Иже во святых отца нашего Кирила патриарха Иеросалимскаго

сказание на осмыи век, и устав ко исповеданию. и предание к познанию веры,

якоже Христос паки приити имать судити живым и мертвым, Его же царьствию не будет конца.

и о антихристе, от пророка Даниила.

 

 

Пролог на первую главу.

О двою Христову пришествию, и о знамениях ею Кирил святыи в первой главе сказует, наказуя нас, паки, с радостию Его ожидати. егда же приидет не еще суд приимет, но всех противников осудит, а верных своих от мук антихристовых свободит и мзду даст. Христов приход не един токмо исповедаем, но и вторыи, перваго велми преславнее. первые убо терпению имел образ, а вторыи, царства Божия показует знамение. зане же убо и ино сугубо о Господе нашем Исусе Христе глаголется, якоже сугубое и рождение, едино от Бога Отца прежде век, а второе от Девы под леты. такоже сугубыи приход, един не славныи, а вторыи, иже имать быти. В первыи приход повит был пеленами в пещере, а в другии одеется в свет, яко в ризу. в первыи претерпе распятие, нерадя о срамоте, а вторыи приидет в славе велице, силами аггельскими хвалим. не имамы же убо довол о первом приходе, но и втораго ожидаем. и в первыи приход глаголаша, благословен грядыи во имя Господне [Пс. 117]. и во вторыи тожде имамы рещи, егда со аггелы встретивше Господа и кланяющеся, благословен приходяи во имя Господне. приидет убо Избавитель не к тому суд прияти, но иже Его осудили, осудити. иже первее терпяше, егда Его судили, ныне, воспоминая, глаголет законопреступником, яко дерзостне Ми есте распятие сотворили, Аз же молчах тогда, строения ради. ныне убо волею призывает людей уча, тогда же имут поддатися аще и не хотят.

Беседа на первую главу.

Христово пришествие исповедаем не едино токмо, но и другое. пришествие убо Христово первое бысть с небесе на землю, в полшесты тысящи лет, от сотворения света, егда изволи во утробе пречистыя Девы от Духа Святаго по человечеству зачатися [воплотитися] и родитися. Первое Христос прииде во убожестве, смирено же и неславно, и не имея дому своего зде на земли. и се творим сих ради вин; первая вина, дабы вси смирении и нищии, и от мира преобидимии доброволне, и без труда к Нему приходили и с Ним общение имели, о них же всегда промышление [прилежание] показует [Мф. 106], братиею их всегда нарицая. за них же поручается глаголя, елико есть сотворили братии Моих меньших, Мне сотвористе, и Аз за них воздам. другая вина, дабы сим устроением [образом] показал нам собою рабов своих, наипаче иереов Христовых [Мф. 37]. занеже убо яков сам Христос бысть, тацы бы и слуги Его были, по глаголющему, несть раб болии господа своего. аще и мало что в сем мире приимающе от человек укорение и хулы, но не творили бы ни едину месть кому, но паче сами скорби и беды терпели. Третия вина, даже антихриста и слуг его покажет, яко во всем Ему противни являющеся, горделиви, высоцы, богати, славни, Христовым рабом люти, и страшливи лукавством и нуждено всех к себе привлачаще, сами убо в напастех не терпяще, всем же беды предлагающе, а наипаче Христовым рабом. и не тако о убогих пекущеся и их величающе, якоже о богатых прилежаще, хотящих зде воцаритися. а кто ся им не покорит, мучат люте. от них же нам дая Христос защищение [опасение] рек [Ин. 49], грядет сего мира князь, и во Мне не имать ничтоже, ниже в Моих место будет имети. Христов приход возвещаем, не токмо первыи, но и вторыи, и перваго славнейше, иже имать быти во осмом веце. занеже свидетельствуют вси учители святии, яко Христос был на земли. второе паки во осмыи век с небес приити имать [Евангелие, неделя Фомина]. и будет приход Его вторыи на землю славно, с силою зело великою и страхом на противных, о нем же две вине. Первая, да силою и духом уст своих онаго гордаго зде в мире, человеки неодолеемаго антихриста, и слуг его, лживых пророк убиет, якоже сам пророком глаголет на пророки лживыя, иже прельщают люди Моя. Вторая вина, да всех своих, иже прельститися не давше доконца, и претерпят от всякаго страха и ужаса антихристова, силою своею избавит, и славою вечною зде в мире преобиденных тогда прославит. якоже сам глаголет, славящих Мя прославлю. а иже Мя преобидят, бесчестни будут. и паки глаголет [Мф. 43], приидете ко Мне вси труждающиися, и обременении, и Аз покою вы.

 

Глава вторая.

Понеже пророцы и святии апостоли два прихода Христова ведяще, человеков наказующе, дабы Его в первыи приход с любовию прияли, а на вторыи з добрыми делы готови были, занеже в то время всем суд будет, и огнь все искусит. И о сею обою приходу, глаголет Малахия пророк [глава 3, Мф. 106], внезапу приидет в церковь свою Господь, Его же вы ищете. и се приидет, глаголет Господь Вседержитель; и кто убо стерпит день прихода Его. или кто пребудет пред лицем Его. занеже приходит яко огнь паля, и яко мыло перущих, и вся паля и очищая. и потом абие глаголет сам Избавитель, прииде к вам в суде, и буду свидетель скор на лукавыя, и на прелюбодеющыя, и на кленущыяся именем Моим во лжю. того ради увещавая Павел глаголет [1 коринф. 128], аще кто созидает на основании Его злато, сребро, камение драгое, дрова, сено, тростие, и когождо дело яве будет, день бо явит, зане огнем открыется. по истинне ведая оба прихода Павел, егда к Титу пиша, глаголет [Тит., зач. 302], явися благодать Божия спасителная всем человеком. наказующе нас, да отвергшеся нечестия и мирских похотей, целомудрено и праведно поживем в нынешнем веце, ждуще блаженнаго упования, и явления славы великаго Бога и Спаса нашего Исуса Христа. разумееши ли, како ти глаголет, яко о первом приходе радуемся, а другаго ожидаем. ибо и символ он по вся дни научает и воспевает и возшедшаго на небеса, и седяща одесную Отца. и паки грядущаго со славою судити живым и мертвым, Его же царствию несть конца.

Беседа на вторую главу.

 Занеже приходит, яко огнь возгорая [паля], Малахия пророк рек, паче же сам Избавитель им глаголет, яко сам прииду к вам в суде, и буду свидетель скор и прочая. Давыд глаголет [Пс. 17], взыде дым гневом Его, и огнь от лица Его воспланется. углия возгорешася от Него, и преклони небеса и сниде. и в другом паки [Пс. 49], Бог яве приидет, Бог наш и не премолчит. огнь пред ним возгорится и окрест Его буря зелна. призовет небо свыше и землю разсудити люди своя. и паки [Пс. 96], огнь пред Ним предъидет, и попалит окрест враги Его. и Павел пишет [зач. 128], когождо дело яве будет, день бо явит, зане огнем открыется. Исаия же пророчествует сице [66]. се Господь, яко огнь приидет, и яко буря оружие Его, воздати яростию месть свою. и мщение Его в пламени огнене, занеже огнем Господним осудится вся земля, и оружием Его всяка плоть. и много будет язвеных Господем. и то все скоро пред судным днем, по воскресении имать быти, якоже Кирил святыи в шестой главе пишет, яко все имать огнем очиститися, и ничтоже нечистаго будет даже до небесе [Мф. 47]. занеже и Петр апостол глаголет в послании своем о сем сице [2 Петр., зач. 68], яко небеса беша исперва, и земля от воды, и водою составлена Божиим словом, ими же тогдашнии мир во дни Ноевы водою потоплен быв, погибе. а нынешняя небеса и земля, темже словом сокровена суть, огнем блюдома в день суда, и в погибель нечестивым человеком. воньже небеса с шумом идут, и стихиа сжегаемы, растаются. земля же и яже на ней дела згорят. новых же небес и новыя земли, по обещанию Его чаем, в них же правда живет. Темже зле Ориген еретик, и друзии еретицы учат, яко муки временны суть, а не вечны. и ныне пред судным днем грешных души сами, кроме дела, во огни чистителном мучатся, и от места на место преходят, еже есть противно правде. Понеже апостол святыи учит нас глаголя [к солун. 274], иже не послушают благовествования Господа нашего Исуса Христа, муку приимут погибельную вечную, от лица Господня, и от славы крепости Его, егда приидет прославитися во святых своих. Иоанн же Златоустыи о сем сице глаголет [Златоуст 2 епистол.], где суть тии, иже глаголют, яко не вечны суть муки. от единаго бо всем лица Христова, ови в муку, ови в царство небесное пойдут. такоже и Дамаскин Иоанн святыи пишет [книга 4, глава 28], понеже душа добра, ниже зла зде сущи, кроме тела, может творити, но обоя вкупе. темже обоя вкупе и мзду приимут. и Григории Богослов на уязвление града пишет. зде очистимся от Бога напастьми и бедами, а не онамо. занеже тамо мукам, а не очищению время, якоже Ориген лжет. А что еретицы взимают себе на свою ересь свидетельства. первое от евангелия, якоже Христос наказует [Мф. 12], дабы всяк человек, дондеже в мире пребывает, увещался с соперником своим, зане ввержен будет в темницу, и не изыдет оттуде, дондеже воздаст и последнии кодрант. и се зде явьствене глаголет, что [яко] то имать быти по судном дни, идеже по ответе отдан будет в вечныя муки, и не может ничим оттуде искупитися, идеже бы дал и последнии кодрант [Мф. 69]. что бо человек может измену дати за душю свою. тако сие место вси святии разумеют [исповедуют], якоже и самое сие слово на концы сего слова Кирил святыи толкует, яко и на том месте показует вечныя, а не временныя муки. якоже апостол Павел глаголет [зач. 128], и егоже аще дело згорит, отщетится, сам же спасется, сиречь не згорит, или сохранен будет, тако, якоже огнем. и се в страшныи и последнии он день, великии судныи имать быти, иже, якоже речеся, огнь всю землю сожжет, его же вси человеци по делом своим проити имут. якоже и Златоустыи глаголет; аще кто златое оружие нося, пройдет реку огненую, светлейши исходит. аще же сено и дрова нося пройдет, то не токмо да себе что поможет, но и то погубит, иже имать. темже образом и при делах, о сем [сего ради] глаголет, яко отщетится, и се есть первая мука. а яже апостол глаголет сице есть, яко сам с делы своими не погибнет, еже бы их не имети, но пребудет во веки во огни. занеже и нам есть обычай глаголати, спасает о той вещи, яже во огни не згорает скоро. темже и зде рекл, спасает не иное что, но точию долгость муки знаменует, яко бы рещи, сам пребудет непрестанно мучася. до зде суть словеса Златоустаго, сего ради несть мукам конца, и огня временнаго, ниже душям скоро по смерти очищения, занеже в день судныи той же огнь праведнии пройдут и светли явятся. грешных же по ответе страшном, егда речет, отъидите от Мене, не знаю вас, обымет, и вовеки мучити имать. и сей суд и ответ Божии не самым душям, кроме тела, ниже преже воскресения имать быти, якоже друзии учат еретицы, но егда душа с телом по воскресении на суд востанет, тогда и мзду по делом, кииждо человек прияти имать, якоже апостол глаголет [зач. 178]. всем бо явитися нам подобает пред судищем Христовым. дабы всякии приял, яже с телом сотворил, или доброе, или злое. о сем и Златоустыи глаголет, приимет убо тело, яже сотворило, или доброе, или злое. зане якоже во обоих делех поработало души, тако же и мзду с нею приимет. заграждает же зде уста еретиком, иже глаголют, яко иное тело тогда востанет; еже несть тако, дабы овому телу согрешати, а иному мучитися; или овому добре творити, другому же венчану быти, якоже и сам Христос глаголет [Ин. 16], грядет час, воньже вси сущии во гробех, услышат глас Сына Божия. и изыдут сотворшии благая в воскресение живота, а сотворшии злая в воскрешение суда. и се веждь, яко несть единым душям муки и мзды ныне, прежде суднаго дне, но по суде вкупе с телом. якоже и инде пишет [Деян. 40], лета убо неведения презрев Бог, яже ныне повелевает человеком всем всюду покаятися, зане уставил есть день, воньже хощет судити вселенней в правду. Такоже и Иоанн Богослов пишет [Апокалипсис 11]. и двадесять и четыре старцы падоша на лица своя, и поклонишася Богу глаголюще, хвалим Тя Господи Боже Вседержителю, яко прииде гнев Твой, и время мертвым суд прияти, и дати мзду рабом Твоим и святым, иже боятся имене Твоего малым и великим. Зри сопротивниче, яко не единому мука и мзда будет, но всем в едином времени. якоже и сам Христос глаголет [Мф. 50], оставите расти обое вкупе до жатвы. и во время жатвы реку жателем, соберите первее плевелы, и свяжите их в снопы, яко сожещи я, а пшеницу соберите в житницу мою. И паки тамо же ниже, сам ту притчю Господь сказа глаголя, жатва есть кончина веку, а жателие аггели, якоже плевелы собирают, и огнем сожигают. тако будет в скончание века сего. послет Сын человеческии аггелы своя, изберут от царствия Его вся соблазны, и творящыя беззаконие, и ввергнут их в пещь огнену. ту будет плачь и скрежет зубом. тогда праведнии просветятся яко солнце в царьствии Отца их. имеяи уши слышати, да слышит. Слыши же и ты еретиче сего сказания, еже Христос глаголет, иже последняго дни, в скончании света сего, всем суд имать быти. тогда же и мзда грешным и праведным дана будет. аще ли речеши, яко малии греси ныне судят и за них до времене мучат, о том ся прелщаеши. Глаголет бо Христос [Мф. 47], иже всяко слово праздно аще возглаголют человецы, воздадут ответ за него в день судныи. Видиши ли яко не токмо за дела, но и за слово, не ныне, но во оно время судити Бог имать. такоже и за сие, еже алчнаго не накормиши, жаднаго не напоиша и прочая, не на время, но на вечныя муки, осудив, отошлет. якоже глаголет [Мф. 106], и пойдут сии в муку вечную, праведницы же в живот вечныи. того ради за умерших молимся, и милостыню творим, иже еще и малыми грехи не осужденом быти и прежде ответа Судию умолити. и не токмо человеческия души, кроме тела, ныне не бывают осуждени и казними, но аггели согрешившии [еже есть] диаволи еще суть по делом своим казни не восприяли, и не мучатся во огни негасимом. но суть заключени во аде. и несть пеклом, яко еретицы слагают. Но пекло ся разумеют, иже печет и палит, а ад греческое слово есть, и разумеется место безведомое; или место темное из ниских пропастей преисподних. в ня же Христос душею обоженною сниде, души праведных от ада свободи. якоже пишет Петр апостол [Петр зач. 60], умерщвен убо Христос плотию, оживе же Духом. о Нем же и сущим в темнице духовом сошед проповеда. и пророк глаголет [Пс. 106], изведе их из тмы и сени смертныя, и узы их растерза, сиречь праведных токмо изведе. а неверных и грешных тамо з бесы остави, идеже ныне беси душы грешных влекут к своим старейшинам, которыя тамо оглушени седят в темных до дне суднаго. а иныя зде на земли пакость творят человеком. ибо егда Христос во стране гергесинской изгна из человеков бесов, лютых зело [ефес. глава 2; Мф. зач. 28]. беси же мняху, яко Христос мучити их хощет, и начаша вопити, что Тебе и нам [до нас] Исусе Сыне Божии, пришел еси прежде времени мучити нас. Христос же по их прошению, не во огнь, но во свиния посла их. Видиши ли еретиче, и беси знают, яко еще им не прииде время мучитися. а о тех, иже суть во аде, Июда брат Господень пишет [Июда зач. 1], аггел же, не соблюдших свое начальство, но оставльших свое жительство, на суд великаго дне узами вечными под мраком [под темностию] соблюде. О том Златоуст пишет, что им будет в страшныи день судныи; един токмо весть праведныи Судия, иже комуждо по достоиньству с правдою воздаст. Такоже и Петр апостол пишет [Петр зач. 66], аще Бог аггелов согрешивших не пощаде, но пленицами темности связав, предаде на суд мучимы блюсти, видиши ли яко в темности седят до суда. Сего ради и Златоуст пишет, виждь яко аггели согрешившии мучатся. и егда сниде Христос с небесе, тогда началнейших бесов заключи в пропасть [бездну]. сие бо явьствено о сем, егда Христа молиша беси, дабы их не послал в бездну. единых бо связав в темность заключи. а других повеле изгоняти, ко ученикам глаголя, се даю вам власть на нечистыя духи, яко да изгоняти их. а в день пришествия Его изведет на большия муки. а что ныне заключи их в пропасть [бездну], тех в то время предаст их огню вечному. а якоже прежде суднаго дне дияволи во огни не мучатся. Тако же и души грешных человек, якоже пишет [Петр зач. 66]. весть Господь Бог благочестивых от напасти избавляти, а неправедных ко дни судному к мучению блюсти. О том бо явствено Иоанн Богослов пишет [Апок., 20], егда суд приидет, тогда смерть и ад ввержени будут в езеро огненое. се есть смерть вторая. И Христос глаголет [Мф., зач. 55], тако будет в скончание века, изыдут аггели и отлучат злых от среды праведных, и ввергут их в пещь огненую. ту будет плачь и скрежет зубом. и глагола им Исус, разуместе ли сия вся. они же реша Ему, ей Господи. Веждь же убо и ты еретиче и разумей, яко души грешных едини, кроме тела, прежде суда, мучения огненаго не восприяша. Тако и праведных души, кроме тела, венчания, ни царства небеснаго еще не восприяли, но по воскресении с плотию вся сия восприимут. якоже сам Христос глаголет [Ин. зач. 47, Мф. зач. 100, Лк. зач. 87], еще паки прииду, и пойму вы к себе идеже есмь Аз, и вы будете. И инде глаголет, идеже будет труп, тамо соберутся и орли. и от того времене начало приимши, вечне с Ним будут, якоже Павел апостол пишет [к солун. 270], яко сам Господь в повеление, и во гласе архаггелове и в трубе Божии снидет с небесе, и мертвии о Христе воскреснут первее. потом же и мы живущии оставшии купно с ним восхищени будем на облацех в сретение Господне на воздусе. и тако с Господем будем. Еще ли зде еретиче речеши, яко Павел, и вси святии, иже со Христом суть, и восприяли вечныя благая, и царство небесное; но души святых в раи суть на высоте, на широком месте, идеже присещает свет лица Божия. Ибо апостол Павел глаголет [филипис. 238]. обдержим же есмь от обою желание имыи разрешитися, и со Христом быти много паче лучше. и на другом месте глаголет [2 коринф. зач. 178], дерзаем же и благоволим паче отъити от тела, и внити к Богу. Исповедаю бо, яко иная есть речь дерзновением хотети, а иная желанием достигнути. Павел от плоти разрешитися, яко добрых глагол желая. а еже со Христом быти, и поведает еще паче того лучши есть. сего ради доброе получи, от плоти разрешение. а лучшее, еже со Христом быти еще содевается. ибо и вси святии, честно умершии, желают и веруют со Христом быти, аще и ныне, в нынешнем или в будущем веце со Христом суть верою и надеждею, и Христос с ними есть. яко глаголет [Мф. зач. 116]. Аз есмь во вся дни с вами до скончания века. но и вси святии, егда с плотию из мертвых, яко и Христос воскреснут, не верою и надеждею, ею же востанут, но лицем к лицу с Ним во веки пребывати имут. того ради и Павел апостол не глаголет, скоро изшедшии из тела, паки венчани в царствии, но исповедает еже в теле со Христом быти паче того лучши. Ибо еретицы манихеи поведают, яко души без телес венцы, вечная благая царства небеснаго, восприяли. того ради телеса их из мертвых не имут воскреснути. ибо и разбойника Христос ввел и без плоти в царство небесное [Епифании Кипрскии, манихейская ересь]. их же псами безстудными Златоустыи нарицает. И пиша о том словеси, яко Христос рек разбойнику [Лк. зач. 111], днесь со Мною будеши в раи. показует, яко рай несть царство небесное. царства бо небеснаго радостей око не виде и ухо не слыша, и на сердце человеку не взыде. а рай паки очи Адамли видеша, и уши Павли радости неизглаголанныя, егда тамо в рай восхищен бысть слыша. в той бо рай Христос душю разбойничю и иных святых введе, якоже пишет. а в царство небесное по воскресении из мертвых и по страшном суде, и с телесы Христос ввести обеща, и венцы подати, яко пресвятое евангелие поведает. Рай бо, еже душам даде, той бо есть в покой или в соблюдение и в руце Божии, якоже пишет [Премудрость, 3], праведных душа в руце Божии, и не прикоснется их мука. а царство небесное еще воздати имать. Якоже Златоуст Иоанн от лица Христова глаголет [ Златоуст в слове Предста Царица], изгубил еси рай, возми его. а воскресение нетление и со аггелы веселие, Сына на облацех сретение, и с Ним во веки пребывание радости, иже не взыде на сердце человеку. егда приидеши ко Отцу Моему, тогда тебе воздам. а ныне по вере и по надежди до судняго дня все предлежит. яко той же Златоуст в другом месте пишет [Во Июдине послании, како Михаил архаггел преся со диаволом о Моисеове телеси]. понеже егда душа от тела разлучится, и пойдет оттуду, сретают ея аггели Божии, и беси лукавии, превратны показующе дела, их же сотворила, или злы или добры. и в кождо место, или сии, или овии посадятся, соблюдающе даже до последняго дне, воньже на суд вси востанем. и тогда или в вечныи живот или в непроходимыи огненыи пламень пойдем. Веруй же в правде, а не сводися сомнением. Ибо Павел явствено, к Тимофею пиша, глаголет [2 Тим. зач. 298], течение соверших, веру соблюдох. прочее убо соблюдаетмися венец правде, его же даст ми Господь в день он, праведныи Судия, не токмо же мне, но и всем, возлюбльшым явление Его, виждь, яко Павел и вси святии еще не венчашася. о том же и Златоуст пишет, егда вси святии в судныи день веньчани будут. тако же и Тимофей святыи и Павел апостол [Златоуст на послан. к Тим. ]. Тако же и о всех святых пишет [ко евреом зач. 330], иже верою победиша царствия, содеяша правду, получиша обетования, и чюдеса многа сотвориша. и не прияша обетования, Богу лучше что о нас предусмотрившу, да не без нас совершенство приимут. О том же и Златоуст пишет [в толков. Златоуста], тогда бо вкупе с ними и они вси совершени явятся. аще нас и в победах предварили, но в венчании не имут придварити. и Бог не изволи им того ради близ себе быти, но и нас, яко Отец, всех вкупе почитает. Показуется сия глава явьствено о триех речах блядей еретических. Первее, глаголют еретицы, яко муки временны суть, а не вечны. ибо и беси долго мучившеся за грех, и сотворится, яко престати мукам, и потом беси изыдут из них, яко Ориген с советники своими блядет. их же всех таковых на пятом вселенском соборе святии отцы и с ними Вигилии папа Римскии проклятию вечному предаша. Второе, яко суда по единому Бог ни кому не творит. аще бы тако было, то уже бы суда ждати не потребно. и о том блядут [лжут] еретицы. Мы же убо веруем, яко имать приити со славою судити живым и мертвым, всем во един день. Третие, яко души сами без телес царствия небеснаго и благ вечных преже воскресения еще не прияша. аще бы душа без тела венчана, якоже блядут проклятии манихеи, то телу несть пользы воскреснути, и вера и надежда святых уже погибе. Первее о сем убо не Дух Святыи, но дух антихристов умысли ту временную муку [приклад папе римскому]. того ради, дабы вси в нечистоте телесней, и в скверном житии его волю исполняли, и беспечалное и безстрашное бы житие жили. и страх грозных мук и вечных отложили бы. и временныи огнь чистительныи быти поведает, в нем же душа сама без телеси всего отмучитися может. Второе, дабы прежде смерти о гресех христианским иереом, епитемиями и постом и молитвою и отлучением, и нуждею человеком не изневолил, якоже прежде человецы молитвою и молением и добрыми делы милость Божию приимали. Третие, к томуже еще, дабы человецы страшнаго суда и грознаго Судии ни в чем не страшилися, ныне суд душам самем без телес быти поведает. даже сам всю власть Христову на себе восхитив, души прежде времене едины на время к чистцу отошлет. А других своею властию оттоле изведет, и в царство небесное пошлет. а про страшныи суд и про вечныя муки глаголет, то все страх и прелесть.

