие таковую их нужду, и в торгу правду, начаша им давати денег в торг, и бысть сперва торг малой, и от того торгу начаша братству некое споможение чинити. по вся годы хлебными припасы к дому посылаху, чрез Вытегру водою в Пигматку. В то время на Вытегре распространяхуся хлебныи торги и судовые промыслы. и бысть на Вытегре велия судовая пристань в Вянгах. еще на старых судах начаша хлеб торговые в Питербурх ставити чрез Вытегру, то бысть во время шветской войны как заводился Питер. потом изволи его императорское величество первый Петр, суды строити всем новоманерныя, для шветской войны, ради посылки в полки всяких припасов, на море в завоеванныя городы. и прислаша на Вытегру своих мастеров, и началника и надсмотрщика, чтоб вси суды строили новоманерныя под великим жестоким запрещением. токмо старые за орлив их доезживать, а впредь не строити староманерных. и вси людие начаша суды новоманерныя строити, и хлеб снизу чрез Вытегру ставити, и в Питербурх возити. Такожде и общежители построиша суды новоманерные. и на старых ово свой покупной, а ово под извозом. и промышляюще, яко же прочии. и от того бываше велия помощь, и пособие братьству.

Но и в тоже время вельми петровские железные заводы распространяхуся. ибо императорское величество Первый Петр часто на петровския заводы, для досмотру оружия и к водам ездяще. помянутыи же настоятели, Даниил и Андрей, по совету з братиями, и с Суземским старостою и с выборными. всегда посылающе, своих посланных с писмами и с гостинцами. к его императорскому величеству, с живыми и стрелянными оленями, и со птицами, ово коней серых пару, а ово и быков больших подгнаша ему, и являхуся и писма подаваху.

И Императорское Величество, все у них милостивно и весело принимаше, и писма их вслух всем читаше. Хотя и в то время от кого со сторон и клеветы быша. он же тому не внимаше. На петровских заводах, и на Вытегры свои поставные хоромы и амбары построиша, и своих людей держаша, для торгу и приезду своих. Во время переписи и свидетельства душ, когда в Суземке писец бяше. в то время приехаста с Москвы Иван Иванов, да с Вязников Алексий Гаврилов. и записашася в Суземок. вязниковец же Алексий Гаврилов, имеяше художество иконы писати, и вельми хитр бе в том художестве. а Москвитин Иван учен церковному пению, и по знамени и по помете древлецерковных книг: тая оба исперва малое время пожиста в монастыре, стояста на крылосе, и после скора поселистася на Березовке и начаша ту жити. отец же Андрей посоветовав со отцем Даниилом взяша Ивана Иванова в монастырь для учения к пению, и собравше лучших грамотников, и сам с ними. нача учитися пению. и тщашеся о учении чтоб церковное пение украшено было добре. и овые из них вскоре научишася. а овые долго учишася. и начаша друг друга учити. и многие из них научишася добре. и начаша по праздником онаго Ивана всегда в монастырь призывати для пения, и в скиты с собою по праздникам, дабы от него прочии научалися к пению, понеже преже того мало в монастыре знающих певцов было по знамени, токмо отец Даниил, и Петр Прокопиев. да Леонтий Феодосиев. а иные наслышкою пояху за ними по крылосам, точию Трифон Петров добре научися. от псковскаго Ларионова, отец же Андрей. пришед скоро после учения на Лексу. в сиротскую девическую обитель и посоветовав со отцем Даниилом и с прочими, и собра грамотниц, старых и малых, которые не учены к пению, и нача их сам учити пению. овые из молодых скоро навыкаху, и научишася добре. а овые не малое время учишася. отец же Андрей понуждая их и уча, чтоб в часовнях пети, церковным красным пением добре, и праздники праздноваше, и пояше пение сам с ними. и научая их яко отец чада своя. и прочии из них научишася. и друг друга начаша учити. такожде и писцов из них учаше, чтоб право писати. понеже имяше попечение неусыпное о спасении душ, как братии. так и сестр.

Ездяше по всем службам осматривая и уставляя, и поставляя надсмотрщиков и старост и келарев, во обоих пределех. чтоб было житие их особь в своих пределех и оградах. такожде и хождение было бы на труды особь не вместе, дабы друг з другом не сходитися нигде никогда, кроме определенных на то, и всем заповедаше с великим запрещением, чины монастырския заповеданныя и данныя на писме хранити со всяким опасением уча всех и наказуя древлецерковное благочестие хранити, и крестное знамение на лицах истово творити, и поклоны добре полагати. и службу церковную по вся дни исправляти. и данные посты сохраняти, трапезное благочиние добре имети на обедах же и ужинах жертвенники читати. а братиям с молчанием седети. такожде и ходящим на труды повелеваше, на трудах с молчанием и с молитвою трудитися, имети между собою мир и любовь братскую, и к старостам послушание без прекословия и роптания: без благословения же старост ничего не делати, и никуда не шататися, а по воскресным днем, и по праздником книги читати братиям после заутрени и у́денья, и правило данное от отец своих духовных по вся нощи исполняти. и о своем спасении всячески тщатися и всем друг друга к полезному понуждати, и друг за другом вражды и свары и спору не имети никогда же. а когда у кого с кем случится, скоро миром и прощением разрушати. о сем крепко надсматривати веляша старостам, и надсмотрщикам чтоб после павечерни сходов и говору и бесед у молодых людей не было, и в другия пределы неуказным никому дерзати ходити, под великим запрещением. о вышеписанном уставляя и запрещая, и уча их и наказуя. сие все хранити добре, и надсматривати крепко. а не хранящих сие все вышеписанное, наказывати по правилам, и по данным им писмам, кто чего достоин. овых поклонами на трапезе. а овых от трапез отлучением. покаряющихся же и прощающихся прощати с милосердием: а противящихся и непокаряющихся, телесным наказанием наказывати, или в монастырь к наказанию отсылати, и никому не попущати, в том своем непокорстве пребывати.

Такожде и в монастырех обоих всем соборным и келарем и казначеям, и городничим и надсмотрщикам, и сторожам, всем приказываше, крепко всегда им данныя своя службы отправляти, и во всех службах надсматривати добре, чтоб было все по чину монастырьскому непременно всегда. и толико о том печашеся, яко не мнимый, но прямый отец чадом своим бяше. и яко пастырь добрый всегда печашеся о стаде своем до самого преставления своего. часто же ездяше и по Суземку по скитам на праздники, и по часовням праздноваше и торжествоваше праздники добре, и учаше с молением всех скитских жителей добродетельному и спасительному житию: в мире и любви пребывати: межсобныя вражды, миром разрушая зазорное житие отсекая, чины и уставы соборно им уставляя. всем жителем з зазорными лицы жить возбраняя: выборных духовных надсмотрщиков поставляя, с писменным укреплением чтобы во двожирных келиях не жити, и на пашнях собственные станы имети. и всякое охранение о сем имети. со всяким опасением всем заповедаше, с великим запрещением. всякое христианское и пустынное благочиние хранити, и посты установленныя, среды и пятки поститися, по данному уставу от отец, и службу церковную всегда на всяк день заповеданную. полунощницу, часы и павечерницу по вся дни отправляти. такожде и правило данное от отец. и всякое хранение о целомудрии, всем о сем попечение имети, с великим опасением чисто жити, а не хранящих сие вышеписанное, повелеваше з запрещением наказывати по правилом, кто чего достоин: овых поклонами и постом. овых от церкви отлучати,овых же и телесным наказанием наказывати никому бы не попущати. о чем самые данные писма во всех скитах свидетельствуют о сем.

 

О терпении в досаждениих, о воздержании.

о мужестве, и о взыскании внешняго любомудрия,

премудраго отца Андрея.

 

Некогда един от братии диаволом подущаем, раскрамолися с прочим братом. и приидоша на суд в келию отца Андрея, он же разсуди праведно, и онаго яростнаго осуди быти виновным. той же не точию не устыдеся суда того, но и на праведнаго судию, острояростныя и весма досадителныя нача словеса испущати. и толико неприличныя настоятельству его, яко и не терпеливно прочим соживущим с ним братиям показовашеся буестная дерзость его. и глаголаху отцу Андрею: благослови отче нам его ис келии яко суть весма бесчиннаго безчинно вытолкати. он же кротко им воспрети дабы его не тронули. крамольный же той брат не престаяше, но наипаче дерзновенно отца укоряше и безчестяше, и толико учинися печально прочим братиям, яко уже и сами с яростию начаша благословения у отца просити, еже бы и с достойным наказанием вон изринути, терпеливейший же отец Андрей напротив их устремления. устремителне с яростию возгна. аще вам его желается изринути вон то прежде его мене изрините. и тогда они умолкоша.

Егда же острожелчивый он укоритель, довольно его всяческими хулами и укорами осрамотивши, восхоте абие и разлучитися. но премудрый отец яко сущий философ терпении философственну душу показа. помяну глагол Павлов ветии церковнаго. яко должни есмы мы сильнии немощи не силных носити, и не себе угождати, кождо вас ближнему да угождает во благое к созданию. и нача толь прехитропремудрый пастырь, внутреннюю его ярость сладостными своими словами укрощати, яко вскоре сей и зело в кроткаго агньца претворися. егда же узре его во смирении суща, тогда другим образом некако премудро, нача его в раскаяние оной злобы, и умилителное прощение приводити. и елико сей умиляшеся, толико он словесно и с яростию наказывати его видяшеся. и тако его хитро. жестоко и изостренными словесы бив. яко он и зело с великим смирением и слезами, о преждебывшем непокорьстве приношаше прощение, падаше часто к ногам его. отец же яко бы наиболее яряшеся, и его поношая в безстудии и глупости, такожде и в продерзости безчестной к настоятелем. но обаче духом кротости исправляше. что видяще тии келейнии братия котории прежде благословения от отца просяще низринути его вон ис келии. тии же начаша по отцу припадати, и за него молебная приношения приношаху еже простити глупость его видя толикое рыдание и раскаяние, но отец не умягчашеся: при оном и сих ходатаев нача некако хитро, скоро превратными порицати, и пределов постоянства и мужества не знати: да еще оному всему и не навыкати, паче же всех вообще своеволниками именоваше: оваго за укоризну, других же, за ярость изриновения без повеления на то отеческаго своеволне судяших: то паки самомненно же за онаго просящих. и сими глаголы всех приведе в плачь и прощение. оваго за злобу, других за самомнение рыдати сотвори, и от всех сил своих прощатися. премудрый же врач, егда добре уврачевав злобнаго своего ругателя, и поносителя сердечныя язвы, и запретив дабы паки и впредь их не разгноил непотребными своими словами, или и непристойными злыми мысльми, отпусти его с миром. Послежде возглагола нравоучение, ко оставшейся келейной братии. зело потребно братие блюстися яростнаго и самомненнаго беса, дабы нас не обладал он продерзостию погрешнаго. другии же самомнением и непослушанием. ибо от высокоумия раждается сие еже помышляти и творити свое, а не повеленное. якоже и вы учинили есте. Егда аз смиряхся, тогда вы напустив ярящеся на озлобляющаго мя. егда же аз праведною яростию возъярихся нань. зря время и пременение его: тогда паки вы напротив мене поступисте. и уже его оправдати и миловати начаша, а не дожидасте конца суда моего. сотворшии же погрешение прощахуся, и впредь не творити тако обещахуся. ибо великое сей премудрый отец всем имея дарование от Бога, ибо толь преухищренно духовным разумом возмогая укрощати внутрения человеческия страсти, яко ин мало кто видяшеся. всегда же бе от цветущия чистоты в плоти и сердцы его показовашеся всем весел, и некако обрадованен. Самый бо чисто веселый вид его, зело зрящим подаваше в сердца духовную сладость. беяше бо блаженный сей чистоту любя зело, и того ради на неимущих ю гневлив бяше. из детска паче рече гневашеся, на иже чистоту не имущих. и не стыдяшеся их истиннаго бо ради жития, небрежаше егда что возглаголют нань. без лукавства же сый, удобь на ся речи привождаше, чиста имея уста, к беседующим к нему со дерзновением беседоваше. и егда учаше я, зело на пользу слышащим нравы привожаше. многи же на добрая дела приведе уча словесныя своя овцы, и верны о древнем благочестии многия народы сотвори. Божествене бо живый, и своими добрыми делы влагаше ревность послушающим его, слово бо добрыми делы утворено, веры достойно ся творит. а сему великому мужу обое бяше. еже хитре учити, и добрая дела имети.

Каков же бе и в разсуждении вещей; весма благоискусен, тако благоискусно во всем рвзсуждаше и суждаше, яко древний боговидец Моисей, или другий Исус Наввин, или Богом дарованный последнему новому израилю, новый другий Самуил. яко бы с правдою и законом Божиим было согласно, по месту и житию и прочим человеческим жизненным и телесным свойствам прилично: и не противно святоотеческим уставопреданием, и благим обычаем. Весма же бяше благопокорен кроток и смирен ко всем. аще же времени зовущу, то и остр гневлив и страшен показовашеся. и во всем тако учительски поступая, како поучает быти совершенному учителю, великий церковный Иоанн Златоустый. что же касается до верховной добродетели всем принадлежащей. особливо же учителем, и владетелем. яко духовным, тако и градским неотменно присущей глаголю разсуждения. ибо без сия вси прочия добродетели совершени быти не могут. того ради велеумный той муж, толико сей о добродетели паче прочих имея попечение и тщание, еже бы оную непогрешно исправляти. к чему наиболший изобретая способ. оная совершеньство взыскивати в мирном и полезном с прочими совете пребывати. покаряяся божественному писанию глаголющему: во мнозе совете спасение бывает. не имея же отнюд в себе вышемернаго о себе мнения аще и весма бысть премудр. справедлив, и достаточен во всех разсуждениях, но всегда мнения своя, во общебрацких делах, прочим предъявляше. аще же когда бываше в соборном разсуждении какое дело, то толико во оном истину изобреташе и при том и братию требованием от всех совета, всемирно утешаше, яко и до самых последних и подлых вопрошаниями дохождаше, и от них разсуждения восприимати не стыдяшеся, помня оныя словеса великаго во учителех преподобнаго Иоанна Дамаскина: еже пишет в слове. Чево учителем не найдеся,  то многажды учеником открыся: или и се воспоминая, аще и зело премудр бяше великий боговидец пророк Моисей. но от совета тестя своего, еще и не просвещеннаго, обрете наставление к лучшему совершеньству, в чинорасположении израильтеских людей, и тако егда всех советы восприемши: и из них истину взявши, оную благоразсуждением своим разсудивши, предложи обществу и сие, яко оная истинна утверждающаяся им. за благое ли ими в деле разсуждаемом. почитатися будет тогда вси согласно ему изрицааху тако да будет, якоже изволил еси разсудити. и того ради при его началопастырьстве от сего во общих делах у всех согласие и любовь бяше.

К разсуждению же матери добродетелей еще в нем процветало, и прекраснейшее из добродетелей воздержание. всегда бо во всем и везде сие при себе имеяше, в пустыни, и в градех, и во многом повсюду странствовании своем. аще в пищи и питии, аще в словесех, и молчании, аще в хождении, и седении, аще во бдении и спании, все бо оное присно позлащаше драгоценным воздержанием. пищу же и питие в пустыни и во обители своей обыкновенную нужную пустынную употребляше. во градех же аще прилучашеся у боголюбивых странноприимцев, и пространнейшия трапезы: но той премудрый отец, никогдаже видяшеся пристрастно предложенными снедьми побежден быти, но и всем некако премудро поступая, по апостольскому завещанию творяше, и вся предлагаемая [кроме мясных и прочих пустынножителем не приличных пищей] ядяше. В восприятии же оных святаго и премудраго Иоанна Лествичника устав держаше: еже всего предложеннаго в причащении рог тщеславия сламляти, и гордым себе воздержником прочим не являти. по оскуду же онаго восприятия, предоблим воздержанием, госпожу страстей мучити присно не ослабляшеся. такожде и во одеянии ризном имеяше благоразсудное воздержание и мерность в простыя дни, простую ношаше одежду. в праздники же по уставу святых отец, к пению полутчее, и качеством поизряднее вздеваше. и не точию в пищи и одежде воздержание и мерность храняше, но и в наказательстве поучительном по премногу оное наблюдаше. ибо толь благоискусно и мерно оное произвождаше. ибо слушателей никогдаже во отягощение и уныние привождаше. и елико чтобы творити не хотяше, тогда с разсуждением благое воздержание восприимаше. и толико оное лобызаше, и им украшашеся, елико в прекрасной оной доброте, при прочих совершеннейше познавашеся. в пребольшее же сему благорачительство, яко для себе, тако и для прочих, сложенным своим словом утвердительне засвидетельствоваше, любезный любензнейшаго своего верховнаго учителя глас восприимши, ветию глаголю церковнаго, и весма воздержнаго премудраго апостола Павла, любомудрено о прекраснейшем оном любрмудрии вещающь. всяк бо подвизаяйся, от всего воздержится.

Егда же премудрый он отец седяше з братиею в трапезе во время ястия: тогда по премногу являшеся в целомудренней святости прекраснейшаго воздержания, аще той премудрый пастырь, и зело оное пред зрящими скрываше. и толико бе опасен в мерности ядения, яко и всем не малое видящим искуство свое, преисполненное духовным любомудрием являше. ибо ни множеством брашна чрево свое не отягощаше: но малостию онаго в безсилие вхождаше, и сице мерным причащением, рог тщеславия сламляше. и седящим с ним братии велие утешение преподаваше. зане всякое благое деяние, с велиим благоразсуждением творяше. и аще зряще на трапезе братию утружденных, общебратскими трудами: тогда и сам даже до последняго с ними трапезования, показовашеся всем охотно ядущим: да зряще на него трудники удовлят пищею свою потребу, и не имут послежде вины в греховном тайноядении. той же премудрый пастырь, умеяше не полною лжицею присное свое воздержание не явленне устрояти, и продолжителным до окончания жертвенника восприиманием своим любезнаго своего поста пред седящими не являти. и сим им в великих трудах сло́ны не творити, и во отхождении от трапезы безропотных учиняти. во дни же праздничныя уже инаков являшеся: и не столь бе в продолжении ястия своего устав полагаше, но некако и сокращением зело мерным, благоговейно трапезу окончаше, и аки бы своим воздержным образом, и братию тогда не пресыщатися учаше: да не дремательни пребудут день той и в поучениих духовных, и всем оным непогрешно апостольский святаго Павла глас исполняше. аки бы тожде глаголаше: аз бо навыкох, в них же есмь доволен быти: вем и смиритися, вем и избыточествовати во всем и во всех. навыкох  и насыщатися и алкати, и избыточествоватися, и лишатися, вся могу о укрепляющем мя Исусе Христе.

Такожде и одежды ношаше по церковному уставу, и по времени и месту, в простыя дни простыя крашенинныя, и пониточныя, иногда же и сии уже многоплаченныя аще когда в работе со братиею труждашеся. егда же господский великий праздник бываше, тогда в церковное собрание на славословие Божие, в лучшей одежде прихождаше, аще качеством и дражайше несколько простых материй: но точию присно цвет черный содержаше, яко же и у всей братии, и во всем последоваше отцем пустынным. щапства́ же излишняго во всяких вещех зело не любляше, и яко во одеждных покроех, тако и в прочем наипаче всегда пустынную святую простоту лобызаше: и сею яко гривною златою украшашеся. иностранных же поступок и обычаев, еже многиими борами излишно одежду отягощати вельми ненавидяще, и буйством сие порицаше.

Еще же к сему и велие мужество в постоянстве имеяше: аще бе и от природы остротою немало естественно награжден бяше обаче оную никогда в неполезныя дела и праздности не употребляше. такоже и от вещи к вещи в действиях их, непостоянно прескакати воздержашеся, разве велия нужда и времени зовущу тогда успехом своим скоровратно творимое обращаше. а без сего зело постоянно всегда начатое концем украшаше, и скородвизателным развращенным смыслом ничево не творяше. но все с благоговением, разсуждением воздержанием, тихомерно действоваше, не коснительно же и лениво, как то у неостроумных бывает, но поспешно и благопостоянно, и точию не вышемерно но по силе своей законно. и от сего зело действия его, в чювственных и разумных вещех быша истинны.

Еда се не мужество, когда для нужд братских, со многим народом чрез езеро на плоту пловяше и среди онаго превеликая буря воздвижеся, конец же еще вящшее трех верст бяше. а уже вода покры много, и все под лежащее древо, ветром же среваше стоящих во глубину езера, да еще и сами от малодушия вси прочии зелно восколебашеся, и хотяху плот сим опровергнути, ибо случай учинися престрашный, являющий всем смерть, но мужественный Андрей, премужественно колебание глаголом уст своих в них останови, и повеле друг о друга твердо держатися, и молитву творити. сам же аки на кафедре глубоко на мосту в воде стояше, в великом воздушном оном обуревании и прочих мужеству и терпению учаше, и на Бога всю надежду имети завещеваше людие же чювства свои обратиша вси на его вид и поучение, и тако позабыша все страхование обстоящее, доньдеже ветр сильно, уже почти истопающих принесе их ко брегу, и спасошася от потопления.

Кто убо в жизни бяше того опаснейши; Кто воздержнейши; Кто постоятельнейши; Кто великодушнейши; Кто целомудреннейши; Кто терпеливейши; иже толь в воздержании прекрасно цветяше, елико всем сладок, всем древним отцем, им же соживяше любезен бяше. кии бо от отцев не возлюби Андрея; кии всесладце не почте его; Корнилий ли началника того и судию всей пустыни вменяше. Виталий ли толико того любляше, яко и при преставлении мантию на благословение остави. Генадий ли, присно сладце тому собеседоваше. Пафнутий ли, тако того любезна имяше. яко и от далече послежде любезная целования яко сыну, и яко брату присному посылаше, Прокопий ли, приснаго советника, и пустынноначалника того имяше, Варлаам ли друга и таинника благочестия того почиташе, и яко сим, тако прочим отцем, зело Андрей прелюбезен бяше. и не токмо отцем, но и всем братиям. и не точию братиям, но и всем пустынножителем всем христианом возжеленен зряшеся иже таков в воздержании страстей пресладок показовашеся, яко и недостойным гнева, не испусти внезапу гнева, не яви абие ярости, не наскочи напрасно но с пожданием и воздержанием исправляя исправляше, коль в словесех слышания воздержателен бяше. тако таиньственен и удобохранителен, яко сердце его бездна моря вменяшеся, тайное слово тому кто изрещи хотяше, в некую пучину слово вринути имяше. к тому уже слово оно от Андреова языка не исхождаше но тамо яко в пучине морстей покрывашеся. и яко в сих тако и во иных в ядении ли, питии ли, в беседовании ли, и в прочих подобных, паче же всюду красота воздержания в нем присно сияше.

Какова же опасность того целомудрия, коль преизрядно в нем блисташе: яко никогда же его опроставшеся, никогда забывшася видети бяше. солнце не виде во едином хитоне, келия не узре его, во единой свитце исшедша, ниже сожитилие келейнии, во всю жизнь оного усмотреша, рука женска тому прикоснуся никогда же, кроме великия немощи, и сия престарелых: ниже оного рука всем опростася главе женстей прикоснутися кргда, да не реку, и малых детей, не приближися, к нему лице женское в седении или беседе, кроме своих присных, аще и часто за попечение с ними бяше. но опасность оного присно с ним цветяше, и всекрасно соводворяшеся: свидетели сему в киновиях соживущии в путех тому сошествуюии, что же того постоянство, яко магнит железа, тако вся люди к нему привлачавшее, не ласкании некими, их же не имяше, ни словесы мягкими и приветами, их же никогда являше. но изряднаго нрава преизрядным постоянством: предобраго обычая предивною твердостию: слово ли кому возглаголаше, словесе не изменяше: обещалися кому, обещание делом исполняше, отсюду вси к тому упование, к тому надежду, к тому прибежище имяху: и яко на Господа тверда на того всежелателно уповаху. ибо онаго великодушие вся послушающия ввождаше во единодушие. онаго великодушие, вся одеваше добродушием: великодушие онаго не отменися когда, не умалися от напасти, не изменися от случая, но всегда мужеством присно велеумием, по выну веледушием прекрасно цветяше. печаль ли когда прихождаше; но онаго великодушия не стираше. скорбь ли и болезнь объимаше; но мужества тому не соотъимаше: не низлагаше твердости. не одолеваше храбрости. но таков присно великодушен таков мужествен являшеся, якова слово закона Божия взыскуем.

Имеяше же блаженный отец, обычай непреложен свойственнаго постоянства, и в читании книг. всегда бо твердо с начала самаго, всякую книгу прочитоваше постоянно даже до конца: аще же какое другое дело между чтением привнидет, то учиняше закладку в листах книжных: а никогда безпорядочным образом и скорохватно, чтение не произвождаше, сперва весма выразумеваше предисловие: и с какими оно мысльми и для каких вин писанное, добре разсмотряше. что и вси ученыя мужи, непреступно сие творяху. всякое же сумнительство, в других книгах взысканиями разрешаше. такожде  и сам что сочиняше, с велиим же опасством и разсмотрением: а особливо ответы свои против Неофита, и с коим праведно рещи, что не точию читающим потребно ко укреплению древлецерковнаго благочестия, но еще весма годны, и для сущей политики. ибо коль он в них умел учтиво и благопристойно во всем. и со всеми высокими персонами. писменно беседовати, нисколько не раздражая их характера: но при том нисколько же не отступая и в заступлении древности. многия из учеников его для вспоможения писаша оныя: но никакое без великих трудов его в переправлении не погодилось: но и тое точию допущено им было с пятьдесятнаго ответа, а до онаго места сам все единственно написуя с велиим трудолюбием. егда же благоревностный брат его и ученик Симеон Дионисьевич написуя что ревностно: тогда он прочетши тое, воспрещаше ему дабы тако не творил. а приглаголаше, брате любезный Симеоне: уже нам российских архиереов и философов, никакою ревностию, не повратити будет в свое состояние, тако Богу извольшу содеватися в последнее сие печальное: но спасая кииждо из нас, да спасает душу свою, а к ним с почтением да отвещеваем, и аки бы солию растворяя честнословием наша словеса, по святому апостолу, тако благоумно да пишем и глаголем. ибо не научити их сим хотяще, но точию себе оным доставити желаем в благоспасительный покой, и како бы в нераспужении конечном нам быти всем из древлецерковнаго святаго благоверия. сие едино точию, должны мы ныне наблюдати, и делом и словом творити.

Еще же велие прилежание, и охоту имеяше, и ко внешнему философскому учению, еже бы он премудрый стадоведец, возмог Богом дарованная ему дражайшия таланты, добре позлатить от презнатнаго учителя, справедливым ведения в познании искусством, елико к грамматикии стихотворству, риторикии красоту всеобразную. толико и к диалектикам, логикам, кабалистичной философии, и всеобоженной превысочайшей богословии, разсуждая сие быти за весма, нужное дело. ибо без ведения божественнаго писания невозможно, по святому апостолу, быти готову отвещати на всякое вопрошение.

Сию убо превысочайшую мудрость, богоподобною мыслию прошед иже кто, всяко убо вещают Святым Духом, якоже Той подаяше им. о самом вышенебесном, яже о исконном начало имут, яко от лица вышняго богословствуют и глаголют. таков бе бяше в первых Давыд, иже и богоотец наречеся. потом девствующии девственный Иоанн. Павел кречет церковный и вселенныя учитель. и Дионисий небесный орел. и Григорий бодрый ум. и златоустый Иоанн, и другий Иоанн домасково солнце. иже и край всякаго богословия достиже, и секира и оскорд всякому блядению и ереси показася. и пребезмерная и безчисленная от присноблаженныя приснопамятныя своея души, многа нам богословная вещания оставил, такоже и прочии вси, иже сицевыми богоблагодатными дары преизлишествовани беша, и преславных и непостижимых нами по Духу Святому достигше. Сие и препоручиша российскому солнцу премудрому Андрею на защищение бегающей от чермнаго змия, древлеправославной церкви и всему древнему благоверию.

