Симеон Денисов

 

Изъявление

в показание желающим уведати известно, о благочестии християнскаго закона,

еже за настоящую нужду, кроме священства,

и кроме видимых церквей, ныне в нас содержащагося.

И яко по которым священным писаниям, и правилным повелениям,

простолюдини сущии, и никоего же рукоположения священства имущии,

обращающихся от ереси в християнскую веру приемлем,

и на них же рука еретическая бяше первее, таковых приемлюще покрещеваем.

 

Предисловие

 

Понеже убо в настоящее се время мнози последнюю нашу грубость потязателно истязателно истязуют, и любоиспытно вопрошают, еже по которым священным писанием, и правильным повелением, простолюдини сущии могут обращающихся от ереси приимати, и на их же рука еретическая бяше первее, таковых простолюдини сущии како могут крестити? И аще простолюдини крещают, то без миропомазания и маслопомазания крещение како может быти совершенно? И благодать Святаго Духа, без молитв иерейских и без благословения простолюдином како содействовати может? О сем во оправдание наше требуют от нас со всяким испытанием опасно. Во укоризну же и в препрение нам предлагают от Номоканона 203 правило, еже о ложных священниках, такоже и о простолюдинах в нужду крестящихся изъявляется. Иже бо от ложных священник крестившыяся, глаголет оное правило, яко второкрещаются. от простолюдин же правоверных аще понужди не сущу священнику крестиша, обаче глаголет не второкрещаются, но крещени суть, точию глаголет аще не рука еретическая бяше первее. И сие правило в свидетельство предлагающе толкуют, яко бы запрещает простолюдину крестити после руки еретической, и крестящих под суд ложных священник подлагающе. И всякими зелными порицаниями гаждающе, и клятвенными запрещениями простую чадь весма устрашающе, аки священнодействия быти сие вменяюще еже крестити простолюдину после руки еретической. И прочая многа несогласна священным писаниям мудрствуют. Которое их суемудрие чюждо есть Христовы церкве православнаго учения. Отчего бо точию раждаются несогласия, и расколотворения, и православной церкви Христове многая оскорбления. Бывают бо по апостолу беседы злы, растлевающыя умы человеком, и лишают истины. И сим всем тако бывшим, и ныне содевающим ими же по премногу Божия церковь оскорбляется, и Дух Святыи досаждается, а народ верныи печалуем колебается, оправдания же от нас со всяким опаством от священных писании любоиспытно взыскуется. Тем же убо, нужно вменихом о своем благочестии, ко истязующим ны вспокорно отвещавати. И яко правость своего благочестия, правость спасительнаго устроения, святым крещением от Бога нам дарованнаго, всесмиренно и добросовестно, благоразумным слышателей слуховом, и очесем объявити понуждаемся. Верховнаго апостолом всепокорно послушающе, повелевающа сице: Будите готови ко всякому ответу, вопрошающему вы слово о вашем уповании. 1, Петрово послан., глава, 3.

Изъявити же всесмиренно потщимся: яко не гордости ради непохвалныя, не кичения ради богоненавистнаго, в таковая духовная действа вступаем, но ревности ради и любве древлецерковнаго благочестия, самех ради повеления Владычних и глаголом онем божественным повинующеся, законоположенная действуем. Видяще святых апостол, и святых отец правилная о том повеления, ведяще известно, яко в древлеправославней церкви кроме священства, и кроме видимых церквей в православных християнех сицевыя образы многажды быша, о чесом впреди явственно покажем. И яко достоверно о сем от священных писании уверихомся, яко действия наша законна и праведна суть. Убо и о новодействуемом крещении известно ведуще, яко надежду спасения о нем сомнително имети, отмен ради и новин богатоизобильствующих, яже в новотворимем крещении. Боязнь и опаство о сем имуще, яко да не новодействуемое крещение приемлюще, в нем действованыя новины понужди приимем, их же [си есть новин] церковь древлеправославная бегати повелевает, яко да в приятии новин, под анафему не подпадем, при которой искушения казни злыя сретают небрегущих о сем. книга О вере, глава 23.

Удобоятнаго же ради познания, грубое сие объявление начинающе, разделами сими располагаем, ими же и правость своего благочестия предлагающе, изъявляем.

1: Яко Господь наш Исус Христос рече о церкви своей, яко врата адова не одолеют ей.

2: Яко апостол Христов Павел, различныя чины в церкви Божии описует, сиречь апостолы, пророки, и учители, и в сих чинех во святей церкви несвященнии в нужди обретахуся, нужныя тайны совершающе.

3: Яко несвященным сущим еже крестити Господне повеление, и святоотеческое предание о том обретается.

4: Яко несвящении аще крещают, то благодать Божия совершает.

5: Яко крещение есть корень християнския непорочныя веры, яко твердое основание.

6: Яко некрещеннии не именуются вернии, ниже возмогут в царство небесное внити.

7: Яко еретическое в три погружения крещение неприятно есть, понеже оставляет их Дух Святыи смотрения же ради приятно бысть. Обаче не за истинное крещение быти веруется, но паче во осквернение вменяется. Ибо аще и приемлется, но вин ради благословных и нужных.

8: Яко аще и в три погружения еретицы крещают, то благодать Божия не совершает, и крещение оное еретическим нарицается, и крестившихся сим крещением мнози святии отцы священными правилы паки крестить повелевают.

9: Яко еретическое крещение не может истинным крещением быти, и приемлющии е за истинно не именуются християне правовернии, но лживии християне, и лживии правовернии.

10: Яко аще на них же рука еретическая бяше первее, таковых простолюдином крестити никоего препятьствия не обретается.

Сия вкратце предлагающе, в самое священных писании объявление востекати понуждаемся, моляще честныя и благоразумныя читатели предлагаемыя свидетельства милостивно прияти, и благоутробною кротостию прочести, с смиреномудрием христоподражателным благоразумно разсудити, излишняя же стязания и словопрения презирающе оставляти. Ибо апостол Павел стязании и словопрении блюстися заповедает, таковии бо [рече] раждают свары, а рабу Господню не подобает сваритися, но тиху быти ко всем, учительну, незлобиву, в кротости наказующу сопротивныя. И Бог мира да будет с нами. Ему же слава подобает, ныне и во вся веки, аминь.

 

Показание, 1.

 

Яко Господь наш Исус Христос рече к верховному апостолом: ты еси Петр, на сем камени созижду церковь Мою, и врата адова не одолеют ей [зач. 67]. Яко же вера святая православная не в стенах заключается, но в неразсудном сложении святых богодухновенных писании святоцерковнаго предания. Тако и святая кафолическая церковь не стенами и столпами утверждается, но верою православною, и житием благочестивым ограждающи сияет. Яко же Златоуст глаголет, в слове О предста Царица [Маргарит, слово 10]: Церковь бо есть не стены и покров, но вера и житие. [Выше:] Не стены церковныя, но законы церковныя.

И преподобныи Никон Черногорскии глаголет: Соборная бо церкви, не стены суть, но правая учения, и предания божественных правил, и святых апостол. Яко же рече Господь к верховному апостолом, ты еси Петр и на сем камени созижду церковь Мою, и врата адова не одолеют ей. Видели, кая есть соборная церкви? Сам бо великии Петр. Первее антиохийския многажды разрушены быша от язык. законы же и предания божественных отец и божественная правила пребывают неразрушена вовеки одержащих та. Тактикон, слово, 22.

Божественныи же Златоуст, в поучении на память Петра и Павла, июня в 29, сице глаголет: Петр  бо камень наричется, на нем же созда Христос церковь духовную, ей же врата смертная не могут одолети. Идеже сам Творец основание положи, и стены возгради верою. кто возможет ей противитися? к той бо верою всяк притек спасется. К той братие прибежим, ту всех грех отпуст приимем. ту исцеление страстем получим. ту веселия и радости насладимся. Пролог, лист 588.

В книге же О правой вере, во главе, 8 [лист 65], о власти апостол пиша, сице и о церкви свидетельствуется: Отвещают ли противнии на вышереченная словеса, яко Христос на Петре церковь созда, и яко ему поручи пасти своя овцы? Но сие вкратце помощию Божиею объявим. Первее положим Христова словеса: Ты еси Петр и на сем камени созижду церковь Мою. Петровым именем камень толкуется; или от камене камень, всяк верныи, человек разуметися имать. и на всяком на таковом яко на камени церковь свою Христос создати обеща. Стих. На камени мя веры утверди. Святыи Абросии. Второе толкование имене. Петр святыи апостол, имать быти разумен, и не точию сам Петр, но и друзии апостоли таковыми же суть каменьми, мнози учителие от святых тако разумеют. Третие сказание, камень имя, иже по гречески Петра, а не Петрос, сам Христос разуметися имать. [ниже] Четвертое сказание, яко Петровым именем, сиречь каменем, вера, или исповедание от Петра реченное разумеваемо имать быти кая вера; от Христа каменя каменем есть реченна. [ниже] Ты еси Петр, и на сем камени созижду церьковь Мою; сиречь, на вере исповедания. еже исповеда, ты еси Христос Сын Бога живаго. и на том исповедании созда Христос церковь свою, еже есть вернии людие, во имя Его крестившиися. Святыи Феофилакт в толковании рече, сие исповедание еже исповедал еси, основание будет верующим в Мя, тако, яко всяк человек иже восхощет дом веры созидати, то основание должен есть положити. И во главе 8. о власти апостол пишет, сице глаголя: Поручает Христос Петрови агньцы своя, иже и Петра пасяше. Сего ради братие, со вниманием слышите, яко овцы Христовы есте. зане и мы с боязнию слышим, паси овцы Моя. [ниже] [во Иоан. бесед 124] егда речено бысть Петрови, дам ти ключа царства небеснаго. и аще что свяжеши на земли; соборную знаменоваше Петр церковь, иже создася на камени, отколе и имя сие стяжа Петр. не от Петра, камень, но от камене Петр. и яко не от християнина Христос, но от Христа християнин; Сего ради глаголет Господь, на сем камени созижду церковь Мою, яко Петр рекл, Ты еси Христос Сын Бога живаго. Того ради церковь иже основася на Христе, ключа от Него царства небеснаго прият в Петре; сиречь власть вязати и решати грехи. еже бо свое Христу есть церковь, сие являет Петр в камне; им же разумеется Христос камень, а Петр церковь. И божественныи Златоуст, в слове на пятьдесятницу [О вере, глава 2, лист 19]. Вельми бо церковь Богу возлюбленна есть. не сия иже стенами ограждена, но сия иже верою ограждена. [ниже] [лист 22] И понеже по апостолу, вы есте тело Христово, и уди отчасти. яко церковь есть тело Христово, яже от собрания верных нас глаголю человеков всякаго возраста сана, святых Божиих и праведных мучеников, и преподобных. и всех благочестивых от веков составися, и церковию наречеся. И егда слышим в писании, церьковь гонение терпит, с церьковию брань. не о стенах и мурах, но о верных Божиих разумети потреба. вкратце помощию Божиею яко церковь от начала мира в гонении есть, и непобедима пребывает, от божественнаго писания показати право судихом. Дозде из книги О вере.

Той же паки [Беседы, лист 430]: Аще бо церковь раскоповати, люто и непреподобно. колми паче храм духовныи. ибо человек от церкве есть честнейшии. ибо не стен ради Христос умре, но храмов сих ради. человек церковь духовная. Беседы, лист 437.

Такоже и в Катихисисе Болшем, во главе, 25-й [лист 118]. Вопрос: Что есть церковь Божия? Ответ: Церковь Божия есть, собрание всех верных Божиих, иже непоколебимую держат едину православную веру. и в любви пребывают, облобызают учение евангельское непоколеблемое. и иже суть достойни приимати святыя и божественныя  и совершенныя тайны. И иже суть под единою главою Гоподем нашим Исус Христом. а под правлением совершенных святых от Него поставленных. и иже в законе християнском пребывают незазорно. а не яко лицемерии творят, к ним же Господь глаголет во евангелии, еже от Матф. сице рече, что Мя искушаете лицемерии. Дозде Катихисис.

А о управлении церьковнем Златоуст святыи, сице глаголет [Маргарит, 1]: Что се пастырь не предстоит, и овца со мнозем благочинием стоят. и се исправление пастырево есть, еже не точию ту сущу, но и не сущу ему, всяко показати тщание пасомым. о безсловесных убо егда иже на паству изгоняи несть ту пребывати внутрь ограды, овцам. или кроме пастыря от ограды изшедшим, много подъимати заблуждение. зде же ничтоже от сих. но и несущу паствующему, ко обычным паствам со мнозем приидосте благочинием, паче же и пастырь предстоит. аще и не плотию, но предложением аще и не пришествием телесным, но благочинием стада. И сего ради паче тому удивляюся и блажю, яко толико тщание вложити вам возможе. ибо и воеводе тогда наипаче чюдимся, егда и не сущу ему, воиньства благочинствуют. Сия и Павел о ученицех искаше глаголя. Тем же возлюбленнии мои, якоже всегда послушасте, не яко в пришествии моем точию. но множае паче, ныне во отшествии моем. яко ту сущу убо пастырю, аще приидет волк к стаду, удобь отгоняем есть от овец. не сущу же ту, в болшем подвизе овцам устроятися нужда, никомуже сущу загражающу их. Дозде Златоуст.

А о епископстве, Алексей Аристин, в толковании на правило апостолское, 58, сице объявляет [Кормчая, глава 30, лист 16]: И великии апостол Павел учительну и трезву епископу быти заповедает, сиречь трезвящуся и бдящу, а не ослаблену и лениву. ибо и имя епископское на трезвение того воздвизает. епископ бо холм высок нарицается; на нем же стража бывает. и аще кто на нем верху стоя стрежет и смотрит семо и овамо, епископ сей нарицается, сиречь стражь. или смотритель, да стражеви убо или смотрителю бдети подобает, а не ленитися. Дозде от толкования.

Премудрыи же богословец, преподобныи Максим Грек, явственно показует, како апостольское величество и область состоится и познавается якоже глаголет сице [книга Кирилова, лист 371 на обор.]: Не бо от оград, или от престол апостольское величество и область состоится. но от догмат правыя веры, и сожития божественнаго, апостольскими и отеческими учительствы управляемо есть, и познавается. зане ниже врача убо наречем, дондеже праве мудрствуем, иже ризами врачевскими одеян вне уду. ведения же врачевскаго не имать согласно одеянием, и ведящаго свидением, по преданием премудрейших врачев, иже прежде его бывших, того наречем врача. и ко исцелению недугов призываем. аще о своем здравии попечение имеем. Дозде святыи.

Явственнейше же показуется сие от Номоканона, еже афонстии отцы о духовникох изъявляют сим образом [Номоканон, лист 71 и 72]: Иже помышления человеческая приемлют, врачев искусных чин содержат. знающих на недужных подобная наводити былия. аще убо кто есть священник, неискусен же, а другии несвященник, искус же имея духовнаго деяния. сему паче священника праведно есть помышления приимати, и правильно исправляти. Дозде Номоканон.

Избранныи же сосуд Христов апостол Павел, к кориньфом пиша, различныя чины в церкви Божии описует глаголя: Положи Бог в церкви, первое апостолы, второе пророки, третие учители. Послание к коринфом, 1 зач. 153.

Но в сих трех чинех во святей Божией церкви несвященнии в нужду обретахуся, нуждныя тайны совершающе. О чесом во 2-м показании пространнее изъявится.

И в Катихисисе Малом, на листу, 35-м сице пишет: Тако убо потреба ведати, яко ни един на священство нерукоположенныи, и ни таин строителем быти не может. разве некоторых нужных случаев таин. Дозде Катихисис.

А нужныя тайны тем же есте две: крещение, и покаяние, еюже кроме несть леть спасения получити, по свидетелству блаженнаго Гавриила архиепископа Филаделфийскаго [книга о 7 тайнах]. О чесом в 4-м показании пространнее изъявится.

И сия вся вышепредложенная свидетелства, яже о церкви, и о управлении ея, о епископех же, и о различных трех чинех церковных, яковыя в церкви Божии самем Богом положишася, такоже и о нужных тайнах церковных свидетелства предложихом. И яко церковь Христова до скончания века пребывает по словеси Христову: обаче не о стенах, но о законах церковных от Христа глаголемо есть. Тако о церкви духовной долженствует вероватися по словеси Златоустаго отца [Пролог, лист 588]. И яко не от престол пастырских познавати ю научаемся, но от догмат правыя веры, и сожития божественнаго, апостолскими и отеческими учителствы управлятися и познавати ю, по премудрому Максиму глаголющу [Максим грек о Святем Дусе в книзе Кирилове, лист 371]. Тако же и епископа не риз ради и сана величества нарицати, но иже пастырскую ревность имущаго и твердость своего стояния всекрепко показующаго, нарицати епископа. Яко ниже врача нарицати, иже ведения врачевскаго не имущаго, ризами же точию красящагося, но иже искус врачевания имущаго, и врачевания полезная творити могущаго. Тако ниже духовника священством точию одеявшагося имети, духовнаго же действа правилно не могуща действовати, но иже искус духовнаго действа имущаго, аще и не священника, но наказана суща в божественном писании, и искусна суща в духовном разсуждении, и ведяща добре правилная повеления, и могуща врачевати язвы греховныя, таковаго имети подобает духовника законна суща и правилна. Так же и о церковных чинех, самем Богом поставленых, не о единех священных лицех непщевание имети, но и о простолюдинех. Яко и онем в церковных чинех в нужду место имети долженствует, и нужныя тайны строити им правилно и законно есть. О чесом грядущими показаниями послежде пространно изъявится.

И сия вся о церкви духовной свидетелства предложихом. обаче не о стенах, но о законах церковных свидетелствуется. О стенах же церковных Златоуст святыи тако глаголет [Маргарит в слове О предста Царица]: Стены леты, обетшают а церкви никогда же стареет, но паче юнеет. стены варвары разоряют, а церкви ни бесове не преодолеют. Толико бо рече имать величество церкви, ратуема, побеждает. наветуема, одолевает. досаждаема светлейши устрояется. приемлет язвы но не испадает от язв. волнуется но не погружается обуревается но потопления не подъемлет и чесо ради [Бог] попусти на ню брани. яко да покажет светлейшую победу. Колицы рече ратовавшеи, церковь. и ратовавшеи ю погибоша. тая же выше небес взыде. И прочая яже в слове О предста Царица пишется явственно. Но зде сия оставляем.

Прочее же о пастырех настоящаго сего века, и правителех видимой церкви, свидетелства предложити хощем. Понеже убо в настоящее се время по божественному писанию познавается, яко пастырие века сего волки быша. Их же обличая великии Златоуст, сице рече [Маргарит лист 590. слово 13 О лжеучителех]: Тем же и волцы нарекошася от пророк, и от самого Христа. и не точию волцы, но и казителие нечестивии. и противницы, и врази, и наветницы, и хулницы, и лицемерии, и татие, и разбойницы, и лжеучители, и лжепророцы и наставницы слепи, и блазнители, и прелестницы, и лукавии противницы Христови, и сынове лукаваго диявола. и духоборцы. охулившеи Дух благодатныи. им же не отпустится ни в сии век, ни в будущии. Ими же путь истинныи хулитися имать. К сему же чада лукаваго диявола, яко же Господь к ним рече  вы отца вашего есте диявола. И Богослов Иоанн. ведома рече суть чада диявола. Дозде Златоуст.

Тако и Мелетии патриарх Александрийскии, в посланиях своих до белорусцев писаше, паче же в 10-м послании своем обличая их сице глаголет: Яко пастыри наши отступиша, или заблудиша, яко и нам не мощнося без них сохранити? но несть тако, несть. мощно бо быти без них. Зане сам Бог их из церкве изгнал и обезчестил, понеже недостойне тыя престолы содержат, и то имя на себе носят. и не мни яко слава им се но безчестие, и вечное отпадение Христа, и святых Его. Се же ти покажем не нагими словесы, но писанием. Яко сии не быша пастыри, ниже учители. ниже вернии. но быша блазнители, прелестницы, и разбойническии престол силою имения злата, и сребра и человеческою помощию и ухищрением восприяша. да имением а не церковию владеют дирою влезли а не дверьми по Христову словеси. И прочая, яже к Василию князю Острожскому пиша явствует.

Обаче учитель вселенскии Иоанн Златоуст, в беседах на послание к Тимофею 2, в главе 1, на зач. 291, в нравоучении 2-м, сице глаголет [Беседы апостол. лист 2508]: Яко подобает повиноватися учителем, и священником, и не судити их, аще и житие имут укорно. аще же о вере погрешат, то не подобает повиноватися им но и отбегати и судити их. Дозде Златоуст.

Свидетельствует же сему и древлегреческая книга, в Завещании святых апостол, кафолическаго учения, 1 книги, во главе 19, о неправомудрствующих пастырех сице глаголюще: Сужду и мирянина к мирянину и князя ко князю. словесны бо суть овцы и овны сии, а не безсловесны. да не когда речет мирянин яко аз овца есмь а не пастырь и никоего словесе о себе сотворю, но пастырь да узрит, и той сам истязан будет о мне в день суда. Но якоже бо доброму пастырю не последующее овча, волком предлежит во истление: сице и лукавому пастырю последующее явлену имать смерть, яко пояст е. тем же бегайте губительных пастырей. Дозде от Завещания.

Но понеже убо, аще пастырем нашим отступльшим и заблуждьшим, а нам овцам мощно ся без них сохранити. И яко злых пастырей бегати и судити их долженьствует, тем же убо и самем овцам созидати праведно и законно, о чесом и святии учителие церьковнии научают ны явственно. Святыи учитель вселенскии Иоанн Златоуст научает глаголя [Беседы апостол. лист 3072, нравоуч. 30]: Не убо вся на учителей возметайте. не вся на наставники. можете и вы друг друга созидати. И паки к ефесеом пиша глаголет: един другаго созидайте, якоже и творите.

И паки [Маргарит лист 158 на обор.]: да не речеши в себе, мирскии есмь человек, жену имам, и дети. сия иерейская суть, сия иноческая. ни бо самарянин он сицевая рече, где ныне суть священницы, где фарисее, где июдейстии учителие? но якоже некии лов велик обрет, тако восхити прибыток. [ниже] Аще бо излиеши нань яко же елей словеса учительства, аще обяжеши тихостию, пожданием; аще уврачуеши, сокровища всякого богатейша тя той соделает. изводяй бо честное от недостойна, яко уста моя будет. Что убо будет сему равно. еже ни пост, и низу легание, ни всенощное бдение, ни ино что могут соделати. се брата твоего спасение творит. Помысли своя уста, колико многажды согрешиша, колико провещаша скверная глаголания, колики укоризны изнесоша. и всяко аще восприимеши падшего исправление, ради единаго сего исправления, всю возможеши очистити скверну ону. И что глаголю очистити, яко уста Божия сотвориши своя уста. Что сей убо будет равно чести. еда бо аз сия обетовая. сам Бог сие рекл есть. яко аще и единаго кого изведеши рече, яко уста Моя будут твоя уста. чиста, свята. Дозде Златоуст.

Преподобныи Никон Черногорскии глаголет [слово 8]: Аще убо видиши кого требующа душевнаго и телеснаго исцеления. да не речеши в себе, почто он сица, и он сица не исцели его; или яко аз мирянин есмь, жену и чада имыи. сия священником и иноком. Рцы ми убо, аще обрящеши злато лежащо, еда речеши в себе, почто он сица, и он сица се не взят; никакоже. но тщишися прежде инех похитити. сице и о падших братии помышляй. и непщуй сокровище быти, еже о онех попечение. Дозде святыи.

Божественныи же Златоуст по Павлу апостолу глаголет [филипписеом, зач. 241, Маргарит слов 1, лист 1 обор.]: Тем же возлюблении мои, якоже всегда послушасте, не яко в пришествии моем точию, но и множае паче, ныне в отшествии моем. яко ту сущу убо пастырю, аще и приидет волк к стаду, удобь отгоняемь есть его от овец, не сущу же ту, в болшем подвизе овцам устроятися нужда, никому же сущу заграждающу их. и к сим же ту сыи убо разделяет с ними яже о тщании мзды. не сыи же, наго оставляет, тех быти исправление.

И прочая яже в 1-м слове О непостижимом пиша явствует, ему же и начало слову сицево: Что се пастырь не предстоит, и овца со мнозем благочинием стоят. Маргарит, лист 1. слово 1. О непостижимом.

Сим являет: овец и кроме пастыря со мнозем благочинием стоящих. Их же и в болшем подвизе устроятися утверждает поучающе.

Мелетии же патриарх Александрийскии похваляет малороссиан отступльших от своих пастырей новин ради, и глаголет сице [книга Кирилова, 5 послание Мелетия]:  Мужие российстии, благочестия воспитание. чюдо (рече). како укрепи вас Божия благодать, от епископов ваших, ох прелести! нынешних возлюбивших век. [ниже] вы бо рече приясте пастырьскую ревность. и злых пастырей отлучистеся. иже благочестия отступлших. И прочая: яже в 4-м послании до белорусцев пиша явствует.

И от сих достоверных свидетелств зрится, яко аще и не сущу пастырю, обаче со мнозем благочинием овец стояние похваляется, и пастырская ревность в сицевых утверждается повеление. И за еже яко отлучившеся от злых пастырей, и пребывают содержаще благочестие, похваляются, яко благодатию Божию укрепляеми суть.

И аще сицевая святых отец в древлеправославной церкве свидетелства обретаются, яко не священником точию, но и всякому православному християнину о исправлении падших попечение имети заповедают. И аще отлучившияся от злых пастырей, и содержащыя благочестие похваляются, яко убо благодатию Божие укреплями суть. И аще не сущу пастырю, но в болшем подвизе овцам устроятися повелевается. И аще не предстоящу пастырю, и овец со мнозем благочинием свидетелствуется стояние. Аще ли же и пастырская ревность в сицевых сказуется. Аще же и епископа, не иже сана величеством в преимущество взимающагося, но иже пастырскую ревность имущаго, и твердость своего стояния всекрепко показующаго, и стражбою и прилежным смотрением, и наблюдателством, опасна нарицает епископа. Тако же аще и в различных церковных чинех, сиречь, во апостолех, в пророцех, и во учителех несвященнии от Бога положишася. Аще ли же и нужныя церковныя тайны несвященным правилно повелевается действовати. Аще ли же убо и не священнии, но искус знающии духовнаго деяния, и сим паче священника [праведно есть] исповедания приимати, и правилно исправляти заповедуется. Тако же и церковь Христова до скончания века проповедается быти, по словеси Христову, не чювственная, но духовная: яко не стены церковныя, но законы церковныя. Аще и апостолское величество и область не от оград, ниже от престол, состоится, но от догмат правыя веры, и сожития божественнаго, апостолскими и отеческими учителствы управляемо есть, и познавается. Аще ли же убо и собрание всех верных нарицается церковию.

Убо по сицевым древлецерковным свидетелством и ныне, и даже до скончания века, православнии христиане аще и не священнии, обаче могут нарицатися церковию. И отлучившыяся от злых пастырей, и содержащыя благочестие не повинни суть. Имже и нужныя тайны церковныя строити праведно есть. Та же и пастырскую ревность приимати, и в болшем подвизе устроятися нужно есть. Аще и не предстоящу пастырю, но со мнозем благочинием стояти и усердствовати весма долженствует, и обращающихся от всякаго нечестия приимати, и пожелающих святаго крещения сподоблятися, спасително есть, яко вещь есть кроме всякаго богословскому таинству нарушения, и кроме всякаго благочестию повреждения, и кроме всякаго правилнаго запрещения.

И яко отнюд кроме всякаго несогласнаго Христовой церкве новшества, и отнюд кроме всякаго благочестию повреждению, и правоверными христианы нужныя тайны по правилом повеленныя действуются убо не противно есть церкве православной содержанию, но согласно и благоприятно может быти церкве Христовой тайнодействия. Божественному бо Златоусту повелевающу творити благочестия не вредящая, яко же к колосаем в 1-й беседе глаголет явственно: Все твори, кроме еже благочестию повредитися.

И понеже убо яко християнским тайнодейством крещения утверждается и совершается наше хрситиянское благоверие, о том святии учителие церковнии показуют явственно.

Святыи Иоанн глаголет: Крещение есть корень християнския непорочныя веры, яко твердое основание. Книга жития Иоасафова, глава, 8.

И святыи Богослов Григории глаголет: Крещение есть утвержение вере и извещение. В слове 2-м, на святое Просвещение.

И по сицевым святых отец свидетелством показуется, яко святое крещение отнюд не повреждает благочестия, но яко корень и основателное утверждение християнскаго благоверия. И творити яко благочестие невредящее по Златоусту долженствует. Сицевое тайнодейство крещения. свидетелствуется быти до скончания века. О чесом святыи Иоанн евангелист во Откровении виде знамение на небеси, яко жена облечена в солнце, и луна под ногама ея, и на главе ея венец от звезд двою надесяте, и во чреве имущи вопиет болящи и страждущи родити. И по толкованию: Женою нарицает церковь Божию, облеченную в солнце праведное Христа Бога нашего, и луна под ногама, ветхии закон под ногама имущи. и на главе ея венец от звезд 12-ти, сиречь 12 апостол учение имущи, вопиет болящи и страждущи родити. сиречь претворящи крещением плотския и духовныя. И роди сына мужеска пола. И по толкованию: Всегда Церковь крещением Христа рождает. И прочая, яже во Апокалипсисе о церковных прогонениях горчайших при антихристе предвидения быти поведает.

Видели церкве Христовой непоколебимое пребывание, разумели Божией благодати укрепление, како во время нужды и гонителных случаев действа и законы церковныя соблюдаемы бывают и кроме видимых церквей. И тако Христова церковь духовная с верными християны повсюду на всяком месте богоугодная действа может исполняти. И яко древле во время нужное пребываше, тако и ныне, и даже до скончания века может пребывати. Ей же врата адова не одолеют по словеси Христову. Матфей зач. 67.

 

Показание, 2.

 

Яко апостол Христов Павел, в послании к кориньфом пиша, различныя чины в церкви Божии описует глаголя: Положи Бог в церкви, первее апостолы, второе пророки, третие учители. Послание к кориньфом, 1 зач. 153.

Но в сих трех чинех во святей церкви яко же священницы быша, тако и несвященницы в нужди обретахуся. Якоже Номоканон утверждает: Ибо Господь наш Исус Христос многим апостолом священства неимущим повеле крестити. Номоканон о священницех, лист 65.

Несвященицы быша во пророцех яко дщери четыре Филиппа апостола бяху прорицающе, Деяние апостольское, глава 21, зач. 45. Несвященницы быша во учителех, по правилу апостола Павла: учитель аще и мирскии человек будет искусен слову учения, и нравом чист, таковыи да учит, будут бо рече вси научени Богом. Правило 15.

И сии вси якоже священницы, тако и несвященницы действующе, единыя церкве, единыя веры бяху. Тем же сия вкратце предложивше, пространне самая словеса святых писании, самыя вещи действования нерукоположенных на среду приносяще объявляем.