 

Глава, 3.

Исповедает, яко Господь, не стерпев злых дел человеческих, приидет, и всю тварь обновит. а еретиком воспоминает, дабы солнца, и месяца и неба со звездами не почитали, паче слова Божия, понеже оно во веки пребывает, а сии не вечны суть. В той же главе и о последних днех. Приидет воистину Господь наш Избавитель Христос с небесе в скончание века сего в последнии день со славою. и все сотворение паки обновится. понеже убийства и блуда, и всякаго злодейства, и всякаго греха исполнися земля. и кровь с кровию смесися на земли. даже не будет страшное таковое замедление, неправды исполнено, применитися имать таковая злоба, даже лучшая явятся. аще ли хощеши слышати от писания указу; слыши Исаию глаголюща [13], небо совьется, якоже свиток, и звезды спадут, яко листвие. Паче же сам Христос глаголет [Мф. зач. 100], солнце померкнет, и луна не даст света своего, и звезды с небесе спадут. не печалуем же мы, яко умираем, ибо и звезды, яко слышим, умирают, но паки востанут. совьет Господь тогда небеса, не того ради, да их погубит, но да еще чюднейши их сотворит. слыше Давыда пророка глаголюща [Пс. 101]. в начале Ты Господи землю основа, и дела рук Твоих суть небеса. та погибнут, Ты же пребываеши. кто речет зде о сем, се бо явствено глаголет, погибнут. слыши, имаши разумети, и другая словеса, яко та погибнут, и вси, яко риза, обетшают, и яко одежду свиеши их и изменятся. видиши ли, како в словесех к человеку глаголет, се бо не согрешившии погибнут. а кто тако не творит, якоже заповеда Господь, како не имать погибнути. Таково бо воскресение, яко и небеса обновления ждут. солнце преложится во тму, и луна в кровь [Иоиль, 3]. да ся научат иже от манихейския ереси обратилися, яко да сих светил богами не творят. и померцающаго и потемняющаго солнца, вместо Христа, нечестиве да не мнят. но паче слыши Господа глаголюща [Мф. зач. 101], небо и земля мимо идет, а словеса Моя не мимо идут. несть бо равно сотворение противу Сотворителя Господа. и кровь с кровию смесися на земли. якоже первое при Нои; ради беззаконнаго смешения, мир весь потопом погуби. такоже и ныне, егда вси человецы во осквернение впадоша, и свое умышление беззоконие творяху. и Бог с ними весь мир погубити имать. Повеле бо Бог древле сыновом своим не смешатися со дщерми человеческими, и никотораго совета с ними не имети. они же духовнаго в себе ничего не имуще, и прелестем мира сего вдашася. и премениша на подобие временное, и возлюбиша славу человеческую, неже Божию. а не помыслиша глаголющаго [Пс. 143], сынове их, яко новосажденна леторасль в юности своей. дшеря их удобрены и преукрашены, яко подобие церкве, хранилища их исполнь, отрыгающа от сея в ину, овцы их многоплодны, множащася во исходищях, сиречь в паствинах своих. волове их толсти. гради безмятежны. стогны их без пагубы. в том же людие себе ублажиша, яко пишет [Бытия, 6]. И видеша сынове Божии дщеря человечески, яко добры суть, и забыша повеления Божия, и соединишася и смесишася с ними. Бог же паки рече, не пребудет Дух Мой в человецех сих, понеже плоть суть, се есть иже плотию того ради во временном веце живут. Такоже егда сынове Божии со дщерми человеческими смесишася, и Бог мир весь потопи водою. Тако же бяше и ныне уже в скончании века содевается. иже церкви Христовы сынове, святители и духовнии мужи прежде реченныя главы вси, и житие мерзское у отступников и у еретиков видят, котории сами прелстишася. и им самем, яко плотяным, нужду мира сего, и терпение Христово и нищету, в проклятие и в вечныя муки влагают. а самовластие и разпущение во благословение и царство небесное поведают быти. того ради не хотяху во смирении и в терпении Христове быти, и к ним соединяются. и в веце сем, самовольном света сего с ними обще совет и дружбу прилагают. а забыв реченнаго апостолом [Тит. зач. 302], еретика человека по первом и втором наказании удаляйся, ведыи яко развратился есть таковыи, и согрешает всегда, и есть самоосужден. И паки инде глаголет [к рим. зач. 96], плотьская мудрость вражда есть на Бога, и закону Божию не покаряется, ни может бо. а якоже видим иже сами духовныя мужи плотьское все разумеюще, и в мире сем по плоти живуще, а не по духу. и ради свободнаго жития законы превращают, и пределы уставленыя им прелагают, и от веры отступают. а православие с еретичеством соединяют. скоро же и антихриста и скончание века сего содеватися имать. Первее бо приидет отступление [к солун. зач. 275]. И паки Христос приидет всем противным мщение воздая, якоже сам глаголет [Апок. 22]. аще кто обидяи, да обидит еще, а скверныи да еще сквернится. и праведныи правду да творит еще. и святыи да святится еще. и се гряду скоро, и мзда Моя со мною есть, воздати комуждо по делом его. Аз есмь альфа и омега, первыи и последнии. начаток и конец. и блажен есть иже соблюдает повеления Его, да будет область им над древом живота, и враты во град внидут, а вне псы и чародеи, и любодеицы, и убиицы и идолослужители, и иже сих любит, и творит лжю Аз Исус послах аггела своего да свидетельствует в церквах. да ся научат манихеи, да не почтут планит, и солнца паче слова Божия. да не рекут, яко церковныи устав, словом Божиим утверженыи, по солнечному хождению. Мы бо речем противу вашего суесловия. ибо по всех седми вселенских соборех, Духом Святым, и словом Божиим, седмижды сшедшихся, вся правила церковная суть утвержены и запечатлены. а наипаче о дни святыя Пасхи, дабы не з жидовы, ни прежде жидовския пасхи, ни с еретики праздновати написали [правила апостол, 70]; уне бо рече небу и солнцу изменитися, нежели церковным правилом в чем изменитися. понеже церковь словом Божиим утвержена [Златоуст в Маргарите слово 1, 2]. слово бо Божие небесе и земли крепчайше. якоже сам Христос рек [Мф. зач. 101], небо и земля прейдет, а словеса Моя не прейдут, аще и глаголют еретики, яко по планитам и по солнечному течению потребно суть дни и праздники пременити. Вемы же, яко несть иныя никоея потребы, токмо даже таковое хитростию, от единыя всех выше истинныя церковныя главы Христа, на иную всех простых человек сведут. о них же явьствено Павел апостол остерегая пишет [колос. зач. 254]. братие блюдитеся, да никтоже вас прельстит хитростию и тщетною лестию, по преданию человеческому, по стихиям мира сего, а не по Христе Исусе, яко в Том живет всяко исполнение Божества телесне. и да будете в Нем исполнени, иже есть глава всякому началу и власти. се бо Павел апостол воспоминает, дабы ложнаго ради умышления, ко иной ложной главе, кроме Христа, не приставали. И в другом месте той же Павел поношает, пиша глаголет [галат. зач. 210], но тогда убо неведуще Бога, служисте не по естеству сущим богом. ныне же убо познавше Бога, паче же познани бывше от Бога, како возвращаетеся паки на немощныя и худыя стихии, им же свыше паки служити хощете, днии сматряюще, и месяцы, и времена и лета. боюся о вас, еда како всуе трудихся в вас. сие бо рек, яко бы опустив паки, да увемы истины истиннаго Бога. ради дней и месяцев и времен, в след худаго человека идет. Якоже и Даниил пророк пишет [Даниил, 7], всю Божию и святых Его истину восхощет превратити злыми делы, и всех первых превзыдет, и трех царей искоренит, и словеса к вышнему возглаголет, святая вышняго смирит. и помыслит премените времена и закон. о сем да познаеши, яко предтечи антихристовы, в них же действует дух его, и возглаголет на Бога. даже тя по пророческих и апостольских Святым Духом не имать прельстити. Ты же разумей, ибо Духом Божиим утверженная церковь не требует дни и месяцы пременити. и во всех своих преданиях стоит непременна. и един устав и предание держит до скончания века. но дух антихристов слугами своими, якоже апостол пишет [к сол. 275], во лжи человечестей начнет сводити прелестию юных и неутверженых в разуме. от того нам соблюдатися учит глаголя [ефес. зач. 225]. да не бываем к тому младенцы умом, влающеся и скитающеся во всяком ветре учения, во лжи человечестей, в коварстве козней лщения. того же ради и Златоустыи глаголет, детем убо свойство есть неуставным быти в разуме, слушающе ложнаго учения. ныне сие, а потом иное, преходяще вся разумная, хотяще солгати. тако убо и еретицы творят. апостол же глаголет [ефес. зач. 225], блюдем истинствующе в любви, да возрастим в Него всяческая, иже есть глава Христос. Того ради Златоустыи ложь нарицает, они исповедают непрасно, и лживому учению учат. а мы правду творим во учении житием, словом, и любовию. инако бо никтоже может правды творити, токмо аще созидает старе в слове и учении нашем, во Христе главе нашей, якоже апостол глаголет [ефес. зач. 225], из Него же все тело составляемо, и счиниваемо приличне, всяцем осязанием подаяния по действу в меру единой коейждо части возвращение телу творит, в создание себе любовию. евангелие [Мф. зач. 98, Мр. зач. 58, Лк. зач. 105]. его же святыи Кирил во учении сем предлагает. Седящу Христу на горе Елеонстей, приступиша к Нему ученицы особь глаголюще, Господи скажи нам когда сия будут; и что есть знамение пришествия Твоего, и кончина веку; и отвещав Исус рече им, блюдете да никтоже вас прельстит. мнози бо приидут во имя Мое, глаголюще, Аз есмь Христос, и многих прельстят. егда же услышите брани и слышания бранем, зрите, не ужасайтеся, подобает бо всем сим быти, но не тогда есть коньчина. востанет бо язык на язык, и царство на царство, и будут пагубы и труси по местом, вся же сия начало болезнем. тогда предадят вы в скорби, и убиют вас, и будете ненавидими всеми имене Моего ради. и тогда соблазнятся мнози, и друг друга предадят, и возненавидит друг друга. и мнози лжепророцы востанут, и прельстят многи, и за умножение беззакония изсякнет любы многих. претерпевыи же доконца той спасется. и проповесться евангелие царствия по всей вселенней во свидетельство всем языком. и тогда приидет коньчина. егда же узрите мерзость запустения реченную Даниилом пророком стоящу на месте святе, иже чтет да разумеет. тогда сущии во июдее да бежат на горы. а иже верху храмов да не слазит взяти яже в дому его. и иже на селе, да не возвратится вспять взяти риз своих. горе же непраздным, и от сосцу доящим в тыя дни. молитежеся, да не будет бегство ваше зиме ни в суботу. будет бо тогда скорбь велия якова же не бывала от начала мира доселе, ниже имать быти. и аще не быша прекратилися дние тии. Тогда аще кто речет вам, се зде Христос, или онде, не имити веры. востанут бо лжехристи, и лжепророцы. и дадят знамения и чудеса, якоже прельстити аще возможно и избранныя. се прежде рех вам. аще бо рекут вам, се в пустыни есть, не изыдите. се в сокровищех, не имите веры; якоже бо молния исходит от востока, и является на западе, тако будет и пришествие Сына человеческаго. идеже будет труп, тамо соберутся и орли. Абие же по скорби дней тех, солнце поморкнет и луна не даст света своего. звезды спадут с небесе, и силы небесныя подвигнутся и тогда явится знамение Сына человеческаго на небеси. и тогда восплачются вся колена земная, и узрят Сына человеческаго грядуща на облацех небесных, с силою и славою многою, и прочая.

 

Глава 4, в сей главе пишет 11 знаменей антихристова настатия.