Ведяше бо добрый пастырь, яко святое писание толкованное разными премудрыми учители, с употреблением ученых терминов, невозможно достаточно знать без учения оных обширности. и тако от сего той принужден бысть непременно,  изыскивать все те правила, кои отверзают пространный ведения вход, в божественное писание. ибо без орудия и видимых вещей невозможно действовати: аще же по нужде секирою что и сотворишь, но не тако изрядно, яко прочими на благоизрядство устроенными, стружными инструменты содеемо быти узрится. кольми паче высочайшия от зримых разумныя вещи, без учителева открытия творити неисправно есть. как и то может существителныя определения, и естествословныя изыскивать вины, и справедливо разсуждать разньство случаев. который не знает что есть существо, и много ли их есть, такожде не ведает. что есть существо; и случай, и в чем они между собою разньствие имеют, или како тот, истинно различит существо от существа; яко ангела от человека, и животное от нечювственнаго, который не знает совершенно существительных их свойств.

Аще сей боголюбивый муж бывый в странствованиих от неких ученый людей малыя ко учению следы, яко в грамматикии и риторикии и получи: к чему еще и естественным остроумием своим, наипаче ко учению приплоди и присвои: но обаче не возможе быти во оном достоверным, дабы он без погрешения знаемое по себе ведать мог, и без добраго и искуснаго учителя, известно во оном художестве засвидетельствованнаго, знал изобрести во учении своем непостыдное совершеньство. услыша сей премудрый отец славу про некоего нарочита в знатнейшем киевском богословском училище, учителя. того ради издавна побуждало его нестерпимое желание, присная охота для самовидения. древних святых свидетельств, еже бы видети славнейший град Киев, и в нем совершенно все оное для пользы всех, древнее благочестие содержащих, ведение получити, еже и получи.

 

О шествии к первопрестольному граду Киеву.

и о исполнении на пути премудрым отцем Андреем похваляемыя любве:

юже совершив остави последнему роду дивный смотрителный образ.

в лето 7226-е.

 

Егда убо премудрая сия пчела облетовающи грады и обители, взыскуя насытися желаемыя ему премудрости сотов. ея же ради подъят труд шествия. к первопрестольному российскому граду Киеву. шествуя же он тамо с московскими купцами. имый с собою единаго от ученика, Мануила великодушнаго.

Едущим же им по пути, лежащему на пространных безводных степех, во днех августа месяца. случися же быти дню тому солнечным варом бедне озаряему. прииде же время обеда, и едущии с ними, поставиша кола и начаша ясти.

Премудрый же Андрей, мало не доехав их обоза такожде ставше с реченным Мануилом, начаша обедовати.

И се скоро на коне бежаше борзоходец, а древняго ли благочестия любитель, или новых преданий содержатель, или ин кто о том известие в слухи едущих не дойде. обаче той солнечным варом бедне жегом бяше, и того ради с великим молением прошаше у купцев тех воды испити, да мучащую его жажду утолить. тии же или презрением его бедности, или сомнением имеющемся в нем каком нибудь в вере его с ними разгласии, мыслию томими не даша ему из своея посуды пити. и той убо от их обоза непомилован  поеха, люте жаждею мучим. Видя же беду его всеразсудителный сей отец Андрей, поминая в мысли своей апостола Павла, к коринфом пишуща: аще [рече] имам всю веру яко и горы преставляти, любве же не имат ничтоже есть. того ради, скоро повеле, Мануилу в чашицу свою, из нея же сами пияху воды везомыя ими из делвы нацедити, и уксусу в ню прилити. и подати тому пити. той же приим испив чашу: вельми благодарив, поеха в путь свой. Манул же сумневашеся о чаше той, не ведый что сотворити: упразднити ли ю на потребу себе, или в презрение повергнути. Премудрый же Андрей, повеле ему ону чашицу водою измыти, и потом нацедить во ону воды паки, юже приим отец, и перекрестив себе крестным знамением, и испи воду ону ис тоя чаши, и повеле из нея ясти и пити, якоже и прежде. и тако великим своим разсуждением остави будущему роду во время коея либо случившияся нужды творити сицевый смотрительный образ.

Абие с Мануилом и с прочими путешественники, достигает и славнейший град Киев. вначале все осмотрив божественныя вещи, и святыя древния свидетельства, яко в пещерах преподобных отец, Антония, и Феодосия, святыя многия нетленнныя мощи, тако и по всем монастырям и церквам чюдотворныя святыя иконы.

Потом же не восхоте лишен быти и желаемаго, от славнейшаго учителя во внешней премудрости надежнаго засвидетельствования: приходит сокровенно благонравнейший наш учитель, к незнаемому учителю чрез прочих в знакомство. и своим благоговейным любомудрым видом, и кроткими учтивыми беседами, входит ко учителю и в любовное приятственное свойство, и без всякия опасности о всем с ним нужнейшем взыскании разглагольствует. бе бо наименованием купеческим. и егда он премудрый отец словесно освидетельствова свои ученыя, наипаче рещи богодарованныя таланты. тогда учитель даде ему книгу нарицаемую библию. и повеле для лучшаго свидетельства ученым порядком написати ему слово. приим же сей премудрый отец книгу, и отъиде во свое жилище. Изобрет же в ней приличную премудрому учению мудрую фему, взятую из премудрых притчей премудраго Соломона. еже есть: сотове медовни, словеса добра, сладость же их исцеление души.

И чрез сию фему люботщателно в немедленном времени, сочини слово. толико и таково всякому ученому и неученому сладостно и приятно, еще же и от страсти празнословия целительно, яко праведно тому согласовати, во всем с предвзятою оною премудрою фемою. и оное принесе к предъявленному академии учителю. той же при собрании всех учеников, повеле е единому ученому студенту велегласно прочести. предстояше же ту и премудрый сочинитель Андрей. и по прочтении слова, вопроси слушающих каково есть слово. они же весма похваляюще. суждаху быти прежних древних творцев. а инии глаголаху, яко с греческаго, друзии же рекуще с латинскаго диалекта вновь преведенное. егда же объяви им учитель предстоящаго сочинителя. тогда они немалую честь ему воздавше разыдошася, и от тогда наипаче присно ко оному, отверстый себе вход получи. и о всем риторском философском феологическом учении, с велиим прилежанием вопрошаше того. он же безпотаенно ему о всем сказоваше, и приятно правилам тем учаше, к чему его ово некая из Москвы рекомендация, о отце Андрее привлекаше: ово же и приносимыя дары кланяюще, ко всему вопросимых открытию. по премудрому мудраго речению. сребра послушают всяческая. егда же блаженный он яко премудрая пчела. от всюду собирающая имство, к возделанию всесладчайших медвенных сотов, собра потребная тамо стяжания, ко укреплению и разспространению древняго благочестия, и видя духовный свой корабль по премногу сущь, невещественным богатьством обременен, яко учением внешним а наипаче получением очезрительных премногих тяжкоценных вещей. иже тех ради взыскания наипаче бысть Богу любезный иже человеком полезный, иже антихристу, и его слугам страшный. его же глас яко гром страшен, словес чистота, яко светлоструйных вод течение, разума ясность яко света пролитие. каково же того люботщательное снискание о древнем благочестии, и о общежительных преданиях, люботрудные побеждающия пчелы, яко вся монастыри российския обходив, вся чины киновийския соглядав: и от всех пресладкое и всепрекрасное сота собрание получив. потом достизает богонасажденнаго не на востоце, но в полунощном окияна брезе, Выговскаго богоявленьскаго общежительнаго едема. и бяше всем обитателем общежителным и скитьским. неисповедимая радость о пришествии премудраго отца. и шед в часовню со отцы и братиею. прежде воздаша Богу благодарение, молебное пение, и поздравление отдаша.

Посем убо мудроделательная трудолюбивая пчела, блаженьства тезоименитый архиерей, новый Ездра, премудрый стада Христова пастырь, от иже толиким и таковым всесладчайшим сотом священных писаний, собранием, вся предстоящыя нача наизусть пребогатно напаяти и наслаждати. И таковыми же священных апостольских и отеческих законов уставоположений, яко крепкими стенами ограждати и укрепляти, и незыблемо утверждая в древнем благочестии пребывати.

Слышасте убо возлюбленнии, о любопремудрей пчеле, отвсюду собравшей имство, к возделанию всесладчайших медвенных сотов, ко укреплению и разспространению древняго благочестия.

Что же аще в высочайшее превысочайших разумных отеческих богатьств сокровище, всежелательно востечем, что узрим: паче же чесого не узрим: киих дивств не усмотрим; киими добротами не усладимся. Все бо доброе, все многоценное, все пресветлое, пребогато в сокровищи премудраго отца водворяющися обитаем. Что убо, кое упование внем. кое надеетеся обрести богатьство; злата, негли и сребра множество; погрешаете: камения многоценнаго негли безчислие; недостизаете: маргаритов дражайших. негли неудобопознанное; никако же. что прочее; грядите и зрите богатьство невещественно, богатьство доброты разумныя, богатьство красоты духовныя, толико преизобильно сущее, елико всем благодатно текущее.

Хощете ли всепребогатое разума зрети; зде обретается: хощете ли всепресветлое разсуждения видети; зде сокрывается: хощете ли всепреизобильное ведения смотрити; зде водворяется. аще и художества всепремудрое, и многоученное желаете созерцати; во Андреи обитает. где правоглаголания преизрядная чистота светяше. аще не в Андреи: где рифмотворения пиитическое мудроплетения предивно сияше; аще не во Андреи: где красотославнаго златоречия соткавашеся поста́в; аще не во Андреи: где витийскаго хитровития соплеташеся пленица; аще не во Андреи; где софитическаго мудрословия сшивашеся багряница; егда не во Андреи: где превысочайшаго феологии таиньства исплеташеся венец; аще не во Андреи. откуду предивнаго красотоглаголания позлатишася цвети. откуду сладкоязычных медословий составишася соти; откуду всесладчайших словотечений истекоша источницы; откуду академических глаголопозлащений пролияшася струи напаяющии рачители всеизобильно. грубии поселяне красотословити научаются, откуду: невеждьствующих уста речеточествовати навыкают, откуду; варварствующих устне, доброфигурствовати тщатся, откуду; ралосодержавшии чинопоносне, словеса софитическая похвалне содержат, откуду; откуду инуду сия притяжаша, токмо от пребогатаго Андреова сокровища. и что не глаголю; что не предлагаю превысочайшаго богатства; благочестия превысокое таинство, како познахом; православия светом, како просветихомся; церковных законов добротою, како удобрихомся богатством, от кого обогатихомся; православнаго догматствования богословити с церковию незаблудно, от кого навыкохом; преестественнаго таиньства, преестественныя феологии превысоких глаголов, от кого научихомся; от кого инаго аще не от Андрея: и не токмо но и дальнии тех же причастишася дарований. не от инуду христианопоморьстии жители в благочестии утвержаются: не от инуду благочестивии в российских странах благоверием сияют: не от инуду европожители православнии, в законех церковных укрепляются: не от инуду вси обитатели древлецерковное благочестие всесладце приемлют, токмо от всепремудраго Андреова сокровища почерпают.

Кто убо премудрости богатьством, паче Андрея обогатися; кто разума множеством преизобильствова; кто разсуждения светлостию превознесеся; кто добротою художественнаго учения превозвысися; паче же рещи, сравнися кто; уподобися кто, утаковствовася кто; воистинну никтоже. вся бо богатства, преестественных даров, аще детелных, аще зрительных, аще осязателных, аще постизателных, аще глаголателных, аще разумевателных, вся во всеблагодатнем и пребогатем онаго оного сокровищи, прекрасно процветоша, предивне возрастоша. всебогатно упокоишася. ими же толико обогатися. елико всякое, всякое спасителное, всем христианом всегда преизобильно изливаше. возведи окрест мысленныя очи, объиди мыслию, облетай помышлением, и виждь всезрително. Кое убо благочестия утвержение, кроме Андрея совершися; кий предобрый совет, кроме Андрея утвердися; кий всеспасителный предел, кроме Андрея положися; писание же кое разсмотрися; закон же кий; таиньство же кое; кроме оного познася, и доброразсудне усветлися, воистинну не едино. Ибо той явися разума всеблагодатная глубина, разсуждения всесветлое светило, премудрости вседражайшее сокровище. оле сокровища всепребогатаго: им же обогатишася всеспасително киновии. оле сокровища всепрекраснаго: им же удобришася окрестнии. оле сокровища всесветлаго: им же просветишася далече сущии, им же озаришася страны, им же осияшася российстии концы. аще поморстии предели, аще обонежския страны, аще нижеградския пустыни, аще близопольская селения, аще запольския границы, аще близодунавстии жители, аще асийския части. и вси древлецерковнаго благочестия любители. пребогатно о нем украсишася. кого убо сии имяху превысочайша в премудрости; Андрея: кого совещание действительнейше всех предпочитаху; Андреово: к кому известныя ради пользы прибегаху; ко Андрею: ким мироуханно друголюбовно сосвязашася; Андреом: о ком крепкодушно стояху во благочестии: о Андреи: его же имя яко священие церкве во устех имяху. его же писание, яко небесное богатьство собираху. его же совет, яко совет Божий вменяху. занеже велик бяше в богатьстве всемудраго учения. Велик во изобилии благоразумнаго писания знании. велик в светлости изряднаго разсуждения. велик во искусе академийскаго преславнаго художества. и толико велик елико всякая уста христианьская, всяк язык благочестивых. того всесладце славяху. толико велик, елико и от внешних славнии мужие. честнии честна. разумнии многоразумна. ученнии многоученна мужа нарицаху. оного великое разума училищ дивнии префекты, велехвально превознашаху. высокое учения пречюднии академии ректоры похваляху. преславное премудрости, преславнии авторы, и перьвейшии в славе словес прелюбезно восхваляху. иже елико словесы своими высоким персонам, Андрея возносяще всежелательно тому беседовати желаху: толико честными своеручными писаньми честно к нему пишуще, честное разума, и художное учение того восхваляху. и вкупе рещи, от всех всякаго звания честных мужей, аще от внутренних, аще от внешних, аще от великоученых, аще от малопостигших. предивный наш отец дивную и преславную, паче же безсмертную похвалу дивне стяжа: по гласу всемудраго мужа: и будет сей слава в народех, и честь пред старцы.

 

О премудром дивнаго отца Андрея ходатайстве,

бывшем за брата его узника Симеона,

и о великодушном его общежителных законов хранении.

 

Егда убо изволися неизреченным Божиим судбам испытати ревность, и терпение, и непосрамляемое пред новолюбительми, древлеправославное церковное исповедание, во всеусердной души древлеотеческаго православия хранителя, Симеона глаголю сладкословеснаго ритора, и храбраго никоновых новин обличителя. Присновоспоминаемому же нами премудрому Андрею единоутробнаго брата. тогда попусти некоему новому Июде предателю, валяющемуся в сквернах любодеяния, последнему пред всеми извергу, Леонтию Лыскову, предати того памятозлобно, за учиненное ему за злыя его дела наказание, в бытность его в Великом Нове граде, по приказанию господина Александра Васильевича Кикина: с данным ему пашпортом, для исполнения потребных ему вещей, а особливо для постижения великих миней четиих макариевых.

И егда убо яша сего незлобиваго агньца, лютии никоновых новопреданий любителие, и к сущему тогда митрополиту Иову предаша. той же яростию дышущий на древнее православие муж, повеле его в железныя узы связати, и великим томлением мучаше страдальца, и коварными вопросами о древнем благочестии того испытоваше.

А како той исповедник древлецерковное благочестие защищаше, свидетель тому есть неложен премудрое его в пяти статиях сочинение, поданное ему митрополиту Иову.

Тогда нужда бяше всем выговским пустынножителем, обратитися к пролитию теплейших молитв, о избавлении узника от уз и темницы. и убо заповедаша пост по всем скитонаселениям, уставиша на всяк день по 300 поклонов полагати. и кийждо убо пустынножитель от своея молчалныя клети, возношаше на небесныя круги усердную о узнике молитву.

Присный же его анексей, всеразсудительный еклисиарх Петр, днию и нощию теплейшия своя ко Господу, со многим слез пролиянием приношаше молитвы. к тому же на всяк день кроме обычных молебнов, по вечерней службе пред павечерницею, о избавлении узника и о даровании ему во ответех премудрости, пояше соборная молебная пения; располагая овогда пречистей Богородице. иногда же святым угодником Божиим, к ним же когда вера и усердие его возгорашеся.

Что же не хотяше страдати присная его единоутробная сестра, сущая незазорнаго целомудрия девица, премудрая Соломония, по всех братиях и сестрах общежителных, теплая к настоятелем заступница. яже оставшагося сего узника Симеона от матери их малолетна суща, яко мати воспита и возрасти. та убо наитеплейшия молитвы и обеты Господеви Богу возсылаше. между которыми ея горячими сердечными прошениями, обещася молебен пети всемилостивому Спасу, в молитвенном Его боголепнаго Преображения храме, пред чюдотворным Его образом, иже в Боровском скитонаселении. приснопамятный же брат их премудрый Андрей, бывый тогда в Санкт Петербурге, для получения милости, от вышних господ о избавлении повествуемаго нами узника. и толикую своим премудрым ходатайством милость обрете, яко для свобождения узника, сам светлейший князь Александр Данилович Меньшиков в Великий Нов град подвижеся. но коварством реченнаго митрополита Иова прелукован бысть князь. остави узника быти во узах. и приехав в Петербург поведа княгине своей о том, она же ведая волка того лукавое лисово хапание, глагола князю: дивлюсь я вашей высококняжей светлости, яко толикою светлостию, от царьскаго величества осияннаго тебе князя, прелукова гнилоносый чернец оболгав беднаго узника, яко бы твоей светлости ругателя и твое сиятельство скотиною нарекшаго.

Слышав же сия князь разсуди тако быти, и глагола к ней: в знак нашея к нему склонности посли ему нечто, да не сокрушится сердце его печалию, яко бы мы на него прогневаны есмы. склонися же к бедности обижаемаго напрасно узника, светлейшаго князя сиятельная супруга, для разрешения сокрушающия его о княжем наношении печали посла ему на утешение рубаху с порты, повелевающи о том не печалитися к тому.

Паки же отца Андрея объемлет подвиг, паки возбуждает его единоутробная по узнике жалость и премудрыми своими увещаниями, подходит к высокопревосходительному господину ланттрихтеру, Иякову Никитичю Корсакову, проливает слезы, обнажает сердечную единоутробную жалость, представляет узникову невинность, объявляет жестокое ему томление. и лежащия на его ногах тяжкия железныя вериги.

Яже вся внят ланттрихтер, умышляет кознию некоею подвигнути митрополита Иова, и с узником к царьскому величеству. подъемлется новый сей Февда, Иов, не от пустыни, ни от вдовствующаго древлевосточным православием софийскаго престола, поемлет с собою новаго Нахора никоновым новинам премудраго, обличителя и тако приходит в царьствующий Петрополь, блистаяй же чести превосходительством, утружденный Андреевым витийством ланттрихтер Корсаков, умышляет посредством пира царьское величество в веселие склонить. митрополиту же поне в мале имеющуюся на юзника ярость обуздать, узнику же смелости дверь отверьсти. Поставлен же бывает узник на предверие полаты, идеже царьское величество пойде, и вопроси узника глаголя: Кто ты и откуда и коего звания. той же по дарованной ему от содетеля Бога премудрости, аще и краткую беседою, но многим разумом вся от себе исповеда, и крестным двоперстным знамением показа себе быти древлецерковнаго благочестия ревнителя непреклонна.

Самодержец же похвалив крестное знамение, рече: добре крестишися. и тако разглагольствуя с ним царь рече: ныне церковь содержит пятипросфирное на литургиях приношение. вы же глаголете, яко древняя церковь, имела обычай приносити в служении седмь просфир. аз же обретох требник предревний харатейный, в нем же повелено служити на пяти просфирах, на то узник Симеон отвеща: доколе за ваше царьское величество, в служении особливая просфира приношена зде в России бяше. дотоле исполнялася служба литургии на седми просфиромисаниих непременно. напротив того государь, изволил молвить: так подлинно.

Вшед же государь царь в палату и за стол седе, и митрополит с ним и прочии боляре. Рече же митрополит государю: прикажи государь сего расколника зжечь. напротив того глагола царь: прежде надлежит книги старыя истребить, тогда и сего юношю зжечь, понеже аще и в раздранной одежде стоит, точию просто противу его умных разговоров и без вины невозможно осудить, и неведущему с ним на разглагольствие для своего стыда вдаватися не подобает. и тако царьское величество митрополиту узника мучити не повеле, а увещева воли его не отъя. и по малех днех митрополит поеха возвратно в Нов град, и узника повеле с собою взяти. ельма убо судбам Божиим, не повелевающим надеятися на князя на сыны человеческия, в них же несть спасения и еще изволившим оставити в руках вражиих. и убо пребываше выговский дражайший птенец, в сетех лютаго ловца связан. По совету же выговских отец и братии, избирает себе узник стезю. яко же древний орел Павел не из дамасковых забрал, но с софийскаго дому, и не через стену в кошницы свешается, но на раму благодати тезоименитаго мужа сед, во врата града износится. и тако оставль печалную темницу, вседает в малую ладийцу, и волховских быстрых струй плещами носим, и прочих езер и рек волнами тихо пореваем, достизает новонасажденнаго не на востоке, но в полунощном окиана брезе, выговскаго богоявленскаго общежительнаго едема. тогда возрадовася, и по Исайи, пустыня выговская, и слава древлецерковная дастся ей, и честь исповедническая со славою вниде в ню. тогда услыша глусии о пришедшей им радости, и скочиша хромии, яко елени, и уяснишася языци гугнивых, яко чаемое ими веселие, к ним возвратися.

Присно же тогда из Питербурха, и приснопамятный отец наш Андрей, и бяше всем обитателем общежительным и скитским, не исповедимая радость о пришествии узника. тогда премудрых сих самобратий, Андрея и Симеона целомудренна сестра, и девическаго полка разумная наставница, объяви братома своима, бывшее ей о молебном пении в Спасове молитвенном храме, иже на Бору обещание. еже бы ей исполнити то самобытием ея, что же творит мужеству тезоименитый адамант; увещевает сестру кроткими своими сердоболными глаголы, вещая к ней тако: о возлюбленная сестро, за теплыя твоя яже за ны молитвы и обещания, непреполовляемое никогдаже благодарение тебе приносим, сие же тебе посещати самобытием твоим скитския пределы. то угаснет неувядаемая слава девственнаго твоего целомудрия, умалится честь твоего всеразсуднаго настоятельства. возопиют молчалные твои постничестии клети, на твое от них разлучение. подивятся скитьстии девы твоему с ними обхождению. и нас убо яко немощных всех покажеши. не к тому убо наречемся общаго жития настоятели, но будем яко общих целомудренных чинов презиратели. аще бо узрят тя сестру нашу, общаго нашего жития сестры, в скитския пределы отшедшую, то вси за благословныя вины прицепившеся, яко для исправления обетов, тако для посещения болящих сродников, другая другую попирающе, не имут дати вратам монастырским затворитися. того ради просительно молим тя, не навязати камени соблазна, на свою целомудренную девственную постническую выю. благоволи возложити на нашу немощь. ибо аще мы с тобою телом и разлучены когда бываем. обаче дух наш с твоим сердцем, и твой с нашею мыслию неотступно пребывает, и тако увещав премудрый брат целомудренную сестру, и взем с собою сродника своего, теплейшаго молитвенника, всеразсуднаго еклисиарха, и Захарию Дровнина, и Луку приезжали, и с ними дошед до реченнаго Боровскаго скитонаселения. и тамо сый присовокупи и служителей молитвеннаго Спасова храма. и обще со всеми ими вшед в дом благолепнаго Преображения, и пред многочюдесным стоящим в том храме Спаса Христа образом, обещанное сестрою их усердное молебное пение совершив. пойде паки в царствующий Питербурх для отдания вышним персонам, благодарения. за их показанное по прошению его милосердие, и в предыдущее время от архиерейскаго налегательства, о взыскании крыющагося узника, щедрыя обороны. Петр же с прочими возвратися во обитель, нося тетце своей Соломонии, от брата о исполнении обета ея радостное известие, и всеприятное сердоболное поздравление.

 

О возражении премудраго отца Андрея

на порицающия поганым обычаем бывающее чихающим поздравление.

 

Многажды убо случается, и достойным мужем, от непостижения неведомых им вещей смущатися бедне. и ревность имети Божию, [яко же глаголет апостол] но не по разуму. ибо елицы в пустынное отшельствие, тако для спасения души, яко для бегства от новолюбителей водворишася. и с ними яко с неприобщенными древняго благочестия. приобщатися не хотящии, и радоватися им по апостолу не глаголющии, возмнеша быти. подобну тому дарования глаголу, и бывающее по народному обыкновению к чишущим поздравление причитаху быти поганых обычаю. не убегающий же из памяти нашея, присноблаженный отец Андрей, по всажденному в нем от рождения его естественному свойству в случай чихания своего, егда тое его нудяше, не два краты или три, но иногда и многажды чиханием тем утруждаем бываше. случися же некогда ехати ему, из Челмужскаго сельца близ брега в малей ладийце, по великому езеру Онегу, в реку малую Возрицу. с поминаемым Захариею Дровниным, и со учеником своим Мануилом и с тезоименитым агкирскому презвитеру юношею, и юноши тому с Мануилом гребущим. Захария же на корме седя, устремление тоя ладийцы на желаемое им место правяше. блаженный же отец среде ладийцы на устроенном ему седалищи седяше.

Приключися же ему по естественному его припадку, чихотою многократно себе утруждати, юноша же ведый имеющейся в Захарии, о поздравлении к чиханию сомнительный нрав, и к поганьскому обычаю причитание, согласився с реченным Мануилом, поздрави отца Андрея чишущаго, он же напротив того воздаде ему благодарение. Захария же стрелою водрузившагося в нем сомнительнаго нрава, уязвен быв, и на страну лице, и очи обратив, глагола: Древний некто старец глаголаше: когда кому на пловут возгри, и от кого кто начнет чихати. а другий напротив, по обычаю поганых языческих народов, поздравляет его глаголя: здоров да здоров. Рече же к Захарии отец. а по тебе Захарие же как сие видится: Захарие же глагола: яко сие дело есть поганьскаго обычая. тогда глагола ему премудрый: обретаем убо в древних летописцах и историях писанное; яко от благочестивых христианских царей. к благочестивым же царем посылаеми бываху, для их царьских между собою каких содружений, или устамений посланники. и егда при разговорах их или с самеми царьми, или с приемлющими тыя посланники боляры. случится кому чихати. тогда посланник поздравляет прежде своего царя, потом того к которому послан, таже приемлющаго того болярина. напротив того и болярин чишущаго посланника последи поздравляет. и сия убо тако быша и бывают. ты же что глаголеши. Захария же откровенною главою говея пред отцем. сотворив молитву, прошаше у отца в таковой дерзости своей, привпадшей ему от неразумия, прощения, еже получив изгна от мысли своея таковое сомнение. имже яко древний Фома неверствием, и о брате своем цельбу своему смущению, и впредь грядущему христианскому народу, остави неразсудней ревности, да не реку дерзости пресечение.

 

О хождении премудраго Андрея Дионисьевича, в Москву,

и на петровских заводах к государыне Парасковии Феодоровне.

и о читании пред нею древлепечатных книг.

