О печати антихристовой.

 

А печать антихристову разуметь, которую он даст на десной руце и на челе, это многаго требует труда, и великия премудрости. Первее нужно знать о тричасном внутреннем человеке. По сказанию богословцев [На поле: евангелие от Луки, зач. 72; превод.]: Человек имать в себе тричастие душевное яростное, похотное, и словесное. Яростное, или к потребным ярость, похотное, или по естеству ко благим похоть, словесное, или слово. И в стоянии сих, по естеству образуется, подобие Бога, сиречь действуются нраву, деяния подобныя Богу. А в падении сих: коеяждо подобие зверя сатаны, и разделяется сие в две части, якоже и человек, в душу и в плоть. Тако сие в видение и деяние, сиречь, в чело и десницу. Деяние образуется исполнение заповедей Божиих делом. А видение, правость словеси и разсуждение о благочестии.

Зде объясним по возможности наших сил, о печати антихристовой, даемой на челе. Господи помоги.

Во первых не имеющим свободы к произношению проповеди благочестия, в котором заключается совершенство Божия хотения и воли, и творит глумитися уму в божественныя вещи и чистое разсуждение, и произходящее действо таковое, чрез тричастнаго исполнения. Антихрист вместо праваго разсуждения о благочестии, даде свое знамение, суетныя помыслы, и мирская мудрость, и телесное попечение, в том и ереси породилися. Сего ради писание глаголет сице [Кирил. глав. 3, лис. 15]: Ради свободнаго жития, законы превращают, и пределы уставленныя им прелагают, и от веры отступают, а православие с еретичеством соединяют. Посему подобно, святыи Ефрем глаголет [слово 105]: Имущим присно ум, в вещех жития сего и любящим земная неразумно се будет. И святыи Ипполит глаголет [слово в нед. мясоп.]: И тогда связании вещьми житейскими, и желанием века сего тии удобь приступят к диаволу, и знаменуются.

И подлежит сия печати существо, еже есть, неподобному ума двизанию в погибельное и мерзостное; приведя вся человеки под власть силы и существа своего, еже есть, под растление и помрачение ума и слова, в коемждо сущно человеке[?нрзб.]; еже зрительныя силы в прелесть, зрением дерзает, то есть, злому ума двизанию, при всех обретатися; а Божию имени попиратися, сиречь не возноситися. Иже живущии на земли человецы, по научению лживаго пророка сотворяющии начертание зверя, и приемлющии на чела своя. Тии суть и причаствующими начертанию числения скоро постизающаго в 666-е, сим человеком причащающимся того числения 666-го. Яко таковое мерзостное и пагубе достойное имя. То есть, зрительныя силы помрачение.

А о печати на десной руце, от антихриста даемей, глаголет писание сице [Апокал. зач. 37]: Да отсечет десных благих дел детели. То есть запретит выполнить то дело, которое бы могло человека христианина поставить, в будущем веце, одесную Бога Отца. Антихрист этот крест попрал, то есть запретил жизнь крестоносную; Еже есть, возми крест свой и последуй Ми [Матф. глав. 16, ст. 24]. А вместо сего антихрист даде свое знамение, то есть запрещение заповедей, научил всех и принудил растленности, еже отсечение добрых, сущаго по естеству в благое, сего ради глаголет: Приимут на десницы, по научению его, за то и нарицает пагубно число 666-е [Христос: 1000, антихрист: 666; со Христом: в 1000-щу верныя; со антихристом: в 666 число. все отступники]. Сим числом и именем скверным всех отступников именует, и самого антихриста нарицает. Испраннаго точила вне града, грешных жребия, испущающаго кровь, чрез стадии 666 заключающее в себе совершенное лукавство, и мерзостное деяние греха; за что и приносяще воздаяние вечную пагубу [Апок. зач. 49, число 666: имя скверная совершенныя злобы, и лукав.; исполняется на отступление число 666-е]. Якоже писание глаголет [Апок. зач. 42]: Аще кто озверившемуся антихристу повинется, злочестивое жительство пройдет, онаго образующее, или словом, или делом, сего проповесть бога; сие бо являти может на челе и на руце даемое начертание. И той приобщится с ним мучительныя чаши пития, не растворенна убо и несмесна божественными щедротами, за праведное суда растворенное же различными мучениями, за много раздирательное, и много образное самоизвольныя и самоизбранныя злобы.