Якоже Христос времене пришествия своего, и кончины века никому не сказа; токмо знамения некая и разделения поведа, ради антихристов, котории оному последнему антихристу человеков вкупе приведут, иже прежде его пришествия востати имут, и изменят дела и глаголы зрящии, и приидут их же ожидаем чюднее и паче сих. о последнем времени никто же не вопрошай; ибо глаголет несть ваше разумети времена и лета, яже Отец положи своею областию; и не леть сказати когда сие будет [Деян. зач. 1]. тако же паки глаголет [Мф. зач. 104], аще кто спит, бдите и молитеся, не весте в кии час Сын человеческии приидет, понеже достоит нам ведати знамения кончины века. понеже Христа ожидаем, даже внезапу не умрем, и лживым антихристом да не будем обладани [прельщени]. Божиим же тогда изволением приступиша апостоли ко Исусу глаголюще [Мф. зач. 98], Учителю скажи нам, когда сия будут; и что есть знамение Твоего пришествия, и коньчина веку; ожидаем Тебе, яко имаши еще приити. но диавол воображается во аггела светла [коринф. зач. 192]. повеждь нам о последних, да быхом иному никому вместо Тебе не поклонилися; Он же отверз божественая уста рече [Мф. зач. 98], блюдитеся, да никто же вас прельстит. вы ныне глаголемая слышите и душевныма очима зрите. бесте бо его видесте и слышасте сие к вам глаголюща. блюдитеся, да никто вас прельстит. и укрепляет убо всех вас сие слово, да бысте его разумели. несть бо история си о задних глаголех, но пророчество о сих всех иже имать быти. не мы пророчествуем, ибо есмы несмыслени, но писание вам предлагаем и знамения, о них же глаголано. Несть ваше разумети времена и лета яже положи Отец своею областию [Деян. зач. 1]. ибо тогда Христос многих ради иных умышлении, и их послушателей, утаи время и час последнии пришествия своего. А превращающих ради и на то привлачающих человек, Петр апостол пишет, утаено бо им сие будет. яко своим Христос глаголет [Мф. зач. 51, Лк. зач. 35], вам есть дано разумети тайны царства небеснаго. прочим же в притчах. А иже во власти Христове лета и дни добрых ради дел человеком продолжити, а злых ради дел прекратити, о том святии пророцы и апостоли, лета и дни и часа последныго не описаша; но по Соломону во осмом веку кончина веку сему, и начаток будущему веку быти поведает [Еклисиаст, 11]. А якоже видим человека состаревшася, и вемы яко уже скоро умрети имать ибо ему предшли суть лета, но котораго дни и часа, не вемы. тако же и о Христове пришествии, и о кончине века сего разумеем, яко во исполнении лет, и знамения иже нам Дух Святыи, пророки, и сам Христос исповеда, повеле в то время блюстися [Лк. зач. 105]. аще бы та времена последняя писании была назнаменана, паки бы дух противныи тщился сие место пременити, и тако человеки в большую свою волю и беззаконие привести. а якоже ведая дух антихристов, яко множество времен предлежит не токмо лет десять или сто, но и полторы тысящи лет от создания мира, жидов и антихристовых предотечь от уставнаго жития всех православных научи утаити. и лета яже исполнятся антихристова пришествия утаити. жидове же того ради месию ожидают, даже и глаголют, яко еще пришествия его не пришли лета. тако же и еретицы, да быша человецы не познали, яко уже лета пришли из них же антихристу последнему востати, не токмо лет числа последняго от создания мира погубляют, но и дни и месяцы, и всего сего мира продолжения ради, с новою своею верою. а старыми ересми ныне начинают, а вси тии слуги того ради творят, даже место своему властелю антихристу приготовят [лет 1582 по рожестве Христове от создания мира 7082 папа Григории 12 календарь премени]. Того ради Христос в та последния времена верным своим явьствено повеле блюстися. ибо о всем о том назнаменовано явьствеными глаголы, иже и простейшии человецы видяще и слышаще разсудити могут, яко антихристу предотечами его место самодержавное царьское мира сего уготовано будет. и не мало царей мира сего к престолу его прореченному, слугами его приведени будут, и поклонятся и предадятся ему. понеже он последнии антихрист не явится, дондеже первое по пророчеству, к престолу своему, слугами своими седмь царей прельстити и прилучити имать [Апок. 16, 17]. и якоже повелит, они же начнут тако творити. с ними же и других трех царей победит, и тако вскоре мало окаянныи властвовати будет. и приидет нань Христос с небес, и его самого и со всею его властию убиет, и вечным мукам предати имать. ибо приити имать скоро, и наипаче избыточествит от церкви своей, еже есть над православными християны творити не попустит. будет бо беда велия вскоре, якова же не была от начала мира, и потом не будет [Мф. 99], в то время в неже он последнии антихрист православных християн везде тружати и мучити начнет. Христос же даяше паки утешение, но прекратятся рече дние тии избранных ради. Прежде же сих ведомо да есть, даже от прелести. и лжи многия да ся блюдем которая издавна началася, и долго не во едином месте имать пребывати. и тако хитростию и лестию аще бы возможно и избранных прельстити. того ради Господь не токмо о своем пришествии иже есть верным Его утешения время исповедает. но и антихристовых предотечь блюстися повелевает. даже в то время не вемы како приидет, и прельщени не будем, и до конца пребудем, антихристу не поклонимся и не предадимся. аще кто ему поклонится, той царства небеснаго не наследит. его же настатие знамения последняго исповеда верным своим.

Знамение, первое.

А се есть первое, якоже святыи Кирил пишет. ты же зри что уже было, и что еще имать быти, и блюдися. ибо глаголет [Мф. зач. 98], блюдите, да никтоже вас прельстит. мнози бо приидут во имя Мое, глаголюще, яко аз есмь христос, и многих прельстят [Фегел, Ермоген, Димас]. сия же еже было отчасти, еже есть Симон волхв, и Менандр, и инии окаяннии началнии еретицы, асиат и иноса суть некотории. Яко святии апостоли тогда, онех отступников и сводителей людей Божиих с собою антихристами нарицали [тол.]. такоже и ныне всех еретиков и сводителей, антихристами, оному последнему служащими разумей, иже от единыя святыя кафолическия соборныя апостольския церкве греческия отступили. паче себе, нежели паки похвальной правде Христове веровати велят. о них же явьствено апостол пишет [Ин. зач. 71], дети последняя година есть. и якоже слышасте яко антихрист грядет, и ныне антихристи мнози быша. и от сего разумеем, яко убо последнии час есть, от нас бо изыдоша, но не беша от нас. аще быша от нас были, пребыли убо быша с нами, но да явятся яко не беша вси от нас. якоже и он гордыи Симон волхв самарийскии отступи от Симона Петра, и других апостол [Деян. зач. 19]. и прииде прежде в Рим, творя себе христом всяцем подобием. последняго антихриста сам первыи бысть. и по нем будущих в Риме, собою назнамена. ибо во имя Симона Петра имать всести гордыи князь мира сего антихрист. якоже знаменует во оно время, егда Христос Петра самого назва сатаною. егда бо восхоте во всем мире божественую истину исправити, его же Христос своим смирением и молитвою исправи, в нем же то не исполнися [Мф. зач. 68, Мк. зач. 36]. но в Симоне волхве, иже велми быв горд, и сведе к своей прелести многих в Риме пред всем народом показася, и на высоту слугам своим бесом носити повеле себе [в житии Петра апостола и кроник. латин.]. но Петр апостол ведая яко той есть первыи пред последним антихристом, и тем возношением по воздуху людей прельщает, и помолися Богу, да его погубит. Бог же по Петрове молитве Симона окаяннаго волхва с высоты поразив погуби, дая нам разум, дабы мы правовернии от таковых гордых укланялися, и вместо антихриста разумели, яже слугам своим бесом повелевают носити. и вместо Христа, главою церкви называются. Петр бо апостол вместо Христа главою церкви Христове не назывался. и ни имать быти церкви тела Христова другою главою. како бо может быти иная церковь тела Петрова, а иная церковь тела Христова. едино тело церковь Христова, двоих глав не имать, но Христос свою едину, а не Петрову церковь другую обеща на твердом камени исповедания создати [Мф. зач. 67]. сам ей будет основание и глава. глава того ради, ибо есмы тело Его, якоже пишет [ефес. зач. 225]. да возрастим в Него всяческая, иже есть глава Христос, из Него же все тело составляемо. камень же того ради якоже пишет [1 Петра зач. 58], понеже вкусисте, яко благ Господь. к Нему же приходяще камени живу, и сами якоже камение живо зиждитеся в храм духовен. а якоже Петр апостол вместо Христа, ни церкви Его другою главою не именовася. но еще великое блюдение умирая в Риме учини [в житии Петрове]. егда восхотеша его яко Христа на кресте распяти. он же моли их дабы не тако якоже Христа главою к горе распнут, да не буду рече подобен Христу моему. но распяша его по его прошению [стремглав] главою к земли, а ногами к горе. даже не мнят его другаго Христа, или вместо главы Христа быти, или церкви Христове две главы имети. и не токмо не восхоте быти якоже Христос главою церкви Его, но не восхоте и на кресте умирая к горе главы подняти, но обрати ея к земли, показуя яко от земли другая глава в Риме церкви оной во Иеросалиме распятой сопротивная имать востати. еяже Христос во второе пришествие свое убиет [к солун. зач. 275]. Той бо есть един истинныи и во веки живыи перворожден всея твари. и яже на небеси и на земли всяческая Тем создашеся. и Той есть глава телу церкве и начаток и во всех первеньствуя [колос. зач. 250, 251]. вся Бог и Отец покори Ему [ефес. 219], и того даде главу выше всех церквей, яже есть тело Его, иже из мертвых воскрес, к тому уже не умрет [к рим. зач. 91]. и по воскресении всех апостолов равно благослови, и мало отступи от них, взыде на небо [Лк. зач. 114]. не остави ни единого вместо себе главою, токмо членки. и слуги церкви тела своего их остави, якоже писано [ефес. зач. 224], Христос есть сшедыи и возшед превыше всех небес. и Той есть дал овы апостолы, овы же пророки, овы же благовестники, овы же пастыри и учители, к совершению святым в дело служения в создание тела Христова церкви. И паки вы есте тело Христово, и уди отчасти [коринф. зач. 153]. Того ради в вас тела Христова никтоже да не небрежет [колос. зач. 255]. А яже не веде учит без ума дмяся, и не держит Христа главы из нея же все тело, и сам чинится вместо Христа главою церкви Христовы, той есть антихрист. и якоже Симон волхв, он первыи антихрист в Риме, Петра апостола предвари, всю славу Христову на себе восхоте прияти. но Христос с небес его порази. Тако же и последняго антихриста убиет духом уст своих [к солун. зач. 275], которыи зде на земли Христа предваряет. и всему телу церкве Христове главою учинився к себе вся человеки привлачит, и себе вместо Христа предложив. и сие како по судном дни будет на себе взяв речет, аз един пастырь, и едино стадо будет. и то есть явственое знамение, антихристова духа.

Знамение, второе.

Второе знамение, услышите брани [войны], иже есть брань в Месопотамии персом с греками. востанет бо язык на язык, и царьство на царьство. и будут глады и моры, и трусы по земли и градом [Мф. зач. 98, Мк. зач. 58, Лк. зач. 105]. и то уже все было. и еще глаголет страхования с небесе и знамения велия будут, и великия непогоды. Бдите убо, яко не весте в кии час Господь приидет. Толк. Услышаны будут брани [войны]. или прежде того брани не бывали, якоже почитаем писания от начала мира сего рати содеваху человецы. а зде будут брани. сие бо глаголет, не токмо власти ради, но и веры вашея ради брани починати будут с вами. того ради даже возмогут от главы нашея Христа отвлещи, и ко иной главе антихристове привлещи. Ибо и сами духовныя церковники имут на се востати, иже отступив даже не словом Божиим яко Христос, и святии Его, но яко князь мира сего мечем тако сами имут воевати. и других на пролитие крови понуждати имут, еже им не повелено творити. якоже Господь Петру рече [Мф. зач. 108], вложи ножь твой в место его. аще кто ножем дерзает, ножем и погибнет. Тако же и в правилех апостольских и во всех соборех писано [прав. апостол. 27], духовнии и церковнии человецы в котором чину ни есть, брани и войны никакия да не составляют, не токмо ересей отступления ради, но и пространьства веры ради, иже во Христа. Тако же брани и войны никто не воставляет, якоже сам Господь глаголет [Мф. зач. 69, Мк. зач. 37, Лк. зач. 44], аще кто хощет по Мне ити, да отвержется себе, и возмет крест свой и по Мне грядет. сиречь кто хощет волею за Христа и за Его веру умрети, нежели иного кого ко Христу неволею привлещи, и того ради убивати. ибо от того вси святии отцы со опасением себе храниша. ибо дух антихристов, един от духовных старейшии Лев третии папа Римскии бывыи по рожестве Христове в девятом сте восмьдесят четвертаго лета, той содела сие [кроник. латин.]. иже первое вси западныя властодержьства от области греческия и от Цареградскаго престола отведе. и другаго царя в Риме у себе учини Карула великаго. а цари греческия, и престол их в Царе граде от Констянтина Великаго до взятия турским царем Магметом пребывали лет тысящю двесте четыре. Папа же Римскии отринувся от греческия области и от царства, и взяв на ся не токмо престол и власть царскую и святительскую, но и Божию. готовя престол яко пишет [Апок., 8], начат по тысящи лет в старом Риме старейшии. а последнии князь мира сего человеки от всех царей земных к себе в повиновение привлачет. якоже первое на греки, тако и на иныя мечем начнет воевати, и всех християн и всяко колено начнет лстити, дабы ему яко богу поклонилися различными коварствы, любовию, дарованием, обещанием, прошением, грозою, казнию, войною, посольством и слуги своими, к своему духовному и святительскому уставы приводит восхищающи, дабы никто не пребывали в прежней православней вере единыя святыя кафолическия апостольския церкве греческаго закона, и от святых отец уставе изложенном на вселенских соборех, и на его римския новыя полныя еретичества уставы приступили. иже по вся годы, то сице, иногда инако устав пременяет. и се есть знамение последнее антихристова наставания [начатия] якоже впреди показует. тако же и зде суть иже духовнии мечем воюют, и веры ради труждати и мучити повелевают. а царства и властели поседающе силою. и коварством [хитростию] под свою власть покаряюще. еже святыи Кирил в знамении девятом о антихристе поведает, еже лукавством и неправдою, а потом насильством всех доконца приводити начнет.

Знамение, третие.

Еще же смотри, каковая знамения имут явитися в духовных. Избавитель глаголет. и того ради соблазнятся мнози, и друг друга предаст на смерть, и возненавидит друг друга. и егда услышите владыки на владык, и клирики на клириков, и иных чина духовнаго на себе востающих, и до крове находящых, тогда не убойтеся, ибо тебе исповедано. не яви же того что ныне соделовается, но правда и истина тебе в первом писании назнаменана. Аще бо аз учащии тебе погибл, но ты не погибай. довлеет бо ученику лучше и крепчайше учителя быти. последи пришедшу, а первому быти. ибо и во единыи надесять час пришедших, аще и последи, приемлет Бог якоже и первых [Мф. зач. 80]. Тому же не дивися, иже владыки друг друга ненавидят, ибо и во апостолех обретеся христопродавец. в то же время прельстятся мнози. [толк.] и о том убо мало есть потребы писати, но еже ныне содевается, иже не токмо мирстии вкупе человецы, но и духовнии прельстятся укоризны ради и убожества ради церкве Христовы отбегают, а к гордому и властию обогащенному князю мира сего окаяннии приходят. яко убо и Июда христопродавец от Христа убогаго, нечего ради инаго к богоубийцам жидом, но ради лакомства и славохотения отъиде. тако же и тех святых патриарх и епископов убогих и укоризненых рабов Христовых отступают, и великих добродеев своих, от них же восприяша благодеяние, ненавидят, наипаче предают их в скорби. всякии же, аще сие узриши, разумей, яко учит святыи Кирил, не вера зла от нея же они отступающе погибнут, но их неподобство на них же таковая знамения исполнятся. яко святыи Июда апостол пишет [Июда зач. 78], яко в последнее время будут ругатели по своих похотех и нечестиях ходяще, сии суть отделяюще себе от единости веры, и суть телесни, Духа Святаго не имуще. вы же возлюбленнии святою вашею верою назидающе себе Духом Святым, отнюд не отступайте святых отец наших, и до конца с ними пребывающе, спасемся.

Знамение, четвертое.

А не токмо на преложеных то знамение есть, но и на мирских вкупе глаголет. ибо за умножение беззакония изсякнет любы многих [Мф. зач. 98]. может ли кто похвалитися в человецех, дабы имел нелицемерную любовь к ближнему своему. но глаголы токмо множицею веселитися всему, и смеется, показуяся и творяся яко ласков, а на сердцы мыслит лукавство, и творит зло, а глаголет добро. и ради умножения неправд изсякнет любы многих. о том святый Феофилакт пишет [толк.]. тогда умножатся студодеяния, неприязни, соблазны, лжепророцы предотечи антихристовы, иже к себе многих привлачающе, и на всяку речь неправедну поспешливы. и ради убо великия неправды и беззакония антихристова, превращени будут человецы, тако, яко и в своих будет иже не обрящется искра любве, предаст бо друг друга в погибель. претерпевыи же доконца, и твердо стояи не преклонится в таковых бедах, яко храбрыи ратоборец на брани спасен будет. до зде Феофилакт. А святии патриарси истиннии пастыри наши Иоаким Антиохийскии [бысть в лето 7000], и Иеремия Цареградскии [бысть в лето 7089], зде у нас в Руси пребывающи уже близ скончания мира, хотяху бо тую, искру любве Божия воспалити в человецех, братство церковное, соединение святаго православия греческаго закона уставиша. Соединения их писания печатию укрепити хотяху, дабы православнии християне по божественому пути в любви и в милосердии и в правде, всякии кождо с ближним своим в щедротах и в покорении сходящеся размышляху друг о друзе любовь исполняя, а гнев Божии утоляюще. Диявол же ненавистник того основания милости Христовы и любви не терпя зрети, первое злых духов мужей добру сопротивных некиих таможе писаных взусти о сем бранию и войною. потом же обще множество народа нача на то приводити противящияся ему, еже нам повелено доконца любити апостола глаголюща [1 Петра, 58] Бога бойтеся, а царя чтите, се бо есть угодно пред Господем Богом, еже жити братии вкупе [Пс. 132]. о сем бо обеща нам живот вечныи; Сие же не ино что зрим, токмо прелесть сатанинскую. того ради союзом любве Христовы себе связуем всегда, якоже впреди пишет, кончина близ суть.

Знамение, пятое.

