Богословие Павла Белокриницкаго, или первая глава "Устава" Белокриницкаго монастыря.

(Приложение к "Истории Белокриницкаго священства".)

 

Москва, Типография Э. Лиснера и Ю. Романа, Арбат, д. Платонова. 1887 г.

 

От издателя.

 

При "Истории Белокриницкой иерархии", изданной в 1874 году, в числе приложений, был напечатан "Устав Белокрыницкаго староверскаго монастыря", составленный известным учредителем ныне существующей у раскольников иерархии иноком Павлом, и утвержденный австрийским правительством в качестве документа, на основании котораго дозволено им существование и Белокриницкаго монастыря и учрежденной в монастыре раскольнической архиерейской кафедры, прародительницы всех ныне существующих раскольнических архиерейских кафедр и за границей и в России.

Печатая потом в 1885—1886 г. в "Братском Слове", а также и отдельною книгою, новое, сокращенное изложение названнаго сочинения, под заглавием «История Белокриницкаго священства», мы не нашли нужным перепечатывать сделанныя к нему приложения, в том числе и "Устав Белокрыницкаго монастыря", дабы без крайней надобности не увеличивать объем книги и тем облегчить ея приобретение для большинства читателей.

Между тем приходится слышать от многих сожаление, что не приложен к новому изданию «Истории» по крайней мере "Устав Белокрыницкаго монастыря", как документ, имеющий особенную важность и для истории Белокриницкой иерархии, которая на нем имеет свое основание, и для полемики с расколом, ибо в первой главе Устава излагается вероучение, или богословие инока Павла, учредителя иерархии, содержащее в себе еретическия мнения, которыя не излишне указывать раскольникам на беседах с ними.

Признавая справедливость особенно этого последняго замечания, мы решились теперь напечатать именно первую главу Белокриницкаго Устава, или так называемое Богословие инока Павла, — напечатать и при "Братском Слове" и отдельною книжкою, которая может служить приложением к недавно изданной "Истории Белокриницкаго священства".

При настоящем издании первой главы Устава мы вновь проверили ее по подлиннику, как известно, находящемуся ныне в Хлудовской библиотеке.

Погрешительныя мнения Павла Белокриницкаго, внесенныя им в первую главу Устава, были в свое время обличены, как еретическия, самими старообрядцами, — первоначально бывшим епископом Коломенским Пафнутием и его приближенными — Пафнутием Казанским, доныне архиерействующим у раскольников, начетчиком Семеном Семеновым и автором Окружнаго Послания Иларионом Егоровым, а потом и целым собором раскольнических властей, находившихся в Москве, который сделал об них постановление 17 августа 1863 года. Об этих еретических мнениях Павла, каково особенно мнение о предвечном существовании особаго "состава", именуемаго "вецы", о подвременном рождении Сына Божия и подвременном исхождении Святаго Духа, и о проч., — желающий может прочесть в "Истории Белокриницкаго священства" (стр. 112—114) и пространнее в "Истории Белокриницкой иерархии" (стр. 170—184), также в книжке "Присоединение раскольнических епископов" (стр. 31—51) и в предисловии к "Восьми вопросам".

 

 

Первая глава из "Устава Белокриницкаго староверскаго монастыря",

каковый Устав сочинен был монастырским письмоводителем иноком Павлом, подписан настоятелем монастыря и прочими должностными лицами в 1841 году, и утвержден "для руководства" старообрядцам австрийским императором Фердинандом в 1844 году.

 

I.

ИСТИННОЕ БОГОПОЗНАНИЕ.

О существе, вседетельстве, и непостижимости.

 

Бог есть [На поле (и далее): Св. отцы: Григорий Богослов.] существо неповинно, яко ни от когоже [Иоанн Дамаскин, Максим Грек.], ни сам от себе; да не будет отнюд кому возмнети, яко прежде не бе, или не совершен бе: ибо тогда последовало бы от нужди глаголати: или создан, или сам себе приведе в божественное существо. Но [Анастасий Антиохийский, Кирилл Александрийский, Катих. вел. и Альфа] Бог есть един, не создан, искони совершен, безначален, превечен и безконечен, якоже сам Моисею глаголаша: [2 Моисей, 3. ст. 14] "Аз есмь сый!" Еже есть Существом [Соборник 60. л. 640 Григорий Богослов, Иоанн Дамаскин], (просто рещи бытием) присносущен, всемогущь, всесилен, и вина всяческим [Иоанн 1. зач. 1, ст. 3]: яко "вся тем быша, и без него ничтоже бысть, еже бысть; и [Во антифоне 7-го гласу] "разве бо его ни дело, ни слово совершается". И ничтоже от него невозможно, даже до толика: якоже человеку несть труда, еже на вся умом восхотети, тако и Богу, егда что точию восхощет, вся та делом сотворити; глаголет бо пророк: [Псалом 113, ст. 11] "Бог наш на небеси и на земли, вся елика восхоте сотвори". Сие приемля святый Григорий Богослов глаголет: [Богослов во 2 слове на Пасху, ст. 11 и Июдифь гл. 9, ст. 5] "Первее убо помысли ангельския силы небесныя, и помышление дело бысть, Словом исполняемо, и Духом совершаемо. И тако составишася светлости втории, слуги первой светлости, сиречь умнии духове, или огнь невеществен и безтелесен, или некое же естество ино, ближайше к реченным", их же естества вид и устав только един Творец весть. Чему с покорением наипаче всех согласует святый Иоанн Дамаскин: [Дамаскин в слове о ангелах] "Лепо бо, рече, бе прежде умная существа сотворити, и потом чувственное, и посем от обоего (существа) человека". Вся же сия содетельствова Бог единородным и соприсносущным Сыном Словом своим, и утверди силою всесвятаго своего Духа, по глаголющему пророку: [Псалом 32, ст. 6] "Словом Господним небеса утвердишася, и Духом уст его вся сила их"; еже есть: [Собор. гл. 60, л.648 на об.] "Отцу убо умыслившу, Сыну же содетельствовавшу и Духу совершившу".

Чувственное же творение его в начале бысть чином вышеестественным: ибо егда восхоте Бог, шар неба и земли [1 Моисей 1], аки некую храмину сотворити, и сотворил из ничего. Первее же [Псалом 103, ст. 2] "простре (вышеобычно покров зданию) небо яко кожу", еже именует писание [Псалом 148, ст. 4] "небо небес" [Св. Дамаскин в слове о небеси. Иоанн Ексарх в Шестодневце о 1-м дни. Блаженный Андрей Цареградск., гл. 8.], суще беззвездное, безчисленною добротою от божественных лучей сияющо. А земля, и воды, и прочия вещи всего здания тогда были не ино что, как вещество смешенное и погруженное во ужасной тьме и мрачном хаосе. И [1 Моисей 1.] Дух Божий носился над сим влажным и неустроенным веществом. [Андрей Цареградский, гл. 32. Иоанн Ексарх о 1-м дне. Хронограф гл. 1. 3 Ездра, гл. 6, ст. 39.] Не о Святем же Дусе зде писание глаголет: ибо не считается с тварию несозданное; но дух той бяше, по глаголу святаго Андрея Цаградскаго, яже прежде всего от Бога сотворен бысть, существо вечнаго состава, еже есть вецы, безвестна прохода [Соборн. гл. 60, л. 646] (о существе века, яко присносущен, его же сотворил Бог прежде мирскаго составления, поясняет Соборник на 8-й стих 2-го слова на пасху святаго Григория Богослова). [1 Моисей 1.] Потом сотворил Бог свет. [Дамаскин в слове о свете] Свет же не ино что, разве огнь. И отделив его от тьмы, соделал первое разделение дня и нощи, и сие составило Первый день, в которой началось творение.

Обаче за сотворение света, да не возмним первобытную тьму быти искони присносущну, да не тем от нужди последует и Бога глаголати тьмою изначала бывша. Но убо достоит разумевати [Св. Григорий Богослов в слове в новую неделю. Св. Андрей Цареградский, гл. 32], яко Бог, сый свет истинный, искони совершен и непременен есть; точию до сотворения дел своих бе в молчании, имея единосущное во уме Слово Сына своего, егоже, по глаголу блаженнаго Андрея Цареградскаго, в первом изречении: "да будут вецы" [Псалом 2, ст. 7], нетленно родил, сиречь во исхождении Соприсносущным Духом своим Святым от серца отрыгнул, якоже свидетельствует пророком: [Псалом 109, ст. 3] "из чрева прежде денницы родих тя". И тако от разумной твари познася, яко есть, в триех составех, един Бог превечный, [Иоанн 1, зач. 1, ст. 9; и молитва утренняя 1-го часа.] свет истинный, иже просвещаяй и освящаяй всякаго человека, грядущаго в мир. Обаче свет, еже глаголется Бог, не есть самое естество Бога, но точию присносущная его слава, свидетельствующу пророку: [Псалом 103, ст. 2.] "одеяйся светом яко ризою". А идеже пророк глаголет: "и положи тьму закров свой," (Псал. 17, стих 13) [Соборник гл. 60, л. 640 и 649.] за непостижение естества его тако изрече; свидетельствует бо Евангелие, да и видимое самое действо показует, что [Иоан. зач. 1, ст. 5] тьма не может обладати светом, сиречь темнотою своею свет покрывати: а посему разумевается, яко первобытная тьма не есть искони некое существо, ниже потом сотворенное какое-либо вещество, но не ино же что, разве: или от тени первоначально простертаго небеси быти случися, или (аще высшее небо, по вышереченному, естеством и кроме солнца светло) [Иоанн Ексарх в Шестодневце о 1-м дне. Иов 38, ст. 9] егда вода бяше всюду по земли и мгла над водами стояше, которая, составив облаки, облаки же посетивше сотвориша тьму, понеже и писание обыче вещати: небо помрачися облаки. В согласность сего свидетельствуют святых отец ясныя разсуждения [Альфа, 20. Соборник гл. 60, л. 687 на об. и Дамаскин в слове о проуведении.], яко тьма не существо некое, но случай: егда света лишение, тогда тьмы пришествие.

А как выше помянулось творение Божие в первой день, так присовокупляются к тому и прочие дни седмицы, в следующем описании: Во вторый день [1 Моисей, 1.]сотворил Бог твердь, аки здание постави, якоже Исаия пророк глаголет: [Исаия 40, ст. 22.] "поставивый небо, яко камару, и простер е, яко скинию обитати". По толкованию Иоанна Ексарха и прочих святых отец: сия твердь [Иоанна Ексарха в Шестодневце, о 2-м дне. Иоанна Дамаскина в слове о небеси. Псал. 103, ст. 3. Псалом 148, ст. 9.], сиречь второе видимое небо, сверху водами покровено есть. "Покрываяй (бо рече Пророк) водами превыспренняя своя". [Дамаскин в слове о небеси.] Обычай же есть Божественному писанию еще и воздух, иже зрим горе, небо нарицати.

В Третий день [1 Моисей 1.] повеле Бог во внутреннем тверди вмещении, аки в храмине, приличному быти устроению, еже есть: [Иов 38, ст. 10 и 11. Псалом 103, ст. 9.] пределы морям, и явитися суши (земли), и украситися ей древесами и травами, и приноситися плодом. [Св. Андрей, гл. 33] В преисподнии же места сгустившаяся собрася мгла, и сотвориша тамо всегда непросветимую тьму.

В четвертый день [1 Моисей 1, ст. 14.] повеле Бог, да будут светила на тверди небесней, (аки светильники для освещения храмины) [Псалом 135, ст. 8 и 9.] и бысть солнце, луна и звезды [Псалом 18, ст. 7. Псалом 103, ст. 19. Еклисиаст гл. 1, ст. 4, 5 и 6.], дабы они правильным своим течением показывали точнейшее обращение часов, изменение времен и течение лет [Соборник гл. 61, л. 746]. Не от инагоже естества сотворил их Бог, но от того же в первый день сотвореннаго света, как сказует святый Иоанн Дамаскин: [Дамаскин в слове о свете.] "светильником бо первотворный свет вложи, не яко не имый инаго света, но да не будет празден той свет".

Пишется убо [Хронограф гл. 1 о 4-м дни. Исаия 14, от ст. 12 до 15. Лука 10, зач. 15, ст. 18.], яко в четвертый день и сатана за гордыню из первыя славы и светлости своея отпаде, и бысть самопроизвольная злоба и помраченная тьма.

В пятый день [1 Моисей 1, ст. 20 и 21.] повеле Бог быти рыбам морским, и птицам пернатым и всем животным, яже от воды.

В шестый день [1 Моисей 1, ст. 24 и 25.] повеле Бог быти другим животным: скотом, зверем, и прочим, яже от земли.