И вот как писание обсуждает, аще кто что либо от закона Христова исполнит; то глаголется, Христу поклонитися. То есть по естеству в благое, орудием тела выполнить заповеди.

Аще киим либо делом отступническим послушным быти, то относится, антихристу поклонитися. То есть, чрез естество орудием тела выполнить противную заповедь [антихристу поклонение власти гражданской покорение].

И вот настоящаго многоплачевнаго времени, не покорение и дань; а сопротивление и брань; по ясным указаниям святых писаний [антихристу непоклонитца нужно власти сопротивитца].

 

О причастие тела и крове Христовой.

 

А что сказано в писании тело и кровь Христова до скончания века соприбывати, Господь обетование сотвори, и священство не оскудеет.

За Божиею помощию, зде объясним от святаго писания. Мнози на сие полагаются, и глаголют: Аще Господь обещал, то все исполнит, хотя мы и недостойны будем. Сие слово многу глубину имать; понеже много видим таковых случаев, яко что и обещал Господь, и не исполнил делом. Почему же? Еда неправда у Бога? Несть тако несть. Праведен Господь во всех словесех своих, и несть неправда от Бога. Да будет всяк человек ложь. Кто же виновен бысть не исполнению обетований Господних. Яве человеческое неисполнение. Понеже Господь обетование достойным дает. А когда человеки не будут обетование Его на них. Не просто речеся: Се Аз есмь с вами во вся дни доскончания века [Бесед. апост. лис. 2358]. Сие Господь завеща глаголя учеником, Се Аз с вами есмь во вся дни доскончания века. Не бо всячески будет с нами, егда себе далече творим. С вами рече, выну: да не отгоняем благодати; яко же пишет во евангелие [Бесед. на Иоан. зач. 1]. Свет истинный просвещает всякаго человека грядущаго в мир. Толк.: Господь хощет всем спастися. Что же не спасаются? человецы сами не хотят. Евангелие от Матф. зач. 79. Како рече Господь апостолом: сядите на двунадесяти престолех судити в будущим веце. Что же Июда сядет ли? Никако же. А како же, рече Господь сести? Послушавый аще доконца послушает, и последует мне, рече, тогда и сядет. А егда недостойна себе сотворил Июда, и не сядет; обетование не исполнится. Евангелие поучительное, в неделю 2, по всех святых. Яко конец возглаголю на языки и царства, насаждать и сограждать, или разорять. Аще что и благо обещаю, да не разленишися, и паки отъиму. А что же воспрещу, не отчайся. можеши бо упросить, рече Господь, каков конец будет вашего жития, по концу и обетование исполню.

Святый Никон инок Черн. гор. глаголет сице [Никон Черн. гор. лис. 382 об.]: Благо обещал Июде Господь: но не сотворил.

Ахаву царю зле обещал, чрез пророка Илию, тело твое псы растерзают; а в крови блудницы измыются; обаче не исполнил, зане покаялся царь Ахав [3 цар. глав. 21, ст. 19].

Сице же и ниневитяном запретил, погубить, а не погубил, тии покаяшася [Маргарит. Слово о святом крещении].

Адаму Господь обещал; яко будеши господин всем зверем земным, и птицам небесным, и не бысть; зане же он не сохранил заповедь, предвиже и Бог почесть сию от него [Быт. глав. 1, ст. 28].

Рече Господь ко Аврааму: Дам тебе землю хананейскую довека, во вся роды; и не збылось сего; давно июдеи своея земли лишилися [Быт. глав. 17, ст. 8].

Рече Господь к Ною, еще 120 лет наведу потоп на землю. И наведе сотаго лета, а 20 лет отложил за неправду человек [Диоптра, часть 1, глав. 38].

Много было обетований Господни благих, и воспретительных, и не исполнилися.

Видите ли, как писание разсуждает, когда мы не будем отгонять благодатнаго обетования то и действует обетование (или обещание). А когда не сохраним заповеди; и обетование просто остается, за человеческое солгание. Еже ли бы было предание догмат непорочное в церкви, то бы и следовало надеятися на обетование Господне. А когда видим отступльших от православия, посему и обетование праздно есть.