 

В царьствующем граде Москве, изволися великаго государя и царя Иоанна Алексиевича, сожительнице. государыни царице Парасковии Феодоровне, вново построити дворец: и к таковому делу, подряжен бысть олонецкаго уезду житель [последи же в выгорецком общежительстве пострижен он бысть во инока, от отца Пахомия, и преименован Корнилием, иже нам сие изо устна повествовавый]. егда же начася дело строения происходити в распространение по уложенному на то архитектонскому плану. тогда милостивая она государыня часто осматриваше оное строение и некако пред явленнаго подрядчика остроумием своим приметя, что он есть древняго благочестия иметель: может наипаче по крестному знамению двема персты, еже он при начале и окончании повседневнаго дела, обычай имяше крестным знамением ограждатися. благоизволила его царица некогда спросить ведущь ли он есть священнаго писания: он же правдою объяви что невежа того есть. ибо все время свое изживаше в плотническом рукоделии: то по писанию держай в руке повсегда рало, или подобно же рещи и секиру, како может умудритися. государыня вопросила, что есть ли кто из древних благочестия содержателей, искусный в писании во граде сем; на что он отвеща, яко может найтися [ибо ведал он про отца Андреа Дионисьевича, яко обретается в Москве] и государыня изволила приказать, чтоб он к ней в комнаты небоязненно онаго привел.

С потщанием взыска и обрете отца Андрея Дионисьевича представи вскоре пред царицу. она же сперва вопроси его о роде и сожительстве, и о нуждах пребывания в том граде: на что премудрая она глава, толь сладостно, и толь благоучтиво и премудро отвеща. яко учини себе весма царской оной высокой особе, в великую привести милость. подобно пророку Даниилу, еже мудростию своею получаше пред всеми вавилоньскими царями. и по многом о многих материах разглагольствии, приказала государыня принести старинныя древлепечатныя книги: Кормчую зовомую: Кирила Иеросалимскаго, Ефрема Сирианина, и прочия и повеле оныя ему по частям пред собою прочитовати, на уготованном месте. сама же и со дщерьми своими девицами Анною Ивановною, иже послежде бысть многолетно всероссийскою императрицею, и другою, весьма прилежно послушаше на долг час чтомаго: недоуменное же что им, разрешаше риторственно пространнейшим толкованием, благоразумнейший отец, и зело сладкоречением своим внимательных их учиняше.

И тако блаженный отец Андрей часто во дворец хождаше, и пред царицею древния книги чтяше, и недоуменное словесы своими благоразумно толковаше. за что она зело возлюби его, и некогда возглагола ему о милости своей, и до всего братства. надобно ли вам рече хлеба, у мене есть собственно в магазейнах моих здесь лежащаго. и аще потребно, то возми колико хощеши. Андрей же [тогда вскоре без испытания тако учини, аще послежде и раскаяся о сем] рече: далеко отсель милостивая государыня к нам доставляти хлеб оный и весма много надобно на провоз денег. царица же прирече, а когда хлебом взять вам от мене подарок за далность неудобно. то восприими же сиими пенязями: и даде ему сто рублев глагола не позазри за малость, истинно в деньгах великую в настоящее время скудость имею. много бо их, яко в строение, и в прочия наши потребности, надлежит ныне выдать. премудрый же наш учитель древности взяв за труды свои жаловальныя пенязи: и по благодарении приличном времени, и царьскому лицу, изыде вон из комнат царевых. егда же прииде на подворие свое и объяви все клевретом своим. тогда разсуждаху, взяти бы хлебом: и оный променити на прочия нужныя братския потребности, а онаго весма было довольно в собственных царицыных хранилищах то бы зело подарок был усугублен против полученных сребрянных талантов. но не сребролюбивый он муж, аще мало и раскаявся за оную вскорости тогда недоуменность. однако восприем скоро по имени своему присно от него во всем неотлучаемое преблагое мужество. и паки размышление оно сетовное, предложи на благодарное и радостное глаголя: чим Бог нас наградил братие, чрез лицо царьское, тем ныне и да будем довольни и благодарни. аще же он восхощет преблагий дародатель, и более сиротство наше наградити. то не закоснит по величеству милости своея тое ими же весть судьбами учинити, благ бо есть и милостив Господь: по потребности нищеты нашея, никогда же презрит верно наше убожество. По прибытии же во общежительство свое, в знак благодарения, посла ея величеству живых еленей, за что получил в награждение высочайшее ея царьское писание, и со именованными денгами пятиюдесять рублями. а особливо неоцененное благодарение, от толико прославленныя царьския персоны.

 

Царьское писание ко отцу Андрею Дионисьевичу.

 

Андрей Дионисьевичь.

Благодарна за вашу любовь что прислали ко мне от еленей, и паки благодарствую, и впредь прошу о лебедях и о журавлях, буде можно промыслить.

Да послала я к вам денег пятьдесять рублев в милостыню.

 

При сем

царица Парасковия.

 

Оное же ея просителное приказание о лебедях и о журавлях живых с велиим потщанием вскоре исполни. ибо он благоразсудителный отец, зело бысть попечителен в таковых вещех. и наиболее тщашеся по присном дненощном угождении Господу Богу. угождати и земным властем поставленным от небеснаго же по священному писанию судити подвластных человеков, и тако чим мощно бе братство все поучаше таковым великим персонам всегда благоугождати кроме точию единаго в благоверии ущербу.

По времени же некоем, случися государыне оной Парасковии Феодоровне быти на петровских заводах. ибо врачевашеся, у марциалных вод, которыя от оных заводов разстояние недалеко имеют. то время довольное пребываше на заводах во уготованных покоех, и со своими дщерьми царевнами Анною Ивановною.

И тамо бывша повеле возвестити благоразумнейшему Андрею Дионисьевичу, дабы к ней из пустыни приехал, и он неленостно прибыв, учини поздравление весма достойное и приличное особе ея. потом государыня изволила учинить с ним продолжайшее разглагольствие о многих вещах. и отпуская его вон ис покоев своих заповеда да бы с заводов не отъезжал. по ея отъезд оттуль в Санкт Петербурх. и тако разумнейший он муж живяше все время на петровских заводах,  донележе оне изволила съехать в Петербург. во время же то повседневно к ней хождаше, и о всем разглагольствоваше: особливо же от священнаго писания, чим и древнее благочестие непозыблемо быти утвержаше. и сие не втуне бысть. ибо егда едина из дщерей ея бысть всероссийскою императрицею, Анна Ивановна, тогда в царьствующий Санкт Петербург приехав на поклон от всея пустыни стряпчей Стахий Осипович: и егда допустиша до ея величества: то она взглянувши изволила спросить, не ты ли старичек часто похаживал к покойной матушке моей Парасковии Феодоровне, и книги читовал. он же отвеща что не он, но их настоятель Андрей Дионисьевич. она изволила сказать, я помню его: ибо часто видывала еще в девицах у матушки. и сие глаголала весма приятным видом. и веселым гласом при многих господах. да тут же прилучися быти и некий российский архиерей, той вопроси Стахия. почему вы раскол с нами учиняете. он же рече ему: мы не учиняем расколу никакого: но точию молимся Богу, по древлепечатным книгам. архиерей на сие некако гордо проглагола: да какия старопечатныя у вас книги, что врешь книги все есть одни. на сие всемилостивая государыня возглагола: никак ты архиерей и старинных книг не знаешь, а в спор входишь. есть старопечатныя книги тии иже при первых царях печатаны: и сих у покойной матушки моей много было. аз сама видала и читывала. ис коих одна псалтырь и теперь есть у меня в кабинете: в ней же напечатано креститися двема персты, так как они крестятся. [указуя перстом на Стахия с товарищем] архиерей же весма обробел, и великом от оного постыждения не знал что более и говорить: но немы быша, по писанию уста его. императрица же изволила пустынножителей жаловать денгами и платием, и с миром отпусти их во своя си. зде благоразумный читателю внемли прилежно едину российской императрицы приятную до премудраго нашего учителя речь: что изволила рещи знавала его, и после оной, коликое показала защищение древности против гордящагося архиерея. чего может оное стоить. аще она и присно заступала о староверцах во время царствования своего против всего синода. ведая справедливость древности, сказуемое ей от премудрой матери своей Парасковии Феодоровны. ей же донесенной и свидетельствами многими утвержденной, от премудраго нашего отца Андрея Дионисьевича. в чем он немалое время труждался пред их высокоцарскими персонами. Колико же его, бывший в тогдашнее время, почти первым в России словесником, и великим оратором, новгородский епископ Феофан Прокопьевич, желаше видети, и с ним беседовати. зело бо многих о сем прошаше, да бы его представили на сие, где бы то случилося лучшее быти. и часто к нему своеручно кое о чем писаше присно. нарицая его возлюбленным во Христе братом. на что не худо и отец Андрей отписываше ему. Егда же восприимаше епископ когда писания от отца, тогда весма изменяем являшеся: и яко бы за не простое весма дело приимашеся. читая же писмо, часто на главе своей камилавку рукою к верху подвизаше, являя сим высокость мыслей писаннаго: и острое свое того понятие и разсуждение, яко же многим есть великоученым сей обычай, при важных случаях являти.

А по вшествии ответов наших в Синод, ничего он про них не глаголаше и не писаше уничиженнаго. а кроме еще увеличителных метафорических некиих слов, как некогда улыбаясь, сие проглагола своим товарищем: вот Андрей Денисов изрядную нам [указуя рукою на ответную книгу] балдахин здесь повесил вновь. и как о премудрости сочинителя, так и о них во многия иностранныя государьства, к славным учителем писаше, нисколько честности и славы не умаляя, что сущим нашим общежителем учинися известно, в датьском государьстве. ибо егда они тамо зимоваху, в доме ученаго пастора: и по частом собеседовании с ними, дознався он о нашем месте, и исповедании веры, громогласно воскликнул. о знаю я вас из сего. писал о вашем учителе похвално из России епископ Феофан Прокопьевич к нашему бискупу, предъявляя изрядно и писателя, и хвалимое ваше ответное написание: аз же слышах от онаго своими ушесы.

 

О посланном из Синода учителе, иеромонахе Неофите.

и о разглагольствовании с ним выговских пустынножителей, о вере,

и его вопросах, и о данных ему ответах.

 

От мироздания, 7201-го, года. сентября в последнех числех. в прошедших [по счислению настоящаго гражданьства] 1722-м году. прииде на олонецкие петровские заводы. посланный из духовнаго Синода иеромонах Неофит, иже объяви, яко во оном 1722 году, апреля 22 императорское величество, Первый Петр. будучи в Преображенском указал к нам обретающимся во олонецком уезде староверцам, послати из Синода духовное лицо, для разглагольствия, о происходящем церковном несогласии, и для увещания немедленно: чего ради оной иеромонах из Синода послан с указом и пунктами, и с книгами. а по явлению его иеромонаха велено господину олонецкому лантрату, указом нам в пустыню объявить, и на разглагольствие с ним сообщити: егда же сие сущии в нас выгорецких пустынь жители услышавше: пост и молитву, во всех пустынножительствах проповедаша, к Богу всемогущему молитвами слезно вопиюще. Бога в помощь призывати усердно потщашася, и пресвятую Богородицу, и всех святых, и всех российских чюдотворцов прилежно моляще, дабы всемилостивый Господь Бог молитв ради пресвятыя Богородицы и всех святых, помогл убогим и грубым. тако благочестие невредно соблюсти, яко в разглагольствии безнапастным и непостыдным явитися. и тако убо молитвами и постом подвизающеся: не пренебрегоша же и приезда учителева, и не обленишася делу подвига касатися. прежде даже о разглагольствии ис канцелярии от  иеромонаха указ не прииде, не единократно посланными пустынножительми, новоприбывшаго на петровския заводы учителя иеромонаха познавше; ово убо честь воздающе присланному по высокому указу от высокаго Синода лицу. ово же учительство познавающе, да коль явится полезно. обще советом и разсмотрением разсудити удостоиньствуют. ово же смиренно моляще учителево лице, да милостиво а не обидливо поступает со убогими людьми: и како и о чем и о каковых вещех быти разглагольству, известно да учинит, и пустыннии убо со смирением милости и щедрот просиша, той же ласков показовашеся: аще по воли его вси склонимся. аще ли же в древлепреданных благочестия уставех пребудем, и его согласия не приимем, разорение обетоваша, и немилостивно расхититися всем надглаголоваше. и бехом тогда вси пустынножитилие в страсе и молении и подвизе, ожидающе что первие, и како о разглагольствии присланный учитель поступит, той же сице начало о разглагольствии произведе. написа бо 106 вопросов, и подаде премеморию господину лантрату. произведе ис канцелярии петровския указ. и подъячего с солдатом с ним же сложенныя его вопросы к нам послати, и повелено в указе за жестоким запрещением, на оные его вопросы написати нам ответы, и с теми ответами определенным от нас пребыти на петровския заводы, в последних декабря числех, онаго 1722-го, году. на тихое кроткое и безопасное разглагольство с ним иеромонахом: посланнии же подъячей и солдат с указом и с вопросами прибыша к нам в выгорецкое жительство, онаго декабря, в первых числех, и привезе подъячей форму счиненную от иеромонаха Неофита. противо которые приказано ему от него. взяти у нас выгорецких пустынножителей скаску, в ней же написано от нашего лица, что нам на присланные вопросы написати ответы, и с теми ответами, определенным от нас стати к нему иеромонаху на разглагольствие. того же декабря месяца в последних числех. а не за статие на той срок со ответами на разглагольствие, повинным быти гражданской казни, или к их церкви покоритися, и протчая, и он убо с таковым умышлением, и тяжкоприказанием вопросы своя посла. пустынножительные же случившыяся, посланнаго подъячего честно прияша, и указ выслушавше, присланныя вопросы прияша: и расписавшеся с ним тако, праведною совестию написаша яко в такое краткое время, ответов, на толикия вопросы, написати невозможно. а писати ответы общепустынным советом радеюще, тщатися о сем усердно будем. и егда написаны будут, определенныя от нас, со ответным разглагольством приидут, и протчая. и тако отпустиша подъячего. о ответах же попечение восприяша вси, всея пустыни жители, моление к молению с постом к Богу и святым о помощи простирающе. в первых предводитель Андрей Дионисиев. приим о сем велие попечение, и труды к трудом нощеденно приложи: кийждо бо вопрос почитающи подобен и ответ с подлинными свидетельствы и обысканием написоваше. пособствоваше же ему и брат его Симеон, и Трифон Петров. яже общим советом разсмотряюще и засвидетельствующе. но Андрей все сам писаше. а на собор на свидетельство всегда полагаше и читаше и разсуждаше и советоваше. к сим же посланными петровския заводы познавахом, моляще учителя иеромонаха, да не нудит скоростию паче силы о написании ответов извествующе, яко нелестным тщанием пишутся ответы: иеромонах же непрестанно понуждая бяше, и командиром о сем скучаше, и посланных наших понуждаше, и в Синод писаше, и всяко тщание о сем показоваше, да свободное время не дастся нам к написанию ответов, но да скоростию и принуждением принуждени будем паче силы нашея: откуду нам страх и мнение учитель о себе подаваше: ибо тем показовашеся не по разсмотрению добре нашему ответству. но неразсмотрителной в словесех оплошки, и неисправным быти ответом нашим желаше. в сих убо декабрю месяцу прошедшу. в генваре же нача оный иеромонах от пустынножителей на словесное разглагольство до совершения ответов позывати: о сем командиром заводским скучаше и о сем посланным нашим притужаше. яко же некий борец от желания победы потрясаяся борца призываше: сице он неотложным тщанием не дождався ответов, на словесное разглагольство принуждаше. о чем господьствующий с заводов приказаша нам, да пришлем определенных на разглагольство: чесо ради пустынножители и общежители и скитяне Бога сиротам помощника призваше на помощь и пречистую Богородицу и всех святых призывающе беззаступным в заступление. отпустихом от общежительства Мануила Петрова. и от скитян Ивана Акиндинова, иже в надежде Божии немедленно заводы постигше, явишася господам и учителю иеромонаху. они же назнаменоваше день разглагольствию, февраля вторый, вонь же к нему иеромонаху в фатеру собрашася множество, приказных и мастеровых и прочих заводских жителей. прииде и господин лантрат и прочии командующии офицеры, идеже позвашася помянутая Мануил и Иван: и первое вопроси иеромонах пустынножителей глаголя. вси православнии християне яко и до царя Иоанна Васильевича; православную ли имели веру; отвещаста пустынножители светлым гласом, яко вси православныя россиане, от начала крещения, и до царя Иоанна Васильевича, и до Никона патриарха всесоборне православную веру, православно и безраздорно содержаша. яко же о сем многия истории засвидетельствуют: тогда иеромонах нача деяние соборное чести. [о нем же во ответе девятом, коль оно сумнително есть написано] и егда дочтеся, о печатовании просфир двочастным крестом: вопроси о том пустынножителей. восприим же слово Мануил и рече. первие должно есть разсмотрити, на коем виде креста Христос распятся, на трисоставном или, или на двучастном: ибо той есть крест Христов, на нем же Христос распятся, а Христовым крестом безсумнительно есть всем просфиры печатати: и вопроси иеромонаха: на трисоставнем ли кресте, или на двучастном Христос распятся; отвеща иеромонах, Христос распяся на двучастном кресте: Мануил вопроси; аще Христос распятся на двучастном кресте; покажи от святых писаний. показати, тако засвидетельствующих. иеромонах же от святых писаний показати сего не возможе, своетолкованием же тако утвержаше. но пустынножители толкование иеромонахово недостоверно засвидетельствоваху: принуждаху же его показати свидетельство от святых писаний, тако ясно по его слову повествующе Христа распеншася на двучастном кресте. и понеже иеромонах свидетельства от святых писаний показати не можаше. тогда пустынножители засвидетельствоваша. яко Христос распяся на тричастном кресте, на трех древах. по пророчеству Исаину, на кипарисе и певге и кедре, и о сем святии богословцы засвидетельствуют. отец Златоуст, Герман патриарх Царя града, Григорий Амиритский, Иоанн Дамаскинский. вкупе же и вся древлевосточная и российская святая церковь священными книгами, и иконоизображением. исповедает Христа распята на тричастнем кресте, на кипарисе и певге и кедре, и многая о сем свидетельства предлагаху, [кая во ответе 65-м положена суть] и старых и новых книг о сем засвидетельствоваша. кая свидетельства реченная ясне показаша Христа распята на тричастном кресте, на кипарисе и певге и кедре. противо к сим иеромонах сопротивословити не можаше. токмо егда глаголашеся церковное свидетельство святым Дамаскином, во октаи воспетое, на кипарисе и певге и кедре. вознеслся еси агньче Божий тогда он рече, вы не знаете которым разумом Дамаскин писа сие слово, понеже четыре разума божественнаго писания суть: на сия его словеса возответствова Мануил истинно четыре разума, ими же познавается божественное писание: аллегорически, анагорически, нравоучительне же и по сущему разуму: зде же словеса Дамаскинова о трех древесех распятия Христова, реченная ясно показуется, по сущему и неприменному разуму глаголана суть, никакого преношения, или возвождения имеющая суть: противо сим умолче иеромонах, и обрати инамо беседу, и рече, царь Давыд глаголет: жезл твой, и палица твоя, та мя утешиста; сия словеса толкуют святии на крест Христов; отвещав Мануил, той же Давыд во ином псалме глаголет: жезл силы послет ти Господь от Сиона. сие слово святии отцы толкующе на крест Христов приводят: и аще мнится не тако сия речена, благоволи на среду принести псалтырь толковую, юже у себе имееши, и вместе разсмотрим, реченная словеса, он же не принесе на свидетельство книги. пустынножителем же о сем принуждающим, той же отречеся, и тии просяще и притужающе его, да очистив речи своя, еже рече о распятии Христове, иеромонах же о той беседе престатия проси, на иныя речи прейти тщашеся. и воспомяну о четвероуголной печати, яже у них печатается на просфирах,  о сем рече ему Мануил, святый Симеон Фессалонитский, в своей книзе засвидетельствует: в восточней церкви печать на просфире круглообразну имети, знаменающе тем безначальнаго и безконечнаго Бога. посреде ея крест: такожде и в древлероссийстей церкви до Никонова пременения, круглообразная печать на просфирах печаташеся, согласно древлевосточной церкви, и тако пишущему святому Симеону. чесо ради у вас сия печать пременися, и от тебе мне проповедуется четыреугольная а не круглообразная печать, не согласно древлевосточней, и древлероссийстей православной церкви, и святому Симеону восточному учителю, тако написавшему; отвеща иеромонах, и наша сия четвероуголная печать, круглообразно же, аще и на четыре углы обаче кругом креста со всех стран граничит: на сия рече Мануил,  круглообразное не может нарещися четвероугольное. яко же и четвероугольное не наречется круглообразное: ибо четвероугольная печать имеет четыре углы, круглообразная же углов не имеет. четвероугольная четыре линей имеет, от угла до угла гранящися. круглообразная же едино без концев окружение имеет, тем же четвероуголная ваша печать не может нарещися круглообразная, понеже не есть круг, но есть и нарицается четвероугольная, и четвеространная. того ради и таинства онаго онаго еже знаменует круглообразная печать, четвероугольная знаменовати не зрится. на сия словеса умолче иеромонах инная разглагольствоваше, о многих еже о инных содержаниих. церковных по два дни беседоваху, о них же всех краткости ради оставляем зде подробну писати. вкратце вышереченная помянувше, да от мала вкушения качество брашен познано будет. в котором разглагольстве во многих предложениях вопрошаем иеромонах очищения слову от святых свидетельств не можаше показати на инная словеса прехождаше. и киих книг новопечатных на свидетельство слова у него вопрошаху он же не даяше: пустынножители же предложенныя речи, достоверными святыми свидетельствы утверждающе засвидетельствоваху, якоже и во ответех написанных показуется. чесо ради многи слышатели разглагольства сего разшедшеся; оглаголоваху иеромонаха Неофита. яко до разглагольства вельми хвалящагося. а на разглагольстве же инакова явльшася. и тако за праотеческое святых благочестие, пустынножителнии кротко беседующе, смиренно и мирно отпущены отъидоша, благодаряще всесильнаго Бога, умудряющаго немудрыя, и смиренныя заступающаго. сим убо сице содеявшимся, и пустынным жителем Бога благодарящим за содеявшееся. и мневшим о иеромонахе, яко удоволится от бывшаго разглагольства, и тишайшим в прочих устроится, той же паки доношение в петрозавоцкую канцелярию подавает, паки пустынножителей, аки противных, и непослушных его императорскаго величества указу оглаголует и яко отбывателей от разглагольства, и не приходящих к нему на разглагольство нарицает. чесо ради в марте месяце, того же года указ ис канцелярии к нам в пустынножительство прийде, повелевающь с написанными ответы немедленно к разглагольству с ним иеромонахом приитти. зане опасение в прибытии гражданскаго суда и казни бес пощады. паки пустынножители писмом, и посланными отзвашася, с молением в канцелярию, яко его императорскаго величества указу не противны, но послушны и отбывательства не творим. и к нему иеромонаху определенныя от нас почасту приходиша, и на разглагольстве с ним быша и ответы на вопросы его неленостно пишутся, обаче за множество их в марте сем, весма невозможно написати, и ранея праздника Пятьдесятницы отнюд не чаем написанным быти. но учитель иеромонах, непрестая о ответах скучаше, и своими вопросами хваляшеся. и ответам не мощно быти написанным от нас проповедаше, и всяко принуждени будем, прежде времени притти. чесо ради паки в апреле месяце позвахомся на заводы со ответами к разглагольству: по недописанным еще ответам, паки чрез посланных канцелярии и учителю известихомся, и росписавшеся, яко по указу пишутся ответы. а егда зготовятся определении посланы будут со ответами на разглагольство немедленно: но немолчный к разглагольству, и о ответех принуждатель иеромонах, по выну неуемно принуждая бе, и господам командующим о сих скучаше, противно сим творя, и синодольному повелению данному ему, еже в 7-м пункте повелевает. в трудных вопросоответах к скорому и неосмотрителному ответу не принуждати, но отлагати на время удобное, в которое возможно было б справится с книгами, и довольно помыслив разсудит, чтоб ответ был не подозрителной, он же не тако творя, но паче силы о ответех принуждая бе, и паки по его понуждению посланнии пустынножители в начале июня месяца росписашася в канцелярии яко прибудут определеннии на разглагольство со ответами, и конечно июня к 29 дню. и от него иеромонаха известишася. како быти разглагольствию, глголаше бо, егда прийдете со ответами. и при всенародном собрании. аз вам прочту вопрос; а вы прочтете ответ, и что явится несогласно, о том возответствуем, тако вси вопросоответы прочтем. сице убо смело и чинно на словах отвеща учитель разглагольствие творити. сим убо сице бывающим, и оному велехвально наступающе. и пустынным с постом и молитвами, слезно Бога в помощь призывающим, и пресвятую Богородицу и всех святых, о заступлении просящим.