В Деянии апостольских в главе 8 сказует [зач. 17]: Бысть же в той день гонение велие на церковь Иеросалимскую. вси же разсеяшася по странам июдейским и самарийским кроме апостол. [ниже:] Филипп сшед во град самарийскии проповеда им Христа. [ниже:] и егда вероваша Филиппу благовествующу яже о царствии Божии, и о имене Исус Христове, крещахуся мужие и жены, и прочая. Но Филипп сей по толкованию учителей диакон бяше, не олтарю, но трапезам, яко 17 зач. Деяния утверждает, и святии учителие церковнии изъявляют. И аще Филипп не священник сыи, крести Самарию, еще же и евнуха на пути. Обаче едина церковь, едина вера бяше, иже во Иеросалиме во апостолех, сия и в Филиппе крестившем, и в самарянех, и в каженице крестившихся.

Святыи апостол Анания, еще в дияконех сыи, крести Павла апостола, оскудения ради презвитер. Якоже Златоуст в толковании на зач. 21 Деянии изъявляет.

Обаче Анания крестив Павла, не повредив ниже веры, ниже апостольства. И Павел крестився не умали благодати крещения, но паче умножи от усердия многаго. И оба, Павел и Анания, тояжде веры, тогоже апостольства, и быста, и глаголютася.

Святая же равноапостольная Фекла, ученица святаго апостола Павла, понужди сама крестися, и потом послана святым апостолом Павлом учити люди и иныя крести, о чесом в житии ея повествуется.

Святая Мариамия, сестра благовестника Филиппа, ходящи со апостолы, Филиппом и Варфоломеем, посем в Ликаонию шедши, проповеда слово, и многия крести, о чеслом в Пролозе, февраля в 17 день, изъявляется.

От сих достоверных свидетельств показуется, яко при апостолех яко священницы учаху, так и несвященницы учаху. И яко священницы крещаху, так и несвященницы мужие же и жены в неприсудствии священник крещаху. И якоже во Иеросалиме, и во иных местех, идеже священницы обретахуся, вера православная и церковь святая бяше, тако и в Самарии и Дамасце и в Ликаонии, без священников, таже православная вера бяше, таже православная церковь стояше. И аще при апостолех по местом вера православная и церковь без архиереов и священников стояше, убо явственно есть, яко вера православная и церковь святая кроме архиереов и священиков во время гонения и нужды может пребывати.

По апостолех же в прилучающихся гонениях, колицы места и грады без священников обретахуся, егда мужие и жены крещаху. И толико оскудение священников бе, яко святому Галактиону, крестившу святую Епистимию глаголати: священство погибе отрода христианска. Минея четия, ноября, 2-е, в житии святаго.

И святыи мученик Потии цареву дщерь крести. Поне же невозможно бяше в то время обрести иерея. Минея четия, июля, в 1-й день, в страдании святаго.

И святыи Феофан, иже во Антиохии сам ся крести, и блудницу научив и крести. В Пролозе, июня 12.

И в житии святаго Конона: Понеже от всех цветяху чудеса, и мног народ от Исаврийския страны обращающеся ко Исусу Христу, исповедающеся, и крещахуся святым Конаном. Минея четия, марта, в 5-й день.

И в житии святаго мученика Христофора: Две убо жене блудницы кающыяся прият, и прощение подаде. Минея четия, маия, в 9 день.

И в житии святаго мученика Кондрата: Святыи мученик Кондрат Никомидийскии отступлших христианския веры поучив обрати к покаянию. кающихся их прием, и помолився Богу прилежно да приято будет обращение их. Минея четия, марта, в 10 день.

И в житии мученицы Дорофеи: Святая мученица Дорофея, премудрая дева, двух жен Христину, и Калисту, отвергшаяся Христа, поучивши, и паки к правой вере обрати. и даде има покаяние. и помолився Богу о них, да простит согрешения ею. Минея четия, февраля, в 10 день, в страдании святыя.

И инии безчисленнии нерукоположении, и крестиша, и крестишася яко же жития святых и Прологи объявляют, и новопечатная книга Жезл на листу 49, и прочая доволно о сем извествует.

Еще же в гонителныя случаи православнии християне церквей не имяху, яко же свидетелствует Баронии, в лете Господнем 201: Яко христиане церквей во оно время не имеяху. Дозде Баронии.

И святыи Василии Великии, о гонении арианском, к западным епископом пиша глаголет [Епистолия 1]: Людие церквей не имеют, и на полях пустых собираются. Увидели бысте великую нужду, жены и дети, старии, и малии, на дожде и снезе, на ветре зимою, а лете на зною солнечном, под единем небом пребывают. И сия тягости терпят ради того единаго, дабы кваса арианскаго прияти не были принуждены. Дозде Василии.

В сих убо гонениих колицы народи, и крестившыяся и крестившии, не имяху видимых церквей. Еда не в православней вере живяху? Ей в православней. Еда не во святей кафоличестей? Ей в кафоличестей. Еда не совершении христиане? Воистину совершеннии. И не точию кафолическия церкве сынове бяху, но и от воинствующия церкве, к ликующей на небо, яко во свое отечество свято преселишася.

По гонителных же случаех, во время мира церковнаго, преподобнии отцы в пустынях поселившеися, елицы отшелницы, елицы безмолвницы, елицы скитницы быша, не имуще священников, не имуще архиереов. О них же преподобныи Ефрем Сирин глаголет: Не закон разоряют, не приемлюще священство держати. И паки: Церкви имут языки своя, ими же совершают молитвы своя прилежныя. И паки: Сами суть священницы себе. В книзе Ефреме, слово, 111.

И сии святии и преподобнии отцы не имеша священства и церквей рукотворных, но церкве соборныя чада быша, и глаголашася, и сами себе священницы нарекошася.

Яко же выше назнаменовахом, несвященнии крещаху, тако же нерукоположеннии и во время мирное исповедание кающихся приимаху, и души человеческия очищаху. О чесом ниже представляемая свидетелства являют.

Святыи Антонии Великии, не имеяй священства, многи приходящыя к нему поучаше, и помышления приимаше, и образ иноческии Павлу препростому подаде [Минея чет. генваря, 17].

Святыи Пахомии Великии, не священник сыи, монастыри многи собрав, помышления братии приимаше, и отвергшагося Христа страха ради на покаяние наставив [Минея чет. маия, 15].

Святыи Сава Освященныи, еще до поставления во священство монастырь создав, и братию собрав помышления их приимаше [Минея чет. декабря, 5].

Святыи Иоаникии Великии, не священник сыи, помышления исповедающих приимаше. Еще же и от иконоборной ереси некоего отступлша на покаяние прият, совершенна християнина быти устрой.

И что много приводити: исполнены сих образов Патерики, исполнены отеческия книги. Иже не токмо велико подвижным отцем, но и братии своей помышления и прилучающыяся напасти от бесов исповедати поучают. Всегда чисту и душю и совесть моляще повелевают.

И аще святии сии, не имеша священства и церквей рукотворных но церкве соборныя чада нарицаются, и сами себе священницы быша. Аще нерукоположеннии нужныя церковныя тайны совершаху. Аще в гонительныя случаи вернии мнози священства и церквей рукотворных не имаху. Аще при апостолех по местом священников не бяше. Аще нерукоположении по апостолу, в чинех церквей, во апостольстве, и учительстве, и пророчестве от Бога положишася.

Убо во время нужды гонительных случаев церков и вера православная может и кроме священства пребывати.

Тем же убо, иже древлеправославное благочестие лобызающии, и за гонение, или иных ради вин благословных, не имуще рукотворных церквей, не имуще священников, нужныя случаи таин действуют. Не противятся словесем Христовым и святых апостол, и святых отец, но и зело соглашаются. Яко таяжде действа тыяжде нужныя случаи, яже от святых апостол, и святых отец, и повеленныя и действованныя совершают, и во время нужное совершают. И яко не гордости ради ни кичения, но спасения ради душ своих. Слышаще сосуда избраннаго апостола Павла глаголюща: Не высокая мудрствующе. носмиренными ведущеся. К римляном, глава 12, зач. 110.

 

Показание, 3.

 

Яко несвященным сущим крестити Господне повеление бысть, и святоотеческая правильная повеления обретаются.

Священныи и богогласныи евангелист Матфеи благовествует нам еже по божественнем Христове востании бывшее, иже в зачале 116, глаголет сице: Едини надесяте ученицы, идоша в Галилея гору. аможе повеле им Исус. и видевше Его поклонишася Ему, овии же усомнешася. и приступль Исус рече им глаголя, даст Ми ся всякая власть на небеси и на земли. шедше научите вся языки крестяще их, во имя Отца, и Сына, и Святаго Духа. учаще их блюсти вся елика заповедах вам. и се Аз с вами есмь во вся дни до скончания века. аминь.

На сия Христова словеса Феофилакт святыи толкование творит сице [Благовестник от Матф., зач. 116, лист 203 на обор.]: Едини надесяте ученицы верьховнии, с прочими всеми последующими Христу, поклонишася. овии же усумнешася; еже глаголет усумнешася? сиречь, мняху о Христе, или Той есть, или несть; и паки еже глаголет, усумнешася нецыи от них? являет же се; сиречь нецыи, яко от прочих седмидесятих, усумнешася о Христе, напоследок же и тии уверишася. [ниже:] Яве бо, яко ко всем языком посла их, заповедав крещати их, во имя Отца, и Сына, и Святаго Духа. [ниже:] Разумей же Господне глаголание како оба верха християнскаго благочестия содержит богословие, и действенную добродетель. рекшу бо. яко подобает крещати во имя Троицы, богословие нам предаде. рекшу же нам учити, и заповеди соблюдати, действительную нам добродетель показа. творя же их не боятися, понеже в языки посла их, и в напасти и закалания, рече им не бойтеся. Аз буду с вами, до скончания века. [ниже:] Не токмо же убо апостолом обещася с ними быти, но и всем верующим вонь, и заповеди Его хранящим, небо жити апостоли до конца века имяху, и нам учеником своим обещается сей. Дозде Феофилакт.

Божественныи же Златоуст сице [Беседы апостол. к фесал. глава 7]: Слыши Христа глаголюща ко учеником: шедше научите вся языки крестяще их, во имя Отца, и Сына, и Святаго Духа, и се Аз с вами есмь во вся дни до скончания века. Не убо точию ко оным сия рекошася, но и к нам. яко не оным точию обещася, явлено есть от еже рещи до скончания. но и к шествующим по стопам оных. Дозде Златоуст.

Такоже и Алексей Аристотель [Аристин?], в толковании на правило апостольское 49, толкует сице глаголя [Кормчая, глава 1]: Господь наш Исус Христос посылая ученики своя на проповедь рече: шедше научите вся страны, крестяще их, во имя Отца, и Сына, и Святаго Духа; Всякому убо правоверному по сему повелению достоит крестити, в три составы, единаго безначалнаго Бога. Дозде от толкования.

Еще же и Номоканон афоньскими отцы составленыи, свидетельствует сице: ибо Господь наш Исус Христос, многим апостолом священства неимущим повеле крестити. Номоканон о священицех, лист 65.

И сия убо словеса Христова повеления, не единем освященным апостолом тогда сущим бе, но и несвященным многим, таже и всем верным взаконеваема суть. Зане сам Христос Бог учеником своим рече, а еже вам глаголю, всем глаголю, сиречь всем верующим во имя Его. И сицевая Его Владыки божественная повеления, ученицы Его апостоли приемше, обращающихся в християнскую веру крестиша во имя Отца, и Сына, и Святаго Духа. Якоже евангелист Иоанн, во главе 4-й, свидетельствует глаголя, Исус же сам не крещаше, но ученицы Его. Дозде евангелист.

Крестиша же яко священнии, так и несвященнии, по повелению Господню. И не бо оваго от нечестия крестиша священнии едини, оваго же несвященнии, но вси едино повеление от Владыки Христа приемше, едину благодать и дар Святаго Духа на крещение верою имуще. Того ради и обращающихся от всякаго нечестия, и языческаго заблуждения безразделно крестиша [Златоуст в неделю праотец лист 323, и 350 и Катих. Бол.].

Суть же и ина многа святых отец правилная повеления яже в неприсудствии священник простолюдином верным сущим, и церковная предания право мудрствующим, взаконевают крестити. О чесом ниже представляемая свидетелства являют.

Блаженнаго Гавриила архиепископа Филаделфийскаго о 7-ми тайнах церковных краткое собрание от божественнаго писания: Ведати подобает яко не сущу священнику, а приключшися нужди, может и иеродиакон и диакон крестити, и людин христианин. любо жена, любо муж. прием воду, крещая младя и глаголет: крещается раб Божии, имярек. или раба во имя Отца, и Сына, и Святаго Духа.

Чти канон Никифора патриарха Цареградскаго, тако писанныи [Севаст Арменополь сечение 5, о людинех]: яко по обстоянию инок прост, тако же и диакон крестити может.

Еще Августин святыи к Фортунату пишет глаголя: яко нашедшей нужди и потребе, обыкоша людяне подаяти крещаемым крещение.

И паки: Яко подобает не крещенныя дети, аще кто обрящется на месте не сущу священнику крестити. да аще окрестит и свой отец, или яковыи убо человек, церковная предания право мудрствуяи, несть греха.

Еще же и в Номоканоне, видом вопроса и ответа сице явствует: Вопрос. Елико аще крещают несвященнии, мужие же и жены, или иноцы, что достоит творити? Ответ. Аще умрет крестивыися прежде нежели постигнути священнику божественная благодать совершает и. Аще ли жив будет, да поставит и священник в купель. и молитвы и мvро по обычаю творит. тожде и Никифор патриарх Цареградскии глаголет. Дозде Номоканон.

Катихисис Малыи лист, 35: Тако убо потреба ведати, яко ни един на священство не рукоположенныи и ни таин строителем быти не может. разве некоторых нужных случаев таин.

Гавриил архиепископ Филаделфийскии: Иныя по нужди заповеди, тем же есте две, крещение и покаяние еюже кроме несть леть спасение получити. Дозде Гавриил.

Иоанн же Лестовичник, глаголет [книга Кирила Иеросалим. лист 204]: Не прелщайся тем сыну послушниче Господень. еже не исповедати грехов своих но исповедуй пред учителем своим вся грехи своя.

Правило апостола Павла, 15 [Кормчая глава 1, лист 26]: Учитель аще и мирскии человек, будет искусен слову учения, и нравом чист, таковыи да учит. будут бо вси научени Богом.

От соборнаго послания Ияковля [посл. Иякова, глава 5]. Исповедайте друг другу согрешения, и молитеся друг за друга. яко да исцелеете. Дозде апостол.

Златоуст в Беседах апостольских [Беседы апостол. лист 2983]. Глаголи твоя яже ко другом велми любимым и праведным и имже уповаеши яко да помолятся о гресех твоих.

Иоанна мниха Епитимейник [глава 11]: Яко подобает кающемуся в тайне исповедати, своя согрешения, человек человеку исповедайся, а не яко человеку. но яко самому Богу. исповедайся брату.

Златоуст в Беседах [лист 3022]: Брате зде глаголяй, всякаго просто вернаго, а не инаго. что бо творящее братство, баня паки бытия, еже возмощи нарещи Отца Бога.

Хрисмологион, глава 5. Второе исповедание прегрешением егда прегрешения наша, или пред Богом или пред священиком или ближнему исповедаем.

Захария Копестинскаго [глава 36]. И коли час имееш учащай до исповеди и не обленися. А однако в той мере и разсуждение есть у отец святых. а особливо под час пригоды, и в недостатку презвитер православных, и под час преследования нынешняго, на нас россов, от папежников, и от тех которыя с ними заодно мудрствуют. такоже и в странах далних, в которых православных иереов не достало. Будущим тогда до латынских князей и до попов, с папежи римскими верующими. Аще же сих призывания несть в сем избавления: [ниже]: Первая наука: пред разумными, и умелыми любо иродияконом или монахом, или такожде и пред простым человеком. якоже Ияков апостол во главе 5 глаголет и учит, исповедати друг другу согрешения, и молитися друг за друга. яко да исцелеете, и паки: Друг другу тяготы носите и тако исполните закон Христов, ниже: По свидетелству даже и простым искусным, и мудрым и разумным исповедания грехов имеют приимати. Дозде Захария.

Никон Черногорскии. Обыче бо Бог спасение человеческое строити, не точию ангелы действовати. но и человеки святыми, и древле убо пророки, и последи собою. и святыми апостолы, и прочее даже до скончания, к своим в роды слугам глаголет. приемляи вас Мене слушает. отметаяися вас Мене отметается. Тем же аще и человек есть. иже исповедания слышай. но Бог его ради обращает и прощает якоже Давыда Нафаном.

Златоуст в слове о лжеучителех и о скончании века [Маргарит, слово 13]: Покаяние же имейте богоотца Давыда. ибо той бысть нам образ покаяния. научая нас глаголет, приидете чада послушайте мене, и аз покажю вам образ покаяния, понеже и аз некогда запенся падох, но покаянием востах. Дозде Златоуст.

Анастасии Синайскии, глава 16: Тем же аще и человек есть духовник, но Бог тем наказует и прощает, якоже Давыда Нафаном. Тем же и приводит глаголя [псалом 31, толк.]. Беззакония моя показах. и грех мой не скрых. сиречь без стыдения объявил есмь пред тобою отцу духовному, сиречь Нафану пророку пред ним же пад рече, согреших Господу Богу моему. и Ты Господи отпустил еси беззаконие сердца моего.

Библия, Бытия, 4: И рече Ламех своима женама, Адда, и Селла, услышите глас, мой, жены Ламеховы. внушите моя словеса. яко мужа убих в язву себе, и юношу в струп мне, яко седмицею мстится от Каина. от Ламеха же 70 седмицею. Дозде Библия.

Никон Черногорец [слово 51]: Не Каина уби Ламех, но иныя праведники, убегну мучения. за исповедание греха. и на ся суд изнес, Божию возбрани суду.

Исидор Пилусийскии [в том же слове Никона Черног., 51 ]. Чесо ради Каин и Ламех убийство сотвориша, но не такожде мучена быста. ов убо казнь прият. ов же милость получи. понеже ов обличаем отвержеся. Сей же не обличаем исповедася. Аще и греховная равна. но яже по гресе не равна. Тем же рече, глаголи ты первее грехи своя, да оправдишися. сего ради убо паче потщимся не согрешати. аще и согрешим да не отвержемся исповедати и скрыти ради лютейшую муку себе уготовим.

Номоканон [Потребник, лист 38, 71 и 72]. Аще кто убо есть священник, неискусен же. а другии не священник. искус же имея духовнаго деяния. сему паче священника праведно есть помышления приимати, и правильно исправляти. И паки: Елицы убо освященни по повелению епископа помышления человеческая да приемлют, несвященному же иноку, наказание его искуства дает власть примирения. Аще убо самого себе безбедно соблюдает, (то) и исповедающихся Богови да примиряет. Дозде Номоканон.

Синодик старописменныи: Помяни Господи душа, иже скорбь имеша по вся дни о своих согрешениих, и слезы пролияша. и простым человеком исповедаша со слезами или без слез. прости им согрешения их, и упокой их с праведными Твоими.  В том же Синодице, описание сицево. Яко сицевая исправления святых апостол бысть, разсылаема по градом. и ведяшеся сие честное апостольское законоположение, до 7-го собора. и на той же собор прииде Евсевии, и сие писание в руку свою держаше. поне же добре любляше. и то исправляше, и инех поучаше тако творити. Святии отцы на 7-м соборе апостольским преданием много избравше от писании, положиша того ради, како достоит на сем свете пребывати всем православным христианом. и сего ради, сей синодик составися, и помяновение от всех православных християн устроися. Дозде от Синодика.

Иоанн Златоуст [Беседы апостол. лист 3078. нравоуч. 30]: Не убо вся на учителей возметайте, не вся на наставники. можете и вы друг другу созидати. И паки к солуняном пиша глаголет: Един другаго созидайте, якоже и творите. И паки: Утешайте друг друга в словесех сих. сие и вам возвещаем ныне мы. множайше бо нас, аще восхощете друг друга исправите.

Маргарит, лист 158, на обор.: Да не речеши в себе мирскии человек есмь. жену имам и дети. сия иерейска суть, сия иноческа. И паки: Аще бо излиеши якоже елей словеса учительства; аще обяжеши тихостию пожданием: аще уврачюеши; сокровища всякаго богатейша тя той соделает. изводяй бо честное от недостойнаго. яко уста Моя будут.

Никон Черногорец [слово 28]. О других же отчасти смотрителне бывших. яково ко иконе исповедавшагося. и Давыдово, и ина, ветхаго завета, и великаго канона, и другая елика честное твое имяше послание, да испытует. владыко мой честь твоя смотрительная сила. отнюд не приводити сих ниже в беседу. яко от таковых смотрительных, развращенная сердца человеческая, не прочитающе тех толкования. ни вмещающе в духовныи ум, но от плотьскаго мудрования совращаются в различныя ереси, и прелести, и до конца погибают. И паки [слово 2]: Аще по смотрению глаголанная, или бывшая, объятно на всяко время приемлем, главою снити имам, и горняя долу будем. Дозде Никон Черногорец.

И по Номоканону [Потребник, лист 71 и 72]. Аще кто убо есть священник, неискусен же. а другии не священник, искус же имея духовнаго деяния, сему паче священника праведно сказуется помышления приимати, и правильно исправляти. И паки сказуется. Елицы убо освященнии, по повелению епископа помышления человеческая да приемлют, несвященному же иноку наказание его искуства дает власть примирения. Аще убо самого себе безбедно соблюдает, то исповедающихся Богови примиряет. Якоже выше изъявися.

И по сим вышепредложенным свидетельством, явственно показуется, яко нужныя тайны церковныя, в неприсудствии священник простолюдином верным сущим и церковная предания правомудрствующим правильно повелевается действовати, яко же премногими священными писании, первое от самого Христа священным евангелием, таже от прочих святых отец священными писании довольно изъявихом, яко Христос многим апостолом священьства неимущим повеле крестити, и не точию единем апостолом, но и всем верным шествующим по стопам онех повеле учити и крестити во имя Отца и Сына и Святаго Духа, с ними же обещася быти до скончания века. Такоже и святии апостоли, и святии отцы, в неприсудствии священник повелевают учити и крестити, таже и исповедания человеческая приимати, о чесом вышепредложенная свидетельства явственно показуют.

И аще сицевая свидетельства явственно о сем достоверствуют; убо в настоящее се время, не сущу иерею православному, праведно есть, желающим святаго крещения, и покаяния, простолюдином верным сущим, и церковная предания правомудрствующим еже крещения и покаяния онех сподобляти, по повелению Господню глаголющу, шедше научите вся языки крестяще их во имя Отца и Сына и Святаго Духа. учаще их блюсти вся елика заповедах вам. и се Аз с вами есмь во вся дни до скончания века, аминь. Матф. зач. 116.

 

Показание, 4.

 

Яко несвященнии аще крещают, то благодать Божия совершает. И яко святаго крещения тайна понужде, кроме мvропомазания и маслопомазания и кроме прочаго священническаго последования, точию в трех погружениях совершатися может. Евхаристия же тайна, с мvропомазанием, и маслопомазанием в посредстве полагаются о чесом и свидетельства представляем.

Яко аще и седмь тайн в церкви Божии исповедуется, обаче овы понужди суть посредния, и кроме сих спасение получить можно, овы же нужнейши, яко кроме их несть мощно спасение получити.

Якоже блаженныи Гавриил архиепископ Филадельфийскии в книзе о 7-ми тайнах свидетельствует глаголя сице: Ведати подобает, яко тайны церковныя и иныя понужди суть посредия: яковыя суть мvропомазание, евхаристие, и елеопомазание. их же аще кто и не сподобится нужды некоея ради, спасен быти может. И иныя понужди заповеди, тем же есте две. крещение, и покаяние, еюже кроме несть леть спасение получити. Дозде Гавриил.

Свидетельствует же сему и новопечатная книга Жезл, изданная от собора на Москве в лето 7174, на листу 49: Мvропомазание, и евхаристие, и маслопомазание тайны. в посредних тайнах полагающе их же аще кто и не сподобится нужды некоея ради, спасение получити сказует. А еже Господь наш Исус Христос рече [Иоанн гл. 6, зач. 24]: Ядыи Мою плоть и пияй Мою кровь, во Мне пребывает, и Аз в нем. И паки: Аще не снесте плоти Сына Человеческаго. и не пиете крови Его, живота не имате в себе, ядыи Мою плоть, и пияй Мою кровь, имате живот вечныи, и Аз воскрешу его в последнии день. На сия Христова словеса святыи Феофилакт в Благовестнице толкует глаголя сице [Благовестник от Иоанна, глава 6, зач. 24 лист 105]: Зде вонми разумне о причащении тела и крови Господни. како подобает веровати [на поле]: Ядыи Мою плоть и пияй Мою кровь, во Мне пребывает и Аз в нем. И ты можеши не токмо по тайному причащению ясти и пити плоть и кровь Владычню, но по иному образу. ибо плоть яст, кто по детели проходит действенное. нужна бо делателна плоть яко же и детель есть трудна. кровь же пиет, яко вино веселящее сердце. виденне глаголю, яко без труда виденное. паче же труду покой зане питие без труда паче, неже ли брашно. Дозде Ферфилакт.

И святыи Никита Ираклийскии, на слово Григория Богослова, на святую Пасху, сказует: Чрез добродетелное устроение, кождо причащается святаго Агнца плоти. и насыщается Исусом по мере своих добродетелей.

И в книзе Анастасия Синайскаго, во главе 2. И в книзе Патерице Иеросалимском, слово 17, пишет: Егда убо человек храм одушевлен и богоздан будет Божии, и Отец и Сын и Святыи Дух живет в нем, и ходит и отстоит душа богоносная от всякия любве церквей зданных и жертв видимых. и соборов множества, и праздник человеческих, внутрь бо имать в себе Отца, внутрь же Сына архиерея. внутрь Дух Истинныи огнь. внутрь жертовник чистую совесть. внутрь очистилище грехов духовную слезу. внутрь вышнии Иеросалим, радостную душу. прочее яко духовен духовныма очима жертвы приносит. Дозде Патерик.

И в книжице о 7-ми сакраментах, на лист. 7 [книга О 7-ми сокраментах, печат. Черниг. рок. 616]. Вопрос: Многократное ли потребление евхаристии. Ответ: Трикратное: едино есть устнами токмо яко же обыче бывати, егда кто с нечистым сердцем приемлет тело и кровь Спасителя нашего, яко Июда беззаконныи на тайной вечери; Но таковыи на погубление души своей приемлет. Другое потребление есть духовное, то есть, егда кто истинною верою, и волею хощет тела и крове Христовой причаститися, но не может его прияти. яко то обыче бывает, не сущу тогда тамо священнику. Третие есть, егда кто и чистым сердцем и чистыми устнами бывает причастник евхаристии святой. Дозде о 7-ми сакраментах.

А еже святое крещение в нужде и кроме мvропомазания, и маслопомазания может совершитися, о том свидетелства являем.

Понеже кроме священника, или при священнике по скудости, крещения тайна может и без мvропомазания и маслопомазания твердо и известно быти. Понеже кое мvро бяше егда крещаху простии мужие и жены; кое мvро бяше при мученицех егда в темницах, егда на самых мучениях крещаху; егда нерукоположении сами ся крещаху; кое мvро при апостолех бяше, котории священства неимущии крещаху.

И аще простии мужие и жены крещающеся без мvропомазания освящахуся. Аще святии мученицы без мvра крещение подающе освящаху. Аще святии апостоли не имущии священства без мvропомазания крещаху верующая во Христа. Зело явственно есть, яко тайна святаго крещения, понужди может и без мvропомазания совершитися, может освятити и облагодатьствовати приступающия к нему.

Свидетельствует сему древлегреческая книга, в Завещании святых апостол, кафолическаго учения. седмыя книги, во главе 23, в завещании к епископу, или презвитеру, сице глаголющи: Да помажеши первее елеом. таже крестиши водою конечне же печатаеши мvром. да помазание убо будет причастие Святаго Духа. вода же совет смерти. мvро же печать сложении. Аще же ниже елей будет, ниже мvро довольствует вода и к помазанию, и к печати, и ко исповеди умирающаго, сиречь соумирающаго. Дозде от Завещания.

Речет ли кто от противльшихся нам, яко сицевая свидетельства и повеления, приличествуют священником, они же и кроме мvропомазания и маслопомазания крещение совершити могут. простолюдини же аще крещают, то како благодать Божия содействовати имать, и которыми священными писаниями тако засвидетельствуется:

Ответствуем.

Божественному бо Златоусту явственно тако глаголющу [евангелие учительное, на Крещение Господне, лист 308 на обор.]: Даже увемы, яко на всякаго крещающагося отверзаются небеса, и призывает его [Бог] в вышнее жилище, сходит же нань и Дух Святыи. Аще ли же чювственныма очима невидим сыи. несть достойно неверовати. знамения бо неверующим дана быша, но не верных ради. Нам же довольна есть вера вместо знамении. Евангелие учительное, на Крещение Господне.

Той же паки яснейше глаголет [евангелие учительное в неделю праотец, лист 323]: Независтна бо есть благодать всякому хотящему благое, малу же, и велику, премудру же и препросту. старцу, и юну, богату же, и нищу, мужем же, и женам, и всякому возрасту. благии бо Бог. всем простирает луча своея благодати. И паки [выше лист 323]: Верою убо един дух приемше, едино разумети должны есмы. яко едино тело, и едина душа. ибо сущии едино тело, и един дух веде будет. Бог убо равно всех призвал есть. всем же живот даровал есть. всем равна есть глава, и душ наших имать яко уды своя всех совоздвиже и спосади, всех убо едино честно прият, и таже благая ожидаем вси видети, и наследити в веце будущем. и на небесех равни есмы. аще и на земли различие имамы. друг от друга, и отстоим и разделяемся. един Господь. едина вера, едино крещение. еда убо ов больша Господа имать, ов же худейша; еда ов убо от веры оправдаися, ов же от дел; еда убо ов от воскресения свободися, ов же не тако: един Бог и Отец всех. иже надо всеми и за всех изволивыи. и тако восхотев, всех едино быти, еже к Нему любве ради и веры, и соглашения. и еже друг к другу совокупления и присвоения и умирения. И паки [лист 324]: Вси бо вернии, елицы от единыя купели святаго крещения порождьшеся. едино тело бываем Духом Святым, аще и многа различна имам рождения. Дозде Златоуст.

