ПОСЛАНИЕ В МОСКВУ ИЗ ПУСТОЗЕРСКА¹

[Издан. Субботин Н. И. Т. 6. С. 60-79.]

Неключимый раб великаго Бога и Спаса нашего Исуса Христа² диакон, Божий дар нареченный от святаго крещения, Феодор³, по милости Исус Христове брату верному о Господе и благодати тезоименитому Иоанну⁴, присно-чаду восточныя святыя церкви, радоватися и здравствовати в непорочной вере православной⁵, юже на основании Исус Христове святии Апостоли положиша в Сионе и богоноснии отцы седми вселенских соборов и девяти поместных утвердиша Святым Духом, и всем верным братиям благодать и мир от начальника веры⁶ и совершителя Исуса. Стойте, возлюблении, и мужайтеся и утверждайтеся, и не поступни бывайте во святых отеческих преданиях⁷, да с ними наследите вечное царство в горнем Иерусалиме. А еже писал еси, брате, (о нуждах и скорбех, належащих ко спасению), и молих отца своего святителя Христова, (Аввакума Протопопа⁸) и прочих с ним святых отец страдальцев, подвизающихся до смерти за церковь Христову, вкупе и о укреплении святых правил⁹, и приписании руку к ним на подтвержение гонимой церкви от антихристова воинства, и то прошение твое о Христе исполнися.

А о горких бедах, належащих на вас, не скорбите: вси бо хотящии благочестно жити о Христе Исусе гоними будут, лукавии же человецы и чародеи преуспевают на горшее, прельщающе и прельщаемы, глаголет Апостол Павел, сосуд Христов¹⁰. И тако апостольское слово действенно есть и доныне; но горе миру от соблазн, да и нужда им быти, по словеси Христову, да познани будут благочестивии и нечестивии¹¹, вси, кои бодрствуют¹² во истинне Христове и стоят неподвижно в ней, и кои дремлют в прелести противнаго духа, и шатаются в той, и уклоняются в развращение, ихже отведет Господь с творящими беззаконие. Мир же на вас, благочестивых христианех, новем Израили, будет во веки.