Аще кто восхощет противитися вышеписанным свидетельствам; то да даст ответ на сии вопросы:

Вопрос, 1: Означеннаго во Апокал., в зач. 55-м. Что собственно состоит и заключается; под названием Вавилона падшаго? и что падение онаго? и когда? и кому заповедание о избежании от онаго? и от чего именно таковое избежание?

[Вавилон есть мятеж ума; или весь мир, сиречь одно тело, и дело наричится антихрист].

Вопрос, 2: Антихристу поклонение, и того образу; указанное писанием, в том именно состоит и заключается, и восприятие тоговы печати, на чело, и на десную руку, и что писанное, яко бы таковому уже покаяния несть?

[А поклонятся образу его, сиречь власти поклонятся].

Вопрос, 3: Писанием указанный крест, разрушающий силу антихриста; и отделяющии верных от неверных, имеющии быть в запрении от антихриста; и у всех тому покаряющихся. что таковое онаго сущность? и какое именно тому запрение? и что даяние на десницу и чело?

[крестом разделяются верныя от неверных]

[антихристу поклонятся и даст им печать, в чело сиречь в лоб, се есть на уме начертать, мерзость, и нечестие, раскол, и еретичество, и отвержение креста, и Христа].

Вопрос, 4: Верных положение прожития при антихристе, в каком положении должно быть; то есть гонительном; или свободном; или во иноческом, и девственном? укажите от святых писаний, положенных о настоящем времени свидетельств при означении книги, и главы, и листа.

Християнин может быть царь, и священник и пророк. Бесед. лис. 1602, нравоуч. 3.

 

Разум о человеце.

 

