Из Русскаго Летописца (Хронографа) 16 в.

 

Сказание вкратце о Латынех, како отступиша от православных патриарх и извержени быша от первенства своего и от книг помянных, и о иконоборных царех в Константине граде царствовавших еретицех.

 

Во царствующем Константине граде, Лву Исаврянину по Божию попущению скиптра царская удержавшу, иконоборения ересь начат являтися и дерзновение име. Оному же зле живот скончавшу, и по нем сын его Константин Копроним началству и ереси приятник бысть; и оному скверне скончавшуся, и по сем сын его Лев, иже от Хозары, во царство поставляется; и сему скончавшуся, и по нем жена его, царица Ирина, и сын его Константин царствию наследницы быша. Сии же, Тарасием патриархом Царяграда наставляеми суще, седмый собор собраша в лето от Адама 6305, а от воплощения Господня лето 805, в Никии Вифинийстей, 7 убо и 60 и 300 священных мужий множеством распространяемо, чиноначалников же и первостоятелей священнаго тех и великаго полка предлагая Тарасия, иже во архиереех преименитаго, божественый сей и всеизрядный муж и Царствующаго града священноначалная кормила, аще убо кто ин обводити достоин, и убо Петра, благоговейнейшаго презвитера Римския святыя церкви, и Петра инаго презвитера и того сущия тамо обители игумена святаго Савы, иже апостолскаго Римския церкви папы седалища держаху место, папе Андриану тогда архиерейское украшающу достоинство, вкупе же сим Ивана и Фому мужей, иноческим житием преименитых, иерейскою честию облистающих и въсточныя всякия области апостольских и великих престол вместо хранителей и архиерейску правду имеющих. Тогда царь Константин, сын Лвов, с материею своею Ириною и с святыми богоносными отцы на седмем соборе еретики иконоборныя низложиша и искорениша, и церковь паки святыя иконы прият и своим украшением украсися. И по Константине и Ирине Никифор Геник царствие приемлет. Сему же скончавшуся, по нем сын его Ставрикие, потом Михаил Рагкавей, зять Никифор. Сии же вси от седмаго собора святыя иконы почитаху. И по сем бысть Лев Арменин, иже у Михаилова сына Никиты детородныя уды отреза и во иноческий образ постриже его, и наречен бысть Игнатий, иже последи бысть патриарх Царяграда. По мале же времени сей звероименитый Лев Арменин бысть иконоборец лют зело. И се второе иконоборство попущением Божиим грех ради наших воздвижеся, и паки без украшения Божия церкви являшеся. По Лве же Арменине бысть царь Михаил Травлый, иже от Аммория, и не почиташе святых икон, но аще и не почиташе, но заточеныя святых ради икон повелѣис темниц свобожати, непокоряющих же ся его ересем повелеваше из града изганяти, а не мучити ни заточати. И по нем царство прият сын его Феофил. Неистовство же на иконы и гнев имея паче прочих и непокоряющихся ему многих святых различным мукам и смерти предаде. Седмый же собор бысть во царство Константина царя и матери его Ирины, в лета священства Андреяна, папы Римскаго, и Тарасия, патриарха Царяграда. По Андрияне же, папе Римстем, бысть в Риме Лев папа. Сему папе Лву завидеща, сродницы бывшаго Андрияна папы и изгнаша его от престола и от града Рима. И много печален бе папа Лев, остав престола, и не обреташе ни откуду помощи, посла во Царьград ко царю Константину и к матери его Ирине, прося помощи, и не обрете. И сего ради приде советом ко Фряжскому князю Карулу. Фрязове же своя князи наричют риги. Князь же Карул даде папе Лву руку помощи велику и паки устраяет его в Риме на престоле и всех под руце его покоряет. Папа же Лев, совещався с святители и со князи Римскими, да поставят себе в Риме царя благочестива, «да царство, рече, паки от Рима начнется, Гречестии бо, рече, цари всегда от ереси в ересь преходят, да не и мы сих ради зле постражем», ово же и Карулу воздая благодать, яко помощник ему бысть и победитель на враги, и призывает его и Греческим законом венчевает его царя, но примесив законы Еврейския, не вем которым помыслом, от главы даже до ногу маслом сего помаза. Сице убо первый соуз градовом раздрася и брани и которы воздвизахуся, и межи материй вхожаще мечь, разделяющи и секущи с лютым гневом и яростию оружною человеки младыя и старыя, новый Рим, Константинов град, от ветхаго и древняго Рима и многословущаго в разделение и ненависть облачахуся