А еже вопрошаеми о попех, рукоположенных от прежних православных святителей, и соблазнившихся от Никона богоотступнаго прелести и инако жертву приносящих, и познавшеся паки по древнему служити начаша: и таковии подлежат суду священных правил, понеже не сопротивишася ни мало прелести, нововводным преданием. На то бо священник всяк рукополагается, яко законно страдати¹³ хощет, по Златоусту; и добрый пастырь душу свою полагает за овцы, по Евангелию. И они, не ведуще, мню, своего священническаго сана и достоинства, тако от простоты погрешиша, еще же и страха ради мучительских запрещений слицемериша вмале: и от таковых понужи мощно всякую святыню приимати, непорочнаго ради на них благословения первых наших святых пастырей¹⁴, — и крещение, и исповедание, и причащение и прочая. Кроме же нужи никакоже от них¹⁵: понеже слюбодействоваша в догматех. А лучше, рещи, тех ныне¹⁶ и невозможно обрести праваго священства. О, горе и увы! третие прииде на всю землю зло, иже под небесем¹⁷. Но надеяйся на Христа истиннаго не оставлен будет¹⁸ всяк правоверный. Да и старии ставленники, коснувшеся агнца неправеднаго, по священномученника Ипполита папы Римскаго¹⁹, аще паки обратившеся²⁰ ко истинней службе, и с таковым намерением держати начаша священство, яко и умрети за старое благочестие, а не предати паки: то от таковых достоит благословение приимати и во всем сообщатися, помянувше Петра верховнаго Апостола²¹, яко по отречении своем, плача горко, прият Христом бысть²² и от апостольства не отлучен. И аще не с таковым обращением и старыи попы по падении своем служат, но мыслят двоедушно, егда понуждени будут от отступников к прелести новых догмат, второе и третие отступити хотят, паки вертящеся, яко прах ветром, в разуме своем и в неигрательных играти смышляюще: то от таковых, яко от Июды предателя, чуждатися православным, яко на время веруют, а во время напасти отпадают. Ибо Апостол Христов Петр по покаянии своем не отвержеся паки, но пострада и умре за Христа и веру его, и душу свою положи за Христово стадо. И лучше ни от когоже наставлятися, нежели от злаго водиму быти, по Златоусту Иоанну, на послание ко евреом беседа 34. А которые попы от Никона отступника ставлены и от никониян после мору, паче же от 174 году, егда совершенно православие все отринуша древняго предания святых Апостол и богоносных отец, и оболгаша их лстивно и охулиша²³, нечестие же всякое прияша, и оправдаша и укрепиша, и новоразвращенныя и богомерския книги со многими неисчетными ересми в них похвалиша, и всех еретик крещение римское и священство их гнусное прияша, ихже вси святии отцы наши проклинаша и от святыя церкви отметаша, понеже Рим всех ересей приятелище, источник всякаго нечестия латынское мудрование богомерское: и тем отступлением своим и с латыны сообщением чужи себе сотвориша архиерейства, по священным правилом святых Апостол и богоносных отец седьми всленских соборов и девяти поместных, и поставляеми от них попы и диаконы не священи суть, по правилом, вси они отступницы сами²⁴ и еретицы глупии, и поставлении от них кононному²⁵ суду подлежат и анафеме, и православным христианом ныне не подобает их²⁶ благословения приимати, ни крещения, ни молитвы, и в церкви с ними не молитися, ниже в домех²⁷. То есть часть антихристова воинства²⁸, и от исполнения церковнаго самовластне²⁹ отсекшеся. Но и от всепагубнаго сына геены, пагубнаго сосуда сатанина, явльшагося во свое время настоящее, о нем же вам изреку, Никона еретика, адова пса, злейши и лютейши паче всех древних еретик, иже быша под небесем: они бо аще и зли суть, но на благочестие не возмогоша, но сами спяти быша и падоша, сей же положи всю вселенную пусту и грады огнем неверия зажже, паче же богоборство воздвиже и гонение велие и благочестию кончание сотворил. Антихристово царство темное, и все их действо и вера в прелести содержима суть и укрепляема не любовию Святаго Духа и не советом, но гордостию сатаниною и мучением различным. В том им судия истинный Христос Бог наш! А отступление их указует Дух Святый истинный во Апокалипсисе, 13 главе, по числу зверя 666, и Книги о вере 30 глава, и святый Ипполит папа Римский, о нем же выше речено. Той пишет в слове своем о страшном суде и о антихристе, за полторы тысящи лет и больше отселе Святым Духом провиде³⁰ о ныне наченшемся времени, и рече о пастырех злых, губящих души: в та времена будет злый вождь, то есть неправедное священство, — и ныне ³¹збысться, — и агнец неправеден³², Титин, то есть жертва неправая³³ в числе зверином: Титин бо то же есть 666 в числе стоит. По сем и ини богословцы мнози глаголют, что в последняя времена Христовы веры не будет на земли, кроме в малых токмо останется, крыющихся в пустынях и горах. И сего ради Христос Сын Божий в последняя дни назад не оглядываяся бегати повеле от прелести, поминая жену лотову. И паки глаголет: егда приидет Сын Человеческий, обрящет ли веру свою на земли. И на сие богословцы глаголют, толкуя: не обрящет³⁴. Паки рече Христос: егда узрите мерзость запустения, стояще на месте святе, и прочая, чтый да разумеет. Мерзость запустения — неправедное священство и прелесть антихристова на святом месте поставится, сиречь на алтари неправославная служба³⁵, еже и видим ныне сбывшееся. Инаго уже отступления нигде не будет: везде бо бысть; последнее³⁶ Русь зде. И то от часа сего на горшее происходити будет цари нечестивыми: то суть рози антихристовы, — ими силно дело все отступническое, без тех же не мощно. Два рога от земли исходяща в виде Богослов: един от тех есть (?), вторый же по нем будет пособитель же злу³⁷.