Человек состоит от души и тела, и внутрении сказуется быти мы [аввы Дорофея поучение 22 и 3]; а плоть, не мы, но наша, и прочая служащая плоти, при нас; Внутрении человек образует собою образ Божии, сиречь слово, душа сердце. Имать же в себе три силы, еже глаголатся тричастие быти; Душевное, сиречь словесное, или слово; Похотное, или по естеству ко благим похотение; Яростное, или к потребным ярость. [Благ., Матф. 12; к ефес. нрав. 2] И в стоянии сил по естеству образуется подобие Бога, сиречь действуется нравы деянии подобны Богу. А а падении сих коеяждо, подобне написуются, образ и подобие зверя сатаны; И разделяется сие в две части, яко же и человек, в душу и плоть. Тако и сие, в видение, и деяние. [Благ. от Лук. 67; Апок. зач. 37, ст. 17] Сиречь, в чело, и десницу. и прочая; Деяние исполняется, яростною частию, и проч.; а очищает собою похотную и возставляет. А видение действует похотною частию, и прозрачит собою словесною, и творит; глумитися уму в божественныя вещи, и чистое расждение; И происходящее действо таковое, чрез тричастнаго исполнения глаголется быти человек с плотию подобне и со всеми удецы [к ефесеом бес. 13, ст. 24]: Аще от благих, подобне и от злых. И прилагаются таковому, имена чрез виды нравов, подобныя коегождо лица; от благих, Бога и ангелов, и проч.; а от злых, от сатаны, и бесов; и проч. [Альфа, глав. 84, лис. 262]. Сиречь, первый сказуется быти Христос, сиречь, образованныи Христос. А вторыи, доказуется быти антихрист, сиречь противный, или подметный христос; [ефес. 13, ст. 24; рим. бес. 11, ст. 6] Именуется первый, паки человеком новым, и человеком правды; а во вторых подобне человеком греха; И первый сказуется паки быти телом Христовым, и печатию креста, и проч. А вторый подобне телом зверя, или печатию антихриста [Апок. зач. 63, и 44]; И перваго совершеннаго число, сказуется быти, число, 666; И от сего возводит действо вещей, на три лица. В первом, на существенаго Христа, и на действо, и на подлежащия тому человеки; Подобне и притворным, относит к лицу сатаны, и самое сие поставляет действо, действителей человеков, и к тому их причитает; [на деян. бес. нрав. 32] За еже тое стоит собою посреде, Христа и человеков; Подобне, сатаны, и человеков: и Христом, или сатаною, приемлется вдохновение; А чрез человеки, производится в виде тела правды, или злобы составление; И егда приемлет по виду, правды, или злобы, рещи …[нрзб.]. Тогда глаголется единственным лицем, Бог, или Христос. Подобне, и диявол, или сатана, или антихрист. А егда приемлется к лицу действителей, именуется множественне, бози, или христи. Подобне, демоны, или христи; и проч.; Делатели существа зверева, или образа, человецы приемлющии слово лжива пророка; А лживый пророк сказуется тому оживитель быти, и податель хульнаго духа. и бытие того зверя, аще и до сего лжива пророка доказует быти; Но точию смертную язву страдати, от оружия креста Христа Спасителя; сиречь, недейственну быти, паки сотворену, от живущих на земли быти, яко сотворену, и тщанием лжива пророка оживлену, и в поклонение произведену; Правому слову есть материю чиста девица, еже есть душа, православных учителей поправших гражданскии плищи. имать же обручника себе, сеятеля Христа жениха; Подобно, и антихриста злобе; сиречь растленному слову, при уме человечи, есть и доказуется быти материю, нечисты души, злословия учителей, возлюбивших гражданския плищи, и тем блудящия с любовником своим шайтаном [сиречь антихристом]; от Христа Бога, законнаго жениха своего; Еретицы проповедуют, к познанию ложнаго християнства, и лицемернаго благоговенства [Марг. лис. 587; Кирил. глав. 3, лис. 15. Альфа глав. 23, лис. 65. Бес. лис. 1710]; еда ино лице диавол содеет, а другое прелесть с ересми, а иное еретицы? никакоже; но вси при едином лице прелести суть. яве яко антихрист в еретицех, а еретицы при оном. Но точию приемлются различными виды, у святаго Ефрема, и Ипполита самый вид действа, лицем поставляет, того ради единственным числом глаголатеся; Антихрист во ипостасных существах и возрастая; при кротости, и благоговейности, и прочая даже до воцарения при всех: еже есть, донележе вся человеки приведет под власть силы и существа своего, еже есть под растление, и помрачение ума, и слова в коемждо сущно человеце; Иже в началных своего рождения сосудех покажет отречение студных дел то бо того слова доказуется быти еже студные дела, грехи творити; Еже зрением ума управляти; А другия силою тричастнаго, в действо орудием тела производити, и подлежит сия печати существо, еже есть, неподобному ума двизанию, в погибельное, и мерзостное; еже деятелное, и зрителныя силы, овыя в прелесть, зрением дерзает; а другия движением студныя содевает, отсечение добрых; Связана рука его будет, сиречь, деятельныя силы пресечение; отсечения своего сущаго по естеству во благое; [Ефрем] Печати воздвиженне быти, во пришествие антихристово сиречь мерзскому того именованию еже есть, злому ума двизанию при всех, обретатися в чесностех; а Божию имени попиратися, сиречь, не возноситися; Нарицается, Бог, именуется, Христос, глаглется правда, истинна, крест, печать Христова, закон, благочестие; вся сия во едино стекаются[?нрзб.]; еже нарещися, 1000-ю [Апок. зач. 60, 62 и 63; глав. 2, ст. 3], еже есть совершенство Божия хотения, и воли. Или совершенное ума, тричастныя силы, плодоношение, в нем же заключается сила.

 

Яко должни воевати всегда противу трех врагов.

 

[Евангелие нравоуч. лис. 162 об., 2-го щета] Якоже воинове мира сего сходяще к брани облагаются всяким оружием, даже страшны будут врагом своим, и мужественно ополчаются противу тех. Тако и Христовы воины должни суть себе облагати всяким оружием духовным, хотяще изыти на брань противу невидимых врагов. яко есть писано [ефес. 6], несть наша брань к плоти и крови: но к миродержителем и началом, и к властем темным; к трем силным врагом, противу мира, противу тела, противу диавола. яко ясней услышим днесь в евангелие [Матф. зач. 39]. Рече Господь своим учеником, иже любит отца, или матерь, паче мене, несть мене достоин, и иже любит сына или дщерь паче мене, несть мене достоин. иже не приимет креста своего, и вслед мене грядет, несть мене достоин. иже бо аще хощет спасти душу свою, погубит ю. и иже аще погубит душу свою мене ради и евангелиа, той спасет ю. кая бо полза человеку, аще мир весь приобрящет, душу же свою отщетит. или что даст человек измену за душу свою.