межи собою. Аще бо Карул от отца и деда християнин нарицашеся и чтяше Христов закон и соблюдаше благочестие и многу честь святым Божиим церквам воздаяше и чествоваше архиерейский и священнический чин, но приидоша с ним священницы и учитилие, имуще в себе ересь тайно, и помале начаша развращати люди Господня и учити тайно своим ересем. Потом же и яве учение, их являшеся, яко от царя Карула любими и помогаеми. И тако начаша глаголати, яко от Отца и Сына исходит Дух Святый во едино начало, и опресноки служити, и иныя многия ереси. Папа же Лев виде погибающи люди Божия, понеже в сладость приимаху учения их, не имяше же у себе в Риме премудрых учителей, еже отгнати таковое злое учение еретическое, восхоте послати в Царьград мудрых ради и убояся, понеже тогда во Цареграде царствующему Феофилу, иконоборцу люту. И тако посылает во Иерусалим к патриарху Фоме, да послет к нему премудрых мужей, могущих обличити и прогнати таковую ересь от Римскаго града. Патриарх же Фома избра Михаила сиггела Великия церкви со ученики его Феодором и Феофаном самобратиями и Иовом и посла их в Рим к папе Лву. Они же грядуще изволиша ити в Константин град и обличити царя Феофила иконоборца, и укрепити люди Божия о честных иконах. Царь же Феофил повеле яти их и мучити. Святый же Михаил протосиггел в тех муках предаде святую свою душу Господеви, такоже, и ученик его Иов, Феодору же и Феофану по многих муках лица их сожже таковым образом. Сотворив железную дску и начерта на ней изваянием стихи таковыя: «Всякому желающему притекати ко граду сему, сиречь Иерусалиму. Идеже пречистеи сташа Божия Слова нозе на востание вселенныя, явишася честному месту сему сосуди лукавии злобесныя прелести». Сосуди лукавии злобесныя прелести нарицает святых сих — Михаила и Феодора и Феофана и Иова. «Темже, многи неверием содеявше скверная и злая злочестивым мудрованием, далече отгнашася, яко отступницы, от града Иерусалима. К сему же граду Константинову державному пришедше, не осташася злаго буйства, темже и написашася лица их, яко злодеем, и осужаются и отгоняются и отсюду паки» [Толкование Феофилово]. И сице таковым железным начертанием сожже лица святых Феофана и Феодора и посла их в заточение. Святии же збодение личное яко венец з бисером и с камением сияющ ношаху, и грядуще на изгнание, мужа некоего, ловяща рыбы, обретоша и въсписаша к великому Мефодию, патриарху Константиноградскому, и тому во изгнании крепко в темницы держиму, малосложно писание амврийским числом, имуще сице: «Живому мертвецу и мертвецу живоносному, живущу на земли и ходящу на небеси, написаннии пишут, связании связаному, заточении заточеному». Святый же Мефодие, прием сия и прочет, восплака и написа к ним сице: «Что сие, еже в книгах небесных званием написаным на лицах, целомудреным, уязвеным живый погребен яко к соузником к живым погребеным». И тамо в заточении великий Феодор ко Господу отъиде. В час же скончания его слышахуся аггелская пения, с ними же и той споя. Блаженный же Мефодие, патриарх Константиноградский, страдаше горко в заточении в злотемничной пещере и зубом его избиеном бывшим и челюстем сокрушеном и иными многими муками мучяху того злочестивии безчеловечне, якоже твердое железо бияху его кузнечьскими млаты. Феофан же пребысть во изгнании и до смерти Феофила царя. Таковыя убо ради вины святый Михаил, протосиггел святыя Великия Иерусалимския церкви, и с ученики своими Феофаном и Феодором и Иовом — ни един их прииде в Рим. Папа же Римский Лев виде люди Божия погибающи от прежереченных Каруловых еретиков, неудомевашеся и скорбяше и сего ради написа на дсках исповедание православныя веры, еже есть «Верую во единаго Бога», и постави на стене в церкви, да входящии глаголют, исповедующе Сына от Отца рожена и Святаго Духа от Отца исходяща. Сие сотвори на укрепление верных и на обличение онех еретиков Каруловых. По преставлении же папы Лва бысть папа в Риме Венедикт. Сей Латынянин убо родом и уметель обоим книгам, Латынским и Греческим. И виде такоже люди Божия развращаемы от еретиков, и тако обема языки, Греческим и Латынским, написа исповедание православныя веры, «Верую во единаго Бога», и повеле всем християном глаголати, Греком же и Латином, на обличение прежереченных