Андрей Денисов

 

Послание П. Ф—вне.

 

Пустыннаго жития любительнице и целомудреннаго, благочистотнаго пребывания рачительнице, но — увы, плачевых времен наших! — ветрами раздорными обуреваемей и раскольными бурями волнуемей, горлице пустынной, П. Ф—вне, радоватися.

Понеже писание твое дойде к нам, в нем же бо нас вопрошаеши, ово же разумение ваше нам назнаменуеши, — за кое писание, за тщание твое, блажу любовь твою. А за еже, по толиком чтении нашем у вас святых книг и по толиком явственном показании неправаго вашего бывшаго сомнения и неправаго толкования книжных словес, и по толиком беззазорном, церкви святыя по древних святых патриархов и прочих кафолическия церкви обычаев, показании светлейшем от святых книг, — вы еще в грубом вашем сумнении пребываете, и в невежеских затвержениих несогласия беду страждете: за сие скорблю и печалую о вас и жалею вашего толикаго неразсуждения и явственныя раздорныя пагубы. Но аще мне и по многому неупражнению, обаче любви ради Христовы краткое ответствование противо письма твоего зде внисую ти, да отсюду познаеши ваше неразсуждение и к церковному разсуждению, светлому и преосвященному, свою грубость да приклоните, и тако церковныя светлости да насладитеся.

Первое написано у тебя: много испытовали божественнаго Писания, а того нигде не могли обрести и изыскати во святых книгах, что испытывати иконописцов веры и жития их. И по сему вашему разумению, аще иконописцы будут или латынники, или люторцы, или армени, или махметовцы или иных вер, и вы не хощете веры их испытовати и пойдете к ним икон писати? Оле, вашего неразсуждения и самомниваго толкования: где вы нашли повеление в божественном Писании, еже ходити к еретиком повелевати святыя иконы писати, и от них без сомнения приимати? Аще ли сего в Писании не обретаете, то чрезъ Писание дерзостию своею тако пишете и мудрствуете. Апостол пишет: еретика человека по первом и втором наказании отрицайся, а вы таким протолкованием вашим, — святых икон писати, — их приемлете и не хощете испытовати веры их. А в соборном Стоглаве повелевает святыя иконы писати благочестивым и воздержным иконописцам, а пияницам и блудникам возбраняется писати. А вы, по вашему письму, всем нечестивым иноверцам поверили иконописателем вами быти. Или не слышасте священнаго Симеона Фессалонитскаго, заповедающа, яко подобает живописати: и благоговейно божественная, и благочестивно, и по преданному обычаю; а вы дерзаете и кроме благоговейнаго жития, и кроме благочестнаго попущати святыя иконы писати, противно святых разумения. А понеже чрез святое Писание тако пишете и мудрствуете, того ради при разумении вашем погрешаете.

Второе  вопрошаеши: кои Христовой веры  не знают, и святого крещения не прияли иконописцы, а на честь истинному Богу иконы от них учинены и которые зело хитры, и по существу писаны иконы от них? Чуждуся и сему вашему вопросу и разумению: како могут тии, кои веры святыя не знают, знати по существу и зело хитро святыя иконы писати, иже непросвещаемии благоверием, иже Духом Святым не освящении, иже нечестием и безверием помраченнии, иже духом противным потемненнии, како у вас таковии хитры и по существу святыя иконы писати могут, и прочая. А святый Симеон Фессалонитский о противоверных латинех в главе 23 пишет: святыя иконы кроме предания иным образом многажды живописуют; и паки: и не образ первообразнаго и изображение и кроме благоговения живописуют их и украшают, еже противно святых икон есть паче; и паки: еже кроме чина неблагочестно, и отцы сие не приемлют. Видеши ли, идеже веру святую премениша, тако иконы инако и кроме предания живописуют, еже есть противно святых икон паче; и паки слыши: еже кроме чина неблагочестно и отцы сие не приемлют. А вы, по твоему письму, дерзаете без сумнения таковая приимати. Како ли же можете знати иконное изображение, кое хитро и по существу, и кое не таково? Прости суще и не научени, — не токмо изографскаго художества, но ниже умеете по просодии прямо писати, нежели в родех, видех, и падежех, и временех, якоже от письма вашего познавается, не знающе же таковыя хитрости, а дерзнете от новиков приимати иконы, убо и по новым латинским образцам написанныя иконы приимете в неведении вашем; и тако дерзающе, отвсюду в погрешение впадете, и противно святым в таковых учините; темже еже хвалитеся, яко без сумнения в таковых пребываете, — обретаетеся многим сумнением обуреваеми есте. В православной же вере безсомненно пребывающие, понеже несть от святых отец повеления к еретиком и безверным ходити, икон святых писати, паче же повлено блюстися их; того ради не дерзают кроме Писания творити, но по благочестии писанныя святыя иконы имеют; и тако в правду без сомнения в безсомненном благочестии пребывают.

