Большой Катихисис, глава 72

Большой Катихисис.

О седми святых тайнах церковных. глава 72.

Вопрос. Потребно ли есть учение и опасное ведение о седми святых тайнах?

Ответ. Зело потребно есть. ими бо вси освящаемся, и спасение содержим, не ведыи же и небрегии о них, сей погибает. тем же прилежно со тщанием должни есмы поучатися о них, да познавше нас достойне их употребляем и спасени будем.

Вопрос. Скажи ми что суть сия святыя тайны?

Ответ. Тайны суть знамения верху являемая подлежащая чювством нашим благодати Божия исполненая, от Господа Бога законоположеныя, яже оправдание и освящение наше, не точию знаменуют но творят е и совершают. якоже святыи Иоанн Златоустыи в Матфее беседа, 83. глаголет, к народу. яко Господь Бог глубиною мудрости своея, человеку видимым телесем облеченному, под видимым и телесными знамении, невидимыя дары своя дает. ибо аще бы точию едину имел человек душу без телесе, яцыи же суть ангели. то убо без сих вещественных и чювственных и видимых знамении взимал бы дары Божия. но понеже телесем обложен есть человек. сего ради кроме видимых и чювственных знамении, благодать Божию не может прияти.

Вопрос. Сицевыми ли суть знамениями благодати Божия святыя тайны, яковыя же бо тайны и знамения благодати древле даде людем своим. Ною на небеси дугу, яко уже не имать мира потопити водою. Аврааму обрезание, яко от семене его Господь наш Исус Христос родитися хощет. Гедеону росу и сухо на руно, яко имяше мадиамы победити. Езекию царю уже умирающу воспящение солнца на десять степений, яко еще имяше пожити, 15 лет. евреом фаску или агньца, яко хотяху спасени пребыти с первородными своими, от убивающаго ангела, и преити из Египта, Чермное море. сицевыми ли суть знамениями сия святыя тайны?

Ответ. Не сицевыми суть, но совершеннейшими, оныя бо токмо знаменоваху и извествоваху благодать, сия же и знаменуют и извествуют благодать, и исполнени суть ея, и подают благодать Божию. сия знамения в новем завете, не суть нага и тща, якоже святыя иконы, яже нам указуют святых живонаписаных, в себе не имут их. но наши святыя тайны, самую ту вещь небесную имут в себе, и души нашей истово ю подают. сим бо разньствены суть ветхаго завета тайны от наших, зане оныя, якоже апостол глаголет, бяху немощныя и худыя стихия. оправдание и очищение душевное в себе не имущая. наши же сильны суть во спасение душевное, и богатьства благодати имут в себе неоскудная, яже изливаются на душу устроенную и препоны не имущую. ветхия убо тайны бяху якоже кивоты праздны без сребренников, инде же точию сребреники, сиречь ко грядущему Исусу Христу чрез веру в онь указующе, в себе же их не имуще. наши же сии кивоты не точию указуют сребреники, но и в себе их имут. яко святое крещение имут в себе правое и истовое паки рожение и очищение душ наших. прощение грехов кающагося во исповедании не знаменует точию, но и дает истинное отпущение грехов. тожде глаголется и о прочих. в ветсем же завете не тако. агнец во Египте и кровь его на празе и кладе и на подбоях, губителя ангела отгоняющая, тело и кровь грядущаго Христа знаменоваху, но истово тело Христово и истовою кровь Его в себе не имяху, сице якова наша пресвятая тайна имать. тем же убо всяк уподобляяи и справляяи наши християнския тайны старозаконным, и творяи я нага же и праздна знамения якоже суть ветхия. сей совершенство лучшаго закона Христова разоряет, и противляется божественому писанию глаголющему, яко ветхии завет, сень токмо имяше грядущих благ. а не самыи образ вещей, сиречь не самую истинну. донележе бо аще некто аки написании обводит шаровы, сень некая есть. егда же цвет намастит некто, и помажет шары, тогда образ бывает. таково нечто и закон бе. сень бо рече, имяи закон будущих благ. не самыи образ вещей, сиречь жертва оставления, благодати небесныя, но сень. в сем же прельстишася звинглияне, и калвинестове, и прочии с ними творящии святыя тайны церковныя празна и нага знамения.

Вопрос. Скажи ми что есть святая тайна?

Ответ. Тайна есть невидимыя благодати Божия видимое знамение, во освящение наше от Бога нам преданая. ино бо в тайне видим, и ино приемлем. знамение убо верху явленное видим, сокровенную же духовную благодать, яже нарицается вещию или концем тайны сию приемлем.

Вопрос. Колико есть таин?

Ответ. Седмь.

Вопрос. Кия?

Ответ. 1, Крещение. 2, утверждение или хрисма, сиречь миропомазание. 3, священничество, сиречь рукоположение, или чин причетнический. 4, божественое причащение, сиречь благодарение. 5, исповедание, или покаяние. 6, законныи брак. 7, маслоосвящение, или последнее елеосвященное помазание.

Вопрос. Несть ли в церкви Божией таин множае разве сих седми?

Ответ. Суть и иныя многия тайны. первое убо, воплощение Христово тайна есть. якоже апостол глаголет [колас. зач. 252]. тайну сокровенную от веков, и от родов, ныне же явленна есть святым Его. и ефес., зач. 223. таже, Тим. зач. 284. о сем святыи Дионисии Ареопагитскии сице глаголет. и се во Исусе тайна сокровенна есть в Нем сущая, и ни коим же словом ниже умом изнесеся. но глаголема несказанна пребывает, и разумеваема недоведома. по нем же и сия великия праздники тайны нарицаются. Воскресение Христово. Вознесение Его на небеса, еже с пречистою плотию своею. и страшное второе пришествие Господне. и прочия многия. но ныне нам не о сих многих тайнах слово, точию о самех седми тайнах, их же святая соборная и апостольская восточная церковь всегда употребляет, ими же особне освящаемся, и оправдаемся, и всыновление божественое приемлем.

Вопрос. Имут ли разделения сия тайны?

Ответ. Имут. едины нуждно во спасение потребныя, другия же ко спасению потребныя.

Вопрос. Скажи ми о сих.

Ответ. Нуждно потребных во спасение есть три. крещение, причащение, и покаяние. потребныя же ко спасению две, святое миро, и последнее елеосвященно помазание. брак же и потребен есть употребляющим его помощи ради и сохранения от блуда, и нужно потребен есть, чадородия ради и исполнения церкве Божия. подобно же и священничество. потребно убо есть хиротонисавшимся, дабы сим служением угодили Богу, нужно же потребно есть правления ради церковнаго, и строения святых божественых таин.

Вопрос. Скажи ми еще о сем явственнее.

Ответ. Да лучше и удобнее уразумееши, послушай другаго сего разделения. вся убо седмь тайны потребни суть, но не всякому человеку, ниже единообразни. брак бо и священничество, аще убо и нуждно потребни суть церкви, но от другия страны, в воли и избрании всякаго есть, тако яко и не брачився и не хиротонисався может спастися. прочая же пять тайны потребни суть во спасение и ко спасению, но не единообразне. крещение бо и причащение, и покаяние, сице нуждно потребни суть всякому во спасение да спасется, якоже корабль во преплытие глубины морския, без них же ни един спастися может, разве аще не возможет их употребляти вожделев их. Святое миро, и последнее елеосвященно помазание, сице ко спасению суть потребни, дабы имели есмы спасение наше дерзновенне известно же и твердо. ельма убо не точию имети требе есть спасение, но да будет дерзновенне и утверженне. святое убо миро дерзновенны нас устрояет ко страдальчеству, последнее же елеосвященно помазание и останки грехов отпущает. сего ради пренебрегии я, немощен есть и не известен, ниже утвержен во своем спасении, разве аще бы я вожделел и не возмогл бы их употребляти.

Вопрос. Кая суть действа и концы сих седми святых таин?

Ответ. Всех седми таин сие есть действо, яко дают благодать Божию освящающую и оправдающую приемлющим я. ибо душу нашу очищают от грех и богоугодну содевают. даров же Божиих различных ко спасению потребных исполняют ю. есть же особне действо другое самех точию трех святых таин, сиречь крещения, святаго мира и священничества. яко нам души начертание содевают и печатают, еже вовеки не истребляется ниже изменяется. о нем же святыи апостол Павел сице глаголет [коринф. зач. 170]. помазавыи нас Бог, иже и запечатлевыи нас, и давыи обручение Духа в сердца наша. помазание же есть благодатию, ею же ны Господь благоугодны себе творит. начертание же или печатление назнаменование, о нем же глаголем. обручение же Духа есть совесть блага во одержание спасения. сих же трех святых таин начертание, разлучает начертанных, или печатленных от прочих человек, сицева начертания не имущих на себе. яко крещенных и святым миром помазаных разлучает от всех неверных. хиротонисанных же, разделяет святыня от мирских человек верных. и пребывает сие начертание на души вовеки неотъемлемо на земли и на небеси. темже не достоит и не леть есть сия повторяти, но единощи точию подаяти.

Вопрос. Из коих вещей содеянна и совершенна бывает тайна?

Ответ. От трех вещей, от перваго видимаго вещества, от другаго видотворения и услышаннаго словесе. от третияго видотворения еже есть от вины.

Вопрос. Кто может сия тайны строити?

Ответ. Никтоже разве святителей хиротонисанных, им же дана есть власть от Господа Бога рукоположением наследников апостольских. раздели бо Бог в церкви саны и строители, яже святыи апостол Павел глаголет. и той даде овы убо апостолы, овы же пророки, овы же благовестники, овы же пастыри и учители. еда вси апостоли. и на ином месте глаголет. никтоже собою честь приемлет, но званыи от Бога, якоже Аарон. аще же в ветсем завете никтоже дерзну не освящен строити тайны, множае паче у нас не достоит дерзати. сего ради Господь на тайней вечере апостолы своя священниками сотворил есть, и по воскресении своем повеле им вся языки крестити, и даде им власть отпущати грехи.

