Священноиерей Лазарь

 

1. Роспись  вкратце нововводным церковным раздором,

ихже собра Никон патриарх со Арсением чернцем от разных вер,

о нихже Павел пишет: не суть бо веры, но ереси и раздоры,

единая бо есть истинная вера, еже во Христа, юже достоит нам неподвижно соблюдати.

 

В царствующем граде Москве выломал престол в соборной церкви, что был освящен от прежних патриарх. А он сделал о пяти столпах и вервиею привязал четыре столпа к сред­нему столпу: а мощи под дску положил; а вместо литона антимис печатной положил, своим переводом. И советницы его по своим паствам такоже творят: старые престолы выламывают и вновь посвящают своим вымыслом, и те антимисы повсюду разсылают, а велят поверх престола класть, а мощи велят класть под дску. И то они творят не по истине: связание четырех столпов к пятому прообразует четырех патриарх с папою. А мощи святых кладут под дску: и то святым попрание. А по истинне, по преданию святых отец, быть святому престолу единостолпну, или четверостолпну, а вервию обязати верх срачицы, по дске, в три ряды, и антимис верх срачицы пришить в три же ряды, а в нем мощи святых, а на верх индитии литон положить. И единостолпный престол плинфеный образует, по Даниилу пророку, камень, а четверостолпный обра­зует четыре евангелия, а одежды и обязание, мvро и масло образует совершенне погребение Христово, а литон сударь именует.

Они жь напечатали в новом Потребнике на освящение церкви престол мылом помывать, а у срачицы по краех четыре верви зделати, и тем столпы связывать: а срачица в новых  книгах напечатана саваном: а над мощми указано слу­жить в иной церкви, а не в той, кую святить; а будет в той день не поспеет освятить, ино в иной церкви досвятить; а над мощми службе быти в иной же церкви, и по утрени преносити мощи архиерею на главе. А протопопом, и попом святить не велено; а кто де дерзнет от священник церковь святить, и тот де не освятит, но и смертно согрешит, то колми паче в приношении бескровныя жертвы. И сие их умышление отеческому преданию великое нарушение.

Они же во святых церквах амбоны выломали, и в то место свои рундуки сделали. И то взято от латыни; а от святых отец амбон сотворен изначала во святых церквах, а не рундук, по­тому что те пророцы евангельски о Христе про­рочествовали, для того над ними Еваагелие прочитати, и по правилом без малых ризиц на него не восходить. И те их рундуки святых отец преданию разрушение.

Они же архиереи во своих паствах велят слу­жить по новым Служебникам с великим запрещением, а хто не служит, и тех от церквей отставливают. А в тех Служебниках велено слу­жить над пятию просвирами, а не над седми по преданию. Да  егда  вынимать  часть о царском здравии и о спасении, а ныне вместо того напеча­тано: Помяни Господи. И сею речью они о царском здравии Бога не молят: та речь заупокойная, а не о здравии. А на тех просвирах печатать велят крыжем, как и у латынь: тако сотвори в лето 6947-е Исидор митрополит, приехав со осмаго собору, служил такоже и Игнатей патриарх при растриге. А по преданно святых апостол и свя­тых отец истинная  жертва достоит приносити седмию просвирами: о том святый Афанасей пишет: седмь просвир во образ седми хлебов, яже прият от Авраама Мелхиседек царь Салимский, и принес Богу хлеб и вино, якоже и Христом, седмь хлебов повеле учеником народам предложити; те же седмь просвир во образ седми веков и седми вселенских соборов и седмичных дней. А на них печатать трисоставный крест Христов в крузе: о том бо Дионисий Ареопагитский пишет, яко круг являет печать непостижимаго Бога; а Василий Великий пишет: прежде приношения хлеб крестом знаменан; о том и пророк Исаия (гл. 60) глаголет: слава Ливанова к тебе приидет кипарисом и певгом и кедром  вкупе прославити место святое Мое. В тех бо трех древесех, свидетельствуют, сотворен бысть крест, наньже восшед Господь прослави церковь. А крыж являет образ кресла, егда жидове, поругавшеся Христу, совлекоша с него ризы его, и одеяше его хлами­дою червленою, и возложиша на главу его венец тернов, и посадиша его на кресла, и прегибающе колена, и поругашася ему. И те кресла от святых отец преданы архиереом на поседание, еже мы, вместо поругания Христова, им, архиереом, поклонение творим. А хламида образует червленыя ризы; а тернов венец оброснение главы образует. А што нашивают образ креста на ризах, и на патрахилех, и на поручах, и на стихарях, и на уларях и на протчих  церковных потребах: и той образ взят от тех же кресел, на нихже Христос бе посажден, того ради Христовы страсти все во священнодействии положены. А егда Христос от мертвых воскрес: и той образ креста под ногами его пишется, являя, яко не сим образом победи диявола, но истинный, совершеным, трисоставным крестом, на немже распятся; с ним же и разбойника в рай посла.

Да он же патриарх со властми зделали посохи со змиею двоеглавною: и то они взяли от жидовства, по чину, егда Моисей вознесе змию в пустыни: а от святых отец предано быть на посохах кресту Христову, а не змиям.

Они же сделали у сака и у мантей звонцы многия: и то они взяли от жидовства же, по чину Ааронову, а не по преданию святых апостол и святых отец: достоит быти чину святительства по образу Христову, якоже и Христос по чину Мелхиседекову.

Да он же, патриарх Никон, сделал себе ка­милавку и клобук рогатой по образу папы Евгения, что осмой собор собирал во граде Флоренске; а кой клобук по явлению ангела сделал великий царь Константин папе Селивестру, и тот клобук ни во что поставил.

Он же, патриарх Никон, сделал себе шапку рогатую без опушки, а назвал ее митрою; а што по явлению пресвятыя Богородицы дана шапка свя­тому Кирилу Александрийскому, и он тое оставил.

Он же, патриарх Никон, и власти благословляют обема рукама в пременении: и то взято от жидовства, по чину, егда Iяков благословляше внучата своя Ефрема и Манасию, пременены руце творяше во образ креста.

Да они же пятию персты странно некако благословляют.

Да они же учат и понуждают православных християн креститися треми болшими персты, а не двема, и  глаголют они те три перста во образ Троицы: и тем они  Христова два естества, бо­жество и человечество, отмещут, и то они мудрствуют яко Иеремия поп болгарский, подобно же и Арию. А о истинном крестном знамении, како подобает архиереом и иереом благословляти и на себя крестное знамение рукою возлагати всем православным християном двема персты, предаша известно писание и достохвално преподобнии отцы наши Иванн Златоустый, Кирилл Иеросалимский, и Мелетий Антиохийский, и Феодорит, и Максим Грек, и в Стоглаве глава 31-я сице возглашает с прочим толкованием: аще кто не благословляет двема персты, якоже и Христос, или не воображает крестнаго знамения, да будет проклят.

Да он же, патриарх Никон, напечатал в новых книгах о крестном знамении, что де Макарий патриарх Антиохийский и Гавриил патриарх Сербский с митрополиты подписали с клятвою воображати знамение креста треми персты: и то он на них солгал. Макарий патриарх Антиохийский написал: аще кто с треми первыми персты не воображает крестнаго знамения, по преданию восточныя церкве, якоже прият от начала веры и доселе, да будет проклят, и прочее; а Гавриил патриарх Сербский и митрополиты вышереченная исповедали и подписали тажде.

Да в новых же книгах напечатано, в пяток страстныя недели, пред Евангелием и после Евангелия, вместо: Слава страстем Твоим, Господи, пети велено: Слава долготерпению Твоему, Господи, слава Тебе. И тем они страсти Христовы не исповедуют, а долготерпение Христово тем исповедуют временно и мимошедшее.  А святии апостоли и святии отцы пишут: страсть Христос нас ради претерпе во едино время, а долготерпение Его и милость вовеки веком, а не временное: не коснит бо, рече, своего обетования, да не погибнут, но да вси в покаяние приидут.

Да они же, патриарх и власти, в великую суботу гроб Господень поставляти велят на полдень лицем: и то они взяли от армен: а по преда­нию святых апостол и святых отец, гроб Го­сподень поставляти к востоку лицем.

Да он же, патриарх, и власти во святую неделю Пасхи на литоргии Евангелие чтут: сами станут перед престолом, а архидьякона, или протодьякона, поставят, против себя, а иных и на полдень ли­цем, и на запад, и в нощь, и чтут евангелие все на переменах на пять статей. И то они взяли от римлян и от армен; а по преданию святых апостол и святых отец, по уставу, Евангелие чести велено архиерею, или иерею, на горнем месте, ставятся за святым престолом, а не перед пре­столом, а в церкви единому архидьякону, или протодьякону, или дьякону достоит чести. А что они стоят пред престолом в то время, как чтут Евангелие: и тем они святому престолу ру­гаются; а еже престол безчестити, не престол безчестят, но седящаго на нем Iсуса Христа, Сына Божия, Творца и Царя всей твари.

Да в новых же книгах напечатано во исповедании православныя веры: егоже царствию не бу­дет конца: и та речь не истинна. Да тут же в толковании пишет: «ибо к настоящему, аще и грех упраздни плотию своею, понеже един сам явися безгрешен, и распятся, и воскресе, и царствова над смертию, и связа лукаваго узы, еще же есть и Царь, яко Бог: но обаче истинно царствует токмо онеми, иже познавают Его и служат Ему, неверными же и иномысленными, иже живут беззаконно, аще есть и Создатель их и Промысленик, не царствует совершенно». И тем они ныне царства Христова и власти не исповедуют, и то их мудрование еретическое: о том бо святии апостоли и святии отцы пишут, яко Iсус Христос, Сын Божий, царствует не токмо зем­ными, но и небесными совершенно, и по преданию святых отец достоит истинно рещи: Егоже царствию несть конца.

Они же, патриарх и власти, говорят в церквах аллилуйю трегубую, а в четвертые: Слава Тебе, Боже, кроме апостольских и отеческих преданий: сия несть православных предания, но латинская ересь, не славят бо Святую Троицу, но четверят, и Святаго Духа от Отца и Сына исходяща глаголют, и тем раболепна Святаго Духа творят. Известно о сем пишут преподобнии отцы Максим Грек и Евфросин Псковский, и в Стоглаве глава 42-я, а в максимове книге глава 45-я.

Да в новом же Потребнике напечатано в крещении человеческом, в молитве водоосвященной: да отступят от нас вся воздушная и неявленая привидения, и да не утаится в воде сей демон темный. И посем двоеточие. Таже: ниже да снидет со крещающимся, молимся тебе дух лукавый, помрачение помыслов и мятеж мыслей наводяй. Таже двоеточие. И потом: но Ты, Владыко всех. И сия речь отметная. Да в той же молитве конец четвероличен.

Да в том же крещении чин положен мvропомазания от главы и до ногу: и то взято от жидовства. А которыя стихи были сотворены от святых отец на мvропомазании, и те все отставлены.

В том же Потребнике молитва заклинателная на имя святаго Трифона на лютыя звери, на черви, и на мухи и на мушицы, и на всякой гада; а вязати их, и бити и мучити Ангелу свинцом и железом: а заклинати их именем, на камени написаным и не носившим, но разседшимся яко воск от лица огня. И сия молитва несть православных, но их злохитрством неведомо какая волшебная.

Да в новых же Потребниках напечатано во исповедании кающихся: поп седит, а  кающийся пред ним припал на едино колено, а руце простер к нему. И то взято от латыни, а правоверию нарушение: достоит исповедающемуся пред святым Евангелием и честным крестом предстояти со страхом многим и со слезами, кому Бог подаст, а не перед попом на колену стояти.

Да в новом же Служебнике напечатано: свя­щеннику, как причастие приимая, глаголати в себе: причащаюсь я поп, имя рек. Та речь латынских попов: они бо крещают и причащают, тако ся именуют: крещаю тя, или причащаю тя я поп, имя рек.

В старых печатных и писменных книгах написано: Спаси нас Сыне Божий, воскресый из мертвых, поющих Ти аллилуйя 3-жь. И тако прославится Сын со Отцем и со Святым Духом. А ныне напечатали и поют: аллилуйя 1-жь, и тем Сына Божия со Отцем и Святым Духом не славят.

Да в новых же книгах напечатано: Честнейшую херувим и славнейшую без сравнения сера­фим. Серафими же напечатаны ветрении. И та их речь ложная. Богородице в похуление. А по преданию святых отец истинно рещи: Честнейшую херувим и славнейшую воистину серафим, небесных сил, а не ветреных. А у канунов говорят в припевах: Пресвятая Богородице, спаси нас. И то не истинно; достоит нам рещи: Пре­святая Госпоже Богородице, спаси нас, понеже Господа роди. О том бо святии и преподобнии отцы Иванн Дамаскин, и Антоний Печерский и Филофей пишут, по Господе Госпожу Богородицу исповедуют.

Да в новых же книгах напечатано: Едино­родный Сыне и Слове Божий. Сия речь двоелична. В том же стисе: смертию смерть поправ. И та речь временная. А в прежних книгах, печатных и писменых, написано: Единородный Сын Слово Божие. Сия речь единолична. Да в том же стисе: смертию на смерть наступи, или поправ. Сия речь во веки вечныя.

Да в новых же книгах напечатано: Достойно есть, яко воистинну, блажити тя, Богородицу. И та речь развратна: истинная речь: блажити тя, или величати тя, Богородице.

Да напечатано во отпусках во всех: Христос истинный Бог наш, молитвами, Пречистыя своея Матере. И та речь не слична; достоит говорити: молитвами Его Матере.

Да в новых же Служебниках напечатано тако: Бог молитвами святаго славнаго и всехвальнаго апостола (имя рек), да даст тебе глагол благовествующему силою многою, во исполнение Евангелия возлюбленнаго ти Сына, Господа нашею Іисуса, Христа. И та речь от Христа отвратна, указует Евангелие Христово диякону исполнити.

Да в Служебниках же напечатана ектенья после Евангелия, а совершена за упокой. Сия ектенья положена от святых отец о здравии; ныне же со­вершена за упокой: и то стал раздор.