 

Часть 1, о тревидной брани, и яко иноцы должни суть противу сих трех врагов ополчатися и побеждати тех.

В той евангелии яве показа Бог трех врагов, воюющих на душу нашу. Первый наилютейший враг диавол, на того повелевает взяти крест. Второй враг тело наше по части: сему противитися повеле презрением отца, и матери, сына и дщери. Третий враг мир, о сем рек, аще человек приобрящет весь мир, кая полза ему. Противу сих трех врагов, должни суть иноцы ополчатися, и воевати всегда, текущи на позорища мира сего, назиратели же бывают брани тоя Бог и ангели его. такожде и диавол, и демони его. Станобище [место или позор] есть брани растояние между праведными, и грешными. конь есть тело: всадник и ездец душа. началник воинству ум. оружие воинов Христовых вера яко щит не пробитый. терпение яко шлем крепкий, молитва прилежная яко меч. смирение нелицемерное яко лук и стрелы: сицеваго оружиа зело трепещет диавол. Полки же сатанины, и воинства его началницы; в первых гордыня, лакомство, нечистота, убийство, тщеславие, ярость, гнев; сими диавол началствует, и грехом яко стрелою язвит душу: Вторий полк сатанины крепости; злость мира сего, ибо и той воюет прелестию и сладостию временных, и пестротами красных: по сих же и самое тело наше подвизает брань свою на душу; объядением пиянством и вожделением блуда, леностию, и прочими страстьми греховными. Вправду убо зело трудная брань противу перваго врага, видимому естеству; с невидимым на таковаго врага, аще не Господь помощник нам буде, не возможем его победити: но и прочиим без помощи Божия, не преодолеем. Первый степень к брани, и ополчение противу мира сего; егда отлучаемся его и покидаем сладострастие его, и прелестное мечтание красот его, тленнаго богатьства и временнаго веселиа. и взымает образ Христов доброволной нищеты, даже нищетою нашею прославим его богатство, иже сый богат, и нас ради обнища даже мы нищетою его обогатимся [2 кор. 8], и приближимся к Богу, весь бо мир во зле  лежит, и вся яже в мире похоть плотская, льстящая очи наше, и гордость житейская.

Сего ради апостол рек [1 Иоан. 2], не любите мира сего, ни яже в мире; аще кто мир любит, враг Богу бывает. Темже от мира сего бежите, яко Лот от запаления Содомы в гору Сигор, безмолвнаго жития. яко Израиль спешетеся от Египта с тмы греха, в землю обетованную, достобливаго жития, чистаго и безгрешнаго, от вавилонской работы бежите: к сионской свободе, отвержетеся мира, и сущей прелести в нем, устранитесе от него: странствием невозвратным, и тако победиши полки перваго врага, победою твоею увеселиши небо, и печаль сотвориши демоном. Аще же он преодолеет вам, и возмет в пленение душа ваша, тогда аще всего мира красоту и богатство приобрящете, от сего ни единой ползы: ни едиными бо вещми искупиш от пленения душа ваша, или что даси измену за ню. Телу же преодолееш, первоей его крепости: аще разлучишся сродства своего, от отца и матери, от жены и чад, от брата и сестры. они бо в мирской работе земной остают яко мертвецы: ты же к работе Божией спешишся, и отходиш от земнаго мудрованиа: к небесному идеже Христос царствует вовеки.

Разлучатижеся сродник подобает не просто всех: но токмо сих, иже возбраняют твоему спасению, и земная мудрствуют глаголюще, посагай сыне, и собирай богатство в мире, работай имению, притяжи села, насади винограды, собери множество рабов. и веселися в сих вся дни живота твоего. ты бо еси наследник дому нашего: таковых родителей подобает отбегати и разлучатися, иже вместо света, тму показуют, и вместо живота смерть.