Тако же и в Катихисисе Болшем, видом вопроса и ответа сице написано есть. Вопрос: Како нам дадеся Дух Святыи, и дарование Его, и в чем действие Его совершается. Ответ: Первее гласом евангельским, и поучением святых писании. якоже святыи апостол Петр к Корнилию глагола, нападе Дух Святыи на вся слышащая слово. [ниже:] И зде Дух веры слышанием, и поучением слова Божия нам дадеся. [ниже:] Потом паки во всех тайнах церьковных действует Дух Святыи. и нам дадеся. яко же на крещение, Дух освящение, и истинныи Дух обручения, и дарования приятие, Дух сыноположения. Тако же и возложением рук и мvропомазания и в хиротонисании. сие же и во время освящения церкви. Тако же бо святыи апостол Павел глаголет, яко Дух Святыи действует вся во всех, вся едина суть потребно к спасению нашему. [ниже:] Сия вся Дух Святыи во всяком изволяющем действует. И тако убо действует яко без Него никто же может рещи Господь Исус, точию Духом Святым. Дух Святыи благодатию и силою своею, во вся совершенства спасения нашего еже нам истекает и исправлением Христовым в нас все совершает. устрояя нас в снабдение и содержание того спасения, тем же той же апостол глаголет, аще ли кто Духа Христова не имать, той несть Егов. Вопрос: В коих убо таковая действует Дух Святыи; Ответ: Яве яко во изволящих благое, и крестящихся. и в послушающих е. и в кающихся. и в тех они же противу совести ничтоже дерзают творити. иже предложением имут блюстися грехопадении, и до издыхания своего Богу повиноватися. в сицевых токмо человецех, дародатель Дух Святыи действует. И паки: во главе, 60. Вопрос: Кии вид, или видотворение сея тайны. Ответ: Оная словеса, ими же Господь повеле крестити, сиречь во имя Отца, и Сына, и Святаго Духа, вкупе со тремя погружениями. сими бо глаголы божественными, и силою их, крещение кончается и совершенно бывает. Аще и прочии глаголи при крещении глаголеми суть от священника, в благолепотное украшение и наказание бывают. Сия же три в видотворение и содеяние крещения суть. Да сими всездравственно и благосовершенно крещение бывает. И паки: Внегда ко умовению водою, словеса сия приложатся, сиречь крещается раб Божии, имярек, во имя Отца, и Сына, и Святаго Духа. тогда с сими словесы, тайна святаго крещения совершается, и душею паки раждается крещаемыи силою Святаго Духа. сей же Дух Святыи, несказанно пременяет воду во умовении сем. якоже внегда огнь зимную воду в кипящии укроп претворяет, и даст ей сицевое совершительное, яко касающися тела, и душу омывает, и паки раждается. и убо не вода сие творит, но Духа благодать. Дозде Катихисис.

Еще же и в Номоканоне, видом вопрошения и ответа, сице явствует. Вопрос: Елико аще крещают несвященнии. мужие и жены, или иноцы, что достоит творити; Ответ: Аще умрет крестивыися, прежде нежели постигнути священнику божественная благодать совершает и. Аще ли же жив будет, да поставит и священник в купель и молитвы, и мvро по обычаю творит.

Тоже и Никифор патриарх Цареградскии глаголет: И сия вся предъявивше. самая збытия вещей, самая действия Святаго Духа. еже нерукоположенными действова, на среду приносяще являем.

В деянии апостольском, в главе 8-й сказует [Деяния апостол. зач. 20]. Како апостол Филипп на пути крести каженника, егда рече изыде от воды, Дух Святыи нападе на каженника.

И в зачале, 18 [Апостол толк.]. егда [в Самарии] вероваша Филиппу благовествующу о царствии Божии, и о имени Исус Христове. крещахуся мужие и жены: В толковании [Епифании Кипрскии]: Понеже апостол Филипп, слуга сыи не имеяше рукоположения власти, еже даяти Дух Святыи, знамениом великим бываемом. како Духа Святаго не прияша; Духа убо Святаго прияша грехом оставлением. знамениом же не прияша иже не бяху прияли сии Дух Святыи; или како не имеяше дарование таково от 70-тих бе, силы бо пряша сии. еже знамения творити, а не Дух Святыи подаяти друзем.

И Златоуст глаголет [Беседы апостол.]: Дух прияша оставления, Духа же знамении, не у бяху приемше.

Еще толкование Аммониево [Апостол толк.]: Понеже не прияша крестившеися от Филиппа Дух Свят, но потом егда помолишася о них Петр и Иоанн, дастся возложением рук своих крестившимся Дух Свят. общим бо именем и нераздельным глаголет писание: яко возложением рук святых апостол, на веровавшая, возсия Духа Святаго благодать. Не рече яко единема точию Петром и Иоанном. но общим именованием рук совокупи и Филиппа. [ниже:] Егда же и той знамения сотвори на исцеления недуг, и изгнания бесом, но яко не помолися еже быти им се. Сице многащи помыслив быти им, обаче на ползу, яко, еще не приличным сущим ко приятию Святаго Духа. [ниже:] И како рече диякон сыи крестил есть; Понеже оскудение бе презвитер в Самарии, и един Филипп точию бе, гонения ради бывшаго. Подобает же в нужи и диакону крещати, не сущу презвитеру, яко же его Дух Святыи научи. Дозде Апостол толк.

И во главе, 9-й [Деяния апост.], сказует како Анания крести Павла, и яко возложением руки его спаде от очию его яко чешуя, и абие прозре, о чесом и Златоуст в толковании на деяние в зачале 21-м, являет.

Обаче Анания крести Павла не повреди ниже веры ниже апостольства. И Павел крестися не умали благодати крещения, но паче умножи от усердия многаго. Но сии, Анания и Филипп, не священницы сущии, но диякони. Обаче не олтарю, но трапезам. Действо же их благодать Божия содействовава. Убо явственно есть, яко крещение сих не повреждается  вера и церковь Божия. Таже и благодать Божия не умаляется, но паче умножается от усердия многаго, яко же вышше изъявися. Тако же и прочии безчисленнии мнози нерукоположеннии крещаху, содействова ими благодать Духа Святаго. О чесом жития святых, и Пролога свидетелствуют.

Яко же в Пролозе, сентября в 7-й день, в житии святаго мученика Созонта, иже бе пастырь овчии, обаче пишет: яко благодатию учаше и крещаше еллины, во имя Отца и Сына и Святаго Духа.

И аще сии Созонт простолюдин сущии, и ни коего же священства имущии, но пастырь бе овчии. Обаче Божиею благодатию учаше и крещаше. Убо явственно есть яко благодать Божия крещающихся от него совершаше и освящаше.

Тако же и августа в 20-й день повествуется, яко простолюдини сущии некоего евреина именем Феодора на пути разболевшася, и за неимением воды песком крестиша. Обаче содействова благодать Духа Святаго. О чесом послежде и священныи собор удивися скорому присещению Духа Святаго [Дионисии Александрийск. епископ с причтом церковным разсуждаше]. Аще и не прияша е, за еже не в такой сущи материи сиречь песком, а не водою, обаче удивишася скорому присещению Святаго Духа. О чесом объявленныи Пролог, паче же печатныи Цветник духовныи явствует.

В заключение же всем вышепредложенным свидетелством конечное свидетелство предлагаем. им же явственнейше действо Духа Святаго показуется. Яко в Патерице скитском повествуется [глава 54] яко во Аравии некоем граде, християнстии отроцы на поли пасущии овцы своя и прилучшагося с ними детища евреина суща, именем Феодула, крестиша во имя Отца и Сына и Святаго Духа. идеже сице пишет, яко осени его благодать Святаго Духа от Святаго Духа. И паки глаголет: Дело отрочищь, пришествие Святаго Духа показа. И егда оное отроча яко ненаказанно сущо, по крещении седе на вечери с родителема своима вкупе ясти, тогда весь дом исполнися благоухания. родителие же его начаша объюхатися но не причастни бо суть рече благодати святаго крещения. Егда же ко отрочати приидоша обретоша его от главы и до ногу благоухания исполнена. и начаша с гневом взирати нань, купно же и бити и начаша. конечне же уведеша от него, яко крещен сыи, абие советоваша о нем, да в пещь огненную ввергнут его, яко да згорев в прах будет. Оному же ввержену бывшу в люте разженую в бани. и до утрияго дни пребывшу заграждену сущу. во утрии же день, по смотрению Божию, обретеся епископом града того невредим сущии, при нем же из оной пещи изшедыи и лице его яко ангела светяшеся и глагола пред всеми отрочищь. яко егда вверже мя в пещь огненную, зрех жену багряны ризы носящу. и огнь погашающу, и пламень в росу претворяющу. и то слышаще разумеша, яко то бяше святая Богородица. Ея же рече молитвами, сподобимся сохранени быти в христианстей вере, и огня будущаго избавитися. И сия зде вкратце предложивше, пространне самая она повествования изъявити имам яко Дух Святыи содействуя крещение оно идеже явственно тако пишет: дело отрочищь, пришествие Святаго Духа показа. Патерик скитскии, глава 54.

И по всем сим, вышепредложенным свидетельством явствуется, яко аще и 7 таин в церкви Божии исповедуется, обаче мvропомазания и маслопомазания, и евхаристия тайны в посредьстве полагаются. Их же аще кто и не сподобится нужды ради, спастися может. Крещения же и покаяния тайны нужнейши, яко кроме сих несть мощно спасения получити. И яко тайны святаго крещения кроме мvропомазания и маслопомазания в трех погружениях воды довольствоватися может, такоже и кроме священнических молитвословии, точию сими глаголы божественными, сиречь, во имя Отца и Сына и Святаго Духа, вкупе со тремя погружениями, кончается, и совершенна бывает.

И яко аще простолюдини крещают, то благодать Божия содействует и совершает. И аще сице священными писаниями утверждается, яко благодать Святаго Духа и нерукоположенными действует и совершает, якоже древлеправославными христианы  и содействова. убо и ныне, и даже до скончания века, правовернии христиане, и церьковная предания право мудрствующии аще крещают, то благодать совершает. Верно слово, и всякаго приятия достойно. [Апостол зач. 280].

 

Показание, 5.

 

Яко святое крещение, корень христианския непорочныя веры, яко твердое основание.

Понеже святаго крещения предел святыи Иоанн Дамаскин объявляет сими словесы, глаголя: Крещение есть корень святыя християнския непорочныя веры, яко твердое основание. Книга жития Иоасафова, глава 8.

И аще крещение есть корень святыя християнския веры по святому Дамаскину; убо вера есть древо с ветвьми возрастающее, и стоящее на корени крестительнем. Яко Кирил мних, в неделю 5-ю поста, древо или стебло благоверие сказует [Соборник печ. в неделю 5 поста]. И аще крещение есть оснвоание веры, убо вера есть здание кафолическаго благочестия, стоящая на всеспасительном крещении основании.

Яко Златоуст сказует, сам Творец стены возгради верою. Пролог, июня в 29 день.

И святыи Василии Великии, в послании о иночестве, согласное веры и крещения показует глаголя [Потребник иноческии, послание Вас. Вел. ко иноком]: Креститися подобает якоже пряхом, а веровати якоже крестихомся. Книга О постничестве.

И аще креститися подобает якоже святии отцы прияша, убо явствует, яко святии отцы от Христа и от святых апостол по древлецерковному чиноположению крещение пряша. Сице и нам повелевают креститися, якоже они прияша. Того ради глаголет великии сей отец наш Василии: яко креститися подобает якоже прияхом. И потом паки глаголет: а веровати так якоже крестихомся. Сим являет, яко аще в християнскую веру по древлецерьковному уставу крестихомся, убо и веровати подобает яко крестихомся. А не разделяти веры от крещения, но пребывати в той вере в нюже крещени есмы, якоже Катихисис Болшии утверждает глаголя: Тако не разделяем веры. в ню же крещени есмы, в той пребываем.

И святыи Афанасии Великии нераздельность крещения и веры изъявляя взывает [в книге Григория Назианзина слово 3 на арианы]: Тем же и Спас, не просто заповедал есть крещати но прежде рече научите, и потом крестити во имя Отца, и Сына, и Святаго Духа. да от учения вера права изъявится. и с верою совершения крещения приложится. Слово 3 на арианы.

И аще прежде учити вере и потом совершати ю крещением Христос заповедал есть. Убо вера от учения прежде в нас раждается, якоже апостол Павел глаголет: вера от слуха, слух же глаголом Божиим. Обаче несовершенна суща, потом же совершается крещением. Откуду является, яко неправославной церкве развращенное учение, и крещение, веры православныя залога не имать, и совершения благочестия лишается. Предел паки святаго крещения святыи Богослов Григории изъявляет, сице возглашает [книга Григория Богослова, слово 2 на Крещение]: Крещение есть утвержение вере и извещение. В слове втором на святое Просвещение.

И аще крещение есть веры утвержение, убо вера есть вещь всекрепко подтверждаемая, и известна суща святым крещением. Неправославной же церкве развращенное учение веры залог развращенныи раждающе, и крещением своим развращенным совершающи, утвержающи же и извествующии.

Убо сицевое крещение не может быти православной вере совершение, и утвержение, и извещение, яко своим залогом веры свое развращение существяющи, и совершающе то, и утверждающе, и извествующе. И каково семя, таков и корень, и каков корень, таково и древо, и каково древо, таковы и плоды. От плода бо всяко древо познавается по словеси Христову.

Якоже и Моисеи глаголет [ глава 33, песнь Моисеова, 2]: от виноград бо содомских виноград их. и лоза их от гоморры, грозд их грозд желчи, грозд горести их, и ярость змии вино их, и ярость аспид неисцельна.

О них же и ангел ко Ездре отвеща [глава 9, лист 242]: какова рече нива, таково и семя. каковы цветы, таковы и пестроты. каков ратай, такова махкота. каков делатель, таково и дело. яко время бысть века.

И по Вере книзе [лист 248], зане пророчества исполняется реченное. Изменят времена, и закон, и беззаконующии завет наведут с прелестию, и осквернят священие.

И по Златоусту [Беседа 29]: Пророчество бо во время збытия подает своя истинны указание. и яко не ложны глаголы, свидетелствуют вещи.

Кто бо ум имущии, видя ныне в великороссийстей церкви новыя догматы, не устрашится? Кто ли зря новотворимое крещение не усумнится? Кто ли без сомнителнаго опасения восхощет е прияти? Яко премногими преизобилует новшествы. И яко древлеправославной церкве догматы отметает и проклинает. Анафематствованая же святыми отцы, в себе удобоятно замыкает. О чесом церковь древлеправославная заповедает нам глаголющи: Яко да в приятии новин под анафему не подпадем, при которой искушения казни злыя стретают неберегущих о сем. Книга О вере, глава 23.

И аще развращенное сие крещение не утверждает християнскаго благоверия, аще православия догматы отметает, и анафеме отдавает, аще анафемствованная святыми отцы в себе удобоятно замыкает. Убо корень есть злобе, и твердь падению еретическаго зловерия. Убо праведно есть о нем сомнящеся, прияти оное опасно есть.

Но на предлежащее да возвратимся, еже о християнском крещении предъявихом, яко есть корень и основателное утверждение древлероссийскаго благоверия. Откуду веры и крещения соединеное и неразделное показуя. святыи Никита Ираклийскии тако глаголет: Вера, и крещение, два образа, равна себе и неразделна. вера совершается крещением, и предходит исповеданием ко спасению. В толковании словес святаго Богослова, на святое Просвещение.

От сего явствует, яко вера православное имать крещение, себе равное. Таже и неразделно есть, яко идеже вера ту и крещение равно с верою соединяется и сраслствует. Еретическое же крещение иже во многих вещех и глаголах благоверию сопротивляющеся, и многим анафемам святых отец подлежащее, отнюд обретается благоверию не равное, и весма благочестия оттерзаемо есть. Убо сицевым крещением крестившияся, и мнящии содержати веру православную, како могут стяжати ю, яко не равно вере имуще крещение? И яко разделно сущо от христианскаго благоверия и весма сопротивляемо, и яко не содержащее древлецерковныя догматы и предания, но отметающее, и яко не согласно сущо святоотеческому преданию, но под клятвы святоотеческия подпадающее. Убо есть не равно, и есть разделно, христианска благоверия весма чюждо, и клятвам древлецерковным есть повинно.

Аще ли же сицевое крещение обретается христианской вере не равно, и есть разделно, и християнскаго благочестия чюждо: таже и древлецерковным клятвам подлежащо. Убо всуе прелстившиися о нем глаголют, яко аще крещение имам и не право, но мы послежде верою и покаянием своим крещение исправити и совершити можем. Не разумеша яко Христос прежде повеле учити, и потом крестити: да от учения вера правая изъявится, и с верою совершение крещения приложится. О чесом Афанасии Великии свидетелствует. Тако же и Григории Богослов глаголет: Крещение есть вере утвержение и извещение.

А не вера крещение утвержение, по онех мнению. Тако же и Никита Ираклийскии толкует: Вера убо совершается крещением.

А не крещение верой совершается, яко же они буесловят.

И аще крещение верою не совершается, ни утверждается, но вера крещением. И аще вера не утверждает ниже совершает крещения, но крещение самую веру совершает и утверждает. Яко же учителие древлецерковнии изъявляют убо любящим христианское благоверие и желающим в христианском благочестии пребыти, и спасение вечное душам своим получити, праведно им есть прежде научитися вере, и потом креститися, по словеси Христову: да от учения вера правая изъявится, и с верою совершение крещения приложится. Яко же Афанасии Великии глаголет. И сице будет тогда по святых отец вера и крещение два образа равна себе и неразделна. Вера убо тогда совершится крещением, и предходит исповеданеим ко спасению, яко же святыи Никита Ираклийскии в толковании явствует.

И по всем сим убо святых пределом аще християнское крещение, еже от простолюдин верных, церковная предания правомудрствующих, действуемое крещение разсмотрим, убо и разумеем е корень быти древлероссийскаго благоверия. Понеже хотящ крещатися первее научается вере, таже крещается. И действе крещения явственно символ православныя веры по древлецерковному преданию, кроме всякаго нарушения, любочестно и всеверно почитаемыи глаголется. В нем же исповедуется Святая Троица, и Господь наш Исус Христос истинным Богом прославляется. И еже о нас человеколюбное Его смотрение все веруется, вся догматы и таинства и предания церковная исповедуема бывают, и веруема. Ибо в сих словесех еже речеся, и во едину святую соборную и апостолскую церковь, глаголется веровати в сих убо словесех вся она таинства, и догматы, и предания церковная заключаются. Такоже и знаменованием перст, им же все доброе веры таиньство православно исповедуемо бывает, сие знаменовательно десницею крестителя и крещающагося, егда знаменаются при крещении, удобоятно замыкается. Такоже и самая видотворящая крещения форма богатовидно таинство Святыя Троицы явственно исповедует: яко крещается раб Божии, имярек, во имя Отца, и Сына, и Святаго Духа. О чесом Катихисис Болшии, подтверждая глаголет: яко оная словеса божественная, ими же Господь повеле крестити, сиречь во имя Отца, и Сына, и Святаго Духа. вкупе со тремя погружениями сими бо глаголы божественными и силою их, крещение кончается. и совершенно бывает. аще и прочии глаголы при крещении глаголеми суть от священника, в благолепотное украшение и наказание бывают. сия же три в видотворение и содеяние крещения суть. да сими всездравственно, и благосовершенно крещение бывает. Катихисис, глава 60.

Наше христианское крещение вся сия христианскаго благоверия таинство в себе удобоятно содержит и замыкает, и в чесом от сих не разлучается, но споевается со оными и срасльствует. Аще ли святыя апостольския и отеческия уставы и предания содержит и православно исповедует, убо есть корень древлероссийскаго православия. И есть основание древлецерковнаго благочестия. И есть утвержение древлеотеческия веры. Елма же убо яко христианское сие крещение не соединяется с нынешнею российскою церковию. Понеже яко не соглашается с новоизданными преданиями и яко не утверждает нынешней российской церькве нововерия, и яко анафематствованная святыми отцы отревает и не приемлет, и яко от новоизданных догмат оттерзается, и яко развращенное оно крещение поруговает и отмывает. Убо и всякое несогласное церкве Христовой новоумышленное мудрование купно с сим разрушает. Аще ли же сице на нечестие вооружается, благочестие же крепце утверждает, праведно убо есть нарицати его щит веры, и оружие не сопротивнаго. Якоже Богослов глаголет: щит веры приимше в нем же возможете вся стрелы лукаваго разженыя угасити. вода убо есть, но огня гаситель. Яко же и Павел глаголет: щит веры приемше, в нем же возможете вся стрелы лукаваго разженыя угасити. И по толкованию: предложи щит веры, еже есть крещение, его же тя обнажает враг, не попустя его прияти, да тя яко безоружна победит. И по Ефрему,  еже в слове о антихристе [слово 105]: щит веры приимем вси и почерпем с любовию от Божия источника, упование спасения. несозданную глаголю возлюбленную Святую Троицу, источник источающу жизни. аще оградится тацем оружием наша душа, то попран будет змии посреде. Дозде Ефрем.

И по сицевым святых отец свидетельством зрится быти христианское святое крещение щит веры и победа на диавола, яко вся стрелы лукаваго разженныя погашати могущее.

И аще сицевое всеспасительное оружие на диавола верным от Бога дарованное, им же вся сила вражия разрушается, и всяко нечестие на нас бывшее очищается, и аще христианское благоверие утверждается и совершается, убо есть корень древлероссийскаго православия, и есть основание древлецерковнаго благочестия, и есть утвержение древлеотеческия веры.

Аще бы христианское сие крещение не было корень древлероссийскаго благочестия, не бы с древлецерковным благочестием соединялося. Аще бы не основание древлеправославныя веры явилося, не бы древнее благочестие содержало и православно исповедало.

А понеже с древлецерковным благочестием соединяется, понеже древлеотеческия догматы содержит и исповедует, убо есть корень и основательное утвержение древлероссийскаго православия. Убо праведно о нем несомнящеся прияти оное не опасно есть.

Тем же убо, елицы христианское сие крещение приемлющии, в правду сицевии христиане православнии наричются. Яко же Катихисис Большии по вопросу ответствует [глава 1]: христианин есть, иже от Бога святым крещением порожденныи. и по благодати его, банею паки бытия, сын Божии именующиися. О сицевых и сам единородныи Сын Божии в евангелии предрече [Ин. гл. 3 зач. 8; Мк. гл. 13 зач. 61 и 62 лист 81 и 82; Мф. зач. 116]: яко род сей не прейдет, дондеже вся сия будут. небо и земля прейдет. словеса же Моя не прейдут. И паки: с вами есмь во вся дни до скончания века. И по толкованию: Род верныи глаголет утешая апостолы. да не мнят, яко толиким злым бывшим, вся оскудеет вера. рече дерзайте, не прейдет род христианскии, ниже оскудеет. аще и вся рече двигнутся. но о Мне вера не оскудеет. не могут бо скончатися грады Израилевы. Дозде Феофилакт.

И аще по евангелию, и по толкованию род верныи не прейдет, ниже оскудеет яже о Христе вера, убо явствено показа яко род сей, иже от воды и Духа раждающиися, нарицается верныи. О нем же рече Господь, яко не прейдет, ниже оскудеет. Зане имут обещание не ложно, с вами есмь рече во вся дни, до скончания века. Сицевии по богословцем могут незазорно рещи, яко не разделяем существа и естества Святыя Троицы, чтем, и славим, и покланяемся Той во единстве божества; тако не разделяем и веры, в ню же крещени есмы, в той пребываем. Сицевии по Василию Великому к вопрошающим могут ответствовати, яко креститися подобает, яко же прияхом, веровати так, яко же крестихомся, славити же яко же веровахом. Сицевых убо вера и крещение по богословцем равна и неразделна: вера убо совершается крещением, и предходит исповеданием ко спасению. Яко же выше предложенная святых отец свидетелства явствуют.

 

Показание, 6.

 

Яко не крещении не именуются вернии ниже возмогут в царство небесное внити, по словеси Господню. Священныи и богогласныи евангелист Иоанн Богослов, в благовестии своем, во главе 3-й, благовествует нам [Ин. зач. 8]: Еже сам Христос Спаситель наш к Никодиму рече, аще кто не родится от воды и Духа, не может в царство небесное внити. И паки: Рожденное бо от плоти плоть есть, рожденное же от Духа дух есть. И Марко евангелист во главе 16, свидетелствует, егда посылаше Господь ученики своя на проповедь, сице рече: Шедше в мир, проповедите евангелие царствия всей вселенней, иже веру имет и крестится спасен будет, а иже не имет веру, осужден будет. Толкование, Феофилакт [Благовестник от Мк. лист 104, зач. 71]: Виждь Господни заповеди проповедите. (евангелие) рече всей твари. иже веру имет и крестится, спасен будет. А иже не имет веру, осужден будет. не рече верным, но всей твари. аще ли верен, аще ли же ни; верующему же не довлеет токмо проповедь прияти, но и креститися. ибо веровав, не крестивжеся еще оглашен сыи, не уже спасен. Дозде толкование.

Видиши ли евангелское Христово повеление и апостолское благовествование, яко не едину веру кроме крещения взаконевающе, но купно веру и крещение всей твари проповедающе: иже бо веру имет и крестится, спасен будет, а иже не имет веру, осужден будет, яко же изъявися в толковании.

Тако же и Григории Богослов глаголет [слово на Крещение, стих 16]: Некрещенныи не верен, аще и во Христа верует.

Яко же и Феофилакт глаголет: Ибо веровав не крестивжеся, еще оглашен сыи, не уже спасен.

Божественныи же Златоуст страшнейше пиша глаголет [Беседы еванг. от Иоаннна, нравоуч. 25]: Яко некрещенныи, аще и безчисленная имея исправления умрет в геену отходит. Толкование: Толиких убо таинств сподоблшеся, житие покажем достойно. дара жителство нарочито. А иже не у сподоблшеся, вся да действует, яко бы сподобитися, да будет тело едино, да будем братия. Дондеже бо по сему разнствуем аще и отец кто будет, аще и сын. аще и брат, аще иже кто не буди, не у сродник есть присныи, еже свыше рождению растерзану. Что бо полза от бреннаго рода совокуплятися. егда от духовнаго совокуплени не будем. Чюж бо есть вернаго оглашенныи. не имеет бо главу тую же. не имеет отца того же, ни пищу, ни одежду, ни трапезу, ни храмину. но вся пременена. ибо вся на земли сему и вся оному на небеси. Царь сему Христос. оному же грех и диавол и щит сему убо Христос: оному же гниющая и растлеваемая и одеяние паки сему убо дела червей. оному же ангелскии Владыка. град сему убо. оному же земля. егда убо ничто же имеем обще, почему приобщаемся рцы ми; Но та яже ли разрешихом рождения, и от единыя пройдохом утробы; ничто же сие ко опаснейшему сродству. Да потщимся убо горняго града быти граждане. Доколе в чюжей стране пребываем: Потребно есть началное отечество восприяти. ниже бо от прилучившихся беда есть. Но аще будет, еже да не будет неначаяному скончанию нашедшу, некрещенным от здешних отъити, аще и безчисленая имеем благая, ничто же нас ино приимет, разве геена. и червь ядовитыи, и огнь негасимыи, и узы нерешимыя. Той же же паки: Услышите елицы есте просвещения кроме устрашитеся, воздохните, страшно прещение, страшно изречение. несть рече нерожденному водою и Духом внити в царство небесное. Дозде Златоуст.

Варлаам же пустынныи, ко Иоасафу царевичю глагола [книга о Иоасафе царевиче, глава 8]: Кроме крещения, несть благую ону надежду получити, аще кто и благочестивых благочестивейше будет.

Иосиф же Волоколамскии глаголет [слово 5]: И яко же глаголет Господь во евангелии: Аще кто не родится от воды и Духа, во имя Отца, и Сына, и Святаго Духа. не может спастися. Аще и всех человек праведнейше будет. се показа Петр апостол праведна суща Корнилия, и Богом свидетелствованна, крести. Дозде Иосиф.

И от сих достоверных свидетелств явственно показуется, яко иже не родятся от воды и Духа святым крещением не могут в царство небесное внити, ниже спасение получити, ниже возмогут вечных мук избыти. Иже бо не родящиися духовно, суть телесни и Духа Святаго неимущии. Рожденное бо от Духа дух есть, рожденное же от плоти плоть есть, яко же Христос глагола. И за еже яко не родишася духовно отчюждена суть от вернаго рода и недостойни суще онаго родословия духовнаго, еже Христос глагола [Мк. гл. 13 зач. 61 и 62]: не может прейти род сей дондеже вся сия будут. небо и земля прейдет. словеса же Моя не прейдут. Якоже и Феофилакт толкует: И яко же род сии христианскии глаголет, утешая апостолы, да не мнят, яко толиким злым бывшим вся оскудеет вера. рече дерзайте. не прейдет род християнскии. ниже оскудеет аще и вся рече двигнутся, но о Мне вера не оскудеет. [выше:] И яко род сии християнскии не прейдет, дондеже вся сия о Иеросалиме, и о антихристове пришествии будут. Дозде Феофилакт.

И от сего явствуется яко род христианскии нарицается верныи, иже и не прейдет до скончания века, по словеси Христову. Неродящиижеся от воды и Духа не нарицаются род верныи, яко же Златоуст глаголет, но та яже ли разрешихом рождения, и от единыя проидохом утробы; ничтоже сие ко опаснейшему сродству. А понеже убо, яко Господь наш Исус Христос веры кроме крещения не предал есть и святии апостоли веры кроме крещения не научиша, несогласну веру с крещением, равну же и нераздельну по повелению Господню всей твари проповедаша и научиша, яко же изъявися. Тем же убо некрещени суть неверни, не могут в царство небесное внити по словеси Господню. Иоанн глава, 3.

 

Показание, 7.

 

Яко еретическое, в три погружения, крещение неприятно есть, понеже оставляет их Дух Святыи, смотрения же ради приятно бысть. Обаче не за истинное крещение веруется, но паче во осквернение вменяется. Аще же и приемлется, но вин ради благословных и нужных. О чесом ниже представляемая свидетельства являют.

Преподобныи Матфей канонист, в составе а, объявляет [глава 2]: Яко ариане, и македониане, и наватиане, и саватиане, и четыредесятницы, и средницы, и аполинариане, точно нам [правоверным] крещаются.

Обаче Афанасии Александрийскии, в слове 3-м, на арианы пиша, и крещение арианское весма похуляет, и не точию арианско едино, но и прочих неправославно мудрствующих, аще глаголет: и имя Отца и Сына притворяти именуются. Не бо глаголя, просто Господи сей дает, но со именем и веру имея праву. [ниже:] Многия убо глаголет, и иныя ереси, имена точию глаголющия, не мудрствующия же право якоже речеся. ниже веру здравствующую имущия, неполезну имут и от них даемую воду, скудствующую благочестием. яко и кропящемуся от них паче сквернитися в нечестии, нежели избавлятися. Дозде Афанасии.

Такоже Алексей архидиакон, в толковании 1-го правила Василия Великаго о наватианех, и о воздержниках сице являет: Наватиан же, рекше чистых. и воде предстоящих, и воздержащихся, крещение аще и не приятно есть понеже оставляет их Дух Святыи. но смотрения ради да будет приятно. Дозде архидиакон.

Такоже и Матфей канонист, в составе а, на правило Василия Великаго о воздержницех сице являет: Василии знаменает о воздержницех, еже не достояше, по Маркионову бо мудрствуют, и создание Божие скверно быти глаголют: да не глаголю яко во имя Отца и Сына и Святаго Духа крещаются, зане злым Творца Бога нарицают. [и прирек] но да опасения держащеся, ленивейших сотворим их ко еже соборней приступити церкви. да примемся обычая. и устроившим о них отцем последуем. якоже онем мнится помазуемом быти святым мvром, сице священи да причащаются. Дозде Матфей.

Тимофей презвитер Константина града, о еретицех третияго чина, сице изъявляет: Зрим же ныне в великих церквах рекше в митрополиях и патриархиях, и прочих яко армены, и яковиты, и несторианы, и проч. мvром помазуют, а не крещают. творят же их проклинати начальники их, и се ныне вообразися вин ради благословных и нужных. Дозде Тимофей.