В том же Служебнике напечатан тропарь: Благообразный Iосиф з древа снем пречистое тело Твое, плащаницею чистою обвив, со благоуханьми, во гробе нове, закрыв, положи. То и конец; и тем они воскресения Христова не исповедуют.

Да в новых же книгах напечатано: Един свят, един Господь Іисус Христос, в славу Бога Отца. И то есть Христову имени разделение; а в правилех написано: аще кто по соединении Хри­стово имя разделяет по господству, или по силе, да будет проклят.

Да в новых же Скрижалех напечатано: креста образ от двою древу слагати и поклонятися, и аще де кто от неверных укорит, яко древу по­клоняемся, можем де два древа разлучить, и образ креста разрушить, и яко праздна и не суща непщевати древа. И то есть кресту разрушение, а не поклонение; а два древа сложить: и то есть не крест, но крыж латынской.

Да в тех же книгах напечатано, креста на себе носити не велено, а хто де носит крест, и тот де не надеется нощи перенощевать, или дня передневать. И то есть святых отец преданию попрание.

Да в тех же книгах напечатано, яко святии зде нас не присещают и не могут являтися: и то святым есть похуление. Сам Господь во Евангелии глаголет: сподобльшиися век он улучити равни суть ангелом, сынове света суть. По сему Христову словеси могут святии присещати нас, являтися, яко и ангели, и мнози святии отцы, от­ходя света сего, учеником своим глаголаху, яко аще и отходим телесне, но духом с вами пребывати будем.

Да в новых же книгах напечатано: Приидите поклонимся и припадем к самому Христу, Цареви и Богу нашему. В сей речи имя Христово разделено: Господа Iсуса отнято. А в правилех святых отец написано: аще кто разделяет имя Христово, да будет проклят.

Да в молитве: Свете тихий напечатано: Ісусе Христе, а Сына Божия отставлено: сие разделение вышереченней клятве подлежит от святых отец. Да в той же молитве напечатано: живот даяй, тем Тя мир славит.

Да в новых же книгах напечатано: Господи, прибежище был еси нам. Еще же и в тропаре напечатано: на престоле был еси, Христе. И те речи Христу похуление и отметны; сею речию сказуют нам Господне прибежище и на престоле бытие мимошедшее.

Да во всех новых книгах напечатано во многих местех Христово имя в разделении. А в правилех святаго Кирилла Александрийскаго написано (правило 3-е): аще кто лицема двема, рекше составома, сущия во апостольских и евангельских писании разделяет гласы, или о Христе от святых глаголанныя, или от самого Христа о себе, ова убо яко человеку от Божия Слова особно разумевая прилагает, боголепным же, иже от Бога Отца Слову, да будет проклят.

В новых же Служебниках вход напечатан не против старых книг, и молитвы архиерейския и иерейския отставлены: и тем они возгордилися, мнятся чисты быти. Еще же и людям велят в цер­ковь входить без молитвы: и то есть к Богу безстрашие.

Да ныне же по многим церквам 9-й час поют с вечернею. А в Номокануне написано: аще кто не чтет, или не слушает 3-го, 6-го, 9-го часа, ниже да яст.

Да по новым же Служебникам священницы часом отпусту в царских дверях, ни прощения не творят. О том пишет в Стоглаве, во главе 41-й: повелеваем во всех святых Божиих церквах быти отпусту часом пред обеднею в царских дверях и прощению.

Да в новых же книгах напечатано, в Служебниках, на отпусте литоргии, Достойно есть от­ставлено.

В новых же книгах напечатано пред Евангелием и после Евангелия: Слава Тебе, Господи, слава Тебе. И та речь двоелична ко Христу Богу, а не совокупна.

Да в новых же книгах напечатано пред отпустом: Слава и ныне, Господи помилуй 3-жь, а 4-е Благослови. И тем являют четвертое лице. Да они же, патриарх и власти, стоят на местех своих и говорят: Мир всем, на всю цер­ковь. А та речь достоит говорити священнику служащему, и тем они гордятся: священническую службу ни во что ставят. А диякони говорят: Главы наша Господеви преклоним. И те речи они к себе говорят, а не к народу, и то есть гор­дость и раздор. А в правилех Великаго Василия написано: аще и грешен священник, но совер­шенна жертва приносится, содействует бо Дух Святый.

Да в новых же книгах от рождества Хри­стова убавлено в летописях осмь лет. И се они творят, подобяся слугам антихристовым: не ток­мо лет числа от создания мира погубляют, но и дни и месяцы с новою своею верою; а старыми ересми ныне начинают даже место своему властелю антихристу приготовят, якоже в Риме бысть по рождестве Христове в лето 1582-е, а от создания мира 7082-е, папа Григорий вторыйнадесять календарь премени.

Да в новых же книгах, в Потребниках и Служебниках, все церковныя чины и молитвы на­печатаны не против прежних старых печатных книг. И то все церкви раздор: о сем бо святый Исидор Пилусийский глаголет: отъемлющии, или что приложити смеющии к Богодухновенным словесем, единым от двоих недугуют, или убо не вероваша Духом Святым реченных бывших святых писаний, или суть неверни, или себе непщуют мудрейших Святаго Духа, и что иное, токмо беснуются.

Да ныне же по многим церквам антифоны поют и говорят по единожды, не против устава: и то церкве раздор и самочинство.

Да в новых же книгах напечатано, во все месяцы охтая петь не велено в седмичных днях: и то взяли от римлян.

Да они же в месяцы прокимнов священникам сказывать не велят: и то они взяли от латын.

Да они же прокимнов петь на литоргии не ве­лят. А по уставу святых апостол и святых отец сказывать и петь велено.

Да они же ектеньи сугубыя отставили на вечерни, и на утрени, и на литоргии: и то они взяли от римлян же.

Да в новык же книгах напечатано, в пренесении честных даров поклонения им творити не велено; а глаголют они, яко во входе сем да­ры не совершенны. И то их мудрование не истинно; истинно же глаголет: О освященных честных дарех Господу помолимся. Да освятятся ли? ни: ибо освященни суть: но да будут нам освятительны. Да в новых же книгах напечатано: Честнейшую херувим и славнейшую  несравнительно серафим; серафими же напечатаны ветреныя, а ангели пламень огня. И то есть ложь: Давыд убо глаголет: творяй  ангели своя  духи, а не ветреное дыхание, и слуги своя огнь палящ, а не пламень огня. Пламень убо огня бывает з дымом, от огня изшедший; а ветр пошествие воздуха. И тем они приводят ветреныя серафимы, еже  по аеру, бесове.

Да в новых же книгах напечатано: И видех, глаголет Іезекииль, и се ветр велий грядяше от севера. И то суть не истинна, Iезекииль виде дух велий, а не ветр; о том писано в пророчестве его. Да в новых же книгах напечатано, на прежесвященных литоргиях, на преношении даров всех вас да помянет Господь Бог говорить не велено: и то святых отец преданию нарушение.

Да в новых же книгах напечатано: два есте­ства Богочеловека. А в правилех написано: аще кто именует Христа богоносна человека, да будет проклят. Достоит нам имети совершенна Бога и совершенна человека, а не Богочеловека.

Да в новых же книгах напечатано: яко у Го­спода милость и у Него избавление и очищние. Аще у Него исповедуют, почто от Него не исповедают? Всем нам от Бога подается милость, и избавление и очищение.

Да в новых же книгах напечатано, в богородичне: яко Спаса родила еси душ наших. И та речь несовершена; совершенная же речь: яко ро­дила еси Христа Спаса, Избавителя душам нашим.

Да в новых же книгах напечатано в херу­вимской песни: ангельскими невидимо дориносима чинми; а в толковании: копии носима, и: с копии провождаема. И та речь Христу в поругание, а не во славу: Ісус Христос Сын Божий от ангельских чинов приемлет невидимое дароприношение, а не копие и с копии провождение.

Да в Служебниках же напечатано, в большом выходе великому государю во всех церквах говорят титлы полныя, болшия, и сами они говорят великаго государя осподарем, тишайшим и кротчайшим. И тем они его государьскому имени ру­гаются, и пред людми величают лицемерством, а втайне за упокой поминают. А во октеньях о здравии и о спасении не говорят; и о болярех и воех его не говорят, а говорят вместо того полаты каменныя и воинство полатное, а не царево. И то их умышление отеческому преданию разрушение. Да в новых же книгах напечатано, в во­скресные дни, когда бывает полиелеос, Блажени непорочны отставлены.

Да в воскресные же дни и в полиелеосные на утрени, по 9-й песни. Достойно есть, яко воистинну блажити тя, Богородице, — отставлено же: и то пре­данию святых отец и уставу нарушение. О том пишет святый Кирилл: Не прелагай предел вечных, яже положиша отцы твои: не беша бо тии глаголющии, но Дух, иже от Бога Отца.

Да в новых же Потребниках напечатаны в венчанье многия речи не против прежних старых книг. Да тут же напечатан ирмос. Исаия ли­куй, а в концы пишет: егоже величающе, Девую блажим. И та речь от Богородицы отвратна; а в старых книгах того стиха не бывало, и то церкви раздор.

Да патриарх же Никон и власти возлюбили пение еллинское, и в церквах поют многия стихи ни по гречески, ни по словенски, согласием арганным. О том преподобный Памво, пророчествуя, рече: Не пишите доброю грамотою: хощет бо последний род гладити предания отеческая и писати песни и тропари еллинския, по своей воли, и протчая.

Да в новых же книгах напечатано в концы 50-го псалма: тогда возложат на олтарь Твой тельцы. И тою речию образуют они жидовскую ветхую жертву.

Да в новых же книгах напечатано в кондаке: Егда сошед языки слия. И та речь на бытейския книги ложная и на Бога хулная: Бог, сошед, вышний языки размеси и племена раздели, а не слия.

Да он же, Никон патриарх, велел себя в но­вых книгах печатать господем московским и всея Великия же и Малыя и Белыя Росии, и многих епархий, сущих по земли и по морю, и всея северныя страны господь Никон. И тем он на Бога возгордился; а у нас, православных християн, един Господь, Ісус Христос Сын Божий, а не Никон патриарх; а святии апостоли и свя­тии отцы господем себя не писали и не называлися ни которыя.

Да он же патриарх в новых книгах велел себя печатать премудрым, и великим государем, и равным Аарону и Ильи пророку: и тем он явно на святых возгордился. Глаголет убо свя­тый Кирилл Іеросалимский во святей своей книзе: Иже аще кто на земли возносится паче всех, блюдися сего: сей бо дух антихристов.

Да он же, патриарх, и власти в новых книгах напечатали и говорят, — многим святым имена переменили не против старых книг. И то есть святым похуление: о том и апостол Іяков пишет, глаголя: не богатии ли насилуют вами? не тии ли хулят имя, еже на вас нареченное свыше? Сие пишет о мирских людех: то колми паче о святых, еже имена переменяти.

Да в новых же книгах напечатано во всех молитвах и в возгласех: ныне и присно и во веки веков. И та речь еретическая.