Вопрос. Кто устави и предаде сия тайны?

Ответ. Крещение, сам Господь наш Исус Христос, внегда крестися, и апостолом своим повеле крестити [Мф. зач. 116, Мф. зач. 6]. Святое миро, такожде сам Господь предаст, внегда помазался елеом радости паче причастник своих, сиречь Духом Святым в видении голубине. апостоли же святии по повелению Господню возложением рук видимым помазанием мира, невидимую благодать Духа Святаго подаяху. Деяния зач. 18. и 42. и ко евреом зач. 312. едина и таяжде есть тайна, миропомазание и возложение рук. Священничество же, и божественую литургию, или божественное причащение, сам Господь устави на тайней вечери, сыи священник вовеки по чину Мелхиседекову. Лука зач. 108. евреом зач. 318. Святии же апостоли и епископи, поставляху священники по местах. к Титу зач. 300. Брак от Бога поставлен бысть. Матфей зач. 78. от Христа же утвержден. Матфея зач. 31. и почтен. Иоанна зач. 6. есть тайна велия. ефесеом зач. 231. Покаяние сам Господь уставил есть, внегда повелевает покаятися. Матфея зач. 8. и тайну покаяния, глаголяи, имже отпустите грхи отпустятся им, и прочая. Иоанна зач. 65. Матфея зач. 76. исповедание грехов. преже апостолы. Деяния зач. 42. исповедание пред священниками. послание Ияковле зач. 57. первое. Иоанново зач. 69. Последнее елеосвященно помазание, сам Господь устави. его же святыи Ияков брат Господень повелевает употребляти, еже бы не дерзал кроме Господня завещания. послание Ияковле. зач. 57.

Вопрос. Но аще и се глаголют, ельма убо в тайне должно есть быти трем вещем, без них же не может быти тайна. Первое да будет слово и верху видимое вещество. тайна бо от двух вещей сложена есть, от слова и верху явленнаго знамения. Второе, тайна должна есть имети повеление ему же бы всяк подлежал во еже употребляти ея. Третие, должно есть тайне имети обетование Божие преданое к видимому знамению. сия же три вещи, точию сами две тайне имут, сиречь, крещение и причащение, тем же сами токмо две сия тайне тайнами суть.

Ответ. Вся седмь тайны имут слово, и видимое знамение. и вся имут обетование благодати, и благословение Божие. а яко не вси человецы по завещанию должни суть женитися, и священствовати, здравии же последним маслом священным помазоватися, сие не разоряет сия тайны. аще бо и не всяк должен есть священствовати, но убо потребовати священничества всяк должен есть, без него бо спастися не может. такожде же аще и не всяк оженится, то убо должен есть во изряднем девстве ангельским житием жительствовати. или непорочно вдовствовати. ащели же сквернавыи прелюбодейно поживет, то убо казнь приимет за презрение и попрание брака. а еже о последнем елеосвященно помазании, яве яко болящим есть завещано, глаголет бо [Иякова зач. 57], помазавше его маслом во имя Господне. а яко сия тайны известно суть тайнами, аще и не вси человецы удолжнотворени суть повелением употребляти их, не дивися сему, ибо паки суть некия сицевыя святыя вещи яже сохраняти и употребляти их должни суть вси человецы по повелению Божию, обаче сия вещи не суть тайны. сиречь, у евреов празднование суботы. а у нас недели. жертв и приносов приношение, моление, пост, милостыня, вера, надежда, любовь, и святыня, и прочая подобная сим. аще убо сице суть вси человецы удолжнотворени повелением Божиим яко должни их сохраняти и употребляти их, зане без них не могут в царство Божие внити. обаче сия вещи не суть тайны, темже якоже повеление должно творящее всех ко употреблению сих святых вещей, не творит я тайны, сице и не должно творящее всех ко употреблению онех таин не разоряет я. веждь убо без всякого сумнения, яко в церкви Божией не две точию суть тайне, но всесовершенно седмь.

Вопрос. Чесо ради должни есмы почитати святыя тайны?

Ответ. Изрядно сих ради четырех вин. первая, яко от Господа нашего Исус Христа в новом завете уставлени суть. вторая, яко благодать Божию тощно потребную нам и зело обильную не точию знаменуют, но аки нецыи сосуди святи в себе заключают, и достойне приемлющим я подают. третия, яко суть заступление и возбранение от грех, или божественныя цельбы нашего Христа Бога. четвертая же, сего ради должни есмы почитати святыя тайны, яко благим и благодарным человеком, благодать Божию сохраняют, умножают и вящьшую творят.

О первой тайне, еже есть о святом крещении, глава 73.

Вопрос. Что знаменует сие речение крещение?

Ответ. Знаменует сие речение крещение, второе рожение. якоже убо сказует сие Богослов Григорий, в слове втором еже на Крещение Господне [стих 2]. три убо рожения нам весть слово. первое от плоти. второе от крещения. третие от воскресения. зде же беседа о крещении нам есть, сие предлагаем. еже крещение дневно глаголет Давыд. во дне бо веща созиждутся, светлости ради от крещения и чистоты. есть бо не токмо свободительно от страстей, но и губительно тем.

Вопрос. Скажи ми, кия образы бяху сего нашего святаго крещения?

Ответ. Сии седмь, первыи образ бяше, оное ношение Святаго Духа верху вод [Бытие, глава 1]. о нем же Великии Василий глаголет. ношашеся Дух над водою, животворяя ю и согреваяи, да вода восприимет силу в рождение рыб и птиц. или же подобни суть християне во благословении и в скорости и быстроте и в высокопарении даже до небес, во крещении от воды и Святаго Духа раждаемии. Вторыи, потоп идеже потоплени суть грешницы, якоже во крещении вси греси наши погружаются. и потоплени бывают. Третий, обрезание в ветсем завете знаменоваше наше крещение. Четвертыи, чермное море, чрез него же вернии спасошася, супостати же погибоша. Пятыи образ, оная вода в ветсем завете очищающая смешена со иссопом знаменоваша наше крещение. о нем же пророчествуя Давыд вопиет, окропиши мя исспопом и очищуся, омыеши мя и паче снега убелюся. Шестыи образ бяше Иордан, чрез него же вернии в землю обетованную внидоша. и в нем же Нееман воевода сирскии очищен бяше. сей Иордан сию нашу тайну знаменоваше, ею же очищаемся, и в землю живых преходим. Седмыи, овчая купель. Иоанна зач. 14. и паки Иоанново же крещение, им же июдее во Иордане крещахуся от него, бяше крещение покаяния [Иоанн зач. 11]. аки наставник проводяи люди ко крещению Христову, или аки хоруговь и знамение некое совокупляющее люди ко Христу, не имяше же отпущения грехов.

Вопрос. Что есть крещение?

Ответ. Крещение есть тайна паки рождения, освящения, очищения и просвещения и умовения водою. в слове Иоанна. зачало 1. рече бо, но от Бога родишася. ефесеом, зачало 228. Дионисий Ареопагитскии, о церковней иерархии, глава 3.

Вопрос. Кая есть потреба нам святаго крещения?

Ответ. Сия есть потреба, да егда человек грешен будет не могии покаянием своим грехов избавитися. благодатию же Христовою во крещении очистився будет християнин, и сын Божии, и дарованием и сыновлением образ Христов, и самого того Сына Божия в себе имеяи. якоже святыи апостол Павел глаголет, елицы во Христа крестистеся, во Христа облекостеся.

И како сие бывает?

Сице, ельма убо вси раждаемся в первороднем гресе, его же имамы от прародителей наших, сей же грех с прочими грехопаденьми в крещении прощен бывает. и дается нам тогда всецела благодать Божия, оправдающая ны. и сице бываем чада Божия, и наследницы царствия небеснаго. внегда бо ко умовению водою словеса сия Божия приложатся, сиречь, крещается раб Божии имярек. во имя Отца, аминь, и Сына, аминь, и Святаго Духа, аминь. тогда с сими словесы, тайна святаго крещения совершается, и душею паки раждается крещаемыи силою Святаго Духа. сей же Дух Святыи несказанно пременяет воду во умовении сем, якоже внегда зимную воду в кипящии укроп претворяет. и дает ей сицевое совершительное, яко касающися тела и душу омывает, и паки раждает. и убо не вода сие творит, но Духа благодать. во крещении бо вода несть тайна, но умовение водою с божественными словесы сию тайну совершает.

Вопрос. Точию ли раждаемся во крещении?

Ответ. Не токмо паки раждаемся, но первее тамо умираем. и бывает нам сия святая купель и гроб и мати.

Вопрос. Истово ли и истинно умираем?

Ответ. Се известно есть, яко истово и истинно, занеже тогда и погребени бываем. глаголет бо Павел. спогребшеся Ему крещением, о нем же и совостасте верою, действом Бога, воскресившаго из мертвых. покрывающей же наши грехи воде в погружении, и воскресаем, сиречь раждаемся, внегда от воды возвождени бываем. трижды же сие творим по подобию тридневнаго погребения и воскресения Христова.

Вопрос. Како же убо и чим умираем, ибо человек жив есть подобообразне, яко в погружении сице и в возвождении, како же се истово и истинно умираем, и паки раждаемся?