 

Часть 2, о начале иноческом, и что знаменует инок;

Инок есть исполнитель всех заповедей Христовых, совершение христианства, бездна смирению, столп терпению, память незабытная смерти, источник неоскудный слезнаго течениа, сокровище чистоты, ругатель тленным, попратель всех красных и прелестных мира сего: самоволный мертвец, повседневный мученик, и нужник, богоприятная жертва, присно горящий светилник премудрости духовной, ум просвещеный, соглядатель всех видимых и невидимых, скорошественная молниа богомышлениа, сердце чисто, немолчная уста хвалы Божия, жилище Святыа Троица: позор аггелом и человеком и человеком. страшило бесом. Инок есть наречен; понеже имать иное житие не телесное: но духовное. иное деание, ин век ему, иная пища, иное одежды и работа: нарицаетжеся и черноризец от честной и плачевной одежды. нарицается и монахос албо уединеный, безпечалный, един с единым токмо Богом причастие должен есть имети. Сих законоположницы и учителе суть; Первый Мелхиседек священник Бога Вышнего живущий без жены, и без причта рода в пустыни. Второй Илиа чюдный, живший без жены в пустыни Хоривской. Третий Иоанн святый Креститель, живший в пустыне Иорданской без жены, кроме всякаго стяжаниа, не ядый мяса и вина не пив, одежду плачевную нося волосяницу. О законе и давности чину иноческаго; ясно покажем, яко самым Господом нашим Iсус Христом узаконен есть и утвержден. Сам убо Господь жив без жены житием чистым, в девстве убогим и бездомным нестяжателным. Такожде и апостоли его вся оставлши [Матф. 19] отца и матерь, жену и чада, и вслед Христов сами и шли, оставивши вся яже в мире. Сего ради иноцы последуют Христову учению и совету, и житию апостольскому ревнуют; вся убо красная и прелестная оставляют в мире, гордость житейскую, и похоть всех красных. оставляют женитву веселие и покой телесный, и богатство временное. Сами же идут вслед Христа, вземши крест свой; доброволное терпение, и убожество, и бездомство, сами скитающеся в пустынях и горах: и вместо светлых домов, живут в темных яскинях, в вертепах и в пропастех земных, вместо жены и детей, живут в пустынях со зверми земными, и птицами небесными, вместо светлых риз, и сладких брашен, и питий: волосяница худая риза, алкание, и в жажде мало воды. вместо смеха и веселиа: плачь и воздыхание, и слезам пролитие. ложе их земля, а покров небо: то их истый крест. терпение повседневнаго. Того ради иноцы погордели житейским суетием, и не обязуются житейскою куплею, женою детьми и домами. богатством не обтяжаются, даже удобнейше возмогут послужити, и угодити Богу. Темже лучше себе избирают безженство; всяк бо оженивыйся печалуется како угодити жене; такожде и жена мужеви: а не оженивыйся печалует како угодити Господеви своему, и тому верно послужит. Ктому уже и се да познают, яко еже жити с женою по естеству се есть, тако живут и зверове, и поганы: а еже жити без жены в девстве и чистоте: се чрез естество, ангельское убо се дело, и житие святых угодников Божиих, иже всегда работают Господеви, яко апостол глаголет [1 кор. 7], аще кто постится и молитву деет, таковый да отлучится жены на время. Но иноцы всегда пребывают в посте и молитве, даже до смерти: сего ради жен не имеют. но и в законе ветхом повелено [2 Моис. 14] да приступающии к Богу, жен отлучатся. Иноцы всегда Господеви предстоят в службе его, сего ради жен отлучишася даже до смерти. и тако в чистоте работают ему, яко присныи рабы его. Аще еретицы и злоречат иноков, аки бы они имели гнушатися пищи, и брака, приводят на них слово апостольское, идеже пишет [1 Тим. 4], яве Дух глагола, яко в посладняя времена отступят неции от веры, внемлющи духом лестным, и учениам бесовским, возбраняющи женитися, и удалятися от брашен, яже Бог сотвори. Сеже пророкова апостол о разных еретиках хотящих по нем быти. яко о манихиех, о марцианех, и свенетех, и евкратианех богомерских. тии бо манихеи мнеша двух богов быти разных, единаго бога в небе добраго; а другаго на земли злаго миродержителя [Епифан. на еретики глав. 26]; зле вменяя апостольское слово: и тако свою проклятую ерсь разсевали. гнушалися брашны сотвореными на земли, и проклинали их первее аки бы от злого бога сотвореными: а потом аки бы благословили их, и ели. По сих же настали лютыи и мерзскии еретицы адамитове, иже гнушалися браком честным, и обще имели жены вси, и блуды нечистоты в них полно всюду; таковыи еретицы держали бесовское учение лестное, понеже бесове их прелстиша. /Потребник иноческ. лис. 325 об./

