О произшедшем несогласии, и о разделении нашем, яко чесо ради у нас с Феодосиевыми ученики обьщение пресекается.

 

[«Филипповское» сочинение, 60-70 гг. XVIII в.]

 

 

Уведомление:

Понеже убо, в настоящее се время, мнози суть от христиан, иже нынешней видимей великороссийстей церкви весма удаляются, и новоизданных тоя догмат, и предании церковных приимати опасаются. такоже и новотворных тайнодейств от видимой великороссийской церкви, яко с новинами, и от новин совершаемых сущих не приемлют, и древнее святоцерковное предание, и християнское благочестие содержати усердствуют. ихже и сущими христианы за сие нарещи долженствует. Обаче же, аще и християнскаго согласия сицеви суть. но некоторых ради вин, имеется о сих омышление. Яко некия новоумышленная мудрования и предания, ова от Никона патриарха новопредании соприяша, ова же от своемышленнаго разсуждения новомудрствующе узакониша, и в том крепце утвердишася. Паче же сии иже от некотораго учителя, именем Феодосия, таковая творити, и мудрствовати научишася. которое их новоумышленное мудрование и предание, древлеправославной церкве Христовой чюждо, и святых отец учению весма несогласно. Тако же и православным христианом держащимся христианскаго благочестия, и святых отец учения и наказания во всем послушающим, онех невопредание и мудрование весма сомнително есть. которое мы зде нижеположенными статиями располагающе изъявляем. и на вся сия статии, от божественнаго писания возобличителная свидетельства представляем:

 

… [пропуск листов]

 

отец учению последующих, и неприемлющих новоумышленнаго ими о литерах мудрования, и предания, жидами, и евангелия Христова преступниками быти оглаголуют; убо и онех святых отец, и учителей древлецерковных, и всю древлеправославную кафолическую церковь, неприемшую литер онех, жидовством, и преступлением евангелия быти неправедно осуждают. Оле дерзостнаго сего их гласа, еже зазор на святых отец, и на всю древлеправославнокафолическую церковь неправедно наносящаго. Ащели проклинаяй Авраама, проклят есть по божественному гласу; Колми убо паче проклинаяи, или безчествуяи святых Божиих, и всю святую православную Христову церковь, проклят, или безчествуем имать быти.

Но начальнейшии же той их учитель Феодосии, внегда из Стародубья приезжал в Поморская пустынножительства, и с тамо сущими отцы пустынными о надписании креста, и о прочих имеющихся разгласиях, имел советование, они же отцы пустыннии, от божественнаго писания доволно избравше, и ему достоверная свидетельства о том предложиша. ими же той много зазрен бяше. и тако Феодосии виде себе от отец писанием святым зазрена суща, и оправдатися отнюд не могуща, отъиде посрамлен без орудия. и тако оттуду пойде в Стародубьския слободы, идеже име прежде пребывание. идущу же ему путем, и немного поприщь прешедшу, виде близ пути трудников монастыря того работу управляющих, и взем данная ему от отец на путь потребная, поверже трудником, извествуя, яко нехотяше и пищи от отец вкусити, за неприятие их новопреданнаго о литерах, и о прочих его мудрованиях законоположения. И мняся той исполнити иже в евангелии Господем заповеданное [Матф. зач. 35]; иже не приемлют вас, ниже послушают словес ваших, изходяще из дому, или из града, и прах от ног ваших отрясайте. И абие ятся сам, и сущии с ним обущах своих, и начаша избуватися. и взяша кождо их обущи своя, и обратишася противу монастыря отец, начаша отрясати, глаголя: яко и прах от ног наших отрясаем. отселе не буди нам общения имети с вами, ни в сии век, ни в будущии. и сия ко отцем изрекоша, и с таковым намерением и залогом яшася своего пути, и отъехаша в Стародубьския слободы, к своим единомысленным. И от того времене Феодосии начат единство церковное раздирати, и обьщение христианское пресекати, и от того времени начаша ученицы его в большее дерзновение о новопреданиях своих вступати, и без сомнения тая содержати. очесом многажды в различная времена, от сущих християн писанием обличаеми бываху. но аки аспиды глухия, затыкаху уши свои, еже не приимати обличения. и тако в таковом их неистовстве, и доныне закосневше пребывают нехотяще уцеломудрятися. И от сего явьственно показуется, яко не мы прежде, но той сам Феодосии, со ученики своими раздор церковныи сотвориша. и той есть вина несогласия нашего, той есть вина и разделения церковнаго. И елико они новомудрствующии, на разделение церковное дерзнувшии, и хуленьми многими нас неправедно оболгаша. толико и мы о них сомнителнейше бываем. Понеже есмы, елико от святых пастырей и учителей своих научихомся, еже соединение церковное хранити, и толико и новомудрствующих учителей опасатися, и новин бегати научихомжеся. и новосотворенная и соделанная отметати и уничижати повелеваемся. очесом и утверждающая ны священных писании свидетельства представляем: Преподобныи Никон Черногорскии, во изглашении правил свидетельствует сице [Кормч. лист 641]: Вся яже чрез церковная предания, и учительства, и воображения святых и приснопамятных отец новосотворенная и соделанная, или посем содеятися хотящая, анафема. [Кирил. лист 305] Темже всякому подобает всею силою держатися церковнаго предания, от божественных апостол Духом Святым уставленнаго. [Ниже:] Прикладающих же что, или отъемлющих, или инако претворяющих, аще и сам будет (учитель) крайнейшии учитель кто, никако же слушати, но удалятися таковаго, якоже божественнии апостоли научают нас, сице глаголющи: аще мы, или ангел с небесе благовестит вам, паче еже благовестихом вам, анафема да есть. И святейшии Мелетии патриарх Александрийскии, в послании своем до белорусцев пиша, сице глаголет [послание, 3]: Всяк неотеризм припряжен есть к беде, бегай беды, или немала есть сия беда, еже церковь колебати. Той же: Обыкшая с новым обретением бывати злая. сия вся молвы и разстояния, ересей наношение, и церковная смущения, новины любославных. В книзе же о вере, пишет сице: Сего ради, всеми силами всяк православныи тщатися повинен есть, яко да в приятии новин, под анафему не подпадет. при которой искушения казни злыя сретает небрегущих о сем. Книга о вере, глава, 23.