Разумей же паки и сие знамение, иже проповесться евангелие во всей вселенней во свидетельство всем языком, и тогда приидет кончина. видим убо яко мало не весь свет учения Христова исполнися. Толкование. Еще не исполнися тысяща лет от вочеловечения Христова, проповедася евангелие мало не во всем мире. наченше от Иеросалима всем языком. а наипаче седмию вселенскими соборы и поместными сшедшихся святых отец, на которых всего мира християном иже в разсеянии, и народом [и языком] правда евангельския проповеди утвержена и запечатленна. и оттоле во всем мире во свидетельство всем языком исповедана. тамо бо во единой святой кафолической, еже есть соборнной апостольской церкви греческой объявлена есть и утвержена правда. тамо быша соборы вселенския всего мира християне. тамо и сам папа римскии на собор ездил. тамо правила и весь закон и устав церковныи уставлен и утвержден. оттоле все совершенно восприяли евангелие и веру. тамо всех еретиков осудиша, и от церкве отлучиша. Тамо всего мира християне, а наипаче Духом Святым слово Божие седмижды по пророком утвердиша и прославиша. якоже пишет [Пс. 11], словеса Господня, словеса чиста, сребро раждежено и искушено земли очищено седморицею. Тоя ради искушеныя веры греческаго православия вси святии мученицы кровь свою пролияша, дающе о ней свидетельство всем языком на земли. Аще кто в той седми вселенскими соборы утверженой правде пребудет, спасен будет, якоже пишет. а кто отступит, или в чем порушит, погибнет вовеки. Егда же уставися последнее и совершенное всем исповедание веры, то уже несть потребы претворяти, или отъяти, или пременити. аще бы что инако вново пременяти, то бы святии отцы седми вселенских соборов на похвалу и на память умели проповедати. Но глаголаша и написаша сице. аще кто инако дерзнет что вново уставляти и проповедати, а не тако якоже святии апостоли предаша, и святии отцы утвердиша, то уже к разрушению и разорению есть, а не начаток проповеди и вере, но и всей твари скончание приидет. не глаголет паки будет, но приидет. сия бо и на первое папа римскии вся соборы разрушил. ибо сатана якоже речеся он древнии змий развязан будет иже своим лукавством прежнею гордостию оного Адама прельсти, и рая лиши. Тако же и той нача выше меры якоже Бог надо всеми превозношатися, и новыя ереси и многая умышления уставляти, повелевая их всем держати, даже помрачит всех во гресех, и оныи Духом Святым уставленыи закон и проповедание. Первие бо в Риме исповедание веры перваго Никейскаго собора разруши. потом же и кровь Сына Божия чашю новаго завета спасения отъят. жертву совершенную отверже. и во многих глаголех спасения нашего Духу Святому и первым святым отцем супротивяся, и доконца супротивляется.

Знамение, шестое.

Потом же паки сие будет, глаголет [Мф. 99], егда узрите мерзость запустения реченную Даниилом пророком стоящю на месте святе, кто чтет, да разумеет. Толк. Место святое разумей во всем свете избранное, Иеросалим, якоже Матфей пишет, святыи град. А Кирил Иеросалимскии глаголет [Катихисис, 16], превышняя церковь апостольская. разумей же и ты, на всяком месте идеже церкви християнския во олтари престол место святое, на нем же священницы приносят жертву Богу, освящают [претворяют] хлеб и вино в тело и кровь Христову. Ибо в церквах християнских два святая места во олтари имать, жертвенник и престол, едино есть на приношение жертвы, а другое на освящение. сие бо везде и всюду у православных узриши, фисиастирион, еже есть жертвеник. на нем же древле по чину Аароню священницы агньцы живыя в жертву закалали и кровь изливали. ныне же по чину Мелхиседекову [Пс. 109] хлеб животныи вместо Христа незлобиваго Агньца в жертву [Исаия, 53] Богу приносяще закалают. и вино с водою [Ин. зач. 61] в чашю новаго завета вливающе приносят священницы Богу уставную чистую жертву. По пророку [Малахия, 1], на всяком месте в дому Божии. и тако первосвященницы действуют над святым агньцем на жертвенице. таже преносят его на престол на место святое, идеже телу и крови Христове соединение бывает. Феофилакт глаголет [Толк. в Мф. зач. 99], мерзость запустения есть труп человека мертваго, еже есть тело запустения без души и без крове есть мертвое и опустелое, и ничего не творящее. А когда Еуспасиан и Тит Римстии цари пришедше, Иеросалим плениша, и пуста его положиша, и кумир свой во олтари на месте святем поставиша. жидове же кумир труп человечь, мерзость называху, яко лицемерством и завистию и злыми делы омерзишася. внемли же мерзость запустения, яко еретицы жертвеников не имут, и егда в церквах християнских пребудут, разоряют, и извергают из олтаря фисиястирия, сиречь жертвенник. и жертвы животнаго хлеба не закалают. и хлеба незлобиваго агньца пречистаго тела, и вина честныя крове Христовы, в жертву не приносят. токмо во олтари на месте священия мерзость запустения подобну трупу поставляют. о том бо Хрисостом [Златоуст] святыи глаголет [толк. 1 коринф. зач. 150], яко антихрист прежде пришествия своего учинит, яже везде жертвеники, и истинную жертву истребит, и кумир свой на святом месте поставит. уже бо сицевое мерзостное запустение послании от него лжепророцы начинают. и от того познаваем яко уже близ есть день Господьскии. егда бо запусте последняя жертва вседневная уставленая в церкви Соломони, якоже о том запустении в евангелии глаголано, тако же и Даниилом пророком реченное, паки збысться и совершися и скончася власть июдейская, и церковь разорена. Тако же будет в запустении нынешняя святая жертва, иже не во храме Соломони, но яже по всему миру уставлена есть. Тогда же и век сей скончается, иже бысть в стени жертвы храма Соломоня, и то совершися и исполнися в самой истине по глаголех пророческих. Сие же тако же начинают посланници антихристовы, сына беззаконнаго, не у еще коньчина, дондеже сам приидет, и с ним совершится и исполнится мерзость вседневнаго запустения. До зде Феофилакт и Златоуст. И не токмо везде и всюду, но и в начальной церкви апостольстей во Иеросалиме жертву истинную в запустение введет, и свою злую мерзость на месте святем поставит, якоже пишет [Мф. зач. 99, Мк. зач. 60]. егда узрите мерзость запустения стоящую на месте святем, тогда сущии в июдеи да бежат на горы. о сем непослушливыи Александр папа Римския церкве западныя, возгордевся отрину хлеб животныи, и совершенную Христову жертву. и опреснок во олтари на месте святем постави, иже есть хлеб злобы. якоже Бог к людем жидовским рек [второзак. 16], седмь дний ядите опресноки, хлеб злобы. от него бо християном всем апостольская и отеческая правила возбраняют [прав. апостол. в лаодик. 30, 37, 39]. якоже бо разность между человеком и трупом, такоже разность хлебу со опресноком. якоже бо тело без души разумныя, тако же и тесто без кваса и соли мертво есть. квас бо паки и соль вместе, знаменует душю разумную в теле. яко сам Христос квас все смешение оживляющее уподоби животу вечному глаголя [Мф. 53, Лк. 72], подобно есть царство небесное квасу. тако же и соль вместо разума в души прикладает сице [колас. зач. 260], слово ваше солию да будет растворено, сиречь разумом. инде глаголет [ефес. зач. 227], слово гнило да не исходит изо уст ваших. разумей слово гнило, сиречь разумом яко солию не осоленое. тако же и опреснок не осоленыи есть, яко згнил. О том убо Григории Богослов во втором слове на Пасху в двоих местех вспоминает глаголя [стих 31, 44], опреснок згнилое египетское тесто. А хлеб квасныи живущии есть. Того ради не можем хлеб и опреснок за едино имети, ни единым именем прозывати. Аще где глаголеши хлеб, разумеется хлеб совершенныи с квасом и солию. аще же человек, разумеется совершенныи человек с душею и разумом. но аще же где опреснок восхощеши хлебом назвати, повеждь явьствено глаголющее, хлеб пресныи, якоже и человека мертваго называюще глаголем, человек мертвыи. или тако же единым бяше именем назовеши труп, тако же и опреснок. явьствено бо святое писание хлеб и опресноки разделяет. Ибо глаголет, Иеровоам к жене своей [3 царств 14], возми в руце твои хлеб и опресноки, и иди к человеку Божию. и на другом месте такоже разделяя пишет [Исход 29], и хлеб един масличен, и опреснок един откоша. и на третием месте пишет [Левит 23], хлебы квашеныя да будут печены от первородных жит Господеви. се бо и сам Бог не без устава повеле опресноки от хлеба разделяти на всякое лето, от онаго времене, егда жидовския люди извед из Египта. А опреснок хлеб злобы самое невольное ядение, седмь днии ясти повеле, воспоминая ону мерзость запустения и работу египетскую. А еже кровь агньча, свобождение им из работы египетския. сия обоя яко агнец свобождение, тако же и опреснок злобы во Египте, начало свое взяша, тогда, егда по всему Египту и по брегох морских великое множество трупия без кровопролития бысть, и содеяся велия мерзость запустения. сие убо жидовским людем пресностию теста повелено на память творити, якоже о том Моисей пишет [Исход, 12, 14], которыя они бремена в работе на раме свои взяша. первое кровь свобождения из агньца пролияша, и самого снедоша, поидоша из Египта. и якоже во Египте тогда зачалося, сие же в первое пришествие Христово исполнися. ибо агнец знаменует Христа, а кровь агньча [агньцева] знаменует кровь Христову. и яко тогда котораго дому праги кровию агньчею не покроплены, в том дому первородных убиваше аггел. Тако и зде, аще кто кровию Сына Божия прагов уст дому своего не помажет, душа его перьвородная в ним жива быти не может, якоже сам Христос рече. аще кто не пиет крови Моея, живота не имать в себе. А опреснок знаменует, мерзость запустения, и работу египетскую, яко работа египетская знаменова душам вечьную работу. того ради Христос не вместо опреснока мертваго теста знаменует работу. но вместо живаго агньца иже знамена свобождение прииде глаголя [Ин. зач. 23], Аз есмь хлеб животныи сшедыи с небесе. И якоже первее люди израильтеския из Египта, тако и зде души от пропасти свободи, истииныи Бог и совершенныи человек. и яко незлобивыи агнец всех верных избави телом и кровию своею, предася на заколение, содела сам собою един паки жертву за всех избавление, рекше нам верующим животным хлебом и вином на вечное воспоминание. и оттоле новыи завет повеле творити. А якоже не во опресноце, но в хлебе, и не в праздник опресночныи, но преже триех дней праздника жидовскаго предаде нам Христос новую жертву ясти тело свое, свидетельствуют о сем вси евангелисти и апостоли, и святии отцы. Матфей глаголет [Мф. зач. 107]. Христос рече, весте яко по двою дню пасха будет, и прочая. егда же ядоша приим Исус артус, еже есть хлеб совершенныи и благослови, преломи и даде учеником своим глаголя, приимите и ядите, се есть тело Мое. Лука же пишет [Лк. зач. 108], приближающуся празднику опресночному, воньже подобно бе жрети пасху, и прочая. и приим Исус хлеб благодарив преломи, и даде учеником своим. Марко же глаголет [Мк. зач. 62], бе же пасха и опресноки по двою дню, и искаху архиереи и книжники Исуса, како Его лестию емше убиют, глаголаху же, но не в праздник, и прочая, приим Исус хлеб и благослови. Иоанн же пишет [Ин. зач. 44, 45], прежде праздника пасхи ведыи Исус, яко прииде час Его, и прочая. и вечери бывши, и прочая. омочив хлеб и даде Июде Симону Искариотскому, и прочая. О том еретицы зле исповедают, яко Христос опреснок и в жидовскии опресночныи праздник тело и кровь свою учеником предаде. Христос бо в четверток вечерю новую творяше, а опресноцы тогда еще не быша, но повеле готовити [Ин. зач. 64]. жидовом же в суботу праздник их будет и опресноки, в ню же Христос уже во гробе положен, якоже пишет. июдеи же понеже пяток бе, да не останут телеса на кресте в суботу. бе бо велик день тоя суботы, и просиша у Пилата да пребиют голени их и соймут. и тако убо прииде субота праздник опресночныи. Христос же уже во гробе положен бысть, и не прежняго стени, но новыи совершенныи завет, совершенныи хлеб Господь нам предал. якоже Златоуст в беседах пишет [Беседа 11, 18]. тамо ковчег, зде же Богородица, тамо агнец, зде же Христос. тамо опреснок, зде же хлеб. опреснок бо иже есть без кваса и без соли не может быти жертва. якоже Христос рече [Мк. зач. 42], всяка жертва солию осолится. совершенным бо хлебом жертву Богу приносим, иже квас и соль в себе имать, тако же и Христа совершенным человеком проповедаем. жидовския же работы опреснока гнушаемся. и за то тако же проклинаем Аполинария еретика, и его учеников, и советников, иже глаголют яко Сын Божии не совершенныи бысть, и души разумныя не требова, токмо самою вещию плоть дебелую [густую] восприят, а вместо души божество в нем бысть. того ради хлеб несовершенныи и без кваса и без соли учеников своим повеле приносити, токмо муку густо замесив, самою вещию глаголющи. квас бо и соль в хлебе знаменует душю разумную в теле, и есть грубость. но плоть Божия бысть дебела. ту же ересь на четвертом вселенском соборе в Халкидоне прокляша святии отцы. А еже паки еретицы в спорех глаголют, Христос нам предал опреснок, якоже Лука пишет [Лк. зач. 108], и прииде день опресночныи. вонь же подобно жрети пасху. Тогда бо четыре дни преже праздника опресночнаго называху, вонь же готовиша на праздник агнец. якоже сие Лука глаголет, воньже подобно жрети пасху еже есть агнец, возмут от стада готовити, а не опресноки ясти. невозможно бо по закону первее ясти опресноков, прежде даже не ядят пасхи агньца, яко о том Моисей пишет. о тех бо четырех днех единех воспоминает Лука, в ня же готовити агньца, а не о тех седми в которыя опресноки ели. ибо за четыре дни прежде праздника жидове агнец возмут от стада и блюдут. а четыренадесятаго дня к вечеру закалают. Господь же и Бог ныне им жрети ни ясти уже не попущает, понеже от Него самого бысть совершенное избавление. сам бо Христос и жертва и жритель повеле и устави нам не по чину Аароню, но по чину Мелхиседекову хлеб и вино жрети, всем иже в православней вере пребывающым. Но жестоковыини [папежницы] якоже и жидове, великаго победителя Господа нашего Исуса Христа видяще во убожестве, возгордеша, и Ему противящеся, опресноки мерзости египетския работы, и до сего дне жрут, ничего на жертву не закалают, иже антихристу предотечи суть помощники. иже строятся совершеную Христову жертву везде помрачити, а их мерзость работы египетския вместити, и на месте святем поставити ложь со истиною вкупе. и место готовят князю мира сего последнему, глаголюще, яко наш един имать быти отец папа, и всех по своей воли во всем мире сберет, его же и жидове имут восприяти. понеже он возмет власть величайшую мерзость египетския работы. и со иным богомолием, церковь Соломоню древняго закона прелести ради создати покусится. о том в знамении девятом пишет.

Знамение, седьмое.

Аще кто речет вам се зде Христос, или инде, не веруйте сим реченным. ненависть братня предает место уже антихристу. Первое бо готовит диявол отступление и разрушение в человецех, даже того ради с радостию его приимут егда приидет. даже ктому не будет, дабы кто из тамошних жителей или из иных рабов Божиих приступи ко врагу Божию. О том же апостол Павел явьствено поведа [2 солун. зач. 275], о знамениях антихристовых глаголя, яко аще не приидет отступление прежде и открыется человек беззаконию, сын погибели и противник, и превозносяися паче всякаго глаголемаго бога, или чтилища, яко ему сести в церкви Божии аки богу, показуя себе яко бог есть. Не помните ли яко еще живя у вас сия глаголах вам. и ныне одержащее весте, явитися ему в свое ему время. тайна бо уже деется беззаконию. точию держаяи ныне дондеже от среды будет, и тогда явится сын беззаконныи. его же Господь Исус убиет духом уст своих, и упразднит явлением пришествия своего. Его же есть пришествие по действу сатанину во всякой силе и знамениих и чюдесех ложных, и во всякой льсти и неправде в погибающих. сие Павел рече. а ныне уже есть видимо отступление. отступиша бо человецы от правыя веры. инии сыноотчее исповедают, сиречь Сына испущателя Духу. а Духа от Отца и Сына исходяща. и тем Сына Отцем нарицают. и друзии Христа от небытия в бытие сотворена смеют рещи еретицы. и ныне их полна церковь таящихся, отступили человецы от правды, и чешут слухи приложенными глаголы. и вси послушают сладце прелести, и вси предаются на глаголы тии. и удалишася человецы от добрых дел, и изволиша лучше прелестное нежели похваляют самую истину. и се есть уже отступление, и ожидаем врага, иже помалу пошлет пред собою предотечь своих, даже и сам на готовое пришед, останок уловит. Тогда же блюдися человече, и утверди душю твою се бо церковь свидетельствует пред живым Богом иже впреди исповедает о антихристе, дондеже не приидет. аще ли и при тебе будет, да дастмися на предь лучшее о том ведати, и укрепися.

Разсуждение.