Что же вины благословныя и нужныя, их же ради не покрещеваху еретиков? Явственно бо о сем, от патриархии Александрийския, самого архиепископа восточнаго достоверное свидетелство в церкви Божии обретается, которое зде на среду представляем. Кормчая, глава 61, лист 606, ответы правилныя святейшаго Тимофея архиепископа Александрийскаго: Вопрос: Почто обращающыяся еретики к соборной церкви не покрещеваем? Ответ: Аще бы се было, не быся человек скоро, обратил от ереси, покрещения стыдяся. Обаче и возложением руку презвитерску и молитвою весть приходити Дух Святыи. якоже деяния святых апостол свидетелствуют.

Тако же и Матфеи Иеросалимскии о воздержницех сице прирек [состав а, глава 2]: Но да не опасения держащеся, ленивейших сотворим их, ко еже соборней приступити церкви. И прочее.

Зрите убо вины благословныя и нужныя, их же ради не покрещеваху еретиков обращающихся в християнскую веру. Яко вещь снисхождения к ним показующая является. Сие же убо нарицается и смотрение, яко от законнаго и обдержнаго устава вин ради благословных и нужных снисхождение.

Устав, глава 40: Главизны же законны и обдержны, а не смотрителны. или отчасти. яже бо отчасти и смотрителне некоего ради слова содеянная или глаголанная, не достоит восприимати во обдержная и законная свидетелства. Сего ради яже отчасти и смотрителная в сих не сочетахом [Никона Черногорскаго слово 28]. О чесом в книзе Уставе, во главе 40, о том свидетелствует.

Тако же и преподобныи Никон Черногорскии, в слове 2-м сице глаголет: Аще не разсуждаем время и вину, и различие вещи, но яко по смотрению глаголанная или бывшая, объятно на всяко время приемлем, главою снити имам, и горняя долу будем. И в слове, 28-м: О других же отчасти смотрителне бывших, яково ко иконе исповедавшагося, и Давыдово. и ина ветхаго закона, и великаго канона. и другая яже честное твое имяше послание, да испытует владыко мой честь твоя, смотрителная силы. отнюд не приводити сих ниже в беседу. от таковых смотрителных развращенная сердца человеческая, не прочитающе тех толкования ни вмещающе в духовныи ум. но от плотскаго мудрования совращаются в различныя ереси, и прелести, и до конца погибают. Дозде Никона Черногорскаго.

Еще же и от прочих вин показуется, яко еретиков крестити святии отцы не соизволиша страха ради их мучителнаго. Понеже еретицы ненавидяще християнское крещение многих христиан, крещенных сущих истинным христианским крещением, в свое еретическо крещение мучителством привлекоша. Инии же не приемлюще сквернаго их крещения и души своя положиша. О чесом ниже представляемая свидетелства являют.

Пролог декабря, 8-е, в страдании святых мученик, иже во Африкии скончавшихся от ариан: Яко Африканскую страну правящу в содержании Онориху, по скончании отца своего Зериха. арианин сыи верою, ариевы ереси. А с ним тояжь ереси иерей Кирил Ивалидис совещавающеся. [ниже:] Сии же Онориху подражающе, повелеша, иже не крещающихся во арианское крещение, внезапу убивати: [ниже:] В старом же Риме, в таковое время, Сулинда, жена риги содержащего Рим, яже и та недугующа подобне во единой вере. едину от градских житель, некоего от велмож жену, нудяще, еже креститися оной во арианское крещение, ей же бяша имя Анфиса. И яко увещати ю не возможе, слышащи, яко от еписокпа Мидиоланскаго водою и Духом крещена бысть. [ниже:] Рагневавшижеся Сулинда, и святую Анфису огнем сожже.

И кроникарь Баронии, выписав из епистолии 6-й папы Феликса, в лете Господнем 487-м,  сице пишет: Феликс папа, падших во Африце епископов, и иереов, и диаконов, иже тяжких ради мук соизволиша на новое крещение от вандалов ариан, паки с покаянием обращающихся приемляше. Обаче епископом, и иным духовным, сицевую епитимию, или довлетворение, чрез послание определи. дабы никогда сана своего касалися, но отлучени от молитв верных на ином месте молилися. и при смерти аки простолюдини причащалися. И проч. Бароний, в лете Господнем 487.

Еще же и святейший Филарет, патриарх Московскии, и во изложении соборном довольно засвидетельствует, како великая Россия от короля Жигимонта пострада, и колико зло учинися за еретическое крещение. Понеже просиша сына его на царство Московское, и дабы повелел его крестити христианским крещением. Король же Жигимонт на се разгневався, Филарета и прочих с ним посланных просителей в дальныя страны разосла в зоточении, великую же Россию повеле к своему нечестию мучением привлещи. И по онаго велению по всей великой России протекаше огнь и мечь, и всюду христиане нудими свет евангельскии оставити, тме же еретичества их последовати. И за сие мнози от благочестивых христиан души своя положиша, церкви же Божия от благолепоты обругаемы бяху тогда, и прочая, яже самое изложение соборное пространно о сем явствует.

Зрите убо, яковая учинися злость правоверным христианом, хотящим отметати и не приимати еретическаго крещения. И от сих причин не дивно есть еже снизхождение показати о еретическом крещении, ово страха ради, ово же смотрения ради. Яко да не опасения держащеся правильнаго ленивейших сотворят их, ко еже соборней церкви приступити, якоже Матфеи глаголет. Или да не паче стыдящеся покрещения укосневают, якоже Тимофеи Александрийскии глаголет. Или да не паче убо развратившеся, гонение некое воздвигнут, якоже и прочии еретицы сотвориша. Сия убо вины благословныя и нужныя, якоже Тимофей презвитер глаголет. И не рече я вины богословныя, но благословныя и нужныя. Яко самем нужным случаем подлежащия, яже во обдержная и законная приимати отнюд не долженствует. О чесом выше предложенная свидетельства явствуют

Речет ли кто от противльшихся нам, яко аще святии отцы сих ради вин благословных и нужных снисхождение показаша, тако и ныне нам тех же ради вин снисхождение показовати должно есть.

Ответствуем:

Якоже преподобныи Никон Черногорскии глаголет: аще не разсуждаем время, и вину, и различие вещи, но яко по смотрению глаголанная или бывша, объятно на всяко время приемлем, главою снити имам, и горняя долу будем. Дозде святыи.

И аще восхощем вся сия разсуждати, обрящем нынешнее время и вины, и вещи несообразны суть прежде бывшим, но многоразличны и вящщии. О чесом и свидетельства вкратце зде представляем.

а: Яко древле аще смотрением и прияша от еретик крещение, но не у еще прииде тогда число зверино, 666-е. О нем же мнози святии отцы проповедающе: яко на сия, 1666 лет, антихристово пришествие, и печати его скверныя приятие, креста же и Христа отвержение, и ко антихристу отступление быти сказующе. Еже ныне исполнися.

в: Яко древнии еретицы покрещения стыдяшеся к соборней церкви приступати укосневали, ныне же обращающыяся еретицы не в таковом намерении обретаются, но яко бы они во Святую и божественную Троицу истиным святым крещением от еретиков уже крестишася. Того ради страхом одержими христианское святое крещение прияти ужасаются, а крестящихся христианским истинным крещением ненавидяще гнушаются, и клятву за сие полагают на них, и вменяют их быти богоотступниками. И сицеваго ради онех зломудрия является на них быти антихристова духа знамение, яко действо его свято и божественно быти верующе. О таковых бо во Апокалипсии толкуется: аще кто словом или делом бога нарицает антихриста, сие бо сказует на руце и на челе даемое начертание. И сицевое непщевание имущих, и залог веры простирающих, яко чюж есть Христовы церкве православнаго учения, и не подобен есть древле обращающимся еретиком в христианскую веру. Того ради не точию нам простолюдином, но и епископом или презвитером приимати сих в таковом намерении отнюд невозможно есть.

г: Яко древнии еретицы, аще и гонения на правоверных воздвигоша, обаче церкви у православных не повреждаху, и законное убо священство, и прочия церковныя тайны, предания же и догматы, в древлеправославной церкви невредимо тогда соблюдаемы бываху. Тем же убо, таковому благочестию распространену сущу, и церквам рукотворным видимо по всюду предстоящим, не леть есть гонителей церковных весма раздражати, да не паче лютое кое гонение на церкви Христовы воздвигнут, и священныя храмы, и благолепота церковная вся потребится, и благочестно живущим христианом отступление будет. Лепо есть убо воистинну, сих ради вин благословных, на время снисхождение показовати. Яко же пишет в Грамматице: разумна мужа, еже снисходити времени. искусна мужа, еже кратку быти в поучениих. И святии богоноснии отцы, пастырие и учителие наши, воистинну убо разумнии, и учителие суть искусни, благо сие сотвориша, еже обращающимся еретиком снисхождение показаша: овых мvропомазанием святым печатьствующе освятиша, имуще свидетельство оно, яко чрез мvропомазание Дух Святыи подается, и мvропомазание часть крещения быти нарицается, яко же Матфей Правилник глаголет; овых же, раздорник, и за проклятием ересей, и чрез благословение и молитвословие освятиша, имуще свидельство оно, яко и возложением руку презвитерску и молитвою весть приходити Дух Святыи, якоже свидетельствуют деяния святых апостол.

О нынешних же еретикох, аще разсмотрим, не вемы како, или коих ради вин благословных и нужных, снизхождение показовати. Понеже вся видимыя церкви благолепоту церковную обругаша, и догматы и таинства церковная испревратиша, и вся предания церковная с клятвою отложиша, новая же по своему хотению, а не по святых отец преданию, новомудрствующе утвердиша, и тем церквы Христовы оскверниша, и благочестно живущим христианом отступление веры. И сих убо ради важных вин, иже благочестие до конца потребивших, и христианом гонение по всюду, и лютое мучительство содеявших, и весь мир к отступлению веры уже приведших, не вемы убо и не леть есть сим снисхождение показовати, яко вящьши сего не вемы что еще зло церквам повреждение быти. Яко и ныне уже осквернены, и благочестие древлецерковное уже с клятвенным запрещением отложися, и христиане к отступлению веры уже мнози приидоша, и мир весь ко онех прелести крепце прилепися, и мерзость запустения, стоящая на месте святе, разумеется быти. И сих ради не имамы отнюд законнаго и правилнаго священства, им же бяше возможно было коих еретиков чрез мvропомазание, и чрез молитвословие и возложением рук их Дух святыи преподати, якоже правила о древних еретикох действовати священником повелевают. И аще сице не имамы законнаго священства, убо и правила она нам не суть прилична.

И яко не о нынешних еретикох, но о древних взаконяема быша, того ради и действовати по них о нынешних еретикох невозможно. Понеже вины, и действа, и вещи нынешних еретик к древним не сообразны, но весма много различны суть, зело важны. Таже и самое время, по числу лет 1666-ти, самого антихриста пришествие, и печати его скверныя приятие, креста же и Христа, крещения же, и службы божественныя отвержение, и ко антихристу присвоение быти сказуется. Еже убо ныне в новосочиненных присягах повсюду содевается.

И всех сих ради вин важных не имамы о нынешних еретикох снисхождение показовати.

д: Яко древле от еретик приятое крещение, еже точно нам совершаемое, и еже ни в чесом же веры преступающая, яко же Матфей Иеросалимскии, и Филарет Московскии объявляют. Нынешния же российския церкве крещение есть нам не точно и во многих вещех является быти православной вере христианской преступно:

1: Яко символ, еже есть образ веры, не точен есть древнему священному символу, но развращен сущии, иже при крещении глаголется. И посему является крещение се нашему не точно, и вере есть преступно.

2: Яко крещаяи священник и крещаемый, обоя знаменаются тремя персты, имиже и равенство Святыя Троицы измеряют дерзостне, по новомудрствованию и преданию нынешния церкви. И сим странно и чуждо благочестивыя веры догматствование вводят. О чесом Максим Грек, на николаитскую прелесть во обличении явствует. И по сему крещение се нашему не точно, и вере есть преступно.

3: Яко крещаяи священник и хотяй креститися обоя по древлецерковному преданию сложение перст знаменовательное, ими же вседоброе веры таинство по святым церковным учителем исповедуется, сие таинственное образование веры в крещении отложиша. И по сему крещение се нашему не точно, и вере преступно.

4: Яко крещаяй священник благословляет воду в купели пятию персты. В них же отложишася обоя таинства веры во образовании: яко образ Святыя Троицы и образ вочеловечения Божия Слова не образуются. Которое их пятиперстное благословение от святых отец клятве соборной преданное. И по сему крещение се нашему не точно, и вере преступно.

5: Яко самая видотворящая крещение форма, еже чрез приглашение троичнаго имени, с трищным погружением, во оном крещении нарушается. Яко крещаяй священник глаголет: Крещается раб Божии, имярек, во имя Отца, аминь, и Сына аминь, и Святаго Духа аминь, ныне и присно и во веки веков, аминь. И на коемждо приглашении возводя его, и низводя, якоже в новых требниках изображено есть. И сим четверократным аминя приглашением, и на всякое приглашение крещаемаго возвождением и низвождением, является четвероличное, а не троичное Святыя Троицы приглашение. И сим четвероличным Святыя Троицы приглашением, или приначертанием, не в возрождение, но во умерщвение совершается крещаемыи. О чесом премудрыи Богослов Григории в слове на из Египта пришедшия, в нем же о еретицех иже приначертающе что к трем богословским лицам крещают, еже аки от лица крещаемаго тако глаголет [книга Григория Назианзина, слово 24]: Не терплю непросвещен быти по просвещении, приначертавая что трех, во яже крестихся, и сущно погребстися воде, не в возрождение, но во умерщвение совершаем. смею что провещати; О Троице, и прощение безумию. о души бо беда, образ есмь и сан Божии, горьния славы, аще и доле положихся. не уветствуяся единочестным спасатися. аще не Бог Дух Свят. да обожается первое, и тако да обожает мя единочестна. Ныне кая лесть благодати, паче же дающих благодать, яко в Бога уверити, и возъити безбожному. Иному исповестися, и иному учитися. каковы словес татьбы, и лести, иным вопрошением, и исповеданием во ино несущия. Увы светлости, аще по бани очерневаюся, аще светлейшия зрю, не у очищенныя. Аще крестителя злославием коварствуюся; аще ищу духа лучшаго и не обретаю; даждь ми баню вторую, и о первой зле помысли. Дозде Богослов Григории. И сицевое крещение нашему есть не точно, и вере преступно.

6: Яко крещаяй священник, по преданию и содержанию своей их церкви, трепогружательное, и единопогружательное, вкупе же и поливательное крещения, за равносильно приемлет, и верует, и исповедует [Требник печат. могил. лист 7 и 8, в лето 1640; в книге О поливат. крещении, лист 47 и 54]. И сицевыя веры залог имущии, в три погружения крещает. Обаче како крещение се может быти христианскому крещению точно? Яко единопогружению и поливанию залогом веры крестителя не различается, но соединяется, и точно тем крещением вменяется, христианскому крещению не точно и вере преступно.

7: Яко приглашение глаголяй священник, по своему их церкви мудрованию, аще страдательным залогом [Скрижаль в слове о 7-ми тайнах], сиречь, крещается раб Божии, или аще и действительным залогом сиречь, крещаю тя аз, за равносильно быти верует, и исповедует. А еже в трепогружателном крещении тайну тридневной смерти и погребения Господня, не нужну, но и преступну быти верует и исповедует. Аще и погружает, аки бы в смерть Господню, обаче погружение не главнейший крещения обряд, и не так важныи и сильныи быти верует и исповедует. И сицевыя веры залог имущии, аще и в три погружения крещает, обаче крещение се веры таинство о смерти Христовой и о погребении, и о спасительном Его воскресении, залогом веры крестителевы преступает. И сицевое убо крещение веры христианской есть преступно, проклятому же римскому поливательному и развращенному в приглашении крещению, такоже и единопогружательному прочих еретик крещению, залогом веры крестителевой есть равносильно, и вменяется быти точно. Христианскому же крещению не точно, и вере есть преступно.

8: А понеже убо, яко вся тайны церковныя крестом освящаются и содеваются, якоже Златоуст глаголет: крещение крестом подобает воспряти. печать рукоположения крестом, без того бо ни крещение, ни литоргия не бывает, ни иная кая духовная вещь. Оное же крещение ныне без креста действуется. Убо крещение се нашему християнскому крещению есть не точно. Аще ли по Златоусту крещение крестом подобает восприяти, без того же крещение не бывает. Убо сицевое кроме креста совершаемое крещение, аки не у бывшее вменяем.

9: А понеже яко по древлецерковному чиноположению в действе крещения материалы быти приписуются, сиречь, отрицание сатаны, обещание Христу, символ веры и окрест купели хождение. Сия в новодействуемом крещении нарушаются: яко вместо отрицаюся сатаны, отрицаюся токмо, а сатаны отставлено. И вместо отрекохся сатаны, отрекохся токмо, а сатаны отставлено. И вместо обещаваюся Христу, сочетаваюся токмо. И вместо обещахся Христу, сочетахся токмо, а Христу во обоих отставлено. Тако же и младенцу, имярек, отставлено же. Но Симеон Фессалонискии, во главе 62, явственно повелевает творити диявола отрицание, и Христу обещатися явственно же. Новотворимое же отрицание диявола и Христу обещание зрится быти не явственно, но лукавым обычаем бывает творимое, и есть фальшивое. И о сем святии богоноснии отцы во святем евангелии, от поучения евангелиста Матфея, еже на Богоявление Владыки Христа Бога, растолкующе слово: яко да не бывает крещение лукавым обычаем, но многим тщанием и вниманием, еже крещением начертавшиися образ всыновления не скверно соблюдати должни есмы. Потребник лист, 577. И в молитве запрещателной, яже от священника к лицу самого диавола глаголаной сице: запрещает ти дияволе, Господь наш Исус Христос пришедыи в мир, и вселивыися в человецех, яко да твое мучительство упразднит, и человеки измет. И проч. Ныне же тая молитва запрещателная от священника к лицу самого Христа глаголется сице: запрещает ти Господь, диаволе пришедыи в мир, и вселивыися в человецех, яко да твое мучительство упраздни, и человеки измет. И прочая. А Исус Христос отставлено.

И от сего зрится яко древнии священницы к лицу дияволю глаголюще, и силою Христовою онаго запрещающе, и пришествием Христовым онаго мучительство низложити глаголюще, и всему человеческому роду свобождение быти проповедающе. Нынешния же священницы к лицу Христову молитву сию превративше глаголют, яко бы запрещает Господу диявол пришедыи в мир и вселивыися в человецех, яко же бы мучительство упразднит и человеки измет. Что же убо, или кое мучительство? Но разве по страшном судищи хотящее быти мучение грешных. Оное мнится упразднити диявол. Яко же и преподобныи Ефрем, в слове 105-м, пиша о антихристе, сице глаголет: яко мнится окаянныи противитися године той страшней егда приидет [Христос] на землю. не ведыи всестрастныи, яко царьство его вскоре разорится. и приимет уготованныи ему огнь со всеми покаряющимися ему, и послужившими тому.

А еже в символе веры, иже при крещении глаголемем, многая обретаются несогласия пред старопечатными. Сиречь, вместо и во единаго Господа Исуса Христа, и во единаго Господа Иисуса Христа. Вместо рождена а не сотворена, рожденна не сотворена. Вместо его же царствию несть конца, его же царствию не будет конца. Вместо и в Духа Святаго Господа истиннаго и животворящаго, и в Духа Святаго Господа животворящаго. И проч. О чесом вселенскаго 3 собора правило 7 запрещает: аще и мало что сложение зловерно приложит кто, на развращение и погибель. И преподобныи Максим Грек глаголет: Аще иоту едину, или едину черту прилагая или отлагаяй да будет проклят, и чюжь благословения и сообщения християнскаго. И аще сицевыи символ, сиречь образ веры, развращенныи при крещении глаголется, убо и вера она развращенна быти является. И аще развращенна сущи вера, убо последует быти и крещения развращение, равное убо и неразделное, яко же и самеми вещьми показуются многая неистовства, яко в символе так и в прочих материалах при крещениих.

10: А еже самая сущая материальная вина, сиречь вода естественная, ей же по достоянию быти чистой, и со иной влагой не смешеной повелевается. Сия убо аше и подобна и таяже в купели влагается. Обаче на оной крещаяи священник в молитвословии сице глаголет: Молимся тебе дух лукавыи, помрачение помыслом, и мятеж мысли наводяи, но ты владыка всех, покажи воду сию, воду благословения, воду освящения и проч. И сицевое молитвословие богоотступно есть, яко не истинному Господу Богу нашему, но духу лукавому от крестителева лица приносится. Иже самыи той в злобе силныи, и отец лжи и лукавству, иже всем клятвам подлежащии, и мерзость запустения сущии, от него же аки от господа просится крестителной воде благословения и освящения. И аще сицевая мерзость запустения крестительныя воды присещением своим устрояет, по молителному прошению крестителя, убо всяко скверно и мерско содеяти имать. Ибо воистинну духа дукаваго и нечистаго крестителным водам подавает. Иже и входит в купель со крещающимся, иже и вогнездившися паче в сердце крещаемаго сокрывается. О чесом древнии священницы Господу Богу молящеся и крещаемаго благословляюще, сице глаголаша: изжени из него всякаго нечистаго и лукаваго сокрытаго духа, гнездящагося в сердцы его. Тако же и над водой крестилной глаголаша: Да отступят от нас вся воздушная и невидимая привидения, и да не утаится в воде сей бес темен. ниже снидет со крещающимся дух лукав, помрачение помыслом, и мятеж мысли наводяй. Но молимтися Владыко, Ты Господи всех, покажи воду сию воду благословения, воду освящения. И проч.

И от сего зрится, яко егоже духа лукаваго древния священницы вогнездившагося в сердцы крещаемаго изгоняху, такоже и над водой крестительной молящеся не утаитися ему в воде той, ниже снити со крещающимся. Того лукаваго духа нынешния священницы господем и владыкою нарицают, ему же молящеся просят крестительной воде благословения и освящения, и в сию воду крещающагося и погружают.

А еже окрест купели надесно кругло обратное хождение оставльше, на шуее же обращающеся окрест купели хождение творяще, сим являют от пути деснаго отступление, и на шуии, сиречь развращенныи, уклонение, и ко антихристу присвоение. Якоже пишет святыи Кирил патриарх Иеросалимскии во главе 6, сице глаголя [лист 60]: Но Христов противник, яко во всем, тако и в том противится Христу, и востающе с шуия против десныя, сиречь дающе силу свою на десную, то же Христово, а шуее бо антихристово. обратився против десныя. сиречь, дающе силу свою на десную, то же Христово а шуее бо антихристово. обратився против по своему на десную знамение свое, или на челе дает. якоже о нем пишет глаголя: Даст знамение свое им на правую руку их, и на чела их. А еже глаголет, на правую руку их, и на чела их, то есть иже на своих. от них же изыдоша, и от них веру прияша, братися будут. Дозде святыи Кирил.

И от сего свидетельства показуется, яко на шуее кругло обратное окрест купели хождение Христу Богу нашему сопротивно есть, свойственно же быти может антихристу. Понеже востающе с шуия против десныя, сиречь, дающе силу свою на десную, то же Христово, а шуее бо антихристово, якоже Кирил святыи сказует. И сицевое крещение не точию нашему христианскому крещению не точно, не точию веры нашея преступно, но и богоотступно, и дияволу есть примирительно.

 

Показание, 8.

 

Яко от еретик действуемое крещение, аще и в три погружения, обаче еретическим нарицается. И яко единопогружательное, и поливательное, тако и трипогружательное купно еретическим крещением нарицается. И не крещение, но паче осквернение быти вменяется. И крестившихся от еретик в три погружения мнози святии отцы паки крестить повелевают. О чесом и свидетельства представляем.

Яко Матфей Иеросалимскии в составе а, о арианех, и о македонианех, о наватианех же и саватианех, о четыредесятниках же и о средниках, и о аполинарианех объявляет: яко точно нам правоверным крещаются. Обаче Афанасии архиепископ Александрийскии в слове 3-м на арианы пиша, и крещение их весма уничижает, и не точию арианское, но и прочих неправославно мудрствующих еретик крещение похуляет, и не крещение, но паче осквернение быти вменяет. О чесом самая словеса отца сего на среду зде представляем. В книзе Григория Назианзина на листу 40-м, страница 1, Афанасия архиепископа Александрийскаго на арианы, слово 3: Сии же бедствуют прочее, и о самой полности тайны, глаголю же крещении. аще бо во имя Отца и Сына дается совершение, не глаголют же Отца истиннаго, за еже отметатися из Него подобнаго существа, отметаютжеся и истиннаго Сына. и иного себе от не сущих зданнаго возтворяюще именуют. како не всеконечно тщее и неполезное от них даемое есть; притворение бо имущее. истинну же ни едину имущее к благочестию помощь. Не бо во Отца и Сына дают ариане, но в Зиждителя и здание, в тварь и Творца якоже ино есть здание кроме Сына. тако ино будет от истинны, мнимое ими даятися, аще и имя Отца и Сына, за написанное, именовати притворяются. Не бо глаголя просто Господи, сей дает, но со именем и веру имея праву, сего убо ради и Спас, не просто рече: научите, таже сице крестите, во имя Отца, и Сына, и Святаго Духа. да от учения вера правая будет, и с верою крещения совершение приложится. Многия убо и иныя ереси глаголющыя точию имена, не мудрствующия же право, яко же речеся. ниже веру здравствующую имущыя. не полезну имут и от них даемую воду, скудствущую благочестием яко же и кропящемуся от них паче сквернитися в нечестии, неже избавлятися. Тако еллини, убо Бога устнами глаголюще, безбожия же имут порок. яко сущно сущаго и истинаго Бога. не знают Отца Господа нашего Исуса Христа. Тако манихеи и фруги, и самосатовы ученицы имена глаголюще, ничто же мнее суть еретицы. Тако поряду прочее, и ариева мудрствующе. аще и чтут написанная и глаголют имена тии ругаются приемлющим от них. вящьше иных еретик нечестивейшии суще. Дозде Афанасии.

Катихисис Большей в нем же по вопросу отвещателно глаголет: Поистинне ничтоже у них [еретик] несть истинно. но все убо еже еретицы творят, от смышления своего. како могут совершати действа Божия, на игралищах своих. аще и Христа проповедуют. и веру свою похваляют, но вся сия льстиво, и лживо творят, аще и церкви своя, и клирики церковныя, и писания божественная почитают. и мнятся, еже тем же крещением крещатися. тако же и тайны божественныя, еже есть пречистое тело, и честную кровь Христовы имети. но вся сия на тако имеют, но инако и нечестиво. о них же смею рещи: иже и маркионити глаголются, учаще три начала Божеству проповедати, и крещение дают, не едино, но и две, и три. и папежи опресноком причащаются, и начало Божеству второе вводят. еже и от Сына исходити Святому Духу. и македониане ветхии и новыи завет приемлют, обаче другия пророки вводят. таже и пепузини и варсунофиане и инии мнози еретицы. [ниже:] О них же святыи Иоанн Златоуст глаголет: праздники убо и святыя дни празднуют, и святых апостол и мученик. но вся во отвержении веры истинныя. от своего умышления творят. и лживыи пророки имеют, и вся сия творят, ко прельщению верным. яко же святыи евангелист Матфей глаголет: Востанут бо рече лжехристи, и лжепророцы и елико бо аще не трезвятся, и праведнии прельщатися будут. Сего ради разумети имамы, яко еретическая писания, и празднества, и службы, и тайны, и проповеди не суть правы. Дозде Катихисис.

И от сих свидетельств показуется, яко ариане, и македониане, аще по Матфею Иеросалимскому и точно нам крещают, обаче Афанасии Великии крещение их равно монтанианскому, и павликианскому крещению быти вменяет. И не крещение, но паче осквернение нарицает. И не точию же сих единех, но и прочих неправомудрствующих, и веру не здравствующую имущих крещение не полезно, но скверно быти вменяет. Тако же и македониане, аще и точно нам крещаются, обаче в Катихисисе македонианское крещение, яко же и маркионитское, или яко папежское, и прочих еретик крещения, за едино полагается, и нечестиво быти глаголется. Не точию же се едино, но и о всем действе их купно глаголется, яко по истинне ничто же у них несть истинно, но вся рече сия творят ко прельщению верным. И яко разумети нам от сего повелевается, яко еретическая писания и празднества и службы, и тайны, и проповеди не суть правы.

И сия убо о еретицех, иже не право о Святей Троице мудрствующих речеся. Прочее же о расколницех, иже о Святей Троице православно мудрствующих свидетельство предлагаем.

Яко преподобныи Иосиф Волоколамскии в слове 15, сказует: Суть же и друзии еретицы, аще и зле мудрствуют, но не тако якоже первии: суть наватиане, и донатиане, и четыренадесятницы, и средницы, и воздержницы, и инии таковии. сии убо исповедуют Святую Троицу, и Господа нашего Исуса Христа истинным Богом нарицают, и плотьскому смотрению веруют.

И преподобныи во священноиноцех Матфей, во главе 2 [состав а], о наватианех сице пишет: Нават презвитер сыи стараго Рима, глаголемых чистых ересь начат, расколник сыи истее, а не еретик. не бо в чесом от правил предании с верными разньствоваше. но иже в гонение подклонившимся, и пожершим отрицаше покаяние. двоеженцем же не приобщашеся. их же ради, аще и не о вере погрешаше, но за немилосердие его и братоненавидение. собору бывшу в Риме при Корнилии папе, Декию царьствующу, извержен бысть и проклят. якоже Памфилийски Евсевии исповедует.

И преподобныи Максим Грек в книзе своей, во главе, 68, о наватианех явственно сказует, сице глаголя: Слыши внятно, и разумей прямо. еретики иже от Навата презвитера бывша Римскаго, наватиане нарицаемии. ниже о крещении, ниже о таинстве православныя веры. ниже о ином коем законе церковном беззаконноваху. но зане точию дарованное от человеколюбца Спаса Христа грешником покаяние отрицаху и не приимаху на покаяние обращающихся. иже в гонении Христа отвергошася. за то едино отриновени быша от всякаго собора православных, и прокляти быша.

Обаче и сих крещение не за истинное быти веруется, якоже Алексей архидиакон в толковании 1-го правила Василия Великаго сице глаголет: Нават же рекше чистых. и воде предстоящих. и воздержащихся, крещение аще и неприятно, понеже оставляет их Дух Святыи. но смотрения ради да будет приятно.

О чесом и Матфей Иеросалимскии глаголет [состав а], яко не достояше онех приимати крещение, и прирек: но да не опасения держащеся, ленивейших сотворим их ко еже соборней церкви приступити. да приимемся рече обычая, и устроившимся о нас отцем последуем. якоже онем мнится помазуемом быти, сице священи да причащаются.

Преподобныи же Никон Черногорскии глаголет [слово 63, на прав. 1 Вас. В.]: Чистии убо и тии от раздорных суть. обаче изволися древним, иже о Киприане, и Фирмилиане нашем, единем судом облагати чистыя, и воздержники, и водныя предстатели. зане же убо начало раздором от них бысть. а иже от церкве отступльшии, не к тому имут в себе благодать Святаго Духа. оскуде бо подаяние, внегда пресещися последованию. Первии убо не отступльшии от отцев, имеша рукоположение, и возложением рук их имяху дарование духовное, отделившежеся простии людие быша. ниже крещати, ниже рукополагати имеша область. к тому не могуще благодать Святаго Духа инем подати. от нея же тии отпадоша. Тем яко от простых людей иже от них крещаемых повелеша приходящих к церкве истинным крещением церковным очищатися.