 

Статия, 2-я:

Образ, и кресты, [и створы меднолитыя] у никониан, у поповщины на торгу променивают, и в домех своих держат, и сим покланяются;

 

Возобличение, 2-е:

Понеже святая православная Христова церковь, молящихся со еретики купно, таковых отлучает; а приемлющих от еретик каковое любо от священных действо, имящихся творимая от них аки благоприятна, обьщниками проклятия их и анафеме быти осуждает, ащели же причетник, то за сие и от сана извергает. очесом священных писании, свидетельства являют. Правило святых апостол, 45. [Кормч., глава 1] Моляйся с еретики, да отлучится, ащеже яко причетники приимет я, да извержется. Толкование. Епископ, или презвитер, или диакон, аще помолится токмо с еретики, да отлучится. аще же и повелит им служити в церькви яко презвитером, или ино что от священных содевати таковыи да извержется. Иоанн же митрополит Никийскии, на еретики пиша, сице глаголет: Яко крещение их, и вся яже от них неприятна, и непотребна суть. аще и тщатся несмысленнии, и лживии христиане, и лживии правовернии, яко благоприятна творити деяния их. но да услышат ненаучении, и ненаказании, Ивана Богослова тако глаголюща в своем послании: аще кто приходит к вам, а учения сего не приносит с собою, радоватися ему не глаголите, и в храмину не приемлите. иже бо глаголет ему радоватися, обьщник обретается делом его лукавым. Темже проявлено, яко иже правовернии обретаются, а приобщаются с сими еретики в ядении и в питии, и в дружбе и в любви, и творимая от них аки благоприятна мнят, и нечестиво, и неразумно истинныя христианы их именуют, обьщники обретаются проклятию анафеме, яже на них написана. Дозде Иоанн. И по сицевым свидетельством показуется, яко молящияся с еретики отлучением осуждаются на время. и приемлющия от еретик каковая любо от священных действия, извержением вечным осуждаются, еже есть тяжчайшии молящихся быти разумеется. И яко крещение их, тако и вся от них неприятна и непотребна суть. А иже тщащияся благоприятна творити деяния их, таковым апостол претит глаголя, яко не приимати еретиков в дом, и радоватися им не повелевает глаголати. глаголющия же радоватися, обьщниками делом их лукавым осуждает быти. такоже и приемлющия действия их, и благоприятна быти въменяющих, обьщею иже на еретик клятвою осуждает таковых. ащели же приемлющия еретиков в дом токмо, и глаголющия им радоватися, обьщники бывают делом их лукавым, кольми паче сии, иже приемлют или въменяют еретиков быти себе изографами, и мастерами искусными и приемлют от них яко писменныя, так и меднолитыя иконоизображения, и в домех своих поставляют на поклонение, яко истинныя святыя образы, и всякую иконную честь воздают им, веруют быти сие богоугождение и спасение получити себе в том надеются; яве бо есть, по апостолу обьщники бывают делом их лукавым, и по святому Иоанну митрополиту, яко общники же обретаются проклятию анафеме, яже на еретиков написана. и правилу апостольскому, 45-му, повинны суть, яко приемлют от еретик священнодействия, и вящьше молящихся с еретики сицевии осуждаются. В книзе же Стоглаве, во главе 42, и 43, о достоиньстве и чести иконописца свидетельствует, яко достоит ему быти искусну, и хитру, и духовну мужю. И не менее иерейскаго онем достойньства ищется. и чести таковой не яко простолюдин, но аки священник да сподобляется. К сему же еще и от древних поморских пустынножителей, сицевое опасное о иконописцех обретающееся в них правилное хранение зде предложити не отречемся. Яко же премудрыи учитель, и еретиков зельныи укоритель, никонианскои же прелести явьственныи обличитель, блаженныя памяти, Андрей Дионисиевичь, пишай к некоторой пустыннице грамоту, а в ней пишет сице: Первое написано у тебе, много испытовали божественнаго писания. а того не могли обрести и изыскати во святых книгах, что испытовати иконописцов веры, и жития их. и по сему вашему разумению, аще иконописцы будут латынники, или люторцы, или армени, или махметовцы, и иных вер, и вы не хощете веры их испытовати, и пойдете к ним иконы писати; Оле вашего неразсуждения, и самомышленнаго толкования. Где вы нашли повеление в божественном писании, еже ходити к еретиком, повелевати им святыя иконы писати; от них безсомнения приимати. ащели сего в писании не обретаете; то чрез писание дерзостию своею тако пишете и мудрствуете. апостол бо пишет, еретика человека, по первом и по втором наказании отрицайся, а вы таким протолкованием вашим, святых икон писати их приемлете. и не хощете испытовати веры их. а в соборном Стоглаве, повелевает святыя иконы писати благочестивым воздержником иконописцам, а пияницам и блудником возбраняет писати. а вы всем нечестивым иноверцам поверили, иконописателем быти. или не слышите священнаго Симеона епископа Фессалонитскаго, заповедающа, яко подобает живописать благоговейно божественная и благочестивно, и по преданному обычаю. а вы дерзаете и кроме благоговейнаго жития, и кроме благочестиваго, попущаете святыя иконы писати, противно святых разумению. А понеже яко чрез святое писание тако пишете и мудрствуете, того ради в разумлении вашем погрешаете. Како могут тии, кои веры святыя не знают, знати по существу, и зело хитро святыя иконы писати; иже не просвещаемии благоверием, иже Духом Святым неосвященнии. иже нечестием и безверием помрачении. и духом противным потемнении. Како у вас таковии хитрии, и по существу святыя иконы писати могут. и проч. А святыи Симеон Фессалонитскии, о противоверных латинех, во главе, 23, пишет: Святыя иконы кроме предания, иным образом, многажды живописуют. /и паки:/ и еже чина неблагочестивна, и отцы сие не приемлют. Видиши ли, идеже веру святую премениша, тамо иконы инако (живописуют) кроме предания живописуют. еже есть противно святых икон паче. Дозде от грамотки. И по всем сим вышепредложенным свидетельством, Феодосиевы ученицы, обличаются, яко неистовствуют, еже святыя иконы еретиком повелевают писати, или по их желанию написанныя приемлют. и чрез запрещения святых отец творят сие, иже и правилному запрещению подпадают. таже и общники делом их лукавым еретическим обретаются, обьщей же и клятве их за сие подпадают, якоже въпреди показася.

