Сборник «Альфа и омега» (издан в Вильне, 1786 г.).

Предисловие составителя и глава 73 (буква Ф), «О философии, или люблении мудрости духовной».

Кн. Альфа и омега. Предисловие.

Иже есть от Бога, глагол Божиих послушает [На поле: Иоанн, глава 8].

[св. Иоанн Златоуст] Блажен град от благочестивых царей царствуем, и монастырь от воздержных и искусных строим, и корабль от искусных управляем. Горе же граду от нечестивых царей царствуему, и монастирю от сластолюбивых и тщеславных строиму, и кораблю от неискусных управляему. Град убо и страны пленены будут, и монастирь запустеет, а корабль разбиется. Горе всем еже о заповедех Господних нерадящим, и о своем спасении небрегущим. писано бо есть: проклят всяк творяй дело Господне с небрежением. о таковых речено бысть: лучше бы им не родитися.

Ниже: Предисловие, ко желающему спасения читателю.

О Господе радоватися, здравствовати сугубо, и умудрятися духовно, усердно желаю. Триех ради вин пред се взях возлюбленныи читателю сию душеполезную книжницу надписать. Первая: яко божественными писании по глаголу Господню: не о хлебе едином жив будет человек, но о всяком глаголе исходящем изуст Божиих душа питается [Матф. глава 4]. Вторая, яко в последняя времена зело разслабеша и обленишася (нетокмо мирстии, но и иноцы) во чтении и стязании книг святых отец. и в гонении триех врагов: мира, тела, и диавола. не имамы (по святому апостолу) оружия и меча духовнаго, иже есть глагол Божии, на побеждение сих. Третия, яко пакость душевредная зело распространяется, зане благочестивии, премудраго наказание глаголющее [притчи: глава 5]: Сыне пии воды от своих сосудов, и от своих студенцов источника дерзновенно презирающе, словенским смиренным языком гнушаются. и от чюжих возмущенных вод наблеваных прелестию лакоме напояваются. учения здраваго непослушающе и от истины слух отвративше, к баснем уклоняются [2Тим. глава 3, ст. 4]. Помяновеных деля триех вин от божественаго писания (по числу словенских литер, удобнейшаго ради обретения) лечбу, на уврачевание душевных язв и телесных страстей, и к сопротивоборству врагов. в сие (не по своей силе и недоумению) великое дело понудихся, известно ведыи, яко от наученных за грубость и простоту уничижен имам быти, но не человекоугождению святое писание взирати повелевает, но ко исправлению в житии. [Слово: о язве града] Св. Григории Богослов глаголет: Премудрость первая, премудрость презрети, иже в слове лежащую: и обращения речем, нечистых излишних сопротивлении. ниже: не бо иже в слове премудр, той мне премудр. ниже иже язык убо удобь обращаем имея, душу же (в духовных) не наказану. якоже от гробов, елицы внешними суще благолепни и красни, внутрь же мертвыми смердят, и многу воню покрывают. ниже: Премудрость не яже словом светящаяся, но яже делы обличаемая разум бо благ всем творящим я рече, а не проповедующим [псалом 110]. добро и зело благо премудрость во смирении (глаголю) и исполнении заповедей Божиих. Велика же пропасть (по святому: Епифанию) неведети писания, и буему той уподоблен. Но к предлежащему возвратимся. Христос Спас и Бог глаголет [Иоан.: глава 5]: Испытайте писания, яко вы мните вних имети живот вечныи. и паки [глава: 14]: Аще кто любит мя, слово мое соблюдает. а не любяй мя, словес моих не соблюдает. и паки [Лука: глава 14]: Блажени слышащии слово Божие и хранящии е. Ниже [1Тим. глава 4]: Апостол Павел наказует питатися словесы веры и добрым учением и внимати чтению и учению, и пребывати в них. [Притчи: глава 16] Сотове бо медовнии (по премудрому) словеса добрая, сладость же их исцеление