На концы же всего создания [1 Моисей, гл. 1 и 2. Альфа, 3. Маргарит слово 7.] сотвори Бог человека (мужа и жену сотвори их) посреди мертвеннаго и безсмертнаго естества, еже есть: не яко прочих животных [5 Моисей 12, ст. 23.], в них же кровь вместо души есть [Еклисиаст гл. 12, ст. 7. Китихиз. в слове о души]. Но человеку тело сотворил Бог от персти земныя, а душу вдохнул ему от божественнаго своего вдохновения, [Соборник, гл. 60, л. 653.] не еже от своего существа, ниже от какого состава, но от своея содетельныя силы, умну и безсмертну [Катихизис в сл. о души.], ей же действию во удех плоти служит кровь человеческая, аки колесница, на ней же душа носима бывает [Маргарит в сл. 7. Григорий Богослов в 2 сл. на св. пасху. И. Дамаскин в сл. о человеце.]. И толика сотвори Бог человека суща всего блага, яко быти ему по образу его и по подобию: по образу — не начертанием телесным, но яко царя твари самовластным саном почтил и разсудительною силою одарил, а по подобию добродетелию снабдил, еже есть: естественным законом (совестию). Сверх же того, к соблюдению таковаго блаженства, заповедию его оградил, того ради: да твердо знает и присно помнит создателя своего, и согласно святой воли его [Соборн. гл. 60, л. 557.] соблюдает данную заповедь ему и пребудет наследником царствию его, еже есть: соединится Богу и обезсмертится; аще ли же преступит ю, приближится тлению, и будет страстен вместо безстрастнаго, сиречь зол вместо благаго, и смертен вместо безсмертнаго. [Альфа гл. 20. Дамаскин в слове о проуведении.] Понеже зло не существо кое есть, но лишение добродетели, якоже и тьма света есть отшествие. В первобытном бо творении Божием ни что же бяже зло, но вся добра зело, якоже пишет: виде Бог вся творения своя, яко добро. И потом: в седмый день [1 Моисей гл. 2, ст. 1, 2 и 3.] почи Бог от всех дел своих, яже сотвори, и благослови день той святити.

Естеством же [Святый Григорий Богослов, Анастасий Антиохийский, Иоанн Дамаскин.] Бог сый преестествен, неизследим и неприступен даже до толика: якоже невозможно есть огня тяжесть извесити, невозможнейше же есть естество Божие изследовати, и ниже к тому, в немже Сый обитает, кому приступити, яко и вся силы небесныя в ня желают приникнути, но говеют зело неприступному свету: понеже [1 Тим. гл. 6, зач. 288, ст. 16.] живет (сказующу Апостолу Павлу) во свете непреступнем. Аще ли свет неприступен, множае паче живяй в нем Бог. Обаче добре вемы, яко есть Бог; а что естеством есть Бог, не вемы. [Иоанн 4, зач. 12, ст. 14 и 24.] Аще и глагола Христос самаряныни, яко "Дух есть Бог", но и кланятися ему достоит, рече, духом; и паки: источник воды живы; еще же и душа наша многажды дух именует, как и Апостол Павел рече: [1 Коринф. 5, зач. 132, ст. 5. К Римл. 8, зач. 97, ст. 16]. "сам бо Дух свидетельствует духови нашему"; и паки той же Апостол, согласно Моисею, глаголет: [К Евреом 12, зач. 333, ст. 29.] "Бог наш огнь поядаяй есть". Паче же и сам Дух Святый в крещении Христовом явися голубом, а в пятьдесятницу на Апостолех во огненных языцех. [Премудрость гл. 13, ст. 2. Маргарит в сл. 5 о непостижимем.] Сия ли вся Бог нам будет? ни дух точию, но и огнь, и вода, и прочее безместнейша? Да не будет! (То бо не о естестве Божием значении, но о действиях его образовании). Егда убо воображенное естество ангельское, аще и тьмами кто любомудрствует, что оно есть, якоже выше речеся, обрести не может [Маргарит в сл. 5 о непостижимом.], и что глаголем о естестве ангельском! но ниже самыя души нашея, аще и воображено также естество имать, отнюд разумети не может, что убо сия есть: воздух ли, или дух, или ветр? сия убо вся телесна суть, она же безтелесна, но паче умна; то едали уму естество обрящем, которой мысленно в мгновении ока пролетает каменныя стены и вся твердейшия преграды, и выше небес взимается, абие и преисподней бездне касается, а от души не отлучается! Зане [Соборник гл. 60, л. 642 на об. Дамаскин в слове о человеце. Альфа во гл. 3.] якоже око в теле, тако и в души ум, того же существа часть пречистейшая есть. — Аще убо ангелов и своея души естества обрести отнюд не можем: кольми паче естество невоображенное всех владыки и содетеля нашего ниже помыслом до того коснутися можем!

Лицем, сый невидим, якоже Моисею глаголаше: [2 Моисей гл. 33 ст. 14, 20 и 23.] "Аз сам предъиду пред тобою и упокою тя, лице же мое не явитътися, не может бо человек лице мое видети и жив быти". И не только человеком в существе Бога видети невозможно, но ниже всем небесным силам, якоже церковь поет: "Бога человеком не удобь видети, наньже не смеют чини ангельстии зрети". Седит бо на херувимех и видит бездны! Обаче, сам сый прост и несложен и невоображен есть, невидим и неосязаем, ниже описуем. Якоже бо невозможно показати гласу образ: невозможнейше же есть кому видети в существе Бога. Глаголет бо Евангелист: [Иоанн 1, зач. 2, ст. 18.] "Бога никтоже виде нигдеже". Елико же о нем плотски речеся, образно глаголется: Лице убо Божие разумеваем, еже вся имеющи пред собою. Очи — видение всех дел и неутаение сердец человеческих и помышлений. Ушеса — вся слышание, и молитв приимание. Уста — повеления, обетования, прещения и учения. Мышца — могущая его сила. Руце — непостижное деяние его. Нозе же — скорое исхождение на помощь требующим, и врагом на отмщение. Аще же и виде [Исаия 6, ст. 1] Исаия Пророк на престоле превысоце Бога и Даниил [Даниил 7, ст. 9 и 13.] ветхаго деньми, и прочии инако; но не существом, а также образно точию, елико возможно естеству вмещати величество славы его, якоже и Апостолом в преображении своем на Фаворе [Матфей 17, зач. 70, ст. 2.].

Присутствованием везде-сый. Аще и глаголет Бог усты Исаия Пророка: [Исаия 66, ст. 1.] "Небо престол мой, земля же подножие ног моих"; обаче местом не определяем. Егда убо мы сами определением места не можем сказать о своей души: ибо аще скажем, яко душа простирается по всем членам, соединившись с дебельством плоти; но несть тако: множицею рукам и ногам отсеченным бывшим, а она цела и неврежденна пребывает; аще ли скажем: не во всем телесе, но в части некоей собрана пребывает, сиречь в сердцы, имже человек животное дыхание имеет, или во главе, идеже ум яко царь во владычественном пребывает (одеян в сан самовластия, имея под собою впреди мысли, созади память, а одесную и ошуюю разсуждение и совесть); но ниже сие мощно рещи: ибо тогда нужда прочим членам тела мертвым быти, бездушное бо всяко мертво есть. Но убо добре вемы, яко душа есть в телеси нашем; какоже есть? — отнюд не вемы. Кольми же паче создателя своего Бога, яко всюду есть, вемы; какоже есть? — не вемы. Свидетельствующу бо Давыду: [Псалом 102, ст. 22.] "На всяком месте владычество его". Чему тойже и удивляяся, со ужасом взывает: [Псалом 138, ст. от 7 до 11.] "Камо пойду от Духа твоего, и от лица твоего камо бежу! аще взыду на небо, ты тамо еси, еще сниду во ад, тамо еси, аще возму криле мои рано, и вселюся в последних моря, и тамо бо рука твоя наставит мя, и удержит мя десница твоя". И паки хвалословно возгласи: [Псалом 76, ст. 14 и 15.] "Кто Бог велий яко Бог наш, ты еси Бог творяй чудеса!"

Величеством [Св. Григорий Богослов во 2-м сл. на пасху, ст. 8.] непостижим, яко ни един помысл постигнути возможет: взыдем убо умныма очима выше небес, и ангелы прейдем, возможно ли постигнути выше оных превыспреннюю высоту, идеже бы ум мог стати и утвердитися? — невозможно! Елико убо невозможно постигнути непостижимую ту высоту, равно глубину и широту: невозможнейше же есть постигнути величество Божества.

Провидением [Премудрость гл. 1, ст. 6.] всепредведущь, свидетельствующу Давыду [Псалом 7, ст. 10.], яко всех испытует сердца и утробы; [Псалом 138, ст. 15 и 16.] не утаится бо кость наша от него, зане он ю сотворил есть в тайне, и несоделанная наша видят очи его, и в книзе его вся написана суть, и [Псалом 38, ст. 6.] пядию измерены он положил есть дни наша, и весь состав наш нивочтоже пред ним, и даже все время жития сего (по свазанию в предисловии на 2-е Петрово послание), яко ничтоже есть пред Господом, за еже и [2 Петр. гл. 3, ст. 8. и Псал. 8, ст. 4.] един день, яко тысяща лет, и тысяща лет, яко един день.

Премудрыми судьбами неиспытан, якоже глаголет пророк: [Псалом 35, ст. 7. Псалом 104, ст. 7.] "Судьбы твоя бездна многа". И паки, тойже рече: "По всей земли судьбы его" к ним же, аки оконцем приникнув, Апостол Павел, иже некогда восхищенный до третияго небесе, и некую часть того истязав, виде яко пучину безмерну и непостижиму, абие отскочив и со ужасом возопив: [К Римляном гл. 11, зач. 107, ст. 33, 34, 35 и 36.] "О глубина богатства премудрости и разума Божия! яко не испытаны судбы его, и не изследованы путие его. Кто бо разуме ум Господень, или кто советник ему бысть, или кто прежде даст ему, и воздастся ему? яко из того, и тем, и в нем всяческая.

Спасительным промыслом безпределен, до толика [Матф. гл. 10, зач. 37, ст. 29 и 30.] яко и малейшия птички, иже две ценятся единым ассарием, и ни едина от них падет на земли без Отца небеснаго. [Лука 12, зач. 37, ст. 6 и 7, гл. 21, зач. 106, ст. 18.] А у человеков и власы главныя вси изочтени суть, и ни един от них погибнет, сиречь, без ведома его, якоже усты Исаия пророка рече: [Исаия 49, ст. 15.] "еда ли забудет жена отроча свое, еже не помиловати исчадия чрева своего! аще и забудет то жена, но аз не забуду тебе, глаголет Господь".

Щедротами и милосердием безчислен. Якоже бо невозможно мерилом измерити воду всего моря: невозможнейши же есть исчислити изливаемыя на нас Божия милосердия щедроты. Ибо присно на всякую тварь, на благия вкупе и на злыя [Псалом 18, ст. 6 и 7.], обтечением солнца осиявает и греет, осеняет распростертым небом, украшенным огненными зарями, сребровидною луною и звездами, иже толикими веки не стареет, но, аки вчера соделано, присно юнеет, да тем всепречюдным и великим творением истиннаго Творца и Бога познавати всех научает. К сим же дождит на землю небесного росою, да сеющия семена и в недрех ея умирающия паки оживляет, и сторицею возращает, и тем всякую плоть на земли питает, и самую же ту землю древесами, травами и цветами украшает, и еще же предивнее! своевременно уставленными стихиями вся умерщвляет, и паки вся та оживляет, да тем [Марк. 12, зач. 55, ст. 25, 26, 27. Исаия 26, ст. 19. Иезекииль 37 от ст. 4 до 11. Даниил 12, ст. 2. 1 Коринф. 15, зач. 162 и 163, ст. 42 и 52.] общее всех умерших воскресение, присно напоминает, вкупе и уверяет. До толика же, рещи, есть благоутробен, елико жена, имущая во чреве бремя, желает разрешения и хощет чада себе родити: вящьше же Бог желает на всех щедрыя своя милости излияти, хощет всем спастися, и царствия его наследниками быти. Обаче жене толико сильное желание бывает случайно: в Бозе же есть естественно и присно. Якоже водное естество, стоящее на горе, присно долу тещи возможности ищет, или якоже чювственное солнце, только бы могло обрести где скважиною вход, и в самыя гнусныя и нечистотами преисполненныя узилищныя места проницает и, вшед в ня, лучи своя не оскверняет, но паче тамо освещает и нечистоту изсушает: такожде и Бог (свидетельствующу святому писанию) [Иезекииль гл. 18, ст. 23 и 32, гл. 33, ст. 11.] хотением не хощет смерти грешнику, [К Тимоф. гл. 2, зач. 282, ст. 4.] но всем человеком спастися, и в разум истинный приити. И паки Спаситель рече: [Матф. 18, зач. 75, ст. 14.] "Несть воля пред отцом вашим небесным, да погибнет един от малых сих". И что еще преболее! [Иоан. 3, зач. 10, ст. 16. К Римл. гл. 6, зач. 99, ст. 32. Исаия 9, ст. 6.] Глаголет писание: Яко Бог Сына своего единороднаго не пощаде, за ны предал есть его, сиречь, до распятия и смерти, да род человеческий избавит от смерти, еже есть, вечныя муки уготованной дияволу и ангелом его.

Правосудием же нелицемерен, сиречь: [Маргарит в слове о муках.] аще многомилостив есть, обаче и праведен, равными мерами возмездие воздает, да елико долготерпит, толико согрешающих и казнит, свидетельствующу пророку Давыду: [Псалом 29, ст. 6.] "гнев в ярости его, и живот в воли его". И Апостол Павел глаголет: [Евреом 10, зач. 394, ст. 13.] "страшно есть еже впасти в руце Бога жива"; томуже согласно и Апостол Петр пишет: [2 Петрово гл. 2, зач. 64, ст. 4, 5, 6, 7 и 9.] "аще бо Бог ангелов согресших не пощаде, но пленицами мрака связав, предает на суд мучими блюсти, и перваго мира не пощаде, но осмаго Ноя, правде проповедника, сохрани, потоп миру нечествовавших ради навед; и грады содомския и гоморския сжег, разорением осуди, образ хотящим нечествовати положив; и праведника Лота, обидима от беззаконных и живущих в нечистоте житейстей, избави; весть бо Господь благочестивыя от напасти избавляти, неправедники же в день судныи мучими блюсти". Кольми паче будущий всеобщий праведный его суд грешным зело грозен и страшен, яко воньже день, утаенной от человек и от ангел, предположи живым и мертвым судити, страшный день той наричится!