 

Статия, 3-я:

Еже древлепечатныя книги во уставех показуют, во святыи великии пост, и в прочия посты, егда поется аллилуия, тогда поклоны земныя творити повелевают, Феодосиевы же ученицы, оныя поклоны точию в великии пост творят, в прочия же посты отлагают, обаче древнии святии отцы во уставе, яко во святую 40-цу, так и в прочия посты егда бывает аллилуия, неизменно земныя поклоны творити повелевают, а на непокланяющих колени  во уреченныя дни, тяжчайшая запрещения и проклятия полагают. очесом возобличителная священных писании свидетельства являют:

 

Возобличение:

Преподобныи Никон, в собрании своея книги, в слове 57-м, пишет сице: Ересь, 91, непоклонницы. Сии на всяко время молитв своих колен не хотят преклонити, но стояще присно молитвы своя творят. и сия убо ересь предлежит к нашему утвержению, егда не произволяюще, или инако от десных окрадаемся, и не хощем преклоняти колена, рекше кланятися в молитвах во уставленых днех. Ибо всяко уклонение от православных велении, отпадение есть от соборныя и апостольския церкве, якоже божественнии отцы глаголют. паче же в сих. ибо уставлении посты, и повеленная коленопреклонения во уставленных днех. образи нецыи суть православныя веры и непорочныя. и паки тойже [Псалтырь малая печатана в лето 7154]: Яко сии земнии поклоны, повсюду обьще всем православным, иноком, и мирским, предани от святых апостол, и святых отец. яко да никакоже сии презираемии бывают, во святыи сей пост великии, но да и паче подвигнемся, еже исправити сие святых отец предание, сиречь коленное поклонение, якоже устав повелевает. и не разрушити, и въместо света тму возлюбити. проклято бо есть сие, и с еретики отвержено таковое злочестие, еже не творити поклонов до земли в молитвах наших к Богу, в уреченныя дни. якоже глаголет Дамаскин во изложении своем. /ниже:/ И зде убо о сих на непокаряющихся иереов, и не вницающих в божественное писание, и презирающих святых отец предание. паче же раскол творящих в церкви Божии. и душа своя, и инех в пагубу совъводящих, и во отлучение от Бога. Дозде святыи. В книзе же Кормчей, святых апостол правило 36, сице глаголет: Аще епископ, или презвитер, не восхощет пасти стадо Христово, ни учити под ним сущих людей, да будет отлучен, дондеже исправится. И по сицевым священных писании свидетельством, Феодосиевы ученицы и их настоятелие обличаются, иже не творят поклонов во уставленныя дни святых постов, якоже устав повелевает, но в сицевом паче уклонишася от православных велении, и отпадоша от соборныя и апостольския церкве, и со еретики осуждаются, за сие злочестие. якоже божественнии отцы глаголют: зане управлении посты, образи суть православныя веры непорочныя, якоже впреди показася. За иже аще и мало что уклоняяйся от православныя веры, еретиками осуждаются, и подлежат законом еретическим. Очесом преподобныи Никон Черногорскии, во изглашении правил сице глаголет [Кормч. лист 641]: Яко еретик есть, и еретическим подлежит законом, аще и мало что уклоняяйся от православныя веры. /Тойже:/ Аще кто от угодных богоносным отцем поколеблет что, не ктому се смотрение нарицает, но преступление предании, и к Богу нечестие. Дозде святыи. И по всем сим свидетельством, Феодосиевы ученицы явственно с еретиками и отступниками веры Христовы осуждаются быти, и яко настоятелие их, тако и ученицы, правилному запрещению повинни суть.