Ответ. Духовне же и невидимо умираем и раждаемся во святом крещении [колас. зач. 254]. внегда и обрезуемся обрезанием нерукотворенным, сиречь, не ктому ножем обрезание, но самим Христом. не рука бо наводит, якоже тамо, обрезание сие, но Дух. не плотию нашею умираем еже от души разделяющеюся, но ветхим Адамом: сиречь, совлечением плоти греха. иже от Адама на нас пришедшим, таже и животом греховным во крещении, аще же умрохом, грехом умираем, рече божественныи апостол [к рим. зач. 90]. како паки оживем в Нем. се уже да не творим их. о сем паки святыи апостол Павел римляном сице глаголет [зач. 91]. не весте ли, яко елицы во Христа Исуса крестихомся, в смерть Его крестихомся, зане спогребохомся с Ним в смерть крещением. да якоже воста Христос из мертвых славою Отчею, тако и мы во обновлении жизни ходити начнем. аще бо сообразны быхом подобию смерти Его, но и воскресению будем причастницы.

О крещении. Вопрос. От коего времени имать начало нашего крещения?

Ответ. Егда крестися Христос, и егда прикосновением пречистаго тела своего воды освяти, во еже имети им силу чистительную, и от оного времене внегда апостоли начаша крестити [Иоанн зач. 11]. по воскресении же Христовом и весь мир посла ученики вся крестити, яко да спасется мир. Марко зач. 71.

Вопрос. Колико вещей должно есть ведети во святом крещении?

Ответ. Особне четыри.

Вопрос. Кия?

Ответ. Сия, первую, вещество. вторую, вид, или видотворение. третию, вину и действеника. четвертую, совершительное.

Вопрос. Почто вода а не иное вещество в крещение нам предана есть?

Ответ. Сих ради трех вин. первая, яко сия святая тайна крещения в воде бяше прообразованна, якоже предрекох ти, еже в потопе, и в чермнем море, и во Иордане реце. таже и ко всякой вещи вода является чистителна умовением своим. да ни едино же неудобство. вторая, да с водою добре яленно будет и душевное умовение. понеже вода плоть очищает, Дух же и душу освящает, сугуб бо человек, сугубо и действо, еже к порождению его во крещении. третия, зане якоже вода утоляет жажду, сице и святое крещение похоти ко грехи потребляет.

Вопрос. Кий есть вид, или видотворение сея тайны?

Ответ. Оная словеса ими же Господь повеле крестити, сиречь, во имя Отца, и Сына, и Святаго Духа. вкупе со трема погружениями. сими бо глаголы божествеными, и силою их крещение кончается и свершено бывает. аще и прочая глаголы при крещении глаголемии от священника, в благолепное украшение и наказание бывают, сия же три в видотворение и содеяние крещения суть, да сими всездравственно и благосовершенно крещение бывает.

Вопрос. А еже в Деяниих апостольских чтем [Деян. зач. 42], яко святии апостоли во имя Господа Исуса Христа крещаху, како се имамы разумети?

Ответ. Сице нам о сем подобает разумети, еже по вознесении сам Господь рече ко учеником своим, шедше убо научите вся языки крестяще их во имя Отца и Сына и Святаго Духа. а еже во апостольских деяниих рече Павел. слышавше же крестишася, во имя Господа Исуса. сие знаменует иже веру прияша яже во Христа Исуса. слыши яко о вере вещает глаголя. во грядущаго по нем да веруют, сиречь во Христа Исуса. сего ради наипаче веру в Господа нашего Исуса Христа в сердца человеческая преподаяху. страсти же и смерть и воскресение Его из мертвых, исправление являху. из них же святое крещение истече, проповедающе. сия же глаголы, яже глаголются. крещается раб Божии, во имя Отца, и Сына, и Святаго Духа. никогда же в крещении презираху ниже оставляху их.

Вопрос. Преначальнейшии есть действенник и вина сам Господь Бог. понеже сам Господь крестися, и крести, и в весь мир ученики своя посла, и научи како да крестят. кая суть совершительная и действа и приобретения сея святыя тайны?

Ответ. Сие приобретение, еже от области бесовския яже имяше на нас из первороднаго греха, избавление. якоже Богослов в слове втором на Крещение Господне пишет. вчера рече на одре повержен оставлен и разслаблен, и не имел еси человека, да егда возмутится вода, ввержет тя в купель. днесь обрел еси Человека, Того же и Бога, паче же Бога и Человека. взят еси от одра, паче же взял еси одр, обрел еси благодать, исторгнул тя есть от власти темныя, и примири отчюждена, во еже быти ти святу и непорочну. глаголет бо апостол Павел в послании еже к коласаем [зач. 255]. вас иногда мертвых сущих в прегрешениих, и в необрезании плоти вашея, сооживил есть с Ним. вчера убо долу, ныне же горе твою душу приемлет Бог. направляет, у престола царьска поставляет, дает сыном Божиим быти. иже не от крове, но от Бога рече родишася. еже есть сыноположеною материю святою купелию. таже тогда и глаголати абие научает, отрицаюся речеши сатаны. вместо еже бы рещи не послушаю тя лукавниче. таже да и не иными тя имет. приложи, и всего студа его. и службы его. и всех аггел его. и не ктому стрещи рая вводит тя. но жительствовати на небеси устрояет. не древо сматряеши, но самого абие объемлеши Владыку. срастворяешися телу, смешиваешися горе седящему. идеже приступити несть мощно дияволу, аще не снидеши ты к Нему не возможет взыти идеже еси, на небеси бо еси. небо же нешествено есть дияволу. сие приобретение имамы от святаго крещения. о нем же глаголет Павел. егда же благодать и человеколюбие явися Спаса нашего Бога. не от дел парведных их же сотворихом мы, но по своей Его милости, спасе нас, банею паки бытия, и обновлением Духа Святаго, Его же излия на нас обильно Исус Христом, Спасителем нашим. да оправдившеся благодатию Его, наследницы будем, по упованию жизни вечныя. сицево нам обретение есть. сицево же и действо знаменует нам. им же нас Господь Бог яко овца своя начертавает и знаменает святым крещением. и сего ради святое крещение не леть есть повторяти, единою бо восприемлемо есть, в души вечное начертавает же и изображает. якоже убо един есть Бог, едина вера, сице и едино есть крещение. якоже единощи Христос умре, сице единощи с Ним во крещении грехом умираем. якоже единощи раждаемся плотьски, вторицею же не можем родитися, сице же и единощи крещаемся. крещение бо есть душевное рождение от воды и Святаго Духа. дерзнувыи же вторицею креститися, хулит первую смерть Христову, в ней же прежде крестися, аки бы вторицею распинал себе Сына Божия.

Вопрос. Скажи ми о неких лепотных благочиниях яже при святом крещении бывают. первее же скажи ми почто освящают воду?

Ответ. На воспоминание творим, великаго Божия смотрения. еже убо и древле бысть, прежде всенароднаго крещения. сам Господь собою воды освяти. тако и ныне сицевым действом вода освящается, в почесть естества нашего и в соединение главы нашея Христа. глаголет бо апостол [к рим. зач. 91], спогребохомся убо с Ним крещением в смерть, да якоже воста Христос от мертвых, главою Отчею. тако и мы во обновлении жизни ходити начнем.

Вопрос. Чесо ради пред враты церковными ожидает хотяи креститися?

Ответ. Сего ради, яко сицевыи во церкви не имать места, прежде даже сатаны не отречется, и работы и ига его не свободится.

Вопрос. Почто священник заклинает сатану и дует нань?

Ответ. Сего смотри в чину церковнем, дунет рече на воду трижды, и знаменует ея крестообразно трижды, и глаголет ко Господу нашему Исусу Христу, сице. да сокрушатся рече под знамением воображения креста Твоего вся супротивныя силы. да отступят от нас вся воздушная и невидимая привидения. и да не утаится в воде сей бес темен, ниже да снидет со крещающимся дух лукав. помрачение помыслом, и мятежь мыслен на разум наводя. сице в чину своем святая соборная и апостольская церковь о дуновении поведает нам.

Вопрос. Почто священник знаменает чело и перси хотящаго креститися?

Ответ. На челе убо знаменует иерей крестившаго, и глаголет сице. печать дара Святаго Духа. да избавит студа, его же первее преступив человек всюду ношаше. тако же и на персех знаменав. то же глаголет, печать дара Святаго Духа. да оболкся во броня правды и противу хитрости вражия станет, яко победитель непобедим. слышал ли еси сие стихословие, еже аще убо знамение и печать дара Святаго Духа нарицает. то есть воин написанныи великаго Царя Бога. якоже на воинех печать, сице на верных Дух возлагается.

Вопрос. Чесо ради помазуется елеом?

Ответ. Сего ради яко благодать и милость подаваемую человеком знаменует, якоже при потопе сучец оливныи сущим в ковчезе, голубем принесеныи знаменаше от потопа избавление. сице и зде благодатию Духа дарует грехов очищение. сие лепотное благочиние трех погружении и возвождение в воде, по подобию тридневнаго погребения и воскресения Господня. с сими глаголы, крещается раб Божии, и прочая. знаменует смерть нашу ветхим Адамом, и паки рождение новым Адамом, сиречь Христом: совершает крещение. без сего же видимаго лепотнаго благочиния, и без сих глаголов, не может быти крещение.

Вопрос. Что знаменует одежда бела, или малаго младенца куколь?

Ответ. Знаменует преславное воскресение, к нему же святым крещением паки раждаемся. знаменует же и неповиннаго приятную совесть и чистоту душевную, юже должни есмы на страшныи суд Божии чисту и непорочну соблюсти.

О младенческом крещении. зачало. глава 74.

Вопрос. Потребно ли есть святое крещение ко спасению младенца?

Ответ. И зело потребно есть, без него бо не могут внити в царство Божие.

Вопрос. Чесо ради сию тщету подъемлют отрочата, ельма ниже собою обладати могут, ниже разума употребляти?

