Сборник статей по вопросу о крещении еретиков, соединяющихся с церковью.

[филипповское сочинение XIX в.]

 

О крещении еретик, аще и в три погружения крещенных вне соборныя церкве, паки сих крестити святая правила повелевают.

Понеже отец Иосия предварив исповеда, яко идеже суть символ веры без прилога и без отъятия содержат, убо чрез богоугодное жительство тии тамо спасутся. И того ради о прежде бывших ересиархах, и подлежащих ересем их чрез которыя от соединения святыя церкви отступили: Древле православных святых соборов председателей, и правилописцев со внятием смотрях истиннаго правосудия. Но убо много таковых обретается: яко прежде бывших ересиархов подлежащии ересем, аще символ веры без прилога и без отъятия содержаху суть: но во иных отменах святей церкви противни показашася, не токмо чрез жительство богоугодное, но и чрез мученическую кровь скончавшихся, подлежащих ересем, ересиархов своих, спасшихся не исповедуют. И того ради о Навате ересиархе например, по вопросу и ответу добровещанию твоему вкраткосте разглагольство предложу, а очесом сомневаюся, о том твою любовь краткословне вопрошу. Вопрос. Аще суть в числе не спасшихся обретаются, иже символ веры, ниже прилогом ниже отъятием нарушаху. Ответ. Суть таковыя наватианы. Вопрос. Почесому имамы познати; яко наватианы символ ни прилогом, ни отъятием ненарушаху. Ответ. Посему имаши познати, понеже Созомент историк в книзе 7, глава, 12. засвидетельствует, яко сисинии наватианския ереси: яже тожде еже и православнии исповедание Троицы Святыя содержаше. Но и преподобныи Иосиф Волоцкии иже бысть в лето 7024, в слове 15 засвидетельствует. иже суть наватиане. [ниже] сии убо суть исповедуют Троицу, и Господа нашего Iсуса Христа истиннаго Бога нарицают и плотьскому смотрению Его веруют. Но и премудрыи богослов святый Максим Грек, в слове 68-м сице пишет: Слыши внятно, и разумей прямо, еретики иже от Навата презвитера бывшаго римскаго, наватиане нарицаемии: ниже о крещении, ниже о таинстве православныя веры, ниже о ином коем законе церковном беззаконноваху. Но зане точию дарованное от человеколюбия Спаса Христа, грешником покаяние отвергошася, за то едино отвержени быша и прокляты. А понеже как давнейшия так и позднейшия богословы засвидетельствуют: яко наватианы, тожде, еже, и правовернии исповедание Троицы Святыя содержаху, отнюдуже разсуждающим дается разумети: яко наватианы символа, ни прилогом ни отъятием ненарушаху. Вопрос. Аще суть наватианы, не отступивше от своего ересиарха Навата ереси, и не прокляша ея, и чрез православныя тайны о святей церкви не освятившеся, сопротив сташа других еретик, и мучени до смерти. Ответ. Мучени. Вопрос. Почесому имаши познати: яко от других еретик наватианы мучени. Ответ. Посему имаши познати: понеже авторы дают ведати, якоже в страдании святаго исповедника Павла патриарха цареградскаго ноября в 6: сице поведает. еще же мучени и наватианы, зане они едино существо исповедают Святыя Троицы, и прочие. Вопрос. Аще наватианския ереси, не отступившии, и не проклявшии ея, в гонениих сопротив других еретиков ставших, и пострадавших, почитает ли православная церковь, за святых мучеников. Ответ. Ни. Вопрос. Почесому познати имамы: яко подлежащих ересем и пострадавших, непочитает за святых. Ответ. Посему познати: понеже преподобныи Матфей правилник, о подлежащих ересем, и в гонениих ставших до смерти; Токмо единославнии тем мучениками нарицаху: А о нарицании таковых мучениками от святей церкви, не пишет: очесом в составе А-м, сице пишет: случибося неким подлежащим ересем, в гонениих сопротив стати даже до смерти: ихже и мучениками единославныя тем нарицаху, глава, 2: о которых и в Лаодикийском соборе правиле 34: сице пишет: Иже лживыя еретическия мученики почитает, да будет проклят. Толк. Аще кто яко истинныя ложныя еретическия мученики почитает иже не за православную веру скончашася, и чюжди суть от Бога таковыи чюждь от Бога есть, и сам да будет проклят. Такожде слышим воеже Иоанна евангелиста глаголющаго: всяк бо творяй грех, раб есть греху. Такожде и блаженныи апостол Петр пишет: имже бо кто побежден бывает, сему и работен есть. И блаженныи Павел в послании к римляном глаголет: рабы есте егоже послушасте, или в смерть, или послушание в правду, и проч. Такожде убо и подлежащии ересем, которыя