Тако ответы многотрудно и многопопечително зготовившим. тако общесоборне во общежительство собравшимся, сице ответы написанныя прочетше, и рукописанием подкрепихом, сице с общежительства и скитов десять братий избравше с ответами на разглагольство слушати на заводы. в том же июне месяце отпустихом и Божиею помощию посланнии пустынножители на заводы петровския постигоша, и в 28, того месяца в канцелярию определении с ответными книгами явишася, господину лантрату Григорию Федоровичю, две заручныя ответныя книги подаша, единей отдадитися иеромонаху Неофиту вторей же для известия в канцелярии быти. в то же время прибыл на заводы, дому его императорскаго величества обер гофмейстер господин Василей Дмитриевич Алсуфьев, иже возжеле вопросоответы наши видети. и по повелению господина лантрата вопросоответы в книзе написанныя, и руками подкрепленныя ему господину Алсуфьеву подаша. и молиша слезно его благородие, да свезет и подаст оные ответы всепресветлейшему императорскому величеству, желающе да известно будет его величеству наше убогих покорное ответство. паче же известие о убогих нас пустынных людех, иже и обетова свести, и подати его всепресветлейшему императорскому величеству. а господин лантрат по упрошению иеромонахову, поданные наши ответы ему иеромонаху с канцелярии отдаде: прием же он ответную книгу и прочет разглагольствовати тогда отрицашеся, иже яко готовый безпрестанно к разглагольству принуждая, не готов тогда беседовати является, иже глаголавый егда приидут со ответами. тогда чести и разглагольствовати публично будем, той до сентября месяца отлагает, чтение соборное ответов, и окончание разглагольства. и понеже отречеся, весма тогда учитель от разглагольства. назнаменоваша паки время чтению ответов последствующий сентябрь месяц до онаго времени отпущены быша посланнии во своя пустынножительства. приходящу же сентябрю, во августе паки нам пустынным попечение и подвизи, и паки схождение и советы, паки поста и молитв всепустынное подвизание, паки избрахом и послахом на заводы прочести ответы, и разглагольствовати со учителем келейника Андрея Дионисьевича, вышепомянутаго Мануила Петрова, и бывшаго прежде со ответами Ивана Матфеева иконника, и прочих с ними для послужения и слушания: и тако Божиею помощию в начале сентября петровские заводы посланнии постигоша, и канцелярии командиром явишася, и учителю иеромонаху объявишася, и о чтении ответов и разглагольства, дабы во окончание дело произвести моляхуся. той же иеромонах прежде разглагольства, глаголаша им, яко дерзостне написасте во ответах, яко Христос на двучастном кресте не распяся, отвещаша Мануил и Иоанн, по пророчеству Исаину, и по сказанию множайших святых отец, Христос распяся на певге и кедре и на кипарисе, на тричастном кресте, о чем многая святых свидетельства во ответах написана, и понеже на тричастнем кресте, Христово распятие бысть, убо не на двочастнем, тем же согласно со святыми во ответех о сем написано. и иная к сим подобная засвидетельствоваша, и о онех вещех вопрошаеми ответствоваху, и самого его вопрошающе ответ, беседоваху, откуду иеромонах кротчайши явися, и молчанием слово запечатле, и тако мирно разыдошася. паки сентября в 4 день, позвани пришедше пустынножители ко иеромонаху, ту прииде господин лантрат и нецыи от офицеров, и заводских жителей, и собраннии попы. глаголах иеромонах к Мануилу и Ивану, ныне мы вкратце поговорим. чтобы во время разглагольства помешательства не было. и нача вопрошати о том же, о чем у него в вопросех написано: но что ему они ответствоваста. о сем на твоя вопросы во ответех ответство написано: благоволи вопросоответы наши чести и тамо о сих засвидетельствуется. иеромонах же всяк подвиг показоваше, и всяку кознь подвизаше, еже бы от ответов не чести: но Мануил и Иван, многая о сем правдословяху, и моляху господина лантрата, и его иеромонаха, да чинное будет разглагольство. яко же прежде и сам иеромонах обетоваше, да прежде прочтется вопрос; и на той вопрос ответство наше прочтется. на ответство же яко же хощет учитель да возответствует. сице убо и господин лантрат присуждаше, тако и прилучившиися офицеры. приглашаху, сице прочии народи желаху, но иеромонах о сем зело противляшеся, иже многое принуждение о написании ответов чини, и публично я обличити ревнова. той прием ответы чести я публично возбраняти нестыдяшеся, иже возобличение на ответы писа аки неповинныя, той на на разглагольстве чести ответы отрицашеся, аки зело правдиво писанныя, и обличити я чим невозможныя. глаголаше бо тогда сопротивословя, о чтении ответов, господьствующим. аще [рече] публично чести ответы, то церкви и священники истребити, сия и больши сих иеромонаху о чтении ответов противословящу: пустынножителем же о чтении их подвизающимся и молящим и господам чести принуждающим: просиша пустынножители господина лантрата и учителя иеромонаха да прочтется его императорскаго величества указ и пункты да слышатся. Како велено с нами разглагольствие чинить на сия господин лантрат, и протчии господа соизволиша: но иеромонах о сем вельми сопротивословяше, и не хотяше явити, и по многим о сем разглагольствии, егда склонися иеромонах, и прочтен бысть указ и неколико пунктов: и приспе тогда время господам отъити, на господы своя. утвердиша слово, еже во утрие сентября в 5 день, быти публичному разглагольству. господам присуждающим, и прочим желающим, еже ответами честися на разглагольстве, тако того дни разыдошася, кождо во своя си, во утрие же сентября в 5 пустынножителем Бога молящим, и у Бога просящим милости и помощи и ожидающим когда позвани будут на разглагольство. и солнцу убо вселенную осиявшу: учитель же разглагольства не начинаше. и дню убо преклонившуся, ожидаемое же разглагольсто не проведашеся. егда же пополудни четвертый час наста, тогда барабанное позвание во вся заводы возгреме. всем же прилучившимся народом, почю́вшим позвание на разглагольство. со многим желанием собравшимся, ко двору жительства иеромонахова, вкупе народи собравшеся. вкупе приказные и мастеровые снидошася. вкупе командиры и офицеры приидоша, вкупе позвани пустынножители явишася. сице иеромонах с господьствующими на крылец взыде, сице и определеннии на разглагольствие от пустынножителей, Мануил и Иван на крыльце предсташа. множеству же народа окрест предстоящим, и ожидающим ответнаго чтения и разглагольствия. пустынножителем смотряющим, како изнесет учитель. книгу ответную ко чтению. но учитель ответов на разглагольствие не изнесе. принесе же с собою в тетратех написано на некия ответы возобличение, и тое нача чести: Мануил же и Иван возопиша ко учителю. благоволи по указу праведне творити чинное разглагольство. изволь прочести кийждо ответ и на него чти твое возобличение. и тако от обоих пишемых разумно будет коеждо разньствуемое, но учитель не внимаше их вопиению. прочиташе возобличение на первый ответ. но понеже убо не праве писано: прочте бо свой первый вопрос; а на него написа речи с четвертаго ответа, а нань написанное читаше возобличение: чего ради возопиша Мануил и Иван; неправедно пишеши и чтеши, кия речи писаны в том первом ответе, сих не писал еси и не чтеши. а киих речей в том первом ответе несть, оная пишеши и чтеши, сего ради обличения пойде иеромонах в фатеру свою, и изнесе книгу ответную. и в ней смотряше в первом ответе, не обретоша тех речений, а обрете он сия написаны в четвертом ответе, и рече иеромонах, оправдаяся: видите ли яко тыя речи суть в четвертом ответе, рекоша Мануил и Иван. почто четвертаго ответа речи неправедне пишеши, под вопрос первый: а перваго ответа не пишеши и не чтеши; благоволи читати ответы наши, и на них яко же хощеши твори возобличение. иеромонах же книгу ответную не читая, положи на место. а прочте на первой ответ неправое возобличение. на кое его чтение вопияху Мануил и Иван, яко у нас в первом ответе о православии древлероссийския церкви положена свидетельства, изволь прочести, или нам дати прочести она. он же с яростию крича на них, и глаголати возбраняше. и по сем читаше шестый вопрос, и некия речи шестаго ответа. а прочия вопросоответы, наипаче пятый ответ в нем же многочисленная староцерковная свидетельства положена суть о двоперстном сложении, тыя мимо иде, и не воспомяну, но на той шестый ответ писанное возобличение, в нем же читаше, новособранная их свидетельства о триперстном сложении. на которая Мануил и Иван вопиюще глаголаху; сия свидетельства твоя нам недостоверна суть, а кая их сумнения; сия в девятом ответе написана суть, прошаху сия чести, он же чести им не даяше воли, но яростно запрещаше им да молчат, и тако читаше своя свидетельства: и егда читаше написано, Михаила митрополита Киевскаго, о триперстном сложении: вопросиша его пустынножители, в коей книзе, и в коем слове, сие поучение у Михаила митрополита написано; он же на сия им не можаше ответствовати. самех убо вопроси с яростию; почитаете ли за святаго Михаила; они же реша почитаем за святаго. но сего вопрошаем, где у него читаемое тобою поучение, написано есть; он же на сия ответства не даде. но закрычав на них, да молчат, паки читаше. на конец же чтения предложи мнящееся ему крепкое свидетельство. книгу печатную в Киеву, року 1645. нарицаемую Православное исповедание, или Катихисис, в ней же высоким гласом, прочте напечатанное в ней повеление, еже треми персты креститися: на сие Мануил и Иван хотяще показати писание, на книгу оную писанное. но он в то время не даде им чести. совершив же чтение свое, обратися к Мануилу и Ивану, глаголя что вы хотели показати на оную книгу, явите; они же с радостию обретше слову место отвещеваху, на сию книгу его, реша славнии ваши учителие и богословы греки самобратия Иоаникий и Софроний Лихудиевы в сочиненной их книзе Акосе, сиречь Врачевании, во ответе 13-м, о сей твоей книзе нарицаемой Православное исповедание. сице глаголют. и прочтоша писание их в нем же о ней пишет, ко отлучению душ. некая книга явися на российстем языце, и тамо написаша, яже хотеша. новости и новосечения безчисленныя. и наименоваша оную книгу. такожде Православное исповедание, или Катихисис, ниже, в Киеве печатанную, в лета 1645, ниже. и чесо ради и мы недоумеваем, негли инде напечатася, а не в Киеве. и не чада восточныя церкви, сложиша тую книгу, но чада западная. и притворно наложиша. и имя и место написания, и иная, да церковь Божию возмутят. по чтении же сего обличения, на книгу иеромонахом чтенную. иеромонах безгласен явися, и молча на мнозе посуплен бысть. Мануил же и Иван реша ко иеромонаху. видиши ли господине. коль недостоверно есть твое свидетельство. о триперстном сложении: в пятом ответе, коликая светлая и незазорная святоцерковная свидетельства положена суть, яже ты не изволил еси прочести, ни возответствовати на она, но испытания зазорныя книги изволил еси привести свидетельство. которую книгу ваши премудрии учители, яко церкви противную обличают и на прочая твоя свидетельства: аще бы с кротостию послушал, показали быхом чесо ради они нам недостоверни суть. и по долзе молчании, рече, господам нашим учителем разве за сие, книгу сию унедостоверившим, яко повелевается в ней, в тайне крещения обливати: противно сего Мануил и Иван реша: аще бы и едино сие было, еже повелевати обливаемое крещение, противно апостольских святых соборов, и святых отец преданию, повелевающему в три погружения крестити, и не крестящих тако, из сана извергати, о чесом во ответе пятьдесятом. в статии тридесять пятой у нас многими свидетельствы засвидетельствовано: но и в вашей новопечатной книзе Пращице обливаемое крещение зазирает, и латинскаго костела, чинодействием именует. и сего ради единаго та книга зазорно может быти: но в ней глаголют учители Лихудиевы, не едино нечто, но новости и новосечения безчисленная. и не чада восточныя церкви сложиша тую книгу, но чада западная да церковь Божию возмятут. чесо ради таковая книга недостоверна и зазорна и православной церкви весма неприятна есть. к сим же словесем иеромонаху конечно замолчавшу, и господину лантрату и прочим господам двигнувшимся. понеже и нощней тме нашедшей. и народом разшедшимся оглаголующим учителя, яко ответов не чте, и решения им не показа. тако разглагольству сему окончавшуся, тако народом разшедшимся. тако внутрь дому иеромонахову и нам вшедшим. и тамо тогда по случаю в разговоре воспомянуся слово о пятиперстном благословении. его же неизобразующии римляне перстам литер Исус Христос, знаменающее Исус Христос в глаголемом Феогностове требнице проклинаются. пустынножители же хотяще показати всем неправедная их свидетельства. рекоша о сем ко иеромонаху, неправедно видится о сем римляне не проклинаются, за еже сих литер не изобразуют перстами на благословение. понеже римляне по своему их языку и грамоте не такими литерами имя Исуса Христа пишут, и хера литеры в римстей грамоте несть. тем же чего им по своему языку изобразити невозможно, и чего в своей грамоте не имеют. неприлично их за то проклинати. иеромонах же о сем нача претися и глаголати. яко есть хер литера у римлян, и прилично оны проклинаются, занеже его имеюще не изображают, пустынножители же, показующе известно, яко несть хера литеры у римлян и у прочих западных западных иноземцев, изволь допросити, у обретающихся зде иноземцов. прилучижеся ту иноземец господин прикащик завоцкой, и вопрошен бысть. прямо показа яко несть хера литеры в римской грамоте. и инако они имя Исуса Христа инеми литерами пишут, неже россиане и грецы: сия услышав умолче иеромонах о сем. напоследок рече к пустынножителем. вижду яко вы к нам не приклоняетеся в согласие. буди же ваше с вами. а наше с нами. пустынножители же реша еже мы древлецерковное благочестие ответами нашими засвидетельствовахом. сие согласно со святыми российскими чюдотворцы, буди с нами, а еже что новое от Никона и прочих произшедшее древлецерковному благочестию несогласное, и вам любимое сие буди с вами, иеромонах же рече, не от Никона наша начася. пустынножители же реша, новопечатныя книги древним несогласныя, и новопреданныя чины, от Никона начашася, иеромонах же рече, Никон да будет с нами, а не с вами. пустынножители же рекоша, с вами и  пред вами да будет Никон. мы за него не стараемся. и тако учителю со смирением поклонившеся: мирно тогда разыдошася. по сем во ин день пустынножители просиша учителя иеромонаха, написанных его возобличений преписати ради общепустыннаго разсмотрения: ведый же он правоту своих возобличений. о сем отказа. паки молиша его да поне прочести им даст: он же и прочести им не изволи дати: откуду показуется, како есть возобличение его, яко не смеемо податися к разсуждению, и учити противящихся: по сем иеромонах написа краткое разглагольство, от лица обоих стран яже он некия ответы и чим зазирает. и яже пустынножители ему отвещаша. но понеже обретошася у него мнози излишныя речи писанныя. о которых сопротивословиша ему Мануил и Иван такожде и господьствующии повелеша между собою советно просвидетельствовати разглагольство, и которая страна на какия свидетельства ссылаются. Тако вкратце да напишем. и тако вместе друг ко другу собеседующе. излишныя речи отложи иеромонах. написа же он вкратце чим зазирает на некия ответы. а пустынножители на ответы ссылающеся, и положенными свидетельствы оправдающеся. тако вкратце подписашася, тако оное краткое разглагольство он иеромонах и господьствующии и прочии от знатных лиц, и поповскими руками подкрепиша. и тако разыдошася, и пустынножительнии подвижники от иеромонаха и ис канцелярии с миром отпущени быша. возвратишася в пустынножительство, благодаряще Бога, младенцы умудряющаго, и беззлобивыя от сети ловящих избавляющаго. сице убо пучину разглагольства сего чрез годищное время всепустынно подвизающеся плавахом, с сентября месяца, 1722. наченши сия подвиги о благочестии подвизатися, всепустынно собирающеся и советующе, часто всепустынный пост и молитвы о помощи Божией проповедающе. беспрестанное к Богу и святым вопиение о заступлении слезно творяще. тако нощеденно Андрей Дионисиев великое тщание и труд показуя, о древлецерковном благочестии с великою ревностию. и прочии пособствующии. ов убо труды, ов попечением, ов благими советами и разсмотрением, а овии слезными молитвами, и постом труждающеся. в шесть месяцев ответы сия написаша. тако Божиею помощию, чрез посланных со учителем разглагольствующе. коварных его наношений избывахом. тако в сентябре же месяце. 1723 году со учителем на заводах плавания сего окончание получихом. но воистину Божиею помощию, и заступлением пресвятыя Богородицы, и российских чюдотворцов, и всех святых многоволнуемое плавание сие преплыхом уже и псаломски умиленно возопием. Бог нам прибежище и сила, помощник в скорбех обретших ны зело: псалом 45. благословен Бог Вседержитель, иже и младенцы умудряяй, немощным заяцем левское мужество подаваяй, и запинаяй коварныя в коварстве их. и беззлобивыя от сети ловящих избавляяй, иже и нам грубым и убогим и загнанным людем помощь подавый, о древлецерковнем святых благочестии ответствовати. тому единому в Троице славиму Богу нашему. подобает всякая слава честь и поклоняние, ныне и присно и во вся веки аминь.

 

О написании блаженным отцем Андреем Дионисиевичем,

нижеградских ответов.

 

Егда убо благоразумный отец Андрей Дионисиевич, приеха из Выговской пустыни в Москву, и спознася тогда тамо с единым весма добрым человеком, из согласия нарицаемаго поповщина, с которым они весма потщателно многия обыскаша вещи, иже зело подкрепление дающе древлецерковному святому благочестию. егда же прииде нужда велия нижеградским староверцам отвещати писменно против злодыхающаго на всех християн а особливо на них нижеградскаго их бывшаго епископа, злолютаго Питирима: тогда они вси яко к могущему зело своему благодетелю оному отца нашего, предреченному другу учиниша известие, и прошение, дабы спомоществовал в настоящей их нужде. но оный муж ведая их всех немощь в писменном руководстве, и яко ко оному составлению. непременно быть надлежит грамматическому правописанию. и риторическому искусству, и непогрешению в ведении превысочайшей богословии. да и всего священнаго писания. недремлющему оку. сего же во своих никако обрести не можаше, аще и на всех купно ум и очи возвождаше. но точию разумеваше во оном быти, великому иметельству, и неоцененному богатьству у нашего преславнаго любомудреца и учителя, весма нача его умиленно молити дабы он вступил в настоящее бедственное [за их согласие] тризнище. давая ему все нужнопотребное, к написанию их ответов. отец же аще сперва и вельми отрицашеся дела того являя аки бы свою немощь, при том же и несогласие с их мнениями: кое может некакое на него нанести во своих подозрение. но обаче по велицей зело их прозбе и умалению нача помышляти о вступлении в тое дело: предлагая себе во первых милость, могущую его из всех подозрениев извлещи. ибо аще в толь бедственной им нужде помощи не восхотел бы, то разсуждая еда како и самому в нуждах присных, никто помощником не будет за сие. а христианское наше любомудрие. аще и всякому скоту милость, в бедственных заблуждениях являти поучает. не точию толь словесному существу, да еще тогда и вообще против новолюбителей трудящихся во многих изысканиих, и древних свидетельств. и тако благоразсудя, призвавши в помощь непреоборимую силу, иже наиболее в немощных высокия своя действа являет: поступил во глубину новоучебнаго своего ответствия от лица нижеградских староверов, и восприимши трость писателную, и все потребное к составлению оных сооруди желаемыя ими вси, чинно ответствия: за что великое от всего их согласия получил себе благодарение, и несколько на скудость пустынную ис пенязей награждение: паче же всего для своих ответствием послежде бывших, от онаго получил себе превеликое во всем  обагащение: ибо яко уже обученный воин противо Неофита, зело храбро поступи, и победи. и восторжествова. при том же не преминул изъяснити в ответе, и о святом крещении: яко древния священники паки приходящих из российской церкви под новым крещением совершенно крещаху. и аще сие согласию их поповскому и диаконскому, и поныне не весма мило: обаче выняти сего, из оной весма приятной им книги не могут, и сим запечатленно есть крепко, что наш, [а не их] всепремудрый учитель, имел труды, в толь великом в первоначалии дел, для всех староверцов, а особливо для их согласия, чим они и благодарны суть.

 

О порицании Питиримовом Андрея Дионисьевича, волхвом:

 

Во время своея власти, Питирим Нижеградский епископ, уже по выдании деяния соборнаго и Пращицы своея разглагольствоваше с почтенным некиим нижеградским посадником о древних и новых книгах, и привниде речь о Андрее Дионисьевиче, како он великое недоверствие явил в своих ответах на деяние соборное, и требник Феогностов. Питирим же при оных речах весма весь изменившися в лице и прочих составех, зело яростно воскрича: волхву ли сущему верити подобает. ибо Андрей Денисов действительный волхв есть: о чем я достоверно знаю. и тако сим точию и безосновательнаго доказательства затушил возженную тогда в словесах важность о злоковарстве своем. аще же и в Пращице многое ухищрение во оправдание свое показывал, еже бы како возмог вытти ис посрамления, обличающих во оном же. но все есть зело похоже на слабую паутину, в ней же точию самыя слабыя умы подобныя мухам могут увязнути: крепкия же вскоре преторгнут зане весма гнила и рыхла есть сеть его уловляющая разве когда во мраце сладострастия, а не во свете веры правыя сердцем.

После же вышереченный посадник, паки во время праздное и спокойное един на едине Питирима вопроси, о Андрее Дионисьевиче, еда правда есть реченное им. яко Андрей искус волхвания имать. епископ же аще уже и не с такою яростию как прежде извещал: однако паки с великою ревностию нача его оным порицати, вину наиболее предлагая, что во многих вещех естественно никако возможно человеку просто знати, яко же Андрей волхванием своим творяше сие же все вящьшее по его речам тогда клоняшеся, за праведное изъяснение, ложно вымышленных его. Деяния и Требника, книг. о чем он почти без закрывательства многаго тогда выговариваяся, во гнев прихождаше. что мог без труда почювствовать вопрошающий. и сие все послежде поведая содержателем древняго святаго благочестия: приглашая и то что де аз хотя с вами и не согласен есмь в вере: однако видел у вас правду и ложь происходящую от епископа Питирима. и думаю что хулимый от него ваш учитель Андрей Дионисьевич, не волшебством порочил новыя книги, но священным писанием, и естественным своим острым проразумением. ибо де мне он ничего праведнаго не доказал о поношении толь злом, а кроме во гневе своем часто упоминая свои книги, аки бы неправедно Андреем опорочены. да и весма зло люто: могуще не точию простых людей поколебати сомнением. и после того оный муж зело бысть ко всем древнолюбителем приятный и в нуждах многих помогателем, бе бо не убог в вещественном имении своем, аще в безвещественное богатство святаго благочестия, за многими мирьскими суетами прийти и не мог. но благим разсмотрением правды, несколко удовлетворил, истинных древности содержателей.

В подкрепление же лучшее истины сея: да привнесутся зде и яростныя глаголы писателя на выгорецкия ответы обличения, Феофилакта епископа Тверскаго, кия не ложно слышавшия древнолюбителем объявиша: от них же и мы написахом, по написании в сей обличителной книги нецый архиерей ведущий ответное наша, вопросиша Феофилакта. почто толь знаменителнаго обличения не внес на ответы; за великую дерзость опорочения ложными и подметными быти, книг Деяния соборнаго, и требника Феогностова. кое бо зело нужно правильно обличити, дабы расколотворцы [нарицая сице нас] не возвышали на нашу церковь своих бровей: и нас аки бы в неправде порицанием не срамили. на что Феофилакт по обычаю своему яростно отвеща: пусть на сие пишут возражения тии, котории в том Питириму помогали, а я писать никогда на то ничего не буду. что по справедливости им и учинено: ибо несть о сем в книзе его обличении ни единаго слова: аще бы неотменно по творческим правилам, и целую главу надлежало писати. понеже во ответах колико пространно ложь оная изъясненна многим писанием безбоязненно: и доказано ясно и чисто, что книги тыя Деяние, и Требник, не древния есть и истинныя по их изданию, но суще новоподметныя, и ложно на древнее благочестие клевещущия и хулящия то. убо возможно ли бы претерпеть сие без досады, толь зело всеяростному писателю обличения: который не стыдился безстудно чертка́ть и зельно поносить староверцев, за непреоборимыя почти доказательства в крестном знамении. Коликое же бы учинил нападение великое за нарицаемую ими дерзость в порицании ложными книгами синодально всею Росиею принятыя и утвержденныя. и по истинне бы тут он уже тое учинил, что писал на нас неискусных суще в сих действах. то есть. восплясал бы, и возскакал легкою рукою обличения на пространныя наши опровержения сильнаго по сему свету дела. восплескал бы глаголю громко о историческом нашем невежестве. аще бы во оном почювствовал правду свою легче бы ему было и самыя греческия подлинники отъискать, нежели по его высокости сана, наипаче, а не мудрости, стерпев от простых мужиков, толь смелое уничтожение приятных церкви их книг, в которых свидетельстве, и митрополит Стефан Рязанский имеется, и прочих лиц немало. но Феофилакт пишет много о незнаемых почти никому, а не точию староверцам, каких то старухах и бабах. и нисколько сим не изъявляющим читателем благоразумным пользы и учтивства архиерейскаго. кроме точию разве смеха, толь знаменитому сочинителю нисколько несвойственнаго по сану и по летам. сущее же самое дело во своем целом звании опускает. ибо не старуха ис подполья шепчет, какой деревеньской бабе, что Деяние соборное великолепно на старой хартии писанное, такожде и предревний по их учительству, Феогностов требник, книги есть ложно подметныя, и на изгнание древняго святаго благочестия, нарочно злоухищренно внове на древних листах написанныя. и в народ выпущенныя. но пишут сие в целой большей своей книге, великое общество ведомаго пустыннаго народа в сей России. и оное небоязнено своими сущими руками подкрепивши и своими же руками поднесоша чрез иеромонаха Неофита, всему российскому духовному Синоду. говоря необиновенно во оном писании своем, что две книги тыя, совершенно ложныя суть да и прочия новоизданныя правды в себе христианьския не содержат, а точию едиными школьными софизмами, усильствуют благоразумных молчать. Сему ли возможно уступить, аще бы оно было неправедно, не уступающему почти целому западу, во издании со своим свидетельством Каменя веры, против всех латин и немцов. не точию бы готов он был нас презелно обругать, аще бы возмог изыскать во ответах наших, какую во опровержениих их книг, хотя малую неправду. но едва ли бы за то, не прогрозил громко и оземствием своим лютым, или и иною казнию. ельма же изобрести ничего невозможе, а точию судил быти праведным, особливо же на писание тое, иже неправедныя две их книги зельно востязаша. сего ради дерзостно и глаголаше преди реченныя словеса: да пишут защищения на тыя книги, тыя авторы, котории помогали во оных Питириму. аз де [аще и не глагола сего, но делом учини] хощу быти свободен от того. и тако ниже о том мало упомяну во своем обличении. сим показуя праведно быти все преднаписанное нами, яко о Питириме, тако и словесем его. и егда он устыдился правды, и не восхотел на ню подняти свою руку. то возможно ли быть Питириму того производителю без ярости и гнева, на оное проницателнаго изобличителя отца нашего Андрея. иже толико изыска в том неправды и лжи, елико имеется писательных букв. но и сии самыя не остави без правилнаго истязания: но что сии: и самыя, не точию харатейныя листы, но и нити имиже сошвены быша книги тии, зело добре разсмотривше, изобличиша, яко новыя суть, и сошвения и старыя же едины знаки обретаются впраздне. показуя ясно, что писанное есть внове, на старой точию харти, прежде бывши сошвенной древле, но внове паки перешвенной, и вместо древних букв еще несколько и видимых, новыя по желанию пишущых вписаны быша. во оном же деле, коликое благоразумнейший учитель наш приложи старание, в самое тогда первоначалное время, когда они проявишася в России, еже яко в себе. тако и в колеблющемся прочем народе чрез них сомнением о благочестии утвердити. а сущность их во лже изобличити. не мало же ему во оном пособствова любомудрейший общежитель Леонтий Федосеевич. ибо прежде егда с ним возмогоша начаток благоразсуждения получити, о непостыдном их опровержении. Нарочно не единожды для сего посылаша единаго от братии своея, именем Мануила в Москву, дабы очевидно узрети, и по их мнению добре разсмотрети их, аще суть новоизданныя, а не древния. Мануил же обрете их в Москве, на печатном дворе, лежащия, для смотрения всем на столе, и прикованныя суть к стене изрядною цепию, дабы, или не были бы унесены киим, или бы инако како не пропали. да еще при них. аки на страже присно стояше монах, белорускаго сущь, прирождения, и учения. и зело быстрыма очима. на смотрящих острозрително книги тыя смотряше, и яко бы каждаго мысли о них хотяше ведати. [бе бо яко же и по истинне добрыми благоразсмотрителями признан имяшеся быти сущий их новописатель и ухищренный издатель] Мануил же по многократном к ним прихождении, улучи некогда время, монашескаго стояния тут праздное: и тако в желаемой свободе, зело их разсмотри добре, преврачая амо же хотяше, и узре тогда все качества ухищренныя, и дивное смешение новости з древностию, простым очесем почти и непонятное. тамо проявившеся тончайшия почерки древних букв, индеже хартии изменение, такожде старое и новое листов сошвение. несхоже древним временам буквоначертание и многое пословие. о чем довольно есть писано, и пространно изъяснено во ответах нарицаемых поморьских, и нижеградских. и тако тонкочастне вся испытав.

Взя же с них и верное преписание, и прежде выданныя от Питирима аки бы с них, несогласныя им копии притяжа, и прочаго к древности удостоверения доволно от благодетелей градских получи, возвратися паки, аки по потопе бывший голубь с масличною ветвию. во общежителный свой благоустроенный ковчег. его же простертыми дланма. аки бы древний он праведной Ной. всепремудрый отец Андрей Дионисьевич любезно с прочими восприяв, о сем по тонку совопрошаше, и принесенныя его масличныя знамения, яко сам зряше. тако и прочим показоваше, и с ними о всем к лучшему благоразсуждаше. утверждая быти престатие великому на благоверие гонителному потопу: и седящая на цепи вода скоро имать изсохнути, яко же и лиющаяся за женою в пустыню из уст звериных погибла бяше землепожрением, что не по долзем времени праведно и учинися. ибо весма пространнейшим своим отвещанием. и опровержением тех ложных книг. и по ныне вси они почти, аки бы безвестни быша.

Весма же правда наша во оном торжествует, яко ни от кого несть, ни малейшаго противоречия на зазрение наше тех в неправде, даже и до днесь.

 

О пожаре монастырьском на Лексе постниц всея обители,

и при Выгу скотнаго двора, и прочего здания; весма вкратце.

и о мужестве в сих премудраго Андрея.

 

Еще к сим [радостная повествовавше] и печальная вкратце поведати потщимся написанием бывшаго тогда нам многопечальнаго случая: Божияго же милостиваго к нам посещения, в наказание нашим согрешением, еже содеяся в лето от мироздания 7235. грех бо ради наших наказует нас и наводит на нас милостивне праведный гнев свой.