 

Статия, 4-я:

С несогласующими христианскому благочестию, и со отлученными во единой храмине, в разных углех, без твердой преграды купно Богу молятся.

 

Возобличение:

Святых апостол правило, 10, повелевает, яко, моляйся со отлучеными, аще и не в церкви, но в дому, сам такожде отлучен да будет. И Матфей правилник, в составе А-м, на правило 33, Лаодикийскаго собора, сице пишет: Тридесять же третие правило, с еретиком, или раздорником, отнюд не повелевает молитися. Тако же и в Номоканоне, правило, 153 [лист 39], свидетельствует сице: Правило же 33. иже в Лаодикии собора, возбраняет с ними молитися, или ясти, или что приимати от благословения их, сиречь милостыню. И Матфей канонист, в составе К, во главе, 24. на правило 2, во Антиохии собора, сице пишет: Иже во Антиохии собора, правило, 2. приобщения неприобьщенных отступати всячески нам заповедает. ниже в дому, с ними молитву творити, ниже в церкви. аще и нужда прилучится быти. аще бо и телом разстоимся, но убо верою друг друга не разстоимся, иже по всей земли христианы. и единыя вси соборныя церкве глаголемся есмы. да иже убо священнаго сословия, неприобьщенъных явится приобьщаяся; и сего неприобьщенна повелевает быти, яко церковное правило смущающа. И по сицевым священных писании свидетельством, Феодосиевы ученицы, обличаются, яко приобщения ради моления, еже во едином храме с неверными, и со отлученными купно молятся. сами такожде неприобьщены, и отлучены от святой соборной и апостольской церькви быти осуждаются, яко церковное правило смущающе.

 

Статия, 5:

О брацех еретических, и о поганских, мудрствуют сице: яко аще муж и жена в неверии брачне совокупятся, законом еретическим, или поганским, и егда оба приидут в познание веры Христовы, и крестятся, таковых оправдуют первое бракосочетание, еже быти ему православну, и христианску сущу браку. извествующе о сем, яко святым крещением той освятися. и таковым попускают чадородием жити, и блудника суд не налагают. и на исповеди сицевым за совокупление плотьское, отцы духовныя не епитимисуют.

 

Возобличение:

Еще сице учити яко да мужие со женами кроме иерейскаго благословения и молитвословия плотьски совокуплятися, беззаконно есть, и блудодейству научително. и еже плотьскии таковым совокуплятися, и чадородием жити блудничество есть. А еже отцем духовным таковым не епитимисати, священным правилом есть сопротивно, и церкви Христовы чюждо. ереси же месалианской, и василианской согласно есть. очесом древнии святии учителие тако предаша нам. А еже сице мудрствовати, яко тайна святаго крещения, с тайною бракосочетания купно спрягаема освящается, святым отцем, учителем церковным несогласно, и древлеправославной Христовы церкве есть противно. Понеже святое крещение, еже от самаго Христа Бога нашего, на спасение мирови даровася, еже сам Христос Бог уставивыи тайну сию, собою образ нам показа. взыде бо во Иордан, и главу свою к рабу преклони, крещения прося неведыи греха. но даже исполнит закона, даже троическую открыет тайну. даже образ и написание будет нам на крещение. яко Златоуст святыи в евангелии учителном на Крщение Господне пишет: И яко крещение есть баня паки бытия, и обновление душ наших. по пророку, омыеши мя, и паче снега убелюся. имже древняя красота нам туне дается [Григории Богослов], юже име Адам прежде преступления,, и ея же Адам погуби преступлением заповеди, сию мы приемлем во святом крещении. Темже святое крещение есть порождение, и от мертвых дел оживление, и спасителная сия купель, бывает нам и гроб, и смерть, и мати. якоже Златоуст глаголет: Елицы во Христа крестихомся, во Христа олекохомся, спогребохомся Ему крещением в смерть. Да якоже Христос воста от мертвых, тако и мы во обновлении жизни да ходим. якоже глаголет апостол. [евангелие учителное на Крещение Господне] И яко крещение образ всыновления приемлем. и чада Божия бываем, по пророку, аз рех бози будете, и сынове Вышняго вси. [Катихизис большей, глава 60] И яко от всяких богомерзских ересей, и злых дел очищаемся, и самого Христа Бога имети в себе сподобляемся. и наследницы царства небеснаго бываем, без него же ниже оставления грехов, ниже очищения ересей, ниже свобождения вечных мук получаем. [Златоуст на деян. апостол.] ниже царствия небеснаго можем наследствовати. якоже сам Христос Бог рече, аще кто не родится от воды и Духа, не может в царство небесное вънити. Иоанн, зач. 8, глава 3. Бракосочетания же тайна, ни единаго от сих не заключает в себе таиньства. ниже очищения грехов, ниже свобождения вечных мук, въсыновления подает, ниже царства небеснаго сподобляет нас. но точию мужа и жену во единомыслие и любовь спрягает, и во едину плоть составляет. и сие не иноя коея ради вины, но точию нашего ради плотьскаго неможения нам творимо бывает. не можеши рече внити же девством, въниди браком. девьство бо ангельское житие. и елико ангели человеков честнейшии, толико девьственницы оженившихся честнейшии суть. по преподобному Иосифу [Иосиф Волоколамскии, слово]. ащели же существо ангельское честнейше есть существа человеческаго, якоже и девьственницы оженившихся честнейши же, ащели же и едино стадо бысть ангел и человек, ради богоугождения, обаче едино другаго честнейшии (суть) по естеству своему. Тако и таинства церковная, едина другой честнейшии, и спасеннейшии бывает, по Божию устроению, аще и вси благодатию Святаго Духа освящаются. но яко крещение, и покаяние, паче прочих таиньств спасению нашему нужнейшии, и кроме сих несть мощно нам получити спасение. прочия же тайны, в посредстве, яко миропомазание, маслопомазание, и евхаристие, ихже аще кто и не сподобится нужды некоя ради, спасен быти может. очесом блаженныи Гавриил архиепископ Филадельфийскии, в книзе о 7-ми тайнах свидетельствует. И аще миропомазание и маслопомазание, таже и причастия тела Христова, сия тайны, на очищение души и тела, и на спасение вечное нам подаемыя, и к будущей жизни нас приводящия, в посредьстве полагаются, и кроме сих спасение нам определяется; кольми паче тайны бракосочетания, от нужнейших таин, сиречь крещения, и покаяния имать отделитися, яко веры во Христа не утверждает, и корень христианской веры не бывает. таиньства православныя веры в себе не заключает. и беззакония и нечестия никакова нас не очищает. и ветхаго человека не совлачает, и в новаго нас не облачает. к будущей жизни нас не устрояет. того ради  с тайною спасенаго крещения во едино съпрягатися не может. яко же и самех иерейских молитв бывают прошения сицева, сопрязи их в любовь, соедини их в плоть едину, даруй им плод чрева, и прочая молитв тех речения, о благополучном их в жизни сей пребывании от иерея распростираются. спасенное же крещение, таиньство православныя веры исповедует, веру совершает и утверждает и извествует. всякое беззаконие и нечестие очищает, ветхаго человека нас совлачает, в новаго же Адама, еже есть во Христа нас облачает. царствия небеснаго сподобляет. древнюю же Адамлю красоту юже име прежде преступления нам подавает. аще ли же тако, яко святое крещение древнюю красоту, Адамлю юже име в раи прежде преступления, нам подавает, убо явственно есть, яко Адам девьство и чистоту име в раи прежде, а не брачное совокупление по преступлении Адамове, по изгнании из рая, по обнажении одежди боготканныя. по еже смертию осудитися им,  и в беззаконии сущим осужденным, позна Адам жену свою, и заченши роди Каина. яко же и пророк глаголет: Се бо в беззаконии зачат есмь, и во гресех роди мя мати моя. псалом, 50. потом и брачное спряжение прощено бысть, по ветхому человеку, сиречь по плоти на дух воюющеи. Но понеже убо яко святое крещение, ветхаго человека с деяньми его нас совлачает, и в новаго Адама, сиречь во Христа облачает. и древнюю красоту, Адамлю, сиречь девьство и чистоту нам подавает, а не по ветхому человеку брачное съпряжение. Елицы бо во Христа крестихомся, во Христа облекохомся, съпогребохомся убо Ему крещением в смерть. да яко же Христос воста от мертвых славою Отчею, тако и мы во обновлении жизни да ходим, себо сообразни есмы подобию смерти Его. сие ведяще, яко ветхии наш человек с Ним распятся, да упразднится тело греховное, яко ктому не работати нам греху. якоже рече апостол. Како же Феодосиева согласия держащиися, сицевая дерзают смешати несмесная; иже зле о сем мудрствуют, якобы тайна бракосочетания, с тайною святаго крещения въкупе совершается и освящается; а сия тайны, не едину силу имеют, и не едино в себе заключают таиньство. и не едино спасеное творят устроение, но различное, якоже въпреди показася, того ради въкупе спрягатися не могут. И яко крещение спасению нашему толь нужно есть, яко кроме того несть мощьно спасение нам получити. бракосочетание же спасению не нужно есть, яко кроме того спасение получить мощно. И яко крещение 1-я тайна церковная, брак же 6-я тайна нарицается. и между ими посредство 4 тайны обретают. по церковному же чиноположению и уставу, каяждо тайна во свое время, и число, и место приимати повелевается, а не безчинно и безвременно восхищати я. яко святое крещение приемлющей миром помазуется, потом, но прежде венчания жениха, и невесту, исповедати, и святых таин причастить, и потом браковенчание чинить, и венчать во ин день, а не в той в ня же причастишася. и тако святое крещение прежде литургии творити повелевается, яко да сподобится на литургии святых таин новопросвещенныи, венчание же не прежде литургии, но после творити повелевается. А по Феодосиеву учению, аще брак с крещением въкупе съпрягается, и совершается и освящается. то миропомазанию, покаянию же и святых таин телу и крове Христовы приобщению, всем сим святым 4-рем тайнам места и времени ко употреблению отнюд не обретается, и хотящим по достоянию прияти сия, отнюд неудобно есть. и сицевое их Феодосиевых ученик, о тайнах церковных мудрование, древлеправославной церкве Христовой весма чюждо есть. И яко крещения тайна, по нужди и кроме священства, кроме видимой церкви, от простолюдина совершитися может, очесом и правилная являют свидетельства. браковенчание же не тако, но кроме священства, и кроме видимой церкви от простолюдина совершитися не может. И яко еретическая тайна сиречь брак, или поганскии, с тайною христианскаго крещения смеситися въкупе и освятитися не может, понеже аще крещение от еретик отметается, брак же како прият быти имать, наипаче же яко кроме иерейскго благословения и молитвословия, понеже брак иереом токмо, а не простолюдином освящается. Ащели же сия тайна брак еретическии, или поганскии, иже священными лицы освящается, по нужди же и от простолюдина может тою же благодатию Святаго Духа освятитися; убо благодать Всесвятаго Духа и несвященным таже действует, то и вся тайны церковныя несвященныи простолюдин может строити, и благодать Духа Святаго яко брак оныи, тако и прочая вся освящати имать. паче же убо еретическая хиротония в крещении может освятитися, яко сия паче брака спасению нашему нужнейша. и тако мудрствующим, долженствует прежде не брак уставляти, но видимыя церкви строити, священников и весь причет церковныи освящати, тайнодейства церковная вся строити; и вся священная действа совершати, благословляти и освящати. Ащели же сего сотворити несвященнии не могут, то почто мудрствуют и о таиньстве брака, еже от простолюдина совершитися. действо бо сие иерейско есть. благословением и молитвословием освящается. и сице мудрствующии о тайне брака, недалече бывают тех, иже кроме священства священная действуют. иже суть горше самех нечистых бесов осуждаются. никтоже бо дает что не имея, и ничтоже приемлет кто от неимущаго. аще и мнится имети, темже и прельщен есть. и веруя быти священник, или крещен, несть, и погибели сих крестивыи повинен. [Номоканон, лист 715].