от ересиархов чрез восприятое учение крещение, миропомазание, священство, и прочия тайны, не оставление грехом, но связанием нечестия связуются, внегда от подлежащих ересем крещаются очесом божествении апостоли в завещании своем [сия книга лежит в Москве в патриаршеи ризнице], книге 6, глава, 15, сице о таковых научают, и крещением единым довлевайтеся, [ниже] не оное еже от злоименитых еретик даемое, [ниже] а онии иже от нечестивых приемлющии осквернение, общницы разума их будут, ниже бо суть тии священницы, глаголет к ним Бог: Понеже и ты отринул еси разум, отрину тя и Аз священствовати Мне: ниже крестившиися у них очистишася но осквернени суть, не оставление грехов приемлюще, но связания нечестия, глава, 15, отнюду же дается ведати: яко подлежащии собственным своим ересем подлежат. Которым первое соединение церковное, ересиархи их разодрашася, но убо в том грех разодра, и крестишася, и прочия тайны прияша, и яко пленицами своих ересей связани: и неотступивше от ересей ересиархов своих, и к святей церкви не обратившеся, и без сущаго покаяния от других еретик замучени. убо того ради о таковых божественныи Златоуст в толковании к галатом глаголет: человек той иже догматы страшныя и неизреченныя погубляяй сей получит ли ответ на страшнем суде и милость; не суть сия не суть. И паки тойже, к ефесяном о раздирающих первое соединение церковное сице глаголет: муж некии святый рече, ниже, кровь мученическая сего греха загладити может. Вопрос. А понеже премудрыи богослов святыи Максим Грек, по Навате ересиарх вящше тысящи и четырех сот лет откровенно о наватианех пишет: яко ниже о крещении, ниже о ином коем законе церковном беззаконноваху [слово 68 и 47]. Такожде и преподобныи Матфей Властарь, по Навате вящше тысящи лет бяше, в составе А, втораго вселенскаго собора на правило 7, толкующь. как о прочих так и о наватианском крещении, сице глаголет: ариане, и саватианы, и наватианы. [ниже] точно нам божественым совершаются крещением: убо на крещающихся от наватиан сходит ли Духа Святаго благодать, и оставляет ли грехи. Ответ. Ни. Вопрос. Почесому познати имамы; яко на крещающихся от наватиан, не сходит Духа Святаго благодать. Ответ. Познати имаши, по писанию святыя церкви и учителей. Вопрос. Которыя от святых учителей о наватианех в писаниих святых засвидетельствуют; яко на крещающихся от наватиан Дух Святыи не сходит. Ответ. 1. Алексий Аристин Василия Великаго, на правило 1-е, толкующь, сице глаголет: наватиан же рекше чистых, (ниже) крещение аще и неприятно есть, понеже оставляет сих Дух Святыи. 2. Преподобныи Никон в слове 63-м сице глаголет: Чистыя и воздержники и водопредстателе, (ниже) от церкве отступльшии, не ктому имеша благодать Святаго Духа в себе, (ниже) ктому немогуще благодать Святаго Духа инем подати, от неяже тии отпадоша. 3. Преподобныи Матфей Властарь в составе А сице пишет: аще и не о вере расколницы погрешают. (ниже) сии же от состава удов телесных отторгнушася, не ктому пребывающую в них имут благодать Святаго Духа, и еже убо не имут сами, как инем преподадут. Но от свыше приведенных свидетельств, достоверно дается разумети: аще ариане, и македонианы, и саватианы и наватианы, и точно нам божественным совершаются крещением обаче на крещающихся от них, Духа Святаго благодать не сходит, отвещаю, 2-е. Но аще бы подлежащии ересем ересиархов своих, сиесть, наватианы, крестящимся и миропомазующимся таковое же недвижимое начертание душам содевало, каковое от християн содевается: и естьли с православно христианским в равной силе быти могло, и благодать Святаго Духа подавали: убо от наватиан обращающихся, не соизволила бы святая церковь, чрез миропомазание Духа Святаго на души их подавати. очесом дается ведати, в толковании перваго вселенскаго собора, на правило 8: сице глаголет: сии глаголемии чистии, (ниже) аще убо приступят ко святей соборней апостольстей церкви (ниже) свою ересь прокленше и иныя вся, прияти да будут, и токмо святым миром помазуются. Кормчая, лист, 35. Такожде и в толковании на первое правило Василия Великаго. и 7 правило иже в Лаодикии собора. и 7, иже в Константине граде, втораго вселенскаго собора, и 95, шестаго вселенскаго собора в Константине граде. в Трулле полатнем: наватиан, рекше, чистых, приходящих к церкви, и проклинающих вся ереси