Сверх же сего, собраннаго от священных писаний, многоименнаго Божияго действия [Катихизис великий во гл. 57.], и множайшая есть имена Божия, якоже свидетельствует великий Катихизис, различнаго ради смотрения, писанием предана суть, иже есть: Любовь, Правда, Премудрость, Благостыня, Вседержитель, Святый, Всеиметель, Всесильность, Величество, Присносущьство, Превечность, Милосердие, и сим подобная, которыя не естество суть, ниже образ, но действо и великая сила Божия, искони от неприступнаго естества происходящая. Естество же от существа разделяется точию в разглагольствии: егда вопрошается о бытии Бога, тогда глаголется существо; а егда вопрошается о качестве его, тогда глаголется естество; понеже гдаголет святый Иоанн Дамаскин: [Дамаскин в послании к Козме Маиумскому] "существо убо, рекше просто, бытие; естество же, существо видотворившееся".

Впрочем, егда убо речет кто: аще Господь Бог наш неведом есть, то како убо и глаголати имамы о нем? Ведомо буди таковому, яко мы, егда убо о Бозе глаголем, не о сем глаголем, еже испытовати и истязати, каков есть качеством в своем естестве, или каков количеством в своем величестве; но о сем от святых писаний поучаемся, яко ни словом изречен, ниже умом домыслим есть. И тако удивляемся величествию его и похваляем дела премудрости его, да возследуем ему благими делы своими, и привлечем к себе благодать его. [Премудрость гл. 13, ст. 1.] "Суетни убо вси человецы естественне, в нихже обретается неведение о Бозе". Сего ради таковым убо вход в блаженный покой гласом пророческим от Господа возбраняется: [Псалом 94, ст. 11.] "Тии же (рече) не познаша путей моих, яко кляхся во гневе моем, аще внидут в покой мой".

Темже блаженна есть душа та, иже единому Богу угодити желает, и иной любви на земли не ищет, и прелести земныя хвалити не хощет, [Царств гл. 2, ст. 10.] "но о сем да хвалится хваляйся (по писанному), во еже разумети и знати Господа".

 

II.

БОГОРАЗСУЖДЕНИЕ.

 

1. Вопрос: Егда преблагий Бог, в первобытном творении своем (якоже выше во статье Богопознания речеся) вся зело добра сотворил есть, и человека душею и телом всего блага создал, и добродетель ему в естество даровал: то почто человецы не вси суть благи и добродетельны? но овыя благия, овыя же злыя? и откуду сие противное бывает?

Ответ: Бог злу не творец: [Матф. 13, зач. 52, ст. 27.] научаемся же от Евангельской притчи о добром семени, и как выше во статье Богопознания явствует, яко творение его есть благо, но самовластное человеков произволение соделовает овых благими, овых же злыми. Понеже сие человеческое самовластие (сила, или власть душевная) уподобися следующему примеру: [Катихизис великий гл. 44.] "якоже воевода владеет подданными ему вои, их же всегда зрит, и во всякое промышление распоряжает, разсуждает и уставляет: тако и самовластие наше, всеми частьми, и удесы, и составы и чувствы человеческими владеет, и содержит, и наставляет, и обращает, и не имать ни едино от уд наших, еже бы где затворити его, течет, идеже хощет, вселяется, идеже желает, а идеже желает, туде и удеса и чувства наша обращает, якоже: ушеса, да слушают полезная или непотребная, и уста, да хвалят Бога, или ино что нелепое, такоже руце, и нозе, и прочее. Сицево есть самовластие наше: безстрашно, ничим же одержимо, и уклонительно на добро и зло. Сим самовластием Адам заповедь Божию преступи".

Хотя Апостол Павел притчею о скудельных сосудех и показует [Рим. 9, зач. 102, ст. 19, 20 и 21.], яко Бог сотворил оваго человека в честь, оваго же не в честь; но сие значение показует только на настоящую времянную жизнь, что Бог сотворил человеков оваго в честь, царем, оваго же не в честь, нищим; и се есть, един вид только или форма, к вечному их соделанию и употреблению; ибо нынешнее сложение человек абие имать паки в перст разсыпатися, рече бо пророк: [Псалом 38, ст. 6.] "состав мой яко нивочтоже пред тобою". А к вечному существованию человеков, аки сосудов в честь или в безчестие, еже есть в царство или в муку, соделовает коегождо от человек свое произволение, якоже глаголет святый Иоанн Дамаскин: [Дамаскин в слове: Бог злу не творец.] "аще и един Бог всяческим народодетель, но не той честныя устрояет, или безчестныя, но свойственное коегождо произволение". Например: так как один исскусный скудельник, из добре ему приготовленнаго брения, соделает сосуд доброй и полезной, а неискусный из тогоже самаго состава соделает сосуд неудобен, и даже погублению достойной: тако и самовластному произволению человека, аки некоему делателю, вручен есть от Бога состав человеческаго естества, как то: чувствы душевныя, — ум, мысли, память, разсуждение и совесть, телесныя же, — зрение, осязание, обоняние, вкус и слух и все прочия удесы. А потому коегождо свойственное произволение имеет власть устрояти человека благим или злым, по глаголу тогоже Дамаскина: [Дамаскин в слове: Бог злу невиновен.] "или по естеству в добродетели пребывати, Богу к той зовущу (поелику добродетель убо человеку от Бога дадеся в естество, потому и глаголется: Бог есть всякаго блага начало и вина), или отъити добродетели, еже есть в злобе быти, диаволу к той зовущу"; ибо [Альфа гл. 20.] "всякая злость от него изобретена есть, и скверныя помыслы, и подущати человека на зло может, принудити же не может: в нашем изволении прияти его предлог, и отринути; диаволи бо не имут власти, аще не будет от Бога попущено им, якоже явлено [Иов 1, ст. 12 и гл. 2, стих 6.] во Иове, и [Матф. 8, зач. 28, ст. 31.] во Евангелии о свиниях". Свидетельствует бо святый Ияков Апостол: [Иаков 1, зач. 50, ст. 13 и 14.] "никтоже искушаем да глаголет, яко от Бога искушаем есмь. Бог бо несть искуситель злым, не искушает же той никогоже; кождо же искушаем от своея похоти влеком и прельщаем". Потому и [Дамаскин в слове о предуведении.] "злоба глаголется ничтоже ино есть, разве отшествие благаго, якоже и тма света отшествие есть. Пребывающе убо в сущем по естеству в добродетели есмы; уклоняющеся же от добродетели, в злобе бываем; покаяние же есть возвращение от злобы в добродетель, и примирение с Богом". Глаголет бо Господь: [Апокалипсис, гл. 3, ст. 20.] "ревнуй убо и покайся, се стою при дверех, и толку, аще кто услышит глас мой, и отверзет двери, вниду к нему, и вечеряю с ним и той со мною".

2. Вопрос: Егда убо всемогущий Бог (как выше во статье о Богопознании сказано), искони вся предведущь, ибо и [Псалом 138, ст. 16.] несоделанная наша видят очи его, точно знал, что человек дарованным ему самовластием может заблудит, то есть презреть заповедь Создателя своего, и из благаго в злаго претворится, и тем наследия царствия его лишится: то вскую убо человек таковым самовластием и награжден? не лучше ль бы ему таковаго дарования власти не дати?

Ответ: Не достойно бы было таковому, по образу Божию созданному творению, яко царю твари, сообразну быти немысленному скоту, еже бы от естества точию водитися, а не разумом от самовластия своего управлятися. Аще бы человек не имел самовластия, не был бы за преступлении подвержен вечному мучению; но и добродетельный не мог бы наследником быти царствию небесному.

А еже глаголати брению о зиждителе сице: вскую Бог человеку толико великий самовластный сан даровал, чрез который он добрыя породы испал? — посему последует рещи (оставив человека в скотском естестве): вскую Бог и Ангельския силы сотворил, зане и от тех чина отпаде сатана с вои своими. И аще бы тако не быша на небеси ангелов, а на земли человеков, умных и словесных, то от кого бы прославлялось славное и великолепное имя Божие? — убо ли от несмысленной, или бездушной твари? Да не будет!

Например: речет ли кто трудолюбивому земледельцу: вскую ты сееши пшеницу твою, понеже оной трава с плевелы прозябает и возрастает, и многажды ю одолевает и заглушает? Обаче благоразумный и трудолюбивый земледелец не зрит на сие от части случающееся, и ради могущих прозябати плевел не оставляет обычное свое трудолюбие. Тако и Бог (доводствующу святому Иоанну Златоусту от божественных писаний) [Маргарит, слово 7 о воплощении Господни.] не зряше токмо Адама в породе (в раю) кормима, и за преступление изгонима, и еже от него [Псалом 91, ст. 8] прозябнути имущыя грешницы яко трава и проникнути, вси делающии беззаконие [Маргарит сл. 7.]. Но паче зряше в нем Павла, благочестие проповедующаго и в рай восхищаема, Петра, ему же ключа небесная вверяема, и вся в первом человеке зряше, то есть вся угодити ему имущия: пророки, апостолы, тысящи тысящь мучеников, многочисленныя лицы святителей и исповедников, великия соборы преподобных, постников и праведников: в корени бо бяху плодове. [Ефесеом 1, зач. 216, ст. 4, 11 и 12.] Сия вся Бог предведяше, прежде даже Адаму создатися.

Создал же Бог человека и даровал ему таковое самовластие не на хуждшее, но на лучшее и на превосходнейшее, яко быти ему царю твари; и при том не без подпоры его оставил, но к тому еще разсудительною силою и обличительною совестию наградил, и надо всем тем всемогущую свою помощь, егда только с верою воспросит, абие присно подавати обещал [Матф. 7, зач. 20, ст. 7 и 8. 2 Моисей 14, ст. 15.]. Понеже самовластие само о себе, кроме помощи Божией, не может устрояти коего добра; но и помощь Божия, аще и испрошаема будет к содействию чего-либо не угоднаго ему, отнюдь не бывает, якоже глаголет святый Апостол Ияков: [Ияков 4, зач. 55, ст. 3.] "аще просите, и не приемлете, зане зле просите". Ибо помощь Божия самовластию нашему всегда способствует точию на дела благая, а не на злая: обаче и на благая дела тогда неукоснительно способствует, егда воля человеческая будет толико сопряжена с волею Божиею, елико душа с плотию. Якоже бо тело без души не может движения имети: тако и человек без помощи Божией ничтоже благо может сотворити. Понеже Спаситель наш Iсус Христос во Евангелии глаголет: [Иоанн. гл. 15, зач. 58, ст. 5.] "без мене не можете творити ничесоже". Но даже и сам о себе свидетельствует глаголя: [Иоанн. 5, зач. 16, ст. 30.] «не могу аз о себе творити ничесоже». [И той же гл. 6, зач. 21, ст. 38.] "Яко снидох с небесе, не да творю волю мою, но волю пославшаго мя Отца". Сия рек, не якобы творити чего не мог, но собою дая нам образ сего душеспасительнаго средства. Темже Апостол Павел пишет: "искушайте, что есть воля Божия, благая и угодная и совершенная". [Альфа гл. 11] "Ибо ничтоже тако пользует человека, якоже отсецати свою волю, и согласовати с волею Божиею: воистину успевает кто от сея вещи, отнюд паче всякия добродетели". Занеже сам Спаситель, первее всего молитися научи, в молитве Отче наш: [Матф. 6, зач. 16, ст. 10.] "да будет воля твоя".

Темже вси святи угодницы Божии, к содействию своего спасения, во-первых ничего инаго толико в сем веце не желали и у Господа не просили, елико волю Божию познати и согласно оной житие свое добре управити. Якоже пророк Давыд моляся ко Господу взывает: [Псал. 142, ст. 10.] "научи мя творити волю твою, яко ты еси Бог мой". Сице и святый Петр Дамаскин: "Господи! не остави мя творити, или глаголати, ниже помыслити что, иже ты не хощеши".

Минуя же многих святых, единаго еще воспомянем, суща наитончайшаго знания душеспасительной вины, иже моляся ко Господу сице: [Апология о утешении скорбящаго] "Господи! аще не погубиши мя со беззаконьми моими, слава безмерному милосердию твоему! Аще же погубиши мя за беззакония моя, слава праведному суду твоему! И якоже хощеши устрой о мне вещь: готов бо есть прияти от руки твоея святыя вся: аще добро, аще зло, аще царство, аще муку". Сея молитвы смысл открыт ясно во Апологии в следующей повести:

[Таже Апология] "Некий бо нищий, исполнь струпов, прошак, между прочим, к мудрому учителю на повторенное приветствие: "хощу, да будет тебе то, еже ты сам себе хощеши", отвеща сице: "несть мне ино что хотети, точию тоежде, еже Бог хощет или не хощет". Глагола учитель: "еда ли туюжде бы имел еси мысль, аще бы тя Бог во ад послати изволил". Абие старец: "мене ли Он послет во ад? Но веждь, яко имам два рамена дивной крепости Его (глубочайшее смирение и нелицемерную любовь), и теми аз емлюся Его крепце, объятием неразлучным, да яко идеже либо бых послан, туде и Его повлек бы с собою: и воистину, изволительнее мне было бы вне небеси быти с Богом, (псал. 138 стих 8), нежели в самом небесе без Него"".