 Первое готовит диявол отступление знамению последнее, поведает антихристова собрания отступление, которое тогда в начале зачалося, егда от святыя восточныя соборныя апостольския церкве греческаго православия отступили, папа, и вси духовнии римския церькве, и раскол [раздор] учиниша в християнстве, мира сего отечестве и отделися сами особно, якоже писано во втором знамении. И потом вси церковныя уставы и правила и каноны седьми вселенских соборов преписующе, и свои указы начаша уставляти, и всем своим западным церьквам предавати. Таже и самое истинное исповедание православныя веры, еже есть верую во единаго Бога, глаголемо во святых Божиих церквах восточных и западных, на утвержение православныя веры, и всем человеком. паче же в хвалу уставлено всеми седмию святыми вселенскими соборы, Формос папа Римскии с помощники своими преписа. а исхождение Святому Духу и от Сына приложити дерзну. поведая яко Сын Божии, и вси святии вселенстии собори, несовершенно рекоша о Святем Дусе, иже от Отца исходит [Ин. зач. 50], но потребно приложити и от Сына. и потому учини Отцем Сына Святому Духу. о том святыи Кирил глаголет, отступиша человецы от правыя веры. и инии сыноотчеее исповедают, Сына Отцем чинят. и потому Духа Отцу, внуком назваша. и есть се пребольшее еретичество, и первое от святых отец седьми соборов отступление. еще же к баснем сим и ино зло многое ухищряют. А еже писание божественое свидетельствует. и самая убо Правда Сын Божии о исхождении Святаго Духа рек [Ин. зач. 22] тому не верят, но учиниша два начала Святому Духу, еже есть от двоих лиц третиему быти поведают окаяннии, не разумеюще яко един есть божества источник, и един Бог. Тако же от единаго лица два лица [две ипостаси] свое бытие имут. ибо сам Отец прежде всех век Сына роди, и Духа Святаго сам испущает. един бо есть Сыну родитель, и Духу Святому испушатель. а Сын паки несть родитель ни испущатель, сего ради Духа Святаго не родит, ни испущает. тако же и Дух Святыи Сына не роди, ниже Отцем нарицаемь. един бо Бог есть, и един Сыну родитель, и Духу Святому испущатель. и от единаго лица два еже есть от единаго Отца Сын и Дух Святыи. якоже Иоанн Предотеча свидетельствует, егда крести Христа во Иордане. и тогда истинною и явно Бог един в триех лицех в разделении показася, иже и до ныне святых богоявлении церковь называет и освящает. ибо первое лице [ипостась] Отчо глас с небесе слышан бысть, сей есть Сын Мой возлюбленныи, о Нем же благоволих, Того послушайте. и в пятьдесятныи день на апостолы сниде в видении огненых язык тамо во Иеросалиме на горней апостольстей церкви. и ниже в той же главе глаголет, един Бог Отец, един Господь единородныи Сын Его. един Дух Святыи Параклит. о сем нам довольно суть. а о прирождении или ипостаси, не спеши вопрошати. ибо о чем писано, о том и глаголем. а о чем не писано, и о том не смеем и рещи. Кирил Александрийскии в послании своем ко Иеремии о Святей Троице глаголет. рече Господь, егда приидет Утешитель, Его же Аз послю от Отца Дух истинныи, иже от Отца исходит, Той свидетельствует о Мне. Разумееши ли, глаголет яко свой обещает нам послати бяше от Отца Дух. а Дух нарицаем исходящии, иже от Отца исходит. тако нам указа Сын. В житии паки святаго Андрея апостола о исповедании веры пишут во Ахаии презвитери ко всем християном, обрящеши во историях церковных и в полных книгах, яже печатал Скарга жития святых, сими словесы. мир вам всем верующым в Троицу единаго Бога совершеннаго. истиннаго Отца нерожденнаго. истиннаго Сына единороднаго. истиннаго Духа Святаго от Отца исходящаго, и на Сыне пребывающаго. И тамо же ниже пишет. сию бо веру прияхом от святаго апостола Христова Андрея. Иустин святыи мученик о вере глаголя. ибо Отец не рожден, от Него же Сын родися, и Дух Святыи исходит. Дионисии же Ареопагит ученик Павла апостола глаголет [О Божестве, глава 1], о божественем существе непостижим есть разум. ибо существо самыя Святыя Троицы, никто не разумеет никогда. а разделение иже во ипостасех славим по бытию, яже есть Сына от Отца неизглаголанная светлость. а Святаго Духа иже убо от Отца неизреченное исхождение. Инии же глаголют, источник есть Отец, а Сын и Дух убо суть от единаго Божества. а како суть; ни рещи ни помыслити невозможно. той святыи апостолом равныи со всеми единако глаголет, яко не от двоих лиц третие, якоже проклятии еретицы развращают, но от единаго лица два суть. Иоанн Златоустыи глаголет [в 1 сказании на Евномия], вемы яко убо Отец Сына роди. а како; того не разумею. И в другом сказании в котором надписание о Святем Дусе глаголет, Избавитель объясняет. егда приидет Параклит Дух истинныи иже от Отца исходит. писание глаголет, инде от Бога, а зде от Отца. тако бо и сам о себе рекл Аз от Отца изыдох. тако же убо и о Святем Дусе глаголет, иже от Отца исходит, не глаголет родися. ибо что не написано, не подобает мудрствовати. Сын от Отца родися, а Дух исходит. и в третием месте глаголет [в Беседах на Ин. зач. 52], Сын Духа Святаго водою нарицает. а Отец глаголет, из Мене потече источник воды живы; источник бо Духу Святому Отец. того же ради и от Отца исходит. нарицаем бо Дух Божии, и Дух иже от Бога Отца. и Дух иже от Отца исходит. Видиши ли, яко едино Божество и един источник, из Него же две живыя реце изыдоша, от единаго Отца, Сын рождением, а Дух Святыи исхождением. Видиши яко суть тии прокляти котории мнят два источника Божества быти, и от двух Духу Святому исходити. Феофилакт святыи пишет [толк. на Ин. зач. 52], глаголет Христос, Его же Аз послю от Отца. а инде глаголет писание, Отец послет Духа, а зде глаголет Аз послю. ибо сей глагол ничего не разнит, но едину равность показует, даже не мнят быти Сына сопротивна Отцу. яко тако же от единаго бытия посылает Духа. того ради приложи от Отца. ибо глаголет послю Его Аз от Отца, еже есть яко Отец изволит послати. ибо не от себе извожду Духа, но от Отца Мною дается. зде явствено Святыи Феофилакт возбраняет тех, иже глаголют Духа Святаго от Сына исходити. яко тако же и Иоанн Дамаскин пишет. Духа Святаго от Отца глаголем, и Дух Отечь именуем. а от Сына Духа не глаголем. токмо Дух Сыновен именуем. видиши ли, аще и Духом Христовым единения ради их божества нарицаем, от Него Духу Святому исходити не глаголем. ибо много богов и много истакателей в Божестве, или испущателей не учинихом, были бы о том великия соблазны. якоже пишет Кирил Александрийскии, во триех лицех божественых, едино существо, всяким подобием безначально нарицается. иже есть Отец не рожден Сын же и Дух Святыи от Отца суть, но не единым подобием. ибо Сын родися, а Дух Святыи исходит. но и паче того ов родился, и ов исходит. и не тако убо якоже от Отца Сын изыде рождением. тако же и Духу Святому от Сына исходити. ибо положихом первое второе и третие, отвратися таковыя соблазны, и многобожия языческаго. им же бози отцы и сынове и внучата. но нам един обоим лицам вина совокуплением, Отец, к Нему же возводятся иже у Него. якоже и апостол учит [1 коринф. зач. 139], нам един Бог Отец, от Него же вся. А инде глаголет [ к рим. зач. 107], яко из Того и Тем и в Нем всяческая. Тому слава. Иустин святыи мученик, и великии философ пишет [Иустин о исповедании веры глава 1], понеже от своего существа Отец Сына роди, от Того же и Духа Святаго произведе. Афанасии Великии исповедает [послание к Серапиону], Дух Святыи всегда есть, и божественому Его бытию от Отца сущу исходити веруем. Василии же Великии возбраняет глаголющих исхождение Духу и от Сына. и о сем глаголет [Василий В. на Ария и Савелия], ибо Сотворитель, и не творение. аз бо со Отцем его исповедаю, а не Отцем Его называю. и Сыном убо прияхом Его исповедати, а не Отцем именуем. но иже ко Отцу свойство имать, разумею, понеже от Отца исходит. паки на конце убо слова того пишет, яко воистину Сын от Бога Отца, и Дух от Бога. понеже и Сын от Отца изыде, и Дух Святыи от Отца исходит. Сын рождением, а Дух Святыи исхождением. Максим святыи пишет [Максим глава 19] един добрыи, единаго Сына родитель, и Духа Святаго источник. Феодорит блаженныи, зловерными называет глаголющих, Дух Святыи и от Сына исходит, идеже глаголет. Дух есть Сыновень, понеже вкупе из единаго существа с Ним от Отца исходит. аще кто тако Его исповедает, да весть яко благочестивыи глас приимает. аще кто речет и от Сына, или Сыном бытие свое имать, таковаго яко бесчестна и нечестива отвержем. веруем Богу глаголющему, Дух иже от Отца исходит. Паче же того Дамас святыи папа в листе своем к Павлину пишет, аще кто не речет Духу Святому от Отца быти воистину и в правду, яко и Сыну от божественнаго существа, и Богу Божию Слову, да будет проклят. Тако бо и на всех седьми вселенских соборех всеми святыми отцы утвержено писанием, и царскими златыми печатьми, что во исповедании православныя веры, еже есть, верую во единаго Бога, не приложити ни отъяти. аще кто смеет приложити, или отъяти, или пременити, да будет проклят. Написаша же и запечатлеша. А иже Формос папа Римскии смел дерзнути во исповедании православныя веры в Риме, исхождение Духу Святому и от Сына приложити; от всех преже его бывших пап Римских, и от всех патриарх, и от святых отец и от всех православных християн буди проклят, и с его единовольники. иже сыноотчее неподобно поведают. и отступивши уставичне [всегда] против истины Святаго Духа борют, им же грех их не отпустится, и прощения несть ни в сии век ни в будущии. Ты же убо Господи Исусе Христе Боже наш, милостив буди им, даждь им даже узнают правду и обратятся к Тебе Богу нашему.

Знамение, осмое.

 Христос истинныи Божии единородныи Сын, уже не приидет от земли, аще кто приидет, в пустынях приведения показуя, не исходи. и паки аще кто глаголя, се зде Христос, или онде тому не веруй, и в дол на землю не зри. ибо Владыка с небесе приидет не сам един якоже первее, но со многими, аггельскими тмами окружаемь. а не тихо якоже дождь на руно. но яко молния исходит от восход солнца, и является на западе. тако будет и пришествие Сына человеческаго. и паки глаголет, узрят Сына человеческаго идуща на облацех с силою и славою многою. и послет аггелы своя с трубным гласом, и прочая. А якоже первое егда восхоте на землю снити, и от девицы родитися ожидаемыи бог, диявол первее омерзи, лукавым лщением сведе человеки идолопоклонением лживыми богами, иже от человеков родишася, и их же они родиша, даже ложью первее нечестиву учинит неправду. тако же и во второе паки егда приити имать Христос истинныи, помощь диявол себе взяв, буих сопротивников ожидание, наипаче же от жидов, приведет беззакония человека волхва, еретика и отметника чародея, и в мечтании все злое хитрствующаго, восхищая себе власть римскаго царьства. и ложно христом прозовется, и тем прозванием жидов прельстит, иже они его надеются, да с ними пребудет. а окрестныя же царьства и власти, и всех человек, своим волшебством и чародейством приведет к себе. Толкование. Се зде Христос или онде, не вери. то бо знамение осмое с первым згодится, и оного объясняет, показует нам прелестника явствено, иже имать сести на римской власти. и ту на земли обогатится, и вместо Христа прозовется, и всех к себе от церкве отвлечет. и начнет созидати грады и храмы светлыя различными мраморы и саны, и величеством и богатьством и славою мира сего прельщая. О том бо нам Христос воспоминает глаголя [Мк. зач. 60], аще рекут вам, се христос в пустыни есть, еже есть в пустошных и в маловременных глаголех, не изыдите, ни откуду не исходите, еже есть от единыя святыя соборныя апостольския церкве от прежния православныя веры паки уставленыя Духом Святым и утверженныя Христом. за новыми ересьми и отступники не исходите. Аще рекут вам, се зде христос во храмех, не имите веры [Мф. зач. 99]. не уклонитеся от Истины Христа, идеже грады и храмы, сами сего могутством поставляются. на дол и на землю не смотри, ибо с небесе Владыка приидет. а кто зде на земли паче всех возносится, блюдися его, сей бо дух антихристов. ибо первее Христова перваго пришествия ведая сатана, яко Сын Божии снидет с небес и вочеловечится и человек будет, сведе человеки на болхвальство [идолопоклонение], даже всех Богу омерзит. и прежде Христова пришествия всех человек от Бога отведет во свою погибель. Христос же Истина с небес пришед, и бысть человек, вся идолы упраздни, и люди в познание Бога приведе. в том бо человечестве паки с небесе приити имать всех судити. Но сатана и о том ведая, яко Христос истинныи Сын человеческии во вторыи паки приити имать с неизреченною радостию и царством небесным, даже всех верующих вонь царства небеснаго сыны сотворит. и вовеки веселие подаст. Паки убо Христа предваряет, и посылает уже не бездушныя кумиры, но человеки живыя лжехристи, иже Христу подобящеся. наипаче себе, нежели Христу веровати повелевают. и теми лживыми антихристы, человеки Христовы ко антихристу приводит, всяким подобием тщася, даже бы всем оному последнему лжехристу, яко истинному Христу поклонитися, иже вместо Христа быти сам прозвася. и учинися князем мира сего, и обогатися на земли областию, и всего мира обдержателем прозвася, восприят на ся Божию и святительскую власть. По всей вселенней послов посылает, всех царей к себе и к своему престолу совокупляя [Апок. 6]. даже и оныи великии град Вавилон совсем на пролитие крови готов будет. которыи Вавилон Христос истинныи своим царством помрачит. о сем чти во Апокалипсисе, главу 17. А якоже прежде Христова перваго пришествия паче всех идолов был един наивящшии идол в Вавилоне при царе Навуходоносоре [Даниил, 3]. ему же царь всем повеле покланятися, егда в трубы и органы и в пищали играли, иже тогда силою Божиею трие отроки победили таковое умышление. Тако же и нынешним многим лжехристом един есть наивышшии папа, иже оному последнему антихристу предотеча, иже на престоле в древнем Вавилоне, яко ниже Кирил святыи пишет, в старом Риме. его же Христос истинныи обличити своих угодников, Еноха и Илию пошлет, не приимати лживаго. он же окаянныи пред всеми повелит их убити.

Знамение, девятое.

Приидет же прежереченныи антихрист сицевым подобием. егда исполнятся лета римския власти, то уже близ есть кончина миру. тогда востанут десять царей римских в разных градех, во едино время властьствующих. таже паки по тех единыи надесять антихрист, мечьтательною злою хитростию приимет власть римскую. тогда же трех царей прежде его бывших победит, других седмь имея под собою. исперва будет смирен, тих, разумен, чист, милосерд, лестию имать показатися. а знаменьми и чюдесы лживыми и мечтательными, жидов прельстит доконца яко показуя себе Христом, его же они ожидают. Последи же пременится сын погибели честию и управлением якоже прейти ему всех прежде его бывших неправедных и лукавых, и будет убиица лют и немилосерд и различен ко всем, наипаче же на нас християн гнев имея. и полчетверта лета тако будет люто царствовати, дондеже вторым с небесе славным пришествием единороднаго Сына Божия Господа нашего Исуса Христа истиннаго, помрачится, его же убив духом уст своих, родству огненому предаст. Сие бо учим не о себе глаголющи, но от святаго писания собирающе. а наипаче взям от пророчества Даниилова. якоже и архаггел Гавриил поведа тако глаголя. зверь четвертыи, царьство четвертое будет на земли, иже будет превыше всех царьств. и сие поистине римския церкве учители суть предаша ми. Первое бо славно было царьство Асирийское. А второе Мидское, соединено с Персским. Третие, Македонское. Четвертое, ныне Римское. Таже паки Гавриил прилагает глаголя, десять рог его, десять царей востанет. и по нем востанет другии, иже прейдет всех первых злобою. не токмо глаголет десяти, но и всех иже прежде его быша, и трех царей победит. Ведати подобает, яко ис тех десяти, трех царей того ради победит, яко сам осмь будет царствовати, и на вышняго имать рещи словеса еретическая отступных беззаконник.

Разсуждение.

Двоя подобия о наставании антихриста на царьстве Римском. Кирил святыи от пророчества собрав нам исповедает. Первое от того времене антихристово царьство в Риме зачнется, якоже глаголет, егда исполнятся лета Римскаго царьства. и не глаголет егда возмущено будет, но егда исполнятся лета. еже есть когда уже Римом цари не имут владети. якоже и ныне видим, иже не владеют. не разумею же, аще Римское царьство антихрист первое имать возмутити, а потом своею силою взяв, сести на нем; или не могл бы тако скоро где инде таковую власть прияти. понеже сам последнии едины полчетверта лета имать пребыти. но до его пришествия в Риме предотечи его римское властодержьство и власть царьскую приимут. им же имут властодержьства множитися, и ему самому место уготовят. се суть антихристовы предотечи, и его властели. якоже Златоустыи пишет глаголя [к солун. зач. 2], егда изгубится римская власть, тогда антихристово начнется властельство. и то явно в Риме от того времене настала власть антихристовых предотечь, егда власть царей римских в Риме престала. тогда человек духовныи папа Римскии, Божию и святительскую власть нача держати. А второе подобие показует нам, како, и коим обычаем последняго антихриста на оном престоле римском надеятися имут, якоже глаголет. тогда востанут в Риме десять царей в разных местех будут, к римскому единонадесятому царьству, во едино послушании будут. Тогда в Риме на том единонадесятом царе, иже есть последнем антихристе скоро содеятися имать. Ибо седмь царей в послушание свое антихрист к римскому престолу слугами своими в то время добровольно и без брани взыскати имать. а трех паки войною и силою с иными седьмию цари достанет. якоже в главе четвертой воспомяну. тии же трие цари, за единым римским царем и именем пребывати начнут. понеже повелением и промыслом римскаго престола побеждени будут. и того ради и сам осмь прозовется антихрист на царьстве Римском седя дух лукавыи седьмию лютейших поймет. и приходит к человеку тому лесть последняя горши первых.

Знамение, десятое.