и свою: мажут святым миром. отнюдуже достоверно дается разумети: яко аще бы подлежащия ересем наватианы крещающимся благодать миропомазания недвижимую и непретворяемую чрез Святаго Духа подавали: убо выше помяненныя святыя соборы, обращающихся от наватиан не определили бы чрез православное миропомазание печатлети, и благодать Духа Святаго подавати. Отвещаю 3-е. Но аще выше помяновенныя соборы и под миропомазание их приемлют: но убо в тойже православной церкви прочии святии, на трепогружение их не обзирающеся: но с прочими раскольниками оных же наватиан обращающихся общим судом второкрещати заповедали, свидетель, 1: преподобныи Матфей Властарь во объятии всех вин, сице поведает: всех убо вселенских же и поместных иже в Кархидоне соборе первейшии написуется, началника убо имущи великаго Киприана, епископ же множащеся к четрем осмьдесять: иже убо едино токмо изнесоша, яко во образ правила, отречение: Иже весма от всякаго еретика же и расколника крестившихся, к соборней приходящих церкви, паки крещати раскольники, сущих, о Навате гананствую. Тогда бо яже сего ересь привниде в церковь, дозде Матфей. 2-е, Но аще бы святыя церкви учители сие в ересь поставили, или грех христораспинателства имел содеватися, еже от еретик или от расколник в три погружения крещенных, паки крещати; убо не благоизволили бы шестаго вселенскаго собора отцы, Киприяновым собором изложенном правилу, во Африкийских наместниках, идеже его собор бысть по преданному их обычаю содержатися: еже всякаго ретика же и расколника паки крещати. очесом преподобныи Никон в предисловии шестаго вселенскаго собора, сице изъявляет [Кормчая, глава 71, лист 639 на обор.]: и паки тойже Святый и покланяемыи Дух вдохну, и научи святым шестым собором, из уст святых в предисловии божественных правил сочетав всех собор, в коемждо колико правил изложил есть. (ниже) еще же и от Киприяна бывшаго архиепископа Африкийския страны и мученика, иже с ним собора изложенное правило, еже в предреченных наместник местех точию по преданнем обычаю удержа, дозде Никон. Такожде и священноинок Матфей, во составе В сице глаголет: А иже убо от архиепископа африкийския страны священномученика Киприана, и иже с ним собора издавшеся правило, в тых местех токмо удержася. Тойже о объятии всех вин сице глаголет, темже и шестыи вселенскии собор, издавшеся, рече, отцы сими правило, в месте их токмо удержася, по преданному им обычаю. дозде Матфей. А понеже святии отцы, святаго шестаго вселенскаго собора. заблагоразсудивше определиша, Киприяновым собором составленному правилу, во оных месте, сиесть идеже собором его составлено правило бысть, чрез оных наместников по преданному их обычаю действовати, еже всякаго еретика и расколника паки крещати: убо аще в тойже апостольстей церкви повеленное святыми отцы, во оных местех действовати: убо не ересь есть, и не суть второхристораспинателство. Третие: о Василии Великом, Алексий Аристин на правило 47 в толковании сице засвидетельствует глаголя [Кормч. лист 239 на об.]: в первом убо правиле своем, по смотрению словесе воздержник и наватиан, глаголемых чистых великии сей светилник церковныи, прият крещение. и повеле токмо святым миром помазовати их, егда приходят к соборныя церкви вере, и ереси своя проклинают. Зде же исправляя еже по смотрению онамо прият, повелевает воздержники и прочая крестити. Четвертое: в Кормчей древлеписменной, на сие же 47 прав., инаго толк. Воздержники и вретищники, томуже предлягут слову емуже и наватиане, яко о тех убо аще возглашено бысть различно, у Василия же умолчано бысть: Мы же единем словом второе крещаем таковыя. Пятое: преподобныи Никон, [иже бысть в лето 6580: по Василии же минувше вящше 700 лет] на тожде Василиево правило 47, толкующь, техже наватиан с прочими повелевает крестити, очесом в слове 63-м сице пишет: Воздержницы, и вретищницы, и апотактиты томуже слову подлежат, емуже и наватиане: яко о онех убо правило изложено бысть, аще и различне. а яже о сих умолчана быша, мы же единем словом покрещеваем таковыя. Дозде Никон. 6-е: Константин Арменопуль, [иже бысть в лето 6961: а по Василии минувше, вяще 1000 и 100 лет] в книзе своей 8: сечение 5-м. о людинех сице глаголет: Василия Великаго, 47, наватиане, аще многих епископ изволися суду, да воскрещеваются. дозде Арменопуль.