Сия нам содеяшася праведным судом Божиим маия 15 дне поутру на Лексе во обители девичестей: егда вси сестры на словословие утрени в храм молитвенный собрашася. возгореся от огня во единой келии верх, не вемы каким случаем: егда увидеша сие, и в камбан удариша, и збегошася сестры вси прилучившияся в монастыре. тщашеся ко угашению. труды к трудом приложиша, но ничтоже успеша. вкратце рещи вся здания оныя обители малая и великая оный великий огнь пламень пояде в полтора часа, или мало больши. вся без останку, все снедно попали, вся уничтожи. тако яко ничесому на том месте остатися.

Лишившиися жилищ своих, на яснине страждааху, ибо имуще покров, землю же помост студению снедаеми, и зноем опаляеми не имуще где главы подклонити. и не токмо сего, но и самое нужное Божия славословия дело, не имуще где Богу приносити обаче и на яснине дрожаще, немолчно и присно Бога славословяще, с плачем и со умилением воспеваху. по реченному апостолом. на всяком месте воздеюще преподобныя руки, и прочее.

Таковому убо Божию посещению посетившу, и к первым нуждам вторыя приложившу. малым днем минувшим и другая постиже еще к старым плачевным случаем, новое многослезное приложися рыдание.

Божиим попущением грех ради наших и действом самого диавола чрез орудие свое, человека [глаголю] безумнаго, и страха Божия весма не имевшаго и как содеяся, сие оставляю. того же месяца в 27 день в пол дни, во время опочева, егда вси сестры спаша. згореся сарай, и коровей двор: и бысть тогда буря ветреняя велия от запада и абие на все келии внезаапу пламень восхождаше, аки гром страшный. и искры огненныя и пламень леташе. сестры же вси друг друга возбуждаху от сна: вси же страхом велиим объяты: такожде и в монастыре братском стражи усмотреша, и начаша бити в камбаны. и братия прилучившаяся дома прибегше, но ничтоже успеша. невозможно бо никому близ приступити, для огненнаго пламени. тем же вся здания малыя и великая в полчаса мало больши, вся без останка всеснедно попали. тако яко ничесому на том месте остатися. в нем же во всеконечном малодушии быша вси всерыдателно унываху, напастию окружены.

Что убо тезоименитый мужества отец еда веледушно не возхрабрствова: еда от малодушия прочих не возстави: еда унывающих не утеши: еда всеблагодарственно понести искушения не научи: ей научи: благодарный глас Иовов благодарно глаголати: Господь даде, Господь и взят. и прочая. Иов глава, 1.

 

О зачатии и строении новаго монастыря, весма вкратце.

 

И послаша отцы в волости людей наймовати чтобы на Лексе в лесе тес и плашье тесати, и бревен сещи. сам же настоятель премудрый Андрей з братиями и с наемники, бревна сечаху, к воде на лошадях возяху, чрез все лето, и навозиша множество плашья, и бревен к воде: и того же лета премудропастырская глава с сиротами другопределными, и со стариками, начаша лес по воде плавити, с верх на повод, и в порогах сам в воде бродяше, и труждашеся с сиротами своими, от изряднаго трудолюбия, благаго по истине отца трудника, с толикою ревностию Бога ради трудящася: не подвигнется на труды телесныя. не чювствен воистину человек есть той, иже толикаго имеяй отца, добродетелному его не поревнует житию его же молитвами тогда и немощныя Бог на великия труды укрепляше. и безсильным преестественную даяше силу. тем же множество лесу того лета к монастырю добыша, и на гору здынуша, против мелницы.

Начаша же отцы оное место смотрети, и вельми место прилюбися, всем братиям и сестрам, понеже удобно и пространно, к строению монастырскому. и нача сам премудрый Андрей с сиротами другопределными, оное место расчищати, лес сечь и колодие секоша удобное на дрова, а неудобное огню предаяху. и очистиша на гладь и нача Андрей разсматривати где быти часовни, и где столовой, где и прочим келиям.

Пособствоваше же ему во всем строение братскаго нарядства попечитель Лука Феодоров всегда с ним и сиротами на трудах у бревенной плавки. такожде и бревенной сечи и воски з братиею, и у наймов работников со всеми хождаше, и надсматриваше, и по разсмотрению и по размеру в есень к зиме наяша плотников келии строити, и прочее.

Тем же много трудов того лета, и зимою подняша, и много пролияша потов. такожде и сироты лето все вси крылошанки, и келейныя жителницы на всяк день в работе пребываху, на всяко время к трудом труды прилагаху: ово бревна секуще и плавяще по малым речкам и Лексою. и прочия толь великия труды поднимающе, яко дивится всем видящим и слышащим, и сам настоятель Андрей, колик подвиг показа; невозможно ми есть сказати словом. на всяк бо день хождаше на работы с сиротами, на всяк день надсматриваше работников. и толь велие попечение имеяше о строении елико всех мужественных мужественнейший, всех крепких крепчайший, и всех ревнивых ревнительнейший бяше и видяшеся: видяше сирот и болничников бес покоев пребывающих. и толико о сем боляше сердцем, толико скорбяше душею, яко всего нужнейшее дело, имяше обители строение. и кое дело совершися без онаго; кое здание монастырское создася бес того; кая келия не име того основателя; кая сень не стяжа того художника; кое бревно не осязая рукама онаго, о руце блаженныя: кто ублажит вас по достоянию. о душе адамантная ни киим же млатом скорби сокрушаемая: о сердце ироическое от Бога и от человек слитое: о блаженнейший наш учителю, и Павлов ревнителю: блажю аз и очи видевшии твое пресветлое лице. блажю и уши слышавшии медоточная твоя словеса. ты един был всем вся по апостолу: был еси алчющим пища сладкая. жаждущим сладчайшее пиво, болящим врачевство драгое, немощным сила непобедимая. унывающим утеха чюдная. и печальным веселие неизреченное был еси, стены не имущим общежителем, стена адамантная, и покрова не стяжавшим, державный покров, был еси во время зимы теплота: во время бури, глубокая тишина. был еси темным о свете солнце незаходимое. и о мудрости ненаказанным, наказатель изрядный. не лаская тебе все сия пишу, не буди сего сладкий мой, но добродетелем твоим удивляюся, и недоумею како тя нарещи за множество великих и преславных твоих действ, яже един в составе своем имел еси.

Тогда же убо на Выгу у монастыря на строение скотскаго двора, и других келий насекоша множество лесу, и навозиша зимою, и ово к воде Выгу, такожде и плашья и лесу.

И по прошедшей зиме с весны на Лексе наяша плотников часовню строити. яже обложивше во имя Воздвижения честнаго и животворящаго Креста, и Одигитрия Богородицы, и Предтечи Иоанна, и Иоанна Богослова. и того лета часовню и столовою довершиша, и вся добре устроиша, тщанием добраго киновиарха Андрея, иже вельми о сем печашеся, дабы дом молитвенный устроити добре, и своих иконников всех завеща в часовню иконы писати. и к зиме оную часовню зготовиша. на Воздвижение честнаго Креста, праздник служити, аще и не вся зготовилася. а к Введению Богородицы все зготовися, и украсиша ю иконами и пеленами добре, и служиша в ней: и начаша людие к праздником собиратися, на Воздвижение честнаго Креста, и на Рожество Иоанна Предтечи, многое множество с волостей. и от окрестных скитов собирахуся, и тако торжественными предложении премудраго отца напитавшеся. и благословение того же великаго, кратиры поучения сладости духовныя преисполненными всеусердно напоившеся: радующеся и торжествующе немолчно и неусыпно славяще Бога: и благодаряще премудропастырскую главу отца Андрея и тако во своя си отхождаху.

Видяще же отцы сие радовахуся о сем, и вельми восхвалиша Бога. таже наяша плотников болницу строити и от келей несколько; по два бо лета и зиму, наемныя в лесах бревна секоша и тес и плашье тесаша. понеже нашедше людей с волостей много работчиков охочих. и на другое лето наймовашася. а братия обоя лета, на двенадцати лошадях, лес к воде возяще и зиму всю. а отец Андрей с Лукою вышеписанным и со стариками и с сиротами, грамотницами и с келейными жительми. и на другое лето, бревна и плашья и тес плавиша по реки к дому лето все, и в сухую пору бродяще в порогах. о коль велий труд подъимаше отец: о коль чюдный образ трудником представляше себе; сироты же и дома во время обедов и ужин и нощию, егда плотники сходят с работы, и в то время по вся нощи труждающеся: и тако вси в трудех в великих пребывающе, яко по писанию, святому: в поте лица своего ядяху хлеб свой: тем же того лета великое строение построиша, и вельми Бог поспешествоваше во всем строении, и в прочих тех трудех, еже и сами отцы и братия и сестры, видяще вельми дивляхуся, толикому Божию поможению же и поспешению, и со усерьдием вси ревноваша. и воздавающе благодарение Богу и пречистей Богородице, и всем святым.

Отец же киновиарх Даниил с церковницами всегда церковную службу по вся дни исполняше, и о духовенстве печашеся и моляше всемилостиваго Бога, о поспешении строения. а промежду службами и на труды с трудницами хождаше посещая их. такожде и о больничнии вси видеша милосердие Божие и поспешение, всегда день и нощь молитвы к Богу безпрестани приношающе. и благодарение Его пресветлому возсылающе величеству. и видяще отцы, что уже болшая доля строения, нужныя келии построени быша, и собравше всех постниц и болничниц. и начаша их переводити по келиям по всем построенным: в лето, от мироздания, 7237-го.

Такожде и при Выгу, построиша привратную келию, и прочия нуждныя келии, и скотской двор достроиша, и ограду около в столбы. и видяще отцы таковое великое строение в малом и скором времяни построено, дивишася милосердию и поспешению Божию и возрадовашася, и воздаша благодарение Господу Богу Вседержителю.

Такожде и сироты возрадовашася вси обоего братства жители радостию великою. ликовствоваху друг со другом: видяще отеческое тщание и ревность, и правление доброе, и киновии ограждение и устроение. и отцев и старейшин, и соборных и попечителей и правителей неоскудение, и трудников умножение, и всякаго изобилия обогащение, и прославиша Господа Бога и Спаса нашего Исуса Христа, и настоятелем за их великое тщание и попечение воздаша благодарение. а к Богу моление и молитвы за их возсылающе.

Еще и сие сказанию достойно. егда на Лексе после погорения монастыря, начаша коров на гору гнати на кониной двор, и вси идоша с великим криком а у овых из очей слезы капаша: такова печаль, такова скорбь, таково сетование, бяше тогда, и самем безсловесным болезновати. а егда на новом месте зготовиша хлевы, и двор до сараев по осени уже снегу падшу, и начаша тех же коров перегоняти в новой двор, и овых уладиша веревками вести по преди. и выпустиша оных коров на улицу. и абие вси коровы с радостию изыдоша из двора и потекоша з горы дорогою, предваряюще тех, которыи на веревках ведены, но и тех не могоша братия удержати. ибо отторгошася от людей и овыя бежаша, а овыя скоростию ступаша, к новопостроенному монастырю, а идучи ни в кую иную на сторону дорогу уклонишася: но вси по одной дороге, друг за другом, аки водими, скоро идуще: и якоже повествуется в книзе первых царьств во главе 6. о коровах оных, которыя впряжены в колесницу имущую киот завета Господня, не совращахуся с пути, ни на десно ни на шуе. но прямо идяху в Версаму, самем хотением Божиим ведоми. тако видеша очи наши, о сих коровах, которыя хотением того же Бога, яко обуздани, и ведоми прямо на устроемное им течаху место, не совращающеся с пути, не заблуждающе от стези своея, но аки словесни. ведуще камо идти подобает им, и аки сказано им бе Богом, яко той есть двор, устроенный во еже жити оным, тако к нему незаблудно приидоша. и приидоша к новопостроенному монастырю, и мимо идуще на новопостроенный двор. и вшедше во двор хождаху по двору, по всем хлевам. и бе видети явственно радость и веселие безсловесных животных: скоти бо слова не причастни, разума разсудителнаго не имущии, аки словесни суще, хождаху по двору, осматриваху хлевы, назираху углы, соглядаху места. прилежно на поющих молебное пение смотряху. молчанием благоговение свое показоваху, веселым зрением хвалу Богу воздаваху, радостными очесы радость сердечную являху. яко благоволением общаго Содетеля устроися им место. ко прибыванию: аще бо по Исайи пророку, познавает вол стяжавшаго его, и осел ясли господина своего: то како не знает своего творца, како не благодарен может быти осуществителю своему и промысленнику. егда же убо настоятель Андрей, в то время с постницами молебен на дворе новом певше, скот же смолком по двору хождаху, и на их смотряюще радовахуся, веселым зрением зряще. настоятель и вси прочии дивишася скотскому благоразумию и радованию: видяще милосердие Божие, и на сие место аки позвани благодариша Господа Бога, и пречистую Богородицу, и всех святых, и воздаша молитвы Богу.

Зрите, о боголюбивии: премудропастырския главы, благоумия, тщания, и мужества, премудраго отца Андрея, и удивитеся: понеже не в младости токмо, не в мужестве токмо, но и в старости уже и в дряхлости теми же прежними благодвиженьми усердия подвизашеся предобрый подвижник. яко орел юностию обновися, паки всеусердныя подвиги показа, паки благоревностныя труды и поты изъяви, паки благодвижная трудотечения постави. коль всеусердно; коль многотщательно подвижеся; дебри и блата обхождая, древия на сограждение примышляя. реки измеряя, в водах бродя: сам собою с немощными сиротами, присно яко рыба в водах плавая, древа плавяше влячаше, и к месту провождаше, идеже новая основашеся обитель, юже тако многотрудно, тако всежелателно, тако благоподвизателно строяше: яко паки всеизрядну возгради и сиротам покои келейныя изрядно содела. како же общее спасения пристанище устрои; како дом Божий согради; како молитвенный храм украси; зело предивен, зело прекрасен и боголепен созда. но и ограду окрест тоя обители всеизрядну возгради: аще и не успе довершити, но предложением благодвижным досовершити возможе: оставляю прочая благотрудства телесных движений: оставляю благодвизательства плотьских добротечений: на духовная того всехрабрая движения прейдем, елика о благочестии подвизася, елика о древлецерковнем православии храбрствова. яко крепкий исполин сопротивныя ратуя, яко Давыд иноплеменныя побеждая, яко Самсон языки всехрабро побивая, сам никогдаже побеждаем бываше. кто убо Андрея победи в разглагольствии; кто низложи в словосражении; кто о благочестии в глаголех посрамити возможе; воистинну никтоже: коль премногия подвиги; коль пребезчисленная стязания, не сочтенная словопрения в толикая лета и путехождения Андреева быша: аще з жидами, аще с лютеранами и калвинисты, аще с несогласными. но всюду цветы подвигов Андрееву главу украшаху, везде победныя почести, во Андреево вметахуся сокровище, вся бо натрижнения венцы, на Андреов всерадостно возлагахуся верх: и амо же Андрей двизашеся, тамо низлагаше. амо течаше, тамо одолеваше. амо напущаше, тамо преславно побеждаше. Давыдово слово в Давыдстем мужестве, Давыдски глаголя: оскорблю их и не могут стати, падут под ногама моима, псалом, 17.

Егда подвиги самыя, одоления самая, доблести побед самыя места и страны самыя, труд велегласнейше. кимвалов громнейше возглашающе и подвигов мужество, и победы светлость пресветло изъявляют. есть ли убо что ниже градскаго онаго заступника новшеств хитроснейши есть ли всековарнейшаго того нрава коварнейши, есть ли пологов онаго многопестрейши:  не вся ли мрежами коварств объят; не всех ли сетию хитрости, яко паучиною мухи обяза; оле мракоплетенныя хитрости: пругло наляче, земным неудобовидное, сеть соплете, человеком неудобопознанную, ею же вся объя удобно, и силныя и немощныя, и крепкия и слабыя: и яко древний гигант ужасными силами. многомощною крепостию полки страшаше израилевы. христианския ужасаше соньмы: величая и возвышая новоизданныя догматы, низлагая весма древлецерковныя предания: вознося же своих новшеств новозаконие. свидетельствы сие таковыми утверждаше, их же не слышахом: доводы таковыми подкрепляше. о них же отцы наши нам не возвестиша. откуду устрашишася христианстии сонми, ужасошася собори благочестивых вострепеташа народи: и самых храбрых мужей сердца в слабость немощных жен претворишася: мнози увы мне восприяша онаго неправое мудрование, мнози предложенная новшества похваляюще. древлецерьковное увы анафематисаху предание: инии же бегством свое улучаху спасение, друзии чюжия познаваху границы. и елико християньстии народи ужасающеся бегаху, толико новый исполин вышением возвышашеся небес касающемся. вся во своей мрежи удержати мняся: но обрете благоподвижна сопротивника, улучи на Давыда стре́ми грядущаго нань камыни: со пращею законов древлецерковных иже толико храбро наступи осмотри и победи его. яко и хитрости его раздра мрежу. и сетей паучину удобно расторже, и всем тайми́чищное рождения непреподобно сшито показа. яко хотящим познавати усердно, познати устрои подобно. и лукавства любодеищное, и правды пресветлое и ясное. и тако оного поправ низверже, яко тому возвышатися не к тому наступати не к тому, соплетатися не к тому: но молчанием срам своего побеждения всесрамно носити, и не молчанием токмо, но и словесы, но и глаголы аще и укорными, и свое побеждение, и Андреову доблесть нехотящу прославляти, Андреа началника и главу всех, всеясно возвещати: но и того много пестротнаго плодородия, елико учением онаго зело надменнаго, толико своемнением кичения, над вся превозносящася: паче столпа халанскаго главу превзимающа, превыше облак летати мнящася. на нас же зельною яростию, злодыхателным гневом толиким кипящаго: елико распудити вся, и искоренити вся, развеяти вся во вся концы вселенныя, всеяростно уготовльшася: яко власть имуща, о вере православия нашего, нас истязати. иже в трилетное время, непрестанно нас повлачаше, частыми повлачении: ово указами жестокими, ово вопрошении тако многопестрыми, яко ко отвещанию весма неудобознанными и колико сей хваляшеся; колико многояростно дыхаше; елико уже в сети своей вся ны содержати мняше. но великодушному православия началнику нашему отцу, в подвизех присно быти обыкшему: паки труды благоревностны, паки сражения благоподвижна, паки победы венцы пресветлыя: елики бо рати соплетоша, толики тому венцы исплетоша: елика ополчения составиша, толика увязения поставиша: елика борьбы нанесоша, толики хвалы принесоша: елика востания устроиша, толика удивления тому умножиша. толь бо мужественно премужественный подвижник противу подвижеся. толь всехрабро сразися: яко общая молитвы и моления всех пустынножителей всеусердно востави. тако и руку и трость на онаго предобльственно настави. аще онаго писателными стрелами болезненно уязви. сице ранами глубочайшими презельно урани, сице высоту его низложи: яко и ополчения советов его вся всепобедно расточив: конечно вне бытие положи. сице нас от онаго востания своими подвизании здравы и невредны сохрани: яко нам пророческое слово явственно глаголати: сеть сокрушися и мы избавлени быхом помощь наша во имя Господне сотворшаго небо и землю. псалом 123.

 

Сказание о учинившемся от злодеев злострадалном искушении

блаженныя памяти отцу Андрею Дионисиевичу:

и о провозвещении, юродивою Ириною Повенецкою, ему о его смерти.

и о жалостном его внезапном в пришедшей болезни скончании.

 

Случися ему быти, за общебратскими нуждами во граде Каргополе, и едущу в нощное время по посаду с единым человеком. вдруг настречю весма борзо едущия попались злыя некакия люди и закричали недоброгласно, что за люди: извощик же отвеща. выговляне: они же диаволом на се научени суть: крикнуша, о тот то нам и надобен. и бросились, аки лютыя звери на блаженнаго отца никакия им никогда досады не учинившаго. но точию им тогда прекротко тако глаголавшаго: помилуйте добрые господа чюжестраннаго человека: но они убо безмилостивии никакия милости над ним не учиниша: и толико его тогда озлобиша, яко еле жива оставиша. зело же всего разбивше и изувечивше, сами убегоша. и привезоша его на подворье, идеже немалое время немоществоваше, услышали же о сем воевода и прочии знаемии ему первоначальнии града онаго, и весма о нем соболезновали. и догадками намеками на оных злодеев что они то учинили. и мнози советоваша чтобы подал на них челобитную. и они бы вскоре отъискавши их учинили достойное наказание. но он никако к сему совету не преклонися: но паче всесмиренно скорбный оный случай в волю Божию полагая глаголаше: аще попустившему их Создателю моему тако мя за грехи моя праведно наказати: то кто аз есмь бренный земля и пепел восхощу противитися святей Его воли, и благодетелей толиких, и таковых. духовно мя облагодетельствовавших буду озлобляти не буди ми сего никогдаже сотворити. и тако оставль быти без всякаго истязания: аще суть и весма онаго достойни. но великодушный он муж толь великодушно всякия напасти и искушения сносити мужественно подвизався: яко никогдаже его во оных бывшаго видена суща в малодушии и нетерпеливости, но всегда вся наипаче в волю Божию полагая. и с непременным благодарением вся находящая нань злая приключения всесмиренно претерпеваше. и бывши во оных, не озлобляющих его но наипаче всегда себе яко повинна суща такому приключению, осуждая и егда мало облегчение себе от належащия болезни получив. тогда потщателне и в монастырь приеха. но токмо уже от онаго искушения повсегда часто немоществова, а более главою, от великаго оных злодеев досаждения: о коль недоведомыя суть судьбы о нас Божия: и где бывает велий страх и боязнь, тамо ничтоже страждем: а где никакого страху не имеем тамо внезапно тягостно пострадаем. как то и учинися над блаженным оным великодушным отцем Андреем Дионисиевичем. ибо колико ему страхования касалось от высоких великороссийских духовных властей, яко противному их учению, таковому презнатному в России нарицаемом за древнее святое содержание, староверческому учителю: колико бысть нападения от зелнейшаго по своему содержания ревнителя Иова епископа Новгородскаго: колико во время ответов от Неофита; колико и от прочих началников как изо оных нападений и иные не возмогли гонзнути: яко учитель Феодосий Васильевич Новгородский и Симеон Дионисиевич, и прочии многочисленнии страдальцы, иные до крове, а иные даже до самыя смерти пострадаша. его же таковыя приличныя ему искушения миноваша: и вместо их весма неприличное и самое такое безделное по изволению Божию прииде, не за что его им было тако обидить никогда их ничем не обидившаго, и обиды творити никому не навыкшаго. но наиболее всякаго делною и словесною милостию награждати присно от младенства извыкшаго, но праведно оное речено бысть. что все житие человеческое во искушениях пребывает и аще от единаго сохранимся то в другое отдадимся. аще от находящаго скрыемся, то от внезапнаго подавляемся. о бедствия: о непостояннаго; на земли сей жития нашего: нисколько ничего не знаем, как в наступающия минуты пребудем, благополучно или злополучно. Некогда убо случися блаженному сему отцу незадолго пред кончиною своею на Лексе с некими богоизбранными постницами беседовати о целомудренном постническом пребывании: последи же позыба́в он главою и рек: еще же все у меня из ума не выходит скорое пресечение жизни в такой младости преставльшагося государя Втораго Петра Алексиевича: се слышавши юродивыя Ирина Повенецкая, [обычай бо ея беяше часто в настоятельскую келию приходити] прежде всех ту бывших предвари пророчески премудрому отцу Андрею рещи. нам отче тебя жаль. сие же слышав отец и яко зело прискорбе мало помолчав. потом глагола ей. э свет Ирина ты мне смерть предвещаеши быти. а аз еще имею намерение аще Бог благоволит. по разлитии весненныя сего года воды к Москве ехать, тамо меня для некоих благословных случаев ожидать будут. а ты смерть мне провозвещаешь. она же прослезившися третицею рече ему нам тебя жаль. и тако блаженная Ирина изыде от отца с келии обычне юродствующи. оставшии же со отцем беседовали зело печални бывше и помышляюще в себе, что сия глаголы блаженныя сея: но егда послежде самеми делы сбышася тогда разумеша яко блаженная она трудница Ирина не точию Христа ради юродива и житием свята. но и пророческаго дарования преисполнена есть будущая яко настоящая светло и неложно сказующи. и о сих дозде. ныне же что писати не вемы; что ли поведати сей многоболезненной повести, [о благоговейный сонме] недоумеем; радостная вам повествовахом но и печалняя тогдашняго времени, и слезная случая сотворившагося повемы, но души вашего боголюбия скорби наполнити боимся. понеже самый случай многопечалнаго сетования, уста нам заграждает язык связует. и руки многоскорбны удержует, случай преужасный: случай плача и рыдания исполненный: случай таковый, яковый никогдаже нам привпаде. плачь толикий и таковый, и тако презелный, яко и нечювственныя вещи, самое камение, к рыданию принудити могущии. о случая. преболезненнаго, преболезнено нам привпадшаго. о случая многоплачевнаго: о случая страха и трепета, и презелнаго стонания исполненнаго: о нем же киими многоплачевными усты; киим рыдателным языком поведаем; откуду возмем рыдательную трость; рыдание рыдательно написующую; откуду приимем слезами текущее чернило; плачь плачевным характиром являющее.

Аще убо и желаем но не дерзаем; хощем но не смеем; усердствуем, но недоумеваем. боимся, яко да не первейшия в ваших сердцах жалостей раны второю глагол наших болезнию, паче назарде́ют. да устоявшияся вмале печалныя утробы, новым памяти видом паки лютейшии да не восколеблются. Но обаче вемы, аще и мы умолчим но ваши зараженныя сердца недремлющею завсегда в печали бдение имут. и того ради восприемлем, слезами яко хлебом питавшагося пророка, плачевное речение глаголющее: сердце мое смутися, остави мя сила моя, и свет очию моею, и той несть со мною.

Сия пророческия плачевныя глаголы размножающи, ныне в прерваном кончиною премудропастырския главы упокоению неотменно зримаго нашего света потаении.

О нем же недоумеем что рещи; аще есть жезл посещения; аще рана наказания; аще чаша гнева и ярости Господня, испити многоплачевно нам за беззакония наша. в текущее же от мироздания 7238-е лето. попустившу Господеви Богу, за наше недостоинство, сей премудрый Христова винограда делатель, непобедимому вражиими прилогами, мужеству тезоименитый Андрей. на третией недели святаго великаго поста. в четверток по обеде, вельми от оныя породителныя болезни занемог: и тако в пяток и суботу, вельми тяжкоглавною болезнию скорбел. егда же прииде час вечерния службы. тогда все братия на молитву изыдоша, в соборный молитвенный храм. остася же при нем един точию келейник. именем Иоанн Герасимов. отец же в великой скорби лежаше. и вдруг во оное вечернее время; с одра своего встав, и взя сам своими руками две свещи: зажегши же оныя, постави едину пред образом всемилостиваго Спаса: а другую пред иконою пресвятыя Его Матери, преблагословеныя Девы Марии, и несколько помоляся: проглагола Иоанну: дабы он вскоре кого послал, по единокровную его сестру Соломонию. иже бе неподалеку в женьских пределех. нечто же еще хотяше наказывати, но точию Иоанн уразумети уже не можаше. ибо некако повредися сущность глаголания его. что весма слушающаго приведе во устрашение, и чювствителное о нем соболезнование. вскоре же посла о сем известие, и в молитвенный храм, к единокровному брату его Симеону Дионисьевичу.