Ответ. Сего ради яко первородныи грех пребывает в них не очищен святым крещением.

Вопрос. Вскую убо прежде пришествия Христова, аще и не крестишася святии пророцы и патриарси, обаче спасошася?

Ответ. Зане крещение не у бе предано, но вместо его обрезание имяху.

Вопрос. Но убо отрочата якоже тамо аще и без обрезания прежде осмаго дне умерша спасена бяху, сице разумевающу и Давыду о своем умершем отрочати. поведает бо ся. царство, 12. тако и у нас могут спастися, аще и некрещенная преставятся. о сицевых убо отрочатах и Господь глаголет, яко таковых есть царство Божие. и паки, несть воля Отца вашего небеснаго, дабы погибл един от малых сих. сие же и святыи апостол Павел пишет, яко раждаемии от християнских родителей младенцы святи суть. не сего ради яко от плоти и крове их раждаются, но яко Бог завеща им о Христе завет, глаголяи, Аз есмь Бог твой семене твоего. се же и святыи извествует апостол сими словесы, яко от корене свята и ветвие святи раждаются. ибо и Господь зачатием своим от Духа Свята, вся зачатия верных младенцев освятил есть. тем же убо християнская отрочата аще и без крещения преставятся царство Божие наследят.

Ответ. Не наследят, о сем бо сам Господь глаголет, аще кто не родится от воды и Духа, не может внити в царство Божие. сими убо глаголы посрамляет Господь наш Исус Христос многия ереси, глаголющая, яко некрещении младенцы во царство небесное внидут. се бо ясне слышат, яко никтоже не крещен может в не внити. ниже младенец ниже в возрасте кто. а еже ко апостолом рече Господь, оставите детей приходити ко Мне, и не возбраняйте им, таковых есть царствие Божие. сие не младенцем обеща Христос царствие небесное. но всех смиреномудрию уча, и величание мирское попирати повелевая, приемлет бо младенцы и объимая, показуя всем яко беззлобивыя приимает. тем и глаголет, таковых бо есть царствие Божие. виждь, не рече сих есть царствие, но таковых, еже есть имущих от злобы воздержания. дети бо имут от естества беззлобие. нас же учит от произволения имети беззлобие и всякия доброты. младенец бо не завидит, ни зла помнит, ни биемо от матери бегает, сицевым и нам учит и повелевает быти. и паки младенцы аще и рубища носят, наипаче теми красятся. аще же и драгия червленицы облачит, ниже тем величается и гордит. сице разумей о возрастных приклад, по добродетели живущих. тем убо объимает таковыя Господь глаголя, приидете ко Мне вси труждающиися. и благословляет глаголя, приидите благословении Отца Моего. се зде в лице глаголет, а не на указание показует, приидете наследуйте уготованное вам царство. и паки показует дети Господь, занеже приемлют учения родителей своих. сего ради и зде рече Господь, иже кто приимет проповедь Божию, яко детищь, сиречь ничто же разсуждая, или неверуя, той входит в царствие Божие. а еже рекл еси о Павле, еже той глаголет [к рим. зач. 106]. аще корень свят то и ветви святы. о сем святыи Иоанн Златоустыи толкует. начаток зде и корень нарицая. иже о Аврааме, и о Исааце и Иякове. пророки, патриархи, иже в ветсем завете хвалимыя вся. а ветви иже от них веровавшая. посем. понеже противу паде Ему, еже многим неверовати, зри како паки то их отсецает, и глаголет. аще ли же нецыи от ветвии отломишася. видел ли еси зде Златоустаго толкование, яко не о младенцах християнских корень и ветви глаголет. о младенцах же на Бога суд возлагати подобает, своя бо Ему во своих, ты же что о сем ропщеши и великословие сееши. внимай себе глагол Божии яко прав суть.

Вопрос. Аще бы сице потребно было святое крещение младенцем во спасение, якоже от писании увещаваеши, то убо нужно им первее веровати, таже креститися. о сем бо сам Господь вещает [Мф. зач. 71], иже веру имет и крестится, спасен будет. а иже не имет веры, осужден будет. тем же прежде прежде даже кто крестится, требе ему есть веровати. младенцы же не могут веровати, то убо ни креститися им подобает, дондеже в возрасте и совершенном разуме будут.

Ответ. Еже от слышания слова Божия имети веру, се в возрасте сущим последовательно есть. младенцы же по естеству суть вернии, сиречь от верных родителей своих. аще и не имут разумом разумети, яко подобоглуси и неми, но имут по природе нрава родителей своих веру си стяжати. силою святаго крещения, от Бога в них влиянную купно с надеждею и любовию и со прочими потребами ко спасению. без веры бо никтоже Богу угодити и оправдан быти может. имут же паки младенцы помощь от веры. якоже оныи разслабленныи [Мф. зач. 29], от исповедания отцев своих крестных. сия же вера наставляет их ко святому крещению, и пособствует им ко спасению. и в лепоту сие им бысть. да якоже прародительным грехопадением, сиречь первородным грехом повредишася. тако и родителей своих верою помощь приемлют. и якоже не ведущим им подпадоша осуждение самем тем зачатием и рождением, сице и в неведении своем цельбу и спасение приимут, сего ради имут прочее младенцы во крещении веру родительную, пособствующую им ко спасению, и свою си спасающую их.

Вопрос. Каковым же образом имут младенцы веру?

Ответ. Сицевым образом, егоже сам Бог весть. ельма бо вера есть дар Божии, то убо тем даром и благодатию своею имать область, якоже хощет строити. овем убо веру слышанием слова своего дает, овем же и без слышания, якоже глухим не могущим слышати. такожде и младенцем. аще ли же еще испытуеши образа, то убо скажи ми и ты, коим образом освяти Бог младенцы сущия во чреве своих матерей, якоже Иеремию, Самуила, Иякова, и Иоанна Крестителя, скажи же ми еще, како изо уст младенец и ссущих совершил есть хвалу. аще же не можеши строение Божие постигнути, и объяти е своим разумом. не испытуй же непостижимая, но веруй.

Вопрос. Принеси ми еще вкратце свидетельства от божественаго писания о сем, яко всячески младенцем подобает креститися?

Ответ. Многая о сем суть свидетельства. Первое сие, еже Господь глаголет [Ин. зач. 8], аще кто не родится от воды и Духа, не внидет в царство Божие. не отверже зде младенцев от крещения. Второе, внегда повелевает Господь крестити вся языки [Мф. 116], и тамо не отмещет же Господь ни женска полу ни младенцы, но всех повелевает крестити. Третие свидетельство. яко тем же образом и святии апостоли по завещанию Господню всех крещаху, сиречь, и младенцы, и вся сущия в домех. Павел убо крести стефанинов дом. коринфом, зачало 124. паки той же крести Лидию и дом ея. Деяния, зачало 37. той же паки темничнаго стража, и вся сущия в дому его крестил есть. Деяния, зачало 38. подобне же и вси прочии святии апостоли крещаху, и церкви Божией се предаша. о сем же послушествуют святии вси, зане и Христос повелевает им к себе приносимом быти. Матфея, зачало 78. Лука, зачало 90. аще же причастни бяху Адамлю грехопадению, кольми паче подобает им причастником быти благодати Христовы [к рим. зач. 90]. к сему же, ельма убо никтоже может спастися кроме соединения церковнаго, якоже и при Нои, не сущии в ковчезе истопоша. то како зде соединятся с церковию, аще не крещением внесутся в ню. и паки, младенцы не могут быти от Бога призвани разве крещением. имже последует оправдание, тем же крещением. известно о сем есть, яко кроме церкве несть спасения. глаголет бо апостол [к рим. зач. 99], их же Бог предустави, тех и призва. то убо кроме церкве призваных не леть им быти предуставленым или избранным, и наследником царства небеснаго.

О второй тайне. сиречь, о утвержении, или о миропомазании. глава 75.

Вопрос. Что есть святое миро?

Ответ. Миро святое есть масть или елей от различных вещей устроеное, сиречь от оливнаго елея, и балсаму, и нарды, и прочих благовонных араматов по Дионисию. освящено в великии четверток от архиерея на божественем престоле, идеже тело и кровь Господню освящают. уготовано же во употребление крестящимся. сие же есть первейшее святое вещество сея вторыя тайны. чти о сем святых писания, Кирила Иеросалимскаго, во оглашении таинственном. глава 1. и 2. и 3. Климентия Римскаго, в завещаниях апостольских, книга 7. глава 42. и 44. и Дамаса, послание 88. и Киприяна, книга 1. послание последнее, и прочих, и святыя соборы чти.

Вопрос. Что есть утвержение или помазание?

Ответ. Утвержение есть тайна от Бога крещенным преданая, в нем же святым помазанием и молитвами благодать Божия в крещении нам подается, и сила Духа Святаго прилагается. да силу духовнаго возраста и совершенство християнское ко спасению приемше, крепко и твердо веруем, и со многим дерзновением веру християнскую исповедуем. в добродетелех же утвердимся. и укрепимся ко брани духовней, во еже мужественне нам подвизатися на диявола, и противу плоти греховней и мирским прелестем, и противу всех искушении и грехов. святыи же Дионисий Ареопагитскии сице глаголет. миро есть совершительное помазание, благовонна творящее совершаннаго, и богоначальному Духу соединяющее его.

Вопрос. Укажи ми от божественнаго писания, яко утвержение или помазание есть воистину тайна новаго закона.