Кирилла Іеросалимскаго глава 9-я: Указует убо еретическия вины, како они единое малое слово доброе зле уразумевают, многия же в нем греси созидают. Слово же убо сие на многих местех в писании знаменует вовеки веком, а не пременное. Хощеши же ли уведать вину безумнаго их умышления, иже учат противно нам и глаголют, яко Христос по судном дни предаст царство свое Богу и Отцу, зле и безумне сие разумевающе, сия есть еретическая и богохульная речь. Се явственно, яко начатка днем Христовым не достоит исповедати, такоже не приимайте нигдеже, иже кто рече: конец царства Христова. Разоритель убо добру диявол, из давних лет насеяв таковых плевел, ей, аки терние и волчец в чистую пшеницу ввел. Якоже и Даниил пророк пишет во главе 12: всю Божию и святых его истинну восхощет превратити злыми делы и всех первых превзыдет и трех царей искоренит, и словеса к Вышнему возглаголет, и святая Вышняго смирит, и помыслит пременити времена и закон. О сем да познаеши, яко предотечи антихристовы, в нихже действует дух его, и возглаголет на Бога, даже тя по пророческих и апостольских Святым Духом реченных не имать прельстити. О том бо и святый апостол Петр пишет: Яко в последняя дни приидут ругатели, по своих похотех ходяще, и глаголюще: где есть обетование пришествия Его, отнеле же отцы успоша, вся там пребывают от начала созданию. Утаитбося им сие хотящим. И мнози будут лживи учители, имиже путь истинный похулится, и в преумножении льстивых словес вас уловят: ихже суд искони не коснит и погибель их не воздремлет. Еще же и святый Іюда апостол пишет: Яко в послед­нее время будут ругатели по своих похотех и нечестиях ходяще. Сии суть отделяюще себе от единости веры и суть телесни, Духа Святаго не имуще. И Павел апостол учит, глаголя: да не бываем ктому младенцы умом, влающеся во всяком ветре учения во лжи человечестей, в коварстве козней лщения. Того же ради и Златоустый глаголет: Детем убо свойственно есть неуставным быти в разуме, слушающе ложнаго учения, ныне сие, а потом иное: преходяще вся разумная хотяще солгати. Тако убо и  еретицы творят, о нихже явственно апостол Павел, остерегая, пишет: Братие, блюдитеся, да никтоже вас прелстит хитростию и тщетною лестию по преданию человеческому, по стихиям сего мира, а не по Христе Ісусе. Яко в том живет всяко исполнение божества телесне: и да будете в Нем исполнени, иже есть глава всякому началу и власти. Се бо Павел апостол воспоминает, дабы ложнаго ради умышления ко иной ложной главе, кроме Христа, не приставали. И паки инде глаголет: плотьская мудрость вражда, есть на Бога и закону Божию не покоряется, ни может бо. А яко видим, иже сами духовныя мужи плотское все разумеюще и в мире сем по плоти живуще, а не по духу, и ради свободнаго жития законы превращают и пределы уставленыя им прелагают и от веры отступают, а православие с еретичеством соединяют, с новою своею верою, а старыми ересми иже начинают. О том бо глаголют святии отцы, иже составиша седмь вселенских соборов и утвер­диша, глаголюще сице: иже смеют иную веру спи­сывать, или составлять, или износити, и аще будут епископи, или иереи, или клирици, да отлу­чатся, а мирстии да прокленутся. И еще глаголют: аще кто все предание церковное написанное, или не написанное отметает, да будет проклят. Что убо сим рекут истинны супостаты? И свидетель глаголемых достоверен блаженый Кирилл: аще кто от исправления  утверженных богоносными отцы подвигнет что, ктому таковаго не подобает звати строением, но преступление и на Бога нечестие. Бла­женный же Златоуст яве глаголет: Яко в царских златицах иже мало что от образа отсечет, всю златицу ложну содела: также и от здравыя веры и малейшее преложив, всю веру повреждает. И аще кто в той седми вселенскими соборы утверженой правде пребудет, спасен будет, якоже пи­шет; а кто отступит, или в чем порушит, погибнет во веки. Егда же уставися последнее и со­вершенное  всем исповедание веры, то уже несть потреба претворяти, или отъяти, или пременити. Аще бы что инако вново пременяти, то святии отцы седми вселенских соборов на похвалу и на память умели проповедать, но глаголаша и написаша еще: аще инако кто дерзнет что вново уставляти и проповедати, а не тако, якоже святии апостоли предаша и святии отцы утвердиша, то уже к разрушению и к разорению есть, а не начаток проповеди и вере. Пишет Мелетий патриарх Александрийский [6-е послан. Кирил. кн.]: Повелеваем собору быти епископску не о дохматех, сиречь церковных обычаях, сим бо всем, еже подвиженом быти, не терпим, ниже соборне, ниже наедине, но яко злато седморицею сугубо искушено, яже седмию соборы в нас предани, да пребудут непревратна. Воистину, не туне богодухновеннии отцы наши изящнии возразители на них врагов учинишася, божественым Духом на них злодеев вооружишася. О еже аки острыя мечи и копия на их ереси сие писание изложиша, жидовство же, и еллинство, и латинство, ариянство, и люторство, и кальвинство обличиша. Юза воистинну протяжена еретическое их учение, болшую бо часть людей соотвела божественнаго за­кона на отвержение. Аки злии волцы на овцы на божественный закон возсташа, дохматы божественыя и всякое богодухновенное писание раздраша. Яко бы растолковаша своим разумением, ей бесовским злым научением. Того ради, возлюблении, подобает нам о сем неленостне прилежати, и им бы врагом и развратником нашея православния веры уста загражати. И стояти бы нам крепце в православней нашей вере: яко вера наша от всех неверных вер на благочестии стоит, аки на высоце престоле. Хотящим же напред быти еретиком устав положиша святии отцы проклинати, расколы же и раздоры церковныя исправляти. Но обаче подобает нам о сем упражнятися, и против ложнаго их учения вооружатися. Наша убо православная вера аки солнце сияет на всю все­ленную: широтою же божественнаго писания просвещает всяку душу правоверную. Тоя ради истинныя веры греческаго православия, вси святии муче­ницы кровь свою пролияша, дающе о  ней свидетелство всем языком на земли, яко истинна есть и непреложна, еще же уставленная Духом Святым, утверженая Христом и святыми Его ученики и апо­столы, и святыми отцы вовеки веком непременно. А за новыми ересьми и отступники исходить не велено: понеже приводят к своей прелести, восхи­щающе, дабы никтоже не пребывал в прежней в православней вере и святых отец уставе, изложенном на седми вселенских соборех, и на их бы новыя полныя еретическия уставы присту­пили, иже по вся годы то сице, иногда инако, уста­вы пременяют. И се есть знамение последнее антихристова наставания. Вы же, возлюблении, святою вашею верою назидающе себе Духом Святым, от­нюдь не отступайте предания святых отец наших, но до конца с ними пребавающе, спасемся благодатию и человеколюбием Господа нашего Ісуса Христа, ныне и в безконечныя веки, аминь.

 

2. Роспись вкратце, в чем новыя книги со старыми несогласны и не сходятся.

 

В нарожении младенца молитва храмине отста­влена, и прочия молитвы со старыми не сходны.

В крещении человеком молитвы со старыми не­сходны, а на мvропомазании божественныя припевы все отставлены.

В покаянии человеком первыя молитвы три от­ставлены, и вопросы о гресех всякаго чина людем, в нихже воспоминаются все страсти человеческия, и то все отставлено-жь. Молитвы разрешалныя отставлены. Маслосвящение над болящими несходно-жь во многих местех.

Вход перед службой со старыми не сходен же: много убавки, и молитвы покаянныя, в нихже воспоминаются все страсти человеческия, отставле­ны же.

Проскомидия не против прежняго.

Просвиры печатают не Христовым крестом, но стению крестною, и вся литоргия со старыми не­сходна.

На той же проскомидии о царском, здравии и о спасении, вынимая часть, не говорят, только говорят: помяни, Господи, государя нашего, и проч., и то есть за упокой; и ектеньи сугубыя о его царском здравии отставлены же, а вместо тех ектений положены малыя, а в них о здравии и о спасении нет-же, а повершены те ектеньи заупокоем.

И все новые книги со старыми не сходны.

Подобно сему времяни пишет Иван Златоуст, на Іюдея в третьем слове, о изменении закона писменнаго и содержащих его, и о возстании великаго князя Михаила, и о изменении частости жерт­вы вседневныя (Маргарита лист 110 и 111, 112 и проч.).

 

3. О несогласии  самих  с собою  новых книг, и о неправых в них дохматех и хулных словах.

 

Выписано из них вкратце.

Вонми всяк христо­любивый послушателю и не просто приимай всякое писание, но испытай е.

 

Христос Спас наш глаголет во святом Евангелии: испытайте писания, яко имате обрести в них живот вечный. Не просто велит прочитати, но испытовати, да не утаится от нас плевел дияволь, сеянный посреде чистыя пшеницы евангельскаго богоразумия. И возлюбленный ученик Христов, наказуя нас, глаголет: не всякому духу веруйте, но искушайте духи, аще от Бога суть. И сего ради да внимаем себе прилежно, Господа ради, и не без искуса веруем всякому духу учения, но да искушаем прилежно писания, аще по всему согла­суют апостольским, и отеческим преданием и учением. Аще бо по нечесому разликуют, или сами к себе не согласуют, да не приемлем я, но да отвержем от себе, аки лукаваго беса плевел, сеянных посреде чистыя пшеницы благоверия на прелщение и погибель душам нашим. И сице бо не просто подобает приимати, но аще по всему согласуют, якоже предречеся, дохматом  и преданием святых отец и аще то само с собою во всем согласует, а нигдеже разликует. И сего ради вникохом в новыя книги и разсмотрихом по ели­ко дарованей нам благодати, и обретохом в них многая, в самых к себе несогласныя и противныя слова, сами с собою не согласуют, но и много разликуют, и иныя противныя новыя дохматы и слова хулныя на Христа Спаса нашего, ихже вкратце на среду предложим, на разсуждение благочестивым слухом. Да слышит благочестивый и внимает: кое слово из старых книг вынято, в того место новое злое положено, и речь всякая изменена неправедно, на соблазн церкви: прямое бо правити, искривити есть паче, а не испрямити.

В книге новой, Скрыжали (гл. 70, л. 167), на­печатано в ней не вынимати части о небесных силах на проскомидии, и в Служебниках не по­ложено о том; а тут же в Скрыжали (гл. 74 и гл. 75), после части Богородичны, велит приносити часть и о небесных силах, «и нужно еще, велит, приносити за имя их, яко и тии, рече, служиша в таинстве смотрения Христова», и проч. О том же такоже велит приносити часть в честь и память святых ангелов: «понеже, рече, соединишася с нами и хранят нас». Посем о Предтечи и Крестители, и все поряд. И зри о сем, яко не согласует меж собою та книга в проскомидии.

В той же книге на литоргии указует пети антифоны: Благо есть исповедатися Господеви, и проч.; а в ином месте тоя же книги велит пети: Бла­гослови, душе моя, Господа, и проч. И в том с со­бою не согласует же.

В новых во всех Служебниках, и в той Скрыжали, в херувимской песни, еже поется: и животворящей Троице трисвятую песнь приносяще, и святое сие слово церковное выкинули вон, а в его место положили злое римское слово: припевающе, иже ни в коих святых книгах не обретается, кроме римских: там бо припевают ко арганом, вместо еже бы Троице трисвятую песнь приносити усты своими, подобящеся оным небесным силам, еже они всех Творцу приносят, а ни к чему не припевают, по писанному нам: вышним силам подобящеся земнии, победную песнь приносим Ти, Блаже, вопиюще: свят, свят, свят еси, Боже, и проч. И паки Iоанна Дамаскинскаго глаголюща (8-й глас): вечернюю песнь и словесную службу Тебе, Христе, приносим, и проч. Везде приносим глаголется, а не припеваем. Зри: за сим словом, хотят арганы внести в церковь. И ина многа та­ковая святыми богословцы реченная в церкви обрящеши: а не тако, якоже зловернии латыни мудрствуют, припевающе к мусикийскому согласию. Нас же от их зловерия сохрани, Господи!

А еже о символе православныя веры слово, зде крат­кости ради оставляю. Аще и глаголют о нем нынешние мудрецы, яко исправили: много паче испор­тили. Потреба опщаго собора о том со благим советом, да тут всякая истинна явится, а лжа и ересь потребится. Аще же собора скоро не будет, то и добра не будет, но всегда рать.

О символе бо веры не одне наши книги свидетельствуют, но и сербския, и болгарския, и мувтяны, и волохи, и моравы, и острозския, все те книги святыя, иже печатаны благословением вселенских патриарх во время униатскаго отступления благочестивым князем Василием Констянтиновичем Острожским: тогда святейшия патриархи к нему и хвальныя грамоты писали, что он крепко стоял за православную веру [На поле: Чти грамоты, напечатаны в Кириловой книге. Святей. Фотия пат. в 10 послан. К нему же кн. Вас. правос. побор. писали из святыя горы Афона скитницы зело полез. пос. напеч. тут же в Кирилл. книге. Сему-ж князю похвал. и в бес. на посл. во предислов. И его острож. книги зел. сход. с ыными соглас. со стар. книги].

И во всех вышереченных книгах тех земель: и в Духа Святаго Господа истиннаго и животворящаго, и: егож царствию несть конца; а не будет конца, сего слова отнюдь нет ни в коих книгах, - коротко глаголю, — ни в писменых, ни в печатных, где символ веры писан есть обретается, но везде: егоже царствию несть конца. А не будет конца те только положили вышепомянутыя униаты во своем символе, как отступили от веры к римскому костелу:  свид.  Книга о прав. вере, лист 119.

Да в новых же Служебниках, по изглаголании символа, егда возгласит иерей: Горе имеем сердца, и людие отвещают: Имамы ко Господу, и паки свя­щенник: Благодарим Господа, людие же ныне поют (тако напечатано): Достойно и праведно есть покланятися Отцу, Сыну, и Святому Духу, и проч. А в Скрыжали, в толковании, сего прилога: есть поклонятися, нет; толко там сице: «егда возгла­сит иерей: Благодарим Господа: и всем исповедающим и глаголющим: Достойно и праведно». Смотри, же и зде, коликое несогласие новых книг в таком таинстве.

А иерейскому гласу сей прилог (есть поклонятися) не сличествует: его глас благодарить велит, а не поклонятся; ино есть благодарим, а ино есть поклонятися. О сем до зде.

В Скрыжали же (л. 973) положено о сложении перстов слово Дамаскина некоего иподиякона: учит три перста слагать во образ Святыя Троицы, и тако знаменатися. И то Никоново мудрование не согласует с церковными учители, предавшими нам сие таинство, со святым Мелетием (аще и Никон на него солга, бутто он тако предаде, но несть тако: мы хощем ево житием и правы быть), такоже, по нем последуя, и Феодорит написа Блаженный, и святый Петр Дамаскин (сего святаго еще Никон не оболгал), такоже и преподобный Максим Грек [На поле: Тоже и в летописи и в Катихисисах Болшем и Малом. Тож сложение перстов на святых иконах во Христове руке]. Вси бо сии единомудрствоваша, и написаша и церкви предаша, един по единому.  Тоже и в Стоглаве с собору написано. А еще старее Стоглава и Ма­ксима Грека есть книга, писана при великом князе Даниле и при преосвященном митропилите Киевском Фотие [На поле: В лето 6900], и сему без мала уже полтретья 100 лет, писана на латинския ереси: а в ней сице, яко и в Стоглаве: иже не знаменается двема персты, якоже и Христос, да есть проклят. А еже знамена­тися тремя персты, Троицею крест, без воплощения Сына Божия, хулно есть и нечестиво; никто от святых не написа, ни предаде о сем кресте, токмо еретик Фармос папа Римский тако мудрствоваше, трема персты и людей благословляше, емуже по смерти благочестивый папа Стефан, выкопавши из земли, наругался над ним, и те три перста, имиже благословлял, повелел отсещи и тело его в Тивер реку воврещи (Книга о вере, гл. 27, л. 239). Такоже сему подобно и Дамаскина иподиякона мудрование: слышим недавно его бывша, всего лет с восмьдесят. Тако и греки, от ево книг научившеся, держат ныне; а кроме ево книги, подиякона Дамаскина, ни на коево от святых не ссылаются [На поле: И во крещении греки обливаются: прочее чего и хотети!]. Писано о сем в хожении старца Арсения Суханова, егда он посылан был благочестивым великим государем во Грецию для исправления церковных вещей во 158 году.

В новых же книгах во всех напечатано хулно зело: Благословим Отца, Сына и Святаго Духа; и инде: Поем Отца, Сына и Святаго Духа Бога, и иная подобная сему; тако уже и поют богохулно; Отца Сына сливающе во едино лице (и сие есть Савелиевы гнилости вред), а Святаго Духа раболепно отставляюще, глаголют: благословим Отца, Сына и Святаго Духа. Потом и отъемлюще ли­теру измежду Отца и Сына, и ко Ісусу прилагают с лестию, да человечество Сына Божия  разделят во ин состав от Божества, глаголя: Да будут милости великого Бога и Спаса нашего Iсуса Христа; потом глаголют и паки: Един свят, един Господь Ісус Христос, и прочая.