Тогда с коликою печалию, борзо притече, сии его прелюбезнейшии по плоти брат, и сын по духу. ученик же его по воспитанию. в неоцененном в сем любомудрии. за ним же едва не вси и братия со слезами из собору бегуще. жалостно вопияху, и в стенании приглашаху: еда наш любезный пастырь, оставити ны хощет сирых: еда толикий учитель и отец отходит от нас, в вечное блаженство. и тако вси стеняще с горестию, внидоша в келию его, и приближишася ко одру. на нем же отец немоществоваше, но уже никто не получи никакого словеси его. точию егда узре очима своима, превозжеленнейшаго брата своего и наследника кир Симеона: пролия великия слезы, и приближившагося онаго с великим воплем к персем его: объят главу вельми немощными своими руками влечаше ко устом своим, аки бы лобызати хотяше. но ослабевающе руце его, опущаше ю. при слезном своем лиянии еще из незакрытых веждами очес. Что же тогда и дивный ритор Симеон, не приглаголаше жалостнаго: яко от сего приити всем предстоящим в великий вопль. ибо богоданною ему премудростию, то исчисляя отеческия подвиги, то оплакуя свое сиротство. то печалуя, за оставление всебратственное. то слезя, и за все христианство. яко лишается толь великаго заступника, и поборника по древнему святому благочестию. братия же вси стоящии позади вельми неутешно плакаху.

Внезапу же еще и новое слезоточение явися. вельми любимая прииде сестра его Соломония. и яко бы уже во изумлении [преступив вси обычныя свои девственныя целомудренныя правила] громко кричаше: пустите мне бедную видети превозлюбленнаго моего, по духу и воспитанию отца Андрея. пустите мене осиротевшую, в последние лобызати честнейшия руце его. пустите мене прегорестную сестру, в последнее объяти превозжделеннаго брата моего. и тако в слезах велиих, и громким воплем приступи к нему возлежащему тогда уже почти на одре смертном. он же зря ю, толь прегорестно вопиющу и плачющуся. некако горце возстенав, и излия из очес своих паки многия слезы, глаголати же ничего не можаше. точию взираше часто на святыя иконы, и зело истово и прилежно крестное на себе, десницею своею знамение творяше. Соломония же ста прямо пред лицем, вся слезами облиянна, немолчно прегорестно вопияше, и сиротство свое оплакиваше. увы мне бедной девице: камо сокрывается безценное мое сокровище; камо отходит свет очию моею; камо минует  учитель и хранитель, девства нашего; о горе мне бедней: уже не услышу сладчайшаго твоего, пресладчайший отче и брате гласа. уже отселе не насыщуся, ненасыщаемаго твоего превозжделеннаго сладкоучения. уже не имам именоватися преславнаго учителя, благодейственною сестрою: но есмь отныне по истинне злополучная дева. и оставленная в сиротстве бедственная странница. но увы моему конечному горконищию, увы последнему рыданию, кто нашу радость восхитити; кто мое веселие украде; кто пресладчайшую увлече сладость; кто всерадостное отлучи утешение, о мене злополучныя в таковое злополучие пришедшия. о каковыми уязвихся стрелами. о каковыми уранихся ранами: о каковыми прободохся копиями. ах, ах, увы мне; но что сего прежалостнейшее; ах: но кое преумиленнейшее; ах; но кое бедственнейшее; измолкшим гласом, пресохшим гортанием, преисполненными очесы слез. тяжко дыхающими персми, сердцем трясущимся жалостно рыдаше. руками же в перси бияше: о моего нещастия злаго какова лишаюсь брата предрагаго увы, увы моего плача непрестающаго. Дивный же отец претяжкою болезнию; презелною немощию; несказанною скорбию содержим бысть; яко и лежати мало можаше; обаче муж мужественное и зде показуя не изъяви малодушия, не испусти стонания, но веледушно и благодарственно светлым лицем терпя. И тако общий наш предводитель, и отец стадоводец, и пресладкий учитель Андрей. от временнаго жития, на вечное отъиде. три точию нощеденства единою главною болезнию уразною содержим, тяжкою же и великою едино нощеденство. в ней же толико тою жестоко объяся. но христианскою кончиною конец его совершися со всем обычным чиноположением: иже ово пред малыми деньми сам исполни, ово же в самое сие время совершися. аще бо и языком провещати не можаше, за зело тяжкую болезнь, обаче рукою своею, сам крестное знамение присно на лицы своем воображаше, зело истово и изрядно. и тако убо марта в первый день. в третию неделю святаго поста. в третий час дне, в первой четверти, от сущих зде преставися его же кончина, не точию киновии две со окрестными селениями, но и вся грады и страны российския, идеже премудрости его слух обиташе на неутешимый плачь и рыдание подвиже. Разлучися от нас разлучением конечным, и многоболезненным разлучением. не увидетися упователным, нас отвсюду сиры до конца убоги и умиленны, еле дышущия от скорби остави: стекошася вси на преставление отцы и братия, и вси сироты и постницы. обоих монастырей. и бысть плачь велий, и рыдание, и вопль от всех неутешимый, и не обретеся такова человека, иже бы не плакал, тако же и вся Выговская пустыня, и вси скиты. по исхождении бо души от отеческаго телеси, слуху плачевному во вся окрестныя пределы, быстропарно прилетевшу. дивный ужас. и нечаянное колебание вся объят: изумлены некако и безгласны яви. и абие отвсюду многонародное множество снидеся. народи яко реки пролияшася. не точию скитских. но и весских премногое безчислие стечеся, и толико премного, толико безчислено снидеся. елико не вмещати молитвенному храму: не вмещати братским жилищам, не вмещати гостинным келиям приходящих: не званием, ни писменным прошением, но самопроизвольным усердием, услышавше всежелателно, стекошася вси: яко превозжеленаго родителя плачюще: яко благодатна стадоводителя рыдающе: яко всепресладка учителя многоболезнено жаляще. многослезными вопли окружаху. и собрашася весь народ старцы и церковницы. и вси людие мужеска пола со свещами и с кандилы. и с пением внесоша тело отца Андрея, в часовню в братском монастыре. и собрашася братии, и окрестных христиан, и со околных волостей многое множество. и в часовню невместимо и в паперть. а прочии мнозии и мирстии стояше пред часовнею на крыльцы и на улицы: и в часовни начаша всем собором, братия старцы и певцы пети. и отпевше честно. и по отпетии отдавше последнее целование отцу по обычаю. и понесоша тело умершаго отца, и с часовни братия на главах. и старцы и певцы и весь собор идоша за телом с пением. а братия и прочии народ весь идоша окрест отеческаго тела: старцы и певцы и вси церковницы. поюще умилителными гласы, и весь народ идуще окружаху отеческое тело, тихими плачевными гласы, плачюще и молящеся Господу Богу поминающе отца и наставника своего: и принесоша на уготованное место. где ныне погребено, и ту поставиша тело. тогда бо еще часовни не бяше на том месте. и собрася толико народа, елико не вмещатися на горку. тем же овы за оградою стояху, мужеский пол, на северной стране. а женьский на полуденной. и посреде их стена зделана, бяше, с парусов, с припонов, и с рогож. и приставлены надсмотрщики о стену. чтоб друг друга не видети. а пение бы слышати. стояние же множество на обоих странах за оградою. и от множества народнаго собрания во обоих странах бысть велий плачь, и многожалостное рыдание. не можаше никто держатися от плача: вси плакавше умилительными жалостными гласы: что же егда обычное погребения славословие бываше: колики реки пролияшася слез; колики вопли воздушную огущеваху светлость; коликая рыдания песненныя покрываху гласы, стекшиися народи. многорыдателно вопльствоваху: не тако сродницы своим сродником многожалостное погребения происхождение сердце плачевне сотвориша. не тако чада родителей, сынове отец своих. горкослезно рыдают, яко зде общаго всех отца. вси собравшиися зде, вси стекшиися, многочисленнии людие, толико множайшим воплем ко гробу проводивше, погребению предаша, елико краткою тростию в кратцем времени, кратким малоумием, описати невозможно. оставляем видящих устом поведати. оставляем зрящих языку таковая слухом протчих порядочне преподавати.

Посем начаша оставшии отцы Даниил, Симеон и Трифон с прочими, всю братию и постниц, и протчих всех братских уговаривати и учити, и от писания им повествовати, о бывших древле случаях глаголюще: братие и сестры апостольскому повелению повиноватися нам подобает: с плачющими плакати велящу. паче же всего нам ныне молити подобает прещедраго и милостиваго Господа Бога, да неизреченным си милосердием преклонився к нашему лишению, обратит нам плачь на радость, и сетование на веселие, и слезная на утешная. и подаст крепость некрепким, силу немощным. и воздвигнет содержати и окормляти могущаго христособранное стадо. якоже от древняго израиля, отъят Бог Моисея, и даде им Исуса Наввина, и даде ему Дух свой и мужество и крепость и доведе их в землю обетованную. такожде негли и нам, последним людем новаго израиля, пастыря и правителя подаст, и своею благодатию охранит и заступит. и покрыет ны от всяких бесовских коварств. невредных в настоящем соблюдет. и своея блаженныя жизни сподобит. и иная многая поучивше их от божественнаго писания. и отпустивше с миром скитских во своя жилища. а своих кождо во своя службы: и еще не разшедшимся, начаша молити Симеона Дионисиевича, да будет вместо брата своего Андреа отцу Даниилу помощником в деле церковнаго предстательства. он же отрицашеся. и понудиша его неволею избраша. а Трифона Петрова по прежнему к церкви уставщиком в пособ с соборными в первых.

Поживе же отец настоятель Андрей в сей пустыни. тридесять девять лет во общем житии, а прииде в пустыню сию на осмом надесять году. и всех лет жития его пятьдесять шесть лет. а о всем его житии повествуется зде во истории пространно: все житие свое в сей пустыни препроводи, в добродетелех богоугодно, изучися божественнаго писания, прошед философское и риторское учение: и велий сказатель бысть словес Божиих без книги из уст свободным уча гласом всегда братию: и толь сладостно бе учение его, яко вси послушающе прилежно внимаху. на праздники же по совершении всенощных пений, простираше праздничная златоструйная словеса учения. яже хитрориторски преизобильно украшаше и всебогатно светлыми словесы, и дивными обогащаше, хитросплетенно праздники украшая. и торжественников всех возводя к веселому ликовствованию: Божия бо благодать изо уст его исхождаше тако, яко все учение его достойно было бы писанию предати: егда же о праздницех краснословная и пресладкая сотворяше беседы: тогда на конец прилагаше, нравоучения преизрядная, златоустнаго подражая учителя: яко же он егда беседы писаше, на апостольская деяния и послания Павлова, тогда по беседах нравоучения полагаше, сладкая и душеполезная. тако и премудрый наш учитель Андрей, на конец праздничных бесед прилагаше, дивная и зело полезная нравоучения. ими же всякий ум жестокий, всякую нечювственную и каменную душу к Богу возводя. тем же и язык его пресладкий, чюдеснейшии орфеовы баснословимыя цевницы показася. не бо горы и камение привлачаше к себе но каменосердечныя человеки, от земли на небо славно влечаше: воспоминаше бо во нравоучениях своих, вся страсти человеческия, и учаше како подобает праздновати, и каковым быти христианом. и яко не именем именоватися точию достоит, но и житием украшатися добродетелным, от грехов и страстей удалятися, и от грехопадных мест отбегати. покаянием же себе очищати, и чисто и целомудрено жити, блуда бегати, скверн плотских удалятися: и тако учением своим всех слушающих в плачь приводя, и во умиление влагая, и на покаяние согрешающыя понуждая: толико бо хитр и сладостен бе словом, яко никто ин таков обретается в нынешних христианех: о церковных же догматех и о православии, тако знаяше божественная писания тако в конец ведяше. яко и впредь не чается таков быти, и просто рещи, дом бе премудрости, и жилище философии християньския. подобен Иоанну Златоусту [но пишу сие поминая остроту о учении, и ревность о благочестии отца, для прикладу, а не сравняя сему великому светильнику, и учителю вселенскому златоструйному языку. о нем же пишет. в слове на святую пасху: Павлова уста, Христова уста, уста Златоустаго, Христова и Павлова уста. но сие оставляю правосудию Божию]. милостив до кающихся, и вельми разсудителен: на нечисто живущих тако жесток. яко и гневашеся на них, и от церкве отлучаше.

В юности же своей, егда ездяше в Москву, и в Санкт Петербург, и в Киев. тогда тамо изучися добре грмматическому и риторскому учению таже и протчих учаше. брата своего Симеона, и Трифона Петрова, и Мануила Петрова, и иконника Даниила и Никифора Семенова и протчих. иже изучишася от него, тому же художеству кийждо по силе своей, чтоб правописати, и добре глаголати. знати силу святаго писания, и ведати догматы церковныя, и укрепляти и прочих, братию в православной христианьской вере. колики же того в пустыни подвиги. колики же того труды и поты, иже тридесять девять лет, в сей пустыни подвизавшася. о чем сия история свидетельствует. бяше убо возрастом телесным доволен. плотию тончайший, власы главы имущь кудрявы и лепы и по всему подобну Феодору великомученику Стратилату, мало надседы же и белы, и брадныя власы такожде светли с белию, и надседы. браду Златоустому подобну, округлу и частнейшими струями сияющу, очи имеющь светли. брови чисте и вознесене, продолгующ нос и прав, мало на горб, ноздре умеренне, руце долзе, персты в длинности тонкостию цветущии. мало наклонен, словесы и духом присно себе нижащь, Господеви работающь. к сим живость на память, остроту ума, силу разсуждения имеющь многу. могущь на многотрудныя затеи, или подлоги, отвещавати безтрудно, и решения подавати светла и пользодатна. в проповедех же и в сказательстве к братии готово словесен являюшеся. и радостным лицем ко всем благоговея, очи опрятане. и образ умилен по выну показоваше. беседа же его и от природы благоуветлива и разумна, и от иже дарования свыше, зело преяснейша, и благодати и премудрости исполнена: яко вси слышащии и видящии удивляющеся, глаголаху, откуду сему сия суть. и в прочих тих по истинне муж, и многосмыслящь и в случающихся поведениях умерен, и постоянен. и не скоро прелагающся. ревностен же обаче. и тепл по потребе, и любоистинен видяшеся. и просто рещи, огнем вседобрейшаго продерзания дышущь. нравом преукрашен, целомудрием неусыпно зрящь. душевную и телесную чистоту сохраняющь, видений и деяний лепотьствуя. ведением многопремудр, весь не точию ветхий, новый завет на языце носящь, и яже по нас богословская отец тайноучительства и догматы опасно соблюдающь. но и внешних мудрец и софист, многохитростных онех наказаний ведетель. не токмо многоведущий, но и весма непостыдный.

Весма же он блаженныя памяти премудрейший отец Андрей Дионисиевич. в сем себе удивителным оказывал: что он не точию единый знал пустынный постнический устав, но и прочия уставы, аще торговыя, аще приказныя, аще воиньския, [чрез употребление речей] а прочия и самым действом производил. и тако аще ему беседующу со иноки, о постнических уставах, и благоговейных пределах: то якобы был он совершенный инок. аще же о купеческих делах разглагольствоваше, то искусным купцом показовашеся быти. аще с приказными о приказных делах разсуждаше, тогда приказным чиноначалником являшеся. аще с земледелатели о земле делатель прочим быти мняшеся. аще с премудрыми учители, о премудрых учениих совопрошашеся, то премудрейшим учителем  предпочиташеся. аще же случаем и с воиньскими чиноначалники, о воиньских уставах разглагольствоваше. то и во оных ведении неоскуден являшеся. такожде и в прочих художествах богодарованное знание имеяше. отчего он и многим различным человеком по премногу любим бяше. Из благоискусных иноков. преподобный Корнилий и Виталий, Пафнутий и Феодосий, Прокопий, и прочии по премногу его любляху, и судиею пустынным нарицаху. мудрыя же века сего авторы, яко бывший славнейший ритор епископ Новоградский Феофан Прокопьевич, толико его на разглагольствие получити желаше, еже и саморучными писмены неоднократно приветствоваше, и любезнейшим во Христе братом ублажаше. Такожде киевстии учители, многими писмены приветствоваху: да не точию российстии. но и в немецких странах от рукописания его иным мудрым учителем, знаем и любим беяше. в политических же гражданских случайно бываемых разговорах весма же чиновным господам превожделенен показовашеся. ибо некогда случилося ему о некиих политических делах разглагольствовати. с господами петрозаводскими лантраты: киих он разумнейшею своею беседою, в толикое себе любление привлек, яко един нетерпеливно тогда нача в жалость преклонятися. еже таковый преполезнейший отечеству своему муж. темною пустынею обладан есть. и глаголаше: о аще бы ты Андрей Д-чь был в наших делах безпрепятствуем пустынею, то бы надежно быти тебе, высоким между нами господином.

Другий же в иное время лантрат бывши с ним в духовных разглагольствиях: от великаго любления проглаголаше тако: о аще бы ты Андрей Дионисиевичь был согласен, с великороссийскою церковию, то бы надлежало тебе быть у нас патриархом.

Такожде и в прочих художествах за высокое его разсуждение от всех предпочиташеся за главнаго настоятеля. понеже всякая уста христианская, и всяк язык благочестивых, того всесладце славяху и дивляхуся и гражданския персоны, и от внешних славнии мужи ритори похваляху, и в славе словес прелюбезно восхваляху, и беседовати с ним желаху: и некогда в беседе высокия персоны друг з другом, после смерти Андреевой беседоваша о нем, и похваляюще и вопрошающе у прилучившагося ту общежителя, Андреевой киновии. еще ли у вас другой Андрей остался таков в разуме, и в книжной премудрости и поучении; и сами друг другу отглаголаша: негде взять и не сыскать и во всех староверцах и нет и впредь не будет.

 

О видении некия жены, еже виде она во время преставления Андреева.

 

Тогда убо прилучися из Выговскаго общежительства, братской и суземской стряпчей во Олонце, на своем постойном дворе с Олонецкими староверцами. и егда приспе день крестопоклонныя третия недели святаго поста. праздноваше по обычаю праздник поклонение честнаго креста, и по отпущении заутрени, и после книжнаго чтения. прииде к ним некая жена с верховской реки, рачительница о вере. обаче еще не согласилася со староверцами. за некими домашними нуждами и суетами, и от мужа не свободна: и пришедше на оное подворье, сказа некое видение, глаголя. В вечер помолився Богу, и поплакав о своем житии. что не сподобилася соединитися с староверцы бояся себе, смертнаго посечения, и печаловашеся о сем, и уснув мало. видит в видении в Выговской пустыни. край Выга реки. у братскаго монастыря, зрит на монастырь. и идут с монастыря из часовни велий полк светлых и чюдных мужей. оболчены в священническия и архиерейския светлыя чюдныя одежды в великой славе и с ними множество юношей прекрасных с пением сладким ангельским умилителным идуще пояху: а посреде несоша одр на главах под покровом честно, а над одром крест трисоставный, светит великою светлостию, аки на воздусе, идяше противу одра. и после того полка другий полк братских и суземских. и отец Даниил з братиею близ того полка идяше позади. и по преди крест же несоша, с пением умилительным плачевным. и позади их третий полк олонецких христиан: а с ними стряпчей вышеписанной идяше. такожде и тии крест несоша, с пением же умилителным, и плачевным идяху. и изшедше вси из монастыря, в восточныя врата, идяху на восток. и вышед над реку Выг. первой большей полк идяше на воздух скоро в верх к востоку, аки на некую гору ставаше, и возшедше высоко и невидими быша, а братской полк отец Даниил с прочими братиями, и суземскими жительми осташася. такожде и стяпчего олонецкой полк остася назади: и оная жена приступи ко олонецкому полку, к стряпчему и прочим хотяше примешатися, во един полк с ними. и глаголаша оные недостойна ты нашему полку примеситися. понеже не имееши на себе святаго крещения: она же вельми о сем опечалися и оскорбися о том что не даша ей примеситися, ко олонецкому полку и пробудися от скорби: и пришед на вышепомянутое подворье, сказавши сие свое видение со слезами, и слышав сие стряпчей, и прочии христиане, дивишася сему видению: и глаголаша друг ко другу, что будет сие. овии глаголаху не просто сие видение будет а овии ни во что вменяху: стряпчей же помышляше в себе, что отец Даниил уже стар, дабы он не отшел к Богу. а нас сирых бы не оставил, и положив упование на Господа Бога. токмо ту неделю вельми печально пребываше, и минувши от того времени недели, и в четвертую неделю, на оном же подворьи. отпев церковную всю службу. заутреню. молебен, и часы. и приеха на подворье олончанка, из монастыря с выга, Лазаревна. и сказа что отец Андрей преставися, отъиде ко Господу в вечный покой. в самое крестопоклонное воскресение, по утру рано. и сие слышав оной стряпчей, и вси прочии христиане. и бысть велий плачь и вопль, весь той день, вси в велицей печали пребываше. и начаша по отце помяновение творити. и сие тако слышав, и написах.

 

О некоем человеце имущем сомнение о благочестии,

и о скоропостижной смерти отца Андрея.

 

По преставлении отца Андрея Дионисиевича. некий человек сумнением велиим одержим о скоропостижном преставлении его и о неначаянном и горкоплачевном случаи постигшем ны; и како толь превеликий светильник. и всея святороссийския земли светлый благочестия проповедник, тако неизвестною и скоропостижною пожат быв смертию от земли, убо права ли есть вера наша, или ни, тако неначаянною смертию отъяту от нас пастырю и попечителю душ наших.

И тако вельми боряся с сумнением сим. и зело усердно моляшеся Богу чрез всю неделю о сем, со многими слезами и с воздыханием, глаголющи тако: Молитва. Господи человеколюбче, Ты един веси праведных твоих судеб безду. како могу уверитися истово о православном мудрствовании нашем. есть ли кая надежда в терпении нашем. или ни, сицеву ужасну и недоуменну случаю привпадшу нашему пастыреначалнику. Во едину же от нощей в тонок сон сведен бысть: и виде во сне ведома себе некиим в некую полату зело пресветлу: и пришед в ню обрете отца Андреа Дионисиевича, седяща на престоле, зело пресветла лицем: и на него взирающа и весело улыбающася. а кудры сияюще на главе тако яко не ведяще к чему от земных вещей и применити: и жезл в руце имуща, и ничесо же ему вещающа. и тако возбнув от сна своего. пребыв день той единаче сумняся о своем размышлении, и о видении соннем. помышляя что убо будет се.

В другую же нощь, паки виде себе ведома неким такоже в пресветлую полату: и тако же в ней обрете отца Петра Прокопьевича, на престоле седяща, и жезл в руце держаща: и пришед к нему, он же воззрев нань, и рече: уже ты [у мене] сумняешися о благочестии. мы с Василием Великим, с Григорием Богословом, и Иоанном Златоустым, единако веруем. аще много станешь сумнятися о сем, будеши отлучен от церкве. и тако возбнув от сна человек той, и прииде в монастырь, и поведа общежителным видение се: прося прощения и разрешения, глаголя, яко Петр Прокопьевич, мя отлучи ради сомнения моего еже о отце Андрее Дионисиевича.

 

О видении некия девицы, екклисиарха Петра, после преставления его.

 

Еще сие понуждает мя писати отеческая любовь, после преставления отца Петра Прокопьевича, некая боголюбивая дева, именем Васса, прозванием Угаркова, имея велию веру ко отцу паче прочих сестр, и моляшеся Господу Богу со слезами, с великою верою и усердием, и постися шесть седмиц. прося у Господа Бога, яко да проявит ей Господь Бог, о отце Петре, киих получил от Господа Бога дарования, и моляся в нощи и печаловашеся о сем отстояв на правиле, аки в тонок сон засну. и видит некоего к ней, благообразна и светла мужа пришедша, и глаголюща к ней, смиренным и кротким гласом не устрашая ея, о чем ты печалуеши и стужаюши, и молиши человеколюбие Божие. пойдем со мною, аз ти желаемое покажу, и взяв ю приведе, яко вне мира, на красное великое поле, красоты его невозможно поведати, и на оном поле древеса растут, аки насаждены, и аки песок вскрай моря, вельми прекрасны: красоты того поля и тех древес. невозможно человеческими устами глаголати, или сказати, и на оном поле, многи церкви и полаты построены, с чистаго и светлаго хрусталя, вельми прекрасны, красоты их невозможно поведати, яко мню рукою Божиею сотворены. и приведе ю во едину от полат, вельми прекрасну, и созади пришед во оную полату, оны Петр Прокопиевич, и с ним пришедше, лик ангел, и пророк, и святителей, и мученик, и преподобных множеств, и братских несколько братий. в великой славе светом сияюще неизреченным. и пришед воззрев виде оную Вассу, ту в полате стоящу: оная Васса поклонися ему до земли. он же воззрев на ню радостным и веселым возрением, и глаголя ей: о благоревностная и боголюбивая дщи; помянет тя Господь Бог за твоя труды и подвиги, во царьствии своем небесном. что ты потрудилася мене ради, и желаеши мя видети: и о сем всегда скорбиши и болезнуеши, и молиши человеколюбие Божие, и просиши у Него. и ныне исполни прошение твое Господь, смотри мое смирение. и ныне насладися красоты сея, данной ми от Господа Бога Вседержителя. и ныне скажи ми како семо прииде, еще ли во плоти, или уже разрешися соуза телеснаго. оная же Васса, глагола ему со смирением: честный отче, еще аз окаянная во плоти пришла, желая видети тя, киих ты от Бога приял воздаяний; и како прошел воздушная князи, и стязатели мытарства; поведай ми честный отче, мне недостойней. оной же Петр, глагола ей светлым и радостным гласом: без пакости пройдохом, и без задержания, ангельским и новых страдальцев, и мученик, и исповедник. протопопа Аввакума, и священноиерея Лазаря. и диакона Феодора. и инока Епифания и их провождением. что я в животе своем в пустыни живучи, по вся дни их поминал, панихидами и канонами, и молением и всегда их призывал в молитвах себе на помощь. и их провождением безнапастно и безпакостно пройдох. токмо с единаго мытарьства, един черный велий эфиоп, хотяше мя задержати, и глаголаше: что ты дерзал на Лексе. и за ту твою дерзость, достоит тя зде задержати на сем мытарстве: а проводящий мя ангел. скоро удари того эфиопа скипетром своим во главу, аки вихорь. и паде аки в бездну, и благодатию всесильнаго Бога, пройдохом вся злая, и достигохом и пройдохом во врата небесная, и сретоша ны святии ангели, радующеся и веселящеся о нас, и целующе и провождающе. и вознося мя ангел на иную некую высоту, страшный дивный воздух чюдный светлый красный сияющь, красоты его и светлости невозможно усты человеческими исповедати. и издалеча показа ми престол Господень страшный, велий неизреченным светом блистающь. и аз видех неизреченную славу и светлость престола и славы величества, и на престоле седящаго Господа Славы, пад поклонихся с великою верою и умилением и слышах от престола сладкий неизреченный Божий глас, радости и веселия наполнихомся. и по гласу тому, поведоша мя оттуду в нижния страны. где мучение грешником. и вземше ангели открыша аки покров от бездны и адской пропасти. и видех тамо в бездне страшныя, и грозныя неисповедимыя муки, уготованное всем грешником на мучение, и невозможно усты человеческими исповедати и сказати страха ради и мучения. и видех в них многих грешников мучимых, и убояхся вельми и ужаснухся, и начах плакати с великим умиленным воплем, смотря на их лютость мучения. како тоскуют и плачут и рыдают; и болезнуют неисповедимым воплем; ох увы нам и горе. а ослабляющаго и помогающаго не получают: и долго смотрех и плаках с великим плачем. и велиим страхом объят: начах оным грешником с плачем глаголати много, что вы бедные о гресех своих не плакали и не каялися, и не поминали смертнаго часа. и сих мук страшных. они же не могоша отвещати ничтоже. и виде мя вожатый ангел страхом объята и вельми плачюща, и глагола ми. виждь сия страшныя грозныя и неисповедимыя муки грешником блудником и прелюбодеем, и еретиком, и отступником, и в православней вере согрешившим, и не покаявшися зол своих: виждь како будут мучитися. како страждут и воздыхают, и тоскуют, и плачют, и болезнуют, а конца и помогающаго и ослабляющаго не имут получити во веки будут мучитися. аз же вельми устрашихся, и изнемогох, и печалию объят не могох ничтоже отвещати противо.