Ответ. Павел апостол пишет в послании своем еже к коринфом [зач. 172], сице глаголя. Богу благодарение, иже всегда нас победителей являющему о Христе Исусе, и воню разума Его являющу нами во всяком месте. о нем же и Златоустыи Иоанн того же зачала в толковании, сице глаголет. якоже убо кадильница есмы царская, идеже аще отъидем, небесным шумяще миром, и духовным благовонием. священныи же Дионисие в таинственем просвещении сице глаголет. се же рече благоделнейшим миром мужа назнаменав. причастника показует прочее священносовершительнейшаго благодарения. или паки, помазание мира святаго причащения приобщение вводит быти. обретаютжеся и ины три вещи в коейждо тайне. первое убо да будет кое обетование Божие, увещевающее благодать небесную. второе, знамение верху явленное, под ним же оная благодать дается. третие же, Божие о сем повеление. вся убо сия три вещи в сем помазании суть, тем же и нарицается тайна.

Вопрос. Где писание глаголет о сем обещании благодати?

Ответ. Во апостольских деяниих глаголет [зач. 6]. покайтеся и да крестится кождо вас во имя Исуса Христа, во оставление грехов. и приимете дар Святаго Духа. вам бо обетование и чадом вашим, и всем дальным, елико аще призовет Господь Бог наш. зриши ли яко всем есть сие обетование благодати.

Вопрос. Кое же есть знамение верху явленное, под ним же сия благодать дается?

Ответ. Сие верху являемое знамение и видимое посредственное, еже есть возложение рук с помазанием. о сем же свидетельствуют деяния святых апостол. внегда в Самарии святии апостоли Петр и Иоанн, на крещения от Филиппа диякона руки возлагаху, они же приемляху Святаго Духа [зач. 18]. и на ином месте. внегда святыи апостол Павел во Ефесе возложи руки своя на крещенныя [зач. 42], прииде на них Дух Святыи, и глаголаша странными языки, и пророчествоваша. се зде пресветлосияющая истинна, яко посредственное и видимое знамение ко приятию Святаго Духа, оно бяше возложением рук апостольских с помазанием. аще же не воспоминает зде помазания. обаче известно се есть, яко от самых времен апостольских, вернии уже крещении сию тайну возложением рук и помазанием приемляху. о сем же свидетельства ниже будут.

Вопрос. Где же есть повеление Божие о сей тайне?

Ответ. Есть убо без сумнения всякаго о сем повеление Божие. ибо святии апостоли не дерзнули бы на се, дабы возложением рук и помазанием подавали Святаго Духа, аще бы на се повеления Божия и власти не имели. к сему же имамы известная свидетельства древних святых отец и соборов, повелевших сию тайну употребляти. и сами тайну то имяху. якоже Дионисий Ареопагитскии, Кирил Иеросалимскии, Иоанн Златоустыи, и вси святии богоноснии отцы. святыи же Климент папа Римскии. послание 4-е, глаголет. всяк со тщанием да ускоряет ко крещению. посем же печатлен быв от епископа, прияти имать седмиричную благодать Святаго Духа. зане глаголет, без сея тайны никтоже совершен християнин может быти. а святыи Амбросий Медиоламскии, о освящаемых тайнами. глава 7. во известно творение сея тайны приводит. сия апостол глаголет. не оскорбляйте Духа Божия Святаго, о Нем же знаменастеся в день избавления. сие глаголет святыи. яко день избавления есть крещение. в то бо время крещением исправления страстей Христовых на ны изливаются. по крещении же абие печатление или знамение помазанием и Духом Святым бывает, Его же повелевает апостол не оскорбляти. Лаодикийскии же собор. правило 48, глаголет. яко подобает просвещающимся святым крещением, по крещении же миром помазоватися мастию небесною.

Вопрос. Укажи ми еще о сем известнее, яко помазание есть тайна новаго завета. обаче укажи ми сея тайны вещество, вид, или видотворение, и совершительное.

Ответ. Вещество, еже и видимое верху явленное знамение сей тайны четверократно есть. первое, самое святое миро. второе, возложение рук. третие, помазание. четвертое, печатление, или знаменование святаго креста. се убо уже о мире рех, и о возложении рук. прочее о сих трех святых, апостол Павел во втором послании коринфяном сице вещает [зач. 170]. извествуяи же нас с вами во Христа, и помазавыи нас Бог, иже и запечатлевыи нас, и давыи обречение Духа в сердца наша. Первое речение апостольское содержит, еже есть свойственно сея тайны. сиречь, утвержение в вере, и во всех благих. Второе содержит, помазание, о нем же глаголем. сице бо вещает апостол, помаза нас. от него же и мы нарицаемся христиане, сиречь помазанцы. Третием же изречением возвещает о печатлении хризмом, сиречь помазанием, внегда глаголет запечатлевыи нас. зде же еще сказует последним речением совершительное, и конец сея тайны, сиречь, приятие Святаго Духа. сице сия глаголы о миропомазании святии отцы толкуют.

Вопрос. Кое же есть видотворение сея тайны?

Ответ. Видотворение сея тайны, есть сила онех глагол. егда бывает в чину крещения по велицей ектении, и по обычных молитвах яже от иерея, бывает святое помазание миром крещающемуся, сице. еже творит крестообразно на челе и на очию, и на ноздрию и на устех и на обе уши и на грудех и на руках и на сердцы и на плечию и между рамома, глаголя на коеждо помазание. егда помазует на челе, тогда сице глаголет. печать дара Святаго Духа, аминь. да избудет студа его же первее преступив человек, всюду ношаше. а егда помазует на лице тогда глаголет сице. печать дара Святаго Духа, аминь. да откровенным лицем славу Господню зрит. такожде и вся прочия уды знаменуя сия глаголет. и сими глаголы содевается и совершается сия тайна. а яко спасенное помазание глаголем, не за еже оно спасает, но за еже тем, якоже орудием и тайнодейственным знамением благодать Духа Святаго дается, спасающая нас.

Вопрос. Воспомяни ми некоих святых свидетельства о помазании.

Ответ. Святыи Дионисий Ареопагитскии, ученик святаго апостола Павла. в церковном священноначалии, части третией, глава 4. сице пишет. крестившагося и в белую одежду одеяннаго, приводят ко епископу. он же божественным миром мужа знаменует. и ниже таможе. сподобившимся пресвятаго паки рождения тайны, помазание миром подает Святаго Духа пришествие содевающее совершенство. такожде и святыи Кирил Иеросалимскии патриарх, во оглашении еже о таинстве, глава 1, сице пишет. якоже убо хлеб по призывании Духа Святаго, не хлеб, но плоть Христова. тако и святое се миро, не ктому просто, или якоже бы рекл кто, по призывании, но Христов дар Духа Святаго пришествием божества Его деятельно бывая. и хризма глаголется, сиречь помазание Христово, еже силу имать пришествием Святаго Духа божества Его. се уже довольны имаши и известны послухи, и свидетельства неложная, и от божественных писании, и от богоносных отец, и самый же той древнии обычай святыя соборныя и апостольския церкве о сей второй святей тайне имаши.

Зде Златоуст. О третией тайне, сиречь о рукоположении, или о священичестве. глава 76.

Вопрос. Что есть хиротония, или чин духовных лиц?

Ответ. Рукоположение есть тайна, ею же вручается власть, яко святителем, священником, и прочим строителем, и служителем церковным. дабы строение и служение в церкви Божией благочинне и благолепне и законне содевали и совершали.

Вопрос. Кое есть вещество сея тайны?

Ответ. Возложение рук. Деяния, зачало 16. и Тимофею, зачало 287. сия свидетельства имаши о веществе же и о видотворении.

Вопрос. Кое есть видотворение сея тайны?

Ответ. Видотворение сея тайны суть онии глаголи их же святитель над рукополагаемым в молитве глаголет.

Вопрос. Кая суть, совершительная сея тайны?

Ответ. Сила и власть от Бога даная, печать дара Духа Святаго, на души священничестей. и оная благодать Божия, о ней же святыи апостол Павел к Тимофею пишет [зач. 285]. не неради о благодати сущей в тебе данней ти пророчеством, со возложением руку священническу. сия благодать Божия устрояет рукоположеннаго, да будет во своем чине и сане благоприятен и благоугоден своим служением Богу и церкви.

О четвертой тайне тела и крове Христовы. глава 77.

Вопрос. Коими именами нарицается сия святая тайна?

Ответ. Различных ради действ яже в себе имать, различная и имена и наречения имать. первое убо нарицается гречески литургия, глаголемая служба. сиречь, народное действо, еже о людех всех верно живущих. и усопших содеваемо бывает. сию же литургию первыи и превышшии Архиерей Христос безкровне в великии четверток под знамением и хлеба и вина нам предал есть. якоже Матфей евангелист вещает нам [зач. 108]. приим Исус хлеб и благословив, преломи, и даяше учеником своим. и рече, приимите и ядите, се есть тело Мое. нецыи же глаголют. яко изшедшу Июде, предаде тайны прочим учеником. прочее же и нам подобает, такожде да творим, злых и лукавых отвращати от божественых таин. и се вемы о сем, яко тайная вечеря именуема есть. сия прият брат Божии Ияков божественую литургию, служити начат, таже и вси божествении апостоли, от них же Иоанн Златоустыи, таже и Василий Великии, по сих же и вси святителие, божественую службу совершающе безкровьну жертву приносят. даже и до ныне непреложно действуется во святей соборней и апостольской церкви. а еже нарицается преломление хлеба, иже есть телом Христовым. и чаша благословения яже есть кровию Христовою. святыи Иоанн Златоустыи сице толкует. во что же преложи, его же ломим? сие бо во благодарении есть видети бываемо. на кресте же не ктому, но и сопротивное сему. кость бо Его, рече, не сокрушится. но еже не пострада на кресте, сие страждет в просфире, сиречь, во приношении тебе ради, и терпит ломим сыи, да всех исполнит. понеже убо Христос единощи тайну сию прежде страсти своея предал есть. якоже Златоуст свидетельствует в толковании Павлова послания еже к коринфом [зач. 149]. в нощь, в ню же и заклан быти хотяше о нас, сия заповедаше и предая нам, вечерю ону. по оной же не ктому приложил есть иную. таже паки и самая та бывшая повествует глаголя, яко прият хлеб, и благодарив преломи, и рече, приимите ядите, се Мое есть тело, еже за вас ломимое. аще убо о благодарении приступаеши рече Златоустыи. ничтоже твори недостойно благодарения. ниже посрамляй брата. ниже презирай алчущаго. ни упивайся, ни досажай церкви. приступаеши бо благодари, о них же приемлеши. понеже сия едина Христова тайная вечеря глаголется. аки бы сице рекл, единою страстию и смертию Христовою освящени есмы и совершени. яко чрез сию не точию оставление грехов прияхом, но и удобрение оправдания, и самое то спасение. к сему же выну, сиречь вовеки от рода и в род, тако яко не требуем другаго Христа, дабы нас смертию своею искупил, или бы Той же Господь наш Исус Христос паки вторицею за ны умирал. а еже глаголет сие творите в Мое воспоминание, сего ради рече, яко да всех нас в память приведет оным, рекше временем, и трапезою, и предательством. вразумляя тя сим, яко Владыко убо твой, сам ся предаде за тя. а еже рече Павел, Отча прияти, ниже бе тогда Павел, но от гонящих бе. да увеси яко ничтоже вящше имать оная трапеза сущия по сих. ибо и днесь Тойже есть. иже вся содеваяи и предаяи, яко и тогда. сицевыми имены и действы нарицается сия святая тайна.