В новых же книгах напечатано и поют, яко еще не прииде Христос, но приидет, глаголя: Пою Тя, слухом бо, Господи, услышах и убояхся, до мене бо идеши, мене ища заблудшаго. Может ли християнин тако пети, или мудрствовати, еже: до мене бо идеши, мене ища заблуждьшаго, Христу пришедшу? Не ли явно, яко тако поюще антихриста ждут, а истиннаго Христа Бога нашего отметаются? Церковь бо Христа Бога нашего поет, гла­голя: Пою Тя, слухом бо, Господи, услышах и убояхся, до мене бо прииде, мене ища заблуждьшаго, и проч.

А инде напечатано и поют, яко не воскресе Христос. В шестодневе, светилен 3, лист 248, сице: яко Христос воскресе, никто же да не верует. Что ино горши сего, такия плевелы насевают?

Или биением бесчестят Спасову непорочную кро­тость, или еще хулу глаголят на Христа, яко не сугуб есть: напечатано в Скрыжали на листу 99 в ответе: умно услышим и не прелщаемся су­губа быти Христа.

В том же ответе ложь на слово Христово. Христос глаголет: иже аще слово речет на Сына человеческаго, оставится ему; а они, мороча, глаго­лют: иже аще речет слово на Сына, оставится ему, а человеческаго прочь отставляют.

Или еще оболгали апостола Христова Иванна Богослова, якобы он едино первое соборное послание писал, а те два ин некто старец Иванн писал, егоже гроб близ Ефеса обретается.

А во крещении положили в молитве: молимся тебе, дух лукавый (новых Потреб. лист 142). Мал ли и сей недуг и соблазн церкви Христове? На што было прямое кривити? Святый Златоуст о таковых продерзателех глаголет: аще бо и худое что подвигнут, анафема да будут. И паки о превращающих глаголет: веру превратиша, аще и мало что ново творят. А нынешния мудрецы не мало что, но много: не оставиша бо во всех кни­гах ни единаго слова, еже бы не пременити, или не преложити. И гордо хвалящеся, глаголют, яко ныне обретохом веру, ныне исправихом вся. Божественное бо писание глаголет нам: яко в последняя времена отступят нецыи от веры, внемлюще духовом лестчим, и проч.; а нигде тово нет, чтоб в последняя времена исправят веру. Отступят, рече, и от истинны слух отворотят и к баснем уклонятся. И другое писание глаголет: поклонятся прелести вси живущии на земли, и проч. Сих всех блюсти подобает нам, возлюблении.

В новых же книгах положили аллилуйю добре дважды глаголати, третие: Слава Тебе, Боже, во Псалтырях со следованием, и во Ирмолоях и в Триодях; а ныне беззаконно утвержают трижды глаголати, и  в книги во иныя по трожды поло­жили после тех. Ты же, благочестивый читателю, разсуди истинну с ложью: какая правда в новых книгах, что так изменяются на всяко лето? О святой аллилуии мощно разумети истину [На поле: О сем царя Ивана Стоглав, 42 глава. Премудраго Максима Грека слово 45. О том же пис. в жит. Ефрос. И Пресвятая Богородица запретила по трижды глаголати, а 4-е Слава Тебе Боже. Еще же о том положено во всех мин. мес. Майя в 15 день похвала преп. Ефр. в канун и стихерах]: идеже поется аллилуия трижды, якоже во святый великий пост на утреннях, вместо Бог Господь, и во иныя дни во весь год в заупокойных службах, и во антифонах, где поют: аллилуйя, аллилуйя, ал­лилуйя; а Слава Тебе Боже четвертое не прият цер­ковь; а инде же дважды поется аллилуйя: тут вместо третияго аллилуйя глаголется: Слава Тебе Боже. Тот святый церковный разум едино богословцы разумеша, что в третья молвити аллилуйя. Слава Тебе Боже в третие, таже аллилуйя. А еже нынешние продерзатели от чрева своего мудрствуют, чрез предание, глаголют по трижды, а в четвертые: Слава Тебе Боже, то подобает им и в святыя посты и в заупокой­ные дни пети вместо Бог Господь, такоже по трижды, а четвертое: Слава Тебе, Боже, по их мудрованию. Да в новых же Ирмолоях печатных прило­жили ко трисвятому пению силу: Сила, святый Боже (Ирмол. листъ 384). В новых же книгах мудрствуют (Скрыж. л. 612), яко Христос над языки не совершенно царствует неверными и иномысленными. Святый Златоуст глаголет, яко не токмо верными, но и всеми убо царствует, еллинами и июдеями, и бесами и противными, по словеси создания: царствует же верными и покоряющимися, по присвоения словеси, и протчая. Чти пространнее в Беседах на послание (л. 1081). Како глаголют новыя книги, яко аще и царь, яко Бог и Создатель их, не царствует совершенно? Зри всяк помра­ченную лесть. В Скрыжалех же положили, яко может всяк простый человек крестити, муж и жена, по нужи: зри, како может несвященный свя­щенна сотворити! Божественная бо правила отрицают сему быти, о сем глаголя, яко и диякону не повелевают крестити и недарованное восхищати: како простый дерзнет что? Прав. Петра и Павла листа 30, глава 4, и правила 1-го вселенскаго собора 18, лист 39, глава 5-я.

Или иная безчисленная хуления и пременения, в новых книгах положенная, о нихже не леть есть и глаголати кроме собора, взыскующа истину святаго Евангелия. Аще ли же ни, то исполнится Божественное писание скоро, еже глаголет: Яко день Господень, яко тать в нощи, тако приидет. Егда рекут: мир и утвержение, тогда абие нападет на них внезапу всегубитество. Емуже несть мощно збытися, разве егда вознебрегут прежде о растлении Божественных писаний и церковных дохматов, приемши лесть за истинну, и истребят из церкви всяку истинну, и рекут: ныне нам мир и утвержение: и тогда нападут на них внезапу  всегубительство, по Божественному писанию. Того ради подобает нам, возлюбленнии, блюстися сетей вражиих, и о истинне всякой пещися присно, да не яты будем прелестию начал и властей тмы века сего.

Еще, возлюбленне, разсуди новых книг не­подобную переправу: в Шестодневе, в среду на утрени, в 9-й песни первой стих.  Зде не явная ли хула на Пресвятую Богородицу, сице: растленна умом, растленна душею и совестию, злобою осквер­нена и нага всяких благ явленна Дево, (запятая) нетленна, непорочна, не презри мене, но делы благочестия украси? В старых Октаях и Шестодневах той же стих стоит в четверток на павечернице, а не в среду на утрени, сице (глас 3): истлевша умом, истлевша душею, и совесть злобою осквернивша и нага всеми благинями явльшагося. (точка) Дево нетленная непорочная не презри мене, но делы благочестия украси [На поле: Сей стих от нашего лица к Богородице]. Вонми же опасно, христолюбче, кой стих православнее. Не яве ли, яко растленны новыя книги растленная и глаголют и на Пречистую Матерь Христову хулу наводят оным превращенным стихом? И дмяся от ума плоти своея, глаголют: яково-любо ни есть, толко бы не по старому!

В тех же Скрыжалех о святом престоле пишет: четыре столпы во образ четырех благовестий, и то есть истинна; в тех же книгах инако: и пятый столп, пишет, во образ Христов; и паки инако пишет: четыре столпы во образ четырех патриарх, а пятый во образ папин [На поле: Зри, в равенство Христа с папою пишут]. Сами бо весте, колико разньствует Христос от проклятых пап, а евангелисты от патриарх колико разнествуют, и старыя книги святыя от новых!

Да в новых же Служебниках напечатано: Священник глаголет: Спаси, Боже, люди своя; людие рекут: Исполаете деспота. А в ином выходе: На многа лета; а в ином выходе: Много лет ти, владыко. И то есть не справа, но явныя бредни. И ты сущая таковая в новых книгах несходки обрящеши не токмо со старыми, но и самих с собою.

Оле их плотскаго мудрования, иже враждует на Бога и закону Божию противится! Забыли реченное: аще и худое что подвигнут, анафема да будут. И что есть худое в церкви? вся права суть разумевающим истинну, а переправления не требует.

О церкви же своей глаголет и сам Христос, яко созижду церковь Мою, и врата адова не одолеют ей: непреклонну бо и недвижиму церковь свою утверди Христос, Ему же в ней слава вовеки веком, аминь.

 

4. Записка о безчинном употреблении креста Христова, писанная для царя Алексея Михаиловича.

 

Доложити великаго государя, царя и великаго князя Алексея Михайловича, всея Великия и Малыя и Белыя Росии самодержца.

Видех, великий государь, един крест Господа Бога и Спаса нашего Ісуса Христа, а не едино есть ему: овогда ему честь, а овогда ему от тех же и безчестие, овогда почитаем и поклоняем, а овогда теми же и поругаем и попираем, не токмо от простых, но и от священническаго чина.

Како и ким образом?

Сей честный и животворящий крест Господа Бога и Спаса нашего Ісуса Христа, который имеет в дому своем на стене поставленный, того почитает и тому покланяется.

А той же честный и животворящий крест Го­спода Бога и Спаса нашего Ісуса Христа, который на теле своем носит, не токмо не поклоняется ему, но и не почитает его, еще же и ругается ему.

Како и ким образом?

Егда носит на теле своем: и носит безстрашно и не мнит, яко той крест Христов же и един есть, а не ин, и равен тому ж, иже и в дому его поставленный на стене; и егда что рукоделует, отметает его безстрашно на гойтане за хребет и нечистыма рукама охапает его; а жены такожде творят, и носят на себе на златых и на сребреных гойтанех долгих с пронизки, украшения ради, а не распятому и умершему и погребенному нас ради Христу Богу нашему подобяся и спасен­ныя Его страсти воспоминая, еже бы распята себе самого распеншемуся за ны Христу; и егда начнет умыватися, тогда такожде безчинно и безстрашно сметает (с) себе и поверзает на лавку, или у печи на шесток, а и лучшее что с перстни з златыми и с сребреными в коробку, или в ларец кинет, чтоб не украли. А разбойницы, и блудницы и прелюбодеи, нося тойже честный и животворящий крест Господа Бога и Спаса нашего Ісуса Христа на теле своем, такожде ругаются ему. Разбойницы, вместо еже ряспяти себе самих, иных распинают, бьют, мучат и имения у них насильством отъемлют и самих конечней смерти предают.

Блудницы и прелюбодеи, вместо еже ко страстем страдания и смерти, блуд и прелюбодейство, и вся мерзкая н нечистая творят, досаждая и ругаяся распятому на том и умершему и погребенному за ны Христу Богу нашему.

А егда мужики и женки приходят мытися в тор­говую лазню: тогда верхнее платье скинув с себя, такожде и пояс, и рубаху, и гашник, и штаны, и портки, черное, и скверное и гнусное, а ино не смею и написати, боюся, да не како зинет на мя окаяннаго вся тварь за мое неискусство и превеликую дерзость: и тогда и той честный и животворящий крест Господа Бога и Спаса нашего Ісуса Христа, сметнут, с себе безчинно и безстрашно, поверзает его в тое жь свою гнусную и скверную нижнюю одежду; а у ково есть малыя робяты, или холоп, или собака: и тех для сторожи платья своего посаждает, на тожь свое гнусное и скверное платье, в немже и драгое и безценное душеспасительное сие сокровище и рая отверзательное орудие, царская наша похвала и превечная слава, оружие и победа крепкая на враги ваша...

И о сих вразех креста Христова как ты, великий государь, царь и великий князь Алексей Михайлович, всеа Великия и Малый и Белыя Росии самодержец, укажешь?

 

 

5. Челобитная царю Алексею Михайловичу.

Великое церковное слово и царево тайное.

 

Великий апостол Павел глаголет: да не изпразднится крест Христов. Святый Григорий Богослов глаголет: да не истощит­ся крест Христов. Истощанная есть креста Хри­стова и знамение совершеннаго образа его.

 

Царю благородну, почто новии учители истощи­ли крест Христов, о нихже Павел апостол плача глаго­лет, враги их наричет креста Христова, яко изпразнили и истощили крест Христов, еже есть совершенный образ его изменили? И паки глаголет: мне, рече, не буди хвалитися токмо о кресте Господни, на немже страдав уби страсти. Того убо и мы известно дер­жимся креста Господня, похвалы всех.

Преднаписание ко царю благородному.

Благочестивый государь, царь и великий князь Алексей Михайлович, имаши власть Божию. Сего ради божест­венная сотворяти смееши. Божие есть еже грехи оставляти и зрения божественнаго сподобляти. Сего ради мо­лю тя, да подаси ми грешному юзнику темничному о сем дерзновении прощение, и где будет, государь, написано не делом, или прописано во именех, или в летах, или в числах, или во ином в чем, милости у тебя света прошу, не положи на мя о том гнева своего праведнаго царскаго. Книг, государь, нам не дают лет больши десяти; а в печали у нас память губится; а забвение, государь, и на всех бывает. И Бог мира да будет с тобою и защитит тя крестом своим от всякаго прилога супротивнаго, види­мых и невидимых враг, во веки, аминь.

О пресуществлении Святыя Троицы.

Глава 1-я.

Единородный образ отечь, образ присносущия Его, образ рабий приемлет, от неискусобрачныя Матери изшед, не преложение претерпе, еже бо бе пребысть, Бог сый ис­тинен, и еже не бе прият, человек быв зачеловечися. Не восхищением непщева быти равен Богу, но себе умалил, зрак рабий приим, правления же держа пречистых сил аще и во яслех скотиих возлежит и пеленами повится, и прочая сил утаився, елико премирных, и елико на земли, вочеловечися юно из Адама отроча, смешения родися сын, и верным дастся будущему веку. Сей есть князь нарицается и велика совета ангел. Сей есть крепок, един в Троицы славимый с прибытием Бог, иже держай областию всю тварь и предведый вся прежде бытия.