Но от сих убо свыше приведенных свидетелств удобь достоверно дается ведати: яко сии еретицы наватиане, аще бы не трепогружением крещалися: убо никогда бы их вышепомяненныи первыи вселенскии, и вторыи, и прочии соборы под миропомазание приимали. такожде, аще бы святии в ересь, и в христораспинателство вменяли, еже трепогружением крестящихся еретик, второкрещати: убо не соизволили бы Киприяновым собором святии отцы: ни Василии Великии, ни Алексии Аристин: ни Никон: ни Константин Арменопуль, ни малым ни многим епископом суду техже наватиан, не повелевали бы паки воскрещевати: а понеже священныя правила изложиша, еже не токмо миром помазывати обращающихся наватиан: но и второкрещати узаконоположиша. отонудуже православнаго слышателя достоверно утверждает: яко ересиарха Навата ересем подлежащии наватиане, аще и точно нам божественным совершаются крещением: но недвижимаго начертания и печати Духа Святаго не имеют.

 

Глава, 2. О еже последовати всякия страны обычаю, как принимать от ересей приходящих ко правоверию.

Но хотя и имеет святая соборная церковь о приятии от ересей приходящих три чины, и по различию их заблуждения, различно тех приемлет, овыя от них крещает совершено, овыя же святым миром помазует, и овыя со отрицанием их богомерскаго закона, и с проклинанием своея их ереси, и других всех, и тако сообщает их правоверному християнскому стаду. о сем Тимофей презвитер великия церкви, сице распределяя глаголет. Три чины обретаем приходящих к святей Божией соборней и апостольстей церкви (ниже) и первыи убо чин есть, требующих святаго крещения. Вторыи же некрещаемых убо но помазуемых святым миром. и третии ни крещаемых же ни помазуемых: но точию проклинающих свою и всяку ересь. Кормч., лист 634. Тойже и Алексии Аристин в толковании, на 1-е, правило Великаго Василия объявляя сице, рече: не приобщающиижеся к соборней церкви, на три части разделяются; на еретики, на расколники, и на подцерковники. он же паки на 8-е правило перваго вселенскаго собора и 6-го собора 95 правило в толкованиих сице глаголет. [Кормч. лист 35 на об.] О приходящих еретик, ко святей Божией соборней и апостольстей церкви, ови убо крещаеми бывают совершено: друзии же, иже токмо миром помазуются: инии же токмо проклинают своя и иныя ереси вся; и на общение приемлеми бывают. дозде из Кормчей. [лист 205].

Но сие убо святыя церкве чиноуставие о еретицех, неповсемественно содержатися может, ибо многия по вселенне страны и царства, сим чиноположениям непоследуют, а содержат токмо един чин первыи, то есть, от всякаго еретика же и расколника крещьшихся, обращающихся ко правоверию, крещают паки совершенно святым крещением, якоже есть обычай в митрополиях, кархидонстей области, и в кесарии каппадокийстей, и в митрополии никейстей, и прочих все оныя области с подлежащими им странами, крещают всякаго еретика совершенно, ибо и Василии Великии, и Никон Черныя горы, сие их соборное уставление, похваляют, и в странах их по преданному ими правилу, еже всякаго еретика же и расколника обращающагося крестити попущают совершенно, якоже о сем во главе 1. напреди сего явьственно показася. но и зде еще отчасти показано будет. Тимофей презвитер великия церкве, во своем послании, к некоему сослужебнику своему Иоанну. Прошед вся соборныя и особенныя святых отец правила, о приятии еретик различными образы и чиньми, и напоследи всех, сице глаголет [Кормч. лист 636]: А иже с Киприяном собор повелевает всякаго еретика крещати. и хотящим от ереси обратитися, десять дней, или пятьнадесять поститися, и упражнятися на молитву вечер и утро, и учити псалмы повелеваем. И сия убо сии вси тако завещавают. Зрим же ныне в великих и соборных церквах, рекше патриархиах и в митрополиях и прочих, яко армены, и яковитяны, и несторияны, и прочия безглавныя и подобныя им обращающияся в православную веру, божественным миром помазуют, а не крещают, творят же их проклинати началники их. И се вообразися ныне вин ради благословных и нужных. Нецыи же совершенно крещают армены, вину приемлюще не от великих церквей, но от слова Иоанна митрополита Никейскаго, иже пишет к Захарии соборному великия Армении, сице о них рече, яко ниже рукоположение имут, но чюжди суть всякаго рукопоставления, [ниже] и иже от них крещаемии, отнюд язычницы некрещени: и армены убо крещающии отсюду свидетелство вземлют, и на подобная вносят, божественнаго же мира сподобляющии святых соборов свидетелствам последуют, мы же сия вся разсмотривше, должни есмы обычаю последовати ныне держащем в митрополиях и патриархиах. Дозде Тимофея презвитера послание. И Василии Великии о приятии еретиков, всякия страны обычаю последовати повелевает, в правилех своих в 1-м, и 47. о наватианех сице узаконополагает: взыскание убо бысть о чистых, и речено есть первее, и добре воспомянул еси, яко подобает обычаю последовати всякия страны, зане вознести различно, о крещенных приемших от тех тогда.