Вопрос. В чесом разньствуют между собою жертва и тайна?

Ответ. В сих трех. Первее убо, яко в тайне приемлем от Бога дарования небесныя, ими же оправдаемся. в жертве же не приемлем тако всегда приносим ю, но прежде даем Господу Богу еже возлюбленное и предрагое имамы, хотяще Богу явити приношением ея благоусердие, и со благоговением почитающе Его испросити потребная. Второе же, яко в тайне сей укрепление и пищу духовную имамы. В жертве же довлетворение о гресех наших отдаем, и очищение содеваем. тоежде бо тело и туюжде кровь приносим, вземшую на кресте всего мира грехи. Третие, в сем разньствует, яко тайна токмо употребляющаго ея пользует и освящает. жертва же и прочим всем и далече сущим приобретение содевает, и благодать у Бога ходатайствует. и не живущим точию но и усопшим, не о себе бо самех точию но и о всем мире приносим ю.

Вопрос. В чесом разньствует сия тайна от прочих?

Ответ. В сем разньствует благодарение от прочих таин. Первое убо, яко иныя тайны суть в деянии и употреблении, сия же есть во освящении, и в вещи о себе пребывающей. яко во указании, святое крещение бывает и совершается обмытием водою в слове. вода в нем несть тайна, но сама есть вода, точию обмытие водою в слове тайна есть. подобне же и во утвержении, миро несть тайна. но миропомазание и возложение рук с подобающими тому глаголы, сие творим и совершаем тайну. тожде разумей и о прочих. в сей же тайне благодарении, инако содевается. освящается хлеб в тело Христово, вино же в кровь Его пречистую, и тогда совершается тайна, внегда нам пищею и питием небесным бывает. не употреблением творится сия тайна, но освящением словеси. се же есть на глаголющия еретики, яко внегда причащаемся, тогда есть тело и кровь Христова. внегда же не причащаемся, тогда не есть. се убо мощно глаголати о крещении, и о прочих тайнах, пременяющею вещию, и употреблением бываемых. но о сей тайне не мощно сие глаголати, яже прежде причастия есть совершенная пища, и истинное пиво. егда убо яси и пиеши, тогда укрепляешися пищею и питием. ядением же и питием не можеши соделати себе пищу и пиво, но первое подобает им устроеном быти, и тогда их насладишися. тем же убо аще и не причащаемся сея тайны, обаче по освящении есть тайна, и пребывает истое тело Христово и пречистая кровь Его. Другое же разньство сея тайны от прочих сие есть, яко в прочих не пременяется вещество, в вещь юже знаменует. яко во крещении не пременяется вода во одрождение духовное, еже знаменует. во благодарении же хлеб и вино пременяются, в тое еже знаменуют, сиречь в тело и кровь Господню. не речебося о воде, сия вода есть одрождение. о благодарении же сем сам Господь прием хлеб рече, се есть тело Мое, и прием чашу с вином глагола, се есть кровь Моя.

Вопрос. Что есть литургия или евхаристия. сиречь, благодарение?

Ответ. Жертва есть и тайна, содержащая в себе истинное, из хлеба премененное, или претворенное тело Христово, из вина истую кровь Его. ясне же являющи живот Христов, и страсти и смерть и воскресение Его, и на небеса вознесение еже с пречистою и божественою плотию Его. сию же жертву сотвори Христос, и сию тайну предал есть на тайней вечери. якоже нам евангелие возвещает [Лк. зач. 108]. приим хлеб, хвалу воздав преломи, и даст им глаголя. се есть тело Мое, еже за вы даемое, се творите в Мое воспоминание. такожде же и чашу по вечери, глаголя. сия чаша новый завет, Моею кровию, яже за вы проливается. виждь яко на оней вечери тело Его дается. не глаголет, вам даемое, но за вас даемое. кому же есть даемое? Богу в жертву и в приношение. за вас рече, а не вам. ино бо есть рещи даемое вам ко причащению, ино же паки даемое за вас в жертве. сиречь, во оставление грехов. внегда приемлем, и употребляем дается нам, и есть тайна. но егда за нас дается во оставление грехов, есть жертва приносимая Богу за нас, дабы имели есмы у Него благодать, и оставление грехов. отсюду благоявленно есть яко Господь наш Исус Христос не точию на кресте тело и кровь свою Богу принесе, но и на тайней вечери внегда апостолом своим ясти и пити даяше.

Вопрос. Кое есть вещество сея тайны?

Ответ. Хлеб пшеничен квасен, солию же осолен. и вино с водою имущее свою естественную целу и сладость.

Вопрос. Кий есть вид, или видотворение сея жертвы и тайны?

Ответ. Сия глаголы Господня. приимите ядите, се есть тело Мое, за вы ломимое во оставление грехов. и пийти от нея вси, се есть кровь Моя новаго завета, за вы и за многих изливаемая во оставление грехов. и сие творите в Мое воспоминание. сиречь, жрите и приносите со благодарением, и освящайте со благословением. о сем и Павел к коринфом пишет [зач. 145] чаша благословения ея же благословляем, не общение ли крове Христовы есть. хлеб его же ломим, не общение ли телу Христову есть. таже Матфей во сто осмом зачале евангелия своего яви. паки же и Лука глаголет тоже. сия вся к видотворению жертвы и тайны сея ключима суть. но сия глаголи действеннейшия в той святой тайне, се есть тело Мое, се есть кровь Моя. о сем святыи Иоанн Златоустыи во третием томе, сиречь книзе, о предательстве Июдином, сице глаголет. якоже оно слово, еже рече Господь Бог, растите и множитеся, и исполните землю, единою реченно бысть, и во вся времена совершительно есть, внегда к рождению естество прилагается. сице и сие слово Господне единою реченно бысть, еже на всех престолех олтаревых даже до сего дне, и до пришествия Его, подает силу жертве. зриши ли еретиче яко не самем чтением послания святаго апостола Павла, или проповедию. но ниже простыми молитвами содеяна бывает сия тайна. но благословением, и освящением, якоже глаголет святыи апостол Павел. чашю благословения юже благословляем, не общение ли крове Христовы есть. чашу благословляем, сиречь, вино в чаши освящаем, и глаголем глаголы Христовы, се есть кровь Моя. не проповедию се, ниже чтением действуют, но благословением. якоже Христос благослови хлеб, тако и мы благословляем на божественней трапезе. сим же отгонится и прочая еретическая прелесть, непщующая не во освящении, но во употреблении самем совершатися тайне.

Вопрос. Скажи ми некая совершительная и действа сея тайны.

Ответ. Три суть особне сия. Первое, яко в сей тайне есть пребывающее тело Христово и кровь Его святая. Второе, яко претворяемо есть в ней хлеб убо в тело Христово, вино же в пречистую Его кровь. Третие, яко в тайне сей пребывают знамения хлеба и вина, сама о себе без основания и водружения и без естества и существа хлебна и винна.

Вопрос. Увещай мя о сем, яко пребывает плот и кровь Христова в тайне сей.

Ответ. Ельма убо в тайне сей дает Христос плоть и кровь свою, последовательно есть прибыти той даемей вещи. глаголех бо, приимите и ядите се есть Мое тело, и пийти, се есть Моя кровь. како же инако наречем тело, разве телом или плотию, и кровь разве кровию. не глаголет же, се есть знамение, или образ телесе Моего. зане сия между собою зело разньствуют, и далече от себе суть. тело и образ тела, яко живыи человек, от написаннаго шаром. ясне убо и явственне предаде нам Христос сию тайну, и истинныи завет завеща нам, и несумнительное примирение с нами устави, и известныи догмат велии же и божественныи веры нашея предал есть нам. в нем же имамы известное оставление грехов, и жизнь вечную, и привременную. якоже глаголет, Иоанн [зач. 23]. аминь аминь глаголю вам. аще не снесте плоти Сына человеческаго, и не пиете крове Его, живота не имате в себе. сице убо мы истинно плоти и крове Христовы причащаемся. яко известно и твердо всем сердцем веруем Христови, глаголющему. яко, се есть тело Мое, а не начертание тела моего, несть бо сего начертанию быти, но телу истинну.