О восстании великаго князя Михаила. Пророк Даниил.

Глава 2-я.

Во время оно, рече, востати имать Михаил князь великий, настояй над сынми людей твоих. О сем много писати ныне. Тем убо воставляет, по реченному, и поставляет во главу правления и власть божественную вручает отцу твоему государеву, благочестивому царю и великому князю Михаилу Феодоровичу, всея Великия, Русии и прочих язык самодержство. Сим же тако бывшим, паки воставляет Сын Божий, ко просвещению разума и во славу царства его, отца его государева, столпа правоверия, новаго страдальца исповедника, святейшаго патриарха Филарета Никитича, и вручает ему престол соборныя великия церкви. Сей убо истинный пастырь подтверди прежде бывший святый поместный собор, иже бысть в лето 7055 году при царе Иване Васильевиче. Сей убо святый пастырь соборне осуди и изверже Иону митрополита Сарскаго и Подонскаго, иже не крести совершено белорусцев, и новоявльшияся ереси белоруския, и ляцския, и латынския до кон­ца исторже, и вся предания отеческая управи, и книги плевельныя пожже, а православныя утверди, и с миром скончася и преложися ко отцем своим. От сих убо корене произведый тя Бог и предаст тебе власть свою, самодержство Великия Русии и прочих язык в век века, жезл правости, жезл царствия твоего. Сего ради исповемся имяни твоему великому, яко страшно и свято есть, и честь царства суд любит. Суд и правду в нас ты сотвори: яко правда и судба уготование престола твоего; обрящется рука твоя всем врагом твоим, десница твоя обрящет вся ненавидящая тебе, яко положиши их яко пещь огненную во время царства твоего, Подобно есть царство небесное неводу, вержену в море и от всякаго руду собравшу, еже егда извлекоша и на край, и седши избраша добрыя в сосуды, а злыя извергоша вон. Подобает и тебе царю благочестивому избрати догматы отеческия, а лесныя отринути.

О правоверии, и свидетельство о истинном крестном знамении и о лесном в новых книгах.

Глава 3-я.

Единаго в Троицы с прибытием Бога и во святую соборную и апостольскую церковь исповедают не истово, не против предания святых отец. И ты, государь, вели допросить новых учителей: како они исповедают пресущество святыя Троицы, и како веруют во единаго Бога со восприятием и во святую церковь? Глаголет Кирилл Александрийский: Аще кто не исповедует Ісуса Христа быти Ему Еммануила с прибытием Бога, да будет проклят. Максим Исповедник глаголет: Аще кто не исповедует пресущества Святыя Троица во едино существо Божества, и не верует во единаго Бога со восприятием во един состав и едину силу, и во святую церковь, апостолы проповеданную и соборами святых отец утверженную, и таковый несть православен. Еще сему достовернии свидетели Боговидцы апостолы: Петр, и Иван Богослов, и Павел. И о сем ныне много писати, да и книг не имеем. К сим же и еще свидетель и сам Спас, — явися в раздранне ризе священномученику Петру Александрийскому, вопросившу его: Господи, кто Ти ризу раздра? Ісус же рече: Арий; той, рече, яко отторже Мя единому быти свя­тыя Троицы; не приемли сего: скверен бо есть таковыий и в сем  веце и в будущем. И святый Петр смерть от царя прият, Ария же не прият. Глаголют бо ариане Сына Божия тварь быти. Того ради и знаменятся треми персты в Троицу, несрасленным существом, беззаконно. Се их мудрование стремнина есть. И сего ради подобает всякому правоверному от сего зело опасну быти, да не впадет в стремнину сию. Мы же, христиане, знаменимся двема персты во пресущество, яко весь бе в нижних, а вышних никакоже отступль, и да явленно будетъ схождение, о едином же срасленном существе беседуем. Сим словом святый Мелетий ариан посрами. Прежде показав арианскии три персты: и не бысть знамения; а потом християнскии два, и един пригнув, благослови християн: и бысть знамение. Еще сему достовернии свидетели святии отцы наши, русские пастыри и чудотворцы, московския святии: Алексей митрополит, да Іона, у нетленных и святынь своих Спасителево знамение и доднесь во уверение верным истинное знамение. И аще, государь, восхощеши, можеши и сим единем уверити истину: сам, бо известно веси, в Великой Русии от на­чала православия никто от святых пастырей треми персты не знаменился и людей не учивал. Митрополит Исидор, да патриарх Игнатей крыж было на жертву наложили; а о трех перстах учения их не было. Только было, государь, в Риме, папа Фармос треми персты знаменился и людей учил. И как он от жития сего изчез: и тело его земля не приняла, — лежало аки тундра. И по нем быв папа Стефан, благочестие содержа на время, и повеле скверное его тело облещи в сан и паки совлещи, и три персты руки его отсещи повеле. И егда отсекоша первый перст и повергоша на землю: и разступися земля и пожре и; а егда отсекоша другий: изыде пламень мрачен; а егда отсекоша третий: изыде смрад зол. И тогда папа Стефан слагает в деснице своей Христово знамение, и знаменует землю: и земля соступилася. И от смрада великаго повеле тело его в Тивер реку воврещи, и во всей Испании ево рукоположенцов из сана изверже. И того ради правоверным не подобает треми персты знаменитися, яко нечестиво есть. А что, государь, в новых книгах о трех перстах пишет Дамаскин иподиакон: и ему имени греки и наши новолюбцы не ведают. И то, государь, знатно, яко без имени добрыя люди не бывают, — сам, государь,  разсуди. Милости просим у тебя, солнца християнскаго, — освети нас и всю Великую Русию, даждь нам праведный суд в законех отеческих; и хотим мы правы быти не токмо отеческими святыми книгами, но и их плевелными: и теми может Сын Божий обличить неправду их и посрамить, яко есть в них хула на Сына Божия, и на рождьшую Его Приснодеву Госпожу Богородицу и на все предание святых отец.

О хуле Сына Божия и Госпожи Богородицы.

Глава 4-я.

Глаголют бо, яко в зачатии Сын Божий совершеною плотию обретеся, и яко не назидашеся плоть Его помалу во чреве девиче, но купно совершися, яко да родится, и яко родися Христос от девица совершенною плотию, яко тридесяти лет.

Хула о Госпоже Деве Богородице.

Яко скверна бяше в Ней прародительная до благовещения, и яко архангеловым гласом очище­на бысть от скверны, и яко к зачатию утроба девича растворися, и яко не имеяше Девая в сосцах своих естественные пища, еже есть млеко, и яко не пресекается рождение детей Ею по Христе.

Свидетельство от святаго писания о воплощении Сына Божия и злохульником укор.

Глава 5-я.

Глаголет Иван Дамаскин: Слухом вниде, а неизреченно изыде. Се есть, егда услыша Девая глас: радуйся, обрадованная, Господь с Тобою, Архангелу возгласившу, и со гласом воплощашеся всех Владыка во чреве девиче. Глаголет Іосиф, яко Дева ложесны Слово прияла есть, а не плоть. Святый Митрофан глаголет: Бог пресущный человеческое зданое прием естество во святем чреве девиче, вообразив сие. И паки Святый Иван Дамаскин глаголет: Наг во входе, не одеяния риз, но плоти; рабий же зрак приемлет в ложеснех Девыя, от чистых Ея кровей, скоростию, яко сам весть, а не тако, якоже прочии человецы в 40 дней совершенно воображение, или вид приемлют. Се есть основание, или начертание; а не совершенна есть плоть. О, учителие прелестнии! Зрите истины, глаголемыя святыми отцы! како не усумнистеся блядословити? Яко же пес бешеный на всякаго пометается, страха не имый и оружия не бояся: тако и вы сотвористе, злохуливше на Сына Божия и на рождьшую Его. К сим же дерзнули есть и Духа Святаго истиннаго не глаголати, яко­же Македоний волк: и сим сами себе свидетельствуют, яко не истинным Духом учими и водими есте. Зрите во втором соборе святых отец, како они исповедали Духа Святаго Господа Бога истин­наго. О, слепии вожди! како таковая  глаголати не убоястеся Бога? Есть бо Судитель и праведен, и и крепок, и долготерпелив, и не гнев наводя на всяк день. Аще не обратитеся: оружие свое оцыстит, лук свой напряже и уготова, и в нем уготова сосуды смертныя, стрелы своя згорящими содела. Приимите наказание, да не когда  прогневается Господь и погибнете от пути праведнаго. О, злии наставницы! зрите, яко помалу назидашеся плоть Слово Божие во чреве девиче. Глаголет Златоуст, яко по благовещении день от дни надымашеся чрево Девиче, еже есть сущего в Ней Бога Слова плоть назидашеся помалу и в сорок седмиц совершися. И тако рождается совершенно плотию отроча Бог. Иван Дамаскин глаголет: И плотоносец явися во исходе Бог; разверз в рождении своем ложесна Девыя, и деву сотвори ю по рождестве своем. В законе пишет прикровенно, яко всяко отроча, ложесна разверзая, свято Богови. Мы же речем явленно, яко един Сын Божий разверз ложесна девыя в рождестве своем, прочия же отрочата вся от века и доднесь не разверзают ложесн в рождении своем.

Свидетельство от святаго писания о Приснодеве Госпоже Богоодице и злохульником укор.

Глава 6-я.

Мы же глаголем, яко Дева от рождества своего, скверны не имела в себе, яко искони избрана бе Богом. В законе пишет о ней: Лествице высокая и купина неопалимая, жезл Ааронов процветший и стамна златая имущая манну, без порока пребываше, и прочая таковая. И по сему нескверна и неблазненна бяше Дева, и яко не бысть таковы девы чисты на земли от века. О, трепроклятии врази! како глаголете, яко скверна бяше в Деве до благовещения? Зрите, яко Дева бе соблюдаема Духом Святым и до благовещения: егда архиерей Захария введе ю во святая святых, тогда и Гавриил послан бысть к Деве, пищу приношаше Ей, и Дух Святый вселися в ню, яко небесная вся ужасошася, зряще Духа Святаго во Деву всельшася. Когда во скверная Дух Святый вселяется? И паки глаголет: и вселися Слово Божие святым. Привод: земной царь егда восхощет и сотворит полату в жилище себе, не прежде ли бытия своего в ней очищает и украшает ю? И паки затворися. Зрите, что глаго­лет Иван Дамаскин: Новое чудо и благолепно, девическую бо дверь затворенну яве проходит Гос­подь, наг во входе, не одеяния риз, но плоти, и плотоносец явися во исходе Бог, и пребывает дверь затворенна. Зрите, душегубцы, яко в зачатии Бога Слова утроба девича не растворяется. А яко имяше Дева в сосцах своих естественную пищу, еже есть млеко, сему свидетель святый Лука евангелист глаголет: Блаженно чрево носившее тя и сосца, еже еси ссал. Млеком питала еси манием питающего всех. Яко младенца доиши Зиждителя и Господа. Наш глагол: не имяше Приснодева, порождей Бога-Слова, не токмо прочих детей, но ниже помысла плотскаго. Ниже затворяется, яко искони освященна бе Богом. Сему свидетели пророцы. Даниил глаголет ко царю Навхудоносору: Царю, видех дондеже отторжеся камень един от горы без руку человеческу, и прочая. И видех врата затворенна, и не отверзутся, и никто же пройдет сквозе их, токмо един Господь Бог израилев пройдет ими, и будут затворенна во веки. Иже сия вышеписанныя ереси держащия низведени будут Сыном Божием в студенец истления. Глаголет Давыд: яко не убояшася Бога, прострет руку свою на воздаяние, яко оскверниша завет Его.

О разности книг и о изменении благолепоты церковныя.

Глава 7-я.

В новых книгах напечатано: и Слово бе у Бога; а в старых книгах: и Слово бе к Богу, — и се право. В новых же книгах Христовы страсти, и пророческия, и апостольския, и мученическия, отмещут их вне святыя церкви. А кто еретиков проклинает, и тот де сам проклят. И кто едино­сущна Христа Отцу быти глаголет, и тех вне же церкви быти глаголют. В новых же книгах Жезлах мои слова напечатаны не против моего письма, а многих и нет, кои нужны: и то, госу­дарь, их властелей не ложь ли? и тем меня ко тебе царю и в мир ложью огласили.

Роспись вкратце, что изменили, опричь книг, преданая святыми отцы во святую церковь.

Первое — святый престол, второе — антимисы, третие — анбон, четвертое — посох, пятое — крест на просвирах, шестое — шапку, вместо ея кидарь воз­ложили. О сем ныне много писати: то бо есть Аарон; отсечено есть священство Аароново; быти священству Мелхиседекову: не дай нам Бог видеть чина Ааронова на чернцах! Седьмое — камилавку, осьмое — клобук, девятое — панагию другую наклады­вают, десятое — благословляют обема рукама, первоенадесять — у мантей  зделали колоколцы. А у святых отец от начала и доднесь колоколцов не бывало; были таковы ж колоколцы у плясавых кобылок, да у сучек, а не в церкве. Римския и лятцкия власти с колоколцы ходят и побрякивают, а собачки за ними и перед ними ходят и потявкивают: посему и у наших властей также быти собачкам. Второенадесять — попы скуфей не носят, и подьяки и певчия власов не постригают, — и се нечестиво есть. И аще дерзнули изменить отеческаго предания благолепоту, подобает им и державших ю святых отец из помянника выписать и с церквей их святыя мощи искинуть, и аще похотят и огню предать, якоже и прежнии отступницы творяху. А прочих, государь, церковных раздоров, и хулы, и изменения чином и уставом, множества ради, ныне невозможно писати; и сам, государь, все веси.

Свидетельство святых, яко предания их не подобает изменяти ни мало что.

Глава 8-я.