3. Вопрос: Егда благоутробный Бог (как выше во статье Богопознания явствует) хотением не хощет смерти грешника и ни един кто бы от человек погибнул, но воля его и хотение присно, еже всем человеком спастися: то почто не вси спасаются, но оныя спасаются, овыя же погибают, что даже и в самых Апостолех быти случися? Убо ли Бог, при толиком всемогуществе своем, не возможет всех спасти, яко сам присно хощет и желает?

Ответ: Еда родитель не желает всякаго блага чадам? Еда ли не хощет быти им наследниками имения своего? Аще ли же хощет, да никтоже паче, токмо чада его, наследники будут достояния его: то еда ли не в силах, или не имеет власти, законным наследникам своим оное определить, и в том их утвердить, якоже сам того присно хощет и желает? Но еда случается, что некоторый из числа детей его уклонится от повиновения его и распутное поведет житие: то качеством беззаконных деяний своих исходатайствует себе (и нехотящу родителю) вместо благословения клятву, и вместо наследственнаго награждения совершенное онаго отчуждение, и еще жестокое наказание.

Таким образом и премилосердый Бог правосудно творит, как свидетельствует Евангелием: [Матф. 7, зач. 20, ст. 11.] "аще убо вы, лукави суще, умеете даяния блага даяти чадом вашим: кольми паче Отец ваш небесный дает блага просящим у него". [Исаия 59, ст. 1, 2 и 3.] Но когда же нецыи от человек уклоняются от заповедей Божиих и развращенным житием пребывают нечювственно в беззакониях своих: тогда исходатайствуют себе от правосудия Божия (и не хотящу ему) достойное мздовоздаяние, сиречь не токмо за нераскаянность свою царствия небеснаго отчюждятся, [Матф. 25, зач. 106, ст. 41] но еще воспримут в геене огненной вечное мучение.

Обаче многоблагоутробный Бог болие склонен к милованию, нежели к наказанию, [Лука 15, зач. 79 от ст. 11 до 32.] якоже притчею во Евангелии о блудном сыне крайнее благоутробие свое к согрешающим показует; и всепремудрым промыслом своим о всех промышляет. Мнози же суть образы спасительнаго его промысла, яко ни словом изрещи, ниже умом постигнути кто может, о чем точию отчасти святый Иоанн Дамаскин поясняет в книге своей глаголемой Небеса, частию же в житии святаго Максима Исповедника и в Соборнике явствует, что промысл Божий есть хотение Его, и еще паче к сущему благому Его прирадение.

а) Промысл убо Божий в действии над благими имеет два вида: 1-е по благоволению, 2-е по попущению. По благоволению убо, елико непротивоглагольна суть благая. По попущению же попущает многажды и праведнаго подпасти напастем, да в нем таящуюся добродетель покажет иным, [Иов 40, ст. 3.] якоже во Иове. Иногда же попущает поносно нечто содеятися, да деянием, мнящимся безместным, великое нечто и чюдное исправит: [1 Корин. 1, зач. 125, ст. 18 и 23.] якоже крестом спасение человеком. По иному образу попущает преподобнаго страдати зде, да не из правыя совести испадет и из данныя ему силы же и благодати в кичение впадет, [2 Корин. 12, зач. 194, ст. 7.] якоже Апостола Павла. Оставляется некто на время ко исправлению инаго, да еже на онаго смотрящии кажутся, [Лука 16, зач. 83, ст. 19, 20 и 21.] якоже в Лазаре и богатом: естественно бо зряще страждущих, абие и сами в чувство приходим и удобь исправляемся. Оставляется же некто на время не ради свойственных или родительских грехов, но во инаго славу, [Иоан. 9, зач. 34, ст. 1, 2 и 3.] якоже и от рождения слепый в славу Сына Божия. Паки попущается страдати кто и ради ревности инаго, да славе страждущаго возвеличившейся, безленостна страсть иным будет надеждою будущия славы и вожделением вечных благ, якоже бысть в мученицех. Попущаетжеся кто и в срамное впасти деяние некогда во исправление иныя горшия страсти, [Псал. 29, ст. 5 и 6.] якоже есть некто возносяйся в добродетелех и исправлениях своих, попущает того в блуд впасти, [Псалом 50.] яко да падением в чювство свойственныя немощи вшед, смирится, и пришед исповедается Господеви. И вси впрочем сетовнии приключении, аще со благодарением приемлем, ко спасению наводятся и всяко пользы бывают ходатаи.

б) Лукавых же оставляет Бог по предзнанию своему праведно, и сие оставление имеет два вида: 1) строительное и наказательное, 2) конечно отчаятельное. Строительное убо и наказательное оставление бывает ко исправлению и спасению таким же образом, якоже и выше речеся. Конечно же отчаятельное оставление: егда убо Богу, вся во спасение сотворшу, безчувствен и неврачебен человек, паче же не исцелен за свое небрежение пребывает, тогда уже [Псалом 9, ст. 28.] отъемлются судьбы Божия от лица его, и предается в конечную погибель, якоже Июда, сосуд совершен к злу, и самопроизволен в погибель, его же сам Христос Спаситель не возможе пользовати. Тем, по праведному суду Божию, и прийде ему ряд службы сея, итти в место свое. И се премудро: да не в тунех негде зле погибнет, но да исполнит писание, и меру злобы своея подъимет. Да пощадит нас Бог и измет сицеваго оставления! Достоверно бо от святых писаний имамы засвидетельствование, [Препод. Нил Сорский в 4 вопр. его книги.] "яко не возможно праве мудрствующему и благочестне живущему погибнути". [1 Моис. гл. 19, ст. 16, 17 и 26.] Аще и приключися жене Лотовой, и [Деяния гл. 5, зач. 13, от ст. 1 до 11.] Ананию и Сапфире ужасное событие, но негли за неисправленное сердце их по Бозе; обаче суд оным остается во глубине неиспытанных судеб Божиих. [1 Кор. 5, зач. 132, ст. 3 и 5.] Нечто убо подобно судив и Апостол Павел, предати некоего согрешша сатане во измождение плоти, да дух его спасется в день Господа нашего Ісуса Христа.

в) Изволение убо к действию в нас есть; а скончание произволяющим добрых в Божием поспешении, праведно по предуведению своему промышляющем. Обаче сущая в нас, не промысла есть Божия, но нашего самовластия, суть два вида: 1) произволение, 2) действие. Произволение убо присно в нас есть: во еже куда поити, или не поити, лгати, или не лгати, и прочее. Деяние также в нас есть, но не всяко и не присно. Многажды бо иное, по некоему образу Божияго промысла, и возбраняется, как-то: богатыми быти, или царствовати, и прочее. Темже святый Златоуст, предупредительно ко Господу моляся, глаголет: "Господи, аще хощу, аще не хощу, спаси мя, понеже бо аз яко кал любовещный греховную скверну желаю, но Ты, яко благ и всесилен, можеши ми возбранити".

4. Вопрос: Аще убо святое писание глаголет, яко Спаситель наш Ісус Христос есть [Иоанн 1, зач. 1, ст. 9.] "свет истинный, иже просвещает всякаго человека грядущаго в мир", то почто множайшия племена и языцы, в числе коих есть добродетельныя, без просвещения Евангельской истины остаются, и вечному [Марк 16, зач. 70, ст. 16.] осуждению, по слову Христову, подвергаются? [Евреом 11, зач. 326, ст. 6, и Римлян. 1, зач. 70, ст. 17.] Занеже, кроме истинныя веры, невозможно спастися и угодити Богу.

Ответ: Воистину тако глаголет святое писание, яко [Молитва утреняя 1-го часа.] Христос есть свет истинный, иже просвещает и освящает всякаго человека, грядущаго в мир. Достоит же убо притом вразумлятися и удостоверятися, вышереченным во статье о Богопознании примером от чувственнаго солнца. Яко оно, не только на всякаго человека, но и на всякую тварь возсиявает, и в самыя гнусныя и нечистотами преисполненныя места проницает, просвещает и нечистоту изсушает: так и праведное солнце, свет истинный, Христос, даже и в самыя внутренния человеков душевныя храмины проницает, и коегождо умнии очи просвещает, разве точию кто сам от Него уклоняется, или нечим, якоже бывает и чувственному солнцу, двери входа ему преграждает. Обаче сие праведное и невечернее солнце и от затворенных дверей вспять не возвращается, но присно, днем и нощию, при дверех душевныя храмины неотступно стоит, и благоуветливо толцет, якоже сам Господь свидетельствует о себе [Апокалипсис гл. 3, ст. 20.]: "се стою при дверех и толку, аще кто услышит глас мой, и отверзет двери, вниду к нему, и вечеряю с ним, и той со мною".

Подобает же разумевати и о языцех, иже лишени суть Евангельскаго просвещения, яко некоторые из них, хотя и добродетельны и к злу непокусивы, но негли и нерадиви суть: тем и пребывают в мере своей яко ничтоже. [3 Ездры 6, ст. 56 и 57.] О них же пророк Ездра ничтоже быти рече, аки плюновение. [Матф. 8, зач. 26, ст. 22.] Сам же Спаситель таковых мертвыми именова. И аще бы сим коснулось слышати истину слова Божия, но нерадением их презираема бы была: то не горшия ли бы подъяли муки? Якоже к подобным во Евангелии речеся: [Матф. 10, зач. 35, ст. 14 и 15.] "отраднее будет земли Содомстей и Гоморстей в день судный, неже граду тому". И паки: [И гл. 11, ст. 22.] "Тиру и Сидону отраднее будет в день судный, неже вам". И паки: [Иоанн 15, зач. 52, ст. 22.] "аще не бых (глаголет Христос) пришел и глаголал им, греха не быша имели". Всяк убо [Лука 12, зач. 68, ст. 47 и 48.] "раб ведый волю Господина своего, и не уготовав, ни сотворив по воли его, биен будет много. Не ведевый же, сотворив же достойная ранам, биен будет мало". А потому, вероятно, всепредведящий и всещедрый Бог не приводит благовестия слухам оных, щадя их от праведнаго осуждения, повинных быти горшим мукам. Других же оставляет без Евангельскаго просвещения токмо до времени, яко не убо прииде им время к познанию, яковоже бысть и в Генесаретстей стране, что жители, [Матф. 8, зач. 28, ст. 34.] егда стадо свиное в мори утопе, тогда истинну Христовой проповеди не прияша; [И гл. 14, зач. 60, ст. 34, 35 и 36.] но по неколиком времени уразумеша и вероваша.

5. Вопрос: Егда всемогущий и правосудный Бог а) пред веки коегождо от человек деяния, словеса и помышления предведал, и предуставил, как сказует Апостол Павел [Рим. 8, зач. 99, ст. 29.] "ихже бо предуведе, тех и предустави": и аще б) его же хощет Бог спасает, а егоже хощет погубляет, как той же Апостол глаголет: [И гл. 9, зач. 102, ст. 18.] "егоже хощет (Бог) милует, а егоже хощет ожесточает"; еще же в) сущим во чреве матернем [Гл. таже, зач. 101, ст. 11, 12 и 13.] "не рождшимся, ни сотворшим что благо или зло" от Бога речеся: "яко больший поработает меньшему, Иакова возлюбих, Исава же возненавидех"; и г) аще вся таковая Бог пред веки ведает и сам предуставляет: то почто овым царство, а овым муку обещает? где правосудие Его?

Ответ: Глубоко слово се и прикровено! Но святый Иоанн Златоуст глаголет, [Маргарит сл. 7 о воплощении Господни.] "яко верных ради кормителям церковным подобает испытовати глубину божественных писаний разумения". Тем убо —

а) Воистину правосуднейший Бог, по всеведящему прозрению своему, пред веки коегождо от человек деяния, словеса и помышления проуведе (как выше во статье о Богопознании явствует) [Дамаскин в сл. о предуведении и Максим Исповедник в Четии-Минеи, янв. 21.], не вся же предуставил: не бо хощет Бог злобе бывати, ниже нудит творити добродетель, но вся нам суть на произволении, добрая дела и злая. По предзнанию же оных предопределяет Бог благополучии или казни, приключающияся нам по благости его и правде. Понеже как мы не имамы власти над мучащею ны болезнию, ниже над здравием, но точию над винами теми, яже или болезнь приносят, или здравие сохраняют, и якоже болезни виною есть невоздержание, воздержание же добраго здравия виновно есть: так и получение(ю) царствия небеснаго виною есть сохранение заповедей Божиих, преступление же тех виновно есть геене огненной. Потому убо и Апостол Павел о Божием предуставлении не о всех соборне человецех глаголет, [Рим. 8, зач. 99, ст. 29. Толк. Апостол л. 376.] но точию о тех избранных, ихже достойных предуведе сообразным быти образу Сына своею, как в толковании Апостола пишет: "Яко ихже проразуме Бог, сих и пронарече; разреши движущееся взыскание, рекше: проуведе Бог [2 Моисей 14, от ст. 17 до окончания 28.] непреложение Фараоново, и ожесточи сердце его, яко да поженет Израиля, и потоплен! [Иерем. 1, ст. 5.] Проуведе же правое Иеремиино, и пронарече его еще во утробе матерни, и освяти в пророка. [1 Моисей 19, ст. 13, 24 и 25.] Проуведе нечестие Содомлян, и сотвори их сосуды безчестия в пожжение. [Деяния 9, зач. 21, ст. 15.] Проуведе покаяние Павлово, и пронарече его сосуда избраннаго.