А десять рогов инде прежде быша по престатии греческаго царства, о нихже пишет Иаков Жидовин в книге своей богословии. Всяк верный да внимает и испытает писание опасно, попросив от Вышняго помощи. А лжеучитилие настоящаго века сего кони сатанины, ихже виде Иоанн Богослов. Главы у них лвовы, то есть рыкание их зверское являет³⁸, и обтичют бо сушу и море³⁹, ища вернаго поглотити в прелесть свою: и в хвостах их жало⁴⁰, то есть учение их смертоносное, — жало, егоже аще кто приимет прельщенный от них, то жив не будет во веки, умрет душею и телом; а хвост, то лесть знаменует их: прежде бо лстят и обманывают, а потом же мучат не приемлющих в хвостах их жала пагубнаго, сиречь прелести учения их смертоноснаго. Того ради судиша богоноснии отцы каноны своими правильными ничегоже от еретик не приимати, ни благословения, ни молитвы. Кого еретицы благословляют и молятся о ком, того Христос Сын Божий со святыми своими проклинает, и отвращается гнусныя молитвы их, и даров ненавидит от тех приносимых: жертвы, рече, нечестивых мерзость Господеви⁴¹. А еретицы и отступницы аще кого проклинают и отлучают, то тех сам Христос благословляет, и обымает⁴² и милует, и вси святии его похваляют таковаго⁴³. Все Бог наш еретиком противо творит и святии его вси: о том пространно пишет святый Иосиф Волоцкой в книге своей Просветителе, в последних словах о еретической клятве, яко не последует им божий суд, — нетокмо отступнической клятве, но аще и православной святитель не по правилом кого свяжет, сам связан будет от Христа. Неправедное бо запрещение не вяжется у Бога. Праведен Господь Бог наш и несть неправды в нем; правду возлюби, правая виде лице его, по пророку Давиду. И кроме бо отступления своего блудят и беззаконнуют чрез правила святых Апостол и богоносных отец. Сами начальники и отступницы⁴⁴ не дверию внидоша во двор овчий, но тако, яко татие суть и разбойницы, по словеси Христову, прескочиша ограду Священных правил, — попы бывше, в миру и растленно житие проходяще. Таковых святая правила отнюдь отсекают их не быти⁴⁵ епископом мирскому попу постригшемуся, ниже патрахили им прощают наложити, не токмо на архиерейство дерзати таковым. А они вси мирстии попы бывше, кроме малых; и каковы сами преступницы отеческих преданий и законов, таковых же и в причет поставляюще⁴⁶, не искусных писанию простяков, воров же и пияниц, и гнусное житие от юности проходящих многих, и детям не искусным вручающе страшное таинство, 9-ти лет и меньше в четцы и певцы поставляюще⁴⁷, и таковым блуда⁴⁸ исполниша церковь, и во алтари бо копают друг друга во афедрон, не смысляще⁴⁹ бесящеся. Оле, скаредия церковнаго и мерзости запустения на святом месте стоящия! Когда тако бысть у православных святителей? Во диаконы их⁵⁰ 15-ти лет поставляют, в попы 20-ти лет, овых и менши! А священная правила вся сия отмещут⁵¹ беззакония и анафеме предают: вся, рече, кроме церковнаго предания содеянная и содеяти⁵² хотящая, анафема 3-жды. И они⁵³, слепыя вожди, сами себя проклинают на всяк год в неделю православия, и то дело яко игру вменяют глухия аспиды! Чтец бо и певец менши 15-ти лет отнюдь не бывает по правилом, поддиакон 20-ти лет, диакон 25-ти лет поставляется, поп 30-ти лет рукополагается; а менши того возраста не поп по правилом святых отец. Сие бо им подобаше исправляти, а не догматы отеческия превращати. Да ослепи их сатана, и ум омрачил не познати благаго в Церкви. Но паче беззакония к беззаконию прилагают, и праведным отеческим законом досаждают преступлением своим. Паче же Святому Духу хулу приносят, глаголавшу усты Давыдовы, святых своих утвержающему предания⁵⁴. Всяко бо пророчество книжное по своему сказанию не бывает. Ни бо волею когда бысть (человеком) пророчество, но от Святаго Духа просвещаеми глаголаша божии пророцы⁵⁵, по божественному Апостолу. Плача достоит о таковых продерзателей⁵⁶: яко сами бо не ведают, что творят, да и весь народ с собою погубляют прелагатаи онии злии. И не диво есть о них, что тако творят волю диаволю. Глаголет Иоанн Дамаскин, в слове своем на еретики, в 1-ю неделю поста: егда бо, рече, диавол хощет погубити человека, тогда первие ослепляет ему ум, да не познает благое. Тако и они, ослеплени суще⁵⁷ от древняго врага, и блудят без матери и без пастыря Христа, на всяко лето себе преправливают а в познание истинны ни когда же не приидут, но от часу в горшее приходят нечестие, верным же мучение прибавливати будут на всяк год, и месяц, и день и час: их бо година прииде и область темная. Зде