Добро и благочестивне рече Василий Великий в первом слове на Евномия: Аще бы на отеческих догматех умолчевали быхом, и просто неблазивою верою апостольскую веровали, не требовали быхом изменити предания святых отец. Златоуст глаголет: В царских златицах аще образа царева и мало что отсечет, златицу ложну потворит: тако и от здравыя веры и малое преложив, всю веру повредил есть. Кирилл Александрийский глаголет: Аще кто от исправления и утверженных богоносными отцы подвигнет хотя мало что, и ктому таковое несть нарещи се исправление, но престу­пление, и попрание повелению и на Бога нечестие. Исидор Пилусицкий  глаголет: Единем от двоих недугуют отъемлющии, или что приложити тщащися и малейшая богодухновенным словесем: или не веруют прежде бывших глаголанных святыми отцы Духом Святым, или мнятся мудрейши быти Духа Святаго, или суть неверни. Ино что же ино, точию беснуются? Иван Дамаскин глаголет: Аще и мало что отметает от закона, весь отметает закон. Уклоняющаяся же в развращение поведет Господь с творящими беззаконие: вселяет бо единомысленныя в дом.

Об очной ставке.

Глава 9-я.

Царю благородный, имееши власть Божию, суди яко Бог, не обинуяся лица человеческа: повели, государь, дать мне очную ставку со властми и с новолюбными книжни­ки, кто из них похочет, в тех их вышеписанных богохулных ересях, перед кем ты, государь, изволишь от своего синклита. А сверх, государь, очныя ставки, да повелит твоя божественная царская власть итти нам на общую правду, на Божию судбу, предо всем царством самовла­стно взыти на огнь во извещение истинны, и да явленно будет благочестие отец твоих, и отымется всяко сомне­ние от душа благочестивых, и соединится святая цер­ковь, и единогласно да славится Всесвятый Дух.

О суде праведном

Глава 10-я.

Во царство Уалента зловернаго царя бысть прение о вере у Ария со христианы. И приидоша ариане ко царю, просяще суда на християн. Царь же повеле собрати всех. И тогда епископи християнстии и людие просиша у царя сроку до прихода Василиева, и егда прииде Василий Великий, идоша ко царю. И собранным всем пред ца­ря, рече Василий: царю, даждь нам суд праведен: кому церковию владети, — арианом ли с бесы, или нам христианом со Христом? Царь же даст суд праведен по прошению Василиеву. Сему история свидетельствует, да житие Василиево. Царю благород­ный! Зри истинны, како глаголет Василий Великий: арианом с бесы церковию владети, и сим словом службу их бесовску наричет. Ариане бо едино зломудрствуют о Христе; а ныне, государь, наши власти и новолюбцы горши ариан есть, яко многая зла внесоша во святую церковь. О сем мы просим, царю благородный, даждь нам суд праведен.

О клятве архиерейской, яко незаконная клятва, их ничтоже есть.

Глава 11-я.

Святый Дионисий глаголет: Аще святитель паче воли Божии отлучит кого, не последует ему боже­ственный суд. Василий Великий глаголет: Аще кто творит кого быти без благословения безвремянно, таковый сам без благословения есть. Иван Златоуст глаголет: Аще епископ повеление имать развращено, аще и ангел будет житием, не покаряйся ему. В житии святаго Симеона пишет: Іерей некто доброчестен беззаконно связуя и заклиная люди, и того ради диаволу предан бысть, егоже исцели святый Симеон.

О лживых учителех, яко подобает их откалатися и отсекатися.

Глава 12-я.

Глаголет Спас наш: Светильник телу есть око, и аще око твое просто будет, не имый некия части темны, все тело твое светло будет; и аще око твое лукаво будет, все тело твое темно будет.

Разсуждение. Глаголет зде не чувственное око и тело, но умное; о немже и апостол Павел глаголет: вы есте тело Христово и уди от части; и овех положи Бог в церкви первое апостолы, вто­рое пророцы, третие учители, потом же прочих.

Разсуждение. Светильник есть людем не имый злаго учения, и вси людие во свет приходят. И аще будет учитель лукав, вси людие во тму пойдут. И того ради глаголет Сын Божий: Аще око твое соблазняет тя, исколи е, и аще рука твоя, или нога твоя соблажняет тя, отсецы ю. Око есть святитель, рука ж и нога прочии учители. И аще блазненное учение простирают нам, подобает таковых откалатися и отсекатися, аще и велики чином будут. Уне есть с последним удом, еже есть учителем, внити в царство небесное, нежели с великими и многами учительми ввержену быти в геену огненную.

О лживых архиереях и о прелесных учителях, и колико от них злая сотворишася, и о клятве их бесовской, яко ничтоже клятва их.

Глава 13-я.

Царя Константина Великаго мало было во арианство не свели и на убийство священномученика Петра наустиша, а правоверных гониша и кляша: и ничтоже успе клятва их верным; царя было обольстиша, и собором исправиша; они же зле погибоша. Царя Феодосия Вели­кого лживии учители прелестным учением о воскресении мертвых поколебаша и на гонение праведным подвигоша. И аще не бы обратился на молитву и тем извещение от Бога прият и спасен бысть. И паки Македонии патри­арх с товарищи в духоборство было привели ево, и собо­ром исправися. Царя Анастасия патриарх Севир с това­рищи в прелесть низложиша, и собор свой собрали, а святый четвертый вселенский собор святых отец 630-ти проклинаша, и всех держащих предание их; и что убо клятва их бесовская успе святым отцем и верным? Ничто же есть: царя прельстиша и сами зле погибоша; клятва их на горшее осуждение бысть им. Царя Лва Исаврянина злии ученицы дияволи по десяти летех царства его от благочестия отторгоша, и гонение велико подвиже на вер­ных. И царя Ираклия Божественнаго и патриарха Сергия епископ зловерен прельсти, тако и скончастася, гонения же на правоверных не подвигоша, и того ради святыми поминаеми еста. Царя Василия Македонина с сыном его Лвом Премудрым епископ некий смутив, и того ради Лев седел в темнице много; сему история свидетельствует. И ты, государь, не во всем вери новолюбцем. Ей, ей, глаголю со Давыдом [На поле: Пс. 5, ст. 10-11]: яко несть во устех их истинны, сердце их суетно, гроб отверст гортань их, языки своими льщаху: суди им, Боже, и прочая. И паки глаголет [На поле: Пс. 72, ст. 9,10,15-17]: по­ложи на небеси уста своя, и язык их прейде по земли: сего ради обратятся людие семо, и дние исполнь обрящутся в них. Аще глаголах, повем тако: се ради сы­нов Твоих, емуже обещахся: непщевах разумети: се труд есть предо мною, дондеже вниду во святило Божие и разумею по­следняя их. О сем пространнее пишет евреин Филон философ.

О исправлении книг церковных великия Русии.

Глава 14-я.

Князь Василий Иванович егда книги исправи и святыя церкви умири, и того ради Великая Русиа какова дара благодати Божия сподоблена бысть! Сыну ево, царю Ивану Васильевичу, покори Бог царство казанское и си­бирское с прочими языки. И оттоле царска божественная власть учинися и патриаршеский престол именовася. И ко извещению благочестия святая риза Сына Божия преславная от нечестиваго, царя и многия святыя божественныя иконы Спасовы и пречистыя Госпожи Девы Бо­городицы, многия святыя мощи святых и иконы явишася и чудотворяху многая. И сего множества ради невозмож­но ныне описати подробну.

О изменении книг и благолепоты церковныя и чинов.

Глава 15-я.

Богу попустившему за наше согрешение, тебе царю бла­городному бывшу на брани, злый пастырь, быв во овчей кожи волк, Никон патриарх, измени святый чин, изврати книги и благолепоты святыя церкви опроверже, и нелепыя раздоры и чины во святую церковь внесе от разных ересей, и гонение велико ученицы его правоверным тво­рят и доднесь. Что же от сего в Великой Русии сотворися? ничто же добра бысть; но токмо кровопролития и рати, морове велицы и межеусобныя брани, и пожары великия, и громы страшнии, и камение с небеси низходящее, человецы побивающа во обличение отступником, изменяющим предания святых отец; а церковныя раздрания повсюду, и народу вселюдску тягота великая, а пребывающим в законах отеческих гонение великое. Многая убо святая места ученицы никоновы разориша и непоко­ряющихся ложному учению их многих злою смертию умориша, а иных в дальния ссылки заточиша и в темни­цах замориша, а иных огню предаша. И тебя, благочестиваго царя, лжею своею на гнев подвигоша, отеческия книги и благолепоту обругаша, и прочее от них правовер­ным, — ох, ох и увы! — сотворися. О сих, молим тя, царю благородный, даждь нам суд праведен; а мы, богомоль­цы твои, во святую церковь ничтоже вносим, или изно­сим, вся преданная нам законом и пророки и евангелисты приемлем, и чествуем, и лобызаем, и никтоже сих дале ищем, и предел вечных не прелагаем, яже положиша отцы наши: не беша бо тии глаголющи, но Дух, иже от Бога Отца.

О новой жертве, яко мертва есть.

Глава 16-я.

Царю благородный, зри истинны, яко власти и свя­щенники по новым книгам пред людми тя лицемерством величают, а втайне заупокой поминают, а жертву о тебе и о всех благородных мертвую приносят.

Разсуждение. Ветхая жертва бесловесных стень есть словесней жертве. И егда приводими бываху на жертву овчата и прочая о очищении когождо от человек, и архиерею седящу на месте, а прочии слу­жители закалаху животная и кровь источаху в сосуд, а мяса на жертву полагаху, и кровию архиерей, или иерей покропляет сосуды и приносящих дары. И тако очищение кровию оною приемлют, а бес кроволития не бывает очищение. А дважды един агнец не закалается, яко мертв есть. И аще о безсловесных тако суть, кольми же паче о словесных. Сло­весный агнец приносим бывает просвирою когождо от человек о здравии и о спасении. Якоже безсловесный агнец сотворен от четырех стихий, тако и просвира четыре составления имать: воду и муку, глаголет пророк Іеремий, соль и квас. Просвира имать на себе печать небеснаго Царя: крест и прочия страсти, и лобное место, и Адамов труп, ту прииде и орел, Сын Божий, и освяти кровию своею трупа онаго. Тако просвира закалаема бывает от иерея, идеже труп Адамов, и последи полагает ю в потир, кровь Спасителеву. И тако бывает очищение онем, о нихже часть вынимана бысть. А в другой ряд части ис тоеже просвиры не вы­нимается, якоже овча заколенное паки не закалается, яко мертво есть. Едино приношение дважды не бывает. А ныне, государь, не токмо дважды, но 10-ю и болше едину просвиру вынимают: и то есть мертвая жертва. А егда часть вынимают, о здравии и о спасении Бога не молят: но только рекут: помяни, Господи, государя царя, имя рек; також и о всех благородных, и о болярех, и о прочих всех. А в октениях такоже и о здравии и о спасении Бога не молят; а совершены заупокоем. И то есть развращенная молитва.

О развращенной молитве.

Глава 17-я.

Свидетельство святых отец. Златоуст глаголет: Аще епископ повеление имать развращенно, аще и ангел будет, не покаряйся ему. Афанасий Великий глаголет: Шествуяй непрелестный и живоносный путь, око убо да извержем, не чувственное, но ум­ное, сиречь аще епископ, или презвитер неподоб­но служат и соблажняют люди, подобает изврещи их: уне есть без них собиратися во храм мо­литвенный, нежели с ними, якоже со Анною и Каиафою, воврещися в геенну огненную. А нынешния новыя службы не токмо соблажняют, но и погубляют, яко креста Господня на жертве не имеют. Василий Великий глаголет: Прежде приношения крестознаменан хлеб да будет. А о изменении отеческаго предания глаголет Кирилл Іеросалимскиий, яко ради свободнаго жития законы превращают и уставы преданныя им прелагают и от веры отступают, а православие со еретичеством соединяют, дабы никто не пребывал в прежней право­славной вере и во уставе, изложенном от святых отец, и на их бы полныя новыя еретичества уста­вы преступили, иже во вся годы то сице, иногда инако устав пременяют. И то есть последнее знамение настатия антихристова.

О нечинной молитве, и о освящении церквей, и о антимисах.

Глава 18-я.

На святую пятдесятницу молятся отвратяся от святаго престола на запад: и то явно есть, яко от Бога отступили и призывают от запада отца своего диявола. А людям велят стоять на коленях прямо, а глав на землю не велят наклонять: и то есть срацинская молитва; а православным подобает преклонив, колена и главу на землю молитися. Прообразил есть сию нашу молитву святый пророк Илия Фезвитянин при царе Ахаве, молився преклонив колена, и положи главу свою между коленома своими, а не выспрь. И сам Спас наш, на страсть идый, отшед от, ученик, яко вержением камени, и паде на лицы своем молящеся. Тако и нам подобает молитись. А церкви ныне указано святить властем; а протопопом, и попом святить не велено, и аще де протопоп, или поп святит церковь, то де не освятит, но и смертно погрешит. И аще, государь, протопопы и попы во освящении церквей смертно погрешают: то колми паче в приношении безкровныя жертвы! А службе велено быти над мощьми не в той церкве, кою святить, но во иной, и по утру приходит в ту церковь, кою святить, а буде не поспеет в той день освятить, ино в иной день досвятит, а слу­жителю послать ковер и возглавницу положити, и почивать: и то, государь, не явная ли их плутость? А круг церквей ныне ходят и круг ку­пели, как младенцов крестят, на шуюю страну: и то их не явное ли отступление от Бога? Могут ли они солнце, и луну и прочая планиты обратити их вспять ходити? И будет могут: и то они делом творят; а буде не могут сего сотворити: и то они от десницы, еже есть от Бога, отходят к ощуйце, отцу своему дияволу. Мы исходим от десныя страны, еже есть от Бога порожаемся, и к шуей стране, еже есть ко греху, приражаемся, и паки  надесно возвращаемся, еже есть к Богу приходим. Трижды же обходим церковь и святую купель, обращаемся надесно, образуем три падения ко греху и обращения к Богу покаянием: 1-е во юности, 2-е в возрасте, 3-е во старо­сти. Они же от шуея страны исходит: являют порождение свое от диявола; и к деснице, еже есть к Богу приражаются, и паки на шуюю возвращают­ся, еже есть ко дияволу приходят; трижды же обра­щаются на шуюю, яко три чины людей отводят от Бога. А антимисы ныне учинили своим переводом, и полагают их на верх индитии вместо литона. А в книгах напечатали, мощно де те их новыя ан­тимисы, где не буди, и без церкви, положить в ка­ковой ни есть храмине, хотя де и в скаредном месте, и тут де и служат литургию. И то, госу­дарь, не явное ли их латинство, яко во всяких местах литургию велят служить? Когда так в Ве­ликой Русии бывало? Сам ты, государь, все веси.