б) Да не будет неправда у Бога за слово: [Римлян. 9, зач. 101, ст. 18.] егоже хощет Бог милует, а егоже хощет ожесточит! Внемли на сие слово толкованию Апостола: [Апостол толковый от л. 373 до л. 378.] "Яко во Израили аще и общий грех бысть, за еже вси тельцу покланяхуся: обаче не вси казними быша, но другия милости получиша (негли не во всех равно к тому начинанию произведение бяше). Того ради и рече Бог к Моисею: помилую, егоже аще помилую, и ущедрю, егоже аще ущедрю. Ибо не твое есть ведати, о Моисею, яже суть достойни моея благости; мне сия остави". И паки там же глаголет святый Анастасий Синайский сице: "Мне мнится, мню же и Богу, яко ни самый сатана дерзнет рещи, яко его же хощет Бог спасает, а его же хощет погубляет; и аще бы было сие тако, то яве, ни спасаемой достоин есть мзды, ниже паки погибаяй достоин есть муце, но ниже самыя бесове в геену внити имут. Обаче, тии сами о себе исповедаша, яко в погибель идут, взывающе ко Христу: остави, что нам и тебе Ісусе Сыне Божий пришед еси семо прежде времени мучити нас (Матф. глава 3, зач. 28, ст. 29). Се время знаменовавше будущия их погибели в геене. А потому никтоже убо в нас да глаголет, яко его же хощет ожесточает, занеже неправедна творит Бога. Еже бо жесточит, разумей жестоку быти попущает, а не сотворяет". [Дамаскин в слове: Бог злу не виновен.] "Сие убо попущение Божие, яко действо и творение его, глаголати обычно божественному писанию". А для того [Апостол толк. л. 376. Никон Черныя горы, сл. 2, л. 7 на об.] и в прочих подобных речениях потребно есть убо, иже Божественная писания разумети хотящим, первее со многим опаством вину, и время, и ум глаголющаго испытати: не разсуждаяй бо сия во многа заблуждения впадает.

в) Кую же вину содержит слово: [Римлян. гл. 9, зач. 101, ст. 10, 11, 12 и 13.] иже еще во утробе матерни, не убо рождшимся, ниже сотворшим что благо или зло, един бысть Богом возлюблен, а другий возненавиден? — дает разумети из вышеписаннаго 2 ответа. Якоже бо о проуведении, яже из Адама, тако и зде Бог убо зряше во утробе Ревекки, не токмо Исава, сластолюбца суща хотящаго быти, но с ним паче Иякова, возлюбленнаго своего Израиля, и в нем дванадесять патриархов, и колено Июдово, и корень Иессеов, и цвет от него, еже быти имяше Христос.

Темже и мы да не испытуем у Творца вины, елико нам не подобает, ниже да глаголем: чесо ради сии венчани, овии же осуждени, но да оставляем неодержимой тайне избрания Божия: понеже он един, испытуяй сердца, весть кого блазе венчати, или наказати. Аще и являются многим аки бы неправедна, но за незнание тако мнится и непостижное Божияго промысла. Достоит же о сем научитися от чувственнаго солнца. Якоже око, мерную восприемши солнечную лучу, просвещается и веселится; аще ли же воззрит в самый круг солнца, не токмо не приемлет свет, но и иже имать погубляет: тако и смертное естество, желающе постигнути чрез волю Божию, не только не приемлет что, но и еже имать, и то погубляет.

г) Правосудие же Божие воистину есть нелицемерно, свидетельствующу Моисею: [5 Моисей 32, ст. 4.] "Бог, истинна дела его и вси путие его суд; Бог верен, и несть неправды в нем; праведен и преподобен Господь". Темже [Исаия 66, ст. 16.] "егда огнем Господним судитися будет вся земля" [Матф. 16, зач. 68, ст. 27. Апокалипсис гл. 22, ст. 12.], тогда воздаст комуждо по деянием его, еже есть: верным убо и добродетельным, разлученным тогда от грешник, аки овцам от козлищь, и одесную его предстоящим, речет пресладким гласом: [Матф. 25, зач. 106, ст. 34.] "приидите благословеннии Отца моего, наследуйте уготованное вам царствие от сложения мира"; всем же зло сотворшим, грешникам и язычникам, ошуюю стоящим, речет праведный судия: [Той же гл. ст. 41.] "идите от мене проклятии во огнь вечный уготованный дияволу и ангелом его; [Матф. гл. 25, ст. 46.] и идут сии в муку вечную, праведницы же в живот вечный". А что глаголет Апостол Павел: [1 Корин. 3, зач. 128, ст. 13, 14 и 15.] "коегождо дело яково есть огнь искусит, и его же дело, аще пребудет, его же назда, мзду приимет, а его же дело сгорит, отщетися, сам же спасется, такожде, якоже огнем", то в Толковом Апостоле поясняется, что [Толк. Апостол л. 487.] добродетели злату и сребру, злодейство же и грехи дровам и сену Апостол уподоби, сия сгорят, а она чистейше явятся, за них же назидатель мзду, царствие небесное, приимет; а отщетившейся, рече, спасется, сиречь не умрет, но тем же огнем, в нем же дело его сгоре, вечно мучен будет. Понеже огнь человека от муки не спасет, но точию коегождо искусит. Апостол бо явленным гласом рече: [1 Корин. 3, зач. 128, ст. 13.] "коегождо дело, яково есть, огнь искусит", да тем добродетельный человек аки злато чисто и серебро возблистает, грешный же обнажится и срамнейший, аки главня опаленная, пред всеми явится. Сему последнему суд сам Спаситель притчею сице яви: [Матф. 22, зач. 89, от ст. 10 до 14.] "исполнися брак возлежащих; вшед же царь видети возлежащих, виде ту человека, не оболчена во одеяние брачное, и глагола ему: друже, како вниде семо, не имый одеяния брачна? Он же умолче. Тогда рече царь слугам: связавше ему руце и нозе, возьмете его, и вверзите во тму кромешную, ту будет плачь и скрежет зубом". Каково же может быть таковому спасение? Уже бо несть [Лука 13, зач. 73, от ст. 25 до ст. 29.] по смерти грешником покаяния: [Лествица, сл. 7, л. 118. Иезекииль 18, ст. 26, 27 и 30.] в чем тя, рече, застану, в том ти и сужду; [Марк. 9, зач. 42. Исаия 66, ст. 24. Даниил 12, ст. 2. Псал. 6, ст. 6. Маргарит в слове о муках.] ниже по страшном суде — будущих мук свобождения: многая бо писания достоверно свидетельствуют, яко оныя суть вечны и неизменны.

Обаче [Соборник гл. 5, л. 31.] умершим грешным во избавление от вечных мук воистину есть помощь, но не огненное искушение, [14 Пр. Св. Апост. Петра и Павла. 2 Маккав. гл. 12, от ст. 42 до скончания 46.] а творимое от верных поминовение, наипаче же во святей литургии безкровное жертвоприношение, прежде даже не постигнет страшный день праведнаго Божия осуждения. Зане [Книга Вера во гл. о душах умерших человек. Пролог Сент. 28.] до последняго дня суднаго еще никтоже восприемлет себе достойное воздаяние, ни праведнии венцов, ниже грешнии мук, донележе вси во второе пришествие Христово [1 Коринф. 15, зач. 162 и 163, ст. 42 и 52.] мертвии с телесами востанут нетленни, а оставшиися живии в безсмертие изменятся, тогда уже совершенно кождо по деянию своему, яже с телом содела, и воздаяние приимет. [Лука 16, зач. 83, ст. 23 и 24.] А что слышим во Евангелии, яко егда некто богатый умре, и абие во огне мучим обретеся, то не настоящему времени причитается, но Христос о будущей вечности притчею показа. Такожде и праведных церковь в песнех ублажает, яко восприяша, венцы небесныя, но еще суще не восприяша, а за достоверное упование, яко в руку уже держати им сия. Якоже бо например зде, преступники царских законов седят в темных заключениях, и, сведая кождо свое преступление, с великою печалию и мучением совести ожидают себе конечнаго осуждения и казни; ближнейшии же царевы друзи и все вернейшии поручений его исполнители, егда будут на обед к царю званы, тогда с великою радостию ко двору его собираются, и до часа обеднаго веселяся ожидают пирования: тако суть и души умерших человек (по извещению святым Ангелом преподобному Макарию Египетскому) [Беседа преп. Макария с ангелом.] ныне и даже до дне суднаго грешнии седят заключени в преисподних адовых темницах, чувствием мучатся и сокрушаются, ожидая в день страшнаго Божия суда грознаго к ним ответа, и по достоянию дел вечнаго мучения, якоже пишется во Апокалипсисе: [Апокалипсис гл. 21, ст. 8.] "часть им в езере горящем огнем и жупелом, еже есть вторая смерть", праведнии же души, в райском упокоении водворяяся, присно радуются и веселятся [Евреом 11, зач. 330, ст. 39 и 40. Псалом 141, ст. 8.], ожидают дондеже соберутся и последнии святии клевреты их [Беседа с ангелом преп. Макария.], в наполнение десятаго чина отпадших ангел, да вси они вкупе сподобятся услышать сладкаго Божия приветствия [Матф. 25, зач. 106, ст. 34.], зовущаго в царствие небесное, и тамо неизреченнаго восприятия [1 Коринф. 2, зач. 127, ст. 9.] "ихже око не виде, и ухо не слыша, и на сердце человеку не взыдоша, яже уготова Бог любящим его".

Что же касается до неверных, а добродетельных язычников, то таковии, по глаголу блаженнаго Андрея Цареградскаго [Св. Андрей Цареград. гл. 11.], отведены будут на место не мучительно, но деснаго предстояния и царствия Божия несть им мощно получити. Отлучение же десных, сиречь, отпадение славы Божия горши огненныя муки вменяет святый Иоанн Златоуст [Маргарит, в слове о муках.]. "Вем (рече), яко мнози геены точию боятся; аз же отпадение славы Божия велми горшу муку вменяю геенския муки". Разумети о сем достоит по примеру зде времяннаго жития. Елико убозии и удаленныя жители, не видевшии славы царской и не знающии тех удовольствий, боятся только телесных наказаний и казней, толико болие страшатся удостоенныя всем удовольствиям оным единаго лишения и от лица царева отчюждения; таково будет разстояние и в будущей вечной жизни правоверным християном от язык неверных.

Верныя же, а ленивыя, такожде царствия небеснаго отчюждятся, геенскаго же мучения свободятся. Глаголет бо святый Григорий Богослов: [Кн. Просветитель в сл. 4.] "ни еже убо не мука се царство, ни еже не царство се мука, ленивым довольно есть, еже муки убежати". Обаче за леность зело болезнено есть, по вышереченному глаголу святаго Златоуста, еже неизречеаныя славы Божия вечно лишену быти.

Есть же [Св. Анастасий Синайский на 6 Псал. и Собор. гл. 15, л. 203.] и кроме добрых дел, точию чистым покаянием и теплою верою райская обитания получити, по свидетельству святых писаний. Глаголет бо пророк Аввакум: [Аввакум 2, ст. 4.] "праведник от веры жив будет"; и Апостол Павел пишет: [Евр. 11, зач. 326, ст. 6.] "без веры невозможно угодити Богу"; и паки: [Римл. 4, зач. 86, ст. 5. Псал. 31, ст. 1.] "не делающему, верующему же во оправдающаго нечестива, причитается вера его в правду". [Просветитель в сл. 4 и в Апостоле толк. на посл. к Римл. гл. 4, зач. 86.] Святый Григорий Амиритский толкует: "яко противу сему отвещает диявол, клевеща на иже веры ради спасающихся, и глаголет: сея ради вины, яко велика вера их, почто спасаеши их туне? И Господь глаголет: предана мя слышат, и связана, и заплевана, на кресте распята, и копием прободена, не смущаются сердцем, ни соблажняются умом, но веруют Бога быти от Бога, и исповедуют мя царя и создателя, и творца своего и Господа без лукавства". Яков же бе разбойник, иже на кресте возопи, глаголя: [Лука 23, зач. 111, ст. 42 и 43.] "помяни мя Господи егда приидеши во царствии си!" Несть ли достойно таковому рещи: "аминь глаголю тебе, днесь со мною будеши в раи?"

Первое же Божие на землю сошествие бысть не того ради смиренно, аки бы Бог со славою не мог явитися, и до ада снити, и его разрушити и седящих во тьме и сени смертней на свет извести; но да соблюдет свое правосудие от врага не оклеветаемо и да покажет собою первее образ блаженнаго смирения, им же всяк вознесется, и да излиет притом на всех безчисленное милосердие свое, и изъявит крайнюю любовь к роду человеческому вольным страданием своим, наипаче же неправедно наведенным на него осуждением праведно избавит падшее естество человеческое от работы вражия, и поносною смертию, яко сый безгрешен, грехом первозданнаго на весь род наведеную смерть умертвит: [1 Коринф. 15, зач. 160, ст. 22.] "яко же бо (глаголет Апостол) о Адаме вси умирают, тако и о Христе вси оживут".