 

… [пропуск листов]

 

клинаниих, всяко отражает мнение, и суетное сопротивословие.

 

Статия, 9-я:

Вся яже на торжищах продаемая брашна, скверна и нечиста быти веруют. и вся сия иерейским молитвам подлежаща быти мудрствуют. и въместо иерейских молитв, по 100 поклонов во освящение брашну оному молятся. а кто по их уставлению 100 поклонов за оное брашно не молится, и таковых они осуждают скверноядцами.

 

Возобличение:

Апостол Христов Павел, в послании к коринфом, в зачале, 146-м, пишет сице: Все еже на торжищах продаемое ядите, ничтоже сомнящеся за совесть. Господня бо земля, и концы ея. Толкование Златоуста [Бесед. 25, во глав. 10, лист 830, и 831]. Истязовати каково есть брашно продаемое не повелевает. но без всякаго сомнения купити и ясти повелевает. И Афанасии Великии [в книзе Никонове], странным сущим, в пути, и в корчемницах и у неверных, купити брашно, и в особне месте ясти повелевает. [Никон преподобныи, в слове, 62, в начале его. воображаем о снеди подобающей] Иже в мире живущим, и како достоит питатися християном. Ниже: Все еже разумницы на торгу продаемое ядите, ничтоже востязующе. сей преподобныи Никон бе в лето, 6580. обретаем же и святых отец наших, Антония Великаго, и Саву Освященнаго, и Макария Желтоводскаго, и иных святых, иже от неверных пищу приемлющих себе и ядущих. И по сих свидетельством, Феодосиевы ученицы обличаются, яко чрез апостольская и отеческая предания тако мудрствуют, еже о брашне продаемом скверно быти непщующе, и ясти не повелевают. но чрез предание святых апсотол, и святых отец своесмышлением по 100 поклонов предаша молитися. и сицевое их учение, или рещи благовествование, паче апостольскаго, благовествования, паче святоотеческаго учения, паче святых угодников Божиих жительства и пребывания, того ради и клятвам, и анафемам от святых отец за сие подпадают. А апостол Христов Павел, к галатом пиша сице глаголет [зач. 199]: Аще мы, или ангел с небесе благовестит вам, паче еже благовестихом вам, анафема да есть. Златоуст же святыи толкуя сие, сице глаголет. Яко не рече аще противная возвестят, или все превратят, но аще и мало нечто благовествуют вам, паче еже благовестихом, анафема. аще и худое что подвигнет анафема да будет. Такоже и в Соборнике, на листу 389-м пишет: Проклят разоряяй уставы отеческия, и непременныя уставы церковныя. яже положиша отцы твои. и в книзе о вере [глава 23]. Сего ради всеми силами всяк православныи тщатися повинен есть, яко да в приятии новин, под анафему не подпадет, при которой искушения казни злыя сретают небрегущих о сем.

 

Статия, 10-я:

Во святую Пасху, и во всю светлую седмицу, на заутерни, на часех, на вечерни, и на молебне, егда настоятельствуяй глаголет отпуст. и крест воздвизая возглашает 3-жды, Христос воскресе. а христиане руки горе воздвижюще отвещают, 3-жды, воистинну воскресе. и сицеваго обычая в древлеправославной церкви еже руки горе воздвизати на отпусте, отнюд не обретается.