души. Святии бо вси радовахуся веселящеся о словесех Божиих, яко обретши богатство много. Но да не будет нам во студ еже присно в псаломских словесех пред Господем Богом погрешаем глаголюще. святых писании, уклоняемся от пути праваго к мирскому, и плотскому хотению и мудрованию, и далече бываем от Бога. а еже страшнейше, еже непопути Господи, уклонившеся от Бога и святых его, прилагаемся диаволу, иже всяко тщится погубити всех. Сия вся разсудив возлюбленне, восприими ползу от святых писании, бежи от всепагубныя лености, да не гладом душа твоя умрет. и да не раскаяватися имаши во тще во веки. потщися стати противу врагов, борися и побеждай мечем духовным. живо бо слово Божие и действенно, и острейше паче всякаго меча обоюду остра. точию со страхом и смиренною мудростию, испытай и почитай со вниманием, а не нерадиво: обрящеши велию ползу, и путь правыи своему спасению, и победу на враги видимыя и невидимыя, и удовлеешися сим, и образ благ покажеши себе всем зрящим к ползе, и от погибели греховныя в покаяние, и от смерти в живот, от нетления в нетление, от многообразных и различных непрестанных мук, в неизглаголанная и присно пребываемая водворения радости небесныя. их же да сподобит нас Бог милосердием своим получити: ему же слава честь и поклон во вся веки, аминь.

[...]

О философии, или люблении мудрости духовной. Слово 21. Глава 73. Роздел 1.

Премудрости наставник, Христос Спас и Бог наш, духовне учит глаголя. Будите убо мудри яко змие, и цели яко голубие [Матф. гл. 4; Лук. гл. 10, 18]. Исповедаютися Отче небеси и земли, яко утаил еси сия от премудрых и разумных, и открыл еси та младенцем [Матф. гл. 12]. Царица южьская прииде от конец земля, слышати премудрость Соломонову, и се более Соломона зде [глава 13]. Отверзу во притчах уста моя, отрыгну сокровенная от сложения мира. Ваша же блаженная очеса, яко видят, и уши ваши яко слышат [зач. 21]. Вода юже аз дах ему, будут внем источник воды текущия и живот вечныи [Иоан. гл. 4]. Кто премудр и худог во вас, да покажет от добраго жития дела своя в кротостней премудрости [Иаков гл. 3]. аще же зависть горку имате и рвение [растерзание] во сердцах ваших, не хвалитеся ни лжите на истинну, несть сия премудрость свыше нисходящая, но земная, тщетная бесовская. Мудрование плотское смерть есть, а мудрование духовное живот и мир, зане мудрование плотское вражда на бога [Рим. гл. 8]. закону бо божию непокаряется, ни может бо. И немудрствовати паче еже подобает мудрствовати [глава 12]. но мудрство в целомудрии, комуждо якоже Бог разделил есть меру веры. Хощу вас мудрым убо быти во благое, кротким же во злое [глава 16]. Погублю премудрость премудрых и разум разумных отвергу. Зане буее Божие премудрее человек есть. и немощное Божие, крепчае человек есть [ниже: глава 2]. Буяя мира избра Бог, да премудрыя посрамит. Яже глаголем не в’наученных человеческия премудрости словесех, но в наученных Духа Святаго. Никтоже себе да прелщает, аще кто мнится мудр быти во вас во веце сем, буй да бывает. яко да премудр будет. премудрость бо мира сего буйство у Бога есть [глава 3]. Блюдитеся да некто вас прелстит будет философиею, и тщетною лестию, по преданию человеческому по стихиям мира а не по Христе [колас. глава 3]. Горняя мудрствуйте а неземная. Зачало премудрости страх Господень [притчи. глава 3]. Блажен человек иже обрете премудрость, и смертен иже уведе разум. лучше бо сию куповати, нежели злата и сребра сокровища. честнейшая есть камении многоценных. несопротивляется ей ничтоже лукаво. Возненавидеша бо (злии) премудрость, страха же