Предумыслив же сие сотворити Бог сицевым неизреченным промыслом и преглубокою в нем едином от века бывшу сокровенною тайною, елико убо премирных, и елико на земли утаився, и преминув естества уставы, от пречистыя девы Марии безсеменно воплотися, и несказанно, во двою естеству, во едином составе, из нея родися. Потом преестественными чюдотворениями, Божеством действуемыми, уверил достойных служению его в он веровати, и [Мар. 16, зач. 71, ст. 15. Псал. 18, ст. 5.] теми спасительное свое Евангелие провозвестил всей твари; а безгрешным тела обложением и человеческою немощию (якоже бысть [Матф. 4, зач. 7, от ст. 1. до ст. 7-го.] в пустыни постяся и во искушение предадеся, наипаче же пред [Матф. 26, зач. 108, от ст. 37 до скончания 44. Евр. 5, зач. 311, ст. 7.] вольным своим страданием, егда со слезами моляся ко Отцу своему небесному, да мимо идет от него чаша смерти его, и ко учеником рече: "прискорбна есть душа моя до смерти) прехитрил диявола: яко же он прежде обольсти коварством Адама, тако и сей вторый Адам немощию плоти прехитрил диявола! Видя бо диявол, яко Ісус боится смерти, возусти жидов, да абие неправедно убиют его, мня окаянный, тма сый помраченный, присносущный свет истинный с прочими во тме ада затворити, да ктому не гонит его и да не разрушает в сем мире царство его. Егда же поглоти сего, абие ощути, аки удицу льщения, сиречь неодержимое Божество, неизреченно плотию человечества прикровенное, и разседеся адская несытая его утроба. И не только сего неодержимаго не удержа, но и яже прежде име, изблева, якоже свидетельствует Соборник: [Соборник л. 714, в толк. 47 ст. 2 сл. на Пасху Григория Богослова.] "Отец бо (небесный) осуди диявола, яко неправедно наведша смерть Сыну Его: смерть бо убо греха запрещение, Христос же безгрешен пребысть. Темже сице осудив Отец мучителя, изят нас и к себе возвед: ибо Сыну его ходатайствовавшу, и путь нам угладившу и указавшу, и в честь се Отцу устроившу".

Темже и мы, душевно чувствуя толикое неизреченное Божие к нам благодетельство, благодарственны пребудем, содержа нижеследующия божественныя догматы християнскаго благочестия, от святых Апостол и святых отец преданныя и соборно утвержденныя, в неизменном исповедании и блюстительном исполнении, ныне и присно и вовеки веком.

 

III.

ДОГМАТ ВЕРЫ.

 

Догмат веры Християнскаго исповедания, старогреческаго закона, блюстительно содержим, по сущему изложению в следующем:

1) Во единаго Бога веруем по символу веры сице: [Изложение 1-го вселенскаго собора.] "Верую во единаго Бога Отца, вседержителя, творца небу и земли, видимым же всем и невидимым. И во единаго Господа Ісуса Христа, Сына Божия, единороднаго, иже от Отца рожденнаго, прежде всех век", и прочее. [Изложение 2-го вселенскаго собора, согласно Еванг. от Иоанна, гл. 15, ст. 26 и гл. 16, ст. 7, зач. 52 и 53.] "И в Духа Святаго Господа истиннаго и животворящаго, иже от Отца исходящаго, иже со Отцем и Сыном спокланяема и сславима, глаголавшаго пророки. И во едину святую соборную и апостольскую церковь. Исповедую едино крещение во оставление грехов. Чаю воскресения мертвым и жизни будущаго века, аминь".

Купно [Св. Иоанн Дамаскин, Афанасий Великий и Кирилл Александрийский.] исповедуем и равно веруем: во Святую Троицу, нераздельную и несказанную, равносильную, и равнобожную, и неописанную, равносоветную, и равноразумную, равносущную и собезначальную, единоначальную и трисоставную, еже есть: во Отца Бога нерожденнаго, в Сына Бога от Отца рожденнаго, и в Духа Святаго, иже от Отца исходящаго. Не бо един от единаго разделишася когда: бяше бо Отец присно с Сыном, и Сын бяше присно с Отцем и Духом вкупе. Сице покланяемся и славим Святую Троицу во Единице и Единицу в Троице, нераздельное в триех составех едино Божество.

К ясному же понятию сего может примером видимое солнце служить: его же бо огненный и светолучный круг уподобляется во образ праведнаго солнца, безначальнаго и безконечнаго Бога Отца, лучи же его, простирающияся от небес и просвещающии весь мир, во образ истиннаго света, Бога Сына, а теплота его, согревающая землю, во образ Бога Духа Святаго, совершающаго всяческая. Обаче не триобразно, но [Стих воскресен на полунощницы.] един образ, едина воля, и едино действие, в триех точию лицех: [Григорий Синаит, Калист Катафигиат в добротолюбии.] якоже и в созданном по образу Божию человеке ум, слово и дух жизни.

Такожде и таинство Божияго воплощения исповедуем: иже от Бога Бог Слово (аки луча света из круга солнечнаго), не отступль Божества своего, в Приснодеву Марию вселися, наитием же Святаго Духа усырися и воплотися, и тако неизреченно из нея родися, невидимый и неосязаемый, яко под завесою плоти, в мире явися, от души словесныя и плоти человеческия состояй, совершен Бог и совершен человек, во двою естеству а во едином составе несмесно убо, якоже ячмень смешавшись со пшеницей; нераздельно же, якоже вино сововупившись с водою [Святый Сильвестр папа Римский, Четь-минея Генваря 2-го, Свят. Петр Дамаскин в 1 книге.]. И так вольныя страсти только плотию терпяше, а Божеством, аки огнь в разженном железе, или яко солнечная луча на секущем древе, безстрастен пребываше: две бо воли и два действия Ісус Христос имеяше, [Псал. 8 от ст. 5 до 10. Евр. 2, зач. 305, от ст. 6 до 10. Филипис. 2, от ст. 8 до 12.] равен сый Отцу по божеству, мний Отца по человечеству. Аще Бог и человек, обаче не два, но якоже душа словесная и плоть един есть человек: тако Бог и человек един есть Христос.

Честный же и животворящий крест Христов почитаем, лобызаем и поклоняемся ему с верою, яко сущей божественной и непобедимой силе.

2) Пресвятую [Св. Иоанн Дамаскин и прочии вышеознач. свят. учит.] Богородицу и Приснодеву Марию исповедаем, и с верою славим, яко воистину святейшую херувим и серафим, и превысшую небес сущу и высшу всех тварей, яко рождшую плотию единаго от Троицы Христа Бога нашего, иже нас ради к нам сшедшаго и вочеловечьшася нашего ради спасения. Которую мы не только в настоящем ныне ея блаженстве [Четь-минея Декабря 9.] (согласно святым богословцем) исповедуем быти чистую и пренепорочную, но веруем, яко она прежде рожества бе Девою, и в рожестве Дева, и по рожестве такожде пребывает Девою, и даже до толика, якоже всемогущий Бог словом своим, словом чистым, созда вещественное небо чисто [Маргарит в слове 2-м о непостижимем.] и естеством неиспытанно, тако и на земли предъуготова Бог на вселение единородному Сыну своему Слову одушевленное небо чисто и никоеяже скверны причастно, еже есть: сию преблагословенную владычицу нашу Богородицу и Приснодеву Марию [Слово на зачатие Пресвят. Богородицы в Четии-минеи, Дек. 9.], от семене чистаго и еще прежде зачатия ея предочищеннаго и освященнаго. Тем убо только сия едина, от родов предъизбранная и от пророк пронареченная, содетеля всего мира мати, не только отнюдь [В том же слове.] первородныя скверны бысть непричастна, но даже вся яко небо чиста и добра зело пребысть. О ней же сам Дух святый в Песнех-песней свидетельствует сими словесы: [Песнь песней гл. 4, ст. 7, и гл. 6, ст. 9.] "вся добра еси ближняя моя, и порока несть в тебе", и паки со удивлением: "кто сия проникающая, аки утро, добра яко луна, избранна яко солнце".

3) Такоже и святых почивших угодников Божиих, как-то: святаго Иоанна Крестителя, и яже прежде его пророков, и яже по нем прехвальных Апостолов и добропобедных мучеников и прочих всех святых почитаем, и с верою призываем их, яко ближайших другов Божиих, да тех ради к Богу молений избавляемся долгов греховных и спасаемся вси, по глаголу пророка: [Псал. 144, ст. 19. Соборн. 17, л. 227.] "волю боящихся его сотворит, и молитву их услышит". Понеже близ престола Божия предстоят и [Петр. 1, зач. 64, ст. 15. 3 Ездра 15, ст. 8. 3 Цар. 11, ст. 12 и 13. Даниил 3, ст. 55.] дерзновение имут молитися о нас, занеже сам Господь наш Ісус Христос в Евангелии рече: [Иоанн гл. 17, зач. 57, ст. 24.] "хощу да идеже есмь аз, и тии будут со мною, да видят славу мою".

4) [Святый Иоанн Дамаскин в сл. 1-я недели поста, в Соборнике гл. 25, л. 323 на об.] Еще же честныя тех угодников Божиих мощи, нетлением от Бога прославленныя, почитаем, и поклоняемся им и лобызаем: многия бо телеса святых миро источают, и многи страсти и болезни у человек исцеляют.

5) Святыя иконы [Соборный многосложный свиток св. отец восточн., числом 1455 подписавшихся в Соборн. гл. 28, л. 360, и Св. Иоанн Дамаскин в слове о иконах.], как-то: Спасителя нашего Ісуса Христа, пречистыя его Матери пресвятыя Богородицы, небесных сил безплотных и прочих всех святых, почитаем, покланяемся и целуем. Обаче почитаем святыя иконы, не яко Бога жива, но взирающе на образ, представляем себе во уме святость изображенных, и теми, равно как и от повестей книг церковных, подражательную любовь в сердцах наших возобновляем. Сие почитание святых икон есть весма нужно и душеспасительно: ибо аще мнози человецы образы искренних своих, и чада родителей своих, плотския ради любви, написуют и в домех своих на незабвенную память содержают: то кольми паче мы, православные християне суще, должни есмы вышереченныя святыя иконы, и кроме молитвенных храмов, каждый по себе в домех непременно и присно имети, почитати и покланяющеся им, лобызати, чювствами же к тем самым первообразным восходити, и во всем упование на них возлагати, да сподобимся и в будущем веце с ними вечно в царствии небесном пребывати.

 

IV.

ДОГМАТ ЦЕРКВИ.

 

Догматы святыя древлевосточныя соборныя апостольския церкви, иже у нас в неизменном исполнении соблюдаются, суть следующия:

1) Седмь изящных святых таин церковных:

Первая святая тайна, Крещение, — едино точию в три погружения творимое, с приглашением Божественнаго триипостаснаго имени, у нас всеобдержно действуется и приемлется, по заповеди самого Христа Спасителя, рекшаго к своим Апостолам: [Матф. 28, зач. 116, ст. 19.] "шедше убо научите вся языки, крестяще их во имя Отца и Сына и Святаго Духа". При первом убо в воду погружении глаголет священник: во имя Отца, аминь; при втором: и Сына, аминь; и при третием: и Святаго Духа, аминь. Зане первенствующая святая восточная церковь сей истинный образ крещения прияла от святых Апостол [В книге св. Дионисия Ареопагита, чин крещения человеком.], который образ, с отрицанием сатаны и всех дел его, и прочее в тому благолепное возследование, святый и богомудрый Дионисий Ареопагит, современник апостольский [Четь-минея Окт. 3.], сам святое крещение от святаго Апостола Павла уже в совершенном возрасте принявший, писанием чинно изложил и парвенствующей Христовой церкви в руководство предоставил.

Не иначе же и сам Христос Спаситель, погружаяся во Иордане, крестился: понеже святии Апостоли, как от него прияша, тако и прочих научиша [Св. Златоуст в толковом Евангелии на крещение Господне.]. Да и по свидетельству Святаго Златоуста, вси людие, приходящии тогда креститися от Иоанна, стояху по выю в воде Иордана: следовательно и Христу погрузитися довлело во глубины Иордана, якоже и вселенская церковь поет во 2 каноне Богоявления его сице: [2-й тропарь 1-й песни.] "Безначальне, водами спогребшутися Слове". Темже святый Апостол Павел к римляном пишет: [Римлянам 6, зач. 91, ст. 3, 4 и 5.] "Или не разумеете, яко елицы во Христа Ісуса крестихомся, в смерть его крестихомся, спогребохомся убо ему крещением в смерть, да яко воста Христос от мертвых славою Отчею, тако и мы во обновлении жизни ходити начнем. Аще бо сообразни быхом подобию смерти его, то и воскресения будем причастницы". Последовательно сему и святый премудрый Максим Грек во своей книге пишет сице: [Св. Максим Грек в 40 сл., тоже и во Псалтыри со возследованием в сл. о крестном знамении.] "яко в божественном крещении треми в воду погружении тридневное Спаса Христа погребение и воскресение гадает церковное предание", и прочее.

Кроме же сего единаго трепогружательнаго крещения никакия инообразныя крещения у нас под строгим запрещением отнюдь не приемлются: [В кн. Кормчей 8 пр. Св. Апостол и прочие вселенских соборов; таже в Великом Потребнике соборное изложение Святейшаго Филарета Московскаго Патриарха л. 564 и 597.] яко дерзати смеющих святое крещение инако действовати, или приимати, церковныя правила из священнаго сана извержением осуждают.

Вторая святая тайна: Миропомазание, которое у нас непременно при самом крещении исполняется, зане сам Христос Спаситель рече: [Иоанн 3, зач. 8, ст. 5.] "аще кто не родится водою и Духом, не может внити в царствие Божие". Действуется же то по уставу древлегрекороссийской церкви с нижеследующими приглашениями: егда бо иерей помазует новокрещеннаго, глаголет: [Великий Потребник в чине миропомазания.]

На челе: "Печать дара Святаго Духа, аминь. Да избудет студа, егоже первее преступив человек всюду ношаше".

На лицы: "Печать дара Святаго Духа, аминь. Да откровенным лицем славу Господню зрит".

На очию: "Печать дара Святаго Духа, аминь. Да зрит очима свет Святыя Троицы, первыя доброты образ".

На ушию: "Печать дара Святаго Духа, аминь. Да приимет ушима слышание таинства духовнаго, святаго Евангелия Христова, якоже рече Господь: имеяй уши слышати да слышит: да не приложится ему злое слышание".