Яко и преподобныи Матфеи Иеросалимскии глаголет [состав а, глава 2]: Чистым же убо от раскольник, и всем сущим, и воздержником, и водным предстателем, годе бысть сущим о Киприане, и Фирмилиане нашем, воляся покрещеватися. в Кархидоне бо бо. ему же епископ бе великии Киприан. собор отец древнейшии всех собрася. им же угодно бысть общим судом всем еретиком и раскольником покрещеватися. Сматряху бо сице, рекше слагаху, аще и не о вере погрешают, но понеже убо глава телеси церьковнаго Христос по божественному апостолу, от Него же уди вси живятся, и духовныи возраст приемлют. сии же от состав удов телесных отторгошася, не к тому пребывающую в них имут благодать Святаго Духа. еже убо не имут сами, како инем преподадут; Но обаче рече великии сей отец. понеже неким сущим во Асии, годе бысть строя ради чистых, крещение приимати да будет приятно. Дозде Матфей.

Яко сотвори собор Киприан, собрав из Африкии и Нумидии епископов 71, на котором вси уставиша, яко еретическое крещение несть истинное крещение, и не может в крещение вменитися. Дозде Баронии.

И по всем сим вышепредложенным свидетельством показуется яко воздержницы и чистии наватиане аще и исповедуют Святую Троицу и Господа нашего Исуса Христа истинным Богом нарицают, и плотскому смотрению веруют, яко же Иосиф Волоколамскии глаголет. Аще же и точно нам крещают, якоже Матфей Иеросалимскии глаголет. Аще ли же и во имя Отца, и Сына, и Святаго Духа крещают, якоже Василии Великии глаголет. Аще же убо и раскольницы, якоже Алексей архидиакон толкует. Но Дух Святыи оставляет их и крещение их неприятно есть, и еретическим нарицается, и крестити их долженствует по свидетельством выше показанных святых отец. Аще ли Никон Черногорец о них сказует: яко повелеша святии отцы, от них крещенным, истинным крещением церковным очищатися. Убо явствует яко у них несть истинное крещение, но еретическое, и не крещение, но паче осквернение, якоже Катихисис о том явственно поведает: яко поистинне ничто же у них несть истинно, но инако и нечестиво, льстиво же и лживо и вся сия ко прельщению верным.

Достовернаго ради свидетельства и правила зде на среду представляем.

Правило Василия Великаго, 47: Воздержники и вретищники, и апотактиты да крестиши. аще и глаголют яко во имя Отца и Сына и Святаго Духа крестихомся. но зане злу творца Бога нарицающе, хулят по маркионову учению, не крещени же неприятни. Толкование: В первом убо правиле своем, по смотрению словесе, воздержник, и прочих наватиан, великии сей светильник церковныи, прият крещение, и повеле токмо миром помазовати их, егда приходят к соборней церькви, и ереси своя прокленут, зде же исправляя еже по смотрению онамо прият повелевает воздержники, и прочия крестити понеже ересь их отрасль есть маркионитския ереси, ненавидят бо сии яко же и они брака. и отвращаются вина, и тварь Божию скверну быти глаголют. Дозде толкования.

Севаст Арменополь глаголет: Аще изволится множайшему суду епископ, и наватиане да воскрещеваются.

Тимофей же презвитер Константиня града, аще и на три чина еретиков разделяет, и овых крестить, овых мvром помазовати, овых же точию за проклятием ересей приятие засвидетельствова. Обаче в третием чине положеных, сиречь, несториан, и евтихиан, и диоскориан, и севериан повеле крестити. О  них же сице рече [Кормчая, лист 635 на обор.], Яко подобает творити им записание, и проклинати своя. Нестория, и Евтихия, и Диоскора, и прочия началники тем ересем, иже тако мудрствующыя, и вся прежде воспомянутыя ереси и тако восприимати им святое крещение.

Той же Тимфей презвитер подтверждая сице глаголет [ниже лист 636]: А иже с Киприаном собор, повелевает всякаго еретика крестити. А еже последи всего той же Тимофей повелевает последовати обычаю держащемуся в митрополиях и прочих, яко же сице рече: Мы же вся сия разсмотривше, должни есмы последовати и прилагатися обычаю, держащемуся ныне в митрополиях и патриархиах.

Тем же убо и мы должни последовати и прилагатися обычаю, держащемуся в патриархии и митрополиах и прочих нашей древлероссийстей церкви. Которой обычай святейшии патриарх Филарет Московскии, во изложении соборном ко Ионе митрополиту глаголя, засвидетельствовал сице [Потребник глава 43, лист 564]: И от лет убо приснопамятнаго, и святаго великаго князя Владимира, иже просвети всю великую Русию святым крещением от грек прием. И даже и до днесь по лет, 7128, никто же в нас не дерзнул творити таков соблазн еретичества, кроме Игнатия изверженаго патриарха и тебя.

И паки: Как и Московское государство учинилося, и от того времени, и по се время того не бывало, чтобы еретиков латынь, и иных различных вер еретиков не крестили, кроме изверженаго из святительства Игнатия патриарха.

И паки той же святейшии патриарх Филарет, о себе самом глаголет: Аз же по малей силе моей, елико благодать Святаго Духа настави мя, вседушно попекохся о сем. и правила святых апостол и святых отец прилежно смотрях со вниманием, и истязовах со испытанием. Того ради да уведят вси людие российския земли, яко вси еретики, различных еретических вер, не имут права святаго крещения, еже водою и Духом Святым. того ради от всех еретических вер различьных приходящих к православию христианскаго закона, подобает совершенно крестити святым крещением.

О четыренадесятницех же и о средницех Алексей архидиакон в толковании на 95 правило, 6-го вселенскаго собора, объявляет: яко того ради и четыредесятницы нарекошася, яко в 14 день луны празднуют Пасху; средницы же, яко в среду ядят мясо, а в суботу постятся и сих крещение приятно быти сказуется.

Обаче Филарет Московскии, во изложении соборном, сея ради вины всех еретик крестити повелевает, яко зде свидетельство его являем. Соборное изложение, о латынских ересях, глава 1: Римская ересь иже прияша от мелхиседекиан, и жидов, и армен. Мельхиседекиане убо и жиды, и армены, равну ересь в себе содержат, еже в суботу постятся. И сея ради вины, подобает убо и от римлян, и от всех различных еретических вер совершенно крестити. понеже еретическое крещение несть крещение, но паче осквернение.

И посему свидетельству является, яко четыренадесятницы и средницы, аще и исповедуют Святую Троицу, и Господа нашего Исуса Христа истинным Богом нарицают, и плотьскому смотрению Его веруют, якоже Иосиф Волоколамскии глаголет. Аще же и точно нам крещают, яко же Матфей Иеросалимскии глаголет. Обаче сея вины ради, еже в суботу постятся, подобает их крестити святым крещением, яко же Филарет патриарх Московскии, во изложении соборном явствует. И не сих единех или неких многих, но и всех купно еретик сея вины повеле крестити святым крещением. И не сея ради единыя вины, но и многих ради вин. О них же зде вкратце предлагаем.

1: Аще в суботу постятся, и сея ради вины всех еретик повелевает крестить.

2: Аще не в три погружения крещают, и сея ради вины, всех еретик повелевает крестить.

3: Аще грехи прощают без епитимей и сея ради вины всех еретик повелевает крестить.

4: Аще Духа Святаго на два начала разделяют, и сея ради вины, всех еретик повелевает крестить.

Таже и сице прирек: Да и многих ради вин. довлеет от латынских, и от иных. различных еретических вер крестити совершенно. понеже прияша в закон свой много частных ересей предания, и прочая.

И от сего явствуется яко не единыя ради вины оныя, еже не в три погружения крестятся, но многих ради вин, сиречь, многоразличных ради ересей предании, их же в закон свой прияша, яко же изъявися, подобает всех различных еретических вер, обращающихся в христианскую веру, совершенно крестити святым христианским крещением.

Аще бы от еретик действуемое крещение в три погружения истинное крещение было, то не бы Афанасии Великии арианское, и прочих еретик крещения, таковыми хульными уничижал словами: яко не крещение, но паче осквернение сие вменяя.

И аще бы сие равносилно было христианскому крещению, не бы с манихейским и монтанианским, и павликианским вкупе за равномощно полагал во осквернение. Такоже аще бы сицевое крещение было право и истинно, не бы в Катихисисе македонианское крещение, с маркионитским и папежским за равно полагалося, и не истинно, но инако и нечестиво, не право же, но льстиво, и лживо порицалося.

И паки: Аще бы сицевое крещение право было и истинно, не бы Павлин епископ Антиохийскии дерзнул ариан совершенно крестити, якоже в житии Мелетия патриарха Антиохийскаго, февраля в 12 день повествуется [Минея чет.].

Аще бы сицевое крещение было право и истино, не бы дерзнул Спиридон епископ Тримифийскии, при соборе 1-м вселенском, арианских любомудрецов совершенно крестити, якоже в Гранографе и в Синоксаре печатном, в неделю 7-ю по Пасце изъявися. И аще бы сицевое дерзновение было не богоугодно, то не бы святии отцы, на том соборе бывшии, сицевому дерзновению тогда быти попустили.

Такоже и послежде того, многим летом минувшим, и собору уже второму вселенскому бывшу, и правила о приятии крещения их уже изложенным сущим, обаче Порфирии епископ Газскии крести Навклира арианина, обратившагося в христианскую веру. О чесом в житии его февраля в 26 день повествуется.

Такоже и о прочих еретик трипогружателном крещении разумети имамы.

Аще бы воздержник и вретищник, и апотактит крещение было право и истинно, не бы Алексей архидиакон, толковщик всех правил и разсудитель, о наватианех чистых, и о воздержницех сице объявил: яко крещение их неприятно есть понеже оставляет их Дух Святыи. Не бы Василии Великии, в 47-м правиле своем, воздержник и прочих крестить повелел. Не бы Тимофей презвитер воздержник в 1-м чине еретическом под крещение положил.

Такоже и сие. Аще бы приятое правилы от еретик крещение повторяти погрешно было, не бы Василии Великии, приятое первым своим правилом от воздержник и от наватиан крещение, в 47-м правиле паки крестить повелел. Не бы и Тимофей презвитер онех же воздержник, вретищник, и апотактит под крещение положил. Аще бы приятое от еретик крещение погрешно было, не бы Тимофей презвитер несториан, и евтихиан, и диоскориан, и севериан положил прежде в третием чине, сиречь за проклятием ересей приимати засвидетелствовал, паки и крестить повелел. Аще бы приятое от еретик крещение, паки повторяти погрешно было, не бы Алексей архидиакон, толковщик всех правил и разсудитель, приятое от фотиниан крещение Лаодикийским собором, паки крестить повелел. Не бы и Тимофей презвитер с маркиониты, и с воздержники, и вретищники же и апотактиты, и с павликианы, и с прочими еретицы и фотиниан под крещение положил, не бы сицы засвидетелствовал и о третием чине, яко не крещают их вин ради благословных и нужных.

Аще бы сице всех еретик крестити несть праведно было, не бы Тимофей презвитер тако засвидетелствовал, яко с Киприаном собор повелевает всякаго еретика крестити.

Аще бы всех еретик крестити законопреступно было, не бы святейшии патриарх Филарет патриарх Московскии, во изложении соборном, сицевое предложил свидетелство: яко вси еретики, различных еретических вер, не имут праваго святаго крещения, еже водою и Духом. того ради от всех еретических вер различных, приходящих к православию христианскаго закона, подобает совершенно крестити святым крещением. Якоже в Потребнице, на листу 561-м, явствует.

Но понеже убо, яко аще от еретик действуемое крещение, аще и в три погружения, но многими священными писании похуляется, и не истинное, но еретическое нарицается, и не крещение, но паче во осквернение быти вменяется. Аще ли же по смотрению и приемлется, вин ради благословных и нужных, обаче во обдержность не законополагается. Яко их же аще и приемлется правилы крещение, тех же послежде и крестить паки истинным церковным крещением законополагается, якоже многих еретик и по приятии правилом совершенно крестиша святии отцы истинным христианским святым крещением.

А еже аще всех еретик крестити засвидетелствуется: сие апостолское, и отеческое, и соборное законоположение есть, понеже апостольския 46, и 47, и 68 правила; вселенскаго 1-го собора 19 правило; поместнаго собора иже в Карфагене, 73 правило; и собор Киприана священномученика, иже всем вселенским же и поместным собором первейшии написуется, егоже Тимофей презвитер, Матфей Иеросалимскии, Никон Черногорец. в свидетелство приемлют. Такоже и последственныи всем вселенским же и поместным собором, святейшаго патриарха Филарета, Московскаго и всея Руссии, и всего освященнаго чина, бывшии тогда священныи собор, на Иону митрополита Сарскаго и Подонскаго, на котором и соборное изложение о крещении еретик от многих священных правил составлено еже от всех различных еретических вер, обратившихся в христианску веру, повелевает крестить христианским святым крещением. О чесом в Потребницех изображено есть.

 

Показание, 9.

 

Яко от еретик действуемое крещение, по священным правилом, не вменятеся быти во истинное крещение, но паче во осквернение полагается. И приемлющии е за истинное, и за христианское быти верующыя, не именуются истиннии христиане, но лживии христиане, и лживии правовернии. О чесом ниже представляемая свидетельства являют.

1: Яко святая древлеправославная церковь молящихся купно с еретики, аще епископ, аще прзвитер, аще диакон отлучает. Приемлющих же еретиков за причетники, и повелевающих им служити в церкви яко священником, или ино что от священных содевати, таковых от сана извергает. О чесом и правилное свидетелство зде представляет:

Правило святых апостол, 45 [Кормчая, глава 1]: Моляйся с еретики, да отлучится. аще же яко причетники приимет я, да извержется. Толкование. Епископ, или презвитер, или диакон, аще помолится токмо с еретики, да отлучится. аще ли же и повелит им служити в церкви яко презвитерам, или ино что от священных содевати, таковыи да извержется.

И посему правилу показуется, яко зло еже с еретики вкупе молитися, и отлучению повинно. Злейше же того еже приимати еретиков за причетники, и позволяти им служити в церкви яко презвитером, или что от священных соделовати. За сие убо и от сана извергати должно есть. Тем же убо, елицы ныне приемлют еретиков за причетников, и повелевают им по старопечатным книгам церковная тайнодействия строити, или прочая от священных содевати яко презвитером. за что и дающе им мздовоздаяние. и мняще от них некую благодать прияти мздовоздаянием. И сицевии горши молящихся с еретики по правилу сему осуждаются. А за еже яко непщующе от еретик некую благодать прияти мздовоздаянием, за сие презельною ересию осуждаются. Сие бо непщевание их горши Македония духоборца ереси, равно же Июде предателю, свойственно же симониянскому нечестию. И правильному извержению и отлучению подлежащо есть.

2: Понеже от еретик действуемое крещение еретическим именуется, и не крещение, но паче осквернение вменяется. Которое священными правилы яко не истинно сущо отметается и не приемлется. О чесом свидетелства на среду представляем:

Правило святых апостол, 46: Второе крещаяй крещеннаго истинным крещением, и не покрещеваяй оскверненаго от зловерных, таковыи святитель не освящен. Толкование. Несть достойно дващи крестити человека. Аще которыи епископ, или презвитер, крестит кого второе, совершенным крещением, да извержется от сана. суть же нецыи, иже по прилучая прежде благоверно крещени бывше, таковии миром токмо помазуеми освящаются. А иже не крестить совершенно второе, первое крещение приемшаго от еретик, но приемлет его яко верна, да извержется от сана.

Такоже и в 68-м правиле апостолском толкуется: Ибо от тех крещени не крещении, и поставлени не причетницы.

Никон Черногорец, в слове 63: От таковех бо поставленом, или крещеном, ниже верном, ни причетником мощно есть быти.

Матфей Иеросалимскии, состав X, глава 14: Аще от еретик хиротонию приял бе, отметаем бо таковех, яко крещение, сице и хиротонию, не бо освящение се но скверну веруем исходатайствовати.

Перваго собора вселенскаго, правило 19: И тако вси возгласиша купно, еже еретическое крещение, несть крещение, но паче осквернение. и подобает таковех крестити святым крещением паки совершенно.

Поместнаго собора в Карфагене, правило 73, в толковании: Аще будет от нечестивых еретик крещен, тех бо крещение сквернение есть паче, а не крещение.

Потребник, глава 17: А иже крестити второе крещеннаго прежде от правоверных, вся правила отрицают. разве аще кто от нечестивых еретик крещен бысть прежде, тех бо крещение сквернение есть паче, а не крещение.

Катихисис Болшей: Поистине ничтоже у них (еретиков) несть истинно. но все убо еже еретицы творят, от смышления своего. како могут совершати действа Божия на игралищах своих. аще и Христа проповедают, и веру свою похваляют, но вся сия льстиво и лживо творят. аще и церкви своя, и клирики церковныя, и писания божественная почитают, и мнятся тем же крещением крещатися. [Ниже:] Но вся сия не тако, но инако и нечестиво. и проч. [ниже:] сего ради разумети имамы, яко еретическая писания, и празднества, и службы, и тайны и проповеди, не суть правы.

И по сим вышепредложенным свидетелством показуется, яко от рук еретических действуемое крещение не истинно есть, но паче осквернение вменяется, и приемлющии таковех яко верных, иже еретическим крещением оскверненых, аще причетники, за сие от сана извергает.

3: Яко приемлющии от рук еретических крещение, или прочая тайнодействия, и за истинно почитающии, не именуются быти правовернии христиане, но лживии христиане, и лживии правовернии. О чесом ниже представляемая свидетелства являют:

Правило святых апостол: Крещение, и жертву еретическую прием, святитель не священ. Толкование. Епископ, или священник, или диакон, аще не похуляет, ни поругается еретическому крещению, но приемлет крещеннаго от сих, или приносимая от них на жертву, сиречь на службу приимет, таковыи да извержется от сана. кое бо сочетание Христови к дияволу, или кая часть верному с неверными.

И сицевое правило явственно показует, яко подобает похуляти и поругатися крещению еретическому, и не приобщати таковых христианом православным, иже крещением осквернени, но отлучатися от таковых, аки от неверных. И уподобляет, яко несть согласия Христови к дияволу, так и верному с неверными: кое бо рече согласие Христови к дияволу, или кая часть верному с неверными. Убо явствуется, яко иже от еретик крещени суть не верни. и сообщатися с ними правоверным, аки Христови со дияволом отнюд неудобно есть.

Еще же и Иоанна митрополита Никийскаго предлагаем свидетельство еже о еретицех тако глаголаше [Кормчая старописм. от задней дски]: Сии проклинаемии да предани будут дияволу. уже да не имут места спасению, но да будут от Христа чюжди. Аще убо толикими от всех святых прокляти бывше, и от Христа отгнани, и дияволу предани, и до скончания века, от всех христиан проклинаеми; како паки яко истиннии христиане от правоверных прияти будут; како же и лживии христиане и лживии правовернии, скверное их крещение, и жертвы их, яко истинныя и крепкия творят. аще бо тмократицею прокляти бывше, и дияволу предани; како от анафемы и от клятвы благословение изыдет, или как от диявола духовное и святое дело совершается; А от анафемы благословение не бывает и от проклятия молитва не исходит. и от диявола Христово таиньство не совершается. и от гноища благоухания не исходит. и от гнилаго трупия иныи не исцелится. ниже от червивых удов здравие иному телеси подается. нипаки от ереси, или от неверия духовное действо исполняется. ни от неверных, ниже зловерных и нечестивых, совершенное и благоприятное крещение может быти. Тем же проявленно, како крещение их, и вся яже от них не приятна и не потребна суть. Аще и тщатся несмысленнии и неразумнии, и не утвержении и лживии христиане, яко истинная и благоприятная творити деяния их, но да услышат ненаучении, и ненаказании, Иоанна Богослова глаголюща тако в своем послании. Аще кто приходит к вам, а сего учения не приносит с собою, радоватися ему не глаголите, и в храмину не приемлите, иже бо глаголет ему радоватися, общник будет делом его лукавым. Темже проявлено есть, яко иже правовернии именуются, а приобщаются с сими еретики в ядении и в питии, и в дружбе, и в любви, и творимая от них яко благоприятна мнят. и нечестивно и неразумно истинныя христианы их именуют, общники обретаются проклятию анафеме, яже на них написана от всея вселенныя. от востока и до запада, от соборныя и апостольския церкви. якоже божественныи Иван Златоуст глаголет. Иже творится друг быти еретиком, враг Божии есть. Дозде Иоанн митрополит.

И по всем сим вышепредложенным свидетелством показуется, яко иже от еретик крещени, осквернени суть. И яко не именуются сицевии вернии, но убо суть невернии. А иже мнят быти аки благоприятна деяния их, таковии не именуются христиане правовернии, но лживии христиане. и лживии правовернии. А иже аще сообщаются с еретики в ядении и в питии, и в дружбе и в любви, и творимая от них аки благоприятна мнят, таже и христианы именуют их, общники обретаются проклятию анафеме, яже на них написана от всея вселенныя святых отец, и врази Божии таковии обретаются.

 

Показание, 10.

 

Яко аще на их же еретическая бяше первее, таковых крестити простолюдином никоего препятьствия не обретается. О чесом нижепредставляемая свидетелства являют.

Понеже в древлеправославней святей Божией церкви, чин и устав сицев обретается, яко обращающимся в христианскую веру, аще жидовином, аще срацыном, или еретическое крещение имущим прежде, на них же аще и рука еретическая бяше первее. Обаче действо единообразно и неизменно о всех купно действуемо бяше показуется. Яко самое чиноположение оно, еже в Потребнице изображено, явствует. Которое зде на среду представляем:

Потребник иноческии, глава 10, лист 247. Чин и устав како достоит приимати иже от латын приходящих, ко святей Божией церкви: К нашей непорочней християнской вере православной, хотящих истинным святым крещением креститися. дающих на себе свиток писания православныя веры. и проклинающих вся своя ереси, и иную всяку ересь. сего чина и устава последование единообразно действуется над приходящими и от иных вер. аще жидовин, аще срацынин, или кто еретическое крещение имея прежде. от них же все совершается неизменно. Дозде Потребник.

И посему явствуется, яко аще жидовина, аще срацынина, так и еретическое крещение имущаго прежде, в христианскую веру обращающихся приимати и крещения сподобляти по церковному сему чиноположению и уставу единообразно и неразлично есть, на которых аще и рука еретическая бяше первее. Понеже о них чиноположение едино еже в Потребнице изображено обретается.

И аще в древлеправославной церкви чин и устав един обретается, аще жидовином, аще срацыном, аще и еретическое крещение имущим прежде на них же и рука еретическая бяше первее, но о всех сих действо единообразно и неизменно показуется, и раличия в том никоего отнюд не обретается. Убо и ныне, и даже до скончания века, последнии древлецерковнаго содержания любителие, иже о новых догматех и тайнодействах церковных сомнящиися, могут аще жидовина, аще срацынина, или ертическое крещение имущаго прежде, обращающагося в христианскую веру прияти, и святым крещением просветити. И якоже в древлеправославней церкви, в действе крещения, рука еретическая ни единаго различия с жидовы, и со срацыны сотворити возможе, тако и в християнском крещении ныне от простолюдин действуемом никоего же различия или препятствия сотворити отнюд не возможет. Но аще жидовинов, аще срацынов, аще и еретическое крещение имущих прежде, всех сих христиане сущии, и церковная предания право мудрствующии, христианским святым крещение просветити могут. Верно слово, и всякаго приятия достойно [Апостол зач. 280].

Аще ли же нецыи не тако о сем разумеша, иже глаголют, яко после руки еретической простолюдину крестити несть мощно. И на утвержение мнения своего приводят от Номоканона 203 правило, иже о ложных священниках, и о христианех в нужду крестящих изъявися. Иже бо от ложных священник крестившияся, глаголет оное правило, яко второкрещаются, от простолюдин же неких православных, понужде не сущу священнику крестившияся, глаголет оное правило, яко не второкрещаются, но крещени суть. Точию глаголется, аще не рука еретическая бяше первее. И сицевое правило предлагающе толкуют, яко бы запрещает простолюдину крестить после руки еретической. Обаче правило оное разумения их толь далече отстоит, елико отстоит восток от запада, толико отстоит разумение правилное, от разумения онех. Понеже како таковое их разумение в правиле сем заключатися может, еже не крестити простолюдину после руки еретической. Идеже не о запрещении или о позволении простолюдину заповедуется, но точию о том, кии второкрещаются, и кии не второкрещаются. Яко же самое изображенное 203 правило показует явственно.

Номоканон, правило 203: Второкрещаются, иже ложне творяшеся, поистинне же не суще священницы крестиша, по 3-й главе 2-го стиха, иже в Матфеи. А сии нужды ради. Обаче не второкрещаются, иже от причетник, или от простца инока, или диякона, или отца самого, или христианина некоего православнаго, и по нужди не сущу священнику, то крещени суть. точию аще не рука еретическая бяше первее.

И сим являет, яко иже от ложных священник крестившияся второкрещаются, от християн же понужди не сущу священнику крестишася, то крещени суть, и не второкрещаются. Точию аще глаголет не рука еретическая бяше первее. Убо явствует, яко аще рука еретическая бяше первее, сиречь, действовала первое крещение, таковии второкрещаются. А не тако якоже тии разумеша: не крестити простолюдину после руки еретической. Аще бы таковое разумение в правиле сем заключалося, то бы не таковым образом сие правило было написано. Но сим образом: А сим, нужды ради, обаче крестити не запрещается: еже причетником, или простцем иноком, или дияконом, или отцем самим, или християном неким православным, и по нужде не сущу священнику, то крещаются. точию аще не рука еретическая бяше первее. И аще бы сице было написано, то право бы было оное разсуждение, еже не крестити простолюдину после руки еретической правилнаго ради сего запрещения, еже глаголет, крестити простолюдином не запрещается, но крещаются, точию аще не рука еретическая бяше первее. Убо явственно бы разумелося, яко аще рука еретическая бяше первее, то от простолюдина уже не крещаются, но запрещаются.

Но аще бы сицевым образом было написано, то бы сицевое правило не само собою утверждалося, но прочим или апостольским, или отеческим, или соборным правилом соглашалося. Такоже и святыми отцы толкователи правил, яснейше было бы истолковано. Обаче же убо правило оное, не таковым образом написано есть, и разумения онаго отнюд лишаемо. Убо и разсуждение оное тще и неполезно быти является. занеже вне разума священных писании обретается. ибо ни с которыми правилы, ни с апостольскими ни с отеческими, ниже с соборными священными правилы не соглашается, но паче сопротивно священным правилом обретается, и церкви Христовой странно и не прилично есть. Тем же и удалятися сицеваго учения долженствует по апостольскому завещанию глаголющу: в научения странна и различна не прилагайтеся. К евреом, глава 21, зач. 334.

А еже убо, яко сущее то еже в Номоканоне, по числу 203-е правило, в яковом разуме является, и грамматическим разумом како разрешается, и с которыми священными правилы удобь соглашается. Такоже убо, аще и рука еретическая бяше первее, в толковании правилном како изъясняется разумение? Мы грубии, по немощи нашей елико потщахомся, и Божией помощию елико вразумихомся толико вам на среду зде представляем.

Яко правило оное 203, в таковом является разуме, в яковом и прежде его вышеписанныя 201 и 202, правила заключаются. Им же всем, 201-му, и 202-му, и 203-му правилом, в заглавии положися надписание сицево: Кии второкрещаются? Таже явствует. Правило, 201: Елицы не знают яко крестишася, от пленения негли, или от иного некоего недоумения, и несть никтоже да известит о них опасно, да крестятся паки, по 73-му правилу, в Карфагене святаго собора. И правило 202: Аще агарянския дети крещени бывше от еретик от кого, паки крестятся и тии, аще от произволения обратятся поистинне. И правило, 203: Воторокрещаются, иже ложне творящеся, поистинне же не суще священницы крестиша, по 3-й главе, 2-го стиха, иже в Матфеи. А сии нужды ради. Обаче не второкрещаются. И сим речением, еже речеся обаче не второкрещаются, являет противление вышеписанному изъявленному разумению. Понеже речение се, Обаче, по грамматическому учению, является быти знаменования противителнаго. Еже вышепредложенным правилом о второкрещении взаконевающим, сопротивно полагается. Того ради и глаголется сице сопротивително, а сии нужды ради обаче не второкрещаются. Еже бо в вышепредложенных правилах изъявися, первое, о сомнящихся, яко второкрещаются. Второе, о агарянских детех, иже первее от еретик крестишася, яко второкрещаются. Третие, иже аще от ложных священник первее крестишася, яко второкрещаются. А от зде еже речеся, Обаче не второкрещаются, сопротивителное онем правилом повеление утверждается. Яко иже от христиан правоверных, в нужду аще крестишася, сицевии не второкрещаются. Ибо яко и самое действо христианскаго крещения неподобно есть действу ложных священников, или действу еретическаго крещения. Того ради, яко христианское суще поистине и приемлется, ибо из среды правила 203-го изъято суще, отделяемо и сопротивляемо, яко же речеся, а сии нужды ради, Обаче не второкрещаются, иже от причетник, или от простца инока, или диякона, или отца самого, или христианина, некоего православнаго, и понужди не сущу священнику, то крещени суть. Внемли силу словес, чесо ради глаголет не второкрещаются, но крещени суть. Понеже не от ложных священник, ниже от еретик, но от правоверных сущих крещени, то крещени суть. И яко несомнящеся о христианском крещении веруют, яко крещени суть. Понеже убо церковная предания правомудрствующыя аще крещают, то несть грех, яко же в 3-м показании о сем изъявися.

Но на предлежащее да возвратимся и к прочим речениям правила того востекати понуждаемся, еже по сих речеся: точию аще не рука еретическая бяше первее. И сим речением, еже речеся, точию, аще являет отделение от онаго разумения, еже выше речеся. Яко от христиан неких православных, понужди крестишася, то не второкрещаются, но крещени суть. А от зде речеся (точию) знаменует отделение. Ибо речение се, еже речеся (точию), по грамматическому учению глаголется наречие отделителное. А еже потом речеся (аще), сие знаменует противление. Понеже по грамматице сие нарицается союз знаменования противителнаго. И обоя вкупе слагаема и глаголема, точию аще, являета выше ею предложеннаго о христинском крещении приятия, отделение и противление, и прежде писанному о второкрещении повелителному изъявлению возращение и сослагание, яко же о сомнящихся изъявися, яко второкрещаются и от агарянских детей изъявися, яко второкрещаются, и от ложных священник крестившияся, яко второкрещаются, так и от руки еретической, аще первее крестившияся, второкрещаются. Первое бо крещение еретическое не прилично есть благочестию христианскому, и хотящим спастися не полезно есть. Яко Афанасии Великии о том глаголет [на ариан слово 3]: притворение бо имущее, истинну же ни едину имуще к благочестию помощь. И паки: неполезну имут от них воду, скудствующую благочестием, яко и кропящемуся от них паче сквернитися в нечестии, нежели избавлятися. Дозде Афанасия.