А еже о разности летописцев в твоем письме надпомнила, и о пременении календаря латинников, а для какого разума сие написала, сего ты не объяснила. Аще ли вы для оных осмих летех, о чем прежде сомнялися и ныне в сомнении пребываете, то удивляемся вашему смущению, по толиком от нас вам светлом показании, и по толиком от святых книг объявлении. Еще в мраце смущеннем и раздорнем обуреваеми есте, белорусцы православнии без осми лет той летописец писаша, и наши православнии патриарси о них сомнения не имеша и раздора с ними не чиниша, но и в книгу Кириллову тако напечаташа; а вы противно святыя церкви о том новое сомнение и раздор вводите. И аще они без тех осми лет летописец писаша, но зрите в священней Кириллове книзе в посланиях, как их благочестие хвалит, несумненныя веры православныя хранителями, и столпами церковными, и ангелами земными и овчатами христоименитыми я хвалословит; темже вы всуе и туне противно древней православной церкви о том смущении и раздор вводите. И елико убо за сия на православных нас восхулите, на древнее церковное предание тую хулу налагаете; и еже с нами за сия раздираетеся, еже для пишемых сих без осми лет с православными не согласны, противны являетеся с древнею православною церковию. Тем же, жалея вас, плачем вашего раздора, скорбим о вашем несогласии, слезим таковыя гибели душевныя и при сем кратком писании молим и паки вашу любовь: отложите мрак грубости вашей и закоснения, и престаните от раздорнаго обуревания и приидите со смирением в пристанище церковнаго согласия и в совокупление тела церковнаго; а грубостию и невежеством не дерзайте разлучатися, памятуще апостольскаго гласа, глаголюща: яже не веде уча, без ума дмяся от ума плоти своея и не держа главы, из нея же все тело, составы и соузы, подаемо и снемлемо; растит возращение Божие, и по божественному Златоусту: ничтоже тако Бога раздражает, яко еже церкви разделятися и прочая его же раздорнаго нрава да избавит вас всемилостивый Господь Бог, да даст же, даст вашей любви от смущения в просвещение, и от сумнения в разум церковный и от раздора в согласие православных приити, дабы вам вкупе с правоверными славити и почитати Христа, истиннаго Бога нашего, со безначальным Его Отцем, и с пресвятым и благим и животворящим Духом, ныне, и присно, и во веки, аминь.

 

 

Приложение:

Из Выговского рукописного сборника («Стостатейника»): свидетельство из древлецерковного писания об иконописцех.

 

Глава, 85.

Свидетельство от божественнаго писания, каковым быти подобает изуграфом, пишущим святыя иконы. иже благоговейным сущим святии отцы быти. и лепо иконы писати, определяют;

 

Из Стоглава соборной ответ. о живописцех и о чистых иконах. глава, 43.