О антихристовых слугах.

Глава 19-я.

Яко антихрист слугами своими властелми место себе самодержавное царское приготовит, и паки глаголет: Не от царей, ни от царска рода воздержит царство, но прелестию восхитит власть, еюже преж­де в раи сведе сатана Адама, тако и зде, обещая им богом быти, во своих ложных умышлениих, и на земли им честь и славу велию имети, в веце сем, да емуже се обещает и с его царством под свою силу и власть привлечет, и всех преж­де бывших его еретик превзыдет, и на Бога воз­гордится, и своих умышлений повеления заповесть творити, еже и бысть. И паки глаголет: В последняя времена востати имут десять царей на земли, царствующих в разных местех во едино время римской власти, и ересям подлежащим, и в то время явится супротивник Христу и трех убиет, а сам, восьм на Христа востанет. Глаголет ангел Богослову: десять рог зверя царие суть, иже имут со антихристом царствовати, и всю власть свою ему предадут. И того ради не подобает нам к римским ересем приставати.

О простоте сердца, и о простыне душа, и лжепророце.

Глава 20-я.

Провиде Сын Божий чистоту царскаго сердца твоего и простыню душа: блажени чистии сердцем, яко тии Бога узрят. Всякая душа проста благословен­на, и ходяй просто ходит во уповании вечнаго живота. Надеющейся на Бога, яко гора Сион не подвижется во веки. На Господа имеяй надежду не устрашится и тогда, егда огнем вся судити имать и мукою. Того ради поуступает на тя, яко на Иова, да чуд­но нечто покажет о тебе. И чудишася зверю, егоже исцеле язва ружная. Посему подобает ти от сих исцелитися. Ириней святый глаголет: Исправитися раздельшемуся царству на мало время, или единому от пророк, ан­тихристу умершу, прелесно воскреснути в чин свой, Того ради подобает ти, царю, заповедати благородным чадом своим, да пребывают в законех отеческих во веки неотступно, а пророка прелеснаго в свой чин да не возводят, да не горше что постражут. О сем летописном лжепро­роке глаголет Иван Богослов, яко чудеса имать творити и огнь с высоты сведет, хотя всех ввести в погибель. И таковая бы видевше не прельстилися, взирали бы на писания Ивана Богослова и сим бы утвержалися. Аще ли на ино что взирати будут, соблазнятся и погибнут. Тогда сущий во Иудеи да бежат на горы; горы глаголет писания пророк и апостол.

О святей церкви Христове.

Глава 21-я.

Глаголет Аввакум: Воздвижеся солнце и луна ста в чину своем: в солнцы положи селение свое. И виде, рече, жену в солнце, и луна под ногама ея, и венец от двунадесяти звезд на главе ея. И же­на скорбящи и хотящи родити. И виде ино знамение на небеси: змий велий явися чермен, иже стояше пред женою хотящи ей родити, да егда родит жена, снесть чадо ея (Апок. гл. 12, ст. 1—4), и прочая.

Разсуждение. Жена есть святая церковь, облечен­ная во Христа, в нейже селение свое положи; лу­на же ветхий есть закон, под ногама же яко стень благодати есть; и венец от 12-ти звезд на главе жены 12-ть посланников Христовых, имиже цер­ковь проповедася и ихже звезды глаголет.

Змий же гоняше жену, и пусти изо уст своих реку, да потопит ю в реце; разседеся земля, поможе жене, пожре реку (ст. 15—16). Воздвиже диявол гонение мучительско на християн, и пускает реку изо уст, разныя ереси. Землю же глаголет иже, земных всех небрегше и на муки мужески дерзнувше, блаженных надежд не погрешиша, церкви помогоша и сию реку, разныя ереси, земными и тленными телесы пожроша.

И даны быша жене крыле орла великаго и лете в пустыню, да препитана будет дний 1295. Богослов дний 1260 (ст. 14). Крыле же глаголет от места на место безтрудное пришествие Христовым повелением; пустыню же глаголет не лес без­душный, или Китиран град великий, в немже святый апостол Фома, ангелом пренесен, слово Божие проповеда отчасти; но преже святаго крещения пу­ста убо бяше Великая Русия всякаго блага: в сей убо пустыни повелено бысть жене сей пребыти до дни вышеписанных.

Змий же разгневася на жену и иде со оставшим семенем ея сотворити брань (ст. 17).

Толкование. Змий, диявол, гнев имея на церковь Христову; оставшее же семя пустыня вышеписанная. Яко творит с нею диявол брань, разными ересми хотя оставшее семя, благоявленно ныне есть, благочестия изгубити в великой Русии. Но, о благочести­вый царю, имаши власть Божию, не попускай сему совершатися: яко сего ради не полезно будет ти на страшном суде Сына Божия, яко, верну ти сущу, отеческия книги и все предание их прелагати попустил еси.

О греческом царстве.

Глава 22-я.

Греческий царь Иван Мануйловичь в лето 6847-го потребова человеческия помощи, и того ради от законов отеческих к папе приступи, хотя Іеросалим от турок очистит, забыв реченная Спасом, яко Іеросалим попираем будет языки, дондеже скончают времена язык: и помощи убо сим не получи, смерть же какову подъят, се история свидетельствует, яко и земля тела его не приняла. И от того времени приняли греки три папежския за­коны: первое — обливатися во святом крещении, второе — знаменатися тремя персты, третие — крестов на себе не носити; последи же и царскую Божию погубиша власть. Того ради и погаными турками обладаны. И как, государь, по твоему государеву повелению был посылан во греки старец Арсеней Суханов: и он пишет в Сходнике своем про греки мало добра. Изволи, государь, то ево арсениево пись­мо досмотрити сам, аще истинна суть.

О Риме и Царе-граде.

Глава 23-я.

Царь-град новый Рим именовася от властей, не ради чина и обычаев папежских, но ради благочестия веры и содержания законов отеческих. А ныне Рим за разныя ереси, по писанию, Вавилон и Египет. Егда в Риме ду­ховный человек, папа, восхити на ся царскую Божию власть: и оттоле антихристово властительство есть в Риме. Сице бо и о Царе-граде: яко Божия царския вла­сти не имеют.

Наш глагол. Может благочестия ради Великая Русия новый Рим именоватися, яко главный папин чин, еже есть святый клобук перваго святаго папы Селиверста, сотворен святым царем Константином по явлению, в Русию послан бысть, в великий Новград ко архиепископу Василию, при патриархе Царя-града Филофее. А ныне, государь, наши власти и то Божие изменили дарование: и то их не явная ли плутость?

О изгублении божественныя царския власти.

Глава 24-я.

Во окресных царствах, болгары, угры и прочии таковии, егда в законех отеческих непоступно пребываху, тогда божественную царскую власть над собою имеяху и окре­стным языком во бранех страшни и храбри беяху; егда же в законех отеческих соблудиша и того ради божествен­ную царскую власть изгубиша, тем ныне окрестным не­честивым языком в порабощение быша. О росийском же царстве глаголет пророк Иезекииль: воздвигнет Господь руку свою на князя. И ты, государь, чти историю еллинскую, от ноевых детей и от внучат и до пророков и апостолов, и се уразумееши. Царю благородный, вем тя благоразумна и мудра суща, и чуждуся, како времени сего не испытуеши! Имееши у себя мудрых философов, разсуждающих лице небеси и земли, и у звезд хвосты аршином измеряющих: и таковых глаголет Спас лице­меры быти, яко времени сего не испытают, а ты, госу­дарь, таковых чесных имаши, и различными брашны питаеши, и благовонными питиями напояеши, и хощеши внешними их плетухами власть свою мирну управити! Ни, ни; ветхий закон стень благодати суть, и егда в законех отеческих непоступно пребываху, и того ради вся благая примоваху от Бога; а егда в законех отчих блудствоваху, и того ради вся злая бывают им.

О царствии Русском, яко время управити закон отеческий.

Глава 25-я.

Греческое царство мимо уже иде; едино твое стоит; ино­му роду не останется: того ради глаголет Ириней: зде есть мудрость, аще кто имать и восхощет разумети, яко во едином телеси родне приемлему, истолковану быти царству мира сего. Царю благородный, аще ныне не управиши судом праведным закона отец: и то знатно, яко дожидаешися слова, еже глаголет Иван Богослов, яко испранно бысть точило вне града и прочая. И в то время не полезно будет управление. Того ради, государь, яко глаголет святый Мефодий исповедник: В то время будут трои люди во граде: и юдей, и християне, и самаряне. Ириней же глаголет, яко едины разде­лятся на трое: первая часть во отступление, вторая в вере пребудет, третья на обе страны клонителна будет. Царю благородный! Не облыгая душа твоея, пишу к тебе, или желая временныя чести, или бояся претимыя тобою смер­ти: ни, ни; сия бо, тобою наносимая нам смерть, не смерть есть, но изменение от временных на нетленная и лутчшая; подобает нам боятися вторыя смерти, о нейже глаголет Сын Божий: не убойтеся от убивающих тело, душу не могущим убити, убойтеся паче имущаго власть, по смерти сей, и душу и тело воврещи в дебрь огненную, ей глаголю вам, того убойтеся. Царю благородный! Поч­то сего не боишися? Како книги, и все предание святых отец и благолепоту святыя церкви изменити попустил еси, а студных и мерских архиереов и ереов клятвы бои­шися, якоже царь Ахав вааловых, ихже клятва ничтоже может, якоже выше сего писах о сем? Мы не судим тебе, царю, но словеса Божия и святых его пишем к тебе. Тии имут судитися с тобою в день страшнаго суда, егда приидет Сын Божий. Глаголет бо: Аз не сужу, но слово еже глаголах вам, то судити вы имать, яко живо есть и действенно и острейше паче всякаго меча обоюду остра, и проходит даже до разделения души же и духа, членов же мозгов, и судительно помышлением и мыслем сердечным. Аз же грешный, закона ради отец твоих и вашего ради благородия, аще Бог изволит, готов есмь не токмо темничное озлобление терпети, но и душу свою за вы положити, яко да пребудет вашего благородия божественная царская власть во веки неизвратна и непоколебима, и да управится вами закон отец ваших и умирится святая церковь во единство.

О горе, иже мимо ходит.

Глава 26-я.

И пятый ангел воструби, и спаде звезда с небеси, ейже дан бысть ключ студенца бездны, и отверзе, и изыде дым, яко пещи велики, и омрачися солнце и воздух от дыма студенечнаго (Апок. гл. 9. ст. 1 и 2).

Толкование. Отпаде учитель святыя церкви, имея ключ разумения бездны, изъявив горесть и губительство душам, и омрачися святая церковь и правоверие от губительнаго учения его. И изыдоша прузи на землю, и дана бысть им власть на пять месяц (ст. 3): пять месяц есть время уроченное. И реченно бысть им не вредити ни древа, ни тра­вы, ни плодов земных, но точию человеки, иже не имут печати Божия на челех своих (ст. 4), еже есть истинное знамение. Описует Богослов: лица их, лица человеческа, да не рекут людие, яко сии прузи, иже древа и траву и плоды поядают, власы же имут женския (ст. 7 и 8): сим являет духовных людей, священников и дияконов и иноков, иже власов не постригают, от сих имут прузи быти. Златыя: честь им данную являет; образец венцам их: камилавки новыя, рогатки. Зубы же их львовы жестостъ являет: броня же железны — лютость, немилосердие к людем, от них бывшая. Крыла же громогласныя глаголет быти, являя яко Христовым путем, исперва ходяща бяху. Ошиби же скорпиевы являет плотское их. Жала же у ошибей имут — учение их лесное. Скорпия  егда уязвит человека, жив не будет: тако и их злое учение аще кто приимет, лишен будет вечнаго живота, аще не покается.

Глаголет Ипполит: и на чело скверный и на чело мерзкий образ. Скверный и мерзкий образ — новый слог перстам, как ныне людей благослов­ляют, яже сотворят предтечи антихристовы. В новых книгах напечатан тот новый слог перстам, и малаксин перевод. По их ложному толкованию: Ісус Христос; а по Ипполиту и по Еф­рему идол есть. О, царю! блюдися сего малаксина благословения. Сии злии учители имут над собою царя, аггела бездны, емуже имя по еврейски Аввадон, а по еллински Аполион (ст. 11). И паки глаголет Богослов: горе едино отыде, се грядут два горя по сих (ст. 12), яже скоро будут, и прочая.

Описание горя втораго вкратце.

И се бысть трус велий, и солнце мрачно бысть, яко вретище власяно. И звезды небесныя падоша на землю, яко смоковница отметает пупы своя, от ветра велика движима (Апок. гл. 6, от. 12—13). Еже есть: учители церковныя прельстятся и падут в земное житие. И небо отлучися яко свиток сви­ваемо (ст. 14). Еже есть: святая церковь благочести­вых отлучится, будут бо тогда, сокрываемы. И всяка гора и остров, от места своего двигнушася (ст. 14). Еже есть: князи и велможи вси и церкви от благочестия своего восколеблются и развращены будут. Четвертый ангел, уготованный на время то, да избиет третью часть человек, иже есть число воинник конных, двоицею тма тмами, слышах число их. И видех кони и седящая на них (Апок. гл. 9, ст. 16—17), еже есть неистовством  владящая, имущая броня огненны и акинфяны и жупельны, главы конем их лвовы. Область же имут, во устех их огнь и дым и жупел (ст. 17—18), и от сего третия часть людей погибнет.