 

Возобличение:

Понеже в древлеправославной церкве Христове обычай сицев обретается. еже древлесвященницы, егда на светлой недели отпуст глаголаша, и крестом осеняюще возглашаху 3-жды, Христос воскресе. а людие же крест десницею на себе изображающе, отвещаваху 3-жды, воистинну воскресе. и сицевыи обычай есть в церкви христианской…

 

… [пропуск листов]

 

лично есть. и сим неприличным чиносодержанием, древлецерковнаго обычая отчюждаются, и крестному изображению аки сопротивни быти являются. и с древлеправославною церковию, яко в писанном, тако и в неписанном законоположении и предании весма несоглашаются, но сопротивляются, очесом прежде изъявися;

 

Надсловие:

Сия вся, яже в десяти статиях о новомудрствовании и предании Феодосиеве предъявихом, и яковое ныне ученицы его содержат законоположение. еже святей древлеправославней церкви Христове чюждо, и святым отцем, и учителем древлецерковным есть несогласно. и православным християном держащимся святоотеческаго предания, и хранящим древлецерковное благочестие, таковое их новоумышленное мудрование, и предание, весма сомнително есть. Чесо ради сомнящеся таковаго их мудрования и содержания, яко не по преданию святых апостол, и святых отец таковая содержаще мудрствуют. Того ради и общение с ними имети опасаемся. помняще апостольское слово заповедающее сице [послание к селуняном, 2. зач. 277]: Повелеваем же вам братие, о имени Господа нашего Iсуса  Христа, отлучатися вам от всякаго брата безчинно ходяща, а не по преданию яже от нас прияша. И паки: не примешайтеся ему да посрамится. И сицевая апостол Павел не о отступльших веры Христовы пиша глаголет, и не о тех иже церковная предания презирают, но о тех иже братия наша о Христе, но безчинно ходят, не по преданию апостол, яко же о них сицевая винословия глаголет: Слышахом бо некия безчинно ходящия у вас, ничто же делающия, но лукавно обходящияся. таковым завещаваем, и молим, о Господе нашем Iсусе Христе, да со безмолвием делающе свой хлеб ядят. и о сих апостол пиша глаголет, аще кто не послушает словесе нашего, посланием онем возвещайте, и не примешайтеся ему, да посрамится. И аще апостол Павел, о сущих христианех пиша, и братиею нарицая, отлучатися и не примешатися повелевает да посрамится той брат отлученныи. Колми убо паче, иже в православной вере погрешивших, кольми паче в преданиих церковных неправославно мудрствующих, и несогласно святым отцем учащих, и неприличная Христовы церкве своесмышленная предания содержащих, святоотеческая же предания презирающих, и под анафему и под клятву святых апостол и святых отец многочисленне подпадших. отлучатися, и не примешатися достойно и праведно есть. якоже Феодосии со ученицы своими, в таковая дерзнутия смеяху поступити, еже писанная, и неписанная предания церковная презирати, новая же по своему хотению уставляти. яже Духом Святым писанное уничижати, своя же паче Духа Святаго мняще лучша учения вносити. како не во отступницех, и како не в еретицех таковии въменяются быти. по святейшему Мелетию патриарху Александрийскому. Також и по преподобному Никону Черногорцу, еже в слове, 57-м пиша, сице глаголет: Ибо всяко уклонение от православных велении, отступление есть от соборныя и апостольския церкве. Тойже о изглашении правил пиша, сице глаголет [Кормчая, глава 71]: Аще кто от угодных богоносным отцем поколеблет что, не ктому се смотрение нарицает, но преступление предании, и к Богу нечестие. и сия правила, якоже предрекохом, подобне же и градстии закони сице глаголют: яко еретик есть, и еретическим подлежит законом, аще и мало что уклоняяися от православныя веры. И по святейшему Мелетию Александрийскому: Или не явно есть преступление таковых, еже святыми отцы писанное Духом Святым предание и чины, во времена подобно положенныя развращати, своя же мнящи паче Духа Святаго лучша учения вносити, како не во отступницех Божиих въменятся таковии. И по Златоусту: яко же бо царских цатах, аще и мало от образа пресек, всю цату непотребну содела, сице и от здравыя веры, малейшую часть превратив, все превратив, на горшее производя от начала. И по преподобному Никону Черногорцу: Вся яже чрез церковная предания и учительства, и воображения святых и приснопамятных отец, новосотворенная и соделанная, или посем содеятися хотящая, анафема. [Кирил. глав. 34, лист 305] Темже вся кому подобает всею силою держатися церковнаго предания от божественных апостол Духом Святым уставленаго. Прикладающих же что, или отъемлющих, или инако претворяющих, аще и сам будет крайнейшии учитель кто, никакоже слушати, но удалятися таковаго; якоже божественнии апостоли научают нас, сице глаголюще: Аще мы, или ангел с небесе благовестит вам, паче еже благовестихом вам, анафема да будет. Такоже и в евангелии учителном, в неделю православия. Смеющих же инако мудрствовати и учити, или по мерзских еретик церковная предания презирати, новая же некая разумевати. /ниже:/ или разумевати строптиво и коварно, еже развращати что от обычных предании вселенския церкве. /ниже:/ аще епископи суть, или клирицы, изметати повелеваем. аще ли иноцы, или бельцы, от причастия да отлучатся, святыи собор сия предал есть. Вси убо тако веруем. вси убо тако мудрствуем. вси тако похваляюще записахом. сия вера есть святых апостол. сия вера