«Да в царствующем же граде Москве, и по всем градом, по царскому совету, и митрополита, и архиепископом, и епископом брещи о многоразличных церковных чинех. паче же о святых иконах и живописцех. и о прочих чинех церковных, по священным правилом. и каким подобает живописцем быти, и тщание имети о начертании плотскаго воображения Господа Бога и Спаса нашего Iсуса Христа. и пречистыя Его Богоматере, и небесных сил, и всех святых, иже от века Богови угодиша. Подобает быти живописцу не празднословцу, не смехотворцу, не сварливу, не завистливу, не пияницы, ни грабежнику, не убиицы. наипаче же хранить чистоту душевную и телесную со всяцем опасением. не могущим же доконца тако пребыти по закону женитися, и браком сочетатися. и приходити ко отцем духовным начасте, и во всем извещатися, и по их наказанию и учению жити в посте, и в молитвах, и в воздержании со смиренномудрием, кроме всякаго зазора, и безчинства, и с превеликим тщанием писати образ Господа нашего Iсуса Христа, и пречистыя Его Богоматере, пророк и апостол, и священномученик, и святых мученик, и преподобных жен, и святителей, и преподобных отец по образу и по подобию, и по существу смотря на образ древних живописцев, и знаменовати з добрых образцов. и аще которыя нынешния мастеры живописцы тако обещавшеся учнут жити и всякия заповеди хранити, и тщание о деле Божии имети. и царю таковых живописцев жаловати, а святителем их брещи и почитати, паче простых человек. Такоже тем живописцем приимати учеников, и их разсматривати во всем, и учити о всяком благочестии и чистоте. и приводити ко отцем духовным. отец же их наказует преданию и уставу от святителей. како быти християном кроме всякаго зазора и безчинства. и тако от своих мастеров со вниманием да научатся. и аще которому открыет Бог таковое рукоделие, и приводит того мастер ко святителю. Святитель же разсмотрив, аще будет написание от ученика по образу и по подобию, и увесть известно о житии его, еже в чистоте и во всяком благочестии, по заповедем живет кроме всякаго бесчинства, абие благословит наказует да и впредь благочестно жити, и святаго онаго дела держатися со усердием всяцем. и приемлет от него ученик той честь, якоже и учитель его паче простых человек живет. Посем же святитель наказует мастера еже ему не поборати ни по брате ни по сыне, ни по ближних. аще кому не даст Бог таковаго рукоделия учнет писати худо, или не по правилом, завещанию жити. а он скажет его горазда и во всем достойна суща. и показует писание иного а не того, и святитель обыскав, полагает таковаго мастера под запрещением правильным, яко да и прочии страх приимут, и не дерзают таковая творити. а ученику оному иконнаго дела отнюд не касатися. и аще которому ученику откроет Бог учение иконнаго писма, и жити учнет по правильному запрещению, а мастер учнет похуляти его по зависти дабы не приял чести, юже он приял. Святитель же обыскав полагает таковаго мастера под запрещением правилным. а ученик же приемлет вящьшую честь. Аще кто от тех живописцов учнет талант скрывати, еже ему Бог дал, и учеником того по существу не отдаст, таковый осужден будет от Бога, с скрывшими талант в муку вечную. аще будет от самех тех мастер живописцев, или от их учеников, учнет жити не по правилом завещанию, во пиянстве, и в нечистоте и во всяком безчинстве, и святителем таковыя под запрещения полагати, от дела иконнаго отнюд отлучати. и касатися не велети. боящеся словесе реченнаго. проклят всяк творяй дело Божие с небрежением. А которыя по се время писали иконы неучася, самовольством и самочинством не по образу, и те иконы променяли дешево простым людем, поселяном и невеждам, ино тем запрещение положити: чтобы училися у добрых мастеров. И которому Бог даст учнет писати по образу и по подобию, и тот бы писал. а которому Бог не даст и им вконец от таковаго дела престати, да не Божие имя таковаго ради писма похулится. И аще которыя не престанут от таковаго дела, таковии царскою грозою да накажутся и да судят. и аще они учнут глаголати, мы тем живем и питаемся, и таковому их речению не внимати. понеже незнающе таковая вещают, и греха в том не ставят. не всем человеком иконописцем быти. многа бо и различна рукоделия подарованна быша от Бога, имиже человеком препитатися, и живым быти и кроме иконнаго писма. а Божия образа во укор и в поношение не давати. такоже архиепископом и епископом, по всем градом и монастырем и весем, и весем своих предел, испытати мастеров иконных, и их писем самим смотрити, и избрати каждому их во своем пределе живописцев нарочитых мастеров. да им приказывати надо всеми иконописцами смотрити. что бы в них худых и безчинных не было. а сама архиепископи и епископи смотреть над теми живописцы которым приказаны, и брегут таковаго дела крепко. А живописцев онех брегут, и почитают паче простых человек. а вельможам и простым человеком тех живописцев во всем почитати, и честны их имети. за то честное иконное писмо воображения. да и о том святителем великое попечение и брежение имети, что бы гораздыя иконники и их ученики писали з древних образцов и от самосмышления бы догадками божества не описывали. Христос бо Бог наш описан плотию, а божеством неописан, яко же рече святыи Иоанн Дамаскин, не описуйте божества, не лжите слепии, просто бо невидимо и незрительно, плотию же образу вообразуя покланяюся и верую, и славлю рождьшую Господа Деву. А иже от хитрых и гораздых мастеров живописцев укрыет который талант что ему Бог дал иных не научит и не укажет, да будет от Христа осужден и сокрывшими талант в муку вечную. И того ради живописцы учите учеников безо всякаго коварства. да не осужденнии будете в муку вечную.