И пойдохом оттуду на инной чюдной высокой воздух, и светлой и несказанной, светом неизглаголанным сияющий, и славою неизреченною прославлен. и познах оное место, где поклонихся престолу Господню: и приидох близше прежняго того места, токмо еще издали, и видех престол Божий сияющь, неисповедимою славою и светлостию, и на престоле седящаго Господа Бога Славы: и глагола ми водящий ангел, пад поклонися на престоле седящему Господу Вседержителю. се тебе девятый день. отнележе душа твоя разлучися от тела в сий день клеврети твои, творят по тебе помяновение, и молятся о души твоей. и аз слышах и поклонихся с великою верою, престолу Вседержителя, и седящему на нем: и бысть от престола Господа Вседержителя, глас сладкий неизреченный к водящему мя ангелу: покажите ему вся райская праведных жилища. и аз слышах сладкий оный глас, и радости и сладости, и веселия наполнихся. и оттуду пойдохом на иной чюдной светлой воздух мню к раю Божию, и нача показовати красоту и светлость неизреченнаго рая: и видех неизреченную красоту, чюднаго неисповедимаго рая. красоты же и сладости невозможно человеку языком сказати. вельми возрадовахся и удивихся и забыхся на мног час: и нача ми показовати всех праведных жилища, еже уготованы от Господа Бога, пророком и апостолом и святителем и мучеником и преподобным и всем святым. красоты же и светлости и веселия чадо кто может сказати и поведати. и поидох потом на иной высокой воздух чюдной и неизглаголанной, и велиим чюдным светом сияющь. и познах быти на прежних местах, где поклонихся престолу Вседержителя, и глагола мне ангел. ныне достоит ти прийти близ престола Вседержителя Бога. и поклонитися и отведену быти повелением Господа Славы, во уготованное место: вонь же разлучися душа твоя от тела, ныне тамо в пустыни клеврети твои братия и отцы помяновение творят по души твоей, и молятся Господу Богу Вседержителю: и приведе мя близ престола страшнаго Господа Славы. и видех неизреченную славу Божию светящую неисповедимою светлостию и славою, и пад поклонихся, к самому подножию Господа Вседержителя. и слышах сладкий тонкий радостный глас Божий глаголющь, отведете его в место уготованное. и поимше мя приведоша на сие место в сию полату. и потом начаша садитися вси пришедшии во оной палаты за столы по чину. многих видех и познах от братий наших отшедших от сего света, ту с ним в полатах ликующих.

Еще поведа ми он, что ему дан от Бога на служение, некий святый. а имени не упомнит, что он в животе своем всегда ему молился, на всяк день призывал его на помощь себе в молении. и видех единаго брата от сего света отшедша, имени не поведала, ту же в полате. пред усты его висит велий страшный пузырь. и особливо его единаго посадиша ниже всех во угол. и вопроси оная Васса: отче честный поведай ми, чесо ради сей брат особь имеет посаждение, и необычный пузырь пред усты его велий висит. он же сказа, что оной человек отцу своему духовному не исповедался во всем чисто, и грех свой утаил срама ради, или забвения. того ради быти ему тако до втораго пришествия Господня.

И потом показа ми во оной же полате одр свой златый всячески украшен, и ковер злат и венец свой. туто же во обои стороны два одра, таковы же тако же украшены, и ковры златыя, и венцы сплетенныя от различных цветов, вельми прекрасны: оная же Васса глагола, отче скажи сие мне, чия сия одры близ тебе по обе стороны; он же глагола. сии одры отцев наших и ваших, Даниила и Андрея. еще оныя во плоти, а сие им уготовано от Бога. и оная Васса смотря на оные одры вельми удивися. и усмотре подаль четвертый одр. вельми украшен, всякими пестротами, и ковер злат, и на ковре венец, аки царьский прекрасный. а чей сей одр не сказа сего, понеже оной человек еще в живых обретается. и инныя одры по полаты поставлены уготованны: и потом оный муж приведший взяв ю и поведе ис полаты, она же начат плакати и скорбети, и глаголаше Петр. не скорбей чадо, пойди и подвизайся добре, и зде будеши по времени: оная же Васса поклонися ему и от того паде на землю, и прохватися оки от сна; и нача размышляти где была, и что видела и дивяся размышляя видение целую седмицу. и сказа сперва отцу духовному, и малым людем, яко от иного видение а не от себе. а после сказа и от себя. и по некоем времени оная Васса преставися с миром о Господе.

 

Еще хощу поведати вам христолюбцы. о преставльшемся отце Андрее,

некое видение сказанию достойно. еже бысть после преставления его.

 

В лето от мироздания 7239-м, году. в октябре месяце: состояся указ в Москве в камер колегии. что из Выговских пустынных скитов и общежительства взять солдат, против уездных крестьян в двое: и для взятья солдат с уезда. со оных пустынных скитов, прислан во Олонец капитан Философов с солдатами. и прислаша указ в Выговскую пустыню, и в прочии скиты. чтоб собрать солдаты по реестру в скорых числех, и прислать во Олонец, к отпуску в Санкт Петербурх. и бысть о сем печаль на всех пустынножителях немалая. и послаша челобитчиков с челобитною в Москву, о сем милости просити. а во Олонец стряпчего, с доношением просити сроку, понеже о том посланы в Москву челобитчики. и пришедше челобитчики, подаша челобитную в камер колегию Макарову дабы не брать рекрутов, для скудости и нищеты, и для платежа двойнаго окладу: понеже не точию еже вдвое, но и во един ряд поставити, ни по которой мере невозможно, обаче ту не получиша милости: они же челобитчики подаша челобитную в Сенат. и продолжися время близ целаго года. а стряпчей пришед во Олонец, и подаде доношение в канцелярию, и принявше судии доношение, и писаша в Москву, и посрочиша немалое время от зимы до весны. Таже начаша указы часто с Москвы ис камер колегии жестоко приходити, о зборе салдат со всего уезда, такожде и с пустынных жителей и стряпчего посланнаго посадиша за караул в приказ. и жестоко с него правяху салдат. таже хотяще в тюрьму посадити, и на правежь по вся дни пред приказ выводити. а в пустыню салдат хотяху послати с начальником чтоб кого мощно захватити в салдаты, или лучших людей привести скованных во Олонец, оной же стряпчей о том воеводе и капитану бил челом, дабы не послати в пустыню салдат: но еще потерпети извольте, а мене держать на правеже хотя по вся дни, а в Москву о том писать, и седе во оной стряпчей лето все за караулом. и писа к дому в пустыню, так же и в Москву к челобитчику. что на нем жестоко спрашивают салдат. и в пустыни заповедаша отцы общим советом пост и по часовням по вся дни по два молебна пети, а по келиям поклоны полагати, и просити у Господа Бога избавления, и в Москву послаша с писмами человека к челобитчику. чтоб били челом и просили о избавлении салдат. а в то время егда человека с писмами посылали в Москву, некая боголюбивая сестра: виде в видении аки во сне. показася ей настоятель преставльшейся Андрей. с прочими наряжается с монастыря с Лексы, отъехати в дорогу и глаголаше к своим, надобно де нам братия ныне ускорить в Москву, для братскаго нужнаго дела и видит оная сестра что поехал на подводах: и после того несколько времени прейде, егда посланный приехал в Москву, и писма подал челобитчику: челобитчик же помолився Богу, нача ходити за делом своим. и положи Бог одному генералу Павлу Ивановичю по сердцу, быть милостивому. и вступися крепко за пустынных жителей и вельма спирашеся, и стояше. та же и прочии пременишася к милосердию, скоро зделаша указ. а како и каким обычаем содеяся, точию оному челобитчику о том повествовати сказанием: а помянутой стряпчей во Олонце седяше за караулом в приказе, и печаловашеся и болезноваше вельми о том, чтоб не попустить посылки с Олонца в пустыню, и моляшеся Богу с великою верою и со слезами, дабы Господь Бог их от сего избавил. и того же году во есень, лета от мироздания 7240-го года в октябре месяце поутру прийде к нему в приказ, еще до людей олончанин староверец счетчик в то время денежной казны, Мартин Григорьев Гуттоев, муж благоразумный и богобоязнивый, и писания ведущий, вельми весел и радостен. и приступи ко оному стряпчему, и даде ему мирное поздравление, и седоста оба близ друг друга. таже глагола счетчик стряпчему. видех брате в сию нощь во сне, аки на яве чюдное видение, таковым образом пошел я из дому в город. и пришед по край реки верховской близ большаго мосту, что чрез оную реку, з деревни Василья Павлова, в деревню Ивана Пахомова. и смотря на оной мост вижю яко с деревни Василья Павлова идет на мост малой полк. чюдных необычных мужей. котории вси в белых ризах вельми светлы: аз же Мартин смотрях на них прилежно и дивихся о сем. и глагола ми некто близ его, незнаемый муж. что ты смотриши и чюдишися. желал ты всегда во уме своем Выговской пустыни и общежительства настоятеля видети, и древлеправославной вере учителя Андрея, и ныне смотри его и пойди к нему и поклонися, и дай поздравление: аз же Мартин, глаголах ко оному мужу, как мне к нему идти, что де он мене не знает, и я его не видал. оной же муж глагола ми пойди не бойся он тебе знает. и указа его которой идет с жезлом передом: аз Мартин приим дерзновение, и с радостию скоро текох к концу моста онаго: видимый же Андрей вышед с мосту на кряж, и сотворив молитву Исусову, и глагола ко мне, здравствуй Мартин Григорьевич, ревнитель древнему благочестию аз же от того слова удивихся. и приступль близ его сотворив молитву, поклонихся ему до земли. он же сотвори со мною братское мирное поздравление, объем мене любезно. аз же глаголах ему. отче честный Андрей Денисович, почему ты мене знаеши, зане ты мене никогда не видал. Андрей же глагола ми, аз тебе брате давно знаю, и слышал про тебе у нашего Ивана Филиповича, и у прочих братии своей, что ты ревнитель древлему благочестию, мужайся брате и крепися, и братию укрепляй, Господь тебе помощник: вопросих убо. сии людие кто суть и откуду; и камо идут; Андрей же глагола ми, сии людие братия наша. а идем ныне в город, в ваш приказ с указом. которой ныне на Москве добыли, чтоб салдат с пустынных жителей не спрашивать: и идем нашего брата заарестованнаго свободить. а сам спешашеся идти во град. аз же Мартин идох с ним до града. он же Андрей во град вниде. аз же абие от сна убудихся. и дивлюся сему чюдному видению, и ныне приидох к тебе сие возвестити, и вопросити: есть ли у вас какия ходаки, или с Москвы какия вести; оной же стряпчей глагола ему несть никаких ходаков, ни известий. и разсуждающе между собою дивишася таже глагола Мартин стряпчему, радуюся рече что сподобил мя Бог. Андрея Дионисьевича видети: и сказоваше ему каков лицем и величеством, и брадою и кудрями, и гласом: стряпчей же разуме, истинно быти сказание его, и яко Андрея виде, рече ему: подлинно самого отца нашего Андрея видел еси. слышу бо яко такова его быти поведаеши, каков и вправду был есть в животе своем. Мартин же радовашеся, что сподобил ему Бог. и по смерти его видети: и абие прииде в приказ воевода и подъячий стряпчей же оной с помянутым. Мартином седяще в приходном приказе, хребтом на канцелярию, яко оному счетчику лицем. и оба дивишася таковому видению таже прийде скоро в приказ салдацкой наборщик, господин Философов: и громко возгласи, по всему приказу глаголя: ныне Выговской пустынный стряпчей рад, что Бог его от караулу избавил, оной же стряпчей скочив стоя, и поклонися ему. и дивишася его необычным глаголам. чаяше что уже ко оному стряпчему писано, и копия прислана: оной же наборщик прошед во внутренной приказ, где воевода седит: и абие объявиша ему указ с Москвы из Сенату, которой к нему принесеся во оную нощь, и подан чтоб с Выговской пустыни, и прочих скитов, салдат не спрашивать, и впредь не брать. оного же стряпчего свободиша из караулу с приказу. и пришед на подворье пеша молебен Спасу, и пресвятей Богородицы, и всем российским чюдотворцем, и возрадовашася радостию велиею.

 

И другое содеяся чюдо,

тем же преставльшимся отцем Андреем

еще при животе настоятеля и отца Даниила.

при новопоставленном настоятеле Симеоне.

в лето, от мироздания, 7241.

 

Аще бо Бог сие место и снабдеваше и покрываше преставльшихся в сей пустыне отцев молитвами. но диавол не терпя зрети добра, тако на сие место всякия крамолы простираше, яко не даваше христианом в покои жити, ни малаго времене: В то же время некий самовольник в верховском кодзерском ските. именем Егор Гаврилов, Кузнецов. выходец с кижского села. иже прийде в пустыню со отцем своим. еще млад сый, и по смерти отца своего не хотяше во оной пустыни, пустынным житием жити, но своеволное слабое. паче же свинское житие возлюби. и с подобными ему житием, нача наслаждатися своих похотей, не хотяше бо чистоты телесныя хранити. и по отеческим ходити законом. но восхоте смрадное блудное житие жити, сыскав себе подобных блудниц смрадных, и нача с ними жити и водворятися скаредно блудя срамно, и прибираше себе таких же подобных в том своем хотении пребывати, и свинскаго скареднаго жития наслаждатися, и не хотяше работою своею кормитися, но хотяше легко наживати, и сладко ясти: а овогда и воровски, паче же разбойнически прочих живущих нача лобозы грабити: и прочии ту жительствующии. не могоша его истоваго жития видети и терьпети. и объявиша писмянно настоятелем старосте и выборным: и старосты захватив его и розыскав о нем. и обрете его в тех вышеписанных винах. всячески повинна, и наказа его жестоко, и не приказа ему ту меж зазорными лицы жити. но отсла его вон из скита, и завод свой завеща продати иным жителем. он же продаде, и сам хотяше сильне жити, и с подобными себе такими же плутами, диаволом научены, начаша писати всякия свои плутовские неподобные скаредные дела. и у прочих таких же самоволников содеявшияся, за которые пустынножители таких плутов всегда наказуют, и вон из пустыни изгоняют, и не велят таковым в пустыни жити. и иные всякия небылыя и неправедныя крамолы писаше. которых невозможно и писанию предати. и меж собою советоваше, как бы тем своим своевольным плутовским житием своеволие прияти, или на пустыню напрасное разорение навести, и грозяху всячески, чтоб попустили такому их своевольному скаредному житию: но настоятели и староста и прочии жители. сего им не попустиша. но положиша упование на Господа Бога, и свое христианское пустынное житие, кое от первых пустынных отец, преданное держаху крепко, и видя лукавый он Кузнецов, со своими други, что им сего не попустиша своевольне жити. и начаша замышляти злое коварство, чтобы идти в Москву, или своевольне тамо скитатися, или на оную пустыню каким бесовским способом навести напасть к разорению оной пустыни, и абие общим советом с подобными себе оными бездельниками, взявше свои плутовские писма, и шедше в Москву и обретоша тамо перваго коварника, и новинам Никоновым поборника Петра Халтурина, Толвуйской волости церковнаго дьячка, которой и на петровских заводах. при посланном из Синода учители иеромонахе Неофите всячески на древлецерковное благочестие держащихся, и на Выговскую пустыню всякую клевету сшиваше, и составляше, к разорению Выговской пустыни, и древняго благочестия держателей; того обретше лукавии подобна себе, совет с ним сотвориша. и ков начаша ковати, на неповинныя пустынножители: и егда подаша ему вси свои крамольныя составныя писма: он же приим от них писма. и разсмотрив возрадовася, чего он от давна желаше: и нача их на то поучати и укрепляти, и челобитную им составляти, ово от их писем, а ово и от себя. всякия небылые крамолы составляше и писаше. чего невозможно и писанию предати. чтоб тем своим ложным челобитьем, и такими крамолами, императорское величество на гнев подвигнути, к разорению Выговской пустыни. и в то время прилучися быти в Москве стряпчей Выговской пустыни, Стахий Осипов, которой прежде того с прочими своими, после коронования ея императорскаго величества. посланы были с писмами, с Выговской пустыни, от отец и братии, которые и поданы, и благодарно и милостивно приняты, такожде и у прочих господ явишася. и прочии к дому съехали: а оной Стахий за иными братскими нуждами продолжися. и уведа сие чрез людей, тамо в Москве прилучившихся плотников того Толвуйскаго села, и начаша онаго Кузнецова уговаривати, и уговориша чрез добрых людей. чтоб ему никаких крамол не заводити, и никаких писем не подавати. и зговоришася несколько денег ему дати на издержку. что из дому издержал на дорогу, а писма у онаго взяти, и ему Кузнецову не крамолитися: и написанную челобитную от него взяша, а даша по зговору несколько денег и помянутому Халтурину стало не любо, что своего хотения не получил. и оных удержав и уговори. а Стахий Осипов с Москвы съеха к дому и оные крамольники осташася в Москве. и приехав в пустыню Стахий, сказа сие отцем и братиям. они же вельми опечалишася, размышляюще, что содеется, от таковой напрасной клеветы. и заповедаша по всей пустыни Богу молитися, и просити милости. и в то время в братском монастыре, некий муж, виде во сне настоятеля Андрея преставльшегося с прочими своими, отъезжающа вон из монастыря: и глагола оной муж, камо отче честный, наскоре поезжаеши от нас; оной же глагола, имеем нужду в Москву наскоре ехати: а сам своим глагола, ускорим братие, и аки поехав. а оной Халтурин после отъезда Стахиева, начат на него гневатися, и призва к себе онаго Кузнецова, начат его на старое клеветное дело вооружати и учити. и со старых с черных писем, написа им новую челобитную. вооружи его идти со оною челобитною к самому лицу ея императорскаго величества Анны Иоанновне самодержицы всероссийския, и даде ему товарища своего села Типиницкаго, или Яндоморзерскаго подобна ему. и вооружи их, они же послушаста его, и прибирати начаста время, где бы оное писмище самое ея императорскому величеству в руки подати, а не чрез людей, и усмотриша время, егда ея императорское величество, изволила в гости ехати со своими ближними, к генералу Павлу Ивановичю Ягузиньскому. тогда окаянный враг Халтурин взяв их обоих Кузнецова со товарыщем даде челобитную в руки. и посла их на оной двор дожидати выходу ея императорскаго величества ис полат на двор. и егда выйдет и начнет садитися в корету, тогда самой ей завеща подати в руки плетеницу тую клеветы исполненную. а сам Халтурин стояше вне двора у врат, и смотряше, коль смелы оны быти имут, и подают ли по его хотению. но что содея милостивый Господь Бог, глаголавый Моисею угоднику своему, лицем к лицу, помилую его же помилую. и ущедрю его же ущедрю. и егда же всемилостивейшая государыня нача походити к своему царьскому дому, изшедши на двор со своими ближними, и начат садится в корету тогда лукавый враг Кузнецов со своим товарищем по попущением караульщиков, приближишася близ кореты, и зарычаста громогласно: приими всемилостивая, государыня. сие наше сироцкое челобитье, на воров и раскольников Выговской пустыни, и подаста ей челобитную в руки: она же воззревши на них ярым оком, прият челобитную, и остоявшися, и разсмотревши несколько, и распроси их на словах, на кого и в чем. понеже виде в ней всякия необычныя крамолы, и ложныя клеветы, и на словах от них слыша тоже. и абие глагола генералу Павлу Ивановичю. возми сию челобитную, и оных челобитчиков за крепкой караул. и в сей вечер испытай их накрепко, по оной челобитной, и обыщи у них иных всяких писем: и испытав их по делу накрепко по градскому суду. на писме завтра ко мне принеси в доклад. да видим оных безстудное и наглое приступление и дерзость и смелость: и господин Павел Иванович, приказа оных взяти за караул, и осмотрети у них всяких иных писем: тогда окаянный Халтурин, слышав сие и видев над своими товарищи что содеяся, и сам побеже от врат, и нейде на свое подворье, где со оными стояше, но утаися и инде: а ея императорское величество, отъеха в свой царьский дворец: а караульщики упомянутых челобитчиков осмотреша, и найдоша у них в шапках корения и травы и писма, како к началником ходити, и объявиша генералу. и оной генерал скоро со оными челобитчики шед в канцелярию. нача оных допрашивати жестоко про оные травы и корение. и они ово сказаста, а овое запирахуся, и начаша их пытати. и ис пытки во всем повинились, и сказаста все житие свое и действо. како жили в пустыни и что творили. и како за их житие старосты и тамошнии старейшины их наказывали. и како их вон изгоняли. и они како на них яряся все сие составляли, всякие неправедные крамолы, на оную пустыню хотяху разорение навести, или своеволие обрести по своему хотению. а составлял им писма в Москве будучи, вышеписанной Халтурин; и абие приказа генерал Халтурина искати жестоко: но искавше и не обретоша: змий бо гоним, скоро под колоду, или под корение убегает. ехидна же сия лукавая не под колоду, ниже под корень скрывшися утаися, от ищущих ю, но в том же царьствующем граде, посреде человек бяше и не обреташеся. человекообразен бо сый змий сей, между человеки скрыся, и не обретен бысть. а оное дело выписав генерал, к ея императорскому величеству в доклад принесе, и разсмотривши всемилостивейшая государыня, абие повеле оных наказати, и в сылку сослати скоро: и наказавши сослаша их в сылку, но един на пути умре, а другаго свезоша: и дойде о сем содеявшемся известие в Выговскую пустыню. чрез Толвуйских плотников: и услышавше сие, выгопустыннии жители, умилившеся зжаливше, о онех непокаявшихся, и поболевши отечески. а о своем избавлении от напрасной их клеветы, воздаша моление и благодарение Господу Богу и пресвятей Богородицы, и всем святым. и сами друг ко другу глаголаша: покаемся братие истинным покаянием, и к целомудрию приступим, и прежних пустынных отец житию поревнуем. и помолим всемилостиваго Господа Бога, да милостива Его к себе сотворим. да не отягчаем грехи своими, милостиваго Владыки нашего человеколюбие, да отвратит гнев свой от нас недостойных, и да сотворит по воли своей святей, якоже хощет; Видим убо братие, яко есть над нами великое Его милосердие и человеколюбие и милостив не наших ради дел, но молитвами прежних отец наших, в сей пустыни живших: видите братие, како оныя отцы, преставльшиися от нас, о нас ходатайствуют. и сию пустыню в ней же сами пожиша ограждают и молитвами своими покрывают: и от всяких нас бед и напастей свобождают. тем же должни есмы творити частое помяновение к Богу. и в молитвах своих оных на помощь призывати, и по их стопам и заповедем последовати. да не в разхищение и разорение предани будем, якоже о прочих слышим.