Обычай великоросийския страны древлеправославныя святыя соборныя и апостольския церкви о приятии еретик таков обдержашеся.

Два святейшии патриарха, Ермоген и Филарет соборне о сем свидетелствуют, сице во изложении их и собрании божественных правил объявляется. [Потребник печат. лист 559].

От божественных писании, и от святых правил. собрание великаго господина смиреннаго Филарета патриарха царьствующаго града Москвы и всея России и сошедшихся к нему митрополитов и архиепископов и епископов, Макария митрополита Новгородскаго. Варлаама митрополита Ростовскаго, Корнилия архиепископа Вологодскаго, Арсения архиепископа Суздалскаго, Пафнутия архиепископа Тверскаго, Рафаила епископа Коломенскаго, о крещении латынь и о их ересех. (ниже) темже убо аз Божиею милостию смиренныи патриарх Филарет, царьствующаго града Москвы и всея Русии. уведев убо неустроение и соблазн в пастве моей сице бывающь. во второе лето паствы моея, от создания же мира в лето 3128-го, возвестися убо мне, некотории два священника Иоанн и Евфимии, от церкве Пресвятыя Владычицы нашея Богородицы и присно Девы Марии, честнаго и славнаго ея Рожества, иже в Столечниках, на Иону митрополита Сарскаго и Подонскаго сицеву вещь, яко той Иона митрополит, тем двема священником Иоанну и Евфимию, от латынския веры пришедших двою человек ляхов, Яна Слобоцкаго, да Матфея Светицкаго, не повеле крестити, но токмо святым миром помазати их. и потом повеле причастити их пречистому телу и крови Господни. (ниже) аз же смиренныи патриарх Филарет не презрех такова раскола, да не погибнут овцы стада Христова и испытанием писании, и правою верою исправитися в подобу явленную вещь изволих, да некако останок еллинския и июдейския злобы воистину в зрелую пшеницу вмесился будет. и искорене яко плевел да восторгнется, и чиста явится церковная нива: и того ради повелех Ионе митрополиту пред собою стати. И воспомянух ему, о Игнатии патриархе, иже бысть во дни наша. от него же смута о томже крещении еретическом первое явися, егда в лето 7114, грех ради наших Господу Богу попустившу, и царьствующии град Москву лестию и мечем прият, рострига чернец Гришка Отрепьев. Патриарх же Игнатии угожая еретиком латынския веры, и в церковь соборную Пресвятыя Владычицы нашея Богородицы и присно Девы Марии, честнаго и славнаго ея Кспения, въведе еретическия папежския веры Маринку, святым же крещением совершенным христианскаго закона, не крестил ю, но токмо единем святым миром помаза: и потом венчал ю с тем растригою: и якоже Июда предатель и сей поругася Христу. И обоим убо сим врагом Божиим ростриге и Маринке, подаде пречистое тело Христово ясти, и святую и честную кровь Христову пити. его же Игнатия за таковую вину священноначалницы великия святыя церкве Российския, яко презревшаго правила святых апостол, и святых отец от престола и от святителства по правилом святым изринуша, в лето 7114. (ниже) Аз же по малей силе моей, елико благодать Святаго Духа настави мя, вседушно попекохся о сем, и правила святых апостол, и святых отец прилежно смотрях со вниманием, и истязовах со испытанием, того ради. Да уведят вси людие всея росийския земли: яко вси еретики различных вер еретических, не имут права святаго крещения. еже водою и Духом Святым. и того ради от всех еретических вер различных приходящих к православию християнскаго закона, подобает совершенно крестити святым крещением, по преданию и содержанию святых вселенских патриарх, еже утвердиша по правилом святых апостол и святых отец, всех же убо еретических вер. сквернейши и лютейши есть латыняне папежницы. Понеже всех древних еллинских и жидовских и агарянских, и еретических вер ереси проклятыя в закон свой прияша, и со всеми с погаными языки и с проклятыми же еретиками обще все действуют и мудрствуют. [мы же чисти есмы от сих] и от лет убо приснопамятнаго, и святаго великаго князя Владимира, иже просвети всю великую Русию святым крещением, от грек прием, и даже доднесь, по лето, седмь тысящь сто двадесять осмое. Никтоже в нас не дерзнул сотворити таков соблазн еретичества, кроме Игнатия изверженнаго патриарха и тебя [Ионы митрополита]. (ниже). Такоже как и московское государьство учинилося. и от того времяне и по сие время того не бывало в Московском государьстве, что бо еретиков латынь, и иных различных вер еретиков не крестили. кроме изверженнаго из святителства Игнатия патриарха.