 

Ис Кормчей писменной. глава, 124. Сказание о иконописцех каковым быти подобает;

Подобает убо изуграфом, рекше иконописцем, чистым быти житием духовном жити и благими нравы, смирением же и кротостию украшатися, и во всем благое творити, а не сквернословцев ни кощунником, ни блудником ни пияницам ни клеветником ни иным иже последуют обычаем скверным. понеже не таковое дело святое таковым не повелено есть. якоже и древле рече Господь к Моисею, еже Весеила наполних Духа Божия, сейже Веселеил делатель быти скинии свидений ветхаго закона. кольми же подобает паче нынешния благодати писавшим образ Спаса Христа Бога нашего, и пречистыя Его матере, и святых Его, тщатися к восприятию, Духа Божия, был бы иконописец хитр от подобий хитр древних переводов, и первых мастеров богомудрых мастеров мужей. имже от начала предано бысть по объявлению коегождо где бывшаго чюдеси, или явления. а собою бы вново, не прибавливал ни единыя оты. Аще убо и зело кто мнится смыслити, а кроме святых отец предания, не дерзати. Аще же кто, и зело, имать быти хитр святых икон воображению, а живый неблаголепно, таковым писати не повелевати. И паки аще кто духовное житие имать жити, а благолепно вообразити святыя иконы не может, таковым писати не повелевати же святых икон но питатися иным рукоделием, имже хотят;

 

О иконах, иже над вратами поставляеми, глава, 125.

Над вратами домов у православных християн воображаемых зверей и змиев и никаких неверных храбрых мужей, поставляти неподобает, ставили бы убо над враты у своих домов православныя християня святыя иконы, или честныя кресты имже в дом входя и исходя, поклоняемся и почитаем первообразное существо, якоже отцы наши предаша, себо есть правоверных знамение. Всего же сего подобает назирати и учити святителем, и иереом духовным настоятелем, якоже рече апсотол, покаряйтеся наставником вашим, непослушающих, и непокаряющихся, со опитимиями запрещение налагати, якоже божественая правила повелевают.

 

Паки о иконописцах.

Достойных же иконописцев и сподобльшихся таковаго святаго делательства истоваго воображения и изряднаго жительства, таковых подобает честно почитати, и посаждати их на седалищах и на вечерях близ святителей с честными людми, якоже и прочих причетников;

 

О том еже кроме святых икон правоверному иконописцу изуграфу ничтоже писати. [из Кормчей писменной, глава 144].

Аще убо кто на таковое святое дело, еже есть иконное воображение всяко сподобится искусен быти. тогда не подобает ему кроме святых икон воображати ничтоже начартавати рекше воображати еже есть на глумление человеком, ни зверия образа ни змиева, ниже ино что от плежущих, или рода гмышевска, кроме где любо во прилучившихся деяниих, яко же есть удобно и подобно;

 

Паки в Кормчей.

«А неверным и иностранным, паче же рещи нечестивым и поганым арменом, святых икон не писати, и на сребро и злато не меняти; понеже не в почесть, но в поругание святыня предавати грех есть. не дадите бо рече святая псом».

 

Глава, 147, о том на коих вещех писати и воображати святыя иконы, и на коих не писати.

Писати святыя иконы и воображати, якоже и на седмом соборе святии и богоноснии отцы повелеша на всяком древе и камени, и на столпех и на стенах, и на сосудех церковных иже суть крепцы существом сиречь вещию на стекле святых икон неписати, и невоображати, понеже сия сокрушителна есть вещь.

 

О том еже святых икон неотягчити ценою сребра.

Подобает се ведати, честным изуграфом рекше иконописцем, иже аще благоверно жительство имать. ктому же истоваго подобия воображению от древних богомудрых изуграфов подражати сподобился еси. ктому же именою сребра да не отягчит святыя иконы, но доволен будет от имущаго прияти напишут и одежду и на рукоделие шаровнаго запасу.