есть терпение⁵⁸ святых. Явныя⁵⁹ от никониян жиды проявляются новые, яко оный поп богоотступный⁶⁰ Сысой Нова-града, что сослан бысть в никонове разбойстве на Вологду, егда Петров посох приехав нощию в Москву и украде из церкви соборныя Никон, а тот поп бысть в шишах⁶¹ у татя церковнаго. И тут на Вологде пред множеством⁶² народа глагола хулныя глаголы на Христа истиннаго Бога нашего⁶³, вором называя Творца небу и земли: по делу, рече, жиды Христа распяли за воровство его. Тако⁶⁴ блядословяше скверный он поп, поборник никонов, паче же самого сатаны сын, емуже псу бешеному нестерпеша тут християне, хотяще его камением побити. Он же, яко волк, убеже ко архиепископу⁶⁵ на двор, к подобну себе врагу⁶⁶, и той укры его у себя в дому. А ини врази Христовы, друзи антихристовы, и в книгах их прилагают, грешным⁶⁷ безгрешнаго Сына Божия нарицающе, сице: якоже бо Христос за своя согрешения распят бысть, тако и мы за своя согрешения распинаемся. А в старых святых книгах истинно стоит та речь: якоже бо владыка Христос за наше согрешение распятся, тако и мы за свои согрешения распинаемся со страстьми. В какой же книге тако есть, умолчим зде до времени и пождем праведнаго судии. Во время се ни царя ни святителя. Един бысть православный царь на земли остался, да и того, не внимающаго себе, западнии еретицы, яко облацы темнии, угасили христианское солнце, и свели во тму многия прелести и погрузили, да не возникнет на истинный свой первый свет правды. Увы, увы, бысть! И се, возлюбленнии, не явно ли антихристова прелесть (показует свою личину)? Да внимаем себе⁶⁸, сиречь отвсюду себе озираем и с нечестивыми себе не смешаем, — путь бо нечестивых погибнет, — и развращеннаго их учения не послушаем, да не осудимся с ними вечно от Христа и святых его, — отступницы бо и еретицы едино⁶⁹, — но бегаем от них и крыем главу свою Христа, да не разлучимся с ним во веки⁷⁰. Ащебы они лукавии наставницы житие свое порочно имели, то не подобает⁷¹ нам того испытовати, по Златоусту Иоанну и прочим святым; аще же в вере прогрешат⁷², то бегай от них и отрицайся: беседа ко евреом на послание 34-я. Приводит Златоуст Павлов глагол⁷³: повинуйтеся наставником вашим и покаряйтеся. Что убо, рече, егда лукав будет, не повинуемся ли лукавому? Како глаголеши? Аще убо веры деля, то бегай его и отрицайся, не токмо аще человек будет, но аще и ангел с небеси сшед, и прочее. И паки Златоуст: Аще учение имать развращенно, аще и ангел будет, не повинуйтеся; аще же право учит, не житию внимай, но глаголом, и прочая. Ниже: И что глаголю? Ниже Павлу повиноватися подобает, аще нечто свое глаголет, аще нечто человеческо⁷⁴, но Апостолу, Христа имущему глаголюща в себе. Видите ли, братие, в колику высоту дело веры возведе крайний учитель вселенныя, божественный Златоуст! Зело в догматех церковных нам непоступным быти подобает и блюстися еретическаго развращеннаго учения. Той же к галатом глаголет: аще и мало что подвигнут, анафема да будут. Тако проклинает святый Златоуст всех еретиков и отступников, прелагающих пределы вечныя, яже они святии отцы положиша. А нынешним отступницы не мало что в вере православной подвигнуша, но и вся догматы превратиша, и его священнаго Златоуста творение литоргии святыя исказиша во многих местах, — ово отъяша, ово свое ухоботья вмешаша тут, и вся книги развратиша и уставы церковныя, инако и чины премениша. И таковым злохитрым лукавством своим отступническим все исполнение российския церкви возмутиша и всех православных христиан в сумнение великое вложиша, гонение же и мучение на верных превелие воздвигоша, дабы ни един христианин явно был стараго благочестия. И се знамение есть настатия антихристова: готовят бо ему путь предотечи его. Того ради всякую церковную истинну изметают вон, да не обличен будет и опален от истинны Христовы противник Христов, но на готовое место сед, и учнет последнюю прелесть свою простирати и чудеса творити привидением, якоже глаголют богословцы о нем святии. И того ради ныне раздвоение в людех, да познает пагубник, кто Божий, кто егов, кто ли держится преданнаго, и кто колеблется, да в тех слабых человецех и век сей любящих власть свою имать. Его же есть пришествие не просто, но по действу сатанину, сказует Апостол Павел. И может в погибающих, кои любви истинныя не прияша, во еже спастися им, да суд приимут вси не веровати истинне и проч. Сего ради Бог послет им действо лсти. Тако же и попы на два чина разсеклися студныя и мерския, как при Илии бысть вааловы