Разсуждение. Яко тогда природные люди неистов­ство сие сотворят, и изнесут слова ярости и го­рести и нечистоты в погибель душам. И ошиби их подобни змием, имуще главы (ст. 19). Хвосты змиевы слабость есть блуда; главы же — яко сим обладаны будут и пакости деяти имут. И в то время приити имут свидетели Енох и Илия во плоти. Идеже прежде благочестие бысть, ту пре­жде и проповедь их будет. Святый Ипполит глаголет с ними же и Ивану Богослову приити, и се вышеписанное воинство конное обличити имут, и убиены будут от них дияволим и антихристовым повелением, и повержены будут на стогнах града великаго, иже духовне наричем Содом и Египет. И тогда людие о смерти их возрадуются и друг другу дары пошлют (Апок. гл. 11, ст. 8, 10). И в четвертый день приидет дух от Бога, и воскреснут зрящим людем, и глас к ним от Бога свыше приидет: взыдите семо, и взыдут на небо на облацех, и будет тогда трус, и 7000 человек погибнет, а прочии будут пристрашни и дадут славу Богу небесному (ст. 11—13). И потом антихрист с прочими царьми осужден будет. Горе второе отыде, се грядет третье ско­ро (ст. 14), в немже вся тварь изменится, и бу­дет небо ново и земля нова, и мертвии о Христе воскреснут прежде, и град святый тогда явится, о немже глаголет Богослов.

О пиянстве жены, яко последнее благочестивое царство — твое, Великая Русия.

Глава 27-я.

Того ради Богослов глаголет: и прииде един от седмих ангел, имущих седмь фиял пос­ледних, и глагола со мною, глаголя ми. Веде мя в пусто место духом. Не в лес без­душный, но во ону пустыню вышеписанную: пусту же быти глаголет ю духом, еже есть духовнаго истиннаго учения опустети имать. И показа ми жену седящу на звери червленем, имущем глав седмь и ро­гов десять. И жена бе пиана кровми святых и кровми свидетелей Iсусовых. И на челе ея написана тайна. И подивися Богослов дивом ве­ликим. И рече ангел: что дивишися? (Апок., гл. 17, ст. 1—6.) Время было жене сей изтрезвитися, отложыти гордость и всяку злобу, и плакатися пиянства своего, яко не вином пияна есть, но кровию християнскою и кровию свидетелей Iсусовых. Зде есть терпение святых, иже соблюдают заповеди Божия и веру Iсусову. Блажени отныне умирающий о Господе, да почиют от трудов своих, ей глаголет Дух Святый (Апок., гл. 14, ст. 13), и прочая. К сим же дерзает и се глаголати: царица есмь и вдова несмь, и рыдания не имам видети. И сего ради во един день приидут язвы ей и смерть, и плачь, и глад, и огнем сожжена будет: яко крепок Господь Бог судяй (Апок., гл. 18, ст. 7— 8). Ей, глаголет Богослов, и от ангела навыцаше тайны. И глаголет ангел: прииди, да реку ти тайну жены, зверя носящаго ю, и зверь, егоже видел еси, бе и несть (гл. 17, ст. 7—8). И той есть осмый, иже по седмих будет и в пагубу идет. И того ради подо­бает нам в законех отеческих крепко стояти, а наследия багрянородных не погубляти: зане царство твое прочим людем не останется, по вышеписанных. Аще и смесится море скляное со огнем, глаголет благочестие с нечести­выми догматы. В сем бо знамении скончается гнев ярости Сына Божия. Егда же сие совершится, и глаголет Ангел: паде, паде Вавилон великий, и вместо святых бысть в жилище бесом (гл. 18, ст. 2), и прочая. И тогда будет царство твое именоватися, по писанию, Вавилон и Египет, яко пребыти имать она жена, облеченная в солнце, до дни вышеписанных, яко на нем таинство откровения совершится. Се бо есть последнее падение правоверия: сему свидетель Иван Богослов. Блажен чтый и слышай словеса книги его. О, благоче­стивый царю! не попускай сему совершатися во своей об­ласти. Есть сицевое правление, аще поспите посреде предел. И того ради даны нам будут крыле голубине посребренне, и междорамия ея во блещании злата. Бого­данная царская власть, егда содержит правления, разньствит от прочих всех властей, яко же отстоит небо от зем­ля, и солнце выше луны и больши светом есть: сице и цар­ская божественная власть вышши и больши прочих вла­стей.

О лжи, и о молчании, и о нерадении пастырей последних.

Глава 28-я.

Власти наши, облыгая тебя, великаго государя, гово­рят тебе, бутто мы одне стоим в книгах и в законе отече­ском. Ей, ей, не одне. Есть в Великой Русии и сто тысящ готовых умрети за законы отеческия; по писанию же, и страха ради властельска, прикровенны суть. Тогда и от разумевших падутся. Ипполит глаголет: В та времена разумеваяй умолкнет. Аввакум: Почию в день пе­чали моея, да взыду в люди пришельствия моего: зане смокви плода не сотворят и не будет рода в виноградех; солжет дело маслина и поля не сотворят яди; оскудеша овца от пища, и не будет волов при яслех.

Толк. Почивание глаголет долготерпение Божие до времени последняго, занеже тогда человецы добра не со­творят. Род винограда глаголет приносящих добрый плод человецы, ихже мало будет. Солжет дело маслина: ми­лость и любовь, глаголет, изсякнет. Поля же не сотворят яди: яко всюду человецы добродетели душевныя и чи­стоты телесныя не сотворят. Оскудеша овца от пища: ос­кудеют тогда людие духовныя пища, истиннаго учения и жертвы, и не будет пастырей при олтари, иже бы душа своя за овца положити. Волну и млеко от стада емлюще, а о овцах не пекущеся: изыщу, глаголет Господь, кровь овец моих от рук их. Оле пастырие! пасоша себе, овец же моих не пасоша. Вопросившу Даниилу: Господи почто се бысть? и глаголет Ангел: даже избрании будут, даже разжегутся, даже убелятся, даже явленны будут искусныя до времени кончины.

О напрасной муце и о терпении блаженнаго пастыря.

Глава 29-я.

Царю благородный! Воспомяни прародителей своих, колико озлобление, и беды и заточения подъяша правости ради душевныя и закона. Яже от многих мала на среду ныне приведем. Царь Борис Годунов, егда самодержавство прият, и тогда прародителей твоих озлоби и в зато­чения распосла: Феодор Никитич бысть заточен в Сийском монастыре в темнице, а братия его един в Помо­рии, а другий в Перьми, — тут и скончастася. А егда бысть царем Григорей рострига: и тогда Феодор Никитич сво­боду получи, и хотя его оболстити Григорей рострига по­сылает к нему думнова своево дьяка Феодора Андронова, и говорил ему дьяк: присла де к тебе государь природ­ный царевич, скинь ты, государь Феодор Никитич, чер­ное платье,— то де наложил на тебя изменник наш Бо­рис Годунов,— и приими, государь, светлую богряницу свою, и буди со мною в царских полатах первым боярином. Он отвеща: скажи государю природному царевичу: неволею де, государь, начинают, да волею совершают. Оле, душевныя крепости! како нимало не поколебася! И бысть митрополит в Ростове, и после царя Василия Шуйскаго послан бысть от руских вельмож и людей к ко­ролю Джигиманту просить сына ево Владислава на дер­жаву царства росийскаго, и много тамо озлобления подъя правоверия ради, и философа латынника препре, и дивишася душевней его крепости и разуму, и похвалиша его. И некогда хотеша его гладом заморити, и пребысть седмь дней не ядый, и от труда изнемог седе. И сну малу нашедшу, видит пред собою инока стояща, светла лицем, и просвиру влагающа в руце его, глаголюще: не бойся, отче Филарете, вручает Сын Божий державу царства росийскаго сыну твоему Михаилу, еже и бысть, тебе же соборную русийскую церковь. Он же рече: кто еси ты, глаголяй ми великая таковая и неначаемая? И явивыйся рече: аз есмь Антоний Сийский, и невидим бысть. Про­свира же оста в руце его тепла, и возбнув благодари Бога и изъяде просвиру. И от того времени пребысть во ослабе, дондеже совершися реченная святым Антонием. Кто в нынешних пастырех обрящется таков в страданиих? и како такова пастыря ныне ни во что поставили? А нынешныя пастыри природныя ли люди? И лутчий их — поп был. А по правилом святых отец в мире быв поп, ктому не бысть попом, не токмо архиереом. А и ноне есть власть, в попы ево турченин ставил: и тот турскии поставленник может ли быти и поп? И таковых власти меж собою не видят: како, како таковии пастыри могут добри быти? Чрез правила святых отец чин на себя вос­хищают! не дверьми входят во святую церковь, но дирою влазят, яко татие, по Христову словеси: не входя и дверьми в о двор овчий, но прелазяй инуде, той есть тать и разбойник, и прочая.

Никтоже, государь, прежних святых пастырей в Русии не был чрез правила святых отец, не нарушивали. А мы держим святыя книги и закон прародителей твоих, и ничего во святую церковь не вносим, ни износим: что приняли, то и держим неизменно. И аще мы, таковая держаще, и того ради мучимы есмы всяко и казними, в тесных темницах затворены, а хлеба дают нам по полу­тора фунта на сутки, да квасу нужнова,— ей, ей, и псом больши сего метают! — а соли не дают, а одежишка нет же, ходим срамно и наго: и о сем, царю, будут судитися с тобою прародители твои, и прежния цари и патриархи, кои те книги управили, к сим же и святии отцы, кои те книги держали и теми спасени быша, нетлением телес и чудесы прославишася. Молим тя, государь, сим книгам и ты поучайся, да спасешися.

О явлении святаго пророка Илии Фезвитянина, и о ругательсте, и о казне, и о молитве.

Глава 30-я.

Похвалитися не полезно ми есть. Вем, яко скверен есмь; но закон чист. Аз грешен есмь; но отцы и братия святи суть. Пишет бо, яко царь Саул мерзок бе пред Богом; а егда бе со пророки, Дух Святый сниде и на Саула. Тако и аз со отцы. И паки пишет, яко сила Божия презираю­щих божественная мудрых и великих ослами обличи: Ва­лаама волхва и царя Константина, егда Зотика мучаше, и прочих. Аз же ничимже осла хуждши есмь. Аще и гре­шен есмь; но верою правою раб есмь Сына Божия. Един бо есть Господь, едина вера, едино крещение, един Бог и отец всех: весть, яко не лжу. В прошлых летех сего стра­дания моего обложен был оковы. Июля в 17-й день был в печали велице, яко и в день рождения моего ослабы не имею, и от печали и хлеба не ядох. И лежащу ми в раз­мышлении и скорбящу,  и сну малу  на  мя нашедшу, и явися мне святый пророк Илия Фезвитянин, и рече ми: «Лазаре, аз есмь с тобою, не бойся!» И не видим бысть. Аз же обретохся радости исполнен; железа же обретох с себя спадша; и трижды замыках, и спадаху. И после сего гладом мориша мя две недели и три дни в темнице, в чепи. И потом привезен бых к Москве, и на потриарше дворе обложен бых тяжкими железы на выю и на ногах: и с ног железа спадоша. И они смык наложиша, и сот­ник некий прииде в полату пьян, и бранил мя всяко, и ругаяся, и ухватил меня за чепь, хотя мя аки пса по полате волочити: и Божиею силою чепь с меня спала; он же отыде посрамлен. И тако пребых седмиц 12-ть. И при­вязан бых железы, на вые чепь, а на ногах кондалы. И пребых седмиц седьм, размышляя о себе, что сотворю. И в нощь субботы пятыя недели поста помышлях бити челом тебе, государю царю, чтобы ты меня пожаловал, велел жить в молчании, а книг бы отеческих у меня не отымал. И с сею мыслию и сну на мя пришедшу, и видех себя стояща на месте в полате, облеченна в одежду иерейску белу, нову, и на главе моей видех голубь злат седящ, крылама возбивая и трепеща, и круг себя видех стоящих властей руских многих, посохами своими опер­шихся. И прихождаше ко мне муж светел стар, егоже познавах быти святаго пророка Илию Фезвитянина, и глаголаше ми, повелевая ми стояти в законех отеческих несумненно и обличати изменяющих закон, и милость Божию сказует ми быти. И власти, стоящии круг меня, един по единому вси розыдошася, и остах един: тойже святый муж, мир дав ми, и отыде. Аз же обретохся ра­дости наполнен и размышлях о видении, аще истинна суть. И бысть утрення. И бе в той же темнице всажен священник, и в туже нощь виде о мне тоже видение: и той же святый старый муж воздвизает его и повелевает ему говорити мне, чтобы я стоял неослабно, и милость Божию сказует ми быти. По утрени он Андрей поведа ми. И сим уверихся, и паки стоях неослабно и без бояз­ни, и властей, изменяющих книги и закон, обличах и поносих. И того ради они к тебе, государю царю, клеветаша на мя всяко ложно, и обругаша мя чина иерейска не по правилом святых отец. А я, богомолец твой, аще и об­руган есмь от иерейских властельми, но имею на себе благословение святейшаго патриарха Филарета Никити­ча, а рукоположение Варлаама митрополита Ростовскаго, и держу их благословением чин священства. И что, госу­дарь, по их властелинской облыжке принял я казнь, немилостивно язык клещами вытянули и обрезали, закона ради отец твоих: и их молитвами дал ми Сын Божий ясно глаголати, по явлению святаго и великаго пророка Илии Фезвитянина. Того ради аз грешный молю в Троицы славимаго с прибытием единаго Бога и пресвятую всех ца­рицу, Госпожу Деву и Богородицу, и святых безплотных сил и всех святых, да утвердится царская божественная власть и Богом данных и благородных чад твоих и в вечныя роды родом и во веки неизвратна, и немятежна, и непоколебима от всяких сопротивных прилог видимых и невидимых враг, молитвами Богородица и всех святых, аминь.

Юзник темничный поп Лазарь, быв в заточении, в Пустоозерской темнице седя, писал своею рукою. Лета 7176 году, месяца февраля.

И у подлиннова списка рука приложена сим образом: Юзник поп Лазарь писал сие не по преодержимому слову человеческия мудрости, но в показании Святаго Духа ж силы, и к сему списку руку приложил.