От втораго изложения. [Потребник, лист 587].

Темже убо аз смиренныи Филарет патриарх Московскии и всея Русии, с сыновы моими положих и утвердих завет и устав, грядущим по нас сыновом и братиям нашим, иже аще будут Божиим благоволением, и всем церковником сущим под нами. Се не новое предание введше, но древнее укрепляюще поновихом: и последующе заповедем святых апостол, и святых отец.

 

Глава, 3. О том яко и новии учители российския церкве, свидетелствуют что сей обычай древле церковныи есть в Русии, еже от всякия ереси приходящаго ко правоверию второе крестити совершенно.

О сем во ответе, на вопрос Александра диакона, весма явьственно доказывают: что не токмо от древних времен церковь древлероссийская второе всех еретиков крещает, но уже и напоследок сей обычай неизменно действовашеся: Ибо священницы христианстии отделившеяся от Никона патриарха, и пребывше храняще древлецерковное божественное, и святоотеческое предание и чины неизменно, аще и в великом гонении от новшества любителей, за благочсетие оно пребываху, обаче чины и уставы и обычаи святыя церкви, и заповедание и законоположение своих православных пастырей неотменно храняху. и по оному чиноположению святыя соборныя древлероссийския церкви действоваху, еже от всех еретических вер различных обращающихся ко истинному древлецерковному правоверию, второе в три погружения истинным божественным крещением крещаху. Понеже еретическое первое на онех бывшее крещение, по божественным апостольским, и соборным святым правилом, несть крещение, но паче осквернение. Прилежно внемли зде следующему вопросу, и на него от российских новых пастырей ответу.

Вопрос диакона Александра к российстей церькви, 165. [Пращица печат. в дест. лист 267]. Соборное изложение блаженныя памяти святейшаго Филарета патриарха Московскаго о белорусцах, которое изложение напечатано и в требниках, при бытности святейшаго Иосифа патриарха, и той чин чесо ради ныне не печатают; коея ради вины. Ответ. Во оном соборном изложении, повелено всякаго еретика совершенно крестити, в немже пишет сице: яко вси еретицы различных вер, не имут права святаго крещения, еже водою и Духом Святым: и того ради от всех еретических вер различных приходящих к православию христианскаго закона, подобает совершенно крестити святым крещением, по преданию и содержанию святых вселенских патриарх, еже утвердиша по правилом святых апостол и святых отец. Дозде из соборнаго иложения. (ниже) [лист 272 на об.] и таковое оное соборное изложение, все конечно вселенских и поместных соборов правилом, по всем вышеписанным свидетельствам противно и несогласно и новоучененое; и сотворенное непоследуя святым оным вселенским и поместным собором. Понеже не точию римлян и белорусцов, но и всех еретиков приходящих к православней нашей вере, повелевает совершено крестити. (ниже) понеже убо безпоповщина. иже именуются перекрещеванцы, последующе оному изложению, приходящих в их мудрование, всех во вторыя совершенно крестят. (ниже) о нихже вы сами всеконечно про все известны. А ежели воспомянути прешедшия лета, отселе назад лет 25. [Пращица писана в лето 1716]. то по оному изложению вы вси противники, мало не вси всех к вам приходящих крещенных паки совершенно крестили: Исидор поп козмодемьянскии. По нем совершено же крестил дворянин Феодор Токмачев. По нем совершенно же крестил Феодосии поп крещенных же совершенно, и прочия многия. (ниже) к ним приходящих крещенных, совершенно крестиша о них же вы сами подлинно известны есте. и проч. [к сему зри Розыск часть 3, глава 18. О поповщине. яко древле второе их крестиша].