жерцы. Что же студныя тогда быша? Кои жертву Богу приношаху по закону данному им и освящени Богу до ахавля отступления; егда же повеле Ахав жертву приносити Воалу вместо Бога, тогда они нечестиваго веления послушавше⁷⁵ царева и служаху Воалу, яко Богу, и сего ради студныя глаголются священники по отступлении. И сему подобни суть попы старых архиереов ставленники, покинувше истинную службу отец своих и наченьше льстивую и развращенную приносити по новым Служебникам еретическую жертву. Мерския же воаловы жерцы се есть: кои в новой⁷⁶ службе поставлени суть, Воалу же, паче бесом служити. И сего ради сии мерския глаголются, они же студныя, овии же нечестиви суть. Всех вкупе их мерских и студных 708 един Илия святый, обличив и ревности Божия исполнився, закла ножем, аки⁷⁷ свиней. И новыя ставленики ныне от новых отступников мерским оным подобны, к иной службе поставлени. И сии обои не прави суть: духовным ножем, святых отец ревностию отсекаются священства. Да по нужи от старых рукоположенцов мощно благословение приимати, обратившихся паки на истинну, яко выше рехом о сем, от православных поставлений. А от новых ставлеников, аще и по старому служат, отнюдь не подобает благословение приимати, по правилом, ни мало, ни велико: понеже от еретик поставлени не освящени суть, но осквернени от рук их. Помяни же⁷⁸ при Златоусте бывших християн, причетников и простых: аще и не о вере у них бысть тогда вражда и раскол, но неправеднаго ради изгнания Златоустаго, иоанновы ученицы, великаго светила, отнюдь не восхотеша врагом иоанновым сообщатися и комкати от арсаковы и от тиковы части, аще и царевыми законами принуждаеми, но мнози от них того ради и до смерти пострадаша, и к соборам их не присташа, и за сие токмо с мученики причтошася. Добрыя овцы за благаго пастыря душу свою положиша, а он за них. Зрите же: аще за святаго мужа христиане право пострадаша и венчашася светло; а нынешним отступницы самого Сына Божия гонят и хулят, и святых его предания отмещут многая, и Пресвятую Матерь Христову, воистинну сущую Богородицу, безчестят во многих местех новых книг, а не единаго Златоуста. И како нам с таковыми врагами Божиими⁷⁹ сообщатися ныне? Не буди то. А иже глаголют нецыи слабострастнии человецы от противных и верных безумныя глаголы на апостольское вещание ко евреом, сие: по нужи и закону пременение бывает, и сим гласом⁸⁰ слабость свою и отступление подпирающе, и законы Христовы многия, и апостольския и отеческия превращающе, лстяще блудную свою мысль сим словом, не ведуще разума апостольскаго отнюдь, ни силы в нем. Сие рече Апостол, избранный сосуд Христов, о июдейском прешедшем священстве и законе их, на время данном им до Христа Исуса. И начало речи тамо сие есть: прелагаему священству, по нужи и закону пременение бывает, сице: понеже аароново священство ветхаго завета преста, егда же Христос, архиерей грядущих благ, прииде и воплотися от Пресвятыя Девы, и егда священство их преста, тогда и закон Моисеов пременил Христос на свой благодатный закон новой. Тамо безсловесная животная закалаху архиереи на жертву, овцы, и волы и птицы: зде же Христос сам изволи закалаем быти нашего ради спасения, словесный агнец, ветхое же упраздни священство и закон порочный. Тойже Апостол глаголет к жидом тамо: аще бы первый закон непорочен бы был, не бы второму искалося место: темже отъемлет первое, да второе поставит. И инде рече Павел: древняя мимоидоша, и се быша вся новая. И Богослов Иоанн глаголет: закон Моисеом дан бысть, благодать же и истинна Исус Христом бысть. И се есть истинна апостольскаго разума: о закона ветхаго пременении, а не о догматех веры Христовы то речено бысть, и не апостольских и отеческих преданиих. За то бо должно есть всякому християнину страдати и умирати, а не пременяти и не предавати. Слышите Апостола, о догматех правых како глаголет страшно: аще, рече, ангел инако благовестити вам будет, анафема есть. Не токмо человека проклинает, но и ангела. Сия слышавше, опасно разумеваем писание, что о чем глаголет. Неведение бо ересей⁸¹ породило, неведение церкви испревратило⁸²; неведение всех ересей злее, по Златоусту. Глаголет Исидор Пилусит о кривотолкующих писание по своему разуму, и не христиан их наричет, сице: яко ниже во Християнех сим быти праведно бы было, иже тако на священная досаду поносящим писания, и в неигрательных играющим, и проч. Аще кто не верит моим словесем и отречение ему: растешет бо его Христос полма и часть его к неверным положит. Аминь.