Тем же и сие 203 правило, о руке еретической, сице явствует глаголя: точию аще не рука еретическая бяше первее. Убо праведно о сем дает ведати, яко действо крещения от руки еретической не приятно есть, понеже оставляет их Дух Святыи, по толкованию 1 правила Василия Великаго. Того ради от христианскаго крещения с наречием сим, еже речеся (точию аще не рука еретическая бяше первее), отделяется, и сопротивно оному разумению, еже о приятии християнскаго крещения изъявися, полагается. Понеже еретическое крещение несть крещение, но паче осквернение, яко же о сем священнии правила явственно свидетельствуют.

Правила святых апсотол, 46, и 47, и 68; перваго вселенскаго собора, правило 19; поместнаго собора иже в Карфагене, правило 73; Никон Черногорец, слово 63; Матфей Иеросалимскии, состав X, глава 14; и в Потребнице, во главе 17, тоже свидетелствуется глаголя: А иже второе крестити кого крещенаго прежде от правоверных, вся правила отрицают разве аще кто от нечестивых еретик крещен бысть прежде, тех бо крещение сквернение есть паче, а не крещение.

И сии вси вышеупомянутыя правила согласно глаголют: яко еретическое крещение несть крещение, но паче осквернение. И повелевают таковех паки крестити, святым христианским крещением всех неотменно.

Яко же и собор священномученика Киприяна, повелевает всякаго еретика крестити. Которой всем вселенскм собором первейшии написуется. Святейшаго Филарета патриарха Московскаго священныи его собор, иже всех еретик крестити повелевающии. Которыи всем вселенским же и поместным собором бысть последнейшии. Тем же убо видится, яко оное еже в Номоканоне 203-е правило, со всеми сими апостольскими, и отеческими, и соборными священными правилы в единосогласии обретается, а не само собою утверждается. Но якоже упомянутыя правила вси согласно глаголют еже от правоверных крестившихся паки паки крестить отрицают, от еретик же крестившихся паки крестить повелевают. Так и сие 203 правило от правоверных крестившихся второкрестити не повелевает, от руки же еретической крестившихся второкрестить не запрещает, но повеление крестить утверждает, и согласное онем правилом разумение в себе удобноятно замыкает.

Темже убо зрим явственно яко правила сего повеление законно и правилно есть, и церкви Божией весма полезно есть и нам после руки еретической крестити не препятствуетю Но паче оправдуя наше християнское крещение и приемлюще, от руки же еретической крестившихся уничижающе крещение и отметающе, и крестить таковех повеление утверждающе, множае паче подавает нам дерзновение. И мы сим правилом нимало обязуемся, но весма паче оправдуемся. И сицевое правило мы любезне приемлем, и правилно о нем мудрствуем, и по нем несомненно действуем.

И грамматически разрешающе его явствуем: яко изъяту бывшу из среды его, еже о христианском крещении изъявлению, еже не второкрещаются, но крещени суть, разум правилныи в едино спрягается повеление, еже второкрещаются. Ибо правило оное, аще и различествует о действах крещения, сиречь о ложных священниках, и о христианех, таже и о руке еретической, обаче под единем 203-м числом за едино правило счисляется. И аще из среды его изъемлется о христианском крещении внесение правилныи разум в начале положенныи о ложных священниках, таже и конечныи о руке еретической засвидетельствуемыи, в едино слагается, яко второкрещаются.

И якоже о сомнящихся изъявися, яко второкрещаются, и о агарянских детех, яко второкрещаются, и о ложных священниках, яко от них крестившияся второкрещаются. Так и от руки еретической первее крестившияся, второе же крещаются.

И сии вси: 201, и 202, и 203 правила, в едином разуме заключаются. Верно слово, и всякаго приятия достойно [Апостол, зач. 280].

В заключение вышепредложенным всем свидетелством, конечное свидетелство предлагаем, имже и вышепредложенныя доводы о руке еретической достоверствовати можем. Яко аще рука ертическая бяше первее в церковнем тайнодействии, то како о ней в толковании правилном изъясняется.

Кормчая глава 1, святых апостол правило 68: Епископ, или презвитер, или диакон, аще второе приимет поставление, да извержется и с поставльшим его, токмо не будет еретическая рука первее. Толкование. Епископ, или презвитер, или диякон, аще второе поставление приимет от кого, перваго возненавидев, да извержется сам, и поставивыи его. токмо аще не прилучится яко от еретик поставлен бе первее, ибо от тех крещени не крещени, и поставлени не причетницы.

И сим являет, яко аще не рука еретическая бяше действовала первое крещение, или поставление, то не второкрещаются, ниже второпоставляются. Аще ли же рука еретическая бяше первее, сиречь действовала первое крещение, или поставление, то второкрещаются, и второпоставляются. Ибо от тех крещени не крещени, и поставлени не причетницы, якоже изъявися в толковании.

И сицевое святых апостол, о руке еретической, 68-е правило преподобныи Никон Черногорскии в 63 слове, свидетельствует глаголя: Разве объявлено есть. яко от еретик имать рукоположение. от еретик бо поставленом, или крещеном, ниже верном, ни причетником мощно есть быти.

Сицевое о руке еретической правило преподобныи Матфеи Иеросалимскии свидетелствует глаголя [состав X, глава 14]: Разве аще от еретик хиротонию приял бе, отметаем бо таковех, якоже крещение, сице и хиротонию, не бо освящение се, но скверну веруем исходатайствовати.

Сему подобно и в Потребнице Болшем во главе 17 свидетелствует: А иже второе крестити кого крещеннаго прежде от правоверных, вся правила отрицают, разве аще кто от нечестивых еретик крещен бысть прежде. тех бо крещение сквернение есть паче, а не крещение.

Зрите убо святых апостол, и святых отец правилная повеления и толкования: яко аще рука еретическая бяше первее, то не запрещается, но паче позволяется таковех крестить святым крещением.

А понеже убо яко в древлеправославной великороссийстей церкви чин и устав един обретается, аще жидовином, аще срацыном, или и еретическое крещение имущим прежде, о них же все повелевается действовати единообразно и неизменно. Яко же и творимо бяше тако. А различия никоего руки ради еретической не обреташеся. Убо и ныне в християнском крещении никоего же различия жидовином, и срацыном, и еретическое крещение имущим прежде, обрестися не имать ибо правовернии сущии христиане, яко чада церковная должни суть прилагатися обычаю держащемуся в древлероссийстей церкви. Темже убо аще жидовина, аще срацына, аще и еретическое крещение имущаго прежде, и христианским святым крещением просветити могут, по повелению и содержанию древлевеликороссийской церкви имуще же и правилная повеления, еже в неприсудствии священник, простолюдином верным сущим, и церковная предания правомудрствующим нужныя церковныя тайны действовати взаконевающия, приемлюще же оное законоположение Владычнее, и содержаще Его спасителное повеление, еже ко святым учеником Его и апостолом реченное: Шедше научите вся языки крестяще их, во имя Отца, и Сына, и Святаго Духа. учаще их блюсти вся елика заповедах вам. И се Аз с вами есмь во вся дни до скончания века, аминь.

 

 

 

 

 

 

 

 

 

 

 

 

Иван Иванов [Астраханец]

 

О крещении еретичестем.

 

О древнем еретичестем, також и о настоящем новодействуемом крещении немалыя в нас [чрез тыяже и едины правилы] настоят распри и разделения, овии убо о том сице, друзии же инако умствующе, и окрест разума подобателнаго ходяще, на свойственныи разум святыя церкве яко слепии не налучают отнюдуже кииждо сих вящше на свое изволение нуждею прегибающе оная, и свое упрямство тыми правилы подтверждающе, не хощут истине покоритися. Тем же нужное сие, не так ради их увещания, как своего ради благонадежнаго о сих сограждения, и отпора известнаго, потщахуся зде светлое святыя церкве разумение явити, и самыми правилы истину о древнем и новом еретическом крещении указати, и надлежащии путь несомненен во спасение подати о чем на разделы зде располагаем.

 

Яко еретическое в три погружения крещение неприятно есть понеже оставляет их Дух Святыи, смотрения ради приятно бысть; обаче не за истинное крещение веруется, но паче во осквернение вменяется. Аще же и приемлется, но вин ради благословных и нужных.

 

Раздел, 1.

 

Преподобныи Матфей канонист, в составе а [глава 2] объявляет, яко ариане, и македониане, и наватиане, и саватиане, и четыренадесятницы, и средницы,  аполинариане, точно нам [правоверным] крещаются.

Обаче Афанасии Александрийскии, в слове 3-м; на арины пиша, и крещение арианское, и прочих еретик неправославномудрствующих зело похуляет, аще [глаголет] и имя Отца и Сына притворяти именуются. не бо глаголя просто Господи сей дает, но со именем и веру имея праву. [ниже:] Многия убо глаголет и иныя ереси, имена точию глаголющия, не мудрствующыя же парво якоже речеся, ниже веру здравствующую имущыя, не полезну имут и оних даемую воду, скудствующую благочестием. яко и кропящему оних паче сквернитися, в нечестии. Дозде Афанасии.

Такоже Алексии архидиакон, в толковании 1-го правила Василия Великаго о наватианех и воздержниках сице являет: Наватиан же, рекше чистых. и воде предстоящих и воздержащихся, крещение аще неприятно есть, понеже оставляет их Дух Святыи. но смотрения ради да будет приятно. Дозде архидиакон.

Преподобныи же Никон Черногорец оное же 1-е правило Василия Великаго сице протолкует: Чистии и тии от раздорных суть, обаче изволися древним, единым судом облагати, чистыя и воздержники и водопредстатели убо: занеже началом разделению раздором бысть. а иже от церкве отступльше, не ктому имеша благодать Святаго Духа в себе, оскуде бо подаяние внегда пресещися последованию. [ниже:] тем же яко от простых людей, от них крещаемых, повелеша приходящим к церкви, истинным крещением церковным очищатися. елма же изволися некиим всяко иже во Асии, смотрения ради многих прияти их крещение да будет приято. Дозде Никон.

Також и Матфей Властарь, в составе а, на првило Василия Великаго о воздержницех сице являет: Василии знаменает о воздержницех, еже не достояше, по маркионову бо мудрствуют, и создание Божие скверно быти глаголют: да не глаголю яко во имя Отца и Сына и Святаго Духа крещаются зане злым Творца Бога нарицают [прирек] но да не опасения держащеся, ленивейших сотворим их, ко еже соборней приступити церкви. да приимемся обычая, и устроившим о них отцем последуем, яко же онем мнится помазуемом быти святым миром, сице священи да причащаются. Дозде Матфей.

Но и прежереченныи, Алексии Аристин в толковании 47-го правила, о оных же воздержниках и прочих сице показует: В первом убо правиле своем, по смотрению словесе, воздержник, и прочих наватиан, великии сей светилник церковныи [Василии] прият крещение, и повеле токмо миром помазовати их, егда приходят к соборней церкви и ереси своя прокленут, зде же исправляя еже по смотрению онамо прият, повелевает воздержники, и прочия крестити. Дозде Алексии Аристин.

Тимофей презвитер Константина града, о еретицех третияго чина сице изъявляет: Зрим же ныне в великих церквах, рекше в митрополиях и патриархиах, и прочих, яко армены, и яковиты, и несторианы, и прочии миром помазуют, а не крещают. творят же их проклинати началники их, и се ныне вообразися вин ради благословных и нужных.

Что же вины благословныя и нужныя, их же ради не покрещеваху еретиков, явственно бо о сем от патриархии Александрийския самого архиепископа восточнаго, [кии бе на втором вселенском соборе первоседателем] достоверное свидетельство в церкви Божии обретается, которое зде на среду представляем.

Ответы правилныя, святейшаго Тимофея архиепископа Александрийскаго [Кормчая, глава 61, лист 607].

Вопрос: Почто обращающияся еретики к соборней церкви не покрещеваем? Ответ: Аще бы се было, не быся человек скоро обратил от ереси, покрещения стыдяся. обаче и возложнием руку презвитерску и молитвою весть приходити Дух Святыи. якоже деяния святых апостол свидетельствуют.

Такоже и Матфей Иеросалимскии сице прирек [состав а, глава 2]: Но да не опасения держащеся, ленивейших сотворим их, коеже соборней приступити церкви и прочая.

Зрите убо вины благословныя и нужныя, их же ради не покрещеваху ертиков, обращающихся в кафолическую веру. Яко вещь снисхождения к ним показующая является. Сеже убо нарицается и смотрение, яко от законнаго и обдержнаго устава вин ради благословных и нужных снисхождение: Но вняти подобает яко обдержныи устав всем и на всякое время ключиме ж, смотрителныи же случай не всем подлежащь. Яко же Никон Черногорец пишет [слово 22]: Смотрителная владыкам нашим оставим. Мы же вне града суще, и таковыя вины извета пременени, яко иноцы да творим подобающая по божественных писаниих просто а не смотрително.

Той же в слове 2-м сице глаголет: Аще не разсуждаем время, и вину, и различие вещи, но яко по смотрению глаголанная или бывшая, объятно на всяко время приемлем, главою снити имам, и горняя долу будем. И в слове 28-м: О других же [рече] отчасти смотрителне бывших, яково ко иконе исповедавшагося, Давыдово. и ина ветхаго закона, и великаго канона. и другая яже честное твое имяше послание, да испытует владыко мой честь твоя смотрителная силы. отнюд не приводити сих ниже в беседу; о таковых смотрителных, развращенная сердца человеческая, не прочитающе тех толкования, ни вмещающе в духовныи ум. но от плотскаго мудрования совращаются в различныя ереси, и прелести и доконца погибают. Дозде Никон Черногорец.

Також и во Уставе в малом и велицем, сице пишет [полуустав, глава 40, лист 67]: Главизны же законны и обдержны, а не смотроителны. или отчасти, яже бо отчасти и смотрителне, некоего ради слова содеянная или глаголанная, не достоит восприимати во обдержная и законная свидетельства; Сего ради яже отчасти и смотрителная, в сих не сочетахом [Никон Черногорец, слово 28]. Дозде из устава.

Тем же вышеприведенными свидетельствы достоверно подкрепися, яко безумная [неких] смотрительства многих в плотская угодия, и в различныя ереси сведоша и каноны святых попрати устроиша [слово 63], якоже приснопоминаемыи Никон Черногорец в предисловии книги своея пишет: Силным бо в разуме смотрителныя вины прилично изобретати, а наипаче сподобльшимся духовныя благодати: сии бо едини смотрят полезнейшее святей церкви, и из крещаемаго в миропомазуемыи, а из помазуемаго в крещаемыи чин полагают.

Показуют убо и от прочих негли и от сих вин отеческое соизволение еже всех еретиков не крестити, понеже страха их мучителных свирепств и нападении. Ибо еретицы ненавидяще кафолическое крещение многих христиан, крещенных сущих истинным кафолическим крещением, в свое еретическое крещение насилно мучительски привлекоша. Инии же не приемлюще сквернаго их крещения и души своя положиша. О чем ниже представляемая свидетелства являют.

Пролог декабря, в 8 день. В страдании святых мученик, иже во Африкии, скончавшихся от ариан.

Яко африкийскую страну правящу во содержании Онориху, по скончании отца своего Зериха арианин бо сыи верою, Ариевы ереси иерей Кирил, Ивалидис совещевающеся. [ниже:] сии же Онориху подражающе, повелеша, иже не крещающихся во арианское крещение, внезапу убивати. [ниже:] в старом же Риме, в таковое время, Сулинда, жена риги содержащаго Рим, яже и та недугующа подобне во единой вере. едину о градских житель, некоего от вельмож жену нудяще, еже креститися оной во арианское крещение. ейже бяше имя Анфиса. и яко увещавати ю невозможе, слышащи яко от епископа Медиоламскаго водою и Духом крещена бысть. [ниже:] разгневавшижеся Сулинда, и святую Анфису огнем сожже. Пролог лист, 458.

И кроникарь Баронии выписал из епистолии 6-й папы Феликса, в лето Господне, 486-м: сице пишет: Феликс папа, падших во Африце епископов, и иереов, и диаконов, иже тяжких ради мук соизволиша на новое крещение от вандалов ариан, паки с покаянием обращающихся приемляше. обаче епископом, и иным духовным, сицевую епистолию, или довлетворение; чрез послание определи. дабы никогда сана своего касалися, но отлучени от молитв верных и на ином месте молилися, и при смерти аки простолюдине причащалися. и прочая. Дозде Баронии.

Но и святейшии Филарет патриарх Московскии, во изложении [своем] соборном доволно свидетельствует, како великая Россиа, от короля Жигимонта пострада, и колико зло учинися за еретическое крещение. Понеже просиша сына его на царство Московское, и дабы повелел его крестити христианским крещением. Король Жигимонт на се разгневася, Филарета и прочих с ним посланных просителей в далныя страны разосла в заточение, великую Россию повеле к своему нечестию мучением привлещи. И по онаго велению по всей велицей России протекаше огнь и мечь, и всюду христиане нудимы быша свет евангельскии оставити, тме же еретичества их последовати. И за сие мнози от благочестивых христиан души своя положиша, церкви же Божия от благолепоты обругаемы бяху тогда. И прочая, яже самое изложение соборное о сем явствует.

Зрите убо яковая учинися злость правоверным христианом хотящим отметати и не приимати еретическаго крещения.  И от сих таковых причин не дивно есть древним снисхождение показати о еретическом крещении, ово страха ради, ово же смотрения ради, яко да не опасения держащеся правилнаго ленивейших сотворят их, ко еже соборней церкви прступити, якоже Матфей Иеросалимскии глаголет. Или да не паче стыдящеся укосневают, якоже Тимофей Александрийскии глаголет. Или да не паче убо развратившеся гонение некое воздвигнут, яко же и прочии еретицы сотвориша. Сии убо вины благословныя и нужныя, якоже Тимофей презвитер глаголет. И не нарече я вины богословныя, но благословныя и нужныя, яко самем нужным случаем подлежащия яже во обдержныя и законныя приимати отнюд не долженствует. О чем выше предложенная свидетельства явствуют.

Речет ли кто от противльшихся нам, яко аще святии отцы сих ради вин благословных и нужных снисхождение показаша, тако и ныне нам тех же ради вин снисхождение показовати должно есть:

Ответствуем:

Понеже преподобныи Никон Черногорскии глаголет: аще неразсуждаем время и вину, и различие вещи, но яко по смотрению глаголанная или бывшая, объятно на всяко время приемлем, главою снити имам, и горняя долу будем. Дозде святыи.

Тем же аще восхощем вся сия разсуждати обрящем нынешнее время, и вины, и вещи несообразня суще преждебывшим, но многоразличны и вящши. О чесом и свидетелства, вкратце здесь представляем.

а: Яко древле аще смотрением и прияша от еретиков крещение, но не у еще прииде тогда число зверино, 666-е. О нем же мнози святии отцы проповедающе яко на сия, 1666 лет, антихристово пришествие, и печати его скверныя приятие, креста и Христа отвержение, и ко антихристу отступление быти сказующе. Еже и ныне исполнися.

в: Яко древнии еертицы покрещения стыдяся к соборней церкви приступити укосневали. Ныне же обращающияся еретицы не в таковом намерении обретаются, но яко бы они во Святую и божественную Троицу истинным святым крещением от еретиков уже крестишася, того ради страхом одержими христианское святое крещение прияти ужасаются. А крестящихся христианским истинным крещением ненавидяще гнушаются, и клятву за сие полагают на них, и вменяют их быти богоотступниками. И сицеваго ради онех зломудрия является на них быти антихристова духа знамение, яко действо его свято и божественно быти верующе. О таковых бо по Апокалипсии толкуется [глава 42. стих. 173]: аще кто словом или делом бога нарицает антихриста, сие бо сказует на руце и на челе даемое начертание. И сицевое непщевание имущих, и залог веры простирающих, неподобно есть равняти древле обращающимся еретиком в кафолическую веру, того ради, не точию нам простым, но и епископом или презвитером приимати сих в таковом намерении отнюд невозможно есть.

г: Яко древнии еретицы, аще и гонение на правоверных воздвигоша, обаче церкви у православных не повреждаху, и законное убо священство, и прочия церковныя тайны, предания же и догматы, в древлекафолической церкви невредимо тогда соблюдаемы бываху. Темже убо, таковому благочестию распространену сущу, и церквам рукотворным видимо повсюду предстоящим, не леть есть тогда гонителей церковных весма раздражати да не паче лютое кое гонение на церкви Христовы воздвигнется, и священныя храмы, и благолепота церковная вся потреблена будет, и благочестно живущим христианом, отступление наведется. Лепо есть убо воистинну, сих ради вин благословных, на время снисхождение показовати. Якоже пишет в Грамматице, часть 3: разумна мужа, еже снисходити времени. искусна учителя, еже кратку быти в поучениих. Тако и святии богоноснии отцы, пастырие [и учителие] наши, воистинну убо разумнии, и учителие суть искусни, благо сие сотворити умыслиша, еже таковым обращающимся еретиком снисхождение показаша: овых мvропомазанием святым печатствующе освятиша, имуще свидетелство оно, яко чрез мvропомазание Дух Святыи подает и миропомазание часть крещения быти наразумеется, якоже Матфей правилник глаголет, овых же раздорник и за проклятием ересей, и чрез благословение и молитвословие освятиша, имуща свидетелство оно, яко и возложением руку презвитерску и молитвою весть приходити Дух Святыи, якоже свидетелствуют деяния святых апостол. О нынешних же еретикох, аще разсмотрим, не вемы како, или коих ради вин благословных и нужных, снисхождение показовати. Понеже вся видимыя церкви, и благолепоту украшения церковнаго, испревратиша, и вся предания церковная с клятвою отложиша, новая же, по своему хотению, а не по святых отец преданию, новомудрствующе утвердиша, и тем церкви Христовы оскверниша, и благочестно живущим христианом. отступление веры содеяша. И сих ради важных вин, иже благочестие доконца потребивших и христианом гонение повсюду и лютое мучительство содеявших, и весь мир к отступлению от веры уже приведших, не вемы убо, и не леть есть, сим снисхождение показовати, яко вящши сего не вемы что еще зло церквам повреждение быти. Ибо ныне уже осквернены, и благочестие древлецерковное уже с клятвенным запрещением отложися, и христиане ко отступлению веры уже мнози приидоша, и мир весь ко онем прелести крепце прилепися, и мерзость запустения, стоящая на месте святе, разумеется быти. И сих ради не имамы снисхождение показовати. И яко не имамы отнюд законнаго и правильнаго священства, имже бяше возможно было коих еретик чрез миропомазание, и чрез молитвословие и возложением рук их Дух Святыи преподати, якоже правила о древних еретик действовати священиком повелевают. И аще сице не имамы законнаго священства, убо и правила она нам не суть прилична. И яко не о нынешних еретик, но о древних полагаема быша, того ради и действовати по них о настоящих еретик невозможно. Понеже вины и действа, и вещи нынешних еретик к древним несообразны, но весьма многоразличны суть, и зело важны. Убо сих ради и снисхождение к ним показовати отнюд не есть удобно.

д: Яко древле от еретик приятое крещение еже точно нам совершаемое, и еже ни в чесом же веры преступающее, якоже Матфей Иеросалимскии, и Никон Черногорец, и Филарет патриарх Московскии объявляют. Нынешней же российской церкви крещение есть нам не точно и во многих вещех является быти православной христианской вере преступно:

1: Яко символ, еже есть образ веры, не точен есть древнему священному символу, но развращен сущии, иже при крещении глаголется. И по всему является крещение се нашему не точно, и вере преступно.

2: Яко крещаяи священник и крещаемыи, обоя знаменуются тремя персты, ими же и равенство Святыя Троицы измеряют дерзостне, по новомудрствованию и преданию нынешней церкви. И сим странно и чюждо благочестия веры догматствование вводят. О чем Максим Грек на николаитскую прелесть во обличении явствует. И посему крещение се нашему не точно, и вере есть преступно.

3: Яко крещаяи священник и хотяи креститися, обоя по древлецерковному преданию сложение перст знаменательное, ими же все доброе веры таинство по святым церковным учителем исповедуется, сие таинственное образование веры в крещении отложиша. И посему крещение нашему не точно, и вере преступно.

4: Яко крещаяи священник благословляет воду в купели пятию персты, в них же отложишася обоя таинства веры вообразования, еже есть Святыя Троицы и вочеловечения Божия Слова. Которое их пятиперстное благословение от святых отец клятве соборной предано есть. И посему крещение се нашему не точно, и вере преступно.

5: Яко крещаяи священник по умствованию своея церкве Божия Вседержителя тмою именует [а не светом по преданию святыя церкве], якоже во Скрижали о том законополагается [лист 665]. И с таковым развращенныя веры крестителя залогом и крещение их есть развращенно, и вере преступно.

6: Яко креститель нынешнеи по догматствованию своея церкве Господа Саваофа Отца от себе самого создана умствует [книга новопечатная Иоанна Дамаскина, глава 10. Богослов. Платонов.]. Учителем же древлецерковным тако глаголющим: Отец ни от когоже, ни сам от себе [Катихисис Бол.]. Максим же Грек глаголет: аще дадим [рече] сие; последует онуже глаголати, яко не бе прежде, еже привести сам себе в бытие. [ниже:] вкупе с происходящим от Него Сыном и Святым Духом. Слово 1. Такоже не истинна, но истина Отца глаголют, истинне токмо причастника показуют. По сицевому залогу веры развращенныя крестителя, во Отца Бога безначалнаго, и крещение будет развращенно, и вере преступно.

7: Яко крещаяи и крещаемыи обоя исповедуют в символе своея веры некоего Иисуса, а не Исуса. И сего своего Иисуса истинным Богом и Спасителем креститель нарицает. Господа же нашего Исуса Христа не Спасителем, но равноухим [оле дерзости] хульствует [Розыск часть, 1, глава 15]. И во оного своего Иисуса и крещает, якоже в Требницех новопечатных видети есть. И таковое крещение во иного Иисуса совершаемое зело нашему не точно, и вере есть преступно.

8: Яко крещаяи и крещаемыи в своем символе противо древлепечатнаго не исповедуют истинным Святаго Духа. По догматствованию же своея церкви креститель [Духа Пресвятаго вся одаряющаго] самого одаренным существом, свойственная Македониеву зловерию исповедает [книга Платонов. богослов.]. По сих трех предложениев познавается не точию в действе, но и во устном исповедании о Святей триипостасной Троице противностей церкви креститель погрешает. Убо не с малыми, но с вящшими еретики сим соглашается. Тем же и крещение таковое нашему не точно, и вере преступно.

9: Яко креститель по согласию своея церкви четвероконечным крестом умствует крещению своему [залогом веры] совершатися. А яко от святых учителей Христовым крестом всем тайнодействам в церкви святей проповедуется совершаемым быти. Христов же крест четверочастен. Бяше четвероконечныи же крест нигде Христовым не именован есть, убо и к действу, или совершению, не есть потребен. Священныи же Златоуст, и прочии учители церковнии, без креста крещению, и прочим тайнам, отнюд не действуемым быти утверждают. Тем же новодействуемое крещение нашему не точно, и вере есть будет преступно.

10: Крещаяи священник в своем четвероконечном кресте усильствуется образ показати триипостасныя Троицы: овогда по иным по древам двучастного креста нудится исчислити треипостасие, овогда же по концам четвероконечнаго креста, и не хотя в своем новодогматствовании двоицу или четверицу изображает. И таковыя веры крещение зело будет нашему не точно, и вере преступно.

11: Еще креститель сопротивно пророком евангелистом, и всем учителем церковным, не на четверочастном кресте Христа распята исповедает, но на четвероконечном, или дводревом [Розыск, часть 2]. Еще же не Исуса проповедает распята, но, по своему мудрованию, Иисуса. И такое мудрование кафоличестей вере будет сопротивно, убо и крещение по оному будет преступно.

12: Яко самая видотворящая крещения форма, еже чрез приглашение троичнаго имене, с трищным погружением, во оном крещении нарушается. Яко крещаяи священник глаголет: крещается раб Божии, имярек, во имя Отца аминь, и Сына аминь, и Святаго Духа аминь, и ныне и присно и вовеки веком, аминь. И на коеждо приглашение возводя его и низводя, якоже в новых Требниках изображено есть. И сим четверократным аминя приглашением, и на всякое приглашение крещаемаго возвождением и низвождением, является четвероличное, а не троичное Святыя Троицы приглашение. О чем в разговорах древлероссийских учителей Валдемара Датскаго королевича с попом Матфеем ясно о сем доводствуется. Яко с единым аминем слитием ипостасей трех во едину будет по Савелиански. Последователно, с четырми четверица, а не троица ипостасей исповедуется. Но нынешнии учители не точию на таковое троичное приглашение вооружишася, но и на свое четверичное восташа, глаголюще: аминя не токмо четыре, но и три непотребни, во всем подобно богомерским лютором [Обличение, глава 9, лист 28]. И сицевое крещение нашему есть не точно, и вере преступно.

13: Яко крещаяи священник, по преданию и содержанию своей их церкви [Потребник Петра Могилы лист 7 и 8, в лето 1646. в книжице о поливат. крещен. лист 47 и 54], трипогружательное, и единопогружательное, вкупе же и поливателное крещения, за равносильны приемлет. И сицевая веры залог имущии аще и в три погружения крещает, но како се крещение может быти христианскому крещению точно, яко единопогружению и поливанию залогом веры крестителя не разлучается, но соединяется, и точно тем крещением вменяется. Следовательно будет христианскому крещению не точно, и вере преступно.

14: Крещаяи священник, по согласию своея церкве, в трепогружении троицу лиц, а во едином, единство смерти Христовой изображатися умствует [О поливат крещен., глава 13, лист 59]. Но сие мудрование елико святому Златоусту противно [научающу чрез три погружения, не троицу лиц но тридневное погребение и воскресение изображати {коринф. беседа 4, лист 1062: еванг. поучит. на крещен.; Нисск. Григ. Богосл.; Вас. Вел.; Иоанн Дамаск.; Феофилакт}], толико Савелию Ливийскому согласно, исповедающему слияние о Святей Троице, того ради и при крещении на коемждо погружении всех трех ипостасей имяна купно изгласив крещаше. Убо таковаго умствования крещение нашему будет не точно, и вере преступно.

15: Крещаяи священник, по новодогматствованию российския церкве, не водою по святых омыватися на души первородному греху, но кровию Христовой [Поливат книж., глава 7, лист 22 и проч.], якоже всесквернии люторяне умствуют [В предлож. люторском основан. 13, Разговоры с Валдемаром]. И таковое исповедание нашего крещения святей вере будет весма разгласно, и преступно.

16: Яко приглашение глаголяи священник по своему их церкве мудрованию, аще страдателным залогом, сиречь, крещается раб Божии, или действителным залогом, сиречь, крещаю тя аз, за равносилно быти верует и исповедует [Скрижаль, в слове о 7 тайнах]. И таковое приглашение нашему крещению будет не точно, но римскому проклятому в крещении приглашению со слагателно, вере же святей преступно.

17: Яко крещаяи священник в трипогружателном крещении тайну тридневной смерти и погребения Господня не нужну, но и преступну быти верует и исповедует [в книге О поливат. крещ., лист 47 и 17]. Аще и погружает, обаче погружение не главнейшии крещения обряд, и не так важныи и силныи, быти верует и исповедует. И сицевыя веры залог имущия, аще и в три погружения крещает, обаче крещения се веры таинство о смерти Хрситовой и о погребении, и о спасителном Его воскресении, залогом веры крестителевы преступает. И сицевое убо по залогу крещение нашему не точно, и вере есть преступно.