Вопрос. Сице ли о сем мудрствоваше святии богоноснии отцы, якоже ты извествуеши?

Ответ. без сумнения всякаго, сице мудрствоваху вси святии. из них же имаши сия три свидетельства. Первыи святыи Киприян, в слове, еже о вечери Господни, сице глаголет. хлеб его же Господь учеником даяше, претвореныи не во образе, но во естестве всесильностию слова, бысть тело. а якоже в составе Христове человечество являшеся, божество же таяшеся. сице и зде в видимей тайне, Божие естество изливыяся освящает е. Вторыи святыи Кирил Иеросалимскии, во оглашении, глава 4. о таинстве, сице глаголет. внегда убо сице Христос извествует и глаголет о хлебе. се есть тело Мое, кто уже смеет усумневатися. и внегда Той же глаголет. се есть кровь Моя, и кто речет яко несть кровь Его. воду иногда преложивыи в вино в Кане Галилейстей. не достоит ли Ему веровати, яко вино и кровь преложил есть. под образом вина дается кровь. и сего ради есмы христоносцы, егда тело и кровь Его во уды наша приемлем. и якоже святыи апостол Петр глаголет, бываем обещницы Его божественнаго естества. не взирай убо аки наг хлеб, есть бо телом Христовым по словесех Его. аще бо и чювство тебе сие подает, но вера да укрепляет тя, да не по вкусу судиши. Третии святыи Иоанн Дамаскин, в слове четвертом еже о вере. глава 14. сице глаголет. хлеб призыванием Святаго Духа над естество прелагается в тело Христово. и не суть двое, но едино. ни есть хлеб образ телесе Христова, не буди се, но само тело Христово обоженное.

Вопрос. Убо мощно ли причащатися под единым образом хлеба?

Ответ. Христос убо не разделяется, но тело Его ломится, и кровь Его изливается. и сие нам изобразительне хлебом и вином совершенныи Христос. но недоуметелно же есть и недомыслително. аще бо и известно в совершеней тайне под видимыми знамениями хлеба и вина даемо бывает, но неизреченно есть.

Вопрос. Возвестил еси мне о первем совершительнем и о действе, яко в тайне благодарения пребывает тело Христово, и кровь Его святая. скажи ми уже ныне о втором действе, яко в ней прелагается хлеб в тело Господне, вино же во предражайшую кровь Его. како и коим образом сие бывает?

Ответ. Силою Божиею и действом Святаго Духа сие бывает, и онеми глаголы Божиими, еже рече. се есть тело Мое, и прочая. аще же убо о сей тайне испытовати понуждаешися, то ереси действо влагаеши. не суть бо тайна Божия, яже от человек испытуема, или истязуема. святыи же Феофилакт, о сей тайне сице глаголет. хлеб оныи таинственными глаголы, святым благословением, и пришествием Святаго Духа прелается в тело Христово. подобне же разумей и о крови Господни, якоже и о телеси Его. преложения же сему не вемы.

Вопрос. То убо две телеси суть, едино от пречистой Богородицы, другое же из хлеба?

Ответ. Вижу тя яко имаши слышати, но не имаши разумети, сего ради и паки реку ти. яко хлеб есть едино тело Христово, и воистинну истинное есть тело Христово, силою Божиею претворяемо. а еже како, сего не вем. уподобления же ли сему какова ищеши, и се мало вразумляя реку ти. подобно убо сему быти имать. якоже день приходит отходящей нощи, сице естество хлеба отступает, тело же обоженное едино и тожде от пресвятыя Богородицы рожденное под образ и знамение хлеба приходит. тем же не суть две телеси но едино есть тело, и тожде еже от пречистыя Богоматере есть восприятое.

Вопрос. Кое есть действо и кое есть совершительное третие сея тайны?

Ответ. Сие есть дивное совершительное, яко в ней верху являемыя образы хлеба и вина, пребывают же сами о себе выше естества, хлеба и вина. сиречь, вид и вкус хлеба есть, хлеба же самого несть. вид и вкус вина есть, вина же несть. якоже иногда и в манне, не бывших в ней пищ, вкусы и сладости бяху в ней. и пребывают сия видимая знамения сами о себе и в себе, без водружения и естества своего. якоже он свет пред созданием солнца, сам в себе а не в солнце бяше, по шестодневцу Василия Великаго. не в хлебе и вине знамения водруженна суть, зане по освящении не ктому ту пребывают. ниже паки в телеси и крови Господни. ибо тело и кровь Христова не сицевая суть, якоже зрим и чюем верху явленная знамения. обаче известно се веждь, яко идеже сия видимая знамения не суть, ту ни телесе Христова и пречестныя крове Его несть. зане под сими точию образы знамениями хлеба и вина, по освящении глагол Господних дается тело и кровь Христова, кроме же сих не дается. да вемы где суть, где же несть их. сия бо суть нашего ради увещания.идеже знамения от Господа назнаменанная и преданная на что суть, тамо ниже вещь и тайна от Бога данная есть. сего бо ради пребывают сия знамения, да будет тайна совершенною, и да усерднее приемлем сию тайну. якоже святыи Кирил Александрийскии в послании к Касирию пишет, да не гнушаемся тела и крове на престоле положенныя, низходяи Бог немощи нашей, вливает в приношение, сиречь, в хлеб и в вино силу живота, прелагаяи их во истинну своего си телесе и крове, да тело и кровь живота, аки некое семя, в нас обретается. о сем же и Господь глаголет [Ин. зач. 23], ядыи Мою плоть, и пияи Мою кровь, имать живот вечныи, и Аз воскрешу его в последнии день. и паки той же [Ин. зач. 24], ядыи Мою плоть, и пияи Мою кровь, во Мне пребывает, и Аз в нем.

Вопрос. Скажи ми некая приобретения сея тайны.

Ответ. Многая и великая и неисповедимая суть совершительная и приобретения от сея тайны, зане сия тайна источник есть всех благ духовных. понеже истинно имать в себе Господа нашего Исуса Христа, иже есть источник всех даров небесных. тако яко достойне приемляи Его в той тайне, сей и живот и благодать и вся благая с ним купно приемлет и бывает уд его жив, и соединяется с ним. якоже сам Христос послушествует, глаголяи [Ин. зач. 24]. ядыи Мою плоть, и пияи Мою кровь, во Мне пребывает и Аз в нем. Второе приобретение сея тайны, якоже есть хлеб и вино телу, сей паче сего большии есть душам нашим, сей хлеб воистину ангельскии, и божественая Его кровь. якоже бо оная с небесе манна, и из камене сладкая вода различных пищ сладости в себе имущи. сущи же образ сея тайны, люди Божия укрепляла. и якоже ныне хлеб и пиво земное укрепляет сердце человеку и веселит, сице и множае паче сего содевает сия тайна. и якоже пища и пиво привременное, естественныя силы исправляет, сице и сей божественныи хлеб с небесе низходяй исправляет в нас теплоту любве, и силу добрыя воли. и якоже убо плоть пищею и пивом естества питаема, не токмо цела сохранена бывает, но и растет и тучнеет, и выну нову сладость от них приемлет. сице сия преестественая пища и пиво, не точию сохраняет человека в животе духовном, но и добродетели ему умножает, и дары небесныя прилагает, и душу сице утучняет, якоже святыи пророк Давыд желая глаголет. яко от тука и масти да исполнится душа моя. Третие приобретение есть, яко сия тайна достойне приемлема, не точию от будущих грехов и искушении диявольских и мирских и плотьских соблюдает, но и бывшая грехи очищает. и не точию сицевыя но и смертныя о них же скорбим. тем же убо не точию есть пища и пиво, но и целебное былие. прочее же приносит нам известное и твердое упование и утешение духовное, яко воистину есмы чада Божия, отнюдуже приходит нам неисповедимое веселие и радость духовная.

О пятой тайне. сиречь, о покаянии и отпущении грехов. глава 78.

Вопрос. Что есть покаяния тайна?

Ответ. Покаяние есть вторая дщица, по разбиении крестилнаго корабля, и нуждно потребная тайна согрешившим, в нем же оставление грехов о повинных испрашается, от Бога же иереом даруется.

Вопрос. Колико есть частей и действ покаяния?

Ответ. Три. Первая, сокрушение сердца, или печаль душевная о гресех, имже к Богу прогневавшему обращаемся, и онех грехов лишаемся, хотяще исправитися. благодати же ради Божия и милосердия Его, ничтоже сумнящеся, ниже отчаявающеся. о сем Исаия пророк глаголет [глава 43]. глаголи ты прежде беззакония своя, да ся оправдиши. то же Иезекииль, в 18 главе, книги своея глаголет. таже и сам Господь во евангелии еже от Луки сице рече [зач. 78]. глаголю вам, яко тако радость будет на небесех о едином грешнице кающемся, и прочая. Вторая часть, исповедание грехов своих пред Богом иерею Его. о сем прочитай в четвертых книгах Моисеовых, Числ, главу 5. таже паки и Давыд глаголет [Пс 31]. за то помолится к Тебе всяк преподобныи, во время благопотребно. то же Ияковле послание, зачало 57, глаголет. Третия часть есть, довлетворение или отмщение и мучение грехов, паче же самех себе, от отца духовнаго восприятое, да сотворим плоды достойны покаяния. о сем писано есть во второй книге Ездры. и воздвигше рече горе руце, и падающи на земли, поклонишася Господу. Иоиль глаголет [глава 2], между степены и требником восплачются жерцы служащии Господу, и рекут. пощади Господи люди своя, и не даждь части своея на укоризну. 2 Царств, глава 24. рече Давыд, аз есмь согрешивыи, аз есмь пастырь зло сотворивыи. а сия овца что сотвориша. буди ныне рука Твоя на мне, и на дому отца моего. таже Иона, глава 3. Павел в послании еже к коринфом пиша глаголет. и вы разгордесте, и не плакасте, да измется от среды вашея содеявыи дело сие. таже и Златоустыи Иоанн святыи на многих местех о сем глаголет.