Не от царей, ни от царьска рода воздержит царьство, но прелестию [мечтанием] восхитит власть. Кто же сей есть, или от какова чина повеждь нам о Павле, коего глаголеши пришествие по действу сатанину, во всякой силе и знамениих и чюдесех ложных; Сие последи повести указует, яко сатана себе ученики себе учинит, иже по оного воли сам собою начнет действовати. ведая бо, яко по суде не имать быти ему покоя. того ради  не слугами своими якоже извыкл, но сам собою имать привлачити и прелщати всякими знаменьми и чюдесы лживыми. отец бо лжям, и лживыя действа мечтанием действовати имать, иже многия начнут видяще мертвых воставших, а они не восташа, и хромых ходящих, и слепых прозирающих, а здравия не будет. и паки глаголет, сопротивляяися и превозносяися паче всякаго глаголемаго бога или чтилища. паче всякаго бога, сиречь сим бога почитают. антихрист же то возненавидит. а еже глаголет, яко в церкви Божии ему сести. в которой церкви; в смущенной глаголю в жидовской, а не в той в которой ныне есть мы. того бо ради сия глаголю, даже мы сами себе не предадим в волю его. понеже бо к жидом приидет, яко христос, и от жидов прият имать быти. даже их тем наипаче обольстит, честную церковь сотворит, да в большее сомнение их вложит. глаголя себе от колена Давыдова, хотящу Соломонову церковь создати. приидет же антихрист тогда, егда в жидовской церкви не останет камень на камени по словеси Христову. егда или состаревшися развалится; или ради закладания основания раскопается; или инем каковым подобием все камение разметано будет; не мню ту покрыты верхи, но стены и все иже внутрь церковное идеже были херувими. тогда он приидет всякими знаменьми и чюдесы ложными обзирая, и собирая вся идолы. исперва же будет к человеком милосерд, а все лестию. последи же лютость и безчеловечие покажет. а наипаче на святых Божиих воздвигнет рать. смотрил же есмь, и се рог той воздвизает брань со святыми. и паки на ином месте пишет, будет время скорби, якова же скорбь не бывала от начала века, даже до того времене. Толкование. Не от царей восприимет власть, еже есть не от оных седми, или десяти царей будет посажден на царьстве Римском, или над их властодержством иже его во всем слушати имут, но мечтанием неким, им же в раи сатана сведе Адама. такоже и он приведет их под свою власть, обещая им, яко богами их зде в мире учинит. даже и самого того, ему же обещает и с его царьством, под свою силу и власть приведет. А иже на Римское царьство якоже ныне видим, не цари царя избирают, или поставляют, но духовыня духовных на монархию римскую, на царьскую власть света сего прекладают. иже Божию и святительскую власть в Риме, на себе восхитив, и по всему миру разширяют и держат, и предадут оному последнему князю мира сего, еже есть антихристу. якоже Кирил святыи в девятом знамении пишет, глаголя о сем. а сие за истинно римския церькве учители суть предатели. [2] Тако же и антихрист он последнии, якоже и нынешнии его предотечи, вознесется и возвысится, паче всякаго глаголемаго бога, или чтилища. не глаголет напрасно [всячески] паче Бога, иже есть един истинныи Бог, но паче всякаго глаголемаго бога, еже есть паче всех царей земных вознесется, иже суть прозваннии. а не бяху суть боги. [3] А еже паче всех святых Божиих вознесется и заповеди их сокрушит, и еже суть у него обратит, и своих повелении умышления заповесть держати. [4] А уже паче чтилища, се есть якоже Златоустыи глаголет, не яко бы во идолопоклонение приведет люди, но себе самому кланятися. и повелит себе вместо бога почитати. и тако с великою нуждею, и тягостию приидет ко июдеом, якоже святыи Кирил впреди в знамении, первом надесять пишет.

Знамение, 11.

Срогкии [лютыи] зверь змий, великии, человеков непобедимых, готовыи пожрети. о нем же много бы хотел глаголати, от божественаго писания, но ныне поспешения ради о том престану, ради того, яко ведая сопротивнаго величество, и смирение благоверных якоже рече Господь [Мф. 99], егда пришед во Иеросалим, тогда сущии во июдеи, да бежат на горы. аще кто слышится силен быти, да ся борет с сатаною, якоже достоит. не ослабляю бо церковных жил, и о всем да глаголет, никто же нас разлучит от любве Божия, и прочая. но страшливии да бегают, а инии да оставимся. будет бо тогда скорбь велия [Мф. зач.], якова же не бысть от начала мира, и потом не будет. Но хвалю Бога, яко велию скорбь на малое время описует. глаголет бо, избранных ради прекратятся дние тии. Будет же антихристова царьства токмо полчетверта лета. не пророчествую же, но от пророка Даниила глаголю. Тако пишет [Даниил, 8] дастся в руку его до времене  и времени, и полвремене; время есть год един возрастет пришествие его. а два времени, другие лета злобы его, и тако суть три лета. а полвремени есть, шесть месецев. И паки на ином месте той же Даниил глаголет [Даниил, 12]. и закляся живым его вовеки, яко во время и во времена и полвремени беду имети нецыи имут, и прочая. дней тысяща, двесте девятьдесят. блажен терпяи и постигии во дни тысяща триста тридесять, пять. того же ради достоит таитися, убегати. не имут бо скончатися грады израилевы, дондеже приидет Сын человеческии. кто же блажен; иже Христа ради с радостию тогда мучение приимет. паче всех мучеников сицевии мне мнятся тогдашнии мученицы быти. первыя бо мученики с человеки брашася. а иже при антихристе и с самем сатаною очевидно братися имут. тако же оны прежнии цари гоняще токмо убивали. а тогда лестию и приведением злым прельстит их и изменит, аще возможно и избранныя. едва тогда кто помыслит яко Христос имать что больше сотворити паче Его, яковою же силою сей действует. аще бы Бог не восхотел, то не бы ему попустил, но тебе укрепляет. и первее сего апостол глаголаше [к солун. зач. 275], сего ради послет им Бог действо льсти. что же послет глаголя; попустит тому быти, не иже тем изглаголали. но да осудит неверующих правде, еже есть Христу. попусти же ему Бог и во время гонения, не яко убо и тогда не возможет возбранити. но ради претерпения мук по обычаю венчает своих мучеников, и сопричтет со своими пророки и апсотолы. аще малое время потерпеша, безконечное и небесное царство восприимут. о сем Даниил глаголет, онаго времени избавлени будут вси людие Твои, написанныи в книгах животных. и множество в земли от земли возбудят, иже востанут в жизнь вечную. а инии на гонение вечное и срамоту. и овии светятся яко светильницы кругов небесных, а инии от праведных яко звезды навеки. Толкование. Тогда сущии во июдеи да бежат на горы. и иже мук не могут терпети, отрадит им Христос тогда на время убежати, да не соблазнившися или убоявшися мук, вечно погибнут. а которыя постраждут доблествено, паче всех мучеников первых начальнейшими будут, иже в то время за Христа муки приимут, ибо не с простым человеком, но с самым дияволом побиются. но токмо и от страха и мук. но котории и от прелести их не отвратятся, страхования ради, яко имут много их соблазнитися прелести ради, глаголюще, яко и Христос ничего больши того не сотвори. и аще бы то не угодно Богу, не попустил бы. не ведуще яко убо сие действо Божие, того ради посылает Бог ради первых действ, еже есть злии иже не вероваху истине, посылает им прелесть, даже услышав осудившеся погибнут. ибо не к правде, но ко лжи присташа неправеднии. аще бо в вере пребудут доконца, спасутся, и большую мзду себе восприимут, иже Судия пришед всем воздаст по делом. До зде суть знамения о антихристе святаго Кирила. Впреди же паки в коейждо главе учит. даже и сам кииждо подлинно разумеет, и иному исповедает.

 

Глава, 5.

Явьствено кождого воспоминает православнаго християнина, даже сими знаменьми выше писанными о антихристе укрепившися, и сам еще больше того поразумев укрепилбыся, и всякому исповедал, дабы никто не приимал лживаго, яко праведнаго. И еще укрепися сам человече, имаши бо знамения антихристова, и не токмо сам един памятуй сие, но и всем без зависти поведай. аще дети имаши родныя, то паки научай их. и аще кого учити начнеши, то первое в том укрепи его, дабы лживаго не приимал, яко праведнаго. тайна бо уже действуется беззакония. страшат мя войны окрестныя. страшат мя отступления церковныя. страшит мя ненависть братня. даже о чем ни глаголем, при нас не сбыстьлися. единако же приписуемся, и не токмо ныне но и при антихристе. Ждем же и озираем Царя с небесе приходящаго на облацех. трубы аггельстии тогда вострубят. а кои Христа ради умроша, первее востанут. победоносцы воздаяние восприимут, и паче человек почтени будут, понеже паче человека терпение восприяша. ибо апостол Павел пишет глаголя [к солун. зач. 270], яко сам Господь в повелении во гласе архаггелове и в трубе Божии снидет с небесе. и мертвии о Христе воскреснут первее. потом же и мы живущии и оставшии вкупе с ними восхитимся на облацех в сретение Господне на воздусе. и тако всегда с Господем будем. Ведомом же сие буди обое, яко пришествие Господне, тако же и кончина света сего.  во Еклисиасте глаголет [11, 12] веселися юноша во младости своей, да ублажит тя сердце твое, в день юности твоея. и потом отрини ярость от сердца своего, и прочая. отведи пронырьство от плоти своея, и воспомяни Сотворителя своего, дондеже не приидет дни злобы твоея. и приспеют лета, в них же речеши, несть ми в них хотения, дондеже не померкнет солнце, и свет и месец, и звезды, и все померкнет, и помрачатся видящая в скважнях, и начнут зрети яко в дупли. и такою повестию, всю потемненую светлость дуплем [скважьнею] менит, прежде даже не разорвется, или на сребреная; еже есть, небо звездами сплетеное, яко сребро видится, и не сотрется. анфимии златыи иже сребро сие златовидное солнце менит. анфос бо нарицают в круг многия листочки имеющии искуса златная. и востанет шум [крик] птиц. и потом узрят с высоты страх, и ужас на путех. и процветет кляпыш, и отолстеет коник, или открида, и разрушится всяк кипарис. и узрят тогда Сына человеча грядуща на облацех. и будут нарекати плачюще колену на колена. а егда Христос приидет, и все утихнет. а яко толковники поведают кляпыш, цвет именует, иже в зиму земля в себе скрывает. и по зиме сиречь в воскресение плоти наша процветут в цвет небесныи. и утолстеет коник душа крилатая оболкшися в плоть и разсыплется кипарис, то есть, высоковерхия законопреступницы изгнаны будут. Видиши ли, яко напредь исповедают пришествие Господне, яко ведят глас птицам, якоже дозналися мы гласу. сам бо Господь во гласе архаггелове и в трубе Божии снидет с небесе [к солун. 270]. аггел возгласит всем глаголя, востаните на сретение Господне. Давыд же паки глаголет [Пс. 49], Бог яве приидет Бог наш и не премолчит. огнь пред Ним возгорится, и окрест Его буря велика, и прочая. Приидет от Отца по писанию иже ныне почитаем на облацех Сын [евангелие, неделя мясопустная]. и река огненая потечет пожигая человеки. аще кто златыя дела имать, светлейши будет. а кто сламяныя дела имать и непребывающыя, ят будет огнем. а Отец седит имея одежду свою белу яко снег, а власы главы Его яко руно чистое; то бо по человечеству глаголется, того ради, понеже есть царь. и котории не окалялися грехи, тем глаголет убелю грехи ваша яко снег, и яко ярину. что есть знамение, грехов отпущение, или несогрешения, а приидет с небесе на облацех. сам бо рек, и узрят Сына человеческаго грядуща на облацех небесных с силою и славою великою.

Наказание.

Якоже Христова пришествия ждати, такоже и антихриста уставичне списати имам, аще кто от его лютости смерть приимет. Христос иже скоро приити имать, и впреди таковых имать веньчати, якоже воспоминает святыи Кирил от Еклисиаста. ибо есмы Христу со всем пожерлися, и не себе жихом но Ему. И паки в пришествие Его огнь кождого дела пожжет, се бо явствено зде указа. что же еретицы глаголют; ибо ныне паки души кроме тела во огни палими суть; о том бо подлинно писано во второй главе.

 

Глава шестая.

Якоже первее знамение Христово явится в пришествие Его, еже есть крест честныи понесут пред Ним. сам же от десницы Отца своего востав последнюю победу долготерпения над враги своими, честным крестом своим покажет, им же яко оружием от десныя страны шуяя поражена будет. Таковое знамение пришествия Христова, даже паки яко не смеет сила противника пришествия Его подобитися. и тогда глаголет явится знамение Сына человеческаго на небесех. знамение же истинное Христово бяше, крест честныи, печать шествует пред Царем, показует Распятаго. первое же увидевше жидове иже Его прободоша, и начнут плакати глаголюще, колена колена, сей есть битыи по ланитома. сей есть Ему же на лице онии плеваша. сей есть Его же праотцы наши связаша. сей есть Его же распяли первее и глумишася и поругашася. где можем утещи от лица гнева Его; ибо аггельское воиньство обыдет их. никакоже утещи невозможно. страшно есть грешником знамение крестное. а праведным радостное, котории веру свою к нему простирали, или его проповедали, или муку Его ради восприяли. кто же тогда блажен будет; иже праведным Христовым обрящется. не презрит бо рабов своих Царь [тако] славныи, имеяи аггелов, и со Отцем седяи на едином престоле. даже ся не смешают избраннии со отступники Его. пошлет аггелов своих с трубою великою, и изберут избранныя Его от четырех ветр. егда единаго Лота не презре, како может много праведных презрети; но речет. приидите вси благословении Отца Моего. и тогда на воздусех облачных от аггел собрани будут. но глаголет взалкахбося и дасте Ми ясти, и прочая. что речеши; аще жена у жернов не будет оставлена, яко наипаче нас не презрит. буди тогда известныи человече, Судия бо не на лица зрит, ни по славе судит, ни по глаголанию обличит, ни почтит мудрых паче грубых, ни богатых паче убогих. аще и на ниве будеши, возмут тя аггели, не мни яко властелей земных возмут, а тебе ратая оставят. но аще слуга будеши хотя убогии не скорби. ибо кто слуга слуг не презрит. аще больныи на постели лежиши, якоже писано есть. тогда два будета на едином ложи. един взят будет, а другии оставлен. аще и в работе у жернов мужь или жена, хотя и дети имаши, и у жерновах работаеши, не презрит Бог тебе иже изводит окованных мужеством. иже изведе Иосифа из работы, и из темницы на царство. и тебе избавит от утеснения в царство небесное, токмо имей надежду, токмо работай, токмо с прилежанием проси. ничто бо не изгибнет, написана бо есть вся твоя добрая дела, милостыня и молитва и воспевание, и милование, и вера и чистота, и воздержание, и что аще еси сотворил Бога ради, и всех святых, первыи венец восприимеши и царство и честь. аще же еси все то сотворил, то будеши яко солнце. А якоже еси Бога послушал с радостию добре, тако же паки послушания не дай просящагося от противнаго. написана ти есть вся твоя злая дела, преступление, лакомство, суровство, и еретичество, и чародейство, и злодейство, и убийство, и все уже написуется ныне. аще по крещении что еси учинил, первее бо очищается. а когда приидет Сын человечь в славе своей, и вси святии аггели с ним. блюдижеся человече, со многими бо на суд приидеши. и весь народ человечь тогда тамо станет. помысли тогда яко велико племя есть римское. и яко много иных язык ныне живущих. и яко много их во сто лет умре. помысли колико их в тысящю лет погребено. помысли всех иже от Адама и до нынешняго дне, коль многое множество, но и еще то малою аггелов бо еще больши есть девятидесяти девяти овец онех. сия есть мыслити подобает, ибо вся земля, на ней же живем, яко едина точка посреди небеси висит колико множество имать. а небеса небесныя еще больше безмерное имут величество якоже писано есть. тысяща тысящами служаху Ему, и тмы тмами предстояху Ему. не иже бы толико таковое множество было, но иже пророк изглаголати больше не мог.

Наказание.

Тогда явится знамение Сына человеческаго на небесех; не ино есть знамение Сына человеческаго, но един крест честныи, его же на рамех своих Христос на смерть грядыи с места снес на гору Голгофу, на нем же и титла его от Пилата была написана. то знамение Христово ныне едины безумием и прекословием, возгордевше отвергли. А друзии еретицы ругающеся ему, на большее Христу досаждение, на ногах своих носят, и на земли пишуще, ногами топчют, и то кресту попиратели, себе же на большую погибель. А мы православнии християне то честное знамение крест Христов восприимаем, на нем же пригвождени быша ноги Его, и поклоняемся ему, не древо, но знамение Христово [Распятаго] почитаем. якоже пишет возносите Господа Бога нашего, и кланяйтеся подножию ногу его, яко свято есть [Пс. 98, 131]. тем и противляемся всякой неправде, полагаем на себе исповедающе, еже Христос творяше, и что еще имать творити. А еже от главы своея на живот преносим рукою знаменуем, яко Христос с небес прииде во чрево Пречистыя, и родися по человечеству, и что Ему потребно нас ради на земли и под землею во аде, исправи. А еже паки от долу на десную руку преносим, знаменуем, яко Христос от земли на десницу Бога Отца своего вознесся. А иже еще, но когда будет кончина, с десницы с небесе и со крестом приити имать, даже осудит шуицу, того ради и с десницы на левую страну крест кончающе полагаем, и знаменуем, яко Христос еще с десницы на шуицу, еже есть на противнаго антихриста и на все собрание его приити имать. и всех иже будут тогда на шуей, конечно крестом победит. такоже и ныне на шуюю, еже есть на противников и на неправду предаде нам Христос знамение свое крест честный, яко бы мечь на неприязнь [Пс. 59]; того ради с десныя, еже есть от Христа истины, на шуюю есть на противника Христова крест относим. но Христов противник яко во всем, тако и в том противится Христу. и востающе с шуия, против десныя, сиречь дающе силу свою на десную, тоже Христово. а шуее бо антихристово, обратився против по своему на десную совершити знамение свое, или на челе дает. якоже о нем пишет глаголя [Апок. 13], даст им знамение на правую руку их и на чела их, то есть, иже на своих, от них же изыдоша, и от них веру восприяша братися будут.

 

Глава седмая.