А еже глаголет апостол и брашен не ошаятися. еретицы убо брашен удаляются не воздержания ради, но скверна быти сия глаголют. Яко же окаяннии манихеи. иже не точию брашна хулят, но и сотворшаго брашна Бога хулят. и глаголют яко брашна лукаваго бога суть сотворение. и аще кто принесет им брашно, прежде проклинают сотворшаго брашна, сеявыи тя да разсеется. и смоловыи тя да смелется, испекии тя да испечется. Северияне же вино отлагают, и лозу винную от змия быти глаголют. И Моамеф, иже агаряны прельсти, повелевает во своих богохульных списаниих вина никакоже вкушати. нечисто убо то быти глаголет. яко еретицы того ради ошаятися повелевают брашен, яко нечиста сия быти глаголют, а не пощения ради.

Иноцы же воздержание любят, и брашна чистая не укоряют. но и укоряющих проклинают. и проч. зри ниже: [лис. 357] А еже глаголет апостол яже сотвори Бог в снедение со благодарением верным. и познавшим истину. Еретицы убо не токмо не благодарят Бога сотворшаго брашно, но и хулят, якоже и прежде речеся. Иноцы же прежде вкушения благодарят Бога, и по вкушении такоже творят. Еретицы убо глаголют яко скверна суть брашна. Иноцы же всегда глаголют со апостолом, яко всяко создание Божие добро, и ничтоже отметно со благодарением, приемлемо и ядомо, освящаетбося словом Божиим и молитвою. яко не о иноцех сие рече святый апостол Павел, но о еретицех. иже брак убо равно блуду глаголют быти. брашно же скверно нарицают. /Евангелие нрав./ А не иноцы, их же ныне злоречут еретицы, ариане, и кальвенове. и из яду бесовскаго составляют на них ересь манихийскую, и адамитскую, и тех без боязни хулят, и ложь сошивают. оболгающи целомудрие чистоты, и воздержание поста святаго: блудницы и чревообъястницы иже работают чреву своему яко идолу, и чрево бог их. А еже не ясти мяса и не пити вина, се не гнушения; но воздержания вид, и еще от начала создания мира до потопа мяса не ядали, и вина не пиша: и в законе Моисеове назарейчики[?нрзб.] вина не пили, и всякаго плода от овощия и мяса. также и мяса свиннаго. Такожде и Даниил и трие отроцы, гнушахуся брашны царя Навходоносора; [1 Моис. 2; 3 Моис. 17; 4 Моис. 6; Даниил 1] Моисей и Илия и сам Господь постился мяса не яде и вина не пит 40 дний и нощий. Иоанн же святый Креститель вся дни живота своего мяса не яде, и вина не пив, и еда ли той бесовское учение держа, рцы ми о еретику еже ныне постник укаряеш, но весть ныне вся вселенная, яко они Духа Святаго полны, аще и воздержалися от добраго мяса и вина, и жены. Тож и о Матфеи евангелисте, и о Иякове Алфеове глаголют древнии богословцы [Климент Александр. гл. 2; Евсевий Кесарийск. книга 2], яко мяса не яде, и вина не пит вся дни живота своего в том не гнушалися созданием Божиим; но воздержалися, и постом греховныя страсти убивали в теле своем. ибо пост есть страшное дело демоном, и Богу любимое, и дар наичестнейший, яко канон пятый собора никейскаго свидетельствует. Истинных поклоников Божиих и постников; чин и закон иноческий узаконили апостоли по вознесении Господни, яко Лука евангелист написал в деяниах [деян. 4], иж в Иеросалиме во множестве веровавших, бысть сердце и душа едина. Ибо продающи имениа своя, все имеяху обще кроме жен. где и Ананиа некии человек с женою своею Самфирою продавши село свое, и утаил от цены, и согласилися солгати Духу Святому, их же апостол Петр предав смерти. И егда сиа уведали апостоли, тогда поразумеша яко невозможно толику множеству народа жити обще всегда, многой ради соблазны. Сего ради некоих верных от народа юнош, клятвою заклявши, и слюбом обвязующе умолиша и научиша да тако живут обще без жен. в чистоте и в доброволной нищете. и в послушании старших даже до смерти: тогда мнози соизволиша совету их, и любезно приаша дело сие честное, и тако апостоли узаконили чин иноческий, постризающи главы оных в кегреи, сиречь в старческое безженное и чистое житие. еже и Павел блаженный сотворив четырех мужей постриг [Деян. 8. 5]: и паки Акилу и Прискилу. А постригшиися, не нарицахуся тогда иноцы, но рабы Божии. яко о сем свидетельствует Дионисие Ареопагит, ученик святаго апостола Павла [Дионис. Ареоп. 8], пишучи к единому мниху Димофилу. нарицающи его рабом, и неволником. иже отнюд отсек волю; точию предал себе всего воли Божии. и яко раб несвободен у Господина своего: тако и инок никогда же упражняется от работы Божия; но безпрестани работает ему день и нощь, хвалением молением пением благодарением, бдением и пощением и богомышлением. се бо воистину дело раба Господня. Всяка добродетель христианскаго совершенства, и всех заповедей Божиих исполнение, во иноческом житии, яко доброволное убожество, чистота, послушание. Господь же яко зерцало всякой добродетели и учитель. свет совершенства, источник чистоты. сам бо родися ис пречистой Девы, и сам в девстве и чистоте пожив даже до смерти волной, и на кресте висящи, поручив пречистую Деву матерь свою ученику девственику. Сам доброволне убожество возлюбив, Бог богатый убого родился в яслех, из убогой девицы, убого поживе в мире, и не име где главы подклонити, убого на кресте наго умер сый, иже одеявся светом яко ризою. В послушании же поживе от рождения своего, послушлив быв даже до смерти крестной. отселе послушание в церкви Христовой славно, и самым Богом взаконено;