есть святых отец. таковая вера есть православных всех. сия вера вселенную укрепи. верующе во единаго Бога в Троицы певаемаго, и святыя иконы целуем. Елицы тако не мудрствуют, прокляти да будут, елицы тако не мудрствуют, далече от церкве святыя да отлучатся. И в Соборнике, на листу, 389-м. Проклят разоряяи уставы отеческия, и непременныя уставы церковныя. яже положиша отцы святии. И в книзе о вере [глава 23]. Сего ради всеми силами всяк православныи тщатися повинен есть, яко да в приятии новин, под анафему не подпадет, при которой искушения казни злыя сретает небрегущих о сем. И в евангелии учителном, в неделю православия, лист, 45. Мы убо древнему законоположению церковному последуем. мы заповедания святых отец соблюдаем. мы прилагающих что, или отъемлющих от церкве, проклинаем. мы вводимое новозаконение, християнохулник еретик проклинаем. И в послании к Тимофею, апостол Павел пишет сице [глава 3, зач. 302]: Еретика человека, по первом и по втором наказании отрицайся. Златоуст в толковании: Не точию ертиков, но аще и христианстии учителие о вере погрешают, бегати повелевает. якоже на листу 2508 пишет сице: Яко подобает повиноватися учителем, и священником, и не судити их, аще и житие имут укорно, аще же о вере погрешат, тогда не подобает покарятися им, но и отбегати, и судити их. И паки: Аще убо веры ради, бегай его и отрицайся. не точию аще человек бы был, но аще и ангел с небесе съшедыи. И в завещании апостол [книга 8]. во главе, 19. Якоже бо доброму пастырю, непоследующая овча, волком предлежит во истление. сице и лукавому пастырю последующее, явлену имать смерть, яко пояст е. темже бегайте губителных пастырей. Афанасии Великии [в книзе Никона Черногор. глава 25]: Всяк рече приемыи от Бога разсуждение, последуя пастырю неискусну, мучен будет. Той же паки [Иосиф Волоцк. слово, 13]: яко тяжчайшии и страшнейшии всех грехов, грех еже в ересь въпасти. И паки [Скриж., лист 20 и 28]: Ересь глаголется, от еже избрати свое, и сему последовати. Риторика [местоименителной 3]: Что глаголется ересь; ересь убо сказуется от греческаго языка, самомненное избрание, егда кто свое мнение любит. яко ниже самыя мученицы, аще и много страдали, а ересию повреждены, спастися не могут. Аможе пишет сице: в коемждо роде содержится ересь; во лжи. Максим Грек пишет [слово 78]: Еретик бо он есть, кто мнению своему лживому крепце прилепляется. В книзе о вере, сице пишет [глава 25]: И кто им последует, тоже на души своей подъяти имать. зане кто пристанет ко отлученным, и той отлучен да будет. И по Златуосту [Бесед к рим. глава 12, лист 388, беседа 22]: Ащели же негде благочестие вреждаемо увидиши, не предпочитай соединение паче истинны, но стани добле, даже до смерти. И паки [евангелие учител. в неделю всех святых]: Не всяко мирование и совокупление добро, но бывает егда распря и разлучение велие божественное дело. никтоже убо сим образом любовию да прилежит лукавым. ниже мира имети с ними. но аще отец, аще мати, аще чада, аще братия, супротивнии обретаются закону Христову, сопротивися им, яко врагом истинне. И по всем сим священных писании свидетельством, о Феодосии оном учители, и о ученикох его, усмотрехом, яко они смеяху инако мудрствовати и учити, и церковная предания презирати. стропотно же и коварно разумевати, еже развращати от обычных предании вселенския церкве, убо разумеем, яко уклонишася от православных велении, и отступиша от святыя соборныя и апостольския церкве, и под анафему и под клятву святых апостол, и святых отец подпадоша. яко же вышеписанная свидетельства являют. предания бо святоотеческая, и содержания древлецерковная, нарицаются верою. зане вера не в стенах заключается, но в неразсудном сложении, святых богодухновенных писании, святоцерковнаго предания. якоже святии отцы от церковных предании пиша глаголют сице [евангелие учител. в неделю православия]: Сия вера есть святых апостол, сия вера есть святых отец. таковая вера есть православных всех. сия вера вселенную укрепи. И аще предании церковных всеверная содержания нарицаются верою; убо явьственно есть, яко елицы погрешиша о преданниих церковных, погрешиша о христианской вере. того ради и еретиками таковии осуждаются быти, зане погрешиша о вере. того ради и под анафему, и под клятву сицевии от святых отец подпадоша. Темже и мы ныне, всех таковых, новомудрствующих учителей, яко в вере погрешивших, и своесмышленне мудрствующих, и новозаконенная предания держати повелевших, не православными, но еретиками быти разумеем. и новосотворенная и соделанная чрез предания и учительства церковная, анафеме, и клятве отдаваем. И сицевых учителей и единомудрствующих и согласующих им, бегати, и удалятися научихомся. и отлучатижеся, и не примешатися им по святых апостол, и святых отец учениям должни есмы. очесом вышепредложенная священных писании свидетельства явьствуют. И сице тако научившеся, в христианской вере непоколебимо пребывающе, и предания церковная невредимо соблюдающе, в православии жизнь свою скончати усердствуем. и в будущем веце, вечную жизнь себе наследствовати желаем. Еже буди всем нам получити, благодатию и человеколюбием, Господа Бога Спаса нашего Iсуса Христа. Ему же слава, со Отцем, и со Святым Духом, ныне и присно, и во вся веки веком, аминь.

Hosted by uCoz