Яко все Отец Сыном исправи, тако и суд последнее действо Сыном же учинит. и яко не иная власть Отча от Сыновни, и Сыновня от Отчи и Духа Святаго, но едина и тажде. приидет тогда на суд Господь всех Отец Исус Христос, и Дух Святыи с Ним, и трубою аггельскою иже от перваго человека Адама и до последняго вси призовутся, дела своя кождо носяще. Того же ради еще ли не повинни есмы уже от сего времене трудитися, еда или малую казнь, или малое то осуждение; человече разумей, яко тайны многи явствены будут. изволил бы человек лучше многажды умрети, нежели клевретом грехи своя объявити. Потрудимся братие даже нас Бог не осудит. ибо Бог не требует на суде свидетелей. не речет иже еси в нощи сотворил преступление, или чаровал, или иное зло учинил, и человек ни каков не был тамо бяше, но сами держати начнем своя дела тайная написана, потому и суд воздаст. а еже сам Христос Судия показа нам глаголя. Отец бо не судит никомуже, но весь суд даст Сыну. не отдаляя себе от власти, но Сыном суд творя. изволением тогда Отчим судит Сын. не иная есть Отча, а иная Сыновня воля, но едина и таяже. что же тогда Судия изволит ли принести твои дела, или несть; соберут пред Ним всех человек. достоит бо вся кому колену пред Христом поклонитися, небесных и земных и подземных. и разлучит их един от другаго, якоже пастырь разлучает овца от козлищь. пастух яко разделяет, смотрит ли в реестр, или в книги, кое есть овца и козлищь; или сверху разсуждает, или за овна овцу указует, или и козлища острыя космы; такоже и ты аще очистишися ныне от грехов имети имаши чистую волну, и будет ти не окалянная риза и рцы всегда наг есмь. какоже облещися имам, от одежди тогда овчии познан будеши. аще власатыи обрящещися яко Исав власы обросл, а безумием перьвенство свое погубил, и честь продал за малую потраву нашю, сиречь за пищю. не даждь Боже да кто от нас отвержен будет от любве Твоея; но злых ради дел на лево к собранию грешных имут приити; соблюди вправду Судие страшныи от самой повести. ибо царство небесное есть, и огнь вечныи уготованныи. какоже речете ми можем огня соблюстися, а в царство небесное внити. веси же путь. не потребно же ныне иного ничего глаголати, токмо что глаголемо творити; еже есть, взалкахбося, и дасте Ми ясти. возжадахся, и напоисте Мя. странен бех, и введосте Мя. наг бех, и одеясте Мя. болен бех, и посетисте Мя. в темнице бех, и приидосте ко Мне. сие аще сотвориши, с Ним будеши царствовати. аще того не сотвориши осужден будеши. и паки начни сие творити, и крепко стой в вере. а не яко буи девы, не хотящи масла купити, но все сотвори иже глаголано выше. не токмо свещу имей, но блюдися дабы горели, даже и свет покажет добрых дел твоих пред человеки. дабы тобою прославлялся Христос. облецыжеся удобне во одежду неокалянну дел добрых. и чтотися от Бога предано свыше аще имение. аще и слово учения благоухищренне и подоболепне росправляй добре душям, иже слушают. аще возможно кого от неправды возбранити, прилежно потрудися. много бо есть и иных действ добрых. токмо бы от нас никто да не осудится от Бога и удален будет. даже мы с радостию Христа усрящем превечнаго Царя, Судию живым и мертвым. иже живых ради и мертвых умре. якоже и Павел глаголет [к рим. зач. 113], на се бо Христос и умре и воскресе и оживе, да мертвыми и живыми обладает. в седмой главе ничего не писано, понеже сама в себе имать извыклое учение. а еже о Христе глаголет, ниже услышати.

 

Глава осмая.

Како же ся имамы о двоих ересех писати. первое, иже учатся, яко по судном дни Христова власть скончается, ибо Богу Отцу своему предаст царство. другая, иже учат, яко Христос обратився ко Отцу на небо, а иже ктому не владеет. но ину главу тела церкви своей сотворив оставит, ей же всю власть свою предаст. а сам действом взыде ко Отцу с нами. таже ересь паче первыя есть разлившися. егда кого услышиши глаголюща, яко царству Христову кончина имать быти, не послушай, то бо есть ересь змиева. иная глава ново выникла. сие бо и в Галате смел некто рещи, якобы по скончании века сего Христос не царствует. и еще дерзнул рещи, Слово от Отца изшедшее, и паки тоже во Отца обратився, ктому не пребывает. сие хулу и ересь глаголет, не послушай; но самого Господа иже глаголет, Сын пребывает вовеки. и архаггел Гавриил к Богородице глаголет. и воцарится в дому Ияковли вовеки. и царству Его не будет конца. Видиши ли еретиче ныне что инако учиши человеки о Христе; что же Гавриил архаггел о вечном пребывании Его сказа. кому паче веровати, аще не Гавриилу. послушай нынешняго Даниилова свидетельства, видех глаголет в видении. и се на облацех небесных грядыи яко Сын человечь, и прииде даже до Ветхаго денми, и Тому дастся власть и честь и царство, и вси люди и колена и языцы послужат Ему. и власть Его власть вечная, иже никогда не пременится, и царство Его инем не останется. ты же сие восприими, сему веруй, а еретическое отверзи. ибо явно слышиши о безконечном царьстве. тамо же близ повесть Даниилова о камени, иже от горы без рук отсечеся, то есть Христос по плоти, и царство Его иным людем не останется. тако же и Давыд глаголет, престол Твой Боже в век века. А инде, вначале Ты Господи землю основа, и дела руку Твоею суть небеса. та погибнут, Ты же тожде еси, и лета Твоя не оскудеют. сие же Павел апостол о Сыне поведает.

Наказание.