Мы же зде на предлежащая возвратимся: вышеписанный Халтурин пребываше после вышепомяновенаго в Москве не малое время, своевольне шатаяся. и за челобитческими делами, о рыбных ловлях пребываше. и тогда с Олонца послан был с казною в Москву чрез Нов город из староверцев посацкой человек с Повенца Лососев. и приехав с казною в Москву: и не вем за каким случаем казны скоро в приказ не отдаде. Халтурин же с товарыщи своими пришед ко оному Лососеву и напоив его вином, и выманил у него тайно, государевых казенных денег в долг, ово на писмо, а ово и без писма, будто для челобитческаго дела пять сот рублев. и начат из оных денег с товарыщи своими пити, и столы ставити, и обеды устрояти, другом своим, и прочим злым, и жити светло и богато, и покупив себе новоманерное платье доброе. и оные деньги издержа, понеже не свои. нечаяше о том опросу и отъиску. понеже взял у староверца. а в то время оного целовальника Лососева испросиша в приказе, по отпуску казны и оной осталую казну отдав в приказе, а в данных денгах Халтурину, подал на него доношение что даны такие денги по прибытии в Москву, оному челобитчику в долг, а он обещал скоро заплатить, та же и писмо показал, а иные сказа без писма даны. и оного Халтурина по оному доношению взяша в приказ. для допросу. Халтурин же по писму в денгах повинился, а во взятых без писма отперся, что не имам больши, и в том им бысть розыск и в розыску повинился во всем, и послаша их в Новгородскую губерньскую канцелярию, обоих за караулом: а оныя деньги после на выборщиках посацких староверцах доправиша, а оных держаху за караулом, в Нове городе. но и там неусыпный враг наш диавол воспоминает ему Халтурину прежнее свое лукавство. и гнев седящу за караулом: нача на староверцов, всякие козни умышляти, понеже надмен бе от сатаны, иже у христиан в пустыни той живущих, не точию благочестие отъяти хотяше, но и самый нуждный живот: и написа убо он злодей доношение в Синод, на оную Выговскую пустыню, и на общежительство на лучших и передовых людей: а в доношении написа всякия напрасные крамолы и коварства. в первых написа настоятелей, Даниила, Симеона, и прочих. что будто оныя по градом и по селам ездят, и людей прельщают, учением своим, и действо священническое действуют. крестят и исповедывают. и свадьбы венчают, и людей причащают, и подговаривают. и со градов увозят, девок с животами, и с ними блудно будто живут, и сверх своих писем ссылается на прежнее доношение с петровских заводов от учителя их Неофита. как он же Халтурин оному учителю писал и составлял, на всех староверцов, и к разорению оной пустыни, и послаша сие в Синод. чтоб оных взять к розыску в Синод, и донесоша и принявше в Синод. и с того доношения, и с Неофитовых первых доношений, написаша свое доношение, и послаша в правительствующий Сенат, чтобы по оных против доношения послать из Сената посыльщиков салдат. и оных Даниила с товарыщи, и прочих становщиков их, и стряпчих взять скованных за крепким караулом всех к розыску в Санкт Питербурх. и прислать в Синод. числом 60 человек: и в Сенате принявше сие их доношение, и написаша определение что послать по них посыльщиков и взять всех скованных в Питербурх. и в то время прилучися в Санкт Питербурх стряпчей Стахий Осипов. с прочими жители. и написа против доношения Халтурина, свое доношение, чтоб такому подозрительному человеку помянутому Халтурину. по его многие напрасные клеветы не поверити, а без розыску бы на разорение Выговской пустыни, посылки напрасной не посылать. и подаша в правительствующий Сенат. понеже сенаторы онаго доношения не принимаху, но отказываху, того ради Стахий писаше к дому с нарочитым посыльником наскоре, и со всего доношения и определения посла копию, и бысть в Выговской пустыни велий страх, и печаль немалая на всех, такожде и во окольных волостях, которые написаны становщиками, и посоветовавше меж собою, положиша на всех пост и моление к Богу, и по часовням начаша молебны пети, по два и по три на день. а по келиям лестовками начаша вси молитися Господу Богу, и по совету написаша писма в Питербурх к вышеписанному стряпчему и к прочим чтоб били челом и плакалися самой государыни царицы и самодержицы Анне Иоанновне, просили бы милости о розыску, чтоб послати розыск, и послаша к ним в пособ, прежняго стряпчего.Алексия Каргопольскаго. и в то время многия боголюбивыя старопустынныя жителницы на Лексе в монастыре моляшеся Богу прилежно и имуще велию печаль. и некая от них боголюбивая сестра, видяше во сне, аки на яве будучи на Лексе преставльшейся настоятель, Андрей снаряжается с прочими мужи, и поезжает наскоре в Санкт Питербурх. и кабы прочия братия и сестры его молят, чтоб с ними еще хотя малое число побыл: он же глаголаше братиям и сестрам. надобно де нам братие наскоре ехати в Питербурх поспешить, есть ныне нужда братская велия, и сам аки поехав с монастыря на подводах, а оной посланной Алексий Каргопол с монастыря поехав с писмами в Питербурх вельми печален, и приехав на Тихвиньской Бор, и в часовни пеше молебен ко образу пресвятыя Богородицы. Тихвиньской, с тамошними жители, прося себе в пути и в деле помощи Божией, и пришед на подворье. от труду путнаго мало уснув, и во сне видит видение, аки на яве: пришед к великому полю, а оное поле все горит велиим пламенем, полно насыпано горящего углия грудами, многое множество, аки мехами, или велиим ветром раздувашеся, и на воздух возхождаше пламень. а на едином краю поля стоит острог, аки монастырь, и около его тын велий стоящий, а ко оному тыну  концами с полевой страны, лежит великая куча больших бревен. и оной огнь прихождаше со всех сторон ко оному острогу, и прочии незнаемыя люди смотряху и глаголаху. егда куча оных бревен загорится, то и острог згорит, и смотряше оной Алексий прилежно на острог и на кучу бревенную и на огнь, и видевши скоро и свирепо с поля огнь пришед, и нача бревенная куча горети живым огнем с яростию, и видя сие оной Алексий вельми опечалися и устрашися. и смотря на оной острог прилежно. и видит у оной бревенной кучи мужа честна незнаемаго, оныя бревна от острога отревающа, подаль на поле с огнем, а огня не пущаше на острог. обороняше. разрея оную кучу вси дале на поле, точию одно бревно велие лежаше, и огнем силным горяше, и оный муж держа в руках своих великий стяг, и оное бревно пихаше, и не можаше един, и оной Алексий пришед близ бревна нача своим стягом пособляти. и созади его слышит глас бывшаго настоятеля своего Андрея, с поля огненнаго пришедша с прочими с ним ко оному бревну, и глаголаше пособи Алексеюшко пихати, и сам жезлом своим пособляше, и спихаша далеко на поле от острога, и оной на поле огнь жезлом ударяше и гасяше, и оной Алексий обратися к настоятелю, и возрадовася великою радостию, и поклонихся настоятелю: и смотрит на поле, уже бо оное поле угасаше, от силнаго огня, и огнь мал становится на всем поли, а настоятель Андрей сам на поле огнь ударяше жезлом своим и гасяше, а сам глаголаше, пускай Халтурин зажигает, а ныне то и все погасло, и глаголаше ко оному Алексию, хощеши ли видети безумнаго Халтурина Петра; аз ти покажу его. и скоро приведоша его нецыи мужи, окована чепьми железными, и руки аки распяты на чепях, и сквозе ноздри, и уста и уши пронзены спицы железныя. а сам Халтурин, вельми черн аки главня, и страшен, аки неприязнь, и смотряше оной Алексий на помянутаго Халтурина, и умилися и устрашися. и абие убудися от сна, и ста на молитвы. и дивися чюдному оному видению, и возбуди хозяина и прочих: и сказа сие видение хозяевам и прочим, и велеша написати на писмо, и послати в монастырь, и в монастыре прочтоша и дивишася, и славяще Бога, и призывающе на помощь настоятеля, и прочих в сей пустыни усопших отец, а сам с радостию и веселием поехав в путь свой, дивяся оному видению, и призываше явльшаго настоятеля на помощь. в то время в Питербурхе, оный стряпчей Стахий с товарыщи. видя что от Сената помощи ему не стало, и доношение оное взяв к себе, и положи им Бог по сердцу, что оное доношение, подати самой ея императорскому величеству государыни: и за отеческими молитвами охрабришася, и осмелишася, яко некое дерзновение, отеческия молитвы приимше, и аки их понуждающа на сие. и чрез добрых людей пришедше во дворец. и допустиша до ея величества. а в то время прилучися ея величеству гуляти, и пришед с плачем и со слезами, и поклонишася ея императорскому величеству, и подаша свое доношение, она же государыня веселым и радостным оком воззре на них, и глаголаша, наши зде. и приняв доношение, и разсмотрев малое число, и распроси, их на словах милостиво, о чем бьют челом, они же сказаша ея величеству, все свое челобитье на словах смиренным плачевным гласом: хотя в то время от генерала Ушакова сперва на словах и жестоко возбранены были, и глагола оной генерал к предстоящим, кто сих пропустил без нашего ведома, и прочии сказаша ему на оного кто их милостивно пропустил, на лево́лда, хотя Ушаков слова говорил, что он чаял не о том бьют челом, но о боярьских: но ея императорское величество его закликала, и милостивно челобитную приняла, и отдала ему Ушакову, и заповеда, что зделайте Сенатом по их прошению розыск. и повеле оному Ушакову, и в Синод сходить, и синодским правителем сказать. ея величества повеление, чтоб напрасно на оных не наступали. и таким подозрителным доносителем не верили б. и оной Ушаков взяв оное доношение, скоро отнесе в Сенат. и приказал указ написать в Нов город к губернатору. чтоб послать с указом с Нова города. для розыску добраго дворянина и розыскать в правду. такожде съездил и в Синод. и указ ея величества словесной сказал, и приказал в Новгородской разряд писать, и из розряду послать в других к дворянину духовное лице добраго человека: и послаша скоро в Нов город. и из Нова города скоро послаша дворянина с салдаты, ис приказу губернскаго с указом, а с розряду архиерейскаго послаша олонецкаго протопопа, и розыскати вправду, и оныя дворянина протопоп, приехав в Выговскую пустыню по указу милостиво управиша, и по окольним погостам, и у приходских церквей во Олонецком уезде в Шуйской половине, у попов с причетники, и у старост и у мирских людей, взяша скаски, за их поповскими руками, и свезоша в Нов город. и с Нова города писаша в Питербурх. в правительствующий Сенат и Синод, и оной розыск послаша. и помянутаго Халтурина ложное доношение и клеветы объявишася. а Выговская пустыня избавися от напраснаго разорения. заступлением пресвятыя Владычицы Богородицы, и российских чюдотворцев, и всех святых, ходатайством и молитвами, отшедших отец ко Господу в сей пустыни, настоятеля нашего Андреа и прочих. а оной доноситель Петр Халтурин, пребываше в казарни с прочими. а днями хождаше просить за караулом, а сам вельми о сем замышляше злое свое коварство и гневашеся на пустынножителей, и седящи многим попом и причетником уездным. которые были высланы в Нов город, для присяги, он же на них всяко коварствоваше, и срываше с них, с кого что может: и не токмо что с чюжих, но и со знаемых и с сродников своих, с брата роднаго, и с племянников своих, никого не оставляше всякими грозами и клеветами, и замышляше благая и добрая, но вся злая всякому творяше.  наипаче же вельми коварствоваше на староверцов. на Выговскую пустыню, всегда писаше доношения всякая ложная, и посылаше в Санкт Питербурх, по ком можно, овые не дохождаху, а иные дохождаху. что будто розыскивали неправдою, и попов и мирских людей посылами задариша, и обольстиша: дабы взять его Халтурина в Питербурх в Синод. он буде все объявити. такожде и стряпчего поймати и прочих и сковати и засадити. дабы их никто не видал. что оныя пустынники яко бы подходят к ея императорскому величеству со зверьми и прочими, также и к судиям: и иные. всякия написанныя крамолы, неудобь писати. хотяше бо теми своими клеветными писмами избыти из караулу, и от наказания. за свое плутовское похищение, государевых денег и оное доношение попадет, в правительствующий Сенат. и в Сенате по тому написаша приговор, чтоб Стахия стряпчего послати за караулом в Нов город, со оным ко очной ставки. и оной Стахий, прилучися в Питербурхе, и объявися в Сенат, и подписася стати в Нов город, в губернской приказ, ко очной ставки наскоро: и егда прибыл в Нов город, и объявися в приказ. и со оным Халтуриным в приказе губернатор с советники и с секретари, взяша из духовнаго приказу двух архимандритов, для правдиваго розыску, и даша скоро, с ним очную ставку, на страстной недели, и в очной ставки объявися его Халтурина плутовская ложь, и после сам он повинился, и подписася, что доносил напрасно гнева ради прежняго, хотя тем своим неправедным гневом и клеветами, на их Выговскую пустыню, гнев навести к разорению. и потом из губернской писаша о всем том деле в Питербурх, в тайную канцелярию. и после онаго Стахия в Питербурх взяша в тайную канцелярию, и в допросе держаша жестоко, и несколько сидел за караулом, за то, для чего з делом шел в Нов город, а не объявил в Питербурхе, в тайной канцелярии, и оправдася и свободися, молитв ради пустынных отец.

 

О жене некоей, юже премудрый отец Андрей явлением своим,

от мучащия ю люте трясавичныя болезни избави.

 

Жена некая благочестивая сущи, и древлее православие любящи, именем Евдокия. ей же от святаго крещения восприемницы бяху, сии благороднейшии самобратия, премудрый Андрей, и целомудренная Соломония. блаженному же Андрею уже к вечному упокоению, от сего суетнаго века преселену бывшу. сей же жене Евдокие. вдове сущи, случися лютым, лютыя трясавицы недугом люте страдати. яже многих врачев взыскающи, многое имение истощи пользы же обрести не можаше. прииде же в память ея пребогатый райския сладости Евфрат, премудрый отец ея Андрей, его же наченьши призывати, с горячею к любви его мыслию.

И тако пребывши некия дни, памятию сладчайшаго его имене, болезни своей некий отдых дающи, обаче злая та болезнь, наипаче в ней день от дне размножающися, люте ю мучаше.

Она же тако немилостиво томима с воплем крепким, и со стонанием сердечным, верою несуменною ко отцу влекома, и яко к живу ему глаголаше: дражайший мой отче, помяни бывшую твою [в жизни твоей] к бедней мне страннице отеческую теплейшую любовь. и святыми твоими молитвами избави мя от грызущаго вся моя составы лютаго сего недуга. и тако ей неутешно плачущей сведеся абие в некое чюдное видение и чювствует себе быти. на некоем поле велице зело и пространне, еже великим небесным светом облиставаемо бяше. по нему же множество колесниц позлащенных, и мягкими постелями настланных, и высокими возглавиями, и дрожайшия пестроты, удивительными одеялами покрытых, везомых пречюдными и гордо выносящими коньми, покрытыми чюдно чюдными коврами.

Во оных колесницах зряше, тако Выговския обители, яко окрестных скитонаселений перьвеньствующих отец, Даниила, и Петра, и Симеона, Петра Кобылева, и Евстафия Бахтина, и Иосифа Головина, и иных многих, их же она не знаяше. в велицей славе и веселии седящих и едущих в некий великий и пресветлый град. тии же вси в жизни сей бяху добродетелнаго жития, и о древнем благочестии горящия ревности.

И о спасении душ человеческих теплое усердие имевших. и зрящи таковую их славу и веселие, радовашеся душею, играше мыслию наслаждающеся зрения таковыя их доброты. и се их зрит в том же великом обозе, едуща в преудивительной над всеми, златосиятельной колеснице призываемаго ея усердными молитвами, теплаго заступника, и учителя премудраго, милосердаго отца Андрея, Выговскую, и всех древлецерковных любителей неущербляемую пресветлую славу, на заднем же тоя колесницы приступе, стояше всегдашний его служитель, и незазорное пред всеми целомудрия правило, прекроткий Евсевий: иже еще в жизни сей сый, тако самобратным отцем Андрею, и Симеону, яко общежительным и скитьским братиям, в духовных и в гражданьских народных исполнениях послужи, усердно лет тридесять. его же блаженная память и до сего дне всех усты немолчно с похвалою проповедуется. вслед же златозарныя тоя колесницы, везяшеся на некоем удивителном возиле превеликая дельва. наполненная непостигаемыми мысли ей туками, яко бы вмещатися в ню можно до четыредесяти водоносных мер.

Егда же узре Евдокия отца Андрея, в таковей славе едуща, паде абие коленома своима лицем на златоносную поля того землю. со всяким усердием, и горькими слезами умильне возопи глаголюще: милостивый мой государь отче, не остави мене бедныя твоея дщери, лютым сим лютыя трясавицы недугом люте до конца страдати, отец же веселым оком возрев на ню, и краткими глаголы поздравствовав ю. и к стоящему на заднем тоя колесницы степени служителю рече: брате Евсевие, даждь ей из ведомыя за нами дельвы изпити. он же скоро взем чашицу малу, ис тоя дельвы потоком наполнив ю, даде ей пити, она же приимши прекрести вся, испи ю. и тако скончася видение. ощутивши же себе на постели лежащу, во устех же ея такова медвеная сладость кипяше, яко бы николиже в жизни своей нигдеже вкусити сподобися. и таковых небесных сотов питием, отгнана бысть от нея абие лютая ея трясавичная болезнь тако, яко ни следу ея в ней обретатися. получивши же Евдокия видением премудраго отца дражайшее здравие, скоро приходит в Выговскую обитель, достизает усповосприемную гору, припадает на месте идеже отеческое тело в земли лежит покровено. Воздает отцу благодарение, поведает знаемым сотворшееся ей отеческим явлением, от лютаго трясавичнаго недуга свобождение, и тако певши отеческаго помяновения, по церковному уставу, и по обычаю киновии, умильныя песни возвратися в дом свой радующися и благодаряши Господа Бога непрестанно.

 

О видении некоторыя девицы,

како виде во сне блаженнаго отца Андрея,

приехавша на беле коне в колеснице,

по душу преставльшагося сродника его Даниила.

 

По преставлении блаженнаго отца Андрея в четвертое лето, некто благочестивый Даниил именем, живый в Боровском скитонаселении, иже целомудрия ради и хранения древлеотеческаго благочестия: юн сый отлучився супружницы своея младыя же, и сына своего единолетна, оставив. и мирьская вся возжеления презрев, и дом и братию яко ни во что же вменив, изыде в пустыню и девственное чистое житие живый, постническими труды, и целомудрием себе украшая, пребысть 37 лет. присно воспоминаемому же отцу Андрею сродник сый, в лето 7242-е. по зачатии болезни, в 25 день, декабря 12, в час обедный. тишайшим кончины сном успе. при кончине же последнее слово тако глагола: дивен Бог Израилев. Преставльшуся же тому в вечер дня того, служащая ему в болезни его некая девица именем Екатерина, яже стара сущи. и обычными к погребению приготовлениями утрудившися, возлеже на верх келейныя пещи, идеже и успе. и яко бы единой четверьти часа минути, скочи абие, и ставши на приступе тоя пещи, хотяше ступити на помост келейный. ту же случися быти в той час сын преставльшагося. и хотящую ринутися с таковыя высоты удержа.

Она же в великом торопе сущи глаголаше ему: пойди пойди скорее отец Дионисьевич приехал по твоего родителя. юже егда раскликавше вопрошаху: что ти бысть таковое забытье; она же рече: приидоша нецый будяще мя глаголаху: востани скоро; Андрей Дионисьевич у крыльца, иже приеха по Даниила Ивановича, мне же избежавшей из келии на крылец не яко во сне, но яко на яве, и се видех блаженнаго отца Андрея в пребогатой колеснице седяща, благолепием лица, и великою славою блистающа, в колесницу же ту впряжен бяше конь бел и предивен. аз же сие узревши возвратихся и мнящи итти в келию, возопила, дабы вы на подъятие итти поспешились. вы же мене возбудисте. и тако скончася мое видение. слышаще же сия сущии ту прославиша Бога прославляющаго тако своя угодники. ему же слава ныне и всегда.

 

Сего ради аз плачю, и очи мои излиясте воду,

яко удалися от мене утешаяй мя.

Плачь Иеремиин. глава 1.

 

Что се; о боголюбивый церковный соньме, всепустынный богоревнителный народе: чесо ради толикое в вас единокупное уныние; толикий неутешный плачь, горесть несносная толиких сердец, многожалостныя гласы, безпремолчная захлипания, источники лиющихся слез; вем вем, о вы желаний, какова вам тщета явися, ея же ради стекостеся, каковый убыток, коликий общий урон: иже вся ны обняв ослези, вся рыдати и безутешно вопити застави. о случая жалостнаго: о плачевнаго дела: о болезни сказати невозможныя. лишихомся отца пустынныя бедныя дети, и того ради слезим. Потеряхом пастыря, несчастливыя горькия овцы, и сего ради рыдаем. не вемы куды дехом учителя, многоплачевнии всецерковныя сироты, и сих ради неуемно сокрушаемся. утече любезный наш наставитель, и постигнути того не возмогаем потаися превозжеленный рачитель, и взыскати его не можем. угасе великий светилник церковный, и зажещи того вси от невозможности удержахомся. устранився отшед многопремудрая глава, общая всех сладость, снедь воистинну благоприятнейшая, пречестнейший господин, имярек. и весма недоумеемся, како и где бывает; усну неусыпный блюститель церковный и всему собранию неутешный вопль остави. о лютой нам язвы: тогда усну, егда еще жити ему вси чаяхом. тогда умре, егда сих ниже на ум положити надеяхомся, яковыми ныне обстоимся: противно мнению нашему случися жизнь нашему животу окончати. о печали самого сердца, егда же жизнию вси жихом. той преложися, его же животом вси безчаснии тянухомся. той усну, толь крепко, его же разве архангельская труба возбудити может. о неизследимых Твоих судеб Христе. о несказаннаго Ти смотрения Царю Святый. но что многоплачевнии содеем; аще толикаго урона воздвигнути не можем, аще таковаго падежа понести, неубуждаемаго сна пробудити. утешимся поне над гробным о отце словом. подотрем слезы малым напоминанием безсмертных дел его. горькую пелынь скорби, сладостию богорастимых плодов. агиомнисия, или блаженное, усопшаго отца воспоминание, да будет нам в великую отраду и утешение. ельма не неизвестно вам, о богораднии насельницы, каков был отец наш и именем и вещию прямаго мужества преисполненая душа. яко еще и в самом юностном цвете, мужеумный смысл показа. око недремлющее всепустыннаго осмотрительства яви. силу неодолеваемаго храборства церьковнаго воображь предложи. егда позываху случаи веледушно поступати ему, тако ступая творяше, аки отдавна тое деяше: тако ревнуя яко от многих лет тая творити его мнети, гладныя нужды. аки лютыя стрелы бедство творяху ему. нравы новосочетаннаго братьства скучаху. лжебратия наветы скорбь приношаху. волны гонительныя аки говоры воднии шумяху. страсти повсечастнии мятяху. безнадежие жития яко супостат некий пакостию дыхаше. и прочая безчисленная на великодушнаго Самсона наскакаху безстудно. но Андрей силою мужества над вся прехождаше. вся ревностию одолеваше, своя укрепляше, колеблющия утверждаше, противодеющыя премудростно возражаше и постыжаше. егда же Богу пособствующу ему, и братьство преумножи, и обитель согради, и люди благочестивых законов исполни, чиноправления подобная положи. которыя ныне со многою обильностию зрятся, со изрядным изяществом свою носят красоту. и в толиких многопотных и весма неусыпных подвизех, коих противенств не случися страдати ему, каковых неудобоносных скорбей вышесильных тягостей подняти. между сими, кий навет не возниче, кая скорбь не подняся, которая диавольская кознь не приразися, адамантовой онаго души. кий вред не исцелися, кий лед страстный не разтаяся. который прижим от самаго ада исходящий и мнящийся пошатати незыблемаго столпа церковнаго, не постыдеся и конечнаго изчезновения не прият. что же егда в память возведем оное время всемирныя бури, ужасно вземшияся и дохнувшия страшно на церковное стадо, синодально вопросоответными стязаньми, приездом учительскаго лица. кий подвиг не воста тогда, кий труд не открыся нашему храборнику. нужда тогда преславному оному мужу и великодушну быти и постоянну к своим многосмысленну, и к противоборьствующим великопремудру не боязливу. и любо истинну зело. которое паче надежды во отце нашем, не точию пустынном обывателем, но и всем европианом, в великое удивление и неначаянное дело збысться, и каменем краеугольным всей церкви и ея рачителем утвердися и возъявствовася. яже самых борений труды и поты, во ответособранном снискании явствуют, и паче трубы богомудрое его, и нескудное благосмыслие возглашающе показуют. и уже не без удивления воспоминается доблий и от внешних. когда случается им в разговорах произнести слово, ах аще бы сей от нашея страны случился, главнейший в нас явился бы. и когда уже наполнися пустыня жительми, богоревнители, аки водами покрыся некими: и толикия великия тягости, и неудобоносныя попечения, вся опрошася  храмине Андреова великосилия. той же яко многомощный атлант, вся со удобством подъемляше, или с подобающим усердием творяще. и не токмо другими, елико собою вся исправити тщашеся своими плещи нежели иными всякую тяготу понести, наглаголуя неленностнаго богопроповедника глас. должни мы сильнии немощи немощных носити. советы же братскии и скитския когда кроме его совета минуша. печали общия и особныя кия покрывшеся пройдоша. дела внутреннии и внешнии, кои потаишася, не протече что праздно, Андреови мозга. не уйде без исправления какая вещь. е изничтожися кий греховный терн, его же бы не прикоснуся Андреова, утруждения не почювшая десница. тамо мняшеся приснопомянутому отцу покой, идеже крайнее неспокойство бываше. тамо пристанище видяшеся, идеже тишина нимало являшеся. то ему отдох како упразднити ссоры, утолити вражды, мир ввести, благонравие насадити, всяк рог тщеславный смирити. то ему тишина была, везде гадины ропот верещаху, отсюду преслыша переговор, отонуду внят злослышания досаду, от иныя страны осуждения болезнь. и во всех сих не огорчися, всемужественный оный исполин, не смалодушествова долгодушием богатеющая душа. не помысли та кого, и от киих пущаем тяжкодосадный сей вихор. не обленися и многовременными смиряем труды. не отказася многобременными отягчаеваем подвиги. не отхвася, яко нерадетель братских и церковных тягостей. сице убо доблему подвижнику, мали мняхуся всесветлии труды. ничтоже зряхуся малочаснии подвизи. но и словеса счиневая, сладки и богомыслены, к благонародным и высокосиятельнейшим, а наипаче к великолепнейшим, и от Бога вознесенным, самодержавнейшим персонам. вся оны умоляя и на человеколюбие склоняя, всемудрыми витийсками искусства моленьми. что и по ныне не потайся, но паче яко Богу извольшу, самеми делы, императорское милосердие, и господствующих заступление, на христоименитых людей, по премногу является и сияет, сими и подобными изъяви себе пастыря неусыпна, и о богорадных людех недреманно пекущагося.

Не без жалостнаго ниже без плачевнаго ока спомнити, недавныя отца труды, обою забралу чиновное возграждение, гнезда братских и сиротских покоев. яже вся братожалостными жалы в прямой горящине слез, оплакуеми ныне и обмываемы, многорыдателно бывают.

Но доколе мужественное и неутружденное тризница Андреова, о всепустынная чета на среду предлагающе творим. доколе мнимся себе утешати, о всеплачевнии безотчии сироты, воспоминающе неисчисленное богатьство безсмертных дел пустыннаго нашего гражданина. не токмо убо сими воспоминаньми не услаждаем себе, но паче желчь горести, и стрекало вселютейшия болезни возновляюще показуемся. и понеже намерения не имеюще, многая исчисляти, отеческих имений, оставляем сие ведение и тщание о сем стяжавшим. но ниже мнящеся быти мудры, одолжающе слышанием толикий вашего боголюбия собор; но весма времени жалостному говеюще, плачевному случаю сообщницы неключимии является. к сим и вселюдственный церьковный собор смотряюще, и говейное сристание зряще, соудивихомся толикому о возлюбленнии тщанию, и от жалости не стерпехом, но паче понудихомся к жалости, жалостное предложити слово. уповающе яко и сими повестьми, негли усладитися получите таковыми умиления приветствованьми, негли духовную пользу возъимеете. се подлинная наша отрада, се известное християн утешение.

Прочее не скучайся о всеплачевный выгопустынный соборе. престаните слезити горы и холми, колибы и вертепы умолкните, от многаго рыдания слезнаго. не плачите скоты, ниже сетуйте в толиком отца лишении. не кричи жалостно, ниже матеролепно тоскуй и ты киновие о своем киновиарсе и отце: аще бо и отъиде пастырь твой, но к Началнику пастырем, от Него же бысть и к Нему взыде. прейде отец, ко небесному Отцу, к нему же жив еще во плоти влеком. Восхищся учитель, но боговещанным гласом вопиет, не оставлю вы сирых, аще возъимею дерзновение к Богу. и что за польза, аще над меру востужим. аще без утехи сетующе восплачемся. не се ли яве Павлову гласу возражающу, не велю рече вам братие неразумевати о умерших, да не скорбите, яко же и прочии не имущии упования. но аще и кинемся безутешно, в плачевное жалости море, то явно покажем о себе, аки бы лишением отца всех благ лишихомся, и к тому надежды утешения не имеем. не тако о друзи любезнии не тако помышляйте, ибо прелюбезный наш, премногая благая сотворь, и от тех овая с собою взя, другая безчисленная при нас суть, нам в вечное владение остави. еще же и самех нас лучших соделав. за что безмерно и слезити нас убеди о себе делатель добрый, но и радоватися и уповати к вечным надеждам повеле, многочисленными и с ним не умершими благодеянии своими. тем же совершим на неже и снидохомся блаженное о усопшем отце четыредесятодневное воспоминание сотворити. отдадим должную оцу честь прилежными молитв провожденьми. почтим усердными молитвенными дароношении всенадежнаго церковнаго рачителя. послужим своему пастырю происхожденьми всеумолителными. проводим сиротскаго руководителя. о и вы пустыннии бедницы. смиренное девическое собрание, иже в жизни сей, недреманно вами пекущагося отца. вкупе вси обоего рода служители, малии и велицыи, провождайте до домов вечных домы вам во упокоение зде оставльшаго. попросим содетеля нашего  Бога прилежно, о еже проститися его согрешением, вольным и невольным. и упокоити душу его, идеже всех веселящихся жилище. Владычицу Богородицу тепло, помолим, заступити нашего заступника и ходатая. вся святыя убедим на поможение, готовому нашему помощнику. немедленно призовем страдальческии лики, способ сотворити, грядущему к дверем небесным. незабвенно поспешим подвигнути слезно вся российския иерарси и наставники. яко да ускорят без промедления пособити, о их законех неотступно старавшемуся. без отложения времене потщимся понудити, отшедшия на он век, братския всетеплейшия ревнители, Петра Дионисия, и великодушнаго Исаакия, и многострадальнаго Мемнона, и прочия, благочестивыя подвижники, да приимут простертыми руками своего пресладкаго утешителя и нелицемернаго сердоболя. таковым всеговейным помяновением, происхождение совершающе, прелюбезнаго нашего вожда прочее уже, к концу упокоим слово.

Ты же прелюбезнейший наш и дражайший отец, приими наше по силе от нас творимое тебе провождение, и не возгнушайся надгробными сими словосчинении премудрейший наставителю, не бо от дерзости, но от крайния воистину жалости, сицевая производим грубии и неотребнии твои ученицы. да яко же мы жива тя суща зрехом и наслаждахомся. Ныне же мертва уже жалостно смотряюще, уязвляемся болезненными жалы твои беднии и неблагополучнии овцы, прочее прости нас, прости молим тя, многоумная главо. аще и паче меры прогневахом, отеческую любовь твою, и оскорбихом милосердыя твоя утробы, и не попомни прямых воистинну пред тобою недостатков наших. аще возъимеши дерзновение, не забуди ны, ей молим тя тишайший пастырю, соживущия с тобою и любве твоея святыя насладившияся, ныне же оставшия при многообразных наветах и волнованиих диавольских. воздвигни за ны теплейшия твоя молитвы, ко Господу Богу, и пречистей Богородицы, присовокупляя и братския непритворныя подвижники, яко да сохранимся от всякаго всеядовитаго прилога сопротивнаго; в печалех утешите в скорбех заступите, в напастех скори избавители будите; немощным силу, напаствуемым поможение подавайте. малодушныя долгодушию, колеблющияся терпению научите. греховныя пламы погасити, бесовския рати уничтожите, церкви умирите, расколы возбраните, бурю гонения в тишину обратите, делатели духовныя упремудряйте. в послушании трудолюбцем помогайте. от всех злых вся свобождающе, и всем благая и полезная дарствующе. о Христе Исусе Господе нашем, Ему же слава и хвала во вся веки,

Аминь.