Вопрос. Кое есть вещество сея тайны?

Ответ. Трегубое есть. Первое, далечайшее есть, греси. Второе не далече сущее, кающиися. Третие ближайшее есть, сокрушение сердца, исповедание, и довлетворение.

Вопрос. Кое есть видотворение сея тайны?

Ответ. Оныя глаголы их же иерей глаголет, отпущаяи грехи кающемуся. егда поучив его, и наказав много, и простит его глаголя. чадо прощает тя Христос невидимо, и аз грешныи. сиречь, волею и повелением и властию и силою живоначальныя Троица. о сем убо покаянии, и сам Господь во евангелии еже от Матфея, к Петру апостолу глагола. прощати грехи повеле, и до седмьдесят крат седмирецею, и прочая.

Вопрос. Кая суть действа и приобретения сея тайны?

Ответ. Приобретение сея тайны есть, отпущение грехов, оправдание, и примирение к Богу, и прочая.

О шестой тайне, сиречь, о браце законнем. глава 79.

Вопрос. Что есть брак?

Ответ. Брак есть тайна, еюже жених и невеста от чистыя любве в сердцы своем усердно себе изволят, и согласие между собою и обет сотворят. яко произволително по благословению Божию во общее и неразделимое сожитие сопрягаются. якоже Адам и Евва прежде падения и без плотьскаго смешения, прав и истинныи брак иместа. и есть сопряжение мужа и жены по законном чину в сожитие нераздельное, иже от Бога приемлют особне сию благодать, дабы дети добре и християнски родили и воспитали, и да соблюдутся от мерзостнаго блуднаго греха и невоздержания.

Вопрос. Кое вещество есть сея тайны?

Ответ. Сопрягающееся браку.

Вопрос. Кое видотворение?

Ответ. Оныя брачащихся глаголы, яко по любви сопрягаются и обетоваются.

Вопрос. Кия дары суть в сей тайне?

Ответ. Сия особне суть седмь. Первыи, любовь духовная. якоже и Христос возлюби церковь [ефес. зач. 231]. Вторыи, яко друг другу обеты содержат и не прелюбодействуют. Третий, яко единодушно в любви пребывают. Четвертыи, яко ложе свое чисто и нескверно соблюдают. Пятыи, яко в той святыни пребывают, целомудрием, яже Павел к Тимофею рек [зач. 282]. Шестыи, яко во времена известная своя, могут воздержне пребыти, не нечистоты ради, ибо нескверно есть ложе, яко и Златоуст глаголет, но ради упражнения на пост и на молитву. якоже к коринфом глаголет Павел. не лишайте рече друг друга, точию по согласию ко времени, да пребывайте в посте и молитве. Седмыи дар Божии, яко вся беды и скорби и лишения различная друг другу претерпевают. и единомысленою любовию покрывают я.

Вопрос. Кто есть действенник сея тайны?

Ответ. Первое убо сам Господь Бог, яко Моисей боговидец пишет [глава 3]. и благослови я Господь Бог глаголяи, раститеся и множитеся, и исполняйте землю, и обладайте ею. иже и Господь во евангелии утвержает, глаголяи [Мф. зач. 78]. яже Бог сочета, человек да не разлучает. посем сами брачащиися сию себе тайну действуют, глаголюще. аз тя посягаю в жену мою, аз же тебе посягаю в мужа моего. аки сам кто продается, сам есть и вещь и купец. сице и в сей тайне, сами себе продаются и предаются оба себе купно в сию честную работу.

О седмой тайне, сиречь о маслосвящении, или о последнем елеосвященно помазании. глава 80.

Вопрос. Что есть последнее елеосвященно помазание?

Ответ. Есть тайна, еюже болящии помазанием елеом святым, и оными молитвенными глаголы, всех грехов по исповедании оставших отпущение приемлют, и в лютых недуга тяжестех и страхования облегчение и отраду восприемлют, яко да благоденственнее от мира сего изыдут, или удобнее и скорее аще се им есть полезно острабеют, и здрави будут.

Вопрос. Где есть написано о сей последней тайне?

Ответ. Святыи апостол Ияков брат Господень сице в соборном послании своем пишет. Болит ли кто в вас. да призовет попы церковныя, и да молитву сотворят над ним, помазавше его маслом во имя Господне. и молитва веры спасет болящаго, и воздвигнет его Господь. и аще грехи будет сотворил, отпустятся ему.

Вопрос. Понеже убо коейждо тайне сия три вещи последуют. Первая, верху являемое знамение. Вторая, благодать Божия под ним небесная. Третия, установление и повеление Христово. укажи ми прочее в сей тайне сия три вещи.

Ответ. Вся сия три вещи содержатся в тех апостольских глаголех. и первое убо верху явленное знамение, се есть помазание святым елеом. Посем благодать и обетование Божие. се есть оставление грехов, и поможение. сице бо глаголет, поможет ему Господь Бог. и аще будет во гресех, оставятся ему. уставы же и повеления Христова, се есть послух достоверен, святыи апостол Ияков, сказуяи нам ясне о сей тайне, и люди к ней призываяи, сие приложив речение, яко сие помазание елеом бывает во имя Господне, сиречь, волею и уставлением и повелением Господним. не апостол бо ю уставил есть. зане тайну ни едина же тварь уставити может, разве сам Бог, иже в ней и ею благодать свою небесную, и отпущение грехов подает. он же ю указует, и яко от Христа уставленую предает, и верным употребляти ея повелевает.

Вопрос. Кое вещество сея тайны?

Ответ. Масло освященное.

Вопрос. Кое есть видотворение сея тайны?

Ответ. Видотворение сея тайны суть оныя глаголы молитвеныя прощающая. егда убо бывает в маслосвящении над болящим. тогда по тропарех и кондацех, пред ектениею великою приходит пред вся священники, хотяи освятитися святым маслом. сотворив обычное поклонение, и глаголет сице. отцы святии благословите и простите мя грешнаго, елико согреших словом и делом, в разуме и в недомысле, и помолитеся о мне грешнем. к нему же глаголют священницы вкупе вси, Бог простит тя, и в нынешнии век и в будущии. также паки единогласно священницы молятся сице вси. безначальне непременне, святе святых, иже единороднаго ти Сына пославыи, исцеляюща вся недуги душ и телес наших. низпосли Святаго Твоего Духа, и освяти масло сие. сотвори то быти помазующемуся рабу твоему, имярек. в совершенное избавление того согрешении, и во освящение души и телу, в царства небеснаго наследие. и абие по чтении от коегождо священника, апостола и евангелия, и по молитвах бываемых от них, глаголет священник. услыши ны Господи. услыши ны Владыко. услыши ны Святыи. и певцы поют тоже трижды. и тако священник вжигает светильце. и приим святое масло, помазует крестообразно, на челе, на устнех, на сердце и на обою слуху, и на обою руку, глаголя сие, благословение Господа Бога и Спаса нашего Исуса Христа, на исцеление души и телу рабу Божию имярек, всегда и ныне и присно и вовеки веком, аминь. сице бо есть видотворение тайны сея.

Вопрос. Кая суть совершительная сея тайны?

Ответ. Сия особне три суть. Первое, здравие телесное. внегда глаголет, и молитва веры спасе болящаго. Второе. оттуждение скорби, и болезненыя тяжести, и огорчения и смятения и страхования, якоже глаголет апостол. и воздвигнет его Бог. Третие совершительное, и приобретение сея тайны, отпущение грехов. якоже апостол глаголет, аще и грехи будет сотворил, отпустятся ему.

Вопрос. Како же зде больному отпущаются греси?

Ответ. Человек убо в болезни бывыи, то уже молитися, слезити же и рыдати не может, точию воздыхание от сердца приносит. и сего ради милостивно и милосердно без всякаго его настоящаго труда, Господь Бог промыслом своим божественым и неизреченною благодатию сею тайною, люте болящим пребогатое и изобильное милосердие свое подает.

Вопрос. Чесо ради Господь Бог сия святыя тайны церкви своей святей предал есть?

Ответ. Удобнейшаго ради спасения нашего, получения же ради и восприятия онаго крайняго блаженства, в неже создани быхом. понеже убо Господь Бог сыи превышшее благо. темже и кроме всякоя зависти, пребогатно и преизобильно всей твари, паче же разумней приобщает своея благости, и благостыни, ей же и знати себе даровал есть, ибо от познания рачение бывает, от рачительства же радость, от радости же наслаждение. от разумныя убо твари, ова есть проста, яко ангели. ова же сложна, яко человецы. и убо часть ангелова за гордыню отпаде, оноя чести, и неизреченнаго блаженства. и не сподобишася ангели сея благодати, дабы Бог был их ради ангел. вместо же их создан есть человек, иже преступив заповедь Божию в раи, люто тяжко падеся. но Господь Бог во что созда человека, сиречь в живот вечныи. в сие его по премногим щедротам своим исправил есть, воплощением и страстьми, и смертию возлюбленнаго Сына своего Господа Бога и Спаса нашего Исуса Христа. Его же исправления, и довлетворение о гресех наших, в верху являемая и видимая знамения, сия святыя тайны вложити благоизволил есть, да мы плотьстии обложени употреблением их невидимую Его божественую благодать имамы, и оное место ангельское, на небеси исполним. сих же таин аще кто по чину святыя соборныя и апостольския церкве восточныя не употребляет, но пренебрегает я. той без них яко без известных посредств, оного крайняго блаженства сподобитися не может.