18: Крещаяи священник, по преданию своея церкве, не точию человеком обливателное крещене за важное быти утверждает [О поливат. крещ.], трепогружателное ж ненужное быти сказует, но и самого Христа от Иоанна во Иордане обливанием крещена быти утверждает. О чем в Скрижале, и в книге Трубе, о сем показуется [Скрижаль, грамматика, Досифея патр. Иеросалим.]. И таковое лжесловесное утвержение весма будет святей цекрви противно, и вере православной преступно.

19: А понеже, яко по древлецерковному чиноположению, в действе крещения материалы быти приписуются, сиречь, отрицание сатаны, обещание Христу, символ веры, и прочая молитвословия, и окрест купели хождение. Сия в новодействуемом крещении нарушаются. Яко вместо отрицаюся сатаны, отрицаюся токмо, а сатаны оставлено. И вместо отрекохся сатаны, отрекохся токмо, а сатаны оставлено. И вместо обещаваюся Христу, сочетаваюся токмо. И вместо общахся Христу, сочетахся токмо, а Христу во обоих оставлено. Но Симеон Фессалоницкии, во главе 62, явственно повелевает творити диавола отрицание и Христу обещатися явственно ж. Новотворимое ж отрицание диявола, и Христу обещание, зрится быти не явственно, но лукавым обычаем бывает творимое, и есть лукавое. И о сем святии богоноснии отцы во святем евангелии, от поучения евангелиста Матфея, еже на Богоявление Владыки Христа Бога, растолкующе слово [глаголют]: Яко да не бывает крещение лукавым обычаем, но многим тщанием и вниманием. еже крещением начертавшиися образ всыновления нескверно соблюдати должни есмы. Потребник лист 577. И в молитве запрещателной, яже от священника к лицу самого диявола глаголанной сице: Запрещает ти диаволе Господь наш Исус Христос пришедыи в мир, и вселивыися в человецех, яко да твое мучительство упразднит и человеки измет. И прочая. Ныне же тая молитва запрещалная от священника к лицу самого Христа глаголется сице: Запрещает ти Господь, диаволе пришедыи в мир, и вселивыися в человецех, яко да твое мучительство упразднит. И в молитве глаголемей тайно в древних: И во образи Христа твоего в хотящем породитися святым крещением, от моего недостоинства. В новых: В хотящем паки родитися моим окаянством. А святым крещением отставлено. И в молитве, велии еси Господи, вместо: Тебе молятся звезды, в новых: Тебе собеседуют звезды. И от сих новых молитвословии коликое зрится богопротивное заключение: Еже запрещение глаголати не к диаволу, но к лицу Христову; еже не святым крещением порождати крещаяи глаголет, но своим окаянством родити; еже звезд немолящихся Богу метафорически рабское покорение являти, но собеседников господственне Богу быти крещаяи глаголет. И прочая безчисленная в молитвах, в запрещениих, во отрицаниих, и иных крещения новодействуемаго последованиих богопротивная совершения за множество оставляем. А еже в символе веры, иже при крещении глаголемом, многая обретается несогласия пред старопечатными. Сиречь: вместо и во единаго Господа Исуса Христа, вместо рожденна а не сотворена, рождена, несотворена; вместо Его же царствию несть конца, Его же царствию не будет конца; вместо и в Духа Святаго Господа истиннаго и животворящаго, в Духа Святаго Господа животворящаго. И прочая, о чем вселенскаго 3 собора правило 7 запрещает: аще и мало что сложение зловерно приложит кто [православней вере] на развращение и погибель. И преподобныи Максим Грек глаголет: аще иоту, или едину черту прилагаия или отлагаяи, да будет проклят. и чужь благословения, и сообщения христианскаго. И аще сицевыи символ, сиречь образ веры развращенныи, при крещении глаголется, убо и вера она развращенна быти является. И аще развращенна суща вера, убо последует быти и крещения развращение, равное убо и неразделное. Яко же и самеми вещьми показуются многая богопротивства яко в символе, тако и в протчих материалах при крещении употребляемых.

20: А еже самая сущая материальная вина, сиречь вода естественная, ейже по достоянию быти чистой и со иной влагой несмешенной заповедуется, сия убо аще и подобна, к таяже в купели влагается. Обаче над оной крещаяи священник в молитвословии своем сице глаголет: молимся тебе, дух лукавыи, помрачение помыслом, и мятежь мысли наводяи, но ты Владыко всех, покажи воду сию, воду благословения, воду освящения. И прочая. И сицевое молитвословие, как не есть богоотступно, понеже не истинному Господу Богу нашему, но духу лукавому от уст крестителя приносится. Иже самыи той в злобе силныи, и отец лжи и лукавству, иже всем клятвам подлежащии, и мерзость запустения. От него же, аки от Господа, просится крестителной воде благословения и освящения. И аще сицевая мерзость запустения [по молителному прошению крестителя] крестителныя воды, присещением своим устрояет, убо тамо кое скверно, и кую мерзость содеяти не имать. Таковым прошением крещаяи вправду не Духа Святаго, но духа лукаваго крещающемуся подавает, иже и входит в купель с ним и возгнездившиися паче в сердце крещаемаго сокрывается. О чем древнии священницы Господу Богу молящуся, и крещаемаго благословяще, сице глаголаше: изжени из него всякаго нечистаго и лукаваго сокрытаго духа, гнездящагося в сердцы его. Такоже и над водой крестителной глаголаше: да отступят от нас вся воздушная и невидимая приведения, и да не утаится в воде сей бес темен. ниже снидет со крещающимся дух лукав, помрачение помыслом и мятежь мыслей наводяи. но молимтися Владыко, Ты Господи всех покажи воду сию, воду благословения, воду освящения. и прочая. И от сего зрится, яко его же, духа лукаваго, древния священницы вогнездившагося в сердцы крещаемаго изгоняху, також и над водой крестителной молящеся, еже не утаитися ему в ней, ниже снити со крещающимся. Того лукаваго духа нынешния священницы господем и владыкою нарицают, емуже молящеся просят крестителной воде благословения и освящения, тако и погружают в сию крещающагося. А еже окрест купели надесно кругообратное хождение оставльше, на шуее ж обращяющеся окрест купели хождение творяще. Сим являют от пути деснаго отступление и на шуии, сиречь, развращенныи уклонение, и ко антихристу присвоение. Яко же пишет святыи Кирил патриарх Иеросалимскии, во главе 6 [Кирил Иеросал. лист 60], сице глаголя: Но Христов противник, яко во всем так и в том противится Христу, и востающе с шуия против десныя, сиречь дающе силу свою на десную, то же Христово, а шуее бо антихристово. обраився против по своему на десную знамение свое, или на челе дает, яко же о нем пишет. глаголя: даст знамение свое им на правую руку их, и на челе их, то есть иже на своих, от них же изыдоша и от них веру прияша, братися будут. Дозде святыи Кирил. И от сего свидетельства показуется, яко на шуее кругообратное окрест купели хождение Христу Богу нашему сопротивно есть, свойственно ж быти может антихристу. Понеже востающе с шуия против десныя, сиречь, дающе силу свою на десную, то ж Христово, а шуее бо антихристово, яко же Кирил святыи сказует. И сицевое крещение не точию нашему христианскому крещению не точно, не точию веры нашея преступно, но и богоотступно, и дияволу есть примирительно.

 

Яко от еретик действуемое крещение аще и в три погружения обаче еретическим нарицается. И яко единопогружателное, и поливателное тако и трипогружателное купно еретическим крещением нарицается. и не крещение, но паче осквернение быти вменяется. И крестившихся от еретик в три погружения мнози святии отцы паки крестити повелевают.

 

Раздел, 2.

 

Преподобныи Матфей Иеросалимскии, в составе а, о арианех и македонианех, наватианех же и саватианех, о четыренадесятниках же и средниках, и аполинарианех объявляет, яко точно нам правоверным крещают. Обаче Афанасии архиепископ Александрийскии в слове 3-м, на арианы, пиша, и крещение их весма уничижает, и не точию арианское, но и прочих неправославномудрствующих еретик крещение похуляет, и не крещение, но паче осквернение быти вменяет. О чем самая словеса сего богоноснаго отца на среду зде представляем.

В книзе Григория Назианзина, на листу 40, страница 1: Афанасия архиепископа Александрийскаго, на арианы слово 3:

Сии же бедствуют прочее, и о самой полности тайны, глаголю же крещении. аще бо во имя Отца и Сына дается совершение, не глаголют же Отца истиннаго, за еже отметатися из Него подобнаго существа, отметаютжеся и истиннаго Сына. и иного себе от несущих зданнаго возтворяюще именуют. како не всеконечно тщее и неполезное от них даемое есть; притворение бо имущее. истинну же ни едину имущее к благочестию помощь. не бо во Отца и Сына дают ариане, но в Зиждителя и здание, в тварь и Творца. яко же ино есть здание кроме Сына: тако ино будет от истинны, мнимое ими даятися, аще имя Отца и Сына, за написанное, именовати притворяются. не бо глаголя просто Господи, сей дает, но со именем и веру имея праву. сего убо ради и Спас, не просто заповеда крещати, но первее рече: научите. таже сице крестите во имя Отца и Сына и Святаго Духа. да от учения вера правая будет, и с верою крещения совершение приложится. многия убо и иныя ереси глаголющия точию имена, не мудрствующия же право, яко же речеся. ниже веру здравствующую имущыя неполезны имут и от них даемую воду, скудствующую благочестием. яко же и кропящемуся от них паче сквернитися в нечестии, неже избавлятися. Тако еллини, убо Бога устнами глаголюще, безбожия же имут порок. яко сущно сущаго и истиннаго Бога не знают Отца Господа нашего Исуса Христа. Тако манихеи и фруги и самосатовы ученицы имена глаголюще, ничтоже мнее суть еретицы. Тако поряду прочее, и ариева мудрствующе. аще и чтут написанная, и глаголют имена. тии ругаются приемлющим от них вящше иных еретик нечестивейшии суще. Дозде Афанасии.

Катихисис Болшеи, в нем же по вопросу отвещателно глаголет [глава 4]:

Поистинне ничтоже у них [еретик] несть истинно. но все убо еже еретицы творят, от смышления своего. како могут совершати действа Божия, на игралищах своих. аще и Христа проповедуют. и веру свою похваляют, но вся сия льстиво, и лживо творят, аще и церкви своя, и клирики церковныя, и писания божественная почитают. и мнятся, еже тем же крещением крещатися. тако же и тайны божественныя, еже есть пречистое тело, и честную кровь Христовы имети. но вся сия на тако имеют, но инако и нечестиво. о них же смею рещи: иже и маркионити глаголются, учаще три начала Божеству проповедати, и крещение дают, не едино, но и две, и три. и папежи опресноком причащаются, и начало Божеству второе вводят. еже и от Сына исходити Святому Духу. и македониане ветхии и новыи завет приемлют, обаче другия пророки вводят. таже и пепузини и варсунофиане и инии мнози еретицы. [ниже:] О них же святыи Иоанн Златоуст глаголет: праздники убо и святыя дни празднуют, и святых апостол и мученик. но вся во отвержении веры истинныя. от своего умышления творят. и лживыи пророки имеют, и вся сия творят, ко прельщению верным. яко же святыи евангелист Матфей глаголет: Востанут бо рече лжехристи, и лжепророцы и елико бо аще не трезвятся, и праведнии прельщатися будут. Сего ради разумети имамы, яко еретическая писания, и празднества, и службы, и тайны, и проповеди не суть правы. Дозде Катихисис.

И от сих свидетельств показуется, яко ариане, и македониане, аще по Матфею Иеросалимскому и точно нам крещают, обаче Афанасии Великии крещение их равно монтанианскому, и павликианскому крещению быти вменяет, и не крещение, но паче осквернение нарицает. И не точию же сих единех, но и прочих не право мудрствующих, и веру нездравствующих имущих, крещение не полезно, но скверно быти вменяет. Такоже и македониане, аще и точно нам крещаются, обаче в Катихисисе македонианское, или яко папежское, и прочих еретик крещения, за едино полагается, и нечестиво быти глаголется. Не точию же се едино, но и о всем действе их купно глаголется: яко поистинне ничтоже у них есть истинно, но вся рече льстиво, и лживо творят, ко прельщению верным. И еже разумути нам от сего повелевается яко еретическая писания, и празднества, и службы, и тайны, и проповеди не суть правы.

Речем же ныне о Павле Самосатском. Первыи убо вселенскии собор правилом 19 павликиан повеле второе крестити глаголя: Павликиане покрещеваются, и прочая. Толкование. От павликианьския ереси приходящии к соборней и апостольстей церкви, да покрещеваются второе: первое крещение, не крещение понеже еретическо бе. Дозде правил.

Речет ли кто яко ереси сей началник Павел не в три погружения крести, и сие доводствуем отсюду. Пишет великии летописец Баронии, в лете Господнем, 266-м: яко сей Павел ересиарх бяше града Антиохии епископ в правоверных. Слух же дойде отцем о нем яко сопротивно о Христе умствует: собравшеся во Антихию епископи, вопросиша его о богохулном учении: он же исповеда себе точна с ними мудрствующа, и того ради оставиша его на епископстве. Но по десяти летех известно отцем сотворися о Павлове учении.  И в лето Господне 277-м паки собравшеся на Павла от святых отец: и вопрошением познавше его, яко зле о Христе учит, извергоша. Дозде Барония.

Отсюду мощно есть познати, яко Павел в три погружения крещаше, того ради и в толикия лета не возмогоша познати его ереси. Аще бы иначе крестил Павел, вскоре бы явился.

Монтана еретика от многих познати мощно, яко в три погружения крести, во Отца и Сына и Святаго Духа [Нил Селунскии, глава 32], но параклита себя мняще сей. Святыи священномученик Дионисии не вняв себе  в сем его словеси, прия крещение его за крещение: О чем зазрен бысть святым Василием яко не разсмотренно о вещи тако содея. Подтверждается же трикратно быти его погружение и от Тертулианова к нему пристатия [Баронии, лето Господне 201]. Како бо хотяще сей Тертулиан согласитися с ним, аще бы иначе Мантан крестил. Ибо Тертулиан о вере ничто зле имяше. Свидетельствуется и от Афанасия Великаго о фругах или монтановых учениках такожде и павликианех, яко они триипостасное Троицы при крещении своем приглашали. О чем тако глаголет [в слове 3 на арианы]: Многия убо и иныя ереси, глаголющия точию имена, не мудрствующия право, яко же речеся. ниже веру здравствующую имущыя, не полезну имут и от них даемую воду, скудствующую благочестием. яко же и кропящемуся от них паче сквернитися в нечестии, неже избавлятися; тако манихеи, и фруги, и самосатовы ученицы имена глаголюще, ничтоже мнее суть еретицы. Дозде Афанасия.

Подобает же рещи и о Фотине, епископе Сирмийском, яко таково же крещение имяше, как и соборная церковь. Показуется сие от собора Лаодикийскаго, яко же услышим.

Поместнаго собора иже в Лаодикии правило 7: Еретики наватианы, фотианы, и четыренадесятники, аще прокленут ереси, по помазании мvром, да приобщаются. Дозде правило.

От него же яве есть фотинианово крещение трикратнаго погружения бывшо. Како бо хотяше собор под миро сего прияти, обаче толкователь сего правила фотиниан в крещаемыи чин положи глаголя: Яко началник их Фотин многи ереси обнови и Павла Самосатскаго, и Савелия, и Монтана ереси.

Зрите убо зде вину сведение в крещаемыи чин фотиниан: не качество крещения, но качество крестителя, сиречь, каковы крещаяи ереси имать, а не то како крещает.

Втораго вселенскаго собора правило 7: Четыренадесятники, арианы, наватианы, македонианы, и аполинаристы, писание вдавше, приятни, помазующе токмо вся чювства. Дозде правило.

Но прежде сего собора дванадесяти лет сущии христиане с Павлином епископом во Антиохии не приимаху крещенныя от ариан. Такожде и после сего втораго собора, спустя 37 лет, божественным откровением Порфирии епископ Газскии крестил некоего Навклира арианина в корабли пловя. Чти о сем Баронии, лета 360; Минеи житие Мелетия, февраля 12; Феодорита, Барония лета 401; в минеи житие Порфирия Газскаго.

О сем же арианском и аполлинарианском крещении Григории Богослов в толковании на символ веры, сице пишет [По конце толк. псалтыри. Афанас. толк.]. Сущее: Исповедую едино крещение [зовется] во оставление грехов. Толкование: Едино убо крещение зовется, еже веровати несовратне в Троицу единосущну, яже дастся нам от юности нашея. ина суть крещения и различна, яже суть нам на вред души. тех же нам, яко нечто нечисто гнушатися, яже суть арианския, и аполлинарская, и та нам отметна имети. Дозде Григории Богослов.

Шестыи вселенскии собора, правилом 95-м, повелевает: арианы, македонианы, наватианы, несторианы, четыренадесятники, аполлинарианы, евтихианы, северианы, и подобная по проклятии ересей мvром помазывати.

По многих же временах сего собора Алексии архидиакон, правил толкователь, на сие глаголет: Несторианы, евтихианы, и северианы, чрез едино проклятие ересей приимати.

А Тимофей презвитер Великия церкве во своем послании ко Иоанну [Кормчая, лист 634], о приятии еретиков сице пишет: Прилагающихся [рече] к православию, и к части спасаемых еретиков, приемлемых по учиненному последованию и обычаю: арианы убо и македонианы, и наватианы, и аполлинарианы, и левыя, и четыренадесятники, по проклятии ересей. мvром вся чювства помазуем их, глаголюще, знамение дара Святаго Духа. Таже на и большия еретики сходя, глаголет: павликианы, евномианы, мантанианисты, и савелианы, аки еллины приемлем. И потом глаголет: несторианы же и евтихианы, и северианы, и иже от подобных ересей [приходящих] подобает им творити записания и проклинати своя ереси, и Несториа, и Евтиха, и Диоскора, и Севира. и прочая: и тако восприимати им святое крещение. Зрим же [глаголет] ныне в великих и соборных церквах. [рекше патриархиах и митрополиах и прочих. яко] армены. и яковитяны, и несторианы, и прочия безглавныя, и подобная им обращающыяся в православную веру, божественным мvром помазуют а не крещают. Нецыи же совершенно крещают армены. Дозде Тимофей.

От сих убо предложенных познаваем. яко святая церковь повсемественно не взираше на качество крещения еретическа [аще чрез трикратное погружение их и миропомазанием некиих приимаше], но и больше качество ересей их смотряше. Темже и разнообразное единым и тем же еретикам приятие творяше. Ныне убо сих еретиков проклинанием точию ересей приимаше, и паки тех же еретиков, по проклятии ересей, помазующе миром приимаше, а иногда тех же, коих проклятием, или мvропомазанием приемля, второкрещением приятие творяше. И сице приятие еретиков творяше в единых и тех же разньственное не иныя коея вины ради, точию сея ради,  яко крещение еретиков бездуховно, яко порождения духовнаго не подающо. О чем мнози учители церковнии засвидетельствуют [Никон Черногорец, слово 63; Мелетии папа Александрийскии, в 10 послании; Филарет патриарх, Потребник лист 561].

 

Яко не точию еретицы, но и прочии под именем расколников во Святую Троицу правомудрствущия, и о крещении не погрешающия, от многих убо святых отец [за лишение Святаго Духа в их тайнодействиях] без крещения в церковь не приемлются; и окрещенных, аще и от православных, но по залогу развращенному, яко и тии от благочестивых архипастырей еже без повторнаго крещения не прияшася и окрещенных от ложных священников.

 

Раздел, 3.

 

Преподобныи Иосиф Волоколамскии, в слове 15, сказует: Суть же и друзии еретицы, аще и зле мудрствуют, но не тако. яко же первии: суть наватиане, и донатиане, и четыренадесятницы, и средницы, и воздержницы, и инии таковии. Сии убо исповедуют Святую Троицу и Господа нашего Исуса Христа истинным Богом нарицают, и плотскому смотрению веруют.

И преподобныи во священноиноцех Матфей, во главе 2, о наватианех сице пишет [состав а]: Нават презвитер сыи стараго Рима, глаголемых чистых ересь начат, расколник сыи истее, а не еретик, не бо в чесом от правил предании с верными разньстоваше, но иже в гонении подклонившимся, и пожершим, отрицаше покаяние, двоеженцем же не приобщашеся. их же ради, аще и не о вере погрешаше, но за немилосердие его и братоненавидение. собору бывшу в Риме при Корнилии папе, Декию царствующу, извержен бысть и проклят, яко же Памфилийскии Евсевии исповедует.

И преподобныи Максим Грек, в книзе своей, во главе 38, о наватианех явственно сказует, сице глаголя: Слыши внятно, и разумей прямо. еретики иже от Навата презвитера бывша Римскаго, наватиане нарицаемии. ниже о крещении, ниже о таинстве православныя веры. ниже о ином коем законе церковном беззаконноваху. но зане точию дарованное от человеколюбца Спаса Христа грешником покаяние обращающихся иже в гонении Христа отвергошася. за то едино отриновени быша от всякаго собора православных, и прокляти быша.

Обаче и сих крещение не за истинное быти веруется, якоже Алексии архидиакон в толковании 1-го правила Василиа Великаго сице глаголет: нават же рекше чистых, и воде предстоящих, и воздержащихся, крещение аще и неприятно есть, понеже оставляет их Дух Святыи. но смотрения ради да будет приятно.

О чем и Матфей Иеросалимскии глаголет [состав а]: яко не достояше онех приимати крещение. И прирек: но да не опасения держащеся, ленивейших сотворим их ко еже соборней церкви приступити. да приимемся рече обычая, и устроившим о нас отцем последуем. якоже онем мнитися быти, сице священи да причащаются.

Книга Никона Черногорскаго, слово 63. на правило 1 Василиа Великаго.

Преподобныи же Никон Черногорскии глаголет: чистии убо и тии от раздорных суть. обаче изволися древним иже о Киприяне, и Фирмилиане нашем, единем судом облагати чистыя, и воздержники, и водныя предстатели. занеже убо начало раздором от них бысть. а иже от церкве отступльшеи, не ктому имут в себе благодать Святаго Духа. оскуде бо подаяние, внегда пресещися последованию. первии убо не отступльшеи от отец, имеша рукоположение, и возложением рук их имяху дарование духовное. отделившежеся простии людии быша. ниже крещати; ниже рукополагати имеша область к тому не могуще благодать Святаго Духа инем подати, от нея же тии падоша. тем яко от простых людей иже от них крещаемых повелеша приходящих к церкви истинным крещением церковным очищатися.

Вышеименованныи же преподобныи Матфей Иеросалимскии глаголет [глава 2, состав а]: Чистым же убо от раскольник, и всем сущим, и воздержником, и водным предстателем, годе бысть сущим о Киприане, и Фирмилиане нашем, воляся покрещеватися. в Халкидоне [Кархидоне?] бо ему же епископ бе великии Киприан. собор отец древнейшии всех собрася. им же угодно бысть общим судом всем еретиком и раскольником покрещеватися. сматряху бо сице, рекше слагаху, аще и не о вере погрешают, но понеже убо глава телеси церковнаго Христос, по божественному апостолу, от Него же уди вси живятся. сии же от состав удов телесных отторгошася, не ктому пребывающую в них имут благодать Святаго Духа. еже убо не имут сами, како инем преподадут; но обаче рече великии сей отец. понеже неким сущим во Асии годе бысть строя ради чистых, крещение приимати да будет приятно. Дозде Матфей.

Сему согласно и кроникарь Баронии, в лете Господнем 258-м объявляет: яко сотвори собор Киприан, собрав из Африкии и Нумидии епископов 71: на котором вси установиша, яко еретическое крещение, не есть истинное крещение. и не может в крещение вменитися. Дозде Баронии.

И по всем сим вышепредложенным свидетельством показуется, яко воздержницы, и чистии наватиане, аще и исповедуют Святую Троицу, и Господа нашего Исуса Христа истинным Богом нарицают, и плотскому смотрению веруют, якоже Иосиф Волоколамскии глаголет. Аще же и точно нам крещают, якоже Матфей Иеросалимскии глаголет. Аще ли же и во имя Отца и Сына, и Святаго Духа крещают, якоже Василии Великии глаголет. Аще же убо и раскольницы, якоже Алексей архидиакон толкует. Но Дух Святыи оставляет их, и крещение их не приятно есть, и еретическим нарицается, и крестити их долженствует по свидетельством вышеуказанных святых отец. Аще ли Никон Черногорец о них сказует, яко повелеша святии отцы от них крещенным, истинным крещением церковным очищатися, убо явствует, яко у них несть истинное крещение, но еретическое, и не крещение, но паче осквернение, якоже Катихисис о том явственно подтверждает: еже поистинне ничто же у них несть истинно, но инако и нечестиво, льстиво же и лживо, и вся сия ко прельщению верным.

Достовернаго ради еще свидетельства подтверждаем священными правилы богоносных отец:

Правило Василия Великаго 47: воздержники, и вретищники, и апотактиты да крестиши, аще и глаголют яко во имя Отца и Сына и Святаго Духа крестихомся: но зане злу Творца Бога нарицающе, хулят по маркионову учению, некрещени же не приятни. Толкование: В первом убо правиле своем, по смотрению словесе, воздержник, и прочих наватиан, великии сей светилник церковныи, прият крещение, и повеле токмо миром помазовати их, егда приходят к соборней церкви, и ереси своя прокленут, зде же исправляя еже по смотрению, онамо прият, повелевает воздержники, и прочия крестити. понеже ересь их отрасль есть маркиониския ереси, ненавидят бо сии якоже и они брака, и отвращаются вина и тварь Божию скверну быти глаголют. Дозде от толкования.

Преподобныи Никон Черныя горы, на оное правило, 47-е, тако глаголет [слово 63]: Воздержницы и вретищницы, и апатактите. томуже слову подлежат емуже и наватиане. яко от оных убо правило изложено бысть. аще и различне, а яже о сих умолчана быша. мы же единем словом покрещаем таковыя. аще ли от вас отречено бысть покрещати, якоже от римлян смотрения ради некоего отметается крещение их. но наше слово крепость да имать. яко понеже маркионитская отрасль тех есть. гнушающимися брака, и отвращающихся вина, и создание Божие осквернено быти глаголющих не приемлем их в церковь, аще не крестятся в наше крещение. да не глаголют убо яко во имя Отца и Сына и Святаго Духа крестихомся зане злу Творца творят Бога, подобне маркионову и прочим ересем. Дозде Никон.

Севаст же Арменополь глаголет [книга 1, толк. на прв. Вас. Вел.]: аще изволися множайшему суду епископ, и наватиане да воскрещеваются.

На оное же, 47-е правило Василия Великаго, в Кормчей старописменной сице толкует: Воздержники и вретищницы томуже подлягут слову, емуже и наватиане, яко о тех убо аще возглашено бысть различно. у Василия же умолчано бысть. мы же убо единем словом второе крещаем таковыя. Дозде от толкования.

О четыренадесятницех же и о средницех Алексей архидиакон, в толковании на 95 правило, 6-го вселенскаго собора, объявляет, яко того ради и четыренадесятницы нарекошася яко в 14 день луны празднуют Пасху, средницы же, яко в среду ядят мясо, а суботу постятся, и сих крещение приято быти сказуется. Обаче Филарет патриарх Московскии, во изложении соборном, сея ради вины всех еретик крестити повелевает. Якоже зде свидетельство его являем [Соборное изложение: о латынских ересех, глава 1]:

Римская [рече] ересь иже прияша от мелхиседекиан, и жидов и армен. мелхиседекиане убо и жиды, и армены равну ересь в себе содержат, еже в суботу постятся. и сея ради вины, подобает убо и от римлян, и от всех различных еретических вер совершенно крестити. Понеже еретическое крещение, несть крещение но паче осквернение.

И по сему свидетельству является, яко четыренадесятницы, и средницы, аще и исповедуют Святую Троицу и Господа нашего Исуса Христа истинным Богом нарицают, и плотскому смотрению Его веруют, якоже Иосиф Волоколамскии глаголет. Ащели и точно нам крещают, якоже Матфей Иеросалимскии глаголает, обаче сея ради вины, еже в суботу постятся, подобает их крестити святым крещением. Якоже Филарет патриарх Московский во изложении соборном явствует. И не сих единех, или некиих многих, но всех купно еретик сея ради вины повеле крестити святым крещением. И не сея ради единыя вины, но и многих ради вин. О них же зде вкратце предлагаем:

1: Аще в суботу постятся, и сея ради вины всех еретик повелевает крестить.

2: Аще не в три погружения крещают, и сея ради вины всех еретик повелевает крестить.

3: Аще Пасху превращают, и сея ради вины всех еретик повелевает крестить. [Пасху же неравно с христианы четыренадесятницы празднуют, но в четыренадесятыи день согласно со июдеи, якоже в толковании у Алексея архидиакона явствует убо зде, и положишася, от Филарета таковии в чину крещения].

4: Аще грехи прощают без епитемей, и сея ради вины всех еретик повелевает крестить.

5: Аще Духа Святаго на два начала разделяют, и сея ради вины всех еретик повелевает крестить.

Таже и сице прирек: Да и многих ради вин довлеет от латыньских, и от иных различных еретических вер крестити совершенно. Понеже прияша в закон свой многочастных ересей предания. И прочая.

И от сего явствуется, яко не единыя ради вины оныя, еже не в три погружения крестятся, но и многих ради вин, сиречь многоразличных ради ересей предании, их же в закон свой прияша. Якоже изъявися, подобает всех различных еретических вер, обращающихся в христианскую веру, совершенно крестити святым крещением.

Грядем же ныне ко второму изложению Филарета патриарха, разсматряти о белорусцех неких нарицаемых юнитах, идеже пишет тако: мнози в них [сиесть в белорусцех] и за папу изверженаго Бога молят, во святей литургии в приношении, и во ектениях и в литиях. а в которой у них церкве, аще она и христианская есть, а молят Бога за папу, и таковая церковь у них нарицается унея, и по их же разсуждению толкуется, яко таковыя церкви, еже нарицаемии от них унеи, сиречь соединение, еже мирующиися и соединяющиися с папежники, и в тех их церьквах, в нарицаемых в унеях, еже есть в соединяющихся с папежники, и под паствою папы римскаго пребывающии митрополиты, и архиепископы, и епископы, и архимариты и игумены, и протопопы и попы, и диаконы, и инии причетницы мнози суть. [Ниже:] А которой белорусец скажется, что был он выной вере и пришол из оной веры в совершеных летех, в христианскую и крестился веру в Литве от рускаго попа. а тот поп которой его крестил, молит Бога за папу, и таковаго совершенно крестити и латынское и еретическое отрицание ему говорити. и молитвы все говорити, и младенческое отрицание, такоже что и еретику, для того, что крещен от отступника, которой молит Бога за папежа. Дозде от изложения.