Начальнейших еретиков зде Кирил святыи помрачает, иже зле веруют о Сыне Божии. первое, котории зле разумевают, доброе писание апостольское, и глаголют: яко Христос по судном дни предаст царьство свое Богу Отцу. противу их зде в разделе девятом [в главе 8] пишет. других помрачает, котории смеют рещи, яко Христос возвратися ко Отцу, уже главою телу церкви своей не пребывает. Сию ересь называет змиевою иною новоприниклою главою, и составляется приклады, яко Христос, и власть Его не токмо по невидимому божеству, но и по видимому человеку пребывает вовеки [Даниил, 2]. где пишет, камень от горы без рук, сиречь Христос по плоти. и царство Его иным людем не останется. И во евангелии глаголет [Лк., 3] и воцарится в дому Ияковли вовеки, и царству Его не будет конца. И сам Господь рече, Сын пребывает вовеки. И Павел апостол пишет [к рим. зач. 113]. на се бо Христос, и умре и воскресе, и оживе, да мертвыми и живыми обладает. и паки [Мф. 116], Сын Божии рек, и се Аз с вами есмь во вся дни до скончания века аминь. се бо соединився с нами, и нигде не разделяется, и не умрет. Како смеют еретицы утвержати, яко Христос всегда не пребывает, и телу церькви Его, иной главы потреба которая бы всегда пребывала. и тако мерзскии возгордевся живым Христом вовеки истинною главою, смертнаго человека всему телу церкви главою быти поведает, о том пишет в знамении первом. А иже тако смертному человеку безсмертнаго Христа хуляще, большую власть исповедают. глаголюще, человек глава в церкви никогда не умирает. А Христос взыде на небо, и не пребывает уставичне телу церкви своею главою, токмо действом нашим есть у Бога. на тех же еретиков наипаче гневается Сын Божии. паче же на тех иже глаголют,  по судном дни предаст Отцу всю свою власть; или на сих, которыя учат, яко скоро отъиде на небо, всю свою власть на единаго человека восприял, иже главою телу церкви учинил. а сам с нами действуется. согласившеся равно Его обои хулят. Противу же их пишет Златоуст в Маргарите о вочеловечении Христове сице. О окаяныи и неразумныи, когда речет Христос, в ты дни яко Аз тело твое обожил, и ты Дух Мой в натуру [естество] сотворения сторгнул. видел еси мертвое, да и воскреслое. видел еси тоже и сопрестольно, еже есть вкупе на престоле есть. видел еси иже выше всякаго начала и господьства и власти. ибо не стыдяся Бог наш почитает, а мы Божияго не почитаем, но ведаю. глаголет злобу еретическую, которая против правды воюет. ведаем, яко еретицы глаголют, то вознеслося на небеса. но не тако почитаемо имать быти, далече бо. но да есть мы ходатая имехом иже за нас Бога молит. о сем безстуднии языцы, и ненаказанныя душы глаголют на ринке [торжище] срамотяще святых не ведаю, како ибо самую паки речь гонения не хощу глаголати, но разум объявлю. тии бо глаголют, помолися о нас. и емлют себе слово, от апостола разума не уведав. не глаголет ли апостол, яко Христос умре и воскресе, иже есть одесную Бога, иже и проповедают о нас. еда или мы Божия действа оклеветали. Павел глаголет Христа проповедающа, то есть молящагося. неразумеюще что есть приповедание. ибо велия убо есть разность между мольбою и приповеданием. аще бы сие убо было, молитися и приповедати, нарекл бы о молитве Павел, хощу да творите молитвы и моления, прошения же и мольбы, и благодарения. ибо моление разумеется. егда кто молится Богу о какой вещи. а мольба паки, егда кто восхваляет Бога. а мольба, егда кто обещавается Богу, а благодарение, егда кто за добродейства, благодарение воздает Богу. а приповедание разумеется, егда кто на обидящих исповедуется Богови, призывая Его на отмщение. а иже приповедати, несть есть о чем молити, но вопрошати и ответ приимати. свидетельствует о том древнии закон, глаголя; рече Бог ко Илии пророку, что ты зде Илие. вопрошает Бог пророка. и отвещает Богу пророк глаголя: ревнуя поревновах по Господе Бозе Вседержители. яко оставиша Тя сынове израилеве, и олтаря Твоя раскопаша, и пророки Твоя избиша. и остах аз един, и ищут душу мою изъяти ю. се не была мольба ни молитва, но вопрошание и ответ и оповедание бысть. ибо послушай Павла апостола глаголюща, или не весте о Илии что глаголет писание, яко приповедует Богови на израиля. о сем разумей, яко приповедание несть моление, но глагол пророческии, иже оповедует Богови такую дерзость. понеже апостоли и во языцех проповедующе беды приимали, от царей и владык влечени, и от жидов гоними. учили их всего снабдевати и претерпевати, изгнания и скорби и смерть. и утешая их глаголати, аще и вы ничто не глаголете деющим вам, той вас оповедает, иже от нас отдание восприял, кто подъемлет на избранныя Божия; Бог оправдаяи, кто осуждаяи. Христос Исус умерыи, паче же и воскрес, иже и есть одесную Бога, иже и приповедует о нас [к рим. 99]. аще бы молился, како бы седел, занеже стоят молящиися, зане видел еси кого яко слугу приповедающа седящаго одесную царя. о том показует глаголя, иже есть одесную Бога, иже оповедует о нас, яко бы рек, не бойтеся, что вас пострекает, токмо прилежно учите. а добро творити не преставайте. и не глаголете, Господи, колико терпим, гонят нас, ненавидят нас. имаши тамо иже о тебе речет, иже оповедует. а оповедует Сын Отцу не меньши властию, но яко Сын со Отцем паки глаголет о всем чтося творит. аще вернии в нас, обидими гоними ненавидими, чего ради се и презираемо бывает. показует Сына иже оповедует. сие бо сам Избавитель к жидом глаголет [Ин. 17], или мните яко Аз реку на вас ко Отцу, иже есть на вас глаголет Моисей, нань же вы надеетеся. или меньши по твоему мнению, Сын иже оповедует Отцу. аще услышиши Бога иже оповедуется человеку на неверующих, чим его уничижиши. слыши что глаголет Господь ко Иеремии. видиши ли что Мне сотвори неразумная дщи июдова, остави Мене, и иде вслед богов чюжих. да то человек оповедует Богови. чего же ради Бог оповедует человеку. А иныи пророк глаголет [Исаия, 5]. и ныне ты человече, иже живеши во Иеросалиме, разсуди Мене с виноградом Моим, иже бо восхотех Аз сотворити над ним, и не сотворих. Такоже и Христос, егда во плоти на земли бысть, промысл Божии исполняя. Иерей бысть, молбы приносил, и молился Отцу плотьским смотрением, а яко взыде на небо, токмо седит славим, а не молится, ни оповедует. аще и оповедует, яко Сын Отцу. понеже и Бог пророку показуется оповедуя. о том Павел глаголет, указуя, ибо Христос, не яко священник стоит, горе принося молитвы о себе и о людях, но седит. глаголет бо такова имамы архиерея, иже седе одесную престола величествия на высоких, превыше всякаго начала и власти, и не имать нужды на всяк день, якоже первосвященник приносит жертву о себе и о людских невежествиих. таково сотвори, единою паки себе принес. чего же ради беснуешися на благочестие, аще не имать нужду, а ты нуждею его ведеши иже есть превыше всякаго принуждения. И еще приводит Павел апостол глаголя [евреом, 322, 323], не в рукотворенная во святая вниде Христос противообразная истинных, но в самое небо, ныне да явится, лицу Божию о нас, и не глаголет являтися, единою бо паки явися. ни да многащи принесет себе, якоже первосвященник входит в святая святых по вся лета. ныне же единою в кончину веков, во отметание греха, жертвою своею явися. и всяк убо священник стоит на всяк день служа, и тыя же множицею принося жертвы, яже никогда же могут отъяти грехи. Христос же единою о гресех принес жертву, всегда седит одесную Бога, прочее ожидая, дондеже положатся врази Его подножие ногама Его; и где оповедует седя, чегоже ради досаждаеши добру делу. До зде Златоустыи. а иже проповедание не разумеется действо, ни молитва, но оповедание и наваждение, якоже святыи Златоустыи в Маргарите, и инде везде из апостольских книг согласно пишет. о том убо зле еретицы превращают по своей воли божественное писание, иже поистине в греческом писании тако в себе имать. Павел о Христове вочеловечении пишет. того же ради избавити может доконца приходящих с Ним, и оповедати о них к Богу, всегда бо живет. о том Златоустыи глаголет явьствено, яко Отец, такоже и Сын мертвыя воскрешает. и его же хощет, живит, и всегда жив есть. и избавляет доконца, се есть совершенное. Показует зде и тайну некую, яко не токмо зде, но и тамо иже хотят веровати в Него, и приходят с Ним ко Отцу. се есть к познанию истиннаго в Троице единаго Бога. сии суть словеса святаго апостола Павла, и святаго Златоустаго, иже знамение не воспомянут, яко Сын Божии с нами имать действовати. но и во всем свидетельствует, даже до скончания века приходящих в соединение к Богу, причастием тела и крови Его избыти доконца сам может, не токмо по Божеству, но и по человечеству. с Ним же соединяемся, и никогда не разлучится, и един есть во едином лице, и всех избавляет. якоже пишет. аще кто яст тело Мое, и пиет кровь Мою, имать живот вечныи, и воскрешу его Аз в последнии день. и еще глаголет, ядыи Мою плоть, и пияй Мою кровь, во Мне пребывает, и Аз в нем. и аще не снесте плоти Сына человеческаго, и не испиете крове Его, живота не имате в себе. Потребно есть ведати. яко Христос бысть месия, иже есть ходатай, или посредник. яко сотворил нам вечныи покой. якоже пишет, восприят образ, иже созда в раи, и всеми красотами украси. и вместо райския красоты, даде ему добрых дел исполнение, в раи брашном прельстися Адам. а плоть Христова постом венчается. в раи первая брань, а в пустыни вторая победа с диаволом. приходит бо Избавитель обновляя сие творение, и всякими добрыми делы венчает в посредник, соединяя божество с человечеством. прииде обещася всему миру, яко обновити имать падшии образ, и во спасение привести. не возможно ли бы сие обещати, аще не бы посредник [ходатай] был. якоже иже некогда начальнейшии мужь обещает что меншему, не смеет обещания просити меньшии. аще не имать посредника. понеже невидим есть Бог, посла в мир сей видимыи ходатая, или посредника достовернаго. посредник бо Богу и человеком, человек Христос. посредник бо аще не имать еже повиноватися, не может быти ходатай. понеже посредник [ходатай] Богу и человеком Христос, да явится сроден Богу, сроден и человеком, якобы промысл среднии, с Богом вкупе по божеству. а с человеки соединився по человечеству. и что творит. понеже первое творит и учит. а потом обновляет, и бывает посредник, и споручник, поведает Божия человеком. а человеческая Богу. понеже бо враг бысть человеческии род Богови, преступления ради. невероваша бо человецы Богови, ни Бог человеком. како же имать востати падшии, кроме посредника [ходатая]. о том глаголет человеком, веруйте яко будет воскресение, Аз тому споручник. восприиму от вас плоть, и предам смерти. аще ли не воскрешу, не веруйте Ми, и поручает [засвидетельствует] человеком Бога, а Богу человека, яко бы рек, от мене человека приимеши, Аз его объявлю. Аз его учиню, яко отринет прелести, и познает правду. прими мене поруку, даже и они приимут мене за порукою твоей власти. а якоже Христос посредник [ходатай] бысть. показует о том писание. тако же и споручник [ходатай] есть, и содетель, даже не обрящемся, еже глаголете свои глаголы показуя в церкви. аще свои глаголю, то како глаголю. аще Божия глаголы исповедую, то Духа Святаго глаголю. приими сие учение. а иже и споручник [хадатай] есть Христос. якоже Павел апостол глаголет; Ты еси Иерей вовеки по чину Мелхиседекову. и приложи, а ныне лучшее служение, понеже елико большаго завета есть ходатай. и о том ходатайствует Бога человеком. заручает человека Богу, якоже рече обновити нас, и обновляет. и безсмертием нас почтити, и почитает. егда бо сотвори Адама без порока, и не обеща ему ничесого. егда же его воздвиже, тогда же не обеща, сия ему воздаде, яко небо и землю и рай и иная. А еже ходатайством обеща, не воздаде ли евангелие, сиречь, новыи завет. до зде Златоуст. Видиши ли како нам исходатай радость вечную, и новыи завет предаде нам. и сотвори един паки совершенное к Богу и человеком. больше же моляшеся не ходатайствует, сам бо всех доконца избавити может. того ради не молебник, но Избавитель наш есть. а еже сопротивники писание Иоанна Богослова, толкуют инако, Христа в безчестие приводят, яко бы Иоанн молебника Его написа, иже с греческаго писма преведено [1 Ин. 69]. тако бяше сие имать, чадца Моя да не согрешайте. и аще кто согрешит, ходатая имамы ко Отцу Исуса Христа праведника, и Той есть очищение о гресех наших. видиши ли, яко не глаголет ко Отцу о нас грех ради, но и утешает нас вкупе со Отцем пребывати, егда о гресех воздыхаем и плачем, и сам от них нас избавити может, яко глаголет, и Той есть очищение о гресех наших. И инде сам глаголет, приидите ко Мне вси труждающиися и обременении, и Аз покою вы. и еще спривводят доброе слово, зле разумевающе писанное во Апостоле, якобы имел и Параклит Дух Святыи, иже плоти не восприят, на се бо ко Отцу от нас причиняется. яже пишет к римляном сими словесы [к рим. зач. 98], что бо помилимся, якоже подобает, не вемы. но сам Дух ходатайствует о нас, воздыхании неизглаголанными. испытая иже сердца весть что есть мудрование Духа, яко по Бозе молится по святых. о том Златоуст широко пиша глаголет, разныя духи, то есть дары Святаго Духа церкви дает Бог с ними, и той дар Дух познания времен приходит на единаго человека, иже вместо всех молится. ведая о том что есть в церкви прижитие. а ныне диакон той чин на себе имать, иже во время моления стоя среди церкве, что имать молится, всем исповедует, егда молится о спасении душ наших, и прочая. И сие показует Павел апостол глаголя, что бо помолимся, якоже подобает, не вемы, но сам Дух ходатайствует о нас воздыхании неизглаголанными. то есть егда молится духовне диакон, за егоже молитвами, и наш дух неизглаголанным молением воздыхает, иже испытает сердце. Златоуст. Видиши ли яко не о Параклите сие глаголет, но о сердце духовном. и аще бы не тако было, то како глаголет. а он иже испытает Духа. но иже весть о человеце духовном глаголет, иже моления дар имать. и того ради приведе апостол, иже испытаяи сердца, весть, что есть мудрование Духа, еже есть человека духовнаго, иже по Бозе живет и молится по святых. даже и мы от него научимся како ся имамы молитя. и еще себе берут на помощь, что писано есть, всяческая от Бога примирившаго нас себе Исусом Христом, и давшего нам служения примирения [2 коринф. зач. 180]. зане Бог бе, о Христе весь мир примиряя себе, не вменив тем согрешения их, и положив в нас слово примирения. по Христе убо молим яко Богу молящу нами, молим убо по Христе примиритися с Богом [коринф. 180]. О том противницы глаголют, понеже Отцу человеки молящу посланники своими. таже и Сын в прошении человечестем молит Отца о нас, но то зле разумевают. аще Христос яко и святии Его соединяется с нами, несть от них разньствия, и потому будет тварь, а не Сотворитель. сие есть велия хула. но подобает тако рещи и верити имамы, яко святии по Христе молят Бога о нас, тако же и с нами Бога молят. а Христос есть рожден, а не сотворен. единою паки вечное примирение соделав. ктому уже не молится, якоже пишет [Ин. зач. 55], но святым чин уставив. и они вместо Христа якоже нас от Бога, такоже за грехи наша Христа Бога молят. а Христос сам собою покой соделал, очистил грехи наша. якоже пишет собою очищение сотворив грехом нашим седе одесную престола величествия на высоких [евреом, 303]. о том Златоуст пространно пиша глаголет, не просто седе, но егда нас очисти, понеже воплотися. и таможе ниже глаголет, собою примири нас Богу, и все соверши, егда вознесл нас крестом своим [Ин. зач. 61]. и оповедует [сказует] убо нам воскресение, и вознесение на небеса приводящее. и седе одесную величествия на высоких. а якоже зде, тако и на другом месте все о власти пречистаго вочеловечения Господня пиша глаголет, воскреси Его от мертвых, и посади одесную себе на небесных, превыше всякаго начальства и власти, и силы и господьства, и всякаго имене именуемаго [ефес. зач. 218]. не токмо в веце сем, но и в грядущем. О сем же Златоустыи не рече спроста вышше, но высоту показует. и того ради превышше глаголет. ибо вем, суть аггельским силам имена, но ныне от многих не именованы, а тогда будут познани. ибо не точию еже единым властвует, а другими не властвует, но всеми бесплотными силами. и о сем разумеем о восприятии плоти, еже промысла ради восприят, о Христе глаголет Павел. ибо прежде воплощения явно есть, яко Бог Слово [Сын] равно име со Отцем всю власть, еже и паче того ныне по воплощении имать. и все покори под нозе Его. Златоуст; Слыши его, яко седит превыше. аще не имать такия власти, яко тако почтен есть, о том объявляет явствено, яко и властелем Его учини всем. Апостол; И того даде главу. Златоуст; И церковь силою Христовою равно посади на оном престоле, идеже глава, ту и иное тело. Апостол; Выше всех церквей. Златоуст; Паче аггел и архаггел, самого Сына даде главою паче всех видимых и разумных Христа. и паче всякаго приятия [добродеяния] сие учини наивышше, еже есть Сына учини главою. Апостол; Еже есть тело Его. Златоуст; А наипаче, что есть даже не мнят слышащи Его главою некоторой токмо части приложеной. егда же телесно речет нам, главою. а церковь есть исполнение Христово. исполняет бо тело и совершеную чинит главу, яко тоже и паче того глава исполнение есть телу. Апостол; Исполнение исполняющаго вся во всех. Како ти указует, яко не токмо по человечеству есть глава и Господь всей твари, но и Сотворитель по божеству, якоже Иоанн пишет в евангелии [Ин. зач. 1]. вся тем быша, и без Него ничтоже бысть, еже бысть, Его же Отец якоже пишет [евреом, 303] по человечеству положи наследника всем, Им же и веки сотвори, иже сыи сияние славы Отчи, и образ ипостаси Его, нося же всяческая глаголом силы своея, собою очищение сотворив грехом нашим. седе одесную престола величествия на высоких. толико лучши быв аггел, елико преславнее паче их наследствова имя. кому бо рече когда от аггел, Сын Мой еси Ты Аз днесь родих Тя. и паки, Аз буду Ему во Отца, и Той будет Мне в Сына. егда же паки вводит Первороднаго во вселенную глаголет, и да поклонятся Ему вси аггели Божии. и ко аггелом убо глаголет [Пс. 103], творяи аггелы своя духи, и слуги своя огнь палящь. к Сыну же [Пс. 43], престол Твой Боже в век века, жезл царствия Твоего. Зри величество Христовы плоти. видиши ли Христа всей твари Царя и Сотворителя. зри яко Сему вся тварь со Отцем и со Святым Духом, равно седящему на престоле поклоняется. паче бо всех больше аггелов Он есть. И еще имамы зде оглаголание. Первое. яко Отец никого от аггел не именова сыном, яко Христа. един сыи бяше по естеству Сын, а не по образу убо ни по благодати. Другое, яко поклоняются Ему аггели. Третие, яко аггели суть слуги; а Христос, и Бог. Четвертое, яко Христос есть Сотворитель, аггели же Его сотворение. Пятое, яко Христос седит одесную Бога, а аггели человеком служат. како же ты не устыдишися, не престая укаряя Его. еда убо еще причинцею [речником], ходатаем, молебником, жрецом, рабом своим, содеваеши. не хощеши разумети, яко то все един паки совершено сам собою сотвори, даже действуя и моляся уставичне [всегда] не жертвова, но сам всеми яко Господь облада. о том пишет Павел, на се бо Христос умре и воскресе, да мертвыми и живыми обладает. аще и слышиши что нам Павел к римляном пишет, иже о нас поведует. о том же Златоуст тако пишет, не меншость зде разумей, но самую любовь зде указует. аще бо Он живот и всякому добру источник. и аще тоя же силы ея же и Отец, и мертвых воскрешает и живит, и ино все творит, како бы о нас ходатайствовал, или молился, якоже еретицы глаголют. которое моление творити имать Той, иже окаянных и осужденных нас своею силою от осуждения свободи, и праведными и сынами Божиими сотворил, и тако на превышнюю честь возведе, о которой не имехом были никакия надежди, на сию конечно приведе. како же вопрошю, егда оное все совершил, и естество наше на царьском престоле посажденное показует, малых ради и удобных действ ходатайства, или моления потребует. смотри же правды, и зри разум святаго. инде пишет [в 3-м слове на Крещение в Маргарите], на сие иже диявол ко Христу рек, аще Сын еси Божии, рцы камению сему, да будут хлебы. и глаголет Златоустыи, о еретиче, аще и диявол сие рек, но послушай, ибо еретицы где молитвы творят, глаголют, помолтся Отцу своему. а диявол не рече помолися. но аще Сын еси Божии, рцы. ибо сие показует свойственое прирождение, даже Сын яко и Отец повелит. и ниже тамо пишет, рцы о еретиче, глаголет ли Сын Отцу, прошю Тя повели Ми разбойника ввести в рай. еда потреба было молитвы, нечего ради. понеже велия была вера разбойнича, и не рече Ему помолися, но помяни мя. о сем велию тогда прия милость; ей ей глаголю тебе, днесь будеши со Мною в раи. Слыши же еще на конце о том великом Архиереи, иже тогда паки пожреся. потом же взыде превыше всех небес, и ктому уже не пожрет, ни молится. якоже Павел пишет [евреом, 318]. такова нам подобаше имети Архиерея преподобна, незлобива безскверна, отлучена от грешник, и выше небес бывша. Златоуст; На самом том седит Отчи престоле. а еже глаголет, превыше небес быв, сие о плоти Его глаголет. Слово бо Божие неотступно всегда выше небес есть. Апостол; Иже не имать нужду по вся дни, якоже первосвященницы, прежде о своих гресех жертву приносити, потом же о людских. сие бо сотвори, единою себе принес. Златоуст; Исповедует разность Его от жидовских иереов. не токмо иже без греха есть, но и подобие име ино в жертве. еже есть, не за себе пожреся, ибо не име греха. но за людския грехи. а жидовския иереи первее о своих гресех, потом же о людских приношаху жертвы. аще и слышим Его архиереом, но не мним Его всегда быти архиереом. тому бо изволению действо бысть. и сотворив сие единою, а наипаче седе на Отчи престоле, и уже не бывает ходатай. свое бо есть иерею стоя служити. а еже есть тело свое, и еже седит на престоле, Ему же служат аггели. До зде Златоуст. Но рекут еретицы, то уже иерейства и жертв, в церкви Христове несть потребы. писано бо есть без всякаго прекословия, меньшее от большаго благословляется [евреом, 316]. В первом законе бысть Аарон большии, от него же поряду вси иереи благословение приимаху. но Мелхиседек иного рода, иже бысть иерей Бога вышняго. по образу Христа, той бысть Аарона больше, понеже великии патриарх Авраам даде ему десятины. ктому Мелхиседек уставися по чину во иерействе вовеки пребывати. Аарон во своем иерействе поставлен на время, и не возмогоша иереи его вовеки пребывати, смерть Ааронова им прекратила. того ради Христос, не по Ааронову временнаго, но по Мелхиседекову вечнаго чина, прииде Архиерей вечных благ. и якоже сам никогда не умирает. тако и иерейство Его по чину Мелхиседекову не престает. якоже пишет [Пс. 109], Ты еси иерей вовеки по чину Мелхиседекову. Престало тогда архиерейство Аароново, яко временное. востало же Христово вечное, иже из мертвых востав, апостолов своих на се освяти хиротониею, еже есть руковозложением [Лк. зач. 114]. и воздвиг руце свои, и благослови их, и вознесеся на небо. А апостоли паки епископ освятиша, якоже пишет [Деяние, 31]. тогда постившеся, и помолившеся, и возложше руки на ня, и отпустиша их проповедати слово Божие. А епископи паки попов, якоже пишет [Деяние, 35], освящьше же им попы на вся церкви помолившеся, с постом предаша их Господеви. И паки инде пишет [Тим. зач. 300], сего ради оставих тя в Крите, да не доконченная исправиши, и устроиши по всех градех попы, якоже Аз тебе повелех. се имаши иерейство Христово, иже не прииде разорити, но прежнии закон, и Его иерейство, в новыи истинныи вечныи закон пременити, якоже пишет [евреом, 16]. ибо пременения ради священьства, имать тако же быти, и закону пременение, еже есть вместо, по чину Ааронову, предаст нам своих священников, по чину Мелхиседекову. вместо же Аароних жертв овнов и крови, повеле нам тело и кровь свою в хлебе и в вине жертву приносити, глаголя, сие творите приношение жертвы в память Мою. да яко убо пишет отъемлет первое, да второе поставит [евреом, 323]. и якоже пременися первое священьство, то и жертва, ибо сие вкупе бывает, и ни едино без другаго не может быти. о сем бо Бог за многа лета жидом пророком прорек глаголя [Малахия, 1]. несть хотение Мое в вас глаголет Господь Вседержитель. и жертвы от рук ваших не прииму. ибо от восток солнца до запада, славимо будет имя Мое во языцех. и на всяком месте фимиян приноситися имени Моему, и жертва чистая будет, яко славно и велико имя Мое во языцех, глаголет Господь. яко уже не восхоте жертвы от рук скверных жидовских, и именова иную жертву себе возлюбленную, треми чинми написав, яко имать быти во языцех, и на всяком месте жертва чистая. и се есть жертва, которую церковь християнская от язык избранная приносит во всем мире Господу Богу, и до скончания века приносити имать, тело и кровь Господа Бога и Спаса нашего Исуса Христа, в память смерти Его. и сие пророчество поистине ко уверению, понеже сильно, и непобедимо есть. ибо тех речей в нем написаных ни в которой иной жертве, кроме тоя не обрящется. Первое бо не обрящется в жертве Господни, яко на кресте бысть, но токмо на единой горе Голгофе. и не всегда, но единою паки. тако же невозможно приложити к жертве хваление ино ко иной внутреней жертве нашей. ибо никто не обрящется чист пред лицем Божиим. якоже пишет, кто похвалится чисто имети сердце, или кто может чист быти от грехов. и еще инде пишет [Ин., 25], и небо несть чисто, и звезды не суть чисты пред Ним, никоим бо образом тех словес может разумети, ни о которой иной жертве, кроме тоя иже от вознесения Господня на небеса. и доныне в церкви християнстей во всяком месте приносится чистая жертва тела и крове Агньца Божия, иже греха не сотвори, ни обретеся лесть во устех Его. и ту святую жертву еще от апостол церковь Христова ядением приим действует. понеже не токмо еже апостоли написаша, но еже и предаша, се в целости приим соблюде. се есть обычай великия верховныя апостольския Иеросалимския церкве соблюдаемь, якоже повелено есть. егда прохождаше Павел грады, и веси, предаяше хранити уставы изложенныя от апостол и старец живущим во Иеросалиме [Деяния, 37]. но еретицы и сопротивницы большую вину полагают на церковь, иже святыя тайны лжицею черплем, а не голою рукою даем. о том их безумии, Соломон мудрыи указует пиша глаголет [Притч., 9]. Премудрость Божия, еже есть Сын Божии созда себе храм, церковь. и утверди столп седмь, вселенских соборов, закла своя жертвеная, и черпа в чаши своей вино. посла своя рабы, с высоким проповеданием призывая на чашю глаголющи, иже есть безумен да уклонится ко Мне. и требующим ума рече, приидите и ядите Мой хлеб, и пийти Мое вино, еже черплю вам. оставите безумие, и живи будете, и вовеки царствуете. До зде Соломон, заступая церкви Христовы, пишет безумным, иже не разумеют писания добраго церковнаго чина, посмехаяся, и в разныя впадают ереси. но оставльше ныне сие, к концу обратимся, како святыи Кирил зловерных доконца помрачает [отревает].

 

Глава десятая.

Указует убо еретическия вины, како они едино малое слово доброе, зле уразумевают, велия же в нем ереси созидают. слово же убо сие на многих местех в писании знаменует, вовеки веком, а не пременное. хощеши же ли ведати вину, безумнаго их умышления, иже учат противно нам, и прелагают на зло, доброе писание апостольское, якоже пишет о Христе. ибо подобает Ему царствовати, дондеже положит вся враги своя под ногама своима, зле и безумне сие разумевающе. аще царствовал прежде победы врагов, како убо по победе не имать царствовати. к сему еще смели рещи, яко есть писано, егда покорятся Ему вси, тогда и сам Сын покорится Покоршему Ему вся; и тако ли есть се от всех безбожнейшии. вы бо есте Христова тварь пребываете, а Христос, Им же и вы, и все создание бысть, погибнет. сия есть еретическая, и богохульная речь. котории же Ему покорятся вси, тии ли, котории погибнут; или тии котории начнут пребывати; или инии пребывают, котории покорятся Сыну. а Христос покорився Отцу, не пребывает ли; а покорится, не иже бы ныне начал Отцу покорятися, всегда бо все по воли Его творит, но да укажет, иже и тогда Ему послушлив будет, и без прекословия послушание к Нему имать. и по добровольству покорение сотворит. несть бо раб, или слуга, иже неволею покорится, но сын, и по добровольству о любви покорится. испытай убо их о сем, что си есть, дондеже, или донеле же, како ся то разумеет. аз бо сие слово тако в писании, инако найти покушаюся. понеже еретицы смели рещи, дондеже положит враги своя под ногама своима. и сим словом показуют ему конец быти, и вечное царство Христово определити смели, и уставити словом неуставную власть. о сем да почитаем во Апостоле, сему же подобно. яко бы царьствова смерть от Адама, даже до Моисея, безсловеснии уроди; или токмо до Моисея умирали. а по Моисеи уже никто не умер, или уже по законе не бысть смерть человеком; но явно есть, яко дондеже сие слово, время не уставленное показует. не известно сие, тако, яко Павел исповеда. он праведныи чюдныи мужь. иже той на Адама преданныи ответ востанет и на него, и на всех иных, иже аще оным Адамовым преступлением и не согрешили. якоже и инде Павел глаголет, утешая самех себе на всякии день, дондеже день прозовется; се явьствено, иже всегда, яко начатка днем Христовем не достоит исповедати. тако же не приимай нигде, иже кто речет конец царства Христова; царство бо Его царство вечно [Пс. 144].

Тако бо есть в писании много свидетельствовано о бесконечном и неизменном царстве Христове. ныне же да престану о сем, ради продолжения времене. Ты же яко истинныи послушник, небесному царствию поклоняйся, и веруй от всея души. и уклоняйся от всякия еретическия льсти. когда же даст Бог в чем есте времене своего, исповем вам. Бог же всех да соблюдет, иже помнят знамения скончания века. и котории пребудут непобедими антихристом. се бо предано тебе в писании знамения льсти, иже приити имать. Предано же тебе указание истиннаго Избавителя Исуса Христа сходящаго явьствено с небес. оного бо лживаго тогда блюдися, и предания его отметай. и буди крепок в вере. юже предаша святии апостоли, и святии отцы седмию вселенскими соборы утвердиша. а сего Истиннаго ожидай. научился еси пути. тако же обрящися на десной стране в день судныи. соблюди предание, еже есть предано о Христе добрыми деянии светяся, да со дерзновением пред станеши пред Судиею и получиши царство небесное, о Христе Исусе Господе нашем. с Ним же вкупе Отцу слава со Святым Духом, ныне и всегда, и на веки вечныя, аминь.