Господня неприяша [глава 1]. Яко Господь даде премудрость, и от лица его познание и разум. Зачало премудрости, стяжати премудрость, и во всем стяжании своем стяжи разум. Сыне послушай мене. и блажени иже пути моя сохранят. сулышите наказание, и умудритеся и не отбегайте [глава 20]. Взыщите премудрость да поживете [глава 9. ст. 8]. Обличай премудра и возлюбит тя. не обличай злыя, да не возненавидят тебе. Премудрость. Премудрости никогдаже одолеет злоба [глава 7]. Зачало бо ея любы и соблюдение закону. Труды ея суть добродетели, целомудрию же и разуму то учит. правде и мужеству, их же потребнее ничтоже есть в житии человеком. Злато в сложении тоя песок, и яко кал мнится пред нею сребро [7]. Сея ради приимут безсмертие в память вечную. Суетни человецы вси, в них же не подлежит о Бозе премудрость [глава 13]. Горе мудрым в самех себе, и пред собою художным [хитрым]. Сирах глава: 1. Корень премудрости боятися Бога, и ветви ея долгоденствие. Вожделев премудрости, соблюди заповеди, и Господь ти ю подаст. Наследие мое паче сота медовна [сахара], ядущии мя еще возалчют, и пиющии мя еще вожаждутся. Велик есть иже премудрость обрете, но несть паче боящагося Господа. О высокотворной и превеликой вещи, душеспасенной мудрости, з прилучшейся литеры (над силу и худыи разум мой) писати понудихся, помянух реченное: Господь умудряет слепца [псалом: 145]. усумневатися ми мало, понеже не своя си, но предложено свидетелство божественнаго писания, яко солнце сияет и увеселяет с любовию чтущих и хранящих ю. положих же не всуе но да поучимся в ней. источник бо и мати и корение мудрости добродетелью. а все лукавство от безумия, и неприлежания в писаниях зачинается. Сего потщимся часто, не вотщетной, но душеспасенной поучатися, да убегнем безумия святых святых послухаймо. Св. Василий великии. на стих евангельскии [глава 146]. Мудрии убо яко змия есть. иже с назиранием и разсмотрением силнаго и поспеяния ко благопокорению слышащих учителство устрояя. Цел же яко голубь, иже ни в помысле приемля еже отмстити наветующему. пребываяй же в благодетелстве, по апостолу: выже нестужайте си доброе творяще. на проповедь бо ученики посылая Господь сия заповедует, идеже и премудрости бе потреба ко еже увещати и незлобия неветующим. Тойже. О смиреномудрии [слово 3]. Аще князь мира первыи и великии и невидимыи, мирскою мудростию умудривыися, ят быв от своих умудрении, и в последнем устроився безумии. много паче иже от оного ученицы и ревнители, аще и тмами умудряются глаголюще себе быти мудри обуяша; [зри ниже:] Гнило есть человеческия премудрости лихоимания, маложе и смиренно паче нежели велие и высоко, якоже никтоже добре смысля, ниже о премудрости своей велемудрствует, ниже от иных коих. но покорится святому писанию наказующему: да нехвалится премудрыи премудростию своею. но что похвала истинная: еже знати и ведати Господа Бога, и творити волю его. [Матф. 36] Св. Феофилакт: Змия все тело дает убивати, главу же блюдет. Тако и христианин, вся своя отдати и тело свое биющим, главу же еже есть Христос, и еже в него вера да блюдет. тесным путем ходя, и ветхаго человека совлачаяся. а понеже змии вредны суть, велит нам Господь целим быти яко голуби, простым без’лукавства и пронырства. [2 глава 1] Св. Фома, иже в малеонстей горе постився. Аще еси разумен, и всю библию изуст имети будеши, и всех любомудрец повести. что от сего за помощь, несущи благодати Божией и милости; суета суетствии, и все есть суета, кроме любити Господа Бога и работати единому. Сия есть высочайшая премудрость уничижением мира влекущеся