еретиков и прелести их не послушати. По сем же и послание написав посла к четырем патриархом: Цареградскому и Александрьскому и Антиохийскому и Еросалимьскому, яко по скончании его не приимати пап Римских в воспоминание в церкви, дондеже исповедят писанием, како веруют, понеже «вкоренися, рече, в Риме злая ересь, и погибают мнози, раболепно почитающе Святаго Духа, еже от Отца и Сына исходити и опресноки служити и иная сеюще злая еретичества». По Венедикте же бысть папа в Риме 1. Андреян, 2. Леон, 3. Стефан, 4. Пасхаль, 5. Евгений, 6. Валентин, 7. Григорий, 8. Сергий, емуже преже имя Свинячей род, 9. Леон, 10. Иван, Ангилский род, 11. Венедикт, 12. Никола, 13. Андреян, 14. Иван, 15. Мартин, 16. Андреян, 17. Стефан. Сии вси православни быша и единомыслени четырем патриархом: Цереградскому и Александрийскому и Антиохийскому и Еросалимскому. В лета же Лва царя Премудраго, сына Василиева Македонянина, бысть папа в Риме Формос проклятый, имый в себе ересь сокровену онех Каруловых еретик. Благочестивии же людие нарекоша его папою, не ведуще в нем ереси. Он же написав исповедание православныя веры лестию и посла к четырем патриархом. Егда же прият престол, начат учити ересем люди Божия, и тако Латини вси удобь прияша злое учение и от царствия Греческаго и от четырех патриарх отлучишася. По первом Формосе, иже началник ереси, 2. бысть папа Внифантий, 3. Стефан, 4. Роман, 5. Феодор, 6. Иван, 7. Венедикт, 8. Леон, 9. Христофор. Сии вси единомыслени бяху Формосу. Бывшу же Сергию патриарху во Цариграде в лето 6552, сей по совету триех патриарх истяза папу Римскаго Христофора, иже бысть осмый папа в Рим по Формосе, в лета Константиноградскаго царя Василия Болгарогубителя, Христофор же исповеда и яви, глаголя, яко Пресвятый Дух от Отца и Сына исхожение имать, и сего ради Сергием, патриархом Царяграда, и прочими патриархи от книг, идеже писани суть патриарси, извержен бысть и проклятие наследова. По сем же Христофоре, развращеннем исповеднице, написаша яве Латини в Римстей церкви, яко и от Сына Дух исходит. Ведомо же буди, яко от 6-го собора до царства Константина царя Манамаха обличаеми бяху помалу Римляне от тогдашных святых отец и патриарх о ересех, еже отчасти имяху тогда, и о опресноцех. Потом же явлено бысть, яко хулят на Дух Святый, и отсекоша до конца помяновение папино и всех отринуша и отвергоша их и конечным проклятием прокляша их. По многих же папах бысть папа великаго престола Римскаго Петр Гугнивый. Сей безаконный отверже веру християнскую и всю Италию возмути и многи ереси злыя насея во всех Римских странах, и потом повеле комуждо седмь жен держати, а наложниц елико хощет, и арганом и мусикиям в церкви повеле быти и браду и лана постризати и попу и диякону и всякому человеку, мужу и жене, сиречь мужску полу и женску, и гипсы и волки ясти и ина многа неподобная беззаконный сей уставя с единомысленики своими Римляны, и сих ради отвержени и прокляти. Вретанийский убо остров велик зело, иже прияша крещение при велицем цари Константине и быша благочестиви и Греком единомыслени, книг же по своему языку не имуще, но Латынским языком держаху книги. Бяху же всегда врази Римляном, папа же совещася с Римляны своими и сотвориста со Вретанияны мир и любовь и многими клятвами утвердиста их, еже всегда мир и любовь имети и на съпротивныя подвизатися заедино и уложеный мир и любовь хранити крепко. Папа же обещася поставити им царя во Вретании, они же царскаго ради имени ради быша и единосоветни папе и всем Римляном. И понеже книги Латынским языком имети Вретанияном удобь, преврати их папа в Римский свой закон и князя их Вретанийскаго постави им царя и написа закон, да от Латын поставляется папа в Риме, а во Вретании поставляется царь от Алман вместо Константиноградскаго Греческаго царя. Такоже и по градом болшим Римских стран вместо четырех патриарх, Цареградскаго и Александрийскаго и Антиохийскаго и Еросалимскаго, постави своя четыре патриархи, иже нарицаются гординалы. И тако совершенно удалишася благочестивыя веры хрястиянския и закона Греческаго и своя законы составиша по своему обычаю и ратни и враждотворни быша Греком и в гордости своей и во отступлении проклятие наследоваша.

Дозде из Русскаго Летописца (Хронографа).