По ноздрям: "Печать дара Святаго Духа, аминь. Да обоневает Божественных таин, яко да и той будет в миро Христова благоухания и в добровоньство спасаемых, и да не обоневает прочее смрадныя первыя льсти".

По устом: "Печать дара Святаго Духа, аминь. Да перваго вкуса вторым заградит, сиречь: телом и кровию Христовою".

На персех: "Печать дара Святаго Духа, аминь. Да оболкся во броня правды, противу художеству вражию станет, яко победитель непобедим".

На руках: "Печать дара Святаго Духа, аминь. Да будут готовы на простертие во благотворение, и на отгребание всякаго зла".

А по псалме 33-м, "возлагает иерей на крестившагося крест с гайтаном, якоже истиннии християне имут обычай, еже носити на себе знамение спасительных Христовых страстей, иже есть честнаго креста образ, на прогнание всякия неприязненныя детели, себе же на сохранение души и телу".

Третия святая тайна: Причащение тела и крови Христовой, иже у нас непременно обое каждому православному християнину подается, во оставление грехов и в жизнь вечную. Сам бо Христос Спаситель наш всем повеле плоть его ясти, и кровь его пити, — а именно на тайней вечери своей [Матф. 27, зач. 108, ст. 26, 27 и 28.], "прием хлеб и благословив преломи, и даяше учеником, и рече: приимите ядите, сие есть тело мое; и приим чашу, и хвалу воздав, даде им, глаголя: пийте от нея вси, сия бо есть кровь моя новаго завета, яже за вы и за многия изливаемая во оставление грехов". Да не уничижим кто повеления сего, рече прочее Ісус: [Иоанн 6, зач. 23, ст. 53.] "Аминь, аминь глаголю вам: аще не снесте плоти Сына человеческаго, и не пиете крови его, живота не имате в себе". Страшно изречение Христовых словес! И яко истинна суть словеса его, сам заключает: [Марк 13, зач. 62, ст. 31.] "Небо и земля прейдет, словеса же моя не прейдут".

Четвертая святая тайна: Исповедание грехов.

Пятая святая тайна: Священство.

Шестая святая тайна: честный Брак.

Седьмая святая тайна: Елеосвящение.

2) При том [Древлепеч. Служебники, содержащие чин Василия Великаго, Иоанна Златоустаго и Григория папы Римскаго.] блюстительно сохраняется у нас древней церкви благолепный чин Божественной литургии, устроенной Василием Великим, и Иоанном Златоустом и святым Григорием папою римским, так, чтобы на святой проскомидии непременно иметь [Потребник великий и древлепечатные Служебники. Великия же не по количеству, но по действу.] седмь просфир, именуемых великия, квасных, из чистой пшеничной муки испеченных:

1-я просфира, за Господьский хлеб, еже есть святый агнец.

2-я в честь Пресвятыя Богородицы.

3-я в честь Святаго Иоанна Крестителя и всех святых.

4-я за верховнаго святителя и всего освященнаго чина.

5-я за самодержавнаго государя царя.

6-я за всех живых православных християн.

7-я за упокой всех православных християн.

И как сии седмь особыя, так равно и прочия, по желанию усердствующих християн на проскомидии в жертву Богу приносимыя, просфиры имеют равным видом сверху печать, круглым обведением [Симеон Селунский во главе 68 книги его.], образующую, по толкованию святаго Симеона Селунскаго, безначальное и безконечное Божие Слово воплощенное (сиречь, хлеб — плоть, а печать — Божество); посреде же сея печати трисоставный крест Христов, со изображением к нему надлежащих литер, а вокруг креста евангельских словес: [Иоанн 1, зач. 3, ст. 29.] "Се агнец Божий вземляй грехи мира". Последнии убо просфиры, по вынятии иереом из них частиц в Божественную жертву, абие принесшим в благословение подаются целостию: ибо на сей случай пекарь церковных просфир запасныя приготовляет просфиры.

Все же таковыя просфиры приуготовляются непременно из кваснаго теста потому: ибо Спаситель наш Ісус Христос, егда по исполнении времени восхоте ветхаго завета сеновно действуемое чиноположение конечно в самую истину благодатию своего привести, сиречь новый благодатный завет уставити, повелел уготовати тайную свою вечерю прежде праздника пасхи и [2 Моис. 12, ст. 3, 6 и 15] прежде нежели изметаем бысть квас в 4 день опресночнаго приготовления, то-есть: 13 числа луны по еврейскому счислению [Иоанн 19, зач. 61, ст. 31.], прилучившагося тогда быти в четверток: идеже к тому [2 Моисей гл. 12, ст. 11 и Григорий Богослов в слове на пасху.] не стояще, якоже обычай бе ясти ветхозаконную пасху, [Матф. гл. 26, зач. 108, ст. 20. Иоанн гл. 13, ст. 4 и 11.] но седяще со ученики новую пасху яде: "и рече к ним: желанием вожделех сию пасху ясти с вами прежде даже не прииму мук"; ядоша же [Лука гл. 22, ст. 15. Златоуст в беседах 11 и 18 на послан. Коринф.] не опресноки [Матф. гл. 26, зач. 108, ст. 26. Марк гл. 14, ст. 20. Лука гл. 22, ст. 19. 1 Кор. гл. 11, ст. 23 и 24.] но хлеб, сиречь квасный, под видом коего хлеба и вина уставил Христос новый завет о своей плоти и крови, по свидетельству всех Евангелистов и Апостола Павла, рекших: "ядущим же им, прием Ісус хлеб и благословив преломи", и прочее.

Хотя святии Евангелисты и пишут [Матф. гл. 26, зач. 108, ст. 17. Марк гл. 14, ст. 12 и Лук. гл. 22, ст. 7.], яко уготоваша Христу ясти пасху во дни опресночныя, но в таком разуме глаголют они только о днях опресночнаго приготовления [2 Моис. гл. 12, ст. 3 и 6.], ибо законом повелено было прежде четырех дней праздника, то-есть в 10-й день Марта месяца, запасать агнца и соблюдать до 14-го числа вечера, а не о самом праздничном, или о канонном дни праздника, воньже квас изметается.

Аще бы оная вечеря была в самый день праздника, то невозможно бы Христу в таковый день посылать учеников путь шествовать и приготовление творить, смерти бо повинни были творящии то. [Иоан. гл. 18, ст. 28 и 29. Матф. гл. 27 ст. 15 и 17.] Более же явствует от Евангелия: егда ведоша Ісуса от Каиафы в претор, бе утро, а пасха еще не бе, как и Пилат рече: "кого хощете отпущу вам на пасху?" Аще ли бы в канонный день праздника вечеря Христова была, то не бы святии Евангелисты написали [Иоан. гл. 19, зач. 61, ст. 31.], яко Христос уже в пяток, в канон праздника пасхи, еще из утра [Мар. гл. 15, зач. 68, ст. 25, 33, 34, 37.], о часе третьем, на Голгофу приведен, о шестом часе распят, о девятом же часе на кресте умре. Егда же Июдеи прося Пилата рекоша: [Иоан. гл. 19, ст. 31.] "да не останут на кресте телеса в суботу, бе бо велик день тоя суботы", то явно от сего есть, что самый великий праздник пасхи прилучился тогда в день суботный.

И если же бы та вечеря была в свое время, и все по обычаю еврейскому на ней уготовано: то стояще, а не седяще яли бы пасху, и не рек бы Христос о ней отлично, яко желанием вожделех сию ясти пасху: ибо ветхозаконную прежде ежегодно ядяше, но никогда такова желания изъяви, якоже о сей. Предварительно же соверши Христос новую сию пасху для того, дабы вместо ветхозаконнаго агнца [2 Моис. гл. 12, ст. 6, 18 и 19.] (коего закон повелеваше в вечер 14-го числа луны заклавши агнец, с тем починати и опресноки ясти, на седмь дней праздника пасхи) сам себя приуготовил на вольное заколение за спасение всего мира, в начало и устав новыя християнския жертвы. Якоже и сотвори: ибо в тот самый день, воньже у евреев к вечеру прилучившагося тогда пятка закалашеся агнец и начинашеся праздник пасхи, Христос на кресте нас ради плотию смерть вкуси и погребен бысть, в суботный же день во гробе почиваше, а в третий день недельный из мертвых воскресе. Итак совершися сия новая спасительная пасха, еже есть новому Израилю преведение от смерти к жизни, и от земли на небо [1 Коринф. гл. 5, зач. 133, ст. 7 и 8.]. А что Апостол Павел, к коринфом пиша, повелевает очистити ветхий квас и праздновать в безквасиих чистоты и истины, а не в квасе злобы и лукавства: се не о употреблении хлебном, но о жительстве чистом и благочестивом поучает. [Матф. гл. 13, зач. 53, ст. 33, и Лука гл. 13, ст. 81.] А сущий квас сам Христос Спаситель в притчах своих царствию небесному уподобляет, яко живот образует, а не мертвость.

3) Все наше древлецерковное исполнение содержится и печатлеется непременно крестом Христовым тричастным, его же с верою исповедуем, яко истинный есть образ животворящаго креста, на нем же Христос Спаситель плотию распятся. Тричастный убо именуется, яко из трех древ: кипариса, певга и кедра, в тридневную смерть Господа Ісуса Христа соделан бысть, как свидетельствуют святии восточнии учители: [В многосложном послании л. 2-й.] Герман патриарх Цареградский, [В Октаи 3-го гл. в среду и пяток на утрен. седалных.] и Иоанн Дамаскин; о нем же и проречение Исаии пророка в самой истине исполнися (иже во главе 60, стихе 13). По разуму же древлевосточной церкви, в кресте Христовом первое древо бе праве устроено; другое преки, к нему же длани Христовы двема гвоздьми пригвождены; а третие в подножие, к нему же нозе Христовы такожде двема гвоздьми пригвождены быша, во исполнение пророческаго гласа, во псалме 98, стих 5. Темже и церковь святая поет в день воздвижения честнаго креста Христова: [Минеи служебн. Сентяб. 14 на литии стихера 6.] "Ты ми покров державен еси тричастный кресте Христов". Святый же Иоанн Дамаскин ублажает сице: [В 8-м гласе ирмосов песнь 5.] "О треблаженное древо, на немже распятся Христос Царь и Господь". Также и святый Феодор Студийский в слове на поклонение честнаго креста глаголет: [Соборник гл. 31, л. 104.] "Днесь тричастный крест поклоняем есть, и четвероконечная вселенная празднует радостно". [Триодь, 4-й недели поста во вторн. в 8-й песни, и св. Григорий Синаит в крестн. каноне.] Равно же и трисоставным почитается, зане Пресвятыя Троицы носит трисоставный образ. Еще же именуется сей в церковном писании [Минея служебная, Сент. 14 в утренних стихерах.] и четверочастным: за положение вверху главы Христа Спасителя дщицы, с титлом Его, Пилатом написаным; дщица же сия бе из древа масличнаго, яко провозвестница Спасителя и спасения всего мира, [1 Моисей гл. 8, ст. 10 и 11.] юже предобразовала при потопе голубица, принесшая к праведному Ною в ковчег во устех своих масличной сучец.

Сей трисоставный крест Христов, как в древлегреческой церкви, равно и у нас, яко самосовершитель, присно во всех священнодействиях употребляется, и паче всех священных вещей предпочитается, тем и наверх самой главы церкви Христовой поставляется: понеже осенением благословлять его, кроме Бога, отнюдь никто не может, но сам той Божественный крест вся осеняет и вся освящает. Двучастнаго же креста знамение, еже из двух частей составленнаго, имеет от тричастнаго велие различие: тако, яко образ от истины, или паче от образа сень.

Понеже двучастный крест, есть сеновнаго завета начертание: [2 Моис. 17, ст. 11, 12 и 13.] якоже древле Моисей крестообразно руце распростре, [2 Моис. 14, ст. 21 и 27, и в 8 гласе ирмосов песнь 1.] и на мори жезлом образ креста начерта, тогда бо и силы деяшася от него, якоже деяшася и во священнодействиях онаго завета; ныне же, от Христова новоблагодатнаго закона, вся та упразднися. [В Октаи догматик 3-го гласа.] "Прейде (бо) сень законная, благодати пришедши". Обаче якоже сень в лице солнца неотлучна есть от сущаго: тако и двучастный от тричастнаго креста не отлучен есть; но только сей двучастный крест у нас приемлется в употребление на священных одеждах, его же священник первее осеняет и потом целует.

Хотя же кресты, которые всякий христианин от крещения своего присно на персех своих носит, и имеют вид двучастнаго креста, обаче на них спереди непременно изображается начертание истиннаго трисоставнаго креста.

И все вообще кресты, сущие в церквах и в домах, трисоставнаго изображения, древянные и метальные, равно у нас приемлются и почитаются, кроме только на главах церквей наших отнюдь не поставляются метальные, но присно древянные, видом трисоставные; прочности же ради сии обиваются жестию, овые же украшения ради и позлащаются. [Книга минея праздничная, печат. в Москве 7158-го года, и особо древняя о явлении на Тихвине Богородичной иконы история.] Вина есть сего, что Пресвятая Владычица наша Богородица, дивным явлением и ужасным чюдотворением в Тихвине, не соизволила на главе храма своего кресту железну быти, но древяну, якоже в каноне ея 4 гласа, в тропарях 5 песни, явствует, которой есть в праздничной Минеи.