к царствию небесному. Тойже. [зри глава: 2] Уншии есть во истинну смиренныи делатель, иже Богу работает, нежели гордый мудрей, иже самого себе оставивши, течению небесному внемлет; престани от излишняго разумения желания, ибо много тамо обретается раздор и прелесть. [ниже:] Во истинну ученыи есть, иже вся земныя вещи тако себе имать яко гной, да Христа приобрящет. истинноже благоумным есть, иже волю Божию творит своюже оставляет. [на 2] Тойже. Сокры тайны Бог, от мнящихся быти мудры, не яко завидя, или повинен неразумию. но зане недостойны быти за то еже мнети быти мудрым, ниже призовет Бога, и Бог непризываем ниже поможет. Не открывает многим таин, да не болми мучитеся, яко поведении в небрежении начнут жити. [Иоан.: 12] Св. Феофилакт. Даю аз убо воду жаждущему, еже нетолика бывает но умножается, и источник бывает. якоже даде Павлу, Анании на оглашение, источник мал воды, и той от Иеросалима даже до Иллирика учением устремився и во всю вселенную. [Богос.] Св. Григорий Богослов. Слово, на Просвещение: Начало бо премудрости страх Божии, яко степень и основа на совершение. идеже бо страх Божии живет, все лукавое деяние отбегает. страх бо воводит деяние. деяние же основа видению. идеже бо страх, ту и заповедем соблюдение. идеже святится плоти чистота, рекуже и души чистота дебродетелей ради: ту светлость разума Божия знатия. восходящи любовию прилепляющимся ему. [слово: 17] Тойже: О нищелюбии. Потребне мню убо трудолюбию датися истинне, или премудрейшим сия солюбомудрствовати духовнейшим. понеже иже дар се един, а не всем разумен. или чистотою жития той ловити, и паче истинныя премудрости премудрость искати. [слово: 33] Тойже: О язве града. Сию хвалю премудрость и лобзаю, еяже ради безроднии прославишася. и в нейже уничижении предпочтошася. и снеюже вселенную всю евангелскими узами уловиша, совершенным и сокрушенным словом, упражняемую премудрость победивше. [Кор.: 30. Бес. 7] Св. Иоанн Злат.: Не внешнеюли премудростию, та бо якоже некая рабыня безчествованна, неоставлена бысть внутрь внити, и приникнути во владычния тайны. зришили колика среда премудрости сея и оноя: яже и ангели незнаху сим нас та показа. внешьняя же противное сотвори: неточию ненаказа, но и возбрани и прегради. [Кор.: бес. 10] Тойже: Егда убо внешняя премудрость вредна есть, духовная же не суть от вас данна. откуду имаши хвалитися; и о внешней убо премудрости никтоже себе прелщает, рече: понеже мудствоваху о временней вещи. здеже понеже вещь пользу имать, никтоже да хвалится. [Рим.: бес. 22] Тойже: Ничтоже бо тако отъемлет, и оттерзает от прочих, яко еже мнетися кому довлети самому себе. темже и в потребу друг друга поставил есть нас Бог. аще бо и мудр будеши, иного требуеши. Ащели мнишися нетребовати, безумнейши всех был еси и немощнейши, таковыи бо и пуста себе составит помощи и в них же аще согрешит, никоегоже восприимет, ниже исправления, ниже прощения, и Бога прогневит гордынею, и многая согрешит. [Тим.: бес. 5] Тойже. Сия слышащи непренебрезем болших наказания, аще и учителе есмы. аще бо Тимофей, емуже вси несмы достойни, приемлет завещания и учим бывает, да еще в чину учителском сыи, много паче мы; [Ефес.: бес. 24] Тойже. Ничтоже так творит сердца лубомудра, якоже скорбь. ничтоже вещь сладку тако, якоже рыдание еже по Бозе. идеже суть слезы, всячески тамо и скорбь. а идеже скорбь и любомудрие, многое и внимание. [Фил.: бес. 3] Велию и любомудрую душю ничтоже от печалных в настоящем житии может угрызнути, ни вражды, ни хуления, ни оклеветания, ни беды, ни наветы, и ничтоже от противных. [Ниже: зри] Истинное любомудрие духовное. а еже внешних, глаголы точию суть, и детей игралище. [Рим.: бес. 13] Мудрование плотское дебелое, еже о житейских вещех, и невозможно да покаряется Богови, злоба бо именуется, а мудрование духовное, благодать в действе со произволением благим дарует. [Колас.: бес. 9] Тойже: Божественных и человеческих вещей есть разум любомудрие, темже весть убо какова суть божественая, каковаже человеческая: и сих убо удаляется, онаяже соделовает: весть и Бога благодарити от всех. ничтоже быти непщует настоящее житие. сего ради ниже услаждается благими, ниже опечаляется в сопротивных. ниже ожидай иного учителя, имаши словеса Божия, никтоже тя научит якоже оная. [Псалом 110] Зачало премудрости страх Господень. Феодорит. Нудится убоятися его и трепетати, тобо есть первое писмо. Божия бо премудрость, не хитрость язычную глаголет: но разума Божия. страх бо начинающих есть, а совершенных стяжание любви. Разум же благ всем творящим его. [Тойже:] Толкование. Недовлеет бо к совершению разум, но требе есть деянию видение. и подобает сподобленному Божияго разума, делы разум красити, и тем услуговати подателю разума. [Афанасии] Елицы премудростное житие делают, сии суть исполнени премудрости и разума, и со многим страхом работают Господеви и претерпевают. [зри] Добродетельныи бо и страх Божии имея, всех есть разумнейшии. [слово: 1] Св. Исаак Сирин. Слово еже от деяния, сокровище упования, и недеянна премудрость, сокровище студа. якоже бо хитрец живописует воду на стенах, и неможет вода она жажду его устудити. тако и недеятелно слово. [слово: 82] Начало премудрости Божия кротость и простота, яже от великия и крепкия души, и твердаго мудрования бывают, и носит недуги человеча. [Рим.: 116. Гал.: 213] Вы бо рече силнии немощи немощных носите, и согрешающаго исправите духом кротости. и от плодов Духа Святаго числит апостол, смирение и терпение. [Часть: 1 ] Св. Никита Стифат. Видех под солнцем (рече премудрыи) человека в себе мнящася мудра быти, егоже видех и аз под жизнию человеческою уповающа на дела своя, и великая мудрствующа о человеческой премудрости земной и душевной, и не точию сея ради над простейшими вземлющася, но и иже в божественнем покои бывшим учителем Христовым подсмевающася вкупе и ругающагося: за еже глаголал их грубообразное, и занеже невосхотеша последовати избранием украшенных речей, внешних мудрец разума. ниже положением их благочиния ухитриша, в написанном учении их. емуже яко неведящу яко от Бога не украшение речем, ниже доброгласное гласов, но доброназнаменателное предпочитателнее и любезнее разумении. сию приреку притчю: Пес жив, той благ паче лва мертва. и благ отрок нищ и премудр, паче старя царя и безумна, иже неразуме внимати ктому. [глава: 147] Св. Григории синаит: от пос.: Любомудрец есть божественныи, иже деянием и видением неходатайственне соединивыися Богови, и друг Божии быв и глаголемыи, яко первую и творительную и истинную мудрость и лобзав и возлюбив паче всея иныя любве и премудрости и разума. Любославец же есть и не воистинну любомудрец. аще и слова любомудрые имя присвоивши, якоже рече великии Григории: отай иже премудрость сию содетелство Божия любве испытуя последнему изглаголанию а непохвалы ради человеческия любомудруяся имети показателне, яко да не любовещен будет, а нелюбомудрец естеством славныя Божия премудрости. Книжник же есть, иже во царство Божие научивыися. всяк же деянием во еже о Бозе видении упражняяся и в безмолвии пребываяй. иже износит от сокровища своего сердца новая и ветхая. сиречь евангельская, или