По окончании же от лица российския церкве, ко Александру диакону ответов: вопрошает же убо и она Александра следующим вопрошанием. Вопрос, 58. Попы ваши в прежняя лета, по соборному приговору старцев и мужиков ваших [и по Филаретову соборному изложению как Пращица говорит во ответе 165-м], от нашея церкве приходящих к вам крестили совершенно в три погружения: и те попы, старцы и мужики кои приговаривали им тако крестити, не покаявшеся о таковом законопреступлении и умроша; православни суть они; или нечестиви по правилом святых отец; Ответ Александров, 58. [в 1716 прошло по скончании священноиноков 25 лет] Аще кии оставшии древле православные церкве попы, в прежняя лета, крещенных по новопечатным книгам, сумнишася приимати за оным крещением, ради пременения чина, и ради прочих новодогматствовании, и премен, объявленных в 1-м, и 4-м, ответех. А наипаче негли от оных попов, кии велми дерзаша гнати и мучити, и хулити за древле церковное старопечатных книг содержание. мы тыя древлеправославныя священники, осудити не смеем. Понеже по сказанию священноинока Матфея Иеросалимскаго, сказателя священных правил священномученик Киприян во освященным его собором: крещенных от всякого а раздоре сущих, повелеша крестити. А Василии Великии сие изречение, в похваление убо положив: строения же ради праздность на не изрек; а нечестивством за сие не оглагола. Такожде по правилом самого Василия Великаго по 1-му, и 47-му. и сказателей сих правил Никона черногорскаго, и Алексия диякона, в Кормчей книге: воздержников, в раздоре сущих, крещающихся во имя Отца и Сына и Святаго Духа, в первом правиле не велено крестити, а в 47-м повелено [сих] крестити; но обаче за сие Великии Василии, от соборов не оглаголуется. сих ради и мы, за новодейства усумневшихся, о тайнодействии, православныя, священники, недоумеем нечестивством осуждати.

Дозде от ответа староверцов диаконом Александром, к Питириму нижегородскому епископу. Никодим сказал. буди им вечная память. зри книгу Андрея попа Охтенскаго, часть 3, лист 71. в 40, лет по Никоне скончались. а в 7204-е поповщина от христиан отделились. в 7214 федос. с помор. разлучились за титлу и браки. филип. в моск. в 1758. от фед. отстали. поповщина в 7270 оправдают поливан. в лето не мажут. в 7290 Никодим к России: церкви пристал. в поморьи тропарь внесен в 7247 лето. в 1054, лето, грецы латин крестиша. Барон. зри. в 1114 Антонии из Рима приплы в Россию.

 

Заключение.

Обоим сим, как соборному Филаретову изложению, так и внешних учителей показанию, яко от древних времен церковь великороссийская всех еретиков приходящих к ней совершенно крещает: ибо следующия доводы утвердят явьственно.

Первыи. Святыи Варлаам Хутынскии Новгородскии чюдотворец [преставися 6751 июня, 8. В помор. ответах зри на 50 вопрос статия 36], обратившагося от латынския веры Прокопия блаженнаго Устюжскаго чюдотворца, крестил совершенно святым крещением: якоже в житии его пишет сице: Прокопии блаженныи, родом бе от немцов, купец богат. прииде же в Великии Нов град со многою куплею, и видев весь чин восточныя церкве, и веру православную добру быти познав, возлюби зело: желая наставитися от ней совершенно и прияти ю, искаше таковаго богодухновеннаго мужа, от негоже бы поучену и просвещену ему быти, и слышав о преподобном отцу Варлааму недалече на Хутыне обитель устроившом, яко муж есть искусен, и духовныя премудрости исполнен: пойде к нему, и доволно от него о правоверии христианстем поучився, прият святое крещение в лето 6811. менея четья печати киевския лист 365. месяца июля в 8 день.

Вторый. Святыи Домнт князь литовскии: егда уразуме от книг старописания. яко отвержеся Рим греческаго стараго православия, пришедши во Псков с домом своим, и с боляры своими от латынския веры, священныи священных псковскии собор вторицею их крестиша, потом псковичи посадиша на княжение у себя: а дотоле неприят, донележе не прия крещения. книга Летописец Матфея Стриковскаго в лето 6742: И послание Иосифа патриарха Московскаго: к Валдемару королевичю, тожь сказует.

Третии. Псковичи егда отлучишася от новгородцов при великом князе Симеоне Ивановиче Московском, и при Феогносте митрополском: просили Олгерда князя литовскаго, дабы у них во Пскове княжествовал, и крестился бы у них по уставу греческаго православия: но Олгерд сам тако сотворити не восхоте, вместо же себя даде им на княжение сына своего Андрея, и повеле ему чрез крещение римское паки креститися во Пскове, его же пришедша от литовския в православную веру, псковских священников собор вторицею крестиша. Летописец Стриковскаго в лето 6850, и послание патриарха Иосифа.

Четвертыи. Князь великии Симеон Иоаннович Московскии, женат бе на литовке, юже пришедшу от литовския веры в православную, вторицею крестиша, имя ей бе Августа, а во святом крещении наречена Анастасия. Летопис. в лето 6853-е.