Мир тебе, брате, и сущим всем с тобою, тако о Христе мудрствующим. Да помолитеся и о нас: писано бо есть: исповедайте друг другу согрешения и молитеся друг за друга, яко да исцелеете, сиречь здравы будете, ныне и присно и во веки веком, аминь.

Да простите, молю, — в бедности писано, скорым делом и без книг, — токмо что Христос подал. Где аще кое слово не так написано, не впротив книг: и вы собою исправите.

А богомудраго старца Спиридона преподобнаго слова писанныя на еретики приемлите, как и прочих богословцев святых: Григория, Василия, и Дамаскина Иоанна и иных, — той же истинный Параклит глаголя в нем. Отец Спиридоний и пророк бысть: что он глаголал⁸³ про собор отступничий, так и збысться все. И на мне его пророчество збысться, — не едино что, преставляяся, глаголал мне. Чюден муж бысть словом и делом, и в премудрости инаго таковаго ныне несть.

У подлинной епистолии, покрай ея, и рука приложена преосвященнаго Аввакума протопопа: Сие Аввакум протопоп чел и сие разумел истинно, к тому и руку свою приписал. Сия до зде. Аминь.

Сие послание от отца священнаго диакона Феодора чернец Авраамий прочет, любезно целовав, и рукою своею подписал, яко хотящим спастися тако достоит веровати воистинну. О Спиридонии же сами разумевайте, прочитая его писания.