И на сии три добродетели христианскаго совершенства, иноцы обещаваются пред Богом, и обетом неизменым обязуются, на чистоту и девство истинное. на убожество доброволное, и на послушание нелицемерное, и на прочии добродетели, яже от сих яко от головнейших родятся.

Разделяетжеся иноческое житие на три чина: на общежители, и на скитницы, и на уединеныи, или пустынножители. Обретаютжеся и четвертыи между ними реченныи сарабантове; сиречь упадныи самовластницы, разбойническо живущи, кождо свое стяжание имея, и в начинани воли своей ходят, сии без всякаго закона и чина живут, лицемерствуют; а не иночествуют. /якоже негде, сказано святым Златоустом [бес. к галат. зач. 15. ст. 17, лис. 971, 1468]: нарицает таковых, испорчиным извергам, и болтунам, в намерение по своей воли ходящих/.

Непостоянным подвижникам не должно давать свободы и дерзновения, но от таковых и убегать надобно [Велик. Василия, книга 3, глав. 8. о постн.].

Блюдиться должно от подвижников непостоянных, то к тем, то другим братиям приходящих, и с безпокойными и непрестанными возмущениями волочащихся по монастырям, и под видом духовныя любви плотския исполняющих прихоти: никакой твердости, никакого постоянства, никакого благочиния, никакого разумнаго украшения в душах не имеющих, но что любопытства, и злонравия, непостоянства, и неразумия исполнено есть, лжи, и лицемерия, обмана, и хитрости ласкательства. Сии бо суть и языком ненаказании, и чревом невоздержнии, и душею же всегда надменнии, и развеваемии, и помыслы наподобие летания нетопырей имеющии, ни на что правое смотрящии, но стропотно, и развращенно летающие: паче же первыми устремлениями инное нечто представляющие, и на инное паче всякаго чаяния непостоянством разума удобопреносящиеся много ползающие, и мало впредь подающиеся. [ниже:] Тако и они всегда в телесных страстях валяющеся, никако же на духовную высоту восходят, но обращаются кругом некончаемым, похотениями телесными и сластьми водимы, и от тех в таяжде паки ввергаеми, и злаго ради произволения от злаго порабощения никогда не освобождаеми. Сии то образ овчии на прельщение зрящих являюще, внутрь обжирчивую, и злонравную, и лукавую лисицу скрывают, и многих в туюжде злобу привести тщатся; которыи управления разума не имуще, удобно как злому, так и доброму вождю последуют, тое добро быти мняще.