 

О том [что] еже не оскудити изуграфа.

Такожде и всякому православному християнину, имущему веру написати, коего любо святыи образ, подобает ему неоскудно удовлити честнаго изуграфа. якоже должно и удобно, да не стужает о неких нужных потребах нань.

 

Из выписки Феодосия пустыника. [Из введения к Иконописному Подлиннику].

Божественная служба иконное воображение, от святых апостол начало прият, подобает священнику и иконописцу чистым быти, или женитися и по закону жити. понеже священник служа божественными словесы составляет плоть, ей же мы причащаемся во оставление грехов, и иконописец вместо словес начертает и воображает плоть и оживляет: имже покланяемся первообразных ради любве державне, а не служебне. и будет случится им впасти в явленныя скверны, обои неприятны. и яко же сказует седмое правило, и достоит быти священнику и иконописцу свободным а не работным, и повнегда изучитися и начертати от ветхих знамении и налепок. приходит со иконою на свидетелство к патриарху, или к митрополиту, или епископу, и будет икона воображена добро свидетельствуют житие его и благословляет его иконы писати, и то благословение вместо поставления ему бывает, и жити добродетелно. А будет нехудожно воображает, и взяти понем порука, что впредь не писати ему, и учитися иному рукоделию;

 

Ис книги Матфея Иеросалимскаго состав Z глава, 2. о изографии сласти ради душа врежающей.

Сторичное шестаго собора правило, зографию рекше живописанию безчестна, яже зрящих к безместным поощряют сластем. на стенах начертавати отричет всячески, понеже яювства удобне не внемлют яже теми зримая, яко и слышамая, в душу пущают и вревают. Сего убо ради, и очи твои праве да зрят, премудрость рече, и всяким хранением соблюдай свое сердце;

 

Глава, 86.

Яко от рук иноверных написанных икон не приимати. и в руки иноверных святых икон не предавати.

 

Ис Кормчей писменной от послания Исидора пустынника, ко Евсевию епископу Полисийскому, глава, 126.

От неверных иностранных римлян, и германов немец. иконнаго воображения православным християном приимати не подобает, ащели по некоему прилучаю от древних лет обрящутся в наших странах — верных греческих рекше, или руских, а вообразуема будет после расколу церковнаго, еже греком с римляны. и тогда аще и зело иконное воображение есть по подобию, и хитро. поклонения же им не творити. понеже от рук неверных воображени суть. аще и по подобию, но совесть их нечистоте подлежит. о таковых бо Павел, божественный апостол. к Титу посылая сице: вся бо чиста чистым. оскверненным же и неверным ничтоже чисто, понеже осквернися их ум и совесть. Бога исповедают ведати, а делы отмещут Его, мерзскии суще и непокоривии. и всякому делу благу неискуснии. а неверным иностранным, паче же рещи нечистым и поганым арменом, святых икон не писати. и на сребро и на злато не меняти, понеже не в почесть, но в поругание святыня предавати грех есть. писано бо есть не дадите святыя псом;

 

Ис книги Симеона Фесалонитскаго, от главы 23. о латынех.

Святыя иконы кроме предания иным образом многажды живописуют. Ниже: И не во образ первообразнаго и изображение, и кроме благоговения же живописуют их и украшают, еже противно святых икон есть паче. Ниже: И еже чина неблагочестно, и отцы сие не приемлют.

 

Из Кормчей писменной, от слова Иоанна митрополита Никейскаго на армен.

Аще бо тмократицею: [армени еретики] прокляти бывше, и диаволю предани: како от анафемы, и от клятвы благословение изыдет: или како от диавола духовное и святое дело совершается; от анафемы благословение не бывает, и от проклятия молитва не исходит. и от диавола Христово таинство не совершается. Ниже: Ни паки от ереси, или от неверия духовное действие исполняется. Ниже: Аще и тщатся несмысленнии и неразумнии и неутвердени, и лживии християне, яко истинная и благоприятная творити деяния их.

 

От послания Фотия митрополита во Псков, в лето, 6927.

А еже на кресте имени не будет, тому не кланятися. а не поругатися ему ниже разоряти таковых;