4) Как [Во Псалтырех со возследованием, напечатанных при древних московских патриархах.] священники на благословление, так равно и все православные христиане древле-грекороссийской церкви на крестное ограждение, слагают персты десныя руки непременно сицевым образом:

а) Три убо персты, первый палец со двема последнима, вкупе, во образ равночисленныя неразделимыя Троицы. Яко и древле трие отроцы, образовали Троицу [Книга Пролог и летописныя святцы 17 дек.], сущия внучата царя Иосии, дети Ехониевы, имоверно были больший, средний и меньший, о них же святая церковь во 8-й песни 8-го гласа поет: [Св. Иоанн Дамаскин.] "благословите дети, Троицы равночисленнии". Лишше же сего никтоже от нас дерзает к неописуемому триипостасному Божеству Святыя Троицы, не только равноперстием бренной руки, но ниже из всей долу имеющейся описуемой твари яве равен образ показати: поелику таковое безместное умствование святии отцы, Богомудрые учители, Григорий Богослов во 2-м слове на святую пасху, Максим Грек в слове о Святом Дусе, и Иоанн Дамаскин в 1-й его книге, главе 9-й, зельно обличают и конечне отражают. б) Два же перста, указательный право, а великосредний мало приклонен, совокупно простерты, образующие таинство воплощения Бога Слова во двою естеству, Божества и человечества, во едином же составе; преклонение же персту толкуется: преклонь небеса сниде на землю, нашего ради спасения. И тако слагая персты, изображаем в них по преданию древлевосточной церкви обоя божественныя таинства: Святыя Троицы и воплощения Бога Слова [Книга Стоглавник, составленныя на Стоглавном соборе в лето 7059. Великия Псалтыри со возследованием и великие Потребники, напечатанные в Москве, при древних царях и патриархах, до Никона бывших]. Ибо всероссийский Стоглавный собор и последующия тому первосвятители, изряднее же московские, до лет Никона бывшие патриархи таковое древнее церковное предание, еже бы двуперстным сложением как священником благословляти, так равно и всем християном знаменатися, единогласно подтвердили и точнаго исполнения ради даже и в книгах церковных (у нас и доныне подлинником сущих) в роды печати предали.

Сие же вышереченное церковное предание имело основание свое на всеобдержном, древлегреческими благочестивыми учительми утвержденном, узаконении, из числа коих святый премудрый Максим Грек, Афонския горы, обители Ватопедския, свидетельствованный в премудрости и благочестии тогдашними восточными патриархами, бывый в России для наилучшаго исправления церковных книг [При великих Псалтырях напечатано явствует.], засвидетельствовал в своем 40-м слове, ясно и достоверно, о древнем вышеозначенном сложении перстов. В точности сему согласует писание и блаженнаго Феодорита Кирскаго. [Четь-минея февр. 12.] А святый Мелетий патриарх Антиохийский, будучи на соборе, востав, показа людям три персты, и не бысть знамения; потом два совокупль и един пригнув, благослови люди, и бысть знамение страшно: изыде бо от него огнь яко молния. Хотя же в житии его и не объясняется, киими он персты благословил люди, обаче разумно явствует, что сей святый Мелетий двуперстным, а не триперстным, или иным каким сложением люди благословлял; тем болие, что треми первыми точию персты оба таинства: Святыя Троицы и воплощения Бога Слова, изобразити невместимо, смешати же неправедно, за опасность следующаго: а) да не подражание некое будет ереси Евтихиевой и Диоскоровой, которыя бежаста Несториева разделения, два сына глаголящаго, во ино зло впадоста, ибо двема естествома, Божеству и человечеству, в совокуплении смеситися и во едино естество сотворитися зле проповедаша; б) ежели бы мы тремя сложенными персты, образующими только едино таинство Святыя Троицы, крестное знамение на себе изображали, то опасность предстояла бы к сходству ереси Севировой и прочих подобных, которыя на кресте Божество страдавше зле мудрствоваху.

А потому, в благословении святаго Мелетия сложение перст, елико не показует быти треперстно, толико и не литеросложно. Если же литеросложное благословение, склоняемое перстами на литеры греческия и славянския, и точно одно имя IC ХС изобразовало бы; но таковое благословение в сложении перст исповедание Святыя Троицы устранило бы, а наипаче благословению Христа Спасителя отнюдь не сообразно было бы: зане литеросложное благословение не может действоваться во вселенском употреблении, идеже литеры других язык не согласуют с сложением перстов. Христова же благословения вид воистину был образ вселенскому содержанию. Святый убо Лука Евангелист, во Евангелии благовествует [Лука 24, зач. 114, ст. 50 и зач. 113, ст. 30, и Евангельская стихера 5], что Христос Спаситель, при вознесении на небо, Апостолов своими пречистыми руками благословил; и хотя сей святый Евангелист прочее тамо не упоминает, како персты рук своих Христос слагал, обаче сей Евангелист, будучи изуграф [Древняя история о принесенной на Тихвину святыми ангелами по воздуху богородичн. иконы.], благословящую десницу у Христа Спасителя, на первой им написанной Богородичной иконе, двуперстным сложением ясно изобразил. Таковой образ Христова благословения приняли первее святии Апостоли, а от сих другоприимательне древлегреческие и прочие первосвятители. Итак были по оному святым Лукою написанному образу и множайшии в древлегреческой церкви иконы точно изобразуемы. [Минея праздничная в каноне иконы Тихвинския, в 3-м тропаре 5-й песни. Таже и в прочих службах явлению богородичных икон, в месячных минеях, напечатанных в Москве при древних царех и патриархах.] А потом промыслом Божиим, не точию с первейших тех икон копии, но даже и самыя подлинныя апостольскаго художества иконы в Россию собраны и великими чюдесами от Бога, прославлены, где и до днесь, как известно, целы сохраняются.

5) Вышеозначенным сложением двух перст десницы во образ таинства Христова воплощения, а трех прочих перст Святую Троицу равночисленно образующих, наблюдается у нас всеопасно истовое на себе знамение честнаго креста, сиречь согласно истинному догмату веры, яко Христово только человечество на кресте страдало, а Божество от плоти не разлучно, но безстрастно присутствовало.

Сим же [Св. Максим Грек в сл. 40.] крестным знаменованием, по сказанию святаго премудраго Максима Грека, учит нас святая церковь вкупе все благоверия християнскаго таинства сице исповедовати [Таже во Псалтыри со возследованием, в слове о крестном знамении, и в Катихизисе великом, и в прочих древлепечатных книгах. Иоанн 1, зач. 1, ст. 1.], во-первых; полагая сложенныя персты на челе, исповедуем: "в начале бе Слово, и Слово бе у Бога, и Бог бе Слово" и яко от Бога Отца родися, яко и наше слово от ума происходит. А яко по божественному слову, глаголющему: приклони небеса, сниде, тако и мы рукою, со главы снося, полагаем на чрево, исповедуем с небесе на землю к нам Божие снитие и воплощение, то-есть во чреве Приснодевы Марии безсеменное вселение, девятомесячное в ней обитание, рождение, страдание и воскресение. Потом вознося полагаем на правое плечо, исповедуем Христово по воскресении на небеса вознесение, и седение его одесную Бога Отца. Потом, перенося, полагая на левое плечо, исповедуем быти второе Христово страшное на землю пришествие судити живым и мертвым, и воздати комуждо по делом его, праведным царствие и жизнь вечную, а грешникам муку вечную: от сея же последней и молимся помиловати нас; при том и таинство образуем: поклонением первое Адамово падение, а восклонением — о Христовем воскресении паки наше возстание. Сицевым бо чином крестное знаменование истово совершающих ангели Божии свыше зрят и веселятся, понеже сила сего велика есть, как повествуется во многих страданиях святых мученик: [Псалтырь со возследованием, в слове о крестном знамении.] егда нечестивые мучители не могше их от Христа различными муками отлучати, повелеша им языки отрезати, и потом вопрошаху, еще ли веруют и проповедуют Христа, они же, не могуще языком уже глаголати, но полагаху на себе знамение честнаго креста, и тем исповедаху таинство веры и прославляху Бога в душах и телесах своих. Того ради святый Максим Грек поучает сице: [Св. Максим Грек в слове 40, таже и во Псалтыри со возследованием.] "Всяк верный да не нерадит, и не полагает сего ни во что, и еже бы без боязни, но со страхом, и с правою верою, и с чистою совестию, полагати креста знамение на лице своем, якоже божественная писания указуют. Есть же и во отеческих книгах писано о сем: "иже аще кто не по подобию лице свое знаменает, сиречь не истово крестит, гордости ради или лености, и махает семо и овамо, и тому маханию беси радуются".

6) И священники наши, в благословении человека, знамение креста непременно тем же двуперстным сложением по древнему обычаю полагают истово, сице: егда кто из православных поклонится священнику и просит от него благословения, и священник первее да положит на главу его вышереченным сложением благословящую свою десницу, глаголя: "благословение Господа Бога и Спаса нашего Ісуса Христа на рабе Божии" (имя рек), и сносит десницу на чрево, потом на оба рама, глаголет: "всегда, и ныне, и присно и во веки веком", а приемлющий благословение на сие отвещает: аминь, и целует десницу, положившую на него великое Божие благословение: и, ликуяся по обычаю, священник речет: "Христос посреде нас", а он отвещает: "есть и будет".

7) Четыре в году соборные посты, составляющие всего до двадцати одной седмицы, соблюдаются у нас ненарушимо, в которые всяк наш православный християнин благоговеет постом, и молитвою и коленопреклонением к Богу; притом же во весь год, иноки понедельник, и вкупе иноки и мирские среды и пятки, кроме некоторых разрешенных дней, постят, так равно как и в великий пост, не вкушая отнюдь не только мяса (его же иноком во веки ясти запрещено), но и млека, сыра и яиц [Номоканон свят. отец Афонския горы, в правилех о вселетнем посте.]. Даже и больным не подается сих скоромных ястий, хотя бы они и до смерти желали, а только, немощи ради, на елей и рыбу разрешается. [Кормчая от правил св. Апостол 69, и прочих свят. соборов.] Аще же бы кто, не только соборные посты, но даже среды и пятки, кроме разрешенных, тверду сущу в нем разуму, не постил, таковый, по правилом святых Апостол и святых отец, аще будет от священных, да извержется, аще ли мирянин, от собора верных да отлучится.

8) Совокупно рещи, сохраняется у нас неизменно то самое веры догматствование и все церковное чиноположение и богослужение, еже, прежде нежели западная церковь от восточной разделилася, вселенскими соборы утвержденное, святым же и равноапостольным князем Владимиром киевским, в 6496 году, от грек во всей целости принятое, и которое существовало в России всеобдержно и неизменно даже до перемен церковных книг бывшим московским патриархом Никоном 7163 года. А дабы вышереченные догматы веры и церковное чиноположение и богослужение точно содержалося, святая вселенская церковь утверждает в следующих запрещениях сице: [Книга Соборник, от многосложнаго свитка восточных свят. отец числом 1455 подписавшихся, гл. 28, л. 391.] "аще убо дерзнет кто инако веровати, или развращати что либо от сущих в церкви, держимых по первым обычаем святых отец и благочестивых царей, аще святители суть да извержени будут и прокляти, аще ли же иноцы и простии люди, тою же клятвою осуждени будут". И паки, святый Леонтий папа римский в поучении своем глаголет: [В Евангелии толковом, святый Леонтий папа Римский, в неделю 1-ю поста.] "смеющих инако мудрствовати, или по мерзских еретик церковная предания презирати, новая же некая разумевати, или отложити некое от чина церковнаго, Евангелие, или знамение креста, или прочее что, аще епископи суть, или клирицы, изметати повелеваем, аще ли же иноцы, или бельцы, от причащения да отлучатся: святый собор сия предал есть". Наипаче же [Беседа 1-я посл. 1-е к Галатам, зач. 199, стр. 1477, гл. 1, ст. 7, 8 и 9.] святый Иоанн Златоуст во апостольских беседах пишет сице: "егда Павла реку, Христа паки глаголю, той бо бяше движа егову душу". Павел бо "не рече: аще противная возвестят, иля превратят все, но: аще и мало нечто благовествуют, паче еже благовестихом, аще и мало что подвигнут, анафема да будут". [Соборник гл. 28, л. 389.] Страшнейшим же словом заключают восточнии вселенские патриархи к Феофилу царю греческому, в соборном многосложном свитке, сице: "проклят разоряяй уставы отеческие и непременные уставы церковные, яже положиша отцы твои".

От сицевых богодухновенных писаний, на какой они конец толико оберегательно к нам возглашают, достоит внимати и вразумлятися, якоже, например, елико к сохранению убо целости винограда необходимо нужно есть бдительно хранима ограда, толико наипаче и несравненно нужно есть к ненарушимому соблюдению целости закона Божия точно хранить добре утвержденная святых отец церковная предания. Ибо аще бы сия церковных догмат ограда от начала опасно всюду всеми блюдома была, то не бы едино стадо единаго пастыря Ісуса Христа на многия секты разделялося. Тем убо мы да пребудем в ненарушимом соблюдении древних церковных преданий, присно молящеся к сему доброму пастырю [Лука гл. 15, зач. 78, ст. 4, 5 и 6.], иже на взыскание заблуждьшей и волкохищной овцы от небес даже до ада сшедшему, и, обретше, на рамо свое восприемшему и радостно в дом к Отцу своему принесшему, да не только нас униженных не оставит от истиннаго его пути заблудити, [Иоанн гл. 10, зач. 36, ст. 16.] но да и иных всех яже не суть от двора его, спасительным своим промыслом соберет и во едину божественную православныя его веры ограду приведет, и тако да будет, по Божественному его слову [Стих той же], "едино стадо, и един пастырь".