Пятыи довод. При том же великом князе Симеоне Московском: брат великих князей литовских, Олгерда Данариманта Едимановичев, третии именем Евнутии, бегая от братии своих родных, прииде во Псков, потом в Нов град, и оттуду прииде в Москву, и отвергся римских ересей, крестися в греческое православие нашея веры, емуже наречено бысть имя вместо Евнутия, Иоанн. Летопис. в лето 6853-е.

Шестыи. Воскел Мегдаговичь королевичь Полскии, разсудя суетие мира сего, и невечную его славу, крестися паки из римской в рускую веру, и посем прият монашескии образ. в лето 1463 Летописец Стриковскии. книга 8-я, глава 4-я.

Седмыи. Великую княгиню, князя Иоанна Михайловича Тферскаго, дщерь великих князей литовских Кестутеву от Литвы взятую владыка Евфимии паки крести. в лето 6883-е. Летописец Стриковск.

И тако от сих доводов весма явьственно светло и непреоборимо показася, что древняя великороссийская соборная и апостольская святая церковь патриаршая Московская, и со всеми ей подлежащими странами, митрополиями, архиепископиями, и епископиями, от начала веры христианския всех еретик обращающихся к ней вторицею крещает совершенно, якоже объяви и утверди святейшии Филарет патриарх Московскии, и весь иже о нем собор освященныи священных всех всероссийских пастырей, во изложении своем, сицев глас изнесе. [Потребник, лист 561] Да уведят вси людие, всея российския земли: яко вси еретики различных вер еретических не имут права святаго крещения еже водою и Духом Святым. и того ради от всех еретических вер различных приходящих к православию христианскаго закона подобает совершенно крестити святым крещением, (ниже) и от лет убо приснопамятнаго, и святаго князя Владимира, иже просвети всю великую Русию святым крещением, от греков прием, и даже и до днесь, по лето седмь тысящь сто двадесять осмое, никто же в нас не дерзнул сотворити таков соблазн еретичества, кроме Игнатия изверженнаго патриарха. И паки: Такоже как и Московское государство учинилося, и от того времени и по сие время того не бывало в Московским государстве. чтобы еретиков латынь, и иных различных вер еретиков не крестили кроме изверженнаго из святителства Игнатия патриарха. И паки. Темже убо аз смиренныи Филарет патриарх Московскиии и всея Русии с сыновы моими, положих и утверди завет и устав грядущим по нас сыновом и братиям нашим, иже аще будут Божиим благоволением, и всем церковником сущим под нами: се не новое предание введше, но древнее укрепляюще поновихом: и последующе заповедем святых апостол и святых отец. Дозде из соборнаго изложения.

Темже убо отсюду истинна утвердися: яко и священницы христианстии, по Никоне бывшем патриархе, оставшиися во благочестии, иже и лютое озлобление от новых учителей подъяша, за древле церковное благочестие. таковыя священники православнии, и старцы любомудрыя, и белцы с ними благоразсудителныя, якоже Питирим сказует соборне с Богом уставиша, последовать всем российским чюдотворцам, и истинным своим пастырем и учителем, по освященнаго собора изложению: еже всех к ним приходящих от ересей различных обращающихся ко православию истинныя христианския древлероссийския веры, повелеша всем, совершенно крестити вновь, в три погружения, по преданию и законению всея древлероссийския святыя соборныя и апостольския церкве: Как выше объявися от Пращицы Питиримом нижегородским епископом, и диаконом Александром, во ответех их 165-м и 58-м. и от других многих свидетелств достоверных, яко священницы древлероссийския святыя церкви, по Никоне патриархе, в церквах российских, по новым книгам крещенных, всех таковых обращающихся к ним в православную христианскую веру древляго благочестия, вновь совершенно крещаху. Кто же суть таковыя, 1: священник Иов, рукоположен патриархом Филаретом. 2: священноинок Досифей игумен Тихвинскаго монастыря [его мощи нетленны на Дону], рукоположен патриархом Иосифом. 3: Козма священник московскии. 4: Стефан священник белевскии. 5. Исидор поп козмодемьянскии по сказанию книги Пращицы, и по нем Феодосии поп, и по сих всех и прочия многия, приходящих к ним в православную веру, всех по Никоне крещенных паки, крещаху совершенно, а идеже не случахуся священницы древлеправославнии, в тех местех. понужди и простолюдини мужие благоговейнии, требующим истиннаго от них крещения, крещаху совершенно, яко и Пращица книга свидетелствует глаголя: крестил Феодор Токмачев; также и другия многия последующе соборному изложению, и прочим святым вышепредложенным: неимущим на себе истиннаго христианскаго крещения, и креститися желающим, таковым, и простолюдини крещение подаваху. Ибо и несвященником крестити, повеле отец правилное изречение: якоже о всех сих следующая глава явьственно покажет.

Hosted by uCoz