Сие убо чтущии мнози разглашаются: овии глаголют, яко сии белорусци самыя латынники, и папежане и не в три погружения крещают; овии же тому прекословят глаголюще: аще бы папежники сии белорусцы были и не в три погружения крещающыя, то бы не речено было, что они в христианскую веру крещают, да еще и миром и маслом помазуют и прочая яве глаголюще яко не папежники сии быша, но сущыя христиане, и в греческой вере пребывающыя. А крестити за то от них повелевается, что они за папежа римскаго Бога молят. Обаче мы самою истинною разсмотряюще достоверствуем: яко сии белорусцы быша ниже самыя папежники, ниже токмо единыя богомолцы, но ниже не трепогруженцы. О чем нижеследующими свидетельствы подтверждаем:

1: Яко сии белорусцы унияты быша, еже есть с костелом римским мирующиися, и соединяющиися, яко же выше о сем засвидетельствовахом.

2: А яко сии белорусцы не совершенныя папежники быша, понеже к восточней церкви приметахуся, тако же и к римскому костелу прикланяхуся. О чем и святейшии Филарет глаголет: яко в два пути ходят.

Кирил же епископ Любортовскии о сей унеи явственно сице пишет: Тая унея не может зватися ни латынская ни христианская вера: бо от церкви отступает, а до костела не прилучается во всем во единость. тая унея матку восточную лобжет, и мачеху западныи костел лижет. тая унея пред очима папежника хвалит его веру, а заочне ганит, удаючися всюду лицемерно, тая унея все то приимует, яже святии отцы отметают вредное, и от церкви изгоняют. Дозде Кирил Любортовскии.

От сего явно зрится, яко сии унеятове ко обоим странам прекланяющеся бяху. Того ради о них и глаголет Филарет, яко они в христианскую веру крещаху.

3: А еже в три погружения крещаху они белорусци показуется отсюду. Богомудрыи Захария Копестинскии, о сих белороссийских униатах, сице пишет: Иже нынешних часов отступницы до отступления удавшии, и случившийся с сопротивными: во всем веру костела противнаго приняли: толко себе поставу з верхнею и церемонии церкви нашея оставивши, дабы чрез то добре могли простых сыскивати прельщати и обманути. Дозде Захария.

Подтверждает сие и О вере списатель в книге своей, о сих униятах, глаголя тако: Подобныя (рече) имут церкви. такожде святаго писания, подобныя епископы, иныя в духовном чину клирики, подобное крещение, подобные святости, и ины вещи вси наипаче же самого Христа. Дозде О вере списатель.

От сих убо свидетельств ясно достоверствуется, яко сии белорусци униаты аще и к костелом римским соединилися, но оставлени быша от папы ради прелести простых во всех восточных церемониях, и подобное православным крещение имеяху. Но аще и подобное крещение бяше у белорусцев, но отступницы от восточныя церкве быша. Того ради суди блаженныи Филарет патриарх непременно их крестити вторично. Но не за богомолие за папежа токмо едино [по неких мнению], но самая причина Филарета патриарха еже крестити сих униатов за отступление, аще и подобное нам правоверным имеющих крещение, яко же в самом изложении от многих вин тако признавается быти.

Свидетельствуем же ныне о агарянских детех крещенных аще и от православных, но по залогу родителей развращену. Чего ради соборне таковии креститися повелешася. О чем Матфей канонист в составе в, во главе 3, пишет: Видети есть и во глубоцей тме агарянскаго злочестия, свет насилуем благодатныи и от тоя не объемлем или убежаем, понеже знамение ниже верным возбранено. бысть, возводяще сих к божественному помазанию. обычай бо есть от агарян многим не первее своя обрезовати младенцы, прежде даже убо под властию их христианстии священницы, и неволею понуждени будут сия крестити. взыскание убо бысть о сем на соборе в царствующем граде, Луце божественному патриаршескии правящу престол, аще подобает истинней христианстей вере приступающих покрещевати, или токмо помазати миром. и суждено бысть сих непрекословне паки крещати, имже бо измывшеся крещением, не мыслию благочестивою, но яко чарование или обавание. Дозде Матфей.

Тако же и севаст Арменополь о сих же агарянских детех свидетельствует сице: во дни святейшаго патриарха господина Луки, предсташа агаряне синодално испрошаеми креститися, и спросими како отвещаша, обычай есть всем младенцем агарянским крещатися от православных иерей. но не прияшася. услышаша бо яко от неверных искомое от христиан крещение, не залог благ и православное ищется. но лечьбу телесную, возмнится убо у агарян чада их бесноватися, и потом смердствовати аще не крещение получат христианское, и оттуду не яко чистителя всякие скверны душевныя, и света божественнаго и святьбы Подателя воспрошуют. но яко бальство, или напевание. нецыи иже из них; матери реша имети православныя. и от обещания сих креститися им от православных, но ниже сии услышашася, яко не предсташа свидетели сие самое свидетельствующии, паче убо и осудишася яко не благое предприятие дающе на себе. во еже приходити к вере правой. тем же и попустися сим крестится. Дозде севаст Арменополь.

О ложных священницех, Номоканон, правило 203-е: Второе крещаются, иже ложне творящеся. поистине же не суще священницы крестиша. по третией главе втораго стиха. еже в Матфеи. А сии нужды ради, обаче не второкрещаются. иже от причетник, или от простца инока, или диакона или от отца самого, или христианина некоего православнаго, и понужде не сущу священнику: то крещени суть, но точию аще не рука еретическая бяше первее. И паки, на листу 715, пишет о действе ложных священников сице: Ниже бо [рече] глас божественныи от них, ниже божественная дела понеже благодати рукоположения не имут, но и месть приимут иную. за прельстившихся от них или негде крещеных, или рукоположеных. сии бо не хиротонисани, ни крещени суть. Дозде от Номоканона.

Зрите убо вы приемлющии за истинно от рук еретических в три погружения действуемое крещение. Яко аще от белорусцев униатов и подобное правоверному бяше их крещение, но за согласие их к римскому костелу вторично креститися всероссийским собором повелено бысть. Аще ли же нецыи агарянския дети и от православных иерей крестишася, но по залогу своих родителей развращенну. Того ради паки от собора цареградскаго креститися повелени быша. Тако же и от ложных священников, аще и согласно правоверным крестишася, обаче второе креститися повелевают.

Тем же престаните (о любопрителие) от зде непщевати противная святей церкви, глаголюще, яко аще кто бы ни крестил толко в три погружения, то истинно и приятно будет крещение. Нецыи же (оле дерзости) возбесновавшижеся тако глаголют, аще и сам сатана в три погружения крестит, и то без всякия опасности крещение приятно есть. Живи убо безстрашнии под власть (тем) и сыновство сатане отдаются. О чем яве апостол их безумие обличая глаголет: Не восхотеша Бога в разуме имети, того ради и предаде их Бог в неискусен ум, еже творити неподобная.

 

Яко всех еретик крестити апостольская правила повелевают. Последующии же в первенствующей церкви (сим) апостольским правилом Агрипинов и Киприанов и прочии собори такожде подтверждают. Сице же и святейшаго Филарета патриарха всеросийский собор согласно оным заповедает.

 

Раздел, 4.

 

Правило 46-е святых апостол: Крещение и жертву еретическую прием святитель не освящен. Толкование: Епископ, или священник, или священник или диакон, аще не похуляет ни поругается еретическому крещению, но приемлет крещенаго от сих, или приносимая от них на жертву, сиречь на службу приимет, таковыи да извержется от сана. кое бо сочетание Христови к дияволу, или кая часть верному с неверными.

И паки, от толкования 47-го правила святых апостол: И иже не крестит совершенно второе, первое крещение приемшаго от еретик, но приемлет его яко верна, да извержется от сана. Дозде от толкования.

Сие убо апостольское заповедание, еже не приимати от еретик крещение, подтверждает и святейшии Филарет патриарх тако глаголя: Правило перваго вселенскаго собора, 19. и тако вси возгласиша купно еже еретическое крещение, несть крещение, но паче осквернение. и повелевают таковых крестити святым крещением паки совершено. Сия бо прияша святии отцы, от самех самовидцов Слову и премудрости божественных апостол, еже еретическое крещение не в крещение полагают: понеже божественнии апостоли в четыредесять шестом и седмом правиле своем тако утвердив. епископ, или поп или диакон, аще еретическо приимет крещение или жертву таковыи да извержется. И паки прирек сице: да и многих ради вин довлеет от латинских и инех различных еретических вер приходящих ко благоверию крестити совершенно. Дозде Филарет патриарх.

Речем же ныне о первенствующей церкви последственне святым апостолом своими соборы, како она с еретики в крещение поступаше. О чем кроникарь Баронии, в лете Господнем 217, о Агрипиновом соборе сице пишет: Агрипин епископ Карфагенскии ненавидя еретиков, видя же яко вся во гресех и проклятии моления своя и тайны совершают, возъмне яко крещение их несть крещение. и сих иже от них, к церкви прилагахуся. паки крестити подобает. [ниже]: На утвержение мнения своего созва епископы африканския и с ними устави, дабы от еретиков крещенни. паки восприимали в церькви истинное крещение. [Стих 2.] Признавается, яко того же мнения бе Тертулиан, быв еще православен. Понеже о крещении пишущь. тако глаголет: еретики не имут общения со учением нашим, само их проклятие о том свидетельствует, не должен есмь у них познати сие, еже мне повелено есть: ибо ни того бога имеют, его же мы ниже того христа, его же мы имамы.

Той же Баронии, в лете Господнем, 258: Мнози такожде православнии епископи еретическое крещение уничтожаху, и тех иже у них крестишася, новым крещением очищати начаша. Восточныя церкви о том, во Иконии, во Фригии, собор сотворше, уставиша ни едину тайну у еретиков, ниже крещение, в тайну вменяти.

И паки тойже: стих 4. Сотвори собор Киприан собрав из Африки и Нумидии. епископов 71: на котором вси уставиша, яко еретическое крещение, не есть истинное крещение и не может в крещение вменитися. Стих 6. Паки святыи Киприан во Африце собор сотвори, собрав нань 87 епископов: и на оном соборе тоже узакониша еже и прежде.

О том же Киприановом соборе Матфей канонист, во объятии всех вин, свидетельствует тако: Всех убо вселенских и поместных соборов, первейшии написуется, иже в Кархидоне собор, началника убо имуще великаго Киприана, в епископех же множашеся к четырем осмь десять. иже убо едино токмо изнесоша. яко во образ правила отречение. иже весма от всякаго еретика и раскольника крестившихся, и к соборней приходящих церкви, и паки крещати. Дозде Матфей.

Тако же Тимофей презвитер, о оном же соборе Киприанове глаголет: А иже (рече) с Киприаном собор, повелевает всякаго еретика крестити. и хотящим от ереси обратитися десять дней, или пять надесять, поститися и упражнятися на молитву, вечер и утро, и учити псалмы повелевает. Дозде Тимофей.

Глаголет ли Баронии о Агрипинове и Киприанове и прочих соборах, аки бы церковь сие их уставление о приятии еретик в заблуждение и ересь постави: обаче истиною доказати сего не может.

Известно убо есть, яко церкве суды оны на архиерействе положены, от них быша онии Агрипин и Киприан, после же сих Василии Великии архиепископ бысть (ему же наипаче верити подобает). Но сей оных повторение не токмо не похули, но паче в похваление положи. аще строения некоего по оному и упраздни.

О сих же повторении и шестыи вселенскии собор воспомяне (яко же Матфей правильник пишет) однако же ересию дело их не назва, только о том глаголаху святии отцы, яко тогдашнему поспеваше времени и вещем таковым, аки бы рек: яко тогдашнее время способно им на покрещевание бысть.

И по сим всем Барониево напрасно на церковь оболгание, аки бы она Агрипиново и Киприаново действо в заблуждение и ересь постави. Виновное бо сему оболгание его, видится гнев его на греческую церковь бывшии сей. Понеже греческая церковь западную и папежа римскаго с действы его ни во что поставляше, тем же и крещенныя ими паки покрещеваше, о чем той же Баронии в лете Господнем 1054-м пишет. Но Баронии великии защитник римския церкве и ревнитель бысть. Темже нужно бысть ему оных дело Агрипиново и Киприаново о крещении повторном похулити и тако обесчестити, коим гаждением тех поносну творит восточную церковь, яко в том же деле повторнаго крещения явися, а западный костел непорочен выставляет.

Но сие доводствуют нецыи спорники, яко у того ж Барония, в лете Господнем 314, обретается писано, яко в Галлии во Ареляте граде на епископском соборе уставлено бысть противу донатистов, иже паки крещаху, дабы от еретиков крещеннии во имя Святыя Троицы, со исповеданеим Отца и Сына и Святаго Духа, не были быти крещаеми, но токмо рукополагаеми, ради приятия Святаго Духа: не ведущии же исповедания Святыя Троицы дабы крестилися. Дозде Баронии.

Но мы видим восточныя церкве святых архиереов каноны своими противно сему [по сем Арелятинском соборе] повелевающих.

Святыи Великии Василии от еретиков крещеных во имя Отца и Сына и Святаго Духа, в первом правиле, прият крещение, и единым токмо мvром помазати их повеле, обаче сих же еретиков, в 47-м правиле, повеле крестити. Еда сей Василии Великии не ведяше во Ареляте граде собор, иначе о таковых еретиков повеле. Не точию се, но и соборнейше в 1-м: правиле сице: наватиан и воздержник крещение неприятно. А вину неприятности изрече сицеву: яко оставляет их Дух Святыи. И посему святая церковь на еретическом крещении не утвержашеся. Отнюду же и севаст Арменополь на правило Василия Великаго 47 и глаголет: Наватиане, аще и многих епископ изволится суду, да воскрещеваются. То севаст.

Понеже сам Василии Великии в 47-м правиле токмо воздержных еретиков повеле покрещевать, а о наватианех умолча, а севаст и наватиан к тем же припряже воздержным: аще изволятся епископом. Но воздержницы и наватианы точно во Святую Троицу и в Христа веруют, подобне православным крестят, о чем в 3-м разделе явихом.

Тимофей же презвитер пиша во изъявлении своем, о приобщении еретик к соборней церкви, повелевает последовати обычаю держащемуся в митрополиях и патриархиях и прочих якоже сице рече [Кормчая, лист 636]: Мы же вся сия разсмотивше, должни есмы последовати и прилагатися обычаю держащемуся ныне в митрополиях и патриархиах и прочих.

Темже убо и мы должни есмы последовати обычаю держащемуся в патриархии и митрополиях и прочих нашей древлероссийской церкви. Которой обычай святейшии патриарх Филарет Московскии, во изложении соборнем [кии собор последователныи апостолским правилом бяше, о чем на листу 565, на обороте показует] ко Ионе митрополиту глаголя засвидетельствовал сице [Потребник, лист 564]: И от лет убо приснопамятнаго и святаго великаго князя Владимира, иже просвети всю Великую Россию святым крещением от грек прием: и даже до днесь по лете 7128: никтоже в нас не дерзнул творити таков соблазн еретичества, кроме Игнатия изверженнаго патриарха и тебя. И паки [лист 565]: Как и Московское государство учинилося, и от того времени, и по се время того не бывало в Московском государстве чтобы еретиков латынь, и иных вер различных вер еретиков не крестили, кроме изверженаго из святителства Игнатия патриарха. И паки той же святейшии патриарх Филарет, о себе самом глаголет [выше лист 561]: Аз же по малей силе моей, елико благодать Святаго Духа настави мя, вседушно попекохся о сем. и правила святых апостол, и святых отец прилежно смотрях со вниманием: того ради, да уведят вси людие, всея Росийския земли, яко вси еретики, различных еретических вер, не имут праваго святаго крещения, еже водою и Духом Святым. того ради от всех еретических вер различных приходящих к православию християнскаго закона, подобает совершено крестити святым крещением. Дозде Филарет.

Зрите убо соперницы, яко ни един Киприанов собор определи всех еретик крестити, но и всероссийский архипастырь святейшии Филарет патриарх во всем последуя апостольским правилом согласно заповеда от всех еретик крещения не приимати: и того не бывало в Российском государстве чтоб всех еретик не крестити. А вину наводит також тую, что вси еретики праваго святаго крещения, еже водою и Духом Святым, не имут. Якоже и Алексей архидиакон о наватиенех и прочих глаголет: яко неприятно их крещение, понеже оставляет их Дух святыи. Толкование на правило 1-е Василия Великаго.

 

Яко от еретик действуемое крещение по священным правилом не вменяется быти во истинное крещение, но паче во осквернение полагается. И приемлющии есть за истинное, и за христианское быти верующыя, не именуются истиннии христиане, а лживии правовернии. О чем нижеследующая свидетелства показуют.

 

Раздел, 5.

 

 Первое: Яко святая древлеправославная церковь, молящихся купно с еретики, аще епископ, аще презвитер, аще диакон, отлучает. Приемлющих же еретиков за причетники, и повелевающих им служити в церкви яко священником или ино что от священных содевати, таковых от сана извергает. О чем и правилное свидетелство зде представляем.

Правило святых апостол 45: Моляйся с еретики, да отлучится. аще же яко причетники приимет я да извержется. Толкование: Епископ или презвитер или диакон, аще помолится токмо с еретики, да отлучится. аще ли же и повелит им служити в церкви яко презвитером, или ино что от священных содевати, таковыи да извержется.

И по сему правилу показуется, яко зло еже с еретики вкупе молитися, и отлучению повинно; злейши же того еже приимати еретиков за причетники, и позволяти им служити в церкви яко презвитером, или что от священных содевати. За сие убо и от сана извергати долженствует.

Тем же убо елицы ныне приемлют еретиков за причетники, и повелевают им по старопечатным книгам церковная тайнодейства строити, или прочая от священных содевати яко иереом, за что наполняюще им мздою десницы их. [и мняще от них некую благодать прияти мздовоздаянием]. И сицевии горши молящихся с еретики по правилу сему осуждаются. А за еже яко непщующе чрез мзду от еретик некую благодать прияти, за сие презелных еретик пагубнаго мудрования причастников себе сотворяют. Сие бо непщевание их горши Македония духоборца ереси, равно же Июде предателю, свойственно же симонианскому нечестию, яко непродаемую благодать Божию пенязями притяжати усилуются.

Второе: Понеже от еретик действуемое крещение еретическим именуется, и не крещением, но паче осквернением вменяется, которое священными правилы яко не истинно сущо отметается. О чем свидетелства предлагаем.

Правило святых апостол 47: Второе крещаяй крещеннаго истинным крещением, и не покрещевая оскверненаго от зловерных, таковыи святитель не священ. Толкование: Несть достойно дващи крестити человека: аще которыи епископ или презвитер, крестит кого второе, совершенным крещением, да извержется от сана. Суть же нецыи иже по прилучаю благоверно крещени бывше, миром токмо помазуеми освящаются, и иже не крестит совершенно второе, первое крещение приемшаго от еретик, но приемлет его яко верна, да извержется от сана.

В Завещании святых апостол [книга 6, глава 15]: Якоже ниже прекрещати подобает, ниже паки приимати еже от нечестивых крещение данно, еже несть крещение, но осквернение: такожде и крещением единым довлевайтеся, самим иже в Господню смерть даемым. не оное еже от злоименитых еретик даемое, но еже от непорочных священник даваемое, во имя Отца и Сына и Святаго Духа. ниже оное еже от нечестивых приято буди вам, ниже от преподобных сущее укоризненно за второе.

Тако и в 68-м правиле апостольском толкуется: Ибо от тех крещени некрещени, и поставлени не причетницы.

Никон Черногорец в слове 63-м от таковех бо поставленом, или крещеном, ниже верном, ни причетником мощно есть быти.

Матфей Иеросалимскии, состав X, глава 14: Аще от еретик хиротонию приял бе, отметаем бо таковех яко крещение, сице и хиротонию, не бо освящение се но скверну веруем исходатайствовати.

Перваго собора вселенскаго, правило 19 [Потребник, соборное изложение патриарха Филарета]: И тако вси возгласиша купно, еже еретическое крещение, несть крещение, но паче осквернение. и подобает таковех крестити святым крещением паки совершенно.

Поместнаго собора в Карфагене, правило 73, от толкования: Аще будет от нечестивых еретик крещен, тех бо крещение сквернение есть паче, а не крещение.

Потребник Болшей, лист 649: А иже крестити второе кого крещеннаго прежде от правоверных, вся правила отрицают. разве аще кто от нечестивых еретик крещен бысть прежде, тех бо крещение сквернение есть паче, а не крещение.

В похваляемом слове святаго Иоанна Златоустаго, на день Иоанна Богослова: Как смеют крестити еретицы, кроме повеления Христова: повелел есть рек, шедше научите языки крестяще их во имя Отца и Сына и Святаго Духа. еда еретицы смеют крестити, во имя Отца и Сына неподобно да будет хромо их крещение.

В Псалтыри толковой, псалом 96, толкование Дидимово: Господь воцарися да радуется земля, да веселятся острова мнози. Толкование: Добре многим островом веселетися а не всем написа. показуя яко суть иныя островы [еретическия церквы] славящеся  и тии водою крещения: но не пристоит им веселитися. зане нечестием [еже к Божеству] благодать крещения отметают.

Катихисис Болшей, глава 4: Поистинне ничтоже у них [еретик] несть истинно. но все убо еже еретицы творят, от смышления своего. како могут совершати действа Божия, на игралищах своих. аще и Христа проповедуют, и веру свою похваляют, но вся сия льстиво и лживо творят. аще и церкви своя, и клирики церковныя, и писания божественная почитают, и мнятся, еже тем же крещением крещатися. [ниже:] но вся сия на тако но инако и нечестиво. и прочая. [ниже:] сего ради разумети имамы, яко еретическая писания, и празднества, и службы, и тайны, и проповеди не суть правы.

И по сим вышепредложенным свидетельством показуется, яко от рук еретических действуемое крещение, не истинно есть, но паче осквернение вменяется. И приемлющии таковех яко верных, иже еретическим крещением оскверненых аще причетники, за сие от сана извергает.

Третие: Яко приемлющии от рук еретических крещение, или прочая тайнодействия, и за истинно почитающии, не именуются быти правовернии христиане, но лживии христиане, и лживии правовернии. О чем ниже представляемая свидетелства являют.

Правило святых апостол, 46: Крещение, и жертву еретическую прием, святитель неосвящен. Толкование: Епископ, или священник, или диакон, аще не похуляет, ни поругается еретическому крещению, но приемлет крещеннаго от сих, или приносимая от них на жертву, сиречь на службу приимет, таковыи да извержется от сана, кое бо сочетание Христови к диаволу, или кая часть верному с неверными.

И сицевое правило явственно показует, яко подобает похуляти и поругатися крещению еретическому, и не приобщати таковых христианом православным, иже крещением еретическим осквернени, но отлучатися от таковых аки от неверных и уподобляет, яко несть согласия Христови к диаволу, так и верному с неверным. кое бо рече согласие Христови к диаволу, или кая часть верному с неверными. Убо явствуется яко иже от еретик крещени суть невернии. И сообщатися с ними правоверным, аки Христови со диаволом отнюд неудобно есть.

Подобне же сему в Завещании своем святии апостоли пишут сице [книга 6, глава 15]: А иже от нечестивых приемлюще осквернение, обещницы разума их будут, ниже бо суть тии священницы, глаголет к ним Бог. Понеже ты отринул еси разум. отрину тя и Аз священствовати Мне. ниже крестившиися у них очистишася. но осквернени суть: не оставление грехов приемлюще, но связания нечестия.

Предлагаем конечное свидетельство, святейшаго Иоанна митрополита Никийскаго, еже пиша о еретицех арменех, тако глаголаше [Кормчая старописмен. пис. от задней дски]: Сии проклинаемии, да предани будут диаволу. уже да не приимут места спасению, но да будут от Христа чюжди. аще убо толикими от всех святых прокляти бывше. и от Христа отгнани; и диаволу предани, и до скончания века, от всех христиан проклинаеми, како паки яко истиннии христиане от правоверных прияти будут; како же и лживии христиане, и лживии правовернии, скверное их крещение, и жертвы их, яко истинныя и крещения творят аще бо тмократицею прокляти бывше, и диаволу предани; како от анафемы и от клятвы благословение изыдет; или како от диавола духовное и святое дело совершается. а от анафемы благословение не бывает, и от проклятия молитва не исходит. и от диавола Христово таинство не совершается. и от гноища благоухания не исходит. и от гнилаго трупия иныи не исцелится. ниже от червивых удов здравие иному телеси подается. ни паки от ереси, или от неверия духовное действо исполняется, ни от неверных, ниже зловерных и нечестивых совершенное и благоприятное крещение может быти: Темже проявлено, яко крещение их, и вся яже от них неприятна и непотребна суть. аще и тщатся несмысленнии, и неразумнии и неутвержени, и лживии христиане, яко истинная и благоприятная творити деяния их, но да услышат ненаучении, и ненаказаннии, Ивана Богослова глаголюще та в своем послании. аще кто приходит к вам, а сего учения не приносит с собою, радоватися ему не глаголите, и в храмину не приемлите. иже бо глаголет ему радоватися, общник будет делом его лукавым. Темже проявлено есть, яко иже правовернии именуются, а приобщаются с сими еретики в ядении и в питии и в дружбе, и в любви, и творимая от них яко благоприятна мнят, и нечестивно и неразумно истинныя христианы их именуют, общники обретаются проклятию и анафеме, яже на них написана от всея вселенныя. от востока и до запада, от соборныя и апостольския церкви. якоже божественныи Иван Златоуст глаголет. Иже творится друг быти еретиком, враг Божии есть. Дозде Иоанн митрополит.

И по всем сим вышепредложенным свидетельством показуется, яко иже от еретик крещени, осквернени суть, и яко не именуются сицевии вернии, но невернии суть. А иже аще мнят быти аки благоприятна деяния их, таковии не именуются христиане правовернии, но лживии христиане, и лживии правовернии. А сообщающиися с еретики в ядении и в питии, и в дружбе и в любви, и творимая от них аки благоприятна мнят, таже и христианы именуют их, общники обретаются проклятию анафеме яже на них написана от всея вселенныя святых отец, и врази Божии сицевии бывают.

 

Окончание.

 

Тако убо доводствующе многими свидетелствы божественнаго писания о еретическом крещении, яко не суть церкви Божии приятно, к концу приближихомся. Тако осмотряюще о трехпогружателном еретическом крещении обретохом есть неосвящателно, но скверну быти исходатайственно, понеже аще и в трипогружателно, но Духа Святаго суть лишително. Тако засвидетельствовахом многими доводы, яко аще и прияша от неких еретики крещение, но не законно или обдержно, но смотрително. Тако удостоверствовахом, яко аще и прияся древле крещение, но ничимже от веры исходящее, и нашему крещению точное. Нынешнее же крещение древнему не точно и вере христианской во многом преступно есть. Сице показахом, яко всех еретик крестити обдержно и законно есть.

Темже аще бы от еретик действуемое крещение в три погружения истинное крещение было, то не бы Афанасии Великии арианское, и прочих еретик крещения, таковыми хулными уничижал словами: яко не крещение, но паче осквернение сие вменяя. И аще бы сие равносилно было христианскому крещению, не бы с манихейским вкупе за равномощно полагал во осквернение. Також аще бы сицевое крещение было бы право и истинно, не бы в Катихисисе македонианское крещение с маркионитским и папежским за равно полагалося, и не истинно, но инако и нечестиво, неправо же но лстиво, и лживо порицалося. И паки. Аще бы сицевое крещение право было и истинно, не бы Павлин епископ Антиохийскии дерзнул ариан совершенно крестити, якоже в житии Мелетия патриарха Антиохийскаго, февраля в 12 день повествуется [Минея четья старописм.]. Аще бы сицевое крещение было право и истинно, не бы по изложении на втором вселенском соборе правила о приятии под миропомазание ариан, Порфирии епископ Газскии крести по Божию откровению Навклира арианина, обратившагося в христианскую веру. О чем в житии его, февраля в 26 день, повествуется. Також и о прочих еретик трипогружателном крещении разумети имамы. Аще бы воздержник и вретищник, и апотактит крещение было право и истинно, не бы Алексии архидиакон, толкователь всех правил и разсудитель, о наватианех чистых и о воздержницех сице объявил: яко крещение их неприятно есть, понеже оставляет их Дух святыи. Не бы Василии Великии в 47 правиле своем воздержник и прочих крестить повелел. Не бы Тимофей презвитер воздержник в 1-м чине еретическом под крещение положил. Такоже и сие. Аще бы приятое правилы от еретик крещение повторяти погрешно было, не бы Василии Великии приятое первым своим правилом от воздержник и наватиан крещение, в 47-м правиле паки крестить повеле. Не бы и Тимофей презвитер онех же воздержник, и прочих, под крещение положил. Аще бы приятое от еретик крещение паки повторяти погрешно было, не бы Тимофей презвитер несториан, и евтихиан, и диоскориан, и севериан положил прежде в третием чине, сиречь за проклятием ересей приимать засвидетелствовав, паки и крестить повелел. Аще бы приятое от еретик крещение паки повторяти погрешно было, не бы Алексии архидиакон, толковщик всех правил и разсудитель, приятое от фотиниан крещение Лаодикийским собором, паки крестить повелел. Не бы и Тимофей презвитер с маркиониты и с прочими еретики и фотиниан под крещение положил. Не бы сице засвидетелствовал и о третием чине, яко не крещают их вин ради благословных и нужных.

Аще бы приятое от еретик крещение твердо было, не бы от ариан еретик, (приемлемым под миропомазание). Иоанн митрополит зелнейшии запретил [от них] приимати крещение, и Тимофей презвитер яко язычников некрещенных быти засвидетелствовал.

И аще бы сице всех еретик крестити несть праведно было, не бы Тимофей презвитер тако засвидетелствовал, яко с Киприаном собор повелел всякаго еретика крестити.

Аще бы всех еретик крестити законно преступно было не бы святейшии Филарет патриарх Московскии, во изложении соборном сицевое предложил свидетелство: яко вси еретики, различных еретических вер, не имут права святаго крещения, еже водою и Духом. того ради от всех еретических вер различных, приходящих к православию христианскаго закона, подобает совершенно крестити святым крещением. Якоже в Потребнице, на листу 561, явствует.

Но понеже убо яко аще от еретик действуемое крещение, аще и в три погружения, но многими священными писаниями похуляется, и не истинно ж, но еретическое называется, и не крещение, но паче во осквернение быти вменяется. Аще ли же по смотрению [яко же выше рекохом] и приемлется, вин ради благословных и нужных, обаче во обдержность не законополагается. Яко их же аще и приемлется правилы крещение, тех же послежде и крестити паки истинным церковным крещением законополагается. Якоже многих еретик и по приятии правилом совершенно крестиша святии отцы истинным христианским святым крещением.

А еже аще всех еретик крестити засвидетелствуется, сие апостолское и отеческое, и соборное законоположение есть. Понеже апостолския: 46, и 47, и 68; правила поместнаго собора иже в Карфагене, 71 правило; и собор Киприана священномученика, иже всем вселенским и поместным собором первейшии написуется, его же Тимофей презвитер, Матфей Иеросалимскии, Никон Черногорец в свидетелство приемлют, такоже и последователныи всем вселенским же и поместным собором, святейшаго патриарха Филарета Московскаго и всея Русии, и всего освященнаго чина, бывшии тогда священныи собор, на Иону митрополита Сарскаго и Подонскаго, на котором и соборное изложение о крещении еретик, от многих священных правил составлено: еже от всех различных еретических вер, обратившихся в христианскую веру повелевает крестити христианским святым крещением. О чем в Потребницех изображено есть.