-------------------------

Примечания - разночтения по списку Казанской Академической библиотеки.

¹ Ркп. библ. А. И. Хлудова № 260. Разночтения приводятся по списку Казанской Академической библиотеки.

² Прибавлено: Сына Божия ...

³ Федор — нет.

⁴ Ивану, присному чаду ...

⁵ в непорочней вере православней ...

⁶ вере ...

⁷ во святых отеческих преданиих ...

⁸ Слова, помещенныя в скобках, и очевидно здесь пропущенныя, находятся в казан. спис.

⁹ святых догматов ...

¹⁰ глаголет сосуд избранный Павел.

¹¹ и нечистивии — нет.

¹² бедствуют ...

¹³ пострадати ...

¹⁴ первых священных пастырей наших ...

¹⁵ никакоже и от них ...

¹⁶ А лучше тех нет ныне ...

¹⁷ прииде на всю землю, яже под небесем ...

¹⁸ не оставлен будет вовеки ...

¹⁹ по священному Ипполиту папе Римскому ...

²⁰ обратишася ...

²¹ Петра Апостола ...

²² плакася горко, и прият его Христос ...

²³ похулиша ...

²⁴ сами — нет.

²⁵ по канонам ...

²⁶ не подобает от них ныне ...

²⁷ в дому ...

²⁸ На поле: полка ...

²⁹ самоволне ...

³⁰ провидя ...

³¹ еже ныне ...

³² неправедный ...

³³ неправедная ...

³⁴ не обрящет, токмо не во мнозех ...

³⁵ неправедная и неправославная жертва ...

³⁶ последняя ...

³⁷ Сл. это отделение с посл. протопопа Аввакума к тому же Иоанну: т. V, стр. 224-228.

³⁸ ихже виде Иоанн Богослов, и седящия на них имущи броня огненны, иакинфы и жупелны, и главы коней их яко лвовы, из уст изхождаше огнь и дым и жупел, то есть рыкание их зверское являет ...

³⁹ моря и сушу ...

⁴⁰ и в хвостах их виде жало ...

⁴¹ и даров их ненавидит, от тех приносимая жертва рече, сиречь нечестивых, мерзость Господеви ...

⁴² объемлет ...

⁴³ похваляют и заступают от всех зол ...

⁴⁴ Сами начальнии отступницы ...

⁴⁵ отсецают не быти ...

⁴⁶ поставляют ...

⁴⁷ поставляют ...

⁴⁸ и таковым блудом ...

⁴⁹ не смысляя ...

⁵⁰ их — нет.

⁵¹ не отметают ...

⁵² содеятися ...

⁵³ А они ...

⁵⁴ глаголавшему усты святых своих и утверждающему предания их.

⁵⁵ святии божии человецы ...

⁵⁶ Плакати достоит таковых продерзателей ...

⁵⁷ суть ...

⁵⁸ терпение и вера ...

⁵⁹ Явно ...

⁶⁰ богоотступник ...

⁶¹ в тишах был ...

⁶² при множестве ...

⁶³ на Христа Бога истиннаго ...

⁶⁴ Таковая ...

⁶⁵ ко архиепископу Симону ...

⁶⁶ врагу же и поборнику ...

⁶⁷ и в книгах прелагают, грешна ...

⁶⁸ Да внимает себе всяк православный ...

⁶⁹ да не осудимся вечно от Христа и святых его с ними, отступники и еретики ...

⁷⁰ Сл. т. V, стр. 228.

⁷¹ не подобаше.

⁷² Аще же, рече, в вере погрешают ...

⁷³ Павловы глаголы ...

⁷⁴ аще свое глаголет нечто человеческо ...

⁷⁵ послушаша ...

⁷⁶ к новой ...

⁷⁷ яко ...

⁷⁸ Помяните ...

⁷⁹ таковым врагом Божиим ...

⁸⁰ и сим апостольским гласом ...

⁸¹ ереси ...

⁸² превратило ...

⁸³ говорил ...