от новаго и ветхаго завета, или учителская или отеческая, или законная и апостолская. сия бо суть новая и ветхая таинства, яже действенныи книжник износит, учився в богоугоднем жителстве. Книжник паки есть всяк действенныи, иже телесне и еще к деланием упражняется. Ветииже божественныи и естественныи, иже к разумом и словесем сущим посреди стояй и показателен сим в дусе разделителною слова силою. Любомудрец же истинныи, иже преестественное Божие соединение ведоме и неходатайственне имея в себе. Тойже [глава: 128]. Иже кроме Духа пишуще иже и глаголющи и церковь создати хотящии душевни суть. якоже негде рече божественныи апостол Духа неимущии. таковии бо повинни суть клятве глаголющей: горе разумным о себе и пред собою художным! о себе бо глаголют, а не Дух Божии есть глаголяй в них, по Господню словеси. от своих убо помысл прежде чистоты глаголющей: духом мнения прелстишася. о сем бо глаголет притча: видех мужа мневшася в себе мудра быти, упование же паче имать безумныи его, и еже не бывайте мудри о себе, премудрость бо запрещает нам; но и сам исполненыи Духа божественныи апостол, исповедует глаголя: ни бо доволни есмы о себе помыслити что, яко от себе, но доволство наше от Бога. и еже не яко от Бога, пред Богом о Христе глаголем. но таковых бо словеса не сладка и непросвещенна, не от живаго источника Духа, приемлющеже и глаголюще, но якоже от некоего езера тименнаго от сердца, пиявица и змия и жабы похотем. возношения и невоздержания имущаго питающее. и вода разума их смердящи, мутнаже и горка [тепла], еже пиющей на возгнушение и скаредие и блевание преминуеми обращаются. [патерик] Рече авва Иперхии: премудр во истинну той есть, иже словом не учит но делы добродетельными наказует. Святыи Исаия глаголаше: несть мудрость еже глаголати но еже разумевати время, егда подобает глаголати, разумом глаголи, внимай прежде глаголания, и отвещевай подобная. [зри] не хвалися разумом своим, никтоже ничтоже весть. Конец же всему, еже себе укаряти, и имети себе под всеми. Два философа приидоста ко святому, и глаголаста ему: Рцы нам отче еже на ползу; старец же нехотяше. По многом же молении рече: вем яко вы самолюбцы есте а не истинна философа. буди же вам философии дело се, еже присно поучатися о смерти, и молчание имети, и блюсти ум тайным поучением. Инаго. Непотщавыися кто проити собою тесныи путь евангельскии, и о очищении ума вознебрег: и аще и всю внешнюю мудрость извыче, слеп есть душею. писма точию убивателнаго предержится, Духа же оживляющаго не приемлет, и не точию инех но ниже себе совершенне исправити может. ин бо есть разум мира сего, ин же есть духовный. [зри] духовной бо премудрости от пресвятаго Духа учишася вси святии, и просветишася яко солнце в мире. днесь же не от Святаго Духа, но от Аристотеля, Цицерона, Платона, и прочих языческих любомудрцев разума [мудрити] учатся. сего ради до конца ослепоша лжею и прелстишася от пути праваго в разуме. святии от святых заповедей Христовых, и умнаго делания учащаго, сии же точию словес и глаголании учатся, внутрь же в души мрак и тма. на языцех же сих вся мудрость. якоже и западнаго сословия любомудрецы от тех навыкше, сопротивная церкви мудрствуют, истинну в неправде содержаще. и аще от святых писании что вносят, но неправо. сим и отступницы споследуют, хотяще в мире сем прелестной славы, покоя и богатств. Тыже возлюбленне, не гонися по внешней прелестной мудрости, но по мудрости Божией, еяже мир вменяет буйство быти, святым последствуя учися, да сними умудришися бо царствии Христа Бога почивая во веки, аминь.